yudhiṣṭhiraṃ madrapatir viddhvā siṃha ivānadat
abhyavarṣad ameyātmā kṣatriyān kṣatriyarṣabhaḥ
sahadevaṃ tribhir viddhvā yudhiṣṭhiram apīḍayat
kuñjarān kuñjarārohān aśvān aśvaprayāyinaḥ
rathāṃś ca rathibhiḥ sārdhaṃ jaghāna rathināṃ varaḥ
cakāra ca mahīṃ yodhais tīrṇāṃ vedīṃ kuśair iva
parivavrur bhṛśaṃ kruddhāḥ pāṇḍupāñcālasomakāḥ
samāgataṃ bhīmabalena rājñā; paryāpur anyonyam athāhvayantaḥ
āvārya cainaṃ samare nṛvīrā; jaghnuḥ śaraiḥ patribhir ugravegaiḥ
madrādhipaṃ patribhir ugravegaiḥ; stanāntare dharmasuto nijaghne
paryāvavruḥ pravarāḥ sarvaśaś ca; duryodhanasyānumate samantāt
taṃ cāpi pārtho navabhiḥ pṛṣatkair; vivyādha rājaṃs tumule mahātmā
anyonyam ācchādayatāṃ mahārathau; madrādhipaś cāpi yudhiṣṭhiraś ca
śarair bhṛśaṃ vivyadhatur nṛpottamau; mahābalau śatrubhir apradhṛṣyau
parasparaṃ bāṇagaṇair mahātmanoḥ; pravarṣator madrapapāṇḍuvīrayoḥ
viṣāṇinau nāgavarāv ivobhau; tatakṣatuḥ saṃyugajātadarpau
vivyādha vīraṃ hṛdaye 'tivegaṃ; śareṇa sūryāgnisamaprabheṇa
jaghāna madrādhipatiṃ mahātmā; mudaṃ ca lebhe ṛṣabhaḥ kurūṇām
śatena pārthaṃ tvarito jaghāna; sahasranetrapratimaprabhāvaḥ
bhittvā hy uras tapanīyaṃ ca varma; jaghāna ṣaḍbhis tv aparaiḥ pṛṣatkaiḥ
dvābhyāṃ kṣurābhyāṃ ca tathaiva rājñaś; ciccheda cāpaṃ kurupuṃgavasya
śalyaṃ tu viddhvā niśitaiḥ samantād; yathā mahendro namuciṃ śitāgraiḥ
nikṛtya raukme paṭuvarmaṇī tayor; vidārayām āsa bhujau mahātmā
kṛpaś ca tasyaiva jaghāna sūtaṃ; ṣaḍbhiḥ śaraiḥ so 'bhimukhaṃ papāta
vāhāṃś ca hatvā vyakaron mahātmā; yodhakṣayaṃ dharmasutasya rājñaḥ
chittvā dhanur vegavatā śareṇa; dvābhyām avidhyat subhṛśaṃ narendram
jaghāna cāśvāṃś caturaḥ sa śīghraṃ; tathā bhṛśaṃ kupito bhīmasenaḥ
bhīmaḥ śatena vyakirac charāṇāṃ; mādrīputraḥ sahadevas tathaiva
sa bhīmasenena nikṛttavarmā; madrādhipaś carma sahasratāram
chittvā ratheṣāṃ nakulasya so 'tha; yudhiṣṭhiraṃ bhīmabalo 'bhyadhāvat
dhṛṣṭadyumno draupadeyāḥ śikhaṇḍī; śineś ca naptā sahasā parīyuḥ
khaḍgaṃ ca bhallair nicakarta muṣṭau; nadan prahṛṣṭas tava sainyamadhye
nādaṃ ca cakrur bhṛśam utsmayantaḥ; śaṅkhāṃś ca dadhmuḥ śaśisaṃnikāśān
svedābhibhūtaṃ rudhirokṣitāṅgaṃ; visaṃjñakalpaṃ ca tathā viṣaṇṇam
yudhiṣṭhirasyābhimukhaṃ javena; siṃho yathā mṛgahetoḥ prayātaḥ
dṛṣṭvā tu madrādhipatiṃ sa tūrṇaṃ; samabhyadhāvat tam ariṃ balena
sa dharmarājo nihatāśvasūte; rathe tiṣṭhañ śaktim evābhikāṅkṣan
smṛtvā manaḥ śalyavadhe yatātmā; yathoktam indrāvarajasya cakre
netre ca dīpte sahasā vivṛtya; madrādhipaṃ kruddhamanā niraikṣat
abhūn na yad bhasmasān madrarājas; tad adbhutaṃ me pratibhāti rājan
cikṣepa vegāt subhṛśaṃ mahātmā; madrādhipāya pravaraḥ kurūṇām
praikṣanta sarve kuravaḥ sametā; yathā yugānte mahatīm ivolkām
sabrahmadaṇḍapratimām amoghāṃ; sasarja yatto yudhi dharmarājaḥ
saṃvartakāgnipratimāṃ jvalantīṃ; kṛtyām atharvāṅgirasīm ivogrām
bhūmyantarikṣādijalāśayāni; prasahya bhūtāni nihantum īśām
tvaṣṭrā prayatnān niyamena kḷptāṃ; brahmadviṣām antakarīm amoghām
sasarja mārgeṇa ca tāṃ pareṇa; vadhāya madrādhipates tadānīm
prasārya bāhuṃ sudṛḍhaṃ supāṇiṃ; krodhena nṛtyann iva dharmarājaḥ
pratigrahāyābhinanarda śalyaḥ; samyag ghutām agnir ivājyadhārām
viveśa gāṃ toyam ivāprasaktā; yaśo viśālaṃ nṛpater dahantī
saṃsiktagātro rudhireṇa so 'bhūt; krauñco yathā skandahato mahādriḥ
mahendravāhapratimo mahātmā; vajrāhataṃ śṛṅgam ivācalasya
tato nipatito bhūmāv indradhvaja ivocchritaḥ
pratyudgata iva premṇā bhūmyā sa narapuṃgavaḥ
ciraṃ bhuktvā vasumatīṃ priyāṃ kāntām iva prabhuḥ
sarvair aṅgaiḥ samāśliṣya prasupta iva so 'bhavat
samyag ghuta iva sviṣṭaḥ praśānto 'gnir ivādhvare
saṃśāntam api madreśaṃ lakṣmīr naiva vyamuñcata
vyadhamad dviṣataḥ saṃkhye khagarāḍ iva pannagān
dehāsūn niśitair bhallai ripūṇāṃ nāśayan kṣaṇāt
nimīlitākṣāḥ kṣiṇvanto bhṛśam anyonyam arditāḥ
saṃnyastakavacā dehair vipatrāyudhajīvitāḥ
bhrātuḥ sarvair guṇais tulyo rathī pāṇḍavam abhyayāt
hatasyāpacitiṃ bhrātuś cikīrṣur yuddhadurmadaḥ
kārmukaṃ cāsya ciccheda kṣurābhyāṃ dhvajam eva ca
pramukhe vartamānasya bhallenāpāharac chiraḥ
puṇyakṣayam iva prāpya patantaṃ svargavāsinam
rudhireṇāvasiktāṅgaṃ dṛṣṭvā sainyam abhajyata
hāhākāraṃ vikurvāṇāḥ kuravo vipradudruvuḥ
vitresuḥ pāṇḍavabhayād rajodhvastās tathā bhṛśam
śiner naptā kiran bāṇair abhyavartata sātyakiḥ
hārdikyas tvarito rājan pratyagṛhṇād abhītavat
hārdikyaḥ sātyakiś caiva siṃhāv iva madotkaṭau
arcirbhir iva sūryasya divākarasamaprabhau
ākāśe samapaśyāma pataṃgān iva śīghragān
cāpam ekena ciccheda hārdikyo nataparvaṇā
anyad ādatta vegena vegavattaram āyudham
hārdikyaṃ daśabhir bāṇaiḥ pratyavidhyat stanāntare
aśvāṃs tasyāvadhīt tūrṇam ubhau ca pārṣṇisārathī
duryodhanabalaṃ sarvaṃ punar āsīt parāṅmukham
balaṃ tu hatabhūyiṣṭhaṃ tat tadāsīt parāṅmukham
vividhaiḥ śoṇitasrāvaiḥ praśāntaṃ puruṣarṣabha
javenāpatataḥ pārthān ekaḥ sarvān avārayat
ānartaṃ ca durādharṣaṃ śitair bāṇair avākirat
athānyaṃ ratham āsthāya hārdikyo 'pi nyavartata
caturbhir nijaghānāśvān patribhiḥ kṛtavarmaṇaḥ
vivyādha gautamaṃ cāpi ṣaḍbhir bhallaiḥ sutejanaiḥ
samapovāha hārdikyaṃ svarathena yudhiṣṭhirāt
vivyādha cāśvān niśitais tasyāṣṭābhiḥ śilīmukhaiḥ
tava durmantrite rājan sahaputrasya bhārata
pārthāḥ sametāḥ paramaprahṛṣṭāḥ; śaṅkhān pradadhmur hatam īkṣya śalyam
cakruś ca nānāvidhavādyaśabdān; ninādayanto vasudhāṃ samantāt