nāmalakṣaṇasaṃyuktaṃ sarvaṃ vakṣyāmi tattvataḥ
śraviṣṭhādīni ṛkṣāṇi ṛtavaḥ śiśirādayaḥ
rūpāṇāṃ jyotir ādis tu sparśādir vāyur ucyate
śabdasyādis tathākāśam eṣa bhūtakṛto guṇaḥ
ādityo jyotiṣām ādir agnir bhūtādir iṣyate
oṃkāraḥ sarvavedānāṃ vacasāṃ prāṇa eva ca
yady asmin niyataṃ loke sarvaṃ sāvitram ucyate
gāvaś catuṣpadām ādir manuṣyāṇāṃ dvijātayaḥ
parisarpiṇāṃ tu sarveṣāṃ jyeṣṭhaḥ sarpo dvijottamāḥ
hiraṇyaṃ sarvaratnānām oṣadhīnāṃ yavās tathā
dravāṇāṃ caiva sarveṣāṃ peyānām āpa uttamāḥ
brahmakṣetraṃ sadā puṇyaṃ plakṣaḥ prathamajaḥ smṛtaḥ
mama viṣṇur acintyātmā svayaṃbhūr iti sa smṛtaḥ
diśāṃ ca pradiśāṃ cordhvā digjātā prathamaṃ tathā
tathā sarodapānānāṃ sarveṣāṃ sāgaro 'grajaḥ
narakiṃnarayakṣāṇāṃ sarveṣām īśvaraḥ prabhuḥ
bhūtaṃ parataraṃ tasmāt trailokye neha vidyate
lokānām ādir avyaktaṃ sarvasyāntas tad eva ca
sukhasyāntaḥ sadā duḥkhaṃ duḥkhasyāntaḥ sadā sukham
saṃyogā viprayogāntā maraṇāntaṃ hi jīvitam
aśāśvataṃ hi loke 'smin sarvaṃ sthāvarajaṅgamam
sarvam etad vināśāntaṃ jñānasyānto na vidyate
nirmamo nirahaṃkāro mucyate sarvapāpmabhiḥ