 | Book 13 Chapter 23
|
| 1 | yudhiṣṭhira uvāca
|
| 1 | kim āhur bharataśreṣṭha pātraṃ viprāḥ sanātanam
brāhmaṇaṃ liṅginaṃ caiva brāhmaṇaṃ vāpy aliṅginam
|
| 2 | bhīṣma uvāca
|
| 2 | svavṛttim abhipannāya liṅgine vetarāya vā
deyam āhur mahārāja ubhāv etau tapasvinau
|
| 3 | yudhiṣṭhira uvāca
|
| 3 | śraddhayā parayā pūto yaḥ prayacched dvijātaye
havyaṃ kavyaṃ tathā dānaṃ ko doṣaḥ syāt pitāmaha
|
| 4 | bhīṣma uvāca
|
| 4 | śraddhāpūto naras tāta durdānto 'pi na saṃśayaḥ
pūto bhavati sarvatra kiṃ punas tvaṃ mahīpate
|
| 5 | yudhiṣṭhira uvāca
|
| 5 | na brāhmaṇaṃ parīkṣeta daiveṣu satataṃ naraḥ
kavyapradāne tu budhāḥ parīkṣyaṃ brāhmaṇaṃ viduḥ
|
| 6 | bhīṣma uvāca
|
| 6 | na brāhmaṇaḥ sādhayate havyaṃ daivāt prasidhyati
devaprasādād ijyante yajamānā na saṃśayaḥ
|
| 7 | brāhmaṇā bharataśreṣṭha satataṃ brahmavādinaḥ
mārkaṇḍeyaḥ purā prāha iha lokeṣu buddhimān
|
| 8 | yudhiṣṭhira uvāca
|
| 8 | apūrvo 'py atha vā vidvān saṃbandhī vātha yo bhavet
tapasvī yajñaśīlo vā kathaṃ pātraṃ bhavet tu saḥ
|
| 9 | bhīṣma uvāca
|
| 9 | kulīnaḥ karmakṛd vaidyas tathā cāpy ānṛśaṃsyavān
hrīmān ṛjuḥ satyavādī pātraṃ pūrve ca te trayaḥ
|
| 10 | tatredaṃ śṛṇu me pārtha caturṇāṃ tejasāṃ matam
pṛthivyāḥ kāśyapasyāgner mārkaṇḍeyasya caiva hi
|
| 11 | pṛthivy uvāca
|
| 11 | yathā mahārṇave kṣiptaḥ kṣipraṃ loṣṭo vinaśyati
tathā duścaritaṃ sarvaṃ trayy āvṛttyā vinaśyati
|
| 12 | kāśyapa uvāca
|
| 12 |
sarve ca vedāḥ saha ṣaḍbhir aṅgaiḥ; sāṃkhyaṃ purāṇaṃ ca kule ca janma
naitāni sarvāṇi gatir bhavanti; śīlavyapetasya narasya rājan
|
| 13 | agnir uvāca
|
| 13 | adhīyānaḥ paṇḍitaṃ manyamāno; yo vidyayā hanti yaśaḥ pareṣām
brahman sa tenācarate brahmahatyāṃ; lokās tasya hy antavanto bhavanti
|
| 14 | mārkaṇḍeya uvāca
|
| 14 | aśvamedhasahasraṃ ca satyaṃ ca tulayā dhṛtam
nābhijānāmi yady asya satyasyārdham avāpnuyāt
|
| 15 | bhīṣma uvāca
|
| 15 | ity uktvā te jagmur āśu catvāro 'mitatejasaḥ
pṛthivī kāśyapo 'gniś ca prakṛṣṭāyuś ca bhārgavaḥ
|
| 16 | yudhiṣṭhira uvāca
|
| 16 | yad idaṃ brāhmaṇā loke vratino bhuñjate haviḥ
bhuktaṃ brāhmaṇakāmāya kathaṃ tat sukṛtaṃ bhavet
|
| 17 | bhīṣma uvāca
|
| 17 | ādiṣṭino ye rājendra brāhmaṇā vedapāragāḥ
bhuñjate brahmakāmāya vrataluptā bhavanti te
|
| 18 | yudhiṣṭhira uvāca
|
| 18 | anekāntaṃ bahudvāraṃ dharmam āhur manīṣiṇaḥ
kiṃ niścitaṃ bhavet tatra tan me brūhi pitāmaha
|
| 19 | bhīṣma uvāca
|
| 19 | ahiṃsā satyam akrodha ānṛśaṃsyaṃ damas tathā
ārjavaṃ caiva rājendra niścitaṃ dharmalakṣaṇam
|
| 20 | ye tu dharmaṃ praśaṃsantaś caranti pṛthivīm imām
anācarantas tad dharmaṃ saṃkare niratāḥ prabho
|
| 21 | tebhyo ratnaṃ hiraṇyaṃ vā gām aśvān vā dadāti yaḥ
daśa varṣāṇi viṣṭhāṃ sa bhuṅkte nirayam āśritaḥ
|
| 22 | medānāṃ pulkasānāṃ ca tathaivāntāvasāyinām
kṛtaṃ karmākṛtaṃ cāpi rāgamohena jalpatām
|
| 23 | vaiśvadevaṃ ca ye mūḍhā viprāya brahmacāriṇe
dadatīha na rājendra te lokān bhuñjate 'śubhān
|
| 24 | yudhiṣṭhira uvāca
|
| 24 | kiṃ paraṃ brahmacaryasya kiṃ paraṃ dharmalakṣaṇam
kiṃ ca śreṣṭhatamaṃ śaucaṃ tan me brūhi pitāmaha
|
| 25 | bhīṣma uvāca
|
| 25 | brahmacaryaṃ paraṃ tāta madhumāṃsasya varjanam
maryādāyāṃ sthito dharmaḥ śamaḥ śaucasya lakṣaṇam
|
| 26 | yudhiṣṭhira uvāca
|
| 26 | kasmin kāle cared dharmaṃ kasmin kāle 'rtham ācaret
kasmin kāle sukhī ca syāt tan me brūhi pitāmaha
|
| 27 | bhīṣma uvāca
|
| 27 | kālyam arthaṃ niṣeveta tato dharmam anantaram
paścāt kāmaṃ niṣeveta na ca gacchet prasaṅgitām
|
| 28 | brāhmaṇāṃś cābhimanyeta gurūṃś cāpy abhipūjayet
sarvabhūtānulomaś ca mṛduśīlaḥ priyaṃvadaḥ
|
| 29 | adhikāre yad anṛtaṃ rājagāmi ca paiśunam
guroś cālīkakaraṇaṃ samaṃ tad brahmahatyayā
|
| 30 | praharen na narendreṣu na gāṃ hanyāt tathaiva ca
bhrūṇahatyāsamaṃ caitad ubhayaṃ yo niṣevate
|
| 31 | nāgniṃ parityajej jātu na ca vedān parityajet
na ca brāhmaṇam ākrośet samaṃ tad brahmahatyayā
|
| 32 | yudhiṣṭhira uvāca
|
| 32 | kīdṛśāḥ sādhavo viprāḥ kebhyo dattaṃ mahāphalam
kīdṛśānāṃ ca bhoktavyaṃ tan me brūhi pitāmaha
|
| 33 | bhīṣma uvāca
|
| 33 | akrodhanā dharmaparāḥ satyanityā dame ratāḥ
tādṛśāḥ sādhavo viprās tebhyo dattaṃ mahāphalam
|
| 34 | amāninaḥ sarvasahā dṛṣṭārthā vijitendriyāḥ
sarvabhūtahitā maitrās tebhyo dattaṃ mahāphalam
|
| 35 | alubdhāḥ śucayo vaidyā hrīmantaḥ satyavādinaḥ
svakarmaniratā ye ca tebhyo dattaṃ mahāphalam
|
| 36 | sāṅgāṃś ca caturo vedān yo 'dhīyīta dvijarṣabhaḥ
ṣaḍbhyo nivṛttaḥ karmabhyas taṃ pātram ṛṣayo viduḥ
|
| 37 | ye tv evaṃguṇajātīyās tebhyo dattaṃ mahāphalam
sahasraguṇam āpnoti guṇārhāya pradāyakaḥ
|
| 38 | prajñāśrutābhyāṃ vṛttena śīlena ca samanvitaḥ
tārayeta kulaṃ kṛtsnam eko 'pīha dvijarṣabhaḥ
|
| 39 | gām aśvaṃ vittam annaṃ vā tadvidhe pratipādayet
dravyāṇi cānyāni tathā pretyabhāve na śocati
|
| 40 | tārayeta kulaṃ kṛtsnam eko 'pīha dvijottamaḥ
kim aṅga punar ekaṃ vai tasmāt pātraṃ samācaret
|
| 41 | niśamya ca guṇopetaṃ brāhmaṇaṃ sādhusaṃmatam
dūrād ānāyayet kṛtye sarvataś cābhipūjayet
|