śarastambhāt kathaṃ jajñe kathaṃ cāstrāṇy avāptavān
putraḥ kila mahārāja jātaḥ saha śarair vibho
yathāsya buddhir abhavad dhanurvede paraṃtapa
tathā sa tapasopetaḥ sarvāṇy astrāṇy avāpa ha
bhṛśaṃ saṃtāpayām āsa devarājaṃ sa gautamaḥ
prāhiṇot tapaso vighnaṃ kuru tasyeti kaurava
dhanurbāṇadharaṃ bālā lobhayām āsa gautamam
loke 'pratimasaṃsthānām utphullanayano 'bhavat
vepathuś cāsya tāṃ dṛṣṭvā śarīre samajāyata
avatasthe mahāprājño dhairyeṇa parameṇa ha
tena susrāva reto 'sya sa ca tan nāvabudhyata
jagāma retas tat tasya śarastambe papāta ha
tasyātha mithunaṃ jajñe gautamasya śaradvataḥ
kaś cit senācaro 'raṇye mithunaṃ tad apaśyata
vyavasya brāhmaṇāpatyaṃ dhanurvedāntagasya tat
sa rājñe darśayām āsa mithunaṃ saśaraṃ tadā
ājagāma gṛhān eva mama putrāv iti bruvan
gautamo 'pi tadāpetya dhanurvedaparo 'bhavat
tasmāt tayor nāma cakre tad eva sa mahīpatiḥ
āgamya cāsmai gotrādi sarvam ākhyātavāṃs tadā
nikhilenāsya tat sarvaṃ guhyam ākhyātavāṃs tadā
so 'cireṇaiva kālena paramācāryatāṃ gataḥ
dhṛtarāṣṭrātmajāś caiva pāṇḍavāś ca mahābalāḥ
vṛṣṇayaś ca nṛpāś cānye nānādeśasamāgatāḥ