vanaṃ yiyāsatāṃ viprās tasthur bhikṣābhujo 'grataḥ
tān uvāca tato rājā kuntīputro yudhiṣṭhiraḥ
phalamūlāmiṣāhārā vanaṃ yāsyāma duḥkhitāḥ
parikleśaś ca vo manye dhruvaṃ tatra bhaviṣyati
kiṃ punar mām ito viprā nivartadhvaṃ yatheṣṭataḥ
nārhathāsmān parityaktuṃ bhaktān saddharmadarśinaḥ
viśeṣato brāhmaṇeṣu sadācārāvalambiṣu
sahāyaviparibhraṃśas tv ayaṃ sādayatīva mām
ta ime śokajair duḥkhair bhrātaro me vimohitāḥ
duḥkhānvitān imān kleśair nāhaṃ yoktum ihotsahe
svayam āhṛtya vanyāni anuyāsyāmahe vayam
kathābhiś cānukūlābhiḥ saha raṃsyāmahe vane
nyūnabhāvāt tu paśyāmi pratyādeśam ivātmanaḥ
madbhaktyā kliśyato 'narhān dhik pāpān dhṛtarāṣṭrajān
tam adhyātmaratir vidvāñ śaunako nāma vai dvijaḥ
yoge sāṃkhye ca kuśalo rājānam idam abravīt
divase divase mūḍham āviśanti na paṇḍitam
śreyoghātiṣu sajjante buddhimanto bhavadvidhāḥ
śrutismṛtisamāyuktāṃ sā rājaṃs tvayy avasthitā
śārīramānasair duḥkhair na sīdanti bhavadvidhāḥ
ātmavyavasthānakarā gītāḥ ślokā mahātmanā
tayor vyāsasamāsābhyāṃ śamopāyam imaṃ śṛṇu
duḥkhaṃ caturbhiḥ śārīraṃ kāraṇaiḥ saṃpravartate
ādhivyādhipraśamanaṃ kriyāyogadvayena tu
mānasasya priyākhyānaiḥ saṃbhogopanayair nṛṇām
ayaḥpiṇḍena taptena kumbhasaṃstham ivodakam
praśānte mānase duḥkhe śārīram upaśāmyati
snehāt tu sajjate jantur duḥkhayogam upaiti ca
śokaharṣau tathāyāsaḥ sarvaṃ snehāt pravartate
aśreyaskāv ubhāv etau pūrvas tatra guruḥ smṛtaḥ
dharmārthinaṃ tathālpo 'pi rāgadoṣo vināśayet
virāgaṃ bhajate jantur nirvairo niṣparigrahaḥ
svaśarīrasamutthaṃ tu jñānena vinivartayet
na teṣu sajjate snehaḥ padmapatreṣv ivodakam
icchā saṃjāyate tasya tatas tṛṣṇā pravartate
adharmabahulā caiva ghorā pāpānubandhinī
yo 'sau prāṇāntiko rogas tāṃ tṛṣṇāṃ tyajataḥ sukham
vināśayati saṃbhūtā ayonija ivānalaḥ
tathākṛtātmā lobhena sahajena vinaśyati
bhayam arthavatāṃ nityaṃ mṛtyoḥ prāṇabhṛtām iva
bhakṣyate salile matsyais tathā sarveṇa vittavān
arthaśreyasi cāsakto na śreyo vindate naraḥ
tasmād arthāgamāḥ sarve manomohavivardhanāḥ
arthajāni viduḥ prājñā duḥkhāny etāni dehinām
nāśe duḥkhaṃ vyaye duḥkhaṃ ghnanti caivārthakāraṇāt
duḥkhena cādhigamyante teṣāṃ nāśaṃ na cintayet
anto nāsti pipāsāyāḥ saṃtoṣaḥ paramaṃ sukham
anityaṃ yauvanaṃ rūpaṃ jīvitaṃ dravyasaṃcayaḥ
aiśvaryaṃ priyasaṃvāso gṛdhyed eṣu na paṇḍitaḥ
na hi saṃcayavān kaś cid dṛśyate nirupadravaḥ
prakṣālanād dhi paṅkasya dūrād asparśanaṃ varam
dharmeṇa yadi te kāryaṃ vimukteccho bhavārthataḥ
bharaṇārthaṃ tu viprāṇāṃ brahman kāṅkṣe na lobhataḥ
bharaṇaṃ pālanaṃ cāpi na kuryād anuyāyinām
tathaivāpacamānebhyaḥ pradeyaṃ gṛhamedhinā
satām etāni geheṣu nocchidyante kadā cana
tṛṣitasya ca pānīyaṃ kṣudhitasya ca bhojanam
pratyudgamyābhigamanaṃ kuryān nyāyena cārcanam
putradārabhṛtāś caiva nirdaheyur apūjitāḥ
na ca tat svayam aśnīyād vidhivad yan na nirvapet
vaiśvadevaṃ hi nāmaitat sāyaṃprātar vidhīyate
vighasaṃ bhṛtyaśeṣaṃ tu yajñaśeṣaṃ tathāmṛtam
tasya dharmaṃ paraṃ prāhuḥ kathaṃ vā vipra manyase
yenāpatrapate sādhur asādhus tena tuṣyati
moharāgasamākrānta indriyārthavaśānugaḥ
vimūḍhasaṃjño duṣṭāśvair udbhrāntair iva sārathiḥ
tadā prādurbhavaty eṣāṃ pūrvasaṃkalpajaṃ manaḥ
tasyautsukyaṃ saṃbhavati pravṛttiś copajāyate
viddhaḥ patati lobhāgnau jyotir lobhāt pataṃgavat
mahāmohamukhe magno nātmānam avabudhyate
avidyākarmatṛṣṇābhir bhrāmyamāṇo 'tha cakravat
jale bhuvi tathākāśe jāyamānaḥ punaḥ punaḥ
ye dharme śreyasi ratā vimokṣaratayo janāḥ
tasmād dharmān imān sarvān nābhimānāt samācaret
alobha iti mārgo 'yaṃ dharmasyāṣṭavidhaḥ smṛtaḥ
kartavyam iti yat kāryaṃ nābhimānāt samācaret
aṣṭāṅgenaiva mārgeṇa viśuddhātmā samācaret
samyag vrataviśeṣāc ca samyak ca gurusevanāt
samyak karmopasaṃnyāsāt samyak cittanirodhanāt
evaṃ karmāṇi kurvanti saṃsāravijigīṣavaḥ
rudrāḥ sādhyās tathādityā vasavo 'thāśvināv api
yogaiśvaryeṇa saṃyuktā dhārayanti prajā imāḥ
tapasā siddhim anviccha yogasiddhiṃ ca bhārata
tapasā siddhim anviccha dvijānāṃ bharaṇāya vai
tasmāt tapaḥ samāsthāya kuruṣvātmamanoratham