 | Book 12 Chapter 315
|
| 1 | bhīṣma uvāca
|
| 1 | etac chrutvā guror vākyaṃ vyāsaśiṣyā mahaujasaḥ
anyonyaṃ hṛṣṭamanasaḥ pariṣasvajire tadā
|
| 2 | uktāḥ smo yad bhagavatā tadātvāyatisaṃhitam
tan no manasi saṃrūḍhaṃ kariṣyāmas tathā ca tat
|
| 3 | anyonyaṃ ca sabhājyaivaṃ suprītamanasaḥ punaḥ
vijñāpayanti sma guruṃ punar vākyaviśāradāḥ
|
| 4 | śailād asmān mahīṃ gantuṃ kāṅkṣitaṃ no mahāmune
vedān anekadhā kartuṃ yadi te rucitaṃ vibho
|
| 5 | śiṣyāṇāṃ vacanaṃ śrutvā parāśarasutaḥ prabhuḥ
pratyuvāca tato vākyaṃ dharmārthasahitaṃ hitam
|
| 6 | kṣitiṃ vā devalokaṃ vā gamyatāṃ yadi rocate
apramādaś ca vaḥ kāryo brahma hi pracuracchalam
|
| 7 | te 'nujñātās tataḥ sarve guruṇā satyavādinā
jagmuḥ pradakṣiṇaṃ kṛtvā vyāsaṃ mūrdhnābhivādya ca
|
| 8 | avatīrya mahīṃ te 'tha cāturhotram akalpayan
saṃyājayanto viprāṃś ca rājanyāṃś ca viśas tathā
|
| 9 | pūjyamānā dvijair nityaṃ modamānā gṛhe ratāḥ
yājanādhyāpanaratāḥ śrīmanto lokaviśrutāḥ
|
| 10 | avatīrṇeṣu śiṣyeṣu vyāsaḥ putrasahāyavān
tūṣṇīṃ dhyānaparo dhīmān ekānte samupāviśat
|
| 11 | taṃ dadarśāśramapade nāradaḥ sumahātapāḥ
athainam abravīt kāle madhurākṣarayā girā
|
| 12 | bho bho maharṣe vāsiṣṭha brahmaghoṣo na vartate
eko dhyānaparas tūṣṇīṃ kim āsse cintayann iva
|
| 13 | brahmaghoṣair virahitaḥ parvato 'yaṃ na śobhate
rajasā tamasā caiva somaḥ sopaplavo yathā
|
| 14 | na bhrājate yathāpūrvaṃ niṣādānām ivālayaḥ
devarṣigaṇajuṣṭo 'pi vedadhvaninirākṛtaḥ
|
| 15 | ṛṣayaś ca hi devāś ca gandharvāś ca mahaujasaḥ
vimuktā brahmaghoṣeṇa na bhrājante yathā purā
|
| 16 | nāradasya vacaḥ śrutvā kṛṣṇadvaipāyano 'bravīt
maharṣe yat tvayā proktaṃ vedavādavicakṣaṇa
|
| 17 | etan manonukūlaṃ me bhavān arhati bhāṣitum
sarvajñaḥ sarvadarśī ca sarvatra ca kutūhalī
|
| 18 | triṣu lokeṣu yad vṛttaṃ sarvaṃ tava mate sthitam
tad ājñāpaya viprarṣe brūhi kiṃ karavāṇi te
|
| 19 | yan mayā samanuṣṭheyaṃ brahmarṣe tad udāhara
viyuktasyeha śiṣyair me nātihṛṣṭam idaṃ manaḥ
|
| 20 | nārada uvāca
|
| 20 | anāmnāyamalā vedā brāhmaṇasyāvrataṃ malam
malaṃ pṛthivyā vāhīkāḥ strīṇāṃ kautūhalaṃ malam
|
| 21 | adhīyatāṃ bhavān vedān sārdhaṃ putreṇa dhīmatā
vidhunvan brahmaghoṣeṇa rakṣobhayakṛtaṃ tamaḥ
|
| 22 | bhīṣma uvāca
|
| 22 | nāradasya vacaḥ śrutvā vyāsaḥ paramadharmavit
tathety uvāca saṃhṛṣṭo vedābhyāse dṛḍhavrataḥ
|
| 23 | śukena saha putreṇa vedābhyāsam athākarot
svareṇoccaiḥ sa śaikṣeṇa lokān āpūrayann iva
|
| 24 | tayor abhyasator evaṃ nānādharmapravādinoḥ
vāto 'timātraṃ pravavau samudrānilavejitaḥ
|
| 25 | tato 'nadhyāya iti taṃ vyāsaḥ putram avārayat
śuko vāritamātras tu kautūhalasamanvitaḥ
|
| 26 | apṛcchat pitaraṃ brahman kuto vāyur abhūd ayam
ākhyātum arhati bhavān vāyoḥ sarvaṃ viceṣṭitam
|
| 27 | śukasyaitad vacaḥ śrutvā vyāsaḥ paramavismitaḥ
anadhyāyanimitte 'sminn idaṃ vacanam abravīt
|
| 28 | divyaṃ te cakṣur utpannaṃ svasthaṃ te nirmalaṃ manaḥ
tamasā rajasā cāpi tyaktaḥ sattve vyavasthitaḥ
|
| 29 | ādarśe svām iva chāyāṃ paśyasy ātmānam ātmanā
nyasyātmani svayaṃ vedān buddhyā samanucintaya
|
| 30 | devayānacaro viṣṇoḥ pitṛyānaś ca tāmasaḥ
dvāv etau pretya panthānau divaṃ cādhaś ca gacchataḥ
|
| 31 | pṛthivyām antarikṣe ca yatra saṃvānti vāyavaḥ
saptaite vāyumārgā vai tān nibodhānupūrvaśaḥ
|
| 32 | tatra devagaṇāḥ sādhyāḥ samabhūvan mahābalāḥ
teṣām apy abhavat putraḥ samāno nāma durjayaḥ
|
| 33 | udānas tasya putro 'bhūd vyānas tasyābhavat sutaḥ
apānaś ca tato jñeyaḥ prāṇaś cāpi tataḥ param
|
| 34 | anapatyo 'bhavat prāṇo durdharṣaḥ śatrutāpanaḥ
pṛthak karmāṇi teṣāṃ tu pravakṣyāmi yathātatham
|
| 35 | prāṇināṃ sarvato vāyuś ceṣṭā vartayate pṛthak
prāṇanāc caiva bhūtānāṃ prāṇa ity abhidhīyate
|
| 36 | prerayaty abhrasaṃghātān dhūmajāṃś coṣmajāṃś ca yaḥ
prathamaḥ prathame mārge pravaho nāma so 'nilaḥ
|
| 37 | ambare sneham abhrebhyas taḍidbhyaś cottamadyutiḥ
āvaho nāma saṃvāti dvitīyaḥ śvasano nadan
|
| 38 | udayaṃ jyotiṣāṃ śaśvat somādīnāṃ karoti yaḥ
antardeheṣu codānaṃ yaṃ vadanti maharṣayaḥ
|
| 39 | yaś caturbhyaḥ samudrebhyo vāyur dhārayate jalam
uddhṛtyādadate cāpo jīmūtebhyo 'mbare 'nilaḥ
|
| 40 | yo 'dbhiḥ saṃyojya jīmūtān parjanyāya prayacchati
udvaho nāma varṣiṣṭhas tritīyaḥ sa sadāgatiḥ
|
| 41 | samuhyamānā bahudhā yena nīlāḥ pṛthag ghanāḥ
varṣamokṣakṛtārambhās te bhavanti ghanāghanāḥ
|
| 42 | saṃhatā yena cāviddhā bhavanti nadatāṃ nadāḥ
rakṣaṇārthāya saṃbhūtā meghatvam upayānti ca
|
| 43 | yo 'sau vahati devānāṃ vimānāni vihāyasā
caturthaḥ saṃvaho nāma vāyuḥ sa girimardanaḥ
|
| 44 | yena vegavatā rugṇā rūkṣeṇārujatā rasān
vāyunā vihatā meghā na bhavanti balāhakāḥ
|
| 45 | dāruṇotpātasaṃcāro nabhasaḥ stanayitnumān
pañcamaḥ sa mahāvego vivaho nāma mārutaḥ
|
| 46 | yasmin pāriplave divyā vahanty āpo vihāyasā
puṇyaṃ cākāśagaṅgāyās toyaṃ viṣṭabhya tiṣṭhati
|
| 47 | dūrāt pratihato yasminn ekaraśmir divākaraḥ
yonir aṃśusahasrasya yena bhāti vasuṃdharā
|
| 48 | yasmād āpyāyate somo nidhir divyo 'mṛtasya ca
ṣaṣṭhaḥ parivaho nāma sa vāyur javatāṃ varaḥ
|
| 49 | sarvaprāṇabhṛtāṃ prāṇān yo 'ntakāle nirasyati
yasya vartmānuvartete mṛtyuvaivasvatāv ubhau
|
| 50 | samyag anvīkṣatāṃ buddhyā śāntayādhyātmanityayā
dhyānābhyāsābhirāmāṇāṃ yo 'mṛtatvāya kalpate
|
| 51 | yaṃ samāsādya vegena diśām antaṃ prapedire
dakṣasya daśa putrāṇāṃ sahasrāṇi prajāpateḥ
|
| 52 | yena sṛṣṭaḥ parābhūto yāty eva na nivartate
parāvaho nāma paro vāyuḥ sa duratikramaḥ
|
| 53 | evam ete 'diteḥ putrā mārutāḥ paramādbhutāḥ
anāramantaḥ saṃvānti sarvagāḥ sarvadhāriṇaḥ
|
| 54 | etat tu mahad āścaryaṃ yad ayaṃ parvatottamaḥ
kampitaḥ sahasā tena vāyunābhipravāyatā
|
| 55 | viṣṇor niḥśvāsavāto 'yaṃ yadā vegasamīritaḥ
sahasodīryate tāta jagat pravyathate tadā
|
| 56 | tasmād brahmavido brahma nādhīyante 'tivāyati
vāyor vāyubhayaṃ hy uktaṃ brahma tat pīḍitaṃ bhavet
|
| 57 | etāvad uktvā vacanaṃ parāśarasutaḥ prabhuḥ
uktvā putram adhīṣveti vyomagaṅgām ayāt tadā
|