Ṛgveda-Saṃhitā

Contents of RV

Header

This file is an html transformation of sa_Rgveda-edAufrecht.xml with a rudimentary header. For a more extensive header please refer to the source file.

Data entry: Barend A. Van Nooten and Gary B. Holland

Contribution: Detlef Eichler

Date of this version: 2019-10-03

Sources:

Publisher: Göttingen Register of Electronic Texts in Indian Languages (GRETIL), SUB Göttingen

Licence:

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.

Interpretive markup: none


Text

Ṛgveda-Saṁhitā

Maṇḍala 1

a̱gnim ī̍ḻe pu̱rohi̍taṁ ya̱jñasya̍ de̱vam ṛ̱tvija̍m |
hotā̍raṁ ratna̱dhāta̍mam || RV_1,001.01

a̱gniḥ pūrve̍bhi̱r ṛṣi̍bhi̱r īḍyo̱ nūta̍nair u̱ta |
sa de̱vām̐ eha va̍kṣati || RV_1,001.02

a̱gninā̍ ra̱yim a̍śnava̱t poṣa̍m e̱va di̱ve-di̍ve |
ya̱śasa̍ṁ vī̱rava̍ttamam || RV_1,001.03

agne̱ yaṁ ya̱jñam a̍dhva̱raṁ vi̱śvata̍ḥ pari̱bhūr asi̍ |
sa id de̱veṣu̍ gacchati || RV_1,001.04

a̱gnir hotā̍ ka̱vikra̍tuḥ sa̱tyaś ci̱traśra̍vastamaḥ |
de̱vo de̱vebhi̱r ā ga̍mat || RV_1,001.05

yad a̱ṅga dā̱śuṣe̱ tvam agne̍ bha̱draṁ ka̍ri̱ṣyasi̍ |
tavet tat sa̱tyam a̍ṅgiraḥ || RV_1,001.06

upa̍ tvāgne di̱ve-di̍ve̱ doṣā̍vastar dhi̱yā va̱yam |
namo̱ bhara̍nta̱ ema̍si || RV_1,001.07

rāja̍ntam adhva̱rāṇā̍ṁ go̱pām ṛ̱tasya̱ dīdi̍vim |
vardha̍māna̱ṁ sve dame̍ || RV_1,001.08

sa na̍ḥ pi̱teva̍ sū̱nave 'gne̍ sūpāya̱no bha̍va |
saca̍svā naḥ sva̱staye̍ || RV_1,001.09

vāya̱v ā yā̍hi darśate̱me somā̱ ara̍ṁkṛtāḥ |
teṣā̍m pāhi śru̱dhī hava̍m || RV_1,002.01

vāya̍ u̱kthebhi̍r jarante̱ tvām acchā̍ jari̱tāra̍ḥ |
su̱taso̍mā aha̱rvida̍ḥ || RV_1,002.02

vāyo̱ tava̍ prapṛñca̱tī dhenā̍ jigāti dā̱śuṣe̍ |
u̱rū̱cī soma̍pītaye || RV_1,002.03

indra̍vāyū i̱me su̱tā upa̱ prayo̍bhi̱r ā ga̍tam |
inda̍vo vām u̱śanti̱ hi || RV_1,002.04

vāya̱v indra̍ś ca cetathaḥ su̱tānā̍ṁ vājinīvasū |
tāv ā yā̍ta̱m upa̍ dra̱vat || RV_1,002.05

vāya̱v indra̍ś ca sunva̱ta ā yā̍ta̱m upa̍ niṣkṛ̱tam |
ma̱kṣv i1̱̍tthā dhi̱yā na̍rā || RV_1,002.06

mi̱traṁ hu̍ve pū̱tada̍kṣa̱ṁ varu̍ṇaṁ ca ri̱śāda̍sam |
dhiya̍ṁ ghṛ̱tācī̱ṁ sādha̍ntā || RV_1,002.07

ṛ̱tena̍ mitrāvaruṇāv ṛtāvṛdhāv ṛtaspṛśā |
kratu̍m bṛ̱hanta̍m āśāthe || RV_1,002.08

ka̱vī no̍ mi̱trāvaru̍ṇā tuvijā̱tā u̍ru̱kṣayā̍ |
dakṣa̍ṁ dadhāte a̱pasa̍m || RV_1,002.09

aśvi̍nā̱ yajva̍rī̱r iṣo̱ drava̍tpāṇī̱ śubha̍s patī |
puru̍bhujā cana̱syata̍m || RV_1,003.01

aśvi̍nā̱ puru̍daṁsasā̱ narā̱ śavī̍rayā dhi̱yā |
dhiṣṇyā̱ vana̍ta̱ṁ gira̍ḥ || RV_1,003.02

dasrā̍ yu̱vāka̍vaḥ su̱tā nāsa̍tyā vṛ̱ktaba̍rhiṣaḥ |
ā yā̍taṁ rudravartanī || RV_1,003.03

indrā yā̍hi citrabhāno su̱tā i̱me tvā̱yava̍ḥ |
aṇvī̍bhi̱s tanā̍ pū̱tāsa̍ḥ || RV_1,003.04

indrā yā̍hi dhi̱yeṣi̱to vipra̍jūtaḥ su̱tāva̍taḥ |
upa̱ brahmā̍ṇi vā̱ghata̍ḥ || RV_1,003.05

indrā yā̍hi̱ tūtu̍jāna̱ upa̱ brahmā̍ṇi harivaḥ |
su̱te da̍dhiṣva na̱ś cana̍ḥ || RV_1,003.06

omā̍saś carṣaṇīdhṛto̱ viśve̍ devāsa̱ ā ga̍ta |
dā̱śvāṁso̍ dā̱śuṣa̍ḥ su̱tam || RV_1,003.07

viśve̍ de̱vāso̍ a̱ptura̍ḥ su̱tam ā ga̍nta̱ tūrṇa̍yaḥ |
u̱srā i̍va̱ svasa̍rāṇi || RV_1,003.08

viśve̍ de̱vāso̍ a̱sridha̱ ehi̍māyāso a̱druha̍ḥ |
medha̍ṁ juṣanta̱ vahna̍yaḥ || RV_1,003.09

pā̱va̱kā na̱ḥ sara̍svatī̱ vāje̍bhir vā̱jinī̍vatī |
ya̱jñaṁ va̍ṣṭu dhi̱yāva̍suḥ || RV_1,003.10

co̱da̱yi̱trī sū̱nṛtā̍nā̱ṁ ceta̍ntī sumatī̱nām |
ya̱jñaṁ da̍dhe̱ sara̍svatī || RV_1,003.11

ma̱ho arṇa̱ḥ sara̍svatī̱ pra ce̍tayati ke̱tunā̍ |
dhiyo̱ viśvā̱ vi rā̍jati || RV_1,003.12

su̱rū̱pa̱kṛ̱tnum ū̱taye̍ su̱dughā̍m iva go̱duhe̍ |
ju̱hū̱masi̱ dyavi̍-dyavi || RV_1,004.01

upa̍ na̱ḥ sava̱nā ga̍hi̱ soma̍sya somapāḥ piba |
go̱dā id re̱vato̱ mada̍ḥ || RV_1,004.02

athā̍ te̱ anta̍mānāṁ vi̱dyāma̍ sumatī̱nām |
mā no̱ ati̍ khya̱ ā ga̍hi || RV_1,004.03

pare̍hi̱ vigra̱m astṛ̍ta̱m indra̍m pṛcchā vipa̱ścita̍m |
yas te̱ sakhi̍bhya̱ ā vara̍m || RV_1,004.04

u̱ta bru̍vantu no̱ nido̱ nir a̱nyata̍ś cid ārata |
dadhā̍nā̱ indra̱ id duva̍ḥ || RV_1,004.05

u̱ta na̍ḥ su̱bhagā̍m̐ a̱rir vo̱ceyu̍r dasma kṛ̱ṣṭaya̍ḥ |
syāmed indra̍sya̱ śarma̍ṇi || RV_1,004.06

em ā̱śum ā̱śave̍ bhara yajña̱śriya̍ṁ nṛ̱māda̍nam |
pa̱ta̱yan ma̍nda̱yatsa̍kham || RV_1,004.07

a̱sya pī̱tvā śa̍takrato gha̱no vṛ̱trāṇā̍m abhavaḥ |
prāvo̱ vāje̍ṣu vā̱jina̍m || RV_1,004.08

taṁ tvā̱ vāje̍ṣu vā̱jina̍ṁ vā̱jayā̍maḥ śatakrato |
dhanā̍nām indra sā̱taye̍ || RV_1,004.09

yo rā̱yo̱3̱̍ 'vani̍r ma̱hān su̍pā̱raḥ su̍nva̱taḥ sakhā̍ |
tasmā̱ indrā̍ya gāyata || RV_1,004.10

ā tv etā̱ ni ṣī̍da̱tendra̍m a̱bhi pra gā̍yata |
sakhā̍ya̱ḥ stoma̍vāhasaḥ || RV_1,005.01

pu̱rū̱tama̍m purū̱ṇām īśā̍na̱ṁ vāryā̍ṇām |
indra̱ṁ some̱ sacā̍ su̱te || RV_1,005.02

sa ghā̍ no̱ yoga̱ ā bhu̍va̱t sa rā̱ye sa pura̍ṁdhyām |
gama̱d vāje̍bhi̱r ā sa na̍ḥ || RV_1,005.03

yasya̍ sa̱ṁsthe na vṛ̱ṇvate̱ harī̍ sa̱matsu̱ śatra̍vaḥ |
tasmā̱ indrā̍ya gāyata || RV_1,005.04

su̱ta̱pāvne̍ su̱tā i̱me śuca̍yo yanti vī̱taye̍ |
somā̍so̱ dadhyā̍śiraḥ || RV_1,005.05

tvaṁ su̱tasya̍ pī̱taye̍ sa̱dyo vṛ̱ddho a̍jāyathāḥ |
indra̱ jyaiṣṭhyā̍ya sukrato || RV_1,005.06

ā tvā̍ viśantv ā̱śava̱ḥ somā̍sa indra girvaṇaḥ |
śaṁ te̍ santu̱ prace̍tase || RV_1,005.07

tvāṁ stomā̍ avīvṛdha̱n tvām u̱kthā śa̍takrato |
tvāṁ va̍rdhantu no̱ gira̍ḥ || RV_1,005.08

akṣi̍totiḥ saned i̱maṁ vāja̱m indra̍ḥ saha̱sriṇa̍m |
yasmi̱n viśvā̍ni̱ pauṁsyā̍ || RV_1,005.09

mā no̱ martā̍ a̱bhi dru̍han ta̱nūnā̍m indra girvaṇaḥ |
īśā̍no yavayā va̱dham || RV_1,005.10

yu̱ñjanti̍ bra̱dhnam a̍ru̱ṣaṁ cara̍nta̱m pari̍ ta̱sthuṣa̍ḥ |
roca̍nte roca̱nā di̱vi || RV_1,006.01

yu̱ñjanty a̍sya̱ kāmyā̱ harī̱ vipa̍kṣasā̱ rathe̍ |
śoṇā̍ dhṛ̱ṣṇū nṛ̱vāha̍sā || RV_1,006.02

ke̱tuṁ kṛ̱ṇvann a̍ke̱tave̱ peśo̍ maryā ape̱śase̍ |
sam u̱ṣadbhi̍r ajāyathāḥ || RV_1,006.03

ād aha̍ sva̱dhām anu̱ puna̍r garbha̱tvam e̍ri̱re |
dadhā̍nā̱ nāma̍ ya̱jñiya̍m || RV_1,006.04

vī̱ḻu ci̍d āruja̱tnubhi̱r guhā̍ cid indra̱ vahni̍bhiḥ |
avi̍nda u̱sriyā̱ anu̍ || RV_1,006.05

de̱va̱yanto̱ yathā̍ ma̱tim acchā̍ vi̱dadva̍su̱ṁ gira̍ḥ |
ma̱hām a̍nūṣata śru̱tam || RV_1,006.06

indre̍ṇa̱ saṁ hi dṛkṣa̍se saṁjagmā̱no abi̍bhyuṣā |
ma̱ndū sa̍mā̱nava̍rcasā || RV_1,006.07

a̱na̱va̱dyair a̱bhidyu̍bhir ma̱khaḥ saha̍svad arcati |
ga̱ṇair indra̍sya̱ kāmyai̍ḥ || RV_1,006.08

ata̍ḥ parijma̱nn ā ga̍hi di̱vo vā̍ roca̱nād adhi̍ |
sam a̍sminn ṛñjate̱ gira̍ḥ || RV_1,006.09

i̱to vā̍ sā̱tim īma̍he di̱vo vā̱ pārthi̍vā̱d adhi̍ |
indra̍m ma̱ho vā̱ raja̍saḥ || RV_1,006.10

indra̱m id gā̱thino̍ bṛ̱had indra̍m a̱rkebhi̍r a̱rkiṇa̍ḥ |
indra̱ṁ vāṇī̍r anūṣata || RV_1,007.01

indra̱ id dharyo̱ḥ sacā̱ sammi̍śla̱ ā va̍co̱yujā̍ |
indro̍ va̱jrī hi̍ra̱ṇyaya̍ḥ || RV_1,007.02

indro̍ dī̱rghāya̱ cakṣa̍sa̱ ā sūrya̍ṁ rohayad di̱vi |
vi gobhi̱r adri̍m airayat || RV_1,007.03

indra̱ vāje̍ṣu no 'va sa̱hasra̍pradhaneṣu ca |
u̱gra u̱grābhi̍r ū̱tibhi̍ḥ || RV_1,007.04

indra̍ṁ va̱yam ma̍hādha̱na indra̱m arbhe̍ havāmahe |
yuja̍ṁ vṛ̱treṣu̍ va̱jriṇa̍m || RV_1,007.05

sa no̍ vṛṣann a̱muṁ ca̱ruṁ satrā̍dāva̱nn apā̍ vṛdhi |
a̱smabhya̱m apra̍tiṣkutaḥ || RV_1,007.06

tu̱ñje-tu̍ñje̱ ya utta̍re̱ stomā̱ indra̍sya va̱jriṇa̍ḥ |
na vi̍ndhe asya suṣṭu̱tim || RV_1,007.07

vṛṣā̍ yū̱theva̱ vaṁsa̍gaḥ kṛ̱ṣṭīr i̍ya̱rty oja̍sā |
īśā̍no̱ apra̍tiṣkutaḥ || RV_1,007.08

ya eka̍ś carṣaṇī̱nāṁ vasū̍nām ira̱jyati̍ |
indra̱ḥ pañca̍ kṣitī̱nām || RV_1,007.09

indra̍ṁ vo vi̱śvata̱s pari̱ havā̍mahe̱ jane̍bhyaḥ |
a̱smāka̍m astu̱ keva̍laḥ || RV_1,007.10

endra̍ sāna̱siṁ ra̱yiṁ sa̱jitvā̍naṁ sadā̱saha̍m |
varṣi̍ṣṭham ū̱taye̍ bhara || RV_1,008.01

ni yena̍ muṣṭiha̱tyayā̱ ni vṛ̱trā ru̱ṇadhā̍mahai |
tvotā̍so̱ ny arva̍tā || RV_1,008.02

indra̱ tvotā̍sa̱ ā va̱yaṁ vajra̍ṁ gha̱nā da̍dīmahi |
jaye̍ma̱ saṁ yu̱dhi spṛdha̍ḥ || RV_1,008.03

va̱yaṁ śūre̍bhi̱r astṛ̍bhi̱r indra̱ tvayā̍ yu̱jā va̱yam |
sā̱sa̱hyāma̍ pṛtanya̱taḥ || RV_1,008.04

ma̱hām̐ indra̍ḥ pa̱raś ca̱ nu ma̍hi̱tvam a̍stu va̱jriṇe̍ |
dyaur na pra̍thi̱nā śava̍ḥ || RV_1,008.05

sa̱mo̱he vā̱ ya āśa̍ta̱ nara̍s to̱kasya̱ sani̍tau |
viprā̍so vā dhiyā̱yava̍ḥ || RV_1,008.06

yaḥ ku̱kṣiḥ so̍ma̱pāta̍maḥ samu̱dra i̍va̱ pinva̍te |
u̱rvīr āpo̱ na kā̱kuda̍ḥ || RV_1,008.07

e̱vā hy a̍sya sū̱nṛtā̍ vira̱pśī goma̍tī ma̱hī |
pa̱kvā śākhā̱ na dā̱śuṣe̍ || RV_1,008.08

e̱vā hi te̱ vibhū̍taya ū̱taya̍ indra̱ māva̍te |
sa̱dyaś ci̱t santi̍ dā̱śuṣe̍ || RV_1,008.09

e̱vā hy a̍sya̱ kāmyā̱ stoma̍ u̱kthaṁ ca̱ śaṁsyā̍ |
indrā̍ya̱ soma̍pītaye || RV_1,008.10

indrehi̱ matsy andha̍so̱ viśve̍bhiḥ soma̱parva̍bhiḥ |
ma̱hām̐ a̍bhi̱ṣṭir oja̍sā || RV_1,009.01

em e̍naṁ sṛjatā su̱te ma̱ndim indrā̍ya ma̱ndine̍ |
cakri̱ṁ viśvā̍ni̱ cakra̍ye || RV_1,009.02

matsvā̍ suśipra ma̱ndibhi̱ḥ stome̍bhir viśvacarṣaṇe |
sacai̱ṣu sava̍ne̱ṣv ā || RV_1,009.03

asṛ̍gram indra te̱ gira̱ḥ prati̱ tvām ud a̍hāsata |
ajo̍ṣā vṛṣa̱bham pati̍m || RV_1,009.04

saṁ co̍daya ci̱tram a̱rvāg rādha̍ indra̱ vare̍ṇyam |
asa̱d it te̍ vi̱bhu pra̱bhu || RV_1,009.05

a̱smān su tatra̍ coda̱yendra̍ rā̱ye rabha̍svataḥ |
tuvi̍dyumna̱ yaśa̍svataḥ || RV_1,009.06

saṁ goma̍d indra̱ vāja̍vad a̱sme pṛ̱thu śravo̍ bṛ̱hat |
vi̱śvāyu̍r dhe̱hy akṣi̍tam || RV_1,009.07

a̱sme dhe̍hi̱ śravo̍ bṛ̱had dyu̱mnaṁ sa̍hasra̱sāta̍mam |
indra̱ tā ra̱thinī̱r iṣa̍ḥ || RV_1,009.08

vaso̱r indra̱ṁ vasu̍patiṁ gī̱rbhir gṛ̱ṇanta̍ ṛ̱gmiya̍m |
homa̱ gantā̍ram ū̱taye̍ || RV_1,009.09

su̱te-su̍te̱ nyo̍kase bṛ̱had bṛ̍ha̱ta ed a̱riḥ |
indrā̍ya śū̱ṣam a̍rcati || RV_1,009.10

gāya̍nti tvā gāya̱triṇo 'rca̍nty a̱rkam a̱rkiṇa̍ḥ |
bra̱hmāṇa̍s tvā śatakrata̱ ud va̱ṁśam i̍va yemire || RV_1,010.01

yat sāno̱ḥ sānu̱m āru̍ha̱d bhūry aspa̍ṣṭa̱ kartva̍m |
tad indro̱ artha̍ṁ cetati yū̱thena̍ vṛ̱ṣṇir e̍jati || RV_1,010.02

yu̱kṣvā hi ke̱śinā̱ harī̱ vṛṣa̍ṇā kakṣya̱prā |
athā̍ na indra somapā gi̱rām upa̍śrutiṁ cara || RV_1,010.03

ehi̱ stomā̍m̐ a̱bhi sva̍rā̱bhi gṛ̍ṇī̱hy ā ru̍va |
brahma̍ ca no vaso̱ sacendra̍ ya̱jñaṁ ca̍ vardhaya || RV_1,010.04

u̱ktham indrā̍ya̱ śaṁsya̱ṁ vardha̍nam puruni̱ṣṣidhe̍ |
śa̱kro yathā̍ su̱teṣu̍ ṇo rā̱raṇa̍t sa̱khyeṣu̍ ca || RV_1,010.05

tam it sa̍khi̱tva ī̍mahe̱ taṁ rā̱ye taṁ su̱vīrye̍ |
sa śa̱kra u̱ta na̍ḥ śaka̱d indro̱ vasu̱ daya̍mānaḥ || RV_1,010.06

su̱vi̱vṛta̍ṁ suni̱raja̱m indra̱ tvādā̍ta̱m id yaśa̍ḥ |
gavā̱m apa̍ vra̱jaṁ vṛ̍dhi kṛṇu̱ṣva rādho̍ adrivaḥ || RV_1,010.07

na̱hi tvā̱ roda̍sī u̱bhe ṛ̍ghā̱yamā̍ṇa̱m inva̍taḥ |
jeṣa̱ḥ sva̍rvatīr a̱paḥ saṁ gā a̱smabhya̍ṁ dhūnuhi || RV_1,010.08

āśru̍tkarṇa śru̱dhī hava̱ṁ nū ci̍d dadhiṣva me̱ gira̍ḥ |
indra̱ stoma̍m i̱mam mama̍ kṛ̱ṣvā yu̱jaś ci̱d anta̍ram || RV_1,010.09

vi̱dmā hi tvā̱ vṛṣa̍ntama̱ṁ vāje̍ṣu havana̱śruta̍m |
vṛṣa̍ntamasya hūmaha ū̱tiṁ sa̍hasra̱sāta̍mām || RV_1,010.10

ā tū na̍ indra kauśika mandasā̱naḥ su̱tam pi̍ba |
navya̱m āyu̱ḥ pra sū ti̍ra kṛ̱dhī sa̍hasra̱sām ṛṣi̍m || RV_1,010.11

pari̍ tvā girvaṇo̱ gira̍ i̱mā bha̍vantu vi̱śvata̍ḥ |
vṛ̱ddhāyu̱m anu̱ vṛddha̍yo̱ juṣṭā̍ bhavantu̱ juṣṭa̍yaḥ || RV_1,010.12

indra̱ṁ viśvā̍ avīvṛdhan samu̱dravya̍casa̱ṁ gira̍ḥ |
ra̱thīta̍maṁ ra̱thīnā̱ṁ vājā̍nā̱ṁ satpa̍ti̱m pati̍m || RV_1,011.01

sa̱khye ta̍ indra vā̱jino̱ mā bhe̍ma śavasas pate |
tvām a̱bhi pra ṇo̍numo̱ jetā̍ra̱m apa̍rājitam || RV_1,011.02

pū̱rvīr indra̍sya rā̱tayo̱ na vi da̍syanty ū̱taya̍ḥ |
yadī̱ vāja̍sya̱ goma̍taḥ sto̱tṛbhyo̱ maṁha̍te ma̱gham || RV_1,011.03

pu̱rām bhi̱ndur yuvā̍ ka̱vir ami̍taujā ajāyata |
indro̱ viśva̍sya̱ karma̍ṇo dha̱rtā va̱jrī pu̍ruṣṭu̱taḥ || RV_1,011.04

tvaṁ va̱lasya̱ goma̱to 'pā̍var adrivo̱ bila̍m |
tvāṁ de̱vā abi̍bhyuṣas tu̱jyamā̍nāsa āviṣuḥ || RV_1,011.05

tavā̱haṁ śū̍ra rā̱tibhi̱ḥ praty ā̍ya̱ṁ sindhu̍m ā̱vada̍n |
upā̍tiṣṭhanta girvaṇo vi̱duṣ ṭe̱ tasya̍ kā̱rava̍ḥ || RV_1,011.06

mā̱yābhi̍r indra mā̱yina̱ṁ tvaṁ śuṣṇa̱m avā̍tiraḥ |
vi̱duṣ ṭe̱ tasya̱ medhi̍rā̱s teṣā̱ṁ śravā̱ṁsy ut ti̍ra || RV_1,011.07

indra̱m īśā̍na̱m oja̍sā̱bhi stomā̍ anūṣata |
sa̱hasra̱ṁ yasya̍ rā̱taya̍ u̱ta vā̱ santi̱ bhūya̍sīḥ || RV_1,011.08

a̱gniṁ dū̱taṁ vṛ̍ṇīmahe̱ hotā̍raṁ vi̱śvave̍dasam |
a̱sya ya̱jñasya̍ su̱kratu̍m || RV_1,012.01

a̱gnim-a̍gni̱ṁ havī̍mabhi̱ḥ sadā̍ havanta vi̱śpati̍m |
ha̱vya̱vāha̍m purupri̱yam || RV_1,012.02

agne̍ de̱vām̐ i̱hā va̍ha jajñā̱no vṛ̱ktaba̍rhiṣe |
asi̱ hotā̍ na̱ īḍya̍ḥ || RV_1,012.03

tām̐ u̍śa̱to vi bo̍dhaya̱ yad a̍gne̱ yāsi̍ dū̱tya̍m |
de̱vair ā sa̍tsi ba̱rhiṣi̍ || RV_1,012.04

ghṛtā̍havana dīdiva̱ḥ prati̍ ṣma̱ riṣa̍to daha |
agne̱ tvaṁ ra̍kṣa̱svina̍ḥ || RV_1,012.05

a̱gninā̱gniḥ sam i̍dhyate ka̱vir gṛ̱hapa̍ti̱r yuvā̍ |
ha̱vya̱vāḍ ju̱hvā̍syaḥ || RV_1,012.06

ka̱vim a̱gnim upa̍ stuhi sa̱tyadha̍rmāṇam adhva̱re |
de̱vam a̍mīva̱cāta̍nam || RV_1,012.07

yas tvām a̍gne ha̱viṣpa̍tir dū̱taṁ de̍va sapa̱ryati̍ |
tasya̍ sma prāvi̱tā bha̍va || RV_1,012.08

yo a̱gniṁ de̱vavī̍taye ha̱viṣmā̍m̐ ā̱vivā̍sati |
tasmai̍ pāvaka mṛḻaya || RV_1,012.09

sa na̍ḥ pāvaka dīdi̱vo 'gne̍ de̱vām̐ i̱hā va̍ha |
upa̍ ya̱jñaṁ ha̱viś ca̍ naḥ || RV_1,012.10

sa na̱ḥ stavā̍na̱ ā bha̍ra gāya̱treṇa̱ navī̍yasā |
ra̱yiṁ vī̱rava̍tī̱m iṣa̍m || RV_1,012.11

agne̍ śu̱kreṇa̍ śo̱ciṣā̱ viśvā̍bhir de̱vahū̍tibhiḥ |
i̱maṁ stoma̍ṁ juṣasva naḥ || RV_1,012.12

susa̍middho na̱ ā va̍ha de̱vām̐ a̍gne ha̱viṣma̍te |
hota̍ḥ pāvaka̱ yakṣi̍ ca || RV_1,013.01

madhu̍mantaṁ tanūnapād ya̱jñaṁ de̱veṣu̍ naḥ kave |
a̱dyā kṛ̍ṇuhi vī̱taye̍ || RV_1,013.02

narā̱śaṁsa̍m i̱ha pri̱yam a̱smin ya̱jña upa̍ hvaye |
madhu̍jihvaṁ havi̱ṣkṛta̍m || RV_1,013.03

agne̍ su̱khata̍me̱ rathe̍ de̱vām̐ ī̍ḻi̱ta ā va̍ha |
asi̱ hotā̱ manu̍rhitaḥ || RV_1,013.04

stṛ̱ṇī̱ta ba̱rhir ā̍nu̱ṣag ghṛ̱tapṛ̍ṣṭham manīṣiṇaḥ |
yatrā̱mṛta̍sya̱ cakṣa̍ṇam || RV_1,013.05

vi śra̍yantām ṛtā̱vṛdho̱ dvāro̍ de̱vīr a̍sa̱ścata̍ḥ |
a̱dyā nū̱naṁ ca̱ yaṣṭa̍ve || RV_1,013.06

nakto̱ṣāsā̍ su̱peśa̍sā̱smin ya̱jña upa̍ hvaye |
i̱daṁ no̍ ba̱rhir ā̱sade̍ || RV_1,013.07

tā su̍ji̱hvā upa̍ hvaye̱ hotā̍rā̱ daivyā̍ ka̱vī |
ya̱jñaṁ no̍ yakṣatām i̱mam || RV_1,013.08

iḻā̱ sara̍svatī ma̱hī ti̱sro de̱vīr ma̍yo̱bhuva̍ḥ |
ba̱rhiḥ sī̍dantv a̱sridha̍ḥ || RV_1,013.09

i̱ha tvaṣṭā̍ram agri̱yaṁ vi̱śvarū̍pa̱m upa̍ hvaye |
a̱smāka̍m astu̱ keva̍laḥ || RV_1,013.10

ava̍ sṛjā vanaspate̱ deva̍ de̱vebhyo̍ ha̱viḥ |
pra dā̱tur a̍stu̱ ceta̍nam || RV_1,013.11

svāhā̍ ya̱jñaṁ kṛ̍ṇota̱nendrā̍ya̱ yajva̍no gṛ̱he |
tatra̍ de̱vām̐ upa̍ hvaye || RV_1,013.12

aibhi̍r agne̱ duvo̱ giro̱ viśve̍bhi̱ḥ soma̍pītaye |
de̱vebhi̍r yāhi̱ yakṣi̍ ca || RV_1,014.01

ā tvā̱ kaṇvā̍ ahūṣata gṛ̱ṇanti̍ vipra te̱ dhiya̍ḥ |
de̱vebhi̍r agna̱ ā ga̍hi || RV_1,014.02

i̱ndra̱vā̱yū bṛha̱spati̍m mi̱trāgnim pū̱ṣaṇa̱m bhaga̍m |
ā̱di̱tyān māru̍taṁ ga̱ṇam || RV_1,014.03

pra vo̍ bhriyanta̱ inda̍vo matsa̱rā mā̍dayi̱ṣṇava̍ḥ |
dra̱psā madhva̍ś camū̱ṣada̍ḥ || RV_1,014.04

īḻa̍te̱ tvām a̍va̱syava̱ḥ kaṇvā̍so vṛ̱ktaba̍rhiṣaḥ |
ha̱viṣma̍nto ara̱ṁkṛta̍ḥ || RV_1,014.05

ghṛ̱tapṛ̍ṣṭhā mano̱yujo̱ ye tvā̱ vaha̍nti̱ vahna̍yaḥ |
ā de̱vān soma̍pītaye || RV_1,014.06

tān yaja̍trām̐ ṛtā̱vṛdho 'gne̱ patnī̍vatas kṛdhi |
madhva̍ḥ sujihva pāyaya || RV_1,014.07

ye yaja̍trā̱ ya īḍyā̱s te te̍ pibantu ji̱hvayā̍ |
madho̍r agne̱ vaṣa̍ṭkṛti || RV_1,014.08

ākī̱ṁ sūrya̍sya roca̱nād viśvā̍n de̱vām̐ u̍ṣa̱rbudha̍ḥ |
vipro̱ hote̱ha va̍kṣati || RV_1,014.09

viśve̍bhiḥ so̱myam madhv agna̱ indre̍ṇa vā̱yunā̍ |
pibā̍ mi̱trasya̱ dhāma̍bhiḥ || RV_1,014.10

tvaṁ hotā̱ manu̍rhi̱to 'gne̍ ya̱jñeṣu̍ sīdasi |
semaṁ no̍ adhva̱raṁ ya̍ja || RV_1,014.11

yu̱kṣvā hy aru̍ṣī̱ rathe̍ ha̱rito̍ deva ro̱hita̍ḥ |
tābhi̍r de̱vām̐ i̱hā va̍ha || RV_1,014.12

indra̱ soma̱m piba̍ ṛ̱tunā tvā̍ viśa̱ntv inda̍vaḥ |
ma̱tsa̱rāsa̱s tado̍kasaḥ || RV_1,015.01

maru̍ta̱ḥ piba̍ta ṛ̱tunā̍ po̱trād ya̱jñam pu̍nītana |
yū̱yaṁ hi ṣṭhā su̍dānavaḥ || RV_1,015.02

a̱bhi ya̱jñaṁ gṛ̍ṇīhi no̱ gnāvo̱ neṣṭa̱ḥ piba̍ ṛ̱tunā̍ |
tvaṁ hi ra̍tna̱dhā asi̍ || RV_1,015.03

agne̍ de̱vām̐ i̱hā va̍ha sā̱dayā̱ yoni̍ṣu tri̱ṣu |
pari̍ bhūṣa̱ piba̍ ṛ̱tunā̍ || RV_1,015.04

brāhma̍ṇād indra̱ rādha̍sa̱ḥ pibā̱ soma̍m ṛ̱tūm̐r anu̍ |
taved dhi sa̱khyam astṛ̍tam || RV_1,015.05

yu̱vaṁ dakṣa̍ṁ dhṛtavrata̱ mitrā̍varuṇa dū̱ḻabha̍m |
ṛ̱tunā̍ ya̱jñam ā̍śāthe || RV_1,015.06

dra̱vi̱ṇo̱dā dravi̍ṇaso̱ grāva̍hastāso adhva̱re |
ya̱jñeṣu̍ de̱vam ī̍ḻate || RV_1,015.07

dra̱vi̱ṇo̱dā da̍dātu no̱ vasū̍ni̱ yāni̍ śṛṇvi̱re |
de̱veṣu̱ tā va̍nāmahe || RV_1,015.08

dra̱vi̱ṇo̱dāḥ pi̍pīṣati ju̱hota̱ pra ca̍ tiṣṭhata |
ne̱ṣṭrād ṛ̱tubhi̍r iṣyata || RV_1,015.09

yat tvā̍ tu̱rīya̍m ṛ̱tubhi̱r dravi̍ṇodo̱ yajā̍mahe |
adha̍ smā no da̱dir bha̍va || RV_1,015.10

aśvi̍nā̱ piba̍ta̱m madhu̱ dīdya̍gnī śucivratā |
ṛ̱tunā̍ yajñavāhasā || RV_1,015.11

gārha̍patyena santya ṛ̱tunā̍ yajña̱nīr a̍si |
de̱vān de̍vaya̱te ya̍ja || RV_1,015.12

ā tvā̍ vahantu̱ hara̍yo̱ vṛṣa̍ṇa̱ṁ soma̍pītaye |
indra̍ tvā̱ sūra̍cakṣasaḥ || RV_1,016.01

i̱mā dhā̱nā ghṛ̍ta̱snuvo̱ harī̍ i̱hopa̍ vakṣataḥ |
indra̍ṁ su̱khata̍me̱ rathe̍ || RV_1,016.02

indra̍m prā̱tar ha̍vāmaha̱ indra̍m praya̱ty a̍dhva̱re |
indra̱ṁ soma̍sya pī̱taye̍ || RV_1,016.03

upa̍ naḥ su̱tam ā ga̍hi̱ hari̍bhir indra ke̱śibhi̍ḥ |
su̱te hi tvā̱ havā̍mahe || RV_1,016.04

semaṁ na̱ḥ stoma̱m ā ga̱hy upe̱daṁ sava̍naṁ su̱tam |
gau̱ro na tṛ̍ṣi̱taḥ pi̍ba || RV_1,016.05

i̱me somā̍sa̱ inda̍vaḥ su̱tāso̱ adhi̍ ba̱rhiṣi̍ |
tām̐ i̍ndra̱ saha̍se piba || RV_1,016.06

a̱yaṁ te̱ stomo̍ agri̱yo hṛ̍di̱spṛg a̍stu̱ śaṁta̍maḥ |
athā̱ soma̍ṁ su̱tam pi̍ba || RV_1,016.07

viśva̱m it sava̍naṁ su̱tam indro̱ madā̍ya gacchati |
vṛ̱tra̱hā soma̍pītaye || RV_1,016.08

semaṁ na̱ḥ kāma̱m ā pṛ̍ṇa̱ gobhi̱r aśvai̍ḥ śatakrato |
stavā̍ma tvā svā̱dhya̍ḥ || RV_1,016.09

indrā̱varu̍ṇayor a̱haṁ sa̱mrājo̱r ava̱ ā vṛ̍ṇe |
tā no̍ mṛḻāta ī̱dṛśe̍ || RV_1,017.01

gantā̍rā̱ hi stho 'va̍se̱ hava̱ṁ vipra̍sya̱ māva̍taḥ |
dha̱rtārā̍ carṣaṇī̱nām || RV_1,017.02

a̱nu̱kā̱maṁ ta̍rpayethā̱m indrā̍varuṇa rā̱ya ā |
tā vā̱ṁ nedi̍ṣṭham īmahe || RV_1,017.03

yu̱vāku̱ hi śacī̍nāṁ yu̱vāku̍ sumatī̱nām |
bhū̱yāma̍ vāja̱dāvnā̍m || RV_1,017.04

indra̍ḥ sahasra̱dāvnā̱ṁ varu̍ṇa̱ḥ śaṁsyā̍nām |
kratu̍r bhavaty u̱kthya̍ḥ || RV_1,017.05

tayo̱r id ava̍sā va̱yaṁ sa̱nema̱ ni ca̍ dhīmahi |
syād u̱ta pra̱reca̍nam || RV_1,017.06

indrā̍varuṇa vām a̱haṁ hu̱ve ci̱trāya̱ rādha̍se |
a̱smān su ji̱gyuṣa̍s kṛtam || RV_1,017.07

indrā̍varuṇa̱ nū nu vā̱ṁ siṣā̍santīṣu dhī̱ṣv ā |
a̱smabhya̱ṁ śarma̍ yacchatam || RV_1,017.08

pra vā̍m aśnotu suṣṭu̱tir indrā̍varuṇa̱ yāṁ hu̱ve |
yām ṛ̱dhāthe̍ sa̱dhastu̍tim || RV_1,017.09

so̱māna̱ṁ svara̍ṇaṁ kṛṇu̱hi bra̍hmaṇas pate |
ka̱kṣīva̍nta̱ṁ ya au̍śi̱jaḥ || RV_1,018.01

yo re̱vān yo a̍mīva̱hā va̍su̱vit pu̍ṣṭi̱vardha̍naḥ |
sa na̍ḥ siṣaktu̱ yas tu̱raḥ || RV_1,018.02

mā na̱ḥ śaṁso̱ ara̍ruṣo dhū̱rtiḥ praṇa̱ṅ martya̍sya |
rakṣā̍ ṇo brahmaṇas pate || RV_1,018.03

sa ghā̍ vī̱ro na ri̍ṣyati̱ yam indro̱ brahma̍ṇa̱s pati̍ḥ |
somo̍ hi̱noti̱ martya̍m || RV_1,018.04

tvaṁ tam bra̍hmaṇas pate̱ soma̱ indra̍ś ca̱ martya̍m |
dakṣi̍ṇā pā̱tv aṁha̍saḥ || RV_1,018.05

sada̍sa̱s pati̱m adbhu̍tam pri̱yam indra̍sya̱ kāmya̍m |
sa̱nim me̱dhām a̍yāsiṣam || RV_1,018.06

yasmā̍d ṛ̱te na sidhya̍ti ya̱jño vi̍pa̱ścita̍ś ca̱na |
sa dhī̱nāṁ yoga̍m invati || RV_1,018.07

ād ṛ̍dhnoti ha̱viṣkṛ̍ti̱m prāñca̍ṁ kṛṇoty adhva̱ram |
hotrā̍ de̱veṣu̍ gacchati || RV_1,018.08

narā̱śaṁsa̍ṁ su̱dhṛṣṭa̍ma̱m apa̍śyaṁ sa̱pratha̍stamam |
di̱vo na sadma̍makhasam || RV_1,018.09

prati̱ tyaṁ cāru̍m adhva̱raṁ go̍pī̱thāya̱ pra hū̍yase |
ma̱rudbhi̍r agna̱ ā ga̍hi || RV_1,019.01

na̱hi de̱vo na martyo̍ ma̱has tava̱ kratu̍m pa̱raḥ |
ma̱rudbhi̍r agna̱ ā ga̍hi || RV_1,019.02

ye ma̱ho raja̍so vi̱dur viśve̍ de̱vāso̍ a̱druha̍ḥ |
ma̱rudbhi̍r agna̱ ā ga̍hi || RV_1,019.03

ya u̱grā a̱rkam ā̍nṛ̱cur anā̍dhṛṣṭāsa̱ oja̍sā |
ma̱rudbhi̍r agna̱ ā ga̍hi || RV_1,019.04

ye śu̱bhrā gho̱rava̍rpasaḥ sukṣa̱trāso̍ ri̱śāda̍saḥ |
ma̱rudbhi̍r agna̱ ā ga̍hi || RV_1,019.05

ye nāka̱syādhi̍ roca̱ne di̱vi de̱vāsa̱ āsa̍te |
ma̱rudbhi̍r agna̱ ā ga̍hi || RV_1,019.06

ya ī̱ṅkhaya̍nti̱ parva̍tān ti̱raḥ sa̍mu̱dram a̍rṇa̱vam |
ma̱rudbhi̍r agna̱ ā ga̍hi || RV_1,019.07

ā ye ta̱nvanti̍ ra̱śmibhi̍s ti̱raḥ sa̍mu̱dram oja̍sā |
ma̱rudbhi̍r agna̱ ā ga̍hi || RV_1,019.08

a̱bhi tvā̍ pū̱rvapī̍taye sṛ̱jāmi̍ so̱myam madhu̍ |
ma̱rudbhi̍r agna̱ ā ga̍hi || RV_1,019.09

a̱yaṁ de̱vāya̱ janma̍ne̱ stomo̱ vipre̍bhir āsa̱yā |
akā̍ri ratna̱dhāta̍maḥ || RV_1,020.01

ya indrā̍ya vaco̱yujā̍ tata̱kṣur mana̍sā̱ harī̍ |
śamī̍bhir ya̱jñam ā̍śata || RV_1,020.02

takṣa̱n nāsa̍tyābhyā̱m pari̍jmānaṁ su̱khaṁ ratha̍m |
takṣa̍n dhe̱nuṁ sa̍ba̱rdughā̍m || RV_1,020.03

yuvā̍nā pi̱tarā̱ puna̍ḥ sa̱tyama̍ntrā ṛjū̱yava̍ḥ |
ṛ̱bhavo̍ vi̱ṣṭy a̍krata || RV_1,020.04

saṁ vo̱ madā̍so agma̱tendre̍ṇa ca ma̱rutva̍tā |
ā̱di̱tyebhi̍ś ca̱ rāja̍bhiḥ || RV_1,020.05

u̱ta tyaṁ ca̍ma̱saṁ nava̱ṁ tvaṣṭu̍r de̱vasya̱ niṣkṛ̍tam |
aka̍rta ca̱tura̱ḥ puna̍ḥ || RV_1,020.06

te no̱ ratnā̍ni dhattana̱ trir ā sāptā̍ni sunva̱te |
eka̍m-ekaṁ suśa̱stibhi̍ḥ || RV_1,020.07

adhā̍rayanta̱ vahna̱yo 'bha̍janta sukṛ̱tyayā̍ |
bhā̱gaṁ de̱veṣu̍ ya̱jñiya̍m || RV_1,020.08

i̱hendrā̱gnī upa̍ hvaye̱ tayo̱r it stoma̍m uśmasi |
tā soma̍ṁ soma̱pāta̍mā || RV_1,021.01

tā ya̱jñeṣu̱ pra śa̍ṁsatendrā̱gnī śu̍mbhatā naraḥ |
tā gā̍ya̱treṣu̍ gāyata || RV_1,021.02

tā mi̱trasya̱ praśa̍staya indrā̱gnī tā ha̍vāmahe |
so̱ma̱pā soma̍pītaye || RV_1,021.03

u̱grā santā̍ havāmaha̱ upe̱daṁ sava̍naṁ su̱tam |
i̱ndrā̱gnī eha ga̍cchatām || RV_1,021.04

tā ma̱hāntā̱ sada̱spatī̱ indrā̍gnī̱ rakṣa̍ ubjatam |
apra̍jāḥ santv a̱triṇa̍ḥ || RV_1,021.05

tena̍ sa̱tyena̍ jāgṛta̱m adhi̍ prace̱tune̍ pa̱de |
indrā̍gnī̱ śarma̍ yacchatam || RV_1,021.06

prā̱ta̱ryujā̱ vi bo̍dhayā̱śvinā̱v eha ga̍cchatām |
a̱sya soma̍sya pī̱taye̍ || RV_1,022.01

yā su̱rathā̍ ra̱thīta̍mo̱bhā de̱vā di̍vi̱spṛśā̍ |
a̱śvinā̱ tā ha̍vāmahe || RV_1,022.02

yā vā̱ṁ kaśā̱ madhu̍ma̱ty aśvi̍nā sū̱nṛtā̍vatī |
tayā̍ ya̱jñam mi̍mikṣatam || RV_1,022.03

na̱hi vā̱m asti̍ dūra̱ke yatrā̱ rathe̍na̱ gaccha̍thaḥ |
aśvi̍nā so̱mino̍ gṛ̱ham || RV_1,022.04

hira̍ṇyapāṇim ū̱taye̍ savi̱tāra̱m upa̍ hvaye |
sa cettā̍ de̱vatā̍ pa̱dam || RV_1,022.05

a̱pāṁ napā̍ta̱m ava̍se savi̱tāra̱m upa̍ stuhi |
tasya̍ vra̱tāny u̍śmasi || RV_1,022.06

vi̱bha̱ktāra̍ṁ havāmahe̱ vaso̍ś ci̱trasya̱ rādha̍saḥ |
sa̱vi̱tāra̍ṁ nṛ̱cakṣa̍sam || RV_1,022.07

sakhā̍ya̱ ā ni ṣī̍data savi̱tā stomyo̱ nu na̍ḥ |
dātā̱ rādhā̍ṁsi śumbhati || RV_1,022.08

agne̱ patnī̍r i̱hā va̍ha de̱vānā̍m uśa̱tīr upa̍ |
tvaṣṭā̍ra̱ṁ soma̍pītaye || RV_1,022.09

ā gnā a̍gna i̱hāva̍se̱ hotrā̍ṁ yaviṣṭha̱ bhāra̍tīm |
varū̍trīṁ dhi̱ṣaṇā̍ṁ vaha || RV_1,022.10

a̱bhi no̍ de̱vīr ava̍sā ma̱haḥ śarma̍ṇā nṛ̱patnī̍ḥ |
acchi̍nnapatrāḥ sacantām || RV_1,022.11

i̱hendrā̱ṇīm upa̍ hvaye varuṇā̱nīṁ sva̱staye̍ |
a̱gnāyī̱ṁ soma̍pītaye || RV_1,022.12

ma̱hī dyauḥ pṛ̍thi̱vī ca̍ na i̱maṁ ya̱jñam mi̍mikṣatām |
pi̱pṛ̱tāṁ no̱ bharī̍mabhiḥ || RV_1,022.13

tayo̱r id ghṛ̱tava̱t payo̱ viprā̍ rihanti dhī̱tibhi̍ḥ |
ga̱ndha̱rvasya̍ dhru̱ve pa̱de || RV_1,022.14

syo̱nā pṛ̍thivi bhavānṛkṣa̱rā ni̱veśa̍nī |
yacchā̍ na̱ḥ śarma̍ sa̱pratha̍ḥ || RV_1,022.15

ato̍ de̱vā a̍vantu no̱ yato̱ viṣṇu̍r vicakra̱me |
pṛ̱thi̱vyāḥ sa̱pta dhāma̍bhiḥ || RV_1,022.16

i̱daṁ viṣṇu̱r vi ca̍krame tre̱dhā ni da̍dhe pa̱dam |
samū̍ḻham asya pāṁsu̱re || RV_1,022.17

trīṇi̍ pa̱dā vi ca̍krame̱ viṣṇu̍r go̱pā adā̍bhyaḥ |
ato̱ dharmā̍ṇi dhā̱raya̍n || RV_1,022.18

viṣṇo̱ḥ karmā̍ṇi paśyata̱ yato̍ vra̱tāni̍ paspa̱śe |
indra̍sya̱ yujya̱ḥ sakhā̍ || RV_1,022.19

tad viṣṇo̍ḥ para̱mam pa̱daṁ sadā̍ paśyanti sū̱raya̍ḥ |
di̱vī̍va̱ cakṣu̱r āta̍tam || RV_1,022.20

tad viprā̍so vipa̱nyavo̍ jāgṛ̱vāṁsa̱ḥ sam i̍ndhate |
viṣṇo̱r yat pa̍ra̱mam pa̱dam || RV_1,022.21

tī̱vrāḥ somā̍sa̱ ā ga̍hy ā̱śīrva̍ntaḥ su̱tā i̱me |
vāyo̱ tān prasthi̍tān piba || RV_1,023.01

u̱bhā de̱vā di̍vi̱spṛśe̍ndravā̱yū ha̍vāmahe |
a̱sya soma̍sya pī̱taye̍ || RV_1,023.02

i̱ndra̱vā̱yū ma̍no̱juvā̱ viprā̍ havanta ū̱taye̍ |
sa̱ha̱srā̱kṣā dhi̱yas patī̍ || RV_1,023.03

mi̱traṁ va̱yaṁ ha̍vāmahe̱ varu̍ṇa̱ṁ soma̍pītaye |
ja̱jñā̱nā pū̱tada̍kṣasā || RV_1,023.04

ṛ̱tena̱ yāv ṛ̍tā̱vṛdhā̍v ṛ̱tasya̱ jyoti̍ṣa̱s patī̍ |
tā mi̱trāvaru̍ṇā huve || RV_1,023.05

varu̍ṇaḥ prāvi̱tā bhu̍van mi̱tro viśvā̍bhir ū̱tibhi̍ḥ |
kara̍tāṁ naḥ su̱rādha̍saḥ || RV_1,023.06

ma̱rutva̍ntaṁ havāmaha̱ indra̱m ā soma̍pītaye |
sa̱jūr ga̱ṇena̍ tṛmpatu || RV_1,023.07

indra̍jyeṣṭhā̱ maru̍dgaṇā̱ devā̍sa̱ḥ pūṣa̍rātayaḥ |
viśve̱ mama̍ śrutā̱ hava̍m || RV_1,023.08

ha̱ta vṛ̱traṁ su̍dānava̱ indre̍ṇa̱ saha̍sā yu̱jā |
mā no̍ du̱ḥśaṁsa̍ īśata || RV_1,023.09

viśvā̍n de̱vān ha̍vāmahe ma̱ruta̱ḥ soma̍pītaye |
u̱grā hi pṛśni̍mātaraḥ || RV_1,023.10

jaya̍tām iva tanya̱tur ma̱rutā̍m eti dhṛṣṇu̱yā |
yac chubha̍ṁ yā̱thanā̍ naraḥ || RV_1,023.11

ha̱skā̱rād vi̱dyuta̱s pary ato̍ jā̱tā a̍vantu naḥ |
ma̱ruto̍ mṛḻayantu naḥ || RV_1,023.12

ā pū̍ṣañ ci̱traba̍rhiṣa̱m āghṛ̍ṇe dha̱ruṇa̍ṁ di̱vaḥ |
ājā̍ na̱ṣṭaṁ yathā̍ pa̱śum || RV_1,023.13

pū̱ṣā rājā̍na̱m āghṛ̍ṇi̱r apa̍gūḻha̱ṁ guhā̍ hi̱tam |
avi̍ndac ci̱traba̍rhiṣam || RV_1,023.14

u̱to sa mahya̱m indu̍bhi̱ḥ ṣaḍ yu̱ktām̐ a̍nu̱seṣi̍dhat |
gobhi̱r yava̱ṁ na ca̍rkṛṣat || RV_1,023.15

a̱mbayo̍ ya̱nty adhva̍bhir jā̱mayo̍ adhvarīya̱tām |
pṛ̱ñca̱tīr madhu̍nā̱ paya̍ḥ || RV_1,023.16

a̱mūr yā upa̱ sūrye̱ yābhi̍r vā̱ sūrya̍ḥ sa̱ha |
tā no̍ hinvantv adhva̱ram || RV_1,023.17

a̱po de̱vīr upa̍ hvaye̱ yatra̱ gāva̱ḥ piba̍nti naḥ |
sindhu̍bhya̱ḥ kartva̍ṁ ha̱viḥ || RV_1,023.18

a̱psv a1̱̍ntar a̱mṛta̍m a̱psu bhe̍ṣa̱jam a̱pām u̱ta praśa̍staye |
devā̱ bhava̍ta vā̱jina̍ḥ || RV_1,023.19

a̱psu me̱ somo̍ abravīd a̱ntar viśvā̍ni bheṣa̱jā |
a̱gniṁ ca̍ vi̱śvaśa̍mbhuva̱m āpa̍ś ca vi̱śvabhe̍ṣajīḥ || RV_1,023.20

āpa̍ḥ pṛṇī̱ta bhe̍ṣa̱jaṁ varū̍thaṁ ta̱nve̱3̱̍ mama̍ |
jyok ca̱ sūrya̍ṁ dṛ̱śe || RV_1,023.21

i̱dam ā̍pa̱ḥ pra va̍hata̱ yat kiṁ ca̍ duri̱tam mayi̍ |
yad vā̱ham a̍bhidu̱droha̱ yad vā̍ śe̱pa u̱tānṛ̍tam || RV_1,023.22

āpo̍ a̱dyānv a̍cāriṣa̱ṁ rase̍na̱ sam a̍gasmahi |
paya̍svān agna̱ ā ga̍hi̱ tam mā̱ saṁ sṛ̍ja̱ varca̍sā || RV_1,023.23

sam mā̍gne̱ varca̍sā sṛja̱ sam pra̱jayā̱ sam āyu̍ṣā |
vi̱dyur me̍ asya de̱vā indro̍ vidyāt sa̱ha ṛṣi̍bhiḥ || RV_1,023.24

kasya̍ nū̱naṁ ka̍ta̱masyā̱mṛtā̍nā̱m manā̍mahe̱ cāru̍ de̱vasya̱ nāma̍ |
ko no̍ ma̱hyā adi̍taye̱ puna̍r dāt pi̱tara̍ṁ ca dṛ̱śeya̍m mā̱tara̍ṁ ca || RV_1,024.01

a̱gner va̱yam pra̍tha̱masyā̱mṛtā̍nā̱m manā̍mahe̱ cāru̍ de̱vasya̱ nāma̍ |
sa no̍ ma̱hyā adi̍taye̱ puna̍r dāt pi̱tara̍ṁ ca dṛ̱śeya̍m mā̱tara̍ṁ ca || RV_1,024.02

a̱bhi tvā̍ deva savita̱r īśā̍na̱ṁ vāryā̍ṇām |
sadā̍van bhā̱gam ī̍mahe || RV_1,024.03

yaś ci̱d dhi ta̍ i̱tthā bhaga̍ḥ śaśamā̱naḥ pu̱rā ni̱daḥ |
a̱dve̱ṣo hasta̍yor da̱dhe || RV_1,024.04

bhaga̍bhaktasya te va̱yam ud a̍śema̱ tavāva̍sā |
mū̱rdhāna̍ṁ rā̱ya ā̱rabhe̍ || RV_1,024.05

na̱hi te̍ kṣa̱traṁ na saho̱ na ma̱nyuṁ vaya̍ś ca̱nāmī pa̱taya̍nta ā̱puḥ |
nemā āpo̍ animi̱ṣaṁ cara̍ntī̱r na ye vāta̍sya prami̱nanty abhva̍m || RV_1,024.06

a̱bu̱dhne rājā̱ varu̍ṇo̱ vana̍syo̱rdhvaṁ stūpa̍ṁ dadate pū̱tada̍kṣaḥ |
nī̱cīnā̍ḥ sthur u̱pari̍ bu̱dhna e̍ṣām a̱sme a̱ntar nihi̍tāḥ ke̱tava̍ḥ syuḥ || RV_1,024.07

u̱ruṁ hi rājā̱ varu̍ṇaś ca̱kāra̱ sūryā̍ya̱ panthā̱m anve̍ta̱vā u̍ |
a̱pade̱ pādā̱ prati̍dhātave 'kar u̱tāpa̍va̱ktā hṛ̍dayā̱vidha̍ś cit || RV_1,024.08

śa̱taṁ te̍ rājan bhi̱ṣaja̍ḥ sa̱hasra̍m u̱rvī ga̍bhī̱rā su̍ma̱tiṣ ṭe̍ astu |
bādha̍sva dū̱re nirṛ̍tim parā̱caiḥ kṛ̱taṁ ci̱d ena̱ḥ pra mu̍mugdhy a̱smat || RV_1,024.09

a̱mī ya ṛkṣā̱ nihi̍tāsa u̱ccā nakta̱ṁ dadṛ̍śre̱ kuha̍ ci̱d dive̍yuḥ |
ada̍bdhāni̱ varu̍ṇasya vra̱tāni̍ vi̱cāka̍śac ca̱ndramā̱ nakta̍m eti || RV_1,024.10

tat tvā̍ yāmi̱ brahma̍ṇā̱ vanda̍māna̱s tad ā śā̍ste̱ yaja̍māno ha̱virbhi̍ḥ |
ahe̍ḻamāno varuṇe̱ha bo̱dhy uru̍śaṁsa̱ mā na̱ āyu̱ḥ pra mo̍ṣīḥ || RV_1,024.11

tad in nakta̱ṁ tad divā̱ mahya̍m āhu̱s tad a̱yaṁ keto̍ hṛ̱da ā vi ca̍ṣṭe |
śuna̱ḥśepo̱ yam ahva̍d gṛbhī̱taḥ so a̱smān rājā̱ varu̍ṇo mumoktu || RV_1,024.12

śuna̱ḥśepo̱ hy ahva̍d gṛbhī̱tas tri̱ṣv ā̍di̱tyaṁ dru̍pa̱deṣu̍ ba̱ddhaḥ |
avai̍na̱ṁ rājā̱ varu̍ṇaḥ sasṛjyād vi̱dvām̐ ada̍bdho̱ vi mu̍moktu̱ pāśā̍n || RV_1,024.13

ava̍ te̱ heḻo̍ varuṇa̱ namo̍bhi̱r ava̍ ya̱jñebhi̍r īmahe ha̱virbhi̍ḥ |
kṣaya̍nn a̱smabhya̍m asura pracetā̱ rāja̱nn enā̍ṁsi śiśrathaḥ kṛ̱tāni̍ || RV_1,024.14

ud u̍tta̱maṁ va̍ruṇa̱ pāśa̍m a̱smad avā̍dha̱maṁ vi ma̍dhya̱maṁ śra̍thāya |
athā̍ va̱yam ā̍ditya vra̱te tavānā̍gaso̱ adi̍taye syāma || RV_1,024.15

yac ci̱d dhi te̱ viśo̍ yathā̱ pra de̍va varuṇa vra̱tam |
mi̱nī̱masi̱ dyavi̍-dyavi || RV_1,025.01

mā no̍ va̱dhāya̍ ha̱tnave̍ jihīḻā̱nasya̍ rīradhaḥ |
mā hṛ̍ṇā̱nasya̍ ma̱nyave̍ || RV_1,025.02

vi mṛ̍ḻī̱kāya̍ te̱ mano̍ ra̱thīr aśva̱ṁ na saṁdi̍tam |
gī̱rbhir va̍ruṇa sīmahi || RV_1,025.03

parā̱ hi me̱ vima̍nyava̱ḥ pata̍nti̱ vasya̍ïṣṭaye |
vayo̱ na va̍sa̱tīr upa̍ || RV_1,025.04

ka̱dā kṣa̍tra̱śriya̱ṁ nara̱m ā varu̍ṇaṁ karāmahe |
mṛ̱ḻī̱kāyo̍ru̱cakṣa̍sam || RV_1,025.05

tad it sa̍mā̱nam ā̍śāte̱ vena̍ntā̱ na pra yu̍cchataḥ |
dhṛ̱tavra̍tāya dā̱śuṣe̍ || RV_1,025.06

vedā̱ yo vī̱nām pa̱dam a̱ntari̍kṣeṇa̱ pata̍tām |
veda̍ nā̱vaḥ sa̍mu̱driya̍ḥ || RV_1,025.07

veda̍ mā̱so dhṛ̱tavra̍to̱ dvāda̍śa pra̱jāva̍taḥ |
vedā̱ ya u̍pa̱jāya̍te || RV_1,025.08

veda̱ vāta̍sya varta̱nim u̱ror ṛ̱ṣvasya̍ bṛha̱taḥ |
vedā̱ ye a̱dhyāsa̍te || RV_1,025.09

ni ṣa̍sāda dhṛ̱tavra̍to̱ varu̍ṇaḥ pa̱styā̱3̱̍sv ā |
sāmrā̍jyāya su̱kratu̍ḥ || RV_1,025.10

ato̱ viśvā̱ny adbhu̍tā ciki̱tvām̐ a̱bhi pa̍śyati |
kṛ̱tāni̱ yā ca̱ kartvā̍ || RV_1,025.11

sa no̍ vi̱śvāhā̍ su̱kratu̍r ādi̱tyaḥ su̱pathā̍ karat |
pra ṇa̱ āyū̍ṁṣi tāriṣat || RV_1,025.12

bibhra̍d drā̱piṁ hi̍ra̱ṇyaya̱ṁ varu̍ṇo vasta ni̱rṇija̍m |
pari̱ spaśo̱ ni ṣe̍dire || RV_1,025.13

na yaṁ dipsa̍nti di̱psavo̱ na druhvā̍ṇo̱ janā̍nām |
na de̱vam a̱bhimā̍tayaḥ || RV_1,025.14

u̱ta yo mānu̍ṣe̱ṣv ā yaśa̍ś ca̱kre asā̱my ā |
a̱smāka̍m u̱dare̱ṣv ā || RV_1,025.15

parā̍ me yanti dhī̱tayo̱ gāvo̱ na gavyū̍tī̱r anu̍ |
i̱cchantī̍r uru̱cakṣa̍sam || RV_1,025.16

saṁ nu vo̍cāvahai̱ puna̱r yato̍ me̱ madhv ābhṛ̍tam |
hote̍va̱ kṣada̍se pri̱yam || RV_1,025.17

darśa̱ṁ nu vi̱śvada̍rśata̱ṁ darśa̱ṁ ratha̱m adhi̱ kṣami̍ |
e̱tā ju̍ṣata me̱ gira̍ḥ || RV_1,025.18

i̱mam me̍ varuṇa śrudhī̱ hava̍m a̱dyā ca̍ mṛḻaya |
tvām a̍va̱syur ā ca̍ke || RV_1,025.19

tvaṁ viśva̍sya medhira di̱vaś ca̱ gmaś ca̍ rājasi |
sa yāma̍ni̱ prati̍ śrudhi || RV_1,025.20

ud u̍tta̱mam mu̍mugdhi no̱ vi pāśa̍m madhya̱maṁ cṛ̍ta |
avā̍dha̱māni̍ jī̱vase̍ || RV_1,025.21

vasi̍ṣvā̱ hi mi̍yedhya̱ vastrā̍ṇy ūrjām pate |
semaṁ no̍ adhva̱raṁ ya̍ja || RV_1,026.01

ni no̱ hotā̱ vare̍ṇya̱ḥ sadā̍ yaviṣṭha̱ manma̍bhiḥ |
agne̍ di̱vitma̍tā̱ vaca̍ḥ || RV_1,026.02

ā hi ṣmā̍ sū̱nave̍ pi̱tāpir yaja̍ty ā̱paye̍ |
sakhā̱ sakhye̱ vare̍ṇyaḥ || RV_1,026.03

ā no̍ ba̱rhī ri̱śāda̍so̱ varu̍ṇo mi̱tro a̍rya̱mā |
sīda̍ntu̱ manu̍ṣo yathā || RV_1,026.04

pūrvya̍ hotar a̱sya no̱ manda̍sva sa̱khyasya̍ ca |
i̱mā u̱ ṣu śru̍dhī̱ gira̍ḥ || RV_1,026.05

yac ci̱d dhi śaśva̍tā̱ tanā̍ de̱vaṁ-de̍va̱ṁ yajā̍mahe |
tve id dhū̍yate ha̱viḥ || RV_1,026.06

pri̱yo no̍ astu vi̱śpati̱r hotā̍ ma̱ndro vare̍ṇyaḥ |
pri̱yāḥ sva̱gnayo̍ va̱yam || RV_1,026.07

sva̱gnayo̱ hi vārya̍ṁ de̱vāso̍ dadhi̱re ca̍ naḥ |
sva̱gnayo̍ manāmahe || RV_1,026.08

athā̍ na u̱bhaye̍ṣā̱m amṛ̍ta̱ martyā̍nām |
mi̱thaḥ sa̍ntu̱ praśa̍stayaḥ || RV_1,026.09

viśve̍bhir agne a̱gnibhi̍r i̱maṁ ya̱jñam i̱daṁ vaca̍ḥ |
cano̍ dhāḥ sahaso yaho || RV_1,026.10

aśva̱ṁ na tvā̱ vāra̍vantaṁ va̱ndadhyā̍ a̱gniṁ namo̍bhiḥ |
sa̱mrāja̍ntam adhva̱rāṇā̍m || RV_1,027.01

sa ghā̍ naḥ sū̱nuḥ śava̍sā pṛ̱thupra̍gāmā su̱śeva̍ḥ |
mī̱ḍhvām̐ a̱smāka̍m babhūyāt || RV_1,027.02

sa no̍ dū̱rāc cā̱sāc ca̱ ni martyā̍d aghā̱yoḥ |
pā̱hi sada̱m id vi̱śvāyu̍ḥ || RV_1,027.03

i̱mam ū̱ ṣu tvam a̱smāka̍ṁ sa̱niṁ gā̍ya̱traṁ navyā̍ṁsam |
agne̍ de̱veṣu̱ pra vo̍caḥ || RV_1,027.04

ā no̍ bhaja para̱meṣv ā vāje̍ṣu madhya̱meṣu̍ |
śikṣā̱ vasvo̱ anta̍masya || RV_1,027.05

vi̱bha̱ktāsi̍ citrabhāno̱ sindho̍r ū̱rmā u̍pā̱ka ā |
sa̱dyo dā̱śuṣe̍ kṣarasi || RV_1,027.06

yam a̍gne pṛ̱tsu martya̱m avā̱ vāje̍ṣu̱ yaṁ ju̱nāḥ |
sa yantā̱ śaśva̍tī̱r iṣa̍ḥ || RV_1,027.07

naki̍r asya sahantya parye̱tā kaya̍sya cit |
vājo̍ asti śra̱vāyya̍ḥ || RV_1,027.08

sa vāja̍ṁ vi̱śvaca̍rṣaṇi̱r arva̍dbhir astu̱ taru̍tā |
vipre̍bhir astu̱ sani̍tā || RV_1,027.09

jarā̍bodha̱ tad vi̍viḍḍhi vi̱śe-vi̍śe ya̱jñiyā̍ya |
stoma̍ṁ ru̱drāya̱ dṛśī̍kam || RV_1,027.10

sa no̍ ma̱hām̐ a̍nimā̱no dhū̱make̍tuḥ puruśca̱ndraḥ |
dhi̱ye vājā̍ya hinvatu || RV_1,027.11

sa re̱vām̐ i̍va vi̱śpati̱r daivya̍ḥ ke̱tuḥ śṛ̍ṇotu naḥ |
u̱kthair a̱gnir bṛ̱hadbhā̍nuḥ || RV_1,027.12

namo̍ ma̱hadbhyo̱ namo̍ arbha̱kebhyo̱ namo̱ yuva̍bhyo̱ nama̍ āśi̱nebhya̍ḥ |
yajā̍ma de̱vān yadi̍ śa̱knavā̍ma̱ mā jyāya̍sa̱ḥ śaṁsa̱m ā vṛ̍kṣi devāḥ || RV_1,027.13

yatra̱ grāvā̍ pṛ̱thubu̍dhna ū̱rdhvo bhava̍ti̱ sota̍ve |
u̱lūkha̍lasutānā̱m aved v i̍ndra jalgulaḥ || RV_1,028.01

yatra̱ dvāv i̍va ja̱ghanā̍dhiṣava̱ṇyā̍ kṛ̱tā |
u̱lūkha̍lasutānā̱m aved v i̍ndra jalgulaḥ || RV_1,028.02

yatra̱ nāry a̍pacya̱vam u̍pacya̱vaṁ ca̱ śikṣa̍te |
u̱lūkha̍lasutānā̱m aved v i̍ndra jalgulaḥ || RV_1,028.03

yatra̱ manthā̍ṁ viba̱dhnate̍ ra̱śmīn yami̍ta̱vā i̍va |
u̱lūkha̍lasutānā̱m aved v i̍ndra jalgulaḥ || RV_1,028.04

yac ci̱d dhi tvaṁ gṛ̱he-gṛ̍ha̱ ulū̍khalaka yu̱jyase̍ |
i̱ha dyu̱matta̍maṁ vada̱ jaya̍tām iva dundu̱bhiḥ || RV_1,028.05

u̱ta sma̍ te vanaspate̱ vāto̱ vi vā̱ty agra̱m it |
atho̱ indrā̍ya̱ pāta̍ve su̱nu soma̍m ulūkhala || RV_1,028.06

ā̱ya̱jī vā̍ja̱sāta̍mā̱ tā hy u1̱̍ccā vi̍jarbhṛ̱taḥ |
harī̍ i̱vāndhā̍ṁsi̱ bapsa̍tā || RV_1,028.07

tā no̍ a̱dya va̍naspatī ṛ̱ṣvāv ṛ̱ṣvebhi̍ḥ so̱tṛbhi̍ḥ |
indrā̍ya̱ madhu̍mat sutam || RV_1,028.08

uc chi̱ṣṭaṁ ca̱mvo̍r bhara̱ soma̍m pa̱vitra̱ ā sṛ̍ja |
ni dhe̍hi̱ gor adhi̍ tva̱ci || RV_1,028.09

yac ci̱d dhi sa̍tya somapā anāśa̱stā i̍va̱ smasi̍ |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.01

śipri̍n vājānām pate̱ śacī̍va̱s tava̍ da̱ṁsanā̍ |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.02

ni ṣvā̍payā mithū̱dṛśā̍ sa̱stām abu̍dhyamāne |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.03

sa̱santu̱ tyā arā̍tayo̱ bodha̍ntu śūra rā̱taya̍ḥ |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.04

sam i̍ndra garda̱bham mṛ̍ṇa nu̱vanta̍m pā̱payā̍mu̱yā |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.05

patā̍ti kuṇḍṛ̱ṇācyā̍ dū̱raṁ vāto̱ vanā̱d adhi̍ |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.06

sarva̍m parikro̱śaṁ ja̍hi ja̱mbhayā̍ kṛkadā̱śva̍m |
ā tū na̍ indra śaṁsaya̱ goṣv aśve̍ṣu śu̱bhriṣu̍ sa̱hasre̍ṣu tuvīmagha || RV_1,029.07

ā va̱ indra̱ṁ krivi̍ṁ yathā vāja̱yanta̍ḥ śa̱takra̍tum |
maṁhi̍ṣṭhaṁ siñca̱ indu̍bhiḥ || RV_1,030.01

śa̱taṁ vā̱ yaḥ śucī̍nāṁ sa̱hasra̍ṁ vā̱ samā̍śirām |
ed u̍ ni̱mnaṁ na rī̍yate || RV_1,030.02

saṁ yan madā̍ya śu̱ṣmiṇa̍ e̱nā hy a̍syo̱dare̍ |
sa̱mu̱dro na vyaco̍ da̱dhe || RV_1,030.03

a̱yam u̍ te̱ sam a̍tasi ka̱pota̍ iva garbha̱dhim |
vaca̱s tac ci̍n na ohase || RV_1,030.04

sto̱traṁ rā̍dhānām pate̱ girvā̍ho vīra̱ yasya̍ te |
vibhū̍tir astu sū̱nṛtā̍ || RV_1,030.05

ū̱rdhvas ti̍ṣṭhā na ū̱taye̱ 'smin vāje̍ śatakrato |
sam a̱nyeṣu̍ bravāvahai || RV_1,030.06

yoge̍-yoge ta̱vasta̍ra̱ṁ vāje̍-vāje havāmahe |
sakhā̍ya̱ indra̍m ū̱taye̍ || RV_1,030.07

ā ghā̍ gama̱d yadi̱ śrava̍t saha̱sriṇī̍bhir ū̱tibhi̍ḥ |
vāje̍bhi̱r upa̍ no̱ hava̍m || RV_1,030.08

anu̍ pra̱tnasyauka̍so hu̱ve tu̍vipra̱tiṁ nara̍m |
yaṁ te̱ pūrva̍m pi̱tā hu̱ve || RV_1,030.09

taṁ tvā̍ va̱yaṁ vi̍śvavā̱rā śā̍smahe puruhūta |
sakhe̍ vaso jari̱tṛbhya̍ḥ || RV_1,030.10

a̱smāka̍ṁ śi̱priṇī̍nā̱ṁ soma̍pāḥ soma̱pāvnā̍m |
sakhe̍ vajri̱n sakhī̍nām || RV_1,030.11

tathā̱ tad a̍stu somapā̱ḥ sakhe̍ vajri̱n tathā̍ kṛṇu |
yathā̍ ta u̱śmasī̱ṣṭaye̍ || RV_1,030.12

re̱vatī̍r naḥ sadha̱māda̱ indre̍ santu tu̱vivā̍jāḥ |
kṣu̱manto̱ yābhi̱r made̍ma || RV_1,030.13

ā gha̱ tvāvā̱n tmanā̱ptaḥ sto̱tṛbhyo̍ dhṛṣṇav iyā̱naḥ |
ṛ̱ṇor akṣa̱ṁ na ca̱kryo̍ḥ || RV_1,030.14

ā yad duva̍ḥ śatakrata̱v ā kāma̍ṁ jaritṝ̱ṇām |
ṛ̱ṇor akṣa̱ṁ na śacī̍bhiḥ || RV_1,030.15

śaśva̱d indra̱ḥ popru̍thadbhir jigāya̱ nāna̍dadbhi̱ḥ śāśva̍sadbhi̱r dhanā̍ni |
sa no̍ hiraṇyara̱thaṁ da̱ṁsanā̍vā̱n sa na̍ḥ sani̱tā sa̱naye̱ sa no̍ 'dāt || RV_1,030.16

āśvi̍nā̱v aśvā̍vatye̱ṣā yā̍ta̱ṁ śavī̍rayā |
goma̍d dasrā̱ hira̍ṇyavat || RV_1,030.17

sa̱mā̱nayo̍jano̱ hi vā̱ṁ ratho̍ dasrā̱v ama̍rtyaḥ |
sa̱mu̱dre a̍śvi̱neya̍te || RV_1,030.18

ny a1̱̍ghnyasya̍ mū̱rdhani̍ ca̱kraṁ ratha̍sya yemathuḥ |
pari̱ dyām a̱nyad ī̍yate || RV_1,030.19

kas ta̍ uṣaḥ kadhapriye bhu̱je marto̍ amartye |
kaṁ na̍kṣase vibhāvari || RV_1,030.20

va̱yaṁ hi te̱ ama̍nma̱hy āntā̱d ā pa̍rā̱kāt |
aśve̱ na ci̍tre aruṣi || RV_1,030.21

tvaṁ tyebhi̱r ā ga̍hi̱ vāje̍bhir duhitar divaḥ |
a̱sme ra̱yiṁ ni dhā̍raya || RV_1,030.22

tvam a̍gne pratha̱mo aṅgi̍rā̱ ṛṣi̍r de̱vo de̱vānā̍m abhavaḥ śi̱vaḥ sakhā̍ |
tava̍ vra̱te ka̱vayo̍ vidma̱nāpa̱so 'jā̍yanta ma̱ruto̱ bhrāja̍dṛṣṭayaḥ || RV_1,031.01

tvam a̍gne pratha̱mo aṅgi̍rastamaḥ ka̱vir de̱vānā̱m pari̍ bhūṣasi vra̱tam |
vi̱bhur viśva̍smai̱ bhuva̍nāya̱ medhi̍ro dvimā̱tā śa̱yuḥ ka̍ti̱dhā ci̍d ā̱yave̍ || RV_1,031.02

tvam a̍gne pratha̱mo mā̍ta̱riśva̍na ā̱vir bha̍va sukratū̱yā vi̱vasva̍te |
are̍jetā̱ṁ roda̍sī hotṛ̱vūrye 'sa̍ghnor bhā̱ram aya̍jo ma̱ho va̍so || RV_1,031.03

tvam a̍gne̱ mana̍ve̱ dyām a̍vāśayaḥ purū̱rava̍se su̱kṛte̍ su̱kṛtta̍raḥ |
śvā̱treṇa̱ yat pi̱tror mucya̍se̱ pary ā tvā̱ pūrva̍m anaya̱nn āpa̍ra̱m puna̍ḥ || RV_1,031.04

tvam a̍gne vṛṣa̱bhaḥ pu̍ṣṭi̱vardha̍na̱ udya̍tasruce bhavasi śra̱vāyya̍ḥ |
ya āhu̍ti̱m pari̱ vedā̱ vaṣa̍ṭkṛti̱m ekā̍yu̱r agre̱ viśa̍ ā̱vivā̍sasi || RV_1,031.05

tvam a̍gne vṛji̱nava̍rtani̱ṁ nara̱ṁ sakma̍n piparṣi vi̱dathe̍ vicarṣaṇe |
yaḥ śūra̍sātā̱ pari̍takmye̱ dhane̍ da̱bhrebhi̍ś ci̱t samṛ̍tā̱ haṁsi̱ bhūya̍saḥ || RV_1,031.06

tvaṁ tam a̍gne amṛta̱tva u̍tta̱me marta̍ṁ dadhāsi̱ śrava̍se di̱ve-di̍ve |
yas tā̍tṛṣā̱ṇa u̱bhayā̍ya̱ janma̍ne̱ maya̍ḥ kṛ̱ṇoṣi̱ praya̱ ā ca̍ sū̱raye̍ || RV_1,031.07

tvaṁ no̍ agne sa̱naye̱ dhanā̍nāṁ ya̱śasa̍ṁ kā̱ruṁ kṛ̍ṇuhi̱ stavā̍naḥ |
ṛ̱dhyāma̱ karmā̱pasā̱ nave̍na de̱vair dyā̍vāpṛthivī̱ prāva̍taṁ naḥ || RV_1,031.08

tvaṁ no̍ agne pi̱tror u̱pastha̱ ā de̱vo de̱veṣv a̍navadya̱ jāgṛ̍viḥ |
ta̱nū̱kṛd bo̍dhi̱ prama̍tiś ca kā̱rave̱ tvaṁ ka̍lyāṇa̱ vasu̱ viśva̱m opi̍ṣe || RV_1,031.09

tvam a̍gne̱ prama̍ti̱s tvam pi̱tāsi̍ na̱s tvaṁ va̍ya̱skṛt tava̍ jā̱mayo̍ va̱yam |
saṁ tvā̱ rāya̍ḥ śa̱tina̱ḥ saṁ sa̍ha̱sriṇa̍ḥ su̱vīra̍ṁ yanti vrata̱pām a̍dābhya || RV_1,031.10

tvām a̍gne pratha̱mam ā̱yum ā̱yave̍ de̱vā a̍kṛṇva̱n nahu̍ṣasya vi̱śpati̍m |
iḻā̍m akṛṇva̱n manu̍ṣasya̱ śāsa̍nīm pi̱tur yat pu̱tro mama̍kasya̱ jāya̍te || RV_1,031.11

tvaṁ no̍ agne̱ tava̍ deva pā̱yubhi̍r ma̱ghono̍ rakṣa ta̱nva̍ś ca vandya |
trā̱tā to̱kasya̱ tana̍ye̱ gavā̍m a̱sy ani̍meṣa̱ṁ rakṣa̍māṇa̱s tava̍ vra̱te || RV_1,031.12

tvam a̍gne̱ yajya̍ve pā̱yur anta̍ro 'niṣa̱ṅgāya̍ catura̱kṣa i̍dhyase |
yo rā̱taha̍vyo 'vṛ̱kāya̱ dhāya̍se kī̱reś ci̱n mantra̱m mana̍sā va̱noṣi̱ tam || RV_1,031.13

tvam a̍gna uru̱śaṁsā̍ya vā̱ghate̍ spā̱rhaṁ yad rekṇa̍ḥ para̱maṁ va̱noṣi̱ tat |
ā̱dhrasya̍ ci̱t prama̍tir ucyase pi̱tā pra pāka̱ṁ śāssi̱ pra diśo̍ vi̱duṣṭa̍raḥ || RV_1,031.14

tvam a̍gne̱ praya̍tadakṣiṇa̱ṁ nara̱ṁ varme̍va syū̱tam pari̍ pāsi vi̱śvata̍ḥ |
svā̱du̱kṣadmā̱ yo va̍sa̱tau syo̍na̱kṛj jī̍vayā̱jaṁ yaja̍te̱ sopa̱mā di̱vaḥ || RV_1,031.15

i̱mām a̍gne śa̱raṇi̍m mīmṛṣo na i̱mam adhvā̍na̱ṁ yam agā̍ma dū̱rāt |
ā̱piḥ pi̱tā prama̍tiḥ so̱myānā̱m bhṛmi̍r asy ṛṣi̱kṛn martyā̍nām || RV_1,031.16

ma̱nu̱ṣvad a̍gne aṅgira̱svad a̍ṅgiro yayāti̱vat sada̍ne pūrva̱vac chu̍ce |
accha̍ yā̱hy ā va̍hā̱ daivya̱ṁ jana̱m ā sā̍daya ba̱rhiṣi̱ yakṣi̍ ca pri̱yam || RV_1,031.17

e̱tenā̍gne̱ brahma̍ṇā vāvṛdhasva̱ śaktī̍ vā̱ yat te̍ cakṛ̱mā vi̱dā vā̍ |
u̱ta pra ṇe̍ṣy a̱bhi vasyo̍ a̱smān saṁ na̍ḥ sṛja suma̱tyā vāja̍vatyā || RV_1,031.18

indra̍sya̱ nu vī̱ryā̍ṇi̱ pra vo̍ca̱ṁ yāni̍ ca̱kāra̍ pratha̱māni̍ va̱jrī |
aha̱nn ahi̱m anv a̱pas ta̍tarda̱ pra va̱kṣaṇā̍ abhina̱t parva̍tānām || RV_1,032.01

aha̱nn ahi̱m parva̍te śiśriyā̱ṇaṁ tvaṣṭā̍smai̱ vajra̍ṁ sva̱rya̍ṁ tatakṣa |
vā̱śrā i̍va dhe̱nava̱ḥ syanda̍mānā̱ añja̍ḥ samu̱dram ava̍ jagmu̱r āpa̍ḥ || RV_1,032.02

vṛ̱ṣā̱yamā̍ṇo 'vṛṇīta̱ soma̱ṁ trika̍drukeṣv apibat su̱tasya̍ |
ā sāya̍kam ma̱ghavā̍datta̱ vajra̱m aha̍nn enam prathama̱jām ahī̍nām || RV_1,032.03

yad i̱ndrāha̍n prathama̱jām ahī̍nā̱m ān mā̱yinā̱m ami̍nā̱ḥ prota mā̱yāḥ |
āt sūrya̍ṁ ja̱naya̱n dyām u̱ṣāsa̍ṁ tā̱dītnā̱ śatru̱ṁ na kilā̍ vivitse || RV_1,032.04

aha̍n vṛ̱traṁ vṛ̍tra̱tara̱ṁ vya̍ṁsa̱m indro̱ vajre̍ṇa maha̱tā va̱dhena̍ |
skandhā̍ṁsīva̱ kuli̍śenā̱ vivṛ̱kṇāhi̍ḥ śayata upa̱pṛk pṛ̍thi̱vyāḥ || RV_1,032.05

a̱yo̱ddheva̍ du̱rmada̱ ā hi ju̱hve ma̍hāvī̱raṁ tu̍vibā̱dham ṛ̍jī̱ṣam |
nātā̍rīd asya̱ samṛ̍tiṁ va̱dhānā̱ṁ saṁ ru̱jānā̍ḥ pipiṣa̱ indra̍śatruḥ || RV_1,032.06

a̱pād a̍ha̱sto a̍pṛtanya̱d indra̱m āsya̱ vajra̱m adhi̱ sānau̍ jaghāna |
vṛṣṇo̱ vadhri̍ḥ prati̱māna̱m bubhū̍ṣan puru̱trā vṛ̱tro a̍śaya̱d vya̍staḥ || RV_1,032.07

na̱daṁ na bhi̱nnam a̍mu̱yā śayā̍na̱m mano̱ ruhā̍ṇā̱ ati̍ ya̱nty āpa̍ḥ |
yāś ci̍d vṛ̱tro ma̍hi̱nā pa̱ryati̍ṣṭha̱t tāsā̱m ahi̍ḥ patsuta̱ḥśīr ba̍bhūva || RV_1,032.08

nī̱cāva̍yā abhavad vṛ̱trapu̱trendro̍ asyā̱ ava̱ vadha̍r jabhāra |
utta̍rā̱ sūr adha̍raḥ pu̱tra ā̍sī̱d dānu̍ḥ śaye sa̱hava̍tsā̱ na dhe̱nuḥ || RV_1,032.09

ati̍ṣṭhantīnām aniveśa̱nānā̱ṁ kāṣṭhā̍nā̱m madhye̱ nihi̍ta̱ṁ śarī̍ram |
vṛ̱trasya̍ ni̱ṇyaṁ vi ca̍ra̱nty āpo̍ dī̱rghaṁ tama̱ āśa̍ya̱d indra̍śatruḥ || RV_1,032.10

dā̱sapa̍tnī̱r ahi̍gopā atiṣṭha̱n niru̍ddhā̱ āpa̍ḥ pa̱ṇine̍va̱ gāva̍ḥ |
a̱pām bila̱m api̍hita̱ṁ yad āsī̍d vṛ̱traṁ ja̍gha̱nvām̐ apa̱ tad va̍vāra || RV_1,032.11

aśvyo̱ vāro̍ abhava̱s tad i̍ndra sṛ̱ke yat tvā̍ pra̱tyaha̍n de̱va eka̍ḥ |
aja̍yo̱ gā aja̍yaḥ śūra̱ soma̱m avā̍sṛja̱ḥ sarta̍ve sa̱pta sindhū̍n || RV_1,032.12

nāsmai̍ vi̱dyun na ta̍nya̱tuḥ si̍ṣedha̱ na yām miha̱m aki̍rad dhrā̱duni̍ṁ ca |
indra̍ś ca̱ yad yu̍yu̱dhāte̱ ahi̍ś co̱tāpa̱rībhyo̍ ma̱ghavā̱ vi ji̍gye || RV_1,032.13

ahe̍r yā̱tāra̱ṁ kam a̍paśya indra hṛ̱di yat te̍ ja̱ghnuṣo̱ bhīr aga̍cchat |
nava̍ ca̱ yan na̍va̱tiṁ ca̱ srava̍ntīḥ śye̱no na bhī̱to ata̍ro̱ rajā̍ṁsi || RV_1,032.14

indro̍ yā̱to 'va̍sitasya̱ rājā̱ śama̍sya ca śṛ̱ṅgiṇo̱ vajra̍bāhuḥ |
sed u̱ rājā̍ kṣayati carṣaṇī̱nām a̱rān na ne̱miḥ pari̱ tā ba̍bhūva || RV_1,032.15

etāyā̱mopa̍ ga̱vyanta̱ indra̍m a̱smāka̱ṁ su prama̍tiṁ vāvṛdhāti |
a̱nā̱mṛ̱ṇaḥ ku̱vid ād a̱sya rā̱yo gavā̱ṁ keta̱m para̍m ā̱varja̍te naḥ || RV_1,033.01

uped a̱haṁ dha̍na̱dām apra̍tīta̱ṁ juṣṭā̱ṁ na śye̱no va̍sa̱tim pa̍tāmi |
indra̍ṁ nama̱syann u̍pa̱mebhi̍r a̱rkair yaḥ sto̱tṛbhyo̱ havyo̱ asti̱ yāma̍n || RV_1,033.02

ni sarva̍sena iṣu̱dhīm̐r a̍sakta̱ sam a̱ryo gā a̍jati̱ yasya̱ vaṣṭi̍ |
co̱ṣkū̱yamā̍ṇa indra̱ bhūri̍ vā̱mam mā pa̱ṇir bhū̍r a̱smad adhi̍ pravṛddha || RV_1,033.03

vadhī̱r hi dasyu̍ṁ dha̱nina̍ṁ gha̱nena̱m̐ eka̱ś cara̍nn upaśā̱kebhi̍r indra |
dhano̱r adhi̍ viṣu̱ṇak te vy ā̍ya̱nn aya̍jvānaḥ sana̱kāḥ preti̍m īyuḥ || RV_1,033.04

parā̍ cic chī̱rṣā va̍vṛju̱s ta i̱ndrāya̍jvāno̱ yajva̍bhi̱ḥ spardha̍mānāḥ |
pra yad di̱vo ha̍rivaḥ sthātar ugra̱ nir a̍vra̱tām̐ a̍dhamo̱ roda̍syoḥ || RV_1,033.05

ayu̍yutsann anava̱dyasya̱ senā̱m ayā̍tayanta kṣi̱tayo̱ nava̍gvāḥ |
vṛ̱ṣā̱yudho̱ na vadhra̍yo̱ nira̍ṣṭāḥ pra̱vadbhi̱r indrā̍c ci̱taya̍nta āyan || RV_1,033.06

tvam e̱tān ru̍da̱to jakṣa̍ta̱ś cāyo̍dhayo̱ raja̍sa indra pā̱re |
avā̍daho di̱va ā dasyu̍m u̱ccā pra su̍nva̱taḥ stu̍va̱taḥ śaṁsa̍m āvaḥ || RV_1,033.07

ca̱krā̱ṇāsa̍ḥ parī̱ṇaha̍m pṛthi̱vyā hira̍ṇyena ma̱ṇinā̱ śumbha̍mānāḥ |
na hi̍nvā̱nāsa̍s titiru̱s ta indra̱m pari̱ spaśo̍ adadhā̱t sūrye̍ṇa || RV_1,033.08

pari̱ yad i̍ndra̱ roda̍sī u̱bhe abu̍bhojīr mahi̱nā vi̱śvata̍ḥ sīm |
ama̍nyamānām̐ a̱bhi manya̍mānai̱r nir bra̱hmabhi̍r adhamo̱ dasyu̍m indra || RV_1,033.09

na ye di̱vaḥ pṛ̍thi̱vyā anta̍m ā̱pur na mā̱yābhi̍r dhana̱dām pa̱ryabhū̍van |
yuja̱ṁ vajra̍ṁ vṛṣa̱bhaś ca̍kra̱ indro̱ nir jyoti̍ṣā̱ tama̍so̱ gā a̍dukṣat || RV_1,033.10

anu̍ sva̱dhām a̍kṣara̱nn āpo̍ a̱syāva̍rdhata̱ madhya̱ ā nā̱vyā̍nām |
sa̱dhrī̱cīne̍na̱ mana̍sā̱ tam indra̱ oji̍ṣṭhena̱ hanma̍nāhann a̱bhi dyūn || RV_1,033.11

ny ā̍vidhyad ilī̱biśa̍sya dṛ̱ḻhā vi śṛ̱ṅgiṇa̍m abhina̱c chuṣṇa̱m indra̍ḥ |
yāva̱t taro̍ maghava̱n yāva̱d ojo̱ vajre̍ṇa̱ śatru̍m avadhīḥ pṛta̱nyum || RV_1,033.12

a̱bhi si̱dhmo a̍jigād asya̱ śatrū̱n vi ti̱gmena̍ vṛṣa̱bheṇā̱ puro̍ 'bhet |
saṁ vajre̍ṇāsṛjad vṛ̱tram indra̱ḥ pra svām ma̱tim a̍tira̱c chāśa̍dānaḥ || RV_1,033.13

āva̱ḥ kutsa̍m indra̱ yasmi̍ñ cā̱kan prāvo̱ yudhya̍ntaṁ vṛṣa̱bhaṁ daśa̍dyum |
śa̱phacyu̍to re̱ṇur na̍kṣata̱ dyām uc chvai̍tre̱yo nṛ̱ṣāhyā̍ya tasthau || RV_1,033.14

āva̱ḥ śama̍ṁ vṛṣa̱bhaṁ tugryā̍su kṣetraje̱ṣe ma̍ghava̱ñ chvitrya̱ṁ gām |
jyok ci̱d atra̍ tasthi̱vāṁso̍ akrañ chatrūya̱tām adha̍rā̱ veda̍nākaḥ || RV_1,033.15

triś ci̍n no a̱dyā bha̍vataṁ navedasā vi̱bhur vā̱ṁ yāma̍ u̱ta rā̱tir a̍śvinā |
yu̱vor hi ya̱ntraṁ hi̱myeva̱ vāsa̍so 'bhyāya̱ṁsenyā̍ bhavatam manī̱ṣibhi̍ḥ || RV_1,034.01

traya̍ḥ pa̱vayo̍ madhu̱vāha̍ne̱ rathe̱ soma̍sya ve̱nām anu̱ viśva̱ id vi̍duḥ |
traya̍ḥ ska̱mbhāsa̍ḥ skabhi̱tāsa̍ ā̱rabhe̱ trir nakta̍ṁ yā̱thas trir v a̍śvinā̱ divā̍ || RV_1,034.02

sa̱mā̱ne aha̱n trir a̍vadyagohanā̱ trir a̱dya ya̱jñam madhu̍nā mimikṣatam |
trir vāja̍vatī̱r iṣo̍ aśvinā yu̱vaṁ do̱ṣā a̱smabhya̍m u̱ṣasa̍ś ca pinvatam || RV_1,034.03

trir va̱rtir yā̍ta̱ṁ trir anu̍vrate ja̱ne triḥ su̍prā̱vye̍ tre̱dheva̍ śikṣatam |
trir nā̱ndya̍ṁ vahatam aśvinā yu̱vaṁ triḥ pṛkṣo̍ a̱sme a̱kṣare̍va pinvatam || RV_1,034.04

trir no̍ ra̱yiṁ va̍hatam aśvinā yu̱vaṁ trir de̱vatā̍tā̱ trir u̱tāva̍ta̱ṁ dhiya̍ḥ |
triḥ sau̍bhaga̱tvaṁ trir u̱ta śravā̍ṁsi nas tri̱ṣṭhaṁ vā̱ṁ sūre̍ duhi̱tā ru̍ha̱d ratha̍m || RV_1,034.05

trir no̍ aśvinā di̱vyāni̍ bheṣa̱jā triḥ pārthi̍vāni̱ trir u̍ dattam a̱dbhyaḥ |
o̱māna̍ṁ śa̱ṁyor mama̍kāya sū̱nave̍ tri̱dhātu̱ śarma̍ vahataṁ śubhas patī || RV_1,034.06

trir no̍ aśvinā yaja̱tā di̱ve-di̍ve̱ pari̍ tri̱dhātu̍ pṛthi̱vīm a̍śāyatam |
ti̱sro nā̍satyā rathyā parā̱vata̍ ā̱tmeva̱ vāta̱ḥ svasa̍rāṇi gacchatam || RV_1,034.07

trir a̍śvinā̱ sindhu̍bhiḥ sa̱ptamā̍tṛbhi̱s traya̍ āhā̱vās tre̱dhā ha̱viṣ kṛ̱tam |
ti̱sraḥ pṛ̍thi̱vīr u̱pari̍ pra̱vā di̱vo nāka̍ṁ rakṣethe̱ dyubhi̍r a̱ktubhi̍r hi̱tam || RV_1,034.08

kva1̱̍ trī ca̱krā tri̱vṛto̱ ratha̍sya̱ kva1̱̍ trayo̍ va̱ndhuro̱ ye sanī̍ḻāḥ |
ka̱dā yogo̍ vā̱jino̱ rāsa̍bhasya̱ yena̍ ya̱jñaṁ nā̍satyopayā̱thaḥ || RV_1,034.09

ā nā̍satyā̱ gaccha̍taṁ hū̱yate̍ ha̱vir madhva̍ḥ pibatam madhu̱pebhi̍r ā̱sabhi̍ḥ |
yu̱vor hi pūrva̍ṁ savi̱toṣaso̱ ratha̍m ṛ̱tāya̍ ci̱traṁ ghṛ̱tava̍nta̱m iṣya̍ti || RV_1,034.10

ā nā̍satyā tri̱bhir e̍kāda̱śair i̱ha de̱vebhi̍r yātam madhu̱peya̍m aśvinā |
prāyu̱s tāri̍ṣṭa̱ṁ nī rapā̍ṁsi mṛkṣata̱ṁ sedha̍ta̱ṁ dveṣo̱ bhava̍taṁ sacā̱bhuvā̍ || RV_1,034.11

ā no̍ aśvinā tri̱vṛtā̱ rathe̍nā̱rvāñca̍ṁ ra̱yiṁ va̍hataṁ su̱vīra̍m |
śṛ̱ṇvantā̍ vā̱m ava̍se johavīmi vṛ̱dhe ca̍ no bhavata̱ṁ vāja̍sātau || RV_1,034.12

hvayā̍my a̱gnim pra̍tha̱maṁ sva̱staye̱ hvayā̍mi mi̱trāvaru̍ṇāv i̱hāva̍se |
hvayā̍mi̱ rātrī̱ṁ jaga̍to ni̱veśa̍nī̱ṁ hvayā̍mi de̱vaṁ sa̍vi̱tāra̍m ū̱taye̍ || RV_1,035.01

ā kṛ̱ṣṇena̱ raja̍sā̱ varta̍māno nive̱śaya̍nn a̱mṛta̱m martya̍ṁ ca |
hi̱ra̱ṇyaye̍na savi̱tā rathe̱nā de̱vo yā̍ti̱ bhuva̍nāni̱ paśya̍n || RV_1,035.02

yāti̍ de̱vaḥ pra̱vatā̱ yāty u̱dvatā̱ yāti̍ śu̱bhrābhyā̍ṁ yaja̱to hari̍bhyām |
ā de̱vo yā̍ti savi̱tā pa̍rā̱vato 'pa̱ viśvā̍ duri̱tā bādha̍mānaḥ || RV_1,035.03

a̱bhīvṛ̍ta̱ṁ kṛśa̍nair vi̱śvarū̍pa̱ṁ hira̍ṇyaśamyaṁ yaja̱to bṛ̱hanta̍m |
āsthā̱d ratha̍ṁ savi̱tā ci̱trabhā̍nuḥ kṛ̱ṣṇā rajā̍ṁsi̱ tavi̍ṣī̱ṁ dadhā̍naḥ || RV_1,035.04

vi janā̍ñ chyā̱vāḥ śi̍ti̱pādo̍ akhya̱n ratha̱ṁ hira̍ṇyapraüga̱ṁ vaha̍ntaḥ |
śaśva̱d viśa̍ḥ savi̱tur daivya̍syo̱pasthe̱ viśvā̱ bhuva̍nāni tasthuḥ || RV_1,035.05

ti̱sro dyāva̍ḥ savi̱tur dvā u̱pasthā̱m̐ ekā̍ ya̱masya̱ bhuva̍ne virā̱ṣāṭ |
ā̱ṇiṁ na rathya̍m a̱mṛtādhi̍ tasthur i̱ha bra̍vītu̱ ya u̱ tac cike̍tat || RV_1,035.06

vi su̍pa̱rṇo a̱ntari̍kṣāṇy akhyad gabhī̱rave̍pā̱ asu̍raḥ sunī̱thaḥ |
kve̱3̱̍dānī̱ṁ sūrya̱ḥ kaś ci̍keta kata̱māṁ dyāṁ ra̱śmir a̱syā ta̍tāna || RV_1,035.07

a̱ṣṭau vy a̍khyat ka̱kubha̍ḥ pṛthi̱vyās trī dhanva̱ yoja̍nā sa̱pta sindhū̍n |
hi̱ra̱ṇyā̱kṣaḥ sa̍vi̱tā de̱va āgā̱d dadha̱d ratnā̍ dā̱śuṣe̱ vāryā̍ṇi || RV_1,035.08

hira̍ṇyapāṇiḥ savi̱tā vica̍rṣaṇir u̱bhe dyāvā̍pṛthi̱vī a̱ntar ī̍yate |
apāmī̍vā̱m bādha̍te̱ veti̱ sūrya̍m a̱bhi kṛ̱ṣṇena̱ raja̍sā̱ dyām ṛ̍ṇoti || RV_1,035.09

hira̍ṇyahasto̱ asu̍raḥ sunī̱thaḥ su̍mṛḻī̱kaḥ svavā̍m̐ yātv a̱rvāṅ |
a̱pa̱sedha̍n ra̱kṣaso̍ yātu̱dhānā̱n asthā̍d de̱vaḥ pra̍tido̱ṣaṁ gṛ̍ṇā̱naḥ || RV_1,035.10

ye te̱ panthā̍ḥ savitaḥ pū̱rvyāso̍ 're̱ṇava̱ḥ sukṛ̍tā a̱ntari̍kṣe |
tebhi̍r no a̱dya pa̱thibhi̍ḥ su̱gebhī̱ rakṣā̍ ca no̱ adhi̍ ca brūhi deva || RV_1,035.11

pra vo̍ ya̱hvam pu̍rū̱ṇāṁ vi̱śāṁ de̍vaya̱tīnā̍m |
a̱gniṁ sū̱ktebhi̱r vaco̍bhir īmahe̱ yaṁ sī̱m id a̱nya īḻa̍te || RV_1,036.01

janā̍so a̱gniṁ da̍dhire saho̱vṛdha̍ṁ ha̱viṣma̍nto vidhema te |
sa tvaṁ no̍ a̱dya su̱manā̍ i̱hāvi̱tā bhavā̱ vāje̍ṣu santya || RV_1,036.02

pra tvā̍ dū̱taṁ vṛ̍ṇīmahe̱ hotā̍raṁ vi̱śvave̍dasam |
ma̱has te̍ sa̱to vi ca̍ranty a̱rcayo̍ di̱vi spṛ̍śanti bhā̱nava̍ḥ || RV_1,036.03

de̱vāsa̍s tvā̱ varu̍ṇo mi̱tro a̍rya̱mā saṁ dū̱tam pra̱tnam i̍ndhate |
viśva̱ṁ so a̍gne jayati̱ tvayā̱ dhana̱ṁ yas te̍ da̱dāśa̱ martya̍ḥ || RV_1,036.04

ma̱ndro hotā̍ gṛ̱hapa̍ti̱r agne̍ dū̱to vi̱śām a̍si |
tve viśvā̱ saṁga̍tāni vra̱tā dhru̱vā yāni̍ de̱vā akṛ̍ṇvata || RV_1,036.05

tve id a̍gne su̱bhage̍ yaviṣṭhya̱ viśva̱m ā hū̍yate ha̱viḥ |
sa tvaṁ no̍ a̱dya su̱manā̍ u̱tāpa̱raṁ yakṣi̍ de̱vān su̱vīryā̍ || RV_1,036.06

taṁ ghe̍m i̱tthā na̍ma̱svina̱ upa̍ sva̱rāja̍m āsate |
hotrā̍bhir a̱gnim manu̍ṣa̱ḥ sam i̍ndhate titi̱rvāṁso̱ ati̱ sridha̍ḥ || RV_1,036.07

ghnanto̍ vṛ̱tram a̍tara̱n roda̍sī a̱pa u̱ru kṣayā̍ya cakrire |
bhuva̱t kaṇve̱ vṛṣā̍ dyu̱mny āhu̍ta̱ḥ kranda̱d aśvo̱ gavi̍ṣṭiṣu || RV_1,036.08

saṁ sī̍dasva ma̱hām̐ a̍si̱ śoca̍sva deva̱vīta̍maḥ |
vi dhū̱mam a̍gne aru̱ṣam mi̍yedhya sṛ̱ja pra̍śasta darśa̱tam || RV_1,036.09

yaṁ tvā̍ de̱vāso̱ mana̍ve da̱dhur i̱ha yaji̍ṣṭhaṁ havyavāhana |
yaṁ kaṇvo̱ medhyā̍tithir dhana̱spṛta̱ṁ yaṁ vṛṣā̱ yam u̍pastu̱taḥ || RV_1,036.10

yam a̱gnim medhyā̍tithi̱ḥ kaṇva̍ ī̱dha ṛ̱tād adhi̍ |
tasya̱ preṣo̍ dīdiyu̱s tam i̱mā ṛca̱s tam a̱gniṁ va̍rdhayāmasi || RV_1,036.11

rā̱yas pū̍rdhi svadhā̱vo 'sti̱ hi te 'gne̍ de̱veṣv āpya̍m |
tvaṁ vāja̍sya̱ śrutya̍sya rājasi̱ sa no̍ mṛḻa ma̱hām̐ a̍si || RV_1,036.12

ū̱rdhva ū̱ ṣu ṇa̍ ū̱taye̱ tiṣṭhā̍ de̱vo na sa̍vi̱tā |
ū̱rdhvo vāja̍sya̱ sani̍tā̱ yad a̱ñjibhi̍r vā̱ghadbhi̍r vi̱hvayā̍mahe || RV_1,036.13

ū̱rdhvo na̍ḥ pā̱hy aṁha̍so̱ ni ke̱tunā̱ viśva̱ṁ sam a̱triṇa̍ṁ daha |
kṛ̱dhī na̍ ū̱rdhvāñ ca̱rathā̍ya jī̱vase̍ vi̱dā de̱veṣu̍ no̱ duva̍ḥ || RV_1,036.14

pā̱hi no̍ agne ra̱kṣasa̍ḥ pā̱hi dhū̱rter arā̍vṇaḥ |
pā̱hi rīṣa̍ta u̱ta vā̱ jighā̍ṁsato̱ bṛha̍dbhāno̱ yavi̍ṣṭhya || RV_1,036.15

gha̱neva̱ viṣva̱g vi ja̱hy arā̍vṇa̱s tapu̍rjambha̱ yo a̍sma̱dhruk |
yo martya̱ḥ śiśī̍te̱ aty a̱ktubhi̱r mā na̱ḥ sa ri̱pur ī̍śata || RV_1,036.16

a̱gnir va̍vne su̱vīrya̍m a̱gniḥ kaṇvā̍ya̱ saubha̍gam |
a̱gniḥ prāva̍n mi̱trota medhyā̍tithim a̱gniḥ sā̱tā u̍pastu̱tam || RV_1,036.17

a̱gninā̍ tu̱rvaśa̱ṁ yadu̍m parā̱vata̍ u̱grāde̍vaṁ havāmahe |
a̱gnir na̍ya̱n nava̍vāstvam bṛ̱hadra̍thaṁ tu̱rvīti̱ṁ dasya̍ve̱ saha̍ḥ || RV_1,036.18

ni tvām a̍gne̱ manu̍r dadhe̱ jyoti̱r janā̍ya̱ śaśva̍te |
dī̱detha̱ kaṇva̍ ṛ̱tajā̍ta ukṣi̱to yaṁ na̍ma̱syanti̍ kṛ̱ṣṭaya̍ḥ || RV_1,036.19

tve̱ṣāso̍ a̱gner ama̍vanto a̱rcayo̍ bhī̱māso̱ na pratī̍taye |
ra̱kṣa̱svina̱ḥ sada̱m id yā̍tu̱māva̍to̱ viśva̱ṁ sam a̱triṇa̍ṁ daha || RV_1,036.20

krī̱ḻaṁ va̱ḥ śardho̱ māru̍tam ana̱rvāṇa̍ṁ rathe̱śubha̍m |
kaṇvā̍ a̱bhi pra gā̍yata || RV_1,037.01

ye pṛṣa̍tībhir ṛ̱ṣṭibhi̍ḥ sā̱kaṁ vāśī̍bhir a̱ñjibhi̍ḥ |
ajā̍yanta̱ svabhā̍navaḥ || RV_1,037.02

i̱heva̍ śṛṇva eṣā̱ṁ kaśā̱ haste̍ṣu̱ yad vadā̍n |
ni yāma̍ñ ci̱tram ṛ̍ñjate || RV_1,037.03

pra va̱ḥ śardhā̍ya̱ ghṛṣva̍ye tve̱ṣadyu̍mnāya śu̱ṣmiṇe̍ |
de̱vatta̱m brahma̍ gāyata || RV_1,037.04

pra śa̍ṁsā̱ goṣv aghnya̍ṁ krī̱ḻaṁ yac chardho̱ māru̍tam |
jambhe̱ rasa̍sya vāvṛdhe || RV_1,037.05

ko vo̱ varṣi̍ṣṭha̱ ā na̍ro di̱vaś ca̱ gmaś ca̍ dhūtayaḥ |
yat sī̱m anta̱ṁ na dhū̍nu̱tha || RV_1,037.06

ni vo̱ yāmā̍ya̱ mānu̍ṣo da̱dhra u̱grāya̍ ma̱nyave̍ |
jihī̍ta̱ parva̍to gi̱riḥ || RV_1,037.07

yeṣā̱m ajme̍ṣu pṛthi̱vī ju̍ju̱rvām̐ i̍va vi̱śpati̍ḥ |
bhi̱yā yāme̍ṣu̱ reja̍te || RV_1,037.08

sthi̱raṁ hi jāna̍m eṣā̱ṁ vayo̍ mā̱tur nire̍tave |
yat sī̱m anu̍ dvi̱tā śava̍ḥ || RV_1,037.09

ud u̱ tye sū̱navo̱ gira̱ḥ kāṣṭhā̱ ajme̍ṣv atnata |
vā̱śrā a̍bhi̱jñu yāta̍ve || RV_1,037.10

tyaṁ ci̍d ghā dī̱rgham pṛ̱thum mi̱ho napā̍ta̱m amṛ̍dhram |
pra cyā̍vayanti̱ yāma̍bhiḥ || RV_1,037.11

maru̍to̱ yad dha̍ vo̱ bala̱ṁ janā̍m̐ acucyavītana |
gi̱rīm̐r a̍cucyavītana || RV_1,037.12

yad dha̱ yānti̍ ma̱ruta̱ḥ saṁ ha̍ bruva̱te 'dhva̱nn ā |
śṛ̱ṇoti̱ kaś ci̍d eṣām || RV_1,037.13

pra yā̍ta̱ śībha̍m ā̱śubhi̱ḥ santi̱ kaṇve̍ṣu vo̱ duva̍ḥ |
tatro̱ ṣu mā̍dayādhvai || RV_1,037.14

asti̱ hi ṣmā̱ madā̍ya va̱ḥ smasi̍ ṣmā va̱yam e̍ṣām |
viśva̍ṁ ci̱d āyu̍r jī̱vase̍ || RV_1,037.15

kad dha̍ nū̱naṁ ka̍dhapriyaḥ pi̱tā pu̱traṁ na hasta̍yoḥ |
da̱dhi̱dhve vṛ̍ktabarhiṣaḥ || RV_1,038.01

kva̍ nū̱naṁ kad vo̱ artha̱ṁ gantā̍ di̱vo na pṛ̍thi̱vyāḥ |
kva̍ vo̱ gāvo̱ na ra̍ṇyanti || RV_1,038.02

kva̍ vaḥ su̱mnā navyā̍ṁsi̱ maru̍ta̱ḥ kva̍ suvi̱tā |
kvo̱3̱̍ viśvā̍ni̱ saubha̍gā || RV_1,038.03

yad yū̱yam pṛ̍śnimātaro̱ martā̍sa̱ḥ syāta̍na |
sto̱tā vo̍ a̱mṛta̍ḥ syāt || RV_1,038.04

mā vo̍ mṛ̱go na yava̍se jari̱tā bhū̱d ajo̍ṣyaḥ |
pa̱thā ya̱masya̍ gā̱d upa̍ || RV_1,038.05

mo ṣu ṇa̱ḥ parā̍-parā̱ nirṛ̍tir du̱rhaṇā̍ vadhīt |
pa̱dī̱ṣṭa tṛṣṇa̍yā sa̱ha || RV_1,038.06

sa̱tyaṁ tve̱ṣā ama̍vanto̱ dhanva̍ñ ci̱d ā ru̱driyā̍saḥ |
miha̍ṁ kṛṇvanty avā̱tām || RV_1,038.07

vā̱śreva̍ vi̱dyun mi̍māti va̱tsaṁ na mā̱tā si̍ṣakti |
yad e̍ṣāṁ vṛ̱ṣṭir asa̍rji || RV_1,038.08

divā̍ ci̱t tama̍ḥ kṛṇvanti pa̱rjanye̍nodavā̱hena̍ |
yat pṛ̍thi̱vīṁ vyu̱ndanti̍ || RV_1,038.09

adha̍ sva̱nān ma̱rutā̱ṁ viśva̱m ā sadma̱ pārthi̍vam |
are̍janta̱ pra mānu̍ṣāḥ || RV_1,038.10

maru̍to vīḻupā̱ṇibhi̍ś ci̱trā rodha̍svatī̱r anu̍ |
yā̱tem akhi̍drayāmabhiḥ || RV_1,038.11

sthi̱rā va̍ḥ santu ne̱mayo̱ rathā̱ aśvā̍sa eṣām |
susa̍ṁskṛtā a̱bhīśa̍vaḥ || RV_1,038.12

acchā̍ vadā̱ tanā̍ gi̱rā ja̱rāyai̱ brahma̍ṇa̱s pati̍m |
a̱gnim mi̱traṁ na da̍rśa̱tam || RV_1,038.13

mi̱mī̱hi śloka̍m ā̱sye̍ pa̱rjanya̍ iva tatanaḥ |
gāya̍ gāya̱tram u̱kthya̍m || RV_1,038.14

vanda̍sva̱ māru̍taṁ ga̱ṇaṁ tve̱ṣam pa̍na̱syum a̱rkiṇa̍m |
a̱sme vṛ̱ddhā a̍sann i̱ha || RV_1,038.15

pra yad i̱tthā pa̍rā̱vata̍ḥ śo̱cir na māna̱m asya̍tha |
kasya̱ kratvā̍ maruta̱ḥ kasya̱ varpa̍sā̱ kaṁ yā̍tha̱ kaṁ ha̍ dhūtayaḥ || RV_1,039.01

sthi̱rā va̍ḥ sa̱ntv āyu̍dhā parā̱ṇude̍ vī̱ḻū u̱ta pra̍ti̱ṣkabhe̍ |
yu̱ṣmāka̍m astu̱ tavi̍ṣī̱ panī̍yasī̱ mā martya̍sya mā̱yina̍ḥ || RV_1,039.02

parā̍ ha̱ yat sthi̱raṁ ha̱tha naro̍ va̱rtaya̍thā gu̱ru |
vi yā̍thana va̱nina̍ḥ pṛthi̱vyā vy āśā̱ḥ parva̍tānām || RV_1,039.03

na̱hi va̱ḥ śatru̍r vivi̱de adhi̱ dyavi̱ na bhūmyā̍ṁ riśādasaḥ |
yu̱ṣmāka̍m astu̱ tavi̍ṣī̱ tanā̍ yu̱jā rudrā̍so̱ nū ci̍d ā̱dhṛṣe̍ || RV_1,039.04

pra ve̍payanti̱ parva̍tā̱n vi vi̍ñcanti̱ vana̱spatī̍n |
pro ā̍rata maruto du̱rmadā̍ iva̱ devā̍sa̱ḥ sarva̍yā vi̱śā || RV_1,039.05

upo̱ rathe̍ṣu̱ pṛṣa̍tīr ayugdhva̱m praṣṭi̍r vahati̱ rohi̍taḥ |
ā vo̱ yāmā̍ya pṛthi̱vī ci̍d aśro̱d abī̍bhayanta̱ mānu̍ṣāḥ || RV_1,039.06

ā vo̍ ma̱kṣū tanā̍ya̱ kaṁ rudrā̱ avo̍ vṛṇīmahe |
gantā̍ nū̱naṁ no 'va̍sā̱ yathā̍ pu̱retthā kaṇvā̍ya bi̱bhyuṣe̍ || RV_1,039.07

yu̱ṣmeṣi̍to maruto̱ martye̍ṣita̱ ā yo no̱ abhva̱ īṣa̍te |
vi taṁ yu̍yota̱ śava̍sā̱ vy oja̍sā̱ vi yu̱ṣmākā̍bhir ū̱tibhi̍ḥ || RV_1,039.08

asā̍mi̱ hi pra̍yajyava̱ḥ kaṇva̍ṁ da̱da pra̍cetasaḥ |
asā̍mibhir maruta̱ ā na̍ ū̱tibhi̱r gantā̍ vṛ̱ṣṭiṁ na vi̱dyuta̍ḥ || RV_1,039.09

asā̱my ojo̍ bibhṛthā sudāna̱vo 'sā̍mi dhūtaya̱ḥ śava̍ḥ |
ṛ̱ṣi̱dviṣe̍ marutaḥ parima̱nyava̱ iṣu̱ṁ na sṛ̍jata̱ dviṣa̍m || RV_1,039.10

ut ti̍ṣṭha brahmaṇas pate deva̱yanta̍s tvemahe |
upa̱ pra ya̍ntu ma̱ruta̍ḥ su̱dāna̍va̱ indra̍ prā̱śūr bha̍vā̱ sacā̍ || RV_1,040.01

tvām id dhi sa̍hasas putra̱ martya̍ upabrū̱te dhane̍ hi̱te |
su̱vīrya̍m maruta̱ ā svaśvya̱ṁ dadhī̍ta̱ yo va̍ āca̱ke || RV_1,040.02

praitu̱ brahma̍ṇa̱s pati̱ḥ pra de̱vy e̍tu sū̱nṛtā̍ |
acchā̍ vī̱raṁ narya̍m pa̱ṅktirā̍dhasaṁ de̱vā ya̱jñaṁ na̍yantu naḥ || RV_1,040.03

yo vā̱ghate̱ dadā̍ti sū̱nara̱ṁ vasu̱ sa dha̍tte̱ akṣi̍ti̱ śrava̍ḥ |
tasmā̱ iḻā̍ṁ su̱vīrā̱m ā ya̍jāmahe su̱pratū̍rtim ane̱hasa̍m || RV_1,040.04

pra nū̱nam brahma̍ṇa̱s pati̱r mantra̍ṁ vadaty u̱kthya̍m |
yasmi̱nn indro̱ varu̍ṇo mi̱tro a̍rya̱mā de̱vā okā̍ṁsi cakri̱re || RV_1,040.05

tam id vo̍cemā vi̱dathe̍ṣu śa̱mbhuva̱m mantra̍ṁ devā ane̱hasa̍m |
i̱māṁ ca̱ vāca̍m prati̱harya̍thā naro̱ viśved vā̱mā vo̍ aśnavat || RV_1,040.06

ko de̍va̱yanta̍m aśnava̱j jana̱ṁ ko vṛ̱ktaba̍rhiṣam |
pra-pra̍ dā̱śvān pa̱styā̍bhir asthitānta̱rvāva̱t kṣaya̍ṁ dadhe || RV_1,040.07

upa̍ kṣa̱tram pṛ̍ñcī̱ta hanti̱ rāja̍bhir bha̱ye ci̍t sukṣi̱tiṁ da̍dhe |
nāsya̍ va̱rtā na ta̍ru̱tā ma̍hādha̱ne nārbhe̍ asti va̱jriṇa̍ḥ || RV_1,040.08

yaṁ rakṣa̍nti̱ prace̍taso̱ varu̍ṇo mi̱tro a̍rya̱mā |
nū ci̱t sa da̍bhyate̱ jana̍ḥ || RV_1,041.01

yam bā̱hute̍va̱ pipra̍ti̱ pānti̱ martya̍ṁ ri̱ṣaḥ |
ari̍ṣṭa̱ḥ sarva̍ edhate || RV_1,041.02

vi du̱rgā vi dviṣa̍ḥ pu̱ro ghnanti̱ rājā̍na eṣām |
naya̍nti duri̱tā ti̱raḥ || RV_1,041.03

su̱gaḥ panthā̍ anṛkṣa̱ra ādi̍tyāsa ṛ̱taṁ ya̱te |
nātrā̍vakhā̱do a̍sti vaḥ || RV_1,041.04

yaṁ ya̱jñaṁ naya̍thā nara̱ ādi̍tyā ṛ̱junā̍ pa̱thā |
pra va̱ḥ sa dhī̱taye̍ naśat || RV_1,041.05

sa ratna̱m martyo̱ vasu̱ viśva̍ṁ to̱kam u̱ta tmanā̍ |
acchā̍ gaccha̱ty astṛ̍taḥ || RV_1,041.06

ka̱thā rā̍dhāma sakhāya̱ḥ stoma̍m mi̱trasyā̍rya̱mṇaḥ |
mahi̱ psaro̱ varu̍ṇasya || RV_1,041.07

mā vo̱ ghnanta̱m mā śapa̍nta̱m prati̍ voce deva̱yanta̍m |
su̱mnair id va̱ ā vi̍vāse || RV_1,041.08

ca̱tura̍ś ci̱d dada̍mānād bibhī̱yād ā nidhā̍toḥ |
na du̍ru̱ktāya̍ spṛhayet || RV_1,041.09

sam pū̍ṣa̱nn adhva̍nas tira̱ vy aṁho̍ vimuco napāt |
sakṣvā̍ deva̱ pra ṇa̍s pu̱raḥ || RV_1,042.01

yo na̍ḥ pūṣann a̱gho vṛko̍ du̱ḥśeva̍ ā̱dide̍śati |
apa̍ sma̱ tam pa̱tho ja̍hi || RV_1,042.02

apa̱ tyam pa̍ripa̱nthina̍m muṣī̱vāṇa̍ṁ hura̱ścita̍m |
dū̱ram adhi̍ sru̱ter a̍ja || RV_1,042.03

tvaṁ tasya̍ dvayā̱vino̱ 'ghaśa̍ṁsasya̱ kasya̍ cit |
pa̱dābhi ti̍ṣṭha̱ tapu̍ṣim || RV_1,042.04

ā tat te̍ dasra mantuma̱ḥ pūṣa̱nn avo̍ vṛṇīmahe |
yena̍ pi̱tṝn aco̍dayaḥ || RV_1,042.05

adhā̍ no viśvasaubhaga̱ hira̍ṇyavāśīmattama |
dhanā̍ni su̱ṣaṇā̍ kṛdhi || RV_1,042.06

ati̍ naḥ sa̱ścato̍ naya su̱gā na̍ḥ su̱pathā̍ kṛṇu |
pūṣa̍nn i̱ha kratu̍ṁ vidaḥ || RV_1,042.07

a̱bhi sū̱yava̍saṁ naya̱ na na̍vajvā̱ro adhva̍ne |
pūṣa̍nn i̱ha kratu̍ṁ vidaḥ || RV_1,042.08

śa̱gdhi pū̱rdhi pra ya̍ṁsi ca śiśī̱hi prāsy u̱dara̍m |
pūṣa̍nn i̱ha kratu̍ṁ vidaḥ || RV_1,042.09

na pū̱ṣaṇa̍m methāmasi sū̱ktair a̱bhi gṛ̍ṇīmasi |
vasū̍ni da̱smam ī̍mahe || RV_1,042.10

kad ru̱drāya̱ prace̍tase mī̱ḻhuṣṭa̍māya̱ tavya̍se |
vo̱cema̱ śaṁta̍maṁ hṛ̱de || RV_1,043.01

yathā̍ no̱ adi̍ti̱ḥ kara̱t paśve̱ nṛbhyo̱ yathā̱ gave̍ |
yathā̍ to̱kāya̍ ru̱driya̍m || RV_1,043.02

yathā̍ no mi̱tro varu̍ṇo̱ yathā̍ ru̱draś cike̍tati |
yathā̱ viśve̍ sa̱joṣa̍saḥ || RV_1,043.03

gā̱thapa̍tim me̱dhapa̍tiṁ ru̱draṁ jalā̍ṣabheṣajam |
tac cha̱ṁyoḥ su̱mnam ī̍mahe || RV_1,043.04

yaḥ śu̱kra i̍va̱ sūryo̱ hira̍ṇyam iva̱ roca̍te |
śreṣṭho̍ de̱vānā̱ṁ vasu̍ḥ || RV_1,043.05

śaṁ na̍ḥ kara̱ty arva̍te su̱gam me̱ṣāya̍ me̱ṣye̍ |
nṛbhyo̱ nāri̍bhyo̱ gave̍ || RV_1,043.06

a̱sme so̍ma̱ śriya̱m adhi̱ ni dhe̍hi śa̱tasya̍ nṛ̱ṇām |
mahi̱ śrava̍s tuvinṛ̱mṇam || RV_1,043.07

mā na̍ḥ somapari̱bādho̱ mārā̍tayo juhuranta |
ā na̍ indo̱ vāje̍ bhaja || RV_1,043.08

yās te̍ pra̱jā a̱mṛta̍sya̱ para̍smi̱n dhāma̍nn ṛ̱tasya̍ |
mū̱rdhā nābhā̍ soma vena ā̱bhūṣa̍ntīḥ soma vedaḥ || RV_1,043.09

agne̱ viva̍svad u̱ṣasa̍ś ci̱traṁ rādho̍ amartya |
ā dā̱śuṣe̍ jātavedo vahā̱ tvam a̱dyā de̱vām̐ u̍ṣa̱rbudha̍ḥ || RV_1,044.01

juṣṭo̱ hi dū̱to asi̍ havya̱vāha̱no 'gne̍ ra̱thīr a̍dhva̱rāṇā̍m |
sa̱jūr a̱śvibhyā̍m u̱ṣasā̍ su̱vīrya̍m a̱sme dhe̍hi̱ śravo̍ bṛ̱hat || RV_1,044.02

a̱dyā dū̱taṁ vṛ̍ṇīmahe̱ vasu̍m a̱gnim pu̍rupri̱yam |
dhū̱make̍tu̱m bhāṛ̍jīka̱ṁ vyu̍ṣṭiṣu ya̱jñānā̍m adhvara̱śriya̍m || RV_1,044.03

śreṣṭha̱ṁ yavi̍ṣṭha̱m ati̍thi̱ṁ svā̍huta̱ṁ juṣṭa̱ṁ janā̍ya dā̱śuṣe̍ |
de̱vām̐ acchā̱ yāta̍ve jā̱tave̍dasam a̱gnim ī̍ḻe̱ vyu̍ṣṭiṣu || RV_1,044.04

sta̱vi̱ṣyāmi̱ tvām a̱haṁ viśva̍syāmṛta bhojana |
agne̍ trā̱tāra̍m a̱mṛta̍m miyedhya̱ yaji̍ṣṭhaṁ havyavāhana || RV_1,044.05

su̱śaṁso̍ bodhi gṛṇa̱te ya̍viṣṭhya̱ madhu̍jihva̱ḥ svā̍hutaḥ |
praska̍ṇvasya prati̱rann āyu̍r jī̱vase̍ nama̱syā daivya̱ṁ jana̍m || RV_1,044.06

hotā̍raṁ vi̱śvave̍dasa̱ṁ saṁ hi tvā̱ viśa̍ i̱ndhate̍ |
sa ā va̍ha puruhūta̱ prace̍ta̱so 'gne̍ de̱vām̐ i̱ha dra̱vat || RV_1,044.07

sa̱vi̱tāra̍m u̱ṣasa̍m a̱śvinā̱ bhaga̍m a̱gniṁ vyu̍ṣṭiṣu̱ kṣapa̍ḥ |
kaṇvā̍sas tvā su̱taso̍māsa indhate havya̱vāha̍ṁ svadhvara || RV_1,044.08

pati̱r hy a̍dhva̱rāṇā̱m agne̍ dū̱to vi̱śām asi̍ |
u̱ṣa̱rbudha̱ ā va̍ha̱ soma̍pītaye de̱vām̐ a̱dya sva̱rdṛśa̍ḥ || RV_1,044.09

agne̱ pūrvā̱ anū̱ṣaso̍ vibhāvaso dī̱detha̍ vi̱śvada̍rśataḥ |
asi̱ grāme̍ṣv avi̱tā pu̱rohi̱to 'si̍ ya̱jñeṣu̱ mānu̍ṣaḥ || RV_1,044.10

ni tvā̍ ya̱jñasya̱ sādha̍na̱m agne̱ hotā̍ram ṛ̱tvija̍m |
ma̱nu̱ṣvad de̍va dhīmahi̱ prace̍tasaṁ jī̱raṁ dū̱tam ama̍rtyam || RV_1,044.11

yad de̱vānā̍m mitramahaḥ pu̱rohi̱to 'nta̍ro̱ yāsi̍ dū̱tya̍m |
sindho̍r iva̱ prasva̍nitāsa ū̱rmayo̱ 'gner bhrā̍jante a̱rcaya̍ḥ || RV_1,044.12

śru̱dhi śru̍tkarṇa̱ vahni̍bhir de̱vair a̍gne sa̱yāva̍bhiḥ |
ā sī̍dantu ba̱rhiṣi̍ mi̱tro a̍rya̱mā prā̍ta̱ryāvā̍ṇo adhva̱ram || RV_1,044.13

śṛ̱ṇvantu̱ stoma̍m ma̱ruta̍ḥ su̱dāna̍vo 'gniji̱hvā ṛ̍tā̱vṛdha̍ḥ |
piba̍tu̱ soma̱ṁ varu̍ṇo dhṛ̱tavra̍to̱ 'śvibhyā̍m u̱ṣasā̍ sa̱jūḥ || RV_1,044.14

tvam a̍gne̱ vasū̍m̐r i̱ha ru̱drām̐ ā̍di̱tyām̐ u̱ta |
yajā̍ svadhva̱raṁ jana̱m manu̍jātaṁ ghṛta̱pruṣa̍m || RV_1,045.01

śru̱ṣṭī̱vāno̱ hi dā̱śuṣe̍ de̱vā a̍gne̱ vice̍tasaḥ |
tān ro̍hidaśva girvaṇa̱s traya̍striṁśata̱m ā va̍ha || RV_1,045.02

pri̱ya̱me̱dha̱vad a̍tri̱vaj jāta̍vedo virūpa̱vat |
a̱ṅgi̱ra̱svan ma̍hivrata̱ praska̍ṇvasya śrudhī̱ hava̍m || RV_1,045.03

mahi̍kerava ū̱taye̍ pri̱yame̍dhā ahūṣata |
rāja̍ntam adhva̱rāṇā̍m a̱gniṁ śu̱kreṇa̍ śo̱ciṣā̍ || RV_1,045.04

ghṛtā̍havana santye̱mā u̱ ṣu śru̍dhī̱ gira̍ḥ |
yābhi̱ḥ kaṇva̍sya sū̱navo̱ hava̱nte 'va̍se tvā || RV_1,045.05

tvāṁ ci̍traśravastama̱ hava̍nte vi̱kṣu ja̱ntava̍ḥ |
śo̱ciṣke̍śam purupri̱yāgne̍ ha̱vyāya̱ voḻha̍ve || RV_1,045.06

ni tvā̱ hotā̍ram ṛ̱tvija̍ṁ dadhi̱re va̍su̱vitta̍mam |
śrutka̍rṇaṁ sa̱pratha̍stama̱ṁ viprā̍ agne̱ divi̍ṣṭiṣu || RV_1,045.07

ā tvā̱ viprā̍ acucyavuḥ su̱taso̍mā a̱bhi praya̍ḥ |
bṛ̱had bhā bibhra̍to ha̱vir agne̱ martā̍ya dā̱śuṣe̍ || RV_1,045.08

prā̱ta̱ryāvṇa̍ḥ sahaskṛta soma̱peyā̍ya santya |
i̱hādya daivya̱ṁ jana̍m ba̱rhir ā sā̍dayā vaso || RV_1,045.09

a̱rvāñca̱ṁ daivya̱ṁ jana̱m agne̱ yakṣva̱ sahū̍tibhiḥ |
a̱yaṁ soma̍ḥ sudānava̱s tam pā̍ta ti̱roa̍hnyam || RV_1,045.10

e̱ṣo u̱ṣā apū̍rvyā̱ vy u̍cchati pri̱yā di̱vaḥ |
stu̱ṣe vā̍m aśvinā bṛ̱hat || RV_1,046.01

yā da̱srā sindhu̍mātarā mano̱tarā̍ rayī̱ṇām |
dhi̱yā de̱vā va̍su̱vidā̍ || RV_1,046.02

va̱cyante̍ vāṁ kaku̱hāso̍ jū̱rṇāyā̱m adhi̍ vi̱ṣṭapi̍ |
yad vā̱ṁ ratho̱ vibhi̱ṣ patā̍t || RV_1,046.03

ha̱viṣā̍ jā̱ro a̱pām pipa̍rti̱ papu̍rir narā |
pi̱tā kuṭa̍sya carṣa̱ṇiḥ || RV_1,046.04

ā̱dā̱ro vā̍m matī̱nāṁ nāsa̍tyā matavacasā |
pā̱taṁ soma̍sya dhṛṣṇu̱yā || RV_1,046.05

yā na̱ḥ pīpa̍rad aśvinā̱ jyoti̍ṣmatī̱ tama̍s ti̱raḥ |
tām a̱sme rā̍sāthā̱m iṣa̍m || RV_1,046.06

ā no̍ nā̱vā ma̍tī̱nāṁ yā̱tam pā̱rāya̱ ganta̍ve |
yu̱ñjāthā̍m aśvinā̱ ratha̍m || RV_1,046.07

a̱ritra̍ṁ vāṁ di̱vas pṛ̱thu tī̱rthe sindhū̍nā̱ṁ ratha̍ḥ |
dhi̱yā yu̍yujra̱ inda̍vaḥ || RV_1,046.08

di̱vas ka̍ṇvāsa̱ inda̍vo̱ vasu̱ sindhū̍nām pa̱de |
svaṁ va̱vriṁ kuha̍ dhitsathaḥ || RV_1,046.09

abhū̍d u̱ bhā u̍ a̱ṁśave̱ hira̍ṇya̱m prati̱ sūrya̍ḥ |
vy a̍khyaj ji̱hvayāsi̍taḥ || RV_1,046.10

abhū̍d u pā̱ram eta̍ve̱ panthā̍ ṛ̱tasya̍ sādhu̱yā |
ada̍rśi̱ vi sru̱tir di̱vaḥ || RV_1,046.11

tat-ta̱d id a̱śvino̱r avo̍ jari̱tā prati̍ bhūṣati |
made̱ soma̍sya̱ pipra̍toḥ || RV_1,046.12

vā̱va̱sā̱nā vi̱vasva̍ti̱ soma̍sya pī̱tyā gi̱rā |
ma̱nu̱ṣvac cha̍mbhū̱ ā ga̍tam || RV_1,046.13

yu̱vor u̱ṣā anu̱ śriya̱m pari̍jmanor u̱pāca̍rat |
ṛ̱tā va̍natho a̱ktubhi̍ḥ || RV_1,046.14

u̱bhā pi̍batam aśvino̱bhā na̱ḥ śarma̍ yacchatam |
a̱vi̱dri̱yābhi̍r ū̱tibhi̍ḥ || RV_1,046.15

a̱yaṁ vā̱m madhu̍mattamaḥ su̱taḥ soma̍ ṛtāvṛdhā |
tam a̍śvinā pibataṁ ti̱roa̍hnyaṁ dha̱ttaṁ ratnā̍ni dā̱śuṣe̍ || RV_1,047.01

tri̱va̱ndhu̱reṇa̍ tri̱vṛtā̍ su̱peśa̍sā̱ rathe̱nā yā̍tam aśvinā |
kaṇvā̍so vā̱m brahma̍ kṛṇvanty adhva̱re teṣā̱ṁ su śṛ̍ṇuta̱ṁ hava̍m || RV_1,047.02

aśvi̍nā̱ madhu̍mattamam pā̱taṁ soma̍m ṛtāvṛdhā |
athā̱dya da̍srā̱ vasu̱ bibhra̍tā̱ rathe̍ dā̱śvāṁsa̱m upa̍ gacchatam || RV_1,047.03

tri̱ṣa̱dha̱sthe ba̱rhiṣi̍ viśvavedasā̱ madhvā̍ ya̱jñam mi̍mikṣatam |
kaṇvā̍so vāṁ su̱taso̍mā a̱bhidya̍vo yu̱vāṁ ha̍vante aśvinā || RV_1,047.04

yābhi̱ḥ kaṇva̍m a̱bhiṣṭi̍bhi̱ḥ prāva̍taṁ yu̱vam a̍śvinā |
tābhi̱ḥ ṣv a1̱̍smām̐ a̍vataṁ śubhas patī pā̱taṁ soma̍m ṛtāvṛdhā || RV_1,047.05

su̱dāse̍ dasrā̱ vasu̱ bibhra̍tā̱ rathe̱ pṛkṣo̍ vahatam aśvinā |
ra̱yiṁ sa̍mu̱drād u̱ta vā̍ di̱vas pary a̱sme dha̍ttam puru̱spṛha̍m || RV_1,047.06

yan nā̍satyā parā̱vati̱ yad vā̱ stho adhi̍ tu̱rvaśe̍ |
ato̱ rathe̍na su̱vṛtā̍ na̱ ā ga̍taṁ sā̱kaṁ sūrya̍sya ra̱śmibhi̍ḥ || RV_1,047.07

a̱rvāñcā̍ vā̱ṁ sapta̍yo 'dhvara̱śriyo̱ vaha̍ntu̱ sava̱ned upa̍ |
iṣa̍m pṛ̱ñcantā̍ su̱kṛte̍ su̱dāna̍va̱ ā ba̱rhiḥ sī̍dataṁ narā || RV_1,047.08

tena̍ nāsa̱tyā ga̍ta̱ṁ rathe̍na̱ sūrya̍tvacā |
yena̱ śaśva̍d ū̱hathu̍r dā̱śuṣe̱ vasu̱ madhva̱ḥ soma̍sya pī̱taye̍ || RV_1,047.09

u̱kthebhi̍r a̱rvāg ava̍se purū̱vasū̍ a̱rkaiś ca̱ ni hva̍yāmahe |
śaśva̱t kaṇvā̍nā̱ṁ sada̍si pri̱ye hi ka̱ṁ soma̍m pa̱pathu̍r aśvinā || RV_1,047.10

sa̱ha vā̱mena̍ na uṣo̱ vy u̍cchā duhitar divaḥ |
sa̱ha dyu̱mnena̍ bṛha̱tā vi̍bhāvari rā̱yā de̍vi̱ dāsva̍tī || RV_1,048.01

aśvā̍vatī̱r goma̍tīr viśvasu̱vido̱ bhūri̍ cyavanta̱ vasta̍ve |
ud ī̍raya̱ prati̍ mā sū̱nṛtā̍ uṣa̱ś coda̱ rādho̍ ma̱ghonā̍m || RV_1,048.02

u̱vāso̱ṣā u̱cchāc ca̱ nu de̱vī jī̱rā rathā̍nām |
ye a̍syā ā̱cara̍ṇeṣu dadhri̱re sa̍mu̱dre na śra̍va̱syava̍ḥ || RV_1,048.03

uṣo̱ ye te̱ pra yāme̍ṣu yu̱ñjate̱ mano̍ dā̱nāya̍ sū̱raya̍ḥ |
atrāha̱ tat kaṇva̍ eṣā̱ṁ kaṇva̍tamo̱ nāma̍ gṛṇāti nṛ̱ṇām || RV_1,048.04

ā ghā̱ yoṣe̍va sū̱nary u̱ṣā yā̍ti prabhuñja̱tī |
ja̱raya̍ntī̱ vṛja̍nam pa̱dvad ī̍yata̱ ut pā̍tayati pa̱kṣiṇa̍ḥ || RV_1,048.05

vi yā sṛ̱jati̱ sama̍na̱ṁ vy a1̱̍rthina̍ḥ pa̱daṁ na ve̱ty oda̍tī |
vayo̱ naki̍ṣ ṭe papti̱vāṁsa̍ āsate̱ vyu̍ṣṭau vājinīvati || RV_1,048.06

e̱ṣāyu̍kta parā̱vata̱ḥ sūrya̍syo̱daya̍nā̱d adhi̍ |
śa̱taṁ rathe̍bhiḥ su̱bhago̱ṣā i̱yaṁ vi yā̍ty a̱bhi mānu̍ṣān || RV_1,048.07

viśva̍m asyā nānāma̱ cakṣa̍se̱ jaga̱j jyoti̍ṣ kṛṇoti sū̱narī̍ |
apa̱ dveṣo̍ ma̱ghonī̍ duhi̱tā di̱va u̱ṣā u̍ccha̱d apa̱ sridha̍ḥ || RV_1,048.08

uṣa̱ ā bhā̍hi bhā̱nunā̍ ca̱ndreṇa̍ duhitar divaḥ |
ā̱vaha̍ntī̱ bhūry a̱smabhya̱ṁ saubha̍gaṁ vyu̱cchantī̱ divi̍ṣṭiṣu || RV_1,048.09

viśva̍sya̱ hi prāṇa̍na̱ṁ jīva̍na̱ṁ tve vi yad u̱cchasi̍ sūnari |
sā no̱ rathe̍na bṛha̱tā vi̍bhāvari śru̱dhi ci̍trāmaghe̱ hava̍m || RV_1,048.10

uṣo̱ vāja̱ṁ hi vaṁsva̱ yaś ci̱tro mānu̍ṣe̱ jane̍ |
tenā va̍ha su̱kṛto̍ adhva̱rām̐ upa̱ ye tvā̍ gṛ̱ṇanti̱ vahna̍yaḥ || RV_1,048.11

viśvā̍n de̱vām̐ ā va̍ha̱ soma̍pītaye̱ 'ntari̍kṣād uṣa̱s tvam |
sāsmāsu̍ dhā̱ goma̱d aśvā̍vad u̱kthya1̱̍m uṣo̱ vāja̍ṁ su̱vīrya̍m || RV_1,048.12

yasyā̱ ruśa̍nto a̱rcaya̱ḥ prati̍ bha̱drā adṛ̍kṣata |
sā no̍ ra̱yiṁ vi̱śvavā̍raṁ su̱peśa̍sam u̱ṣā da̍dātu̱ sugmya̍m || RV_1,048.13

ye ci̱d dhi tvām ṛṣa̍ya̱ḥ pūrva̍ ū̱taye̍ juhū̱re 'va̍se mahi |
sā na̱ḥ stomā̍m̐ a̱bhi gṛ̍ṇīhi̱ rādha̱soṣa̍ḥ śu̱kreṇa̍ śo̱ciṣā̍ || RV_1,048.14

uṣo̱ yad a̱dya bhā̱nunā̱ vi dvārā̍v ṛ̱ṇavo̍ di̱vaḥ |
pra no̍ yacchatād avṛ̱kam pṛ̱thu ccha̱rdiḥ pra de̍vi̱ goma̍tī̱r iṣa̍ḥ || RV_1,048.15

saṁ no̍ rā̱yā bṛ̍ha̱tā vi̱śvape̍śasā mimi̱kṣvā sam iḻā̍bhi̱r ā |
saṁ dyu̱mnena̍ viśva̱turo̍ṣo mahi̱ saṁ vājai̍r vājinīvati || RV_1,048.16

uṣo̍ bha̱drebhi̱r ā ga̍hi di̱vaś ci̍d roca̱nād adhi̍ |
vaha̍ntv aru̱ṇapsa̍va̱ upa̍ tvā so̱mino̍ gṛ̱ham || RV_1,049.01

su̱peśa̍saṁ su̱khaṁ ratha̱ṁ yam a̱dhyasthā̍ uṣa̱s tvam |
tenā̍ su̱śrava̍sa̱ṁ jana̱m prāvā̱dya du̍hitar divaḥ || RV_1,049.02

vaya̍ś cit te pata̱triṇo̍ dvi̱pac catu̍ṣpad arjuni |
uṣa̱ḥ prāra̍nn ṛ̱tūm̐r anu̍ di̱vo ante̍bhya̱s pari̍ || RV_1,049.03

vyu̱cchantī̱ hi ra̱śmibhi̱r viśva̍m ā̱bhāsi̍ roca̱nam |
tāṁ tvām u̍ṣar vasū̱yavo̍ gī̱rbhiḥ kaṇvā̍ ahūṣata || RV_1,049.04

ud u̱ tyaṁ jā̱tave̍dasaṁ de̱vaṁ va̍hanti ke̱tava̍ḥ |
dṛ̱śe viśvā̍ya̱ sūrya̍m || RV_1,050.01

apa̱ tye tā̱yavo̍ yathā̱ nakṣa̍trā yanty a̱ktubhi̍ḥ |
sūrā̍ya vi̱śvaca̍kṣase || RV_1,050.02

adṛ̍śram asya ke̱tavo̱ vi ra̱śmayo̱ janā̱m̐ anu̍ |
bhrāja̍nto a̱gnayo̍ yathā || RV_1,050.03

ta̱raṇi̍r vi̱śvada̍rśato jyoti̱ṣkṛd a̍si sūrya |
viśva̱m ā bhā̍si roca̱nam || RV_1,050.04

pra̱tyaṅ de̱vānā̱ṁ viśa̍ḥ pra̱tyaṅṅ ud e̍ṣi̱ mānu̍ṣān |
pra̱tyaṅ viśva̱ṁ sva̍r dṛ̱śe || RV_1,050.05

yenā̍ pāvaka̱ cakṣa̍sā bhura̱ṇyanta̱ṁ janā̱m̐ anu̍ |
tvaṁ va̍ruṇa̱ paśya̍si || RV_1,050.06

vi dyām e̍ṣi̱ raja̍s pṛ̱thv ahā̱ mimā̍no a̱ktubhi̍ḥ |
paśya̱ñ janmā̍ni sūrya || RV_1,050.07

sa̱pta tvā̍ ha̱rito̱ rathe̱ vaha̍nti deva sūrya |
śo̱ciṣke̍śaṁ vicakṣaṇa || RV_1,050.08

ayu̍kta sa̱pta śu̱ndhyuva̱ḥ sūro̱ ratha̍sya na̱ptya̍ḥ |
tābhi̍r yāti̱ svayu̍ktibhiḥ || RV_1,050.09

ud va̱yaṁ tama̍sa̱s pari̱ jyoti̱ṣ paśya̍nta̱ utta̍ram |
de̱vaṁ de̍va̱trā sūrya̱m aga̍nma̱ jyoti̍r utta̱mam || RV_1,050.10

u̱dyann a̱dya mi̍tramaha ā̱roha̱nn utta̍rā̱ṁ diva̍m |
hṛ̱dro̱gam mama̍ sūrya hari̱māṇa̍ṁ ca nāśaya || RV_1,050.11

śuke̍ṣu me hari̱māṇa̍ṁ ropa̱ṇākā̍su dadhmasi |
atho̍ hāridra̱veṣu̍ me hari̱māṇa̱ṁ ni da̍dhmasi || RV_1,050.12

ud a̍gād a̱yam ā̍di̱tyo viśve̍na̱ saha̍sā sa̱ha |
dvi̱ṣanta̱m mahya̍ṁ ra̱ndhaya̱n mo a̱haṁ dvi̍ṣa̱te ra̍dham || RV_1,050.13

a̱bhi tyam me̱ṣam pu̍ruhū̱tam ṛ̱gmiya̱m indra̍ṁ gī̱rbhir ma̍datā̱ vasvo̍ arṇa̱vam |
yasya̱ dyāvo̱ na vi̱cara̍nti̱ mānu̍ṣā bhu̱je maṁhi̍ṣṭham a̱bhi vipra̍m arcata || RV_1,051.01

a̱bhīm a̍vanvan svabhi̱ṣṭim ū̱tayo̍ 'ntarikṣa̱prāṁ tavi̍ṣībhi̱r āvṛ̍tam |
indra̱ṁ dakṣā̍sa ṛ̱bhavo̍ mada̱cyuta̍ṁ śa̱takra̍tu̱ṁ java̍nī sū̱nṛtāru̍hat || RV_1,051.02

tvaṁ go̱tram aṅgi̍robhyo 'vṛṇo̱r apo̱tātra̍ye śa̱tadu̍reṣu gātu̱vit |
sa̱sena̍ cid vima̱dāyā̍vaho̱ vasv ā̱jāv adri̍ṁ vāvasā̱nasya̍ na̱rtaya̍n || RV_1,051.03

tvam a̱pām a̍pi̱dhānā̍vṛṇo̱r apādhā̍raya̱ḥ parva̍te̱ dānu̍ma̱d vasu̍ |
vṛ̱traṁ yad i̍ndra̱ śava̱sāva̍dhī̱r ahi̱m ād it sūrya̍ṁ di̱vy āro̍hayo dṛ̱śe || RV_1,051.04

tvam mā̱yābhi̱r apa̍ mā̱yino̍ 'dhamaḥ sva̱dhābhi̱r ye adhi̱ śuptā̱v aju̍hvata |
tvam pipro̍r nṛmaṇa̱ḥ prāru̍ja̱ḥ pura̱ḥ pra ṛ̱jiśvā̍naṁ dasyu̱hatye̍ṣv āvitha || RV_1,051.05

tvaṁ kutsa̍ṁ śuṣṇa̱hatye̍ṣv āvi̱thāra̍ndhayo 'tithi̱gvāya̱ śamba̍ram |
ma̱hānta̍ṁ cid arbu̱daṁ ni kra̍mīḥ pa̱dā sa̱nād e̱va da̍syu̱hatyā̍ya jajñiṣe || RV_1,051.06

tve viśvā̱ tavi̍ṣī sa̱dhrya̍g ghi̱tā tava̱ rādha̍ḥ somapī̱thāya̍ harṣate |
tava̱ vajra̍ś cikite bā̱hvor hi̱to vṛ̱ścā śatro̱r ava̱ viśvā̍ni̱ vṛṣṇyā̍ || RV_1,051.07

vi jā̍nī̱hy āryā̱n ye ca̱ dasya̍vo ba̱rhiṣma̍te randhayā̱ śāsa̍d avra̱tān |
śākī̍ bhava̱ yaja̍mānasya codi̱tā viśvet tā te̍ sadha̱māde̍ṣu cākana || RV_1,051.08

anu̍vratāya ra̱ndhaya̱nn apa̍vratān ā̱bhūbhi̱r indra̍ḥ śna̱thaya̱nn anā̍bhuvaḥ |
vṛ̱ddhasya̍ ci̱d vardha̍to̱ dyām ina̍kṣata̱ḥ stavā̍no va̱mro vi ja̍ghāna sa̱ṁdiha̍ḥ || RV_1,051.09

takṣa̱d yat ta̍ u̱śanā̱ saha̍sā̱ saho̱ vi roda̍sī ma̱jmanā̍ bādhate̱ śava̍ḥ |
ā tvā̱ vāta̍sya nṛmaṇo mano̱yuja̱ ā pūrya̍māṇam avahann a̱bhi śrava̍ḥ || RV_1,051.10

mandi̍ṣṭa̱ yad u̱śane̍ kā̱vye sacā̱m̐ indro̍ va̱ṅkū va̍ṅku̱tarādhi̍ tiṣṭhati |
u̱gro ya̱yiṁ nir a̱paḥ srota̍sāsṛja̱d vi śuṣṇa̍sya dṛṁhi̱tā ai̍raya̱t pura̍ḥ || RV_1,051.11

ā smā̱ ratha̍ṁ vṛṣa̱pāṇe̍ṣu tiṣṭhasi śāryā̱tasya̱ prabhṛ̍tā̱ yeṣu̱ manda̍se |
indra̱ yathā̍ su̱taso̍meṣu cā̱kano̍ 'na̱rvāṇa̱ṁ śloka̱m ā ro̍hase di̱vi || RV_1,051.12

ada̍dā̱ arbhā̍m maha̱te va̍ca̱syave̍ ka̱kṣīva̍te vṛca̱yām i̍ndra sunva̱te |
menā̍bhavo vṛṣaṇa̱śvasya̍ sukrato̱ viśvet tā te̱ sava̍neṣu pra̱vācyā̍ || RV_1,051.13

indro̍ aśrāyi su̱dhyo̍ nire̱ke pa̱jreṣu̱ stomo̱ duryo̱ na yūpa̍ḥ |
a̱śva̱yur ga̱vyū ra̍tha̱yur va̍sū̱yur indra̱ id rā̱yaḥ kṣa̍yati praya̱ntā || RV_1,051.14

i̱daṁ namo̍ vṛṣa̱bhāya̍ sva̱rāje̍ sa̱tyaśu̍ṣmāya ta̱vase̍ 'vāci |
a̱sminn i̍ndra vṛ̱jane̱ sarva̍vīrā̱ḥ smat sū̱ribhi̱s tava̱ śarma̍n syāma || RV_1,051.15

tyaṁ su me̱ṣam ma̍hayā sva̱rvida̍ṁ śa̱taṁ yasya̍ su̱bhva̍ḥ sā̱kam īra̍te |
atya̱ṁ na vāja̍ṁ havana̱syada̱ṁ ratha̱m endra̍ṁ vavṛtyā̱m ava̍se suvṛ̱ktibhi̍ḥ || RV_1,052.01

sa parva̍to̱ na dha̱ruṇe̱ṣv acyu̍taḥ sa̱hasra̍mūti̱s tavi̍ṣīṣu vāvṛdhe |
indro̱ yad vṛ̱tram ava̍dhīn nadī̱vṛta̍m u̱bjann arṇā̍ṁsi̱ jarhṛ̍ṣāṇo̱ andha̍sā || RV_1,052.02

sa hi dva̱ro dva̱riṣu̍ va̱vra ūdha̍ni ca̱ndrabu̍dhno̱ mada̍vṛddho manī̱ṣibhi̍ḥ |
indra̱ṁ tam a̍hve svapa̱syayā̍ dhi̱yā maṁhi̍ṣṭharāti̱ṁ sa hi papri̱r andha̍saḥ || RV_1,052.03

ā yam pṛ̱ṇanti̍ di̱vi sadma̍barhiṣaḥ samu̱draṁ na su̱bhva1̱̍ḥ svā a̱bhiṣṭa̍yaḥ |
taṁ vṛ̍tra̱hatye̱ anu̍ tasthur ū̱taya̱ḥ śuṣmā̱ indra̍m avā̱tā ahru̍tapsavaḥ || RV_1,052.04

a̱bhi svavṛ̍ṣṭi̱m made̍ asya̱ yudhya̍to ra̱ghvīr i̍va prava̱ṇe sa̍srur ū̱taya̍ḥ |
indro̱ yad va̱jrī dhṛ̱ṣamā̍ṇo̱ andha̍sā bhi̱nad va̱lasya̍ pari̱dhīm̐r i̍va tri̱taḥ || RV_1,052.05

parī̍ṁ ghṛ̱ṇā ca̍rati titvi̱ṣe śavo̱ 'po vṛ̱tvī raja̍so bu̱dhnam āśa̍yat |
vṛ̱trasya̱ yat pra̍va̱ṇe du̱rgṛbhi̍śvano nija̱ghantha̱ hanvo̍r indra tanya̱tum || RV_1,052.06

hra̱daṁ na hi tvā̍ nyṛ̱ṣanty ū̱rmayo̱ brahmā̍ṇīndra̱ tava̱ yāni̱ vardha̍nā |
tvaṣṭā̍ cit te̱ yujya̍ṁ vāvṛdhe̱ śava̍s ta̱takṣa̱ vajra̍m a̱bhibhū̍tyojasam || RV_1,052.07

ja̱gha̱nvām̐ u̱ hari̍bhiḥ sambhṛtakrata̱v indra̍ vṛ̱tram manu̍ṣe gātu̱yann a̱paḥ |
aya̍cchathā bā̱hvor vajra̍m āya̱sam adhā̍rayo di̱vy ā sūrya̍ṁ dṛ̱śe || RV_1,052.08

bṛ̱hat svaśca̍ndra̱m ama̍va̱d yad u̱kthya1̱̍m akṛ̍ṇvata bhi̱yasā̱ roha̍ṇaṁ di̱vaḥ |
yan mānu̍ṣapradhanā̱ indra̍m ū̱taya̱ḥ sva̍r nṛ̱ṣāco̍ ma̱ruto 'ma̍da̱nn anu̍ || RV_1,052.09

dyauś ci̍d a̱syāma̍vā̱m̐ ahe̍ḥ sva̱nād ayo̍yavīd bhi̱yasā̱ vajra̍ indra te |
vṛ̱trasya̱ yad ba̍dbadhā̱nasya̍ rodasī̱ made̍ su̱tasya̱ śava̱sābhi̍na̱c chira̍ḥ || RV_1,052.10

yad in nv i̍ndra pṛthi̱vī daśa̍bhuji̱r ahā̍ni̱ viśvā̍ ta̱tana̍nta kṛ̱ṣṭaya̍ḥ |
atrāha̍ te maghava̱n viśru̍ta̱ṁ saho̱ dyām anu̱ śava̍sā ba̱rhaṇā̍ bhuvat || RV_1,052.11

tvam a̱sya pā̱re raja̍so̱ vyo̍mana̱ḥ svabhū̍tyojā̱ ava̍se dhṛṣanmanaḥ |
ca̱kṛ̱ṣe bhūmi̍m prati̱māna̱m oja̍so̱ 'paḥ sva̍ḥ pari̱bhūr e̱ṣy ā diva̍m || RV_1,052.12

tvam bhu̍vaḥ prati̱māna̍m pṛthi̱vyā ṛ̱ṣvavī̍rasya bṛha̱taḥ pati̍r bhūḥ |
viśva̱m āprā̍ a̱ntari̍kṣam mahi̱tvā sa̱tyam a̱ddhā naki̍r a̱nyas tvāvā̍n || RV_1,052.13

na yasya̱ dyāvā̍pṛthi̱vī anu̱ vyaco̱ na sindha̍vo̱ raja̍so̱ anta̍m āna̱śuḥ |
nota svavṛ̍ṣṭi̱m made̍ asya̱ yudhya̍ta̱ eko̍ a̱nyac ca̍kṛṣe̱ viśva̍m ānu̱ṣak || RV_1,052.14

ārca̱nn atra̍ ma̱ruta̱ḥ sasmi̍nn ā̱jau viśve̍ de̱vāso̍ amada̱nn anu̍ tvā |
vṛ̱trasya̱ yad bhṛ̍ṣṭi̱matā̍ va̱dhena̱ ni tvam i̍ndra̱ praty ā̱naṁ ja̱ghantha̍ || RV_1,052.15

ny ū̱3̱̍ ṣu vāca̱m pra ma̱he bha̍rāmahe̱ gira̱ indrā̍ya̱ sada̍ne vi̱vasva̍taḥ |
nū ci̱d dhi ratna̍ṁ sasa̱tām i̱vāvi̍da̱n na du̍ṣṭu̱tir dra̍viṇo̱deṣu̍ śasyate || RV_1,053.01

du̱ro aśva̍sya du̱ra i̍ndra̱ gor a̍si du̱ro yava̍sya̱ vasu̍na i̱nas pati̍ḥ |
śi̱kṣā̱na̱raḥ pra̱divo̱ akā̍makarśana̱ḥ sakhā̱ sakhi̍bhya̱s tam i̱daṁ gṛ̍ṇīmasi || RV_1,053.02

śacī̍va indra purukṛd dyumattama̱ taved i̱dam a̱bhita̍ś cekite̱ vasu̍ |
ata̍ḥ sa̱ṁgṛbhyā̍bhibhūta̱ ā bha̍ra̱ mā tvā̍ya̱to ja̍ri̱tuḥ kāma̍m ūnayīḥ || RV_1,053.03

e̱bhir dyubhi̍ḥ su̱manā̍ e̱bhir indu̍bhir nirundhā̱no ama̍ti̱ṁ gobhi̍r a̱śvinā̍ |
indre̍ṇa̱ dasyu̍ṁ da̱raya̍nta̱ indu̍bhir yu̱tadve̍ṣasa̱ḥ sam i̱ṣā ra̍bhemahi || RV_1,053.04

sam i̍ndra rā̱yā sam i̱ṣā ra̍bhemahi̱ saṁ vāje̍bhiḥ puruśca̱ndrair a̱bhidyu̍bhiḥ |
saṁ de̱vyā prama̍tyā vī̱raśu̍ṣmayā̱ goa̍gra̱yāśvā̍vatyā rabhemahi || RV_1,053.05

te tvā̱ madā̍ amada̱n tāni̱ vṛṣṇyā̱ te somā̍so vṛtra̱hatye̍ṣu satpate |
yat kā̱rave̱ daśa̍ vṛ̱trāṇy a̍pra̱ti ba̱rhiṣma̍te̱ ni sa̱hasrā̍ṇi ba̱rhaya̍ḥ || RV_1,053.06

yu̱dhā yudha̱m upa̱ ghed e̍ṣi dhṛṣṇu̱yā pu̱rā pura̱ṁ sam i̱daṁ ha̱ṁsy oja̍sā |
namyā̱ yad i̍ndra̱ sakhyā̍ parā̱vati̍ niba̱rhayo̱ namu̍ci̱ṁ nāma̍ mā̱yina̍m || RV_1,053.07

tvaṁ kara̍ñjam u̱ta pa̱rṇaya̍ṁ vadhī̱s teji̍ṣṭhayātithi̱gvasya̍ varta̱nī |
tvaṁ śa̱tā vaṅgṛ̍dasyābhina̱t puro̍ 'nānu̱daḥ pari̍ṣūtā ṛ̱jiśva̍nā || RV_1,053.08

tvam e̱tāñ ja̍na̱rājño̱ dvir daśā̍ba̱ndhunā̍ su̱śrava̍sopaja̱gmuṣa̍ḥ |
ṣa̱ṣṭiṁ sa̱hasrā̍ nava̱tiṁ nava̍ śru̱to ni ca̱kreṇa̱ rathyā̍ du̱ṣpadā̍vṛṇak || RV_1,053.09

tvam ā̍vitha su̱śrava̍sa̱ṁ tavo̱tibhi̱s tava̱ trāma̍bhir indra̱ tūrva̍yāṇam |
tvam a̍smai̱ kutsa̍m atithi̱gvam ā̱yum ma̱he rājñe̱ yūne̍ arandhanāyaḥ || RV_1,053.10

ya u̱dṛcī̍ndra de̱vago̍pā̱ḥ sakhā̍yas te śi̱vata̍mā̱ asā̍ma |
tvāṁ sto̍ṣāma̱ tvayā̍ su̱vīrā̱ drāghī̍ya̱ āyu̍ḥ prata̱raṁ dadhā̍nāḥ || RV_1,053.11

mā no̍ a̱smin ma̍ghavan pṛ̱tsv aṁha̍si na̱hi te̱ anta̱ḥ śava̍saḥ parī̱ṇaśe̍ |
akra̍ndayo na̱dyo̱3̱̍ roru̍va̱d vanā̍ ka̱thā na kṣo̱ṇīr bhi̱yasā̱ sam ā̍rata || RV_1,054.01

arcā̍ śa̱krāya̍ śā̱kine̱ śacī̍vate śṛ̱ṇvanta̱m indra̍m ma̱haya̍nn a̱bhi ṣṭu̍hi |
yo dhṛ̱ṣṇunā̱ śava̍sā̱ roda̍sī u̱bhe vṛṣā̍ vṛṣa̱tvā vṛ̍ṣa̱bho nyṛ̱ñjate̍ || RV_1,054.02

arcā̍ di̱ve bṛ̍ha̱te śū̱ṣya1̱̍ṁ vaca̱ḥ svakṣa̍tra̱ṁ yasya̍ dhṛṣa̱to dhṛ̱ṣan mana̍ḥ |
bṛ̱hacchra̍vā̱ asu̍ro ba̱rhaṇā̍ kṛ̱taḥ pu̱ro hari̍bhyāṁ vṛṣa̱bho ratho̱ hi ṣaḥ || RV_1,054.03

tvaṁ di̱vo bṛ̍ha̱taḥ sānu̍ kopa̱yo 'va̱ tmanā̍ dhṛṣa̱tā śamba̍ram bhinat |
yan mā̱yino̍ vra̱ndino̍ ma̱ndinā̍ dhṛ̱ṣac chi̱tāṁ gabha̍stim a̱śani̍m pṛta̱nyasi̍ || RV_1,054.04

ni yad vṛ̱ṇakṣi̍ śvasa̱nasya̍ mū̱rdhani̱ śuṣṇa̍sya cid vra̱ndino̱ roru̍va̱d vanā̍ |
prā̱cīne̍na̱ mana̍sā ba̱rhaṇā̍vatā̱ yad a̱dyā ci̍t kṛ̱ṇava̱ḥ kas tvā̱ pari̍ || RV_1,054.05

tvam ā̍vitha̱ narya̍ṁ tu̱rvaśa̱ṁ yadu̱ṁ tvaṁ tu̱rvīti̍ṁ va̱yya̍ṁ śatakrato |
tvaṁ ratha̱m eta̍śa̱ṁ kṛtvye̱ dhane̱ tvam puro̍ nava̱tiṁ da̍mbhayo̱ nava̍ || RV_1,054.06

sa ghā̱ rājā̱ satpa̍tiḥ śūśuva̱j jano̍ rā̱taha̍vya̱ḥ prati̱ yaḥ śāsa̱m inva̍ti |
u̱kthā vā̱ yo a̍bhigṛ̱ṇāti̱ rādha̍sā̱ dānu̍r asmā̱ upa̍rā pinvate di̱vaḥ || RV_1,054.07

asa̍maṁ kṣa̱tram asa̍mā manī̱ṣā pra so̍ma̱pā apa̍sā santu̱ neme̍ |
ye ta̍ indra da̱duṣo̍ va̱rdhaya̍nti̱ mahi̍ kṣa̱traṁ sthavi̍ra̱ṁ vṛṣṇya̍ṁ ca || RV_1,054.08

tubhyed e̱te ba̍hu̱lā adri̍dugdhāś camū̱ṣada̍ś cama̱sā i̍ndra̱pānā̍ḥ |
vy a̍śnuhi ta̱rpayā̱ kāma̍m eṣā̱m athā̱ mano̍ vasu̱deyā̍ya kṛṣva || RV_1,054.09

a̱pām a̍tiṣṭhad dha̱ruṇa̍hvara̱ṁ tamo̱ 'ntar vṛ̱trasya̍ ja̱ṭhare̍ṣu̱ parva̍taḥ |
a̱bhīm indro̍ na̱dyo̍ va̱vriṇā̍ hi̱tā viśvā̍ anu̱ṣṭhāḥ pra̍va̱ṇeṣu̍ jighnate || RV_1,054.10

sa śevṛ̍dha̱m adhi̍ dhā dyu̱mnam a̱sme mahi̍ kṣa̱traṁ ja̍nā̱ṣāḻ i̍ndra̱ tavya̍m |
rakṣā̍ ca no ma̱ghona̍ḥ pā̱hi sū̱rīn rā̱ye ca̍ naḥ svapa̱tyā i̱ṣe dhā̍ḥ || RV_1,054.11

di̱vaś ci̍d asya vari̱mā vi pa̍pratha̱ indra̱ṁ na ma̱hnā pṛ̍thi̱vī ca̱na prati̍ |
bhī̱mas tuvi̍ṣmāñ carṣa̱ṇibhya̍ āta̱paḥ śiśī̍te̱ vajra̱ṁ teja̍se̱ na vaṁsa̍gaḥ || RV_1,055.01

so a̍rṇa̱vo na na̱dya̍ḥ samu̱driya̱ḥ prati̍ gṛbhṇāti̱ viśri̍tā̱ varī̍mabhiḥ |
indra̱ḥ soma̍sya pī̱taye̍ vṛṣāyate sa̱nāt sa yu̱dhma oja̍sā panasyate || RV_1,055.02

tvaṁ tam i̍ndra̱ parva̍ta̱ṁ na bhoja̍se ma̱ho nṛ̱mṇasya̱ dharma̍ṇām irajyasi |
pra vī̱rye̍ṇa de̱vatāti̍ cekite̱ viśva̍smā u̱graḥ karma̍ṇe pu̱rohi̍taḥ || RV_1,055.03

sa id vane̍ nama̱syubhi̍r vacasyate̱ cāru̱ jane̍ṣu prabruvā̱ṇa i̍ndri̱yam |
vṛṣā̱ chandu̍r bhavati harya̱to vṛṣā̱ kṣeme̍ṇa̱ dhenā̍m ma̱ghavā̱ yad inva̍ti || RV_1,055.04

sa in ma̱hāni̍ sami̱thāni̍ ma̱jmanā̍ kṛ̱ṇoti̍ yu̱dhma oja̍sā̱ jane̍bhyaḥ |
adhā̍ ca̱na śrad da̍dhati̱ tviṣī̍mata̱ indrā̍ya̱ vajra̍ṁ ni̱ghani̍ghnate va̱dham || RV_1,055.05

sa hi śra̍va̱syuḥ sada̍nāni kṛ̱trimā̍ kṣma̱yā vṛ̍dhā̱na oja̍sā vinā̱śaya̍n |
jyotī̍ṁṣi kṛ̱ṇvann a̍vṛ̱kāṇi̱ yajya̱ve 'va̍ su̱kratu̱ḥ sarta̱vā a̱paḥ sṛ̍jat || RV_1,055.06

dā̱nāya̱ mana̍ḥ somapāvann astu te̱ 'rvāñcā̱ harī̍ vandanaśru̱d ā kṛ̍dhi |
yami̍ṣṭhāsa̱ḥ sāra̍thayo̱ ya i̍ndra te̱ na tvā̱ ketā̱ ā da̍bhnuvanti̱ bhūrṇa̍yaḥ || RV_1,055.07

apra̍kṣita̱ṁ vasu̍ bibharṣi̱ hasta̍yo̱r aṣā̍ḻha̱ṁ saha̍s ta̱nvi̍ śru̱to da̍dhe |
āvṛ̍tāso 'va̱tāso̱ na ka̱rtṛbhi̍s ta̱nūṣu̍ te̱ krata̍va indra̱ bhūra̍yaḥ || RV_1,055.08

e̱ṣa pra pū̱rvīr ava̱ tasya̍ ca̱mriṣo 'tyo̱ na yoṣā̱m ud a̍yaṁsta bhu̱rvaṇi̍ḥ |
dakṣa̍m ma̱he pā̍yayate hira̱ṇyaya̱ṁ ratha̍m ā̱vṛtyā̱ hari̍yoga̱m ṛbhva̍sam || RV_1,056.01

taṁ gū̱rtayo̍ nema̱nniṣa̱ḥ parī̍ṇasaḥ samu̱draṁ na sa̱ṁcara̍ṇe sani̱ṣyava̍ḥ |
pati̱ṁ dakṣa̍sya vi̱datha̍sya̱ nū saho̍ gi̱riṁ na ve̱nā adhi̍ roha̱ teja̍sā || RV_1,056.02

sa tu̱rvaṇi̍r ma̱hām̐ a̍re̱ṇu pauṁsye̍ gi̱rer bhṛ̱ṣṭir na bhrā̍jate tu̱jā śava̍ḥ |
yena̱ śuṣṇa̍m mā̱yina̍m āya̱so made̍ du̱dhra ā̱bhūṣu̍ rā̱maya̱n ni dāma̍ni || RV_1,056.03

de̱vī yadi̱ tavi̍ṣī̱ tvāvṛ̍dho̱taya̱ indra̱ṁ siṣa̍kty u̱ṣasa̱ṁ na sūrya̍ḥ |
yo dhṛ̱ṣṇunā̱ śava̍sā̱ bādha̍te̱ tama̱ iya̍rti re̱ṇum bṛ̱had a̍rhari̱ṣvaṇi̍ḥ || RV_1,056.04

vi yat ti̱ro dha̱ruṇa̱m acyu̍ta̱ṁ rajo 'ti̍ṣṭhipo di̱va ātā̍su ba̱rhaṇā̍ |
sva̍rmīḻhe̱ yan mada̍ indra̱ harṣyāha̍n vṛ̱traṁ nir a̱pām au̍bjo arṇa̱vam || RV_1,056.05

tvaṁ di̱vo dha̱ruṇa̍ṁ dhiṣa̱ oja̍sā pṛthi̱vyā i̍ndra̱ sada̍neṣu̱ māhi̍naḥ |
tvaṁ su̱tasya̱ made̍ ariṇā a̱po vi vṛ̱trasya̍ sa̱mayā̍ pā̱ṣyā̍rujaḥ || RV_1,056.06

pra maṁhi̍ṣṭhāya bṛha̱te bṛ̱hadra̍ye sa̱tyaśu̍ṣmāya ta̱vase̍ ma̱tim bha̍re |
a̱pām i̍va prava̱ṇe yasya̍ du̱rdhara̱ṁ rādho̍ vi̱śvāyu̱ śava̍se̱ apā̍vṛtam || RV_1,057.01

adha̍ te̱ viśva̱m anu̍ hāsad i̱ṣṭaya̱ āpo̍ ni̱mneva̱ sava̍nā ha̱viṣma̍taḥ |
yat parva̍te̱ na sa̱maśī̍ta harya̱ta indra̍sya̱ vajra̱ḥ śnathi̍tā hira̱ṇyaya̍ḥ || RV_1,057.02

a̱smai bhī̱māya̱ nama̍sā̱ sam a̍dhva̱ra uṣo̱ na śu̍bhra̱ ā bha̍rā̱ panī̍yase |
yasya̱ dhāma̱ śrava̍se̱ nāme̍ndri̱yaṁ jyoti̱r akā̍ri ha̱rito̱ nāya̍se || RV_1,057.03

i̱me ta̍ indra̱ te va̱yam pu̍ruṣṭuta̱ ye tvā̱rabhya̱ carā̍masi prabhūvaso |
na̱hi tvad a̱nyo gi̍rvaṇo̱ gira̱ḥ sagha̍t kṣo̱ṇīr i̍va̱ prati̍ no harya̱ tad vaca̍ḥ || RV_1,057.04

bhūri̍ ta indra vī̱rya1̱̍ṁ tava̍ smasy a̱sya sto̱tur ma̍ghava̱n kāma̱m ā pṛ̍ṇa |
anu̍ te̱ dyaur bṛ̍ha̱tī vī̱rya̍m mama i̱yaṁ ca̍ te pṛthi̱vī ne̍ma̱ oja̍se || RV_1,057.05

tvaṁ tam i̍ndra̱ parva̍tam ma̱hām u̱ruṁ vajre̍ṇa vajrin parva̱śaś ca̍kartitha |
avā̍sṛjo̱ nivṛ̍tā̱ḥ sarta̱vā a̱paḥ sa̱trā viśva̍ṁ dadhiṣe̱ keva̍la̱ṁ saha̍ḥ || RV_1,057.06

nū ci̍t saho̱jā a̱mṛto̱ ni tu̍ndate̱ hotā̱ yad dū̱to abha̍vad vi̱vasva̍taḥ |
vi sādhi̍ṣṭhebhiḥ pa̱thibhī̱ rajo̍ mama̱ ā de̱vatā̍tā ha̱viṣā̍ vivāsati || RV_1,058.01

ā svam adma̍ yu̱vamā̍no a̱jara̍s tṛ̱ṣv a̍vi̱ṣyann a̍ta̱seṣu̍ tiṣṭhati |
atyo̱ na pṛ̱ṣṭham pru̍ṣi̱tasya̍ rocate di̱vo na sānu̍ sta̱naya̍nn acikradat || RV_1,058.02

krā̱ṇā ru̱drebhi̱r vasu̍bhiḥ pu̱rohi̍to̱ hotā̱ niṣa̍tto rayi̱ṣāḻ ama̍rtyaḥ |
ratho̱ na vi̱kṣv ṛ̍ñjasā̱na ā̱yuṣu̱ vy ā̍nu̱ṣag vāryā̍ de̱va ṛ̍ṇvati || RV_1,058.03

vi vāta̍jūto ata̱seṣu̍ tiṣṭhate̱ vṛthā̍ ju̱hūbhi̱ḥ sṛṇyā̍ tuvi̱ṣvaṇi̍ḥ |
tṛ̱ṣu yad a̍gne va̱nino̍ vṛṣā̱yase̍ kṛ̱ṣṇaṁ ta̱ ema̱ ruśa̍dūrme ajara || RV_1,058.04

tapu̍rjambho̱ vana̱ ā vāta̍codito yū̱the na sā̱hvām̐ ava̍ vāti̱ vaṁsa̍gaḥ |
a̱bhi̱vraja̱nn akṣi̍ta̱m pāja̍sā̱ raja̍ḥ sthā̱tuś ca̱ratha̍m bhayate pata̱triṇa̍ḥ || RV_1,058.05

da̱dhuṣ ṭvā̱ bhṛga̍vo̱ mānu̍ṣe̱ṣv ā ra̱yiṁ na cāru̍ṁ su̱hava̱ṁ jane̍bhyaḥ |
hotā̍ram agne̱ ati̍thi̱ṁ vare̍ṇyam mi̱traṁ na śeva̍ṁ di̱vyāya̱ janma̍ne || RV_1,058.06

hotā̍raṁ sa̱pta ju̱hvo̱3̱̍ yaji̍ṣṭha̱ṁ yaṁ vā̱ghato̍ vṛ̱ṇate̍ adhva̱reṣu̍ |
a̱gniṁ viśve̍ṣām ara̱tiṁ vasū̍nāṁ sapa̱ryāmi̱ praya̍sā̱ yāmi̱ ratna̍m || RV_1,058.07

acchi̍drā sūno sahaso no a̱dya sto̱tṛbhyo̍ mitramaha̱ḥ śarma̍ yaccha |
agne̍ gṛ̱ṇanta̱m aṁha̍sa uru̱ṣyorjo̍ napāt pū̱rbhir āya̍sībhiḥ || RV_1,058.08

bhavā̱ varū̍thaṁ gṛṇa̱te vi̍bhāvo̱ bhavā̍ maghavan ma̱ghava̍dbhya̱ḥ śarma̍ |
u̱ru̱ṣyāgne̱ aṁha̍so gṛ̱ṇanta̍m prā̱tar ma̱kṣū dhi̱yāva̍sur jagamyāt || RV_1,058.09

va̱yā id a̍gne a̱gnaya̍s te a̱nye tve viśve̍ a̱mṛtā̍ mādayante |
vaiśvā̍nara̱ nābhi̍r asi kṣitī̱nāṁ sthūṇe̍va̱ janā̍m̐ upa̱mid ya̍yantha || RV_1,059.01

mū̱rdhā di̱vo nābhi̍r a̱gniḥ pṛ̍thi̱vyā athā̍bhavad ara̱tī roda̍syoḥ |
taṁ tvā̍ de̱vāso̍ 'janayanta de̱vaṁ vaiśvā̍nara̱ jyoti̱r id āryā̍ya || RV_1,059.02

ā sūrye̱ na ra̱śmayo̍ dhru̱vāso̍ vaiśvāna̱re da̍dhire̱ 'gnā vasū̍ni |
yā parva̍te̱ṣv oṣa̍dhīṣv a̱psu yā mānu̍ṣe̱ṣv asi̱ tasya̱ rājā̍ || RV_1,059.03

bṛ̱ha̱tī i̍va sū̱nave̱ roda̍sī̱ giro̱ hotā̍ manu̱ṣyo̱3̱̍ na dakṣa̍ḥ |
sva̍rvate sa̱tyaśu̍ṣmāya pū̱rvīr vai̍śvāna̱rāya̱ nṛta̍māya ya̱hvīḥ || RV_1,059.04

di̱vaś ci̍t te bṛha̱to jā̍tavedo̱ vaiśvā̍nara̱ pra ri̍rice mahi̱tvam |
rājā̍ kṛṣṭī̱nām a̍si̱ mānu̍ṣīṇāṁ yu̱dhā de̱vebhyo̱ vari̍vaś cakartha || RV_1,059.05

pra nū ma̍hi̱tvaṁ vṛ̍ṣa̱bhasya̍ voca̱ṁ yam pū̱ravo̍ vṛtra̱haṇa̱ṁ saca̍nte |
vai̱śvā̱na̱ro dasyu̍m a̱gnir ja̍gha̱nvām̐ adhū̍no̱t kāṣṭhā̱ ava̱ śamba̍ram bhet || RV_1,059.06

vai̱śvā̱na̱ro ma̍hi̱mnā vi̱śvakṛ̍ṣṭir bha̱radvā̍jeṣu yaja̱to vi̱bhāvā̍ |
śā̱ta̱va̱ne̱ye śa̱tinī̍bhir a̱gniḥ pu̍ruṇī̱the ja̍rate sū̱nṛtā̍vān || RV_1,059.07

vahni̍ṁ ya̱śasa̍ṁ vi̱datha̍sya ke̱tuṁ su̍prā̱vya̍ṁ dū̱taṁ sa̱dyoa̍rtham |
dvi̱janmā̍naṁ ra̱yim i̍va praśa̱staṁ rā̱tim bha̍ra̱d bhṛga̍ve māta̱riśvā̍ || RV_1,060.01

a̱sya śāsu̍r u̱bhayā̍saḥ sacante ha̱viṣma̍nta u̱śijo̱ ye ca̱ martā̍ḥ |
di̱vaś ci̱t pūrvo̱ ny a̍sādi̱ hotā̱pṛcchyo̍ vi̱śpati̍r vi̱kṣu ve̱dhāḥ || RV_1,060.02

taṁ navya̍sī hṛ̱da ā jāya̍mānam a̱smat su̍kī̱rtir madhu̍jihvam aśyāḥ |
yam ṛ̱tvijo̍ vṛ̱jane̱ mānu̍ṣāsa̱ḥ praya̍svanta ā̱yavo̱ jīja̍nanta || RV_1,060.03

u̱śik pā̍va̱ko vasu̱r mānu̍ṣeṣu̱ vare̍ṇyo̱ hotā̍dhāyi vi̱kṣu |
damū̍nā gṛ̱hapa̍ti̱r dama̱ ām̐ a̱gnir bhu̍vad rayi̱patī̍ rayī̱ṇām || RV_1,060.04

taṁ tvā̍ va̱yam pati̍m agne rayī̱ṇām pra śa̍ṁsāmo ma̱tibhi̱r gota̍māsaḥ |
ā̱śuṁ na vā̍jambha̱ram ma̱rjaya̍ntaḥ prā̱tar ma̱kṣū dhi̱yāva̍sur jagamyāt || RV_1,060.05

a̱smā id u̱ pra ta̱vase̍ tu̱rāya̱ prayo̱ na ha̍rmi̱ stoma̱m māhi̍nāya |
ṛcī̍ṣamā̱yādhri̍gava̱ oha̱m indrā̍ya̱ brahmā̍ṇi rā̱tata̍mā || RV_1,061.01

a̱smā id u̱ praya̍ iva̱ pra ya̍ṁsi̱ bharā̍my āṅgū̱ṣam bādhe̍ suvṛ̱kti |
indrā̍ya hṛ̱dā mana̍sā manī̱ṣā pra̱tnāya̱ patye̱ dhiyo̍ marjayanta || RV_1,061.02

a̱smā id u̱ tyam u̍pa̱maṁ sva̱rṣām bharā̍my āṅgū̱ṣam ā̱sye̍na |
maṁhi̍ṣṭha̱m accho̍ktibhir matī̱nāṁ su̍vṛ̱ktibhi̍ḥ sū̱riṁ vā̍vṛ̱dhadhyai̍ || RV_1,061.03

a̱smā id u̱ stoma̱ṁ saṁ hi̍nomi̱ ratha̱ṁ na taṣṭe̍va̱ tatsi̍nāya |
gira̍ś ca̱ girvā̍hase suvṛ̱ktīndrā̍ya viśvami̱nvam medhi̍rāya || RV_1,061.04

a̱smā id u̱ sapti̍m iva śrava̱syendrā̍yā̱rkaṁ ju̱hvā̱3̱̍ sam a̍ñje |
vī̱raṁ dā̱nauka̍saṁ va̱ndadhyai̍ pu̱rāṁ gū̱rtaśra̍vasaṁ da̱rmāṇa̍m || RV_1,061.05

a̱smā id u̱ tvaṣṭā̍ takṣa̱d vajra̱ṁ svapa̍stamaṁ sva̱rya1̱̍ṁ raṇā̍ya |
vṛ̱trasya̍ cid vi̱dad yena̱ marma̍ tu̱jann īśā̍nas tuja̱tā ki̍ye̱dhāḥ || RV_1,061.06

a̱syed u̍ mā̱tuḥ sava̍neṣu sa̱dyo ma̱haḥ pi̱tum pa̍pi̱vāñ cārv annā̍ |
mu̱ṣā̱yad viṣṇu̍ḥ paca̱taṁ sahī̍yā̱n vidhya̍d varā̱haṁ ti̱ro adri̱m astā̍ || RV_1,061.07

a̱smā id u̱ gnāś ci̍d de̱vapa̍tnī̱r indrā̍yā̱rkam a̍hi̱hatya̍ ūvuḥ |
pari̱ dyāvā̍pṛthi̱vī ja̍bhra u̱rvī nāsya̱ te ma̍hi̱māna̱m pari̍ ṣṭaḥ || RV_1,061.08

a̱syed e̱va pra ri̍rice mahi̱tvaṁ di̱vas pṛ̍thi̱vyāḥ pary a̱ntari̍kṣāt |
sva̱rāḻ indro̱ dama̱ ā vi̱śvagū̍rtaḥ sva̱rir ama̍tro vavakṣe̱ raṇā̍ya || RV_1,061.09

a̱syed e̱va śava̍sā śu̱ṣanta̱ṁ vi vṛ̍śca̱d vajre̍ṇa vṛ̱tram indra̍ḥ |
gā na vrā̱ṇā a̱vanī̍r amuñcad a̱bhi śravo̍ dā̱vane̱ sace̍tāḥ || RV_1,061.10

a̱syed u̍ tve̱ṣasā̍ ranta̱ sindha̍va̱ḥ pari̱ yad vajre̍ṇa sī̱m aya̍cchat |
ī̱śā̱na̱kṛd dā̱śuṣe̍ daśa̱syan tu̱rvīta̍ye gā̱dhaṁ tu̱rvaṇi̍ḥ kaḥ || RV_1,061.11

a̱smā id u̱ pra bha̍rā̱ tūtu̍jāno vṛ̱trāya̱ vajra̱m īśā̍naḥ kiye̱dhāḥ |
gor na parva̱ vi ra̍dā tira̱śceṣya̱nn arṇā̍ṁsy a̱pāṁ ca̱radhyai̍ || RV_1,061.12

a̱syed u̱ pra brū̍hi pū̱rvyāṇi̍ tu̱rasya̱ karmā̍ṇi̱ navya̍ u̱kthaiḥ |
yu̱dhe yad i̍ṣṇā̱na āyu̍dhāny ṛghā̱yamā̍ṇo niri̱ṇāti̱ śatrū̍n || RV_1,061.13

a̱syed u̍ bhi̱yā gi̱raya̍ś ca dṛ̱ḻhā dyāvā̍ ca̱ bhūmā̍ ja̱nuṣa̍s tujete |
upo̍ ve̱nasya̱ jogu̍vāna o̱ṇiṁ sa̱dyo bhu̍vad vī̱ryā̍ya no̱dhāḥ || RV_1,061.14

a̱smā id u̱ tyad anu̍ dāyy eṣā̱m eko̱ yad va̱vne bhūre̱r īśā̍naḥ |
praita̍śa̱ṁ sūrye̍ paspṛdhā̱naṁ sauva̍śvye̱ suṣvi̍m āva̱d indra̍ḥ || RV_1,061.15

e̱vā te̍ hāriyojanā suvṛ̱ktīndra̱ brahmā̍ṇi̱ gota̍māso akran |
aiṣu̍ vi̱śvape̍śasa̱ṁ dhiya̍ṁ dhāḥ prā̱tar ma̱kṣū dhi̱yāva̍sur jagamyāt || RV_1,061.16

pra ma̍nmahe śavasā̱nāya̍ śū̱ṣam ā̍ṅgū̱ṣaṁ girva̍ṇase aṅgira̱svat |
su̱vṛ̱ktibhi̍ḥ stuva̱ta ṛ̍gmi̱yāyārcā̍mā̱rkaṁ nare̱ viśru̍tāya || RV_1,062.01

pra vo̍ ma̱he mahi̱ namo̍ bharadhvam āṅgū̱ṣya̍ṁ śavasā̱nāya̱ sāma̍ |
yenā̍ na̱ḥ pūrve̍ pi̱tara̍ḥ pada̱jñā arca̍nto̱ aṅgi̍raso̱ gā avi̍ndan || RV_1,062.02

indra̱syāṅgi̍rasāṁ ce̱ṣṭau vi̱dat sa̱ramā̱ tana̍yāya dhā̱sim |
bṛha̱spati̍r bhi̱nad adri̍ṁ vi̱dad gāḥ sam u̱sriyā̍bhir vāvaśanta̱ nara̍ḥ || RV_1,062.03

sa su̱ṣṭubhā̱ sa stu̱bhā sa̱pta viprai̍ḥ sva̱reṇādri̍ṁ sva̱ryo̱3̱̍ nava̍gvaiḥ |
sa̱ra̱ṇyubhi̍ḥ phali̱gam i̍ndra śakra va̱laṁ rave̍ṇa darayo̱ daśa̍gvaiḥ || RV_1,062.04

gṛ̱ṇā̱no aṅgi̍robhir dasma̱ vi va̍r u̱ṣasā̱ sūrye̍ṇa̱ gobhi̱r andha̍ḥ |
vi bhūmyā̍ aprathaya indra̱ sānu̍ di̱vo raja̱ upa̍ram astabhāyaḥ || RV_1,062.05

tad u̱ praya̍kṣatamam asya̱ karma̍ da̱smasya̱ cāru̍tamam asti̱ daṁsa̍ḥ |
u̱pa̱hva̱re yad upa̍rā̱ api̍nva̱n madhva̍rṇaso na̱dya1̱̍ś cata̍sraḥ || RV_1,062.06

dvi̱tā vi va̍vre sa̱najā̱ sanī̍ḻe a̱yāsya̱ḥ stava̍mānebhir a̱rkaiḥ |
bhago̱ na mene̍ para̱me vyo̍ma̱nn adhā̍raya̱d roda̍sī su̱daṁsā̍ḥ || RV_1,062.07

sa̱nād diva̱m pari̱ bhūmā̱ virū̍pe puna̱rbhuvā̍ yuva̱tī svebhi̱r evai̍ḥ |
kṛ̱ṣṇebhi̍r a̱ktoṣā ruśa̍dbhi̱r vapu̍rbhi̱r ā ca̍rato a̱nyānyā̍ || RV_1,062.08

sane̍mi sa̱khyaṁ sva̍pa̱syamā̍naḥ sū̱nur dā̍dhāra̱ śava̍sā su̱daṁsā̍ḥ |
ā̱māsu̍ cid dadhiṣe pa̱kvam a̱ntaḥ paya̍ḥ kṛ̱ṣṇāsu̱ ruśa̱d rohi̍ṇīṣu || RV_1,062.09

sa̱nāt sanī̍ḻā a̱vanī̍r avā̱tā vra̱tā ra̍kṣante a̱mṛtā̱ḥ saho̍bhiḥ |
pu̱rū sa̱hasrā̱ jana̍yo̱ na patnī̍r duva̱syanti̱ svasā̍ro̱ ahra̍yāṇam || RV_1,062.10

sa̱nā̱yuvo̱ nama̍sā̱ navyo̍ a̱rkair va̍sū̱yavo̍ ma̱tayo̍ dasma dadruḥ |
pati̱ṁ na patnī̍r uśa̱tīr u̱śanta̍ṁ spṛ̱śanti̍ tvā śavasāvan manī̱ṣāḥ || RV_1,062.11

sa̱nād e̱va tava̱ rāyo̱ gabha̍stau̱ na kṣīya̍nte̱ nopa̍ dasyanti dasma |
dyu̱mām̐ a̍si̱ kratu̍mām̐ indra̱ dhīra̱ḥ śikṣā̍ śacīva̱s tava̍ na̱ḥ śacī̍bhiḥ || RV_1,062.12

sa̱nā̱ya̱te gota̍ma indra̱ navya̱m ata̍kṣa̱d brahma̍ hari̱yoja̍nāya |
su̱nī̱thāya̍ naḥ śavasāna no̱dhāḥ prā̱tar ma̱kṣū dhi̱yāva̍sur jagamyāt || RV_1,062.13

tvam ma̱hām̐ i̍ndra̱ yo ha̱ śuṣmai̱r dyāvā̍ jajñā̱naḥ pṛ̍thi̱vī ame̍ dhāḥ |
yad dha̍ te̱ viśvā̍ gi̱raya̍ś ci̱d abhvā̍ bhi̱yā dṛ̱ḻhāsa̍ḥ ki̱raṇā̱ naija̍n || RV_1,063.01

ā yad dharī̍ indra̱ vivra̍tā̱ ver ā te̱ vajra̍ṁ jari̱tā bā̱hvor dhā̍t |
yenā̍viharyatakrato a̱mitrā̱n pura̍ i̱ṣṇāsi̍ puruhūta pū̱rvīḥ || RV_1,063.02

tvaṁ sa̱tya i̍ndra dhṛ̱ṣṇur e̱tān tvam ṛ̍bhu̱kṣā narya̱s tvaṁ ṣāṭ |
tvaṁ śuṣṇa̍ṁ vṛ̱jane̍ pṛ̱kṣa ā̱ṇau yūne̱ kutsā̍ya dyu̱mate̱ sacā̍han || RV_1,063.03

tvaṁ ha̱ tyad i̍ndra codī̱ḥ sakhā̍ vṛ̱traṁ yad va̍jrin vṛṣakarmann u̱bhnāḥ |
yad dha̍ śūra vṛṣamaṇaḥ parā̱cair vi dasyū̱m̐r yonā̱v akṛ̍to vṛthā̱ṣāṭ || RV_1,063.04

tvaṁ ha̱ tyad i̱ndrāri̍ṣaṇyan dṛ̱ḻhasya̍ ci̱n martā̍nā̱m aju̍ṣṭau |
vy a1̱̍smad ā kāṣṭhā̱ arva̍te var gha̱neva̍ vajriñ chnathihy a̱mitrā̍n || RV_1,063.05

tvāṁ ha̱ tyad i̱ndrārṇa̍sātau̱ sva̍rmīḻhe̱ nara̍ ā̱jā ha̍vante |
tava̍ svadhāva i̱yam ā sa̍ma̱rya ū̱tir vāje̍ṣv ata̱sāyyā̍ bhūt || RV_1,063.06

tvaṁ ha̱ tyad i̍ndra sa̱pta yudhya̱n puro̍ vajrin puru̱kutsā̍ya dardaḥ |
ba̱rhir na yat su̱dāse̱ vṛthā̱ varg a̱ṁho rā̍ja̱n vari̍vaḥ pū̱rave̍ kaḥ || RV_1,063.07

tvaṁ tyāṁ na̍ indra deva ci̱trām iṣa̱m āpo̱ na pī̍paya̱ḥ pari̍jman |
yayā̍ śūra̱ praty a̱smabhya̱ṁ yaṁsi̱ tmana̱m ūrja̱ṁ na vi̱śvadha̱ kṣara̍dhyai || RV_1,063.08

akā̍ri ta indra̱ gota̍mebhi̱r brahmā̱ṇy oktā̱ nama̍sā̱ hari̍bhyām |
su̱peśa̍sa̱ṁ vāja̱m ā bha̍rā naḥ prā̱tar ma̱kṣū dhi̱yāva̍sur jagamyāt || RV_1,063.09

vṛṣṇe̱ śardhā̍ya̱ suma̍khāya ve̱dhase̱ nodha̍ḥ suvṛ̱ktim pra bha̍rā ma̱rudbhya̍ḥ |
a̱po na dhīro̱ mana̍sā su̱hastyo̱ gira̱ḥ sam a̍ñje vi̱dathe̍ṣv ā̱bhuva̍ḥ || RV_1,064.01

te ja̍jñire di̱va ṛ̱ṣvāsa̍ u̱kṣaṇo̍ ru̱drasya̱ maryā̱ asu̍rā are̱pasa̍ḥ |
pā̱va̱kāsa̱ḥ śuca̍ya̱ḥ sūryā̍ iva̱ satvā̍no̱ na dra̱psino̍ gho̱rava̍rpasaḥ || RV_1,064.02

yuvā̍no ru̱drā a̱jarā̍ abho̱gghano̍ vava̱kṣur adhri̍gāva̱ḥ parva̍tā iva |
dṛ̱ḻhā ci̱d viśvā̱ bhuva̍nāni̱ pārthi̍vā̱ pra cyā̍vayanti di̱vyāni̍ ma̱jmanā̍ || RV_1,064.03

ci̱trair a̱ñjibhi̱r vapu̍ṣe̱ vy a̍ñjate̱ vakṣa̍ḥsu ru̱kmām̐ adhi̍ yetire śu̱bhe |
aṁse̍ṣv eṣā̱ṁ ni mi̍mṛkṣur ṛ̱ṣṭaya̍ḥ sā̱kaṁ ja̍jñire sva̱dhayā̍ di̱vo nara̍ḥ || RV_1,064.04

ī̱śā̱na̱kṛto̱ dhuna̍yo ri̱śāda̍so̱ vātā̍n vi̱dyuta̱s tavi̍ṣībhir akrata |
du̱hanty ūdha̍r di̱vyāni̱ dhūta̍yo̱ bhūmi̍m pinvanti̱ paya̍sā̱ pari̍jrayaḥ || RV_1,064.05

pinva̍nty a̱po ma̱ruta̍ḥ su̱dāna̍va̱ḥ payo̍ ghṛ̱tava̍d vi̱dathe̍ṣv ā̱bhuva̍ḥ |
atya̱ṁ na mi̱he vi na̍yanti vā̱jina̱m utsa̍ṁ duhanti sta̱naya̍nta̱m akṣi̍tam || RV_1,064.06

ma̱hi̱ṣāso̍ mā̱yina̍ś ci̱trabhā̍navo gi̱rayo̱ na svata̍vaso raghu̱ṣyada̍ḥ |
mṛ̱gā i̍va ha̱stina̍ḥ khādathā̱ vanā̱ yad āru̍ṇīṣu̱ tavi̍ṣī̱r ayu̍gdhvam || RV_1,064.07

si̱ṁhā i̍va nānadati̱ prace̍tasaḥ pi̱śā i̍va su̱piśo̍ vi̱śvave̍dasaḥ |
kṣapo̱ jinva̍nta̱ḥ pṛṣa̍tībhir ṛ̱ṣṭibhi̱ḥ sam it sa̱bādha̱ḥ śava̱sāhi̍manyavaḥ || RV_1,064.08

roda̍sī̱ ā va̍datā gaṇaśriyo̱ nṛṣā̍caḥ śūrā̱ḥ śava̱sāhi̍manyavaḥ |
ā va̱ndhure̍ṣv a̱mati̱r na da̍rśa̱tā vi̱dyun na ta̍sthau maruto̱ rathe̍ṣu vaḥ || RV_1,064.09

vi̱śvave̍daso ra̱yibhi̱ḥ samo̍kasa̱ḥ sammi̍ślāsa̱s tavi̍ṣībhir vira̱pśina̍ḥ |
astā̍ra̱ iṣu̍ṁ dadhire̱ gabha̍styor ana̱ntaśu̍ṣmā̱ vṛṣa̍khādayo̱ nara̍ḥ || RV_1,064.10

hi̱ra̱ṇyaye̍bhiḥ pa̱vibhi̍ḥ payo̱vṛdha̱ ujji̍ghnanta āpa̱thyo̱3̱̍ na parva̍tān |
ma̱khā a̱yāsa̍ḥ sva̱sṛto̍ dhruva̱cyuto̍ dudhra̱kṛto̍ ma̱ruto̱ bhrāja̍dṛṣṭayaḥ || RV_1,064.11

ghṛṣu̍m pāva̱kaṁ va̱nina̱ṁ vica̍rṣaṇiṁ ru̱drasya̍ sū̱nuṁ ha̱vasā̍ gṛṇīmasi |
ra̱ja̱stura̍ṁ ta̱vasa̱m māru̍taṁ ga̱ṇam ṛ̍jī̱ṣiṇa̱ṁ vṛṣa̍ṇaṁ saścata śri̱ye || RV_1,064.12

pra nū sa marta̱ḥ śava̍sā̱ janā̱m̐ ati̍ ta̱sthau va̍ ū̱tī ma̍ruto̱ yam āva̍ta |
arva̍dbhi̱r vāja̍m bharate̱ dhanā̱ nṛbhi̍r ā̱pṛcchya̱ṁ kratu̱m ā kṣe̍ti̱ puṣya̍ti || RV_1,064.13

ca̱rkṛtya̍m marutaḥ pṛ̱tsu du̱ṣṭara̍ṁ dyu̱manta̱ṁ śuṣma̍m ma̱ghava̍tsu dhattana |
dha̱na̱spṛta̍m u̱kthya̍ṁ vi̱śvaca̍rṣaṇiṁ to̱kam pu̍ṣyema̱ tana̍yaṁ śa̱taṁ himā̍ḥ || RV_1,064.14

nū ṣṭhi̱ram ma̍ruto vī̱rava̍ntam ṛtī̱ṣāha̍ṁ ra̱yim a̱smāsu̍ dhatta |
sa̱ha̱sriṇa̍ṁ śa̱tina̍ṁ śūśu̱vāṁsa̍m prā̱tar ma̱kṣū dhi̱yāva̍sur jagamyāt || RV_1,064.15

pa̱śvā na tā̱yuṁ guhā̱ cata̍nta̱ṁ namo̍ yujā̱naṁ namo̱ vaha̍ntam || RV_1,065.01

sa̱joṣā̱ dhīrā̍ḥ pa̱dair anu̍ gma̱nn upa̍ tvā sīda̱n viśve̱ yaja̍trāḥ || RV_1,065.02

ṛ̱tasya̍ de̱vā anu̍ vra̱tā gu̱r bhuva̱t pari̍ṣṭi̱r dyaur na bhūma̍ || RV_1,065.03

vardha̍ntī̱m āpa̍ḥ pa̱nvā suśi̍śvim ṛ̱tasya̱ yonā̱ garbhe̱ sujā̍tam || RV_1,065.04

pu̱ṣṭir na ra̱ṇvā kṣi̱tir na pṛ̱thvī gi̱rir na bhujma̱ kṣodo̱ na śa̱mbhu || RV_1,065.05

atyo̱ nājma̱n sarga̍pratakta̱ḥ sindhu̱r na kṣoda̱ḥ ka ī̍ṁ varāte || RV_1,065.06

jā̱miḥ sindhū̍nā̱m bhrāte̍va̱ svasrā̱m ibhyā̱n na rājā̱ vanā̍ny atti || RV_1,065.07

yad vāta̍jūto̱ vanā̱ vy asthā̍d a̱gnir ha̍ dāti̱ romā̍ pṛthi̱vyāḥ || RV_1,065.08

śvasi̍ty a̱psu ha̱ṁso na sīda̱n kratvā̱ ceti̍ṣṭho vi̱śām u̍ṣa̱rbhut || RV_1,065.09

somo̱ na ve̱dhā ṛ̱tapra̍jātaḥ pa̱śur na śiśvā̍ vi̱bhur dū̱rebhā̍ḥ || RV_1,065.10

ra̱yir na ci̱trā sūro̱ na sa̱ṁdṛg āyu̱r na prā̱ṇo nityo̱ na sū̱nuḥ || RV_1,066.01

takvā̱ na bhūrṇi̱r vanā̍ siṣakti̱ payo̱ na dhe̱nuḥ śuci̍r vi̱bhāvā̍ || RV_1,066.02

dā̱dhāra̱ kṣema̱m oko̱ na ra̱ṇvo yavo̱ na pa̱kvo jetā̱ janā̍nām || RV_1,066.03

ṛṣi̱r na stubhvā̍ vi̱kṣu pra̍śa̱sto vā̱jī na prī̱to vayo̍ dadhāti || RV_1,066.04

du̱roka̍śoci̱ḥ kratu̱r na nityo̍ jā̱yeva̱ yonā̱v ara̱ṁ viśva̍smai || RV_1,066.05

ci̱tro yad abhrā̍ṭ chve̱to na vi̱kṣu ratho̱ na ru̱kmī tve̱ṣaḥ sa̱matsu̍ || RV_1,066.06

sene̍va sṛ̱ṣṭāma̍ṁ dadhā̱ty astu̱r na di̱dyut tve̱ṣapra̍tīkā || RV_1,066.07

ya̱mo ha̍ jā̱to ya̱mo jani̍tvaṁ jā̱raḥ ka̱nīnā̱m pati̱r janī̍nām || RV_1,066.08

taṁ va̍ś ca̱rāthā̍ va̱yaṁ va̍sa̱tyāsta̱ṁ na gāvo̱ nakṣa̍nta i̱ddham || RV_1,066.09

sindhu̱r na kṣoda̱ḥ pra nīcī̍r aino̱n nava̍nta̱ gāva̱ḥ sva1̱̍r dṛśī̍ke || RV_1,066.10

vane̍ṣu jā̱yur marte̍ṣu mi̱tro vṛ̍ṇī̱te śru̱ṣṭiṁ rāje̍vāju̱ryam || RV_1,067.01

kṣemo̱ na sā̱dhuḥ kratu̱r na bha̱dro bhuva̍t svā̱dhīr hotā̍ havya̱vāṭ || RV_1,067.02

haste̱ dadhā̍no nṛ̱mṇā viśvā̱ny ame̍ de̱vān dhā̱d guhā̍ ni̱ṣīda̍n || RV_1,067.03

vi̱dantī̱m atra̱ naro̍ dhiya̱ṁdhā hṛ̱dā yat ta̱ṣṭān mantrā̱m̐ aśa̍ṁsan || RV_1,067.04

a̱jo na kṣāṁ dā̱dhāra̍ pṛthi̱vīṁ ta̱stambha̱ dyām mantre̍bhiḥ sa̱tyaiḥ || RV_1,067.05

pri̱yā pa̱dāni̍ pa̱śvo ni pā̍hi vi̱śvāyu̍r agne gu̱hā guha̍ṁ gāḥ || RV_1,067.06

ya ī̍ṁ ci̱keta̱ guhā̱ bhava̍nta̱m ā yaḥ sa̱sāda̱ dhārā̍m ṛ̱tasya̍ || RV_1,067.07

vi ye cṛ̱tanty ṛ̱tā sapa̍nta̱ ād id vasū̍ni̱ pra va̍vācāsmai || RV_1,067.08

vi yo vī̱rutsu̱ rodha̍n mahi̱tvota pra̱jā u̱ta pra̱sūṣv a̱ntaḥ || RV_1,067.09

citti̍r a̱pāṁ dame̍ vi̱śvāyu̱ḥ sadme̍va̱ dhīrā̍ḥ sa̱mmāya̍ cakruḥ || RV_1,067.10

śrī̱ṇann upa̍ sthā̱d diva̍m bhura̱ṇyuḥ sthā̱tuś ca̱ratha̍m a̱ktūn vy ū̍rṇot || RV_1,068.01

pari̱ yad e̍ṣā̱m eko̱ viśve̍ṣā̱m bhuva̍d de̱vo de̱vānā̍m mahi̱tvā || RV_1,068.02

ād it te̱ viśve̱ kratu̍ṁ juṣanta̱ śuṣkā̱d yad de̍va jī̱vo jani̍ṣṭhāḥ || RV_1,068.03

bhaja̍nta̱ viśve̍ deva̱tvaṁ nāma̍ ṛ̱taṁ sapa̍nto a̱mṛta̱m evai̍ḥ || RV_1,068.04

ṛ̱tasya̱ preṣā̍ ṛ̱tasya̍ dhī̱tir vi̱śvāyu̱r viśve̱ apā̍ṁsi cakruḥ || RV_1,068.05

yas tubhya̱ṁ dāśā̱d yo vā̍ te̱ śikṣā̱t tasmai̍ ciki̱tvān ra̱yiṁ da̍yasva || RV_1,068.06

hotā̱ niṣa̍tto̱ mano̱r apa̍tye̱ sa ci̱n nv ā̍sā̱m patī̍ rayī̱ṇām || RV_1,068.07

i̱cchanta̱ reto̍ mi̱thas ta̱nūṣu̱ saṁ jā̍nata̱ svair dakṣai̱r amū̍rāḥ || RV_1,068.08

pi̱tur na pu̱trāḥ kratu̍ṁ juṣanta̱ śroṣa̱n ye a̍sya̱ śāsa̍ṁ tu̱rāsa̍ḥ || RV_1,068.09

vi rāya̍ aurṇo̱d dura̍ḥ puru̱kṣuḥ pi̱peśa̱ nāka̱ṁ stṛbhi̱r damū̍nāḥ || RV_1,068.10

śu̱kraḥ śu̍śu̱kvām̐ u̱ṣo na jā̱raḥ pa̱prā sa̍mī̱cī di̱vo na jyoti̍ḥ || RV_1,069.01

pari̱ prajā̍ta̱ḥ kratvā̍ babhūtha̱ bhuvo̍ de̱vānā̍m pi̱tā pu̱traḥ san || RV_1,069.02

ve̱dhā adṛ̍pto a̱gnir vi̍jā̱nann ūdha̱r na gonā̱ṁ svādmā̍ pitū̱nām || RV_1,069.03

jane̱ na śeva̍ ā̱hūrya̱ḥ san madhye̱ niṣa̍tto ra̱ṇvo du̍ro̱ṇe || RV_1,069.04

pu̱tro na jā̱to ra̱ṇvo du̍ro̱ṇe vā̱jī na prī̱to viśo̱ vi tā̍rīt || RV_1,069.05

viśo̱ yad ahve̱ nṛbhi̱ḥ sanī̍ḻā a̱gnir de̍va̱tvā viśvā̍ny aśyāḥ || RV_1,069.06

naki̍ṣ ṭa e̱tā vra̱tā mi̍nanti̱ nṛbhyo̱ yad e̱bhyaḥ śru̱ṣṭiṁ ca̱kartha̍ || RV_1,069.07

tat tu te̱ daṁso̱ yad aha̍n samā̱nair nṛbhi̱r yad yu̱kto vi̱ve rapā̍ṁsi || RV_1,069.08

u̱ṣo na jā̱ro vi̱bhāvo̱sraḥ saṁjñā̍tarūpa̱ś cike̍tad asmai || RV_1,069.09

tmanā̱ vaha̍nto̱ duro̱ vy ṛ̍ṇva̱n nava̍nta̱ viśve̱ sva1̱̍r dṛśī̍ke || RV_1,069.10

va̱nema̍ pū̱rvīr a̱ryo ma̍nī̱ṣā a̱gniḥ su̱śoko̱ viśvā̍ny aśyāḥ || RV_1,070.01

ā daivyā̍ni vra̱tā ci̍ki̱tvān ā mānu̍ṣasya̱ jana̍sya̱ janma̍ || RV_1,070.02

garbho̱ yo a̱pāṁ garbho̱ vanā̍nā̱ṁ garbha̍ś ca sthā̱tāṁ garbha̍ś ca̱rathā̍m || RV_1,070.03

adrau̍ cid asmā a̱ntar du̍ro̱ṇe vi̱śāṁ na viśvo̍ a̱mṛta̍ḥ svā̱dhīḥ || RV_1,070.04

sa hi kṣa̱pāvā̍m̐ a̱gnī ra̍yī̱ṇāṁ dāśa̱d yo a̍smā̱ ara̍ṁ sū̱ktaiḥ || RV_1,070.05

e̱tā ci̍kitvo̱ bhūmā̱ ni pā̍hi de̱vānā̱ṁ janma̱ martā̍m̐ś ca vi̱dvān || RV_1,070.06

vardhā̱n yam pū̱rvīḥ kṣa̱po virū̍pāḥ sthā̱tuś ca̱ ratha̍m ṛ̱tapra̍vītam || RV_1,070.07

arā̍dhi̱ hotā̱ sva1̱̍r niṣa̍ttaḥ kṛ̱ṇvan viśvā̱ny apā̍ṁsi sa̱tyā || RV_1,070.08

goṣu̱ praśa̍sti̱ṁ vane̍ṣu dhiṣe̱ bhara̍nta̱ viśve̍ ba̱liṁ sva̍r ṇaḥ || RV_1,070.09

vi tvā̱ nara̍ḥ puru̱trā sa̍paryan pi̱tur na jivre̱r vi vedo̍ bharanta || RV_1,070.10

sā̱dhur na gṛ̱dhnur aste̍va̱ śūro̱ yāte̍va bhī̱mas tve̱ṣaḥ sa̱matsu̍ || RV_1,070.11

upa̱ pra ji̍nvann uśa̱tīr u̱śanta̱m pati̱ṁ na nitya̱ṁ jana̍ya̱ḥ sanī̍ḻāḥ |
svasā̍ra̱ḥ śyāvī̱m aru̍ṣīm ajuṣrañ ci̱tram u̱cchantī̍m u̱ṣasa̱ṁ na gāva̍ḥ || RV_1,071.01

vī̱ḻu ci̍d dṛ̱ḻhā pi̱taro̍ na u̱kthair adri̍ṁ ruja̱nn aṅgi̍raso̱ rave̍ṇa |
ca̱krur di̱vo bṛ̍ha̱to gā̱tum a̱sme aha̱ḥ sva̍r vividuḥ ke̱tum u̱srāḥ || RV_1,071.02

dadha̍nn ṛ̱taṁ dha̱naya̍nn asya dhī̱tim ād id a̱ryo di̍dhi̱ṣvo̱3̱̍ vibhṛ̍trāḥ |
atṛ̍ṣyantīr a̱paso̍ ya̱nty acchā̍ de̱vāñ janma̱ praya̍sā va̱rdhaya̍ntīḥ || RV_1,071.03

mathī̱d yad ī̱ṁ vibhṛ̍to māta̱riśvā̍ gṛ̱he-gṛ̍he śye̱to jenyo̱ bhūt |
ād ī̱ṁ rājñe̱ na sahī̍yase̱ sacā̱ sann ā dū̱tya1̱̍m bhṛga̍vāṇo vivāya || RV_1,071.04

ma̱he yat pi̱tra ī̱ṁ rasa̍ṁ di̱ve kar ava̍ tsarat pṛśa̱nya̍ś ciki̱tvān |
sṛ̱jad astā̍ dhṛṣa̱tā di̱dyum a̍smai̱ svāyā̍ṁ de̱vo du̍hi̱tari̱ tviṣi̍ṁ dhāt || RV_1,071.05

sva ā yas tubhya̱ṁ dama̱ ā vi̱bhāti̱ namo̍ vā̱ dāśā̍d uśa̱to anu̱ dyūn |
vardho̍ agne̱ vayo̍ asya dvi̱barhā̱ yāsa̍d rā̱yā sa̱ratha̱ṁ yaṁ ju̱nāsi̍ || RV_1,071.06

a̱gniṁ viśvā̍ a̱bhi pṛkṣa̍ḥ sacante samu̱draṁ na sra̱vata̍ḥ sa̱pta ya̱hvīḥ |
na jā̱mibhi̱r vi ci̍kite̱ vayo̍ no vi̱dā de̱veṣu̱ prama̍tiṁ ciki̱tvān || RV_1,071.07

ā yad i̱ṣe nṛ̱pati̱ṁ teja̱ āna̱ṭ chuci̱ reto̱ niṣi̍kta̱ṁ dyaur a̱bhīke̍ |
a̱gniḥ śardha̍m anava̱dyaṁ yuvā̍naṁ svā̱dhya̍ṁ janayat sū̱daya̍c ca || RV_1,071.08

mano̱ na yo 'dhva̍naḥ sa̱dya ety eka̍ḥ sa̱trā sūro̱ vasva̍ īśe |
rājā̍nā mi̱trāvaru̍ṇā supā̱ṇī goṣu̍ pri̱yam a̱mṛta̱ṁ rakṣa̍māṇā || RV_1,071.09

mā no̍ agne sa̱khyā pitryā̍ṇi̱ pra ma̍rṣiṣṭhā a̱bhi vi̱duṣ ka̱viḥ san |
nabho̱ na rū̱paṁ ja̍ri̱mā mi̍nāti pu̱rā tasyā̍ a̱bhiśa̍ste̱r adhī̍hi || RV_1,071.10

ni kāvyā̍ ve̱dhasa̱ḥ śaśva̍tas ka̱r haste̱ dadhā̍no̱ naryā̍ pu̱rūṇi̍ |
a̱gnir bhu̍vad rayi̱patī̍ rayī̱ṇāṁ sa̱trā ca̍krā̱ṇo a̱mṛtā̍ni̱ viśvā̍ || RV_1,072.01

a̱sme va̱tsam pari̱ ṣanta̱ṁ na vi̍ndann i̱cchanto̱ viśve̍ a̱mṛtā̱ amū̍rāḥ |
śra̱ma̱yuva̍ḥ pada̱vyo̍ dhiya̱ṁdhās ta̱sthuḥ pa̱de pa̍ra̱me cārv a̱gneḥ || RV_1,072.02

ti̱sro yad a̍gne śa̱rada̱s tvām ic chuci̍ṁ ghṛ̱tena̱ śuca̍yaḥ sapa̱ryān |
nāmā̍ni cid dadhire ya̱jñiyā̱ny asū̍dayanta ta̱nva1̱̍ḥ sujā̍tāḥ || RV_1,072.03

ā roda̍sī bṛha̱tī vevi̍dānā̱ḥ pra ru̱driyā̍ jabhrire ya̱jñiyā̍saḥ |
vi̱dan marto̍ ne̱madhi̍tā ciki̱tvān a̱gnim pa̱de pa̍ra̱me ta̍sthi̱vāṁsa̍m || RV_1,072.04

sa̱ṁjā̱nā̱nā upa̍ sīdann abhi̱jñu patnī̍vanto nama̱sya̍ṁ namasyan |
ri̱ri̱kvāṁsa̍s ta̱nva̍ḥ kṛṇvata̱ svāḥ sakhā̱ sakhyu̍r ni̱miṣi̱ rakṣa̍māṇāḥ || RV_1,072.05

triḥ sa̱pta yad guhyā̍ni̱ tve it pa̱dāvi̍da̱n nihi̍tā ya̱jñiyā̍saḥ |
tebhī̍ rakṣante a̱mṛta̍ṁ sa̱joṣā̍ḥ pa̱śūñ ca̍ sthā̱tṝñ ca̱ratha̍ṁ ca pāhi || RV_1,072.06

vi̱dvām̐ a̍gne va̱yunā̍ni kṣitī̱nāṁ vy ā̍nu̱ṣak chu̱rudho̍ jī̱vase̍ dhāḥ |
a̱nta̱rvi̱dvām̐ adhva̍no deva̱yānā̱n ata̍ndro dū̱to a̍bhavo havi̱rvāṭ || RV_1,072.07

svā̱dhyo̍ di̱va ā sa̱pta ya̱hvī rā̱yo duro̱ vy ṛ̍ta̱jñā a̍jānan |
vi̱dad gavya̍ṁ sa̱ramā̍ dṛ̱ḻham ū̱rvaṁ yenā̱ nu ka̱m mānu̍ṣī̱ bhoja̍te̱ viṭ || RV_1,072.08

ā ye viśvā̍ svapa̱tyāni̍ ta̱sthuḥ kṛ̍ṇvā̱nāso̍ amṛta̱tvāya̍ gā̱tum |
ma̱hnā ma̱hadbhi̍ḥ pṛthi̱vī vi ta̍sthe mā̱tā pu̱trair adi̍ti̱r dhāya̍se̱ veḥ || RV_1,072.09

adhi̱ śriya̱ṁ ni da̍dhu̱ś cāru̍m asmin di̱vo yad a̱kṣī a̱mṛtā̱ akṛ̍ṇvan |
adha̍ kṣaranti̱ sindha̍vo̱ na sṛ̱ṣṭāḥ pra nīcī̍r agne̱ aru̍ṣīr ajānan || RV_1,072.10

ra̱yir na yaḥ pi̍tṛvi̱tto va̍yo̱dhāḥ su̱praṇī̍tiś ciki̱tuṣo̱ na śāsu̍ḥ |
syo̱na̱śīr ati̍thi̱r na prī̍ṇā̱no hote̍va̱ sadma̍ vidha̱to vi tā̍rīt || RV_1,073.01

de̱vo na yaḥ sa̍vi̱tā sa̱tyama̍nmā̱ kratvā̍ ni̱pāti̍ vṛ̱janā̍ni̱ viśvā̍ |
pu̱ru̱pra̱śa̱sto a̱mati̱r na sa̱tya ā̱tmeva̱ śevo̍ didhi̱ṣāyyo̍ bhūt || RV_1,073.02

de̱vo na yaḥ pṛ̍thi̱vīṁ vi̱śvadhā̍yā upa̱kṣeti̍ hi̱tami̍tro̱ na rājā̍ |
pu̱ra̱ḥsada̍ḥ śarma̱sado̱ na vī̱rā a̍nava̱dyā pati̍juṣṭeva̱ nārī̍ || RV_1,073.03

taṁ tvā̱ naro̱ dama̱ ā nitya̍m i̱ddham agne̱ saca̍nta kṣi̱tiṣu̍ dhru̱vāsu̍ |
adhi̍ dyu̱mnaṁ ni da̍dhu̱r bhūry a̍smi̱n bhavā̍ vi̱śvāyu̍r dha̱ruṇo̍ rayī̱ṇām || RV_1,073.04

vi pṛkṣo̍ agne ma̱ghavā̍no aśyu̱r vi sū̱rayo̱ dada̍to̱ viśva̱m āyu̍ḥ |
sa̱nema̱ vāja̍ṁ sami̱theṣv a̱ryo bhā̱gaṁ de̱veṣu̱ śrava̍se̱ dadhā̍nāḥ || RV_1,073.05

ṛ̱tasya̱ hi dhe̱navo̍ vāvaśā̱nāḥ smadū̍dhnīḥ pī̱paya̍nta̱ dyubha̍ktāḥ |
pa̱rā̱vata̍ḥ suma̱tim bhikṣa̍māṇā̱ vi sindha̍vaḥ sa̱mayā̍ sasru̱r adri̍m || RV_1,073.06

tve a̍gne suma̱tim bhikṣa̍māṇā di̱vi śravo̍ dadhire ya̱jñiyā̍saḥ |
naktā̍ ca ca̱krur u̱ṣasā̱ virū̍pe kṛ̱ṣṇaṁ ca̱ varṇa̍m aru̱ṇaṁ ca̱ saṁ dhu̍ḥ || RV_1,073.07

yān rā̱ye martā̱n suṣū̍do agne̱ te syā̍ma ma̱ghavā̍no va̱yaṁ ca̍ |
chā̱yeva̱ viśva̱m bhuva̍naṁ sisakṣy āpapri̱vān roda̍sī a̱ntari̍kṣam || RV_1,073.08

arva̍dbhir agne̱ arva̍to̱ nṛbhi̱r nṝn vī̱rair vī̱rān va̍nuyāmā̱ tvotā̍ḥ |
ī̱śā̱nāsa̍ḥ pitṛvi̱ttasya̍ rā̱yo vi sū̱raya̍ḥ śa̱tahi̍mā no aśyuḥ || RV_1,073.09

e̱tā te̍ agna u̱cathā̍ni vedho̱ juṣṭā̍ni santu̱ mana̍se hṛ̱de ca̍ |
śa̱kema̍ rā̱yaḥ su̱dhuro̱ yama̱ṁ te 'dhi̱ śravo̍ de̱vabha̍kta̱ṁ dadhā̍nāḥ || RV_1,073.10

u̱pa̱pra̱yanto̍ adhva̱ram mantra̍ṁ vocemā̱gnaye̍ |
ā̱re a̱sme ca̍ śṛṇva̱te || RV_1,074.01

yaḥ snīhi̍tīṣu pū̱rvyaḥ sa̍ṁjagmā̱nāsu̍ kṛ̱ṣṭiṣu̍ |
ara̍kṣad dā̱śuṣe̱ gaya̍m || RV_1,074.02

u̱ta bru̍vantu ja̱ntava̱ ud a̱gnir vṛ̍tra̱hāja̍ni |
dha̱na̱ṁja̱yo raṇe̍-raṇe || RV_1,074.03

yasya̍ dū̱to asi̱ kṣaye̱ veṣi̍ ha̱vyāni̍ vī̱taye̍ |
da̱smat kṛ̱ṇoṣy a̍dhva̱ram || RV_1,074.04

tam it su̍ha̱vyam a̍ṅgiraḥ sude̱vaṁ sa̍haso yaho |
janā̍ āhuḥ suba̱rhiṣa̍m || RV_1,074.05

ā ca̱ vahā̍si̱ tām̐ i̱ha de̱vām̐ upa̱ praśa̍staye |
ha̱vyā su̍ścandra vī̱taye̍ || RV_1,074.06

na yor u̍pa̱bdir aśvya̍ḥ śṛ̱ṇve ratha̍sya̱ kac ca̱na |
yad a̍gne̱ yāsi̍ dū̱tya̍m || RV_1,074.07

tvoto̍ vā̱jy ahra̍yo̱ 'bhi pūrva̍smā̱d apa̍raḥ |
pra dā̱śvām̐ a̍gne asthāt || RV_1,074.08

u̱ta dyu̱mat su̱vīrya̍m bṛ̱had a̍gne vivāsasi |
de̱vebhyo̍ deva dā̱śuṣe̍ || RV_1,074.09

ju̱ṣasva̍ sa̱pratha̍stama̱ṁ vaco̍ de̱vapsa̍rastamam |
ha̱vyā juhvā̍na ā̱sani̍ || RV_1,075.01

athā̍ te aṅgirasta̱māgne̍ vedhastama pri̱yam |
vo̱cema̱ brahma̍ sāna̱si || RV_1,075.02

kas te̍ jā̱mir janā̍nā̱m agne̱ ko dā̱śva̍dhvaraḥ |
ko ha̱ kasmi̍nn asi śri̱taḥ || RV_1,075.03

tvaṁ jā̱mir janā̍nā̱m agne̍ mi̱tro a̍si pri̱yaḥ |
sakhā̱ sakhi̍bhya̱ īḍya̍ḥ || RV_1,075.04

yajā̍ no mi̱trāvaru̍ṇā̱ yajā̍ de̱vām̐ ṛ̱tam bṛ̱hat |
agne̱ yakṣi̱ svaṁ dama̍m || RV_1,075.05

kā ta̱ upe̍ti̱r mana̍so̱ varā̍ya̱ bhuva̍d agne̱ śaṁta̍mā̱ kā ma̍nī̱ṣā |
ko vā̍ ya̱jñaiḥ pari̱ dakṣa̍ṁ ta āpa̱ kena̍ vā te̱ mana̍sā dāśema || RV_1,076.01

ehy a̍gna i̱ha hotā̱ ni ṣī̱dāda̍bdha̱ḥ su pu̍rae̱tā bha̍vā naḥ |
ava̍tāṁ tvā̱ roda̍sī viśvami̱nve yajā̍ ma̱he sau̍mana̱sāya̍ de̱vān || RV_1,076.02

pra su viśvā̍n ra̱kṣaso̱ dhakṣy a̍gne̱ bhavā̍ ya̱jñānā̍m abhiśasti̱pāvā̍ |
athā va̍ha̱ soma̍pati̱ṁ hari̍bhyām āti̱thyam a̍smai cakṛmā su̱dāvne̍ || RV_1,076.03

pra̱jāva̍tā̱ vaca̍sā̱ vahni̍r ā̱sā ca̍ hu̱ve ni ca̍ satsī̱ha de̱vaiḥ |
veṣi̍ ho̱tram u̱ta po̱traṁ ya̍jatra bo̱dhi pra̍yantar janita̱r vasū̍nām || RV_1,076.04

yathā̱ vipra̍sya̱ manu̍ṣo ha̱virbhi̍r de̱vām̐ aya̍jaḥ ka̱vibhi̍ḥ ka̱viḥ san |
e̱vā ho̍taḥ satyatara̱ tvam a̱dyāgne̍ ma̱ndrayā̍ ju̱hvā̍ yajasva || RV_1,076.05

ka̱thā dā̍śemā̱gnaye̱ kāsmai̍ de̱vaju̍ṣṭocyate bhā̱mine̱ gīḥ |
yo martye̍ṣv a̱mṛta̍ ṛ̱tāvā̱ hotā̱ yaji̍ṣṭha̱ it kṛ̱ṇoti̍ de̱vān || RV_1,077.01

yo a̍dhva̱reṣu̱ śaṁta̍ma ṛ̱tāvā̱ hotā̱ tam ū̱ namo̍bhi̱r ā kṛ̍ṇudhvam |
a̱gnir yad ver martā̍ya de̱vān sa cā̱ bodhā̍ti̱ mana̍sā yajāti || RV_1,077.02

sa hi kratu̱ḥ sa marya̱ḥ sa sā̱dhur mi̱tro na bhū̱d adbhu̍tasya ra̱thīḥ |
tam medhe̍ṣu pratha̱maṁ de̍va̱yantī̱r viśa̱ upa̍ bruvate da̱smam ārī̍ḥ || RV_1,077.03

sa no̍ nṛ̱ṇāṁ nṛta̍mo ri̱śādā̍ a̱gnir giro 'va̍sā vetu dhī̱tim |
tanā̍ ca̱ ye ma̱ghavā̍na̱ḥ śavi̍ṣṭhā̱ vāja̍prasūtā i̱ṣaya̍nta̱ manma̍ || RV_1,077.04

e̱vāgnir gota̍mebhir ṛ̱tāvā̱ vipre̍bhir astoṣṭa jā̱tave̍dāḥ |
sa e̍ṣu dyu̱mnam pī̍paya̱t sa vāja̱ṁ sa pu̱ṣṭiṁ yā̍ti̱ joṣa̱m ā ci̍ki̱tvān || RV_1,077.05

a̱bhi tvā̱ gota̍mā gi̱rā jāta̍vedo̱ vica̍rṣaṇe |
dyu̱mnair a̱bhi pra ṇo̍numaḥ || RV_1,078.01

tam u̍ tvā̱ gota̍mo gi̱rā rā̱yaskā̍mo duvasyati |
dyu̱mnair a̱bhi pra ṇo̍numaḥ || RV_1,078.02

tam u̍ tvā vāja̱sāta̍mam aṅgira̱svad dha̍vāmahe |
dyu̱mnair a̱bhi pra ṇo̍numaḥ || RV_1,078.03

tam u̍ tvā vṛtra̱hanta̍ma̱ṁ yo dasyū̍m̐r avadhūnu̱ṣe |
dyu̱mnair a̱bhi pra ṇo̍numaḥ || RV_1,078.04

avo̍cāma̱ rahū̍gaṇā a̱gnaye̱ madhu̍ma̱d vaca̍ḥ |
dyu̱mnair a̱bhi pra ṇo̍numaḥ || RV_1,078.05

hira̍ṇyakeśo̱ raja̍so visā̱re 'hi̱r dhuni̱r vāta̍ iva̱ dhrajī̍mān |
śuci̍bhrājā u̱ṣaso̱ nave̍dā̱ yaśa̍svatīr apa̱syuvo̱ na sa̱tyāḥ || RV_1,079.01

ā te̍ supa̱rṇā a̍minanta̱m̐ evai̍ḥ kṛ̱ṣṇo no̍nāva vṛṣa̱bho yadī̱dam |
śi̱vābhi̱r na smaya̍mānābhi̱r āgā̱t pata̍nti̱ miha̍ḥ sta̱naya̍nty a̱bhrā || RV_1,079.02

yad ī̍m ṛ̱tasya̱ paya̍sā̱ piyā̍no̱ naya̍nn ṛ̱tasya̍ pa̱thibhī̱ raji̍ṣṭhaiḥ |
a̱rya̱mā mi̱tro varu̍ṇa̱ḥ pari̍jmā̱ tvaca̍m pṛñca̱nty upa̍rasya̱ yonau̍ || RV_1,079.03

agne̱ vāja̍sya̱ goma̍ta̱ īśā̍naḥ sahaso yaho |
a̱sme dhe̍hi jātavedo̱ mahi̱ śrava̍ḥ || RV_1,079.04

sa i̍dhā̱no vasu̍ṣ ka̱vir a̱gnir ī̱ḻenyo̍ gi̱rā |
re̱vad a̱smabhya̍m purvaṇīka dīdihi || RV_1,079.05

kṣa̱po rā̍jann u̱ta tmanāgne̱ vasto̍r u̱toṣasa̍ḥ |
sa ti̍gmajambha ra̱kṣaso̍ daha̱ prati̍ || RV_1,079.06

avā̍ no agna ū̱tibhi̍r gāya̱trasya̱ prabha̍rmaṇi |
viśvā̍su dhī̱ṣu va̍ndya || RV_1,079.07

ā no̍ agne ra̱yim bha̍ra satrā̱sāha̱ṁ vare̍ṇyam |
viśvā̍su pṛ̱tsu du̱ṣṭara̍m || RV_1,079.08

ā no̍ agne suce̱tunā̍ ra̱yiṁ vi̱śvāyu̍poṣasam |
mā̱rḍī̱kaṁ dhe̍hi jī̱vase̍ || RV_1,079.09

pra pū̱tās ti̱gmaśo̍ciṣe̱ vāco̍ gotamā̱gnaye̍ |
bhara̍sva sumna̱yur gira̍ḥ || RV_1,079.10

yo no̍ agne 'bhi̱dāsa̱ty anti̍ dū̱re pa̍dī̱ṣṭa saḥ |
a̱smāka̱m id vṛ̱dhe bha̍va || RV_1,079.11

sa̱ha̱srā̱kṣo vica̍rṣaṇir a̱gnī rakṣā̍ṁsi sedhati |
hotā̍ gṛṇīta u̱kthya̍ḥ || RV_1,079.12

i̱tthā hi soma̱ in made̍ bra̱hmā ca̱kāra̱ vardha̍nam |
śavi̍ṣṭha vajri̱nn oja̍sā pṛthi̱vyā niḥ śa̍śā̱ ahi̱m arca̱nn anu̍ sva̱rājya̍m || RV_1,080.01

sa tvā̍mada̱d vṛṣā̱ mada̱ḥ soma̍ḥ śye̱nābhṛ̍taḥ su̱taḥ |
yenā̍ vṛ̱traṁ nir a̱dbhyo ja̱ghantha̍ vajri̱nn oja̱sārca̱nn anu̍ sva̱rājya̍m || RV_1,080.02

prehy a̱bhī̍hi dhṛṣṇu̱hi na te̱ vajro̱ ni ya̍ṁsate |
indra̍ nṛ̱mṇaṁ hi te̱ śavo̱ hano̍ vṛ̱traṁ jayā̍ a̱po 'rca̱nn anu̍ sva̱rājya̍m || RV_1,080.03

nir i̍ndra̱ bhūmyā̱ adhi̍ vṛ̱traṁ ja̍ghantha̱ nir di̱vaḥ |
sṛ̱jā ma̱rutva̍tī̱r ava̍ jī̱vadha̍nyā i̱mā a̱po 'rca̱nn anu̍ sva̱rājya̍m || RV_1,080.04

indro̍ vṛ̱trasya̱ dodha̍ta̱ḥ sānu̱ṁ vajre̍ṇa hīḻi̱taḥ |
a̱bhi̱kramyāva̍ jighnate̱ 'paḥ sarmā̍ya co̱daya̱nn arca̱nn anu̍ sva̱rājya̍m || RV_1,080.05

adhi̱ sānau̱ ni ji̍ghnate̱ vajre̍ṇa śa̱tapa̍rvaṇā |
ma̱ndā̱na indro̱ andha̍sa̱ḥ sakhi̍bhyo gā̱tum i̍ccha̱ty arca̱nn anu̍ sva̱rājya̍m || RV_1,080.06

indra̱ tubhya̱m id a̍dri̱vo 'nu̍ttaṁ vajrin vī̱rya̍m |
yad dha̱ tyam mā̱yina̍m mṛ̱gaṁ tam u̱ tvam mā̱yayā̍vadhī̱r arca̱nn anu̍ sva̱rājya̍m || RV_1,080.07

vi te̱ vajrā̍so asthiran nava̱tiṁ nā̱vyā̱3̱̍ anu̍ |
ma̱hat ta̍ indra vī̱rya̍m bā̱hvos te̱ bala̍ṁ hi̱tam arca̱nn anu̍ sva̱rājya̍m || RV_1,080.08

sa̱hasra̍ṁ sā̱kam a̍rcata̱ pari̍ ṣṭobhata viṁśa̱tiḥ |
śa̱taina̱m anv a̍nonavu̱r indrā̍ya̱ brahmodya̍ta̱m arca̱nn anu̍ sva̱rājya̍m || RV_1,080.09

indro̍ vṛ̱trasya̱ tavi̍ṣī̱ṁ nir a̍ha̱n saha̍sā̱ saha̍ḥ |
ma̱hat tad a̍sya̱ pauṁsya̍ṁ vṛ̱traṁ ja̍gha̱nvām̐ a̍sṛja̱d arca̱nn anu̍ sva̱rājya̍m || RV_1,080.10

i̱me ci̱t tava̍ ma̱nyave̱ vepe̍te bhi̱yasā̍ ma̱hī |
yad i̍ndra vajri̱nn oja̍sā vṛ̱tram ma̱rutvā̱m̐ ava̍dhī̱r arca̱nn anu̍ sva̱rājya̍m || RV_1,080.11

na vepa̍sā̱ na ta̍nya̱tendra̍ṁ vṛ̱tro vi bī̍bhayat |
a̱bhy e̍na̱ṁ vajra̍ āya̱saḥ sa̱hasra̍bhṛṣṭir āya̱tārca̱nn anu̍ sva̱rājya̍m || RV_1,080.12

yad vṛ̱traṁ tava̍ cā̱śani̱ṁ vajre̍ṇa sa̱mayo̍dhayaḥ |
ahi̍m indra̱ jighā̍ṁsato di̱vi te̍ badbadhe̱ śavo 'rca̱nn anu̍ sva̱rājya̍m || RV_1,080.13

a̱bhi̱ṣṭa̱ne te̍ adrivo̱ yat sthā jaga̍c ca rejate |
tvaṣṭā̍ ci̱t tava̍ ma̱nyava̱ indra̍ vevi̱jyate̍ bhi̱yārca̱nn anu̍ sva̱rājya̍m || RV_1,080.14

na̱hi nu yād a̍dhī̱masīndra̱ṁ ko vī̱ryā̍ pa̱raḥ |
tasmi̍n nṛ̱mṇam u̱ta kratu̍ṁ de̱vā ojā̍ṁsi̱ saṁ da̍dhu̱r arca̱nn anu̍ sva̱rājya̍m || RV_1,080.15

yām atha̍rvā̱ manu̍ṣ pi̱tā da̱dhyaṅ dhiya̱m atna̍ta |
tasmi̱n brahmā̍ṇi pū̱rvathendra̍ u̱kthā sam a̍gma̱tārca̱nn anu̍ sva̱rājya̍m || RV_1,080.16

indro̱ madā̍ya vāvṛdhe̱ śava̍se vṛtra̱hā nṛbhi̍ḥ |
tam in ma̱hatsv ā̱jiṣū̱tem arbhe̍ havāmahe̱ sa vāje̍ṣu̱ pra no̍ 'viṣat || RV_1,081.01

asi̱ hi vī̍ra̱ senyo 'si̱ bhūri̍ parāda̱diḥ |
asi̍ da̱bhrasya̍ cid vṛ̱dho yaja̍mānāya śikṣasi sunva̱te bhūri̍ te̱ vasu̍ || RV_1,081.02

yad u̱dīra̍ta ā̱jayo̍ dhṛ̱ṣṇave̍ dhīyate̱ dhanā̍ |
yu̱kṣvā ma̍da̱cyutā̱ harī̱ kaṁ hana̱ḥ kaṁ vasau̍ dadho̱ 'smām̐ i̍ndra̱ vasau̍ dadhaḥ || RV_1,081.03

kratvā̍ ma̱hām̐ a̍nuṣva̱dham bhī̱ma ā vā̍vṛdhe̱ śava̍ḥ |
śri̱ya ṛ̱ṣva u̍pā̱kayo̱r ni śi̱prī hari̍vān dadhe̱ hasta̍yo̱r vajra̍m āya̱sam || RV_1,081.04

ā pa̍prau̱ pārthi̍va̱ṁ rajo̍ badba̱dhe ro̍ca̱nā di̱vi |
na tvāvā̍m̐ indra̱ kaś ca̱na na jā̱to na ja̍niṣya̱te 'ti̱ viśva̍ṁ vavakṣitha || RV_1,081.05

yo a̱ryo ma̍rta̱bhoja̍nam parā̱dadā̍ti dā̱śuṣe̍ |
indro̍ a̱smabhya̍ṁ śikṣatu̱ vi bha̍jā̱ bhūri̍ te̱ vasu̍ bhakṣī̱ya tava̱ rādha̍saḥ || RV_1,081.06

made̍-made̱ hi no̍ da̱dir yū̱thā gavā̍m ṛju̱kratu̍ḥ |
saṁ gṛ̍bhāya pu̱rū śa̱tobha̍yāha̱styā vasu̍ śiśī̱hi rā̱ya ā bha̍ra || RV_1,081.07

mā̱daya̍sva su̱te sacā̱ śava̍se śūra̱ rādha̍se |
vi̱dmā hi tvā̍ purū̱vasu̱m upa̱ kāmā̍n sasṛ̱jmahe 'thā̍ no 'vi̱tā bha̍va || RV_1,081.08

e̱te ta̍ indra ja̱ntavo̱ viśva̍m puṣyanti̱ vārya̍m |
a̱ntar hi khyo janā̍nām a̱ryo vedo̱ adā̍śuṣā̱ṁ teṣā̍ṁ no̱ veda̱ ā bha̍ra || RV_1,081.09

upo̱ ṣu śṛ̍ṇu̱hī giro̱ magha̍va̱n māta̍thā iva |
ya̱dā na̍ḥ sū̱nṛtā̍vata̱ḥ kara̱ ād a̱rthayā̍sa̱ id yojā̱ nv i̍ndra te̱ harī̍ || RV_1,082.01

akṣa̱nn amī̍madanta̱ hy ava̍ pri̱yā a̍dhūṣata |
asto̍ṣata̱ svabhā̍navo̱ viprā̱ navi̍ṣṭhayā ma̱tī yojā̱ nv i̍ndra te̱ harī̍ || RV_1,082.02

su̱sa̱ṁdṛśa̍ṁ tvā va̱yam magha̍van vandiṣī̱mahi̍ |
pra nū̱nam pū̱rṇava̍ndhuraḥ stu̱to yā̍hi̱ vaśā̱m̐ anu̱ yojā̱ nv i̍ndra te̱ harī̍ || RV_1,082.03

sa ghā̱ taṁ vṛṣa̍ṇa̱ṁ ratha̱m adhi̍ tiṣṭhāti go̱vida̍m |
yaḥ pātra̍ṁ hāriyoja̱nam pū̱rṇam i̍ndra̱ cike̍tati̱ yojā̱ nv i̍ndra te̱ harī̍ || RV_1,082.04

yu̱ktas te̍ astu̱ dakṣi̍ṇa u̱ta sa̱vyaḥ śa̍takrato |
tena̍ jā̱yām upa̍ pri̱yām ma̍ndā̱no yā̱hy andha̍so̱ yojā̱ nv i̍ndra te̱ harī̍ || RV_1,082.05

yu̱najmi̍ te̱ brahma̍ṇā ke̱śinā̱ harī̱ upa̱ pra yā̍hi dadhi̱ṣe gabha̍styoḥ |
ut tvā̍ su̱tāso̍ rabha̱sā a̍mandiṣuḥ pūṣa̱ṇvān va̍jri̱n sam u̱ patnyā̍madaḥ || RV_1,082.06

aśvā̍vati pratha̱mo goṣu̍ gacchati suprā̱vīr i̍ndra̱ martya̱s tavo̱tibhi̍ḥ |
tam it pṛ̍ṇakṣi̱ vasu̍nā̱ bhavī̍yasā̱ sindhu̱m āpo̱ yathā̱bhito̱ vice̍tasaḥ || RV_1,083.01

āpo̱ na de̱vīr upa̍ yanti ho̱triya̍m a̱vaḥ pa̍śyanti̱ vita̍ta̱ṁ yathā̱ raja̍ḥ |
prā̱cair de̱vāsa̱ḥ pra ṇa̍yanti deva̱yum bra̍hma̱priya̍ṁ joṣayante va̱rā i̍va || RV_1,083.02

adhi̱ dvayo̍r adadhā u̱kthya1̱̍ṁ vaco̍ ya̱tasru̍cā mithu̱nā yā sa̍pa̱ryata̍ḥ |
asa̍ṁyatto vra̱te te̍ kṣeti̱ puṣya̍ti bha̱drā śa̱ktir yaja̍mānāya sunva̱te || RV_1,083.03

ād aṅgi̍rāḥ pratha̱maṁ da̍dhire̱ vaya̍ i̱ddhāgna̍ya̱ḥ śamyā̱ ye su̍kṛ̱tyayā̍ |
sarva̍m pa̱ṇeḥ sam a̍vindanta̱ bhoja̍na̱m aśvā̍vanta̱ṁ goma̍nta̱m ā pa̱śuṁ nara̍ḥ || RV_1,083.04

ya̱jñair atha̍rvā pratha̱maḥ pa̱thas ta̍te̱ tata̱ḥ sūryo̍ vrata̱pā ve̱na āja̍ni |
ā gā ā̍jad u̱śanā̍ kā̱vyaḥ sacā̍ ya̱masya̍ jā̱tam a̱mṛta̍ṁ yajāmahe || RV_1,083.05

ba̱rhir vā̱ yat sva̍pa̱tyāya̍ vṛ̱jyate̱ 'rko vā̱ śloka̍m ā̱ghoṣa̍te di̱vi |
grāvā̱ yatra̱ vada̍ti kā̱rur u̱kthya1̱̍s tasyed indro̍ abhipi̱tveṣu̍ raṇyati || RV_1,083.06

asā̍vi̱ soma̍ indra te̱ śavi̍ṣṭha dhṛṣṇa̱v ā ga̍hi |
ā tvā̍ pṛṇaktv indri̱yaṁ raja̱ḥ sūryo̱ na ra̱śmibhi̍ḥ || RV_1,084.01

indra̱m id dharī̍ vaha̱to 'pra̍tidhṛṣṭaśavasam |
ṛṣī̍ṇāṁ ca stu̱tīr upa̍ ya̱jñaṁ ca̱ mānu̍ṣāṇām || RV_1,084.02

ā ti̍ṣṭha vṛtraha̱n ratha̍ṁ yu̱ktā te̱ brahma̍ṇā̱ harī̍ |
a̱rvā̱cīna̱ṁ su te̱ mano̱ grāvā̍ kṛṇotu va̱gnunā̍ || RV_1,084.03

i̱mam i̍ndra su̱tam pi̍ba̱ jyeṣṭha̱m ama̍rtya̱m mada̍m |
śu̱krasya̍ tvā̱bhy a̍kṣara̱n dhārā̍ ṛ̱tasya̱ sāda̍ne || RV_1,084.04

indrā̍ya nū̱nam a̍rcato̱kthāni̍ ca bravītana |
su̱tā a̍matsu̱r inda̍vo̱ jyeṣṭha̍ṁ namasyatā̱ saha̍ḥ || RV_1,084.05

naki̱ṣ ṭvad ra̱thīta̍ro̱ harī̱ yad i̍ndra̱ yaccha̍se |
naki̱ṣ ṭvānu̍ ma̱jmanā̱ naki̱ḥ svaśva̍ ānaśe || RV_1,084.06

ya eka̱ id vi̱daya̍te̱ vasu̱ martā̍ya dā̱śuṣe̍ |
īśā̍no̱ apra̍tiṣkuta̱ indro̍ a̱ṅga || RV_1,084.07

ka̱dā marta̍m arā̱dhasa̍m pa̱dā kṣumpa̍m iva sphurat |
ka̱dā na̍ḥ śuśrava̱d gira̱ indro̍ a̱ṅga || RV_1,084.08

yaś ci̱d dhi tvā̍ ba̱hubhya̱ ā su̱tāvā̍m̐ ā̱vivā̍sati |
u̱graṁ tat pa̍tyate̱ śava̱ indro̍ a̱ṅga || RV_1,084.09

svā̱dor i̱tthā vi̍ṣū̱vato̱ madhva̍ḥ pibanti gau̱rya̍ḥ |
yā indre̍ṇa sa̱yāva̍rī̱r vṛṣṇā̱ mada̍nti śo̱bhase̱ vasvī̱r anu̍ sva̱rājya̍m || RV_1,084.10

tā a̍sya pṛśanā̱yuva̱ḥ soma̍ṁ śrīṇanti̱ pṛśna̍yaḥ |
pri̱yā indra̍sya dhe̱navo̱ vajra̍ṁ hinvanti̱ sāya̍ka̱ṁ vasvī̱r anu̍ sva̱rājya̍m || RV_1,084.11

tā a̍sya̱ nama̍sā̱ saha̍ḥ sapa̱ryanti̱ prace̍tasaḥ |
vra̱tāny a̍sya saścire pu̱rūṇi̍ pū̱rvaci̍ttaye̱ vasvī̱r anu̍ sva̱rājya̍m || RV_1,084.12

indro̍ dadhī̱co a̱sthabhi̍r vṛ̱trāṇy apra̍tiṣkutaḥ |
ja̱ghāna̍ nava̱tīr nava̍ || RV_1,084.13

i̱cchann aśva̍sya̱ yac chira̱ḥ parva̍te̱ṣv apa̍śritam |
tad vi̍dac charya̱ṇāva̍ti || RV_1,084.14

atrāha̱ gor a̍manvata̱ nāma̱ tvaṣṭu̍r apī̱cya̍m |
i̱tthā ca̱ndrama̍so gṛ̱he || RV_1,084.15

ko a̱dya yu̍ṅkte dhu̱ri gā ṛ̱tasya̱ śimī̍vato bhā̱mino̍ durhṛṇā̱yūn |
ā̱sanni̍ṣūn hṛ̱tsvaso̍ mayo̱bhūn ya e̍ṣām bhṛ̱tyām ṛ̱ṇadha̱t sa jī̍vāt || RV_1,084.16

ka ī̍ṣate tu̱jyate̱ ko bi̍bhāya̱ ko ma̍ṁsate̱ santa̱m indra̱ṁ ko anti̍ |
kas to̱kāya̱ ka ibhā̍yo̱ta rā̱ye 'dhi̍ bravat ta̱nve̱3̱̍ ko janā̍ya || RV_1,084.17

ko a̱gnim ī̍ṭṭe ha̱viṣā̍ ghṛ̱tena̍ sru̱cā ya̍jātā ṛ̱tubhi̍r dhru̱vebhi̍ḥ |
kasmai̍ de̱vā ā va̍hān ā̱śu homa̱ ko ma̍ṁsate vī̱tiho̍traḥ sude̱vaḥ || RV_1,084.18

tvam a̱ṅga pra śa̍ṁsiṣo de̱vaḥ śa̍viṣṭha̱ martya̍m |
na tvad a̱nyo ma̍ghavann asti marḍi̱tendra̱ bravī̍mi te̱ vaca̍ḥ || RV_1,084.19

mā te̱ rādhā̍ṁsi̱ mā ta̍ ū̱tayo̍ vaso̱ 'smān kadā̍ ca̱nā da̍bhan |
viśvā̍ ca na upamimī̱hi mā̍nuṣa̱ vasū̍ni carṣa̱ṇibhya̱ ā || RV_1,084.20

pra ye śumbha̍nte̱ jana̍yo̱ na sapta̍yo̱ yāma̍n ru̱drasya̍ sū̱nava̍ḥ su̱daṁsa̍saḥ |
roda̍sī̱ hi ma̱ruta̍ś cakri̱re vṛ̱dhe mada̍nti vī̱rā vi̱dathe̍ṣu̱ ghṛṣva̍yaḥ || RV_1,085.01

ta u̍kṣi̱tāso̍ mahi̱māna̍m āśata di̱vi ru̱drāso̱ adhi̍ cakrire̱ sada̍ḥ |
arca̍nto a̱rkaṁ ja̱naya̍nta indri̱yam adhi̱ śriyo̍ dadhire̱ pṛśni̍mātaraḥ || RV_1,085.02

gomā̍taro̱ yac chu̱bhaya̍nte a̱ñjibhi̍s ta̱nūṣu̍ śu̱bhrā da̍dhire vi̱rukma̍taḥ |
bādha̍nte̱ viśva̍m abhimā̱tina̱m apa̱ vartmā̍ny eṣā̱m anu̍ rīyate ghṛ̱tam || RV_1,085.03

vi ye bhrāja̍nte̱ suma̍khāsa ṛ̱ṣṭibhi̍ḥ pracyā̱vaya̍nto̱ acyu̍tā ci̱d oja̍sā |
ma̱no̱juvo̱ yan ma̍ruto̱ rathe̱ṣv ā vṛṣa̍vrātāsa̱ḥ pṛṣa̍tī̱r ayu̍gdhvam || RV_1,085.04

pra yad rathe̍ṣu̱ pṛṣa̍tī̱r ayu̍gdhva̱ṁ vāje̱ adri̍m maruto ra̱ṁhaya̍ntaḥ |
u̱tāru̱ṣasya̱ vi ṣya̍nti̱ dhārā̱ś carme̍vo̱dabhi̱r vy u̍ndanti̱ bhūma̍ || RV_1,085.05

ā vo̍ vahantu̱ sapta̍yo raghu̱ṣyado̍ raghu̱patvā̍na̱ḥ pra ji̍gāta bā̱hubhi̍ḥ |
sīda̱tā ba̱rhir u̱ru va̱ḥ sada̍s kṛ̱tam mā̱daya̍dhvam maruto̱ madhvo̱ andha̍saḥ || RV_1,085.06

te̍ 'vardhanta̱ svata̍vaso mahitva̱nā nāka̍ṁ ta̱sthur u̱ru ca̍krire̱ sada̍ḥ |
viṣṇu̱r yad dhāva̱d vṛṣa̍ṇam mada̱cyuta̱ṁ vayo̱ na sī̍da̱nn adhi̍ ba̱rhiṣi̍ pri̱ye || RV_1,085.07

śūrā̍ i̱ved yuyu̍dhayo̱ na jagma̍yaḥ śrava̱syavo̱ na pṛta̍nāsu yetire |
bhaya̍nte̱ viśvā̱ bhuva̍nā ma̱rudbhyo̱ rājā̍na iva tve̱ṣasa̍ṁdṛśo̱ nara̍ḥ || RV_1,085.08

tvaṣṭā̱ yad vajra̱ṁ sukṛ̍taṁ hira̱ṇyaya̍ṁ sa̱hasra̍bhṛṣṭi̱ṁ svapā̱ ava̍rtayat |
dha̱tta indro̱ nary apā̍ṁsi̱ karta̱ve 'ha̍n vṛ̱traṁ nir a̱pām au̍bjad arṇa̱vam || RV_1,085.09

ū̱rdhvaṁ nu̍nudre 'va̱taṁ ta oja̍sā dādṛhā̱ṇaṁ ci̍d bibhidu̱r vi parva̍tam |
dhama̍nto vā̱ṇam ma̱ruta̍ḥ su̱dāna̍vo̱ made̱ soma̍sya̱ raṇyā̍ni cakrire || RV_1,085.10

ji̱hmaṁ nu̍nudre 'va̱taṁ tayā̍ di̱śāsi̍ñca̱nn utsa̱ṁ gota̍māya tṛ̱ṣṇaje̍ |
ā ga̍cchantī̱m ava̍sā ci̱trabhā̍nava̱ḥ kāma̱ṁ vipra̍sya tarpayanta̱ dhāma̍bhiḥ || RV_1,085.11

yā va̱ḥ śarma̍ śaśamā̱nāya̱ santi̍ tri̱dhātū̍ni dā̱śuṣe̍ yaccha̱tādhi̍ |
a̱smabhya̱ṁ tāni̍ maruto̱ vi ya̍nta ra̱yiṁ no̍ dhatta vṛṣaṇaḥ su̱vīra̍m || RV_1,085.12

maru̍to̱ yasya̱ hi kṣaye̍ pā̱thā di̱vo vi̍mahasaḥ |
sa su̍go̱pāta̍mo̱ jana̍ḥ || RV_1,086.01

ya̱jñair vā̍ yajñavāhaso̱ vipra̍sya vā matī̱nām |
maru̍taḥ śṛṇu̱tā hava̍m || RV_1,086.02

u̱ta vā̱ yasya̍ vā̱jino 'nu̱ vipra̱m ata̍kṣata |
sa gantā̱ goma̍ti vra̱je || RV_1,086.03

a̱sya vī̱rasya̍ ba̱rhiṣi̍ su̱taḥ somo̱ divi̍ṣṭiṣu |
u̱ktham mada̍ś ca śasyate || RV_1,086.04

a̱sya śro̍ṣa̱ntv ā bhuvo̱ viśvā̱ yaś ca̍rṣa̱ṇīr a̱bhi |
sūra̍ṁ cit sa̱sruṣī̱r iṣa̍ḥ || RV_1,086.05

pū̱rvībhi̱r hi da̍dāśi̱ma śa̱radbhi̍r maruto va̱yam |
avo̍bhiś carṣaṇī̱nām || RV_1,086.06

su̱bhaga̱ḥ sa pra̍yajyavo̱ maru̍to astu̱ martya̍ḥ |
yasya̱ prayā̍ṁsi̱ parṣa̍tha || RV_1,086.07

śa̱śa̱mā̱nasya̍ vā nara̱ḥ sveda̍sya satyaśavasaḥ |
vi̱dā kāma̍sya̱ vena̍taḥ || RV_1,086.08

yū̱yaṁ tat sa̍tyaśavasa ā̱viṣ ka̍rta mahitva̱nā |
vidhya̍tā vi̱dyutā̱ rakṣa̍ḥ || RV_1,086.09

gūha̍tā̱ guhya̱ṁ tamo̱ vi yā̍ta̱ viśva̍m a̱triṇa̍m |
jyoti̍ṣ kartā̱ yad u̱śmasi̍ || RV_1,086.10

pratva̍kṣasa̱ḥ prata̍vaso vira̱pśino 'nā̍natā̱ avi̍thurā ṛjī̱ṣiṇa̍ḥ |
juṣṭa̍tamāso̱ nṛta̍māso a̱ñjibhi̱r vy ā̍najre̱ ke ci̍d u̱srā i̍va̱ stṛbhi̍ḥ || RV_1,087.01

u̱pa̱hva̱reṣu̱ yad aci̍dhvaṁ ya̱yiṁ vaya̍ iva maruta̱ḥ kena̍ cit pa̱thā |
ścota̍nti̱ kośā̱ upa̍ vo̱ rathe̱ṣv ā ghṛ̱tam u̍kṣatā̱ madhu̍varṇa̱m arca̍te || RV_1,087.02

praiṣā̱m ajme̍ṣu vithu̱reva̍ rejate̱ bhūmi̱r yāme̍ṣu̱ yad dha̍ yu̱ñjate̍ śu̱bhe |
te krī̱ḻayo̱ dhuna̍yo̱ bhrāja̍dṛṣṭayaḥ sva̱yam ma̍hi̱tvam pa̍nayanta̱ dhūta̍yaḥ || RV_1,087.03

sa hi sva̱sṛt pṛṣa̍daśvo̱ yuvā̍ ga̱ṇo̱3̱̍ 'yā ī̍śā̱nas tavi̍ṣībhi̱r āvṛ̍taḥ |
asi̍ sa̱tya ṛ̍ṇa̱yāvāne̍dyo̱ 'syā dhi̱yaḥ prā̍vi̱tāthā̱ vṛṣā̍ ga̱ṇaḥ || RV_1,087.04

pi̱tuḥ pra̱tnasya̱ janma̍nā vadāmasi̱ soma̍sya ji̱hvā pra ji̍gāti̱ cakṣa̍sā |
yad ī̱m indra̱ṁ śamy ṛkvā̍ṇa̱ āśa̱tād in nāmā̍ni ya̱jñiyā̍ni dadhire || RV_1,087.05

śri̱yase̱ kam bhā̱nubhi̱ḥ sam mi̍mikṣire̱ te ra̱śmibhi̱s ta ṛkva̍bhiḥ sukhā̱daya̍ḥ |
te vāśī̍manta i̱ṣmiṇo̱ abhī̍ravo vi̱dre pri̱yasya̱ māru̍tasya̱ dhāmna̍ḥ || RV_1,087.06

ā vi̱dyunma̍dbhir marutaḥ sva̱rkai rathe̍bhir yāta ṛṣṭi̱madbhi̱r aśva̍parṇaiḥ |
ā varṣi̍ṣṭhayā na i̱ṣā vayo̱ na pa̍ptatā sumāyāḥ || RV_1,088.01

te̍ 'ru̱ṇebhi̱r vara̱m ā pi̱śaṅgai̍ḥ śu̱bhe kaṁ yā̍nti ratha̱tūrbhi̱r aśvai̍ḥ |
ru̱kmo na ci̱traḥ svadhi̍tīvān pa̱vyā ratha̍sya jaṅghananta̱ bhūma̍ || RV_1,088.02

śri̱ye kaṁ vo̱ adhi̍ ta̱nūṣu̱ vāśī̍r me̱dhā vanā̱ na kṛ̍ṇavanta ū̱rdhvā |
yu̱ṣmabhya̱ṁ kam ma̍rutaḥ sujātās tuvidyu̱mnāso̍ dhanayante̱ adri̍m || RV_1,088.03

ahā̍ni̱ gṛdhrā̱ḥ pary ā va̱ āgu̍r i̱māṁ dhiya̍ṁ vārkā̱ryāṁ ca̍ de̱vīm |
brahma̍ kṛ̱ṇvanto̱ gota̍māso a̱rkair ū̱rdhvaṁ nu̍nudra utsa̱dhim piba̍dhyai || RV_1,088.04

e̱tat tyan na yoja̍nam aceti sa̱svar ha̱ yan ma̍ruto̱ gota̍mo vaḥ |
paśya̱n hira̍ṇyacakrā̱n ayo̍daṁṣṭrān vi̱dhāva̍to va̱rāhū̍n || RV_1,088.05

e̱ṣā syā vo̍ maruto 'nubha̱rtrī prati̍ ṣṭobhati vā̱ghato̱ na vāṇī̍ |
asto̍bhaya̱d vṛthā̍sā̱m anu̍ sva̱dhāṁ gabha̍styoḥ || RV_1,088.06

ā no̍ bha̱drāḥ krata̍vo yantu vi̱śvato 'da̍bdhāso̱ apa̍rītāsa u̱dbhida̍ḥ |
de̱vā no̱ yathā̱ sada̱m id vṛ̱dhe asa̱nn aprā̍yuvo rakṣi̱tāro̍ di̱ve-di̍ve || RV_1,089.01

de̱vānā̍m bha̱drā su̍ma̱tir ṛ̍jūya̱tāṁ de̱vānā̍ṁ rā̱tir a̱bhi no̱ ni va̍rtatām |
de̱vānā̍ṁ sa̱khyam upa̍ sedimā va̱yaṁ de̱vā na̱ āyu̱ḥ pra ti̍rantu jī̱vase̍ || RV_1,089.02

tān pūrva̍yā ni̱vidā̍ hūmahe va̱yam bhaga̍m mi̱tram adi̍ti̱ṁ dakṣa̍m a̱sridha̍m |
a̱rya̱maṇa̱ṁ varu̍ṇa̱ṁ soma̍m a̱śvinā̱ sara̍svatī naḥ su̱bhagā̱ maya̍s karat || RV_1,089.03

tan no̱ vāto̍ mayo̱bhu vā̍tu bheṣa̱jaṁ tan mā̱tā pṛ̍thi̱vī tat pi̱tā dyauḥ |
tad grāvā̍ṇaḥ soma̱suto̍ mayo̱bhuva̱s tad a̍śvinā śṛṇutaṁ dhiṣṇyā yu̱vam || RV_1,089.04

tam īśā̍na̱ṁ jaga̍tas ta̱sthuṣa̱s pati̍ṁ dhiyaṁji̱nvam ava̍se hūmahe va̱yam |
pū̱ṣā no̱ yathā̱ veda̍sā̱m asa̍d vṛ̱dhe ra̍kṣi̱tā pā̱yur ada̍bdhaḥ sva̱staye̍ || RV_1,089.05

sva̱sti na̱ indro̍ vṛ̱ddhaśra̍vāḥ sva̱sti na̍ḥ pū̱ṣā vi̱śvave̍dāḥ |
sva̱sti na̱s tārkṣyo̱ ari̍ṣṭanemiḥ sva̱sti no̱ bṛha̱spati̍r dadhātu || RV_1,089.06

pṛṣa̍daśvā ma̱ruta̱ḥ pṛśni̍mātaraḥ śubha̱ṁyāvā̍no vi̱dathe̍ṣu̱ jagma̍yaḥ |
a̱gni̱ji̱hvā mana̍va̱ḥ sūra̍cakṣaso̱ viśve̍ no de̱vā ava̱sā ga̍mann i̱ha || RV_1,089.07

bha̱draṁ karṇe̍bhiḥ śṛṇuyāma devā bha̱dram pa̍śyemā̱kṣabhi̍r yajatrāḥ |
sthi̱rair aṅgai̍s tuṣṭu̱vāṁsa̍s ta̱nūbhi̱r vy a̍śema de̱vahi̍ta̱ṁ yad āyu̍ḥ || RV_1,089.08

śa̱tam in nu śa̱rado̱ anti̍ devā̱ yatrā̍ naś ca̱krā ja̱rasa̍ṁ ta̱nūnā̍m |
pu̱trāso̱ yatra̍ pi̱taro̱ bhava̍nti̱ mā no̍ ma̱dhyā rī̍riṣa̱tāyu̱r ganto̍ḥ || RV_1,089.09

adi̍ti̱r dyaur adi̍tir a̱ntari̍kṣa̱m adi̍tir mā̱tā sa pi̱tā sa pu̱traḥ |
viśve̍ de̱vā adi̍ti̱ḥ pañca̱ janā̱ adi̍tir jā̱tam adi̍ti̱r jani̍tvam || RV_1,089.10

ṛ̱ju̱nī̱tī no̱ varu̍ṇo mi̱tro na̍yatu vi̱dvān |
a̱rya̱mā de̱vaiḥ sa̱joṣā̍ḥ || RV_1,090.01

te hi vasvo̱ vasa̍vānā̱s te apra̍mūrā̱ maho̍bhiḥ |
vra̱tā ra̍kṣante vi̱śvāhā̍ || RV_1,090.02

te a̱smabhya̱ṁ śarma̍ yaṁsann a̱mṛtā̱ martye̍bhyaḥ |
bādha̍mānā̱ apa̱ dviṣa̍ḥ || RV_1,090.03

vi na̍ḥ pa̱thaḥ su̍vi̱tāya̍ ci̱yantv indro̍ ma̱ruta̍ḥ |
pū̱ṣā bhago̱ vandyā̍saḥ || RV_1,090.04

u̱ta no̱ dhiyo̱ goa̍grā̱ḥ pūṣa̱n viṣṇa̱v eva̍yāvaḥ |
kartā̍ naḥ svasti̱mata̍ḥ || RV_1,090.05

madhu̱ vātā̍ ṛtāya̱te madhu̍ kṣaranti̱ sindha̍vaḥ |
mādhvī̍r naḥ sa̱ntv oṣa̍dhīḥ || RV_1,090.06

madhu̱ nakta̍m u̱toṣaso̱ madhu̍ma̱t pārthi̍va̱ṁ raja̍ḥ |
madhu̱ dyaur a̍stu naḥ pi̱tā || RV_1,090.07

madhu̍mān no̱ vana̱spati̱r madhu̍mām̐ astu̱ sūrya̍ḥ |
mādhvī̱r gāvo̍ bhavantu naḥ || RV_1,090.08

śaṁ no̍ mi̱traḥ śaṁ varu̍ṇa̱ḥ śaṁ no̍ bhavatv arya̱mā |
śaṁ na̱ indro̱ bṛha̱spati̱ḥ śaṁ no̱ viṣṇu̍r urukra̱maḥ || RV_1,090.09

tvaṁ so̍ma̱ pra ci̍kito manī̱ṣā tvaṁ raji̍ṣṭha̱m anu̍ neṣi̱ panthā̍m |
tava̱ praṇī̍tī pi̱taro̍ na indo de̱veṣu̱ ratna̍m abhajanta̱ dhīrā̍ḥ || RV_1,091.01

tvaṁ so̍ma̱ kratu̍bhiḥ su̱kratu̍r bhū̱s tvaṁ dakṣai̍ḥ su̱dakṣo̍ vi̱śvave̍dāḥ |
tvaṁ vṛṣā̍ vṛṣa̱tvebhi̍r mahi̱tvā dyu̱mnebhi̍r dyu̱mny a̍bhavo nṛ̱cakṣā̍ḥ || RV_1,091.02

rājño̱ nu te̱ varu̍ṇasya vra̱tāni̍ bṛ̱had ga̍bhī̱raṁ tava̍ soma̱ dhāma̍ |
śuci̱ṣ ṭvam a̍si pri̱yo na mi̱tro da̱kṣāyyo̍ arya̱mevā̍si soma || RV_1,091.03

yā te̱ dhāmā̍ni di̱vi yā pṛ̍thi̱vyāṁ yā parva̍te̱ṣv oṣa̍dhīṣv a̱psu |
tebhi̍r no̱ viśvai̍ḥ su̱manā̱ ahe̍ḻa̱n rāja̍n soma̱ prati̍ ha̱vyā gṛ̍bhāya || RV_1,091.04

tvaṁ so̍māsi̱ satpa̍ti̱s tvaṁ rājo̱ta vṛ̍tra̱hā |
tvam bha̱dro a̍si̱ kratu̍ḥ || RV_1,091.05

tvaṁ ca̍ soma no̱ vaśo̍ jī̱vātu̱ṁ na ma̍rāmahe |
pri̱yasto̍tro̱ vana̱spati̍ḥ || RV_1,091.06

tvaṁ so̍ma ma̱he bhaga̱ṁ tvaṁ yūna̍ ṛtāya̱te |
dakṣa̍ṁ dadhāsi jī̱vase̍ || RV_1,091.07

tvaṁ na̍ḥ soma vi̱śvato̱ rakṣā̍ rājann aghāya̱taḥ |
na ri̍ṣye̱t tvāva̍ta̱ḥ sakhā̍ || RV_1,091.08

soma̱ yās te̍ mayo̱bhuva̍ ū̱taya̱ḥ santi̍ dā̱śuṣe̍ |
tābhi̍r no 'vi̱tā bha̍va || RV_1,091.09

i̱maṁ ya̱jñam i̱daṁ vaco̍ jujuṣā̱ṇa u̱pāga̍hi |
soma̱ tvaṁ no̍ vṛ̱dhe bha̍va || RV_1,091.10

soma̍ gī̱rbhiṣ ṭvā̍ va̱yaṁ va̱rdhayā̍mo vaco̱vida̍ḥ |
su̱mṛ̱ḻī̱ko na̱ ā vi̍śa || RV_1,091.11

ga̱ya̱sphāno̍ amīva̱hā va̍su̱vit pu̍ṣṭi̱vardha̍naḥ |
su̱mi̱traḥ so̍ma no bhava || RV_1,091.12

soma̍ rāra̱ndhi no̍ hṛ̱di gāvo̱ na yava̍se̱ṣv ā |
marya̍ iva̱ sva o̱kye̍ || RV_1,091.13

yaḥ so̍ma sa̱khye tava̍ rā̱raṇa̍d deva̱ martya̍ḥ |
taṁ dakṣa̍ḥ sacate ka̱viḥ || RV_1,091.14

u̱ru̱ṣyā ṇo̍ a̱bhiśa̍ste̱ḥ soma̱ ni pā̱hy aṁha̍saḥ |
sakhā̍ su̱śeva̍ edhi naḥ || RV_1,091.15

ā pyā̍yasva̱ sam e̍tu te vi̱śvata̍ḥ soma̱ vṛṣṇya̍m |
bhavā̱ vāja̍sya saṁga̱the || RV_1,091.16

ā pyā̍yasva madintama̱ soma̱ viśve̍bhir a̱ṁśubhi̍ḥ |
bhavā̍ naḥ su̱śrava̍stama̱ḥ sakhā̍ vṛ̱dhe || RV_1,091.17

saṁ te̱ payā̍ṁsi̱ sam u̍ yantu̱ vājā̱ḥ saṁ vṛṣṇyā̍ny abhimāti̱ṣāha̍ḥ |
ā̱pyāya̍māno a̱mṛtā̍ya soma di̱vi śravā̍ṁsy utta̱māni̍ dhiṣva || RV_1,091.18

yā te̱ dhāmā̍ni ha̱viṣā̱ yaja̍nti̱ tā te̱ viśvā̍ pari̱bhūr a̍stu ya̱jñam |
ga̱ya̱sphāna̍ḥ pra̱tara̍ṇaḥ su̱vīro 'vī̍rahā̱ pra ca̍rā soma̱ duryā̍n || RV_1,091.19

somo̍ dhe̱nuṁ somo̱ arva̍ntam ā̱śuṁ somo̍ vī̱raṁ ka̍rma̱ṇya̍ṁ dadāti |
sā̱da̱nya̍ṁ vida̱thya̍ṁ sa̱bheya̍m pitṛ̱śrava̍ṇa̱ṁ yo dadā̍śad asmai || RV_1,091.20

aṣā̍ḻhaṁ yu̱tsu pṛta̍nāsu̱ papri̍ṁ sva̱rṣām a̱psāṁ vṛ̱jana̍sya go̱pām |
bha̱re̱ṣu̱jāṁ su̍kṣi̱tiṁ su̱śrava̍sa̱ṁ jaya̍nta̱ṁ tvām anu̍ madema soma || RV_1,091.21

tvam i̱mā oṣa̍dhīḥ soma̱ viśvā̱s tvam a̱po a̍janaya̱s tvaṁ gāḥ |
tvam ā ta̍tantho̱rv a1̱̍ntari̍kṣa̱ṁ tvaṁ jyoti̍ṣā̱ vi tamo̍ vavartha || RV_1,091.22

de̱vena̍ no̱ mana̍sā deva soma rā̱yo bhā̱gaṁ sa̍hasāvann a̱bhi yu̍dhya |
mā tvā ta̍na̱d īśi̍ṣe vī̱rya̍syo̱bhaye̍bhya̱ḥ pra ci̍kitsā̱ gavi̍ṣṭau || RV_1,091.23

e̱tā u̱ tyā u̱ṣasa̍ḥ ke̱tum a̍krata̱ pūrve̱ ardhe̱ raja̍so bhā̱num a̍ñjate |
ni̱ṣkṛ̱ṇvā̱nā āyu̍dhānīva dhṛ̱ṣṇava̱ḥ prati̱ gāvo 'ru̍ṣīr yanti mā̱tara̍ḥ || RV_1,092.01

ud a̍paptann aru̱ṇā bhā̱navo̱ vṛthā̍ svā̱yujo̱ aru̍ṣī̱r gā a̍yukṣata |
akra̍nn u̱ṣāso̍ va̱yunā̍ni pū̱rvathā̱ ruśa̍ntam bhā̱num aru̍ṣīr aśiśrayuḥ || RV_1,092.02

arca̍nti̱ nārī̍r a̱paso̱ na vi̱ṣṭibhi̍ḥ samā̱nena̱ yoja̍ne̱nā pa̍rā̱vata̍ḥ |
iṣa̱ṁ vaha̍ntīḥ su̱kṛte̍ su̱dāna̍ve̱ viśved aha̱ yaja̍mānāya sunva̱te || RV_1,092.03

adhi̱ peśā̍ṁsi vapate nṛ̱tūr i̱vāpo̍rṇute̱ vakṣa̍ u̱sreva̱ barja̍ham |
jyoti̱r viśva̍smai̱ bhuva̍nāya kṛṇva̱tī gāvo̱ na vra̱jaṁ vy u1̱̍ṣā ā̍va̱r tama̍ḥ || RV_1,092.04

praty a̱rcī ruśa̍d asyā adarśi̱ vi ti̍ṣṭhate̱ bādha̍te kṛ̱ṣṇam abhva̍m |
svaru̱ṁ na peśo̍ vi̱dathe̍ṣv a̱ñjañ ci̱traṁ di̱vo du̍hi̱tā bhā̱num a̍śret || RV_1,092.05

atā̍riṣma̱ tama̍sas pā̱ram a̱syoṣā u̱cchantī̍ va̱yunā̍ kṛṇoti |
śri̱ye chando̱ na sma̍yate vibhā̱tī su̱pratī̍kā saumana̱sāyā̍jīgaḥ || RV_1,092.06

bhāsva̍tī ne̱trī sū̱nṛtā̍nāṁ di̱vaḥ sta̍ve duhi̱tā gota̍mebhiḥ |
pra̱jāva̍to nṛ̱vato̱ aśva̍budhyā̱n uṣo̱ goa̍grā̱m̐ upa̍ māsi̱ vājā̍n || RV_1,092.07

uṣa̱s tam a̍śyāṁ ya̱śasa̍ṁ su̱vīra̍ṁ dā̱sapra̍vargaṁ ra̱yim aśva̍budhyam |
su̱daṁsa̍sā̱ śrava̍sā̱ yā vi̱bhāsi̱ vāja̍prasūtā subhage bṛ̱hanta̍m || RV_1,092.08

viśvā̍ni de̱vī bhuva̍nābhi̱cakṣyā̍ pratī̱cī cakṣu̍r urvi̱yā vi bhā̍ti |
viśva̍ṁ jī̱vaṁ ca̱rase̍ bo̱dhaya̍ntī̱ viśva̍sya̱ vāca̍m avidan manā̱yoḥ || RV_1,092.09

puna̍ḥ-puna̱r jāya̍mānā purā̱ṇī sa̍mā̱naṁ varṇa̍m a̱bhi śumbha̍mānā |
śva̱ghnīva̍ kṛ̱tnur vija̍ āminā̱nā marta̍sya de̱vī ja̱raya̱nty āyu̍ḥ || RV_1,092.10

vyū̱rṇva̱tī di̱vo antā̍m̐ abo̱dhy apa̱ svasā̍raṁ sanu̱tar yu̍yoti |
pra̱mi̱na̱tī ma̍nu̱ṣyā̍ yu̱gāni̱ yoṣā̍ jā̱rasya̱ cakṣa̍sā̱ vi bhā̍ti || RV_1,092.11

pa̱śūn na ci̱trā su̱bhagā̍ prathā̱nā sindhu̱r na kṣoda̍ urvi̱yā vy a̍śvait |
ami̍natī̱ daivyā̍ni vra̱tāni̱ sūrya̍sya ceti ra̱śmibhi̍r dṛśā̱nā || RV_1,092.12

uṣa̱s tac ci̱tram ā bha̍rā̱smabhya̍ṁ vājinīvati |
yena̍ to̱kaṁ ca̱ tana̍yaṁ ca̱ dhāma̍he || RV_1,092.13

uṣo̍ a̱dyeha go̍ma̱ty aśvā̍vati vibhāvari |
re̱vad a̱sme vy u̍ccha sūnṛtāvati || RV_1,092.14

yu̱kṣvā hi vā̍jinīva̱ty aśvā̍m̐ a̱dyāru̱ṇām̐ u̍ṣaḥ |
athā̍ no̱ viśvā̱ saubha̍gā̱ny ā va̍ha || RV_1,092.15

aśvi̍nā va̱rtir a̱smad ā goma̍d dasrā̱ hira̍ṇyavat |
a̱rvāg ratha̱ṁ sama̍nasā̱ ni ya̍cchatam || RV_1,092.16

yāv i̱tthā śloka̱m ā di̱vo jyoti̱r janā̍ya ca̱krathu̍ḥ |
ā na̱ ūrja̍ṁ vahatam aśvinā yu̱vam || RV_1,092.17

eha de̱vā ma̍yo̱bhuvā̍ da̱srā hira̍ṇyavartanī |
u̱ṣa̱rbudho̍ vahantu̱ soma̍pītaye || RV_1,092.18

agnī̍ṣomāv i̱maṁ su me̍ śṛṇu̱taṁ vṛ̍ṣaṇā̱ hava̍m |
prati̍ sū̱ktāni̍ haryata̱m bhava̍taṁ dā̱śuṣe̱ maya̍ḥ || RV_1,093.01

agnī̍ṣomā̱ yo a̱dya vā̍m i̱daṁ vaca̍ḥ sapa̱ryati̍ |
tasmai̍ dhattaṁ su̱vīrya̱ṁ gavā̱m poṣa̱ṁ svaśvya̍m || RV_1,093.02

agnī̍ṣomā̱ ya āhu̍ti̱ṁ yo vā̱ṁ dāśā̍d dha̱viṣkṛ̍tim |
sa pra̱jayā̍ su̱vīrya̱ṁ viśva̱m āyu̱r vy a̍śnavat || RV_1,093.03

agnī̍ṣomā̱ ceti̱ tad vī̱rya̍ṁ vā̱ṁ yad amu̍ṣṇītam ava̱sam pa̱ṇiṁ gāḥ |
avā̍tirata̱m bṛsa̍yasya̱ śeṣo 'vi̍ndata̱ṁ jyoti̱r eka̍m ba̱hubhya̍ḥ || RV_1,093.04

yu̱vam e̱tāni̍ di̱vi ro̍ca̱nāny a̱gniś ca̍ soma̱ sakra̍tū adhattam |
yu̱vaṁ sindhū̍m̐r a̱bhiśa̍ster ava̱dyād agnī̍ṣomā̱v amu̍ñcataṁ gṛbhī̱tān || RV_1,093.05

ānyaṁ di̱vo mā̍ta̱riśvā̍ jabhā̱rāma̍thnād a̱nyam pari̍ śye̱no adre̍ḥ |
agnī̍ṣomā̱ brahma̍ṇā vāvṛdhā̱noruṁ ya̱jñāya̍ cakrathur u lo̱kam || RV_1,093.06

agnī̍ṣomā ha̱viṣa̱ḥ prasthi̍tasya vī̱taṁ harya̍taṁ vṛṣaṇā ju̱ṣethā̍m |
su̱śarmā̍ṇā̱ svava̍sā̱ hi bhū̱tam athā̍ dhatta̱ṁ yaja̍mānāya̱ śaṁ yoḥ || RV_1,093.07

yo a̱gnīṣomā̍ ha̱viṣā̍ sapa̱ryād de̍va̱drīcā̱ mana̍sā̱ yo ghṛ̱tena̍ |
tasya̍ vra̱taṁ ra̍kṣatam pā̱tam aṁha̍so vi̱śe janā̍ya̱ mahi̱ śarma̍ yacchatam || RV_1,093.08

agnī̍ṣomā̱ save̍dasā̱ sahū̍tī vanata̱ṁ gira̍ḥ |
saṁ de̍va̱trā ba̍bhūvathuḥ || RV_1,093.09

agnī̍ṣomāv a̱nena̍ vā̱ṁ yo vā̍ṁ ghṛ̱tena̱ dāśa̍ti |
tasmai̍ dīdayatam bṛ̱hat || RV_1,093.10

agnī̍ṣomāv i̱māni̍ no yu̱vaṁ ha̱vyā ju̍joṣatam |
ā yā̍ta̱m upa̍ na̱ḥ sacā̍ || RV_1,093.11

agnī̍ṣomā pipṛ̱tam arva̍to na̱ ā pyā̍yantām u̱sriyā̍ havya̱sūda̍ḥ |
a̱sme balā̍ni ma̱ghava̍tsu dhattaṁ kṛṇu̱taṁ no̍ adhva̱raṁ śru̍ṣṭi̱manta̍m || RV_1,093.12

i̱maṁ stoma̱m arha̍te jā̱tave̍dase̱ ratha̍m iva̱ sam ma̍hemā manī̱ṣayā̍ |
bha̱drā hi na̱ḥ prama̍tir asya sa̱ṁsady agne̍ sa̱khye mā ri̍ṣāmā va̱yaṁ tava̍ || RV_1,094.01

yasmai̱ tvam ā̱yaja̍se̱ sa sā̍dhaty ana̱rvā kṣe̍ti̱ dadha̍te su̱vīrya̍m |
sa tū̍tāva̱ naina̍m aśnoty aṁha̱tir agne̍ sa̱khye mā ri̍ṣāmā va̱yaṁ tava̍ || RV_1,094.02

śa̱kema̍ tvā sa̱midha̍ṁ sā̱dhayā̱ dhiya̱s tve de̱vā ha̱vir a̍da̱nty āhu̍tam |
tvam ā̍di̱tyām̐ ā va̍ha̱ tān hy u1̱̍śmasy agne̍ sa̱khye mā ri̍ṣāmā va̱yaṁ tava̍ || RV_1,094.03

bharā̍me̱dhmaṁ kṛ̱ṇavā̍mā ha̱vīṁṣi̍ te ci̱taya̍nta̱ḥ parva̍ṇā-parvaṇā va̱yam |
jī̱vāta̍ve prata̱raṁ sā̍dhayā̱ dhiyo 'gne̍ sa̱khye mā ri̍ṣāmā va̱yaṁ tava̍ || RV_1,094.04

vi̱śāṁ go̱pā a̍sya caranti ja̱ntavo̍ dvi̱pac ca̱ yad u̱ta catu̍ṣpad a̱ktubhi̍ḥ |
ci̱traḥ pra̍ke̱ta u̱ṣaso̍ ma̱hām̐ a̱sy agne̍ sa̱khye mā ri̍ṣāmā va̱yaṁ tava̍ || RV_1,094.05

tvam a̍dhva̱ryur u̱ta hotā̍si pū̱rvyaḥ pra̍śā̱stā potā̍ ja̱nuṣā̍ pu̱rohi̍taḥ |
viśvā̍ vi̱dvām̐ ārtvi̍jyā dhīra puṣya̱sy agne̍ sa̱khye mā ri̍ṣāmā va̱yaṁ tava̍ || RV_1,094.06

yo vi̱śvata̍ḥ su̱pratī̍kaḥ sa̱dṛṅṅ asi̍ dū̱re ci̱t san ta̱ḻid i̱vāti̍ rocase |
rātryā̍ś ci̱d andho̱ ati̍ deva paśya̱sy agne̍ sa̱khye mā ri̍ṣāmā va̱yaṁ tava̍ || RV_1,094.07

pūrvo̍ devā bhavatu sunva̱to ratho̱ 'smāka̱ṁ śaṁso̍ a̱bhy a̍stu dū̱ḍhya̍ḥ |
tad ā jā̍nīto̱ta pu̍ṣyatā̱ vaco 'gne̍ sa̱khye mā ri̍ṣāmā va̱yaṁ tava̍ || RV_1,094.08

va̱dhair du̱ḥśaṁsā̱m̐ apa̍ dū̱ḍhyo̍ jahi dū̱re vā̱ ye anti̍ vā̱ ke ci̍d a̱triṇa̍ḥ |
athā̍ ya̱jñāya̍ gṛṇa̱te su̱gaṁ kṛ̱dhy agne̍ sa̱khye mā ri̍ṣāmā va̱yaṁ tava̍ || RV_1,094.09

yad ayu̍kthā aru̱ṣā rohi̍tā̱ rathe̱ vāta̍jūtā vṛṣa̱bhasye̍va te̱ rava̍ḥ |
ād i̍nvasi va̱nino̍ dhū̱make̍tu̱nāgne̍ sa̱khye mā ri̍ṣāmā va̱yaṁ tava̍ || RV_1,094.10

adha̍ sva̱nād u̱ta bi̍bhyuḥ pata̱triṇo̍ dra̱psā yat te̍ yava̱sādo̱ vy asthi̍ran |
su̱gaṁ tat te̍ tāva̱kebhyo̱ rathe̱bhyo 'gne̍ sa̱khye mā ri̍ṣāmā va̱yaṁ tava̍ || RV_1,094.11

a̱yam mi̱trasya̱ varu̍ṇasya̱ dhāya̍se 'vayā̱tām ma̱rutā̱ṁ heḻo̱ adbhu̍taḥ |
mṛ̱ḻā su no̱ bhūtv e̍ṣā̱m mana̱ḥ puna̱r agne̍ sa̱khye mā ri̍ṣāmā va̱yaṁ tava̍ || RV_1,094.12

de̱vo de̱vānā̍m asi mi̱tro adbhu̍to̱ vasu̱r vasū̍nām asi̱ cāru̍r adhva̱re |
śarma̍n syāma̱ tava̍ sa̱pratha̍sta̱me 'gne̍ sa̱khye mā ri̍ṣāmā va̱yaṁ tava̍ || RV_1,094.13

tat te̍ bha̱draṁ yat sami̍ddha̱ḥ sve dame̱ somā̍huto̱ jara̍se mṛḻa̱yatta̍maḥ |
dadhā̍si̱ ratna̱ṁ dravi̍ṇaṁ ca dā̱śuṣe 'gne̍ sa̱khye mā ri̍ṣāmā va̱yaṁ tava̍ || RV_1,094.14

yasmai̱ tvaṁ su̍draviṇo̱ dadā̍śo 'nāgā̱stvam a̍dite sa̱rvatā̍tā |
yam bha̱dreṇa̱ śava̍sā co̱dayā̍si pra̱jāva̍tā̱ rādha̍sā̱ te syā̍ma || RV_1,094.15

sa tvam a̍gne saubhaga̱tvasya̍ vi̱dvān a̱smāka̱m āyu̱ḥ pra ti̍re̱ha de̍va |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,094.16

dve virū̍pe carata̱ḥ svarthe̍ a̱nyānyā̍ va̱tsam upa̍ dhāpayete |
hari̍r a̱nyasyā̱m bhava̍ti sva̱dhāvā̍ñ chu̱kro a̱nyasyā̍ṁ dadṛśe su̱varcā̍ḥ || RV_1,095.01

daśe̱maṁ tvaṣṭu̍r janayanta̱ garbha̱m ata̍ndrāso yuva̱tayo̱ vibhṛ̍tram |
ti̱gmānī̍ka̱ṁ svaya̍śasa̱ṁ jane̍ṣu vi̱roca̍māna̱m pari̍ ṣīṁ nayanti || RV_1,095.02

trīṇi̱ jānā̱ pari̍ bhūṣanty asya samu̱dra eka̍ṁ di̱vy eka̍m a̱psu |
pūrvā̱m anu̱ pra diśa̱m pārthi̍vānām ṛ̱tūn pra̱śāsa̱d vi da̍dhāv anu̱ṣṭhu || RV_1,095.03

ka i̱maṁ vo̍ ni̱ṇyam ā ci̍keta va̱tso mā̱tṝr ja̍nayata sva̱dhābhi̍ḥ |
ba̱hvī̱nāṁ garbho̍ a̱pasā̍m u̱pasthā̍n ma̱hān ka̱vir niś ca̍rati sva̱dhāvā̍n || RV_1,095.04

ā̱viṣṭyo̍ vardhate̱ cāru̍r āsu ji̱hmānā̍m ū̱rdhvaḥ svaya̍śā u̱pasthe̍ |
u̱bhe tvaṣṭu̍r bibhyatu̱r jāya̍mānāt pratī̱cī si̱ṁham prati̍ joṣayete || RV_1,095.05

u̱bhe bha̱dre jo̍ṣayete̱ na mene̱ gāvo̱ na vā̱śrā upa̍ tasthu̱r evai̍ḥ |
sa dakṣā̍ṇā̱ṁ dakṣa̍patir babhūvā̱ñjanti̱ yaṁ da̍kṣiṇa̱to ha̱virbhi̍ḥ || RV_1,095.06

ud ya̍ṁyamīti savi̱teva̍ bā̱hū u̱bhe sicau̍ yatate bhī̱ma ṛ̱ñjan |
uc chu̱kram atka̍m ajate si̱masmā̱n navā̍ mā̱tṛbhyo̱ vasa̍nā jahāti || RV_1,095.07

tve̱ṣaṁ rū̱paṁ kṛ̍ṇuta̱ utta̍ra̱ṁ yat sa̍mpṛñcā̱naḥ sada̍ne̱ gobhi̍r a̱dbhiḥ |
ka̱vir bu̱dhnam pari̍ marmṛjyate̱ dhīḥ sā de̱vatā̍tā̱ sami̍tir babhūva || RV_1,095.08

u̱ru te̱ jraya̱ḥ pary e̍ti bu̱dhnaṁ vi̱roca̍mānam mahi̱ṣasya̱ dhāma̍ |
viśve̍bhir agne̱ svaya̍śobhir i̱ddho 'da̍bdhebhiḥ pā̱yubhi̍ḥ pāhy a̱smān || RV_1,095.09

dhanva̱n srota̍ḥ kṛṇute gā̱tum ū̱rmiṁ śu̱krair ū̱rmibhi̍r a̱bhi na̍kṣati̱ kṣām |
viśvā̱ sanā̍ni ja̱ṭhare̍ṣu dhatte̱ 'ntar navā̍su carati pra̱sūṣu̍ || RV_1,095.10

e̱vā no̍ agne sa̱midhā̍ vṛdhā̱no re̱vat pā̍vaka̱ śrava̍se̱ vi bhā̍hi |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,095.11

sa pra̱tnathā̱ saha̍sā̱ jāya̍mānaḥ sa̱dyaḥ kāvyā̍ni̱ baḻ a̍dhatta̱ viśvā̍ |
āpa̍ś ca mi̱traṁ dhi̱ṣaṇā̍ ca sādhan de̱vā a̱gniṁ dhā̍rayan draviṇo̱dām || RV_1,096.01

sa pūrva̍yā ni̱vidā̍ ka̱vyatā̱yor i̱māḥ pra̱jā a̍janaya̱n manū̍nām |
vi̱vasva̍tā̱ cakṣa̍sā̱ dyām a̱paś ca̍ de̱vā a̱gniṁ dhā̍rayan draviṇo̱dām || RV_1,096.02

tam ī̍ḻata pratha̱maṁ ya̍jña̱sādha̱ṁ viśa̱ ārī̱r āhu̍tam ṛñjasā̱nam |
ū̱rjaḥ pu̱tram bha̍ra̱taṁ sṛ̱pradā̍nuṁ de̱vā a̱gniṁ dhā̍rayan draviṇo̱dām || RV_1,096.03

sa mā̍ta̱riśvā̍ puru̱vāra̍puṣṭir vi̱dad gā̱tuṁ tana̍yāya sva̱rvit |
vi̱śāṁ go̱pā ja̍ni̱tā roda̍syor de̱vā a̱gniṁ dhā̍rayan draviṇo̱dām || RV_1,096.04

nakto̱ṣāsā̱ varṇa̍m ā̱memyā̍ne dhā̱paye̍te̱ śiśu̱m eka̍ṁ samī̱cī |
dyāvā̱kṣāmā̍ ru̱kmo a̱ntar vi bhā̍ti de̱vā a̱gniṁ dhā̍rayan draviṇo̱dām || RV_1,096.05

rā̱yo bu̱dhnaḥ sa̱ṁgama̍no̱ vasū̍nāṁ ya̱jñasya̍ ke̱tur ma̍nma̱sādha̍no̱ veḥ |
a̱mṛ̱ta̱tvaṁ rakṣa̍māṇāsa enaṁ de̱vā a̱gniṁ dhā̍rayan draviṇo̱dām || RV_1,096.06

nū ca̍ pu̱rā ca̱ sada̍naṁ rayī̱ṇāṁ jā̱tasya̍ ca̱ jāya̍mānasya ca̱ kṣām |
sa̱taś ca̍ go̱pām bhava̍taś ca̱ bhūre̍r de̱vā a̱gniṁ dhā̍rayan draviṇo̱dām || RV_1,096.07

dra̱vi̱ṇo̱dā dravi̍ṇasas tu̱rasya̍ draviṇo̱dāḥ sana̍rasya̱ pra ya̍ṁsat |
dra̱vi̱ṇo̱dā vī̱rava̍tī̱m iṣa̍ṁ no draviṇo̱dā rā̍sate dī̱rgham āyu̍ḥ || RV_1,096.08

e̱vā no̍ agne sa̱midhā̍ vṛdhā̱no re̱vat pā̍vaka̱ śrava̍se̱ vi bhā̍hi |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,096.09

apa̍ na̱ḥ śośu̍cad a̱gham agne̍ śuśu̱gdhy ā ra̱yim |
apa̍ na̱ḥ śośu̍cad a̱gham || RV_1,097.01

su̱kṣe̱tri̱yā su̍gātu̱yā va̍sū̱yā ca̍ yajāmahe |
apa̍ na̱ḥ śośu̍cad a̱gham || RV_1,097.02

pra yad bhandi̍ṣṭha eṣā̱m prāsmākā̍saś ca sū̱raya̍ḥ |
apa̍ na̱ḥ śośu̍cad a̱gham || RV_1,097.03

pra yat te̍ agne sū̱rayo̱ jāye̍mahi̱ pra te̍ va̱yam |
apa̍ na̱ḥ śośu̍cad a̱gham || RV_1,097.04

pra yad a̱gneḥ saha̍svato vi̱śvato̱ yanti̍ bhā̱nava̍ḥ |
apa̍ na̱ḥ śośu̍cad a̱gham || RV_1,097.05

tvaṁ hi vi̍śvatomukha vi̱śvata̍ḥ pari̱bhūr asi̍ |
apa̍ na̱ḥ śośu̍cad a̱gham || RV_1,097.06

dviṣo̍ no viśvatomu̱khāti̍ nā̱veva̍ pāraya |
apa̍ na̱ḥ śośu̍cad a̱gham || RV_1,097.07

sa na̱ḥ sindhu̍m iva nā̱vayāti̍ parṣā sva̱staye̍ |
apa̍ na̱ḥ śośu̍cad a̱gham || RV_1,097.08

vai̱śvā̱na̱rasya̍ suma̱tau syā̍ma̱ rājā̱ hi ka̱m bhuva̍nānām abhi̱śrīḥ |
i̱to jā̱to viśva̍m i̱daṁ vi ca̍ṣṭe vaiśvāna̱ro ya̍tate̱ sūrye̍ṇa || RV_1,098.01

pṛ̱ṣṭo di̱vi pṛ̱ṣṭo a̱gniḥ pṛ̍thi̱vyām pṛ̱ṣṭo viśvā̱ oṣa̍dhī̱r ā vi̍veśa |
vai̱śvā̱na̱raḥ saha̍sā pṛ̱ṣṭo a̱gniḥ sa no̱ divā̱ sa ri̱ṣaḥ pā̍tu̱ nakta̍m || RV_1,098.02

vaiśvā̍nara̱ tava̱ tat sa̱tyam a̍stv a̱smān rāyo̍ ma̱ghavā̍naḥ sacantām |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,098.03

jā̱tave̍dase sunavāma̱ soma̍m arātīya̱to ni da̍hāti̱ veda̍ḥ |
sa na̍ḥ parṣa̱d ati̍ du̱rgāṇi̱ viśvā̍ nā̱veva̱ sindhu̍ṁ duri̱tāty a̱gniḥ || RV_1,099.01

sa yo vṛṣā̱ vṛṣṇye̍bhi̱ḥ samo̍kā ma̱ho di̱vaḥ pṛ̍thi̱vyāś ca̍ sa̱mrāṭ |
sa̱tī̱nasa̍tvā̱ havyo̱ bhare̍ṣu ma̱rutvā̍n no bhava̱tv indra̍ ū̱tī || RV_1,100.01

yasyānā̍pta̱ḥ sūrya̍syeva̱ yāmo̱ bhare̍-bhare vṛtra̱hā śuṣmo̱ asti̍ |
vṛṣa̍ntama̱ḥ sakhi̍bhi̱ḥ svebhi̱r evai̍r ma̱rutvā̍n no bhava̱tv indra̍ ū̱tī || RV_1,100.02

di̱vo na yasya̱ reta̍so̱ dughā̍nā̱ḥ panthā̍so̱ yanti̱ śava̱sāpa̍rītāḥ |
ta̱raddve̍ṣāḥ sāsa̱hiḥ pauṁsye̍bhir ma̱rutvā̍n no bhava̱tv indra̍ ū̱tī || RV_1,100.03

so aṅgi̍robhi̱r aṅgi̍rastamo bhū̱d vṛṣā̱ vṛṣa̍bhi̱ḥ sakhi̍bhi̱ḥ sakhā̱ san |
ṛ̱gmibhi̍r ṛ̱gmī gā̱tubhi̱r jyeṣṭho̍ ma̱rutvā̍n no bhava̱tv indra̍ ū̱tī || RV_1,100.04

sa sū̱nubhi̱r na ru̱drebhi̱r ṛbhvā̍ nṛ̱ṣāhye̍ sāsa̱hvām̐ a̱mitrā̍n |
sanī̍ḻebhiḥ śrava̱syā̍ni̱ tūrva̍n ma̱rutvā̍n no bhava̱tv indra̍ ū̱tī || RV_1,100.05

sa ma̍nyu̱mīḥ sa̱mada̍nasya ka̱rtāsmāke̍bhi̱r nṛbhi̱ḥ sūrya̍ṁ sanat |
a̱sminn aha̱n satpa̍tiḥ puruhū̱to ma̱rutvā̍n no bhava̱tv indra̍ ū̱tī || RV_1,100.06

tam ū̱tayo̍ raṇaya̱ñ chūra̍sātau̱ taṁ kṣema̍sya kṣi̱taya̍ḥ kṛṇvata̱ trām |
sa viśva̍sya ka̱ruṇa̍syeśa̱ eko̍ ma̱rutvā̍n no bhava̱tv indra̍ ū̱tī || RV_1,100.07

tam a̍psanta̱ śava̍sa utsa̱veṣu̱ naro̱ nara̱m ava̍se̱ taṁ dhanā̍ya |
so a̱ndhe ci̱t tama̍si̱ jyoti̍r vidan ma̱rutvā̍n no bhava̱tv indra̍ ū̱tī || RV_1,100.08

sa sa̱vyena̍ yamati̱ vrādha̍taś ci̱t sa da̍kṣi̱ṇe saṁgṛ̍bhītā kṛ̱tāni̍ |
sa kī̱riṇā̍ ci̱t sani̍tā̱ dhanā̍ni ma̱rutvā̍n no bhava̱tv indra̍ ū̱tī || RV_1,100.09

sa grāme̍bhi̱ḥ sani̍tā̱ sa rathe̍bhir vi̱de viśvā̍bhiḥ kṛ̱ṣṭibhi̱r nv a1̱̍dya |
sa pauṁsye̍bhir abhi̱bhūr aśa̍stīr ma̱rutvā̍n no bhava̱tv indra̍ ū̱tī || RV_1,100.10

sa jā̱mibhi̱r yat sa̱majā̍ti mī̱ḻhe 'jā̍mibhir vā puruhū̱ta evai̍ḥ |
a̱pāṁ to̱kasya̱ tana̍yasya je̱ṣe ma̱rutvā̍n no bhava̱tv indra̍ ū̱tī || RV_1,100.11

sa va̍jra̱bhṛd da̍syu̱hā bhī̱ma u̱graḥ sa̱hasra̍cetāḥ śa̱tanī̍tha̱ ṛbhvā̍ |
ca̱mrī̱ṣo na śava̍sā̱ pāñca̍janyo ma̱rutvā̍n no bhava̱tv indra̍ ū̱tī || RV_1,100.12

tasya̱ vajra̍ḥ krandati̱ smat sva̱rṣā di̱vo na tve̱ṣo ra̱vatha̱ḥ śimī̍vān |
taṁ sa̍cante sa̱naya̱s taṁ dhanā̍ni ma̱rutvā̍n no bhava̱tv indra̍ ū̱tī || RV_1,100.13

yasyāja̍sra̱ṁ śava̍sā̱ māna̍m u̱ktham pa̍ribhu̱jad roda̍sī vi̱śvata̍ḥ sīm |
sa pā̍riṣa̱t kratu̍bhir mandasā̱no ma̱rutvā̍n no bhava̱tv indra̍ ū̱tī || RV_1,100.14

na yasya̍ de̱vā de̱vatā̱ na martā̱ āpa̍ś ca̱na śava̍so̱ anta̍m ā̱puḥ |
sa pra̱rikvā̱ tvakṣa̍sā̱ kṣmo di̱vaś ca̍ ma̱rutvā̍n no bhava̱tv indra̍ ū̱tī || RV_1,100.15

ro̱hic chyā̱vā su̱mada̍ṁśur lalā̱mīr dyu̱kṣā rā̱ya ṛ̱jrāśva̍sya |
vṛṣa̍ṇvanta̱m bibhra̍tī dhū̱rṣu ratha̍m ma̱ndrā ci̍keta̱ nāhu̍ṣīṣu vi̱kṣu || RV_1,100.16

e̱tat tyat ta̍ indra̱ vṛṣṇa̍ u̱kthaṁ vā̍rṣāgi̱rā a̱bhi gṛ̍ṇanti̱ rādha̍ḥ |
ṛ̱jrāśva̱ḥ praṣṭi̍bhir amba̱rīṣa̍ḥ sa̱hade̍vo̱ bhaya̍mānaḥ su̱rādhā̍ḥ || RV_1,100.17

dasyū̱ñ chimyū̍m̐ś ca puruhū̱ta evai̍r ha̱tvā pṛ̍thi̱vyāṁ śarvā̱ ni ba̍rhīt |
sana̱t kṣetra̱ṁ sakhi̍bhiḥ śvi̱tnyebhi̱ḥ sana̱t sūrya̱ṁ sana̍d a̱paḥ su̱vajra̍ḥ || RV_1,100.18

vi̱śvāhendro̍ adhiva̱ktā no̍ a̱stv apa̍rihvṛtāḥ sanuyāma̱ vāja̍m |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,100.19

pra ma̱ndine̍ pitu̱mad a̍rcatā̱ vaco̱ yaḥ kṛ̱ṣṇaga̍rbhā ni̱raha̍nn ṛ̱jiśva̍nā |
a̱va̱syavo̱ vṛṣa̍ṇa̱ṁ vajra̍dakṣiṇam ma̱rutva̍ntaṁ sa̱khyāya̍ havāmahe || RV_1,101.01

yo vya̍ṁsaṁ jāhṛṣā̱ṇena̍ ma̱nyunā̱ yaḥ śamba̍ra̱ṁ yo aha̱n pipru̍m avra̱tam |
indro̱ yaḥ śuṣṇa̍m a̱śuṣa̱ṁ ny āvṛ̍ṇaṅ ma̱rutva̍ntaṁ sa̱khyāya̍ havāmahe || RV_1,101.02

yasya̱ dyāvā̍pṛthi̱vī pauṁsya̍m ma̱had yasya̍ vra̱te varu̍ṇo̱ yasya̱ sūrya̍ḥ |
yasyendra̍sya̱ sindha̍va̱ḥ saśca̍ti vra̱tam ma̱rutva̍ntaṁ sa̱khyāya̍ havāmahe || RV_1,101.03

yo aśvā̍nā̱ṁ yo gavā̱ṁ gopa̍tir va̱śī ya ā̍ri̱taḥ karma̍ṇi-karmaṇi sthi̱raḥ |
vī̱ḻoś ci̱d indro̱ yo asu̍nvato va̱dho ma̱rutva̍ntaṁ sa̱khyāya̍ havāmahe || RV_1,101.04

yo viśva̍sya̱ jaga̍taḥ prāṇa̱tas pati̱r yo bra̱hmaṇe̍ pratha̱mo gā avi̍ndat |
indro̱ yo dasyū̱m̐r adha̍rām̐ a̱vāti̍ran ma̱rutva̍ntaṁ sa̱khyāya̍ havāmahe || RV_1,101.05

yaḥ śūre̍bhi̱r havyo̱ yaś ca̍ bhī̱rubhi̱r yo dhāva̍dbhir hū̱yate̱ yaś ca̍ ji̱gyubhi̍ḥ |
indra̱ṁ yaṁ viśvā̱ bhuva̍nā̱bhi sa̍ṁda̱dhur ma̱rutva̍ntaṁ sa̱khyāya̍ havāmahe || RV_1,101.06

ru̱drāṇā̍m eti pra̱diśā̍ vicakṣa̱ṇo ru̱drebhi̱r yoṣā̍ tanute pṛ̱thu jraya̍ḥ |
indra̍m manī̱ṣā a̱bhy a̍rcati śru̱tam ma̱rutva̍ntaṁ sa̱khyāya̍ havāmahe || RV_1,101.07

yad vā̍ marutvaḥ para̱me sa̱dhasthe̱ yad vā̍va̱me vṛ̱jane̍ mā̱dayā̍se |
ata̱ ā yā̍hy adhva̱raṁ no̱ acchā̍ tvā̱yā ha̱viś ca̍kṛmā satyarādhaḥ || RV_1,101.08

tvā̱yendra̱ soma̍ṁ suṣumā sudakṣa tvā̱yā ha̱viś ca̍kṛmā brahmavāhaḥ |
adhā̍ niyutva̱ḥ saga̍ṇo ma̱rudbhi̍r a̱smin ya̱jñe ba̱rhiṣi̍ mādayasva || RV_1,101.09

mā̱daya̍sva̱ hari̍bhi̱r ye ta̍ indra̱ vi ṣya̍sva̱ śipre̱ vi sṛ̍jasva̱ dhene̍ |
ā tvā̍ suśipra̱ hara̍yo vahantū̱śan ha̱vyāni̱ prati̍ no juṣasva || RV_1,101.10

ma̱rutsto̍trasya vṛ̱jana̍sya go̱pā va̱yam indre̍ṇa sanuyāma̱ vāja̍m |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,101.11

i̱māṁ te̱ dhiya̱m pra bha̍re ma̱ho ma̱hīm a̱sya sto̱tre dhi̱ṣaṇā̱ yat ta̍ āna̱je |
tam u̍tsa̱ve ca̍ prasa̱ve ca̍ sāsa̱him indra̍ṁ de̱vāsa̱ḥ śava̍sāmada̱nn anu̍ || RV_1,102.01

a̱sya śravo̍ na̱dya̍ḥ sa̱pta bi̍bhrati̱ dyāvā̱kṣāmā̍ pṛthi̱vī da̍rśa̱taṁ vapu̍ḥ |
a̱sme sū̍ryācandra̱masā̍bhi̱cakṣe̍ śra̱ddhe kam i̍ndra carato vitartu̱ram || RV_1,102.02

taṁ smā̱ ratha̍m maghava̱n prāva̍ sā̱taye̱ jaitra̱ṁ yaṁ te̍ anu̱madā̍ma saṁga̱me |
ā̱jā na̍ indra̱ mana̍sā puruṣṭuta tvā̱yadbhyo̍ maghava̱ñ charma̍ yaccha naḥ || RV_1,102.03

va̱yaṁ ja̍yema̱ tvayā̍ yu̱jā vṛta̍m a̱smāka̱m aṁśa̱m ud a̍vā̱ bhare̍-bhare |
a̱smabhya̍m indra̱ vari̍vaḥ su̱gaṁ kṛ̍dhi̱ pra śatrū̍ṇām maghava̱n vṛṣṇyā̍ ruja || RV_1,102.04

nānā̱ hi tvā̱ hava̍mānā̱ janā̍ i̱me dhanā̍nāṁ dharta̱r ava̍sā vipa̱nyava̍ḥ |
a̱smāka̍ṁ smā̱ ratha̱m ā ti̍ṣṭha sā̱taye̱ jaitra̱ṁ hī̍ndra̱ nibhṛ̍ta̱m mana̱s tava̍ || RV_1,102.05

go̱jitā̍ bā̱hū ami̍takratuḥ si̱maḥ karma̍n-karmañ cha̱tamū̍tiḥ khajaṁka̱raḥ |
a̱ka̱lpa indra̍ḥ prati̱māna̱m oja̱sāthā̱ janā̱ vi hva̍yante siṣā̱sava̍ḥ || RV_1,102.06

ut te̍ śa̱tān ma̍ghava̱nn uc ca̱ bhūya̍sa̱ ut sa̱hasrā̍d ririce kṛ̱ṣṭiṣu̱ śrava̍ḥ |
a̱mā̱traṁ tvā̍ dhi̱ṣaṇā̍ titviṣe ma̱hy adhā̍ vṛ̱trāṇi̍ jighnase puraṁdara || RV_1,102.07

tri̱vi̱ṣṭi̱dhātu̍ prati̱māna̱m oja̍sas ti̱sro bhūmī̍r nṛpate̱ trīṇi̍ roca̱nā |
atī̱daṁ viśva̱m bhuva̍naṁ vavakṣithāśa̱trur i̍ndra ja̱nuṣā̍ sa̱nād a̍si || RV_1,102.08

tvāṁ de̱veṣu̍ pratha̱maṁ ha̍vāmahe̱ tvam ba̍bhūtha̱ pṛta̍nāsu sāsa̱hiḥ |
semaṁ na̍ḥ kā̱rum u̍pama̱nyum u̱dbhida̱m indra̍ḥ kṛṇotu prasa̱ve ratha̍m pu̱raḥ || RV_1,102.09

tvaṁ ji̍getha̱ na dhanā̍ rurodhi̱thārbhe̍ṣv ā̱jā ma̍ghavan ma̱hatsu̍ ca |
tvām u̱gram ava̍se̱ saṁ śi̍śīma̱sy athā̍ na indra̱ hava̍neṣu codaya || RV_1,102.10

vi̱śvāhendro̍ adhiva̱ktā no̍ a̱stv apa̍rihvṛtāḥ sanuyāma̱ vāja̍m |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,102.11

tat ta̍ indri̱yam pa̍ra̱mam pa̍rā̱cair adhā̍rayanta ka̱vaya̍ḥ pu̱redam |
kṣa̱medam a̱nyad di̱vy a1̱̍nyad a̍sya̱ sam ī̍ pṛcyate sama̱neva̍ ke̱tuḥ || RV_1,103.01

sa dhā̍rayat pṛthi̱vīm pa̱pratha̍c ca̱ vajre̍ṇa ha̱tvā nir a̱paḥ sa̍sarja |
aha̱nn ahi̱m abhi̍nad rauhi̱ṇaṁ vy aha̱n vya̍ṁsam ma̱ghavā̱ śacī̍bhiḥ || RV_1,103.02

sa jā̱tūbha̍rmā śra̱ddadhā̍na̱ oja̱ḥ puro̍ vibhi̱ndann a̍cara̱d vi dāsī̍ḥ |
vi̱dvān va̍jri̱n dasya̍ve he̱tim a̱syārya̱ṁ saho̍ vardhayā dyu̱mnam i̍ndra || RV_1,103.03

tad ū̱cuṣe̱ mānu̍ṣe̱mā yu̱gāni̍ kī̱rtenya̍m ma̱ghavā̱ nāma̱ bibhra̍t |
u̱pa̱pra̱yan da̍syu̱hatyā̍ya va̱jrī yad dha̍ sū̱nuḥ śrava̍se̱ nāma̍ da̱dhe || RV_1,103.04

tad a̍sye̱dam pa̍śyatā̱ bhūri̍ pu̱ṣṭaṁ śrad indra̍sya dhattana vī̱ryā̍ya |
sa gā a̍vinda̱t so a̍vinda̱d aśvā̱n sa oṣa̍dhī̱ḥ so a̱paḥ sa vanā̍ni || RV_1,103.05

bhūri̍karmaṇe vṛṣa̱bhāya̱ vṛṣṇe̍ sa̱tyaśu̍ṣmāya sunavāma̱ soma̍m |
ya ā̱dṛtyā̍ paripa̱nthīva̱ śūro 'ya̍jvano vi̱bhaja̱nn eti̱ veda̍ḥ || RV_1,103.06

tad i̍ndra̱ preva̍ vī̱rya̍ṁ cakartha̱ yat sa̱santa̱ṁ vajre̱ṇābo̍dha̱yo 'hi̍m |
anu̍ tvā̱ patnī̍r hṛṣi̱taṁ vaya̍ś ca̱ viśve̍ de̱vāso̍ amada̱nn anu̍ tvā || RV_1,103.07

śuṣṇa̱m pipru̱ṁ kuya̍vaṁ vṛ̱tram i̍ndra ya̱dāva̍dhī̱r vi pura̱ḥ śamba̍rasya |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,103.08

yoni̍ṣ ṭa indra ni̱ṣade̍ akāri̱ tam ā ni ṣī̍da svā̱no nārvā̍ |
vi̱mucyā̱ vayo̍ 'va̱sāyāśvā̍n do̱ṣā vasto̱r vahī̍yasaḥ prapi̱tve || RV_1,104.01

o tye nara̱ indra̍m ū̱taye̍ gu̱r nū ci̱t tān sa̱dyo adhva̍no jagamyāt |
de̱vāso̍ ma̱nyuṁ dāsa̍sya ścamna̱n te na̱ ā va̍kṣan suvi̱tāya̱ varṇa̍m || RV_1,104.02

ava̱ tmanā̍ bharate̱ keta̍vedā̱ ava̱ tmanā̍ bharate̱ phena̍m u̱dan |
kṣī̱reṇa̍ snāta̱ḥ kuya̍vasya̱ yoṣe̍ ha̱te te syā̍tām prava̱ṇe śiphā̍yāḥ || RV_1,104.03

yu̱yopa̱ nābhi̱r upa̍rasyā̱yoḥ pra pūrvā̍bhis tirate̱ rāṣṭi̱ śūra̍ḥ |
a̱ñja̱sī ku̍li̱śī vī̱rapa̍tnī̱ payo̍ hinvā̱nā u̱dabhi̍r bharante || RV_1,104.04

prati̱ yat syā nīthāda̍rśi̱ dasyo̱r oko̱ nācchā̱ sada̍naṁ jāna̱tī gā̍t |
adha̍ smā no maghavañ carkṛ̱tād in mā no̍ ma̱gheva̍ niṣṣa̱pī parā̍ dāḥ || RV_1,104.05

sa tvaṁ na̍ indra̱ sūrye̱ so a̱psv a̍nāgā̱stva ā bha̍ja jīvaśa̱ṁse |
mānta̍rā̱m bhuja̱m ā rī̍riṣo na̱ḥ śraddhi̍taṁ te maha̱ta i̍ndri̱yāya̍ || RV_1,104.06

adhā̍ manye̱ śrat te̍ asmā adhāyi̱ vṛṣā̍ codasva maha̱te dhanā̍ya |
mā no̱ akṛ̍te puruhūta̱ yonā̱v indra̱ kṣudhya̍dbhyo̱ vaya̍ āsu̱tiṁ dā̍ḥ || RV_1,104.07

mā no̍ vadhīr indra̱ mā parā̍ dā̱ mā na̍ḥ pri̱yā bhoja̍nāni̱ pra mo̍ṣīḥ |
ā̱ṇḍā mā no̍ maghavañ chakra̱ nir bhe̱n mā na̱ḥ pātrā̍ bhet sa̱hajā̍nuṣāṇi || RV_1,104.08

a̱rvāṅ ehi̱ soma̍kāmaṁ tvāhur a̱yaṁ su̱tas tasya̍ pibā̱ madā̍ya |
u̱ru̱vyacā̍ ja̱ṭhara̱ ā vṛ̍ṣasva pi̱teva̍ naḥ śṛṇuhi hū̱yamā̍naḥ || RV_1,104.09

ca̱ndramā̍ a̱psv a1̱̍ntar ā su̍pa̱rṇo dhā̍vate di̱vi |
na vo̍ hiraṇyanemayaḥ pa̱daṁ vi̍ndanti vidyuto vi̱ttam me̍ a̱sya ro̍dasī || RV_1,105.01

artha̱m id vā u̍ a̱rthina̱ ā jā̱yā yu̍vate̱ pati̍m |
tu̱ñjāte̱ vṛṣṇya̱m paya̍ḥ pari̱dāya̱ rasa̍ṁ duhe vi̱ttam me̍ a̱sya ro̍dasī || RV_1,105.02

mo ṣu de̍vā a̱daḥ sva1̱̍r ava̍ pādi di̱vas pari̍ |
mā so̱myasya̍ śa̱mbhuva̱ḥ śūne̍ bhūma̱ kadā̍ ca̱na vi̱ttam me̍ a̱sya ro̍dasī || RV_1,105.03

ya̱jñam pṛ̍cchāmy ava̱maṁ sa tad dū̱to vi vo̍cati |
kva̍ ṛ̱tam pū̱rvyaṁ ga̱taṁ kas tad bi̍bharti̱ nūta̍no vi̱ttam me̍ a̱sya ro̍dasī || RV_1,105.04

a̱mī ye de̍vā̱ḥ sthana̍ tri̱ṣv ā ro̍ca̱ne di̱vaḥ |
kad va̍ ṛ̱taṁ kad anṛ̍ta̱ṁ kva̍ pra̱tnā va̱ āhu̍tir vi̱ttam me̍ a̱sya ro̍dasī || RV_1,105.05

kad va̍ ṛ̱tasya̍ dharṇa̱si kad varu̍ṇasya̱ cakṣa̍ṇam |
kad a̍rya̱mṇo ma̱has pa̱thāti̍ krāmema dū̱ḍhyo̍ vi̱ttam me̍ a̱sya ro̍dasī || RV_1,105.06

a̱haṁ so a̍smi̱ yaḥ pu̱rā su̱te vadā̍mi̱ kāni̍ cit |
tam mā̍ vyanty ā̱dhyo̱3̱̍ vṛko̱ na tṛ̱ṣṇaja̍m mṛ̱gaṁ vi̱ttam me̍ a̱sya ro̍dasī || RV_1,105.07

sam mā̍ tapanty a̱bhita̍ḥ sa̱patnī̍r iva̱ parśa̍vaḥ |
mūṣo̱ na śi̱śnā vy a̍danti mā̱dhya̍ḥ sto̱tāra̍ṁ te śatakrato vi̱ttam me̍ a̱sya ro̍dasī || RV_1,105.08

a̱mī ye sa̱pta ra̱śmaya̱s tatrā̍ me̱ nābhi̱r āta̍tā |
tri̱tas tad ve̍dā̱ptyaḥ sa jā̍mi̱tvāya̍ rebhati vi̱ttam me̍ a̱sya ro̍dasī || RV_1,105.09

a̱mī ye pañco̱kṣaṇo̱ madhye̍ ta̱sthur ma̱ho di̱vaḥ |
de̱va̱trā nu pra̱vācya̍ṁ sadhrīcī̱nā ni vā̍vṛtur vi̱ttam me̍ a̱sya ro̍dasī || RV_1,105.10

su̱pa̱rṇā e̱ta ā̍sate̱ madhya̍ ā̱rodha̍ne di̱vaḥ |
te se̍dhanti pa̱tho vṛka̱ṁ tara̍ntaṁ ya̱hvatī̍r a̱po vi̱ttam me̍ a̱sya ro̍dasī || RV_1,105.11

navya̱ṁ tad u̱kthya̍ṁ hi̱taṁ devā̍saḥ supravāca̱nam |
ṛ̱tam a̍rṣanti̱ sindha̍vaḥ sa̱tyaṁ tā̍tāna̱ sūryo̍ vi̱ttam me̍ a̱sya ro̍dasī || RV_1,105.12

agne̱ tava̱ tyad u̱kthya̍ṁ de̱veṣv a̱sty āpya̍m |
sa na̍ḥ sa̱tto ma̍nu̱ṣvad ā de̱vān ya̍kṣi vi̱duṣṭa̍ro vi̱ttam me̍ a̱sya ro̍dasī || RV_1,105.13

sa̱tto hotā̍ manu̱ṣvad ā de̱vām̐ acchā̍ vi̱duṣṭa̍raḥ |
a̱gnir ha̱vyā su̍ṣūdati de̱vo de̱veṣu̱ medhi̍ro vi̱ttam me̍ a̱sya ro̍dasī || RV_1,105.14

brahmā̍ kṛṇoti̱ varu̍ṇo gātu̱vida̱ṁ tam ī̍mahe |
vy ū̍rṇoti hṛ̱dā ma̱tiṁ navyo̍ jāyatām ṛ̱taṁ vi̱ttam me̍ a̱sya ro̍dasī || RV_1,105.15

a̱sau yaḥ panthā̍ ādi̱tyo di̱vi pra̱vācya̍ṁ kṛ̱taḥ |
na sa de̍vā ati̱krame̱ tam ma̍rtāso̱ na pa̍śyatha vi̱ttam me̍ a̱sya ro̍dasī || RV_1,105.16

tri̱taḥ kūpe 'va̍hito de̱vān ha̍vata ū̱taye̍ |
tac chu̍śrāva̱ bṛha̱spati̍ḥ kṛ̱ṇvann a̍ṁhūra̱ṇād u̱ru vi̱ttam me̍ a̱sya ro̍dasī || RV_1,105.17

a̱ru̱ṇo mā̍ sa̱kṛd vṛka̍ḥ pa̱thā yanta̍ṁ da̱darśa̱ hi |
uj ji̍hīte ni̱cāyyā̱ taṣṭe̍va pṛṣṭyāma̱yī vi̱ttam me̍ a̱sya ro̍dasī || RV_1,105.18

e̱nāṅgū̱ṣeṇa̍ va̱yam indra̍vanto̱ 'bhi ṣyā̍ma vṛ̱jane̱ sarva̍vīrāḥ |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,105.19

indra̍m mi̱traṁ varu̍ṇam a̱gnim ū̱taye̱ māru̍ta̱ṁ śardho̱ adi̍tiṁ havāmahe |
ratha̱ṁ na du̱rgād va̍savaḥ sudānavo̱ viśva̍smān no̱ aṁha̍so̱ niṣ pi̍partana || RV_1,106.01

ta ā̍dityā̱ ā ga̍tā sa̱rvatā̍taye bhū̱ta de̍vā vṛtra̱tūrye̍ṣu śa̱mbhuva̍ḥ |
ratha̱ṁ na du̱rgād va̍savaḥ sudānavo̱ viśva̍smān no̱ aṁha̍so̱ niṣ pi̍partana || RV_1,106.02

ava̍ntu naḥ pi̱tara̍ḥ supravāca̱nā u̱ta de̱vī de̱vapu̍tre ṛtā̱vṛdhā̍ |
ratha̱ṁ na du̱rgād va̍savaḥ sudānavo̱ viśva̍smān no̱ aṁha̍so̱ niṣ pi̍partana || RV_1,106.03

narā̱śaṁsa̍ṁ vā̱jina̍ṁ vā̱jaya̍nn i̱ha kṣa̱yadvī̍ram pū̱ṣaṇa̍ṁ su̱mnair ī̍mahe |
ratha̱ṁ na du̱rgād va̍savaḥ sudānavo̱ viśva̍smān no̱ aṁha̍so̱ niṣ pi̍partana || RV_1,106.04

bṛha̍spate̱ sada̱m in na̍ḥ su̱gaṁ kṛ̍dhi̱ śaṁ yor yat te̱ manu̍rhita̱ṁ tad ī̍mahe |
ratha̱ṁ na du̱rgād va̍savaḥ sudānavo̱ viśva̍smān no̱ aṁha̍so̱ niṣ pi̍partana || RV_1,106.05

indra̱ṁ kutso̍ vṛtra̱haṇa̱ṁ śacī̱pati̍ṁ kā̱ṭe nibā̍ḻha̱ ṛṣi̍r ahvad ū̱taye̍ |
ratha̱ṁ na du̱rgād va̍savaḥ sudānavo̱ viśva̍smān no̱ aṁha̍so̱ niṣ pi̍partana || RV_1,106.06

de̱vair no̍ de̱vy adi̍ti̱r ni pā̍tu de̱vas trā̱tā trā̍yatā̱m apra̍yucchan |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,106.07

ya̱jño de̱vānā̱m praty e̍ti su̱mnam ādi̍tyāso̱ bhava̍tā mṛḻa̱yanta̍ḥ |
ā vo̱ 'rvācī̍ suma̱tir va̍vṛtyād a̱ṁhoś ci̱d yā va̍rivo̱vitta̱rāsa̍t || RV_1,107.01

upa̍ no de̱vā ava̱sā ga̍ma̱ntv aṅgi̍rasā̱ṁ sāma̍bhiḥ stū̱yamā̍nāḥ |
indra̍ indri̱yair ma̱ruto̍ ma̱rudbhi̍r ādi̱tyair no̱ adi̍ti̱ḥ śarma̍ yaṁsat || RV_1,107.02

tan na̱ indra̱s tad varu̍ṇa̱s tad a̱gnis tad a̍rya̱mā tat sa̍vi̱tā cano̍ dhāt |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,107.03

ya i̍ndrāgnī ci̱trata̍mo̱ ratho̍ vām a̱bhi viśvā̍ni̱ bhuva̍nāni̱ caṣṭe̍ |
tenā yā̍taṁ sa̱ratha̍ṁ tasthi̱vāṁsāthā̱ soma̍sya pibataṁ su̱tasya̍ || RV_1,108.01

yāva̍d i̱dam bhuva̍na̱ṁ viśva̱m asty u̍ru̱vyacā̍ vari̱matā̍ gabhī̱ram |
tāvā̍m̐ a̱yam pāta̍ve̱ somo̍ a̱stv ara̍m indrāgnī̱ mana̍se yu̱vabhyā̍m || RV_1,108.02

ca̱krāthe̱ hi sa̱dhrya1̱̍ṅ nāma̍ bha̱draṁ sa̍dhrīcī̱nā vṛ̍trahaṇā u̱ta stha̍ḥ |
tāv i̍ndrāgnī sa̱dhrya̍ñcā ni̱ṣadyā̱ vṛṣṇa̱ḥ soma̍sya vṛṣa̱ṇā vṛ̍ṣethām || RV_1,108.03

sami̍ddheṣv a̱gniṣv ā̍najā̱nā ya̱tasru̍cā ba̱rhir u̍ tistirā̱ṇā |
tī̱vraiḥ somai̱ḥ pari̍ṣiktebhir a̱rvāg endrā̍gnī saumana̱sāya̍ yātam || RV_1,108.04

yānī̍ndrāgnī ca̱krathu̍r vī̱ryā̍ṇi̱ yāni̍ rū̱pāṇy u̱ta vṛṣṇyā̍ni |
yā vā̍m pra̱tnāni̍ sa̱khyā śi̱vāni̱ tebhi̱ḥ soma̍sya pibataṁ su̱tasya̍ || RV_1,108.05

yad abra̍vam pratha̱maṁ vā̍ṁ vṛṇā̱no̱3̱̍ 'yaṁ somo̱ asu̍rair no vi̱havya̍ḥ |
tāṁ sa̱tyāṁ śra̱ddhām a̱bhy ā hi yā̱tam athā̱ soma̍sya pibataṁ su̱tasya̍ || RV_1,108.06

yad i̍ndrāgnī̱ mada̍tha̱ḥ sve du̍ro̱ṇe yad bra̱hmaṇi̱ rāja̍ni vā yajatrā |
ata̱ḥ pari̍ vṛṣaṇā̱v ā hi yā̱tam athā̱ soma̍sya pibataṁ su̱tasya̍ || RV_1,108.07

yad i̍ndrāgnī̱ yadu̍ṣu tu̱rvaśe̍ṣu̱ yad dru̱hyuṣv anu̍ṣu pū̱ruṣu̱ sthaḥ |
ata̱ḥ pari̍ vṛṣaṇā̱v ā hi yā̱tam athā̱ soma̍sya pibataṁ su̱tasya̍ || RV_1,108.08

yad i̍ndrāgnī ava̱masyā̍m pṛthi̱vyām ma̍dhya̱masyā̍m para̱masyā̍m u̱ta sthaḥ |
ata̱ḥ pari̍ vṛṣaṇā̱v ā hi yā̱tam athā̱ soma̍sya pibataṁ su̱tasya̍ || RV_1,108.09

yad i̍ndrāgnī para̱masyā̍m pṛthi̱vyām ma̍dhya̱masyā̍m ava̱masyā̍m u̱ta sthaḥ |
ata̱ḥ pari̍ vṛṣaṇā̱v ā hi yā̱tam athā̱ soma̍sya pibataṁ su̱tasya̍ || RV_1,108.10

yad i̍ndrāgnī di̱vi ṣṭho yat pṛ̍thi̱vyāṁ yat parva̍te̱ṣv oṣa̍dhīṣv a̱psu |
ata̱ḥ pari̍ vṛṣaṇā̱v ā hi yā̱tam athā̱ soma̍sya pibataṁ su̱tasya̍ || RV_1,108.11

yad i̍ndrāgnī̱ udi̍tā̱ sūrya̍sya̱ madhye̍ di̱vaḥ sva̱dhayā̍ mā̱daye̍the |
ata̱ḥ pari̍ vṛṣaṇā̱v ā hi yā̱tam athā̱ soma̍sya pibataṁ su̱tasya̍ || RV_1,108.12

e̱vendrā̍gnī papi̱vāṁsā̍ su̱tasya̱ viśvā̱smabhya̱ṁ saṁ ja̍yata̱ṁ dhanā̍ni |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,108.13

vi hy akhya̱m mana̍sā̱ vasya̍ i̱cchann indrā̍gnī jñā̱sa u̱ta vā̍ sajā̱tān |
nānyā yu̱vat prama̍tir asti̱ mahya̱ṁ sa vā̱ṁ dhiya̍ṁ vāja̱yantī̍m atakṣam || RV_1,109.01

aśra̍va̱ṁ hi bhū̍ri̱dāva̍ttarā vā̱ṁ vijā̍mātur u̱ta vā̍ ghā syā̱lāt |
athā̱ soma̍sya̱ praya̍tī yu̱vabhyā̱m indrā̍gnī̱ stoma̍ṁ janayāmi̱ navya̍m || RV_1,109.02

mā cche̍dma ra̱śmīm̐r iti̱ nādha̍mānāḥ pitṝ̱ṇāṁ śa̱ktīr a̍nu̱yaccha̍mānāḥ |
i̱ndrā̱gnibhyā̱ṁ kaṁ vṛṣa̍ṇo madanti̱ tā hy adrī̍ dhi̱ṣaṇā̍yā u̱pasthe̍ || RV_1,109.03

yu̱vābhyā̍ṁ de̱vī dhi̱ṣaṇā̱ madā̱yendrā̍gnī̱ soma̍m uśa̱tī su̍noti |
tāv a̍śvinā bhadrahastā supāṇī̱ ā dhā̍vata̱m madhu̍nā pṛ̱ṅktam a̱psu || RV_1,109.04

yu̱vām i̍ndrāgnī̱ vasu̍no vibhā̱ge ta̱vasta̍mā śuśrava vṛtra̱hatye̍ |
tāv ā̱sadyā̍ ba̱rhiṣi̍ ya̱jñe a̱smin pra ca̍rṣaṇī mādayethāṁ su̱tasya̍ || RV_1,109.05

pra ca̍rṣa̱ṇibhya̍ḥ pṛtanā̱have̍ṣu̱ pra pṛ̍thi̱vyā ri̍ricāthe di̱vaś ca̍ |
pra sindhu̍bhya̱ḥ pra gi̱ribhyo̍ mahi̱tvā prendrā̍gnī̱ viśvā̱ bhuva̱nāty a̱nyā || RV_1,109.06

ā bha̍rata̱ṁ śikṣa̍taṁ vajrabāhū a̱smām̐ i̍ndrāgnī avata̱ṁ śacī̍bhiḥ |
i̱me nu te ra̱śmaya̱ḥ sūrya̍sya̱ yebhi̍ḥ sapi̱tvam pi̱taro̍ na̱ āsa̍n || RV_1,109.07

pura̍ṁdarā̱ śikṣa̍taṁ vajrahastā̱smām̐ i̍ndrāgnī avata̱m bhare̍ṣu |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,109.08

ta̱tam me̱ apa̱s tad u̍ tāyate̱ puna̱ḥ svādi̍ṣṭhā dhī̱tir u̱cathā̍ya śasyate |
a̱yaṁ sa̍mu̱dra i̱ha vi̱śvade̍vya̱ḥ svāhā̍kṛtasya̱ sam u̍ tṛpṇuta ṛbhavaḥ || RV_1,110.01

ā̱bho̱gaya̱m pra yad i̱cchanta̱ aita̱nāpā̍kā̱ḥ prāñco̱ mama̱ ke ci̍d ā̱paya̍ḥ |
saudha̍nvanāsaś cari̱tasya̍ bhū̱manāga̍cchata savi̱tur dā̱śuṣo̍ gṛ̱ham || RV_1,110.02

tat sa̍vi̱tā vo̍ 'mṛta̱tvam āsu̍va̱d ago̍hya̱ṁ yac chra̱vaya̍nta̱ aita̍na |
tyaṁ ci̍c cama̱sam asu̍rasya̱ bhakṣa̍ṇa̱m eka̱ṁ santa̍m akṛṇutā̱ catu̍rvayam || RV_1,110.03

vi̱ṣṭvī śamī̍ taraṇi̱tvena̍ vā̱ghato̱ martā̍sa̱ḥ santo̍ amṛta̱tvam ā̍naśuḥ |
sau̱dha̱nva̱nā ṛ̱bhava̱ḥ sūra̍cakṣasaḥ saṁvatsa̱re sam a̍pṛcyanta dhī̱tibhi̍ḥ || RV_1,110.04

kṣetra̍m iva̱ vi ma̍mu̱s teja̍nena̱m̐ eka̱m pātra̍m ṛ̱bhavo̱ jeha̍mānam |
upa̍stutā upa̱maṁ nādha̍mānā̱ ama̍rtyeṣu̱ śrava̍ i̱cchamā̍nāḥ || RV_1,110.05

ā ma̍nī̱ṣām a̱ntari̍kṣasya̱ nṛbhya̍ḥ sru̱ceva̍ ghṛ̱taṁ ju̍havāma vi̱dmanā̍ |
ta̱ra̱ṇi̱tvā ye pi̱tur a̍sya saści̱ra ṛ̱bhavo̱ vāja̍m aruhan di̱vo raja̍ḥ || RV_1,110.06

ṛ̱bhur na̱ indra̱ḥ śava̍sā̱ navī̍yān ṛ̱bhur vāje̍bhi̱r vasu̍bhi̱r vasu̍r da̱diḥ |
yu̱ṣmāka̍ṁ devā̱ ava̱sāha̍ni pri̱ye̱3̱̍ 'bhi ti̍ṣṭhema pṛtsu̱tīr asu̍nvatām || RV_1,110.07

niś carma̍ṇa ṛbhavo̱ gām a̍piṁśata̱ saṁ va̱tsenā̍sṛjatā mā̱tara̱m puna̍ḥ |
saudha̍nvanāsaḥ svapa̱syayā̍ naro̱ jivrī̱ yuvā̍nā pi̱tarā̍kṛṇotana || RV_1,110.08

vāje̍bhir no̱ vāja̍sātāv aviḍḍhy ṛbhu̱mām̐ i̍ndra ci̱tram ā da̍rṣi̱ rādha̍ḥ |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,110.09

takṣa̱n ratha̍ṁ su̱vṛta̍ṁ vidma̱nāpa̍sa̱s takṣa̱n harī̍ indra̱vāhā̱ vṛṣa̍ṇvasū |
takṣa̍n pi̱tṛbhyā̍m ṛ̱bhavo̱ yuva̱d vaya̱s takṣa̍n va̱tsāya̍ mā̱tara̍ṁ sacā̱bhuva̍m || RV_1,111.01

ā no̍ ya̱jñāya̍ takṣata ṛbhu̱mad vaya̱ḥ kratve̱ dakṣā̍ya supra̱jāva̍tī̱m iṣa̍m |
yathā̱ kṣayā̍ma̱ sarva̍vīrayā vi̱śā tan na̱ḥ śardhā̍ya dhāsathā̱ sv i̍ndri̱yam || RV_1,111.02

ā ta̍kṣata sā̱tim a̱smabhya̍m ṛbhavaḥ sā̱tiṁ rathā̍ya sā̱tim arva̍te naraḥ |
sā̱tiṁ no̱ jaitrī̱ṁ sam ma̍heta vi̱śvahā̍ jā̱mim ajā̍mi̱m pṛta̍nāsu sa̱kṣaṇi̍m || RV_1,111.03

ṛ̱bhu̱kṣaṇa̱m indra̱m ā hu̍va ū̱taya̍ ṛ̱bhūn vājā̍n ma̱ruta̱ḥ soma̍pītaye |
u̱bhā mi̱trāvaru̍ṇā nū̱nam a̱śvinā̱ te no̍ hinvantu sā̱taye̍ dhi̱ye ji̱ṣe || RV_1,111.04

ṛ̱bhur bharā̍ya̱ saṁ śi̍śātu sā̱tiṁ sa̍marya̱jid vājo̍ a̱smām̐ a̍viṣṭu |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,111.05

īḻe̱ dyāvā̍pṛthi̱vī pū̱rvaci̍ttaye̱ 'gniṁ gha̱rmaṁ su̱ruca̱ṁ yāma̍nn i̱ṣṭaye̍ |
yābhi̱r bhare̍ kā̱ram aṁśā̍ya̱ jinva̍tha̱s tābhi̍r ū̱ ṣu ū̱tibhi̍r aśvi̱nā ga̍tam || RV_1,112.01

yu̱vor dā̱nāya̍ su̱bharā̍ asa̱ścato̱ ratha̱m ā ta̍sthur vaca̱saṁ na manta̍ve |
yābhi̱r dhiyo 'va̍tha̱ḥ karma̍nn i̱ṣṭaye̱ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.02

yu̱vaṁ tāsā̍ṁ di̱vyasya̍ pra̱śāsa̍ne vi̱śāṁ kṣa̍yatho a̱mṛta̍sya ma̱jmanā̍ |
yābhi̍r dhe̱num a̱sva1̱̍m pinva̍tho narā̱ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.03

yābhi̱ḥ pari̍jmā̱ tana̍yasya ma̱jmanā̍ dvimā̱tā tū̱rṣu ta̱raṇi̍r vi̱bhūṣa̍ti |
yābhi̍s tri̱mantu̱r abha̍vad vicakṣa̱ṇas tābhi̍r ū̱ ṣu ū̱tibhi̍r aśvi̱nā ga̍tam || RV_1,112.04

yābhī̍ re̱bhaṁ nivṛ̍taṁ si̱tam a̱dbhya ud vanda̍na̱m aira̍yata̱ṁ sva̍r dṛ̱śe |
yābhi̱ḥ kaṇva̱m pra siṣā̍santa̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.05

yābhi̱r anta̍ka̱ṁ jasa̍māna̱m āra̍ṇe bhu̱jyuṁ yābhi̍r avya̱thibhi̍r jiji̱nvathu̍ḥ |
yābhi̍ḥ ka̱rkandhu̍ṁ va̱yya̍ṁ ca̱ jinva̍tha̱s tābhi̍r ū̱ ṣu ū̱tibhi̍r aśvi̱nā ga̍tam || RV_1,112.06

yābhi̍ḥ śuca̱ntiṁ dha̍na̱sāṁ su̍ṣa̱ṁsada̍ṁ ta̱ptaṁ gha̱rmam o̱myāva̍nta̱m atra̍ye |
yābhi̱ḥ pṛśni̍gum puru̱kutsa̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.07

yābhi̱ḥ śacī̍bhir vṛṣaṇā parā̱vṛja̱m prāndhaṁ śro̱ṇaṁ cakṣa̍sa̱ eta̍ve kṛ̱thaḥ |
yābhi̱r varti̍kāṁ grasi̱tām amu̍ñcata̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.08

yābhi̱ḥ sindhu̱m madhu̍manta̱m asa̍ścata̱ṁ vasi̍ṣṭha̱ṁ yābhi̍r ajarā̱v aji̍nvatam |
yābhi̱ḥ kutsa̍ṁ śru̱tarya̱ṁ narya̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.09

yābhi̍r vi̱śpalā̍ṁ dhana̱sām a̍tha̱rvya̍ṁ sa̱hasra̍mīḻha ā̱jāv aji̍nvatam |
yābhi̱r vaśa̍m a̱śvyam pre̱ṇim āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.10

yābhi̍ḥ sudānū auśi̱jāya̍ va̱ṇije̍ dī̱rghaśra̍vase̱ madhu̱ kośo̱ akṣa̍rat |
ka̱kṣīva̍ntaṁ sto̱tāra̱ṁ yābhi̱r āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.11

yābhī̍ ra̱sāṁ kṣoda̍so̱dnaḥ pi̍pi̱nvathu̍r ana̱śvaṁ yābhī̱ ratha̱m āva̍taṁ ji̱ṣe |
yābhi̍s tri̱śoka̍ u̱sriyā̍ u̱dāja̍ta̱ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.12

yābhi̱ḥ sūrya̍m pariyā̱thaḥ pa̍rā̱vati̍ mandhā̱tāra̱ṁ kṣaitra̍patye̱ṣv āva̍tam |
yābhi̱r vipra̱m pra bha̱radvā̍ja̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.13

yābhi̍r ma̱hām a̍tithi̱gvaṁ ka̍śo̱juva̱ṁ divo̍dāsaṁ śambara̱hatya̱ āva̍tam |
yābhi̍ḥ pū̱rbhidye̍ tra̱sada̍syu̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.14

yābhi̍r va̱mraṁ vi̍pipā̱nam u̍pastu̱taṁ ka̱liṁ yābhi̍r vi̱ttajā̍niṁ duva̱syatha̍ḥ |
yābhi̱r vya̍śvam u̱ta pṛthi̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.15

yābhi̍r narā śa̱yave̱ yābhi̱r atra̍ye̱ yābhi̍ḥ pu̱rā mana̍ve gā̱tum ī̱ṣathu̍ḥ |
yābhi̱ḥ śārī̱r āja̍ta̱ṁ syūma̍raśmaye̱ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.16

yābhi̱ḥ paṭha̍rvā̱ jaṭha̍rasya ma̱jmanā̱gnir nādī̍dec ci̱ta i̱ddho ajma̱nn ā |
yābhi̱ḥ śaryā̍ta̱m ava̍tho mahādha̱ne tābhi̍r ū̱ ṣu ū̱tibhi̍r aśvi̱nā ga̍tam || RV_1,112.17

yābhi̍r aṅgiro̱ mana̍sā nira̱ṇyatho 'gra̱ṁ gaccha̍tho viva̱re goa̍rṇasaḥ |
yābhi̱r manu̱ṁ śūra̍m i̱ṣā sa̱māva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.18

yābhi̱ḥ patnī̍r vima̱dāya̍ nyū̱hathu̱r ā gha̍ vā̱ yābhi̍r aru̱ṇīr aśi̍kṣatam |
yābhi̍ḥ su̱dāsa̍ ū̱hathu̍ḥ sude̱vya1̱̍ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.19

yābhi̱ḥ śaṁtā̍tī̱ bhava̍tho dadā̱śuṣe̍ bhu̱jyuṁ yābhi̱r ava̍tho̱ yābhi̱r adhri̍gum |
o̱myāva̍tīṁ su̱bharā̍m ṛta̱stubha̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.20

yābhi̍ḥ kṛ̱śānu̱m asa̍ne duva̱syatho̍ ja̱ve yābhi̱r yūno̱ arva̍nta̱m āva̍tam |
madhu̍ pri̱yam bha̍ratho̱ yat sa̱raḍbhya̱s tābhi̍r ū̱ ṣu ū̱tibhi̍r aśvi̱nā ga̍tam || RV_1,112.21

yābhi̱r nara̍ṁ goṣu̱yudha̍ṁ nṛ̱ṣāhye̱ kṣetra̍sya sā̱tā tana̍yasya̱ jinva̍thaḥ |
yābhī̱ rathā̱m̐ ava̍tho̱ yābhi̱r arva̍ta̱s tābhi̍r ū̱ ṣu ū̱tibhi̍r aśvi̱nā ga̍tam || RV_1,112.22

yābhi̱ḥ kutsa̍m ārjune̱yaṁ śa̍takratū̱ pra tu̱rvīti̱m pra ca̍ da̱bhīti̱m āva̍tam |
yābhi̍r dhva̱santi̍m puru̱ṣanti̱m āva̍ta̱ṁ tābhi̍r ū̱ ṣu ū̱tibhi̍r aśvi̱nā ga̍tam || RV_1,112.23

apna̍svatīm aśvinā̱ vāca̍m a̱sme kṛ̱taṁ no̍ dasrā vṛṣaṇā manī̱ṣām |
a̱dyū̱tye 'va̍se̱ ni hva̍ye vāṁ vṛ̱dhe ca̍ no bhavata̱ṁ vāja̍sātau || RV_1,112.24

dyubhi̍r a̱ktubhi̱ḥ pari̍ pātam a̱smān ari̍ṣṭebhir aśvinā̱ saubha̍gebhiḥ |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,112.25

i̱daṁ śreṣṭha̱ṁ jyoti̍ṣā̱ṁ jyoti̱r āgā̍c ci̱traḥ pra̍ke̱to a̍janiṣṭa̱ vibhvā̍ |
yathā̱ prasū̍tā savi̱tuḥ sa̱vāya̍m̐ e̱vā rātry u̱ṣase̱ yoni̍m āraik || RV_1,113.01

ruśa̍dvatsā̱ ruśa̍tī śve̱tyāgā̱d ārai̍g u kṛ̱ṣṇā sada̍nāny asyāḥ |
sa̱mā̱naba̍ndhū a̱mṛte̍ anū̱cī dyāvā̱ varṇa̍ṁ carata āminā̱ne || RV_1,113.02

sa̱mā̱no adhvā̱ svasro̍r ana̱ntas tam a̱nyānyā̍ carato de̱vaśi̍ṣṭe |
na me̍thete̱ na ta̍sthatuḥ su̱meke̱ nakto̱ṣāsā̱ sama̍nasā̱ virū̍pe || RV_1,113.03

bhāsva̍tī ne̱trī sū̱nṛtā̍nā̱m ace̍ti ci̱trā vi duro̍ na āvaḥ |
prārpyā̱ jaga̱d vy u̍ no rā̱yo a̍khyad u̱ṣā a̍jīga̱r bhuva̍nāni̱ viśvā̍ || RV_1,113.04

ji̱hma̱śye̱3̱̍ cari̍tave ma̱ghony ā̍bho̱gaya̍ i̱ṣṭaye̍ rā̱ya u̍ tvam |
da̱bhram paśya̍dbhya urvi̱yā vi̱cakṣa̍ u̱ṣā a̍jīga̱r bhuva̍nāni̱ viśvā̍ || RV_1,113.05

kṣa̱trāya̍ tva̱ṁ śrava̍se tvam mahī̱yā i̱ṣṭaye̍ tva̱m artha̍m iva tvam i̱tyai |
visa̍dṛśā jīvi̱tābhi̍pra̱cakṣa̍ u̱ṣā a̍jīga̱r bhuva̍nāni̱ viśvā̍ || RV_1,113.06

e̱ṣā di̱vo du̍hi̱tā praty a̍darśi vyu̱cchantī̍ yuva̱tiḥ śu̱kravā̍sāḥ |
viśva̱syeśā̍nā̱ pārthi̍vasya̱ vasva̱ uṣo̍ a̱dyeha su̍bhage̱ vy u̍ccha || RV_1,113.07

pa̱rā̱ya̱tī̱nām anv e̍ti̱ pātha̍ āyatī̱nām pra̍tha̱mā śaśva̍tīnām |
vyu̱cchantī̍ jī̱vam u̍dī̱raya̍nty u̱ṣā mṛ̱taṁ kaṁ ca̱na bo̱dhaya̍ntī || RV_1,113.08

uṣo̱ yad a̱gniṁ sa̱midhe̍ ca̱kartha̱ vi yad āva̱ś cakṣa̍sā̱ sūrya̍sya |
yan mānu̍ṣān ya̱kṣyamā̍ṇā̱m̐ ajī̍ga̱s tad de̱veṣu̍ cakṛṣe bha̱dram apna̍ḥ || RV_1,113.09

kiyā̱ty ā yat sa̱mayā̱ bhavā̍ti̱ yā vyū̱ṣur yāś ca̍ nū̱naṁ vyu̱cchān |
anu̱ pūrvā̍ḥ kṛpate vāvaśā̱nā pra̱dīdhyā̍nā̱ joṣa̍m a̱nyābhi̍r eti || RV_1,113.10

ī̱yuṣ ṭe ye pūrva̍tarā̱m apa̍śyan vyu̱cchantī̍m u̱ṣasa̱m martyā̍saḥ |
a̱smābhi̍r ū̱ nu pra̍ti̱cakṣyā̍bhū̱d o te ya̍nti̱ ye a̍pa̱rīṣu̱ paśyā̍n || RV_1,113.11

yā̱va̱yaddve̍ṣā ṛta̱pā ṛ̍te̱jāḥ su̍mnā̱varī̍ sū̱nṛtā̍ ī̱raya̍ntī |
su̱ma̱ṅga̱līr bibhra̍tī de̱vavī̍tim i̱hādyoṣa̱ḥ śreṣṭha̍tamā̱ vy u̍ccha || RV_1,113.12

śaśva̍t pu̱roṣā vy u̍vāsa de̱vy atho̍ a̱dyedaṁ vy ā̍vo ma̱ghonī̍ |
atho̱ vy u̍cchā̱d utta̍rā̱m̐ anu̱ dyūn a̱jarā̱mṛtā̍ carati sva̱dhābhi̍ḥ || RV_1,113.13

vy a1̱̍ñjibhi̍r di̱va ātā̍sv adyau̱d apa̍ kṛ̱ṣṇāṁ ni̱rṇija̍ṁ de̱vy ā̍vaḥ |
pra̱bo̱dhaya̍nty aru̱ṇebhi̱r aśvai̱r oṣā yā̍ti su̱yujā̱ rathe̍na || RV_1,113.14

ā̱vaha̍ntī̱ poṣyā̱ vāryā̍ṇi ci̱traṁ ke̱tuṁ kṛ̍ṇute̱ ceki̍tānā |
ī̱yuṣī̍ṇām upa̱mā śaśva̍tīnāṁ vibhātī̱nām pra̍tha̱moṣā vy a̍śvait || RV_1,113.15

ud ī̍rdhvaṁ jī̱vo asu̍r na̱ āgā̱d apa̱ prāgā̱t tama̱ ā jyoti̍r eti |
ārai̱k panthā̱ṁ yāta̍ve̱ sūryā̱yāga̍nma̱ yatra̍ prati̱ranta̱ āyu̍ḥ || RV_1,113.16

syūma̍nā vā̱ca ud i̍yarti̱ vahni̱ḥ stavā̍no re̱bha u̱ṣaso̍ vibhā̱tīḥ |
a̱dyā tad u̍ccha gṛṇa̱te ma̍ghony a̱sme āyu̱r ni di̍dīhi pra̱jāva̍t || RV_1,113.17

yā goma̍tīr u̱ṣasa̱ḥ sarva̍vīrā vyu̱cchanti̍ dā̱śuṣe̱ martyā̍ya |
vā̱yor i̍va sū̱nṛtā̍nām uda̱rke tā a̍śva̱dā a̍śnavat soma̱sutvā̍ || RV_1,113.18

mā̱tā de̱vānā̱m adi̍te̱r anī̍kaṁ ya̱jñasya̍ ke̱tur bṛ̍ha̱tī vi bhā̍hi |
pra̱śa̱sti̱kṛd brahma̍ṇe no̱ vy u1̱̍cchā no̱ jane̍ janaya viśvavāre || RV_1,113.19

yac ci̱tram apna̍ u̱ṣaso̱ vaha̍ntījā̱nāya̍ śaśamā̱nāya̍ bha̱dram |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,113.20

i̱mā ru̱drāya̍ ta̱vase̍ kapa̱rdine̍ kṣa̱yadvī̍rāya̱ pra bha̍rāmahe ma̱tīḥ |
yathā̱ śam asa̍d dvi̱pade̱ catu̍ṣpade̱ viśva̍m pu̱ṣṭaṁ grāme̍ a̱sminn a̍nātu̱ram || RV_1,114.01

mṛ̱ḻā no̍ rudro̱ta no̱ maya̍s kṛdhi kṣa̱yadvī̍rāya̱ nama̍sā vidhema te |
yac chaṁ ca̱ yoś ca̱ manu̍r āye̱je pi̱tā tad a̍śyāma̱ tava̍ rudra̱ praṇī̍tiṣu || RV_1,114.02

a̱śyāma̍ te suma̱tiṁ de̍vaya̱jyayā̍ kṣa̱yadvī̍rasya̱ tava̍ rudra mīḍhvaḥ |
su̱mnā̱yann id viśo̍ a̱smāka̱m ā ca̱rāri̍ṣṭavīrā juhavāma te ha̱viḥ || RV_1,114.03

tve̱ṣaṁ va̱yaṁ ru̱draṁ ya̍jña̱sādha̍ṁ va̱ṅkuṁ ka̱vim ava̍se̱ ni hva̍yāmahe |
ā̱re a̱smad daivya̱ṁ heḻo̍ asyatu suma̱tim id va̱yam a̱syā vṛ̍ṇīmahe || RV_1,114.04

di̱vo va̍rā̱ham a̍ru̱ṣaṁ ka̍pa̱rdina̍ṁ tve̱ṣaṁ rū̱paṁ nama̍sā̱ ni hva̍yāmahe |
haste̱ bibhra̍d bheṣa̱jā vāryā̍ṇi̱ śarma̱ varma̍ ccha̱rdir a̱smabhya̍ṁ yaṁsat || RV_1,114.05

i̱dam pi̱tre ma̱rutā̍m ucyate̱ vaca̍ḥ svā̱doḥ svādī̍yo ru̱drāya̱ vardha̍nam |
rāsvā̍ ca no amṛta marta̱bhoja̍na̱ṁ tmane̍ to̱kāya̱ tana̍yāya mṛḻa || RV_1,114.06

mā no̍ ma̱hānta̍m u̱ta mā no̍ arbha̱kam mā na̱ ukṣa̍ntam u̱ta mā na̍ ukṣi̱tam |
mā no̍ vadhīḥ pi̱tara̱m mota mā̱tara̱m mā na̍ḥ pri̱yās ta̱nvo̍ rudra rīriṣaḥ || RV_1,114.07

mā na̍s to̱ke tana̍ye̱ mā na̍ ā̱yau mā no̱ goṣu̱ mā no̱ aśve̍ṣu rīriṣaḥ |
vī̱rān mā no̍ rudra bhāmi̱to va̍dhīr ha̱viṣma̍nta̱ḥ sada̱m it tvā̍ havāmahe || RV_1,114.08

upa̍ te̱ stomā̍n paśu̱pā i̱vāka̍ra̱ṁ rāsvā̍ pitar marutāṁ su̱mnam a̱sme |
bha̱drā hi te̍ suma̱tir mṛ̍ḻa̱yatta̱māthā̍ va̱yam ava̱ it te̍ vṛṇīmahe || RV_1,114.09

ā̱re te̍ go̱ghnam u̱ta pū̍ruṣa̱ghnaṁ kṣaya̍dvīra su̱mnam a̱sme te̍ astu |
mṛ̱ḻā ca̍ no̱ adhi̍ ca brūhi de̱vādhā̍ ca na̱ḥ śarma̍ yaccha dvi̱barhā̍ḥ || RV_1,114.10

avo̍cāma̱ namo̍ asmā ava̱syava̍ḥ śṛ̱ṇotu̍ no̱ hava̍ṁ ru̱dro ma̱rutvā̍n |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,114.11

ci̱traṁ de̱vānā̱m ud a̍gā̱d anī̍ka̱ṁ cakṣu̍r mi̱trasya̱ varu̍ṇasyā̱gneḥ |
āprā̱ dyāvā̍pṛthi̱vī a̱ntari̍kṣa̱ṁ sūrya̍ ā̱tmā jaga̍tas ta̱sthuṣa̍ś ca || RV_1,115.01

sūryo̍ de̱vīm u̱ṣasa̱ṁ roca̍mānā̱m maryo̱ na yoṣā̍m a̱bhy e̍ti pa̱ścāt |
yatrā̱ naro̍ deva̱yanto̍ yu̱gāni̍ vitanva̱te prati̍ bha̱drāya̍ bha̱dram || RV_1,115.02

bha̱drā aśvā̍ ha̱rita̱ḥ sūrya̍sya ci̱trā eta̍gvā anu̱mādyā̍saḥ |
na̱ma̱syanto̍ di̱va ā pṛ̱ṣṭham a̍sthu̱ḥ pari̱ dyāvā̍pṛthi̱vī ya̍nti sa̱dyaḥ || RV_1,115.03

tat sūrya̍sya deva̱tvaṁ tan ma̍hi̱tvam ma̱dhyā karto̱r vita̍ta̱ṁ saṁ ja̍bhāra |
ya̱ded ayu̍kta ha̱rita̍ḥ sa̱dhasthā̱d ād rātrī̱ vāsa̍s tanute si̱masmai̍ || RV_1,115.04

tan mi̱trasya̱ varu̍ṇasyābhi̱cakṣe̱ sūryo̍ rū̱paṁ kṛ̍ṇute̱ dyor u̱pasthe̍ |
a̱na̱ntam a̱nyad ruśa̍d asya̱ pāja̍ḥ kṛ̱ṣṇam a̱nyad dha̱rita̱ḥ sam bha̍ranti || RV_1,115.05

a̱dyā de̍vā̱ udi̍tā̱ sūrya̍sya̱ nir aṁha̍saḥ pipṛ̱tā nir a̍va̱dyāt |
tan no̍ mi̱tro varu̍ṇo māmahantā̱m adi̍ti̱ḥ sindhu̍ḥ pṛthi̱vī u̱ta dyauḥ || RV_1,115.06

nāsa̍tyābhyām ba̱rhir i̍va̱ pra vṛ̍ñje̱ stomā̍m̐ iyarmy a̱bhriye̍va̱ vāta̍ḥ |
yāv arbha̍gāya vima̱dāya̍ jā̱yāṁ se̍nā̱juvā̍ nyū̱hatū̱ rathe̍na || RV_1,116.01

vī̱ḻu̱patma̍bhir āśu̱hema̍bhir vā de̱vānā̍ṁ vā jū̱tibhi̱ḥ śāśa̍dānā |
tad rāsa̍bho nāsatyā sa̱hasra̍m ā̱jā ya̱masya̍ pra̱dhane̍ jigāya || RV_1,116.02

tugro̍ ha bhu̱jyum a̍śvinodame̱ghe ra̱yiṁ na kaś ci̍n mamṛ̱vām̐ avā̍hāḥ |
tam ū̍hathur nau̱bhir ā̍tma̱nvatī̍bhir antarikṣa̱prudbhi̱r apo̍dakābhiḥ || RV_1,116.03

ti̱sraḥ kṣapa̱s trir ahā̍ti̱vraja̍dbhi̱r nāsa̍tyā bhu̱jyum ū̍hathuḥ pata̱ṁgaiḥ |
sa̱mu̱drasya̱ dhanva̍nn ā̱rdrasya̍ pā̱re tri̱bhī rathai̍ḥ śa̱tapa̍dbhi̱ḥ ṣaḻa̍śvaiḥ || RV_1,116.04

a̱nā̱ra̱mbha̱ṇe tad a̍vīrayethām anāsthā̱ne a̍grabha̱ṇe sa̍mu̱dre |
yad a̍śvinā ū̱hathu̍r bhu̱jyum asta̍ṁ śa̱tāri̍trā̱ṁ nāva̍m ātasthi̱vāṁsa̍m || RV_1,116.05

yam a̍śvinā da̱dathu̍ḥ śve̱tam aśva̍m a̱ghāśvā̍ya̱ śaśva̱d it sva̱sti |
tad vā̍ṁ dā̱tram mahi̍ kī̱rtenya̍m bhūt pai̱dvo vā̱jī sada̱m id dhavyo̍ a̱ryaḥ || RV_1,116.06

yu̱vaṁ na̍rā stuva̱te pa̍jri̱yāya̍ ka̱kṣīva̍te aradata̱m pura̍ṁdhim |
kā̱ro̱ta̱rāc cha̱phād aśva̍sya̱ vṛṣṇa̍ḥ śa̱taṁ ku̱mbhām̐ a̍siñcata̱ṁ surā̍yāḥ || RV_1,116.07

hi̱menā̱gniṁ ghra̱ṁsam a̍vārayethām pitu̱matī̱m ūrja̍m asmā adhattam |
ṛ̱bīse̱ atri̍m aśvi̱nāva̍nīta̱m un ni̍nyathu̱ḥ sarva̍gaṇaṁ sva̱sti || RV_1,116.08

parā̍va̱taṁ nā̍satyānudethām u̱ccābu̍dhnaṁ cakrathur ji̱hmabā̍ram |
kṣara̱nn āpo̱ na pā̱yanā̍ya rā̱ye sa̱hasrā̍ya̱ tṛṣya̍te̱ gota̍masya || RV_1,116.09

ju̱ju̱ruṣo̍ nāsatyo̱ta va̱vrim prāmu̍ñcataṁ drā̱pim i̍va̱ cyavā̍nāt |
prāti̍rataṁ jahi̱tasyāyu̍r da̱srād it pati̍m akṛṇutaṁ ka̱nīnā̍m || RV_1,116.10

tad vā̍ṁ narā̱ śaṁsya̱ṁ rādhya̍ṁ cābhiṣṭi̱man nā̍satyā̱ varū̍tham |
yad vi̱dvāṁsā̍ ni̱dhim i̱vāpa̍gūḻha̱m ud da̍rśa̱tād ū̱pathu̱r vanda̍nāya || RV_1,116.11

tad vā̍ṁ narā sa̱naye̱ daṁsa̍ u̱gram ā̱viṣ kṛ̍ṇomi tanya̱tur na vṛ̱ṣṭim |
da̱dhyaṅ ha̱ yan madhv ā̍tharva̱ṇo vā̱m aśva̍sya śī̱rṣṇā pra yad ī̍m u̱vāca̍ || RV_1,116.12

ajo̍havīn nāsatyā ka̱rā vā̍m ma̱he yāma̍n purubhujā̱ pura̍ṁdhiḥ |
śru̱taṁ tac chāsu̍r iva vadhrima̱tyā hira̍ṇyahastam aśvināv adattam || RV_1,116.13

ā̱sno vṛka̍sya̱ varti̍kām a̱bhīke̍ yu̱vaṁ na̍rā nāsatyāmumuktam |
u̱to ka̱vim pu̍rubhujā yu̱vaṁ ha̱ kṛpa̍māṇam akṛṇutaṁ vi̱cakṣe̍ || RV_1,116.14

ca̱ritra̱ṁ hi ver i̱vācche̍di pa̱rṇam ā̱jā khe̱lasya̱ pari̍takmyāyām |
sa̱dyo jaṅghā̱m āya̍sīṁ vi̱śpalā̍yai̱ dhane̍ hi̱te sarta̍ve̱ praty a̍dhattam || RV_1,116.15

śa̱tam me̱ṣān vṛ̱kye̍ cakṣadā̱nam ṛ̱jrāśva̱ṁ tam pi̱tāndhaṁ ca̍kāra |
tasmā̍ a̱kṣī nā̍satyā vi̱cakṣa̱ ādha̍ttaṁ dasrā bhiṣajāv ana̱rvan || RV_1,116.16

ā vā̱ṁ ratha̍ṁ duhi̱tā sūrya̍sya̱ kārṣme̍vātiṣṭha̱d arva̍tā̱ jaya̍ntī |
viśve̍ de̱vā anv a̍manyanta hṛ̱dbhiḥ sam u̍ śri̱yā nā̍satyā sacethe || RV_1,116.17

yad ayā̍ta̱ṁ divo̍dāsāya va̱rtir bha̱radvā̍jāyāśvinā̱ haya̍ntā |
re̱vad u̍vāha saca̱no ratho̍ vāṁ vṛṣa̱bhaś ca̍ śiṁśu̱māra̍ś ca yu̱ktā || RV_1,116.18

ra̱yiṁ su̍kṣa̱traṁ sva̍pa̱tyam āyu̍ḥ su̱vīrya̍ṁ nāsatyā̱ vaha̍ntā |
ā ja̱hnāvī̱ṁ sama̍na̱sopa̱ vājai̱s trir ahno̍ bhā̱gaṁ dadha̍tīm ayātam || RV_1,116.19

pari̍viṣṭaṁ jāhu̱ṣaṁ vi̱śvata̍ḥ sīṁ su̱gebhi̱r nakta̍m ūhathū̱ rajo̍bhiḥ |
vi̱bhi̱ndunā̍ nāsatyā̱ rathe̍na̱ vi parva̍tām̐ ajara̱yū a̍yātam || RV_1,116.20

eka̍syā̱ vasto̍r āvata̱ṁ raṇā̍ya̱ vaśa̍m aśvinā sa̱naye̍ sa̱hasrā̍ |
nir a̍hataṁ du̱cchunā̱ indra̍vantā pṛthu̱śrava̍so vṛṣaṇā̱v arā̍tīḥ || RV_1,116.21

śa̱rasya̍ cid ārca̱tkasyā̍va̱tād ā nī̱cād u̱ccā ca̍krathu̱ḥ pāta̍ve̱ vāḥ |
śa̱yave̍ cin nāsatyā̱ śacī̍bhi̱r jasu̍raye sta̱rya̍m pipyathu̱r gām || RV_1,116.22

a̱va̱sya̱te stu̍va̱te kṛ̍ṣṇi̱yāya̍ ṛjūya̱te nā̍satyā̱ śacī̍bhiḥ |
pa̱śuṁ na na̱ṣṭam i̍va̱ darśa̍nāya viṣṇā̱pva̍ṁ dadathu̱r viśva̍kāya || RV_1,116.23

daśa̱ rātrī̱r aśi̍venā̱ nava̱ dyūn ava̍naddhaṁ śnathi̱tam a̱psv a1̱̍ntaḥ |
vipru̍taṁ re̱bham u̱dani̱ pravṛ̍kta̱m un ni̍nyathu̱ḥ soma̍m iva sru̱veṇa̍ || RV_1,116.24

pra vā̱ṁ daṁsā̍ṁsy aśvināv avocam a̱sya pati̍ḥ syāṁ su̱gava̍ḥ su̱vīra̍ḥ |
u̱ta paśya̍nn aśnu̱van dī̱rgham āyu̱r asta̍m i̱vej ja̍ri̱māṇa̍ṁ jagamyām || RV_1,116.25

madhva̱ḥ soma̍syāśvinā̱ madā̍ya pra̱tno hotā vi̍vāsate vām |
ba̱rhiṣma̍tī rā̱tir viśri̍tā̱ gīr i̱ṣā yā̍taṁ nāsa̱tyopa̱ vājai̍ḥ || RV_1,117.01

yo vā̍m aśvinā̱ mana̍so̱ javī̍yā̱n ratha̱ḥ svaśvo̱ viśa̍ ā̱jigā̍ti |
yena̱ gaccha̍thaḥ su̱kṛto̍ duro̱ṇaṁ tena̍ narā va̱rtir a̱smabhya̍ṁ yātam || RV_1,117.02

ṛṣi̍ṁ narā̱v aṁha̍sa̱ḥ pāñca̍janyam ṛ̱bīsā̱d atri̍m muñcatho ga̱ṇena̍ |
mi̱nantā̱ dasyo̱r aśi̍vasya mā̱yā a̍nupū̱rvaṁ vṛ̍ṣaṇā co̱daya̍ntā || RV_1,117.03

aśva̱ṁ na gū̱ḻham a̍śvinā du̱revai̱r ṛṣi̍ṁ narā vṛṣaṇā re̱bham a̱psu |
saṁ taṁ ri̍ṇītho̱ vipru̍ta̱ṁ daṁso̍bhi̱r na vā̍ṁ jūryanti pū̱rvyā kṛ̱tāni̍ || RV_1,117.04

su̱ṣu̱pvāṁsa̱ṁ na nirṛ̍ter u̱pasthe̱ sūrya̱ṁ na da̍srā̱ tama̍si kṣi̱yanta̍m |
śu̱bhe ru̱kmaṁ na da̍rśa̱taṁ nikhā̍ta̱m ud ū̍pathur aśvinā̱ vanda̍nāya || RV_1,117.05

tad vā̍ṁ narā̱ śaṁsya̍m pajri̱yeṇa̍ ka̱kṣīva̍tā nāsatyā̱ pari̍jman |
śa̱phād aśva̍sya vā̱jino̱ janā̍ya śa̱taṁ ku̱mbhām̐ a̍siñcata̱m madhū̍nām || RV_1,117.06

yu̱vaṁ na̍rā stuva̱te kṛ̍ṣṇi̱yāya̍ viṣṇā̱pva̍ṁ dadathu̱r viśva̍kāya |
ghoṣā̍yai cit pitṛ̱ṣade̍ duro̱ṇe pati̱ṁ jūrya̍ntyā aśvināv adattam || RV_1,117.07

yu̱vaṁ śyāvā̍ya̱ ruśa̍tīm adattam ma̱haḥ kṣo̱ṇasyā̍śvinā̱ kaṇvā̍ya |
pra̱vācya̱ṁ tad vṛ̍ṣaṇā kṛ̱taṁ vā̱ṁ yan nā̍rṣa̱dāya̱ śravo̍ a̱dhyadha̍ttam || RV_1,117.08

pu̱rū varpā̍ṁsy aśvinā̱ dadhā̍nā̱ ni pe̱dava̍ ūhathur ā̱śum aśva̍m |
sa̱ha̱sra̱sāṁ vā̱jina̱m apra̍tītam ahi̱hana̍ṁ śrava̱sya1̱̍ṁ taru̍tram || RV_1,117.09

e̱tāni̍ vāṁ śrava̱syā̍ sudānū̱ brahmā̍ṅgū̱ṣaṁ sada̍na̱ṁ roda̍syoḥ |
yad vā̍m pa̱jrāso̍ aśvinā̱ hava̍nte yā̱tam i̱ṣā ca̍ vi̱duṣe̍ ca̱ vāja̍m || RV_1,117.10

sū̱nor māne̍nāśvinā gṛṇā̱nā vāja̱ṁ viprā̍ya bhuraṇā̱ rada̍ntā |
a̱gastye̱ brahma̍ṇā vāvṛdhā̱nā saṁ vi̱śpalā̍ṁ nāsatyāriṇītam || RV_1,117.11

kuha̱ yāntā̍ suṣṭu̱tiṁ kā̱vyasya̱ divo̍ napātā vṛṣaṇā śayu̱trā |
hira̍ṇyasyeva ka̱laśa̱ṁ nikhā̍ta̱m ud ū̍pathur daśa̱me a̍śvi̱nāha̍n || RV_1,117.12

yu̱vaṁ cyavā̍nam aśvinā̱ jara̍nta̱m puna̱r yuvā̍naṁ cakrathu̱ḥ śacī̍bhiḥ |
yu̱vo ratha̍ṁ duhi̱tā sūrya̍sya sa̱ha śri̱yā nā̍satyāvṛṇīta || RV_1,117.13

yu̱vaṁ tugrā̍ya pū̱rvyebhi̱r evai̍ḥ punarma̱nyāv a̍bhavataṁ yuvānā |
yu̱vam bhu̱jyum arṇa̍so̱ niḥ sa̍mu̱drād vibhi̍r ūhathur ṛ̱jrebhi̱r aśvai̍ḥ || RV_1,117.14

ajo̍havīd aśvinā tau̱gryo vā̱m proḻha̍ḥ samu̱dram a̍vya̱thir ja̍ga̱nvān |
niṣ ṭam ū̍hathuḥ su̱yujā̱ rathe̍na̱ mano̍javasā vṛṣaṇā sva̱sti || RV_1,117.15

ajo̍havīd aśvinā̱ varti̍kā vām ā̱sno yat sī̱m amu̍ñcata̱ṁ vṛka̍sya |
vi ja̱yuṣā̍ yayathu̱ḥ sānv adre̍r jā̱taṁ vi̱ṣvāco̍ ahataṁ vi̱ṣeṇa̍ || RV_1,117.16

śa̱tam me̱ṣān vṛ̱kye̍ māmahā̱naṁ tama̱ḥ praṇī̍ta̱m aśi̍vena pi̱trā |
ākṣī ṛ̱jrāśve̍ aśvināv adhatta̱ṁ jyoti̍r a̱ndhāya̍ cakrathur vi̱cakṣe̍ || RV_1,117.17

śu̱nam a̱ndhāya̱ bhara̍m ahvaya̱t sā vṛ̱kīr a̍śvinā vṛṣaṇā̱ nareti̍ |
jā̱raḥ ka̱nīna̍ iva cakṣadā̱na ṛ̱jrāśva̍ḥ śa̱tam eka̍ṁ ca me̱ṣān || RV_1,117.18

ma̱hī vā̍m ū̱tir a̍śvinā mayo̱bhūr u̱ta srā̱maṁ dhi̍ṣṇyā̱ saṁ ri̍ṇīthaḥ |
athā̍ yu̱vām id a̍hvaya̱t pura̍ṁdhi̱r āga̍cchataṁ sīṁ vṛṣaṇā̱v avo̍bhiḥ || RV_1,117.19

adhe̍nuṁ dasrā sta̱rya1̱̍ṁ viṣa̍ktā̱m api̍nvataṁ śa̱yave̍ aśvinā̱ gām |
yu̱vaṁ śacī̍bhir vima̱dāya̍ jā̱yāṁ ny ū̍hathuḥ purumi̱trasya̱ yoṣā̍m || RV_1,117.20

yava̱ṁ vṛke̍ṇāśvinā̱ vapa̱nteṣa̍ṁ du̱hantā̱ manu̍ṣāya dasrā |
a̱bhi dasyu̱m baku̍reṇā̱ dhama̍nto̱ru jyoti̍ś cakrathu̱r āryā̍ya || RV_1,117.21

ā̱tha̱rva̱ṇāyā̍śvinā dadhī̱ce 'śvya̱ṁ śira̱ḥ praty ai̍rayatam |
sa vā̱m madhu̱ pra vo̍cad ṛtā̱yan tvā̱ṣṭraṁ yad da̍srāv apika̱kṣya̍ṁ vām || RV_1,117.22

sadā̍ kavī suma̱tim ā ca̍ke vā̱ṁ viśvā̱ dhiyo̍ aśvinā̱ prāva̍tam me |
a̱sme ra̱yiṁ nā̍satyā bṛ̱hanta̍m apatya̱sāca̱ṁ śrutya̍ṁ rarāthām || RV_1,117.23

hira̍ṇyahastam aśvinā̱ rarā̍ṇā pu̱traṁ na̍rā vadhrima̱tyā a̍dattam |
tridhā̍ ha̱ śyāva̍m aśvinā̱ vika̍sta̱m uj jī̱vasa̍ airayataṁ sudānū || RV_1,117.24

e̱tāni̍ vām aśvinā vī̱ryā̍ṇi̱ pra pū̱rvyāṇy ā̱yavo̍ 'vocan |
brahma̍ kṛ̱ṇvanto̍ vṛṣaṇā yu̱vabhyā̍ṁ su̱vīrā̍so vi̱datha̱m ā va̍dema || RV_1,117.25

ā vā̱ṁ ratho̍ aśvinā śye̱napa̍tvā sumṛḻī̱kaḥ svavā̍m̐ yātv a̱rvāṅ |
yo martya̍sya̱ mana̍so̱ javī̍yān trivandhu̱ro vṛ̍ṣaṇā̱ vāta̍raṁhāḥ || RV_1,118.01

tri̱va̱ndhu̱reṇa̍ tri̱vṛtā̱ rathe̍na trica̱kreṇa̍ su̱vṛtā yā̍tam a̱rvāk |
pinva̍ta̱ṁ gā jinva̍ta̱m arva̍to no va̱rdhaya̍tam aśvinā vī̱ram a̱sme || RV_1,118.02

pra̱vadyā̍manā su̱vṛtā̱ rathe̍na̱ dasrā̍v i̱maṁ śṛ̍ṇuta̱ṁ śloka̱m adre̍ḥ |
kim a̱ṅga vā̱m praty ava̍rti̱ṁ gami̍ṣṭhā̱hur viprā̍so aśvinā purā̱jāḥ || RV_1,118.03

ā vā̍ṁ śye̱nāso̍ aśvinā vahantu̱ rathe̍ yu̱ktāsa̍ ā̱śava̍ḥ pata̱ṁgāḥ |
ye a̱pturo̍ di̱vyāso̱ na gṛdhrā̍ a̱bhi prayo̍ nāsatyā̱ vaha̍nti || RV_1,118.04

ā vā̱ṁ ratha̍ṁ yuva̱tis ti̍ṣṭha̱d atra̍ ju̱ṣṭvī na̍rā duhi̱tā sūrya̍sya |
pari̍ vā̱m aśvā̱ vapu̍ṣaḥ pata̱ṁgā vayo̍ vahantv aru̱ṣā a̱bhīke̍ || RV_1,118.05

ud vanda̍nam airataṁ da̱ṁsanā̍bhi̱r ud re̱bhaṁ da̍srā vṛṣaṇā̱ śacī̍bhiḥ |
niṣ ṭau̱gryam pā̍rayathaḥ samu̱drāt puna̱ś cyavā̍naṁ cakrathu̱r yuvā̍nam || RV_1,118.06

yu̱vam atra̱ye 'va̍nītāya ta̱ptam ūrja̍m o̱māna̍m aśvināv adhattam |
yu̱vaṁ kaṇvā̱yāpi̍riptāya̱ cakṣu̱ḥ praty a̍dhattaṁ suṣṭu̱tiṁ ju̍juṣā̱ṇā || RV_1,118.07

yu̱vaṁ dhe̱nuṁ śa̱yave̍ nādhi̱tāyāpi̍nvatam aśvinā pū̱rvyāya̍ |
amu̍ñcata̱ṁ varti̍kā̱m aṁha̍so̱ niḥ prati̱ jaṅghā̍ṁ vi̱śpalā̍yā adhattam || RV_1,118.08

yu̱vaṁ śve̱tam pe̱dava̱ indra̍jūtam ahi̱hana̍m aśvinādatta̱m aśva̍m |
jo̱hūtra̍m a̱ryo a̱bhibhū̍tim u̱graṁ sa̍hasra̱sāṁ vṛṣa̍ṇaṁ vī̱ḍva̍ṅgam || RV_1,118.09

tā vā̍ṁ narā̱ sv ava̍se sujā̱tā havā̍mahe aśvinā̱ nādha̍mānāḥ |
ā na̱ upa̱ vasu̍matā̱ rathe̍na̱ giro̍ juṣā̱ṇā su̍vi̱tāya̍ yātam || RV_1,118.10

ā śye̱nasya̱ java̍sā̱ nūta̍nenā̱sme yā̍taṁ nāsatyā sa̱joṣā̍ḥ |
have̱ hi vā̍m aśvinā rā̱taha̍vyaḥ śaśvatta̱māyā̍ u̱ṣaso̱ vyu̍ṣṭau || RV_1,118.11

ā vā̱ṁ ratha̍m purumā̱yam ma̍no̱juva̍ṁ jī̱rāśva̍ṁ ya̱jñiya̍ṁ jī̱vase̍ huve |
sa̱hasra̍ketuṁ va̱nina̍ṁ śa̱tadva̍suṁ śruṣṭī̱vāna̍ṁ varivo̱dhām a̱bhi praya̍ḥ || RV_1,119.01

ū̱rdhvā dhī̱tiḥ praty a̍sya̱ prayā̍ma̱ny adhā̍yi̱ śasma̱n sam a̍yanta̱ ā diśa̍ḥ |
svadā̍mi gha̱rmam prati̍ yanty ū̱taya̱ ā vā̍m ū̱rjānī̱ ratha̍m aśvināruhat || RV_1,119.02

saṁ yan mi̱thaḥ pa̍spṛdhā̱nāso̱ agma̍ta śu̱bhe ma̱khā ami̍tā jā̱yavo̱ raṇe̍ |
yu̱vor aha̍ prava̱ṇe ce̍kite̱ ratho̱ yad a̍śvinā̱ vaha̍thaḥ sū̱rim ā vara̍m || RV_1,119.03

yu̱vam bhu̱jyum bhu̱ramā̍ṇa̱ṁ vibhi̍r ga̱taṁ svayu̍ktibhir ni̱vaha̍ntā pi̱tṛbhya̱ ā |
yā̱si̱ṣṭaṁ va̱rtir vṛ̍ṣaṇā vije̱nya1̱̍ṁ divo̍dāsāya̱ mahi̍ ceti vā̱m ava̍ḥ || RV_1,119.04

yu̱vor a̍śvinā̱ vapu̍ṣe yuvā̱yuja̱ṁ ratha̱ṁ vāṇī̍ yematur asya̱ śardhya̍m |
ā vā̍m pati̱tvaṁ sa̱khyāya̍ ja̱gmuṣī̱ yoṣā̍vṛṇīta̱ jenyā̍ yu̱vām patī̍ || RV_1,119.05

yu̱vaṁ re̱bham pari̍ṣūter uruṣyatho hi̱mena̍ gha̱rmam pari̍tapta̱m atra̍ye |
yu̱vaṁ śa̱yor a̍va̱sam pi̍pyathu̱r gavi̱ pra dī̱rgheṇa̱ vanda̍nas tā̱ry āyu̍ṣā || RV_1,119.06

yu̱vaṁ vanda̍na̱ṁ nirṛ̍taṁ jara̱ṇyayā̱ ratha̱ṁ na da̍srā kara̱ṇā sam i̍nvathaḥ |
kṣetrā̱d ā vipra̍ṁ janatho vipa̱nyayā̱ pra vā̱m atra̍ vidha̱te da̱ṁsanā̍ bhuvat || RV_1,119.07

aga̍cchata̱ṁ kṛpa̍māṇam parā̱vati̍ pi̱tuḥ svasya̱ tyaja̍sā̱ nibā̍dhitam |
sva̍rvatīr i̱ta ū̱tīr yu̱vor aha̍ ci̱trā a̱bhīke̍ abhavann a̱bhiṣṭa̍yaḥ || RV_1,119.08

u̱ta syā vā̱m madhu̍ma̱n makṣi̍kārapa̱n made̱ soma̍syauśi̱jo hu̍vanyati |
yu̱vaṁ da̍dhī̱co mana̱ ā vi̍vāsa̱tho 'thā̱ śira̱ḥ prati̍ vā̱m aśvya̍ṁ vadat || RV_1,119.09

yu̱vam pe̱dave̍ puru̱vāra̍m aśvinā spṛ̱dhāṁ śve̱taṁ ta̍ru̱tāra̍ṁ duvasyathaḥ |
śaryai̍r a̱bhidyu̱m pṛta̍nāsu du̱ṣṭara̍ṁ ca̱rkṛtya̱m indra̍m iva carṣaṇī̱saha̍m || RV_1,119.10

kā rā̍dha̱d dhotrā̍śvinā vā̱ṁ ko vā̱ṁ joṣa̍ u̱bhayo̍ḥ |
ka̱thā vi̍dhā̱ty apra̍cetāḥ || RV_1,120.01

vi̱dvāṁsā̱v id dura̍ḥ pṛcche̱d avi̍dvān i̱tthāpa̍ro ace̱tāḥ |
nū ci̱n nu marte̱ akrau̍ || RV_1,120.02

tā vi̱dvāṁsā̍ havāmahe vā̱ṁ tā no̍ vi̱dvāṁsā̱ manma̍ vocetam a̱dya |
prārca̱d daya̍māno yu̱vāku̍ḥ || RV_1,120.03

vi pṛ̍cchāmi pā̱kyā̱3̱̍ na de̱vān vaṣa̍ṭkṛtasyādbhu̱tasya̍ dasrā |
pā̱taṁ ca̱ sahya̍so yu̱vaṁ ca̱ rabhya̍so naḥ || RV_1,120.04

pra yā ghoṣe̱ bhṛga̍vāṇe̱ na śobhe̱ yayā̍ vā̱cā yaja̍ti pajri̱yo vā̍m |
praiṣa̱yur na vi̱dvān || RV_1,120.05

śru̱taṁ gā̍ya̱traṁ taka̍vānasyā̱haṁ ci̱d dhi ri̱rebhā̍śvinā vām |
ākṣī śu̍bhas patī̱ dan || RV_1,120.06

yu̱vaṁ hy āsta̍m ma̱ho ran yu̱vaṁ vā̱ yan ni̱rata̍taṁsatam |
tā no̍ vasū sugo̱pā syā̍tam pā̱taṁ no̱ vṛkā̍d aghā̱yoḥ || RV_1,120.07

mā kasmai̍ dhātam a̱bhy a̍mi̱triṇe̍ no̱ mākutrā̍ no gṛ̱hebhyo̍ dhe̱navo̍ guḥ |
sta̱nā̱bhujo̱ aśi̍śvīḥ || RV_1,120.08

du̱hī̱yan mi̱tradhi̍taye yu̱vāku̍ rā̱ye ca̍ no mimī̱taṁ vāja̍vatyai |
i̱ṣe ca̍ no mimītaṁ dhenu̱matyai̍ || RV_1,120.09

a̱śvino̍r asana̱ṁ ratha̍m ana̱śvaṁ vā̱jinī̍vatoḥ |
tenā̱ham bhūri̍ cākana || RV_1,120.10

a̱yaṁ sa̍maha mā tanū̱hyāte̱ janā̱m̐ anu̍ |
so̱ma̱peya̍ṁ su̱kho ratha̍ḥ || RV_1,120.11

adha̱ svapna̍sya̱ nir vi̱de 'bhu̍ñjataś ca re̱vata̍ḥ |
u̱bhā tā basri̍ naśyataḥ || RV_1,120.12

kad i̱tthā nṝm̐ḥ pātra̍ṁ devaya̱tāṁ śrava̱d giro̱ aṅgi̍rasāṁ tura̱ṇyan |
pra yad āna̱ḍ viśa̱ ā ha̱rmyasyo̱ru kra̍ṁsate adhva̱re yaja̍traḥ || RV_1,121.01

stambhī̍d dha̱ dyāṁ sa dha̱ruṇa̍m pruṣāyad ṛ̱bhur vājā̍ya̱ dravi̍ṇa̱ṁ naro̱ goḥ |
anu̍ sva̱jām ma̍hi̱ṣaś ca̍kṣata̱ vrām menā̱m aśva̍sya̱ pari̍ mā̱tara̱ṁ goḥ || RV_1,121.02

nakṣa̱d dhava̍m aru̱ṇīḥ pū̱rvyaṁ rāṭ tu̱ro vi̱śām aṅgi̍rasā̱m anu̱ dyūn |
takṣa̱d vajra̱ṁ niyu̍taṁ ta̱stambha̱d dyāṁ catu̍ṣpade̱ naryā̍ya dvi̱pāde̍ || RV_1,121.03

a̱sya made̍ sva̱rya̍ṁ dā ṛ̱tāyāpī̍vṛtam u̱sriyā̍ṇā̱m anī̍kam |
yad dha̍ pra̱sarge̍ trika̱kum ni̱varta̱d apa̱ druho̱ mānu̍ṣasya̱ duro̍ vaḥ || RV_1,121.04

tubhya̱m payo̱ yat pi̱tarā̱v anī̍tā̱ṁ rādha̍ḥ su̱reta̍s tu̱raṇe̍ bhura̱ṇyū |
śuci̱ yat te̱ rekṇa̱ āya̍janta saba̱rdughā̍yā̱ḥ paya̍ u̱sriyā̍yāḥ || RV_1,121.05

adha̱ pra ja̍jñe ta̱raṇi̍r mamattu̱ pra ro̍cy a̱syā u̱ṣaso̱ na sūra̍ḥ |
indu̱r yebhi̱r āṣṭa̱ svedu̍havyaiḥ sru̱veṇa̍ si̱ñcañ ja̱raṇā̱bhi dhāma̍ || RV_1,121.06

svi̱dhmā yad va̱nadhi̍tir apa̱syāt sūro̍ adhva̱re pari̱ rodha̍nā̱ goḥ |
yad dha̍ pra̱bhāsi̱ kṛtvyā̱m̐ anu̱ dyūn ana̍rviśe pa̱śviṣe̍ tu̱rāya̍ || RV_1,121.07

a̱ṣṭā ma̱ho di̱va ādo̱ harī̍ i̱ha dyu̍mnā̱sāha̍m a̱bhi yo̍dhā̱na utsa̍m |
hari̱ṁ yat te̍ ma̱ndina̍ṁ du̱kṣan vṛ̱dhe gora̍bhasa̱m adri̍bhir vā̱tāpya̍m || RV_1,121.08

tvam ā̍ya̱sam prati̍ vartayo̱ gor di̱vo aśmā̍na̱m upa̍nīta̱m ṛbhvā̍ |
kutsā̍ya̱ yatra̍ puruhūta va̱nvañ chuṣṇa̍m ana̱ntaiḥ pa̍ri̱yāsi̍ va̱dhaiḥ || RV_1,121.09

pu̱rā yat sūra̱s tama̍so̱ apī̍te̱s tam a̍drivaḥ phali̱gaṁ he̱tim a̍sya |
śuṣṇa̍sya ci̱t pari̍hita̱ṁ yad ojo̍ di̱vas pari̱ sugra̍thita̱ṁ tad āda̍ḥ || RV_1,121.10

anu̍ tvā ma̱hī pāja̍sī aca̱kre dyāvā̱kṣāmā̍ madatām indra̱ karma̍n |
tvaṁ vṛ̱tram ā̱śayā̍naṁ si̱rāsu̍ ma̱ho vajre̍ṇa siṣvapo va̱rāhu̍m || RV_1,121.11

tvam i̍ndra̱ naryo̱ yām̐ avo̱ nṝn tiṣṭhā̱ vāta̍sya su̱yujo̱ vahi̍ṣṭhān |
yaṁ te̍ kā̱vya u̱śanā̍ ma̱ndina̱ṁ dād vṛ̍tra̱haṇa̱m pārya̍ṁ tatakṣa̱ vajra̍m || RV_1,121.12

tvaṁ sūro̍ ha̱rito̍ rāmayo̱ nṝn bhara̍c ca̱kram eta̍śo̱ nāyam i̍ndra |
prāsya̍ pā̱raṁ na̍va̱tiṁ nā̱vyā̍nā̱m api̍ ka̱rtam a̍varta̱yo 'ya̍jyūn || RV_1,121.13

tvaṁ no̍ a̱syā i̍ndra du̱rhaṇā̍yāḥ pā̱hi va̍jrivo duri̱tād a̱bhīke̍ |
pra no̱ vājā̍n ra̱thyo̱3̱̍ aśva̍budhyān i̱ṣe ya̍ndhi̱ śrava̍se sū̱nṛtā̍yai || RV_1,121.14

mā sā te̍ a̱smat su̍ma̱tir vi da̍sa̱d vāja̍pramaha̱ḥ sam iṣo̍ varanta |
ā no̍ bhaja maghava̱n goṣv a̱ryo maṁhi̍ṣṭhās te sadha̱māda̍ḥ syāma || RV_1,121.15

pra va̱ḥ pānta̍ṁ raghumanya̱vo 'ndho̍ ya̱jñaṁ ru̱drāya̍ mī̱ḻhuṣe̍ bharadhvam |
di̱vo a̍sto̱ṣy asu̍rasya vī̱rair i̍ṣu̱dhyeva̍ ma̱ruto̱ roda̍syoḥ || RV_1,122.01

patnī̍va pū̱rvahū̍tiṁ vāvṛ̱dhadhyā̍ u̱ṣāsā̱naktā̍ puru̱dhā vidā̍ne |
sta̱rīr nātka̱ṁ vyu̍ta̱ṁ vasā̍nā̱ sūrya̍sya śri̱yā su̱dṛśī̱ hira̍ṇyaiḥ || RV_1,122.02

ma̱mattu̍ na̱ḥ pari̍jmā vasa̱rhā ma̱mattu̱ vāto̍ a̱pāṁ vṛṣa̍ṇvān |
śi̱śī̱tam i̍ndrāparvatā yu̱vaṁ na̱s tan no̱ viśve̍ varivasyantu de̱vāḥ || RV_1,122.03

u̱ta tyā me̍ ya̱śasā̍ śveta̱nāyai̱ vyantā̱ pāntau̍śi̱jo hu̱vadhyai̍ |
pra vo̱ napā̍tam a̱pāṁ kṛ̍ṇudhva̱m pra mā̱tarā̍ rāspi̱nasyā̱yoḥ || RV_1,122.04

ā vo̍ ruva̱ṇyum au̍śi̱jo hu̱vadhyai̱ ghoṣe̍va̱ śaṁsa̱m arju̍nasya̱ naṁśe̍ |
pra va̍ḥ pū̱ṣṇe dā̱vana̱ ām̐ acchā̍ voceya va̱sutā̍tim a̱gneḥ || RV_1,122.05

śru̱tam me̍ mitrāvaruṇā̱ have̱mota śru̍ta̱ṁ sada̍ne vi̱śvata̍ḥ sīm |
śrotu̍ na̱ḥ śrotu̍rātiḥ su̱śrotu̍ḥ su̱kṣetrā̱ sindhu̍r a̱dbhiḥ || RV_1,122.06

stu̱ṣe sā vā̍ṁ varuṇa mitra rā̱tir gavā̍ṁ śa̱tā pṛ̱kṣayā̍meṣu pa̱jre |
śru̱tara̍the pri̱yara̍the̱ dadhā̍nāḥ sa̱dyaḥ pu̱ṣṭiṁ ni̍rundhā̱nāso̍ agman || RV_1,122.07

a̱sya stu̍ṣe̱ mahi̍maghasya̱ rādha̱ḥ sacā̍ sanema̱ nahu̍ṣaḥ su̱vīrā̍ḥ |
jano̱ yaḥ pa̱jrebhyo̍ vā̱jinī̍vā̱n aśvā̍vato ra̱thino̱ mahya̍ṁ sū̱riḥ || RV_1,122.08

jano̱ yo mi̍trāvaruṇāv abhi̱dhrug a̱po na vā̍ṁ su̱noty a̍kṣṇayā̱dhruk |
sva̱yaṁ sa yakṣma̱ṁ hṛda̍ye̱ ni dha̍tta̱ āpa̱ yad ī̱ṁ hotrā̍bhir ṛ̱tāvā̍ || RV_1,122.09

sa vrādha̍to̱ nahu̍ṣo̱ daṁsu̍jūta̱ḥ śardha̍staro na̱rāṁ gū̱rtaśra̍vāḥ |
visṛ̍ṣṭarātir yāti bāḻha̱sṛtvā̱ viśvā̍su pṛ̱tsu sada̱m ic chūra̍ḥ || RV_1,122.10

adha̱ gmantā̱ nahu̍ṣo̱ hava̍ṁ sū̱reḥ śrotā̍ rājāno a̱mṛta̍sya mandrāḥ |
na̱bho̱juvo̱ yan ni̍ra̱vasya̱ rādha̱ḥ praśa̍staye mahi̱nā ratha̍vate || RV_1,122.11

e̱taṁ śardha̍ṁ dhāma̱ yasya̍ sū̱rer ity a̍voca̱n daśa̍tayasya̱ naṁśe̍ |
dyu̱mnāni̱ yeṣu̍ va̱sutā̍tī rā̱ran viśve̍ sanvantu prabhṛ̱theṣu̱ vāja̍m || RV_1,122.12

mandā̍mahe̱ daśa̍tayasya dhā̱ser dvir yat pañca̱ bibhra̍to̱ yanty annā̍ |
kim i̱ṣṭāśva̍ i̱ṣṭara̍śmir e̱ta ī̍śā̱nāsa̱s taru̍ṣa ṛñjate̱ nṝn || RV_1,122.13

hira̍ṇyakarṇam maṇigrīva̱m arṇa̱s tan no̱ viśve̍ varivasyantu de̱vāḥ |
a̱ryo gira̍ḥ sa̱dya ā ja̱gmuṣī̱r osrāś cā̍kantū̱bhaye̍ṣv a̱sme || RV_1,122.14

ca̱tvāro̍ mā maśa̱rśāra̍sya̱ śiśva̱s trayo̱ rājña̱ āya̍vasasya ji̱ṣṇoḥ |
ratho̍ vām mitrāvaruṇā dī̱rghāpsā̱ḥ syūma̍gabhasti̱ḥ sūro̱ nādyau̍t || RV_1,122.15

pṛ̱thū ratho̱ dakṣi̍ṇāyā ayo̱jy aina̍ṁ de̱vāso̍ a̱mṛtā̍so asthuḥ |
kṛ̱ṣṇād ud a̍sthād a̱ryā̱3̱̍ vihā̍yā̱ś ciki̍tsantī̱ mānu̍ṣāya̱ kṣayā̍ya || RV_1,123.01

pūrvā̱ viśva̍smā̱d bhuva̍nād abodhi̱ jaya̍ntī̱ vāja̍m bṛha̱tī sanu̍trī |
u̱ccā vy a̍khyad yuva̱tiḥ pu̍na̱rbhūr oṣā a̍gan pratha̱mā pū̱rvahū̍tau || RV_1,123.02

yad a̱dya bhā̱gaṁ vi̱bhajā̍si̱ nṛbhya̱ uṣo̍ devi martya̱trā su̍jāte |
de̱vo no̱ atra̍ savi̱tā damū̍nā̱ anā̍gaso vocati̱ sūryā̍ya || RV_1,123.03

gṛ̱haṁ-gṛ̍ham aha̱nā yā̱ty acchā̍ di̱ve-di̍ve̱ adhi̱ nāmā̱ dadhā̍nā |
siṣā̍santī dyota̱nā śaśva̱d āgā̱d agra̍m-agra̱m id bha̍jate̱ vasū̍nām || RV_1,123.04

bhaga̍sya̱ svasā̱ varu̍ṇasya jā̱mir uṣa̍ḥ sūnṛte pratha̱mā ja̍rasva |
pa̱ścā sa da̍ghyā̱ yo a̱ghasya̍ dhā̱tā jaye̍ma̱ taṁ dakṣi̍ṇayā̱ rathe̍na || RV_1,123.05

ud ī̍ratāṁ sū̱nṛtā̱ ut pura̍ṁdhī̱r ud a̱gnaya̍ḥ śuśucā̱nāso̍ asthuḥ |
spā̱rhā vasū̍ni̱ tama̱sāpa̍gūḻhā̱viṣ kṛ̍ṇvanty u̱ṣaso̍ vibhā̱tīḥ || RV_1,123.06

apā̱nyad ety a̱bhy a1̱̍nyad e̍ti̱ viṣu̍rūpe̱ aha̍nī̱ saṁ ca̍rete |
pa̱ri̱kṣito̱s tamo̍ a̱nyā guhā̍ka̱r adyau̍d u̱ṣāḥ śośu̍catā̱ rathe̍na || RV_1,123.07

sa̱dṛśī̍r a̱dya sa̱dṛśī̱r id u̱ śvo dī̱rghaṁ sa̍cante̱ varu̍ṇasya̱ dhāma̍ |
a̱na̱va̱dyās tri̱ṁśata̱ṁ yoja̍nā̱ny ekai̍kā̱ kratu̱m pari̍ yanti sa̱dyaḥ || RV_1,123.08

jā̱na̱ty ahna̍ḥ pratha̱masya̱ nāma̍ śu̱krā kṛ̱ṣṇād a̍janiṣṭa śvitī̱cī |
ṛ̱tasya̱ yoṣā̱ na mi̍nāti̱ dhāmāha̍r-ahar niṣkṛ̱tam ā̱cara̍ntī || RV_1,123.09

ka̱nye̍va ta̱nvā̱3̱̍ śāśa̍dānā̱m̐ eṣi̍ devi de̱vam iya̍kṣamāṇam |
sa̱ṁsmaya̍mānā yuva̱tiḥ pu̱rastā̍d ā̱vir vakṣā̍ṁsi kṛṇuṣe vibhā̱tī || RV_1,123.10

su̱sa̱ṁkā̱śā mā̱tṛmṛ̍ṣṭeva̱ yoṣā̱vis ta̱nva̍ṁ kṛṇuṣe dṛ̱śe kam |
bha̱drā tvam u̍ṣo vita̱raṁ vy u̍ccha̱ na tat te̍ a̱nyā u̱ṣaso̍ naśanta || RV_1,123.11

aśvā̍vatī̱r goma̍tīr vi̱śvavā̍rā̱ yata̍mānā ra̱śmibhi̱ḥ sūrya̍sya |
parā̍ ca̱ yanti̱ puna̱r ā ca̍ yanti bha̱drā nāma̱ vaha̍mānā u̱ṣāsa̍ḥ || RV_1,123.12

ṛ̱tasya̍ ra̱śmim a̍nu̱yaccha̍mānā bha̱dram-bha̍dra̱ṁ kratu̍m a̱smāsu̍ dhehi |
uṣo̍ no a̱dya su̱havā̱ vy u̍cchā̱smāsu̱ rāyo̍ ma̱ghava̍tsu ca syuḥ || RV_1,123.13

u̱ṣā u̱cchantī̍ samidhā̱ne a̱gnā u̱dyan sūrya̍ urvi̱yā jyoti̍r aśret |
de̱vo no̱ atra̍ savi̱tā nv artha̱m prāsā̍vīd dvi̱pat pra catu̍ṣpad i̱tyai || RV_1,124.01

ami̍natī̱ daivyā̍ni vra̱tāni̍ pramina̱tī ma̍nu̱ṣyā̍ yu̱gāni̍ |
ī̱yuṣī̍ṇām upa̱mā śaśva̍tīnām āyatī̱nām pra̍tha̱moṣā vy a̍dyaut || RV_1,124.02

e̱ṣā di̱vo du̍hi̱tā praty a̍darśi̱ jyoti̱r vasā̍nā sama̱nā pu̱rastā̍t |
ṛ̱tasya̱ panthā̱m anv e̍ti sā̱dhu pra̍jāna̱tīva̱ na diśo̍ mināti || RV_1,124.03

upo̍ adarśi śu̱ndhyuvo̱ na vakṣo̍ no̱dhā i̍vā̱vir a̍kṛta pri̱yāṇi̍ |
a̱dma̱san na sa̍sa̱to bo̱dhaya̍ntī śaśvatta̱māgā̱t puna̍r e̱yuṣī̍ṇām || RV_1,124.04

pūrve̱ ardhe̱ raja̍so a̱ptyasya̱ gavā̱ṁ jani̍try akṛta̱ pra ke̱tum |
vy u̍ prathate vita̱raṁ varī̍ya̱ obhā pṛ̱ṇantī̍ pi̱tror u̱pasthā̍ || RV_1,124.05

e̱ved e̱ṣā pu̍ru̱tamā̍ dṛ̱śe kaṁ nājā̍mi̱ṁ na pari̍ vṛṇakti jā̱mim |
a̱re̱pasā̍ ta̱nvā̱3̱̍ śāśa̍dānā̱ nārbhā̱d īṣa̍te̱ na ma̱ho vi̍bhā̱tī || RV_1,124.06

a̱bhrā̱teva̍ pu̱ṁsa e̍ti pratī̱cī ga̍rtā̱rug i̍va sa̱naye̱ dhanā̍nām |
jā̱yeva̱ patya̍ uśa̱tī su̱vāsā̍ u̱ṣā ha̱sreva̱ ni ri̍ṇīte̱ apsa̍ḥ || RV_1,124.07

svasā̱ svasre̱ jyāya̍syai̱ yoni̍m ārai̱g apai̍ty asyāḥ prati̱cakṣye̍va |
vyu̱cchantī̍ ra̱śmibhi̱ḥ sūrya̍syā̱ñjy a̍ṅkte samana̱gā i̍va̱ vrāḥ || RV_1,124.08

ā̱sām pūrvā̍sā̱m aha̍su̱ svasṝ̍ṇā̱m apa̍rā̱ pūrvā̍m a̱bhy e̍ti pa̱ścāt |
tāḥ pra̍tna̱van navya̍sīr nū̱nam a̱sme re̱vad u̍cchantu su̱dinā̍ u̱ṣāsa̍ḥ || RV_1,124.09

pra bo̍dhayoṣaḥ pṛṇa̱to ma̍gho̱ny abu̍dhyamānāḥ pa̱ṇaya̍ḥ sasantu |
re̱vad u̍ccha ma̱ghava̍dbhyo maghoni re̱vat sto̱tre sū̍nṛte jā̱raya̍ntī || RV_1,124.10

ave̱yam a̍śvaid yuva̱tiḥ pu̱rastā̍d yu̱ṅkte gavā̍m aru̱ṇānā̱m anī̍kam |
vi nū̱nam u̍cchā̱d asa̍ti̱ pra ke̱tur gṛ̱haṁ-gṛ̍ha̱m upa̍ tiṣṭhāte a̱gniḥ || RV_1,124.11

ut te̱ vaya̍ś cid vasa̱ter a̍papta̱n nara̍ś ca̱ ye pi̍tu̱bhājo̱ vyu̍ṣṭau |
a̱mā sa̱te va̍hasi̱ bhūri̍ vā̱mam uṣo̍ devi dā̱śuṣe̱ martyā̍ya || RV_1,124.12

asto̍ḍhvaṁ stomyā̱ brahma̍ṇā̱ me 'vī̍vṛdhadhvam uśa̱tīr u̍ṣāsaḥ |
yu̱ṣmāka̍ṁ devī̱r ava̍sā sanema saha̱sriṇa̍ṁ ca śa̱tina̍ṁ ca̱ vāja̍m || RV_1,124.13

prā̱tā ratna̍m prāta̱ritvā̍ dadhāti̱ taṁ ci̍ki̱tvān pra̍ti̱gṛhyā̱ ni dha̍tte |
tena̍ pra̱jāṁ va̱rdhaya̍māna̱ āyū̍ rā̱yas poṣe̍ṇa sacate su̱vīra̍ḥ || RV_1,125.01

su̱gur a̍sat suhira̱ṇyaḥ svaśvo̍ bṛ̱had a̍smai̱ vaya̱ indro̍ dadhāti |
yas tvā̱yanta̱ṁ vasu̍nā prātaritvo mu̱kṣīja̍yeva̱ padi̍m utsi̱nāti̍ || RV_1,125.02

āya̍m a̱dya su̱kṛta̍m prā̱tar i̱cchann i̱ṣṭeḥ pu̱traṁ vasu̍matā̱ rathe̍na |
a̱ṁśoḥ su̱tam pā̍yaya matsa̱rasya̍ kṣa̱yadvī̍raṁ vardhaya sū̱nṛtā̍bhiḥ || RV_1,125.03

upa̍ kṣaranti̱ sindha̍vo mayo̱bhuva̍ ījā̱naṁ ca̍ ya̱kṣyamā̍ṇaṁ ca dhe̱nava̍ḥ |
pṛ̱ṇanta̍ṁ ca̱ papu̍riṁ ca śrava̱syavo̍ ghṛ̱tasya̱ dhārā̱ upa̍ yanti vi̱śvata̍ḥ || RV_1,125.04

nāka̍sya pṛ̱ṣṭhe adhi̍ tiṣṭhati śri̱to yaḥ pṛ̱ṇāti̱ sa ha̍ de̱veṣu̍ gacchati |
tasmā̱ āpo̍ ghṛ̱tam a̍rṣanti̱ sindha̍va̱s tasmā̍ i̱yaṁ dakṣi̍ṇā pinvate̱ sadā̍ || RV_1,125.05

dakṣi̍ṇāvatā̱m id i̱māni̍ ci̱trā dakṣi̍ṇāvatāṁ di̱vi sūryā̍saḥ |
dakṣi̍ṇāvanto a̱mṛta̍m bhajante̱ dakṣi̍ṇāvanta̱ḥ pra ti̍ranta̱ āyu̍ḥ || RV_1,125.06

mā pṛ̱ṇanto̱ duri̍ta̱m ena̱ āra̱n mā jā̍riṣuḥ sū̱raya̍ḥ suvra̱tāsa̍ḥ |
a̱nyas teṣā̍m pari̱dhir a̍stu̱ kaś ci̱d apṛ̍ṇantam a̱bhi saṁ ya̍ntu̱ śokā̍ḥ || RV_1,125.07

ama̍ndā̱n stomā̱n pra bha̍re manī̱ṣā sindhā̱v adhi̍ kṣiya̱to bhā̱vyasya̍ |
yo me̍ sa̱hasra̱m ami̍mīta sa̱vān a̱tūrto̱ rājā̱ śrava̍ i̱cchamā̍naḥ || RV_1,126.01

śa̱taṁ rājño̱ nādha̍mānasya ni̱ṣkāñ cha̱tam aśvā̱n praya̍tān sa̱dya āda̍m |
śa̱taṁ ka̱kṣīvā̱m̐ asu̍rasya̱ gonā̍ṁ di̱vi śravo̱ 'jara̱m ā ta̍tāna || RV_1,126.02

upa̍ mā śyā̱vāḥ sva̱naye̍na da̱ttā va̱dhūma̍nto̱ daśa̱ rathā̍so asthuḥ |
ṣa̱ṣṭiḥ sa̱hasra̱m anu̱ gavya̱m āgā̱t sana̍t ka̱kṣīvā̍m̐ abhipi̱tve ahnā̍m || RV_1,126.03

ca̱tvā̱ri̱ṁśad daśa̍rathasya̱ śoṇā̍ḥ sa̱hasra̱syāgre̱ śreṇi̍ṁ nayanti |
ma̱da̱cyuta̍ḥ kṛśa̱nāva̍to̱ atyā̍n ka̱kṣīva̍nta̱ ud a̍mṛkṣanta pa̱jrāḥ || RV_1,126.04

pūrvā̱m anu̱ praya̍ti̱m ā da̍de va̱s trīn yu̱ktām̐ a̱ṣṭāv a̱ridhā̍yaso̱ gāḥ |
su̱bandha̍vo̱ ye vi̱śyā̍ iva̱ vrā ana̍svanta̱ḥ śrava̱ aiṣa̍nta pa̱jrāḥ || RV_1,126.05

āga̍dhitā̱ pari̍gadhitā̱ yā ka̍śī̱keva̱ jaṅga̍he |
dadā̍ti̱ mahya̱ṁ yādu̍rī̱ yāśū̍nām bho̱jyā̍ śa̱tā || RV_1,126.06

upo̍pa me̱ parā̍ mṛśa̱ mā me̍ da̱bhrāṇi̍ manyathāḥ |
sarvā̱ham a̍smi roma̱śā ga̱ndhārī̍ṇām ivāvi̱kā || RV_1,126.07

a̱gniṁ hotā̍ram manye̱ dāsva̍nta̱ṁ vasu̍ṁ sū̱nuṁ saha̍so jā̱tave̍dasa̱ṁ vipra̱ṁ na jā̱tave̍dasam |
ya ū̱rdhvayā̍ svadhva̱ro de̱vo de̱vācyā̍ kṛ̱pā |
ghṛ̱tasya̱ vibhrā̍ṣṭi̱m anu̍ vaṣṭi śo̱ciṣā̱juhvā̍nasya sa̱rpiṣa̍ḥ || RV_1,127.01

yaji̍ṣṭhaṁ tvā̱ yaja̍mānā huvema̱ jyeṣṭha̱m aṅgi̍rasāṁ vipra̱ manma̍bhi̱r vipre̍bhiḥ śukra̱ manma̍bhiḥ |
pari̍jmānam iva̱ dyāṁ hotā̍raṁ carṣaṇī̱nām |
śo̱ciṣke̍śa̱ṁ vṛṣa̍ṇa̱ṁ yam i̱mā viśa̱ḥ prāva̍ntu jū̱taye̱ viśa̍ḥ || RV_1,127.02

sa hi pu̱rū ci̱d oja̍sā vi̱rukma̍tā̱ dīdyā̍no̱ bhava̍ti druhaṁta̱raḥ pa̍ra̱śur na dru̍haṁta̱raḥ |
vī̱ḻu ci̱d yasya̱ samṛ̍tau̱ śruva̱d vane̍va̱ yat sthi̱ram |
ni̱ḥṣaha̍māṇo yamate̱ nāya̍te dhanvā̱sahā̱ nāya̍te || RV_1,127.03

dṛ̱ḻhā ci̍d asmā̱ anu̍ du̱r yathā̍ vi̱de teji̍ṣṭhābhir a̱raṇi̍bhir dā̱ṣṭy ava̍se̱ 'gnaye̍ dā̱ṣṭy ava̍se |
pra yaḥ pu̱rūṇi̱ gāha̍te̱ takṣa̱d vane̍va śo̱ciṣā̍ |
sthi̱rā ci̱d annā̱ ni ri̍ṇā̱ty oja̍sā̱ ni sthi̱rāṇi̍ ci̱d oja̍sā || RV_1,127.04

tam a̍sya pṛ̱kṣam upa̍rāsu dhīmahi̱ nakta̱ṁ yaḥ su̱darśa̍taro̱ divā̍tarā̱d aprā̍yuṣe̱ divā̍tarāt |
ād a̱syāyu̱r grabha̍ṇavad vī̱ḻu śarma̱ na sū̱nave̍ |
bha̱ktam abha̍kta̱m avo̱ vyanto̍ a̱jarā̍ a̱gnayo̱ vyanto̍ a̱jarā̍ḥ || RV_1,127.05

sa hi śardho̱ na māru̍taṁ tuvi̱ṣvaṇi̱r apna̍svatīṣū̱rvarā̍sv i̱ṣṭani̱r ārta̍nāsv i̱ṣṭani̍ḥ |
āda̍d dha̱vyāny ā̍da̱dir ya̱jñasya̍ ke̱tur a̱rhaṇā̍ |
adha̍ smāsya̱ harṣa̍to̱ hṛṣī̍vato̱ viśve̍ juṣanta̱ panthā̱ṁ nara̍ḥ śu̱bhe na panthā̍m || RV_1,127.06

dvi̱tā yad ī̍ṁ kī̱stāso̍ a̱bhidya̍vo nama̱syanta̍ upa̱voca̍nta̱ bhṛga̍vo ma̱thnanto̍ dā̱śā bhṛga̍vaḥ |
a̱gnir ī̍śe̱ vasū̍nā̱ṁ śuci̱r yo dha̱rṇir e̍ṣām |
pri̱yām̐ a̍pi̱dhīm̐r va̍niṣīṣṭa̱ medhi̍ra̱ ā va̍niṣīṣṭa̱ medhi̍raḥ || RV_1,127.07

viśvā̍sāṁ tvā vi̱śām pati̍ṁ havāmahe̱ sarvā̍sāṁ samā̱naṁ dampa̍tim bhu̱je sa̱tyagi̍rvāhasam bhu̱je |
ati̍thi̱m mānu̍ṣāṇām pi̱tur na yasyā̍sa̱yā |
a̱mī ca̱ viśve̍ a̱mṛtā̍sa̱ ā vayo̍ ha̱vyā de̱veṣv ā vaya̍ḥ || RV_1,127.08

tvam a̍gne̱ saha̍sā̱ saha̍ntamaḥ śu̱ṣminta̍mo jāyase de̱vatā̍taye ra̱yir na de̱vatā̍taye |
śu̱ṣminta̍mo̱ hi te̱ mado̍ dyu̱mninta̍ma u̱ta kratu̍ḥ |
adha̍ smā te̱ pari̍ caranty ajara śruṣṭī̱vāno̱ nāja̍ra || RV_1,127.09

pra vo̍ ma̱he saha̍sā̱ saha̍svata uṣa̱rbudhe̍ paśu̱ṣe nāgnaye̱ stomo̍ babhūtv a̱gnaye̍ |
prati̱ yad ī̍ṁ ha̱viṣmā̱n viśvā̍su̱ kṣāsu̱ jogu̍ve |
agre̍ re̱bho na ja̍rata ṛṣū̱ṇāṁ jūrṇi̱r hota̍ ṛṣū̱ṇām || RV_1,127.10

sa no̱ nedi̍ṣṭha̱ṁ dadṛ̍śāna̱ ā bha̱rāgne̍ de̱vebhi̱ḥ saca̍nāḥ suce̱tunā̍ ma̱ho rā̱yaḥ su̍ce̱tunā̍ |
mahi̍ śaviṣṭha nas kṛdhi sa̱ṁcakṣe̍ bhu̱je a̱syai |
mahi̍ sto̱tṛbhyo̍ maghavan su̱vīrya̱m mathī̍r u̱gro na śava̍sā || RV_1,127.11

a̱yaṁ jā̍yata̱ manu̍ṣo̱ dharī̍maṇi̱ hotā̱ yaji̍ṣṭha u̱śijā̱m anu̍ vra̱tam a̱gniḥ svam anu̍ vra̱tam |
vi̱śvaśru̍ṣṭiḥ sakhīya̱te ra̱yir i̍va śravasya̱te |
ada̍bdho̱ hotā̱ ni ṣa̍dad i̱ḻas pa̱de pari̍vīta i̱ḻas pa̱de || RV_1,128.01

taṁ ya̍jña̱sādha̱m api̍ vātayāmasy ṛ̱tasya̍ pa̱thā nama̍sā ha̱viṣma̍tā de̱vatā̍tā ha̱viṣma̍tā |
sa na̍ ū̱rjām u̱pābhṛ̍ty a̱yā kṛ̱pā na jū̍ryati |
yam mā̍ta̱riśvā̱ mana̍ve parā̱vato̍ de̱vam bhāḥ pa̍rā̱vata̍ḥ || RV_1,128.02

eve̍na sa̱dyaḥ pary e̍ti̱ pārthi̍vam muhu̱rgī reto̍ vṛṣa̱bhaḥ kani̍krada̱d dadha̱d reta̱ḥ kani̍kradat |
śa̱taṁ cakṣā̍ṇo a̱kṣabhi̍r de̱vo vane̍ṣu tu̱rvaṇi̍ḥ |
sado̱ dadhā̍na̱ upa̍reṣu̱ sānu̍ṣv a̱gniḥ pare̍ṣu̱ sānu̍ṣu || RV_1,128.03

sa su̱kratu̍ḥ pu̱rohi̍to̱ dame̍-dame̱ 'gnir ya̱jñasyā̍dhva̱rasya̍ cetati̱ kratvā̍ ya̱jñasya̍ cetati |
kratvā̍ ve̱dhā i̍ṣūya̱te viśvā̍ jā̱tāni̍ paspaśe |
yato̍ ghṛta̱śrīr ati̍thi̱r ajā̍yata̱ vahni̍r ve̱dhā ajā̍yata || RV_1,128.04

kratvā̱ yad a̍sya̱ tavi̍ṣīṣu pṛ̱ñcate̱ 'gner ave̍ṇa ma̱rutā̱ṁ na bho̱jye̍ṣi̱rāya̱ na bho̱jyā̍ |
sa hi ṣmā̱ dāna̱m inva̍ti̱ vasū̍nāṁ ca ma̱jmanā̍ |
sa na̍s trāsate duri̱tād a̍bhi̱hruta̱ḥ śaṁsā̍d a̱ghād a̍bhi̱hruta̍ḥ || RV_1,128.05

viśvo̱ vihā̍yā ara̱tir vasu̍r dadhe̱ haste̱ dakṣi̍ṇe ta̱raṇi̱r na śi̍śrathac chrava̱syayā̱ na śi̍śrathat |
viśva̍smā̱ id i̍ṣudhya̱te de̍va̱trā ha̱vyam ohi̍ṣe |
viśva̍smā̱ it su̱kṛte̱ vāra̍m ṛṇvaty a̱gnir dvārā̱ vy ṛ̍ṇvati || RV_1,128.06

sa mānu̍ṣe vṛ̱jane̱ śaṁta̍mo hi̱to̱3̱̍ 'gnir ya̱jñeṣu̱ jenyo̱ na vi̱śpati̍ḥ pri̱yo ya̱jñeṣu̍ vi̱śpati̍ḥ |
sa ha̱vyā mānu̍ṣāṇām i̱ḻā kṛ̱tāni̍ patyate |
sa na̍s trāsate̱ varu̍ṇasya dhū̱rter ma̱ho de̱vasya̍ dhū̱rteḥ || RV_1,128.07

a̱gniṁ hotā̍ram īḻate̱ vasu̍dhitim pri̱yaṁ ceti̍ṣṭham ara̱tiṁ ny e̍rire havya̱vāha̱ṁ ny e̍rire |
vi̱śvāyu̍ṁ vi̱śvave̍dasa̱ṁ hotā̍raṁ yaja̱taṁ ka̱vim |
de̱vāso̍ ra̱ṇvam ava̍se vasū̱yavo̍ gī̱rbhī ra̱ṇvaṁ va̍sū̱yava̍ḥ || RV_1,128.08

yaṁ tvaṁ ratha̍m indra me̱dhasā̍taye 'pā̱kā santa̍m iṣira pra̱ṇaya̍si̱ prāna̍vadya̱ naya̍si |
sa̱dyaś ci̱t tam a̱bhiṣṭa̍ye̱ karo̱ vaśa̍ś ca vā̱jina̍m |
sāsmāka̍m anavadya tūtujāna ve̱dhasā̍m i̱māṁ vāca̱ṁ na ve̱dhasā̍m || RV_1,129.01

sa śru̍dhi̱ yaḥ smā̱ pṛta̍nāsu̱ kāsu̍ cid da̱kṣāyya̍ indra̱ bhara̍hūtaye̱ nṛbhi̱r asi̱ pratū̍rtaye̱ nṛbhi̍ḥ |
yaḥ śūrai̱ḥ sva1̱̍ḥ sani̍tā̱ yo viprai̱r vāja̱ṁ taru̍tā |
tam ī̍śā̱nāsa̍ iradhanta vā̱jina̍m pṛ̱kṣam atya̱ṁ na vā̱jina̍m || RV_1,129.02

da̱smo hi ṣmā̱ vṛṣa̍ṇa̱m pinva̍si̱ tvaca̱ṁ kaṁ ci̍d yāvīr a̱raru̍ṁ śūra̱ martya̍m parivṛ̱ṇakṣi̱ martya̍m |
indro̱ta tubhya̱ṁ tad di̱ve tad ru̱drāya̱ svaya̍śase |
mi̱trāya̍ voca̱ṁ varu̍ṇāya sa̱pratha̍ḥ sumṛḻī̱kāya̍ sa̱pratha̍ḥ || RV_1,129.03

a̱smāka̍ṁ va̱ indra̍m uśmasī̱ṣṭaye̱ sakhā̍yaṁ vi̱śvāyu̍m prā̱saha̱ṁ yuja̱ṁ vāje̍ṣu prā̱saha̱ṁ yuja̍m |
a̱smāka̱m brahmo̱taye 'vā̍ pṛ̱tsuṣu̱ kāsu̍ cit |
na̱hi tvā̱ śatru̱ḥ stara̍te stṛ̱ṇoṣi̱ yaṁ viśva̱ṁ śatru̍ṁ stṛ̱ṇoṣi̱ yam || RV_1,129.04

ni ṣū na̱māti̍mati̱ṁ kaya̍sya ci̱t teji̍ṣṭhābhir a̱raṇi̍bhi̱r notibhi̍r u̱grābhi̍r ugro̱tibhi̍ḥ |
neṣi̍ ṇo̱ yathā̍ pu̱rāne̱nāḥ śū̍ra̱ manya̍se |
viśvā̍ni pū̱ror apa̍ parṣi̱ vahni̍r ā̱sā vahni̍r no̱ accha̍ || RV_1,129.05

pra tad vo̍ceya̱m bhavyā̱yenda̍ve̱ havyo̱ na ya i̱ṣavā̱n manma̱ reja̍ti rakṣo̱hā manma̱ reja̍ti |
sva̱yaṁ so a̱smad ā ni̱do va̱dhair a̍jeta durma̱tim |
ava̍ sraved a̱ghaśa̍ṁso 'vata̱ram ava̍ kṣu̱dram i̍va sravet || RV_1,129.06

va̱nema̱ tad dhotra̍yā ci̱tantyā̍ va̱nema̍ ra̱yiṁ ra̍yivaḥ su̱vīrya̍ṁ ra̱ṇvaṁ santa̍ṁ su̱vīrya̍m |
du̱rmanmā̍naṁ su̱mantu̍bhi̱r em i̱ṣā pṛ̍cīmahi |
ā sa̱tyābhi̱r indra̍ṁ dyu̱mnahū̍tibhi̱r yaja̍traṁ dyu̱mnahū̍tibhiḥ || RV_1,129.07

pra-prā̍ vo a̱sme svaya̍śobhir ū̱tī pa̍riva̱rga indro̍ durmatī̱nāṁ darī̍man durmatī̱nām |
sva̱yaṁ sā ri̍ṣa̱yadhyai̱ yā na̍ upe̱ṣe a̱traiḥ |
ha̱tem a̍sa̱n na va̍kṣati kṣi̱ptā jū̱rṇir na va̍kṣati || RV_1,129.08

tvaṁ na̍ indra rā̱yā parī̍ṇasā yā̱hi pa̱thām̐ a̍ne̱hasā̍ pu̱ro yā̍hy ara̱kṣasā̍ |
saca̍sva naḥ parā̱ka ā saca̍svāstamī̱ka ā |
pā̱hi no̍ dū̱rād ā̱rād a̱bhiṣṭi̍bhi̱ḥ sadā̍ pāhy a̱bhiṣṭi̍bhiḥ || RV_1,129.09

tvaṁ na̍ indra rā̱yā tarū̍ṣaso̱graṁ ci̍t tvā mahi̱mā sa̍kṣa̱d ava̍se ma̱he mi̱traṁ nāva̍se |
oji̍ṣṭha̱ trāta̱r avi̍tā̱ ratha̱ṁ kaṁ ci̍d amartya |
a̱nyam a̱smad ri̍riṣe̱ḥ kaṁ ci̍d adrivo̱ riri̍kṣantaṁ cid adrivaḥ || RV_1,129.10

pā̱hi na̍ indra suṣṭuta sri̱dho̍ 'vayā̱tā sada̱m id du̍rmatī̱nāṁ de̱vaḥ san du̍rmatī̱nām |
ha̱ntā pā̱pasya̍ ra̱kṣasa̍s trā̱tā vipra̍sya̱ māva̍taḥ |
adhā̱ hi tvā̍ jani̱tā jīja̍nad vaso rakṣo̱haṇa̍ṁ tvā̱ jīja̍nad vaso || RV_1,129.11

endra̍ yā̱hy upa̍ naḥ parā̱vato̱ nāyam acchā̍ vi̱dathā̍nīva̱ satpa̍ti̱r asta̱ṁ rāje̍va̱ satpa̍tiḥ |
havā̍mahe tvā va̱yam praya̍svantaḥ su̱te sacā̍ |
pu̱trāso̱ na pi̱tara̱ṁ vāja̍sātaye̱ maṁhi̍ṣṭha̱ṁ vāja̍sātaye || RV_1,130.01

pibā̱ soma̍m indra suvā̱nam adri̍bhi̱ḥ kośe̍na si̱ktam a̍va̱taṁ na vaṁsa̍gas tātṛṣā̱ṇo na vaṁsa̍gaḥ |
madā̍ya harya̱tāya̍ te tu̱viṣṭa̍māya̱ dhāya̍se |
ā tvā̍ yacchantu ha̱rito̱ na sūrya̱m ahā̱ viśve̍va̱ sūrya̍m || RV_1,130.02

avi̍ndad di̱vo nihi̍ta̱ṁ guhā̍ ni̱dhiṁ ver na garbha̱m pari̍vīta̱m aśma̍ny ana̱nte a̱ntar aśma̍ni |
vra̱jaṁ va̱jrī gavā̍m iva̱ siṣā̍sa̱nn aṅgi̍rastamaḥ |
apā̍vṛṇo̱d iṣa̱ indra̱ḥ parī̍vṛtā̱ dvāra̱ iṣa̱ḥ parī̍vṛtāḥ || RV_1,130.03

dā̱dṛ̱hā̱ṇo vajra̱m indro̱ gabha̍styo̱ḥ kṣadme̍va ti̱gmam asa̍nāya̱ saṁ śya̍d ahi̱hatyā̍ya̱ saṁ śya̍t |
sa̱ṁvi̱vyā̱na oja̍sā̱ śavo̍bhir indra ma̱jmanā̍ |
taṣṭe̍va vṛ̱kṣaṁ va̱nino̱ ni vṛ̍ścasi para̱śveva̱ ni vṛ̍ścasi || RV_1,130.04

tvaṁ vṛthā̍ na̱dya̍ indra̱ sarta̱ve 'cchā̍ samu̱dram a̍sṛjo̱ rathā̍m̐ iva vājaya̱to rathā̍m̐ iva |
i̱ta ū̱tīr a̍yuñjata samā̱nam artha̱m akṣi̍tam |
dhe̱nūr i̍va̱ mana̍ve vi̱śvado̍haso̱ janā̍ya vi̱śvado̍hasaḥ || RV_1,130.05

i̱māṁ te̱ vāca̍ṁ vasū̱yanta̍ ā̱yavo̱ ratha̱ṁ na dhīra̱ḥ svapā̍ atakṣiṣuḥ su̱mnāya̱ tvām a̍takṣiṣuḥ |
śu̱mbhanto̱ jenya̍ṁ yathā̱ vāje̍ṣu vipra vā̱jina̍m |
atya̍m iva̱ śava̍se sā̱taye̱ dhanā̱ viśvā̱ dhanā̍ni sā̱taye̍ || RV_1,130.06

bhi̱nat puro̍ nava̱tim i̍ndra pū̱rave̱ divo̍dāsāya̱ mahi̍ dā̱śuṣe̍ nṛto̱ vajre̍ṇa dā̱śuṣe̍ nṛto |
a̱ti̱thi̱gvāya̱ śamba̍raṁ gi̱rer u̱gro avā̍bharat |
ma̱ho dhanā̍ni̱ daya̍māna̱ oja̍sā̱ viśvā̱ dhanā̱ny oja̍sā || RV_1,130.07

indra̍ḥ sa̱matsu̱ yaja̍māna̱m ārya̱m prāva̱d viśve̍ṣu śa̱tamū̍tir ā̱jiṣu̱ sva̍rmīḻheṣv ā̱jiṣu̍ |
mana̍ve̱ śāsa̍d avra̱tān tvaca̍ṁ kṛ̱ṣṇām a̍randhayat |
dakṣa̱n na viśva̍ṁ tatṛṣā̱ṇam o̍ṣati̱ ny a̍rśasā̱nam o̍ṣati || RV_1,130.08

sūra̍ś ca̱kram pra vṛ̍haj jā̱ta oja̍sā prapi̱tve vāca̍m aru̱ṇo mu̍ṣāyatīśā̱na ā mu̍ṣāyati |
u̱śanā̱ yat pa̍rā̱vato 'ja̍gann ū̱taye̍ kave |
su̱mnāni̱ viśvā̱ manu̍ṣeva tu̱rvaṇi̱r ahā̱ viśve̍va tu̱rvaṇi̍ḥ || RV_1,130.09

sa no̱ navye̍bhir vṛṣakarmann u̱kthaiḥ purā̍ṁ dartaḥ pā̱yubhi̍ḥ pāhi śa̱gmaiḥ |
di̱vo̱dā̱sebhi̍r indra̱ stavā̍no vāvṛdhī̱thā aho̍bhir iva̱ dyauḥ || RV_1,130.10

indrā̍ya̱ hi dyaur asu̍ro̱ ana̍mna̱tendrā̍ya ma̱hī pṛ̍thi̱vī varī̍mabhir dyu̱mnasā̍tā̱ varī̍mabhiḥ |
indra̱ṁ viśve̍ sa̱joṣa̍so de̱vāso̍ dadhire pu̱raḥ |
indrā̍ya̱ viśvā̱ sava̍nāni̱ mānu̍ṣā rā̱tāni̍ santu̱ mānu̍ṣā || RV_1,131.01

viśve̍ṣu̱ hi tvā̱ sava̍neṣu tu̱ñjate̍ samā̱nam eka̱ṁ vṛṣa̍maṇyava̱ḥ pṛtha̱k sva̍ḥ sani̱ṣyava̱ḥ pṛtha̍k |
taṁ tvā̱ nāva̱ṁ na pa̱rṣaṇi̍ṁ śū̱ṣasya̍ dhu̱ri dhī̍mahi |
indra̱ṁ na ya̱jñaiś ci̱taya̍nta ā̱yava̱ḥ stome̍bhi̱r indra̍m ā̱yava̍ḥ || RV_1,131.02

vi tvā̍ tatasre mithu̱nā a̍va̱syavo̍ vra̱jasya̍ sā̱tā gavya̍sya ni̱ḥsṛja̱ḥ sakṣa̍nta indra ni̱ḥsṛja̍ḥ |
yad ga̱vyantā̱ dvā janā̱ sva1̱̍r yantā̍ sa̱mūha̍si |
ā̱viṣ kari̍kra̱d vṛṣa̍ṇaṁ sacā̱bhuva̱ṁ vajra̍m indra sacā̱bhuva̍m || RV_1,131.03

vi̱duṣ ṭe̍ a̱sya vī̱rya̍sya pū̱rava̱ḥ puro̱ yad i̍ndra̱ śāra̍dīr a̱vāti̍raḥ sāsahā̱no a̱vāti̍raḥ |
śāsa̱s tam i̍ndra̱ martya̱m aya̍jyuṁ śavasas pate |
ma̱hīm a̍muṣṇāḥ pṛthi̱vīm i̱mā a̱po ma̍ndasā̱na i̱mā a̱paḥ || RV_1,131.04

ād it te̍ a̱sya vī̱rya̍sya carkira̱n made̍ṣu vṛṣann u̱śijo̱ yad āvi̍tha sakhīya̱to yad āvi̍tha |
ca̱kartha̍ kā̱ram e̍bhya̱ḥ pṛta̍nāsu̱ prava̍ntave |
te a̱nyām-a̍nyāṁ na̱dya̍ṁ saniṣṇata śrava̱syanta̍ḥ saniṣṇata || RV_1,131.05

u̱to no̍ a̱syā u̱ṣaso̍ ju̱ṣeta̱ hy a1̱̍rkasya̍ bodhi ha̱viṣo̱ havī̍mabhi̱ḥ sva̍rṣātā̱ havī̍mabhiḥ |
yad i̍ndra̱ hanta̍ve̱ mṛdho̱ vṛṣā̍ vajri̱ñ cike̍tasi |
ā me̍ a̱sya ve̱dhaso̱ navī̍yaso̱ manma̍ śrudhi̱ navī̍yasaḥ || RV_1,131.06

tvaṁ tam i̍ndra vāvṛdhā̱no a̍sma̱yur a̍mitra̱yanta̍ṁ tuvijāta̱ martya̱ṁ vajre̍ṇa śūra̱ martya̍m |
ja̱hi yo no̍ aghā̱yati̍ śṛṇu̱ṣva su̱śrava̍stamaḥ |
ri̱ṣṭaṁ na yāma̱nn apa̍ bhūtu durma̱tir viśvāpa̍ bhūtu durma̱tiḥ || RV_1,131.07

tvayā̍ va̱yam ma̍ghava̱n pūrvye̱ dhana̱ indra̍tvotāḥ sāsahyāma pṛtanya̱to va̍nu̱yāma̍ vanuṣya̱taḥ |
nedi̍ṣṭhe a̱sminn aha̱ny adhi̍ vocā̱ nu su̍nva̱te |
a̱smin ya̱jñe vi ca̍yemā̱ bhare̍ kṛ̱taṁ vā̍ja̱yanto̱ bhare̍ kṛ̱tam || RV_1,132.01

sva̱rje̱ṣe bhara̍ ā̱prasya̱ vakma̍ny uṣa̱rbudha̱ḥ svasmi̱nn añja̍si krā̱ṇasya̱ svasmi̱nn añja̍si |
aha̱nn indro̱ yathā̍ vi̱de śī̱rṣṇā-śī̍rṣṇopa̱vācya̍ḥ |
a̱sma̱trā te̍ sa̱dhrya̍k santu rā̱tayo̍ bha̱drā bha̱drasya̍ rā̱taya̍ḥ || RV_1,132.02

tat tu praya̍ḥ pra̱tnathā̍ te śuśukva̱naṁ yasmi̍n ya̱jñe vāra̱m akṛ̍ṇvata̱ kṣaya̍m ṛ̱tasya̱ vār a̍si̱ kṣaya̍m |
vi tad vo̍ce̱r adha̍ dvi̱tāntaḥ pa̍śyanti ra̱śmibhi̍ḥ |
sa ghā̍ vide̱ anv indro̍ ga̱veṣa̍ṇo bandhu̱kṣidbhyo̍ ga̱veṣa̍ṇaḥ || RV_1,132.03

nū i̱tthā te̍ pū̱rvathā̍ ca pra̱vācya̱ṁ yad aṅgi̍ro̱bhyo 'vṛ̍ṇo̱r apa̍ vra̱jam indra̱ śikṣa̱nn apa̍ vra̱jam |
aibhya̍ḥ samā̱nyā di̱śāsmabhya̍ṁ jeṣi̱ yotsi̍ ca |
su̱nvadbhyo̍ randhayā̱ kaṁ ci̍d avra̱taṁ hṛ̍ṇā̱yanta̍ṁ cid avra̱tam || RV_1,132.04

saṁ yaj janā̱n kratu̍bhi̱ḥ śūra̍ ī̱kṣaya̱d dhane̍ hi̱te ta̍ruṣanta śrava̱syava̱ḥ pra ya̍kṣanta śrava̱syava̍ḥ |
tasmā̱ āyu̍ḥ pra̱jāva̱d id bādhe̍ arca̱nty oja̍sā |
indra̍ o̱kya̍ṁ didhiṣanta dhī̱tayo̍ de̱vām̐ acchā̱ na dhī̱taya̍ḥ || RV_1,132.05

yu̱vaṁ tam i̍ndrāparvatā puro̱yudhā̱ yo na̍ḥ pṛta̱nyād apa̱ taṁ-ta̱m id dha̍ta̱ṁ vajre̍ṇa̱ taṁ-ta̱m id dha̍tam |
dū̱re ca̱ttāya̍ cchantsa̱d gaha̍na̱ṁ yad ina̍kṣat |
a̱smāka̱ṁ śatrū̱n pari̍ śūra vi̱śvato̍ da̱rmā da̍rṣīṣṭa vi̱śvata̍ḥ || RV_1,132.06

u̱bhe pu̍nāmi̱ roda̍sī ṛ̱tena̱ druho̍ dahāmi̱ sam ma̱hīr a̍ni̱ndrāḥ |
a̱bhi̱vlagya̱ yatra̍ ha̱tā a̱mitrā̍ vailasthā̱nam pari̍ tṛ̱ḻhā aśe̍ran || RV_1,133.01

a̱bhi̱vlagyā̍ cid adrivaḥ śī̱rṣā yā̍tu̱matī̍nām |
chi̱ndhi va̍ṭū̱riṇā̍ pa̱dā ma̱hāva̍ṭūriṇā pa̱dā || RV_1,133.02

avā̍sām maghavañ jahi̱ śardho̍ yātu̱matī̍nām |
vai̱la̱sthā̱na̱ke a̍rma̱ke ma̱hāvai̍lasthe arma̱ke || RV_1,133.03

yāsā̍ṁ ti̱sraḥ pa̍ñcā̱śato̍ 'bhivla̱ṅgair a̱pāva̍paḥ |
tat su te̍ manāyati ta̱kat su te̍ manāyati || RV_1,133.04

pi̱śaṅga̍bhṛṣṭim ambhṛ̱ṇam pi̱śāci̍m indra̱ sam mṛ̍ṇa |
sarva̱ṁ rakṣo̱ ni ba̍rhaya || RV_1,133.05

a̱var ma̱ha i̍ndra dādṛ̱hi śru̱dhī na̍ḥ śu̱śoca̱ hi dyauḥ kṣā na bhī̱ṣām̐ a̍drivo ghṛ̱ṇān na bhī̱ṣām̐ a̍drivaḥ |
śu̱ṣminta̍mo̱ hi śu̱ṣmibhi̍r va̱dhair u̱grebhi̱r īya̍se |
apū̍ruṣaghno apratīta śūra̱ satva̍bhis trisa̱ptaiḥ śū̍ra̱ satva̍bhiḥ || RV_1,133.06

va̱noti̱ hi su̱nvan kṣaya̱m parī̍ṇasaḥ sunvā̱no hi ṣmā̱ yaja̱ty ava̱ dviṣo̍ de̱vānā̱m ava̱ dviṣa̍ḥ |
su̱nvā̱na it si̍ṣāsati sa̱hasrā̍ vā̱jy avṛ̍taḥ |
su̱nvā̱nāyendro̍ dadāty ā̱bhuva̍ṁ ra̱yiṁ da̍dāty ā̱bhuva̍m || RV_1,133.07

ā tvā̱ juvo̍ rārahā̱ṇā a̱bhi prayo̱ vāyo̱ vaha̍ntv i̱ha pū̱rvapī̍taye̱ soma̍sya pū̱rvapī̍taye |
ū̱rdhvā te̱ anu̍ sū̱nṛtā̱ mana̍s tiṣṭhatu jāna̱tī |
ni̱yutva̍tā̱ rathe̱nā yā̍hi dā̱vane̱ vāyo̍ ma̱khasya̍ dā̱vane̍ || RV_1,134.01

manda̍ntu tvā ma̱ndino̍ vāya̱v inda̍vo̱ 'smat krā̱ṇāsa̱ḥ sukṛ̍tā a̱bhidya̍vo̱ gobhi̍ḥ krā̱ṇā a̱bhidya̍vaḥ |
yad dha̍ krā̱ṇā i̱radhyai̱ dakṣa̱ṁ saca̍nta ū̱taya̍ḥ |
sa̱dhrī̱cī̱nā ni̱yuto̍ dā̱vane̱ dhiya̱ upa̍ bruvata ī̱ṁ dhiya̍ḥ || RV_1,134.02

vā̱yur yu̍ṅkte̱ rohi̍tā vā̱yur a̍ru̱ṇā vā̱yū rathe̍ aji̱rā dhu̱ri voḻha̍ve̱ vahi̍ṣṭhā dhu̱ri voḻha̍ve |
pra bo̍dhayā̱ pura̍ṁdhiṁ jā̱ra ā sa̍sa̱tīm i̍va |
pra ca̍kṣaya̱ roda̍sī vāsayo̱ṣasa̱ḥ śrava̍se vāsayo̱ṣasa̍ḥ || RV_1,134.03

tubhya̍m u̱ṣāsa̱ḥ śuca̍yaḥ parā̱vati̍ bha̱drā vastrā̍ tanvate̱ daṁsu̍ ra̱śmiṣu̍ ci̱trā navye̍ṣu ra̱śmiṣu̍ |
tubhya̍ṁ dhe̱nuḥ sa̍ba̱rdughā̱ viśvā̱ vasū̍ni dohate |
aja̍nayo ma̱ruto̍ va̱kṣaṇā̍bhyo di̱va ā va̱kṣaṇā̍bhyaḥ || RV_1,134.04

tubhya̍ṁ śu̱krāsa̱ḥ śuca̍yas tura̱ṇyavo̱ made̍ṣū̱grā i̍ṣaṇanta bhu̱rvaṇy a̱pām i̍ṣanta bhu̱rvaṇi̍ |
tvāṁ tsā̱rī dasa̍māno̱ bhaga̍m īṭṭe takva̱vīye̍ |
tvaṁ viśva̍smā̱d bhuva̍nāt pāsi̱ dharma̍ṇāsu̱ryā̍t pāsi̱ dharma̍ṇā || RV_1,134.05

tvaṁ no̍ vāyav eṣā̱m apū̍rvya̱ḥ somā̍nām pratha̱maḥ pī̱tim a̍rhasi su̱tānā̍m pī̱tim a̍rhasi |
u̱to vi̱hutma̍tīnāṁ vi̱śāṁ va̍va̱rjuṣī̍ṇām |
viśvā̱ it te̍ dhe̱navo̍ duhra ā̱śira̍ṁ ghṛ̱taṁ du̍hrata ā̱śira̍m || RV_1,134.06

stī̱rṇam ba̱rhir upa̍ no yāhi vī̱taye̍ sa̱hasre̍ṇa ni̱yutā̍ niyutvate śa̱tinī̍bhir niyutvate |
tubhya̱ṁ hi pū̱rvapī̍taye de̱vā de̱vāya̍ yemi̱re |
pra te̍ su̱tāso̱ madhu̍manto asthira̱n madā̍ya̱ kratve̍ asthiran || RV_1,135.01

tubhyā̱yaṁ soma̱ḥ pari̍pūto̱ adri̍bhiḥ spā̱rhā vasā̍na̱ḥ pari̱ kośa̍m arṣati śu̱krā vasā̍no arṣati |
tavā̱yam bhā̱ga ā̱yuṣu̱ somo̍ de̱veṣu̍ hūyate |
vaha̍ vāyo ni̱yuto̍ yāhy asma̱yur ju̍ṣā̱ṇo yā̍hy asma̱yuḥ || RV_1,135.02

ā no̍ ni̱yudbhi̍ḥ śa̱tinī̍bhir adhva̱raṁ sa̍ha̱sriṇī̍bhi̱r upa̍ yāhi vī̱taye̱ vāyo̍ ha̱vyāni̍ vī̱taye̍ |
tavā̱yam bhā̱ga ṛ̱tviya̱ḥ sara̍śmi̱ḥ sūrye̱ sacā̍ |
a̱dhva̱ryubhi̱r bhara̍māṇā ayaṁsata̱ vāyo̍ śu̱krā a̍yaṁsata || RV_1,135.03

ā vā̱ṁ ratho̍ ni̱yutvā̍n vakṣa̱d ava̍se̱ 'bhi prayā̍ṁsi̱ sudhi̍tāni vī̱taye̱ vāyo̍ ha̱vyāni̍ vī̱taye̍ |
piba̍ta̱m madhvo̱ andha̍saḥ pūrva̱peya̱ṁ hi vā̍ṁ hi̱tam |
vāya̱v ā ca̱ndreṇa̱ rādha̱sā ga̍ta̱m indra̍ś ca̱ rādha̱sā ga̍tam || RV_1,135.04

ā vā̱ṁ dhiyo̍ vavṛtyur adhva̱rām̐ upe̱mam indu̍m marmṛjanta vā̱jina̍m ā̱śum atya̱ṁ na vā̱jina̍m |
teṣā̍m pibatam asma̱yū ā no̍ gantam i̱hotyā |
indra̍vāyū su̱tānā̱m adri̍bhir yu̱vam madā̍ya vājadā yu̱vam || RV_1,135.05

i̱me vā̱ṁ somā̍ a̱psv ā su̱tā i̱hādhva̱ryubhi̱r bhara̍māṇā ayaṁsata̱ vāyo̍ śu̱krā a̍yaṁsata |
e̱te vā̍m a̱bhy a̍sṛkṣata ti̱raḥ pa̱vitra̍m ā̱śava̍ḥ |
yu̱vā̱yavo 'ti̱ romā̍ṇy a̱vyayā̱ somā̍so̱ aty a̱vyayā̍ || RV_1,135.06

ati̍ vāyo sasa̱to yā̍hi̱ śaśva̍to̱ yatra̱ grāvā̱ vada̍ti̱ tatra̍ gacchataṁ gṛ̱ham indra̍ś ca gacchatam |
vi sū̱nṛtā̱ dadṛ̍śe̱ rīya̍te ghṛ̱tam ā pū̱rṇayā̍ ni̱yutā̍ yātho adhva̱ram indra̍ś ca yātho adhva̱ram || RV_1,135.07

atrāha̱ tad va̍hethe̱ madhva̱ āhu̍ti̱ṁ yam a̍śva̱ttham u̍pa̱tiṣṭha̍nta jā̱yavo̱ 'sme te sa̍ntu jā̱yava̍ḥ |
sā̱kaṁ gāva̱ḥ suva̍te̱ pacya̍te̱ yavo̱ na te̍ vāya̱ upa̍ dasyanti dhe̱navo̱ nāpa̍ dasyanti dhe̱nava̍ḥ || RV_1,135.08

i̱me ye te̱ su vā̍yo bā̱hvo̍jaso̱ 'ntar na̱dī te̍ pa̱taya̍nty u̱kṣaṇo̱ mahi̱ vrādha̍nta u̱kṣaṇa̍ḥ |
dhanva̍ñ ci̱d ye a̍nā̱śavo̍ jī̱rāś ci̱d agi̍raukasaḥ |
sūrya̍syeva ra̱śmayo̍ durni̱yanta̍vo̱ hasta̍yor durni̱yanta̍vaḥ || RV_1,135.09

pra su jyeṣṭha̍ṁ nici̱rābhyā̍m bṛ̱han namo̍ ha̱vyam ma̱tim bha̍ratā mṛḻa̱yadbhyā̱ṁ svādi̍ṣṭham mṛḻa̱yadbhyā̍m |
tā sa̱mrājā̍ ghṛ̱tāsu̍tī ya̱jñe-ya̍jña̱ upa̍stutā |
athai̍noḥ kṣa̱traṁ na kuta̍ś ca̱nādhṛṣe̍ deva̱tvaṁ nū ci̍d ā̱dhṛṣe̍ || RV_1,136.01

ada̍rśi gā̱tur u̱rave̱ varī̍yasī̱ panthā̍ ṛ̱tasya̱ sam a̍yaṁsta ra̱śmibhi̱ś cakṣu̱r bhaga̍sya ra̱śmibhi̍ḥ |
dyu̱kṣam mi̱trasya̱ sāda̍nam arya̱mṇo varu̍ṇasya ca |
athā̍ dadhāte bṛ̱had u̱kthya1̱̍ṁ vaya̍ upa̱stutya̍m bṛ̱had vaya̍ḥ || RV_1,136.02

jyoti̍ṣmatī̱m adi̍tiṁ dhāra̱yatkṣi̍ti̱ṁ sva̍rvatī̱m ā sa̍cete di̱ve-di̍ve jāgṛ̱vāṁsā̍ di̱ve-di̍ve |
jyoti̍ṣmat kṣa̱tram ā̍śāte ādi̱tyā dānu̍na̱s patī̍ |
mi̱tras tayo̱r varu̍ṇo yāta̱yajja̍no 'rya̱mā yā̍ta̱yajja̍naḥ || RV_1,136.03

a̱yam mi̱trāya̱ varu̍ṇāya̱ śaṁta̍ma̱ḥ somo̍ bhūtv ava̱pāne̱ṣv ābha̍go de̱vo de̱veṣv ābha̍gaḥ |
taṁ de̱vāso̍ juṣerata̱ viśve̍ a̱dya sa̱joṣa̍saḥ |
tathā̍ rājānā karatho̱ yad īma̍ha̱ ṛtā̍vānā̱ yad īma̍he || RV_1,136.04

yo mi̱trāya̱ varu̍ṇā̱yāvi̍dha̱j jano̍ 'na̱rvāṇa̱ṁ tam pari̍ pāto̱ aṁha̍so dā̱śvāṁsa̱m marta̱m aṁha̍saḥ |
tam a̍rya̱mābhi ra̍kṣaty ṛjū̱yanta̱m anu̍ vra̱tam |
u̱kthair ya e̍noḥ pari̱bhūṣa̍ti vra̱taṁ stomai̍r ā̱bhūṣa̍ti vra̱tam || RV_1,136.05

namo̍ di̱ve bṛ̍ha̱te roda̍sībhyām mi̱trāya̍ voca̱ṁ varu̍ṇāya mī̱ḻhuṣe̍ sumṛḻī̱kāya̍ mī̱ḻhuṣe̍ |
indra̍m a̱gnim upa̍ stuhi dyu̱kṣam a̍rya̱maṇa̱m bhaga̍m |
jyog jīva̍ntaḥ pra̱jayā̍ sacemahi̱ soma̍syo̱tī sa̍cemahi || RV_1,136.06

ū̱tī de̱vānā̍ṁ va̱yam indra̍vanto maṁsī̱mahi̱ svaya̍śaso ma̱rudbhi̍ḥ |
a̱gnir mi̱tro varu̍ṇa̱ḥ śarma̍ yaṁsa̱n tad a̍śyāma ma̱ghavā̍no va̱yaṁ ca̍ || RV_1,136.07

su̱ṣu̱mā yā̍ta̱m adri̍bhi̱r gośrī̍tā matsa̱rā i̱me somā̍so matsa̱rā i̱me |
ā rā̍jānā divispṛśāsma̱trā ga̍nta̱m upa̍ naḥ |
i̱me vā̍m mitrāvaruṇā̱ gavā̍śira̱ḥ somā̍ḥ śu̱krā gavā̍śiraḥ || RV_1,137.01

i̱ma ā yā̍ta̱m inda̍va̱ḥ somā̍so̱ dadhyā̍śiraḥ su̱tāso̱ dadhyā̍śiraḥ |
u̱ta vā̍m u̱ṣaso̍ bu̱dhi sā̱kaṁ sūrya̍sya ra̱śmibhi̍ḥ |
su̱to mi̱trāya̱ varu̍ṇāya pī̱taye̱ cāru̍r ṛ̱tāya̍ pī̱taye̍ || RV_1,137.02

tāṁ vā̍ṁ dhe̱nuṁ na vā̍sa̱rīm a̱ṁśuṁ du̍ha̱nty adri̍bhi̱ḥ soma̍ṁ duha̱nty adri̍bhiḥ |
a̱sma̱trā ga̍nta̱m upa̍ no̱ 'rvāñcā̱ soma̍pītaye |
a̱yaṁ vā̍m mitrāvaruṇā̱ nṛbhi̍ḥ su̱taḥ soma̱ ā pī̱taye̍ su̱taḥ || RV_1,137.03

pra-pra̍ pū̱ṣṇas tu̍vijā̱tasya̍ śasyate mahi̱tvam a̍sya ta̱vaso̱ na ta̍ndate sto̱tram a̍sya̱ na ta̍ndate |
arcā̍mi sumna̱yann a̱ham antyū̍tim mayo̱bhuva̍m |
viśva̍sya̱ yo mana̍ āyuyu̱ve ma̱kho de̱va ā̍yuyu̱ve ma̱khaḥ || RV_1,138.01

pra hi tvā̍ pūṣann aji̱raṁ na yāma̍ni̱ stome̍bhiḥ kṛ̱ṇva ṛ̱ṇavo̱ yathā̱ mṛdha̱ uṣṭro̱ na pī̍paro̱ mṛdha̍ḥ |
hu̱ve yat tvā̍ mayo̱bhuva̍ṁ de̱vaṁ sa̱khyāya̱ martya̍ḥ |
a̱smāka̍m āṅgū̱ṣān dyu̱mnina̍s kṛdhi̱ vāje̍ṣu dyu̱mnina̍s kṛdhi || RV_1,138.02

yasya̍ te pūṣan sa̱khye vi̍pa̱nyava̱ḥ kratvā̍ ci̱t santo 'va̍sā bubhujri̱ra iti̱ kratvā̍ bubhujri̱re |
tām anu̍ tvā̱ navī̍yasīṁ ni̱yuta̍ṁ rā̱ya ī̍mahe |
ahe̍ḻamāna uruśaṁsa̱ sarī̍ bhava̱ vāje̍-vāje̱ sarī̍ bhava || RV_1,138.03

a̱syā ū̱ ṣu ṇa̱ upa̍ sā̱taye̍ bhu̱vo 'he̍ḻamāno rari̱vām̐ a̍jāśva śravasya̱tām a̍jāśva |
o ṣu tvā̍ vavṛtīmahi̱ stome̍bhir dasma sā̱dhubhi̍ḥ |
na̱hi tvā̍ pūṣann ati̱manya̍ āghṛṇe̱ na te̍ sa̱khyam a̍pahnu̱ve || RV_1,138.04

astu̱ śrauṣa̍ṭ pu̱ro a̱gniṁ dhi̱yā da̍dha̱ ā nu tac chardho̍ di̱vyaṁ vṛ̍ṇīmaha indravā̱yū vṛ̍ṇīmahe |
yad dha̍ krā̱ṇā vi̱vasva̍ti̱ nābhā̍ sa̱ṁdāyi̱ navya̍sī |
adha̱ pra sū na̱ upa̍ yantu dhī̱tayo̍ de̱vām̐ acchā̱ na dhī̱taya̍ḥ || RV_1,139.01

yad dha̱ tyan mi̍trāvaruṇāv ṛ̱tād adhy ā̍da̱dāthe̱ anṛ̍ta̱ṁ svena̍ ma̱nyunā̱ dakṣa̍sya̱ svena̍ ma̱nyunā̍ |
yu̱vor i̱tthādhi̱ sadma̱sv apa̍śyāma hira̱ṇyaya̍m |
dhī̱bhiś ca̱na mana̍sā̱ svebhi̍r a̱kṣabhi̱ḥ soma̍sya̱ svebhi̍r a̱kṣabhi̍ḥ || RV_1,139.02

yu̱vāṁ stome̍bhir deva̱yanto̍ aśvināśrā̱vaya̍nta iva̱ śloka̍m ā̱yavo̍ yu̱vāṁ ha̱vyābhy ā̱3̱̍yava̍ḥ |
yu̱vor viśvā̱ adhi̱ śriya̱ḥ pṛkṣa̍ś ca viśvavedasā |
pru̱ṣā̱yante̍ vām pa̱vayo̍ hira̱ṇyaye̱ rathe̍ dasrā hira̱ṇyaye̍ || RV_1,139.03

ace̍ti dasrā̱ vy u1̱̍ nāka̍m ṛṇvatho yu̱ñjate̍ vāṁ ratha̱yujo̱ divi̍ṣṭiṣv adhva̱smāno̱ divi̍ṣṭiṣu |
adhi̍ vā̱ṁ sthāma̍ va̱ndhure̱ rathe̍ dasrā hira̱ṇyaye̍ |
pa̱theva̱ yantā̍v anu̱śāsa̍tā̱ rajo 'ñja̍sā̱ śāsa̍tā̱ raja̍ḥ || RV_1,139.04

śacī̍bhir naḥ śacīvasū̱ divā̱ nakta̍ṁ daśasyatam |
mā vā̍ṁ rā̱tir upa̍ dasa̱t kadā̍ ca̱nāsmad rā̱tiḥ kadā̍ ca̱na || RV_1,139.05

vṛṣa̍nn indra vṛṣa̱pāṇā̍sa̱ inda̍va i̱me su̱tā adri̍ṣutāsa u̱dbhida̱s tubhya̍ṁ su̱tāsa̍ u̱dbhida̍ḥ |
te tvā̍ mandantu dā̱vane̍ ma̱he ci̱trāya̱ rādha̍se |
gī̱rbhir gi̍rvāha̱ḥ stava̍māna̱ ā ga̍hi sumṛḻī̱ko na̱ ā ga̍hi || RV_1,139.06

o ṣū ṇo̍ agne śṛṇuhi̱ tvam ī̍ḻi̱to de̱vebhyo̍ bravasi ya̱jñiye̍bhyo̱ rāja̍bhyo ya̱jñiye̍bhyaḥ |
yad dha̱ tyām aṅgi̍robhyo dhe̱nuṁ de̍vā̱ ada̍ttana |
vi tāṁ du̍hre arya̱mā ka̱rtarī̱ sacā̍m̐ e̱ṣa tāṁ ve̍da me̱ sacā̍ || RV_1,139.07

mo ṣu vo̍ a̱smad a̱bhi tāni̱ pauṁsyā̱ sanā̍ bhūvan dyu̱mnāni̱ mota jā̍riṣur a̱smat pu̱rota jā̍riṣuḥ |
yad va̍ś ci̱traṁ yu̱ge-yu̍ge̱ navya̱ṁ ghoṣā̱d ama̍rtyam |
a̱smāsu̱ tan ma̍ruto̱ yac ca̍ du̱ṣṭara̍ṁ didhṛ̱tā yac ca̍ du̱ṣṭara̍m || RV_1,139.08

da̱dhyaṅ ha̍ me ja̱nuṣa̱m pūrvo̱ aṅgi̍rāḥ pri̱yame̍dha̱ḥ kaṇvo̱ atri̱r manu̍r vidu̱s te me̱ pūrve̱ manu̍r viduḥ |
teṣā̍ṁ de̱veṣv āya̍tir a̱smāka̱ṁ teṣu̱ nābha̍yaḥ |
teṣā̍m pa̱dena̱ mahy ā na̍me gi̱rendrā̱gnī ā na̍me gi̱rā || RV_1,139.09

hotā̍ yakṣad va̱nino̍ vanta̱ vārya̱m bṛha̱spati̍r yajati ve̱na u̱kṣabhi̍ḥ puru̱vāre̍bhir u̱kṣabhi̍ḥ |
ja̱gṛ̱bhmā dū̱raā̍diśa̱ṁ śloka̱m adre̱r adha̱ tmanā̍ |
adhā̍rayad ara̱rindā̍ni su̱kratu̍ḥ pu̱rū sadmā̍ni su̱kratu̍ḥ || RV_1,139.10

ye de̍vāso di̱vy ekā̍daśa̱ stha pṛ̍thi̱vyām adhy ekā̍daśa̱ stha |
a̱psu̱kṣito̍ mahi̱naikā̍daśa̱ stha te de̍vāso ya̱jñam i̱maṁ ju̍ṣadhvam || RV_1,139.11

ve̱di̱ṣade̍ pri̱yadhā̍māya su̱dyute̍ dhā̱sim i̍va̱ pra bha̍rā̱ yoni̍m a̱gnaye̍ |
vastre̍ṇeva vāsayā̱ manma̍nā̱ śuci̍ṁ jyo̱tīra̍thaṁ śu̱krava̍rṇaṁ tamo̱hana̍m || RV_1,140.01

a̱bhi dvi̱janmā̍ tri̱vṛd anna̍m ṛjyate saṁvatsa̱re vā̍vṛdhe ja̱gdham ī̱ puna̍ḥ |
a̱nyasyā̱sā ji̱hvayā̱ jenyo̱ vṛṣā̱ ny a1̱̍nyena̍ va̱nino̍ mṛṣṭa vāra̱ṇaḥ || RV_1,140.02

kṛ̱ṣṇa̱prutau̍ vevi̱je a̍sya sa̱kṣitā̍ u̱bhā ta̍rete a̱bhi mā̱tarā̱ śiśu̍m |
prā̱cāji̍hvaṁ dhva̱saya̍ntaṁ tṛṣu̱cyuta̱m ā sācya̱ṁ kupa̍ya̱ṁ vardha̍nam pi̱tuḥ || RV_1,140.03

mu̱mu̱kṣvo̱3̱̍ mana̍ve mānavasya̱te ra̍ghu̱druva̍ḥ kṛ̱ṣṇasī̍tāsa ū̱ juva̍ḥ |
a̱sa̱ma̱nā a̍ji̱rāso̍ raghu̱ṣyado̱ vāta̍jūtā̱ upa̍ yujyanta ā̱śava̍ḥ || RV_1,140.04

ād a̍sya̱ te dhva̱saya̍nto̱ vṛthe̍rate kṛ̱ṣṇam abhva̱m mahi̱ varpa̱ḥ kari̍krataḥ |
yat sī̍m ma̱hīm a̱vani̱m prābhi marmṛ̍śad abhiśva̱san sta̱naya̱nn eti̱ nāna̍dat || RV_1,140.05

bhūṣa̱n na yo 'dhi̍ ba̱bhrūṣu̱ namna̍te̱ vṛṣe̍va̱ patnī̍r a̱bhy e̍ti̱ roru̍vat |
o̱jā̱yamā̍nas ta̱nva̍ś ca śumbhate bhī̱mo na śṛṅgā̍ davidhāva du̱rgṛbhi̍ḥ || RV_1,140.06

sa sa̱ṁstiro̍ vi̱ṣṭira̱ḥ saṁ gṛ̍bhāyati jā̱nann e̱va jā̍na̱tīr nitya̱ ā śa̍ye |
puna̍r vardhante̱ api̍ yanti de̱vya̍m a̱nyad varpa̍ḥ pi̱troḥ kṛ̍ṇvate̱ sacā̍ || RV_1,140.07

tam a̱gruva̍ḥ ke̱śinī̱ḥ saṁ hi re̍bhi̱ra ū̱rdhvās ta̍sthur ma̱mruṣī̱ḥ prāyave̱ puna̍ḥ |
tāsā̍ṁ ja̱rām pra̍mu̱ñcann e̍ti̱ nāna̍da̱d asu̱m para̍ṁ ja̱naya̍ñ jī̱vam astṛ̍tam || RV_1,140.08

a̱dhī̱vā̱sam pari̍ mā̱tū ri̱hann aha̍ tuvi̱grebhi̱ḥ satva̍bhir yāti̱ vi jraya̍ḥ |
vayo̱ dadha̍t pa̱dvate̱ reri̍ha̱t sadānu̱ śyenī̍ sacate varta̱nīr aha̍ || RV_1,140.09

a̱smāka̍m agne ma̱ghava̍tsu dīdi̱hy adha̱ śvasī̍vān vṛṣa̱bho damū̍nāḥ |
a̱vāsyā̱ śiśu̍matīr adīde̱r varme̍va yu̱tsu pa̍ri̱jarbhu̍rāṇaḥ || RV_1,140.10

i̱dam a̍gne̱ sudhi̍ta̱ṁ durdhi̍tā̱d adhi̍ pri̱yād u̍ ci̱n manma̍na̱ḥ preyo̍ astu te |
yat te̍ śu̱kraṁ ta̱nvo̱3̱̍ roca̍te̱ śuci̱ tenā̱smabhya̍ṁ vanase̱ ratna̱m ā tvam || RV_1,140.11

rathā̍ya̱ nāva̍m u̱ta no̍ gṛ̱hāya̱ nityā̍ritrām pa̱dvatī̍ṁ rāsy agne |
a̱smāka̍ṁ vī̱rām̐ u̱ta no̍ ma̱ghono̱ janā̍m̐ś ca̱ yā pā̱rayā̱c charma̱ yā ca̍ || RV_1,140.12

a̱bhī no̍ agna u̱ktham ij ju̍guryā̱ dyāvā̱kṣāmā̱ sindha̍vaś ca̱ svagū̍rtāḥ |
gavya̱ṁ yavya̱ṁ yanto̍ dī̱rghāheṣa̱ṁ vara̍m aru̱ṇyo̍ varanta || RV_1,140.13

baḻ i̱tthā tad vapu̍ṣe dhāyi darśa̱taṁ de̱vasya̱ bharga̱ḥ saha̍so̱ yato̱ jani̍ |
yad ī̱m upa̱ hvara̍te̱ sādha̍te ma̱tir ṛ̱tasya̱ dhenā̍ anayanta sa̱sruta̍ḥ || RV_1,141.01

pṛ̱kṣo vapu̍ḥ pitu̱mān nitya̱ ā śa̍ye dvi̱tīya̱m ā sa̱ptaśi̍vāsu mā̱tṛṣu̍ |
tṛ̱tīya̍m asya vṛṣa̱bhasya̍ do̱hase̱ daśa̍pramatiṁ janayanta̱ yoṣa̍ṇaḥ || RV_1,141.02

nir yad ī̍m bu̱dhnān ma̍hi̱ṣasya̱ varpa̍sa īśā̱nāsa̱ḥ śava̍sā̱ kranta̍ sū̱raya̍ḥ |
yad ī̱m anu̍ pra̱divo̱ madhva̍ ādha̱ve guhā̱ santa̍m māta̱riśvā̍ mathā̱yati̍ || RV_1,141.03

pra yat pi̱tuḥ pa̍ra̱mān nī̱yate̱ pary ā pṛ̱kṣudho̍ vī̱rudho̱ daṁsu̍ rohati |
u̱bhā yad a̍sya ja̱nuṣa̱ṁ yad inva̍ta̱ ād id yavi̍ṣṭho abhavad ghṛ̱ṇā śuci̍ḥ || RV_1,141.04

ād in mā̱tṝr āvi̍śa̱d yāsv ā śuci̱r ahi̍ṁsyamāna urvi̱yā vi vā̍vṛdhe |
anu̱ yat pūrvā̱ aru̍hat sanā̱juvo̱ ni navya̍sī̱ṣv ava̍rāsu dhāvate || RV_1,141.05

ād id dhotā̍raṁ vṛṇate̱ divi̍ṣṭiṣu̱ bhaga̍m iva papṛcā̱nāsa̍ ṛñjate |
de̱vān yat kratvā̍ ma̱jmanā̍ puruṣṭu̱to marta̱ṁ śaṁsa̍ṁ vi̱śvadhā̱ veti̱ dhāya̍se || RV_1,141.06

vi yad asthā̍d yaja̱to vāta̍codito hvā̱ro na vakvā̍ ja̱raṇā̱ anā̍kṛtaḥ |
tasya̱ patma̍n da̱kṣuṣa̍ḥ kṛ̱ṣṇaja̍ṁhasa̱ḥ śuci̍janmano̱ raja̱ ā vya̍dhvanaḥ || RV_1,141.07

ratho̱ na yā̱taḥ śikva̍bhiḥ kṛ̱to dyām aṅge̍bhir aru̱ṣebhi̍r īyate |
ād a̍sya̱ te kṛ̱ṣṇāso̍ dakṣi sū̱raya̱ḥ śūra̍syeva tve̱ṣathā̍d īṣate̱ vaya̍ḥ || RV_1,141.08

tvayā̱ hy a̍gne̱ varu̍ṇo dhṛ̱tavra̍to mi̱traḥ śā̍śa̱dre a̍rya̱mā su̱dāna̍vaḥ |
yat sī̱m anu̱ kratu̍nā vi̱śvathā̍ vi̱bhur a̱rān na ne̱miḥ pa̍ri̱bhūr ajā̍yathāḥ || RV_1,141.09

tvam a̍gne śaśamā̱nāya̍ sunva̱te ratna̍ṁ yaviṣṭha de̱vatā̍tim invasi |
taṁ tvā̱ nu navya̍ṁ sahaso yuvan va̱yam bhaga̱ṁ na kā̱re ma̍hiratna dhīmahi || RV_1,141.10

a̱sme ra̱yiṁ na svartha̱ṁ damū̍nasa̱m bhaga̱ṁ dakṣa̱ṁ na pa̍pṛcāsi dharṇa̱sim |
ra̱śmīm̐r i̍va̱ yo yama̍ti̱ janma̍nī u̱bhe de̱vānā̱ṁ śaṁsa̍m ṛ̱ta ā ca̍ su̱kratu̍ḥ || RV_1,141.11

u̱ta na̍ḥ su̱dyotmā̍ jī̱rāśvo̱ hotā̍ ma̱ndraḥ śṛ̍ṇavac ca̱ndrara̍thaḥ |
sa no̍ neṣa̱n neṣa̍tamai̱r amū̍ro̱ 'gnir vā̱maṁ su̍vi̱taṁ vasyo̱ accha̍ || RV_1,141.12

astā̍vy a̱gniḥ śimī̍vadbhir a̱rkaiḥ sāmrā̍jyāya prata̱raṁ dadhā̍naḥ |
a̱mī ca̱ ye ma̱ghavā̍no va̱yaṁ ca̱ miha̱ṁ na sūro̱ ati̱ niṣ ṭa̍tanyuḥ || RV_1,141.13

sami̍ddho agna̱ ā va̍ha de̱vām̐ a̱dya ya̱tasru̍ce |
tantu̍ṁ tanuṣva pū̱rvyaṁ su̱taso̍māya dā̱śuṣe̍ || RV_1,142.01

ghṛ̱tava̍nta̱m upa̍ māsi̱ madhu̍mantaṁ tanūnapāt |
ya̱jñaṁ vipra̍sya̱ māva̍taḥ śaśamā̱nasya̍ dā̱śuṣa̍ḥ || RV_1,142.02

śuci̍ḥ pāva̱ko adbhu̍to̱ madhvā̍ ya̱jñam mi̍mikṣati |
narā̱śaṁsa̱s trir ā di̱vo de̱vo de̱veṣu̍ ya̱jñiya̍ḥ || RV_1,142.03

ī̱ḻi̱to a̍gna̱ ā va̱hendra̍ṁ ci̱tram i̱ha pri̱yam |
i̱yaṁ hi tvā̍ ma̱tir mamācchā̍ sujihva va̱cyate̍ || RV_1,142.04

stṛ̱ṇā̱nāso̍ ya̱tasru̍co ba̱rhir ya̱jñe sva̍dhva̱re |
vṛ̱ñje de̱vavya̍castama̱m indrā̍ya̱ śarma̍ sa̱pratha̍ḥ || RV_1,142.05

vi śra̍yantām ṛtā̱vṛdha̍ḥ pra̱yai de̱vebhyo̍ ma̱hīḥ |
pā̱va̱kāsa̍ḥ puru̱spṛho̱ dvāro̍ de̱vīr a̍sa̱ścata̍ḥ || RV_1,142.06

ā bhanda̍māne̱ upā̍ke̱ nakto̱ṣāsā̍ su̱peśa̍sā |
ya̱hvī ṛ̱tasya̍ mā̱tarā̱ sīda̍tām ba̱rhir ā su̱mat || RV_1,142.07

ma̱ndraji̍hvā jugu̱rvaṇī̱ hotā̍rā̱ daivyā̍ ka̱vī |
ya̱jñaṁ no̍ yakṣatām i̱maṁ si̱dhram a̱dya di̍vi̱spṛśa̍m || RV_1,142.08

śuci̍r de̱veṣv arpi̍tā̱ hotrā̍ ma̱rutsu̱ bhāra̍tī |
iḻā̱ sara̍svatī ma̱hī ba̱rhiḥ sī̍dantu ya̱jñiyā̍ḥ || RV_1,142.09

tan na̍s tu̱rīpa̱m adbhu̍tam pu̱ru vāra̍m pu̱ru tmanā̍ |
tvaṣṭā̱ poṣā̍ya̱ vi ṣya̍tu rā̱ye nābhā̍ no asma̱yuḥ || RV_1,142.10

a̱va̱sṛ̱jann upa̱ tmanā̍ de̱vān ya̍kṣi vanaspate |
a̱gnir ha̱vyā su̍ṣūdati de̱vo de̱veṣu̱ medhi̍raḥ || RV_1,142.11

pū̱ṣa̱ṇvate̍ ma̱rutva̍te vi̱śvade̍vāya vā̱yave̍ |
svāhā̍ gāya̱trave̍pase ha̱vyam indrā̍ya kartana || RV_1,142.12

svāhā̍kṛtā̱ny ā ga̱hy upa̍ ha̱vyāni̍ vī̱taye̍ |
indrā ga̍hi śru̱dhī hava̱ṁ tvāṁ ha̍vante adhva̱re || RV_1,142.13

pra tavya̍sī̱ṁ navya̍sīṁ dhī̱tim a̱gnaye̍ vā̱co ma̱tiṁ saha̍saḥ sū̱nave̍ bhare |
a̱pāṁ napā̱d yo vasu̍bhiḥ sa̱ha pri̱yo hotā̍ pṛthi̱vyāṁ ny asī̍dad ṛ̱tviya̍ḥ || RV_1,143.01

sa jāya̍mānaḥ para̱me vyo̍many ā̱vir a̱gnir a̍bhavan māta̱riśva̍ne |
a̱sya kratvā̍ samidhā̱nasya̍ ma̱jmanā̱ pra dyāvā̍ śo̱ciḥ pṛ̍thi̱vī a̍rocayat || RV_1,143.02

a̱sya tve̱ṣā a̱jarā̍ a̱sya bhā̱nava̍ḥ susa̱ṁdṛśa̍ḥ su̱pratī̍kasya su̱dyuta̍ḥ |
bhātva̍kṣaso̱ aty a̱ktur na sindha̍vo̱ 'gne re̍jante̱ asa̍santo a̱jarā̍ḥ || RV_1,143.03

yam e̍ri̱re bhṛga̍vo vi̱śvave̍dasa̱ṁ nābhā̍ pṛthi̱vyā bhuva̍nasya ma̱jmanā̍ |
a̱gniṁ taṁ gī̱rbhir hi̍nuhi̱ sva ā dame̱ ya eko̱ vasvo̱ varu̍ṇo̱ na rāja̍ti || RV_1,143.04

na yo varā̍ya ma̱rutā̍m iva sva̱naḥ sene̍va sṛ̱ṣṭā di̱vyā yathā̱śani̍ḥ |
a̱gnir jambhai̍s tigi̱tair a̍tti̱ bharva̍ti yo̱dho na śatrū̱n sa vanā̱ ny ṛ̍ñjate || RV_1,143.05

ku̱vin no̍ a̱gnir u̱catha̍sya̱ vīr asa̱d vasu̍ṣ ku̱vid vasu̍bhi̱ḥ kāma̍m ā̱vara̍t |
co̱daḥ ku̱vit tu̍tu̱jyāt sā̱taye̱ dhiya̱ḥ śuci̍pratīka̱ṁ tam a̱yā dhi̱yā gṛ̍ṇe || RV_1,143.06

ghṛ̱tapra̍tīkaṁ va ṛ̱tasya̍ dhū̱rṣada̍m a̱gnim mi̱traṁ na sa̍midhā̱na ṛ̍ñjate |
indhā̍no a̱kro vi̱dathe̍ṣu̱ dīdya̍c chu̱krava̍rṇā̱m ud u̍ no yaṁsate̱ dhiya̍m || RV_1,143.07

apra̍yuccha̱nn apra̍yucchadbhir agne śi̱vebhi̍r naḥ pā̱yubhi̍ḥ pāhi śa̱gmaiḥ |
ada̍bdhebhi̱r adṛ̍pitebhir i̱ṣṭe 'ni̍miṣadbhi̱ḥ pari̍ pāhi no̱ jāḥ || RV_1,143.08

eti̱ pra hotā̍ vra̱tam a̍sya mā̱yayo̱rdhvāṁ dadhā̍na̱ḥ śuci̍peśasa̱ṁ dhiya̍m |
a̱bhi sruca̍ḥ kramate dakṣiṇā̱vṛto̱ yā a̍sya̱ dhāma̍ pratha̱maṁ ha̱ niṁsa̍te || RV_1,144.01

a̱bhīm ṛ̱tasya̍ do̱hanā̍ anūṣata̱ yonau̍ de̱vasya̱ sada̍ne̱ parī̍vṛtāḥ |
a̱pām u̱pasthe̱ vibhṛ̍to̱ yad āva̍sa̱d adha̍ sva̱dhā a̍dhaya̱d yābhi̱r īya̍te || RV_1,144.02

yuyū̍ṣata̱ḥ sava̍yasā̱ tad id vapu̍ḥ samā̱nam artha̍ṁ vi̱tari̍tratā mi̱thaḥ |
ād ī̱m bhago̱ na havya̱ḥ sam a̱smad ā voḻhu̱r na ra̱śmīn sam a̍yaṁsta̱ sāra̍thiḥ || RV_1,144.03

yam ī̱ṁ dvā sava̍yasā sapa̱ryata̍ḥ samā̱ne yonā̍ mithu̱nā samo̍kasā |
divā̱ na nakta̍m pali̱to yuvā̍jani pu̱rū cara̍nn a̱jaro̱ mānu̍ṣā yu̱gā || RV_1,144.04

tam ī̍ṁ hinvanti dhī̱tayo̱ daśa̱ vriśo̍ de̱vam martā̍sa ū̱taye̍ havāmahe |
dhano̱r adhi̍ pra̱vata̱ ā sa ṛ̍ṇvaty abhi̱vraja̍dbhir va̱yunā̱ navā̍dhita || RV_1,144.05

tvaṁ hy a̍gne di̱vyasya̱ rāja̍si̱ tvam pārthi̍vasya paśu̱pā i̍va̱ tmanā̍ |
enī̍ ta e̱te bṛ̍ha̱tī a̍bhi̱śriyā̍ hira̱ṇyayī̱ vakva̍rī ba̱rhir ā̍śāte || RV_1,144.06

agne̍ ju̱ṣasva̱ prati̍ harya̱ tad vaco̱ mandra̱ svadhā̍va̱ ṛta̍jāta̱ sukra̍to |
yo vi̱śvata̍ḥ pra̱tyaṅṅ asi̍ darśa̱to ra̱ṇvaḥ saṁdṛ̍ṣṭau pitu̱mām̐ i̍va̱ kṣaya̍ḥ || RV_1,144.07

tam pṛ̍cchatā̱ sa ja̍gāmā̱ sa ve̍da̱ sa ci̍ki̱tvām̐ ī̍yate̱ sā nv ī̍yate |
tasmi̍n santi pra̱śiṣa̱s tasmi̍nn i̱ṣṭaya̱ḥ sa vāja̍sya̱ śava̍saḥ śu̱ṣmiṇa̱s pati̍ḥ || RV_1,145.01

tam it pṛ̍cchanti̱ na si̱mo vi pṛ̍cchati̱ svene̍va̱ dhīro̱ mana̍sā̱ yad agra̍bhīt |
na mṛ̍ṣyate pratha̱maṁ nāpa̍ra̱ṁ vaco̱ 'sya kratvā̍ sacate̱ apra̍dṛpitaḥ || RV_1,145.02

tam id ga̍cchanti ju̱hva1̱̍s tam arva̍tī̱r viśvā̱ny eka̍ḥ śṛṇava̱d vacā̍ṁsi me |
pu̱ru̱prai̱ṣas tatu̍rir yajña̱sādha̱no 'cchi̍droti̱ḥ śiśu̱r āda̍tta̱ saṁ rabha̍ḥ || RV_1,145.03

u̱pa̱sthāya̍ṁ carati̱ yat sa̱māra̍ta sa̱dyo jā̱tas ta̍tsāra̱ yujye̍bhiḥ |
a̱bhi śvā̱ntam mṛ̍śate nā̱ndye̍ mu̱de yad ī̱ṁ gaccha̍nty uśa̱tīr a̍piṣṭhi̱tam || RV_1,145.04

sa ī̍m mṛ̱go apyo̍ vana̱rgur upa̍ tva̱cy u̍pa̱masyā̱ṁ ni dhā̍yi |
vy a̍bravīd va̱yunā̱ martye̍bhyo̱ 'gnir vi̱dvām̐ ṛ̍ta̱cid dhi sa̱tyaḥ || RV_1,145.05

tri̱mū̱rdhāna̍ṁ sa̱ptara̍śmiṁ gṛṇī̱ṣe 'nū̍nam a̱gnim pi̱tror u̱pasthe̍ |
ni̱ṣa̱ttam a̍sya̱ cara̍to dhru̱vasya̱ viśvā̍ di̱vo ro̍ca̱nāpa̍pri̱vāṁsa̍m || RV_1,146.01

u̱kṣā ma̱hām̐ a̱bhi va̍vakṣa ene a̱jara̍s tasthāv i̱taū̍tir ṛ̱ṣvaḥ |
u̱rvyāḥ pa̱do ni da̍dhāti̱ sānau̍ ri̱hanty ūdho̍ aru̱ṣāso̍ asya || RV_1,146.02

sa̱mā̱naṁ va̱tsam a̱bhi sa̱ṁcara̍ntī̱ viṣva̍g dhe̱nū vi ca̍rataḥ su̱meke̍ |
a̱na̱pa̱vṛ̱jyām̐ adhva̍no̱ mimā̍ne̱ viśvā̱n ketā̱m̐ adhi̍ ma̱ho dadhā̍ne || RV_1,146.03

dhīrā̍saḥ pa̱daṁ ka̱vayo̍ nayanti̱ nānā̍ hṛ̱dā rakṣa̍māṇā aju̱ryam |
siṣā̍santa̱ḥ pary a̍paśyanta̱ sindhu̍m ā̱vir e̍bhyo abhava̱t sūryo̱ nṝn || RV_1,146.04

di̱dṛ̱kṣeṇya̱ḥ pari̱ kāṣṭhā̍su̱ jenya̍ ī̱ḻenyo̍ ma̱ho arbhā̍ya jī̱vase̍ |
pu̱ru̱trā yad abha̍va̱t sūr ahai̍bhyo̱ garbhe̍bhyo ma̱ghavā̍ vi̱śvada̍rśataḥ || RV_1,146.05

ka̱thā te̍ agne śu̱caya̍nta ā̱yor da̍dā̱śur vāje̍bhir āśuṣā̱ṇāḥ |
u̱bhe yat to̱ke tana̍ye̱ dadhā̍nā ṛ̱tasya̱ sāma̍n ra̱ṇaya̍nta de̱vāḥ || RV_1,147.01

bodhā̍ me a̱sya vaca̍so yaviṣṭha̱ maṁhi̍ṣṭhasya̱ prabhṛ̍tasya svadhāvaḥ |
pīya̍ti tvo̱ anu̍ tvo gṛṇāti va̱ndāru̍s te ta̱nva̍ṁ vande agne || RV_1,147.02

ye pā̱yavo̍ māmate̱yaṁ te̍ agne̱ paśya̍nto a̱ndhaṁ du̍ri̱tād ara̍kṣan |
ra̱rakṣa̱ tān su̱kṛto̍ vi̱śvave̍dā̱ dipsa̍nta̱ id ri̱pavo̱ nāha̍ debhuḥ || RV_1,147.03

yo no̍ agne̱ ara̍rivām̐ aghā̱yur a̍rātī̱vā ma̱rcaya̍ti dva̱yena̍ |
mantro̍ gu̱ruḥ puna̍r astu̱ so a̍smā̱ anu̍ mṛkṣīṣṭa ta̱nva̍ṁ duru̱ktaiḥ || RV_1,147.04

u̱ta vā̱ yaḥ sa̍hasya pravi̱dvān marto̱ marta̍m ma̱rcaya̍ti dva̱yena̍ |
ata̍ḥ pāhi stavamāna stu̱vanta̱m agne̱ māki̍r no duri̱tāya̍ dhāyīḥ || RV_1,147.05

mathī̱d yad ī̍ṁ vi̱ṣṭo mā̍ta̱riśvā̱ hotā̍raṁ vi̱śvāpsu̍ṁ vi̱śvade̍vyam |
ni yaṁ da̱dhur ma̍nu̱ṣyā̍su vi̱kṣu sva1̱̍r ṇa ci̱traṁ vapu̍ṣe vi̱bhāva̍m || RV_1,148.01

da̱dā̱nam in na da̍dabhanta̱ manmā̱gnir varū̍tha̱m mama̱ tasya̍ cākan |
ju̱ṣanta̱ viśvā̍ny asya̱ karmopa̍stuti̱m bhara̍māṇasya kā̱roḥ || RV_1,148.02

nitye̍ ci̱n nu yaṁ sada̍ne jagṛ̱bhre praśa̍stibhir dadhi̱re ya̱jñiyā̍saḥ |
pra sū na̍yanta gṛ̱bhaya̍nta i̱ṣṭāv aśvā̍so̱ na ra̱thyo̍ rārahā̱ṇāḥ || RV_1,148.03

pu̱rūṇi̍ da̱smo ni ri̍ṇāti̱ jambhai̱r ād ro̍cate̱ vana̱ ā vi̱bhāvā̍ |
ād a̍sya̱ vāto̱ anu̍ vāti śo̱cir astu̱r na śaryā̍m asa̱nām anu̱ dyūn || RV_1,148.04

na yaṁ ri̱pavo̱ na ri̍ṣa̱ṇyavo̱ garbhe̱ santa̍ṁ reṣa̱ṇā re̱ṣaya̍nti |
a̱ndhā a̍pa̱śyā na da̍bhann abhi̱khyā nityā̍sa īm pre̱tāro̍ arakṣan || RV_1,148.05

ma̱haḥ sa rā̱ya eṣa̍te̱ pati̱r dann i̱na i̱nasya̱ vasu̍naḥ pa̱da ā |
upa̱ dhraja̍nta̱m adra̍yo vi̱dhann it || RV_1,149.01

sa yo vṛṣā̍ na̱rāṁ na roda̍syo̱ḥ śravo̍bhi̱r asti̍ jī̱vapī̍tasargaḥ |
pra yaḥ sa̍srā̱ṇaḥ śi̍śrī̱ta yonau̍ || RV_1,149.02

ā yaḥ pura̱ṁ nārmi̍ṇī̱m adī̍de̱d atya̍ḥ ka̱vir na̍bha̱nyo̱3̱̍ nārvā̍ |
sūro̱ na ru̍ru̱kvāñ cha̱tātmā̍ || RV_1,149.03

a̱bhi dvi̱janmā̱ trī ro̍ca̱nāni̱ viśvā̱ rajā̍ṁsi śuśucā̱no a̍sthāt |
hotā̱ yaji̍ṣṭho a̱pāṁ sa̱dhasthe̍ || RV_1,149.04

a̱yaṁ sa hotā̱ yo dvi̱janmā̱ viśvā̍ da̱dhe vāryā̍ṇi śrava̱syā |
marto̱ yo a̍smai su̱tuko̍ da̱dāśa̍ || RV_1,149.05

pu̱ru tvā̍ dā̱śvān vo̍ce̱ 'rir a̍gne̱ tava̍ svi̱d ā |
to̱dasye̍va śara̱ṇa ā ma̱hasya̍ || RV_1,150.01

vy a̍ni̱nasya̍ dha̱nina̍ḥ praho̱ṣe ci̱d ara̍ruṣaḥ |
ka̱dā ca̱na pra̱jiga̍to̱ ade̍vayoḥ || RV_1,150.02

sa ca̱ndro vi̍pra̱ martyo̍ ma̱ho vrādha̍ntamo di̱vi |
pra-pret te̍ agne va̱nuṣa̍ḥ syāma || RV_1,150.03

mi̱traṁ na yaṁ śimyā̱ goṣu̍ ga̱vyava̍ḥ svā̱dhyo̍ vi̱dathe̍ a̱psu jīja̍nan |
are̍jetā̱ṁ roda̍sī̱ pāja̍sā gi̱rā prati̍ pri̱yaṁ ya̍ja̱taṁ ja̱nuṣā̱m ava̍ḥ || RV_1,151.01

yad dha̱ tyad vā̍m purumī̱ḻhasya̍ so̱mina̱ḥ pra mi̱trāso̱ na da̍dhi̱re svā̱bhuva̍ḥ |
adha̱ kratu̍ṁ vidataṁ gā̱tum arca̍ta u̱ta śru̍taṁ vṛṣaṇā pa̱styā̍vataḥ || RV_1,151.02

ā vā̍m bhūṣan kṣi̱tayo̱ janma̱ roda̍syoḥ pra̱vācya̍ṁ vṛṣaṇā̱ dakṣa̍se ma̱he |
yad ī̍m ṛ̱tāya̱ bhara̍tho̱ yad arva̍te̱ pra hotra̍yā̱ śimyā̍ vītho adhva̱ram || RV_1,151.03

pra sā kṣi̱tir a̍sura̱ yā mahi̍ pri̱ya ṛtā̍vānāv ṛ̱tam ā gho̍ṣatho bṛ̱hat |
yu̱vaṁ di̱vo bṛ̍ha̱to dakṣa̍m ā̱bhuva̱ṁ gāṁ na dhu̱ry upa̍ yuñjāthe a̱paḥ || RV_1,151.04

ma̱hī atra̍ mahi̱nā vāra̍m ṛṇvatho 're̱ṇava̱s tuja̱ ā sadma̍n dhe̱nava̍ḥ |
svara̍nti̱ tā u̍pa̱ratā̍ti̱ sūrya̱m ā ni̱mruca̍ u̱ṣasa̍s takva̱vīr i̍va || RV_1,151.05

ā vā̍m ṛ̱tāya̍ ke̱śinī̍r anūṣata̱ mitra̱ yatra̱ varu̍ṇa gā̱tum arca̍thaḥ |
ava̱ tmanā̍ sṛ̱jata̱m pinva̍ta̱ṁ dhiyo̍ yu̱vaṁ vipra̍sya̱ manma̍nām irajyathaḥ || RV_1,151.06

yo vā̍ṁ ya̱jñaiḥ śa̍śamā̱no ha̱ dāśa̍ti ka̱vir hotā̱ yaja̍ti manma̱sādha̍naḥ |
upāha̱ taṁ gaccha̍tho vī̱tho a̍dhva̱ram acchā̱ gira̍ḥ suma̱tiṁ ga̍ntam asma̱yū || RV_1,151.07

yu̱vāṁ ya̱jñaiḥ pra̍tha̱mā gobhi̍r añjata̱ ṛtā̍vānā̱ mana̍so̱ na prayu̍ktiṣu |
bhara̍nti vā̱m manma̍nā sa̱ṁyatā̱ giro 'dṛ̍pyatā̱ mana̍sā re̱vad ā̍śāthe || RV_1,151.08

re̱vad vayo̍ dadhāthe re̱vad ā̍śāthe̱ narā̍ mā̱yābhi̍r i̱taū̍ti̱ māhi̍nam |
na vā̱ṁ dyāvo 'ha̍bhi̱r nota sindha̍vo̱ na de̍va̱tvam pa̱ṇayo̱ nāna̍śur ma̱gham || RV_1,151.09

yu̱vaṁ vastrā̍ṇi pīva̱sā va̍sāthe yu̱vor acchi̍drā̱ manta̍vo ha̱ sargā̍ḥ |
avā̍tirata̱m anṛ̍tāni̱ viśva̍ ṛ̱tena̍ mitrāvaruṇā sacethe || RV_1,152.01

e̱tac ca̱na tvo̱ vi ci̍ketad eṣāṁ sa̱tyo mantra̍ḥ kaviśa̱sta ṛghā̍vān |
tri̱raśri̍ṁ hanti̱ catu̍raśrir u̱gro de̍va̱nido̱ ha pra̍tha̱mā a̍jūryan || RV_1,152.02

a̱pād e̍ti pratha̱mā pa̱dvatī̍nā̱ṁ kas tad vā̍m mitrāvaru̱ṇā ci̍keta |
garbho̍ bhā̱ram bha̍ra̱ty ā ci̍d asya ṛ̱tam pipa̱rty anṛ̍ta̱ṁ ni tā̍rīt || RV_1,152.03

pra̱yanta̱m it pari̍ jā̱raṁ ka̱nīnā̱m paśyā̍masi̱ nopa̍ni̱padya̍mānam |
ana̍vapṛgṇā̱ vita̍tā̱ vasā̍nam pri̱yam mi̱trasya̱ varu̍ṇasya̱ dhāma̍ || RV_1,152.04

a̱na̱śvo jā̱to a̍nabhī̱śur arvā̱ kani̍kradat patayad ū̱rdhvasā̍nuḥ |
a̱citta̱m brahma̍ jujuṣu̱r yuvā̍na̱ḥ pra mi̱tre dhāma̱ varu̍ṇe gṛ̱ṇanta̍ḥ || RV_1,152.05

ā dhe̱navo̍ māmate̱yam ava̍ntīr brahma̱priya̍m pīpaya̱n sasmi̱nn ūdha̍n |
pi̱tvo bhi̍kṣeta va̱yunā̍ni vi̱dvān ā̱sāvivā̍sa̱nn adi̍tim uruṣyet || RV_1,152.06

ā vā̍m mitrāvaruṇā ha̱vyaju̍ṣṭi̱ṁ nama̍sā devā̱v ava̍sā vavṛtyām |
a̱smāka̱m brahma̱ pṛta̍nāsu sahyā a̱smāka̍ṁ vṛ̱ṣṭir di̱vyā su̍pā̱rā || RV_1,152.07

yajā̍mahe vām ma̱haḥ sa̱joṣā̍ ha̱vyebhi̍r mitrāvaruṇā̱ namo̍bhiḥ |
ghṛ̱tair ghṛ̍tasnū̱ adha̱ yad vā̍m a̱sme a̍dhva̱ryavo̱ na dhī̱tibhi̱r bhara̍nti || RV_1,153.01

prastu̍tir vā̱ṁ dhāma̱ na prayu̍kti̱r ayā̍mi mitrāvaruṇā suvṛ̱ktiḥ |
a̱nakti̱ yad vā̍ṁ vi̱dathe̍ṣu̱ hotā̍ su̱mnaṁ vā̍ṁ sū̱rir vṛ̍ṣaṇā̱v iya̍kṣan || RV_1,153.02

pī̱pāya̍ dhe̱nur adi̍tir ṛ̱tāya̱ janā̍ya mitrāvaruṇā havi̱rde |
hi̱noti̱ yad vā̍ṁ vi̱dathe̍ sapa̱ryan sa rā̱taha̍vyo̱ mānu̍ṣo̱ na hotā̍ || RV_1,153.03

u̱ta vā̍ṁ vi̱kṣu madyā̱sv andho̱ gāva̱ āpa̍ś ca pīpayanta de̱vīḥ |
u̱to no̍ a̱sya pū̱rvyaḥ pati̱r dan vī̱tam pā̱tam paya̍sa u̱sriyā̍yāḥ || RV_1,153.04

viṣṇo̱r nu ka̍ṁ vī̱ryā̍ṇi̱ pra vo̍ca̱ṁ yaḥ pārthi̍vāni vima̱me rajā̍ṁsi |
yo aska̍bhāya̱d utta̍raṁ sa̱dhastha̍ṁ vicakramā̱ṇas tre̱dhoru̍gā̱yaḥ || RV_1,154.01

pra tad viṣṇu̍ḥ stavate vī̱rye̍ṇa mṛ̱go na bhī̱maḥ ku̍ca̱ro gi̍ri̱ṣṭhāḥ |
yasyo̱ruṣu̍ tri̱ṣu vi̱krama̍ṇeṣv adhikṣi̱yanti̱ bhuva̍nāni̱ viśvā̍ || RV_1,154.02

pra viṣṇa̍ve śū̱ṣam e̍tu̱ manma̍ giri̱kṣita̍ urugā̱yāya̱ vṛṣṇe̍ |
ya i̱daṁ dī̱rgham praya̍taṁ sa̱dhastha̱m eko̍ vima̱me tri̱bhir it pa̱debhi̍ḥ || RV_1,154.03

yasya̱ trī pū̱rṇā madhu̍nā pa̱dāny akṣī̍yamāṇā sva̱dhayā̱ mada̍nti |
ya u̍ tri̱dhātu̍ pṛthi̱vīm u̱ta dyām eko̍ dā̱dhāra̱ bhuva̍nāni̱ viśvā̍ || RV_1,154.04

tad a̍sya pri̱yam a̱bhi pātho̍ aśyā̱ṁ naro̱ yatra̍ deva̱yavo̱ mada̍nti |
u̱ru̱kra̱masya̱ sa hi bandhu̍r i̱tthā viṣṇo̍ḥ pa̱de pa̍ra̱me madhva̱ utsa̍ḥ || RV_1,154.05

tā vā̱ṁ vāstū̍ny uśmasi̱ gama̍dhyai̱ yatra̱ gāvo̱ bhūri̍śṛṅgā a̱yāsa̍ḥ |
atrāha̱ tad u̍rugā̱yasya̱ vṛṣṇa̍ḥ para̱mam pa̱dam ava̍ bhāti̱ bhūri̍ || RV_1,154.06

pra va̱ḥ pānta̱m andha̍so dhiyāya̱te ma̱he śūrā̍ya̱ viṣṇa̍ve cārcata |
yā sānu̍ni̱ parva̍tānā̱m adā̍bhyā ma̱has ta̱sthatu̱r arva̍teva sā̱dhunā̍ || RV_1,155.01

tve̱ṣam i̱tthā sa̱mara̍ṇa̱ṁ śimī̍vato̱r indrā̍viṣṇū suta̱pā vā̍m uruṣyati |
yā martyā̍ya pratidhī̱yamā̍na̱m it kṛ̱śāno̱r astu̍r asa̱nām u̍ru̱ṣyatha̍ḥ || RV_1,155.02

tā ī̍ṁ vardhanti̱ mahy a̍sya̱ pauṁsya̱ṁ ni mā̱tarā̍ nayati̱ reta̍se bhu̱je |
dadhā̍ti pu̱tro 'va̍ra̱m para̍m pi̱tur nāma̍ tṛ̱tīya̱m adhi̍ roca̱ne di̱vaḥ || RV_1,155.03

tat-ta̱d id a̍sya̱ pauṁsya̍ṁ gṛṇīmasī̱nasya̍ trā̱tur a̍vṛ̱kasya̍ mī̱ḻhuṣa̍ḥ |
yaḥ pārthi̍vāni tri̱bhir id vigā̍mabhir u̱ru krami̍ṣṭorugā̱yāya̍ jī̱vase̍ || RV_1,155.04

dve id a̍sya̱ krama̍ṇe sva̱rdṛśo̍ 'bhi̱khyāya̱ martyo̍ bhuraṇyati |
tṛ̱tīya̍m asya̱ naki̱r ā da̍dharṣati̱ vaya̍ś ca̱na pa̱taya̍ntaḥ pata̱triṇa̍ḥ || RV_1,155.05

ca̱turbhi̍ḥ sā̱kaṁ na̍va̱tiṁ ca̱ nāma̍bhiś ca̱kraṁ na vṛ̱ttaṁ vyatī̍m̐r avīvipat |
bṛ̱haccha̍rīro vi̱mimā̍na̱ ṛkva̍bhi̱r yuvāku̍māra̱ḥ praty e̍ty āha̱vam || RV_1,155.06

bhavā̍ mi̱tro na śevyo̍ ghṛ̱tāsu̍ti̱r vibhū̍tadyumna eva̱yā u̍ sa̱prathā̍ḥ |
adhā̍ te viṣṇo vi̱duṣā̍ ci̱d ardhya̱ḥ stomo̍ ya̱jñaś ca̱ rādhyo̍ ha̱viṣma̍tā || RV_1,156.01

yaḥ pū̱rvyāya̍ ve̱dhase̱ navī̍yase su̱majjā̍naye̱ viṣṇa̍ve̱ dadā̍śati |
yo jā̱tam a̍sya maha̱to mahi̱ brava̱t sed u̱ śravo̍bhi̱r yujya̍ṁ cid a̱bhy a̍sat || RV_1,156.02

tam u̍ stotāraḥ pū̱rvyaṁ yathā̍ vi̱da ṛ̱tasya̱ garbha̍ṁ ja̱nuṣā̍ pipartana |
āsya̍ jā̱nanto̱ nāma̍ cid vivaktana ma̱has te̍ viṣṇo suma̱tim bha̍jāmahe || RV_1,156.03

tam a̍sya̱ rājā̱ varu̍ṇa̱s tam a̱śvinā̱ kratu̍ṁ sacanta̱ māru̍tasya ve̱dhasa̍ḥ |
dā̱dhāra̱ dakṣa̍m utta̱mam a̍ha̱rvida̍ṁ vra̱jaṁ ca̱ viṣṇu̱ḥ sakhi̍vām̐ aporṇu̱te || RV_1,156.04

ā yo vi̱vāya̍ sa̱cathā̍ya̱ daivya̱ indrā̍ya̱ viṣṇu̍ḥ su̱kṛte̍ su̱kṛtta̍raḥ |
ve̱dhā a̍jinvat triṣadha̱stha ārya̍m ṛ̱tasya̍ bhā̱ge yaja̍māna̱m ābha̍jat || RV_1,156.05

abo̍dhy a̱gnir jma ud e̍ti̱ sūryo̱ vy u1̱̍ṣāś ca̱ndrā ma̱hy ā̍vo a̱rciṣā̍ |
āyu̍kṣātām a̱śvinā̱ yāta̍ve̱ ratha̱m prāsā̍vīd de̱vaḥ sa̍vi̱tā jaga̱t pṛtha̍k || RV_1,157.01

yad yu̱ñjāthe̱ vṛṣa̍ṇam aśvinā̱ ratha̍ṁ ghṛ̱tena̍ no̱ madhu̍nā kṣa̱tram u̍kṣatam |
a̱smāka̱m brahma̱ pṛta̍nāsu jinvataṁ va̱yaṁ dhanā̱ śūra̍sātā bhajemahi || RV_1,157.02

a̱rvāṅ tri̍ca̱kro ma̍dhu̱vāha̍no̱ ratho̍ jī̱rāśvo̍ a̱śvino̍r yātu̱ suṣṭu̍taḥ |
tri̱va̱ndhu̱ro ma̱ghavā̍ vi̱śvasau̍bhaga̱ḥ śaṁ na̱ ā va̍kṣad dvi̱pade̱ catu̍ṣpade || RV_1,157.03

ā na̱ ūrja̍ṁ vahatam aśvinā yu̱vam madhu̍matyā na̱ḥ kaśa̍yā mimikṣatam |
prāyu̱s tāri̍ṣṭa̱ṁ nī rapā̍ṁsi mṛkṣata̱ṁ sedha̍ta̱ṁ dveṣo̱ bhava̍taṁ sacā̱bhuvā̍ || RV_1,157.04

yu̱vaṁ ha̱ garbha̱ṁ jaga̍tīṣu dhattho yu̱vaṁ viśve̍ṣu̱ bhuva̍neṣv a̱ntaḥ |
yu̱vam a̱gniṁ ca̍ vṛṣaṇāv a̱paś ca̱ vana̱spatī̍m̐r aśvinā̱v aira̍yethām || RV_1,157.05

yu̱vaṁ ha̍ stho bhi̱ṣajā̍ bheṣa̱jebhi̱r atho̍ ha stho ra̱thyā̱3̱̍ rāthye̍bhiḥ |
atho̍ ha kṣa̱tram adhi̍ dhattha ugrā̱ yo vā̍ṁ ha̱viṣmā̱n mana̍sā da̱dāśa̍ || RV_1,157.06

vasū̍ ru̱drā pu̍ru̱mantū̍ vṛ̱dhantā̍ daśa̱syata̍ṁ no vṛṣaṇāv a̱bhiṣṭau̍ |
dasrā̍ ha̱ yad rekṇa̍ auca̱thyo vā̱m pra yat sa̱srāthe̱ aka̍vābhir ū̱tī || RV_1,158.01

ko vā̍ṁ dāśat suma̱taye̍ cid a̱syai vasū̱ yad dhethe̱ nama̍sā pa̱de goḥ |
ji̱gṛ̱tam a̱sme re̱vatī̱ḥ pura̍ṁdhīḥ kāma̱preṇe̍va̱ mana̍sā̱ cara̍ntā || RV_1,158.02

yu̱kto ha̱ yad vā̍ṁ tau̱gryāya̍ pe̱rur vi madhye̱ arṇa̍so̱ dhāyi̍ pa̱jraḥ |
upa̍ vā̱m ava̍ḥ śara̱ṇaṁ ga̍meya̱ṁ śūro̱ nājma̍ pa̱taya̍dbhi̱r evai̍ḥ || RV_1,158.03

upa̍stutir auca̱thyam u̍ruṣye̱n mā mām i̱me pa̍ta̱triṇī̱ vi du̍gdhām |
mā mām edho̱ daśa̍tayaś ci̱to dhā̱k pra yad vā̍m ba̱ddhas tmani̱ khāda̍ti̱ kṣām || RV_1,158.04

na mā̍ garan na̱dyo̍ mā̱tṛta̍mā dā̱sā yad ī̱ṁ susa̍mubdham a̱vādhu̍ḥ |
śiro̱ yad a̍sya traita̱no vi̱takṣa̍t sva̱yaṁ dā̱sa uro̱ aṁsā̱v api̍ gdha || RV_1,158.05

dī̱rghata̍mā māmate̱yo ju̍ju̱rvān da̍śa̱me yu̱ge |
a̱pām artha̍ṁ ya̱tīnā̍m bra̱hmā bha̍vati̱ sāra̍thiḥ || RV_1,158.06

pra dyāvā̍ ya̱jñaiḥ pṛ̍thi̱vī ṛ̍tā̱vṛdhā̍ ma̱hī stu̍ṣe vi̱dathe̍ṣu̱ prace̍tasā |
de̱vebhi̱r ye de̱vapu̍tre su̱daṁsa̍se̱tthā dhi̱yā vāryā̍ṇi pra̱bhūṣa̍taḥ || RV_1,159.01

u̱ta ma̍nye pi̱tur a̱druho̱ mano̍ mā̱tur mahi̱ svata̍va̱s tad dhavī̍mabhiḥ |
su̱reta̍sā pi̱tarā̱ bhūma̍ cakratur u̱ru pra̱jāyā̍ a̱mṛta̱ṁ varī̍mabhiḥ || RV_1,159.02

te sū̱nava̱ḥ svapa̍saḥ su̱daṁsa̍so ma̱hī ja̍jñur mā̱tarā̍ pū̱rvaci̍ttaye |
sthā̱tuś ca̍ sa̱tyaṁ jaga̍taś ca̱ dharma̍ṇi pu̱trasya̍ pāthaḥ pa̱dam adva̍yāvinaḥ || RV_1,159.03

te mā̱yino̍ mamire su̱prace̍taso jā̱mī sayo̍nī mithu̱nā samo̍kasā |
navya̍ṁ-navya̱ṁ tantu̱m ā ta̍nvate di̱vi sa̍mu̱dre a̱ntaḥ ka̱vaya̍ḥ sudī̱taya̍ḥ || RV_1,159.04

tad rādho̍ a̱dya sa̍vi̱tur vare̍ṇyaṁ va̱yaṁ de̱vasya̍ prasa̱ve ma̍nāmahe |
a̱smabhya̍ṁ dyāvāpṛthivī suce̱tunā̍ ra̱yiṁ dha̍tta̱ṁ vasu̍mantaṁ śata̱gvina̍m || RV_1,159.05

te hi dyāvā̍pṛthi̱vī vi̱śvaśa̍mbhuva ṛ̱tāva̍rī̱ raja̍so dhāra̱yatka̍vī |
su̱janma̍nī dhi̱ṣaṇe̍ a̱ntar ī̍yate de̱vo de̱vī dharma̍ṇā̱ sūrya̱ḥ śuci̍ḥ || RV_1,160.01

u̱ru̱vyaca̍sā ma̱hinī̍ asa̱ścatā̍ pi̱tā mā̱tā ca̱ bhuva̍nāni rakṣataḥ |
su̱dhṛṣṭa̍me vapu̱ṣye̱3̱̍ na roda̍sī pi̱tā yat sī̍m a̱bhi rū̱pair avā̍sayat || RV_1,160.02

sa vahni̍ḥ pu̱traḥ pi̱troḥ pa̱vitra̍vān pu̱nāti̱ dhīro̱ bhuva̍nāni mā̱yayā̍ |
dhe̱nuṁ ca̱ pṛśni̍ṁ vṛṣa̱bhaṁ su̱reta̍saṁ vi̱śvāhā̍ śu̱kram payo̍ asya dukṣata || RV_1,160.03

a̱yaṁ de̱vānā̍m a̱pasā̍m a̱pasta̍mo̱ yo ja̱jāna̱ roda̍sī vi̱śvaśa̍mbhuvā |
vi yo ma̱me raja̍sī sukratū̱yayā̱jare̍bhi̱ḥ skambha̍nebhi̱ḥ sam ā̍nṛce || RV_1,160.04

te no̍ gṛṇā̱ne ma̍hinī̱ mahi̱ śrava̍ḥ kṣa̱traṁ dyā̍vāpṛthivī dhāsatho bṛ̱hat |
yenā̱bhi kṛ̱ṣṭīs ta̱tanā̍ma vi̱śvahā̍ pa̱nāyya̱m ojo̍ a̱sme sam i̍nvatam || RV_1,160.05

kim u̱ śreṣṭha̱ḥ kiṁ yavi̍ṣṭho na̱ āja̍ga̱n kim ī̍yate dū̱tya1̱̍ṁ kad yad ū̍ci̱ma |
na ni̍ndima cama̱saṁ yo ma̍hāku̱lo 'gne̍ bhrāta̱r druṇa̱ id bhū̱tim ū̍dima || RV_1,161.01

eka̍ṁ cama̱saṁ ca̱tura̍ḥ kṛṇotana̱ tad vo̍ de̱vā a̍bruva̱n tad va̱ āga̍mam |
saudha̍nvanā̱ yady e̱vā ka̍ri̱ṣyatha̍ sā̱kaṁ de̱vair ya̱jñiyā̍so bhaviṣyatha || RV_1,161.02

a̱gniṁ dū̱tam prati̱ yad abra̍vīta̱nāśva̱ḥ kartvo̱ ratha̍ u̱teha kartva̍ḥ |
dhe̱nuḥ kartvā̍ yuva̱śā kartvā̱ dvā tāni̍ bhrāta̱r anu̍ vaḥ kṛ̱tvy ema̍si || RV_1,161.03

ca̱kṛ̱vāṁsa̍ ṛbhava̱s tad a̍pṛcchata̱ kved a̍bhū̱d yaḥ sya dū̱to na̱ āja̍gan |
ya̱dāvākhya̍c cama̱sāñ ca̱tura̍ḥ kṛ̱tān ād it tvaṣṭā̱ gnāsv a̱ntar ny ā̍naje || RV_1,161.04

hanā̍mainā̱m̐ iti̱ tvaṣṭā̱ yad abra̍vīc cama̱saṁ ye de̍va̱pāna̱m ani̍ndiṣuḥ |
a̱nyā nāmā̍ni kṛṇvate su̱te sacā̍m̐ a̱nyair e̍nān ka̱nyā̱3̱̍ nāma̍bhiḥ sparat || RV_1,161.05

indro̱ harī̍ yuyu̱je a̱śvinā̱ ratha̱m bṛha̱spati̍r vi̱śvarū̍pā̱m upā̍jata |
ṛ̱bhur vibhvā̱ vājo̍ de̱vām̐ a̍gacchata̱ svapa̍so ya̱jñiya̍m bhā̱gam ai̍tana || RV_1,161.06

niś carma̍ṇo̱ gām a̍riṇīta dhī̱tibhi̱r yā jara̍ntā yuva̱śā tākṛ̍ṇotana |
saudha̍nvanā̱ aśvā̱d aśva̍m atakṣata yu̱ktvā ratha̱m upa̍ de̱vām̐ a̍yātana || RV_1,161.07

i̱dam u̍da̱kam pi̍ba̱tety a̍bravītane̱daṁ vā̍ ghā pibatā muñja̱neja̍nam |
saudha̍nvanā̱ yadi̱ tan neva̱ harya̍tha tṛ̱tīye̍ ghā̱ sava̍ne mādayādhvai || RV_1,161.08

āpo̱ bhūyi̍ṣṭhā̱ ity eko̍ abravīd a̱gnir bhūyi̍ṣṭha̱ ity a̱nyo a̍bravīt |
va̱dha̱ryantī̍m ba̱hubhya̱ḥ praiko̍ abravīd ṛ̱tā vada̍ntaś cama̱sām̐ a̍piṁśata || RV_1,161.09

śro̱ṇām eka̍ uda̱kaṁ gām avā̍jati mā̱ṁsam eka̍ḥ piṁśati sū̱nayābhṛ̍tam |
ā ni̱mruca̱ḥ śakṛ̱d eko̱ apā̍bhara̱t kiṁ svi̍t pu̱trebhya̍ḥ pi̱tarā̱ upā̍vatuḥ || RV_1,161.10

u̱dvatsv a̍smā akṛṇotanā̱ tṛṇa̍ṁ ni̱vatsv a̱paḥ sva̍pa̱syayā̍ naraḥ |
ago̍hyasya̱ yad asa̍stanā gṛ̱he tad a̱dyedam ṛ̍bhavo̱ nānu̍ gacchatha || RV_1,161.11

sa̱mmīlya̱ yad bhuva̍nā pa̱ryasa̍rpata̱ kva̍ svit tā̱tyā pi̱tarā̍ va āsatuḥ |
aśa̍pata̱ yaḥ ka̱rasna̍ṁ va āda̱de yaḥ prābra̍vī̱t pro tasmā̍ abravītana || RV_1,161.12

su̱ṣu̱pvāṁsa̍ ṛbhava̱s tad a̍pṛccha̱tāgo̍hya̱ ka i̱daṁ no̍ abūbudhat |
śvāna̍m ba̱sto bo̍dhayi̱tāra̍m abravīt saṁvatsa̱ra i̱dam a̱dyā vy a̍khyata || RV_1,161.13

di̱vā yā̍nti ma̱ruto̱ bhūmyā̱gnir a̱yaṁ vāto̍ a̱ntari̍kṣeṇa yāti |
a̱dbhir yā̍ti̱ varu̍ṇaḥ samu̱drair yu̱ṣmām̐ i̱cchanta̍ḥ śavaso napātaḥ || RV_1,161.14

mā no̍ mi̱tro varu̍ṇo arya̱māyur indra̍ ṛbhu̱kṣā ma̱ruta̱ḥ pari̍ khyan |
yad vā̱jino̍ de̱vajā̍tasya̱ sapte̍ḥ prava̱kṣyāmo̍ vi̱dathe̍ vī̱ryā̍ṇi || RV_1,162.01

yan ni̱rṇijā̱ rekṇa̍sā̱ prāvṛ̍tasya rā̱tiṁ gṛ̍bhī̱tām mu̍kha̱to naya̍nti |
suprā̍ṅ a̱jo memya̍d vi̱śvarū̍pa indrāpū̱ṣṇoḥ pri̱yam apy e̍ti̱ pātha̍ḥ || RV_1,162.02

e̱ṣa cchāga̍ḥ pu̱ro aśve̍na vā̱jinā̍ pū̱ṣṇo bhā̱go nī̍yate vi̱śvade̍vyaḥ |
a̱bhi̱priya̱ṁ yat pu̍ro̱ḻāśa̱m arva̍tā̱ tvaṣṭed e̍naṁ sauśrava̱sāya̍ jinvati || RV_1,162.03

yad dha̍vi̱ṣya̍m ṛtu̱śo de̍va̱yāna̱ṁ trir mānu̍ṣā̱ḥ pary aśva̱ṁ naya̍nti |
atrā̍ pū̱ṣṇaḥ pra̍tha̱mo bhā̱ga e̍ti ya̱jñaṁ de̱vebhya̍ḥ prative̱daya̍nn a̱jaḥ || RV_1,162.04

hotā̍dhva̱ryur āva̍yā agnimi̱ndho grā̍vagrā̱bha u̱ta śaṁstā̱ suvi̍praḥ |
tena̍ ya̱jñena̱ sva̍raṁkṛtena̱ svi̍ṣṭena va̱kṣaṇā̱ ā pṛ̍ṇadhvam || RV_1,162.05

yū̱pa̱vra̱skā u̱ta ye yū̍pavā̱hāś ca̱ṣāla̱ṁ ye a̍śvayū̱pāya̱ takṣa̍ti |
ye cārva̍te̱ paca̍naṁ sa̱mbhara̍nty u̱to teṣā̍m a̱bhigū̍rtir na invatu || RV_1,162.06

upa̱ prāgā̍t su̱man me̍ 'dhāyi̱ manma̍ de̱vānā̱m āśā̱ upa̍ vī̱tapṛ̍ṣṭhaḥ |
anv e̍na̱ṁ viprā̱ ṛṣa̍yo madanti de̱vānā̍m pu̱ṣṭe ca̍kṛmā su̱bandhu̍m || RV_1,162.07

yad vā̱jino̱ dāma̍ sa̱ṁdāna̱m arva̍to̱ yā śī̍rṣa̱ṇyā̍ raśa̱nā rajju̍r asya |
yad vā̍ ghāsya̱ prabhṛ̍tam ā̱sye̱3̱̍ tṛṇa̱ṁ sarvā̱ tā te̱ api̍ de̱veṣv a̍stu || RV_1,162.08

yad aśva̍sya kra̱viṣo̱ makṣi̱kāśa̱ yad vā̱ svarau̱ svadhi̍tau ri̱ptam asti̍ |
yad dhasta̍yoḥ śami̱tur yan na̱kheṣu̱ sarvā̱ tā te̱ api̍ de̱veṣv a̍stu || RV_1,162.09

yad ūva̍dhyam u̱dara̍syāpa̱vāti̱ ya ā̱masya̍ kra̱viṣo̍ ga̱ndho asti̍ |
su̱kṛ̱tā tac cha̍mi̱tāra̍ḥ kṛṇvantū̱ta medha̍ṁ śṛta̱pāka̍m pacantu || RV_1,162.10

yat te̱ gātrā̍d a̱gninā̍ pa̱cyamā̍nād a̱bhi śūla̱ṁ niha̍tasyāva̱dhāva̍ti |
mā tad bhūmyā̱m ā śri̍ṣa̱n mā tṛṇe̍ṣu de̱vebhya̱s tad u̱śadbhyo̍ rā̱tam a̍stu || RV_1,162.11

ye vā̱jina̍m pari̱paśya̍nti pa̱kvaṁ ya ī̍m ā̱huḥ su̍ra̱bhir nir ha̱reti̍ |
ye cārva̍to māṁsabhi̱kṣām u̱pāsa̍ta u̱to teṣā̍m a̱bhigū̍rtir na invatu || RV_1,162.12

yan nīkṣa̍ṇam mā̱m̐spaca̍nyā u̱khāyā̱ yā pātrā̍ṇi yū̱ṣṇa ā̱seca̍nāni |
ū̱ṣma̱ṇyā̍pi̱dhānā̍ carū̱ṇām a̱ṅkāḥ sū̱nāḥ pari̍ bhūṣa̱nty aśva̍m || RV_1,162.13

ni̱krama̍ṇaṁ ni̱ṣada̍naṁ vi̱varta̍na̱ṁ yac ca̱ paḍbī̍śa̱m arva̍taḥ |
yac ca̍ pa̱pau yac ca̍ ghā̱siṁ ja̱ghāsa̱ sarvā̱ tā te̱ api̍ de̱veṣv a̍stu || RV_1,162.14

mā tvā̱gnir dhva̍nayīd dhū̱maga̍ndhi̱r mokhā bhrāja̍nty a̱bhi vi̍kta̱ jaghri̍ḥ |
i̱ṣṭaṁ vī̱tam a̱bhigū̍rta̱ṁ vaṣa̍ṭkṛta̱ṁ taṁ de̱vāsa̱ḥ prati̍ gṛbhṇa̱nty aśva̍m || RV_1,162.15

yad aśvā̍ya̱ vāsa̍ upastṛ̱ṇanty a̍dhīvā̱saṁ yā hira̍ṇyāny asmai |
sa̱ṁdāna̱m arva̍nta̱m paḍbī̍śam pri̱yā de̱veṣv ā yā̍mayanti || RV_1,162.16

yat te̍ sā̱de maha̍sā̱ śūkṛ̍tasya̱ pārṣṇyā̍ vā̱ kaśa̍yā vā tu̱toda̍ |
sru̱ceva̱ tā ha̱viṣo̍ adhva̱reṣu̱ sarvā̱ tā te̱ brahma̍ṇā sūdayāmi || RV_1,162.17

catu̍striṁśad vā̱jino̍ de̱vaba̍ndho̱r vaṅkrī̱r aśva̍sya̱ svadhi̍ti̱ḥ sam e̍ti |
acchi̍drā̱ gātrā̍ va̱yunā̍ kṛṇota̱ paru̍ṣ-parur anu̱ghuṣyā̱ vi śa̍sta || RV_1,162.18

eka̱s tvaṣṭu̱r aśva̍syā viśa̱stā dvā ya̱ntārā̍ bhavata̱s tatha̍ ṛ̱tuḥ |
yā te̱ gātrā̍ṇām ṛtu̱thā kṛ̱ṇomi̱ tā-tā̱ piṇḍā̍nā̱m pra ju̍homy a̱gnau || RV_1,162.19

mā tvā̍ tapat pri̱ya ā̱tmāpi̱yanta̱m mā svadhi̍tis ta̱nva1̱̍ ā ti̍ṣṭhipat te |
mā te̍ gṛ̱dhnur a̍viśa̱stāti̱hāya̍ chi̱drā gātrā̍ṇy a̱sinā̱ mithū̍ kaḥ || RV_1,162.20

na vā u̍ e̱tan mri̍yase̱ na ri̍ṣyasi de̱vām̐ id e̍ṣi pa̱thibhi̍ḥ su̱gebhi̍ḥ |
harī̍ te̱ yuñjā̱ pṛṣa̍tī abhūtā̱m upā̍sthād vā̱jī dhu̱ri rāsa̍bhasya || RV_1,162.21

su̱gavya̍ṁ no vā̱jī svaśvya̍m pu̱ṁsaḥ pu̱trām̐ u̱ta vi̍śvā̱puṣa̍ṁ ra̱yim |
a̱nā̱gā̱stvaṁ no̱ adi̍tiḥ kṛṇotu kṣa̱traṁ no̱ aśvo̍ vanatāṁ ha̱viṣmā̍n || RV_1,162.22

yad akra̍ndaḥ pratha̱maṁ jāya̍māna u̱dyan sa̍mu̱drād u̱ta vā̱ purī̍ṣāt |
śye̱nasya̍ pa̱kṣā ha̍ri̱ṇasya̍ bā̱hū u̍pa̱stutya̱m mahi̍ jā̱taṁ te̍ arvan || RV_1,163.01

ya̱mena̍ da̱ttaṁ tri̱ta e̍nam āyuna̱g indra̍ eṇam pratha̱mo adhy a̍tiṣṭhat |
ga̱ndha̱rvo a̍sya raśa̱nām a̍gṛbhṇā̱t sūrā̱d aśva̍ṁ vasavo̱ nir a̍taṣṭa || RV_1,163.02

asi̍ ya̱mo asy ā̍di̱tyo a̍rva̱nn asi̍ tri̱to guhye̍na vra̱tena̍ |
asi̱ some̍na sa̱mayā̱ vipṛ̍kta ā̱hus te̱ trīṇi̍ di̱vi bandha̍nāni || RV_1,163.03

trīṇi̍ ta āhur di̱vi bandha̍nāni̱ trīṇy a̱psu trīṇy a̱ntaḥ sa̍mu̱dre |
u̱teva̍ me̱ varu̍ṇaś chantsy arva̱n yatrā̍ ta ā̱huḥ pa̍ra̱maṁ ja̱nitra̍m || RV_1,163.04

i̱mā te̍ vājinn ava̱mārja̍nānī̱mā śa̱phānā̍ṁ sani̱tur ni̱dhānā̍ |
atrā̍ te bha̱drā ra̍śa̱nā a̍paśyam ṛ̱tasya̱ yā a̍bhi̱rakṣa̍nti go̱pāḥ || RV_1,163.05

ā̱tmāna̍ṁ te̱ mana̍sā̱rād a̍jānām a̱vo di̱vā pa̱taya̍ntam pata̱ṁgam |
śiro̍ apaśyam pa̱thibhi̍ḥ su̱gebhi̍r are̱ṇubhi̱r jeha̍mānam pata̱tri || RV_1,163.06

atrā̍ te rū̱pam u̍tta̱mam a̍paśya̱ṁ jigī̍ṣamāṇam i̱ṣa ā pa̱de goḥ |
ya̱dā te̱ marto̱ anu̱ bhoga̱m āna̱ḻ ād id grasi̍ṣṭha̱ oṣa̍dhīr ajīgaḥ || RV_1,163.07

anu̍ tvā̱ ratho̱ anu̱ maryo̍ arva̱nn anu̱ gāvo 'nu̱ bhaga̍ḥ ka̱nīnā̍m |
anu̱ vrātā̍sa̱s tava̍ sa̱khyam ī̍yu̱r anu̍ de̱vā ma̍mire vī̱rya̍ṁ te || RV_1,163.08

hira̍ṇyaśṛ̱ṅgo 'yo̍ asya̱ pādā̱ mano̍javā̱ ava̍ra̱ indra̍ āsīt |
de̱vā id a̍sya havi̱radya̍m āya̱n yo arva̍ntam pratha̱mo a̱dhyati̍ṣṭhat || RV_1,163.09

ī̱rmāntā̍sa̱ḥ sili̍kamadhyamāsa̱ḥ saṁ śūra̍ṇāso di̱vyāso̱ atyā̍ḥ |
ha̱ṁsā i̍va śreṇi̱śo ya̍tante̱ yad ākṣi̍ṣur di̱vyam ajma̱m aśvā̍ḥ || RV_1,163.10

tava̱ śarī̍ram patayi̱ṣṇv a̍rva̱n tava̍ ci̱ttaṁ vāta̍ iva̱ dhrajī̍mān |
tava̱ śṛṅgā̍ṇi̱ viṣṭhi̍tā puru̱trāra̍ṇyeṣu̱ jarbhu̍rāṇā caranti || RV_1,163.11

upa̱ prāgā̱c chasa̍naṁ vā̱jy arvā̍ deva̱drīcā̱ mana̍sā̱ dīdhyā̍naḥ |
a̱jaḥ pu̱ro nī̍yate̱ nābhi̍r a̱syānu̍ pa̱ścāt ka̱vayo̍ yanti re̱bhāḥ || RV_1,163.12

upa̱ prāgā̍t para̱maṁ yat sa̱dhastha̱m arvā̱m̐ acchā̍ pi̱tara̍m mā̱tara̍ṁ ca |
a̱dyā de̱vāñ juṣṭa̍tamo̱ hi ga̱myā athā śā̍ste dā̱śuṣe̱ vāryā̍ṇi || RV_1,163.13

a̱sya vā̱masya̍ pali̱tasya̱ hotu̱s tasya̱ bhrātā̍ madhya̱mo a̱sty aśna̍ḥ |
tṛ̱tīyo̱ bhrātā̍ ghṛ̱tapṛ̍ṣṭho a̱syātrā̍paśyaṁ vi̱śpati̍ṁ sa̱ptapu̍tram || RV_1,164.01

sa̱pta yu̍ñjanti̱ ratha̱m eka̍cakra̱m eko̱ aśvo̍ vahati sa̱ptanā̍mā |
tri̱nābhi̍ ca̱kram a̱jara̍m ana̱rvaṁ yatre̱mā viśvā̱ bhuva̱nādhi̍ ta̱sthuḥ || RV_1,164.02

i̱maṁ ratha̱m adhi̱ ye sa̱pta ta̱sthuḥ sa̱ptaca̍kraṁ sa̱pta va̍ha̱nty aśvā̍ḥ |
sa̱pta svasā̍ro a̱bhi saṁ na̍vante̱ yatra̱ gavā̱ṁ nihi̍tā sa̱pta nāma̍ || RV_1,164.03

ko da̍darśa pratha̱maṁ jāya̍mānam astha̱nvanta̱ṁ yad a̍na̱sthā bibha̍rti |
bhūmyā̱ asu̱r asṛ̍g ā̱tmā kva̍ svi̱t ko vi̱dvāṁsa̱m upa̍ gā̱t praṣṭu̍m e̱tat || RV_1,164.04

pāka̍ḥ pṛcchāmi̱ mana̱sāvi̍jānan de̱vānā̍m e̱nā nihi̍tā pa̱dāni̍ |
va̱tse ba̱ṣkaye 'dhi̍ sa̱pta tantū̱n vi ta̍tnire ka̱vaya̱ ota̱vā u̍ || RV_1,164.05

aci̍kitvāñ ciki̱tuṣa̍ś ci̱d atra̍ ka̱vīn pṛ̍cchāmi vi̱dmane̱ na vi̱dvān |
vi yas ta̱stambha̱ ṣaḻ i̱mā rajā̍ṁsy a̱jasya̍ rū̱pe kim api̍ svi̱d eka̍m || RV_1,164.06

i̱ha bra̍vītu̱ ya ī̍m a̱ṅga vedā̱sya vā̱masya̱ nihi̍tam pa̱daṁ veḥ |
śī̱rṣṇaḥ kṣī̱raṁ du̍hrate̱ gāvo̍ asya va̱vriṁ vasā̍nā uda̱kam pa̱dāpu̍ḥ || RV_1,164.07

mā̱tā pi̱tara̍m ṛ̱ta ā ba̍bhāja dhī̱ty agre̱ mana̍sā̱ saṁ hi ja̱gme |
sā bī̍bha̱tsur garbha̍rasā̱ nivi̍ddhā̱ nama̍svanta̱ id u̍pavā̱kam ī̍yuḥ || RV_1,164.08

yu̱ktā mā̱tāsī̍d dhu̱ri dakṣi̍ṇāyā̱ ati̍ṣṭha̱d garbho̍ vṛja̱nīṣv a̱ntaḥ |
amī̍med va̱tso anu̱ gām a̍paśyad viśvarū̱pya̍ṁ tri̱ṣu yoja̍neṣu || RV_1,164.09

ti̱sro mā̱tṝs trīn pi̱tṝn bibhra̱d eka̍ ū̱rdhvas ta̍sthau̱ nem ava̍ glāpayanti |
ma̱ntraya̍nte di̱vo a̱muṣya̍ pṛ̱ṣṭhe vi̍śva̱vida̱ṁ vāca̱m avi̍śvaminvām || RV_1,164.10

dvāda̍śāraṁ na̱hi taj jarā̍ya̱ varva̍rti ca̱kram pari̱ dyām ṛ̱tasya̍ |
ā pu̱trā a̍gne mithu̱nāso̱ atra̍ sa̱pta śa̱tāni̍ viṁśa̱tiś ca̍ tasthuḥ || RV_1,164.11

pañca̍pādam pi̱tara̱ṁ dvāda̍śākṛtiṁ di̱va ā̍hu̱ḥ pare̱ ardhe̍ purī̱ṣiṇa̍m |
athe̱me a̱nya upa̍re vicakṣa̱ṇaṁ sa̱ptaca̍kre̱ ṣaḻa̍ra āhu̱r arpi̍tam || RV_1,164.12

pañcā̍re ca̱kre pa̍ri̱varta̍māne̱ tasmi̱nn ā ta̍sthu̱r bhuva̍nāni̱ viśvā̍ |
tasya̱ nākṣa̍s tapyate̱ bhūri̍bhāraḥ sa̱nād e̱va na śī̍ryate̱ sanā̍bhiḥ || RV_1,164.13

sane̍mi ca̱kram a̱jara̱ṁ vi vā̍vṛta uttā̱nāyā̱ṁ daśa̍ yu̱ktā va̍hanti |
sūrya̍sya̱ cakṣū̱ raja̍sai̱ty āvṛ̍ta̱ṁ tasmi̱nn ārpi̍tā̱ bhuva̍nāni̱ viśvā̍ || RV_1,164.14

sā̱ka̱ṁjānā̍ṁ sa̱ptatha̍m āhur eka̱jaṁ ṣaḻ id ya̱mā ṛṣa̍yo deva̱jā iti̍ |
teṣā̍m i̱ṣṭāni̱ vihi̍tāni dhāma̱śaḥ sthā̱tre re̍jante̱ vikṛ̍tāni rūpa̱śaḥ || RV_1,164.15

striya̍ḥ sa̱tīs tām̐ u̍ me pu̱ṁsa ā̍hu̱ḥ paśya̍d akṣa̱ṇvān na vi ce̍tad a̱ndhaḥ |
ka̱vir yaḥ pu̱traḥ sa ī̱m ā ci̍keta̱ yas tā vi̍jā̱nāt sa pi̱tuṣ pi̱tāsa̍t || RV_1,164.16

a̱vaḥ pare̍ṇa pa̱ra e̱nāva̍reṇa pa̱dā va̱tsam bibhra̍tī̱ gaur ud a̍sthāt |
sā ka̱drīcī̱ kaṁ svi̱d ardha̱m parā̍gā̱t kva̍ svit sūte na̱hi yū̱the a̱ntaḥ || RV_1,164.17

a̱vaḥ pare̍ṇa pi̱tara̱ṁ yo a̍syānu̱veda̍ pa̱ra e̱nāva̍reṇa |
ka̱vī̱yamā̍na̱ḥ ka i̱ha pra vo̍cad de̱vam mana̱ḥ kuto̱ adhi̱ prajā̍tam || RV_1,164.18

ye a̱rvāñca̱s tām̐ u̱ parā̍ca āhu̱r ye parā̍ñca̱s tām̐ u̍ a̱rvāca̍ āhuḥ |
indra̍ś ca̱ yā ca̱krathu̍ḥ soma̱ tāni̍ dhu̱rā na yu̱ktā raja̍so vahanti || RV_1,164.19

dvā su̍pa̱rṇā sa̱yujā̱ sakhā̍yā samā̱naṁ vṛ̱kṣam pari̍ ṣasvajāte |
tayo̍r a̱nyaḥ pippa̍laṁ svā̱dv atty ana̍śnann a̱nyo a̱bhi cā̍kaśīti || RV_1,164.20

yatrā̍ supa̱rṇā a̱mṛta̍sya bhā̱gam ani̍meṣaṁ vi̱dathā̍bhi̱svara̍nti |
i̱no viśva̍sya̱ bhuva̍nasya go̱pāḥ sa mā̱ dhīra̱ḥ pāka̱m atrā vi̍veśa || RV_1,164.21

yasmi̍n vṛ̱kṣe ma̱dhvada̍ḥ supa̱rṇā ni̍vi̱śante̱ suva̍te̱ cādhi̱ viśve̍ |
tasyed ā̍hu̱ḥ pippa̍laṁ svā̱dv agre̱ tan non na̍śa̱d yaḥ pi̱tara̱ṁ na veda̍ || RV_1,164.22

yad gā̍ya̱tre adhi̍ gāya̱tram āhi̍ta̱ṁ traiṣṭu̍bhād vā̱ traiṣṭu̍bhaṁ ni̱rata̍kṣata |
yad vā̱ jaga̱j jaga̱ty āhi̍tam pa̱daṁ ya it tad vi̱dus te a̍mṛta̱tvam ā̍naśuḥ || RV_1,164.23

gā̱ya̱treṇa̱ prati̍ mimīte a̱rkam a̱rkeṇa̱ sāma̱ traiṣṭu̍bhena vā̱kam |
vā̱kena̍ vā̱kaṁ dvi̱padā̱ catu̍ṣpadā̱kṣare̍ṇa mimate sa̱pta vāṇī̍ḥ || RV_1,164.24

jaga̍tā̱ sindhu̍ṁ di̱vy a̍stabhāyad rathaṁta̱re sūrya̱m pary a̍paśyat |
gā̱ya̱trasya̍ sa̱midha̍s ti̱sra ā̍hu̱s tato̍ ma̱hnā pra ri̍rice mahi̱tvā || RV_1,164.25

upa̍ hvaye su̱dughā̍ṁ dhe̱num e̱tāṁ su̱hasto̍ go̱dhug u̱ta do̍had enām |
śreṣṭha̍ṁ sa̱vaṁ sa̍vi̱tā sā̍viṣan no̱ 'bhī̍ddho gha̱rmas tad u̱ ṣu pra vo̍cam || RV_1,164.26

hi̱ṅkṛ̱ṇva̱tī va̍su̱patnī̱ vasū̍nāṁ va̱tsam i̱cchantī̱ mana̍sā̱bhy āgā̍t |
du̱hām a̱śvibhyā̱m payo̍ a̱ghnyeyaṁ sā va̍rdhatām maha̱te saubha̍gāya || RV_1,164.27

gaur a̍mīme̱d anu̍ va̱tsam mi̱ṣanta̍m mū̱rdhāna̱ṁ hiṅṅ a̍kṛṇo̱n māta̱vā u̍ |
sṛkvā̍ṇaṁ gha̱rmam a̱bhi vā̍vaśā̱nā mimā̍ti mā̱yum paya̍te̱ payo̍bhiḥ || RV_1,164.28

a̱yaṁ sa śi̍ṅkte̱ yena̱ gaur a̱bhīvṛ̍tā̱ mimā̍ti mā̱yuṁ dhva̱sanā̱v adhi̍ śri̱tā |
sā ci̱ttibhi̱r ni hi ca̱kāra̱ martya̍ṁ vi̱dyud bhava̍ntī̱ prati̍ va̱vrim au̍hata || RV_1,164.29

a̱nac cha̍ye tu̱ragā̍tu jī̱vam eja̍d dhru̱vam madhya̱ ā pa̱styā̍nām |
jī̱vo mṛ̱tasya̍ carati sva̱dhābhi̱r ama̍rtyo̱ martye̍nā̱ sayo̍niḥ || RV_1,164.30

apa̍śyaṁ go̱pām ani̍padyamāna̱m ā ca̱ parā̍ ca pa̱thibhi̱ś cara̍ntam |
sa sa̱dhrīcī̱ḥ sa viṣū̍cī̱r vasā̍na̱ ā va̍rīvarti̱ bhuva̍neṣv a̱ntaḥ || RV_1,164.31

ya ī̍ṁ ca̱kāra̱ na so a̱sya ve̍da̱ ya ī̍ṁ da̱darśa̱ hiru̱g in nu tasmā̍t |
sa mā̱tur yonā̱ pari̍vīto a̱ntar ba̍hupra̱jā nirṛ̍ti̱m ā vi̍veśa || RV_1,164.32

dyaur me̍ pi̱tā ja̍ni̱tā nābhi̱r atra̱ bandhu̍r me mā̱tā pṛ̍thi̱vī ma̱hīyam |
u̱ttā̱nayo̍ś ca̱mvo̱3̱̍r yoni̍r a̱ntar atrā̍ pi̱tā du̍hi̱tur garbha̱m ādhā̍t || RV_1,164.33

pṛ̱cchāmi̍ tvā̱ para̱m anta̍m pṛthi̱vyāḥ pṛ̱cchāmi̱ yatra̱ bhuva̍nasya̱ nābhi̍ḥ |
pṛ̱cchāmi̍ tvā̱ vṛṣṇo̱ aśva̍sya̱ reta̍ḥ pṛ̱cchāmi̍ vā̱caḥ pa̍ra̱maṁ vyo̍ma || RV_1,164.34

i̱yaṁ vedi̱ḥ paro̱ anta̍ḥ pṛthi̱vyā a̱yaṁ ya̱jño bhuva̍nasya̱ nābhi̍ḥ |
a̱yaṁ somo̱ vṛṣṇo̱ aśva̍sya̱ reto̍ bra̱hmāyaṁ vā̱caḥ pa̍ra̱maṁ vyo̍ma || RV_1,164.35

sa̱ptārdha̍ga̱rbhā bhuva̍nasya̱ reto̱ viṣṇo̍s tiṣṭhanti pra̱diśā̱ vidha̍rmaṇi |
te dhī̱tibhi̱r mana̍sā̱ te vi̍pa̱ścita̍ḥ pari̱bhuva̱ḥ pari̍ bhavanti vi̱śvata̍ḥ || RV_1,164.36

na vi jā̍nāmi̱ yad i̍ve̱dam asmi̍ ni̱ṇyaḥ saṁna̍ddho̱ mana̍sā carāmi |
ya̱dā māga̍n prathama̱jā ṛ̱tasyād id vā̱co a̍śnuve bhā̱gam a̱syāḥ || RV_1,164.37

apā̱ṅ prāṅ e̍ti sva̱dhayā̍ gṛbhī̱to 'ma̍rtyo̱ martye̍nā̱ sayo̍niḥ |
tā śaśva̍ntā viṣū̱cīnā̍ vi̱yantā̱ ny a1̱̍nyaṁ ci̱kyur na ni ci̍kyur a̱nyam || RV_1,164.38

ṛ̱co a̱kṣare̍ para̱me vyo̍ma̱n yasmi̍n de̱vā adhi̱ viśve̍ niṣe̱duḥ |
yas tan na veda̱ kim ṛ̱cā ka̍riṣyati̱ ya it tad vi̱dus ta i̱me sam ā̍sate || RV_1,164.39

sū̱ya̱va̱sād bhaga̍vatī̱ hi bhū̱yā atho̍ va̱yam bhaga̍vantaḥ syāma |
a̱ddhi tṛṇa̍m aghnye viśva̱dānī̱m piba̍ śu̱ddham u̍da̱kam ā̱cara̍ntī || RV_1,164.40

gau̱rīr mi̍māya sali̱lāni̱ takṣa̱ty eka̍padī dvi̱padī̱ sā catu̍ṣpadī |
a̱ṣṭāpa̍dī̱ nava̍padī babhū̱vuṣī̍ sa̱hasrā̍kṣarā para̱me vyo̍man || RV_1,164.41

tasyā̍ḥ samu̱drā adhi̱ vi kṣa̍ranti̱ tena̍ jīvanti pra̱diśa̱ś cata̍sraḥ |
tata̍ḥ kṣaraty a̱kṣara̱ṁ tad viśva̱m upa̍ jīvati || RV_1,164.42

śa̱ka̱maya̍ṁ dhū̱mam ā̱rād a̍paśyaṁ viṣū̱vatā̍ pa̱ra e̱nāva̍reṇa |
u̱kṣāṇa̱m pṛśni̍m apacanta vī̱rās tāni̱ dharmā̍ṇi pratha̱māny ā̍san || RV_1,164.43

traya̍ḥ ke̱śina̍ ṛtu̱thā vi ca̍kṣate saṁvatsa̱re va̍pata̱ eka̍ eṣām |
viśva̱m eko̍ a̱bhi ca̍ṣṭe̱ śacī̍bhi̱r dhrāji̱r eka̍sya dadṛśe̱ na rū̱pam || RV_1,164.44

ca̱tvāri̱ vāk pari̍mitā pa̱dāni̱ tāni̍ vidur brāhma̱ṇā ye ma̍nī̱ṣiṇa̍ḥ |
guhā̱ trīṇi̱ nihi̍tā̱ neṅga̍yanti tu̱rīya̍ṁ vā̱co ma̍nu̱ṣyā̍ vadanti || RV_1,164.45

indra̍m mi̱traṁ varu̍ṇam a̱gnim ā̍hu̱r atho̍ di̱vyaḥ sa su̍pa̱rṇo ga̱rutmā̍n |
eka̱ṁ sad viprā̍ bahu̱dhā va̍danty a̱gniṁ ya̱mam mā̍ta̱riśvā̍nam āhuḥ || RV_1,164.46

kṛ̱ṣṇaṁ ni̱yāna̱ṁ hara̍yaḥ supa̱rṇā a̱po vasā̍nā̱ diva̱m ut pa̍tanti |
ta āva̍vṛtra̱n sada̍nād ṛ̱tasyād id ghṛ̱tena̍ pṛthi̱vī vy u̍dyate || RV_1,164.47

dvāda̍śa pra̱dhaya̍ś ca̱kram eka̱ṁ trīṇi̱ nabhyā̍ni̱ ka u̱ tac ci̍keta |
tasmi̍n sā̱kaṁ tri̍śa̱tā na śa̱ṅkavo̍ 'rpi̱tāḥ ṣa̱ṣṭir na ca̍lāca̱lāsa̍ḥ || RV_1,164.48

yas te̱ stana̍ḥ śaśa̱yo yo ma̍yo̱bhūr yena̱ viśvā̱ puṣya̍si̱ vāryā̍ṇi |
yo ra̍tna̱dhā va̍su̱vid yaḥ su̱datra̱ḥ sara̍svati̱ tam i̱ha dhāta̍ve kaḥ || RV_1,164.49

ya̱jñena̍ ya̱jñam a̍yajanta de̱vās tāni̱ dharmā̍ṇi pratha̱māny ā̍san |
te ha̱ nāka̍m mahi̱māna̍ḥ sacanta̱ yatra̱ pūrve̍ sā̱dhyāḥ santi̍ de̱vāḥ || RV_1,164.50

sa̱mā̱nam e̱tad u̍da̱kam uc caity ava̱ cāha̍bhiḥ |
bhūmi̍m pa̱rjanyā̱ jinva̍nti̱ diva̍ṁ jinvanty a̱gnaya̍ḥ || RV_1,164.51

di̱vyaṁ su̍pa̱rṇaṁ vā̍ya̱sam bṛ̱hanta̍m a̱pāṁ garbha̍ṁ darśa̱tam oṣa̍dhīnām |
a̱bhī̱pa̱to vṛ̱ṣṭibhi̍s ta̱rpaya̍nta̱ṁ sara̍svanta̱m ava̍se johavīmi || RV_1,164.52

kayā̍ śu̱bhā sava̍yasa̱ḥ sanī̍ḻāḥ samā̱nyā ma̱ruta̱ḥ sam mi̍mikṣuḥ |
kayā̍ ma̱tī kuta̱ etā̍sa e̱te 'rca̍nti̱ śuṣma̱ṁ vṛṣa̍ṇo vasū̱yā || RV_1,165.01

kasya̱ brahmā̍ṇi jujuṣu̱r yuvā̍na̱ḥ ko a̍dhva̱re ma̱ruta̱ ā va̍varta |
śye̱nām̐ i̍va̱ dhraja̍to a̱ntari̍kṣe̱ kena̍ ma̱hā mana̍sā rīramāma || RV_1,165.02

kuta̱s tvam i̍ndra̱ māhi̍na̱ḥ sann eko̍ yāsi satpate̱ kiṁ ta̍ i̱tthā |
sam pṛ̍cchase samarā̱ṇaḥ śu̍bhā̱nair vo̱ces tan no̍ harivo̱ yat te̍ a̱sme || RV_1,165.03

brahmā̍ṇi me ma̱taya̱ḥ śaṁ su̱tāsa̱ḥ śuṣma̍ iyarti̱ prabhṛ̍to me̱ adri̍ḥ |
ā śā̍sate̱ prati̍ haryanty u̱kthemā harī̍ vahata̱s tā no̱ accha̍ || RV_1,165.04

ato̍ va̱yam a̍nta̱mebhi̍r yujā̱nāḥ svakṣa̍trebhis ta̱nva1̱̍ḥ śumbha̍mānāḥ |
maho̍bhi̱r etā̱m̐ upa̍ yujmahe̱ nv indra̍ sva̱dhām anu̱ hi no̍ ba̱bhūtha̍ || RV_1,165.05

kva1̱̍ syā vo̍ marutaḥ sva̱dhāsī̱d yan mām eka̍ṁ sa̱madha̍ttāhi̱hatye̍ |
a̱haṁ hy u1̱̍gras ta̍vi̱ṣas tuvi̍ṣmā̱n viśva̍sya̱ śatro̱r ana̍maṁ vadha̱snaiḥ || RV_1,165.06

bhūri̍ cakartha̱ yujye̍bhir a̱sme sa̍mā̱nebhi̍r vṛṣabha̱ pauṁsye̍bhiḥ |
bhūrī̍ṇi̱ hi kṛ̱ṇavā̍mā śavi̱ṣṭhendra̱ kratvā̍ maruto̱ yad vaśā̍ma || RV_1,165.07

vadhī̍ṁ vṛ̱tram ma̍ruta indri̱yeṇa̱ svena̱ bhāme̍na tavi̱ṣo ba̍bhū̱vān |
a̱ham e̱tā mana̍ve vi̱śvaśca̍ndrāḥ su̱gā a̱paś ca̍kara̱ vajra̍bāhuḥ || RV_1,165.08

anu̍tta̱m ā te̍ maghava̱n naki̱r nu na tvāvā̍m̐ asti de̱vatā̱ vidā̍naḥ |
na jāya̍māno̱ naśa̍te̱ na jā̱to yāni̍ kari̱ṣyā kṛ̍ṇu̱hi pra̍vṛddha || RV_1,165.09

eka̍sya cin me vi̱bhv a1̱̍stv ojo̱ yā nu da̍dhṛ̱ṣvān kṛ̱ṇavai̍ manī̱ṣā |
a̱haṁ hy u1̱̍gro ma̍ruto̱ vidā̍no̱ yāni̱ cyava̱m indra̱ id ī̍śa eṣām || RV_1,165.10

ama̍ndan mā maruta̱ḥ stomo̱ atra̱ yan me̍ nara̱ḥ śrutya̱m brahma̍ ca̱kra |
indrā̍ya̱ vṛṣṇe̱ suma̍khāya̱ mahya̱ṁ sakhye̱ sakhā̍yas ta̱nve̍ ta̱nūbhi̍ḥ || RV_1,165.11

e̱ved e̱te prati̍ mā̱ roca̍mānā̱ ane̍dya̱ḥ śrava̱ eṣo̱ dadhā̍nāḥ |
sa̱ṁcakṣyā̍ marutaś ca̱ndrava̍rṇā̱ acchā̍nta me cha̱dayā̍thā ca nū̱nam || RV_1,165.12

ko nv atra̍ maruto māmahe va̱ḥ pra yā̍tana̱ sakhī̱m̐r acchā̍ sakhāyaḥ |
manmā̍ni citrā apivā̱taya̍nta e̱ṣām bhū̍ta̱ nave̍dā ma ṛ̱tānā̍m || RV_1,165.13

ā yad du̍va̱syād du̱vase̱ na kā̱rur a̱smāñ ca̱kre mā̱nyasya̍ me̱dhā |
o ṣu va̍rtta maruto̱ vipra̱m acche̱mā brahmā̍ṇi jari̱tā vo̍ arcat || RV_1,165.14

e̱ṣa va̱ḥ stomo̍ maruta i̱yaṁ gīr mā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || RV_1,165.15

tan nu vo̍cāma rabha̱sāya̱ janma̍ne̱ pūrva̍m mahi̱tvaṁ vṛ̍ṣa̱bhasya̍ ke̱tave̍ |
ai̱dheva̱ yāma̍n marutas tuviṣvaṇo yu̱dheva̍ śakrās tavi̱ṣāṇi̍ kartana || RV_1,166.01

nitya̱ṁ na sū̱num madhu̱ bibhra̍ta̱ upa̱ krīḻa̍nti krī̱ḻā vi̱dathe̍ṣu̱ ghṛṣva̍yaḥ |
nakṣa̍nti ru̱drā ava̍sā nama̱svina̱ṁ na ma̍rdhanti̱ svata̍vaso havi̱ṣkṛta̍m || RV_1,166.02

yasmā̱ ūmā̍so a̱mṛtā̱ arā̍sata rā̱yas poṣa̍ṁ ca ha̱viṣā̍ dadā̱śuṣe̍ |
u̱kṣanty a̍smai ma̱ruto̍ hi̱tā i̍va pu̱rū rajā̍ṁsi̱ paya̍sā mayo̱bhuva̍ḥ || RV_1,166.03

ā ye rajā̍ṁsi̱ tavi̍ṣībhi̱r avya̍ta̱ pra va̱ evā̍sa̱ḥ svaya̍tāso adhrajan |
bhaya̍nte̱ viśvā̱ bhuva̍nāni ha̱rmyā ci̱tro vo̱ yāma̱ḥ praya̍tāsv ṛ̱ṣṭiṣu̍ || RV_1,166.04

yat tve̱ṣayā̍mā na̱daya̍nta̱ parva̍tān di̱vo vā̍ pṛ̱ṣṭhaṁ naryā̱ acu̍cyavuḥ |
viśvo̍ vo̱ ajma̍n bhayate̱ vana̱spatī̍ rathī̱yantī̍va̱ pra ji̍hīta̱ oṣa̍dhiḥ || RV_1,166.05

yū̱yaṁ na̍ ugrā marutaḥ suce̱tunāri̍ṣṭagrāmāḥ suma̱tim pi̍partana |
yatrā̍ vo di̱dyud rada̍ti̱ krivi̍rdatī ri̱ṇāti̍ pa̱śvaḥ sudhi̍teva ba̱rhaṇā̍ || RV_1,166.06

pra ska̱mbhade̍ṣṇā anava̱bhrarā̍dhaso 'lātṛ̱ṇāso̍ vi̱dathe̍ṣu̱ suṣṭu̍tāḥ |
arca̍nty a̱rkam ma̍di̱rasya̍ pī̱taye̍ vi̱dur vī̱rasya̍ pratha̱māni̱ pauṁsyā̍ || RV_1,166.07

śa̱tabhu̍jibhi̱s tam a̱bhihru̍ter a̱ghāt pū̱rbhī ra̍kṣatā maruto̱ yam āva̍ta |
jana̱ṁ yam u̍grās tavaso virapśinaḥ pā̱thanā̱ śaṁsā̱t tana̍yasya pu̱ṣṭiṣu̍ || RV_1,166.08

viśvā̍ni bha̱drā ma̍ruto̱ rathe̍ṣu vo mitha̱spṛdhye̍va tavi̱ṣāṇy āhi̍tā |
aṁse̱ṣv ā va̱ḥ prapa̍theṣu khā̱dayo 'kṣo̍ vaś ca̱krā sa̱mayā̱ vi vā̍vṛte || RV_1,166.09

bhūrī̍ṇi bha̱drā narye̍ṣu bā̱huṣu̱ vakṣa̍ḥsu ru̱kmā ra̍bha̱sāso̍ a̱ñjaya̍ḥ |
aṁse̱ṣv etā̍ḥ pa̱viṣu̍ kṣu̱rā adhi̱ vayo̱ na pa̱kṣān vy anu̱ śriyo̍ dhire || RV_1,166.10

ma̱hānto̍ ma̱hnā vi̱bhvo̱3̱̍ vibhū̍tayo dūre̱dṛśo̱ ye di̱vyā i̍va̱ stṛbhi̍ḥ |
ma̱ndrāḥ su̍ji̱hvāḥ svari̍tāra ā̱sabhi̱ḥ sammi̍ślā̱ indre̍ ma̱ruta̍ḥ pari̱ṣṭubha̍ḥ || RV_1,166.11

tad va̍ḥ sujātā maruto mahitva̱naṁ dī̱rghaṁ vo̍ dā̱tram adi̍ter iva vra̱tam |
indra̍ś ca̱na tyaja̍sā̱ vi hru̍ṇāti̱ taj janā̍ya̱ yasmai̍ su̱kṛte̱ arā̍dhvam || RV_1,166.12

tad vo̍ jāmi̱tvam ma̍ruta̱ḥ pare̍ yu̱ge pu̱rū yac chaṁsa̍m amṛtāsa̱ āva̍ta |
a̱yā dhi̱yā mana̍ve śru̱ṣṭim āvyā̍ sā̱kaṁ naro̍ da̱ṁsanai̱r ā ci̍kitrire || RV_1,166.13

yena̍ dī̱rgham ma̍rutaḥ śū̱śavā̍ma yu̱ṣmāke̍na̱ parī̍ṇasā turāsaḥ |
ā yat ta̱tana̍n vṛ̱jane̱ janā̍sa e̱bhir ya̱jñebhi̱s tad a̱bhīṣṭi̍m aśyām || RV_1,166.14

e̱ṣa va̱ḥ stomo̍ maruta i̱yaṁ gīr mā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || RV_1,166.15

sa̱hasra̍ṁ ta indro̱tayo̍ naḥ sa̱hasra̱m iṣo̍ harivo gū̱rtata̍māḥ |
sa̱hasra̱ṁ rāyo̍ māda̱yadhyai̍ saha̱sriṇa̱ upa̍ no yantu̱ vājā̍ḥ || RV_1,167.01

ā no 'vo̍bhir ma̱ruto̍ yā̱ntv acchā̱ jyeṣṭhe̍bhir vā bṛ̱haddi̍vaiḥ sumā̱yāḥ |
adha̱ yad e̍ṣāṁ ni̱yuta̍ḥ para̱māḥ sa̍mu̱drasya̍ cid dha̱naya̍nta pā̱re || RV_1,167.02

mi̱myakṣa̱ yeṣu̱ sudhi̍tā ghṛ̱tācī̱ hira̍ṇyanirṇi̱g upa̍rā̱ na ṛ̱ṣṭiḥ |
guhā̱ cara̍ntī̱ manu̍ṣo̱ na yoṣā̍ sa̱bhāva̍tī vida̱thye̍va̱ saṁ vāk || RV_1,167.03

parā̍ śu̱bhrā a̱yāso̍ ya̱vyā sā̍dhāra̱ṇyeva̍ ma̱ruto̍ mimikṣuḥ |
na ro̍da̱sī apa̍ nudanta gho̱rā ju̱ṣanta̱ vṛdha̍ṁ sa̱khyāya̍ de̱vāḥ || RV_1,167.04

joṣa̱d yad ī̍m asu̱ryā̍ sa̱cadhyai̱ viṣi̍tastukā roda̱sī nṛ̱maṇā̍ḥ |
ā sū̱ryeva̍ vidha̱to ratha̍ṁ gāt tve̱ṣapra̍tīkā̱ nabha̍so̱ netyā || RV_1,167.05

āsthā̍payanta yuva̱tiṁ yuvā̍naḥ śu̱bhe nimi̍ślāṁ vi̱dathe̍ṣu pa̱jrām |
a̱rko yad vo̍ maruto ha̱viṣmā̱n gāya̍d gā̱thaṁ su̱taso̍mo duva̱syan || RV_1,167.06

pra taṁ vi̍vakmi̱ vakmyo̱ ya e̍ṣām ma̱rutā̍m mahi̱mā sa̱tyo asti̍ |
sacā̱ yad ī̱ṁ vṛṣa̍maṇā aha̱ṁyuḥ sthi̱rā ci̱j janī̱r vaha̍te subhā̱gāḥ || RV_1,167.07

pānti̍ mi̱trāvaru̍ṇāv ava̱dyāc caya̍ta īm arya̱mo apra̍śastān |
u̱ta cya̍vante̱ acyu̍tā dhru̱vāṇi̍ vāvṛ̱dha ī̍m maruto̱ dāti̍vāraḥ || RV_1,167.08

na̱hī nu vo̍ maruto̱ anty a̱sme ā̱rāttā̍c ci̱c chava̍so̱ anta̍m ā̱puḥ |
te dhṛ̱ṣṇunā̱ śava̍sā śūśu̱vāṁso 'rṇo̱ na dveṣo̍ dhṛṣa̱tā pari̍ ṣṭhuḥ || RV_1,167.09

va̱yam a̱dyendra̍sya̱ preṣṭhā̍ va̱yaṁ śvo vo̍cemahi sama̱rye |
va̱yam pu̱rā mahi̍ ca no̱ anu̱ dyūn tan na̍ ṛbhu̱kṣā na̱rām anu̍ ṣyāt || RV_1,167.10

e̱ṣa va̱ḥ stomo̍ maruta i̱yaṁ gīr mā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || RV_1,167.11

ya̱jñā-ya̍jñā vaḥ sama̱nā tu̍tu̱rvaṇi̱r dhiya̍ṁ-dhiyaṁ vo deva̱yā u̍ dadhidhve |
ā vo̱ 'rvāca̍ḥ suvi̱tāya̱ roda̍syor ma̱he va̍vṛtyā̱m ava̍se suvṛ̱ktibhi̍ḥ || RV_1,168.01

va̱vrāso̱ na ye sva̱jāḥ svata̍vasa̱ iṣa̱ṁ sva̍r abhi̱jāya̍nta̱ dhūta̍yaḥ |
sa̱ha̱sriyā̍so a̱pāṁ normaya̍ ā̱sā gāvo̱ vandyā̍so̱ nokṣaṇa̍ḥ || RV_1,168.02

somā̍so̱ na ye su̱tās tṛ̱ptāṁśa̍vo hṛ̱tsu pī̱tāso̍ du̱vaso̱ nāsa̍te |
aiṣā̱m aṁse̍ṣu ra̱mbhiṇī̍va rārabhe̱ haste̍ṣu khā̱diś ca̍ kṛ̱tiś ca̱ saṁ da̍dhe || RV_1,168.03

ava̱ svayu̍ktā di̱va ā vṛthā̍ yayu̱r ama̍rtyā̱ḥ kaśa̍yā codata̱ tmanā̍ |
a̱re̱ṇava̍s tuvijā̱tā a̍cucyavur dṛ̱ḻhāni̍ cin ma̱ruto̱ bhrāja̍dṛṣṭayaḥ || RV_1,168.04

ko vo̱ 'ntar ma̍ruta ṛṣṭividyuto̱ reja̍ti̱ tmanā̱ hanve̍va ji̱hvayā̍ |
dha̱nva̱cyuta̍ i̱ṣāṁ na yāma̍ni puru̱praiṣā̍ aha̱nyo̱3̱̍ naita̍śaḥ || RV_1,168.05

kva̍ svid a̱sya raja̍so ma̱has para̱ṁ kvāva̍ram maruto̱ yasmi̍nn āya̱ya |
yac cyā̱vaya̍tha vithu̱reva̱ saṁhi̍ta̱ṁ vy adri̍ṇā patatha tve̱ṣam a̍rṇa̱vam || RV_1,168.06

sā̱tir na vo 'ma̍vatī̱ sva̍rvatī tve̱ṣā vipā̍kā maruta̱ḥ pipi̍ṣvatī |
bha̱drā vo̍ rā̱tiḥ pṛ̍ṇa̱to na dakṣi̍ṇā pṛthu̱jrayī̍ asu̱rye̍va̱ jañja̍tī || RV_1,168.07

prati̍ ṣṭobhanti̱ sindha̍vaḥ pa̱vibhyo̱ yad a̱bhriyā̱ṁ vāca̍m udī̱raya̍nti |
ava̍ smayanta vi̱dyuta̍ḥ pṛthi̱vyāṁ yadī̍ ghṛ̱tam ma̱ruta̍ḥ pruṣṇu̱vanti̍ || RV_1,168.08

asū̍ta̱ pṛśni̍r maha̱te raṇā̍ya tve̱ṣam a̱yāsā̍m ma̱rutā̱m anī̍kam |
te sa̍psa̱rāso̍ 'janaya̱ntābhva̱m ād it sva̱dhām i̍ṣi̱rām pary a̍paśyan || RV_1,168.09

e̱ṣa va̱ḥ stomo̍ maruta i̱yaṁ gīr mā̍ndā̱ryasya̍ mā̱nyasya̍ kā̱roḥ |
eṣā yā̍sīṣṭa ta̱nve̍ va̱yāṁ vi̱dyāme̱ṣaṁ vṛ̱jana̍ṁ jī̱radā̍num || RV_1,168.10

ma̱haś ci̱t tvam i̍ndra ya̱ta e̱tān ma̱haś ci̍d asi̱ tyaja̍so varū̱tā |
sa no̍ vedho ma̱rutā̍ṁ ciki̱tvān su̱mnā va̍nuṣva̱ tava̱ hi preṣṭhā̍ || RV_1,169.01

ayu̍jran ta indra vi̱śvakṛ̍ṣṭīr vidā̱nāso̍ ni̱ṣṣidho̍ martya̱trā |
ma̱rutā̍m pṛtsu̱tir hāsa̍mānā̱ sva̍rmīḻhasya pra̱dhana̍sya sā̱tau || RV_1,169.02

amya̱k sā ta̍ indra ṛ̱ṣṭir a̱sme sane̱my abhva̍m ma̱ruto̍ junanti |
a̱gniś ci̱d dhi ṣmā̍ta̱se śu̍śu̱kvān āpo̱ na dvī̱paṁ dadha̍ti̱ prayā̍ṁsi || RV_1,169.03

tvaṁ tū na̍ indra̱ taṁ ra̱yiṁ dā̱ oji̍ṣṭhayā̱ dakṣi̍ṇayeva rā̱tim |
stuta̍ś ca̱ yās te̍ ca̱kana̍nta vā̱yoḥ stana̱ṁ na madhva̍ḥ pīpayanta̱ vājai̍ḥ || RV_1,169.04

tve rāya̍ indra to̱śata̍māḥ praṇe̱tāra̱ḥ kasya̍ cid ṛtā̱yoḥ |
te ṣu ṇo̍ ma̱ruto̍ mṛḻayantu̱ ye smā̍ pu̱rā gā̍tū̱yantī̍va de̱vāḥ || RV_1,169.05

prati̱ pra yā̍hīndra mī̱ḻhuṣo̱ nṝn ma̱haḥ pārthi̍ve̱ sada̍ne yatasva |
adha̱ yad e̍ṣām pṛthubu̱dhnāsa̱ etā̍s tī̱rthe nāryaḥ pauṁsyā̍ni ta̱sthuḥ || RV_1,169.06

prati̍ gho̱rāṇā̱m etā̍nām a̱yāsā̍m ma̱rutā̍ṁ śṛṇva āya̱tām u̍pa̱bdiḥ |
ye martya̍m pṛtanā̱yanta̱m ūmai̍r ṛṇā̱vāna̱ṁ na pa̱taya̍nta̱ sargai̍ḥ || RV_1,169.07

tvam māne̍bhya indra vi̱śvaja̍nyā̱ radā̍ ma̱rudbhi̍ḥ śu̱rudho̱ goa̍grāḥ |
stavā̍nebhiḥ stavase deva de̱vair vi̱dyāme̱ṣaṁ vṛ̱jana̍ṁ jī̱radā̍num || RV_1,169.08

na nū̱nam asti̱ no śvaḥ kas tad ve̍da̱ yad adbhu̍tam |
a̱nyasya̍ ci̱ttam a̱bhi sa̍ṁca̱reṇya̍m u̱tādhī̍ta̱ṁ vi na̍śyati || RV_1,170.01

kiṁ na̍ indra jighāṁsasi̱ bhrāta̍ro ma̱ruta̱s tava̍ |
tebhi̍ḥ kalpasva sādhu̱yā mā na̍ḥ sa̱mara̍ṇe vadhīḥ || RV_1,170.02

kiṁ no̍ bhrātar agastya̱ sakhā̱ sann ati̍ manyase |
vi̱dmā hi te̱ yathā̱ mano̱ 'smabhya̱m in na di̍tsasi || RV_1,170.03

ara̍ṁ kṛṇvantu̱ vedi̱ṁ sam a̱gnim i̍ndhatām pu̱raḥ |
tatrā̱mṛta̍sya̱ ceta̍naṁ ya̱jñaṁ te̍ tanavāvahai || RV_1,170.04

tvam ī̍śiṣe vasupate̱ vasū̍nā̱ṁ tvam mi̱trāṇā̍m mitrapate̱ dheṣṭha̍ḥ |
indra̱ tvam ma̱rudbhi̱ḥ saṁ va̍da̱svādha̱ prāśā̍na ṛtu̱thā ha̱vīṁṣi̍ || RV_1,170.05

prati̍ va e̱nā nama̍sā̱ham e̍mi sū̱ktena̍ bhikṣe suma̱tiṁ tu̱rāṇā̍m |
ra̱rā̱ṇatā̍ maruto ve̱dyābhi̱r ni heḻo̍ dha̱tta vi mu̍cadhva̱m aśvā̍n || RV_1,171.01

e̱ṣa va̱ḥ stomo̍ maruto̱ nama̍svān hṛ̱dā ta̱ṣṭo mana̍sā dhāyi devāḥ |
upe̱m ā yā̍ta̱ mana̍sā juṣā̱ṇā yū̱yaṁ hi ṣṭhā nama̍sa̱ id vṛ̱dhāsa̍ḥ || RV_1,171.02

stu̱tāso̍ no ma̱ruto̍ mṛḻayantū̱ta stu̱to ma̱ghavā̱ śambha̍viṣṭhaḥ |
ū̱rdhvā na̍ḥ santu ko̱myā vanā̱ny ahā̍ni̱ viśvā̍ maruto jigī̱ṣā || RV_1,171.03

a̱smād a̱haṁ ta̍vi̱ṣād īṣa̍māṇa̱ indrā̍d bhi̱yā ma̍ruto̱ reja̍mānaḥ |
yu̱ṣmabhya̍ṁ ha̱vyā niśi̍tāny āsa̱n tāny ā̱re ca̍kṛmā mṛ̱ḻatā̍ naḥ || RV_1,171.04

yena̱ mānā̍saś ci̱taya̍nta u̱srā vyu̍ṣṭiṣu̱ śava̍sā̱ śaśva̍tīnām |
sa no̍ ma̱rudbhi̍r vṛṣabha̱ śravo̍ dhā u̱gra u̱grebhi̱ḥ sthavi̍raḥ saho̱dāḥ || RV_1,171.05

tvam pā̍hīndra̱ sahī̍yaso̱ nṝn bhavā̍ ma̱rudbhi̱r ava̍yātaheḻāḥ |
su̱pra̱ke̱tebhi̍ḥ sāsa̱hir dadhā̍no vi̱dyāme̱ṣaṁ vṛ̱jana̍ṁ jī̱radā̍num || RV_1,171.06

ci̱tro vo̍ 'stu̱ yāma̍ś ci̱tra ū̱tī su̍dānavaḥ |
maru̍to̱ ahi̍bhānavaḥ || RV_1,172.01

ā̱re sā va̍ḥ sudānavo̱ maru̍ta ṛñja̱tī śaru̍ḥ |
ā̱re aśmā̱ yam asya̍tha || RV_1,172.02

tṛ̱ṇa̱ska̱ndasya̱ nu viśa̱ḥ pari̍ vṛṅkta sudānavaḥ |
ū̱rdhvān na̍ḥ karta jī̱vase̍ || RV_1,172.03

gāya̱t sāma̍ nabha̱nya1̱̍ṁ yathā̱ ver arcā̍ma̱ tad vā̍vṛdhā̱naṁ sva̍rvat |
gāvo̍ dhe̱navo̍ ba̱rhiṣy ada̍bdhā̱ ā yat sa̱dmāna̍ṁ di̱vyaṁ vivā̍sān || RV_1,173.01

arca̱d vṛṣā̱ vṛṣa̍bhi̱ḥ svedu̍havyair mṛ̱go nāśno̱ ati̱ yaj ju̍gu̱ryāt |
pra ma̍nda̱yur ma̱nāṁ gū̍rta̱ hotā̱ bhara̍te̱ maryo̍ mithu̱nā yaja̍traḥ || RV_1,173.02

nakṣa̱d dhotā̱ pari̱ sadma̍ mi̱tā yan bhara̱d garbha̱m ā śa̱rada̍ḥ pṛthi̱vyāḥ |
kranda̱d aśvo̱ naya̍māno ru̱vad gaur a̱ntar dū̱to na roda̍sī cara̱d vāk || RV_1,173.03

tā ka̱rmāṣa̍tarāsmai̱ pra cyau̱tnāni̍ deva̱yanto̍ bharante |
jujo̍ṣa̱d indro̍ da̱smava̍rcā̱ nāsa̍tyeva̱ sugmyo̍ rathe̱ṣṭhāḥ || RV_1,173.04

tam u̍ ṣṭu̱hīndra̱ṁ yo ha̱ satvā̱ yaḥ śūro̍ ma̱ghavā̱ yo ra̍the̱ṣṭhāḥ |
pra̱tī̱caś ci̱d yodhī̍yā̱n vṛṣa̍ṇvān vava̱vruṣa̍ś ci̱t tama̍so viha̱ntā || RV_1,173.05

pra yad i̱tthā ma̍hi̱nā nṛbhyo̱ asty ara̱ṁ roda̍sī ka̱kṣye̱3̱̍ nāsmai̍ |
saṁ vi̍vya̱ indro̍ vṛ̱jana̱ṁ na bhūmā̱ bharti̍ sva̱dhāvā̍m̐ opa̱śam i̍va̱ dyām || RV_1,173.06

sa̱matsu̍ tvā śūra sa̱tām u̍rā̱ṇam pra̍pa̱thinta̍mam paritaṁsa̱yadhyai̍ |
sa̱joṣa̍sa̱ indra̱m made̍ kṣo̱ṇīḥ sū̱riṁ ci̱d ye a̍nu̱mada̍nti̱ vājai̍ḥ || RV_1,173.07

e̱vā hi te̱ śaṁ sava̍nā samu̱dra āpo̱ yat ta̍ ā̱su mada̍nti de̱vīḥ |
viśvā̍ te̱ anu̱ joṣyā̍ bhū̱d gauḥ sū̱rīm̐ś ci̱d yadi̍ dhi̱ṣā veṣi̱ janā̍n || RV_1,173.08

asā̍ma̱ yathā̍ suṣa̱khāya̍ ena svabhi̱ṣṭayo̍ na̱rāṁ na śaṁsai̍ḥ |
asa̱d yathā̍ na̱ indro̍ vandane̱ṣṭhās tu̱ro na karma̱ naya̍māna u̱kthā || RV_1,173.09

viṣpa̍rdhaso na̱rāṁ na śaṁsai̍r a̱smākā̍sa̱d indro̱ vajra̍hastaḥ |
mi̱trā̱yuvo̱ na pūrpa̍ti̱ṁ suśi̍ṣṭau madhyā̱yuva̱ upa̍ śikṣanti ya̱jñaiḥ || RV_1,173.10

ya̱jño hi ṣmendra̱ṁ kaś ci̍d ṛ̱ndhañ ju̍hurā̱ṇaś ci̱n mana̍sā pari̱yan |
tī̱rthe nācchā̍ tātṛṣā̱ṇam oko̍ dī̱rgho na si̱dhram ā kṛ̍ṇo̱ty adhvā̍ || RV_1,173.11

mo ṣū ṇa̍ i̱ndrātra̍ pṛ̱tsu de̱vair asti̱ hi ṣmā̍ te śuṣminn ava̱yāḥ |
ma̱haś ci̱d yasya̍ mī̱ḻhuṣo̍ ya̱vyā ha̱viṣma̍to ma̱ruto̱ vanda̍te̱ gīḥ || RV_1,173.12

e̱ṣa stoma̍ indra̱ tubhya̍m a̱sme e̱tena̍ gā̱tuṁ ha̍rivo vido naḥ |
ā no̍ vavṛtyāḥ suvi̱tāya̍ deva vi̱dyāme̱ṣaṁ vṛ̱jana̍ṁ jī̱radā̍num || RV_1,173.13

tvaṁ rāje̍ndra̱ ye ca̍ de̱vā rakṣā̱ nṝn pā̱hy a̍sura̱ tvam a̱smān |
tvaṁ satpa̍tir ma̱ghavā̍ na̱s taru̍tra̱s tvaṁ sa̱tyo vasa̍vānaḥ saho̱dāḥ || RV_1,174.01

dano̱ viśa̍ indra mṛ̱dhravā̍caḥ sa̱pta yat pura̱ḥ śarma̱ śāra̍dī̱r dart |
ṛ̱ṇor a̱po a̍nava̱dyārṇā̱ yūne̍ vṛ̱tram pu̍ru̱kutsā̍ya randhīḥ || RV_1,174.02

ajā̱ vṛta̍ indra̱ śūra̍patnī̱r dyāṁ ca̱ yebhi̍ḥ puruhūta nū̱nam |
rakṣo̍ a̱gnim a̱śuṣa̱ṁ tūrva̍yāṇaṁ si̱ṁho na dame̱ apā̍ṁsi̱ vasto̍ḥ || RV_1,174.03

śeṣa̱n nu ta i̍ndra̱ sasmi̱n yonau̱ praśa̍staye̱ pavī̍ravasya ma̱hnā |
sṛ̱jad arṇā̱ṁsy ava̱ yad yu̱dhā gās tiṣṭha̱d dharī̍ dhṛṣa̱tā mṛ̍ṣṭa̱ vājā̍n || RV_1,174.04

vaha̱ kutsa̍m indra̱ yasmi̍ñ cā̱kan syū̍ma̱nyū ṛ̱jrā vāta̱syāśvā̍ |
pra sūra̍ś ca̱kraṁ vṛ̍hatād a̱bhīke̱ 'bhi spṛdho̍ yāsiṣa̱d vajra̍bāhuḥ || RV_1,174.05

ja̱gha̱nvām̐ i̍ndra mi̱trerū̍ñ co̱dapra̍vṛddho harivo̱ adā̍śūn |
pra ye paśya̍nn arya̱maṇa̱ṁ sacā̱yos tvayā̍ śū̱rtā vaha̍mānā̱ apa̍tyam || RV_1,174.06

rapa̍t ka̱vir i̍ndrā̱rkasā̍tau̱ kṣāṁ dā̱sāyo̍pa̱barha̍ṇīṁ kaḥ |
kara̍t ti̱sro ma̱ghavā̱ dānu̍citrā̱ ni du̍ryo̱ṇe kuya̍vācam mṛ̱dhi śre̍t || RV_1,174.07

sanā̱ tā ta̍ indra̱ navyā̱ āgu̱ḥ saho̱ nabho 'vi̍raṇāya pū̱rvīḥ |
bhi̱nat puro̱ na bhido̱ ade̍vīr na̱namo̱ vadha̱r ade̍vasya pī̱yoḥ || RV_1,174.08

tvaṁ dhuni̍r indra̱ dhuni̍matīr ṛ̱ṇor a̱paḥ sī̱rā na srava̍ntīḥ |
pra yat sa̍mu̱dram ati̍ śūra̱ parṣi̍ pā̱rayā̍ tu̱rvaśa̱ṁ yadu̍ṁ sva̱sti || RV_1,174.09

tvam a̱smāka̍m indra vi̱śvadha̍ syā avṛ̱kata̍mo na̱rāṁ nṛ̍pā̱tā |
sa no̱ viśvā̍sāṁ spṛ̱dhāṁ sa̍ho̱dā vi̱dyāme̱ṣaṁ vṛ̱jana̍ṁ jī̱radā̍num || RV_1,174.10

matsy apā̍yi te̱ maha̱ḥ pātra̍syeva harivo matsa̱ro mada̍ḥ |
vṛṣā̍ te̱ vṛṣṇa̱ indu̍r vā̱jī sa̍hasra̱sāta̍maḥ || RV_1,175.01

ā na̍s te gantu matsa̱ro vṛṣā̱ mado̱ vare̍ṇyaḥ |
sa̱hāvā̍m̐ indra sāna̱siḥ pṛ̍tanā̱ṣāḻ ama̍rtyaḥ || RV_1,175.02

tvaṁ hi śūra̱ḥ sani̍tā co̱dayo̱ manu̍ṣo̱ ratha̍m |
sa̱hāvā̱n dasyu̍m avra̱tam oṣa̱ḥ pātra̱ṁ na śo̱ciṣā̍ || RV_1,175.03

mu̱ṣā̱ya sūrya̍ṁ kave ca̱kram īśā̍na̱ oja̍sā |
vaha̱ śuṣṇā̍ya va̱dhaṁ kutsa̱ṁ vāta̱syāśvai̍ḥ || RV_1,175.04

śu̱ṣminta̍mo̱ hi te̱ mado̍ dyu̱mninta̍ma u̱ta kratu̍ḥ |
vṛ̱tra̱ghnā va̍rivo̱vidā̍ maṁsī̱ṣṭhā a̍śva̱sāta̍maḥ || RV_1,175.05

yathā̱ pūrve̍bhyo jari̱tṛbhya̍ indra̱ maya̍ i̱vāpo̱ na tṛṣya̍te ba̱bhūtha̍ |
tām anu̍ tvā ni̱vida̍ṁ johavīmi vi̱dyāme̱ṣaṁ vṛ̱jana̍ṁ jī̱radā̍num || RV_1,175.06

matsi̍ no̱ vasya̍ïṣṭaya̱ indra̍m indo̱ vṛṣā vi̍śa |
ṛ̱ghā̱yamā̍ṇa invasi̱ śatru̱m anti̱ na vi̍ndasi || RV_1,176.01

tasmi̱nn ā ve̍śayā̱ giro̱ ya eka̍ś carṣaṇī̱nām |
anu̍ sva̱dhā yam u̱pyate̱ yava̱ṁ na carkṛ̍ṣa̱d vṛṣā̍ || RV_1,176.02

yasya̱ viśvā̍ni̱ hasta̍yo̱ḥ pañca̍ kṣitī̱nāṁ vasu̍ |
spā̱śaya̍sva̱ yo a̍sma̱dhrug di̱vyevā̱śani̍r jahi || RV_1,176.03

asu̍nvantaṁ samaṁ jahi dū̱ṇāśa̱ṁ yo na te̱ maya̍ḥ |
a̱smabhya̍m asya̱ veda̍naṁ da̱ddhi sū̱riś ci̍d ohate || RV_1,176.04

āvo̱ yasya̍ dvi̱barha̍so̱ 'rkeṣu̍ sānu̱ṣag asa̍t |
ā̱jāv indra̍syendo̱ prāvo̱ vāje̍ṣu vā̱jina̍m || RV_1,176.05

yathā̱ pūrve̍bhyo jari̱tṛbhya̍ indra̱ maya̍ i̱vāpo̱ na tṛṣya̍te ba̱bhūtha̍ |
tām anu̍ tvā ni̱vida̍ṁ johavīmi vi̱dyāme̱ṣaṁ vṛ̱jana̍ṁ jī̱radā̍num || RV_1,176.06

ā ca̍rṣaṇi̱prā vṛ̍ṣa̱bho janā̍nā̱ṁ rājā̍ kṛṣṭī̱nām pu̍ruhū̱ta indra̍ḥ |
stu̱taḥ śra̍va̱syann ava̱sopa̍ ma̱drig yu̱ktvā harī̱ vṛṣa̱ṇā yā̍hy a̱rvāṅ || RV_1,177.01

ye te̱ vṛṣa̍ṇo vṛṣa̱bhāsa̍ indra brahma̱yujo̱ vṛṣa̍rathāso̱ atyā̍ḥ |
tām̐ ā ti̍ṣṭha̱ tebhi̱r ā yā̍hy a̱rvāṅ havā̍mahe tvā su̱ta i̍ndra̱ some̍ || RV_1,177.02

ā ti̍ṣṭha̱ ratha̱ṁ vṛṣa̍ṇa̱ṁ vṛṣā̍ te su̱taḥ soma̱ḥ pari̍ṣiktā̱ madhū̍ni |
yu̱ktvā vṛṣa̍bhyāṁ vṛṣabha kṣitī̱nāṁ hari̍bhyāṁ yāhi pra̱vatopa̍ ma̱drik || RV_1,177.03

a̱yaṁ ya̱jño de̍va̱yā a̱yam mi̱yedha̍ i̱mā brahmā̍ṇy a̱yam i̍ndra̱ soma̍ḥ |
stī̱rṇam ba̱rhir ā tu śa̍kra̱ pra yā̍hi̱ pibā̍ ni̱ṣadya̱ vi mu̍cā̱ harī̍ i̱ha || RV_1,177.04

o suṣṭu̍ta indra yāhy a̱rvāṅ upa̱ brahmā̍ṇi mā̱nyasya̍ kā̱roḥ |
vi̱dyāma̱ vasto̱r ava̍sā gṛ̱ṇanto̍ vi̱dyāme̱ṣaṁ vṛ̱jana̍ṁ jī̱radā̍num || RV_1,177.05

yad dha̱ syā ta̍ indra śru̱ṣṭir asti̱ yayā̍ ba̱bhūtha̍ jari̱tṛbhya̍ ū̱tī |
mā na̱ḥ kāma̍m ma̱haya̍nta̱m ā dha̱g viśvā̍ te aśyā̱m pary āpa̍ ā̱yoḥ || RV_1,178.01

na ghā̱ rājendra̱ ā da̍bhan no̱ yā nu svasā̍rā kṛ̱ṇava̍nta̱ yonau̍ |
āpa̍ś cid asmai su̱tukā̍ aveṣa̱n gama̍n na̱ indra̍ḥ sa̱khyā vaya̍ś ca || RV_1,178.02

jetā̱ nṛbhi̱r indra̍ḥ pṛ̱tsu śūra̱ḥ śrotā̱ hava̱ṁ nādha̍mānasya kā̱roḥ |
prabha̍rtā̱ ratha̍ṁ dā̱śuṣa̍ upā̱ka udya̍ntā̱ giro̱ yadi̍ ca̱ tmanā̱ bhūt || RV_1,178.03

e̱vā nṛbhi̱r indra̍ḥ suśrava̱syā pra̍khā̱daḥ pṛ̱kṣo a̱bhi mi̱triṇo̍ bhūt |
sa̱ma̱rya i̱ṣaḥ sta̍vate̱ vivā̍ci satrāka̱ro yaja̍mānasya̱ śaṁsa̍ḥ || RV_1,178.04

tvayā̍ va̱yam ma̍ghavann indra̱ śatrū̍n a̱bhi ṣyā̍ma maha̱to manya̍mānān |
tvaṁ trā̱tā tvam u̍ no vṛ̱dhe bhū̍r vi̱dyāme̱ṣaṁ vṛ̱jana̍ṁ jī̱radā̍num || RV_1,178.05

pū̱rvīr a̱haṁ śa̱rada̍ḥ śaśramā̱ṇā do̱ṣā vasto̍r u̱ṣaso̍ ja̱raya̍ntīḥ |
mi̱nāti̱ śriya̍ṁ jari̱mā ta̱nūnā̱m apy ū̱ nu patnī̱r vṛṣa̍ṇo jagamyuḥ || RV_1,179.01

ye ci̱d dhi pūrva̍ ṛta̱sāpa̱ āsa̍n sā̱kaṁ de̱vebhi̱r ava̍dann ṛ̱tāni̍ |
te ci̱d avā̍sur na̱hy anta̍m ā̱puḥ sam ū̱ nu patnī̱r vṛṣa̍bhir jagamyuḥ || RV_1,179.02

na mṛṣā̍ śrā̱ntaṁ yad ava̍nti de̱vā viśvā̱ it spṛdho̍ a̱bhy a̍śnavāva |
jayā̱ved atra̍ śa̱tanī̍tham ā̱jiṁ yat sa̱myañcā̍ mithu̱nāv a̱bhy ajā̍va || RV_1,179.03

na̱dasya̍ mā rudha̱taḥ kāma̱ āga̍nn i̱ta ājā̍to a̱muta̱ḥ kuta̍ś cit |
lopā̍mudrā̱ vṛṣa̍ṇa̱ṁ nī ri̍ṇāti̱ dhīra̱m adhī̍rā dhayati śva̱santa̍m || RV_1,179.04

i̱maṁ nu soma̱m anti̍to hṛ̱tsu pī̱tam upa̍ bruve |
yat sī̱m āga̍ś cakṛ̱mā tat su mṛ̍ḻatu pulu̱kāmo̱ hi martya̍ḥ || RV_1,179.05

a̱gastya̱ḥ khana̍mānaḥ kha̱nitrai̍ḥ pra̱jām apa̍tya̱m bala̍m i̱cchamā̍naḥ |
u̱bhau varṇā̱v ṛṣi̍r u̱graḥ pu̍poṣa sa̱tyā de̱veṣv ā̱śiṣo̍ jagāma || RV_1,179.06

yu̱vo rajā̍ṁsi su̱yamā̍so̱ aśvā̱ ratho̱ yad vā̱m pary arṇā̍ṁsi̱ dīya̍t |
hi̱ra̱ṇyayā̍ vām pa̱vaya̍ḥ pruṣāya̱n madhva̱ḥ piba̍ntā u̱ṣasa̍ḥ sacethe || RV_1,180.01

yu̱vam atya̱syāva̍ nakṣatho̱ yad vipa̍tmano̱ narya̍sya̱ praya̍jyoḥ |
svasā̱ yad vā̍ṁ viśvagūrtī̱ bharā̍ti̱ vājā̱yeṭṭe̍ madhupāv i̱ṣe ca̍ || RV_1,180.02

yu̱vam paya̍ u̱sriyā̍yām adhattam pa̱kvam ā̱māyā̱m ava̱ pūrvya̱ṁ goḥ |
a̱ntar yad va̱nino̍ vām ṛtapsū hvā̱ro na śuci̱r yaja̍te ha̱viṣmā̍n || RV_1,180.03

yu̱vaṁ ha̍ gha̱rmam madhu̍manta̱m atra̍ye̱ 'po na kṣodo̍ 'vṛṇītam e̱ṣe |
tad vā̍ṁ narāv aśvinā̱ paśva̍ïṣṭī̱ rathye̍va ca̱krā prati̍ yanti̱ madhva̍ḥ || RV_1,180.04

ā vā̍ṁ dā̱nāya̍ vavṛtīya dasrā̱ gor ohe̍ṇa tau̱gryo na jivri̍ḥ |
a̱paḥ kṣo̱ṇī sa̍cate̱ māhi̍nā vāṁ jū̱rṇo vā̱m akṣu̱r aṁha̍so yajatrā || RV_1,180.05

ni yad yu̱vethe̍ ni̱yuta̍ḥ sudānū̱ upa̍ sva̱dhābhi̍ḥ sṛjatha̱ḥ pura̍ṁdhim |
preṣa̱d veṣa̱d vāto̱ na sū̱rir ā ma̱he da̍de suvra̱to na vāja̍m || RV_1,180.06

va̱yaṁ ci̱d dhi vā̍ṁ jari̱tāra̍ḥ sa̱tyā vi̍pa̱nyāma̍he̱ vi pa̱ṇir hi̱tāvā̍n |
adhā̍ ci̱d dhi ṣmā̍śvināv anindyā pā̱tho hi ṣmā̍ vṛṣaṇā̱v anti̍devam || RV_1,180.07

yu̱vāṁ ci̱d dhi ṣmā̍śvinā̱v anu̱ dyūn viru̍drasya pra̱srava̍ṇasya sā̱tau |
a̱gastyo̍ na̱rāṁ nṛṣu̱ praśa̍sta̱ḥ kārā̍dhunīva citayat sa̱hasrai̍ḥ || RV_1,180.08

pra yad vahe̍the mahi̱nā ratha̍sya̱ pra sya̍ndrā yātho̱ manu̍ṣo̱ na hotā̍ |
dha̱ttaṁ sū̱ribhya̍ u̱ta vā̱ svaśvya̱ṁ nāsa̍tyā rayi̱ṣāca̍ḥ syāma || RV_1,180.09

taṁ vā̱ṁ ratha̍ṁ va̱yam a̱dyā hu̍vema̱ stomai̍r aśvinā suvi̱tāya̱ navya̍m |
ari̍ṣṭanemi̱m pari̱ dyām i̍yā̱naṁ vi̱dyāme̱ṣaṁ vṛ̱jana̍ṁ jī̱radā̍num || RV_1,180.10

kad u̱ preṣṭā̍v i̱ṣāṁ ra̍yī̱ṇām a̍dhva̱ryantā̱ yad u̍nninī̱tho a̱pām |
a̱yaṁ vā̍ṁ ya̱jño a̍kṛta̱ praśa̍sti̱ṁ vasu̍dhitī̱ avi̍tārā janānām || RV_1,181.01

ā vā̱m aśvā̍sa̱ḥ śuca̍yaḥ paya̱spā vāta̍raṁhaso di̱vyāso̱ atyā̍ḥ |
ma̱no̱juvo̱ vṛṣa̍ṇo vī̱tapṛ̍ṣṭhā̱ eha sva̱rājo̍ a̱śvinā̍ vahantu || RV_1,181.02

ā vā̱ṁ ratho̱ 'vani̱r na pra̱vatvā̍n sṛ̱prava̍ndhuraḥ suvi̱tāya̍ gamyāḥ |
vṛṣṇa̍ḥ sthātārā̱ mana̍so̱ javī̍yān ahampū̱rvo ya̍ja̱to dhi̍ṣṇyā̱ yaḥ || RV_1,181.03

i̱heha̍ jā̱tā sam a̍vāvaśītām are̱pasā̍ ta̱nvā̱3̱̍ nāma̍bhi̱ḥ svaiḥ |
ji̱ṣṇur vā̍m a̱nyaḥ suma̍khasya sū̱rir di̱vo a̱nyaḥ su̱bhaga̍ḥ pu̱tra ū̍he || RV_1,181.04

pra vā̍ṁ nice̱ruḥ ka̍ku̱ho vaśā̱m̐ anu̍ pi̱śaṅga̍rūpa̱ḥ sada̍nāni gamyāḥ |
harī̍ a̱nyasya̍ pī̱paya̍nta̱ vājai̍r ma̱thrā rajā̍ṁsy aśvinā̱ vi ghoṣai̍ḥ || RV_1,181.05

pra vā̍ṁ śa̱radvā̍n vṛṣa̱bho na ni̱ṣṣāṭ pū̱rvīr iṣa̍ś carati̱ madhva̍ i̱ṣṇan |
evai̍r a̱nyasya̍ pī̱paya̍nta̱ vājai̱r veṣa̍ntīr ū̱rdhvā na̱dyo̍ na̱ āgu̍ḥ || RV_1,181.06

asa̍rji vā̱ṁ sthavi̍rā vedhasā̱ gīr bā̱ḻhe a̍śvinā tre̱dhā kṣara̍ntī |
upa̍stutāv avata̱ṁ nādha̍māna̱ṁ yāma̱nn ayā̍mañ chṛṇuta̱ṁ hava̍m me || RV_1,181.07

u̱ta syā vā̱ṁ ruśa̍to̱ vapsa̍so̱ gīs tri̍ba̱rhiṣi̱ sada̍si pinvate̱ nṝn |
vṛṣā̍ vām me̱gho vṛ̍ṣaṇā pīpāya̱ gor na seke̱ manu̍ṣo daśa̱syan || RV_1,181.08

yu̱vām pū̱ṣevā̍śvinā̱ pura̍ṁdhir a̱gnim u̱ṣāṁ na ja̍rate ha̱viṣmā̍n |
hu̱ve yad vā̍ṁ variva̱syā gṛ̍ṇā̱no vi̱dyāme̱ṣaṁ vṛ̱jana̍ṁ jī̱radā̍num || RV_1,181.09

abhū̍d i̱daṁ va̱yuna̱m o ṣu bhū̍ṣatā̱ ratho̱ vṛṣa̍ṇvā̱n mada̍tā manīṣiṇaḥ |
dhi̱ya̱ṁji̱nvā dhiṣṇyā̍ vi̱śpalā̍vasū di̱vo napā̍tā su̱kṛte̱ śuci̍vratā || RV_1,182.01

indra̍tamā̱ hi dhiṣṇyā̍ ma̱rutta̍mā da̱srā daṁsi̍ṣṭhā ra̱thyā̍ ra̱thīta̍mā |
pū̱rṇaṁ ratha̍ṁ vahethe̱ madhva̱ āci̍ta̱ṁ tena̍ dā̱śvāṁsa̱m upa̍ yātho aśvinā || RV_1,182.02

kim atra̍ dasrā kṛṇutha̱ḥ kim ā̍sāthe̱ jano̱ yaḥ kaś ci̱d aha̍vir mahī̱yate̍ |
ati̍ kramiṣṭaṁ ju̱rata̍m pa̱ṇer asu̱ṁ jyoti̱r viprā̍ya kṛṇutaṁ vaca̱syave̍ || RV_1,182.03

ja̱mbhaya̍tam a̱bhito̱ rāya̍ta̱ḥ śuno̍ ha̱tam mṛdho̍ vi̱dathu̱s tāny a̍śvinā |
vāca̍ṁ-vācaṁ jari̱tū ra̱tninī̍ṁ kṛtam u̱bhā śaṁsa̍ṁ nāsatyāvata̱m mama̍ || RV_1,182.04

yu̱vam e̱taṁ ca̍krathu̱ḥ sindhu̍ṣu pla̱vam ā̍tma̱nvanta̍m pa̱kṣiṇa̍ṁ tau̱gryāya̱ kam |
yena̍ deva̱trā mana̍sā nirū̱hathu̍ḥ supapta̱nī pe̍tathu̱ḥ kṣoda̍so ma̱haḥ || RV_1,182.05

ava̍viddhaṁ tau̱gryam a̱psv a1̱̍ntar a̍nārambha̱ṇe tama̍si̱ pravi̍ddham |
cata̍sro̱ nāvo̱ jaṭha̍lasya̱ juṣṭā̱ ud a̱śvibhyā̍m iṣi̱tāḥ pā̍rayanti || RV_1,182.06

kaḥ svi̍d vṛ̱kṣo niṣṭhi̍to̱ madhye̱ arṇa̍so̱ yaṁ tau̱gryo nā̍dhi̱taḥ pa̱ryaṣa̍svajat |
pa̱rṇā mṛ̱gasya̍ pa̱taro̍r ivā̱rabha̱ ud a̍śvinā ūhathu̱ḥ śroma̍tāya̱ kam || RV_1,182.07

tad vā̍ṁ narā nāsatyā̱v anu̍ ṣyā̱d yad vā̱m mānā̍sa u̱catha̱m avo̍can |
a̱smād a̱dya sada̍saḥ so̱myād ā vi̱dyāme̱ṣaṁ vṛ̱jana̍ṁ jī̱radā̍num || RV_1,182.08

taṁ yu̍ñjāthā̱m mana̍so̱ yo javī̍yān trivandhu̱ro vṛ̍ṣaṇā̱ yas tri̍ca̱kraḥ |
yeno̍payā̱thaḥ su̱kṛto̍ duro̱ṇaṁ tri̱dhātu̍nā patatho̱ vir na pa̱rṇaiḥ || RV_1,183.01

su̱vṛd ratho̍ vartate̱ yann a̱bhi kṣāṁ yat tiṣṭha̍tha̱ḥ kratu̍ma̱ntānu̍ pṛ̱kṣe |
vapu̍r vapu̱ṣyā sa̍catām i̱yaṁ gīr di̱vo du̍hi̱troṣasā̍ sacethe || RV_1,183.02

ā ti̍ṣṭhataṁ su̱vṛta̱ṁ yo ratho̍ vā̱m anu̍ vra̱tāni̱ varta̍te ha̱viṣmā̍n |
yena̍ narā nāsatyeṣa̱yadhyai̍ va̱rtir yā̱thas tana̍yāya̱ tmane̍ ca || RV_1,183.03

mā vā̱ṁ vṛko̱ mā vṛ̱kīr ā da̍dharṣī̱n mā pari̍ varktam u̱ta māti̍ dhaktam |
a̱yaṁ vā̍m bhā̱go nihi̍ta i̱yaṁ gīr dasrā̍v i̱me vā̍ṁ ni̱dhayo̱ madhū̍nām || RV_1,183.04

yu̱vāṁ gota̍maḥ purumī̱ḻho atri̱r dasrā̱ hava̱te 'va̍se ha̱viṣmā̍n |
diśa̱ṁ na di̱ṣṭām ṛ̍jū̱yeva̱ yantā me̱ hava̍ṁ nāsa̱tyopa̍ yātam || RV_1,183.05

atā̍riṣma̱ tama̍sas pā̱ram a̱sya prati̍ vā̱ṁ stomo̍ aśvināv adhāyi |
eha yā̍tam pa̱thibhi̍r deva̱yānai̍r vi̱dyāme̱ṣaṁ vṛ̱jana̍ṁ jī̱radā̍num || RV_1,183.06

tā vā̍m a̱dya tāv a̍pa̱raṁ hu̍vemo̱cchantyā̍m u̱ṣasi̱ vahni̍r u̱kthaiḥ |
nāsa̍tyā̱ kuha̍ ci̱t santā̍v a̱ryo di̱vo napā̍tā su̱dāsta̍rāya || RV_1,184.01

a̱sme ū̱ ṣu vṛ̍ṣaṇā mādayethā̱m ut pa̱ṇīm̐r ha̍tam ū̱rmyā mada̍ntā |
śru̱tam me̱ accho̍ktibhir matī̱nām eṣṭā̍ narā̱ nice̍tārā ca̱ karṇai̍ḥ || RV_1,184.02

śri̱ye pū̍ṣann iṣu̱kṛte̍va de̱vā nāsa̍tyā vaha̱tuṁ sū̱ryāyā̍ḥ |
va̱cyante̍ vāṁ kaku̱hā a̱psu jā̱tā yu̱gā jū̱rṇeva̱ varu̍ṇasya̱ bhūre̍ḥ || RV_1,184.03

a̱sme sā vā̍m mādhvī rā̱tir a̍stu̱ stoma̍ṁ hinotam mā̱nyasya̍ kā̱roḥ |
anu̱ yad vā̍ṁ śrava̱syā̍ sudānū su̱vīryā̍ya carṣa̱ṇayo̱ mada̍nti || RV_1,184.04

e̱ṣa vā̱ṁ stomo̍ aśvināv akāri̱ māne̍bhir maghavānā suvṛ̱kti |
yā̱taṁ va̱rtis tana̍yāya̱ tmane̍ cā̱gastye̍ nāsatyā̱ mada̍ntā || RV_1,184.05

atā̍riṣma̱ tama̍sas pā̱ram a̱sya prati̍ vā̱ṁ stomo̍ aśvināv adhāyi |
eha yā̍tam pa̱thibhi̍r deva̱yānai̍r vi̱dyāme̱ṣaṁ vṛ̱jana̍ṁ jī̱radā̍num || RV_1,184.06

ka̱ta̱rā pūrvā̍ kata̱rāpa̍rā̱yoḥ ka̱thā jā̱te ka̍vaya̱ḥ ko vi ve̍da |
viśva̱ṁ tmanā̍ bibhṛto̱ yad dha̱ nāma̱ vi va̍rtete̱ aha̍nī ca̱kriye̍va || RV_1,185.01

bhūri̱ṁ dve aca̍rantī̱ cara̍ntam pa̱dvanta̱ṁ garbha̍m a̱padī̍ dadhāte |
nitya̱ṁ na sū̱num pi̱tror u̱pasthe̱ dyāvā̱ rakṣa̍tam pṛthivī no̱ abhvā̍t || RV_1,185.02

a̱ne̱ho dā̱tram adi̍ter ana̱rvaṁ hu̱ve sva̍rvad ava̱dhaṁ nama̍svat |
tad ro̍dasī janayataṁ jari̱tre dyāvā̱ rakṣa̍tam pṛthivī no̱ abhvā̍t || RV_1,185.03

ata̍pyamāne̱ ava̱sāva̍ntī̱ anu̍ ṣyāma̱ roda̍sī de̱vapu̍tre |
u̱bhe de̱vānā̍m u̱bhaye̍bhi̱r ahnā̱ṁ dyāvā̱ rakṣa̍tam pṛthivī no̱ abhvā̍t || RV_1,185.04

sa̱ṁgaccha̍māne yuva̱tī sama̍nte̱ svasā̍rā jā̱mī pi̱tror u̱pasthe̍ |
a̱bhi̱jighra̍ntī̱ bhuva̍nasya̱ nābhi̱ṁ dyāvā̱ rakṣa̍tam pṛthivī no̱ abhvā̍t || RV_1,185.05

u̱rvī sadma̍nī bṛha̱tī ṛ̱tena̍ hu̱ve de̱vānā̱m ava̍sā̱ jani̍trī |
da̱dhāte̱ ye a̱mṛta̍ṁ su̱pratī̍ke̱ dyāvā̱ rakṣa̍tam pṛthivī no̱ abhvā̍t || RV_1,185.06

u̱rvī pṛ̱thvī ba̍hu̱le dū̱rea̍nte̱ upa̍ bruve̱ nama̍sā ya̱jñe a̱smin |
da̱dhāte̱ ye su̱bhage̍ su̱pratū̍rtī̱ dyāvā̱ rakṣa̍tam pṛthivī no̱ abhvā̍t || RV_1,185.07

de̱vān vā̱ yac ca̍kṛ̱mā kac ci̱d āga̱ḥ sakhā̍yaṁ vā̱ sada̱m ij jāspa̍tiṁ vā |
i̱yaṁ dhīr bhū̍yā ava̱yāna̍m eṣā̱ṁ dyāvā̱ rakṣa̍tam pṛthivī no̱ abhvā̍t || RV_1,185.08

u̱bhā śaṁsā̱ naryā̱ mām a̍viṣṭām u̱bhe mām ū̱tī ava̍sā sacetām |
bhūri̍ cid a̱ryaḥ su̱dāsta̍rāye̱ṣā mada̍nta iṣayema devāḥ || RV_1,185.09

ṛ̱taṁ di̱ve tad a̍vocam pṛthi̱vyā a̍bhiśrā̱vāya̍ pratha̱maṁ su̍me̱dhāḥ |
pā̱tām a̍va̱dyād du̍ri̱tād a̱bhīke̍ pi̱tā mā̱tā ca̍ rakṣatā̱m avo̍bhiḥ || RV_1,185.10

i̱daṁ dyā̍vāpṛthivī sa̱tyam a̍stu̱ pita̱r māta̱r yad i̱hopa̍bru̱ve vā̍m |
bhū̱taṁ de̱vānā̍m ava̱me avo̍bhir vi̱dyāme̱ṣaṁ vṛ̱jana̍ṁ jī̱radā̍num || RV_1,185.11

ā na̱ iḻā̍bhir vi̱dathe̍ suśa̱sti vi̱śvāna̍raḥ savi̱tā de̱va e̍tu |
api̱ yathā̍ yuvāno̱ matsa̍thā no̱ viśva̱ṁ jaga̍d abhipi̱tve ma̍nī̱ṣā || RV_1,186.01

ā no̱ viśva̱ āskrā̍ gamantu de̱vā mi̱tro a̍rya̱mā varu̍ṇaḥ sa̱joṣā̍ḥ |
bhuva̱n yathā̍ no̱ viśve̍ vṛ̱dhāsa̱ḥ kara̍n su̱ṣāhā̍ vithu̱raṁ na śava̍ḥ || RV_1,186.02

preṣṭha̍ṁ vo̱ ati̍thiṁ gṛṇīṣe̱ 'gniṁ śa̱stibhi̍s tu̱rvaṇi̍ḥ sa̱joṣā̍ḥ |
asa̱d yathā̍ no̱ varu̍ṇaḥ sukī̱rtir iṣa̍ś ca parṣad arigū̱rtaḥ sū̱riḥ || RV_1,186.03

upa̍ va̱ eṣe̱ nama̍sā jigī̱ṣoṣāsā̱naktā̍ su̱dughe̍va dhe̱nuḥ |
sa̱mā̱ne aha̍n vi̱mimā̍no a̱rkaṁ viṣu̍rūpe̱ paya̍si̱ sasmi̱nn ūdha̍n || RV_1,186.04

u̱ta no 'hi̍r bu̱dhnyo̱3̱̍ maya̍s ka̱ḥ śiśu̱ṁ na pi̱pyuṣī̍va veti̱ sindhu̍ḥ |
yena̱ napā̍tam a̱pāṁ ju̱nāma̍ mano̱juvo̱ vṛṣa̍ṇo̱ yaṁ vaha̍nti || RV_1,186.05

u̱ta na̍ ī̱ṁ tvaṣṭā ga̱ntv acchā̱ smat sū̱ribhi̍r abhipi̱tve sa̱joṣā̍ḥ |
ā vṛ̍tra̱hendra̍ś carṣaṇi̱prās tu̱viṣṭa̍mo na̱rāṁ na̍ i̱ha ga̍myāḥ || RV_1,186.06

u̱ta na̍ īm ma̱tayo 'śva̍yogā̱ḥ śiśu̱ṁ na gāva̱s taru̍ṇaṁ rihanti |
tam ī̱ṁ giro̱ jana̍yo̱ na patnī̍ḥ sura̱bhiṣṭa̍maṁ na̱rāṁ na̍santa || RV_1,186.07

u̱ta na̍ īm ma̱ruto̍ vṛ̱ddhase̍nā̱ḥ smad roda̍sī̱ sama̍nasaḥ sadantu |
pṛṣa̍daśvāso̱ 'vana̍yo̱ na rathā̍ ri̱śāda̍so mitra̱yujo̱ na de̱vāḥ || RV_1,186.08

pra nu yad e̍ṣām mahi̱nā ci̍ki̱tre pra yu̍ñjate pra̱yuja̱s te su̍vṛ̱kti |
adha̱ yad e̍ṣāṁ su̱dine̱ na śaru̱r viśva̱m eri̍ṇam pruṣā̱yanta̱ senā̍ḥ || RV_1,186.09

pro a̱śvinā̱v ava̍se kṛṇudhva̱m pra pū̱ṣaṇa̱ṁ svata̍vaso̱ hi santi̍ |
a̱dve̱ṣo viṣṇu̱r vāta̍ ṛbhu̱kṣā acchā̍ su̱mnāya̍ vavṛtīya de̱vān || RV_1,186.10

i̱yaṁ sā vo̍ a̱sme dīdhi̍tir yajatrā api̱prāṇī̍ ca̱ sada̍nī ca bhūyāḥ |
ni yā de̱veṣu̱ yata̍te vasū̱yur vi̱dyāme̱ṣaṁ vṛ̱jana̍ṁ jī̱radā̍num || RV_1,186.11

pi̱tuṁ nu sto̍ṣam ma̱ho dha̱rmāṇa̱ṁ tavi̍ṣīm |
yasya̍ tri̱to vy oja̍sā vṛ̱traṁ vipa̍rvam a̱rdaya̍t || RV_1,187.01

svādo̍ pito̱ madho̍ pito va̱yaṁ tvā̍ vavṛmahe |
a̱smāka̍m avi̱tā bha̍va || RV_1,187.02

upa̍ naḥ pita̱v ā ca̍ra śi̱vaḥ śi̱vābhi̍r ū̱tibhi̍ḥ |
ma̱yo̱bhur a̍dviṣe̱ṇyaḥ sakhā̍ su̱śevo̱ adva̍yāḥ || RV_1,187.03

tava̱ tye pi̍to̱ rasā̱ rajā̱ṁsy anu̱ viṣṭhi̍tāḥ |
di̱vi vātā̍ iva śri̱tāḥ || RV_1,187.04

tava̱ tye pi̍to̱ dada̍ta̱s tava̍ svādiṣṭha̱ te pi̍to |
pra svā̱dmāno̱ rasā̍nāṁ tuvi̱grīvā̍ iverate || RV_1,187.05

tve pi̍to ma̱hānā̍ṁ de̱vānā̱m mano̍ hi̱tam |
akā̍ri̱ cāru̍ ke̱tunā̱ tavāhi̱m ava̍sāvadhīt || RV_1,187.06

yad a̱do pi̍to̱ aja̍gan vi̱vasva̱ parva̍tānām |
atrā̍ cin no madho pi̱to 'ra̍m bha̱kṣāya̍ gamyāḥ || RV_1,187.07

yad a̱pām oṣa̍dhīnām pari̱ṁśam ā̍ri̱śāma̍he |
vātā̍pe̱ pīva̱ id bha̍va || RV_1,187.08

yat te̍ soma̱ gavā̍śiro̱ yavā̍śiro̱ bhajā̍mahe |
vātā̍pe̱ pīva̱ id bha̍va || RV_1,187.09

ka̱ra̱mbha o̍ṣadhe bhava̱ pīvo̍ vṛ̱kka u̍dāra̱thiḥ |
vātā̍pe̱ pīva̱ id bha̍va || RV_1,187.10

taṁ tvā̍ va̱yam pi̍to̱ vaco̍bhi̱r gāvo̱ na ha̱vyā su̍ṣūdima |
de̱vebhya̍s tvā sadha̱māda̍m a̱smabhya̍ṁ tvā sadha̱māda̍m || RV_1,187.11

sami̍ddho a̱dya rā̍jasi de̱vo de̱vaiḥ sa̍hasrajit |
dū̱to ha̱vyā ka̱vir va̍ha || RV_1,188.01

tanū̍napād ṛ̱taṁ ya̱te madhvā̍ ya̱jñaḥ sam a̍jyate |
dadha̍t saha̱sriṇī̱r iṣa̍ḥ || RV_1,188.02

ā̱juhvā̍no na̱ īḍyo̍ de̱vām̐ ā va̍kṣi ya̱jñiyā̍n |
agne̍ sahasra̱sā a̍si || RV_1,188.03

prā̱cīna̍m ba̱rhir oja̍sā sa̱hasra̍vīram astṛṇan |
yatrā̍dityā vi̱rāja̍tha || RV_1,188.04

vi̱rāṭ sa̱mrāḍ vi̱bhvīḥ pra̱bhvīr ba̱hvīś ca̱ bhūya̍sīś ca̱ yāḥ |
duro̍ ghṛ̱tāny a̍kṣaran || RV_1,188.05

su̱ru̱kme hi su̱peśa̱sādhi̍ śri̱yā vi̱rāja̍taḥ |
u̱ṣāsā̱v eha sī̍datām || RV_1,188.06

pra̱tha̱mā hi su̱vāca̍sā̱ hotā̍rā̱ daivyā̍ ka̱vī |
ya̱jñaṁ no̍ yakṣatām i̱mam || RV_1,188.07

bhāra̱tīḻe̱ sara̍svati̱ yā va̱ḥ sarvā̍ upabru̱ve |
tā na̍ś codayata śri̱ye || RV_1,188.08

tvaṣṭā̍ rū̱pāṇi̱ hi pra̱bhuḥ pa̱śūn viśvā̍n samāna̱je |
teṣā̍ṁ naḥ sphā̱tim ā ya̍ja || RV_1,188.09

upa̱ tmanyā̍ vanaspate̱ pātho̍ de̱vebhya̍ḥ sṛja |
a̱gnir ha̱vyāni̍ siṣvadat || RV_1,188.10

pu̱ro̱gā a̱gnir de̱vānā̍ṁ gāya̱treṇa̱ sam a̍jyate |
svāhā̍kṛtīṣu rocate || RV_1,188.11

agne̱ naya̍ su̱pathā̍ rā̱ye a̱smān viśvā̍ni deva va̱yunā̍ni vi̱dvān |
yu̱yo̱dhy a1̱̍smaj ju̍hurā̱ṇam eno̱ bhūyi̍ṣṭhāṁ te̱ nama̍üktiṁ vidhema || RV_1,189.01

agne̱ tvam pā̍rayā̱ navyo̍ a̱smān sva̱stibhi̱r ati̍ du̱rgāṇi̱ viśvā̍ |
pūś ca̍ pṛ̱thvī ba̍hu̱lā na̍ u̱rvī bhavā̍ to̱kāya̱ tana̍yāya̱ śaṁ yoḥ || RV_1,189.02

agne̱ tvam a̱smad yu̍yo̱dhy amī̍vā̱ ana̍gnitrā a̱bhy ama̍nta kṛ̱ṣṭīḥ |
puna̍r a̱smabhya̍ṁ suvi̱tāya̍ deva̱ kṣāṁ viśve̍bhir a̱mṛte̍bhir yajatra || RV_1,189.03

pā̱hi no̍ agne pā̱yubhi̱r aja̍srair u̱ta pri̱ye sada̍na̱ ā śu̍śu̱kvān |
mā te̍ bha̱yaṁ ja̍ri̱tāra̍ṁ yaviṣṭha nū̱naṁ vi̍da̱n māpa̱raṁ sa̍hasvaḥ || RV_1,189.04

mā no̍ a̱gne 'va̍ sṛjo a̱ghāyā̍vi̱ṣyave̍ ri̱pave̍ du̱cchunā̍yai |
mā da̱tvate̱ daśa̍te̱ mādate̍ no̱ mā rīṣa̍te sahasāva̱n parā̍ dāḥ || RV_1,189.05

vi gha̱ tvāvā̍m̐ ṛtajāta yaṁsad gṛṇā̱no a̍gne ta̱nve̱3̱̍ varū̍tham |
viśvā̍d riri̱kṣor u̱ta vā̍ nini̱tsor a̍bhi̱hrutā̱m asi̱ hi de̍va vi̱ṣpaṭ || RV_1,189.06

tvaṁ tām̐ a̍gna u̱bhayā̱n vi vi̱dvān veṣi̍ prapi̱tve manu̍ṣo yajatra |
a̱bhi̱pi̱tve mana̍ve̱ śāsyo̍ bhūr marmṛ̱jenya̍ u̱śigbhi̱r nākraḥ || RV_1,189.07

avo̍cāma ni̱vaca̍nāny asmi̱n māna̍sya sū̱nuḥ sa̍hasā̱ne a̱gnau |
va̱yaṁ sa̱hasra̱m ṛṣi̍bhiḥ sanema vi̱dyāme̱ṣaṁ vṛ̱jana̍ṁ jī̱radā̍num || RV_1,189.08

a̱na̱rvāṇa̍ṁ vṛṣa̱bham ma̱ndraji̍hva̱m bṛha̱spati̍ṁ vardhayā̱ navya̍m a̱rkaiḥ |
gā̱thā̱nya̍ḥ su̱ruco̱ yasya̍ de̱vā ā̍śṛ̱ṇvanti̱ nava̍mānasya̱ martā̍ḥ || RV_1,190.01

tam ṛ̱tviyā̱ upa̱ vāca̍ḥ sacante̱ sargo̱ na yo de̍vaya̱tām asa̍rji |
bṛha̱spati̱ḥ sa hy añjo̱ varā̍ṁsi̱ vibhvābha̍va̱t sam ṛ̱te mā̍ta̱riśvā̍ || RV_1,190.02

upa̍stuti̱ṁ nama̍sa̱ udya̍tiṁ ca̱ śloka̍ṁ yaṁsat savi̱teva̱ pra bā̱hū |
a̱sya kratvā̍ha̱nyo̱3̱̍ yo asti̍ mṛ̱go na bhī̱mo a̍ra̱kṣasa̱s tuvi̍ṣmān || RV_1,190.03

a̱sya śloko̍ di̱vīya̍te pṛthi̱vyām atyo̱ na ya̍ṁsad yakṣa̱bhṛd vice̍tāḥ |
mṛ̱gāṇā̱ṁ na he̱tayo̱ yanti̍ ce̱mā bṛha̱spate̱r ahi̍māyām̐ a̱bhi dyūn || RV_1,190.04

ye tvā̍ devosri̱kam manya̍mānāḥ pā̱pā bha̱dram u̍pa̱jīva̍nti pa̱jrāḥ |
na dū̱ḍhye̱3̱̍ anu̍ dadāsi vā̱mam bṛha̍spate̱ caya̍sa̱ it piyā̍rum || RV_1,190.05

su̱praitu̍ḥ sū̱yava̍so̱ na panthā̍ durni̱yantu̱ḥ pari̍prīto̱ na mi̱traḥ |
a̱na̱rvāṇo̍ a̱bhi ye cakṣa̍te̱ no 'pī̍vṛtā aporṇu̱vanto̍ asthuḥ || RV_1,190.06

saṁ yaṁ stubho̱ 'vana̍yo̱ na yanti̍ samu̱draṁ na sra̱vato̱ rodha̍cakrāḥ |
sa vi̱dvām̐ u̱bhaya̍ṁ caṣṭe a̱ntar bṛha̱spati̱s tara̱ āpa̍ś ca̱ gṛdhra̍ḥ || RV_1,190.07

e̱vā ma̱has tu̍vijā̱tas tuvi̍ṣmā̱n bṛha̱spati̍r vṛṣa̱bho dhā̍yi de̱vaḥ |
sa na̍ḥ stu̱to vī̱rava̍d dhātu̱ goma̍d vi̱dyāme̱ṣaṁ vṛ̱jana̍ṁ jī̱radā̍num || RV_1,190.08

kaṅka̍to̱ na kaṅka̱to 'tho̍ satī̱naka̍ṅkataḥ |
dvāv iti̱ pluṣī̱ iti̱ ny a1̱̍dṛṣṭā̍ alipsata || RV_1,191.01

a̱dṛṣṭā̍n hanty āya̱ty atho̍ hanti parāya̱tī |
atho̍ avaghna̱tī ha̱nty atho̍ pinaṣṭi piṁṣa̱tī || RV_1,191.02

śa̱rāsa̱ḥ kuśa̍rāso da̱rbhāsa̍ḥ sai̱ryā u̱ta |
mau̱ñjā a̱dṛṣṭā̍ vairi̱ṇāḥ sarve̍ sā̱kaṁ ny a̍lipsata || RV_1,191.03

ni gāvo̍ go̱ṣṭhe a̍sada̱n ni mṛ̱gāso̍ avikṣata |
ni ke̱tavo̱ janā̍nā̱ṁ ny a1̱̍dṛṣṭā̍ alipsata || RV_1,191.04

e̱ta u̱ tye praty a̍dṛśran prado̱ṣaṁ taska̍rā iva |
adṛ̍ṣṭā̱ viśva̍dṛṣṭā̱ḥ prati̍buddhā abhūtana || RV_1,191.05

dyaur va̍ḥ pi̱tā pṛ̍thi̱vī mā̱tā somo̱ bhrātādi̍ti̱ḥ svasā̍ |
adṛ̍ṣṭā̱ viśva̍dṛṣṭā̱s tiṣṭha̍te̱laya̍tā̱ su ka̍m || RV_1,191.06

ye aṁsyā̱ ye aṅgyā̍ḥ sū̱cīkā̱ ye pra̍kaṅka̱tāḥ |
adṛ̍ṣṭā̱ḥ kiṁ ca̱neha va̱ḥ sarve̍ sā̱kaṁ ni ja̍syata || RV_1,191.07

ut pu̱rastā̱t sūrya̍ eti vi̱śvadṛ̍ṣṭo adṛṣṭa̱hā |
a̱dṛṣṭā̱n sarvā̍ñ ja̱mbhaya̱n sarvā̍ś ca yātudhā̱nya̍ḥ || RV_1,191.08

ud a̍paptad a̱sau sūrya̍ḥ pu̱ru viśvā̍ni̱ jūrva̍n |
ā̱di̱tyaḥ parva̍tebhyo vi̱śvadṛ̍ṣṭo adṛṣṭa̱hā || RV_1,191.09

sūrye̍ vi̱ṣam ā sa̍jāmi̱ dṛti̱ṁ surā̍vato gṛ̱he |
so ci̱n nu na ma̍rāti̱ no va̱yam ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || RV_1,191.10

i̱ya̱tti̱kā śa̍kunti̱kā sa̱kā ja̍ghāsa te vi̱ṣam |
so ci̱n nu na ma̍rāti̱ no va̱yam ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || RV_1,191.11

triḥ sa̱pta vi̍ṣpuliṅga̱kā vi̱ṣasya̱ puṣya̍m akṣan |
tāś ci̱n nu na ma̍ranti̱ no va̱yam ma̍rāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || RV_1,191.12

na̱vā̱nāṁ na̍vatī̱nāṁ vi̱ṣasya̱ ropu̍ṣīṇām |
sarvā̍sām agrabha̱ṁ nāmā̱re a̍sya̱ yoja̍naṁ hari̱ṣṭhā madhu̍ tvā madhu̱lā ca̍kāra || RV_1,191.13

triḥ sa̱pta ma̍yū̱rya̍ḥ sa̱pta svasā̍ro a̱gruva̍ḥ |
tās te̍ vi̱ṣaṁ vi ja̍bhrira uda̱kaṁ ku̱mbhinī̍r iva || RV_1,191.14

i̱ya̱tta̱kaḥ ku̍ṣumbha̱kas ta̱kam bhi̍na̱dmy aśma̍nā |
tato̍ vi̱ṣam pra vā̍vṛte̱ parā̍cī̱r anu̍ sa̱ṁvata̍ḥ || RV_1,191.15

ku̱ṣu̱mbha̱kas tad a̍bravīd gi̱reḥ pra̍vartamāna̱kaḥ |
vṛści̍kasyāra̱saṁ vi̱ṣam a̍ra̱saṁ vṛ̍ścika te vi̱ṣam || RV_1,191.16

Maṇḍala 2

tvam a̍gne̱ dyubhi̱s tvam ā̍śuśu̱kṣaṇi̱s tvam a̱dbhyas tvam aśma̍na̱s pari̍ |
tvaṁ vane̍bhya̱s tvam oṣa̍dhībhya̱s tvaṁ nṛ̱ṇāṁ nṛ̍pate jāyase̱ śuci̍ḥ || RV_2,001.01

tavā̍gne ho̱traṁ tava̍ po̱tram ṛ̱tviya̱ṁ tava̍ ne̱ṣṭraṁ tvam a̱gnid ṛ̍tāya̱taḥ |
tava̍ praśā̱straṁ tvam a̍dhvarīyasi bra̱hmā cāsi̍ gṛ̱hapa̍tiś ca no̱ dame̍ || RV_2,001.02

tvam a̍gna̱ indro̍ vṛṣa̱bhaḥ sa̱tām a̍si̱ tvaṁ viṣṇu̍r urugā̱yo na̍ma̱sya̍ḥ |
tvam bra̱hmā ra̍yi̱vid bra̍hmaṇas pate̱ tvaṁ vi̍dhartaḥ sacase̱ pura̍ṁdhyā || RV_2,001.03

tvam a̍gne̱ rājā̱ varu̍ṇo dhṛ̱tavra̍ta̱s tvam mi̱tro bha̍vasi da̱sma īḍya̍ḥ |
tvam a̍rya̱mā satpa̍ti̱r yasya̍ sa̱mbhuja̱ṁ tvam aṁśo̍ vi̱dathe̍ deva bhāja̱yuḥ || RV_2,001.04

tvam a̍gne̱ tvaṣṭā̍ vidha̱te su̱vīrya̱ṁ tava̱ gnāvo̍ mitramahaḥ sajā̱tya̍m |
tvam ā̍śu̱hemā̍ rariṣe̱ svaśvya̱ṁ tvaṁ na̱rāṁ śardho̍ asi purū̱vasu̍ḥ || RV_2,001.05

tvam a̍gne ru̱dro asu̍ro ma̱ho di̱vas tvaṁ śardho̱ māru̍tam pṛ̱kṣa ī̍śiṣe |
tvaṁ vātai̍r aru̱ṇair yā̍si śaṁga̱yas tvam pū̱ṣā vi̍dha̱taḥ pā̍si̱ nu tmanā̍ || RV_2,001.06

tvam a̍gne draviṇo̱dā a̍ra̱ṁkṛte̱ tvaṁ de̱vaḥ sa̍vi̱tā ra̍tna̱dhā a̍si |
tvam bhago̍ nṛpate̱ vasva̍ īśiṣe̱ tvam pā̱yur dame̱ yas te 'vi̍dhat || RV_2,001.07

tvām a̍gne̱ dama̱ ā vi̱śpati̱ṁ viśa̱s tvāṁ rājā̍naṁ suvi̱datra̍m ṛñjate |
tvaṁ viśvā̍ni svanīka patyase̱ tvaṁ sa̱hasrā̍ṇi śa̱tā daśa̱ prati̍ || RV_2,001.08

tvām a̍gne pi̱tara̍m i̱ṣṭibhi̱r nara̱s tvām bhrā̱trāya̱ śamyā̍ tanū̱ruca̍m |
tvam pu̱tro bha̍vasi̱ yas te 'vi̍dha̱t tvaṁ sakhā̍ su̱śeva̍ḥ pāsy ā̱dhṛṣa̍ḥ || RV_2,001.09

tvam a̍gna ṛ̱bhur ā̱ke na̍ma̱sya1̱̍s tvaṁ vāja̍sya kṣu̱mato̍ rā̱ya ī̍śiṣe |
tvaṁ vi bhā̱sy anu̍ dakṣi dā̱vane̱ tvaṁ vi̱śikṣu̍r asi ya̱jñam ā̱tani̍ḥ || RV_2,001.10

tvam a̍gne̱ adi̍tir deva dā̱śuṣe̱ tvaṁ hotrā̱ bhāra̍tī vardhase gi̱rā |
tvam iḻā̍ śa̱tahi̍māsi̱ dakṣa̍se̱ tvaṁ vṛ̍tra̱hā va̍supate̱ sara̍svatī || RV_2,001.11

tvam a̍gne̱ subhṛ̍ta utta̱maṁ vaya̱s tava̍ spā̱rhe varṇa̱ ā sa̱ṁdṛśi̱ śriya̍ḥ |
tvaṁ vāja̍ḥ pra̱tara̍ṇo bṛ̱hann a̍si̱ tvaṁ ra̱yir ba̍hu̱lo vi̱śvata̍s pṛ̱thuḥ || RV_2,001.12

tvām a̍gna ādi̱tyāsa̍ ā̱sya1̱̍ṁ tvāṁ ji̱hvāṁ śuca̍yaś cakrire kave |
tvāṁ rā̍ti̱ṣāco̍ adhva̱reṣu̍ saścire̱ tve de̱vā ha̱vir a̍da̱nty āhu̍tam || RV_2,001.13

tve a̍gne̱ viśve̍ a̱mṛtā̍so a̱druha̍ ā̱sā de̱vā ha̱vir a̍da̱nty āhu̍tam |
tvayā̱ martā̍saḥ svadanta āsu̱tiṁ tvaṁ garbho̍ vī̱rudhā̍ṁ jajñiṣe̱ śuci̍ḥ || RV_2,001.14

tvaṁ tān saṁ ca̱ prati̍ cāsi ma̱jmanāgne̍ sujāta̱ pra ca̍ deva ricyase |
pṛ̱kṣo yad atra̍ mahi̱nā vi te̱ bhuva̱d anu̱ dyāvā̍pṛthi̱vī roda̍sī u̱bhe || RV_2,001.15

ye sto̱tṛbhyo̱ goa̍grā̱m aśva̍peśasa̱m agne̍ rā̱tim u̍pasṛ̱janti̍ sū̱raya̍ḥ |
a̱smāñ ca̱ tām̐ś ca̱ pra hi neṣi̱ vasya̱ ā bṛ̱had va̍dema vi̱dathe̍ su̱vīrā̍ḥ || RV_2,001.16

ya̱jñena̍ vardhata jā̱tave̍dasam a̱gniṁ ya̍jadhvaṁ ha̱viṣā̱ tanā̍ gi̱rā |
sa̱mi̱dhā̱naṁ su̍pra̱yasa̱ṁ sva̍rṇaraṁ dyu̱kṣaṁ hotā̍raṁ vṛ̱jane̍ṣu dhū̱rṣada̍m || RV_2,002.01

a̱bhi tvā̱ naktī̍r u̱ṣaso̍ vavāśi̱re 'gne̍ va̱tsaṁ na svasa̍reṣu dhe̱nava̍ḥ |
di̱va i̱ved a̍ra̱tir mānu̍ṣā yu̱gā kṣapo̍ bhāsi puruvāra sa̱ṁyata̍ḥ || RV_2,002.02

taṁ de̱vā bu̱dhne raja̍saḥ su̱daṁsa̍saṁ di̱vaspṛ̍thi̱vyor a̍ra̱tiṁ ny e̍rire |
ratha̍m iva̱ vedya̍ṁ śu̱kraśo̍ciṣam a̱gnim mi̱traṁ na kṣi̱tiṣu̍ pra̱śaṁsya̍m || RV_2,002.03

tam u̱kṣamā̍ṇa̱ṁ raja̍si̱ sva ā dame̍ ca̱ndram i̍va su̱ruca̍ṁ hvā̱ra ā da̍dhuḥ |
pṛśnyā̍ḥ pata̱raṁ ci̱taya̍ntam a̱kṣabhi̍ḥ pā̱tho na pā̱yuṁ jana̍sī u̱bhe anu̍ || RV_2,002.04

sa hotā̱ viśva̱m pari̍ bhūtv adhva̱raṁ tam u̍ ha̱vyair manu̍ṣa ṛñjate gi̱rā |
hi̱ri̱śi̱pro vṛ̍dhasā̱nāsu̱ jarbhu̍ra̱d dyaur na stṛbhi̍ś citaya̱d roda̍sī̱ anu̍ || RV_2,002.05

sa no̍ re̱vat sa̍midhā̱naḥ sva̱staye̍ saṁdada̱svān ra̱yim a̱smāsu̍ dīdihi |
ā na̍ḥ kṛṇuṣva suvi̱tāya̱ roda̍sī̱ agne̍ ha̱vyā manu̍ṣo deva vī̱taye̍ || RV_2,002.06

dā no̍ agne bṛha̱to dāḥ sa̍ha̱sriṇo̍ du̱ro na vāja̱ṁ śrutyā̱ apā̍ vṛdhi |
prācī̱ dyāvā̍pṛthi̱vī brahma̍ṇā kṛdhi̱ sva1̱̍r ṇa śu̱kram u̱ṣaso̱ vi di̍dyutaḥ || RV_2,002.07

sa i̍dhā̱na u̱ṣaso̱ rāmyā̱ anu̱ sva1̱̍r ṇa dī̍ded aru̱ṣeṇa̍ bhā̱nunā̍ |
hotrā̍bhir a̱gnir manu̍ṣaḥ svadhva̱ro rājā̍ vi̱śām ati̍thi̱ś cāru̍r ā̱yave̍ || RV_2,002.08

e̱vā no̍ agne a̱mṛte̍ṣu pūrvya̱ dhīṣ pī̍pāya bṛ̱haddi̍veṣu̱ mānu̍ṣā |
duhā̍nā dhe̱nur vṛ̱jane̍ṣu kā̱rave̱ tmanā̍ śa̱tina̍m puru̱rūpa̍m i̱ṣaṇi̍ || RV_2,002.09

va̱yam a̍gne̱ arva̍tā vā su̱vīrya̱m brahma̍ṇā vā citayemā̱ janā̱m̐ ati̍ |
a̱smāka̍ṁ dyu̱mnam adhi̱ pañca̍ kṛ̱ṣṭiṣū̱ccā sva1̱̍r ṇa śu̍śucīta du̱ṣṭara̍m || RV_2,002.10

sa no̍ bodhi sahasya pra̱śaṁsyo̱ yasmi̍n sujā̱tā i̱ṣaya̍nta sū̱raya̍ḥ |
yam a̍gne ya̱jñam u̍pa̱yanti̍ vā̱jino̱ nitye̍ to̱ke dī̍di̱vāṁsa̱ṁ sve dame̍ || RV_2,002.11

u̱bhayā̍so jātavedaḥ syāma te sto̱tāro̍ agne sū̱raya̍ś ca̱ śarma̍ṇi |
vasvo̍ rā̱yaḥ pu̍ruśca̱ndrasya̱ bhūya̍saḥ pra̱jāva̍taḥ svapa̱tyasya̍ śagdhi naḥ || RV_2,002.12

ye sto̱tṛbhyo̱ goa̍grā̱m aśva̍peśasa̱m agne̍ rā̱tim u̍pasṛ̱janti̍ sū̱raya̍ḥ |
a̱smāñ ca̱ tām̐ś ca̱ pra hi neṣi̱ vasya̱ ā bṛ̱had va̍dema vi̱dathe̍ su̱vīrā̍ḥ || RV_2,002.13

sami̍ddho a̱gnir nihi̍taḥ pṛthi̱vyām pra̱tyaṅ viśvā̍ni̱ bhuva̍nāny asthāt |
hotā̍ pāva̱kaḥ pra̱diva̍ḥ sume̱dhā de̱vo de̱vān ya̍jatv a̱gnir arha̍n || RV_2,003.01

narā̱śaṁsa̱ḥ prati̱ dhāmā̍ny a̱ñjan ti̱sro diva̱ḥ prati̍ ma̱hnā sva̱rciḥ |
ghṛ̱ta̱pruṣā̱ mana̍sā ha̱vyam u̱ndan mū̱rdhan ya̱jñasya̱ sam a̍naktu de̱vān || RV_2,003.02

ī̱ḻi̱to a̍gne̱ mana̍sā no̱ arha̍n de̱vān ya̍kṣi̱ mānu̍ṣā̱t pūrvo̍ a̱dya |
sa ā va̍ha ma̱rutā̱ṁ śardho̱ acyu̍ta̱m indra̍ṁ naro barhi̱ṣada̍ṁ yajadhvam || RV_2,003.03

deva̍ barhi̱r vardha̍mānaṁ su̱vīra̍ṁ stī̱rṇaṁ rā̱ye su̱bhara̱ṁ vedy a̱syām |
ghṛ̱tenā̱ktaṁ va̍savaḥ sīdate̱daṁ viśve̍ devā ādityā ya̱jñiyā̍saḥ || RV_2,003.04

vi śra̍yantām urvi̱yā hū̱yamā̍nā̱ dvāro̍ de̱vīḥ su̍prāya̱ṇā namo̍bhiḥ |
vyaca̍svatī̱r vi pra̍thantām aju̱ryā varṇa̍m punā̱nā ya̱śasa̍ṁ su̱vīra̍m || RV_2,003.05

sā̱dhv apā̍ṁsi sa̱natā̍ na ukṣi̱te u̱ṣāsā̱naktā̍ va̱yye̍va raṇvi̱te |
tantu̍ṁ ta̱taṁ sa̱ṁvaya̍ntī samī̱cī ya̱jñasya̱ peśa̍ḥ su̱dughe̱ paya̍svatī || RV_2,003.06

daivyā̱ hotā̍rā pratha̱mā vi̱duṣṭa̍ra ṛ̱ju ya̍kṣata̱ḥ sam ṛ̱cā va̱puṣṭa̍rā |
de̱vān yaja̍ntāv ṛtu̱thā sam a̍ñjato̱ nābhā̍ pṛthi̱vyā adhi̱ sānu̍ṣu tri̱ṣu || RV_2,003.07

sara̍svatī sā̱dhaya̍ntī̱ dhiya̍ṁ na̱ iḻā̍ de̱vī bhāra̍tī vi̱śvatū̍rtiḥ |
ti̱sro de̱vīḥ sva̱dhayā̍ ba̱rhir edam acchi̍dram pāntu śara̱ṇaṁ ni̱ṣadya̍ || RV_2,003.08

pi̱śaṅga̍rūpaḥ su̱bharo̍ vayo̱dhāḥ śru̱ṣṭī vī̱ro jā̍yate de̱vakā̍maḥ |
pra̱jāṁ tvaṣṭā̱ vi ṣya̍tu̱ nābhi̍m a̱sme athā̍ de̱vānā̱m apy e̍tu̱ pātha̍ḥ || RV_2,003.09

vana̱spati̍r avasṛ̱jann upa̍ sthād a̱gnir ha̱viḥ sū̍dayāti̱ pra dhī̱bhiḥ |
tridhā̱ sama̍ktaṁ nayatu prajā̱nan de̱vebhyo̱ daivya̍ḥ śami̱topa̍ ha̱vyam || RV_2,003.10

ghṛ̱tam mi̍mikṣe ghṛ̱tam a̍sya̱ yoni̍r ghṛ̱te śri̱to ghṛ̱tam v a̍sya̱ dhāma̍ |
a̱nu̱ṣva̱dham ā va̍ha mā̱daya̍sva̱ svāhā̍kṛtaṁ vṛṣabha vakṣi ha̱vyam || RV_2,003.11

hu̱ve va̍ḥ su̱dyotmā̍naṁ suvṛ̱ktiṁ vi̱śām a̱gnim ati̍thiṁ supra̱yasa̍m |
mi̱tra i̍va̱ yo di̍dhi̱ṣāyyo̱ bhūd de̱va āde̍ve̱ jane̍ jā̱tave̍dāḥ || RV_2,004.01

i̱maṁ vi̱dhanto̍ a̱pāṁ sa̱dhasthe̍ dvi̱tāda̍dhu̱r bhṛga̍vo vi̱kṣv ā̱3̱̍yoḥ |
e̱ṣa viśvā̍ny a̱bhy a̍stu̱ bhūmā̍ de̱vānā̍m a̱gnir a̍ra̱tir jī̱rāśva̍ḥ || RV_2,004.02

a̱gniṁ de̱vāso̱ mānu̍ṣīṣu vi̱kṣu pri̱yaṁ dhu̍ḥ kṣe̱ṣyanto̱ na mi̱tram |
sa dī̍dayad uśa̱tīr ūrmyā̱ ā da̱kṣāyyo̱ yo dāsva̍te̱ dama̱ ā || RV_2,004.03

a̱sya ra̱ṇvā svasye̍va pu̱ṣṭiḥ saṁdṛ̍ṣṭir asya hiyā̱nasya̱ dakṣo̍ḥ |
vi yo bhari̍bhra̱d oṣa̍dhīṣu ji̱hvām atyo̱ na rathyo̍ dodhavīti̱ vārā̍n || RV_2,004.04

ā yan me̱ abhva̍ṁ va̱nada̱ḥ pana̍nto̱śigbhyo̱ nāmi̍mīta̱ varṇa̍m |
sa ci̱treṇa̍ cikite̱ raṁsu̍ bhā̱sā ju̍ju̱rvām̐ yo muhu̱r ā yuvā̱ bhūt || RV_2,004.05

ā yo vanā̍ tātṛṣā̱ṇo na bhāti̱ vār ṇa pa̱thā rathye̍va svānīt |
kṛ̱ṣṇādhvā̱ tapū̍ ra̱ṇvaś ci̍keta̱ dyaur i̍va̱ smaya̍māno̱ nabho̍bhiḥ || RV_2,004.06

sa yo vy asthā̍d a̱bhi dakṣa̍d u̱rvīm pa̱śur naiti̍ sva̱yur ago̍pāḥ |
a̱gniḥ śo̱ciṣmā̍m̐ ata̱sāny u̱ṣṇan kṛ̱ṣṇavya̍thir asvadaya̱n na bhūma̍ || RV_2,004.07

nū te̱ pūrva̱syāva̍so̱ adhī̍tau tṛ̱tīye̍ vi̱dathe̱ manma̍ śaṁsi |
a̱sme a̍gne sa̱ṁyadvī̍ram bṛ̱hanta̍ṁ kṣu̱manta̱ṁ vāja̍ṁ svapa̱tyaṁ ra̱yiṁ dā̍ḥ || RV_2,004.08

tvayā̱ yathā̍ gṛtsama̱dāso̍ agne̱ guhā̍ va̱nvanta̱ upa̍rām̐ a̱bhi ṣyuḥ |
su̱vīrā̍so abhimāti̱ṣāha̱ḥ smat sū̱ribhyo̍ gṛṇa̱te tad vayo̍ dhāḥ || RV_2,004.09

hotā̍janiṣṭa̱ ceta̍naḥ pi̱tā pi̱tṛbhya̍ ū̱taye̍ |
pra̱yakṣa̱ñ jenya̱ṁ vasu̍ śa̱kema̍ vā̱jino̱ yama̍m || RV_2,005.01

ā yasmi̍n sa̱pta ra̱śmaya̍s ta̱tā ya̱jñasya̍ ne̱tari̍ |
ma̱nu̱ṣvad daivya̍m aṣṭa̱mam potā̱ viśva̱ṁ tad i̍nvati || RV_2,005.02

da̱dha̱nve vā̱ yad ī̱m anu̱ voca̱d brahmā̍ṇi̱ ver u̱ tat |
pari̱ viśvā̍ni̱ kāvyā̍ ne̱miś ca̱kram i̍vābhavat || RV_2,005.03

sā̱kaṁ hi śuci̍nā̱ śuci̍ḥ praśā̱stā kratu̱nāja̍ni |
vi̱dvām̐ a̍sya vra̱tā dhru̱vā va̱yā i̱vānu̍ rohate || RV_2,005.04

tā a̍sya̱ varṇa̍m ā̱yuvo̱ neṣṭu̍ḥ sacanta dhe̱nava̍ḥ |
ku̱vit ti̱sṛbhya̱ ā vara̱ṁ svasā̍ro̱ yā i̱daṁ ya̱yuḥ || RV_2,005.05

yadī̍ mā̱tur upa̱ svasā̍ ghṛ̱tam bhara̱nty asthi̍ta |
tāsā̍m adhva̱ryur āga̍tau̱ yavo̍ vṛ̱ṣṭīva̍ modate || RV_2,005.06

svaḥ svāya̱ dhāya̍se kṛṇu̱tām ṛ̱tvig ṛ̱tvija̍m |
stoma̍ṁ ya̱jñaṁ cād ara̍ṁ va̱nemā̍ rari̱mā va̱yam || RV_2,005.07

yathā̍ vi̱dvām̐ ara̱ṁ kara̱d viśve̍bhyo yaja̱tebhya̍ḥ |
a̱yam a̍gne̱ tve api̱ yaṁ ya̱jñaṁ ca̍kṛ̱mā va̱yam || RV_2,005.08

i̱mām me̍ agne sa̱midha̍m i̱mām u̍pa̱sada̍ṁ vaneḥ |
i̱mā u̱ ṣu śru̍dhī̱ gira̍ḥ || RV_2,006.01

a̱yā te̍ agne vidhe̱morjo̍ napā̱d aśva̍miṣṭe |
e̱nā sū̱ktena̍ sujāta || RV_2,006.02

taṁ tvā̍ gī̱rbhir girva̍ṇasaṁ draviṇa̱syuṁ dra̍viṇodaḥ |
sa̱pa̱ryema̍ sapa̱ryava̍ḥ || RV_2,006.03

sa bo̍dhi sū̱rir ma̱ghavā̱ vasu̍pate̱ vasu̍dāvan |
yu̱yo̱dhy a1̱̍smad dveṣā̍ṁsi || RV_2,006.04

sa no̍ vṛ̱ṣṭiṁ di̱vas pari̱ sa no̱ vāja̍m ana̱rvāṇa̍m |
sa na̍ḥ saha̱sriṇī̱r iṣa̍ḥ || RV_2,006.05

īḻā̍nāyāva̱syave̱ yavi̍ṣṭha dūta no gi̱rā |
yaji̍ṣṭha hota̱r ā ga̍hi || RV_2,006.06

a̱ntar hy a̍gna̱ īya̍se vi̱dvāñ janmo̱bhayā̍ kave |
dū̱to janye̍va̱ mitrya̍ḥ || RV_2,006.07

sa vi̱dvām̐ ā ca̍ piprayo̱ yakṣi̍ cikitva ānu̱ṣak |
ā cā̱smin sa̍tsi ba̱rhiṣi̍ || RV_2,006.08

śreṣṭha̍ṁ yaviṣṭha bhāra̱tāgne̍ dyu̱manta̱m ā bha̍ra |
vaso̍ puru̱spṛha̍ṁ ra̱yim || RV_2,007.01

mā no̱ arā̍tir īśata de̱vasya̱ martya̍sya ca |
parṣi̱ tasyā̍ u̱ta dvi̱ṣaḥ || RV_2,007.02

viśvā̍ u̱ta tvayā̍ va̱yaṁ dhārā̍ uda̱nyā̍ iva |
ati̍ gāhemahi̱ dviṣa̍ḥ || RV_2,007.03

śuci̍ḥ pāvaka̱ vandyo 'gne̍ bṛ̱had vi ro̍case |
tvaṁ ghṛ̱tebhi̱r āhu̍taḥ || RV_2,007.04

tvaṁ no̍ asi bhāra̱tāgne̍ va̱śābhi̍r u̱kṣabhi̍ḥ |
a̱ṣṭāpa̍dībhi̱r āhu̍taḥ || RV_2,007.05

drva̍nnaḥ sa̱rpirā̍sutiḥ pra̱tno hotā̱ vare̍ṇyaḥ |
saha̍sas pu̱tro adbhu̍taḥ || RV_2,007.06

vā̱ja̱yann i̍va̱ nū rathā̱n yogā̍m̐ a̱gner upa̍ stuhi |
ya̱śasta̍masya mī̱ḻhuṣa̍ḥ || RV_2,008.01

yaḥ su̍nī̱tho da̍dā̱śuṣe̍ 'ju̱ryo ja̱raya̍nn a̱rim |
cāru̍pratīka̱ āhu̍taḥ || RV_2,008.02

ya u̍ śri̱yā dame̱ṣv ā do̱ṣoṣasi̍ praśa̱syate̍ |
yasya̍ vra̱taṁ na mīya̍te || RV_2,008.03

ā yaḥ sva1̱̍r ṇa bhā̱nunā̍ ci̱tro vi̱bhāty a̱rciṣā̍ |
a̱ñjā̱no a̱jarai̍r a̱bhi || RV_2,008.04

atri̱m anu̍ sva̱rājya̍m a̱gnim u̱kthāni̍ vāvṛdhuḥ |
viśvā̱ adhi̱ śriyo̍ dadhe || RV_2,008.05

a̱gner indra̍sya̱ soma̍sya de̱vānā̍m ū̱tibhi̍r va̱yam |
ari̍ṣyantaḥ sacemahy a̱bhi ṣyā̍ma pṛtanya̱taḥ || RV_2,008.06

ni hotā̍ hotṛ̱ṣada̍ne̱ vidā̍nas tve̱ṣo dī̍di̱vām̐ a̍sadat su̱dakṣa̍ḥ |
ada̍bdhavratapramati̱r vasi̍ṣṭhaḥ sahasrambha̱raḥ śuci̍jihvo a̱gniḥ || RV_2,009.01

tvaṁ dū̱tas tvam u̍ naḥ para̱spās tvaṁ vasya̱ ā vṛ̍ṣabha praṇe̱tā |
agne̍ to̱kasya̍ na̱s tane̍ ta̱nūnā̱m apra̍yuccha̱n dīdya̍d bodhi go̱pāḥ || RV_2,009.02

vi̱dhema̍ te para̱me janma̍nn agne vi̱dhema̱ stomai̱r ava̍re sa̱dhasthe̍ |
yasmā̱d yone̍r u̱dāri̍thā̱ yaje̱ tam pra tve ha̱vīṁṣi̍ juhure̱ sami̍ddhe || RV_2,009.03

agne̱ yaja̍sva ha̱viṣā̱ yajī̍yāñ chru̱ṣṭī de̱ṣṇam a̱bhi gṛ̍ṇīhi̱ rādha̍ḥ |
tvaṁ hy asi̍ rayi̱patī̍ rayī̱ṇāṁ tvaṁ śu̱krasya̱ vaca̍so ma̱notā̍ || RV_2,009.04

u̱bhaya̍ṁ te̱ na kṣī̍yate vasa̱vya̍ṁ di̱ve-di̍ve̱ jāya̍mānasya dasma |
kṛ̱dhi kṣu̱manta̍ṁ jari̱tāra̍m agne kṛ̱dhi pati̍ṁ svapa̱tyasya̍ rā̱yaḥ || RV_2,009.05

sainānī̍kena suvi̱datro̍ a̱sme yaṣṭā̍ de̱vām̐ āya̍jiṣṭhaḥ sva̱sti |
ada̍bdho go̱pā u̱ta na̍ḥ para̱spā agne̍ dyu̱mad u̱ta re̱vad di̍dīhi || RV_2,009.06

jo̱hūtro̍ a̱gniḥ pra̍tha̱maḥ pi̱teve̱ḻas pa̱de manu̍ṣā̱ yat sami̍ddhaḥ |
śriya̱ṁ vasā̍no a̱mṛto̱ vice̍tā marmṛ̱jenya̍ḥ śrava̱sya1̱̍ḥ sa vā̱jī || RV_2,010.01

śrū̱yā a̱gniś ci̱trabhā̍nu̱r hava̍m me̱ viśvā̍bhir gī̱rbhir a̱mṛto̱ vice̍tāḥ |
śyā̱vā ratha̍ṁ vahato̱ rohi̍tā vo̱tāru̱ṣāha̍ cakre̱ vibhṛ̍traḥ || RV_2,010.02

u̱ttā̱nāyā̍m ajanaya̱n suṣū̍ta̱m bhuva̍d a̱gniḥ pu̍ru̱peśā̍su̱ garbha̍ḥ |
śiri̍ṇāyāṁ cid a̱ktunā̱ maho̍bhi̱r apa̍rīvṛto vasati̱ prace̍tāḥ || RV_2,010.03

jigha̍rmy a̱gniṁ ha̱viṣā̍ ghṛ̱tena̍ pratikṣi̱yanta̱m bhuva̍nāni̱ viśvā̍ |
pṛ̱thuṁ ti̍ra̱ścā vaya̍sā bṛ̱hanta̱ṁ vyaci̍ṣṭha̱m annai̍ rabha̱saṁ dṛśā̍nam || RV_2,010.04

ā vi̱śvata̍ḥ pra̱tyañca̍ṁ jigharmy ara̱kṣasā̱ mana̍sā̱ taj ju̍ṣeta |
marya̍śrīḥ spṛha̱yadva̍rṇo a̱gnir nābhi̱mṛśe̍ ta̱nvā̱3̱̍ jarbhu̍rāṇaḥ || RV_2,010.05

jñe̱yā bhā̱gaṁ sa̍hasā̱no vare̍ṇa̱ tvādū̍tāso manu̱vad va̍dema |
anū̍nam a̱gniṁ ju̱hvā̍ vaca̱syā ma̍dhu̱pṛca̍ṁ dhana̱sā jo̍havīmi || RV_2,010.06

śru̱dhī hava̍m indra̱ mā ri̍ṣaṇya̱ḥ syāma̍ te dā̱vane̱ vasū̍nām |
i̱mā hi tvām ūrjo̍ va̱rdhaya̍nti vasū̱yava̱ḥ sindha̍vo̱ na kṣara̍ntaḥ || RV_2,011.01

sṛ̱jo ma̱hīr i̍ndra̱ yā api̍nva̱ḥ pari̍ṣṭhitā̱ ahi̍nā śūra pū̱rvīḥ |
ama̍rtyaṁ cid dā̱sam manya̍māna̱m avā̍bhinad u̱kthair vā̍vṛdhā̱naḥ || RV_2,011.02

u̱ktheṣv in nu śū̍ra̱ yeṣu̍ cā̱kan stome̍ṣv indra ru̱driye̍ṣu ca |
tubhyed e̱tā yāsu̍ mandasā̱naḥ pra vā̱yave̍ sisrate̱ na śu̱bhrāḥ || RV_2,011.03

śu̱bhraṁ nu te̱ śuṣma̍ṁ va̱rdhaya̍ntaḥ śu̱bhraṁ vajra̍m bā̱hvor dadhā̍nāḥ |
śu̱bhras tvam i̍ndra vāvṛdhā̱no a̱sme dāsī̱r viśa̱ḥ sūrye̍ṇa sahyāḥ || RV_2,011.04

guhā̍ hi̱taṁ guhya̍ṁ gū̱ḻham a̱psv apī̍vṛtam mā̱yina̍ṁ kṣi̱yanta̍m |
u̱to a̱po dyāṁ ta̍sta̱bhvāṁsa̱m aha̱nn ahi̍ṁ śūra vī̱rye̍ṇa || RV_2,011.05

stavā̱ nu ta̍ indra pū̱rvyā ma̱hāny u̱ta sta̍vāma̱ nūta̍nā kṛ̱tāni̍ |
stavā̱ vajra̍m bā̱hvor u̱śanta̱ṁ stavā̱ harī̱ sūrya̍sya ke̱tū || RV_2,011.06

harī̱ nu ta̍ indra vā̱jaya̍ntā ghṛta̱ścuta̍ṁ svā̱ram a̍svārṣṭām |
vi sa̍ma̱nā bhūmi̍r aprathi̱ṣṭāra̍ṁsta̱ parva̍taś cit sari̱ṣyan || RV_2,011.07

ni parva̍taḥ sā̱dy apra̍yuccha̱n sam mā̱tṛbhi̍r vāvaśā̱no a̍krān |
dū̱re pā̱re vāṇī̍ṁ va̱rdhaya̍nta̱ indre̍ṣitāṁ dha̱mani̍m papratha̱n ni || RV_2,011.08

indro̍ ma̱hāṁ sindhu̍m ā̱śayā̍nam māyā̱vina̍ṁ vṛ̱tram a̍sphura̱n niḥ |
are̍jetā̱ṁ roda̍sī bhiyā̱ne kani̍kradato̱ vṛṣṇo̍ asya̱ vajrā̍t || RV_2,011.09

aro̍ravī̱d vṛṣṇo̍ asya̱ vajro 'mā̍nuṣa̱ṁ yan mānu̍ṣo ni̱jūrvā̍t |
ni mā̱yino̍ dāna̱vasya̍ mā̱yā apā̍dayat papi̱vān su̱tasya̍ || RV_2,011.10

pibā̍-pi̱bed i̍ndra śūra̱ soma̱m manda̍ntu tvā ma̱ndina̍ḥ su̱tāsa̍ḥ |
pṛ̱ṇanta̍s te ku̱kṣī va̍rdhayantv i̱tthā su̱taḥ pau̱ra indra̍m āva || RV_2,011.11

tve i̱ndrāpy a̍bhūma̱ viprā̱ dhiya̍ṁ vanema ṛta̱yā sapa̍ntaḥ |
a̱va̱syavo̍ dhīmahi̱ praśa̍stiṁ sa̱dyas te̍ rā̱yo dā̱vane̍ syāma || RV_2,011.12

syāma̱ te ta̍ indra̱ ye ta̍ ū̱tī a̍va̱syava̱ ūrja̍ṁ va̱rdhaya̍ntaḥ |
śu̱ṣminta̍ma̱ṁ yaṁ cā̱kanā̍ma devā̱sme ra̱yiṁ rā̍si vī̱rava̍ntam || RV_2,011.13

rāsi̱ kṣaya̱ṁ rāsi̍ mi̱tram a̱sme rāsi̱ śardha̍ indra̱ māru̍taṁ naḥ |
sa̱joṣa̍so̱ ye ca̍ mandasā̱nāḥ pra vā̱yava̍ḥ pā̱nty agra̍ṇītim || RV_2,011.14

vyantv in nu yeṣu̍ mandasā̱nas tṛ̱pat soma̍m pāhi dra̱hyad i̍ndra |
a̱smān su pṛ̱tsv ā ta̍ru̱trāva̍rdhayo̱ dyām bṛ̱hadbhi̍r a̱rkaiḥ || RV_2,011.15

bṛ̱hanta̱ in nu ye te̍ tarutro̱kthebhi̍r vā su̱mnam ā̱vivā̍sān |
stṛ̱ṇā̱nāso̍ ba̱rhiḥ pa̱styā̍va̱t tvotā̱ id i̍ndra̱ vāja̍m agman || RV_2,011.16

u̱greṣv in nu śū̍ra mandasā̱nas trika̍drukeṣu pāhi̱ soma̍m indra |
pra̱dodhu̍va̱c chmaśru̍ṣu prīṇā̱no yā̱hi hari̍bhyāṁ su̱tasya̍ pī̱tim || RV_2,011.17

dhi̱ṣvā śava̍ḥ śūra̱ yena̍ vṛ̱tram a̱vābhi̍na̱d dānu̍m aurṇavā̱bham |
apā̍vṛṇo̱r jyoti̱r āryā̍ya̱ ni sa̍vya̱taḥ sā̍di̱ dasyu̍r indra || RV_2,011.18

sane̍ma̱ ye ta̍ ū̱tibhi̱s tara̍nto̱ viśvā̱ḥ spṛdha̱ ārye̍ṇa̱ dasyū̍n |
a̱smabhya̱ṁ tat tvā̱ṣṭraṁ vi̱śvarū̍pa̱m ara̍ndhayaḥ sā̱khyasya̍ tri̱tāya̍ || RV_2,011.19

a̱sya su̍vā̱nasya̍ ma̱ndina̍s tri̱tasya̱ ny arbu̍daṁ vāvṛdhā̱no a̍staḥ |
ava̍rtaya̱t sūryo̱ na ca̱kram bhi̱nad va̱lam indro̱ aṅgi̍rasvān || RV_2,011.20

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,011.21

yo jā̱ta e̱va pra̍tha̱mo mana̍svān de̱vo de̱vān kratu̍nā pa̱ryabhū̍ṣat |
yasya̱ śuṣmā̱d roda̍sī̱ abhya̍setāṁ nṛ̱mṇasya̍ ma̱hnā sa ja̍nāsa̱ indra̍ḥ || RV_2,012.01

yaḥ pṛ̍thi̱vīṁ vyatha̍mānā̱m adṛ̍ṁha̱d yaḥ parva̍tā̱n praku̍pitā̱m̐ ara̍mṇāt |
yo a̱ntari̍kṣaṁ vima̱me varī̍yo̱ yo dyām asta̍bhnā̱t sa ja̍nāsa̱ indra̍ḥ || RV_2,012.02

yo ha̱tvāhi̱m ari̍ṇāt sa̱pta sindhū̱n yo gā u̱dāja̍d apa̱dhā va̱lasya̍ |
yo aśma̍nor a̱ntar a̱gniṁ ja̱jāna̍ sa̱ṁvṛk sa̱matsu̱ sa ja̍nāsa̱ indra̍ḥ || RV_2,012.03

yene̱mā viśvā̱ cyava̍nā kṛ̱tāni̱ yo dāsa̱ṁ varṇa̱m adha̍ra̱ṁ guhāka̍ḥ |
śva̱ghnīva̱ yo ji̍gī̱vām̐l la̱kṣam āda̍d a̱ryaḥ pu̱ṣṭāni̱ sa ja̍nāsa̱ indra̍ḥ || RV_2,012.04

yaṁ smā̍ pṛ̱cchanti̱ kuha̱ seti̍ gho̱ram u̱tem ā̍hu̱r naiṣo a̱stīty e̍nam |
so a̱ryaḥ pu̱ṣṭīr vija̍ i̱vā mi̍nāti̱ śrad a̍smai dhatta̱ sa ja̍nāsa̱ indra̍ḥ || RV_2,012.05

yo ra̱dhrasya̍ codi̱tā yaḥ kṛ̱śasya̱ yo bra̱hmaṇo̱ nādha̍mānasya kī̱reḥ |
yu̱ktagrā̍vṇo̱ yo̍ 'vi̱tā su̍śi̱praḥ su̱taso̍masya̱ sa ja̍nāsa̱ indra̍ḥ || RV_2,012.06

yasyāśvā̍saḥ pra̱diśi̱ yasya̱ gāvo̱ yasya̱ grāmā̱ yasya̱ viśve̱ rathā̍saḥ |
yaḥ sūrya̱ṁ ya u̱ṣasa̍ṁ ja̱jāna̱ yo a̱pāṁ ne̱tā sa ja̍nāsa̱ indra̍ḥ || RV_2,012.07

yaṁ kranda̍sī saṁya̱tī vi̱hvaye̍te̱ pare 'va̍ra u̱bhayā̍ a̱mitrā̍ḥ |
sa̱mā̱naṁ ci̱d ratha̍m ātasthi̱vāṁsā̱ nānā̍ havete̱ sa ja̍nāsa̱ indra̍ḥ || RV_2,012.08

yasmā̱n na ṛ̱te vi̱jaya̍nte̱ janā̍so̱ yaṁ yudhya̍mānā̱ ava̍se̱ hava̍nte |
yo viśva̍sya prati̱māna̍m ba̱bhūva̱ yo a̍cyuta̱cyut sa ja̍nāsa̱ indra̍ḥ || RV_2,012.09

yaḥ śaśva̍to̱ mahy eno̱ dadhā̍nā̱n ama̍nyamānā̱ñ charvā̍ ja̱ghāna̍ |
yaḥ śardha̍te̱ nānu̱dadā̍ti śṛ̱dhyāṁ yo dasyo̍r ha̱ntā sa ja̍nāsa̱ indra̍ḥ || RV_2,012.10

yaḥ śamba̍ra̱m parva̍teṣu kṣi̱yanta̍ṁ catvāri̱ṁśyāṁ śa̱rady a̱nvavi̍ndat |
o̱jā̱yamā̍na̱ṁ yo ahi̍ṁ ja̱ghāna̱ dānu̱ṁ śayā̍na̱ṁ sa ja̍nāsa̱ indra̍ḥ || RV_2,012.11

yaḥ sa̱ptara̍śmir vṛṣa̱bhas tuvi̍ṣmān a̱vāsṛ̍ja̱t sarta̍ve sa̱pta sindhū̍n |
yo rau̍hi̱ṇam asphu̍ra̱d vajra̍bāhu̱r dyām ā̱roha̍nta̱ṁ sa ja̍nāsa̱ indra̍ḥ || RV_2,012.12

dyāvā̍ cid asmai pṛthi̱vī na̍mete̱ śuṣmā̍c cid asya̱ parva̍tā bhayante |
yaḥ so̍ma̱pā ni̍ci̱to vajra̍bāhu̱r yo vajra̍hasta̱ḥ sa ja̍nāsa̱ indra̍ḥ || RV_2,012.13

yaḥ su̱nvanta̱m ava̍ti̱ yaḥ paca̍nta̱ṁ yaḥ śaṁsa̍nta̱ṁ yaḥ śa̍śamā̱nam ū̱tī |
yasya̱ brahma̱ vardha̍na̱ṁ yasya̱ somo̱ yasye̱daṁ rādha̱ḥ sa ja̍nāsa̱ indra̍ḥ || RV_2,012.14

yaḥ su̍nva̱te paca̍te du̱dhra ā ci̱d vāja̱ṁ darda̍rṣi̱ sa kilā̍si sa̱tyaḥ |
va̱yaṁ ta̍ indra vi̱śvaha̍ pri̱yāsa̍ḥ su̱vīrā̍so vi̱datha̱m ā va̍dema || RV_2,012.15

ṛ̱tur jani̍trī̱ tasyā̍ a̱pas pari̍ ma̱kṣū jā̱ta āvi̍śa̱d yāsu̱ vardha̍te |
tad ā̍ha̱nā a̍bhavat pi̱pyuṣī̱ payo̱ 'ṁśoḥ pī̱yūṣa̍m pratha̱maṁ tad u̱kthya̍m || RV_2,013.01

sa̱dhrīm ā ya̍nti̱ pari̱ bibhra̍tī̱ḥ payo̍ vi̱śvapsnyā̍ya̱ pra bha̍ranta̱ bhoja̍nam |
sa̱mā̱no adhvā̍ pra̱vatā̍m anu̱ṣyade̱ yas tākṛ̍ṇoḥ pratha̱maṁ sāsy u̱kthya̍ḥ || RV_2,013.02

anv eko̍ vadati̱ yad dadā̍ti̱ tad rū̱pā mi̱nan tada̍pā̱ eka̍ īyate |
viśvā̱ eka̍sya vi̱nuda̍s titikṣate̱ yas tākṛ̍ṇoḥ pratha̱maṁ sāsy u̱kthya̍ḥ || RV_2,013.03

pra̱jābhya̍ḥ pu̱ṣṭiṁ vi̱bhaja̍nta āsate ra̱yim i̍va pṛ̱ṣṭham pra̱bhava̍ntam āya̱te |
asi̍nva̱n daṁṣṭrai̍ḥ pi̱tur a̍tti̱ bhoja̍na̱ṁ yas tākṛ̍ṇoḥ pratha̱maṁ sāsy u̱kthya̍ḥ || RV_2,013.04

adhā̍kṛṇoḥ pṛthi̱vīṁ sa̱ṁdṛśe̍ di̱ve yo dhau̍tī̱nām a̍hiha̱nn āri̍ṇak pa̱thaḥ |
taṁ tvā̱ stome̍bhir u̱dabhi̱r na vā̱jina̍ṁ de̱vaṁ de̱vā a̍jana̱n sāsy u̱kthya̍ḥ || RV_2,013.05

yo bhoja̍naṁ ca̱ daya̍se ca̱ vardha̍nam ā̱rdrād ā śuṣka̱m madhu̍mad du̱dohi̍tha |
sa śe̍va̱dhiṁ ni da̍dhiṣe vi̱vasva̍ti̱ viśva̱syaika̍ īśiṣe̱ sāsy u̱kthya̍ḥ || RV_2,013.06

yaḥ pu̱ṣpiṇī̍ś ca pra̱sva̍ś ca̱ dharma̱ṇādhi̱ dāne̱ vy a1̱̍vanī̱r adhā̍rayaḥ |
yaś cāsa̍mā̱ aja̍no di̱dyuto̍ di̱va u̱rur ū̱rvām̐ a̱bhita̱ḥ sāsy u̱kthya̍ḥ || RV_2,013.07

yo nā̍rma̱raṁ sa̱hava̍su̱ṁ niha̍ntave pṛ̱kṣāya̍ ca dā̱save̍śāya̱ cāva̍haḥ |
ū̱rjaya̍ntyā̱ apa̍riviṣṭam ā̱sya̍m u̱taivādya pu̍rukṛ̱t sāsy u̱kthya̍ḥ || RV_2,013.08

śa̱taṁ vā̱ yasya̱ daśa̍ sā̱kam ādya̱ eka̍sya śru̱ṣṭau yad dha̍ co̱dam āvi̍tha |
a̱ra̱jjau dasyū̱n sam u̍nab da̱bhīta̍ye suprā̱vyo̍ abhava̱ḥ sāsy u̱kthya̍ḥ || RV_2,013.09

viśved anu̍ rodha̱nā a̍sya̱ pauṁsya̍ṁ da̱dur a̍smai dadhi̱re kṛ̱tnave̱ dhana̍m |
ṣaḻ a̍stabhnā vi̱ṣṭira̱ḥ pañca̍ sa̱ṁdṛśa̱ḥ pari̍ pa̱ro a̍bhava̱ḥ sāsy u̱kthya̍ḥ || RV_2,013.10

su̱pra̱vā̱ca̱naṁ tava̍ vīra vī̱rya1̱̍ṁ yad eke̍na̱ kratu̍nā vi̱ndase̱ vasu̍ |
jā̱tūṣṭhi̍rasya̱ pra vaya̱ḥ saha̍svato̱ yā ca̱kartha̱ sendra̱ viśvā̍sy u̱kthya̍ḥ || RV_2,013.11

ara̍maya̱ḥ sara̍pasa̱s tarā̍ya̱ kaṁ tu̱rvīta̍ye ca va̱yyā̍ya ca sru̱tim |
nī̱cā santa̱m ud a̍nayaḥ parā̱vṛja̱m prāndhaṁ śro̱ṇaṁ śra̱vaya̱n sāsy u̱kthya̍ḥ || RV_2,013.12

a̱smabhya̱ṁ tad va̍so dā̱nāya̱ rādha̱ḥ sam a̍rthayasva ba̱hu te̍ vasa̱vya̍m |
indra̱ yac ci̱traṁ śra̍va̱syā anu̱ dyūn bṛ̱had va̍dema vi̱dathe̍ su̱vīrā̍ḥ || RV_2,013.13

adhva̍ryavo̱ bhara̱tendrā̍ya̱ soma̱m āma̍trebhiḥ siñcatā̱ madya̱m andha̍ḥ |
kā̱mī hi vī̱raḥ sada̍m asya pī̱tiṁ ju̱hota̱ vṛṣṇe̱ tad id e̱ṣa va̍ṣṭi || RV_2,014.01

adhva̍ryavo̱ yo a̱po va̍vri̱vāṁsa̍ṁ vṛ̱traṁ ja̱ghānā̱śanye̍va vṛ̱kṣam |
tasmā̍ e̱tam bha̍rata tadva̱śāya̍m̐ e̱ṣa indro̍ arhati pī̱tim a̍sya || RV_2,014.02

adhva̍ryavo̱ yo dṛbhī̍kaṁ ja̱ghāna̱ yo gā u̱dāja̱d apa̱ hi va̱laṁ vaḥ |
tasmā̍ e̱tam a̱ntari̍kṣe̱ na vāta̱m indra̱ṁ somai̱r orṇu̍ta̱ jūr na vastrai̍ḥ || RV_2,014.03

adhva̍ryavo̱ ya ura̍ṇaṁ ja̱ghāna̱ nava̍ ca̱khvāṁsa̍ṁ nava̱tiṁ ca̍ bā̱hūn |
yo arbu̍da̱m ava̍ nī̱cā ba̍bā̱dhe tam indra̱ṁ soma̍sya bhṛ̱the hi̍nota || RV_2,014.04

adhva̍ryavo̱ yaḥ sv aśna̍ṁ ja̱ghāna̱ yaḥ śuṣṇa̍m a̱śuṣa̱ṁ yo vya̍ṁsam |
yaḥ pipru̱ṁ namu̍ci̱ṁ yo ru̍dhi̱krāṁ tasmā̱ indrā̱yāndha̍so juhota || RV_2,014.05

adhva̍ryavo̱ yaḥ śa̱taṁ śamba̍rasya̱ puro̍ bi̱bhedāśma̍neva pū̱rvīḥ |
yo va̱rcina̍ḥ śa̱tam indra̍ḥ sa̱hasra̍m a̱pāva̍pa̱d bhara̍tā̱ soma̍m asmai || RV_2,014.06

adhva̍ryavo̱ yaḥ śa̱tam ā sa̱hasra̱m bhūmyā̍ u̱pasthe 'va̍paj jagha̱nvān |
kutsa̍syā̱yor a̍tithi̱gvasya̍ vī̱rān ny āvṛ̍ṇa̱g bhara̍tā̱ soma̍m asmai || RV_2,014.07

adhva̍ryavo̱ yan na̍raḥ kā̱mayā̍dhve śru̱ṣṭī vaha̍nto naśathā̱ tad indre̍ |
gabha̍stipūtam bharata śru̱tāyendrā̍ya̱ soma̍ṁ yajyavo juhota || RV_2,014.08

adhva̍ryava̱ḥ karta̍nā śru̱ṣṭim a̍smai̱ vane̱ nipū̍ta̱ṁ vana̱ un na̍yadhvam |
ju̱ṣā̱ṇo hastya̍m a̱bhi vā̍vaśe va̱ indrā̍ya̱ soma̍m madi̱raṁ ju̍hota || RV_2,014.09

adhva̍ryava̱ḥ paya̱sodha̱r yathā̱ goḥ some̍bhir īm pṛṇatā bho̱jam indra̍m |
vedā̱ham a̍sya̱ nibhṛ̍tam ma e̱tad ditsa̍nta̱m bhūyo̍ yaja̱taś ci̍keta || RV_2,014.10

adhva̍ryavo̱ yo di̱vyasya̱ vasvo̱ yaḥ pārthi̍vasya̱ kṣamya̍sya̱ rājā̍ |
tam ūrda̍ra̱ṁ na pṛ̍ṇatā̱ yave̱nendra̱ṁ some̍bhi̱s tad apo̍ vo astu || RV_2,014.11

a̱smabhya̱ṁ tad va̍so dā̱nāya̱ rādha̱ḥ sam a̍rthayasva ba̱hu te̍ vasa̱vya̍m |
indra̱ yac ci̱traṁ śra̍va̱syā anu̱ dyūn bṛ̱had va̍dema vi̱dathe̍ su̱vīrā̍ḥ || RV_2,014.12

pra ghā̱ nv a̍sya maha̱to ma̱hāni̍ sa̱tyā sa̱tyasya̱ kara̍ṇāni vocam |
trika̍drukeṣv apibat su̱tasyā̱sya made̱ ahi̱m indro̍ jaghāna || RV_2,015.01

a̱va̱ṁśe dyām a̍stabhāyad bṛ̱hanta̱m ā roda̍sī apṛṇad a̱ntari̍kṣam |
sa dhā̍rayat pṛthi̱vīm pa̱pratha̍c ca̱ soma̍sya̱ tā mada̱ indra̍ś cakāra || RV_2,015.02

sadme̍va̱ prāco̱ vi mi̍māya̱ mānai̱r vajre̍ṇa̱ khāny a̍tṛṇan na̱dīnā̍m |
vṛthā̍sṛjat pa̱thibhi̍r dīrghayā̱thaiḥ soma̍sya̱ tā mada̱ indra̍ś cakāra || RV_2,015.03

sa pra̍vo̱ḻhṝn pa̍ri̱gatyā̍ da̱bhīte̱r viśva̍m adhā̱g āyu̍dham i̱ddhe a̱gnau |
saṁ gobhi̱r aśvai̍r asṛja̱d rathe̍bhi̱ḥ soma̍sya̱ tā mada̱ indra̍ś cakāra || RV_2,015.04

sa ī̍m ma̱hīṁ dhuni̱m eto̍r aramṇā̱t so a̍snā̱tṝn a̍pārayat sva̱sti |
ta u̱tsnāya̍ ra̱yim a̱bhi pra ta̍sthu̱ḥ soma̍sya̱ tā mada̱ indra̍ś cakāra || RV_2,015.05

soda̍ñca̱ṁ sindhu̍m ariṇān mahi̱tvā vajre̱ṇāna̍ u̱ṣasa̱ḥ sam pi̍peṣa |
a̱ja̱vaso̍ ja̱vinī̍bhir vivṛ̱ścan soma̍sya̱ tā mada̱ indra̍ś cakāra || RV_2,015.06

sa vi̱dvām̐ a̍pago̱haṁ ka̱nīnā̍m ā̱vir bhava̱nn ud a̍tiṣṭhat parā̱vṛk |
prati̍ śro̱ṇaḥ sthā̱d vy a1̱̍nag a̍caṣṭa̱ soma̍sya̱ tā mada̱ indra̍ś cakāra || RV_2,015.07

bhi̱nad va̱lam aṅgi̍robhir gṛṇā̱no vi parva̍tasya dṛṁhi̱tāny ai̍rat |
ri̱ṇag rodhā̍ṁsi kṛ̱trimā̍ṇy eṣā̱ṁ soma̍sya̱ tā mada̱ indra̍ś cakāra || RV_2,015.08

svapne̍nā̱bhyupyā̱ cumu̍ri̱ṁ dhuni̍ṁ ca ja̱ghantha̱ dasyu̱m pra da̱bhīti̍m āvaḥ |
ra̱mbhī ci̱d atra̍ vivide̱ hira̍ṇya̱ṁ soma̍sya̱ tā mada̱ indra̍ś cakāra || RV_2,015.09

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,015.10

pra va̍ḥ sa̱tāṁ jyeṣṭha̍tamāya suṣṭu̱tim a̱gnāv i̍va samidhā̱ne ha̱vir bha̍re |
indra̍m aju̱ryaṁ ja̱raya̍ntam ukṣi̱taṁ sa̱nād yuvā̍na̱m ava̍se havāmahe || RV_2,016.01

yasmā̱d indrā̍d bṛha̱taḥ kiṁ ca̱nem ṛ̱te viśvā̍ny asmi̱n sambhṛ̱tādhi̍ vī̱ryā̍ |
ja̱ṭhare̱ soma̍ṁ ta̱nvī̱3̱̍ saho̱ maho̱ haste̱ vajra̱m bhara̍ti śī̱rṣaṇi̱ kratu̍m || RV_2,016.02

na kṣo̱ṇībhyā̍m pari̱bhve̍ ta indri̱yaṁ na sa̍mu̱draiḥ parva̍tair indra te̱ ratha̍ḥ |
na te̱ vajra̱m anv a̍śnoti̱ kaś ca̱na yad ā̱śubhi̱ḥ pata̍si̱ yoja̍nā pu̱ru || RV_2,016.03

viśve̱ hy a̍smai yaja̱tāya̍ dhṛ̱ṣṇave̱ kratu̱m bhara̍nti vṛṣa̱bhāya̱ saśca̍te |
vṛṣā̍ yajasva ha̱viṣā̍ vi̱duṣṭa̍ra̱ḥ pibe̍ndra̱ soma̍ṁ vṛṣa̱bheṇa̍ bhā̱nunā̍ || RV_2,016.04

vṛṣṇa̱ḥ kośa̍ḥ pavate̱ madhva̍ ū̱rmir vṛ̍ṣa̱bhānnā̍ya vṛṣa̱bhāya̱ pāta̍ve |
vṛṣa̍ṇādhva̱ryū vṛ̍ṣa̱bhāso̱ adra̍yo̱ vṛṣa̍ṇa̱ṁ soma̍ṁ vṛṣa̱bhāya̍ suṣvati || RV_2,016.05

vṛṣā̍ te̱ vajra̍ u̱ta te̱ vṛṣā̱ ratho̱ vṛṣa̍ṇā̱ harī̍ vṛṣa̱bhāṇy āyu̍dhā |
vṛṣṇo̱ mada̍sya vṛṣabha̱ tvam ī̍śiṣa̱ indra̱ soma̍sya vṛṣa̱bhasya̍ tṛpṇuhi || RV_2,016.06

pra te̱ nāva̱ṁ na sama̍ne vaca̱syuva̱m brahma̍ṇā yāmi̱ sava̍neṣu̱ dādhṛ̍ṣiḥ |
ku̱vin no̍ a̱sya vaca̍so ni̱bodhi̍ṣa̱d indra̱m utsa̱ṁ na vasu̍naḥ sicāmahe || RV_2,016.07

pu̱rā sa̍mbā̱dhād a̱bhy ā va̍vṛtsva no dhe̱nur na va̱tsaṁ yava̍sasya pi̱pyuṣī̍ |
sa̱kṛt su te̍ suma̱tibhi̍ḥ śatakrato̱ sam patnī̍bhi̱r na vṛṣa̍ṇo nasīmahi || RV_2,016.08

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,016.09

tad a̍smai̱ navya̍m aṅgira̱svad a̍rcata̱ śuṣmā̱ yad a̍sya pra̱tnatho̱dīra̍te |
viśvā̱ yad go̱trā saha̍sā̱ parī̍vṛtā̱ made̱ soma̍sya dṛṁhi̱tāny aira̍yat || RV_2,017.01

sa bhū̍tu̱ yo ha̍ pratha̱māya̱ dhāya̍sa̱ ojo̱ mimā̍no mahi̱māna̱m āti̍rat |
śūro̱ yo yu̱tsu ta̱nva̍m pari̱vyata̍ śī̱rṣaṇi̱ dyām ma̍hi̱nā praty a̍muñcata || RV_2,017.02

adhā̍kṛṇoḥ pratha̱maṁ vī̱rya̍m ma̱had yad a̱syāgre̱ brahma̍ṇā̱ śuṣma̱m aira̍yaḥ |
ra̱the̱ṣṭhena̱ harya̍śvena̱ vicyu̍tā̱ḥ pra jī̱raya̍ḥ sisrate sa̱dhrya1̱̍k pṛtha̍k || RV_2,017.03

adhā̱ yo viśvā̱ bhuva̍nā̱bhi ma̱jmane̍śāna̱kṛt prava̍yā a̱bhy ava̍rdhata |
ād roda̍sī̱ jyoti̍ṣā̱ vahni̱r āta̍no̱t sīvya̱n tamā̍ṁsi̱ dudhi̍tā̱ sam a̍vyayat || RV_2,017.04

sa prā̱cīnā̱n parva̍tān dṛṁha̱d oja̍sādharā̱cīna̍m akṛṇod a̱pām apa̍ḥ |
adhā̍rayat pṛthi̱vīṁ vi̱śvadhā̍yasa̱m asta̍bhnān mā̱yayā̱ dyām a̍va̱srasa̍ḥ || RV_2,017.05

sāsmā̱ ara̍m bā̱hubhyā̱ṁ yam pi̱tākṛ̍ṇo̱d viśva̍smā̱d ā ja̱nuṣo̱ veda̍sa̱s pari̍ |
yenā̍ pṛthi̱vyāṁ ni krivi̍ṁ śa̱yadhyai̱ vajre̍ṇa ha̱tvy avṛ̍ṇak tuvi̱ṣvaṇi̍ḥ || RV_2,017.06

a̱mā̱jūr i̍va pi̱troḥ sacā̍ sa̱tī sa̍mā̱nād ā sada̍sa̱s tvām i̍ye̱ bhaga̍m |
kṛ̱dhi pra̍ke̱tam upa̍ mā̱sy ā bha̍ra da̱ddhi bhā̱gaṁ ta̱nvo̱3̱̍ yena̍ mā̱maha̍ḥ || RV_2,017.07

bho̱jaṁ tvām i̍ndra va̱yaṁ hu̍vema da̱diṣ ṭvam i̱ndrāpā̍ṁsi̱ vājā̍n |
a̱vi̱ḍḍhī̍ndra ci̱trayā̍ na ū̱tī kṛ̱dhi vṛ̍ṣann indra̱ vasya̍so naḥ || RV_2,017.08

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,017.09

prā̱tā ratho̱ navo̍ yoji̱ sasni̱ś catu̍ryugas trika̱śaḥ sa̱ptara̍śmiḥ |
daśā̍ritro manu̱ṣya̍ḥ sva̱rṣāḥ sa i̱ṣṭibhi̍r ma̱tibhī̱ raṁhyo̍ bhūt || RV_2,018.01

sāsmā̱ ara̍m pratha̱maṁ sa dvi̱tīya̍m u̱to tṛ̱tīya̱m manu̍ṣa̱ḥ sa hotā̍ |
a̱nyasyā̱ garbha̍m a̱nya ū̍ jananta̱ so a̱nyebhi̍ḥ sacate̱ jenyo̱ vṛṣā̍ || RV_2,018.02

harī̱ nu ka̱ṁ ratha̱ indra̍sya yojam ā̱yai sū̱ktena̱ vaca̍sā̱ nave̍na |
mo ṣu tvām atra̍ ba̱havo̱ hi viprā̱ ni rī̍rama̱n yaja̍mānāso a̱nye || RV_2,018.03

ā dvābhyā̱ṁ hari̍bhyām indra yā̱hy ā ca̱turbhi̱r ā ṣa̱ḍbhir hū̱yamā̍naḥ |
āṣṭā̱bhir da̱śabhi̍ḥ soma̱peya̍m a̱yaṁ su̱taḥ su̍makha̱ mā mṛdha̍s kaḥ || RV_2,018.04

ā vi̍ṁśa̱tyā tri̱ṁśatā̍ yāhy a̱rvāṅ ā ca̍tvāri̱ṁśatā̱ hari̍bhir yujā̱naḥ |
ā pa̍ñcā̱śatā̍ su̱rathe̍bhir i̱ndrā ṣa̱ṣṭyā sa̍pta̱tyā so̍ma̱peya̍m || RV_2,018.05

āśī̱tyā na̍va̱tyā yā̍hy a̱rvāṅ ā śa̱tena̱ hari̍bhir u̱hyamā̍naḥ |
a̱yaṁ hi te̍ śu̱naho̍treṣu̱ soma̱ indra̍ tvā̱yā pari̍ṣikto̱ madā̍ya || RV_2,018.06

mama̱ brahme̍ndra yā̱hy acchā̱ viśvā̱ harī̍ dhu̱ri dhi̍ṣvā̱ ratha̍sya |
pu̱ru̱trā hi vi̱havyo̍ ba̱bhūthā̱smiñ chū̍ra̱ sava̍ne mādayasva || RV_2,018.07

na ma̱ indre̍ṇa sa̱khyaṁ vi yo̍ṣad a̱smabhya̍m asya̱ dakṣi̍ṇā duhīta |
upa̱ jyeṣṭhe̱ varū̍the̱ gabha̍stau prā̱ye-prā̍ye jigī̱vāṁsa̍ḥ syāma || RV_2,018.08

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,018.09

apā̍yy a̱syāndha̍so̱ madā̍ya̱ manī̍ṣiṇaḥ suvā̱nasya̱ praya̍saḥ |
yasmi̱nn indra̍ḥ pra̱divi̍ vāvṛdhā̱na oko̍ da̱dhe bra̍hma̱ṇyanta̍ś ca̱ nara̍ḥ || RV_2,019.01

a̱sya ma̍ndā̱no madhvo̱ vajra̍ha̱sto 'hi̱m indro̍ arṇo̱vṛta̱ṁ vi vṛ̍ścat |
pra yad vayo̱ na svasa̍rā̱ṇy acchā̱ prayā̍ṁsi ca na̱dīnā̱ṁ cakra̍manta || RV_2,019.02

sa māhi̍na̱ indro̱ arṇo̍ a̱pām praira̍yad ahi̱hācchā̍ samu̱dram |
aja̍naya̱t sūrya̍ṁ vi̱dad gā a̱ktunāhnā̍ṁ va̱yunā̍ni sādhat || RV_2,019.03

so a̍pra̱tīni̱ mana̍ve pu̱rūṇīndro̍ dāśad dā̱śuṣe̱ hanti̍ vṛ̱tram |
sa̱dyo yo nṛbhyo̍ ata̱sāyyo̱ bhūt pa̍spṛdhā̱nebhya̱ḥ sūrya̍sya sā̱tau || RV_2,019.04

sa su̍nva̱ta indra̱ḥ sūrya̱m ā de̱vo ri̍ṇa̱ṅ martyā̍ya sta̱vān |
ā yad ra̱yiṁ gu̱hada̍vadyam asmai̱ bhara̱d aṁśa̱ṁ naita̍śo daśa̱syan || RV_2,019.05

sa ra̍ndhayat sa̱diva̱ḥ sāra̍thaye̱ śuṣṇa̍m a̱śuṣa̱ṁ kuya̍va̱ṁ kutsā̍ya |
divo̍dāsāya nava̱tiṁ ca̱ navendra̱ḥ puro̱ vy ai̍ra̱c chamba̍rasya || RV_2,019.06

e̱vā ta̍ indro̱catha̍m ahema śrava̱syā na tmanā̍ vā̱jaya̍ntaḥ |
a̱śyāma̱ tat sāpta̍m āśuṣā̱ṇā na̱namo̱ vadha̱r ade̍vasya pī̱yoḥ || RV_2,019.07

e̱vā te̍ gṛtsama̱dāḥ śū̍ra̱ manmā̍va̱syavo̱ na va̱yunā̍ni takṣuḥ |
bra̱hma̱ṇyanta̍ indra te̱ navī̍ya̱ iṣa̱m ūrja̍ṁ sukṣi̱tiṁ su̱mnam a̍śyuḥ || RV_2,019.08

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,019.09

va̱yaṁ te̱ vaya̍ indra vi̱ddhi ṣu ṇa̱ḥ pra bha̍rāmahe vāja̱yur na ratha̍m |
vi̱pa̱nyavo̱ dīdhya̍to manī̱ṣā su̱mnam iya̍kṣanta̱s tvāva̍to̱ nṝn || RV_2,020.01

tvaṁ na̍ indra̱ tvābhi̍r ū̱tī tvā̍ya̱to a̍bhiṣṭi̱pāsi̱ janā̍n |
tvam i̱no dā̱śuṣo̍ varū̱tetthādhī̍r a̱bhi yo nakṣa̍ti tvā || RV_2,020.02

sa no̱ yuvendro̍ jo̱hūtra̱ḥ sakhā̍ śi̱vo na̱rām a̍stu pā̱tā |
yaḥ śaṁsa̍nta̱ṁ yaḥ śa̍śamā̱nam ū̱tī paca̍ntaṁ ca stu̱vanta̍ṁ ca pra̱ṇeṣa̍t || RV_2,020.03

tam u̍ stuṣa̱ indra̱ṁ taṁ gṛ̍ṇīṣe̱ yasmi̍n pu̱rā vā̍vṛ̱dhuḥ śā̍śa̱duś ca̍ |
sa vasva̱ḥ kāma̍m pīparad iyā̱no bra̍hmaṇya̱to nūta̍nasyā̱yoḥ || RV_2,020.04

so aṅgi̍rasām u̱cathā̍ juju̱ṣvān brahmā̍ tūto̱d indro̍ gā̱tum i̱ṣṇan |
mu̱ṣṇann u̱ṣasa̱ḥ sūrye̍ṇa sta̱vān aśna̍sya cic chiśnathat pū̱rvyāṇi̍ || RV_2,020.05

sa ha̍ śru̱ta indro̱ nāma̍ de̱va ū̱rdhvo bhu̍va̱n manu̍ṣe da̱smata̍maḥ |
ava̍ pri̱yam a̍rśasā̱nasya̍ sā̱hvāñ chiro̍ bharad dā̱sasya̍ sva̱dhāvā̍n || RV_2,020.06

sa vṛ̍tra̱hendra̍ḥ kṛ̱ṣṇayo̍nīḥ puraṁda̱ro dāsī̍r airaya̱d vi |
aja̍naya̱n mana̍ve̱ kṣām a̱paś ca̍ sa̱trā śaṁsa̱ṁ yaja̍mānasya tūtot || RV_2,020.07

tasmai̍ tava̱sya1̱̍m anu̍ dāyi sa̱trendrā̍ya de̱vebhi̱r arṇa̍sātau |
prati̱ yad a̍sya̱ vajra̍m bā̱hvor dhur ha̱tvī dasyū̱n pura̱ āya̍sī̱r ni tā̍rīt || RV_2,020.08

nū̱naṁ sā te̱ prati̱ vara̍ṁ jari̱tre du̍hī̱yad i̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱g bhago̍ no bṛ̱had va̍dema vi̱dathe̍ su̱vīrā̍ḥ || RV_2,020.09

vi̱śva̱jite̍ dhana̱jite̍ sva̱rjite̍ satrā̱jite̍ nṛ̱jita̍ urvarā̱jite̍ |
a̱śva̱jite̍ go̱jite̍ a̱bjite̍ bha̱rendrā̍ya̱ soma̍ṁ yaja̱tāya̍ harya̱tam || RV_2,021.01

a̱bhi̱bhuve̍ 'bhibha̱ṅgāya̍ vanva̱te 'ṣā̍ḻhāya̱ saha̍mānāya ve̱dhase̍ |
tu̱vi̱graye̱ vahna̍ye du̱ṣṭarī̍tave satrā̱sāhe̱ nama̱ indrā̍ya vocata || RV_2,021.02

sa̱trā̱sā̱ho ja̍nabha̱kṣo ja̍naṁsa̱haś cyava̍no yu̱dhmo anu̱ joṣa̍m ukṣi̱taḥ |
vṛ̱ta̱ṁca̱yaḥ sahu̍rir vi̱kṣv ā̍ri̱ta indra̍sya voca̱m pra kṛ̱tāni̍ vī̱ryā̍ || RV_2,021.03

a̱nā̱nu̱do vṛ̍ṣa̱bho dodha̍to va̱dho ga̍mbhī̱ra ṛ̱ṣvo asa̍maṣṭakāvyaḥ |
ra̱dhra̱co̱daḥ śnatha̍no vīḻi̱tas pṛ̱thur indra̍ḥ suya̱jña u̱ṣasa̱ḥ sva̍r janat || RV_2,021.04

ya̱jñena̍ gā̱tum a̱pturo̍ vividrire̱ dhiyo̍ hinvā̱nā u̱śijo̍ manī̱ṣiṇa̍ḥ |
a̱bhi̱svarā̍ ni̱ṣadā̱ gā a̍va̱syava̱ indre̍ hinvā̱nā dravi̍ṇāny āśata || RV_2,021.05

indra̱ śreṣṭhā̍ni̱ dravi̍ṇāni dhehi̱ citti̱ṁ dakṣa̍sya subhaga̱tvam a̱sme |
poṣa̍ṁ rayī̱ṇām ari̍ṣṭiṁ ta̱nūnā̍ṁ svā̱dmāna̍ṁ vā̱caḥ su̍dina̱tvam ahnā̍m || RV_2,021.06

trika̍drukeṣu mahi̱ṣo yavā̍śiraṁ tuvi̱śuṣma̍s tṛ̱pat soma̍m apiba̱d viṣṇu̍nā su̱taṁ yathāva̍śat |
sa ī̍m mamāda̱ mahi̱ karma̱ karta̍ve ma̱hām u̱ruṁ saina̍ṁ saścad de̱vo de̱vaṁ sa̱tyam indra̍ṁ sa̱tya indu̍ḥ || RV_2,022.01

adha̱ tviṣī̍mām̐ a̱bhy oja̍sā̱ krivi̍ṁ yu̱dhābha̍va̱d ā roda̍sī apṛṇad asya ma̱jmanā̱ pra vā̍vṛdhe |
adha̍ttā̱nyaṁ ja̱ṭhare̱ prem a̍ricyata̱ saina̍ṁ saścad de̱vo de̱vaṁ sa̱tyam indra̍ṁ sa̱tya indu̍ḥ || RV_2,022.02

sā̱kaṁ jā̱taḥ kratu̍nā sā̱kam oja̍sā vavakṣitha sā̱kaṁ vṛ̱ddho vī̱ryai̍ḥ sāsa̱hir mṛdho̱ vica̍rṣaṇiḥ |
dātā̱ rādha̍ḥ stuva̱te kāmya̱ṁ vasu̱ saina̍ṁ saścad de̱vo de̱vaṁ sa̱tyam indra̍ṁ sa̱tya indu̍ḥ || RV_2,022.03

tava̱ tyan narya̍ṁ nṛ̱to 'pa̍ indra pratha̱mam pū̱rvyaṁ di̱vi pra̱vācya̍ṁ kṛ̱tam |
yad de̱vasya̱ śava̍sā̱ prāri̍ṇā̱ asu̍ṁ ri̱ṇann a̱paḥ |
bhuva̱d viśva̍m a̱bhy āde̍va̱m oja̍sā vi̱dād ūrja̍ṁ śa̱takra̍tur vi̱dād iṣa̍m || RV_2,022.04

ga̱ṇānā̍ṁ tvā ga̱ṇapa̍tiṁ havāmahe ka̱viṁ ka̍vī̱nām u̍pa̱maśra̍vastamam |
jye̱ṣṭha̱rāja̱m brahma̍ṇām brahmaṇas pata̱ ā na̍ḥ śṛ̱ṇvann ū̱tibhi̍ḥ sīda̱ sāda̍nam || RV_2,023.01

de̱vāś ci̍t te asurya̱ prace̍taso̱ bṛha̍spate ya̱jñiya̍m bhā̱gam ā̍naśuḥ |
u̱srā i̍va̱ sūryo̱ jyoti̍ṣā ma̱ho viśve̍ṣā̱m ij ja̍ni̱tā brahma̍ṇām asi || RV_2,023.02

ā vi̱bādhyā̍ pari̱rāpa̱s tamā̍ṁsi ca̱ jyoti̍ṣmanta̱ṁ ratha̍m ṛ̱tasya̍ tiṣṭhasi |
bṛha̍spate bhī̱mam a̍mitra̱dambha̍naṁ rakṣo̱haṇa̍ṁ gotra̱bhida̍ṁ sva̱rvida̍m || RV_2,023.03

su̱nī̱tibhi̍r nayasi̱ trāya̍se̱ jana̱ṁ yas tubhya̱ṁ dāśā̱n na tam aṁho̍ aśnavat |
bra̱hma̱dviṣa̱s tapa̍no manyu̱mīr a̍si̱ bṛha̍spate̱ mahi̱ tat te̍ mahitva̱nam || RV_2,023.04

na tam aṁho̱ na du̍ri̱taṁ kuta̍ś ca̱na nārā̍tayas titiru̱r na dva̍yā̱vina̍ḥ |
viśvā̱ id a̍smād dhva̱raso̱ vi bā̍dhase̱ yaṁ su̍go̱pā rakṣa̍si brahmaṇas pate || RV_2,023.05

tvaṁ no̍ go̱pāḥ pa̍thi̱kṛd vi̍cakṣa̱ṇas tava̍ vra̱tāya̍ ma̱tibhi̍r jarāmahe |
bṛha̍spate̱ yo no̍ a̱bhi hvaro̍ da̱dhe svā tam ma̍rmartu du̱cchunā̱ hara̍svatī || RV_2,023.06

u̱ta vā̱ yo no̍ ma̱rcayā̱d anā̍gaso 'rātī̱vā marta̍ḥ sānu̱ko vṛka̍ḥ |
bṛha̍spate̱ apa̱ taṁ va̍rtayā pa̱thaḥ su̱gaṁ no̍ a̱syai de̱vavī̍taye kṛdhi || RV_2,023.07

trā̱tāra̍ṁ tvā ta̱nūnā̍ṁ havāma̱he 'va̍spartar adhiva̱ktāra̍m asma̱yum |
bṛha̍spate deva̱nido̱ ni ba̍rhaya̱ mā du̱revā̱ utta̍raṁ su̱mnam un na̍śan || RV_2,023.08

tvayā̍ va̱yaṁ su̱vṛdhā̍ brahmaṇas pate spā̱rhā vasu̍ manu̱ṣyā da̍dīmahi |
yā no̍ dū̱re ta̱ḻito̱ yā arā̍tayo̱ 'bhi santi̍ ja̱mbhayā̱ tā a̍na̱pnasa̍ḥ || RV_2,023.09

tvayā̍ va̱yam u̍tta̱maṁ dhī̍mahe̱ vayo̱ bṛha̍spate̱ papri̍ṇā̱ sasni̍nā yu̱jā |
mā no̍ du̱ḥśaṁso̍ abhidi̱psur ī̍śata̱ pra su̱śaṁsā̍ ma̱tibhi̍s tāriṣīmahi || RV_2,023.10

a̱nā̱nu̱do vṛ̍ṣa̱bho jagmi̍r āha̱vaṁ niṣṭa̍ptā̱ śatru̱m pṛta̍nāsu sāsa̱hiḥ |
asi̍ sa̱tya ṛ̍ṇa̱yā bra̍hmaṇas pata u̱grasya̍ cid dami̱tā vī̍ḻuha̱rṣiṇa̍ḥ || RV_2,023.11

ade̍vena̱ mana̍sā̱ yo ri̍ṣa̱ṇyati̍ śā̱sām u̱gro manya̍māno̱ jighā̍ṁsati |
bṛha̍spate̱ mā praṇa̱k tasya̍ no va̱dho ni ka̍rma ma̱nyuṁ du̱reva̍sya̱ śardha̍taḥ || RV_2,023.12

bhare̍ṣu̱ havyo̱ nama̍sopa̱sadyo̱ gantā̱ vāje̍ṣu̱ sani̍tā̱ dhana̍ṁ-dhanam |
viśvā̱ id a̱ryo a̍bhidi̱psvo̱3̱̍ mṛdho̱ bṛha̱spati̱r vi va̍varhā̱ rathā̍m̐ iva || RV_2,023.13

teji̍ṣṭhayā tapa̱nī ra̱kṣasa̍s tapa̱ ye tvā̍ ni̱de da̍dhi̱re dṛ̱ṣṭavī̍ryam |
ā̱vis tat kṛ̍ṣva̱ yad asa̍t ta u̱kthya1̱̍m bṛha̍spate̱ vi pa̍ri̱rāpo̍ ardaya || RV_2,023.14

bṛha̍spate̱ ati̱ yad a̱ryo arhā̍d dyu̱mad vi̱bhāti̱ kratu̍ma̱j jane̍ṣu |
yad dī̱daya̱c chava̍sa ṛtaprajāta̱ tad a̱smāsu̱ dravi̍ṇaṁ dhehi ci̱tram || RV_2,023.15

mā na̍ḥ ste̱nebhyo̱ ye a̱bhi dru̱has pa̱de ni̍rā̱miṇo̍ ri̱pavo 'nne̍ṣu jāgṛ̱dhuḥ |
ā de̱vānā̱m oha̍te̱ vi vrayo̍ hṛ̱di bṛha̍spate̱ na pa̱raḥ sāmno̍ viduḥ || RV_2,023.16

viśve̍bhyo̱ hi tvā̱ bhuva̍nebhya̱s pari̱ tvaṣṭāja̍na̱t sāmna̍ḥ-sāmnaḥ ka̱viḥ |
sa ṛ̍ṇa̱cid ṛ̍ṇa̱yā brahma̍ṇa̱s pati̍r dru̱ho ha̱ntā ma̱ha ṛ̱tasya̍ dha̱rtari̍ || RV_2,023.17

tava̍ śri̱ye vy a̍jihīta̱ parva̍to̱ gavā̍ṁ go̱tram u̱dasṛ̍jo̱ yad a̍ṅgiraḥ |
indre̍ṇa yu̱jā tama̍sā̱ parī̍vṛta̱m bṛha̍spate̱ nir a̱pām au̍bjo arṇa̱vam || RV_2,023.18

brahma̍ṇas pate̱ tvam a̱sya ya̱ntā sū̱ktasya̍ bodhi̱ tana̍yaṁ ca jinva |
viśva̱ṁ tad bha̱draṁ yad ava̍nti de̱vā bṛ̱had va̍dema vi̱dathe̍ su̱vīrā̍ḥ || RV_2,023.19

semām a̍viḍḍhi̱ prabhṛ̍ti̱ṁ ya īśi̍ṣe̱ 'yā vi̍dhema̱ nava̍yā ma̱hā gi̱rā |
yathā̍ no mī̱ḍhvān stava̍te̱ sakhā̱ tava̱ bṛha̍spate̱ sīṣa̍dha̱ḥ sota no̍ ma̱tim || RV_2,024.01

yo nantvā̱ny ana̍ma̱n ny oja̍so̱tāda̍rdar ma̱nyunā̱ śamba̍rāṇi̱ vi |
prācyā̍vaya̱d acyu̍tā̱ brahma̍ṇa̱s pati̱r ā cāvi̍śa̱d vasu̍manta̱ṁ vi parva̍tam || RV_2,024.02

tad de̱vānā̍ṁ de̱vata̍māya̱ kartva̱m aśra̍thnan dṛ̱ḻhāvra̍danta vīḻi̱tā |
ud gā ā̍ja̱d abhi̍na̱d brahma̍ṇā va̱lam agū̍ha̱t tamo̱ vy a̍cakṣaya̱t sva̍ḥ || RV_2,024.03

aśmā̍syam ava̱tam brahma̍ṇa̱s pati̱r madhu̍dhāram a̱bhi yam oja̱sātṛ̍ṇat |
tam e̱va viśve̍ papire sva̱rdṛśo̍ ba̱hu sā̱kaṁ si̍sicu̱r utsa̍m u̱driṇa̍m || RV_2,024.04

sanā̱ tā kā ci̱d bhuva̍nā̱ bhavī̍tvā mā̱dbhiḥ śa̱radbhi̱r duro̍ varanta vaḥ |
aya̍tantā carato a̱nyad-a̍nya̱d id yā ca̱kāra̍ va̱yunā̱ brahma̍ṇa̱s pati̍ḥ || RV_2,024.05

a̱bhi̱nakṣa̍nto a̱bhi ye tam ā̍na̱śur ni̱dhim pa̍ṇī̱nām pa̍ra̱maṁ guhā̍ hi̱tam |
te vi̱dvāṁsa̍ḥ prati̱cakṣyānṛ̍tā̱ puna̱r yata̍ u̱ āya̱n tad ud ī̍yur ā̱viśa̍m || RV_2,024.06

ṛ̱tāvā̍naḥ prati̱cakṣyānṛ̍tā̱ puna̱r āta̱ ā ta̍sthuḥ ka̱vayo̍ ma̱has pa̱thaḥ |
te bā̱hubhyā̍ṁ dhami̱tam a̱gnim aśma̍ni̱ naki̱ḥ ṣo a̱sty ara̍ṇo ja̱hur hi tam || RV_2,024.07

ṛ̱tajye̍na kṣi̱preṇa̱ brahma̍ṇa̱s pati̱r yatra̱ vaṣṭi̱ pra tad a̍śnoti̱ dhanva̍nā |
tasya̍ sā̱dhvīr iṣa̍vo̱ yābhi̱r asya̍ti nṛ̱cakṣa̍so dṛ̱śaye̱ karṇa̍yonayaḥ || RV_2,024.08

sa sa̍ṁna̱yaḥ sa vi̍na̱yaḥ pu̱rohi̍ta̱ḥ sa suṣṭu̍ta̱ḥ sa yu̱dhi brahma̍ṇa̱s pati̍ḥ |
cā̱kṣmo yad vāja̱m bhara̍te ma̱tī dhanād it sūrya̍s tapati tapya̱tur vṛthā̍ || RV_2,024.09

vi̱bhu pra̱bhu pra̍tha̱mam me̱hanā̍vato̱ bṛha̱spate̍ḥ suvi̱datrā̍ṇi̱ rādhyā̍ |
i̱mā sā̱tāni̍ ve̱nyasya̍ vā̱jino̱ yena̱ janā̍ u̱bhaye̍ bhuñja̱te viśa̍ḥ || RV_2,024.10

yo 'va̍re vṛ̱jane̍ vi̱śvathā̍ vi̱bhur ma̱hām u̍ ra̱ṇvaḥ śava̍sā va̱vakṣi̍tha |
sa de̱vo de̱vān prati̍ paprathe pṛ̱thu viśved u̱ tā pa̍ri̱bhūr brahma̍ṇa̱s pati̍ḥ || RV_2,024.11

viśva̍ṁ sa̱tyam ma̍ghavānā yu̱vor id āpa̍ś ca̱na pra mi̍nanti vra̱taṁ vā̍m |
acche̍ndrābrahmaṇaspatī ha̱vir no 'nna̱ṁ yuje̍va vā̱jinā̍ jigātam || RV_2,024.12

u̱tāśi̍ṣṭhā̱ anu̍ śṛṇvanti̱ vahna̍yaḥ sa̱bheyo̱ vipro̍ bharate ma̱tī dhanā̍ |
vī̱ḻu̱dveṣā̱ anu̱ vaśa̍ ṛ̱ṇam ā̍da̱diḥ sa ha̍ vā̱jī sa̍mi̱the brahma̍ṇa̱s pati̍ḥ || RV_2,024.13

brahma̍ṇa̱s pate̍r abhavad yathāva̱śaṁ sa̱tyo ma̱nyur mahi̱ karmā̍ kariṣya̱taḥ |
yo gā u̱dāja̱t sa di̱ve vi cā̍bhajan ma̱hīva̍ rī̱tiḥ śava̍sāsara̱t pṛtha̍k || RV_2,024.14

brahma̍ṇas pate su̱yama̍sya vi̱śvahā̍ rā̱yaḥ syā̍ma ra̱thyo̱3̱̍ vaya̍svataḥ |
vī̱reṣu̍ vī̱rām̐ upa̍ pṛṅdhi na̱s tvaṁ yad īśā̍no̱ brahma̍ṇā̱ veṣi̍ me̱ hava̍m || RV_2,024.15

brahma̍ṇas pate̱ tvam a̱sya ya̱ntā sū̱ktasya̍ bodhi̱ tana̍yaṁ ca jinva |
viśva̱ṁ tad bha̱draṁ yad ava̍nti de̱vā bṛ̱had va̍dema vi̱dathe̍ su̱vīrā̍ḥ || RV_2,024.16

indhā̍no a̱gniṁ va̍navad vanuṣya̱taḥ kṛ̱tabra̍hmā śūśuvad rā̱taha̍vya̱ it |
jā̱tena̍ jā̱tam ati̱ sa pra sa̍rsṛte̱ yaṁ-ya̱ṁ yuja̍ṁ kṛṇu̱te brahma̍ṇa̱s pati̍ḥ || RV_2,025.01

vī̱rebhi̍r vī̱rān va̍navad vanuṣya̱to gobhī̍ ra̱yim pa̍pratha̱d bodha̍ti̱ tmanā̍ |
to̱kaṁ ca̱ tasya̱ tana̍yaṁ ca vardhate̱ yaṁ-ya̱ṁ yuja̍ṁ kṛṇu̱te brahma̍ṇa̱s pati̍ḥ || RV_2,025.02

sindhu̱r na kṣoda̱ḥ śimī̍vām̐ ṛghāya̱to vṛṣe̍va̱ vadhrī̍m̐r a̱bhi va̱ṣṭy oja̍sā |
a̱gner i̍va̱ prasi̍ti̱r nāha̱ varta̍ve̱ yaṁ-ya̱ṁ yuja̍ṁ kṛṇu̱te brahma̍ṇa̱s pati̍ḥ || RV_2,025.03

tasmā̍ arṣanti di̱vyā a̍sa̱ścata̱ḥ sa satva̍bhiḥ pratha̱mo goṣu̍ gacchati |
ani̍bhṛṣṭataviṣir ha̱nty oja̍sā̱ yaṁ-ya̱ṁ yuja̍ṁ kṛṇu̱te brahma̍ṇa̱s pati̍ḥ || RV_2,025.04

tasmā̱ id viśve̍ dhunayanta̱ sindha̱vo 'cchi̍drā̱ śarma̍ dadhire pu̱rūṇi̍ |
de̱vānā̍ṁ su̱mne su̱bhaga̱ḥ sa e̍dhate̱ yaṁ-ya̱ṁ yuja̍ṁ kṛṇu̱te brahma̍ṇa̱s pati̍ḥ || RV_2,025.05

ṛ̱jur ic chaṁso̍ vanavad vanuṣya̱to de̍va̱yann id ade̍vayantam a̱bhy a̍sat |
su̱prā̱vīr id va̍navat pṛ̱tsu du̱ṣṭara̱ṁ yajved aya̍jyo̱r vi bha̍jāti̱ bhoja̍nam || RV_2,026.01

yaja̍sva vīra̱ pra vi̍hi manāya̱to bha̱dram mana̍ḥ kṛṇuṣva vṛtra̱tūrye̍ |
ha̱viṣ kṛ̍ṇuṣva su̱bhago̱ yathāsa̍si̱ brahma̍ṇa̱s pate̱r ava̱ ā vṛ̍ṇīmahe || RV_2,026.02

sa ij jane̍na̱ sa vi̱śā sa janma̍nā̱ sa pu̱trair vāja̍m bharate̱ dhanā̱ nṛbhi̍ḥ |
de̱vānā̱ṁ yaḥ pi̱tara̍m ā̱vivā̍sati śra̱ddhāma̍nā ha̱viṣā̱ brahma̍ṇa̱s pati̍m || RV_2,026.03

yo a̍smai ha̱vyair ghṛ̱tava̍dbhi̱r avi̍dha̱t pra tam prā̱cā na̍yati̱ brahma̍ṇa̱s pati̍ḥ |
u̱ru̱ṣyatī̱m aṁha̍so̱ rakṣa̍tī ri̱ṣo̱3̱̍ 'ṁhoś ci̍d asmā uru̱cakri̱r adbhu̍taḥ || RV_2,026.04

i̱mā gira̍ ādi̱tyebhyo̍ ghṛ̱tasnū̍ḥ sa̱nād rāja̍bhyo ju̱hvā̍ juhomi |
śṛ̱ṇotu̍ mi̱tro a̍rya̱mā bhago̍ nas tuvijā̱to varu̍ṇo̱ dakṣo̱ aṁśa̍ḥ || RV_2,027.01

i̱maṁ stoma̱ṁ sakra̍tavo me a̱dya mi̱tro a̍rya̱mā varu̍ṇo juṣanta |
ā̱di̱tyāsa̱ḥ śuca̍yo̱ dhāra̍pūtā̱ avṛ̍jinā anava̱dyā ari̍ṣṭāḥ || RV_2,027.02

ta ā̍di̱tyāsa̍ u̱ravo̍ gabhī̱rā ada̍bdhāso̱ dipsa̍nto bhūrya̱kṣāḥ |
a̱ntaḥ pa̍śyanti vṛji̱nota sā̱dhu sarva̱ṁ rāja̍bhyaḥ para̱mā ci̱d anti̍ || RV_2,027.03

dhā̱raya̍nta ādi̱tyāso̱ jaga̱t sthā de̱vā viśva̍sya̱ bhuva̍nasya go̱pāḥ |
dī̱rghādhi̍yo̱ rakṣa̍māṇā asu̱rya̍m ṛ̱tāvā̍na̱ś caya̍mānā ṛ̱ṇāni̍ || RV_2,027.04

vi̱dyām ā̍dityā̱ ava̍so vo a̱sya yad a̍ryaman bha̱ya ā ci̍n mayo̱bhu |
yu̱ṣmāka̍m mitrāvaruṇā̱ praṇī̍tau̱ pari̱ śvabhre̍va duri̱tāni̍ vṛjyām || RV_2,027.05

su̱go hi vo̍ aryaman mitra̱ panthā̍ anṛkṣa̱ro va̍ruṇa sā̱dhur asti̍ |
tenā̍dityā̱ adhi̍ vocatā no̱ yaccha̍tā no duṣpari̱hantu̱ śarma̍ || RV_2,027.06

pipa̍rtu no̱ adi̍tī̱ rāja̍pu̱trāti̱ dveṣā̍ṁsy arya̱mā su̱gebhi̍ḥ |
bṛ̱han mi̱trasya̱ varu̍ṇasya̱ śarmopa̍ syāma puru̱vīrā̱ ari̍ṣṭāḥ || RV_2,027.07

ti̱sro bhūmī̍r dhāraya̱n trīm̐r u̱ta dyūn trīṇi̍ vra̱tā vi̱dathe̍ a̱ntar e̍ṣām |
ṛ̱tenā̍dityā̱ mahi̍ vo mahi̱tvaṁ tad a̍ryaman varuṇa mitra̱ cāru̍ || RV_2,027.08

trī ro̍ca̱nā di̱vyā dhā̍rayanta hira̱ṇyayā̱ḥ śuca̍yo̱ dhāra̍pūtāḥ |
asva̍pnajo animi̱ṣā ada̍bdhā uru̱śaṁsā̍ ṛ̱jave̱ martyā̍ya || RV_2,027.09

tvaṁ viśve̍ṣāṁ varuṇāsi̱ rājā̱ ye ca̍ de̱vā a̍sura̱ ye ca̱ martā̍ḥ |
śa̱taṁ no̍ rāsva śa̱rado̍ vi̱cakṣe̱ 'śyāmāyū̍ṁṣi̱ sudhi̍tāni̱ pūrvā̍ || RV_2,027.10

na da̍kṣi̱ṇā vi ci̍kite̱ na sa̱vyā na prā̱cīna̍m ādityā̱ nota pa̱ścā |
pā̱kyā̍ cid vasavo dhī̱ryā̍ cid yu̱ṣmānī̍to̱ abha̍ya̱ṁ jyoti̍r aśyām || RV_2,027.11

yo rāja̍bhya ṛta̱nibhyo̍ da̱dāśa̱ yaṁ va̱rdhaya̍nti pu̱ṣṭaya̍ś ca̱ nityā̍ḥ |
sa re̱vān yā̍ti pratha̱mo rathe̍na vasu̱dāvā̍ vi̱dathe̍ṣu praśa̱staḥ || RV_2,027.12

śuci̍r a̱paḥ sū̱yava̍sā̱ ada̍bdha̱ upa̍ kṣeti vṛ̱ddhava̍yāḥ su̱vīra̍ḥ |
naki̱ṣ ṭaṁ ghna̱nty anti̍to̱ na dū̱rād ya ā̍di̱tyānā̱m bhava̍ti̱ praṇī̍tau || RV_2,027.13

adi̍te̱ mitra̱ varu̍ṇo̱ta mṛ̍ḻa̱ yad vo̍ va̱yaṁ ca̍kṛ̱mā kac ci̱d āga̍ḥ |
u̱rv a̍śyā̱m abha̍ya̱ṁ jyoti̍r indra̱ mā no̍ dī̱rghā a̱bhi na̍śa̱n tami̍srāḥ || RV_2,027.14

u̱bhe a̍smai pīpayataḥ samī̱cī di̱vo vṛ̱ṣṭiṁ su̱bhago̱ nāma̱ puṣya̍n |
u̱bhā kṣayā̍v ā̱jaya̍n yāti pṛ̱tsūbhāv ardhau̍ bhavataḥ sā̱dhū a̍smai || RV_2,027.15

yā vo̍ mā̱yā a̍bhi̱druhe̍ yajatrā̱ḥ pāśā̍ ādityā ri̱pave̱ vicṛ̍ttāḥ |
a̱śvīva̱ tām̐ ati̍ yeṣa̱ṁ rathe̱nāri̍ṣṭā u̱rāv ā śarma̍n syāma || RV_2,027.16

māham ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍m ā̱peḥ |
mā rā̱yo rā̍jan su̱yamā̱d ava̍ sthām bṛ̱had va̍dema vi̱dathe̍ su̱vīrā̍ḥ || RV_2,027.17

i̱daṁ ka̱ver ā̍di̱tyasya̍ sva̱rājo̱ viśvā̍ni̱ sānty a̱bhy a̍stu ma̱hnā |
ati̱ yo ma̱ndro ya̱jathā̍ya de̱vaḥ su̍kī̱rtim bhi̍kṣe̱ varu̍ṇasya̱ bhūre̍ḥ || RV_2,028.01

tava̍ vra̱te su̱bhagā̍saḥ syāma svā̱dhyo̍ varuṇa tuṣṭu̱vāṁsa̍ḥ |
u̱pāya̍na u̱ṣasā̱ṁ goma̍tīnām a̱gnayo̱ na jara̍māṇā̱ anu̱ dyūn || RV_2,028.02

tava̍ syāma puru̱vīra̍sya̱ śarma̍nn uru̱śaṁsa̍sya varuṇa praṇetaḥ |
yū̱yaṁ na̍ḥ putrā aditer adabdhā a̱bhi kṣa̍madhva̱ṁ yujyā̍ya devāḥ || RV_2,028.03

pra sī̍m ādi̱tyo a̍sṛjad vidha̱rtām̐ ṛ̱taṁ sindha̍vo̱ varu̍ṇasya yanti |
na śrā̍myanti̱ na vi mu̍canty e̱te vayo̱ na pa̍ptū raghu̱yā pari̍jman || RV_2,028.04

vi mac chra̍thāya raśa̱nām i̱vāga̍ ṛ̱dhyāma̍ te varuṇa̱ khām ṛ̱tasya̍ |
mā tantu̍ś chedi̱ vaya̍to̱ dhiya̍m me̱ mā mātrā̍ śāry a̱pasa̍ḥ pu̱ra ṛ̱toḥ || RV_2,028.05

apo̱ su mya̍kṣa varuṇa bhi̱yasa̱m mat samrā̱ḻ ṛtā̱vo 'nu̍ mā gṛbhāya |
dāme̍va va̱tsād vi mu̍mu̱gdhy aṁho̍ na̱hi tvad ā̱re ni̱miṣa̍ś ca̱neśe̍ || RV_2,028.06

mā no̍ va̱dhair va̍ruṇa̱ ye ta̍ i̱ṣṭāv ena̍ḥ kṛ̱ṇvanta̍m asura bhrī̱ṇanti̍ |
mā jyoti̍ṣaḥ pravasa̱thāni̍ ganma̱ vi ṣū mṛdha̍ḥ śiśratho jī̱vase̍ naḥ || RV_2,028.07

nama̍ḥ pu̱rā te̍ varuṇo̱ta nū̱nam u̱tāpa̱raṁ tu̍vijāta bravāma |
tve hi ka̱m parva̍te̱ na śri̱tāny apra̍cyutāni dūḻabha vra̱tāni̍ || RV_2,028.08

para̍ ṛ̱ṇā sā̍vī̱r adha̱ matkṛ̍tāni̱ māhaṁ rā̍jann a̱nyakṛ̍tena bhojam |
avyu̍ṣṭā̱ in nu bhūya̍sīr u̱ṣāsa̱ ā no̍ jī̱vān va̍ruṇa̱ tāsu̍ śādhi || RV_2,028.09

yo me̍ rāja̱n yujyo̍ vā̱ sakhā̍ vā̱ svapne̍ bha̱yam bhī̱rave̱ mahya̱m āha̍ |
ste̱no vā̱ yo dipsa̍ti no̱ vṛko̍ vā̱ tvaṁ tasmā̍d varuṇa pāhy a̱smān || RV_2,028.10

māham ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍m ā̱peḥ |
mā rā̱yo rā̍jan su̱yamā̱d ava̍ sthām bṛ̱had va̍dema vi̱dathe̍ su̱vīrā̍ḥ || RV_2,028.11

dhṛta̍vratā̱ ādi̍tyā̱ iṣi̍rā ā̱re mat ka̍rta raha̱sūr i̱vāga̍ḥ |
śṛ̱ṇva̱to vo̱ varu̍ṇa̱ mitra̱ devā̍ bha̱drasya̍ vi̱dvām̐ ava̍se huve vaḥ || RV_2,029.01

yū̱yaṁ de̍vā̱ḥ prama̍tir yū̱yam ojo̍ yū̱yaṁ dveṣā̍ṁsi sanu̱tar yu̍yota |
a̱bhi̱kṣa̱ttāro̍ a̱bhi ca̱ kṣama̍dhvam a̱dyā ca̍ no mṛ̱ḻaya̍tāpa̱raṁ ca̍ || RV_2,029.02

kim ū̱ nu va̍ḥ kṛṇavā̱māpa̍reṇa̱ kiṁ sane̍na vasava̱ āpye̍na |
yū̱yaṁ no̍ mitrāvaruṇādite ca sva̱stim i̍ndrāmaruto dadhāta || RV_2,029.03

ha̱ye de̍vā yū̱yam id ā̱paya̍ḥ stha̱ te mṛ̍ḻata̱ nādha̍mānāya̱ mahya̍m |
mā vo̱ ratho̍ madhyama̱vāḻ ṛ̱te bhū̱n mā yu̱ṣmāva̍tsv ā̱piṣu̍ śramiṣma || RV_2,029.04

pra va̱ eko̍ mimaya̱ bhūry āgo̱ yan mā̍ pi̱teva̍ kita̱vaṁ śa̍śā̱sa |
ā̱re pāśā̍ ā̱re a̱ghāni̍ devā̱ mā mādhi̍ pu̱tre vim i̍va grabhīṣṭa || RV_2,029.05

a̱rvāñco̍ a̱dyā bha̍vatā yajatrā̱ ā vo̱ hārdi̱ bhaya̍māno vyayeyam |
trādhva̍ṁ no devā ni̱juro̱ vṛka̍sya̱ trādhva̍ṁ ka̱rtād a̍va̱pado̍ yajatrāḥ || RV_2,029.06

māham ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍m ā̱peḥ |
mā rā̱yo rā̍jan su̱yamā̱d ava̍ sthām bṛ̱had va̍dema vi̱dathe̍ su̱vīrā̍ḥ || RV_2,029.07

ṛ̱taṁ de̱vāya̍ kṛṇva̱te sa̍vi̱tra indrā̍yāhi̱ghne na ra̍manta̱ āpa̍ḥ |
aha̍r-ahar yāty a̱ktur a̱pāṁ kiyā̱ty ā pra̍tha̱maḥ sarga̍ āsām || RV_2,030.01

yo vṛ̱trāya̱ sina̱m atrābha̍riṣya̱t pra taṁ jani̍trī vi̱duṣa̍ uvāca |
pa̱tho rada̍ntī̱r anu̱ joṣa̍m asmai di̱ve-di̍ve̱ dhuna̍yo ya̱nty artha̍m || RV_2,030.02

ū̱rdhvo hy asthā̱d adhy a̱ntari̱kṣe 'dhā̍ vṛ̱trāya̱ pra va̱dhaṁ ja̍bhāra |
miha̱ṁ vasā̍na̱ upa̱ hīm adu̍drot ti̱gmāyu̍dho ajaya̱c chatru̱m indra̍ḥ || RV_2,030.03

bṛha̍spate̱ tapu̱ṣāśne̍va vidhya̱ vṛka̍dvaraso̱ asu̍rasya vī̱rān |
yathā̍ ja̱ghantha̍ dhṛṣa̱tā pu̱rā ci̍d e̱vā ja̍hi̱ śatru̍m a̱smāka̍m indra || RV_2,030.04

ava̍ kṣipa di̱vo aśmā̍nam u̱ccā yena̱ śatru̍m mandasā̱no ni̱jūrvā̍ḥ |
to̱kasya̍ sā̱tau tana̍yasya̱ bhūre̍r a̱smām̐ a̱rdhaṁ kṛ̍ṇutād indra̱ gonā̍m || RV_2,030.05

pra hi kratu̍ṁ vṛ̱hatho̱ yaṁ va̍nu̱tho ra̱dhrasya̍ stho̱ yaja̍mānasya co̱dau |
indrā̍somā yu̱vam a̱smām̐ a̍viṣṭam a̱smin bha̱yasthe̍ kṛṇutam u lo̱kam || RV_2,030.06

na mā̍ tama̱n na śra̍ma̱n nota ta̍ndra̱n na vo̍cāma̱ mā su̍no̱teti̱ soma̍m |
yo me̍ pṛ̱ṇād yo dada̱d yo ni̱bodhā̱d yo mā̍ su̱nvanta̱m upa̱ gobhi̱r āya̍t || RV_2,030.07

sara̍svati̱ tvam a̱smām̐ a̍viḍḍhi ma̱rutva̍tī dhṛṣa̱tī je̍ṣi̱ śatrū̍n |
tyaṁ ci̱c chardha̍ntaṁ taviṣī̱yamā̍ṇa̱m indro̍ hanti vṛṣa̱bhaṁ śaṇḍi̍kānām || RV_2,030.08

yo na̱ḥ sanu̍tya u̱ta vā̍ jigha̱tnur a̍bhi̱khyāya̱ taṁ ti̍gi̱tena̍ vidhya |
bṛha̍spata̱ āyu̍dhair jeṣi̱ śatrū̍n dru̱he rīṣa̍nta̱m pari̍ dhehi rājan || RV_2,030.09

a̱smāke̍bhi̱ḥ satva̍bhiḥ śūra̱ śūrai̍r vī̱ryā̍ kṛdhi̱ yāni̍ te̱ kartvā̍ni |
jyog a̍bhūva̱nn anu̍dhūpitāso ha̱tvī teṣā̱m ā bha̍rā no̱ vasū̍ni || RV_2,030.10

taṁ va̱ḥ śardha̱m māru̍taṁ sumna̱yur gi̱ropa̍ bruve̱ nama̍sā̱ daivya̱ṁ jana̍m |
yathā̍ ra̱yiṁ sarva̍vīra̱ṁ naśā̍mahā apatya̱sāca̱ṁ śrutya̍ṁ di̱ve-di̍ve || RV_2,030.11

a̱smāka̍m mitrāvaruṇāvata̱ṁ ratha̍m ādi̱tyai ru̱drair vasu̍bhiḥ sacā̱bhuvā̍ |
pra yad vayo̱ na papta̱n vasma̍na̱s pari̍ śrava̱syavo̱ hṛṣī̍vanto vana̱rṣada̍ḥ || RV_2,031.01

adha̍ smā na̱ ud a̍vatā sajoṣaso̱ ratha̍ṁ devāso a̱bhi vi̱kṣu vā̍ja̱yum |
yad ā̱śava̱ḥ padyā̍bhi̱s titra̍to̱ raja̍ḥ pṛthi̱vyāḥ sānau̱ jaṅgha̍nanta pā̱ṇibhi̍ḥ || RV_2,031.02

u̱ta sya na̱ indro̍ vi̱śvaca̍rṣaṇir di̱vaḥ śardhe̍na̱ māru̍tena su̱kratu̍ḥ |
anu̱ nu sthā̍ty avṛ̱kābhi̍r ū̱tibhī̱ ratha̍m ma̱he sa̱naye̱ vāja̍sātaye || RV_2,031.03

u̱ta sya de̱vo bhuva̍nasya sa̱kṣaṇi̱s tvaṣṭā̱ gnābhi̍ḥ sa̱joṣā̍ jūjuva̱d ratha̍m |
iḻā̱ bhago̍ bṛhaddi̱vota roda̍sī pū̱ṣā pura̍ṁdhir a̱śvinā̱v adhā̱ patī̍ || RV_2,031.04

u̱ta tye de̱vī su̱bhage̍ mithū̱dṛśo̱ṣāsā̱naktā̱ jaga̍tām apī̱juvā̍ |
stu̱ṣe yad vā̍m pṛthivi̱ navya̍sā̱ vaca̍ḥ sthā̱tuś ca̱ vaya̱s triva̍yā upa̱stire̍ || RV_2,031.05

u̱ta va̱ḥ śaṁsa̍m u̱śijā̍m iva śma̱sy ahi̍r bu̱dhnyo̱3̱̍ 'ja eka̍pād u̱ta |
tri̱ta ṛ̍bhu̱kṣāḥ sa̍vi̱tā cano̍ dadhe̱ 'pāṁ napā̍d āśu̱hemā̍ dhi̱yā śami̍ || RV_2,031.06

e̱tā vo̍ va̱śmy udya̍tā yajatrā̱ ata̍kṣann ā̱yavo̱ navya̍se̱ sam |
śra̱va̱syavo̱ vāja̍ṁ cakā̱nāḥ sapti̱r na rathyo̱ aha̍ dhī̱tim a̍śyāḥ || RV_2,031.07

a̱sya me̍ dyāvāpṛthivī ṛtāya̱to bhū̱tam a̍vi̱trī vaca̍sa̱ḥ siṣā̍sataḥ |
yayo̱r āyu̍ḥ prata̱raṁ te i̱dam pu̱ra upa̍stute vasū̱yur vā̍m ma̱ho da̍dhe || RV_2,032.01

mā no̱ guhyā̱ ripa̍ ā̱yor aha̍n dabha̱n mā na̍ ā̱bhyo rī̍radho du̱cchunā̍bhyaḥ |
mā no̱ vi yau̍ḥ sa̱khyā vi̱ddhi tasya̍ naḥ sumnāya̱tā mana̍sā̱ tat tve̍mahe || RV_2,032.02

ahe̍ḻatā̱ mana̍sā śru̱ṣṭim ā va̍ha̱ duhā̍nāṁ dhe̱num pi̱pyuṣī̍m asa̱ścata̍m |
padyā̍bhir ā̱śuṁ vaca̍sā ca vā̱jina̱ṁ tvāṁ hi̍nomi puruhūta vi̱śvahā̍ || RV_2,032.03

rā̱kām a̱haṁ su̱havā̍ṁ suṣṭu̱tī hu̍ve śṛ̱ṇotu̍ naḥ su̱bhagā̱ bodha̍tu̱ tmanā̍ |
sīvya̱tv apa̍ḥ sū̱cyācchi̍dyamānayā̱ dadā̍tu vī̱raṁ śa̱tadā̍yam u̱kthya̍m || RV_2,032.04

yās te̍ rāke suma̱taya̍ḥ su̱peśa̍so̱ yābhi̱r dadā̍si dā̱śuṣe̱ vasū̍ni |
tābhi̍r no a̱dya su̱manā̍ u̱pāga̍hi sahasrapo̱ṣaṁ su̍bhage̱ rarā̍ṇā || RV_2,032.05

sinī̍vāli̱ pṛthu̍ṣṭuke̱ yā de̱vānā̱m asi̱ svasā̍ |
ju̱ṣasva̍ ha̱vyam āhu̍tam pra̱jāṁ de̍vi didiḍḍhi naḥ || RV_2,032.06

yā su̍bā̱huḥ sva̍ṅgu̱riḥ su̱ṣūmā̍ bahu̱sūva̍rī |
tasyai̍ vi̱śpatnyai̍ ha̱viḥ si̍nīvā̱lyai ju̍hotana || RV_2,032.07

yā gu̱ṅgūr yā si̍nīvā̱lī yā rā̱kā yā sara̍svatī |
i̱ndrā̱ṇīm a̍hva ū̱taye̍ varuṇā̱nīṁ sva̱staye̍ || RV_2,032.08

ā te̍ pitar marutāṁ su̱mnam e̍tu̱ mā na̱ḥ sūrya̍sya sa̱ṁdṛśo̍ yuyothāḥ |
a̱bhi no̍ vī̱ro arva̍ti kṣameta̱ pra jā̍yemahi rudra pra̱jābhi̍ḥ || RV_2,033.01

tvāda̍ttebhī rudra̱ śaṁta̍mebhiḥ śa̱taṁ himā̍ aśīya bheṣa̱jebhi̍ḥ |
vy a1̱̍smad dveṣo̍ vita̱raṁ vy aṁho̱ vy amī̍vāś cātayasvā̱ viṣū̍cīḥ || RV_2,033.02

śreṣṭho̍ jā̱tasya̍ rudra śri̱yāsi̍ ta̱vasta̍mas ta̱vasā̍ṁ vajrabāho |
parṣi̍ ṇaḥ pā̱ram aṁha̍saḥ sva̱sti viśvā̍ a̱bhī̍tī̱ rapa̍so yuyodhi || RV_2,033.03

mā tvā̍ rudra cukrudhāmā̱ namo̍bhi̱r mā duṣṭu̍tī vṛṣabha̱ mā sahū̍tī |
un no̍ vī̱rām̐ a̍rpaya bheṣa̱jebhi̍r bhi̱ṣakta̍maṁ tvā bhi̱ṣajā̍ṁ śṛṇomi || RV_2,033.04

havī̍mabhi̱r hava̍te̱ yo ha̱virbhi̱r ava̱ stome̍bhī ru̱draṁ di̍ṣīya |
ṛ̱dū̱dara̍ḥ su̱havo̱ mā no̍ a̱syai ba̱bhruḥ su̱śipro̍ rīradhan ma̱nāyai̍ || RV_2,033.05

un mā̍ mamanda vṛṣa̱bho ma̱rutvā̱n tvakṣī̍yasā̱ vaya̍sā̱ nādha̍mānam |
ghṛṇī̍va cchā̱yām a̍ra̱pā a̍śī̱yā vi̍vāseyaṁ ru̱drasya̍ su̱mnam || RV_2,033.06

kva1̱̍ sya te̍ rudra mṛḻa̱yāku̱r hasto̱ yo asti̍ bheṣa̱jo jalā̍ṣaḥ |
a̱pa̱bha̱rtā rapa̍so̱ daivya̍syā̱bhī nu mā̍ vṛṣabha cakṣamīthāḥ || RV_2,033.07

pra ba̱bhrave̍ vṛṣa̱bhāya̍ śvitī̱ce ma̱ho ma̱hīṁ su̍ṣṭu̱tim ī̍rayāmi |
na̱ma̱syā ka̍lmalī̱kina̱ṁ namo̍bhir gṛṇī̱masi̍ tve̱ṣaṁ ru̱drasya̱ nāma̍ || RV_2,033.08

sthi̱rebhi̱r aṅgai̍ḥ puru̱rūpa̍ u̱gro ba̱bhruḥ śu̱krebhi̍ḥ pipiśe̱ hira̍ṇyaiḥ |
īśā̍nād a̱sya bhuva̍nasya̱ bhūre̱r na vā u̍ yoṣad ru̱drād a̍su̱rya̍m || RV_2,033.09

arha̍n bibharṣi̱ sāya̍kāni̱ dhanvārha̍n ni̱ṣkaṁ ya̍ja̱taṁ vi̱śvarū̍pam |
arha̍nn i̱daṁ da̍yase̱ viśva̱m abhva̱ṁ na vā ojī̍yo rudra̱ tvad a̍sti || RV_2,033.10

stu̱hi śru̱taṁ ga̍rta̱sada̱ṁ yuvā̍nam mṛ̱gaṁ na bhī̱mam u̍paha̱tnum u̱gram |
mṛ̱ḻā ja̍ri̱tre ru̍dra̱ stavā̍no̱ 'nyaṁ te̍ a̱sman ni va̍pantu̱ senā̍ḥ || RV_2,033.11

ku̱mā̱raś ci̍t pi̱tara̱ṁ vanda̍māna̱m prati̍ nānāma rudropa̱yanta̍m |
bhūre̍r dā̱tāra̱ṁ satpa̍tiṁ gṛṇīṣe stu̱tas tvam bhe̍ṣa̱jā rā̍sy a̱sme || RV_2,033.12

yā vo̍ bheṣa̱jā ma̍ruta̱ḥ śucī̍ni̱ yā śaṁta̍mā vṛṣaṇo̱ yā ma̍yo̱bhu |
yāni̱ manu̱r avṛ̍ṇītā pi̱tā na̱s tā śaṁ ca̱ yoś ca̍ ru̱drasya̍ vaśmi || RV_2,033.13

pari̍ ṇo he̱tī ru̱drasya̍ vṛjyā̱ḥ pari̍ tve̱ṣasya̍ durma̱tir ma̱hī gā̍t |
ava̍ sthi̱rā ma̱ghava̍dbhyas tanuṣva̱ mīḍhva̍s to̱kāya̱ tana̍yāya mṛḻa || RV_2,033.14

e̱vā ba̍bhro vṛṣabha cekitāna̱ yathā̍ deva̱ na hṛ̍ṇī̱ṣe na haṁsi̍ |
ha̱va̱na̱śrun no̍ rudre̱ha bo̍dhi bṛ̱had va̍dema vi̱dathe̍ su̱vīrā̍ḥ || RV_2,033.15

dhā̱rā̱va̱rā ma̱ruto̍ dhṛ̱ṣṇvo̍jaso mṛ̱gā na bhī̱mās tavi̍ṣībhir a̱rcina̍ḥ |
a̱gnayo̱ na śu̍śucā̱nā ṛ̍jī̱ṣiṇo̱ bhṛmi̱ṁ dhama̍nto̱ apa̱ gā a̍vṛṇvata || RV_2,034.01

dyāvo̱ na stṛbhi̍ś citayanta khā̱dino̱ vy a1̱̍bhriyā̱ na dyu̍tayanta vṛ̱ṣṭaya̍ḥ |
ru̱dro yad vo̍ maruto rukmavakṣaso̱ vṛṣāja̍ni̱ pṛśnyā̍ḥ śu̱kra ūdha̍ni || RV_2,034.02

u̱kṣante̱ aśvā̱m̐ atyā̍m̐ ivā̱jiṣu̍ na̱dasya̱ karṇai̍s turayanta ā̱śubhi̍ḥ |
hira̍ṇyaśiprā maruto̱ davi̍dhvataḥ pṛ̱kṣaṁ yā̍tha̱ pṛṣa̍tībhiḥ samanyavaḥ || RV_2,034.03

pṛ̱kṣe tā viśvā̱ bhuva̍nā vavakṣire mi̱trāya̍ vā̱ sada̱m ā jī̱radā̍navaḥ |
pṛṣa̍daśvāso anava̱bhrarā̍dhasa ṛji̱pyāso̱ na va̱yune̍ṣu dhū̱rṣada̍ḥ || RV_2,034.04

indha̍nvabhir dhe̱nubhī̍ ra̱pśadū̍dhabhir adhva̱smabhi̍ḥ pa̱thibhi̍r bhrājadṛṣṭayaḥ |
ā ha̱ṁsāso̱ na svasa̍rāṇi gantana̱ madho̱r madā̍ya marutaḥ samanyavaḥ || RV_2,034.05

ā no̱ brahmā̍ṇi marutaḥ samanyavo na̱rāṁ na śaṁsa̱ḥ sava̍nāni gantana |
aśvā̍m iva pipyata dhe̱num ūdha̍ni̱ kartā̱ dhiya̍ṁ jari̱tre vāja̍peśasam || RV_2,034.06

taṁ no̍ dāta maruto vā̱jina̱ṁ ratha̍ āpā̱nam brahma̍ ci̱taya̍d di̱ve-di̍ve |
iṣa̍ṁ sto̱tṛbhyo̍ vṛ̱jane̍ṣu kā̱rave̍ sa̱nim me̱dhām ari̍ṣṭaṁ du̱ṣṭara̱ṁ saha̍ḥ || RV_2,034.07

yad yu̱ñjate̍ ma̱ruto̍ ru̱kmava̍kṣa̱so 'śvā̱n rathe̍ṣu̱ bhaga̱ ā su̱dāna̍vaḥ |
dhe̱nur na śiśve̱ svasa̍reṣu pinvate̱ janā̍ya rā̱taha̍viṣe ma̱hīm iṣa̍m || RV_2,034.08

yo no̍ maruto vṛ̱katā̍ti̱ martyo̍ ri̱pur da̱dhe va̍savo̱ rakṣa̍tā ri̱ṣaḥ |
va̱rtaya̍ta̱ tapu̍ṣā ca̱kriyā̱bhi tam ava̍ rudrā a̱śaso̍ hantanā̱ vadha̍ḥ || RV_2,034.09

ci̱traṁ tad vo̍ maruto̱ yāma̍ cekite̱ pṛśnyā̱ yad ūdha̱r apy ā̱payo̍ du̱huḥ |
yad vā̍ ni̱de nava̍mānasya rudriyās tri̱taṁ jarā̍ya jura̱tām a̍dābhyāḥ || RV_2,034.10

tān vo̍ ma̱ho ma̱ruta̍ eva̱yāvno̱ viṣṇo̍r e̱ṣasya̍ prabhṛ̱the ha̍vāmahe |
hira̍ṇyavarṇān kaku̱hān ya̱tasru̍co brahma̱ṇyanta̱ḥ śaṁsya̱ṁ rādha̍ īmahe || RV_2,034.11

te daśa̍gvāḥ pratha̱mā ya̱jñam ū̍hire̱ te no̍ hinvantū̱ṣaso̱ vyu̍ṣṭiṣu |
u̱ṣā na rā̱mīr a̍ru̱ṇair apo̍rṇute ma̱ho jyoti̍ṣā śuca̱tā goa̍rṇasā || RV_2,034.12

te kṣo̱ṇībhi̍r aru̱ṇebhi̱r nāñjibhī̍ ru̱drā ṛ̱tasya̱ sada̍neṣu vāvṛdhuḥ |
ni̱megha̍mānā̱ atye̍na̱ pāja̍sā suśca̱ndraṁ varṇa̍ṁ dadhire su̱peśa̍sam || RV_2,034.13

tām̐ i̍yā̱no mahi̱ varū̍tham ū̱taya̱ upa̱ ghed e̱nā nama̍sā gṛṇīmasi |
tri̱to na yān pañca̱ hotṝ̍n a̱bhiṣṭa̍ya āva̱varta̱d ava̍rāñ ca̱kriyāva̍se || RV_2,034.14

yayā̍ ra̱dhram pā̱raya̱thāty aṁho̱ yayā̍ ni̱do mu̱ñcatha̍ vandi̱tāra̍m |
a̱rvācī̱ sā ma̍ruto̱ yā va̍ ū̱tir o ṣu vā̱śreva̍ suma̱tir ji̍gātu || RV_2,034.15

upe̍m asṛkṣi vāja̱yur va̍ca̱syāṁ cano̍ dadhīta nā̱dyo giro̍ me |
a̱pāṁ napā̍d āśu̱hemā̍ ku̱vit sa su̱peśa̍sas karati̱ joṣi̍ṣa̱d dhi || RV_2,035.01

i̱maṁ sv a̍smai hṛ̱da ā suta̍ṣṭa̱m mantra̍ṁ vocema ku̱vid a̍sya̱ veda̍t |
a̱pāṁ napā̍d asu̱rya̍sya ma̱hnā viśvā̍ny a̱ryo bhuva̍nā jajāna || RV_2,035.02

sam a̱nyā yanty upa̍ yanty a̱nyāḥ sa̍mā̱nam ū̱rvaṁ na̱dya̍ḥ pṛṇanti |
tam ū̱ śuci̱ṁ śuca̍yo dīdi̱vāṁsa̍m a̱pāṁ napā̍ta̱m pari̍ tasthu̱r āpa̍ḥ || RV_2,035.03

tam asme̍rā yuva̱tayo̱ yuvā̍nam marmṛ̱jyamā̍nā̱ḥ pari̍ ya̱nty āpa̍ḥ |
sa śu̱krebhi̱ḥ śikva̍bhī re̱vad a̱sme dī̱dāyā̍ni̱dhmo ghṛ̱tani̍rṇig a̱psu || RV_2,035.04

a̱smai ti̱sro a̍vya̱thyāya̱ nārī̍r de̱vāya̍ de̱vīr di̍dhiṣa̱nty anna̍m |
kṛtā̍ i̱vopa̱ hi pra̍sa̱rsre a̱psu sa pī̱yūṣa̍ṁ dhayati pūrva̱sūnā̍m || RV_2,035.05

aśva̱syātra̱ jani̍mā̱sya ca̱ sva̍r dru̱ho ri̱ṣaḥ sa̱mpṛca̍ḥ pāhi sū̱rīn |
ā̱māsu̍ pū̱rṣu pa̱ro a̍pramṛ̱ṣyaṁ nārā̍tayo̱ vi na̍śa̱n nānṛ̍tāni || RV_2,035.06

sva ā dame̍ su̱dughā̱ yasya̍ dhe̱nuḥ sva̱dhām pī̍pāya su̱bhv anna̍m atti |
so a̱pāṁ napā̍d ū̱rjaya̍nn a̱psv a1̱̍ntar va̍su̱deyā̍ya vidha̱te vi bhā̍ti || RV_2,035.07

yo a̱psv ā śuci̍nā̱ daivye̍na ṛ̱tāvāja̍sra urvi̱yā vi̱bhāti̍ |
va̱yā id a̱nyā bhuva̍nāny asya̱ pra jā̍yante vī̱rudha̍ś ca pra̱jābhi̍ḥ || RV_2,035.08

a̱pāṁ napā̱d ā hy asthā̍d u̱pastha̍ṁ ji̱hmānā̍m ū̱rdhvo vi̱dyuta̱ṁ vasā̍naḥ |
tasya̱ jyeṣṭha̍m mahi̱māna̱ṁ vaha̍ntī̱r hira̍ṇyavarṇā̱ḥ pari̍ yanti ya̱hvīḥ || RV_2,035.09

hira̍ṇyarūpa̱ḥ sa hira̍ṇyasaṁdṛg a̱pāṁ napā̱t sed u̱ hira̍ṇyavarṇaḥ |
hi̱ra̱ṇyayā̱t pari̱ yone̍r ni̱ṣadyā̍ hiraṇya̱dā da̍da̱ty anna̍m asmai || RV_2,035.10

tad a̱syānī̍kam u̱ta cāru̱ nāmā̍pī̱cya̍ṁ vardhate̱ naptu̍r a̱pām |
yam i̱ndhate̍ yuva̱taya̱ḥ sam i̱tthā hira̍ṇyavarṇaṁ ghṛ̱tam anna̍m asya || RV_2,035.11

a̱smai ba̍hū̱nām a̍va̱māya̱ sakhye̍ ya̱jñair vi̍dhema̱ nama̍sā ha̱virbhi̍ḥ |
saṁ sānu̱ mārjmi̱ didhi̍ṣāmi̱ bilmai̱r dadhā̱my annai̱ḥ pari̍ vanda ṛ̱gbhiḥ || RV_2,035.12

sa ī̱ṁ vṛṣā̍janaya̱t tāsu̱ garbha̱ṁ sa ī̱ṁ śiśu̍r dhayati̱ taṁ ri̍hanti |
so a̱pāṁ napā̱d ana̍bhimlātavarṇo̱ 'nyasye̍ve̱ha ta̱nvā̍ viveṣa || RV_2,035.13

a̱smin pa̱de pa̍ra̱me ta̍sthi̱vāṁsa̍m adhva̱smabhi̍r vi̱śvahā̍ dīdi̱vāṁsa̍m |
āpo̱ naptre̍ ghṛ̱tam anna̱ṁ vaha̍ntīḥ sva̱yam atkai̱ḥ pari̍ dīyanti ya̱hvīḥ || RV_2,035.14

ayā̍ṁsam agne sukṣi̱tiṁ janā̱yāyā̍ṁsam u ma̱ghava̍dbhyaḥ suvṛ̱ktim |
viśva̱ṁ tad bha̱draṁ yad ava̍nti de̱vā bṛ̱had va̍dema vi̱dathe̍ su̱vīrā̍ḥ || RV_2,035.15

tubhya̍ṁ hinvā̱no va̍siṣṭa̱ gā a̱po 'dhu̍kṣan sī̱m avi̍bhi̱r adri̍bhi̱r nara̍ḥ |
pibe̍ndra̱ svāhā̱ prahu̍ta̱ṁ vaṣa̍ṭkṛtaṁ ho̱trād ā soma̍m pratha̱mo ya īśi̍ṣe || RV_2,036.01

ya̱jñaiḥ sammi̍ślā̱ḥ pṛṣa̍tībhir ṛ̱ṣṭibhi̱r yāma̍ñ chu̱bhrāso̍ a̱ñjiṣu̍ pri̱yā u̱ta |
ā̱sadyā̍ ba̱rhir bha̍ratasya sūnavaḥ po̱trād ā soma̍m pibatā divo naraḥ || RV_2,036.02

a̱meva̍ naḥ suhavā̱ ā hi ganta̍na̱ ni ba̱rhiṣi̍ sadatanā̱ raṇi̍ṣṭana |
athā̍ mandasva jujuṣā̱ṇo andha̍sa̱s tvaṣṭa̍r de̱vebhi̱r jani̍bhiḥ su̱madga̍ṇaḥ || RV_2,036.03

ā va̍kṣi de̱vām̐ i̱ha vi̍pra̱ yakṣi̍ co̱śan ho̍ta̱r ni ṣa̍dā̱ yoni̍ṣu tri̱ṣu |
prati̍ vīhi̱ prasthi̍taṁ so̱myam madhu̱ pibāgnī̍dhrā̱t tava̍ bhā̱gasya̍ tṛpṇuhi || RV_2,036.04

e̱ṣa sya te̍ ta̱nvo̍ nṛmṇa̱vardha̍na̱ḥ saha̱ oja̍ḥ pra̱divi̍ bā̱hvor hi̱taḥ |
tubhya̍ṁ su̱to ma̍ghava̱n tubhya̱m ābhṛ̍ta̱s tvam a̍sya̱ brāhma̍ṇā̱d ā tṛ̱pat pi̍ba || RV_2,036.05

ju̱ṣethā̍ṁ ya̱jñam bodha̍ta̱ṁ hava̍sya me sa̱tto hotā̍ ni̱vida̍ḥ pū̱rvyā anu̍ |
acchā̱ rājā̍nā̱ nama̍ ety ā̱vṛta̍m praśā̱strād ā pi̍bataṁ so̱myam madhu̍ || RV_2,036.06

manda̍sva ho̱trād anu̱ joṣa̱m andha̱so 'dhva̍ryava̱ḥ sa pū̱rṇāṁ va̍ṣṭy ā̱sica̍m |
tasmā̍ e̱tam bha̍rata tadva̱śo da̱dir ho̱trāt soma̍ṁ draviṇoda̱ḥ piba̍ ṛ̱tubhi̍ḥ || RV_2,037.01

yam u̱ pūrva̱m ahu̍ve̱ tam i̱daṁ hu̍ve̱ sed u̱ havyo̍ da̱dir yo nāma̱ patya̍te |
a̱dhva̱ryubhi̱ḥ prasthi̍taṁ so̱myam madhu̍ po̱trāt soma̍ṁ draviṇoda̱ḥ piba̍ ṛ̱tubhi̍ḥ || RV_2,037.02

medya̍ntu te̱ vahna̍yo̱ yebhi̱r īya̱se 'ri̍ṣaṇyan vīḻayasvā vanaspate |
ā̱yūyā̍ dhṛṣṇo abhi̱gūryā̱ tvaṁ ne̱ṣṭrāt soma̍ṁ draviṇoda̱ḥ piba̍ ṛ̱tubhi̍ḥ || RV_2,037.03

apā̍d dho̱trād u̱ta po̱trād a̍matto̱ta ne̱ṣṭrād a̍juṣata̱ prayo̍ hi̱tam |
tu̱rīya̱m pātra̱m amṛ̍kta̱m ama̍rtyaṁ draviṇo̱dāḥ pi̍batu drāviṇoda̱saḥ || RV_2,037.04

a̱rvāñca̍m a̱dya ya̱yya̍ṁ nṛ̱vāha̍ṇa̱ṁ ratha̍ṁ yuñjāthām i̱ha vā̍ṁ vi̱moca̍nam |
pṛ̱ṅktaṁ ha̱vīṁṣi̱ madhu̱nā hi ka̍ṁ ga̱tam athā̱ soma̍m pibataṁ vājinīvasū || RV_2,037.05

joṣy a̍gne sa̱midha̱ṁ joṣy āhu̍ti̱ṁ joṣi̱ brahma̱ janya̱ṁ joṣi̍ suṣṭu̱tim |
viśve̍bhi̱r viśvā̍m̐ ṛ̱tunā̍ vaso ma̱ha u̱śan de̱vām̐ u̍śa̱taḥ pā̍yayā ha̱viḥ || RV_2,037.06

ud u̱ ṣya de̱vaḥ sa̍vi̱tā sa̱vāya̍ śaśvatta̱maṁ tada̍pā̱ vahni̍r asthāt |
nū̱naṁ de̱vebhyo̱ vi hi dhāti̱ ratna̱m athābha̍jad vī̱tiho̍traṁ sva̱stau || RV_2,038.01

viśva̍sya̱ hi śru̱ṣṭaye̍ de̱va ū̱rdhvaḥ pra bā̱havā̍ pṛ̱thupā̍ṇi̱ḥ sisa̍rti |
āpa̍ś cid asya vra̱ta ā nimṛ̍grā a̱yaṁ ci̱d vāto̍ ramate̱ pari̍jman || RV_2,038.02

ā̱śubhi̍ś ci̱d yān vi mu̍cāti nū̱nam arī̍rama̱d ata̍mānaṁ ci̱d eto̍ḥ |
a̱hyarṣū̍ṇāṁ ci̱n ny a̍yām̐ avi̱ṣyām anu̍ vra̱taṁ sa̍vi̱tur moky āgā̍t || RV_2,038.03

puna̱ḥ sam a̍vya̱d vita̍ta̱ṁ vaya̍ntī ma̱dhyā karto̱r ny a̍dhā̱c chakma̱ dhīra̍ḥ |
ut sa̱ṁhāyā̍sthā̱d vy ṛ1̱̍tūm̐r a̍dardhar a̱rama̍tiḥ savi̱tā de̱va āgā̍t || RV_2,038.04

nānaukā̍ṁsi̱ duryo̱ viśva̱m āyu̱r vi ti̍ṣṭhate prabha̱vaḥ śoko̍ a̱gneḥ |
jyeṣṭha̍m mā̱tā sū̱nave̍ bhā̱gam ādhā̱d anv a̍sya̱ keta̍m iṣi̱taṁ sa̍vi̱trā || RV_2,038.05

sa̱māva̍varti̱ viṣṭhi̍to jigī̱ṣur viśve̍ṣā̱ṁ kāma̱ś cara̍tām a̱mābhū̍t |
śaśvā̱m̐ apo̱ vikṛ̍taṁ hi̱tvy āgā̱d anu̍ vra̱taṁ sa̍vi̱tur daivya̍sya || RV_2,038.06

tvayā̍ hi̱tam apya̍m a̱psu bhā̱gaṁ dhanvānv ā mṛ̍ga̱yaso̱ vi ta̍sthuḥ |
vanā̍ni̱ vibhyo̱ naki̍r asya̱ tāni̍ vra̱tā de̱vasya̍ savi̱tur mi̍nanti || RV_2,038.07

yā̱drā̱dhya1̱̍ṁ varu̍ṇo̱ yoni̱m apya̱m ani̍śitaṁ ni̱miṣi̱ jarbhu̍rāṇaḥ |
viśvo̍ mārtā̱ṇḍo vra̱jam ā pa̱śur gā̍t stha̱śo janmā̍ni savi̱tā vy āka̍ḥ || RV_2,038.08

na yasyendro̱ varu̍ṇo̱ na mi̱tro vra̱tam a̍rya̱mā na mi̱nanti̍ ru̱draḥ |
nārā̍taya̱s tam i̱daṁ sva̱sti hu̱ve de̱vaṁ sa̍vi̱tāra̱ṁ namo̍bhiḥ || RV_2,038.09

bhaga̱ṁ dhiya̍ṁ vā̱jaya̍nta̱ḥ pura̍ṁdhi̱ṁ narā̱śaṁso̱ gnāspati̍r no avyāḥ |
ā̱ye vā̱masya̍ saṁga̱the ra̍yī̱ṇām pri̱yā de̱vasya̍ savi̱tuḥ syā̍ma || RV_2,038.10

a̱smabhya̱ṁ tad di̱vo a̱dbhyaḥ pṛ̍thi̱vyās tvayā̍ da̱ttaṁ kāmya̱ṁ rādha̱ ā gā̍t |
śaṁ yat sto̱tṛbhya̍ ā̱paye̱ bhavā̍ty uru̱śaṁsā̍ya savitar jari̱tre || RV_2,038.11

grāvā̍ṇeva̱ tad id artha̍ṁ jarethe̱ gṛdhre̍va vṛ̱kṣaṁ ni̍dhi̱manta̱m accha̍ |
bra̱hmāṇe̍va vi̱datha̍ uktha̱śāsā̍ dū̱teva̱ havyā̱ janyā̍ puru̱trā || RV_2,039.01

prā̱ta̱ryāvā̍ṇā ra̱thye̍va vī̱rājeva̍ ya̱mā vara̱m ā sa̍cethe |
mene̍ iva ta̱nvā̱3̱̍ śumbha̍māne̱ dampa̍tīva kratu̱vidā̱ jane̍ṣu || RV_2,039.02

śṛṅge̍va naḥ pratha̱mā ga̍ntam a̱rvāk cha̱phāv i̍va̱ jarbhu̍rāṇā̱ taro̍bhiḥ |
ca̱kra̱vā̱keva̱ prati̱ vasto̍r usrā̱rvāñcā̍ yātaṁ ra̱thye̍va śakrā || RV_2,039.03

nā̱veva̍ naḥ pārayataṁ yu̱geva̱ nabhye̍va na upa̱dhīva̍ pra̱dhīva̍ |
śvāne̍va no̱ ari̍ṣaṇyā ta̱nūnā̱ṁ khṛga̍leva vi̱srasa̍ḥ pātam a̱smān || RV_2,039.04

vāte̍vāju̱ryā na̱dye̍va rī̱tir a̱kṣī i̍va̱ cakṣu̱ṣā yā̍tam a̱rvāk |
hastā̍v iva ta̱nve̱3̱̍ śambha̍viṣṭhā̱ pāde̍va no nayata̱ṁ vasyo̱ accha̍ || RV_2,039.05

oṣṭhā̍v iva̱ madhv ā̱sne vada̍ntā̱ stanā̍v iva pipyataṁ jī̱vase̍ naḥ |
nāse̍va nas ta̱nvo̍ rakṣi̱tārā̱ karṇā̍v iva su̱śrutā̍ bhūtam a̱sme || RV_2,039.06

haste̍va śa̱ktim a̱bhi sa̍ṁda̱dī na̱ḥ kṣāme̍va na̱ḥ sam a̍jata̱ṁ rajā̍ṁsi |
i̱mā giro̍ aśvinā yuṣma̱yantī̱ḥ kṣṇotre̍ṇeva̱ svadhi̍ti̱ṁ saṁ śi̍śītam || RV_2,039.07

e̱tāni̍ vām aśvinā̱ vardha̍nāni̱ brahma̱ stoma̍ṁ gṛtsama̱dāso̍ akran |
tāni̍ narā jujuṣā̱ṇopa̍ yātam bṛ̱had va̍dema vi̱dathe̍ su̱vīrā̍ḥ || RV_2,039.08

somā̍pūṣaṇā̱ jana̍nā rayī̱ṇāṁ jana̍nā di̱vo jana̍nā pṛthi̱vyāḥ |
jā̱tau viśva̍sya̱ bhuva̍nasya go̱pau de̱vā a̍kṛṇvann a̱mṛta̍sya̱ nābhi̍m || RV_2,040.01

i̱mau de̱vau jāya̍mānau juṣante̱mau tamā̍ṁsi gūhatā̱m aju̍ṣṭā |
ā̱bhyām indra̍ḥ pa̱kvam ā̱māsv a̱ntaḥ so̍māpū̱ṣabhyā̍ṁ janad u̱sriyā̍su || RV_2,040.02

somā̍pūṣaṇā̱ raja̍so vi̱māna̍ṁ sa̱ptaca̍kra̱ṁ ratha̱m avi̍śvaminvam |
vi̱ṣū̱vṛta̱m mana̍sā yu̱jyamā̍na̱ṁ taṁ ji̍nvatho vṛṣaṇā̱ pañca̍raśmim || RV_2,040.03

di̱vy a1̱̍nyaḥ sada̍naṁ ca̱kra u̱ccā pṛ̍thi̱vyām a̱nyo adhy a̱ntari̍kṣe |
tāv a̱smabhya̍m puru̱vāra̍m puru̱kṣuṁ rā̱yas poṣa̱ṁ vi ṣya̍tā̱ṁ nābhi̍m a̱sme || RV_2,040.04

viśvā̍ny a̱nyo bhuva̍nā ja̱jāna̱ viśva̍m a̱nyo a̍bhi̱cakṣā̍ṇa eti |
somā̍pūṣaṇā̱v ava̍ta̱ṁ dhiya̍m me yu̱vābhyā̱ṁ viśvā̱ḥ pṛta̍nā jayema || RV_2,040.05

dhiya̍m pū̱ṣā ji̍nvatu viśvami̱nvo ra̱yiṁ somo̍ rayi̱pati̍r dadhātu |
ava̍tu de̱vy adi̍tir ana̱rvā bṛ̱had va̍dema vi̱dathe̍ su̱vīrā̍ḥ || RV_2,040.06

vāyo̱ ye te̍ saha̱sriṇo̱ rathā̍sa̱s tebhi̱r ā ga̍hi |
ni̱yutvā̱n soma̍pītaye || RV_2,041.01

ni̱yutvā̍n vāya̱v ā ga̍hy a̱yaṁ śu̱kro a̍yāmi te |
gantā̍si sunva̱to gṛ̱ham || RV_2,041.02

śu̱krasyā̱dya gavā̍śira̱ indra̍vāyū ni̱yutva̍taḥ |
ā yā̍ta̱m piba̍taṁ narā || RV_2,041.03

a̱yaṁ vā̍m mitrāvaruṇā su̱taḥ soma̍ ṛtāvṛdhā |
mamed i̱ha śru̍ta̱ṁ hava̍m || RV_2,041.04

rājā̍nā̱v ana̍bhidruhā dhru̱ve sada̍sy utta̱me |
sa̱hasra̍sthūṇa āsāte || RV_2,041.05

tā sa̱mrājā̍ ghṛ̱tāsu̍tī ādi̱tyā dānu̍na̱s patī̍ |
sace̍te̱ ana̍vahvaram || RV_2,041.06

goma̍d ū̱ ṣu nā̍sa̱tyāśvā̍vad yātam aśvinā |
va̱rtī ru̍drā nṛ̱pāyya̍m || RV_2,041.07

na yat paro̱ nānta̍ra āda̱dharṣa̍d vṛṣaṇvasū |
du̱ḥśaṁso̱ martyo̍ ri̱puḥ || RV_2,041.08

tā na̱ ā vo̍ḻham aśvinā ra̱yim pi̱śaṅga̍saṁdṛśam |
dhiṣṇyā̍ varivo̱vida̍m || RV_2,041.09

indro̍ a̱ṅga ma̱had bha̱yam a̱bhī ṣad apa̍ cucyavat |
sa hi sthi̱ro vica̍rṣaṇiḥ || RV_2,041.10

indra̍ś ca mṛ̱ḻayā̍ti no̱ na na̍ḥ pa̱ścād a̱ghaṁ na̍śat |
bha̱dram bha̍vāti naḥ pu̱raḥ || RV_2,041.11

indra̱ āśā̍bhya̱s pari̱ sarvā̍bhyo̱ abha̍yaṁ karat |
jetā̱ śatrū̱n vica̍rṣaṇiḥ || RV_2,041.12

viśve̍ devāsa̱ ā ga̍ta śṛṇu̱tā ma̍ i̱maṁ hava̍m |
edam ba̱rhir ni ṣī̍data || RV_2,041.13

tī̱vro vo̱ madhu̍mām̐ a̱yaṁ śu̱naho̍treṣu matsa̱raḥ |
e̱tam pi̍bata̱ kāmya̍m || RV_2,041.14

indra̍jyeṣṭhā̱ maru̍dgaṇā̱ devā̍sa̱ḥ pūṣa̍rātayaḥ |
viśve̱ mama̍ śrutā̱ hava̍m || RV_2,041.15

ambi̍tame̱ nadī̍tame̱ devi̍tame̱ sara̍svati |
a̱pra̱śa̱stā i̍va smasi̱ praśa̍stim amba nas kṛdhi || RV_2,041.16

tve viśvā̍ sarasvati śri̱tāyū̍ṁṣi de̱vyām |
śu̱naho̍treṣu matsva pra̱jāṁ de̍vi didiḍḍhi naḥ || RV_2,041.17

i̱mā brahma̍ sarasvati ju̱ṣasva̍ vājinīvati |
yā te̱ manma̍ gṛtsama̱dā ṛ̍tāvari pri̱yā de̱veṣu̱ juhva̍ti || RV_2,041.18

pretā̍ṁ ya̱jñasya̍ śa̱mbhuvā̍ yu̱vām id ā vṛ̍ṇīmahe |
a̱gniṁ ca̍ havya̱vāha̍nam || RV_2,041.19

dyāvā̍ naḥ pṛthi̱vī i̱maṁ si̱dhram a̱dya di̍vi̱spṛśa̍m |
ya̱jñaṁ de̱veṣu̍ yacchatām || RV_2,041.20

ā vā̍m u̱pastha̍m adruhā de̱vāḥ sī̍dantu ya̱jñiyā̍ḥ |
i̱hādya soma̍pītaye || RV_2,041.21

kani̍kradaj ja̱nuṣa̍m prabruvā̱ṇa iya̍rti̱ vāca̍m ari̱teva̱ nāva̍m |
su̱ma̱ṅgala̍ś ca śakune̱ bhavā̍si̱ mā tvā̱ kā ci̍d abhi̱bhā viśvyā̍ vidat || RV_2,042.01

mā tvā̍ śye̱na ud va̍dhī̱n mā su̍pa̱rṇo mā tvā̍ vida̱d iṣu̍mān vī̱ro astā̍ |
pitryā̱m anu̍ pra̱diśa̱ṁ kani̍kradat suma̱ṅgalo̍ bhadravā̱dī va̍de̱ha || RV_2,042.02

ava̍ kranda dakṣiṇa̱to gṛ̱hāṇā̍ṁ suma̱ṅgalo̍ bhadravā̱dī śa̍kunte |
mā na̍ḥ ste̱na ī̍śata̱ māghaśa̍ṁso bṛ̱had va̍dema vi̱dathe̍ su̱vīrā̍ḥ || RV_2,042.03

pra̱da̱kṣi̱ṇid a̱bhi gṛ̍ṇanti kā̱ravo̱ vayo̱ vada̍nta ṛtu̱thā śa̱kunta̍yaḥ |
u̱bhe vācau̍ vadati sāma̱gā i̍va gāya̱traṁ ca̱ traiṣṭu̍bha̱ṁ cānu̍ rājati || RV_2,043.01

u̱dgā̱teva̍ śakune̱ sāma̍ gāyasi brahmapu̱tra i̍va̱ sava̍neṣu śaṁsasi |
vṛṣe̍va vā̱jī śiśu̍matīr a̱pītyā̍ sa̱rvato̍ naḥ śakune bha̱dram ā va̍da vi̱śvato̍ naḥ śakune̱ puṇya̱m ā va̍da || RV_2,043.02

ā̱vada̱m̐s tvaṁ śa̍kune bha̱dram ā va̍da tū̱ṣṇīm āsī̍naḥ suma̱tiṁ ci̍kiddhi naḥ |
yad u̱tpata̱n vada̍si karka̱rir ya̍thā bṛ̱had va̍dema vi̱dathe̍ su̱vīrā̍ḥ || RV_2,043.03

Maṇḍala 3

soma̍sya mā ta̱vasa̱ṁ vakṣy a̍gne̱ vahni̍ṁ cakartha vi̱dathe̱ yaja̍dhyai |
de̱vām̐ acchā̱ dīdya̍d yu̱ñje adri̍ṁ śamā̱ye a̍gne ta̱nva̍ṁ juṣasva || RV_3,001.01

prāñca̍ṁ ya̱jñaṁ ca̍kṛma̱ vardha̍tā̱ṁ gīḥ sa̱midbhi̍r a̱gniṁ nama̍sā duvasyan |
di̱vaḥ śa̍śāsur vi̱dathā̍ kavī̱nāṁ gṛtsā̍ya cit ta̱vase̍ gā̱tum ī̍ṣuḥ || RV_3,001.02

mayo̍ dadhe̱ medhi̍raḥ pū̱tada̍kṣo di̱vaḥ su̱bandhu̍r ja̱nuṣā̍ pṛthi̱vyāḥ |
avi̍ndann u darśa̱tam a̱psv a1̱̍ntar de̱vāso̍ a̱gnim a̱pasi̱ svasṝ̍ṇām || RV_3,001.03

ava̍rdhayan su̱bhaga̍ṁ sa̱pta ya̱hvīḥ śve̱taṁ ja̍jñā̱nam a̍ru̱ṣam ma̍hi̱tvā |
śiśu̱ṁ na jā̱tam a̱bhy ā̍ru̱r aśvā̍ de̱vāso̍ a̱gniṁ jani̍man vapuṣyan || RV_3,001.04

śu̱krebhi̱r aṅgai̱ raja̍ ātata̱nvān kratu̍m punā̱naḥ ka̱vibhi̍ḥ pa̱vitrai̍ḥ |
śo̱cir vasā̍na̱ḥ pary āyu̍r a̱pāṁ śriyo̍ mimīte bṛha̱tīr anū̍nāḥ || RV_3,001.05

va̱vrājā̍ sī̱m ana̍datī̱r ada̍bdhā di̱vo ya̱hvīr ava̍sānā̱ ana̍gnāḥ |
sanā̱ atra̍ yuva̱taya̱ḥ sayo̍nī̱r eka̱ṁ garbha̍ṁ dadhire sa̱pta vāṇī̍ḥ || RV_3,001.06

stī̱rṇā a̍sya sa̱ṁhato̍ vi̱śvarū̍pā ghṛ̱tasya̱ yonau̍ sra̱vathe̱ madhū̍nām |
asthu̱r atra̍ dhe̱nava̱ḥ pinva̍mānā ma̱hī da̱smasya̍ mā̱tarā̍ samī̱cī || RV_3,001.07

ba̱bhrā̱ṇaḥ sū̍no sahaso̱ vy a̍dyau̱d dadhā̍naḥ śu̱krā ra̍bha̱sā vapū̍ṁṣi |
ścota̍nti̱ dhārā̱ madhu̍no ghṛ̱tasya̱ vṛṣā̱ yatra̍ vāvṛ̱dhe kāvye̍na || RV_3,001.08

pi̱tuś ci̱d ūdha̍r ja̱nuṣā̍ viveda̱ vy a̍sya̱ dhārā̍ asṛja̱d vi dhenā̍ḥ |
guhā̱ cara̍nta̱ṁ sakhi̍bhiḥ śi̱vebhi̍r di̱vo ya̱hvībhi̱r na guhā̍ babhūva || RV_3,001.09

pi̱tuś ca̱ garbha̍ṁ jani̱tuś ca̍ babhre pū̱rvīr eko̍ adhaya̱t pīpyā̍nāḥ |
vṛṣṇe̍ sa̱patnī̱ śuca̍ye̱ saba̍ndhū u̱bhe a̍smai manu̱ṣye̱3̱̍ ni pā̍hi || RV_3,001.10

u̱rau ma̱hām̐ a̍nibā̱dhe va̍va̱rdhāpo̍ a̱gniṁ ya̱śasa̱ḥ saṁ hi pū̱rvīḥ |
ṛ̱tasya̱ yonā̍v aśaya̱d damū̍nā jāmī̱nām a̱gnir a̱pasi̱ svasṝ̍ṇām || RV_3,001.11

a̱kro na ba̱bhriḥ sa̍mi̱the ma̱hīnā̍ṁ didṛ̱kṣeya̍ḥ sū̱nave̱ bhāṛ̍jīkaḥ |
ud u̱sriyā̱ jani̍tā̱ yo ja̱jānā̱pāṁ garbho̱ nṛta̍mo ya̱hvo a̱gniḥ || RV_3,001.12

a̱pāṁ garbha̍ṁ darśa̱tam oṣa̍dhīnā̱ṁ vanā̍ jajāna su̱bhagā̱ virū̍pam |
de̱vāsa̍ś ci̱n mana̍sā̱ saṁ hi ja̱gmuḥ pani̍ṣṭhaṁ jā̱taṁ ta̱vasa̍ṁ duvasyan || RV_3,001.13

bṛ̱hanta̱ id bhā̱navo̱ bhāṛ̍jīkam a̱gniṁ sa̍canta vi̱dyuto̱ na śu̱krāḥ |
guhe̍va vṛ̱ddhaṁ sada̍si̱ sve a̱ntar a̍pā̱ra ū̱rve a̱mṛta̱ṁ duhā̍nāḥ || RV_3,001.14

īḻe̍ ca tvā̱ yaja̍māno ha̱virbhi̱r īḻe̍ sakhi̱tvaṁ su̍ma̱tiṁ nikā̍maḥ |
de̱vair avo̍ mimīhi̱ saṁ ja̍ri̱tre rakṣā̍ ca no̱ damye̍bhi̱r anī̍kaiḥ || RV_3,001.15

u̱pa̱kṣe̱tāra̱s tava̍ supraṇī̱te 'gne̱ viśvā̍ni̱ dhanyā̱ dadhā̍nāḥ |
su̱reta̍sā̱ śrava̍sā̱ tuñja̍mānā a̱bhi ṣyā̍ma pṛtanā̱yūm̐r ade̍vān || RV_3,001.16

ā de̱vānā̍m abhavaḥ ke̱tur a̍gne ma̱ndro viśvā̍ni̱ kāvyā̍ni vi̱dvān |
prati̱ martā̍m̐ avāsayo̱ damū̍nā̱ anu̍ de̱vān ra̍thi̱ro yā̍si̱ sādha̍n || RV_3,001.17

ni du̍ro̱ṇe a̱mṛto̱ martyā̍nā̱ṁ rājā̍ sasāda vi̱dathā̍ni̱ sādha̍n |
ghṛ̱tapra̍tīka urvi̱yā vy a̍dyaud a̱gnir viśvā̍ni̱ kāvyā̍ni vi̱dvān || RV_3,001.18

ā no̍ gahi sa̱khyebhi̍ḥ śi̱vebhi̍r ma̱hān ma̱hībhi̍r ū̱tibhi̍ḥ sara̱ṇyan |
a̱sme ra̱yim ba̍hu̱laṁ saṁta̍rutraṁ su̱vāca̍m bhā̱gaṁ ya̱śasa̍ṁ kṛdhī naḥ || RV_3,001.19

e̱tā te̍ agne̱ jani̍mā̱ sanā̍ni̱ pra pū̱rvyāya̱ nūta̍nāni vocam |
ma̱hānti̱ vṛṣṇe̱ sava̍nā kṛ̱temā janma̍ñ-janma̱n nihi̍to jā̱tave̍dāḥ || RV_3,001.20

janma̍ñ-janma̱n nihi̍to jā̱tave̍dā vi̱śvāmi̍trebhir idhyate̱ aja̍sraḥ |
tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma || RV_3,001.21

i̱maṁ ya̱jñaṁ sa̍hasāva̱n tvaṁ no̍ deva̱trā dhe̍hi sukrato̱ rarā̍ṇaḥ |
pra ya̍ṁsi hotar bṛha̱tīr iṣo̱ no 'gne̱ mahi̱ dravi̍ṇa̱m ā ya̍jasva || RV_3,001.22

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,001.23

vai̱śvā̱na̱rāya̍ dhi̱ṣaṇā̍m ṛtā̱vṛdhe̍ ghṛ̱taṁ na pū̱tam a̱gnaye̍ janāmasi |
dvi̱tā hotā̍ra̱m manu̍ṣaś ca vā̱ghato̍ dhi̱yā ratha̱ṁ na kuli̍śa̱ḥ sam ṛ̍ṇvati || RV_3,002.01

sa ro̍cayaj ja̱nuṣā̱ roda̍sī u̱bhe sa mā̱tror a̍bhavat pu̱tra īḍya̍ḥ |
ha̱vya̱vāḻ a̱gnir a̱jara̱ś cano̍hito dū̱ḻabho̍ vi̱śām ati̍thir vi̱bhāva̍suḥ || RV_3,002.02

kratvā̱ dakṣa̍sya̱ taru̍ṣo̱ vidha̍rmaṇi de̱vāso̍ a̱gniṁ ja̍nayanta̱ citti̍bhiḥ |
ru̱ru̱cā̱nam bhā̱nunā̱ jyoti̍ṣā ma̱hām atya̱ṁ na vāja̍ṁ sani̱ṣyann upa̍ bruve || RV_3,002.03

ā ma̱ndrasya̍ sani̱ṣyanto̱ vare̍ṇyaṁ vṛṇī̱mahe̱ ahra̍ya̱ṁ vāja̍m ṛ̱gmiya̍m |
rā̱tim bhṛgū̍ṇām u̱śija̍ṁ ka̱vikra̍tum a̱gniṁ rāja̍ntaṁ di̱vyena̍ śo̱ciṣā̍ || RV_3,002.04

a̱gniṁ su̱mnāya̍ dadhire pu̱ro janā̱ vāja̍śravasam i̱ha vṛ̱ktaba̍rhiṣaḥ |
ya̱tasru̍caḥ su̱ruca̍ṁ vi̱śvade̍vyaṁ ru̱draṁ ya̱jñānā̱ṁ sādha̍diṣṭim a̱pasā̍m || RV_3,002.05

pāva̍kaśoce̱ tava̱ hi kṣaya̱m pari̱ hota̍r ya̱jñeṣu̍ vṛ̱ktaba̍rhiṣo̱ nara̍ḥ |
agne̱ duva̍ i̱cchamā̍nāsa̱ āpya̱m upā̍sate̱ dravi̍ṇaṁ dhehi̱ tebhya̍ḥ || RV_3,002.06

ā roda̍sī apṛṇa̱d ā sva̍r ma̱haj jā̱taṁ yad e̍nam a̱paso̱ adhā̍rayan |
so a̍dhva̱rāya̱ pari̍ ṇīyate ka̱vir atyo̱ na vāja̍sātaye̱ cano̍hitaḥ || RV_3,002.07

na̱ma̱syata̍ ha̱vyadā̍tiṁ svadhva̱raṁ du̍va̱syata̱ damya̍ṁ jā̱tave̍dasam |
ra̱thīr ṛ̱tasya̍ bṛha̱to vica̍rṣaṇir a̱gnir de̱vānā̍m abhavat pu̱rohi̍taḥ || RV_3,002.08

ti̱sro ya̱hvasya̍ sa̱midha̱ḥ pari̍jmano̱ 'gner a̍punann u̱śijo̱ amṛ̍tyavaḥ |
tāsā̱m ekā̱m ada̍dhu̱r martye̱ bhuja̍m u lo̱kam u̱ dve upa̍ jā̱mim ī̍yatuḥ || RV_3,002.09

vi̱śāṁ ka̱viṁ vi̱śpati̱m mānu̍ṣī̱r iṣa̱ḥ saṁ sī̍m akṛṇva̱n svadhi̍ti̱ṁ na teja̍se |
sa u̱dvato̍ ni̱vato̍ yāti̱ vevi̍ṣa̱t sa garbha̍m e̱ṣu bhuva̍neṣu dīdharat || RV_3,002.10

sa ji̍nvate ja̱ṭhare̍ṣu prajajñi̱vān vṛṣā̍ ci̱treṣu̱ nāna̍da̱n na si̱ṁhaḥ |
vai̱śvā̱na̱raḥ pṛ̍thu̱pājā̱ ama̍rtyo̱ vasu̱ ratnā̱ daya̍māno̱ vi dā̱śuṣe̍ || RV_3,002.11

vai̱śvā̱na̱raḥ pra̱tnathā̱ nāka̱m āru̍had di̱vas pṛ̱ṣṭham bhanda̍mānaḥ su̱manma̍bhiḥ |
sa pū̍rva̱vaj ja̱naya̍ñ ja̱ntave̱ dhana̍ṁ samā̱nam ajma̱m pary e̍ti̱ jāgṛ̍viḥ || RV_3,002.12

ṛ̱tāvā̍naṁ ya̱jñiya̱ṁ vipra̍m u̱kthya1̱̍m ā yaṁ da̱dhe mā̍ta̱riśvā̍ di̱vi kṣaya̍m |
taṁ ci̱trayā̍ma̱ṁ hari̍keśam īmahe sudī̱tim a̱gniṁ su̍vi̱tāya̱ navya̍se || RV_3,002.13

śuci̱ṁ na yāma̍nn iṣi̱raṁ sva̱rdṛśa̍ṁ ke̱tuṁ di̱vo ro̍cana̱sthām u̍ṣa̱rbudha̍m |
a̱gnim mū̱rdhāna̍ṁ di̱vo apra̍tiṣkuta̱ṁ tam ī̍mahe̱ nama̍sā vā̱jina̍m bṛ̱hat || RV_3,002.14

ma̱ndraṁ hotā̍ra̱ṁ śuci̱m adva̍yāvina̱ṁ damū̍nasam u̱kthya̍ṁ vi̱śvaca̍rṣaṇim |
ratha̱ṁ na ci̱traṁ vapu̍ṣāya darśa̱tam manu̍rhita̱ṁ sada̱m id rā̱ya ī̍mahe || RV_3,002.15

vai̱śvā̱na̱rāya̍ pṛthu̱pāja̍se̱ vipo̱ ratnā̍ vidhanta dha̱ruṇe̍ṣu̱ gāta̍ve |
a̱gnir hi de̱vām̐ a̱mṛto̍ duva̱syaty athā̱ dharmā̍ṇi sa̱natā̱ na dū̍duṣat || RV_3,003.01

a̱ntar dū̱to roda̍sī da̱sma ī̍yate̱ hotā̱ niṣa̍tto̱ manu̍ṣaḥ pu̱rohi̍taḥ |
kṣaya̍m bṛ̱hanta̱m pari̍ bhūṣati̱ dyubhi̍r de̱vebhi̍r a̱gnir i̍ṣi̱to dhi̱yāva̍suḥ || RV_3,003.02

ke̱tuṁ ya̱jñānā̍ṁ vi̱datha̍sya̱ sādha̍na̱ṁ viprā̍so a̱gnim ma̍hayanta̱ citti̍bhiḥ |
apā̍ṁsi̱ yasmi̱nn adhi̍ saṁda̱dhur gira̱s tasmi̍n su̱mnāni̱ yaja̍māna̱ ā ca̍ke || RV_3,003.03

pi̱tā ya̱jñānā̱m asu̍ro vipa̱ścitā̍ṁ vi̱māna̍m a̱gnir va̱yuna̍ṁ ca vā̱ghatā̍m |
ā vi̍veśa̱ roda̍sī̱ bhūri̍varpasā purupri̱yo bha̍ndate̱ dhāma̍bhiḥ ka̱viḥ || RV_3,003.04

ca̱ndram a̱gniṁ ca̱ndrara̍tha̱ṁ hari̍vrataṁ vaiśvāna̱ram a̍psu̱ṣada̍ṁ sva̱rvida̍m |
vi̱gā̱haṁ tūrṇi̱ṁ tavi̍ṣībhi̱r āvṛ̍ta̱m bhūrṇi̍ṁ de̱vāsa̍ i̱ha su̱śriya̍ṁ dadhuḥ || RV_3,003.05

a̱gnir de̱vebhi̱r manu̍ṣaś ca ja̱ntubhi̍s tanvā̱no ya̱jñam pu̍ru̱peśa̍saṁ dhi̱yā |
ra̱thīr a̱ntar ī̍yate̱ sādha̍diṣṭibhir jī̱ro damū̍nā abhiśasti̱cāta̍naḥ || RV_3,003.06

agne̱ jara̍sva svapa̱tya āyu̍ny ū̱rjā pi̍nvasva̱ sam iṣo̍ didīhi naḥ |
vayā̍ṁsi jinva bṛha̱taś ca̍ jāgṛva u̱śig de̱vānā̱m asi̍ su̱kratu̍r vi̱pām || RV_3,003.07

vi̱śpati̍ṁ ya̱hvam ati̍thi̱ṁ nara̱ḥ sadā̍ ya̱ntāra̍ṁ dhī̱nām u̱śija̍ṁ ca vā̱ghatā̍m |
a̱dhva̱rāṇā̱ṁ ceta̍naṁ jā̱tave̍dasa̱m pra śa̍ṁsanti̱ nama̍sā jū̱tibhi̍r vṛ̱dhe || RV_3,003.08

vi̱bhāvā̍ de̱vaḥ su̱raṇa̱ḥ pari̍ kṣi̱tīr a̱gnir ba̍bhūva̱ śava̍sā su̱madra̍thaḥ |
tasya̍ vra̱tāni̍ bhūripo̱ṣiṇo̍ va̱yam upa̍ bhūṣema̱ dama̱ ā su̍vṛ̱ktibhi̍ḥ || RV_3,003.09

vaiśvā̍nara̱ tava̱ dhāmā̱ny ā ca̍ke̱ yebhi̍ḥ sva̱rvid abha̍vo vicakṣaṇa |
jā̱ta āpṛ̍ṇo̱ bhuva̍nāni̱ roda̍sī̱ agne̱ tā viśvā̍ pari̱bhūr a̍si̱ tmanā̍ || RV_3,003.10

vai̱śvā̱na̱rasya̍ da̱ṁsanā̍bhyo bṛ̱had ari̍ṇā̱d eka̍ḥ svapa̱syayā̍ ka̱viḥ |
u̱bhā pi̱tarā̍ ma̱haya̍nn ajāyatā̱gnir dyāvā̍pṛthi̱vī bhūri̍retasā || RV_3,003.11

sa̱mit-sa̍mit su̱manā̍ bodhy a̱sme śu̱cā-śu̍cā suma̱tiṁ rā̍si̱ vasva̍ḥ |
ā de̍va de̱vān ya̱jathā̍ya vakṣi̱ sakhā̱ sakhī̍n su̱manā̍ yakṣy agne || RV_3,004.01

yaṁ de̱vāsa̱s trir aha̍nn ā̱yaja̍nte di̱ve-di̍ve̱ varu̍ṇo mi̱tro a̱gniḥ |
semaṁ ya̱jñam madhu̍mantaṁ kṛdhī na̱s tanū̍napād ghṛ̱tayo̍niṁ vi̱dhanta̍m || RV_3,004.02

pra dīdhi̍tir vi̱śvavā̍rā jigāti̱ hotā̍ram i̱ḻaḥ pra̍tha̱maṁ yaja̍dhyai |
acchā̱ namo̍bhir vṛṣa̱bhaṁ va̱ndadhyai̱ sa de̱vān ya̍kṣad iṣi̱to yajī̍yān || RV_3,004.03

ū̱rdhvo vā̍ṁ gā̱tur a̍dhva̱re a̍kāry ū̱rdhvā śo̱cīṁṣi̱ prasthi̍tā̱ rajā̍ṁsi |
di̱vo vā̱ nābhā̱ ny a̍sādi̱ hotā̍ stṛṇī̱mahi̍ de̱vavya̍cā̱ vi ba̱rhiḥ || RV_3,004.04

sa̱pta ho̱trāṇi̱ mana̍sā vṛṇā̱nā inva̍nto̱ viśva̱m prati̍ yann ṛ̱tena̍ |
nṛ̱peśa̍so vi̱dathe̍ṣu̱ pra jā̱tā a̱bhī̱3̱̍maṁ ya̱jñaṁ vi ca̍ranta pū̱rvīḥ || RV_3,004.05

ā bhanda̍māne u̱ṣasā̱ upā̍ke u̱ta sma̍yete ta̱nvā̱3̱̍ virū̍pe |
yathā̍ no mi̱tro varu̍ṇo̱ jujo̍ṣa̱d indro̍ ma̱rutvā̍m̐ u̱ta vā̱ maho̍bhiḥ || RV_3,004.06

daivyā̱ hotā̍rā pratha̱mā ny ṛ̍ñje sa̱pta pṛ̱kṣāsa̍ḥ sva̱dhayā̍ madanti |
ṛ̱taṁ śaṁsa̍nta ṛ̱tam it ta ā̍hu̱r anu̍ vra̱taṁ vra̍ta̱pā dīdhyā̍nāḥ || RV_3,004.07

ā bhāra̍tī̱ bhāra̍tībhiḥ sa̱joṣā̱ iḻā̍ de̱vair ma̍nu̱ṣye̍bhir a̱gniḥ |
sara̍svatī sārasva̱tebhi̍r a̱rvāk ti̱sro de̱vīr ba̱rhir edaṁ sa̍dantu || RV_3,004.08

tan na̍s tu̱rīpa̱m adha̍ poṣayi̱tnu deva̍ tvaṣṭa̱r vi ra̍rā̱ṇaḥ sya̍sva |
yato̍ vī̱raḥ ka̍rma̱ṇya̍ḥ su̱dakṣo̍ yu̱ktagrā̍vā̱ jāya̍te de̱vakā̍maḥ || RV_3,004.09

vana̍spa̱te 'va̍ sṛ̱jopa̍ de̱vān a̱gnir ha̱viḥ śa̍mi̱tā sū̍dayāti |
sed u̱ hotā̍ sa̱tyata̍ro yajāti̱ yathā̍ de̱vānā̱ṁ jani̍māni̱ veda̍ || RV_3,004.10

ā yā̍hy agne samidhā̱no a̱rvāṅ indre̍ṇa de̱vaiḥ sa̱ratha̍ṁ tu̱rebhi̍ḥ |
ba̱rhir na̍ āstā̱m adi̍tiḥ supu̱trā svāhā̍ de̱vā a̱mṛtā̍ mādayantām || RV_3,004.11

praty a̱gnir u̱ṣasa̱ś ceki̍tā̱no 'bo̍dhi̱ vipra̍ḥ pada̱vīḥ ka̍vī̱nām |
pṛ̱thu̱pājā̍ deva̱yadbhi̱ḥ sami̱ddho 'pa̱ dvārā̱ tama̍so̱ vahni̍r āvaḥ || RV_3,005.01

pred v a̱gnir vā̍vṛdhe̱ stome̍bhir gī̱rbhiḥ sto̍tṝ̱ṇāṁ na̍ma̱sya̍ u̱kthaiḥ |
pū̱rvīr ṛ̱tasya̍ sa̱ṁdṛśa̍ś cakā̱naḥ saṁ dū̱to a̍dyaud u̱ṣaso̍ viro̱ke || RV_3,005.02

adhā̍yy a̱gnir mānu̍ṣīṣu vi̱kṣv a1̱̍pāṁ garbho̍ mi̱tra ṛ̱tena̱ sādha̍n |
ā ha̍rya̱to ya̍ja̱taḥ sānv a̍sthā̱d abhū̍d u̱ vipro̱ havyo̍ matī̱nām || RV_3,005.03

mi̱tro a̱gnir bha̍vati̱ yat sami̍ddho mi̱tro hotā̱ varu̍ṇo jā̱tave̍dāḥ |
mi̱tro a̍dhva̱ryur i̍ṣi̱ro damū̍nā mi̱traḥ sindhū̍nām u̱ta parva̍tānām || RV_3,005.04

pāti̍ pri̱yaṁ ri̱po agra̍m pa̱daṁ veḥ pāti̍ ya̱hvaś cara̍ṇa̱ṁ sūrya̍sya |
pāti̱ nābhā̍ sa̱ptaśī̍rṣāṇam a̱gniḥ pāti̍ de̱vānā̍m upa̱māda̍m ṛ̱ṣvaḥ || RV_3,005.05

ṛ̱bhuś ca̍kra̱ īḍya̱ṁ cāru̱ nāma̱ viśvā̍ni de̱vo va̱yunā̍ni vi̱dvān |
sa̱sasya̱ carma̍ ghṛ̱tava̍t pa̱daṁ ves tad id a̱gnī ra̍kṣa̱ty apra̍yucchan || RV_3,005.06

ā yoni̍m a̱gnir ghṛ̱tava̍ntam asthāt pṛ̱thupra̍gāṇam u̱śanta̍m uśā̱naḥ |
dīdyā̍na̱ḥ śuci̍r ṛ̱ṣvaḥ pā̍va̱kaḥ puna̍ḥ-punar mā̱tarā̱ navya̍sī kaḥ || RV_3,005.07

sa̱dyo jā̱ta oṣa̍dhībhir vavakṣe̱ yadī̱ vardha̍nti pra̱svo̍ ghṛ̱tena̍ |
āpa̍ iva pra̱vatā̱ śumbha̍mānā uru̱ṣyad a̱gniḥ pi̱tror u̱pasthe̍ || RV_3,005.08

ud u̍ ṣṭu̱taḥ sa̱midhā̍ ya̱hvo a̍dyau̱d varṣma̍n di̱vo adhi̱ nābhā̍ pṛthi̱vyāḥ |
mi̱tro a̱gnir īḍyo̍ māta̱riśvā dū̱to va̍kṣad ya̱jathā̍ya de̱vān || RV_3,005.09

ud a̍stambhīt sa̱midhā̱ nāka̍m ṛ̱ṣvo̱3̱̍ 'gnir bhava̍nn utta̱mo ro̍ca̱nānā̍m |
yadī̱ bhṛgu̍bhya̱ḥ pari̍ māta̱riśvā̱ guhā̱ santa̍ṁ havya̱vāha̍ṁ samī̱dhe || RV_3,005.10

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,005.11

pra kā̍ravo mana̱nā va̱cyamā̍nā deva̱drīcī̍ṁ nayata deva̱yanta̍ḥ |
da̱kṣi̱ṇā̱vāḍ vā̱jinī̱ prācy e̍ti ha̱vir bhara̍nty a̱gnaye̍ ghṛ̱tācī̍ || RV_3,006.01

ā roda̍sī apṛṇā̱ jāya̍māna u̱ta pra ri̍kthā̱ adha̱ nu pra̍yajyo |
di̱vaś ci̍d agne mahi̱nā pṛ̍thi̱vyā va̱cyantā̍ṁ te̱ vahna̍yaḥ sa̱ptaji̍hvāḥ || RV_3,006.02

dyauś ca̍ tvā pṛthi̱vī ya̱jñiyā̍so̱ ni hotā̍raṁ sādayante̱ damā̍ya |
yadī̱ viśo̱ mānu̍ṣīr deva̱yantī̱ḥ praya̍svatī̱r īḻa̍te śu̱kram a̱rciḥ || RV_3,006.03

ma̱hān sa̱dhasthe̍ dhru̱va ā niṣa̍tto̱ 'ntar dyāvā̱ māhi̍ne̱ harya̍māṇaḥ |
āskre̍ sa̱patnī̍ a̱jare̱ amṛ̍kte saba̱rdughe̍ urugā̱yasya̍ dhe̱nū || RV_3,006.04

vra̱tā te̍ agne maha̱to ma̱hāni̱ tava̱ kratvā̱ roda̍sī̱ ā ta̍tantha |
tvaṁ dū̱to a̍bhavo̱ jāya̍māna̱s tvaṁ ne̱tā vṛ̍ṣabha carṣaṇī̱nām || RV_3,006.05

ṛ̱tasya̍ vā ke̱śinā̍ yo̱gyābhi̍r ghṛta̱snuvā̱ rohi̍tā dhu̱ri dhi̍ṣva |
athā va̍ha de̱vān de̍va̱ viśvā̍n svadhva̱rā kṛ̍ṇuhi jātavedaḥ || RV_3,006.06

di̱vaś ci̱d ā te̍ rucayanta ro̱kā u̱ṣo vi̍bhā̱tīr anu̍ bhāsi pū̱rvīḥ |
a̱po yad a̍gna u̱śadha̱g vane̍ṣu̱ hotu̍r ma̱ndrasya̍ pa̱naya̍nta de̱vāḥ || RV_3,006.07

u̱rau vā̱ ye a̱ntari̍kṣe̱ mada̍nti di̱vo vā̱ ye ro̍ca̱ne santi̍ de̱vāḥ |
ūmā̍ vā̱ ye su̱havā̍so̱ yaja̍trā āyemi̱re ra̱thyo̍ agne̱ aśvā̍ḥ || RV_3,006.08

aibhi̍r agne sa̱ratha̍ṁ yāhy a̱rvāṅ nā̍nāra̱thaṁ vā̍ vi̱bhavo̱ hy aśvā̍ḥ |
patnī̍vatas tri̱ṁśata̱ṁ trīm̐ś ca̍ de̱vān a̍nuṣva̱dham ā va̍ha mā̱daya̍sva || RV_3,006.09

sa hotā̱ yasya̱ roda̍sī cid u̱rvī ya̱jñaṁ-ya̍jñam a̱bhi vṛ̱dhe gṛ̍ṇī̱taḥ |
prācī̍ adhva̱reva̍ tasthatuḥ su̱meke̍ ṛ̱tāva̍rī ṛ̱tajā̍tasya sa̱tye || RV_3,006.10

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,006.11

pra ya ā̱ruḥ śi̍tipṛ̱ṣṭhasya̍ dhā̱ser ā mā̱tarā̍ viviśuḥ sa̱pta vāṇī̍ḥ |
pa̱ri̱kṣitā̍ pi̱tarā̱ saṁ ca̍rete̱ pra sa̍rsrāte dī̱rgham āyu̍ḥ pra̱yakṣe̍ || RV_3,007.01

di̱vakṣa̍so dhe̱navo̱ vṛṣṇo̱ aśvā̍ de̱vīr ā ta̍sthau̱ madhu̍ma̱d vaha̍ntīḥ |
ṛ̱tasya̍ tvā̱ sada̍si kṣema̱yanta̱m pary ekā̍ carati varta̱niṁ gauḥ || RV_3,007.02

ā sī̍m arohat su̱yamā̱ bhava̍ntī̱ḥ pati̍ś ciki̱tvān ra̍yi̱vid ra̍yī̱ṇām |
pra nīla̍pṛṣṭho ata̱sasya̍ dhā̱ses tā a̍vāsayat puru̱dhapra̍tīkaḥ || RV_3,007.03

mahi̍ tvā̱ṣṭram ū̱rjaya̍ntīr aju̱ryaṁ sta̍bhū̱yamā̍naṁ va̱hato̍ vahanti |
vy aṅge̍bhir didyutā̱naḥ sa̱dhastha̱ ekā̍m iva̱ roda̍sī̱ ā vi̍veśa || RV_3,007.04

jā̱nanti̱ vṛṣṇo̍ aru̱ṣasya̱ śeva̍m u̱ta bra̱dhnasya̱ śāsa̍ne raṇanti |
di̱vo̱ruca̍ḥ su̱ruco̱ roca̍mānā̱ iḻā̱ yeṣā̱ṁ gaṇyā̱ māhi̍nā̱ gīḥ || RV_3,007.05

u̱to pi̱tṛbhyā̍m pra̱vidānu̱ ghoṣa̍m ma̱ho ma̱hadbhyā̍m anayanta śū̱ṣam |
u̱kṣā ha̱ yatra̱ pari̱ dhāna̍m a̱ktor anu̱ svaṁ dhāma̍ jari̱tur va̱vakṣa̍ || RV_3,007.06

a̱dhva̱ryubhi̍ḥ pa̱ñcabhi̍ḥ sa̱pta viprā̍ḥ pri̱yaṁ ra̍kṣante̱ nihi̍tam pa̱daṁ veḥ |
prāñco̍ madanty u̱kṣaṇo̍ aju̱ryā de̱vā de̱vānā̱m anu̱ hi vra̱tā guḥ || RV_3,007.07

daivyā̱ hotā̍rā pratha̱mā ny ṛ̍ñje sa̱pta pṛ̱kṣāsa̍ḥ sva̱dhayā̍ madanti |
ṛ̱taṁ śaṁsa̍nta ṛ̱tam it ta ā̍hu̱r anu̍ vra̱taṁ vra̍ta̱pā dīdhyā̍nāḥ || RV_3,007.08

vṛ̱ṣā̱yante̍ ma̱he atyā̍ya pū̱rvīr vṛṣṇe̍ ci̱trāya̍ ra̱śmaya̍ḥ suyā̱māḥ |
deva̍ hotar ma̱ndrata̍raś ciki̱tvān ma̱ho de̱vān roda̍sī̱ eha va̍kṣi || RV_3,007.09

pṛ̱kṣapra̍yajo draviṇaḥ su̱vāca̍ḥ suke̱tava̍ u̱ṣaso̍ re̱vad ū̍ṣuḥ |
u̱to ci̍d agne mahi̱nā pṛ̍thi̱vyāḥ kṛ̱taṁ ci̱d ena̱ḥ sam ma̱he da̍śasya || RV_3,007.10

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,007.11

a̱ñjanti̱ tvām a̍dhva̱re de̍va̱yanto̱ vana̍spate̱ madhu̍nā̱ daivye̍na |
yad ū̱rdhvas tiṣṭhā̱ dravi̍ṇe̱ha dha̍ttā̱d yad vā̱ kṣayo̍ mā̱tur a̱syā u̱pasthe̍ || RV_3,008.01

sami̍ddhasya̱ śraya̍māṇaḥ pu̱rastā̱d brahma̍ vanvā̱no a̱jara̍ṁ su̱vīra̍m |
ā̱re a̱smad ama̍ti̱m bādha̍māna̱ uc chra̍yasva maha̱te saubha̍gāya || RV_3,008.02

uc chra̍yasva vanaspate̱ varṣma̍n pṛthi̱vyā adhi̍ |
sumi̍tī mī̱yamā̍no̱ varco̍ dhā ya̱jñavā̍hase || RV_3,008.03

yuvā̍ su̱vāsā̱ḥ pari̍vīta̱ āgā̱t sa u̱ śreyā̍n bhavati̱ jāya̍mānaḥ |
taṁ dhīrā̍saḥ ka̱vaya̱ un na̍yanti svā̱dhyo̱3̱̍ mana̍sā deva̱yanta̍ḥ || RV_3,008.04

jā̱to jā̍yate sudina̱tve ahnā̍ṁ sama̱rya ā vi̱dathe̱ vardha̍mānaḥ |
pu̱nanti̱ dhīrā̍ a̱paso̍ manī̱ṣā de̍va̱yā vipra̱ ud i̍yarti̱ vāca̍m || RV_3,008.05

yān vo̱ naro̍ deva̱yanto̍ nimi̱myur vana̍spate̱ svadhi̍tir vā ta̱takṣa̍ |
te de̱vāsa̱ḥ svara̍vas tasthi̱vāṁsa̍ḥ pra̱jāva̍d a̱sme di̍dhiṣantu̱ ratna̍m || RV_3,008.06

ye vṛ̱kṇāso̱ adhi̱ kṣami̱ nimi̍tāso ya̱tasru̍caḥ |
te no̍ vyantu̱ vārya̍ṁ deva̱trā kṣe̍tra̱sādha̍saḥ || RV_3,008.07

ā̱di̱tyā ru̱drā vasa̍vaḥ sunī̱thā dyāvā̱kṣāmā̍ pṛthi̱vī a̱ntari̍kṣam |
sa̱joṣa̍so ya̱jñam a̍vantu de̱vā ū̱rdhvaṁ kṛ̍ṇvantv adhva̱rasya̍ ke̱tum || RV_3,008.08

ha̱ṁsā i̍va śreṇi̱śo yatā̍nāḥ śu̱krā vasā̍nā̱ḥ svara̍vo na̱ āgu̍ḥ |
u̱nnī̱yamā̍nāḥ ka̱vibhi̍ḥ pu̱rastā̍d de̱vā de̱vānā̱m api̍ yanti̱ pātha̍ḥ || RV_3,008.09

śṛṅgā̍ṇī̱vec chṛ̱ṅgiṇā̱ṁ saṁ da̍dṛśre ca̱ṣāla̍vanta̱ḥ svara̍vaḥ pṛthi̱vyām |
vā̱ghadbhi̍r vā viha̱ve śroṣa̍māṇā a̱smām̐ a̍vantu pṛta̱nājye̍ṣu || RV_3,008.10

vana̍spate śa̱tava̍lśo̱ vi ro̍ha sa̱hasra̍valśā̱ vi va̱yaṁ ru̍hema |
yaṁ tvām a̱yaṁ svadhi̍ti̱s teja̍mānaḥ praṇi̱nāya̍ maha̱te saubha̍gāya || RV_3,008.11

sakhā̍yas tvā vavṛmahe de̱vam martā̍sa ū̱taye̍ |
a̱pāṁ napā̍taṁ su̱bhaga̍ṁ su̱dīdi̍tiṁ su̱pratū̍rtim ane̱hasa̍m || RV_3,009.01

kāya̍māno va̱nā tvaṁ yan mā̱tṝr aja̍gann a̱paḥ |
na tat te̍ agne pra̱mṛṣe̍ ni̱varta̍na̱ṁ yad dū̱re sann i̱hābha̍vaḥ || RV_3,009.02

ati̍ tṛ̱ṣṭaṁ va̍vakṣi̱thāthai̱va su̱manā̍ asi |
pra-prā̱nye yanti̱ pary a̱nya ā̍sate̱ yeṣā̍ṁ sa̱khye asi̍ śri̱taḥ || RV_3,009.03

ī̱yi̱vāṁsa̱m ati̱ sridha̱ḥ śaśva̍tī̱r ati̍ sa̱ścata̍ḥ |
anv ī̍m avindan nici̱rāso̍ a̱druho̱ 'psu si̱ṁham i̍va śri̱tam || RV_3,009.04

sa̱sṛ̱vāṁsa̍m iva̱ tmanā̱gnim i̱tthā ti̱rohi̍tam |
aina̍ṁ nayan māta̱riśvā̍ parā̱vato̍ de̱vebhyo̍ mathi̱tam pari̍ || RV_3,009.05

taṁ tvā̱ martā̍ agṛbhṇata de̱vebhyo̍ havyavāhana |
viśvā̱n yad ya̱jñām̐ a̍bhi̱pāsi̍ mānuṣa̱ tava̱ kratvā̍ yaviṣṭhya || RV_3,009.06

tad bha̱draṁ tava̍ da̱ṁsanā̱ pākā̍ya cic chadayati |
tvāṁ yad a̍gne pa̱śava̍ḥ sa̱māsa̍te̱ sami̍ddham apiśarva̱re || RV_3,009.07

ā ju̍hotā svadhva̱raṁ śī̱ram pā̍va̱kaśo̍ciṣam |
ā̱śuṁ dū̱tam a̍ji̱ram pra̱tnam īḍya̍ṁ śru̱ṣṭī de̱vaṁ sa̍paryata || RV_3,009.08

trīṇi̍ śa̱tā trī sa̱hasrā̍ṇy a̱gniṁ tri̱ṁśac ca̍ de̱vā nava̍ cāsaparyan |
aukṣa̍n ghṛ̱tair astṛ̍ṇan ba̱rhir a̍smā̱ ād id dhotā̍ra̱ṁ ny a̍sādayanta || RV_3,009.09

tvām a̍gne manī̱ṣiṇa̍ḥ sa̱mrāja̍ṁ carṣaṇī̱nām |
de̱vam martā̍sa indhate̱ sam a̍dhva̱re || RV_3,010.01

tvāṁ ya̱jñeṣv ṛ̱tvija̱m agne̱ hotā̍ram īḻate |
go̱pā ṛ̱tasya̍ dīdihi̱ sve dame̍ || RV_3,010.02

sa ghā̱ yas te̱ dadā̍śati sa̱midhā̍ jā̱tave̍dase |
so a̍gne dhatte su̱vīrya̱ṁ sa pu̍ṣyati || RV_3,010.03

sa ke̱tur a̍dhva̱rāṇā̍m a̱gnir de̱vebhi̱r ā ga̍mat |
a̱ñjā̱naḥ sa̱pta hotṛ̍bhir ha̱viṣma̍te || RV_3,010.04

pra hotre̍ pū̱rvyaṁ vaco̱ 'gnaye̍ bharatā bṛ̱hat |
vi̱pāṁ jyotī̍ṁṣi̱ bibhra̍te̱ na ve̱dhase̍ || RV_3,010.05

a̱gniṁ va̍rdhantu no̱ giro̱ yato̱ jāya̍ta u̱kthya̍ḥ |
ma̱he vājā̍ya̱ dravi̍ṇāya darśa̱taḥ || RV_3,010.06

agne̱ yaji̍ṣṭho adhva̱re de̱vān de̍vaya̱te ya̍ja |
hotā̍ ma̱ndro vi rā̍ja̱sy ati̱ sridha̍ḥ || RV_3,010.07

sa na̍ḥ pāvaka dīdihi dyu̱mad a̱sme su̱vīrya̍m |
bhavā̍ sto̱tṛbhyo̱ anta̍maḥ sva̱staye̍ || RV_3,010.08

taṁ tvā̱ viprā̍ vipa̱nyavo̍ jāgṛ̱vāṁsa̱ḥ sam i̍ndhate |
ha̱vya̱vāha̱m ama̍rtyaṁ saho̱vṛdha̍m || RV_3,010.09

a̱gnir hotā̍ pu̱rohi̍to 'dhva̱rasya̱ vica̍rṣaṇiḥ |
sa ve̍da ya̱jñam ā̍nu̱ṣak || RV_3,011.01

sa ha̍vya̱vāḻ ama̍rtya u̱śig dū̱taś cano̍hitaḥ |
a̱gnir dhi̱yā sam ṛ̍ṇvati || RV_3,011.02

a̱gnir dhi̱yā sa ce̍tati ke̱tur ya̱jñasya̍ pū̱rvyaḥ |
artha̱ṁ hy a̍sya ta̱raṇi̍ || RV_3,011.03

a̱gniṁ sū̱nuṁ sana̍śruta̱ṁ saha̍so jā̱tave̍dasam |
vahni̍ṁ de̱vā a̍kṛṇvata || RV_3,011.04

adā̍bhyaḥ purae̱tā vi̱śām a̱gnir mānu̍ṣīṇām |
tūrṇī̱ ratha̱ḥ sadā̱ nava̍ḥ || RV_3,011.05

sā̱hvān viśvā̍ abhi̱yuja̱ḥ kratu̍r de̱vānā̱m amṛ̍ktaḥ |
a̱gnis tu̱viśra̍vastamaḥ || RV_3,011.06

a̱bhi prayā̍ṁsi̱ vāha̍sā dā̱śvām̐ a̍śnoti̱ martya̍ḥ |
kṣaya̍m pāva̱kaśo̍ciṣaḥ || RV_3,011.07

pari̱ viśvā̍ni̱ sudhi̍tā̱gner a̍śyāma̱ manma̍bhiḥ |
viprā̍so jā̱tave̍dasaḥ || RV_3,011.08

agne̱ viśvā̍ni̱ vāryā̱ vāje̍ṣu saniṣāmahe |
tve de̱vāsa̱ eri̍re || RV_3,011.09

indrā̍gnī̱ ā ga̍taṁ su̱taṁ gī̱rbhir nabho̱ vare̍ṇyam |
a̱sya pā̍taṁ dhi̱yeṣi̱tā || RV_3,012.01

indrā̍gnī jari̱tuḥ sacā̍ ya̱jño ji̍gāti̱ ceta̍naḥ |
a̱yā pā̍tam i̱maṁ su̱tam || RV_3,012.02

indra̍m a̱gniṁ ka̍vi̱cchadā̍ ya̱jñasya̍ jū̱tyā vṛ̍ṇe |
tā soma̍sye̱ha tṛ̍mpatām || RV_3,012.03

to̱śā vṛ̍tra̱haṇā̍ huve sa̱jitvā̱nāpa̍rājitā |
i̱ndrā̱gnī vā̍ja̱sāta̍mā || RV_3,012.04

pra vā̍m arcanty u̱kthino̍ nīthā̱vido̍ jari̱tāra̍ḥ |
indrā̍gnī̱ iṣa̱ ā vṛ̍ṇe || RV_3,012.05

indrā̍gnī nava̱tim puro̍ dā̱sapa̍tnīr adhūnutam |
sā̱kam eke̍na̱ karma̍ṇā || RV_3,012.06

indrā̍gnī̱ apa̍sa̱s pary upa̱ pra ya̍nti dhī̱taya̍ḥ |
ṛ̱tasya̍ pa̱thyā̱3̱̍ anu̍ || RV_3,012.07

indrā̍gnī tavi̱ṣāṇi̍ vāṁ sa̱dhasthā̍ni̱ prayā̍ṁsi ca |
yu̱vor a̱ptūrya̍ṁ hi̱tam || RV_3,012.08

indrā̍gnī roca̱nā di̱vaḥ pari̱ vāje̍ṣu bhūṣathaḥ |
tad vā̍ṁ ceti̱ pra vī̱rya̍m || RV_3,012.09

pra vo̍ de̱vāyā̱gnaye̱ barhi̍ṣṭham arcāsmai |
gama̍d de̱vebhi̱r ā sa no̱ yaji̍ṣṭho ba̱rhir ā sa̍dat || RV_3,013.01

ṛ̱tāvā̱ yasya̱ roda̍sī̱ dakṣa̱ṁ saca̍nta ū̱taya̍ḥ |
ha̱viṣma̍nta̱s tam ī̍ḻate̱ taṁ sa̍ni̱ṣyanto 'va̍se || RV_3,013.02

sa ya̱ntā vipra̍ eṣā̱ṁ sa ya̱jñānā̱m athā̱ hi ṣaḥ |
a̱gniṁ taṁ vo̍ duvasyata̱ dātā̱ yo vani̍tā ma̱gham || RV_3,013.03

sa na̱ḥ śarmā̍ṇi vī̱taye̱ 'gnir ya̍cchatu̱ śaṁta̍mā |
yato̍ naḥ pru̱ṣṇava̱d vasu̍ di̱vi kṣi̱tibhyo̍ a̱psv ā || RV_3,013.04

dī̱di̱vāṁsa̱m apū̍rvya̱ṁ vasvī̍bhir asya dhī̱tibhi̍ḥ |
ṛkvā̍ṇo a̱gnim i̍ndhate̱ hotā̍raṁ vi̱śpati̍ṁ vi̱śām || RV_3,013.05

u̱ta no̱ brahma̍nn aviṣa u̱ktheṣu̍ deva̱hūta̍maḥ |
śaṁ na̍ḥ śocā ma̱rudvṛ̱dho 'gne̍ sahasra̱sāta̍maḥ || RV_3,013.06

nū no̍ rāsva sa̱hasra̍vat to̱kava̍t puṣṭi̱mad vasu̍ |
dyu̱mad a̍gne su̱vīrya̱ṁ varṣi̍ṣṭha̱m anu̍pakṣitam || RV_3,013.07

ā hotā̍ ma̱ndro vi̱dathā̍ny asthāt sa̱tyo yajvā̍ ka̱vita̍ma̱ḥ sa ve̱dhāḥ |
vi̱dyudra̍tha̱ḥ saha̍sas pu̱tro a̱gniḥ śo̱ciṣke̍śaḥ pṛthi̱vyām pājo̍ aśret || RV_3,014.01

ayā̍mi te̱ nama̍üktiṁ juṣasva̱ ṛtā̍va̱s tubhya̱ṁ ceta̍te sahasvaḥ |
vi̱dvām̐ ā va̍kṣi vi̱duṣo̱ ni ṣa̍tsi̱ madhya̱ ā ba̱rhir ū̱taye̍ yajatra || RV_3,014.02

drava̍tāṁ ta u̱ṣasā̍ vā̱jaya̍ntī̱ agne̱ vāta̍sya pa̱thyā̍bhi̱r accha̍ |
yat sī̍m a̱ñjanti̍ pū̱rvyaṁ ha̱virbhi̱r ā va̱ndhure̍va tasthatur duro̱ṇe || RV_3,014.03

mi̱traś ca̱ tubhya̱ṁ varu̍ṇaḥ saha̱svo 'gne̱ viśve̍ ma̱ruta̍ḥ su̱mnam a̍rcan |
yac cho̱ciṣā̍ sahasas putra̱ tiṣṭhā̍ a̱bhi kṣi̱tīḥ pra̱thaya̱n sūryo̱ nṝn || RV_3,014.04

va̱yaṁ te̍ a̱dya ra̍ri̱mā hi kāma̍m uttā̱naha̍stā̱ nama̍sopa̱sadya̍ |
yaji̍ṣṭhena̱ mana̍sā yakṣi de̱vān asre̍dhatā̱ manma̍nā̱ vipro̍ agne || RV_3,014.05

tvad dhi pu̍tra sahaso̱ vi pū̱rvīr de̱vasya̱ yanty ū̱tayo̱ vi vājā̍ḥ |
tvaṁ de̍hi saha̱sriṇa̍ṁ ra̱yiṁ no̍ 'dro̱gheṇa̱ vaca̍sā sa̱tyam a̍gne || RV_3,014.06

tubhya̍ṁ dakṣa kavikrato̱ yānī̱mā deva̱ martā̍so adhva̱re aka̍rma |
tvaṁ viśva̍sya su̱ratha̍sya bodhi̱ sarva̱ṁ tad a̍gne amṛta svade̱ha || RV_3,014.07

vi pāja̍sā pṛ̱thunā̱ śośu̍cāno̱ bādha̍sva dvi̱ṣo ra̱kṣaso̱ amī̍vāḥ |
su̱śarma̍ṇo bṛha̱taḥ śarma̍ṇi syām a̱gner a̱haṁ su̱hava̍sya̱ praṇī̍tau || RV_3,015.01

tvaṁ no̍ a̱syā u̱ṣaso̱ vyu̍ṣṭau̱ tvaṁ sūra̱ udi̍te bodhi go̱pāḥ |
janme̍va̱ nitya̱ṁ tana̍yaṁ juṣasva̱ stoma̍m me agne ta̱nvā̍ sujāta || RV_3,015.02

tvaṁ nṛ̱cakṣā̍ vṛṣa̱bhānu̍ pū̱rvīḥ kṛ̱ṣṇāsv a̍gne aru̱ṣo vi bhā̍hi |
vaso̱ neṣi̍ ca̱ parṣi̱ cāty aṁha̍ḥ kṛ̱dhī no̍ rā̱ya u̱śijo̍ yaviṣṭha || RV_3,015.03

aṣā̍ḻho agne vṛṣa̱bho di̍dīhi̱ puro̱ viśvā̱ḥ saubha̍gā saṁjigī̱vān |
ya̱jñasya̍ ne̱tā pra̍tha̱masya̍ pā̱yor jāta̍vedo bṛha̱taḥ su̍praṇīte || RV_3,015.04

acchi̍drā̱ śarma̍ jaritaḥ pu̱rūṇi̍ de̱vām̐ acchā̱ dīdyā̍naḥ sume̱dhāḥ |
ratho̱ na sasni̍r a̱bhi va̍kṣi̱ vāja̱m agne̱ tvaṁ roda̍sī naḥ su̱meke̍ || RV_3,015.05

pra pī̍paya vṛṣabha̱ jinva̱ vājā̱n agne̱ tvaṁ roda̍sī naḥ su̱doghe̍ |
de̱vebhi̍r deva su̱rucā̍ rucā̱no mā no̱ marta̍sya durma̱tiḥ pari̍ ṣṭhāt || RV_3,015.06

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,015.07

a̱yam a̱gniḥ su̱vīrya̱syeśe̍ ma̱haḥ saubha̍gasya |
rā̱ya ī̍śe svapa̱tyasya̱ goma̍ta̱ īśe̍ vṛtra̱hathā̍nām || RV_3,016.01

i̱maṁ na̍ro marutaḥ saścatā̱ vṛdha̱ṁ yasmi̱n rāya̱ḥ śevṛ̍dhāsaḥ |
a̱bhi ye santi̱ pṛta̍nāsu dū̱ḍhyo̍ vi̱śvāhā̱ śatru̍m āda̱bhuḥ || RV_3,016.02

sa tvaṁ no̍ rā̱yaḥ śi̍śīhi̱ mīḍhvo̍ agne su̱vīrya̍sya |
tuvi̍dyumna̱ varṣi̍ṣṭhasya pra̱jāva̍to 'namī̱vasya̍ śu̱ṣmiṇa̍ḥ || RV_3,016.03

cakri̱r yo viśvā̱ bhuva̍nā̱bhi sā̍sa̱hiś cakri̍r de̱veṣv ā duva̍ḥ |
ā de̱veṣu̱ yata̍ta̱ ā su̱vīrya̱ ā śaṁsa̍ u̱ta nṛ̱ṇām || RV_3,016.04

mā no̍ a̱gne 'ma̍taye̱ māvīra̍tāyai rīradhaḥ |
māgotā̍yai sahasas putra̱ mā ni̱de 'pa̱ dveṣā̱ṁsy ā kṛ̍dhi || RV_3,016.05

śa̱gdhi vāja̍sya subhaga pra̱jāva̱to 'gne̍ bṛha̱to a̍dhva̱re |
saṁ rā̱yā bhūya̍sā sṛja mayo̱bhunā̱ tuvi̍dyumna̱ yaśa̍svatā || RV_3,016.06

sa̱mi̱dhyamā̍naḥ pratha̱mānu̱ dharmā̱ sam a̱ktubhi̍r ajyate vi̱śvavā̍raḥ |
śo̱ciṣke̍śo ghṛ̱tani̍rṇik pāva̱kaḥ su̍ya̱jño a̱gnir ya̱jathā̍ya de̱vān || RV_3,017.01

yathāya̍jo ho̱tram a̍gne pṛthi̱vyā yathā̍ di̱vo jā̍tavedaś ciki̱tvān |
e̱vānena̍ ha̱viṣā̍ yakṣi de̱vān ma̍nu̱ṣvad ya̱jñam pra ti̍re̱mam a̱dya || RV_3,017.02

trīṇy āyū̍ṁṣi̱ tava̍ jātavedas ti̱sra ā̱jānī̍r u̱ṣasa̍s te agne |
tābhi̍r de̱vānā̱m avo̍ yakṣi vi̱dvān athā̍ bhava̱ yaja̍mānāya̱ śaṁ yoḥ || RV_3,017.03

a̱gniṁ su̍dī̱tiṁ su̱dṛśa̍ṁ gṛ̱ṇanto̍ nama̱syāma̱s tveḍya̍ṁ jātavedaḥ |
tvāṁ dū̱tam a̍ra̱tiṁ ha̍vya̱vāha̍ṁ de̱vā a̍kṛṇvann a̱mṛta̍sya̱ nābhi̍m || RV_3,017.04

yas tvad dhotā̱ pūrvo̍ agne̱ yajī̍yān dvi̱tā ca̱ sattā̍ sva̱dhayā̍ ca śa̱mbhuḥ |
tasyānu̱ dharma̱ pra ya̍jā ciki̱tvo 'thā̍ no dhā adhva̱raṁ de̱vavī̍tau || RV_3,017.05

bhavā̍ no agne su̱manā̱ upe̍tau̱ sakhe̍va̱ sakhye̍ pi̱tare̍va sā̱dhuḥ |
pu̱ru̱druho̱ hi kṣi̱tayo̱ janā̍nā̱m prati̍ pratī̱cīr da̍hatā̱d arā̍tīḥ || RV_3,018.01

tapo̱ ṣv a̍gne̱ anta̍rām̐ a̱mitrā̱n tapā̱ śaṁsa̱m ara̍ruṣa̱ḥ para̍sya |
tapo̍ vaso cikitā̱no a̱cittā̱n vi te̍ tiṣṭhantām a̱jarā̍ a̱yāsa̍ḥ || RV_3,018.02

i̱dhmenā̍gna i̱cchamā̍no ghṛ̱tena̍ ju̱homi̍ ha̱vyaṁ tara̍se̱ balā̍ya |
yāva̱d īśe̱ brahma̍ṇā̱ vanda̍māna i̱māṁ dhiya̍ṁ śata̱seyā̍ya de̱vīm || RV_3,018.03

uc cho̱ciṣā̍ sahasas putra stu̱to bṛ̱had vaya̍ḥ śaśamā̱neṣu̍ dhehi |
re̱vad a̍gne vi̱śvāmi̍treṣu̱ śaṁ yor ma̍rmṛ̱jmā te̍ ta̱nva1̱̍m bhūri̱ kṛtva̍ḥ || RV_3,018.04

kṛ̱dhi ratna̍ṁ susanita̱r dhanā̍nā̱ṁ sa ghed a̍gne bhavasi̱ yat sami̍ddhaḥ |
sto̱tur du̍ro̱ṇe su̱bhaga̍sya re̱vat sṛ̱prā ka̱rasnā̍ dadhiṣe̱ vapū̍ṁṣi || RV_3,018.05

a̱gniṁ hotā̍ra̱m pra vṛ̍ṇe mi̱yedhe̱ gṛtsa̍ṁ ka̱viṁ vi̍śva̱vida̱m amū̍ram |
sa no̍ yakṣad de̱vatā̍tā̱ yajī̍yān rā̱ye vājā̍ya vanate ma̱ghāni̍ || RV_3,019.01

pra te̍ agne ha̱viṣma̍tīm iya̱rmy acchā̍ sudyu̱mnāṁ rā̱tinī̍ṁ ghṛ̱tācī̍m |
pra̱da̱kṣi̱ṇid de̱vatā̍tim urā̱ṇaḥ saṁ rā̱tibhi̱r vasu̍bhir ya̱jñam a̍śret || RV_3,019.02

sa tejī̍yasā̱ mana̍sā̱ tvota̍ u̱ta śi̍kṣa svapa̱tyasya̍ śi̱kṣoḥ |
agne̍ rā̱yo nṛta̍masya̱ prabhū̍tau bhū̱yāma̍ te suṣṭu̱taya̍ś ca̱ vasva̍ḥ || RV_3,019.03

bhūrī̍ṇi̱ hi tve da̍dhi̱re anī̱kāgne̍ de̱vasya̱ yajya̍vo̱ janā̍saḥ |
sa ā va̍ha de̱vatā̍tiṁ yaviṣṭha̱ śardho̱ yad a̱dya di̱vyaṁ yajā̍si || RV_3,019.04

yat tvā̱ hotā̍ram a̱naja̍n mi̱yedhe̍ niṣā̱daya̍nto ya̱jathā̍ya de̱vāḥ |
sa tvaṁ no̍ agne 'vi̱teha bo̱dhy adhi̱ śravā̍ṁsi dhehi nas ta̱nūṣu̍ || RV_3,019.05

a̱gnim u̱ṣasa̍m a̱śvinā̍ dadhi̱krāṁ vyu̍ṣṭiṣu havate̱ vahni̍r u̱kthaiḥ |
su̱jyoti̍ṣo naḥ śṛṇvantu de̱vāḥ sa̱joṣa̍so adhva̱raṁ vā̍vaśā̱nāḥ || RV_3,020.01

agne̱ trī te̱ vāji̍nā̱ trī ṣa̱dhasthā̍ ti̱sras te̍ ji̱hvā ṛ̍tajāta pū̱rvīḥ |
ti̱sra u̍ te ta̱nvo̍ de̱vavā̍tā̱s tābhi̍r naḥ pāhi̱ giro̱ apra̍yucchan || RV_3,020.02

agne̱ bhūrī̍ṇi̱ tava̍ jātavedo̱ deva̍ svadhāvo̱ 'mṛta̍sya̱ nāma̍ |
yāś ca̍ mā̱yā mā̱yinā̍ṁ viśvaminva̱ tve pū̱rvīḥ sa̍ṁda̱dhuḥ pṛ̍ṣṭabandho || RV_3,020.03

a̱gnir ne̱tā bhaga̍ iva kṣitī̱nāṁ daivī̍nāṁ de̱va ṛ̍tu̱pā ṛ̱tāvā̍ |
sa vṛ̍tra̱hā sa̱nayo̍ vi̱śvave̍dā̱ḥ parṣa̱d viśvāti̍ duri̱tā gṛ̱ṇanta̍m || RV_3,020.04

da̱dhi̱krām a̱gnim u̱ṣasa̍ṁ ca de̱vīm bṛha̱spati̍ṁ savi̱tāra̍ṁ ca de̱vam |
a̱śvinā̍ mi̱trāvaru̍ṇā̱ bhaga̍ṁ ca̱ vasū̍n ru̱drām̐ ā̍di̱tyām̐ i̱ha hu̍ve || RV_3,020.05

i̱maṁ no̍ ya̱jñam a̱mṛte̍ṣu dhehī̱mā ha̱vyā jā̍tavedo juṣasva |
sto̱kānā̍m agne̱ meda̍so ghṛ̱tasya̱ hota̱ḥ prāśā̍na pratha̱mo ni̱ṣadya̍ || RV_3,021.01

ghṛ̱tava̍ntaḥ pāvaka te sto̱kāḥ śco̍tanti̱ meda̍saḥ |
svadha̍rman de̱vavī̍taye̱ śreṣṭha̍ṁ no dhehi̱ vārya̍m || RV_3,021.02

tubhya̍ṁ sto̱kā ghṛ̍ta̱ścuto 'gne̱ viprā̍ya santya |
ṛṣi̱ḥ śreṣṭha̱ḥ sam i̍dhyase ya̱jñasya̍ prāvi̱tā bha̍va || RV_3,021.03

tubhya̍ṁ ścotanty adhrigo śacīvaḥ sto̱kāso̍ agne̱ meda̍so ghṛ̱tasya̍ |
ka̱vi̱śa̱sto bṛ̍ha̱tā bhā̱nunāgā̍ ha̱vyā ju̍ṣasva medhira || RV_3,021.04

oji̍ṣṭhaṁ te madhya̱to meda̱ udbhṛ̍ta̱m pra te̍ va̱yaṁ da̍dāmahe |
ścota̍nti te vaso sto̱kā adhi̍ tva̱ci prati̱ tān de̍va̱śo vi̍hi || RV_3,021.05

a̱yaṁ so a̱gnir yasmi̱n soma̱m indra̍ḥ su̱taṁ da̱dhe ja̱ṭhare̍ vāvaśā̱naḥ |
sa̱ha̱sriṇa̱ṁ vāja̱m atya̱ṁ na sapti̍ṁ sasa̱vān san stū̍yase jātavedaḥ || RV_3,022.01

agne̱ yat te̍ di̱vi varca̍ḥ pṛthi̱vyāṁ yad oṣa̍dhīṣv a̱psv ā ya̍jatra |
yenā̱ntari̍kṣam u̱rv ā̍ta̱tantha̍ tve̱ṣaḥ sa bhā̱nur a̍rṇa̱vo nṛ̱cakṣā̍ḥ || RV_3,022.02

agne̍ di̱vo arṇa̱m acchā̍ jigā̱sy acchā̍ de̱vām̐ ū̍ciṣe̱ dhiṣṇyā̱ ye |
yā ro̍ca̱ne pa̱rastā̱t sūrya̍sya̱ yāś cā̱vastā̍d upa̱tiṣṭha̍nta̱ āpa̍ḥ || RV_3,022.03

pu̱rī̱ṣyā̍so a̱gnaya̍ḥ prāva̱ṇebhi̍ḥ sa̱joṣa̍saḥ |
ju̱ṣantā̍ṁ ya̱jñam a̱druho̍ 'namī̱vā iṣo̍ ma̱hīḥ || RV_3,022.04

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,022.05

nirma̍thita̱ḥ sudhi̍ta̱ ā sa̱dhasthe̱ yuvā̍ ka̱vir a̍dhva̱rasya̍ praṇe̱tā |
jūrya̍tsv a̱gnir a̱jaro̱ vane̱ṣv atrā̍ dadhe a̱mṛta̍ṁ jā̱tave̍dāḥ || RV_3,023.01

ama̍nthiṣṭā̱m bhāra̍tā re̱vad a̱gniṁ de̱vaśra̍vā de̱vavā̍taḥ su̱dakṣa̍m |
agne̱ vi pa̍śya bṛha̱tābhi rā̱yeṣāṁ no̍ ne̱tā bha̍vatā̱d anu̱ dyūn || RV_3,023.02

daśa̱ kṣipa̍ḥ pū̱rvyaṁ sī̍m ajījana̱n sujā̍tam mā̱tṛṣu̍ pri̱yam |
a̱gniṁ stu̍hi daivavā̱taṁ de̍vaśravo̱ yo janā̍nā̱m asa̍d va̱śī || RV_3,023.03

ni tvā̍ dadhe̱ vara̱ ā pṛ̍thi̱vyā iḻā̍yās pa̱de su̍dina̱tve ahnā̍m |
dṛ̱ṣadva̍tyā̱m mānu̍ṣa āpa̱yāyā̱ṁ sara̍svatyāṁ re̱vad a̍gne didīhi || RV_3,023.04

iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme || RV_3,023.05

agne̱ saha̍sva̱ pṛta̍nā a̱bhimā̍tī̱r apā̍sya |
du̱ṣṭara̱s tara̱nn arā̍tī̱r varco̍ dhā ya̱jñavā̍hase || RV_3,024.01

agna̍ i̱ḻā sam i̍dhyase vī̱tiho̍tro̱ ama̍rtyaḥ |
ju̱ṣasva̱ sū no̍ adhva̱ram || RV_3,024.02

agne̍ dyu̱mnena̍ jāgṛve̱ saha̍saḥ sūnav āhuta |
edam ba̱rhiḥ sa̍do̱ mama̍ || RV_3,024.03

agne̱ viśve̍bhir a̱gnibhi̍r de̱vebhi̍r mahayā̱ gira̍ḥ |
ya̱jñeṣu̱ ya u̍ cā̱yava̍ḥ || RV_3,024.04

agne̱ dā dā̱śuṣe̍ ra̱yiṁ vī̱rava̍nta̱m parī̍ṇasam |
śi̱śī̱hi na̍ḥ sūnu̱mata̍ḥ || RV_3,024.05

agne̍ di̱vaḥ sū̱nur a̍si̱ prace̍tā̱s tanā̍ pṛthi̱vyā u̱ta vi̱śvave̍dāḥ |
ṛdha̍g de̱vām̐ i̱ha ya̍jā cikitvaḥ || RV_3,025.01

a̱gniḥ sa̍noti vī̱ryā̍ṇi vi̱dvān sa̱noti̱ vāja̍m a̱mṛtā̍ya̱ bhūṣa̍n |
sa no̍ de̱vām̐ eha va̍hā purukṣo || RV_3,025.02

a̱gnir dyāvā̍pṛthi̱vī vi̱śvaja̍nye̱ ā bhā̍ti de̱vī a̱mṛte̱ amū̍raḥ |
kṣaya̱n vājai̍ḥ puruśca̱ndro namo̍bhiḥ || RV_3,025.03

agna̱ indra̍ś ca dā̱śuṣo