Book 3 Chapter 61 | |
1 | bṛhadaśva uvāca |
1 | sā nihatya mṛgavyādhaṃ pratasthe kamalekṣaṇā
vanaṃ pratibhayaṃ śūnyaṃ jhillikāgaṇanāditam |
2 | siṃhavyāghravarāharkṣarurudvīpiniṣevitam
nānāpakṣigaṇākīrṇaṃ mlecchataskarasevitam |
3 | śālaveṇudhavāśvatthatindukeṅgudakiṃśukaiḥ
arjunāriṣṭasaṃchannaṃ candanaiś ca saśālmalaiḥ |
4 | jambvāmralodhrakhadiraśākavetrasamākulam
kāśmaryāmalakaplakṣakadambodumbarāvṛtam |
5 | badarībilvasaṃchannaṃ nyagrodhaiś ca samākulam
priyālatālakharjūraharītakabibhītakaiḥ |
6 | nānādhātuśatair naddhān vividhān api cācalān
nikuñjān pakṣisaṃghuṣṭān darīś cādbhutadarśanāḥ nadīḥ sarāṃsi vāpīś ca vividhāṃś ca mṛgadvijān |
7 | sā bahūn bhīmarūpāṃś ca piśācoragarākṣasān
palvalāni taḍāgāni girikūṭāni sarvaśaḥ saritaḥ sāgarāṃś caiva dadarśādbhutadarśanān |
8 | yūthaśo dadṛśe cātra vidarbhādhipanandinī
mahiṣān varāhān gomāyūn ṛkṣavānarapannagān |
9 | tejasā yaśasā sthityā śriyā ca parayā yutā
vaidarbhī vicaraty ekā nalam anveṣatī tadā |
10 | nābibhyat sā nṛpasutā bhaimī tatrātha kasya cit
dāruṇām aṭavīṃ prāpya bhartṛvyasanakarśitā |
11 | vidarbhatanayā rājan vilalāpa suduḥkhitā
bhartṛśokaparītāṅgī śilātalasamāśritā |
12 | damayanty uvāca |
12 | siṃhoraska mahābāho niṣadhānāṃ janādhipa
kva nu rājan gato 'sīha tyaktvā māṃ nirjane vane |
13 | aśvamedhādibhir vīra kratubhiḥ svāptadakṣiṇaiḥ
katham iṣṭvā naravyāghra mayi mithyā pravartase |
14 | yat tvayoktaṃ naravyāghra matsamakṣaṃ mahādyute
kartum arhasi kalyāṇa tad ṛtaṃ pārthivarṣabha |
15 | yathoktaṃ vihagair haṃsaiḥ samīpe tava bhūmipa
matsakāśe ca tair uktaṃ tad avekṣitum arhasi |
16 | catvāra ekato vedāḥ sāṅgopāṅgāḥ savistarāḥ
svadhītā mānavaśreṣṭha satyam ekaṃ kilaikataḥ |
17 | tasmād arhasi śatrughna satyaṃ kartuṃ nareśvara
uktavān asi yad vīra matsakāśe purā vacaḥ |
18 | hā vīra nanu nāmāham iṣṭā kila tavānagha
asyām aṭavyāṃ ghorāyāṃ kiṃ māṃ na pratibhāṣase |
19 | bhartsayaty eṣa māṃ raudro vyāttāsyo dāruṇākṛtiḥ
araṇyarāṭ kṣudhāviṣṭaḥ kiṃ māṃ na trātum arhasi |
20 | na me tvad anyā subhage priyā ity abravīs tadā
tām ṛtāṃ kuru kalyāṇa puroktāṃ bhāratīṃ nṛpa |
21 | unmattāṃ vilapantīṃ māṃ bhāryām iṣṭāṃ narādhipa
īpsitām īpsito nātha kiṃ māṃ na pratibhāṣase |
22 | kṛśāṃ dīnāṃ vivarṇāṃ ca malināṃ vasudhādhipa
vastrārdhaprāvṛtām ekāṃ vilapantīm anāthavat |
23 | yūthabhraṣṭām ivaikāṃ māṃ hariṇīṃ pṛthulocana
na mānayasi mānārha rudatīm arikarśana |
24 | mahārāja mahāraṇye mām ihaikākinīṃ satīm
ābhāṣamāṇāṃ svāṃ patnīṃ kiṃ māṃ na pratibhāṣase |
25 | kulaśīlopasaṃpannaṃ cārusarvāṅgaśobhanam
nādya tvām anupaśyāmi girāv asmin narottama vane cāsmin mahāghore siṃhavyāghraniṣevite |
26 | śayānam upaviṣṭaṃ vā sthitaṃ vā niṣadhādhipa
prasthitaṃ vā naraśreṣṭha mama śokavivardhana |
27 | kaṃ nu pṛcchāmi duḥkhārtā tvadarthe śokakarśitā
kaccid dṛṣṭas tvayāraṇye saṃgatyeha nalo nṛpaḥ |
28 | ko nu me kathayed adya vane 'smin viṣṭhitaṃ nalam
abhirūpaṃ mahātmānaṃ paravyūhavināśanam |
29 | yam anveṣasi rājānaṃ nalaṃ padmanibhekṣaṇam
ayaṃ sa iti kasyādya śroṣyāmi madhurāṃ giram |
30 | araṇyarāḍ ayaṃ śrīmāṃś caturdaṃṣṭro mahāhanuḥ
śārdūlo 'bhimukhaḥ praiti pṛcchāmy enam aśaṅkitā |
31 | bhavān mṛgāṇām adhipas tvam asmin kānane prabhuḥ
vidarbharājatanayāṃ damayantīti viddhi mām |
32 | niṣadhādhipater bhāryāṃ nalasyāmitraghātinaḥ
patim anveṣatīm ekāṃ kṛpaṇāṃ śokakarśitām āśvāsaya mṛgendreha yadi dṛṣṭas tvayā nalaḥ |
33 | atha vāraṇyanṛpate nalaṃ yadi na śaṃsasi
mām adasva mṛgaśreṣṭha viśokāṃ kuru duḥkhitām |
34 | śrutvāraṇye vilapitaṃ mamaiṣa mṛgarāṭ svayam
yāty etāṃ mṛṣṭasalilām āpagāṃ sāgaraṃgamām |
35 | imaṃ śiloccayaṃ puṇyaṃ śṛṅgair bahubhir ucchritaiḥ
virājadbhir divaspṛgbhir naikavarṇair manoramaiḥ |
36 | nānādhātusamākīrṇaṃ vividhopalabhūṣitam
asyāraṇyasya mahataḥ ketubhūtam ivocchritam |
37 | siṃhaśārdūlamātaṅgavarāharkṣamṛgāyutam
patatribhir bahuvidhaiḥ samantād anunāditam |
38 | kiṃśukāśokabakulapuṃnāgair upaśobhitam
saridbhiḥ savihaṃgābhiḥ śikharaiś copaśobhitam girirājam imaṃ tāvat pṛcchāmi nṛpatiṃ prati |
39 | bhagavann acalaśreṣṭha divyadarśana viśruta
śaraṇya bahukalyāṇa namas te 'stu mahīdhara |
40 | praṇame tvābhigamyāhaṃ rājaputrīṃ nibodha mām
rājñaḥ snuṣāṃ rājabhāryāṃ damayantīti viśrutām |
41 | rājā vidarbhādhipatiḥ pitā mama mahārathaḥ
bhīmo nāma kṣitipatiś cāturvarṇyasya rakṣitā |
42 | rājasūyāśvamedhānāṃ kratūnāṃ dakṣiṇāvatām
āhartā pārthivaśreṣṭhaḥ pṛthucārvañcitekṣaṇaḥ |
43 | brahmaṇyaḥ sādhuvṛttaś ca satyavāg anasūyakaḥ
śīlavān susamācāraḥ pṛthuśrīr dharmavic chuciḥ |
44 | samyag goptā vidarbhāṇāṃ nirjitārigaṇaḥ prabhuḥ
tasya māṃ viddhi tanayāṃ bhagavaṃs tvām upasthitām |
45 | niṣadheṣu mahāśaila śvaśuro me nṛpottamaḥ
sugṛhītanāmā vikhyāto vīrasena iti sma ha |
46 | tasya rājñaḥ suto vīraḥ śrīmān satyaparākramaḥ
kramaprāptaṃ pituḥ svaṃ yo rājyaṃ samanuśāsti ha |
47 | nalo nāmāridamanaḥ puṇyaśloka iti śrutaḥ
brahmaṇyo vedavid vāgmī puṇyakṛt somapo 'gnicit |
48 | yaṣṭā dātā ca yoddhā ca samyak caiva praśāsitā
tasya mām acalaśreṣṭha viddhi bhāryām ihāgatām |
49 | tyaktaśriyaṃ bhartṛhīnām anāthāṃ vyasanānvitām
anveṣamāṇāṃ bhartāraṃ taṃ vai naravarottamam |
50 | kham ullikhadbhir etair hi tvayā śṛṅgaśatair nṛpaḥ
kaccid dṛṣṭo 'calaśreṣṭha vane 'smin dāruṇe nalaḥ |
51 | gajendravikramo dhīmān dīrghabāhur amarṣaṇaḥ
vikrāntaḥ satyavāg dhīro bhartā mama mahāyaśāḥ niṣadhānām adhipatiḥ kaccid dṛṣṭas tvayā nalaḥ |
52 | kiṃ māṃ vilapatīm ekāṃ parvataśreṣṭha duḥkhitām
girā nāśvāsayasy adya svāṃ sutām iva duḥkhitām |
53 | vīra vikrānta dharmajña satyasaṃdha mahīpate
yady asy asmin vane rājan darśayātmānam ātmanā |
54 | kadā nu snigdhagambhīrāṃ jīmūtasvanasaṃnibhām
śroṣyāmi naiṣadhasyāhaṃ vācaṃ tām amṛtopamām |
55 | vaidarbhīty eva kathitāṃ śubhāṃ rājño mahātmanaḥ
āmnāyasāriṇīm ṛddhāṃ mama śokanibarhiṇīm |
56 | iti sā taṃ giriśreṣṭham uktvā pārthivanandinī
damayantī tato bhūyo jagāma diśam uttarām |
57 | sā gatvā trīn ahorātrān dadarśa paramāṅganā
tāpasāraṇyam atulaṃ divyakānanadarśanam |
58 | vasiṣṭhabhṛgvatrisamais tāpasair upaśobhitam
niyataiḥ saṃyatāhārair damaśaucasamanvitaiḥ |
59 | abbhakṣair vāyubhakṣaiś ca patrāhārais tathaiva ca
jitendriyair mahābhāgaiḥ svargamārgadidṛkṣubhiḥ |
60 | valkalājinasaṃvītair munibhiḥ saṃyatendriyaiḥ
tāpasādhyuṣitaṃ ramyaṃ dadarśāśramamaṇḍalam |
61 | sā dṛṣṭvaivāśramapadaṃ nānāmṛganiṣevitam
śākhāmṛgagaṇaiś caiva tāpasaiś ca samanvitam |
62 | subhrūḥ sukeśī suśroṇī sukucā sudvijānanā
varcasvinī supratiṣṭhā svañcitodyatagāminī |
63 | sā viveśāśramapadaṃ vīrasenasutapriyā
yoṣidratnaṃ mahābhāgā damayantī manasvinī |
64 | sābhivādya tapovṛddhān vinayāvanatā sthitā
svāgataṃ ta iti proktā taiḥ sarvais tāpasaiś ca sā |
65 | pūjāṃ cāsyā yathānyāyaṃ kṛtvā tatra tapodhanāḥ
āsyatām ity athocus te brūhi kiṃ karavāmahe |
66 | tān uvāca varārohā kaccid bhagavatām iha
tapasy agniṣu dharmeṣu mṛgapakṣiṣu cānaghāḥ kuśalaṃ vo mahābhāgāḥ svadharmacaraṇeṣu ca |
67 | tair uktā kuśalaṃ bhadre sarvatreti yaśasvinī
brūhi sarvānavadyāṅgi kā tvaṃ kiṃ ca cikīrṣasi |
68 | dṛṣṭvaiva te paraṃ rūpaṃ dyutiṃ ca paramām iha
vismayo naḥ samutpannaḥ samāśvasihi mā śucaḥ |
69 | asyāraṇyasya mahatī devatā vā mahībhṛtaḥ
asyā nu nadyāḥ kalyāṇi vada satyam anindite |
70 | sābravīt tān ṛṣīn nāham araṇyasyāsya devatā
na cāpy asya girer viprā na nadyā devatāpy aham |
71 | mānuṣīṃ māṃ vijānīta yūyaṃ sarve tapodhanāḥ
vistareṇābhidhāsyāmi tan me śṛṇuta sarvaśaḥ |
72 | vidarbheṣu mahīpālo bhīmo nāma mahādyutiḥ
tasya māṃ tanayāṃ sarve jānīta dvijasattamāḥ |
73 | niṣadhādhipatir dhīmān nalo nāma mahāyaśāḥ
vīraḥ saṃgrāmajid vidvān mama bhartā viśāṃ patiḥ |
74 | devatābhyarcanaparo dvijātijanavatsalaḥ
goptā niṣadhavaṃśasya mahābhāgo mahādyutiḥ |
75 | satyavāg dharmavit prājñaḥ satyasaṃdho 'rimardanaḥ
brahmaṇyo daivataparaḥ śrīmān parapuraṃjayaḥ |
76 | nalo nāma nṛpaśreṣṭho devarājasamadyutiḥ
mama bhartā viśālākṣaḥ pūrṇenduvadano 'rihā |
77 | āhartā kratumukhyānāṃ vedavedāṅgapāragaḥ
sapatnānāṃ mṛdhe hantā ravisomasamaprabhaḥ |
78 | sa kaiś cin nikṛtiprajñair akalyāṇair narādhamaiḥ
āhūya pṛthivīpālaḥ satyadharmaparāyaṇaḥ devane kuśalair jihmair jito rājyaṃ vasūni ca |
79 | tasya mām avagacchadhvaṃ bhāryāṃ rājarṣabhasya vai
damayantīti vikhyātāṃ bhartṛdarśanalālasām |
80 | sā vanāni girīṃś caiva sarāṃsi saritas tathā
palvalāni ca ramyāṇi tathāraṇyāni sarvaśaḥ |
81 | anveṣamāṇā bhartāraṃ nalaṃ raṇaviśāradam
mahātmānaṃ kṛtāstraṃ ca vicarāmīha duḥkhitā |
82 | kaccid bhagavatāṃ puṇyaṃ tapovanam idaṃ nṛpaḥ
bhavet prāpto nalo nāma niṣadhānāṃ janādhipaḥ |
83 | yatkṛte 'ham idaṃ viprāḥ prapannā bhṛśadāruṇam
vanaṃ pratibhayaṃ ghoraṃ śārdūlamṛgasevitam |
84 | yadi kaiś cid ahorātrair na drakṣyāmi nalaṃ nṛpam
ātmānaṃ śreyasā yokṣye dehasyāsya vimocanāt |
85 | ko nu me jīvitenārthas tam ṛte puruṣarṣabham
kathaṃ bhaviṣyāmy adyāhaṃ bhartṛśokābhipīḍitā |
86 | evaṃ vilapatīm ekām araṇye bhīmanandinīm
damayantīm athocus te tāpasāḥ satyavādinaḥ |
87 | udarkas tava kalyāṇi kalyāṇo bhavitā śubhe
vayaṃ paśyāma tapasā kṣipraṃ drakṣyasi naiṣadham |
88 | niṣadhānām adhipatiṃ nalaṃ ripunighātinam
bhaimi dharmabhṛtāṃ śreṣṭhaṃ drakṣyase vigatajvaram |
89 | vimuktaṃ sarvapāpebhyaḥ sarvaratnasamanvitam
tad eva nagaraśreṣṭhaṃ praśāsantam ariṃdamam |
90 | dviṣatāṃ bhayakartāraṃ suhṛdāṃ śokanāśanam
patiṃ drakṣyasi kalyāṇi kalyāṇābhijanaṃ nṛpam |
91 | evam uktvā nalasyeṣṭāṃ mahiṣīṃ pārthivātmajām
antarhitās tāpasās te sāgnihotrāśramās tadā |
92 | sā dṛṣṭvā mahad āścaryaṃ vismitā abhavat tadā
damayanty anavadyāṅgī vīrasenanṛpasnuṣā |
93 | kiṃ nu svapno mayā dṛṣṭaḥ ko 'yaṃ vidhir ihābhavat
kva nu te tāpasāḥ sarve kva tad āśramamaṇḍalam |
94 | kva sā puṇyajalā ramyā nānādvijaniṣevitā
nadī te ca nagā hṛdyāḥ phalapuṣpopaśobhitāḥ |
95 | dhyātvā ciraṃ bhīmasutā damayantī śucismitā
bhartṛśokaparā dīnā vivarṇavadanābhavat |
96 | sā gatvāthāparāṃ bhūmiṃ bāṣpasaṃdigdhayā girā
vilalāpāśrupūrṇākṣī dṛṣṭvāśokataruṃ tataḥ |
97 | upagamya taruśreṣṭham aśokaṃ puṣpitaṃ tadā
pallavāpīḍitaṃ hṛdyaṃ vihaṃgair anunāditam |
98 | aho batāyam agamaḥ śrīmān asmin vanāntare
āpīḍair bahubhir bhāti śrīmān dramiḍarāḍ iva |
99 | viśokāṃ kuru māṃ kṣipram aśoka priyadarśana
vītaśokabhayābādhaṃ kaccit tvaṃ dṛṣṭavān nṛpam |
100 | nalaṃ nāmāridamanaṃ damayantyāḥ priyaṃ patim
niṣadhānām adhipatiṃ dṛṣṭavān asi me priyam |
101 | ekavastrārdhasaṃvītaṃ sukumāratanutvacam
vyasanenārditaṃ vīram araṇyam idam āgatam |
102 | yathā viśokā gaccheyam aśokanaga tat kuru
satyanāmā bhavāśoka mama śokavināśanāt |
103 | evaṃ sāśokavṛkṣaṃ tam ārtā triḥ parigamya ha
jagāma dāruṇataraṃ deśaṃ bhaimī varāṅganā |
104 | sā dadarśa nagān naikān naikāś ca saritas tathā
naikāṃś ca parvatān ramyān naikāṃś ca mṛgapakṣiṇaḥ |
105 | kandarāṃś ca nitambāṃś ca nadāṃś cādbhutadarśanān
dadarśa sā bhīmasutā patim anveṣatī tadā |
106 | gatvā prakṛṣṭam adhvānaṃ damayantī śucismitā
dadarśātha mahāsārthaṃ hastyaśvarathasaṃkulam |
107 | uttarantaṃ nadīṃ ramyāṃ prasannasalilāṃ śubhām
suśītatoyāṃ vistīrṇāṃ hradinīṃ vetasair vṛtām |
108 | prodghuṣṭāṃ krauñcakuraraiś cakravākopakūjitām
kūrmagrāhajhaṣākīrṇāṃ pulinadvīpaśobhitām |
109 | sā dṛṣṭvaiva mahāsārthaṃ nalapatnī yaśasvinī
upasarpya varārohā janamadhyaṃ viveśa ha |
110 | unmattarūpā śokārtā tathā vastrārdhasaṃvṛtā
kṛśā vivarṇā malinā pāṃsudhvastaśiroruhā |
111 | tāṃ dṛṣṭvā tatra manujāḥ ke cid bhītāḥ pradudruvuḥ
ke cic cintāparās tasthuḥ ke cit tatra vicukruśuḥ |
112 | prahasanti sma tāṃ ke cid abhyasūyanta cāpare
cakrus tasyāṃ dayāṃ ke cit papracchuś cāpi bhārata |
113 | kāsi kasyāsi kalyāṇi kiṃ vā mṛgayase vane
tvāṃ dṛṣṭvā vyathitāḥ smeha kaccit tvam asi mānuṣī |
114 | vada satyaṃ vanasyāsya parvatasyātha vā diśaḥ
devatā tvaṃ hi kalyāṇi tvāṃ vayaṃ śaraṇaṃ gatāḥ |
115 | yakṣī vā rākṣasī vā tvam utāho 'si varāṅganā
sarvathā kuru naḥ svasti rakṣasvāsmān anindite |
116 | yathāyaṃ sarvathā sārthaḥ kṣemī śīghram ito vrajet
tathā vidhatsva kalyāṇi tvāṃ vayaṃ śaraṇaṃ gatāḥ |
117 | tathoktā tena sārthena damayantī nṛpātmajā
pratyuvāca tataḥ sādhvī bhartṛvyasanaduḥkhitā sārthavāhaṃ ca sārthaṃ ca janā ye cātra ke cana |
118 | yūnaḥ sthavirabālāś ca sārthasya ca purogamāḥ
mānuṣīṃ māṃ vijānīta manujādhipateḥ sutām nṛpasnuṣāṃ rājabhāryāṃ bhartṛdarśanalālasām |
119 | vidarbharāṇ mama pitā bhartā rājā ca naiṣadhaḥ
nalo nāma mahābhāgas taṃ mārgāmy aparājitam |
120 | yadi jānīta nṛpatiṃ kṣipraṃ śaṃsata me priyam
nalaṃ pārthivaśārdūlam amitragaṇasūdanam |
121 | tām uvācānavadyāṅgīṃ sārthasya mahataḥ prabhuḥ
sārthavāhaḥ śucir nāma śṛṇu kalyāṇi madvacaḥ |
122 | ahaṃ sārthasya netā vai sārthavāhaḥ śucismite
manuṣyaṃ nalanāmānaṃ na paśyāmi yaśasvini |
123 | kuñjaradvīpimahiṣaśārdūlarkṣamṛgān api
paśyāmy asmin vane kaṣṭe amanuṣyaniṣevite tathā no yakṣarāḍ adya maṇibhadraḥ prasīdatu |
124 | sābravīd vaṇijaḥ sarvān sārthavāhaṃ ca taṃ tataḥ
kva nu yāsyasi sārtho 'yam etad ākhyātum arhatha |
125 | sārthavāha uvāca |
125 | sārtho 'yaṃ cedirājasya subāhoḥ satyavādinaḥ
kṣipraṃ janapadaṃ gantā lābhāya manujātmaje |