āśvāsayaṃs tadā dhaumyo bṛhaspatisamo 'bravīt
diśas tīrthāni śailāṃś ca śṛṇu me gadato nṛpa
ramyāṃ te kīrtayiṣyāmi yudhiṣṭhira yathāsmṛti
yatra tīrthāni devānāṃ supuṇyāni pṛthak pṛthak
yajñabhūmiś ca devānāṃ śāmitraṃ ca vivasvataḥ
śivaṃ brahmasaro yatra sevitaṃ tridaśarṣibhiḥ
eṣṭavyā bahavaḥ putrā yady eko 'pi gayāṃ vrajet
yatrāsau kīrtyate viprair akṣayyakaraṇo vaṭaḥ
yatra dattaṃ pitṛbhyo 'nnam akṣayyaṃ bhavati prabho
bahumūlaphalā cāpi kauśikī bharatarṣabha
viśvāmitro 'bhyagād yatra brāhmaṇatvaṃ tapodhanaḥ
ayajat tāta bahubhiḥ kratubhir bhūridakṣiṇaiḥ
viśvāmitro 'yajad yatra śakreṇa saha kauśikaḥ
yatrānuvaṃśaṃ bhagavāñ jāmadagnyas tathā jagau
kanyakubje 'pibat somam indreṇa saha kauśikaḥ
tataḥ kṣatrād apākrāmad brāhmaṇo 'smīti cābravīt
gaṅgāyamunayor vīra saṃgamaṃ lokaviśrutam
prayāgam iti vikhyātaṃ tasmād bharatasattama
hiraṇyabinduḥ kathito girau kālaṃjare nṛpa
mahendro nāma kauravya bhārgavasya mahātmanaḥ
yatra bhāgīrathī puṇyā sadasyāsīd yudhiṣṭhira
dhūtapāpmabhir ākīrṇā puṇyaṃ tasyāś ca darśanam
kedāraś ca mataṅgasya mahān āśrama uttamaḥ
naiṣadhas tṛṣito yatra jalaṃ śarma ca labdhavān
bāhudā ca nadī yatra nandā ca girimūrdhani
prācyāṃ diśi mahārāja kīrtitāni mayā tava
saritaḥ parvatāṃś caiva puṇyāny āyatanāni ca