Kavirājayati: Sāṃkhyatattvapradīpa

atha sāṃkhyatattvapradīpaḥ /

śrīgaṇeśāya namaḥ /

prakṛtiṃ puruṣaṃ śuddhaṃ praṇipatya praṇīyate /
pradīpaḥ sāṃkhyatattvasya paropakṛtaye mayā //

iha khalu pravāhavidhvastottaraṇopāyā iva sāṃkhyatantrādhyayanapariśramālasāstatprakriyājñānatarīvihīnāḥ śabdodadhāvananyāvalambanāḥ sīdanti tattaraṇopāyaḥ sakalasāṃkhyaprakriyādyotako bahvartho 'lpākṣaro mayā prakāśyate / kāpilatantrādhyayanālasaistatprakriyājijñāsāyāmidameva prakaraṇaṃ samyagavalokanīyamatyugraśubhāśubhādṛṣṭaphalavat prayatnaṃ vinaiva sarvamatraivādhigantavyam ayatnalabdherthe yatnādarśanāt / uktaṃ ca sāṃkhyācāryaiḥ /

akke cenmadhu vindeta kimarthaṃ parvataṃ vrajet /
iṣṭasyārthasya saṃsiddhau ko vidvān yatnamācaret //

ṛjumārgeṇa siddhyato 'rthasya vakreṇa sādhanāyogāt iti kecit / duḥkhatrayābhighātodvignacittāstānnivṛttyupāyameva tāvadabhikāmayante / taṃ cāgre darśayiṣyāmaḥ / duḥkhatrayaṃ ca ādhyātmikamādhibhautikamādhidaivikaṃ ca / tatrādhyātmikaṃ dvidhā śārīraṃ mānasaṃ ca vātapittaśleṣmaṇāṃ vaiṣamyanimittaṃ śārīram kāmakrodhalobhamoherṣyāviṣādaviṣayaviśeṣādarśanakāraṇakaṃ mānasam / āntaropāyasādhyatvādādhyātmikaṃ duḥkhamiti vyapadiśyate / brāhmopāyasādhyamapi duḥkhaṃ dvividham / ādhibhautikamādhidaivaikaṃ ca / tatrādhibhautikaṃ mānuṣapakṣisarīsṛpasthāvaranibandhanam / ādhidaivikaṃ pakṣarākṣavināyakagrahādyāveśanimittam / sarvaṃ mānasapratyakṣam / etad duḥkhaṃ rajaḥpariṇāmaviśeṣo nityapariṇāmitvādidamapi nityamiti na śakyate bādhitum tathāpi śakya eva tadabhibhavaḥ kartuṃ sādhanena tacca sādhanaṃ śāstrajanitaṃ prakṛtipuruṣānyatājñānaṃ nānyaditi tacchāstrapratipādyārthaścaturvidhaḥ tadyathā kaścidarthaḥ prakṛtireva na tu kasyacit vikṛtiryathā mūlaprakṛtiḥ sā sarvasya mūlamādikāraṇaṃ na tu tasyāḥ kāraṇāntaraṃ kiñcit pramāṇasiddhaṃ tathātve vā mūlakṣatikārītyanavasthā syāt svasyaiva svakāraṇatve tu tasyāpekṣayā kāraṇatvāt svasyaiva pūrvavartitvaṃ kāryatvāt paścādvartitvamityasaṃbhavaḥ / sakāraṇatve ajāmekāṃ lohitaśuklakṛṣṇāmityajatvapratipādanaparaśrutivirodhaḥ syāt / sā ca prakarotīti prakṛtiḥ pradhānaṃ sattvarajastamasāṃ sāmyāvasthā / kaścidarthaḥ prakṛtirvikṛtiśca tacca mahattattvamahaṅkāraḥ pañcatanmātrāṇi ceti saptasaṅkhyāko gaṇaḥ kasyacitprakṛtiḥ kasyacidvikṛtiḥ / tadyathā mahattattvamahaṅkārasya prakṛtirvikṛtiśca mūlaprakṛteḥ tathā ahaṅkāraḥ pañcatanmātrāṇāmindriyāṇāṃ ca prakṛtirvikṛtirmahataḥ tathā pañcatanmātrāṇi bhūtānāmākāśādīnāṃ prakṛtayo vikṛtayaścāhaṅkārasya / pañca mahābhūtānyekādaśendriyāṇi ceti ṣoḍaśasaṅkhyāko gaṇo vikṛtireva na tu kasyacitprakṛtiḥ / nanu pṛthivyādīnāmapi goghaṭavṛkṣādayo vikārā upalabhyante tathā tadvikāraviśeṣāṇāṃ payobījādīnāṃ dadhyaṅkurādaya iti kathaṃ vikṛtitvameva teṣāmiti cenna tattvāntaropādānatvaṃ prakṛtitvamihābhyupagatam na tveteṣāṃ tadasti sthaulyendriyagrāhyatayā goghaṭādīnāṃ samānatvāt na tattvāntaratā pṛthivyādibhyaḥ / uktaṃ ca tattvakaumudyām "sarveṣāṃ goghaṭādīnāṃ sthūlatendriyagrāhyatā ca sameti" na tattvāntaram / puruṣastu na kasyacit prakṛtirapariṇāmitvānnāpi vikṛtirnityatvādanyathā sādhanasādhyābhivyaktiḥ syāt ghaṭavat / pramāṇavirahiṇo 'rthasya nṛśṛṅgasādṛśyābhyupagamāt / uktaprameyasādhakaṃ trividhaṃ pramāṇamurarīkatyam pratyakṣamanumānamāptavacanaṃ ceti / sāṅkhyācāryaiḥ / anyavādyaṅgīkṛtapramāṇānāmeteṣveva triṣvantarbhāvaḥ / uktaṃ ca 'sarvapramāṇasiddhatvāditi'; sarveṣāṃ vādyantarābhyupagatānāṃ pramāṇānāṃ siddhatvāt triṣvevāntarbhāvādityarthaḥ / nanu yatra yatra pratyakṣamapravartamānaṃ tattadatyantā 'saditi vyāptiḥ suprasiddhā śaśaśṛṅgakūrmalomādau evaṃ pradhānasyāpi pratyakṣāsiddhatvāt tadatyantāsattvameva yuktaṃ gaganakusumādīnāmiveti cenna nahi yat pratyakṣāgocaraṃ tadatyantāsaditi vyāptigraho yukto 'nyathā gṛhānnirgatasya gṛhadhanaputrapaśuvanitādīn sukhasādhanabhūtānapaśyatastannāśaniścayajaduḥkhavipluṣṭāntaḥkaraṇasya rudato maraṇaṃ syāt na tvevamasti / kiñca kiṃ sarvapratyakṣaviṣayatvaṃ sattve hetuḥ kiñcitpratyakṣaviṣayatvaṃ vā ? nādyaḥ nahi gṛhāntaradeśāntarakālāntaragataṃ vastu kenāpyayoginā pratyakṣeṇa viṣayīkartuṃ śakyamanyathā sarva eva sarvajñaḥ syāt parabuddherapratyakṣatayā sarvaiḥ sarvaṃ pratyakṣeṇa gṛhyate navetyasarvajñena niścetumaśakyatayā saṃśayānivṛtteḥ / nāpi caramaḥ vyabhicārāt nahi nagarasthena svenānupalabdho gavaya etāvataivāraṇyakopalabdhasya tasyāpalāpasambhavaḥ / uktañca līlāvatīkāreṇa "sarvādṛṣṭeśca sandehāt svādṛṣṭervyabhicārata" iti / tasmāt pratyakṣapravṛttipratikūlābhāvaviśiṣṭaṃ pratyakṣaṃ yatra na pravartate tadatyantāsaditi niścetuṃ śakyam na tu pratyakṣāpravṛttimātrāt anyathā puruṣapradhānamahatsvargāpūrvadevatādīnāmatīndriyāṇāmatyantābhāvaḥ syāt / tena viyati gacchataḥ patatriṇo grahaṇe 'tidūratvameva pratikūlam tathā netragatakajjalagrahaṇe 'tisāmīpyam evaṃ rūpaśabdādigrahaṇe āndhyabadhiratvādayaḥ tathā viṣayagrahaṇe manasaḥ kāmādyabhivyāptiḥ yathā kāmādyabhivyāptamanāḥ sphītālokamadhyavartinamindriyasannikṛṣṭamapyarthaṃ na paśyati / paramāṇvādiviṣayatāyāṃ saukṣmyameva pratikūlam yataḥ praṇihitamanā api taṃ na paśyati / bhittyādiparavastugrahaṇe tadvyavadhānameva pratikūlaṃ sampratipannapadārthagrahaṇe hastādivyavadhānavat / kvacidabhibhavaḥ yathā ahani saurībhirbhābhirabhibhūtaṃ nakṣatrasūryādigrahe cakṣuḥ samarthaṃ na bhavati / kvacit samānābhihāraḥ pratikūlaṃ yathā jalāśaye 'mbudavimuktajalabindugrahaṇe netrāsāmarthyam / kvacidanudbhavaḥ yathā kṣīradadhyādyavasthāyāṃ dadhighṛtādivivecanāsāmarthyam / evaṃ sati dṛḍhatarapramāṇāntaraprasiddhe vastuni pratyakṣāpravṛttāvetadanyatamaṃ pratibandhakaṃ kalpyate na tu tadabhāvādevāpravṛttiḥ / uktañca sāṅkhyamūlakāreṇa "saukṣmyāt tadanupalabdhirnābhāvāt" / nanu kvacitpratyakṣaprasiddhasya kvacitsandehādanumānaviṣayatā na tvasya tadastītyabhāva eva yukta iti cenna kāryaṃ hi kāraṇānumāpakaṃ bhavatīti sarvavādyabhimatam tathā ca mahadādikāryānyathānupapattyaiva pradhānasiddhiriti na tadabhāvo yuktaḥ / nanu kāryānyathānupapattyā kāraṇasiddhau tantrāntarābhimatakāraṇasiddhiḥ setsyati na tu tvadabhimatapradhānasiddhiriti cenna mataparyālocanena yanmataṃ kapilasūtranibaddhaṃ pradhānasādhanānuguṇaṃ tadeva yuktisahamanyat tu bāhyamatavat matābhāsatvādbādhyameva / tadyathā 'asataḥ sajjāyata'; iti bauddhamate pradhānasiddhiḥ 'sataḥ sajjāyata'; iti sāṅkhyamataviruddhatvānna paṇḍitamukhamaṇḍanāyālam sadasatoḥ kāryakāraṇabhāvāsambhavāt asadalīkaṃ kāraṇaṃ sattvādirūpaśabdādyātmakaṃ kathaṃ syāt sadasatostādātmyadarśanāt kāryaṃ hi kāraṇasamavetaṃ tantupaṭādisthaleṣu prasiddham tathā ca ghaṭo 'san paṭo 'sannityasatsamavetaṃ sarvo vyavahartā vyavahareta na tu sadidamiti sattāvaiśiṣṭyena pratītiḥ syāt / atha sadvivarto 'yaṃ prapañca iti yadvedāntimatam / tadapyasādhu anenāpi sataḥ sajjāyata iti matasiddhirna syāt / advayasya sadvayatayā bhāne rajjoḥ srakkhaṇḍasarppādyātmanā bhānavat bhrāntireva syāt bādhitaviṣayatayā rajjusarpapratyayavat prapañcajñānasyāpramāṇatayā pramārūpaṃ jñānamevāstamiyāt / na ceṣṭāpattirguruśiṣyottarapraśnayorapramāṇabuddhyā vyavahāramātrocchedaḥ syāt laukikavaidikavyavahārānuṣṭhāne ca kasyacit pravṛttyanupapattyā bhogāpavargau na syātāmiti tacchāstrāprāmāṇyaṃ syāt / apasiddhāntaśca na hi vedāntimate brahma vivarti bhavati / uktañca - bālān prati vivarto 'yaṃ brahmaṇaḥ sakalaṃ jagat / avivartitamānandamāsthitāḥ kṛtinaḥ sadā // iti / sato 'sajjāyata iti sataḥ paramāṇorasaddvyaṇukākhyaṃ kāryaṃ jāyata iti kaṇabhakṣākṣacaraṇamatamapi na yuktisaham tathā hi paramāṇurhi dvyaṇukasamavāyikāraṇam dvyaṇukaṃ cāsadityasattvāviśeṣācchaśaśṛṅgādisamavāyikāraṇatāpi paramāṇau syāt sadasatoḥ samavāyāsambhavācca asatā tādātmye satopyasattvaṃ syāt nanvasattvaṃ nāma prāgabhāvapratiyogitvaṃ na tu vāyurūpādivat trikālāsattvamiti cenna kimidaṃ prāgabhāvapratiyogitvamasattvam kiṃ prāgabhāvapratiyogitvādasattvamasattvādvā prāgabhāvapratiyogitvam ? nādyaḥ sarveṣāṃ kāryapadārthānāmasattvāviśeṣeṇākāśapuṣpādiṣvivāsattvenaiva vyavahāraḥ syāt teṣāmapi prāgabhāvapratiyogitvāt tathā ca kāryapadārthagataguṇasāmānyādīnāmucchedaḥ syāt teṣāṃ bhāvadharmatvenāsattvenāvasthānāt / na ca kūrmalomāderasyāsato viśeṣaḥ sāmānyādyabhāvena bhedakadharmābhāvāt / nāpi caramaḥ asattvātprāgabhāvapratiyogitve naraśṛṅgādīnāmapi prāgabhāvapratiyogitvaṃ syāt prāgabhāvasya ca svapratiyogyutpādakatvaniyamena sarveṣāmasatāṃ sattvaṃ syāt sadasadvibhāgo jagati dattajalāñjaliḥ syāditi na tārkikavaiśeṣikamataṃ vicārasaham / tasmāt sataḥ sajjāyata iti sāṅkhyamatameva yuktisaham / sataḥ kāraṇāt svotpatteḥ prāgapi sadeva kāryaṃ kāraṇavyāpārādabhivyaktimāpnoti / na ca siddhasādhanatā kāraṇavaiyarthyaṃ ceti vācyam kāryasattve 'pi tadabhivyaktau kāraṇaṃ prayojanavaditi na kiñcidavadyam / asatkāryapakṣe tu kāraṇavaiyarthyaṃ sphuṭameva na hyasataḥ kāraṇasambandho nirūpayituṃ śakyate sambaddhameva asambaddhena janyate asambaddhasya janyatve sarvasmāt sarvaṃ syāt kāraṇaniyamo 'stamiyāt / asaccetkāryaṃ na kāraṇavyāpārāt sadbhavitumarhati uktañca tattvakaumudyām - nahi nīlaṃ śilpasahasreṇāpi pītaṃ kartuṃ śakyam / na ca kāraṇavyāpārāt pūrvaṃ ghaṭo 'san saṃśca vyāpārānantaramiti ghaṭasya sattvāsattve dharmāviti vācyam dharmasya bhāvadharmatvena tenaiva dharmiṇaḥ sattvaṃ svasthityanyathānupapattyā sādhitamiti sadeva kāryaṃ kāraṇavyāpārādūrdhvamiva prāgapi / kāraṇavyāpārastu tadabhivyaktāvananyathāsiddhaḥ anyatrāpi kāraṇavyāpārādabhivyaktireva dṛśyate yathā 'vaghātena dhānyeṣu taṇḍulānām avapīḍanena tileṣu tailasya dohanena saurabheyīṇāṃ payasa iti / asadutpattau tu na dṛṣṭānto 'sti tasmāt sadeva kāryaṃ kāraṇavyāpāreṇābhivyajyate / asatā kāraṇasambandhāsambhavāt na tasya tadutpādakatvam uktañca sāṅkhyācāryaiḥ asattvānnāsti sambandhaḥ kāraṇaiḥ sattvasaṅgibhiḥ //

asambaddhasya cotpattimicchato na vyavasthitiḥ //

kiñca sambaddhamapi tadeva karoti yatra yat kāraṇaṃ śaktam śaktiśca kāryaikādhigamyā yathā cakṣuṣaiva rūpajñānaṃ bhavati nendriyāntareṇetīdameva tatra śaktamityadhigamyate / tathā ca sā śaktiḥ śaktakāraṇāśrayā śakyakāryāśrayā sarvatra vā syāt ? antye sarvasmāt sarvaṃ syāt / atha kārye sā śaktistadā kathamasataḥ kāryasya śaktyāśrayatā tathā ca śaktena śakyamutpādyate śakyaṃ ca kāraṇātmakam kāraṇaṃ ca saditi kathaṃ tadabhinnaṃ kāryamasatsyāt 'uktañca śaktasya śakyakaraṇāditi'; / upādānopādeyabhāvagrahaṇācca na bhedastantupaṭayoryayorbhedo na tayorupādānopādeyabhāvo yathāśvavṛkṣayoḥ / ito 'pi nārthāntaratvaṃ tantupaṭayoḥ saṃyogāprāptyadarśanāt arthāntaratve saṃyogo dṛṣṭo rajjughaṭakuṇḍabadarādau aprāptirapi dṛṣṭā sumeruvidhyayoriva iha ca saṃyogāprāptyorabhāvānna tantubhyo 'rthāntaraṃ paṭaḥ / kāryakāraṇayorabhedasādhakaṃ pramāṇaṃ coktaṃ sāṅkhyācāryaiḥ tadyathā na paṭastantubhyo bhidyate taddharmatvāt iha yadyato bhidyate tat tasya dharmo na bhavati yathā gauraśvasya dharmaśca paṭastantūnāntasmānnārthāntaram / gurutvāntarāgrahaṇādapi na kāraṇādarthāntaraṃ kāryam / evamabhede siddhe tantava eva tena tena saṃsthānaviśeṣeṇa pariṇatāḥ paṭo na tu paṭastantubhyo 'rthāntaram / na cātmāśrayabuddhibhedādarthakriyābhedācca bhedasiddhiḥ kāryakāraṇayoriti vācyam ekasminnapi viśeṣāntarāvirbhāvatirobhāvābhyāmātmāśrayārthakriyābuddhibhedasambhavānna tadanyathānupapattyā bhedasiddhiḥ / tatra ekasyāpi kūrmasyāvayavā niḥsarantyāvirbhavanti ta eva kūrmaśarīre niviśamānāstirobhavanti nahi te kūrmāvayavā utpadyante dhvaṃsante vā evamekasyāpi suvarṇasya mṛdo va kaṭakakuṇḍalādayo ghaṭādayo niḥsaranta utpannā iti vyavahāraṃ bhajante ta eva niviśamānāstirobhavanti naśyantītyucyante na punaḥ sadasatornirodhotpādayornidarśanamasti / uktaṃ ca bhagavatā nāsato vidyate bhāvo nābhāvo vidyate sata iti / yathā saṅkocavikāśavadbhyaḥ svāvayavebhyaḥ kūrmo na bhidyate tathā mṛtsuvarṇādibhyo 'pi kaṭakakuṇḍalādayo na bhinnāḥ / na ca nāma buddhyarthakriyābhedāt kāryakāraṇayorbhedasiddhiriti vācyam naṭe vyabhicārāt / naṭo hi daśaratho 'haṃ rāmo 'haṃ yudhiṣṭhiro 'hamiti svayamanantanāmā bhūtvā nāmāntareṇa veśāntaramarthakriyāntarañca kurute tathā ca satyapi bhedatraye naṭabhedādarśanāt yathāhuḥ -

rūpamatho api kāryamatho
abhidhāpi naṭasya pṛthagviditā /
na pṛthaktvamupaiti naṭaḥ kimiti
prativācyamavaśyamidaṃ kuśalaiḥ //

ekasyāpi vahnerdāhakatvapācakatvabhedena nānārthakriyākāritvaṃ dṛśyate na hyetāvatā vahnirbhedamadhigacchati ekaikasya tṛṇasyātapavṛṣṭyādinivṛttāvasāmarthye 'pi bahūni militvāvasthāviśeṣamavāpya yathā tānyeva tannivṛttau sāmarthyamadhigacchanti tathaika eva tantuḥ prāvaraṇādyarthakriyāsamartho 'pi militāsta evāvasthāviśeṣaṃ prāpyāvirbhūtapaṭabhāvāḥ prāvaraṇādyarthakriyāṃ kariṣyanti tasmātsadeva kāryaṃ kāraṇāt tadabhivyaktiriti / nanvāvirbhāvaḥ kāraṇavyāpārātpūrvaṃ sannasan vā ? ādye kāraṇavyāpārāsambavaḥ nahi sadutpattau kenāpi kāraṇāni vyāpāryante / antye prāptamasadutpādanatvamiti cenna tavāpi keyamutpattiḥ satyasatī vā ? ādye na kāraṇaprayojanaṃ paśyāmaḥ / antye 'sadutpattirutpadyata iti tadutpatterapyutpattyantaraṃ tatrāpyanyaditi sphuṭaivānavasthā / atha paṭāt tadutpattirnātiricyate tadā paṭa ityukte punarutpadyate iti na vācyaṃ paunaruktyāt tathotpadyate ityuktvā punaḥ paṭa iti na vācyaṃ pūrvoktadoṣādeva paṭo vinaśyatītyapi na vācyaṃ virodhāt tasmātsvasattāsamavāyo vā svakāraṇasamavāyo vā paṭotpattiḥ samavāyasya ca nityatvena sarvathāpi na paṭotpattiḥ sambhavati na tadarthañca kāraṇāni vyāpāryyante tathā ca sata eva paṭāderāvirbhāve kāraṇāpekṣeti na kiñcidavadyam / na ca paṭādikāryarūpeṇa kāraṇasambandhastasyākriyatvāt kriyāsambadhitvātkārakāṇāmanyathā kārakatvakṣatiḥ syāt tasmātsatkāryamiti sthitam / duḥkhatrayābhibhavasādhanaṃ prakṛtipuruṣānyatājñānaṃ tadupayogitvāt vyaktavairūpyaṃ pratipādanīyam / tacca vyaktaṃ pṛthivyādi taccāvyaktātpradhānādvilakṣaṇam yata idaṃ sakāraṇakaṃ tata evānityaṃ parābhimatavināśasāmagryā tirobhavati / avyāpakaṃ ca kāraṇaṃ hi kāryaṃ vyāpnoti na tu kāryaṃ kāraṇam / sakriyaṃ ca buddhyādayaḥ pūrvapūrvopāttaṃ dehaṃ parityajanti dehāntaraṃ copādadate saiva teṣāṃ kriyā pṛthivyādīnāṃ kriyā pariṇāmarūpeṇa prasiddhaiva / pratipuruṣaṃ buddhyādibhedādanekam tathā ghaṭaśarīrādibhedena pṛthivyādyapyanekam / svakāraṇāśritam yadyapi buddhyādīnāṃ pradhānabhedābhāvāt nāśrayāśrayibhāvastathāpi kathañcit bhedavivakṣayāśrayāśrayibhāvo yatheha vane tilakāḥ / sāvayavamavayavāvayavisaṃyogasaṃyogibuddhipradhānayostu na saṃyogastādātmyāt nāpi sattvarajastamasāṃ saṃyogaḥ aprāptipūrvikā prāptiḥ saṃyogastadabhāvāt / nityameva paratantraṃ svakārye 'haṅkārākhye janayitavye prakṛtyā pūramapekṣate anyathā kṣīṇā satī nāhaṅkāraṃ janayituṃ kṣamā bhavati tathāhaṅkāro 'pi svakārye prakṛtyā pūramapekṣate evaṃ kāraṇamātraṃ svakārye janayitavye tadapekṣāṃ kurute tathā ca svakārye janayitavye paratantraṃ vyaktam / yata ityabhivyāpya yaduktaṃ tadviparītamavyaktam yadyapyavyaktasya pariṇāmalakṣaṇākriyāsti tathāpi na parispandaḥ //

idānīṃ vyaktāvyaktayoḥ sādharmyaṃ puruṣācca vaidharmyaṃ pratipādanīyam / vyaktaṃ hi triguṇaṃ trayo guṇāḥ sukhaduḥkhamohātmakā asyeti / atra kāryakāraṇayorabhedāt sukhādiśabdaiḥ sattvādayo 'bhidhīyante triguṇamityuktyā sattvādīnāmātmaguṇatvaṃ parābhimatamapākṛtaṃ veditavyam / tathā aviveki yathā pradhānaṃ sato na vivicyate tathā mahadādayo 'pi pradhānānna vivicyante tatsvarūpatvāt / yadvā saṃbhūyakāritā 'vivekaḥ nahyekaṃ kiñcitkāryaṃ janayituṃ kṣamaṃ bhavatyapi tu saṃbhūya sarvaḥ sarvaṃ karoti / evamacetanaṃ pradhānabuddhyādayaḥ sarve acetanā tathā prasavarūpadharmavantaḥ / ete vyaktadharmāḥ kathitāsta evāvyaktasyāpītyavagantavyamidameva vyaktāvyaktayoḥ sādharmyam //

ete sādharmyavaidharmyābhyāṃ vyaktāvyakte nirūpite tadubhayagatadharmarahitatvāt viparītaḥ puruṣa iti puruṣasya vyaktāvyaktavaidharmyam / nanvahetumattvanityatvādi pradhānasādharmyaṃ puruṣasya pratīyate tathā cānekatvaṃ vyaktasādharmyamevaṃ sati kathaṃ vyaktāvyaktaviparītaḥ puruṣa iti cenna ahetumattvādisādharmye 'pyatraiguṇyādyasyāstyeva vaidharmyamiti na doṣaḥ / na ca traiguṇyamaprasiddham prītyaprītiviṣādātmakā guṇā iti sāṃkhyācāryāḥ / atra krameṇa prītiḥ sukhaṃ tadeva sattvam tathā aprītirduḥkhamaprītyātmako rajo guṇaḥ evaṃ viṣādo moho viṣādātmakastamoguṇaḥ / yanmate prītirduḥkhābhāvaḥ tathā duḥkhamapi prītyabhāvastannivṛttyarthaṃ mūlakāreṇātmagrahaṇaṃ kṛtamātmaśabdasya bhāvatattvena netaretarāśrayastathāsatyekasyāpi siddhirna syāt / prakāśapravṛttiniyamanameṣāṃ krameṇa prayojanamapyavagantavyam / kriyātmakena rajasa laghu sattvaṃ sarvatra nītaṃ syādativāyunā tūlāvayavavadyadi guruṇā tamasā niyamanaṃ na syāttamoniyataṃ tu kvacideva pravartayati tatastamo niyamārtham / anyonyābhibhavavṛttayaḥ / eteṣāmanyatamenārthavaśādudbhūtenānyatamamabhibhūyate tadyathā sattvaṃ rajastamasī abhibhūyātmanaḥ śāntāṃ vṛttimadhigacchati tathā rajaḥ sattvatamasī abhibhūya ghorāṃ vṛttimeti evaṃ tamaḥ sattvarajasī abhibhūya mūḍhāmiti / tathā 'nyonyāśrayavṛttayaḥ / yathāhuḥ sattvaṃ pravṛttiniyamāvāśritya rajastamasoḥ prakāśenopakaroti rajaḥ prakāśaniyamāvāśritya pravṛtyetarayoḥ tamaḥ prakāśapravṛttī āśritya niyamenetarayoriti / tathā anyonyajananavṛttayaḥ / anyatamo 'nyatamaṃ janayati jananamatra parimāṇaḥ sa ca guṇānāṃ sadṛśarūpaḥ / ata eva na hetumattvaṃ tattvāntarasya hetorabhāvāt / nāpyanityatvaṃ tattvāntare layābhāvāt / anyonyasaṃjñāvyabhicāriṇaśca / uktañca

anyonyamithunāḥ sarve sarve sarvatragāminaḥ /
rajaso mithunaṃ sattvaṃ sattvasya mithunaṃ rajaḥ //

tamasaścāpi mithune te sattvarajasī ubhe /
mithunavṛttitvaṃ sahacārāvyabhicāritvam //

ubhayoḥ sattvarajasormithunaṃ tama ucyate / naiṣāmādiḥ saṃprayogo viyogo vopalabhyate // iti / niyatakṛtyaṃ tu teṣāmidaṃ laghutvaṃ prakāśakatvaṃ ca sattvasyaiva na tu tayoḥ kasyacit tatrordhvagamanahetubhūto dharmo lāghavaṃ gauravāsahavarti yato 'gnerūrdhvajvālā gatirbhavati tadeva kasyacittiryaggamane heturyathā vāyoḥ / evaṃ karaṇānāṃ vṛttikuśalatāheturlāghavaṃ gurutve tu tāni mandāni syuriti sattvasya prakāśātmakatvamuktam / sattvatamasī akriyatayā svakāryotpādane 'vasīdantī rajasopaṣṭebhyete / avasādādvimucyotsāhe prayatnavatī kriyete / uktaṃ ca sattvaṃ laghu prakāśakamiṣṭamupaṣṭambhakaṃ calaṃ ca rajaḥ / kuta upaṣṭambhakaṃ yataścalamiti / rajaścalatayā sarvatastraiguṇyaṃ cālayedyadi guruṇā āvṛṇvatā tamasā tatra pratibandho na syāt tamasā tu tatastato vyāvṛttya kvacideva pravartyate iti niyāmakaṃ tamaḥ / yathāhuḥ guru varaṇakameva tama iti / tathāca laghu prakāśakaṃ sattvameva upaṣṭambhakaṃ calaṃ ca raja eva guru varaṇakaṃ tama eva / nanu parasparaṃ virodhaśīlānāṃ guṇānāṃ sundopasundanyāyena parasparaṃ bādha eva yukto na tvekakāryakartṛtvamiti cet na evaṃbhūtānāmapyekakāryakartṛtāyāḥ pradarśanāt / tadyathā varttitaile analavirodhinī athānalena militvā rūpaprakāśalakṣaṇaṃ kāryaṃ kurutaḥ yathāca vātapittaśleṣmāṇaḥ parasparaṃ virodhaśīlā api militāḥ santaḥ śarīradhāraṇakāryyakāriṇaḥ tathā sattvarajastamāṃsi viruddhaśīlānyapi saha vartsyanti militvā caikaṃ kāryyaṃ kariṣyanti ca puruṣārthavaśāt / uktañca pradīpavaccārthato vṛttiriti / guṇānāṃ pradhānātmakatvādaikye 'pyabhibhāvyābhibhāvakarūpeṇa nānātvam / uktaṃ ekaiva strī guṇakularūpaśīlayauvanasampannā svāminaṃ sukhākaroti tat kasya hetostaṃ prati tasyāḥ sukharūpasamudbhavāt saiva sapatnīrduḥkhākaroti tatkasya hetostāṃ prati tasyāḥ duḥkharūpasamudbhavāt evaṃ puruṣāntaraṃ tāmavindamānaṃ saiva mohayati tatkasya hetostaṃ prati tasyāḥ moharūpasamudbhavāt / anayā striyā sarve bhāvā vyākhyātāḥ / tatra yatsukhakāraṇaṃ tatsukhātmakaṃ sattvam evaṃ yat duḥkhakāraṇaṃ tat duḥkhātmakaṃ rajaḥ tathā yanmohahetustanmohātmakaṃ tamaḥ / tasmātkāraṇavyāpārātsadeva kāryaṃ pūrvam / tadeva punastadvyāpārādāvirbhavati yathā santyeva kūrmāṅgāni niḥsaranti vibhajyante idaṃ kūrmaśarīrametāni tadaṅgāni tena tāni saṅkocitāni tasminnavyaktībhavanti tathā mṛtsuvarṇādibhyaḥ santyeva ghaṭakuṇḍalādīnyāvirbhavanti vibhajyante iyaṃ mṛdayaṃ tatkāryo ghaṭa ityādi / tathā santyeva pṛthivyādīni kāraṇāttanmātrādāvirbhavanti vibhajyante idamasya kāraṇamidamasya kāryamiti tathā santyeva tanmātrāṇyahaṅkārādāvirbhavanti vibhajyante evaṃ sannevāhaṅkāro mahato 'bhivyaktimeti sanneva ca mahānmūlaprakṛterabhivyaktiṃ yāti / evaṃ kāraṇabhūtātparamāvyaktātsākṣātpāramparyeṇa samanvitasya kāryabhūtasya prapañcasya vibhāgaḥ / sargamātraṃ mṛtpiṇḍaṃ hemapiṇḍaṃ vā viśanto ghaṭakuṇḍalādayo 'vyaktībhavanti kāraṇarūpeṇābhivyaktā api kāryarūpeṇānabhivyaktībhavanti tathā pṛthivyādayastanmātrāṇi viśantaḥ svasvarūpeṇa tanmātrāṇyabhivyaktayanti svasvarūpeṇa kāraṇamabhivyaktamapi kāryasvarūpaṃ svakīyaṃ svasminnanabhivyaktayati tanmātrāṇi tathāhaṅkāraṃ viśantyahaṅkāraṃ svāpekṣayā 'vyaktayanti tathāhaṅkāro mahāntaṃ viśan mahāntamavyaktayati mahānpradhānaṃ svakāraṇaṃ viśan tadavyaktayati pradhānasya tu na kvacitpraveśo 'kāraṇatvādapi tu tatsarvakāryāṇāmavyaktam kāraṇam evamavibhāgaḥ / prakṛtau viśvasyaivaṃ vibhāgāvibhāgau / kecana avyaktaṃ vā mahāntaṃ vāhaṅkāraṃ vā indriyāṇi vā bhūtāni vā ātmatvenādāya tānevopāsate te tu vakṣyamāṇarītyā 'pākaraṇīyāḥ / avyaktādervyatiriktaḥ puruṣo 'sti avyaktamahadahaṅkārādayaḥ parārthāḥ kutaḥ saṅghātatvāt yaḥ saṅghāto bhavati sa parārtho dṛṣṭastailatāmbūlaghṛtadadhidugdhānnavastrādivat sukhaduḥkhamohātmakatvena sarve saṅghātāstathāca yadarthaṃ saṅghātāḥ sa eva puruṣaḥ / nanu śayanāsanādiḥ saṅghātaḥ saṅghātaśarīrādiparārtho dṛṣṭo na tvātmānaṃ prati parārthaḥ tasmātsaṅghātāntarameva sādhayeyurnāsaṃhatamātmānamiti yaduktam tanna sādhu saṅghātasya saṅghātāntarārthatve tasyāpi saṅghātatvātsaṃghātāntarārthatā tasyāpi saṅghātatvāttathātvaṃ tasyāpi tathātvamityanavasthā dustarā syāt / kiñca saṅghātasya pārārthyamātreṇa vyāptirna tu saṅghātapārārthyena / na ca dṛṣṭāntadṛṣṭatvāttathā kalpyata iti vācyam / dṛṣṭāntadṛṣṭayāvaddharmāṇāṃ dārṣṭāntike sādhanāyānumānamicchato dṛṣṭāntamahānasādigatamahānasatvādeḥ parvatādāvabhāvātsarvānumānocchedaḥ syāt / yathāhuḥ triguṇatvādayo hi dharmā saṅghātatvena vyāptāḥ te tu asminpare vyāvartamānāstraiguṇyādi vyāvartayanti brāhmaṇyamiva nivartamānaṃ kaṭhatvādikam / adhiṣṭhānādapi puruṣāstitvaṃ siddhyati triguṇātmakānāṃ buddhyādīnāmadhiṣṭhīyamānatvāt yathā rathādiryantrādibhiradhiṣṭhīyate tathā sukhaduḥkhamohātmakaṃ buddhyādi pareṇādhiṣṭhātavyam / bhoktṛbhāvādapi puruṣāstitvamavaseyam bhogye hi sukhaduḥkhe anukūlapratikūlavedanīye pratyātmamanubhūyete tenānayoranukūlatayā pratikūlatayā vā 'nubhavitrā kenacidbhavitavyam / na ca buddhyādireva tatheti vācyam / teṣāṃ sukhādyātmakatvena svenaiva svavedane ātmāśrayaḥ syāt / kaivalyārthaṃ pravṛtterapi puruṣāstitvaṃ siddham duḥkhatrayātyantikanivṛttilakṣaṇaṃ kaivalyaṃ na tāvadbuddhyādīnāṃ te hi sukhaduḥkhamohātmakāḥ kathaṃ svabhāvādviyojayituṃ śakyāḥ tasmātkaivalyārthamāgamānāṃ mahādhiyāṃ ca pravṛtterasti buddhyādvyatirikta ātmeti puruṣāstitvaṃ siddham / nanu bhavatvevaṃ buddhyādyatiriktātmasiddhistathāpi sa kiṃ pratiśarīraṃ bhinna eka eva veti cedbhinna eveti brūmaḥ janmamaraṇādivyavasthānyathānupapattyā bahutvasyaiva sambhavāt / uktaṃ ca sāṃkhyācāryaiḥ /

janmamaraṇakaraṇānāṃ pratiniyamādayugapatpravṛtteśca /
puruṣabahutvaṃ siddhaṃ traiguṇyaviparyayāccaiva //

jātiviśiṣṭābhirapūrvābhirdehendriyamano 'haṅkārabuddhivedanābhiḥ puruṣasyābhisambandho janma na tu puruṣasya pariṇāmastasyāpariṇāmitvāt teṣāmeva ca dehādīnāmupāttānāṃ parityāgo maraṇaṃ na tvātmano vināśastasya kūṭasthasya nityatvāt / buddhyādīni karaṇāni trayodaśa teṣāṃ janmamaraṇakaraṇānāṃ pratiniyamo vyavasthā sā tviyaṃ śarvaśarīreṣvekasminpuruṣe na sambhavati tathā satyekasminsukhini sarve sukhinaḥ syuḥ duḥkhini vā duḥkhino bhaveyuḥ tathā ekasmin mriyamāṇe sarve mriyeran jāyamāne ca jāyeran evamekasminnandhabadhirādau sarva eva tathā syuḥ na tvevamasti tathā ekasminvicitte sarve vicittāḥ syurityavyavasthā puruṣabhede tu samyagupapadyate vyavasthā / nacaikasminnapi puruṣe dehāntaropādhivaśāt upapadyata eva vyavastheti vācyam karacaraṇastanādibhedenāpi janmamaraṇādivyavasthā syāt / guṇatrayaviparyayādapi puruṣabahutvamavaseyam / tadyathā kecitsattvabahulāḥ yathorddhvasrotasaḥ kecidrahobahulāḥ yathā manuṣyāḥ kecittamobahulāḥ yathā tiryagyonayaḥ / puruṣasya bahutvavadatriguṇatvaṃ vivekitvamaviṣayatvamasādhāraṇatvaṃ cetanatvamaprasavadharmitvaṃ sākṣitvādikamapi boddhavyam / pradhānapuruṣayoḥ saṃyogakṛto 'yaṃ sargaḥ sa cāpekṣāṃ vinā bhinnayorna sambhavati apekṣā ca svadarśanārthaṃ puruṣeṇa pradhānasya pradhānaṃ hi viṣayātmakatayā bhogyam bhogaśca bhoktāramantareṇa na bhavatīti bhoktrapekṣā pradhānasya puruṣasya svakaivalyārthaṃ pradhānāpekṣā pradhānena hi bhogyena sambhinnaḥ puruṣastadgataṃ duḥkhatrayaṃ svātmanyabhimanyamānaḥ kaivalyaṃ prārthayate tattu sattvapuruṣānyatākhyātikāraṇakaṃ sattvapuruṣānyatākhyātiśca pradhānamantarā na bhavatīti puruṣasya pradhānāpekṣayā paṅgvandhavadubhayoḥ saṃyogaḥ bhogāyānādiparamparāsaṃyukto 'pi kaivalyāya punaḥ saṃyujyate sa ca saṃyogo mahadādisargamantareṇa bhogāpavargayoḥ samartho na bhavatīti saṃyoga eva mahadādisargaṃ karoti / uktañca /

prakṛtermahāṃstato 'haṅkārastasmādgaṇaśca ṣoḍaśakaḥ /
tasmādapi ṣoḍaśakātpañcabhyaḥ pañca bhūtāni //

ekādaśendriyāṇi pañca tanmātrāṇi ceti ṣoḍaśasaṃkhyāmito gaṇaḥ ṣoḍaśakaḥ / uktañca tatra śabdatanmātrādākāśaṃ śabdaguṇam, śabdatanmātrasahitācca sparśatanmātrādvāyuḥ śabdasparśaguṇaḥ, śabdasparśatanmātrasahitādrūpatanmātrāttejaḥ śabdasparśarūpaguṇaṃ, śabdasparśarūpatanmātrasahitādrasatanmātrācchabdasparśarūparasaguṇaṃ jalam, śabdasparśarūparasatanmātrāsahitādgandhatanmātrācchabdasparśarūparasagandhaguṇā pṛthivī jāyate / adhyavasāyo buddhiḥ kriyākriyāvatorabhedavivakṣayā vyapadeśaḥ / dharmo jñānaṃ virāga aiśvaryamiti sāttvikāḥ buddhidharmāḥ etadviparītāstvadharmādayastāmasāḥ / buddhidharmādaiśvaryādaṇimādiprādurbhāvaḥ / tacca aṇimā mahimā caiva garimā laghimā tathā / prāptiḥ prākāmyamīśitvaṃ vaśitvaṃ cāṣṭasiddhayaḥ // iti / nanvekādaśaka indriyagaṇaḥ pañcatanmātrakaṃ ceti dvividhaḥ pravartate sargo 'haṅkārāt tathā caikasmādahaṅkārāt kāraṇātkathaṃ prakāśajaḍātmako vilakṣaṇaḥ sarga iti yaduktaṃ tanna sundaram prakāśalāghavābhyāmekādaśaka indriyagaṇaḥ sāttvikādahaṅkārādbhavati bhūtādestvahaṅkārāt tāmasāttanmātragaṇaḥ / yadyapyeko 'haṅkārastathāpi guṇodbhavābhibhavābhyāṃ bhinnaṃ kāryaṃ karoti / nanu yadi sattvatamobhyāmeva sargaḥ kṛtaṃ tarhi rajasā akiñcikareṇeti cenna taijasādubhayamiti mūlakaraḥ taijasādubhayaṃ gaṇadvayaṃ bhavati sargadvayaṃ sattvatamasoriti / yadyapi rajaso na kāryāntaramasti tathāpi sattvatamasī svayamakriye samarthe api na kāryaṃ kuruto rajasā cālite tu tatprasādāt prāptakriye svakāryotpādane samarthe bhavata iti rājasādubhayam / yathāhuḥ ubhayasminnapi kārye sattvatamasoḥ kriyotpādanadvāreṇāsti rajasaḥ kāraṇatvamiti na vyarthaṃ raja iti / indriyavicārastu tattvapradīpe kṛta iti vistarabhayānneha pratanyate / mahadahaṅkāramanāṃsyantarindriyāṇi tāni svalakṣaṇāni svamasādhāraṇaṃ lakṣaṇaṃ yeṣāṃ tāni svalakṣaṇāni tacca mahato 'dhyavasāyaḥ ahaṅkārasyābhimānaḥ saṅkalpo manaso vṛttirvyāpāraḥ / eteṣāṃ vṛttidvaividhyaṃ sādhāraṇatvāsādhāraṇatvābhyāmāha saiṣā bhavatyasāmānyā iti / eṣoktā 'sādhāraṇī vṛttiḥ sādhāraṇī vṛttistu karaṇānāṃ prāṇādyā vāyavaḥ pañca karaṇatrayasya pañca vāyavo vṛttirjīvanaṃ tadbhāve bhāvāt abhāve cābhāvāt / tatra prāṇo nāsāgrahṛnnābhipādāṅguṣṭhavṛttiḥ apānaḥ kṛkāṭikāpṛṣṭhapārśvapāyūpasthavṛttiḥ samāno hṛnnābhisarvasandhivṛttiḥ udāno hṛtkaṇṭhatālamūrdhabhrūmadhyavṛttiḥ vyānastvagvṛttiriti pañca vāyavaḥ / avidyā pañcavidhā tathāhi avidyā 'smitārāgadveṣābhiniveśā yathāsaṃkhyaṃ tamomohamahāmohatāmisrāndhatāmisrasaṃjñakā ceti pañcaparvā / pratyayasargatadbhedāstvativistarabhayātsanto 'pi na nidarśyante pratyayasargo buddhisargaḥ uktañca eṣa pratyayasargo viparyayāśaktituṣṭisiddhyākhyaḥ / pratīyate 'neneti pratyayo buddhistasya sargaḥ pratyayasargaḥ / daivasargastu mūlakāreṇaiva spaṣṭo niruktaḥ / sa ca aṣṭavikalpo daivaḥ sargaḥ brāhmaprājāpatyaindrapaitryagāndharvayākṣarākṣasapaiśāca ityaṣṭavikalpo daivasargaḥ / tiryagyonayaśca pañcavidhā bhavanti paśumṛgapakṣisarīsṛpasthāvarāḥ / mānuṣaścaikavidhaḥ brāhmaṇatvādyavantarajātibhedāvivakṣayā saṃsthānasya caturṣvapyaviśeṣāditi //

nanu prādhāniko 'yaṃ sargaḥ pradhānaṃ ca jaḍaṃ kathaṃ svārthaṃ parārthaṃ vā pravṛttiṃ kartumarhati tasmātkenaciccetanena prakṛtyadhiṣṭhātrā bhavitavyam / na ca kṣetrajñāstathā teṣāṃ prakṛtisvarūpānabhijñatvāt tasmādasti prakṛteradhiṣṭhātā kaścitsarvajñaḥ sa eveśvara iti cenna acetanamapi prayojanavaśāt pravartamānaṃ dṛṣṭaṃ yathā vatsavivṛddhyarthamacetanamapi kṣīraṃ pravartate tathā jaḍāpi prakṛtiḥ puruṣavimokṣāya pravartiṣyate / kiñcābhokturīśvarasya pravṛttau na karuṇāṃ vinā 'nyat prayojanaṃ paśyāmaḥ / sā ca nirupādhiparaduḥkhaprahāṇecchā sṛṣṭeḥ pūrvaṃ prāṇyabhāvādeva tatsambandhiduḥkhābhāvāt kasya nivṛttau pravṛttiḥ syādīśvarasya / na ca sargānantaramīśvarapravṛttiḥ sargasya jātatvādeva neśvaraprayojanaṃ paśyāmaḥ / na ca duḥkhanivṛttiḥ prayojanaṃ tadarthaṃ tatpravṛttau jagati ko 'pi duḥkhī na syāt / uktañca prekṣāvataḥ pravṛtteḥ svārthakāruṇyābhyāṃ vyāptatvāt te ca jagatsargādvyāvartamāne prekṣāvatpravṛttipūrvakatvamapi nivartayataḥ na hyāptasakalepsitasya bhagavato jagatsṛjataḥ kimapyabhilaṣitaṃ bhavati nāpi kāruṇyādasya sarge pravṛttiḥ prāksargājjīvānāmindriyaśarīraviṣayānutpattau duḥkhābhāvena kasya prahāṇecchā kāruṇyena sṛṣṭiḥ sṛṣṭyā ca kāruṇyamiti parasparāśrayaḥ / api ca karuṇayā pravṛttaḥ sukhina eva jantūnsṛjet na daridrān / na ca karmavaicitryāt jagadvaicitryam tarhi kṛtamīśvareṇa tata eva jagadvaicitryopapatteḥ pravṛttistu pārārthyaprayojanavaśāt jaḍasyāpi dṛśyate vatsavivṛddhinimittaṃ dugdhasyeva / nanu bhavatu prakṛteḥ pravartakaḥ puruṣārtho nivartakaṃ na tu kamapi paśyāma iti cenna yathā nartakī pariṣadbhyo nṛtyaṃ darśayitvā svayameva nivartate na tu tasyāḥ svanivṛttau nivartakāntarāpekṣā tathā śabdādyātmakaṃ svasvarūpaṃ puruṣādbhedena prakāśya sādhitapuruṣaprayojanā svayameva nivartate prakṛtiḥ / yathāhuḥ sāṃkhyācāryāḥ /

raṅgasya darśayitvā nivartate yathā nartakī nṛtyāt /
puruṣasya tathātmānaṃ prakāśya vinivartate prakṛtiḥ //

nanu yathā darśitanṛtyā nartakī draṣṭṛkautuhalātpunaḥ pravartate tathā prakṛtirapi puruṣāyātmānaṃ darśayitvā nivṛttāpi punaścet pravartete tadā muktānāmapi punaḥ saṃsāraprāptiḥ syāditi cenna yathā parapuruṣadarśanāsahā sūryadarśanavarjitāpi kulavadhūḥ pramādādvigalitāṅgapaṭā cedavalokyate parapuruṣeṇa tadā 'sau tathā pravartate 'pramattāṃ yathaināṃ punaḥ puruṣāntarāni na paśyanti tathā prakṛtiḥ kulavadhūto 'pyadhikā dṛṣṭā biṃbakena punarna darśanamārgameti / uktaṃ ca /

prakṛteḥ sukumārataraṃ na kiñcidastīti me matirbhavati /
yā dṛṣṭāsmīti punarna darśanamupaiti puruṣasyeti //

dharmo jñānaṃ virāga aiśvaryamiti sāttvikā buddhidharmāḥ / adharmājñānāvairāgyānaiśvaryābhidhānāścatvārastāmasāḥ / atra jñānavarjitaiḥ saptabhiḥ prakṛtirbadhnātyātmānaṃ vivekakhyātyā prakṛtipuruṣānyatājñānena saiva vimocayati / uktañca /

rūpaiḥ saptabhirevambadhnātyātmānamātmanā prakṛtiḥ /
saiva ca puruṣārthama prati vimocayatyekarūpeṇa //

yathā vidrumamaṇimauktikaśuktimakarakacchapanāgaśaṃkhakapardakādīn vihāya paramakāruṇikena līlāvigrahadhāriṇā bhagavatā ratnyānyeva samuddhṛtānyudadherdevasamṛddhyarthaṃ tathā jalpatarkābhāsākhyā 'nyatrasulabhaprameyavitaṇḍādīṃśca vihāya sāṃkhyamātaikalabhyaprameyaratnāni sāṃkhyataṃtrādhyayanapariśramālasānāṃ sāṃkhyatantrodadhermayā samuddhṛtāni /
rāmakṛṣṇakathā yāvadyāvaccandradivākarau /
sāṃkhyatattvapradīpo 'yaṃ tāvadastu mahītale //

iti śrīmatparamahaṃsaparivrājakācāryapūjyapādaśrīvaikuṇṭhaśiṣyayatikavirājayatiprakāśitaḥ sāṃkhyatattvapradīpaḥ samāptaḥ //