bṛhaspatiḥ samiddhe 'gnau juhāvājyaṃ yathāvidhi
divyaratnācite divye niṣaṇṇaḥ paramāsane
ābhiṣecanikaṃ dravyaṃ gṛhītvā devatāgaṇāḥ
dhātā caiva vidhātā ca tathā caivānilānalau
rudraś ca sahito dhīmān mitreṇa varuṇena ca
viśvedevair marudbhiś ca sādhyaiś ca pitṛbhiḥ saha
devarṣibhir asaṃkhyeyais tathā brahmarṣibhir varaiḥ
bhṛgubhiś cāṅgirobhiś ca yatibhiś ca mahātmabhiḥ
sarvair vidyādharaiḥ puṇyair yogasiddhais tathā vṛtaḥ
aṅgirāḥ kaśyapo 'triś ca marīcir bhṛgur eva ca
ṛtavaś ca grahāś caiva jyotīṃṣi ca viśāṃ pate
samudrāś ca hradāś caiva tīrthāni vividhāni ca
pṛthivī dyaur diśaś caiva pādapāś ca janādhipa
umā śacī sinīvālī tathā cānumatiḥ kuhūḥ
rākā ca dhiṣaṇā caiva patnyaś cānyā divaukasām
airāvataḥ sānucaraḥ kalāḥ kāṣṭhās tathaiva ca
māsārdhamāsā ṛtavas tathā rātryahanī nṛpa
aruṇo garuḍaś caiva vṛkṣāś cauṣadhibhiḥ saha
kālo yamaś ca mṛtyuś ca yamasyānucarāś ca ye
te kumārābhiṣekārthaṃ samājagmus tatas tataḥ
ābhiṣecanikaṃ bhāṇḍaṃ maṅgalāni ca sarvaśaḥ
sarasvatībhiḥ puṇyābhir divyatoyābhir eva tu
senāpatiṃ mahātmānam asurāṇāṃ bhayāvaham
tathābhyaṣiñcad bhagavān brahmā lokapitāmahaḥ
kaśyapaś ca mahātejā ye cānye nānukīrtitāḥ
kāmavīryadharān siddhān mahāpāriṣadān prabhuḥ
caturtham asyānucaraṃ khyātaṃ kumudamālinam
māyāśatadharaṃ kāmaṃ kāmavīryabalānvitam
dadau skandāya rājendra surārivinibarhaṇam
jaghāna dorbhyāṃ saṃkruddhaḥ prayutāni caturdaśa
devaśatrukṣayakarīm ajayyāṃ viśvarūpiṇīm
gandharvayakṣarakṣāṃsi munayaḥ pitaras tathā
unmāthaṃ ca pramāthaṃ ca mahāvīryau mahādyutī
tau sūryaḥ kārttikeyāya dadau prītaḥ pratāpavān
somo 'py anucarau prādān maṇiṃ sumaṇim eva ca
dadāv anucarau śūrau parasainyapramāthinau
dahatiṃ dahanaṃ caiva pracaṇḍau vīryasaṃmatau
aṃśo 'py anucarān pañca dadau skandāya dhīmate
dadāv analaputrāya vāsavaḥ paravīrahā
tau hi śatrūn mahendrasya jaghnatuḥ samare bahūn
skandāya trīn anucarān dadau viṣṇur mahāyaśāḥ
skandāya dadatuḥ prītāv aśvinau bharatarṣabha
ḍambarāḍambarau caiva dadau dhātā mahātmane
dadau tvaṣṭā mahāmāyau skandāyānucarau varau
kumārāya mahātmānau tapovidyādharau prabhuḥ
suprabhaṃ ca mahātmānaṃ śubhakarmāṇam eva ca
kārttikeyāya saṃprādād vidhātā lokaviśrutau
pūṣā ca pārṣadau prādāt kārttikeyāya bhārata
pradadau kārttikeyāya vāyur bharatasattama
pradadau kārttikeyāya varuṇaḥ satyasaṃgaraḥ
himavān pradadau rājan hutāśanasutāya vai
dadāv anucarau merur agniputrāya bhārata
mahātmane 'gniputrāya mahābalaparākramau
pradadāv agniputrāya vindhyaḥ pāriṣadāv ubhau
pradadāv agniputrāya mahāpāriṣadāv ubhau
pradadāv agniputrāya pārvatī śubhadarśanā
pradadau puruṣavyāghra vāsukiḥ pannageśvaraḥ
sāgarāḥ saritaś caiva girayaś ca mahābalāḥ
divyapraharaṇopetān nānāveṣavibhūṣitān
vividhāyudhasaṃpannāś citrābharaṇavarmiṇaḥ
ananto dvādaśabhujas tathā kṛṣṇopakṛṣṇakau
akṣasaṃtarjano rājan kunadīkas tamobhrakṛt
sahasrabāhur vikaṭo vyāghrākṣaḥ kṣitikampanaḥ
pariśrutaḥ kokanadaḥ priyamālyānulepanaḥ
jvālājihvaḥ karālaś ca sitakeśo jaṭī hariḥ
vidyudakṣo dhanurvaktro jaṭharo mārutāśanaḥ
samudravego rājendra śailakampī tathaiva ca
dhūmraḥ śvetaḥ kaliṅgaś ca siddhārtho varadas tathā
ānandaś ca pramodaś ca svastiko dhruvakas tathā
govrajaḥ kanakāpīḍo mahāpāriṣadeśvaraḥ
vaitālī cātitālī ca tathā katikavātikau
raṇotkaṭaḥ prahāsaś ca śvetaśīrṣaś ca nandakaḥ
kālakākṣaḥ sitaś caiva bhūtalonmathanas tathā
sajālaś ca mahātejāḥ krathakrāthau ca bhārata
madhuraḥ suprasādaś ca kirīṭī ca mahābalaḥ
dhamanto manmathakaraḥ sūcīvaktraś ca vīryavān
daṇḍabāhuḥ subāhuś ca rajaḥ kokilakas tathā
saṃcārakaḥ kokanado gṛdhravaktraś ca jambukaḥ
madgugrīvaś ca kṛṣṇaujā haṃsavaktraś ca candrabhāḥ
cāṣavaktraś ca jambūkaḥ śākavaktraś ca kuṇḍakaḥ
paitāmahā mahātmāno mahāpāriṣadāś ca ha
yauvanasthāś ca bālāś ca vṛddhāś ca janamejaya
vaktrair nānāvidhair ye tu śṛṇu tāñ janamejaya
kharoṣṭravadanāś caiva varāhavadanās tathā
bhīmā makaravaktrāś ca śiṃśumāramukhās tathā
nakulolūkavaktrāś ca śvavaktrāś ca tathāpare
matsyameṣānanāś cānye ajāvimahiṣānanāḥ
bhīmā gajānanāś caiva tathā nakramukhāḥ pare
gokharoṣṭramukhāś cānye vṛṣadaṃśamukhās tathā
pārāvatamukhāś cānye tathā vṛṣamukhāḥ pare
kṛkalāsamukhāś caiva virajombaradhāriṇaḥ
āśīviṣāś cīradharā gonāsāvaraṇās tathā
hrasvagrīvā mahākarṇā nānāvyālavibhūṣitāḥ
skandhemukhā mahārāja tathā hy udaratomukhāḥ
pārśvānanāś ca bahavo nānādeśamukhās tathā
nānāvyālamukhāś cānye bahubāhuśirodharāḥ
bhujaṃgabhogavadanā nānāgulmanivāsinaḥ
nānāveṣadharāś caiva carmavāsasa eva ca
kirīṭinaḥ pañcaśikhās tathā kaṭhinamūrdhajāḥ
śikhaṇḍino mukuṭino muṇḍāś ca jaṭilās tathā
divyamālyāmbaradharāḥ satataṃ priyavigrahāḥ
sthūlapṛṣṭhā hrasvapṛṣṭhāḥ pralambodaramehanāḥ
kubjāś ca dīrghajaṅghāś ca hastikarṇaśirodharāḥ
dīrghoṣṭhā dīrghajihvāś ca vikarālā hy adhomukhāḥ
vāraṇendranibhāś cānye bhīmā rājan sahasraśaḥ
piṅgākṣāḥ śaṅkukarṇāś ca vakranāsāś ca bhārata
nānāpādauṣṭhadaṃṣṭrāś ca nānāhastaśirodharāḥ
nānāvarmabhir ācchannā nānābhāṣāś ca bhārata
hṛṣṭāḥ paripatanti sma mahāpāriṣadās tathā
piṅgākṣā nīlakaṇṭhāś ca lambakarṇāś ca bhārata
śvetāṅgā lohitagrīvāḥ piṅgākṣāś ca tathāpare
kalmāṣā bahavo rājaṃś citravarṇāś ca bhārata
nānāvarṇāḥ savarṇāś ca mayūrasadṛśaprabhāḥ
śeṣaiḥ kṛtaṃ pāriṣadair āyudhānāṃ parigraham
pṛthvakṣā nīlakaṇṭhāś ca tathā parighabāhavaḥ
śūlāsihastāś ca tathā mahākāyā mahābalāḥ
asimudgarahastāś ca daṇḍahastāś ca bhārata
mahābalā mahāvegā mahāpāriṣadās tathā
ghaṇṭājālapinaddhāṅgā nanṛtus te mahaujasaḥ
upatasthur mahātmānaṃ kārttikeyaṃ yaśasvinam
vyādiṣṭā daivataiḥ śūrāḥ skandasyānucarābhavan
abhiṣiktaṃ mahātmānaṃ parivāryopatasthire