duḥkhena mahatāviṣṭo niḥśvasan pannago yathā
idaṃ nūnaṃ mahāprājño viduro dṛṣṭavān purā
tato nivārayitavān dhṛtarāṣṭraṃ janeśvaram
nihatāḥ kauravaiḥ saṃkhye tathāsmābhiś ca te hatāḥ
dhig arthān yatkṛte hy evaṃ kriyate jñātisaṃkṣayaḥ
kiṃ nu prāpsyāmahe kṛṣṇa hatvā jñātīn samāgatān
kṣatriyā nidhanaṃ yānti karṇadurmantritena ca
kṛtaṃ rājñā mahābāho yācatā sma suyodhanam
rājyārdhaṃ pañca vā grāmān nākārṣīt sa ca durmatiḥ
nindāmi bhṛśam ātmānaṃ dhig astu kṣatrajīvikām
yuddhaṃ mamaibhirucitaṃ jñātibhir madhusūdana
pratariṣye mahāpāraṃ bhujābhyāṃ samarodadhim
nāyaṃ klībayituṃ kālo vidyate mādhava kva cit
codayām āsa tān aśvān pāṇḍurān vātaraṃhasaḥ
mārutoddhūtavegasya sāgarasyeva parvaṇi
parjanyasamanirghoṣo bhīṣmasya saha pāṇḍavaiḥ
parivārya raṇe droṇaṃ vasavo vāsavaṃ yathā
bhagadattaḥ suśarmā ca dhanaṃjayam upādravan
ambaṣṭhakas tu nṛpatir abhimanyum avārayat
tataḥ pravavṛte yuddhaṃ ghorarūpaṃ bhayāvaham
prajajvāla raṇe kruddho haviṣā havyavāḍ iva
prāvṛṣīva mahārāja jaladāḥ parvataṃ yathā
sṛkkiṇī vilihan vīraḥ śārdūla iva darpitaḥ
kṣurapreṇa sutīkṣṇena so 'bhavad gatajīvitaḥ
apātayat kuṇḍalinaṃ siṃhaḥ kṣudramṛgaṃ yathā
sa sapta tvarayā yuktaḥ putrāṃs te prāpya māriṣa
apātayanta putrāṃs te rathebhyaḥ sumahārathān
dīrghabāhuṃ subāhuṃ ca tathaiva kanakadhvajam
vasante puṣpaśabalāś cūtāḥ prapatitā iva
taṃ kālam iva manyanto bhīmasenaṃ mahābalam
yathādriṃ vāridhārābhiḥ samantād vyakirac charaiḥ
droṇena vāryamāṇo 'pi nijaghne yat sutāṃs tava
bhīmas tathā droṇamuktaṃ śaravarṣam adīdharat
yat putrāṃs te 'vadhīt saṃkhye droṇaṃ caiva nyayodhayat
mṛgeṣv iva mahārāja caran vyāghro mahābalaḥ
vṛkodaras tava sutāṃs tathā vyadrāvayad raṇe
pāṇḍavaṃ rabhasaṃ yuddhe vārayām āsur arjunam
pravīrāṃs tava sainyeṣu preṣayām āsa mṛtyave
virathaṃ rathināṃ śreṣṭhaṃ kārayām āsa sāyakaiḥ
avaplutya rathāt tūrṇaṃ savrīḍo manujādhipaḥ
āruroha rathaṃ caiva hārdikyasya mahātmanaḥ
lāghavād vyaṃsayām āsa saubhadraḥ paravīrahā
sādhu sādhv iti sainyānāṃ praṇādo 'bhūd viśāṃ pate
tathaiva tāvakāḥ sarve pāṇḍusainyam ayodhayan
nighnatāṃ bhṛśam anyonyaṃ kurvatāṃ karma duṣkaram
nakhair dantair ayudhyanta muṣṭibhir jānubhis tathā
vivaraṃ prāpya cānyonyam anayan yamasādanam
vyākulīkṛtasaṃkalpā yuyudhus tatra mānavāḥ
hatānām apaviddhāni kalāpāś ca mahādhanāḥ
tailadhautā vyarājanta nirmuktabhujagopamāḥ
carmāṇi cāpaviddhāni rukmapṛṣṭhāni dhanvinām
jātarūpamayāś carṣṭīḥ śaktyaś ca kanakojjvalāḥ
parighān paṭṭiśāṃś caiva bhiṇḍipālāṃś ca māriṣa
kuthāś ca bahudhākārāś cāmaravyajanāni ca
jīvanta iva dṛśyante gatasattvā mahārathāḥ
gajavājirathakṣuṇṇāḥ śerate sma narāḥ kṣitau
saṃchannā vasudhā rājan parvatair iva sarvataḥ
nistriṃśaiḥ paṭṭiśaiḥ prāsair ayaskuntaiḥ paraśvadhaiḥ
śarīraiḥ śastrabhinnaiś ca samāstīryata medinī
gatāsubhir amitraghna vibabhau saṃvṛtā mahī
hastihastopamaiś chinnair ūrubhiś ca tarasvinām
patitair vṛṣabhākṣāṇāṃ babhau bhārata medinī
rarāja subhṛśaṃ bhūmiḥ śāntārcibhir ivānalaiḥ
viprakīrṇaiḥ śaraiś cāpi rukmapuṅkhaiḥ samantataḥ
vājibhiś ca hataiḥ kīrṇaiḥ srastajihvaiḥ saśoṇitaiḥ
pravīrāṇāṃ mahāśaṅkhair viprakīrṇaiś ca pāṇḍuraiḥ
nānārūpair alaṃkāraiḥ pramadevābhyalaṃkṛtā
karaiḥ śabdaṃ vimuñcadbhiḥ śīkaraṃ ca muhur muhuḥ
vibabhau tad raṇasthānaṃ dhamyamānair ivācalaiḥ
vaiḍūryamaṇidaṇḍaiś ca patitair aṅkuśaiḥ śubhaiḥ
vighāṭitavicitrābhiḥ kuthābhī rāṅkavais tathā
yantraiś ca bahudhā chinnais tomaraiś ca sakampanaiḥ
sādināṃ ca bhujaiś chinnaiḥ patitaiḥ sāṅgadais tathā
uṣṇīṣaiś ca tathā chinnaiḥ praviddhaiś ca tatas tataḥ
aśvāstaraparistomai rāṅkavair mṛditais tathā
chatrais tathāpaviddhaiś ca cāmaravyajanair api
kḷptaśmaśrubhir atyarthaṃ vīrāṇāṃ samalaṃkṛtaiḥ
grahanakṣatraśabalā dyaur ivāsīd vasuṃdharā
parasparaṃ samāsādya tava teṣāṃ ca saṃyuge
rātriḥ samabhavad ghorā nāpaśyāma tato raṇam
ghore niśāmukhe raudre vartamāne sudāruṇe
nyaviśanta yathākālaṃ gatvā svaśibiraṃ tadā