janma dharmagṛhe caiva naranārāyaṇātmakam
mahāvarāhasṛṣṭā ca piṇḍotpattiḥ purātanī
sa tathā naḥ śruto brahman kathyamānas tvayānagha
havyakavyabhujo viṣṇor udakpūrve mahodadhau
tac ca dṛṣṭaṃ bhagavatā brahmaṇā parameṣṭhinā
rūpaṃ prabhāvamahatām apūrvaṃ dhīmatāṃ vara
tad aśvaśirasaṃ puṇyaṃ brahmā kim akaron mune
kathayasvottamamate mahāpuruṣanirmitam
pāvitāḥ sma tvayā brahman puṇyāṃ kathayatā kathām
jagau yad bhagavān vyāso rājño dharmasutasya vai
utpannasaṃśayo rājā tam eva samacodayat
kimarthaṃ tat samabhavad vapur devopakalpitam
sarvaṃ pañcabhir āviṣṭaṃ bhūtair īśvarabuddhijaiḥ
bhūtāntarātmā varadaḥ saguṇo nirguṇo 'pi ca
bhūtapralayam avyaktaṃ śṛṇuṣva nṛpasattama
jyotirbhūte jale cāpi līne jyotiṣi cānile
vyakte manasi saṃlīne vyakte cāvyaktatāṃ gate
tama evābhavat sarvaṃ na prājñāyata kiṃ cana
tad viśvabhāvasaṃjñāntaṃ pauruṣīṃ tanum āsthitam
tad avyaktam iti jñeyaṃ triguṇaṃ nṛpasattama
apsv eva śayanaṃ cakre nidrāyogam upāgataḥ
jagataś cintayan sṛṣṭiṃ citrāṃ bahuguṇodbhavām
ahaṃkāras tato jāto brahmā śubhacaturmukhaḥ
hiraṇyagarbho bhagavān sarvalokapitāmahaḥ
sahasrapatre dyutimān upaviṣṭaḥ sanātanaḥ
sattvasthaḥ parameṣṭhī sa tato bhūtagaṇān sṛjat
nārāyaṇakṛtau bindū apām āstāṃ guṇottarau
ekas tatrābhavad bindur madhvābho ruciraprabhaḥ
kaṭhinas tv aparo binduḥ kaiṭabho rājasas tu saḥ
balavantau gadāhastau padmanālānusāriṇau
sṛjantaṃ prathamaṃ vedāṃś caturaś cāruvigrahān
sahasā jagṛhatur vedān brahmaṇaḥ paśyatas tadā
rasāṃ viviśatus tūrṇam udakpūrve mahodadhau
tato vacanam īśānaṃ prāha vedair vinākṛtaḥ
vedā me paramaṃ dhāma vedā me brahma cottamam
andhakārā hi me lokā jātā vedair vinākṛtāḥ
vedān ṛte hi kiṃ kuryāṃ lokān vai sraṣṭum udyataḥ
prāptaṃ dunoti hṛdayaṃ tīvraśokāya randhayan
vedāṃs tān ānayen naṣṭān kasya cāhaṃ priyo bhave
hareḥ stotrārtham udbhūtā buddhir buddhimatāṃ vara
tato jagau paraṃ japyaṃ sāñjalipragrahaḥ prabhuḥ
lokādya bhuvanaśreṣṭha sāṃkhyayoganidhe vibho
viśvabhuk sarvabhūtānām antarātmann ayonija
tvatto me mānasaṃ janma prathamaṃ dvijapūjitam
tvatprasādāc ca me janma tṛtīyaṃ vācikaṃ mahat
nāsikyaṃ cāpi me janma tvattaḥ pañcamam ucyate
idaṃ ca saptamaṃ janma padmajaṃ me 'mitaprabha
prathitaḥ puṇḍarīkākṣa pradhānaguṇakalpitaḥ
tvayā vinirmito 'haṃ vai vedacakṣur vayotigaḥ
dadasva cakṣuṣī mahyaṃ priyo 'haṃ te priyo 'si me
jahau nidrām atha tadā vedakāryārtham udyataḥ
aiśvareṇa prayogeṇa dvitīyāṃ tanum āsthitaḥ
kṛtvā hayaśiraḥ śubhraṃ vedānām ālayaṃ prabhuḥ
keśāś cāsyābhavan dīrghā raver aṃśusamaprabhāḥ
gaṅgā sarasvatī puṇyā bhruvāv āstāṃ mahānadī
oṃkāras tv atha saṃskāro vidyuj jihvā ca nirmitā
goloko brahmalokaś ca oṣṭhāv āstāṃ mahātmanaḥ
grīvā cāsyābhavad rājan kālarātrir guṇottarā
antardadhe sa viśveśo viveśa ca rasāṃ prabhuḥ
śaikṣaṃ svaraṃ samāsthāya om iti prāsṛjat svaram
babhūvāntarmahībhūtaḥ sarvabhūtaguṇoditaḥ
rasātale vinikṣipya yataḥ śabdas tato drutau
jagrāha vedān akhilān rasātalagatān hariḥ
prādāc ca brahmaṇe bhūyas tataḥ svāṃ prakṛtiṃ gataḥ
vedānām ālayaś cāpi babhūvāśvaśirās tataḥ
punar ājagmatus tatra vegitau paśyatāṃ ca tau
yatra vedā vinikṣiptās tat sthānaṃ śūnyam eva ca
punar uttasthatuḥ śīghraṃ rasānām ālayāt tadā
dadṛśāte ca puruṣaṃ tam evādikaraṃ prabhum
bhūyo 'py amitavikrāntaṃ nidrāyogam upāgatam
śayane nāgabhogāḍhye jvālāmālāsamāvṛte
taṃ dṛṣṭvā dānavendrau tau mahāhāsam amuñcatām
ayaṃ sa puruṣaḥ śvetaḥ śete nidrām upāgataḥ
kasyaiṣa ko nu khalv eṣa kiṃ ca svapiti bhogavān
yuddhārthinau tu vijñāya vibuddhaḥ puruṣottamaḥ
atha yuddhaṃ samabhavat tayor nārāyaṇasya ca
brahmaṇopacitiṃ kurvañ jaghāna madhusūdanaḥ
śokāpanayanaṃ cakre brahmaṇaḥ puruṣottamaḥ
nirmame sa tadā lokān kṛtsnān sthāvarajaṅgamān
tatraivāntardadhe devo yata evāgato hariḥ
punaḥ pravṛttidharmārthaṃ tām eva vidadhe tanum
paurāṇam etad ākhyātaṃ rūpaṃ varadam aiśvaram
na tasyādhyayanaṃ nāśam upagacchet kadā cana
pāñcālena kramaḥ prāpto rāmeṇa pathi deśite
purāṇaṃ vedasamitaṃ yan māṃ tvaṃ paripṛcchasi
tāṃ tāṃ kuryād vikurvāṇaḥ svayam ātmānam ātmanā
eṣa yogaś ca sāṃkhyaṃ ca brahma cāgryaṃ harir vibhuḥ
tapo nārāyaṇaparaṃ nārāyaṇaparā gatiḥ
nārāyaṇaparo dharmaḥ punarāvṛttidurlabhaḥ
nārāyaṇātmako gandho bhūmau śreṣṭhatamaḥ smṛtaḥ
jyotiṣāṃ ca guṇo rūpaṃ smṛtaṃ nārāyaṇātmakam
nārāyaṇātmakaś cāpi śabda ākāśasaṃbhavaḥ
nārāyaṇaparaḥ kālo jyotiṣām ayanaṃ ca yat
nārāyaṇaparaṃ sāṃkhyaṃ yogo nārāyaṇātmakaḥ
svabhāvaś caiva karmāṇi daivaṃ yeṣāṃ ca kāraṇam
tattvaṃ jijñāsamānānāṃ hetubhiḥ sarvatomukhaiḥ
sabrahmakānāṃ lokānām ṛṣīṇāṃ ca mahātmanām
manīṣitaṃ vijānāti keśavo na tu tasya te
dānāni ca prayacchanti tapyanti ca tapo mahat
sarvabhūtakṛtāvāso vāsudeveti cocyate
guṇaiś ca saṃyogam upaiti śīghraṃ; kālo yathartāv ṛtusaṃprayuktaḥ
jñānātmakāḥ saṃyamino maharṣayaḥ; paśyanti nityaṃ puruṣaṃ guṇādhikam