Book 5 Chapter 20 | |
1 | vaiśaṃpāyana uvāca |
1 | sa tu kauravyam āsādya drupadasya purohitaḥ
satkṛto dhṛtarāṣṭreṇa bhīṣmeṇa vidureṇa ca |
2 | sarvaṃ kauśalyam uktvādau pṛṣṭvā caivam anāmayam
sarvasenāpraṇetṝṇāṃ madhye vākyam uvāca ha |
3 | sarvair bhavadbhir vidito rājadharmaḥ sanātanaḥ
vākyopādānahetos tu vakṣyāmi vidite sati |
4 | dhṛtarāṣṭraś ca pāṇḍuś ca sutāv ekasya viśrutau
tayoḥ samānaṃ draviṇaṃ paitṛkaṃ nātra saṃśayaḥ |
5 | dhṛtarāṣṭrasya ye putrās te prāptāḥ paitṛkaṃ vasu
pāṇḍuputrāḥ kathaṃ nāma na prāptāḥ paitṛkaṃ vasu |
6 | evaṃ gate pāṇḍaveyair viditaṃ vaḥ purā yathā
na prāptaṃ paitṛkaṃ dravyaṃ dhārtarāṣṭreṇa saṃvṛtam |
7 | prāṇāntikair apy upāyaiḥ prayatadbhir anekaśaḥ
śeṣavanto na śakitā nayituṃ yamasādanam |
8 | punaś ca vardhitaṃ rājyaṃ svabalena mahātmabhiḥ
chadmanāpahṛtaṃ kṣudrair dhārtarāṣṭraiḥ sasaubalaiḥ |
9 | tad apy anumataṃ karma tathāyuktam anena vai
vāsitāś ca mahāraṇye varṣāṇīha trayodaśa |
10 | sabhāyāṃ kleśitair vīraiḥ sahabhāryais tathā bhṛśam
araṇye vividhāḥ kleśāḥ saṃprāptās taiḥ sudāruṇāḥ |
11 | tathā virāṭanagare yonyantaragatair iva
prāptaḥ paramasaṃkleśo yathā pāpair mahātmabhiḥ |
12 | te sarve pṛṣṭhataḥ kṛtvā tat sarvaṃ pūrvakilbiṣam
sāmaiva kurubhiḥ sārdham icchanti kurupuṃgavāḥ |
13 | teṣāṃ ca vṛttam ājñāya vṛttaṃ duryodhanasya ca
anunetum ihārhanti dhṛtarāṣṭraṃ suhṛjjanāḥ |
14 | na hi te vigrahaṃ vīrāḥ kurvanti kurubhiḥ saha
avināśena lokasya kāṅkṣante pāṇḍavāḥ svakam |
15 | yaś cāpi dhārtarāṣṭrasya hetuḥ syād vigrahaṃ prati
sa ca hetur na mantavyo balīyāṃsas tathā hi te |
16 | akṣauhiṇyo hi saptaiva dharmaputrasya saṃgatāḥ
yuyutsamānāḥ kurubhiḥ pratīkṣante 'sya śāsanam |
17 | apare puruṣavyāghrāḥ sahasrākṣauhiṇīsamāḥ
sātyakir bhīmasenaś ca yamau ca sumahābalau |
18 | ekādaśaitāḥ pṛtanā ekataś ca samāgatāḥ
ekataś ca mahābāhur bahurūpo dhanaṃjayaḥ |
19 | yathā kirīṭī senābhyaḥ sarvābhyo vyatiricyate
evam eva mahābāhur vāsudevo mahādyutiḥ |
20 | bahulatvaṃ ca senānāṃ vikramaṃ ca kirīṭinaḥ
buddhimattāṃ ca kṛṣṇasya buddhvā yudhyeta ko naraḥ |
21 | te bhavanto yathādharmaṃ yathāsamayam eva ca
prayacchantu pradātavyaṃ mā vaḥ kālo 'tyagād ayam |