Nagnajit: Citralakṣaṇam (= NCit)

prathamaḥ parivarttaḥ

brahmāṇaṃ ca mahādevaṃ nārāyaṇaṃ sarasvatīm
varadāṃ ca mayā natvā kriyate jayamaṃgalam // NCit_1.1

prajāpatestathā śambhoḥ padmāsyāyāstathā giram
pārvatyā anusṛtyaiva jāyatāṃ kila paṇḍitāḥ // NCit_1.2

tadanantaraṃ citralakṣaṇamucyate | maṃgalamastu |

mahādevāya devāya sarvavidyavijānate
namo namo mayā samyag ucyate citralakṣaṇam // NCit_1.3

ādau candramasaṃ vande haraṃ ca candraśekharaṃ
viṣṇvindrau sūryamagniṃ ca varuṇaṃ marutaṃ tathā // NCit_1.4

namaskaromyahaṃ caiva viśvakarmaprajāpatī
nagnajitaṃ namaskṛtya tvācāryāṃśca punaḥ punaḥ // NCit_1.5

varṇaṃ ca citrakarmātha śāstrānusāratastathā
yathājñānaṃ yathāśakti saṃkṣepeṇa mayocyate // NCit_1.6

viśvakṛnnagnajiddevaprahlādasāramujjvalam
lakṣaṇamanusṛtyaica viduṣāṃ sudhiyāṃ punaḥ // NCit_1.7

saṃgṛhya mativṛddhaye nānāśāstrasamuddhṛtam
ucyate citralakṣaṇaṃ śṛṇvantu tadvidā janāḥ // NCit_1.8

puredaṃ lakṣaṇaṃ śrutvā nararājo mahodharaḥ
dharmajñaḥ satyaniṣṭhaśca buddhimāṃśca yaśo'nvitaḥ
viśruto bhayajinnāmnā tathābhūt dharaṇītale // NCit_1.9

guṇottamasya bhūpasya dhārmikasya praśāsane
śatasahasravarṣāṇi cāyuḥ prajāḥ prapedire // NCit_1.10

nīrogā na ca hantāro manorogavivarjitāḥ
akālamṛtyuhīnāstāḥ kutaḥ krodhāḥ kuto malāḥ // NCit_1.11

vāyuḥ supravahaścaiva śakraḥ suvarṣakastathā
varṇarasasametāni vījamūlaphalāni ca // NCit_1.12

varṇāśramā hi catvāro na cyutā dharmatatparāḥ
ṛddhiguṇasamāyuktaṃ śrīmad vikasitaṃ jagat // NCit_1.13

evambhūte sthite rāṣṭre sukhaśāntisamanvite
bhayajito manaḥ śuddhaṃ pravṛttaṃ tapasi drutam // NCit_1.14

suduṣkaraṃ tapaḥ kṛtvā rājñātiśuddhacetasā
varā bahuvidhā prāptā devāllokapitāmahāt // NCit_1.15

viṣayastasya śatrubhir devāstrairapi durjayaḥ
uttamāpratirodhyā ca sarvaśāstre matistvatha // NCit_1.16

sarvaguṇairupetasya parākrāntasya dhīmataḥ
mahābhāgasya devānāṃ prabhāvaiḥ prāptaviśruteḥ // NCit_1.17

sarvavidyāśrayasyāsya mūrttadharmasya bodhinaḥ
maṇiputrasamākhyaspa etādṛśasya bhūpateḥ // NCit_1.18

savidhe tvāgataḥ kaścid rudan vipro 'tiduḥkhitaḥ
kathaṃ rodiṣi bho vipra cetyapṛcchad dvijaṃ nṛpaḥ // NCit_1.19

kruddhena tena vipreṇa kathito nṛpatistadā
tava śāsanakāle 'smin deśe 'kālamṛtiyataḥ // NCit_1.20

tato 'dharmeṇa rājyaṃ taṃ śāssīdaṃ nṛpa niścitam
viṣmayo ya itaḥ pūrvaṃ na jāto 'sau pravartate // NCit_1.21

madīyavaṃśarakṣākṛt lakṣaṇākṛtisundaraḥ
akālamṛtyunā kasmāt kroṛato 'pahṛtaḥ sutaḥ // NCit_1.22

bramha priyau hi rājan tvaṃ sarva jānāsi bhūtale
prāṇatulyaṃ sutaṃ mahyaṃ dehi svāmin kṛpānvitaḥ // NCit_1.23

dayāṃ yadi na kuryāstvaṃ śaktiman guṇavan nṛpa
tṛṇakhaṇḍāṇiva prāṇān tvatsavidhe tyajāmyaham // NCit_1.24

bhāṣite tu dvijenaivaṃ buddhimān puraṣottamaḥ
ākarṣaṇe sutaṃ tasya matiṃ cakre nṛpālakaḥ // NCit_1.25

sāntvitastu nṛvākyena "āgaccha mama dāsa hi"
sūryavarcodharaṃ yamam uditaṃ tatra dṛṣṭavān // NCit_1.26

dharmarājaṃ jagadbandyaṃ praṇamya bhayajinnṛpaḥ
brāhmaṇasya hitārthāya sādaraṃ vākyamabravīt // NCit_1.27

pratyupakṛddvijātestu prāṇebhyo 'pi sutaḥ priyaḥ
cākāle 'pahṛto yo 'sau tava dūtena durdhiyā // NCit_1.28

prabho tribhuvanasyāpi dīyatāṃ tanayaḥ priyaḥ
viśvakarman dvijanmane asmai prītyā ca dhīmate // NCit_1.29

śrutvā pretādhipo vākyaṃ pūjanīyaṃ hasan nṛpam
dadau pratyuttaraṃ mṛdu tejasā pūritaṃ vacaḥ // NCit_1.30

svakīyakarmavaśād jīvāḥ sarve madvaśagā dhruvam
kasyāpyākarṣaṇe tyāge svecchāśaktiḥ kuto mama // NCit_1.31

sukhaṃ vā yadi vā duḥkhaṃ sarvaṃ karmavaśaṃ sadā
tasmāt rājan vijānīyān mayā naiva pragṛhyate // NCit_1.32

madgṛhaṃ pratipadyātha śarīrī na nivartate
kālena mahatākṛṣṭo dvijaputro balīyasā // NCit_1.33

kuśalaṃ cākuśalaṃ vā sarvamihānubhūyate
karmānusāriṇī bhūmir vijñeyā ca sadā nṛṇām // NCit_1.34

evamuktaḥ punarbhūpaḥ prāha vaivasvataṃ yamam
matprārthanāvaśād deva dehyasmai putramuttamam // NCit_1.35

na śakyate na śakyate yama āha punaḥ punaḥ
dehi dehi sutaṃ deva rājñāpi prārthitaḥ punaḥ // NCit_1.36

āgrahasyātiśayyaṃ ca tayoritthaṃ babhūva ha
vyākulau tī mahāyuddhe tadā liptau babhūvatuḥ // NCit_1.37

tiṣṭha tiṣṭheti ta rājā bahuśaḥ prāha vīrahā
sthito 'smīti raṇe rājan tamavocad nṛpaṃ yamaḥ // NCit_1.38

asaṃkhyānāṃ ca vāṇānāṃ tīkṣṇānāṃ parivarṣaṇam
akarod bhayajid rājā yamasyopari sarvataḥ // NCit_1.39

śrutaghnaṃ sarvato divyaṃ meghato vārivarṣavat
apratirodharupaṃ tad astraṃ vavarṣa dharmarāṭ // NCit_1.40

tena rājā mahākruddho mahāprabhāvaśālibhiḥ
yamadūtāṃścadevāstraiḥ prapīḍya mumude bhṛśam // NCit_1.41

śūlāsiprāsamudgarā yamadūtavinirgatāḥ
bhūpena sarvathā naṣṭā bhayapravartakā ime // NCit_1.42

preto dāruṇarupī ca pratidiśamadhāvata
naṣṭaḥ senāpatiścaiva āgamadāhavād drutam // NCit_1.43

tataḥ pretādhipo devo dṛṣṭvā taṃ tu parājitam
yathājñākāriṇaṃ daṇḍaṃ jagrāha pratihiṃsayā // NCit_1.44

kālāgnisadṛśaṃ dṛṣṭvā utkṣiptaṃ pṛthivīpatiḥ
brahmaśiro 'ṅkita cāstram ātmahaste gṛhītavān // NCit_1.45

sarve bhūtā bhayatrastā mahābhūto 'pi sarvataḥ
babhūvurāturā sarve tena durlakṣaṇena vai // NCit_1.46

duḥkhitāṃ sakalāṃ pṛthvīṃ dṛsṭvā brahmā tathā suraiḥ
ājagāma svayaṃ tatra tasmin deśe raṇākule // NCit_1.47

brahmāṇaṃ svāgata dṛṣṭvā bhayajinnṛpasattamaḥ
sāñjaliḥ pūjayitvā taṃ prāha yathāyathaṃ vacaḥ // NCit_1.48

yamo 'pi praṇipatyātha sarvāmakathayat kathām
vaiklavyakāraṇani ca śrutvā śeṣāṇi sṛṣṭikṛt
pratyāvṛtya raṇād devaḥ kathayāmāsa tau tadā // NCit_1.49

na doṣo bhavatāṃ nātha mṛtyupatermahātmanaḥ
satyanarādhipasyaiva kālasya na tu karmaṇaḥ // NCit_1.50

purā śubhāśubhaṃ karma tathā ca śiśunā kṛtam
labdhañca maraṇaṃ śīghra janma prāpya ca mānuṣam // NCit_1.51

sāphalyameti te śramo brāhmaṇasyāsya pūjanāt
tasminnupāyavidyeyaṃ matprasādāt prapūjyatām // NCit_1.52

varṇādīnāṃ samāyogaiḥ etaddvijasutākṛtim
rupamālikha bho rājan sarvalokahitāya vaṃ // NCit_1.53

āvirbhūtena brahmaṇā itthamukte suvuddhimān
jīvayituṃ lilekha taṃ dvijaputraṃ mahopatiḥ
brahmā taccitramādāya yojayāmāsa jīvitam // NCit_1.54

vikacotpalacakṣuṣmān sukumāraśarīradhṛk
cakṣurunmīlya sānandaṃ punarjīvanamāpede // NCit_1.55

jīvitaṃ putramāsādya hṛṣṭo brāhmaṇasattamaḥ
bramhāṇamabhivandyātha svīyaputraṃ gṛhitavān // NCit_1.56

brahmābravīt tato bhūpaṃ brāhmaṇaprītaye ime
yamadutā jitāḥ śaktyā sādhu sādhu kṛtaṃ tvayā // NCit_1.57

brahmāṇā kathite tvevaṃ sa rājā harṣamāptavām
sarvadamanakārī tu daurmanasyaṃ yamo gataḥ // NCit_1.58

aprasannaṃ yamaṃ dṛṣṭvā vacobhirmadhurairbhṛśam
brahmā svayaṃ samāśvāsya bhūpatiṃ prāha sattamaḥ // NCit_1.59

dharmanītiḥ suvijñāya na nindet kāmapi prajām
sadānandapradobhavyastv abhimānaṃ ca varjayet // NCit_1.60

yatra sevā satāṃ nāsti tatra nindā bhaved dhruvam
nālpamapi sukhaṃ kiñcid āpnoti nindukaḥ sadā // NCit_1.61

dveṣiṇo 'pi budhāḥ svargād bhavanti vicyutāstahā
ahaṅkānarayuta bhūtaṃ tyajanti sarvamānavāḥ // NCit_1.62

nirahaṅkāriṇā tasmāt bhavitavyaṃ sadā khalu
jātyā balena dānena naipuṇyena ca vidyayā // NCit_1.63

devatānāñca viprāṇāṃ viśeṣaṇa samādaraḥ
prakartavyo na kartavyo nindopāyaḥ kathañcana // NCit_1.64

avirodhena satkāraḥ karaṇīyaḥ sadā nṛpaiḥ
kṣamāvalambanīyā syāt nindā tyājyā tathaiva ca
sarvajño nirahaṃkaro guṇine na dviṣennṛpaḥ // NCit_1.65

puruṣaṃ vacanaṃ tyājyam āghātaṃ visṛjet sadā
pratyakṣaṃ prāpyate yattu sārthakyaṃ tasya cintayet // NCit_1.66

devavipravirodhināṃ kutrāpi na sukhaṃ bhavet
vidhiyaṃ naiva kāryaṃ hi yamasyāpi tato nṛpa // NCit_1.67

brahmaṇetthaṃ sa bhūpālo hy upadiṣṭo dvijapriyaḥ
namaskṛtya yamasvārthe kṛtavān supriyaṃ tathā // NCit_1.68

yamo 'pi prītimāpanno brahmā prasannatāṃ gataḥ
aśokaṃ prītimāpede jagadetañcarācaram // NCit_1.69

atha brahmā nṛpaṃ prāha nagnaṃ pretaṃ nivāraya
yamadāsaiḥ sadā viśvaṃ na pātayed bhavān khalu // NCit_1.70

balena tejasā cāpi tapasemaṃ guṇaṃ nṛpāḥ
anukuryurna karttavyo 'kuśala iha bhāvini // NCit_1.71

bhavān mahāyaśasvī ca karaṇīyo mayā kṣitau
nivartasva kumārgebhyas tvaṃ sadā pṛthivīpate // NCit_1.72

pretaparyāyakaṃ nagnam ajaiṣīstvaṃ yato balāt
mama prasādād rājendra brāhmaṇānugrahāttathā
prajāpatitulaḥ pṛthvāṃ yaśasvī tvaṃ bhaviṣyasi // NCit_1.74

vedajño vrataniṣṭhaśca tapasā śuddhamānasaḥ
prajāḥ pālaya niṣpāpaḥ anumatistathā mama // NCit_1.75

asya brāhmaṇaputrasya citrasya lekhanena ca
tādṛśeṇa kṣitāvādicitrāviṣkārako bhava // NCit_1.76

lokānāṃ hitasādhanāt pūjanīyo bhaviṣyasi
adya prabhṛti taccitra jagadvandyaṃ bhavet sadā // NCit_1.77

pāpaghnaṃ ca manohāri protisukhapradaṃ nṛṇām
maṅgalaśropradāyakaṃ rakṣoghnaṃ śatrunāśanam // NCit_1.78

tavādau lekhakakhyātiḥ mameyaṃ vacanena ca
citramiti prasiddhaṃ tat sarvatraiva bhaviṣyati // NCit_1.79

brahmaṇetthaṃ vacasyukte yamo vipraśca nagnajit
sarve nemuśca bhaktyā taṃ brahmāṇaṃ lokapālakam // NCit_1.80

sarveṣāṃ maṅgalaṃ kṛtvā trilokeśaḥ prajāpatiḥ
sarvadevagaṇaiḥ sārdhaṃ jagāma svagṛhaṃ mudā // NCit_1.81

rājātha dharmarājaṃ taṃ pūjayitvā prayantataḥ
svasthānamāgato dhīmān prīṇayitvā yamaṃ tathā // NCit_1.82

athāsau brāhmaṇastuṣṭaḥ prapayau nagaraṃ drutam
yasmād deśāt samāpannas tatraiva praviveśa ca // NCit_1.83

hṛṣṭo rājā samitraśca citrasaṃracanāya vai
udyato 'bhūt sadaivāsau saputre prasthite dvije // NCit_1.84

sarvarūpānukūlaṃ tat mānaṃ vā kīdṛśaṃ bhavet
tat praṣṭuṃ sṛṣṭikattariṃ brahmalokaṃ jagāma saḥ // NCit_1.85

kṛpayā brūhi me brahman citrasaṃlekhanakramam
citrasya lakṣaṇāni me nānāvidhāni santi ca // NCit_1.86

parimāṇaṃ kimasya syāt vidhinā kīdṛśena vā
utpādanīyametaddhi sāñjaliḥ pṛṣṭhavān nṛpaḥ // NCit_1.87

brahmātha prāha bhūpendraṃ śṛṇu rājan samāhitaḥ
atiguhyaṃ mahad vākyaṃ paramaṃ kathayāmi te // NCit_1.88

sṛṣṭerādau samāyātā vedā yajñāśca bhūpate
tataḥ prajā mayā sṛṣṭā upadiṣṭāśca tā mayā // NCit_1.89

caityānāṃ karaṇāyaiva citraṃ saṃlikhyate yataḥ
vedāccitraṃ prajātaṃ vai tasmād jñeyaṃ tathaiva tat // NCit_1.90

ādau saṃlikhitatvācca citramityucyate tataḥ
carācarayutā vṛkṣā jaṅgamāśca yathāsthitāḥ
tathā pralikhanātteṣāṃ taccitramiti kathyate // NCit_1.91

girīṇāṃ sumeruḥ śreṣṭhaḥ aṇḍajānāṃ khagādhipaḥ
yathā nareṣu bhūpendras tathā citraṃ kalāsu vai // NCit_1.92

patanti sāgare nadyaḥ samudrā ratnamāśritāḥ
nakṣatraiścāśritaḥ sūryo bramhā ṝṣyāśrayo yathā
tathaiva citrakarmaṇi kalāḥ sarvāḥ samāśritāḥ // NCit_1.93

himālayo yathā śreṣṭho nageṣu sakaleṣu ca
gaṅgā nadiṣu śreṣṭhaiva graheṣu somabhāskarau // NCit_1.94

sameṣu vainateyaśca mahendro devavṛndake
tathā śreṣṭhaṃ bhaveccitraṃ sarvāsu hi kalāsu ca // NCit_1.95

nagnajid gaccha tasmāt tvaṃ viśvakarma samīpataḥ
lakṣaṇavidhimānaṃ ca tubhyaṃ sa upadekṣyati // NCit_1.96

upadeśamanusṛtya brahmaṇo bhūpatistataḥ
viśvakarmasamīpe tu prasanno hyagamad drutam // NCit_1.97

dṛṣṭo 'sau viśvakarmā ca rājñā namaskṛtastathā
ātithyaṃ vidhivat kṛtvā rājñe so 'dadadāsanam // NCit_1.98

rājāha viśvakarman bho brahmajñayā hyupasthitaḥ
citrasya lakṣaṇaṃ karma upadiśatu me prabho // NCit_1.99

vidhirvā parimāṇaṃ vā kīdṛśaṃ vā bhavettathā
upadiśatu kārtsnyena rahasyaṃ saprakārakam // NCit_1.100

evamukte narendreṇa viśvakarmā mudānvitaḥ
citraśilpasya śāstraṃ tu tasmai rājñe hyupādiśat // NCit_1.101

ekāgramanasā tattu śrūyatāṃ yad madbhāṣitaṃ
parimāṇaṃ tathāsthānaṃ varṇopāyau yathāyatham // NCit_1.102

pradāya sarvamīśena devena padmayoninā
nirdiṣṭaṃ citralakṣaṇaṃ buddhimantaḥ kṛte śṛṇu // NCit_1.103

sarvavastusamākīrṇā ākṛtīrlakṣaṇānvitāḥ
lokaśraddhāspadaṃ mahyaṃ likhitvādau hyupāharat // NCit_1.104

kena mānena śobhanāḥ sthānopāyaiśca kīdṛśaiḥ
brahmaṇaḥ kṛpayā labdhāḥ sarve śilpā mayā kṛtāḥ // NCit_1.105

ākāreṇedṛśenaiva prajā mayā vinirmitāḥ
devaiścitraṃ vivarddhitaṃ vividhaṃ lakṣaṇānvitam // NCit_1.106

jñeyaṃ mattastvathā rājan lakṣaṇamākṛti tathā
sādṛśyaṃ veśasaundaryaṃ parimāṇaṃ kalānvitaṃ // NCit_1.107

citramīdṛśaṃ saṃlekhyaṃ yatnād buddhimatā tvayā
darśanīyaṃ manuṣyebhyo vidvabhyo guṇayuktebhyaḥ
citrasandarśane tāvad utsāhamatiyuktebhyaḥ // NCit_1.108

munināgāsurāṇāṃ ca pretānāṃ yakṣarakṣasām
gandharvāṇāṃ ca rājendra vidhivat kakṣaṇādikam
likhitvā vividhaṃ samyak tubhyaṃ mayā pradaśryate // NCit_1.109

|| iti nagnajiccitralakṣaṇanirdeśe nagnajayo nāma prathamaḥ parivarttaḥ ||

dvitīyaḥ parivarttaḥ

yathoktaṃ brahmaṇā pūrvam ācaṣṭe bhūpatiṃ tathā
likhanādividhiṃ samyak citrasya parinirmito // NCit_2.1

sthāvare jaṃgame naṣṭe pralayānte ca vai purā
prādurabhūt suvarṇāṇḍaṃ tamo hatvā jalāt kila // NCit_2.2

tasmādaṇḍāt prādurabhūt lokapitāmahaḥ svayam
omityekākṣaraṃ tasmād vedavidyāśca kalpanā // NCit_2.3

catasraśca prajāstāsāṃ rupasaṃjñādayastadā
āyuṣā sahitasyaiva brahmaṇo jātireva ca // NCit_2.4

sthānaṃ caryā ca dharmaśca nyāyaśca prābhavan tadā
evaṃ kṛte sati brahmācintayat jagato hitam // NCit_2.5

evaṃ cintayatastasya matiritthaṃ babhūva ha
kathaṃ janāśca jānīyuḥ saṃjñāṃ devamahībhūjām
apramādena cādaraḥ sadā teṣu kathaṃ bhavet // NCit_2.6

brahmetthaṃ cintayitvā tu viṣṇoḥ śivasya cātmanaḥ
śakrasya sarvadevānāṃ parimāṇaṃ guṇaṃ tathā // NCit_2.7

savastraṃ vividhasthitam alaṃkārāstrasaṃyutaṃ
manoramaṃ surupaṃ ca atyantasradṛśaṃ tathā // NCit_2.8

sasavibhaktasarvāṅgaṃ pratyaṅgaṃ ca yathāyatham
miśritena ca varṇena citrākāraṃ vinirmame // NCit_2.9

vilokya tāni citrāṇi netramūlāt pramoditāḥ
sādhu sādhviti saṃpūjya praśaṃśasurvidhiṃ surāḥ // NCit_2.10

ime devāḥ prasannāśca svaptākāraṃ ca lebhire
adhiṣṭhānaṃ prabhāvaṃ ca kṛtavantastathā ime // NCit_2.11

prāha saptasurān brahmā astu puṇyaṃ samāśritam
adya prabhṛti sarvatra yuṣmākaṃ pratimāsu ca
nātra śaṅkā kṛthā naraḥ pūjayiṣyati vaḥ sadā // NCit_2.12

śūddhayā dānena vidhivat tatparāyaṇamānasaḥ
manuṣyeṣu ca yo nāma bhavantaṃ pūjayiṣyati
tasmai kāmasya siddhaye nairujyaṃ saṃpradāsyati // NCit_2.13

nānā prakāraduḥsvapnāt dveṣagrastebhya eva ca
sarveṣā rakṣaṇa kṛtvā pāpān nāśayati dhruvam // NCit_2.14

dharmaśca sadṛśo bhāvyaḥ rakṣohānirbhaved dhruvam
yaśovṛddhirbhaved viśve yuṣmākaṃ paripūjanāt // NCit_2.15

lokapūjāvyavasthāyai pratimānāṃ yathāyatham
nāmādikīrtanaṃ kārya stavapūjādikaṃ tathā // NCit_2.16

pratimāṃ yāṃ pratidinaṃ puṇyātmā pūjayiṣyati
tayaiva dīyate śāntis tasmai bhaktāya sarvataḥ // NCit_2.17

evaṃ vavatviti prāhur devāḥ prasannamānasāḥ
svīyaveṣaiḥ svacetasā svādhiṣṭhānaṃ samāgatāḥ
itthaṃ pūjābhavad viśvavāsibhiste prapūjitāḥ // NCit_2.18

parimāṇādikaṃ teṣāṃ mattaḥ śrutvā ca lakṣaṇam
adya manuṣyalokeṣu pracāraya prayatnataḥ // NCit_2.19

brahmaṇaśca mayā prāptaṃ vidyottamā ca lakṣaṇam
aśeṣaṃ parimāṇaṃ ca tubhyamadya pradīyate // NCit_2.20

trilokeṣu ca pūjyānāṃ sarveṣāṃ dehināṃ tathā
pāpahānikaraṃ bhīter nāśakam netramodakaṃ // NCit_2.22

ādyutpannañca doṣeṇa hīnaṃ nānāśrayaṃ param
vijānīhi kṣitīndra tvaṃ yaśorāśivivardhakam // NCit_2.23

|| citralakṣaṇe pūjotpattirnām dvitīyaḥ parivarttaḥ ||

lokasya kāyamānaṃ māṃ svayambhūrupadiṣṭavān
tat tathaiva pravakṣyāmi mānaṃ brūhi prajāsu ca // NCit_3.1

devarākṣasagandharva siddhanartakakinnarāḥ
vidyādharāśca nāgendrāḥ piśācapretakāyikāḥ // NCit_3.2

ye bhavanti ca teṣāṃ vai bhūpatonāṃ tatastathā
sarveṣāṃ prāṇijātānāṃ mānamidaṃ pravartate // NCit_3.3

paramāṇuśca vālāgraṃ likṣā yūko yavo 'ṅguliḥ
aṣṭāṣṭaguṇavṛddhyā vai jñātavyamiti niścitam // NCit_3.4

paramāṇubhiraṣṭābhir ekaṃ vālāgramucyate
vālāgrāṣṭau ca likṣā sā parimāṇajñakīrtitā
aṣṭalikṣā bhaved yūkaḥ aṣṭayūkā yavaḥ smṛtaḥ // NCit_3.5

dvyaṅgulordvyaṅgulaṃ mānam aṅguliḥ syād yavāṣṭakam
ardhāṅguliścaturyavā iti mānaṃ nigadyate // NCit_3.6

vistārasya yathaivārtha āyāmena prakāśitaḥ
tathārohasamucchrāyau paryāyavācinau matau
parimāṇānusareṇa varṇanoyāḥ kṣitau narāḥ // NCit_3.7

ucchrāyaśca tathāyāmo rājñāṃ nyagrodhavṛkṣavat
vistṛtaścakravartināṃ śruyatāṃ varṇyate mayā // NCit_3.8

ucchrāyaścakravartināṃ svāṅguleḥ parimāṇataḥ
aṣṭottaraśataṃ jñeyaṃ kadācinna parāṅguleḥ // NCit_3.9

cakravartimahīpānām ucchrāyaparimāṇakam
sākṣāt savarṇyate cātra purvoktaṃ vistareṇa ca // NCit_3.10

mukhādīnāṃ parimāṇaṃ śruyatāmucyate mayā
tribhāgena vibhaktaṃ ca samānena tathā budhaiḥ
civunāsālalāṭaṃ vā caturaṅgulamānakam // NCit_3.11

āyāmo mukhabhāgasya bhaveccaturdaśāṅguliḥ
urddhabhāge tvadhībhāge āyamo dvādaśāṅguliḥ
āroho vadanasyātra dvādaśāṅgulimānakaḥ // NCit_3.12

ārohaścaturaṃgulam uṣṇīṣasya bhaved dhruvaṃ
āyāmaśca tathaivāsya ṣaḍaṅgulasamāyutaḥ // NCit_3.13

śīrṣaṃ chatrasamākāram āyāmo dvādaśāṅgulaḥ
dvātriṃśat tasya maṇdalam aṅgulīnāṃ hi mānataḥ // NCit_3.14

karṇadeśasya cāyamo dvyaṅguliparimāṇakaḥ
caturaṅgalisamucchrāyo randhramardhāṅgalaṃ matam
karṇārandhrasya cāroha ekāṅgulo bhaved dhruvam // NCit_3.15

samānatalavijñeyaṃ bhrupṛṣṭhakarṇayostathā
akṣikoṣasya vistāraḥ karṇarandhrasamānakaḥ // NCit_3.16

karṇasya luṭikāmānaṃ niścayena na kīrtyate
bhruvorucchrāya āroho dvau yavau caturaṃguliḥ // NCit_3.17

sarveṣāmeva śāntānāṃ bhruḥsyānnavaśaśāṅkavat
narttane rodane krodhe cāpākārā bhavet sadā // NCit_3.18

bhaye śoke ca bhrūprāntāv unnatau kramikau smṛtau
nāsākośāt samutthāya ardhalalāṭagāminau // NCit_3.19

ekāṅgulistathā madhyaḥ romakoṣasamāvṛtaḥ
bhrūmadhyāt keśaparyantaṃ mānaṃ dvyardhāṅgulaṃ matam // NCit_3.20

bhrūvaḥ prabhṛti bhālāntaṃ mānaṃ syāccaturaṅgulam
dvyaṅgulau hyakṣikoṣaḥ syān netramadhyaṃ tathaiva tu // NCit_3.21

cakṣuṣodvaryaṅgulāroha āyāmaścaikakāṅguliḥ
tribhāgastārakā hyasya mukhamānasusammatā // NCit_3.22

cakṣuvat tārakocchrāyo nayanaṃ cāpasannibham
yad bhavettasya mānaṃ syād yavatrayapramāṇakam // NCit_3.23

utpalapatranetrasya pramāṇaṃṣaḍyavaṃ smṛtam
matsyodarasunetrasya mānamaṣṭayavaṃ bhavet // NCit_3.24

padmapatranibhaṃ netraṃ navayavaiḥ susaṃnitam
varāṭakābhanetrasya mānaṃ daśayavaṃ bhavet // NCit_3.25

ucchrāyaśca tathāyāmo netrāṇāṃ varṇito mayā
nirvikalpaṃ bhaveccakṣur yogināṃ cāpasannibhaṃ // NCit_3.26

kāmināṃ ca tathā strīṇāṃ netraṃ matsyodaraṃ bhavet
sāmānyānaṃ tu karttavyam utpaladalasannibham // NCit_3.27

trastasya rudataścaiva padmapatranibhaṃ varam
kruddhasya duḥkhitasyaiva varāṭakanibhaṃ sadā // NCit_3.28

utpaladalavannetraṃ raktāntaṃ kṛṣṇatārakam
dīrghāgrasundaraṃ pakṣma śuvarṇaṃ saralaṃ mṛdu // NCit_3.29

gokṣīravarṇavatsnigdhaṃ prajāhitakaraṃ bhavet
rājannetat vijānīyād yathā syāt netralakṣaṇam // NCit_3.30

prasannapadmavannetrāṃ nīlavalkalasundaraṃ
antarākhacitaṃ kṛṣṇaṃ tārakaṃ śrīsukhapradam
vilikhayet tathā dhīmān citraśāstreṣu dīkṣitaḥ // NCit_3.31

netramānamidaṃ jñeyaṃ yathāśāstramudīritam
ṣaṭtriṃśaddṛṣṭiniyamalakṣaṇamagra ucyate // NCit_3.32

nāsāyāḥ punarārohaś caturaṅgulimātrakaḥ
māsāgrasya samucchrāyau dvyaṅguliparimāṇakaḥ // NCit_3.33

vakratāyāḥ puṭasyāpi āyāmaḥ svāṅgulidvayam
nāsārandhrāgradeśasya mānavaṃ syāccaturyavam
ucchrāyaśca tathaivāsya yavadvayasamāyutaḥ // NCit_3.34

deśasturandhrayormadhye dviyavaparimāṇakaḥ
ārohaḥ ṣaḍyavastasya oṣṭha ekāṅguliḥ smṛtaḥ // NCit_3.35

adharo 'rdhāṅgulistasya gojī cārdhāṅgulistathā
adharoṣṭhasya cārohaś caturaṅgulimānakaḥ // NCit_3.36

oṣṭhāntau vimbavad raktau tathā cāpānukārakau
alpocco mukhakoṇaḥ syāt sadāsusmitasaṃyutaḥ // NCit_3.37

ucchrāye dvyaṅgulirhanur āyāme tryaṅgulistathā
kaṇṭhasya tu samucchāyaś caturaṅgulakaṃ smṛtam
utkṣiptakaṇṭhamānaṃ hi jñeyametanna cānyathā // NCit_3.38

adhādhaḥ kaṇṭhadeśaya cāyamaḥ syād daśāṅguliḥ
kaśo 'ṣṭāṅgulakaṃ mānaṃ tataḥ sthūlastrimānataḥ // NCit_3.39

kaṇṭhastribalibhiryuktaḥ karttavyaḥ kambuvat sadā
unnataḥ pṛṣṭhabhāga syāt parimaṇḍalasaṃyutaḥ // NCit_3.40

pañcāṅgulaṃ tu gaṇḍodhvaṃ adhaḥ syāt caturaṅgulam
civukasya tathā mānaṃ caturaṅgulakaṃ matam // NCit_3.41

āyāmo mukhagāgasya tathauṣṭhasya vivarṇitaḥ
caturasraṃ mukhaṃ pūrṇaṃ prasannaṃ cārulakṣaṇam // NCit_3.42

trikoṇā kuṭilā vṛttā naiva kāryā mukhākṛtiḥ
krodhayuk roṣayuk caiva na mukhaṃ syāt kadācana // NCit_3.43

īdṛśairlakṣaṇairyuktaṃ mukhaṃ vilikhayed yadi
susampanno bhaviṣyati nara iha ca sarvadā // NCit_3.44

śāntikāmi mukhaṃ yat syād dīrghaṃ khartaṃ ca vartulam
trikoṇaṃ vā prajānāñca sāmānyānāṃ bhaviṣyati // NCit_3.45

taditarañca yad bhavet pūrvalakṣaṇasaṃyutaṃ
tad vijñeyaṃ ca devānāṃ mukhasya mānamīdṛśam // NCit_3.46

ata ūdhrvaṃ pravakṣyāmi kāyamāna vicārataḥ
avikṣiptena gṛhyatāṃ manasā ca mahipate // NCit_3.47

yat sthānaṃ kaṭideśasya udarasya tathāntarā
jñeyaṃ tad dvyaṅgulaṃ nūnaṃ skandhāyāmaḥ ṣaḍaṅgulaḥ
daighrye tvaṣṭāṅgulo jñeyo vakṣastu dviguṇaṃ smṛtam // NCit_3.48

ārohaḥ syāttu meṭrasya ṣaḍaṅgulapramāṇakaḥ
aṣṭādaśāṅgulā śroṇī ārohe kathitā budhaiḥ // NCit_3.49

jatruto hṛdayaṃ yāvan na kuṭilaḥ pradeśakaḥ
hṛdayān nābhirandhrakaḥ bandhuraḥ syānna saṃśayaḥ
nābhito meṭraparyantaṃ samānaṃ ca bhaved dhruvam // NCit_3.50

caturdaśāṅgulaṃ kaṭyā nābherardhāṅgulaṃ matam
mānaṃ ca dahiṇāvarttaṃ yavaikaṃ cucukaṃ smṛtam // NCit_3.51

maṇḍalo dvayaṅgulo vāsaḥ punardeyaṃ cucūkayoḥ
bandhanaṃ ca pradātavyaṃ kaṭideśasya śobhanam
kaṭideśastathā nābher adhastāccaturaṅguliḥ // NCit_3.52

āyāme dvyaṅgulaṃ meḍhraṃ vāsteyastu ṣaḍaṅgulaḥ
bṛṣaṇau nātilambau hi sthūlatve saptakāṅgulau
parivṛtiḥ samānaiva ucchrāye caturaṅgulau // NCit_3.53

medaṃ ṣaḍaṅgulaṃ proktam antaraṃ svodarānnanu
ṣaḍaṅgulaṃ bhavet mānaṃ lakṣaṇajñairudāhṛtam // NCit_3.54

āyāmo jaṅghayoḥ kāryaḥ pañcaviṃśatiraṅgulaḥ
ūrvorgulphayoścaiva mānaṃ syāccaturaṅgulam // NCit_3.55

prāntadvayaṃ ca jaṅghāyā vikhyātaṃ citrakarmaṇi
gulphalagnapradeśasya āyāmaścaturaṅgulaḥ
tathaiva madhyadeśī hi āroheṇa ṣaḍaṅguliḥ // NCit_3.56

ñyaṅgulaṃ jānubhāgasya āyāme na tathārohe
jaṅghādvayasya tasyordhaṃ mānamaṣṭāṅgulaṃ matam
jaṅghayoḥ sthūlatāmānaṃ bhaved dvādaśakāṅgulam // NCit_3.57

jaṅghāgramunnataṃ kuryāt puṣṭamasina saṃyutam
mṛdu karikarākāraṃ na kāryaṃ viṣamaṃ kvacit // NCit_3.58

gulphādeśastathā nāṛī pragacchannaiva dṛṣṭitām
jaṅghāyāḥ paścimo bhāgaḥ suvṛtto 'lponnatau bhavet // NCit_3.59

ucchrāyeṇa tu pārṣṇīnāṃ mānaṃ pañcāṅgulaṃ matam
āyāmastryaṅgula proktaḥ pādau caturdaśāṅgulau // NCit_3.60

caturaṅguliko 'ṅguṣṭo raktaṃ pādatalaṃ smṛtam
raktapadmāgrasādṛśyaṃ lākṣārasasamāyutam // NCit_3.61

cakrādilakṣaṇairyuktaṃ parasparasamīpagam
pādasya bandhanaṃ syāttu dvyuṅgulaṃ bhūpadeśagam // NCit_3.62

cakravartimahīpasya haṃsavaccaraṇau matau
bhūsparśau jālavṛddhau ca aṣṭāṅgulipramāṇakau // NCit_3.63

kūrmapṛṣṭasamākārau sundaracinhasaṃyutau
pañcāṅgulisamāyāmau darśane sumanoharau // NCit_3.64

kaniṣṭikāttayārohaḥ ṣaḍaṅgulisusaṃyataḥ
aṅguṣṭasya tathāyāmo dvyaṅgulaḥ sādhuniścitaḥ
parivṛtiḥ ṣaḍaṅguliḥ ārohe caturaṅguliḥ // NCit_3.65

agre samunnatā kāryā dīrghā aṅgulayastathā
aṅguṣṭhāpekṣayā sthūlā ārohe tryaṅgulā matāḥ // NCit_3.66

ekaikāṅgulito nyūnāḥ sarvāḥ syuḥ kramikāgatāḥ
kaniṣṭhikāsamucchrāyaparivṛttirdviraṅguliḥ // NCit_3.67

aṅgulīnāṃ tu jālāśca sannaddhāḥ sundarāstathā
nāḍyaviṣamasaṃpuṣṭā asthi cādarśanaṃ gatam // NCit_3.68

nakhāścārdhaśaśāṅkavat raktimāḥ snigdhavarṇakāḥ
sinduraliptasarvāṅgāḥ pradiptāgniśikhā yathā // NCit_3.69

candrakāntasamujjvalās tathā suspaṣṭasaṃyutāḥ
avraṇā mṛdavaḥ pūrṇāḥ yavamānena pūritāḥ // NCit_3.70

aṅgulistu tribhāgaḥ syāt spaṣṭā vṛddhāṅgulistathā
tasyāḥ pārśvāṅgulermadhye sthānamardhāṅgulaṃ matam // NCit_3.71

gulphādeśādadhobhāgaś caraṇamitisaṃjñitam
taccaraṇasamucchrāyaḥ caturaṅgulako mataḥ
itthaṃ caraṇamānaṃ syān mayā proktaṃ sucintitam // NCit_3.72

hastasya lakṣaṇānyatra śruyantāṃ kathayāmyaham
talaṃ saptāṅgulaṃ dīrghaṃ vistāraḥ pañcakāṅguliḥ // NCit_3.73

madhyāṅguleḥ samucchrāyaḥ pañcāṅgulaṃ prakīrtitam
tarjanyā nyūnatā bodhyā parvārdhena susaṃmatā // NCit_3.74

anāmikāṅgulīmānaṃ tadvadeva bhaved dhruvam
kaniṣṭhikāpyadīrghā syāt pārśvāṅgulikramādanu // NCit_3.75

aṅguṣṭhasya sadorahoś caturaṅgulako mataḥ
aṅguṣṭhe dve tu parvaṇī samenaika yavo bhavet // NCit_3.76

tasyādho māṃsapiṇḍaśca tryaṅgulisammito bhavet
aṅguṣṭhasya pramāṇaṃ tu navayavakasammatam
āyāmo 'ṣṭayavaḥ kārya ārohastu yavā nava // NCit_3.77

aṅguṣṭhāttu caturbhāgā naddhā jālakramādanu
nakhā raktāstathā svacchāḥ śuktivaccārutānvitā // NCit_3.78

aṅguṣṭhapārśvamāṃsaṃ tvāyāme aṅgulakaṃ matam
aṅguṣṭhāntaṃ tu karabhāt saptāṅgulamānakam // NCit_3.79

āyāmaśca tathārohaḥ kramādaṅguṣṭhayormithaḥ
yathāśāstramupanyastaḥ śubhaṃ kāryaṃ vicārayan // NCit_3.80

parvārdhena mitāḥ kāryā nakhāḥ sūkṣmāṃ nakhāgrakāḥ
sṛṣyante ca yavādṛśaḥ parvatarekhā tvadoṣabhāk // NCit_3.81

parvaṃ dīrghaṃ ca vṛtaṃ ca karatalasuśobhanam
talau padmasamau raktau karasyaivaṃ vidhānataḥ // NCit_3.82

akuṭilamavakraṃ ca gambhīraṃ sūkṣmakaṃ tathā
rekhātrayaṃ kare proktaṃ raktavarṇaṃ suśobhanam // NCit_3.83

śrīvatsacakracihnasvastilakṣaṇa samanvitam
kārpāsasparśakomalaṃ kṣaumasūtramanoharam
sukhadaṃ cāru susparśaṃ kuryāt karatalaṃ śubham // NCit_3.84

samantān māṃsapūrṇaṃ vai nāṛī dṛśyā kadāpi na
hastapṛṣṭhaṃ sadā snigdham unnataṃ ca bhaved dhruvam
sūkṣmā aṅgulijālā hi sundaraṃ ca tanustathā // NCit_3.85

utpalābhaḥ sadā rakto nāgendrābhogasannibhaḥ
nakhodarastanuḥ snigdha unnataḥ karaśobhakaḥ // NCit_3.86

ārohāyāmamānaṃ tu hastasya gaditaṃ mayā
bāhūnāṃ mānamārohaṃ dhīman śṛṇu vadāni te // NCit_3.87

ubhayostu tathā bāhvīr mānaṃ kuryād yathāvidhi
ṣaṭtriśakaṃ pramāṇaṃ vai aṅgulīnāṃ vidhānataḥ
aṣṭādaśa prabāhośca bāhoścāpi tathaiva ca // NCit_3.88

skandhāgrasya bhaven mānaṃ ṣaḍaṅgulisusammatam
āyāmo bāhubhāgasya jñeyaṃ pañcāṅgulaṃ sadā // NCit_3.89

aṅgulirmaṇibandhaḥ syāt pravāhū caturaṅgulī
viśālo varttulākāraḥ suspaṣṭoraṃśo bhavet punaḥ // NCit_3.90

āroho bhujayoryastu bhavedaṣṭādaśāṅguliḥ
ākarādaṣṭacatvāriśat nāṛiparva tvadṛśyakam // NCit_3.91

hastau na jānuparyantau dīrdhau sūkṣrmau ca sundarau
samantān māṃsapūrṇau ca bhavetāmānapūrṇyataḥ // NCit_3.92

gopucchāgrasamau tāvat krameṇoccāvacau punaḥ
bāhū daṇḍāyamānasya jānuparyantagāminau // NCit_3.93

tasmād rājendra hastena jānuprāpta udīryate
bāhuprabāhumānāni āyāmārohaḥ kīrttitaḥ // NCit_3.94

punaragre pravakṣyāmi lakṣaṇāni śubhāni vai
yāni purvaṃ na coktāni tāni tubhyaṃ vadāmyaham // NCit_3.95

keśānāṃ prāntabhāgāttu sthānaṃ kaṭyāsthivistṛtam
parimāṇaṃ ṣaḍaṅgulaṃ jñeyaṃ sadā mahīpate
skandhasthalasya mānaṃ hi ṣoṛaśāṅgulisammitam // NCit_3.96

ārohastasya madhyasya daśāṅgulaṃ bhaved dhruvam
āyāme cāṅgulīnāṃ hī saṃkhyā yāyād navānvitā // NCit_3.97

skandhadeśasya madhyāṃśa ārohāyāmaśobhitaḥ
pṛṣṭhamadhyaḥ ṣaḍaṅgulir urdhve tu viṃśatirmatā // NCit_3.98

madhyasya dvayaṅgulāyāmaḥ pṛṣṭhaṃ bhāgena sundaram
puruṣāṇāmidaṃ mānaṃ strīṇāṃ bhāgaḥ sa eva hi
māṃsapeśyalpasaṃyutaḥ sarvaśarīraśobhanaḥ // NCit_3.99

nitambapārśvamānaṃ syāt ṣaḍaṅgulisamanvitam
caturasraṃ ca vijñeyaṃ maṇḍalānvitanimnagam // NCit_3.100

sthānāt tasmāt samārabhya śroṇīsīmāsamīpagam
caturaṅgulaṃ sthānaṃ syāt pāyustu dvyuṅgulaṃ matam // NCit_3.101

nitambadeśa ārohe cāṣṭāṅgulisamanvitaḥ
nātisaṃkocamāpanna āyāmaḥ saptakāṅguliḥ
cārumaṇḍalayuktaśca nātiprasārito bhavet // NCit_3.102

ārohāyāmayoḥ sarvaṃ lakṣaṇaṃ śāstrasammatam
nirdiṣṭaṃ cāvabodhārthaṃ punaratra pravakṣyate
avikṣiptena cittena gṛhyatāṃ lokahetave // NCit_3.103

dantaśirasya lobhānāṃ vyavasthā kramaśo yathā
varṇasya lakṣaṇaṃ caiva devamukhe na dīyate // NCit_3.104

sugrathitāḥ samādantāḥ snigdhavarṇāḥ sutīkṣṇakāḥ
dadhimuktābjavacchuklāḥ svacchāḥ śvetā himā iva // NCit_3.105

catvāriśacchubhā dantāḥ śvadantaiśca suśobhitāḥ
ārohe triyavā jñeyā āyāme yavayugmakāḥ // NCit_3.106

dantamūlaṃ tathā tālu jihvāsīmā ca lohitam
jātīkusumasaṃkāśaṃ śvadantābhaṃ suśobhanaṃ // NCit_3.107

śvadantānāṃ yavārdhena vṛddhiḥ kāryā vicārayan
tīkṣṇāgraparimaṇḍalaṃ mṛdu mṛṇālatantuvat // NCit_3.108

padmapatrapratīkāśaḥ komalaśca sulakṣaṇaḥ
sthirataḍīnnibho jihvād eśaḥ spaṣṭaśca raktimaḥ
navārdhaparṇavaccāruḥ mukhe vai vitato bhavet // NCit_3.109

airāvatasya vṛṃhatī hayarājasya nādavat
megharavasya gambhīrā vāṇī proktā sulakṣaṇā // NCit_3.110

jālarekhānibhā keśāḥ śiro 'laṃkaraṇaṃ gatāḥ
indranīlasabhāḥ kṛṣṇā bhramarāñjanasannibhāḥ // NCit_3.111

mayūrakaṇṭharomābhāḥ kokilābhāḥ śiroruhāḥ
nīlā dedīpyamānāśca pṛṣṭamūlasamāgatāḥ // NCit_3.112

sundarā dakṣiṇāvarttāḥ keśariṇaḥ saṭāprabhāḥ
jālarekhāṅkitāḥ koṇāḥ keśacūṛā manoharāḥ // NCit_3.113

bāhumūlopajaṅghāsu nāsākarṇamukheṣu ca
jaṅghāsu kaṇṭhagaṇḍeṣu keśā na syurmahātmanām // NCit_3.114

mṛdusūkṣmaistathā snigdhair jālarekhaiḥ suśobhanaiḥ
keśānāṃ parimaṇḍalair nīlāñjanasamaprabhaiḥ
vakṣasthalaṃ nṛpāṇāṃ ca śobhitaṃ syāt sulakṣaṇam // NCit_3.115

devabhūtamanuṣyāṇāṃ mukhe śmaśru na roma ca // NCit_3.116

eteṣāṃ devadehastu romabhiḥ parivarjitaḥ
ṣoṛaśavarṣapūrakaṃ śarīraṃ taddhi kathyate // NCit_3.117

surāṇāṃ keśajālaṃ tu sūkṣmalateva saṃgatam
nīlaṃ cakṣurmanogrāhi sarvasattvasukhapradam // NCit_3.118

jambunadasamāhṛtataptakāñcanavarṇakaḥ
dediṣyate ca deho 'sya pātacampakapuṣpavat // NCit_3.119

kamaladalakoṣasya prākāra iva tṛptidaḥ
uttamaḥ puruṣo jñeyaḥ lakṣmaṇaṃ cakravarttinaḥ // NCit_3.120

gajarājagatiryasya vṛṣarājapadonnatiḥ
mṛgarājagatisthairyaṃ lakṣmaṇaṃ cakravarttinaḥ // NCit_3.121

gajavat sabalau pādau vṛṣavadānanaṃ kharam
vadanaṃ siṃhavad rājahaṃsatejaḥ samāyutaḥ // NCit_3.122

veśadṛśāṃ gatiṃ cātha atikramya ca sarveṣām
dṛśyavannāṭakasyeva bhūtānāṃ śikṣako yathā
gatirasya bhavedrājan sarveṣāṃ ca manoramā // NCit_3.123

sugandhastvak kṛśaḥ snigdhī darpaṇasparśakomalaḥ
dhūlimalena nirliptaḥ lakṣaṇaṃ cakravarttinaḥ // NCit_3.124

pradīptamaṇisaṃkāśaḥ śvetavastrasuśobhitaḥ
samantāt kiraṇāvṛtaḥ rājā lekhyaḥ kṛśaḥ sadā // NCit_3.125

nirmedhaśaśiccāru prabhāmaṇḍalamaṇḍitam
śarīraṃ yasya rājendra lakṣaṇaṃ cakravarttinaḥ // NCit_3.126

mukhaṃ candradṛśaṃ śvetaṃ sugnigdhaścāparaḥ śaśī
dharāpṛṣṭe samāyāta itthaṃ mādhuryamaṇḍitaḥ
bhrūvoḥ kaṇṭhasya bhālasya saundaryaṃ hi mukhasya ca // NCit_3.127

ākuñcitamṛdusnigdha cārukeśaḥ sunāsikaḥ
cārvoṣṭaṃ raktimāpūrṇaṃ svacchā dantā nabho yathā // NCit_3.128

dīrdhottama ca pakṣma hi snigdhavarṇaṃ bhavettathā
nīlaṃ kṛṣṇaṃ ca dīrghaṃ ca cakṣuḥ syāt sumanoharam
bhrūvau dīptau sadā jñeyau netrānandavidhāyakau // NCit_3.129

phullāravindakoṣasya karṇayorākṛtiḥ samā
īṣadromau manoharau śarīrāṅgavibhūṣaṇau // NCit_3.130

karṇayorluṭike tasya kramike śaṅkhasannibhau
baddhaskandhau supūrṇāṃśau śobhanamaṅgamaṇḍalam // NCit_3.131

māṃsapurṇaṃ bhaved vakṣaḥ tasyāroho yathākraman
āyāmaśca yathāyathaṃ cānupūrvyeṇa saṃgatā // NCit_3.132

siṃhodaravad vijñeyā kaṭirāvartitā bhavet
dakṣiṇāvartino nābhiḥ gabhīrā syād yathāyatham // NCit_3.133

airāvatasamānau hi liṅgakoṣaśca sundaraḥ
samantāt maṇḍalākāraḥ ābhādṛśyā bhaved dhruvam // NCit_3.134

gajaśuṇḍasamā jaṅghā anukrameṇa vistṛtā
mukheṣu connatā jñeyā gulpho 'dṛśpo bhavet tathā // NCit_3.135

subaddhāṅgulisundarau kūrmavat māṃsalau tathā
ardhacandraprabhāyuktā-ṅgulicakrapadāṅkitau
pādapṛṣṭomṛdū syātāṃ komalau haritau smṛtau // NCit_3.136

vṛṣapucchānupūrviyau dīrghāṅguliyutau karau
nakhaprabhāsamujjvalau prasāre dīrghakau yathā
parimaṇḍalasampannau cakrarekhāsvalaṅkṛtau // NCit_3.137

campakadāmaśobhitaḥ marālagātasaṃyutaḥ
susaṃsthānasamāpannaḥ sarvāṅgeṇa manoharaḥ // NCit_3.138

tejasvī vīryavān rājan cakravarttī sadā bhavet
āyāmārohamānaṃ ca lakṣaṇaṃ tadudāhṛtam // NCit_3.139

dehe jaṅghopajaṅghā ca bhṛśaṃ vikaśitā bhavet
suhastau caraṇau syātāṃ tathā parva ca dṛśyate // NCit_3.140

kukṣipṛṣṭe suśobhite mukhaṃ cāru manoharam
śobhitau ca bhujau syātāṃ deho mānānvito bhavet // NCit_3.141

aṅgāni māṃsapūrṇāni śarīraṃ snigdhavarṇakam
priyaudāryaguṇā yatra rājahaṃsagatistathā
cārudeho mahīpateḥ cakravartī sa ucyate // NCit_3.142

prasiddhaiḥ śilpibhiḥ kāryaṃ mānavāṅgeṣu yatnataḥ
śīrṣakaṣṭabhujadvandaṃ jaṅkhopajaṅkhasundaram // NCit_3.143

upayukteṣu sarveṣu parimāṇaṃ tu yatra ca
tatra svāṅgulinā kāryaṃ mānaṃ sarvatra karmaṇi // NCit_3.144

ārohāyāmapīnatve pratyaṅgaṃ samatāṃ bhajet
vidhinā parimāṇena sammpannaṃ śobhitaṃ bhavet // NCit_3.145

atī jñeyañca paṇḍitaiḥ parimāṇaṃ suyatnataḥ
parimāṇapratiṣṭāno-pāyādibhirvihīnā yā
pratimā sā parityaktā suradevaiḥ sadā khalu // NCit_3.146

piśācā rākṣasā bhūtā vasanti tvarita tathā
śobhitān nāśayanti ca amaṅgalaṃ bhayaṃ bhavet // NCit_3.147

ārohāyāmayoḥ rājan lakṣaṇaṃ kathitaṃ mayā
yathecchaṃ vai vibhaktavyaṃ caturbhāgena mukhyataḥ // NCit_3.148

valiḥ sūryo dāśarathiḥ rāmo manusutastathā
parimāṇānusāreṇa kāryo bhinno vīcakṣaṇaiḥ // NCit_3.149

bhadrau dvayaṅgulinā nyūno mālavyaścaturaṅguliḥ
rucako 'ṣṭāṅgulinyūnaḥ śaśakaśca daśāṅguliḥ // NCit_3.150

apriyo na yathā yāyāt tathā mānaṃ vicārayet
kiṃ bhavet parimāṇena śarīraṃ cedasundaram // NCit_3.151

caturṇāṃ ca tathā rājñāṃ parimāṇasya lakṣaṇam
brahmaṇā tu pradarśitaṃ vistaraṃ bravīmi te // NCit_3.152

sarvasya lekhane granthe vistāro bhavati dhruvam
tena trasyanti cālpajñā aśrutikāraṇān nanu // NCit_3.153

nārīpuruṣayoḥ satsu lakṣaṇeṣu prajāpatiḥ
dvādaśeṣu sahasreṣu pañcaśa upadiṣṭavān // NCit_3.154

naralakṣaṇayukteṣu tathānirdiṣṭapañcadhā
tubhyaṃ pradarśayāmi ced gacched grantho viśālatām // NCit_3.155

cakravarttinarendrasya lakṣaṇaṃ kathitaṃ mayā
vidhivat parimāṇañca anyapradarśanena kim
uttamapuruṣādīnāṃ tena mānaṃ dhruvaṃ bhavet // NCit_3.156

ato buddhayā suniścitya bhadro lekhyo vicārayan
sa ca bhavet samucchrāye ṣaḍuttaraśatāṅgulam // NCit_3.157

rucakasya samucchrāyaḥ śatasaṃkhyānvito bhavet
mālavasya tathocchrāyaś catuḥśatamitāṅgulam // NCit_3.158

śaśakasya samucchrāye saṃkhyāṣṭanavatiḥ sadā
aṅgulīnāṃ vidhātavyā citraśāstraviśāradaiḥ // NCit_3.159

ato 'nyomānaniyamo na bhūto na bhaviṣyati
uttamādhamamadhyamapradhānānāñca bhūbhṛtām
ārohāthāmamānaṃ tu ālocyātra pradarśinam // NCit_3.160

ucchrāyo navarat strīṇā jñeya ekāṅguliḥ kṛśaḥ
ekāṅgulistathā rājñā puṣṭirjñeyā mahāmate // NCit_3.161

nābhijaṅkhopajaṅkhānāṃ laṭikaṇṭhopajānunām
śīrṣadeśasya vakṣasas tathā caraṇayornṛpa
āroho nāpriyo yāyāt tathā mānaṃ vidhīyatām // NCit_3.162

uttamamadhyamādhamamānaṃ tu kramikaṃ matam
ārohaśca tathāyāmaḥ teṣāmatra pradarśitaḥ
nārīṇāṃ parimāṇaṃ ca sarvaṃ śṛṇu krameṇa hi // NCit_3.163

rājñāṃ yathā pradarśitaṃ mānena ca tathāyutam
samyag vicārya śemuṣyā bahusthānapratiṣṭhitam // NCit_3.164

samadvibhāgasampannaṃ niṣkuṭilaṃ sukomalam
lekhyaṃ citramaninditaṃ netraprītivivarddhanaṃ // NCit_3.165

iti citralakṣaṇe parimāṇo nāmstṛtīyaḥ parivartaḥ |