Book 3 Chapter 75 | |
1 | damayanty uvāca |
1 | na mām arhasi kalyāṇa pāpena pariśaṅkitum
mayā hi devān utsṛjya vṛtas tvaṃ niṣadhādhipa |
2 | tavābhigamanārthaṃ tu sarvato brāhmaṇā gatāḥ
vākyāni mama gāthābhir gāyamānā diśo daśa |
3 | tatas tvāṃ brāhmaṇo vidvān parṇādo nāma pārthiva
abhyagacchat kosalāyām ṛtuparṇaniveśane |
4 | tena vākye hṛte samyak prativākye tathāhṛte
upāyo 'yaṃ mayā dṛṣṭo naiṣadhānayane tava |
5 | tvām ṛte na hi loke 'nya ekāhnā pṛthivīpate
samartho yojanaśataṃ gantum aśvair narādhipa |
6 | tathā cemau mahīpāla bhaje 'haṃ caraṇau tava
yathā nāsatkṛtaṃ kiṃ cin manasāpi carāmy aham |
7 | ayaṃ carati loke 'smin bhūtasākṣī sadāgatiḥ
eṣa muñcatu me prāṇān yadi pāpaṃ carāmy aham |
8 | tathā carati tigmāṃśuḥ pareṇa bhuvanaṃ sadā
sa vimuñcatu me prāṇān yadi pāpaṃ carāmy aham |
9 | candramāḥ sarvabhūtānām antaś carati sākṣivat
sa vimuñcatu me prāṇān yadi pāpaṃ carāmy aham |
10 | ete devās trayaḥ kṛtsnaṃ trailokyaṃ dhārayanti vai
vibruvantu yathāsatyam ete vādya tyajantu mām |
11 | evam ukte tato vāyur antarikṣād abhāṣata
naiṣā kṛtavatī pāpaṃ nala satyaṃ bravīmi te |
12 | rājañ śīlanidhiḥ sphīto damayantyā surakṣitaḥ
sākṣiṇo rakṣiṇaś cāsyā vayaṃ trīn parivatsarān |
13 | upāyo vihitaś cāyaṃ tvadartham atulo 'nayā
na hy ekāhnā śataṃ gantā tvad ṛte 'nyaḥ pumān iha |
14 | upapannā tvayā bhaimī tvaṃ ca bhaimyā mahīpate
nātra śaṅkā tvayā kāryā saṃgaccha saha bhāryayā |
15 | tathā bruvati vāyau tu puṣpavṛṣṭiḥ papāta ha
devadundubhayo nedur vavau ca pavanaḥ śivaḥ |
16 | tad adbhutatamaṃ dṛṣṭvā nalo rājātha bhārata
damayantyāṃ viśaṅkāṃ tāṃ vyapākarṣad ariṃdamaḥ |
17 | tatas tad vastram arajaḥ prāvṛṇod vasudhādhipaḥ
saṃsmṛtya nāgarājānaṃ tato lebhe vapuḥ svakam |
18 | svarūpiṇaṃ tu bhartāraṃ dṛṣṭvā bhīmasutā tadā
prākrośad uccair āliṅgya puṇyaślokam aninditā |
19 | bhaimīm api nalo rājā bhrājamāno yathā purā
sasvaje svasutau cāpi yathāvat pratyanandata |
20 | tataḥ svorasi vinyasya vaktraṃ tasya śubhānanā
parītā tena duḥkhena niśaśvāsāyatekṣaṇā |
21 | tathaiva maladigdhāṅgī pariṣvajya śucismitā
suciraṃ puruṣavyāghraṃ tasthau sāśrupariplutā |
22 | tataḥ sarvaṃ yathāvṛttaṃ damayantyā nalasya ca
bhīmāyākathayat prītyā vaidarbhyā jananī nṛpa |
23 | tato 'bravīn mahārājaḥ kṛtaśaucam ahaṃ nalam
damayantyā sahopetaṃ kālyaṃ draṣṭā sukhoṣitam |
24 | tatas tau sahitau rātriṃ kathayantau purātanam
vane vicaritaṃ sarvam ūṣatur muditau nṛpa |
25 | sa caturthe tato varṣe saṃgamya saha bhāryayā
sarvakāmaiḥ susiddhārtho labdhavān paramāṃ mudam |
26 | damayanty api bhartāram avāpyāpyāyitā bhṛśam
ardhasaṃjātasasyeva toyaṃ prāpya vasuṃdharā |
27 | saivaṃ sametya vyapanītatandrī; śāntajvarā harṣavivṛddhasattvā
rarāja bhaimī samavāptakāmā; śītāṃśunā rātrir ivoditena |