Mahāsubhāṣitasaṃgraha 1-9979

Header

This file is an html transformation of sa_mahAsubhASitasaMgraha-1-9979.xml with a rudimentary header. For a more extensive header please refer to the source file.

Data entry: n.n.

Contribution: n.n.

Date of this version: 2020-07-31

Source:

Publisher: Göttingen Register of Electronic Texts in Indian Languages (GRETIL), SUB Göttingen

Licence:

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.

Interpretive markup: none

Notes:

This file has been created by mass conversion of GRETIL's Sanskrit corpus from msubhs_u.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the <note> element below:

Mahasubhashitasangraha, verses 1-9979

input by ...

Revisions:


Text

aṃśavastava niśākara nūnaṃ kalpitāstaruṇaketakakhaṇḍaiḥ /
yena pāṇḍurataradyutayo naḥ kaṇṭakairiva tudanti śarīram // MSS_0001

aṃśukaṃ hṛtavatā tanubāhu- svastikāpihitamugdhakucāgrā /
bhinnaśaṅkhavalayaṃ pariṇetrā paryarambhi rabhasādaciroḍhā // MSS_0002

aṃśukamiva śītabhayāt saṃstyānatvacchalena himadhavalam /
ambhobhirapi gṛhītaṃ paśyata śiśirasya māhātmyam // MSS_0003

aṃśukena jaghanaṃ tirodadhe ka cukena ca kucau mṛgīdṛśām /
pīyamānamaniśaṃ priyekṣaṇaiḥ kṣāmatāmiva jagāma madhyamam // MSS_0004

aṃśupāṇibhiratīva pipāsuḥ padmajaṃ madhu bhṛśaṃ rasayitvā /
kṣībatāmiva gataḥ kṣitimeṣyaṃl lohitaṃ vapuruvāha pataṅgaḥ // MSS_0005

aṃśumānapi vipākapiśaṅgaṃ rūpamāpa parito divasānte /
kaḥ paro'tra na vikāramupeyād dhvāntabhīmaparivellitamūrtiḥ // MSS_0006

aṃśo daṇḍasamaḥ pūrvaḥ prayāsasama uttamaḥ /
vilopo vā yathālābhaṃ prakṣepasama eva vā // MSS_0007

aṃśo'pi duṣṭadiṣṭānāṃ pareṣāṃ syād vināśakṛt /
bālaleśo'pi vyāghrāṇāṃ yat syāj jīvitahānaye // MSS_0008

aṃsāvavaṣṭabdhanatā samādhiḥ śirodharāyā rahitaprayāsaḥ /
dhṛtā vikārāṃstyajatā mukhena prasādalakṣmīḥ śaśalāñchanasya // MSS_0009

aṃsālambitavāmakuṇḍaladharaṃ mandonnatabhrūlataṃ kiṃcit kuñcitakomalādharapuṭaṃ sāciprasārīkṣaṇam /
alolāṅgulipallavairmuralikāmāpūrayantaṃ mudā mūle kalpatarostribhaṅgalalitaṃ dhyāye jaganmohanam // MSS_0010

aṃsāsaktakapolavaṃśavadanavyāsaktabimbādhara-dvandvodīritamandamandapavanprārabdhamugdhadhvaniḥ /
īṣadvakrimalolahāranikaraḥ pratyekarokānana-nyañcaccañcadudañcadaṅgulicayastvāṃ pātu rādhādhavaḥ // MSS_0011

aṃsena karṇaṃ cibukena vakṣaḥ karadvayenākṣi tirodadhānām /
saṃtāḍayāmāsa hariḥ sametya cakoranetrāṃ calukodakena // MSS_0012

aṃhaḥ saṃharadakhilaṃ sakṛdudayādeva sakalalokasya /
taraṇiriva timirajaladhiṃ jayati jaganmaṅgalaṃ harernāma // MSS_0013

akaṇṭakā puṣpamahī veśayoṣidamātṛkā /
mantrihīnā ca rājyaśrīr bhujyate viṭaceṭakaiḥ // MSS_0014

akaṇṭhasya kaṇṭhe kathaṃ puṣpamālā vinā nāsikāyāḥ kathaṃ dhūpagandhaḥ /
akarṇasya karṇe kathaṃ gītanṛtyam apādasya pāde kathaṃ me praṇāmaḥ // MSS_0015

akaparddakasya viphalaṃ januriti jānīmahe maheśo'pi /
śirasi kṛtena kaparddī bhavati jaṭājūṭakenāpi // MSS_0016

akaravamadhimauli pādapadmāv apanaya mānini mānitāmakāṇḍe /
yadi pararamaṇīṃ gatastadātha stanayugaliṅgayugaṃ sprśāmi tanvi // MSS_0017

akaruṇa kātaramanasā darśitanīrā nirantarāleyam /
tvāmanudhāvati vimukhaṃ gaṅgeva bhagīrathaṃ dṛṣṭiḥ // MSS_0018

akaruṇatvamakāraṇavigrahaḥ paradhanāpahṛtiḥ parayoṣitaḥ /
svajanabandhujaneṣvasahiṣṇutā prakṛtisidhamidaṃ hi durātmanām // MSS_0019

akaruṇa mṛṣābhāśāsindho vimuñca mamāñcalaṃ tava paricitaḥ snehaḥ samyaṅmayetyabhidhāyinīm /
aviralagaladvāṣpāṃ tanvīṃ nirastavibhūṣaṇāṃ ka iha bhavatīṃ bhadre nidre vinā vinivedayet // MSS_0020

akaroḥ kimu netraśoṇimānaṃ kimakārṣīḥ karapallavāvarodham /
kalahaṃ kimadhāḥ krudhā rasajñe hitamarthaṃ na vidanti daivadaṣṭāḥ // MSS_0021

akarṇamakaroccheṣaṃ vidhirbrahmāṇḍabhaṅgadhīḥ /
śrutvā rāmakathāṃ ramyāṃ śiraḥ kasya na kampate // MSS_0022

akarṇadhārāśugasaṃbhṛtāṅgatāṃ gatairaritreṇa vināsya vairibhiḥ /
vidhāya yāvattaraṇerbhidāmaho nimajjya tīrṇaḥ samare bhavārṇavaḥ // MSS_0023

akartavyaṃ na kartavyaṃ prāṇaiḥ kaṇṭhagatairapi /
kartavyameva kartavyaṃ prāṇaiḥ kaṇṭhagatairapi // MSS_0024

akartavyeṣvasādhvīva tṛṣṇā prerayate janam /
tameva sarvapāpebhyo lajjā māteva rakṣati // MSS_0025

akarmaṇāṃ vai bhūtānāṃ vṛttiḥ syān na hi kācana /
tadevābhriprapadyeta na vihanyāt kathaṃcana // MSS_0026

akarmaśīlaṃ ca mahāśanaṃ ca lokadviṣṭaṃ bahumāyaṃ nṛśaṃsam /
adeśakālajñamaniṣṭaveṣam etān gṛhe na prativāsayīta // MSS_0027

akalaṅkacandrakalayā kalitā sā bhāti vāruṇī taruṇī /
bhālasthalīva śambhoḥ saṃdhyādhyānopaviṣṭasya // MSS_0028

akalaṅkāntike kāntiḥ keti kālaṅkalaṅkinaḥ /
aruṇe taruṇe masyā dhāvaṃ kāmayate śaśī // MSS_0029

akalaṅkā pulakavatī sasnehā muktakañcukī śyāmā /
patatu tavorasi dayitā khaṅgalatā vairiṇaḥ śirasi // MSS_0030

akalaṅko dṛḍhaḥ śuddhaḥ parivārī guṇānvitaḥ /
sadvaṃśo hṛdayagrāhī khaṅgaḥ susadṛśastava // MSS_0031

akalitanijapararūpaḥ svakamapi doṣaṃ parasthitaṃ vetti /
nāvāsthitastaṭasthān acalānapi vicalitān manute // MSS_0032

akaliyugamakharvamatra hṛdyaṃ vyacaradapāpaghano yataḥ kuṭumbī /
mama ruciriha lakṣmaṇāgrajena prabhavati śarmadaśāsyamardena // MSS_0033

akalilatapastejovīryaprathimni yaśonidhā- vavitathamadadhmāte roṣānmunāvabhidhāvati /
abhinavadhanurvidyādarpakṣamāya ca karmaṇe sphurati rabhasāt pāṇiḥ pādopasaṃgrahaṇāya ca // MSS_0034

akalpaḥ svāṅgaceṣṭāyāṃ śakunta iva pañjare /
anucchvasansmaran pūrvaṃ garbhe kiṃ nāma vindate // MSS_0035

akasmāt prakriyā nṝṇāṃ akasmāccāpakarṣaṇam /
śubhāśubhe mahattvaṃ ca prakartuṃ buddhilāghavāt // MSS_0036

akasmādapi yaḥ kaścid arthaṃ prāpnoti pūruṣaḥ /
taṃ haṭheneti manyante sa hi yatno na kasyacit // MSS_0037

akasmādunmatta praharasi kimadhvakṣitiruhaṃ hradaṃ hastāghātairvidalasi kimutphullanalinam /
tadā jānīmaste karivara balodgāramasamaṃ saṭāṃ suptasyāpi spṛśasi yadi pañcānanaśiśoḥ // MSS_0038

akasmādekasmin pathi sakhi mayā yāmunataṭaṃ vrajantyā dṛṣṭo'yaṃ navajaladharaśyāmalatanuḥ /
sa dṛgbhaṅgyā kiṃ vākuruta na hi jāne tata idaṃ mano me vyālolaṃ kvacana gṛhakṛtye na lagate // MSS_0039

akasmādeva kupyanti prasīdantyanimittataḥ /
śīlametadasādhūnām abhraṃ pāriplavaṃ yathā // MSS_0040

akasmādeva tanvaṅgī jahāsa yadiyaṃ punaḥ /
nūnaṃ prasūnabāṇo'syāṃ svārājyamadhitiṣṭhati // MSS_0041

akasmādeva te caṇḍi sphuritādharapallavam /
mukhaṃ muktāruco dhatte gharmāmbhaḥkaṇamañjarīḥ // MSS_0042

akasmādeva yaḥ kopād abhīkṣṇaṃ bahu bhāṣate /
tasmādudvijate lokaḥ sasphuliṅgādivānalāt // MSS_0043

akasmāddveṣṭi yo bhaktam ājanmaparisevitam /
na vyañjane ruciryasya tyājyo nṛpa ivāturaḥ // MSS_0044

akāṇḍakopino bhartur anyāsakteśca yoṣitaḥ /
praśāntiścetasaḥ kartuṃ brahmaṇāpi na śakyate // MSS_0045

akāṇḍadhrtamānasavyavasitotsavaiḥ sārasair akāṇdapaṭutāṇḍavairapi śikhaṇḍināṃ maṇḍalaiḥ /
diśaḥ samavalokitāḥ sarasanirbharaprollasad- bhavatpṛthuvarūthinīrajanibhūrajaḥśyāmalāḥ // MSS_0046

akāṇḍapātajātānām astrāṇāṃ marmabhedinām /
gāḍhaśokaprahārāṇām acintaiva mahauṣadham // MSS_0047

akāṇḍe vakṣojaskhalitavasanavyāpṛtakaraṃ mṛṣā jṛmbhārambhonnamitabhujabandhonnatakucam /
vṛthā yātāyātaiḥ kapaṭakalitānyonyahasitaṃ harantyetāścittānyahaha jagatāṃ vāravanitāḥ // MSS_0048

akāmasya kriyā kācid dṛśyate neha kaṛhicit /
yadyaddhi kurute kiṃcit tattat kāmasya ceṣṭitam // MSS_0049

akāmāṃ kāmayānasya śarīramupatapyate /
icchantīṃ kāmayānasya prītirbhavati śobhanā // MSS_0050

akāmān kāmayati yaḥ kāmayānān paridviṣan /
balavantaṃ ca yo dveṣṭi tamāhurmūḍhacetasam // MSS_0051

akāraṇaṃ rūpamakāraṇaṃ kulaṃ mahatsu nīceṣu ca karma śobhate /
idaṃ hi rūpaṃ paribhutapūrvakaṃ tadeva bhūyo bahumānamāgataṃ // MSS_0052

akāraṇaṃ vyākaraṇaṃ tantrīśabdo'pyakāraṇam /
akāraṇaṃ trayo vedās taṇḍulāstatra kāraṇam // MSS_0053

akāraṇāviṣkṛtakopadāruṇāt khalādbhayaṃ kasya na nāma jāyate /
viṣaṃ mahāheriva yasya durvacaḥ suduḥsahaṃ saṃnihitaṃ sadā mukhe // MSS_0054

akāraṇena viprebhyo yaḥ kupyati narādhipaḥ /
krṣṇasarpaṃ sa gṛhṇāti śirasā baladaṛpitaḥ // MSS_0055

akāryakaraṇādbhītaḥ kāryāṇāṃ ca vivarjanāt /
akāle mantrabhedācca yena mādyenna tat pibet // MSS_0056

akāryapratiṣedhaśca kāryāṇāṃ ca pravartanam /
pradānaṃ ca pradeyānām adeyānāmasaṃgrahaḥ // MSS_0057

akāryamasakṛt kṛtvā dṛśyante hyadhanā narāḥ /
dhanayuktāstvadharmasthā dṛśyante cāpare janāḥ // MSS_0058

akāryāṇyapi paryāpya kṛtvāpiṃ vṛjinārjanaṃ /
vidhīyate hitaṃ yasya sa dehaḥ kasya susthiraḥ // MSS_0059

akārye tathyo vā bhavati vitathaḥ kāmamathavā tathāpyuccairdhāmnāṃ harati mahimānaṃ janaravaḥ /
tulottīrṇasyāpi prakaṭanihatāśeṣatamaso ravestādṛktejo na hi bhavati kanyāṃ gata iti // MSS_0060

akālacaryā viṣamā ca goṣṭhī kumitrasevā na kadāpi kāryā /
paśyāṇḍajaṃ padmavane prasuptaṃ dhanurvimuktena śareṇa bhinnam // MSS_0061

akālajaladendoḥ sā hṛdyā vadanacandrikā /
nityaṃ kavicakorairyā pīyate na ca hīyate // MSS_0062

akālajaladaślokaiś citramātmakṛtairiva /
jātaḥ kādambarīrāmo nāṭake pravaraḥ kaviḥ // MSS_0063

akālajaladacchannam ālokya ravimaṇḍalam /
cakravākayugaṃ rauti rajanībhayaśaṅkayā // MSS_0064

akālamṛtyuṃ parihṛtya jīvitaṃ dadāti yo dehasukhaṃ ca dehinām /
natena dhātrāsti samaḥ kuto'dhiko na jīvitāddānamihātiricyate // MSS_0065

akālamṛtyurviśvāso viśvasan hi vipadyate /
yasmin karoti viśvāsaṃ sa jīvatyaparo mṛtaḥ // MSS_0066

akālasahamatyalpaṃ mūrkhavyasanināyakam /
aguptaṃ bhīruyodhaṃ ca durgavyasanamucyate // MSS_0067

akālasainyayuktastu hanyate kālayodhinā /
kauśikena hatajyotir niśītha iva vāyasaḥ // MSS_0068

akāle kṛtyamārabdhaṃ kaṛtuṃ nārthāya kalpate /
tadeva kāla ārabdhaṃ mahate'rthāya kalpate // MSS_0069

akāle garjite deve durdinaṃ vāthavā bhavet /
pūrvakāṇḍahataṃ lakṣyam anadhyāyaṃ pracakṣate // MSS_0070

akiṃcanaḥ paripatan sukhamāsvādayiṣyasi /
akiṃcanaḥ sukhaṃ śete samuttiṣṭhati caiva hi // MSS_0071

akiṃcanatvaṃ rājyaṃ ca tulayā samatolayat /
akiṃcanatvamadhikaṃ rājyādapi jitātmanaḥ // MSS_0072

akiṃcanasya dāntasya śāntasya samacetasaḥ /
mayā saṃtuṣṭamanasaḥ sarvāḥ sukhamayā diśaḥ // MSS_0073

akiṃcanasya śuddhasya upapannasya sarvaśaḥ /
avekṣamāṇastrīṃllokān na tulyamupalakṣaye // MSS_0074

akiṃcanāśca dṛśyante puruṣāścirajīvinaḥ /
samṛddhe ca kule jātā vinaśyanti pataṃgavat // MSS_0075

akiṃcitkāriṇāṃ dīnair ākṛṣṭaguṇakarmaṇām /
aghāya gatasattvānāṃ darśanasparśanādikam // MSS_0076

akīrtiṃ cāpi bhūtāni kathayiṣyanti te'vyayām /
saṃbhāvitasya cākīrtir maraṇādatiricyate // MSS_0077

akīrtiryasya gīyeta loke bhūtasya kasyacit /
patatyevādhamāṃllokān yāvacchabdaḥ prakīrtyate // MSS_0078

akīrtirnindyate devaiḥ kīrtirlokeṣu pūjyate /
kīrtyarthaṃ tu samārambhaḥ sarveṣāṃ sumahātmanām // MSS_0079

akīrteḥ kāraṇaṃ yoṣid yoṣidvairasya kāraṇam /
saṃsārakāraṇaṃ yoṣid yoṣitaṃ varjayettataḥ // MSS_0080

akuṇṭhotkaṇṭhayā pūrṇam akaṇṭhaṃ kalakaṇṭhi mām /
kambukaṇṭhyāḥ kṣaṇaṃ kaṇṭhe kuru kaṇṭhārtimuddhara // MSS_0081

akuberapurīvilokanaṃ na dharāsūnukaraṃ kadācana /
atha tatpratikārahetave- 'damayantīpatilocanaṃ bhaja // MSS_0082

akurvanto'pi pāpāni śucayaḥ pāpasaṃśrayāt /
parapāpairvinaśyanti matsyā nāgahrade yathā // MSS_0083

akulānāṃ kule bhāvaṃ kulīnānāṃ kulakṣayam /
saṃyogaṃ viprayogaṃ ca paśyanti cirajīvinaḥ // MSS_0084

akulīnaḥ kulīnaśca maryādāṃ yo na laṅghayet /
dharmāpekṣī mṛdurdāntaḥ sa kulīnaśatairvaraḥ // MSS_0085

akulīnastu puruṣaḥ prakṛtaḥ sādhusaṃkṣayāt /
durlabhaiśvaryasaṃprāpto garvitaḥ śatrutāṃ vrajet // MSS_0086

akulīno'pi mūrkho'pi bhūpālaṃ yo'tra sevate /
api saṃmānahīno'pi sa sarvatra prapūjyate // MSS_0087

akule patito rājā mūrkhaputro hi paṇḍitaḥ /
nirdhanasya dhanaprāptis tṛṇavanmanyate jagat // MSS_0088

akūpārād vāri pracurataramādāya jaladaḥ sa dānādhyakṣo'pi prakirati jalaṃ nādbhutamidam /
sa megho dhanyo yat parikirati muktāphalatayā yadīyāsau kīrtirnaṭati nṛpanārīkucataṭe // MSS_0089

akūrcārambho'pi praticubukadeśaṃ karatalaṃ pratijñāyāṃ kurvan yuvatiṣu dṛśaṃ snigdhataralāṃ /
kumāro'haṃ kārāt pariṣadi samānānagaṇayan bhujau vakṣaḥ paśyannavavayasi kāntiṃ vitanute // MSS_0090

akṛtakavalārambhairvaktrairbhayasthagitekṣaṇāḥ kimapi valitagrīvaṃ sthitvā muhurmṛgapaṅktayaḥ /
gaganamasakṛtpaśyantyetāstathāśrughanairmukhair nipatati yathā śṛṅgāgrebhyo'kramaṃ nayanodakam // MSS_0091

akṛtajñamanāryaṃ ca dīrgharoṣamanārjavam /
caturo viddhi cāṇḍālāñ jātyā jāyeta pañcamaḥ // MSS_0092

akṛtatyāgamahimnāṃ mithyā kiṃ rājarājaśabdena /
goptāraṃ na nidhīnāṃ mahayanti maheśvaraṃ vibudhāḥ // MSS_0093

akṛtadviṣadunnaticchidaḥ śritasaṃrakṣaṇavandhyakarmaṇaḥ /
puruṣasya nirarthakaḥ karaḥ kila kaṇḍūyanamātrasārthakaḥ // MSS_0094

akṛtapremaiva varaṃ na punaḥ saṃjātavighaṭitapremā /
uddhṛtanayanastāmyati yathā hi na tatheha jātāndhaḥ // MSS_0095

akṛta viśadadhāmno bimbasāraṃ gṛhītvā dayita yuvativaktraṃ lokadhātreti vidmaḥ /
na hi na hi bhavadīyo moha evaiṣa mitra sitagaralanidhānaṃ tattvato niścinu tvam // MSS_0096

akṛtasyāgamo nāsti kṛte nāśo na vidyate /
akasmādeva loko'yaṃ tṛṣṇe dāsīkṛtastvayā // MSS_0097

akṛtātmānamāsādya rājānamanaye ratam /
samṛddhāni vinaśyanti rāṣṭrāṇi nagarāṇi ca // MSS_0098

akṛte'pyudyame puṃsām anyajanmakṛtaṃ phalam /
śubhāśubhaṃ samabhyeti vidhinā saṃniyojitam // MSS_0099

akṛteṣvevakāryeṣu mṛtyurvai saṃprakarṣati /
yuvaiva dharmaśīlaḥ syād animittaṃ hi jīvitam // MSS_0100

akṛtopadravaḥ kaścin mahānapi na pūjyate /
pūjayanti narā nāgān na tārkṣyaṃ nāgaghātinam // MSS_0101

akṛtayaṃ naiva kṛtyaṃ syāt prāṇatyāge'pyupasthite /
na ca kṛtyaṃ parityājyam eṣa dharmaḥ sanātanaḥ // MSS_0102

akṛtayaṃ manyate kṛtayaṃ agamyaṃ manyate sugam /
abhakṣyaṃ manyate bhakṣyaṃ strīvākyaprerito naraḥ // MSS_0103

akṛtrimapremarasā vilāsālasagāminī /
asāre dagdhasaṃsāre sāraṃ sāraṅgalocanā // MSS_0104

akṛtrimavilāsāṅkam aśikṣitakalākramam /
avibhāgāṅgasubhagaṃ babhūva surataṃ tayoḥ // MSS_0105

akṛtvā karma yo loke phalaṃ vindati viṣṭitaḥ /
sa tu vaktavyatāṃ yāti dveṣyo bhavati prāyaśaḥ // MSS_0106

akṛtvā nijadeśasya rakṣāṃ yo vijigīṣate /
sa nṛpaḥ paridhānena vṛtamauliḥ pumāniva // MSS_0107

akṛtvā parasaṃtāpam agatvā khalanamratām /
anutsṛjya satāṃ vartma yat svalpamapi tad bahu // MSS_0108

akṛtvā pauruṣaṃ yā śrīḥ kiṃ tayālasabhāgyayā /
kuraṅgo'pi samaśnāti daivādupanataṃ tṛṇam // MSS_0109

akṛtvā mānuṣaṃ karma yo daivamanuvartate /
vṛthā śrāmyati saṃprāpya patiṃ klībamivāṅganā // MSS_0110

akṛtvā helayā pādam uccairmūrdhasu vidviṣām /
kathaṃkāramanālambā kīrtirdyāmadhirohati // MSS_0111

akṛpaṇamaśaṭhamacapalaṃ yoginamaviṣādinaṃ budhaṃ śūram /
yadi nāśrayati naraṃ śrīḥ śrīreva hi vañcitā bhavati // MSS_0112

akṛśaṃ kucayoḥ kṛśaṃ valagne vitataṃ cakṣuṣi vistṛtaṃ nitambe /
aruṇādharamāvirastu citte karuṇāśāli kapālibhāgadheyam // MSS_0113

akṛśaṃ nitambabhāge kṣāmaṃ madhye samunnataṃ kucayoḥ /
atyāyataṃ nayanayor mama jīvitametadāyāti // MSS_0114

akṛṣṭaphalamūlena vanavāsarataḥ sadā /
kurute'harahaḥ śrāddham ṛṣirvipraḥ sa ucyate // MSS_0115

akekī kiṃ kekī vacasi caturaḥ kinna kuraraḥ śukaḥ kiṃvā mūkaḥ sa ca kalaravaḥ kiṃ kṣataravaḥ /
tvayāgaṇyaiḥ puṇyaiḥ pikamadhurimā dhīragarimā yato labdhaḥ stabdhaḥ kimasi ruciraṃ neha suciram // MSS_0116

akausumī manmathacāpayaśṭi- ranaṃśukā vibhramavaijayantī /
lalāṭaraṅgāṅgaṇanartakīyam anañjanā bhrūranuyāti dṛṣṭam // MSS_0117

akratvaṅgamatastakraṃ na śatakratunā hutam /
nādattamiti vākyārthāt takraṃ śakrasya durlabham // MSS_0118

akratvarthamiti jñātvā śakre na hutavān purā /
nādattamiti śāstrārthāt takraṃ śakrasya durlabham // MSS_0119

akrameṇānupāyena karmārambho na sidhyati /
dadhisarpiḥpayāṃsīva śabarasya yathā hi goḥ // MSS_0120

akrodhaṃ śikṣayantyanyaiḥ krodhanā ye tapodhanāḥ /
nirdhanāste dhanāyaiva dhātuvādopadeśinaḥ // MSS_0121

akrodhanaḥ krodhanebhyo viśiṣṭas tathā titikṣuratitikṣorviśiṣṭaḥ /
amānuṣebhyomānuṣāśca pradhānā vidvāṃstathaivāviduṣaḥ pradhānaḥ // MSS_0122

akrodhanaḥ satyavādī bhūtānāmavihiṃsakaḥ /
anasūyaḥ sadācāro dīrghamāyuravāpnuyāt // MSS_0123

akrodhanaśca rājendra satyaśīlo dṛḍhavrataḥ /
ātmopamaśca bhūteṣu sa tīrthaphalamaśnute // MSS_0124

akrodhavairāgyajitendriyatvaṃ kṣamādayāśāntijanapriyatvam /
nirlobhadātā bhayaśokahārī jñānasya cihnaṃ bhayalakṣaṇāni // MSS_0125

akrodhasya yadā krodhaḥ sarvanāśāya kalpate /
rāghavasya prakopena baddho nadanadīpatiḥ // MSS_0126

akrodhena jayet krodham asādhuṃ sādhunā jayet /
jayet kadaryaṃ dānena jayet satyena cānṛtam // MSS_0127

aklāntadyutibhirvasantakusumairuttaṃsayan kuntalān antaḥ khelati khañjarīṭanayane kuñjeṣu kañjekṣaṇaḥ /
asmanmandirakarmatastava karau nādyāpi viśrāmyataḥ kiṃ brūmo rasikāgraṇīrasi ghaṭī neyaṃ vilambakṣamā // MSS_0128

akliṣṭabālatarupallavalobhanīyaṃ pītaṃ mayā sadayameva ratotsaveṣu /
bimbādharaṃ daśasi ced bhramara priyāyās tvāṃ kārayāmi kamalodarabandhanastham // MSS_0129

akleśādiva cintitam upatiṣṭhati siddhameva puṇyavatām /
uḍḍīyāpuṇyavatāṃ gacchanti kapotakāḥ paśya // MSS_0130

akṣatrārikṛtābhimanyunidhanaprodbhūtatīvrabhruvaḥ pārthasyākṛta śātravapratikṛterantaḥ śucā muhyataḥ /
kīrṇā bāṣpakaṇaiḥ patanti dhanuṣi vrīḍājaḍā dṛṣṭayo hā vatseti giraḥ sphuranti na punarniryānti vaktrādbahiḥ // MSS_0131

akṣadevanapaṇīkṛtedhare kāntayorjayaparājaye sati /
atra vaktu yadi vetti manmathaḥ kastayorjayati jīyate'pi vā // MSS_0132

akṣadyūtajitādharagrahavidhāvīśo'si tatkhaṇḍanā- dādhikye vada ko bhavāniti mṛṣā kopāñcitabhrū latam /
svidyatkhinnakarā /grakuḍma/ laparāyattīkṛtāsyasya me mugdhākṣīpratikṛtya tat kṛtavatī dyūte'pi yannārjitam // MSS_0133

akṣamaḥ kṣamatāmāno kriyāyāṃ yaḥ pravartate /
sa hi hāsyāspadatvaṃ ca labhate prāṇasaṃśayam // MSS_0134

akṣamālāpavṛttijñā kuśāsanaparigrahā /
brāhmīva daurjanī saṃsad vandanīyā samekhalā // MSS_0135

akṣamā hrīparityāgaḥ śrīnāśo dharmasaṃkṣayaḥ /
abhidhyāprājñatā caiva sarvaṃ lobhāt pravartate // MSS_0136

akṣamo'satyasaṃdhaśca paradārī nṛśaṃsakṛt /
pacyate narakeṣveva dahyamānaḥ svakarmaṇā // MSS_0137

akṣaradvayamabhyastaṃ nāsti nāstīti yat purā /
tadidaṃ dehi dehīti viparītamupasthitam // MSS_0138

akṣaramaitrībhājaḥ sālaṃkārasya cāruvṛttasya /
kiṃ brūmo sakhi yūno na hi na hi sakhi padyabandhasya // MSS_0139

akṣarāṇāmakāro'ham iti viṣṇuḥ svayaṃ bruvan /
bhavatā so'pi yat satyam ākāreṇa laghūkṛtaḥ // MSS_0140

akṣarāṇi parīkṣyantām ambarāḍambareṇa kim /
śaṃbhurambarahīno'pi sarvajñaḥ kiṃ na jāyate // MSS_0141

akṣarāṇi vicitrāṇi yena jānanti mānavāḥ /
balīvardasamāste tu khuraśṛṅgavivarjitāḥ // MSS_0142

akṣarāṇi samānāni vartulāni ghanāni ca /
parasparavilagnāni taruṇīkucakumbhavat // MSS_0143

akṣipakṣma kadā luptaṃ chidyante hi śiroruhāḥ /
vardhamānātmanāmeva bhavanti hi vipattayaḥ // MSS_0144

akṣibhyāṃ kṛṣṇaśārābhyām asyāḥ karṇau na bādhitau /
śaṅke kanakatāḍaṅkapāśatrāsavaśādiva // MSS_0145

akṣīṇakarmabandhastu jñātvā mṛtyumupasthitam /
uktvāntikāle saṃsmṛtya punaryogitvamṛcchati // MSS_0146

akṣīṇabhogādviṣamād iṣṭāniṣṭabhayojjhitāt /
durjanādvata devā apy aśaktā iva bibhyati // MSS_0147

akṣetre bījamutsṛṣṭam antareva vinaśyati /
abījakamapi kṣetraṃ kevalaṃ sthaṇḍilaṃ bhavet // MSS_0148

akṣeṣu mṛgayāyāṃ ca strīṣu pāne vṛthāṭane /
nidrāyāṃ ca nibandhena kṣipraṃ naśyati bhūpatiḥ // MSS_0149

akṣeṣviyaṃ vyasanitā hṛdaye yadete rāgo ghano madhumadotkaṭamānanaṃ ca /
padmastathāpi paramāspadameva lakṣmyās taddainyameva kila durbhagatā yadebhiḥ // MSS_0150

akṣoṭhaśuṇṭhimaricārdrakadāḍimatvak kustumburūlavaṇatailasusaṃskṛtān yaḥ /
matsyān suśītasitabhaktatale dadhāti sa brahmalokamadhigacchati puṇyakarmā // MSS_0151

akṣaure'pi ca nakṣatre kurvīta budhasomayoḥ /
yukte'pi tithinakṣatre na kuryācchanibhaumayoḥ // MSS_0152

akṣauhiṇī ripuṃ hanyāt svayaṃ vā tena hanyate /
brāhmaṇo mantraviddhanyāt sarvāneva ripūn kṣaṇāt // MSS_0153

akṣṇornikṣipadañjanaṃ śravaṇayostāpiñchagucchāvalīṃ mūrdhni śyāmasarojadāma kucayoḥ kastūrikāpatrakam /
dhūrtānāmabhisārasaṃbhramajuṣāṃ viṣvaṅnikuñje sakhi dhvāntaṃ nīlanicolacāru sudṛśāṃ pratyaṅgamāliṅgati // MSS_0154

akṣṇormañjulamañjanaṃ caraṇayornīlāśmajau nūpurā- vaṅge nīlapaṭaḥ sphuṭaṃ mṛgamadanyāsaḥ kapolasthale /
yatprītyā pariśīlitaṃ paradṛśāṃ rodhāya tatsāṃprataṃ nepathyasya vidhāvapīdamasatījātasya jātaṃ tamaḥ // MSS_0155

akṣṇoryugmaṃ vilokānmṛdutanuguṇatastarpayantī śarīraṃ divyāmodena vaktrādapagatamarutā nāsikāṃ cāruvācā /
śrotradvaṃdvaṃ manojñādrasanamapi rasādarpayantī mukhābjaṃ yadvatpañcākṣasaukhyaṃ vitarati yuvatiḥ kāmināṃ nānyadevaṃ // MSS_0156

akṣṇorvipakṣa iti sānuśayaṃ lulāva nīlotpalaṃ yadabalā kalamasya goptrī /
bhūyastadeva śirasāvahadunnatānāṃ vairaṃ virodhiṣu dṛḍhaṃ na parājiteṣu // MSS_0157

akhaṇḍamaṇḍalaḥ śrīmān paśyaiṣa pṛthivīpatiḥ /
na niśākaravajjātu kalāvaikalyamāgataḥ // MSS_0158

akhaṇḍitaṃ ca kramukaṃ cūrṇam tu rasavarjitam /
bhūmau nipatitaṃ patraṃ śakrasyāpi śriayaṃ haret // MSS_0159

akhaṇḍitā śaktirathopamānaṃ na svīkṛtaṃ na cchalarītirasti /
aspṛṣṭasaṃdehaviparyayasya ko'yaṃ tava nyāyanaye niveśaḥ // MSS_0160

akharvaparvagarteṣu vicchinno yasya vāridhiḥ /
sa eva hi muneḥ pāṇir adhastādvindhyabhūbhṛtaḥ // MSS_0161

akhilaṃ viduṣāmanāvilaṃ suhṛdā ca svahṛdā ca paśyatām /
savidhe'pi nasūkṣmasākṣiṇī vadanālaṃkṛtimātramakṣiṇī // MSS_0162

akhileṣu vihaṃgeṣu hanta svacchandacāriṣu /
śuka pañjarabandhaste madhurāṇāṃ girāṃ phalam // MSS_0163

agajānanapadmārkaṃ gajānanamaharniśam /
anekadaṃ taṃ bhaktānām ekadantamupāsmahe // MSS_0164

agaṇitaguṇena sundara kṛtvā cāritramapyudāsīnam /
bhavatānanyagatiḥ sā vihitāvartena taraṇiriva // MSS_0165

agaṇitagururyācñālolaṃ padāntasadātithiḥ samayamavidan mugdhaḥ kālāsaho ratilampaṭaḥ /
kṛtakakupitaṃ hastāghātaṃ trapāruditaṃ haṭhā- daparigaṇayan lajjāyāṃ māṃ nimajjayati priyaḥ // MSS_0166

agaṇitanijaśramāṇāṃ parakṛtye'bhyetya vartamānānām /
sujanaghanadinamaṇīnāṃ paropakārārthamajani janiḥ // MSS_0167

agaṇitayaśasā tyakta- sthitinā kriyate'tha yākṛtajñena /
snigdhe suhṛdi sarāge mitre tava vañcanā na yuktā sā // MSS_0168

agatitvamatiśraddhā jñānābhāsena tṛptatā /
trayaḥ śiṣyaguṇā hyete mūrkhācāryasya bhāgyajāḥ // MSS_0169

agatīnāṃ khalīkārād duḥkhaṃ naivopajāyate /
bhavantyaśokāḥ prāyeṇa sāṃkurāḥ pādatāḍitāḥ // MSS_0170

agadaiḥ sarvasāmānyair vyantarāṇāṃ viṣaṃ haret /
dhūpo devīsahāpicchakhaṇḍanaistadviṣāpahaḥ // MSS_0171

agamyagamanāt prāyaḥ prāyaścittīyate janaḥ /
agamyaṃ tvadyaśo yāti sarvatraiva ca pāvanam // MSS_0172

agamyāni pumān yāti yo'sevyāṃśca niṣevate /
sa mṛtyumupagṛhṇāti garbhamaśvatarī yathā // MSS_0173

agamyārthaṃ tṛṇaprāṇāḥ pṛṣṭhasthīkṛtabhīhriyaḥ /
śambhalībhuktasarvasvā janā yatpāripārśvikāḥ // MSS_0174

agamyo mantrāṇāṃ prakṛtibhiṣajāmapyaviṣayaḥ sudhāsārāsādhyo visadṛśatarārambhagahanaḥ /
jagadbhrāmīkartuṃ pariṇatadhiyānena vidhinā sphuṭaṃ sṛṣṭo vyādhiḥ prakṛtiviṣamo durjanajanaḥ // MSS_0175

agastitulyāśca ghṛtābdhiśoṣaṇe dambholitulyā vaṭakādribhedane /
śākāvalīkānanavahnirūpās ta eva bhaṭṭā itare bhaṭāśca // MSS_0176

agastihastaculukamite'bdhau vāhanākṛtau /
magnaḥ samudro velāyām iti devāstadā jaguḥ // MSS_0177

agastya iva yasyāsir nyañcitakṣitibhṛdbabhau /
citraṃ so'pyakaronnṛtyat kabandhaṃ samarārṇavam // MSS_0178

agastyasya muneḥ śāpād brahmasyandanamāsthitaḥ /
mahāsukhāt paribhraṣṭo nahuṣaḥ sarpatāṃ gataḥ // MSS_0179

agastyena payorāśeḥ kiyat kiṃ pītamujjhitam /
tvayā vairikulaṃ vīra samare kīdṛśaṃ kṛtam // MSS_0180

agā gāṅgāṅgakākākagāhakāghakakākahā /
ahāhāṅka khagāṅkāgakaṅkāgakhagakākaka // MSS_0181

agādhajalasaṃcārī vikārī na ca rohitaḥ /
gaṇḍūṣajalamātre tu śapharī pharpharāyate // MSS_0182

agādhahṛdayā bhūpāḥ kūpā iva durāsadāḥ /
ghaṭakā guṇino no cet kathaṃ labhyeta jīvanam // MSS_0183

agādhenāpi kiṃ tena toyena lavaṇāmbudheḥ /
janumātraṃ varaṃ vāri tṛṣṇācchedakaraṃ nṛṇām // MSS_0184

agāre'smin kānte giriśamaniśānāthaśakalaṃ bhujaṃgānuttuṅgān sakalamapi vātāyanapathe /
nikuñjeṣu śyenānadhigṛhaśiro rāhuvalayaṃ likhantyā nīyante śiva śiva tayā hanta divasāḥ // MSS_0185

aguṇakaṇo guṇarāśir dvayamapi daivena khalamukhe patitam /
prasarati tailamivaikaḥ salile ghṛtavajjaḍatvametyanyaḥ // MSS_0186

agururiti vadatu loko gauravamatraiva punarahaṃ manye /
darśitaguṇaikavṛttir yasya jane janitadāhe'pi // MSS_0187

agurusurabhidhūpāśobhitaṃ keśapāśaṃ galitakusumamālaṃ dhunvatī kuñcitāgram /
tyajati gurunitambā nimnanābhiḥ sumadhyāpy uṣasi śayanavāsaḥ kāminī kāmaśobhā // MSS_0188

agurorapi sata uccaiḥ praśaṃsanaṃ tadguṇā vitanvanti /
agururjvalane'pyastaḥ saurabhamiṣato guṇān vamati // MSS_0189

agūḍhavibhavā yasya paurā rāṣṭravāsinaḥ /
nayāpanayavettāyaḥ sa rājā rājasattamaḥ // MSS_0190

agūḍhahāsasphuṭadantakesaraṃ mukhaṃ svidetadvikasannu paṅkajam /
iti pralīnāṃ nalinīvane sakhīṃ vidāmbabhūvuḥ sucireṇa yoṣitaḥ // MSS_0191

agniṃ prāpya yathā sadyas tūlarāśirvinaśyati /
tathā gaṅgājalenaiva sarvapāpaṃ vinaśyati // MSS_0192

agniṃ stokamivātmānaṃ saṃdhukṣayati yo naraḥ /
sa vardhamāno grasate mahāntamapi saṃcayam // MSS_0193

agniḥ stoko vardhate cājyasikto bījaṃ caikaṃ bahusāhasrameti /
kṣayodayau vipulau saṃniyamya tasmādalpaṃ nāvamanyeta vittam // MSS_0194

agnikuṇḍasamā nārī ghṛtakumbhasamo naraḥ /
saṃgamena parastrīṇāṃ kasya no calate manaḥ // MSS_0195

agnikumbhasamā nārī ghṛtakumbhasamo naraḥ /
ubhayorapi saṃyogaḥ kasya viśvāsakārakaḥ // MSS_0196

agnidāhe na me duḥkhaṃ chede na nikaṣe na vā /
yattadeva mahadduḥkhaṃ guñjayā saha tolanam // MSS_0197

agnido garadaścaiva śastrapāṇirdhanāpahaḥ /
kṣetradārāpahārī ca ṣaḍete hyātatāyinaḥ // MSS_0198

agninā bhasmanā caiva stambhena ca janena ca /
advāreṇaiva mārgeṇa paṅktitadoṣo na vidyate // MSS_0199

agnirāpaḥ striyo mūrkhāḥ sarpā rājakulāni ca /
nityaṃ yatnena sevyāni sadyaḥ prāṇaharāṇi ṣaṭ // MSS_0200

agnirgururdvijātīnāṃ varṇānāṃ pārthivo guruḥ /
kulastrīṇāṃ gururbhartā sarvasyābhyāgato guruḥ // MSS_0201

agnirdahati tāpena sūryo dahati raśmibhiḥ /
rājā dahati daṇḍena tapasā brāhmaṇo dahet // MSS_0202

agnirdevo dvijātīnāṃ munīnāṃ hṛdi daivatam /
pratimāsvalpabuddhīnāṃ sarvatra samadarśinaḥ // MSS_0203

agnirhi devatāḥ sarvāḥ sarvaṇaṃ ca tadātmakam /
tasmāt suvarṇaṃ dadatā dattāḥ sarvāḥ sma devatāḥ // MSS_0204

agniṣṭomādibhiryajñair vividhairāptadakṣiṇaiḥ /
na tat phalamavāpnoti tīrthārthe gamanena yat // MSS_0205

agniśtejo mahalloke gūḍhastiṣṭhati dāruṣu /
na copayuṅkte taddāru yāvanno dīpyate paraiḥ // MSS_0206

sa eva khalu dārubhyo yadā nirmathya dīpyate /
tadā tacca vanaṃ cānyan nirdahatyāśu tejasā // MSS_0207

evameva kule jātāḥ pāvakopamatejasaḥ /
kṣamāvanto nirākārāḥ kāṣṭhe'gniriva śerate // MSS_0208

agnihotraṃ gṛhaṃ kṣetraṃ garbhirṇīṃ vṛddhabālakau /
riktahastena nopeyād rājānaṃ devatāṃ gurum // MSS_0209

agnihotraṃ trayo vedās tridaṇḍaṃ bhasmaguṇṭhanam /
buddhipauruṣahīnānāṃ jīviketi bṛhaspatiḥ // MSS_0210

agnihotraphalā vedāḥ śīlavṛttaphalaṃ śrutam /
ratiputraphalā dārā dattabhuktaphalaṃ dhanam // MSS_0211

agnihotramadhītaṃ vā dānādyāścākhilāḥ kriyāḥ /
bhajante tasya vaiphalyaṃ yasya vākyamakāraṇam // MSS_0212

agnihotreṣu viprāṇāṃ hṛdi devo manīṣiṇām /
pratimāsvalpabuddhīnāṃ sarvatra viditātmanām // MSS_0213

agneryathā dāruviyogayogayor adṛṣṭato'nyatra nimittamasti /
evaṃ hi jantorapi durvibhāvyaḥ śarīrasaṃyogaviyogahetuḥ // MSS_0214

agnau kriyāvatāṃ devo divi devo manīṣiṇām /
pratimāsvalpabuddhīnāṃ yogināṃ hṛdaye hariḥ // MSS_0215

agnau dagdhaṃ jale magnaṃ hṛtaṃ taskarapārthivaiḥ /
tatsarvaṃ dānamityāhur yadi klaibyaṃ na bhāṣate // MSS_0216

agnau prāptaṃ pradhūyeta yathā tūlaṃ dvijottama /
tathā gaṅgāvagāḍhasya sarvaṃ pāpaṃ pradhūyate // MSS_0217

agnau prāstaṃ tu puruṣaṃ karmānveti svayaṃkṛtam /
tasmāttu puruṣo yatnād dharmaṃ saṃcinuyācchanaiḥ // MSS_0218

agnau prāstāhutiḥ samyag ādityamupatiṣṭhate /
ādityājjāyate vṛṣṭir vṛṣr̥erannaṃ tataḥ prajāḥ // MSS_0219

agnyākāraṃ kalayasi puraścakravākīva candraṃ baddhotkampaṃ śiśiramarutā dahyate padminīva /
prāṇān dhatse kathamapi balādgacchataḥ śalyatulyāṃs tat kenāsau sutanu janito māmmathaste vikāraḥ // MSS_0220

agnyādhānena yajñena kāṣāyeṇa jaṭājinaiḥ /
lokān viśvāsayitvaiva tato lumpedyathā vṛkaḥ // MSS_0221

agracchāyā tṛṇāgniśca nīcasevā paṭe jalam /
veśyārāgaḥ khalaprema sarvaṃ budbudasannibham // MSS_0222

agrataḥ pṛṣṭhato madhye pārśvato'tha samantataḥ /
vidyuccakitavadbhāti sūryakoṭisamaprabhaḥ // MSS_0223

agrataścaturo vedān pṛṣṭhataḥ saśaraṃ dhanuḥ /
ubhābhyāṃ ca samartho'haṃ śāpādapi śarādapi // MSS_0224

agrato vāmapādaṃ ca dakṣiṇaṃ jātu kuñcitam /
ālīḍhaṃ tu prakartavyaṃ hastadvayasavistaram // MSS_0225

agrasānuṣu nitāntapiśaṅgair bhūruhānmṛdukarairavalambya /
astaśailagahanaṃ nu vivasvān āviveśa jaladhiṃ nu mahīṃ nu // MSS_0226

agrāhyaṃ śravaṇasya bhūṣaṇamalaṃkāro na bhāvocitaḥ kaṇṭhasyāñjanamujjvalaṃ nayanayoḥ sūkṣmatvamāvekṣitum /
vaktrasya kṣaṇiko'dhivāsanavidhiḥ kānte priye nābhavas saubhāgyapratikarmanirmitamahāvidyaiva yenātmanaḥ // MSS_0227

agrāhyā mūrdhajeṣvetāḥ striyo guṇasamanvitāḥ /
na latāḥ pallavacchedam arhantyupavanodbhavāḥ // MSS_0228

agre kasyacidasti kaṃcidabhitaḥ kenāpi pṛṣṭe kṛtaḥ saṃsāraḥ śiśubhāvayauvanajarābhārāvatārādayam /
bālastaṃ bahu manyatāmasulabhaṃ prāptaṃ yuvā sevatāṃ vṛddhastadviṣyādbahiṣkṛta iva vyāvṛtya kiṃ paśyati // MSS_0229

agre kugrāmavargaḥ piśitarasalasaccaṇḍacaṇḍāyamānaḥ paścādvyādho vadhārtho niśitaśarakaraḥ pādamudrānapāyī /
viṣvagdīpto vanāgnirvanamatigahanaṃ dhūmavātyā ca dṛṣṭeḥ saroddhī kāndiśīko hari hari hariṇaḥkaṃ śaraṇyaṃ prayātu // MSS_0230

agre gacchata dhenudugdhakalaśānādāya gopyo gṛhaṃ dugdhe vaskayaṇīkule punariyaṃ rādhā śanairyāsyati /
ityanyavyapadeśaguptahṛdayaḥ kurvan viviktaṃ vrajaṃ devaḥ kāraṇanandasūnuraśivaṃ kṛṣṇaḥ sa muṣṇātu vaḥ // MSS_0231

agre gītaṃ sarasakavayaḥ pārśvato dākṣiṇātyāḥ pṛṣṭhe līlāvalayaraṇitaṃ cāmaragrāhiṇīnām /
yadyastyevaṃ kuru bhavarasāsvādane lampaṭatvaṃ no ceccetaḥ praviśa sahasā nirvikalpe samādhau // MSS_0232

agre taptajalā nitāntaśiśirā mūle muhurbāhubhir vyāmathyoparataprapeṣu pathikairmārgeṣu madhyaṃdine /
ādhārāḥ plutabālaśaivaladalacchedāvakīrṇormayaḥ pīyante halamuktamagnamahiṣaprakṣobhaparyāvilāḥ // MSS_0233

agre tiṣṭhati dāruṇākṛtirasau krodhoddhataḥ kesarī paścādudbhaṭadāvadūṣitadharāsaṃkrāntacaṇḍānilaḥ /
kiṃ kurmaḥ sahasā vihāya kalabhānetān brajāmaḥ kathaṃ haṃho kūṇitalocaneti kariṇī cintākulā tābhyati // MSS_0234

agre dhanuḥ śarakaraḥ svayamasti kāmaḥ paścāttvarā śaśadharodayasaṃśayotthā /
dhvāntaṃ dināntavikasadvibhavaṃ samantāt kiṃ kevalā pathi vadhūrdayitābhisāre // MSS_0235

agre prastutanāśānāṃ mūkatā paramo guṇaḥ /
tathāpi prabhubhaktānāṃ saudharmyādevamucyate // MSS_0236

yaireva stutibhiḥ svāmī prāpyate vyasanāvaṭam /
paścānmūkatvamāpannair ḍaddharttuṃ naiva śakyate // MSS_0237

agre māhiṣikaṃ dṛṣṭvā madhye tu vṛṣalīpatim /
ante vārdhuṣikaṃ dṛṣṭvā nirāśāḥ pitaro gatāḥ // MSS_0238

agre yānti rathasya reṇuvadamī cūrṇībhavanto ghanāś cakrabhrāntirarāntareṣu janayatyanyāmivārāvalim /
citranyastamivācalaṃ hayaśirasyāyāmavaccāmaraṃ yaṣṭyagre ca samaṃ sthito dhvajapaṭaḥ prānte ca vegānilāt // MSS_0239

agre laghimā paścān mahatāpi pidhīyate na hi mahimnā /
vāmana iti trivikramam abhidadhati daśāvatāravidaḥ // MSS_0240

agre vikīrṇakurabaka- phalajālakahīyamānasahakāram /
pariṇāmābhimukhamṛtor utsukayati yauvanaṃ cetaḥ // MSS_0241

agre vyādhaḥ karadhṛtaśaraḥ pārśvato jālamālā pṛṣṭe vahnirdahati nitarāṃ saṃnidhau sārameyāḥ /
eṇī garbhādalasagamanā bālakai ruddhapādā cintāviṣṭā vadati hi mṛgaṃ kiṃ karomi kva yāmiḥ // MSS_0242

agre śyāmalabindubaddhatilakairmadhye'pi pākānvaya- prauḍhībhūtapaṭolapāṭalatarairmūle manāgbabhrubhiḥ /
vṛnte karkaśakīrapiccaharibhiḥ sthūlaiḥ phalairbandhurāḥ saṃpratyutsukayanti kasya na manaḥ pūgadrumāṇāṃ chaṭāḥ // MSS_0243

agresarī kumārī tatpṛṣṭe puṅkhago yadā tāraḥ /
siddhistadottamā syād dṛṣṭāpyādau varā durgā // MSS_0244

agre strīnakhapāṭalaṃ kuravakaṃ śyāmaṃ dvayorbhāgayor bālāśokamupoḍharāgasubhagaṃ bhedonmukhaṃ tiṣṭhati /
īṣadbaddharajaḥkaṇāṃgrakapiśā cūte navā mañjarī mugdhatvasya ca yauvanasya ca sakhe madhye madhuśrīḥ sthitā // MSS_0245

agryo muktimatāṃ prayogasamaye mantreṣu pṛṣṭhaṃ gataḥ pākāgāragatastu pācakamanastoṣāya vācaspatiḥ /
uccāyāṃ nirato rato'rthakagaṇe piṇḍeṣu dattādaro nānāśrāddhagaṇaikacālitamanā bhaddoṭṭamo rājate // MSS_0246

aghaṃ sa kevalaṃ bhuṅkte yaḥ pacatyātmakāraṇāt /
yajñaśiṣṭāśanaṃ hyetat satāmannaṃ vidhīyate // MSS_0247

aghaṭitaṃ ghaṭanāṃ nayati dhruvaṃ sughaṭitaṃ kṣaṇabhaṅguratācalam /
jagadidaṃ kurute sacarācaraṃ vidhiraho balavāniti me matiḥ // MSS_0248

aghaṭitaghaṭitaṃ ghaṭayati sughaṭitaghaṭitāni jarjarīkurute /
vidhireva tāni ghaṭayati yāni pumānnaiva cintayati // MSS_0249

aghṛṣṭamiva māṇikyam amattamiva ca dvipam /
aśūraṃ pārthivaṃ loko jātyamapyavamanyate // MSS_0250

aṅkaṃ ke'pi śaśaṅkirejalanidheḥ paṅkaṃ pare menire sāraṅgaṃ katicicca saṃjagadire bhūmeśca bimbaṃ pare /
indau yaddalitendranīlaśakalaśyāmaṃ darīdṛśyate tanmanye ravibhītamandhatamasaṃ kukṣisthamālakṣyate // MSS_0251

aṅkanilīnagajānana- śaṅkākulabāhuleyahṛtavasanau /
sasmitaharakarakalitau himagiritanayāstanau jayataḥ // MSS_0252

aṅkanyāsairviṣamair māyāvanitālakāvalīkuṭilaiḥ /
ko nāma kāmacāraiḥ kāyasthairmohito na janaḥ // MSS_0253

aṅkamallavinodeṣu tathānyeṣūtsavādiṣu /
antaḥpurapracāreṣu devapūjāpareṣu ca // MSS_0254

aṅkādhiropitamṛgaś candramā mṛgalāñchanaḥ /
kesarī niṣṭhurakṣiptamṛgayūtho mṛgādhipaḥ // MSS_0255

aṅkurite pallavite korakite vikasite ca sahakāre /
aṅkuritaḥ pallavitaḥ korakito vikasitaśca madanaḥ // MSS_0256

aṅkekṛtvottamāṅgaṃ plavagabalapateḥ pādamakṣasya hantur datvotsaṅge salīlaṃ tvaci kanakamṛgasyāṅgaśeṣaṃ nidhāya /
bāṇaṃ rakṣaḥ kulaghanaṃ praguṇitamanujenādarāttīkṣṇamakṣṇaḥ koṇenāvekṣamāṇastvadanujavacane dattakarṇo'yamāste // MSS_0257

aṅke vṛddhimupāgataṃ śiśutayā sarvāṅgamāliṅgitaṃ matsyaḥ śrīparirambhanirbharataravyākośakoṣonmukhaiḥ /
āśāptaiḥ paripīyamānamaniśaṃ niḥspandamindindirair dūrādeva nimeṣaśūnyanayanaḥ padmaṃ samudvīkṣate // MSS_0258

aṅkeṣu śūnyavinyāsād vṛddhiḥ syāttu daśādhikā /
tasmājjñeyā viśeṣeṇa aṅkānāṃ vāmato gatiḥ // MSS_0259

aṅkollakvāthatoyena miśritaṃ ghṛtamākṣikam /
vasā kiṭikuṅgāṇām etaiḥ siktā mahīruhāḥ // MSS_0260

aṅkollakvathitaṃ svinnaṃ nṛmāṃsaṃ chāgadugdhayuk /
piṇyākasahitaṃ mūle sahakārasya nikṣipet // MSS_0261

aṅkollatailabhāvitam uṣitaṃ gośakṛti kumudakandamalam /
karakāmbukardamabhṛte kalaśe kusumaṃ samudvahati // MSS_0262

aṅkollatailasūkara- śiśumāravasāsu bhāvitaṃ bījam /
sadyo rohati nihitaṃ bhūmau karakāmbhasā siktam // MSS_0263

aṅkollapatradhapena yadvā keśasamanvitaiḥ /
saktubhiḥ kaṭutailāktair yāti matsyaviṣaṃ kṣayam // MSS_0264

aṅkollabījamajjānāṃ sūkṣmacūrṇaṃ vidhīyate /
tilatailena taccūrṇaṃ samyakkṛtvā ca bhāvayet // MSS_0265

aṅgaṃ galitaṃ palitaṃ muṇḍaṃ dantavihīnaṃ jātaṃ tuṇḍam /
karadhṛtakampitaśobhitadaṇḍaṃ tadapi na muñcatyāśā piṇḍam // MSS_0266

aṅgaṃ candanapaṅkapaṅkajabisacchedāvalīnaṃ muhus tāpaḥ śāpa ivaiṣa śoṣaṇapaṭuḥ kampaḥ sakhīkampanaḥ /
śvāsāḥ saṃvṛtatārahārarucayaḥ saṃbhinnacīnāṃśukā jātaḥ prāgatidāhavedanamahārambhaḥ sa tasyā jvaraḥ // MSS_0267

aṅgaṃ candanapāṇḍu pallavamṛdustāmbūlatāmro'varo dhārāyantrajalābhiṣekakaluṣe dhautāñjane locane /
antaḥpuṣpasugandhirārdrakabarī svacchaṃ tanīyo'mbaraṃ kāntānāṃ kamanīyatāṃ bidadhate grīṣme'parāhṇagame // MSS_0268

aṅgaṃ dakṣiṇamāruhya vāmenottarati sphuṭam /
tadā hānikarī jñeyā vyatyayena tu lābhadā // MSS_0269

aṅgaṃ damanapattrābhamaṅge yasmin pratīyate /
vidyāddamanavajraṃ tu tīkṣṇadhāraṃ mahāguṇam // MSS_0270

aṅgaṃ pratīyate yatra bahugranthisamanvitam /
durlabhaṃ tanmahāmūlyaṃ granthivajrakamucyate // MSS_0271

aṅgaṃ bhūṣaṇanikaro bhūṣayatītyeṣa laukiko vādaḥ /
aṅgāni bhūṣaṇānāṃ kāmapi suṣamāmajījanaṃstasyāḥ // MSS_0272

aṅgaṃ yena rathīkṛtaṃ nayanayoryugmaṃ rathāṅgīkṛtaṃ patraṃ svaṃ rathakarmasāratthikṛtaṃ śvāsasturaṃgīkṛtāḥ /
koda'ḍīkṛtamātmavīryamacirānmaurvīkṛtaṃ bhūṣaṇaṃ vāmāṅgaṃ viśikhīkṛtaṃ diśatu naḥ kṣemaṃ sa dhanvī pumān // MSS_0273

aṅgaṇaṃ tadidamunmadadvipa- śreṇiśoṇitavihāriṇo hareḥ /
ullasattaruṇakelipallavāṃ sallakīṃ tyajati kiṃ mataṅgajaḥ // MSS_0274

aṅgaṇavedirvasudhā kulyā jaladhiḥ sthalī ca pātālam /
valmīkaśca sumeruḥ kṛtapratijñasya dhīrasya // MSS_0275

aṅgadoṣaparityaktaś caturmārgakṛtaśramaḥ /
jñātā kulakavādyasya rañjako vādakaḥ smṛtaḥ // MSS_0276

aṅganānāmivāṅgāni gopyante svaguṇā yadā /
tadā te spṛhaṇīyāḥ syur ime hyatyantadurlabhāḥ // MSS_0277

aṅganāmaṅganāmantare mādhavo mādhavaṃ mādhavaṃ cāntareṇāṅganā /
itthamākalpite maṇḍale madhyagaḥ saṃjagau veṇunā devakīnandanaḥ // MSS_0278

aṅganyāsastataḥ kāryaḥ śivoktaḥ siddhimicchatā /
ācāryeṇa ca śiṣyasya pāpaghno vighnanāśanaḥ // MSS_0279

aṅgapratyaṅgajaḥ putro hṛdayāccāpi jāyate /
tasmāt priyataro mātuḥ priyatvānna tu bāndhavaḥ // MSS_0280

aṅgapratyaṅgabhāgena tataḥ piṇḍaḥ prajāyate /
carmaṇācchāditaḥ sapta dhātavaḥ suyranukramāt // MSS_0281

aṅgamaṅgena saṃpīḍya māṃsaṃ māṃsena tu striyaḥ /
purāhamabhavaṃ prīto yattanmohavijṛmbhitam // MSS_0282

aṅgamanaṅgakliṣṭaṃ sukhayedanyā na me karasparśāt /
nocchvasiti tapanakiraṇaiś candrasyevāṃśubhiḥ kumudam // MSS_0283

aṅgayuktaḥ kṛtāsraśca kurvan samyakpurovidhim /
vijānan siddhasādhyādīn vairiṇo'strairna pīḍyate // MSS_0284

aṅgasaṅgāt tathā jīvo bhajate prākṛtān guṇān /
ahaṃkārābhibhūtaḥ san bhinnastebhyo'pi so'vyayaḥ // MSS_0285

aṅgāḥ saṃjātabhaṅgādyanavanavasatiprāptaraṅgāḥ kaliṅgās tailaṅgāḥsvargagaṅgābhiṣavaṇamatayaḥ śīryadaṅgāśca vaṅgāḥ /
lāṭāḥsvidyallalāṭāḥ padagamanadṛḍhāśvāsalolāśca colā jāyante śrīnijāma pṛthuraṇa bhavataḥ prauḍhaniḥsāṇanādāt // MSS_0286

aṅgākṛṣṭadukūlayā sarabhasaṃ gūḍhau bhujābhyāṃ stanāv ākṛṣṭe jaghanāṃśuke kṛtamadhaḥ saṃsaktamūrudvayam /
nābhīmūlanibaddhacakṣuṣi mayi vrīḍānatāṅgyā tayā dīpaḥ sphūtkṛtavātavepitaśikhaḥ karṇotpalenāhataḥ // MSS_0287

aṅgākṛṣṭirvyathayati nakhāṅkeṣu vakṣojakumbhā- vāsyaṃ jṛmbhā daśanavasane dantadaṣṭaṃ dunoti /
yāntyāḥ khedaṃ vrajati karajaśreṇiṣu śroṇibhāgaḥ prātaryāti praguṇataratāṃ vaiśasaṃ naiśamasyāḥ // MSS_0288

aṅgāṅgamāgate śatrau kiṃ karoti paricchadaḥ /
rāhuṇā grasite candre kiṃ kiṃ bhavati tārakaiḥ // MSS_0289

aṅgāṅgibhāvamajñātvā kathaṃ sāmarthyanirṇayaḥ /
paśya ṭiṭṭibhamātreṇa samudro vyākulīkṛtaḥ // MSS_0290

aṅgānāmatitānavaṃ kuta idaṃ kampaśca kasmāt kuto mugdhe pāṇḍukapolamānanamiti prāṇeśvarepṛcchati /
tanvyā sarvamidaṃ svabhāvata iti vyāhṛtya pakṣmāntara- vyāpī bāṣpabharastayā valitayā niḥśvasya mukto'nyataḥ // MSS_0291

aṅgāni khedayasi kiṃ śirīṣakusumaparipelavāni mudhā /
ayamīhitakusumānāṃ saṃpādayitā tavāsti dāsajanaḥ // MSS_0292

aṅgāni candanarajaḥparidhūsarāṇi tāmbūlarāgasubhago'dharapallavaśca /
svacchāñjane ca nayane vasanaṃ tanīyaḥ kāntāsu bhūṣaṇamidaṃ vibahvaśca śeṣaḥ // MSS_0293

aṅgāni dattvā hemāṅgi prāṇān krīṇāsi cen nṛṇām /
yuktametan na tu punaḥ koṇaṃ nayanapadmayoḥ // MSS_0294

aṅgāni dhīpaṭutvaṃ śaktirdaśanāḥ śanairviśīryante /
nikhilendriyāṇi yeṣāṃ cirāyuṣaste narā jñeyāḥ // MSS_0295

aṅgāni nidrālasavibhramāṇi vākyāni kiṃcin madalālasāni /
bhrūkṣepajihmāni ca vīkṣitāni cakāra kāmaḥ pramadājanānām // MSS_0296

aṅgāni me dahatu kāntaviyogavahniḥ samrakṣatu priyatamaṃ hṛdi vartate'sau /
ityāśayā śaśimukhī jaladaśruvāri- dhārābhiruṣṇamabhiṣiñcati hṛtpradeśam // MSS_0297

aṅgāni ślathaniḥ sahāni nayate mugdhālase vibhramaś- vāsotkampitakomalastanamuraḥ sāyāsasupte bhruvau /
kiṃ cāndolanakautukavyuparatāvāsyeṣu vāmabhruvāṃ svedāmbhaḥ stapitākulālakalateṣvāvāsito manmathaḥ // MSS_0298

aṅgāmodasamocchaladghṛṇipatadbhṛṅgāvalīmālita- sphūrjallañchanasūtragumphitamilannīlotpalaśrīriva /
niryatpādanakhonmukhāṃśuvisarasragdanturaḥ smaryatāṃ mañjuśrīḥ suramuktamañjariśikhāvarṣairivābhyarcitaḥ // MSS_0299

aṅgārapūrve gamane ca lābhaḥ some śanau dakṣiṇamarthalābham /
budhe gurau paścimakāryasiddhī ravau bhṛgau cottaramarthalābhaḥ // MSS_0300

aṅgāraśūlāśmapalālakeśa- vistīrṇaviṭcarmamṛteṣu dṛṣṭaḥ /
śvā mūtrayanyacchati kāryanāśaṃ dāridryamṛtyupramukhānanarthān // MSS_0301

aṅgārasadṛśī nārī ghṛtakumbhasamaḥ pumān /
ye prasaktā vilīnāste ye sthitāste pade sthitāḥ // MSS_0302

aṅgārasadṛśī yoṣit sarpiḥkumbhasamaḥ pumān /
tasyāḥ parisare brahman sthātavyaṃ na kadācana // MSS_0303

aṅgārahāsiṣu vilāsagṛhodareṣu talpeṣu tūlapaṭakalpitaveṣṭaneṣu /
uṣṇeṣu ca praṇayinīkucamaṇḍaleṣu śāntiṃ jagāma śiśirasya tuṣāragarvaḥ // MSS_0304

aṅgāraiḥ khaciteva bhūrviyadapi jvālākarālaṃ karais tigmāṃśoḥ kiratīva tīvramabhito vāyuḥ kukūlānalam /
apyambhāṃsi nakhaṃpacāni saritāmāśā jvalantīva ca grīṣme'sminnavavahnidīpitamivāśeṣaṃ jagadvartate // MSS_0305

aṅgāraiḥ śākavṛkṣasya cūrṇitaiḥ saghṛtaistryaham /
dattairnaśyatyatīsārastry ahaṃ pānīyavāraṇāt // MSS_0306

aṅgāsaṅgimṛṇālakāṇḍamayate bhṛṅgāvalīnāṃ rucaṃ nāsāmauktikamindranīlasaraṇiṃ śvāsānilād gāhate /
datteyaṃ himavālukāpi kucayordhatte kṣaṇaṃ dīpatāṃ taptāyaḥpatitāmbuvatkaratale dhārāmbu saṃlīyate // MSS_0307

aṅgīkuru tvamavadhīraya vā vayaṃ tu dāsāstaveti vacasaiva jayema lokān /
etāvataiva sukaro nanu viśvamāta- ruddaṇḍadaṇḍadharakiṃkaramaulibhaṅgaḥ // MSS_0308

aṅgīkurvanti bhaṅgīmakhilagirigaṇāstaptajāmbūnadīyāṃ dūrīkurvanti pūrīkṛtakanakagirisphāragavaṃ ca yasyāḥ /
unmattadhvāntadhārāsuravarapaṭalīdāhasañjātakīrtiḥ seyaṃ prācī pradīptirdalayatu duritaṃ sarvadā sarvadā me // MSS_0309

aṅgīkurvannamṛtarucirāmutpatiṣṇossalīlaṃ chāyāmantastava maṇimayo mālyavāneṣa śailaḥ /
śobhāṃ vakṣyatyadhikalalitāṃ śobhamānāmatīndor devasyāderupajanayato mānasādindubimbam // MSS_0310

aṅgīkṛtatitikṣaḥ seḍ guṇī niṣṭhāparo yathā /
mṛṣistathā vijayate śrīrāmo rājasattamaḥ // MSS_0311

aṅgīkṛttāḥ kṣatimimāmapi ye viṣahya goptuṃ guṇān kimiti vāñchasi tānmudhaiva /
muktāmaṇervimalarūpatayā nitāntam ete tava svayamapi prakaṭībhavanti // MSS_0312

aṅgulibhaṅgavikalpana- vividhavivādapravṛttapāṇḍityaḥ /
japacapaloṣṭhaḥ sajane dhyānaparo nagararathyāsu // MSS_0313

aṅgulīkisalayāgratarjanaṃ bhrūvibhaṅgakuṭilaṃ ca vīkṣitam /
mekhalābhirasakṛcca bandhanaṃ vañcayan praṇayinīravāpa saḥ // MSS_0314

aṅgulībhiḥ kuraṅgākṣyāḥ śobhate mudrikāvaliḥ /
proteva bāṇaiḥ pañceṣoḥ sūkṣmā lakṣyaparamparā // MSS_0315

aṅgulībhiriva keśasaṃcayaṃ saṃnigṛhya timiraṃ marīcibhiḥ /
kuḍmalīkṛtasarojalocanaṃ cumbatīva rajanīmukhaṃ śaśī // MSS_0316

aṅgulyaḥ pañcame māse dṛṣṭikukṣau ca ṣaṣṭhame /
saṃcāraḥ saptame māse aṣṭame nayaneṣu ca // MSS_0317

aṅgulyaḥ pallavānyāsan kusumāni nakhārciṣaḥ /
bāhū late vasantaśrīs tvaṃ naḥ pratyakṣacāriṇī // MSS_0318

aṅgulyagranakhena bāṣyasalilaṃ vikṣipya vikṣipya kiṃ tūṣṇīṃ rodiṣi kopane bahutaraṃ phūtkṛtya rodiṣyasi /
yasyāste piśunopadeśavacanairmāne'tibhūmiṃ gate nirviṇṇo'nunayaṃ prati priyatamo madhyasthatāmeṣyati // MSS_0319

aṅgulyagranirodhatastanutarāṃ dhārāmiyaṃ tanvatī karkayā na paraṃ payo nipuṇikā dātuṃ prapāpālikā /
viśliṣṭāṅgulinā kareṇa daśanāpāḍaṃ śanaiḥ pāntha he niśpandordhvavilocanas tvamapi hā jānāsi pātuṃ payaḥ // MSS_0320

aṅgulyagreṇa yajjaptaṃ yajjaptaṃ merulaṅghane /
vyagracittena yajjaptaṃ trividhaṃ niṣphalaṃ bhavet // MSS_0321

aṅgulyā kaḥ kavāṭaṃ praharati kuṭile mādhavaḥ kiṃ vasanto no cakrī kiṃ kulālo na hi dharaṇidharaḥ kiṃ dvijihvaḥ phaṇīndraḥ /
nāhaṃ ghorāhimardī kimasi khagapatirno hariḥ kiṃ kapīndraḥ ityevaṃ gopakanyāprativacanajitaḥ pātu vaścakrapāṇiḥ // MSS_0322

aṅguṣṭhatarjanībhyāṃ gā ghrāṇe saṃgṛhya nāmayet /
mantreṇānena vaśyāḥ syuḥ paśavo'śvādayastathā // MSS_0323

aṅguṣṭhanakhadambhena pādayoḥ patitaḥ kimu /
vibhāti vaktravijitaḥ śaśī vigatakalmaṣaḥ // MSS_0324

aṅguṣṭhanakhamūle tu tarjanyagraṃ susaṃsthitaṃ /
matsarī sā ca vijñeyā citralakṣyasya vedhane // MSS_0325

aṅguṣṭhākramavakritāṅguliradhaḥ pādārdhanīruddhabhūḥ pārśvādvegakṛto nihatya kaphaṇidvandvena daṃśānmuhuḥ /
nyagjānudvayayantrayantritaghaṭīvaktrāntarālaskhalad dhārādhvānamanoharaṃ sakhi payo gāṃ dogdhi gopālakaḥ // MSS_0326

aṅguṣṭhāgre tu tarjanyā mukhaṃ yatra niveśitaṃ /
kākatuṇḍī ca vijñeyā sūkṣmalakṣyeṣu yojitā // MSS_0327

aṅguṣṭhe padagulphajānujaghane nābhau ca vakṣaḥstane kakṣākaṇṭhakapoladantavasane netrālike mūrdhani /
śuklāśuklavibhāgato mṛgadṛśāmaṅgeṣvanaṅgasthitī- rūrdhvādhogamanena vāmapadagāḥ pakṣadvaye lakṣayet // MSS_0328

aṅguṣṭhodaramātraṃ viśeṣavitprāpya padmarāgamaṇim /
sukhasaṃvāhyamanuttaraṃ arthaṃ kiṃ tena nāpnoti // MSS_0329

aṅgena kenāpi vijetumasyā gaveṣyate kiṃ calapatrapatraṃ /
na cedviśeṣāditaracchadebhyas tasyāstu kampastu kuto bhayena // MSS_0330

aṅgena gātraṃ nayanena vaktraṃ nyāyena rājyaṃ lavaṇena bhojyaṃ /
dharmeṇa hīnaṃ khalu jīvitaṃ ca na rājate candramasā vinā niśā // MSS_0331

aṅge'naṅgajvarahutavahaścakṣuṣi dhyānamudrā kaṇṭhe jīvaḥ karakisalaye dīrghaśāyī kapolaḥ /
aṃse vīṇā kucaparisare candanaṃ vāci maunaṃ tasyāḥ sarvaṃ sthitamiti na tu tvāṃ vinā kvāpi cetaḥ // MSS_0332

aṅgenāṅgaṃ pratanu tanunā gāḍhataptena taptaṃ sāsrepyāsradrutamaviratotkaṇṭhamutkaṇṭhitena /
aṣṇocchvāsaṃ samadhikatarocchvāsinā dūravartī saṃkalpaiste viśati vidhinā vairiṇā ruddhamārgaḥ // MSS_0333

aṅgenāṅgamanupraviśya milato hastāvalepādibhiḥ kā vārtā yudhi gandhasindhurapatergandho'pi cetke dvipāḥ /
jetavyo'sti hareḥ sa lāñchanamato vandāmahe tāmabhūd yadgabha śarabhaḥ svayaṃjaya iti śrutvāpi yo nāṅkitaḥ // MSS_0334

aṅgeṣu caturaśratvaṃ samapādau latākarau /
prārambhe sarvanṛtyānām etatsāmānyamucyate // MSS_0335

aṅgeṣu mukhyā dvijamadhyasaṃsthā vāṇānusaṃdhāna parāsi nityaṃ /
adhaṃ sthirapremarasā rasajñe narastutiṃ saṃtyaja karṇavat tvaṃ // MSS_0336

aṅgeṣvābharaṇaṃ karoti bahuśaḥ patre'pi saṃcāriṇi prāptaṃ tvāṃ pariśaṅkate vitanute śayyāṃ ciraṃ dhyāyati /
ityākalpavikalpatalparacanāsaṅkalpalīlāśata- vyāsaktāpi vinā tvayā varatanurnaiṣā niśāṃ neṣyati // MSS_0337

aṅgaiḥ sukumārataraiḥ sā kusumānāṃ śriyaṃ praharati /
vikalayati kusumabāṇo bāṇālībhirmama prāṇān // MSS_0338

aṅgairantarnihitavacanaiḥ sūcitaḥ samyagarthaḥ pādanyāso layamanugatastanmayatvaṃ raseṣu /
śākhāyonirmṛdurabhinayastadvikalpānuvṛttau bhāvo bhāvaṃ nudati viṣayādrāgabandhaḥ sa eva // MSS_0339

aṅghridaṇḍo harerūrdhvam utkṣipto balinigrahe /
vidhiviṣṭarapadmasya nāladaṇḍo mude'stu vaḥ // MSS_0340

acakamata sapallavāṃ dharitrīṃ mṛdusurabhiṃ virahayya puṣpaśayyām /
bhṛśamaratimavāpya tatra cāsyās tava sukhaśītamupaitumaṅkamicchā // MSS_0341

acañcalaṃ mugdhamudañcitaṃ dṛśor anunnataṃ śrīmaduro mṛgīdṛśaḥ /
abhaṅgurākūtavatī gatirbhruvor abaddhalakṣyaṃ kvacidutkamāntaram // MSS_0342

acaturvadano brahmā dvibāhuraparo hariḥ /
abhālalocanaḥ śaṃbhur bhagavān bādarāyaṇaḥ // MSS_0343

acalaṃ caladiva cakṣuḥ prakṛtamapīdaṃ samudyadiva vakṣaḥ /
atadiva tadapi śarīraṃ saṃprati vāmabhruvo jayati // MSS_0344

acalā kamalā kasya kasya mitraṃ mahīpatiḥ /
śarīraṃ ca sthiraṃ kasya kasya vaśyā varāṅganā // MSS_0345

acalā kamalā hi kasya kasya kṣitipālaḥ kila mitramasti loke /
iha vaśyatamā ca kasya veśyā sthiramapyasti ca kasya dehamatra // MSS_0346

acintanīyā vidhivañcaneyaṃ yadambujākṣī sthavirasya bhartuḥ /
svayaṃ samādāya karaṃ nidhāya vakṣojayugme svapiti śvasantī // MSS_0347

acintitāni duḥkhāni yathaivāyānti dehinām /
sukhānyapi tathā manye daivamatrātiricyate // MSS_0348

acintyamatiduḥsahaṃ trividhaduḥkhameno'rjitaṃ caturvidhagatiśritaṃ bhavabhṛtā na kiṃ prāpyate /
śarīramasukhākaraṃ jagati gṛhṇatā muñcatā tanoti na tathāpyayaṃ viratimūrjitāṃ pāpataḥ // MSS_0349

acintyāḥ panthānaḥ kimapi mahatāmandhakaripor yadakṣṇo'bhūt tejastadakṛta kathāśeṣamadanam /
munernetrādatreryadajani punarjyotirahaha pratene tenedaṃ madanamayameva tribhuvanam // MSS_0350

acirāt parātmaniṣṭhā bhavati yatastatkriyeta catureṇa kleśen kāmadamanaṃ dhigekadārañjayantamātmānam // MSS_0351

acirādupakarturācared atha vātmaupayikīmupakriyām /
pṛthuritthamathāṇurastu sā na viśeṣe viduṣāmiha grahaḥ // MSS_0352

acirādhiṣṭhitarājyaḥ śatruḥ prakṛtiṣvarūḍhamūlatvāt /
navasaṃropaṇaśithilas taruriva sukaraḥ samuddhartum // MSS_0353

acireṇa parasya bhūyasoṃ viparītāṃ vigaṇayya cātmanaḥ /
kṣayayuktimupekṣate kṛtī kurute tatpratikāramanyathā // MSS_0354

acireṇa rocate me divasānevaṃ vṛthātivāhayate /
śritakṛṣṇapakṣagataye vayasya kāmyastanīvirahaḥ // MSS_0355

acumbi yā candanabindumaṇḍalī nalīyavaktreṇa sarojatarjinā /
śriyaṃ śritā kācana tārakāsakhī kṛtāśaśāṅkasya tayāṅkavartinī // MSS_0356

acetanā api prāyo maitrīmevānubadhyate /
svavṛddhāt kṣīyate kṣīrāt kṣīrāt prāgeva vāriṇā // MSS_0357

aceṣṭamānamāsīnaṃ śrīḥ kaṃcidupatiṣṭhati /
kaścit karmāṇi kurvan hi na prāpyamadhigacchati // MSS_0358

acodyamānāni yathā puṣpāṇi ca phalāni ca /
svakālaṃ nātivartante tathā karma purākṛtam // MSS_0359

acchaprakāśavati candramasi priye'sminn āhlādakāriṇi sudhāvati pūrṇabimbe /
dhātā vicintya manasākhiladṛṣṭipātaṃ hartuṃ cakāra kimu kajjalabinduyogam // MSS_0360

. . . . . .
acchalaṃ mitrabhāvena satāṃ dārāvalokanam MSS_0361

acchācchacandanarasārdrakarā mṛgākṣyo dhārāgṛhāṇi kusumāni ca kaumudī ca /
mando marut sumanasaḥ śuci harmyapṛṣṭhaṃ grīṣme madaṃ ca madanaṃ ca vivardhayanti // MSS_0362

acchāsu haṃsa iva bālamṛṇālikāsu bhṛṅgo navāsviva madhudrumamañjarīṣu /
ko'vantibharturaparo rasanirbharāsu pṛthvīpatiḥ sukavisūktiṣu baddhabhāvaḥ // MSS_0363

acchidramastu hṛdayaṃ paripūrṇamastu maukharyamastamitamastu gurutvamastu /
kṛṣṇapriye sakhi diśāmi sadāśiṣaste yadvāsare murali me karuṇāṃ karoṣi // MSS_0364

acchinnaṃ nayanāmbu bandhuṣu kṛtaṃ cintā guruṣvarpitā dattaṃ dainyamaśeṣataḥ parijane tāpaḥ sakhīṣvāhitaḥ /
adya śvaḥ paranirvṛtiṃ bhajati sā śvāsaiḥ paraṃ khidyate viśrabdho bhava viprayogajanitaṃ duḥkhaṃ vibhaktaṃ tayā // MSS_0365

acchinnamekhalamalabdhadṛḍhopagūḍham aprāptacumbanamavīkṣitavaktrakānti /
kāntāvimiśravapuṣaḥ kṛtavipralambha- sambhogasakhyamiva pātu vapuḥ smarāreḥ // MSS_0366

acchinnāmṛtabinduvṛṣṭisadṛśīṃ prītiṃ dadatyā dṛśāṃ yātāyā vigalatpayodharabharāddraṣṭavyatāṃ kāmapi /
asyāścandramasastanoriva karasparśāspadatvaṃ gatā naite yanmukulībhavanti sahasā padmāstadevādbhutam // MSS_0367

acchedyo'yamadāhyo'yam akledyo'śoṣya eva ca /
nityaḥ sarvagataḥ sthāṇur acalo'yaṃ sanātanaḥ // MSS_0368

acyutacaraṇataraṅgiṇi śaśiśekharamaulimālatīmāle /
tvayi tanuvitaraṇasamaye haratā deyā na me haritā // MSS_0369

acyutabhaktivaśādiha samabhāvastatprasaṅgena /
sā ramaterabhyudayati ratiriti naivādbhutaṃ kiṃcit // MSS_0370

acyutānantagovindanāmoccāraṇabheṣajāt /
naśyanti sakalā rogāḥ satyaṃ satyaṃ vadāmyaham // MSS_0371

ajani pratidinameṣā kardamaśeṣā madaṅgasaṅgena /
pratiniśamapūri pampā dakṣiṇasaṃpātibhiḥ salilaiḥ // MSS_0372

ajani bhagavānasmādvedhāḥ śiraḥsu sudhābhujāṃ kṛtapadamidaṃ caitaddevyāḥ śriyo dhṛtimandiram /
tadiha bhuvanābhogaślāghye saroruhi yacciraṃ śaśadhara tava dveṣārambhaḥ sa eṣa jaḍagrahaḥ // MSS_0373

ajani rajaniranyā candramaḥ kāntivanyā- vipulacapalavīcivyācitā kācideva /
satarugirisaridbhiḥ kiṃ haridbhiḥ sametaṃ dhavalimani dharitrīmaṇḍalaṃ magnametat // MSS_0374

ajani śiśiraśīlaṃ śaivalaṃ sāgare yac cikuramakṛta kāmastanvi te kiṃ na tena /
vahati kuṭilamenaṃ hetunā kena mūrdhnā vadanavidhurayaṃ cet sodaro nādasīyaḥ // MSS_0375

ajanmā puruṣastāvad gatāsustṛṇameva vā /
yāvanneṣubhirādatte viluptamaribhiryaśaḥ // MSS_0376

ajanyakampāḥ śūrā ye nityamapyaparāṅmukhāḥ /
darśayantyaparāgeṇa parebhyaścitrarūpavat // MSS_0377

ajarāmaravat prājño vidyāmarthaṃ ca cintayet /
gṛhīta iva keśeṣu mṛtyunā dharmamācaret // MSS_0378

ajavaccarvaṇaṃ kuryād gajavat snānamācaret /
rājavat praviśedgrāmaṃ coravadgamanaṃ caret // MSS_0379

ajasya gṛhṇato janma nirīhasya hatadviṣaḥ /
svapato jāgarūkasya yāthātmyaṃ veda kastava // MSS_0380

ajasraṃ lasatpadminī vṛndasaṅgaṃ madhūni prakāmaṃ pibantaṃ milindam /
ravirmocayatyabjakārāgṛhebhyo dayālurhi no duṣṭavad doṣadarśī // MSS_0381

ajasrabhūmītaṭakuṭṭanotthitair upāsyamānaṃ caraṇeṣu reṇubhiḥ /
rayaprakarṣādhyayanārthamāgatair janasya cetobhirivāṇimāṅkitaiḥ // MSS_0382

ajasramabhyāsamupeyuṣā samaṃ mudaiva devaḥ kavinā budhena ca /
dadhau paṭīyān samayaṃ nayannayaṃ dineśvaraśrīrudayaṃ dine dine // MSS_0383

ajasramārohasi dūradīrghāṃ saṃkalpasopānatatiṃ tadīyām /
śvāsān sa varṣatyadhikaṃ punaryad dhyānāttava tvanmayatāṃ tadāpya // MSS_0384

ajā iva prajā mohād yo hanyāt pṛthivīpatiḥ /
tasyaikā jāyate tṛptir na dvitīyā kathaṃcana // MSS_0385

ajāgalasthastana uṣṭrapucchaṃ kakṣāntare keśamathāṇḍayugmam /
tvāṃ saṃsṛjan sāyaṇamāyaṇādau brahmāgragaṇyo na babhūva pūjyaḥ // MSS_0386

ajāṅghrinirdattarajaścayāpi kapālinā baddharasāpi kāmam /
tato'pyadhodhaḥ patitāpi nityaṃ gaṅgā kusaṅgāpi punāti lokān // MSS_0387

ajājījambāle rajasi maricānāṃ ca luṭhitāḥ kaṭutvāduṣṇatvājjanitarasanauṣṭhavyatikarāḥ /
anirvāṇotthena prabalataratailāktatanavo mayā sadyo bhṛṣṭāḥ katipayakavayyaḥ kavalitāḥ // MSS_0388

ajātamṛtamūrkhāṇāṃ varamādyau na cāntimaḥ /
sakṛdduḥkhakarāvādyāv antimas tu pade pade // MSS_0389

ajātamṛtamūrkhebhyo mṛtājātau sutau varam /
yatastau svalpaduḥkhāya yāvajjīvaṃ jaḍo dahet // MSS_0390

ajātaromāmatisundarāṅgīṃ śṛṅgāravallīmiva rājakanyām /
bhuktvā drutaṃ kvāpi gato na cet syāḥ syātte tadānarthanipāta eva // MSS_0391

ajādhūliriva trastair mārjanīreṇuvajjanaiḥ /
dīpakhaṭvotthacchāyeva tyajyate nirdhano janaḥ // MSS_0392

ajānatā bhavetkaścid aparādhaḥ kuto yadi kṣantavyameva tasyāhuḥ suparīkṣya parīkṣayā // MSS_0393

ajānatī kāpi vilokanotsukā samīradhūtārdhamapi stanāṃśukam /
kucena tasmai calate'karot puraḥ purāṅganā maṅgalakumbhasaṃbhṛtim // MSS_0394

ajānan māhātmyaṃ patati śalabhas tīvradahane sa mīno'pyajñānād baḍiśayutamaśnātu piśitam /
vijānanto'pyete vayamiha vipajjālajaṭilān na muñcāmaḥ kāmānahaha gahano mohamahimā // MSS_0395

ajāmūtraṃ ca tadviṣṭhā sūkarasya tathaiva viṭ /
budbudaṃ lepato hanyān maṇḍalikṣveḍasaṃbhavam // MSS_0396

ajāyantaitasmādamṛtaśaśilakṣmīprabhṛtayaḥ paritrātāścendrāt kulaśikhariṇaḥ pūrvayamunā /
upetā ityevaṃ tava jalanidhe tīramadhunā vigarjābhiḥ kiṃ naḥ śrutipuṭamaho jarjarayasi // MSS_0397

ajāyuddhamṛṣiśrāddhaṃ prabhāte meghaḍambaraḥ /
dampatyoḥ kalahaścaiva bahvārambhe laghukriyā // MSS_0398

ajārajaḥ khararajas tathā saṃmārjanīrajaḥ /
dīpakhaṭvotthacchāyā ca śakrasyāpi śriyaṃ haret // MSS_0399

ajārajaḥ parvaṇi maithunāni śmaśānadhūmo maṭhabhojanāni /
rajasvalānetranirīkṣaṇāni haranti puṇyāni divā kṛtāni // MSS_0400

ajāvigardabhoṣṭrāṇāṃ mārjāramūṣikasya ca /
rajāṃsyetāni pāpāni sarvataḥ parivarjayet // MSS_0401

ajāśvayormukhaṃ medhyaṃ gāvo medhyāstu pṛṣṭhataḥ /
brāhmaṇāḥ pādato medhyāḥ striyo medhyāśca sarvataḥ // MSS_0402

ajā siṃhaprasādena vane carati nirbhayam /
rāmamāsādya laṅkāyāṃ lebhe rājyaṃ vibhīṣaṇaḥ // MSS_0403

ajitendriyavargasya nācāreṇa bhavet phalam /
kevalaṃ dehakhedāya durbhagasya vibhūṣaṇam // MSS_0404

ajitvā sārṇavāmurvīm aniṣṭvā vividhairmakhaiḥ /
adattvā cārthamarthibhyo bhaveyaṃ pārthivaḥ katham // MSS_0405

ajīyatāvartaśubhaṃyunābhyāṃ dorbhyāṃ mṛṇālaṃ kimu komalābhyām /
niḥ sūtramāste ghanapaṅkamṛtsu mūrtāsu nākīrtiṣu tannimagnam // MSS_0406

ajīrṇaṃ tapasaḥ krodho jñānājīrṇamahaṃkṛtiḥ /
parinindā kriyāṃjīrṇam annājīrṇaṃ viṣūcikā // MSS_0407

ajīrṇe bheṣajaṃ vāri jīrṇe vāri balapradam /
bhojane cāmṛtaṃ vāri bhojanānte viṣāpaham // MSS_0408

ajeyaḥ subhagaḥ saumyaḥ tyāgī bhogī yaśonidhiḥ /
bhavatyabhayadānena ciraṃjīvī nirāmayaḥ // MSS_0409

ajaiḍakāsūkaraviḍviḍaṅga- kiṇvopacāreṇa ca bījapūraḥ /
bhūyośvamūtrāvilavārisiktaḥ phalāni dhatte subahūni śaśvat // MSS_0410

arjitaṃ svena vīryeṇa nānyapāśritya kaṃcana /
phalaśākamapi śreyo bhoktuṃ hyakṛpaṇaṃ gṛhe // MSS_0411

ajñaṃ karmāṇi limpanti tajjñaṃ karma na limpati /
lipyate rasanaivaikā sarpiṣā karavad yathā // MSS_0412

ajñaḥ sukhamārādhyaḥ sukhataramārādhyate viśeṣajñaḥ /
jñānalavadurvidagdhaṃ brahmāpi naraṃ na rañjayati // MSS_0413

ajñatayā premṇā vā cūḍāmaṇimākalayya kācamaṇim /
nṛpatirvaheta śirasā tenāsau nahyanarghyamaṇiḥ // MSS_0414

ajñaścāśraddadhānaśca saṃśayātmā vinaśyati /
nāyaṃ loko'sti na paro na sukhaṃ saṃśayātmanaḥ // MSS_0415

ajñastāvadahaṃ na mandadhiṣaṇaḥ kartuṃ manohāriṇīś cāṭūktīḥ prabhavāmiyāmibhavato yābhiḥ kṛpāpātratām /
ārtenāśaraṇena kiṃ tu kṛpaṇenākranditaṃ karṇayoḥ kṛtvā satvarame hi dehi caraṇaṃ mūrdhanyadhanyasya me // MSS_0416

ajñātakālocitakarmayogā rogā ivāharniśi paśyamānāḥ jagattraye devamanuṣyanāgāḥ /
prajñādaridrāḥ khalu sarva eva // MSS_0417

ajñātakulaśīlasya vāso deyo na kasyacit /
mārjārasya hi doṣeṇa hato gṛdhro jaradgavaḥ // MSS_0418

ajñātakulaśīle'pi prītiṃ kurvanti vānarāḥ /
ātmārthe ca na rodanti rodanti tvitare janāḥ // MSS_0419

ajñātadeśakālāś capalamukhā paṅgavo'pisa plutayaḥ /
navavihagā iva mugdhā bhakṣyante dhūrtamārjāraiḥ // MSS_0420

ajñātadoṣairdoṣajñair uddūṣyobhayavetanaiḥ /
bhedyāḥ śatrorabhivyaktaśāsanaiḥ sāmavāyikāḥ // MSS_0421

ajñātanāmavarṇeṣv ātmāpi yayārpyate dhanāṃśena /
tasyā api sadbhāvaṃ mṛgayante moghasaṃkalpāḥ // MSS_0422

ajñātapāṇḍityarahasyamudrā ye kāvyamārge dadhate'bhimānam /
te gāruḍīyānanadhītya mantrān hālāhalāsvādanamārabhante // MSS_0423

ajñātabhāvicaurādi doṣairnityavināśinā /
hāsyaikahetunā loke gaṇakasya dhanena kim // MSS_0424

ajñātamahimā vāṇī śivaṃ stautu rasonmadā /
rasātirekādaucityabhaṅgaḥ strīṇāṃ kva labhyate // MSS_0425

ajñātamātṛla lana- maiṇaśiśuṃ kaścidaṅkamāropya /
adyāpi rakṣasi vidho dharmātmā konu bhavadanyaḥ // MSS_0426

ajñātavīvadhāsāratoyasasyo vrajettu yaḥ pararāṣṭraṃ na bhūyaḥ sa svarāṣṭramadhigacchati // MSS_0427

ajñātaśāstrasadbhāvāñ chāstramātraparāyaṇān /
tyajed dūrād bhiṣakpāśān pāśān vaivasvatāniva // MSS_0428

ajñātāḥ puruṣā yasya praviśanti mahīpateḥ /
durgaṃ tasya na saṃdehaḥ praviśanti drutaṃ dviṣaḥ // MSS_0429

ajñātāgamamīlitākṣiyugalaṃ kiṃ tvaṃ mudhā tiṣṭhasi jñātosi prakaṭaprakampapulakairaṅgai sphuṭaṃ mugdhayā /
muñcaināṃ jaḍa kiṃ na paśyasi galadbāṣpāmbudhau tānanāṃ sakhyaivaṃ gadite vimucya rabhasāt kaṇṭhevalagno yuvā // MSS_0430

ajñātenduparābhavaṃ parilasadvyālolanetrāñjanaṃ bhrāntabhrū latamaiṇanābhitilakaṃ śrīkhaṇḍapatrālakam /
bandhūkādharasundaraṃ suramunivyāmohi vākyāmṛtaṃ trailokyādbhutapaṅkajaṃ varatanorāsyaṃ na kasya priyam // MSS_0431

ajñānaṃ kāraṇaṃ na syād viyogo yadi kāraṇam /
śoko dineṣu gacchatsu vardhatāmapayāti kim // MSS_0432

ajñānaṃ khalu kaṣṭaṃ krodhādibhyo'pi sarvapāpebhyaḥ /
arthaṃ hitamahitaṃ vā na vetti yenāvṛto lokaḥ // MSS_0433

ajñānaṃ yatphalaṃ tasya raso'dharmaḥ prakīrtitaḥ /
bhāvodakena saṃvṛddhis tasyāśraddhā ṛtuḥ priya // MSS_0434

ajñānatimirāndhasya jñānañjanaśalākyā /
cakṣurun mīlitaṃ yena tasmai śrīgurave namaḥ // MSS_0435

ajñānaprabhavaṃ hīdaṃ yadduḥkhamupalabhyate /
lobhaprabhavamajñānaṃ vṛddhaṃ bhūyaḥ pravardhate // MSS_0436

ajñānamiha nidānaṃ prāgrūpaṃ jananameva bhavaroge /
pāripākaḥ saṃsaraṇaṃ bhaiṣajyaṃ naiṣṭhikī śāntiḥ // MSS_0437

ajñānavaraṣaṇḍena prasupto naragarddabhaḥ /
kaḥ samarthaḥ prabīddhuṃ taṃ jñānabherīśatairapi // MSS_0438

ajñānavalito bālye madamūḍhaśca yauvane /
vārddhake vihvalāṅgaśca kadā kuśalabhāgjanaḥ // MSS_0439

ajñānājjñānato vāpi jambūryena praropitā /
gṛhe'pi sa vasannityaṃ yatidharmeṇa yujyate // MSS_0440

ajñānāt kurute śrāddhaṃ yo'bhiśravaṇavarjitam /
śrāddhahantā bhavetkartā nirāśāḥ pitaro gatāḥ // MSS_0441

ajñānājjñānato vāpi yadduruktamudāhṛtam /
tat kṣantavyaṃ yuvābhyāṃ me kṛtvā prītiparaṃ manaḥ // MSS_0442

ajñānādyadi vā jñānāt kṛtvā karma vigarhitam /
tasmād vimuktimanvicchan dvitīyaṃ na samācaret // MSS_0443

ajñānādyadi vādhipatyarabhasādasmatparokṣaṃ hṛtā sīteyaṃ pravimucyatāṃ śaṭha marutputrasya haste'dhunā /
no cel lakṣmaṇamuktamārgaṇagaṇacchedocchalacchoṇita- cchatracchannadigantamantakapuraṃ putrairvṛto yāsyasi // MSS_0444

ajñānāndhamabāndhavaṃ kavalitaṃ rakṣobhirakṣābhidhaiḥ kṣiptaṃ mohamahāndhakūpakuhare durhṛdbhirābhyntaraiḥ /
krandantaṃ śaraṇāgataṃ gatadhṛtiṃ sarvāpadāmāspadaṃ mā māṃ muñca maheśa peśaladṛśā satrāsamāśvāsaya // MSS_0445

ajñānānnirayaṃ yāti tathājñānena durgatim /
ajñānāt kleśamāpnoti tathāpatsu nimajjati // MSS_0446

ajñānāmavanībhujāmaharaḥ svarṇābhiṣekotsavāj jñātuḥ śrīyuvaraṅgabhūparasikaślāghaiva saṃmānanā /
sārāsāravivekaśūnyaramaṇīsaṃbhogasāmrājyataḥ sārajñendumukhīvilokakapaṭaścāturyayūnāṃ mude // MSS_0447

ajñānāmavirāmalaukikavacobhājāmamīṣāṃ punar mantroccāraṇa eva paryavasitaṃ maunavrataṃ karmasu /
grāmāyavyayalekhanena nayatāṃ kālānaśeṣānaho pāraṃparyata īdṛśāmiha nṛṇāṃ brāhmaṇyamanyādṛśam // MSS_0448

ajñānena parāṅmukhīṃ paribhavādāśliṣya māṃ duḥkhitāṃ kiṃ labdhaṃ śaṭha durnayena nayatā saubhāgyametāṃ daśām /
paśyaitaddayitākucavyatikaronmṛṣṭāṅgarāgāruṇaṃ vakṣaste malatailapaṅkaśabalairveṇīpadairaṅkitam // MSS_0449

ajñānenāpihite vijñāne karma kiṃ kurute /
vikale cakṣuṣi tamasā vyādāya mukhaṃ kimīkṣeta // MSS_0450

ajñānenāvṛto loko mātsaryānna prakāśate /
lobhāt tyajati mitrāṇi saṅgāt svargaṃ na gacchati // MSS_0451

ajñānenāvṛto loko lobhena ca vaśīkṛtaḥ /
saṅgana bahubhirnaṣṭas tena svargaṃ na gacchati // MSS_0452

ajñānaikahato bālye yauvane gṛhatatparaḥ /
vārdhake'patyacintārtaḥ karmabhirbadhyate punaḥ // MSS_0453

ajñānopahato bālye yauvane madanāhataḥ /
śeṣe kalatracintārtaḥ kiṃ karotu kadā janaḥ // MSS_0454

ajñaścāśraddadhānaśca saṃśayātmā vinaśyati //
nāyaṃ loko'sti na paro na sukhaṃ saṃśayātmanaḥ // MSS_0455

ajñāstaranti pāraṃ vijñā vijñāya drāṅnimajjanti /
kathaya kalāvati keyaṃ tava nayanataraṅgiṇīrītiḥ // MSS_0456

ajñebhyo granthinaḥ śreṣṭhā granthibhyo dhāriṇo varāḥ /
dhāribhyo jñāninaḥ śreṣṭhā jñānibhyo vyavasāyinaḥ // MSS_0457

ajñeṣvajño guṇiṣu guṇavān paṇḍite paṇḍito'sau dīne dīnaḥ sukhini sukhavān bhogino bhogibhāvaḥ /
jñātā jñāturyuvatiṣu yuvā vāgmināṃ tattvavettā dhanyaḥ so'yaṃ bhavati bhuvana yo'vadhūte'vadhūtaḥ // MSS_0458

ajño jantuśca nīco'yam ātmanaḥ sukhaduḥkhayoḥ /
īśvaraprerito gacchet svargaṃ vā śvabhrameva vā // MSS_0459

ajño na vitaratyarthān punardāridriyaśaṅkayā /
prājño'pi vitaratyarthān punardāridriyaśaṅkayā // MSS_0460

ajño'pi tajjñatāmeti śanaiḥ śailo'pi cūrṇyate /
bāṇo'pyeti mahālakṣyaṃ paśyābhyāsavijṛmbhitam // MSS_0461

ajño bhavati vai bālaḥ pitā bhavati mantradaḥ /
ajñaṃ hi bāla ityāhuḥ pitetyeva tu mantradam // MSS_0462

ajño vā yadi vā viparyayagate jñāne'tha saṃdehabhṛd dṛṣṭādṛṣṭavirodhi karma kurute yastasya goptā guruḥ /
niḥ saṃdehaviparyaye sati punarjñāne viruddhakriyaṃ rājā cet puruṣaṃ na śāsti tadayaṃ prāptaḥ prajāviplavaḥ // MSS_0463

añcati rajanirudañcati timiramidaṃ cañcati mahobhūḥ /
uktaṃ na tyaja yuktaṃ viracaya raktaṃ manastasmin// MSS_0464

añcalāntaritagurjarāṅganā- kuṅkmāruṇakucaprabhādharam /
kokarāgapaṭalairnu rañjitaṃ bhānumantamudayantamāśraye // MSS_0465

añjanamustośīraiḥ sanāgakośātakāmalakacūrṇaiḥ /
katakaphalasamāyuktaiḥ kūpe yogaḥ pradātavyaḥ // MSS_0466

añjanamiṣataḥ strīṇāṃ dṛśorviṣaṃ śaśvadāvasati /
kathamanyathā tadīṣat pāte'pi hatā yuvānaḥ syuḥ // MSS_0467

añjanasya kṣayaṃ dṛṣṭvā valmīkasya ca saṃcayam /
avandhyaṃ divasaṃ kuryād dānādhyayanakarmabhiḥ // MSS_0468

añjaliṃ śapathaṃ sāntvaṃ praṇamya śirasā vadet /
aśruprapātanaṃ caiva kartavyaṃ bhūtimicchatā // MSS_0469

añjaliṃ śapathaṃ sāntvaṃ śirasā pādavandanam /
āśākaraṇamityekaṃ kartavyaṃ bhūtimicchatā // MSS_0470

añjalirakāri lokair mlānimanāptaiva rañjitā jagatī /
saṃdhyāyā iva vasatiḥ svalpāpi sakhe sukhāyaiva // MSS_0471

añjalisthāni puṣpāṇi vāsayanti karadvayam /
aho sumanasāṃ vṛttir vāmadakṣiṇayoḥ samā // MSS_0472

añjalau jalamadhīralocanā locanapratiśarīraśāritam /
āttamāttamapi kāntamukṣituṃ kātarā śapharaśaṅkinī jahau // MSS_0473

aṭatā dhātrīmakhilām idamāścaryaṃ mayā dṛṣṭam /
dhanado'pi nayananandana pariharasi yadugrasaṃparkam // MSS_0474

aṭatkaṭakaghoṭakaprakaṭacāpaṭaṅkāravac caṭaccaṭaditi sphuṭaṃ sphuṭati medinī karparam /
nijāmadharaṇīpatau valati kautukāḍambarād idaṃ bhuvanamaṇḍalaṃ daradarīdarīdaryaho // MSS_0475

aṭanena mahāraṇye supanthā jāyate śanaiḥ /
vedābhyāsāt tathā jñānaṃ śanaiḥ parvatalaṅghanam // MSS_0476

aṭa vā vikaṭaḥ patatranādaiḥ kaṭuvācaṃ raṭa vāthavā divāndha /
paruṣaṃ paripaśya saṃyataṃ tat paramaṃ naḥ puramāgato na cet tvam // MSS_0477

aṭavī kīdṛśī prāyo durgamā bhavati priye /
priyasya kīdṛśī kāntā tanoti suratotsavam // MSS_0478

aṭavyā drumapuṣpāṇi dūrasthā api bāndhavāḥ /
kāntā cālekhyarūpā ca te kāle na pratiṣṭhitāḥ // MSS_0479

aṭṭaśūlā janapadāḥ śivaśūlāścatuṣpathāḥ /
keśaśūlāḥ striyo rājan bhaviṣyanti yugakṣaye // MSS_0480

aṇimā mahimā caiva laghimā garimā tathā /
prāptiḥ prākāmyamīśitvaṃ vaśitvaṃ cāṣṭa siddhayaḥ // MSS_0481

aṇukaṃ surataṃ nāma daṃpatyoḥ pārśvasaṃsthayoḥ /
jāyante nibiḍāśleṣāḥ samībhūtaśarīrayoḥ // MSS_0482

aṇunāpi praviśyāriṃ chidreṇa balavattaram /
niḥśeṣaṃ majjayedrāṣṭraṃ yānapātramivodakam // MSS_0483

aṇu dhanamapi na tyājyaṃ mama bhavatā jñāpite satyam /
vittaṃ jīvitamagryaṃ jīvitahānirdhanatyāgaḥ // MSS_0484

aṇupūrvaṃ bṛhat paścād bhavatyāryeṣu saṃgatam /
viparītamanāryeṣu yathecchasi tathā kuru // MSS_0485

aṇubhyaśca mahadbhyaśca śāstrebhyaḥ kuśalo naraḥ /
sarvatḥ sāramādadyāt puṣpebhya iva ṣaṭpadaḥ // MSS_0486

aṇumātraṃ yathā śalyaṃ śarīre duḥkhadāyakam /
tathātisū . . saṃyuktaṃ manaḥ saṃsāradāyakam // MSS_0487

aṇurapi nanu naiva kroḍabhūṣāsya kācit paribhajasi yadetattadvibhūtistathaiva /
iha sarasi manojñe saṃtataṃ pātumambhaḥ śramaparibhavamagnāḥ ke na magnāḥ karīndrāḥ // MSS_0488

aṇurapi maṇiḥ prāṇatrāṇakṣamo viṣabhakṣiṇāṃ śiśurapi ruṣā siṃhīsūnuḥ samāhvayate gajān /
tanurapi taruskandhodbhūto dahatyanalo vanaṃ prakṛtimahatāṃ jātyaṃ tejo na mūrtimapekṣate // MSS_0489

aṇurapyasatāṃ saṅgaḥ sadguṇaṃ hanti vistṛtam /
guṇarupāntaraṃ yāti takrayogādyathā payaḥ // MSS_0490

aṇurapyupahanti vigrahaḥ prabhumantaḥ prakṛtiprakopajaḥ /
akhilaṃ hi hinasti bhūdharaṃ taruśākhāntanigharṣajo'nalaḥ // MSS_0491

aṇoraṇīyān mahato mahīyān ātmāsya jantor nihito guhāyām /
tamakratuḥ paśyati vītaśoko dhātuprasādānmahimānamātmanaḥ // MSS_0492

aṇoraṇīyān mahato mahīyān madhyo nitambaśca mama priyāyāḥ /
yajñopavītaṃ paramaṃ pavitraṃ kiṃcāṅgarāgāruṇitaṃ priyāyāḥ // MSS_0493

aṇoraṇīyān mahato mahīyān yoge viyoge divaso'ṅganāyāḥ /
yajñopavītaṃ paramaṃ pavitraṃ spṛṣṭvā sakhe satyamidaṃ bravīmi // MSS_0494

aṇḍaṃ kaṇḍūyamānena yat sukhaṃ tava bhūpate /
khurjanānantaraṃ duḥkhaṃ bhūyāttu tava vairiṇām // MSS_0495

aṇḍajāḥ puṇḍarīkeṣu samudreṣu janārdanāḥ /
nīlakaṇṭhāśca śaileṣu nivasantu na tena te // MSS_0496

aṇḍābhyāṃ lomaśābhyāṃ tu jātāṇḍo na hitaḥ smṛtaḥ /
bharamābhāvaktrapucchaṃ ca kṛṣṇanīlaṃ parityajet /
nindyaḥ kevalakṛṣṇastu sarvaśvetastu pūjitaḥ // MSS_0497

aṇvapi guṇāya mahatāṃ mahadapi doṣāya doṣiṇāṃ sukṛtam /
tṛṇamapi dugdhāya gavāṃ dugdhamapi viṣāya sarpāṇām // MSS_0498

ataḥ kavirnāmasu yāvadarthaḥ syādapramatto vyavasāyabuddhiḥ /
siddhe'nyathā'rthe na yateta bhūyaḥ pariśramaṃ tatra samīkṣamāṇaḥ // MSS_0499

ataḥ paraṃ pravakṣyāmi khaḍgalakṣaṇamuttamam /
pradhānadehasaṃbhūtair daityāsthibhirariṃdam // MSS_0500

ataḥ paraṃ pravakṣyāmi śarāṇāṃ lakṣaṇāṃ śubham /
sthūlaṃ na cātisūkṣmaṃ ca na pakvaṃ na kubhūmijam /
hīnagranthividīrṇaṃ ca varjayedīdṛśaṃ śaram // MSS_0501

ataḥ paramagamyo'yaṃ panthā viśramyatāmiti /
pratyakṣiyugalaṃ tasyāḥ karṇau vaktumivāgatau // MSS_0502

ataḥ praśaste nakṣatre śubhe vāre śuciṣmatā /
auṣadhaṃ vidhivadgrāhyaṃ smṛtvā devīṃ ca suprabhām //
mantraḥ -- oṃ suprabhāyai namaḥ // MSS_0503

ataḥ saṃdehadolāyāṃ ropaṇīyaṃ na mānasam /
granthe'smiṃścāpacaturair cīracintāmaṇau kvacit // MSS_0504

ataḥ samīkṣya kartavyaṃ viśeṣāt saṃgataṃ rahaḥ /
ajñātahṛdayeṣvevaṃ vairībhavati sauhṛdam // MSS_0505

ataḥ susthitacittena prasthātavyaṃ śubhe dine /
smṛtvā kṣemaṃkarīṃ devīṃ paśyatā śakunāñśubhān // MSS_0506

ata āhartumicchāmi pārvatīmātmajanmane /
utpattaye havirbhoṃktur yajamāna ivāraṇim // MSS_0507

ata eva hi necchanti sādhavaḥ satsamāgamam /
yadviyogāsilūnasya manaso nāsti bheṣajam // MSS_0508

ataṭasthasvāduphala- grahaṇavyavasāyaniścayo yeṣām /
te śokakleśarujāṃ kevalamupayānti pātratāṃ mandāḥ // MSS_0509

atattvajño'si bālaśca dustoṣo'pūraṇo'nalaḥ /
naiva tvaṃ vettha sulabhaṃ naiva tvaṃ vettha durlabham // MSS_0510

atathyānyapi tathyāni darśayanti hi peśalāḥ /
same nimnonnatānīva citrakarmavido janāḥ // MSS_0511

atathyāstathyasaṃkāśās tathyāścātathyadarśanāḥ /
dṛśyante vividhā bhāvās tasmādyuktaṃ parīkṣaṇam // MSS_0512

atathyenocyamānasya kaḥ kopo yanna tattathā /
tathyenāpi hi kaḥ kopo yadanukte'pi mattathā // MSS_0513

atanujvarapīḍitāsi bāle tava saukhyāya mato mamopavāsaḥ /
rasamarpaya vaidyanātha nāhaṃ bhavadāveditalaṅghane samarthā // MSS_0514

atanunā navamambudamāmbudaṃ sutanurastramudastamavekṣya sā /
ucitamāyataniḥśvasitacchalāc chvasanaśastramamuñcadamuṃ prati // MSS_0515

atantrī vāgvīṇā stanayugalamagrīvakalasā- vanabjaṃ dṛṅnīlotpaladalamapatrorukadalī /
akāṇḍā dorvallī vadanamalakalaṅkaḥ śaśadharas tadasyāstāruṇyaṃ bhuvanaviparītaṃ ghaṭayati // MSS_0516

atandracandrābharaṇā samuddīpitamanmathā /
tārakātaralā śyāmā sānandaṃ na karoti kam // MSS_0517

atandritacamūpatiprahitahastamasvīkṛta- praṇītamaṇipādukaṃ kimiti vismitāntaḥpuram /
avāhanapariṣkriyaṃ patagarājamārohataḥ karipravarabṛṃhite bhagavatastvarāyai namaḥ // MSS_0518

atasīkusumopameyakāntir yamunālakukadambamūlavartī /
navagopavadhūvinodaśālī vanamālī vitanotu maṅgalāni // MSS_0519

atasīpuṣpasaṃkāśaṃ khaṃ vīkṣya jaladāgame /
ye viyoge'pi jīvanti na teṣāṃ vidyate bhayam // MSS_0520

ataskarakaragrāhyam arājājñāvaśaṃvadam /
adāyādavibhāgārhaṃ dhanamārjayatasthiram // MSS_0521

atastu viparītasya nṛpaterajitātmanaḥ /
saṃkṣipyate yaśo loke ghṛtabindurivāmbhasi // MSS_0522

atastvaṣṭāṅgayā buddhyā nṛpatirnītiśāstravit /
samarthaḥ pṛthivīṃ kṛtsnām api jetuṃ vicakṣaṇaḥ // MSS_0523

atāḍayat pallavapāṇinaikāṃ puṣpoccaye rājavadhūmaśokaḥ /
tacchedahetoralipaṅki bhaṅgyā vyākṛṣyate vāsilatā smareṇa // MSS_0524

atikaluṣamāśunaśvaram āpātasphuraṇamanabhilāṣakaram /
api hṛṣyanti janāḥ katham avalambya jñānakhadyotam // MSS_0525

atikupitamanaske kopaniṣpattihetuṃ vidadhati sati śatrau vikriyāṃ citrarūpām /
vadati vacanamuccairduḥśravaṃ karkaśādi kaluṣavikalatā yā tāṃ kṣamāṃ varṇayanti // MSS_0526

atikupitā api sujanā yogena mṛdūbhavanti na tu nīcāḥ /
hemnaḥ kaṭhinasyāpi dravaṇopāyo'sti na tṛṇānām // MSS_0527

atikṛṣṇeṣvatigaureṣv atipīneṣvatikṛśeṣu manujeṣu /
atidīrgheṣvatilaghuṣu prāyeṇa na vidyate'patyam // MSS_0528

atikramyāpāṅgaṃ śravaṇapathaparyantagamana- prayāsenevākṣṇostaralataratāraṃ gamitayoḥ /
idānīṃ rādhāyāḥ priyatamasamāyātasamaye papātasve dāmbuprasara iva harṣāśrunikaraḥ // MSS_0529

atikrāntaṃ tu yaḥ kāryaṃ paścāccintayate naraḥ /
taccāsya na bhavet kāryaṃ cintayā tu vinaśyati // MSS_0530

atikrāntaḥ kālaḥ sucaritaśatāmodasubhago gatāḥ śuklā dharmā navanalinasūtrāṃśutanutām /
parimlānaḥ prāyo budhajanakathāsāranipuṇo nirānandaṃ jātaṃ jagadidamatītotsavamiva // MSS_0531

atikrāntaḥ kālo laṭabhalalanābhogasubhago bhramantaḥ śrāntāḥ smaḥ suciramiha saṃ sārasaraṇau /
idānīṃ svaḥ sindhostaṭabhuvi samākrandanagiraḥ sutāraiḥ phūtkāraiḥ śiva śiva śiveti pratanumaḥ // MSS_0532

atikrāntamatikrāntam anāgatamanāgatam /
vartamānasukhabhrāntir navā bhogidaridrayoḥ // MSS_0533

atikleśena yad dravyam atilobhena yatsukham /
parapīḍā ca yā vṛttir naiva sādhuṣu vidyate // MSS_0534

atikleśena ye'rthāḥ syur dharmasyātikrameṇa ca /
arervā praṇipātena mā sma teṣu manaḥ kṛthāḥ // MSS_0535

atikleśe manaḥsthairyaṃ krameṇa sahanaṃ tathā /
jayalābhāya hetū dvau sainyānāmadhikau viduḥ // MSS_0536

atigambhīramanāvilam akṣobhyamadṛṣṭapāramavilaṅghyam /
aviralataraṅgasaṃkulam ekṣiṣi vijñānasāgaraṃ mahatām // MSS_0537

atigambhīre bhūpe kūpa iva janasya duḥkhatārasya /
dadhati samīhitasiddhiṃ guṇavantaḥ pārthivā ghaṭakāḥ // MSS_0538

aticapalakalatraṃ prātiveśmāticaura- stanayagatimāṃdhaṃ (?) bālaraṇḍā tanūjā /
atiśaṭhamatha maitrī (?) vaśyatā sarvajanto ripubhayatanurogau cāṣṭaduḥkhaṃ narāṇām // MSS_0539

aticārucandrarociḥ kurvan kusumeṣukeliketanatām /
surabhiḥ kadānuyāsyati samukularucirastanīhāraḥ // MSS_0540

aticirādanuṣaṅgavataḥ kaṇā- navanijān yadi hema jihāsasi /
paṭupuṭajvalanajvaravedanā tava bhavatyapayāti ca gauravam // MSS_0541

atijīrṇamapakvaṃ ca jñātidhṛṣṭaṃ tathaiva ca /
dagdhaṃ chidraṃ na kartavyaṃ bāhyābhyantarahastakam // MSS_0542

atijīvati vittena sukhaṃ jīvati vidyayā /
kiṃcijjīvati śilpena ṛte karma na jīvati // MSS_0543

atitāmaso'jagandhiḥ kākaravo hrasvakūrcakaḥ pāpaḥ /
bhīruḥ kudhīḥ piśāco rāsabhaliṅgastu vijñeyaḥ // MSS_0544

atitṛṣṇā na kartavyā tṛṣṇāṃ naiva parityajet /
atitṛṣṇābhibhūtasya śikhā bhavati mastake / MSS_0545

atitejasvyapi rājā pānāsakto na sādhayatyarthān /
tṛṇamapi dagdhuṃ śakto na vāḍavāgniḥ pibannaniśam // MSS_0546

atithiṃ nāma kākutsthāt putraṃ prāpa kumudvatī /
paścimādyāminīyāmāt prasādamiva cetanā // MSS_0547

. . . . . .
atithiḥ kila pūjārhaḥ prākṛto'pi vijānatā // MSS_0548

atithiḥ dvāri tiṣṭheta āpo gṛhṇāti yo naraḥ /
āpośanaṃ surāpānam annaṃ gomāṃsabhakṣaṇam // MSS_0549

atithiḥ pūjito yasya gṛhasthasya tu gacchati /
nānyastasmāt paro dharma iti prāhurmanīṣiṇaḥ // MSS_0550

atithiḥ pūjito yasya dhyāyate manasā śabham /
na tat kratuśatenāpi tulyamāhurmanīṣiṇaḥ // MSS_0551

atithitvena varṇānāṃ deyaṃ śakyānupūrvaśaḥ /
apraṇodyo'tithiḥ sāyam api vāgbhūtṛṇodakaiḥ // MSS_0552

atithirbālakaḥ patnī jananī janakastathā /
pañcaite gṛhiṇaḥ poṣyā itare ca svaśaktitaḥ // MSS_0553

atithirbālakaścaiva rājā bhāryā tathaiva ca /
asti nāsti na jānanti dehi dehi punaḥ punaḥ // MSS_0554

atithirbālakaścaīva strījano nṛpatistathā /
ete vittaṃ na jānanti jāmātā caiva pañcamaḥ // MSS_0555

atithiryasya bhagnāśo gṛhātpratinivartate /
sa dattvā duṣkṛtaṃ tasmai puṇyamādāya gacchati // MSS_0556

atithiścāpavādī ca dvāvetau mama bāndhavau /
apavādī haret pāpam atithiḥ svargasaṃkramaḥ // MSS_0557

atithīnāṃ ca sarveṣāṃ preṣyāṇāṃ svajanasya ca /
sāmānyaṃ bhojanaṃ sadbhir gṛhasthasya praśasyate // MSS_0558

atithīnāṃ na satkāro na ca sajjanasaṃgamaḥ /
na yatra svātmavarṇāsthā sā gṛhāśramavañcanā // MSS_0559

atidarpe hatā laṅkā atimāne ca kauravāḥ /
atidāne balirbaddhaḥ sarvamatyantagarhitam // MSS_0560

atidākṣiṇyayuktānāṃ śaṅkitānāṃ pade pade /
parāpavādibhīrūṇāṃ na bhavanti vibhūtayaḥ // MSS_0561

atidānāddhataḥ karṇastv atilobhāt suyodhanaḥ /
atikāmāddaśagrīvastv ati sarvatra varjayet // MSS_0562

atidānādbalirbaddho naṣṭo mānāt suyodhanaḥ /
vinaṣṭo rāvaṇo lau lyād ati sarvatra varjayet // MSS_0563

atidānādbalirbaddho hyatimānāt suyodhanaḥ /
atikāmāddaśagrīvo hyati sarvatra garhitaḥ // MSS_0564

atidāne balirbaddho atimāne ca kauravāḥ /
atirūpe hṛtā sītā sarvamatyantagarhitam // MSS_0565

atidīrghajīvidoṣād vyāsena yaśo'pahāritaṃ hanta /
kairnocyeta guṇāḍhyaḥ sa eva janmāntarāpannaḥ // MSS_0566

atidūrapathaśrāntāś chāyāṃ yānti ca śītalām /
śitalāśca punaryānti kā kasya paridevanā // MSS_0567

ati dharmād balaṃ manye balād dharmaḥ pravartate /
bale pratiṣṭhito dharmo dharṇyāmiva jaṅgamam // MSS_0568

atinīcāni vākyāni dṛṣṭimātrātinindakaḥ /
kṣudrasaṃvādabhāṣī yo hyevaṃ duṣṭaḥ śaṭho janaḥ // MSS_0569

atipakvakapitthena liptapātre suyāmitam /
dugdhamastuvihīnaṃ syāc candrabimbopamaṃ dadhi // MSS_0570

atipaṭalairanuyātāṃ sahṛdayahṛdayajvaraṃ vilumpantīm /
mṛgamadaparimalalaharīṃ samīra pāmarapure kirasi // MSS_0571

atiparamādbhutaveṣā kāpyeṣā jayati sṛṣṭirātmabhuvaḥ /
tat kiṃ na vāñchitaṃ syād asyā yadi vidhuravīkṣaṇaḥ pātā // MSS_0572

atiparigṛhītamaunā varjitamālyānulepanasnānā /
dūrotsāritalajjā nirgranthagrantharacaneva // MSS_0573

atiparicayādavajñā bhavati viśiṣṭe'pi vastuni prāyaḥ /
lokaḥ prayāgavāsī kūpe snānaṃ samācarati // MSS_0574

atiparicayādavajñā saṃtatagamanādanādaro bhavati /
malaye bhillapurandhrī candanatarumindhanaṃ kurute // MSS_0575

atiparicayādavajñety etad vākyaṃ mṛṣaiva tadbhāti /
atiparicite'pyanādau saṃsāre'smin na jāyate'vajñā // MSS_0576

atipātitakālasādhanā svaśarīrendriyavargatāpanī /
janavanna bhavantamakṣamā nayasiddherapanetumarhati // MSS_0577

atipītāṃ tamorājīṃ tanīyān soḍhumakṣamaḥ /
vamatīva śanaireṣa pradīpaḥ kajjalacchalāt // MSS_0578

atipūjitatāreyaṃ dṛṣṭiḥ śrutilaṅghanakṣamā sutanu /
jinasiddhāntasthitiriva savāsanā kaṃ na mohayati // MSS_0579

atipelavamatiparimita- varṇaṃ laghutaramudāharati śaṭhaḥ /
paramārthataḥ sa hṛdayaṃ vahati punaḥ kālakūṭaghaṭitamiva // MSS_0580

atipracaṇḍāṃ bahupākapākinīṃ vivādaśīlāṃ svayameva taskarīm /
akrośabījāṃ paraveśmagāminīṃ tyajeta bhāryāṃ daśaputrasūrapi // MSS_0581

atipracaṇḍā bahuduḥkhabhāginī vivādaśīlā paragehagāminī /
bhartuḥ svayaṃ nindati yā ca taskarī tyajet svabhāryāṃ daśaputraputriṇīm // MSS_0582

atiprauḍhā rātrirbahalaśikhadīpaḥ prabhavati priyaḥ premārabdhasmaravidhirasajñaḥ paramasau /
sakhi svairaṃ svairaṃ suratamakarodvrīḍitavapur yataḥ paryaṅko'yaṃ ripuriva kaḍatkāramukharaḥ // MSS_0583

atibalināmapi malinā- śayena balikarṇaputrāṇām /
viśvāsopanatānāṃ vāsoputreṇa jīvitaṃ jahre // MSS_0584

atibahutaralajjāśṛṅkhalābaddhapādo madananṛpativāho yauvanonmattahastī /
prakaṭitakucakumbho lomarājīkareṇa pibati sarasi nābhīmaṇḍalākhye payāṃsi // MSS_0585

atibhīrumatiklībaṃ dīrghasūtraṃ pramādinam /
vyasanād viṣayākrāntaṃ na bhajanti nṛpaṃ prajāḥ // MSS_0586

atimandacandanamahīdharavātaṃ stabakābhirāmalatikātarujātam /
api tāpasānupavanaṃ madanārtān madamañjuguñjadalipuñjamakārṣīt // MSS_0587

atimaline kartavye bhavati khalānāmatīva nipuṇā dhīḥ /
timire hi kauśikānāṃ rūpaṃ pratipadyate dṛṣṭiḥ // MSS_0588

atimātrabhāsuratvaṃ puṣyati bhānuḥ parigrahādahnaḥ /
adhigacchati mahimānaṃ candro'pi niśāparigṛhītaḥ // MSS_0589

atimānaḥ śriyaṃ hanti puruṣasyālpamedhasaḥ /
garbheṇa duṣyate kanyā gṛhavāsena ca dvijaḥ // MSS_0590

atimāninamagrāhyam ātmasaṃbhāvitaṃ naram /
krodhanaṃ vyasane hanti svajano'pi narādhipam // MSS_0591

atimṛdu navanītāccandrakāccātiramyaṃ bahulalitasudhāyāḥ svādataḥ sadrasāḍhyam /
sakalalalitabhogāgārabhāgyaikayogyaṃ parilasati haviṣyaṃ kasya gallacchalena // MSS_0592

atiyatnagṛhīto'pi khalaḥ khalakhalāyate /
śirasā dhāryamāṇo'pi toyasyārdhaghaṭo yathā // MSS_0593

atiramaṇīye kāvye piśuno'nveṣayati dūśaṇānyeva /
atiramaṇīye vapuṣi vraṇameva hi makṣikānikaraḥ // MSS_0594

atirāgād daśagrīvo hyatilobhāt suyodhanaḥ /
atidānād dhataḥ karṇo hyatiḥ sarvatra garhitaḥ // MSS_0595

atiricyate sujanmā kaścijjanakānnijena caritena /
kumbhaḥ parimitamambhaḥ pibati papau kumbhasaṃbhavo'mbhodhim // MSS_0596

atiruciraṅgajakṛttyā kṣobhitadakṣaṃ bhavantameva bhaje /
yasmin prasādasumukhe sadyo vāmāpi bhavati mama tuṣṭyai // MSS_0597

atirupavatī sītā atigarvī ca rāvaṇaḥ /
atīva balavān rāmo laṅkāyena kṣayaṃ gatā // MSS_0598

atirūpād dhṛtā sītā atigarveṇa rāvaṇaḥ /
atidānād balirbaddho hyati sarvatra garhitam // MSS_0599

atirūpeṇa vai sītā atigarveṇa rāvanaḥ /
atidānaṃ balirdattvā ati sarvatra varjayet // MSS_0600

atilobho na kartavyaḥ kartavyastu pramāṇataḥ /
atilobhajadoṣeṇa jambuko nidhanaṃ gataḥ // MSS_0601

atilobho na kartavyo lobhaṃ naiva parityajet /
atilobhābhibhūtasya cakraṃ bhramati mastake // MSS_0602

atilohitakaracaraṇaṃ mañjulagorocanātilakam /
haṭhaparivartitaśakaṭaṃ muraripumuttānaśāyinaṃ vande // MSS_0603

atilaulyaprasaktānāṃ vipattinairva dūrataḥ /
jīvaṃ naśyati lobhena mīnasyāmiṣadarśane // MSS_0604

ativādāṃstitikṣeta nābhimanyetkathaṃcana /
krodhyamānaḥ priyaṃ brūyād ākruṣṭaḥ kuśalaṃ vadet // MSS_0605

ativādāṃstitikṣeta nāvamanyeta kaṃcana /
na cemaṃ dehamāśritya vairaṃ kurvīta kenacit // MSS_0606

ativādo'timānaśca tathātyāgo narādhipa /
krodhaścātivivitsā ca mitradrohaśca tānī ṣaṭ // MSS_0607

eta evāsayastīkṣṇāḥ kṛntantyāyūṃṣi dehinām /
etāni mānavān ghnanti na mṛtyurbhadramastu te // MSS_0608

ativāhitamatigahanaṃ vināpavādena yauvanaṃ yena /
doṣanidhāne janmani kiṃ na prāptaṃ phalaṃ tena // MSS_0609

ativitatagaganasaraṇi- prasaraṇaparimuktaviśramānandaḥ /
marudullāsitasaurabha- kamalākarahāsakṛdravirjayati // MSS_0610

ativipulaṃ kucayugalaṃ rahasi karairāmṛśan muhurlakṣmyāḥ /
tadapahṛtaṃ nijahṛdayaṃ jayati hararmṛgayamāṇa iva // MSS_0611

ativiśadānantapada- pravṛttadṛṣṭirna madhuravīkṣaṇataḥ /
tṛpyatyañcitakāmaḥ prātastanakamalamukulavīkṣaṇataḥ // MSS_0612

ativṛṣṭiranāvṛṣṭiḥ śalabhāḥ mūṣaKāḥ śukāḥ /
asatkaraśca daṇḍaśca paracakrāṇi taskarāḥ // MSS_0613

rājānīkapriyotsargo marakavyādhipīḍanam /
paśūnāṃ maraṇaṃ rogo rāṣṭravyasanamucyate // MSS_0614

ativyayo'napekṣā ca tathārjanamadharmataḥ /
moṣaṇaṃ dūrasaṃsthānāṃ koṣavyasanamucyate // MSS_0615

atiśayitakadambo'yaṃ modakadambānilo vahati /
viyadambudameduritaṃ me duritaṃ paśya nāgato dayitaḥ // MSS_0616

atiśaravyayatā madanena tāṃ nikhilapuṣpamayasvaśaravyayāt /
sphuṭamakāri phalānyapi muñcatā tadurasi stanatālayugārpaṇam // MSS_0617

atiśaucamaśaucaṃ vā atinindā atistutiḥ /
atyācāramanācāraṃ ṣaḍvidhaṃ mūrkhalakṣaṇam // MSS_0618

atiślathālambipayodhareyaṃ śubhrībhavatkāśavikāsikeśā /
atītalāvaṇyajalapravāhā prāvṛṭ jarāṃ prāpa śaracchalena // MSS_0619

atisaṃcayalubdhānāṃ vittamanyasya kāraṇam /
anyaiḥ saṃcīyate yatnād anyaiśca madhu pīyate // MSS_0620

atisaṃpadamāpannair bhetavyaṃ patanādbhūyaḥ /
atyuccaśikharā meroḥ śakravajreṇa pātitāḥ // MSS_0621

atisajjanadurgatiḥ khalapaṅktisamunnatiḥ /
yuvatistanavicyutiriti kiṃ vidhinirmitiḥ // MSS_0622

atisatkṛtā api śaṭhāḥ sahabhuvamujjhanti jātu na prakṛtim /
śirasā maheśvareṇā- 'pi nanu dhṛto vakra eva śaśī // MSS_0623

atisāhasamatiduṣkaram atyāścaryaṃ ca dānamarthānām /
yo'pi dadāti śarīraṃ na dadāti sa vittaleśamapi // MSS_0624

atisāhasikaṃ śūrā mantriṇastaṃ nirūpakam /
vinītaṃ guravo jajñur dhūrtamantaḥpurāṅganāḥ // MSS_0625

atiharitapatraparikara- saṃpannaspandanaikaviṭapasya /
ghanavāsanairmayūkhaiḥ kusumbhakusumāyate taraṇiḥ // MSS_0626

atītalābhasya surakṣaṇārthaṃ bhaviṣyalābhasya ca saṃgamārtham /
āpatprapannasya ca mokṣaṇārthaṃ yanmantryate'sau paramo hi mantraḥ // MSS_0627

atītānāgatānarthān viprakṛṣṭatirohitān /
vijānāti yadā yogī tadā saṃviditi smṛtā // MSS_0628

atītānāgatā bhāvā ye ca vartanti sāṃpratam /
tān kālanirmitān buddhvā na saṃjñāṃ hātumarhasi // MSS_0629

atītā śītārtiḥ prasarati śanairuṣmakaṇikā dināni sphāyante ravirapi rathaṃ mantharayati /
himānīnirmuktaḥ sphurati nitarāṃ śītakiraṇaḥ śarāṇāṃ vyāpāraḥ kusumadhanuṣo na vyavahitaḥ // MSS_0630

atītya bandhūnavalaṅghya mitrāṇy ācāryamāgacchati śiṣyadoṣaḥ /
bālaṃ hyapatyaṃ gurave pradātur naivāparādho'sti piturna mātuḥ // MSS_0631

atīndriyāyāṃ paralokavṛttāv ihaiva tīvrāśubhapākaśaṃsī /
dṛṣyeta nāśo yadi nāma nāśu na kaḥ kukṛtyena yateta bhūtyai // MSS_0632

atīva karkaśāḥ stabdhā hiṃsrajantubhirāvṛtāḥ /
durāsadāśca viṣamā īśvarāḥ parvatā iva // MSS_0633

atīva khalu te kāntā vasudhā vasudhādhipa /
gatāsurapi yāṃ gātrair māṃ vihāya niṣevase // MSS_0634

atīva balahīnaṃ hi laṅghanaṃ naiva kārayet /
ye guṇā laṅghane proktās te guṇā laghubhojane // MSS_0635

atīva saukhyaśubhadā yāmyā niśi bhavecchivā /
pūrvasyāṃ tatpurādhyakṣam anyaṃ kuryādaharmukhe // MSS_0636

atulitabaladhāmaṃ svarṇaśailābhadehaṃ danujavanakṛśānuṃ jñānināmagragaṇyam /
sakalaguṇanidhānaṃ vānarāṇāmadhīśaṃ raghupativaradūtaṃ vātajātaṃ namāmi // MSS_0637

atuṣṭaṃ sveṣu dāreṣu capalaṃ capalendriyam /
nayanti nikṛtiprajñaṃ paradārāḥ parābhavam // MSS_0638

atuṣṭidānaṃ kṛtapūrvanāśanam amānanaṃ duścaritānukīrtanam /
kathāprasaṅgena ca nāmavismṛtir viraktabhāvasya janasya lakṣaṇam // MSS_0639

atuhinarucināsau kevalaṃ nodayādriḥ kṣaṇamuparigatena kṣmābhṛtaḥ sarva eva /
navakaranikareṇa spaṣṭabandhūkasūna- stabakaracitamete śekharaṃ bibhratīva // MSS_0640

atṛṇe patito vahniḥ svayamevopaśāmyati /
akṣamāvān paraṃ doṣair ātmānaṃ caiva yojayet // MSS_0641

atṛṇe satṛṇā yasmin satṛṇe tṛṇavarjitā mahī yatra /
tasmiñśirā pradiṣṭā vaktavyaṃ vā dhanaṃ tatra // MSS_0642

atogarīyaḥ kiṃ nusyād aśarma narakeṣvapi /
yat priyasya priyaṃ kartum adhamena na śakyate // MSS_0643

ato nijabalonmānaṃ cāpaṃ syācchubhakārakam /
devānāmuttamaṃ cāpaṃ tato nyūnaṃ ca mānavam // MSS_0644

ato'rthaṃ paṭhyate śāstraṃ kīrtirlokeṣu jāyate /
kīrtimān pūjyate loke paratreha ca mānavaḥ // MSS_0645

ato hāsyataraṃ loke kiṃcidanyanna vidyate /
yatra durjana ityāha durjanaḥ sajjanaṃ svayam // MSS_0646

attuṃ vāñchati śāṃbhavo gaṇapaterākhuṃ kṣudhārttaḥ phaṇī taṃ ca krauñcaripoḥ śikhī girisutāsiṃho'pi nāgānanam /
itthaṃ yatra parigrahasya ghaṭanā śaṃbhorapi syādgṛhe tatrānyasya kathaṃ na bhāvi jagatastasmāt svarūpaṃ hi tat // MSS_0647

atyacchaṃ sitamaṃśukaṃ śuci madhu svāmodamacchaṃ rajaḥ kārpuraṃ vidhṛtārdracandanakucadvandvāḥ kuraṅgīdṛśaḥ /
dhārāveśma sapāṭalaṃ vicakilasragdāma candratviṣo dhātaḥ sṛṣṭiriyaṃ vṛthaiva tava na grīṣmo'bhaviṣyadyadi // MSS_0648

atyadbhutamimaṃ manye svabhāvamamanasvinaḥ /
yadupakriyamāṇo'pi prīyate na vilīyate // MSS_0649

atyantaṃ kurutāṃ rasāyanavidhiṃ vākyaṃ priyaṃ jalpatu vārdheḥ pāramiyartu gacchatu nabho devādrimārohatu /
pātālaṃ viśatu prasarpatu diśaṃ deśāntaraṃ bhrāmyatu na prāṇī tadapi prahartumanasā saṃtyajyate mṛtyunā // MSS_0650

atyantakaṇḍūtiparo narāṇām virodhakārī śunakaḥ sadaiva /
syādūrdhvapādaḥ śunakaḥ śayānaḥ siddhipradaḥ kāryavidhau viduṣṭe // MSS_0651

atyantakṛṣṇaḥ sa vinirmalastvaṃ sa vāmanaḥ sarvata unnato'si /
janārdano yat sa dayāparastvaṃ viṣṇuḥ kathaṃ vīra tavopamānam // MSS_0652

atyantakopaḥ kaṭukā ca vāṇī daridratā ca svajaneṣu vairam /
nīcaprasaṅgaḥ kulahīnasevā cihnāni dehe narakasthitānām // MSS_0653

atyantacañcalasyeha pāradasya nibandhane /
kāmaṃ vijñāyate yuktir na strīcittasya kācana // MSS_0654

atyantanirgate caiva subaddhe naiva cāvile /
praśaste vājināṃ netre madhvābhe kālatārake // MSS_0655

atyantapariṇāhitvād atīva ślakṣṇatāvaśāt /
na kāṃcidupamāṃ roḍhum ūrū śaknoti subhruvaḥ // MSS_0656

atyantabhīmavanajīvagaṇena pūrṇaṃ durgaṃ vanaṃ bhavabhṛtāṃ manasāpyagamyam /
caurākulaṃ viśati lobhavaśena martyo no dharmakarma vidadhāti kadācidajñaḥ // MSS_0657

atyantamatimedhāvī trayāṇāmekamaśnute /
alpāyuṣo daridro vā hyanapatyo na saṃśayaḥ // MSS_0658

atyantamanthanakadarthanamutsahante maryādayā niyamitāḥ kimu sādhavo'pi /
lakṣmīsudhākarasudhādyupanīya śeṣe ratnākaro'pi garalaṃ kimu nojjagāra // MSS_0659

atyantamasadāryāṇām anālocitaceṣṭitam /
atasteṣāṃ vivardhante satataṃ sarvasaṃpadaḥ // MSS_0660

atyantavimukhe daive vyarthayatne ca pauruṣe /
manasvino daridrasya vanādanyat kutaḥ sukham // MSS_0661

atyantavyavadhānalabdhajanuṣo jātyāpi bhinnakramāḥ sāṃnidhyaṃ vidhinā kutūhalavatā kutrāpi saṃprāpitāḥ /
gacchantyāmaraṇaṃ guṇavyatikṛtā bhedaṃ na bhūmīruhas te kāṣṭhādapi niṣṭhurā guṇagaṇairye naikatāṃ prāpitāḥ // MSS_0662

atyantaśītalatayā subhagasvabhāva satyaṃ na kaścidapi te tarurasti tulyaḥ /
chāyārthināmapi punarvikaṭadvijihva- saṅgena candana viṣadrumanirviśeṣaḥ // MSS_0663

atyantaśuddhacinmātre pariṇāmaścirāya yaḥ /
turyātītaṃ padaṃ tat syāt tatstho bhūyo na śocati // MSS_0664

atyantasukhasaṃcārā madhyāhne sparśataḥ sukhāḥ /
divasāḥ subhagādityāś chāyāsaliladurbhagāḥ // MSS_0665

atyantastimitāṅgānāṃ vyāyāmena sukhaiṣiṇām /
bhrāntijñānāvṛtākṣāṇāṃ prahāro'pi sukhāyate // MSS_0666

atyantonnatapūrvaparvatamahāpīṭhe haraspardhayā dūrodañcitadhūmasaṃnibhatamastārāsphuliṇgākulam /
nūnaṃ pañcaśaro'karocchaśimiṣāt svaṃ jvālaliṅgaṃ yato garvāccharvaparān dahenmunivarān sarvānakharvā śubhiḥ // MSS_0667

atyapūrvasya rāgasya pūrvapakṣāya pallavāḥ /
padmāni pādayugmasya pratyudāharaṇāni ca // MSS_0668

atyambupānaṃ kaṭhināsanaṃ ca dhātukṣayo vegavidhāraṇaṃ ca /
divāśayo jāgaraṇaṃ ca rātrau ṣaḍbhirnarāṇāṃ nivasanti rogāḥ // MSS_0669

atyambupānāt prabhavanti rogāḥ alpāmbupāne ca tathaiva doṣāḥ /
tasmānnaro vahnivivardhanāya muhurmuhurvāri pibedabhuri // MSS_0670

atyambupānād viṣamāśanācca divāśayājjāgaraṇacca rātrau /
samrodhanān mūtrapurīṣayośca ṣaḍbhiḥ prakāraiḥ prabhavanti rogāḥ // MSS_0671

atyambupānānna vipacyate'nnam anambupānācca sa eva doṣaḥ /
tasmānnaro vahnivivardhanārthaṃ mahurmuhurvāri pibedabhūri // MSS_0672

atyarthavakratvamanarthakaṃ yā śūnyāpi sarvānyaguṇairvyanakti /
aspṛśyatādūṣitayā tayā kiṃ tucchaśvapucchacchaṭayeva vācā // MSS_0673

atyalpaṃ jīvitaṃ pāpāny āpātamadhurāṇyalam /
tadācara cirastheyaparalokāvalokanam // MSS_0674

atyalpasaṃpadaḥ santaḥ pumāniṣṭaśca duṣkule /
lakṣmīranabhijātasya vedhasaḥ skhalitatrayam // MSS_0675

atyāgraho na kartavyo haṭhātkaścinna bhāṣate /
yathāyathondati tathā bhāro bhavati kambalaḥ // MSS_0676

atyājilabdhavijayaprasarastvayā kiṃ vijñāyate rucipadaṃ na mahīmahendraḥ /
pratyarthidānavaśatāhitaceṣṭayāsau jīmūtavāhanadhiyaṃ na karoti kasya // MSS_0677

atyādarādadhyayanaṃ dvijānām arthopalabdhyā phalavadvidhāya /
kratūnatucchānavituṃ tavaiṣā mīmāṃsakādyādhikṛtiḥ prasiddhā // MSS_0678

atyādareṇa nihitaṃ mayi yadbhavatyā tatpremahema kimabhūditi naiva jāne /
utsṛjya kiṃ tadiha pātakamuttarāṇi prāṇā api priyatame katame bhaveyuḥ // MSS_0679

atyādaro dārasahodareṣu na mātṛpitrorna ca sodareṣu /
mūrkhe niyogastanaye viyogaḥ paśyanti lokāḥ kalikautukāni // MSS_0680

atyādaro bhaved yatra kāryakāraṇavarjitaḥ /
tatra śaṅkā prakartavyā pariṇāme'sukhāvahā // MSS_0681

atyāyatairniyamakāribhiruddhatānāṃ divyaiḥ prabhābhiranapāyamayairupāyaiḥ /
śaurirbhujairiva caturbhiradaḥ sadā yo lakṣmīvilāsabhavanairbhuvanaṃ babhāra // MSS_0682

atyāyāsena nātmānaṃ kuryādatisamucchrayam /
pāto yathā hi duḥkhāya nocchrāyaḥ sukhakṛt tathā // MSS_0683

atyāryamatidātāram atiśūramativratam /
prajñābhimāninaṃ caiva śrīrbhayānnopasarpati // MSS_0684

na cātiguṇavatsveṣā nātyantaṃ nirguṇeṣu ca /
naiṣā guṇānkāmayate nairguṇyāṃ nānurajyate /
unmattā gaurivāndhā śrīḥ kvacidevāvatiṣṭhate // MSS_0685

atyāśīviṣaśastraṃ hi vijitapralayānalam /
tejo laṅghayituṃ śaktaḥ ko nu nāma dvijanmanām // MSS_0686

atyāsannā vināśāya dūrasthā na phalapradā /
tasmādāhṛtya dātavyā bhūmiḥ pārthivasattama // MSS_0687

atyāsannā vināśāya dūrasthā na phalapradāḥ /
sevyā madhyamabhāvena rājāvahnirguruḥ striyaḥ // MSS_0688

atyuktau yadi na prakupyasi mṛṣāvādaṃ na cenmanyase tadbrūmo'dbhutakīrtanāya rasanā keṣāṃ na kaṇḍūyate /
deva tvattaruṇapratāpadahanajvālāvalīśoṣitāḥ sarve vāridhayastato ripuvadhūnetrāmbubhiḥ pūritāḥ // MSS_0689

atyuccastanaśailadurgamamuro nābhirgabhīrāntarā bhīmaṃ dehavanaṃ sphuradbhujalataṃ romālijālākulam /
vyādhaḥ pañcaśaraḥ kiratyatitarāṃ tīkṣṇān kaṭākṣāśugāṃs- tanme brūhi manaḥkuraṅga śaraṇaṃ kiṃ sāṃprataṃ yāsyasi // MSS_0690

atyuccāḥ paritaḥsphuranti girayaḥ sphārāstathāmbhodhayas tānetānapi bibhratī kimapi na klāntāsi tubhyaṃ namaḥ /
āścaryeṇa muhurmuhuḥ stutimimāṃ prastaumi yāvadbhuvas tāvadbibhrādimāṃ smṛtastava bhujo vācastato mudritāḥ // MSS_0691

atyuccairatinīcair aślīlamayuktamanupayuktaṃ ca /
na vadati nṛpatisabhāyā- mādaramīpsurmahāmanasām // MSS_0692

atyucchrite mantriṇi pārthive ca viṣṭabhya pādāvupatiṣṭhate śrīḥ /
sā strīsvabhāvādasahā bharasya tayordvayorekataraṃ jahāti // MSS_0693

atyucchritonnatasitadhvajapaṅkticitrair nāgāśvapattirathasaṃkṣubhitairbalaughaiḥ /
uddhūtacāmaravirājitagātraśobhāḥ puṇyena bhūmipatayo bhuvi saṃcaranti // MSS_0694

atyujjvalairavayavairmṛdutāṃ dadhānā muktā balaṃ vitarati smaradānadakṣā /
snigdhāśāyā guruguṇagrathitā manojñā phīṇī navīnalalaneva mudaṃ dadāti // MSS_0695

atyutsārya bahirviṭaṅkavaḍabhīgaṇḍasthalaśyāmikāṃ bhinnābhinnagavākṣajālaviralacchidraiḥ pradīpāṃśavaḥ /
ārūḍhasya bhareṇa yauvanamiva dhvāntasya naktaṃ mukhe niryātāḥ kapilāḥ karālaviralaśmaśrūprarohā iva // MSS_0696

atyutsekena mahasā sāhasādhyavasāyinām /
śrīrārohati saṃdehaṃ mahatāmapi bhūbhṛtām // MSS_0697

atyudāttagaṇeṣveṣā kṛtapuṇyaiḥ praropitā /
śataśākhī bhavatyeva yāvanmātrāpi satkriyā // MSS_0698

atyudgāḍharayasthirākṛtighanadhvānabhramanmandara- kṣubdhakṣīradhivīcisaṃcayagataprāleyapādopamaḥ /
śrīmatpotalake gabhīravivṛtidhvānapratidhvānite sāndrasvāṃśucayaśriyā valayito lokeśvaraḥ pātu vaḥ // MSS_0699

atyuddhṛtā vasumatī dalito'rivargaḥ kroḍīkṛtā balavatā balirājalakṣmīḥ /
ekatra janmani kṛtaṃ yadanena yūnā janmatraye tadakarot puruṣaḥ purāṇaḥ // MSS_0700

atyunnatapadaṃ prāptaḥ pūjyān naivāvamānayet /
nahuṣaḥ śakratāṃ prāptaś cyuto'gastyāvamānanāt // MSS_0701

atyunnatastanamuro nayane sudīrghe vakre bhruvāvatitarāṃ vacanaṃ tato'pi /
madhyo'dhikaṃ tanuranūnagururnitambo mandā gatiḥ kimapi cādbhutayauvanāyāḥ // MSS_0702

atyunnatastanayugā taralāyatākṣī dvāri sthitā tadupayānamahotsavāya /
sā pūrṇakumbhanavanīrajatoraṇasrak- saṃbhāramaṅgalamayatnakṛtaṃ vidhatte // MSS_0703

atyunnatiṃ prāpya naraḥ prāvāraḥ kīṭako yathā /
sa vinaśyatyasaṃdeham āhaivamuśanā nṛpaḥ // MSS_0704

atyunnativyasaninaḥ śiraso'dhunaiṣa svasyaiva cātakaśiśuḥ praṇayaṃ vidhattām /
asyaitadicchati yadi pratatāsu dikṣu tāḥ svacchaśītamadhurāḥ kva nu nāma nāpaḥ // MSS_0705

atyunnato'mbubhirmeghaś cātakān na dhinoti cet /
marutā hṛtasarvasvaḥ sa paścāt kiṃ kariśyati // MSS_0706

atyupacittairupāyaiś cakrabhṛdeko bhujairiva caturbhiḥ /
nṛpatiḥ śriyamapi suciraṃ haririva parirabhya nirbharaṃ ramate // MSS_0707

atyullasadbisarahasyayujā bhujena vaktreṇa śāradasudhāṃśusahodareṇa /
pīyuṣapoṣasubhagena ca bhāṣitena tvaṃ cet prasīdasi mṛgākṣi kuto nidāghaḥ // MSS_0708

atyuṣṇā jvariteva bhāskarakarairāpītasārā mahī yakṣmārtā iva pādapāḥ pramuṣitacchāyā davāgnyāśrayāt /
vikrośantyavaśādivocchritaguhāvyāttānanāḥ parvatā loko'yaṃ ravipākanaṣṭahṛdayaḥ saṃyāti mūrchāmiva // MSS_0709

atyuṣṇāt saghṛtādannād acchidrāccaiva vāsasaḥ /
aparapreṣyabhāvācca bhūya icchan patatyadhaḥ // MSS_0710

atyeti rajanī yā tu sā na pratinivartate /
yātyeva yamunā pūrṇā samudramudakārṇavam // MSS_0711

atra caitrasamaye nirantarāḥ proṣitāhṛdayakīrṇapāvakāḥ /
vānti kāmukamanovimohanā vyālalolamalayācalānilāḥ // MSS_0712

atra manmathamivātisundaraṃ dānavārimiva divyatejasam /
śailarājamiva dhairyaśālinaṃ vedmi veṅkaṭapatiṃ mahīpatim // MSS_0713

atra yat patitaṃ varṇabindumātrāvisargakam /
bhramapramādadoṣāddhi kṣantavyaṃ tat subuddhibhiḥ // MSS_0714

atrasto nijapakṣais tuṇḍavighātairjanānabhibhavantaḥ /
kurvanti śatruvṛddhiṃ niśi virutavanto janavināśam // MSS_0715

atrasthaḥ sakhi lakṣayojanagatasyāpi priyasyāgamaṃ vettyākhyāti ca dhikchukādaya ime sarve pathantaḥ sthitāḥ /
matkāntasya viyogatāpadahanajvālāvalīcandanaḥ kākastena guṇena kāñcanamaye vyāpāritaḥ pañjare // MSS_0716

atrakaṇṭhaṃ viluṭha salile nirjalā bhūḥ purastāj jahyāḥ śoṣaṃ vadanavihitenāmalakyāḥ /
phalena sthāne sthāne taditi pathikastrījana(ḥ) klāntagātrīṃ paśyan sītāṃ kimu na kṛpayā vardhito roditaśca // MSS_0717

atranugodaṃ mṛgayānivṛttas taraṅgavātena vinītakhedaḥ /
rahastvadutsaṅganiṣaṇṇamūrdhā smarāmi vānīragṛheṣu suptaḥ // MSS_0718

atrāntare kimapi vāgvibhavātivṛtta- vaicitryamullasitavibhramamāyatākṣyāḥ /
tadbhūrisāttvikavikāramapāstadhairyam ācāryakaṃ vijayi mānmathamāvirāsīt // MSS_0719

atrāntare ca kulaṭākulavartmaghāta- saṃjātapātaka iva sphuṭalāñchanaśrīḥ /
vṛndāvanāntaramadīpayadṃśujālair diksundarīvadanacandanabindurinduḥ // MSS_0720

atrāpi bhārataṃ śreṣṭhaṃ jambudvīpe mahāmune /
yato hi karmabhūreṣā ato'nyā bhogabhūmayaḥ // MSS_0721

atrāyātaṃ pathika bhavatā karmaṇākāri pathyaṃ tathyaṃ brūmaḥ punarapi sakhe sāhasaṃ mā vidhāsīḥ /
vāmākṣīṇāṃ nayananalinaprāntanirdhūtadhairyāḥ svāṃ maryādāmiha hi nagare yogino'pi tyajanti // MSS_0722

atrardracandanakucārpitasūtrahāra- sīmantacumbisicayasphuṭabāhumūlaḥ /
dūrvāprakāṇḍarucirāsu gurūpabhogo gauḍāṅganāsu cirameṣa cakāsti veṣaḥ // MSS_0723

atrāryaḥ kharadūṣaṇatriśirasāṃ nādānubandhodyame rundhāne bhuvanaṃ tvayā cakitayā yoddhā niruddhaḥ kṣaṇam /
sasnehāḥ sarasāḥ sahāsarabhasāḥ sabhrū bhramāḥ saspṛhāḥ sotsāhāstvayi tadbale ca nidadhe dolāyamānā dṛśaḥ // MSS_0724

atrāvāsaparigrahaṃ gṛhapaterācakṣva caṇḍodyamaiḥ caṇḍālairupasevitāḥ sakhi dhanurhastaiḥ purastādimāḥ /
utkālākulasārameyarasanālelihyamānonnata- dvārāgratvagavāsthisāsraśakalasragvallayaḥ pallayaḥ // MSS_0725

atrāśitaṃ śayitamatra nipītamatra sāyaṃ tayā saha mayā vidhivañcitena /
ityādi hanta paricintayato vanānte rāmasya locanapayobhirabhūt payodhiḥ // MSS_0726

atrāsīt kila nandasadma śakaṭasyātrābhavad bhañjanaṃ bandhacchedakaro'pidāmabhirabhūd baddho'tra dāmodaraḥ /
itthaṃ māthuravṛddhavaktravigalatpīyūṣadhārāṃ pibann ānandāśrudharaḥ kadā madhupurīṃ dhanyaścariṣyāmyaham // MSS_0727

atrāsīt phaṇipāśabandhanavidhiḥ śaktyā bhavad devare gāḍhaṃ vakṣasi tāḍite hanumatā droṇādriratrāhṛtaḥ /
divyairindrajidatra lakṣmaṇaśarairlokāntaraṃ prāpitaḥ kenāpyatra mṛgākṣi rākṣasapateḥ kṛttā ca kaṇṭhṭavī // MSS_0728

atrāsthaḥ piśitaṃ śavasya kaṭhinairutkṛtya kṛtsnaṃ nakhair nagnasnāyukarālaghorakuharairmastiṣkadigdhāṅgaliḥ /
saṃdaśyauṣṭhapuṭena bhugnavadanaḥ pretaścitāgnidrutaṃ sūtkārairnalakāsthikoṭaragataṃ majjānamākarṣati // MSS_0729

atrāsmin sutanu latāgṛhe'sti ramyaṃ mālatyāḥ kusumamanuccitaṃ pareṇa /
ityuktvā mṛdukarapallavaṃ gṛhītvā mugdhākṣī rahasi nināya ko'pi dhanyaḥ // MSS_0730

atrilocanasaṃbhūtajyotirudgamabhāsibhiḥ /
sadṛśaṇ śobhate'tyarthaṃ bhūpāla tava ceṣṭitam // MSS_0731

atraiva dāsyasi vimuktimathāpi yāce mātaḥ śarīrapatanaṃ maṇikarṇikāyām /
astu svakṛtyamanukampanamīśvarāṇāṃ dāsasya karmakarataiva tathā svakṛtyam // MSS_0732

atraiva sarasi jātaṃ vikasitamatraiva nirbharaṃ nalinaiḥ /
kālavaśāgatatuhinair vilīnamatraiva hā kaṣṭam // MSS_0733

atraiṣa svayameva citraphalake kampaskhalallekhayā saṃtāpārtivinodanāya kathamapyālikhya sakhyā bhavān /
bāṣpavyākulamīkṣitaḥ sarabhasaṃ cūtāṅkurairarcito mūrdhnā ca praṇataḥ sakhīṣu madanavyājena cāpahnutaḥ // MSS_0734

atrotpātaghanena mantrivikale śūnyāmbaravyāpinā dhṛṣṭasvaprakṛtikriyāsamucite grame tathā jṛmbhitam /
rathyākardamavāhināmatiśucisvacchātmanāmantaraṃ nāpyajñāyi janairyathaughapayasāṃ srotojalānāmapi // MSS_0735

atrodyāne mayā dṛṣṭā vallarī pañcapallavā /
pallave pallave tāmrā yasyāṃ kusumamañjarī // MSS_0736

atvarā sarvakāryeṣu tvarā kāryavināśinī /
tvaramāṇena mūrkheṇa mayūro vāyasīkṛtaḥ // MSS_0737

atha kālāgnirudrasya tṛtīyanayanotthitā /
jvālā dahati tatsarvaṃ nirvāṇaṃ brahmaṇo yataḥ // MSS_0738

atha kṛtakavihaṅgaiḥ pārthivoddūlayantais tumulamuparipātādambuvarṣāt trasantyaḥ avigalitasapatnīgātrasaṃmardaduḥkhāḥ praṇayinamabhipeturhāninādena devyaḥ // MSS_0739

(arjuna uvāca) atha kena prayukto'yaṃ pāpaṃ carati pūruṣaḥ /
anicchannapi vārṣṇeya balādiva niyojitaḥ // MSS_0740

(śrībhagavānuvāca) kāma eṣa krodha eṣa rajoguṇasamudbhavaḥ /
mahāśano mahāpāpmā viddhyenamiha vairiṇam // MSS_0741

dhūmenāvriyate vahnir yathādarśo malena ca /
yatholbenāvṛto garbhas tathā tenedamāvṛtam // MSS_0742

atha kokila kuru maunaṃ jaladharasamaye'pi picchilā bhūmiḥ /
vikasati kuṭajakadambe vaktari bheke kutastavāvasaraḥ // MSS_0743

atha dhūkasvaro vāme yātrāyāṃ gacchataḥ śubhaḥ /
dakṣiṇe mṛtaye kiṃcid duṣṭaṃ darśanamasya hi // MSS_0744

atha jagadavagāḍhaṃ vāsarāntāpacārāt timirapaṭalavṛddhāvapratīkārasattvam /
śaśibhiṣaganupūrvaṃ śītahasto bhiṣajyann adhikaviśadavaktraḥ svairabhāvaṃ cakāra // MSS_0745

atha dīrghatamaṃ tamaḥ pravekṣyan sahasā rugṇarayaḥ sa saṃbhrameṇa /
nipatantamivoṣṇaraśmimurvyāṃ valayībhūtataruṃ dharāṃ ca mene // MSS_0746

atha dehaṃ sthirīrktuṃ yogināṃ siddhimicchatām /
kathyante śuddhakarmāṇi yaiḥ siddhiṃ prāpuruttamāḥ // MSS_0747

atha nagaradhṛtairamātyaratnaiḥ pathi samiyāya sa jāyayābhirāmaḥ /
madhuriva kusumaśriyā sanāthaḥ kramamilitairalibhiḥ kutūhalotkaiḥ // MSS_0748

atha nabhasi nirīkṣya vyāptadikcakravālaṃ sajalajaladajālaṃ prāptahaṛṣaprakarṣaḥ /
vihitavipulabarhāḍambaro nīlakaṇṭho madamṛdukalakaṇṭho nāṭyamaṅgīcakāra // MSS_0749

atha nayanasamutthaṃ jyotiratreriva dyauḥ surasaridiva tejo vahniniṣṭhyūtamaiśam /
narapatikulabhūtyai garbhamādhatta rājñī gurubhirabhiniviṣṭaṃ lokapālānubhāvaiḥ // MSS_0750

atha nityamanityaṃ vā neha śocanti tadvidaḥ /
nānyathā śakyate kartuṃ svabhāvaḥ śocatāmiti // MSS_0751

atha paṅktimatāmupeyivadbhiḥ sarasairvakrapathaśritairvacobhiḥ /
kṣitibharturupāyanaṃ cakāra prathamaṃ tatparatasturaṅgamādyaiḥ // MSS_0752

atha pathikavadhūdahanaḥ śanakairudabhūnniśākarālokaḥ /
kumudaprabodhadūto vyasanaguruścakravākīṇām // MSS_0753

atha prasannendumukhīn sitāmbarā samāyayāvutpalapatralocanā /
sapaṅkajā śrīriva gāṃ niṣevituṃ sahaṃsabālavyajanā śaradvadhūḥ // MSS_0754

athabaddhajeṭe rāme sumantre gṛhamāgate /
tyakto rājā sutatyāgād aviśvastairivāsubhiḥ // MSS_0755

atha bhadrāṇi bhūtāṇi hīnaśaktirahaṃ param /
mudaṃ tadāpi kurvīta hānirdveṣaphalaṃ yataḥ // MSS_0756

atha manasijadigjyābhiśaṃsī jaladharadugdubhirātatāna śabdam /
tadanu tadanujīvibhiḥ kadambaiḥ kavacitamunmadaṣaṭpadacchalena // MSS_0757

atha mantramimaṃ karne japeddaṃśaṃ spṛśet tathā /
ekaviṃśativāraṃ ca vṛścikakṣveḍaśāntaye // MSS_0758

atha manmathavāhinīparāgaḥ kimapi jyotirudasphurat purastāt /
timirasya jarā cakorakūraṃ kulaḍākelibanīdavānalārciḥ // MSS_0759

atha ratirabhasādalīkanidrā- madhuravighūrṇitalocanotpalābhiḥ /
śayanatalamaśiśriyan vadhūbhiḥ saha madamanmathamantharā yuvānaḥ // MSS_0760

atha rājñā daraḥ kāryo na tu kasyāṃ cidāpadi /
api cetasi dīrṇaḥ syān naiva varteta dīrṇavat // MSS_0761

arthatupakvāt kalato'vaśoṣitād vikṛṣya bījaṃ payasā niṣicya /
viśoṣitaṃ pañcadināni sarpiṣā viḍaṅgamiśreṇa ca dhūpayet tataḥ // MSS_0762

atharvavidhitattvajñair brāhmaṇairvijitendriyaiḥ /
mantratantravidhānajñair dūrādunmūlayed ripūn // MSS_0763

atharvāmnāyatattvajñas tantrajñaḥ kratukarmaṭhaḥ dhanurvedasya vettā ca purodhā rājasaṃmataḥ // MSS_0764

atha lakṣmaṇānugatakāntavapur jaladhiṃ vilaṅghya śaśidāśarathiḥ /
parivāritaḥ parita ṛkṣaganais timiraugharākṣasakulaṃ bibhide // MSS_0765

athavā naśyati prajñā prājñasyāpi narasya hi /
pratikūle gate daive vināśe samupasthite // MSS_0766

athavā procyate dhyānam anyadevātra yoginām /
rahasyaṃ paramaṃ mukteḥ kāraṇaṃ prathamaṃ ca yat // MSS_0767

athavā bhavataḥ pravartanā na kathaṃ piṣṭamiyaṃ pinaṣṭi naḥ /
svata eva satāṃ parārthatā grahaṇānāṃ hi yathā yathārthatā // MSS_0768

athavābhiniviṣṭabuddhiṣu vrajati vyarthakatāṃ subhāṣitam /
ravirāgiṣu śītarociṣaḥ karajālaṃ kamalākaroṣviva // MSS_0769

athavā mama bhāgyaviplavād aśaniḥ kalpita eṣa vedhasā /
yadanena tarurna pātitaḥ kṣipatā tadviḍapāśrayā latā // MSS_0770

athavā mūlasaṃsthānām udghātaistu prabodhayet /
suptāṃ kuṇḍalinīṃ śaktiṃ bisatantunibhākṛtim // MSS_0771

athavā mṛdu vastu hiṃsituṃ mṛdunaivārabhate prajāntakaḥ /
himasekavipattiratra me nalīnī pūrvanidarśanaṃ matā // MSS_0772

atha vāsavasya vacanena ruciravadanastrilocanam /
klāntirahitamabhirādhayituṃ vidhivat tapāṃsi vidadhe dhanaṃjayaḥ // MSS_0773

atha saṃsārasaṃhāravāmanābandhavāsitaḥ /
ajāyata vṛṣārūḍho bhairavo mahasāṃ nidhiḥ // MSS_0774

atha sa lalitayoṣidbhrūlatācāruśṛṅgaṃ rativalayapadāṅke cāpamāsajya kaṇṭhe /
sahacaramadhuhastanyastucūtāṅkurāstraś śatamakhamupatasthe prāñjaliḥ puṣpadhanvā // MSS_0775

atha sa viṣayavyāvṛttātmā yathāvidhi sūnave nṛpatikakudaṃ dattvā yūne sitātapavāraṇam /
munivanatarucchāyāṃ devyā tayā saha śiśriye galitavayasāmikṣvākūṇāmidaṃ hi kulavratam // MSS_0776

atha sāndrasāṃdhyakiraṇāruṇitaṃ harihetihūti mithunaṃ patatoḥ /
pṛthagutpapāta virahārtidalad- dhṛdayasrutāsṛganuliptamiva // MSS_0777

atha sāmānyaśṛṅgāre yuvatīnāṃ praśaṃsanam /
strīpuṃsajātikathanaṃ tayoḥ saṃyogavarṇanam // MSS_0778

atha sphuranmīnavidhūtapaṅkajā vikaṅkatīraskhalitormisaṃhatiḥ /
payo'vagāḍhuṃ kalahaṃsanādinī samājuhāveva vadhūḥ surāpagā // MSS_0779

atha svamādāya bhayena manthanāc ciratnaratnādhikamuccitaṃ cirāt /
nilīya tasmin nivasannapāṃnidhir vane taḍāko dadṛśo'vanībhujā // MSS_0780

atha svasthāya devāya nityāya hatapāpmane /
tyaktakramavibhāgāya caitanyajyotiṣe namaḥ // MSS_0781

athāgatya bhuvaṃ rājñāṃ gatā vāhanatāṃ hayāḥ /
teṣāṃ dharmārthakāmāṃśca sādhayantyupakāriṇaḥ // MSS_0782

athāṅgarājādavatārya cakṣur yāhīti janyāmavadat kumārī /
nāsau na kāmyo na ca veda samyag dṛṣṭuṃ na sā bhinnarucirhi lokaḥ // MSS_0783

athātaḥ saṃpravakṣyāmi lakṣaṇāni hi vājinām /
śubhāni varṇairāvartais tāni vidyādvicārataḥ // MSS_0784

athātaḥ saṃpravakṣyāmi hayārohaṇamuttamam /
yena vijñātamātreṇa revantaḥ priyatāṃ vrajet // MSS_0785

athātmanaḥ śabdaguṇaṃ guṇajñaḥ padaṃ vimānena vigāhamānaḥ /
ratnākaraṃ vīkṣya mithaḥ sa jāyāṃ rāmābhidhāno harirityuvāca // MSS_0786

athānandakaraṃ vakṣye ṣaḍartūnāṃ ca varṇanam /
yadrasāsvādamuditā vibhānti vibudhālayaḥ // MSS_0787

athānukramadvārāṇi viracyante'tra vāṅmaye /
anyoktisūktamuktālīṃ samuddhṛtya śrutāmbudheḥ // MSS_0788

athāpi nāpasajjeta strīṣu straiṇeṣu cārthavit /
viṣayendriyasaṃyogān manaḥ kṣubhyati nānyathā // MSS_0789

athāpraśastāḥ kharatulyanādāḥ pradīptapucchāḥ kūnakhā vivarṇāḥ /
nikṛttakarṇā dvipamastakāśca bhavanti ye vā sitatālujihvāḥ // MSS_0790

athāyatanasaṃnidhau bhagavato bhavānīpater manoharamacīkhanad bhuvanabhūṣaṇaṃ bhūpatiḥ /
vigāhanakutūhalottaralapaurasīmantinī- payodharabharatruṭadvikaṭavīcimudraṃ saraḥ // MSS_0791

athāśuddhodbhavo grāmyanartaksyeva yo bhavet /
kaitavasnehamāpanno bhavaḥ saṃkīrṇa ucyate // MSS_0792

athāśvānāṃ janmadeśān pravakṣyāmyanupūrvaśaḥ /
uttamānāṃ ca madhyānāṃ hīnānāṃ yatra saṃbhavaḥ // MSS_0793

athāsasādāstamanindyatejā janasya dūrojjhitamṛtyubhīteḥ /
utpattimadvastu vināśyavaśyaṃ yathāhamityevamivopadeṣṭum // MSS_0794

athetare sapta raghupravīrā jyeṣṭhaṃ purojanmatayā guṇaiśca cakruḥ kuśaṃ ratnaviśoṣabhājaṃ saubhrātrameṣāṃ hi kulānusāri // MSS_0795

athedaṃ rakṣobhiḥ kanakahariṇacchadmavidhinā tathā vṛttaṃ pāpairvyathayati yathā kṣālitamapi /
janasthāne śūnye vikalakaraṇairāryacaritair api grāvā rodityapi dalati vajrasya hṛdayam // MSS_0796

atheha kathyatesmābhiḥ karmanā yena bandhanam /
chidyate sadupāyena śrutvā tatra pravartyatām // MSS_0797

athaitat pūrṇamabhyātmaṃ yac ca netyanṛtaṃ vacaḥ /
sarvaṃ netyanṛtaṃ brūyāt sa duṣkīrtiḥ svasan mṛtaḥ // MSS_0798

atho gaṇapatiṃ vande mahāmodavidhāyinam /
vidyādharagaṇairyasya pūjyate kaṇṭhagarjitam // MSS_0799

athoccakairjaraṭhakapotakaṃdharā- tanūruhaprakaravipāṇḍuradyuti /
balaiścalaccaraṇavidhūtamuccarad dhanāvalīrudacarata kṣamārajaḥ // MSS_0800

athocyate śvānarutasya sāraṃ sāraṃ samasteṣvapi śākuneṣu /
vispaṣṭaceṣṭaṃ śubhalakṣaṇaṃ ca śubhāśubhaṃ prāktanakarmapākam // MSS_0801

athottarasyāṃ diśi khañjarīṭam ālokya ko'pi smitamādadhānaḥ /
kasyāścidāsye smitacārubhāsi sabhāvayāmāsa vilocanāni // MSS_0802

athodyayau bālasuhṛt smarasya śayāmādhavaḥ śyāmalalakṣmabhaṅgyā /
tārāvadhūlocanacumbanena līlāvilīnāñjanabindurinduḥ // MSS_0803

athopagūḍhe śaradā śaśāṅke prāvṛḍ yayau śāntataḍitkaṭākṣā /
kāsāṃ na saubhāgyaguṇo'ṅganānāṃ naṣṭaḥ paribhraṣṭpayodharāṇām // MSS_0804

adaḥ samitsaṃmukhavīrayauvata- traṭadbhujākambumṛṇālahāriṇī /
dviṣadgaṇastraiṇadṛgambunirjhare yaśomarālāvalirasya khelati // MSS_0805

adaṇḍanamadaṇḍyānāṃ daṇḍyānāṃ cāpi daṇḍanam /
agrāhyāgrahaṇaṃ caiva grāhyāṇāṃ grahaṇaṃ tathā // MSS_0806

adaṇḍyān daṇḍayan rājā daṇḍyāṃścaivāpyadaṇḍayan /
ayaśo mahadāpnoti narakaṃ caiva gacchati // MSS_0807

adattaṃ nādatte kṛtasukṛtakāmaḥ kimapi yaḥ śubhaśreṇistasmin vasati kalahaṃsīva kamale /
vipat tasmād dūraṃ vrajati rajanīvāmbaramaṇer vinītaṃ vidyeva tridivaśivalakṣmīrbhajati tam // MSS_0808

adattadoṣeṇa bhaved daridro daridradoṣeṇa karoti pāpam /
pāpādavaśyaṃ narakaṃ prayāti punardaridraḥ punareva pāpī // MSS_0809

adattabhuktamutsṛjya dhanaṃ sucirarakṣitam /
mūṣakā iva gacchanti kadaryāḥ svakṣaye kṣayam // MSS_0810

adattānāmupādānaṃ hiṃsā caivāvidhānataḥ /
paradāropasevā ca śārīraṃ trividhaṃ smṛtam // MSS_0811

adattetyāgatā lajjā datteti vyathitaṃ manaḥ /
dharmasnehāntare nyastā duḥkhitāḥ khalu mātaraḥ // MSS_0812

adanaspṛhayā durīśvarāṇāṃ sadandvāri vitardimāśrayantām /
apunarbhavasādhanaṃ śarīraṃ jarayāmo vayamoṃ namaḥ śivāya // MSS_0813

adabhramabhropalapaṭṭakeṣu ye śitīkriyante madanena patriṇaḥ /
taḍillatā tannikaṣotthapāvaka- sphuliṅgabhaṅgīṃ lalitāṅgi sevate // MSS_0814

adambhā hi rambhā vilakṣā ca lakṣmīr ghṛtācī hriyā cīrasaṃcchāditāsyā /
aho jāyate mandavarṇāpyaparṇā samākarṇya tasyā guṇasyaikadeśam // MSS_0815

adayaṃ gharṣa śilāyāṃ daha vā dāhena bhindhi lauhena /
he hemakāra kanakaṃ ma māṃ guñjāphalaistulaya // MSS_0816

adaya daśasi kiṃ tvaṃ bimbabuddhyādharaṃ me bhava capala nirāśaḥ pakvajambūphalānām /
iti dayitamavetya dvāradeśāptamanyā nigadati śukamuccaiḥ kāntadantakṣatauṣṭhī // MSS_0817

adarśanādāpatitaḥ punaścādarśanaṃ gataḥ /
na tvāsau veda na tvaṃ taṃ kaḥ san kamanuśocasi // MSS_0818

adarśanādāpatitāḥ punaścādarśanaṃ gatāḥ /
na te tava na teṣāṃ tvaṃ tatra kā paridevanā // MSS_0819

adarśane darśanamātrakāmā dṛṣṭau pariṣvaṅgarasaikalolā /
āliṅgitāyāṃ punarāyatākṣyām āśāsmahe vigrahayorabhedam // MSS_0820

adākṣiṇyādatīvogrāḥ pavanā iva durjanāḥ /
gurūnapi pratikṣeptuṃ prayatante kṣamābhṛtaḥ // MSS_0821

adātā puruṣastyāgī dātā tyāgī ca nityaśaḥ /
iti jñātvā svayaṃ buddhayā dhanaṃ dadyāt punaḥ punaḥ // MSS_0822

adātā puruṣas dhanaṃ saṃtyajya gacchati /
dātāraṃ kṛpaṇaṃ manye mṛto'pyarthaṃ na muñcati // MSS_0823

adātāraṃ dātṛpravaramanayaṃ viśvavinayaṃ virūpaṃ rūpāḍhyaṃ vigatajayinaṃ viśvajayinam /
akulyaṃ kulyaṃ tvāmahamavadamāśāparavaśāt mṛṣāvādetyuktistvayi khalu mṛṣāvādini mayi // MSS_0824

adātā vaṃśadoṣeṇa karmadoṣād daridratā /
utmādo mātṛdoṣeṇa pitṛdoṣeṇa mūrkhatā // MSS_0825

adātṛmānasaṃ kvāpi na spṛśanti kavergiraḥ /
duḥkhāyaivātivṛddhasya vilāsāstaruṇīkṛtāḥ // MSS_0826

adānamīṣad dānaṃ ca kiṃcit kopāya dardhiyām /
saṃpūrṇadānaṃ prakṛtir virāmo vairakāraṇam // MSS_0827

adāntasyāvinītasya vṛthāpaṇḍitamāninaḥ /
na guṇāya bhavanti sma naṭasyevājitātmanaḥ // MSS_0828

adāhi yastena daśārdhabāṇaḥ purā purārernayanālayena /
na nirdahaṃstaṃ bhavadakṣivāsī na vairaśuddheradhunādharmaṇaḥ // MSS_0829

adīpte'gnau hato homo hatā bhuktirasākṣikā /
upajīvyā hatā kanyā svārthe pākakriyā hatā // MSS_0830

adīrghaṃ kālamāpannaḥ praśrayaṃ yuvateḥ smaraḥ /
pragalbhyate manasyeva mughaṃ vapuṣi jāyate // MSS_0831

bibhetyaṅgārpaṇe vācchatyālikhyātāṃ ratiṃ priye /
uktapratyuktasaṃmūḍhā saṃmukhaṃ na nirīkṣate // MSS_0832

ratacūtaphalotpākarasaiḥ kāntaṃ na dhinvatī /
bālā nidāghalakṣmīva tāpayatyeva kevalam // MSS_0833

adīrghadarśibhiḥ krūrair mūḍhairindriyasāyakaiḥ /
hamadbhiḥ kriyate karma rudadbhiranubhūyate // MSS_0834

adīrghasūtraḥ smṛtimān kutajño nītiśāstravit /
dhīmānāyatidarśī ca mantrī rājñaḥ susaṃnidhiḥ // MSS_0835

adurgaviṣayaḥ kasya nāreḥ paribhavāspadam /
adurgo'nāśrayo rājā potacyutamanuṣyavat // MSS_0836

adṛṣṭāpatitāṃ bhāryāṃ mūḍho yastu parityajet /
saptajanmani sa strītvaṃ labhate nātra saṃśayaḥ // MSS_0837

aduṣṭāpatitāṃ bhāryāṃ yauvane yaḥ parityajet /
sa jīvanānte strītvaṃ ca vandhyatvaṃ ca samāpnuyāt // MSS_0838

adūragamanaṃ tīrtham adehadamanaṃ tapaḥ /
anambhaḥsaṃbhavaṃ snānaṃ mātuścaraṇapaṅkajam // MSS_0839

adṛṣyanti purastena khelāḥ khañjanapaṅktayaḥ /
asmayranta viniḥśvasya priyānayanavibhramāḥ // MSS_0840

adṛṣṭaguṇadoṣāṇām adhṛtānāṃ ca karmaṇām /
nāntareṇa kriyāṃ teṣāṃ phalmiṣṭaṃ pravartate // MSS_0841

adṛṣṭapūrvaḥ kaṇṭho'yaṃ kāntāyā bhuvantraye /
yasmādviṇāninādasya samudbhūtirvibhāvyate // MSS_0842

adṛṣṭapūrvamasmābhir yadetaddṛśyate'dhunā /
viṣaṃ viṣadharaiḥ pītaṃ mūrchitāḥ pathikāṅganāḥ // MSS_0843

adṛṣṭapūrvānādāya bhāvānapariśaṅkitān /
iṣṭāniṣṭān manuṣyāṇām astaṃ gacchanti rātrayaḥ // MSS_0844

adṛṣṭapūrvā bahavaḥ sahāyāḥ sarve padasthasya bhavanti vaśyāḥ /
arthādvihīnasya padacyutasya bhavanti kāle svajano'pi śatruḥ // MSS_0845

adṛṣṭamukhabhaṅgasya yuktamandhasya yācitum /
aho bata mahat kaṣṭaṃ cakṣuṣmānapi yācate // MSS_0846

adṛṣṭavyāpāraṃ gatavati dinānāmadhipatau yaśaḥ śeṣībhūte śaśini gatadhāmni grahagaṇe /
tathāndhaṃ saṃjātaṃ jagadupanate meghasamaye yathāmī gaṇyante tamasi paṭavaḥ kīṭamaṇayaḥ // MSS_0847

adṛṣṭe darśanotkaṇṭhā dṛṣṭe vicchedabhīrutā /
tadṛṣṭena na dṛṣṭena bhatratā labhyate mukham // MSS_0848

adeśakālārthamanāyatikṣamaṃ yadapriyaṃ lāghavakāri cātmanaḥ /
vicintya buddhyā muhurapyavaimyahaṃ na tadvaco hālahalaṃ hi tadviṣam // MSS_0849

adeśakāle yad dānam apātrebhyaśca dīyate /
asatkṛtamavajñātaṃ tattāmasamudāhṛdam // MSS_0850

adeśastho hi ripuṇā svalpakenāpi hanyate /
grāho'lpīyānapi jale jalendramapāi karṣati // MSS_0851

adaivaṃ daivataṃ kuryur daivataṃ cāpyadaivatam /
lokapālān sṛjeyuśca lokānanyāṃstathā dvijaḥ // MSS_0852

adoṣāddoṣādvā tyajti vipine tāṃ yadi bhavān abhradraṃ bhadraṃ vā tribhuvanapate tvāṃ vadatu kaḥ /
idaṃ krūraṃ me smarati hṛdayaṃ yat kila tayā tvadartha kāntāre kulatilaka nātmāpi gaṇitaḥ // MSS_0853

adbhiḥ śudhyanti vastrāṇi manaḥ satyena śudhyati /
ahiṃsayā ca bhūtātmā buddhirjñānena śudhyati // MSS_0854

adbhirgātrāṇi śudhyanti manaḥ satyena śudhyati /
vidyātapobhyāṃ bhūtātmā buddhirjñānena śudhyati // MSS_0855

adbhutastakrpāthodhir agādhī yasya vardhakaḥ /
akṣapādo'tamaḥspṛṣṭas tvakalaṅkaḥ kalānidhiḥ // MSS_0856

adbhyo 'gnirbrahmataḥkṣatram aśmano lohamutthitam /
teṣāṃ sarvatragaṃ tejaḥ svāsu yoniṣu sāmyati // MSS_0857

adyatano yoddhavye śakuno vihayāya yākrikavirudvaḥ /
divasāntarite yuddhe kṣemaḥ prāsthānikaḥ śakunaḥ // MSS_0858

adya dhārā sadādhārā sadālambā sarasvatī /
paṇḍitā maṇḍitāḥ sarve bhojarāje bhuvaṃ gate // MSS_0859

adya prabhṛtyavanatāṅgi tavāsmi dāsaḥ krītastapobhiriti vādini candramaulau /
ahnāya sā niyamajaṃ klamamutsasarja kleśaḥ phalena hi punarnavatāṃ vidhatte // MSS_0860

adya bhomidinaṃ satyaṃ satyamaprastutaṃ tava /
tathāpi dūti gantavyaṃ nārtaḥ kālamapekṣate // MSS_0861

adya me saphalamāyatanetre jīvitaṃ madanasaṃśrayabhāvam /
āgatāsi bhavanaṃ mama yasmāt svāgataṃ tava varoru niṣīda // MSS_0862

adya yāvadapi yena nibaddhau na prabhū vicalituṃ balivindhyau /
āsthitāvitathatāguṇapāśas tvādṛśā sa viduṣā durapāsaḥ // MSS_0863

adya śītaṃ varivarti sarīsarti samīraṇaḥ /
apatnīko marīmarti narīnarti kucoṣṇavān // MSS_0864

adya sa pravasatīti subhruvaḥ śrotrasīmani vijṛmbhite dhvanau /
sadya eva nijapāṇigumphite puṣpadāmani mahoragabhramaḥ // MSS_0865

adya sundari kalindanandinī- tīrakuñjabhuvi kelilampaṭaḥ /
vādayan muralikāṃ muhurmuhur mādhavo harati māmakaṃ manaḥ // MSS_0866

adya svargavadhūgaṇe guṇamaya tvatkīrtimindūjjavalām uccairgāyati niṣkalaṅkimadaśāmādāsyate candramāḥ /
gītākarṇanamodamuktayavasagrāsābhilāṣo vada svāminnaṅkamṛgaḥ kiyanti hi dinānyetasya vartiṣyate // MSS_0867

adya svāṃ jananīmakāraṇaruṣā prātaḥ sudūraṃ gatāṃ pratyānetumito gato gṛhapatiḥ kṣutvaiva madhyaṃdine /
paṅgutvena śarīrajarjaratayā prāyaḥ sa lakṣyākṛtir dṛṣṭo'sau bhavatā na kiṃ pathika he sthitvā kṣaṇaṃ kathyatām // MSS_0868

adyāpi kokanadacārusarekhahastāṃ tāṃ śātakumbhakalaśastanacārugātrīm /
bimbādharīṃ viṣamabāṇanipīḍitāṅgīṃ saṃcintaye dvyaṇukamadhyatanuprakāśām // MSS_0869

adyāpi kopavimukhīkṛtagantukāmā noktaṃ vacaḥ pratidadāti yadaiva vaktram /
cumbāmi rodati bhṛśaṃ patito'smi pāde dāsastava priyatame bhaja māṃ smarāmi // MSS_0870

adyāpi cāṭuśatadurlalitocitārthaṃ tasyāḥ smarāmi surataklamavihvalāyāḥ /
avyaktaniḥsvanitakātarakthyamāna- saṃkīrṇavarṇarucitaṃ vacanaṃ priyāyāḥ // MSS_0871

adyāpi tatkanakakuṇḍalaghṛṣṭagaṇḍam āsyaṃ smarāmi viparītaratābhiyoge /
āndolanaśramajalasphuṭasāndrabindu- muktāphalaprakaravicchuritaṃ priyāyāḥ // MSS_0872

adyāpi tatkanakagaurakṛtāṅgarāgaṃ prasvedabinduvitataṃ vadnaṃ priyāyāḥ /
ante smarāmi ratikhedavilolanetraṃ rāhūparāgaparimuktamivendubimbam // MSS_0873

adyāpi tatkanakareṇughanorudeśe nyastaṃ smarāmi nakharakṣatalakṣma tasyāḥ /
ākṛṣṭahemarucirāmbarmutthitāyā lajjāvaśāt karadhṛtaṃ ca tato vrajantyāḥ // MSS_0874

adyāpi tatkamalareṇusugandhagandhi tatpremavāri makaradhvajapātakāri /
prāpnomyahaṃ yadi punaḥ surataikatīrthaṃ prāṇāṃstyajāmi niyataṃ tadavāptihetoḥ // MSS_0875

adyāpi tatkṛtakacagrahamāgraheṇa dantairmayā daśanavāsasi khaṇḍyamāne /
tasyā manāṅmukulitākṣamalakṣyamāṇa- sītkāragarbhamasakṛdvadanaṃ smarāmi // MSS_0876

adyāpi tattaralatārakitākṣamāsyam ālipracandanarasāhitaśobhamasyāḥ /
kastūrikātilakatārakitābhirāma- gaṇḍasthaladyuti muhurmanasā smarāmi // MSS_0877

adyāpi tatpraṇayabhaṅguradṛṣṭipātaṃ tasyāḥ smarāmi rativibhramagātrabhaṅgam /
vastrāñcalaskhalanacārupayodharāntaṃ dantacchadaṃ daśanakhaṇḍanamaṇḍanaṃ ca // MSS_0878

adyāpi tatsapariveṣaśaśiprakāśam āsyaṃ smarāmi jaḍgātravivartaneṣu /
tadveladujjvalakarāṅgulijālagumpha- doḥ kandalīyugalakaṃ dayitaṃ priyāyāḥ // MSS_0879

adyāpi tatsuratakelinirastrayuddhaṃ bandhopabandhapatanotthitaśūnyahastam / MSS_0880

dantauṣṭhapīḍananakhakṣataraktasiktaṃ tasyāḥ smarāmi ratibandhuraniṣṭhuratvam // MSS_0879

adyāpi tatsuratakelivimardakheda- saṃjātagharmakaṇavisphuritaṃ priyāyāḥ /
āpāṇḍuraṃ taralatāranimīlitākṣaṃ vaktraṃ smarāmi paripūrṇaniśākarābham // MSS_0881

adyāpi tadvadanapaṅkajagandhalubdha- bhrāmyaddvirephacayacumbitagaṇḍayugmam /
līlāvadhūtakarapallavakaṅkanānāṃ kvāṇo vimūrcchati manaḥ stutarāṃ madīyam // MSS_0882

adyāpi tadvikasitāmbujamadhyagauraṃ gorocanātilakabhāsuraphālarekham /
īṣanmadālasavighūrṇitadṛṣṭipātaṃ tasyā mukhaṃ prati mano mama gacchatīdam // MSS_0883

adyāpi tannayanakajjalamujjvalāsyaṃ viśrāntakarṇayugalaṃ parihāsahetoḥ /
paśye tavātmani navīnapayodharābhyāṃ kṣīṇaṃ vapuryadi vinaśyati no na doṣaḥ // MSS_0884

adyāpi tanmadanakārmukabhaṅgurabhru- dantadyutiprakarakarburitādharoṣṭham /
karṇāvasaktapulakojjvaladantapatraṃ tasyāḥ punaḥ punarapīha mukhaṃ smarāmi // MSS_0885

adyāpi tanmanasi saṃparivartate me rātrau mayi kṣutavati kṣitipālaputryā /
jīveti maṅgalavacaḥ parihṛtya kopāt karṇe kṛtaṃ kanakapatramanālapantyā // MSS_0886

adyāpi tāṃ kanakakaṅkaṇabhūṣitāgra- hastāṃ ca vaktrakamalena sunirjitendum /
līlāvartīṃ suratakhedanimīlitākṣīṃ dhyāyāmi cetasi madākulalālasāṅgīm // MSS_0887

adyāpi tāṃ kanakakāntimadālasāṅgīṃ vrīḍotsukāṃ nipatitāmiva ceṣṭamānām /
aṅgāṅgasaṅgaparicumbanajātamohāṃ tāṃ jīvanauṣadhimiva pramadhāṃ smarāmi // MSS_0888

adyāpi tāṃ kanakacampakadāmagaurīṃ phullāravindavadanāṃ tanuromarājīm /
suptotthitāṃ madanavihvalasālasāṅgīṃ vidyāṃ pramādagalitāmiva cintayāmi // MSS_0889

adyāpi tāṃ kanakapatrasanāthakarṇām uttuṅgakarkaśakucārpitatārahārām /
kāñcīnipuñjitaviśālanitambabimbām uddānanūpuraraṇaccaraṇāṃ smarāmi // MSS_0890

adyāpi tāṃ kaṭisamārpitavāmapāṇim ākuñcitaikacaraṇāgraniruddhabhūmim /
stambhāvalambitabhujāṃ pathi māṃ vrajantaṃ paśyāmi bandhuritakaṃdharamīkṣamāṇām // MSS_0891

adyāpi tāṃ kuṭilakuntalakeśapāśām untidratāmarasapatraviśālanetrām /
uttuṅgapīvarapayodharakuṅmalāḍhyāṃ dhyāyāmi cetasi yathaiva gurūpadeśam // MSS_0892

adyāpi tāṃ kṣaṇaviyogaviṣopame yāṃ saṅge punarbahutarāmamṛtābhiṣekām /
tāṃ jīvadhāraṇakarīṃ madanātapatrām uddhṛttakeśanivahāṃ sudatīṃ smarāmi // MSS_0893

adyāpi tāṃ kṣititale varakāminīnāṃ sarvāṅgasundaratayā prathamaikarekhām /
śṛṅgāranāṭakarasottamapānapātrīṃ kāntāṃ smarāmi kusumāyudhabāṇakhinnām // MSS_0894

adyāpi tāṃ gatinirākṛtarājahaṃsīṃ dhammillanirjitakalāpamayūkhabhāsām /
mattaśriyā madacakoravilolanetrāṃ saṃcintayāmi kalakaṇṭjasamānakaṇṭhām // MSS_0895

adyāpi tāṃ gamanamityuditaṃ madīyaṃ śrutvaiva bhīruhariṇīmiva cañcalākṣīm /
vācaḥ skhaladvigaladaśruhalākulākṣīṃ saṃcintayāmi guruśokavinamravaktrām // MSS_0896

adyāpi tāṃ galitabandhanakeśapāśāṃ srastasrajaṃ smitasudhāmadhurādharauṣṭhīm /
pīnonnatastanayugoparicārucumban- muktāvalīṃ rahasi loladṛśaṃ smarāmi // MSS_0897

adyāpi tāṃ cirayite mayi tannivāsaṃ rātrau samāgatavatīṃ parivartamānām /
gatvā smitaṃ kimapi caṇcalitāṃ niṣaṇṇāṃ sakhyā samāgatavatīmadhikaṃ smarāmi // MSS_0898

adyāpi tāṃ jagati varṇayituṃ na kaścic chaknotyadṛṣṭasadṛśīṃ ca parigrahaṃ me /
dṛṣṭaṃ dvayoḥ sadṛśayoḥ khalu yena rūpaṃ śakto bhavedyadi sa eva naro na cānyaḥ // MSS_0899

adyāpi tāṃ jaghanadarśanalālasena kṛṣṭaṃ mayā nivasanāṃcalamekapārśvāt /
pūjya sthitāmapi tato muhurākṛṣantīṃ mandākṣasaṃkucitanūtnamukhīṃ smarāmi // MSS_0900

adyāpi tāṃ jhaṭiti vakritakandharāgrāṃ nikṣiptapāṇikamalāṃ ca nitambamimbe /
vāsāṃsapārśvalasadulbaṇakeśapāśāṃ paśyāmi māṃ prati dṛśaṃ bahuśaḥ kṣipantīm // MSS_0901

adyāpi tāṃ dhavalaveśmani ratnadīpa- mālāmayūkhapaṭalairdalitāndhakāre /
prāptodyame rahasi saṃmukhadarśanārthaṃ lajjābhayārtanayanāmanucintayāmi // MSS_0902

adyāpi tāṃ nakhapadaṃ stanamaṇḍale yad dattaṃ mayāsyamadhupānavimohitena /
udbhinnaromapulakairbahubhiḥ samantāj jāgarti rakṣati vilokayati smarāmi // MSS_0903

adyāpi tāṃ na khalu vedmi kimīśapatnī śāpaṃ gatā surapateratha kṛṣṇalakṣmīḥ /
dhatraiva kiṃ nu jagataḥ parimohanāya sā nirmitā yuvatiratnadidṛkṣayā vā // MSS_0904

adyāpi tāṃ navavayaḥśriyaminduvaktrāṃ uttuṅgapīvarapayodharabhārakhinnām /
saṃpīḍya bāhuyugalena pibāmi vaktrāṃ pronmattavanmadhukaraḥ kamalaṃ yatheṣṭam // MSS_0905

adyāpi tāṃ nijavapuḥkṛśavedimadhyām uttuṅgasaṃbhṛtasudhāstanakumbhayugmām /
nānāvicitrakṛtamaṇḍanamṇḍitāṅgīṃ suptotthitāṃ niśi divā na hi vismarāmi // MSS_0906

adyāpi tāṃ nidhuvanaklamaniḥsahāṅgīm āpāṇḍugaṇḍapatitālakakuntalālīm /
pracchannapāpakṛtamantarivāvahantīṃ kaṇṭhāvasaktamṛdubāhulatāṃ smarāmi // MSS_0907

adyāpi tāṃ nidhuvane madhupānaraktāṃ līlādharāṃ kṛśatanuṃ capalāyatākṣīm /
kāśmīrapaṅkamṛganābhikṛtāṅgarāgāṃ karpūrapūgaparipūrṇamukhīṃ smarāmi // MSS_0908

adyāpi tāṃ nibhṛtavaktrakamāpatantaṃ māṃ dvāri vīkṣya sahasaiva miṣeṇa suptām /
mandaṃ mayi spṛśati kaṇṭakitāṅgayaṣṭim utphullagallaphalakāṃ bahuśaḥ smarāmi // MSS_0909

adyāpi tāṃ nṛpatiśekhararājaputrīṃ saṃpūrṇayauvanamadālasaghūrṇanetrīm /
gandharvayakṣasurakinnarnāgakanyāṃ svargādaho nipatitāmiva cintayāmi // MSS_0910

adyāpi tāṃpraṇayinīṃ mṛgaśāvakākṣīṃ pīyūṣapūrṇakucakumbhayugaṃ vahantīm /
paśyāmyahaṃ yadi purnadivasāvasāne svargāpavarganararājasukhaṃ tyajāmi // MSS_0911

adyāpi tāṃ prathamato varasundarīṇāṃ snehaikapātraghaṭitāmavanīśaputrīm /
haṃho janā mama viyogahutāśano'yaṃ soḍhuṃ na śakyata iti praticintayāmi // MSS_0912

adyāpi tāṃ prathamameva gataṃ virāgaṃ nirbhartsya roṣaparuṣairvacanairmuhurmām /
āndolanena ca nitambasahāyavṛttyā samcintayāmi ratye sudatīmabhīkṣṇam // MSS_0913

adyāpi tāṃ prathamasaṃgamajātalajjāṃ bālāṃ rasena patite mayi mandapīṭhe /
phūrkārakampitaśikhātaralapradīpaṃ karṇotpalena vinivārayatīṃ smarāmi // MSS_0914

adyāpi tāṃ bhujalatārpitakaṇṭhapāśāṃ vakṣaḥsthalaṃ mama pidhāya payodharābhyām /
īṣannimīlitasalīlavilocanāntāṃ paśyāmi mṛgdhavadanāṃ vadanaṃ pibantīm // MSS_0915

adyāpi tāṃ madanamandiravaijayantīm antargṛhe vivasanāṃ dadhatīṃ niśānte /
aṅgairanaṅgavisarairmama gāḍhmaṅgam āliṅgya keliśayane śayitāṃ smarāmi // MSS_0916

adyāpi tāṃ mama manaḥparitāpaśāntyai cakṣurviśuddhataṭinīmalasālasāṅgīm /
śrīkhaṇḍakhaṇḍakhacitācitagātrayiṣṭaṃ tanvīṃ sadā hṛdayaharṣanidhiṃ smarāmi // MSS_0917

adyāpi tāṃ mayi kapāṭasamīpalīne manmārgadattadṛśamānanadattahastām madgotracihnitapadaṃ mṛdukākalībhiḥ kiṃcittaraṅgamanasaṃ manasā smarāmi // MSS_0918

adyāpi tāṃ mayi kṛtāgasi dṛṣṭabhāvāṃ bhāṣāṃ lapatyapi muhurnigṛhītavācam /
rāmāṃ viruddhaghanamanyusabāṣpakaṇṭhāṃ niḥśvāsaśuṣyadadharāṃ rudatīṃ smarāmi // MSS_0919

adyāpi tāṃ mayi gate cirakopayantīṃ yāntīṃ samāgatavatīṃ parivartamānām /
ūrdhvasthitāṃ kimapi mañcatalaṃ niṣaṇṇāṃ śayyāṃ samāśratavatīmadhikaṃ smarāmi // MSS_0920

adyāpi tāṃ mayi dṛśaṃ tudatīṃ smarāmi smerāṃ smaradvarakarāṃ madhurāṃ sutārām /
atyudbalāṃ suratalāṃ kuṭilāṃ suśīlāṃ niṣpandamandasamadapramadaprasādām // MSS_0921

adyāpi tāṃ mayi nimīlitacārunetre ko'yaṃ vadetyabhihitāṃ vadatīṃ sakhībhiḥ /
mātarna vidya iti sasmitamullasantīm utphullagaṇḍaphalakāṃ nitarāṃ smarāmi // MSS_0922

adyāpi tāṃ masṛṇacandanapaṅkamiśra- kastūrikāparimalotthavisarpigandām /
anyonyacañcupuṭacumbanalagnapakṣma - yugmābhirāmanayanāṃ śayane smarāmi // MSS_0923

adyāpi tāṃ mukhagatairaruṇaiḥ karāgrair āpṛcchyamānamapi māṃ na vibhāṣayantīm /
tadvāṣpapūritadṛśaṃ bahu niḥśvasantīṃ cintākulāṃ kimapi namramukhīṃ smarāmi // MSS_0924

adyāpi tāṃ punaḥ kamalāyatākṣīṃ paśyāmi pīvarapayodharabhārakhinnām /
saṃpīḍya bāhuyugalena pibāmi vaktram unmattavanmadhukaraḥ kamalaṃ yatheṣṭam // MSS_0925

adyāpi tāṃ yadi punaḥ śravaṇāyatākṣīṃ paśyāmi dīrghavirahajvaritāṅgayaṣṭim /
aṅgairahaṃ samupagūhma tato'tigāḍhaṃ nonmīlayāmi nayane na ca tāṃ tyajāmi // MSS_0926

adyāpi tāṃ rahasi darpaṇamīkṣamāṇām dṛṣṭvā sphuṭaṃ pratinidhiṃ mayi pṛṣṭhalīne /
paśyāmi vepathumatīṃ ca suvibhramāṃ ca lajjākulāṃ ca samudaṃ jitamanmathāṃ ca // MSS_0927

adyāpi tāṃ vidhṛtakajjalalolanetrāṃ pṛthvīṃ prabhūtakusumākulakeśapāśām /
sindūrasaṃlulitamauktikadantakāntim ābaddhahemakaṭakāṃ rahasi smarāmi // MSS_0928

adyāpi tāṃ vidhṛtakakajjalalolanetrāṃ pṛthvīṃ prabhūtakusumākulakeśapāśām /
sindūrasaṃlulitamauktikadantakāntim ābaddhahemakaṭakāṃ rahasi smarāmi // MSS_0929

adyāpi tāṃ virahavahri nipoḍitāṅgīṃ tanvīṃ kuraṅganayanāṃ surataikapātrīm /
nānāvicitrakutamaṇḍanamāvahantīṃ tāṃ rājahaṃsagamanāṃ sudatīṃ smarāmi // MSS_0930

adyāpi tāṃ vihasītāṃ kācabhāranamrāṃ muktākalāpadhavalīkṛtakaṇṭhadeśām /
tatkelimandaragirau kusumāyudhasya kāntāṃ smarāmi rucirojjvalapuṣpaketum // MSS_0931

adyāpi tāṃ śaśimukhīṃ navayauvanāḍhyāṃ pīnastanīṃ punarahaṃ yadi gaurakāntim /
paśyāmi manmathaśarānalapīḍitāṅgīṃ gātrāṇi saṃprati karomi suśītalāni // MSS_0932

adyāpi tāṃ śikharacāruvalakṣadantair mukhyāni kundamukulāni jitāṃ ca sādhvīm /
saṃcintayāmi satataṃ pravilolicittāṃ kāmeṣunīrajadṛśaṃ vanajāvataṃsām // MSS_0933

adyāpi tāṃ samapanītanitambavastrāṃ śyāmāṃ ca sādhvasarasākulavihvalāṅgīm /
ekena pāṇikamalena pidhāya gṛhyam anyena nābhikuharaṃ dadhatīṃ smarāmi // MSS_0934

adyāpi tāṃ salalitaślathakeśapāśām īṣatsamunmiṣitaghūrṇitavakranetrām /
suptotthitāṃ vidadhatīṃ muhuraṅgabhaṅga paśyāmi daṣṭamadharaṃ bahuśaḥ spṛśantīm // MSS_0935

adyāpi tāṃ sunipuṇaṃ yatatā mayāpi dṛṣṭaṃ na yatsadṛśato vadanaṃ kadācit /
saundaryanirjitarati dvijarājakānti kāntāmihātivimalatvamahāguṇena // MSS_0936

adyāpi tāṃ surataghūrṇanimīlitākṣīṃ srastāṅgayaṣṭagalitāṃśukakeśapāśām /
śṛṅgāravāriruhakānanarāhahaṃsīṃ janmāntare'pi nidhane'pyanucintayāmi // MSS_0937

adyāpi tāṃ suratajāgaraghūrṇamāna- tiryagvalattaralatārakdīrghanetrām /
śṛṅgārasārakamalākararājahaṃsīṃ vrīḍāvinamravadanāmuṣasi smarāmi // MSS_0938

adyāpi tāṃ suratatāṇḍavasūtradhāraṃ durvāradarpajaghanaglapitāṅgayaṣṭim /
aṅgaṃ rasaiḥ samupaguhya kaṭiṃ dadhānāṃ kiṃcinnimīlanayanāṃ manasā smarāmi // MSS_0939

adyāpi tāṃ suratatāṇḍavasūtradhārīṃ pūrṇendusundaramukhīṃ madavihvalāṅgīm /
tanvīṃ viśālajaghanastanabhāranamrāṃ vyālolakuntalakalāpavatīṃ smarāmi // MSS_0940

adyāpi tāṃ suratalabdhayaśaḥpatākāṃ lambālakāṃ virahapāṇḍuragaṇḍabhittim /
svapne'pi lolanayanāṃ kṣaṇadṛṣṭanaṣṭāṃ vidyāṃ pramādaguṇitāmiva saṃsmarāmi // MSS_0941

adyāpi tāṃ surabhinirbharadantabhājaṃ dhāvantamāsyakamalaṃ calacañcarīkam /
kiṃciccalallalitakuñcitavāmanetrāṃ paśyāmi kelikamalena nivārayantīm // MSS_0942

adyāpi tāṃ suvadanāṃ valabhau niṣaṇṇāṃ tadgehasaṃnidhipade mayi dṛṣṭamātre /
vītottarāṃ priyasakhīṣu kutasmarāsu lajjāvilāsahasitāṃ hṛdi cintayāmi // MSS_0943

adyāpi tāṃ suvadanāṃ stanabhāranabhrāṃ śyāmāṃ ca vāmanayanāṃ ramaṇīyagātrīm /
nidrālasāmalakanirjitaṣaṭpadāliṃ saṃcintayāmi satataṃ smaravaijayantīm // MSS_0944

adyāpi tāṃ suśayitāṃ kṣaṇaviprabuddhāṃ nidrālasāṃ hṛdi vahāmi kṛtāṅgabhaṅgām /
jṛmbhāvatīrṇamukhamārutagandhalabdha- mughabhramadbhramaravibhramalolanetrām // MSS_0945

adyāpi tāṃ stimitavastramivāṅgalagnāṃ prauḍhapratāpamadanānalataptadehām /
bālāmanāthaśaraṇāmanukampanīyāṃ prāṇādhikāṃ kṣaṇamahaṃ na hi vismarāmi // MSS_0946

adyāpi tāni smitamukhīṃ puruṣāyiteṣu lambālakākulakapolalatāṃ smarāmi /
āndolanaśramajalākulavihvalāṅgīṃ śvāsottaraṃ ca nibhṛtaṃ ca muhurvadantīm // MSS_0947

adyāpi tāni parivartitakaṃdharāṇi kiṃcitkṣutatruṭitakañcukajālakāni /
tasyā bhujāgraluladudvalakuntalāni citte sphuranti mama vakravilocanāni // MSS_0948

adyāpi tāni mama cetasi saṃsphuranti karṇāntasaṃgatakaṭākṣanirīkṣitāni /
tasyāḥ smarajvarakarāṇi madālasāni līlāvilāsabahulāni vilocanāni // MSS_0949

adyāpi tāni mama cetasi saṃsphuranti bimboṣṭhadeśaparikīrṇaśucismatāni / MSS_0950

adyāpi tāni mṛduvākyasubhāṣitāni tirthagvivarttinayanāntanirīkṣaṇāni līlālasāñcitagatāni śucismitāni tasyāḥ smarāmi madavibhramaceṣṭitāni // MSS_0951

adyāpi tāmanibhṛtakramamāgataṃ ca māṃ dvāri vīkṣya śayane nimiṣeṇa suptām /
mandaṃ mayi spṛśati kaṇḍakitāṅgayaṣṭim utphullagaṇḍaphalakāṃ bahuśaḥ smarāmi // MSS_0952

adyāpi tāmanunayatyapi cāṭupūrvaṃ kopāt prākṛtamukhīṃ mayi sāparādhe /
āliṅgati prasabhamutpulakāṅgayaṣṭiṃ māmete duḥsahamivoktavatīṃ smarāmi // MSS_0953

adyāpi tāmanunayatyapi mayyasaktāṃ vyāvṛttya keliśayane śayitāṃ parācīm /
nidrākulāmiva mamābhimukhībhavantīṃ prātarmadaṅganihitaikabhujāṃ smarāmi // MSS_0954

adyāpi tāmabhiviśālanitambabimbāṃ gambhīranābhikuharāṃ tanumadhyabhāgām /
amlānakomalamṛṇālasamānabāhuṃ līlālasāñcitagatiṃ manasā smarāmi // MSS_0955

adyāpi tāmaruṇayatyaruṇentarikṣam āpṛcchamānamapi nāma vidhārayantīm /
utthāpya niścaladṛśau mama niḥśvasantīṃ cintākulāṃ kimapi namramukhīṃ smarāmi // MSS_0956

adyāpi tāmalamasīlitacārunetrāṃ loladbhujāvalayajhaṃkṛtimāvahantīm /
vellatkarorukucamunnamitasvakarṇe kaṇḍūyanaṃ vidadhatīṃ hṛdi cintayāmi // MSS_0957

adyāpi tāmavahitāṃ manasācalena saṃcintayāmi yuvatīṃ mama jīvitāśām /
nānyopabhuktanavayauvanabhārasārāṃ janmāntare'pi mama saiva gatiryathā syāt // MSS_0958

adyāpi tāmavigaṇayya kṛtāparādham āpādamūlapatitaṃ sahasā calantīm /
vastrāñcalaṃ mama karānnijamākṣipantīṃ mā meti roṣaparuṣaṃ vadatīṃ smarāmi // MSS_0959

adyāpi tāmahamalajjitapūrvaghṛṣṭe śayyātale suśayitāṃ madanotsavāya /
vīrṇāvatīṃ vikacacampakapuṣpanāsāṃ dhyāyāmi cetasi sadā nadatīṃ śubhāṅgīm // MSS_0960

adyāpi tāmita itaśca puraśca paścād antarbahiḥ parita eva paribhramantīm /
paśyāmi phullakanakāmbujasaṃnibhen vaktreṇa tiryagapavartitalocanena // MSS_0961

adyāpi tāmupavane paricārayuktāṃ saṃcintayāmyupagatāṃ madanotsavāya /
māṃ pārśvasaṃnihitalokabhayāt saśaṅkaṃ vyāvartitekṣaṇamanukṣaṇamīkṣamāṇām // MSS_0962

adyāpi tāmubhayapārśvagahāraramyāṃ vāsantikākusumabhāsittakañcukāṃ ca /
rākābhirāmavidhumaṇḍalavalguvavatrāṃ lāvaṇyanirjjitarayāṃ satataṃ smarāmi // MSS_0963

adyāpi tāmurasijadvayamunnamayya madhye valitritayalakṣitaromarājim /
dhyāyāmi vellitabhujāṃ vihitāṅgabhaṅgaṃ vyājena nābhikuharaṃ mama darśayantīm // MSS_0964

adyāpi tiṣṭhati dṛśoridamuttarīyaṃ dhartuṃ punaḥ stanataṭe galitaṃ pravṛttā /
vācaṃ niśamya nayanaṃ nayanaṃ mameti kiṃcittadā yadkarot smitamāyatākṣī // MSS_0965

adyāpi durnivāraṃ stutikanyā bhajati kaumāram /
madbhyo na rocate sā- 'santo'pyasyai na rocante // MSS_0966

adyāpi dhāvati manaḥ kimahaṃ karomi sārdhaṃ sakhībhirapi vāsagṛhe sukānte /
kāntāṅgasaṃgaparihāsavicitranṛtye krīḍābhirāma iti yātu madīyakālaḥ // MSS_0967

adyāpi na sphurati kesarabhāralakṣmīr na preṅkhati dhvanitamadraguhāntareṣu /
mattāstathāpi kariṇo hariṇādhipasya paśyanti bhītamanasaḥ padavīṃ vaneṣu // MSS_0968

adyāpi nirmalaśaracchaśigaurakānti ceto munerapi haret kimutāsmadīyam /
vaktraṃ sudhāmayamahaṃ yadi tat prapadye cumban pibāmyavirataṃ vyathate mano me // MSS_0969

adyāpi nānaṃ harakopavahnis tvayi jvalatyaurva ivāmburāśau /
tvamanyathā manmatha madvidhānāṃ bhasmāvaśeṣaḥ kathamevamuṣṇaḥ // MSS_0970

adyāpi rojjhati haraḥ kila kālakūṭaṃ kūrmo bibharti dharaṇīṃ puṣṭhabhāge /
ambhonidhirvahati duḥsahavāḍavāgniṃ aṅgīkṛtaṃ sukṛtinaḥ paripālayanti // MSS_0971

adyāpi mārutavidhūtalatāvitānāṃ vīṇāvinodaracanāṃ mama jīviteśām /
pañceṣurāṣṭrakamalāṃ śubhavedimadhyāṃ dhyāyāmi cetasi sartīṃ madanābhirāmām // MSS_0972

adyāpi me niśi divā hṛdayaṃ dunoti pūrṇendusundarasukhaṃ mama vallabhāyāḥ /
lāvaṇyanirjitaratikṣatakāmadarpaṃ bhūyaḥ puraḥ pratipadaṃ na vilokyate yat // MSS_0973

adyāpi me varatanormadhurāṇi tasyā yānyarthavanti na ca yāni nirarthakāni /
nidrānimīlitadṛśo madamantharāyās tānyakṣarāṇi hṛdaye kimapi dhvananti // MSS_0974

adyāpi ye na vihitā vipulāḥ prabandhā vidyotamānavibhavāḥ sukhayanti viśvam /
so'yaṃ dviśuddhaguruvaṃśabhavaḥ prasiddho gopāladatta upameyapadaṃ kathaṃ syāt // MSS_0975

adyāpi vāsagṛhato mayi nīyamāne durvārabhīṣaṇakarairyamadūtakalpaiḥ /
kiṃ kiṃ tayā bahuvidhaṃ na kṛtaṃ madarthe vaktuṃ na pāryata iti vyathate mano me // MSS_0976

adyāpi vismayakarī tridaśān vihāya buddhirbalāccalati me kimahaṃ karomi /
jānannapi pratimuhūrtamihāntakāle kānteti vallabhatareti mameti dhīrā // MSS_0977

adyāpi śītadyutirātmabimbaṃ nirmāya nirmāya punarbhunakti /
tasyā mukhenāyatalocanāyāḥ kartuṃ na śaktiḥ sadṛśaṃ priyāyāḥ // MSS_0978

adyāpi śravasī na kuṇḍalacale kelikvaṇatkaṅkaṇau bāhū nāpi na hārihāravalayāluṇṭhā ca kaṇṭhāvaniḥ /
asyāḥ paśya tathāpi paṅkajadṛśo viśvaṃ priyaṃ bhāvukaṃ paśyāmaḥ sphuṭatāvibhūṣaṇakarābhogaṃ vapurvaibhavam // MSS_0979

adyāpi sā mama manastaṭinī sadāste romāñcavīcivilasadvipulasvabhāvā /
kādambakeśararuciḥ kṣatavīkṣaṇaṃ māṃ gātraklamaṃ kathayatī priyarājahaṃsī // MSS_0980

adyāpi sundari tavānanacandrabimbaṃ bandīkṛtāmbujayugaṃ paricumbya cetaḥ /
tvatsaṃgamodbhavasukhaṃ tanute tathāpi vairaṃ karoti karuṇāvikalo vivekaḥ // MSS_0981

adyāpi stanaśailadurgaviṣame sīmantinīnāṃ hṛdi sthātuṃ vāñchati māna eṣa dhigiti krodhādivālohitaḥ /
udyaddūrataraprasāritakaraḥ karṣatyasau tatkṣaṇāt phullatkairavakośaniḥsaradaliśreṇīkṛpāṇaṃ śaśī // MSS_0982

adyāpi hariharādibhir amarairapi tattvato na vijñātāḥ /
bhramavibhramabahumohā veśyāḥ saṃsāramāyāśca // MSS_0983

adyāpi hi nṛśaṃsasya pituste divaso gataḥ /
tamasā pihitaḥ panthā ehi putraka śevahe // MSS_0984

adyāpyaśokanavapallavaraktahastāṃ muktāphalapracayacumbitacūcukāgrām /
antaḥsmitocchvasitapāṇḍuragaṇḍabhittiṃ tāṃ vallabhāmalasahaṃsagatiṃ smarāmi // MSS_0985

adyāpyahaṃ calitacārunimīlitākṣam āsyaṃ smarāmi satataṃ suratāvasāne /
tatkālaniśvasitaniḥsṛtakāntikāntaṃ svedodabinduparidanturitaṃ priyāyāḥ // MSS_0986

adyāpyahaṃ varavadhūsuratopabhogaṃ jīvāmi nānyavidhinā kṣaṇamantareṇa /
tadbhrātaro maraṇameva hi duḥkhaśāntyai vijñāpayāmi bhavatastvaritaṃ lunīdhvam // MSS_0987

adyāpyahaṃ vikacakundasamānadantaṃ tiryagvivartitaviśālavilocanāntam /
tasyā mukhaṃ suvijitendu na vismarāmi codyaṃ kṛtajña iva sādhukṛtopakāram // MSS_0988

adyāpyahaṃ sarasamañjulabhṛṅganādam īṣatsmarollasitarāgasupāṇḍugaṇḍam /
paśyāmi pūrṇaśaradindusamānakānti tasyā mukhaṃ vikacapaṅkajapātranetram // MSS_0989

adyāpyaho jagati sundaralakṣapūrṇe anyānyamuttamaguṇādhikasaṃprapanne /
anyābhirapyupamituṃ na mayā ca śakyaṃ rūpaṃ tadīyamiti me hṛdaye vitarkaḥ // MSS_0990

adyāpyunmadayātudhānataruṇīcañ catkarāsphālana- vyāvalgannṛkapālatālaraṇitairnṛtyatpiśācāṅganāḥ /
udgāyanti yaśāṃsi yasya vitatairnādaiḥ pracaṇḍānila- prakṣubhyatkarikumbhakūṭakuharavyaktai raṇakṣoṇayaḥ // MSS_0991

adyābhogini gāḍhamarmanivahe harmyāgravedījuṣāṃ sadyaścandanaśoṣiṇi stanataṭe saṅge kuraṅgīdṛśām /
prāyaḥ praślathayanti puṣpadhanuṣaḥ puṣpākare niṣṭhite nirvedaṃ navamallikāsurabhayaḥ sāyaṃtanā vāyavaḥ // MSS_0992

adyāmbhaḥ paritaḥ patiṣyati bhuvastāpo'dya nirvāsyati kṣetreṣvadya yatiṣyate janapadaḥ sasyeṣu paryutsukaḥ /
nartiṣyanti tavodaye'dya jalada vyālolapucchacchada- cchatracchāditamaulayo diśi diśi krīḍālasāḥ kekinaḥ // MSS_0993

adyārabhya kaṭhorakārmukalatāvinyastahastāmbujas tāvanna prakaṭīkaromi nayane śoṇe nimeṣodayān /
yāvat sāyakakotipāṭitaripukṣmāpālamauliskhalan mallīmālyapatatparāgapaṭalairāmodinī medinī // MSS_0994

adyārabhya na hi priye punarahaṃ mānasya vā bhājanaṃ gṛhṇīyāṃ viṣarūpiṇaḥ śaṭhamaternāmāpi saṃkṣepataḥ /
kiṃ tenaiva vinā śaśāṅkakiraṇaspaṣṭāṭṭahāsā niśā naiko vā divasaḥ payodamalino yāyān mama prāvṛṣi // MSS_0995

adyāśanaṃ śiśujanasya balena jātaṃ śvo vā kathaṃ nu bhaviteti vicintayantī /
ityaśrupātamalinīkṛtagaṇḍadeśā neccheddaridragṛhiṇī rajanīvirāmam // MSS_0996

adyedaṃ śva idaṃ tathā parudidaṃ kṛtyaṃ parāri tvadaś cetaścintayasītthameva satataṃ nirvyākulaṃ re kutaḥ /
tatkālaṃ vilasanmanorathalatākāntāradāvānalo yasmin daṇḍadharaṃ smariṣyasi sakhe so'pyasti kaścit kṣaṇaḥ // MSS_0997

adyeśvarāścāraṇagāyanānāṃ sadaiva kalpadrumavat phalanti /
sadbhyastu kiṃcid vacasaiva sāyaṃ dīpāya karpūramivārpayanti // MSS_0998

adyaike prātarapare vitate'hni tathā pare /
yānti niḥsīmni saṃsāre kaḥ sthātā nanu śocati // MSS_0999

adyaiva kuru yacchreyo mā tvā kālo'tyagādayam /
akṛteṣveva kāryeṣu mṛtyurvai saṃprakarṣati // MSS_1000

adyaiva kuru yacchreyo vṛddhaḥsan kiṃ kariṣyasi /
svagātrāṇyapi bhārāya bhavanti hi viparyaye // MSS_1001

adyaiva yat pratipadudgatacandralekhā- sakhyaṃ tvayā tanuriyaṃ gamitā varākyāḥ /
kānte gate kusumasāyaka tat prabhāte bāṇāvalīṃ kathaya kutra vimokṣyasi tvam // MSS_1002

adyaiva śvaḥ paraśvastricaturadivasānantaraṃ sāyamahni prātaḥ prāhṇe parāhṇe kṣaṇamiha nivasa prasthito'bhyehi bhūyaḥ /
itthaṃ rekātirekānaviditakapaṭaprakriyānarthisārthān atyarthaṃ vyarthayanti pratidivasamaho rājadhānyāṃ vadānyāḥ // MSS_1003

adyaiva hasitaṃ gītaṃ krīḍitaṃ yaiḥ śarīribhiḥ /
adyaiva te na dṛśyante paśya kālasya ceṣṭitam // MSS_1004

adyotsaṅgavasadbhujaṃgakavalakleśādiveśācala- prāleyaplavanecchayānusarati śrīkhaṇḍaśailānilaḥ /
kiṃ ca snigdharasālamaulimukulānyālokya harṣodayād unmīlanti kuhūḥkuhūriti kalottālāḥ pikānāṃ giraḥ // MSS_1005

adyodyānagṛhāṅgaṇe sakhi mayā svapnena lākṣāruṇaḥ protkṣipto'yamaśokadohadavidhau pādaḥ kvaṇannūpuraḥ /
tāvat kiṃ kathayāmi kelipaṭunā nirgatya kuñjodarād ajñātopanatena tena sahasā mūrdhnaiva saṃbhāvitaḥ // MSS_1006

adyonmīlanmalayapavanoddhūtacūtāṃkurāgra- grāsāsvādādadhikamadhurairuccaradbhirninādaiḥ /
kvāpi kvāpi smarahutavahoddīpanāyādhvagānāṃ hotuṃ prāṇānṛcamiva pikaḥ sāmidhenīmadhīte // MSS_1007

adrākṣīdapanidrakorakabharavyānamravallīskhalad- dhūlīdurdinasūditāmbaramasāvudyānamurvīpatiḥ /
āsthānībhavanaṃ vasantanṛpaterdevasya cetobhuvaḥ satrāgāramanuttaraṃ madhulihāmekaṃ prapāmaṇḍapam // MSS_1008

adrākṣurye narendrā drupadatanubhuvaḥ keśapāśāvakṛṣṭiṃ cakrurvākārayan vā manasi kimaparaṃ ye'nvamanyanta mohāt /
sarveṣāmeva teṣāṃ samaramakhabhuvi krodhavahṇau juhoti dvitrairhuṃkāramntrairabhijanasamidho madhyamaḥ pāṇḍaveyaḥ // MSS_1009

adriṣvañjanapuñjakānti jaladraprāyaṃ ca mūle diśām ūrdhvaṃ nīlavitānakalpabhavanau jambālalepopamam /
tīre nīranidhestamālaviṭapicchāyāṃ ca sāyaṃ śanair udgacchatyabhisārikāpriyatamapremānukūlaṃ tamaḥ // MSS_1010

adreḥ kiṃ svidvahati pavanaḥ śṛṅgamityunmukhībhir dṛṣṭotsāhaścakitacakitaṃ mugdhasiddhāṅganābhiḥ /
sthānādasmāt sarasaniculādutpatodaṅmukhaḥ khaṃ diṅnāgānāṃ pathi pariharan sthūlahastāvalepān // MSS_1011

adrohaḥ śaucānām acāpalaṃ vrataviśeṣaniyamānām /
paiśunyamapriyāṇāṃ vṛtticchedo nṛśaṃsacaritānām // MSS_1012

adrohaḥ sarvabhūteṣu karmaṇā manasā girā /
anugrahaśca dānaṃ ca satāṃ dharmaḥ sanātanaḥ // MSS_1013

adrohasamayaṃ kṛtvā munīnāmagrato hariḥ /
jaghāna namuciṃ paścād apāṃ phenena pārthiva // MSS_1014

adrohe samayaṃ kṛtvā ciccheda namuceḥ śiraḥ /
śakraḥ sā hi matā tasya ripau vṛttiḥ sanātanī // MSS_1015

adrau jīrṇadarīṣu saṃkaṭasarittīreṣu nimnonnate ūḍhā yena vṛṣeṇa dhūrbalavatā yūnā dvitīyena yā /
tāṃ vṛddho'pi kṛśo'pi durvaha dhuraṃ voḍhuṃ sa eva kṣamo rathyābhaḍḍalakaiḥ sametya bahubhirnākṛṣyate'nyairvṛṣaiḥ // MSS_1016

advitīyaṃ nijaṃ loke vilokya vahato mudam /
pramadāvadanasyāyaṃ darpodreko na tu smitam // MSS_1017

advisaṃvīkṣaṇaṃ cakṣur advisaṃmīlanaṃ manaḥ /
advisaṃsparśanaḥ pāṇir adya me kiṃ kariṣyati // MSS_1018

adveṣapeśalaṃ kuryān manaḥ kusumakomalam /
babhūva dveṣadoṣeṇa devadānavasaṃkṣayaḥ // MSS_1019

advaitaṃ sukhaduḥkhayoranuguṇaṃ sarvāsvavasthāsu yad viśrāmo hṛdayasya yatra jarasā yasminnahāryo rasaḥ /
kālenāvaraṇātyayāt pariṇate yatsnehasāre sthitaṃ bhadraṃ tasya sumānuṣasya kathamapyekaṃ hi tat prāpyate // MSS_1020

advaitamekaṃ sukhamunnayantī vismārayantī jagadeva tanvi /
muktāśritāmātmaruciṃ vadantī vedāntasiddhāntakatheva bhāsi // MSS_1021

advaitoktipaṭūn vaṭūnapi vayaṃ bālān namaskurmahe ye tu dvandvavadāstadīyaśirasi nyasyāma vāmaṃ padam /
siṃhaḥ svīyaśiśūn niveśya hṛdaye sāndrādarādāmṛśaty āveśena bhinatti saṃbhramapadaṃ mattebhakumbhasthalam // MSS_1022

advaidhamānasaṃyuktaṃ śūraṃ dhīraṃ vipaścitam /
na śrīḥ saṃtyajate nityam ādityamiva raśmayaḥ // MSS_1023

adhaḥ karoti yadratnaṃ mūrdhnā dhārayate tṛṇam /
doṣastasyaiva jaladhe ratnaṃ ratnaṃ tṛṇaṃ tṛṇam // MSS_1024

adhaḥ kurvanprajāḥ sarvā bahudhā mahimolbaṇaḥ /
rājā parvaṇi kasmiṃścid bhavedahibhayākulaḥ // MSS_1025

adhaḥ kṣipanti kṛpaṇā vittaṃ tatra yiyāsavaḥ /
santastu gurutīrthādau taduccaiḥpadakāṅkṣiṇaḥ // MSS_1026

adhaḥ paśyan pārśvadvayavalitasācīkṛtaśirāḥ śanaiḥ pakṣasthairyāddivi masṛṇacakrākṛtigatiḥ /
cirāccillastiryaktvaritataramāhāranipuṇo nipatyaivākasmāccalacaraṇamūrdhaṃ prapatati // MSS_1027

adhaḥ paśyasi kiṃ bāle patitaṃ tava kiṃ bhuvi /
re re mūrkha na jānāsi gataṃ tāruṇyamauktikam // MSS_1028

adhaḥpuṣpī śaṅkhapuṣpī lajjālurgirikarṇikā /
nīlinī sahadevā ca putramārjārikā tathā // MSS_1029

viṣṇukrāntā ca sarvāsāṃ jaṭā grāhyā raverdine /
baddhā bhuje vilepādvā kāye śastraughavārikā // MSS_1030

adhaḥ śete śambhustava caraṇamādhāya hṛdaye bahirdvāre dauvārikapadamupetaḥ kamalajaḥ /
viḍaujā vaiphalyaṃ bhajati nijavijñāpanakṛte tāvahaṃ dāsaḥ syāmiti manasi lajjā bhayamapi // MSS_1031

adhaḥsthā ramate nārī uparisthaśca kāmukaḥ /
prasiddhaṃ tadrataṃ jñeyaṃ grāmabālajanapriyam // MSS_1032

adhanaṃ khalu jīvadhanaṃ dhanamardhadhanaṃ mahaddhanaṃ dhānyam /
atidhanametat sundari vidyā ca tapaśca kīrtiśca // MSS_1033

adhanā api te dhanyāḥ sādhavo gṛhamedhinaḥ /
yadgṛhā hyarhavaryāmbutṛṇabhūmīśvarāvarāḥ // MSS_1034

adhanā dhanamicchanti vācaṃ caiva catuṣpadāḥ /
mānavāḥ svargamicchanti mokṣamicchanti devatāḥ // MSS_1035

adhanenārthakāmena nārthaḥ śakyo vivitsatā /
arthairarthā nibadhyante gajairiva mahāgajāḥ // MSS_1036

adhano dātukāmo'pi saṃprāpto dhanināṃ gṛham /
manyate yācako'yaṃ dhig dāridryaṃ khalu dehinām // MSS_1037

adhano'yaṃ dhanaṃ prāpya mādyannuccairna māṃ smaret /
iti kāruṇiko nūnaṃ dhanaṃ me bhūri nādadat // MSS_1038

adhamaṃ bādhate bhūyo duḥkhavego na tattamam /
pādadvayaṃ vrajatyāśu śītasparśo na cakṣuṣī // MSS_1039

adhamamitrakumitrasamāgamaḥ priyaviyogabhayāni daridratā /
apayaśaḥ khalu lokaparābhavo bhavati pāpataroḥ phalamīdṛśam // MSS_1040

adhamarṇaśavājīviśrāddhabhugduṣṭabhūbhujām /
abhiprāyā na siddhyanti tenedaṃ dhriyate jagat // MSS_1041

adhamāḥ kalimicchanti saṃdhimicchanti madhyamāḥ /
uttamā mānamicchanti māno hi mahatāṃ dhanam // MSS_1042

adhamā dhanamicchanti dhanamānau ca madhyamāḥ /
uttamā mānamicchanti māno hi mahatāṃ dhanam // MSS_1043

adhame saṃgatā lakṣmīr nopabhogāya kasyacit /
kardame patitā chāyā sahakārataroriva // MSS_1044

adhamo mātukāraśca dhātukāraśca madhyamaḥ /
dhātumātukriyākāra uttamaḥ parikīrtitaḥ // MSS_1045

adhamo lakṣaṇajñaḥ syān madhyamo lakṣyamācaret /
lakṣyalakṣaṇasaṃyukta uttamaḥ parikīrtitaḥ // MSS_1046

adharaṃ kila bimbanāmakaṃ phalamasmāditi bhavyamanvayam /
labhate'dharabimbamityadaḥ padamasyā radanacchadaṃ vadat // MSS_1047

adharaḥ kisalayarāgaḥ komalaviṭapānukāriṇau bāhū /
kusumamiva lobhanīyaṃ yauvanamaṅgeṣu saṃnaddham // MSS_1048

adharaḥ padmarāgo'yam anarghaḥ savraṇo'pi te /
mugdhe hastaḥ kimartho'yam apārtha iha dīyate // MSS_1049

adharadyutirastapallavā mukhaśobhā śaśikāntilaṅghinī /
tanurapratimā ca subhruvo na vidherasya kṛtiṃ vivakṣati // MSS_1050

adharamadhare kaṇṭhaṃ kaṇṭhe nidhāya bhujaṃ bhuje hṛdi ca hṛdayaṃ madhye madhyaṃ sarojadṛśo dṛḍham /
sarabhasamaho corāvūruṃ padaṃ ca pade balād gamayati jano dhanyaḥ kaścit samāṃ śiśire niśām // MSS_1051

adharamadhare kaṇṭhe kaṇṭhaṃ sacāṭu dṛśordṛśāv alikamalike kṛtvā gopījanena sasaṃbhramam /
śiśuriti rudan kṛṣṇo vakṣaḥsthale nihito'cirān- nibhṛtapulakaḥ smeraḥ pāyāt smarālasavigrahaḥ // MSS_1052

adharamamṛtaṃ kaḥ saṃdeho madhunyapi nānyathā madhuramadhikaṃ drākṣāyāśca prasannarasaṃ phalam /
sakṛdapi punarmadhyasthaḥ san rasāntaravijjano vadatu yadihānyat svādu syāt priyādaśanacchadāt // MSS_1053

adharasya madhurimāṇaṃ kucakāṭhinyaṃ dṛśostathā taikṣṇyam /
kavitāyāḥ paripākān anubhavarasiko vijānāti // MSS_1054

adharāmṛtapānena mamāsyamaparādhyatu /
mūrdhno kimaparāddhaṃ yaḥ pādau nāpnoti cumbitum // MSS_1055

adharāmṛtamādhurīdhurīṇo harilīlāmuralīnināda eṣaḥ /
pratatāna manaḥpramodamuccair hariṇīnāṃ hariṇīdṛśaṃ munīnām // MSS_1056

adharāmṛtena pittaṃ naśyati vāyuḥ payodharayugena /
anavarataratena kaphaṃ tridoṣaśamanaṃ vapurnāryāḥ // MSS_1057

adhareṇa samāgamād radānām aruṇimnā pihito'pi śuklabhāvaḥ /
hasitena sitena pakṣmalākṣyāḥ punarullāsamavāpa jātapakṣaḥ // MSS_1058

adhareṇonnatibhājā bhujaṃgaparipīḍitena te dūti /
saṃkṣobhitaṃ mano me jalanidhiriva mandarāgeṇa // MSS_1059

adhare navavīṭikānurāgo nayane kajjalamujjvalaṃ dukūlam /
idamābharaṇaṃ nitambanīnām itaradbhūṣaṇamaṅgadūṣaṇāya // MSS_1060

adhare binduḥ kaṇṭhe maṇimālā stanayuge śaśaplutakam /
tava sūcayanti ketaki kusumāyudhaśāstrapaṇḍitaṃ ramaṇam // MSS_1061

adhare madhurā sarasvatīyaṃ nanu karṇe maṇikarṇikāpravāhaḥ /
śirasi pratibhāti cāruveṇī kathameṇīnayanā na tīrtharājaḥ // MSS_1062

adhare vinihitavaṃśaṃ campakakusumena kalpitottaṃsam /
vinataṃ dadhānamaṃsaṃ vāmaṃ satataṃ namāmi jitakaṃsam // MSS_1063

adharo'yamadhīrākṣyā bandhujīvaprabhāharaḥ /
anyajīvaprabhāṃ hanta haratīti kimadbhutam // MSS_1064

adharoṣṭhe ca ghoṇāyāṃ gaṇḍayościbuke tathā /
muṣke nābhau trike kukṣāv āvartāstvatininditāḥ // MSS_1065

adharo'sau kuraṅgākṣyāḥ śobhate nāsikātale /
suvarṇanalikāmadhyān māṇikyamiva vicyutam // MSS_1066

adharmaṃ dharmamiti yā manyate tamasāvṛtā /
sarvārthān viparītāṃśca buddhiḥ sā pārtha tāmasī // MSS_1067

adharmaṃ dharmaveṣeṇa yadimaṃ lokasaṃkaram /
abhipatsye śubhaṃ hitvā kriyāvidhivivarjitam / MSS_1068

adharmaḥ kṣatriyasyaitad yad vyādhimaraṇaṃ gṛhe /
yuddhe tu maraṇaṃ yat syāt so'sya dharmaḥ sanātanaḥ // MSS_1069

adharmaḥ surasastasya cotkaṭairmadhurāyate /
yādṛśaiśca phalaiścaiva suphalo lobhapādapaḥ // MSS_1070

adharmadaṇḍanaṃ loke yaśoghnaṃ kīrtināśanam /
asvargyaṃ ca paratrāpi tasmāttat parivarjayet // MSS_1071

adharmadaṇḍanaṃsvargakīrtilokavināśanam /
samyaktu daṇḍanaṃ rājñaḥ svargakīrtijayāvaham // MSS_1072

adharmadrohasaṃyukte mitrajāte'pyupekṣaṇam /
ātmavanmitravarge tu prāṇānapi parityajet // MSS_1073

adharmapratiṣedhaśca nyāyamārgeṇa vartanam /
upakāryopakāritvam iti vṛttaṃ mahīpateḥ // MSS_1074

adharmamanyatra mahītale'smin saṃkṣobhahetuṃ malinaṃ vicārya /
niṣkāsanāyāsya ruṣeva deva sitaṃ yaśaḥ sarvadiśaḥ prayāti // MSS_1075

adharmarucayo mūḍhās tiryaggatiparāyaṇāḥ /
kṛcchrāṃ yonimanuprāpya na sukhaṃ vindate janāḥ // MSS_1076

adharmasādhanaṃ budhā mudhā na jantuhiṃsanaṃ sṛjantu vedanindayā bhajantu kevalaṃ dayām /
iti prabodhayan vidhiṃ vidhāya vaidikaṃ vidhiṃ viśuddhabodhabandhurantaredhi buddhadeva naḥ // MSS_1077

adharmastu mahāṃstāta bhavet tasya mahīpateḥ /
yo hared baliṣaḍbhāgaṃ na ca rakṣati putravat // MSS_1078

adharmādarjitaṃ dravyam alpakālaṃ tu tiṣṭhati /
tataḥ sapatnamayate samūlaṃ tena naśyati // MSS_1079

adharmeṇa ca yaḥ prāha yaścādharmeṇa pṛcchati /
tayoranyataraḥ praiti vidveṣaṃ vādhigacchati // MSS_1080

adharmeṇaidhate tāvat tato bhadrāṇi paśyati /
tataḥ sapatnāñ jayati samūlastu vinaśyati // MSS_1081

adharmeṣu rasastasya utkledairmadhurāyate /
tādṛśaiśca phalaiścaiva saphalo lobhapādapaḥ // MSS_1082

adharmopacitaṃ vittaṃ harantyanye'lpamedhasaḥ /
saṃbhojanīyāpadeśair jalānīva jalaukasaḥ // MSS_1083

adharmopārjitairarthairyaḥ karotyaurdhvadehikam /
na sa tasya phalaṃ pretya bhuṅkte'rthasya durāgamāt // MSS_1084

adharṣitānāṃ śūrāṇāṃ samareṣvanivartinām /
dharṣaṇāmarṣaṇaṃ bhīru maraṇādatiricyate // MSS_1085

adhaśca dūrapātitvaṃ same lakṣyaṃ suniścitam /
dṛḍhasphoṭaṃ prakurvīta ūrdhvasaṃsthānayogataḥ // MSS_1086

adhastanaśvabhrabhuvo na yāti ṣaṇ- na sarvanārīṣu na sañjito'nyataḥ /
na jāyate vyantaradevajātiṣu na bhāvanajyotiṣikeṣu sadruciḥ // MSS_1087

adhastācchidritaṃ carma durgandhiparipūritam /
mūtraklinnaṃ ca tasyārthe mā rājan brāhmaṇān vadhīḥ // MSS_1088

adhākṣīnno laṅkāmayamayamudanvantamatarad viśalyāṃ saumitrairayamupanināyauṣadhivarām /
iti smāraṃ smāraṃ tvadarinagarībhittilikhitaṃ hanūmantaṃ dantairdaśati kupito rākṣasagaṇaḥ // MSS_1089

adhāri padmeṣu tadaṅghriṇā ghṛṇā kva tacchayacchāyalavo'pi pallave /
tadāsyadāsye'pi gato'dhikāritāṃ na śāradaḥ pārvikaśarvarīśvaraḥ // MSS_1090

adhārmikāṃśca krūrāṃśca dṛṣṭadoṣān nirākṛtān /
parebhyo'bhyāgatāṃścaiva dūrādetān vivarjayet // MSS_1091

adhārmiko naro yo hi yasya cāpyanṛtaṃ dhanam /
hiṃsāratiśca yo nityaṃ nehāsau sukhamedhate // MSS_1092

adhikaḥ syāt pituḥ putro rūpavidyāparākramaiḥ /
tiṣṭhan pitrārjitapade subrahmaṇyastu tādṛśaḥ // MSS_1093

adhikaratalatalpaṃ kalpitasvāpalīlā- parimilananimīlatpāṇḍimā gaṇḍapālī /
sutanu kathaya kasya vyañjayatyañjasaiva smaranarapatilīlāyauvarājyābhiṣekam // MSS_1094

adhikāra ṛṇaṃ garbhaś caturthaṃ śvānamaithunam /
āgame paramaṃ saukhyaṃ nirgame duḥkhakāraṇam // MSS_1095

adhikārābhiṣekeṣu mṛdaṅgavacanaṃ śṛṇu /
baddhā daṇḍahatā riktā bhaviṣyasi yathā vayam // MSS_1096

adhikāreṇa yo yuktaḥ kathaṃ tasyāsti khaṇḍanam /
nīceṣūpakṛtaṃ rājan bālukāsviva mudritam // MSS_1097

adhikonnatairapi sudāruṇānvitair asakṛdbhramatpaśugaṇāṅghripīḍitaiḥ /
vidhisiddhanaikaguṇasasyasampadāṃ virasasvabhāvakaṭhinairalaṃ khalaiḥ // MSS_1098

adhigaganamanekāstārakā rājyabhājaḥ pratigṛhamiha dīpā darśayanti prabhutvam /
diśi diśi vilasantaḥ santi khadyotapotāḥ savitari paribhūte kiṃ na lokairvyaloki // MSS_1099

adhigataparamārthān paṇḍitān māvamaṃsthās tṛṇamiva laghu lakṣmīrnaiva tān saṃruṇaddhi /
abhinavamadalekhāśyāmagaṇḍasthalānāṃ na bhavati bisatanturvāraṇaṃ vāraṇānām // MSS_1100

adhigatamahimā manuṣyaloke bata sutarāmavasīdati pramādī /
gajapatiruruśailaśṛṅgavaṛṣmā gururavamajjati paṅkabhāṅna dāru // MSS_1101

adhigatyedṛgetasyā hṛdayaṃ mṛdutāmucoḥ /
pratīma eva vaimukhyaṃ kucayoryuktavṛttayoḥ // MSS_1102

adhigamanamanekāstārakā rājamānāḥ pratigṛhamapi dīpāḥ prāpnuvanti pratiṣṭhām /
diśi diśi vikasantaḥ santi khadyotapotāḥ savitari udite'smin kiṃ nu lokairaloki // MSS_1103

adhigamyāśu golakṣyam ekaḥ śāmyati mārgaṇaḥ /
anurodhasthiratayā na ca śakyapratāraṇaḥ // MSS_1104

adhidehali hanta hemavallī śaradinduḥ sarasīruhe śayānaḥ /
adhikhañjanacañcu mauktikālī phalitaṃ kasya sujanmanastapobhiḥ // MSS_1105

adhipañcavaṭīkuṭīravarti sphuṭitendīvarasundarorumūrti /
api lakṣmaṇalocanaikalakṣyaṃ bhajata brahma saroruhāyatākṣam // MSS_1106

adhibhillapalligallaṃ syādballavapallavo'pi vācālaḥ /
nāgaranaravarapariṣadi kasya mukhādakṣaraṃ kṣarati // MSS_1107

adhiyāmini gajagāmini kāmini saudāminīva yaṃ vrajasi /
jaladeneva na jāne kati kati sukṛtāni tena vihitāni // MSS_1108

adhirajani jagāma dhāma tasyāḥ priyatamayeti ruṣā srajāvanaddhaḥ /
padamapi calituṃ yuvā na sehe kimiva na śaktiharaṃ sasādhvasānām // MSS_1109

adhirajani priayasavidhe kathmapi saṃveśitā balād gurubhiḥ /
kiṃ bhaviteti saśaṅkaṃ paṅkajanayanā parāmṛśati // MSS_1110

adhirajanimukhe yaḥ sāndralākṣānurāgair vyatikarita ivoccaiḥ pāṭalatvaṃ dadhānaḥ /
uṣasi sa khalu dīpaḥ pānanirdhūtarāgaḥ sphuradadhara ivāyaṃ dhasaratvaṃ bibharti // MSS_1111

adhirajani vyādhagṛhe sukhamananabhūtamanubhūya /
apaśokakokamithunaṃ jīvanadānesamullasati / MSS_1112

adhirohārya pādābhyāṃ pāduke hemabhūṣite /
ete hi sarvalokasya yogakṣemaṃ vidhāsyataḥ // MSS_1113

adhilavaṅgamamī rajasādhikaṃ malinitāḥ sumanodalatālinaḥ /
sphuṭamiti prasavena puro'hasat sapadi kundalatā dalatālinaḥ // MSS_1114

adhiśrīrudyāne tvamasi bhavataḥ pallavacayo dhurīṇaḥ kalyāṇe tava jagati śākhā śramaharā /
mude puṣpollekhaḥ phalamapi ca tuṣṭyai tanabhṛtāṃ rasāla tvāṃ tasmāc chrayati śataśaḥ kokilakulam // MSS_1115

adhiṣṭhānaṃ samicchanti hyacalaṃ nirbale sati /
saṃsāre sarvabhūtānāṃ tṛṇabinduvadasthire // MSS_1116

adhītapañcāśugabāṇavañcane sthitā madantarbahireṣi ceduraḥ /
smarāśugebhyo hṛdaya bibhetu na praviśya tattvanmayasapuṭe mama // MSS_1117

adhītavidyairvigate śiśutve dhanorjite hāriṇi yauvane ca /
sevyā nitambāstu vilāsinīnāṃ tatastadarthaṃ dharaṇīdharāṇām // MSS_1118

adhītasya ca taptasya karmaṇaḥ sukṛtasya ca /
ṣaṣṭhaṃ bhajati bhāgaṃ tu prajā dharmeṇa pālayan //
ṣaḍbhāgasya na bhoktāsau rakṣate na prajāḥ katham // MSS_1119

adhītibodhācaraṇapracāraṇair daśāścatasraḥ praṇayannupādhibhiḥ /
caturdaśatvaṃ kṛtavān kutaḥ svayaṃ na vedmi vidyāsu caturdaśasvayam // MSS_1120

adhīte tu mahābhāṣye vyarthā sā padamañjarī /
nādhīte tu mahābhāṣye vyarthā sā padamañjarī // MSS_1121

adhītya caturo vedān dharmaśāstrāṇyanekaśaḥ /
paraṃ tattvaṃ na jānāti darvī pākarasāniva // MSS_1122

adhītya caturo vedān vyākṛtyāṣṭādaśa smṛtīḥ /
aho śramasya vaiphalyam ātmāpi kalito na cet // MSS_1123

adhītya nītiṃ yasmācca nītiyukto na dṛśyate /
anabhijñaśca sācivyaṃ gamitaḥ kena hetunā // MSS_1124

adhītya vedān parisaṃstīrya cāgnīn iṣṭvā yajñaiḥ pālayitvā prajāśca /
gobrāhmaṇārthe śastrapūtāntarātmā hataḥ saṃgrame kṣatriyaḥ svargameti // MSS_1125

adhītya sakalaṃ śrutaṃ ceramupāsya ghoraṃ tapo yadicchasi phalaṃ tayoraha hi lābhapūjādikam /
chinatsi tarupallavaprasarameva śūnyāśayaḥ kathaṃ samupalipsate surasamasya pakvaṃ phalam / MSS_1126

adhītyedaṃ yathāśāstraṃ naro jānāti sattamaḥ /
dharmopadeśavikhyātaṃ kāryākāryaṃ śubhāśubham // MSS_1127

adhīyate vijānanti virajyanti muhurmuhuḥ /
nātyantāya nivartante narā vaṣamyato vidheḥ // MSS_1128

adhīyīta brāhmaṇo'tho yajeta dadyādiyāt tīrthamukhyāni caiva /
adhyāpayedyājayeccāpi yājyān pratigrahān vā viditān pratīcchet // MSS_1129

tathā rājanyo rakṣaṇaṃ vai prajānāṃ kṛtvā dharmeṇāprayatto'tha dattvā /
yajñairiṣṭvā sarvavedānadhītya dārān kṛtvā puṇyakṛdāvased gṛhān // MSS_1130

vaiśyo'dhītya kṛṣigorakṣapaṇyair vittaṃ cinvan pālayannapramattaḥ /
priyaṃ kurvan brāhmaṇakṣatriyāṇāṃ dharmaśīlaḥ puṇyakṛdāvased gṛhān // MSS_1131

paricaryāṃ vandanaṃ brāhmāṇānāṃ nādhīyīta pratiṣiddho'sya yajñaḥ /
nityotthito bhūtaye'tandritahaḥ syād eṣa smṛtaḥ śūdradharmaḥ purāṇaḥ // MSS_1132

adhīraḥ karkaśaḥ stabdhaḥ kucelaḥ svayamāgataḥ /
ete pañca na pūjyante bṛhaspatisamā yadi // MSS_1133

adhīrākṣyāḥ pīnastanakalaśamāskandasi muhuḥ kramādūrudvandvaṃ kalayasi ca lāvaṇyalalitam /
bhujāśliṣṭo harṣādanubhavasi hastāhatikalām idaṃ vīṇādaṇḍaṃ prakaṭaya phalaṃ kasya tapasaḥ // MSS_1134

adhunā dadhimanthanānubandhaṃ kuruṣe kiṃ guruvibhramālasāṅgi /
kalaśastani lālasīti kuñje muralīkomalakākalī murāreḥ // MSS_1135

adhunā madhukarapatinā gilito'pyapakāradaṃpatī yena /
trātaḥ sa pālayettvāṃ vikārarahito vināyako lakṣmyāḥ // MSS_1136

adhṛtaparipatannicolabandhaṃ muṣitanakāramavakradṛṣṭipātaṃ /
prakaṭahasitamunnatāsyabimbaṃ purasudṛśaḥsmaraceṣṭitaṃ smarāmi // MSS_1137

adhṛta yadvirahoṣmaṇi sajjitaṃ manasijena tadūruyugaṃ tadā /
spṛśati tatkadanaṃ kadalītarur yadi marujvaladūṣaradūṣitaḥ // MSS_1138

adhogatiṃ ca samprāpya bisāḥ paṅkakalaṅkitāḥ /
guṇino nirguṇairdāśaiḥ kṛṣṭāḥ svāṅkuradarśitāḥ // MSS_1139

adhodṛṣṭinairkṛtikaḥ svārthasādhanatatparaḥ /
śaṭho mithyāvinītaśca bakavratacaro dvijaḥ // MSS_1140

adho'dhaḥ paśyataḥ kasya mahimā nopacīyate /
uparyupari paśyantaḥ sarva eva daridrati // MSS_1141

adhomukhī strīstanatulyatāptaye pratapya tīvraṃ sumahattaraṃ tapaḥ /
yadā na tāmāpa tadā hṛdi sphuṭaṃ vidīryate pakvamiṣeṇa dāḍimaḥ // MSS_1142

adhomukhaikadaṃṣṭreṇa viṣaśukrapravāhiṇā /
anena duścikitsyena jagaddaṣṭaṃ bhagāhinā // MSS_1143

adho'rdhe lakṣaṇaṃ yasya parārdhe naiva dṛśyate /
adhamaḥ sa bhavet khaṅgaḥ kṣitīśānāṃ bhayāvahaḥ // MSS_1144

adho'rdhe varṇa ekaḥ syād ūrdhvārdhe bhinnavarṇakaḥ /
varṇasaṃkaravān khaḍgo nṛpāṇāṃ bhayavardhanaḥ // MSS_1145

adhovidhānāt kamalapravālayoḥ śiraḥsu dānādakhilakṣamābhujām /
puredamūrdhvaṃ bhavatīti vedhasā padaṃ kimasyāṅkitamūrdhvarekhayā // MSS_1146

adhyayanamitrasaṅga- praveśayātrāvivāhadāneṣu /
śubhakāryeṣvakhileṣvapi śastaḥ somādhvagaḥ pavanaḥ // MSS_1147

adhyastāndhyamapūrvamarthadhiṣaṇairgrāhyaṃ pumarthāspadaṃ lakṣyaṃ lakṣaṇabhedataḥ śrutigataṃ nirdhūtasādhyārthakam /
āmnāyāntavibhātaviśvavibhavaṃ sarvāviruddhaṃ paraṃ satyaṃ jñānamanarthasārthavidhuraṃ brahma prapadye sadom // MSS_1148

adhyākrāntā vasatiramunāpyāśramaṃ sarvabhogye rakṣāyogādayamapi tapaḥ pratyahaṃ saṃcinoti /
asyāpi dyāṃ spṛśati vaśinaścāraṇadvandvagītaḥ puṇyaḥ śabdo muniriti muhuḥ kevalaṃ rājapūrvaḥ // MSS_1149

adhyāpayanti śāstrāṇi tṛṇīkurvanti paṇḍitān /
vismārayanti jātiṃ svāṃ varāṭāḥ pañcaṣāḥ kare // MSS_1150

adhyāpitasyośanasāpi nītiṃ prayuktarāgapraṇidhirdviṣaste /
kasyārthadharmau vada pīḍayāmi sindhostaṭāvogha iva pravṛddhaḥ // MSS_1151

adhyāpito'si kenaitāṃ maśaka kṣudratāmiha /
yasyaiva karṇe lagasi pīḍāṃ tasya karoṣi yat // MSS_1152

adhyāyodhanavedi mārgaṇakuśānāstīrya khaḍgasrucā hutvāreḥ palalaṃ caruṃ havirasṛk tanmastakasvastikaiḥ /
saṃveṣṭyāhavanīyamānasadasi khyo'sau pratāpānalo- 'sthāpi drāgudakāñjalīkṛtacatuḥpāthodhinā śrīmatā // MSS_1153

adhyāsāmāsuruttuṅgahemapīṭhāni yānyamī /
tairūhe kesarikrāntatrikūṭaśikharopamā // MSS_1154

adhyāsite vayasyāyā bhavatā mahatā hṛdi /
stanāvantarasaṃmāntau niṣkrāntau brūmahe bahiḥ // MSS_1155

adhyāsīnāśvavārairupajanitabhaye heṣamāṇaisturaṅgair garjatsphūrjanmahaujotkaṭakaraṭighaṭākoṭibhirduṣpraveśe/
saṃgrāme kalpakalpe'pyarijanavisarairmārgaṇaśreṇibaddhe badhye'vadhye nṛpe'pi prabhavati yavasaṃ prāṇaviśrāṇanāya // MSS_1156

adhyāsya śāntāṃ kukubhaṃ śrgālī narasya vāmā yadi rāraṭīti /
tadarthalābhaṃ vitaratyavaśyam arthakṣayaṃ dakṣiṇato raṭantī // MSS_1157

adhyāsya saurabheyaṃ mauktikaruciraṅgaṇeṣu vihitagatiḥ mānyaḥ sa eva hṛdi me gaurī vāmāṅgamāśritā yasya // MSS_1158

adhyāhāraḥ smaraharaśiraścandraśeṣasya śeṣa- syāherbhūyaḥ phaṇasamucitaḥ kāyayaṣṭīnikāyaḥ /
dugdhāmbhodhermuniculukanatrāsanāśābhyupāyaḥ kāyavyūhaḥ kva jagati na jāgartyadaḥ kīrtipūraḥ // MSS_1159

adhyeti nṛtyati lunāti minoti nauti krīṇāti hanti vapate cinute bibheti /
muṣṇāti gāyati dhinoti bibharti bhinte lobhena sīvyati paṇāyati yācate ca // MSS_1160

adhruveṇa śarīreṇa pratikṣaṇavināśinā /
dhruvaṃ yo nārjayeddharmaṃ sa śocyo mūḍhacetanaḥ // MSS_1161

adhruve hi śarīre yo na karoti tapo'rjanam /
sa paścāttapyate mūḍho mṛto gatvātmano gatim // MSS_1162

adhvaklāntatanurnavajvaravatī nṛtyaślathāṅgī tathā māsaikaprasavā dadāti surate ṣaṇmāsagarbhā sukham /
vikhyātā virahasya saṃgamavidhau kruddhaprasanne ṛtu- sthāne nūtanasaṃgame madhumade rāgāspadaṃ yoṣitaḥ // MSS_1163

adhvani padagrahaparaṃ madayati hṛdayaṃ na vā na vā śravaṇam /
kāvyamabhijñasabhāyāṃ mañjīraṃ kelivelāyām // MSS_1164

adhvanīno'tithirjñeyaḥ śrotriyo vedapāragaḥ /
mānyāvetau gṛhasthasya brahmalokamabhīpsataḥ // MSS_1165

adhvanyadhvani taravaḥ pathi pathi pathikairupāsyate chāyā /
viralaḥ sa ko'pi viṭapī yamadhvago gṛhagataḥ smarati // MSS_1166

adhvanyadhvani bhūruhaḥ phalabṛto namrānupekṣyādarād dūrādunnatisaṃśrayavyasaninaḥ pānthasya mugdhātmanaḥ /
yanmūlaṃ samupāgatasya madhuracchāyāphalaiḥ kā kathā śīrṇenāpi hi nopayogamagamat parṇena tāladrumaḥ // MSS_1167

adhvanyasya vadhūrviyogavidhurā bhartuḥ smarantī yadi prāṇānujjhati kasya tanmahadaho saṃjāyate kilbiṣam /
ityevaṃ pathikaḥ karoti hṛdaye yāvat tarormūrdhani prodghuṣṭaṃ parapuṣṭayā tava tavetyuccairvaco'nekaśaḥ // MSS_1168

adhvanyāḥ kila mūlagartamadhunāpyāpūrayantyaśrubhir vyākrośantyadhunā sabāndhavakulāḥ sāyaṃ muhūrtaṃ dvijāḥ /
itthaṃ yāvadimāni bibhrati śucaṃ bhūtānyapi tvatkṛte tāvattvaṃ na gato'si pādapa ciraṃ kīrtyātmanā vartase // MSS_1169

adhvanyānāṃ śiśirasamaye caṇḍacāṇḍālakāṇḍa- prāyāḥ kāyānahaha pavanāḥ kleśayanto viśanti /
badhnantyete sapadi sudṛśāṃ durbhagānāmapīha prauḍhāśleṣāślathitadayitaṃ mūrdhni saubhāgyapaṭṭam // MSS_1170

adhvanyān kati rundhate kati dṛdhān bhindanti toyākarān kedārān kati yajjayanti kati ca vyāpāṭayanti drumān /
vāhinyaḥ kṣaṇaluptavārivibhavā vanyā avanyāmimā yaḥ sindhuḥ sakalāśrayaḥ sa tu punaḥ kutreti na jñāyate // MSS_1171

adhvanyairmakarandaśīkarasurāmattakvaṇatkokile mārge mārganirodhinī parihṛtā śaṅke'śubhāśaṅkayā /
pānthastrīvadhapātakādupagataṃ caṇḍālacihnaṃ madhor eṣā kiṅkiṇikeva ṣaṭpadamayī jhaṃkāriṇī saṃhatiḥ // MSS_1172

adhvaśramāya caraṇau virahāya dārā abhyarthanāya vacanaṃ ca vapurjarāyai /
etāni me vidadhatastava sarvadaiva dhātastrapā yadi na kiṃ na pariśramo'pi // MSS_1173

adhvaśrāntamavijñātam atithiṃ kṣutpipāsitam /
yastaṃ na pūjayed bhaktyā tamāhurbrahmaghātinam // MSS_1174

adhvāgrajāgrannibhṛtāpadandhur bandhuryadi syāt pratibandhumarhaḥ /
joṣaṃ janaḥ kāryavidastu vastu pracchyā nijecchā padavīṃ mudastu // MSS_1175

adhvā jarā dehavatāṃ parvatānāṃ jalaṃ jarā /
asaṃbhogo jarā strīṇāṃ vākśalyaṃ manaso jarā // MSS_1176

adhvā jarā manuṣyāṇām anadhvā vājināṃ jarā /
amaithunaṃ jarā strīṇām aśvānāṃ maithunaṃ jarā // MSS_1177

adhvānaṃ naikacakraḥ prabhavati bhuvanabhrāntidīrghaṃ vilaṅghya prātaḥ prāptuṃratho me punariti manasi nyastacintātibhāraḥ /
saṃdhyākṛṣṭāvaśiṣṭasvakaraparikaraiḥ spaṣṭahemārapaṅkti vyākṛṣyāvasthito'stakṣitibhṛti nayatīvaiṣa dikcakramarkaḥ // MSS_1178

adhvā na yadi nisaṅgapaṅkasaṃkulito bhavet /
tataḥ kutaste dhaureya dhuryatā vyajyatāmiyam // MSS_1179

advāreṇa viśantyeva buddhimanto riporgṛham /
akṛtvā dharṣaṇāṃ pūrvaṃ kathaṃ yuddhaṃ pravartate // MSS_1180

anakṣaraṃ rūpamiha kṣarantī pañcāśadarṇairamṛtāmbupūrṇaiḥ /
vyākīrṇavidhyamaṇḍamadantarālā (?) śabdātmikā māmavatāt samantāt // MSS_1181

anakṣarajñena janena sakhyaṃ saṃbhāṣaṇaṃ duṣprabhusevanaṃ ca /
āliṅganaṃ lambapayodharāṇāṃ pratyakṣaduḥkhaṃ trayameva bhūmau // MSS_1182

anaṅkuritakūrcakaḥ sa tu sitopalāḍhyaṃ payaḥ sa eva dhṛtakūcakaḥ salavaṇāmbutakropamaḥ /
sa eva sitakūrcakaḥ kvathitaguggulodvegakṛd bhavanti hariṇīdṛśāṃ priyatameṣu bhāvāstrayaḥ // MSS_1183

anaṅgaḥ pañcabhiḥ puṣpair viśvaṃ vyajayateṣubhiḥ /
ityasaṃbhāvyamathavā vicitrā vastuśaktayaḥ // MSS_1184

anaṅgatāpapraśamāya tasya kadarthyamānā muhurāmṛṇālam /
madhau madhau nākanadīnalinyo varaṃ vahantāṃ śiśire'nurāgam // MSS_1185

anaṅga palitaṃ mūrdhni paśyaitad vijayadhvajam /
idānīṃ jitamasmābhis tavākiṃcitkarāḥ śarāḥ // MSS_1186

anaṅgabāṇākulitasya śaṃbhoḥ śiro bhavānīcaraṇe'tinamram /
vilokya kāciccaraṇe carantī pipīlikā cumbati candrabimbam // MSS_1187

anaṅgamaṅgalagṛhāpāṅgabhaṅgitaraṅgitaiḥ /
āliṅgitaḥ sa tanvaṅgyā kārtārthyaṃ labhate kadā // MSS_1188

anaṅgamaṅgalabhuvas tadapāṅgasya bhaṅgayaḥ /
janayanti muhuryūnām antaḥsaṃtāpasaṃtatim // MSS_1189

anaṅgamaṅgalārambhakumbhāviva payodharau /
kasya nārtiharau tasyāḥ karapallavasaṃvṛtau // MSS_1190

anaṅgaraṅgapīṭho'syāḥ śṛṅgārasvarṇaviṣṭaraḥ /
lāvaṇyasārasaṃghātaḥ sā ghanā jaghanasthalī // MSS_1191

anaṅgaraṅgapratimaṃ tadaṅgaṃ bhaṅgībhiraṅgīkṛtamānatāṅgyāḥ /
kurvanti yūnāṃ sahasā yathaitāḥ svāntāni śāntāparacintanāni // MSS_1192

anaṅgarasacāturīcapalacārucelāñcalaś calanmakarakuṇḍalasphuritakāntigaṇḍasthalaḥ /
vrajollasitanāgarīnikararāsalāsyotsukaḥ sa me sapadi mānase sphuratu ko'pi gopālakaḥ // MSS_1193

anaṅgalaṅghanālagnanānātaṅkā sadaṅganā /
sadānagha sadānanda natāṅgāsaṅgasaṃgata // MSS_1194

anaṅgaśastrāṇi natāṅgi tīkṣṇatāṃ nayatyayaskāra ivāmbudāgamaḥ /
malīmasāṅgārarucāṃ payomucāṃ tathāhi madhye jvalitastaḍicchikhī // MSS_1195

anaṅgīkṛtakāmānām anumānārhavarṣmaṇām /
dhrtanirmalatīrthānāṃ bhūtilepo vibhūṣaṇam // MSS_1196

anaṅgenābalāsaṅgāj jitā yena jagattrayī /
sa citracaritaḥ kāmaḥ sarvakāmaprado'stu vaḥ // MSS_1197

anaṅgo'yamanaṅgatvam adya nindiṣyati dhruvam /
yadanena na saṃprāptaḥ pāṇisparśotsavastava // MSS_1198

anañjitāsitā dṛṣṭir bhrūranāvarjitā natā /
arañjito'ruṇaścāyam adharastava sundari // MSS_1199

anaṇuraṇanmaṇimekhala- mavirataśiñjānamañjumañjīram /
parisaraṇamaruṇacaraṇe raṇaraṇakamakāraṇaṃ kurute // MSS_1200

anaticirojjhitasya jaladena cira- sthitabahubudbudasya payaso'nukṛtim /
viralavikīrṇavajraśakalā sakalām iha vidadhāti dhautakaladhautamahī // MSS_1201

anatiśayaṃ svarṇacayaṃ nivahan nitarāṃ pramodaye svānte /
kiṃtu tavaiṣā saṃpat kasyopakṛte pratibrūhi // MSS_1202

anatiśithile puṃbhāvena pragalbhabalāḥ khalu prasabhamalayaḥ pāthojāsye niviśya niritvarāḥ /
kimapi mukhataḥ kṛtvānītaṃ vitīrya sarojinī- madhurasamuṣoyoge jāyāṃ navānnamacīkaran // MSS_1203

anadhigatamanorathasya pūrvaṃ śataguṇiteva gatā mama triyāmā /
yadi tu tava samāgame tathaiva prasarati subhrutataḥ kṛtī bhaveyam // MSS_1204

anadhītya yathā vedān na vipraḥ śrāddhamarhati /
evamaśrutaṣāḍguṇyo na mantraṃ śrotumarhati // MSS_1205

anadhītya svajaśāstraṃ yo'nyaśāstraṃ samīhate vaktum /
so'heḥ padāni gaṇayati niśi tamasi jale ciragatasya // MSS_1206

anadhītyārthaśāstraṇi bahavaḥ paśubuddhayaḥ /
prāgalbhyādvaktumicchanti mantreṣvabhyantarīkṛtāḥ // MSS_1207

anadhyavasitāvagāhanamanalpadhīśaktināpy adṛṣṭaparmārthatattvamadhikābhiyogairapi /
mataṃ mama jagatyalabdhasadṛśapratigrāhakaṃ prayāsyati payonidheḥ paya iva svadehe jarām // MSS_1208

anadhvanyāḥ kāvyeṣvalasagatayaḥ śāstragahaneṣv aduḥkhajñā vācāṃ pariṇatiṣu mūkāḥ paraguṇe /
vidagdhānāṃ goṣṭhīṣvakṛtaparicaryāśca khalu ye bhaveyuste kiṃ vā parabhaṇitikaṇḍūtinikaṣāḥ // MSS_1209

anantaṃ bata me vittaṃ yasya me nāsti kiṃcana /
mithilāyāṃ pradīptāyāṃ na me dahyati kiṃcana // MSS_1210

anantakopādicatuṣṭayodaye tribhedamithyātvamalodaye tathā /
durantamithyātvaviṣaṃ śarīriṇām anantasaṃsārakaraṃ prarohati // MSS_1211

anantakhyātisaṃpannaḥ śuddhasattvaḥ sadhībalaḥ /
dhatte bahumukhaṃ bhogaṃ śrutidṛṣṭisthirāśayaḥ // MSS_1212

anantatattvaṃ parigṛhya dhātrā vinirmito'syāḥ kila madhyabhāgaḥ /
aṇuḥ paraṃ yogidṛśānulakṣyaḥ saccitkalāsthairyabalāvanaddhaḥ // MSS_1213

anantanāmadheyāya sarvākāravidhāyine /
samastamantravācyāya viśvaikapataye namaḥ // MSS_1214

anantapadavinyāsaracanā sarasā kaveḥ /
budho yadi samīpastho na kujanyaḥ puro yadi // MSS_1215

anantapāraṃ kila śabdaśāstraṃ svalpaṃ tathāyurbahavaśca vighnāḥ /
yat sārabhūtaṃ tadupāsanīyaṃ haṃsairyathā kṣīramivāmbumadhyāt // MSS_1216

anantaratnaprabhavasya yasya himaṃ na saubhāgyavilopi jātam /
eko hi doṣo guṇasaṃnipāte nimajjatīndoḥ kiraṇeṣvivāṅkaḥ // MSS_1217

anantaramariṃ vadyād arisevinameva ca areranantaraṃ mitram udāsīnaṃ tayoḥ param // MSS_1218

anantavibhavabhraṣṭā daurbbhāgyaparitāpinī /
śocyati prāpya jīvatvaṃ bhartṛhīneva nāyikā // MSS_1219

anantaśāstraṃ bahulāśca vidyāḥ svalpaśca kālo bahuvidhnatā ca /
yat sārabhūtaṃ tadupāsanīyaṃ haṃso yathā kṣīramivāmbumadhyāt // MSS_1220

anantāsau kīrtiḥ kavikumudabandhoḥ kṣitipates trilokīyaṃ kṣudrā tadiha kathamasyāḥ sthitiriti /
mudheyaṃ vaḥ śaṅkā kalayata kiyaddarpaṇatalaṃ viśālā kiṃ tatra sphurati na kavīndrapratikṛtiḥ // MSS_1221

anantodbhūtabhūtaughasaṃkule bhūtale'khile /
śastre śāstre tricaturāś caturā yadi mādṛśāḥ // MSS_1222

ananyakṣuṇṇaśrīrmalayavanajanmāyamanilo nipīya svedāmbu smaramakarasaṃbhukttavibhavam /
vidarbhāṇāṃ bhūri priyatamaparīrambharabhasa- prasaṅgādeṅgāni dviguṇapulakāsañji tanute // MSS_1223

ananyaśobhābhibhaveyamākṛtir vimānanā subhru kutaḥ piturgṛhe /
parābhimarśo na tavāsti kaḥ karaṃ prasārayet pannagaratnasūcaye // MSS_1224

ananyasādhāraṇakāntikānta- tanoramuṣyāḥ kimu madhYadeśaḥ /
jagattrayījanmabhṛtāṃ niṣaṇṇā cittāvalīyaṃ trivalīmiṣeṇa // MSS_1225

ananyasādhāraṇasaurabhānvitaṃ dadhānamatyujjvalapuṣpasaṃpadaḥ /
na campakaṃ bhṛṅgagaṇaḥ siṣeve kathaṃ sugandhermalinātmanāṃ ratiḥ // MSS_1226

ananyasāmānyatayā prasiddhas tyāgīti gīto jagatītale yaḥ /
abhūdahaṃpūrvikayā gatānām atīva bhūmiḥ smaramārgaṇānām // MSS_1227

ananyālambanatvena prema bhāgavataṃ bhaja /
nṛṇāṃ premeti kā mātrā prāptaṃ prema prabhoryadi // MSS_1228

ananyāścintayanto māṃ ye janāḥ paryuṃpāsate /
teṣāṃ nityābhiyuktānāṃ yogakṣemaṃ vahāmyaham // MSS_1229

ananyāśritacittena sevito'pi ca vāridaḥ /
siṃñcenna cet tadā manye cātakasyaiva pātakam // MSS_1230

anapekṣitaguruvacanā sarvān granthīn vibhedayati samyak /
prakaṭayati pararahasyaṃ vimarśaśakttirnijā jayati // MSS_1231

anabhijñāya śāstrārthān puruṣāḥ paśubuddhayaḥ /
prāgalbhyādvaktumicchanti mantreṣvabhyantarīkṛtāḥ // MSS_1232

anabhijño guṇānāṃ yo na bhṛtyaiḥ so'nugamyate /
dhanāḍhyo'pi kulīno'pi kramāyāto'pi bhūpatiḥ // MSS_1233

anabhidhyā parasveṣu sarvasattveṣu sauhṛdam /
karmaṇāṃ phalamastīti trividhaṃ manasā caret // MSS_1234

anabhilaṣataḥ śrīlīlābje parāgavilepanaṃ tridaśakariṇaḥ pātuṃ dānapravāhamavāñchataḥ /
tridaśasumanogandhāsaktiṃ vimuktavataḥ sakhe bata khalu śivā saṃtuṣṭasya dvirepha tava sthitiḥ // MSS_1235

anabhyāsahatotsāhā pareṇa paribhūyate /
yā lajjājananī jāḍyāt kiṃ tayā mandavidyayā // MSS_1236

anabhyāsahatā vidyā hato rājavirodhakṛt /
jīvanārthaṃ hataṃ tīrthaṃ jīvanārthaṃ hataṃ vratam // MSS_1237

anabhyāsena vidyānām asaṃsargeṇa dhīmatām /
anigraheṇa cākṣāṇāṃ jāyate vyasanaṃ nṛṇām // MSS_1238

anabhyāsena vedānām ācārasya ca varjanāt /
ālasyādannadoṣācca mṛtyurviprān jighāṃsati // MSS_1239

anamyāsairhatā vidyā nityahāsairhatāḥ striyaḥ /
kubījena hataṃ kṣetraṃ bhṛtyadoṣairhatā nṛpāḥ // MSS_1240

anabhravṛṣṭiḥ śravaṇāmṛtasya sarasvatī vibhramajanmabhūmiḥ /
vaidarbharītiḥ kṛtināmudeti saubhāgyalābhapratibhūḥ padānām // MSS_1241

anabhrevidyutaṃ dṛṣṭvā dakṣiṇāṃ diśamāśritām /
rātrāvindradhanuścāpi jīvitaṃ dvitrimāsikam // MSS_1242

anamrākramaṇaṃ śauryaṃ dhanaṃ nijabhujārjitam bhāryā rūpānurūpā ca puruṣasyeha yujyate //
anyathā tu kimetena rūpeṇāpi . . . MSS_1243

anayanapathe priye na vyathā yathā dṛśya eva duṣprāpe /
mlānaiva kevalaṃ niśi tapanaśilā vāsare jvalati // MSS_1244

anayaśca nayaścāpi daivāt saṃpadyate naraiḥ /
tadvaśāt kurute karma śubhāśubhaphalaṃ pumān // MSS_1245

anayā kṛtamanyabhuktayā vasudhāgocarayā viraktayā /
atiśāyi mahendrayoṣitāṃ vapuṣā kiṃ na tavāvarodhanam // MSS_1246

anayā jaghanābhogabharamantharayānayā /
anyato'pi vrajantyā me hṛdaye nihitaṃ padam // MSS_1247

anayā tava rūpasīmayā kṛtasaṃskāravibodhanasya me /
ciramapyavalokitādya sā smṛtimārūḍhavatī śucismitā // MSS_1248

anayānukramaṇikayā muktāmaṇayo mayābhihitāḥ /
ekaiko'pi hi bhāsvān kiṃ punareṣāṃ nigadyate nikaraḥ // MSS_1249

anayā ratnasamṛddhyā sāgara lahalahasi kimiha laharībhiḥ /
tvadvallabhā varākyo vahanti varṣāsu vārīṇi // MSS_1250

anayā surakāmyamānayā saha yogaḥ sulabhastu na tvayā /
ghanasaṃvṛtayāmbudāgame kumudeneva niśākaratviṣā // MSS_1251

anayeneva rājyaśrīr dainyeneva manasvitā /
mamlau sātha viṣādena padminīva himāmbhasā // MSS_1252

anayoranavadyāṅgi stanayorjṛmbhamāṇayoḥ /
avakāśo na paryāptas tava bāhulatāntare // MSS_1253

anayo vinayastasya vidhiryasyānuvartate /
nayaḥ samyakprayukto'pi bhāgyahīnasya durnayaḥ // MSS_1254

anarghyaṃ saundaryaṃ jagadupari mādhuryalaharī- parītaṃ saurabhyaṃ diśi diśi rasaikavyasanitā /
iti prītyāsmābhistvayi khalu rasāle vyavasitaṃ ka evaṃ jānīte yadasi kaṭukīṭairupahataḥ // MSS_1255

anarghyamapi māṇikyaṃ hemāśrayamapekṣate /
anāśrayā na śobhante paṇḍitā vanitā latāḥ // MSS_1256

anarghyalāvaṇyanidhānabhūmir na kasya lobhaṃ laṭabhā tanoti /
avaimi puṣpāyudhayāmiko'syām aviśvasan na kṣaṇameti nidrām // MSS_1257

anarghyāṇyapi ratnāni labhyante vibhavaiḥ sukham /
durlabho ratnakoṭyāpi kṣaṇo'pi hi gatāyuṣaḥ // MSS_1258

anarthakaṃ vipravāsaṃ gṛhebhyaḥ pāpaiḥ saṃdhiṃ paradārābhimarśam /
dambhaṃ stainyaṃ paiśunaṃ madyapānaṃ na sevate yaḥ sa sukhī sadaiva // MSS_1259

anarthamakarāgārād asmāt saṃsārasāgarāt /
uḍḍīyate nirudvegaṃ sarvatyāgena putraka // MSS_1260

anarthamarthataḥ paśyann arthaṃ caivāpyanarthataḥ /
indriyaiḥ prasṛto bālaḥ suduḥkhaṃ manyate sukham // MSS_1261

anarthāṃ ścārtharūpeṇa arthāṃścānartharūpataḥ /
arthāyaiva hi keṣāṃcid dhananāśo bhavatyuta // MSS_1262

anarthā hyartharūpāśca arthāścānartharūpiṇaḥ /
bhavanti te vināśāya daivāyattasya rocate // MSS_1263

anarthitarpaṇaṃ vittaṃ cittamadhyānadarpaṇam /
atīrthasarpaṇaṃ dehaṃ paryante śocyatāṃ vrajet // MSS_1264

anarthitvānmanuṣyāṇāṃ bhayāt parijanasya ca /
maryādāyāmamaryādāḥ striyastiṣṭhanti bhartṛṣu // MSS_1265

anarthe caiva niratam arthe caiva parāṅmukham /
na taṃ bhartāramicchanti ṣaṇḍhaṃ patimiva striyaḥ // MSS_1266

anartho'pyartharūpeṇa tathārtho'nartharūpabhāk /
utpadyate vināśāya tasmāduktaṃ parīkṣayet // MSS_1267

analaṃkṛto'pi mādhava harasi mano me sadā prasabham /
kiṃ punaralaṃkṛtastvaṃ saṃprati nakharakṣataistasyāḥ // MSS_1268

analaḥ śītanāśāya viṣanāśāya gāruḍam /
viveko duḥkhanāśāya sarvanāśāya durmatiḥ // MSS_1269

analaḥ salilājjātaḥ kārttikeyo'pi vahnitaḥ /
gūḍhaṃ hi mahatāṃ janma paricchettuṃ ka īśvaraḥ // MSS_1270

analasajavāpuṣpotpīḍacchavi prathamaṃ tataḥ samadayavanīgaṇḍacchāyaṃ punarmadhupiṅgalam /
tadanu ca navasvarṇādarśaprabhaṃ śaśinastatas taruṇatagarākāraṃ bimbaṃ vibhāti nabhastale // MSS_1271

analastambhanavidyāṃ subhaga bhavān niyatameva jānāti /
manmathaśarāgnitapte hṛdi me kathamanyathā vasasi // MSS_1272

analpaṃ jalpantaḥ kati bata gatā no yamapuraṃ purastādasmākaṃ vidhṛtanayanā vyāttavadanāḥ /
atītā yadyevaṃ na hi nijahitaṃ cetasi vayaṃ vahāmo hā mohād viṣayaviṣajātādavasitāḥ // MSS_1273

analpaṃ saṃtāpaṃ śamayati manojanmajanitaṃ tathā śītaṃ sphītaṃ himavati niśīthe glapayati /
tadevaṃ ko'pyūṣmā ramaṇaparirambhotsavamilat- purandhrīnīrandhrastanakalaśajanmā vijayate // MSS_1274

analpacintābharamohaniścalā vilokyamānaiva karoti sādhvasam /
svabhāvaśobhānatimātrabhūṣaṇā tanustaveyaṃ bata kiṃ nu sundari // MSS_1275

analpatvāt pradhānatvād vaṃśasyevetare svarāḥ /
vijigīṣornṛpatayaḥ prayānti parivāratām // MSS_1276

anavadyamavadyaṃ syād vāruṇīleśamātrataḥ /
tadvacchiṣyo viruddhārthād viguroreva naśyati // MSS_1277

anavaratakanakavitaraṇa- jalalavabhṛtakarataraṅgitārthitateḥ /
bhaṇitiriva matirmatiriva ceṣṭā ceṣṭeva kīrtirativimalā // MSS_1278

anavaratadhanurjyāsphālanakrūrapūrvaṃ ravikiraṇasahiṣṇu svedaleśairabhinnam /
apacitamapi gātraṃ vyāyatatvādalakṣyaṃ giricara iva nāgaḥ prāṇasāraṃ bibharti // MSS_1279

anavaratanayanavigalita- jalalavaghaṭitākṣasūtravalayena /
mṛtyuṃjayamiva japati tvadgotraṃ virahiṇī bālā // MSS_1280

anavaratanayanavigalita- jalalavaparimuṣitapattralekhāntam /
karatalaniṣaṇṇamabale vadanamidaṃ kaṃ na tāpayati // MSS_1281

anavarataparopakaraṇa- vyagrībhavadamalacetasāṃ mahatām /
āpātakāṭavāni sphuranti vacanāni bheṣajānīva // MSS_1282

anavaratarasena rāgabhājā karajaparikṣatilabdhasaṃstavena /
sapadi taruṇapallavena vadhvā vigatadayaṃ khalu khaṇḍitena mamle // MSS_1283

anavasare ca yadukttaṃ subhāṣitaṃ tacca bhavati hāsyāya /
rahasi prauḍhavadhūnāṃ ratisamaye vedapāṭha iva // MSS_1284

anavasthitacittasya na jane na vane sukham /
jane dahati saṃsargo vane saṅgavivarjanam // MSS_1285

anavasthitacittānāṃ prasādo'pi bhayaṃkaraḥ /
sarpī hanti kila snehād apatyāni na vairataḥ // MSS_1286

anavahitaḥ kimaśaktto vibudhairabhyarthitaḥ kimatirasikaḥ /
sarvaṃkaṣo'pi kālas tirayati sūktāni na kavīnām // MSS_1287

anavāpyaṃ ca śokena śarīraṃ copatapyate /
amitrāśca prahṛṣyanti mā sma śoke manaḥ kṛthāḥ // MSS_1288

anavekṣitamaryādaṃ nāstikaṃ vipralumpakam /
arakṣitāramattāraṃ nṛpaṃ vidyādadhogatim // MSS_1289

anavyaye vyayaṃ yāti vyaye yāti suvistṛtim /
apūrvastava kośo'yaṃ vidyākośeṣu bhārati // MSS_1290

anasi sīdati saikatavartmani pracurabhārabharakṣapitaukṣake /
gurubharoddharaṇoddhurakaṃdharaṃ smarati sārathireṣa dhuraṃdharam // MSS_1291

anasūyaḥ kṛtaprajñaḥ śobhanānyācaran sadā /
akṛcchrāt sukhamāpnoti sarvatra ca virājate // MSS_1292

anasūyā kṣamā śāntiḥ saṃtoṣaḥ priyavāditā /
kāmakrodhaparityāgaḥ śiṣṭācāranidarśanam // MSS_1293

anasūyārjavaṃ śaucaṃ saṃtoṣaḥ priyavāditā /
damaḥ satyamanāyāso na bhavanti durātmanām // MSS_1294

anastamitasārasya tejasastadvijṛmbhitam /
yena pāṣāṇakhaṇḍasya mūlyamalpaṃ vasuṃdharā // MSS_1295

anākalitamānuṣyāḥ kṣamāsaṃsparśavarjitāḥ /
pratibuddhairna sevyante pūrvadevavirodhinaḥ // MSS_1297

anākāśe candraḥ sarasijadaladvandvasahito gṛhītaḥ paścārdhe kuṭilakuṭilaiḥ so'pi timiraiḥ /
sudhāṃ muñcatyuccairaniśamatha saṃmohajananīṃ kimutpātālīyaṃ vadata jagataḥ kartumuditā // MSS_1298

anākūtaireva priyasahacarīṇāṃ śiśutayā vacobhiḥ pāñcālīmithunamadhunā saṃgamayitum /
upādatte no vā viramati na vā kevalamiyaṃ kapolau kalyāṇī pulakamukulairdanturayati // MSS_1299

anākṛṣṭasya viṣayair vidyānāṃ pāradṛśvanaḥ /
tasya dharmaraterāsīd vṛddhatvaṃ jarasā vinā // MSS_1300

anāgataṃ bhayaṃ dṛṣṭvā nītiśāstraviśāradaḥ /
avasanmūṣakastatra kṛtvā śatamukhaṃ bilam // MSS_1301

anāgataṃ yaḥ kurute sa śobhate sa śocate yo na karotyanāgatam /
vane vasanneva jarāmupāgato bilasya vācā na kadāpi hi śrutā // MSS_1302

anāgataṃ hi budhyeta yacca kāryaṃ puraḥ sthitam /
na tu buddhikṣayāt kiṃcid atikrāmet prayojanam // MSS_1303

anāgatavartīṃ cintāṃ kṛtvā yastu prahṛṣyati /
sa tiraskāramāpnoti bhagnabhāṇḍo dvijo yathā // MSS_1304

anāgatavatīṃ cintāṃ yo naraḥ kartumicchati /
sa bhūmau pāṇḍuraḥ śete somaśarmapitā yathā // MSS_1305

anāgatavidhātā ca pratyutpannamatiśca yaḥ /
dvaveva sukhamedhete dīrghasūtrī vinaśyati // MSS_1306

anāgatavidhātāram apramattamakopanam /
sthirārambhamadīnaṃ ca naraṃ śrīrupatiṣṭhati // MSS_1307

anāgatavidhānaṃ ca kartavyaṃ viṣaye nṛpaiḥ //
āgamaścāpi kartavyas tathā doṣo na jāyate // MSS_1308

anāgatavidhānaṃ tu kartavyaṃ śubhamicchatā /
āpadaṃ śaṅkamānena puruṣeṇa vipaścitā // MSS_1309

anāgatopadhaṃ hiṃsraṃ durbuddhimabahuśrutam /
tyakttopāttaṃ madyapānadyūtastrīmṛgayāpriyam //
kārye mahati yuñjāno hīyate'rthapatiḥ śriyā // MSS_1310

anāghrātaṃ puṣpaṃ kisalayamalūnaṃ kararuhair anāviddhaṃ ratnaṃ madhu navamanāsvāditarasam /
akhaṇḍaṃ puṇyānāṃ phalamiva ca tadrūpamanaghaṃ na jāne bhokttāraṃ kamiha samupasthāsyati vidhiḥ // MSS_1311

anātapatro'pyayamatra lakṣyate sitātapatrairiva sarvato vṛtaḥ /
acāmaro'pyeṣa sadaiva vījyate vilāsabālavyajanena ko'pyayam // MSS_1312

anāturotkaṇṭhitayoḥ prasidhyatā samāgamenāpi ratirna māṃ prati /
parasparaprāptinirāśayorvaraṃ śarīranāśo'pi samānurāgayoḥ // MSS_1313

anātmavān nayadveṣī vardhayannarisaṃpadaḥ /
prāpyāpi mahadaiśvaryaṃ saha tena vinaśyati // MSS_1314

anāthānāṃ daridrāṇāṃ bālavṛddhatapasvinām /
anyāyaparibhūtānāṃ sarveṣāṃ pārthivo gatiḥ // MSS_1315

anāthānāṃ nātho gatiragatikānāṃ vyasanināṃ vinetā bhītānāmabhayamadhṛtīnāṃ bharavaśaḥ /
suhṛdbandhuḥ svāmī śaraṇamupakārī varaguruḥ pitā mātā bhrātā jagati puruṣo yaḥ sa nṛpatiḥ // MSS_1316

anāthān rogiṇo yaśca putravat paripālayet /
guruṇā samanujñātaḥ sa bhiṣakcchabdamaśnute // MSS_1317

anādaraparo vidvān īhamānaḥ sthirāṃ śriyam /
agneḥ śeṣamṛṇāccheṣaṃ śatroḥ śeṣaṃ na śeṣayet // MSS_1318

anādarahatāṃ sevāṃ dāmpatyaṃ premavarjitam /
maitrīṃ ca hetusāpekṣāṃ ce tanā nādhikurvate // MSS_1319

anādarālokavivṛddhaśokaḥ pituḥ priyāvākyavaśaṃgatasya /
auttānapādirjagatāṃ śaraṇyam ārādhya viṣṇuṃ padamagryamāyāt // MSS_1320

anādāyī vyayaṃ kuryād asahāyī raṇapriyaḥ /
āturaḥ sarvabhakṣī ca naraḥ śīghraṃvinaśyati // MSS_1321

anādidhāvisvaparaṃparāyā hetusrajaḥ srotasi veśvare vā /
āyattadhīreṣa janastadāryāḥ kimīdṛśaḥ paryanuyogayogyaḥ // MSS_1322

anādiṣṭopi bhūpasya dṛṣṭvā hānikaraṃ ca yaḥ /
yatate tasya nāśāya sa bhṛtyo'rho mahībhujām // MSS_1323

anādṛtyaucityaṃ hriyamavigaṇayyātimahatīṃ yadetasyāpyarthe dhanalavadurāśātaralitāḥ /
alīkāhaṃkārajvarakuṭilitabhrūṇi dhanināṃ mukhāni prekṣyante dhigidamatiduṣpūramudaram // MSS_1324

anādeyaṃ nādadīta parikṣīṇo'pi pārthivaḥ /
na cādeyaṃ samṛddho'pi sūkṣmamapyarthamutsṛjet // MSS_1325

anādeyasya cādānād ādeyasya ca varjanāt /
daurbalyaṃ khyāpyate rājñaḥ sa pretyeha ca naśyati // MSS_1326

anādyantā tu sā tṛṣṇā antardehagatā nṛṇām /
vināśayati saṃbhūtā ayonija ivānalaḥ // MSS_1327

anāptapuṇyopacayairdurāpā phalasya nirdhūtarajāḥ savitrī /
tulyā bhavaddarśanasaṃpadeṣā vṛṣṭerdivo vītabalāhakāyāḥ // MSS_1328

anāmnāyamalā vedā brāhmaṇasyāvrataṃ malam /
malaṃ pṛthivyā vāhīkāḥ puruṣasyānṛtaṃ malam // MSS_1329

anāyakā vinaśyanti naśyanti bahunāyakāḥ /
strīnāyakā vinaśyanti naśyanti śiśunāyakāḥ // MSS_1330

anāyake na vastavyaṃ na vased bahunāyake /
strīnāyake na vastavyaṃ na vased bālanāyake // MSS_1331

anāyavyayakartā ca anāthaḥ kalahapriyaḥ /
āturaḥ sarvabhakṣī ca naraḥ śīghraṃ vinaśyati // MSS_1332

anāyāsakṛśaṃ madhyam aśaṅkatarale dṛśau /
abhūṣaṇamanohāri vapurvayasi subhruvaḥ // MSS_1333

anāyi deśaḥ katamastvayādya vasantamuktasya daśāṃ vanasya /
tvadāptasaṃketatayā kṛtārthā śravyāpi nānena janena saṃjñā // MSS_1334

anārataṃ tena padeṣu lambhitā vibhajya samyagviniyogasatkriyāḥ /
phalantyupāyāḥ paribṛṃhitāyatīr upetya saṃgharṣamivārthasaṃpadaḥ // MSS_1335

anārataṃ pratidiśaṃ pratideśaṃ jale sthale /
jāyante ca mriyante ca budbudā iva vāriṇi // MSS_1336

anāratapariskhalannayanavāridhārāśata- pravṛddhapathanimnagāsalilaruddhayānodyamā /
tvadīyaripukāminī bahuvideśayānaiṣiṇī vinindati valaddṛśā gururuṣāśrupaṃ prāvṛṣam // MSS_1337

anārabdhākṣepaṃ paramakṛtavāṣpavyatikaraṃ nigūḍhāntastāpaṃ hṛdayavinipītaṃ vyavasitam /
kṛśāṅgyā yatpāpe vrajati mayi nairāśyapiśunaṃ ślathairaṅgairuktaṃ hṛdayamidamunmūlayati tat // MSS_1338

anārabhyā bhavantyarthāḥ kecin nityaṃ tathāgatāḥ /
kṛtaḥ puruṣakāro'pi bhavedyeṣu nirarthakaḥ // MSS_1339

anārambhastu kāryāṇāṃ prathamaṃ buddhilakṣaṇam /
ārabdhasyāntagamanaṃ dvitīyaṃ buddhilakṣaṇam // MSS_1340

anārādhya kālīmanāsvādya gauḍī- mṛte mantratantrādvinā śabdacauryāt /
prabandhaṃ pragalbhaṃ prakartuṃ pravaktuṃ viriñciprapañce madanyaḥ kaviḥ kaḥ // MSS_1341

anārogyamanāyuṣyam asvargyaṃ cātibhojanam /
apuṇyaṃ lokavidviṣṭaṃ tasmāt tat parivarjayet // MSS_1342

anāryatā niṣṭhuratā krūratā niṣkriyātmatā /
puruṣaṃ vyañjayantīha loke kaluṣayonijam // MSS_1343

anāryaprajñānāmiha janavadhūnāṃ hi manaso mahāśalyaṃ karṇe tava kanakajambūkisalayaḥ /
bhraman bhikṣāhetoradhinagari buddho'si na mayā ? tvayaitāvadveṣaḥ pathika na vidheyaḥ punarapi // MSS_1344

anāryamapyācaritaṃ kumāryā bhavān mama kṣāmyatu saumya tāvat /
haṃso'pi devāṃśatayāsi vandyaḥ śrīvatsalakṣmeva hi matsyamūrtiḥ // MSS_1345

anāryavṛttamaprājñam asūyakamadhārmikam /
anarthāḥ kṣipramāyānti vāgduṣṭaṃ krodhanaṃ tathā // MSS_1346

anāryeṇa kṛtaghnena saṃgatirme na yujyate /
vināśamapi kāṅkṣanti jñātīnāṃ jñātayaḥ sadā // MSS_1347

anālokya vyayaṃ karttā anāthaḥ kalahapriyaḥ /
āturaḥ sarvakṣetreṣu naraḥ śīghraṃ vinaśyati // MSS_1348

anālocya premṇaḥ pariṇatimanādṛtya suhṛdas tvayākāṇḍe mānaḥ kimiti sarale saṃprati kṛtaḥ /
samākṛṣṭā hyete pralayadahanodbhāsuraśikhāḥ svahastenāṅgārāstadalamadhunāraṇyaruditaiḥ // MSS_1349

anāvartī kālo vrajati sa vṛthā tanna gaṇitaṃ daśāstāstāḥ soḍhā vyasanaśatasaṃpātavidhurāḥ /
kiyadvā vakṣyāmaḥ kimiva bata nātmanyupakṛtaṃ vayaṃ yāvattāvat punarapi tadeva vyavasitam // MSS_1350

anāvarjitacittāpi dhruvaṃ sarvān pradhāvati /
phalaṃ na labhate kiṃcit tṛṣṇā jīrṇeva kāminī // MSS_1351

anāvilaṃ phalaṃ bhuṅkte viṣayāṇāmanutsukaḥ /
utsuko labdharokeṇa tatra śokena śīryate // MSS_1352

anāvṛtanavadvārapañjare vihagānilaḥ /
yattiṣṭhati tadāścaryaṃ viyoge tasya kā kathā // MSS_1353

anāvṛtāḥ svavarṇeṣu sarvasādhāraṇāḥ purā /
nāryo babhūvurnirvairo yataḥ sarvo'bhavajjanaḥ // MSS_1354

anāvṛṣṭihate deśe sasye ca pralayaṃ gate /
dhanyāstāta na paśyanti deśabhaṅgaṃ kulakṣayam // MSS_1355

anāśritā dānapuṇyaṃ vedapuṇyamanāśritāḥ /
rāgadveṣavinirmuktā vicarantīha mokṣiṇaḥ // MSS_1356

anāśrite dṛptagurau avajñāṃ kalayen nṛpaḥ /
saṃvartena maruttastu nirastamakarodgurum // MSS_1357

anāsthā vastūnāmabhimataguṇānāmupahṛtau ghano garvastanvyā ruṣi ca vihitāḍambaravidhiḥ /
prahāraḥ pādābhyāṃ yamanamapi kāñcyā caraṇayoḥ priyāyā vibbokaṃ tadidamiti dhanyo'nubhavati // MSS_1358

anāsvāditasaṃbhogāḥ patantu tava śatravaḥ /
bālavaidhavyadagdhānāṃ kulastrīṇāṃ stanā iva // MSS_1359

anāsvādyamavikreyam anādeyamanīpsitam /
dattaṃ nirupakāraṃ yad vandhyadānena tena kim // MSS_1360

anāhitāgniḥ śatagur ayajvā ca sahsraguḥ /
surāpo vṛṣalībhartā braḥmahā gurutalpagaḥ // MSS_1361

asatpratigrahe yukttaḥ stenaḥ kutsitayājakaḥ /
adoṣastyaktumanyonyaṃ karmasaṃkaraniścayāt // MSS_1362

anāhūtaḥ praviśati apṛṣṭo bahu bhāṣate /
viśvasityapramatteṣu mūḍhacetā narādhamaḥ //
anāhūtaḥ samāyātaḥ anāpṛṣṭastu bhāṣate /
paranindātmanaḥ stutiś catvāri laghulakṣaṇam // MSS_1363

anāhūtapraviṣṭasya dṛṣṭasya kruddhacakṣuṣā /
svayamevopaviṣṭasya varaṃ mṛtyurna bhojanam // MSS_1364

anahūtāḥ svayaṃ yānti rasāsvādavilolupāḥ /
nivāritā na gacchanti makṣikā iva bhikṣukāḥ // MSS_1365

anāhūto viśedyastu apṛṣṭo bahu bhāṣate /
ātmānaṃ manyate prītaṃ bhūpālasya sa durmatiḥ // MSS_1366

anāhvāne praveśaśca apṛṣṭe paribhāṣaṇam /
ātmastutiḥ pare nindā catvāri laghulakṣaṇam // MSS_1367

anicchato'pi duḥkhāni yathehāyānti dehinaḥ /
sukhānyapi tathā manye cintādainyena ko guṇaḥ // MSS_1368

aniḥsarantīmapi gehagarbhāt kīrtiṃ pareṣāmasatīṃ vadanti /
svairaṃ bhramantīmapi ca trilokyāṃ tvatkīrtimāhuḥ kavayaḥ satīṃ tu // MSS_1369

anicchanto'pi vinayaṃ vidyābhyāsena bālakāḥ /
bheṣajeneva nairujyaṃ prāpaṇīyāḥ prayatnataḥ // MSS_1370

anicchannapi cittena videśastho'pi mānavaḥ /
svakarmotpātavātena nīyate yatra tatphalam // MSS_1371

anijyayā vivāhaiśca vedasyotsādanena ca /
kulānyakulatāṃ yānti dharmasyātikrameṇa ca // MSS_1372

anityaṃ nisrāṇaṃ jananamaraṇavyādhikalitaṃ jaganmithyātvārthairahamahamikāliṅgitamidam /
vicintyaivaṃ santo vimalamanaso dharmamatayas tapaḥ kartuṃ vṛttāstadapasṛtaye jainamanagham // MSS_1373

anityaṃ yauvanaṃ rūpaṃ jīvitaṃ dravyasaṃcayaḥ /
aiśvaryaṃ priyasaṃvāso gṛdhyedeṣu na paṇḍitaḥ // MSS_1374

anityatāsamākhyānaṃ viṣayādiviḍambanam /
paścāttāpasya kathanaṃ kālasya caritaṃ tathā // MSS_1375

anityate jagannindye vandanīyāsi saṃprati /
yā karoṣi prasaṅgena duḥkhānāmapyanityatām // MSS_1376

anityatve kṛtamatir mlānamālyena śocati /
nityatve kṛtabuddhistu bhinnabhāṇḍe'nuśocati // MSS_1377

anityamiti jānanto na bhavanti bhavanti ca /
atha yenaiva kurvanti naiva jātu bhavanti te // MSS_1378

anityasya śarīrasya sarvadoṣamayasya ca /
durgandhasya ca rakṣārthaṃ nāhaṃ pāpaṃ karomi vai // MSS_1379

anityāni śarīrāṇi vibhavo naiva śāśvataḥ /
nityaṃ saṃnihito mṛtyuḥ kartavyo dharmasaṃgrahaḥ // MSS_1380

anitye priyasaṃvāse saṃsāre cakravadgatau /
pathi saṃgatamevaitad bhrātā mātā pitā sakhā // MSS_1381

anityo vijayo yasmād dṛśyate yudhyamānayoḥ /
parājayaśca saṃgrāme tasmādyuddhaṃ vivarjayet // MSS_1382

anidro duḥsvapnaḥ prapatanamanadri drumataṭaṃ jarāhīnaḥ kampastimirarahitastrāsasamayaḥ /
anāghātaṃ duḥkhaṃ vigatanigaḍo bandhanavidhiḥ sajīvaṃ jantūnāṃ maraṇamavanīśāśrayarasaḥ // MSS_1383

anidhāya mukhe patraṃ pūgaṃ khādati yo naraḥ /
saptajanmadaridratvam ante viṣṇusthitiśca na // MSS_1384

anindā parakṛtyeṣu svadharmaparipālanam /
kṛpaṇeṣu dayālutvaṃ sarvatra madhurā giraḥ // MSS_1385

prāṇairapyupakāritvaṃ mitrāyāvyabhicāriṇe /
gṛhāgate pariṣvaṅgaḥ śaktyā dānaṃ sahiṣṇutā // MSS_1386

bandhubhirbaddhasaṃyogaḥ sujane caturaśratā /
taccittānuvidhāyitvam iti vṛttaṃ mahātmanām // MSS_1387

anindyamapi nindanti stuvantyastutyamuccakaiḥ /
svāpateyakṛte martyāḥ kiṃ kiṃ nāma na kurvate // MSS_1388

anibandhanakacabandhanam anidānaṃ dānamuttarīyasya /
ākasmikamandasmitam apahastayatīva bālyametasyāḥ // MSS_1389

anibhālita eva kevalaṃ khanigarbhe nidhireṣa jīryatu /
na tu sīdatu mūlyahānito vaṇijālokanagocarīkṛtaḥ // MSS_1390

animiṣamavirāmā rāgiṇāṃ sarvarātraṃ navanidhuvanalīlāḥ kautukenātivīkṣya /
idamudavasitānāmasphuṭālokasaṃpan nayanamiva sanidraṃ ghūrṇate daipamarciḥ // MSS_1391

aniyataruditasmitaṃ virājat- katipayakomaladantakuḍmalāgram /
vadanakamalakaṃ śiśoḥ smarāmi skhaladasamañjasamugdhajalpitaṃ te // MSS_1392

aniyuktā hi sācivye yadvadanti manīṣiṇaḥ /
anurāgadravasyaitāḥ praṇayasyātibhūmayaḥ // MSS_1393

anirākṛtatāpasaṃpadaṃ phalahīnāṃ sumanobhirujjhitām /
khalatāṃ khalanāmivāsatīṃ pratipadyeta kathaṃ budho janaḥ // MSS_1394

anirīkṣaṇameva dṛṣṭirārdrā parihāsālapanāni maunameva /
avadhīraṇameva cābhiyogo vinigūḍho'pi hi lakṣyate'nurāgaḥ // MSS_1395

anirghātaṃ dhārādharamaśamanīyaṃ nidhirapām akāṭhinyaṃ cintāmaṇimajaḍabhūtaṃ suratarum /
abhittvopādāya prabhurapaśuvṛttiṃ ca surabhiṃ parārthaikasvārthānakṛta puruṣānādipuruṣaḥ // MSS_1396

anirjayena dviṣatāṃ yasyāmarṣaḥ praśāmyati /
puruṣoktiḥ kathaṃ tasmin brūhi tvaṃ hi tapodhana // MSS_1397

kṛtaṃ puruṣaśabdena jātimātrāvalambinā /
yo'ṅgīkṛtaguṇaiḥ ślādhyaḥ savismayamudāhṛtaḥ // MSS_1398

grasamānamivaujāṃsi sadasā gauraveritam /
nāma yasyābhinanadanti dviṣo'pi sa pumānpumān // MSS_1399

anirdayopabhogasya rūpasya mṛdunaḥ katham /
kaṭhinaṃ khalu te cetaḥ śirīṣasyeva bandhanam // MSS_1400

anirloḍitakāryasya vāgjālaṃ vāgmino vṛthā /
nimittādaparāddheṣor dhānuṣkasyeva valgitam // MSS_1401

anirvācyamanirbhinnam aparicchinnamavyayam /
brahmeva sujanaprema duḥkhamūlanikṛntanam // MSS_1402

anirvṛtaṃ tathā mandaṃ paralokaparāṅmukham /
narakāya na sadgatyaṃ kuputrālambijanma vai // MSS_1403

anirvedaḥ śriyo mūlaṃ cañcurme lohasaṃnibhā /
ahorātrāṇi dīrghāṇi samudraḥ kiṃ na śuṣyati // MSS_1404

anirvedaḥ śriyo mūlaṃ duḥkhanāśe sukhasya ca /
mahān bhavatyanirviṇṇaḥ sukhaṃ cātyantamaśnute // MSS_1405

anirvedaḥ śriyo mūlam anirvedaḥ paraṃ sukham /
anirvedo hi satataṃ sarvārtheṣu pravartakaḥ // MSS_1406

anirvedo hi satataṃ sarvārtheṣu pravartakaḥ /
karoti saphalaṃ jantoḥ karma yacca karoti saḥ // MSS_1407

anila nikhilaviśvaṃ prāṇiti tvatprayuktaṃ sapadi ca vinimīlatyākulaṃ tvadviyogāt /
vapurasi parameśasyācitaṃ nocitaṃ te surabhimasurabhiṃ vā yatsamaṃ svīkaroṣi // MSS_1408

aniśaṃ nayanābhirāmayā ramayā saṃmadino mukhasya te /
niśi niḥsaradindiraṃ kathaṃ tulayāmaḥ kalayāpi paṅkajam // MSS_1409

aniśaṃ mataṅgajānāṃ bṛṃhitamākarṇyate yathā vipine /
manye tathā na jīvati gajendrapalakavalanaḥ siṃhaḥ // MSS_1410

aniśamapi makaraketur manaso rujamāvahannabhimato me /
yadi madirāyatanayanāṃ tāmadhikṛtya praharatīti // MSS_1411

aniścitairadhyavasāyabhīrubhir yatheṣṭasaṃlāparatiprayojanaiḥ /
phale visaṃvādamupāgatā giraḥ prayānti loke parihāsavastutām // MSS_1412

aniṣṭaḥ kanyakāyā yo varo rūpānvito'pi yaḥ /
yadi syāttasya no deyā kanyā śreyo'bhivāñchatā // MSS_1413

aniṣṭadaḥ kṣitīśānāṃ bhūkampaḥ saṃdhyayordvayoḥ /
digdāhaḥ pītavarṇatvād rājñāṃ cāniṣṭadaḥ paraḥ // MSS_1414

aniṣṭayogāt priyaviprayogataḥ parāpamānāddhanahīnajīvitāt /
anekajanmavyasanaprabandhato bibheti no yastapaso bibheti saḥ // MSS_1415

aniṣṭasamprayogācca viprayogātpriyasya ca /
mānuṣā mānasairduḥkhair yujyante alpabuddhayaḥ // MSS_1416

aniṣṭādiṣṭalābhe'pi na gatirjāyate śubhā /
yatrāste viṣasaṃsargo'mṛtaṃ tadapi mṛtyave // MSS_1417

aniṣpannāmapi kriyāṃ nayopetāṃ vicakṣaṇāḥ /
phaladāṃ hi prakurvanti mahāsenāpatiryathā // MSS_1418

anīrṣyāḥ śrotāro mama vacasi cedvacmi tadahaṃ svapakṣādbhetavyaṃ bahu na tu viprapakṣāt prabhavataḥ /
tamasyākrāntaśe kiyadapi hi tejovayavinaḥ svaśaktyā bhāsante divasakṛti satyeva na punaḥ // MSS_1419

anīrṣyurguptadāraḥ syāc cokṣaḥ syādaghṛṇī nṛpaḥ /
striyaṃ seveta nātyarthaṃ mṛṣṭaṃ muñjīta nāhitam // MSS_1420

anīrṣyurguptadāraḥ syāt saṃvibhāgī priyaṃvadaḥ /
ślakṣṇo madhuravākstrīṇāṃ na cāsāṃ vaśago bhavet // MSS_1421

anīśāya śarīrasya hṛdayaṃ svavaśaṃ mayi /
stanakampakriyālakṣyair nyastaṃ niḥśvasitairiva // MSS_1422

anīśvaro'yaṃ puruṣo bhavābhave sūtraprotā dārumayīva yoṣā /
dhātrā tu diṣṭasya vaśe kilāyaṃ tasmādvada tvaṃ śravaṇe dhrto'ham // MSS_1423

anukartumapahnotum ativartitumīkṣitum /
aśakye tejasāṃ patyau mitratānumatikṣamā // MSS_1424

anukurutaḥ khalasujanāv agrimapāścātyabhāgayoḥ sūcyāḥ /
vidadhāti randhrameko guṇavānanyastvapidadhāti // MSS_1425

anukūlakalatro yas tasya svarga ihaiva hi /
pratikūlakalatrasya narako nātra saṃśayaḥ // MSS_1426

anukūlamarthyamavirodhi hitaṃ śravaṇīyamāgamarahasyayutam /
vacanaṃ madīyamapakarṇayati kva manobhavaḥ kva guṇasaṃgrahaṇam // MSS_1427

anukūlavarapuraṃdhriṣu puruṣāṇāṃ baddhamūlarāgāṇām /
nayati mano duḥśīlaḥ kusumāstro hīnapātreṣu // MSS_1428

anukūlavidhāyidaivato vijayī syān nanu kīdṛśo nṛpaḥ /
virahiṇyapi jānakī vane nivasantī mudamādadhau kutaḥ // MSS_1429

anukūlāṃ vimalāṅgīṃ kulajāṃ kuśalāṃ suśīlasaṃpannām /
pañcalakārāṃ bhāryāṃ puruṣaḥ puṇyodayāllabhate // MSS_1430

anukūlā sadā tuṣṭā dakṣā sādhvī vicakṣaṇā /
ebhireva guṇairyuktā śrīriva strī na saṃśayaḥ // MSS_1431

anukūle vidhau deyaṃ yataḥ pūrayitā hariḥ /
pratikūle vidhau deyaṃ yataḥ sarvaṃ hariṣyati // MSS_1432

anukūle sati dhātari bhavatyaniṣṭādapīṣṭamavilambam /
pītvā viṣamapi śaṃbhur mṛtyuṃjayatāmavāpa tatkālam // MSS_1433

anukṛtagaṇḍaśailamadamaṇḍitagaṇḍataṭa- bhramadalimaṇḍalīniviḍaguṅgumaghoṣajuṣaḥ /
dalayati helayaiva harirugrakarānkariṇa- strijagati teja eva guru no vikṛtākṛtitā // MSS_1434

anukṣaṇamanukṣaṇaṃ kṣitipa rakṣyamāṇā tvayā prayāti vidiśo daśa prabalakīrtirekākinī /
iyaṃ niyatamarthiṣu pratidinaṃ vitīrṇā ramā jahāti na tavāntikaṃ dvitayametadatyadbhutam // MSS_1435

anugataparitoṣitānujīvī madhuravacāścaritānuraktalokaḥ /
sunipuṇaparamāptasaktatantro bhavati ciraṃ nṛpatiḥ pradīptaraśmiḥ // MSS_1436

anugantuṃ satāṃ vartma kṛtsnaṃ yadi na śakyate /
svalpamapyanugantavyaṃ mārgastho nāvasīdati // MSS_1437

anugamya śmaśānāntaṃ nivartantīha bāndhavāḥ /
agnau prakṣipya puruṣaṃ jñātayaḥ suhṛdastathā // MSS_1438

anugṛhāṇa śiśūnabhilaṅghitā śabaravārivihāravanasthalī /
visṛja kātaratāmidamagrato harini kāruṇikasya tapovanam // MSS_1439

anugrahavidhau devyā mātuśca mahdantaram /
mātā gāḍhaṃ nibadhnāti bandhaṃ devī nikṛntati // MSS_1440

anugrahādeva divaukasāṃ naro nirasya mānuṣyakameti divyatām /
ayovikāre svaritatvamiṣyate kuto'yasāṃ siddharasaspṛśāmapi // MSS_1441

anucarati śaśāṅkaṃ rāhudoṣe'pi tārā patati na vanavṛkṣe yāti bhūmiṃ latā ca /
tyjati na ca kareṇuḥ paṅkalagnaṃ gajendraṃ vrajatu caratu dharmaṃ bhartṛnāthā hi nāryaḥ // MSS_1442

anucitakarmārambhaḥ svajanavirodho balīyasā spardhā /
pramadājanaviśvāso mṛtyordvārāṇi catvāri // MSS_1443

anucitaphalābhilāṣī nityaṃ vidhinā nivāryate puruṣaḥ /
drākṣāvipākasamaye mukhapāko bhavati kākānām // MSS_1444

anucitamucitaṃ vā karma ko'yaṃ vibhāgo bhagavati paramāstāṃ bhaktiyogo draḍhīyān /
kirati viṣamahīndraḥ sāndrapīyūṣamindur dvayamapi sa maheśo nirviśeṣaṃ bibharti // MSS_1445

anucitamevācaritaṃ paśupatinā yadvidheḥ śiraśchinnam /
chinno na cāsya hasto yenāyaṃ durlipiṃ likhati // MSS_1446

anucite yadi karmaṇi yujyate śaṭhadhiyā prabhuṇā saguṇo janaḥ /
bhavati nāsya guṇāpacayastataḥ padagatasya kirīṭamaṇeriva // MSS_1447

anuccanīcacalatām aṅgānāṃ calapādatām /
kaṭikūrparaśīrṣāṃśakarṇānāṃ samarūpatām // MSS_1448

ramyāṃ pratīkaviśrāntim urasaśca samunnatim /
abhyāsābhyarhitaṃ prāhuḥ sauṣṭhavaṃ nṛtyavedinaḥ // MSS_1449

anucchiṣṭo devairaparidalito rāhudaśanaiḥ kalaṅkenāspṛṣṭo na khalu paribhūto dinakṛtā /
kuhūbhirno lupto na ca yuvativaktreṇa vijitaḥ kalānāthaḥ ko'yaṃ kanakalatikāyāmudayate // MSS_1450

anujaguratha divyaṃ dundubhidhvānamāśāḥ surakusumanipātairvyomni lakṣmīrvitene /
priyamiva kathayiṣyannāliliṅga sphurantīṃ bhuvamanibhṛtavelāvīcibāhuḥ payodhiḥ // MSS_1451

anujjhitasuhṛdbhāvaḥ suhṛdāṃ durhṛdāmapi /
sama ityeva bhāvyo'pi nama ityabhibhāṣyate // MSS_1452

anutkīrṇā yathā paṅke putrikā vātha dāruṇi /
varṇā yathā maṣīkalke tathā sarge sthitāḥ pare // MSS_1453

anuttamānubhāvasya parairapihitaujasaḥ /
akāryasuhṛdo'smākam apūrvāstava kīrtayaḥ // MSS_1454

anutthāne dhruvo nāśaḥ prāptasyānāgatasya ca /
prāpyate phalamutthānāl labhate cārthasaṃpadam // MSS_1455

anu tvā tāta jīvantu suhṛdaḥ sādhubhiḥ saha /
parjanyamiva bhūtāni svādudrumamivāṇḍajāḥ // MSS_1456

anutsūtrapadanyāsā sadvṛttiḥ sannibandhanā /
śabdavidyeva no bhāti rājanītirapaspaśā // MSS_1457

anuditasaṭāvaṃsau nātisphuṭāḥ karajāṅkurā daśanamukulodbhedaḥ stoko mukhe mṛdu garjitam /
mṛgapatiśiśornāstyadyāpi kriyā svakulocitā madakṛtamahāgandhasyāndhyaṃ vyapohati dantinām // MSS_1458

anudinamatitīvraṃ rodiṣīti tvamuccaiḥ sakhi kila kuruṣe tvaṃ vācyatāṃ me mudhaiva /
hṛdayamidamanaṅgāṅgārasaṅgādvilīya prasarati bahirambhaḥ susthite naitadaśru // MSS_1459

anudinamadhikaṃ te kampate kāyavallī śiva śiva nayanāntaṃ nāśrudhārā jahāti /
kathaya kathaya ko'yaṃ yatkṛte komalāṅgi tyajati na pariṇaddhaṃ pāṇḍimānaṃ kapolaḥ // MSS_1460

anudinamanukūlamācarantaṃ vihitamatiḥ pratikūlamācaret kaḥ /
śamitagaralajātakaṇṭhadāhaṃ śitikaṇṭhaḥ śaśinaṃ śirahsu dhatte // MSS_1461

anudunamanuraktaḥ padminīcakravāle navaparimalamādyaccañcarīkānukarṣī /
kalitamadhurapadmaḥ ko'pi gambhīravedī jayati mihirakanyākūlavanyākarīndraḥ // MSS_1462

anudinamabhyāsadṛḍhaiḥ soḍhuṃ dīrgho'pi śakyate virahaḥ /
pratyāsannasamāga ma- muhūrtavighno'pi durviṣaḥ // MSS_1463

anudehamāgatavataḥ pratimāṃ pariṇāyakasya gurumudvahatā /
mukureṇa vepathubhṛto'tibharāt kathamapyapāti na vadhūkarataḥ // MSS_1464

anudghuṣṭaḥ śabdairatha ca ghaṭanātaḥ sphuṭarasaḥ padānāmarthātmā ramayati na tūttānitarasaḥ /
yathā dṛśyaḥ kiṃcitpavanacalacīnāṃśukatayā stanābhogaḥ strīṇāṃ harati na tathonmudritatanuḥ // MSS_1465

anunayagurorgoṣṭhībandho mukhāsavasaṃpadāṃ śapathavivaraṃ visrabdhānāṃ dhiyāṃ prathamātithiḥ /
avinayavacovādasthānaṃ puraṃdhriṣu paprathe madavilasitasyaikācāryaściraṃ rativibhramaḥ // MSS_1466

anunayati patiṃ na lajjamānā kathayati nāpi sakhījanāya kiṃcit /
prasarati malayānile navoḍhā vahati paraṃtu cirāya śūnyamantaḥ // MSS_1467

anunayamagṛhītvā vyājasuptā parācī rutamatha kṛkavākostāramākarṇya kalye /
kathamapi parivṛttā nidrayāndhā kila strī mukulitanayanaivāśliṣyati prāṇanātham // MSS_1468

anunetuṃ māninyā dayitaścaraṇe sarāgacaraṇāyāḥ /
yāvat patitaḥ sa tayā tatkṣaṇamavadhīritaḥ kasmāt // MSS_1469

anupāyena karmāṇi viparītāni yāni ca kriyamāṇāni duṣyanti havīṃṣyaprayateṣviva // MSS_1470

anupālayatāmudeṣyatīṃ prabhuśaktiṃ dviṣatāmanīhayā /
apayāntyacirānmahībhujāṃ jananirvādabhayādiva śriyaḥ // MSS_1471

anupoṣya trirātrāṇi tirthānyanabhigamya ca /
adattvā kāñcanaṃ gāśca daridro nāma jāyate // MSS_1472

anuprāsini sandarbhe gonandanasamaḥ kutaḥ /
yathārthanāmataivāsya yadvā vadati cārutām // MSS_1473

anubandhaṃ kṣayaṃ hiṃsām anapekṣya ca pauruṣam /
mohādārabhyate karma yattattāmasamucyate // MSS_1474

anubandhaṃ ca saṃprekṣya vipākāṃścaiva karmaṇām /
utthānamātmanaścaiva dhīraḥ kurvīta vā na vā // MSS_1475

anubandhānavekṣeta sānubandheṣu karmasu /
saṃpradhārya ca kurvīta na vegena samācaret // MSS_1476

anubhavaṃ vadanendurupāgaman niyatameṣa yadasya mahātmanaḥ /
kṣubhitamutkalikātaralaṃ manaḥ paya iva stimitasya mahodadheḥ // MSS_1477

anubhavata dadata vittaṃ mānyān mānayata sajjanān bhajata /
atiparuṣapavanavilulita- dīpaśikhācañcalā lakṣmīḥ // MSS_1478

anubhavata yuvatyo bhāgyavatyo nitāntaṃ kusumavalayavelāsaṅgakhelāsukhāni /
mama tu madhukarāṇāṃ vāṭapāṭaccarāṇāṃ sapadi patati dhāṭī puṣpavāṭīniveśe // MSS_1479

anubhavannavadolamṛtūtsavaṃ paṭurapi priyakaṇṭhajighṛkṣayā /
anyadāsanarajjuparigrahe bhujalatāṃ jalatāmabalājanaḥ // MSS_1480

anubhāvavatā guru sthiratvād avisaṃvādi dhanurdhanaṃjayena /
svabalavyasane'pi pīḍyamānaṃ guṇavanmitramivānatiṃ prapede // MSS_1481

anubhūtacareṣu dīrghikāṇām upakaṇtheṣu gatāgataikatānāḥ /
madhupāḥ kathayanti padminīnāṃ salilairantaritāni korakāṇi // MSS_1482

anubhūtabhavavyavasthitir janatākānaratābhilāṣiṇī /
tadavaimi sukhena saṃsṛtau kalitānaṅgatayaiva nisṛtiḥ // MSS_1483

anubhūtamidaṃ loke yadbadhvā balavattaraiḥ /
īśvarairdurbalaḥ kṛṣyaḥ kratau paśurivābalaḥ // MSS_1484

anumatamivānetuṃ joṣaṃ tamītamasāṃ kulaṃ diśi diśi dṛśo vinyasyantyaḥ śriyāṅkuritāñjanāḥ /
madanahutabhugdhūmacchāyaiḥ paṭairasitairvṛtāḥ prayayurarasadbhūṣairaṅgaiḥ priyānabhisārikāḥ // MSS_1485

anumatisarasaṃ vimucya cūtaṃ navanavamañjulamañjarīparītam /
api pikadayite kathaṃ matiste ghaṭayati niśphalapippale'valepam // MSS_1486

anumamāra na māra kathaṃ nu sā ratiratiprathitāpi pativratā /
iyadanāthavadhūvadhapātakī dayitayāpi tayāsi kimujjñitaḥ // MSS_1487

anumaraṇe vyavasāyaṃ strīdharme kaḥ karoti savivekaḥ /
saṃsāramuktyupāyaṃ daṇḍagrahaṇaṃ vrataṃ hitvā // MSS_1488

anuyayau vividhopalakuṇḍala- dyutivitānakasaṃvalitāṃśukam /
dhṛtadhanuvalayasya payomucaḥ śabalimā balimānamuṣo vapuḥ // MSS_1489

anuyātāne kajanaḥ parapuruṣairuhyate'sya nijadehaḥ /
adhikārasthaḥ puruṣaḥ śava iva na śṛṇoti vīkṣate kumatiḥ // MSS_1490

anuyāti na bhartāraṃ yadi daivāt kathaṃcana /
tathāpi śīlaṃ saṃrakṣyaṃ śīlabhaṅgāt patatyadhaḥ // MSS_1491

anuyāsyan munitanayāṃ sahasā vinayena vāritaprasaraḥ /
sthānādanuccalannapi gatveva punaḥ pratinivṛttaḥ // MSS_1492

anuyukto dasyuvadhe raṇe kuryāt parākramam /
nāsya kṛtyamataḥ kiṃcid anyad dasyunibarhaṇāt // MSS_1493

anuraktajanaviraktā namrotsiktā viraktarāgiṇyaḥ /
vañcakavacanāsaktā nāryaḥ sadbhāvaśaṅkinyaḥ // MSS_1494

anuraktena hrṣṭena tuṣṭena jagatīpatiḥ /
alpenāpi svasainyena bhūmiṃ jayati bhūmipaḥ // MSS_1495

anurañjitā api guṇair na namanti prakṛtayo vinā daṇḍāt /
aṅkagatāpi na vīṇā kalamadhuramatāḍitā kvaṇati // MSS_1496

anurañjaya rājānaṃ mā jānan jātu kopayeḥ prakṛtīḥ /
etaddvayānurāga- sthirayā tiṣṭha pratiṣṭhayāśliṣṭaḥ // MSS_1497

anurāgaṃ jano yāti parokṣe guṇakīrtanam /
na bibhyati ca sattvāni siddherlakṣaṇamuttamam // MSS_1498

anurāgavatī saṃdhyā divasastatpuraḥsaraḥ /
aho daivagatiścitrā tathāpi na samāgamaḥ // MSS_1499

anurāgavantamapi locanayor dadhataṃ vapuḥ sukhamatāpakaram /
nirakāsayadravimapetavasuṃ viyadālayādaparadiggaṇikā // MSS_1500

anurāgavartinā tava viraheṇogreṇa sā gṛhītāṅgī /
tripuraripuṇeva gaurī varatanurardhāvaśiṣṭeva // MSS_1501

anurāgādabhisarato laṅghitajaladheḥ kalādhināthasya /
rajanīmukhacumbanataḥ śithilitamalakaṃ kalaṅkamākalaye // MSS_1502

anurāgo vṛthā strīṣu strīṣu garvo vṛthā tathā /
pṛiyo'ham sarvadā hyasyā mamaiṣā sarvadāpriyā // MSS_1503

anurūpamidaṃ kūpa chadmacchannasya kiṃ na te /
sanmārgavibhramānmārgapāto'yaṃ yannipātitaḥ // MSS_1504

anurūpeṇa saṃsargaṃ prāpya sarvo'pi modate /
dinaṃ tejonidhiryadvad ratriṃ doṣākaras tathā // MSS_1505

anulepanāni kusumānyabalāḥ kṛtamanyavaḥ patiṣu dīpaśikhāḥ /
samayena tena cirasuptamano- bhavabodhanaṃ samamabodhiṣata // MSS_1506

anulomena balinaṃ pratilomena durjanam /
ātmatulyabalaṃ śatruṃ vinayena balena vā // MSS_1507

anuvanaṃ vanarājivadhūmukhe bahalarāgajavādharacāruṇi /
vikacabāṇadalāvalayo'dhikaṃ rurucire rucirekṣaṇavibhramāḥ // MSS_1508

anuvanamanuyāntaṃ bāṣpavāri tyajantaṃ muditakamaladāmakṣāmamālokya rāmam /
dinamapi ravirocistāpamantaḥ prapede rajanirapi ca tārābāṣpabindūn babhāra // MSS_1509

anuvanamanuśailaṃ tāmanālokya sītāṃ pratidinamatidīnaṃ vīkṣya rāmaṃ virāmam /
giriraśanimayo'yaṃ yastadā na dvidhābhūt kṣitirapi na vidīrṇā sāpi sarvaṃsahaiva / MSS_1510

anuvādayitā vādyaṃ nṛtyasi yattvayi sureśvaraḥ sākṣāt /
pakṣaśca te'javandyas tadasi kalāpin paraṃ dhanyaḥ // MSS_1511

anuvelaṃ nihanyante yasya sindhorivodyamāḥ /
taṃ pramathya śriyaṃ ko'pi vipakṣo bhūbhṛduddharet // MSS_1512

anuśayavatyevoktā proṣyatpatikā na bhedato bahubhiḥ /
paradeśādāgacchat- patikāpi yathā pramuditaiva // MSS_1513

anuśāsaddhi dharmeṇa vyavahāreṇa saṃsthayā /
nyāyena ca caturthena caturantāṃ mahīṃ jayet // MSS_1514

anuśīlitakuñjavāṭikāyāṃ jaghanālaṃkṛtapītaśāṭikāyām /
muralīkalakūjite ratāyāṃ mama ceto'stu kadambadevatāyām // MSS_1515

anuśocanamastavicāramanā vigatasya mṛtasya ca yaḥ kurute /
sa gate salile tanute varaṇaṃ bhujagasya gatasya gatiṃ kṣipati // MSS_1516

anuṣṭhānena rahitāṃ pāṭhamātreṇa kevalam /
rañjayatyeva yā lokaṃ kiṃ tayā śukavidyayā // MSS_1517

anuṣṭhitaṃ tu yad devair ṛṣibhiryadanuṣṭhitam /
nānuṣṭheyaṃ manuṣyaistu taduktaṃ karma ācaret // MSS_1518

anuṣṭhiteṣu kāryeṣu yo guhyaṃ na prakāśayet /
sa tatra labhate siddhiṃ jalamadhye kapiryathā // MSS_1519

anusarati karikapolaṃ bhramaraḥ śravaṇena tāḍyamāno'pi /
gaṇayati na tiraskāraṃ dānāndhavilocano nīcaḥ // MSS_1520

anusara sarastīraṃ vairaṃ kimatra sahātmanā katipayapayaḥpāṇam mānin samācara cātaka /
pralayapavanairastaṃ nītaḥ purātanavārido yadayamadayaṃ kīlājālaṃ vimuñcati nūtanaḥ // MSS_1521

anūḍhā mandire yasya rajaḥ prāpnoti kanyakā /
patanti pitaras tasya svargasthā api tairguṇaiḥ // MSS_1522

anūnavegādayamadvitīyaś cchāyāturaṅgādiva lajjamānaḥ /
khuroddhutairvīra turaṅgamaste rajobhirahṇanāṃ patimāvṛṇoti //
anrjutvamasadbhāvaṃ kārpaṇyaṃ calacittatā /
puṃsāṃ mitreṣu ye doṣās te veśyāsu guṇāḥ smṛtāḥ // MSS_1523

anṛtaṃ ca samutkarṣe rājagāmi ca paiśunam /
guroścālīkanirbandhaḥ samāni brahmahatyayā // MSS_1524

anṛtaṃ cāṭuvādaśca dhanayogo mahānayam /
satyaṃ vaiduṣyamityeṣa yogo dāridryakārakaḥ // MSS_1525

anṛtaṃ satyamityāhuḥ satyaṃ cāpi tathānṛtam /
iti yāstāḥ kathaṃ vīra saṃrakṣyāḥ puruṣairiha // MSS_1526

anṛtaṃ sāhasaṃ māyā mūrkhatvamatilubdhatā /
aśaucatvaṃ nirdayatvaṃ strīṇāṃ doṣāḥ svabhāvajāḥ // MSS_1527

anṛtapaṭutā kraurye cittaṃ satāmavamānitā matiravinaye dharme śāṭhyaṃ guruṣvapi vañcanam /
lalitamadhurā vākpratyakṣe parokṣavibhāṣiṇī kaliyugamahārājasyaitāḥ sphuranti vibhūtayaḥ // MSS_1528

anrtamanṛtametadyastudhāsūtirindur niyatamayamanāryo nirgataḥ kālakūṭāt /
hṛdayadahanadakṣā dāruṇā cānyatheyaṃ vada sakhi madhuratve mohaśaktiḥ kuto'sya // MSS_1529

anṛte dharmabhagne ca na śuśrūṣati cāpriye /
na priyaṃ na hitaṃ vācyaṃ sadbhireveti ninditāḥ // MSS_1530

anekagaticitritaṃ vividhajātibhedākulaṃ sametya tanumadgaṇaḥ pracuracitraceṣṭodyataḥ /
purārjitavicitrakarmaphalabhugvicitrāṃ tanuṃ pragṛhya naṭavat sadā bhramati janmaraṅgāṅgaṇe // MSS_1531

anekacittamantraśca dveṣyo bhavati mantriṇām /
anavasthitacittatvāt karye taiḥ samupekṣyate // MSS_1532

anekajanmasaṃbhūtaṃ pāpaṃ puṃsāṃ praṇaśyati /
snānamātreṇa gaṅgāyāṃ sadyaḥ puṇyasya bhājanam // MSS_1533

anekajīvaghātotthaṃ mlecchocchiṣṭaṃ malāvilam /
malāktapātranikṣiptaṃ kiṃ śaucaṃ lihato madhu // MSS_1534

anekadoṣaduṣṭasya kāyasyaiko mahān guṇaḥ /
yo yathā vartayatyenaṃ taṃ tathaivānuvartate // MSS_1535

anekadoṣaduṣṭasya madhuno'pāstadoṣatām /
yo brūte tadrasāsaktaḥ so'satyāmbudhirastadhīḥ // MSS_1536

anekadheti praguṇena cetasā vivicya mithyātvamalaṃ sadūṣaṇam /
vimucya jainendramataṃ sukhāvahaṃ bhajanti bhavyā bhavaduḥkhabhīravaḥ // MSS_1537

anekaparyāyaguṇairupetaṃ vilokyate yena samastatattvam /
tadindriyānindriyabhedabhinnaṃ jñānaṃ jinendrairgaditaṃ hitāya // MSS_1538

anekabhavasaṃcitā iha hi karmaṇā nirmitāḥ priyāpriyaviyogasaṃgamavipattisaṃpattayaḥ /
bhavanti sakalāsvimā gatiṣu sarvadā dehināṃ jarāmaraṇavīcike jananasāgare majjatām // MSS_1539

anekamalasaṃbhave kṛmikulaiḥ sadā saṃkule vicitrabahuvedane budhavinindite duḥsahe /
bhramannayamanārataṃ vyasanasaṃkaṭe dehavān purārjitavaśo bhave bhavati bhāminīgarbhake // MSS_1540

anekamukhapāpātmā chadmasaṃdarśitāśramaḥ /
karburaprakṛtiḥ kaścit kāpeyakalahocitaḥ //
anekayuddhavijayī saṃdhānaṃyasya gacchati /
tatpratāpena tasyāśu vaśaṃ gacchanti vidviṣaḥ // MSS_1541

anekarājyāntaritam atikṣiptaṃ na yudhyate /
antargatāmitraśalyam antaḥśalyaṃ hi na kṣamam // MSS_1542

anekavarṇapadatāṃ vāgvidyudiva bibhratī /
abhrānteṣu sadā sārasaṅgiṣu syāt sphuradguṇā // MSS_1544

anekavidvajjanaratnapūrṇaṃ ve dodakanyāyataraṅgaramyam /
alaṅghanīyaṃ gurutīrthamekaṃ sabhāsamudraṃ śirasā namāmi // MSS_1545

anekaśāstraṃ bahu veditavyam alpaśca kālo bahavaśca vighnāḥ /
yat sārabhūtaṃ tadupāsitavyaṃ haṃso yathā kṣīramivāmbumadhyāt // MSS_1546

anekasaṃśayocchedi parokṣārthasya darśakam /
sarvasya locanaṃ śāstraṃ yasya nāstyandha eva saḥ // MSS_1547

anekasuṣiraṃ kāntaṃ vādi strīmukhapaṅkajam /
paśya kānte vanasyānte netraśrutimanoramam // MSS_1548

anekasuṣiraṃ vādyaṃ kāntaṃ ca ṛṣisaṃjñitam /
cakriṇā ca sadārādhyaṃ yo jānāti sa paṇḍitaḥ // MSS_1549

aneke phaṇinaḥ santi bhekahbakṣaṇatatparāḥ /
eka eva hi śeṣo'yaṃ dharaṇīdharaṇakṣamaḥ // MSS_1550

anekairnāyakaguṇaiḥ sahitaḥ sakhi me patiḥ /
sa eva yadi jāraḥ syāt saphalaṃ jīvitaṃ bhavet // MSS_1551

anena kalyāṇi mṛṇālakomalaṃ vratena gātraṃ glapayasyakāraṇam /
prasādamākāṅkṣati yastavotsukaḥ sa kiṃ tvayā dāsajanaḥ prasādyate // MSS_1552

anena kasyāpi kulāṅkureṇa spṛṣṭasya gātreṣu sukhaṃ mamaivam /
kāṃ nirvṛtiṃ cetasi tasya kuryād yasyāyamaṅgāt kṛtinaḥ prarūḍhaḥ // MSS_1553

anena kiṃ na paryāptaṃ māṃsasya parivarjanam /
yatpāṭitaṃ tṛṇenāpi svamaṅgaṃ paridūyate // MSS_1554

anena kumbhadvayasaṃniveśa- saṃlakṣyamāṇena kucadvayena unmajjatā yauvanavāraṇena vāpīva tanvaṅgi taraṅgitāsi // MSS_1555

anena tanumadyayā mukharanūpurārāviṇā navāmburuhakomalena caraṇena saṃbhāvitaḥ /
aśoka yadi sadya eva kusumairna saṃpatsyase vṛthā vahasi dohadaṃ lalitakāmisādhāraṇam // MSS_1556

anena tava putrasya prasuptasya vanāntare /
śikhāmāruhya hastena khaḍgena nihataṃ śiraḥ // MSS_1557

anena tvaṃ svarūpeṇa puṣpabāṇaiśca pañcabhiḥ /
mohayan puruṣān strīśca kuru sṛṣṭiṃ sanātanīm // MSS_1558

anena dharmaḥ saviśeṣamadya me trivargasāraḥ pratibhāti bhāvini /
tvayā manonirviṣayārthakāmayā yadeka eva pratigṛhya sevyate // MSS_1559

anena puruṣo dehān upādatte vimuñcati /
harṣaṃ śokaṃ bhayaṃ duḥkhaṃ sukhaṃ cānena vindati // MSS_1560

anena bhavati śreṣṭho mucyante ca sabhāsadaḥ /
kartārameno gacchecca nindyo yatra hi nindyate // MSS_1561

anena martyadehena yallokadvayaśarmadam /
vicintya tadanuṣṭheyaṃ heyaṃ karma tato'nyathā // MSS_1562

anena yūnā saha pārthivena rambhoru kaccin manaso ruciste /
siprātaraṅgānilakampitāsu vihartumudyānaparaṃparāsu // MSS_1563

anena yogarājena dhūpitāmbarabhūṣaṇaḥ /
dhūpitāṅgastribhuvanaṃ manujaḥ kurute vaśam // MSS_1564

anena yogena vivṛddhatejā nijāṃ parasmai padavīmayacchan /
samācarācāramupāttaśastro japopavāsābhiṣavairmunīnām // MSS_1565

anena rambhoru bhavanmukhena tuṣārabhānostulayā jitasya /
ūnasya nūnaṃ paripūraṇāya tārāḥ sphuranti pratimānakhaṇḍāḥ // MSS_1566

anena vītarāgeṇa buddhenevādhareṇa te /
dūti nirvyājamākhyātā sarvavastuṣu śūnyatā // MSS_1567

anena sarvārthikṛtārthitā kṛtā hṛtārthinau kāmagavīsuradrumau /
mithaḥpayaḥsecanapallavāśanaiḥ pradāya dānavyasanaṃ samāpnutam // MSS_1568

anena sārdhaṃ tava yauvanena koṭiṃ parāmacchiduro'dhyarohat /
premāpi tanvi tvayi vāsavasya guṇo'pi cāpe sumanaḥśarasya // MSS_1569

anena sārdhaṃ viharāmburāśes tīreṣu tālīvanamarmareṣu /
dvīpāntarānītalavaṅgapuṣpair apākṛtasvedalavā marudbhiḥ // MSS_1570

anena sidhyati hyetanmamāpyeṣa parākramaḥ /
evaṃ jñātvā caredyastu saphalāstasya buddhayaḥ // MSS_1571

anenaiva prakāreṇa trayo grīvāśritāḥ śubhāḥ /
lalāṭe yugalāvartau candrārkau śubhakārakau // MSS_1572

anaiśvarye tṛṣā bhāryā pathi kṣetre tridhā kṛṣiḥ /
lambakaḥ sākṣiṇaścaiva pañcānarthā asaṃkṛtāḥ // MSS_1573

anaucityādṛte nānyad rasabhaṅgasya kāraṇam /
prasiddhaucityabandhastu rasasyopaniṣat parā // MSS_1574

anaucityena kanyāsu purastrīṣu ca yā ratiḥ /
sa kāmo hi kṣitīndrāṇām ariṣaḍvargapūrvajaḥ // MSS_1575

antaḥkaṭurapi laghurapi sadvṛttaṃ yaḥ pumān na saṃtyajati /
sa bhavati sadyo vandyaḥ sarṣapa iva sarvalokasya // MSS_1576

antaḥkaṭu sadā prema mānuṣaṃ parilakṣyate /
hatāśān na karotyasmān daivapremaiva kevalam // MSS_1577

antaḥkapālavivare jihvāmākuñcya cārpayet /
bhrūmadhyadṛṣṭiramṛtaṃ pibet khecaramudrayā // MSS_1578

antaḥkaraṇatattvasya dampatyoḥ snehasaṃśrayāt /
ānandagranthireko'yam apatyamiti kathyate // MSS_1579

antaḥkaraṇavikāraṃ guruparijanasaṃkaṭe'pi kulaṭānām /
jānanti tadabhiyuktā bhrūbhaṅgāpāṅgamadhuradṛṣṭena // MSS_1580

antaḥkaraṇaśūnyo'pi tṛṇapūlakapūruṣaḥ satkṛtaḥ kṣetrapatinā samartho mṛgavārane // MSS_1581

antaḥ kiṃcit kiṃcin muktānāmahaha vibhramaṃ vahasi /
dūrāddarśayasi punaḥ kṣārodgāraṃ jaḍādhīśaḥ // MSS_1582

antaḥ kuṭilatāṃ bibhrac chaṅkhaḥ sa khalu niṣṭhuraḥ /
huṃkaroti yadā dhmātas tadaiva bahu gaṇyatām // MSS_1583

antaḥkūjadudārakaṇṭhamasakṛnmuñceti lolekṣaṇaṃ prāyaḥ smerakapolamūlamamṛtaprasyandi bimbādharam /
ādhūtāṅgulipallavāgramalamityānartitabhrūlataṃ pītaṃ yena mukhaṃ tvadīyamabale so'haṃ hi dhanyo yuvā //
antaḥ kecana kecanāpi hi dale kecit tathā pallave mūle kecana kecana tvaci phale puṣpe ca ke'pi drumāḥ /
saurabhyaṃ nitarāṃ bibhartyavikalaḥ śrīkhaṇḍaṣaṇḍīkṛtaḥ sarvāṅge surabhirna ko'pi dadṛśe muktvā bhavantaṃ kvacit // MSS_1584

antaḥkopakaṣāyite'pi hṛdaye sādhorasacceṣṭitair bhadrāṇyeva bahiḥ kriyāsu vacanānyāvirbhavantyarthataḥ /
madhye'tyantakarālavāḍavaśikhāśoṣe'pi vārāṃnidheḥ kallolāḥ prakaṭībhavanti satataṃ muktāphalodgāriṇaḥ // MSS_1585

antaḥkrūrāḥ saumyamukhā agādhahṛdayāḥ striyaḥ /
antarviṣā bahiḥsaumyā bhakṣyā viṣakṛtā iva // MSS_1587

antaḥ krodhojjihānajvalanabhavaśikhākārajihvāvalīḍha- prauḍhabrahmāṇḍabhāṇḍaḥ pṛthubhuvanaguhāgarbhagambhīranādaḥ /
dṛpyatpārīndramūrtirmurajidavatu vaḥ suprabhāmaṇḍalībhiḥ kurvannirdhūmadhūmadhvajanicitamiva vyoma romacchaṭānām // MSS_1588

antaḥkhedamivodvahan yadaniśaṃ ratnākaro ghūrṇate yacca dhyānamivāsthito na kanakakṣoṇīdharaḥ syandate /
jāne dānavilāsadānarabhasaṃ śauryaṃ ca te śuśruvān eko manthavighaṭṭanāstadaparaṣṭaṅkāhatīḥ śaṅkate // MSS_1589

antaḥpuracaraiḥ sārdhaṃ yo na mantraṃ samācaret /
na kalatrairnarendrasya sa bhaved rājavallabhaḥ // MSS_1590

antaḥpuradhanādhyakṣair vairidūtairnirākṛtaiḥ /
saṃsargaṃ na vrajed rājam vinā pārthivaśāsanāt // MSS_1591

antaḥpurāṇāṃ vihitavyavasthaḥ pade pade'haṃ skhalitāni rakṣan /
jarāturaḥ saṃprati daṇḍanītyā sarvaṃ nṛpasyānukaromi vṛttam // MSS_1592

antaḥpurīyasi raṇeṣu sutīyasi tvaṃ pauraṃ janaṃ tava sadā ramaṇīyate śrīḥ /
dṛṣṭaḥ priyābhiramṛtadyutidarśamindra- saṃcāramatra bhuvi saṃcarasi kṣitīśa // MSS_1593

antaḥpure pitṛtulyaṃ mātṛtulyaṃ mahānase /
goṣu cātmasamaṃ dadyāt svayameva kṛṣiṃ vrajet // MSS_1594

antaḥprakāśamicchantaḥ sadasacca vivecitum /
snehaṃ sūktipradīpe'smin vardhayantu subuddhayaḥ // MSS_1595

antaḥprataptamarusaikatadahyamāna- mūlasya campakataroḥ kva vikāsacintā /
prāyo bhavatyanucitasthitideśabhājāṃ śreyaḥ svajīvaparipālanamātrameva // MSS_1596

antaḥ praviśya yuvacihnamuro'balānāṃ yena krameṇa bata loḍayate manīṣin /
āśritya taṃ hi niyamaṃ tata unnayete etau kucau sapadi hanti vidīrṇamadhyāt // MSS_1597

antaḥśarīrapariśoṣamudagrayantaḥ kīṭakṣatasrutibhirasramivodvamantaḥ /
chāyāviyogamalinā vyasane nimagnā vṛkṣāḥ śmaśānamupagantumiva pravṛttāḥ // MSS_1598

antaḥsaṃtoṣacittānāṃ saṃpadasti pade pade /
antarmalinacittānāṃ sukhaṃ svapne'pi durlabham // MSS_1599

antaḥsaṃtoṣavāṣpaiḥ sthagayati na dṛśastābhirākarṇayiṣyann aṅgenānastiromā racayati pulakaśreṇimānandakandām /
na kṣoṇībhaṅgabhīruḥ kalayati ca śiraḥkampanaṃ tanna vidmaḥ śṛṇvannetasya kīrtīḥ kathamuragapatiḥ prītimāviṣkaroti // MSS_1600

antaḥsamutthavirahānalatīvratāpa- saṃtāpitāṅga karipuṅgava muñca śokam /
dhātrā svahastalikhitāni lalāṭapaṭṭe ko vākṣarāṇi parimārjayituṃ samarthaḥ // MSS_1601

antaḥ sametyāpi bahiḥ prayāti spṛṣṭā vidhatte tvavagūhanāni /
dattvādharaṃ roditi śuṣkameva saivaṃ vilāsaistapasāpyalabhyā // MSS_1602

antaḥsāravihīnānāṃ sahāyaḥ kiṃ kariṣyati /
malaye'pi sthito veṇur veṇureva na candanaḥ // MSS_1603

antaḥsāravihīnānām upadeśo na jāyate /
malayācalasaṃsargān na veṇuścandanāyate // MSS_1604

antaḥsārairakuṭilais susnigdhaiḥ suparīkṣitaiḥ /
mantribhirdhāryate rājyaṃ sustambhairiva mandiram // MSS_1605

antaḥsāro'pi niryāti nūnamarthitayā saha /
anyathā tadavasthasya mahimā kena dehinām // MSS_1606

antaḥsthasuratārambhā bhilāṣamapi gopayat /
anyonyaṃ mithunaṃ vetti netre dṛṣṭvaiva cañcale // MSS_1607

antaḥsthenāviruddhena suvṛttenāticāruṇā /
antarbhinnena saṃprāptaṃ mauktikenāpi bandhanam // MSS_1608

antaḥsvīkṛtajāhnavījalamatisvacchandaratnāṃkura- śreṇīśoṇabhujaṅganāyakaphaṇācakrollasatpallavam /
bhūyādabhyudayāya mokṣanagaraprasthānabhājāmitaḥ pratyūhapraśamaikapūrṇakalaśaprāyaṃ śiro dhūrjaṭeḥ // MSS_1609

antakaḥ paryavasthātā janminaḥ saṃtatāpadaḥ /
iti tyājye bhave bhavyo muktāvruttiṣṭhate janaḥ // MSS_1610

antakaḥ śamano mṛtyuḥ pātālaṃ vaḍavāmukham /
kṣuradhārā viṣaṃ sarpo vahnirityekataḥ striyaḥ // MSS_1611

antakāya dadatā tvayā priyā- kāyakāncanalatāpratigraham /
dīyate bata madīyajīvanaṃ dakṣiṇānila kuto na dakṣiṇā // MSS_1612

antakāle ca māmeva smaranmuktvā kalevaram /
yaḥ prayāti sa madbhāvaṃ yāti nāstyatra saṃśayaḥ // MSS_1613

antakāle hi bhūtāni muhyantīti purāśrutiḥ /
[rājñaivaṃ kurvatā loke pratyakṣā sā śrutiḥ kṛtā] // MSS_1614

antako'pi hi jantūnām antakālamapekṣate /
na kālaniyamaḥ kaścid uttamarṇasya vidyate // MSS_1615

antaraṃ kiyadākhyānti santo raghukirātayoḥ /
antaraṃ tāvadākhyānti santo raghukirātayoḥ // MSS_1616

antaraṅgamanaṅgasya śṛṅgārakuladaivatam /
aṅgīkaroti tanvaṅgī sā vilāsamayaṃ vayaḥ // MSS_1617

antaraṅgā hi ye rājñaḥ parasvādāyinaḥ śaṭhāḥ /
bhṛtyā bhavanti prāyeṇa tebhyo rakṣedimāḥ prajāḥ // MSS_1618

antarāyatimiropaśāntaye śāntapāvanamacintyavaibhavam /
taṃ naraṃ vapuṣi kuñjaraṃ mukhe manmahe kimapi tundilaṃ mahaḥ // MSS_1619

antargatamalo duṣṭas tīrthasnānaśatairapi /
na śudhyati yathā bhāṇḍaṃ surāyā dāhitaṃ ca sat // MSS_1620

antargatā madanavahniśikhāvalī yā sā bāghyate kimiha candanapaṅkalepaiḥ /
yatkumbhakārapacanopari paṅkalepas tāpāya kevalamasau na ca tāpaśāntyai // MSS_1621

antargatairguṇaiḥ kiṃ dvitrā api yatra sākṣiṇo viralāḥ /
sa guṇo gīteryadasau vanecaraṃ hariṇamapi harati // MSS_1622

antargato yadi haristapasā tataḥ kiṃ nāntargato yadi haristapasā tataḥ kim /
antarbahiryadi haristapasā tataḥ kiṃ nāntarbahiryadi haristapasā tataḥ kim // MSS_1623

antargāḍhaṃ cihnahīnaṃ viśālaṃ madhye sthūlaṃ sthūladhārātitīkṣṇam /
rakṣovakṣaśchedanārthaṃ mahāntaṃ kṛtvā khaṅgaṃ devarājotihṛṣṭaḥ // MSS_1624

antargūḍhānarthān avyañjayataḥ prasādarahitasya /
saṃdarbhasya nadasya ca na rasaḥ prītyai rasajñānām // MSS_1625

antargṛhaṃ nayati vardhitaromaharṣaṃ sparśena sītkaraṇagarbhamukhīḥ karoti /
kiṃcādharavraṇavatīḥ kurute puranghrīḥ kiṃ vallabhaḥ kimuta haimana eṣa vātaḥ // MSS_1626

antargṛhe kṛṣṇamavekṣya cauraṃ baddhvā kavāṭaṃ jananīṃ gataikā /
ulūkhale dāmanibaddhamenaṃ tatrāpi dṛṣṭvā stimitā babhūva // MSS_1627

antarjalāvāritamūrti yāto bālāpariṣvaṅgasukhāya patyuḥ /
vighnāya vaimalyamapāṃ babhūva vyarthaḥ prasādo hi jalāśayānām // MSS_1628

antardadhānāpi kaṭhorabhāvaṃ svacchadyutiḥ sā nijamādhurībhiḥ /
bhuktā rasaṃ svāduvidāṃ tanoti guṇopagūḍhā sitaśarkareva // MSS_1629

antarduṣṭaḥ kṣamāyuktaḥ sarvānarthakaraḥ kila /
śakuniḥ śakaṭāraśca dṛṣṭāntāvatra bhūpate // MSS_1630

antardhṛtaguṇaireva pareṣāṃ sthīyate hṛdi /
arthaṃ samarthayantyenaṃ samagraṃ kusumasrajaḥ // MSS_1631

antarnāḍīniyamitamarullaṅghitabrahmarandhraṃ svānte śāntipraṇayini samunmīladānandasāndram /
pratyagjyotirjayti yaminaḥ spaṣṭalālāṭanetra- vyājavyaktīkṛtamiva jagadvāpi candrārdhamauleḥ // MSS_1632

antarnidahyamānena śaktihīnena śatruṣu /
saṃtatiḥ kriyate yena nindyaṃ dhiktasya jīvitam // MSS_1633

antarnibaddhagurumanyuparaṃparābhir iccocitaṃ kimapi vaktumaśaknuvatyāḥ /
avyktahūṃkuticalatkucamaṇḍalāyās tasyāḥ smarāmi muhurardhavilokitāni // MSS_1634

antarbalānyahamamuṣya mṛgādhipasya vācā nigadya kathamadya laghūkaromi /
jānanti kiṃ na karajakṣatakumbhikumbhā- dāmuktamauktikamayāni digantarāṇi // MSS_1635

antarbhāvanigūdheyaṃ vākte prakṛtipeśalā /
vikārādyanabhijñeyā viṣadigdheva vāruṇī // MSS_1636

antarbhūto nivasati jaḍe jaḍaḥ śiśiramahasi hariṇa iva /
ajaḍe śaśīva tapane sa tu praviṣṭo'pi niḥsarati // MSS_1637

antarbhūya prabhoḥ prāpyo viśeṣaḥ sarvathā budhaiḥ /
ko hi nāma na kurvīta kevalodarapūraṇam // MSS_1638

antarmagnakareṇavaḥ kalabhakavyārugṇakandāṅkuraiḥ sāmodāḥ paritaḥ pramattamahiṣaśvāsollasadvīcayaḥ /
saṃmodaṃ janayanti śailasaritaḥ succhāyakacchasthalī- sīmāno jalasekaśītalaśilānidrāṇarohidgaṇāḥ // MSS_1639

antarmanyuvibhinnadīrgharasitaprodbhūtakaṇṭhavyathair ākruṣṭāstaṭinīṣu kokamithunairyāvanniśīthaṃ mithaḥ /
śītojjāgarajambukaughamukharagrāmopakaṇṭhasthalāḥ kṛcchreṇoparamanti pānthagṛhiṇīcintāyatā rātrayaḥ // MSS_1640

antarmalinadehena bahirāhlādakāriṇā /
mahākālaphaleneva kaḥ khalena na vañcitaḥ // MSS_1641

antarmalinasaṃsargāc chrutavānapi duṣyati /
yaccakṣuḥsaṃnikarṣeṇa karṇo'bhūt kuṭilāśrayaḥ // MSS_1642

antarmalīmase vakre cale karṇāntasarpiṇi tasyā netrayuge dṛṣṭe durjane ca kutaḥ sukham // MSS_1643

antarmārarasārdrā guruguṇabaddhānukūlatāṃ dhatte /
niṣṭhurabāhyākārā dṛtiriva patisaṃnidhau navyā // MSS_1644

antarmohanamaulighūrṇanacalanmandāravibhraṃśanaḥ stambhākarṣaṇadṛptiharṣaṇamahāmantraḥ kuraṅgīdṛśām /
dṛpyaddānavadūyamānadiviṣaddurvāraduḥkhāpadāṃ bhraṃśaḥ kaṃsariporvilopayatu vo'śreyāṃsi vaṃśīravaḥ // MSS_1645

antarye satataṃ luthantyagaṇitāstāneva pāthodharair āttānāpatatastaraṅgavalayairāliṅgya gṛhṇannasau /
vyaktaṃ mauktikaratnatāṃ jalakaṇānsaṃprāpayatyambudhiḥ prāyo'nyena kṛtādaro laghurapi prāpto'rcyate svāmibhiḥ // MSS_1646

antarlīnabhujaṃgamaṃ gṛhamivāntaḥsthograsiṃhaṃ vanaṃ grāhākīrṇamivābhirāmakamalacchāyāsanāthaṃ saraḥ /
kālenāryajanāpavādapiśunaiḥ kṣudrairanāryaiḥ śritaṃ duḥkhena pravigāhyate sacakitaṃ rājñāṃ manaḥ sāmayam // MSS_1647

antarlīnasya duḥkhāgner adyoddāmaṃ jvaliṣyataḥ /
utpīḍa iva dhūmasya mohaḥ prāgāvṛṇoti mām // MSS_1648

antarvasati mārjārī śunī vā rājaveśmani /
bahirbaddho'pi mātaṅgas tataḥ kiṃ laghutāṃ gataḥ // MSS_1649

antarvahasi kaṣāyaṃ bāhyākāreṇa madhuratāṃ yāsi /
sahakāra māyiviṭapin yuktaṃ lokairbahirnītaḥ // MSS_1650

antarbahistrijagatīrasabhāvavidvān yo nartayatyakhiladehabhṛtāṃ kulāni /
kṣemaṃ dadātu bhagavān paramādidevaḥ śṛṅgāranāṭakamahākavirātmajanmā // MSS_1651

antarvāṇiṃ manyamānaḥ khalo'yaṃ paurobhāgyaṃ sūktimuktāsu dhatte /
sarvānandinyaṅgake kāminīnām īrma mārgatyeṣa vai bambharāliḥ // MSS_1652

antarviśati mārjārī śunī vā rājaveśmani /
bahiḥsthasya gajendrasya kimarthaḥ parihīyate // MSS_1653

antarviṣamayā hyetā bahiścaiva manoramāḥ /
guñjāphalasamākārā yoṣitaḥ kena nirmitāḥ // MSS_1654

antarviṣṇostrilokī nivasati phaṇināmīśvare so'pi śete sindhoḥ so'pyekadeśe tamapi culukayāṃ kumbhayoniścakāra /
dhatte khadyotalīlāmayamapi nabhasi śrīnṛsiṃhakṣitīndra tvatkīrteḥ karṇanīlotpalamidamapi ca prekṣaṇīyaṃ vibhāti // MSS_1655

antarhite śaśini saiva kumudvatī me dṛṣṭiṃ na nandayati saṃsmaraṇīyaśobhā /
iṣṭapravāsajanitānyabalājanena duḥkhāni nūnamatimātradurudvahāni // MSS_1656

antaśchidrāṇi bhūyaṃsi kaṇṭakā bahavo bahiḥ /
kathaṃ kamalanālasya mā bhūvan bhaṅgurā guṇāḥ // MSS_1657

antaśchidrairiyamadhigatā dustyajā duṣṭavaṃśair atyāsaktirnijakulaśubhodarkalābhāya na syāt /
kiṃ tu grīṣmaśvasanajanitānyonyasaṃgharṣavahni- jvālāmālājaṭilavapuṣāmātmanāṃ nāśanāya // MSS_1658

antastava sa jvalano bhīmā makarāśca sarvato vikaṭāḥ /
atha bata viṣamayamaṅgam taditi niṣevyaḥ kathaṃ bhaverjaladhe // MSS_1659

antastāraṃ taralitatalāḥ stokamutpīḍabhājaḥ pakṣmāgreṣu grathitapṛṣataḥ kīrṇadhārāḥ krameṇa /
cittātaṅkaṃ nijagarimataḥ samyagāsūtrayanto niryāntyasyāḥ kuvalayadṛśo bāṣpavārāṃ pravāhāḥ // MSS_1660

antastimiranāśāya śābdabodho nirarthakaḥ /
na naśyati tamo nāma kṛtayā dīpavārtayā // MSS_1661

antastṛṣṇopataptānāṃ dāvadāhamayaṃ jagat /
bhavatyakhilajantūnāṃ yadantastadbahiḥ sthitam // MSS_1662

antikāntikagatenduvisṛṣṭe jihmatāṃ jahati dīdhitijāle /
niḥsṛtastimirabhāranirodhād ucchvasanniva rarāja digantaḥ // MSS_1663

antenārjunatāṃ dadhāti nayanaṃ madhye tathā kṛṣṇatāṃ dvairūpyaṃ dadhatāmunā viracitaḥ karṇena te vigrahaḥ /
tatkarṇārjunakṛṣṇavigrahavatī sākṣāt kurukṣetratāṃ yātāsi tvadavāptireva taruṇi śreyaḥ paraṃ gaṇyate // MSS_1664

anteṣu remire dhīrā nate madhyeṣu remire /
antaprāptiṃ sukhāmāhur duḥkhamantaramantayoḥ // MSS_1665

ante santoṣadaṃ viṣṇuṃ smaret hantāramāpadām /
śaratalpagato bhīṣmaḥ sasmāra garuḍadhvajam // MSS_1666

anto nāścaryajātasya jatato dṛśyate kvacit /
kṣudrāhaṃbhāvasīmāyā yāvatīṃ muktimāpnumaḥ /
āścaryāṇi hi tāvanti prakāśāni bhavanti naḥ // MSS_1667

anto nāsti pipāsāyāḥ saṃtoṣaḥ paramaṃ sukham /
tasmāt saṃtoṣameveha dhanaṃ paśyanti paṇḍitāḥ // MSS_1668

antyajo'pi naraḥ pūjyo yasyāsti vipulaṃ dhanam /
api brahmakule jāto nirdhanaḥ paribhūyate // MSS_1669

antyajo'pi yadā sākṣī vivāde saṃprajāyate /
na tatra yujyate divyaṃ kiṃ punarvanadevatāḥ // MSS_1670

antyāvasthāgato'pi mahān svaguṇāñjahāti na śuddhatayā /
na śvetabhāvamujjhati śaṅkhaḥ śikhibhuktamukto'pi // MSS_1671

antraprotabṛhatkapālanalakakrūrakvaṇatkaṅkaṇa- prāyapreṅkhitabhūribhūṣaṇaravairādhoṣayantyambaram /
pītaccharditaraktakardamaghanaprāgbhāraghorollasad vyālolastanabhārabhairavavapurdarpoddhataṃ dhāvati // MSS_1672

antrākalpacalatpayodharabharavyāviddhameghacchaṭā- sṛkvasthāmiṣagṛdhnugṛdhragarudāsphāloccalanmūrdhajā /
vyādāyānanamaṭṭahāsavikaṭaṃ dūreṇa tārāpathāt trasyatsiddhapuraṃdhrivṛndarabhasonmuktādupakrāmati // MSS_1673

antraiḥ kalpitamaṅgalapratisarāḥ strīhastaraktotpala- vyaktottaṃsabhṛtaḥ pinahya sahasā hṛtpuṇḍarīkasrajaḥ /
etāḥ śoṇitapaṅkakuṅkumajuṣaḥ saṃbhūya kāntaiḥ pibanty asthisnehasurāḥ kapālacaṣakaiḥ prītāḥ piśācāṅganāḥ // MSS_1674

antraiḥ svairapi saṃyatāgracaraṇo mūrcchāvirāmakṣaṇe svādhīnavraṇitāṅgaśastranicito romodgamaṃ varmayan /
bhagnānudvalayannijān parabhaṭān saṃtarjayan niṣṭhuraṃ dhanyo dhāma jayaśriyaḥ pṛthuraṇastambhe patākāyate // MSS_1675

andūmuddhūya baddhāṃ nijamapi sahasā sūtamunmathya sadyo niryātastrastavājivrajakṛtaninadākarṇanakruddhacetāḥ /
saṃrambhārambhabhagnadrumaviṭapaśataiḥ prothayannāpanasthān āyāti vyālanāgastvaritamiha janāḥ sāvadhānā bhavantu // MSS_1676

andhaṃ tamaścedayi bādhate tvāṃ sarojanetraṃ jagadekasūtram /
sudhācaritram paramaṃ pavitraṃ kuruṣva mitraṃ vasudevaputram // MSS_1677

andhaṃ daridritamapi priyayā vihīnaṃ vīkṣyeśvare vadati yā ca varaṃ tvamekam /
netre na nāpi vasu no vanitāṃ sa vavre chatrābhirāmasutadarśanamityuvāca // MSS_1678

andhaṃ patiṃ prāpya vilāsinīnāṃ kaṭākṣabāṇā viphalā bhavanti /
tadvat kujādityaśanaiścarāṇāṃ na vāradoṣāḥ prabhavanti rātrau // MSS_1679

andhaḥ sa eva śrutavarjito yaḥ śaṭhaḥ sa evārthinirarthako yaḥ /
mṛtaḥ sa evāsti yaśo na yasya dharme na dhīryasya sa eva śocyaḥ // MSS_1680

andhaḥ syādandhavelāyāṃ bādhiryamapi cāśrayet /
kuryāt tṛṇamayaṃ cāpaṃ śayīta mṛgaśāyikām // MSS_1681

sāntvādibhirupāyaistu hanyācchatruṃ vaśe sthitam /
dayā tasmin na karttavyā śaraṇāgata ityuta // MSS_1682

andhakaṃ kubjakaṃ caiva kuṣṭhāṅgaṃ vyādhipīḍitam /
āpadgataṃ ca bhartāraṃ na tyajet sā mahāsatī // MSS_1683

andhakaḥ kubjakaścaiva tristanī rājakanyakā /
trayo'pyanyāyataḥ siddhāḥ saṃmukhe karmaṇi sthite // MSS_1684

andhakaḥ kubjakaścaiva rājakanyā ca tristanī /
anayo'pi nayaṃ yāti yāvacchrīrbhajate naram // MSS_1685

andhakaḥ kubjakaścaiva rājakanyā ca tristanī /
sānukūle jagannāthe viparītaḥ suyugbhavet // MSS_1686

andhakāragaralaṃ yato jagan- mohakāri bhṛśamatti nityaśaḥ /
ujjvalaṃ jaṭharamoṣadhīpater añjanābhamabhavat tataḥ priye // MSS_1687

andhakārāṅkuro jajñe vavṛdhe cāvilambitam /
bhīmena ramamāṇāyā hiḍimbāyā ivātmajaḥ // MSS_1688

andhatvamandhasamaye badhiratvaṃ bahdirakāla ālambya /
śrīkeśavayoḥ praṇayī parameṣṭhī nābhivāstavyaḥ // MSS_1689

andhadvaye mahānandho viṣayāndhīkṛtekṣaṇaḥ /
cakṣuṣāndho na jānāti viṣayāndho na kenacit // MSS_1690

andhasya darpaṇeneva hiteneva hataśruteḥ /
duḥkhābhitaptaḥ śokena nekṣate na śṛṇoti ca // MSS_1691

andhasya panthā badhirasya panthāḥ striyaḥ panthā vaivadhikasya panthāḥ /
rājñaḥ panthā brāhmaṇenāsametya sametya tu brāhmaṇasyaiva panthāḥ // MSS_1692

andhasya me hṛtavivekamahādhanasya caurairvibho balibhirindriyanāmadheyaiḥ /
mohāndhakūpakuhare vinipātitasya deveśa dehi kṛpaṇasya karāvalambam // MSS_1693

andhā iva na paśyanti yogyāyogyaṃ hitāhitam /
pathā tenaiva gacchanti nīyante yena pārthivāḥ // MSS_1694

andhā iva badhirā iva mūkā iva mohabhāja iva /
paṅgava ivānabhimate nṛpaternivasanti sādhavaḥ sadasi // MSS_1695

andhā vidvajjanairhīnā mūkā kavibhirujjhitā /
badhirā gāyanairhīnā sabhā bhavati bhūbhṛtām // MSS_1696

andhīkaromi bhuvanaṃ badhirīkaromi dhīraṃ sacetanamacetanatāṃ nayāmi /
kṛtyaṃ na paśyati na yena hitaṃ śṛṇoti dhīmānadhītamapi na pratisaṃdadhāti //
andhe tamasi majjāmaḥ paśubhirye yajāmahe /
ahiṃsāyāḥ paro dharmo na bhūto na bhaviṣyati // MSS_1697

ando'pyanyoktapatho daṇḍadhṛganyopacaraṇīyaḥ /
rājatvapratihatair janānurāgairbharati bhūpaḥ // MSS_1698

andho matsyānivāśnāti sa naraḥ kaṇṭakaiḥ saha /
yo bhāṣate'rthavaikalyam apratyakṣaṃ sabhāṃ gataḥ // MSS_1699

andho vā vadhiro vātha kuṣṭī vāpyantyajo'pi vā /
parigṛhṇātu tāṃ kanyāṃ salakṣāṃ syād videśagaḥ // MSS_1700

andho hi rājā bhavati yastu śāstravivarjitaḥ /
andhaḥ paśyati cāreṇa śāstrahīno na paśyati // MSS_1701

anghrīnīranghrapīnastanataṭaluṭhanāyāsamandapracārāś cārūnullāsayanto draviḍanaravadhūhāridhammillabhārān /
jighrantaḥ siṃhalīnāṃ mukhakamalamalaṃ keralīnāṃ kapolaṃ cumbanto vānti mandaṃ malayaparimalā vāyavo dākṣiṇātyāḥ // MSS_1702

annaṃ kiṃśukapuṣpapuñjasadṛśaṃ pāṣāṇajālairyutaṃ dhūmyaṃ gandhayutaṃ ca jālamakhilaṃ bhagnāśca dantālayaḥ /
ājyaṃ dūrataraṃ na cāpi lavaṇaṃ na śrūyate tintriṇī bhakṣyāṇāṃ vacanaṃ ca nāsti hi sakhe tadbhojanaṃ varṇaye // MSS_1703

annaṃ dadyādatithaye śraddhayā svargadaṃ hi tat /
sakuṭumbo diśannannaṃ saktuprastho divaṃgataḥ // MSS_1704

annaṃ dhānyaṃ vasu vasumatītyuttareṇottareṇa vyākṛṣyante paramakṛpaṇāḥ pāmarā yadvadityam /
bhūmiḥ khaṃ dyaurdruhiṇagṛhamityuttareṇottareṇa vyāmohyante vimalamatayo'pyasthireṇaiva dhāmnā // MSS_1705

annaṃ nāstyudakaṃ nāsti nāsti tāmbūlacarvaṇam /
mandireṣumahotsāhaḥ śuṣkacarmasya (?) tāḍanam // MSS_1706

annaṃ muktāsuvarṇaṃ dravaguṇarahitāḥ svarṇarūpāśca sūpāḥ sāmodāḥ śākabhedāḥ phalaguḍamilitāḥ pāyasam ... /
yāvadbhojyaṃ tadājyaṃ dadhi kathinataraṃ naikarūpāstvapūpāḥ bhujyante bhūsuraudhairmahati tava gṛhe rāmacandrasya tṛptyai // MSS_1707

annaṃ vidhātrā vihitaṃ martyānāṃ jīvadhāraṇam /
tadanādṛtya matimān prārthayenna tu kiṃcana // MSS_1708

annaṃ saṃprokṣya gāyatryā satyaṃ tvarteti mantrataḥ /
ṛtaṃ tveti ca sāyaṃ tu pariṣiñcet pradakṣiṇam // MSS_1709

annaṃ hi prāṇināṃ prāṇā ārtānāṃ śaraṇaṃ tvaham /
dharmo vittaṃ nṛṇāṃ pretya santo'rvāg bibhyato'raṇam // MSS_1710

annajā bhuvi martyānāṃ śramajā vā kathaṃcana /
saiṣā bhavati lokasya nidrā sarvasya laukikī // MSS_1711

annadātā bhayatrātā kanyādātā tathaiva ca /
janitā copanetā ca pañcaite pitaraḥ smṛtāḥ // MSS_1712

annadānaṃ mahādānaṃ vidyādānaṃ mahattaram /
annena kṣaṇikā tṛptir yāvajjīvaṃ tu vidyayā // MSS_1713

annadānāt paraṃ dānaṃ na bhūtaṃ na bhaviṣyati /
annena dhāryate sarvaṃ jagadetaccarācaram // MSS_1714

annadāhe harenmāṃsam ambudāhe ca śoṇitam /
kāmadāhe harennetram anidrā rogakāriṇī // MSS_1715

annado jaladaścaiva āturasya cikitsakaḥ /
trayaste svargamāyānti vinā yajñena bhārata // MSS_1716

annapānaṃ viṣādrakṣed viśeṣeṇa mahīpateḥ /
yogakṣemau tadāyattau dharmādyā yannibandhanāḥ // MSS_1717

annapānādibhiścaiva vastrālaṃkārabhūṣaṇaiḥ /
gandhamālyairvicitraiśca guruṃ tatra prapūjayet // MSS_1718

annapānāni jīryante yatra bhakṣāśca bhakṣitāḥ /
tasminnevodare garbhaḥ kiṃ nāma na vijīryate // MSS_1719

annapraṇāśe sīdanti śarīre pañca dhātavaḥ /
āhārāt sarvabhūtāni saṃbhavanti mahītale // MSS_1720

annamūlaṃ balaṃ puṃsāṃ balamūlaṃ hi jīvanam /
tasmād yatnena saṃrakṣed balaṃ ca kuśalo bhiṣak // MSS_1721

annavastrasuvarṇāni ratnāni vividhāni ca /
brāhmaṇebhyo nadītīre dadāti vraja satvaram // MSS_1722

annahīno dahedrāṣṭraṃ mantrahīnaśca ṛtvijaḥ /
yajamānaṃ dānahīno nāsti yajñasamo ripuḥ // MSS_1723

annādaṣṭaguṇaṃ piṣṭaṃ piṣṭādaṣtaguṇaṃ payaḥ /
payaso'ṣṭaguṇaṃ māṃsaṃ māṃsādaṣṭaguṇaṃ ghṛtam // MSS_1724

annādivargaṃ phalapuṣpamāṃsa- matsyādibhiḥ pūrṇamukhaḥ sadaiva /
syāddṛṣṭamātro'bhimatārthasiddhyai mṛṣṭānnabhojyāya mude ca kākaḥ // MSS_1725

annādiviṣṭhānavagomayāni na vā vidhunvan vadane sadaiva /
vāmopasavyo'pyavalokyamāno manorathaṃ pūrayate dhruvaśca // MSS_1726

annādiviṣṭhāpiśitādibhiryaḥ pūrṇānano'bhīṣṭaphalaprado'sau /
mantrādisiddhyai vaṇigādilābhe śasto vivāhādividhau ca kākaḥ // MSS_1727

annāde bhrūṇahā mārṣṭi annena abhiśaṃsati /
stenaḥ pramukto rājani yācannanṛtasaṃkare // MSS_1728

annāde bhrūṇahā mārṣṭi patyau bhāryāpacāriṇī /
gurau śiṣyaśca yājyaśca steno rājani kilbiṣam // MSS_1729

annādbhavanti bhūtāni parjanyādannasaṃbhavaḥ /
yajñād bhavati parjanyo yajñaḥ karmasamudbhavaḥ // MSS_1730

annādraktaṃ ca śuklaṃ cāpy ato jīvaḥ pratiṣṭhitaḥ /
indriyāṇi ca buddhiśca tṛpyantyannena nityaśaḥ // MSS_1731

annābhāve mṛtyuḥ śālibhirannāni śālayo vṛṣṭyā /
vṛṣṭistapaseti vadann amṛtyave tattapaścaratu // MSS_1732

annāśane syāt paramāṇumātraḥ praśakyate śodhayituṃ tapobhiḥ /
māṃsāśane parvatarājamātro no śakyate śodhayituṃ mahattvāt // MSS_1733

annena dhāryate sarvaṃ jagadetaccarācaram /
annāt prabhavati prāṇaḥ pratyakṣaṃ nāsti saṃśayaḥ // MSS_1734

anne pāne ca tāmbūle phale puṣpe vibhūṣaṇe /
vastre vilepane dhūpe śayyāyāmāsaneṣu ca // MSS_1735

anyaṃ kānanamāśu gaccha tarasā vanyaṃ phalaṃ bhuṅkṣva re dhanyaṃ dhāma vibhāti te na hi tathā puṇyaṃ jaghanyaṃ kuru /
etasminkariśāva mā vraja vane jalpāmi tathyaṃ vaco jānāsyeva karīndradarpadalano nidrāti pañcānanaḥ // MSS_1736

anyaṃ manuṣyaṃ hṛdayena kṛtvā anyaṃ tato dṛṣṭibhirāhvayanti /
anyatra muñcanti madaprasekam anyaṃ śarīreṇa ca kāmayante // MSS_1737

anyaḥ kaḥ kṣāravārdhe tvamiva niyamito vānarairvā narairvā vipreṇaikena ko'nyaḥ karakuharapuṭīpātramātre nipītaḥ /
jalpannitthaṃ pṛthūrmighvanibhiravataratphenakūṭāṭṭahāsaiḥ spardhāṃ dhatte payodheradhikamadhipuraṃ nirmito yattaṭākaḥ // MSS_1738

anyaḥ karoti vyāpāraṃ lipto bhavati lekhakaḥ /
bhagaliṅgaprasaṅgena chinnā bhavati nāsikā // MSS_1739

anyaḥ ko'pi sa kumbhasaṃbhavamunerāstāṃ śikhī jāṭharo yaṃ saṃcintya dukūlavahnisadṛśaḥ saṃlakṣyate vāḍavaḥ /
vandyaṃ tajjaṭharaṃ sa mīnamakaragrāhāvalistoyadhiḥ paścātpārśvamapūritāntaraviyadyatra svanan bhrāmyati // MSS_1740

anya ityanupajātayantraṇaṃ drāgudañcitavatī vilocanam /
māmavetya cakitā vṛtānanā dantadaṣṭarasanā manāgabhūt // MSS_1741

anyakarmavimūḍho ya ātmakarmaviśāradaḥ /
yathā paśya na jānāti stanapānetaracchiśuḥ // MSS_1742

anyakālaparihāryamajasraṃ taddvayena vidadhe dvayameva /
dhṛṣṭatā rahasi bhartṛṣu tābhir nirdayatvamitarairabalāsu // MSS_1743

anyakṣetre kṛtaṃ pāpaṃ puṇyakṣetre vinaśyati /
puṇyakṣetre kṛtaṃ pāpaṃ vajralepo bhaviṣyati // MSS_1744

anyato naya muhūrtamānanaṃ candra eṣa sarale kalāmayaḥ //
mā kadācana kapolayormalaṃ saṃkramayya samatāṃ sa neṣyati // MSS_1745

anyato yadi nijopacikīrṣā mānahāniriti bhītiranītiḥ /
śrīdharo'pi hi bale śriyamicchan mānamātanuta vāmanameva // MSS_1476

anyatkṛtyaṃ manujaś cintayati divāniśaṃ viśuddhadhiyā /
vedhā vidadhātyanyat svāmīva na śakyate dhartum // MSS_1477

anyatra deśe ghaṭitā jaganti grasiṣyate viśvasṛjeti matvā /
saṃkocayitvā kimu pādamūla- dvayāntarāle nihitāsti yoniḥ // MSS_1748

anyatra bhīṣmād gāṅgeyād anyatra ca hanūmataḥ /
hariṇīkhuramātreṇa carmaṇā mohitaṃ jagat // MSS_1749

anyatra yāpitaniśaṃ parilohitāṅgam anyāṅganāgatamivāgatamuṣṇaraśmim /
prātarnirīkṣya kupiteva hi padminīyam utphullahallakasulohitalocanābhūt // MSS_1750

anyatra yūyaṃ kusumāvacāyaṃ kurudhvamatrāsmi karomi sakhyaḥ /
nāhaṃ hi dūraṃ bhramituṃ samarthā prasīdatāyaṃ racito'ñjalirvaḥ // MSS_1751

anyatra vrajatīti kā khalu kathā nāpyasya tādṛk suhṛd yo māṃ necchati nāgataśca hahahā ko'yaṃ vidheḥ prakramaḥ /
ityalpetarakalpanākavalitasvāntā niśāntāntare bālā vṛttavivartanavyatikarā nāpnoti nidrāṃ niśi // MSS_1752

anyathā cintitā hyarthā naraistāta manasvibhiḥ /
anyathaiva hi gacchanti daivāditi matirmama // MSS_1753

anyathā paridṛṣṭāni munibhirvedadarśibhiḥ /
anyathā parivartante vegā iva nabhasvataḥ // MSS_1754

anyathāliṅgyate kāntā bhāvena duhitānyathā /
manaso bhidyate vṛttir abhinneṣvapi vastuṣu // MSS_1755

anyathā varttamānānām arthī bhūto'yamanyathā /
asmābhiryadanuṣṭheyaṃ gandharvaistadanuṣṭhitam // MSS_1756

anyathā vedaśāstrāṇi jñānapāṇḍityamanyathā /
anyathā tatpadaṃ śāntaṃ lokāḥ kliśyanti cānyathā // MSS_1757

anyathā śāstragarbhiṇyā dhiyā dhīro'rthamīhate /
svāmīva prāktanaṃ karma vidadhāti tadanyathā // MSS_1758

anyathaiva vicintyante puruṣeṇa manorathāḥ /
daivenāhitasadbhāvāḥ karmaṇāṃ gatayo'nyathā // MSS_1759

anyathaivasatī putraṃ cintayedanyathā patim /
yathā yathā svabhāvasya mahābhāga udāhṛtam // MSS_1760

anyathaiva hi manyante puruṣāstāni tāni ca /
anyathaiva prabhustāni karoti vikaroti ca // MSS_1761

anyathaiva hi sauhārdaṃ bhavetsvacchāntarātmanaḥ /
pravartate'nyathā vāṇī śāṭhyopahatacetasaḥ // MSS_1762

anyadasmi bhavatīṃ na yācitā vāramekamadharaṃ dhayāmi te /
ityasisvadadupāṃśukākuvāk sopamardahaṭhavṛttireva tam // MSS_1763

anyadābhāṣitaṃ pūrvaṃ dattamanyattato'lpakam /
yatsadoṣamayogyaṃ vā kūṭadānena tena kim // MSS_1764

anyadā bhūṣaṇaṃ puṃsaḥ kṣamā lajjeva yoṣitaḥ /
parākramaḥ paribhave vaiyātyaṃ surateṣviva // MSS_1765

anyadīyamavicintya pātaka nirghṛṇo harati jīvitopamam /
dravymatra kitavo vicetanas tena gacchati kadarthanāṃ ciram // MSS_1766

anyaduḥkhena yo duḥkhī yo'nyaharṣeṇa harṣataḥ /
sa eva jagatāmīśo nararūpadharo hariḥ // MSS_1767

anyaducchṛṅkhalaṃ sattvam anyacchāstraniyantritam /
sāmānādhikaraṇyaṃ hi tejastimirayoḥ kutaḥ // MSS_1768

anyaduptaṃ jātamanyad ityetannopapadyate /
upyate yaddhi yadbījaṃ tattadeva prarohati // MSS_1769

anyadoṣamiva sa svakaṃ guṇaṃ khyāpayet kathamadhṛṣṭatājaḍaḥ /
ucyate sa khalu kāryavattayā dhigvabhinnabudhasetumarthitām // MSS_1770

anyadgopucchakaṃ jñeyaṃ śuddhakāṣṭhavinirmitam /
mukhe ca lohakaṇṭhena vedhyaṃ tryaṅgulasaṃmitam // MSS_1771

anyapūrvāṃ striyaṃ sādhvīṃ kāmayeta na garvataḥ /
sādhvīricchan mahādevaḥ ṣaṇḍo'bhūddārukāvane // MSS_1772

anyapratāpamāsādya yo dṛḍhatvaṃ na gacchati /
jātuṣābharaṇasyeva rūpeṇāpi hi tasya kim // MSS_1773

anyamāśrayate lakṣmīs tvanyamanyaṃ ca medinī /
ananyagāminī puṃsāṃ kīrtirekā pativratā // MSS_1774

anyayānyavanitāgatacittaṃ cittanāthamabhiśaṅkitavatyā /
pītabhūrisurayāpi na mede nirvṛtirhi manaso madahetuḥ // MSS_1775

anyayā yauvane martyo buddhyā bhavati mohitaḥ /
madhye'nyayā jarāyāṃtu so'nyāṃ rocayate matim // MSS_1776

anyavarṇaṃ śiro yasya pucchaṃ vā yasya vājinaḥ /
pucchena śirasā vāpi nānāvarṇaḥ sa ninditaḥ // MSS_1777

anyavarṇaparāvṛttyā bandhacihnanigūhanaiḥ /
anākhyātaḥ satāṃ madhye kaviścoro vibhāvyate // MSS_1778

anyastrīspṛhayālavo jagati ke padbhyāmagamyā ca kā ko dhāturdaśane samastamanujaiḥ kā prārthyate'harniśam /
dṛṣṭvaikāṃ yavaneśvaro nijapure padmānanāṃ kāminīṃ mitraṃ prāha kimādareṇa sahasā yārānadīdaṃśamā // MSS_1779

anyasmāllabdhoṣmā kśudraḥ prāyeṇa duḥsaho bhavati /
ravirapi na dahati tādṛg yādṛghyuttaptavālukānikaraḥ // MSS_1780

anyasminnapi kāle dayitāvirahaḥ karoti saṃtāpam /
kiṃ punaraviralajaladhara- gurutararasiteṣu divaseṣu // MSS_1781

anyasmin preṣyamāṇe tu purastādyaḥ samutpatet /
ahaṃ kiṃ karavāṇīti sa rājavasatiṃ vaset // MSS_1782

anyasya lagati karṇe jīvitamanyasya harati bāṇa iva /
hṛdayaṃ dunoti piśunaḥ kaṇṭaka iva pādalagno'pi // MSS_1783

anyasyai saṃpratīyaṃ kuru madanaripo svāṅgadānaprasādaṃ nāhaṃ soḍhuṃ samarthā śirasi suranadīṃ nāpi saṃdhyāṃ praṇantum /
ityuktvā kopaviddhāṃ vighaṭayitumumāmātmadehaṃ pravṛttāṃ rundhānaḥ pātu śambhoḥ kucakalasahaṭhasparśakṛṣṭo bhujo vaḥ // MSS_1784

anyāṅganābhiradhikaṃ sa karoti keliṃ tvaṃ tena mā kuru viṣādamadabhrarūpe /
pepīyate madhukaraḥ kva na taṃ marandaṃ no jātu vismarati paṅkajinīṃ tathāpi // MSS_1785

anyā jagaddhitamayī manasaḥ pravṛttir anyaiva kāpi racanā vacanāvalīnām /
lokottarā ca kṛṭirākṛtirārtahṛdyā vidyāvatāṃ sakalameva girāṃ davīyaḥ // MSS_1786

anyādānākulāntaḥkaraṇavaśavipadbādhitapretaraṅkaṃ grāsabhraśyatkarālaślathapiśitaśavāgragrahe muktanādam /
sarvaiḥ krāmadbhirulkānanakavalarasavyāttavaktraprabhābhir vyaktaistaiḥ saṃvaladbhiḥ kṣaṇamaparamiva vyomni vṛttaṃ śmaśānam // MSS_1787

anyānapi tarūn ropya phalapuṣpopayoginaḥ /
ratnadhenusahasrasya phalaṃ prāpnoti mānavaḥ // MSS_1788

anyā nirarthikā cintā balatejaḥpraṇāśinī /
nāśayet sarvasaukhyaṃ tu rūpahāniṃ nidarśayet // MSS_1789

anyāni śāstrāṇi vinodamātraṃ prāpteṣu vā teṣu na taiśca kiṃcit /
cikitsitajyotiṣamantravādāḥ pade pade pratyayamāvahanti // MSS_1790

anyāni śāstrāṇi vinodamātraṃ prāpteṣu kāleṣu na taiśca kiṃcit /
cikitsitajyotiṣamantravādāḥ pade pade pratyayamāvahanti // MSS_1791

anyānparivadan sādhur yathā hi paritapyate /
tathā parivadannanyāṃs tuṣṭo bhavati durjanaḥ // MSS_1792

anyānyopamitaṃ yugaṃ nirupamaṃ te'yugmamaṅgeṣu yat so'yaṃ sikthakamāsyakāntimadhunastanvaṅgi candrastava /
tvadvācāṃ svaramātrikāṃ madakalaḥ puṃskokilo ghoṣayaty abhyāsasya kimastyagocaramiti pratyāśayā mohitaḥ // MSS_1793

anyā prakāmasurataśramakhinnadehā rātriprajāgaravipāṭalanetrapadmā /
śayyāntadeśalulitākulakeśapāśā nidrāṃ prayāti mṛdusūryakarābhitaptā // MSS_1794

anyā priyeṇa paribhuktamavekṣya gātraṃ harṣānvitā viracitādharacāruśobhā /
kūrpāsakaṃ paridadhāti nakhakṣatāṅgī vyālambinīlalalitālakakuñcitākṣī // MSS_1795

anyābhyo vanyābhyo mālati dhanyāsi vallarībhyastvam /
yat kila tavaiva savidhe krīḍati madhupaḥ sadaiva mudito'yam // MSS_1796

anyāmanyāṃ dhanāvasthāṃ prāpya vaiśeṣikīṃ narāḥ /
asaṃtuṣṭāḥ pramuhyanti saṃtoṣaṃ yānti paṇḍitāḥ // MSS_1797

anyāyaḥ prauḍhavādena nīyate nyāyatāṃ yayā /
nyāyaścānyāyatāṃ lobhāt kiṃ tayā kṣudravidyayā // MSS_1798

anyāyakarabhogaiśca yo hi jīvati nityaśaḥ /
virāgādeva lokānāṃ bhraṃśate sa hi pārthivaḥ // MSS_1799

anyāyadraviṇādāneṣv udyamaḥ kriyate vṛthā /
lubdhānāṃ satyasaṃkocāt saṃkucantyeva saṃpadaḥ // MSS_1800

anyāyavittena kṛto'pi dharmaḥ savyāja ityāhuraśeṣalokāḥ /
nyāyārjitārthena sa eva dharmo nirvyāja ityāryajanā vadanti // MSS_1801

anyāyasamupāttena dānadharmo dhanena yaḥ /
kriyate na sa kartāraṃ trāyate mahato bhayāt // MSS_1802

anyā yā vasanottamaṃ tadadhunā saṃgṛhya mānyaṃ punar yanmāṃ darśayasi priyaṃ priyatamaṃ toṣāya roṣāya no /
sarvasaiva sataśca rītiriyatī pūrvaṃ śrutā vṛddhataḥ prāyaḥ prāpya nijaprakarṣamakhilaṃ mitraṃ mudādarśayat // MSS_1803

anyāyopārjitaṃ dravyaṃ daśavarṣāṇi tiṣṭhati /
prāpte caikādaśe varṣe samūlaṃ ca vinaśyati // MSS_1804

anyāyopārjitaṃ dravyam arthadūṣaṇamucyate /
apātradānaṃ pātrārtha haraṇaṃ tasya lakṣaṇam // MSS_1805

anyārthamaṅgīkṛtavāripāṇau viśaṅkamānāstava dānanīram /
parasparaṃ dīnamukhā na ke vā devāḥ sumeruṃ śuśucuḥ svabhūmim // MSS_1806

anyā vihāya patigṛha- mavicintitakulakalaṅkajanagarhāḥ /
rāgoparaktahṛdayā yānti digantaṃ manuṣyā āsajya // MSS_1807

anyāściraṃ suratakelipariśrameṇa khedaṃ gatāḥ praśithilīkṛtagātrayaṣṭyaḥ /
saṃhṛṣyamāṇavipulorupayodharārtā abhyañjanaṃ vidadhati pramadāḥ suśobhāḥ // MSS_1808

anyāsāṃ na kimasti veśmani vadhūḥ kaivaṃ niśi prāvṛṣi praiti prāntataḍāgamamba gṛhiṇi svasthāsi me'vasthayā /
bhagno'yaṃ valayo ghaṭo vighaṭitaḥ kṣaṇṇā tanuḥ kaṇṭakair ākrāntaḥ sa tathā bhujaṅgahatakaḥ kaṣṭaṃ na yaddaṣṭavān // MSS_1809

anyā sādhigatā tvayā kva yuvatī yasyāḥ sa mānagraho yāte locanagocaraṃ priyatame saṃpratyapakrāmati /
asmākaṃ punarugrapūruṣaśatāśleṣapragalbhātmanām etādṛśyanabhijñapūruṣapariṣvaṅge kutaḥ sādhvasam // MSS_1810

anyā sā sarasī marāla munibhiryattīrasopānikā- vinyastān balitaṇḍulān kavalayan dṛṣṭo'si hṛdyairmukhaiḥ /
eṣā pakkaṇavāpikā kamalinīkhaṇḍe'tra guptātmabhir vyādhaistvadvidhamugdhabandhanavidhau kiṃ nāma nāsūtryate // MSS_1811

anyāsu tāvadupamardasahāsu bhṛṅga lolaṃ vinodaya manaḥ sumanolatāsu /
mughdāmajātarajasaṃ kalikāmakāle vyarthaṃ kadarthayasi kiṃ navamallikāyāḥ // MSS_1812

anyāstā guṇaratnarohaṇabhuvo dhanyā mṛdanyaiva sā saṃbhārāḥ khalu te'nya eva vidhinā yaireṣa sṛṣṭo yuvā /
śrīmatkāntijuṣāṃ dviṣāṃ karatalāt strīṇāṃ nitambasthalād dṛṣṭe yatra patanti mūḍhamanasāmastrāṇi vastrāṇi ca // MSS_1813

anyāstā malayādrikānanabhuvaḥ svacchasravannirjjharās tṛṣṇā yāsu nivartate tanubhṛtāmālokamātrādapi /
rūkṣadhvāṅkṣaparigraho marurayaṃ sphārībhavadbhrāntayaḥ tā etā mṛgatṛṣṇikā hariṇa he nedaṃ payo gamyatām // MSS_1814

anyūnaṃ guṇamamṛtasya dhārayantī saṃphullasphuritasaroruhāvataṃsā /
preyobhiḥ saha sarasī niṣevyamāṇā raktatvaṃ vyadhita vadhūdṛśaṃ surā ca // MSS_1815

anyūnonnatayo'timātrapṛthavaḥ pṛthvīdharaśrībhṛtas tanvantaḥ kanakāvalībhirupamāṃ saudāmanīdāmabhiḥ /
varṣantaḥ śamamānayannupalasacchṛṅgāralekhāyudhāḥ kāle kāliyakāyakālavapuṣaḥ pāṃsūn gajāmbhomucaḥ // MSS_1816

anye ca bahavo rāgā jātā deśaviśeṣataḥ /
mārūprabhṛtayo loke te ca tad deśikāḥ smṛtāḥ // MSS_1817

anye cet prākṛtā lokā bahupāpāni kurvate /
pradhānapuruṣeṇāpi kāryaṃ tatpṛṣṭhato nu kim // MSS_1818

anye te jaladāyino jaladharāstṛṣṇāṃ vinighnanti ye bhrātaścātaka kiṃ vṛthātiraṭitaiḥ khinno'si viśrāmyatām /
meghaḥ śārada eṣa kāśadhavalaḥ pānīyariktodaro garjatyeva hi kevalaṃ bhṛśataraṃ no bindumapyujjhati // MSS_1819

anye te vihagāḥ payoda parito dhāvanti tṛṣṇāturā vāpīkūpataḍāgasāgarajale majjanti dattādarāḥ /
māmadyāpi na vetsi cātakaśiśuṃ yacchuṣkakaṇṭho'pi san nānyaṃ vāñchati nopasarpati na ca prastauti na dhyāyati // MSS_1820

anye te sumanolihaḥ prahasadapyambhojamujjhanti ye vātāndolanakelicañcaladalaprāntairapi trāsitāḥ /
anyaḥ ko'pi sa eṣa ṣaṭpadabhaṭaḥ saṃsahya karṇāhatīr yenānekapagaṇḍagaṇḍalamiladdānāmbuni krīḍitam // MSS_1821

anyenāpi svamāṃsena chidyamānena dūyate /
tathāpi paramāṃsāni svādūnīti samaśnute // MSS_1822

anye'pi santi guṇinaḥ kati no jagatyāṃ hāra tvameva guṇināmuparisthito'si /
eṇīdṛśāmurasi nityamavasthito'si sadvṛttatā ca śucitā ca na khaṇḍitā te // MSS_1823

anye'pi santi bata tāmarasāvataṃsā haṃsāvalīvalayino jalasaṃniveśāḥ /
ko'pyāgraho gururayaṃ bata cātakasya pauraṃdarīṃ yadabhivāñchati vāridhārām // MSS_1824

anyeyaṃ rūpasaṃpattir anyā vaidagdhyadhoraṇī /
naiṣā nalinapatrākṣī sṛṣṭiḥ sādhāraṇī vidheḥ // MSS_1825

anyeṣāṃ yo na pāpāni cintayatyātmano yathā /
tasya pāpāgamastāta hetvabhāvānna vidyate // MSS_1826

karmaṇā manasā vācā parapīḍāṃ karoti yaḥ /
tadbījaṃ janma phalati prabhūtaṃ tasya cāśubham // MSS_1827

anyeṣāmapi naśyanti suhṛdaśca dhanāni ca /
paśya buddhyā manuṣyāṇāṃ rājannāpadamātmanaḥ // MSS_1828

anyeṣvarthakṛtā maitrī yāvadarthaviḍambanam /
puṃbhiḥ strīṣu kṛtā yadvat sumanaḥsviva ṣaṭpadaiḥ // MSS_1829

anye hi duḥkhamṛtavaḥ prathayantyahobhiḥ sūryāṃśuluptatimirairabhisārikāṇām /
hemanta eṣa himaruddhasahasradhāmā kāmaṃ karoti divaseṣvapi śarma tāsām // MSS_1830

anyaiḥ sākaṃ virodhena vayaṃ pañcottaraṃ śatam /
parasparavirodhena vayaṃ pañca ca te śatam // MSS_1831

anyocchiṣṭeṣu pātreṣu bhuktvaiteṣu mahībhujaḥ /
kasmānna lajjāmavahañ śaucacintāṃ na vā dadhuḥ // MSS_1832

anyo dhanaṃ pretagatasya bhuṅkte vayāṃsi cāgniśca śarīradhātūn /
dvābhyāmayaṃ saha gacchatyamutra puṇyena pāpena ca veṣṭyamānaḥ // MSS_1833

anyonyaṃ kṛtavairāṇāṃ putrapautraṃ nigacchati /
putrapautre vinaṣṭe tu paralokaṃ nigacchati // MSS_1834

anyonyaṃ daśanacchadeṣu daśatoranyonyamāliṅgator anyonyaṃ nakharaiḥ kharairvilikhatoranyonyamācumbatoḥ /
autsukyena navaṃ navaṃ nidhuvanaprāgalbhyamabhyasyatoḥ śrānte pañcaśare'pi na praṇayinoḥ prāpto'pakarṣaṃ rasaḥ // MSS_1835

anyonyaṃ matimāsthāya yatra sampratibhāṣyate /
na caikamatye śreyosti mantraḥ so'dhama ucyate // MSS_1836

anyonyakṛtavairāṇāṃ saṃvāsānmṛdutāṃ gatam /
nava tiṣṭhati tadvaraṃ puṣkarasthamivodakam // MSS_1837

anyonyagūḍhaceṣṭita- sadbhāvasnehapāśabaddhasya /
vicchedakaro mṛtyur dhīrāṇāṃ vā paricchedaḥ // MSS_1838

anyonyagopyaṃ viduṣāṃ tu lakṣaṃ yadasya tulyāḥ prabhavo bhavanti /
parasparāliṅganatatparāṇāṃ na kānta saukhyaṃ yuvatījanānām // MSS_1839

anyonyagrathitāruṇāṅgulinamatpāṇidvayasyopari nyasyocchavāsavikampitādharadalaṃ nirvedaśūnyaṃ mukham /
āmīlannayanāntavāntasalilaṃ ślādhyasya nindyasya vā kasyedaṃ dṛḍhasauhṛdaṃ pratidinaṃ dīnaṃ tvayā smaryate // MSS_1840

anyonyadarśanakṛtaḥ samānarūpānurāgakulavayasām /
keṣāṃcideva manye samāgamo bhavati puṇyavatām // MSS_1841

anyonyaprakaṭānurāgarabhasādudbhūtaromāñcayor utkaṇṭhāparikhedaduḥsahatayā kṣāmībhavadgātrayoḥ /
naktaṃ daivavaśāt kṣaṇaṃ gurujanātsvāyattatāṃ prāptayor yāto durlabhasaṃgamotsavavidhiryūnorjanākhyeyatām // MSS_1842

anyonyabhedo bhrātṝṇāṃ suhṛdāṃ vā balāntaka /
bhavatyānandakṛddeva dviṣatāṃ nātra saṃśayaḥ // MSS_1843

anyonyamutpīḍayadutpalākṣyāḥ stanadvayaṃ pāṇḍu tathā pravṛddham /
madhye yathā śyāmamukhasya tasya mṛṇālasūtrāntaramapyalabhyam // MSS_1844

anyonyarāgavaśayoryuvayorvilāsa- svacchandatācchidapayātu tadālivargaḥ /
atyājayan sicayamājimakārayanvā dantairnakhaiśca madano madanaḥ kathaṃ syāt // MSS_1845

anyonyalakṣaṇairyuktāṃ nārīṃ saṃkīrṇakāṃ viduḥ /
yā nijaireva saṃyuktā cihnaistāṃ kevalāṃ jaguḥ // MSS_1846

anyonyalāvaṇyavilokanāntaṃ netradvayaṃ syātsatataṃ kilāsyāḥ /
ityeva nāsā vihitā vidhātrā madhye tayordarśanavighnakartrī // MSS_1847

anyonyavārighaṭitau dhanavāripātād bhītau bhṛśaṃ mṛgavadhūrmṛgayūthapaśca /
vittastayā ghaṭanayā kṛtasaukhyamohau naivāmbuvāhajalaśīkarapātapīḍām // MSS_1848

anyonyaviparītāni matāni manasaḥ sadā /
avidyāyāṃ punaḥ satye jñānasyoccatarasya hi /
aṅgāni nikhilāni syuḥ pūrayanti parasparam // MSS_1849

anyonyaśvasitāśanaiḥ phaṇadharairāviśya sattvānbahir bhuñjānaiḥ paricārakaistṛṇagaṇairānandinā nandinā /
bhikṣānnopacitaiśca dāratanayaiḥ puṣṇāti viśvāni yaḥ sa svāmī mama daivataṃ taditaro nāmnāpi nāmnāyate // MSS_1850

anyonyasaṃgamavaśādadhunā vibhātāṃ tasyāpi te'pi manasī vikasadvilāse /
sraṣṭuṃ punarmanasijasya tanuṃ pravṛttam ādāviva dvyaṇukakṛtparamāṇuyugmam // MSS_1851

anyonyasaṃbhinnadṛśāṃ sakhīnāṃ tasyāstvayi prāganurāgacihnam /
kasyāpi ko'pīti niveditaṃ ca dhātreyikāyāścaturaṃ vacaśca // MSS_1852

anyonyasaṃvalitamāṃsaladantakānti sollāsamāviralasaṃ valitārdhatāram /
līlāgṛhe pratikalaṃ kilakiñciteṣu vyāvartamānavinayaṃ mithunaṃ cakāsti // MSS_1853

anyonyasamupaṣṭambhād anyonyāpāśrayeṇa ca /
jñātayaḥ saṃpravardhante sarasīvotpalānyuta // MSS_1854

anyonyasmādvinirbhinnaṃ bhinnagarbhaṃ na yudhyate /
tathaivāpasṛtaṃ śaktaṃ naikarājyāntarīkṛtam // MSS_1855

anyonyasya niyantraṇāparibhavādaprauḍhaśītātapāḥ puṣpyatkiṃśukacūtanūtanadalāvirbhūtaśoṇaśriyaḥ /
padmollāsitagandhavāsitavahadvātāvadātatviṣo modonmādajuṣo haranti hṛdayaṃ vāsantikā vāsarāḥ // MSS_1856

anyonyasya layaṃ bhayādiva mahābhūteṣu yāteṣvalaṃ kalpānte parameka eva sa taruḥ skandhoccayairjṛmbhate /
vinyasya trijaganti kukṣikurhare devena yasyāsyate śākhāgre śiśuneva sevitajalakrīḍāvilāsālasam // MSS_1857

anyonyasyāvyabhīcāro bhavedāmaraṇāntikaḥ /
eṣa dharmaḥ samāsena jñeyaḥ matrīpuṃsayoḥ paraḥ // MSS_1858

anyonyākṣinipātajātamadayoranyonyaceṣṭāśata- spṛṣṭāntaḥpadayormanobhavaśaravyāghātasaṃbhrāntayoḥ /
syādeva dviradendrayoriva tayorāliṅganaṃ prāṅgaṇe dhairyastambhaviḍambinī balavatī lajjā na cedargalā // MSS_1859

anyonyāntaranirgatāṅgulidalaśreṇībhavanniścala- granthipragrathitaṃ karadvayamuparyuttānamābibhratā /
seyaṃ vibhramatoraṇapraṇayinā jṛmbhābharottabhite- noccairbāhuyugena śaṃsati manojanmapraveśotsavam // MSS_1860

anyonyāsphālabhinnadviparudhiravasāmāṃsamastiṣkapaṅke magnānāṃ syandanānāmupari kṛtapadanyāsavikrāntapattau /
sphītāsṛkpānagoṣṭhīrasadaśivaśivātūṛyanṛtyatkabandhe saṃgrāmaikārṇavāntaḥpayasi vicarituṃ paṇḍitāḥ pāṇḍuputrāḥ // MSS_1861

anyonyāhatadantanādamukharaṃ prahvaṃ mukhaṃ kurvatā netre sāśrukaṇe nimīlya pulakavyāsaṅgi kaṇḍūyatā /
hā hā heti suniṣṭhuraṃ vivadatā bāhū prasārya kṣaṇaṃ puṇyāgniḥ pathikena pīyata iva jvālāhataśmaśruṇā // MSS_1862

anyonyeṣāṃ puṣkarairāmṛśanto dānodbhedānuccakairbhugnavālāḥ /
unmūrdhānaḥ saṃnipatyāparāntaiḥ prāyudhyanta spaṣṭadantadhvanībhāḥ // MSS_1863

anyopabhogakaluṣā mānavatī premagarvitā muditā /
saundaryagarvitā ca premaparādhīnamānasānūḍhā // MSS_1864

anyo'pi candanatarormahanīyamūrteḥ sekārthamutsahati tadguṇabaddhatṛṣṇaḥ /
śākhoṭakasya punarasya mahāśayoyam ambhoda eva śaraṇaṃ yadi nirguṇasya // MSS_1865

anyo hi nāśnāti kṛtaṃ hi karma sa eva kartā sukhaduḥkhabhāgī /
yattena kiṃciddhi kṛtaṃ hi karma tadaśnute nāsti kṛtasya nāśaḥ // MSS_1866

anvagrāhi mayā preyān niśi svopanayāditi /
na vipralabhate tāvad ālīriyamalīkavāk // MSS_1867

anvayāgatavidyānām anvayāgatasaṃpadām /
viduṣāṃ ca prabhūṇāṃ ca hṛdayaṃ nāvalipyate // MSS_1868

anvarthavedī śūraśca kṣamāvānna ca karkaśaḥ /
kalyāṇamedhāstejasvī sa bhadraḥ parikīrtitaḥ // MSS_1869

anviṣyadbhirayaṃ cirāt kathamapi prārthyeta yadyarthibhir nātha tvaṃ punararthinaḥ pratidinaṃ yatnāt samanviṣyasi /
prāptau cintitamātrakaṃ dadadasau cintātiriktapradaṃ tvāmālokya vidīryate yadi na tadgrāvaiva cintāmaṇiḥ // MSS_1870

anvīkṣaṇaṃ ca vidyānāṃ sadvarṇāśramarakṣaṇam /
grahaṇaṃ śastraśāstrāṇāṃ yuddhamārgopaśikṣaṇam // MSS_1871

anvetaṃ vāyavo yānti pṛṣṭhe bhānurvayāṃsi ca /
anuplavante meghāśca yasya tasya raṇe jayaḥ // MSS_1872

anveṣayati madāndha- dviradamadāmbusiktamavanitalam /
pariṇatagarbhabharārtā siṃhavadhūḥ śallakīvipine // MSS_1873

apaḥ piban prapāpālīm anurakto vilokayan /
agastyaṃ cintayāmāsa caturaḥ sāpi sāgarān // MSS_1874

apakartāhamasmīti hṛdi te mā sma bhūdbhayam /
vimukheṣu na me khaḍgaḥ prahartuṃ jātu vāñchati // MSS_1875

apakāradaśāyāmapy upakurvanti sādhavaḥ /
chindantamapi vṛkṣaḥ svac chāyayā kiṃ na rakṣati // MSS_1876

apakāramasaṃprāpya tuṣyet sādhurasādhutaḥ /
naiṣo'lābho bhujaṅgena veṣṭito yo na daśyate // MSS_1877

apakāriṇi kopaścet kope kopaḥ kathaṃ na jāyeta /
dharmārthakāmamokṣa- prāṇayaśohāriṇi krūre // MSS_1878

apakāriṇi cet kopaḥ kope kāpaḥ kathaṃ na te /
dharmārthakāmamokṣāṇāṃ prasahya paripanthini // MSS_1879

apakāriṇi visrambhaṃ yaḥ karoti narādhamaḥ /
anātho durbalo yadvan na ciraṃ sa tu jīvati // MSS_1880

apakāriṣu mā pāpaṃ cintaya tvaṃ kadācana /
svayameva patiṣyanti kūlajātā iva drumāḥ // MSS_1881

apakuryāt samarthaṃ vā nopakuryādyadāpadi /
ucchindyādeva tanmitraṃ viśvasyāṅkamupasthitam // MSS_1882

apakurvannapi prāyaḥ prāpnoti mahataḥ phalam /
aurvaṃ dahantamevāgniṃ saṃtarpayati sāgaraḥ // MSS_1883

apakṛtya balasthasya dūrastho'smīti nāśvaset /
śyenānucaritairhyete nipatanti pramādyataḥ // MSS_1884

apakṛtvā buddhimato dūrastho'smīti nāśvaset /
dīrghau buddhimato bāhū yābhyāṃ hiṃsati hiṃsitaḥ // MSS_1885

apakrānte bālye taruṇimani cāgantumanasi prayāte mugdhatve caturimaṇi cāśleṣarasike /
na kenāpi spṛṣṭaṃ yadiha vayasā marma paramaṃ yadetat pañceṣorjayati vapurindīvaradṛśaḥ // MSS_1886

apakvaṃ bhaṅgamāyāti atijīrṇaṃ tu karkaśam /
jñātighṛṣṭaṃ tu sodvegaṃ kalaho bāndhavaiḥ saha // MSS_1887

apakvamapi cūtasya phalaṃ dravati vegataḥ /
guḍaśuṇṭīpralepena vidhṛtaṃ śaśvadātape // MSS_1888

apakve tu ghaṭe nīraṃ cālanyāṃ sūkṣmapiṣṭakam /
strīṇāṃ ca hṛdaye vārtā na tiṣṭhati kadāpi hi // MSS_1889

apagatamadarāgā yoṣidekā prabhāte kṛtanibiḍakucāgrā patyurāliṅganena /
priyatamaparibhuktaṃ vīkṣamānā svadehaṃ vrajati śayanavāsād vāsamanyaddhasantī // MSS_1890

apagatarajovikārā ghanapaṭalākrāntatārakālokā /
lambapayodharabhārā prāvṛḍiyaṃ vṛddhavaniteva // MSS_1891

apaṅkiladhiyaḥ śuddhāḥ sādhumānasavṛttayaḥ /
vamanti śrutijīvātuṃ dhvaniṃ navarasāspadam // MSS_1892

apacikramiṣuḥ pūrvaṃ senāṃ svāṃ parisāntvayan /
vilaṅghayitvā satreṇa tataḥ svayamupakramet // MSS_1893

apaṭaḥ kapaṭī himahīnaruciḥ prathitaḥ paśuranyakalatrarataḥ /
tava rāya(?)vasantasamo na haro na harirnna harirnna harirnna hariḥ // MSS_1894

apaṇḍitāste puruṣā matā me ye strīṣu ca śrīṣu ca viśvasanti /
śriyo hi kurvanti tathaiva nāryo bhujaṅgakanyāparisarpaṇāni // MSS_1895

apaṇḍito vāpi suhṛt paṇḍito vāpyanātmavān /
mantramūlaṃ yato rājyam ato mantraṃ surakṣitam // MSS_1896

apatuṣāratayā viśadaprabhaiḥ suratasaṅgapariśramanodibhiḥ /
kusumacāpamatejayadaṃśubhir himakaro makarorjitaketanam // MSS_1897

apatyaṃ dharmakāryāṇi śuśrūṣā ratiruttamā /
dārādhīnastathā svargaḥ pitṛṇāmātmanaśca ha // MSS_1898

apatyadarśanasyārthe prāṇānapi ca yā tyajet /
tyajanti tāmapi krūrā mātaraṃ dārahetave // MSS_1899

apatyāni prāyo daśa daśa varāhī janayati kṣamābhāre dhuryaḥ sa punariha nāsīnna bhavitā /
padaṃ kṛtvā yaḥ svaṃ phaṇipatiphaṇācakravalaye nimajjantīmantarjaladhi vasudhāmuttulayati // MSS_1900

apatye yat tādṛgduritamabhavat tena mahatā viṣaktastīvreṇa vraṇitahṛdayena vyathayatā /
paṭurdhārāvāhī nava iva cireṇāpi hi na me nikṛntanmarmāṇi krakaca iva manyurviramati // MSS_1901

apathena pravavṛte na jātūpacito'pi saḥ /
vṛddhau nadīmukhenaiva prasthānaṃ lavaṇāmbhasaḥ // MSS_1902

apathenaiva yo yogād adhaḥ sārāyate svayam /
nīcopasarpaṇavaśāt sa pated vaṃśavānapi // MSS_1903

apathyabhogeṣu yathāturāṇāṃ spṛhā yathārtheṣvatidurgatānām /
paropatāpeṣu yathā khalānāṃ strīṇāṃ tathā cauryaratotsaveṣu // MSS_1904

apathyamāyatau lobhād āmanantyanujīvinaḥ /
priyaṃ śrṇoti yastebhyas tamṛcchanti na saṃpadaḥ // MSS_1905

apathyasya ca bhuktasya dantasya calitasya ca /
amātyasya ca duṣṭasya samūloddharaṇaṃ sukham // MSS_1906

apadāntaraṃ ca paritaḥ kṣitikṣitām apatan drutabhramitahemanemayaḥ /
javimārutāñcitaparasparopama- kṣitireṇuketuvasanāḥ patākinaḥ // MSS_1907

apado dūragāmo ca sākṣaro na ca paṇḍitaḥ /
amukhaḥ sphuṭavaktā ca yo jānāti sa paṇḍitaḥ // MSS_1908

apadhvasto hyavamato duḥkhaṃ jīvati jīvitam /
jīvitaṃ yadavakṣiptaṃ yathaiva maraṇaṃ tathā // MSS_1909

apanaya mahāmohaṃ rājannanena tavāsinā kathaya kuhakakrīḍāścaryaṃ kathaṃ kva ca śikṣitam /
yadarirudhiraṃ pāyaṃ pāyaṃ kusumbharasāruṇaṃ jhagiti vamati kṣīrāmbhodhipravāhasitaṃ yaśaḥ // MSS_1910

apanidramadhūkapāṇḍurā sudṛśo'dṛśyata gaṇḍamaṇḍalī /
gamitāśrujalaplavairiva kraśimākīrṇatayāpi nimnatām // MSS_1911

apanītaṃ sunītena yo'rthaṃ pratyāninīṣate /
matimāsthāya sudṛḍhāṃ tadakāpuruṣavratam // MSS_1912

apanītaparimalāntara- kathe padaṃ nyasya devatarukusume /
puṣpāntare'pi gantuṃ vāñchasi ced bhramara dhanyo'si // MSS_1913

apaneyamudetumicchatā timiraṃ roṣamayaṃ dhiyā puraḥ /
avibhidya niśākṛtaṃ tamaḥ prabhayā nāṃśumatāpyudīyate // MSS_1914

apamānaṃ puraskṛtya mānaṃ kṛtvā tu pṛṣṭhataḥ /
svārthamabhyuddharet prājñaḥ kāryadhvaṃso hi mūrkhatā // MSS_1915

apamānaḥ pativihito guruparikaratīvratā gṛhe dauḥsthyam /
śīlakṣataye yāsāṃ tāsāmatirāgato'nyanararaktiḥ // MSS_1916

apamānāt tapovṛddhiḥ saṃmānācca tapaḥkṣayaḥ /
arcitaḥ pūjito vipro dugdhā gauriva gacchati // MSS_1917

apamānāt tu saṃbhūtaṃ mānena praśamaṃ nayet /
sāmapūrva upāyo vā praṇāmo vābhimānaje // MSS_1918

apamānito'pi kulajo na vadati puruṣaṃ svabhāvadākṣiṇyāt /
nahi malayacandanataruḥ paraśuprahataḥ sravet pūyam // MSS_1919

apameghodayaṃ varṣam adṛṣṭakusumaṃ phalam /
atarkitopapannaṃ vo darśanaṃ pratibhāti me // MSS_1920

apayāti saroṣayā niraste kṛtakaṃ kāmini cukṣuve mṛgākṣyā /
kalayannapi savyatho'vatasthe- 'śakunena skhalitaḥ kiletaro'pi // MSS_1921

apayāntīnāmadhunā saṃketaniketanānmṛgākṣīṇām /
vāsasa eva na kevalam abhavanmanaso'pi parivartaḥ // MSS_1922

apayāyini svato'rthe kathamiva sauhārdadhīḥ kadaryāṇām /
yasyāpayānasamaye prāṇatyāgo'pi hā sukaraḥ // MSS_1923

aparajaladherlakṣmīṃ yasmin purīṃ purabhitprabhe madagajaghaṭākārairnāvāṃ śatairavamṛdnati /
jaladapaṭalānīkākīrṇaṃ navotpalamecakaṃ jalanidhiriva vyoma vyomnaḥ samo'bhavadambudhiḥ // MSS_1924

aparatarunikaramuktaṃ marumaṇḍalamāvasatyasāvekaḥ /
phalakusumairupakurvann arare karīra kathaṃ dhīraḥ // MSS_1925

aparāgasamīraṇeritaḥ kramaśīrṇākulamūlasaṃtatiḥ /
sukarastaruvat sahiṣṇunā ripurunmūlayituṃ mahānapi // MSS_1926

aparāddhaṃ bhavadvāṇīśrāviṇā pṛccha kiṃ mayā /
vīṇāha paruṣaṃ yanmāṃ kalakaṇṭhī ca niṣṭhuram // MSS_1927

aparāddhāṃstu susnigdhān snohoktyā mānadānataḥ /
sādhayed bhedadaṇḍābhyāṃ yathāyogena cāparān // MSS_1928

aparādhaṃ na śṛṇumo na cāsatyaṃ tvayoditam /
gopyeti gaditaḥ kṛṣṇas tūṣṇīṃ tiṣṭhan punātu vaḥ // MSS_1929

aparādhaḥ sa daivasya na punarmantriṇāmayam /
kāryaṃ sughaṭitaṃ yatnād daivayogād vinaśyati // MSS_1930

aparādhasahasrabhājanaṃ patitaṃ bhīmabhavārṇavodare /
agatiṃ śaraṇāgataṃ hare kṛpayā kevalamātmasātkuru // MSS_1931

aparādhānurūpaṃ ca daṇḍaṃ pāpeṣu pātayet /
udvejayeddhanairṛddhān daridrān vadhabandhanaiḥ // MSS_1932

aparādhini mayi daṇḍaṃ saṃharasi kimudyataṃ kuṭilakeśi /
vardhayasi vilasitaṃ tvaṃ dāsajanāyātra kupyasi ca // MSS_1933

aparādhī nāmāhaṃ prasīda rambhoru virama saṃrambhāt /
sevyo janaśca kupitaḥ kathaṃ nu dāso niraparādhaḥ // MSS_1934

aparādhīnāśokaḥ sahate caraṇāhatiṃ sarojadṛśām /
vilasitabakulo vanitā- mukhavāsī madyapāta iva // MSS_1935

aparādhe'pi niḥśaṅko niyogī cirasevakaḥ /
sa svāminamavajñāya carecca niravagrahaḥ // MSS_1936

aparādho na me'stīti naitad viśvāsakāraṇam /
vidyate hi nṛśaṃsebhyo bhayaṃ guṇavatāmapi // MSS_1937

aparādho mayā kānte kṛto yadi tvayā mataḥ /
nipātya giriśṛṅgoccau kucau kiṃ na nipīḍyate // MSS_1938

aparāhṇaśītalatareṇa śanair anilena lolitalatāṅgulaye /
nilayāya śākhina ivāhvayate dadurākulāḥ khagakulāni giraḥ //
aparityaktamātmānam icchatā paṇyayoṣitām /
nityaupayogikaṃ dravyam ātmasāraṃ pradarśayet // MSS_1939

aparīkṣitaparavañcanam añcati lobhādapekṣitaprekṣī /
vyādhūtapakṣamavaśo vihanyate pakṣivat kṣitipaḥ // MSS_1940

aparīkṣitalakṣaṇapramāṇair aparāmṛṣṭapadārthasārthatattvaiḥ /
avaśīkṛtajaitrayuktijālair alametairanadhītatarkavidyaiḥ // MSS_1941

aparīkṣya na kartavyaṃ kartavyaṃ suparīkṣitam /
paścādbhavati saṃtāpo brāhmaṇī nakulaṃ yathā // MSS_1942

aparokṣadhano gamyaḥ śrīmānapi nānyatheti nirdiṣṭam /
kandarpaśāstrakāraiḥ kutaḥ kathā luptavibhavasya // MSS_1943

aparṇeyaṃ bhūbhṛdvanamaṭati valkāmbaradharā jaṭālo digvāsāḥ śikhariṇi śivo'yaṃ nivasati /
iti bhrāntyānyo'nyaṃ kṣaṇamilitayoḥ kṣoṇitilaka dviṣaddampatyoste śiva śiva bhavanti praṇatayaḥ // MSS_1944

aparṇaiva latā sevyā vidvadbhiriti me matiḥ /
yayā vṛtaḥ purāṇo'pi sthāṇuḥ sūte'mṛtaṃ phalam // MSS_1945

aparyantasya kālasya kiyānaṃśaḥ śaracchatam /
tanmātraparamāyuryaḥ sa kathaṃ svaptumarhati // MSS_1946

aparyāptabhujāyāmaḥ sakhedo'syāḥ sakhījanaḥ /
śroṇyāṃ kathaṃcit kurute raśanādāmabandhanam // MSS_1947

apavarjitaviplave śucau hṛdayagrāhiṇi maṅgalāspade /
vimalā tava vistare girāṃ matirādarśa ivābhidṛśyate // MSS_1948

apavādādabhītasya samasya guṇadoṣayoḥ /
asadvṛtteraho vṛttaṃ durvibhāvaṃ vidheriva // MSS_1949

apavādo bhaved yena yena vipratyayo bhavet /
narake gamyate yena tad budhaḥ kathamācaret // MSS_1950

apaśaṅkamaṅkaparivartanocitāś calitāḥ puraḥ patimupaitumātmajāḥ /
anuroditīva karuṇena patriṇāṃ virutena vatsalatayaiṣa nimnagāḥ // MSS_1951

apaśāstradhano rājā saṃcayaṃ nādhigacchati /
asthāne cāsya tadvittaṃ sarvameva vinaśyati // MSS_1952

apaśūlaṃ tamāsādya lavaṇaṃ lakṣmaṇānujaḥ /
rurodha saṃmukhīno hi jayo randhraprahāriṇām // MSS_1953

apaśokamanāḥ kuṭumbinīm anugṛhṇīṣva nivāpadattibhiḥ /
svajanāśru kilātisaṃtataṃ dahati pretamiti pracakṣate // MSS_1954

apaścāttāpakṛt samyag anubandhiphalapradaḥ /
adīrghakālo'bhīṣṭaśca praśasto mantra ucyate // MSS_1955

apaśyadbhiriveśānaṃ raṇānnivavṛte gaṇaiḥ /
muhyatyeva hi kṛcchreṣu saṃbhramajvalitaṃ manaḥ // MSS_1956

apaśyadbhirmahāsvādān bhāvān svādvavivekibhiḥ /
kiṃ jñeyamaśanādanyat kṣmāpairandhairivokṣabhiḥ // MSS_1957

apasaraṇameva yuktaṃ maunaṃ vā tatra rājahaṃsasya /
kaṭu raṭati nikaṭavartī vācāṭaṣṭiṭṭibho yatra // MSS_1958

apasarati na cakṣuṣo mṛgākṣī rajaniriyaṃ ca na yāti naiti nidrā /
praharati madano'pi duḥkhitānāṃ bata bahuśo'bhimukhībhavantyapāyāḥ // MSS_1959

apasara pṛthivi samudrāḥ saṃvṛṇutāmbūni bhūdharā namata /
vāmanaharilaghutunde jagatāṃ kalahaḥ sa vaḥ pāyāt // MSS_1960

apasara madhukara dūraṃ parimalabahule'pi ketakīkusume /
iha nahi madhulavalābho bhavati paraṃ dhūlidhūsaraṃ vadanam // MSS_1961

apasara sakhe dūrādasmāt kaṭākṣaviṣānalāt prakṛtiviṣamād yoṣitsarpād vilāsaphaṇābhṛtaḥ /
itaraphaṇinā daṣṭaḥ śakyaścikitsitumauṣadhaiś caṭulavanitābhogigrastaṃ tyajanti hi mantriṇaḥ // MSS_1962

apasāraya ghanasāraṃ kuru hāraṃ dūra eva kiṃ kamalaiḥ /
alamalamāli mṛṇālair iti vadati divāniśaṃ bālā // MSS_1963

apasārasamāyuktaṃ nayajñairdurgamucyate /
apasāraparityaktaṃ durgavyājena bandhanam // MSS_1964

apastaranti pāṣāṇā hyanughnanti hi rākṣasān /
kapayaḥ karma kurvanti kālasya kuṭilā gatiḥ // MSS_1965

apahatya tamastīvraṃ yathā bhātyudare raviḥ /
tathāpahatya pāpmānaṃ bhāti gaṅgājalokṣitaḥ // MSS_1966

apaharati mano me ko'pyayaṃ kṛṣṇacauraḥ praṇataduritacauraḥ pūtanāprāṇacauraḥ /
valayavasanacauro bālagopījanānāṃ nayanahṛdayacauraḥ paśyatāṃ sajjanānām // MSS_1967

apaharati mahattvaṃ prārthanā kiṃ na jāne janayati gurulajjāmityahaṃ kiṃ na vedmi /
tadapi vada vadānyaṃ taṃ sadā pratyahaṃ māṃ jaṭharapiṭharavartī vahnirarthīkaroti // MSS_1968

apaharasi sadā manāṃsi puṃsām atimahatā guṇasaṃparigraheṇa /
na ca bhavasi tathāpyanekacitto hṛtamathavā vivṛṇoti kaḥ parasvam // MSS_1969

apahastitabāndhave tvayā vihitaṃ sāhasamasya tṛṣṇayā /
tadihānaparādhini priye sakhi ko'yaṃ karuṇojjhitakramaḥ // MSS_1970

apahāya śanaiḥ paṭīravāṭīr iha lāṭījanamānaluṇṭhanāya /
samudeti manojarājadhāṭī- paripāṭīpaṭureṣa gandhavāhaḥ // MSS_1971

apahṛtya parasyārthaṃ tena dharmaṃ karoti yaḥ /
sa dātā narakaṃ yāti yasyārthastasya tatphalam // MSS_1972

apahnuvānasya janāya yannijām adhīratāmasya kṛtaṃ manobhuvā /
abodhi tajjāgaraduḥkhasākṣiṇī niśā ca śayyā ca śaśāṅkakomalā // MSS_1973

apāṃ nidhiṃ vāribhirarcayanti dīpena sūryaṃ pratibodhayanti /
tābhyāṃ tayoḥ kiṃ paripūrṇatā syād bhaktyā hi tuṣyanti mahānubhāvāḥ // MSS_1974

apāṃ pravāho gāṅgo'pi samudraṃ prāpya tadrasaḥ /
bhavatyavaśyaṃ tad vidvān nāśrayedaśubhātmakam // MSS_1975

apāṃ mūle līnaṃ kṣaṇaparicitaṃ candanarase muṇālīhārādau kṛtalaghupadaṃ candramasi ca /
muhūrtaṃ viśrāntaṃ sarasakadalīkānanatale priyākaṇṭhāśleṣe nivasati paraṃ śaityamadhunā // MSS_1976

apāṃ vihāre tava hāravibhramaṃ karotu nīre pṛṣadutkarastaran /
kaṭhorapīnoccakucadvayītaṭa- truṭattaraḥ sāravasāravormijaḥ // MSS_1977

apākuru kapolataḥ sakhi bhujaṅgavallīrasaṃ parityaja kucasthalāt truṭitabandhanaṃ kañcukam /
pidhehi daśanacchade daśanajakṣataṃ lākṣayā vadetthamabalāgaṇe gurujane kathaṃ yāsyasi // MSS_1978

apākṛtyāśeṣāṇyapi ca ghanajālāni paritas tamodhūmastomodbhavamalinimānaṃ ca tadanu /
śaraccandraḥ śilpī ratipatimude'sau nijakaraiḥ sudhāsaṃdohārdrairbhuvanabhavanaṃ pāṇḍurayati // MSS_1979

apāṅgatarale dṛśau madhuravakravarṇā giro vilāsabharamantharā gatiratīva kāntaṃ mukham /
iti sphuritamaṅgake mṛgadṛśaḥ svato līlayā tadatra na madodayaḥ kṛtapado'pi saṃlakṣyate // MSS_1980

apāṅgapātairapadeśapūrvair eṇīdṛśāmekaśilānagaryāt /
vīthīṣu vīthīṣu vināparādhaṃ pade pade śṛṅkhalitā yuvānaḥ // MSS_1981

apāṅgasaṃsargi taraṅgitaṃ dṛśor bhruvorarālāntavilāsi vellitam /
visāri romāñcanakañcukaṃ tanos tanoti yo'sau subhage tavāgataḥ // MSS_1982

apāṅgastava tanvaṅgi vicitro'yaṃ bhujaṅgamaḥ /
dṛṣṭamātraḥ sumanasām api mūrchāvidhāyakaḥ // MSS_1983

apāṅgāt pucchamūlaṃ tu tiryagaśvaṃ pramāṇayet /
khurāntāt kakudaṃ yāvad ūrdhvamānena buddhimān // MSS_1984

apātraṃ pātratā yāti yatra pātraṃ na vidyate /
asmin deśe drumo nāsti eraṇḍo'pi drumāyate // MSS_1985

apātravarṣaṇaṃ jātu na kuryāt sadvigarhitam /
apātravarṣaṇāt kiṃ syād anyat kośakṣayādṛte // MSS_1986

apātre pātratābuddhiḥ pātre buddhirapātratā /
ṛṇānubandharūpeṇa dāturutpadyate matiḥ // MSS_1987

apātre ramate nārī girau varṣati vāsavaḥ /
khalamāśrayate lakṣmīḥ prājñaḥ prāyeṇa nirdhanaḥ // MSS_1988

apānaprāṇayoraikyaṃ kṣayo mūtrapurīṣayoḥ /
yuvā bhavati vṛddho'pi satataṃ mūlabandhanāt // MSS_1989

apānena punaḥ kaścit preritaḥ kālarūpiṇā /
niḥśvāsocchvāsakṛdvāti japan haṃsetyaharniśam // MSS_1990

apāpaghanasaṃvṛteraviśadasmitātyunnamat samastanarasādaragrahaṇataḥ kṛtārthapriyā /
ratirmanasi jāyate yadi kadāpi śauryāśrayā tadaiva sakalaṃ januḥ saphalamevamāhātmabhūḥ // MSS_1991

apāpāstatkulīnāśca mānayanti svakān hitān /
eṣa prāyo narendrāṇāṃ śaṅkanīyastu śobhanaḥ // MSS_1992

apāmudvṛttānāṃ nijamupadiśantyā sthitipadaṃ dadhatyā śālīnāmavanatimudāre sati phale /
mayūrāṇāmugraṃ viṣamiva harantyā madamaho kṛtaḥ kṛtsnasyāyaṃ vinaya iva lokasya śaradā // MSS_1993

apāyakalitā manurjagati sāpadaḥ sampado vinaśvaramidaṃ sukhaṃ viṣayajaṃ śriyaścañcalāḥ /
bhavanti jarasārasāstaralalocanā yoṣitas tadapyayamaho janastapasi no pare rajyati // MSS_1994

apāyasaṃdarśanajāṃ vipattim upāyasaṃdarśanajāṃ ca siddhim /
medhāvino nītividhiprayuktāṃ puraḥ sphurantīmiva darśayanti // MSS_1995

apāyi muninā purā punaramāyi maryādayā atāri kapinā purā punaradāhi laṅkāriṇā /
amanthi muravairiṇā punarabandhi laṅkāriṇā kva nāma vasudhāpate tava yaśo'mbudhiḥ kvāmbudhiḥ // MSS_1996

apāraḥ pāthodhiḥ pulinapadavī yojanaśataṃ nirālambo mārgo viyati kila śūnyā daśa diśaḥ /
itīvāyaṃ kīraḥ katipayapadānyeva gagane muhurbhrāmyan bhrāmyan patati guṇavṛkṣe punarapi // MSS_1997

apārapulinasthalībhuvi himālaye mālaye nikāmavikaṭonnate duradhirohaṇe rohaṇe /
mahatyamarabhūdhare gahanakandare mandare bhramanti na patantyaho pariṇatā bhavatkīrtayaḥ // MSS_1998

apārasaṃsārasamudramadhye saṃmajjato me śaraṇaṃ kimasti /
guro dayālo kṛpayā vadaitad viśveśapādāmbujadīrghanaukā // MSS_1999

apāre kāvyasaṃsāre kavireva prajāpatiḥ /
yathā vai rocate viśvaṃ tathedaṃ parivartate // MSS_2000

apāre pāthodhau kimiti satimigrāhagahane nilīya śrīnāthaḥ svapiti bhujage śaṅkita iva /
kimetāvadbhirvā bhavatu kila sarvātiśayitaḥ śriyā saṃśliṣṭāṅko vyapagatabhayaṃ ko nivasatu // MSS_2001

apārairvyāpārairahariha nayanto'śanadaśā- svatha snātāḥ saṃdhyāṃ vidadhati na jātu svasamaye /
tyajantaḥ svāṃ vṛttiṃ dvijakulabhavā grāmagaṇakī- bhavanto hantāmī kathamapi ca jīvanti bahavaḥ // MSS_2002

apārthakamanāyuṣyaṃ goviṣāṇasya bhakṣaṇam /
dantāśca parighṛṣyante rasaścāpi na labhyate // MSS_2003

apārthetarayuktānāṃ vyāsasaṃgrahaśālinām /
api gopālagītānāṃ niveśo nigamādiṣu // MSS_2004

apāstapātheyasudhopayogais tvaccumbinaiva svamanorathena /
kṣudhaṃ ca nirvāpayatā tṛṣaṃ ca svādīyasādhvā gamitaḥ sukhaṃ taiḥ // MSS_2005

apāstapāthoruhi śāyitaṃ kare karoti līlākamalaṃ kimānanam /
tanoṣi hāraṃ kiyadasruṇaḥ sravair adoṣanirvāsitabhūṣaṇe hṛdi // MSS_2006

apāstastārābhirvidhana iva kāmī yuvatibhir madhucchatracchāyāṃ spṛśati śaśalakṣmā pariṇataḥ /
ayaṃ prācīkarṇābharaṇaracanāśokakusuma- cchaṭālakṣmīcauraḥ kalayati raviḥ pūrvamacalam // MSS_2007

apāsya lakṣmīharaṇotthavairitām acintayitvā ca tadadrimanthanam /
dadau nivāsaṃ haraye mahodadhir vimatsarā dhīradhiyāṃ hi vṛttayaḥ // MSS_2008

api kalpānilasyaiva taraṅgasya mahodadheḥ /
śakyate prasaro roddhuṃ nānuraktasya cetasaḥ // MSS_2009

api kāpuruṣo bhīruḥ syāccennṛpatisevakaḥ /
tathāpi na parābhūtiṃ janādāpnoti mānavaḥ // MSS_2010

api kāpuruṣo bhīruḥ syāccennṛpatisevakaḥ /
yadāpnoti phalaṃ lokāt tasyāṃśamapi no guṇī // MSS_2011

api kāpuruṣo mārge dvitīyaḥ kṣemakārakaḥ /
karkaṭena dvitīyena jīvitaṃ parirakṣitam // MSS_2012

api kālasya yaḥ kālaḥ so'pi kālamapekṣate /
kartuṃ jaganti hantuṃ vā kālastena jagatprabhuḥ // MSS_2013

api kīrtyarthamāyānti nāśaṃ sadyo'timāninaḥ /
na cecchantyayaśomiśram apyevānantyamāyuṣaḥ // MSS_2014

api kuñjarakarṇāgrād api pippalapallavāt /
api vidyudvilasitād vilolaṃ lalanāmanaḥ // MSS_2015

api kriyārthaṃ sulabhaṃ samitkuśaṃ jalānyapi snānavidhikṣamāṇi te /
api svaśaktyā tapasi pravartase śarīramādyaṃ khalu dharmasādhanam // MSS_2016

api ghorāparādhasya dharmamāśritya tiṣṭhataḥ /
sa hi pracchādyate doṣaḥ śailo meghairivāsitaiḥ // MSS_2017

api cāpyaphalaṃ karma paśyāmaḥ kurvato janān /
nānyathā hyabhijānanti vṛttiṃ loke kathaṃcana // MSS_2018

api cintāmaṇiścintāpariśramamapekṣate /
idaṃ tvacintitaṃ manye kṛtamāścaryamāryayā // MSS_2019

api cet sudurācāro bhajate māmananyabhāk /
sādhureva sa mantavyaḥ samyag vyavasito hi saḥ // MSS_2020

api cedasi pāpebhyaḥ sarvebhyaḥ pāpakṛttamaḥ /
sarvaṃ jñānaplavenaiva vṛjinaṃ saṃtariṣyasi // MSS_2021

api janakasutāyāstacca taccānurūpaṃ sphuṭamiha śiśuyugme naipuṇonneyamasti /
nanu punariva tanme gocarībhūtamakṣṇor abhinavaśatapatraśrīmadāsyaṃ priyāyāḥ // MSS_2022

api jalakaṇān payodher dūrādāhṛtya jāyate jaladaḥ /
nikaṭād ghaṭānapi śataṃ samīharan vārihāryeva // MSS_2023

api tadvapuṣi prasarpator gamite kāntijharairagādhatām /
smarayauvanayoḥ khalu dvayoḥ plavakumbhau bhavataḥ kucāvubhau // MSS_2024

api taruvanānyūṣmāyante tapatyapi yāminī dahati sarasīvāto'pyeṣa jvalanti jalānyapi /
iti samadhikaṃ grīṣme bhīṣme na puṇyavatāṃ bhayaṃ malayajarasairdigdhaṃ labdhvā vadhūstanamaṇḍalam // MSS_2025

api turagasamīpādutpatantaṃ mayūraṃ na sa rucirakalāpaṃ bāṇalakṣyīcakāra /
sapadi gatamanaskaścitramālyānukīrṇe rativigalitabandhe keśapāśe priyāyāḥ // MSS_2026

api tejo nidhirhanta patito yadi jāyate /
surataṃ kimivāsmākam iti kokairviyujyate // MSS_2027

api tvayā kairaviṇi vyadhāyi mudhā sudhābandhuni bandhubhāvaḥ /
janāpavādaḥ paritaḥ prayātaḥ samāgamo hanta na jātu jātaḥ // MSS_2028

api dalanmukule bakule yayā padamadhāyi kadāpi na tṛṣṇayā /
ahaha sā sahasā vidhure vidhau madhukarī badarīmanuvartate // MSS_2029

api dinamaṇireṣa kleśitaḥ śītasaṃghair atha niśi nijabhāryāṃ gāḍhamāliṅgya dorbhyām /
svapiti punarudetuṃ sālasāṅgastu tasmāt kimu na bhavatu dīrghā yāminī kāminīyam // MSS_2030

api dorbhyāṃ paribaddhā baddhāpi guṇairanekadhā nipuṇaiḥ /
nirgacchati kṣaṇādiva jaladhijalotpattipicchilā lakṣmīḥ // MSS_2031

api nadatha nikāmaṃ dardurāḥ kiṃ suvarṇa- dyutibharamupanītā nūtanairvāripūraiḥ /
ayamaciravināśī śocanīyastu bhāvī sa ciramavaṭasīmni prācya eva krayo vaḥ // MSS_2032

api nāma sa dṛśyeta puruṣātiśayo bhuvi /
garvocchūnamukhā yena dhanino nāvalokitāḥ // MSS_2033

api nityānandamayaṃ sahaḥ śriyaṃ vahati saṃtataṃ hṛdaye /
kaḥ sādhāraṇapuruṣaḥ prabhavatvenāmanādarttum // MSS_2034

api nipuṇataramadhītaṃ durvinayārūḍhacetasaḥ puṃsaḥ /
maṇiriva phaṇiphaṇavartī prabhavati śokāya lokānām // MSS_2035

api nirmuktabhogena svāntaḥsthaviṣayekṣayā /
asadbhāvāya jāyeta jihmagena sahāsikā // MSS_2036

api pañcaśataṃ daṇḍyān daṇḍayet pṛthivīpatiḥ /
abhāve pañca kāyasthān ekaṃ vā svarṇakārakam // MSS_2037

api pañcaśataṃ śūrā mṛdnanti mahatīṃ camūm /
athavā pañca ṣaṭ sapta vijayante'nivartinaḥ // MSS_2038

api putraiḥ kalatrairvā prāṇān rakṣeta paṇḍitaḥ /
vidyamānairyatastaiḥ syāt sarvaṃ bhūyo'pi dehinām // MSS_2039

api pauruṣamādeyaṃ śāstraṃ cedyuktibodhakam /
anyattvārṣamapi tyājyaṃ bhāvyaṃ nyāyyaikasevinā // MSS_2040

api pragalbhalalanākaṭākṣacapalāḥ śriyaḥ /
sanmantripraṇidhānena ciraṃ tiṣṭhanti bhūbhujām // MSS_2041

api prājyaṃ rājyaṃ tṛṇamiva parityajya sahasā viloladvānīraṃ tava janani tīraṃ śritavatām /
sudhātaḥ svādīyaḥ salilamidamātṛpti pibatāṃ janānāmānandaḥ parihasati nirvāṇapadavīm // MSS_2042

api prāṇasamāniṣṭān pālitāṃllālitānapi /
bhṛtyān yuddhe samutpanne paśyecchuṣkamivendhanam // MSS_2043

api bandhutayā nārī bahuputrā guṇairyutā /
śocyā bhavatisā nārī patihīnā tapasvinī // MSS_2044

api brahmaparānandādidamapyadhikaṃ dhruvam /
jahāra nāradādīnāṃ cittāni kathamanyathā // MSS_2045

api brahmavadhaṃ kṛtvā prāyaścittena śudhyati /
tadarthena vicīrṇena na kathaṃcitsuhṛddruhaḥ // MSS_2046

api bhujalatotkṣepādasyāḥ kṛtaṃ parirambhaṇaṃ priyasahacarīkrīḍālāpe śrutā api sūktayaḥ /
navapariṇayavrīḍāvatyā mukhonnatiyatnato- 'pyalasavalitā tiryagdṛṣṭiḥ karoti mahotsavam // MSS_2047

api bhogiṣu maṇidhāriṇa eva nihaṃsi natu yaddviṣo'pi parān /
tattava garuḍa sthāne dānavasaṃhārivāhasya // MSS_2048

api bhrātā suto'rghyo vā śvaśuro mātulo'pi vā /
nādaṇḍyo nāma rājño'sti dharmādvicalitaḥ svakāt // MSS_2049

api mandatvamāpanno naṣṭo vāpīṣṭadarśanāt /
prāyeṇa prāṇināṃ bhūyo duḥkhavego'dhiko bhavet // MSS_2050

api maraṇamupaiti sā mṛgāṅke vilasati kaiva kathā rasāntarasya /
ayi kathamadhunā dadhāti śāntiṃ viṣamaśarajvaratīvradehadāhaḥ // MSS_2051

api mānuṣyakaṃ labdhvā bhavanti jñānino na ye /
paśutaiva varā teṣāṃ pratyavāyāpravartanāt // MSS_2052

api mārdavabhāvena gātraṃ saṃlīya buddhimān /
ariṃ nāśayate nityaṃ yathā vallī mahādrumam // MSS_2053

api mudamupayānto vāgvilāsaiḥ svakīyaiḥ parabhaṇitiṣu toṣaṃ yānti santaḥ kiyantaḥ /
nijaghanamakarandasyandapūrṇālavālaḥ kalaśasalilasekaṃ nehate kiṃ rasālaḥ // MSS_2054

api mṛgapatinā karīndrakumbha- sthaladalanodgatapauruṣeṇa yasya /
bhayacakitadṛśā pranaṣṭamuccaiḥ sa hi śarabhīkularājacakravartī // MSS_2055

api mṛdvyā girā labhyaḥ sadā jāgartyatandritaḥ /
nāsti dharmasamo bhṛtyaḥ kiṃciduktastu dhāvati // MSS_2056

api merūpamaṃ prājñam api śūramapi sthiram /
tṛṇīkaroti tṛṣṇaikā nimeṣeṇa narottamam // MSS_2057

api yatsukaraṃ karma tadapyekena duṣkaram /
biśeṣato'sahāyena kimu rājyaṃ mahodayam // MSS_2058

api rājyādapi svargād apīndorapi mādhavāt /
api kāntākucasparśāt saṃtoṣaḥ paramaṃ sukham // MSS_2059

api lapitumahaṃ na hanta śaktas tava purataḥ paritāpamāyatākṣyāḥ /
śiva śiva rasanā yato na yatnād api yatate nijadāhaśaṅkayeva // MSS_2060

api lalitasuguṇaveṇiḥ sālaṃkārāpi yā suvarṇāpi /
raghutilaka vihīnā ced vāṇī ramaṇīva naiva kalyāṇī // MSS_2061

api vajreṇa saṃgharṣam api padbhyāṃ parābhavam /
sahante guṇalobhena ta eva maṇayo yadi // MSS_2062

api vaṭataroḥ spardhāṃ bījena sarṣapa sāṃprataṃ pariṇamasi yo muṣṭiḥ śākaṃ sati sthalasauṣṭhave /
jaṭharakuharakrīḍadviśvo yadekadalodare pralayaśiśuko devaḥ śiśye pureti ha śuśrumaḥ // MSS_2063

api varṣaśataṃ sthitvā sadā kṛtrimarāgiṇī /
veśyā śukīva niḥśvāsā niḥsaṅgebhyaḥ palāyate // MSS_2064

api vidhiḥ kusumāni tavāśugān smara vidhāya na nirvṛtimāptavān /
adita pañca hi te sa niyamya tāṃs tadapi tairbata jarjaritaṃ jagat // MSS_2065

api vīryotkaṭaḥ śatrur yato bhedena sidhyati /
tasmād bhedaḥ prayoktavyaḥ śatrūṇāṃ vijigīṣuṇā // MSS_2066

api vetti ṣaḍakṣarāṇi ced upadeṣṭuṃ śitikaṇṭhamicchati /
vasanāśanamātramasti ced dhanadādapyatiricyate khalaḥ // MSS_2067

api śāradacandrikā yadīyāṃ tulanāṃ gacchati duṣkaraistapobhiḥ /
na taṭuñjhati mānasaṃ madīyaṃ hasitaṃ khañjanamañjulocanāyāḥ // MSS_2068

api śāstreṣu kuśalā lokācāravivarjitāḥ /
sarve te hāsyatāṃ yānti yathā te mūrkhapaṇḍitāḥ // MSS_2069

api śiśirataropacārayogyaṃ dvitayamidaṃ yugapanna sahyameva /
jaraṭhitaravidīdhitiśca kālo dayitajanena samaṃ ca viprayogaḥ // MSS_2070

api śroṇibharasvairāṃ dhartuṃ tāmaśakanna saḥ /
tadaṅgasaṅgajastambho gajastambhorudorapi // MSS_2071

api saṃtāpaśamanāḥ śuddhāḥ surabhiśītalāḥ /
bhujaṅgasaṅgājjāyante bhīṣaṇāścandanadrumāḥ // MSS_2072

api saṃpūrṇatāyuktaiḥ kartavyāḥ suhṛdo budhaiḥ /
nadīśaḥ paripūrṇo'pi candrodayamapekṣate // MSS_2073

api saṃbhṛtasya satataṃ riktatvaṃ bibhrato visarjanataḥ /
udarasyodārasya ca kevalamākārato bhedaḥ // MSS_2074

api satpathaniṣṭhānām āśāḥ pūrayatāmapi /
agastyavṛttirmeghānāṃ hanta mālinyakāraṇam // MSS_2075

api sa divasaḥ kiṃ syādyatra priyāmukhapaṅkaje madhu madhukarīvāsmaddṛṣṭirvikāsini pāsyati /
tadanu ca mṛdusnigdhālāpakramāhitanarmaṇaḥ suratasacivairaṅgaiḥ saṅgo mamāpi bhaviṣyati // MSS_2076

api sarvavido na rājate vacanaṃ śrotari bodhavarjite /
api bhartari naṣṭalocane viphalaḥ kiṃ na kalatravibhramaḥ // MSS_2077

api sahavasatāmasatāṃ jalaruhajalavadbhavatyasaṃśleṣaḥ /
dūre'pi satāṃ vasatāṃ prītiḥ kumudenduvad bhavati // MSS_2078

api sāgaraparyantā vicetavyā vasundharā /
deśo hyaratnimātro'pi nāsti daivajñavarjitaḥ // MSS_2079

api subhagaṃ tava vadanaṃ paśyati subhage yadā yadā candraḥ /
glāyati hanta pidhatte sapadi mukhaṃ svaṃ payodāntaḥ // MSS_2080

api sthānuvadāsīta śuṣyan parigataḥ kṣudhā /
na tvevānātmasaṃpannād vṛttimīheta paṇḍitaḥ // MSS_2081

api syāt pitṛhā vairī so'pi dānavilobhitaḥ /
gatvā viśvāsabhāvaṃ sa śatrorātmānamarpayet // MSS_2082

api svamasvapnamasūṣupannamī parasya dārānanavaitumeva mām /
svayaṃ duradhvārṇavanāvikāḥ kathaṃ spṛśantu vijñāya hṛdāpi tādṛśīm // MSS_2083

api svalpataraṃ kāryaṃ yadbhavet pṛthivīpateḥ /
tanna vācyaṃ sabhāmadhye provācedaṃ bṛhaspatiḥ // MSS_2084

api svalpamasatyaṃ yaḥ puro vadati bhūbhujām /
devānāṃ ca vināśaḥ syād dhruvaṃ tasya gurorapi // MSS_2085

api svaiḥ sarvasvaiḥ punarapadhanaiḥ kairapi dhanaiḥ paritrāṇaiḥ prāṇairyadapi ca vidheyaṃ parahitam /
tadadyaitacchabdāt parabhṛta bhavatyeva bhavatas tataḥ śabdālasyaṃ kathamapi nirasyaṃ kṣaṇamapi // MSS_2086

apīḍayan balaṃ śatrūñ jigīṣurabhiṣeṇayet /
sukhasādhyaṃ dviṣāṃ sainyaṃ dīrghaprayāṇapīḍitam // MSS_2087

apītakṣībakādambam asaṃmṛṣṭāmalāmbaram /
aprasāditaśuddhāmbu jagadāsīnmanoharam // MSS_2088

aputratvaṃ bhavacchreyo na tu syādviguṇaḥ sutaḥ /
jīvannapyavinīto'sau mṛta eva na saṃśayaḥ // MSS_2089

aputrasya gatirnāsti svargo naiva ca naiva ca /
tasmāt putramukhaṃ dṛṣṭvā bhavet paścāddhi tāpasaḥ // MSS_2090

aputrasya gṛhaṃ śūnyaṃ diśaḥ śūnyāstvabāndhavāḥ /
mūrkhasya hṛdayaṃ śūnyaṃ sarvaśūnyā daridratā // MSS_2091

aputrasya gṛhaṃ śocyaṃ śocyaṃ rājyamarājakam /
nirāhārāḥ prajāḥ śocyā śocyaṃ maithunamaprajam // MSS_2092

apunardehiśabdārtham apratyupakṛtikṣamam /
arthinaṃ kurute kaścit punarāvṛttivarjitam // MSS_2093

apuṣyata ghanāvalī bhuvanajīvanairyatkarair avardhyata sudhārucirbahubudhālisaṃtarpaṇaḥ /
tamandhatamasacchidaṃ ravimavekṣya jājvalyase tvameva ravikāntatāmayasi hanta kiṃ kurmahe // MSS_2094

apūjitaivāstu girīndrakanyā kiṃ pakṣapātena manobhavasya /
yadyasti dūtī sarasoktidakṣā dāsaḥ patiḥ pādatale vadhūnām // MSS_2095

apūjito'tithiryasya gṛhādyāti viniḥśvasan /
gacchanti pitarastasya vimukhāḥ saha daivataiḥ // MSS_2096

apūjyā yatra pūjyante pūjyānāṃ tu vimānanā /
trīṇi tatra pravartante durbhikṣaṃ maraṇaṃ bhayam // MSS_2097

apūjyā yatra pūjyante pūjyānāmapyamānanā /
tava daivakṛto daṇḍaḥ sadyaḥ patati dāruṇaḥ // MSS_2098

apūrṇe naiva martavyaṃ saṃpūrṇe naiva jīvati /
tasmāddhairyaṃ vidhātavyaṃ hantavyā paravāhinī // MSS_2099

apūrvaṃ cauryamabhyastaṃ tvayā cañcalalocane /
divāpi jāgratāṃ puṃsāṃ ceto harasi dūrataḥ // MSS_2100

apūrvaṃ yadvastu prathayati vinā kāraṇakalāṃ jagad grāvaprakhyaṃ nijarasabharāt sārayati ca /
kramāt prakhyopākhyāprasarasubhagaṃ bhāsayati tat sarasvatyāstattvaṃ kavisahṛdayākhyaṃ vijayate // MSS_2101

apūrvaḥ ko'pi kopāgniḥ sajjanasya khalasya ca /
ekasya śāmyati snehād vardhate'nyasya vāritaḥ // MSS_2102

apūrvaḥ ko'pi kośo'yaṃ vidyate tava bhārati /
vyayato vṛddhimāyāti kṣayamāyāti saṃcayāt // MSS_2103

apūrvaḥ ko'pi tanvaṅgyā mama mārgaḥ pradarśitaḥ /
yogaṃ cintayato yena rāga eva vivardhate // MSS_2104

apūrvakarmacaṇḍālam api mugdhe vimuñca mām /
śritāsi candanabhrāntyā durvipākaṃ viṣadrumam // MSS_2105

apūrvadeśādhigame yuvarājābhiṣecane /
putrajanmani vā mokṣo bandhanasya vidhīyate // MSS_2106

apūrvamadhurāmodapramoditadiśastataḥ /
āyayurbhṛṅgamukharāḥ śiraḥ śekharaśālinaḥ // MSS_2107

apūrvayeva tatkālasamāgamasakāmayā /
dṛṣṭena rājan vapuṣā kaṭākṣairvijayaśriyā // MSS_2108

apūrvā rasanāvyālī khalānanabileśayā /
karṇamūle daśatyanyaṃ haratyanyasya jīvitam // MSS_2109

apūrvāhlādadāyinya uccaistarapadāśrayāḥ /
atimohāpahāriṇyaḥ sūktayo hi mahīyasām // MSS_2110

apūrviṇā na kartavyaṃ karma loke vigarhitam /
kṛtapūrviṇastu tyajato mahān dharma iti śrutiḥ // MSS_2111

apūrveyaṃ dhanurvidyā bhavatā śikṣitā kutaḥ /
mārgaṇaughaḥ samāyāti guṇo jāti digantaram // MSS_2112

apūrvo dṛśyate vahniḥ kāminyāḥ stanamaṇḍale /
dūrato dahate gātraṃ gātralagnaḥ suśītalaḥ // MSS_2113

apūrvo bhāti bhāratyāḥ kāvyāmṛtaphale rasaḥ /
carvaṇe sarvasāmānye svāduvit kevalaṃ kaviḥ // MSS_2114

apūrvo'yaṃ kānte jvalati mukhadīpastava ciraṃ tamo draṣṭ ṇāṃ yo janayatitarāṃ yāti sutano /
adhastādyatreyaṃ bata surabhidhūmālakatatir yadīyā vārtaiva jvalayati pataṃgāniva janān // MSS_2115

apūrvo'yaṃ dhanurvedo manmathasya mahātmanaḥ /
śarīramakṣataṃ kṛtvā bhinattyantargataṃ manaḥ // MSS_2116

apūrvo'yaṃ panthāḥ śiva tava vibhutvasya katamo jagadbandho yatte padayugamakāmaṃ praṇamatām /
prayāti pradhvaṃsaṃ na khalu duritaṃ kevalamidaṃ ciropāttaṃ sadyaḥ sukṛtamapi sarvaṃ vigalati // MSS_2117

apūrvo'yaṃ mayā dṛṣṭaḥ kāntaḥ kamalalocane /
śo'ntaraṃ yo vijānāti sa vidvannātra saṃśayaḥ // MSS_2118

apṛcchaṃ putradārādīṃs tairukto'haṃ raghattama /
pāpaṃ tavaiva tatsarvaṃ vayaṃ tu phalabhāginaḥ // MSS_2119

apṛṣṭastasya na brūyād yaśca necchet parābhavam /
eṣa eva satāṃ dharmo viparīto'satāṃ mataḥ // MSS_2120

apṛṣṭastu naraḥ kiṃcid yo brūte rājasaṃsadi /
na kevalamasaṃmānaṃ labhate ca viḍambanām // MSS_2121

apṛṣṭena na vaktavyaḥ sacivena vipaścitā /
nānuśiṣyādapṛcchantaṃ mahadetaddhi sāhasam // MSS_2122

apṛṣṭenāpi vaktavyaṃ sacivenātra kiṃcana /
pṛṣṭena tu viśeṣeṇa vācyaṃ pathyaṃ mahīpateḥ // MSS_2123

apṛṣṭo'trāpradhāno yo brūte rājñaḥ puraḥ kudhīḥ /
na kevalamasaṃmānaṃ labhate ca viḍambanam // MSS_2124

apṛṣṭvaiva bhavenmūḍhajñānaṃ manasi cintanāt /
apūrṇaḥ kurute śabdaṃ na pūrṇaḥ kurute ghaṭaḥ // MSS_2125

apekṣante na ca snehaṃ na pātraṃ na daśāntaram /
sadā lokahitāsaktā ratnadīpā ivottamāḥ // MSS_2126

apetāḥ śatrubhyo vayamiti viṣādo'yamaphalaḥ pratīkārastveṣāmaniśamanusaṃdhātumucitaḥ /
jarāsaṃdhādbhagnaḥ saha halabhṛtā dānavaripur jaghānainaṃ paścānna kimanilasūnuḥ priyasakhaḥ // MSS_2127

apehi hṛdayādvā me vāme darśanamehi vā /
adūravirahotkaṇṭhāduḥkhaṃ duḥkena sahyate // MSS_2128

apyakhilālaṃkārā- nākalayanto'pi rasavidaścitram /
kalayanti sarasakāvye nālaṃkāraṃ kadācidapi // MSS_2129

apyagraṇīrmantrakṛtāmṛṣīṇāṃ kuśāgrabuddhe kuśalī guruste /
yatastvayā jñānamaśeṣamāptaṃ lokena caitanyamivoṣṇaraśmeḥ // MSS_2130

apyatiśayitamanarthaṃ śamayatyarthaṃ samarpayan nṛpatiḥ /
tamanarpayan nirarthaṃ prāṇena samaṃ parityajatyartham // MSS_2131

apyatyucco bhūmisamaḥ pārthivo'pi na pārthivaḥ /
mānārthaṃ jīvitaṃ tasya kṛte māne na jīvati // MSS_2132

apyanārabhamāṇasya vibhorutpāditāḥ paraiḥ /
vrajanti guṇatāmarthāḥ śabdā iva vihāyasaḥ // MSS_2133

apyanāvarjitāḥ svena phalarāgeṇa saṃnatāḥ /
arbhakairapi gṛhyante sādhusaṃtānaśākhinaḥ // MSS_2134

apyanekairupacitair durvinītaiḥ sutairalam /
nidarśanaṃ dhārtarāṣṭrāḥ śataṃ duryodhanādayaḥ // MSS_2135

apyabhīṣṭā na labhyante saṃtyaktā na tyajanti ca /
vāsanā iva saṃsāre mohanaikaparāḥ striyaḥ // MSS_2136

apyaśakyaṃ tvayā dattaṃ duḥkhaṃ śakyantarātmani /
bāṣpo vāhīkanārīṇāṃ vegavāhī kapolayoḥ // MSS_2137

apyākarasamutpannamaṇijātirasaṃskṛtā /
jātarūpeṇa kalyāṇi na hi saṃyogamarhati // MSS_2138

apyātmano vināśaṃ gaṇayati na khalaḥ paravyasanahṛṣṭaḥ /
prāyo mastakanāśe samaramukhe nṛtyati kabandhaḥ // MSS_2139

apyāpatsamayaḥ sādhoḥ prayāti ślāghanīyatām /
vidhorvidhuṃtudāskandavipatkālo'pi sundaraḥ // MSS_2140

apyāmīlitapaṅkajāṃ kamalinīmapyullasatpallavāṃ vāsantīmapi saudhabhittipatitāmātmapraticchāyikām /
manvānaḥ prathamaṃ priyeti pulakasvedaprakampākulaṃ prītyāliṅgati nāsti seti na punaḥ khedottaraṃ mūrcchati // MSS_2141

apyutkaṭe ca raudre ca śatrau yasya na hīyate /
dhairyaṃ prāpte mahīpasya na sa yāti parābhavam // MSS_2142

apyunnatapadārūḍhaḥ pūjyān naivāpamānayet /
nahuṣaḥ śakratāṃ prāpya cyuto'gastyāvamānanāt // MSS_2143

apyunmattāt pralapato bālācca parisarpataḥ /
sarvataḥ sāramādadyād aśmabhya iva kāñcanam // MSS_2144

apyupāyaistribhistāta yo'rthaḥ prāptuṃ na śakyate /
tasya vikramakālāṃstān yuktānāhurmanīṣiṇaḥ // MSS_2145

apyuddāmavyasanasaraṇeḥ saṃgame kāmukānāṃ bhadraṃ bhadre bhuvanajayinastvatkalākaulaśasya /
apyutsāhapracurasuhṛdaḥ kāmakelīnivāsāḥ prauḍhotsāhāstava suvadane svastimanto vilāsāḥ // MSS_2146

apyekavaṃśajanuṣoḥ paśyata pūrṇatvatucchatābhājoḥ /
jyākārmukayoḥ kaścid guṇabhūtaḥ kaścidapi bhartā // MSS_2147

apyetadrajanīmayaṃ jagadatho nidrāmayī sā niśā nidrā svapnamayī bhavedatha ca sa svapno mṛgākṣīmayaḥ /
seyaṃ mānamayī mama priyatamā taccāṭuceṣṭāmayo mādṛk kveti samīhitaikavidhaye saṃkalpa tubhyaṃ namaḥ // MSS_2148

apyeva dahanaṃ spṛṣṭvā vane tiṣṭhanti pādapāḥ /
rājadoṣaparāmṛṣṭās tiṣṭhante nāparādhinaḥ // MSS_2149

apyautsukye mahati dayitaprārthanāsu pratīpāḥ kāṅkṣantyo'pi vyatikarasukhaṃ kātarāḥ svāṅgadāne /
ābādhyante na khalu madanenaiva labdhāntaratvād ābādhante manasijamapi kṣiptakālāḥ kumāryaḥ // MSS_2150

aprakaṭavartitastana- maṇḍalikānibhṛtacakradarśinyaḥ /
āveśayanti hṛdayaṃ smaracaryāguptayoginyaḥ // MSS_2151

aprakaṭīkṛtaśaktiḥ śakto'pi janāt tiraskriyāṃ labhate /
nivasannantardāruṇi laṅghyo vahnirna tu jvalitaḥ // MSS_2152

apragalbhasya yā vidyā kṛpaṇasya ca yaddhanam /
yacca bāhubalaṃ bhīror vyarthametat trayaṃ bhuvi // MSS_2153

apragalbhāḥ padanyāse jananīrāgahetavaḥ /
santyeke bahulālāpāḥ kavayo bālakā iva // MSS_2154

apraṇodyo'tithiḥ sāyaṃ sūryoḍho gṛhamedhinā /
kāle prāptastvakāle vā nāsyānaśnan gṛhe vaset // MSS_2155

apraṇādyo'tithiḥ sāyaṃ sūryoḍho gṛhamedhinām /
pūjayā tasya devatvaṃ prayānti gṛhamedhinaḥ // MSS_2156

apratikṛtyātmānaṃ sahasānartheṣu na pravarteta /
śirasi dhṛte'mṛtakiraṇe viṣamaghasadviṣamanetro'pi // MSS_2157

apratibuddhe śrotari vakturvākyaṃ prayāti vaiphalyam /
nayanavihīne bhartari lāvaṇyamiveha khañjanākṣīṇām // MSS_2158

apratiṣṭhāśca ye kecid adharmaśaraṇāśca ye /
teṣāṃ pratiṣṭhā gaṅgeha śaraṇaṃ śarma varma ca // MSS_2159

apratyakṣāṇi śāstrāṇi vivādastatra kevalam /
pratyakṣaṃ jyautiṣaṃ śāstraṃ candrārkau yatra sākṣiṇau // MSS_2160

apratyākalitaprabhāvavibhave sarvāśrayāmbhonidhau vāso nālpatapaḥphalaṃ yadaparaṃ doṣo'yameko mahān /
śambūko'pi yadatra durlabhatarai ratnairanarghaiḥ saha spardhāmekanivāsakāraṇavaśādekāntato vāñchati // MSS_2161

apradātā samṛddho'sau daridraśca mahāmanāḥ /
aśrutaśca samunnaddhas tamāhurmūḍhacetasam // MSS_2162

apradīpā yathā rātrir anādityaṃ yathā nabhaḥ /
tathāsāṃvatsaro rājā bhramatyandha ivādhvani // MSS_2163

apradhānaḥ pradhānaḥ syāt pārthivaṃ yadi sevate /
pradhāno'pyapradhānaḥ syād yadi sevāvivarjitaḥ // MSS_2164

aprabhūtamatanīyasi tanvī kāñcidhāmni pihitaikataroru /
kṣaumamākulakarā vicakarṣa krāntapallavamabhīṣṭatamena // MSS_2165

apramattaśca yo rājā sarvajño vijitendriyaḥ /
kṛtajño dharmaśīlaśca sa rājā tiṣṭhate ciram // MSS_2166

apramatte'pi puruṣe hitakāryāvalambini /
daivamunmārgarasikam anyathaiva pramadyate // MSS_2167

apramādaśca kartavyas tvayā rājñaḥ samāśraye /
tvadīyasya śarīrasya vayaṃ bhāgyopajīvinaḥ // MSS_2168

aprasannamaparāddhari patyau kopadīptamurarīkṛtadhairyam /
kṣālitaṃ nu śamitaṃ nu vadhūnāṃ drāvitaṃ nu hṛdayaṃ madhuvāraiḥ // MSS_2169

aprasādo'nadhiṣṭhānaṃ deyāṃśaharaṇaṃ ca yat /
kālayāpo'pratīkāras tad vairāgyasya kāraṇam // MSS_2170

aprastāvastutibhiraniśaṃ karṇaśūlaṃ karoti svaṃ dāridryaṃ vadati vasanaṃ darśayatyeva jīrṇam /
chāyābhūtaścalati na puraḥ pārśvayornaiva paścān niḥsvaḥ khedaṃ diśati dhanināṃ vyādhivadduścikitsyaḥ // MSS_2171

aprākṛtaḥ sa kathamastu na vismayāya yasminnuvāsa karuṇā ca kṛtajñatā ca /
lakṣmīśca sāttvikaguṇajvalitaṃ ca tejo dharmaśca mānavinayau ca parākramaśca // MSS_2172

aprākṛtasya cāritātiśayasya bhāvair atyadbhutairmama hṛtasya tathāpyanāsthā /
ko'pyeṣa vīraśiśukākṛtiraprameya- sāmarthyasārasamudāyamayaḥ padārthaḥ // MSS_2173

aprākṛtasyāhavadurmadasya nivāryamasyāstrabalena vīryam /
alpīyaso'pyāmayatulyavṛtter mahāpakārāya riporvivṛddhiḥ // MSS_2174

aprājñena ca kātareṇa ca guṇaḥ syād bhaktiyuktena kaḥ prajñāvikramaśālino'pi hi bhavet kiṃ bhaktihīnāt phalam /
prajñāvikramabhaktayaḥ samuditā yeṣāṃ guṇā bhūtaye te bhṛtyā nṛpateḥ kalatramitare saṃpatsu cāpatsu ca // MSS_2175

aprāptakālaṃ vacanaṃ bṛhaspatirapi bruvan /
labhate buddhyavajñānam avamānaṃ ca bhārata // MSS_2176

aprāptakālavacanaṃ bṛhaspatirapi bruvan /
prāpnuyād buddhiśaithilyam apamānaṃ ca śāśvatam // MSS_2177

aprāptakālo yo mūrkho haset svecchānusārataḥ /
prāpnuyād buddhyavajñānaṃ sabhāyāṃ caiva śāśvatam // MSS_2178

aprāptakelisukhayoratimānaruddha- saṃdhānayo rahasi jātaruṣorakasmāt /
yūnormitho'bhilaṣatoḥ prathamānunītiṃ bhāvāḥ prasādapiśunāḥ kṣapayanti nidrām // MSS_2179

aprāptapuṣpodgamavibhramaiva ruddhā bhujaṅgena tathā yatheyam /
na śakyate spraṣṭumapīhamānair āmodinī candanaśākhikeva // MSS_2180

aprāptaprathamāvakartanaruṣā vyānamramūkībhavad- vakreṣvanyaśiraḥsu yasya dahane chinnaṃ śiro juhvataḥ /
uccārya svayameva mantramakaronnāsyāhamityātmanas tyāgaṃ paṅktimukhaḥ sa vikramasuhṛdvīraḥ kathaṃ varṇyate // MSS_2181

aprāptayauvanā nārī na kāmāya na śāntaye /
saṃprāpte ṣoḍaśe varṣe gardabhī cāpsarāyate // MSS_2182

aprāptavallabhasamāgamanādhikāyāḥ sakhyāḥ puro'tra nijacittavinodabuddhyā /
ālāpaveṣagatihāsyavikatthanādyaiḥ prāṇeśvarānukṛtimākalayanti līlām // MSS_2183

aprāpye'pi yathā kāme dharme cintā na kiṃ tathā /
alābhe'pi dvayorekā bhayadā śivadāparā // MSS_2184

aprāpyeṣurudāsitāsiraśanerārāt kutaḥ śaṅkutaś cakravyutkramakṛt parokṣaparaśuḥ śūlena śūnyā yayā /
mṛtyurdaityapateḥ kṛtaḥ sa sadṛśaḥ pādāṅgulīparvataḥ pārvatyā pratipālyatāṃ tribhuvanaṃ niḥśalyakalyaṃ tayā // MSS_2185

aprāmāṇyaṃ ca vedānāṃ śāstrāṇāṃ cātilaṅghanam /
sarvatra cānavasthānam etannāśanamātmanaḥ // MSS_2186

aprārthanamasaṃsparśam asaṃdarśanameva ca /
puruṣasyeha niyamo bhavedrāgaprahāṇaye // MSS_2187

aprārthitaṃ yathā duḥkhaṃ tathā sukhamapi svayam /
prāṇinaṃ pratipadyeta sarvaṃ niyatiyantritam // MSS_2188

apriyaṃ na hi bhāṣeta na virudhyeta kenacit /
kāryasiddhiṃ samīheta kāryabhraṃśo hi mūrkhatā // MSS_2189

apriyaṃ puruṣa cāpi paradrohaṃ parastriyam /
adharmamanṛtaṃ caiva dūrāt prājño vivarjayet // MSS_2190

apriyaṃ yasya kurvīta bhūyas tasya priyaṃ caret /
acireṇa priyaḥ sa syād yo'priyaḥ priyamācaret // MSS_2191

apriyamuktāḥ puruṣāḥ prayatante dviguṇamapriyaṃ vaktum /
tasmādavācyamapriyam apriyamaśrotukāmena // MSS_2192

apriyavacanadaridraiḥ priyavacanāḍhyaiḥ svadāraparituṣṭaiḥ /
paraparivādanivṛttaiḥ kvacit kvacin maṇḍitā vasudhā // MSS_2193

apriyavacanāṅgārair dagdho'pi na vipriyaṃ vadatyāryaḥ /
kiṃ dahyamānamagaru svabhāvasurabhiṃ parityajati // MSS_2194

apriyasyāpi vacasaḥ pariṇāmāvirodhinaḥ /
vaktā śrotā ca yatrāsti ramante tatra saṃpadaḥ // MSS_2195

apriyāṇyapi kurvantaḥ svārthāyodyata ceṣṭitāḥ /
paṇḍitā nopalabhyante vāyasairiva kokilāḥ // MSS_2196

apriyāṇyapi kurvāṇo niṣṭhurāṇyapi ca bruvan /
cetaḥ prahlādayatyeva sarvāvasthāsu vallabhaḥ // MSS_2197

apriyāṇyapi kurvāṇo yaḥ priyaḥ priya eva saḥ /
dagdhamandirasāre'pi kasya vahnāvanādaraḥ // MSS_2198

apriyāṇyapi pathyāni ye vadanti nṛṇāmiha /
ta eva suhṛdaḥ proktā anye syurnāmadhārakāḥ // MSS_2199

apriyā na bhaviṣyanti priyo me na bhaviṣyati /
ahaṃ ca na bhaviṣyāmi sarvaṃ ca na bhaviṣyati // MSS_2200

apriyaiḥ saha saṃvāsaḥ priyaiścāpi vinābhavaḥ /
asadbhiḥ saṃprayogaśca tadduḥkhaṃ cirajīvinām // MSS_2201

apriyairapi niṣpiṣṭaiḥ kiṃ syāt kleśāsahiṣṇubhiḥ /
ye tadunmūlane śaktā jigīṣā teṣu śobhate // MSS_2202

apriyo'pi hi pathyaḥ syād iti vṛddhānuśāsanam /
vṛddhānuśāsane tiṣṭhan priyatāmupagacchati // MSS_2203

aprītāṃ rogiṇīṃ nārīm antarvatnīṃ dhṛtavratām /
rajasvalāmakāmāṃ ca na kāmeta balāt pumān // MSS_2204

apsu plavante pāṣāṇā mānuṣā ghnanti rākṣasān /
kapayaḥ karma kurvanti kālasya kuṭilā gatiḥ // MSS_2205

apsvātmānaṃ na vīkṣeta nāvagāhet payorayam /
saṃdigdhanāvaṃ nārohen na bāhubhyāṃ nadīṃ taret //
aphalaṃ śrāddham apātre dhanam aphalaṃ yat na dattamarthibhyaḥ /
yauvanamaphalaṃ yaminaś śrutamaphalaṃ durvinītasya // MSS_2206

aphalasyāpi vṛkṣasya chāyā bhavati śītalā /
nirguṇo'pi varaṃ bandhur yaḥ paraḥ para eva saḥ // MSS_2207

aphalāni durantāni samavyayaphalāni ca /
aśakyāni ca kāryāṇi nārabheta vicakṣaṇaḥ // MSS_2208

abandhuṣvapi bandhutvaṃ snehāt samupajāyate /
bandhuṣvapi ca bandhutvam alokajñeṣu hīyate // MSS_2209

abalaḥ pronnataṃ śatruṃ yo yāti madamohitaḥ /
yuddhārthaṃ sa nivarteta śīrṇadanto yathā gajaḥ // MSS_2210

abalasvakulāśino jhaṣān nijanīḍadrumapīḍinaḥ khagān /
anavadyatṛṇārdino mṛgān mṛgayāghāya na bhūbhujāṃ ghnatām // MSS_2211

abalāṃ balinā nītāṃ daśāmimāṃ makaraketunā rakṣa /
āpatpatitoddhṛtaye bhavati hi śubhajanmanāṃ janma // MSS_2212

abalā api vīreśān yatsāhāyyamupāśritāḥ /
parābhavanti dṛkkoṇapātenaiva sa manmathaḥ // MSS_2213

abalāḍhyavigrahaśrīr amartyanatirakṣamālayopetaḥ /
pañcakramoditamukhaḥ pāyāt parameśvaro muhuranādiḥ // MSS_2214

abalābuddhihīnāyā doṣaṃ kṣantuṃ sadārhasi /
mūḍhasya satataṃ doṣaṃ kṣamāṃ kurvanti sādhavaḥ // MSS_2215

abalā yatra prabalā śiśuravanīśo nirakṣaro mantrī /
nahi nahi tatra dhanāśā jīvita āśāpi durlabhā bhavati // MSS_2216

abalāvanapara eko bhuvanatritaye'pi cettadā bharttā /
kathamanyathā sudhākara- candanamukhyāpriyatvaṃ syāt // MSS_2217

abalā viṣaheta kathaṃ dṛḍhaśaktimamuṣya ratirasaprasaram /
madanatulitānurāgo na vidadhyādyadi balādhānam // MSS_2218

abalāsu vilāsino'nvabhūvan nayanaireva navopagūhanāni /
marudāgamavārtayāpi śūnye samaye jāgrati saṃpravṛddha eva // MSS_2219

abaleti parīvādo vṛthā hi hariṇīdṛśām /
yāsāṃ netranipātena naṭavad ghūrṇyate jagat // MSS_2220

abale salile vyavasyatā te mukhabhāvo gamito na paṅkajena /
kathamādimavarṇatāntyajasya dvijarājena kṛtorunigrahasya // MSS_2221

abalo'si na jitakāśī- pratibhaṭarāśīn parāpata kṣitipa /
jātāmbhaḥkaṇapātaḥ kva vinaśyatyanalasaṃghātaḥ // MSS_2222

abālarucire bhruvau na ca marālamandā gatir dṛgañcalamacañcalaṃ hṛdayabhūdabhūto dayā(?) /
sudhā na khalu vākpathātithirathāpi yūnāṃ mano manojaśarajarjjarannayati mohamasyāstanuḥ // MSS_2223

abudhā ajaṃgamā api kayāpi gatyā paraṃ padamavāptāḥ /
mantriṇa iti kīrtyante nayabalaguṭikā iva janena // MSS_2224

abudhaiḥ kṛtamānasaṃvidas tava pārthaiḥ kuta eva yogyatā /
sahasi plavagairupāsitaṃ na hi guñjāphalameti soṣmatām // MSS_2225

abudhairarthalābhāya paṇyastrībhiriva svayam /
ātmā saṃskṛtya saṃskṛtya paropakaraṇīkṛtaḥ // MSS_2226

abuddhimāśritānāṃ ca kṣantavyamaparādhinām /
na hi sarvatra pāṇḍityaṃ sulabhaṃ puruṣeṇa vai // MSS_2227

atha ced buddhijaṃ kṛtvā brūyuste tadabuddhijam /
pāpān svalpe'pi tān hanyād aparādhe tathānṛjūn // MSS_2228

abuddhvā cittamaprāpya viśrambhaṃ prabhaviṣṇuṣu /
na svecchaṃ vyavahartavyam ātmano bhūtimicchatā // MSS_2229

abodhi no hrīnibhṛtaṃ madiṅgitaṃ pratītya vā nādṛtavatyasāviti /
lunāti yūnaḥ sma dhiyaṃ kiyadgatā nivṛtya bālādaradarśaneṣuṇā // MSS_2230

abjaṃ tvajjamathābjabhūstata idaṃ brahmāṇḍamaṇḍāt punar viśvaṃ sthāvarajaṃgamaṃ taditarat tvanmūlamitthaṃ payaḥ /
dhik tvāṃ caura iva prayāsi nibhṛtaṃ nirgatya jālāntarair badhyante vivaśāstvadekaśaraṇāstvāmāśritā jantavaḥ // MSS_2231

abdāyanartuṣvatha māsapakṣa- dināni kārye'pyavadhau vidadhyāt /
hīnāvadhiryena bhavatyasatyaḥ sarvo'pi loke śakuno gṛhītaḥ // MSS_2232

abdebhakumbhe nirbinne vidyutkhaḍgalatāhate /
svacchamuktāphalasthūlā nipetustoyabindavaḥ // MSS_2233

abdairvārijighṛkṣayārṇavagataiḥ sākaṃ vrajantī muhuḥ saṃsargādvaḍavānalasya samabhūdāpannasattvā taḍit /
manye deva tayā krameṇa janito yuṣmatpratāpānalo yenārātivadhūvilocanajalaiḥ sikto'pi saṃvardhate // MSS_2234

abdhinā saha mitratve dāridryaṃ yadi jāyate /
lāñchanaṃ sāgarasyaiva maitrīkarturna lāñchanam // MSS_2235

abdhirna tṛpyati yathā saritāṃ sahasrair no cendhanairiva śikhī bahudhopanītaiḥ /
jīvaḥ samastaviṣayairapi tadvadevaṃ saṃcintya cārudhiṣaṇastyajatīndriyārthān // MSS_2236

abdhiryadyavadhīrito na tu tadā tasmānnipīyāmbudair vāntān yācasi kākubhirjalalavānuttānacañcūpuṭaḥ /
tatte nistrapanīcataivamucitā nirvaktumetat kathaṃ vidmaḥ kena guṇena māniṣu punaḥ sāraṅga saṃgīyate // MSS_2237

abdhī ratnamadho dhatte dhatte vā śirasā tṛṇam /
abdhereva hi doṣo'yaṃ ratnaṃ ratnaṃ tṛṇaṃ tṛṇam // MSS_2238

abdherambhaḥ sthagitabhuvanābhogapātālakukṣeḥ / potopāyā iha hi bahavo laṅghane'pi kṣamante /
āho riktaḥ kathamapi bhavedeṣa daivāt tadānīṃ ko nāma syādavaṭakuharālokane'pyasya kalpaḥ // MSS_2239

abdhau majjanti mīnā iva phaṇina iva kṣauṇirandhraṃ viśanti krāmantyadrīn vihaṅgā iva kapaya iva kvāpyaraṇye caranti /
deva kṣmāpālaśakra prasaradanupamatvaccamūcakravāha- vyūhavyādhūtadhūlīpaṭalahatadṛśaḥ kāndiśīkāḥ kṣitīśāḥ // MSS_2240

abravīcca bhagavan mataṅgajair yadbṛhadbhirapi karma duṣkaram /
tatra nāhamanumantumutsahe moghavṛtti kalabhasya ceṣṭitam // MSS_2241

abhakṣyaṃ bhakṣayennityaṃ suvāsomadyapā gṛhe /
kuṣṭhī bhavati vitteśo veśyādoṣāḥ svabhāvajāḥ // MSS_2242

abhagnavṛttāḥ prasabhād ākṛṣṭā yauvanoddhataiḥ /
cakranduruccakairmuṣṭigrāhyamadhyā dhanurlatā // MSS_2243

abhayaṃ sattvasaṃśuddhir jñānayogavyavasthitiḥ /
dānaṃ damaśca yajñaśca svādhyāyastapa ārjavam // MSS_2244

ahiṃsā satyamakrodhas tyāgaḥ śāntirapaiśunam /
dayā bhūteṣvaloluptvaṃ mārdavaṃ hrīracāpalam // MSS_2245

tejaḥ kṣamā dhṛtiḥ śaucam adroho nātimānitā /
bhavanti saṃpadaṃ daivīm abhijātasya bhārata // MSS_2246

dambho darpo'timānaśca krodhaḥ pāruṣyameva ca /
ajñānaṃ cābhijātasya pārtha saṃpadamāsurīm // MSS_2247

daivī saṃpadvimokṣāya nibandhāyāsurī matā // MSS_2248

abhayaṃ sarvabhūtebhyo dattvā yaścarate muniḥ /
tasyāpi sarvabhūtebhyo na bhayaṃ vidyate kvacit // MSS_2249

abhayaṃ sarvabhūtebhyo yo dadāti dayāparaḥ /
abhayaṃ tasya bhūtāni dadatītyanuśuśrumaḥ // MSS_2250

abhayaṃ sarvabhūtebhyo yo dadāti dayāparaḥ /
tasya dehavimuktasya kṣaya eva na vidyate // MSS_2251

abhayamabhayaṃ deva brūmastavāsilatāvadhūḥ kuvalayadalaśyatmā śatroruraḥsthalaśāyinī /
samayasulabhāṃ kīrtiṃ bhavyāmasūta sutāmasāv api ramayituṃ rāgāndheva bhramatyakhilaṃ jagat // MSS_2252

abhayasya hi yo dātā sa pūjyaḥ satataṃ nṛpaḥ /
satraṃ hi vardhate tasya sadaivābhayadakṣiṇam // MSS_2253

abhayasyaiva yo dātā tasyaiva sumahatphalam /
na hi prāṇasamaṃ dānaṃ triṣu lokeṣu vidyate // MSS_2254

abhavadabhinavaprarohabhājāṃ chaviparipāṭiṣu yaḥ purāṅgakānām /
ahaha virahavaikṛte sa tasyāḥ kraśimani saṃprati dūrvayā vivādaḥ // MSS_2255

abhavyajīvo vacanaṃ paṭhannapi jinasya mithyātvaviṣaṃ na muñcati /
yathā viṣaṃ raudraviṣo'ti pannagaḥ saśarkaraṃ cāru payaḥ pibannapi // MSS_2256

abhāvi sindhvā saṃdhyābhrasadṛgrudhiratoyayā /
hṛte yoddhuṃ janaḥ pāṃśau sa dṛgrudhi rato yayā // MSS_2257

abhāve na narastasmād bhāvaḥ sarvatra kāraṇam /
cittaṃ śodhaya yatnena kimanyairbāhyaśodhanaiḥ // MSS_2258

abhāve paṭṭasūtrasya hāriṇī snāyuriṣyate /
guṇārthamathavā grāhyāḥ snāyavo mahiṣīgavām //
abhigamyāste sadbhir vyapagatamānāvamānadoṣāśca /
ye svagṛhamupagatānāṃ śramamupacārairvyapanayanti // MSS_2259

abhijanavato bhartuḥ ślāghye sthitā gṛhiṇīpade vibhavagarubhiḥ kṛtyairasya pratikṣaṇamākulā /
tanayamacirāt prācīvārkaṃ prasūya ca pāvanaṃ mama virahajāṃ na tvaṃ vatse śucaṃ gaṇayiṣyasi // MSS_2260

abhijātajanavyathāvahā bahaloṣmaprasarā vidāhinaḥ /
prakhalā iva dṛṣṭimāgatā bhuvi tāpāya nidāghavāsarāḥ // MSS_2261

abhitāpasaṃpadamathoṣṇarucir nijatejasāmasahamāna iva /
payasi prapitsuraparāmbunidher adhiroḍhumastagirimabhyapatat // MSS_2262

abhitigmaraśmi ciramāviramā- davadhānakhinnamanimeṣatayā /
vigalanmadhuvratakulāśrujalaṃ nyamimīladabjanayanaṃ nalinī // MSS_2263

abhito nitarāṃ salilaṃ jalade dātuṃ samudyate bhavati /
tadapi bahulamalpaṃ vā pātrādhīnaṃ mataṃ patanam // MSS_2264

abhittāvutthite citre dṛśyate bhittirātatā /
aho vicitrā māyeyaṃ bhagnaṃ tuṇḍaṃ śilāplutā // MSS_2265

abhidroheṇa bhūtānām arjayan gatvarīḥ śriyaḥ /
udanvāniva sindhūnām āpadāmeti pātratām // MSS_2266

abhidhāya tadā tadapriyaṃ śiśupālo'nuśayaṃ paraṃ gataḥ /
bhavato'bhimanāḥ samīhate saruṣaḥ kartumupetya mānanām // MSS_2267

abhidhāvati māṃ mṛtyur ayamudgūrṇamudgaraḥ /
kṛpaṇaṃ puṇḍarīkākṣa rakṣa māṃ śaraṇāgatam // MSS_2268

abhidhyālu parasveṣu neha nāmutra nandati /
tasmādabhidhyā saṃtyājyā sarvadābhīpsatā sukham // MSS_2269

abhinayaśastau hastau pādau paribhūtakisalayau salayau /
aṅgaṃ rañjitaraṅgaṃ nṛttaṃ puṃbhāvaśāli samavṛttam // MSS_2270

abhinayān paricetumivodyatā malayamārutakampitapallavā /
amadayat sahakāralatā manaḥ sakalikā kalikāmajitāmapi // MSS_2271

abhinavaṃ galitāṃśukadarśitaṃ dadhati yatstanayoruparisthitam /
vasanamaṇḍalamaṇḍanamaṅganās tadadhikaṃ pratipakṣamanojvaram // MSS_2272

abhinavakuśasūtraspardhi karṇe śirīṣaṃ kuravakaparidhānaṃ pāṭalādāma kaṇṭhe /
tanusarasajalārdronmīlitaḥ sundarīṇāṃ dinapariṇatijanmā ko'pi veśaścakāsti // MSS_2273

abhinavajavāpuṣpaspardhī tavādharapallavo hasitakusumonmeṣacchāyādaracchuritāntaraḥ /
nayanamadhupaśreṇīṃ yūnāmanāratamāharaṃs taruṇi tanute tāruṇyaśrīrvilāsavataṃsatām // MSS_2274

abhinavanalinīkisalaya- mṛṇālavalayādi davadahanarāśiḥ /
subhaga kuraṅgadṛśo'syā vidhivaśatastvadviyogapavipāte // MSS_2275

abhinavanalinīvinodalubdho mukulitakairaviṇīviyogabhīruḥ /
bhramati madhukaro'yamantarāle śrayati na paṅkajinīṃ kumudvatīṃ vā // MSS_2276

abhinavanavanītaprītamātāmranetraṃ vikacanalinalakṣmīspardhi sānandavaktram /
hṛdayabhavanamadhye yogibhirdhyānagamyaṃ navagaganatamālaśyāmalaṃ kaṃcidīḍe // MSS_2277

abhinavanavanītasnigdhamāpītadugdhaṃ dadhikaṇaparidigdhaṃ mugdhamaṅgaṃ murāreḥ /
diśatu bhuvanakṛcchraccheditāpicchagucchac chavi navaśikhipicchālāñchitaṃ vāñchitaṃ vaḥ // MSS_2278

abhinavapallavaraśanā śiśirataratuṣārajalamaṅgalasnātā /
puṣpavatī cūtalatā priyeva dadṛśe phalābhimukhī // MSS_2279

abhinavapulakālīmaṇḍitā gaṇḍapālī nigadati vinigūḍhānandahindolicetaḥ /
sudati vadati puṇyaiḥ kasya dhanyairmanoja- prasaramasakṛdetaccāpalaṃ locanasya // MSS_2280

abhinavamukhamudraṃ kṣudrakūpopavītaṃ praśithilavipulatvaṃ jvālakocchavāsipālam /
pariṇatiparipāṭivyākṛtenāruṇimnā hataharitimaśeṣaṃ nāgaraṅgaṃ cakāsti // MSS_2281

abhinavayavasaśrīśālini kṣmātale'smin atiśayaparabhāgaṃ bhejire jiṣṇugopāḥ /
kuvalayaśayanīye mugdhamugdhekṣaṇāyā maṇaya iva vimuktāḥ kāmakeliprasaṅgāt // MSS_2282

abhinavavadhūroṣasvādaḥ karīṣatanūnapād asaralajanāśleṣakrūrastuṣārasamīraṇaḥ /
galitavibhavasyājñevādya dyutirmasṛṇā raver virahivanitāvaktraupamyaṃ bibharti niśākaraḥ // MSS_2283

abhinavaviṣavallīpādapadmasya viṣṇor madanamathanamaulermālatīpuṣpamālā /
jayati jayapatākā kāpyasau mokṣalakṣmyāḥ kṣapitakalikalaṅkā jāhnavī naḥ punātu // MSS_2284

abhinavasevakavinayaiḥ prāghuṇakoktairvilāsinīruditaiḥ /
dhūrtajanavacananikarair iha kaścidavañcito nāsti // MSS_2285

abhinaṣati vainateyaṃ cāmarasahitaḥ sasatyabhāmo yaḥ /
nārāyaṇaḥ sa sākṣād vibudhasamarcyaḥ sadā jayatu // MSS_2286

abhinnavelau gambhīrāv amburāśirbhavānapi /
asāvañjanasaṃkāśas tvaṃ tu cāmīkaradyutiḥ // MSS_2287

abhinneṣvapi kāryeṣu bhidyate manasaḥ kriyā /
anyathaiva stanaṃ putraś cintayatyanyathā patiḥ // MSS_2288

abhipatati ghanaṃ śṛṇoti garjāḥ sahati śilāḥ sahate taḍittaraṅgān /
vidhuvati garutaṃ rutaṃ vidhatte jalapṛṣate kiyate'pi cātako'yam // MSS_2289

abhiprāyaṃ yo viditvā tu bhartuḥ sarvāṇi kāryāṇi karotyatandrīḥ /
vaktā hitānāmanurakta āryaḥ śaktijña ātmeva hi so'nukampyaḥ // MSS_2290

vākyaṃ tu yo nādriyate'nuśiṣṭaḥ pratyāha yaścāpi niyujyamānaḥ /
prajñābhimānī pratikūlavādī tyājyaḥ sa tādṛktvarayaiva bhṛtyaḥ // MSS_2291

abhiprāyānusāreṇa prakaṭīkurute priyam /
aho mahāprabhāvānāṃ bhūpatīnāṃ vasuṃdharā // MSS_2292

abhipretārthasiddhyarthaṃ pūjito yaḥ surairapi /
sarvavighnacchide tasmai gaṇādhipataye namaḥ // MSS_2293

abhibhavati manaḥ kadambavāyau madamadhure ca śikhaṇḍināṃ nināde /
jana iva na dhṛteścacāla jiṣṇur na hi mahatāṃ sukaraḥ samādhibhaṅgaḥ // MSS_2294

abhibhūto'pi notsāhaṃ jahyājjātu svasiddhaye /
naṣṭāṅgo'pi grasatyeva saiṃhikeyo muhurdviṣau // MSS_2295

abhibhūto'pyavajñāto yo rājñāṃ dvāri tiṣṭhati /
sa tu rājñāṃ śriyaṃ bhuṅkte nābhimānī kadācana // MSS_2296

abhibhūya vibhūtimārtavīṃ madhugandhātiśayena vīrudhām /
nṛpateramarasragāpa sā dayitorustanakoṭisusthitam // MSS_2297

abhibhūya satāmavasthitiṃ jaḍajeṣu pratipādya ca śriyam /
jagatīparitāpakṛt kathaṃ jaladhau nāvapatedasau raviḥ // MSS_2298

abhimataphaladātā tvaṃ ca kalpadrumaśca prakaṭamiha viśeṣaṃ kaṃcanodāharāmaḥ /
kathamiha madhuroktipremasaṃmānamiśraṃ tulayati suraśākhī deva dānaṃ tvadīyam // MSS_2299

abhimataphalasiddhisiddhamantrā- vali balijitparameṣṭhinorupāsye /
bhagavati madanārināri vande nikhilanagādhipabhartṛdārike tvām // MSS_2300

abhimatamabhitaḥ kṛtāṅgabhaṅgā kucayugamunnativittamunnamayya /
tanurabhilaṣitaṃ klamacchalena vyavṛṇuta vellitabāhuvallarīkā // MSS_2301

abhimatamahāmānagranthiprabhedapaṭīyasī gurutaraguṇagrāmāmbhojasphuṭojjvalacandrikā /
vipulavilasallajjāvallīvidārakuṭhārikā jaṭharapiṭharī duḥpūreyaṃ karoti viḍambanām // MSS_2302

abhimatavastūpahṛtā- vapi gurugarvādanādarastanvyāḥ /
skhalite'pi priyasya saṃ- yamatāḍanamityeva bibbokaḥ // MSS_2303

abhimatasiddhiraśeṣā bhavati hi puruṣasya puruṣakāreṇa /
daivamiti yadapi kathayasi puruṣaguṇaḥ so'pyadṛṣṭākhyaḥ // MSS_2304

abhimantrya śucividhānād ājyāḍhyaṃ hastikarṇajaṃ cūrṇam /
yo'śnāti sa hi naraḥ syād yatheṣṭaceṣṭo'pi dīrghāyuḥ // MSS_2305

abhimānadhanaṃ yeṣāṃ ciraṃ jīvanti te narāḥ /
abhimānavihīnānāṃ kiṃ dhanena kimāyuṣā // MSS_2306

abhimānadhanasya gatvarair asubhiḥ sthāsnu yaśaścicīṣataḥ /
acirāṃśuvilāsacañcalā nanu lakṣmīḥ phalamānuṣaṅgikam // MSS_2307

abhimānavatāṃ puṃsām ātmasāramajānatām /
andhānāmiva dṛśyante patanāntāḥ pravṛttayaḥ // MSS_2308

abhimānavatāṃ brahman yuktāyuktavivekinām /
yujyate'vaśyabhogyānāṃ duḥkhānāmaprakāśanam // MSS_2309

abhimānavato manasvinaḥ priyamuccaiḥ padamārurukṣataḥ /
vinipātanivartanakṣamaṃ matamālambanamātmapauruṣam // MSS_2310

abhimānitabhūtena sānubandharasena tu /
yataḥ sarvendriyaprītiḥ sa kāmaḥ procyate budhaiḥ // MSS_2311

abhimāninamudbhrāntam ātmasaṃbhāvitaṃ śaṭham /
krodhanaṃ caiva nṛpatiṃ vyasane ghnanti vairiṇaḥ // MSS_2312

abhimukhagate yasminneva priye bahuśo vadaty avanatamukhaṃ tūṣṇīmeva sthitaṃ mṛganetrayā /
atha kila balāllīlālolaṃ sa eṣa tathekṣitaḥ kathamapi yathā dṛṣṭyā manye kṛtaṃ śrutilaṅghanam //
abhimukhamadhuratarebhyaḥ parāṅmukhākrośanāt kuśīlebhyaḥ /
abhyantarakaluṣebhyo bhetavyaṃ mitraśatrubhyaḥ // MSS_2313

abhimukhanihatasya satas tiṣṭhatu tāvajjayo'tha vā svargaḥ /
ubhayabalasādhuvādaḥ śravaṇamukho'styeva cātyartham // MSS_2314

abhimukhapatayālubhirlalāṭa- śramasalilairavidhautapatralekhaḥ /
kathayati puruṣāyitaṃ vadhūnāṃ mṛditahimadyutidurmanāḥ kapolaḥ // MSS_2315

abhimukhapatitairguṇaprakarṣād avajitamuddhatimujjvalāṃ dadhānaiḥ /
tarukisalayajālamagrahastaiḥ prasabhamanīyata bhaṅgamaṅganānām // MSS_2316

abhimukhamupayāti māṃ sma kiṃcit tvamabhidadhāḥ paṭale madhuvratānām /
madhusurabhimukhābjagandhalabdher adhikamadhi tvadanena mā nipāti // MSS_2317

abhimukhāgatamārgaṇadhoraṇi- dhvanitapallavitāmbaragahvare /
vitaraṇe ca raṇe ca samudyate bhavati ko'pi paraṃ viralaḥ paraḥ // MSS_2318

abhimukhe mayi saṃhṛtamīkṣitaṃ hasitamanyanimittakṛtodayam /
vinayavāritavṛttiratastayā na vivṛto madano na ca saṃvṛtaḥ // MSS_2319

abhimuni sahasā hṛte parasyā ghanamarutā jaghanāṃśukaikadeśe /
cakitamavasanoru satrapāyāḥ pratiyuvatīrapi vismayaṃ nināya // MSS_2320

abhiyāti naḥ satṛṣa eṣa cakṣuṣo harirityakhidyata nitambinījanaḥ /
na viveda yaḥ satatamenamīkṣate na vitṛṣṇatāṃ vrajati khalvasāvapi // MSS_2321

abhiyuktaṃ balavatā durlabhaṃ hīnasādhanam /
hṛtasvaṃ kāminaṃ coram āviśanti prajāgarāḥ // MSS_2322

abhiyukto balavatā tiṣṭhan durge prayatnavān /
tadbalīyastarāhvānaṃ kurvītātmavimuktaye // MSS_2323

abhiyukto yadā paśyen na kāṃcid gatimātmanaḥ /
yudhyamānastadā prājño mriyate ripuṇā saha // MSS_2324

abhiyoktā balī yasmād alabdhvā na nivartate /
upahārādṛte tasmāt saṃdhiranyo na vidyate // MSS_2325

abhirāme'bhiniveśaṃ vidadhānā vividhalābhanirapekṣā /
upahasyase sumadhye vidagdhavārāṅganāvāraiḥ // MSS_2326

abhilakṣyaṃ sthiraṃ puṇyaṃ khyātaṃ sadbhirniṣevitam /
seveta siddhimanvicchañ ślāghyaṃ vindhyamiveśvaram // MSS_2327

abhilaṣata upāyaṃ vikramaṃ kīrtilakṣmyor asugamamarisainyairaṅkamabhyāgatasya /
janaka iva śiśutve supriyasyaikasūnor avinayamapi sehe pāṇḍavasya smarāriḥ // MSS_2328

abhilaṣati na khalu puruṣaḥ śriyamapi kīrtyā vinākṛtāṃ kuśalaḥ /
kṣaṇikāya vastune kas tyajatīha cirasthiraṃ śreyaḥ // MSS_2329

abhilaṣati padmayonau niḥsvavadhūnāṃ sutān sraṣṭum /
svaṃ svaṃ viśaṅkamānā vepante krakacavarttino lokāḥ // MSS_2330

abhilaṣatoranubhāvān tilottamāyāḥ kilottamānubhayoḥ /
sundopasundayorapi nāśo bhedādudāhriyate // MSS_2331

abhilaṣanti tavādharamādhurīṃ tadiha kiṃ hariṇākṣi mudhā budhāḥ /
surasudhāmadharīkurute yatas tvadadharo'dharatāmagamat tataḥ // MSS_2332

abhilaṣasi yadīndo vaktralakṣmīṃ mṛgākṣyāḥ punarapi sakṛdabdhau majja saṃkṣālayāṅkam /
suvimalamatha bimbaṃ pārijātaprasūnaiḥ surabhaya vada no cet tvaṃ kva tasyā mukhaṃ kva // MSS_2333

abhilaṣitādhikavarade praṇipatitajanārtihāriṇi śaraṇye /
caraṇau namāmyahaṃ te vidyādharadevate gauri // MSS_2334

abhivarṣati yo'nupālayan vidhibījāni vivekavāriṇā /
sa sadā phalaśālinīṃ kriyāṃ śaradaṃ loka ivādhitiṣṭhati // MSS_2335

abhivādanaśīlasya nityaṃ vṛddhopasevinaḥ /
catvāri tasya vardhanta āyuḥ prajñā yaśo balam // MSS_2336

abhivādayeta vṛddham āsanaṃ cāsya darśayet /
kṛtāñjalirupāsīta gacchantaṃ pṛṣṭhato'nviyāt // MSS_2337

abhivādya yathā vṛddhān santo gacchanti nirvṛtim /
evaṃ sajjanamākruśya mūrkho bhavati nirvṛtaḥ // MSS_2338

abhivīkṣya sāmikṛtamaṇḍanaṃ yatīḥ kararuddhanīvigaladaṃśukāḥ striyaḥ /
dadhire'dhibhitti paṭahapratisvanaiḥ sphuṭamaṭṭahāsamiva saudhapaṅktayaḥ // MSS_2339

abhiśaptaḥ puṇyakārye pravṛtto'pi na siddhibhāk /
bhartrānugamanodyuktā reṇukā janamārikā // MSS_2340

abhiśastavat prapaśyanti daridraṃ pārśvataḥ sthitam /
dāridryaṃ pātikaṃ loke kastacchaṃsitumarhati // MSS_2341

abhiṣiṣeṇayiṣuṃ bhuvanāni yaḥ smaramivākhyata lodhrarajaścayaḥ /
kṣubhitasainyaparāgavipāṇḍura- dyutirayaṃ tirayannudabhūddiśaḥ // MSS_2342

abhiṣekārdraśirasā rājā rājyāvalokinā /
sahāyavaraṇaṃ kāryaṃ tatra rājyaṃ pratiṣṭhitam // MSS_2343

yadapyalpataraṃ karma tadapyekena duṣkaram /
puruṣeṇāsahāyena kimu rājyaṃ mahodayam // MSS_2344

abhisaraṇaparā sadā varākī samaramahādhvasu raktapaṅkileṣu /
hṛdi dharaṇibhujāmiyaṃ nṛpaśrīr nihitapadaiva kalaṅkamātanoti // MSS_2345

abhisaraṇamayuktamaṅganānām iti tava sundari mā sma bhūdvitarkaḥ /
nanu patimagamat svayaṃ nadīnāṃ saridapi śaṃbhujaṭāmuhūrtamālā // MSS_2346

abhisaraṇarasaḥ kṛśāṅgayaṣṭer ayamaparatra na vīkṣitaḥ śruto vā /
ahimapi yadiyaṃ nirāsa nāṅghrer nibiḍatanūpuramātmanīnabuddhyā // MSS_2347

abhisāre sarojākṣi yadi gantuṃ samīhase /
samācchādya mukhaṃ yāhi prayatnena priyaṃ prati // MSS_2348

abhihanti hanta kathameṣa mādhavaṃ sukumārakāyamanavagrahaḥ smaraḥ /
acireṇa vaikṛtavivartadāruṇaḥ kalabhaṃ kaṭhora iva kūṭapākalaḥ // MSS_2349

abhihitāpyabhiyogaparāṅmukhī prakaṭamaṅgavilāsamakurvatī /
upari te puruṣāyitumakṣamā navavadhūriva śatrupatākinī // MSS_2350

abhīkṣṇamuccairdhvanatā payomucā ghanāndhakārīkṛtaśarvarīṣvapi /
taḍitprabhādarśitamārgabhūmayaḥ prayānti rāgādabhisārikāḥ striyaḥ // MSS_2351

abhīkṣṇamuṣṇairapi tasya soṣmaṇaḥ surendrabandīśvasitānilairyathā /
sacandanāmbhaḥkaṇakomalaistathā vapurjalārdrāpavanairna nirvavau // MSS_2352

abhīpsāṃ svātmano rakṣā'virataṃ susthiraṃ tathā /
yatnamātiṣṭha dhairyeṇa tataḥ siddhirbhaved dhruvam // MSS_2353

abhīṣṭaphalasaṃsiddhis tuṣṭiḥ kāmyā susaṃpadaḥ /
dvitribhirbahubhi sārdhaṃ bhojanena prajāyate // MSS_2354

abhīṣṭamāsādya cirāya kāle samuddhṛtāśaṃ kamanī cakāśe /
yoṣinmanojanmasukhodayeṣu samuddhṛtāśaṅkamanīcakāśe // MSS_2355

abhuktāyāṃ yasyāṃ kṣaṇamapi na yātaṃ nṛpaśatair bhuvas tasyā lābhe ka iva bahumānaḥ kṣitibhujām /
tadaṃśasyāpyaṃśe tadavayavaleśe'pi patayo viṣāde kartavye vidadhati jaḍāḥ pratyuta mudam // MSS_2356

abhuktvāmalakaṃ pathyaṃ bhuktvā tu badarīphalam /
kapitthaṃ sarvadā pathyaṃ kadalī na kadācana // MSS_2357

abhuñjatāṃścādadatāṃ dhanaṃ caurā haranti hi /
saraghāṇāṃ yathā sarvaṃ mākṣikaṃ vanacāriṇaḥ // MSS_2358

abhūtapūrvaṃ mama bhāvi kiṃ vā sarvaṃ sahe me sahajaṃ ca duḥkham /
kiṃ tu tvadagre śaraṇāgatānāṃ parābhavo nātha na te'nurūpam // MSS_2359

abhūtamāsajya viruddhamīhitaṃ balādalabhyaṃ tava lipsate nṛpaḥ /
vijānato'pi hyanayasya raudratāṃ bhavatyapāye parimohinī matiḥ // MSS_2360

abhūt prācī piṅgā rasapatiriva prāśya kanakaṃ gatacchāyaścandro budhajana iva grāmyasadasi /
kṣaṇāt kṣīṇāstārā nṛpataya ivānudyamaparā na dīpā rājante draviṇarahitānāmiva guṇāḥ // MSS_2361

abhūdambhorāśeḥ saha vasatirāsīt kamalayā guṇānāmādhāro nayanaphalaminduḥ prathayati /
kathaṃ siṃhīsūnustamapi tudati prauḍhadaśanair guṇānāmāsvādaṃ piśunarasanā kiṃ rasayati // MSS_2362

abhūvannadbhutoṣmāṇaḥ śītavyāpte jagattraye /
kucotsaṅgāḥ kṛśāṅgīṇāṃ sthānaṃ manmathatejasaḥ // MSS_2363

abhedenaiva yudhyeran rakṣeyuśca parasparam /
phalgu sainyasya yat kiṃcin madhye vyūhasya tadbhavet // MSS_2364

abhedenopāste kumudamudare vā sthitavato vipakṣādambhojādupagatavato vā madhulihaḥ /
aparyāptaḥ ko'pi svaparaparicaryāparicaya- prabandhaḥ sādhūnāmayamanabhisaṃdhānamadhuraḥ // MSS_2365

abhedyo'nuddhataḥ stabdhaḥ sūnṛtaḥ priyadarśanaḥ /
bahuśrutaḥ kālavedī jitagrantho'rthakarmavit // MSS_2366

abhogasubhagā bhūtir adainyadhavalaṃ kulam /
adarpaviśadā vidyā bhavatyunnatacetasām // MSS_2367

abhoginau maṇḍalinau tatkṣaṇānmuktakañcukau /
varamāśīviṣau spṛṣṭau na tu patnyāḥ payodharau // MSS_2368

abhyaktaṃ rahasi gataṃ vicittamanyena mantrayantaṃ vā /
ucitapraṇayamapi nṛpaṃ sahasāryā nopasarpanti // MSS_2369

abhyaktamiva snātaḥ śuciraśucimiva prabuddha iva suptam /
baddhamiva strairagatir janamiha sukhasaṅginamavaimi // MSS_2370

abhyaghāni municāpalāt tvayā yanmṛgaḥ kṣitipateḥ parigrahaḥ /
akṣamiṣṭa tadayaṃ pramādyatāṃ saṃvṛṇoti khalu doṣamajñatā //
abhyantaragatā bāhyā bāhyāścābhyataraṃ gatāḥ /
yairnarā nidhanaṃ yānti yathā rājā kacadrumaḥ // MSS_2371

abhyarthaye kimapi jīvitajanmatastvām utkaṇṭhatodgati niḥsara tāvadeva /
kānte dṛgantapathalambini jīvatīti yāvanna karṇapathameti janāpavādaḥ // MSS_2372

abhyarthya sapraṇati mandiramabhyupetā devī svayaṃ bhagavatī pṛthageva tāsām /
āsannavallabhasamāgamasūcanāni saṃjīvanāni vacanānyapi vācitāni // MSS_2373

abhyastāḥ sphuṭameva śāstragatayaḥ samyakkavitvodadheḥ pāraṃ cādhigataṃ satāṃ pariṣadi prāptaḥ pratiṣṭhodayaḥ /
nirviṇṇasya mamādhunā nanu paraḥ panthā na dainyaṃ vinā netuṃ vāñchati vāsanā suradhunītīre'nurūpaṃ vayaḥ // MSS_2374

abhyaste'pi nitambabhāraphalake khedālaseyaṃ gatiḥ kiṃcit saṃvalitārdhapakṣmaviralālokā dṛśo'ntargatāḥ /
tanmanye nibhṛtaṃ tvayādya hṛdaye kaściddhṛto vallabho niśvāsāḥ kathamanyathā dviguṇatāmete tavaivaṃ gatāḥ // MSS_2375

abhyaste'pi hi nāma vastuni cirādajñānasaṃbhāvanaṃ śaucāśaucāvivāditā viśakalasmṛtyakṣarāvartanam /
vāraṃ vāramṛṇopaghātakathanaṃ ko'pyeṣa ḍambhātmanāṃ prāyo dagdhadurīśavañcanavidhau jāgartyapūrvaḥ kramaḥ // MSS_2376

abhyasya pavanavijayaṃ vyākhyāya ca śaivasaṃhitāḥ sakalāḥ /
maraṇasamaye gurūṇāṃ pardavadasavo viniṣkrāntāḥ // MSS_2377

abhyasya vedamavadhāya ca pūrvatantram ālakṣya śiṣṭacaritāni pṛthagvidhāni /
adhyāpanādibhiravāpya dhanaṃ ca bhūri karmāṇi mātaralasāḥ kathamācareyuḥ // MSS_2378

abhyasya smaradaṃśakauśalamupādhyāyīrupāsyāvayoḥ krīḍāmnāyarahasyavastuni mitho'pyāsījjigīṣā sakhi /
utkampotpulakāṅgasaṃbhṛtaghanasvedāvilastanmayā sadyo niṣpratibhaḥ sa manmathakathāvaitaṇḍikaḥ khaṇḍitaḥ // MSS_2379

abhyasyādau śrutimatha gṛhaṃ prāpya labdhvā mahārthān iṣṭvā yajñairjanitatanayaḥ pravrajedāyuṣo'nte /
ityācaṣṭe ya iha sa manuryājñavalkyo'pi vā me tāvat kālaṃ pratibhavati cedāyuṣastatpramāṇam // MSS_2380

abhyāyāntaṃ jhaṭiti gilituṃ vāyumapyāyatāsye bhīmākāre prakṛtikuṭile baddhanirvyājavaire /
prāyeṇetthaṃ kṛtaparicaye pāpini krūrasarpe bhadraśrībhiḥ paricitikathā kīdṛśī mādṛśānām // MSS_2381

abhyāvahati kalyāṇaṃ vividhā vāksubhāṣitā /
saiva durbhāṣitā rājann anarthāyopapadyate // MSS_2382

abhyāsaḥ karmaṇāṃ samyag utpādayati kauśalam /
vidhinā tāvadabhyastaṃ yāvat sṛṣṭā mṛgekṣaṇā // MSS_2383

abhyāsakāraṇā vidyā lakṣmīḥ puṇyānusāriṇī /
dānānusāriṇī kīrtir buddhiḥ karmānusāriṇī // MSS_2384

abhyāsarahitā vidyā nirudyogā nṛpaśriyaḥ /
veṣayoṣāśca rāgiṇyo hāsyāyatanamaṅgane // MSS_2385

abhyāsaśchandasāṃ daṇḍo jvaradaṇḍaśca laṅghanam /
yamadaṇḍo viṣṇubhaktiḥ śatrudaṇḍaḥ śubhā gatiḥ // MSS_2386

abhyāsasthitacūtaṣaṇḍagahanasthānādito gehinī grāmaṃ kaṃcidavṛkṣakaṃ virahiṇī tūrṇaṃ vadhūrnīyatām /
atrāyāntyacireṇa kokilakulavyāhārajhaṃkāriṇaḥ panthastrījanajīvitaikaharaṇaprauḍhāḥ puro vāsarāḥ // MSS_2387

abhyāsāttu sthirasvānta ūrdhvaretāśca jāyate /
parānandamayo yogī jarāmaraṇavarjitaḥ // MSS_2388

abhyāsāddhāryate vidyā kulaṃ śīlena dhāryate /
guṇena jñāyate tvāryaḥ kopo netreṇa gamyate // MSS_2389

abhyāsāddhāryate vidyā kulaṃ śīlena dhāryate /
guṇairmitrāṇi dhāryante akṣṇā krodhaśca dhāryate // MSS_2390

abhyāsānusarī vidyā buddhiḥ karmānusāriṇī /
udyogānusarī lakṣmīḥ phalaṃ bhāgyānusāri ca // MSS_2391

abhyāsena sthiraṃ cittam abhyāsenānilacyutiḥ /
abhyāsena parānando hyabhyāsenātmadarśanam // MSS_2392

abhyāsenānyasaṃcāro hyabhyāsenānyarūpatā /
abhyāsena samutkrāntir abhyāsenāṇimādayaḥ // MSS_2393

abhyāso ratihetor bhavati narāṇāṃ na vastusadguṇataḥ /
satyapi māṃsopacaye rāgāya kucau sphijau na punaḥ // MSS_2394

abhyāso hi karmaṇāṃ kauśalamāvahati /
na hi sakṛnnipātamātreṇoda- bindurapi grāvaṇi nimnatāmādadhāti // MSS_2395

abhyukṣito'si salilairna balāhakānāṃ cāṣāgrapakṣasadṛśaṃ bhṛśamantarāle /
mithyaitadānanamidaṃ bhavatastathā hi hemantapadmamiva niṣprabhatāmupaiti // MSS_2396

abhyutthānamupāgate gṛhapatau tadbhāṣaṇe namratā tatpādārpitadṛṣṭirāsanavidhistasyopacaryā svayam /
supte tatra śayīta tatprathamato jahyācca śayyāmiti prācyaiḥ putri niveditaḥ kulavadhūsiddhāntadharmāgamaḥ // MSS_2397

abhyuddhṛtā vasumatī dalitaṃ ripūraḥ krīḍīkṛtā balavatā balirājalakṣmīḥ /
ekatra janmani kṛtaṃ tadanena yūnā janmatraye yadakarot puruṣaḥ purāṇaḥ // MSS_2398

abhyudyatkavalagrahapraṇayinaste śallakīpallavās taccāsphālasahaṃ saraḥ kṣitidhṛtāmityasti ko nihnute /
dantastambhaniṣaṇṇaniḥsahakaraḥ śvāsairatiprāṃśubhir yenāyaṃ virahī tu vāraṇapatiḥ svāmin sa vindhyo bhavān // MSS_2399

abhyunnatastanayugā taralāyatākṣī dvāri sthitā tadupayānamahotsavāya /
sā pūrṇakumbhanavanīrajatoraṇasrak saṃbhāramaṅgalamayatnakṛtaṃ vidhatte // MSS_2400

abhyunnatāṅguṣṭhanakhaprabhābhir nikṣepaṇādrāgamivodgirantau /
ājahratustaccaraṇau pṛthivyāṃ sthalāravindaśriyamavyavasthām // MSS_2401

abhyunnatānāmaṇurapyudāraṃ paścāt prakopaṃ janayedarīṇām /
taṃ cāpramattaḥ prasamīkṣya yāyān- na nāśayed dṛṣṭamadṛṣṭahetoḥ // MSS_2402

abhyunnatā purastād avagāḍhā jaghanagauravāt paścāt /
dvāre'sya pāṇḍusikate padapaṅktirdṛśyate'bhinavā // MSS_2403

abhyunnate'pi jalade jagadekasāra- sādhāraṇapraṇayahāriṇi hā yadete /
ullāsalāsyalalitaṃ taravo na yānti he dāvapāvaka sa tāvaka eva doṣaḥ // MSS_2404

abhyunnatevāṅghrinakhāṅkurāṇāṃ dyutirvireje hariṇī dṛśo'syāḥ /
puṅkhāvalī pañcaśarā yudhānāṃ lāvaṇyadarpadviguṇīkṛteva // MSS_2405

abhyunnato'si salilaiḥ paripūrito'si tvāmarthayanti vihagāstṛṣitāstathaite /
kālaḥ payodhara paropakṛtestavāyaṃ caṇḍānilavyatikare kva bhavān kva te vā // MSS_2406

abhyupayuktāḥ sadbhir gatāgatairaharahaḥ prakhindānāḥ /
kṛpaṇajanasaṃnikarṣaṃ prāpyārthāḥ prasvapantīva // MSS_2407

abhyullasanti vinivāritacandanānām eṇīdṛśāṃ vapuṣi kuṅkumapatralekhāḥ /
abhyāgatāḥ karasarojapadāravinda- saṃrakṣaṇāya kiraṇā iva tigmabhānoḥ // MSS_2408

abhyuṣṇāt saghṛtādannād acchidrāccaiva vāsasaḥ /
aparapreṣyabhāvācca bhūya icchan patatyadhaḥ // MSS_2409

abhyetya yācito'pi tyaktvā lajjāṃ mayā vigatalajjaḥ /
cicchedaiṣa mamāśāṃ sahasā pratiṣedhaśastreṇa // MSS_2410

abhracchāyā khalaprītiḥ samudrānte ca medinī /
alpenaiva vinaśyanti yauvanāni dhanāni ca // MSS_2411

abhracchāyā khalaprītir navasasyāni yoṣitaḥ /
kiṃcitkālopabhogyāni yauvanāni dhanāni ca // MSS_2412

abhracchāyā khalaprītir veśyārāgo vibhūtayaḥ /
mahībhujāṃ prasādaśca pañcaite cañcalāḥ smṛtāḥ // MSS_2413

abhracchāyā tṛṇādagniḥ khalaprītiḥ sthale jalam /
veśyārāgaḥ kumitraṃ ca ṣaḍete budbudopamāḥ // MSS_2414

abhracchāyā tṛṇādagniḥ parādhīnaṃ ca yat sukham /
ajñāneṣu ca vairāgyaṃ kṣiprametad vinaśyati // MSS_2415

abhradhvānairmukharitadiśaḥ śreṇayastoyadānāṃ dhārāsārairdharaṇivalayaṃ sarvataḥ plāvayanti /
tena snehaṃ vahati vipulaṃ matsakhīyuktametat tvam niḥsneho yadasi tadidaṃ nātha me vismayāya // MSS_2416

abhrapuṣpamapi ditsati śītaṃ sārthinā vimukhatā yadabhāji /
stokakasya khalu cañcupuṭena mlānirullasati tadghanasaṃghe // MSS_2417

abhravṛndaṃ viśākhāntaṃ prasūtyantaṃ ca yauvanam /
rājyāntaṃ narakaṃ tadvad yācanāntaṃ hi gauravam // MSS_2418

abhrūvilāsamaspṛṣṭamadarāgaṃ mṛgekṣaṇam /
idaṃ tu nayanadvandvaṃ tava tadguṇabhūṣitam // MSS_2419

amajjadākaṇṭhamasau sudhāsu priyaṃ priyāyā vacanaṃ nipīya /
dviṣanmukhe'pi svadate stutiryā tanmiṣṭatā neṣṭamukhe tvameyā // MSS_2420

amadayanmadhugandhasanāthayā kisalayādharasaṃgatayā manaḥ /
kusumasaṃbhṛtayā navamallikā smitarucā tarucāruvilāsinī // MSS_2421

amanaskaṃ gate citte jāyate karmaṇāṃ kṣayaḥ /
yathā citrapaṭe dagdhe dahyate citrasaṃcayaḥ // MSS_2422

amantramakṣaraṃ nāsti nāsti mūlamanauṣadham /
ayogyaḥ puruṣo nāsti yojakastatra durlabhaḥ // MSS_2423

amantramakṣaraṃ nāsti nāsti mūlamanauṣadham /
nirdhanā pṛthivī nāsti hyāmnāyāḥ khalu durlabhāḥ // MSS_2424

amandataravāryagradhārāhatamahībhṛtaḥ /
citracāpadharā vīrā vidyotante ghanā iva // MSS_2425

amandamaṇinūpurakvaṇanacārucārīkramaṃ jhaṇajjhaṇitamekhalāskhalitatārahāracchaṭam /
idaṃ taralakaṅkaṇāvaliviśeṣavācālitaṃ mano harati subhruvaḥ kimapi kandukakrīḍitam // MSS_2426

amandamattamātaṅga āsārābhyudayānvitaḥ /
ityādilakṣaṇopetaḥ skandhāvāraḥ praśasyate // MSS_2427

amandānandaniṣyandam apāstānyakriyākramam /
jagajjanmotsave tasyāḥ pītāmṛtamivābhavat // MSS_2428

amandānandānāṃ galadalaghusaṃtāpavipadāṃ padāmbhojadvandvaṃ śirasi dadhatāminduśirasaḥ /
kadā naḥ kālindīsalilaśabalairambarasarit taraṅgairaṅgārībhavati bhavabandhendhanacayaḥ // MSS_2429

amanyatāsau kusumeṣu garbhagaṃ parāgamandhaṃkaraṇaṃ viyoginām /
smareṇa mukteṣu purā purāraye tadaṅgabhasmeva śareṣu saṃgatam // MSS_2430

amaratarukusumasaurabha- sevanasaṃpūrṇasakalakāmasya /
puṣpāntaraseveyaṃ bhramarasya viḍambanā mahatī // MSS_2431

amarayuvatigītodgrīvasāraṅgaśṛṅgo- llikhitaśaśisudhāmbhaḥśādvalārāmaramyām /
surapatigajagaṇḍasraṃsidānāmbudhārā prasavasurabhimāśāṃ vāsavīyāṃ namāmi // MSS_2432

amarīmukhasīdhumādhurīṇāṃ laharī kācana cāturī kalānām /
taralīkurute mano madīyaṃ muralīnādaparaṃparā murāreḥ // MSS_2433

amarukakavitvaḍamaruka- nādena vinuhnutā na saṃcarati /
śṛṅgārabhaṇitiranyā dhanyānāṃ śravaṇavivareṣu // MSS_2434

amarairamṛtaṃ na pītamabdher na ca hālāhalamulbaṇaṃ hareṇa /
vidhinā nihitaṃ khalasya vāci dvayametad bahirekamantaranyat // MSS_2435

amarairgataṃ madhukaraiścalitaṃ pravaraiḥ prayātamapi padmadṛśām /
vibhave gate sakalameva gataṃ dhruvamekamañcati yaśaḥ sarasaḥ // MSS_2436

amartyāḥ santu martyā vā cetanāḥ santvacetanāḥ /
dānameva puraskṛtya stūyante bhuvanaistribhiḥ // MSS_2437

amarṣiṇā kṛtyamiva kṣamāśrayaṃ madoddhateneva hitaṃ priyaṃ vacaḥ /
balīyasā tadvidhineva pauruṣaṃ balaṃ nirastaṃ na rarāja jiṣṇunā // MSS_2438

amarṣopagṛhītānāṃ manyusaṃtaptacetasām /
parasparāpakāreṇa puṃsāṃ bhavati vigrahaḥ // MSS_2439

amalamṛṇālakāṇḍakamanīyakapolaruces taralasalīlanīlanalinapratiphulladṛśaḥ /
vikasadaśokaśoṇakarakāntibhṛtaḥ sutanor madalulitāni hanta lalitāni haranti manaḥ // MSS_2440

amalātmasu pratiphalannabhitas taruṇīkapolaphalakeṣu muhuḥ /
visasāra sāndrataramindurucām adhikāvabhāsitadiśāṃ nikaraḥ // MSS_2441

amalīmasamacchidram akrauryamatisundaram /
adeyamapratigrāhyam aho jñānaṃ mahādhanam // MSS_2442

amātyaḥ śūra eva syād yuddhasaṃpanna eva ca /
tasmādapi bhayaṃ rājñaḥ paśya rājyasya yojanam // MSS_2443

amātyarāṣṭradurgāṇi kośo daṇḍaśca pañcamaḥ /
etāḥ prakṛtayastajjñair vijigīṣorudāhṛtāḥ // MSS_2444

amātyādyāḥ prakṛtayo mitrāntā rājyamucyate /
aśeṣarājyavyasanāt pārthivavyasanaṃ guru // MSS_2445

amātye daṇḍa āyatto daṇḍe vainayikī kriyā /
nṛpatau koṣarāṣṭre tu dūte saṃdhiviparyayau // MSS_2446

amātyaiḥ kāmavṛtto hi rājā kāpathamāśritaḥ /
nigrāhyaḥ sarvathā sadbhir na nigrāhyo nigṛhyase // MSS_2447

amātyo yuvarājaśca bhujāvetau mahīpateḥ /
mantrī netraṃ hi tadbhinna etasminnapi tadvadhaḥ // MSS_2448

amātsaryaṃ budhāḥ prāhur dānaṃ dharme ca saṃyamam /
avasthitena nityaṃ ca satyenāmatsarī bhavet // MSS_2449

amānitaṃ hi yudhyeta kṛtamānārthasaṃgraham /
na vimānimatyarthaṃ pradīptakrodhapāvakam // MSS_2450

amānuṣaṃ sattvamantar yoginaṃ praviśedyadi /
vāyvagnidhāraṇā cainaṃ dehasaṃsthaṃ vinirdahet // MSS_2451

amānenāpi bhavatā dānamānādibhirguṇaiḥ /
āśritaḥ sarva evāyaṃ samānaḥ kriyate janaḥ // MSS_2452

amāyayaiva varteta na kathaṃcana māyayā /
budhyetāriprayuktāṃ ca māyāṃ nityaṃ susaṃvṛtaḥ // MSS_2453

amāvāsyāmaṣṭamīṃ ca paurṇamāsīṃ caturdaśīm /
brahmacārī bhavennityam apyṛtau snātako dvijaḥ // MSS_2454

amitaṃ madhu tatkathā mama śravaṇaprāghuṇakīkṛtā janaiḥ /
madanānalabodhane bhavet khaga dhāyyā dhigadhairyadhāriṇaḥ // MSS_2455

amitaḥ samitaḥ prāptair utkarṣairharṣada prabho /
ahitaḥ sahitaḥ sādhuyaśobhirasatāmasi // MSS_2456

amitaguṇo'pi padārtho doṣeṇaikena nindito bhavati /
nikhilarasāyanamahito gandhenogreṇa laśuna iva // MSS_2457

amitadyutirākarāt prasūtiḥ pariśuddhā ca mahāmaṇerviśeṣaḥ /
makuṭe caraṇāṅgulīyake vā viniveśaḥ punarasya śilpitantram // MSS_2458

amitraṃ kurute mitraṃ mitraṃ dveṣṭi hinasti ca /
karma cārabhate duṣṭaṃ tamāhurmūḍhacetasam // MSS_2459

amitraṃ kurute mitraṃ mitraṃ dveṣṭi hinasti ca /
śubhaṃ vettyaśubhaṃ pāpaṃ bhadraṃ daivahato naraḥ // MSS_2460

amitraṃ kurute mitraṃ mitraṃ dveṣṭi hinasti vaḥ /
mitrāṇi tasya naśyanti amitraṃ naṣṭameva ca // MSS_2461

amitraṃ naiva muñceta bruvantaṃ karuṇānyapi /
duḥkhaṃ tatra na kurvīta hanyāt pūrvāpakāriṇam // MSS_2462

amitramapi ceddīnaṃ śaraṇaiṣiṇamāgatam /
vyasane yo'nugṛhṇāti sa vai puruṣasattamaḥ // MSS_2463

amitrapramitā hyetā gataśraddhāḥ sudāruṇaḥ /
mūlapravādena viṣaṃ prayacchanti jighāṃsavaḥ // MSS_2464

amitravyasanānmitram utthitaṃ yadvirajyati /
arivyasanasiddhyā tac chatruṇaiva prasidhyati // MSS_2465

amitrāṇāṃ vadhe yukto mitrāṇāṃ saṃgrahe rataḥ /
trivargaphalabhoktā tu rājā dharmeṇa yujyate // MSS_2466

amitrādunnatiṃ prāpya nonnato'smīti viśvaset /
tasmāt prāpyonnatiṃ naśyet prāvāra iva kīṭakaḥ // MSS_2467

amitrānapi kurvīta mitrānyupacayāvahān /
ahite vartamānāni mitrāṇyapi parityajet // MSS_2468

amitre viśvāsaḥ śvapacakarake saumikarasaḥ kapāle gaṅgāmbhaḥ khalapariṣadaṅke sujanatā /
parikṣīṇācāre śrutamanupanīte ca nigamaḥ svataḥsiddhāṃ śuddhiṃ tyajati viparītaṃ ca phalati // MSS_2469

amitro na vimoktavyaḥ kṛpaṇaṃ bahvapi bruvan /
kṛpā tasmin na kartavyā hanyādevāpakāriṇam // MSS_2470

amitro mitratāṃ yāti mitraṃ cāpi praduṣyati /
sāmarthyayogāt kāryāṇāṃ tadgatyā hi sadā gatiḥ // MSS_2471

amī kārāgāre niviḍanalinīnālanigaḍair nibadhyantāṃ haṃsāḥ prathamavisakandāṅkurabhidaḥ /
nave vāsantīnāmudayini vane garbhakalikā- cchido nirdhāryantāṃ parabhṛtayuvāno madakalāḥ // MSS_2472

amī taṭasamīpanirjharataraṅgariṅgatpayo- jaḍīkṛtapaṭīrabhūruhakuṭīrasaṃcāriṇaḥ /
mano vidhurayanti me malayamekhalāmedurāḥ durāsadavanapriyapriyatamārutā mārutāḥ // MSS_2473

amī tilāḥ tailika nūnametāṃ snehādavasthāṃ bhavatopanītāḥ /
dveṣo'bhaviṣyadyadamīṣu nūnaṃ tadā na jāne kimivākariṣyaḥ // MSS_2474

amī pānakarambhābhāḥ saptāpi jalarāśayaḥ /
tvadyaśorāja haṃsasya pañjaraṃ bhuvanatrayam // MSS_2475

amī purasthāḥ sakalāḥ sunidritā na nūpuraṃ muñca sukhena yāsyasi /
vrajatyapi śrīpatiraṅghrimāśritaṃ hare tavākhyātiriyaṃ bhaviṣyati // MSS_2476

amī pṛthustambabhṛtaḥ piśaṅgatāṃ gatā vipākena phalasya śālayaḥ /
vikāsi vaprāmbhasi gandhasūcitaṃ namanti nighrātumivāsyatotpalam // MSS_2477

amībhiḥ saṃsiktestava kimu phalaṃ vāridaghaṭe yadete'pekṣante salilamavaṭebhyo'pi taravaḥ /
ayaṃ yukto vyaktaṃ nanu sukhayituṃ cātakaśiśur yadeṣa grīṣme'pi spṛhayati na pāthastvadaparān // MSS_2478

amībhirākaṇṭhamabhoji tadgṛhe tuṣāradhārāmṛditeva śakarā /
hayadviṣadvaṣkayaṇīpayaḥ sutaṃ sudhāhradāt paṅkamivoddhṛtaṃ dadhi // MSS_2479

amī vyarthārambhā duradhigamabhūbhṛtparisare viṣaktā lakṣyante vayamiva hatāśā jaladharāḥ /
mamevāntaśceṣṭāviphalavipulākāravibhavāḥ svabhūmau yāntīmāḥ pariṇatimasaṃkhyāśca saritaḥ // MSS_2480

amī śirīṣaprasavāvataṃsāḥ prabhraṃśino vārivihāriṇīnām /
pāriplavāḥ srotasi nimnagāyāḥ śaivālalolāṃśchalayanti mīnān // MSS_2481

amīṣāṃ jantūnāṃ katipayanimeṣasthitijuṣāṃ viyoge dhīrāṇāṃ ka iha paritāpasya viṣayaḥ /
kṣaṇādutpadyante vilayamapi yānti kṣaṇamamī na ke'pi sthātāraḥ suragiripayodhiprabhṛtayaḥ // MSS_2482

amīṣāṃ prāṇānāṃ tulitabisinīpatrapayasāṃ kṛte kiṃ nāsmābhirvigalitavivekairvyavasitam /
yadāḍhyānāmagre draviṇamadaniḥsaṃjñamanasāṃ kṛtaṃ vītavrīḍairnijaguṇakathāpātakamapi // MSS_2483

amīṣāṃ mañjuśrīruciravadanaśrīkṛtarucāṃ śrutaṃ no nāmāpi kva nu khalu himāṃśuprakṛtayaḥ /
mamābhyarṇe dhārṣṭyāccarati punarindīvaramiti krudhevedaṃ prāntāruṇamavatu vo locanayugam // MSS_2484

amīṣāṃ maṇḍalābhogaḥ stanānāmeva śobhate /
yeṣāmupetya sotkampā rājāno'pi karapradāḥ // MSS_2485

amīṣāṃ mohādvā dharaṇidharacūḍāñcalabhuvām abhāgyādvā kaiścinmarakatamaṇiścenna gaṇitaḥ /
tathāsau rathyāyāmapi nipatitaḥ kiṃ na kurute samunmīlannīladyutilahariliptā iva diśaḥ // MSS_2486

amīṣāmāmodapraṇayasubhagaṃ saṃgatamabhūt prasūnairunnidraiḥ saha bahubhireva prativanam /
udanyā na kvāpi vyaramadaravinde paramamī pibanti svacchandaṃ rasamudarapūraṃ madhulihaḥ // MSS_2487

amīṣāmārūḍhaprasavavivarāṇāṃ madhulihāṃ dhvaniḥ pānthastrīṇāṃ prasarati viyogajvara iva /
drumālīnāṃ yūnormana iva sarāgaṃ kisalayaṃ parāgaḥ puṣpāṇāṃ patati madanasyeva viśikhaḥ // MSS_2488

amīṣāmuṣṇāṃśoḥ kiraṇanikarāṇāṃ paricayāt sarastīkṣṇaṃ mābhūstava kila nisargaḥ śiśirimā /
durātmāno hyete katipayapayobindurasikān nirasyantaḥ pānthāṃstvayi kimapi śoṣaṃ vidadhati // MSS_2489

amī samuddhūtasarojareṇunā hṛtā hṛtāsārakaṇena vāyunā /
upāgame duścaritā ivāpadāṃ gatiṃ na niścetumalaṃ śilīmukhāḥ // MSS_2490

amī hi vastrāntaniruddhavaktrāḥ prayānti me dūrataraṃ vayasyāḥ /
paro'pi bandhuḥ sukhasaṃsthitasya mitraṃ na kaścid viṣamasthitasya // MSS_2491

amī hi vṛkṣāḥ phalapuṣpaśobhitāḥ kaṭhoraniṣpandalatopaveṣṭitāḥ /
nṛpājñayā rakṣijanena pālitā narāḥ sadārā iva yānti nirvṛtim // MSS_2492

amī helonmeṣavyasaniṣu palāśeṣu paritaḥ pibanti svacchandaṃ madhu madhuliho mādyati janaḥ /
ayaṃ ca pratyagraṃ daśati sahakāraṃ parabhṛto yadīdaṃ marmāntarvidalati ka eṣa vyatikaraḥ // MSS_2493

amuṃ kālakṣepaṃ tyaja jalada gambhīramadhuraiḥ kimebhirnirghoṣaiḥ sṛja jhaṭiti jhātkāri salilam /
aye paśyāvasthāmakaruṇasamīravyatikara- sphuraddāvajvālāvalijaṭilamūrterviṭapinaḥ // MSS_2494

amuṃ puraḥ paśyasi devadāruṃ putrīkṛto'sau vṛṣabhadhvajena /
yo hemakumbhastananiḥsṛtānāṃ skandasya mātuḥ payasāṃ rasajñaḥ // MSS_2495

amuṃ sahāsaprahitekṣaṇāni vyājārdhasaṃdarśitamekhalāni /
nālaṃ vikartuṃ janitendraśaṅkaṃ surāṅganāvibhramaceṣṭitāni // MSS_2496

amuktāṃ bhūṣayantu svāṃ tanuṃ saṃsārasindhugaiḥ /
maṇikarṇī tāmraparṇī muktimuktāphalairjanāḥ // MSS_2497

amudrakumudatviṣaḥ sphuritaphenalakṣmīspṛśo marālakulavibhramāḥ śapharaphālalīlābhṛtaḥ /
jayanti girijāpatestaralamaulimandākinī- taraṅgacayacumbinastuhinadīdhiteraṃśavaḥ // MSS_2498

amudro'pi varaṃ kūpaḥ samudreṇāpi tena kim /
susvādu salilaṃ yatra pīyate pathikaiḥ pathi // MSS_2499

amunā marukūpena ke ke nāma na vañcitāḥ /
rudatpathikanetrāmbupicchilaprāntabhūminā // MSS_2500

amunā yamunājalakelikṛtā sahasā tarasā parirabhya bhṛtā /
hariṇā hariṇī mṛganetravatī navayauvanayauvanabhāravatī // MSS_2501

amunaiva kaṣāyitastanī subhagena priyagātrabhasmanā /
navapallavasaṃstare yathā racayiṣyāmi tanuṃ vibhāvasau // MSS_2502

amunaiva pathāgatāgataṃ kṛtavānadya manoharo hariḥ /
sakhi durjanabhītayā mayā hatayā hanta ciraṃ na vīkṣitaḥ // MSS_2503

amuṣminnārāme tarubhirabhirāme viṭapinaḥ sphuṭaṃ nṛtyadbhṛṅgī vividhanavasaṃgītakalanāt /
parānandaiḥ pūrṇāḥ ka iva tava varṇāvalipada- kramaśrotā vettā dvijavara śuka śrāmyasi kutaḥ // MSS_2504

amuṣminnudyānadrumakuharanīrandhrabharite tamaḥkhaṇḍe piṇḍīkṛtabahalakālāyasaghane /
yatāmadyāsmākaṃ kathamapi puronyastacaraṇaṃ nimeṣe'pyunmeṣe nahi nahi viśeṣo nayanayoḥ // MSS_2505

amuṣminnudyāne vihagakhala eṣa pratikalaṃ vilolaḥ kākolaḥ kvaṇati khalu yāvat kaṭutaram /
sakhe tāvat kīra draḍhaya hṛdi vācaṃ ca sakalāṃ na maunena nyūno bhavati guṇabhājāṃ guṇagaṇaḥ // MSS_2506

amuṣmin pañceṣostribhuvanajigīṣoḥ sahacare mukhaṃ rātreratrestanubhuvi rahaścumbati sati /
jvalantīrṣyāroṣodayamayatayevoṣadhilatāḥ patadbhṛṅgībhaṅgyā dadhati kumudinyaḥ kaluṣatām // MSS_2507

amuṣmin saṃnaddhe jalamuci samabhyasya katicit kakārān paryantadviguṇamatarephaprasavinaḥ /
sa mādyandātyūhaścalavipulakaṇṭhaḥ prasarati kramodañcattāraḥ kramavaśanamanmandamadhuraḥ // MSS_2508

amuṣmin saṃsāre parikalitasāretaratayā tadā vidyotkarṣaḥ pariṇatimupaiti śrutividām /
yadā mandākinyā madhuravamarālīkalakala- praṇālīvācāle parisarataṭe yānti divasāḥ // MSS_2509

amuṣmiṃllāvāṇyāmṛtasarasi nūnaṃ mṛgadṛśaḥ smaraḥ śarvapluṣṭaḥ pṛthujaghanabhāge nipatitaḥ /
yadaṅgāṅgārāṇāṃ prathamapiśunā nābhikuhare śikhā dhūmasyeyaṃ pariṇamati romāvalivapuḥ // MSS_2510

amuṣmai caurāya pratinihatamṛtyupratibhiye prabhuḥ prītaḥ prādāduparitanapādadvayakṛte /
suvarṇānāṃ koṭīrdaśa daśanakoṭikṣatagirīn gajendrānapyaṣṭau madamuditakūjanmadhulihaḥ // MSS_2511

amuṣya dorbhyāmaridurgaluṇṭhane dhruvaṃ gṛhītārgaladīrghapīnatā /
uraḥśriyā tatra ca gopurasphurat- kapāṭadurdharṣatiraḥprasāritā // MSS_2512

amuṣya dhīrasya jayāya sāhasī tadā khalu jyāṃ viśikhaiḥ sanāthayan /
nimajjayāmāsa yaśāṃsi saṃśaye smarastrilokīvijayārjitānyapi // MSS_2513

amuṣya muṣitā lakṣmīś cakṣuṣeti na nūtanam /
na vedmi kathayatyasyāḥ karṇe lagnaṃ kimutpalam // MSS_2514

amuṣya vidyā rasanāgranartakī trayīva nītāṅgaguṇena vistaram /
agāhatāṣṭādaśatāṃ jigīṣayā navadvayadvīpapṛthagjayaśriyām // MSS_2515

amuṣyāṃ saṃkrāntau tava taruṇi tāruṇyataraṇe smaro dātā devastrivalitaṭinītīranikaṭe /
amū te vakṣojau sakhi sughaṭitau hāṭakaghaṭau mahādānaṃ kasmai vada bhavatu sāraṅganayane // MSS_2516

amuṣyā lāvaṇyaṃ mṛdulamṛdulānapyavayavān manolaulyaṃ dhātuḥ karakaṭhinatāṃ me vimṛśati /
padaṃ citte dhatte matiriti purā paṅkajabhuvā dhruvaṃ kalyāṇīyaṃ kalitasukṛtaireva racitā // MSS_2517

amuṣyorvībharttuḥ prasṛmaracamūsindhurabhavair avaimi prārabdhe vamathubhiravaśyāyasamaye /
na kampantāmantaḥ pratinṛpabhaṭā mlāyatu na tad vadhūvaktrāmbhojaṃ bhavatu na sa teṣāṃ kudivasaḥ // MSS_2518

amūni gacchanti yugāni na kṣaṇaḥ kiyat sahiṣye na hi mṛtyurasti me /
sa māṃ na kāntaḥ sphuṭamantarujjhitā na taṃ manastacca na kāyavāyavaḥ // MSS_2519

amūrkho yo manuṣyāṇāṃ manyusaṃtaptacetasām /
parasparopakāreṇa puṃsāṃ bhavati vigrahaḥ // MSS_2520

amūrhi bhittvā jaladāntarāṇi paṅkāntarāṇīva mṛṇālasūcyaḥ /
patanti candravyasanādvimuktā divo'śrudhārā iva vāridhārāḥ // MSS_2521

amūlyasya mama svarṇatulākoṭidvayaṃ kiyat /
iti kopādivātāmraṃ pādayugmaṃ mṛgīdṛśaḥ // MSS_2522

amṛtaṃ kirati himāṃśur viṣameva phaṇī samudgirati /
guṇameva vakti sādhur doṣamasādhuḥ prakāśayati // MSS_2523

amṛtaṃ caiva mṛtyuśca dvayaṃ dehe pratiṣṭhitam /
mṛtyumāpadyate mohāt satyenāpadyate'mṛtam // MSS_2524

amṛtaṃ tadadharabimbe vacaneṣvamṛtaṃ vilokane'pyamṛtam /
amṛtabhṛtau kucakumbhau satyaṃ sā sṛṣṭiraparaiva // MSS_2525

amṛtaṃ durlabhaṃ n ṇāṃ devānāmudakaṃ tathā /
pit ṇāṃ durlabhaḥ putras takraṃ śakrasya durlabham // MSS_2526

amṛtaṃ nāma yat santo mantrajihveṣu juhvati /
śobhaiva mandarakṣubdhakṣubhitāmbhodhivarṇanā // MSS_2527

amṛtaṃ bhujyate vidye bhavatīmāśritaiḥ param /
anye tu bata dūyante saṃsaranta itastataḥ // MSS_2528

amṛtaṃ śiśire vahnir amṛtaṃ kṣīrabhojanam /
amṛtaṃ guṇavadbhāryā amṛtaṃ bālabhāṣitam // MSS_2529

amṛtaṃ śiśire vahnir amṛtaṃ priyadarśanam /
amṛtaṃ rājasaṃmānam amṛtaṃ kṣīrabhojanam // MSS_2530

amṛtaṃ śiśire vahnir amṛtaṃ bālabhāṣaṇam /
amṛtaṃ svapriyā bhāryā hyamṛtaṃ svāmigauravam // MSS_2531

amṛtaṃ śiśire vahnir amṛtaṃ svāmigauram /
bhāryāmṛtaṃ guṇavatī dhāroṣṇamamṛtaṃ payaḥ // MSS_2532

amṛtaṃ sadguṇā bhāryā amṛtaṃ bālabhāṣitam /
amṛtaṃ rājasaṃmānam amṛtaṃ mānabhojanam // MSS_2533

amṛtajaladheḥ pāyaṃ pāyaṃ payāṃsi payodharaḥ kirati karakāstārākārā yadi sphaṭikāvanau /
tadiha tulanāmānīyante kṣaṇaṃ kaṭhināḥ punaḥ satatamamṛtasyandodgārā giraḥ pratibhāvatām // MSS_2534

amṛtadravamādhurīdhurīṇāṃ giramākarṇya kuraṅgalocanāyāḥ /
muhurabhyasanaṃ kaṣāyakaṇṭhī kalakaṇṭhī kurute kuhūrutena // MSS_2535

amṛtadravairvidadhadabjadṛśām apamārgamoṣadhipatiḥ sma karaiḥ /
parito visarpi paritāpi bhṛśaṃ vapuṣo'vatārayati mānaviṣam // MSS_2536

amṛtanidhānaṃ ruciraṃ saṃtāpanivartate sadā niratam /
candramukhaṃ tava sundari susmitabhāsā vikāsate paritaḥ // MSS_2537

amṛtamadhuraiḥ kāñcīnādaiḥ kṛtābhayaḍiṇḍime trivalilaharīlāvaṇyāmbhaḥkaṇotkarakarbure /
viṣamanayanajvālājālāvalīḍhaparākramo luṭhati madanastanvaṅgīnāṃ nitambaśilātale // MSS_2538

amṛtamamṛtaṃ kaḥ saṃdeho madhūnyapi nānyathā madhuramadhikaṃ cūtasyāpi prasannarasaṃ phalam /
sakṛdapi punarmadhyasthaḥ san rasāntaravijjano vadatu yadihānyatsvādu syāt priyādaśanacchadāt // MSS_2539

amṛtamamṛtaṃ candraṃ candraṃ ratiṃ ca ratiṃ tathā prathitamatayaḥ kāmaṃ brūyurmadhūni madhūnyapi /
yadi na subhagāsparśāmodaṃ vinā pramude tataḥ sakalamakalaṃ teṣāṃ vyūhaṃ bravīmi punaḥ priye // MSS_2540

amṛtamamṛtaṃ candraścandrastathāmbujamambujaṃ ratirapi ratiḥ kāmaḥ kāmo madhūni madhūnyapi /
iti na bhajate vastu prāyaḥ parasparasaṃkaraṃ tadiyamabalā dhatte lakṣmīṃ kathaṃ sakalātmikām // MSS_2541

amṛtamayamanaṅgakṣmāruhasyālavālaṃ mṛtadivasakapālaṃ kālakāpālikasya /
jayati makaraketoḥ śāṇacakraṃ śarāṇām amarapurapurandhrīdarpaṇaḥ śvetabhānuḥ // MSS_2542

amṛtarasavisaravitaraṇa- maraṇottāritasure sati payodhau /
kasya sphuranti hṛdaye grīṣmataḍākā bhuvi varākāḥ // MSS_2543

amṛtarasasārabhūtaḥ sakalakalo makaraketusarvasvam /
akhilajananayanasukhakṛt kathamindurvāsare'bhyuditaḥ // MSS_2544

amṛtavacanalīlāvibhramairannapānaṃ racaya catura kīra bhrāntacitteṣu teṣu /
akalitaparasevātāpapāpaḥ piko'sau bhajatu vipinavāṭīmeṣa pīyūṣakaṇṭhaḥ // MSS_2545

amṛtasiktamivāṅgamidaṃ yadi bhavati tanvi tavādbhutavīkṣitaiḥ /
adharamindukarādapi śubhrayanty aruṇayantyaruṇādapi kiṃ dṛśam // MSS_2546

amṛtasyandikiraṇaś candramā nāmato mataḥ /
anya evāyamarthātmā viṣaniṣyandidīdhitiḥ // MSS_2547

amṛtasyandinaṃ kaścit kṛṣṇameghaṃ dvijaḥ smaran /
udanyayā na veśantam udanvantaṃ ca vīkṣate // MSS_2548

amṛtasya pravāhaiḥ kiṃ kāyakṣālanasaṃbhavaiḥ /
cirānmitrapariṣvaṅgo yo'sau mūlyavivarjitaḥ // MSS_2549

amṛtasyeva kuṇḍāni sukhānāmiva rāśayaḥ /
rateriva nidhānāni yoṣitaḥ kena nirmitāḥ // MSS_2550

amṛtasyeva tṛpyeta apamānasya yogavit /
viṣavacca jugupseta saṃmānasya sadā dvijaḥ // MSS_2551

amṛtasyeva saṃtṛpyed avamānasya vai dvijaḥ /
sukhaṃ hyavamataḥ śete yo'vamantā sa naśyati // MSS_2552

amṛtāṃśoḥ kiraṇebhyo- 'jāyata vṛddhirmahodadherudare /
kathayanti hāramaṇayo hṛdi tāpamuṣaḥ spṛśanto'pi // MSS_2553

amṛtātmani padmānāṃ dveṣṭari snigdhatārake /
mukhendau tava satyasmin apareṇa kimindunā // MSS_2554

amṛtādamṛtaṃ na tāvakād aparaṃ yat tripurārirādarāt /
avalambya śiraḥsthalena tad dhṛtahālāhāla eṣa jīvati // MSS_2555

amṛtādhmātajīmūtasnigdhasaṃhananasya te /
pariṣvaṅgīya vātsalyād ayamutkaṇṭhate janaḥ // MSS_2556

amṛtāpyāyināṃ n ṇāṃ saṃtoṣo naiva jāyate /
gāvastṛṇamivāraṇye prārthayanti navaṃ navam // MSS_2557

amṛtāyatāmiti vadet pīte bhukte kṣute ca śataṃ jīva /
choṭikayā saha jṛmbhā- samaye syātāṃ cirāyurānandau // MSS_2558

amṛtā vigataprāṇā sāntaḥ śalyākṛtavraṇā /
abaddhā niścalevāste kūṭasaṃsthe mṛge mṛgī // MSS_2559

amṛtotprekṣaṇe cārur aśeṣajanasajjanaḥ /
kavirgaruḍavanmānya indravajrādivṛttakṛt // MSS_2560

amṛtonmathitaiḥ suvarṇacūrṇair mṛdamutpādya nidhāya nābhicakre /
akaronnavaromarājiyaṣṭyā kucakumbhau kusumeṣukumbhakāraḥ // MSS_2561

amedhyapūrṇe kṛmijālasaṃkule svabhāvadurgandhini śaucavarjite /
kalevare mūtrapurīṣabhājane ramanti mūḍhā viramanti paṇḍitāḥ // MSS_2562

ameyo mitalokastvam anarthī prārthanāvahaḥ /
ajito jiṣṇuratyantam avyakto vyaktakāraṇam // MSS_2563

amoghakrodhaharṣasya svayaṃ kṛtyānvavekṣiṇaḥ /
ātmapratyayakośasya vasudheyaṃ vasuṃdharā // MSS_2564

amoghā vāsare vidyud amoghaṃ niśi garjitam /
amoghā munīnāṃ vāṇī amoghaṃ devadarśanam // MSS_2565

amauktikamasauvarṇaṃ brāhmaṇānāṃ vibhūṣaṇam /
devatānāṃ pit ṇāṃ ca bhāgo yena pradīyate // MSS_2566

ambaraṃ vinayataḥ priyapāṇer yoṣitaśca karayoḥ kalahasya /
vāraṇāmiva vidhātumabhīkṣṇaṃ kakṣyayā ca valayaiśca śiśiñje // MSS_2567

ambaraṃ stimitamambudhārayā vyakta eṣa paritaḥ payodharaḥ /
prāvṛṣā kimapi lajjamānayā mīlite ravividhūvilocane // MSS_2568

ambaramanūrulaṅghyaṃ vasuṃdharā sāpi vāmanaikapadā /
abdhirapi potalaṅghyaḥ satāṃ manaḥ kena tulyaṃ syāt // MSS_2569

ambaramapanaya mugdhe vrajatu vikāśaṃ digambaratā /
hārāvalisurataṭinī nakhaśaśimaṇḍalasya kucaśambhoḥ // MSS_2570

ambaramambuni patramarātiḥ pītamahīnagaṇasya dadāha /
yasya vadhūstanayaṃ gṛhamabjā pātu sa vo haralocanavahniḥ // MSS_2571

ambarameṣa ramaṇyai yāminyai vāsaraḥ preyān /
adhikaṃ dadau nijāṅkād atha saṃkucitaḥ svayaṃ tasthau // MSS_2572

ambaravipinamidānīṃ timiravarāho'vagāhate jaladheḥ /
romasu yadasya lagnās tārakajalabindavo bhānti // MSS_2573

ambarāntamavalambitukāmam andhyayā samabhivīkṣya tu kāmam /
andhakāramatha gamya tanūnaṃ lajjayeva niragamyata nūnam // MSS_2574

ambare'mbubharalambipayode mattabarhirucire'drinitambe /
puṣpadhāmani kadambakadambe kā gatiḥ pathika kālavilambe // MSS_2575

amba śrāmyasi tiṣṭha gorasamahaṃ mathnāmi manthānakaṃ prālambya sthitamīśvaraṃ sarabhasaṃ dīnānano vāsukiḥ /
sāsūyaṃ kamalālayā suragaṇaḥ sānandamudyadbhayaṃ rāhuḥ praikṣata yaṃ sa vo'stu śivado gopālabālo hariḥ // MSS_2576

ambā kupyati tāta mūrdhni vidhṛtā gaṅgeyamutsṛjyatāṃ vidvan ṣaṇmukha kā gatirmama ciraṃ mūrdhni sthitāyā vada /
kopāveśavaśādaśeṣavadanaiḥ pratyuttaraṃ dattavān ambhodhirjaladhiḥ payodhirudadhirvārāṃ nidhirvāridhiḥ // MSS_2577

ambā tuṣyati na mayā na snuṣayā sāpi nāmbayā na mayā /
ahamapi na tayā na tayā vada rājan kasya doṣo'yam // MSS_2578

ambāmathārghajalapātrabhṛtaṃ nirīkṣya dūrādapāsaradasau janatā vihastā /
pūrṇādivāndhatamasāni tuṣārakānter āryāt pṛthagjanaśatāni hi saṃbhramanti // MSS_2579

ambāyāśca pituśca sadguṇagaṇo yasminnabhivyajyate tasmin svapratibimbiteva nikhilā saivākṛtiḥ sā dyutiḥ /
sā vāṇi vinayaḥ sa eva sahajaḥ puṇyānubhāvaḥ sa ca ślāghāyāḥ sadanaṃ sukhasya vasatistenaiva putrī pitā // MSS_2580

ambā yena sarasvatī sutavatī tasyārpayantī rasān nānācāṭumukhī sa durlaḍitavān khelābhirucchṛṅkhalaḥ /
jihvādurvyasanairupadravarujaḥ kurvanti ye duḥsutām tān dṛṣṭvārthamitastato nikhanati svaṃ niḥsvamātanvatī // MSS_2581

ambā śete'tra vṛddhā pariṇatavayasāmagraṇīratra tāto niḥśeṣāgārakarmaśramaśithilatanuḥ kumbhadāsī tatheha /
asmin pāpāhamekā katipayadivasaproṣitaprāṇanāthā pānthāyetthaṃ yuvatyā kathitamabhimataṃ vyāhṛtivyājapūrvam // MSS_2582

ambujamambuni jātaṃ nahi dṛṣṭaṃ jātamambujādambu /
adhunā tadviparītaṃ caraṇasarojādvinirgatā gaṅgā // MSS_2583

ambujamambuni magnaṃ trāsādākāśamāśritaścandraḥ /
samprati kaḥ paripanthī yaṃ prati kopāruṇaṃ vadanam // MSS_2584

ambudaḥ kṛtapado nabhastale toyapūraparipūritodadhiḥ /
goṣpadasya bharaṇe'pmaśaktimān ityasatyamabhidhīyate katham // MSS_2585

ambudherudagamadvidhubhaṅgyā nūnamaurvaśikhibhāsmanapiṇḍaḥ /
yatkilāsya ghaṭate nahi tṛptiḥ khaṇḍitājanadṛgambusaridbhiḥ // MSS_2586

ambeyaṃ neyamambā nahi kharakapiśaṃ śmaśru tasyā mukhārdhe tāto'yaṃ naiṣa tātaḥ stanamurasi piturdṛṣṭavānnāhamatra /
keyaṃ ko'yaṃ kimetadyuvatiratha pumān vastu kiṃ syāt tṛtīyaṃ śaṃbhoḥ saṃvīkṣya rūpādapasarati guhaḥ śaṅkitaḥ pātu yuṣmān // MSS_2587

ambhaḥ kardamatāmupaiti sahasā paṅkadravaḥ pāṃśutāṃ pāṃśurvāraṇakarṇatālapavanair dikprāntanīhāratām /
nimnatvaṃ girayaḥ samaṃ viṣamatāṃ śūnyaṃ janasthānakaṃ niryāte tvayi rājyapāla bhavati tyaktasvabhāvaṃ jagat // MSS_2588

ambhaḥ kumbhāmbhoruha- cāmarabhṛṅgārahemarūpyāṇi /
phalatāmbūlavarāmbara- madirāmīnājyabhojyāni // MSS_2589

ambhaḥsaṃbhṛtimantharāmbudaravaiḥ śālūragarjābhara- prārabdhapriyaviprayuktayuvatījīvagrahe bhīṣaṇāḥ /
vidyuddanturitāndhakārapaṭalā gāmbhīryabaddhārava- sthairyonmūlanaśaktayaḥ kathamamī niryānti varṣāniśāḥ // MSS_2590

ambhasaḥ parimāṇena unnataṃ kamalaṃ bhavet /
svasvāminā balavatā bhṛtyo bhavati garvitaḥ // MSS_2591

ambhasaḥ prasṛtīraṣṭau ravāvanudite pibet /
vātapittakaphān hatvā jīvedvarṣaśataṃ sukhī // MSS_2592

ambhasā bhidyate setus tathā mantro'pyarakṣitaḥ /
paiśunyād bhidyate sneho vāgbhirbhidyeta kātaraḥ // MSS_2593

ambhasā śamamāyāti muṣṭimeyaśikhaḥ śikhī /
pravṛddho'dhaḥsthitaiḥ paścāt saṃtaptaireva dṛśyate // MSS_2594

ambhasi taraṇisutāyāḥ stambhitataraṇiḥ sa devakīsūnuḥ /
ātaravirahitagopyāḥ kātaramukhamīkṣate smeraḥ // MSS_2595

ambhastattvaṃ bhūmitattvaṃ ca vāyos tattvaṃ tejastattvamākāśatattvam /
pañcaitāni prāṇavāyuṃ militvā nāḍīyugme prāṇināṃ saṃcaranti // MSS_2596

ambhāṃsi jalajantūnāṃ durgaṃ durganivāsinām /
svabhūmiḥ śvāpadādīnāṃ rājñāṃ sainyaṃ paraṃ balam // MSS_2597

ambhojagarbhasukumāratanustadāsau kaṇṭhagrahe prathamarāgaghane vilīya /
sadyaḥ patanmadanamārgaṇarandhramārgair manye mama priyatamā hṛdayaṃ praviṣṭā // MSS_2598

ambhojapatrāyatalocanānām ambhodhidīrghāsviha dīrghikāsu /
samāgatānāṃ kuṭilairapāṅgair anaṅgabāṇaiḥ prahatā yuvānaḥ // MSS_2599

ambhojaprakaro'tha ketakakulaṃ kundotkaraḥ kairava- vrāto malligaṇo'tha campakacayo jātīgaṇo vāthavā /
no cedādaramātanoti pika tatkhedaṃ vṛthā mā kṛthā yasmāt kvāpi kadāpi ko'pi bhavitā yastvadguṇaṃ jñāsyati // MSS_2600

ambhojākṣyāḥ puravanalatā dhāmni saṃketabhājaś cetonāthe cirayati bhṛśaṃ mohanidrāṃ gatāyāḥ /
svacchaṃ nābhihradavalayitaṃ kāntaratnāṃśujālaṃ toyabhrāntyā pibati hariṇī vismayaṃ ca prayāti / MSS_2601

ambhojāni ghanāghanavyavahito'pyullāghayatyaṃśumān dūrastho'pi payodharo'tiśiśirasparśaṃ karotyātapam /
śaktiḥ kāpyaparikṣatāsti mahatāṃ svairaṃ daviṣṭhānyaho yanmāhātmyavaśena yānti ghaṭanāṃ kāryāṇi niryantraṇām // MSS_2602

ambhojinīvanavilāsanivāsameva haṃsasya hanti nitarāṃ kupito vidhātā /
na tvasya dugdhajalabhedavidhau prasiddhāṃ vaidagghyakīrtimapahartumasau samarthaḥ // MSS_2603

ambhodastanitaṃ niśamya kariṇāṃ bṛṃheti raṃhoyutas sadyastyaktamahīdhrakandaragṛhaḥ kautūhalī nirgataḥ /
etasmin kṣaṇa eva caṇḍamaśanerākarṇya śabdaṃ krudhā taṃ pratyutpatati svagarjitajitaṃ dhīro mṛgāṇāṃ patiḥ // MSS_2604

ambhodhiḥ sthalatāṃ sthalaṃ jaladhitāṃ dhūlīvalaḥ śailatāṃ merurmṛtkaṇatāṃ tṛṇaṃ kuliśatāṃ vajraṃ tṛṇaklībatām /
vahniḥ śītalatāṃ himaṃ dahanatāmāyāti yasyecchayā līlādurlalitādbhutavyasanine daivāya tasmai namaḥ // MSS_2605

ambhodhikṣiptamuktāruciharicaraṇodgīrṇagaṅgāmbutulyaṃ kālindīphenakāntisphuritaphaṇadharonmuktanirmokarociḥ /
karṇāṭīkuntalāntarvigalitasumanodāmaramyaṃ samantāc chrīkhaṇḍālepalakṣmīmupanayati yaśo yasya khaḍgaprasūtam // MSS_2606

ambhodhīnāṃ tamālaprabhavakisalayaśyāmavelāvanānām ā pārebhyaścaturṇāṃ caṭulatimikulakṣobhitāntarjalānām /
mālevāmlānapuṣpā tava nṛpatiśatairuhyate yā śirobhiḥ sā mayyeva skhalantī kathayati vinayālaṃkṛtaṃ te prabhutvam // MSS_2607

ambhodhereva jātāḥ kati jagati na te hanta santīha śaṅkhā yān saṃgṛhya bhramanti pratibhavanamamī bhikṣavo jīvanāya /
ekaḥ śrīpāñcajanyo hariharakamalakroḍahaṃsāyamāno yasyādhvānairamānairasuravaravadhūvargagarbhā galanti // MSS_2608

ambhodherjalayantramandiraparispande'pi nidrāṇayoḥ śrīnārāyaṇayorghanaṃ vighaṭayatyūṣmā samāliṅganam /
kiṃ cottaptaviyatkapālaphalake kaṅkālaśeṣaśriyaṃ candraṃ marmarayanti parpaṭamiva krūrā raveraṃśavaḥ // MSS_2609

ambhodhervaḍavāmukhānalajhalājvālopagūḍhāntarā vyāmohādapibannapaḥ sphuṭamamī tarṣeṇa paryāvilāḥ /
uddeśasphuradindracāpavalayajvālāpadeśādaho dahyante kathamanyathārdhamalināṅgāradyutastoyadāḥ // MSS_2610

ambhodhau viharantamantarahitaiḥ kīrtiṃ vahantaṃ guṇais taṃ mainākamavajragarvaviṣayau pakṣau dadhānaṃ numaḥ /
āsanne suralokamānuṣajagatpātālapārātyaye yaḥ pāthonidhilaṅghinaḥ pathi marutsūnorvyanaiṣīt klamam // MSS_2611

ambhonidheranavagītaguṇaikarāśer uccaiḥśravaprabhṛtiṣu prasabhaṃ hṛteṣu /
āśvāsanaṃ yadavakṛṣṭamabhūnmaharṣe toyaṃ tvayā tadapi niṣkaruṇena pītam // MSS_2612

ambho'pi pravahatsvabhāvamaśanairāśyānamaśmāyate grāvāmbhaḥ sravati dravatvamuditodrekeṣu cāveyuṣaḥ /
kālasyāskhalitaprabhāvarabhasaṃ bhāti prabhutve'dbhute kasyāmutra vidhātṛśaktighaṭite mārge nisargaḥ sthiraḥ // MSS_2613

ambhobindugrahaṇarabhasāṃścātakān vīkṣamāṇāḥ śreṇībhūtāḥ parigaṇanayā nirdiśanto valākāḥ /
tvāmāsādya stanitasamaye mānayiṣyanti siddhāḥ sotkampāni priyasahacarīsaṃbhramāliṅgitāni // MSS_2614

ambho bhajasva ciramasya yathābhilāṣam etanna tāṇḍavaya sairibha kānanaṃ ca /
duśceṣṭitena yadanena bhṛśaṃ tavaiṣa dhvastāśayo bhavati niṣkaluṣastaḍāgaḥ // MSS_2615

ambhobhistanakumbhayostava ghanaśleṣāt samutkīrṇatāṃ yātāyā śukavakrimapraṇayinī seyaṃ na luptā lipiḥ /
kiṃ caitāṃ kusumeṣu kuñjaraśironakṣatramālāṃ tiro- dhitsurniṣphalameva majjasi nabhaḥ svacche sarovāriṇi // MSS_2616

ambhomucāṃ salilamudgiratāṃ niśīthe tāḍīvaneṣu nibhṛtasthitakarṇatālāḥ /
ākarṇayanti kariṇo'rdhanimīlitākṣā dhārāravaṃ daśanakoṭiniṣaṇṇahastāḥ // MSS_2617

ambhorāśirivāsi sattvanilayo no mandarakṣo bhavān kalyāṇaprakṛtiḥ sumeruriva kiṃ devaḥ surāpāśrayaḥ /
sacchāyo na tu rūḍhadustaralatastvaṃ kalpavṛkṣo yathā taiḥ kurvanti tulāṃ tathāpi bhavato mūḍhāḥ kavīnāṃ dhiyaḥ // MSS_2618

ambhoruhaṃ vadanamambakamindukāntaḥ pāthonidhiḥ kusumacāpabhṛto vikāraḥ /
prādurbabhūva subhaga tvayi dūrasaṃsthe caṇḍālacandradhavalāsu niśāsu tasyāḥ // MSS_2619

ambhoruhamaye snātvā vāpīpayasi kāminī /
dadāti bhaktisaṃpannā puṣpasaubhāgyakāmyayā // MSS_2620

ambhoruhākṣi śaṃbhoś caraṇāvārādhitau kena /
yasmai vicalitavadanā madanākūtaṃ vibhāvayasi // MSS_2621

ambhovāhamuradviṣo nivasanaṃ dhvāntādridivyauṣadhī kandarpasya vilāsacampakadhanurvarṣālatāmañjarī /
lekhā vyomakaśopale viracitā cāmīkarasya sphurad dhāmnaḥ pānthivilāsinījanamanaḥ kampāya śampābhavat // MSS_2622

amlānapaṅkajā mālā kaṇṭhe rāmasya sītayā /
mudhā budhā bhramantyatra pratyakṣe'pi kriyāpade // MSS_2623

amlānamālyābharaṇāmbarasya varāṅganānandanamandirasya /
nityaprakāśotsavasevitasya svargasya vittasya ca ko viśeṣaḥ // MSS_2624

amlānastabakanti kuntalabhare sīmantasīmāsvimāḥ sindūranti kapolabhittiṣu milanmaireyarāganti ca /
prauḍherṣyādyutiviśramanti nayanopānte kuraṅgīdṛśaḥ bimboṣṭhe kṣitipāla bālataraṇerlākṣārasanti tviṣaḥ // MSS_2625

amlānirāmodabharaśca divyaḥ puṣpeṣu bhūyādbhavadaṅgasaṅgāt /
dṛṣṭaṃ prasūnopamayā mayānyan na dharmaśarmobhayakarmaṭhaṃ yat // MSS_2626

amlāno balavāñśūraś chāyevānugataḥ sadā /
satyavādī mṛdurdāntaḥ sa rājavasatiṃ vaset // MSS_2627

ayaṃ kanakanirmitaḥ sakalabhūdharādunnataḥ sahasranayanāśrayaḥ sapadi labdhabhāgyodayaḥ /
kucopari parisphurattaruṇicārucelāñcalaṃ manāgapi nivāraya tyajatu garvamurvīdharaḥ // MSS_2628

ayaṃ kāṇaḥ śukro viṣamacaraṇaḥ sūryatanayaḥ kṣatāṅgo'yaṃ rāhurvikalamahimā śītakiraṇaḥ /
ajānānasteṣāmapi niyatakarmasvakaphalaṃ grahagrāmagrastā vayamiti jano'yaṃ pralapati // MSS_2629

ayaṃ kāmo nijāmo vā tvayā kimavadhāritam /
iti dṛṣṭiriva praṣṭuṃ śrutiṃ śrayati subhruvām // MSS_2630

ayaṃ khalu mṛṇālinīnavavilāsavaihāsikas tviṣāṃ vitapate patiḥ sapadi dṛśyamānā nijāḥ /
stanau pulakayanti cotpaladṛśāṃ priyoraḥsthale viparyasitavṛttayo ghusṛṇapaṅkapatrāṅkurāḥ // MSS_2631

ayaṃ ca suratajvālaḥ kāmāgniḥ praṇayendhanaḥ /
narāṇāṃ yatra hūyante yauvanāni dhanāni ca // MSS_2632

ayaṃ jyotsnājānistava vadanadūno'mbaraguhāṃ praviṣṭastatrāpi prasṛtamidamenaṃ dṛḍhatamaḥ /
iti trāsodrekakramagalitasattvaḥ kṣayagadī vidhirdagdho dīnaṃ vyathayati nidānaṃ hi mṛdutā // MSS_2633

ayaṃ tasyā rathakṣobhād aṃsenāṃso nipīḍitaḥ /
ekaḥ kṛtī śarīre'smiñ śeṣamaṅgaṃ bhuvo bharaḥ // MSS_2634

ayaṃ tāvad bāṣpastruṭita iva muktāmaṇisaro visarpan dhārābhirluṭhati dharaṇīṃ jarjarakaṇaḥ /
niruddho'pyāvegaḥ sphuradadharanāsāpuṭatayā pareṣāmunneyo bhavati ca bharādhmātahṛdayaḥ // MSS_2635

ayaṃ te vidrumacchāyo marumārga ivādharaḥ /
karoti kasya no bāle pipāsākulitaṃ manaḥ // MSS_2636

ayaṃ trayāṇāṃ grāmāṇāṃ nidhānaṃ madhuradhvaniḥ /
rekhātrayamitīvāsyāḥ sūtritaṃ kaṇṭhakandale // MSS_2637

ayaṃ daridro bhaviteti vaidhasīṃ lipiṃ lalāṭe'rthijanasya jāgratīm /
mṛṣā na cakre'lpitakalpapādapaḥ praṇīya dāridryadaridratāṃ nalaḥ // MSS_2638

ayaṃ dūtārthasaṃkṣepaḥ pratyarthaniyatā giraḥ /
prayojanaṃ kriyotpādi kiyacchakyeta bhāṣitum // MSS_2639

ayaṃ dūrabhrāntaḥ paṭutarapipāsākulamanāḥ kapole te mattadvipa nipatitaḥ ṣaṭpadayuvā /
tvamapyetāṃ pīnaśravaṇadaradolāvyasanitāṃ vimuñca svācchandyādapanayatu tāvat tṛṣamimām // MSS_2640

ayaṃ dvīpī priyāṃ leḍhi jihvāgreṇa punaḥ punaḥ /
prītimāyāti ca tayā lihyamānaḥ svakāntayā // MSS_2641

ayaṃ dhārāvāhastaḍidiyamiyaṃ dagdhakarakā sa cāyaṃ nirghoṣaḥ sa ca ravavaśo bhekanicayaḥ /
itīva pratyaṅgaprathitamadanāgniṃ kṛśatanur ghanaśvāsotkṣepairjvalayati muhurmṛtyuvaśinī // MSS_2642

ayaṃ dhūrto māyāvinayamadhurādasya caritāt sakhi pratyūṣi tvaṃ prakṛtisarale paśyasi na kim /
kapole yallākṣārasabahalarāgapraṇayinīm imāṃ dhatte mudrāmanaticiravṛttāntapiśunām // MSS_2643

ayaṃ nijaḥ paro veti gaṇanā laghucetasām /
udāracaritānāṃ tu vasudhaiva kuṭumbakam // MSS_2644

ayaṃ netrādatrerajani rajanīvallabha iti bhramaḥ ko'yaṃ prajñāparicayaparādhīnamanasām /
sudhānāmādhāraḥ sa khalu ratibimbādharasudhā- rasāsekasnigdhādajani nayanāt puṣpadhanuṣaḥ // MSS_2645

ayaṃ paṭaḥ sūtradaridratāṃ gato hyayaṃ paṭaśchidraśatairalaṃkṛtaḥ /
ayaṃ paṭaḥ prāvarituṃ na śakyate hyayaṃ paṭaḥ saṃvṛta eva śobhate // MSS_2646

ayaṃ paṭo me pituraṅgabhūṣaṇaṃ pitāmahādyairupabhuktayauvanaḥ /
alaṃkariṣyatyatha putrapautrakān mayādhunā puṣpavadeva dhāryate // MSS_2647

ayaṃ padmāsanāsīnaś cakravāko virājate /
yugādau bhagavān vedhā vinirmitsuriva prajāḥ // MSS_2648

ayaṃ pīnastanābhogasaubhāgyavibhavocitaḥ /
draviṇopārjanasyaiva kālaḥ kuvalayekṣaṇe // MSS_2649

ayaṃ puraḥ pārvaṇaśarvarīśaḥ kiṃ darpaṇo'yaṃ rajanīramaṇyāḥ /
yatastadīyaṃ pratibimbamasmin saṃlakṣyate lāñchanakaitavena // MSS_2650

ayaṃ prabhurayaṃ bhṛtya iti yā jagataḥ sthitiḥ /
phalaṃ vijayate tatra śrīprasādāprasādayoḥ // MSS_2651

ayaṃ bandhuḥ paraścāyaṃ mamāyamayamanyataḥ /
iti brahmanna jānāmi tena jīvāmyanāmayaḥ // MSS_2652

ayaṃ mandadyutirbhāsvān astaṃ prati yiyāsati /
udayaḥ patanāyeti śrīmato bodhayan narān // MSS_2653

ayaṃ mama dahatyaṅgam ambhojadalasaṃstaraḥ /
hutāśanapratinidhir dāhātmā nanu yujyate // MSS_2654

ayaṃ mārtaṇḍaḥ kiṃ sa khalu turagaiḥ saptabhiritaḥ kṛśānuḥ kiṃ sarvāḥ prasarati diśo naiṣa niyatam /
kṛtāntaḥ kiṃ sākṣānmahiṣavahano'sāviti ciraṃ samālokyājau tvāṃ vidadhati vikalpān pratibhaṭāḥ // MSS_2655

ayaṃ mukhasaroruhabhramaravibhramaḥ subhruvāṃ kucasthalakuraṅgakaḥ pṛthunitambalīlāśikhī /
na yauvanamadodayaścarati cārukānticchaṭā- kulatrivalikūlinīpulinarājahaṃsaściram // MSS_2656

ayaṃ mṛgaḥ samāyāti mṛgāt siṃhaḥ palāyate /
tato vegāt palāyasva tvaritaistvaritaiḥ padaiḥ // MSS_2657

ayaṃ meghavyūhe balini paripanthinyapasṛte śarajjanyāḥ svairaṃ hasitamiva harṣādaviratam /
payaḥpūrabhraṃśakramajanitasopānasikate nadītīre dhīraṃ carati viśadaḥ khañjanagaṇaḥ // MSS_2658

ayaṃ me vāggumpho viśadapadavaidagdhyamadhuraḥ sphuradbandho vandhyaḥ parahṛdi kṛtārthaḥ kavihṛdi /
kaṭākṣo vāmākṣyā daradalitanetrāntagalitaḥ kumāre niḥsāraḥ sa tu kimapi yūnaḥ sukhayati // MSS_2659

ayaṃ ratnākaro'mbhodhir ityasevi dhanāśayā /
dhanaṃ dūre'stu vadanam apūri kṣāravāribhiḥ // MSS_2660

ayaṃ rasālaḥ sukṛtaikasālaḥ pravālamālollasadālavālaḥ /
mudaḥ pradātā bhavitā kathaṃ me varāṅganetyaśrumukhī śuśoca // MSS_2661

ayaṃ revākuñjaḥ kusumaśarasevāsamucitaḥ samīro'yaṃ velāvanavidaladelāparimalaḥ /
iyaṃ prāvṛḍ dhanyā navajaladavinyāsacaturā smarādhīnaṃ cetaḥ sakhi kimapi kartuṃ mṛgayate // MSS_2662

ayaṃ lolanmuktāvalikiraṇamālāparikaraḥ sphuṭasyendorlakṣmīṃ kṣapayitumalaṃ manmathasuhṛt /
viśālaḥ śyāmāyāḥ skhalitaghananīlāṃśukavṛtiḥ stanābhogaḥ snihyanmasṛṇaghusṛṇālepasubhagaḥ // MSS_2663

ayaṃ vahati dhātāraṃ yadvā devīṃ sarasvatīm /
pakṣadvayamapi sthāne rājahaṃsasya nirmalam // MSS_2664

ayaṃ vārāmeko nilaya iti ratnākara iti śrito'smābhistṛṣṇātaralitamanobhirjalanidhiḥ /
ka evaṃ jānīte nijakarapuṭīkoṭaragataṃ kṣaṇādenaṃ tāmyattimimakaramāpāsyati muniḥ // MSS_2665

ayaṃ vipāko vada kasya yūnaḥ kalyāṇi kalyāṇaparaṃparāṇām /
yadakṣikoṇasravadacchadhārā hārāvatāro guṇamantareṇa // MSS_2666

ayaṃ śūnyo grāmaḥ surasadanametannu patitaṃ puraḥ śuṣkā vāpī tarurayamitaḥ śīrṇaviṭapaḥ /
vayaṃ caite pānthāḥ parikṛśadaśābhāgyagatayaḥ samānaḥ saṃyogaḥ kaṭurapi mano me ramayati // MSS_2667

ayaṃ sa kālaḥ saṃprāpto dhārttarāṣṭropajīvinām /
niveṣṭavyaṃ mayā tatra prāṇānaparirakṣatā // MSS_2668

ayaṃ sa te tiṣṭhati saṃgamotsuko viśaṅkase bhīru yato'vadhīraṇām /
labheta vā prārthayitā na vā śriyaṃ śriyo durāpaḥ kathamīpsito bhavet // MSS_2669

ayaṃ sa bhuvanatrayaprathitasaṃyamaḥ śaṃkaro bibharti vapuṣādhunā virahakātaraḥ kāminīm /
anena kila nirjitā vayamiti priyāyāḥ karaṃ kareṇa paritāḍayan jayati jātahāsaḥ smaraḥ // MSS_2670

ayaṃ sa raśanotkarṣī pīnastanavimardanaḥ /
nābhyūrujaghanasparśī nīvīvisraṃsanaḥ karaḥ // MSS_2671

ayaṃ sarvāṇi śāstrāṇi hṛdi jñeṣu ca vakṣyati /
sāmarthyakṛdamitrāṇāṃ mitrāṇāṃ ca nṛpātmajaḥ // MSS_2672

ayaṃ senottaṃsaḥ karakṛtakṛpāṇo raṇabhuvi dviṣadbhūmīpālāḥ kimapasarata prāṇakṛpaṇāḥ /
kimabhyarthyaḥ pṛthvīdharakuharavāso'dya bhavatāṃ na kiṃ hṛdyā vidyādharanagaranīlotpaladṛśaḥ // MSS_2673

ayaṃ snigdhaśyāmo ya iha viharatyambujavane vinidre vyāguñjanmadhupa iti taṃ jalpatu janaḥ /
ahaṃ śaṅke paṅkeruhakuharavāsavyasaninīṃ śriyaṃ bhṛṅgacchadmā muraripurupeto ramayitum // MSS_2674

ayaṃ svabhāvaḥ svata eva yat para- śramāpanodapravaṇaṃ mahātmanām /
sudhāṃśureṣa svayamarkakarkaśa- prabhābhitaptāmavati kṣitiṃ kila // MSS_2675

ayaṃ svārthaḥ parārtho'yam ityevaṃ vā na kalpayet / vibudhā naiva manyante svaṃ paraṃ vā pṛthak pṛthak / niyuñjīta parasyārthe protsaheta svakarmaṇi // ayaṃ hi tīvreṇa jaganti tejasā MSS_2676

pratāpya bhāsāṃ patirastamāgataḥ /
pratāpamātropanatā vibhūtayaś ciraṃ na tiṣṭhanti paropatāpinām // MSS_2677

ayaṃ hi dehino deho dravyajñānakriyātmakaḥ /
dehino vividhakleśasaṃtāpakṛdudāhṛtaḥ // MSS_2678

ayaṃ hi prathamo rāgaḥ samastajanarañjane /
yasya nāsti dvitīyo'pi sa kathaṃ pañcamo bhavet // MSS_2679

ayaḥpiṇḍa ivottapte khalānāṃ hṛdaye kṣaṇāt /
patitā api nekṣyante guṇāstoyakanā iva // MSS_2680

ayathāvihitānāṃ yan manojñatāsaṃpādau na staḥ /
kathayāmyatastarūṇāṃ ropavidhānaṃ yathoddiṣṭam // MSS_2681

ayane viṣuve caiva ṣaḍaśītimukheṣu ca /
candrasūryoparāge ca dattamakṣayamaśnute // MSS_2682

ayamakṣuṇṇakāntaśrīr adharo hariṇīdṛśaḥ /
pravālapadmarāgāder upari pratigarjati // MSS_2683

ayamaṅkurabhāva eva tāvat kucayoḥ karṣati lokalocanāni /
itaretarapīḍanīmavasthāṃ gatayoḥ śrīranayoḥ kathaṃ bhavitrī // MSS_2684

ayamatijaraṭhāḥ prakāmagurvīr alaghuvilambipayodharoparuddhāḥ /
satatamasumatāmagamyarūpāḥ pariṇatadikkarikāstaṭīrbibharti // MSS_2685

ayamaparalatāyāḥ sādaraṃ hanta pītvā madhu mama makarandaṃ pātumāyāti bhṛṅgaḥ /
iti manasi viṣādaṃ mallike mā kuru tvaṃ bata vada madhupānāṃ mānase ko vivekaḥ // MSS_2686

ayamapi kharayoṣitkarṇakāṣāyamīṣad visṛmaratimirorṇājarjaropāntamarciḥ /
madakalakalaviṅkīkākunāndīkarebhyaḥ kṣitiruhaśikharebhyo bhānumānuccinoti // MSS_2687

ayamapi puruhūtapreyasīmūrdhni pūrṇaḥ kalaśa iva sudhāṃśuḥ sādhurullālasīti /
madanavijayayātrākālavijñāpānāya sphurati jaladhimadhye tāmrapātrīva bhānuḥ // MSS_2688

ayamabhinavameghaśyāmalottuṅgasānur madamukharamayūrīmuktasaṃsaktakekaḥ /
śakuniśabalanīḍānokahasnigdhavarṣmā vitarati bṛhadaśmā parvataḥ prītimakṣṇoḥ // MSS_2689

ayamamṛtanidhānaṃ nāyako'pyoṣadhīnām amṛtamayaśarīraḥ kāntiyukto'pi candraḥ /
bhavati vigataraśmirmaṇḍalaṃ prāpya bhānoḥ parasadananiviṣṭaḥ ko laghutvaṃ na yāti // MSS_2690

ayamamṛtanidhānaṃ nāyako'pyoṣadhīnāṃ śatabhiṣaganuyātaḥ śaṃbhumūrdhāvataṃsaḥ /
virahayati na cainaṃ rājayakṣmā śaśāṅkaṃ hatavidhiparipākaḥ kena vā laṅghanīyaḥ // MSS_2691

ayamayamasāvākarṇyārāt pratidvipaḍiṇḍimaṃ madakaluṣite netre mārjannudastakarārgalaḥ /
agaṇitasṛṇiḥ krodhastabdhāyataśrutipallavaḥ praviśati nṛpasyāntaḥkakṣāṃ javādarimudgaraḥ // MSS_2692

ayamayogivadhūvadhapātakair mramimavāpya divaḥ khalu pātyate /
śitiniśādṛṣadi sphuṭadutpatat- kaṇagaṇādhikatārakitāmbaraḥ // MSS_2693

ayamaravivarebhyaścātakairniṣpatadbhir haribhiracirabhāsāṃ tejasā cānuliptaiḥ /
gatamupari ghanānāṃ vārigarbhodarāṇāṃ piśunayati rathastaṃ śīkaraklinnanemiḥ // MSS_2694

ayamalaghuvisārisphārijihvākalāpo jvalati yadi na madhye vāḍavo havyavāhaḥ /
muhurupacitasāro vāribhirnimnagānāṃ tribhuvanamapi kiṃ na plāvayatyamburāśiḥ // MSS_2695

ayamavasaraḥ saraste salilairupakartumarthināmaniśam /
idamapi ca sulabhamambho bhavati purā jaladharābhyudaye // MSS_2696

ayamavasara upakṛtaye prakṛticalā yāvadasti saṃpadiyam /
vipadi sadābhyudayinyāṃ punarupakartuṃ kuto'vasaraḥ // MSS_2697

ayamavicāritacārutayā saṃsāro bhāti ramaṇīyaḥ /
atra punaḥ paramārthadṛśāṃ na kimapi sāramaṇīyaḥ // MSS_2698

ayamasau gaganāṅgaṇadīpakas taralakālabhujaṃgaśikhāmaṇiḥ /
kṣaṇaviḍambitavāḍavavigrahaḥ patati vārinidhau vidhuro raviḥ // MSS_2699

ayamasau bhagavānuta pāṇḍavaḥ sthitamavāṅmuninā śaśimaulinā /
samadhirūḍhamajena nu jiṣṇunā sviditi vegavaśānmumuhe gaṇaiḥ // MSS_2700

ayamaho rajanīcarakesarī giridarīśayanāt sahasotthitaḥ /
timiravāraṇakumbhavidāraṇoc- chvalitaraktabharairiva lohitaḥ // MSS_2701

ayamātmā svayaṃ sākṣād guṇaratnamahārṇavaḥ /
sarvajñaḥ sarvadṛk sārvaḥ parameṣṭhī nirañjanaḥ // MSS_2702

ayamāndolitaprauḍhacandanadrumapallavaḥ /
utpādayati sarvasya prītiṃ malayamārutaḥ // MSS_2703

ayamālohitacchāyo madena mukhacandramāḥ /
saṃnaddhodayarāgasya candrasya pratigarjati // MSS_2704

ayamiha mugdho madhupaḥ parihṛtasahakāramañjarīpuñjaḥ /
asaralamarasamasāraṃ śākhoṭakaviṭapamanusarati // MSS_2705

ayamudayati kokīśokaśalyairmayūkhaiḥ śatamakhapuranārīnetragaṇḍūṣapeyaḥ /
udayagirimṛgendrodgārabhinnāṅkaraṅku- śravaṇarudhiradhārāpāṭalaḥ pārvaṇenduḥ // MSS_2706

ayamudayati candraścandrikādhautaviśvaḥ pariṇatavimalimni vyomni karpūragauraḥ /
ṛjurajataśalākāspardhibhiryasya pādair jagadamalamṛṇālīpañjarasthaṃ vibhāti // MSS_2707

ayamudayati candro vāridherambugarbhād amṛtakaṇakarālairaṃśubhirdīpyamānaḥ /
bhujagaśayanavakṣoharmyadeśe lalantyā vadanamiva yadṛcchottānitaṃ viśvamātuḥ // MSS_2708

ayamudayati mudrābhañjanaḥ padminīnām udayagirivanālībālamandārapuṣpam /
virahavidhurakokadvandvabandhurvibhindan kupitakapikapolakroḍatāmrastamāṃsi // MSS_2709

ayamudayamahīdhradhāturāgair aruṇakarāruṇitāmbarābhirāmaḥ /
vitarasi na dṛśau kṛśāṅgi tārām iva divi vanditumindurabhyupaiti // MSS_2710

ayamudayamahībhṛnmūrdhni pāṇiṃ gṛhītvā divasapatirahauṣīdindupādān havīṃṣi /
aruṇakiraṇavahnau kanyakā pauruhūtī haridapi kimakārṣīt tārakālājahomam // MSS_2711

ayamudito himaraśmir vanitāvadanasya kīdṛśaḥ sadṛśaḥ /
nīlādikopalambhaḥ sphurati pratyakṣataḥ kasya // MSS_2712

ayamupagatakṛṣṇaḥ kṛṣṇasārākṣipātair yamakṛ(vikasi?)tanavanīlāmbhojavaktraścakāsti /
jalayuvatikucānuprāsitottuṅgakumbha- sthalamadakalagarjannīranāgastaṭākaḥ // MSS_2713

ayamuṣasi vinidradrāviḍītuṅgapīna- stanaparisarasāndrasvedabindūpamardī /
srutamalayajavṛkṣakṣīrasaurabhyasabhyo vahati sakhi bhujaṅgībhuktaśeṣaḥ samīraḥ // MSS_2714

ayamekapade tayā viyogaḥ priyayā copanataḥ suduḥsaho me /
nava vāridharodayādahobhir bhavitavyaṃ ca nirātapatvaramyaiḥ // MSS_2715

ayameko'hameketi jñānaṃ tatsaṃgame na me /
rāga evādhikastatra haridrācūrṇayoriva // MSS_2716

ayameva paro dharmo hyayameva paraṃ tapaḥ /
patiśuśrūṣaṇaṃ yatra tat strīṇāṃ svargahetukam // MSS_2717

ayaśaḥ prāpyate yena yena cādhogatirbhavet /
svārthācca bhraśyate yena tat karma na samācaret // MSS_2718

ayaśasyam anāyuṣyaṃ paradārābhimarśanam /
arthakṣayakaraṃ ghoraṃ pāpasya ca punarbhavam // MSS_2719

ayaśobhidurāloke kopadhāmaraṇādṛte /
ayaśobhidurā loke kopadhā maraṇādṛte // MSS_2720

ayaścaṇakacarvaṇaṃ phaṇiphaṇāmaṇeḥ karṣaṇaṃ kareṇa giritolanaṃ jalanidheḥ padā laṅghanam /
prasuptaharibodhanaṃ niśitakhaṅgasaṃsparśanaṃ kadācidakhilaṃ bhavenna ca śaṭhāddhanasyārjanam // MSS_2721

ayastu kākatuṇḍena carma ārāmukhena hi /
mṛtpiṇḍaṃ ca ghaṭaṃ caiva vidhyet sūcīmukhena hi // MSS_2722

ayācataḥ sīdataśca sarvopāyairnimantraya /
ānṛśaṃsyaṃ paro dharmo'yācate yat pradīyate // MSS_2723

ayācitaḥ sukhaṃ datte yācitaśca na yacchati /
sarvasvaṃ cāpi harate vidhiruccṛṅkhalo nṛṇām // MSS_2724

ayācitāraṃ nahi devadevam adriḥ sutāṃ grāhayituṃ śaśāka /
abhyarthanābhaṅgabhayena sādhur mādhyasthamiṣṭe'pyavalambate'rthe // MSS_2725

ayācito mayā labdho matpreṣitaḥ punargataḥ /
yatrāgatastatra gatas tatra kā parivedanā // MSS_2726

ayācyaṃ caiva yācante'bhojyān vyāhārayanti ca /
utkocairvañcanābhiśca kāryāṇi ghnanti cāsyati // MSS_2727

ayājyayājanaiścaiva nāstikyena ca karmaṇām /
kulānyāśu vinaśyanti yāni hīnāni mantrataḥ // MSS_2728

ayi kaṭhora yaśaḥ kila te priyaṃ kimayaśo nanu ghoramataḥparam /
kimabhavadvipine hariṇīdṛśaḥ kathaya nātha kathaṃ bata manyase // MSS_2729

ayi kānta paśya meghaṃ nahi nahi pāpaṃ tavātipuṇyāyāḥ /
nahi nahi paśya payodharam apasāraya kañcukīmurasaḥ // MSS_2730

ayi kiṃ guṇavati mālati jīvati bhavatīṃ vinā madhupāḥ /
atha yadi jīvati jīvatu jīvanamapi jīvanābhāsaḥ // MSS_2731

ayi kuraṅgi tapovanavibhramād upagatāsi kirātapurīmimām /
iha na paśyasi dāraya māraya grasa pibeti śukānapi jalpataḥ // MSS_2732

ayi kuraṅgi turaṅgamavikrame tyaja vanaṃ javanaṃ gamanaṃ kuru /
iha vane vicaranti hi nāyakāḥ surabhilohitalohitasāyakāḥ // MSS_2733

ayi kulanicūlamūloc- chedanaduḥśīlavīcivācāle /
bakavighasapaṅkasārā na cirāt kāveri bhavitāsi // MSS_2734

ayi kṣudro mābhūn matimahimagarvo manasi vaḥ karī yāto bandhaṃ yadiha vinayastatra vijayī /
ayaṃ krodhādhmātastyajati vinayaṃ cen madavaśāt tataḥ skandhāvāraṃ na kimakhilamevākulayati // MSS_2735

ayi khalu badhirādhirāja kīraṃ tudasi śalākanipātanena mohāt /
aniśamapi sudhānidhānavāṇīṃ racayatu maunamukho'stu vā samaste // MSS_2736

ayi khalu viṣamaḥ purākṛtānāṃ bhavati hi jantuṣu karmaṇāṃ vipākaḥ /
haraśirasi śirāṃsi yāni rejuḥ śiva śiva tāni luṭhanti gṛdhrapādāḥ // MSS_2737

ayi cakitamugdhacātaka marubhuvi dhāvasi mudhā kimudgrīvam /
grīṣme davāgnivalitas tāpiccho'yaṃ na vidyutvān // MSS_2738

ayi cakorakuṭumbini kātare tiraya pakṣapuṭena kuṭumbakam /
bahu gataṃ kiyadapyavaśiṣyate vyapagataṃ timirairuditaḥ śaśī // MSS_2739

ayi cātaka cañcupuṭāt skhalayati jaladodabindumanilaścet /
dvija eva bhāgyahīno jīvanadātā kṛtī jaladaḥ // MSS_2740

ayi citta vittaleśe sahajapremṇā kiyannu lubdhamasi /
na tathāpi tadviyogaḥ kevalamāste śivenāpi // MSS_2741

ayi cetovihaga tvaṃ viṣayāraṇye bhramannasi śrāntaḥ /
viśrāmakāmanā cec chivakalparuhe ciraṃ tiṣṭha // MSS_2742

ayi jalada yadi na dāsyasi katicit tvaṃ cātakāya jalakaṇikāḥ /
tadayamacireṇa bhavitā salilāñjalidānayogyaste // MSS_2743

ayi tyaktāsi kastūri pāmaraiḥ paṅkaśaṅkayā /
alaṃ khedena bhūpālāḥ kiṃ na santi mahītale // MSS_2744

ayi dayite tava vadanaṃ pāyaṃ pāyaṃ manobhavo garjan /
smitamavalambya tamisrāsv api hatakān hanta no hanti // MSS_2745

ayi daladaravinda syandamānaṃ marandaṃ tava kimapi lihanto mañju guñjantu bhṛṅgāḥ /
diśi diśi nirapekṣastāvakīnaṃ vivṛṇvan parimalamayamanyo bāndhavo gandhavāhaḥ // MSS_2746

ayi dīnadayārdranātha he mathurānātha kadāvalokyase /
hṛdayaṃ tvadalokakātaraṃ dayita bhrāmyati kiṃ karomyaham // MSS_2747

ayi durjanagarjitena kiṃ sarale namramukhī viṣīdasi tvam /
paripanthini devakīsute parivādo'pi tapobhirunnataiḥ // MSS_2748

ayi duṣkṛtakena kena vatse halikadvāri lavaṅgi puṣpitāsi /
stabakāstava pāṃsubhiḥ parītāḥ paritaḥ prāṅgaṇasīmni yal luṭhanti // MSS_2749

ayi dūti sakhī tvameva me madano hanti śitaiḥ śilīmukhaiḥ /
dayitaṃ tamupānayāśu tat suśako jīvitanirgamo'nyathā // MSS_2750

ayi nandatanūja kiṃkaraṃ patitaṃ māṃ viṣame bhavāmbudhau /
kṛpayā tava pādapaṅkaja- sthitadhūlīsadṛśaṃ vibhāvaya // MSS_2751

ayi pataṅgi lavaṅgalatāvane piba madhūni vidhūya madhuvratān /
iha vane ca vanecarasaṃkule na ca satāmasātāṃ ca nirūpaṇam // MSS_2752

ayi parāri parunmalayānilā vavuramī jagureva ca kokilāḥ /
kalamalotkalitaṃ tu na me manaḥ sakhi babhūva vṛthaiva yathaiṣamaḥ // MSS_2753

ayi pibata cakorāḥ kṛtsnamunnāmikaṇṭha- kramasaralitacañcaccañcavaścandrikāmbhaḥ /
virahavidhuritānāṃ jīvitatrāṇahetor bhavati hariṇalakṣmā ye na tejodaridraḥ // MSS_2754

ayi bata guru garvaṃ mā sma kastūri yāsīr akhilaparimalānāṃ maulinā saurabheṇa /
girigahanaguhāyāṃ līnamatyantadīnaṃ svajanakamamunaiva prāṇahīnaṃ karoṣi // MSS_2755

ayi makarandasyandini padmini manye tavaiva subhagatvam /
puṣpavatīmapi bhavatīṃ tyajati na vṛddhaḥ śucirhaṃsaḥ // MSS_2756

ayi madana na dagdhastvaṃ kimīśena kopāt kimuta rativiyoge nānvabhūrmūrkha duḥkham /
aviditaparapīḍo yena māmutpalākṣī- rahitamahitapātraiḥ patrivarṣairdunoṣi // MSS_2757

ayi manmathacūtamañjari śravaṇāyatalocane priye /
apahṛtya manaḥ kva yāsi me kimarājakamatra vartate // MSS_2758

ayi mamaiṣa cakoraśiśurmuner vrajati sindhupibasya na śiṣyatām /
aśitumabdhimadhītavato'sya ca śaśikarāḥ pibataḥ kati śīkarāḥ // MSS_2759

ayi malayaja mahimāyaṃ kasya girāmastu viṣayaste /
udgirato yadgaralaṃ phaṇinaḥ puṣṇāsi parimalodgāraiḥ // MSS_2760

ayi mālati saurabhasāravinir- jitasaṃvikasatkamalānilaye /
madhupānavidhau madhupasya punar bhuvane bhavatīmahamākalaye // MSS_2761

ayi mṛgākṣi tavādharapallave dayitadantapadaṃ na bhavatyadaḥ /
bhuvanamohanamantrapadāṅkitaṃ kimuta yantramidaṃ smarayoginaḥ // MSS_2762

ayi roṣamurīkaroṣi no cet kimapi tvāṃ prati vāridhe vadāmaḥ /
jaladena tavārthinā vimuktāny api toyāni mahān na hā jahāsi // MSS_2763

ayi laṅghitamaryāda smara smara harānalam /
dagdhaṃ dagdhumayuktaṃ te janaṃ virahakātaram // MSS_2764

ayi varoru hatasmaradīpike yadi gatāsi madīkṣaṇagocarāt /
asamasāyakasāyakakīlitā vada gamiṣyasi me hṛdayāt katham // MSS_2765

ayi vijahīhi dṛḍhopagūhanaṃ tyaja navasaṃgamabhīru vallabham /
aruṇakarodgama eṣa vartate varatanu saṃpravadanti kukkuṭāḥ // MSS_2766

ayi vidhuṃ paripṛccha guroḥ kutaḥ sphuṭamaśikṣyata dāhavadānyatā /
glapitaśaṃbhugalād garalāt tvayā kimudadhau jaḍa vā vaḍavānalāt // MSS_2767

ayi śākunika kṛto'ñjalir itare na katīha jīvanopāyāḥ /
hatvā śukān kimetad vipinamasārasvataṃ kuruṣe // MSS_2768

ayi saṃprati dehi darśanaṃ smara paryutsuka eṣa mādhavaḥ /
dayitāsvanavasthitaṃ nṛṇāṃ na khalu prema calaṃ suhṛjjane // MSS_2769

ayi saṃprasīda pārvati śivo'pi tava pādayornipatito'ham /
śiva iti kathaṃ hi jalpasi sarudhiragajacarmasaṃvītaḥ // MSS_2770

āyi sakhi kuru kṣipraṃ rambhādalaiḥ śiśirānilaṃ sahacari tanau satkarpūraṃ drutaṃ parilepaya /
sarasabisinīpatraistalpaṃ priye parikalpaya sphuṭamiti vibho tasyā gehe bhavanti kiloktayaḥ // MSS_2771

ayi sakhi niśā kiṃ vā ghasraḥ śaśī kimu bhāskaraḥ sphurati purataḥ kāmaḥ kiṃ vā mamāsti sa vallabhaḥ /
pratipalamiti prāṇādhīśa priyā virahāturā kathayati muhurmandaṃ mandaṃ sakhīṃ savidhasthitām // MSS_2772

ayi sakhi paridoṣo jāyate cumbane kiṃ kimu kucaparirambhe kiṃ rate brūhi tathyam /
itinigadati nāthe dīpamālokayantī hari hari hariṇākṣī hrīsamudre nimagnā // MSS_2773

ayi sakhi mama prāṇādhīśo gato viṣayāntaraṃ kusumaviśikhastasmāduccairdunoti tanuṃ śaraiḥ /
laghu kuru tathā yatnaṃ yena smarādhinivāraṇe paṭutaramatestasyāśu syādihāgamanaṃ tataḥ // MSS_2774

ayi sakhi śastaḥ sakhivat patiriti kiṃ tvaṃ na jānāsi /
śasto'tisakhivadupapatir ityāli kathaṃ tvayāpi nābodhi // MSS_2775

ayi sarasija sāyaṃ saṃnidhānaṃ tvadīyaṃ bhramara upagato'yaṃ cūtamālāṃ vihāya /
anupamamadhulobhād dūrataḥ sāṃprataṃ tad idamanucitametan mudraṇaṃ yanmukhasya // MSS_2776

ayi sarale tāvadimā upadeśagiro viśanti karṇāntaḥ /
yāvannāntarbhūtaṃ taccetasi māmakaṃ cetaḥ // MSS_2777

ayi sutanuśarīre talpamāruhya tūrṇaṃ viracaya mama kaṇṭhe bandhanaṃ bāhuvallyā /
itinigadati nāthe dīpamālokayantī hari hari hariṇākṣī hrīsamudre nimagnā // MSS_2778

ayi sundari tava vadanaṃ nityaṃ pūrṇaṃ sudhānidhirmatvā /
hanta patatyupariṣṭān madhye'mbudhi nityamevāsau // MSS_2779

ayi sundari saṃprati paśya puraś caramācalamastakameti raviḥ /
samupaiti tamaḥpaṭalījaṭilā rajanī kuru kāmakalāḥ sakalāḥ // MSS_2780

ayi svayūthyairaśanikṣatopamaṃ mamādya vṛttāntamimaṃ batoditā /
mukhāni lolākṣi diśāmasaṃśayaṃ daśāpi śūnyāni vilokayiṣyasi // MSS_2781

ayi hastagataiḥ prāṇair amībhiḥ kandukairiva /
aparyantarasaṃ mugdhe kiyat krīḍitumicchasi // MSS_2782

ayi hāralate saṃhara harahuṃkṛtidagdhadehasaṃkṣobham /
sadbhāvajānuraktir nahi ramyā paṇyanārīṇām // MSS_2783

ayi hṛdaya dayāṃ mayi kuru kuraṅganayanāṃ vinā badhāna dhṛtim /
ṭasaditi jhaṭiti sphuṭa vā sphuṭamidamuktaṃ gatirnānyā // MSS_2784

ayuktaṃ bahu bhāṣante yatra kutrāpi śerate /
nagnā vikṣipya gātrāṇi sajjarā iva madyapāḥ // MSS_2785

ayuktaṃ yuktaṃ vā yadabhihitamajñena vibhunā stuyādetannityaṃ jaḍamapi guruṃ tasya vinuyāt /
vivatsurnaiḥspṛhyaṃ kathamapi sabhāyāmabhinayet svakāryaṃ saṃtuṣṭe kṣitibhṛti rahasyeva kathayet // MSS_2786

ayuktaṃ svāmino yuktaṃ yuktaṃ nīcasya dūṣaṇam /
amṛtaṃ rāhave mṛtyur viṣaṃ śaṃkarabhūṣaṇam // MSS_2787

ayuktaḥ prākṛtaḥ stabdhaḥ śaṭho naikṛtiko'lasaḥ /
viṣādī dīrghasūtrī ca kartā tāmasa ucyate // MSS_2788

ayuktacāraṃ durdarśam asvādhīnaṃ narādhipam /
varjayanti narā dūrān nadīpaṅkamiva dvipāḥ // MSS_2789

ayuktarūpaṃ kimataḥparaṃ bhavet trinetravakṣaḥ sulabhaṃ tavāpi yat /
stanadvaye'smin haricandanāspade padaṃ citābhasmarajaḥ kariṣyati // MSS_2790

ayutaṃ niyutaṃ vāpi pradiśantu prākṛtāya bhogāya /
krīṇanti na bilvadalaiḥ kaivalyaṃ paccaṣairmūḍhāḥ // MSS_2791

ayudhyamānasyotpādya brāhmaṇasyāsṛgaṅgataḥ /
duḥkhaṃ sumahadāpnoti pretyāprājñatayā naraḥ // MSS_2792

aye kīraśreṇīparivṛḍha vṛthā vāsaraśataṃ tarorasya skandhe gamayati phalāśārabhasataḥ /
yadā puṣpārambhe mukhamalinimā kiṃśukataros tadaivābhijñātaṃ phaliparicayo durlabha itaḥ // MSS_2793

aye keyaṃ dhanyā dhavalagṛhavātāyanagatā tulākoṭikvāṇairviṣamaviśikhaṃ jāgarayati /
purā yā prāṇeśe gatavati kṛtā puṣpadhanuṣā śarāsārai rātriṃdivamakṛpamujjāgarakṛśā // MSS_2794

aye keyaṃ līlādhavalagṛhavātāyanatale tulākoṭikvāṇaiḥ kusumadhanuṣaṃ jāgarayati /
aho netradvandvaṃ vilasati vilaṅghya śrutipathaṃ kathaṃ na trailokyaṃ jayati madanaḥ smeravadanaḥ // MSS_2795

aye kelīgṛhastambha kiṃ kṛtaṃ sukṛtaṃ tvayā /
paryaṅke vallabhaṃ tyaktvā tvāmāliṅgati māninī // MSS_2796

aye ko jānīte nijapuruṣasaṅgo hi na tathā yathā cetaḥ strīṇāṃ parapuruṣasaṅgo ramayate /
api svairaṃ bhuktā divasamakhilaṃ vāsarakṛtā karasparśādindormukulayati netrāṇi nalinī // MSS_2797

aye ko'yaṃ vṛddho gṛhaparivṛḍhaḥ kiṃ tava pitā na me bhartā kiṃtu vyapagatadṛganyacca badhiraḥ /
huhuṃ śrānto'dyāhaṃ śiśayiṣurihaivāpavarake kva yāminyāṃ yāmi svapimi nanu nirdaṃśamaśake // MSS_2798

aye jaladhinandinīnayananīrajālambana- jvalajjvalanajitvarajvarabharatvarābhaṅguram /
prabhātajalajonnamadgarimagarvasarvaṃkaṣair jagattritayarocanaiḥ śiśirayāśu māṃ locanaiḥ // MSS_2799

aye tāla vrīḍāṃ vraja gurutayā bhāti na bhavān phale na cchāyā no kaṭhinaparivāro hi bhavataḥ /
iyaṃ dhanyā dhanyā saralakadalī sundaradalā parātmānaṃ manye sukhayati phalenāmṛtavatā // MSS_2800

aye diṣṭyā naṣṭo mama gṛhapiśācīparicayaḥ parāvṛttaṃ mohāt sphurati ca manāg brahmaṇi manaḥ /
vikāro'pyakṣāṇāṃ galita iva nirbhāti viṣayāt tathāpi kṣetrajñaḥ spṛhayati vanāya prati muhuḥ // MSS_2801

aye dūrabhrāntaṃ viṣayaviṣamāraṇyavipathe paribhrāntaṃ ceto mama vidhuritaṃ svairamadhunā /
nirāvarte nitye sthiraniravadhānabhramamaye vivekaprabhraśyadvikṛtiparamānandajaladhau // MSS_2802

aye nīlagrīva kva kathaya sakhe te'dya munayaḥ paraṃ toṣaṃ yeṣāṃ tava varavilāso vitanute /
amī dūrāt krūrāḥ kvaṇitamidamākarṇya sahasā tvarante hantuṃ tvāmahaha śabarāḥ puṅkhitaśarāḥ // MSS_2803

aye nṛpatimaṇḍalīmukuṭaratna yuṣmadbhujā- mahoṣmatatisaṃjuṣā bata bhavatpratāpārciṣā /
dviṣāmatibhṛśaṃ yaśaḥ prakaṭapārado dhmāpanād udusphuṭata tārakāḥ kapaṭato vihāyastaṭe // MSS_2804

aye pāthovāha sthagaya kakubho'nyāstata itas tyajaitāṃ sīmānaṃ vasati munirasyāṃ kalaśabhūḥ /
udañcatkope'smin sa jaladhirapi sthāsyati na te yataḥ pāyaṃ pāyaṃ salilamiha śauryaṃ prathayasi // MSS_2805

aye madhupa mā kṛthā bata vṛthā manodīnatāṃ tuṣārasamaye latāśataniṣevaṇavyākulaḥ /
iyaṃ purata eva te sarasapuṣpamāsodaye rasālanavamañjarī madhujharī jarījṛmbhate // MSS_2806

aye mamodāsitameva jihvayā dvaye'pi tasminnanatiprayojane /
garau giraḥ pallavanārthalāghave mitaṃ ca sāraṃ ca vaco hi vāgmitā // MSS_2807

aye mātardṛṣṭvā mukhamamṛtabhānubhramavaśāt kacacchadmā rāhurvasati kimu tṛṣṇātaralitaḥ /
kimevaṃ kandarpāntakataruṇi sindūrasaraṇic- chalādbhoktuṃ bhūyo bahiriva rasajñāṃ kalayati // MSS_2808

aye mātastātaḥ kva gata iti yadvairiśiśunā darīgehe līnā nibhṛtamiha pṛṣṭā svajananī /
kareṇāsyaṃ tasya drutamatha niruddhyāśrubhṛtayā viniḥśvasya sphāraṃ śiva śiva dṛśaivottarayati // MSS_2809

aye muktāratna prasara bahiruddyotaya gṛhān api kṣoṇīndrāṇāṃ kuru phalavataḥ svānapi guṇān /
kimatraivātmānaṃ jarayasi mudhā śuktikuhare mahāgambhīro'yaṃ jaladhiriha kastvāṃ gaṇayati // MSS_2810

aye yadi samīhase parapurāvarodhaṃ prabho tadākalaya madvacaḥ kimapi darpanārāyaṇa /
pratīpanṛpanāgarīnayananīrakallolinī- samuttaraṇacāturīṃ turagarājimadhyāpaya // MSS_2811

aye lājā uccaiḥ pathi vacanamākarṇya gṛhiṇī śiśoḥ karṇau yatnāt supihitavatī dīnavadanā /
mayi kṣīṇopāye yadakṛta dṛśāvaśrubahule tadantaḥśalyaṃ me tvamasi punaruddhartumucitaḥ // MSS_2812

aye vāpīhaṃsā nijavasatisaṃkocapiśunaṃ kurudhvaṃ mā ceto viyati calato vīkṣya vihagān /
amī te sāraṅgā bhuvanamahanīyavratabhṛtāṃ nirīhāṇāṃyeṣāṃ tṛṇamiva bhavantyambunidhayaḥ // MSS_2813

aye vārāṃ rāśe katipayapayobinduvibhavair amībhirmā garvaṃ vaha niravalepā hi kṛtinaḥ /
na kiṃ lopāmudrāsahacarakarakroḍakuhare bhavān dṛṣṭaḥ kaṣṭaṃ pracalajalajantuvyatikaraḥ // MSS_2814

aye vārāṃ rāśe kuliśakarakopapratibhayād ayaṃ pakṣapremṇā giripatisutastvāmupagataḥ /
tvadantarvāstavyo yadi punarayaṃ vāḍavaśikhī pradīptaḥ pratyaṅgaṃ glapayati tataḥ ko'sya śaraṇam // MSS_2815

aye sudhākairaviṇi vyadhāyi mudhā sudhādhāmani bandhubhāvaḥ /
janāpavādaḥ paritaḥ prayātaḥ samāgamo hanta na jātu jātaḥ // MSS_2816

aye'stamayate śaśī nahi kṛśībhavatyāgraho vinaśyati tamo haṭhaṃ kimaṇumapyapāste manaḥ /
sakhi prakaṭito'ruṇo na karuṇodayaste manāk prayāti khalu yāminī na vimanīkṛthā nāyakam // MSS_2817

aye svargaḥ svargaḥ katidivasamārgaḥ pravasatāṃ purastuṅgau syātāṃ yadi na kucakumbhau mṛgadṛśaḥ /
ayācaṃ pātheyaṃ sulabha[mubhayaṃ] mūlaphalayoḥ payaḥ sthāne sthāne pathi pathi ca viśrāmataravaḥ // MSS_2818

aye helāvelātulitakulaśaile jalanidhau kuto vārāmoghaṃ bata jalada moghaṃ vitarasi /
samantāduttālajvaladanalakīlākavalana- klamopetānetānupacara payobhirviṭapinaḥ // MSS_2819

ayogajāmanvabhavaṃ na vedanāṃ hitāya me'bhūdiyamunmadiṣṇutā /
udeti doṣādapi doṣalāghavaṃ kṛśatvamajñānavaśādivainasaḥ // MSS_2820

ayogyavastubharaṇāt bhajedyogyo'pi duṣṭatām /
rakṣaṇāyendradattāsiṃ vahan vyādho'bhavanmuniḥ // MSS_2821

ayodhyāmaṭavībhūtāṃ pitrā bhrātrā ca varjitām /
pipāsārto'nudhāvāmi kṣīṇatoyāṃ nadīmiva // MSS_2822

ayyayi sāhasakāriṇi kiṃ tava caṅkramaṇena /
ṭasaditi bhaṅgamavāpsyasi kucayugabhārabhareṇa //
arakte na sukhaṃ vetti nārakto duḥkhamaśnute /
duḥkhānāṃ ca sukhānāṃ ca rakta evāspadaṃ sadā // MSS_2823

arakṣitaṃ tiṣṭhati daivarakṣitaṃ surakṣitaṃ daivahataṃ vinaśyati /
jīvatyanātho'pi vane visarjitaḥ kṛtaprayatno'pi gṛhe na jīvati // MSS_2824

arakṣitaṃ bhavet satyaṃ daivaṃ tameva rakṣati /
daivena nāśitaṃ yattu tasya rakṣā na dṛśyate // MSS_2825

arakṣitā gṛhe ruddhāḥ puruṣairāptakāribhiḥ /
ātmānamātmanā yāstu rakṣeyustāḥ surakṣitāḥ // MSS_2826

arakṣitāraṃ rājānaṃ baliṣaḍbhāgahāriṇam /
tamāhuḥ sarvalokasya samagramalahārakam // MSS_2827

arakṣyamānāḥ kurvanti yatkiṃcit kilviṣaṃ prajāḥ /
tasmāttu nṛpaterardhaṃ yasmād gṛhṇātyasau karān // MSS_2828

araṇyaṃ rakṣitaṃ siṃhāt tasmāt siṃhaḥ surakṣitaḥ /
ityanyonyasyopakāre mitratvaṃ tannibandhanam // MSS_2829

araṇyaṃ sāraṅgairgirikuharagarbhāśca haribhir diśo diṅmātaṅgaiḥ salilamuṣitaṃ paṅkajavanaiḥ /
priyācakṣurmadhyastanavadanasaundaryavijitaiḥ satāṃ māne mlāne maraṇamathavā dūragamanam // MSS_2830

araṇyabījāñjalidānalālitās tathā ca tasyāṃ hariṇā viśaśvasuḥ /
yathā tadīyairnayanaiḥ kutūhalāt puraḥ sakhīnāmamimīta locane // MSS_2831

araṇyaruditaṃ kṛtaṃ śavaśarīramudvartitaṃ sthale'bjamavaropitaṃ suciramūṣare varṣitam /
śvapucchamavanāmitaṃ badhirakarṇajāpaḥ kṛtaḥ kṛtāndhamukhamaṇḍanā yadabudho janaḥ sevitaḥ // MSS_2832

araṇyahariṇagrāmam ācakrāma hutāśanaḥ /
indoḥ kroḍamṛgaṃ dhartum iva dhūmo nabho yayau // MSS_2833

araṇyānī kveyaṃ dhṛtakanakasūtraḥ kva ca mṛgaḥ kva muktāhāro'yaṃ kva ca sa patagaḥ kveyamabalā /
kva tatkanyāratnaṃ lalitamahibhartuḥ kva ca vayaṃ svamākūtaṃ dhātā kimapi nibhṛtaṃ pallavayati // MSS_2834

araṇye puṣpitā vṛkṣā dūrasthāne ca bāndhavāḥ /
samṛddhenāpi kiṃ tena yaḥ kāle nopatiṣṭhati // MSS_2835

aratiriyamupaiti māṃ na nidrā gaṇayati tasya guṇān mano na doṣān /
vigalati rajanī na saṃgamāśā vrajati tanustanutāṃ na cānurāgaḥ // MSS_2836

aratnālokasaṃhāryam avāryaṃ sūryaraśmibhiḥ /
dṛṣṭirodhakaraṃ yūnāṃ yauvanaprabhavaṃ tamaḥ // MSS_2837

arayo'pi hi mitratvaṃ yānti daṇḍavato dhruvam /
daṇḍaprāyo hi nṛpatir bhunaktyākramya medinīm // MSS_2838

arayo'pi hi saṃdheyāḥ sati kāryārthagaurave /
ahimūṣakavad devā hyarthasya padavīṃ gataiḥ // MSS_2839

aralūvṛkṣapatrāṇāṃ lepo gomukharogahṛt /
gonāsasaṃbhavaḥ kṣāro hanti puṣpaṃ cirodbhavam // MSS_2840

aravindamidaṃ vīkṣya khelatkhañjanamañjulam /
smarāmi vadanaṃ tasyāś cāru cañcalalocanam // MSS_2841

aravindavṛndamakarandatundilo marudeti mandamiha mandarācalāt /
suratāntatāntasudatīmatallikā- kabarīparīmalajharī parīvṛtaḥ // MSS_2842

aravindeṣu kundeṣu ramitaṃ kālayogataḥ /
aye mākanda jānīhi tavaivāyaṃ madhuvrataḥ // MSS_2843

araśmi bimbaṃ sūryasya vahniṃ caivāṃśumālinam /
dṛṣṭvaikādaśamāsāttu naro norddhvaṃ tu jīvati // MSS_2844

arasāpi hi vāg bhāti proktāvasara eva hi /
sarvacittapramodāya gālidānaṃ karagrahe // MSS_2845

arasikajanabhāṣaṇato rasikajanaiḥ saha varaṃ kalahaḥ /
lambakucāliṅganato likucakucāpādatāḍanaṃ śreyaḥ // MSS_2846

arājake jīvaloke durbalā balavattaraiḥ /
bādhyante na ca vitteṣu prabhutvamiha kasyacit // MSS_2847

arājake tu loke'smiṃs tasmād rājā vidhīyatām /
rājā rājye ciraṃ rakṣāṃ kṛtvā svargamavāpnuyāt // MSS_2848

arājakeṣu rāṣṭreṣu dharmo na hyavatiṣṭhate /
parasparaṃ ca bādhante sarvathā dhigarājakam // MSS_2849

arājake hi loke'smin sarvato vidrute bhayāt /
rakṣārthamasya sarvasya rājānamasṛjat prabhuḥ // MSS_2850

arātibhiryudhi sahayudhvano hatāñ jighūkṣavaḥ śrutaraṇatūryaniḥsvanāḥ /
akurvata prathamasamāgamocitaṃ cirojjhitaṃ suragaṇikāḥ prasādhanam // MSS_2851

arātivikramālokavikasvaravilocanaḥ /
kṛpāṇodagradordaṇḍaḥ sa sahasrāyudhīyati // MSS_2852

arālakeśyā alake vidhātrā vidhīyamāne calatūlikāgrāt /
cyutasya bindorasitasya mārga- rekheva reje navaromarājī // MSS_2853

arāvapyucitaṃ kāryam ātithyaṃ gṛhamāgate /
chettumapyāgate chāyāṃ nopasaṃharate drumaḥ // MSS_2854

ariṃ mitramudāsīnaṃ madhyasthaṃ sthaviraṃ gurum /
yo na budhyati mandātmā sa ca sarvatra naśyati // MSS_2855

ariṇā saha saṃvāsād viṣeṇa saha bhojanāt /
pāpmanā saha sauhārdān maraṇaṃ pratipadyate // MSS_2856

arito'bhyāgato doṣaḥ śatrusaṃvāsakāritaḥ /
sarpasaṃvāsadharmitvān nityodvegena dūṣitaḥ // MSS_2857

jāyate plakṣabījāśāt kapotādiva śālmaleḥ /
udvegajanano nityaṃ paścādapi bhayāvahaḥ // MSS_2858

aripakṣāśrite mitre marmavedipriyaṃvade /
viśvāso naiva kartavyaḥ yadi sākṣād bṛhaspatiḥ // MSS_2859

aribhirjitairaśaktair vijñāpyaṃ sevakaiḥ prabhornītiḥ /
viṣayairjito'smi śaṃbho tava yacchlāghyaṃ tadāracaya // MSS_2860

arivadhadehaśarīraḥ sahasā rathisūtaturagapādātaḥ /
bhāti sadānatyāgaḥ sthiratāyāmavanitalatilakaḥ // MSS_2861

ariśca mitraṃ bhavati mitraṃ cāpi praduṣyati /
anityacittaḥ puruṣas tasmin ko nāma viśvaset // MSS_2862

ariṣaṅvarga evāyam asyāstāta padāni ṣaṭ /
teṣāmekamapi cchindan khañjaya bhramarīṃ śriyam // MSS_2863

ariṣṭāni mahārāja śṛṇu vakṣyāmi tāni te /
yeṣāmālokanān mṛtyuḥ nijaṃ jānāti yogavit // MSS_2864

aruṃtudaṃ paruṣaṃ rūkṣavācaṃ vākkaṇṭakairvitudantaṃ manuṣyān /
vidyādalakṣmīkatamaṃ janānāṃ mukhe nibaddhāṃ nirṛtiṃ vahantam // MSS_2865

arucirniśayā vinā śaśī śaśinā sāpi vinā mahattamaḥ /
ubheyena vinā manobhava- sphuritaṃ naiva cakāsti kāminoḥ // MSS_2866

aruṇakiraṇajālairantarikṣe gatarkṣe calati śiśiravāte mandamandaṃ prabhāte /
yuvatijanakadambe nāthamuktauṣṭhabimbe caramagirinitambe candrabimbaṃ lalambe // MSS_2867

aruṇakiraṇe vahnau lājānuḍūni juhoti yā pariṇayati tāṃ saṃdhyāmetāmavaimi maṇirdivaḥ /
iyamiva sa evāgnibhrāntiṃ karoti purāyataḥ karamapi na kastasyaivotkaḥ sakautukamīkṣitum // MSS_2868

aruṇajalajarājīmugdhahastāgrapādā bahulamadhupamālākajjalendīvarākṣī /
anupatati virāvaiḥ patriṇāṃ vyāharantī rajanimacirajātā pūrvasaṃdhyā suteva // MSS_2869

aruṇadalanalinyā snigdhapādāravindā kaṭhinatanudharaṇyāṃ yātyakasmāt skhalantī /
avani tava suteyaṃpādavinyāsadeśe tyaja nija kaṭhinatvaṃ jānakī yātyaraṇyam // MSS_2870

aruṇanayanaṃ sabhrūbhaṅgaṃ darasphuritādharaṃ sutanu śaśinaḥ kliṣṭāṃ kāntiṃ karotu tavānanam /
kṛtamanunayaiḥ kopo'yaṃ te manasvini vardhatām iti gaditayāśliṣṭo devyā śivāya śivo'stu vaḥ // MSS_2871

aruṇamapi vidrumadruṃ mṛdulataraṃ cāpi kisalayaṃ bāle /
adharīkaroti nitarāṃ tavādharo madhurimātiśayāt // MSS_2872

aruṇarāganiṣedhibhiraṃśukaiḥ śravaṇalabdhapadaiśca yavāṅkuraiḥ /
parabhṛtāvirutaiśca vilāsinaḥ smarabalairabalaikarasāḥ kṛtāḥ // MSS_2873

aruṇitākhilaśailavanā muhur vidadhatī pathikān paritāpinaḥ /
vikacakiṃśukasaṃhatiruccakair udavahaddavahavyavahaśriyam // MSS_2874

aruṇe ca taruṇi nayane tava malinaṃ ca priyasya mukham /
mukhamānataṃ ca sakhite jvalitaścāsyāntare smarajvalanaḥ // MSS_2875

aruṇodayavelāyāṃ daśāhena phalaṃ labhet /
govisarjanavelāyāṃ sadyaḥ phalada iṣyate // MSS_2876

arundhatīkāmapuraṃdhrilakṣmī- jambhadviṣaddāranavāmbikānām /
caturdaśīyaṃ tadihocitaiva gulphadvayāptā yadadṛśyasiddhiḥ // MSS_2877

aruṣyan kruśyamānasya sukṛtaṃ nāma vindati /
duṣkṛtaṃ cātmano marṣī ruṣyatyevāpamārṣṭi vai // MSS_2878

arūpo'pi surūpo'pi āḍhyo'pi dravyavarjitaḥ /
duḥśīlaḥ śīlayukto vā strīṇāṃ bhartādhidevatā // MSS_2879

are cetomatsya bhramaṇamadhunā yauvanajale tyaja tvaṃ svacchandaṃ yuvatijaladhau paśyasi na kim /
tanūjālījālaṃ stanayugalatumbīphalayutaṃ manobhūḥ kaivartaḥ kṣipati ratitantu pratimuhuḥ // MSS_2880

are daiva tvadāyattaṃ kāmaṃ vittādi gacchatu /
mamāyattaṃ punarvṛttaṃ hartuṃ kasyeha yogyatā // MSS_2881

are yamabhaṭāḥ śaṭhāḥ kapaṭavigrahe tūdbhaṭā nivedayata vo yamaṃ na ca tavādhikāro mayi /
ahaṃ ca śivasundarīcaraṇayugmapaṅkeruha- skhalanmadhusudhārasaṃ samapibaṃ na jānītha re // MSS_2882

are rāmāhastābharaṇa bhasalaśreṇiśaraṇa smarakrīḍāvrīḍāśamana virahiprāṇadamana /
sarohaṃsottaṃsa pracaladala nīlotpala sakhe sakhedo'haṃ mohaṃ ślathaya kathaya kvenduvadana // MSS_2883

are vada harernāma kṣemadhāma kṣaṇe kṣaṇe /
bahiḥ sarati niḥśvāse viśvāsaḥ kaḥ pravartate // MSS_2884

araiḥ saṃdhāryate nābhir nābhau cārāḥ pratiṣṭhitāḥ /
svāmisevakayorevaṃ vṛtticakraṃ pravartate // MSS_2885

arodi madhupairbhṛśaṃ kamalamālayā mīlitaṃ vyakampi jalavīcibhirvidalitaṃ mukhaṃ kairavaiḥ /
vilokya rajanau hrade virahikokaśokaṃ ghanaṃ paravyasanakātarāḥ kimiva kurvate sādhavaḥ // MSS_2886

arkakarpāsayormūlaṃ jalapītaṃ jayedviṣam /
paṭolamūlanasyena kāladaṣṭo'pi jīvati // MSS_2887

arkacchāyaṃ tirayati sudhāliptavidyunmatallī cakraprakhyaṃ mahati suṣamāmaṇḍale dūramagnam /
raktādarśapratiphalamiva śrīsadaṅgaṃ vahantī dṛṣṭā kācit taralanayanā devateva smarasya // MSS_2888

arkāḥ kiṃ phalasaṃcayena bhavatāṃ kiṃ vaḥ prasūnairnavaiḥ kiṃ vā bhūrilatācayena mahatā gotreṇa kiṃ bhūyasā /
yeṣāmekatamo babhūva sa punarnaivāsti kaścit kule chāyāyāmupaviśya yasya pathikāstṛptiṃ phalaiḥ kurvate // MSS_2889

arkāḥ kecana kecidakṣataravaḥ keciddalakṣmāruhāḥ nimbāḥ kecana kecidatra vipine krūrāḥ karīradrumāḥ /
mākando makarandatundilamiladbhṛṅgāliśṛṅgāritaḥ ko'pyatrāsti na mitra yatra tanute karṇāmṛtaṃ kokilaḥ // MSS_2890

arkābhimukhyasalilasthitisādhanāni raktāmbujasya phalitānyadhunā tapāṃsi /
yadbhīru tasya paribhūtikaraṃ padaṃ tvaṃ lākṣārasāntaritarāgamidaṃ karoṣi // MSS_2891

arghāyāmbudhirindumaṇḍalamapi śrīcandanaṃ taṇḍulās tārā bilvadalaṃ nabhaḥsuradhunī dhūpaḥ pradīpo raviḥ /
kheṭāḥ pañcaphalāni kiṃ ca kakubhastāmbūlamārātrikaṃ meruḥ śrījagatīpate tava yaśoyogeśvarasyārcane // MSS_2892

arghyaṃ dattvātha devāya bhāskarāya samāhitaḥ /
tato'laṃkṛtagātraḥ san vṛttamālokya mantravat // MSS_2893

arghyamarghyamiti vādinaṃ nṛpaṃ so'navekṣya bharatāgrajo yataḥ /
kṣatrakopadahanārciṣaṃ tataḥ saṃdadhe dṛśamudagratārakām // MSS_2894

arcakasya tapoyogād arcanasyātiśāyanāt /
ābhirūpyācca mūrtīnāṃ devaḥ sāṃnidhyamṛcchati // MSS_2895

arcāmaḥ satataṃ gaṇādhipamathāpyākhūn nihanmaḥ śataṃ dhyāyāmo hṛdi bhairavaṃ tadapi tu protsārayāmaḥ śunaḥ /
bhūteśaṃ praṇumastathāpi śataśo bhūtān nigṛhṇīmahe nahyekasya guṇaḥ parasya mahato doṣānapi prorṇute // MSS_2896

arcāmīti dhiyā yadeva kusumaṃ kṣiptvā jano mucyate vidhyāmīti dhiyā tadeva vikiran bhasmīkṛto manmathaḥ /
ityābhyantaravṛttimātrarasiko bāhyānapekṣaśca yaḥ sa svāmī mama daivataṃ taditaro nāmnāpi nāmnāyate // MSS_2897

arcirmālākarālāddivamabhilihato dāvavahneradūrād uḍḍīyoḍḍīya kiṃcicchalabhakavalanānandamandapracārāḥ /
agre'gre saṃraṭantaḥ pracurataramasīpātadurlakṣadhūmrā dhūmyāṭāḥ paryaṭanti prativiṭapamamī niṣṭhurāḥ svasthalīṣu // MSS_2898

arciṣmanti vidārya vaktrakuharāṇyāsṛkkaṇo vāsukes tarjanyā viṣakarburān gaṇayataḥ saṃspṛśya dantāṅkurān /
ekaṃ trīṇi navāṣṭa sapta ṣaḍiti vyastāstasaṃkhyākramā vācaḥ śaktidharasya śaiśavakalāḥ kurvantu vo maṅgalam // MSS_2899

arcye viṣṇau śilādhīrguruṣu naramatirvaiṣṇave jātibuddhir viṣṇorvā vaiṣṇavānāṃ kalimalamathane pādatīrthe'mbubuddhiḥ /
śrīviṣṇornāmni mantre sakalakaluṣahe śabdasāmānyabuddhir viṣṇau sarveśvareśe taditarasamadhīryasya vā nārakī saḥ // MSS_2900

arjayejjñānamarthāṃśca pumānamaravat sadā /
keśeṣviva gṛhītaḥ san mṛtyunā dharmamācaret // MSS_2901

arjitaṃ svena vīryeṇa nānyamāśritya kaṃcana /
phalaśākamapi śreyo bhoktuṃ hyakṛpaṇaṃ gṛhe // MSS_2902

parasya nu gṛhe bhoktuḥ paribhūtasya nityaśaḥ /
sumṛṣṭamapi na śreyo vikalpo'yamataḥ satām // MSS_2903

arjunaḥ kṛṣṇasaṃyuktaḥ karṇaṃ yatrānudhāvati /
tannetraṃ tu kurukṣetram iti mugdhe mṛśāmahe // MSS_2904

arjunaḥ phalgunaḥ pārthaḥ kirīṭī śvetavāhanaḥ /
bībhatsurvijayī kṛṣṇaḥ savyasācī dhanaṃjayaḥ // MSS_2905

arjunasya ime bāṇā neme bāṇāḥ śikhaṇḍinaḥ /
sīdanti mama gātrāṇi māghamā segavā iva // MSS_2906

arjunasya pratijñe dve na dainyaṃ na palāyanam /
āyū rakṣati marmāṇi āyurannaṃ prayacchati // MSS_2907

arjunānte varārohe bhīmānte ca varānane /
pāṇḍavaiḥ saha yoddhavyaṃ rakṣaṇīyo dhanaṃjayaḥ // MSS_2908

arjunīyati yadarjane jano varjanīyajanatarjanādibhiḥ /
maṅkṣu naśyati cirāya saṃcitā vañcitā jagati ke na saṃpadā // MSS_2909

arthaṃ dhigastu bahuvairikaraṃ narāṇāṃ rājyaṃ dhigastu bhayadaṃ bahu cintanīyam /
svargaṃ dhigastu punarāgamanapravṛttiṃ dhig dhik śarīramapi rogasamāśrayaṃ ca // MSS_2910

arthaṃ mahāntamāsādya vidyāmaiśvaryameva vā /
vicaratyasamunnaddho yaḥ sa paṇḍita ucyate // MSS_2911

arthaṃ sapratibandhaṃ prabhuradhigantuṃ sahāyavāneva /
dṛśyaṃ tamasi na paśyati dīpena vinā sacakṣurapi // MSS_2912

arthaḥ kāmo dharmo mokṣaḥ sarve bhavanti puruṣasya /
tāvadyāvat pīḍāṃ jāṭharavahnirna vidadhāti // MSS_2913

arthaḥ sukhaṃ kīrtirapīha mā bhūd anartha evāstu tathāpi dhīrāḥ /
nijapratijñāmanurudhyamānā mahodyamāḥ karmasamārabhante // MSS_2914

artha eva hi keṣāṃcid anartho bhavitā nṛṇām /
arthaśreyasi cāsakto na śreyo vindate naraḥ // MSS_2915

arthagrahaṇe na tathā dunoti kaṭukūjitairyathā piśunaḥ /
rudhirādānādadhikaṃ dunoti karṇe kvaṇan maśakaḥ // MSS_2916

arthajñāt saṃśayacchettā tataḥ śreyān svakarmakṛt /
muktasaṅgastato bhūyān adogdhā dharmamātmanaḥ // MSS_2917

arthatyāgo hi kāryaḥ syād arthaṃ śreyāṃsamicchatā /
bījaupamyena kaunteya mā te bhūdatra saṃśayaḥ // MSS_2918

arthadharmau parityajya yaḥ kāmamanuvartate /
evamāpadyate kṣipraṃ rājā daśaratho yathā // MSS_2919

arthanāśaṃ manastāpaṃ gṛhe duścaritāni ca /
vañcanaṃ cāpamānaṃ ca matimān na prakāśayet // MSS_2920

arthapatau bhūmipatau bāle vṛddhe tapo'dhike viduṣi /
yoṣiti mūrkhe guruṣu ca viduṣā naivottaraṃ deyam // MSS_2921

arthapraśnakṛtau loke sulabhau tau gṛhe gṛhe /
dātā cottaradaścaiva durlabhau puruṣau bhuvi // MSS_2922

arthaprāṇavināśasaṃśayakarīṃ prāpyāpadaṃ dustarāṃ pratyāsannabhayo na vetti vibhavaṃ svaṃ jīvitaṃ kāṅkṣati /
uttīrṇastu tato dhanārthamaparāṃ bhūyo viśatyāpadaṃ prāṇānāṃ ca dhanasya cādhamadhiyāmanyonyahetuḥ paṇaḥ // MSS_2923

arthapriyatayātmānam apriyāya dadāti yā /
kāmātmanyapi niḥsnehāṃ ko'nurakteti manyate // MSS_2924

arthamanarthaṃ bhāvaya nityaṃ nāsti tataḥ sukhaleśaḥ satyam /
putrādapi dhanabhājāṃ bhītiḥ sarvatraiṣā vihitā rītiḥ // MSS_2925

arthayuktasya karaṇam anarthasya ca varjanam /
nyāyataśca karādānaṃ svayaṃ ca pratimokṣaṇam // MSS_2926

arthayuktimavijñāya yaḥ śubhe kurute matim /
mitre vā yadi vā śatrau tasyāpi calitā matiḥ // MSS_2927

arthayedeva mitrāṇi sati vāsati vā dhane /
nānarthayan vijānāti mitrāṇāṃ sāraphalgutām // MSS_2928

artharakṣāparo bhṛtyaḥ kṛtyākṛtyavivekavit /
sāndhivigrahikaḥ kāryo rājñā nayaviśāradaḥ // MSS_2929

arthavantaḥ praśasyante nindyante tadvinākṛtāḥ /
āgemeṣvapi cedevam adbhutaṃ kiṃ śarīriṣu // MSS_2930

arthavānarthamarthibhyo na dadātyatra ko guṇaḥ /
ekaiva gatirarthasya dānamanyā vipattayaḥ // MSS_2931

arthavāneva loke'smin pūjyate mitrabāndhavaiḥ /
arthahīnastu puruṣo jīvannapi mṛtopamaḥ // MSS_2932

arthavān duṣkulīno'pi loke pūjyatamo naraḥ /
śaśinastulyavaṃśo'pi nirdhanaḥ paribhūyate // MSS_2933

arthaścet sarvathā rakṣya iti kaiścidudāhṛtam /
tatkathaṃ na hariścandro'rakṣat kuśikanandane // MSS_2934

dharmastu rakṣitaḥ sarvair api dehavyayena ca /
śibiprabhṛtibhūpālair dadhīcipramukhairdvijaiḥ // MSS_2935

arthasaṃpadvimohāya bahuśokāya caiva hi /
tasmādarthamanarthakyaṃ śreyo'rthī dūratastyajet // MSS_2936

arthasaṃpādanārthaṃ ca pīḍyamānasya śatrubhiḥ /
sādhuṣu vyapadeśārthaṃ dvividhaḥ saṃśrayaḥ smṛtaḥ // MSS_2937

arthasiddhiṃ parāmicchan dharmamevāditaścaret /
nahi dharmādapaityarthaḥ svargalokādivāmṛtam // MSS_2938

arthasya niścayo dṛṣṭo vicāreṇa hitoktitaḥ /
na snānena na dānena prāṇāyāmaśatena vā // MSS_2939

arthasya puruṣo dāsaḥ sa ca jātu na kasyacit /
yadarjanaparā loke sarve'pi bhuvanatraye // MSS_2940

arthasya puruṣo dāso dāsastvartho na kasyacit /
iti satyaṃ mahārāja baddho'smyarthena kauravaiḥ // MSS_2941

arthasya mūlaṃ prakṛtirnayaśca dharmasya kāruṇyamakaitavaṃ ca /
kāmasya vittaṃ ca vapurvayaśca mokṣasya sarvārthanivṛttireva // MSS_2942

arthasya saṃgrahe caināṃ vyaye caiva niyojayet /
śauce dharme'nnapaktyāṃ ca pāriṇāhyasya cekṣaṇe // MSS_2943

arthasya sadotthānaṃ niyamaparīpālanaṃ kriyājñānam /
sthānatyāgaḥ paṭutā- 'nudvegaḥ strīṣvaviśvāsaḥ // MSS_2944

arthasya sādhane siddha utkarṣe rakṣaṇe vyaye /
nāśopabhoga āyāsas trāsaścintā bhramo nṛṇām // MSS_2945

arthasyānarthapūrṇasya ko'vasīdatu saṃgrahe /
tatsaṃtuṣṭairnnacediṣṭair duṣṭaiḥ syānnayanotsavaḥ // MSS_2946

arthasyopārjanaṃ kaṣṭaṃ kaṣṭamasya gṛhāgamaḥ /
tasyāgatasya bandhubhyo viniyogaḥ sukhāvahaḥ // MSS_2947

arthasyopārjanaṃ kṛtvā naivābhāgyaḥ samaśnute /
araṇyaṃ mahadāsādya mūḍhaḥ somilako yathā // MSS_2948

arthasyopārjane duḥkhaṃ pālane ca kṣaye tathā /
nāśe duḥkhaṃ vyaye duḥkhaṃ ghnanti caivārthakāraṇāt // MSS_2949

arthahīno'pi madhuraḥ śabdo lokapriyaṃkaraḥ /
vīṇāveṇumṛdaṅgādīny atrodāharaṇāni naḥ // MSS_2950

arthāṃśca durlabhāṃlloke kleśāṃśca sulabhāṃstathā /
duḥkhaṃ caiva kuṭumbārthe yaḥ paśyati sa mucyate // MSS_2951

arthāṃstyajata pātrebhyaḥ sutān prāpnuta kāmajān /
priyaṃ priyebhyaścarata rājā hi tvarate jaye // MSS_2952

arthāḥ khalu samṛddhā hi bāḍhaṃ duḥkhaṃ vijānatām /
asamṛddhāstvapi sadā mohayantyavicakṣaṇān // MSS_2953

arthāḥ pādarajopamā girinadīvegopamaṃ yauvanaṃ mānuṣyaṃ jalabindulolacapalaṃ phenopamaṃ jīvanam /
dharmaṃ yo na karoti niścalamatiḥ svargārgalodghāṭanaṃ paścāttāpahato jarāpariṇataḥ śokāgninā dahyate // MSS_2954

arthāḥ sādhāraṇā eva viyujyante svabhāvataḥ /
mamatāṃ tyajatāṃ teṣu mahadutpadyate yaśaḥ // MSS_2955

arthākṛṣṭadhiyaḥ padaṃ racayataḥ śabdāvadhānātmanaḥ saṃdhicchedavidhānanirgamavidhivyāpāramātanvataḥ /
mā māṃ kaścidiha grahīditi muhuḥ sāśaṅkamāpaśyataś caurasyeva kaverbhayaṃ bhavati yattadvidviṣāmastu vaḥ // MSS_2956

arthāgamo nityamarogitā ca priyā ca bhāryā priyavādinī ca /
vaśyaśca putro'rthakarī ca vidyā ṣaḍ jīvalokasya sukhāni rājan // MSS_2957

arthā gṛhe nivartante śmaśāne caiva bāndhavāḥ /
sukṛtaṃ duṣkṛtaṃ cāpi gacchantamanugacchati // MSS_2958

arthāturāṇāṃ na suhṛn na bandhuḥ kāmāturāṇāṃ na bhayaṃ na lajjā /
vidyāturāṇāṃ na sukhaṃ na nidrā kṣudhāturāṇāṃ na vapurna tejaḥ // MSS_2959

arthāt palāyate jñānaṃ mārjārānmūṣiko yathā /
vakavat jñāyatāmarthaḥ siṃhavacca jayedripum // MSS_2960

arthā duḥkhaṃ parityaktuṃ pālitāścāpi te'sukhāḥ /
duḥkhena cādhigamyante teṣāṃ nāśaṃ na cintayet // MSS_2961

arthāddharmaśca kāmaśca svargaścaiva narādhipa /
prāṇayātrā hi lokasya vinārthaṃ na prasidhyati // MSS_2962

arthād bhraṣṭastīrthayātrāṃ tu gacchet satyād mraṣṭo rauravaṃ vai vrajecca /
yogād bhraṣṭaḥ satyadhṛtiṃ ca gacched rājyād bhraṣṭo mṛgayāyāṃ vrajecca // MSS_2963

arthānarthāntare buddhir niścitāpi na śobhate /
ghātayanti hi karyāṇi dūtāḥ paṇḍitamāninaḥ // MSS_2964

arthānarthau viniścitya vyavasāyaṃ bhajeta ha /
guṇataḥ saṃgrahaṃ kuryād doṣatastu visarjayet // MSS_2965

arthā na santi na ca muñcati māṃ durāśā tyāge ratiṃ vahati durlalitaṃ mano me /
yācñā ca lāghavakarī svavadhe ca pāpaṃ prāṇāḥ svayaṃ vrajata kiṃ paridevanena // MSS_2966

arthā na syuryadi vijahimo dharmamarthaikasādhyaṃ kāyakleśaiḥ katikatividhaḥ sādhanīyo na dharmaḥ /
kāyaḥ śrānto yadi bhavati kastāvatā dharmalopaś cittaṃ dattvā sakṛdiva śive cintitaṃ sādhayāmaḥ // MSS_2967

arthānāmadhikānāṃ rājñā caureṇa vā nāśaḥ /
anne khalvatibhukte vamanaṃ vā syādvireko vā // MSS_2968

arthānāmananuṣṭhātā kāmacārī vikatthanaḥ /
api sarvāṃ mahīṃ labdhvā kṣiprameva vinaśyati // MSS_2969

arthānāmarjanaṃ kāryaṃ vardhanaṃ rakṣaṇaṃ tathā /
bhakṣyamāṇo nirādāyaḥ sumerurapi hīyate // MSS_2970

arthānāmarjane duḥkham arjitānāṃ ca rakṣaṇe /
nāśe duḥkhaṃ vyaye duḥkhaṃ dhigarthāḥ kaṣṭasaṃśrayāḥ // MSS_2971

arthānāmārjanaṃ kāryaṃ vardhanaṃ rakṣaṇaṃ tathā /
bhakṣyamāṇo nirādāyaḥ kṣīyate himavānapi // MSS_2972

arthānāmīśiṣe tvaṃ vayamapi ca girāmīśmahe yāvaditthaṃ śūras tvaṃ vāgmidarpajvaraśamanavidhāvakṣayaṃ pāṭavaṃ naḥ /
sevante tvāṃ dhanāndhā matimalahataye māmapi śrotukāmā mayyapyāsthā na te cet tvayi mama sutarāmeṣa rājan gato'smi // MSS_2973

arthānāmīśvaro yaḥ syād indriyāṇāmanīśvaraḥ /
indriyāṇāmanaiśvaryād aiśvaryād bhraśyate hi saḥ // MSS_2974

arthānāharato'narthāḥ samāyānti pramādinaḥ /
apramattastato mārge nityamevāstu vittavān // MSS_2975

arthānulāpān vrajasundarīṇām akṛtrimāṇāṃ ca sarasvatīnām /
ārdrāśayena śravaṇāñcalena saṃbhāvayantaṃ taruṇaṃ gṛṇīmaḥ // MSS_2976

arthān kecidupāsate kṛpaṇavat kecit tvalaṃkurvate veśyāvat khalu dhātuvādina ivodbadhnanti kecid rasān /
arthālaṃkṛtisadrasadravamucāṃ vācāṃ praśastispṛśāṃ kartāraḥ kavayo bhavanti katicit puṇyairagaṇyairiha // MSS_2977

arthān brūyān na cāsatsu guṇān brūyān na cātmanaḥ /
ādadyān na ca sādhubhyo nāsatpuruṣamāśrayet // MSS_2978

arthā bhāgyodaye jantuṃ viśanti śataśaḥ svayam /
digbhyo'bhyupetya sarvābhyaḥ sāyaṃ tarumivāṇḍajāḥ // MSS_2979

arthābhāve tu yajjñānaṃ pratyakṣamiva dṛśyate /
gandharvanagarākāraṃ svapnaṃ tadupalakṣayet // MSS_2980

arthābhāve mṛdutā kāṭhinyaṃ bhavati cārthabāhulye /
naikatrārthamṛdutve prāyaḥ śloke ca loke ca // MSS_2981

arthārthinā priyā eva śrīharṣodīritā giraḥ /
sārasvate tu saubhāgye prasiddhā tadviruddhatā // MSS_2982

arthārthinī devapūjāspapnopaśrutitatparā /
sadā gaṇakagehaṃ sā praṣṭuṃ yāti grahasthitim // MSS_2983

arthārthī jīvaloko'yaṃ jvalantamupasarpati /
kṣīṇakṣīrāṃ nirājīvyāṃ vatsastyajati mātaram // MSS_2984

arthārthī jīvaloko'yaṃ śmaśānamapi sevate /
janitāramapi tyaktvā niḥsvaṃ gacchati dūrataḥ // MSS_2985

arthārthī yāni kaṣṭāni mūḍho'yaṃ sahate janaḥ /
śatāṃśenāpi mokṣārthī tāni cen mokṣamāpnuyāt // MSS_2986

arthārthī yāni kaṣṭāni sahate kṛpaṇo janaḥ /
tānyeva yadi dharmārthī na bhūyaḥ kleśabhājanam // MSS_2987

arthālābhe'pi mahati svādhyāyaṃ na samutsṛjet /
kulānyakulatāṃ yānti svādhyāyasya vivarjanāt // MSS_2988

arthāharaṇakauśalyaṃ kiṃ stumaḥ śāstravādinām /
avyayebhyo'pi ye cārthān niṣkarṣanti sahasraśaḥ // MSS_2989

arthā hasantyucitadānavihīnacittaṃ bhūmirnaraṃ ca mama bhūmiriti bruvāṇam /
jārā hasanti tanayānupalālayantaṃ mṛtyurhasatyavanipaṃ raṇaraṅgabhīrum // MSS_2990

arthiko vyādhito mūrkhaḥ pravāsī parasevakaḥ /
jīvanto'pi mṛtāḥ pañca pañcaite dukhabhāginaḥ // MSS_2991

arthitā vibhavastyāgaḥ svātantryamucitajñatā /
iti pañcaguṇopatem āśrayedāśrayaṃ naraḥ // MSS_2992

arthitve prakaṭīkṛte'pi na phalaprāptiḥ prabhoḥ pratyuta druhyan dāśarathirviruddhacarito yuktastayā kanyayā /
utkarṣaṃ ca parasya mānayaśasorvisraṃsanaṃ cātmanaḥ strīratnaṃ ca jagatpatirdaśamukho dṛptaḥ kathaṃ mṛṣyate // MSS_2993

arthinastvaritadānena tṛptirbhavati yādṛśī /
bahudānaṃ vilambena na tādṛk tṛptikārakam // MSS_2994

arthināṃ kṛpaṇā dṛṣṭis tvanmukhe patitā sakṛt /
tadavasthā punardeva nānyasya mukhamīkṣate // MSS_2995

arthināṃ mitravargasya vidviṣāṃ ca parāṅmukhaḥ /
yo na yāti pitā tena putrī mātā ca vīrasūḥ // MSS_2996

arthināmupapannānāṃ pūrvaṃ cāpyupakāriṇām /
āśāṃ saṃśrutya yo hanti sa loke puruṣādhamaḥ // MSS_2997

arthini kavayati kavayati paṭhati ca paṭhati stavonmukhe stauti /
paścādyāmītyukte maunī dṛṣṭiṃ nimīlayati // MSS_2998

arthine na tṛṇavaddhanamātraṃ kiṃ tu jīvanamapi pratipādyam /
evamāha kuśavajjaladāpī dravyadānavidhiruktividagdhaḥ // MSS_2999

arthino jaṭharajvālādagdhā vāk kaṃcidañcati /
tāṃ cāśamayato vittaṃ kinnimittaṃ na vidmahe // MSS_3000

arthipratyarthilakṣairapy aparāṅmukhacetasam /
tvāṃ parāṅmukhatāṃ ninyuḥ kevalaṃ parayoṣitaḥ // MSS_3001

arthibhuktāvaśiṣṭaṃ yat tadaśnīyān mahāśayaḥ /
śveto'rthirahitaṃ bhuktvā nijamāṃsāśano'bhavat // MSS_3002

arthibhyaḥ kanakasya dīpakapiśā viśrāṇitā rāśayo vāde vādiviṣāṇināṃ pratihatāḥ śāstroktigarvā giraḥ /
utkhātapratiropitairnṛpatibhiḥ śārairiva krīḍitaṃ kartavyaṃ kṛtamarthitā yadi vidhestatrāpi sajjā vayam // MSS_3003

arthibhyaśca dviṣadbhyaśca vaimukhyaṃ yasya nāstyasau /
mahodāraḥ sadā śāntaḥ kṛtajñaḥ ko'pi durlabhaḥ // MSS_3004

arthibhraṃśabahūbhavatphalabharavyājena kubjāyitaḥ satyasminnatidānabhāji kathamapyāstāṃ sa kalpadrumaḥ /
āste nirvyayaratnasaṃpadudayodagraḥ kathaṃ yācaka- śreṇīvarjanaduryaśonibiḍitavrīḍastu ratnācalaḥ // MSS_3005

arthī karoti dainyaṃ labdhārtho garvamaparitoṣaṃ ca /
naṣṭadhanaśca saśokaḥ sukhamāste niḥspṛhaḥ puruṣaḥ // MSS_3006

arthī yenārthakṛtyena saṃvrajatyavicārayan /
tamarthamarthaśāstrajñāḥ prāhurarthyāśca lakṣmaṇa // MSS_3007

arthī lāghavamucchrito nipatanaṃ kāmāturo lāñchanaṃ lubdho'kīrtimasaṃgaraḥ paribhavaṃ duṣṭo'nyadoṣe ratim /
niḥsvo vañcanamunmanā vikalatāṃ śokākulaḥ saṃśayaṃ durvāgapriyatāṃ durodaravaśaḥ prāpnoti kaṣṭaṃ muhuḥ // MSS_3008

arthena kiṃ kṛpaṇahastagatena tena rūpeṇa kiṃ guṇaparākramavarjitena /
mitreṇa kiṃ vyasanakālaparāṅmukhena jñānena kiṃ bahuśaṭhādhikamatsareṇa // MSS_3009

arthena parihīṇaṃ tu naramaspṛśyatāṃ gatam /
tyajanti bāndhavāḥ sarve mṛtaṃ sattvamivāsavaḥ // MSS_3010

arthena rakṣitamidaṃ rājyaṃ punararthamarpayati /
arthaikaparo nṛpatiḥ pariharati punaḥ kṣaṇādubhayam // MSS_3011

arthena hi vihīnasya puruṣasyālpamedhasaḥ /
vyucchidyante kriyāḥ sarvā grīṣme kusarito yathā // MSS_3012

arthena hīnaḥ puruṣas tyajyate mitrabāndhavaiḥ /
tyaktalokakriyāhāraḥ parāsuriva niṣprabhaḥ // MSS_3013

arthenāpi hi kiṃ tena yasyānarthe tu saṃgatiḥ /
ko hi nāma śikhājātaṃ pannagasya maṇiṃ haret // MSS_3014

arthenopārjyate dharmo dharmeṇārtha upārjyate /
anyonyāśrayaṇaṃ hyetad ubhayotpattisādhanam // MSS_3015

arthendriyārthābhidhyānaṃ sarvārthāpahnavo nṛṇām /
bhraṃśito jñānavijñānād yenāviśati mukhyatām // MSS_3016

arthe pratyupalabdhe ca paradoṣe ca kīrtite /
ātmānaṃ sādhu kartavyaṃ śīlavṛttamabhīpsitam // MSS_3017

arthebhyo hi vivṛttebhyaḥ saṃbhṛtebhyastatastataḥ /
kriyāḥ sarvāḥ pravartante parvatebhya ivāpagāḥ // MSS_3018

artheṣu kāmamupalabhya manoratho me strīṇāṃ dhaneṣvanucitaṃ praṇayaṃ karoti /
māne ca kāryakaraṇe ca vilambamāno dhig bhoḥ kulaṃ ca puruṣasya daridratāṃ ca // MSS_3019

artheṣvalabhyeṣvakṛtaprayatnaṃ kṛtādaraṃ nityamupāyavatsu /
jitendriyaṃ nānutapanti rogās tatkālayuktaṃ yadi nāsti daivam // MSS_3020

arthe hyavidyamāne'pi saṃsṛtirna nivartate /
dhyāyato viṣayānasya svapne'narthāgamo yathā // MSS_3021

arthairanekairjananīmamuṣyāś cittaṃ ca dattvā cirakālacintyam /
saṃtoṣayeyaṃ sahasaiva bhadre na cet kathaṃ syād iha naḥ praveśaḥ // MSS_3022

arthairarthā nibaghyante gajairiva mahāgajāḥ /
na hyanarthavatā śakyaṃ vāṇijyaṃ kartumīhayā // MSS_3023

arthairvihīnaḥ puruṣo jīvannapi mṛtopamaḥ /
dharmārthavidyārjanato matiryasya nivartate // MSS_3024

artho girāmapihitaḥ pihitaśca kaścit saubhāgyameti marahaṭṭavadhūkucābhaḥ /
nāndhrīpayodhara ivātitarāṃ prakāśo no gurjarīstana ivātitarāṃ nigūḍhaḥ // MSS_3025

arthotkaṇṭhāvakuṇṭhapramuṣitavinayairluṭhyatāṃ nākiśuṇṭhaiḥ pratno ratnoccayaḥ kiṃ tvativiṣamadaśāṃ tāmanudhyāya khidye /
sindho manthādrimanthāt taralatarabṛhadbhaṅgasaṃghātaghāta- prabhraśyanmūlavelāgirigaṇapatanoddāmadhāmandhamīkā // MSS_3026

artho narāṇāṃ patiraṅganānāṃ varṣā nadīnāmṛturāṭ tarūṇām /
svadharmacārī nṛpatiḥ prajānāṃ gataṃ gataṃ yauvanamānayanti // MSS_3027

artho na saṃbhṛtaḥ kaścin na vidyā kācidarjitā /
na tapaḥ saṃcitaṃ kiṃcid gataṃ ca sakalaṃ vayaḥ // MSS_3028

artho nāma janānāṃ jīvitamakhilakriyākalāpaśca /
tamapi harantyatidhūrtāḥ chagalagalā gāyanā loke // MSS_3029

arthopacayavijñānam asti yasya sa paṇḍitaḥ /
saraḥ salilasaṃpūrṇam āśrayanti vihaṅgamāḥ // MSS_3030

arthopārjanadakṣaśca kṣāntiśīlaḥ sadā bhavet /
na tatra parakāryāṇi vidvānāpi viśeṣayet // MSS_3031

artho'pyarthena cet sādhyaḥ kā vārtā dharmakāmayoḥ /
arthaḥ sarvajaganmūlam anartho'rthaviparyayaḥ // MSS_3032

artho vinaivārthanayopasīdan nālpo'pi dhīrairavadhīraṇīyaḥ /
mānyena manye vidhinā vitīrṇaḥ sa prītidāyo bahu mantumarhaḥ // MSS_3033

arthoṣmā pitṛlālanaṃ viṭaghaṭāmelaḥ priyaṃmanyatā tāruṇyaṃ nagare sthitistaralatā dhīḥ kāmaśāstraṃ prati /
saṃgītaṃ rajanī vidhurmadhumadaḥ spardhā sapatnaistathā veśyānāmanuraktavittaharaṇe kurvanti sāhāyakam // MSS_3034

artho'sti cenna padaśuddhirathāsti sāpi no rītirasti yadi sā ghaṭanā kutastyā /
sāpyasti cenna navavakragatistadetad vyarthaṃ vinā rasamaho gahanaṃ kavitvam // MSS_3035

artho hi kanyā parakīya eva tāmadya saṃpreṣya parigrahītuḥ /
jāto mamāyaṃ viśadaḥ prakāmaṃ pratyarpitanyāsa ivāntarātmā // MSS_3036

artho hi naṣṭakāryārthair ayatnenādhigamyate /
utsāho balavānārya nāstyutsāhāt paraṃ balam // MSS_3037

arthaucityavatā sūktir alaṃkāreṇa śobhate /
pīnastanasthiteneva hāreṇa hariṇekṣaṇā // MSS_3038

ardhaṃ kalaṅkarahitā karuṇaiva śaṃbhor ardhaṃ guṇāstaditare sakalāḥ sametāḥ /
ityamba saṃprati kila sphuritaṃ rahasyaṃ saṃpaśyato mama bhavanmayamaiśamardham // MSS_3039

ardhaṃ jitaṃ tripuramamba tava smitaṃ ced ardhāntareṇa ca tathā bhavitavyameva /
taccintaye janani kāraṇasūkṣmarūpa- sthūlātmakatripuraśāntikṛte smitaṃ te // MSS_3040

ardhaṃ dantacchadasya sphurati japavaśādardhamapyutprakopād ekaḥ pāṇiḥ praṇantuṃ śirasi kṛtapadaḥ kṣeptumanyastameva /
ekaṃ dhyānānnimīlatyaparamavikasadvīkṣate netramitthaṃ tulyānicchāvidhitsā tanuravatu sa vo yasya saṃdhyāvidhāne // MSS_3041

ardhaṃ dānavavairiṇā girijayāpyardhaṃ śivasyāhṛtaṃ devetthaṃ jagatītale puraharābhāve samunmīlati /
gaṅgā sāgaramambaraṃ śaśikalā nāgādhipaḥ kṣmātalaṃ sarvajñatvamadhīśvaratvamagamat tvāṃ māṃ tu bhikṣāṭanam // MSS_3042

ardhaṃ nītvā niśāyāḥ sarabhasasuratāyāsasaṃśleṣayogaiḥ prodbhūtāsahyatṛṣṇo madhumadanirato harmyapṛṣṭhe vivikte /
saṃbhogaklāntakāntāśithilabhujalatāvarjitaṃ karkarīto jyotsnābhinnācchadhāraṃ na pibati salilaṃ śāradaṃ mandabhāgyaḥ // MSS_3043

ardhaṃ premanibaddhamardhamaparaṃ lajjāśritaṃ mānasaṃ evaṃ netrasaroruhaṃ priyamukhe cānyad gavākṣe'rpitam /
paryaṅke padamekameva dharaṇau pṛṣṭhe ca kṛtvāparaṃ sthātuṃ gantumapi prabhātasamaye śaknoti naivābalā // MSS_3044

ardhaṃ bhāryā manuṣyasya bhāryā śreṣṭhatamaḥ sakhā /
bhāryā mūlaṃ trivargasya bhāryā mitraṃ mariṣyataḥ // MSS_3045

ardhaṃ sajjanasaṃparkād avidyāyā vinaśyati /
caturbhāgastu śāstrārthaiś caturbhāgaṃ svayatnataḥ // MSS_3046

ardhaṃ striyastribhuvane sacarācare'sminn ardhaṃ pumāṃsa iti darśayituṃ bhavatyā /
strīpuṃsalakṣaṇamidaṃ vapurādṛtaṃ yat tenāsi devi viditā trijagaccharīrā // MSS_3047

ardhacandraṃ ca cakraṃ ca śakaṭaṃ makaraṃ tathā /
kamalaṃ śreṇikāṃ gulmaṃ vyūhānevaṃ prakalpayet // MSS_3048

ardhacandravadākāraṃ strīnāmārthaṃ ca tryakṣaram /
nakārādi rikārāntaṃ yo jānāti sa paṇḍitaḥ // MSS_3049

ardhacandrasamāyuktaṃ puṃnāma caturakṣaram /
kakārādi lakārāntam iha jānāti paṇḍitaḥ // MSS_3050

ardhacandrākṛtiryasmin khaṅge svābhāvikī bhavet /
api doṣasahasrāṇi hanti candrastamo yathā // MSS_3051

ardhapañcamahastaṃ tu śreṣṭhaṃ cāpaṃ prakīrtitam /
tadvijñeyaṃ dhanurdivyaṃ śaṃkareṇa dhṛtaṃ purā // MSS_3052

ardhapītamadirā maṇipārī śobhatāṃ kathamatīva taruṇyāḥ /
cumbitairadhikapāṭalabhāsā pūritādharamayūkhabhareṇa // MSS_3053

ardhapītastanaṃ mātur āmardākliṣṭakesaram /
prakrīḍituṃ siṃhaśiśuṃ balātkāreṇa karṣati // MSS_3054

ardhapuruṣe ca matsyaḥ pārāvatasaṃnibhaśca pāṣāṇaḥ /
mṛdbhavati tatra nīlā dīrghaṃ kālaṃ ca bahutoyam // MSS_3055

ardhaprothasthitā rekhā dṛśyante yasya vājinaḥ /
tasya mṛtyuḥ samuddiṣṭo daśamaṃ prāpya vatsaram // MSS_3056

ardhapluṣṭaṃ bahubhyaḥ śavapiśitamupāhṛtya hṛṣṭaścitābhyo jātagrāsātirekaḥ sphuṭataradhamanīnaddhaśuṣkārdrakāyaḥ /
pretaḥ saṃtarjya dṛṣṭyā kuṭilaparuṣayā majjaniṣkarṣaśuṣkair āhantyāhāralubdhānmuhurabhipatato jambukānasthikhaṇḍaiḥ // MSS_3057

ardhamīlitavilolatārake sā dṛśau nidhuvanaklamālasā /
yanmuhūrtamavahanna tatpunas tṛptirāsta dayitasya paśyataḥ // MSS_3058

tatklamastamadidīkṣata kṣaṇaṃ tālavṛntacalanāya nāyakam /
tadvidhā hi bhavadaivataṃ priyā vedhaso'pi vidadhāti cāpalam // MSS_3059

ardharātre dinasyārdhe tvardhacandre'rdhabhāskare /
rāvaṇena hṛtā sītā kṛṣṇapakṣe sitāṣṭamī // MSS_3060

ardhasiddheṣu kāryeṣu ātmaguhyaṃ prakāśayet /
sa eva nidhanaṃ yāti bakaḥ karkaṭakādyathā // MSS_3061

ardhasmitena vinimantrya daśārdhabāṇam ardhaṃ vidhūya vasanāñcalamardhamārge /
ardhena netraviśikhena nivṛtya sārdham ardhārdhameva taruṇī taruṇaṃ cakāra // MSS_3062

ardhahastena hīnastu bhavenmadhyasturaṅgamaḥ /
tato hastena hīnaśca hīna eva smṛto hayaḥ // MSS_3063

ardhāṅganāpuṃvapuṣaḥ purārer mūrttiḥ śriyaṃ nauriva vastanotu /
premātibhārādaparaṃ yadardhaṃ mamajja śṛṅgārarasāmburāśau // MSS_3064

ardhāṅgāhitapaurvakīrtivanitādīvyatsitāṃśuprabhaṃ kailāsīkṛtadikkarīndraśirasi nyastasvapādāmbujam /
viśvavyāpyavināśi śaṃkarapadaṃ yāyāttvadīyaṃ yaśo na syādasya yadi kṣitīśa bhavato dānādikebhyo janiḥ // MSS_3065

ardhāṅgulaparīṇāhajihvāgrāyāsabhīravaḥ /
sarvāṅgakleśajananam abudhāḥ karma kurvate // MSS_3066

ardhācitā satvaramutthitāyāḥ pade pade durnimite galantī /
kasyāścidāsīd raśanā tadānīm aṅguṣṭhamūlārpitasūtraśeṣā // MSS_3067

ardhādhītāśca yairvedās tathā śūdrānnabhojanāḥ /
te dvijāḥ kiṃ kariṣyanti nirviṣā iva pannagāḥ // MSS_3068

ardhāsane samadhiropya suradvipasya śakro'pi yadyudhi śacīṃ kavacīkaroti /
dhīrasya tasya sahate daśakandharasya kaḥ sāhasaikarasikaḥ karavāladhārām // MSS_3069

ardhena jaladaśyāmam ardhenātapapiṅgalam /
ardhanārīśvarākāraṃ na ko manyeta vāsaram // MSS_3070

ardhokte bhayamāgato'si kimidaṃ kaṇṭhaśca kiṃ gadgadaś cāṭorasya na ca kṣaṇo'yamanupakṣipteyamāstāṃ kathā /
brūhi prastutamastu saṃprati mahat karṇe sakhīnāṃ mukhais tṛptirnirbharamebhirakṣarapadaiḥ prāgeva me saṃbhṛtā // MSS_3071

ardhodgatena kadalī mṛdutāmratalena garbhakoṣeṇa /
pibati nidāghajvaritā ghanadhārāṃ karapuṭenaiva // MSS_3072

ardhonmīlitalocanasya pibataḥ paryāptamekaṃ stanaṃ sadyaḥ prasnutadugdhadigdhamaparaṃ hastena saṃmārjataḥ /
mātrā cāṅgulilālitasya vadane smerāyamāne muhur viṣṇoḥ kṣīrakaṇorudhāmadhavalā dantadyutiḥ pātu vaḥ // MSS_3073

arpayati pratidivasaṃ priyasya pathi locane bālā /
nikṣipati kamalamālāḥ komalamiva kartumadhvānam // MSS_3074

arpayantyarthine prāṇān na praṇāmamarātaye /
na nāstītyuttaraṃ jātu suhṛde sumanojanāḥ // MSS_3075

arpitaṃ rasitavatyapi nāma- grāhamanyayuvaterdayitena /
ujjhati sma madamapyapibantī vīkṣya madyamitarā tu mamāda // MSS_3076

arpitāḥ prathamatastvayi gāvo gopaśāvaka iti praṇayena /
dīyate punaridaṃ dhanahīnair vetanaṃ garuḍaketana cetaḥ // MSS_3077

arvāgabhyetya garvādiva saridavarā seyamityuddidhīrṣāḥ kālindīṃ kopavegākalitahalahaṭhotkṣepiṇaḥ kṣemahetuḥ /
tālāṅkasyāśu dālārasavivaśahṛdaḥ sraṃsadaṃsottarīyaṃ tiryagvyastāḍghri bhūyaḥ suvalanamatha laghūtthānamādhāvanaṃ tat // MSS_3078

arvācīnavacaḥ prapañcasukhināṃ duḥśikṣitānāṃ puro gambhīraṃ kavipuṅgavasya kimaho sarvasvamuddhāṭyate /
vyarthaṃ kardamagandhagauravahṛtagrāmīṇagoṣṭhīmukhe ko'yaṃ nāma sacetano'sti ya iha prastauti kastūrikām // MSS_3079

arvāñcatpañcaśākhaḥ sphuraduparijaṭāmaṇḍalaḥ saṃśritānāṃ nityāparṇo'pi tāpatritayamapanayan sthāṇuravyādapūrvaḥ /
yaḥ pronmīlatkapardaiḥ śirasi viracitābālabandhe dyusindhoḥ pāthobhirlabdhasekaḥ phalati phalaśataṃ vāñchitaṃ bhaktibhājām // MSS_3080

alaṃkaroti yaḥ ślokaṃ śuka eva na madhyamaḥ /
alaṃ karoti yaḥ ślokaṃ śuka eva namadhyamaḥ // MSS_3081

alaṃkaroti hi jarā rājāmātyabhiṣagyatīn /
viḍambayati paṇyastrīmallagāyanasevakān // MSS_3082

alaṃkartuṃ karṇau bhṛśamanubhavantyā navarujaṃ sasītkāraṃ tiryagvalitavadanāyā mṛgadṛśaḥ /
karābjavyāpārānatisukṛtasārān rasayato januḥ sarvaślāghyaṃ jayati lalitottaṃsa bhavataḥ // MSS_3083

alaṃkāraḥ śaṅkākaranarakapālaṃ parijano viśīrṇāṅgo bhṛṅgī vasu ca vṛṣa eko bahuvayāḥ /
avastheyaṃ sthāṇorapi bhavati sarvāmaraguror vidhau vakre mūrdhni sthitavati vayaṃ ke punaramī // MSS_3084

alaṃkārapriyo viṣṇur jaladhārāpriyaḥ śivaḥ /
namaskārapriyo bhānur brāhmaṇo bhojanapriyaḥ // MSS_3085

alaṃkārabhṛto rītimantaḥ siddhā rasonnatau /
lakṣaṇairlakṣitātmānaḥ kṛtino nanu kecana // MSS_3086

alaṃkāro hi nārīṇāṃ kṣamā tu puruṣasya vā /
duṣkaraṃ tacca vaḥ kṣāntaṃ tridaśeṣu viśeṣataḥ // MSS_3087

yādṛśī vaḥ kṣamā putryaḥ sarvāsāmaviśeṣataḥ /
kṣamā dānaṃ kṣamā yajñaḥ kṣamā satyaṃ ca putrikāḥ // MSS_3088

kṣamā yaśaḥ kṣamā dharmaḥ kṣamāyāṃ viṣṭhitaṃ jagat // MSS_3089

alaṃkṛtaḥ kāñcanakoṭimūlyair mahārharatnairgajavājivāhaiḥ /
nimeṣamātraṃ labhate na jīvaṃ kālena kāle śikhayā gṛhītaḥ // MSS_3090

alaṃkriyante śikhinaḥ kekayā madaraktayā /
vācā vipaścito'tyarthaṃ mādhuryaguṇayuktayā // MSS_3091

alaṃkriyā śaktisamanvitānāṃ tapodhanānāṃ balaśaktiragryā /
vyāpādadāvānalavāridhārā pratyeha ca kṣāntiranarthaśāntiḥ // MSS_3092

alaṃ tridivavārtayā kimiti sārvabhaumaśriyā vidūrataravartinī bhavatu mokṣalakṣmīrapi /
kalindagirinandinītaṭanikuñjapuñjodare mano harati kevalaṃ navatamālanīlaṃ mahaḥ // MSS_3093

alaṃ nalaṃ roddhumamī kilābhavan guṇā vivekapramukhā na cāpalam /
smaraḥ sa ratyāmaniruddhameva yat sṛjatyayaṃ sarganisarga īdṛśaḥ // MSS_3094

alaṃ parigraheṇeha doṣavān hi parigrahaḥ /
kṛmirhi kośakārastu badhyate svaparigrahāt // MSS_3095

alaṃ vā bahu yo brūte hitavākyāvamāninaḥ /
sa tasmāllabhate doṣaṃ kapeḥ sūcīmukho yathā // MSS_3096

alaṃ vā bahuvādena yatra yatrānurajyase /
tatra tatraiva te duḥkhadāvapāvakapaṅktayaḥ // MSS_3097

alaṃ vilaṅghya priyavijña yācñāṃ kṛtvāpi vāmyaṃ vividhaṃ vidheye /
yaśaḥpathādāśravatāpadotthāt khalu skhalitvāstakhaloktikhelāt // MSS_3098

alaṃ vilambya tvarituṃ hi velā kārye kila sthairyasahe vicāraḥ /
gurūpadeśaṃ pratibheva tīkṣṇā pratīkṣate jātu na kālamartiḥ // MSS_3099

alaṃ vivādena yathā śrutaṃ tvayā tathāvidhastāvadaśeṣamastu saḥ /
mamātra bhāvaikarasaṃ manaḥ sthitaṃ na kāmavṛttirvacanīyamīkṣate // MSS_3100

alaṃ sthitvā śmaśāne'smin gṛdhragomāyusaṃkule /
kaṅkālabahule ghore sarvaprāṇibhayaṃkare // MSS_3101

na punarjīvitaḥ kaścit kāladharmamupāgataḥ /
priyo vā yadi vā dveṣyaḥ prāṇināṃ gatirīdṛśī // MSS_3102

alaṃ himānīparidīrṇagātraḥ samāpitaḥ phālgunasaṃgamena /
atyantamākāṅkṣitakṛṣṇavartmā bhīṣmo mahātmājani māghatulyaḥ // MSS_3103

alakatamaḥ paripītaṃ susmitasuṣamāpuraskṛtaṃ madhuram /
ko na sudhānidhisahajaṃ sumukhi mukhaṃ hanta saṃmanutām // MSS_3104

alakāśca khalāścaiva mūrdhni bhīrujanairdhṛtāḥ /
uparyupari satkāre'pyāviṣkurvanti vakratām // MSS_3105

alakeṣu cūrṇabhāsaḥ svedalavābhān kapolaphalakeṣu /
navaghanakautukinīnāṃ vārikaṇān paśyati kṛtārthaḥ // MSS_3106

alaktako yathā rakto naraḥ kāmī tathaiva ca /
hṛtasārastathā so'pi pādamūle nipātyate // MSS_3107

alaktako yathā rakto niṣpīḍya puruṣas tathā /
abalābhirbalād raktaḥ pādamūle nipātyate // MSS_3108

alakṣitakucābhogaṃ bhramantī nṛtyabhūmiṣu /
smareṇāpi sarojākṣī na lakṣyīkriyate śaraiḥ // MSS_3109

alakṣitagatāgataiḥ kulavadhūkaṭākṣairiva kṣaṇānunayaśītalaiḥ praṇayakelikopairiva /
suvṛttamasṛṇonnatairmṛgadṛśāmurojairiva tvadīyaturagairidaṃ dharaṇicakramākramyate // MSS_3110

alakṣmīrāviśatyenaṃ śayānamalasaṃ naram /
niḥsaṃśayaṃ phalaṃ labdhvā dakṣo bhūtimupāśnute // MSS_3111

alaghutā jaṭharasya kucau gatā caraṇacañcalatā nayane gatā /
sakhi vilokaya me tanuceṣṭitaṃ vinimayapragataṃ navayauvanam // MSS_3112

alaghūpalapaṅktiśālinīḥ parito ruddhanirantarāmbarāḥ /
adhirūḍhanitambabhūmayo na vimuñcanti cirāya mekhalāḥ // MSS_3113

alaṅghyaṃ tattadudvīkṣya yadyaduccairmahībhṛtām /
priyatāṃ jyāyasīṃ mā gān mahatāṃ kena tuṅgatā // MSS_3114

alaṅghyaṃ sarveṣāmiha khalu phalaṃ karmajanitaṃ vipat karmapraiṣyā vyathayati na jātāsi hṛdayam /
yadajñāḥ kurvanti prasabhamupahāsaṃ dhanamadād idaṃ tvantargāḍhaṃ paramaparitāpaṃ janayati // MSS_3115

alabdhaṃ caiva lipseta labdhaṃ rakṣet prayatnataḥ /
rakṣitaṃ vardhayeccaiva vṛddhaṃ pātreṣu nikṣipet // MSS_3116

alabdhadugdhādiraso rasāvahaṃ tadudbhavo nimbarasaṃ kṛmiryathā /
adṛṣṭajainendravacorasāyanas tathā kutattvaṃ manute rasāyanam // MSS_3117

alabdhamiccheddaṇḍena labdhaṃ rakṣedavekṣayā /
rakṣitaṃ vardhayed vṛddhyā vṛddhaṃ pātreṣu nikṣipet // MSS_3118

alabdhamīheddharmeṇa labdhaṃ yatnena pālayet /
pālitaṃ vardhayennītyā vṛddhaṃ pātreṣu nikṣipet // MSS_3119

alabdhalipsā nyāyena labdhasya ca vivardhanam /
parivṛddhasya vidhivat pātre saṃpratipādanam // MSS_3120

alabdhavetano lubdho mānī cāpyavamānitaḥ /
kruddhaśca kopito'kasmāt tathā bhītaśca bhīṣitaḥ // MSS_3121

yathābhilaṣitaiḥ kāmair bhindyādetāṃścaturvidhān /
parapakṣe svapakṣe ca yathāvat praśamaṃ nayet // MSS_3122

alabdhāntaḥ praveśasya tāramākrandato bahiḥ /
prabho karuṇayā karṇe kriyantāṃ kṛpaṇoktayaḥ // MSS_3123

alabdhe rāgiṇo lokā aho labdhe virāgiṇaḥ /
hemante tāpamīhante hanta grīṣme himaṃ punaḥ // MSS_3124

alabdhvāpi dhanaṃ rājñaḥ saṃśritā yānti saṃpadam /
mahāhradasamīpasthaṃ paśya nīlaṃ vanaspatim // MSS_3125

alabdhvā yadi vā labdhvā nānuśocanti paṇḍitāḥ /
ānantaryaṃ cārabhate na prāṇānāṃ dhanāyate // MSS_3126

alabhanta nabhaḥkṣetre tārāstaralakāntayaḥ /
tviṣaṃ tuṣārabījānāṃ nūtanāṅkuraśālinām // MSS_3127

alabhyaṃ lapsyamānena tattvaṃ jijñāsunā ciram /
jigīṣuṇā hriyaṃ tyaktvā kāryaṃ kolāhalo mahān // MSS_3128

alabhyaṃ labdhukāmasya janasya gatirīdṛśī /
alabdheṣu manastāpaḥ saṃcitārtho vinaśyati // MSS_3129

alabhyalābhāya ca labdhavṛddhaye yathārhatīrthapratipādanāya ca /
yaśasvinaṃ vedavidaṃ vipaścitaṃ bahuśrutaṃ brāhmaṇameva vāsaya // MSS_3130

alamaticapalatvāt svapnamāyopamatvāt pariṇativirasatvāt saṃgamenāṅganāyāḥ /
iti yadi śatakṛtvas tattvamālocayāmas tadapi na hariṇākṣīṃ vismaratyantarātmā // MSS_3131

alamathavā bahuvādair viracaya lokānurāganirbandham /
tatraikatra samagraṃ tannihitaṃ yanna jātu saṃnihitam // MSS_3132

alamandha bhujāyaṣṭibhrāntyā bhrātarjaḍasya te /
daṃśāya daṃdaśūko'yaṃ daṃśamudrāṃ na muñcati // MSS_3133

alamanyathā gṛhītvā na khalu manasvini mayā prayuktamidam /
prāyaḥ samānavidyāḥ parasparayaśaḥpurobhāgāḥ // MSS_3134

alamanyairupālambhaiḥ kīrtitaiśca vyatikramaiḥ /
peśalaṃ cānurūpaṃ ca kartavyaṃ hitamātmanaḥ // MSS_3135

alamapriyāṇyuditvā rucirārthāḥ kimiha na sthitā vācaḥ /
amṛtamiti vacasi satyapi viṣamiti hi kimucyate vāri // MSS_3136

alamabhimukhairbaddhairbhogairalaṃ bhramibhirdṛśor alamaviralairgarjodgārairalaṃ viṣavṛṣṭibhiḥ /
kimiha bhujagāḥ kopāvegairamībhiramudritair nanu bhagavatastārkṣyasyaite vayaṃ stutipāṭhakāḥ // MSS_3137

alamalamaghṛṇasya tasya nāmnā punarapi saiva kathā gataḥ sa kālaḥ /
kathaya kathaya vā tathāpi dūti prativacanaṃ dviṣato'pi mānanīyam // MSS_3138

alamalamatimātraṃ sāhasenāmunā te tvaritamayi vimuñca tvaṃ latāpāśamenam /
calitamapi niroddhuṃ jīvitaṃ jīviteśe kṣaṇamiha mama kaṇṭhe bāhupāśaṃ nidhehi // MSS_3139

alamalamativṛddhyā sthīyatāṃ tasya paśyasy akaruṇa karabhororbhajyate madhyametat /
iti gurujaghanājñācoditā romarājiḥ stanayugamasitākṣyā vaktumārohatīva // MSS_3140

alamalamanugamya prasthitaṃ prāṇanāthaṃ prathamavirahaśoke na pratīkāra eṣaḥ /
sapadi ramaṇayātrā śreya ityāraṭantyā caraṇapatanapūrvaṃ sā niruddheva kāñcyā // MSS_3141

alamalamiyameva prāṇināṃ pātakānāṃ nirasanaviṣaye yā kṛṣṇa kṛṣṇeti vāṇī /
yadi bhavati mukunde bhaktirānandasāndrā viluṭhati caraṇābje mokṣasāmrājyalakṣmīḥ // MSS_3142

alamātmīyaṃ viditaṃ viditaṃ dhanikasya yācako'vahitaḥ /
candraṃ bravīti caṭakaṃ caṭakaṃ candraṃ ca lobhalolamanā // MSS_3143

alamādivarāheṇa vaṭudāsaṃ paraṃ stumaḥ /
jagaduddharatā yena na vakrīkṛtamānanam // MSS_3144

alamudakena tṛṇairvā manasvinā prāṇadhāraṇā kāryā /
nāsaṃskṛtaśca puruṣaḥ prākṛtasattvaḥ praṇayitavyaḥ // MSS_3145

alalitagatiruccaiḥ sthūlavakrāṅgulīkaṃ vahati caraṇa yugmaṃ kandharāṃ hrasvapīnām /
kapilakacakalāpā krūraceṣṭātipīnā dviradamadavigandhiḥ svāṅkake'naṅkake ca // MSS_3146

dviguṇakaṭukaṣāyaprāyabhug vītalajjā luladativipuloṣṭhī duḥkhasādhyā prayoge /
bahirapi bahuromātyantamantarviśālaṃ vahati jaghanarandhraṃ hastinī gadgadoktiḥ // MSS_3147

alasaṃ mukharaṃ stabdhaṃ krūraṃ vyasaninaṃ śaṭham /
asaṃtuṣṭamabhaktaṃ ca tyajed bhṛtyaṃ narādhipaḥ // MSS_3148

alasaṃ vapuṣi ślathaṃ dukūle capalaṃ cetasi dhūsaraṃ kapole /
cakitaṃ nayane stane vilolaṃ tava nāmaśravaṇaṃ tanūdarīṇām // MSS_3149

alasaṃ vikramaśrāntaṃ vihatopāyaceṣṭitam /
kṣayavyayapravāsaiśca śrameṇa viparidrutam // MSS_3150

bhīruṃ mūrkhaṃ striyaṃ bālaṃ dhārmikaṃ durjanaṃ paśum /
maitrīpradhānaṃ kalyāṇabuddhiṃ sāntvena sādhayet // MSS_3151

alasabhujalatābhirnādṛto nāgarībhir bhavanadamanakānāṃ nātithirvā babhūva /
tvadarinagaramadhye saṃcaraṃścaitrajanmā jaradajagarapītaḥ kṣīyate gandhavāhaḥ // MSS_3152

alasamadhurā snigdhā dṛṣṭirghanatvamupāgatā kisalayarucirnistāmbūlasvabhāvadharodharaḥ /
trivalivalayā lekhonneyā ghaṭanta ivaikataḥ prakṛtisubhagā garbheṇāsau kimapyupapāditā // MSS_3153

alasamukulitākṣaṃ vaktramālokya tasyā mayi vilulitacitte mūkabhāvaṃ prapanne /
śravaṇakuvalayāntaścāriṇā ṣaṭpadena kṣaṇamanugatanādaṃ gītamantaḥ smarāmi // MSS_3154

alasayati gātramadhikaṃ bhramayati cetastanoti saṃtāpam /
mohaṃ ca muhuḥ kurute viṣamaviṣaṃ vīkṣitaṃ tasyāḥ // MSS_3155

alasalulitamugdhānyadhvasaṃpātakhedād aśithilaparirambhairdattasaṃvāhanāni /
parimṛditamṛṇālīdurbalānyaṅgakāni tvamurasi mama kṛtvā yatra nidrāmavāptā // MSS_3156

alasavalitaiḥ premārdrārdrairmuhurmukulīkṛtaiḥ kṣaṇamabhimukhairlajjālolairnimeṣaparāṅmukhaiḥ /
hṛdayanihitaṃ bhāvākūtaṃ vamadbhirivekṣaṇaiḥ kathaya sukṛtī ko'yaṃ mugdhe tvayādya vilokyate // MSS_3157

alasavilasanmugdhasnigdhasmitaṃ vrajasundarīm adanakadanasvinnaṃ dhanyaṃ mahadvadanāmbujam /
taruṇamaruṇajyotsnākārtsnyasmitasnapitādharaṃ jayati vijayaśreṇīmeṇīdṛśāṃ madayanmahaḥ // MSS_3158

alasavilasitānāmullasadbhrūlatānāṃ masṛṇamukulitānāṃ prāntavistāritānām /
pratinayananipāte kiṃcidākuñcitānāṃ vividhamahamabhūvaṃ pātramālokitānām // MSS_3159

alasasya kuto vidyā avidyasya kuto dhanam /
adhanasya kuto mitram amitrasya kutaḥ sukham // MSS_3160

alasasyālpadoṣasya nirvidyasyākṛtātmanaḥ /
pradānakāle bhavati mātāpi hi parāṅmukhī // MSS_3161

alasānapi n n rakṣen na kṛtaghnān kadācana /
dviṣato'pi guṇāḥ kāmyāḥ suhṛdo'pi na durguṇāḥ // MSS_3162

alasāruṇalocanāravindāṃ paribhogocitadhūsaraikacelām /
śithilākulaveṇibandharamyām abalāmantikaśāyinīṃ didṛkṣe // MSS_3163

alasairmadena sudṛśaḥ śarīrakaiḥ svagṛhān prati pratiyayuḥ śanaiḥ śanaiḥ /
alaghuprasāritavilocanāñjali- drutapītamādhavarasaughanirbharaiḥ // MSS_3164

alaso mandabuddhiśca sukhī ca vyādhipīḍitaḥ /
nidrāluḥ kāmukaścaiva ṣaḍete śāstravarjitāḥ // MSS_3165

alābuṃ vartulākāraṃ vārtākaṃ kundasaṃnibham /
prāṇānte'pi na cāśnīyān masūrānnaṃ savalkalam // MSS_3166

alābubījaṃ trapusasya bījaṃ tasyaiva toyena ca tanniṣiktam /
ālepanādyairvidhivat prayuktaṃ hanyādviṣaṃ takṣakasaṃbhavaṃ ca // MSS_3167

alābhāt puruṣāṇāṃ hi bhayāt parijanasya ca /
vadhabandhabhayāccāpi svayaṃ guptā bhavanti tāḥ // MSS_3168

alikulamañjulakeśī parimalabahulā rasāvahā tanvī /
kiśalayapeśalapāṇiḥ kokilakalabhāṣiṇī priyatamā me // MSS_3169

alinīlālakalataṃ kaṃ na hanti ghanastani /
ānanaṃ nalinacchāyanayanaṃ śaśikānti te // MSS_3170

alipaṭalairanuyātāṃ sahṛdayahṛdayajvaraṃ vilumpantīm /
mṛgamadaparimalalaharīṃ samīra pāmarapure kirasi // MSS_3171

alibhirañjanabindumanoharaiḥ kusumapaṅktinipātibhiraṅkitaḥ /
na khalu śobhayati sma vanasthalīṃ na tilakastilakaḥ pramadāmiva // MSS_3172

aliyuvā vilalāsa cirāya yas tridaśaśaivalinīkamalodare /
vidhiviyoganiyogavaśīkṛto gatatarau sa marau ramate katham // MSS_3173

aliranusarati parimalaṃ lakṣmīranusarati nayaguṇasamṛddhim /
nimnamanusarati salilaṃ vidhilikhitaṃ buddhiranusarati // MSS_3174

alirayaṃ nalinīdalamadhyagaḥ kamalinīmakarandamadālasaḥ /
vidhivaśāt paradeśamupāgataḥ kuṭajapuṣparasaṃ bahu manyate // MSS_3175

alirmṛgo vā netraṃ vā yatra kiṃcid vibhāsate /
aravindaṃ mṛgāṅko vā mukhaṃ vedaṃ mṛgīdṛśaḥ // MSS_3176

alivalayairalakairiva kusumastabakaiḥ stanairiva vasante /
bhānti latā lalanā iva pāṇibhiriva kisalayaiḥ sapadi // MSS_3177

alīka eva tvadbhāvo madbhāvo'līka eva ca /
anubhūto'pyasadrūpaḥ svapne svamaraṇaṃ yathā // MSS_3178

alīkarūpo yadi madhyabhāgaḥ payodharākārabhṛtaśca keśāḥ /
utsaṅgaśobhāpi saroruhākṣyāḥ karasya śobhāṃ kalayenna kasmāt // MSS_3179

alīkavyāmuktapracurakabarībandhanamiṣād udañcaddorvallīdvayadhṛtaparīveśanihitaḥ /
ayaṃ jṛmbhārambhasphaṭikaśucidantāṃśunicayo mukhendurgaurāṅgyā galitamṛgajñakṣmā vijayate // MSS_3180

alīnāṃ mālābhirviracitajaṭābhāramahimā parāgaiḥ puṣpāṇāmuparacitabhasmavyatikaraḥ /
vanānāmābhoge kusumavati puṣpoccayaparo marun mandaṃ mandaṃ vicarati parivrājaka iva // MSS_3181

aluptasattvakośānāṃ mahattvaṃ mahatāṃ hi kim /
ākarṇitāṃ parasyārtiṃ na cecchindanti tatkṣaṇam // MSS_3182

alubdhaiḥ saha sauhārdaṃ paṇḍitaiḥ saha saṃkathā /
uttamaiḥ saha saṅgaśca vidheyāḥ sukhamicchatā // MSS_3183

alobhaḥ paramaṃ vittam ahiṃsā paramaṃ tapaḥ /
amāyā paramā vidyā niravadyā manīṣiṇām // MSS_3184

alomaśaṃ pūrṇaśaśāṅkaśobhaṃ mukhaṃ tu yūnāṃ katicid dināni /
jāte tataḥ śmaśruviśālajāle śevālalīnābjatulāṃ bibharti // MSS_3185

alaukikamahālokaprakāśitajagattrayaḥ /
stūyate deva sadvaṃśamuktāratnaṃ na kairbhavān // MSS_3186

alaulyamārogyamaniṣṭhuratvaṃ gandhaḥ śubho mūtrapurīṣamalpam /
kāntiḥ prasādaḥ svarasaumyatā ca yogapravṛtteḥ prathamaṃ hi cihnam // MSS_3187

alpaṃ kiṃcicchriyaṃ prāpya nīco garvāyate laghu /
padmapatratale bheko manyate daṇḍadhāriṇam // MSS_3188

alpaṃ darpabalaṃ daitya sthiramakrodhaja balam /
hatastvaṃ darpajairdoṣair hitvā yo bhāṣase kṣamām // MSS_3189

alpaṃ nirmitamākāśam anālocyaiva vedhasā /
idamevaṃvidhaṃ bhāvi bhavatyāḥ stanajṛmbhanam // MSS_3190

alpato'dhikataḥ sādhyaṃ laghunaiva prasādhayet /
bhūpradakṣiṇato'halyāṃ gautamaḥ kapilāṃ bhraman // MSS_3191

alpatoyaścalatkumbho hyalpadugdhāśca dhenavaḥ /
alpavidyo mahāgarvī kurūpī bahuceṣṭitaḥ // MSS_3192

alpaprabhostu sevāyāṃ bhuktimātraṃ prayojanam /
anugrahamajāmūlyaṃ nigrahaṃ prāṇasaṃkaṭam // MSS_3193

alpamapyavamanyeta na śatrurbaladarpitaḥ /
rāmeṇa rāmaḥ śiśunā brāhmaṇyadayayojjhitaḥ // MSS_3194

alpaśrutalava eva prāyaḥ prakaṭayati vāgvibhavamuccaiḥ /
sarvatra kunaṭa eva hi nāṭakamadhikaṃ viḍambayati // MSS_3195

alpasāro'pi yo mohād vistāraṃ kartumicchati /
paścācchocati durbuddhir nālikerabako yathā // MSS_3196

alpākṣararamaṇīyaṃ yaḥ kathayati niścitaṃ sa khalu vāgmī /
bahuvacanamalpasāraṃ yaḥ kathayati vipralāpī saḥ // MSS_3197

alpānāmapi vastūnāṃ saṃhatiḥ kāryasādhikā /
tṛṇairguṇatvamāpannair badhyante mattadantinaḥ // MSS_3198

alpāpakāramapi pārśvagataṃ nihanti nīco na dūramasamāgasamapyarātim /
śvā nirdaśatyupalamantikamāpatantaṃ tattyāginaṃ na tu vidūragamugraroṣaḥ // MSS_3199

alpāyāṃ vā mahatyāṃ vā senāyāmiti niścayaḥ /
harṣo yodhagaṇasyaiko jayalakṣaṇamucyate // MSS_3200

alpāśca guṇāḥ sphītā bhavanti guṇasamuditeṣu puruṣeṣu /
śvetagiriśikharakeṣviva niśāsu candrāṃśavaḥ patitāḥ // MSS_3201

alpāśrayaṃ samāsādya mahānapyalpako bhavet /
gajendraḥ parvatākāro yathā darpaṇamāśritaḥ // MSS_3202

alpīyaḥskhalanena yatra patanaṃ kṛcchreṇa yatronnatir dvāre vetralatāvitānagahane kaṣṭaḥ praveśakramaḥ /
he sāraṅga manoramā vanabhuvastyaktvā viśeṣārthinā kiṃ bhūbhṛtkaṭakasthitivyasaninā vyarthaṃ khurāḥ śātitāḥ // MSS_3203

alpīyasāmeva nivāsabhūmi- tyāgādvipattirmahatāṃ na jātu /
ratnākarāt sanmaṇayo'bhiyānti rājñāṃ śiraḥ kākamukhāni bhekāḥ // MSS_3204

alpīyasaiva payasā yatkumbhaḥ pūryate prasiddhaṃ tat /
brāhmaṃ tejaḥ paśyata kumbhodbhūtaḥ papau vārdhim // MSS_3205

alpecchurdhṛtimān prājñaś chāyevānugataḥ sadā /
ādiṣṭo na vikalpeta sa rājavasatiṃ vaset // MSS_3206

alpena vibhavenaiva vyayādhikyaṃ na yuktitaḥ /
kṣīṇena vāsasācchanne pādavistāraṇaṃ yathā // MSS_3207

alpenāpi suraktena sādhanena prayojanam /
oṣṭhadvayasahāyena kāntāsyena jagajjitam // MSS_3208

alpenaiva guṇena hi kaścilloke prasiddhimupayāti /
ekena kareṇa gajaḥ karī na sūryaḥ sahasreṇa // MSS_3209

alpe'pi nṛpatidatte pratiśrute vāpi dātumetena /
utthāyāśīrdeyā kvacidupaviśyāpi pariṣadaucityāt // MSS_3210

alpe'pyapakṛte mohān na śāntimupagacchati /
tādṛśaiḥ saṃgataṃ nīcair nṛśaṃsairakṛtātmabhiḥ /
niśāmya nipuṇaṃ buddhyā vidvān dūrād vivarjayet // MSS_3211

alpe vayasi he bāle kucayoḥ patanaḥ kutaḥ /
adhastāt khanane mūḍha girayo na patanti kim // MSS_3212

alpo'pi hyariratyantaṃ vardhamānaparākramaḥ /
valmīko mūlaja iva grasate vṛkṣamantikāt // MSS_3213

avaṃśapatito rājā mūrkhaputraśca paṇḍitaḥ /
adhanī hi dhanaṃ prāpya tṛṇavanmanyate jagat // MSS_3214

avakāśaḥ suvṛttānāṃ hṛdayāntarna yoṣitām /
itīva vihitau dhātrā suvṛttau tadbahiḥ kucau // MSS_3215

avakeśino'sya yuktaṃ jānāmi taroraśoka iti nāma /
phalapākavidhuritātmā yato'nyathāsau saśokaḥ syāt // MSS_3216

avakrastārakādhīśaḥ paripūrṇapriyodayaḥ /
prācīṃ diśamatikramya patanaṃ pratipadyate // MSS_3217

avakre māṃsahīne ca vājijaṅghe suśobhane /
kūrcaṃ samaṃ susaṃdhi syād granthivraṇavivārjitam // MSS_3218

avagacchati mūḍhacetanaḥ priyanāśaṃ hṛdi śalyamarpitam /
sthiradhīstu tadeva manyate kuśaladvāratayā samuddhṛtam // MSS_3219

avagamya kathīkṛtaṃ vapuḥ priyabandhostava niṣphalodayaḥ /
bahule'pi gate niśākaras tanutāṃ duḥkhamanaṅga mokṣyati // MSS_3220

avacanaṃ vacanaṃ priyasaṃnidhāv anavalokanameva vilokanam /
avayavāvaraṇaṃ ca yadañcala- vyatikareṇa tadaṅgasamarpaṇam // MSS_3221

avacayaparibhogavanti hiṃsraiḥ sahacaritānyamṛgāṇi kānanāni /
abhidadhurabhito muniṃ vadhūbhyaḥ samuditasādhvasaviklavaṃ ca cetaḥ // MSS_3222

avacitakusumā vihāya vallīr yuvatiṣu komalamālyamālinīṣu /
padamupadadhire kulānyalīnāṃ naparicayo malinātmanāṃ pradhānam // MSS_3223

avacitabalipuṣpā vedisaṃmārgadakṣā niyamavidhijalānāṃ barhiṣāṃ copanetrī /
giriśamupacacāra pratyahaṃ sā sukeśī niyamitaparikhedā tacchiraścandrapādaiḥ // MSS_3224

avajitamadhunā tavāhamakṣṇo ruciratayetyavanamya lajjayeva /
śravaṇakuvalayaṃ vilāsavatyā bhramararutairupakarṇamācacakṣe // MSS_3225

avajñayā dīyate yat tathaivāśraddhayāpi ca /
tadāhuradhamaṃ dānaṃ munayaḥ satyavādinaḥ // MSS_3226

avajñayā na dātavyaṃ kasya cillīlayāpi vā /
avajñayā kṛtaṃ hanyād dātāraṃ nātra saṃśayaḥ // MSS_3227

avajñayā yadahasaduccakairbalaḥ samullasaddaśanamayūkhamaṇḍalaḥ /
ruṣāruṇīkṛtamapi tena tatkṣaṇaṃ nijaṃ vapuḥ punaranayannijāṃ rucim // MSS_3228

avajñāto'pi duṣṭena guṇo doṣo na manyate /
nahi campakasaugandhyaṃ pūtirbhṛṅgāvahelayā // MSS_3229

avajñānasahasraistu doṣāḥ kaṣṭatarā dhane /
dhane sukhakalā yā ca sāpi duḥkhairvidhīyate // MSS_3230

avajñāsphuṭitaṃ prema samīkartuṃ ka īśvaraḥ /
saṃdhiṃ na yāti sphuṭitaṃ lākṣālepena mauktikam // MSS_3231

avatārā hyasaṃkheyā hareḥ sattvanidherdvijāḥ /
yathā vidāsinaḥ kulyāḥ sarasaḥ syuḥ sahasraśaḥ // MSS_3232

avati nikhilalokaṃ yaḥ pitevādṛtātmā dahati duritarāśiṃ pāvako vendhanaukam /
vitarati śivasaukhyaṃ hanti saṃsāraśatruṃ vidadhatu śubhabuddhyā taṃ budhā dharmamatra // MSS_3233

avatu vaḥ savitusturagāvalī sphurati madhyagatāruṇanāyakā /
samabhilambhitatuṅgapayodharā marakataikalateva nabhaḥśriyaḥ // MSS_3234

avadyajambālagaveṣaṇāya kṛtodyamānāṃ khalasairibhāṇām /
kavīndravāṅnirjaranirjhariṇyāṃ saṃjāyate vyarthamanorathatvam // MSS_3235

avadyamukte pathi yaḥ pravartate pravartayatyanyajanaṃ ca niḥspṛhaḥ /
sa sevitavyaḥ svahitaiṣiṇā guruḥ svayaṃ taraṃstārayituṃ kṣamaḥ param // MSS_3236

avadhānena maunena kāṣāyeṇa jaṭājinaiḥ /
viśvāsayitvā dveṣṭāram avalumped yathā vṛkaḥ // MSS_3237

avadhāraya dharmeṣu pradhānamavadhānataḥ /
nirbharānandakandāya govindāya mano'rpaya // MSS_3238

avadhārya kāryagurutāmabhavan na bhayāya sāndratamasaṃtamasam /
sutanoḥ stanau ca dayitopagame tanuromarājipathavepathave // MSS_3239

avadhidināvadhijīvāḥ prasīda jīvantu pathikajanajāyāḥ /
durlaṅghyavartmaśailau stanau pidhehi prapāpāli // MSS_3240

avadhidivasaḥ prāptaścāyaṃ tanorvirahasya vā ravirayamupaityastaṃ sakhyo mamāpi ca jīvitam /
tadalamaphalairāśābandhaiḥ prasīda namo'stu te hṛdaya sahasā pākotpīḍaṃ viḍambaya dāḍimam // MSS_3241

avadhidivasaḥ so'yaṃ nātrāgataḥ kimiyat kṣaṇaṃ vitara nayane paśyaitanme puraḥ sakhi sāhasam /
iyamiyamahaṃ rūḍhajvālākarālitarodasīṃ malayajarasābhyaktairaṅgaiḥ patāmyabhi kaumudīm // MSS_3242

avadhīraṇāṃ kṛtavatī bhavatī mayi yatkukarmamahimā sa hi me /
yadi cātako na labhate'mbu ghanād vacanīyatā bhavati kāmbumucaḥ // MSS_3243

avadhīraya dhanavikalaṃ kuru gauravamakṛśasaṃpadaḥ puṃsaḥ /
asmādṛśaṃ hi mugdhe dhanasiddhyai rūpanirmāṇam // MSS_3244

avadhūtapraṇipātāḥ paścāt saṃtapyamānamanaso'pi /
nibhṛtairvyapatrapante dayitānunayairmanasvinyaḥ // MSS_3245

avadhūyāribhirnītā hariṇaistulyavṛttitām /
anyonyasyāpi jihrīmaḥ kiṃ punaḥ sahavāsinām // MSS_3246

avadhehi kṣaṇamehi bhrātarbhāvajña bhāvaya giraṃ naḥ /
carame cakāsti cetasi mūkasvapnopamo bhāvaḥ // MSS_3247

avadhau divasāvasānakāle bhavanadvāri vilocane dadhānā /
avalokya samāgataṃ tadā mām atha rāmā vikasanmukhī babhūva // MSS_3248

avadhyaṃ vāthavāgamyam akṛtyaṃ nāsti kiṃcana /
loke buddhimatāmatra tasmāttāṃ yojayāmyaham // MSS_3249

avadhyā brāhmaṇā gāvo striyo bālāśca jñātayaḥ /
yeṣāṃ cānnāni bhuñjīta ye ca syuḥ śaraṇāgatāḥ // MSS_3250

avadhyairindupādānām asādhyaiścandanāmbhasām /
dehoṣmabhiḥ subodhaṃ te sakhi kāmāturaṃ manaḥ // MSS_3251

avadhyo brāhmaṇo bālaḥ strī tapasvī ca rogabhāk /
yeṣāṃ cānnāni bhuktāni ye ca syuḥ śaraṇaṃ gatāḥ // MSS_3252

avadhyo brāhmaṇo bālaḥ strī tapasvī ca rogabhāk /
vihitā vyaṅgitā teṣām aparādhe garīyasi // MSS_3253

avanatavadanenduricchatīva vyavadhimadhīratayā yadasthitāsmai /
aharata sutarāmato'sya cetaḥ sphuṭamabhibhūṣayati striyastrapaiva // MSS_3254

avanataśirasaḥ prayāma śīghraṃ pathi vṛṣabhā iva varṣatāḍitākṣāḥ /
mama hi sadasi gauravapriyasya kulajanadarśanakātaraṃ hi cakṣuḥ // MSS_3255

avanamya vakṣasi nimagnakuca- dvitayena gāḍhamupagūḍhavatā /
dayitena tatkṣaṇacaladraśanā- kalakiṃkiṇīravamudāsi vadhūḥ // MSS_3256

avanau śanaiḥ śanaistvaṃ nidadhāsi padadvayaṃ svasya /
lakṣyaṃ paśyasi na vadasi bhajasi jalaṃ baka tato'si sitaḥ // MSS_3257

avantiḥ kāvyamānarca bharcormaukhariśekharaḥ (?) /
śiṣyo bāṇaśca saṃkrāntakāntavedyavacāḥ kaviḥ // MSS_3258

avantinātho'yamudagrabāhur viśālavakṣāstanuvṛttamadhyaḥ /
āropya cakrabhramamuṣṇatejās tvaṣṭreva yatnollikhito vibhāti // MSS_3259

avanti ye janakasamā munīśvarāś caturvidhaṃ gaṇamanavadyavṛttayaḥ /
svadehavaddalitamadāṣṭakārayo bhavantu te mama guravo bhavāntakāḥ // MSS_3260

avandhyaṃ divasaṃ kuryād dharmataḥ kāmato'rthataḥ /
gate hi divase tasmiṃs tadūnaṃ tasya jīvitam // MSS_3261

avandhyakopasya vihanturāpadāṃ bhavanti vaśyāḥ svayameva dehinaḥ /
amarṣaśūnyena janasya jantunā na jātahārdena na vidviṣādaraḥ // MSS_3262

avamānahataṃ yacca dattamaśraddhayā dhanam /
ūṣare niṣphalaṃ bījaṃ kṣiptamakṣiptameva tat // MSS_3263

avamānāraṇimathitaṃ durvāgindhanavivardhitajvālam /
satpuruṣāḥ kopāgniṃ jñānāmbughaṭaiḥ praśamayanti // MSS_3264

avamānena mahatāṃ praharṣakrodhavismayaiḥ /
tapāṃsi kṣayamāyānti yaśāṃsīva sudurnayaiḥ // MSS_3265

avamuktamapakrāntamukhyaṃ tanna kṣamaṃ yudhi /
pitṛpaitāmahaṃ maulaṃ tat kruddhaṃ sāntvitaṃ kṣamam // MSS_3266

avayaḥ kevalakavayaḥ kīrāḥ syuḥ kevalaṃ dhīrāḥ /
vīrāḥ paṇḍitakavayas tānavamantā tu kevalaṃ gavayaḥ // MSS_3267

avayaveṣu parasparabiṃbiteṣv atulanirmalakāntiṣu tattanoḥ /
ayamayaṃ pravibhāga iti sphuṭaṃ jagati niścinute caturo'pi kaḥ // MSS_3268

avalambitaviṣṇupadaḥ karṣitajanacakṣuratulagatiḥ /
patramayo'pi padārthaḥ pataṅgatāmeti guṇayogāt // MSS_3269

avalipteṣu mūrkheṣu raudrasāhasikeṣu ca /
tathaivāpetadharmeṣu na maitrīmācared budhaḥ // MSS_3270

avalepamanaṅgasya vardhayanti balāhakāḥ /
karśayanti tu dharmasya mārutoddhūtaśīkarāḥ // MSS_3271

avalokanamapi sukhayati kuvalayadalacārucapalanayanāyāḥ /
kiṃ punaralakacaladdyuti- sarabhasamāliṅganaṃ tanvyāḥ // MSS_3272

avalokitamanumodita- māliṅgitamaṅganābhiranurāgaiḥ /
adhivṛndāvanakuñjaṃ marakatapuñjaṃ namasyāmaḥ // MSS_3273

avalokya nartitaśikhaṇḍimaṇḍalair navanīradairniculitaṃ nabhastalam /
divase'pi vañjulanikuñjamitvarī viśati sma vallabhavataṃsitaṃ rasāt // MSS_3274

avalokya stanau vadhvā guñjāphalavibhūṣitau /
niḥśvasya roditi kliṣṭā kuto vyādhakaṭumbinī // MSS_3275

avaśendriyacittānāṃ hastisnānamiva kriyā /
durbhagābharaṇaprāyo jñānaṃ bhāraḥ kriyāṃ vinā // MSS_3276

avaśyaṃ kopāgnistava sutanu nirvāsyati cirāt svaśobhāmārūḍhaṃ mukhamapi ca te hāsyati śucam /
bhavadgoṣṭhīśūnyā mama tu divasā yānti ya ime na teṣāmāvṛttiḥ punarapi mano dūyata iti // MSS_3277

avaśyaṃ nidhanaṃ sarvair gantavyamiha mānavaiḥ /
avaśyabhāvinyarthe vai saṃtāpo neha vidyate // MSS_3278

avaśyaṃ piturācāraṃ putraḥ samanuvartate /
nahi ketakavṛkṣasya bhavatyāmalakīphalam // MSS_3279

... ... ... ... ... ... /
avaśyaṃ prāṇināṃ prāṇā rakṣitavyā yathābalam // MSS_3280

avaśyaṃ bhāvinaṃ nāśaṃ bhāvitvād vidhyupasthitam /
ayameva hi te kālaḥ pūrvamāsīdanāgataḥ // MSS_3281

avaśyaṃ bhāvino bhāvā bhavanti mahātamapi /
nagnatvaṃ nīlakaṇṭhasya mahāhiśayanaṃ hareḥ // MSS_3282

avaśyaṃbhāvibhāvānāṃ pratīkāro bhaved yada /
tadā duḥkhairna bādhyante nalarāmayudhiṣṭhirāḥ // MSS_3283

avaśyaṃ yātāraścirataramuṣitvāpi viṣayā viyoge ko bhedastyajati na jano yat svamamūn /
vrajantaḥ svātantryādatulaparitāpāya manasaḥ svayaṃ tyaktā hyete śamasukhamanantaṃ vidadhati // MSS_3284

avaśyaṃ labhate kartā phalaṃ pāpasya karmaṇaḥ /
ghoraṃ paryāgate kāle drumaḥ puṣpamivārtavam // MSS_3285

avaśyakāraṇaiḥ prāṇān dhārayatyeva cātakaḥ /
prārthanābhaṅgabhīto'pi śakrādapi na yācate // MSS_3286

avaśyagatvaraiḥ prāṇair mṛtyukāle mahātmanām /
paropakāraścet kaścit sidhyet tadamṛtaṃ mṛtam // MSS_3287

avaśyaniṣpattimahāphalāḍhyām adīrghasūtrāṃ pariṇāmakalyām /
kāmaṃ vyayāyāsakarīmupeyān na tveva jātu kṣayadoṣayuktām // MSS_3288

avaśyabhavyeṣvanavagrahagrahā yayā diśā dhāvati vedhasaḥ spṛhā /
tṛṇena vātyeva tayānugamyate janasya cittena bhṛśāvaśātmanā // MSS_3289

avaśyamāyānti vaśaṃ vipaścitām upāyasaṃdaṃśabalena saṃpadaḥ /
bhavatyudāraṃ vidhivat prayojite phalaṃ hi rājñāṃ kvacidarthasiddhaye // MSS_3290

avaśyamindriyaistāta vartitavyaṃ svagocare /
caṇḍarāgastu yastatra taṃ budhaḥ parivarjayet // MSS_3291

avaśyameva bhoktavyaṃ karmaṇāṃ tvakṣayaṃ phalam /
nābhuktaṃ kṣīyate karma kalpakoṭiśatairapi // MSS_3292

avaśyameva bhoktavyaṃ kṛtaṃ karma śubhāśubham /
kṛtakarmakṣayo nāsti kalpakoṭiśatairapi // MSS_3293

avaśyāyakaṇaiḥ prāṇān saṃdhārayati tittiriḥ /
yācñābhaṅgabhayād bhīto na daivamapi yācate // MSS_3294

avasarapaṭhitaṃ sarvaṃ subhāṣitatvaṃ prayāti yat kiṃcit /
cāṣaḥ prayāṇasamaye kharaninado maṅgalo bhavati // MSS_3295

avasarapaṭhitaṃ sarvaṃ subhāṣitatvaṃ prayātyasūktamapi /
kṣudhi kadaśanamapi nitarāṃ bhoktuḥ saṃpadyate svādu // MSS_3296

avasarapaṭhitā vāṇī guṇagaṇarahitāpi śobhate puṃsām /
ratisamaye ramaṇīnāṃ bhūṣaṇahānistu bhūṣaṇaṃ bhavati // MSS_3297

avasaramadhigamya taṃ harantyo hṛdayamayatnakṛtojjvalasvarūpāḥ /
avaniṣu padamaṅganāstadānīṃ nyadadhata vibhramasaṃpado'ṅganāsu // MSS_3298

avasitaṃ hasitaṃ prasitaṃ mudā vilasitaṃ hrasitaṃ smarabhāsitam /
na samadāḥ pramadā hatasaṃmadāḥ purahitaṃ vihitaṃ na samīhitam // MSS_3299

avaskandapradānasya sarve kālāḥ prakīrtitāḥ /
vyasane vartamānasya śatrocchidrānvitasya ca // MSS_3300

avaskandabhayād rājā prajāgarakṛtaśramam /
divāsuptaṃ sadā hanyān nidrāvyākulasainikam // MSS_3301

avasthā pūjyate rājan na śarīraṃ śarīriṇām /
tadā vanacaro rāma idānīṃ nṛpatāṃ gataḥ // MSS_3302

avākiran vayovṛddhās taṃ lājaiḥ paurayoṣitaḥ /
pṛṣatairmandaroddhūtaiḥ kṣīrormaya ivācyutam // MSS_3303

avākṣirāstamasyandhe kilbiṣī narakaṃ patet /
yaḥ praśnaṃ vitathaṃ brūyāt pṛṣṭaḥ san dharmaniścaye // MSS_3304

avācyavādāṃśca bahūn vadiṣyanti tavāhitāḥ /
nindantastava sāmarthyaṃ tato duḥkhataraṃ nu kim // MSS_3305

avāpa sāpatrapatāṃ sa bhūpatir jitendriyāṇāṃ dhuri kīrtitasthitiḥ /
asaṃvare śambaravairivikrame krameṇa tatra sphuṭatāmupeyuṣi // MSS_3306

avāpustāpamatyarthaṃ śapharyaḥ palvalodake /
putrakṣetrādisaktena mamatvena yathā gṛhī // MSS_3307

avāptaḥ prāgalbhyaṃ pariṇatarucaḥ śailatanaye kalaṅko naivāyaṃ vilasati śaśāṅkasya vapuṣi /
amuṣyeyaṃ manye vigaladamṛtasyandaśiśire ratiśrāntā śete rajaniramaṇī gāḍhamurasi // MSS_3308

avāptairdrāghimṇā paricayamudanvattaṭabhuvām asau bhāti śyāmadyutibhirudakairmekhalabhuvaḥ /
agastyasyākārṣīd vacanamiti kopādudadhinā gṛhītaḥ keśeṣu prasabhamiva vindhyakṣitidharaḥ // MSS_3309

avāpyate vā kimiyadbhavatyā cittaikapadyāmapi vidyate yaḥ /
yatrāndhakāraḥ kila cetaso'pi jihmetarairbrahma tadapyavāpyam // MSS_3310

avāpyān kāmayasvārthān nānavāpyān kadācana /
pratyutpannānanubhavan mā śucastvamanāgatān // MSS_3311

avāmabhāgena yadā valitvā śvā pṛṣṭhakaṇḍūtimapākaroti /
tadahni tatraiva kṛtāntagehe rogābhibhūto niyataṃ prayāti // MSS_3312

avālukāślakṣṇamṛdā pūrite gartaśodhanam /
kodaṇḍārdhamite khāte jalasikte vapettarum /
kadalīkṣīriṇau ropyau mūle dattvā tu gomayam // MSS_3313

avāhitā vinaśyanti sarvakarmakṣamā api /
kṛśā vyādhiparītāṅgā jāyante'tyantavāhanāt // MSS_3314

avikāriṇamapi sajjanam aniśamanāryaḥ prabādhate'tyartham /
kamalinyā kimiha kṛtaṃ himasya yattāṃ sadā dahati // MSS_3315

avikṛtakṛtabhaumaravā susthānasthā suceṣṭitā vāme /
yātrāsu dṛṣṭamātrā durgā durgāṇi tārayati // MSS_3316

avikriyāṃ caiva samāśritāḥ samaṃ haranti jālaṃ mama pakṣiṇo hyamī /
vivādameṣyanti parasparaṃ yadā samāgamiṣyanti ca madvaśaṃ tadā // MSS_3317

avikreyaṃ lavaṇaṃ pakvamannaṃ dadhi kṣīraṃ madhu tailaṃ ghṛtaṃ ca /
tilā māṃsaṃ mūlaphalāni śākaṃ raktaṃ vāsaḥ sarvagandhā guḍaśca // MSS_3318

avigrahasyāpyatulena hetunā sametabhinnadvayamūrti tiṣṭhataḥ /
tavaiva nānyasya jagatsu dṛśyate viruddhaveṣābharaṇasya kāntatā // MSS_3319

avicārayato yuktikathanaṃ tuṣakhaṇḍanam /
nīceṣūpakṛtaṃ rājan bālukāsviva mūtritam // MSS_3320

avicāreṇa yat karma kṛtaṃ tanmarmakṛntanam /
prasahya sītāharaṇād atītā rāvaṇaśriyaḥ // MSS_3321

avijitya ya ātmānam amātyān vijigīṣate /
amitrān vājitāmātyaḥ so'vaśaḥ parihīyate // MSS_3322

avijñātaprabandhasya vaco vācaspaterapi /
vrajatyaphalatāmeva nayadruha ivehitam // MSS_3323

avijñātaprayuktena dharṣitā mama vāsasā /
saṃvṛtā śaradabhreṇa candralekheva śobhate // MSS_3324

avijñātaviśeṣasya sarvatejo'pahāriṇaḥ /
svāmino nirvivekasya tamasaśca kimantaram // MSS_3325

avijñātasya vijñānaṃ vijñātasya ca niścayaḥ /
ārambhaḥ karmaṇāṃ śaśvad ārabdhasyāntadarśanam // MSS_3326

avijñātasya vijñānaṃ vijñātasya viniścayaḥ /
arthadvaidhasya saṃdehac chedanaṃ śeṣadarśanam // MSS_3327

avijñātāvasaktena dūṣitā mama vāsasā /
chāditā śaradabhreṇa candralekheva dṛśyate // MSS_3328

avijñāte pare tattve śāstrādhītistu niṣphalā /
vijñāte'pi pare tattve śāstrādhītistu niṣphalā // MSS_3329

avijñāto dhṛtaḥ khaṅgaḥ śubhasaṃpattināśakaḥ /
vijñātaḥ sakalaiśvaryadāyako bhavati prabhoḥ /
tasmāt teṣāṃ guṇān vakṣye yathoktaṃ munipuṃgavaiḥ // MSS_3330

avijñānād rājño bhavati matihīnaḥ parijanas tatastatprādhānyād bhavati na samīpe budhajanaḥ /
budhaistyakte rājye bhavati hi na nītirguṇavatī pranaṣṭāyāṃ nītau sanṛpamavaśaṃ naśyati kulam // MSS_3331

avijñāya phalaṃ yo hi karma tvevānudhāvati /
sa śocet phalavelāyāṃ yathā kiṃśukasecakaḥ // MSS_3332

avijñāyānyasāmarthyaṃ svasāmarthyaṃ pradarśayet /
upahāsamavāpnoti tathaivāyamihācalaḥ // MSS_3333

avitathamanorathapatha- prathaneṣu praguṇagarimagītaśrīḥ /
suratarusadṛśaḥ sa bhavān abhilaṣaṇīyaḥ kṣitīśvara na kasya // MSS_3334

avitṛptatayā tathāpi me hṛdayaṃ nirṇayameva dhāvati /
avasāyayituṃ kṣamāḥ sukhaṃ na vidheyeṣu viśeṣasaṃpadaḥ // MSS_3335

avidagdhaḥ patiḥ strīṇāṃ prauḍhāṇāṃ nāyako guṇī /
guṇināṃ tyāgināṃ stoko vibhavaśceti duḥkhakṛt // MSS_3336

avidagdhaḥ śramakaṭhino durlabhayoṣidyuvā jaḍo vipraḥ /
apamṛtyurupakrāntaḥ kāmivyājena me rātrau // MSS_3337

aviditaguṇāntarāṇāṃ no doṣaḥ prāptadeśavāsānām /
svādhīnakuṅkumā api yadvidadhati bahumatiṃ nīle // MSS_3338

aviditaguṇāpi satkavi- bhaṇitiḥ karṇeṣu vamati madhudhārām /
anadhigataparimalāpi hi harati dṛśaṃ mālatīmālā // MSS_3339

aviditaparamānando vadati jano viṣayameva ramaṇīyam /
tilatailameva miṣṭaṃ yena na dṛṣṭaṃ ghṛtaṃ kvāpi // MSS_3340

aviditaparavedano manobhūr dhruvamayamevamanaṅga eva nityam /
yadi punarabhaviṣyadasya cāṅgaṃ na khalu tadā vyathayiṣyadanyadeham // MSS_3341

aviditaśaṣasaviśeṣā vāṇī niḥsarati vaktrato yeṣām /
gudavadanavivarabhedo radanairanumīyate teṣām // MSS_3342

aviditasukhaduḥkhaṃ nirguṇaṃ vastu kiṃcij jaḍamatiriha kaścin mokṣa ityācacakṣe /
mama tu matamanaṅgasmeratāruṇyaghūrṇan madakalamadirākṣīnīvimokṣo hi mokṣaḥ // MSS_3343

aviditvātmanaḥ śaktiṃ parasya na samutsukaḥ /
gacchannabhimukho vahnau nāśaṃ yāti pataṅgavat // MSS_3344

avidyaṃ jīvanaṃ śūnyaṃ dikśūnyā cedabāndhavā /
putrahīnaṃ gṛhaṃ śūnyaṃ sarvaśūnyā daridratā // MSS_3345

avidyaḥ puruṣaḥ śocyaḥ śocyaṃ mithunamaprajam /
nirāhārāḥ prajāḥ śocyāḥ śocyaṃ rāṣṭramarājakam // MSS_3346

avidyākāmakarmādipāśabandhaṃ vimocitum /
kaḥ śaknuyād vinātmānaṃ kalpakoṭiśatairapi // MSS_3347

avidyānāśinī vidyā bhāvanā bhavanāśinī /
dāridryanāśanaṃ dānaṃ śīlaṃ durgatināśanam // MSS_3348

avidyābījavidhvaṃsād ayamārṣeṇa cakṣuṣā /
kālau bhūtabhaviṣyantau vartamānamavīviśat // MSS_3349

avidvāṃścaiva vidvāṃśca brāhmaṇo daivataṃ mahat /
praṇītaścāpraṇītaśca yathāgnirdaivataṃ mahat // MSS_3350

avidvāṃsamalaṃ loke vidvāṃsamapi vā punaḥ /
pramadā hyutpathaṃ netuṃ kāmakrodhavaśānugam // MSS_3351

avidvānapi bhūpālo vidyāvṛddhopasevayā /
parāṃ śriyamavāpnotijalāsannataruryathā // MSS_3352

avidheye jane puṃsāṃ kopaḥ kimupajāyate /
vidheye'pi ca kaḥ kopas tanniveśitajīvite // MSS_3353

avidheyo bhṛtyajanaḥ śaṭhāni mitrāṇyadāyakaḥ svāmī /
vinayarahitā ca bhāryā mastakaśūlāni catvāri // MSS_3354

avinayabhuvāmajñānānāṃ śamāya bhavannapi prakṛtikuṭilādvidyābhyāsaḥ khalatvavivṛddhaye /
phaṇibhayabhṛtāmastūcchedakṣamastamasāmasau viṣadharaphaṇāratnāloko bhayaṃ tu bhṛśāyate // MSS_3355

avinayaratamādarādṛte vaśamavaśaṃ hi nayanti vidviṣaḥ /
śrutavinayanidhiṃ samāśritas tanurapi naiti parābhavaṃ kvacit // MSS_3356

avināśi tu tadviddhi yena sarvamidaṃ tatam /
vināśamavyayasyāsya na kaścit kartumarhati // MSS_3357

avināśinamagrāmyam akarot sātavāhanaḥ /
viśuddhajātibhiḥ kośaṃ ratnairiva subhāṣitaiḥ // MSS_3358

avinītaḥ suto jātaḥ kathaṃ na dahanātmakaḥ /
vinītastu suto jātaḥ kathaṃ na puruṣottamaḥ // MSS_3359

avinītasya yā vidyā sā ciraṃ naiva tiṣṭhati /
markaṭasya gale baddhā maṇīnāṃ mālikā yathā // MSS_3360

avinīto bhṛtyajano nṛpatiradātā śaṭhāni mitrāṇi /
avinayavatī ca bhāryā mastakaśūlāni catvāri // MSS_3361

avibhāviteṣuviṣayaḥ prathamaṃ madano'pi nūnamabhavat tamasā /
udite diśaḥ prakaṭayatyamunā yadadharmadhāmni dhanurācakṛṣe // MSS_3362

avibhāvyatārakamadṛṣṭahima- dyutibimbamastamitabhānu nabhaḥ /
avasannatāpamatamisramabhād apadoṣataiva viguṇasya guṇaḥ // MSS_3363

avibhramālokanadurbhagāṇi pravyaktavaktrastanamaṇḍalāni /
aṅgāni re pāmarakāminīnām apuṇyatāruṇya kimāśritāni // MSS_3364

avimṛṣyametadabhilaṣyati sa dviṣatāṃ vadhena viṣayābhiratim /
bhavavītaye nahi tathā sa vidhiḥ kva śarāsanaṃ kva ca vimuktipathaḥ // MSS_3365

avirataṃ parakāryakṛtāṃ satāṃ madhurimātiśayena vaco'mṛtam /
api ca mānasamambunidhiryaśo vimalaśāradacandiracandrikā // MSS_3366

aviratakusumāvacāyakhedān nihitabhujālatayaikayopakaṇṭham /
vipulataranirantarāvalagna- stanapihitapriyavakṣasā lalambe // MSS_3367

aviratataruṇīsahasramadhya- sthitivigalatpuruṣavratā ivaite /
pratipadamatikātarāḥ kṣitīśāḥ parikalayanti bhayaṃ samantato'pi // MSS_3368

aviratamaklamamuddhṛta- dharātalaṃ susmitollasadvadanam /
jagadānandavidhāyinam upaimi śaraṇaṃ prabhuṃ śeṣam // MSS_3369

aviratamadhupānāgāramindindirāṇām abhisaraṇanikuñjaṃ rājahaṃsīkulasya /
pravitatabahuśālaṃ sadma padmālayāyā vitarati ratimakṣṇoreṣa līlātaḍāgaḥ // MSS_3370

aviratamidamambhaḥ svecchayoccālayantyā vikacakamalakāntottānapāṇidvayena /
parikalita ivārghyaḥ kāmabāṇātithibhyaḥ salilamiva vitīrṇaṃ bālalīlāsukhānām // MSS_3371

avirataratalīlāyāsajātaśramāṇām upaśamamupayāntaṃ niḥsahe'ṅge'ṅganānām /
punaruṣasi viviktairmātariśvāvacūrṇya jvalayati madanāgniṃ mālatīnāṃ rajobhiḥ // MSS_3372

aviratavirutakapotīm arpitarasamāvṛṇoti ghanavalanaḥ /
navalatikāmatikātara- taralitamadiradvayīṃ mudiraḥ // MSS_3373

aviratāmbujasaṃgatisaṃgalad- bahalakesarasaṃvaliteva yā /
lalitavastuvidhānasukhollasat- tanuruhā tanurātmabhuvo'vatāt // MSS_3374

aviralakamalavikāsaḥ sakalālimadaśca kokilānandaḥ /
ramyo'yameti saṃprati lokotkaṇṭhākaraḥ kālaḥ // MSS_3375

aviralakaravālakampanair bhrukuṭītarjanagarjanairmuhuḥ /
dadṛśe tava vairiṇāṃ madaḥ sa gataḥ kvāpi tavekṣaṇe kṣaṇāt // MSS_3376

aviraladhārānikaraṃ jaladairjalamutsṛjadbhiratimātram /
mānivadhūhṛdayebhyaḥ kāluṣyamaśeṣato mṛṣṭam // MSS_3377

aviralapatadbāṣpotpīḍaprasiktakapolayā vacanaviṣayaḥ saṃdeśo'nyastayā vihito na te /
manasi kimapi dhyāyantyā tu kṣaṇaṃ tava kāntayā pathika nihitā dṛṣṭiḥ kaṣṭaṃ nave karuṇāṅkure // MSS_3378

aviralaparāgasaikata- makarandataraṅgiṇīmanuvanāntam /
pikayuvatijānudaghnīṃ gāhante madhupayoṣitastṛṣitāḥ // MSS_3379

aviralaparivāhairaśruṇaḥ sāraṇīnāṃ smaradahanaśikhoṣṇaśvāsapūraiśca tasyāḥ /
subhaga bata kṛśāṅgyāḥ spardhayānyonyamebhiḥ kriyata iva puro bhūḥ paṅkilā pāṃsulā ca // MSS_3380

aviralapulakaḥ saha vrajantyāḥ pratipadamekataraḥ stanastaruṇyāḥ /
ghaṭitavighaṭitaḥ priyasya vakṣas- taṭamuvi kandukavibhramaṃ babhāra // MSS_3381

aviralaphalinīvanaprasūnaḥ kusumitakundasugandhigandhavāhaḥ /
guṇamasamayajaṃ cirāya lebhe viralatuṣārakaṇastuṣārakālaḥ // MSS_3382

aviralamadajalanivahaṃ bhramarakulānīkasevitakapolam /
abhimataphaladātāraṃ kāmeśaṃ gaṇapatiṃ vande // MSS_3383

aviralamadadhārādhautakumbhaḥ śaraṇyaḥ phaṇivaravṛtagātraḥ siddhasādhyādivandyaḥ /
tribhuvanajanavighnadhvāntavidhvaṃsadakṣo vitaratu gajavaktraḥ saṃtataṃ maṅgalaṃ vaḥ // MSS_3384

aviralamiva dāmnā pauṇḍarīkeṇa naddhaḥ snapita iva ca dugdhasrotasā nirbhareṇa /
kavalita iva kṛtsnaścakṣuṣā sphāritena prasabhamamṛtamegheneva sāndreṇa siktaḥ // MSS_3385

aviralavigalanmadajala- kapolapālīnilīnamadhupakulaḥ /
udbhinnanavaśmaśru- śreṇiriva dvipamukho jayati // MSS_3386

aviralavilolajaladaḥ kuṭajārjunanīpasurabhivanavātaḥ /
ayamāyātaḥ kālo hanta mṛtāḥ pathikagehinyaḥ // MSS_3387

aviruddhaṃ sukhasthaṃ yo duḥkhamārge niyojayet /
janmajanmāntare duḥkhī sa naraḥ syādasaṃśayam // MSS_3388

avilambi suvṛttaṃ ca udaraṃ cātipūjitam /
nātidīrghaṃ samaṃ pṛṣṭhaṃ kiṃcicca vinataṃ śubham // MSS_3389

avilambe kṛtyasiddhau māntrikairāpyate yaśaḥ /
vilambe karmabāhulyaṃ vikhyāpyāvāpyate dhanam // MSS_3390

aviviktāvatistabdhau stanāvāḍhyāvivādṛtau /
viviktāvānatāveva daridrāviva garhitau // MSS_3391

avivekamatirnṛpatir mantrī guṇavatsu vakritagrīvaḥ /
yatra khalāśca prabalās tatra kathaṃ sajjanāvasaraḥ // MSS_3392

avivekavṛthāśramāvivārthaṃ kṣayalobhāviva saṃśritānurāgam /
vijigīṣumivānayapramādāv avasādaṃ viśikhau vininyatustam // MSS_3393

aviveki kucadvaṃdvaṃ hantu nāma jagattrayam /
śrutipraṇayinorakṣṇor ayuktaṃ janamāraṇam // MSS_3394

avivekini bhūpāle naśyanti guṇināṃ guṇāḥ /
pravāsarasike kānte yathā sādhvyāḥ stanonnatiḥ // MSS_3395

avivekini bhūpe yaḥ karotyāśāṃ samṛddhaye /
yāsyāmyahamaneneti karotyāśāṃ sa mṛddhaye // MSS_3396

aviveko hi sarveṣām āpadāṃ paramaṃ padam /
vivekarahito loke paśureva na saṃśayaḥ // MSS_3397

aviśadacalaṃ netraprāntāvalokanamasphuṭaṃ cakitacakitā vācaḥ sparśaḥ kvacijjanasaṃkule /
iti tava mayā premārambhe ya eva nirīkṣitāḥ kaṭhinamanaso dṛṣṭā bhāvāsta eva virajyataḥ // MSS_3398

aviśīrṇakāntapātre navyadaśe sumukhi saṃbhṛtasnehe /
madgehadīpakalike kathamupayātāsi nirvāṇam // MSS_3399

aviśuddhakulotpannā dehārpaṇajīvikā śaṭhācaraṇā /
kvāhaṃ rūpājīvā kva bhavantaḥ ślāghanīyajanmaguṇāḥ // MSS_3400

aviśrānto vāto dahana iva soyaṃ janayati prasaktaṃ sātatyād dalayati kulādrīnapi jalam /
prasūte kṛtyeṣu vyavasitiranirvyūḍhasudṛḍhā phalāvāptiṃ loke pratikalamasaṃbhāvyavibhavām // MSS_3401

aviśrāmaṃ vahed bhāraṃ śītoṣṇaṃ ca na vindati /
sasaṃtoṣastathā nityaṃ trīṇi śikṣeta gardabhāt // MSS_3402

aviśrāmamapātheyam anālambhamadeśakam /
tamaḥkāntāramadhvānaṃ kathameko gamiṣyasi // MSS_3403

aviśvasan dhūrtadhuraṃdharo'pi naraḥ puraṃdhrīpurato'ndha eva /
aśeṣaśikṣākuśalo'pi kākaḥ pratāryate kiṃ na pikāṅganābhiḥ // MSS_3404

aviśvastā striyaḥ sarvā adhamottamamadhyamāḥ /
yaḥ kaścid viśvaset tāsāṃ paścāttāpaiḥ sa dahyate // MSS_3405

aviśvāsaṃ sadā tiṣṭhet saṃdhinā vigraheṇa ca /
dvaidhībhāvaṃ samāśritya pāpe śatrau balīyasi // MSS_3406

aviśvāsavidhānāya mahāpātakahetave /
pitāputravirodhāya hiraṇyāya namo'stu te // MSS_3407

aviṣaṃ viṣamityāhur brahmasvaṃ viṣamucyate /
viṣaṃ hanti kilaikaṃ ca brahmasvaṃ putrapautrakam // MSS_3408

avisaṃvādako dakṣaḥ kṛtajño matimānṛjuḥ /
api saṃkṣīṇakośo'pi labhate parivāraṇam // MSS_3409

avisaṃvādanaṃ dānaṃ samayasyāvyatikramaḥ /
āvartayanti bhūtāni samyakpraṇihitā ca vāk // MSS_3410

avisṛṣṭo'pi san prājñaḥ sarveṇa ca samaṃ vrajet /
praviśedapyanāhūtas tvanyadā bhartturājñayā // MSS_3411

avismṛtopakāraḥ syān na kurvīta kṛtaghnatām /
hatvopakāriṇaṃ vipro nāḍījaṅghamadhaścyutaḥ // MSS_3412

avīro'pi camūvīrasāhāyyena dviṣo jayet /
camūsāhāyyaśūnyānāṃ jayaśrīrvyākulāyate // MSS_3413

avṛttiṃ vinayo hanti hantyanarthaṃ parākramaḥ /
hanti nitayṃ kṣamā krodham ācāro hantyalakṣaṇam // MSS_3414

avṛttikaṃ tyajed deśaṃ vṛttiṃ sopadravāṃ tyajet /
tyajen māyāvinaṃ mitraṃ dhanaṃ prāṇaharaṃ tyajet // MSS_3415

avṛttikaṃ prabhuṃ bhṛtyā apuṣpaṃ bhramarāstarum /
ajalaṃ ca saro haṃsā muñcantyapi ciroṣitam // MSS_3416

avṛttirbhayamantyānāṃ madhyānāṃ maraṇād bhayam /
uttamānāṃ tu martyānām avamānāt paraṃ bhayam // MSS_3417

avṛttivyādhiśokārtān anuvarteta śaktitaḥ /
ātmavatsatataṃ paśyed api kīṭapipīlakāḥ // MSS_3418

avekśya svātmānaṃ viguṇamaparānicchati tathā phalatyetanno ced vilapati na santīha guṇinaḥ /
nimārṣṭuṃ śaptuṃ vā paribhavitumudyacchati tato'py aho nīce ramyā saguṇavijigīṣā vidhikṛtā // MSS_3419

avemavyāpārākalanamaturīsparśamacirād anunmīlattantuprakaraghaṭanāyāsamasakṛt /
viṣīdatpāñcālīvipadapanayaikapraṇayinaḥ paṭānāṃ nirmāṇaṃ patagapatiketoravatu naḥ // MSS_3420

avaiti tattvaṃ sadasattvalakṣaṇaṃ vinā viśeṣaṃ viparītarocanaḥ /
yadṛcchayā mattavadastacetano jano jinānāṃ vacanāt parāṅmukhaḥ // MSS_3421

avaitu śāstrāṇi naro viśeṣataḥ karotu citrāṇi tapāṃsi bhāvataḥ /
atattvasaṃsaktamanāstathāpi no vimuktisaukhyaṃ gatabādhamaśnute // MSS_3422

avaimi caināmanagheti kiṃ tu lokāpavādo balavān mato me /
chāyā hi bhūmeḥ śaśino malatve- nāropitā śuddhimataḥ prajābhiḥ // MSS_3423

avaimi te sāramataḥ khalu tvāṃ kārye guruṇyātmasamaṃ niyokṣye /
vyādiśyate bhūdharatāmavekṣya kṛṣṇena dehodvahanāya śeṣaḥ // MSS_3424

avaimi pūtamātmānaṃ dvayenaiva dvijottamāḥ /
mūrdhni gaṅgāprapātena dhautapādāmbhasā ca vaḥ // MSS_3425

avaimi saubhāgyamadena vañcitaṃ tava priyaṃ yaścaturāvalokinaḥ /
karoti lakṣyaṃ ciramasya cakṣuṣo na vaktramātmīyamarālapakṣmaṇaḥ // MSS_3426

avaimi haṃsāvalayo valakṣās tvatkāntikīrteścapalāḥ pulākāḥ /
uḍḍīya yuktaṃ patitāḥ sravantī- veśantapūraṃ paritaḥ plavante // MSS_3427

avaiṣṇavo hato vipro hataṃ śrāddhamadakṣiṇam /
abrahmaṇyaṃ hataṃ kṣetram anācāraṃ kulaṃ hatam // MSS_3428

avyaktamakṣaramupāsya babhūva kaścit svaṃ labdhavarṇamavagatya kṛtārthamānī /
sadyastribhaṅgalalitasphuraṇādamanda- nandotthayā jaḍatayaiva vayaṃ kṛtārthāḥ // MSS_3429

avyaktādīni bhūtāni vyaktamadhyāni bhārata /
avyaktanidhanānyeva tatra kā paridevanā // MSS_3430

avyayavato'pi dhaninaḥ svajanasahasraṃ bhavet padasthasya /
bhraṣṭadhanasya hi satataṃ bandhurapi mukhaṃ na darśayati // MSS_3431

avyaye vyayamāyāti vyaye yāti suvistaram /
apurvaḥ ko'pi bhāṇḍāras tava bhārati dṛśyate // MSS_3432

avyavasāyinamalasaṃ daivaparaṃ sahasācca parihīṇam /
pramadeva hi vṛddhapatiṃ necchatyavagūhituṃ lakṣmīḥ // MSS_3433

avyavasthitacittasya prasādo'pi bhayaṃkaraḥ /
vyavasthitaprasannātmā kupito'pyabhayaṃkaraḥ // MSS_3434

avyavasthitavṛttānām abhinnaśruticakṣuṣām /
adharmārjitabhogānām āśīrapyahitocitā // MSS_3435

... ... ... ... ... ... /
avyavasthau hi dṛśyete yuddhe jayaparājayau // MSS_3436

avyākaraṇamadhītaṃ bhinnadroṇyā taraṅgiṇītaraṇam /
bheṣajamapathyasahitaṃ trayamidamakṛtaṃ varaṃ na kṛtam // MSS_3437

... ... ... ... ... ... /
anyākṣepo bhaviṣyantyāḥ kāryasiddherhi lakṣaṇam // MSS_3438

avyākhyeyāṃ vitarati parāṃ prītimantarnimagnā kaṇṭhe lagnā harati nitarāṃ yāntaradhvāntajālam /
tāṃ drākṣādyairapi bahumatāṃ mādhurīmudgirantīṃ kṛṣṇetyākhyāṃ kathaya rasane yadyasi tvaṃ rasajñā // MSS_3439

avyājasundaramanuttaramaprameyam aprākṛtaṃ paramamaṅgalamaṅghripadmam /
saṃdarśayedapi sakṛdbhavatī dayārdrā draṣṭāsmi kena tadahaṃ tu vilocanena // MSS_3440

avyājasundarīṃ tāṃ vijñānena lalitena yojayatā /
parikalpito vidhātrā bāṇaḥ kāmasya viṣadigdhaḥ // MSS_3441

avyāt sa vo yasya nisargavakraḥ spṛśatyadhijyasmaracāpalīlām /
jaṭāpinaddhoragarājaratna- marīcilīḍhobhayakoṭirinduḥ // MSS_3442

avyāt svarlokacūḍāmaṇipaṭalaśikhāśreṇiśoṇīkṛtāṅghriḥ kṣoṇībhāraṃ vinetuṃ jaṭharajuṣi jagadbāndhave devakī vaḥ /
rājñāmuddāmadoṣṇāṃ raṇaśirasi raṇatkīkasacchedabhīmāḥ śastrāṇāṃ khaṇṇakārāḥ pratihatiguravo yacchruterdohado'bhūt // MSS_3443

avyād vo vajrasārasphuradurunakharakrūracakrakramāgra- prodbhinnendrārivakṣaḥsthalagaladasṛgāsārakāśmīragauraḥ /
prasphūrjatkeśarāgragrathitajaladharaśreṇinīlābjamālyaḥ sūryācandrāvataṃso naraharirasamābaddhaśṛṅgāralīlaḥ // MSS_3444

avyād vo valitāṅghripātavicaladbhūgolahelonmukha- bhrāmyaddikkarikalpitānukaraṇo nṛtyan gaṇagrāmaṇīḥ /
yasyoddaṇḍitaśuṇḍapuṣkaramarudvyākṛṣṭasṛṣṭaṃ muhus tārācakramudaktaśīkarapṛṣallīlāmivābhyasyati // MSS_3445

avyād vo vāmano yasya kaustubhapratibimbitā /
kautukālokinī jātā jāṭharīva jagattrayī // MSS_3446

avyādhigātramanukūlataraṃ kalatraṃ veśma prasiddhavibhavaṃ niśitā ca vidyā /
ślāghyaṃ kulaṃ caramakālagatiḥ samartho mātuḥ kaṭākṣapariṇāmavibhūtayas te // MSS_3447

avyādhijaṃ kaṭukaṃ śīrṣarogaṃ pāpānubandhaṃ paruṣaṃ tīkṣṇamugram /
satāṃ peyaṃ yanna pibantyasanto manyuṃ mahārāja piba praśāmya // MSS_3448

avyādhinā śarīreṇa manasā ca nirādhinā /
pūrayannarthināmāśāṃ tvaṃ jīva śaradāṃ śatam // MSS_3449

avyāpareṣu vyāpāraṃ yo naraḥ kartumicchati /
sa eva nidhanaṃ yāti kīlotpaṭīva vānaraḥ // MSS_3450

avyāpāraratā vasantasamaye grīṣme vyavāyapriyāḥ saktāḥ pramṛṣi palvalāmbhasi nave kūpodakadveṣiṇaḥ /
kaṭvamloṣṇaratāḥ śaradyadhibhujo hemantanidrālasāḥ svairdoṣairapacīyamānavapuṣo naśyantu te śatravaḥ // MSS_3451

avyāhati na śakyā gaur vinā daṇḍena rakṣitum /
iti pratyeti mugdho'pi vallavaḥ kimu rājakam // MSS_3452

avyāhṛtaṃ vyāhṛtācchreya āhuḥ satyaṃ vaded vyāhṛtaṃ taddvitīyam /
priyaṃ vaded vyāhṛtaṃ tattṛtīyaṃ dharmyaṃ vaded vyāhṛtaṃ taccaturtham // MSS_3453

avyutpannasvabhāvānāṃ nārīṇamiva sāṃpratam /
sītkārācāryakaṃ kartum ayaṃ prāpto himāgamaḥ // MSS_3454

avyutpanne śrotari vaktṛtvamanarthakaṃ puṃsām /
netravihīne bhartari lāvaṇyamanarthakaṃ strīṇām // MSS_3455

avratasyāpi te dharmaḥ kārya evāntarāntarā /
medhībhūto'pi hi bhrāmyan ghāsagrāsaṃ karoti gauḥ // MSS_3456

aśaktaḥ satataṃ sādhuḥ kurūpā ca pativratā /
vyādhito devabhaktaśca nirdhanā brahmacāriṇaḥ // MSS_3457

aśaktastaskaraḥ sādhuḥ kurūpā cet pativratā /
rogī ca devatābhakto vṛddhā veśyā tapasvinī // MSS_3458

aśaktastu bhavet sādhur brahmacārī va nirdhanaḥ /
vyādhito devabhaktaśca vṛddhā nārī pativratā // MSS_3459

aśaktāḥ śaktimātmīyāṃ ślāghante ye ca durjanāḥ /
te bhavantyupahāsāya mahatāmeva saṃnidhau // MSS_3460

aśakte raudratātaikṣṇyaṃ tīvrapāpeṣu dhīratā /
chadmadhīrvāci pāruṣyaṃ nīcānāṃ śauryamīdṛśam // MSS_3461

aśaktairbalinaḥ śatroḥ kartavyaṃ prapalāyanam /
saṃśritavyo'thavā durgo nānyā teṣāṃ gatirbhavet // MSS_3462

aśakto yaḥ kṣāntiṃ satatamapakāriṇyapi jane vidhatte so'vaśyaṃ bhujaga iva daṃṣṭrāvirahitaḥ /
prabhuḥ satyāṃ śaktau kṣamata iha yasmāt sucaritaḥ sa tejasvī lokadvitayavijigīṣurvijayate // MSS_3463

aśaknuvan soḍhumadhīralocanaḥ sahasraraśmeriva yasya darśanam /
praviśya hemādriguhāgṛhāntaraṃ nināya bibhyad divasāni kauśikaḥ // MSS_3464

aśakyaṃ nārabhet prājñaḥ akāryaṃ naiva kārayet /
asatyaṃ naiva vaktavyam ālasyaṃ naiva kārayet // MSS_3465

aśakyaṃ nārabhet prājño akāryaṃ naiva kārayet /
yathādeśagataṃ dharmaṃ yathākālaṃ ca jīvayet // MSS_3466

aśakyaḥ sahasā rājan bhāvo vettuṃ parasya vai /
antaḥsvabhāvairgītaistair naipuṇyaṃ paśyatā bhṛśam // MSS_3467

aśakyārambhavṛttīnāṃ kutaḥ kleśādṛte phalam /
ākāśamāsvādayataḥ kutastu kavalagrahaḥ // MSS_3468

aśaṅkitamatiḥ svastho na śaṭhaḥ parisarpati /
na cāsya duṣṭā vāk cāpi tasmān nāstīha saṃśayaḥ // MSS_3469

aśaṅkitebhyaḥ śaṅketa śaṅkitebhyaśca sarvaśaḥ /
aśaṅkyādbhayamutpannam api mūlaṃ nikṛntati // MSS_3470

aśaṅkyamapi śaṅketa nityaṃ śaṅketa śaṅkitāt /
bhayaṃ hi śaṅkitājjātaṃ samūlamapi kṛntati // MSS_3471

aśaṭhamalolamajihmaṃ tyāginamanurāgiṇaṃ viśeṣajñam /
yadi nāśrayati naraṃ śrīḥ śrīreva hi vañcitā tatra // MSS_3472

aśaṭhahṛdayaḥ kṛtajñaḥ sānukrośaḥ sthitaḥ satāṃ mārge /
aparāpavādakarmā śucikarmarataḥ sa khalvāryaḥ // MSS_3473

aśanaṃ me vasanaṃ me jāyā me bandhuvargo me /
iti me me kurvāṇaṃ kālavṛko hanti puruṣājam // MSS_3474

aśanaṃ vasanaṃ vāso yasya kāśyāmamārgataḥ /
kīkaṭena samā kāśī gaṅgāpyaṅgāravāhinī // MSS_3475

aśanamātrakṛtajñatayā guror na piśuno'pi śuno labhate tulām /
api bahūpakṛte sakhitā khale na khalu khelati khe latikā yathā // MSS_3476

aśanādindriyāṇīva syuḥ kāryāṇyakhilānyapi /
etasmāt kāraṇād vittaṃ sarvasādhanamucyate // MSS_3477

aśanairaśanairbālye yauvane ghasmarāt smarāt /
kalyavaikalyataḥ śeṣe sphuṭaṃ naṣṭaṃ vayo nṛṇām // MSS_3478

aśaraṇaśaraṇapramodabhūtair vanatarubhiḥ kriyamāṇacārukarma /
hṛdayamiva durātmanāmaguptaṃ navamiva rājyamanirjitopabhogyam // MSS_3479

aśarmadahanajvalatkaṭukaṭākṣarūkṣekṣaṇa- kṣaṇakṣapitaśātrave jayati sindhurādhīśvare /
vayaṃ na bahu manmahe nijabhujānamadgāṇḍiva- cyutāstraśikhitāṇḍavajvalitakhāṇḍavaṃ pāṇḍavam // MSS_3480

aśastraṃ puruṣaṃ hatvā naraḥ saṃjāyate kharaḥ /
kṛmiḥ strīvadhakarttā ca bālahantā ca jāyate // MSS_3481

aśastrapūtamavyājaṃ puruṣāṅgopakalpitam /
vikrīyate mahāmāṃsaṃ gṛhyatāṃ gṛhyatāmidam // MSS_3482

aśāntahutabhukśikhākavalitaṃ jaganmandiraṃ sukhaṃ viṣamavātabhugnasanavaccalaṃ kāmajam /
jalasthaśaśicañcalā bhuvi vilokya lokasthitiṃ vimuñcata janāḥ sadā viṣayamūrchanāṃ tattvataḥ // MSS_3483

aśāntāntastṛṣṇā dhanalavaṇavārivyatikarair gatacchāyaḥ kāyaściravirasarūkṣāśanatayā /
anidrā mando'gnirnṛpasalilacaurānalabhayāt kadaryāṇāṃ kaṣṭaṃ sphuṭamadhanakaṣṭādapi param // MSS_3484

aśāśvatamidaṃ sarvaṃ cintyamānaṃ hi bhārata /
kadalīsaṃnibho lokaḥ samo hyasya na vidyate // MSS_3485

aśāsaṃstaskarān yastu baliṃ gṛhṇāti pārthivaḥ /
tasya prakṣubhyate rāṣṭraṃ svargācca parihīyate // MSS_3486

aśāstracakṣunṛpatir andha ityabhidhīyate /
varamandho na cakṣuṣmān madādākṣiptasatpathaḥ // MSS_3487

aśāstraviduṣāṃ teṣāṃ na kāryamahitaṃ vacaḥ /
arthaśāstrānabhijñānāṃ vipulāṃ śriyamicchatām // MSS_3488

aśikṣitānāṃ kāvyeṣu śāstrābhyāso nirarthakaḥ /
kimastyanupanītasya vājapeyādibhirmakhaiḥ // MSS_3489

aśithilaparispandaḥ kunde tathaiva madhuvrato nayanasuhṛdo vṛkṣāścaite na kuḍmalaśālinaḥ /
dalati kalikā cautī nāsmiṃstathā mṛgacakṣuṣām atha ca hṛdaye mānagranthiḥ svayaṃ śithilāyate // MSS_3490

aśithilamaparāvasajya kaṇṭhe dṛḍhaparirabdhabṛhadbahiḥ stanena /
hṛṣitatanuruhā bhujena bhartur mṛdumamṛdu vyatividdhamekabāhum // MSS_3491

aśirāḥ puruṣaḥ kāryo lalāṭe brahmaghātinaḥ /
asambhāṣyaśca kartavyas tan manoranuśāsanam // MSS_3492

rājā stenena gantavyo muktakeśena dhāvatā /
ācakṣāṇena tat steyam evaṃkarmāsmi śādhi mām // MSS_3493

aśiṣyaṃ śāsti yo rājan yaśca śūnyamupāsate /
kadaryaṃ bhajate yaśca tamāhurmūḍhacetasam // MSS_3494

aśītāstaraṇo māghe phālgune paśupakṣiṇau /
caitre jalacarāḥ sarve vaiśākhe naravānarau // MSS_3495

aśītenāmbhasā snānaṃ payaḥpānaṃ varāḥ striyaḥ /
etadvo mānuṣāḥ pathyaṃ snigdhamuṣṇaṃ ca bhojanam // MSS_3496

aśīmahi vayaṃ bhikṣām āśāvāso vasīmahi /
śayīmahi mahīpṛṣṭhe kurvīmahi kimīśvaraiḥ // MSS_3497

aśīlā bhinnamaryādā nityasaṃkīrṇamaithunāḥ /
alpāyuṣo bhavantīha tathā nirayagāminaḥ // MSS_3498

aśucitānilayaṃ pralayaṃ śriyām ayaśasāṃ vibhavaṃ prabhavaṃ rujām /
sukṛtanirdalanaṃ calanaṃ dhṛteḥ pariharet paravallabhayā ratam // MSS_3499

aśucirvacanād yasyaśucirbhavati pūruṣaḥ /
śuciścaivāśuciḥ sadyaḥ kathaṃ rājā na daivatam // MSS_3500

aśucīkṣaṇe'śrupāte kalahe śvāsakāsayoḥ /
rathyāprasarpaṇe'bhyaṅge kṣute narmaṇyupaspṛśet // MSS_3501

aśuddhaprakṛtau rājñi janatā nānurajyate /
yathā gṛdhrasamāsannaḥ kalahaṃsaḥ samācaret // MSS_3502

aśuddhā tu bhaven nārī yāvacchalyaṃ na muñcati /
niḥsṛte tu tataḥ śalye rajasā śudhyate tataḥ // MSS_3503

aśuddhīnāṃ tu sarvāsām ālayāḥ kutsitāḥ striyaḥ /
sadā śaucaṃ na kurvanti bhuñjate'nnaṃ tathāvidhāḥ // MSS_3504

aśubhapuṣi kalāvapyapramattāḥ svadharmād anudinamupakārānācarante budhānām /
bahujanaparipuṣṭā baddhadīkṣāsta ete tanusukhamapi hitvā tanvate rājasevām // MSS_3505

aśubhodaye janānāṃ naśyati buddhirna vidyate rakṣā /
suhṛdo'pi santi ripavo viṣamaviṣaṃ jāyate'pyamṛtam // MSS_3506

aśṛṇvannapi boddhavyo mantribhiḥ pṛthivīpatiḥ /
yathā svadoṣanāśāya vidureṇāmbikāsutaḥ // MSS_3507

aśeṣacakṣuḥśravaṇaṃ pratikūlo bhavannapi /
vinatānandaheturyaḥ sa pumānāptanandanaḥ // MSS_3508

aśeṣadoṣāpagamaprakāśa- mitrāgamotsāhamahotsavārham /
vikāsaśobhāṃ janayatyajasraṃ dhanaṃ janānāṃ dinamambujānām // MSS_3509

aśeṣalaṅkāpatisainyahantā śrīrāmasevācaraṇaikakartā /
anekaduḥkhāhatalokagoptā tvasau hanūmāṃstava saukhyakartā // MSS_3510

aśeṣavighnapratiṣedhadakṣa- mantrākṣatānāmiva diṅmukheṣu /
vikṣepalīlā karaśīkarāṇāṃ karotu vaḥ prītimibhānanasya // MSS_3511

aśokanirbhartsitapadmarāgam ākṛṣṭahemadyutikarṇikāram /
muktākalāpīkṛtasinduvāraṃ vasantapuṣpābharaṇaṃ vahantī // MSS_3512

aśoke śokārtaḥ kimasi bakule'pyākulamanā nirānandaḥ kunde saha ca sahakārairna ramase /
kusumbhe viśrambhaṃ yadiha bhajase kaṇṭakaśatair asaṃdigdhaṃ dagdhabhramara bhavitāsi kṣatavapuḥ // MSS_3513

aśocyaḥ śocate śocyaṃ kiṃ vā śocyo na śocyate /
kaśca kasyeha śocyo'sti dehe'smin budbudopame // MSS_3514

aśocyānanvaśocastvaṃ prajñāvādāṃśca bhāṣase /
gatāsūnagatāsūṃśca nānuśocanti paṇḍitāḥ // MSS_3515

aśocyānīha bhūtāni yo mūḍhastāni śocati /
tadduḥkhāllabhate duḥkhaṃ dvāvanarthau niṣevate // MSS_3516

aśocyo nirdhanaḥ prājño'śocyaḥ paṇḍitabāndhavaḥ /
aśocyā vidhavā nārī putrapautrapratiṣṭhitā // MSS_3517

aśnāti yaḥ saṃskurute nihanti dadāti gṛhṇātyanumanyate ca /
ete ṣaḍapyatra vinindanīyā bhramanti saṃsāravane nirantam // MSS_3518

aśnāti yo māṃsamasau vidhatte vadhānumodaṃ trasadehabhājām /
gṛhṇāti repāṃsi tatastapasvī tebhyo durantaṃ bhavameti jantuḥ // MSS_3519

aśnābhyācchādayāmīti prāpaśyan pāpapūruṣaḥ /
nāmarṣaṃ kurute yastu puruṣaḥ so'dhamaḥ smṛtaḥ // MSS_3520

aśnīta pibata khādata jāgrata saṃviśata tiṣṭhata vā /
sakṛdapi cintayatāhnaḥ sāvadhiko dehabandha iti // MSS_3521

aśmanā sādhayellohaṃ lohenāśmānameva ca /
bilbāniva kare bilvair mlecchān mlecchaiḥ prasādhayet // MSS_3522

aśmātakasya vāme badarī vā dṛśyate'hinilayo vā /
ṣaḍbhirudagvāsya karaiḥ sārdhe puruṣatraye toyam // MSS_3523

aśmānamapyupāyena lohaṃ vā jarayen naraḥ /
na tu kaścid upāyo'sti brahmasvaṃ yena jīryate // MSS_3524

aśmāpyahṛdayo yasya guṇasāraṃ parīkṣate /
ucitaiva suvarṇasya tasyāgnipatane ruciḥ // MSS_3525

aśraddhayā hutaṃ dattaṃ tapastaptaṃ kṛtaṃ ca yat /
asadityucyate pārtha na ca tat pretya no iha // MSS_3526

aśraddhādarśanaṃ bhāntir duḥkhaṃ ca trividhaṃ tataḥ /
daurmanasyamayogyeṣu viṣayeṣu ca yogatā // MSS_3527

aśraddheyaṃ na vaktavyaṃ pratyakṣamapi yad bhavet /
yathā vānarasaṃgītaṃ tathaiva plavate śilā // MSS_3528

aśrāntaṃ dṛḍhayantraṇena kucayoratyaktakāṭhinyayor ābaddhasphuṭamaṇḍalonnatimilaccolaṃ vimucyorasaḥ /
nīvīvicchuritaṃ vidhāya tamamuṃ vāmastanālambinīṃ veṇīṃ pāṇinakhāñcalaiḥ śithilayatyākramya pīṭhaṃ padā // MSS_3529

aśrāntaviśrāṇitayajñayūpa- stambhāvalīrdrāgavalambamānaḥ /
yasya svabhāvād bhuvi saṃcacāra kālakramādekapado'pi dharmaḥ // MSS_3530

aśrāntaśrutipāṭhapūtarasanāvirbhūtabhūristavā- jihmabrahmamukhaughavighnitanavasvargakriyākelinā /
pūrvaṃ gādhisutena sāmighaṭitā muktā nu mandākinī yatprāsādadukūlavalliranilāndolairakheladdivi // MSS_3531

aśrāntirbandhutāṃ dhatte kaṣṭaṃ naṣṭasya naśvaraḥ /
skandhena paṅgunā paṅgur nahi vartmani nīyate // MSS_3532

aśrāvi bhūmipatibhiḥ kṣaṇavītanidrair aśnan puro haritakaṃ mudamādadhānaḥ /
grīvāgralolakalakiṅkiṇikānināda- miśraṃ dadhaddaśanacarcuraśabdamaśvaḥ // MSS_3533

aśrucchalena sudṛśo hutapāvakadhūmakaluṣākṣyāḥ /
aprāpya mānamaṅge vigalati lāvaṇyavāripūra iva // MSS_3534

aśrutamiva khalajalpitam adṛṣṭamiva gurumukhendumālinyam /
agaṇitanijāpamānaṃ bhāmini bhavadarthamacyutaḥ sahate // MSS_3535

aśrutaśca samunnaddho daridraśca mahāmanāḥ /
arthāścākarmaṇā prepsur mūḍha ityucyate budhaiḥ // MSS_3536

aśrubhiḥ pādyamākalpya praṇīya hṛdayāsanam /
upete dayite kāntā pariṣvaṅgamupānayat // MSS_3537

aśvaṃ naiva gajaṃ naiva vyāghraṃ naiva ca naiva ca /
ajāputraṃ baliṃ dadyād devo durbalaghātakaḥ // MSS_3538

aśvaṃ snātaṃ gajaṃ mattaṃ vṛṣabhaṃ kāmamohitam /
śūdramakṣarasaṃyuktaṃ dūrataḥ parivarjayet // MSS_3539

aśvaḥ śastraṃ śāstraṃ vīṇā vāṇī naraśca nārī ca /
puruṣaviśeṣaṃ prāptā bhavantyayogyāśca yogyāśca // MSS_3540

aśvaḥ supto gajo matto gāvaḥ prathamasūtikāḥ /
antaḥpuragato rājā dūrataḥ parivarjayet // MSS_3541

aśvagandhāpalaṃ triṃśac cūrṇayitvā vicakṣaṇaḥ /
vṛddhadārukacūrṇena samabhāgaṃ ca kārayet // MSS_3542

aśvatthacalapatrāgralīnatoyakaṇopame /
sthirāśā jīvite yasya tatsamo nāstyacetanaḥ // MSS_3543

aśvatthamekaṃ picumandamekaṃ nyagrodhamekaṃ daśa ciñciṇīkāḥ /
kapitthabilvāmalakatrayaṃ ca pañcāmravāpī narakaṃ na paśyet // MSS_3544

aśvatthasya mahattvaṃ ko nanu vaktuṃ naraḥ prabhavet /
savitari yatrālakṣmīr mande lakṣmīramandāste // MSS_3545

aśvatthāmā balirvyāso hanūmāṃśca vibhīṣaṇaḥ /
kṛpaḥ paraśurāmaśca saptaite cirajīvinaḥ // MSS_3546

aśvatthāmā hata iti yudhi giramanṛtāṃ yudhiṣṭhiro'vādīt /
punaranutāpamavāpat pāpaṃ kṛtvānutapyeta // MSS_3547

aśvapṛṣṭhaṃ gajaskandho nārīṇāṃ ca payodharaḥ /
dantadhāvanaśastraṃ ca yathā sthūlaṃ tathā sukham // MSS_3548

aśvapraśaṃsā vikhyātā dhanurvedastataḥparam /
gāndharvaśāstramaparaṃ vṛkṣāyurveda eva ca // MSS_3549

aśvaplutaṃ vāsavagarjitaṃ ca strīṇāṃ ca cittaṃ puruṣasya bhāgyam /
avarṣaṇaṃ cāpyativarṣaṇaṃ ca devo na jānāti kṛto manuṣyaḥ // MSS_3550

aśvamadhye kṛtaravā śivā yuddhaprapañcakṛt /
śivā saptasvarā grāhyā bahuśabdāśca niṣphalāḥ // MSS_3551

aśvamedhasahasraṃ ca satyaṃ ca tulayā dhṛtam /
atyaricyata satyaṃ ca iti vedavido viduḥ // MSS_3552

aśvamedhasahasraṃ ca satyaṃ ca tulayā dhṛtam /
aśvamedhasahasrāddhi satyameva viśiṣyate // MSS_3553

aśvamedhasahasraṃ ca satyaṃ ca tulayā dhṛtam /
tulayitvā tu paśyāmi satyamevātiricyate // MSS_3554

aśvamedhasahasraṃ ca satyaṃ ca tulayā dhṛtam /
nābhijānāmi yadyasya satyasyārdhamavāpnuyāt // MSS_3555

aśvamedhasahasrasya phalaṃ satyaṃ tulāntare /
dhṛtvā saṃloḍyate rājan satye bhavati gauravam // MSS_3556

aśvamedhasahasrāṇāṃ sahasraṃ yaḥ samācaret /
nāsau padamavāpnoti madbhaktair yadavāpyate // MSS_3557

aśvayānaṃ gajaṃ mattaṃ gāvaścaiva prasūtikāḥ /
tathā cāntaḥpure dāsīṃ dūrataḥ parivarjayet // MSS_3558

aśvaśālāṃ samāsādya yadāntarmadhumakṣikāḥ /
madhujālaṃ prabadhnanti mriyante'śvāstadā dhruvam // MSS_3559

aśvasya lakṣaṇaṃ vego mado mātaṅgalakṣaṇam /
cāturyaṃ lakṣaṇaṃ nāryā udyogaḥ puruṣalakṣaṇam // MSS_3560

aśvānāṃ ca patākānāṃ bālānāṃ paṇyayoṣitām /
vidūṣakapaṭānāṃ ca cāpalyamatimaṇḍanam // MSS_3561

aśvā nāgāḥ syandanānāṃ ca saṅghā mantrāḥ siddhā daivataṃ cānukūlam /
etānyāhuḥ sādhanāni sma rājñāṃ yebhyaśceyaṃ buddhirutkṛṣyate me // MSS_3562

aśvā yasya jayastasya yasyāśvāstasya medinī /
aśvā yasya yaśas tasya yasyāśvās tasya kāñcanam // MSS_3563

aśvārūḍhaṃ payaḥpānaṃ gajārūḍhaṃ tu maithunam /
śibikīmardanaṃ caiva pādacārī tu bhojanam // MSS_3564

aśvārūḍhaṃ yatiṃ dṛṣṭvā khaṭvārūḍhāṃ rajasvalām /
sakeśāṃ vidhavāṃ dṛṣṭvā sacailaṃ snānamācaret // MSS_3565

aśvāścatuṣkoṭimitā lakṣāṇyekādaśaiva ca /
saptatriṃśatsahasrāṇi tathā śatacatuṣṭayam // MSS_3566

saptatiścaiva saṃkhyātāḥ procyante pattayastataḥ /
ṣaṭkoṭyo'śītilakṣāṇi pañcādhikamitāni ca // MSS_3567

dviṣaṣṭi ca sahasrāṇi tathā śatacatuṣṭayam /
pañcāśaditi saṃkhyātā mahākṣauhinikā budhaiḥ // MSS_3568

aśvinīmaitrarevatyo mṛgo mūlaṃ punarvasuḥ /
puṣyo jyeṣṭhā tathā hastaḥ prasthāne śreṣṭha ucyate // MSS_3569

aśvinī sūyate vatsaṃ kāmadhenusturaṃgamam /
tathaiva sāgaro vahniṃ yathā rājā tathā prajā // MSS_3570

aśvīye yamavāhanasya nakulasyāśīviṣāṇāṃ kule mārjārasya ca mūṣakeṣu ghaṭate yā prītirātyantikī /
kṣīṇe'rthe vidhureṣu bandhuṣu dṛḍhe lokāpavāde śanair jñeyā kāmijaneṣu saiva gaṇikāvargasya naisargikī // MSS_3571

aśve javo vṛṣe dhauryaṃ maṇau kāntiḥ kṣamā nṛpe /
hāvabhāvau ca veśyāyāṃ gāyake madhurasvaraḥ // MSS_3572

dātṛtvaṃ dhanike śauryaṃ sainike bahudugdhatā /
goṣu damastapasviṣu vidvatsu vāvadūkatā // MSS_3573

sabhyeṣvapakṣapātastu tathā sākṣiṣu satyavāk /
ananyabhaktirbhṛtyeṣu suhitoktiśca mantriṣu // MSS_3574

maunaṃ mūrkheṣu ca strīṣu pātivratyaṃ subhūṣaṇam /
mahādurbhūṣaṇaṃ caitad viparītamamīṣu ca // MSS_3575

aśvairyānaṃ yānaṃ strībhir līlaiva procyate līlā /
māṃsāṃ bhuktaṃ bhuktaṃ cānyad ayānamalīlābhuktam // MSS_3576

aṣṭakulācalasaptasamudrā brahmapuraṃdaradinakararudrāḥ /
na tvaṃ nāhaṃ nāyaṃ lokas tadapi kimarthaṃ kriyate śokaḥ // MSS_3577

aṣṭadhā devatāyonis tiryagyoniśca pañcadhā /
ekadhā mānuṣī yonir ime bhūtāścaturdaśa // MSS_3578

aṣṭapādaścatuṣkarṇo dvimukhī dvimukhastathā /
rājadvāre paṭhed ghoro na ca devo na rākṣasaḥ // MSS_3579

aṣṭamaṃ brahmarandhraṃ syāt paraṃ nirvāṇasūcakam / taddhyātvā sūcikāgrābhaṃ dhūmākāraṃ vimucyate /
tacca jālaṃdharaṃ jñeyaṃ mokṣadaṃ līnacetasām // aṣṭamī ca amāvāsyā varjanīyā caturdaśī / MSS_3580

pūrṇimārdhadinaṃ yāvan niṣiddhā sarvakarmasu // MSS_3581

aṣṭamī hantyupādhyāyaṃ śiṣyaṃ hanti caturdaśī /
āmāvāsyo'bhayaṃ hanti pratipat pāṭhanāśinī // MSS_3582

aṣṭame dvādaśe vāpi śākaṃ yaḥ pacate gṛhe /
kumitrāṇyanapāśritya kiṃ vai sukhataraṃ tataḥ // MSS_3583

aṣṭāṅgayogapariśīlanakīlanena duḥsādhasiddhisavidhaṃ vidadhad vidūre /
āsādayannabhimatāmadhunā viveka- khyātiṃ samādhidhanamaulimaṇirvimuktaḥ // MSS_3584

aṣṭāṅgulasya kathito vāyormāno vicakṣaṇaiḥ /
caturaṅgulamānaṃ ca tejastattvaṃ nigadyate // MSS_3585

aṣṭādaśa tathā madhye hīne caiva caturdaśa /
saptāṅgulaḥ khuraḥ prokta uttamāśvasya paṇḍitaiḥ // MSS_3586

aṣṭādaśapurāṇeṣu vyāsasya vacanadvayam /
paropakāraḥ puṇyāya pāpāya parapīḍanam // MSS_3587

aṣṭādaśāpi smṛtayo vadanti yasyāparādhaḥ khalu tasya daṇḍaḥ /
svasyāparādhaḥ khalu nābhimūle śiraḥ kuto muṇḍayate mṛgākṣi // MSS_3588

aṣṭānāṃ lokapālānāṃ saṃbhavatyaṃśato nṛpaḥ /
tasmādabhibhavatyeṣa sarvabhūtāni tejasā // MSS_3589

aṣṭābhiḥ kila daṇḍanītinipuṇaiḥ satprāḍvivākaiḥ samaṃ madhyesaudhamanuttamāsanagataḥ kāryāṇi kurvan nṛṇām /
viṣṇurbhūpavapurvidhāya kimasau dikpālayuk pālayaty evaṃ bhrāntimato manāṅ na kurute kāskānayaṃ mādhavaḥ // MSS_3590

aṣṭāvaṅgāni yogasya yamo niyama āsanam /
prāṇāyāmaḥ pratyāhāro dhāraṇā dhyānatanmayaḥ // MSS_3591

aṣṭāvimāni harṣasya navanītāni bhārata /
vartamānāni dṛśyante tānyeva susukhānyapi // MSS_3592

samāgamaśca sakhibhir mahāṃścaiva dhanāgamaḥ /
putreṇa ca pariṣvaṅgaḥ saṃnipātaśca maithune // MSS_3593

samaye ca priyālāpaḥ svayūtheṣu ca saṃnatiḥ /
abhipretasya lābhaśca pūjā ca janasaṃsadi // MSS_3594

aṣṭottaraśataṃ ślokaṃ cāṇakyena yathoditam /
yasya vijñānamātreṇa n ṇāṃ prajñā pravardhate // MSS_3595

aṣṭau guṇāḥ puruṣaṃ dīpayanti prajñā ca kaulyaṃ ca damaḥ śrutaṃ ca /
parākramaścābahubhāṣitā ca dānaṃ yathāśakti kṛtajñatā ca // MSS_3596

aṣṭau tānyavrataghnāni āpo mūlaṃ phalaṃ payaḥ /
havirbhrāhmaṇakāmyā ca gurorvacanamauṣadham // MSS_3597

aṣṭau nṛpemāni manuṣyaloke svargasya lokasya nidarśanāni /
catvāryeṣāmanvavetāni sadbhiś catvāryeṣāmanvavayanti santaḥ // MSS_3598

yajño dānamadhyayanaṃ tapaśca catvāryetānyanvavetāni sadbhiḥ /
damaḥ satyamārjavamānṛśaṃsyaṃ catvāryetānyanvavayanti santaḥ // MSS_3599

aṣṭau pūrvanimittāni narasya vinaśiṣyataḥ /
brāhmaṇān prathamaṃ dveṣṭi brāhmaṇaiśca virudhyate // MSS_3600

brāhmaṇasvāni cādatte brāhmaṇāṃśca jighāṃsati /
ramate nindayā caiṣāṃ praśaṃsāṃ nābhinandati // MSS_3601

naitān smarati kṛtyeṣu yācitaś cābhyasūyati /
etān doṣān naraḥ prājño buddhyā buddhvā vivarjayet // MSS_3602

aṣṭau māsān yathādityas toyaṃ harati raśmibhiḥ /
tathā haret karaṃ rāṣṭrān nityamarkavrataṃ hi tat // MSS_3603

aṣṭau yadā tu dṛśyante samantād devayonayaḥ /
upasargaṃ tamityāhur daivamunmattavad budhāḥ // MSS_3604

aṣṭau yasya diśo dalāni vipulaḥ kośaḥ suvarṇācalaḥ kāntaṃ kesarajālamarkakiraṇā bhṛṅgāḥ payodāvalī /
nālaṃ śeṣamahoragaḥ pravitataṃ vārāṃnidherlīlayā tadvaḥ pātu samuddharan kuvalayaṃ kroḍākṛtiḥ keśavaḥ // MSS_3605

aṣṭau hāṭakakoṭayastrinavatirmuktāphalānāṃ tulāḥ pañcāśanmadhugandhamattamadhupāḥ krodhoddhatāḥ sindhurāḥ /
aśvānāmayutaṃ prapañcacaturaṃ vārāṅganānāṃ śataṃ dattaṃ pāṇḍyanṛpeṇa yautakamidaṃ vaitālikāyārpyatām // MSS_3606

asaṃkalpājjayet kāmaṃ krodhaṃ kāmavivarjanāt /
arthānarthekṣayā lobhaṃ bhayaṃ tattvāvamarśanāt // MSS_3607

asaṃkalpitameveha yadakasmāt pravartate /
nivartyārambhamārabdhaṃ nanu daivasya karma tat // MSS_3608

asaṃkhyapuṣpo'pi manobhavasya pañcaiva bāṇārthamayaṃ dadāti /
evaṃ kadaryatvamivāvadhārya sarvasvamagrāhi madhorvadhūbhiḥ // MSS_3609

asaṃkhyāḥ paradoṣajñā guṇajñā api kecana /
svayameva svadoṣajñā vidyante yadi pañcaṣāḥ // MSS_3610

asaṃgatenonnatimāgatena calena vakreṇa malīmasena /
sā durjaneneva samastametaṃ prabādhate bhrūyugalena lokam // MSS_3611

asaṃgṛhītasya punar mantrasya śṛṇu yatphalam /
ahīnaṃ dharmakāmābhyām arthaṃ prāpnoti kevalam // MSS_3612

asaṃcayādapūrvasya kṣayāt pūrvārjitasya ca /
karmaṇo bandhamāpnoti śārīraṃ na punaḥ punaḥ // MSS_3613

asaṃtuṣṭasya viprasya tejo vidyā tapo yaśaḥ /
sravantīndriyalaulyena jñānaṃ caivāvakīryate // MSS_3614

asaṃtuṣṭā dvijā naṣṭāḥ saṃtuṣṭāśca mahībhṛtaḥ /
salajjā gaṇikā naṣṭā nirlajjāśca kulāṅganā // MSS_3615

asaṃtuṣṭāścyutāḥ sthānān mānāt pratyavaropitāḥ /
svayaṃ copahṛtā bhṛtyā ye cāpyupahatāḥ paraiḥ // MSS_3616

asaṃtuṣṭo'sakṛllokān āpnotyapi sureśvaraḥ /
akiṃcano'pi saṃtuṣṭaḥ śete sarvāṅgavijvaraḥ // MSS_3617

asaṃtoṣaḥ paraṃ duḥkhaṃ saṃtoṣaḥ paramaṃ sukham /
sukhārthī puruṣas tasmāt saṃtuṣṭaḥ satataḥ bhavet // MSS_3618

asaṃtoṣaḥ paraṃ pāpam ityāha bhagavān hariḥ /
lobhaḥ pāpasya bījo'yaṃ moho mūlaṃ ca tasya vai /
asatyaṃ tasya hi skandho mahāśākhā suvistarā // MSS_3619

asaṃtoṣaparā mūḍhāḥ saṃtoṣaṃ yānti paṇḍitāḥ /
asantoṣasya nāstyantas tuṣṭistu paramaṃ sukham // MSS_3620

asaṃtoṣo'sukhāyaiva lobhādindriyavibhramaḥ /
tato'sya naśyati prajñā vidyevābhyāsavarjitā // MSS_3621

asaṃtyāgāt pāpakṛtāmapāpāṃs tulyo daṇḍaḥ spṛśate miśrabhāvāt /
śuṣkeṇārdraṃ dahyate miśrabhāvāt tasmāt pāpaiḥ saha saṃdhiṃ na kuryāt // MSS_3622

asaṃdadhāno mānāndhaḥ samenāpi hato bhṛśam /
āmakumbhamivābhittvā nāvatiṣṭheta śaktimān // MSS_3623

asaṃdigdhamanā bhūtvā vadedikṣuraso yathā /
vikṣubdho vacasā yo hi vākyaśalyena hanyate // MSS_3624

asaṃpattau paro lābho guhyasya kathanaṃ tathā /
āpadvimokṣaṇaṃ caiva mitrasyaitat phalatrayam // MSS_3625

asaṃpannaḥ kathaṃ bandhur asahiṣṇuḥ kathaṃ prabhuḥ /
anātmavit kathaṃ vidvān asaṃtuṣṭaḥ kathaṃ sukhī // MSS_3626

asaṃpādayataḥ kaṃcidarthaṃ jātikriyāguṇaiḥ /
yadṛcchāśabdavatpuṃsaḥ saṃjñāyai janma kevalam // MSS_3627

asaṃprāptarajā gaurī prāpte rajasi rohiṇī /
avyañjanā bhavet kanyā kucahīnā ca nagnikā // MSS_3628

asaṃbhavaṃ hemamṛgasya janma tathāpi rāmo lulubhe mṛgāya /
prāyaḥ samāpannavipattikāle dhiyo'pi puṃsāṃ malinā bhavanti // MSS_3629

asaṃbhavaguṇastutyā jāyate svātmanastrapā /
karṇikāraṃ sugandhīti vadan ko nopahasyate // MSS_3630

asaṃbhāvyaṃ na vaktavyaṃ pratyakṣamapi dṛśyate /
śilā tarati pānīyaṃ gītaṃ gāyati vānaraḥ // MSS_3631

asaṃbhāṣyaṃ na bhāṣeta bhāṣase yadi tattathā /
pareṣāṃ hi samudvege nātmanaśca śubhaṃ phalam // MSS_3632

asaṃbhṛtaṃ maṇḍanamaṅgayaṣṭer anāsavākhyaṃ karaṇaṃ madasya /
kāmasya puṣpavyatiriktamastraṃ bālyāt paraṃ sātha vayaḥ prapede // MSS_3633

asaṃbhedyaḥ śucirdakṣaḥ kṛtānnasya parīkṣakaḥ /
sūdānāṃ ca viśeṣajñaḥ sūdādhyakṣo vidhīyate // MSS_3634

asaṃbhogena sāmānyaṃ kṛpaṇasya dhanaṃ paraiḥ /
asyedamiti saṃbandho hānau duḥkhena gamyate // MSS_3635

asaṃbhramo vilajjatvam avajñā prativādini /
hāso rājñaḥ stavaśceti pañcaite jayahetavaḥ // MSS_3636

asaṃmataḥ kastava muktimārgaṃ punarbhavakleśabhayāt prapannaḥ /
baddhaściraṃ tiṣṭhatu sundarīṇām ārecitabhrūcaturaiḥ kaṭākṣaiḥ // MSS_3637

asaṃmāne tapovṛddhiḥ saṃmmānācca tapaḥkṣayaḥ /
pūjayā puṇyahāniḥ syān nindayā sadgatirbhavet // MSS_3638

asaṃmukhālokanamābhimukhyaṃ niṣedha evānumatiprakāraḥ /
pratyuttaraṃ mudraṇameva vācāṃ navāṅganānāṃ nava eva panthāḥ // MSS_3639

asaṃvibhāgī duṣṭātmā kṛtaghno nirapatrapaḥ /
tādṛṅnarādhamo loke varjanīyo narādhipa // MSS_3640

asaṃvṛtasya kāryāṇi prāptānyapi viśeṣataḥ /
niḥsaṃśayaṃ vipadyante bhinnaplava ivodadhau // MSS_3641

asaṃvṛtākāratayā bhinnamantrasya bhūpateḥ /
sakṛcchidraghaṭasyeva na tiṣṭhatyudayodakam // MSS_3642

asaṃśayaṃ kṣatraparigrahakṣamā yadāryamasyāmabhilāṣi me manaḥ /
satāṃ hi saṃdehapadeṣu vastuṣu pramāṇamantaḥkaraṇapravṛttayaḥ // MSS_3643

asaṃśayaṃ nyastamupāntaraktatāṃ yadeva roddhuṃ rāmaṇībhirañjanam /
hṛte'pi tasmin salilena śuklatāṃ nirāsa rāgo nayaneṣu na śriyam // MSS_3644

asaṃśayaṃ mahābāho mano durnigrahaṃ calam /
abhyāsena tu kaunteya vairāgyeṇa ca gṛhyate // MSS_3645

asaṃśayaṃ vijānīhi kāle sarvaṃ phaliṣyati /
dhṛtiṃ dhāraya visrabdhaṃ bhavet sarvaṃ samañjasam // MSS_3646

asakalakalikākulīkṛtāli- skhalanavikīrṇavikāsikeśarāṇām /
marudavaniruhāṃ rajo vadhūbhyaḥ samupaharan vicakāra korakāṇi // MSS_3647

asakalanayanāvalokanena smitaparihāsamanoharairvacobhiḥ /
kamalamukhi murārirevamevaṃ kathaya kiyanti dināni vañcanīyaḥ // MSS_3648

asakalanayanekṣitāni lajjā gatamalasaṃ paripāṇḍutā viṣādaḥ /
iti vividhamiyāya tāsu bhūṣāṃ prabhavati maṇḍayituṃ vadhūranaṅgaḥ // MSS_3649

asakṛdasakṛnnaṣṭāṃ naṣṭāṃ mṛgo mṛgatṛṣṇikāṃ śramaparigato'pyutpakṣmākṣaḥ paraiti punaḥ punaḥ /
gaṇayati na tanmāyātoyaṃ hataḥ salilāśayā bhavati hi matistṛṣṇāndhānāṃ vivekaparāṅmukhī // MSS_3650

asakṛn na ne'ti sāvadhi- niṣedhabodhiśrutirmayā kalitā /
gamayati paramanavarataṃ yā tamakhaṇḍārtharūpamānandam // MSS_3651

asakṛdekarathena tarasvinā harihayāgrasareṇa dhanurbhṛtā /
dinakarābhimukhā raṇareṇavo rurudhire rudhireṇa suradviṣām // MSS_3652

asakṛd yudhi vijitādapi bhīto bārhadrathājjale durgam /
kṛtvā harirnyavātsīd vijito'pyāśaṅkanīyo'riḥ // MSS_3653

asakṛn na vadedāśāṃ prārthayed devatāṃ sakṛt /
nālāyanī pañca patīn prāpoccārya punaḥ punaḥ // MSS_3654

asaktamārādhayato yathāyathaṃ vibhajya bhaktyā samapakṣapātayā /
guṇānurāgādiva sakhyamīyivān na bādhate'sya trigaṇaḥ parasparam // MSS_3655

asaṅgasaṃgadoṣeṇa satyāśca mativibhramaḥ /
ekarātraprasaṅgena kāṣṭhaghaṇṭāviḍambanā // MSS_3656

asajjanaḥ sajjanasaṅgisaṅgāt karoti duḥsādhyamapīha sādhyam /
puṣpāśrayācchaṃbhuśiro'dhirūḍhā pipīlikā cumbati candrabimbam // MSS_3657

asajjanāyāśu varaṃ na dadyāt prītito nṛpaḥ /
varaṃ bhasmāsurāyeśaḥ dattvā nīliphalaṃ gataḥ // MSS_3658

asajjanāścen madhurairvacobhiḥ śakyanta eva pratikartumāryaiḥ /
tatketakīreṇubhiramburāśer bandhakriyāyāmapi kaḥ prayāsaḥ // MSS_3659

asajjanena saṃparkād anayaṃ yānti sādhavaḥ /
madhuraṃ śītalaṃ toyaṃ pāvakaṃ prāpya tapyate // MSS_3660

asataḥ śrīmadāndhasya dāridryaṃ paramāñjanam /
ātmaupamyena bhūtāni daridraḥ paramīkṣate // MSS_3661

asatāṃ ca parikṣepaḥ satāṃ ca parigūhanam /
abhūtānāṃ ca hiṃsānām adharmāṇāṃ ca varjanam // MSS_3662

asatāṃ dharmabuddhiścet satāṃ saṃtāpakāraṇam /
upoṣitasya vyāghrasya pāraṇaṃ paśumāraṇam // MSS_3663

asatāṃ pragrahaḥ kāmaḥ kopaścāvagrahaḥ satām /
vyasanaṃ doṣabāhulyād atyantamubhayaṃ matam // MSS_3664

asatāṃ bata sattāpi na nyāyānugatā yadā /
tatastebhyorthapūrttyāśā sudhālipseva bhoginaḥ // MSS_3665

asatāṃ saṅgadoṣeṇa satī yāti matirbhramam /
ekarātripravāsena kāṣṭhaṃ muñje pralambitam // MSS_3666

asatāṃ saṅgadoṣeṇa sādhavo yānti vikriyām /
duryodhanaprasaṅgena bhīṣmo goharaṇe gataḥ // MSS_3667

asatāṃ saṅgamutsṛjya satsu saṅgaṃ samācaret /
asatāṃ saṅgadoṣeṇa māṇḍavyaḥ śūlamāptavān // MSS_3668

asatāṃ sahajo bhāvaś channaḥ kenāpi hetunā /
saṃskāra iva bījānāṃ phalena saha jāyate // MSS_3669

asatāmupabhogāya durjanānāṃ vibhūtayaḥ /
picumandaḥ phalāḍhyo'pi kākairevopabhujyate // MSS_3670

asatā saha saṅgena ko na yātyadhamāṃ gatim /
payo'pi śauṇḍanīhaste madyamityabhidhīyate // MSS_3671

asatīcaritaṃ tadvad vasantādeścavarṇanam /
grīṣmādervarṇanaṃ tadvad varṣāderapi varṇanam // MSS_3672

asatī bhavati salajjā kṣāraṃ nīraṃ ca śītalaṃ bhavati /
dambhī bhavati vivekī priyavaktā bhavati dhūrtajanaḥ // MSS_3673

asato'pi bhavati guṇavān sadbhyo'pi paraṃ bhavantyasadvṛttāḥ /
paṅkādudeti kamalaṃ krimayaḥ kamalādapi bhavanti // MSS_3674

asato vā sato vāpi svayaṃ svān varṇayan guṇān /
hāsyatāṃ yāti śakro'pi kiṃ punaḥ prākṛto janaḥ // MSS_3675

asatkāryarato'dhīra ārambhī viṣayī ca yaḥ /
sa rājaso manuṣyeṣu mṛto janmādhigacchati // MSS_3676

asatpratigrahītā ca narake yātyadhomukhe /
eko miṣṭānnabhug yaḥ sa yāti pūyavahaṃ naraḥ // MSS_3677

asatpralāpaṃ pāruṣyaṃ paiśunyamanṛtaṃ tathā /
catvāri vācā rājendra na jalpen nānucintayet // MSS_3678

asatyaḥ sarvaloke'smin satataṃ satkṛtāḥ priyaiḥ /
bhartāraṃ nānumanyaṃte vinipātagataṃ striyaḥ // MSS_3679

asatyatā niṣṭhuratākṛtajñatā bhayaṃ pramādo'lasatā viṣāditā /
vṛthābhimāno'pi ca dīrghasūtratā tathāṅganākṣādi vināśanaṃ śriyaḥ // MSS_3680

asatyamapratyayamūlakāraṇaṃ kuvāsanāsadmasamṛddhivāraṇam /
vipannidānaṃ paravañcanorjitaṃ kṛtāparādhaṃ kṛtibhirvivarjitam // MSS_3681

asatyametad viditaṃ samastam akāryakārīti mṛṣā prapañcaḥ /
kucāpalāpakramameva kartum ācchādanaṃ te hṛdayasya śaśvat // MSS_3682

asatyaśīlā vikṛtā durgrāhyahṛdayāḥ sadā /
yuvatyaḥ pāpasaṃkalpāḥ kṣaṇamātrād virāgiṇaḥ // MSS_3683

asatyasaṃdhasya sataś calasyāsthiracetasaḥ /
naiva devā na pitaraḥ pratīcchantīti naḥ śrutam // MSS_3684

asatyasya vaṇigmūlaṃ śākhāstasya varāṅganāḥ /
kāyasthāḥ patrapuṣpāṇi phalāni dyūtakāriṇaḥ // MSS_3685

asatyāḥ satyasaṃkāśāḥ satyāścāsatyarūpiṇaḥ /
dṛśyante vividhā bhāvās tasmād yuktaṃ parīkṣaṇam // MSS_3686

asatyā ca hatā vāṇī tathā paiśunyavādinī /
saṃdigdho'pi hato mantro vyagracitto hato japaḥ // MSS_3687

asatyātmaguṇe śastraṃ hastābhyāṃ vinivāryate /
eṣāpi na gatiḥ kṣemyā na cānyā vidyate kvacit // MSS_3688

asatyenaiva jīvanti veśyāḥ satyavivarjitāḥ /
etāḥ satyena naśyanti madyeneva kulāṅganāḥ // MSS_3689

asatsaṃparkadoṣeṇa adhastād yānti sādhavaḥ /
mārgastimiradoṣeṇa samo'pi viṣamāyate // MSS_3690

asatsaṅgād guṇajño'pi viṣayāsaktamānasaḥ /
akasmāt pralayaṃ yāti gītarakto yathā mṛgaḥ // MSS_3691

asadṛśajaneṣu yācñā mahatāṃ nahi lāghavāya suhṛdarthe /
harirapi pāṇḍusutebhyaḥ svayamarthī dhārtarāṣṭreṣu // MSS_3692

asaddharmastvayaṃ strīṇām asmākaṃ bhavati prabho /
pāpīyaso narān yadvai lajjāṃ tyaktvā bhajāmahe // MSS_3693

asadbhiḥ sevito rājā svayaṃ sannapi dūṣyate /
kiṃ sevyo bhogisaṃvīto gandhavānapi candanaḥ // MSS_3694

asadbhirasatāmeva bhujyante dhanasaṃpadaḥ /
phalaṃ kimpākavṛkṣasya dhvāṅkṣā bhakṣanti netare // MSS_3695

asadvṛtto nāyaṃ na ca sakhi guṇaireṣa rahitaḥ priyo muktāhārastava caraṇamūle nipatitaḥ /
gṛhāṇainaṃ mugdhe vrajatu tava kaṇṭhapraṇayitām upāyo nāstyanyo hṛdayaparitāpopaśamane // MSS_3696

asanto'bhyarthitāḥ sadbhiḥ kiṃcitkāryaṃ kadācana /
manyante santamātmānam asantamapi vitaśrum // MSS_3697

asanto ye nivartante vedebhya iva nāstikāḥ /
narakaṃ bhajamānāste pratipadyanti kilbiṣam // MSS_3698

asanthitapadā suvihvalāṅgī madaskhalitaceṣṭitairmanojñā /
kva yāsyasi varoru suratakāle viṣamā kiṃ vānavāsikā tvam // MSS_3699

asabhyaḥ piśunaścaiva kṛtaghno dīrghavairiṇaḥ /
catvāraḥ karmacaṇḍālāḥ jāticaṇḍālapañcamāḥ // MSS_3700

asamagravilokitena kiṃ te dayitaṃ paśya varoru nirviśaṅkam /
nahi jātu kuśāgrapītamambhaḥ sucireṇāpi karotyapetatṛṣṇam // MSS_3701

asamañjasamasamañjasa- masañjasametadāpatitam /
vallavakumārabuddhyā hari hari harirīkṣataḥ kutukāt // MSS_3702

asamarthaṃ parityajya samarthāḥ paribhuñjate /
nṛpāṇāṃ nāsti dāyādyaṃ vīrabhogyā vasundharā // MSS_3703

asamaye matirunmiṣati dhruvaṃ karagataiva gatā yadiyaṃ kuhūḥ /
punarupaiti nirudhya nivāsyate sakhi mukhaṃ na vidhoḥ punarīkṣyate // MSS_3704

asamarthāḥ prakurvanti munayo'pyarthasaṃcayam /
kiṃ na kurvanti bhūpālā yeṣāṃ kośavaśāḥ prajāḥ // MSS_3705

asamartho bhavet sādhur nirdhano brahmacāryapi /
vyādhimān devapūjī ca kurūpā ca pativratā // MSS_3706

asamasamarasampallampaṭānāṃ bhaṭānām avadhiravadhi yuddhe yena hampīravīraḥ /
sa kila sakaladṛptakṣatranakṣatralakṣmī- haraṇakiraṇamālī kasya na syān namasyaḥ // MSS_3707

asamasāhasasuvyavasāyinaḥ sakalalokacamatkṛtikāriṇaḥ /
yadi bhavanti na vāñchitasiddhayo hatavidherayaśo na manasvinaḥ // MSS_3708

asamāne samānatvaṃ bhavitā kalahe mama /
iti matvā dhruvaṃ mānī mṛgāt siṃhaḥ palāyate // MSS_3709

asamāpitakṛtyasaṃpadāṃ hatavegaṃ vinayena tāvatā /
prabhavantyabhimānaśālināṃ madamuttambhayituṃ vibhūtayaḥ // MSS_3710

asamāptajigīṣasya strīcintā kā manasvinaḥ /
anākramya jagat kṛtsnaṃ no saṃdhyāṃ bhajate raviḥ // MSS_3711

asamaiḥ samīyamānaḥ samaiśca parihīyamāṇasatkāraḥ /
adhuri viniyujyamānas tribhirarthapatiṃ tyajati bhṛtyaḥ // MSS_3712

asamyagupayuktaṃ hi jñānaṃ sukuśalairapi /
upalabhyāpyaviditaṃ viditaṃ cāpyanuṣṭhitam // MSS_3713

asahāyaḥ pumānekaḥ kāryāntaṃ nādhigacchati /
tuṣeṇāpi vinirmuktas taṇḍulo na prarohati // MSS_3714

asahāyaḥ samartho'pi tejasvī kiṃ kariṣyati /
rāmaḥ sugrīvasāhāyyāt laṅkāṃ nirdagdhavān purā // MSS_3715

asahāyaḥ samartho'pi tejasvyapi karoti kim /
nivāte patito vahniḥ svayamevopaśāmyati // MSS_3716

asahāyaḥ samartho'pi na kāryaṃ kartumarhati /
tuṣeṇāpi parityaktā na prarohanti taṇḍulāḥ // MSS_3717

asahāyaḥ sahāyārthī māmanudhyātavān dhruvam /
pīḍyamānaḥ śaraistīkṣṇair droṇadrauṇikṛpādibhiḥ // MSS_3718

asahāyasya kāryāṇi siddhiṃ nāyānti kānicit /
tasmāt samastakāryeṣu sahāyo bhūpatergatiḥ // MSS_3719

asahāyo'samartho vā tejasvī kiṃ kariṣyati /
atṛṇe patito vahniḥ svayamevopaśāmyate // MSS_3720

asahāścaiva vijñeyāḥ prabhāvanto videhajāḥ /
aṅgadeśodbhavāstīkṣṇāḥ suhastāḥ sudṛḍhāstathā // MSS_3721

asahyavātoddhatareṇumaṇḍalā pracaṇḍasūryātapatāpitā mahī /
na śakyate draṣṭumapi pravāsibhiḥ priyāviyogānaladagdhamānasaiḥ // MSS_3722

asahyānyapi soḍhāni gaditānyapriyāṇyapi /
sthitaḥ paragṛhadvāri tṛṣṇe nivṛttimāpnuhi // MSS_3723

asādhanā vittahīnā buddhimantaḥ suhṛnmatāḥ /
sādhayantyāśu kāryāṇi kākakūrmamṛgākhuvat // MSS_3724

asādhuḥ sādhurvā bhavati khalu jātyaiva puruṣo na saṅgād daurjanyaṃ na hi sujanatā kasyacidapi /
prarūḍhe saṃsarge maṇibhujagayorjanmajanite maṇirnāherdoṣān spṛśati na tu sarpo maṇiguṇān // MSS_3725

asādhu parigantavyaṃ na ca sādhu ca saṃvalam /
saṃvalaṃ kuru yatnena maraṇaṃ dhruvaniścayam // MSS_3726

asādhyaṃ nārabhet prājñaḥ akāryaṃ naiva kārayet /
anṛtaṃ naiva jalpeta abhakṣyaṃ naiva bhakṣayet // MSS_3727

asādhyaṃ śatrumālokya dāyādaṃ tasya bhedayet /
rājyakāmaṃ samarthaṃ ca yathā rāmo vibhīṣaṇam // MSS_3728

asādhyaṃ sādhumantrāṇāṃ tīvraṃ vāgviṣamutsṛjat /
dvijihvaṃ vadanaṃ dhatte duṣṭo durjanapannagaḥ // MSS_3729

asādhyamanyathā doṣaṃ paricchidya śarīriṇām /
yathā vaidyastathā rājā śastrapāṇirviṣahyati // MSS_3730

asādhyāyāḥ sukhaṃ siddhiḥ siddhāyāścānurañjanam /
raktāyāśca ratiḥ samyak kāmaśāstraprayojanam // MSS_3731

asāmānyollekhaṃ virasahatahevākinamalaṃ vidhiṃ vande nindāmyuta bata na jāne kimucitam /
anarghaṃ nirmāṇaṃ lalitatanu yasyeha bhavatī na yaḥ kṛtvāpi tvāṃ pariharati sargavyasanitām // MSS_3732

asāraṃ saṃsāraṃ parimuṣitaratnaṃ tribhuvanaṃ nirālokaṃ lokaṃ maraṇaśaraṇaṃ bāndhavajanam /
adarpaṃ kandarpaṃ jananayananirmāṇamaphalaṃ jagajjīrṇāraṇyaṃ kathamasi vidhātuṃ vyavasitaḥ // MSS_3733

asāraḥ saṃsāraḥ sarasakadalīsārasadṛśo lasadvidyullekhācakitacapalaṃ jīvitamidam /
yadetat tāruṇyaṃ nagagatanadīvegasadṛśam aho dhārṣṭyaṃ puṃsāṃ tadapi viṣayān dhāvati manaḥ // MSS_3734

asāraḥ sarvataḥ sāro vācā sārasamuccayaḥ /
vācā sā calitā yena sukṛtaṃ tena hāritam // MSS_3735

asārabhūte saṃsāre sāraṃ sāraṅgalocanā /
tadarthaṃ dhanamicchanti tattyāge ca dhanena kim // MSS_3736

asārabhūte saṃsāre sārabhūtā nitambinī /
iti saṃcintya vai śaṃbhur ardhāṅge kāminīṃ dadhau // MSS_3737

asārāḥ santyete virativirasā vātha viṣayā jugupsantāṃ yad vā nanu sakaladoṣāspadamiti /
tathāpyantastattvapraṇihitadhiyāmapyatibalas tadīyo'nākhyeyaḥ sphurati hṛdaye ko'pi mahimā // MSS_3738

asāre khalu saṃsāre sāraṃ śvaśuramandiram /
kṣīrābdhau ca hariḥ śete śivaḥ śete himālaye // MSS_3739

asāre khalu saṃsāre sāraṃ śvaśuramandiram /
haro himālaye śete viṣṇuḥ śete mahodadhau // MSS_3740

asāre khalu saṃsāre sārametaccatuṣṭayam /
kāśyāṃ vāsaḥ satāṃ saṅgo gaṅgāmbhaḥ śaṃbhusevanam // MSS_3741

asāre khalu saṃsāre sukhabhrāntiḥ śarīriṇām /
lālāpānamivāṅguṣṭhe bālānāṃ stanyavibhramaḥ // MSS_3742

asāre bata saṃsāre karmatantraḥ śarīriṇām /
jāyante priyasaṃyogā viyoge hṛdayacchidaḥ // MSS_3743

asāre saṃsāre viṣamaviṣapāke nṛpasukhe kṛtāntenācānte prakṛticapale jīvitabale /
dhruvāpāye kāye viṣayamṛgatṛṣṇāhatahṛdaḥ kṣaraprāṇaiḥ prāṇānahaha parimuṣṇanti kudhiyaḥ // MSS_3744

asāre saṃsāre sumatiśaraṇe kāvyakaraṇe yatheṣṭaṃ ceṣṭante kati na kavayaḥ svasvarucayaḥ /
paraṃ dugdhasnigdhaṃ madhuraracanaṃ yastu vacanaṃ prasūte brūte vā bhavati viralaḥ ko'pi saralaḥ // MSS_3745

asāro nirguṇo vakraś citrarūpatayānvitaḥ /
avāpa na cirād bhraṃśaṃ śakracāpaḥ khalo yathā // MSS_3746

asāvadhāne pāṇḍityaṃ krayakrītaṃ ca maithunam /
bhojanaṃ ca parādhīnaṃ tisraḥ puṃsāṃ viḍambanāḥ // MSS_3747

asāvanāsthāparayāvadhīritaḥ saroruhiṇyā śirasā namannapi /
upaiti śuṣyan kalamaḥ sahāmbhasā manobhuvā tapta ivābhipāṇḍutām // MSS_3748

asāvanupanīto'pi vedānadhijage guroḥ /
svabhāvaśuddhaḥ sphaṭiko na saṃskāramapekṣate // MSS_3749

asāvantaścañcadvikacanavalīlābjayugala- stalasphūrjatkamburvilasadalisaṃghāta upari /
vinā doṣāsaṅgaṃ satataparipūrṇākhilakalaḥ kutaḥ prāptaścandro vigalitakalaṅkaḥ sumukhi te // MSS_3750

asāvahaṃ lohamayī sa yasyāḥ krūraḥ sakhi prastara eṣa kāntaḥ /
ākarṣakadrāvakacumbakeṣu naiko'pyasau bhrāmaka ityavaihi // MSS_3751

asāvudayamārūḍhaḥ kāntimān raktamaṇḍalaḥ /
rājā harati lokasya hṛdayaṃ mṛdubhiḥ karaiḥ // MSS_3752

asāvudvelalāvaṇyaratnākarasamudbhavaḥ /
jagadvijayamāṅgalyaśaṅkhaḥ kusumadhanvanaḥ // MSS_3753

asāvekadvitriprabhṛtiparipāṭyā prakaṭayan kalāḥ svairaṃ svairaṃ navakamalakandāṅkurarucaḥ /
purandhrīṇāṃ preyovirahadahanoddīpitadṛśāṃ kaṭākṣebhyo bibhyannibhṛtamiva candro'bhyudayate // MSS_3754

asiḥ śarā varma dhanuśca noccakair vivicya kiṃ prārthitamīśvareṇa te /
athāsti śaktiḥ kṛtameva yācñayā na dūṣitaḥ śaktimatāṃ svayaṃgrahaḥ // MSS_3755

asijīvī maṣījīvī devalo grāmayājakaḥ /
dhāvakaḥ pācakaścaiva ṣaḍ viprāḥ śūdrajātayaḥ // MSS_3756

asitakhuracatuṣkaḥ śyāmalagranthipādaḥ sravati karasamīpe mūtradhārāṃ savegām /
daśanacalakhalīnaḥ kukkuṭaskandhabandhaḥ kiṭivarakaṭhinorurdūragaḥ syāt turuṅgaḥ // MSS_3757

asitagirisamaṃ syāt kajjalaṃ sindhupātre surataruvaraśākhā lekhanī patramurvī /
likhati yadi gṛhītvā śāradā sarvakālaṃ tadapi tava guṇānāmīśa pāraṃ na yāti // MSS_3758

asitanayanalakṣmīṃ lakṣayitvotpaleṣu kvaṇitakanakakāñcīṃ mattahaṃsasvaneṣu /
adhararuciraśobhāṃ bandhujīve priyāṇāṃ pathikajana idānīṃ roditi bhrāntacittaḥ // MSS_3759

asitabhujagabhīṣaṇāsipatro ruharuhikāhitacittatūrṇacāraḥ /
pulakitatanurutkapolakāntiḥ pratibhaṭavikramadarśane'yamāsīt // MSS_3760

asitabhujagaśiśuveṣṭitam abhinavamābhāti ketakīkusumam /
āyasavalayālaṃkṛta- viṣāṇamiva dantinaḥ patitam // MSS_3761

asitamekasurāśitamapyamūn na punareṣa vidhurviśadaṃ viṣam /
api nipīya surairjanitakṣayaṃ svayamudeti punarnavamārṇavam // MSS_3762

asitavasanasragsaṃvītā ghanāgurusāravan mṛgamadamaṣīsnātā jātāṃ tvameva tamasvinī /
abhisara sukhaṃ dantoddyotaṃ na tanvi vikāsayeḥ śvasitamathavā muñceścañcaddvirephaghanodgamam // MSS_3763

asitātmā susaṃnaddhaḥ samāviṣkṛtacāpalaḥ /
bhujaṃgakuṭilas tasyā bhrūvikṣepaḥ khalāyate // MSS_3764

asiddhasādhanaṃ sadbhiḥ śāsanaṃ daṇḍa ucyate /
taṃ yuktyaiva nayed daṇḍaṃ yuktadaṇḍaḥ praśasyate // MSS_3765

asidhārāṃ viṣaṃ vahniṃ samatve yaḥ prapaśyati /
mālāsudhātuṣārāṇāṃ sa yogī kathyate budhaiḥ // MSS_3766

asidhārākramakrītā varamekāpi kākiṇī /
na parabhrūvinirdiṣṭā sāgarāntāpi medinī // MSS_3767

asidhārāpathe nātha śatruśoṇitapicchile /
ājagāma kathaṃ lakṣmīr nirjagāma kathaṃ yaśaḥ // MSS_3768

asidhenuriyaṃ vibhāti te jitasarvakṣitipālamaṇḍalā /
pralaye jagatīmivāśituṃ sphuratī kālakarālajihvakā // MSS_3769

asindūreṇa sīmanto mā bhūnno yoṣitāmiti /
ataḥ pariharantyājāv asiṃ dūreṇa te'rayaḥ // MSS_3770

asimātrasahāyasya prabhūtāriparābhave /
anyatucchajanasyeva na smayo'sya mahādhṛteḥ // MSS_3771

asīvyad dehe sve paśupatirumāṅkaṃ samaghano vigupto gopībhirduhitaramayāt sā kamalabhūḥ /
yadādeśādetaj jagadapi mṛgīdṛkparavaśaṃ sa vaśyaḥ kasya syādahaha viṣamo manmathabharaḥ // MSS_3772

asukhamatha sukhaṃ vā karmaṇāṃ paktivelāsv ahaha niyatamete bhuñjate dehabhājaḥ /
tadiha purata eva prāha mauhurtikaścet kathaya phalamamīṣāmantataḥ kiṃ tataḥ syāt // MSS_3773

asukhaiśca vinālāpo guhyasya kathanaṃ tathā /
vipadvimokṣaṇaṃ caiva mitratāyāḥ phalatrayam // MSS_3774

asubhiraśubhaṃ tyaktvā dehaṃ nijaṃ kila yogavid viśati viśadaṃ jñānālokāt parasya kalevaram /
nayanavivaraiḥ sūkṣmaiḥ sākṣādaho tava naipuṇaṃ viśasi hṛdayaṃ draṣṭuṃ spaṣṭaṃ bahiśca viceṣṭase // MSS_3775

asubhṛtāṃ vadhamācarati kṣamād vadati vākyamasahyamasūnṛtam /
parakalatradhanānyapi vāñchati na kurute kimu madyamadākulaḥ // MSS_3776

asuraracitaprayatnād vijñātā diviravañcanā yena /
saṃrakṣitā matimatā ratnavatī vasumatī tena // MSS_3777

asurasamaradakṣairvajrasaṃdhṛṣṭacāpair anupamabalavīryaiḥ svaiḥ kulaistulyavīryaḥ /
raghuriva sa narendro yajñaviśrāntakośo bhava jagati guṇānāṃ bhājanaṃ bhrājitānām // MSS_3778

asurasuranareśāṃ yo na bhogeṣu tṛptaḥ kathamiha manujānāṃ tasya bhogeṣu tṛptiḥ /
jalanidhijalapāne yo na jāto vitṛṣṇas tṛṇaśikharagatāmbhambhaḥpānataḥ kiṃ sa tṛpyet // MSS_3779

asurahitamapyādityotthaṃ vipattimupāgataṃ ditisutaguruḥ prāṇairyoktuṃ na kiṃ kacavat tamaḥ /
paṭhati luṭhatīṃ kaṇṭhe vidyāmayaṃ mṛtajīvanīṃ yadi na vahate saṃdhyāmaunavratavyayabhīrutām // MSS_3780

asuro hitamupadiṣṭaḥ prahlādo nāradena garbhasthaḥ /
tattvaviduṣāṃ varo'bhūd- dhitopadeśaṃ sadā śṛṇuyāt // MSS_3781

asulabhā sakalendumukhī ca sā kimapi cedamanaṅgaviceṣṭitam /
abhimukhīṣviva vāñchitasiddhiṣu vrajati nirvṛtimekapade manaḥ // MSS_3782

asuhṛtsasuhṛccāpi saśatrur mitravānapi /
saprajñaḥ prajñayā hīno daivena labhate sukham // MSS_3783

asūcibhedyāmāsādya bālāṃ prauḍhābhilāpiṇīm /
hā kaṣṭaṃ muṣito'smīti prabhāte vakti kāmukaḥ // MSS_3784

asūcīsaṃcāre tamasi nabhasi prauḍhajalada- dhvaniprājñaṃmanye patati pṛṣatānāṃ nicaye /
idaṃ saudāminyāḥ kanakakamanīyaṃ vilasitaṃ mudaṃ ca mlāniṃ ca prathayati pathi svairasudṛśām // MSS_3785

asūta sadyaḥ kusumānyaśokaḥ skandhāt prabhṛtyeva sapallavāni /
pādena nāpaikṣata sundarīṇāṃ saṃparkamāśiñjitanūpureṇa // MSS_3786

asūta sā nāgavadhūpabhogyaṃ mainākamambhonidhibaddhasakhyam /
kruddhe'pi pakṣacchidi vṛtraśatrāv avedanājñaṃ kuliśakṣatānām // MSS_3787

asūyako dandaśūko niṣṭhuro vairakṛnnaraḥ /
sa kṛcchraṃ mahadāpnoti nacirāt pāpamācaran // MSS_3788

asūyayā hatenaiva pūrvopāyodyamairapi /
kart ṇāṃ gṛhyate saṃpat suhṛdbhirmantribhistathā // MSS_3789

asūyāviṣṭe manasi yadi saṃpat pravartate /
tuṣāgniṃ vāyusamyogam iva jānīhi suvrata // MSS_3790

asūyaikapadaṃ mṛtyur ativādaḥ śriyo vadhaḥ /
aśuśrūṣā tvarā ślāghā vidyāyāḥ śatravastrayaḥ // MSS_3791

asekato'tyantaniṣekataśca śākhāviśoṣaṃ phalino nirūpya /
saptāhamātraṃ śṛtameva sarpir viḍaṅgadugdhāmbu niṣecanīyam // MSS_3792

asevake cānuraktir dānaṃ sapriyabhāṣaṇam /
anuraktasya cihnāni doṣe'pi guṇasaṃgrahaḥ // MSS_3793

aseviteśvaradvāram adṛṣṭavirahavyatham /
anuktaklībavacanaṃ dhanyaṃ kasyāpi jīvitam // MSS_3794

asoḍhā tatkālollasadasahabhāvasya tapasaḥ kathānāṃ viśrambheṣvatha ca rasikaḥ śailaduhituḥ /
pramodaṃ vo diśyāt kapaṭabaṭuveṣāpanayane tvarāśathilyābhyāṃ yugapadabhiyuktaḥ smaraharaḥ // MSS_3795

asau gataḥ saugata eva yasmāt kuryān nirālambanatāṃ mamaiva /
sakhi priyaste kṣaṇikaḥ kimanyan nirātmakaḥ śūnyatamaḥ sa vandyaḥ // MSS_3796

asau gireḥ śītalakandarasthaḥ pārāvato manmathacāṭudakṣaḥ /
dharmālasāṅgīṃ madhurāṇi kūjan saṃvījate pakṣapuṭena kāntām // MSS_3797

asaujanyañcetobhavasamucitaṃ bhāvayati tad vṛthā saṃsāre'sminnahaha samayaṃ kiṃ gamayasi /
cirād bhūyo bhūyaḥ kalayasi sakhedo bhavasukhaṃ tato manye tyāgāt prabhavati parā nirvṛtiriti // MSS_3798

asau nāstīvenduḥ kvacidapi raviḥ proṣita iva grahoḍūnāṃ cakraṃ nabhasi likhitaproñchitamiva /
aharvā rātrirvā dvayamapi praluptapravicayaṃ ghanairbaddhavyūhaiḥ kimidamatighoraṃ vyavasitam // MSS_3799

asau bibhrattāmratviṣamudayaśailasya śirasi skhalan prāleyāṃśuryadi bhavati matto haladharaḥ /
tadānīmetat tu pratinavatamāladyutiharaṃ tamo'pi vyālolaṃ vigalati tadīyaṃ nivasanam // MSS_3800

asaubhāgyaṃ dhatte paramasukhabhogāspadamayaṃ vicitraṃ tadgehaṃ bhavati pṛthukārtasvaramayam /
niviṣṭaḥ palyaṅke kalayati sa kāntārataraṇaṃ prasādaṃ kopaṃ vā janani bhavatī yatra tanute // MSS_3801

asau maruccumbitacārukesaraḥ prasannatārādhipamaṇḍalāgraṇīḥ /
viyuktarāmāturadṛṣṭivīkṣito vasantakālo hanumānivāgataḥ // MSS_3802

asau mahākālaniketanasya vasannadūre kila candramauleḥ /
tamisrapakṣe'pi saha priyābhir jotsnāvato nirviśati pradoṣān // MSS_3803

asau mahendradvipadānagandhis trimārgagāvīcivimardaśītaḥ /
ākāśavāyurdinayauvanotthān ācāmati svedalavān mukhe te // MSS_3804

asau mahendrādrisamānasāraḥ patirmahendrasya mahodadheśca /
yasya kṣaratsainyagajacchalena yātrāsu yātīva puro mahendraḥ // MSS_3805

asau rasaucityaguṇojjvalo'pi gumpho na kāvyavyapadeśayogyaḥ /
dhatte khalasyāpi na durviṣahya- dveṣagrahotsāraṇamantratāṃ yaḥ // MSS_3806

asau vidyāśālī śiśurapi vinirgatya bhavanād ihāyātaḥ saṃpratyavikalaśaraccandravadanaḥ /
yadālokasthāne bhavati puramunmādataralaiḥ kaṭākṣairnārīṇāṃ kuvalayitavātāyanamiva // MSS_3807

asau samarasāhasaṃ vitanute'grimaśreyase mukundamamumātmani sthirayituṃ na kiṃ vāñchati /
ataḥ parataraṃ kutaḥ prataraṇāya vārāṃnidher nidānamiha saṃsṛteḥ sukhasṛteśca kiṃ kāraṇam // MSS_3808

asau samālokitakānanāntare vikīrṇavispaṣṭamarīcikesaraḥ /
vinirgataḥ siṃha ivodayācalād gṛhītaniṣpandamṛgo niśākaraḥ // MSS_3809

asau hi dattvā timirāvakāśam astaṃ vrajatyunnatakoṭirinduḥ /
jalāvagāḍhasya vanadvipasya tīkṣṇaṃ viṣāṇāgramivāvaśiṣṭam // MSS_3810

asau hi rāmā rativigrahapriyā rahaḥpragalbhā ramaṇaṃ rahogatam /
ratena śatrau ramayet parena vā no cedudeṣyatyaruṇaḥ puro ripuḥ // MSS_3811

asau hi saṃketasamutsukābhir vilāsinībhirmadanāturābhiḥ /
saroṣadṛṣṭaḥ sphuritādharābhir drutaṃ ravirbhīta ivāstameti // MSS_3812

astaṃgatabhāraviravi kālavaśāt kālidāsavidhuvidhuram /
nirvāṇabāṇadīpaṃ jagadidamadyoti ratnena // MSS_3813

astaṃ gatavati savitari pāyasapiṇḍaṃ sudhākaraṃ prācī /
vyaracayadambarakuśabhuvi carati kalaṅkastadantare kākaḥ // MSS_3814

astaṃ gatavati savitari bhartari madhupaṃ niveśya kośānte /
kamalinyo'pi ramante kimatra citraṃ mṛgākṣīṇām // MSS_3815

astaṃgate divānāthe nalinī madhupacchalāt /
gilanti svavināśāya guṭikāṃ kālakūṭajām // MSS_3816

astaṃgate nijaripāvapi kumbhayonau saṃkocamāpa jaladhirna tu mādyati sma /
gambhīratāguṇacamatkṛtaviṣṭapānāṃ śatrukṣaye'pi mahatāmucitaṃ hyadaḥ syāt // MSS_3817

astaṃgate bhāsvati nāndhakārān śanaiścaro hanti vidhau budhaśca /
piturguṇairna pratibhāti putro guṇānvito yaḥ sa guṇena bhāti // MSS_3818

astaṃgato'yamaravindavanaikabandhur bhāsvānna laṅghayati ko'pi vidhipraṇītam /
he cakra dhairyamavalambya vimuñca śokaṃ dhīrāstaranti vipadaṃ na tu dīnacittāḥ // MSS_3819

astaṃ bhāsvati lokalocanakalāloke gate bhartari strīlokocitamācaranti sukṛtaṃ vahnau vilīya tviṣaḥ /
apyetāstu cikīrṣayeva tapasāṃ tārākṣamālā diśo manye khañjanakaṇṭhakomalatamaḥkṛṣṇājinaṃ bibhrati // MSS_3820

astaṃ muktirupaitu yatra na tanūsādhyā harerbhaktayas tannaḥ saṃsṛtiredhatāṃ niravadhiryasyāḥ prasādodayāt /
mūrdhni śrīpuruṣottamapraṇatayaḥ śrīrāmanāmānane hṛddeśe yadunandanasya jaladaśyāmābhirāmākṛtiḥ // MSS_3821

astaṃ yatāpi kila mastakavartināsāv astācalo'himarucā rucimapyalambhi /
prāyaḥ paropakṛtaye kṛtino'nepekṣya svārthaṃ vipatkavalitā api bhāvayanti // MSS_3822

astaṃ yātastimirapaṭalīdattabhaṅgaḥ pataṃgaḥ prāpto naivodayagiriśiromūlameṇāvacūlaḥ /
tatte kālaṃ katipalamayaṃ bhāti khadyotapota dyotaṃ dyotaṃ punarapi punardyotatāṃ ko vilambaḥ // MSS_3823

astaṃ śaśī yāti śaśāṅkavadane mānaṃ vimuñcādhunā kiṃ mānena mudhā natabhru gaganād bhraśyantyamūstārakāḥ /
itthaṃ tvāmanuśikṣayan kṣititalādunnamya pādaṃ śanaiḥ kṣīṇāṃ vīkṣya niśāṃ nisargasubhagaṃ gāyatyasau kukkuṭaḥ // MSS_3824

astagrastagabhastimatkaratatinyaṅnītacañcūpuṭī pāṭīrādrimatho himācalamadhaḥ prakṣipya pakṣadvayam /
paścādunnatapucchapuñjamudayatprācīprakāśacchalād aṇḍaṃ maṇḍalamaindavaṃ janayati vyaktaṃ bakoṭīviyat // MSS_3825

astapratyupakāragandhamakṛtasvaprārthanāpekṣama- pyambhobhirbhuvamārdrayanti jaladā jīvantyamī jantavaḥ /
daivajñaḥ punarasti vṛṣṭiriti vāgekā mayokteti yad viśvaṃ krītamivādhigacchati tadevāghūrṇate marmaṇi // MSS_3826

astabdhaḥ pūjayen mānyān gurūn sevedamāyayā /
arced devānnadambhena śriyamicchedakutsitām // MSS_3827

astabdhatāmacāpalyaṃ vairāṇāṃ cāpyakartṛtām /
pratyakṣato vijānīyād bhadratāṃ kṣudratāmapi // MSS_3828

astabdhamaklībamadīrghasūtraṃ sānukrośaṃ ślakṣṇamahāryamanyaiḥ /
arogajātīyamudāravākyaṃ dūtaṃ vadantyaṣṭaguṇopapannam // MSS_3829

astamastakaparyastasamastārkāṃśusaṃstarā /
pīnastanasthitātāmrakamravastreva vāruṇī // MSS_3830

astamitaviṣayasaṅgā mukulitanayanotpalā mṛduśvasitā /
dhyāyati kimapyalakṣyaṃ nityaṃ yogābhiyukteva // MSS_3831

astamīyuṣi niśākare satī rāgato'tividhurā kumudvatī /
ṣaṭpadaṃ garalamagrahīn mukhe saṃmukhe'pi khagaśabdavāritā // MSS_3832

astavyastamitastataḥ pathi patan madyaṃ mahādudvaman hastābhyāṃ mukhamakṣikāḥ pariṇudan gālīrgadan gadgadan /
uttālaiḥ śiśubhirbhṛśaṃ valayito bībhatsamūrtirmahān matto dakṣiṇataḥ kṣaṇaṃ kṣipa dṛśaṃ matto'yamāgacchati // MSS_3833

astavyastasamīrakampitatayā dṛṣṭestiraskāriṇīṃ hastenālakavallarīmakuṭilāmānīya karṇāntikam /
udvīkṣya priyamārgamadhvagavadhūrastaṃ gate bhāsvati chinnāśā svaniveśameti śanakaiḥ svapnekṣaṇāśaṃsinī // MSS_3834

astavyastān kramatatagatīn patrimālātaraṅgān veṇīdaṇḍāniva dhṛtavatī muktasaṃdhyāṅgarāgā /
dhvāntamlānāṃśukaparicayacchannalāvaṇyaśocyā dyauḥ pratyagradyumaṇivirahādvāntamakṣṇorna yāti // MSS_3835

astādripārśvamupajagmuṣi tigmabhāsi jānīta śītakiraṇo'bhyudito na veti /
cārā ivātha rajanītimiraprayuktāś ceruściraṃ caraṇabhūmiṣu cañcarīkāḥ // MSS_3836

astādriśirovinihita- ravimaṇḍalasarasayāvaghaṭṭāṅkam /
nayatīva kālakaulaḥ kvāpi nabhaḥsairibhaṃ siddhyai // MSS_3837

astābhimukhe sūrye udite saṃpūrṇamaṇḍale candre /
gamanaṃ budhasya lagne uditāstamite ca ketau // MSS_3838

astāvalambiravibimbatayodayādri- cūḍonmiṣatsakalacandratayā ca sāyam /
saṃdhyāpranṛttaharahastagṛhītakāṃsya- tāladvayeva samalakṣyata nākalakṣmīḥ // MSS_3839

astāvilarūkṣākṣyo mūṣakanayanāśca na śubhadā gāvaḥ /
pracalaccipiṭaviṣāṇā karaṭāḥ kharasadṛśavarṇāśca // MSS_3840

asti kāraṇamavyaktaṃ sarvavyāpi parāparam /
sāṃnidhyādapi durgrāhyaṃ viśvamūrtyopalakṣitam // MSS_3841

asti ko'pi timirastanaṃdhayaḥ kiṃcidañcitapadaṃ sa gāyati /
yanmanāgapi niśamya kā vadhūr nāvadhūtahṛdayopajāyate // MSS_3842

asti grīvā śiro nāsti dvau bhujau karavarjitau /
sītāharaṇasāmarthyo na rāmo na ca rāvaṇaḥ // MSS_3843

asti jalaṃ jalarāśau kṣāraṃ tat kiṃ vidhīyate tena /
laghurapi varaṃ sa kūpo yatrākaṇṭhaṃ janaḥ pibati // MSS_3844

asti putro vaśe yasya bhṛtyo bhāryā tathaiva ca /
abhāve sati saṃtoṣaḥ svargastho'sau mahītale // MSS_3845

asti bhayamasti kautukam asti ca mandākṣamasti cotkaṇṭhā /
bālānāṃ praṇayijane bhāvaḥ ko'pyeṣa naikarasaḥ // MSS_3846

asti yadyapi sarvatra nīraṃ nīrajarājitam /
modate na tu haṃsasya mānasaṃ mānasaṃ vinā // MSS_3847

asti śrīstanapatrabhaṅgamakarīmudrāṅkitoraḥsthalo devaḥ sarvajagatpatirmadhuvadhūvaktrābjacandrodayaḥ /
krīḍākroḍatanornavenduviśade daṃṣṭrāṅkure yasya bhūr bhāti sma pralayābdhipalvalatalotkhātaikamustākṛtiḥ // MSS_3848

asti svarṇamayo'drirasti viṣayaḥ kṣuttṛḍbharāvarjitaḥ santi kṣīraghṛtākarā jaladhayaḥ santi drumāḥ kāmadāḥ /
kiṃ nastaccaritādbhutaśravaṇataḥ sādhyaṃ kṣudhā tāmyatāṃ dṛṣṭaṃ yatsavidhe vidhehi sumate tatraiva sarvaṃ śramam // MSS_3849

asti svāduphalaṃ kimasti kimathāghrātuṃ kṣamaḥ korakas tadviśrāmyatu nāma bhoktumucitaṃ patraṃ kimastyantataḥ /
sevyo hanta yadīdṛśo'pi manujairvṛkṣādhamaḥ pippalo duḥsvātantryamidaṃ vidheḥ kathaya tat kasyāgrato rudyatām // MSS_3850

astītyeva kṛṣiṃ kuryāt asti nāstīti vāṇijam /
nāstītyeva ṛṇaṃ dadyāt nāhamasmīti sāhasam // MSS_3851

astu tāvadagastyena jahnormahimanihnavaḥ /
kā kathā tasya bālasya viśvagrāse'pyatṛpyataḥ // MSS_3852

astu svastyayanāya digdhanapate kailāsaśailāśraya- śrīkaṇṭhābharaṇenduvibhramadivānaktaṃbhramatkaumudī /
yatrālaṃ nalakūbarābhisaraṇārambhāya rambhāsphurat pāṇḍimnaiva tanostanoti virahavyagrāpi veśagraham // MSS_3853

aste śivā paścimāyāṃ paracakrabhayāya sā /
śubhā kuberadiśyaste grāmāntaḥ śūnyakāriṇī // MSS_3854

astokavismayamapasmṛtapūrvavṛttam udbhūtanūtanabhayajvarajarjaraṃ naḥ /
ekakṣaṇatruṭitasaṃghaṭitapramoham ānandaśokaśabalatvamupaiti cetaḥ // MSS_3855

astodayācalavilambiravīndubimba- vyājāt kṣaṇaṃ śravaṇayornihitāravindā /
tārācchalena kusumāni samutkṣipantī saṃdhyeyamāgatavatī pramadeva kācit // MSS_3856

astodayādrigatamarkaśaśāṅkabimbam ahno'tivārdhakadaśāmavalambitasya /
tārākṣarāṇi paṭhituṃ tapanīyaśaila- nāsāvasaktamupanetramivābabhāse // MSS_3857

astopadhānavinihita- ravibimbaśironikuñcitadigaṅgaḥ /
vaste'ndhakārakambalam ambaraśayane dinādhvanyaḥ // MSS_3858

astyatraiva kilārṇave tadamṛtaṃ tatraiva hālāhalaḥ santyasmin malaye paṭīrataravastatraiva vātāśanāḥ /
yadyadvastvabhijātamasti savidhe tattad durāpaṃ nṛṇāṃ prāptavyaṃ rasanāñcale karatale bhāle ca vedhā nyadhāt // MSS_3859

astyadyāpi catuḥsamudraparikhāparyantamurvītalaṃ vartante'pi ca tatra tatra rasikā goṣṭhīṣu saktā nṛpāḥ /
ekastatra nirādaro bhavati cedanyo bhavet sādaro vāgdevī vadanāmbuje vasati cet ko nāma dīno janaḥ // MSS_3860

astyapratisamādheyaṃ stanadvandvasya dūṣaṇam /
sphuṭatāṃ kañcukānāṃ yan nāyātyāvaraṇīyatām // MSS_3861

astyuttarasyāṃ diśi devatātmā himālayo nāma nagādhirājaḥ /
pūrvāparau toyanidhī vagāhya sthitaḥ pṛthivyā iva mānadaṇḍaḥ // MSS_3862

astyekaṃ bhuvanaṃ sūkṣmaṃ kṣamadhve yatra vīkṣitum /
viṣayāṃścitravidyāyāś citrāṇāṃ calatāṃ tathā // MSS_3863

nāṭakākhyāyikānāṃ ca śakyān sarvavidhānapi /
sphuraṇā jāyate prāyas tata eva kalākṛtām // MSS_3864

astyeva bhūbhṛtāṃ mūrdhni divi vā dyotate'mbudaḥ /
marudbhirbhajyamāno'pi sa kimeti rasātalam // MSS_3865

astyevoddāmadāvānalavikalataraṃ kānanaṃ yatra tatra prauḍhottāpābhibhūtaṃ jagadapi sakalaṃ nirjalā eva nadyaḥ /
kiṃ re nirlajja garjaṃ kalayasi bahuśastarjayan pānthabālāḥ parjanya tvāmamī kiṃ kvacidapi gaṇayantyambudatvena lokāḥ // MSS_3866

astraṃ vimucya sakalaṃ prathamaprayoge bhūyo'pi hantumabalāṃ vihitodyamasya /
puṣpāyudhasya vapureva tadīyamekaṃ lakṣyaṃ ca hanta śaradhiśca tadā babhūva // MSS_3867

astraṃ strī vāmano martyaḥ paśurebhyo'thavetaraḥ /
vidhiyogād bhavet kāmaṃ pauruṣaṃ na parityajet // MSS_3868

astrajvālāvalīḍhapratibalajaladherantaraurvāyamāṇe senānāthe sthite'smin mama pitari gurau sarvadhanvīśvarāṇām /
karṇālaṃ saṃbhrameṇa vraja kṛpa samaraṃ muñca hārdikyaśaṅkāṃ tāte cāpadvitīye vahati raṇadhuraṃ ko bhayasyāvakāśaḥ // MSS_3869

astraprayogakhuralīkalahe gaṇānāṃ sainyairvṛto'pi jita eva mayā kumāraḥ /
etāvatāpi parirabhya kṛtaprasādaḥ prādādimaṃ priyaguṇo bhagavān gururme // MSS_3870

astravyastaśirastraśastrakaṣaṇaiḥ kṛttottamāṅge kṣaṇaṃ vyūḍhāsṛksariti svanatpraharaṇe varmodvamadvāhnini /
āhūyājimukhe sa kosalapatirbhagne pradhāne bale ekenaiva rumaṇvatā śaraśatairmattadvipastho hataḥ // MSS_3871

astrāṇi plavagādhipena vihitāḥ paulastyavakṣaḥsthalī- saṃghaṭṭānaladattadāvavipadaḥ sīdanti bhūmīruhāḥ /
utpāṭya prahitaśca śailaśikharo laṅkendrahastāvalī- niṣpiṣṭo nijakuñjanirjharajalairjambālapiṇḍāyate // MSS_3872

astrāmāsa tṛṇaṃ priyādruhi tṛṇāmāsa smarārerdhanur dārāmāsa muneḥ śilāpi nṛvarāmāsa svayaṃ pādukā /
kulyāmāsa mahārṇavo'pi kapayo yodhāṃbabhūvustadā paulastyo maśakībabhūva bhagavaṃstvaṃ mānuṣāmāsithāḥ // MSS_3873

astraughaprasareṇa rāvaṇirasau yaṃ duryaśobhāginaṃ cakre gautamaśāpayantritabhujasthemānamākhaṇḍalam /
kacchāvartakulīratāṃ gamayatā vīra tvayā rāvaṇaṃ tatsaṃmṛṣṭamaho viśalyakaraṇī jāgarti satputratā // MSS_3874

astvakṣaragrahavidhirjanuṣāṃ sahasrair āpātato bhavatu vāpi tato'rthabodhaḥ /
durvādikalpitavikalpataraṅgasāndrān duṣpūrvapakṣajaladhīn kathamuttareyuḥ // MSS_3875

asthānagāmibhiralaṃkaraṇairupetā bhūyaḥ padaskhalananihnutiraprasannā /
vāṇīva kāpi kukaverjanahasyamānā drāṅnirgatā nijagṛhād vanitā madāndhā // MSS_3876

asthānābhiniveśitā ratipateraucityabhaṅgo rater vaiyarthyaṃ navayauvanasya kimapi premṇaḥ kalaṅkāṅkuraḥ /
saubhāgyasya vimānanā viguṇatā saundaryasāraśriyaḥ śṛṅgārasya viḍambanā kimaparaṃ veśyāratāḍambaraḥ // MSS_3877

asthānābhiniveśī prāyo jaḍa eva bhavati no vidvān /
bālādanyaḥ ko'mbhasi jighṛkṣatīndoḥ sphuradbimbam // MSS_3878

asthāne gamitā layaṃ hatadhiyāṃ vāgdevatā kalpate dhikkārāya parābhavāya mahate tāpāya pāpāya vā /
sthāne tu vyayitā satāṃ prabhavati prakhyātaye bhūtaye cetonirvṛtaye paropakṛtaye prānte śivāvāptaye // MSS_3879

asthāne janasaṃkaṭe mayi manāk kāñcīṃ samāskandati vyālole raśanāṃśuke vigalite nīte ca nābheradhaḥ /
dhanyo'yaṃ sa karaḥ kuraṅgakadṛśā tasminnavasthāntare kampātaṅkakaraṃbitāṅgalatayā yasyāvakāśaḥ kṛtaḥ // MSS_3880

asthāne tāḍito vājī bahūn doṣānavāpnuyāt /
tāvadbhavanti te doṣā yāvajjīvatyasau hayaḥ // MSS_3881

asthāne'bhiniviṣṭān mūrkhānasthāna eva saṃtuṣṭān /
anuvartante dhīrāḥ pitara iva krīḍato bālān // MSS_3882

asthāne hyapi ca sthāne satataṃ cānugāmini /
kruddho daṇḍān praṇayati vividhāṃstejasā vṛtaḥ // MSS_3883

asthikṣodavatīva kundamukulaiḥ phullaiḥ palāśadrumaiḥ sāṅgāraprakareva dhūmakaluṣevotpātibhiḥ ṣaṭpadaiḥ /
raktākṣadyutibhiḥ saśeṣadahanālāteva puṃskokilair dṛṣṭā prāṇasamāciteva pathikairārād vanāntasthalī // MSS_3884

asthi nāsti śiro nāsti bāhurasti niraṅguliḥ /
nāsti pādadvayaṃ gāḍham aṅgamāliṅgati svayam // MSS_3885

asthiraṃ jīvitaṃ loke yauvanaṃ dhanamasthiram /
asthiraṃ putradārādi dharmaḥ kīrtirdvayaṃ sthiram // MSS_3886

asthiraḥ kulasaṃbandhaḥ sadā vidyā vivādinī /
mado mohāya mithyaiva muhūrtanidhanaṃ dhanam // MSS_3887

asthiramanekarāgaṃ guṇarahitaṃ nityavakraduṣprāpam /
prāvṛṣi surendracāpaṃ vibhāvyate yuvaticittamiva // MSS_3888

asthireṇa śarīreṇa sthiraṃ karma samācaret /
avaśyameva yāsyanti prāṇāḥ prāghūrṇakā iva // MSS_3889

asthivad dadhivaccaiva śaṅkhavad bakavat tathā /
rājaṃstava yaśo bhāti punaḥ saṃnyāsidantavat // MSS_3890

asthiṣvarthāḥ sukhaṃ māṃse tvaci bhogāḥ striyo'kṣiṣu /
gatau yānaṃ svare cājñā sarvaṃ sattve pratiṣṭhitam // MSS_3891

asthisthūṇaṃ snāyuyutaṃ māṃsaśoṇitalepanam /
carmāvanaddhaṃ durgandhi pūrṇaṃ mūtrapurīṣayoḥ // MSS_3892

jarāśokasamāviṣṭaṃ rogāyatanamāturam /
rajasvalamanityaṃ ca bhūtāvāsamimaṃ tyajet // MSS_3893

nadīkūlaṃ yathā vṛkṣaṃ vṛkṣaṃ vā śakuniryathā /
tathā tyajannimaṃ dehaṃ kṛcchrād grāhād vimucyate // MSS_3894

asthīni majjā śuklaṃ ca pituraṃśāstrayo matāḥ /
raktaṃ romāṇi palalam aṃśā māturamī matā // MSS_3895

asthīnyasthīnyajinamajinaṃ bhasma bhasmendurindur gaṅgā gaṅgoraga uraga ityākulāḥ saṃbhrameṇa /
bhūṣāveṣopakaraṇagaṇaprāpaṇavyāpṛtānāṃ nṛttārambhapraṇayini śive pāntu vāco gaṇānām // MSS_3896

asnātāśī malaṃ bhuṅkte ajapī pūyabhakṣaṇam /
ahutāśī viṣaṃ bhuṅkte adātā viṣamaśnute // MSS_3897

aspṛśyasaṃgatimiha pravidhāya soḍhā daṇḍāhatīḥ paṭaha bandhamapi prapadya /
doṣaṃ prakāśayasi yatpratirathyameva lokasya tadvimukhatāṃ prakaṭīkaroṣi // MSS_3898

aspṛśyo'stu malīmaso'stvaniyatāhāro'stvato'pyudbhaṭair doṣairastu paraḥśataiḥ parivṛtaḥ kākastataḥ kā kṣatiḥ /
bhuṅkte bhojyamupasthitaṃ samupahūyaiva svayaṃ bāndhavān yaḥ sīdan kṣudhayā vicintaya tato dhanyaśca puṇyaśca kaḥ // MSS_3899

aspṛṣṭe rāhubhītyāhani niśi ca same kalmaṣacchāyayone hāsatrāsād vidūre samupacitavibhāvaibhave hṛdyagandhe /
pāthodācchādahīne dharaṇitalagatādurlabhe sarvalokā- hlādaṃ cāpyādadhāne sumukhi tava mukhaupamyaleśaḥ sudhāṃśau // MSS_3900

asmatpūrvaiḥ surapatihṛtaṃ draṣṭukāmaisturaṅgaṃ bhittvā kṣoṇīmagaṇitabalaiḥ sāgaro vardhitātmā /
satkārārthaṃ tava yadi girīnādiśed guptapakṣā na śrānto'pi praṇayamucitaṃ naiva bandhorvihanyāḥ // MSS_3901