Moksopaya (also known as "Yogavasistha")
with Bhaskarakantha's Tika

Prakaranas 1 - 4 (without notes)


[Uncorrected preprint of the edition published by W. Slaje in 1996]



REFERENCE SYSTEM:
Mo_ = Moksopaya, MoT_ = Moksopaya-Tika:
[prakarana],[sarga].[verse]






THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.

Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)

description:multibyte sequence:
long a ā
long A Ā
long i ī
long I Ī
long u ū
long U Ū
vocalic r
vocalic R
long vocalic r
vocalic l
vocalic L
long vocalic l
velar n
velar N
palatal n ñ
palatal N Ñ
retroflex t
retroflex T
retroflex d
retroflex D
retroflex n
retroflex N
palatal s ś
palatal S Ś
retroflex s
retroflex S
anusvara
visarga
long e ē
long o ō
l underbar
r underbar
n underbar
k underbar
t underbar

Unless indicated otherwise, accents have been dropped in order
to facilitate word search.

For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf

For further information see:
http://gretil.sub.uni-goettingen.de/gretil.htm









oṃ
svātantryākhyaguṇeritena satataṃ saṅkṣobhyamāṇān nijād
icchāmandarakeṇa sārabharitād rūpād alolāt sadā /
svāntaḥsthaṃ svamayaṃ svabhinnasadṛśaṃ tattvāliratnoccayam
bodhāhvaḥ pratibhāsayan parasarinnātho jayaty adbhutaḥ // *1 //




śuddhaṃ sphāṭikadarpaṇena sadṛśaṃ nityaṃ svaśaktyutthitair
acchatvāt svamayīkṛtam bahuvidhair bāhyāntaraiḥ svair malaiḥ /
śaktyaitān api sarvadātmani layīkurvāṇam ādyaṃ śivam
bodhāhvam praṇato 'smi devam anaghaṃ ṣaṭkośadāvānalam // *2 //




bodhābodhavibhedabhāsanaparam bodhānvitair bodhitam
bodhābodhavihīnamūrtim amalam bodhaikasāraṃ vibhum /
bodhābodhavibhedagopanakaraṃ svasmiṃs tu tasyāpy anu
bodhaṃ taṃ śaraṇaṃ śrayāmi satataṃ sadbodhasamprāptaye // *3 //




svacchatvāśrayamātṛbhāvabhajanād vaiḍūryanāmārhatām
āsādyānv avatāranāmakalanām etyācchameyāspadām /
tattvaṃ svam prakaṭaṃ vidhāya ca tataḥ svam bhāvam evāgato
yas tasmai satataṃ svabhāvagurave nairguṇyadhāmne namaḥ // *4 //




acchācchasvavimarśane 'pi kuśalo vaiḍūryanāmnāśrito
yāto 'to 'nv avatārabhāvam amalaṃ tattvopadeśecchayā /
śiṣyāṇām upadiśya tattvam atha yaḥ svaṃ rūpam evāgatas
tasmai śrīnidhaye prakāśagurave sadbodhadātre namaḥ // *5 //


dehādristhamanodrumotthakalanāśākhālisandhyantarād
draṣṭuṃ jāḍyaharaṃ vimarśavibhavād unmeṣarūpaṃ ravim /
lagnā ye satataṃ tadekamayatām paśyanta ātmany atho
saṃsāre 'pi ca tatprakāśavaśato bhāte 'stu tebhyo namaḥ // *6 //




apūrvaṃ sāmarthyaṃ kim api hṛdayāgocara idam
paricchedātītaṃ jayati laghumukhyam bhagavataḥ /
vivṛttyākhye karmaṇy atimahati vākpatyaviṣaye
yadāviṣṭo 'muṣminn api bhajati mūko 'py adhikṛtim // *7 //




svataḥsiddhāl labdham paramagahanaṃ yat svajanakād
rahasyaṃ saṅkṣepān niratiśayam ābhyantaram alam /
tad etat sarveṣu prakaṭayitum evātra vihito
mayāsāv udyogo na nijadhiṣaṇākhyāpanadhiyā // *8 //




svabhāvenaivāndhāḥ katicid apare roṣatamasā
pareṣāṃ nāpekṣā bhavati ca nijālokavibhavāt /
ato vyākhyādīpe 'prakaṭa iva nātrāsty adhikṛto
bhaved vā ko 'pīti bhramata iha yatnas tu racitaḥ // *9 //



avatārakaṇṭhaputraḥ pautro vaiḍūryakaṇṭhapādānām /
bhāskarakaṇṭho racayati vidvatkaṇṭhe vibhūṣaṇaṃ vyākhyām // *10 //


śaktyādīnām abhāve me pravṛttasya pade pade /
skhalitāni bhaviṣyanti santu santo 'valambanam // *11 //


nutvā gaṇeśaṃ vibudheśavandyaṃ vāgdevatāṃ ca pratibhāsvarūpām /
gurūṃs tathā kaulanarottamādīn karomi ṭīkāṃ śrutipātrapeyām // *12 //


gurūṇāṃ caraṇau smṛtvā kṛtvā svātmārcanaṃ svataḥ /
mokṣopāyābhidhe granthe vyākhyāṃ kurve samāsataḥ // *13 //


************************************************************************


iha khalu kaścin mahāpuruṣaḥ śrīvālmīkinibaddhaśrīmahārāmāyaṇākhyasāgarādikāṇḍasthaśrīrāmajñānotpādakaśrīvasiṣṭhopadeśaratnaiḥ svayam āsāditasamyagjñānākhyaprakāśaḥ athānyān prati dayayā prakaṭīkaraṇārtham proktasāgarāt tāny uddhartukāmas taduddhṛtinirvighnasamāptigamanāya paradevatāsvarūpam paramātmānaṃ stauti
divi bhūmau tathākāśe bahir antaś ca me vibhuḥ /
yo 'vabhāty avabhāsātmā tasmai viśvātmane namaḥ // Mo_1,1.1 //
"tasmai" prasiddhāya | "viśvātmane" sarvasāratvena sthitatvāt sarveṣām ātmabhūtāyārthāt paramātmane "namaḥ" | aparimitāyāṃ tatsattāyām parimitasvasattānyagbhāvarūpaḥ prahvībhāvaḥ astu | tatsattāyām eva svasattāṃ līnām bhāvayāmīti yāvat | "tasmai" kasmai | "avabhāsātmā" bāhyāntarālokagatanānāvidhabāhyāntarapadārthavṛndaviṣayajñānasārabhūtaḥ | "yaḥ "viśvātmā | "avabhāti" pratyakṣam eva sphurati | yataḥ pratyakṣaṃ sphurantaḥ nānābhāsāḥ vicāraviṣayīkṛtāḥ santaḥ anirvācyatāsvarūpāyām paramātmatāyām eva viśrāmyanti | tataḥ nānāvabhāsāvabhāsena paramātmaivāvabhātīti bhāvaḥ | "yaḥ" kathambhūtaḥ | "vibhuḥ" vyāpakaḥ | kutra | "me" parimitapramātṛtāsādanena cinmātrarūpāparimitapramātṛbhāvāc cyutasyāta eva paricchinnavācakāsmacchabdavācyatāṃ gatasya parimitapramātuḥ | "bahiḥ "bāhye | ahantāviṣayatām anīte pradeśe iti yāvat | punaḥ kutra | "antaś ca" ahantāviṣayatāṃ nīte pradeśe ca | "bahiḥ" kiṃrūpe | "divi" samastasurādhārabhūtasvargalokarūpe | tathā "bhūmau" samastanarādinānāvidhabhūtādhārabhūtabhūlokarūpe | "tathā" tadvat | "ākāśe" śūnyamātrādhārabhūtākāśalokasvarūpe | etena caturdaśabhuvanānāṃ grahaṇaṃ jñeyaṃ | "antaś ca" kiṃrūpe | "divi" dyotanamātrasvarūpasvapnāvasthārūpe | "bhūmau" sthūlatvasādṛśyāj jāgradavasthārūpe | "tathā" tadvat | "ākāśe" śūnyamātrādhāratvasādṛśyāt suṣuptyavasthāsvarūpe | atra ca paramātmanaḥ vyāpakatvaṃ śaktiprādhānyenopādānatayā sthitatvāt svaprādhānyena sākṣitayā sthitatvāc ceti dvividhaṃ jñeyam | evam abhīṣṭasamu-citadevatānamaskāralakṣaṇam maṅgalaṃ kṛtvā uddhariṣyamāṇasyāsya granthasyādhikāryādyanubandhacatuṣṭayaṃ vaktukāmaḥ sa evoddhṛtikāraḥ abhidheyasambandhaprayojanāny arthāt sūcayan adhikārinirūpaṇaṃ sākṣātkaroti || MoT_1,1.1 ||



aham baddho vimuktaḥ syām iti yasyāsti niścayaḥ /
nātyantatajjño nātajjñaḥ so 'smiñ śāstre 'dhikāravān // Mo_1,1.2 //
śrībhagavatkṛpākaṭākṣapātrībhūtasya "yasya" puruṣasya | ahamparimitapramātṛrūpaḥ "aham baddhaḥ" svātmabhāvena niścitadehopayogibhogajālāsaktacittaḥ | asmi katham iti śeṣaḥ | proktajālānāsaktacittaḥ kathaṃ "syām" bhave-yam | "iti" evam |" niścayaḥ" manasi satatam anusandhānaṃ | syāt | "saḥ" puruṣaḥ | "asminn" uddhariṣyamāṇe mokṣopāyākhye granthe | "adhikāravān" syāt | tasyaivedaṃ śāstraṃ vicāraṇīyam ity arthaḥ | "saḥ" kathambhūtaḥ | nātyantaṃ tajjñaḥ "nātyantatajjñaḥ" | muktikāmatvena samyagjñānarahita 4ity arthaḥ | samyagjñānī hi muktim api na kāṅkṣati | kāṅkṣāmātrasyaiva bandhatvāt | punaḥ kathambhūtaḥ | "nātajjñaḥ" | bhogākāṅkṣāyāḥ muktatvāt | atajjño hi bhogākāṅkṣāṃ tyaktuṃ na śaknoti | atyantatajjñe kṛtakṛtyatvāt "asmiñ śāstre" anadhikāraḥ | atajjñe tu ayogyatayeti vibhāgaḥ | atra paramātmatattvaikyam abhidheyam | pade pade tasyaivābhidhānāt svaviṣayajñānadvāreṇa mokṣākhyaparamaprayojanasādhakatvāc ca | sarvaśāstreṣv abhidheyasyaiva paramaprayojanasādhakatvadarśanāt | tadviṣayaṃ samyagjñānam avāntaraprayojanam | anyathā tatkāṅkṣiṇaḥ amūrkhasyāvāntarādhikāritvaṃ na syāt | paramaprayojaṇam muktir | anyathā tatkāṅkṣiṇaḥ mumukṣoḥ paramādhikāritvaṃ na syāt | śāstrāvāntaraprayojanayoḥ abhidheyaparamaprayojanayoś ca sādhyasādhanabhāvaḥ sambandhaḥ | adhikārī tu svakaṇṭhenaivokta iti sarvaṃ svastham || MoT_1,1.2 ||



evam adhikāryādi nirūpya śāstroddhāram ārabhate
vālmīkir uvāca
iti | "vālmīkiḥ" vālmīkināmā ṛṣiḥ | "uvāca" uktavān | śrīrāmam prati iti śeṣaḥ | kim uvācety āśaṅkāyām āha
kathopāyān vicāryādau mokṣopāyān imān atha |
yo vicārayati prājño na sa bhūyo 'bhijāyate || MoT_1,1.3 ||



kathārūpā upāyāḥ "kathopāyāḥ" | tān | kathānām api samyagjñānam prati pravartakatvenopāyatvaṃ jñeyam | "imān" vakṣyamāṇān | nanu śrīvālmīkiḥ śrīrāmavṛttāntamayaṃ śrīmahārāmāyaṇaṃ śrīrāmam praty eva katham uvācānyasyaiva hy anyavṛttāntakathanam ucitam iti cet | satyam | adyakalpe bhavaḥ śrīvālmīkir adyakalpe bhavaṃ śrīrāmam prati purātanakalpaśrīvālmīkikṛtam purātanaśrīrāmavṛttāntamayaṃ śrīmahārāmāyaṇam uvāceti kecid atra samādadhate | kim asmākaṃ vyākhyāmātrapravṛttānām etadyuktatvāyuktatvacintanena | asti cātra kim api nigūḍham bījam "api pauruṣam ādeyam" ityādivakṣyamāṇaślokasūcitam | tac ca pratibhāvatāṃ svayam eva gamyam | anyeṣāṃ tatkathanam ayuktam | ity alaṃ rahasyodghāṭanena || MoT_1,1.3 ||



asmin rāmāyaṇe rāma kathopāyān mahāphalān /
etāṃs tu prathamaṃ kṛtvā purāham arimardana // Mo_1,1.4 //
śiṣyāyāsmai vinītāya bharadvājāya dhīmate /
ekāgro dattavān ramyān maṇīn abdhir ivārthine // Mo_1,1.5 //
"rāme"ty āmantraṇam | rāmasyaiva pratipādyatvāt | "etān" tvayā "asmin" samaya eva dṛṣṭān | ādau "kṛtvā" sampādya | "asmai" agre sthitāya | "ekāgraḥ" etasya vinayena etasmiṃl lagnacittaḥ | yugalakam || MoT_1,1.4-5 ||



tata ete kathopāyā bharadvājena dhīmatā /
kasmiṃścin merugahane brahmaṇo 'gra udāhṛtāḥ // Mo_1,1.6 //
"udāhṛtāḥ" kathitāḥ || MoT_1,1.6 ||


athāsya tuṣṭo bhagavān brahmā lokapitāmahaḥ /
varam putra gṛhāṇeti samuvāca mahāśayaḥ // Mo_1,1.7 //
spaṣṭam || MoT_1,1.7 ||



bharadvājaḥ kathayati
bhagavan bhūtabhavyeśa varo 'yam me 'dya rocate /
yeneyaṃ janatā duḥkān mucyate tad udāhara // Mo_1,1.8 //
"bhūtabhavyeśā"tītānāgatayor īśātītānāgatajñeti yāvat | "udāhara" kathaya || MoT_1,1.8 || bharadvājavākyaṃ śrutvā śrībrahmā kathayati
guruṃ vālmīkim atrāśu prārthayasva prayatnataḥ /
tenedaṃ yat samārabdhaṃ rāmāyaṇam aninditam // Mo_1,1.9 //
tasmiñ jñāte naro mohāt samagrāt santariṣyati /
setunevāmbudheḥ pāram apāraguṇaśālinā // Mo_1,1.10 //
yugalakam | "pāram" iti pūrvārdhenāpi yojyam | "ambudher" iti pañcamī brahmavākyam upasaṃharati || MoT_1,1.9-10 ||



ity uktvā sa bharadvājam parameṣṭhī mamāśramam /
abhyāgamat samaṃ tena bharadvājena bhūtakṛt // Mo_1,1.11 //
parame cinmātrākhye uttame pade tiṣṭhati śuddhamanorūpatvād iti "parameṣṭhī" || MoT_1,1.11 ||



tūrṇaṃ sampūjito devaḥ so 'rghyapādyādinā mayā /
avocan mām mahāsattvaḥ sarvabhūtahite rataḥ // Mo_1,1.12 //
[BhG V 25d]
spaṣṭam || MoT_1,1.12 ||
brahmā kathayati
rāmasvabhāvakathanād asmād varamune tvayā /
nodyogaḥ samparityājya ā samāpter aninditāt // Mo_1,1.13 //
"ā samāpteḥ "samāptiparyantam || MoT_1,1.13 ||


nanu kimartham udyogaṃ na tyajāmīty | atrāha
jñātenānena loko 'yam asmāt saṃsārasaṅkaṭāt /
samuttariṣyati kṣipram potenevātha sāgarāt // Mo_1,1.14 //
"atha"śabdaḥ pādapūraṇārthaḥ || MoT_1,1.14 ||


vaktuṃ tavaitam evārtham aham āgatavān ayam /
kuru lokahitārthaṃ tvaṃ śāstram ity uktavān ajaḥ // Mo_1,1.15 //
spaṣṭam | brahmaṇo vākyam upasaṃharati "ity uktavān" iti || MoT_1,1.15 ||



rāma puṇyāśramāt tasmāt kṣaṇād antardhim āgataḥ /
muhūrtād udyataḥ proccais taraṅga iva vāriṇaḥ // Mo_1,1.16 //



"puṇyāśramāt" pavitrāt madāśramāt | "tasmāt" tasmin samaye gṛhītāt | munayo
hi navīnāni navīnāny āśramāṇi gṛhṇanti | brahmā ka "iva" | "taraṅga iva" | yathā "vāriṇaḥ" "udyataḥ" pūrvam utthitaḥ "taraṅgaḥ" | "muhūrtād antardhim" āgacchati tathety arthaḥ || MoT_1,1.16 ||



tasmin prayāte bhagavaty ahaṃ vismayam āgataḥ /
punas tatra bharadvājam apṛcchaṃ svacchayā dhiyā // Mo_1,1.17 //
"bharadvājaṃ" kathambhūtam | upalakṣitaṃ kayā | "svacchayā dhiyā" | anyathā pṛcchanam ayuktam eva syād iti bhāvaḥ || MoT_1,1.17 ||

kim apṛccha ity | atrāha
kim etad brahmaṇā proktam bharadvāja vadāśu me /
ity uktena punaḥ proktam bharadvājena me 'nagha // Mo_1,1.18 //
"anagha" he doṣarahita rāma || MoT_1,1.18 ||

bharadvājaḥ kathayati
etad uktam bhagavatā yathā rāmāyaṇaṃ kuru /
sarvalokahitāyāśu saṃsārārṇavapotakam // Mo_1,1.19 //
"etat"padākāṅkṣām pūrayati "yathe"ti || MoT_1,1.19 ||
nanu tatas tava kim ity | atrāha
mahyaṃ ca bhagavan brūhi kathaṃ saṃsārasaṅkaṭe /
rāmo vyavahṛto 'py asmin bharataś ca mahāmanāḥ // Mo_1,1.20 //
"vyavahṛtaḥ" vyavahāraṃ kṛtavān | "api"śabdaḥ asambhāvanādyotakaḥ "saṃsārasaṅkaṭe" ity anena sambadhyate || MoT_1,1.20 ||



śatrughno lakṣmaṇaś cāpi sītā cāpi yaśasvinī /
rāmānuyāyinas te vā mantriputrā mahādhiyaḥ // Mo_1,1.21 //
spaṣṭam || MoT_1,1.21 ||


nirduḥkhatāṃ yathaite tu prāptās tad brūhi me sphuṭam /
tathaivāhaṃ tariṣyāmi tato janatayā saha // Mo_1,1.22 //
"ete" rāmādayaḥ || MoT_1,1.22 ||
śrīvālmīkiḥ śrīrāmam prati kathayati
bharadvājena rājendra yadety ukto 'smi sādaram /
tadā kartuṃ vibhor ājñām ahaṃ vaktum pravṛttavān // Mo_1,1.23 //
"asmi" aham | "iti" pūrvoktaprakāreṇa | "uktaḥ" kathitaḥ | "vibhoḥ" brahmaṇaḥ || MoT_1,1.23 ||



pravṛttim eva sphuṭayati
śṛṇu vatsa bharadvāja yathāpṛṣṭaṃ vadāmi te /
śrutena yena sammoham alaṃ dūre kariṣyasi // Mo_1,1.24 //
"alam" atiśayena | "śṛṇv" iti pratijñāṃ sampādayitum prastāvaṃ karoti || MoT_1,1.24 ||


tathā vyavahara prājña yathā vyavahṛtaḥ sukhī /
sarvāsaṃsaktayā buddhyā rāmo rājīvalocanaḥ // Mo_1,1.25 //
"sarvāsaṃsaktayā" samastaphalāsaṅgarahitayā || MoT_1,1.25 ||
na kevalaṃ rāma eva kiṃ tv anye 'pīty abhiprāyeṇa kathayati
lakṣmaṇo bharataś caiva śatrughnaś ca mahāmanāḥ |
kausalyā ca sumitrā ca sītā daśarathas tathā || MoT_1,1.26 ||


spaṣṭam || MoT_1,1.26 ||


kṛtāsthaś cāvirodhaś ca bodhapāram upāgataḥ /
vasiṣṭho vāmadevaś ca mantriṇo 'ṣṭau tathetare // Mo_1,1.27 //
"kṛtāstha" iti nāma "avirodha" iti ca | "aṣṭau mantriṇaḥ" aṣṭāv amātyās | "tathetare" anye 'py aṣṭau mantriṇaḥ | tena ṣoḍaśa mantriṇa iti paramārthaḥ || MoT_1,1.27 ||
"itara" ity asyārthaṃ sphuṭaṃ kathayati
ghṛṣṭir vikunto bhāmaś ca satyavardhana eva ca /
vibhīṣaṇaḥ suṣeṇaś ca hanumān indrajit tathā // Mo_1,1.28 //
spaṣṭam || MoT_1,1.28 ||


ete 'ṣṭāviṃśatiḥ proktāḥ samanīrāgacetasaḥ /
jīvanmuktā mahātmāno yathāprāptānuvartinaḥ // Mo_1,1.29 //
"yathāprāptānuvartinaḥ" | na tu svaprayatnaniṣṭhā iti yāvat || MoT_1,1.29 ||


ebhir yathā hṛtaṃ dattaṃ gṛhītam uṣitaṃ smṛtam /
tathā ced vartase putra mukta evāsi saṅkaṭāt // Mo_1,1.30 //
"ebhiḥ" rāmādibhiḥ || MoT_1,1.30 ||


bharadvājasya praśnāvasaradānārthaṃ sargāntaślokena tāvat svavākyam upasaṃharati
apārasaṃsārasamudrapātī
labdhvā parāṃ yuktim udārasattvaḥ /
na śokam āyāti na dainyam eti
gatajvaras tiṣṭhati nityatṛptaḥ // Mo_1,1.31 //
"apāraḥ" yaḥ "saṃsārasamudraḥ" | tatra "pātī" patanaśīlaḥ | "udārasattvaḥ" utkṛṣṭadhairyayuktaḥ "puruṣaḥ" | "parām" utkṛṣṭāṃ | "yuktiṃ" dṛśyātyantābhāvajñānalakṣaṇāṃ vakṣyamāṇāṃ yuktiṃ | prāpya | "śokam" apekṣālakṣaṇaṃ śokaṃ | "nāyāti" | tathā "dainyam" dīnatvam | atṛptim iti yāvat | "naiti" | pratyuta "gatajvaraḥ" apekṣāsvarūpajvararahitaḥ | ata eva "nityatṛptaḥ" "tiṣṭhatī"ti śivam || MoT_1,1.31 ||



iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe prathamaḥ sargaḥ || 1,1 ||


************************************************************************


bharadvājaḥ pṛcchati
jīvanmuktasthitim brahman kṛtvā rāghavam āditaḥ /
kramāt kathaya me nityam bhaviṣyāmi sukhī yathā // Mo_1,2.1 //
"brahman" śrīvālmīke | tvaṃ | "jīvanmuktasthitiṃ" jīvanmuktamaryādāṃ | "rāghavaṃ" śrīrāmam | "āditaḥ" "kṛtvā" | "me kathaya" śrīrāmavṛttāntadvāreṇa kathayeti bhāvaḥ | nanu kimarthaṃ kathayāmīty | atrāha | "bhaviṣyāmī"ti | ahaṃ "yathā" yena jīvanmuktasthitikathanena | "nityasukhī" jīvanmuktyākhyamahāsukhayukto | "bhaviṣyāmi" || MoT_1,2.1 ||
śrīvālmīkiḥ śrīrāmavṛttāntaśravaṇādhikāritvasampādanārthaṃ tāvat sāmānyenopadeśaṃ karoti
bhramasya jāgatasyāsya jātasyākāśavarṇavat /
apunaḥsmaraṇam manye sādho vismaraṇaṃ varam // Mo_1,2.2 //
he "sādho" | aham "asya" puraḥ sphurataḥ | "jāgatasya" jagatsambandhinaḥ | tadviṣayasyeti yāvat | tathā "ākāśavarṇavat" ākāśanīlimavat | "jātasya" prādurbhūtasya | mithyābhātasyeti yāvat | "bhramasya" jagattvajñānarūpasya mithyājñānasya | "apunaḥsmaraṇam" punaḥsmṛtiviṣayabhāvānayanam | upekṣām iti yāvat | "varam" utkṛṣṭaṃ | "vismaraṇam" vismṛtiṃ | "manye" | upekṣā evātra yuktā | na vismṛtiḥ | tasyāḥ jāḍyavyāptatvād iti bhāvaḥ || MoT_1,2.2 ||



nanu tad "apunaḥsmaraṇaṃ "kenopāyena bhaviṣyatīty | atrāha
dṛśyātyantābhāvabodhaṃ vinā tan nānubhūyate /
kadācit kenacin nāma sa bodho 'nviṣyatām ataḥ // Mo_1,2.3 //
"nāma" niścaye | "kenacit" puruṣeṇa | "tad" apunaḥsmaraṇaṃ | dṛśyasya ...



...

ajñānasughanākārā ghanāhaṅkāraśālinī /
punar janmakarī proktā malinā vāsanā budhaiḥ // Mo_1,2.12 //
paṇḍitaiḥ "vāsanā" "malinā" "uktā" | kathambhūtā | "ajñānasughanākārā" | "ajñānena" cinmātrājñānena | "sughanaḥ ākāraḥ" yasyāḥ | sā | cinmātrājñānenaiva hi vāsanā ghanībhavanti | anyathā śuddhacinmātraikyena vāsanā kiṃviṣayā syāt | punaḥ kathambhūtā | "ghanaḥ" acchinnaḥ | yaḥ "ahaṅkāraḥ" dehādiviṣayaḥ ahambhāvaḥ | tena "śālinī" | vāsanāvaśenaiva hi dehādiniṣṭhaḥ ahaṅkāro ghanībhavati | punaḥ kathambhūtā | "punaḥ janmakarī" punar api bhavakarī | padārthabhāvena vyaktībhāvāt || MoT_1,2.12 ||
śuddhāyāḥ svarūpaṃ kathayati
punarjanmāṅkuratyaktā sthitā sambhṛṣṭabījavat /
dehāntaṃ dhriyate jñātajñeyā śuddheti socyate // Mo_1,2.13 //
paṇḍitaiḥ "sā" vāsanā | "śuddheti" kathyate | "sā" kā | yā "dehāntaṃ" dehasthitiparyantam eva | na tu tadanantaram api | "dhriyate" avatiṣṭhate | yā kathambhūtā |" punarjanmā"khyen"āṅkureṇa" "tyaktā" | yataḥ "sambhṛṣṭabījavat" bharjitabījavat | "sthitā" | yathā sambhṛṣṭam bījam ākāramātreṇa tiṣṭhati | aṅkurasamarthaṃ na bhavati | tathā śuddhā vāsanāpy ākāramātreṇaiva tiṣṭhati | janmāṅkurotpādanasamarthā na bhavatīty arthaḥ | punaḥ kathambhūtā | "jñātaṃ jñeyam" avaśyajñeyatvena sthitam paramātmatattvam | yayā hetubhūtayā | tādṛśī | śāstravicārādirūpayā śuddhayā vāsanayaiva hi paramātmatattvaṃ jñāyate || MoT_1,2.13 ||
śuddhāyā āśrayaviśeṣaṃ kathayati
apunarjanmakaraṇī jīvanmukteṣu dehiṣu /
vāsanā vidyate śuddhā dehe cakra iva bhramaḥ // Mo_1,2.14 //
"jīvanmukteṣu dehiṣu" jīveṣu | "apunarjanmakaraṇī" punarjanmākārikā | "śuddhā" "vāsanā dehe vidyate" | na tu citte | kā "iva "| "bhramaḥ" "iva" | yathā "bhramaḥ" cākrākāreṇa bhramaṇaṃ | "cakre" vidyate | tathety arthaḥ | jīvanmuktānāṃ vāsanā phalādyanusandhānānutpādikā evāstīti bhāvaḥ || MoT_1,2.14 ||



jīvanmuktalakṣaṇaṃ kathayati
ye śuddhavāsanā bhūyo na janmānarthabhājanam /
jñātajñeyās ta ucyante jīvanmuktā mahādhiyaḥ // Mo_1,2.15 //
"śuddhā vāsanā" yeṣāṃ | te | tādṛśāḥ || MoT_1,2.15 ||
sāmānyenopadeśaṃ kṛtvā śrīrāmavṛttāntam ārabhate
jīvanmuktapadam prāpto yathā rāmo mahāmatiḥ /
tat te 'ham sampravakṣyāmi jarāmaraṇaśāntaye // Mo_1,2.16 //
nanu kimarthaṃ śrīrāmajīvanmuktiprāptiṃ kathayasīty | atrāha "jare"ti | śrīrāmajīvanmuktipadaprāptiśravaṇena hi tavāpi tadvyavahārānusāreṇa jarādiśāntir bhavatīti bhāvaḥ || MoT_1,2.16 ||
nanu bahūpadeśakāṅkṣiṇo mama kiṃ rāmakramamātrakathanenety | atrāha
bharadvāja mahābuddhe rāmakramam imaṃ śubham /
śṛṇu vakṣyāmi tenaiva sarvaṃ jñāsyasi sarvathā // Mo_1,2.17 //
"sarvathe"ty anena tataḥ kāpy ākāṅkṣā tava na syād iti bhāvaḥ || MoT_1,2.17 ||
tad eva kathayati
vidyāgṛhād viniṣkramya rāmo rājīvalocanaḥ /
divasāny anayad gehe līlābhir akutobhayaḥ // Mo_1,2.18 //
"divasāni" | na tu māsān | avidyamānaṃ kuto 'pi bhayaṃ yasya saḥ "akutobhayaḥ "| nirbhaya ity arthaḥ || MoT_1,2.18 ||



atha gacchati kāle 'tra pālayaty avaniṃ nṛpe /
prajāsu vītaśokāsu sthitāsu vigatajvaram // Mo_1,2.19 //
tīrthamunyāśramaśreṇīṃ draṣṭum utkaṇṭhitam manaḥ /
rāmasyābhūd bhṛśaṃ tatra kadācid guṇaśālinaḥ // Mo_1,2.20 //
spaṣṭam | yugmam || MoT_1,2.19-20 ||


rāghavaś cintayitvaivam upetya caraṇau pituḥ /
haṃsaḥ padmāv iva navau jagrāha navakesarau // Mo_1,2.21 //
pādavandanaṃ cakārety arthaḥ || MoT_1,2.21 ||
śrīrāmaḥ pitaram prati kathayati
tīrthāni devasadmāni vanāny āyatanāni ca /
draṣṭum utkaṇṭhitaṃ tāta mamedaṃ hi bhṛśam manaḥ // Mo_1,2.22 //
"hi" niścaye || MoT_1,2.22 ||



tad etām arthanām pūrvāṃ saphalīkartum arhasi /
na so 'sti bhuvane tāta tvayā yo 'rthī vimānitaḥ // Mo_1,2.23 //
mayādya tāvat tava kāpi prārthanā na kṛteti "pūrvām" ity asyābhiprāyaḥ || MoT_1,2.23 || śrīrāmaprārthanām upasaṃharati
iti samprārthito rājā vasiṣṭhena samaṃ tadā /
vicāryāmuñcad evainaṃ rāmam prathamam arthinam // Mo_1,2.24 //
"vicāryai"va | na tu "vicāram" akṛtvā | "prathamam arthinaṃ" tatpūrvam arthibhūtam || MoT_1,2.24 ||



śubhe nakṣatradivase bhrātṛbhyāṃ saha rāghavaḥ /
maṅgalālaṅkṛtavapuḥ kṛtasvastyayano dvijaiḥ // Mo_1,2.25 //
vasiṣṭhaprahitair vipraiḥ śāstratajjñaiḥ samanvitaḥ /
snigdhaiḥ katipayair eva rājaputravaraiḥ saha // Mo_1,2.26 //
ambābhir vihitāśīrbhir āliṅgyāliṅgya bhūṣitaḥ /
niragāt sa gṛhāt tasmāt tīrthayātrārtham udyataḥ // Mo_1,2.27 //
"āliṅgyāliṅgye"ty anena snehātiśayo dyotyate | "niragāt" niryayau || MoT_1,2.25-27 ||



nirgataḥ svapurāt paurais tūryaghoṣeṇa vardhitaḥ /
pīyamānaḥ purandhrīṇāṃ netrair bhṛṅgaughabhaṅguraiḥ // Mo_1,2.28 //
grāmīṇalalanālokahastapadmāpavarjitaiḥ /
lājavarṣair vikīrṇātmā himair iva himācalaḥ // Mo_1,2.29 //
āvarjayan vipragaṇān pariśṛṇvan prajāśiṣaḥ /
ālokayan digantāṃś ca paricakrāma jaṅgale // Mo_1,2.30 //
"paricakrāma" pādacāreṇa gatavān | tīrthayātrāyāṃ hi pādacāreṇa gamanam puṇyāvaham || MoT_1,2.28-30 ||



athārabhya svakāt tasmāt kramāt kosalamaṇḍalāt /
snānadānatapodhyānapūrvakaṃ sa dadarśa ha // Mo_1,2.31 //
"ha"śabdaḥ nipātaḥ || MoT_1,2.31 ||
kiṃ "dadarśe"ti karmāpekṣāyām āha
nadīs tīrthāni puṇyāni vanāny āyatanāni ca /
jaṅgalāni vanānteṣu taṭāny abdhimahībhṛtām // Mo_1,2.32 //
"vanānteṣu" sthitāni "jaṅgalāni" sajalāḥ deśāḥ || MoT_1,2.32 ||


mandākinīm indunibhāṃ kālindīṃ cotpalāmalām /
sarasvatīṃ śatadruṃ ca candrabhāgām irāvatīm // Mo_1,2.33 //
spaṣṭam || MoT_1,2.33 ||


veṇāṃ ca kṛṣṇaveṇāṃ ca nirvindhyāṃ sarayūṃ tathā /
carmaṇvatīṃ vitastāṃ ca vipāśām bāhudām api // Mo_1,2.34 //
spaṣṭam || MoT_1,2.34 ||



prayāgaṃ naimiṣaṃ caiva dharmāraṇyaṃ gayāṃ tathā /
vārāṇasīṃ śrīgiriṃ ca kedāram puṣkaraṃ tathā // Mo_1,2.35 //



spaṣṭam || MoT_1,2.35 ||


mānasaṃ ca kramasaras tathaivottaramānasam /
vaḍavām maḍavāṃ caiva tīrthavṛndaṃ sasodaram // Mo_1,2.36 //
"tīrthavṛndaṃ" kathambhūtaṃ | "sasodaraṃ" sodarākhyatīrthasahitam || MoT_1,2.36 ||


agnitīrtham mahātīrtham indradyumnasaras tathā /
sarāṃsi sarasīś caiva tathā vāpīhradāvalīm // Mo_1,2.37 //
spaṣṭam || MoT_1,2.37 ||


svāminaṃ kārttikeyaṃ ca sāligrāmahariṃ tathā /
sthānāni ca catuṣṣaṣṭiṃ harasya girijāpateḥ // Mo_1,2.38 //
spaṣṭam || MoT_1,2.38 ||



nānāścaryavicitrāṇi caturabdhitaṭāni ca /
vindyakandarakuñjāṃś ca kulaśailasthalāni ca // Mo_1,2.39 //
spaṣṭam || MoT_1,2.39 ||



rājarṣīṇāṃ ca mahatām brahmarṣīṇāṃ tathaiva ca /
devānām brāhmaṇānāṃ ca pāvanān āśramāñ śubhān // Mo_1,2.40 //
spaṣṭam || MoT_1,2.40 ||


bhūyo bhūyaḥ sa babhrāma bhrātṛbhyāṃ saha mānadaḥ /
caturṣv api diganteṣu sarvān eva mahītaṭān // Mo_1,2.41 //
spaṣṭam || MoT_1,2.41 ||
sargāntaślokena tīrthayātrābhramaṇam upasaṃharati
amarakinnaramānavamānitaḥ
samavalokya mahīm akhilām imām /
upayayau svagṛhaṃ raghunandano
vihṛtadik śivalokam iveśvaraḥ // Mo_1,2.42 //
"īśvaraḥ" kathambhūtaḥ | "vihṛtadik" vihṛtāḥ vihāraviṣayīkṛtāḥ diśaḥ yena | tādṛśaḥ | iti śivam || MoT_1,2.42 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe dvitīyaḥ sargaḥ || 1,2 ||



************************************************************************


śrīrāmasya gṛhapraveśaṃ kathayati
lājapuṣpāñjalivrātair vikīrṇaḥ pauravāsibhiḥ /
sa viveśa gṛhaṃ śrīmāñ jayanto viṣṭapaṃ yathā // Mo_1,3.1 //
"vikīrṇaḥ" bharitaḥ |" jayantaḥ" indraputraḥ || MoT_1,3.1 ||
praṇanāmātha pitaraṃ vasiṣṭham mātṛbāndhavān /
brāhmaṇān guruvṛddhāṃś ca rāghavaḥ prathamāgataḥ // Mo_1,3.2 //
spaṣṭam || MoT_1,3.2 ||



suhṛdbhir mātṛbhiś caiva pitrā dvijagaṇena ca /
muhur āliṅganācārai rāghavo na mamau tadā // Mo_1,3.3 //
"rāghavas" "tadā" "suhṛd"ādi"bhiḥ" sahakṛtaiḥ "āliṅganācāraiḥ" āliṅganarūpaiḥ lokācāraiḥ |" na" "mamau" mahānandayukto jāta iti bhāvaḥ || MoT_1,3.3 ||



tasmin dṛḍhair dāśarathau priyaprakathanair mithaḥ /
jughūrṇur madhurair āśā mṛduvaṃśasvanair iva // Mo_1,3.4 //
"tasmin" "dāśarathau" "mithaḥ" "priyaprakathanaiḥ" śrīrāmaviṣayaiḥ anyo'nyam priyakathanaiḥ | śrīrāmo gṛham prāpta ity evaṃrūpaiḥ parasparam priyakathanair iti yāvat |" āśāḥ" diśaḥ | "jughūrṇuḥ" ghūrṇim prāpuḥ | maṅgalavācibhūkampotthānād iyam uktiḥ |" priyaprakathanaiḥ" kathambhūtaiḥ | "dṛḍhais" tathā "madhuraiḥ" karṇasukhaiḥ | "priyaprakathanaiḥ" kair "iva" | "mṛduvaṃśasvanair" "iva" | yathā taiḥ puruṣāḥ ghūrṇanti | tathety arthaḥ || MoT_1,3.4 ||
bahūny āsa dināny atra rāmāgamanam utsavaḥ /
mahānande janān muñcan kelikolāhalākulaḥ // Mo_1,3.5 //
"atra" daśarathapure |" rāmāgamanam" " utsavaḥ" "āsa" abhūt | kiyantaṃ kālaṃ | "bahūni" "dināni" | bahudinaparyantam ity arthaḥ |" utsavaḥ" kiṃ kurvan | "janān mahānande" "muñcan" | "āse"ti prayoga ārṣaḥ || MoT_1,3.5 ||



uvāsa sa sukhaṃ gehe tataḥ prabhṛti rāghavaḥ /
varṇayan vividhācārān deśācārān itas tataḥ // Mo_1,3.6 //
"itas tataḥ" yatra tatra || MoT_1,3.6 ||


prātar utthāya rāmo 'sau kṛtvā sandhyāṃ yathāvidhi /
sabhāsaṃsthaṃ dadarśendrasamaṃ svapitaraṃ tadā // Mo_1,3.7 //
spaṣṭam || MoT_1,3.7 ||


kathābhiḥ suvicitrābhiḥ sa vasiṣṭhādibhiḥ saha /
sthitvā dinacaturbhāgaṃ jñānagarbhābhir ādṛtaḥ // Mo_1,3.8 //
jagāma pitranujñāto mahatyā senayāvṛtaḥ /
varāhamahiṣākīrṇaṃ vanam ākheṭakecchayā // Mo_1,3.9 //
"ākheṭecchayā" mṛgayākāṅkṣayā || MoT_1,3.8-9 ||


tata āgatya sadane kṛtvā snānādikaṃ kramāt /
samitrabāndhavo bhuktvā nināya sasuhṛn niśām // Mo_1,3.10 //
spaṣṭam || MoT_1,3.10 ||
evaṃrūpam ācāram asau naikasminn eva dine kṛtavān api tu sarvadaivety abhiprāyeṇa kathayati
evamprāyadinācāro bhrātṛbhyāṃ saha rāghavaḥ /
āgatya tīrthayātrāyāḥ samuvāsa pitur gṛhe // Mo_1,3.11 //
spaṣṭam || MoT_1,3.11 ||


sargāntaślokenaitad upasaṃharati
nṛpatisaṃvyavahāramanojñayā
sujanacetasi candrikayā tathā /
parinināya dināni sa ceṣṭayā
śrutasudhārasapeśalayānaghaḥ // Mo_1,3.12 //



"saḥ anaghaḥ" doṣarahitaḥ śrīrāmaḥ | evaṃvidhayā "ceṣṭayā dināni parinināya" laṅghitavān | kiṃvidhayā | "nṛpativyavahāreṇa" prajāvicārādinā rājavyavahāreṇa | "manojñayā" hṛdyayā | tathā "sujanacetasi" satpuruṣamanasi | "candrikayā" sujanahṛdayāhlādikayeti yāvat | tathā "śrute" śravaṇe | "sudhārasa"vat "peśalayā" | dṛṣṭatve tu kiṃ vācyam iti bhāvaḥ | iti śivam || MoT_1,3.12 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe tṛtīyaḥ sargaḥ || 1,3 ||



************************************************************************


athonaṣoḍaśe varṣe vartamāne raghūdvahe /
rāmānuyāyini tathā śatrughne lakṣmaṇe 'pi ca // Mo_1,4.1 //
bharate saṃsthite nityam mātāmahagṛhe sukham /
pālayaty avaniṃ rājñi yathāvad akhilām imām // Mo_1,4.2 //
janyatrārthaṃ ca putrāṇām pratyahaṃ saha mantribhiḥ /
kṛtamantre mahāprājñe tajjñe daśarathe nṛpe // Mo_1,4.3 //
kṛtāyāṃ tīrthayātrāyāṃ rāmo nijagṛhasthitaḥ /
jagāmānudinaṃ kārśyaṃ śaradīvāmalaṃ saraḥ // Mo_1,4.4 //
"tathā" ūnaṣoḍaśavarṣe satīty arthaḥ | "janyatrārthaṃ" vivāhārtham | "kārśyaṃ" kṣīṇatām || MoT_1,4.1-4 ||



kārśyam eva kathayati
kramād asya viśālākṣam pāṇḍutām mukham ādadhe /
pākaphulladalaṃ śuklaṃ sālimālam ivāmbujam // Mo_1,4.5 //
kṛśatāyāṃ hi mukhasya pāṇḍimā jāyate || MoT_1,4.5 ||


kapolatalasaṃlīnapāṇiḥ padmāsanasthitaḥ /
cintāparavaśas tūṣṇīm avyāpāro babhūva saḥ // Mo_1,4.6 //
"saḥ" śrīrāmaḥ || MoT_1,4.6 ||


kṛśāṅgaś cintayā yuktaḥ khedī paramadurmanāḥ /
novāca kasyacit kiñcil lipikarmārpitopamaḥ // Mo_1,4.7 //
spaṣṭam || MoT_1,4.7 ||


khedāt parijanenāsau prārthyamānaḥ punaḥ punaḥ /
cakārāhnikam ācāram parimlānamukhāmbujaḥ // Mo_1,4.8 //
spaṣṭam || MoT_1,4.8 ||


evam muniviśiṣṭaṃ taṃ rāmaṃ guṇagaṇākaram /
ālokya bhrātarāv asya tām evāyayatur daśām // Mo_1,4.9 //
"muniviśiṣṭam" utkṛṣṭam muniṃ | vairāgyavattvāt | "asya tām" "eva" "daśāṃ" rāmasambandhinīṃ kārśyādirūpām evāvasthām || MoT_1,4.9 ||


tathā teṣu tanūjeṣu khedavatsu kṛśeṣu ca /
sapatnīko mahīpālaś cintāvivaśatāṃ yayau // Mo_1,4.10 //
spaṣṭam || MoT_1,4.10 ||


kā te putra ghanā cintety evaṃ rāmam punaḥ punaḥ /
apṛcchat snigdhayā vācā na cākathayad asya saḥ // Mo_1,4.11 //
"saḥ" rāmaḥ | "asya" pituḥ || MoT_1,4.11 ||


na kiñcit tāta me duḥkam ity uktvā pitur aṅkagaḥ /
rāmo rājīvapatrākṣas tūṣṇīm eva sma tiṣṭhati // Mo_1,4.12 //
spaṣṭam || MoT_1,4.12 ||


tato daśaratho rājā rāmaḥ kiṃ khedavān iti /
apṛcchat sarvakāryajñaṃ vasiṣṭhaṃ vadatāṃ varam // Mo_1,4.13 //
"sarvakāryajñaṃ" sarveṣu kāryeṣu nipuṇam | anyathā pṛcchanam ayuktam eva syād iti bhāvaḥ || MoT_1,4.13 ||


asty atra kāraṇaṃ śrīman mā rājan duḥkham astu te /
ity uktaś cintayā yukto vasiṣṭhamuninā nṛpaḥ // Mo_1,4.14 //
"śrīmat" jñānākhyaphalakāritvāt | "kāraṇaṃ" vairāgyākhyaṃ kiñcid | asmin samaye vaktum ayuktam iti bhāvaḥ || MoT_1,4.14 ||


upasaṃhṛtam api vasiṣṭhavākyaṃ sargāntaślokena punaḥ kathayati
kopaṃ viṣādakalanāṃ vitataṃ ca harṣaṃ
nālpena kāraṇavaśena vahanti santaḥ |
sargeṇa saṃhatijavena vinā jagatyām
bhūtāni bhūpa na mahānti vikārayanti || MoT_1,4.15 ||



"santaḥ" sādhavaḥ | "alpena" stokena | "kāraṇavaśena" vitataṃ "kopaṃ" vitatāṃ "viṣādakalanāṃ" "vitataṃ" "harṣaṃ" "ca" | "na" "vahanti" na dhārayanti | "alpene"ti viśeṣaṇasya "kāraṇe"ty anenārthikaḥ sambandhaḥ | atra vyatirekeṇa dṛṣṭāntam āha "sargeṇe"ti | he "bhūpa" | "mahānti bhūtāni" mahābhūtāni | "jagatyāṃ" jagati | "sargeṇa vinā" mahāsṛṣṭiṃ "vinā" | tathā "saṃhatijavena vinā" saṃhārākhyavegena vinā | "na vikārayanti" kāryotpattyākhyavikārayuktāni tathā nāśākhyavikārayuktāni ca na bhavanti | tat karoti tad ācaṣṭe iti ṇic | "vikāravantī"ti vā pāṭhaḥ | sthityavasthāyām avāntarasargasaṃhatirūpeṇālpena kāraṇena na bhavantīti bhāvaḥ | iti śivam || MoT_1,4.15 ||



iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe caturthaḥ sargaḥ || 1,4 ||



************************************************************************

śrīvālmīkir bharadvājam prati kathayati
ity ukte munināthena sandehavati pārthive /
khedavaty āsthite maunaṃ kañcit kālam pratīkṣiṇi // Mo_1,5.1 //
parikhinnāsu sarvāsu rājñīṣu nṛpasadmasu /
sthitāsu sāvadhānāsu rāmaceṣṭāsu sarvataḥ // Mo_1,5.2 //
etasminn eva kāle tu viśvāmitra iti śrutaḥ /
maharṣir āgamad draṣṭuṃ tam ayodhyāṃ narādhipam // Mo_1,5.3 //
"āgamat" āgacchati sma || MoT_1,5.1-3 ||



nanu kimartham asau āgata ity | atrāha
tasya yajño 'tha rakṣobhis tadā vilulupe kila /
māyāvīryabalonmattair dharmakāmasya dhīmataḥ // Mo_1,5.4 //
rakṣārthaṃ tasya yajñasya draṣṭum aicchat sa pārthivam /
na hi śakto hy avighnena tam āptuṃ sa muniḥ kratum // Mo_1,5.5 //
nanu kimarthaṃ taṃ "rakṣārthaṃ" "draṣṭum aicchad" ity | atrāha "na hī"ti || MoT_1,5.4-5 ||



tatas teṣāṃ vināśārtham udyatas tapasāṃ nidhiḥ /
viśvāmitro mahātejā ayodhyām abhyayāt purīm // Mo_1,5.6 //
[Rām I 17, 23]
"abhyayāt" abhigacchati sma || MoT_1,5.6 ||



sa rājño darśanākāṅkṣī dvārādhyakṣān uvāca ha /
śīghram ākhyāta mām prāptaṃ kauśikaṃ gādhinaḥ sutam // Mo_1,5.7 //
[Rām I 17, 24]
"ha"śabdaḥ nipātaḥ | kim "uvāce"ti karmāpekṣāyām uttarārdhaṃ karmatvena kathayati "śīghram" iti | "ākhyāta" kathayata | yūyam iti śeṣaḥ | "gādhinaḥ" gādhirājasya || MoT_1,5.7 ||


tasya tad vacanaṃ śrutvā dvāḥsthā rājagṛhaṃ yayuḥ /
sambhrāntamanasaḥ sarve tena vākyena coditāḥ // Mo_1,5.8 //
[Rām I 17, 25]
"tena" "vākyena" viśvāmitroktena vākyena || MoT_1,5.8 ||


te gatvā rājabhavanaṃ viśvāmitram ṛṣiṃ tataḥ /
prāptam āvedayām āsuḥ pratīhārapatiṃ tadā // Mo_1,5.9 //
[Rām I 17, 26]
"pratīhārapatiṃ" dvāsthādhikāriṇam || MoT_1,5.9 ||


athāsthānagatam bhūpaṃ rājamaṇḍalam āsthitam /
samupetya tvarāyukto yāṣṭīko 'sau vyajijñapat // Mo_1,5.10 //
"asau yāṣṭīkaḥ" pratīhārapatiḥ || MoT_1,5.10 ||


kiṃ "vyajijñapad" ity | atrāha
deva dvāri mahātejā bālabhāskarasannibhaḥ /
jvālāruṇajaṭājūṭaḥ pumāñ śrīmān avasthitaḥ // Mo_1,5.11 //
spaṣṭam || MoT_1,5.11 ||


sa cāmarapatākāḍhyaṃ sāśvebhapuruṣāyudham /
kṛtavāṃs tam pradeśaṃ yas tejobhiḥ kīrṇakāñcanam // Mo_1,5.12 //



spaṣṭam || MoT_1,5.12 ||


vakty asmān āśu yāṣṭīkā nivedayata rājani /
viśvāmitro muniḥ prāpta ity anuddhatayā girā // Mo_1,5.13 //
asau puruṣaḥ "asmān" "anuddhatayā" "gire"ti "vaktī"ti sambandhaḥ |
yāṣṭīkā ity āmantraṇam | yūyam ity adhyāhāryam || MoT_1,5.13 ||



iti yāṣṭīkavacanam ākarṇya nṛpasattamaḥ /
sa samantrī sasāmantaḥ prottasthe hemaviṣṭarāt // Mo_1,5.14 //
"hemaviṣṭarāt" suvarṇapīṭhāt || MoT_1,5.14 ||


padātir eva mahatāṃ rājñāṃ vṛndena pālitaḥ /
vasiṣṭhavāmadevābhyāṃ saha sāmantasaṃstutaḥ // Mo_1,5.15 //
spaṣṭam || MoT_1,5.15 ||



jagāma tatra yatrāsau viśvāmitro mahāmuniḥ /
dadarśa muniśārdūlaṃ dvārabhūmāv adhiṣṭhitam // Mo_1,5.16 //
spaṣṭam || MoT_1,5.16 ||


kīdṛśaṃ dadarśety apekṣāyām āha
kenāpi kāraṇenorvītalam arkam ivāgatam /
brāhmeṇa tejasākrāntaṃ kṣātreṇa ca mahaujasā // Mo_1,5.17 //
spaṣṭam || MoT_1,5.17 ||


jarājaraḍhayā nityaṃ tapaḥprasararūkṣayā /
jaṭāvallyā vṛtaskandhaṃ sasandhyābhram ivācalam // Mo_1,5.18 //
spaṣṭam || MoT_1,5.18 ||



upaśāntaṃ ca kāntaṃ ca dīptam apratighaṃ tathā /
nibhṛtaṃ corjitākāraṃ dadhānam bhāsvaraṃ vapuḥ // Mo_1,5.19 //
"apratigham" apratighātākāram | "nibhṛtaṃ" komalaṃ || MoT_1,5.19 ||



peśalenātibhīmena prasannenākulena ca /
gambhīreṇātipūrṇena tejasā rañjitaprajam // Mo_1,5.20 //
spaṣṭam || MoT_1,5.20 ||


anantajīvitadaśāsakhīm ekām aninditām /
dhārayantaṃ kare ślakṣṇāṃ vīṇām amlānamānasam // Mo_1,5.21 //
"ślakṣṇām" peśalām || MoT_1,5.21 ||


karuṇākrāntacetastvāt prasannamadhurekṣitaiḥ /
īkṣaṇair amṛteneva saṃsiñcantam imāḥ prajāḥ // Mo_1,5.22 //
spaṣṭam || MoT_1,5.22 ||



sitāsitatatāpāṅgaṃ dhavalapronnatabhruvam /
ānandaṃ ca bhayaṃ cāntaḥ prayacchantam avekṣituḥ // Mo_1,5.23 //
"avekṣituḥ" paśyataḥ | atipeśalatvāt "ānanda"dānaṃ | satejaskatvāt "bhaya"dānam || MoT_1,5.23 ||


munim ālokya bhūpālo dūrād evānatākṛtiḥ /
praṇanāma galanmaulimaṇimālitabhūtalam // Mo_1,5.24 //
"galad" ityādi kriyāviśeṣaṇam || MoT_1,5.24 ||



munir apy avaner īśam bhāsvān iva śatakratum /
tatrābhivādayāṃ cakre madhurodārayā girā // Mo_1,5.25 //
spaṣṭam || MoT_1,5.25 ||


tato vasiṣṭhapramukhāḥ sarva eva dvijātayaḥ /
svāgatādikrameṇainam pūjayām āsur ādṛtāḥ // Mo_1,5.26 //
"enaṃ" viśvāmitram || MoT_1,5.26 ||


daśarathaḥ kathayati
aśaṅkitopanītena bhāsvatā darśanena te /
sādho svanugṛhītāḥ smo raviṇevāmbujākarāḥ // Mo_1,5.27 //
"aśaṅkitam" śaṅkarāhitam | "upanītena" prāptena || MoT_1,5.27 ||


yad anādi yad akṣubdhaṃ yad apāyavivarjitam /
tad ānandasukham prāptā adya tvaddarśanān mune // Mo_1,5.28 //
"tvaddarśanena" vayam brahmānandam "prāptā" iti bhāvaḥ || MoT_1,5.28 ||



adya vartāmahe nūnaṃ dharmyāṇāṃ dhuri dharmataḥ /
bhavadāgamanasyeme yad vayaṃ lakṣyatāṃ gatāḥ // Mo_1,5.29 //
"vartāmahe" tiṣṭhāmaḥ | "lakṣyatām" āśrayatvam | viṣayatvam iti yāvat || MoT_1,5.29 ||


evam prakathayanto 'tra rājāno 'tha maharṣayaḥ /
āsaneṣu sabhāsthānam āsthāya samupāviśan // Mo_1,5.30 //
"samupāviśan" upaviṣṭāḥ || MoT_1,5.30 ||


sa dṛṣṭvā jvalitaṃ lakṣmyā bhītas tam ṛṣim āgatam /
prahṛṣṭavadano rājā svayam arghyaṃ nyavedayat // Mo_1,5.31 //
[Rām I 17, 28]
"nyavedayad" arpitavān || MoT_1,5.31 ||


sa rājñaḥ pratigṛhyārghyaṃ śāstradṛṣṭena karmaṇā /
pradakṣiṇam prakurvantaṃ rājānam paryapūjayat // Mo_1,5.32 //
[Rām I 17, 29ab (*539cd)]
spaṣṭam || MoT_1,5.32 ||


sa rājñā pūjitas tena prahṛṣṭavadanas tadā /
kuśalaṃ cāvyayaṃ caiva paryapṛcchan narādhipam // Mo_1,5.33 //
[Rām I 17, 29cd]
spaṣṭam || MoT_1,5.33 ||



vasiṣṭhena samāgamya prahasya munipuṅgavaḥ /
yathārhaṃ cārcayitvainam papracchānāmayaṃ tataḥ // Mo_1,5.34 //
[Rām I 17, 30ab (*541ab)]
spaṣṭam || MoT_1,5.34 ||


kṣaṇaṃ yathārham anyo'nyam pūjayitvā sametya ca /
te sarve hṛṣṭamanaso mahārājaniveśane // Mo_1,5.35 //
[Rām I 17, 31ab (*541cd)]
spaṣṭam || MoT_1,5.35 ||


yathocitāsanagatā mithaḥ saṃvṛddhatejasaḥ /
paraspareṇa papracchuḥ sarve 'nāmayam ādarāt // Mo_1,5.36 //
spaṣṭam || MoT_1,5.36 ||


upaviṣṭāya tasmai sa viśvāmitrāya dhīmate /
pādyam arghyaṃ ca gāś caiva bhūyo bhūyo nyavedayat // Mo_1,5.37 //
[Rām I *542ab;ef]
spaṣṭam || MoT_1,5.37 ||



arcayitvā ca vidhivad viśvāmitram abhāṣata /
prāñjaliḥ prayato vākyam idam prītamanā nṛpaḥ // Mo_1,5.38 //
[Rām I *542g-j]
spaṣṭam || MoT_1,5.38 ||


yathāmṛtasya samprāptir yathā varṣam avarṣake |
[Rām I 17, 33ab]
yathāndhasyekṣaṇaprāptir bhavadāgamanaṃ tathā || MoT_1,5.39 ||



spaṣṭam || MoT_1,5.39 ||



yatheṣṭadhanasamparkaḥ putrajanmāprajāvataḥ |
[Rām I 17, 33cd]
svapnadṛṣṭārthalābhaś ca bhavadāgamanaṃ tathā || MoT_1,5.40 ||


[Rām I *545c]
spaṣṭam || MoT_1,5.40 ||


yathepsitena saṃyoga iṣṭasyāgamanaṃ yathā |
[Rām I *544]
praṇaṣṭasya yathā lābho bhavadāgamanaṃ tathā || MoT_1,5.41 ||


[Rām I 17, 33e]
spaṣṭam || MoT_1,5.41 ||



yathā harṣo nabhogatyā mṛtasya punar āgamāt /
tathā tvadāgamād brahman svāgataṃ te mahāmune // Mo_1,5.42 //
[Rām I 17, 33f-h (*545d)]
"mṛtasya" "punar āgamād" | ity atra yatheti śeṣaḥ | he mahāmune | "te" "svāgatam" astu || MoT_1,5.42 ||



brahmalokanivāso hi kasya na prītim āvahet /
mune tavāgamas tadvat satyam eva bravīmi te // Mo_1,5.43 //
[Rām I *545ef;*546]
spaṣṭam || MoT_1,5.43 ||



kaś ca te paramaḥ kāmaḥ kiṃ ca te karavāṇy aham /
pātrabhūto 'si me vipra prāptaḥ paramadhārmikaḥ // Mo_1,5.44 //
[Rām I 17, 34a-d]
he "vipra" | "asi" tvaṃ | "me pātrabhūtaḥ prāptaḥ" || MoT_1,5.44 ||


pūrvaṃ rājarṣiśabdena tapasā dyotitaprajaḥ /
brahmarṣitvam anu prāptaḥ pūjyo 'si bhagavan mama // Mo_1,5.45 //
[Rām I 17, 35]
he "bhagavan" | "pūrvaṃ" "rājarṣiśabdenai"va pūjyaḥ | "anu" paścāt | "tapasā dyotitaprajaḥ" san | "brahmarṣitvam" "prāptaḥ" tvam | "mama pūjyaḥ asi" || MoT_1,5.45 ||



gaṅgājalābhiṣekeṇa yathā prītir bhaven mama /
tathā tvaddarśanāt prītir antaḥ śītayatīva mām // Mo_1,5.46 //
[Rām I *551a-c]
"antaḥ" manasi || MoT_1,5.46 ||


vigatecchābhayakrodho vītarāgo nirāmayaḥ /
idam atyadbhutam brahman yad bhavān mām upāgataḥ // Mo_1,5.47 //
"mām" upāgamānarham iti bhāvaḥ || MoT_1,5.47 ||


śubhakṣetragataṃ cāham ātmānam apakalmaṣam |
[Rām I 17, 36c]
candrabimba ivonmagnaṃ vedmi vedyavidāṃ vara || MoT_1,5.48 ||


"unmagnam" uditam || MoT_1,5.48 ||


sākṣād iva brahmaṇo me tavābhyāgamanam matam /
pūto 'smy anugṛhīto 'smi tavābhyāgamanān mune // Mo_1,5.49 //
[Rām I *555]
spaṣṭam || MoT_1,5.49 ||


tvadāgamanapuṇyena sādho yad anurañjitam /
adya me saphalaṃ janma jīvitaṃ tat sujīvitam // Mo_1,5.50 //
[Rām I 17, 34ef]
"tvadāgamanāt" utpannena "puṇyena" | "me janma me jīvitaṃ" ca | "yat" "anurañjitam" svoparaktaṃ kṛtaṃ | "tat" tato hetoḥ | "me janma saphalam" bhavati | "me jīvitaṃ sujīvitam" bhavati || MoT_1,5.50 ||



tvām ihābhyāgataṃ dṛṣṭvā pratipūjya praṇamya ca |
[Rām I *552]
ātmany eva namāmy antar dṛṣṭendur jaladhir yathā || MoT_1,5.51 ||



spaṣṭam || MoT_1,5.51 ||


yat kāryaṃ yena cārthena prāpto 'si munipuṅgava /
kṛtam ity eva tad viddhi mānyo 'si hi bhṛśam mama // Mo_1,5.52 //
[Rām I *557]
spaṣṭam || MoT_1,5.52 ||


svakāryeṇa vimarśaṃ tvaṃ kartum arhasi kauśika /
bhagavan nāsty adeyaṃ hi tvayi yat pratipadyate // Mo_1,5.53 //
[Rām I 17, 38ab (*558)]
he "kauśika" | "tvaṃ" | "svakāryeṇa" saha "vimarśaṃ kartum arhasi" kim mama kāryam astīti vicāraṃ kartum arhasīti bhāvaḥ | nanu kimartham ahaṃ "svakāryeṇa" saha "vimarśaṃ" karomīty | atrāha "bhagavann" iti | "hi" yasmāt | he "bhagavan" | "tvayi yat pratipadyate" upayujyate | tat "adeyaṃ nāsti" | tad dadāmy evety arthaḥ || MoT_1,5.53 ||



kāryasya ca vicāraṃ tvaṃ kartum arhasi dharmataḥ /
kartā cāham aśeṣaṃ te daivatam paramam bhavān // Mo_1,5.54 //
[Rām I 17, 38]
spaṣṭam || MoT_1,5.54 ||



sargāntaślokena daśarathavinayoktyā muner harṣagamanaṃ kathayati
idam atimadhuraṃ niśamya vākyaṃ
śrutisukham arthavidā vinītam uktam /
prathitaguṇavaśād guṇair viśiṣṭaṃ
munivṛṣabhaḥ paramaṃ jagāma harṣam // Mo_1,5.55 //
[Rām I 17, 39]
"atimadhuram" utkṛṣṭamadhurākhyaguṇaviśiṣṭaṃ | "śrutisukhaṃ" karṇasukham | "arthavidā" paramārthajñena daśarathena | "vinītaṃ" savinayaṃ yathā bhavati tath"oktaṃ" kathitaṃ | tathā "prathitāḥ" ye "guṇāḥ" vākyaguṇās | tad"vaśāt" "guṇaiḥ viśiṣṭam" | prathitaguṇaviśiṣṭam iti yāvat | īdṛśaṃ "vākyaṃ niśamya" saḥ "munivṛṣabhaḥ" muniśreṣṭhaḥ kauśikaḥ | "paramaṃ harṣaṃ jagāma" | dātṛvinayena hi arthino mahān harṣo jāyate | iti śivam || MoT_1,5.55 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe pañcamaḥ sargaḥ || 1,5 ||



************************************************************************


tac chrutvā rājasiṃhasya vākyam adbhutavistaram /
hṛṣṭaromā mahātejā viśvāmitro 'bhyabhāṣata // Mo_1,6.1 //
[Rām I 18, 1]
spaṣṭam || MoT_1,6.1 ||


sadṛśaṃ rājaśārdūla tavaivaitan mahītale /
mahāvaṃśaprasūtasya vasiṣṭhavaśavartinaḥ // Mo_1,6.2 //
[Rām I 18, 2]
"tavaiva" na tv anyasyety arthaḥ || MoT_1,6.2 ||


yat tu me hṛdgataṃ vākyaṃ tasya kāryavinirṇayam /
kuru tvaṃ rājaśārdūla dharmaṃ samanupālaya // Mo_1,6.3 //
[Rām I 18, 3]
"tu"śabdaḥ "vākya"vācyasya "kārya"syātikaṣṭaṃ sampādanīyatāṃ dyotayati | tasya "kāryanirṇayam" hṛdgatavākyavācyakāryanirṇayam ity arthaḥ | nanu kimarthaṃ karomīty | atrāha "dharmam" iti | tavānena dharmapālanam bhaviṣyatīti bhāvaḥ || MoT_1,6.3 ||



"hṛdgataṃ vākyam" prakaṭīkaroti
ahaṃ niyamam ātiṣṭhe siddhyartham puruṣarṣabha /
tasya vighnakarā ghorā rākṣasā mama saṃsthitāḥ // Mo_1,6.4 //
[Rām I 18, 4]
"ātiṣṭhe" āśrayāmi || MoT_1,6.4 ||


yadā yadā tu yajñena yaje 'haṃ vibudhavrajam /
tadā tadā me yajñaṃ taṃ vinighnanti niśācarāḥ // Mo_1,6.5 //
"yaje" pūjayāmi || MoT_1,6.5 ||


bahuśo vihite tasmin mama rākṣasanāyakāḥ /
akiraṃs te mahīṃ yāge māṃsena rudhireṇa ca // Mo_1,6.6 //
[Rām I 18, 5 (*562)]
spaṣṭam || MoT_1,6.6 ||



avadhūte tathābhūte tasmin yāgakadambake /
kṛtaśramo nirutsāhas tasmād deśād apāgamam // Mo_1,6.7 //
[Rām I 18, 6]
"apāgamam" apagataḥ || MoT_1,6.7 ||


na ca me krodham utsraṣṭum buddhir bhavati pārthiva /
tathābhūtaṃ hi tat karma na śāpas tasya vidyate // Mo_1,6.8 //
[Rām I 18, 7]
śāpadānena sa yajñaḥ naśyatīti bhāvaḥ || MoT_1,6.8 ||



īdṛśī ca kṣamā rājan mama tasmin mahākratau /
tvatprasādād avighnena prāpayeyam mahāphalam // Mo_1,6.9 //
he "rājan" | ataḥ "mama tasmin mahākratau īdṛśī kṣamā" bhavati | ataḥ aham "mahāphalam" taṃ kratuṃ | "tvatprasādāt prāpayeyam" prāpnuyām | "prāpayeyam" iti svārthe ṇic ārṣaḥ || MoT_1,6.9 ||



trātum arhasi mām ārtaṃ śaraṇārthinam āgatam /
arthināṃ yan nirāśatvaṃ satām abhibhavo hi saḥ // Mo_1,6.10 //
spaṣṭam || MoT_1,6.10 ||


nanu kena prakāreṇāhaṃ tvattrāṇaṃ karomīty | atrāha
tavāsti tanayaḥ śrīmān dṛptaśārdūlavikramaḥ /
mahendrasadṛśo vīro rāmo rakṣovidāraṇaḥ // Mo_1,6.11 //
spaṣṭam || MoT_1,6.11 ||



nanu tataḥ kim ity | atrāha
tam putraṃ rājaśārdūla rāmaṃ satyaparākramam /
kākapakṣadharaṃ śūraṃ jyeṣṭham me dātum arhasi // Mo_1,6.12 //
[Rām I 18, 8]
tenaiva rakṣāparaparyāyaṃ trāṇam me bhaviṣyatīti bhāvaḥ || MoT_1,6.12 ||


nanu kathaṃ śiśurūpo 'sau rākṣasebhyas tava makhaṃ rakṣiṣyatīty | atrāha
śakto hy eṣa mayā gupto divyena svena tejasā /
rākṣasā ye 'pakartāras teṣām mūrdhavinigrahe // Mo_1,6.13 //
[Rām I 18, 9]
spaṣṭam || MoT_1,6.13 ||


śreyaś cāsmin kariṣyāmi bahurūpam anantakam /
trayāṇām api lokānāṃ yena pūjyo bhaviṣyati // Mo_1,6.14 //
[Rām I 18, 10]
spaṣṭam || MoT_1,6.14 ||


nanu katham asau tādṛśānāṃ rākṣasānām puraḥ sthātuṃ śaknotīty | atrāha
na ca tena samāsādya sthātuṃ śaktā niśācarāḥ |
[Rām I 18, 11ab]
kruddhaṃ kesariṇaṃ dṛṣṭvā raṇe vana ivaiṇakāḥ || MoT_1,6.15 ||



"tena" iti dvitīyāsthāne tṛtīyā ārṣī || MoT_1,6.15 ||



teṣāṃ ca nānyaḥ kākutsthād yoddhum utsahate pumān |
[Rām I 18, 11cd]
ṛte kesariṇaḥ kruddhān mattānāṃ kariṇām iva || MoT_1,6.16 ||



spaṣṭam || MoT_1,6.16 ||


vīryotsiktā hi te pāpāḥ kālakūṭopamā raṇe |
[Rām I 18, 12ab]
kharadūṣaṇayor bhṛtyāḥ kṛtāntāḥ kupitā iva || MoT_1,6.17 ||



spaṣṭam || MoT_1,6.17 ||


rāmasya rājaśārdūla sahiṣyante na sāyakān |
[Rām I 18, 12cd]
anāratāgatā dhārā jaladasyeva pāṃsavaḥ || MoT_1,6.18 ||



spaṣṭam || MoT_1,6.18 ||


na ca putragataṃ snehaṃ kartum arhasi pārthiva |
[Rām I 18, 13ab]
na tad asti jagaty asmin yan na deyam mahātmanaḥ || MoT_1,6.19 ||


spaṣṭam || MoT_1,6.19 ||


hanta nūnaṃ vijānāmi hatāṃs tān viddhi rākṣasān |
[Rām I 18, 13cd]
na hy asmadādayaḥ prājñāḥ sandigdhe sampravṛttayaḥ || MoT_1,6.20 ||



"hanta" harṣe |" nūnaṃ" niścaye | ahaṃ tān "rākṣasān" "hatān" jānāmi | tvam api "viddhi" | nanu katham ahaṃ tvatkathanamātreṇa jānāmīty | atrāha "na" "hī"ti | "saṃ" samyak | "pravṛttiḥ" | yeṣāṃ | te tādṛśāḥ || MoT_1,6.20 ||


ahaṃ vedmi mahātmānaṃ rāmaṃ rājīvalocanam /
vasiṣṭhaś ca mahātejā ye cānye dīrghadarśinaḥ // Mo_1,6.21 //
[Rām I 18, 14]
spaṣṭam || MoT_1,6.21 ||


yadi dharmo mahattvaṃ ca yaśas te manasi sthitam /
tan mahyaṃ svam abhipretam ātmajaṃ dātum arhasi // Mo_1,6.22 //
[Rām I 18, 15]
"manasi sthitaṃ" kāṅkṣitam | "abhipretam" proktaṃ kāryārtham iṣṭam || MoT_1,6.22 ||


daśarātraś ca me yajño yasmin rāmeṇa rākṣasāḥ |
[Rām I 18, 17cd]
hantavyā vighnakartāro mama yajñasya vairiṇaḥ || MoT_1,6.23 ||


spaṣṭam || MoT_1,6.23 ||


atrābhyanujñāṃ kākutstha dadatām tava mantriṇaḥ /
vasiṣṭhapramukhāḥ sarve tena rāmaṃ visarjaya // Mo_1,6.24 //
[Rām I 18, 16]
spaṣṭam || MoT_1,6.24 ||


nātyeti kālaḥ kālajña yathāyam mama rāghava /
tathā kuruṣva bhadraṃ te mā ca śoke manaḥ kṛthāḥ // Mo_1,6.25 //
[Rām I 18, 18]
"atyeti" gacchati || MoT_1,6.25 ||


kāryam aṇv api kāle tu kṛtam ety upakāratām /
mahad apy upakāreṇa riktatām ety akālataḥ // Mo_1,6.26 //
"akālataḥ" akāle || MoT_1,6.26 ||


ity evam uktvā dharmātmā dharmārthasahitaṃ vacaḥ /
virarāma mahātejā viśvāmitro munīśvaraḥ // Mo_1,6.27 //
[Rām I 18, 19]
spaṣṭam || MoT_1,6.27 ||



sargāntaślokena daśarathatūṣṇīmbhāvaṃ kathayati
śrutvā vaco munivarasya mahāprabhāvas
tūṣṇīm atiṣṭhad upapannam idaṃ sa vaktum /
no yuktiyuktakathanena vinaiti toṣaṃ
dhīmān apūritamano'bhimataś ca lokaḥ // Mo_1,6.28 //
"mahāprabhāvo" mahānubhāvayuktaḥ | "sa" daśarathaḥ | "munivarasya" viśvāmitrasya | "vacaḥ" "śrutvā" "tūṣṇīm atiṣṭḥat" | no kiñcid apy uktavān ity arthaḥ | "idaṃ" tūṣṇīm āsanam | "upapannaṃ" yuktam | bhavati | yataḥ "dhīmān" buddhiyuktaḥ | "yuktiyuktakathanena" "vinā" "vaktuṃ" kathayituṃ "toṣaṃ" "naiti" | na kathayatīty arthaḥ | "lokaś" "ca" lokas tu | "apūritamano'bhi"laṣitaḥ "vaktuṃ" "toṣaṃ" "naiti" | ataḥ yuktirahitaṃ viśvāmitrasya vākyaṃ śrutvā daśarathaḥ tuṣṇīm abhūd iti bhāvaḥ | iti śivam || MoT_1,6.28 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ṣaṣṭhaḥ sargaḥ || 1,6 ||


************************************************************************


tac chrutvā rājaśārdūlo viśvāmitrasya bhāṣitam /
muhūrtam āsīn niśceṣṭaḥ sadainyaṃ caivam abravīt // Mo_1,7.1 //
[Rām I 19, 1]
spaṣṭam || MoT_1,7.1 ||



ūnaṣoḍaśavarṣo 'yaṃ rāmo rājīvalocanaḥ /
na yuddhayogyatām asya paśyāmi saha rākṣasaiḥ // Mo_1,7.2 //
[Rām I 19, 2]
spaṣṭam || MoT_1,7.2 ||


iyam akṣauhiṇī pūrṇā yasyāḥ patir aham prabho /
tayā parivṛto yuddhaṃ dāsyāmi piśitāśinām // Mo_1,7.3 //
[Rām I 19, 3]
"piśitāśināṃ" rākṣasānām || MoT_1,7.3 ||


ime hi śūrā vikrāntā bhṛtyā astraviśāradāḥ |
[Rām I 19, 4ab]
ahaṃ caiṣāṃ dhanuṣpāṇir goptā samaramūrdhani || MoT_1,7.4 ||



[Rām I 19, 5ab]
spaṣṭam || MoT_1,7.4 ||


ebhiḥ saha tavārīṇām mahendramahatām api /
dadāmi yuddham mattānāṃ kariṇām iva kesarī // Mo_1,7.5 //
"hi" yasmād | ete "bhṛtyā" bhavanti | "aham caiṣāṃ samaramūrdhani goptā"smi | ataḥ aham "ebhiḥ" "saha tavārīṇāṃ yuddhaṃ dadāmī"ti sambandhaḥ || MoT_1,7.5 ||


bālo rāmas tv anīkeṣu na jānāti balābalam |
[Rām I 19, 7ab]
antaḥpurād ṛte dṛṣṭā nānenānyā raṇāvaniḥ || MoT_1,7.6 ||



spaṣṭam || MoT_1,7.6 ||

na cāstraiḥ paramair yukto na ca yuddhaviśāradaḥ /
na bhaṭabhrūkuṭīnāṃ ca tajjñaḥ samaramūrdhasu // Mo_1,7.7 //
eṣa iti śeṣaḥ || MoT_1,7.7 ||


kevalam puṣpaṣaṇḍeṣu nagaropavaneṣu ca /
udyānavanakuñjeṣu sadaiva pariśīlitaḥ // Mo_1,7.8 //
spaṣṭam || MoT_1,7.8 ||


vihartum eṣa jānāti saha rājakumārakaiḥ /
kīrṇapuṣpopakārāsu svakāsv ajirabhūmiṣu // Mo_1,7.9 //
spaṣṭam || MoT_1,7.9 ||


adya tv atitarām brahman mama bhāgyaviparyayāt /
himenevāhataḥ padmas sampanno haritaḥ kṛśaḥ // Mo_1,7.10 //
"haritaḥ" pāṇḍuḥ || MoT_1,7.10 ||



nāttum annāni śaknoti na vihartuṃ gṛhāvanau /
antaḥkhedaparītātmā tūṣṇīṃ tiṣṭhati kevalam // Mo_1,7.11 //
"attum" bhakṣitum || MoT_1,7.11 ||


sadāraḥ sahabhṛtyo 'haṃ tatkṛte munināyaka /
śaradīva payovāho nūnaṃ niḥsahatāṃ gataḥ // Mo_1,7.12 //
"niḥsahatām" utkṛśatāṃ | soḍhum aśaktatvam || MoT_1,7.12 ||


īdṛśo 'sau suto bāla ādhinā vivaśīkṛtaḥ /
kathaṃ dadāmi taṃ tubhyaṃ yoddhuṃ saha niśācaraiḥ // Mo_1,7.13 //
spaṣṭam || MoT_1,7.13 ||


api bālāṅganāsaṅgād api sādho sudhārasāt /
rājyād api sukhāyaiṣa putrasneho mahāmate // Mo_1,7.14 //
spaṣṭam || MoT_1,7.14 ||


ye durantā mahārambhās triṣu lokeṣu khedadāḥ /
putrasnehena santo 'pi kurvate te na saṃśrayam // Mo_1,7.15 //
"santaḥ api" sthitā api | "saṃśrayaṃ" sthitiṃ | "putrasnehena te" vismṛtiṃ gacchantīti bhāvaḥ || MoT_1,7.15 ||


asavo 'tha dhanaṃ dārās tyajyante mānavaiḥ sukham /
na putrā muniśārdūla svabhāvo hy eṣa jantuṣu // Mo_1,7.16 //
spaṣṭam || MoT_1,7.16 ||


rākṣasāḥ krūrakarmāṇaḥ kūṭayuddhaviśāradāḥ |
[Rām I 19, 7ef]
rāmas tān yodhayatv ittham uktir evātiduḥsahā || MoT_1,7.17 ||



"kūṭayuddhaṃ" chalayuddham | "uktir eve"ti anuṣṭhānasya kā katheti bhā-vaḥ || MoT_1,7.17 ||


viprayukto hi rāmeṇa muhūrtam api notsahe /
jīvituṃ jīvitākāṅkṣī na rāmaṃ netum arhasi // Mo_1,7.18 //
[Rām I 19, 8]
"notsahe" samartho na bhavāmi | "jīvituṃ" jīvanakriyākartṛtām anubhavitum | "jīvitākāṅkṣī" mama jīvitākāṅkṣīty arthaḥ || MoT_1,7.18 ||


navavarṣasahasrāṇi mama yātāni kauśika /
duḥkhenotpāditās tv ete catvāraḥ putrakā mayā // Mo_1,7.19 //
[Rām I 19, 10]
anukampitāḥ putrāḥ "putrakāḥ" || MoT_1,7.19 ||



pradhānabhūtas teṣv eṣu rāmaḥ kamalalocanaḥ /
taṃ vinā te trayo 'py anye dhārayanti na jīvitam // Mo_1,7.20 //
spaṣṭam || MoT_1,7.20 ||



sa eva rāmo bhavatā nīyate rākṣasān prati /
yadi tat putrahīnaṃ tvam mṛtam evāśu viddhi mām // Mo_1,7.21 //
spaṣṭam || MoT_1,7.21 ||



caturṇām ātmajānāṃ hi prītir atra hi me parā /
jyeṣṭhaṃ dharmamayaṃ tasmān na rāmaṃ netum arhasi // Mo_1,7.22 //
[Rām I 19, 11]
nirdhāraṇe ṣaṣṭhī || MoT_1,7.22 ||


niśācarabalaṃ hantum mune yadi tavepsitam /
caturaṅgasamāyuktaṃ mayā saha balaṃ naya // Mo_1,7.23 //
spaṣṭam || MoT_1,7.23 ||


kiṃvīryā rākṣasās te tu kasya putrāḥ kathaṃ ca te /
kiyatpramāṇāḥ ke caite iti varṇaya me sphuṭam // Mo_1,7.24 //
[Rām I 19, 12]
spaṣṭam || MoT_1,7.24 ||


kathaṃ tena prahartavyaṃ teṣāṃ rāmeṇa rākṣasām | / māmakair vā balair brahman mayā vā kūṭayodhinām // Mo_1,7.25 //
[Rām I 19, 13]
rāmasyāgre sthitatvābhāvāt "tene"ty uktam || MoT_1,7.25 ||


sarvam me śaṃsa bhagavan yathā teṣām mayā raṇe /
sthātavyaṃ duṣṭasattvānāṃ vīryotsiktā hi rākṣasāḥ // Mo_1,7.26 //
[Rām I 19, 14]
spaṣṭam || MoT_1,7.26 ||


śrūyate hi mahāvīro rāvaṇo nāma rākṣasaḥ /
sākṣād vaiśravaṇabhrātā putro viśravaso muneḥ // Mo_1,7.27 //
[Rām I 19, 17]
spaṣṭam || MoT_1,7.27 ||


astu saḥ | tataḥ kim ity | atrāha
sa cet tava makhe vighnaṃ karoti kila durmatiḥ /
tat saṅgrāme na śaktāḥ 'smo vayaṃ tasya durātmanaḥ // Mo_1,7.28 //
[Rām I 19, 19cd]
"tat" tadā || MoT_1,7.28 ||


nanu katham asau tādṛgvīryaḥ astīty | atrāha
kāle kāle pṛthag brahman bhūrivīryavibhūtayaḥ | /
bhūteṣv abhyudayaṃ yānti pralīyante ca kālataḥ // Mo_1,7.29 //
"bhūrivīryavibhūtayaḥ" mahadvīryasampadyuktāḥ | "bhūteṣv" iti nirdhāraṇe sap-tamī || MoT_1,7.29 ||


adyāsmiṃs te vayaṃ kāle rāvaṇādiṣu śatruṣu /
na samarthāḥ puraḥ sthātuṃ niyater eṣa niścayaḥ // Mo_1,7.30 //
spaṣṭam || MoT_1,7.30 ||


tasmāt prasādaṃ dharmajña kuru tvaṃ mama putrake /
mama caivālpabhāgyasya bhavān hy asamadaivatam // Mo_1,7.31 //
[Rām I 19, 20]
"alpabhāgyasye"ti | anyathā tvaṃ rāmaṃ na yācitavān iti bhāvaḥ || MoT_1,7.31 ||


devadānavagandharvā yakṣaplavagapannagāḥ /
na śaktā rāvaṇaṃ yoddhuṃ kiṃ punaḥ puruṣā yudhi // Mo_1,7.32 //
spaṣṭam || MoT_1,7.32 ||


mahāvīryavatāṃ vīryam ādatte sa sudhābhujām /
tena sārdhaṃ na śaktā smas saṃyuge tasya vāvarāḥ // Mo_1,7.33 //
[Rām I 19, 22a-d]
"ādatte" gṛhṇāti | pratibadhnātīti yāvat | mahāvīryān sudhābhujo 'py asau vīryarahitān karotīti bhāvaḥ | "avarās" tadapekṣayā nīcāḥ | "vā"śabdaḥ pādapūraṇārthaḥ || MoT_1,7.33 ||



nanu rāmasya sajjanatvenaivāvaśyaṃ jayaḥ syād ity | atrāha
ayam anyatamaḥ kālaḥ pelavīkṛtasajjanaḥ /
rāghavo 'pi gato dainyaṃ yatra vārdhakajarjaraḥ // Mo_1,7.34 //
"api"śabdaḥ rāghavasya mahāsajjanatvaṃ dyotayati | vārdhakeneva jarjaraḥ "vārdhakajarjaraḥ" || MoT_1,7.34 ||


atha vā lavaṇam brahman yajñaghnaṃ tam madhoḥ sutam /
kathaya tvaṃ suraprakhya kveva mokṣyāmi putrakam // Mo_1,7.35 //
"atha vā madhoḥ sutaṃ taṃ" prasiddhaṃ | "yajñaghnaṃ lavaṇaṃ" yoddhuṃ "na śaktāḥ" smaḥ iti vyavahitādhyāhṛtaiḥ saha sambandhaḥ | lavaṇo 'pi cet tava yajñavighnakārī asti tam api yoddhuṃ na śaktāḥ sma iti bhāvaḥ | he "suraprakhya" | "tvaṃ kathaya" | ahaṃ "putrakaṃ kveva" kutreva | "mokṣyāmi" | na mokṣyāmīti bhāvaḥ || MoT_1,7.35 ||



atha necchasi ced brahmaṃs tad vidheyo 'ham eva te /
anyathā tu na paśyāmi śāśvataṃ jayam ātmanaḥ // Mo_1,7.36 //
"atha" pakṣāntare | tvam putrāmokṣaṇaṃ "cet" yadi | "necchasi" | "tad ahaṃ te" tava | "vidheyaḥ" āyattaḥ | "evā"smi | tadā aham evāgacchāmīty arthaḥ | "anyathā" sahajavicāre kriyamāṇe | aham "ātmanaḥ śāśvataṃ jayaṃ na paśyāmi" | na jānāmīty arthaḥ || MoT_1,7.36 ||



sargāntaślokena daśarathavacanam upasaṃharati
ity uktvā mṛduvacanam bhayākulo 'sāv
ālole munimatasaṃśaye nimagnaḥ /
nājñāsīt kaṇam api niścayaṃ mahātmā
prodvīcāv iva jaladhau samuhyamānaḥ // Mo_1,7.37 //
"munimatasya saṃśaye" 'nuṣṭhānānanuṣṭhānarūpe sandehe | "magnaḥ" | ata eva "bhayākulaḥ" | "mahātmā asau" daśarathaḥ | "ity" evaṃ | "mṛduvacanaṃ" komalavacanam | "uktvā" | "kaṇam api" stokam api | "niścayaṃ na ajñāsīt" na jñātavān | "asau" kathambhūtaḥ "iva" | "prodvīcau jaladhau samuhyamāna iva" | jaladhau samuhyamāno 'pi kutra gacchāmīti niścayaṃ na jānātīti śivam || MoT_1,7.37 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe saptamaḥ sargaḥ || 1,7 ||


************************************************************************



tac chrutvā vacanaṃ tasya snehaparyākulākṣaram /
samanyuḥ kauśiko vākyam pratyuvāca mahīpatim // Mo_1,8.1 //
[Rām I 20, 1]
"tasya" daśarathasya || MoT_1,8.1 ||



viśvāmitraḥ kathayati
kariṣyāmīti saṃśrutya pratijñāṃ hātum icchasi |
[Rām I 20, 2ab]
sattvavān kesarī bhūtvā mṛgatām abhivāñchasi || MoT_1,8.2 ||



spaṣṭam || MoT_1,8.2 ||


rāghavānām ayukto 'yaṃ kulasyāsya viparyayaḥ |
[Rām I 20, 2cd]
na kadācana jāyante śītāṃśau kṛṣṇaraśmayaḥ || MoT_1,8.3 ||


nanu kathaṃ "rāghavānāṃ kulasyāyaṃ viparyayaḥ ayukto" bhavatīty | atra dṛṣṭāntam āha | "na kadācane"ti || MoT_1,8.3 ||


yadi tvaṃ na kṣamo rājan gamiṣyāmi yathāgataḥ /
hīnapratijñaḥ kākutstha sukhī bhava sabāndhavaḥ // Mo_1,8.4 //
[Rām I 20, 3]
spaṣṭam || MoT_1,8.4 ||



śrīvālmīkiḥ bharadvājam prati kathayati
tasmin kopaparīte 'tha viśvāmitre mahātmani /
cacāla vasudhā kṛtsnā surāś ca bhayam āviśan // Mo_1,8.5 //
[Rām I 20, 4]
spaṣṭam || MoT_1,8.5 ||



krodhābhibhūtaṃ vijñāya jaganmitram mahāmunim /
dhṛtimān suvrato dhīmān vasiṣṭho vākyam abravīt // Mo_1,8.6 //
[Rām I 20, 5]
"jaganmitraṃ" viśvāmitram || MoT_1,8.6 ||


śrīvasiṣṭhaḥ kathayati
ikṣvākūṇāṃ kule jātaḥ sākṣād dharma ivāparaḥ |
[Rām I 20, 6ab]
bhavān daśarathaḥ śrīmāṃs trailokye guṇabhūṣitaḥ || MoT_1,8.7 ||


spaṣṭam || MoT_1,8.7 ||


nītimān suvrato bhūtvā na dharmaṃ hātum arhasi |
[Rām I 20, 6cd]
munes tribhuvaneśasya vacanaṃ kartum arhasi || MoT_1,8.8 ||


spaṣṭam | yugmam || MoT_1,8.8 ||


triṣu lokeṣu vikhyāto dharmeṇa yaśasā yutaḥ /
svadharmam pratipadyasva na dharmaṃ hātum arhasi // Mo_1,8.9 //
[Rām I 20, 7]
"pratipadyasva" svīkuru || MoT_1,8.9 ||


kariṣyāmīti saṃśrutya tat te rājann akurvataḥ /
iṣṭāpūrtaḥ pated dharmas tasmād rāmaṃ visarjaya // Mo_1,8.10 //
[Rām I 20, 8]
"iṣṭāpūrtaḥ" iṣṭāpūrtasvarūpaḥ | pratijñātākaraṇena hi sarvo dharmaḥ naśyati || MoT_1,8.10 ||


guptam puruṣasiṃhena jvalanenāmṛtaṃ yathā |
[Rām I 20, 9cd]
kṛtāstram akṛtāstraṃ vā nainaṃ drakṣyanti rākṣasāḥ || MoT_1,8.11 ||


[Rām I 20, 9ab]
"kṛtāstraṃ" śikṣitāstram || MoT_1,8.11 ||


ikṣvākuvaṃśajāto 'pi svayaṃ daśaratho 'pi san /
na pālayasi ced vākyaṃ ko 'paraḥ pālayiṣyati // Mo_1,8.12 //
spaṣṭam || MoT_1,8.12 ||


yuṣmadādipraṇītena vyavahāreṇa jantavaḥ /
maryādāṃ na vimuñcanti tāṃ na hātum ihārhasi // Mo_1,8.13 //
"tām" maryādām || MoT_1,8.13 ||



eṣa vigrahavān dharma eṣa vīryavatāṃ varaḥ /
eṣa buddhyādhiko loke tapasāṃ ca parāyaṇaḥ // Mo_1,8.14 //
[Rām I 20, 10]
"parāyaṇaḥ" āśrayaḥ || MoT_1,8.14 ||



eṣo 'straṃ vividhaṃ vetti trailokye sacarācare /
naitad anyaḥ pumān vetti na ca vetsyati kaścana // Mo_1,8.15 //
[Rām I 20, 11]
spaṣṭam || MoT_1,8.15 ||


na ca devarṣayaḥ kecin nāmarā na ca rākṣasāḥ /
na nāgayakṣagandharvā anena sadṛśā nṛpa // Mo_1,8.16 //
[Rām I 20, 12]
spaṣṭam || MoT_1,8.16 ||


astram asmai kṛśāśvena paraiḥ paramadurjayam |
[Rām I 20, 13;599*]
kauśikāya purā dattaṃ yadā rājyaṃ samanvaśāt || MoT_1,8.17 ||


[Rām I 20, 13cd]
"paraiḥ" anyaiḥ | "paramadurjayam" atyantaṃ jetum aśakyaṃ | "samanvaśāt" sa-mapālayat || MoT_1,8.17 ||



nanu kimarthaṃ kṛśāśvenāsmai astrāṇi dattānīty | atrāha
te hi putrāḥ kṛśāśvasya prajāpatisutopamāḥ /
enam anvacaran vīrā dīptimanto mahaujasaḥ // Mo_1,8.18 //
[Rām I 20, 14]
"hi" yasmāt | "prajāpatisutopamās te" prasiddhāḥ | "kṛśāśvasya putrāḥ" | "enaṃ" viśvāmitram | "anvacaran" anucaranti sma | ataḥ putrasnehena dattavān iti bhāvaḥ || MoT_1,8.18 ||



te putrāḥ ke ity apekṣāyām āha
jayā ca suprabhā caiva dākṣāyaṇyau sumadhyame /
tayos tu yāny apatyāni śatam paramadurjayam // Mo_1,8.19 //
"jayā ca suprabhā caive"ti ye | "dākṣāyaṇyau" dakṣasya strīrūpe apatye | "sumadhyame" striyau | āstām | "tayoḥ" "yāni" "paramadurjayaṃ" "śataṃ" "apatyāni" āsan | atra ca pūrvaślokāpekṣayottaravākyagatatvād yacchabdasya tacchabdāpekṣā nāsti || MoT_1,8.19 ||



nanu kasyāḥ katy apatyāni āsann ity apekṣāyām āha
pañcāśataḥ sutāñ jajñe jayā labdhavarā purā /
vadhāyāsurasainyānāṃ te 'kṣayāḥ kāmarūpiṇaḥ // Mo_1,8.20 //
[Rām I 20, 16]
"akṣayāḥ" nāśarahitāḥ || MoT_1,8.20 ||



suprabhā janayām āsa putrān pañcāśataḥ parān /
saṅgharṣān nāma durdharṣān durākrośān balīyasaḥ // Mo_1,8.21 //
[Rām I 20, 17]
"durdharṣān" parābhavitum aśakyān | "durākrośān" śatrubhiḥ samare āhvātum aśakyān || MoT_1,8.21 ||



prāsaṅgikam upasaṃhṛtya prakṛtam anusarati
evaṃvīryo mahātejā viśvāmitro mahāmuniḥ /
na rāmagamane buddhiṃ viklavāṃ kartum arhasi // Mo_1,8.22 //
[Rām I 20, 19]
pūrvārdham uttarārdhasya hetutvena yojyam || MoT_1,8.22 ||


sargāntaślokena śrīvasiṣṭho vākyaṃ samāpayati
asmin mahāsattvamaye munīndre
sthite samīpe puruṣas tu sādhuḥ /
prāpte 'pi mṛtyāv amaratvam eti
mā dīnatāṃ gaccha yathā vimūḍhaḥ // Mo_1,8.23 //
"yathā vimūḍhaḥ" | mūḍhavad ity arthaḥ | iti śivam || MoT_1,8.23 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe aṣṭamaḥ sargaḥ || 1,8 ||



************************************************************************


śrīvālmīkir bharadvājam prati kathayati
tathā vasiṣṭhe bruvati rājā daśarathaḥ sutam /
samutsraṣṭumanā rāmam ājuhāva salakṣmaṇam // Mo_1,9.1 //
[Rām I 21, 1]
"samutsraṣṭumanāḥ" dātumanāḥ || MoT_1,9.1 ||


daśarathaḥ pratīhāram prati kathayati
pratīhāra mahābāhuṃ rāmam satyaparākramam /
salakṣmaṇam avighnena munyarthaṃ śīghram ānaya // Mo_1,9.2 //
spaṣṭam || MoT_1,9.2 ||



daśarathavākyam upasaṃharati
iti rājñā visṛṣṭo 'sau gatvāntaḥpuramandiram /
muhūrtamātreṇāgatya samuvāca mahīpatim // Mo_1,9.3 //
spaṣṭam || MoT_1,9.3 ||



pratīhāraḥ kathayati
deva dordalitāśeṣaripo rāmaḥ svamandire /
vimanāḥ saṃsthito rātrau ṣaṭpadaḥ kamale yathā // Mo_1,9.4 //
spaṣṭam || MoT_1,9.4 ||


āgacchāmi kṣaṇeneti vakti dhyāyati caikakaḥ /
na kasyacic ca nikaṭe sthātum icchati khinnadhīḥ // Mo_1,9.5 //
spaṣṭam || MoT_1,9.5 ||


ity ukte tena bhūpālas taṃ rāmānucaraṃ janam /
sarvam āśvāsayām āsa papraccha ca yathākramam // Mo_1,9.6 //
spaṣṭam || MoT_1,9.6 ||


rājapraśnam eva kathayati
kathaṃ kīdṛk sthito rāma iti pṛṣṭo mahībhṛtā /
rāmabhṛtyajanaḥ khinno vākyam āha mahīpatim // Mo_1,9.7 //
spaṣṭam || MoT_1,9.7 ||


dehayaṣṭim imāṃ deva dhārayanta ime vayam /
khinnāḥ khedaparimlāne vibho rāme sute tava // Mo_1,9.8 //
he "deva" he rājan | "dehayaṣṭiṃ" dehalatāṃ | "rāme" rāmākhye | "tava sute" tava sutanimittaṃ | carmaṇi dvīpinaṃ hantītivat || MoT_1,9.8 ||



rāmo rājīvapatrākṣo yataḥprabhṛti cāgataḥ /
savipras tīrthayātrāyās tataḥprabhṛti durmanāḥ // Mo_1,9.9 //
spaṣṭam || MoT_1,9.9 ||


yatnaprārthanayāsmākaṃ nijavyāpāram āhnikam /
sāyam amlānavadanaḥ karoti na karoti vā // Mo_1,9.10 //
spaṣṭam || MoT_1,9.10 ||


snānadevārcanācāraparyante parikhedavān /
prārthito 'pi hi nā tṛpter aśnāty aśanam īśvaraḥ // Mo_1,9.11 //
"ā tṛpteḥ" tṛptiparyantam || MoT_1,9.11 ||


lolāntaḥpuranārībhiḥ kṛtadolābhir aṅgane /
na ca krīḍati līlābhir varādbhir iva cātakaḥ // Mo_1,9.12 //
"varādbhiḥ" sarojalaiḥ | "cātakaḥ" pakṣiviśeṣaḥ | sa hi varṣābindūn eva pibati || MoT_1,9.12 ||



māṇikyamuktāsamprotā keyūrakaṭakāvalī /
nānandayati taṃ rājan dyauḥ pātavivaśaṃ yathā // Mo_1,9.13 //
"pātavivaśam" patantam || MoT_1,9.13 ||



krīḍadvadhūviloleṣu vahatkusumavāyuṣu /
latāvalayageheṣu bhavaty ativiṣādavān // Mo_1,9.14 //
"latāvalayageheṣu" latāmaṇḍalayukteṣu gṛheṣu || MoT_1,9.14 ||


yad ramyam ucitaṃ svādu peśalaṃ cittahāri vā /
bāṣpapūrekṣaṇa iva tenaiva parikhidyate // Mo_1,9.15 //
spaṣṭam || MoT_1,9.15 ||



kim imā duḥkhadāyinyaḥ prasphuranti purogatāḥ /
iti nṛttavilāseṣu kāminīḥ parinindati // Mo_1,9.16 //
"imāḥ" etāḥ kāminyaḥ || MoT_1,9.16 ||



bhojanaṃ śayanam pānaṃ vilāsaṃ snānam āsanam /
unmattaveṣṭitam iva nābhinandati ninditam // Mo_1,9.17 //
"ninditaṃ" nindāviṣayīkṛtam || MoT_1,9.17 ||


kiṃ sampadā kiṃ vipadā kiṃ gehena kim īhitaiḥ /
sarvam evāsad ity uktvā tūṣṇīm eko 'vatiṣṭhate // Mo_1,9.18 //
spaṣṭam || MoT_1,9.18 ||


nodeti parihāseṣu na bhogeṣu nimajjati /
na ca tiṣṭhati kāryeṣu maunam evāvalambate // Mo_1,9.19 //
spaṣṭam || MoT_1,9.19 ||



vilolālakavallaryo helāvalitalocanāḥ /
nānandayanti taṃ nāryo mṛgyo vanataruṃ yathā // Mo_1,9.20 //
spaṣṭam || MoT_1,9.20 ||



ekānteṣu diganteṣu tīreṣu vipineṣu ca /
ratim āyāty araṇyeṣu vikrītavad ajantuṣu // Mo_1,9.21 //
"vikrīto" hi palāyanārthaṃ "janturahite" eva deśe "ratim āyāti" || MoT_1,9.21 ||


vastrapānāśanādānaparāṅmukhatayā tayā /
parivraḍdharmiṇāṃ rājan so 'nuyāti tapasvinām // Mo_1,9.22 //
"tapasvinām anuyāti" tapasvisambandhicaritam anukarotīty arthaḥ | na māṣāṇām aśnīyād itivat prayogaḥ || MoT_1,9.22 ||


eka eva vasan deśe janaśūnye janeśvara /
na hasaty ekayā buddhyā na gāyati na roditi // Mo_1,9.23 //
"ekayā buddhyā" sarvatyāgarūpayā matyā upalakṣitaḥ || MoT_1,9.23 ||


punaḥ kiṃ karotīty apekṣāyām āha
baddhapadmāsanaḥ śūnyamanā vāmakarasthale /
kapolatalam ādāya kevalam paritiṣṭhati // Mo_1,9.24 //
spaṣṭam || MoT_1,9.24 ||


nābhimānam upādatte nāpi vāñchati rājatām /
nodeti nāstam āyāti sukhaduḥkhānuvṛttiṣu // Mo_1,9.25 //
spaṣṭam || MoT_1,9.25 ||


na vidmaḥ kim asau jātaḥ kiṃ karoti kim īhate /
kiṃ dhyāyati kim āyāti kathaṃ kim anudhāvati // Mo_1,9.26 //
"na vidma" ity asya karmāpekṣāyām āha "kim asau jātaḥ" kimartham asau jātaḥ | jananaṃ hi bhogādisevanārtham iti bhāvaḥ || MoT_1,9.26 ||



pratyahaṃ kṛśatāṃ yāti pratyahaṃ yāti pāṇḍutām /
virāgam pratyahaṃ yāti śaradanta iva drumaḥ // Mo_1,9.27 //
spaṣṭam || MoT_1,9.27 ||


anuyātau tam evaitau rājañ śatrughnalakṣmaṇau /
tādṛśāv eva tasyaiva pratibimbāv iva sthitau // Mo_1,9.28 //
spaṣṭam || MoT_1,9.28 ||


bhṛtyai rājabhir ambābhiḥ sa pṛṣṭo 'pi punaḥ punaḥ /
uktvā na kiñcid eveti tūṣṇīm āste nirīhitaḥ // Mo_1,9.29 //
"saḥ" śrīrāmaḥ | nirīhitaḥ ceṣṭitarahitaḥ | "iti"śabdaḥ pādapūraṇārthaḥ śrīrāmottaravākyasvarūpanirdeśaparo vā jñeyaḥ || MoT_1,9.29 ||



āpātamātrahṛdyeṣu mā bhogeṣu manaḥ kṛthāḥ /
iti pārśvagatam bhavyam anuśāsti suhṛjjanam // Mo_1,9.30 //
"bhavyam" anuśāsanayogyam || MoT_1,9.30 ||


nānāvibhavaramyāsu strīṣu goṣṭhīkathāsu ca /
puraḥsthitam ivāsneho nāśam evānupaśyati // Mo_1,9.31 //
spaṣṭam || MoT_1,9.31 ||


rītimādhuryasāyāsapadasaṃsthitivarjitaiḥ /
ceṣṭitair eva kākalyā bhūyo bhūyaḥ pragāyati // Mo_1,9.32 //
saḥ rāmaḥ | "rītimādhuryasāyāsapadasaṃsthitivarjitaiḥ" "ceṣṭitair eva" kevalaiḥ abhinayair evopalakṣitayā "kākalyā" kalasūkṣmadhvaninā | "gāyati" || MoT_1,9.32 ||



samrāḍ bhaveti pārśvasthaṃ vadantam anujīvinam /
pralapantam ivonmattaṃ hasaty anyamanā muniḥ // Mo_1,9.33 //
spaṣṭam || MoT_1,9.33 ||


na proktam ākarṇayati prekṣate na purogatam /
karoty avajñāṃ sarvatra sumahaty api vastuni // Mo_1,9.34 //
spaṣṭam || MoT_1,9.34 ||


apy ākāśasarojinyām apy ākāśamahāvane /
ittham etat katham iti vismayo 'sya na jāyate // Mo_1,9.35 //
vismayasya svarūpaṃ darśayati "ittham etat katham" iti || MoT_1,9.35 ||


kāntāmadhyagatasyāpi mano 'sya madaneṣavaḥ /
na bhedayanti durbhedaṃ dhārā iva mahopalam // Mo_1,9.36 //
spaṣṭam || MoT_1,9.36 ||


āpadām ekam āvāsam abhivāñchasi kiṃ dhanam /
anuśāsyeti sarvasvam arthine samprayacchati // Mo_1,9.37 //
"anuśāsya" anuśāsanaṃ kṛtvā || MoT_1,9.37 ||


iyam āpad iyaṃ saṃpad ity ayaṃ kalpanāmayaḥ /
manasy abhyudito moha iti śokāt pragāyati // Mo_1,9.38 //
spaṣṭam || MoT_1,9.38 ||


hā hato 'ham anātho 'ham ity ākrandaparo 'pi san /
na jano yāti vairāgyaṃ citram ity eva vakty asau // Mo_1,9.39 //
ākrandaparasya vairāgyaṃ yuktam evety "api"śabdena dyotyate || MoT_1,9.39 ||



raghukānanasālena rāmeṇa ripughātinā /
bhṛśam itthaṃ sthitenaiva vayaṃ khedam upāgatāḥ // Mo_1,9.40 //
spaṣṭam || MoT_1,9.40 ||



na vidmaḥ kim mahābāho tasya tādṛśacetasaḥ /
kurmaḥ kamalapatrākṣa gatir atra hi no bhavān // Mo_1,9.41 //
spaṣṭam || MoT_1,9.41 ||


rājānam atha vā vipram upadeṣṭāram agragam /
hasan paśum ivāvyagraḥ so 'vadhīrayati prabho // Mo_1,9.42 //
spaṣṭam || MoT_1,9.42 ||


prapañco 'yam iha sphāraṃ jagannāma yad utthitam /
naitad vastu na caivāham iti nirṇīya saṃsthitaḥ // Mo_1,9.43 //
yaḥ "ayam prapañcaḥ utthitam" idaṃ "sphāraṃ jagannāma" bhavati | "etad" "vastu" paramārthasat | "na" bhavati | "eva"śabdaḥ apiśabdasyārthe | "aham" api "vastu na ca" bhavāmi | "iti" evaṃ | "nirṇīyā"sau rāmaḥ "saṃsthitaḥ" || MoT_1,9.43 ||


nārau nātmani no mitre na rājye na ca mātari /
na saṃpadāpador nāntas tasyāsthā na vibhor bahiḥ // Mo_1,9.44 //
"āsthā" ratiḥ || MoT_1,9.44 ||



nirastāstho nirāśo 'sau nirīho 'sau nirāspadaḥ /
mohe na ca vimukto 'sau tena tapyāmahe vayam // Mo_1,9.45 //
spaṣṭam || MoT_1,9.45 ||


kiṃ dhanena kim ambābhiḥ kiṃ rājyena kim īhayā /
iti niścayavān antaḥ prāṇatyāgamanāḥ sthitaḥ // Mo_1,9.46 //
spaṣṭam || MoT_1,9.46 ||


bhogeṣv āyuṣi rājye ca mitre pitari mātari /
param udvegam āyātaś cātako 'vagrahe yathā // Mo_1,9.47 //
spaṣṭam || MoT_1,9.47 ||


tasya tādṛksvabhāvasya samagravibhavānvitam /
saṃsārajālam ābhogi prabho prativiṣāyate // Mo_1,9.48 //
prativiṣam ivācarate "prativiṣāyate" || MoT_1,9.48 ||


tādṛśaḥ syān mahāsattvaḥ ka ivāsmin mahītale /
prakṛte vyavahāre taṃ yo niveśayituṃ kṣamaḥ // Mo_1,9.49 //
spaṣṭam || MoT_1,9.49 ||


iti no yeyam āyātā śākhāprasaraśālinī /
āpat tām alam uddhartuṃ samudetu dayā parā // Mo_1,9.50 //
"samudetu" taveti śeṣaḥ || MoT_1,9.50 ||


sargāntaślokena rāmabhṛtyavacanaṃ samāpayati
manasi moham apāsya mahāmanāḥ
sakalam ārtimataḥ kila sādhutām /
saphalatāṃ nayatīha tamo haran
dinakaro bhuvi bhāskaratām iva // Mo_1,9.51 //
"mahāmanāḥ" puruṣaḥ | "ārtimataḥ" ārtiyuktasya puruṣasya | "manasi sakalam moham" ārtisvarūpaṃ samastam moham | "apāsya" dūrīkṛtya | "sādhutām" svasmin sthitaṃ sādhubhāvaṃ | "saphalatāṃ nayati" | ka "iva" | "dinakara iva" | yathā "dinakaraḥ" "bhuvi" "tamaḥ" "haran" "bhāskaratām" "saphalatāṃ" "nayati" | tathety arthaḥ | iti śivam || MoT_1,9.51 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe navamaḥ sargaḥ || 1,9 ||


************************************************************************


rāmabhṛtyavacanaṃ śrutvā viśvāmitraḥ kathayati
evaṃ cet tan mahāprājñam bhavanto raghunandanam /
ihānayantu tvaritaṃ hariṇaṃ hariṇā iva // Mo_1,10.1 //
spaṣṭam || MoT_1,10.1 ||



eṣa moho raghupater nāpadbhyo na ca rāgataḥ /
vivekavairāgyakṛto bodha eṣa mahodayaḥ // Mo_1,10.2 //
mahān udayaḥ muktilakṣaṇaḥ yasmāt "saḥ" "mahodayaḥ" || MoT_1,10.2 ||



ihāyātu kṣaṇād rāmas tad ihaiva vayaṃ kṣaṇāt /
mohaṃ tasyāpaneṣyāmo maruto 'drer ghanaṃ yathā // Mo_1,10.3 //
"vayaṃ" ke iva | "maruta" iva | "yathā" "marutaḥ" vāyavaḥ | "adreḥ" "ghanaṃ" megham | apanayanti | tathety arthaḥ || MoT_1,10.3 ||
etasmin mārjite yuktyā mohe ca raghunandanaḥ /
viśrāntim eṣyati pade tasmin vayam ivottame // Mo_1,10.4 //
"tasmin pade" cinmātrākhye viśrāntisthāne || MoT_1,10.4 ||



satyatām muditām prajñāṃ viśrāntiṃ ca sametya saḥ /
pīnatāṃ varavarṇatvam pītāmṛta ivaiṣyati // Mo_1,10.5 //
spaṣṭam || MoT_1,10.5 ||


nijāṃ ca prakṛtām eva vyavahāraparamparām /
paripūrṇamanā mānya ācariṣyaty akhaṇḍitām // Mo_1,10.6 //
spaṣṭam || MoT_1,10.6 ||


bhaviṣyati mahāsattvo jñātalokaparāvaraḥ /
sukhaduḥkhadaśāhīnaḥ samaloṣṭāśmakāñcanaḥ // Mo_1,10.7 //
[BhG VI 8d; XIV 24b]
"jñāte" samyak niścite | "lokānām" "parāvare" parāvācī | pāradvayam iti yāvat | yena | saḥ || MoT_1,10.7 ||


viśvāmitravākyam upasaṃharati
ity ukte munināthena rājā sampūrṇamānasaḥ /
prāhiṇod rāmam ānetum bhūyo dūtaparamparām // Mo_1,10.8 //
spaṣṭam || MoT_1,10.8 ||


etāvatā ca kālena rāmo nijagṛhāsanāt /
pituḥ sakāśam āgantum utthito 'rka ivācalāt // Mo_1,10.9 //
spaṣṭam || MoT_1,10.9 ||


vṛtaḥ katipayair bhṛtyair bhrātṛbhyāṃ cājagāma ha /
tat puṇyam pitur āsthānaṃ svargaṃ surapater iva // Mo_1,10.10 //
spaṣṭam || MoT_1,10.10 ||


dūrād eva dadarśāsau rāmo daśarathaṃ tadā /
vṛtaṃ rājasamūhena devaugheneva vāsavam // Mo_1,10.11 //
spaṣṭam || MoT_1,10.11 ||


vasiṣṭhaviśvāmitrābhyāṃ sevitam pārśvayor dvayoḥ /
sarvaśāstrārthatajjñena mantrivṛndena pālitam // Mo_1,10.12 //
spaṣṭam || MoT_1,10.12 ||


cārucāmarahastābhiḥ kāntābhiḥ samupāsitam |
kakubbhir iva mūrtābhiḥ saṃsthitābhir yathocitam || MoT_1,10.13 ||


"kakubbhiḥ" digbhiḥ || MoT_1,10.13 ||


vasiṣṭhaviśvāmitrādyās tathā daśarathādayaḥ /
dadṛśū rāghavaṃ dūrād upāyāntaṃ guhopamam // Mo_1,10.14 //
"guhopamaṃ" kumārasadṛśam || MoT_1,10.14 ||


sattvāvaṣṭambhagarveṇa śaityeneva himālayam /
śritaṃ sakalasevyena gambhīreṇa svareṇa ca // Mo_1,10.15 //
"sattvasyāvaṣṭambhena" hastāvalambena yaḥ "garvaḥ" | tena | pūrvasya ślokasya viśeṣaṇatvena yojyam || MoT_1,10.15 ||



saumyaṃ samaśubhākāraṃ vinayodāram ūrjitam /
kāntopaśāntavapuṣam parasyārthasya bhājanam // Mo_1,10.16 //
"parasyārthasya" mokṣasya || MoT_1,10.16 ||



samudyadyauvanārambham udyogaśamaśobhitam /
anudvignam anāyāsam pūrṇaprāyamanoratham // Mo_1,10.17 //
spaṣṭam || MoT_1,10.17 ||


vicāritajagadyātram pavitraguṇagocaram /
mahāsattvaikalobhena guṇair iva samāśritam // Mo_1,10.18 //
"mahāsattvasya" mahādhairyasya | yaḥ "eko" "lobhaḥ" | tatsaṅgalobhaḥ iti yāvat | tena || MoT_1,10.18 ||



udārasāram āpūrṇam antaḥkaraṇakoṭaram /
avikṣubhitayā vṛttyā darśayantam anuttamam // Mo_1,10.19 //
rāmam punaḥ kathambhūtam | īdṛśyā "vṛttyā" īdṛśam "antaḥkaraṇaṃ" "darśayantam" iti sambandhaḥ | "āpūrṇam" bhogān prati alaulyena samantāt pūrṇam || MoT_1,10.19 ||



śrīrāmaviśeṣaṇāny upasaṃharati
evam guṇagaṇākīrṇo dūrād eva raghūdvahaḥ /
parimeyasitācchācchasvahārāmbarapallavaḥ // Mo_1,10.20 //
praṇanāma calaccārucūḍāmaṇimarīcinā /
śirasā vasudhākampalolamānācalaśriyā // Mo_1,10.21 //
"parimeyāḥ" parimitāḥ | "sitāḥ" "acchācchāḥ" "svahārāmbarapallavāḥ" yasya | saḥ tādṛśaḥ | "śirasā" kathambhūtena | "vasudhāyāṃ" yaḥ "kampaḥ" | tena "lolamānasyā-calasya" "śrīḥ" yasya | tat | tādṛśena | yugmam || MoT_1,10.20-21 ||



kān praṇanāmety apekṣāyām āha
prathamam pitaram paścān munīn mānyaikam ānataḥ /
tato viprāṃs tato bandhūṃs tato 'dhikaguṇān gurūn // Mo_1,10.22 //
"pitaraṃ" kathambhūtaṃ | mānyānām madhye ekam "mānyaikam" || MoT_1,10.22 ||


jagrāha cātmanā dṛṣṭvā manāk svādugirā tathā /
rājalokena vihitāṃ sa praṇāmaparasparām // Mo_1,10.23 //
spaṣṭam || MoT_1,10.23 ||


vihitāśīr munibhyāṃ tu rāmaḥ saśamamānasaḥ /
āsasāda pituḥ puṇyaṃ samīpaṃ surasundaraḥ // Mo_1,10.24 //
"samīpaṃ" nikaṭam || MoT_1,10.24 ||


pādābhivandanarataṃ tam athāsau mahīpatiḥ /
śirasy abhyāliliṅgāśu cucumba ca punaḥ punaḥ // Mo_1,10.25 //
śatrughnaṃ lakṣmaṇaṃ caiva tathaiva paravīrahā /
āliliṅga ghanasnehaṃ rājahaṃso 'mbujaṃ yathā // Mo_1,10.26 //
spaṣṭam | yugmam || MoT_1,10.25-26 ||



utsaṅge vatsa tiṣṭheti vadaty atha mahīpatau /
bhūmau parijanāstīrṇe so 'ṃśuke 'tha nyavikṣata // Mo_1,10.27 //
"nyavikṣata" upāviśat | "atha"śabdadvayaṃ sambandhibhedenānantaryadvayavācakam || MoT_1,10.27 ||


daśarathaḥ kathayati
putra prāptavivekas tvaṃ kalyāṇānāṃ ca bhājanam /
janavaj jīrṇayā buddhyā khedāyātmā na dīyate // Mo_1,10.28 //
tvayā "na dīyate" na deya ity arthaḥ | "khedāy"eti sampradāne caturthī || MoT_1,10.28 ||


vṛddhavipraguruproktaṃ tvādṛśenānutiṣṭhatā /
padam āsādyate puṇyaṃ na moham anudhāvatā // Mo_1,10.29 //
spaṣṭam || MoT_1,10.29 ||


tāvad evāpado dūre tiṣṭhanti paripelavāḥ /
yāvad eva na mohasya prasaraḥ putra dīyate // Mo_1,10.30 //
spaṣṭam || MoT_1,10.30 ||


śrīvasiṣṭhaḥ kathayati
rājaputra mahābāho śūras tvaṃ vijitās tvayā /
durucchedā durārambhā apy amī viṣayārayaḥ // Mo_1,10.31 //
spaṣṭam || MoT_1,10.31 ||


kim atajjña ivājñānāṃ yogye vā mohasāgare /
vinimajjasi kallolagahane jāḍyaśālini // Mo_1,10.32 //
spaṣṭam || MoT_1,10.32 ||


viśvāmitra āha
calannīlotpalavyūhasamalocana lolatām /
brūhi cetaḥkṛtāṃ tyaktvā hetunā kena muhyasi // Mo_1,10.33 //
he "calannīlotpalavyūhasamalocana "tvaṃ | "cetaḥkṛtāṃ" "lolatāṃ" "tyaktvā" "brūhi" | karmāpekṣāyāṃ vākyaṃ karmatvena kathayati "hetune"ti | tvaṃ kimarthaṃ "muhyasī"ty arthaḥ || MoT_1,10.33 ||



kiṃniṣṭhāḥ kiyatā kena kiyantaḥ kāraṇena te /
ādhayo nu vilumpanti mano geham ivākhavaḥ // Mo_1,10.34 //
"te" "kiyantaḥ" "ādhayaḥ" | "kiṃniṣṭhāḥ" kiṃviṣayāḥ santaḥ | "kiyatā" "kena" "kāraṇena" "manaḥ" "nu" "vilumpanti" | ke "iva" | "ākhava" "iva" | yathā "ākhavaḥ gehaṃ vilumpanti" | tathety arthaḥ | "nu"śabdaḥ praśnadyotakaḥ || MoT_1,10.34 ||


manye nānucitānāṃ tvam ādhīnām padam uttamaḥ /
āpatsu cāpto yo dhīro nirjitās tena cādhayaḥ // Mo_1,10.35 //
"āptaḥ" vicārakārī | na hy ucitasy"ānucitapadatvaṃ" yuktam iti bhāvaḥ || MoT_1,10.35 ||


yathābhimatam āśu tvam brūhi prāpsyasi cānagham /
sarvam eva punar yena tava bhetsyanti nādhayaḥ // Mo_1,10.36 //
"yena" sarvaprāpaṇena || MoT_1,10.36 ||


viśvāmitravākyaṃ sargāntaślokenopasaṃharati
ity uktam asya sa mune raghuvaṃśaketur
ākarṇya vākyam ucitārthavilāsagarbham /
tatyāja khedam abhigarjati vārivāhe
barhī yathābhyanumitābhimatārthasiddhiḥ // Mo_1,10.37 //
"abhyanumitā" garjanahetukenānumānena jñātā | "abhimatārthasya siddhiḥ" yas-ya | sa | iti śivam || MoT_1,10.37 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe daśamaḥ sargaḥ || 1,10 ||



************************************************************************


iti pṛṣṭo munīndreṇa samāśvāsya ca rāghavaḥ /
uvāca vacanaṃ cāru dhīrapūrṇārthamantharam // Mo_1,11.1 //
"dhīraṃ" ca tat "pūrṇārthena" "mantharaṃ" nirbharaṃ ca "dhīrapūrṇārthamantharam" || MoT_1,11.1 ||


itaḥ paraṃ vairāgyaprakaraṇārambhaḥ |

smṛtvā tattvam paramagahanaṃ svasvarūpākhyam ādyaṃ
spṛṣṭvā mūrdhnā gurucaraṇayor dhūlipuñjam prayatnāt *
kṛtvā devaṃ śaraṇam aniśaṃ vighnarājaṃ ca ṭīkā
vairāgyākhye prakaraṇavare tanyate bhāskareṇa ** 14 **



samāśvāsanaparaṃ śrīvasiṣṭhaśrīviśvāmitrayor vākyaṃ śrutvā śrīrāmo hṛdgataṃ vairāgyam prakaṭīkaroti
bhagavan bhavatā pṛṣṭo yathāvad adhunā kila /
kathayāmy aham ajño 'pi ko laṅghayati sadvacaḥ // Mo_1,11.2 //
"bhavate"ti kulaguruṃ vasiṣṭham praty uktiḥ | kimarthaṃ kathayasīty | atrāha "ko" "laṅghayatī"ti || MoT_1,11.2 ||



svayaṃ kṛtām pratijñāṃ sampādayati
ahaṃ tāvad ayaṃ jāto nije 'smin pitṛsadmani /
krameṇa vṛddhiṃ samprāptaḥ prāptavidyaś ca saṃsthitaḥ // Mo_1,11.3 //
"tāvac"chabdo vipratipattyabhāvavācakaḥ || MoT_1,11.3 ||



tataḥ sadācāraparo bhūtvāham munināyaka /
vihṛtas tīrthayātrārtham urvīm ambudhimekhalām // Mo_1,11.4 //
spaṣṭam || MoT_1,11.4 ||



etāvatātha kālena saṃsārāsthām imām mama /
svaviveko jahārāntar oghas taṭalatām iva // Mo_1,11.5 //
"svavivekaḥ" ko 'ham iti vicāraḥ || MoT_1,11.5 ||


vivekena parītātmā tenāhaṃ tad anu svayam /
bhoganīrasayā buddhyā pravicāritavān idam // Mo_1,11.6 //
spaṣṭam || MoT_1,11.6 ||


kiṃ tvayā "pravicāritam" ity | atrāha
kiṃ nāmedaṃ vata sukhaṃ yo 'yaṃ saṃsārasaṃsṛtiḥ /
jāyate mṛtaye loko mriyate jananāya ca // Mo_1,11.7 //
"vata" kaṣṭe | "idaṃ" "sukhaṃ" "kiṃ" "nāma" bhavati | na bhavatīty arthaḥ | "idaṃ" kiṃ | "saṃsāre" "saṃsṛtiḥ" saṃsaraṇaṃ yasya | saḥ tādṛśaḥ | "yaḥ" "ayaṃ" "lokaḥ" | "mṛtaye" yat "jāyate" | "jananāya" ca yan "mriyate" || MoT_1,11.7 ||



mṛtijananarūpasya saṃsaraṇasya duḥkhatvam uktvā tadāśrayabhūtānām bhāvānāṃ duḥkhayuktatvaṃ kathayati
svasthitāḥ sarva eveme sacarācaraceṣṭitāḥ /
āpadām patayaḥ pāpā bhāvā vibhavabhūmayaḥ // Mo_1,11.8 //
"sacarācaraceṣṭitāḥ" calanasthitirūpakriyāyuktāḥ | "sarve" "eveme" 'nubhūyamānāḥ | "bhāvāḥ" sthāvarajaṅgamarūpāḥ padārthāḥ | "āpadām" "patayaḥ" āpadyuktāḥ bhavanti | pūrvaślokoktajananamaraṇarūpaduḥkhāśrayatvād ity arthaḥ | "bhāvāḥ" kathambhūtāḥ | "svasthitāḥ" svasmin sthitāḥ | na tu parasparaṃ sambandhayuktāḥ | punaḥ kathambhūtāḥ | "vibhavabhūmayaḥ" yathāsvaṃ śaktiyuktāḥ || MoT_1,11.8 ||



nanu katham "bhāvāḥ" "svasthitāḥ" bhavanti | parasparaṃ teṣāṃ nānāvidhasambandhadarśanād ity | atrāha
ayaḥśalākāsadṛśāḥ parasparam asaṅginaḥ /
śliṣyante kevalam bhāvā manaḥkalpanayā svayā // Mo_1,11.9 //
ayam mama putrādiḥ ayam mama pitrādir iti "manaḥkalpitena" saṅkalpenaiva bhāvānām "parasparaṃ" sambandho 'sti | na tu paramārthata iti bhāvaḥ || MoT_1,11.9 ||



nanu manasaḥ katham etāvatī śaktir astīty | atrāha
manaḥsamāyattam idaṃ jagad ābhogi dṛśyate /
manaś cāsad ihābhāti kena smaḥ parimohitāḥ // Mo_1,11.10 //
"ābhogi" vistārayuktam | "manasaḥ" "asattvam" asatyabhūtapadārthānusandhānamātrarūpatvena jñeyam || MoT_1,11.10 ||


asataiva vayaṃ kaṣṭaṃ vikrītā mūḍhabuddhayaḥ /
mṛgatṛṣṇāmbhasā dūre vane mugdhamṛgā iva // Mo_1,11.11 //
"asatā" "eva" | na tu satyabhūtena | manaseti śeṣaḥ || MoT_1,11.11 ||



na kenacic ca vikrītā vikrītā iva saṃsthitāḥ /
vata mūḍhā vayaṃ sarve janānā api śambaram // Mo_1,11.12 //
"śambaram" māyām || MoT_1,11.12 ||


kim eteṣu prapañceṣu bhogā nāma sudurbhagāḥ /
mudhaiva hi vayam mohāt saṃsthitā baddhabhāvanāḥ // Mo_1,11.13 //
"eteṣu prapañceṣu" madhye |" sudurbhagāḥ" atiśayena durbhagatvākhyaguṇayuktāḥ | "bhogā nāma kim" bhavanti | āpātamātraramaṇīyatvāt na kiñcid api bhavantīty arthaḥ | "hi"śabdaḥ ataḥśabdārthe | "hi" ataḥ | "vayam" "eteṣu" bhogeṣu | "baddhabhāvanāḥ" | "mohāt" "mudhaiva" "saṃsthitāḥ" vyarthatvāt || MoT_1,11.13 ||


ajñāte bahukālena vyartha eva vayaṃ ghane /
mohe nipatitā mugdhāḥ śvabhre mugdhamṛgā iva // Mo_1,11.14 //
"mohe" bhogabhāvanākhye mohe | "bahukālena" bahukālaṃ tāvat || MoT_1,11.14 ||

kim me rājyena kim bhogaiḥ ko 'haṃ kim idam āgatam /
yan mithyaivāstu tan mithyā kasya nāma kim āgatam // Mo_1,11.15 //
[BhG I 32cd]
"yat mithyā" bhavati "tat mithyaivāstu" iti sambandhaḥ || MoT_1,11.15 ||


avāntaram upasaṃhāraṃ karoti
evaṃ vimṛśato brahman sarveṣv eva tato mama /
bhāveṣv aratir āyātā pathikasya maruṣv iva // Mo_1,11.16 //
spaṣṭam || MoT_1,11.16 ||


svābhimatam āviṣkaroti
tad etad bhagavan brūhi kim idam parinaśyati /
kim idaṃ jāyate bhūyaḥ kim idam parivardhate // Mo_1,11.17 //
"kim" iti katham ity asyārthe || MoT_1,11.17 ||


jarāmaraṇam āpac ca jananaṃ sampadas tathā /
āvirbhāvatirobhāvair vivartante punaḥ punaḥ // Mo_1,11.18 //
bhāveṣu iti śeṣaḥ | "bhāvair" iti itthambhāve tṛtīyā | "vivartante" rūpāntaraṃ gacchanti || MoT_1,11.18 ||



bhāvais tair eva tair eva tucchair vayam ime kila /
paśya jarjaratāṃ nītā vātair iva giridrumāḥ // Mo_1,11.19 //
spaṣṭam || MoT_1,11.19 ||


acetanā iva janāḥ pavanaiḥ prāṇanāmabhiḥ /
dhvanantaḥ saṃsthitā vyarthaṃ yathā kīcakaveṇavaḥ // Mo_1,11.20 //
"kīcakaveṇavo" hi vyarthaṃ dhvananti || MoT_1,11.20 ||


śāmyatīdaṃ kathaṃ duḥkham iti tapto 'smi cintayā /
jaraddruma ivogreṇa koṭarasthena vahninā // Mo_1,11.21 //
spaṣṭam || MoT_1,11.21 ||


saṃsāraduḥkhapāṣāṇanīrandhrahṛdayo 'py aham /
nijalokabhayād eva galadbāṣpair na rodimi // Mo_1,11.22 //
"saṃsāraduḥkhāny" eva "pāṣāṇāḥ" | taiḥ "nīrandhraṃ" "hṛdayaṃ" yasya | saḥ tādṛśaḥ || MoT_1,11.22 ||


śūnyasanmukhavṛttīs tu śuṣkarodananīrasāḥ /
viveka eva hṛtsaṃstho mamaikānteṣu paśyati // Mo_1,11.23 //
"śūnyā" vyarthāś ca tāḥ | "sanmukhavṛttayaḥ" sanmukhavyāpārāḥ tāḥ | "ekānteṣu" "vivekai"kapara "evā"smīti bhāvaḥ || MoT_1,11.23 ||



bhṛśam muhyāmi saṃsmṛtya bhāvābhāvamayīṃ sthitim /
dāridryeṇeva subhago dūre saṃsāracintayā // Mo_1,11.24 //
"sthitiṃ" jagadākhyāṃ sthitim | ahaṃ ka "iva" | "subhaga iva" | yathā "subhagaḥ" "dāridryeṇa" "muhyati" | tathety arthaḥ | ataḥ "saṃsāracintayā" "dūre" | sā dūre bhavatv ity arthaḥ || MoT_1,11.24 ||


evaṃ sāmānyena saṃsārapadārthānāṃ duḥkhadatām uktvā tad viśeṣeṣu pradhānabhūtāyāḥ śriyaḥ kathayati
mohayanti manovṛttiṃ khaṇḍayanti guṇānalam /
duḥkhajālam prayacchanti vipralambhaparāḥ śriyaḥ // Mo_1,11.25 //
"mohayanti" avivekayuktatāṃ kurvanti | aiśvaryamadagrastā hi pūrvāparavicāraśūnyā eva bhavanti | "vipralambhaparāḥ" vañcanaparāḥ || MoT_1,11.25 ||



evaṃ śriyaḥ duḥkhadatvam uktvā tat pradhānāvayavabhūtasya dhanasyāpi duḥkhadatvaṃ kathayati
cintānicayavakrāṇi nānandāya dhanāni me /
samprasūtakalatrāṇi gṛhāṇy ugrāpadāṃ yathā // Mo_1,11.26 //
"cintānicayenā"rjanādyartham prayuktena cintāsamūhena | "vakrāṇi" kuṭilāni | "ugrāpadāṃ" hi bahu"kalatrāṇi" "gṛhāṇi" duḥkhāyaiva bhavanti || MoT_1,11.26 ||



saṅgraheṇa svāsvāsthyaṃ kathayati
vividhadoṣadaśāparicintanaiḥ
satatabhaṅgurakāraṇakalpitaiḥ /
mama na nirvṛtim eti mano mune
nigaḍitasya yathā vanahastinaḥ // Mo_1,11.27 //
"vividhā" yāḥ "doṣadaśāḥ" | tāsām "paricintanaiḥ" | kathambhūtaiḥ | "satataṃ" "bhaṅgurāṇi" yāni "kāraṇāni" bhogarūpāṇi kāraṇāni | taiḥ "kalpitaiḥ" svaviṣayatayā prakaṭīkṛtaiḥ || MoT_1,11.27 ||



sarvadoṣamūlakāraṇabhūtān viṣayān sargāntaślokena nindati
khalāḥ kāle kāle niśi niśitamohaikamihikā
gatāloke loke viṣayahaṭhacaurāḥ sucaturāḥ /
pravṛttāḥ prodyuktā diśi diśi vivekaikaharaṇe
raṇe śaktās teṣāṃ vadata vibudhāḥ ke 'dya subhaṭāḥ // Mo_1,11.28 //
"khalāḥ" atyantaduḥkhakāritvāt durjanasadṛśās | tathā "sucaturāḥ" aticāturyayuktāḥ | "viṣayahaṭhacaurāḥ" | "niśi" lakṣaṇayā avidyārūpāyāṃ rātrau | "niśitā" tīkṣṇā yā "mohaikamihikā" | tayā "gatāloke" dūre gatavicārākhyaprakāśe | "loke" asmin saṃsāre | "kāle kāle" sarveṣu kāleṣu | "diśi diśi" sarvāsu dikṣu | "prodyuktāḥ" prakṛṣṭodyogabhājaḥ | ata eva "vivekasya" samyagvicārasya | yad "ekaṃ" "haraṇaṃ" kevalaṃ haraṇaṃ | tatra "pravṛttāḥ" bhavanti | he "vibudhāḥ" yūyaṃ | "vadatādya" asmin samaye | "teṣāṃ" "viṣayahaṭhacaurāṇāṃ" "raṇe ke subhaṭāḥ" "śaktāḥ" bhavanti | na ke 'pīti bhāvaḥ | iti śivam || MoT_1,11.28 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ekādaśaḥ sargaḥ || 1,11 ||


************************************************************************



samanantaram eva prakṛtāṃ śrīnindāṃ vistareṇa kathayati
iyam asmin vinodāya saṃsāre parikalpitā /
śrīr mune parimohāya sāpi nūnam anarthadā // Mo_1,12.1 //
"nūnaṃ" niścayena | "anarthade"ti viśeṣaṇadvārahetuḥ || MoT_1,12.1 ||



anarthadatvam evāsyāḥ kathayati
ullāsabahulān antaḥ kallolān akramākulān /
jaḍān prasravati sphārān prāvṛṣīva taraṅgiṇī // Mo_1,12.2 //
iyaṃ śrīḥ "ullāsabahulān" ullāsapūrṇān | "akramākulān" kramollaṅghananirbha-rān | tathā "jaḍān" jāḍyadāyitvāt jaḍarūpān | "kallolān" darpākhyān mahātaraṅgān | "prasravati" utpādayati | kā "iva" | "taraṅgiṇīva" | yathā "taraṅgiṇī" "prāvṛṣi" varṣākāle | uktaviśeṣaṇān mahātaraṅgān prasravati | tathety arthaḥ || MoT_1,12.2 ||



cintāduhitaro bahvyo bhūridurlaliteritāḥ /
cañcalāḥ prabhavanty asyās taraṅgāḥ sarito yathā // Mo_1,12.3 //
"bhūrīṇi" yāni "durlalitāni" durvilāsāḥ | tair "īritāḥ" cañcalitāḥ | utthāpitā iti yāvat || MoT_1,12.3 ||



eṣā hi padam ekatra na nibadhnāti durbhagā /
mugdhevāniyatācāram itaś cetaś ca dhāvati // Mo_1,12.4 //
"hi" niścaye | "aniyatācāraṃ" kāmacārata ity arthaḥ | kriyāviśeṣaṇam etat || MoT_1,12.4 ||


janayantī paraṃ dāham parāmṛṣṭāṅgikā satī /
vināśam eva dhatte 'ntar dīpalekheva kajjalam // Mo_1,12.5 //
spaṣṭam || MoT_1,12.5 ||


guṇāguṇavicāreṇa vinaiva kila pārśvagam /
rājaprakṛtivan mūḍhā durārūḍhāvalambate // Mo_1,12.6 //
"rājaprakṛtivat" rājasvabhāvavat | rājāpi hi "guṇāguṇavicāra"rahitam eva "pārśvagam" "avalambate" || MoT_1,12.6 ||



karmaṇā tena tenaiṣā vistāram upagacchati /
doṣāśīviṣavegasya yat kṣīravisarāyate // Mo_1,12.7 //
"kṣīrasya" "visaraḥ" sekaḥ | sa ivācarate "kṣīravisarāyate" || MoT_1,12.7 ||



tāvac chītamṛdusparśaḥ parasve ca jane janaḥ /
vātyayeva himaṃ yāvac chriyā na paruṣīkṛtaḥ // Mo_1,12.8 //
śrīsparśe "janaḥ" "svasmin pare ca" mahākaṭhina eva bhavatīti piṇḍārthaḥ | "vātyā" hi "himam" "paruṣīkarotī"ty upamānatvena gṛhītā || MoT_1,12.8 ||


prājñāḥ śūrāḥ kṛtajñāś ca peśalā mṛdavaś ca ye /
pāṃsumuṣṭyeva maṇayaḥ śriyā te malinīkṛtāḥ // Mo_1,12.9 //
spaṣṭam || MoT_1,12.9 ||


na śrīḥ sukhāya bhagavan duḥkhāyaiva hi kalpate /
guptaṃ vināśanaṃ dhatte mṛtiṃ viṣalatā yathā // Mo_1,12.10 //
spaṣṭam || MoT_1,12.10 ||



śrīmān ajananindyaś ca śūraś cāpy avikatthanaḥ /
samadṛṣṭiḥ prabhuś caiva durlabhāḥ puruṣās trayaḥ // Mo_1,12.11 //
śriyā spṛṣṭaḥ sāhaṅkāratvena jananindya eva bhavatīti bhāvaḥ || MoT_1,12.11 ||


eṣā hi viṣamā duḥkhabhogināṃ gahanā guhā /
ghanamohagajendrāṇāṃ vindhyaśailamahāṭavī // Mo_1,12.12 //
spaṣṭaṃ || MoT_1,12.12 ||


punaḥ kīdṛśy astīty apekṣāyām āha
satkāryapadmarajanī duḥkhakairavacandrikā /
saddṛṣṭidīpikāvātyā kallolaughataraṅgiṇī // Mo_1,12.13 //
"kallolāḥ" darparūpāḥ mahātaraṅgāḥ || MoT_1,12.13 ||


sambhramābhrādipadavī viṣādaviṣavardhinī /
kedārikā vikalpānāṃ khadā kubhayabhoginām // Mo_1,12.14 //
"khadā" guhā | "kubhayāni" eva "bhoginaḥ" sarpāḥ | teṣām || MoT_1,12.14 ||


himaṃ vairāgyavallīnāṃ vikārolūkayāminī /
rāhudaṃṣṭrā vivekendoḥ saujanyāmbhojacandrikā // Mo_1,12.15 //
spaṣṭam || MoT_1,12.15 ||


indrāyudhavad ālolanānārāgamanoharā /
lolā taḍid ivotpannadhvaṃsinī jaḍasaṃśrayā // Mo_1,12.16 //
spaṣṭam || MoT_1,12.16 ||


capalā varjitā ratyā nakulī nakulīnajā /
vipralambhanatātparyahetūgramṛgatṛṣṇikā // Mo_1,12.17 //
"capalā" cāpalyaguṇasahitā | ata eva "ratyā" "varjitā" kutrāpi ratim akurvatīty arthaḥ | tathā "nakulī" aticāpalatvena nakulastrīsarūpā | tathā "nakulīnajā" duṣṭā | akulīnajo hi duṣṭo bhavati | tathā "vipralambhane" paravañcane | yat "tātparyam" | tasya "hetuś" cāsau "ugramṛgatṛṣṇikā" kaṭhinamṛgatṛṣṇāsvarūpā || MoT_1,12.17 ||



laharīvaikarūpeṇa kṣaṇam padam akurvatī /
calā dīpaśikhevāti durjñeyāgatigocarā // Mo_1,12.18 //
na "gatau" gamane gocarā "agatigocarā" | "dīpaśikhā"pi gatau agocarā eva bhavati || MoT_1,12.18 ||


siṃhīva vigrahavyagrakarīndrakulapātinī /
khaḍgadhāreva śiśirā tīkṣṇā tīkṣṇāśayāśrayā // Mo_1,12.19 //
"vigrahavyagraṃ" yuddhavyagraṃ | yat "karīndrakulaṃ" hastikulaṃ | tatra patatīti tādṛśī tatsādhyatvāt | "siṃhī" cedṛśī bhavati | "śiśirā" āmukhe santāpaharitvāt | "tīkṣṇāśayāḥ" kaṭhinacintāḥ | "āśrayaḥ" yasyāḥ | sā || MoT_1,12.19 ||



nānayopahatārthinyā durādhiparipīnayā /
paśyāmy abhavyayā lakṣmyā kiñcid duḥkhād ṛte sukham // Mo_1,12.20 //
"upahatān" ajñānabādhitān | "arthate" ālambanatvena kāṅkṣatīti tādṛśyā || MoT_1,12.20 ||



dvāreṇotsāritā lakṣmīḥ punar eti tamo'riṇā /
aho vata hṛtasthānā nirlajjā durjanāspadā // Mo_1,12.21 //
"tamo'riṇā" gehāntargatatamonivāraṇārthaṃ kalpitena kṣudradvāreṇa || MoT_1,12.21 || sargāntaślokena śrīnindāṃ samāpayati
manoramā karṣati cittavṛttiṃ
kadaryasādhyā kṣaṇabhaṅgurā ca /
vyālāvalīgarbhanivṛttadehā
śvabhrotthitā puṣpalateva lakṣmīḥ // Mo_1,12.22 //
"kadaryasādhyā" kukarmasādhyā | śrīpakṣe "vyālāvalī" duḥkhāvalī | iti śivam || MoT_1,12.22 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe dvādaśaḥ sargaḥ || 1,12 ||


************************************************************************


evaṃ śrīnindāṃ kṛtvā jīvitanindāṃ karoti
āyuḥ pallavakoṇāgralambāmbukaṇabhaṅguram /
unmattam iva santyajya yāty akāṇḍe śarīrakam // Mo_1,13.1 //
"āyuḥ" jīvitaṃ | "yātī"ti sambandhaḥ | "akāṇḍe" asamaye | tatsammatirūpaṃ samayam ullaṅghyeti yāvat || MoT_1,13.1 ||


viṣayāśīrviṣāsaṅgaparijarjaracetasām /
aprauḍhātmavivekānām āyur āyāsakāraṇam // Mo_1,13.2 //
spaṣṭam || MoT_1,13.2 ||



ye tu vijñātavijñeyā viśrāntā vitate pade /
bhāvābhāvasamāśvastā āyus teṣāṃ sukhāyate // Mo_1,13.3 //
"viśrāntā" ātmatve niścitāḥ | "vitate" aparimite | "bhāvābhāveṣu" pravāhāgateṣu nāśotpādeṣu | "samāśvastāḥ" svabhāvād apracyutāḥ || MoT_1,13.3 ||


vayam parimitākārapariniṣṭhitaniścayāḥ /
saṃsārābhrataḍitpuñje mune nāyuṣi nirvṛtāḥ // Mo_1,13.4 //
"parimitaḥ" pārimityayuktaḥ | yaḥ "ākāraḥ" dehādirūpaḥ ākāraḥ | tatra "pariniṣṭhitaḥ" niṣṭhāṃ gataḥ | "niścayaḥ" ātmaniścayaḥ | yeṣāṃ | te | "nirvṛtir" hi aparimitasvarūpaniṣṭhatvam iti bhāvaḥ || MoT_1,13.4 ||



yujyate veṣṭanaṃ vāyāv ākāśasya ca khaṇḍanam /
grathanaṃ ca taraṅgāṇām āsthā nāyuṣi yujyate // Mo_1,13.5 //
"āsthā" dṛḍhatāviśvāsaḥ || MoT_1,13.5 ||



pelavaṃ śaradīvābhram asneham iva dīpakam /
taraṅgakam ivālolaṃ gatam evopalakṣyate // Mo_1,13.6 //
āyur iti śeṣaḥ | "pelavaṃ" laghu || MoT_1,13.6 ||


taraṅgapratibimbenduṃ taḍitpuñjaṃ nabho'mbudam /
grahītum āsthām badhnāmi na tv āyuṣi gatasthitau // Mo_1,13.7 //
spaṣṭam || MoT_1,13.7 ||



aviśrāntamanāḥ śūnyam āyur ātatam īhate /
duḥkhāyaiva vimūḍho 'ntar garbham aśvatarī yathā // Mo_1,13.8 //
"aśvatarī" kharastriyām aśvāj jātā vaḍavā | tasyā "garbhaḥ" kukṣipāṭanaṃ vinā na niryāti || MoT_1,13.8 ||


saṃsārasaṃsṛtāv ambhaḥpheno 'smin sargasāgare /
kāyavallyāṃ raso rājañ jīvitam me na rocate // Mo_1,13.9 //
"sargasāgare" kathambhūte | "saṃsāre" "saṃsṛtiḥ" saṃsaraṇaṃ | yasya | tādṛśe | "ambhaḥphenaḥ" ambhovikāraḥ phenaḥ | daśaratham prati iyam uktiḥ || MoT_1,13.9 ||


prāpyaṃ samprāpyate yena bhūyo yena na śocyate /
parāyā nirvṛteḥ sthānaṃ yat taj jīvitam ucyate // Mo_1,13.10 //
"parāyā" utkṛṣṭāyāḥ || MoT_1,13.10 ||



taravo 'pi hi jīvanti jīvanti mṛgapakṣiṇaḥ /
sa jīvati mano yasya mananena na jīvati // Mo_1,13.11 //
"mananena" bhogānusandhānena || MoT_1,13.11 ||


jātās ta eva jagati jantavaḥ sādhujīvitāḥ /
ye punar neha jāyante śeṣā jānīta gardabhāḥ // Mo_1,13.12 //
yūyaṃ "jānīta" | kim ity apekṣāyām āha | "śeṣā" iti | "śeṣā" "gardabhāḥ" bhavanti || MoT_1,13.12 ||


bhāro 'vivekinaḥ śāstram bhāro jñānaṃ ca rāgiṇaḥ /
aśāntaṃ ca mano bhāro bhāro 'nātmavido vapuḥ // Mo_1,13.13 //
"avivekinaḥ" vivekarahitasya | "bhāra"tvaṃ ca "śāstrā"deḥ samyagjñānādyarthakriyākāritvābhāvena jñeyam || MoT_1,13.13 ||


rūpam āyur mano buddhir ahaṅkāras tathehitam /
bhāro bhāradharasyeva sarvaṃ duḥkhāya durdhiyaḥ // Mo_1,13.14 //
"durdhiyaḥ" buddhirahitasya | buddhirahito hi "rūpā"dau samatayā pāravaśyaṃ yāti | tataś ca duḥkhe nimajjati || MoT_1,13.14 ||


aviśrāntamanaḥpūrṇam āpadām paramāspadam /
nīḍo rogavihaṅgānām āyur āyāsanaṃ dṛḍham // Mo_1,13.15 //
"āyuḥ" kathambhūtam | "aviśrāntam" paramapadaviśrāntirahitaṃ | yan "manas" | tena "pūrṇam" || MoT_1,13.15 ||


pratyahaṃ khedam utsṛjya śanair alam anāratam /
āśv eva janmanaḥ śvabhraṃ kālena vinikhanyate // Mo_1,13.16 //
kālanāśyatvaṃ hi āyuṣaḥ prasiddham || MoT_1,13.16 ||



śarīrabilaviśrāntair viṣadāhapradāyibhiḥ /
rogair nipīyate raudrair vyālair iva vanānilaḥ // Mo_1,13.17 //
āyur iti śeṣaḥ || MoT_1,13.17 ||


prasuvānair avacchedaṃ tucchair antaravāsibhiḥ /
duḥkhair ākṛṣyate krūrair ghuṇair iva jaraddrumaḥ // Mo_1,13.18 //
"avacchedaṃ" chedanam | "prasuvānair" utpādayadbhiḥ | "ākṛṣyate" svavaśaṃ nīyate || MoT_1,13.18 ||


nūnaṃ nigiraṇāyāśu ghanagarvam anāratam /
ākhur mārjārakeṇeva maraṇenāvalokyate // Mo_1,13.19 //
"avalokyate" kadā etat grase iti dṛśyate || MoT_1,13.19 ||


garvādiguṇagarbhiṇyā śūnyayāśaktivaśyayā /
annam mahāśaneneva jarasā parijīryate // Mo_1,13.20 //
"aśaktivaśyayā" aśaktigrastayā || MoT_1,13.20 ||


dinaiḥ katipayair eva parijñāya gatādaram /
durjanaḥ sajjaneneva yauvanenāvamucyate // Mo_1,13.21 //
spaṣṭam || MoT_1,13.21 ||


vināśasuhṛdā nityaṃ jarāmaraṇabandhunā /
rūpaṃ śiḍgavareṇeva kṛtāntenābhilaṣyate // Mo_1,13.22 //
spaṣṭam || MoT_1,13.22 ||


sargāntaślokena jīvitanindāṃ samāpayati
sthiratayā sukhahāritayā tayā
satatam ujjhitam uttama phalgu ca /
jagati nāsti tathā guṇavarjitam
maraṇamārjitam āyur idaṃ yathā // Mo_1,13.23 //
"uttame"ty āmantraṇam | "phalgu" niḥsāram | "maraṇena" "mārjitaṃ" saṅkṣiptam | iti śivam || MoT_1,13.23 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe trayodaśaḥ sargaḥ || 1,13 ||


************************************************************************


adhunāhaṅkāranindām prastauti
mudhaivābhyutthito mohān mudhaiva parivardhate /
mithyāmayena bhīto 'smi durahaṅkāraśatruṇā // Mo_1,14.1 //
"mithyāmayena" mithyāsvarūpeṇa || MoT_1,14.1 ||



ahaṅkāravaśād eva doṣakośaḥ kadarthanām /
dadāti dīnadīnānāṃ saṃsāro vividhākṛtiḥ // Mo_1,14.2 //
"kadarthanāṃ" duḥkham || MoT_1,14.2 ||


ahaṅkāravaśād āpad ahaṅkārād durādhayaḥ /
ahaṅkāravaśād īhāpy ahaṅkāro mahāmayaḥ // Mo_1,14.3 //
"īhā" bhogārthaṃ ceṣṭā || MoT_1,14.3 ||


tam ahaṅkāram āśritya paramaṃ ciravairiṇam /
na bhuñje na pibāmy ambhaḥ kim u bhogān bhaje mune // Mo_1,14.4 //
spaṣṭam || MoT_1,14.4 ||


saṃsārarajjur ādīrghā mama cetasi mohinī /
tatāhaṅkāradoṣeṇa kirāteneva vāgurā // Mo_1,14.5 //
"ahaṅkāradoṣeṇā"haṅkārākhyena doṣeṇa || MoT_1,14.5 ||


yāni duḥkhāni dīrghāṇi viṣamāṇi mahānti ca /
ahaṅkārāt prasūtāni tāny agāt khadirā iva // Mo_1,14.6 //
"agāt" parvatāt || MoT_1,14.6 ||


śamendoḥ saiṃhikeyāsyaṃ guṇipadmamahāśanim /
jñānameghaśaratkālam ahaṅkāraṃ tyajāmy aham // Mo_1,14.7 //
spaṣṭam || MoT_1,14.7 ||


ahaṅkāratyāgam eva karoti
nāhaṃ rāmo na me vāñchā bhāveṣu na ca me manaḥ /
śānta āsitum icchāmi svātmany eva jino yathā // Mo_1,14.8 //
dehasyaiva rāmatvāt | mama cinmātratvād iti bhāvaḥ | "śāntaḥ" ahaṅkārarahitaḥ || MoT_1,14.8 ||


ahaṅkāravaśād yad yan mayā bhuktaṃ kṛtaṃ hṛtam /
sarvaṃ tat tad avastv eva vastv ahaṅkārariktatā // Mo_1,14.9 //
"ahaṅkārariktatā" ahaṅkārarāhityam || MoT_1,14.9 ||


aham ity asti ced brahmann aham āpadi duḥkhitaḥ /
sampatsu sukhitas tasmād anahaṅkāritā dhanaḥ // Mo_1,14.10 //
dhanayuktasya eva hi āpatsu sampatsu ca duḥkhādisparśo na bhavatīti pūrvavākye bhāvaḥ | phalitam āha "tasmād" iti | "tasmāt" tato hetoḥ | "anahaṅkāritā dhanaḥ" dhanam bhavati | dehātmatve niścitaḥ puruṣo hi dehārtham bhogajālam icchan bhogarāhityarūpāyām āpadi duḥkhī bhavati | tatsampattirūpāyāṃ sampadi sukhī bhavati | cinmātrātmatve niścito 'haṃ na tādṛśo bhavāmīti bhāvaḥ || MoT_1,14.10 ||



ahaṅkāram parityājya mune śāntamanās tathā /
avatiṣṭhe gatodvego bhogaughe 'bhaṅgurāspadam // Mo_1,14.11 //
"avatiṣṭhe" tiṣṭhāmi | "ahaṅkāraṃ" kathambhūtam | "bhogaughe" bhogasamūhe | "abhaṅgurāspadam" anaśvarapratiṣṭham || MoT_1,14.11 ||


brahman yāvad ahaṅkāravāridaḥ pravijṛmbhate /
tāvad vikāsam āyāti tṛṣṇākuṭajamañjarī // Mo_1,14.12 //
spaṣṭam || MoT_1,14.12 ||


ahaṅkāraghane śānte tṛṣṇānavataḍillatā /
śāntadīpaśikhāvṛttyā kvāpi yāsyati satvaram // Mo_1,14.13 //
spaṣṭam || MoT_1,14.13 ||


ahaṅkāramahāvindhye manomattamataṅgajaḥ /
visphūrjati ghanāsphoṭaiḥ stanitair iva vāridaḥ // Mo_1,14.14 //
"visphūrjati" vilasati | "ghanāsphoṭaiḥ" niviḍakarṇatālaiḥ || MoT_1,14.14 ||


iha dehamahādaryāṃ ghanāhaṅkārakesarī /
yo 'yam ullasati sphāraṃ tenedaṃ jagad ātatam // Mo_1,14.15 //
anahaṅkāritve hi sad api jagan nāsti apekṣāviṣayatvābhāvāt || MoT_1,14.15 ||



tṛṣṇātantulavaprotā bahujanmaparamparā /
ahaṅkārograśiḍgena kaṇṭhe muktāvalī kṛtā // Mo_1,14.16 //
"śiḍgo" hi "tantuprotām" "muktāvalīṃ" "kaṇṭhe" karoti || MoT_1,14.16 ||


putradārakalatrāṇi tantram mantravivarjitam /
prasāritam aneneha durahaṅkāravairiṇā // Mo_1,14.17 //
spaṣṭam || MoT_1,14.17 ||


pramārjite 'ham ity asmin pade svayam akhidyatā /
pramārjitā bhavanty eva sarvā eva durādhayaḥ // Mo_1,14.18 //
spaṣṭam || MoT_1,14.18 ||


aham ity ambude śānte śanaiḥ suśamaśālini /
manomananasammohamihikā kvāpi gacchati // Mo_1,14.19 //
"manasaḥ" yaḥ "mananasammohaḥ" mananarūpaḥ | sa eva "mihikā" nīhāraḥ || MoT_1,14.19 ||


nirahaṅkāravṛtter me maurkhyāc chokena sīdataḥ /
yat kiñcid ucitam brahmaṃs tad ākhyātum ihārhasi // Mo_1,14.20 //
prathamam ahaṅkāraṃ svayam eva tyajāmi | paścāt tvaduktaṃ karomīti bhāvaḥ || MoT_1,14.20 ||


sargāntaślokenāhaṅkāranindāṃ samāpayati
sarvāpadāṃ nilayam adhruvam antarastham
unmuktam uttamaguṇena na saṃśrayāmi /
yatnād ahaṅkṛtipadam parito 'tiduḥkham
śeṣeṇa māṃ samanuśādhi mahānubhāva // Mo_1,14.21 //
"ahaṅkṛtipadam" ahaṅkṛtyākhyaṃ sthānam | "śeṣeṇe"ti ahaṅkārāśrayaṇaṃ tyaktvā yat kiñcit samājñāpayasi tat sampādayāmīti bhāvaḥ | ahaṅkāraś ca idantāviṣayatvayogye dehe ahantāviṣayatvasañjananaṃ jñeyam | iti śivam || MoT_1,14.21 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe caturdaśaḥ sargaḥ || 1,14 ||


************************************************************************



evam ahaṅkāranindāṃ kṛtvā cittanindām prastauti
doṣair jarjaratāṃ yātaṃ satkāryād āryasevitāt /
vātāttapiñchalavavac cetaś calati cañcalam // Mo_1,15.1 //
"doṣaiḥ" rāgādidoṣaiḥ | "satkāryāt" "calati" satkārye sthairyeṇa na tiṣṭhatīty arthaḥ || MoT_1,15.1 ||



itaś cetaś ca suvyagraṃ vyartham evābhidhāvati /
dūrād dūrataraṃ dīnaṃ grāme kauleyako yathā // Mo_1,15.2 //
"kauleyakaḥ" śvā || MoT_1,15.2 ||



na prāpnoti kvacit kiñcit prāptair api mahādhanaiḥ /
nāntaḥ sampūrṇatām eti karaṇḍaka ivāmbubhiḥ // Mo_1,15.3 //
kiñcit prāpto hi punaḥ kiñcid "api" na prārthayed iti bhāvaḥ || MoT_1,15.3 ||



nityam eva manaḥ śūnyaṃ kadāśāvāgurāvṛtam /
na manāṅ nirvṛtiṃ yāti mṛgo yūthād iva cyutaḥ // Mo_1,15.4 //



"śūnyaṃ" niḥsāram || MoT_1,15.4 ||


taraṅgataralāṃ vṛttiṃ dadhad ālūnaśīrṇatām /
parityajya kṣaṇam api na mano yāti nirvṛtim // Mo_1,15.5 //



"ālūnaśīrṇatāṃ" hastasparśāsahatvam | maticāñcalyam iti yāvat || MoT_1,15.5 ||



mano mananavikṣubdhaṃ diśo daśa vidhāvati /
mandarāhananodbhūtaṃ kṣīrārṇavapayo yathā // Mo_1,15.6 //
"mananavikṣubdham" bhogānusandhānakṣubdham || MoT_1,15.6 ||


kallolakalanāvartam māyāmakaramālitam /
na niroddhuṃ samartho 'smi manomohamahārṇavam // Mo_1,15.7 //



"kallola"rūpā yā "kalanā" saṅkalpaḥ | saiv"āvartaḥ" yasya | tat | "māyā" viparyayajñānam || MoT_1,15.7 ||


bhogadūrvāṅkurākāṅkṣī śvabhrapātam acintayan /
manohariṇako brahman dūraṃ viparidhāvati // Mo_1,15.8 //


spaṣṭam || MoT_1,15.8 ||




na kadācana me cetas tām ālūnaviśīrṇatām /
tyajaty ākulayā vṛttyā cañcalatvam ivārṇavaḥ // Mo_1,15.9 //


"ālūnaviśīrṇatāṃ" hastasparśāsahatvaṃ | maticāñcalyam iti yāvat || MoT_1,15.9 ||



cetaś cañcalayā vṛttyā cintānicayacañcuram /
dhṛtim badhnāti naikatra kesarī pañjare yathā // Mo_1,15.10 //



"cintānicayena" cintāsamūhena | "cañcuraṃ" nirbharam || MoT_1,15.10 ||


mano moharathārūḍhaṃ śarīrāc chamatāsukham /
haraty upagatodyogaṃ haṃsaḥ kṣīram ivāmbhasaḥ // Mo_1,15.11 //



spaṣṭam || MoT_1,15.11 ||


analpakalpanātalpe nilīnāś cittavṛttayaḥ /
munīndra na prabudhyante tena tapto 'ham ākulaḥ // Mo_1,15.12 //



kalpanāgrastam eva sadāsanmano 'stīti bhāvaḥ || MoT_1,15.12 ||



kroḍīkṛtadṛḍhagranthitṛṣṇāsūtrombhitātmanā /
vihago jālakeneva brahman baddho 'smi cetasā // Mo_1,15.13 //



"granthayo" 'tra rāgādirūpā jñeyāḥ || MoT_1,15.13 ||


satatāmarṣadhūmena cintājvālābilena ca /
vahnineva tṛṇaṃ śuṣkam mune dagdho 'smi cetasā // Mo_1,15.14 //



"satatam amarṣaḥ" krodha eva | "dhūmaḥ" yasya | tādṛśena || MoT_1,15.14 ||


krūreṇa jaḍatāṃ yātas tṛṣṇābhāryānugāminā /
śavaḥ kauleyakeneva brahman bhukto 'smi cetasā // Mo_1,15.15 //



spaṣṭam || MoT_1,15.15 ||


taraṅgataralāsphālavṛttinā jaḍarūpiṇā /
taṭavṛkṣa ivaughena brahman nīto 'smi cetasā // Mo_1,15.16 //



"taraṅga"vat "taralāsphālā" atyantacañcalā | "vṛttiḥ" yasya | tādṛśena || MoT_1,15.16 ||


avāntaranipātāya śūnyenākramaṇāya ca /
tṛṇaṃ caṇḍānileneva dūre nunno 'smi cetasā // Mo_1,15.17 //



"avāntareṣu" bhogarūpeṣu paramaviśrāntirahiteṣu padeṣu | yaḥ "nipātas" | tasmai | "ākramaṇāya" ākramaṇārthaṃ | "śūnyene"ti manoviśeṣaṇam || MoT_1,15.17 ||



saṃsārajaladher asmān nityam uttaraṇonmukhaḥ /
setuneva payaḥpūro rodhito 'smi kucetasā // Mo_1,15.18 //



spaṣṭam || MoT_1,15.18 ||


pātālād gacchatā pṛṣṭham pṛṣṭhāt pātālagāminā /
kūpakāṣṭhaṃ kudāmneva veṣṭito 'smi kucetasā // Mo_1,15.19 //



spaṣṭam || MoT_1,15.19 ||


mithyaiva sphārarūpeṇa vicāraviśarāruṇā /
bālo vetālakeneva gṛhīto 'smi svacetasā // Mo_1,15.20 //



"gṛhītaḥ" svavaśīkṛtaḥ || MoT_1,15.20 ||


vahner uṣṇataraḥ śailād api kaṣṭatarakramaḥ /
vajrād api dṛḍho brahman durnigrahamanograhaḥ // Mo_1,15.21 //



"kaṣṭataraḥ" "kramaḥ" ullaṅghanaṃ yasya | saḥ "kaṣṭatarakramaḥ" | "durnigrahaṃ" duḥkhena nirgrahītuṃ śakyaṃ | yat "manaḥ" | tasya "grahaḥ" grahanaṃ | "durnigrahamanograhaḥ" || MoT_1,15.21 ||



cetaḥ patati kāryeṣu vihagaś cāmiṣeṣv iva /
kṣaṇena viratiṃ yāti bālaḥ krīḍanakād iva // Mo_1,15.22 //



spaṣṭam || MoT_1,15.22 ||


jaḍaprakṛtir ālolo vitatāvartavṛttimān /
mano'bdhir īhitavyālo dūrān nayati tāta mām // Mo_1,15.23 //



"jaḍaprakṛtiḥ" jaḍasvabhāvaḥ śītaprakṛtiś ca | "vitatāvartā" eva "vṛttayaḥ" yasya | saḥ | "īhitāni" kāṅkṣitāni eva "vyālāḥ" sarpāḥ | yasya | saḥ | ceṣṭāyuktasarpāś ca yasmin | saḥ | "dūrān" "nayati" nānāviṣayeṣu bhramayati || MoT_1,15.23 ||



yadīdṛśam manas tavāsti tarhi tasya nigrahaṃ kurv ity | atrāha
apy abdhipānān mahataḥ sumerūllaṅghanād api /
api vahnyaśanāt sādho viṣamaś cittanigrahaḥ // Mo_1,15.24 //


spaṣṭam || MoT_1,15.24 ||



nanu cittanigraho duḥsādhya eva bhavatu | kiṃ tena setsyatīty | atrāha
cittaṃ kāraṇam arthānāṃ tasmin sati jagattrayam /
tasmin kṣīṇe jagat kṣīṇaṃ tac cikitsyam prayatnataḥ // Mo_1,15.25 //


spaṣṭam || MoT_1,15.25 ||




cittād imāni sukhaduḥkhaśatāni nūnam
abhyāgatāny agavarād iva kānanāni /
tasmin vivekavaśatas tanutām prayāte
manye mune nipuṇam eva galanti tāni // Mo_1,15.26 //



"imāni" anubhūyamānāni | "agavarāt" parvataśreṣṭhāt | "nipuṇaṃ" samyak || MoT_1,15.26 ||


sargāntaślokena cittanindāṃ samāpayati
sakalaguṇajayāśā yatra baddhā mahadbhis
tam arim iha vijetuṃ cittam abhyutthito 'ham /
vigataratitayāntar nābhinandāmi lakṣmīṃ
jaḍamalinaviśālām meghamālām ivenduḥ // Mo_1,15.27 //


"yatra" yasmin manasi | "abhyutthitaḥ" udyogayukto jātaḥ | iti śivam || MoT_1,15.27 ||





iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe pañcadaśaḥ sargaḥ || 1,15 ||



************************************************************************



evam manonindāṃ kṛtvā tṛṣṇānindām prastauti
hārdāndhakāraśarvaryā tṛṣṇayeha durantayā /
caranti cetanākāśe doṣakauśikapaṅktayaḥ // Mo_1,16.1 //
"cetanākāśe" cittākāśe | "doṣāḥ" rāgādayaḥ | yuktaṃ ca śarvaryāṃ kauśikaca-raṇam || MoT_1,16.1 ||


antardāhapradāyinyā samūḍharasamārdavaḥ /
paṅka ādityadīptyeva śoṣaṃ nīto 'smi cintayā // Mo_1,16.2 //
"samūḍhaṃ" dhṛtaṃ | "rasamārdavam" āsvādakṛtaṃ jalakṛtaṃ ca mārdavaṃ ye-na | saḥ | "cintā" cātra tṛṣṇā eva jñeyā | tṛṣṇāyāḥ cintārūpatvānapāyāt | evam uttaratrāpi jñeyam || MoT_1,16.2 ||



mama cittamahāraṇye vyāmohatimirākule /
śūnye tāṇḍavinī mattā bhṛśam āśā piśācikā // Mo_1,16.3 //
"āśā" tṛṣṇā || MoT_1,16.3 ||


rajoracitanīhārā kāñcanāvacayojjvalā /
nūnaṃ vikāsam āyāti cintā me 'śokamañjarī // Mo_1,16.4 //
"nūnaṃ" niścaye | "cintā" "aśokamañjarī" "me" "vikāsam" "āyāti" | kathambhūtā | "rajasā" svayam utpāditena lobhena | "racitaḥ" "nīhāraḥ" jāḍyaṃ yayā | sā | "rajasā" parā-geṇa | "racitaḥ" utpāditaḥ | "nīhāraḥ" yayā seti ca | "kāñcanāvacayena" kāñcanasaṅgraheṇa | "ujjvalā" jvalantī | kāñcanāvacayavat ujjvalā ca || MoT_1,16.4 ||


alam antar bhramāyaiṣā tṛṣṇā kavalitāśayā /
āyātā vimalollāsam ūrmir ambunidhāv iva // Mo_1,16.5 //
"antar" manasi | "bhramāya" mithyājñānāya || MoT_1,16.5 ||


uddāmakallolaravā dehādrau vahatīva me /
taraṅgitatarākārā taratṛṣṇātaraṅgiṇī // Mo_1,16.6 //
tarantī cāsau tṛṣṇātaraṅgiṇī "taratṛṣṇātaraṅgiṇī" || MoT_1,16.6 ||


vegaṃ saṃroddhum udito vātyayeva jarattṛṇam /
nītaḥ kaluṣayā kvāpi dhiyāyaṃ cittacātakaḥ // Mo_1,16.7 //
"vegaṃ" svakīyaṃ vegaṃ | "dhiyā" tṛṣṇāviṣṭayā buddhyā || MoT_1,16.7 ||



yāṃ yām aham adhītāsthām āśrayāmi guṇaśriyam /
tāṃ tāṃ kṛntati me tṛṣṇā tantrīm iva kumūṣikā // Mo_1,16.8 //
"adhītāsthām" śikṣitadārḍhyaṃ | dṛḍhām iti yāvat || MoT_1,16.8 ||



payasīva jaratparṇaṃ vāyāv iva jarattṛṇam /
nabhasīva śaranmeghaś cintācakre bhramāmy aham // Mo_1,16.9 //
"cintācakre" tṛṣṇācakre || MoT_1,16.9 ||



gantum āspadam ātmīyam asamarthadhiyo vayam /
cintājāle vimuhyāmo jāle śakunayo yathā // Mo_1,16.10 //
"ātmīyam āspadam" paramātmatattvākhyaṃ nijaṃ sthānam || MoT_1,16.10 ||



tṛṣṇābhidhānayā tāta dagdho 'smi jvālayā tathā /
yathā dāhopaśamanam āśaṅke nāmṛtair api // Mo_1,16.11 //
spaṣṭam || MoT_1,16.11 ||


dūraṃ dūram ito gatvā sametya ca punaḥ punaḥ /
bhramaty āśu diganteṣu tṛṣṇonmattā turaṅgamī // Mo_1,16.12 //
spaṣṭam || MoT_1,16.12 ||


jaḍasaṃsaṅgiṇī tṛṣṇā kṛtordhvādhogamāgamā /
kṣubdhā granthimatī nityam araghaṭṭograrajjuvat // Mo_1,16.13 //
"granthimatī" rāgādigranthiyuktā || MoT_1,16.13 ||



antar grathitayā dehe sambhramocchidyamānayā /
rajjvevāśu balīvardas tṛṣṇayā vāhyate janaḥ // Mo_1,16.14 //
"dehe" śarīre | "sambhrameṇa" na tu yuktyā | "ucchidyamānayā" nāśayitum ārabdhayā | "vāhyate" yatra tatra nīyate || MoT_1,16.14 ||


putradārakalatrāditṛṣṇayā nityakṛṣṇayā /
khageṣv iva kirātyeha jālaṃ lokeṣu racyate // Mo_1,16.15 //
"putrādibhir" eva hi lokaḥ saṃsāre bandham āpnoti || MoT_1,16.15 ||



bhāyayaty api dhīreham andhayaty api sekṣaṇam /
khedayaty api sānandaṃ tṛṣṇā kṛṣṇeva śarvarī // Mo_1,16.16 //
spaṣṭam || MoT_1,16.16 ||


kuṭilā komalasparśā viṣavaiṣamyaśaṃsinī /
dahaty api manāk spṛṣṭā tṛṣṇā kṛṣṇeva bhoginī // Mo_1,16.17 //
spaṣṭam || MoT_1,16.17 ||



bhinatti hṛdayam puṃsām māyāmayavidhāyinī /
daurbhāgyadāyinī dīnā tṛṣṇā kṛṣṇeva rākṣasī // Mo_1,16.18 //
"māyā" ev"āmayaḥ" rogas | taṃ karotīti tādṛśī | "daurbhāgyadāyinī" vaivarṇyakāriṇī || MoT_1,16.18 ||


tandrātantrīgaṇaṃ kośe dadhānā pariveṣṭitam /
nānande rājate brahmaṃs tṛṣṇājarjaravallakī // Mo_1,16.19 //
"tandrāḥ" viṣayeṣv avasādāḥ | tā eva "tantryas" | tāsāṃ "gaṇas" | taṃ "pariveṣṭitaṃ" samyak baddhaṃ | "ānande" viśrāntyavasthārūpe ānande nāṭye ca || MoT_1,16.19 ||


nityam evātimalinā kaṭukonmādaśālinī /
dīrghā tanvī ghanasnehā tṛṣṇāgahvaravallarī // Mo_1,16.20 //
"tṛṣṇā" eva "gahvaravallarī" śvabhralatā || MoT_1,16.20 ||


anānandakarī śūnyā niṣphalātyartham unnatā /
amaṅgalakarī krūrā tṛṣṇā kṣīṇeva mañjarī // Mo_1,16.21 //
"kṣīṇā mañjarī" nissārā mañjarī || MoT_1,16.21 ||


anāvarjitacittāpi sarvam evānudhāvati /
na cāpnoti phalaṃ kiñcit tṛṣṇā jīrṇeva kāminī // Mo_1,16.22 //
"anāvarjitacittā" aramyatvād avaśīkṛtajanahṛdayā || MoT_1,16.22 ||


saṃsāranṛtte mahati nānārasasamākule /
bhuvanābhogaraṅgeṣu tṛṣṇā jaraḍhanartakī // Mo_1,16.23 //
"nānārasāḥ" sukhādirūpāḥ śṛṅgārādirūpāś ca || MoT_1,16.23 ||


jarā kusumitā rūḍhā pātotpātaphalāvaliḥ /
saṃsārajaṅgale dīrghe tṛṣṇāviṣalatā tatā // Mo_1,16.24 //
"rūḍhā" prarohaṃ gatā || MoT_1,16.24 ||


yan na śaknoti tatrāpi dhatte tāṇḍavitāṃ gatim /
nṛtyaty ānandarahitaṃ tṛṣṇā jīrṇeva nartakī // Mo_1,16.25 //
spaṣṭam || MoT_1,16.25 ||


bhṛśaṃ sphurati nīhāre śāmyaty āloka āgate /
duḥkhaugheṣu padaṃ dhatte tṛṣṇācapalavarhiṇī // Mo_1,16.26 //
"nīhāre" mohe | "āloke" jñāne || MoT_1,16.26 ||



jaḍakallolabahalā ciraṃ śūnyatarāntarā /
kṣaṇam ullāsam āyāti tṛṣṇāprāvṛṭtaraṅgiṇī // Mo_1,16.27 //
"jaḍakallolaiḥ" jāḍyarūpaiḥ kallolaiḥ jalakallolaiś ca || MoT_1,16.27 ||


naṣṭam utsṛjya tiṣṭhantaṃ vṛkṣād vṛkṣam ivā param /
puruṣāt puruṣaṃ yāti tṛṣṇā loleva pakṣiṇī // Mo_1,16.28 //
"tṛṣṇā" "naṣṭam" "puruṣam" "utsṛjya" "puruṣāt" tasmān naṣṭāt puruṣāt | "param" anyarūpaṃ | "tiṣṭhantaṃ" sthitiyuktam | "puruṣam ā yāti" | kā "iva" | "pakṣiṇīva" | yathā "pakṣiṇī" "naṣṭaṃ vṛkṣam" parityajya "vṛkṣāt" tasmāt naṣṭāt | "aparam" anyarūpaṃ | "tiṣṭhantaṃ vṛkṣaṃ yāti" | tathety arthaḥ || MoT_1,16.28 ||



padaṃ karoty alaṅghye 'pi tṛptāpi phalam īhate /
ciraṃ tiṣṭhati naikatra tṛṣṇācapalamarkaṭī // Mo_1,16.29 //
spaṣṭam || MoT_1,16.29 ||


idaṃ kṛtvedam āyāti sarvam evāsamañjasam /
anārataṃ ca yatate tṛṣṇā ceṣṭeva daivikī // Mo_1,16.30 //
"daivikī" daivasambandhinī || MoT_1,16.30 ||



kṣaṇam āyāti pātālaṃ kṣaṇaṃ yāti nabhastalam /
kṣaṇam bhramati dikkuñje tṛṣṇāhṛtpadmaṣaṭpadī // Mo_1,16.31 //
spaṣṭam || MoT_1,16.31 ||


sarvasaṃsāradoṣāṇāṃ tṛṣṇaikā dīrghaduḥkhadā /
antaḥpurastham api yā yojayaty atisaṅkaṭe // Mo_1,16.32 //
"doṣāṇām" iti nirdhāraṇe ṣaṣṭhī | dīrghaduḥkhatvam evottarārdhena kathayati "antaḥpurastham" iti || MoT_1,16.32 ||



prayacchati paraṃ jāḍyam paramālokarodhinī /
mohanīhāragahanā tṛṣṇājaladamālikā // Mo_1,16.33 //
spaṣṭam || MoT_1,16.33 ||


sarveṣāṃ jantujālānāṃ saṃsāravyavahāriṇām /
pariprotamanomālās tṛṣṇā bandhanarajjavaḥ // Mo_1,16.34 //
spaṣṭam || MoT_1,16.34 ||



vicitravarṇā viguṇā dīrghā malinasaṃsthitiḥ /
śūnyāśūnyāspadā tṛṣṇā śakrakārmukadharmiṇī // Mo_1,16.35 //
malināspadatvaṃ śakrakārmukapakṣe meghāśrayatvena jñeyam || MoT_1,16.35 ||



aśanir guṇasasyānām phalitā śarad āpade /
himaṃ sampatsarojinyās tamasāṃ dīrghayāminī // Mo_1,16.36 //
tṛṣṇā kā | "āpade" āpadartham | "phalitā" "śarat" phalayuktā śarad | āpatpradety arthaḥ || MoT_1,16.36 ||


saṃsāranāṭakanaṭī kāyālayavihaṅgamī /
mānasāraṇyahariṇī smarasaṅgītavallakī // Mo_1,16.37 //
spaṣṭam || MoT_1,16.37 ||


vyavahārābdhilaharī mohamātaṅgaśṛṅkhalā /
mārganyagrodhasubhagā duḥkhakairavacandrikā // Mo_1,16.38 //
"mārge" "nyagrodha"cchāyāvat pariṇāmaduḥkhāvahety arthaḥ || MoT_1,16.38 ||


jarāmaraṇaduḥkhānām ekā ratnasamudgikā /
ādhivyādhivilāsānāṃ nityamattā vilāsinī // Mo_1,16.39 //
"samudgikā" peṭikā || MoT_1,16.39 ||


kṣaṇam ālokavimalā sāndhakāralavā kṣaṇam /
vyomavīthīsamā tṛṣṇā nīhāragahanā kṣaṇam // Mo_1,16.40 //
spaṣṭam || MoT_1,16.40 ||


gacchatūpaśamaṃ tṛṣṇā kāryavyāyāmaśāntaye /
tamī ghanatamaḥkṛṣṇā yathā rakṣonivṛttaye // Mo_1,16.41 //
"kārya"kṛtaḥ yaḥ "vyāyāmaḥ" | tasya "śāntaye" | "tamī" rātriḥ || MoT_1,16.41 ||


tāvan muhyaty ayaṃ loko mūko vilulitāśayaḥ /
yāvad evānusandhatte tṛṣṇāviṣaviṣūcikām // Mo_1,16.42 //
"viṣaviṣūcikā" viṣabhakṣaṇakṛto rogaviśeṣaḥ || MoT_1,16.42 ||


loko 'yam akhilaṃ duḥkhaṃ cintayojjhita ujjhati /
cintāviṣūcikāmantraś cintātyāgo hi kathyate // Mo_1,16.43 //
"duḥkhaṃ" cintāsvarūpaṃ duḥkhaṃ || MoT_1,16.43 ||


tṛṇapāṣāṇakāṣṭhādi sarvam āmiṣaśaṅkayā /
ādadhānā sphuraty antas tṛṣṇā matsyī hrade yathā // Mo_1,16.44 //
spaṣṭam || MoT_1,16.44 ||



rogārtir aṅgagā tṛṣṇā gambhīram api mānavam /
uttānatāṃ nayaty āśu sūryāṃśava ivāmbujam // Mo_1,16.45 //
"uttānatām" uttānapāṇitvaṃ | yācakabhāvam iti yāvat || MoT_1,16.45 ||


aho bata mahac citraṃ tṛṣṇām api mahādhiyaḥ /
duśchedām api kṛntanti vivekenāmalāsinā // Mo_1,16.46 //
spaṣṭam || MoT_1,16.46 ||



nāsidhārā na vajrāgnir na taptāyaḥkaṇārciṣaḥ /
tathā tīkṣṇā yathā brahmaṃs tṛṣṇeyaṃ hṛdi saṃsthitā // Mo_1,16.47 //
spaṣṭam || MoT_1,16.47 ||


kajjalāsitatīkṣṇāgrāḥ snehadīrghadaśāparāḥ /
prakāśā dāhadasparśās tṛṣṇā dīpaśikhā iva // Mo_1,16.48 //
"kajjalāsitāś" ca tāḥ "tīkṣṇāgrāś" ca | "snehaḥ" rāgaḥ tailaṃ ca | "daśā" avasthā vartiś ca || MoT_1,16.48 ||



api merūpamam prājñam api śūram api sthiram /
tṛṇīkaroti tṛṣṇaikā nimeṣeṇa narottamam // Mo_1,16.49 //
"tṛṇīkaroti" laghūkarotīty arthaḥ || MoT_1,16.49 ||


vistīrṇagahanā bhīmā ghanajālarajomayī /
sāndhakārogranīhārā tṛṣṇā vindhyamahāṭavī // Mo_1,16.50 //
"vistīrṇā" cāsau "gahanā" ca | vindhyamahāṭavīpakṣe "vistīrṇāni gahanāni" yasyāḥ | seti | "ghanā" cāsau bandhakatvāt "jāla"rūpā ca | tādṛśī cāsau "rajomayī" ca rajoguṇamayī ca | meghajālena rajasā ca vyāptety aṭavīpakṣe | "sāndhakārā" ajñānāndhyayuktā | "ugranīhārā" kaṭhinamohayuktā || MoT_1,16.50 ||



sargāntaślokena tṛṣṇānindāṃ samāpayati
ekaiva sarvabhuvanāntaralabdhalakṣyā
durlakṣatām upagataiva puraḥsthiteva /
tṛṣṇā sthitā jagati cañcalavīcimāle
kṣīrārṇavāmbupaṭale madhureva śaktiḥ // Mo_1,16.51 //
"durlakṣatām" "upagataivā"tyantāsattvād iti bhāvaḥ | "madhurā śaktiḥ" mādhuryākhyo guṇaḥ | iti śivam || MoT_1,16.51 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ṣoḍaśaḥ sargaḥ || 1,16 ||


************************************************************************



evaṃ tṛṣṇānindāṃ kṛtvā śarīranindām prastauti
ārdrāntratantrīgahano vikārī paritāpavān /
dehaḥ sphurati saṃsāre so 'pi duḥkhāya kevalam // Mo_1,17.1 //
"ārdrā" raktārdrāḥ | yāḥ "antratantryaḥ" | tābhiḥ "gahanaḥ" durgamaḥ | "vikārī" rogavān || MoT_1,17.1 ||



deham eva vistareṇa viśinaṣṭi
ajño 'pi tajjñasadṛśo valitātmacamatkṛtiḥ /
yuktyā bhavyo 'py abhavyo me na jaḍo nāpi cetanaḥ // Mo_1,17.2 //
"ajño 'pi" pāṣāṇatulyatvenācetano 'pi | "tajjñasadṛśaḥ" pramātṛtvena bhāsamānatvāt | "valite"ti dehāhambhāvanayaiva param"ātmacamatkāro" vyavadhānaṃ yāti | "yuktyā" yogādirūpayā yuktyā | "bhavyo 'pi" śreṣṭho 'pi mokṣasādhanatvāt | "me abhavyaḥ" maddṛṣṭyābhavyaḥ || MoT_1,17.2 ||



jaḍājaḍadṛśor madhye dolāyitadurāśayaḥ /
na vivekī na mūḍhātmā moham eva prayacchati // Mo_1,17.3 //
"jaḍatve" pāṣāṇavat ceṣṭāśrayo na syāt | "ajaḍatve" grāhyatāṃ na yāyād iti bhāvaḥ || MoT_1,17.3 ||



stokenānandām āyāti stokenāyāti khinnatām /
nāsti dehasamaḥ śocyo nīco guṇabahiṣkṛtaḥ // Mo_1,17.4 //
"nīco" hi "stokenānandam āyāti khinnatāṃ" c"āyāti" || MoT_1,17.4 ||


āgamāpāyinā nityaṃ dantakesaraśālinā /
vikāsismitapuṣpeṇa pratikṣaṇam alaṅkṛtaḥ // Mo_1,17.5 //
spaṣṭam || MoT_1,17.5 ||


bhujaśākhaughanamito dvijānustambhasusthitaḥ /
locanālivanākrāntaḥ śiraḥpīṭhabṛhatphalaḥ // Mo_1,17.6 //
spaṣṭam || MoT_1,17.6 ||



sravadasrurasasrotā hastapādasupallavaḥ /
gulphavān kāryasaṅghātavihaṅgamatatāspadam // Mo_1,17.7 //
"kāryasaṅghātavihaṅgamānām tataṃ" vistīrṇam | "āspadam" || MoT_1,17.7 ||



sacchāyo dehavṛkṣo 'yaṃ jīvapānthagaṇāspadam /
kasyātmīyaḥ kasya para āsthānāsthe kilātra ke // Mo_1,17.8 //
"āsthānāsthe" iti upekṣā evātra yukteti bhāvaḥ || MoT_1,17.8 ||


bhārasantāraṇārthena gṛhītāyām punaḥ punaḥ /
nāvi dehalatāyāṃ ca kasya syād ātmabhāvanā // Mo_1,17.9 //
dehapakṣe "bhārasantāraṇārthena" saṃsārabhārasamāptaye | dehaṃ vinā hi saṃsāro naśyati || MoT_1,17.9 ||


dehanāmni vane śūnye bahugartasamākule /
tanūruhāsaṅkhyatarau viśvāsaṃ ko 'dhigacchati // Mo_1,17.10 //
"gartāḥ" atra viṣayāḥ || MoT_1,17.10 ||


carmasnāyvasthivalite śarīrapaṭahe dṛḍhe /
mārjāravad ahaṃ nāntas tiṣṭhāmy aviratadhvanau // Mo_1,17.11 //
"snāyavaḥ" sūkṣmanāḍyaḥ "paṭahā"ntare | "mārjāro" hi tatra "na" tiṣṭhati || MoT_1,17.11 ||



saṃsārāraṇyasaṃrūḍho vilasaccittamarkaṭaḥ /
cintāmañjarikākāro dīrghaduḥkhaghuṇakṣataḥ // Mo_1,17.12 //
tṛṣṇābhujaṅgamīdehaḥ kopakākakṛtālayaḥ /
smitapuṣpo drumaḥ śrīmāñ śubhāśubhamahāphalaḥ // Mo_1,17.13 //
suskandho dorlatājālo hastastabakasundaraḥ /
pavanaspanditāśeṣasvāṅgāvayavapallavaḥ // Mo_1,17.14 //
sarvendriyakhagādhāraḥ sujānuḥ sutvag unnataḥ /
sarasacchāyayā yuktaḥ kāmapānthaniṣevitaḥ // Mo_1,17.15 //
mūrdhni sañjanitādīrghaśiroruhatṛṇāvaliḥ /
ahaṅkārajaradgṛddhakulāyasuṣirodaraḥ // Mo_1,17.16 //
ucchinnavāsanājālamūlatvād durbalākṛtiḥ /
vyāyāmaviramaḥ kāyavṛkṣo 'yaṃ na sukhāya me // Mo_1,17.17 //
"ahaṅkāra" eva "gṛddhaḥ" | tasya "kulāya"bhūtaṃ yat "suṣiraṃ" vivaraṃ | tat "udare" yasya | tat tādṛśaṃ | "durbalākṛtiḥ" śithilākṛtiḥ | "vāsanayā" ahambhāvena gṛhīta eva hi dehaḥ dṛḍhākṛtiḥ bhavati | "vyāyāmena" āghātena | "viramaḥ" nāśo yasya | tādṛśaḥ | kulakam || MoT_1,17.12-17 ||



kalevaram ahaṅkāragṛhasthasya mahāgṛham /
luṭhatv abhyetu vā sthairyaṃ kim anena mune hi me // Mo_1,17.18 //
na hi paragṛhasya luṭhane sthairye vā sukhaduḥkhe yukte iti bhāvaḥ || MoT_1,17.18 ||



paṅktibaddhendriyapaśuṃ valgattṛṣṇāgṛhāṅganam /
rajorañjitasarvāṅgaṃ neṣṭaṃ dehagṛham mama // Mo_1,17.19 //
anena dehasya grāmīṇagṛhasadṛśatvam uktam || MoT_1,17.19 ||


kāṣṭhāsthikāṣṭhasaṅghaṭṭaparisaṅkaṭakoṭaram /
antradāmabhir ābaddhaṃ neṣṭaṃ dehagṛham mama // Mo_1,17.20 //
"kāṣṭha" iti kāṣṭharūpam "asthikāṣṭhaṃ" | tasya yaḥ "saṅghaṭṭaḥ" niḥsandhibandham avasthānaṃ | tena "parisaṅkaṭaṃ" paritaḥ sambādhaṃ | "koṭaraṃ" yasya | tādṛśam | "antradāmabhir" antrarajjubhiḥ || MoT_1,17.20 ||



prasṛtasnāyutantrīkaṃ raktāmbukṛtakardamam /
jarāmakkoladhavalaṃ neṣṭaṃ dehagṛham mama // Mo_1,17.21 //
spaṣṭam || MoT_1,17.21 ||



citrakṛtyabhṛtānantaceṣṭāvaṣṭabdhasaṃsthiti /
mithyāmohamahāsthūṇaṃ neṣṭaṃ dehagṛham mama // Mo_1,17.22 //
"citrakṛtyeṣu" nānāvidhakāryeṣu | "bhṛtāḥ" dhāritāḥ | yāḥ "anantaceṣṭāḥ" | tābhir "avaṣṭabdhā" bharitā | "saṃsthitiḥ" yasya | tat | gṛhapakṣe "citrakṛtyāni" ālekhyāni | "mithyāmohaḥ" mithyājñānam eva "mahāsthūṇā" yasya | tat tādṛśaṃ | mithyājñānenaiva hi deho dhāryate || MoT_1,17.22 ||



duḥkhārbhakakṛtākrandaṃ sukhaśayyāmanoharam /
durīhādagdhadāsīkaṃ neṣṭaṃ dehagṛham mama // Mo_1,17.23 //
"sukhāny" eva "śayyāḥ" | tābhiḥ "manoharam" | "durīhāḥ" kutsitāḥ kāṅkṣā eva "dagdhadāsyaḥ" hatadāsyaḥ yasya || MoT_1,17.23 ||



malāḍhyaviṣayivyūhabhāṇḍopaskarasaṅkaṭam /
ajñānakṣāravalitaṃ neṣṭaṃ dehagṛham mama // Mo_1,17.24 //
"viṣayīṇi" indriyāṇi | "kṣāram" bhasma || MoT_1,17.24 ||


gulphagulguluviśrāntajānūccastambhamastakam /
dīrghadordārusudṛḍhaṃ neṣṭaṃ dehagṛham mama // Mo_1,17.25 //
"gulguluḥ" stambhādhārabhūtā śilā || MoT_1,17.25 ||


prakaṭākṣagavākṣāntaḥ krīḍatprajñāgṛhāṅganam /
cintāduhitṛkam brahman neṣṭaṃ dehagṛham mama // Mo_1,17.26 //
spaṣṭam || MoT_1,17.26 ||


mūrdhajacchādanacchannakarṇaśrīcandraśālikam /
ādīrghāṅguliniryūhaṃ neṣṭaṃ dehagṛham mama // Mo_1,17.27 //
"channā" āvṛtā | "candraśālikā" śirogṛham | "niryūhaḥ" bahirgatadāru || MoT_1,17.27 ||


sarvāṅgakuḍyasañjātaghanaromayavāṅkuram /
saṃśūnyapīṭhapiṭhiraṃ neṣṭaṃ dehagṛham mama // Mo_1,17.28 //
"pīṭhapiṭhiram" madhyadeśaḥ || MoT_1,17.28 ||



nakhorṇanābhanilayaiḥ śāram āraṇitāntaram /
bhāṅkārakāripavanaṃ neṣṭaṃ dehagṛham mama // Mo_1,17.29 //
"nilayāḥ" ālayāḥ | "śāraṃ" śavalam || MoT_1,17.29 ||



praveśanirgamavyagravātavegam anāratam /
vitatākṣagavākṣaṃ ca neṣṭaṃ dehagṛham mama // Mo_1,17.30 //
"vātaḥ" prāṇavātaḥ || MoT_1,17.30 ||


jihvāmarkaṭikākrāntavadanadvārabhīṣaṇam /
dṛṣṭadantāsthiśakalaṃ neṣṭaṃ dehagṛham mama // Mo_1,17.31 //
spaṣṭam || MoT_1,17.31 ||


tvaksudhālepamasṛṇaṃ yantrasañcāracañcalam /
manomandākhunotkhātaṃ neṣṭaṃ dehagṛham mama // Mo_1,17.32 //
"yantra"vad yaḥ "sañcāraḥ" | tena "cañcalam" || MoT_1,17.32 ||


smitadīpaprabhābhāsi kṣaṇam ānandasundaram /
kṣaṇaṃ vyāptam prabhāpūrair neṣṭaṃ dehagṛham mama // Mo_1,17.33 //
spaṣṭam || MoT_1,17.33 ||



samastarogāyatanaṃ valīpalitapattanam /
sarvādhisāraṅgavanaṃ neṣṭam mama kalevaram // Mo_1,17.34 //
"sarvādhaya" eva "sārangāḥ" | teṣāṃ "vanam" || MoT_1,17.34 ||


akṣarkṣakṣobhaviṣamā śūnyā niḥsārakoṭarā /
tamogahanahṛtkuñjā neṣṭā dehāṭavī mama // Mo_1,17.35 //
"akṣāṇi" eva "ṛkṣās" | teṣāṃ yaḥ "kṣobhaḥ" | tena "viṣamā" | "tamaḥ" ajñānam andhakāraṃ ca || MoT_1,17.35 ||


dehālayaṃ dhārayituṃ na śakto 'smi munīśvara /
paṅkamagnaṃ samuddhartuṃ gajam alpabalo yathā // Mo_1,17.36 //
"dehālayaṃ" dehākhyaṃ gṛham || MoT_1,17.36 ||


kiṃ śriyā kiṃ ca kāyena kim mānena kim īhayā /
dinaiḥ katipayair eva kālaḥ sarvaṃ nikṛntati // Mo_1,17.37 //
spaṣṭam || MoT_1,17.37 ||



raktamāṃsamayasyāsya sabāhyābhyantaram mune /
nāśaikadharmiṇo brūhi keva kāyasya ramyatā // Mo_1,17.38 //
nāśasya ekaḥ dharmī "nāśaikadharmī" | tasya || MoT_1,17.38 ||



maraṇāvasare kāyā jīvaṃ nānusaranti ye /
teṣu tāta kṛtaghneṣu kevāsthā vata dhīmataḥ // Mo_1,17.39 //
spaṣṭam || MoT_1,17.39 ||



mattebhakarṇāgracalaḥ kāyo lambāmbubhaṅguraḥ /
na santyajati māṃ yāvat tāvad enaṃ tyajāmy aham // Mo_1,17.40 //
ahantāviṣayatvenāgrahaṇād iti bhāvaḥ || MoT_1,17.40 ||



pavanaspandataralaḥ pelavaḥ kāyapallavaḥ /
jarjaras tanuvṛttaś ca neṣṭo 'yaṃ kaṭunīrasaḥ // Mo_1,17.41 //
tanuś cāsau vṛttaś ca "tanuvṛttaḥ" || MoT_1,17.41 ||



bhuktvā pītvā ciraṃ kālam bālapallavapelavam /
tanutām ety ayatnena vināśam anudhāvati // Mo_1,17.42 //
ādau "tanutām" "eti" | tato '"yatnena" "vināśam" "anudhāvati" || MoT_1,17.42 ||


tāny eva sukhaduḥkhāni bhāvābhāvamayāny asau /
bhūyo 'py anubhavan kāyaḥ prākṛto hi na lajjate // Mo_1,17.43 //
spaṣṭam || MoT_1,17.43 ||


suciram prabhutāṃ kṛtvā saṃsevya vibhavaśriyam /
nocchrāyam eti na sthairyaṃ kāyaḥ kim iti pālyate // Mo_1,17.44 //
"kim iti" kimarthaṃ | "pālyate" rakṣyate || MoT_1,17.44 ||


jarākāle jarām eti mṛtyukāle tathā mṛtim /
samam eva viśeṣajña kāyo bhogidaridrayoḥ // Mo_1,17.45 //
he "viśeṣajña" | "bhogidaridrayoḥ" "kāyaḥ" "samam eva" nirviśeṣam eva | "jarākāle" "jarām" "eti" | "tathā" "mṛtikāle" "mṛtim" eti | ataḥ śarīrabhogasādhanārthaṃ yatno vyartha eveti bhāvaḥ || MoT_1,17.45 ||



saṃsārāmbhodhijaṭhare tṛṣṇākuharakāntare /
suptas tiṣṭhati mukteho mūko 'yaṃ kāyakacchapaḥ // Mo_1,17.46 //
"kacchapaḥ" kūrmaḥ | "kuharakaṃ" randhram || MoT_1,17.46 ||



dahanaikārthayogyāni kāyakāṣṭhāni bhūriśaḥ /
saṃsārābdhāv ivohyante kañcit teṣu naraṃ viduḥ // Mo_1,17.47 //
"dahanā"khyo yaḥ "ekaḥ arthaḥ" prayojanaṃ | tatra "yogyāni" | kañcit jñātajñeyajīvāśrayam ity arthaḥ | "teṣu" iti nirdhāraṇe saptamī | anye paśava iva iti bhāvaḥ || MoT_1,17.47 ||



dīrghadaurātmyacalayā nipātaphalayānayā /
na dehalatayā kāryaṃ kiñcid asti vivekinaḥ // Mo_1,17.48 //
"nipātaphalayā" nāśaphalayā | "vivekinaḥ" ātmavicārayuktasya || MoT_1,17.48 ||


majjan kardamakośeṣu jhagity evaṃ jarāṃ gataḥ /
na jñāyate yāty acirāt kva kathaṃ dehadarduraḥ // Mo_1,17.49 //
"deha" eva "darduraḥ" bhekaḥ || MoT_1,17.49 ||



niḥsārasakalārambhāḥ kāyāś capalavāyavaḥ /
rajomārgeṇa gacchanto dṛśyante neha kenacit // Mo_1,17.50 //
"rajomārgeṇa" lobhamārgeṇa dhūlimargeṇa ca || MoT_1,17.50 ||


vāyor dīpasya manaso gacchato jñāyate gatiḥ /
āgacchataś ca bhagavan na śarīraśarasya naḥ // Mo_1,17.51 //
"naḥ" asmatsambandhina ity arthaḥ || MoT_1,17.51 ||


baddhāśā ye śarīreṣu baddhāśā ye jagatsthitau /
tān mohamadironmattān dhig dhig astu punaḥ punaḥ // Mo_1,17.52 //
spaṣṭam || MoT_1,17.52 ||



nāhaṃ dehasya no deho mama nāyam ahaṃ tathā /
iti viśrāntacittā ye te mune puruṣottamāḥ // Mo_1,17.53 //
"ahaṃ tathā" tadvat | "ayaṃ" deho | nāsmi || MoT_1,17.53 ||


mānāvamānabahulā bahulābhamanoramāḥ /
śarīramātrabaddhāsthaṃ ghnanti doṣadṛśo naram // Mo_1,17.54 //
"doṣadṛśaḥ" rāgādirūpāḥ | "bahulābhamanorama"tvam āmukhe jñeyam || MoT_1,17.54 ||


śarīrasaṅgaśāyinyā piśācyā peśalāṅgayā /
ahaṅkāracamatkṛtyā chalena cchalitā vayam // Mo_1,17.55 //
śarīrotsaṅgeti vā pāṭhaḥ || MoT_1,17.55 ||


prajñā varākī sarvaiva kāyabaddhāsthayānayā /
mithyājñānakurākṣasyā chalitā kaṣṭam ekikā // Mo_1,17.56 //
rākṣasī hi ekakam eva cchalayati || MoT_1,17.56 ||


na kiñcid api yasyāsti satyaṃ tena hatātmanā /
citraṃ dagdhaśarīreṇa janatā vipralabhyate // Mo_1,17.57 //
"kiñcid api" vipralambhakaraṇaṃ kim api vastu | "vipralabhyate" vañcyate || MoT_1,17.57 ||



dinaiḥ katipayair eva nirjharāmbukaṇo yathā /
pataty ayam ayatnena jarjaraḥ kāyapallavaḥ // Mo_1,17.58 //
spaṣṭam || MoT_1,17.58 ||


kāyo 'yam acirāpāyo budbudo 'mbunidhāv iva /
vyarthaṃ kāryaparāvarte parisphurati niṣphalaḥ // Mo_1,17.59 //
"kāryaparāvarte" saṃsāre || MoT_1,17.59 ||


mithyājñānavikāre 'smin svapnasambhramapattane /
kāye sphuṭatarāpāye kṣaṇam āsthā na me dvija // Mo_1,17.60 //
"svapnasambhramapattane" svapnasambhramadṛṣṭapattanatulye ity arthaḥ || MoT_1,17.60 ||



taḍitsu śaradabhreṣu gandharvanagareṣu ca /
sthairyaṃ yena vinirṇītaṃ sa viśvasiti vigrahe // Mo_1,17.61 //
"viśvasiti" viśvāsaṃ karoti || MoT_1,17.61 ||


sargāntaślokena śarīranindāṃ samāpayati
satatabhaṅgurakāryaparamparā-
vijayi jātajayaṃ śaṭhavṛttiṣu /
sakaladoṣam idaṃ kukalevaraṃ
tṛṇam ivāham upojjhya sukhaṃ sthitaḥ // Mo_1,17.62 //
"satatabhaṅgurāḥ" yāḥ "kāryaparamparāḥ" | tāsu "vijayaḥ" asyāstīti tādṛśaṃ | bhaṅgurakāryaparamparāsādhanam iti yāvat | ata eva "śaṭhavṛttiṣu" kutsitavyāpāreṣu | "jātajayam" | iti śivam || MoT_1,17.62 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe saptadaśaḥ sargaḥ || 1,17 ||






************************************************************************



evaṃ śarīranindāṃ kṛtvā tatprathamāvasthārūpasya bālyasya nindām prastauti
labdhvāpi taralākāre kāryabhārataraṅgiṇi /
saṃsārasāgare janma bālyaṃ duḥkāya kevalam // Mo_1,18.1 //
spaṣṭam || MoT_1,18.1 ||


tatkṛtaṃ duḥkham eva vistareṇa kathayati
aśaktir āpadas tṛṣṇā mūkatā mūḍhabuddhitā /
gṛdhnutā lolatā dainyaṃ sarvam bālye pravartate // Mo_1,18.2 //
spaṣṭam || MoT_1,18.2 ||


roṣarodanaraudrīṣu dainyajarjaritāsu ca |
daśāsu bandhanam bālyam ālānaṃ kariṇīṣv iva || MoT_1,18.3 ||


"daśāsv" iti vaiṣayike ādhāre saptamī | badhyate asminn iti "bandhanam" || MoT_1,18.3 ||


na mṛtau na jarāroge na cāpadi na yauvane /
tāś cintā na nikṛntanti hṛdayaṃ śaiśaveṣu yāḥ // Mo_1,18.4 //
jarā eva rogaḥ "jarārogas" | tasmin || MoT_1,18.4 ||



tiryagjātisamārambhaḥ sarvair evāvadhīritaḥ /
lolo bālajanācāro maraṇād api duḥkhadaḥ // Mo_1,18.5 //
"tiryagjāti"vat "samārambhaḥ" yasya | saḥ | paśujātitulyasamārambha ity arthaḥ || MoT_1,18.5 ||


pratibimbaṃ ghanājñānāṃ nānāsaṅkalpapelavam /
bālyam ālūnasaṃśīrṇamanaḥ kasya sukhāvaham // Mo_1,18.6 //
"bālyaṃ" kathambhūtam | "ālūnasaṃśīrṇam" atyantacañcalaṃ | "manaḥ" yasmin | tat tādṛśam | "ghanājñānām" atyantajaḍānāṃ | "pratibimbaṃ" dṛṣṭāntaḥ || MoT_1,18.6 ||



jaḍaśyāmalayājasraṃ jātabhītyā pade pade /
yad bhayaṃ śaiśave buddhyā kasyām āpadi tad bhavet // Mo_1,18.7 //
"buddhyā" "bhayaṃ" buddhikṛtam bhayaṃ | na kasyām apīti bhavaḥ || MoT_1,18.7 ||


līlāsu durvilāseṣu durīhāsu durāśaye /
paramam moham ādatte bālo balavadāpadam // Mo_1,18.8 //
"durāśaye" kutsite citte | "mohaṃ" kathambhūtam "balavatī" "āpad" yasmāt | tat tādṛśam || MoT_1,18.8 ||



vikalpakalilārambhaṃ durvilāsaṃ durāspadam /
śaiśavaṃ śāsanāyaiva puruṣasya na śāntaye // Mo_1,18.9 //
"śāsanāya" māraṇāya | "śāntaye" sukhāya || MoT_1,18.9 ||



ye doṣā ye durācārā duṣkramā ye durādhayaḥ /
te sarve saṃsthitā bālye durgarta iva kauśikāḥ // Mo_1,18.10 //
"kauśikāḥ "ghūkāḥ || MoT_1,18.10 ||



bālyaṃ ramyam iti vyarthabuddhayaḥ kathayanti ye /
tān mūrkhapuruṣān brahman dhig astu hatacetasaḥ // Mo_1,18.11 //
spaṣṭam || MoT_1,18.11 ||


yatra lolākṛti manaḥ parisphurati vṛttiṣu /
trailokyarājyam api tat kathaṃ vahati tuṣṭaye // Mo_1,18.12 //
"trailokyarājyam" "api" trailokyarājyarūpam api | "vahati" prabhavati || MoT_1,18.12 ||


sarveṣām eva sattvānāṃ sarvāvasthāsu caiva hi /
manaś cañcalatām eti bālye daśaguṇaṃ mune // Mo_1,18.13 //
"tu"śabdo 'dhyāhāryaḥ | he "mune" | "bālye" tu "manaḥ" "daśaguṇaṃ" "cañcalatām" "eti" || MoT_1,18.13 ||


manaḥ prakṛtyaiva calam bālyaṃ ca calatāvaram /
tayoḥ saṃśliṣṭayoḥ tāta kenaivāntaḥ kucāpale // Mo_1,18.14 //
"calatāyāṃ varam" pradhānam | bahucalam ity arthaḥ | he "tāta" | "tayoḥ" manobālatayoḥ | "saṃśliṣṭayoḥ" satyoḥ | "kucāpale" "kenaiva" prakāreṇ"āntaḥ" avasānaṃ syāt | na kenāpīty arthaḥ || MoT_1,18.14 ||


strīlocanais taḍitpuñjair jvālāmālais taraṅgakaiḥ /
cāpalaṃ śikṣitam brahmañ śaiśavān manaso 'tha vā // Mo_1,18.15 //
"strīlocanā"dibhyo 'pi "śaiśavaṃ" calam iti bhāvaḥ || MoT_1,18.15 ||


śaiśavaṃ ca manaś caiva sarvāsv eva hi vṛttiṣu /
bhrātarāv iva lakṣyete satatam bhaṅgurasthitī // Mo_1,18.16 //
"bhaṅgurasthitī" calasthitī || MoT_1,18.16 ||


sarvāṇi duṣṭabhūtāni sarve doṣā durāśayāḥ /
bālyam evopajīvanti śrīmantam iva mānavāḥ // Mo_1,18.17 //
"durāśayāḥ" kaṭhināḥ | "upajīvanti" apekṣante || MoT_1,18.17 ||


navaṃ navam prītikaraṃ na śiśuḥ pratyahaṃ yadi /
prāpnoti tad asau yāti viṣavegasya mūrchanām // Mo_1,18.18 //
"navaṃ navaṃ" navīnaṃ navīnaṃ vastu || MoT_1,18.18 ||


stokena vaśam āyāti stokenaiti vikāritām /
amedhya eva ramate bālaḥ kauleyako yathā // Mo_1,18.19 //
spaṣṭam || MoT_1,18.19 ||


ajasram bāṣpavadanaḥ kardamāntar jaḍāśayaḥ /
varṣokṣitasya taptasya sthalasya sadṛśaḥ śiśuḥ // Mo_1,18.20 //
"kardamāntaḥ" kardamamadhye | "jaḍaḥ āśayaḥ" yasya | saḥ tādṛśaḥ | "varṣokṣitaṃ" "taptasthalam" apīdṛśam eva bhavati || MoT_1,18.20 ||


bhayāhāraparaṃ dīnaṃ yathādṛṣṭābhilāṣi ca /
lolabuddhiḥ vapur dhatte bālo duḥkhāya kevalam // Mo_1,18.21 //
spaṣṭam || MoT_1,18.21 ||


svasaṅkalpābhilaṣitān bhāvān aprāpya taptadhīḥ /
duḥkham ety abalo bālo vinikṛtta ivāśaye // Mo_1,18.22 //
spaṣṭam || MoT_1,18.22 ||



durīhālabdhalakṣyāṇi bahupakṣolvaṇāni ca /
bālasya yāni duḥkhāni mune tāni na kasyacit // Mo_1,18.23 //
"durīhābhis" tatkartṛkābhiḥ duśceṣṭābhiḥ | "labdhaṃ lakṣyam" āspadaṃ yaiḥ | tāni | "bahuḥ" yaḥ "pakṣaḥ" svavargaḥ | tena "ulvaṇāni" kaṭhināni | śarāṇām atropamānatvaṃ vyaṅgyam || MoT_1,18.23 ||



bālo balavatāśvena manorathavilāsinā /
manasā tapyate nityaṃ grīṣmeṇeva vanasthalam // Mo_1,18.24 //
"aśvene"ty | atrāśv eveti pāṭhaḥ || MoT_1,18.24 ||


vidyāgṛhagato bālaḥ parām eti kadarthanām /
ālāna iva nāgendro viṣavaiṣamyabhīṣaṇam // Mo_1,18.25 //
spaṣṭam || MoT_1,18.25 ||


nānāmanorathamayī mithyākalpitakalpanā /
duḥkhāyātyantadīrghāya bālatā pelavāśayā // Mo_1,18.26 //
"pelavaḥ" jaḍaḥ | "āśayaḥ" yasyāṃ | sā tādṛśī || MoT_1,18.26 ||



sambhṛṣṭaṃ tuhinam bhoktum indum ādātum ambarāt /
vāñchyate yena maurkhyeṇa tat sukhāya katham bhavet // Mo_1,18.27 //
"sambhṛṣṭam" bharjitam || MoT_1,18.27 ||



antaściter aśaktasya śītātapanivāraṇe /
ko viśeṣo mahābuddhe bālasyorvīruhasya ca // Mo_1,18.28 //
"antaściteḥ" na tu vikasitaciteḥ | "citiḥ" śītātapajñānam || MoT_1,18.28 ||



uḍḍīnam abhivāñchanti pakṣābhyāṃ kṣutparāyaṇāḥ /
bhayāhāraparā nityam bālā vihagadharmiṇaḥ // Mo_1,18.29 //
bhayāhārayoḥ parāḥ "bhayāhāraparāḥ" || MoT_1,18.29 ||


śaiśave guruto bhītir mātṛtaḥ pitṛtas tathā /
janato jyeṣṭhabālāc ca śaiśavam bhayamandiram // Mo_1,18.30 //
jyeṣṭhabālo hi kaniṣṭhabālam parābhavatīti "jyeṣṭhabālāc" "ce"ty uktam || MoT_1,18.30 ||



sargāntaślokena bālyanindāṃ samāpayati
sakaladoṣadaśāvihatāśayaṃ
śaraṇam apy avivekavilāsinaḥ /
iha na kasyacid eva mahāmune
bhavati bālyam alam parituṣṭidam // Mo_1,18.31 //
"aviveka" eva "vilāsī" | tasya "śaraṇaṃ" gṛham | avivekāspadam ity arthaḥ | "api"śabdaḥ pādapūraṇārthaḥ | iti śivam || MoT_1,18.31 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe 'ṣṭādaśaḥ sargaḥ || 1,18 ||


************************************************************************


evam bālyanindāṃ kṛtvā kramaprāptāṃ yauvananindām prastauti
bālyānartham atha tyaktvā pumān abhihatāśayaḥ /
ārohati nipātāya yauvanaṃ śvabhrasambhramam // Mo_1,19.1 //
"śvabhra"vat "sambhramo" yasmiṃs tādṛśam | "pātaś" cātra jarāgamanarūpaḥ jñeyaḥ || MoT_1,19.1 ||



tatratyaṃ nipātaṃ vistareṇa kathayati
tatrānantavilāsasya lolasya svasya cetasaḥ /
vṛttīr anusaran yāti duḥkhād duḥkhāntaraṃ jaḍaḥ // Mo_1,19.2 //
"jaḍaḥ" na tu jñānī || MoT_1,19.2 ||



svacittabilasaṃsthena nānāsambhramakāriṇā /
balāt kāmapiśācena vivaśaḥ paribhūyate // Mo_1,19.3 //
pūrvaślokasthaṃ "tatre"ti padam atrāpy anuvartanīyam || MoT_1,19.3 ||



cintānāṃ lolavṛttīnāṃ lalanānām ivābhitaḥ /
arpayaty avaśaś ceto jvālānām ātmajo yathā // Mo_1,19.4 //
"cintānāṃ" kuṭumbabharaṇādiviṣayāṇāṃ | yauvane puruṣaḥ yathā "lalanānāṃ" "cetaḥ" "arpayati" tathā "cintānām" apīti piṇḍārthaḥ | ko yath"ātmajo" bālaḥ "yathā" | "yathā" saḥ "jvālānāṃ" "cetaḥ arpayati" | tathety arthaḥ || MoT_1,19.4 ||


te te doṣā durārambhās tatra taṃ tādṛśāśayam /
taruṇam pravilumpanti dṛśyās te naiva ye mune // Mo_1,19.5 //
"taruṇaṃ" yauvanāviṣṭam puruṣam | "pravilumpanti" viśrānteḥ cyāvayanti | "te te" ke | he "mune" | "te" tava | "ye" "doṣāḥ" "dṛśyāḥ" "naiva" bhavanti | tebhyo niṣkrāntatvād iti bhāvaḥ | atha vā "ye doṣāḥ te naiva" nānyena "dṛśyāḥ" bhavantīti yojyam || MoT_1,19.5 ||


mahānarakabījena santatabhramadāyinā /
yauvanena na ye naṣṭā naṣṭā nānyena te janāḥ // Mo_1,19.6 //
spaṣṭam || MoT_1,19.6 ||


nānārasamayī cintāvṛttāntanicayombhitā /
bhīmā yauvanabhūr yena tīrṇā dhīraḥ sa ucyate // Mo_1,19.7 //
spaṣṭam || MoT_1,19.7 ||


nimeṣabhāsurākāram ālolaghanagarjitam /
vidyutprakāśam aniśaṃ yauvanam me na rocate // Mo_1,19.8 //
spaṣṭam || MoT_1,19.8 ||


vividhāvartabahulam paṅkalagnaṃ jaḍāśayam /
taraṅgabhaṅguram bhīmaṃ yauvanam me na rocate // Mo_1,19.9 //
"āvartāḥ" kāmavegāḥ | "paṅkalagnam" pāpagrastam | "jaḍaḥ āśayaḥ" yasmiṃs | tādṛśam || MoT_1,19.9 ||

sarvasyāgresaram puṃsaḥ kṣaṇamātramanoharam /
gandharvanagaraprakhyaṃ yauvanam me na rocate // Mo_1,19.10 //
"sarvasya" "puṃsa" iti jātau ekavacanam | "agresaram" avyabhicārīty arthaḥ || MoT_1,19.10 ||


iṣuprapātamātraṃ hi sukhadaṃ duḥkhabhāsuram /
dāhadoṣapradaṃ nityaṃ yauvanam me na rocate // Mo_1,19.11 //
"iṣuprapātamātraṃ" kṣanamātram ity arthaḥ || MoT_1,19.11 ||


madhuraṃ svādu tiktaṃ ca dūṣaṇaṃ doṣabhūṣaṇam /
surākallolasadṛśaṃ yauvanam me na rocate // Mo_1,19.12 //
"madhuram" āpāte | "tiktam" pariṇāme || MoT_1,19.12 ||


asatyaṃ satyasaṅkāśam acirād vipralambhadam /
svapnāṅganāsaṅgasamaṃ yauvanam me na rocate // Mo_1,19.13 //
spaṣṭam || MoT_1,19.13 ||


kṣaṇaprakāśataralam mithyāracitacakrikam /
alātacakrapratimaṃ yauvanam me na rocate // Mo_1,19.14 //
spaṣṭam || MoT_1,19.14 ||


mṛdusphāratarodāram antaḥśūnyaṃ kṣaṇāt kṣatam /
śaradambudasaṅkāśaṃ yauvanam me na rocate // Mo_1,19.15 //
spaṣṭam || MoT_1,19.15 ||


āpātamātraramaṇaṃ sadbhāvarahitāntaram /
veśyāstrīsaṅgamaprakhyaṃ yauvanam me na rocate // Mo_1,19.16 //
"sadbhāvaḥ" sattvaṃ snehaś ca || MoT_1,19.16 ||


ye kecana durārambhās te sarve sarvaduḥkhadāḥ /
tāruṇye sannidhiṃ yānti mahotpātā iva kṣaye // Mo_1,19.17 //
spaṣṭam || MoT_1,19.17 ||



hārdāndhakārakāriṇyā bhairavākāravān api /
yauvanākārayāminyā bibheti bhagavān api // Mo_1,19.18 //
"hārdaṃ" hṛtsambandhi | "andhakāraṃ" karotīti tādṛśyā | "bhagavān" śrīmahādevaḥ | anyeṣāṃ tu kā kathety "api"śabdābhiprāyaḥ || MoT_1,19.18 ||


suvismṛtaśubhācāram buddhivaidhuryadāyinam /
dadāty atitarām eṣa bhramaṃ yauvanavibhramaḥ // Mo_1,19.19 //
"suvismṛtaḥ" "śubhācāraḥ" yasmiṃs | tam || MoT_1,19.19 ||


kāntāviyogajātena hṛdi durdharṣavahninā /
yauvane dahyate jantus tarur dāvāgninā yathā // Mo_1,19.20 //
"durdharṣavahninā" durnivāryeṇa kāmāgninā || MoT_1,19.20 ||


vistīrṇāpi prasannāpi pāvany api hi yauvane /
matiḥ kaluṣatām eti prāvṛṣīva taraṅgiṇī // Mo_1,19.21 //
spaṣṭam || MoT_1,19.21 ||


śakyate ghanakallolabhīmā rodhayituṃ nadī /
na tu tāruṇyataralā tṛṣṇātaralitāntarā // Mo_1,19.22 //
"tāruṇyatarale"ty anena yauvananindaiveyaṃ jñātavyā || MoT_1,19.22 ||


sā kāntā tau stanau pīnau te vilāsās tad ānanam /
tāruṇya iti cintābhir yāti jarjaratāṃ janaḥ // Mo_1,19.23 //
"tāruṇye" yauvane || MoT_1,19.23 ||


tarattaralatṛṣṇārtaṃ yuvānam iha sādhavaḥ /
pūjayanti na tucchehaṃ jarattṛṇalavaṃ yathā // Mo_1,19.24 //
"tarantī" cañcalatāṃ gacchantī | yā "taralā tṛṣṇā" | tayā "ārtaṃ" dīnaṃ || MoT_1,19.24 ||


nāśāyaiva madāndhasya doṣamauktikadhāriṇaḥ /
abhimānamahebhasya nityālānaṃ hi yauvanam // Mo_1,19.25 //
"doṣāḥ" rāgādayaḥ | "abhimāna" evāhaṅkāra eva "mahebhas" | tasya || MoT_1,19.25 ||



manovipulamūlānāṃ doṣāśīviṣadhāriṇām /
roṣarodanavṛkṣāṇāṃ yauvanaṃ navakānanam // Mo_1,19.26 //
"roṣeṇa" yāni "rodanāni" | tāny eva "vṛkṣās" | teṣām || MoT_1,19.26 ||


rasakesarasambādhaṃ kuvikalpadalākulam /
duścintācañcarīkāṇām puṣkaraṃ viddhi yauvanam // Mo_1,19.27 //
tvaṃ "yauvanaṃ" | "duścintāḥ" eva bhogaviṣayāḥ kucintā eva | "cañcarīkāḥ" bhramarāḥ | teṣām "puṣkaram" ādhārabhūtam padmaṃ | "viddhi" jānīhi | kathambhūtam | "rasāḥ" viṣayāsvādā eva | "kesarāḥ" kiñjalkās | taiḥ "sambādhaṃ" saṅkaṭaṃ | tathā "kuvikalpāḥ" kutsitāḥ vikalpā eva "dalāni" | taiḥ "ākulaṃ" nirbharitam || MoT_1,19.27 ||



kṛtākṛtakupakṣāṇāṃ hṛtsarastīracāriṇām /
ādhivyādhivihaṅgānām ālayo navayauvanam // Mo_1,19.28 //
"kṛtākṛtau" vihitāvihitau eva | "kupakṣau" yeṣāṃ | tādṛśānām | vihitasyāpi dharmākhyaśuddhāśuddhivyutthāpakatvena "kṛtākṛte"ty uktam || MoT_1,19.28 ||


jaḍānāṃ gatasaṅkhyānāṃ kallolānāṃ vilāsinām /
anapekṣitamaryādo vāridhiḥ pūrṇayauvanam // Mo_1,19.29 //
"anapekṣitamaryādaḥ" maryādarahita ity arthaḥ || MoT_1,19.29 ||


sarveṣāṃ guṇaparṇānām apanetuṃ rajastataḥ /
apanetuṃ sthito dakṣo viṣamo yauvanānilaḥ // Mo_1,19.30 //
"apanetuṃ" "sthitaḥ" sarvāpanayanaśīlaḥ | "rajasā" rajoguṇena dhūlyā ca | "tataḥ" vyāptaḥ | "viṣamaḥ" "yauvanānilaḥ" "sarveṣāṃ" "guṇaparṇānām" "apanetuṃ" dūrīkartuṃ | "dakṣaḥ" bhavati || MoT_1,19.30 ||


nayanti pāṇḍutāṃ vaktram ākulāvakarotkaṭāḥ /
ārohanti parāṃ koṭiṃ rūkṣā yauvanapāṃsavaḥ // Mo_1,19.31 //
"ākulaḥ" cañcalaḥ | yaḥ "avakaraḥ" saṅkaraḥ | marjanīsaṅkṣiptaṃ raja iti yāvat | tadvat "utkaṭāḥ" udbhaṭāḥ || MoT_1,19.31 ||



udbodhayati doṣālīṃ nikṛntati guṇāvalim /
narāṇāṃ yauvanollāso vilāso duṣkṛtaśriyāḥ // Mo_1,19.32 //
spaṣṭam || MoT_1,19.32 ||



śarīrapaṅkajarajaś cañcalām matiṣaṭpadīm /
nibadhya mohayaty eṣa naraṃ yauvanacandramāḥ // Mo_1,19.33 //
"yauvana"vaśenaiva puruṣaḥ "śarīrā"sakto bhavatīti bhāvaḥ || MoT_1,19.33 ||



śarīraṣaṇḍakodbhūtā ramyā yauvanavallarī /
lagnam eva manobhṛṅgam madayaty unnatiṃ gatā // Mo_1,19.34 //
spaṣṭam || MoT_1,19.34 ||



śarīramarutāpotthāṃ yuvatām mṛgatṛṣṇikām /
manomṛgāḥ pradhāvantaḥ patanti viṣamāṭavīm // Mo_1,19.35 //
"śarīram" eva "maruḥ" | tatra tāpotthāṃ "śarīramarutāpotthāṃ" | "viṣamāṭavīṃ" strītyādiviṣayarūpaṃ viṣamāraṇyam || MoT_1,19.35 ||



śarīraśarvarījyotsnā cittakesariṇaḥ saṭā /
laharī jīvitāmbhodher yuvatā me na rocate // Mo_1,19.36 //
spaṣṭam || MoT_1,19.36 ||



dināni katicid yeyam phalitā dehajaṅgale /
yuvatāśarad asyāṃ hi na samāśvāsam arhatha // Mo_1,19.37 //
"phalitā" kāntābhogādiphalayuktā || MoT_1,19.37 ||


jhagity eṣa prayāty eva śarīrād yuvatākhagaḥ /
kṣaṇenaivālpabhāgyasya hastāc cintāmaṇir yathā // Mo_1,19.38 //
spaṣṭam || MoT_1,19.38 ||


yadā yadā parāṃ koṭim abhyārohati yauvanam /
valganti sarasāḥ kāmās tadā nāśāya kevalam // Mo_1,19.39 //
"sarasāḥ" viṣayarasapūrṇāḥ | "kāmāḥ" abhilāṣāḥ || MoT_1,19.39 ||


tāvad eva vivalganti rāgadveṣapiśācikāḥ /
nāstam eti samastaiṣā yāvad yauvanayāminī // Mo_1,19.40 //
spaṣṭam || MoT_1,19.40 ||


nānādhikārabahale varāke kṣaṇanāśini /
kārunyaṃ kuru tāruṇye mriyamāṇe sute yathā // Mo_1,19.41 //
spaṣṭam || MoT_1,19.41 ||


harṣam āyāti yo mohāt puruṣaḥ kṣaṇabhaṅginā /
yauvanena mahāmugdhaḥ sa vai naramṛgaḥ smṛtaḥ // Mo_1,19.42 //
spaṣṭam || MoT_1,19.42 ||


mānamohamadonmattaṃ yauvanaṃ yo 'bhilaṣyati /
acireṇa sudurbuddhiḥ paścāttāpena yujyate // Mo_1,19.43 //
"paścāttāpena" tannāśakṛtena ity arthaḥ || MoT_1,19.43 ||



te dharmyās te mahātmānas ta eva puruṣā bhuvi /
ye sukhena samuttīrṇāḥ sādho yauvanasaṅkaṭāt // Mo_1,19.44 //
spaṣṭam || MoT_1,19.44 ||


sukhena tīryate 'mbhodhir utkṛṣṭamakarākaraḥ /
na kallolavanollāsi sadoṣaṃ hatayauvanam // Mo_1,19.45 //
spaṣṭam || MoT_1,19.45 ||


sargāntaślokena yauvananindāṃ samāpayati
vinayabhūṣitam āryajanāspadaṃ
karuṇayojjvalam āvalitaṃ guṇaiḥ /
iha hi durlabham aṅga suyauvanaṃ
jagati kānanam ambaragaṃ yathā // Mo_1,19.46 //
etādṛśaṃ yauvanam praśastam eveti bhāvaḥ | iti śivam || MoT_1,19.46 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ekonaviṃśaḥ sargaḥ || 1,19 ||



************************************************************************



evaṃ yauvananindāṃ sampādya tatprasaṅgena strīnindām prastauti
māṃsaputtalikāyāś ca yantralolāṅgapañjare /
snāyvasthigranthiśālinyāḥ striyāḥ kim iva śobhanam // Mo_1,20.1 //
"puttalikāyāḥ" putrikāyāḥ | "yantra"vat "lolaṃ" yat "aṅgapañjaraṃ" | tasmin | putrikāpi yantrasthā bhavati | na hi kiñcid api striyāḥ śobhanam iti bhāvaḥ || MoT_1,20.1 ||



tvaṅmāṃsaraktabāṣpāsru pṛthak kṛtvā vilocanam /
samālokaya ramyaṃ cet kim mudhā parimuhyasi // Mo_1,20.2 //
sarvāṅgānām upalakṣaṇam etat || MoT_1,20.2 ||


itaḥ keśā ito raktam itīyam pramadātanuḥ /
kim etayā ninditayā karotu vipulāśayaḥ // Mo_1,20.3 //
"vipulāśayasyā"tra ratir na yukteti bhāvaḥ || MoT_1,20.3 ||


vāsovilepanair yāni lālitāni punaḥ punaḥ /
tāny aṅgāny avalumpanti kravyādāḥ sarvadehinām // Mo_1,20.4 //
ataḥ strīṇām api "kravyādā avalumpantī"ti bhāvaḥ || MoT_1,20.4 ||



meroḥ śṛṅgataṭollāsigaṅgājalarayopamā /
dṛṣṭā yasmin stane muktā hārasyollāsaśālinaḥ // Mo_1,20.5 //
śmaśāneṣu diganteṣu sa eva lalanāstanaḥ /
śvabhir āsvādyate kāle laghupiṇḍa ivāndhasaḥ // Mo_1,20.6 //
spaṣṭam | yugmam || MoT_1,20.5-6 ||


raktamāṃsādidigdhāni karabhasya yathā vane /
tathaivāṅgāni kāminyās tat praty api hi ko grahaḥ // Mo_1,20.7 //
spaṣṭam || MoT_1,20.7 ||


āpātaramaṇīyatvaṃ kalpyate kevalaṃ striyāḥ /
manye tad api nāsty atra mune mohaikakāraṇe // Mo_1,20.8 //
"atra" strīśarīre || MoT_1,20.8 ||


vipulollāsadāyinyā madonmathanapūrvakam /
ko viśeṣo vikāriṇyā madirāyā iha striyāḥ // Mo_1,20.9 //
"madirāyā" iti pañcamī || MoT_1,20.9 ||



lalanālānasaṃlīnā mune mānavadantinaḥ /
prabodhaṃ nādhigacchanti dīrghair api śamāṅkuśaiḥ // Mo_1,20.10 //
spaṣṭam || MoT_1,20.10 ||


keśakajjaladhāriṇyas tīkṣṇāḥ prakṛtitaḥ sadā /
duṣkṛtāgniśikhā nāryo dahanti tṛṇavan naram // Mo_1,20.11 //
spaṣṭam || MoT_1,20.11 ||


te vandyās te mahātmānas ta eva puruṣā bhuvi /
ye sukhena samuttīrṇāḥ sādho yauvatasaṅkaṭāt // Mo_1,20.12 //
"yauvatasaṅkaṭāt" strīsamūhākhyāt || MoT_1,20.12 ||


jvalatām atidūre 'pi sarasā api nīrasam /
striyo hi narakāgnīnāṃ dāru cāru ca dāruṇam // Mo_1,20.13 //
"sarasā api" "striyaḥ" "nīrasaṃ" "dāru" bhavantīti virodhābhāsaḥ || MoT_1,20.13 ||


kīrṇāndhakārakavarī tarattārakalocanā /
pūrṇendubimbavadanā kumudotkarahāsinī // Mo_1,20.14 //
līlāvilolapuruṣā kāryasaṃhārakāriṇī /
paraṃ vimohanam buddheḥ kāminī dīrghayāminī // Mo_1,20.15 //
spaṣṭam || MoT_1,20.14-15 ||



puṣpābhirāmamadhurā karapallavalāsinī /
bhramarabhrūvilāsāḍhyā stabakastanadhāriṇī // Mo_1,20.16 //
puṣpakesaragaurāṅgī naramāraṇatatparā /
dadāty uttamavaivaśyaṃ kāntā viṣamahālatā // Mo_1,20.17 //
spaṣṭam || MoT_1,20.16-17 ||


sītkārocchvāsamātreṇa bhujaṅgadalanotkayā /
kāntayoddhriyate jantuḥ kariṇyevorago bilāt // Mo_1,20.18 //
"bhujaṅgāḥ" viṭāḥ sarpāś ca | "uddhriyate" ākṛṣyate || MoT_1,20.18 ||


kāmanāmnā kirātena vikīrṇā mugdhacetasām /
nāryo naravihaṅgānām aṅgabandhanavāgurāḥ // Mo_1,20.19 //
spaṣṭam || MoT_1,20.19 ||



lalanāvipulālāne manomattamataṅgajaḥ /
ratiśṛṅkhalayā brahman baddhas tiṣṭhati mūkavat // Mo_1,20.20 //
spaṣṭam || MoT_1,20.20 ||


janmapalvalamatsyānāṃ karmakoṭaravāriṇām /
puṃsāṃ durvāsanārajjur nārī baḍiśapiṇḍikā // Mo_1,20.21 //
"baḍiśe" hi matsyagrahaṇārtham annādi"piṇḍikā" sthāpyate || MoT_1,20.21 ||



mandureva turaṅgānām ālānam iva dantinām /
puṃsām abjam ivālīnām bandhanaṃ vāmalocanāḥ // Mo_1,20.22 //
spaṣṭam || MoT_1,20.22 ||


nānārasamayī citrā bhogabhūmir iyam mune /
striyam āśritya saṃyātā parām iha hi saṃsthitim // Mo_1,20.23 //
spaṣṭam || MoT_1,20.23 ||


sarveṣāṃ doṣaratnānāṃ susamudgikayānayā /
duḥkhaśṛṅkhalayā nityam alam astu mama striyā // Mo_1,20.24 //
"alam astu" dūre bhavatu || MoT_1,20.24 ||


kiṃ stanena kim akṣṇā vā kiṃ nitambena kim bhruvā /
māṃsamātraikasāreṇa karomy aham avastunā // Mo_1,20.25 //
spaṣṭam || MoT_1,20.25 ||



ito māṃsam ito raktam ito 'sthīni ca vāsaraiḥ /
brahman katipayair eva yāti strī viśarārutām // Mo_1,20.26 //
"iti"śabda adhyāhāryaḥ || MoT_1,20.26 ||


yās tā niṣparuṣais tūlair lālitāḥ patibhiḥ striyaḥ /
tā mune pravibhaktāṅgyaḥ svapanti pitṛbhūmiṣu // Mo_1,20.27 //
"niṣparuṣaiḥ" komalaiḥ | "tūlaiḥ" tūlavikāraiḥ śayanīyaiḥ | "pitṛbhūmiṣu" śmaśāneṣu || MoT_1,20.27 ||



yasmin ghananavasneham mukhe pattrāṅkuraśriyaḥ /
kāntena racitā brahmañ śīryate tat tu jaṅgale // Mo_1,20.28 //
"ghanaḥ" "navaḥ" "snehaḥ" yatra | tat | kriyāviśeṣaṇam etat || MoT_1,20.28 ||



keśāḥ śmaśānavṛkṣeṣu yānti cāmaraleśatām /
asthīny uḍuvad ābhānti dinair avanimaṇḍale // Mo_1,20.29 //
"dinaiḥ" svalpakālenety arthaḥ || MoT_1,20.29 ||


pibanti pāṃsavo raktaṃ kravyādāś cāpy anekaśaḥ /
carmānalaśikhā bhuṅkte khaṃ yānti prāṇavāyavaḥ // Mo_1,20.30 //
ity eṣā lalanāṅgānām acireṇaiva bhāvinī /
sthitir mayā vaḥ kathitā kim bhrāntim anudhāvatha // Mo_1,20.31 //
spaṣṭam || MoT_1,20.30-31 ||


bhūtapañcakasaṅghaṭṭasaṃsthānaṃ lalanābhidham /
rasād abhivahatv etat kathaṃ nāma dhiyānvitaḥ // Mo_1,20.32 //
"bhūtapañcakasya" yaḥ "saṅghaṭṭaḥ" | tasya "saṃsthānaṃ" racanāviśeṣaḥ | "rasād" abhilāṣāt | "abhivahatu" anuyātu || MoT_1,20.32 ||


śākhāvitānagahanā kaṭvamlaphalaśālinī /
pratānottālatām eti cintā kāntānusāriṇī // Mo_1,20.33 //
"vitānaṃ" samūhaḥ | "pratānair" upaśākhābhir | yā "uttālatā" udbhaṭatā | tām | "kāntānusāriṇī" kāntāviṣayā | "kāntānusāriṇī" "cintā" atyantaṃ ghanībhavatīti bhāvaḥ || MoT_1,20.33 ||



śocyatām paramām eti taruṇas taruṇīrataḥ /
nibaddhaḥ kariṇīlobhād vindhyakhāte yathā dvipaḥ // Mo_1,20.34 //
spaṣṭam || MoT_1,20.34 ||


yasya strī tasya bhogecchā niḥstrīkasya na bhogabhūḥ /
striyaṃ tyaktvā jagat tyaktaṃ jagat tyaktvā sukhī bhavet // Mo_1,20.35 //
"bhogeṣu" stryādirūpeṣu | "bhogabhūḥ" bhogecchā || MoT_1,20.35 ||


sargāntaślokena strīnindāṃ samāpayati
āpātamātramadhureṣu duruttareṣu
bhogeṣu nāham alipakṣatipelaveṣu /
brahman rame maraṇarogajarādibhītyā
śāmyāmy aham param upaimi vanam prayatnāt // Mo_1,20.36 //
spaṣṭam | iti śivam || MoT_1,20.36 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe viṃśaḥ sargaḥ || 1,20 ||



************************************************************************



evaṃ prasaṅgāyātāṃ strīnindāṃ kṛtvā prakaraṇaprāptaṃ jarānindām prastauti
aparyāptaṃ hi bālatvam bālyam pibati yauvanam /
yauvanaṃ ca jarā paścāt paśya karkaśatām mithaḥ // Mo_1,21.1 //
"pibati" grasate || MoT_1,21.1 ||



himāśanir ivāmbhojaṃ vātyeva śaradambudam /
dehaṃ jarā jarayati sarit tīrataruṃ yathā // Mo_1,21.2 //
"jarayati" jīrṇatāṃ nayati || MoT_1,21.2 ||


śithilādīrghasarvāṅgaṃ jarājīrṇakalevaram /
samam paśyanti kāminyaḥ puruṣaṃ karabhaṃ tathā // Mo_1,21.3 //
"tathā"śabdaḥ samuccaye || MoT_1,21.3 ||



śvāsāyāsakadarthinyā gṛhīte jarasā jane /
palāyya gacchati prajñā sapatnyeva hatāṅganā // Mo_1,21.4 //
"śvāsāyāsaiḥ" "kadarthayatī"ti tādṛśyā || MoT_1,21.4 ||



dāsāḥ putrāḥ striyaś caiva bāndhavāḥ suhṛdas tathā /
hasanty unmattakam iva naraṃ vārdhakakampitam // Mo_1,21.5 //
spaṣṭam || MoT_1,21.5 ||


duṣprajñaṃ jaraḍhaṃ dīnaṃ hīnaṃ guṇaparākramaiḥ /
gṛdhro vṛkṣam ivādīrghaṃ gardho hy abhyeti vṛddhatām // Mo_1,21.6 //
dainyadoṣamayī dīrghā hṛdi dāhapradāyinī /
sarvāpadām ekasakhī vardhate vārdhake spṛhā // Mo_1,21.7 //
"ādīrghaṃ" samantād dīrgham | "gardhaḥ" lobhaḥ | "abhyeti" āśrayati | "vṛddhatām" vārdhakam | yugmam || MoT_1,21.6-7 ||



kartavyaṃ kim mayā kaṣṭam paratrety atidāruṇam /
apratīkārayogyaṃ hi vārdhake vardhate bhayam // Mo_1,21.8 //
spaṣṭam || MoT_1,21.8 ||


ko 'haṃ varākaḥ kim iva karomi katham eva vā /
tiṣṭhāmi maunam eveti dīnatodeti vārdhake // Mo_1,21.9 //
spaṣṭam || MoT_1,21.9 ||


gardho 'bhyudeti sollāsam upabhoktuṃ na śakyate /
hṛdayaṃ dahyate nūnaṃ śaktidausthyena vārdhake // Mo_1,21.10 //
"gardhaḥ" upabhogalobhaḥ | "sollāsam" iti kriyāviśeṣaṇam || MoT_1,21.10 ||

jarājīrṇabakī yāvat kāsakreṅkārakāriṇī /
rauti rogoragākīrṇā kāyadrumaśiraḥsthitā // Mo_1,21.11 //
tāvad āgata evāśu kuto 'pi paridṛśyate /
ghanāndhatimirākāṅkṣī mune maraṇakauśikaḥ // Mo_1,21.12 //
"kāsaḥ" rogaviśeṣaḥ || MoT_1,21.11-12 ||


sāyaṃsandhyāprajātaiva tamaḥ samanudhāvati /
jarā vapuṣi dṛṣṭaiva mṛtiṃ samanudhāvati // Mo_1,21.13 //
spaṣṭam || MoT_1,21.13 ||



jarākusumitaṃ dehadrumaṃ dṛṣṭvaiva dūrataḥ /
mṛtibhṛṅgī drutam brahman narasyāyāti sūtsukā // Mo_1,21.14 //
suṣṭhu utsukā "sūtsukā" || MoT_1,21.14 ||



śūnyaṃ nagaram ābhāti bhāti cchinnalato drumaḥ /
bhāty anāvṛṣṭimān deśo na jarājarjaraṃ vapuḥ // Mo_1,21.15 //
"śūnyanagarā"dibhyo 'pi aśubham eva vṛddhatvam iti bhāvaḥ || MoT_1,21.15 || kṣaṇān nigiraṇāyaiva kāsakvaṇitakāriṇī /
gṛdhrīvāmiṣam ādatte tarasaiva naraṃ jarā // Mo_1,21.16 //
spaṣṭam || MoT_1,21.16 ||



dṛṣṭvaiva sūtsukevāśu pragṛhya śirasi kṣaṇāt /
pralunāti jarā dehaṃ kumārī kairavaṃ yathā // Mo_1,21.17 //
spaṣṭam || MoT_1,21.17 ||


sītkārakāriṇī pāṃsuparuṣā parijarjaram /
śarīraṃ śātayaty eṣā vātyeva tarupallavam // Mo_1,21.18 //
"eṣā" jarā | jarāgṛhītaḥ "vāta"gṛhītaś ca puruṣaḥ "sītkāraṃ karoti" || MoT_1,21.18 ||


jarasopahato deho dhatte jarjaratāṃ gataḥ /
tuṣāranikarākīrṇaparimlānāmbujaśriyam // Mo_1,21.19 //
spaṣṭam || MoT_1,21.19 ||



jarājyotsnoditaiveyaṃ śiraḥśikharipṛṣṭhataḥ /
vikāsayati saṃrabdhavātāṃ kāsakumudvatīm // Mo_1,21.20 //
"saṃrabdhaḥ" ārabdhaḥ | "vātaḥ" vātarogaḥ yayā | sā | tām || MoT_1,21.20 ||


paripakvaṃ samālokya jarākṣāravidhūsaram /
śiraḥkuṣmāṇḍakam bhuṅkte puṃsaḥ kālaḥ kileśvaraḥ // Mo_1,21.21 //
"śira" eva "kuṣmāṇḍakam" phalaviśeṣaḥ || MoT_1,21.21 ||



jarājahnusutodyuktā mūlāny asya nikṛntati /
śarīratīravṛkṣasya calasyāyūṃṣi satvaram // Mo_1,21.22 //
"udyuktā" pravṛttā | "āyūṃṣi" "mūlāni" āyurākhyāni mūlāni || MoT_1,21.22 ||


jarāmārjārikā bhuktayauvanākhutayendhitā /
param ullāsam āyāti śarīrāmiṣagardhinī // Mo_1,21.23 //
spaṣṭam || MoT_1,21.23 ||



kācid asti jagaty asmin nāmaṅgalakarī tathā /
yathā jarākrośakarī dehajaṅgalajambukī // Mo_1,21.24 //
spaṣṭam || MoT_1,21.24 ||


kāsaśvāsasasītkārā duḥkhadhūmatamomayī /
jarājvālā jvalaty eṣā yayāsau dagdha eva hi // Mo_1,21.25 //
"asau" vṛddhaḥ || MoT_1,21.25 ||


jarasā vakratām eti śuklāvayavapallavā /
tāta tanvī tanur nṝṇāṃ latā puṣpānatā yathā // Mo_1,21.26 //
spaṣṭam || MoT_1,21.26 ||



jarākarpūradhavalaṃ dehakarpūrapādapam /
mune maraṇamātaṅgo nūnam uddharati kṣaṇāt // Mo_1,21.27 //
spaṣṭam || MoT_1,21.27 ||


maraṇasya mune rājño jarādhavalacāmarā /
āgacchato 'gre niryāti svādhivyādhipatākinī // Mo_1,21.28 //
spaṣṭam || MoT_1,21.28 ||


na jitāḥ śatrubhiḥ saṅkhye ye niṣpiṣṭādrikoṭayaḥ /
te jarājīrṇarākṣasyā paśyāśu vijitā mune // Mo_1,21.29 //
spaṣṭam || MoT_1,21.29 ||


jarātuṣāradhavale śarīrasadanāntare /
śaknuvanty akṣaśiśavaḥ spandituṃ na manāg api // Mo_1,21.30 //
"akṣaśiśavaḥ" indriyabālakāḥ || MoT_1,21.30 ||


saṃsārasaṃsṛter asyā gandhakuṭyāḥ śirogatā /
dehayaṣṭyā jarānāmnī cāmaraśrīr virājate // Mo_1,21.31 //
"gandhakuṭyāḥ" "śirasi" "cāmaraṃ" sthāpyate | ghaṭakuṭyā iti vā pāṭhaḥ || MoT_1,21.31 ||


jarācandrodayasite śarīranagare sthite /
kṣaṇād vikāsam āyāti mune maraṇakairavam // Mo_1,21.32 //
spaṣṭam || MoT_1,21.32 ||


jarāsudhālepasite śarīrāntaḥpurāntare /
aśaktir ādhir ārtiś ca tiṣṭhanti sukham aṅganāḥ // Mo_1,21.33 //
spaṣṭam || MoT_1,21.33 ||


abhāvāgre sarā yatra jarā jayati jantuṣu /
kas tatreha samāśvāso mama mandamater mune // Mo_1,21.34 //
"abhāvasya" maraṇasy"āgre sarā" || MoT_1,21.34 ||


sargāntaślokena jarānindāṃ samāpayati
kiṃ tena durjīvitadurgraheṇa
jarāṃ gatenāpi hi jīvyate yat /
jarā jagatyām ajitā narāṇāṃ
sarvaiṣaṇās tāta tiraskaroti // Mo_1,21.35 //
"tena" prasiddhena | "durjīvitadurgraheṇa" kutsitajīvitākhyena duṣṭagraheṇa | "jarāgatenāpi" satā "kiṃ" "jīvyate" kimarthaṃ jīvyate | vyarthaṃ jīvyate iti yāvat | "hi" niścaye | he "tāta" | "yad" yasmāt kāraṇāt | "jagatyāṃ" jagati | "ajitā" "jarā narāṇāṃ" "sarvaiṣaṇāḥ" samastāḥ ceṣṭāḥ | "tiraskaroti" nayati | iti śivam || MoT_1,21.35 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ekaviṃśaḥ sargaḥ || 1,21 ||



************************************************************************



evaṃ jarānindāṃ kṛtvā kālanindām prastauti
vikalpakalpanānalpakalpitair alpabuddhibhiḥ /
bhedair uddharatāṃ nītaḥ saṃsārakuhakabhramaḥ // Mo_1,22.1 //
"bhedaiḥ" kathambhūtaiḥ | vikalpakalpanābhiḥ "analpam" atyantaṃ | "kalpitaiḥ" | asatyabhūtair ity arthaḥ | "saṃsāra "eva "kuhakabhramaḥ" mithyābhramaḥ || MoT_1,22.1 ||



satāṃ katham ivāstheha jāyate jālapañjare /
bālā evāttum icchanti phalam makurabimbitam // Mo_1,22.2 //
"iha" "jālapañjare" indrajālapañjararūpe saṃsāre ity arthaḥ | bhāmetivat prayogaḥ | "attum" bhakṣitum || MoT_1,22.2 ||



ihāpi vidyate yaiṣā pelavā sukhabhāvanā /
ākhus tantum ivāśeṣaṃ kālas tām api kṛntati // Mo_1,22.3 //
"aśeṣam" iti kriyāviśeṣaṇam | "tāṃ" sukhabhāvanām || MoT_1,22.3 ||


na tad astīha yad ayaṃ kālas sakalaghasmaraḥ /
grasate na jagajjātam mahābdhim iva vāḍavaḥ // Mo_1,22.4 //
spaṣṭam || MoT_1,22.4 ||


samastasāmānyatayā bhīmaḥ kālo maheśvaraḥ /
dṛśyasattām imāṃ sarvāṃ kavalīkartum udyataḥ // Mo_1,22.5 //
spaṣṭam || MoT_1,22.5 ||


mahatām api no devaḥ pratipālayati kṣaṇāt /
kālaḥ kavalitānantaviśvo viśvātmatāṃ gataḥ // Mo_1,22.6 //
"no" "pratipālayati" na pratīkṣate | "viśvātmatāṃ" vyāpakatāṃ || MoT_1,22.6 ||


yugavatsarakalpākhyaiḥ kiñcit prakaṭatāṃ gataḥ /
rūpair alakṣyarūpātmā sarvam ākramya tiṣṭhati // Mo_1,22.7 //
sūryavārādivaśena jñātair iti śeṣaḥ || MoT_1,22.7 ||


ye ramyā ye śubhārambhāḥ sumeruguravo 'pi ye /
kālena vinigīrṇās te karabheṇeva pallavāḥ // Mo_1,22.8 //
spaṣṭam || MoT_1,22.8 ||



nirdayaḥ kaṭhinaḥ krūraḥ karkaśaḥ kṛpaṇo 'dhamaḥ /
na tad asti yad adyāpi na kālo nigiraty ayam // Mo_1,22.9 //
paunaruktyaprayogaḥ krodhāveśabāhulyaṃ sūcayati || MoT_1,22.9 ||



kālaḥ kavalanaikāntamatir atti girīn api /
anantair api bhogaughair nāyaṃ tṛpto mahāśanaḥ // Mo_1,22.10 //
"mahāśanaḥ" bahvāśī || MoT_1,22.10 ||



haraty ayaṃ nāśayati karoty atti nihanti ca /
kālaḥ saṃsāranṛtye hi nānārūpair yathā naṭaḥ // Mo_1,22.11 //
spaṣṭam || MoT_1,22.11 ||



bhinatti pravibhāgastho bhūtabījāny anāratam /
jagaty asattayā cañcvā dāḍimāni yathā śukaḥ // Mo_1,22.12 //
"pravibhāge" ti"ṣṭha"tīti tādṛśaḥ | pravibhāgakārīty arthaḥ || MoT_1,22.12 ||


śubhāśubhaviṣāṇāgravilūnajanapallavaḥ /
sphūrjati sphītajanatājīvarājīvinīgajaḥ // Mo_1,22.13 //
"sphītā" sphāratvaṃ gatā | "jīvarājīvinī" jīvayuktā padminī || MoT_1,22.13 ||



viriñcamajjabrahmāṇḍabṛhadvilvaphaladrumam /
brahmakānanam ābhogi param āvṛtya tiṣṭhati // Mo_1,22.14 //
"brahmāṇḍe" hi "viriñca" eva sārabhūto bhavatīti "viriñcamajje"ty uktaṃ | "āvṛtya" ācchādya | etena brahmaṇy api kālasparśa uktaḥ || MoT_1,22.14 ||


yāminībhramarīpūrṇā racayan dinamañjarīḥ /
varṣakalpakalāvallīr na kadācana khidyate // Mo_1,22.15 //
kāla iti śeṣaḥ | kālaḥ kiṃ kurvan | "varṣakalpakalāvallī" "racayann" iti yojyam || MoT_1,22.15 ||


bhidyate nāvabhagno 'pi dagdho 'pi hi na dahyate /
dṛśyate nātidṛśyo 'pi dhūrtacūḍāmaṇir mune // Mo_1,22.16 //
"atidṛśya"tvaṃ kālasya ṛtuguṇādidarśanena jñeyam | "na dṛśyate" ākārābhāvāt | "dhūrto 'pi" evaṃvidho bhavatīti "dhūrtacūḍāmaṇir" ity uktam || MoT_1,22.16 ||



ekenaiva nimeṣeṇa kiñcid utthāpayaty alam /
kiñcid vināśayaty uccair manorājyavad ātataḥ // Mo_1,22.17 //
spaṣṭam || MoT_1,22.17 ||


durvilāsavilāsinyā ceṣṭayā paripuṣṭayā /
darvyeva sūpakṛt sūpaṃ janam āvartayan sthitaḥ // Mo_1,22.18 //
"āvartayan" bhramayan || MoT_1,22.18 ||



tṛṇam pāṃsum mahendraṃ ca sumerum parṇam arṇavam /
ātmasphāratayā sarvam ātmasātkartum udyataḥ // Mo_1,22.19 //
"ātmanaḥ" yā "sphāratā" vyāpakatā | tayā | "ātmasātkartum" svādhīnaṃ kartum || MoT_1,22.19 ||



krauryam atraiva paryāptaṃ lubdhatātraiva saṃsthitā /
sarvaṃ daurbhāgyam atraiva sarvam atraiva cāpalam // Mo_1,22.20 //
"atraiva" asmin kāle eva | "paryāptam" pūrṇam || MoT_1,22.20 ||


prerayaṃl līlayārkendū krīḍatīha nabhastale /
nikṣiptavīṭāyugalo nije bāla ivāṅgane // Mo_1,22.21 //
"vīṭā" kandukaṃ || MoT_1,22.21 ||


sarvabhūtāsthimālābhir āpādavalitākṛtiḥ /
vilasaty eṣa kalpānte kālaḥ kalpitakalpanaḥ // Mo_1,22.22 //
"kalpitāḥ" "kalpanāḥ" jagadrūpāḥ kalpanāḥ | yena | saḥ || MoT_1,22.22 ||


asyoḍḍāmaranṛttasya kalpānte 'ṅgavinirgataiḥ /
prasphuraty ambare merur bhūrjatvag iva vāyubhiḥ // Mo_1,22.23 //
"sphurati" ākāśe bhramati || MoT_1,22.23 ||


rudro bhūtvā bhavaty eṣa mahendro 'tha pitāmahaḥ /
śukro vaiśravaṇaś cāpi punar eva na kiñcana // Mo_1,22.24 //
spaṣṭam || MoT_1,22.24 ||


dhatte 'jasrotthitadhvastān sargān amitabhāsurān /
anyān anyān apy ananyān vīcīn abdhir ivātmani // Mo_1,22.25 //
"ajasram" "utthitāṃś" ca tān "dhvastāṃś" ca "sargān" sṛṣṭīn | "anyān anyān" iti vīpsā | "api"śabdaḥ "ananyān" ity anena sambadhyate || MoT_1,22.25 ||



mahākalpābhidhānebhyo vṛkṣebhyaḥ pariśātayan /
devāsuragaṇān pakvān phalabhārān avasthitaḥ // Mo_1,22.26 //
"pariśātayan" chedayan || MoT_1,22.26 ||


ālolabhūtamaṣakaghuṅghumānām prapātinām /
brahmāṇḍoḍumbaraughānām bṛhatpādapatāṃ gataḥ // Mo_1,22.27 //
"ghuṅghume"ti śabdānukaraṇam | "uḍumbaraḥ" phalaviśeṣaḥ | tatra hi maṣakāḥ bāhulyena tiṣṭhanti || MoT_1,22.27 ||


sattāmātrakumudvatyā cijjyotsnāpariphullayā /
vapur vinodayaty eṣaḥ kriyāpriyatamānvitaḥ // Mo_1,22.28 //
"kriyāpriyatamānvitaḥ" "saḥ" kālaḥ | "cid" eva prakāśarūpatvāt "jyotsnā" | tayā "pariphullayā" prakaṭībhūtayā | "sattāmātrakumudvatyā" | "vapuḥ" ātmānaṃ | "vinodayati" sadāsattayā kriyayā yuto bhavatīti || MoT_1,22.28 ||



anantāpāyaparyantam baddhapīṭhaṃ nijaṃ vapuḥ /
mahāśailavad uttuṅgam avalambya vyavasthitaḥ // Mo_1,22.29 //
"anantāpāyaparyantam" antāpāyaparyantarahitaṃ | nāśarahitam ity arthaḥ || MoT_1,22.29 || kvacic chyāmatamaḥśyāmaṃ kvacit kāntiyutaṃ tatam /
dvayenāpi kramād riktaṃ svabhāvam bhāvayan sthitaḥ // Mo_1,22.30 //
"śyāmaṃ" yat "tamaḥ" | tena "śyāmaṃ" | ["svabhāvam" "bhāvayan"] svarūpaṃ sampādayann iti yāvat | etena rātridivase sandhyā ceti trayam uktam || MoT_1,22.30 ||



saṃlīnāsaṅkhyasaṃsārasārayā svātmasattayā /
gurvīva bhāraghanayā nibaddhapadatāṃ gataḥ // Mo_1,22.31 //
"saṃlīnaḥ" "asaṅkhyasaṃsārāṇāṃ" "sāro" yasyāṃ | sā | tayā | gurvī hi "nibaddhapadatāṃ" gacchati iti "gurvī"ty uktam || MoT_1,22.31 ||



na khidyate na mriyate na tiṣṭhati na gacchati /
nāstam eti na codeti mahākalpaśatair api // Mo_1,22.32 //
spaṣṭam || MoT_1,22.32 ||


kevalaṃ jagadārambhalīlayā ghanahelayā /
yāpayaty ātmanātmānam anahaṅkāram ānatam // Mo_1,22.33 //
"ghanā" "helā" yasyāṃ | tādṛśyā | "yāpayati" samāpayati | ahaṅkārābhave hi kālo naśyati | svanāśakrīḍām api svayam eva karotīti bhāvaḥ || MoT_1,22.33 ||



yāminīpaṅkakalilāṃ dinakokanadāvalīm /
kriyābhramarikām mandaṃ saraḥsu āropayan sthitaḥ // Mo_1,22.34 //
"saraḥsu" arthāt bhuvanarūpeṣu | "āropayan" kalpayan | sūryarūpeṇeti śeṣaḥ || MoT_1,22.34 ||


gṛhītvā bhīṣaṇaḥ kṛṣṇāṃ rajanīṃ jīrṇamārjanīm /
ālokakanakakṣodam āharaty abhito 'vanim // Mo_1,22.35 //
"āharati" sammārjayati | rātriṃ vidhāya prakāśam upasaṃharatīti bhāvaḥ || MoT_1,22.35 ||



sañcārayan kriyāṅgulyā koṇakeṣv arkadīpikām /
jagatsadmani kāruṇyāt kva kim astīti vīkṣate // Mo_1,22.36 //
"koṇakeṣu" dikkoṇeṣu | anyo 'pi hi dīpikām prajvālya sadmani kva kim astīti paśyati || MoT_1,22.36 ||



prekṣyāhāni nimeṣeṇa sūryākṣṇā pākavanty alam /
lokapālaphalāny atti jagajjīrṇavanād ayam // Mo_1,22.37 //
"sūryākṣṇā" sūryākhyena cakṣuṣā | "ahāni" "prekṣya" kañcit kālam pratīkṣyety arthaḥ || MoT_1,22.37 ||


jagajjīrṇakuṭīkīrṇān arpayaty ugrakoṭare /
krameṇa guṇavallokamaṇīn mṛtyusamudgake // Mo_1,22.38 //
"jagajjīrṇakuṭyāṃ kīrṇān" vikṣiptān | anyo 'pi hi kuṭyāṃ vikṣiptān maṇīn samudgake 'rpayati || MoT_1,22.38 ||



guṇair āpūryate yaiva lokaratnāvalī bhṛśam /
bhūṣārtham iva tām aṅge kṛtvā bhūyo nikṛntati // Mo_1,22.39 //
anyo 'pi rājādiḥ ratnāvalīm aṅge kṛtvā līlayā kṛntati || MoT_1,22.39 ||



dinahaṃsānusṛtayā niśendīvaramālayā /
tārākesarayājasraṃ capalo valayaty alam // Mo_1,22.40 //
"valayati" āvṛttaṃ sampādayati | bhuvanam iti śeṣaḥ || MoT_1,22.40 ||



śailorṇadyudharāśṛṅgajagadūrṇāyusaunikaḥ /
pratyaham pibati prekṣya tārāraktakaṇān api // Mo_1,22.41 //
"śailā" eva "ūrṇā" yasya | tat | tādṛśaṃ | "dyudhare" dyāvāpṛthivyau eva "śṛṅge" yasya | tat | tādṛśaṃ ca | īdṛśaṃ ca yat "jagat" tad eva "ūrṇāyuḥ" meṣaḥ | tasya "saunikaḥ" hiṃsakaḥ || MoT_1,22.41 ||



tāruṇyanalinīsoma āyurmātaṅgakesarī /
na tad asti na yasyāyaṃ tucchātucchasya taskaraḥ // Mo_1,22.42 //
spaṣṭam || MoT_1,22.42 ||


kalpakelivilāsena piṣṭapātitajantunā /
nyagbhāvodbhavahāsena ramate svātmanātmani // Mo_1,22.43 //
"piṣṭāḥ" cūrṇīkṛtāḥ | ata eva "pātitāḥ" "jantavo" yena | saḥ | tādṛśena | kāla iti śeṣaḥ | tṛtīyāntatrayaṃ "svātmane"ty asya viśeṣaṇatvena yojyam || MoT_1,22.43 ||



kartā bhoktātha saṃhartā smartā sarvam padaṃ gataḥ /
sarvam eva karotīdaṃ na karoti ca kiñcana // Mo_1,22.44 //
nakiñcidrūpatvāt na kiñcit karaṇaṃ jñeyam || MoT_1,22.44 ||



sargāntaślokena kālanindāṃ samāpayati
sakalam apy akalākalitāntaraṃ
subhagadurbhagarūpadharaṃ vapuḥ /
prakaṭayan sahasaiva ca gopayan
vilasatīha hi kālabalaṃ nṛṣu // Mo_1,22.45 //
"sakalatvākala"tvādikaṃ viṣayavibhāgena jñeyaṃ | "prakaṭayan" "gopayan" ity atra sarvanāmasthānābhāve 'pi numāgama ārṣaḥ | iti śivam || MoT_1,22.45 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe dvāviṃśaḥ sargaḥ || 1,22 ||


************************************************************************



evaṃ kālanindāṃ kṛtvā kālavilāsaṃ kathayati
asyoḍḍāmaralīlasya dūrāstasakalāpadaḥ /
saṃsāre rājaputrasya kālasyākalitaujasaḥ // Mo_1,23.1 //
asminn ācarato dīnair mugdhair bhūtamṛgavrajaiḥ /
ākheṭakaṃ jarjarite jagajjaṅgalajālake // Mo_1,23.2 //
ekadeśollasaccāruvaḍavānalapaṅkajā /
krīḍāpuṣkariṇī ramyā kalpakālamahārṇavaḥ // Mo_1,23.3 //
spaṣṭam || MoT_1,23.1-3 ||



kaṭutiktāmlabhūtāḍhyaiḥ sadadhikṣīrasāgaraiḥ /
tair eva taiḥ paryuṣitair jagadbhiḥ kālyavartanam // Mo_1,23.4 //
"kaṭutiktāmlāḥ" atyantatāmasikatāmasikarājasikāḥ | kaṭvādirasaviśeṣayuktāś ca ye "bhūtāḥ" carācarāḥ bhūtāḥ siddhadravyāṇi ca | taiḥ "āḍhyaiḥ" yuktaiḥ | paredyuḥ uṣitaiḥ "paryuṣitaiḥ" | na tu navair ity arthaḥ | "kālyavartanam" prābhātikabhojanaṃ | "asye"ti sargādyaślokasthaṃ sarvatra yojyam || MoT_1,23.4 ||


caṇḍī caturasañcārā sarvamātṛgaṇānvitā /
saṃsāravanavinyastanaraiṇākarṣaṇī vṛkī // Mo_1,23.5 //
asya kālasya "caṇḍī"ti nāmadheyā śaktiḥ | "vṛkī" bhavatīti sambandhaḥ | "mātṛgaṇaḥ" prasiddhaḥ | rājaputro 'pi ākheṭakārthaṃ vṛkīm pālayati || MoT_1,23.5 ||


pṛthvī karatale pṛthvī pānapātrī rasānvitā /
kamalotpalakalhāralolajālakamālitā // Mo_1,23.6 //
"pṛthvī" vistīrṇā || MoT_1,23.6 ||


virāvī vikaṭāsphālo nṛsiṃho bhujapañjare /
saṭāvikaṭapīnāṃsaḥ kāntaḥ krīḍāśakuntakaḥ // Mo_1,23.7 //
"nṛsiṃhaḥ" narasiṃhaḥ | rājaputrasyāpi vilāsārtham pañjare siṃho bhavati || MoT_1,23.7 ||


alābuvīṇāmadhuraḥ śaradvyomāmalacchaviḥ /
devaḥ kila mahākālo līlākokilabālakaḥ // Mo_1,23.8 //
"mahākālaḥ" saṃhārādhikārī "deva"viśeṣaḥ || MoT_1,23.8 ||


ajasrasphūrjitākāro vāntaduḥkhaśarāśaniḥ /
abhāvanāmakodaṇḍaḥ parisphurati sarvataḥ // Mo_1,23.9 //
"vāntāḥ" udgīrṇāḥ | "duḥkhāny" eva "śarāśanayaḥ" | yena | saḥ | abhāvanāmā cāsau kodaṇḍaḥ "abhāvanāmakodaṇḍaḥ" || MoT_1,23.9 ||



sargāntaślokena kālavilāsavarṇanaṃ samāpayati
anuttamasphuritavilāsavardhito
bhraman haran parivilasan vidārayan /
jarajjagaj jaraḍhavilolamarkaṭaḥ
parisphuradvapur iha kāla īhate // Mo_1,23.10 //
"īhate" nānāvidhāḥ ceṣṭāḥ karoti | iti śivam || MoT_1,23.10 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe trayoviṃśaḥ sargaḥ || 1,23 ||



************************************************************************



evaṃ kālavilāsam uktvā daivavilāsam prastauti
atraiva durvilāsānāṃ cūḍāmaṇir ivāparaḥ /
karoty astīti lokena daivaṃ kālaś ca kathyate // Mo_1,24.1 //
"karoti" iti kriyākathanam | "astīti" sattākathanaṃ | "kālo" 'tra kṛtānto 'bhipretaḥ | tasyaiva "daiva"paryāyatvāt || MoT_1,24.1 ||



kriyāmātrād ṛte yasya svaparispandarūpiṇaḥ /
nānyad ālakṣyate rūpaṃ karmaṇo na samīhitam // Mo_1,24.2 //
teneyam akhilā bhūtasantatir nityapelavā /
tāpena himamāleva nītā vidhuratām bhṛśam // Mo_1,24.3 //
"yasya" daivasya | "kriyāmātraṃ" vinā | "na rūpam ālakṣyate" | "nā"pi "karmaṇaḥ" "samīhitaṃ" karmālambanaṃ kāṅkṣitam | "ālakṣyate" | kimartham | ayaṃ kiñcit karotīti "teneyam" "bhūtasantatir vidhuratāṃ nītā" || MoT_1,24.2-3 ||



yad idaṃ dṛśyate kiñcij jagadābhogimaṇḍalam /
tat tasya nartanāgāram ihāsāv abhinṛtyati // Mo_1,24.4 //
"tasya" daivasya || MoT_1,24.4 ||


asya nāmāntarakathanābhiprāyeṇāha
tṛtīyaṃ ca kṛtānteti nāma bibhrat sudāruṇam /
kāpālikavapur mattaṃ daivaṃ jagati nṛtyati // Mo_1,24.5 //
"kāpālikavapuḥ" kāpālikatulyaḥ || MoT_1,24.5 ||


asyaiva sarvādhāratvaṃ kathayati
nṛtyato hi kṛtāntasya nitāntam avirāgiṇaḥ /
nityaṃ niyatikāntāyā mune paramakāminaḥ // Mo_1,24.6 //
śeṣaḥ śaśikalāśubhro gaṅgāvāhaś ca tau tridhā /
upavīte avītābhe ubhe saṃsāravakṣasi // Mo_1,24.7 //
"tau" kau | "śeṣaḥ gaṅgāvāhaś" ca | "avītābhe" śobhāyukte | "saṃsāra" eva "vakṣas" | tatra || MoT_1,24.6-7 ||



candrārkamaṇḍale hemakaṭake karamūlayoḥ /
līlāsarasijaṃ haste brāhmam brahmāṇḍakarṇikam // Mo_1,24.8 //
"brāhmam" brahmaṇaḥ āsanabhūtam padmam | "brahmāṇḍasya karṇikam" karnikābhūtaṃ | tanmadhyavartitvāt || MoT_1,24.8 ||



tārābinducitaṃ lolapuṣkarāvartapallavam /
ekārṇavapayodhautam ekam ambaram ambaram // Mo_1,24.9 //
"ambaram" ākāśam | "ambaraṃ" vastram || MoT_1,24.9 ||



evaṃrūpasya tasyāgre niyatir nityakāminī /
anastamitasaṃrambham ārambhaiḥ parinṛtyati // Mo_1,24.10 //
"ārambhaiḥ" yamaniyamarūpaiḥ | nartakasya samīpe hi nartakī api nṛtyati || MoT_1,24.10 ||



tasyā nartanalolāyā jaganmaṇḍapakoṭare /
aruddhaspandarūpāyā āgamāpāyacañcure // Mo_1,24.11 //
cārubhūṣaṇam aṅgeṣu devalokāntarāvalī /
āpātālaṃ nabho lambaṃ kavarīmaṇḍalam bṛhat // Mo_1,24.12 //
"devānām" yāni "lokāntarāṇi" | teṣām "āvalī" "aṅgeṣu" "cārubhūṣaṇam" bhavati | "nabhaḥ" kathambhūtam | "āpātālam" pātālaṃ tāvat | "lambaṃ" vyāpakaṃ | nṛtyantyāś ca "kavarī" lambā bhavati || MoT_1,24.11-12 ||


narakālī ca mañjīramālā kalakalākulā /
protā duṣkṛtasūtreṇa pātālacaraṇe calā // Mo_1,24.13 //
"mañjīramālā" kiṅkiṇīmālā || MoT_1,24.13 ||


kastūrikātilakakaṃ kriyāsakhyopakalpitam /
citritaṃ citraguptena yāme vadanapaṭṭake // Mo_1,24.14 //
"yāme" yamasambandhini | "vadanapaṭṭake" mukhapaṭṭake | 'rthāt yamaśāsanapaṭṭarūpake mukhe | "citraguptena citritaṃ" citraguptakartṛkaṃ citritaṃ | citraguptalikhitā lipir iti yāvat | "kastūrikātilakam" bhavati | kathambhūtaṃ | "kriyāsakhyā" kriyāśaktirūpayā sakhyā | "upakalpitam" citraguptam āviśya racitam | "sakhī" hi sakhyās tilakaṃ karoti || MoT_1,24.14 ||



kālīrūpam upasthāya kalpānteṣu kriyākulam /
nṛtyaty eṣā punar devī sphuṭacchailaghanāravam // Mo_1,24.15 //
"kālī" kālaśaktiḥ | tasyā "rūpam upasthāya" āśritya | pūrvavṛttāpekṣayā "punar" iti prayogaḥ || MoT_1,24.15 ||


paścātpralambavibhrāntakaumārarathabarhibhiḥ /
netratrayabṛhadrandhrabhūribhāṅkārabhīṣaṇaiḥ // Mo_1,24.16 //
lambalolaśaraccandravitīrṇaharamūrdhajaiḥ /
uccaraccārumandāragaurīkavaricāmaraiḥ // Mo_1,24.17 //
uttāṇḍavācalākārabhairavādaratumbakaiḥ /
raṇatsahasrarandhrendradehabhikṣākapālakaiḥ // Mo_1,24.18 //
śuṣkā śarīrakhaṭvāṅgabhaṅgair āpūritāmbaram /
bhāyayaty ātmanātmānam api kṛṣṇair ghanāsitam // Mo_1,24.19 //
kulakam | "śuṣkā" śoṣaṇadharmayuktā | prakṛtatvāt iyaṃ niyatiḥ | "ātmanā" "ghanāsitam" atyantakṛṣṇam | "ātmānam api bhāyayati" bhayāviṣṭaṃ karoti | anyeṣāṃ tu kā katheti bhāvaḥ | "ātmānam" kathambhūtam | "śarīrasya" ye "khaṭvāṅgabhaṅgāḥ" arthāt khaṭvāṅgabhaṅgarūpāḥ avayavāḥ | taiḥ "āpūritāmbaram" | "śarīrakhaṭvāṅgaiḥ" kathambhūtaiḥ | "paścād" ityādi | "paścātpralambaḥ" ata eva "vibhrāntaḥ" bhraman | "kaumāraḥ" kumārasambandhī | "rathabarhī" yeṣāṃ | taiḥ | "bhāṅkārāḥ" vātakṛtāḥ jñeyāḥ | "lambaś" cāsau "lolaś "ca yaḥ "śaraccandras" | tena "vitīrṇāḥ" dattāḥ | kṛtā iti yāvat | "hara"vat "mūrdhajāḥ" yeṣāṃ | taiḥ | yathā harasya keśāḥ candrakalayā bhāsitāḥ bhavanti | tathāsyāḥ pūrṇena śaraccandreṇeti bhāvaḥ | "uccaraccārumandārā" vilasaccārumandārā | yā "gaurīkavarī" | sā eva "cāmaraṃ" yeṣāṃ | taiḥ | "uttāṇḍavaḥ" cāsau "acalākāraḥ "| "bhairavaḥ" mahābhairavaḥ | sa ev"ādaratumbakaḥ" ādaraviṣayaḥ vādyabhāṇḍaviśeṣaḥ yeṣāṃ | taiḥ | "raṇanti sahasrarandhrāṇi" netrarūpāṇi randhrasahasrāṇi yasya | tādṛśaḥ yaḥ "indradehaḥ" | sa eva "bhikṣākapālakaṃ" yeṣāṃ | taiḥ | tathā "kṛṣṇaiḥ" | idaṃ ca sthūladṛṣṭyartham bāhyadhyānam uktam | sūkṣmadṛṣṭīn prati tu bhaṅgyā kumārādiṣv api niyatisparśaḥ uktaḥ || MoT_1,24.16-19 ||



viśvarūpaśiraścakracārupuṣkaramālayā /
tāṇḍaveṣu vivalgantī mahākalpeṣu rājate // Mo_1,24.20 //
"viśvarūpasya" virājo | yat "śiraścakraṃ" | tad eva "cārupuṣkaramālā" | tayā || MoT_1,24.20 ||



pramattapuṣkarāvartaḍamarūḍḍāmarāravaiḥ /
tasyāḥ kila palāyante kalpānte tumburādayaḥ // Mo_1,24.21 //
"ḍamaravaḥ" vādyabhāṇḍaviśeṣāḥ | "uḍḍāmarāḥ" udbhaṭāḥ | "tumbure"ti gandharvanāma || MoT_1,24.21 ||


nṛtyato 'nte kṛtāntasya candramaṇḍalahāsinaḥ /
tārakācandrakācāruvyomapiñchāvacūlinaḥ // Mo_1,24.22 //
ekasmiñ śravaṇe dīrghā himavān asti mudrikā /
apare 'pi mahāmeruḥ kāntā kāñcanakarṇikā // Mo_1,24.23 //
"ante" kalpānte | "candramaṇḍalam" eva "hāsaḥ" | tadyuktasya | "candrakāṇi" [...] | tābhiḥ "cāru" yat | "vyomai"va "piñchaṃ" | tad "avacūlaṃ" śirobhūṣaṇaṃ yasya | tādṛśasya | "mudrikā" śvetaḥ karṇābharaṇaviśeṣaḥ || MoT_1,24.22-23 ||



atraiva kuṇḍale lole candrārkau gaṇḍamaṇḍale /
lokālokācalaśreṇī sarvataḥ kaṭimekhalā // Mo_1,24.24 //
"gaṇḍamaṇḍale" gaṇḍabhittau | kaṭisthā mekhalā "kaṭimekhalā" || MoT_1,24.24 ||



itaś cetaś ca gacchantī vidyudvalayavarṇikā /
anilāndolitā bhāti nīradāṃśukapaṭṭikā // Mo_1,24.25 //
"vidyudvalaya" eva "varṇikā" bhūṣaṇaviśeṣaḥ yasyās | tādṛśī "vidyudvalayavarṇikā" || MoT_1,24.25 ||



musulaiḥ paṭṭisaiḥ śūlaiḥ prāsais tomaramudgaraiḥ /
tīkṣṇaiḥ kṣīṇajagadvrātakṛtāntair iva sambhṛtaiḥ // Mo_1,24.26 //
saṃsārabandhanādīrghe pāśe kālakaracyute /
śeṣabhogamahāsūtre protair mālāsya śobhate // Mo_1,24.27 //
"saṃsārabandhanā"rtham | "ā" samantād | "dīrghe" | "asya" samanantaroktasya | daivāparaparyāyasya kṛtāntasya || MoT_1,24.26-27 ||



jīvollasanmakarikāratnatejobhir ujjvalā /
saptābdhikaṅkaṇaśreṇī bhujayor asya bhūṣaṇam // Mo_1,24.28 //
"jīvena ullasantaḥ" | sajīvā iti yāvat | "makarāḥ" yāsāṃ | tāḥ | "kaṅkaṇeṣv" api makarikāḥ bhavanti | kiṃ tu nirjīvāḥ || MoT_1,24.28 ||


vyavahāramahāvartā sukhaduḥkhaparamparā /
rajaḥpūrṇā tamaḥśyāmā romālī tasya rājate // Mo_1,24.29 //
"vyavahārāṇām mahāvartāḥ" punaḥ punar āgamanāni yasyāṃ | sā | tādṛśī "sukhaduḥkhaparamparā" "tasya" "romālī" "rājate" | kathambhūtā | "rajaḥpūrṇā" rajoguṇabharitā | tathā "tamaḥśyāmā" tamoguṇamalinā | "romālī" api āvartayuktā rajaḥpūrṇā tamaḥśyāmā ca bhavati || MoT_1,24.29 ||



evamprāyāṃ sa kalpānte kṛtāntas tāṇḍavodbhaṭām /
upasaṃhṛtya nṛtyehāṃ sṛṣṭyā saha maheśvaraḥ // Mo_1,24.30 //
punar hāsyamayīṃ nṛttalīlāṃ sarvasvarūpiṇīm /
tanotīmāṃ jarāduḥkhaśokābhinayabhūṣitām // Mo_1,24.31 //
"sṛṣṭyā saha" niyatyā saha | "punaḥ" sargārambhe | "imāṃ" jagadrūpām || MoT_1,24.30-31 ||



sargāntaślokenaitat samāpayati
bhūyaḥ karoti bhuvanāni vanāntarāṇi
lokāntarāṇi janajālakakalpanāṃ ca /
ācāracārukalanāṃ ca calācalāṃ ca
paṅkād yathārbhakajano racanām akhinnaḥ // Mo_1,24.32 //
"calācalām" atyantacalām | iti śivam || MoT_1,24.32 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe caturviṃśaḥ sargaḥ || 1,24 ||


************************************************************************



evaṃ daivavilāsam uktvā phalitam āha
vṛtte 'sminn eva caiteṣāṃ kālādīnām mahāmune /
saṃsāranāmni kaivāsthā mādṛśānām bhavatv iha // Mo_1,25.1 //
ata iti śeṣaḥ | "vṛtte" carite | "ādi"śabdena daivādīnāṃ grahaṇam || MoT_1,25.1 ||



vikrītā iva tiṣṭhāma etair daivādibhir vayam /
dhūrtaiḥ prapañcacaturair mugdhā vanamṛgā iva // Mo_1,25.2 //
spaṣṭam || MoT_1,25.2 ||



eṣo 'nāryasamācāraḥ kālaḥ kavalanonmukhaḥ /
jagaty avirataṃ lokam pātayaty āpadarṇave // Mo_1,25.3 //
spaṣṭam || MoT_1,25.3 ||



dahaty ante durāśābhir daivo dāruṇaceṣṭayā /
lokam puṣpanikāśābhir jvālābhir dahano yathā // Mo_1,25.4 //
spaṣṭam || MoT_1,25.4 ||


dhṛtiṃ vidhurayaty ekāmayadārūpavallabhā /
strītvāt svabhāvacapalā niyatir niyamonmukhī // Mo_1,25.5 //
"āmayadā" rogadāyinī | na rūpeṇa vallabhā "arūpavallabhā" || MoT_1,25.5 ||


grasate 'viratam bhūtajālaṃ sarpa ivānilam /
kṛtāntaḥ karkaśācāro jarāṃ nītvā jagadvapuḥ // Mo_1,25.6 //
"jagad" eva "vapuḥ" yasya | tādṛśaḥ || MoT_1,25.6 ||


yamanirghṛṇarājendro nārtaṃ nāmānukampate /
sarvabhūtadayācāro jano durlabhatāṃ gataḥ // Mo_1,25.7 //
"ārtaṃ" dīnam || MoT_1,25.7 ||


sarvā eva mune phalguvibhavā bhūtajātayaḥ /
duḥkhāyaiva durantāya dāruṇā lobhabhūmayaḥ // Mo_1,25.8 //
"phalguvibhavāḥ" nissāravibhavayuktāḥ || MoT_1,25.8 ||


āyur atyantataralam mṛtyur ekas tu niṣṭhuraḥ /
tāruṇyaṃ cātitaralam bālyaṃ jaḍatayā hṛtam // Mo_1,25.9 //
spaṣṭam || MoT_1,25.9 ||


kalākalaṅkito loko bandhavo bhavabandhanam /
bhogā bhavamahārogās tṛṣṇā ca mṛgatṛṣṇikā // Mo_1,25.10 //
"kalābhiḥ" paravañcanākhyābhiḥ kalābhiḥ | "kalaṅkitaḥ" || MoT_1,25.10 ||


śatravaś cendriyāṇy eva satyaṃ yātam asatyatām /
praharaty ātmanaivātmā mana eva manoripuḥ // Mo_1,25.11 //
"ātmā" | "ātmanā" svayam | "praharaty" ātmānaṃ | durvikalpair iti śeṣaḥ | "mana" "eva" aśuddhamanaḥ eva | na tv anyaḥ | "manoripuḥ" śuddhasya manaso ripuḥ bhavati || MoT_1,25.11 ||



ahaṅkāraḥ kalaṅkāya buddhayaḥ paripelavāḥ /
kriyā duṣphaladāyinyo līlāḥ strīniṣṭhatāṃ gatāḥ // Mo_1,25.12 //
"paripelavā" atīkṣṇāḥ || MoT_1,25.12 ||

vāñchāviṣayaśālinyaḥ sacamatkṛtayaḥ kṛtāḥ /
nāryo doṣapatākinyo rasā nīrasatāṃ gatāḥ // Mo_1,25.13 //
"vāñchāviṣayāś" ca tāḥ "śālinyaś" ca āpātaramaṇīyāś ca | tādṛśyaḥ "nāryaḥ" | "sacamatkṛtayaḥ" camatkārayuktāḥ | "kṛtāḥ" kalpitāḥ | bhāvitā iti yāvat | kīdṛśyaḥ "nāryaḥ" | "doṣapatākinyaḥ" | rāgādidoṣamayatvāt rāgādi"doṣapatākinyaḥ" | "rasāḥ" śāstrādiviṣayāḥ abhilāṣāḥ | "nīrasatāṃ" śuṣkatāṃ "gatāḥ" || MoT_1,25.13 ||


vastv avastutayā cāttaṃ dattaṃ cittam ahaṅkṛtau /
abhāvarodhitā bhāvā bhavānto nādhigamyate // Mo_1,25.14 //
asmābhiḥ | "vastu" satyaṃ vastu | "avastutayā" deho 'ham ity evaṃrūpeṇa avastubhāven"āttaṃ" gṛhītaṃ | tathā "cittam" "ahaṅkṛtau" "dattam" ahaṅkāragrastaṃ kṛtam ity arthaḥ | "bhāvāḥ" "abhāvarodhitāḥ" nāśagṛhītāḥ | na jñātā iti śeṣaḥ | ataḥ "bhavāntaḥ" "nādhigamyate" na prāpyate || MoT_1,25.14 ||



tapyate kevalaṃ sādho matir ākulitāntarā /
rāgorago vilasati virāgaṃ nopagacchati // Mo_1,25.15 //
"virāgaṃ" rāgābhāvaḥ | "nopagacchati" nāgacchati || MoT_1,25.15 ||



rajoguṇahatā dṛṣṭis tamaḥ samparivardhate /
na cādhigamyate sattvaṃ tattvam atyantadūrataḥ // Mo_1,25.16 //
"tattvam" paramārthaḥ || MoT_1,25.16 ||


sthitir asthiratāṃ yātā mṛtir āgamanonmukhī /
dhṛtir vaidhuryam āyāti ratir nityam avastuni // Mo_1,25.17 //
"avastuni" avastubhūte dehādau || MoT_1,25.17 ||


matir māndyena malinā pātaikaparamaṃ vapuḥ /
jvalatīva jarā dehe pravisphūrjati duṣkṛtam // Mo_1,25.18 //
"māndyena" jāḍyena || MoT_1,25.18 ||


yatnenāyāti yuvatā dūre sajjanasaṅgatiḥ /
gatir na vidyate kācit kvacin nodeti satyatā // Mo_1,25.19 //
"yuvatā" lakṣaṇayā stryāsaktiḥ || MoT_1,25.19 ||


mano vimuhyatīvāntar muditā dūrato gatā /
nojjvalā karuṇodeti dūrād āyāti nīcatā // Mo_1,25.20 //
spaṣṭam || MoT_1,25.20 ||


dhīratādhīratām eti pātotpātaparo janaḥ /
sulabho durjanāśleṣo durlabhaḥ sādhusaṅgamaḥ // Mo_1,25.21 //
"dhīratā" "adhīratām" "eti" naśyatīty arthaḥ || MoT_1,25.21 ||



āgamāpāyino bhāvā bhāvanā bhavabandhanī /
nīyate kevalaṃ kvāpi nityam bhūtaparamparā // Mo_1,25.22 //
"nīyate" | kāleneti śeṣaḥ || MoT_1,25.22 ||


diśo 'pi hi na dṛśyante deśo 'py avyapadeśabhāk /
śailā api hi śīryante kaivāsthā mādṛśe jane // Mo_1,25.23 //
"deśaḥ" "avyapadeśabhāk" deśeti vyapadeśaṃ na bhajatīti tādṛk syāt | deśasyāpi deśeti nāma kālena na syād ity arthaḥ | yatredṛśānām īdṛśā daśā bhaviṣyanti tatra "mādṛśe jane kā eva āsthā" ko viśvāsaḥ syād iti bhāvaḥ || MoT_1,25.23 ||



dravanty api samudrāś ca śīryante tārakā api /
siddhā api na sidhyanti kaivāsthā mādṛśe jane // Mo_1,25.24 //
spaṣṭam || MoT_1,25.24 ||


adyate 'sattayāpi dyaur bhuvanaṃ cāpi bhajyate /
dharāpi yāti vaidhuryaṃ kaivāsthā mādṛśe jane // Mo_1,25.25 //
"asattayā" nāśena | "dyaur" "api" "adyate" grasyate || MoT_1,25.25 ||


dānavā api dīryanti dhruvo 'py adhruvajīvitaḥ /
amarā api māryante kaivāsthā mādṛśe jane // Mo_1,25.26 //
"māryante" | kāleneti śeṣaḥ || MoT_1,25.26 ||


śakro 'py ākramyate śakrair yamo 'pi hi niyamyate /
vāyor apy asty avāyuṣṭvaṃ kaivāsthā mādṛśe jane // Mo_1,25.27 //
"śakraiḥ" navīnaiḥ śakraiḥ || MoT_1,25.27 ||


somo 'pi vyomatām eti mārtāṇḍo 'py eti khaṇḍanam /
rugṇatām agnir apy eti kaivāsthā mādṛśe jane // Mo_1,25.28 //
"vyomatām" | nāśam ity arthaḥ || MoT_1,25.28 ||



parameṣṭhy apy aniṣṭhāvān harate harim apy ajaḥ /
bhavo 'py abhavatāṃ yāti kaivāsthā mādṛśe jane // Mo_1,25.29 //
"bhavo 'py" śrīmahādevo 'pi | "abhavatām" amahādevabhāvam || MoT_1,25.29 ||



kālaḥ śakalatām eti niyatiś cāpi nīyate /
kham apy ālīyate 'nante kaivāsthā mādṛśe jane // Mo_1,25.30 //
"anante" antarahite kasmiṃścid vastuni || MoT_1,25.30 ||


aśravyāvācyadurdarśatantreṇājñātamūrtinā /
bhuvanāni viḍambyante kenāpi bhramadāyinā // Mo_1,25.31 //
"aśravyaṃ" tathā "avācyaṃ" tathā "durdarśaṃ" "tantraṃ" vañcanopāyaḥ | yasya | tādṛśena | "kenā"pīti anirvācyenety arthaḥ || MoT_1,25.31 ||



ahaṅkārakalām etya sarvatrāntaravāsinā /
na so 'sti triṣu lokeṣu yas teneha na badhyate // Mo_1,25.32 //
dehādau ātmabhāvaḥ "ahaṅkāraḥ" | "tena" kenāpīty arthaḥ || MoT_1,25.32 ||


śilāśailakaṭapreṣu sāśvasūto divākaraḥ /
vanapāṣāṇavan nityam avaśaḥ paridolyate // Mo_1,25.33 //
śilāyuktāḥ śailāḥ "śilāśailāḥ" | teṣāṃ "kaṭaprāḥ" samūhāḥ | teṣu "paridolyate" dolanaṃ kāryate || MoT_1,25.33 ||



dharāgolakam antaḥsthasurāsuragaṇāspadam /
veṣṭyate dhiṣṇyacakreṇa pakvākṣoṭam iva tvacā // Mo_1,25.34 //
"dharāgolakam" bhūgolaṃ | "veṣṭyate" veṣṭanayuktaṃ kriyate | "dhiṣṇyacakreṇe"ti karaṇe tṛtīyā || MoT_1,25.34 ||



divi devā bhuvi narāḥ pātāle 'surabhoginaḥ /
kalpitāḥ kalpamātreṇa nīyante jarjarāṃ daśām // Mo_1,25.35 //
"asurabhoginaḥ" daityasarpāḥ | "kalpamātreṇa" kalpamātraparimāṇena || MoT_1,25.35 ||


kāmaś ca jagatīśānaraṇalabdhaparākramaḥ /
akrameṇaiva vikrānto lokam ākramya valgati // Mo_1,25.36 //
"īśānena" yaḥ "raṇaḥ" | tena "labdhaḥ" "parākramaḥ" | yena | tādṛśaḥ || MoT_1,25.36 ||


vasanto mattamātaṅgo madaiḥ kusumavarṣanaḥ /
āmoditakakupcakraś ceto nayati vakratām // Mo_1,25.37 //
"madaiḥ" madavāribhiḥ | "vakratāṃ" kāmakalāvidagdhatvam | kāmaprasaṅgeneha vasantābhidhānam || MoT_1,25.37 ||



anuraktāṅganālokalocanālokitākṛti /
spaṣṭīkartum manaḥ śakto na viveko mahān api // Mo_1,25.38 //
"mahān api vivekaḥ manaḥ spaṣṭīkartuṃ" śuddhīkartuṃ | "śakto na" bhavati | "manaḥ" kathambhūtaṃ | "anurakto" yaḥ "aṅganālokaḥ" | tasya yat "locanālokitam" dṛṣṭipātas | tadvad "ākṛtiḥ" yasya | tādṛśam | atyantacalam ity arthaḥ || MoT_1,25.38 ||



paropakārakāriṇyā parārtyā paritaptayā /
buddha eva sukhī manye svārthaśītalayā dhiyā // Mo_1,25.39 //
"buddhaḥ" jñānī | "svārthe" svaprayojane | "śītalayā" | na svārthanimittam paritaptayeti yāvat || MoT_1,25.39 ||



utpannadhvaṃsinaḥ kālavaḍavānalapātinaḥ /
saṅkhyātuṃ kena śakyante kallolā jīvitāmbudheḥ // Mo_1,25.40 //
"jīvitāmbudheḥ" "kallolāḥ" jīvā ity arthaḥ || MoT_1,25.40 ||



sarva eva narā mohād durāśāpāśapātinaḥ /
doṣagulmakasāraṅgā nigīrṇā janmajaṅgale // Mo_1,25.41 //
"doṣagulmakasāraṅgāḥ" doṣapriyā ity arthaḥ | mṛgo gulmapriyo bhavati | "nigīrṇāḥ" grastāḥ | moheneti śeṣaḥ | sāraṅgā api pāśapātinaḥ "jaṅgale" kirātena grastā bhavanti || MoT_1,25.41 ||



saṅkṣīyate jagati janmaparamparāsu
lokasya tair iha kukarmabhir āyur etat /
ākāśapādapalatākṛtapāśakalpaṃ
yeṣām phalaṃ na hi vicāravido 'pi vidmaḥ // Mo_1,25.42 //
"ākāśapādapalatākṛtapāśakalpam" asad ity arthaḥ | "iha" karma kurvantīti bhāvaḥ || MoT_1,25.42 ||



sargāntaślokenaitat samāpayati
adyotsavo 'yam ṛtur eṣa tatheha yātrā
te bāndhavāḥ sukham idaṃ sa viśeṣabhogaḥ /
itthaṃ mudhaiva kalayan svavikalpajālam
ālolapelavamatir galatīha lokaḥ // Mo_1,25.43 //
"ālolapelavamatir" aticañcalasvalpabuddhir ity arthaḥ | "svavikalpajālam" ity anena "utsavā"dīnām atyantāsattvam uktam | iti śivam || MoT_1,25.43 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe pañcaviṃśaḥ sargaḥ || 1,25 ||


************************************************************************



punar api saṃsāradurvilasitam eva kathayati
anyac ca tātātitarām aramye
manorame veha jagatsvarūpe /
na kiñcid apy eti tad arthajātaṃ
yenātiviśrāntim upaiti cetaḥ // Mo_1,26.1 //
aham bravīmīti śeṣaḥ | he "tātā"ham "anyac ca" bravīmi | kim bravīṣīty apekṣāyām āh"ātitarām" iti | "manorame vā" manorame iva | "arthajātam" padārthasamūhaḥ | atyantaviśrāntau hi satyām anyārthaviṣayākāṅkṣā na punar udbhaved iti bhāvaḥ || MoT_1,26.1 ||



bālye gate kalpitakelilole
vayomṛge dāradarīṣu kīrṇe /
śarīrake jarjaratām prayāte
vidūyate kevalam eva lokaḥ // Mo_1,26.2 //
"vayomṛge" yauvanākhye mṛge | "jarjaratāṃ" vṛddhatvaṃ | "vidūyate" santapyate || MoT_1,26.2 ||


jarātuṣārābhihatāṃ śarīra-
sarojinīṃ dūratare vihāya /
kṣaṇād gate jīvitacañcarīke
janasya saṃsārasaro viśuṣkam // Mo_1,26.3 //
"vihāya" tyaktvā | "jīvitacañcarīke" jīvitākhye bhramare || MoT_1,26.3 ||


yadā yadā pākam upaiti nūnaṃ
tadā tadeyaṃ navam ātanoti /
jarābharānalpanavaprasūnaṃ
vijarjarā kāyalatā narāṇām // Mo_1,26.4 //
"nūnaṃ" niścaye | "navam" iti kriyāviśeṣaṇam | tena na paunaruktyam | āścaryaṃ ca pākaṃ gatāyāḥ latāyāḥ navaprasūnasya navam ātananam || MoT_1,26.4 ||


tṛṣṇānadī sāratarapravāha-
grastākhilānantapadārthajātā /
taṭasthasantoṣasuvṛkṣamūla-
nikāṣadakṣā vahatīha loke // Mo_1,26.5 //
spaṣṭam || MoT_1,26.5 ||


śarīranauś carmanibaddhabandhā
bhavāmbudhāv ālulitā bhramantī /
pravroḍyate pañcabhir indriyākhyair
adho vahantī makarair adhīnā // Mo_1,26.6 //
"pañcabhir" "indriyākhyaiḥ" "makaraiḥ" "śarīranauḥ" "pravroḍyate" magnā sampādyate iti sambandhaḥ | "ālulitaṃ" samantāc cañcalam || MoT_1,26.6 ||



tṛṣṇālatākānanacāriṇo 'mī
śākhāśataṃ kāmamahīruheṣu /
paribhramantaḥ kṣapayanti kāmam
manomṛgā no phalam āpnuvanti // Mo_1,26.7 //
"kāmaṃ" niścaye | "tṛṣṇālatānāṃ" yat "kānanam" | tatra "carantī"ti tādṛśās | tathā "paribhramantaḥ" paribhramaṇaśīlāḥ | "amī" "manomṛgāḥ" | "kāmamahīruheṣu" kānanagateṣu paramakāmākhyavṛkṣeṣu | gatam "śākhāśataṃ" | arthāt avāntarakāmarūpaṃ "śākhāśataṃ" | "kṣapayanti" cālayanti | svaviṣayaṃ kurvantīti yāvat | tathāpi "phalaṃ" "no" "āpnuvanti" || MoT_1,26.7 ||



kṛcchreṣu dūrāstaviṣādamohāḥ
svāmyeṣv anutsiktamano'bhirāmāḥ /
sudurlabhāḥ samprati sundarībhir
anāhatāntaḥkaraṇā mahāntaḥ // Mo_1,26.8 //
"kṛcchreṣu" āpatsu | "svāmyeṣu" sampatsu | "anutsiktaṃ" darparahitaṃ sat | "manaḥ" | ten"ābhirāmāḥ" || MoT_1,26.8 ||



taranti mātaṅgaghaṭātaraṅgaṃ
raṇāmbudhiṃ ye mayi te na śūrāḥ /
śūrās ta eveha manastaraṅgaṃ
ye svendriyāmbhodhim imaṃ taranti // Mo_1,26.9 //
spaṣṭam || MoT_1,26.9 ||



akliṣṭaparyantaphalābhirāmā
na dṛśyate kasyacid eva kācit /
kriyā durāśāhatacittavṛtter
yām etya viśrāntim upaiti lokaḥ // Mo_1,26.10 //
spaṣṭam || MoT_1,26.10 ||


kīrtyā jagad dikkuharam pratāpaiḥ
śriyā gṛhaṃ sattvabalena lakṣmīm /
ye pūrayanty akṣatadhairyabandhā
na te jagatyāṃ sulabhā mahāntaḥ // Mo_1,26.11 //
spaṣṭam || MoT_1,26.11 ||


apy antarasthaṃ giriśailabhitter
vajrālayābhyantarasaṃsthitaṃ vā /
sarvaṃ samāyānti samiddhavegāḥ
sarvāḥ śriyaḥ santatam āpadaś ca // Mo_1,26.12 //
śilānām iyaṃ śailā | sā cāsau bhittiḥ "śailabhittiḥ" | gireḥ śailabhittiḥ "giriśailabhittis" | tasyāḥ || MoT_1,26.12 ||



putrāś ca dārāś ca dhanaṃ ca buddhyā
prakalpyate tāta rasāyanaṃ ca /
sarvaṃ tu tan nāma karoty athānte
yatrātiramyā viṣamūrchanaiva // Mo_1,26.13 //
"prakalpyate" kalpanayā bhāvyate | "rasāyanam" | amṛtam iva | "ca"śabda ivārthaḥ | "ante" pariṇāme || MoT_1,26.13 ||


viṣādayukto viṣamām avasthām
upāgataḥ kāyavayo'vasāne /
bhāvān smaran svān abhidharmariktāñ
jano jarāvān abhidahyate 'ntaḥ // Mo_1,26.14 //
"kāyavayo'vasāne" vṛddhatve | "bhāvān" abhilāṣān | abhitaḥ dharmeṇa riktān "abhidharmariktān" | "antaḥ" manasi || MoT_1,26.14 ||



kāmārthadharmāptikṛśāntarābhiḥ
kriyābhir ādau divasāni nītvā /
cetaś caladbarhiṇapiñchalolaṃ
viśrāntim āgacchatu kena puṃsām // Mo_1,26.15 //
"kāmārthadharmāṇāṃ" yā "āptiḥ" | tayā "kṛśāntarābhiḥ" niḥsārābhiḥ | mokṣārthaṃ na kaścit kriyāṃ karotīti bhāvaḥ || MoT_1,26.15 ||



purogatair apy anavāptarūpais
taraṅgiṇītuṅgataraṅgakalpaiḥ /
kriyāphalaiḥ daivavaśād upetair
viḍambyate bhinnarucir hi lokaḥ // Mo_1,26.16 //
"hi" niścaye | "viḍambyate" vañcyate | "kriyāphalānāṃ" ca "anavāptarūpa"tvaṃ kṣaṇanaśvaratvena jñeyam || MoT_1,26.16 ||


imāny amūnīti vibhāvitāni
kāryāṇy aparyantamanoramāṇi /
janasya jāyājanarañjanena
jaṭājarāntaṃ jarayanti cetaḥ // Mo_1,26.17 //
"jāyājanarañjanene"ti hetau tṛtīyā | "jaṭānāṃ" yā "jarā" | tad"antam" || MoT_1,26.17 ||



parṇāni śīrṇāni yathā tarūṇāṃ
sametya janmāśu layam prayānti /
tathaiva lokāḥ svavivekahīnāḥ
sametya gacchanti kuto 'py ahobhiḥ // Mo_1,26.18 //
"svavivekahīnāḥ" ātmavicārarahitāḥ || MoT_1,26.18 ||


itas tato dūrataraṃ vihṛtya
praviśya gehaṃ divasāvasāne /
vivekilokāśrayisādhukarma-
rikte 'hni yāte ka upaiti nidrām // Mo_1,26.19 //
spaṣṭam || MoT_1,26.19 ||


vidrāvite śatrujane samaste
samāgatāyām abhitaś ca lakṣmyām /
sevyanta etāni sukhāni yāvat
tāvat samāyāti kuto 'pi mṛtyuḥ // Mo_1,26.20 //
spaṣṭam || MoT_1,26.20 ||



kuto 'pi saṃvardhitatuccharūpair
bhāvair amībhiḥ kṣaṇadṛṣṭanaṣṭaiḥ /
vilobhyamānā janatā jagatyāṃ
na vetty upāyātam aho na yātam // Mo_1,26.21 //
"kuto 'pi" anirvācyāt kasmāccid vastunaḥ | "bhāvaiḥ" padārthaiḥ | "upāyātam" bhāvaviṣayajanma | "yātam" bhāvaviṣayasaraṇam || MoT_1,26.21 ||


yiyāsubhiḥ kālamukhaṃ kriyante
janaiḍakais te hatakarmabandhāḥ /
ye pīnatām eva balād upetya
śarīrabandhe nanu te bhavanti // Mo_1,26.22 //
"janaiḍakaiḥ" janākhyaiḥ meṣaiḥ | "te" "hatakarmabandhāḥ" kutsitakarmaprapañcāḥ | "kriyante" | "te" ke | "ye" pratisvaṃ sthitāḥ" "ye "balād" haṭhena | "pīnatām" "eva" na tu kṣīnatām | "etya" āgatya | "te" tava | "śarīrabandhe" śarīrabandhārthaṃ | "nanu" "bhavanti" niścayena bhavantīty arthaḥ | karmavaśād eva hi puruṣaḥ dehabandham prāpnoti || MoT_1,26.22 ||



ajasram āgacchati satvareyam
anārataṃ gacchati satvaraiva /
kuto 'pi lolā janatā jagatyāṃ
taraṅgamālā kṣaṇabhaṅgureva // Mo_1,26.23 //
"janatā" janasamūhaḥ || MoT_1,26.23 ||


prāṇāpahāraikaparā narāṇām
mano manohāritayā haranti /
raktacchadāḥ ṣaṭpadacañcalākṣyo
viṣadrumālolalatāḥ striyaś ca // Mo_1,26.24 //
"haranti" svavaśīkurvanti mohayanti ca | "raktacchadāḥ" raktapattrāḥ raktādharāś ca | "lolalatāḥ" lolaśākhāḥ | lakṣaṇayā lolabhujāś ca || MoT_1,26.24 ||


ito 'nyataś copagatā mudhaiva
samānasaṅketanibandhabhāvā /
yātrāsamāsaṅgasamā narāṇāṃ
kalatramitravyavahāramāyā // Mo_1,26.25 //
"saṅketaḥ" gantavyo deśaḥ | yathā "yātrāyām" mārge janā anyo'nyaṃ rātrau militvā prabhāte "samānaṃ" gantavyaṃ deśaṃ gacchanti | tathā saṃsāre 'pi putrādibhiḥ militvā mṛtvā paralokākhyaṃ deśaṃ gacchanti | atas teṣu bhāvabandhanaṃ na yuktam iti bhāvaḥ || MoT_1,26.25 ||



pradīpaśāntiṣv iva bhuktabhūri-
daśāsv atisnehanibandhanīṣu /
saṃsāramāyāsu calācalāsu
na jñāyate tattvam atāttvikīṣu // Mo_1,26.26 //
"atisnehaḥ" rāgādhikyaṃ tailādhikyaṃ ca | sa "nibandhanaṃ" kāraṇaṃ yāsāṃ | tāḥ | tādṛśīṣu "calācalāsu" aticañcalāsu | "atāttvikīṣu" asatyāsu || MoT_1,26.26 ||


saṃsārasaṃrambhakucakrikeyam
prāvṛṭpayobudbudabhaṅgurāpi /
asāvadhānasya janasya buddhau
cirasthirapratyayam ātanoti // Mo_1,26.27 //
atyantam bhramyamāṇā "cakrikāpi" "asāvadhānasya" "janasya" "buddhau" "sthiratāpratyayam" ādadhāti | atyantavairāgyāviṣṭatvāt "ku"śabdaprayogaḥ || MoT_1,26.27 ||


śobhojjvalā dainyavaśād vinaṣṭā
guṇāḥ sthitāḥ samprati jarjaratve /
āśvāsanā dūrataram prayātā
janasya hemanta ivāmbujasya // Mo_1,26.28 //
"jarjaratve "nāśaunmukhye | "janasyāśvāsanā" janakartṛkam "āśvāsanam" || MoT_1,26.28 ||



punaḥ punar daivavaśād upetya
svadehabhāreṇa kṛtāpakāraḥ /
vilūyate yatra taruḥ kuṭhārair
āśvāsane tatra hi kaḥ prasaṅgaḥ // Mo_1,26.29 //
"yatra" "daivavaśāt" "punaḥ punaḥ upetya" upāgatya | "svadehabhāreṇa" śākhopaśākhabhāreṇa | "kṛtaḥ apakāro" yasya | saḥ "taruḥ kuṭhāraiḥ" janena "lūyate" | "hi" niścaye | "tatra" tasmin saṃsāre | "āśvāsane kaḥ prasaṅgaḥ" kā yuktatā bhavati | "upetye"ty asya "kṛte"ty anena sahaikakartṛtvam bṛhadbhayāya eva bhavatīti bhāvaḥ || MoT_1,26.29 ||



manoramasyāpy atidoṣavṛtter
antar vighātāya samutthitasya /
viṣadrumasyeva janasya saṅgād
āsādyate samprati mūrcchanaiva // Mo_1,26.30 //
"ati"śayena "doṣe vṛttir" yasya | saḥ | tasya || MoT_1,26.30 ||



kās tā dṛśo yāsu na santi doṣāḥ
kās tā diśo yāsu na duḥkhadāhaḥ /
kās tāḥ prajā yāsu na bhaṅguratvaṃ
kās tāḥ kriyā yāsu na nāma māyā // Mo_1,26.31 //
"māyā" kapaṭaḥ || MoT_1,26.31 ||



kalpābhidhānakṣaṇajīvino 'pi
kalpaughasaṅkhyākalane viriñcāḥ /
ataḥ kalāśālini kālajāle
laghutvadīrghatvadhiyo 'py asatyāḥ // Mo_1,26.32 //
"kalpaughānāṃ" "kalane" gaṇane | kriyamāṇe iti śeṣaḥ | kriyamāṇe sati "viriñcā" "api" brahmāṇaḥ api | "kalpābhidhānakṣaṇajīvinaḥ" bhavanti | phalitam āh"āta" iti | "kalāḥ" kalpādirūpāḥ | tābhih "śālini" || MoT_1,26.32 ||



sarvatra pāṣāṇamayā mahīdhrā
mṛdā mahī dārubhir eva vṛkṣāḥ /
māṃsair janāḥ pauruṣabaddhabhāvā
nāpūrvam astīha vikārahīnam // Mo_1,26.33 //
"pauruṣe" puruṣakāre | "baddhāḥ" "bhāvāḥ" yeṣāṃ | te || MoT_1,26.33 ||



ālokyate cetanayānuviddhaḥ
payonibaddho 'ṇucayo nabhaḥsthaḥ /
pṛthagvibhāgena padārthalakṣmyā
etaj jagan netarad asti kiñcit // Mo_1,26.34 //
"cetanayā" "anuviddhaḥ" vyāptaḥ | "nabhaḥsthaḥ payonibaddhaḥ" jalāvaṣṭabdhaḥ | "aṇucayaḥ" paramāṇusamūhaḥ | "padārthalakṣmyāḥ pṛthagvibhāgena" padārthalakṣmīsambandhinā pṛthak vibhāgena | "ālokyate" | uktaviśeṣaṇāḥ paramāṇava eva nānārthabhāvena dṛśyante iti yāvat | "etaj jagad" asti | "itarat" anyat | "kiñcij jagan" "nāsti" | padārthanānābhāvasyaiva jagattvāt | ataś cātra kiṃ ramyatvaṃ kiṃ vāramyatvam iti bhāvaḥ || MoT_1,26.34 ||



camatkṛtiś ceha manasviloke
cetaścamatkārakarī narāṇām /
svapne 'pi sādho viṣayaṃ kadācit
keṣāñcid apy eti na citrarūpā // Mo_1,26.35 //
"iha" saṃsāre | "manasviloke" iti nirdhāraṇe | teṣām api manasvinām madhye saṃsāre cittānandakarī "keṣām api" "camatkṛtir" nāstīti piṇḍārthaḥ || MoT_1,26.35 ||


adyāpayāte tv api kalpanāyā
ākāśavallīphalavanmahattve /
udeti nālobhalavāhatānām
udāravṛttāntamayī kathaiva // Mo_1,26.36 //
"adyā"smin vairāgyasamaye | "kalpanāyāḥ" saṃsārakalpanāyāḥ | "udāravṛttāntamayī" "kathā" adhyātmaśāstrakathā | "alobhalavāhatānāṃ" lobharahitānām asmākam ity arthaḥ | etadanubhave tu kā kathety "eva"śabdābhiprāyaḥ || MoT_1,26.36 ||



ādātum icchan padam uttamānāṃ
svacetasaivopahato 'dya lokaḥ /
pataty aśaṅkam paśur adrikūṭād
ānīlavallīdalavāñchayeva // Mo_1,26.37 //
spaṣṭam || MoT_1,26.37 ||


avāntaranyastanirarthakāṃsa-
cchāyālatāpattraphalaprasūnāḥ /
śarīra eva kṣatasampadaś ca
śvabhradrumā adyatanā narāś ca // Mo_1,26.38 //
"śvabhradrumāḥ" kathambhūtāḥ | "avāntare" na tu viśrāntisthāne | "nyastāni" sthāpitāni | "nirarthakāni" anyeṣām upayogitvābhāvena arthaśūnyāni | "aṃsacchāyālatāpattraphalaprasūnāni" yaiḥ | te | "adyatanāḥ" "narāḥ" kathambhūtāḥ | "śarīre eva "svaśarīrārtham eva | na tu paropakārārthaṃ | "kṣatasampadaḥ" | "aṃsa"śabdo 'tra lakṣaṇayā drumaskandavācakaḥ | anyat svayam abhyūham || MoT_1,26.38 ||



kvacij janā mārdavasundareṣu
kvacit karāleṣu ca sañcaranti /
daśāntarāleṣu nirantareṣu
vanāntaṣaṇḍeṣv iva kṛṣṇaśārāḥ // Mo_1,26.39 //
"daśāntarāleṣu" daśāmadhyeṣu || MoT_1,26.39 ||



dhātur navāni divasam prati bhīṣaṇāni
ramyāṇi cāvalulitākhilamānavāni /
kāryāṇi kaṣṭaphalapākahatodayāni
vismāpayanti na śaṭhasya manāṃsi keṣām // Mo_1,26.40 //
"dhātuḥ" daivasya | "divasam" "prati" pratidivasaṃ | "avalulitāḥ" cāñcalyaṃ nītāḥ | "akhilāḥ" "mānavāḥ" yaiḥ | tāni | "śaṭhasye"ti dhātāram prati kopātiśayaṃ sūcayati || MoT_1,26.40 ||



sargāntaślokenaitat samāpayati
janaḥ kāmāsakto vividhakukalāvedanaparaḥ
samaḥ svapne 'py asmiñ jagati sulabho nādya sujanaḥ /
kriyā duḥkhāsaṅgād vidhuravidhurā nūnam akhilā
na jāne netavyā katham iva daśā jīvitamayī // Mo_1,26.41 //
"kāmāsaktaḥ" svapnayojanamātraparaḥ | "āvedanam" prakaṭīkaraṇam | iti śivam || MoT_1,26.41 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ṣaḍviṃśaḥ sargaḥ || 1,26 ||


************************************************************************



evaṃ jagato nityatām uktvātha tadviparyāsaṃ kathayati
yac cedaṃ dṛśyate kiñcij jagat sthāvarajaṅgamam /
tat sarvam asthiram brahman svapnasaṅgamasannibham // Mo_1,27.1 //
spaṣṭam || MoT_1,27.1 ||



asthiratvam eva vistarataḥ kathayati
śuṣkasāgarasaṅkāśo nikhāto yo 'dya dṛśyate /
sa prātar abhrasaṃvīto nagaḥ sampadyate mune // Mo_1,27.2 //
"nikhātaḥ" gartaḥ || MoT_1,27.2 ||


yo vanavyūhavistīrṇo vilīḍhagagano 'calaḥ /
dinair eva sa yāty urvīsamatāṃ kūpatāṃ ca vā // Mo_1,27.3 //
"vilīḍhagaganaḥ" vyāptākāśaḥ || MoT_1,27.3 ||



yad aṅgam adya saṃvītaṃ kauśeyasragvilepanaiḥ /
digambaraṃ tad eva śvo dūre viśaritāvaṭe // Mo_1,27.4 //
"śvo" dine | "viśaritā" viśīrṇo bhavitā || MoT_1,27.4 ||


yatrādya nagaraṃ dṛṣṭaṃ vicitrācāracañcalam /
tatraivodeti divasaiḥ saṃśūnyāraṇyadhanvatā // Mo_1,27.5 //
"dhanvā" maruḥ || MoT_1,27.5 ||


yaḥ pumān adya tejasvī maṇḍalāny adhitiṣṭhati /
sa bhasmakūṭatāṃ rājan divasair adhigacchati // Mo_1,27.6 //
"maṇḍalāni" deśān | "bhasmakūṭatām" bhasmacayabhāvam || MoT_1,27.6 ||


araṇyānī mahābhīmā yā nabhomaṇḍalopamā /
patākācchāditākāśā saiva sampadyate purī // Mo_1,27.7 //
spaṣṭam|| MoT_1,27.7 ||


yā latāvalitā bhīmā bhāty adya vipināvalī /
divasair eva sā yāti mune marumahīpadam // Mo_1,27.8 //
"marumahīpadam" marumahībhāvam || MoT_1,27.8 ||


salilaṃ sthalatāṃ yāti sthalī bhavati vāribhūḥ /
viparyasyati sarvaṃ hi sakāṣṭhāmbutṛṇaṃ jagat // Mo_1,27.9 //
"viparyasyati" viparyāsaṃ yāti || MoT_1,27.9 ||


anityaṃ yauvanam bālyaṃ śarīraṃ dravyasañcayāḥ /
bhāvād bhāvāntaraṃ yānti taraṅgavad anāratam // Mo_1,27.10 //
"bhāvāt" ekasmāt svarūpāt | "bhāvāntaram" anyat svarūpam || MoT_1,27.10 ||



vātāttadīpakaśikhālolaṃ jagati jīvitam /
taḍitsphuraṇasaṅkāśā padārthaśrīr jagattraye // Mo_1,27.11 //
"vātāttā" vātagṛhītā || MoT_1,27.11 ||


viparyāsam iyaṃ yāti bhūribhūtaparamparā /
bījarāśir ivājasram prathamānaḥ punaḥ punaḥ // Mo_1,27.12 //
"prathamānaḥ" upyamānaḥ || MoT_1,27.12 ||


manaḥpavanaparyastabhūribhūtarajaḥpaṭā /
pātotpātaparāvartavarābhinayabhūṣitā // Mo_1,27.13 //
ālakṣyate sthitir iyaṃ jāgatī janitabhramā /
nṛttāveśavivṛtteva saṃsārārabhaṭīnaṭī // Mo_1,27.14 //
"manaḥpavanena paryastāḥ" īritāḥ | ye "bhūribhūtās" | te eva "rajaḥpaṭaḥ" rajovṛtaḥ paṭaḥ | yasyāḥ | sā | "parāvartaḥ" punarāvṛttirūpo bhramaḥ | "jāgatī sthitiḥ" jagadrūpā sthitiḥ | "nṛtte" ya "āveśaḥ" | tatra "vivṛttā" pravṛttā | "saṃsāre" saṃsārākhye raṅge | yā "ārabhaṭī" | tasyāḥ "naṭī" | "ārabhaṭī" raudrarasavṛttiviśeṣaḥ || MoT_1,27.13-14 ||



gandharvanagarākāraviparyāsavidhāyinī /
apāṅgabhaṅgurodāravyavahāramanoramā // Mo_1,27.15 //
taḍittaralam ālokam ātanvānā punaḥ punaḥ /
saṃsārarañjanā brahman nṛttamatteva rājate // Mo_1,27.16 //
"saṃsārasya" "rañjanā" rāgaḥ | "nṛttamatteva rājate" | kathambhūtā | "gandharvanagarākāraḥ" yaḥ "viparyāsaḥ" | taṃ "vidadhātī"ti tādṛśī | tath"āpāṅga"vat "bhaṅguraḥ" | "apāṅgeṣu" ca "bhaṅguraḥ" | yaḥ "udāravyavahāraḥ" | tena "manoramā" | tathā "taḍittaralam" aticañcalam | "ālokaṃ" svaviṣayaṃ jñānaṃ svaśarīraprakāśanaṃ ca | "punaḥ" "punaḥ ātanvānā" || MoT_1,27.15-16 ||


divasās te mahāntas te saṃpadas tāḥ kriyāś ca tāḥ /
sarvaṃ smṛtipadaṃ yātaṃ yāmo vayam api kṣaṇāt // Mo_1,27.17 //
"te divasā" iti sambandhaḥ | "tac"chabdena pūrvānubhūtānāṃ divasānāṃ smaraṇam || MoT_1,27.17 ||


pratyahaṃ kṣayam āyāti pratyahaṃ jāyate punaḥ /
adyāpi hatarūpāyā nānto 'syā dagdhasaṃsṛteḥ // Mo_1,27.18 //
spaṣṭam || MoT_1,27.18 ||


tiryaktvam puruṣā yānti tiryañco naratām api /
devāś cādevatāṃ caite kim eveha vibho sthiram // Mo_1,27.19 //
"tiryag"ādīnām "puruṣatvā"digamanaṃ svabhāvadvāreṇa jñeyam atha vā janmadvāreṇa || MoT_1,27.19 ||



racayan raśmijālena rātryahāni punaḥ punaḥ /
ativāhya raviḥ kāyaṃ vināśāvadhim īkṣate // Mo_1,27.20 //
"ativāhya" pravartayitvā || MoT_1,27.20 ||



brahmā viṣṇuś ca rudraś ca sarvā vā bhūtajātayaḥ /
nāśam evānudhāvanti salilānīva vāḍavam // Mo_1,27.21 //
spaṣṭam || MoT_1,27.21 ||


dyauḥ kṣamā vāyur ākāśam parvatāḥ sarito diśaḥ /
vināśavāḍavasyaitat sarvaṃ saṃśuṣkam indhanam // Mo_1,27.22 //
sudāhyatvasūcakaṃ "saṃśuṣkam" iti || MoT_1,27.22 ||



dhanāni bandhavo bhṛtyā mitrāṇi vibhavāś ca ye /
vināśabhayabhītasya sarvaṃ nīrasatāṃ gatam // Mo_1,27.23 //
mameti śeṣaḥ || MoT_1,27.23 ||


svadante tāvad evaite bhāvā jagati dhīmataḥ /
yāvat smṛtipathaṃ yāti na vināśakurākṣasaḥ // Mo_1,27.24 //
spaṣṭam || MoT_1,27.24 ||


kṣaṇam aiśvaryam āyāti kṣaṇam eti daridratā /
kṣaṇaṃ vigatarogatvaṃ kṣaṇam āgatarogatā // Mo_1,27.25 //
spaṣṭam || MoT_1,27.25 ||


pratikṣaṇaṃ viparyāsadāyinā mahatāmunā /
jagadbhrameṇa ke nāma dhīmanto 'pi na mohitāḥ // Mo_1,27.26 //
spaṣṭam || MoT_1,27.26 ||


tamaḥpaṅkasamālabdhaṃ kṣaṇam ākāśamaṇḍalam /
kṣaṇaṃ kanakaniḥṣyandakomalālokasundaram // Mo_1,27.27 //
kṣaṇaṃ jaladanīlābjamālāvalitakoṭaram /
kṣaṇam uḍḍāmararavaṃ kṣaṇam mūkam avasthitam // Mo_1,27.28 //
kṣaṇaṃ tārāvilasitaṃ kṣaṇam arkeṇa bhūṣitam /
kṣaṇam indukṛtāhlādaṃ kṣaṇaṃ sarvabahiṣkṛtam // Mo_1,27.29 //
āgamāpāyaparayā sthityā saṃsthitanāśayā /
na bibhetīha saṃsāre dhīro 'pi ka ivānayā // Mo_1,27.30 //
"sthityā" jagatsthityā | adhīrasya tu kā katheti bhāvaḥ || MoT_1,27.27-30 ||



āpadaḥ kṣaṇam āyānti kṣaṇam āyānti sampadaḥ /
kṣaṇaṃ janmātha maraṇam mune kim iva na kṣaṇam // Mo_1,27.31 //
sarvaṃ kṣaṇe eveti bhāvaḥ || MoT_1,27.31 ||


prāg āsīd anya eveha tātas tv anyetaro dinaiḥ /
apy ekarūpam bhagavan kiñcid asti na susthitam // Mo_1,27.32 //
"tātaḥ" daśarathaḥ | anyasmāt itaraḥ "anyetaraḥ" || MoT_1,27.32 ||



ghaṭasya paṭatā dṛṣṭā paṭasyāpi ghaṭasthitiḥ /
na tad asti na yad dṛṣṭaṃ viparyasyati saṃsṛtau // Mo_1,27.33 //
"dṛṣṭe"ti kālāntare mṛttvādidvāreṇa "viparyasyati" viparyāsaṃ gacchati || MoT_1,27.33 ||



aśūreṇa hataḥ śūra ekenāpi śataṃ hatam /
prākṛtāḥ prabhutāṃ yātāḥ sarvam āvartate jagat // Mo_1,27.34 //
"āvartate" parivṛttim bhajate || MoT_1,27.34 ||


janateyaṃ viparyāsam ajasram anugacchati /
jaḍaspandaparāmarśāt taraṅgānām ivāvalī // Mo_1,27.35 //
"janatā" janasamūhaḥ | "jaḍaḥ" yaḥ "spandaḥ" | tena "parāmarśāt" sparśāt | jāḍyād iti yāvat | "jalaspande" yaḥ "parāmarśaḥ" | tasmād iti ca || MoT_1,27.35 ||


bālyam adya dinair eva yauvanaśrīs tato jarā /
dehe 'pi naikarūpatvaṃ kāsthā bāhyeṣu vastuṣu // Mo_1,27.36 //
spaṣṭam || MoT_1,27.36 ||


kṣaṇam ānanditām eti kṣaṇam eti viṣāditām /
kṣaṇam saumyatvam āyāti sarvasmin naṭavan manaḥ // Mo_1,27.37 //
"sarvasmin" sarveṣu prāṇiṣu || MoT_1,27.37 ||


itaś cānyad itaś cānyad itaś cānyad ayaṃ vidhiḥ /
racayan vastu nāyāti khedaṃ līlāsv ivārbhakaḥ // Mo_1,27.38 //
spaṣṭam || MoT_1,27.38 ||


cinoty unmādayaty atti nihanty āhanti cātmasāt /
jagajjātam idaṃ dhātā pātotpātaśatair iha // Mo_1,27.39 //
"cinoti" vardhayati | "unmādayati" unmādayuktaṃ karoti | "atti" bhakṣayati | "nihanti" nāśayati | "ātmasāt" svādhīnaṃ karoti | "āhanti" samantān nāśayati || MoT_1,27.39 ||


kṣaṇenānyad dinenānyat prātar anyad itas tataḥ /
racayan vañcanādakṣo vidhir dṛṣṭo na kenacit // Mo_1,27.40 //
"na dṛṣṭaḥ" indriyāviṣayatvāt || MoT_1,27.40 ||


yad adya tat tu na prātar yat prātas tat tu nādya ca /
yad anyadā tu tan nādya sarvam āvartatetarām // Mo_1,27.41 //
spaṣṭam || MoT_1,27.41 ||


santatānīha duḥkhāni sukhāni viralāni ca /
satataṃ rātryahānīva vivartante naram prati // Mo_1,27.42 //
"santatāni" avicchinnāni | "naram" "prati" pratipuruṣam || MoT_1,27.42 ||


āvirbhāvatirobhāvabhāgino bhavabhāvinaḥ /
janasya sthiratāṃ yānti nāpado na ca sampadaḥ // Mo_1,27.43 //
"āvirbhāvatirobhāvau" bhajatīti tādṛśasya | "bhave" saṃsāre | "bhāvaḥ" prādurbhāvaḥ asyāstīti tādṛśasya || MoT_1,27.43 ||



padāt padam ayam pāpaḥ sarvam āpadi pātayan /
helāvivalitāśeṣaḥ khalaḥ kālalavaḥ sthitaḥ // Mo_1,27.44 //
gacchann iti śeṣaḥ | "helayā" na tu yatnena | "vivalitaṃ" rūpāntaraṃ nītam | "aśeṣam" | yena | saḥ || MoT_1,27.44 ||



sargāntaślokenaitat samāpayati
samaviṣamadaśāvipākabhinnās
tribhuvanabhūtaparamparāphalaughāḥ /
samayapavanapātitāḥ patanti
pratidinam ātatasaṃsṛtidrumebhyaḥ // Mo_1,27.45 //
"samaviṣamadaśānāṃ" yaḥ "vipākaḥ" pariṇāmaḥ | tena "bhinnāḥ" | tadyuktā iti yāvad | iti śivam || MoT_1,27.45 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe saptaviṃśaḥ sargaḥ || 1,27 ||


************************************************************************



evaṃ jagadviparyāsam uktvā tatkṛtāṃ viraktatām pratipādayati
iti medhopadāvāgnidagdhe mahati cetasi /
prasphuranti na bhogāśā mṛgatṛṣṇāḥ sarassv iva // Mo_1,28.1 //
"iti medhā" eva "upadāvāgni" davāgnisamīpaṃ | tena "dagdhe" || MoT_1,28.1 ||



pratyahaṃ cātikaṭutām eti saṃsārasaṃsthitiḥ /
kālapākavaśollāsirasā nimbalatā yathā // Mo_1,28.2 //
"kālena" yaḥ "pākaḥ" | tasya "vaśena" "ullāsī rasaḥ" | yasyāḥ | sā || MoT_1,28.2 ||



vṛddhim āyāti daurjanyaṃ saujanyaṃ yāti tānavam /
karañjakarkaśe rājan pratyahaṃ janacetasi // Mo_1,28.3 //
"rājann" iti daśaratham prati kathanaṃ | "karañja"vat kaṇṭakavat | "karkaśe" | ato janasaṅgān mama viratiḥ jāteti bhāvaḥ | evam uttaratrāpi bhāvayojanā kāryā || MoT_1,28.3 ||



bhajyate bhuvi maryādā jhagity eva diśam prati /
śuṣkeva māṣaśimikā ṭāṅkārakaṭhināravam // Mo_1,28.4 //
spaṣṭam || MoT_1,28.4 ||


rājyebhyo bhogapūgebhyaś cintāvanto mahīśvarāḥ /
nirastacintākalikā varam ekāntaśīlatā // Mo_1,28.5 //
"rājyebhyaḥ" rājyārthaṃ | phalitam āha "niraste"ti | ata ity adhyāhāryam || MoT_1,28.5 ||



nānandāya mamodyānaṃ na sukhāya mama śriyaḥ /
na harṣāya mamārthāśā śāmyāmi manasā saha // Mo_1,28.6 //
"śāmyāmi" nakiñcidbhāvanārūpāṃ śāntiṃ gacchāmi || MoT_1,28.6 ||



anityaś cāsukho lokas tṛṣṇā tāta durutsahā /
cāpalopahataṃ cetaḥ kathaṃ yāsyāmi nirvṛtim // Mo_1,28.7 //
spaṣṭam || MoT_1,28.7 ||


nābhinandāmi maraṇaṃ nābhinandāmi jīvitam /
yathā tiṣṭhāmi tiṣṭhāmi tathaiva vigatajvaram // Mo_1,28.8 //
anena ca jīvanmuktapadaprāptiḥ sūcitā | yathāsthitatvaṃ hi jīvanmuktiṃ vinā na sambhavati || MoT_1,28.8 ||


kim me rājyena kim bhogaiḥ kim arthena kim īhitaiḥ /
ahaṅkāravaśād etat sa eva galito mama // Mo_1,28.9 //
ahaṅkārābhāve hi nakiñcidrūpaḥ puruṣaḥ kiṃ rājyādibhiḥ karoti || MoT_1,28.9 ||


janmāvalivaratrāyām indriyagranthayo dṛḍhāḥ /
ye lagnās tadvimokṣārthaṃ ye yatante ta uttamāḥ // Mo_1,28.10 //
"tadvimokṣārtham" indriyagranthīnāṃ vimokṣārtham || MoT_1,28.10 ||


dalitam māninīlokair mano makaraketunā /
komalaṃ khuraniṣpeṣaiḥ kamalaṃ kariṇā yathā // Mo_1,28.11 //
"māninīlokair" iti karaṇe tṛtīyā | "makaraketune"ti kartari || MoT_1,28.11 ||



adya cet svasthayā buddhyā munīndra na cikitsyate /
bhūyaś cittacikitsāyāṃ kaḥ kilāvasaraḥ kutaḥ // Mo_1,28.12 //
"adya" sakalasāmagryānvite samaye |" svasthayā" sāmagrīcintāhīnayā || MoT_1,28.12 ||



nanu viṣayasevanaṃ tyaktvā kimarthaṃ cikitsāparo bhavatīty | atrāha
viṣaṃ viṣayavaiṣamyaṃ na viṣaṃ viṣam ucyate /
janmāntaraghnā viṣayā ekadehaharaṃ viṣam // Mo_1,28.13 //
"viṣaya"kṛtaṃ "vaiṣamyam" "viṣayavaiṣamyam" | janmāntare ghnanti "janmāntaraghnāḥ" vāsanārūpeṇa sthitatvāt || MoT_1,28.13 ||


te eva tvāṃ kathaṃ tyajantīty | atrāha
na sukhāni na duḥkhāni na mitrāṇi na bandhavaḥ /
na jīvitaṃ na maraṇam bandhāya jñasya cetasaḥ // Mo_1,28.14 //
"bandhāya" rāgadveṣarūpabandhārtham | "jñasya" vivekayuktasya || MoT_1,28.14 ||



nanu tava jñatvam kuto 'stīty apekṣāyāṃ jñatvakaraṇam eva prārthayate
tad bhavāmi yathā brahman pūrvāparavidāṃ vara /
vītaśokabhayāyāso jñas tathopadiśāśu me // Mo_1,28.15 //
spaṣṭam || MoT_1,28.15 ||



vāsanājālavalitā duḥkhakaṇṭakasaṅkaṭā /
nipātotpātabahalā bhīmarūpājñatāṭavī // Mo_1,28.16 //
spaṣṭam || MoT_1,28.16 ||



krakacograviniṣpeṣaṃ soḍhuṃ śakto 'smy aham mune /
saṃsāravyavahārotthaṃ nāśāviṣamavaiśasam // Mo_1,28.17 //
"āśayā" kṛtaṃ "viṣamaṃ" kaṭhinaṃ |" vaiśasaṃ" hiṃsanam | "āśāviṣamavaiśasam" || MoT_1,28.17 ||


idaṃ nāstīdam astīti vyavahārijanabhramaḥ /
dhunotīdaṃ calaṃ ceto rajorāśim ivānilaḥ // Mo_1,28.18 //
"dhunoti" kampayati || MoT_1,28.18 ||


tṛṣṇātantulavaprotajīvasañcayamauktikam /
cidacchāṅgatayā nityam prakaṭaṃ cittanāyakam // Mo_1,28.19 //
saṃsārahāram aratiḥ kālavyālavibhūṣaṇam /
troṭayāmy aham akrūrāṃ vāgurām iva kesarī // Mo_1,28.20 //
"cid" eva "accham" "aṅgaṃ" svarūpaṃ | yasya | saḥ | tasya bhāvaḥ tat"tā" | tayā | cinmayatvenety arthaḥ | "prakaṭaṃ" vedyatāṃ gataṃ | anyathā hy acinmayatvād vedyaṃ kathaṃ syāt | cidaviruddhasya cidviṣayībhūtasyaiva vedyatvayogāt | hāro 'pi "prakaṭo" viśado bhavati | "cittam" eva "nāyakaḥ" utpādakaḥ madhyamaṇiś ca yasya | taṃ | "akrūrāṃ" komalām || MoT_1,28.19-20 ||



nīhāraṃ hṛdayāṭavyām manastimiram āśu me /
kenacij jñānadīpena bhinddhi tattvavidāṃ vara // Mo_1,28.21 //
"hṛdayaṃ" hṛtkamalam eva "aṭavī" araṇyaṃ | tatra "nīhāraṃ" | "kenacit" mayā vaktum aśakyenety arthaḥ || MoT_1,28.21 ||


vidyanta eveha na te mahātman
durādhayo na kṣayam āpnuvanti /
ye saṅgamenottamamānasānāṃ
niśātamāṃsīva niśākareṇa // Mo_1,28.22 //
he "mahātman" | "iha" loke | "te" "durādhayo na" "vidyante" "ye uttamānāṃ saṅgamena kṣayaṃ nāpnuvanti" uttamamānasasaṅgamena durādhayo naśyantīti bhavaḥ || MoT_1,28.22 ||


sargāntaślokenaitat samāpayati
āyur vāyuvighaṭṭitābjapaṭalīlambāmbuvad bhaṅguram
bhogā meghavitānamadhyavilasatsaudāminīcañcalāḥ /
lolo yauvanalālanājalarayaś cety ākalayya drutam
mudraivādridṛḍhārpitā nanu mayā citte ciraṃ śāntaye // Mo_1,28.23 //
"vitānaṃ" samūhaḥ | "lālanā "vilāsaḥ | "mudrā "maunaṃ | viṣayāvedanam iti yāvat | kathambhūtā | "adri"vat parvatavat | "dṛḍhā" | iti śivam || MoT_1,28.23 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe aṣṭāviṃśaḥ sargaḥ || 1,28 ||



************************************************************************



evaṃ viraktatām pratipādya vairāgyakṛtāvasthākathanam prastauti
evam abhyutthitānarthasārthasaṅkaṭakoṭaram /
jagad ālokya nirmagnam manomananakardame // Mo_1,29.1 //
mano me bhramatīvedaṃ sambhramaś copajāyate /
gātrāṇi parikampante pattrāṇīva jarattaroḥ // Mo_1,29.2 //
"abhyutthitaḥ" abhyudayaṃ gataḥ | yaḥ "anarthasārtha" anarthasamūhaḥ | tena "saṅkaṭaṃ" sambādhaṃ | "koṭaram" madhyaṃ yasya | tat | "manasaḥ" yat "mananam" saṅkalpāparaparyāyo mananākhyo dharmaḥ | sa eva "kardamaḥ" | tasmin | "sambhramaḥ" āvegaḥ | "gātrāṇi" aṅgāni || MoT_1,29.1-2 ||



anāptottamasantoṣacaryotsaṅgākulā matiḥ /
śūnyāspadā bibhetīha bālevālpabaleśvarā // Mo_1,29.3 //
"anāptaḥ" | "uttamasantoṣasya" "caryāyāḥ" kriyāyāḥ | "utsaṅgaḥ" aṅkaḥ | yayā | sā | tādṛśī cāsau | ata ev"ākulā" ca | bālāpi anāptapriyasakhyutsaṅgā ākulā bhavati | "alpabalaḥ īśvaraḥ" patir | yasyāḥ | sā | tādṛśī | "alpabaleśvarā" "śūnyāspadā" ca "bālā" hi sphuṭam eva "bibheti" || MoT_1,29.3 ||



vikalpebhyo luṭhanty etāś cāntaḥkaraṇavṛttayaḥ /
śvabhrebhya iva sāraṅgyas tucchālambaviḍambitāḥ // Mo_1,29.4 //
"vikalpebhyaḥ luṭhanti" anyasmād vikalpād anyaṃ vikalpaṃ yāntīty arthaḥ | atha vā mohaṃ gacchantīti | "antaḥkaraṇavṛttayaḥ" kathambhūtāḥ | "tucchāḥ" āpātamātramadhuratvena niḥsārāḥ | ye "ālaṃbāḥ" viṣayās | tair "viḍambitāḥ" vañcitāḥ | svonmukhāḥ kṛtā iti yāvat || MoT_1,29.4 ||


avivekāspadabhraṣṭāḥ kaṣṭe rūḍhā na satpade /
andhakūpam ivāpannā varākāś cakṣurādayaḥ // Mo_1,29.5 //
"kaṣṭe" viṣayākhye kaṭhine pade ity arthaḥ || MoT_1,29.5 ||



nāvasthitim upāyāti na ca yāti yathepsitam /
cintā jīveśvarāyattā kāntevāpriyasadmani // Mo_1,29.6 //
"avasthitiṃ" sthairyam | "yathepsitaṃ" svepsitam artham | "jīva" eva "īśvaraḥ" patiḥ | tasy"āyattā" vaśyā | na tu svādhīnā || MoT_1,29.6 ||



jarjarīkṛtya vastūni tyajantī bibhratī tathā /
mārgaśīrṣāntavallīva dhṛtir vidhuratāṃ gatā // Mo_1,29.7 //
"jarjarīkṛtya" nirvidya | "bibhratī" | navānīti śeṣaḥ | "dhṛtiḥ" lakṣaṇayā dhairyayuktā buddhiḥ || MoT_1,29.7 ||



apahastitasarvārtham anavasthitir āsthitā /
gṛhītvotsṛjya cātmānam avasthitir avasthitā // Mo_1,29.8 //
"apahastitāḥ" hastād atītāḥ | "sarve arthāḥ" yatra | tat | niṣprayojanam ity arthaḥ | "anavasthitiḥ" aratiḥ | "āsthitā" dṛḍhībhūtā | "avasthitiḥ" ratiḥ | "ātmānaṃ gṛhītvā" "utsṛjya" "cāvasthitā" śithilāsthitety arthaḥ || MoT_1,29.8 ||



calitācalitenāntar avaṣṭambhena me matiḥ /
daridrācchinavṛkṣasya mūleneva viḍambyate // Mo_1,29.9 //
"daridrair" "ācchinno" mūladeśaṃ tāvac chinnaś cāsau "vṛkṣas" | tasya | "mūlena" kartrā | "calitācalitena" kṣaṇam acalitena | avaṣṭambhena dhairyeṇa | upalakṣitā "me matiḥ" karmabhūtā | "viḍambyate" 'nukriyate | mama matiḥ chinnavṛkṣamūlavad aṅkurajananāsamarthāstīti bhāvaḥ || MoT_1,29.9 ||



cetaś cañcalam ābhogi bhuvanāntarvihāri ca /
sambhramaṃ na jahātīdaṃ svavimānam ivāmaraḥ // Mo_1,29.10 //
"ābhogi" vikalpākhyābhogayuktam || MoT_1,29.10 ||


ato 'tuccham anāyāsam anupādhi gatabhramam /
kiṃ tat sthitipadaṃ sādhu yatra śaṅkā na vidyate // Mo_1,29.11 //
sthiteḥ yogyam padaṃ "sthitipadaṃ" | "śaṅkā" nāśaśaṅkā || MoT_1,29.11 ||


sarvārambhasamārambhāḥ sujanā janakādayaḥ /
vyavahāraparā eva katham uttamatāṃ gatāḥ // Mo_1,29.12 //
"sarvārambheṣu" "samārambhaḥ" yeṣāṃ | te | sarvakāriṇa iti yāvat | "sujanāḥ" sajjanāḥ || MoT_1,29.12 ||



lagnenāpi kilāṅgeṣu bahunā bahumānada /
kathaṃ saṃsārapaṅkena pumān iha na lipyate // Mo_1,29.13 //
"na lipyate" svāveśenotpāditaiḥ sukhaduḥkhaiḥ pāpapuṇyaiḥ vā na gṛhyate || MoT_1,29.13 ||



kāṃ dṛṣṭiṃ samupāśritya bhavanto vītakalmaṣāḥ /
mahānto vicarantīha jīvanmuktā mahāśayāḥ // Mo_1,29.14 //
tāṃ mamāpi kathayeti bhāvaḥ || MoT_1,29.14 ||



lobhayanto bhayāyaiva viṣayābhogabhoginaḥ /
bhaṅgurākāravibhavāḥ katham āyānti bhavyatām // Mo_1,29.15 //
"bhayāyaiva" na tu sukhāya | "viṣayāḥ" "bhogāḥ" | bhogayuktāḥ bhoginaḥ "bhogabhoginaḥ" | puṣṭaśarīrayuktasarpasvarūpā ity arthaḥ | "bhaṅgurākāraḥ" naśvarasvabhāvaḥ | "vibhavaḥ" utpattisthānaṃ yeṣāṃ | tādṛśāḥ | "bhavyatām" rāgānutpādakatvena ramaṇīyatām || MoT_1,29.15 ||



mohamātaṅgamṛditā kalaṅkakalitāntarā /
param prasādam āyāti śemuṣīsarasī katham // Mo_1,29.16 //
"kalaṅko" 'tra bhogānusandhānarūpo jñeyaḥ | "śemuṣī" buddhiḥ | sā eva "sarasī" || MoT_1,29.16 ||


saṃsāra eva nivasañ jano vyavaharann api /
na bandhaṃ katham āyāti padmapattre payo yathā // Mo_1,29.17 //
spaṣṭam || MoT_1,29.17 ||


ātmavat tṛṇavad vedaṃ sakalaṃ janayañ jagat /
katham uttamatām eti manomanmatham aspṛśan // Mo_1,29.18 //
"janayan" utpādayan | lakṣaṇayā jānan ity arthaḥ | mano hi jñānadvāreṇaiva sarvaṃ janayati | ubhayathāpi mokṣa eveti bhāvaḥ || MoT_1,29.18 ||



kam mahāpuruṣam pāram upayātam bhavodadheḥ /
ācāreṇānusṛtyāyaṃ jano yāti na duṣkṛtam // Mo_1,29.19 //
spaṣṭam || MoT_1,29.19 ||



kiṃ tad yad ucitaṃ śreyaḥ kiṃ tat syād ucitam phalam /
vartitavyaṃ ca saṃsāre kathaṃ nāmāsamañjase // Mo_1,29.20 //
"asamañjase" viṣame || MoT_1,29.20 ||


tat tvaṃ kathaya me kiñcid yenāsya jagataḥ prabho /
vedmi pūrvāparāṃ dhātuś ceṣṭitasyāsamasthitim // Mo_1,29.21 //
"yena" kathitena | "pūrvāparām" antadvayayuktāṃ | samagrām iti yāvat | "asamasthitiṃ" viṣamāṃ sthitiṃ | "jagataḥ" kathambhūtasya | "dhātuś ceṣṭitasya" brahmaceṣṭitarūpasya || MoT_1,29.21 ||



hṛdayākāśaśaśinaś cetaso malamārjanam /
yathā me jāyatām brahmaṃs tathā nirvighnam ācara // Mo_1,29.22 //
"malamārjanam" saṃśayākhyamalamārjanam || MoT_1,29.22 ||


kim iha syād upādeyaṃ kiṃ vā heyam athetarat /
kathaṃ viśrāntim āyātu cetaś capalam adrivat // Mo_1,29.23 //
"atha itarad" upekṣyaṃ kim asti || MoT_1,29.23 ||


kena pāvanamantreṇa duḥsaṃsṛtiviṣūcikā /
śāmyatīyam anāyāsam āyāsaśatakāriṇī // Mo_1,29.24 //
spaṣṭam || MoT_1,29.24 ||


kathaṃ śītalatām antar ānandatarumañjarīm /
pūrṇacandra ivākṣīṇāṃ rākām āsādayāmy aham // Mo_1,29.25 //
"rākām" pūrṇimām || MoT_1,29.25 ||


prāpyāntaḥpūrṇatām antar na śocāmi yathā punaḥ /
santo bhavantas tattvajñās tathaivopadiśantu mām // Mo_1,29.26 //
spaṣṭam || MoT_1,29.26 ||


sargāntaślokenaitat samāpayati
anuttamānandapadapradhāna-
viśrāntiriktaṃ hi mano mahātman /
kadarthayantīha bhṛśaṃ vikalpāḥ
śvāno vane deham ivālpajīvam // Mo_1,29.27 //
"kadarthayanti" mathnanti | iti śivam || MoT_1,29.27 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ekonatriṃśaḥ sargaḥ || 1,29 ||


************************************************************************


evaṃ vairāgyakṛtām avasthām uktvopāyam praṣṭum prastāvaṃ karoti
proccavṛkṣacalatpattralambāmbulavabhaṅgure /
āyuṣīśānaśītāṃśukalāmṛduni dehake // Mo_1,30.1 //
kedāraviraṭadbhekakaṇṭhatvakkoṇabhaṅgure /
vāgurāvalaye jantoḥ suhṛtsvajanasaṅgame // Mo_1,30.2 //
vāsanāvātavalitakadāśātaḍiti sphuṭe /
mohaughamihikāmeghe ghanaṃ sphūrjati garjati // Mo_1,30.3 //
nṛtyaty uttāṇḍavaṃ caṇḍe lole lobhakalāpini /
suvikāsini sasphoṭam anarthakuṭajadrume // Mo_1,30.4 //
krūre kṛtāntamārjāre sarvabhūtākhuhāriṇi /
aśrutaspandasañcāre kuto 'py uparipātini // Mo_1,30.5 //
ka upāyo gatiḥ kā vā kā cintā kaḥ samāśrayaḥ /
keneyam aśubhodarkā na bhavej jīvitāṭavī // Mo_1,30.6 //
"īśānaśītāṃśukalā" śrīmahādevaśiraḥsthā candrakalā | "raṭataḥ" "bhekasya" "kaṇṭhatvak" atyanta"bhaṅgurā" bhavati | iti tasyā upamānatvena grahaṇam | "mihikāmeghe" nīhārayukte meghe | kathambhūte | "vāsanāvātena" "valitā" yā "kadāśā" | sā eva "taḍit" yasya | tādṛśe | "sphuṭe" prakaṭe | "uttāṇḍavam" udbhaṭaṃ | "sasphoṭaṃ" sphoṭanayuktaṃ | saśabdam ity arthaḥ | "kṛtāntamārjāre" kathambhūte | "aśrutaspandaḥ sañcāro" yasya | tādṛśe | "aśubhodarkā" aśubhottaraphalā | "jīvitam" ev"āṭavī "vanam || MoT_1,30.1-6 ||



na tad asti pṛthivyāṃ vā divi deveṣu vā kvacit /
sudhiyas tuccham apy etad yan na yāti naramyatām // Mo_1,30.7 //
"naramyatām" iti nasamāso 'yam | aramyatām ity arthaḥ | sarvatra sarvaṃ "sudhiyaḥ" aramyatām eva yātīti bhāvaḥ | "api"śabdaḥ pādapūraṇārthaḥ || MoT_1,30.7 ||



ayaṃ hi dagdhasaṃsāro nīrandhrakalanākulaḥ /
kathaṃ susvādutām eti nīraso mūrkhatāṃ vinā // Mo_1,30.8 //
mūrkhatābhāve tu susvādutāṃ naitīti bhāvaḥ || MoT_1,30.8 ||



āśāprativiṣā kena kṣīrasnānena ramyatām /
upaiti puṣpaśubhreṇa madhuneva suvallarī // Mo_1,30.9 //
"āśā" eva "prativiṣā" tiktadravyaviśeṣaḥ | "kena" kiṃrūpeṇa || MoT_1,30.9 ||


apamṛṣṭamalodeti kṣālanenāmṛtadyutiḥ /
manaścandramasaḥ kena tena kāmakalaṅkinaḥ // Mo_1,30.10 //
"apamṛṣṭaṃ" naṣṭaṃ | "malaṃ" yasyāḥ | sā | "tena kene"ti praśnaḥ | "manaścandramasaḥ" kathambhūtasya | "kāma" eva "kalaṅkaḥ" asyāstīti tādṛśasya || MoT_1,30.10 ||


dṛṣṭasaṃsāragatinā dṛṣṭādṛṣṭavināśinā /
kena vā vyavahartavyaṃ saṃsāravanavīthiṣu // Mo_1,30.11 //
"dṛṣṭā saṃsāragatiḥ" yena | saḥ | tādṛśena | tathā "dṛṣṭādṛṣṭayoḥ" "vināśaḥ" asyāstīti tādṛśena | padārthadharmādharmādyatītena jīvanmukteneti yāvat | "kena" kena prakāreṇa | "saṃsāravanavīthiṣu" "vyavahartavyaṃ" vyavahāraḥ kartavyaḥ || MoT_1,30.11 ||



rāgadveṣamahārogā bhogapūrvātipūtayaḥ /
kathaṃ jantor na bādhante saṃsārāraṇyacāriṇaḥ // Mo_1,30.12 //
"rāgadveṣā" eva "mahārogāḥ" | te "saṃsārāraṇyacāriṇo" "jantoḥ" "kathaṃ na bādhante" | kathambhūtāḥ | "bhogāḥ" "pūrvaṃ" kāraṇaṃ yeṣāṃ | te | tādṛśāś ca te '"tipūtayaś" cātiśayena pūtigandhāś ca | rāgādigataḥ pūtiḥ | arthād dharṣāmarṣau jñeyau | rogapakṣe tu prasiddhārtha eva || MoT_1,30.12 ||



kathaṃ ca vīravairāgnau patatāpi na dahyate /
pāvake pārateneva rasena rasaśālinā // Mo_1,30.13 //
kṣatriyajātitvād iyam uktiḥ | "pāratena" "rasena" pāratākhyena rasena || MoT_1,30.13 ||



tarhi vyavahāram eva mā kurv ity | atrāha
yasmāt kila jagaty asmin vyavahārakriyāṃ vinā /
na sthitiḥ sambhavaty abdhau patitasyājalā yathā // Mo_1,30.14 //
"sthitiḥ" avasthānam || MoT_1,30.14 ||



rāgadveṣavinirmuktā sukhaduḥkhavivarjitā /
kṛśānor dāhahīneva śikhā nāstīha satkriyā // Mo_1,30.15 //
spaṣṭam || MoT_1,30.15 ||



manomananamāninyāḥ satāpābhuvanatraye /
kṣayayuktiṃ vinā nāsti brūta tām alam uttamāḥ // Mo_1,30.16 //
"satāpam" "ā" samantād | "bhuvanatrayaṃ" | tasmin | "manomananamāninyāḥ kṣayayuktiṃ vinā nāsti" | tāpanivārakam iti śeṣaḥ | ataḥ he "uttamāḥ" | yūyaṃ "tāṃ" kṣayayuktiṃ | "brūta" kathayatety arthaḥ | "ābhuvanatrayam" ity atra āṅśabdo 'bhivyāpakatve samasyate | ānagaram itivat || MoT_1,30.16 ||


vyavahāravato yuktyā duḥkhaṃ nāyāti me yayā /
atha vāvyavahārasya brūta tāṃ gatim uttamāḥ // Mo_1,30.17 //
"avyavahārasya" vyavahārarahitasya | "gatiṃ" yuktim || MoT_1,30.17 ||


tat kathaṃ kena vā kiṃ vā kṛtam uttamacetasā /
pūrvaṃ yenaiti viśrāmam paramam pāvanam manaḥ // Mo_1,30.18 //
"kenottamacetasā" "pūrvaṃ" "tat kiṃ" "kṛtaṃ kathaṃ vā kṛtaṃ" | "tat kim" mameti śeṣaḥ | "yena" mama "manaḥ" "pāvanaṃ" sat "paramaṃ" "viśrāmam" "eti" || MoT_1,30.18 ||


yathā jānāsi bhagavaṃs tathā mohanivṛttaye /
brūhi me sādhavo yena yūyaṃ nirduḥkhatāṃ gatāḥ // Mo_1,30.19 //
nanu katham ahaṃ vaktuṃ śaknomīty atrāha "sādhava" iti || MoT_1,30.19 ||



atha vā tādṛśī brahman yuktir yadi na vidyate /
na yuktim mama vā kaścid vidyamānām api sphuṭam // Mo_1,30.20 //
svayaṃ caiva na cāpnomi tāṃ viśrāntim anuttamām /
tad ahaṃ tyaktasarveho nirahaṅkāratāṃ gataḥ // Mo_1,30.21 //
na bhokṣye na pibāmy ambu nāham paridadhe 'mbaram /
karomi nāhaṃ vyāpāraṃ snānadānāśanādikam // Mo_1,30.22 //
he "brahmann" | "atha vā yadi tādṛśī yuktir na vidyate" | "vidyamānām api" "yuktiṃ kaścin mama" "na" | brūyād iti śeṣaḥ | "svayaṃ ca" "tāṃ viśrāntiṃ" yathātathālabdhayā yuktyā kṛtaṃ viśrāmam | atijāḍyān "nāpnomi" | "tadāhaṃ" "nirahaṅkāratāṃ gato" 'ta eva "tyaktasarvehaḥ "san | "na bhokṣye" | tilakam || MoT_1,30.20-22 ||



" " na ca tiṣṭhāmi kāryeṣu sampatsv āpaddaśāsu ca /
na kiñcid api vāñchāmi dehatyāgād ṛte mune // Mo_1,30.23 //
spaṣṭam || MoT_1,30.23 ||


kevalaṃ vigatāśaṅko nirmamo gatamatsaraḥ /
maunam eveha tiṣṭhāmi lipikarmasv ivārpitaḥ // Mo_1,30.24 //
spaṣṭam || MoT_1,30.24 ||


atha krameṇa santyajya saśvāsocchvāsasaṃvidam /
sanniveśaṃ tyajāmīmam anarthaṃ dehanāmakam // Mo_1,30.25 //
śvāsaś cocchvāsaś ca | tau "śvāsocchvāsau" | tābhyāṃ saha vartate iti "saśvāsocchvāsā" | tādṛśī "saṃvit" | tāṃ | "sanniveśaṃ" saṃsthānam || MoT_1,30.25 ||



nanu samatāviṣayatvena svasambandhitayā sthitasya dehasya tyāgaḥ kathaṃ sidhyatīty | atrāha
nāham asya na me dehaḥ śāmyāmy asnehadīpavat /
sarvam eva parityajya tyajāmīdaṃ kalevaram // Mo_1,30.26 //
spaṣṭam || MoT_1,30.26 ||



sargāntaślokena śrīrāmavākyam upasaṃharati
ity uktavān amalaśītakarābhirāmo
rāmo mahattaravivekavikāsicetāḥ /
tūṣṇīm babhūva purato mahatāṃ ghanānāṃ
kekāravaśramavaśād iva nīlakaṇṭhaḥ // Mo_1,30.27 //
"nīlakaṇṭhaḥ" mayūraḥ | iti śivam || MoT_1,30.27 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe triṃśaḥ sargaḥ || 1,30 ||



************************************************************************


śrīvālmīkiḥ śrībharadvājam prati kathayati
vadaty evam manomohavinivṛttikaraṃ vacaḥ /
rāme rājīvapattrākṣe tasmin rājakumārake // Mo_1,31.1 //
sarve babhūvus tatrasthā vismayotphullalocanāḥ /
dhṛtāmbarā deharuhair giraḥ śrotum ivodgataiḥ // Mo_1,31.2 //
virāmavāsanāpāstasamastabhavavāsanāḥ /
muhūrtam amṛtāmbhodhivīcīvilulitā iva // Mo_1,31.3 //
"deharuhaiḥ" romabhiḥ | "dhṛtāmbarāḥ" dhṛtavastrāḥ | romakañcukānvitāḥ ity arthaḥ | "deharuhaiḥ" kathambhūtair "iva" | "giraḥ" śrīrāma"giraḥ" "śrotum udgataiḥ" utthitair "iva" | "virāmavāsanayā" nivṛttivāsanayā | "apāstāḥ" tyaktāḥ | "samastāḥ" "bhavavāsanāḥ" yaiḥ | te "vilulitāḥ" cañcalīkṛtāḥ || MoT_1,31.1-3 ||



tā giro rāmabhadrasya tasya citrārpitair iva /
saṃśrutāḥ śṛṇukair antar ānandaparipīvaraiḥ // Mo_1,31.4 //
"śṛṇukaiḥ" śrotṛbhiḥ || MoT_1,31.4 ||



śṛṇukān eva viśeṣeṇa kathayati
vasiṣṭhaviśvāmitrādyair munibhiḥ saṃsadi sthitaiḥ /
jayantaghṛṣṭipramukhair mantribhir mantrakovidaiḥ // Mo_1,31.5 //
spaṣṭam || MoT_1,31.5 ||



nṛpair daśarathaprakhyaiḥ pauraiḥ pāraśavādibhiḥ /
sāmantai rājaputraiś ca brāhmaṇair brahmavādibhiḥ // Mo_1,31.6 //
spaṣṭam || MoT_1,31.6 ||


tathā bhṛtyair amātyaiś ca pañjarasthaiś ca pakṣibhiḥ /
krīḍāmṛgair gataspandais turaṅgair gatacarvaṇaiḥ // Mo_1,31.7 //
"gatacarvaṇaiḥ" tyaktabhojanaiḥ || MoT_1,31.7 ||


kausalyāpramukhaiś caiva nijavātāyanasthitaiḥ /
saṃśāntabhūṣaṇārāvair aspandair vanitāgaṇaiḥ // Mo_1,31.8 //
spaṣṭam || MoT_1,31.8 ||


udyānavallīnilayair viṭaṅkanilayair api /
akṣubdhapakṣatatibhir vihagair viratāravaiḥ // Mo_1,31.9 //
siddhair nabhaścaraiś caiva tathā gandharvakinnaraiḥ /
nāradavyāsapulahapramukhair munipuṅgavaiḥ // Mo_1,31.10 //
spaṣṭam || MoT_1,31.9-10 ||


anyaiś ca devadeveśavidyādharamahoragaiḥ /
rāmasya tā vicitrārthā mahodārā giraḥ śrutāḥ // Mo_1,31.11 //
spaṣṭam || MoT_1,31.11 ||


atha tūṣṇīṃ sthitavati rāme rājīvalocane /
tasmin raghukulākāśaśaśāṅkasamasundare // Mo_1,31.12 //
sādhuvādagirā sārdhaṃ siddhasārthasamīritā /
vitānakasamā vyomnaḥ puṣpavṛṣṭiḥ papāta ha // Mo_1,31.13 //
spaṣṭaṃ || MoT_1,31.12-13 ||



puṣpavṛṣṭiṃ viśinaṣṭi
mandārakośaviśrāntabhramaradvandvanādinī /
madirāmodasaundaryamuditonmadamānavā // Mo_1,31.14 //
spaṣṭam || MoT_1,31.14 ||


vyomavātavinunneva tārakāṇām paramparā /
patiteva dharāpīṭhaṃ svargastrīhasitacchaṭā // Mo_1,31.15 //
spaṣṭam || MoT_1,31.15 ||


vṛṣṭiṣv ekaśaranmeghalavāvalir iva cyutā /
haiyaṅgavīnapiṇḍānām īriteva paramparā // Mo_1,31.16 //
"vṛṣṭiṣu" "vṛṣṭy"antaḥ || MoT_1,31.16 ||



himavṛṣṭir ivodārā muktāhāracayopamā /
aindavīraśmimāleva kṣīrormīṇām ivātatiḥ // Mo_1,31.17 //
spaṣṭam|| MoT_1,31.17 ||


kiñjalkāmodavalitā bhramadbhṛṅgakadambakā /
sītkāragāyadāmodamadhurāniladolitā // Mo_1,31.18 //
"sītkāreti" śabdānukaraṇam || MoT_1,31.18 ||


prabhramatketakavyūhā prasaratkairavotkarā /
prapatatkundavalayā valatkuvalayālayā // Mo_1,31.19 //
spaṣṭam || MoT_1,31.19 ||


āpūritāṅganārāmagṛhacchādanacatvarā /
udgrīvapuravāstavyavaranārīvilokitā // Mo_1,31.20 //
"aṅganāni" c"ārāmāś" ca "gṛhacchādanāni" ca "catvarāṇi" ca | tāni "āpūritāni" "aṅganā"dīni yayā | sā | darśanotsuko hi "udgrīvo" bhavati || MoT_1,31.20 ||



nirabhrotpalasaṅkāśavyomavṛṣṭir anākulā /
adṛṣṭapūrvā sarvasya janasya janitasmayā // Mo_1,31.21 //
spaṣṭam || MoT_1,31.21 ||



adṛṣṭapūrvasiddhaughakarotkarasamīritā /
sā muhūrtacaturbhāge puṣpavṛṣṭiḥ papāta ha // Mo_1,31.22 //
"ha" iti nipātaḥ pādapūraṇārthaḥ || MoT_1,31.22 ||



āpūritasabhāloke śānte kusumavarṣaṇe /
imān siddhagaṇālāpāñ śuśruvus te sabhāgatāḥ // Mo_1,31.23 //
spaṣṭam || MoT_1,31.23 ||



siddhagira eva kathayati
ākalpaṃ siddhasenāsu bhramadbhir abhito divam /
apūrvam adya tv asmābhiḥ śrutaṃ śrutirasāyanam // Mo_1,31.24 //
"śrut"au karṇe | "rasāyanam" amṛtam || MoT_1,31.24 ||


yad anena kilodāram uktaṃ raghukulendunā /
vītarāgatayā tad dhi vākpater apy agocaram // Mo_1,31.25 //
spaṣṭam || MoT_1,31.25 ||



aho vata mahat puṇyam adyāsmābhir idaṃ śrutam /
vaco rāmamukhodbhūtam amṛtāhlādakaṃ dhiyaḥ // Mo_1,31.26 //
spaṣṭam || MoT_1,31.26 ||


sargāntaślokaṃ kathayati
upaśamāmṛtasundaram ādarād
adhigatottamatāpadam eṣa yat /
kathitavān ucitaṃ raghunandanaḥ
sapadi tena vayam pratibodhitāḥ // Mo_1,31.27 //
"pratibodhitāḥ" jñānayuktāḥ sampāditāḥ | iti śivam || MoT_1,31.27 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe ekatriṃśaḥ sargaḥ || 1,31 ||



************************************************************************



siddhā eva parasparaṃ kathayanti
pāvanasyāsya vacasaḥ proktasya raghuketunā /
nirṇayaṃ śrotum ucitaṃ vakṣyamāṇam maharṣibhiḥ // Mo_1,32.1 //
nāradavyāsapulahapramukhā munipuṅgavāḥ /
āgacchatāśv avighnena sarva eva maharṣayaḥ // Mo_1,32.2 //
patāmaḥ paritaḥ puṇyām etāṃ dāśarathīṃ sabhām /
nīrandhrakanakāmbhojām padminīm iva ṣaṭpadāḥ // Mo_1,32.3 //
spaṣṭam || MoT_1,32.1-3 ||



śrīvālmīkiḥ śrībharadvājam prati kathayati
ity uktvā sā samastaiva vyomāvāsanivāsinī /
tām papāta sabhāṃ tatra divyā muniparamparā // Mo_1,32.4 //
"vyomni" yaḥ "āvāsaḥ" | tatra "nivasa"tīti tādṛśī || MoT_1,32.4 ||


muniparamparāṃ viśinaṣṭi
agrasthitamarutpṛṣṭharaṇadvīṇamunīśvarā /
payaḥpīnaghanaśyāmavyāsamecakitāmbarā // Mo_1,32.5 //
"agre sthitāḥ" "marutaḥ" yasyāṃ | sā | tādṛśī cāsau "pṛṣṭhe" ca "raṇadvīṇāḥ" "munīśvarāḥ" yasyāṃ | sā | tādṛśī || MoT_1,32.5 ||



bhṛgvaṅgiraḥpulastyādimunināyakamaṇḍitā /
cyavanoddālakośīraśaralomādipālitā // Mo_1,32.6 //
spaṣṭam || MoT_1,32.6 ||



parasparaparāmarśād duḥsaṃsthānamṛgājinā /
lolākṣamālāvalayā sukamaṇḍaludhāriṇī // Mo_1,32.7 //
"parāmarśāt" saṅghaṭṭāt || MoT_1,32.7 ||



tārāvalir ivānyonyakṛtaśobhātiśāyinī /
kausumī vṛṣṭir anyeva dvitīyevārkamaṇḍalī // Mo_1,32.8 //
spaṣṭam || MoT_1,32.8 ||


tārājāla ivāmbhodo vyāso hy atra vyarājata /
tāraugha iva śītāṃśur nārado 'tra vyarājata // Mo_1,32.9 //
spaṣṭam || MoT_1,32.9 ||



deveṣv iva svarādhīśaḥ pulastyo 'tra vyarājata /
āditya iva devānām aṅgirāś ca vyarājata // Mo_1,32.10 //
spaṣṭam || MoT_1,32.10 ||


athāsyāṃ siddhasenāyām patantyāṃ nabhaso rasāt /
uttasthau munisampūrṇā tadā dāśarathī sabhā // Mo_1,32.11 //
spaṣṭam || MoT_1,32.11 ||


miśrībhūtā virejus te nabhaścaramahīcarāḥ /
parasparavṛtāṅgābhā bhāsayanto diśo daśa // Mo_1,32.12 //
"parasparaṃ vṛtā" "aṅgānām" "ābhā" yaiḥ | te || MoT_1,32.12 ||



nabhaścaramahīcarān viśinaṣṭi
veṇughaṇṭāvṛtakarā līlākamaladhāriṇaḥ /
dūrvāṅkurākrāntaśikhāḥ sacuḍāmaṇimūrdhajāḥ // Mo_1,32.13 //
spaṣṭam || MoT_1,32.13 ||



jaṭākaṭaprakapilā maulimālitamastakāḥ /
prakoṣṭhagākṣavalayā māṇikyavalayānvitāḥ // Mo_1,32.14 //
"jaṭākaṭapreṇa" jaṭāsamūhena | "kapilāḥ" || MoT_1,32.14 ||



cīravalkalasaṃvītāḥ srakkauśeyāvaluṇṭhitāḥ /
vilolamekhalāpāśāś calanmuktākalāpinaḥ // Mo_1,32.15 //
spaṣṭam || MoT_1,32.15 ||


vasiṣṭhaviśvāmitrau tān pūjayām āsatuḥ kṣaṇāt /
arghyaiḥ pādyair vacobhiś ca nabhaścaramahāgaṇān // Mo_1,32.16 //
spaṣṭam || MoT_1,32.16 ||


sarvācāreṇa siddhaugham pūjayām āsa bhūpatiḥ /
siddhaugho bhūpatiṃ caiva kuśalapraśnavārtayā // Mo_1,32.17 //
spaṣṭam || MoT_1,32.17 ||



tais taiḥ praṇayasaṃrambhair anyo'nyam prāptasatkriyāḥ /
upāviśan viṣṭareṣu nabhaścaramahīcarāḥ // Mo_1,32.18 //
"praṇayasaṃrambhaiḥ" snehasaṃrambhaiḥ || MoT_1,32.18 ||



vacobhiḥ puṣpavarṣeṇa sādhuvādena cābhitaḥ /
rāmaṃ tam pūjayām āsuḥ puraḥ praṇatam āsthitam // Mo_1,32.19 //
spaṣṭam || MoT_1,32.19 ||


āsāṃ cakre ca tatrāsau rājalakṣmyā virājitaḥ /
viśvāmitro vasiṣṭhaś ca vāmadevaś ca mantriṇaḥ // Mo_1,32.20 //
"asau" śrīrāmaḥ || MoT_1,32.20 ||



nārado devaputraś ca vyāsaś ca munipuṅgavaḥ /
marīcir atha durvāsā munir āṅgirasas tathā // Mo_1,32.21 //
spaṣṭam || MoT_1,32.21 ||


kratuḥ pulastyaḥ pulahaḥ śaralomā munīśvaraḥ /
vātsyāyano bharadvājo vālmīkir munipuṅgavaḥ // Mo_1,32.22 //
spaṣṭam || MoT_1,32.22 ||


uddālaka ṛcīkaś ca śaryātiś cyavanas tathā /
ūṣmapāś ca ghṛtārciś ca śāluḍir vāluḍis tathā // Mo_1,32.23 //
spaṣṭam || MoT_1,32.23 ||



ete cānye ca bahavo vedavedāṅgapāragāḥ /
jñātajñeyā mahātmānaḥ saṃsthitās tatra nāyakāḥ // Mo_1,32.24 //
"nāyakāḥ" śreṣṭhāḥ || MoT_1,32.24 ||


vasiṣṭhaviśvāmitrābhyāṃ saha te nāradādayaḥ /
idam ūcur anūcānā rāmam ānamitānanam // Mo_1,32.25 //
"anūcānāḥ" sāṅgavedajñāḥ || MoT_1,32.25 ||


aho vata kumāreṇa kalyāṇaguṇaśālinī /
vāg uktā paramodāravirāgarasagarbhiṇī // Mo_1,32.26 //
spaṣṭam || MoT_1,32.26 ||


pariniṣṭhitavākyārthasubodham ucitaṃ sphuṭam /
udāram priyacaryārham avihvalam aviplutam // Mo_1,32.27 //
abhivyaktapadaṃ caiva niṣṭhaṃ spaṣṭaṃ ca tuṣṭimat /
karoti rāghavaproktaṃ vacaḥ kasya na vismayam // Mo_1,32.28 //
"pariniṣṭhitaḥ" ākāṅkṣārahitaḥ | "vākyārthaḥ" yasmin | tat "pariniṣṭhitavākyārthaṃ" | tādṛśam ca tat "subodhaṃ" ca tat | "sphuṭam" prakaṭārtham | "priyacaryām" priyavyavahāram "arhatī"ti tādṛśam | "avihvalaṃ" vyākulatārahitam | "aviplutaṃ" kenāpi bādhitum aśakyam | "tuṣṭimat" śrotuḥ tuṣṭikāritvena tuṣṭimat || MoT_1,32.27-28 ||



śatād ekatamasyaiva sarvodāracamatkṛteḥ /
īpsitārthārpaṇaikāntadakṣā bhavati bhāratī // Mo_1,32.29 //
"sarvebhyaḥ udārā" udbhaṭā | "camatkṛtiḥ" camatkāro | yasya | tādṛśasya | na tu sarve etādṛśāḥ bhavantīti bhāvaḥ || MoT_1,32.29 ||



śrīrāmam prati kathayati
kumāra tvāṃ vinā kasya vivekaphalaśālinī /
evaṃ vikāsam āyāti prajñā vanalatā yathā // Mo_1,32.30 //
spaṣṭam || MoT_1,32.30 ||



prajñādīpaśikhā yasya rāmasyeva hṛdi sthitā /
prajvalaty alam ālokakāriṇī sa pumān smṛtaḥ // Mo_1,32.31 //
spaṣṭam || MoT_1,32.31 ||


raktamāṃsāsthiyantrāṇi bahūny atitatāni ca /
padārthān apakarṣanti nāsti teṣu sacetanam // Mo_1,32.32 //
"atitatāni bahūni raktamāṃsāsthiyantrāṇi" dehaniṣṭhāḥ puruṣā iti yāvat | santi kathambhūtāni | "padārthān" "apakarṣanti" jāḍyena jetṝṇi | kiṃ tu "teṣu" kiñcid api "raktamāṃsāsthiyantram" "sacetanaṃ" vicārayuktaṃ | "nāsti" | kaścid api puruṣaḥ sacetano nāstīty arthaḥ || MoT_1,32.32 ||



janmamṛtyujarāduḥkham anuyānti punaḥ punaḥ /
vimṛśanti na saṃsārapaśavaḥ parimohitāḥ // Mo_1,32.33 //
"vimṛśantī"ty atrāpi "janmamṛtyujarāduḥkham" ity etad eva karma | "saṃsārapaśavaḥ" ajñāninaḥ || MoT_1,32.33 ||


kathañcit kvacid evaiko dṛśyate vimalāśayaḥ /
pūrvāparavicārārho yathāyam arisūdanaḥ // Mo_1,32.34 //
"pūrvāparavicārārhaḥ" samyagvicārayogyaḥ || MoT_1,32.34 ||


anuttamacamatkāraphalāḥ subhagamūrtayaḥ /
bhavyā hi viralā loke sahakāradrumā iva // Mo_1,32.35 //
"bhavyāḥ" vivekayuktāḥ || MoT_1,32.35 ||


samyagdṛṣṭir jagajjātau svavivekacamatkṛtiḥ /
asmin bhavyamatāv antar iyam anyeva dṛśyate // Mo_1,32.36 //
asmābhiḥ | "bhavyamatau" "asmin" garbharūpe śrīrāme | "samyagdṛṣṭiḥ" samyagdṛṣṭisvarūpā | "iyaṃ" "svavivekacamatkṛtiḥ" ātmavivekacamatkāraḥ | "jagajjātau" jagatsthitau | "anyā iva" navīnā iva | "dṛśyate" || MoT_1,32.36 ||



sulabhāḥ subhagā lokāḥ phalapallavaśālinaḥ /
jāyante taravo deśe na tu candanapādapāḥ // Mo_1,32.37 //
"subhagāḥ" ākāramātreṇa manoharāḥ || MoT_1,32.37 ||


vṛkṣāḥ prativane santi satyaṃ suphalapallavāḥ /
na tv apūrvacamatkāro lavaṅgaḥ sulabhaḥ sadā // Mo_1,32.38 //
spaṣṭam || MoT_1,32.38 ||


jyotsneva śītā śaśinaḥ sutaror iva mañjarī /
puṣpād āmodalekheva dṛṣṭā rāmāc camatkṛtiḥ // Mo_1,32.39 //
"camatkṛtiḥ" vairāgyarūpety arthaḥ || MoT_1,32.39 ||



asmād uddāmadaurātmyadaivanirmāṇanirmiteḥ /
dvijendrā dagdhasaṃsārāt sāro hy atyantadurlabhaḥ // Mo_1,32.40 //
he "dvijendrāḥ" | "dagdhasaṃsārāt" kathambhūtāt | atyantavaiṣamyakāritvena "uddāmadaurātmyaṃ" yad "daivaṃ" vidhiḥ | tasya yat "nirmāṇaṃ" racanaṃ | tataḥ "nirmitiḥ" sampattir | yasya | saḥ | tādṛśāt | nirmāṇanirmityoḥ sāmānyaviśeṣabhāvena bhedo draṣṭavyaḥ | atra vairāgyotkarṣāt daivam prati asūyā na yukteti nānyathā śaṅkitavyam || MoT_1,32.40 ||



yatante sārasamprāptau ye yaśonidhayo dhiyā /
dhanyā dhuri satāṃ gaṇyās tā eva puruṣottamāḥ // Mo_1,32.41 //
spaṣṭam || MoT_1,32.41 ||



na rāmeṇa samo 'stīha triṣu lokeṣu kaścana /
vivekavān udārātmā mahātmā ceti no matiḥ // Mo_1,32.42 //
spaṣṭam || MoT_1,32.42 ||



sargāntaślokena vairāgyaprakaraṇaṃ samāpayati
sakalalokacamatkṛtikāriṇo
'py abhimataṃ yadi rāghavacetasaḥ /
phalati no tad ime vayam eva hi
sphuṭataram munayo hatabuddhayaḥ // Mo_1,32.43 //
"abhimataṃ" samanantaroktasya praśnasyottaram | iti śivam || MoT_1,32.43 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ vairāgyaprakaraṇe dvātriṃśaḥ sargaḥ || 1,32 ||


************************************************************************


śrotṝṇām bhāvanāveśasatkṛtasvāntaśālinām *
vairāgyākhyaprakaraṇavyākhyā satphaladāstv iyam ** 15 **
yacchaktyāveśavaśataḥ sāmarthyaṃ kāryagocaram *
bhāvānām astu yatno 'yaṃ tatkāryatvena niścitaḥ ** 16 **
vāsanābījarāgākhyadrumonmūlanapaṇḍitaḥ *
vairāgyākhyaḥ payaḥpūraḥ sphuratān mama mānase ** 17 **

iti śivam ||


iti śrīkāśmīramaṇḍalāntarvartyārādhyapādamahāmāheśvaravaiḍūryakaṇṭhātmajaśrīmadavatārakaṇṭhaputraśrībhāskarakaṇṭhaviracitāyāṃ śrīmokṣopāyaṭīkāyāṃ vairāgyākhyam prakaraṇaṃ samāptam ||



tad evāha
anarthaḥ prāpyate yatra śāstritād api pauruṣāt /
anarthakaṃ tu balavat tatra jñeyaṃ svapauruṣam // Mo_2,5.6 //
"yatra" puruṣeṇa "śāstritād api pauruṣāt anarthaḥ prāpyate tatra anarthakam" anarthotpādakaṃ "svapauruṣam" aśāstrīyaṃ pauruṣaṃ | "balavaj jñeyam" | tanmadhye praviṣṭād balavataḥ svapauruṣād evāsau anartha utpanna iti "jñeyam" iti bhāvaḥ | arthāt tu yatra anarthaḥ na prāpyate tatra śāstrīyam eva balavaj jñeyam | dvayoḥ pauruṣayoś ca sarvatra sandhir asti asahāyasyaikakasyotthānāsaṃbhavāt || MoT_2,5.6 ||



puruṣasya kartavyaṃ darśayati
paraṃ pauruṣam āśritya dantair dantān vicūrṇayan /
śubhenāśubham udyuktaḥ prāktanaṃ pauruṣaṃ jayet // Mo_2,5.7 //
"paraṃ pauruṣam" śāstroktaṃ pauruṣam | "udyuktaḥ" udyogayuktaḥ | "prāktanaṃ pauruṣam" vāsanākhyam prāktanam | api "śubhaṃ" śubhakāry eva | yataḥ śubhā vāsanaiva mokṣadāyinī proktety "aśubham" ity uktam || MoT_2,5.7 ||


prāktanaḥ puruṣārtho 'sau māṃ niyojayatīti dhīḥ /
balād adhaspadīkāryā pratyakṣād adhikā na sā // Mo_2,5.8 //
pratyakṣeṇa tu pauruṣasyaiva niyojane sāmarthyaṃ dṛṣṭam ity etad abhipretya "pratyakṣād adhikā na se"ty uktam || MoT_2,5.8 ||


tāvat tāvat prayatnena yatitavyaṃ svapauruṣaṃ /
prāktanaṃ pauruṣaṃ yāvad aśubhaṃ śāmyati svayam // Mo_2,5.9 //
"svapauruṣaṃ yatitavyam" śāstrānusāreṇa svaviṣayaṃ prati yatnayuktaṃ kāryaṃ | "yatitavyam" iti ṇicyuktaḥ prayogaḥ || MoT_2,5.9 ||


doṣaḥ śāmyaty asandehaṃ prāktano 'dyatanair guṇaiḥ /
dṛṣṭānto 'tra hyastanasya doṣasyādyaguṇaiḥ kṣayaḥ // Mo_2,5.10 //
spaṣṭam || MoT_2,5.10 ||
asaddaivam adhaḥ kṛtvā nityam udyuktayā dhiyā /
saṃsārottaraṇaṃ bhūtyai yatetādhātum ātmani // Mo_2,5.11 //
"bhūtyai" muktirūpāyaiśvaryāya || MoT_2,5.11 ||



na gantavyam anudyogaiḥ sāmyaṃ puruṣagardabhaiḥ /
udyogas tu yathāśāstraṃ lokadvitayasiddhaye // Mo_2,5.12 //
spaṣṭam || MoT_2,5.12 ||
saṃsārakuharād asmān nirgantavyaṃ svayaṃ balāt /
pauruṣaṃ yatnam āśritya hariṇevāripañjarāt // Mo_2,5.13 //
"saṃsārakuharāt" saṃsāraśvabhrāt | "hariṇā" siṃhena | "aripañjarāt" aribhūtāt pañjarāt || MoT_2,5.13 ||


pratyahaṃ pratyavekṣeta naraś caritam ātmanaḥ /
saṃtyajet paśubhis tulyaṃ śrayet satpuruṣocitam // Mo_2,5.14 //
"pratyavekṣeta" kīdṛśam iti vimarśaviṣayaṃ kuryāt || MoT_2,5.14 ||


kiṃcitkāntānnapānādikalilaṃ komalaṃ gṛhe /
vraṇe kīṭa ivāsvādya vayaḥ kāryaṃ na bhasmasāt // Mo_2,5.15 //
"kalilaṃ" pāpajanakam | "komalaṃ" āmukhe komalatayā pratibhāsamānam | "vraṇe" randhre || MoT_2,5.15 ||


śubhena pauruṣeṇāśu śubham āsādyate phalam /
aśubhenāśubhaṃ nityaṃ daivaṃ nāma na kiṃcana // Mo_2,5.16 //
spaṣṭam || MoT_2,5.16 ||


pratyakṣadṛṣṭam utsṛjya yo 'numānamanās tv asau /
svabhujābhyām imau sarpāv iti prekṣya palāyatām // Mo_2,5.17 //
"svabhujābhyām" iti pañcamī || MoT_2,5.17 ||


daivaṃ saṃprerayati mām iti mugdhadhiyāṃ mukham /
adṛṣṭaśreṣṭhadṛṣṭīnāṃ dṛṣṭvā lakṣmīr nivartate // Mo_2,5.18 //
"adṛṣṭā" | "śreṣṭhā" uttamā | "dṛṣṭiḥ" pauruṣākhyā dṛṣṭiḥ | yaiḥ teṣām || MoT_2,5.18 ||


tasmāt puruṣayatnena vivekaṃ pūrṇam āśrayet /
ātmajñānamahārthāni śāstrāṇi pravicārayet // Mo_2,5.19 //
"ātmajñānam" eva "mahān arthaḥ" yeṣāṃ tāni || MoT_2,5.19 ||


citte cintayatām arthaṃ yathāśāstraṃ nijehitaiḥ /
asaṃsādhayatām eva mūḍhānāṃ dhig durīpsitam // Mo_2,5.20 //
"nijehitaiḥ" svapauruṣaiḥ | "durīpsitam" duṣṭakāṅkṣitam || MoT_2,5.20 ||


pauruṣaṃ ca na cānantaṃ na yatnam abhivāñchate /
na yatnenāpi mahatā tailam āsādyate 'śmanaḥ // Mo_2,5.21 //
"pauruṣam anantaṃ" antarahitaṃ | "na ca" bhavati | kiṃ tu niyatam eva bhavati | "pauruṣaṃ" kartṛ | "yatnam na abhivāñchate" na svotpādakatvena kāṅkṣate | yatnena svasya niyamaṃ na laṅghayati iti yāvat | puruṣo "mahatāpi yatnena" svasmin niyataṃ pauruṣaṃ na laṅghayituṃ śaknotīti bhāvaḥ | etad dṛṣṭāntena sugamaṃ karoti | "na yatnene"ti || MoT_2,5.21 ||



pūrvoktam evārthaṃ sphuṭayati
yathā ghaṭaḥ parimito yathā parimitaḥ paṭaḥ /
niyataḥ parimāṇasthaḥ puruṣārthas tathaiva vaḥ // Mo_2,5.22 //
ataḥ svapauruṣāviṣaye ākāśagamanādau na yatitavyam iti bhāvaḥ || MoT_2,5.22 ||


sa ca śāstrārthasatsaṅgasamācārair nijaṃ phalam /
dadātīti svabhāvo 'yam anyathānarthasiddhaye // Mo_2,5.23 //
"anyathā" śāstrārthasatsaṅgasamācārāṇām abhāve || MoT_2,5.23 ||


svarūpaṃ pauruṣasyaitad daivaṃ vyavaharan naraḥ /
yāti niṣphalayatnatvaṃ na kadācana kaścana // Mo_2,5.24 //
"pauruṣasya svarūpam daivam vyavaharan" daivam iti nāmnā vyavaharan | na tu paramārthato daivam iti jānann iti yāvat || MoT_2,5.24 ||


dainyadāridryaduḥkhārtā apy anye puruṣottamāḥ /
pauruṣeṇaiva yatnena yātā devendratulyatām // Mo_2,5.25 //
spaṣṭam || MoT_2,5.22 ||


ā bālyāc caivam abhyastaiḥ śāstrasatsaṅgamādibhiḥ /
guṇaiḥ puruṣayatnena svo 'rthaḥ saṃprāpyate hi taiḥ // Mo_2,5.26 //
"svo 'rthaḥ" mokṣākhyaḥ kāṅkṣito 'rthaḥ | "puruṣeṇe"ti śeṣaḥ | "hi"śabdaḥ niścaye | "taiḥ" prasiddhaiḥ "guṇair" iti karaṇe tṛtīyā | "yatnene"ti tu hetau || MoT_2,5.26 ||


upasaṃhāraṃ karoti
iti pratyakṣato dṛṣṭam anubhūtaṃ kṛtaṃ śrutam /
daivottham iti manyante ye hatās te kubuddhayaḥ // Mo_2,5.27 //
"kṛtam śrutam" anuṣṭhitam | sarvam "daivāt uttham" asti | "iti ye manyante" | "te kubuddhayaḥ hatāḥ" naṣṭāḥ || MoT_2,5.27 ||



ālasyaṃ yadi na bhavej jagaty anarthaḥ
ko na syād bahudhaniko bahuśruto vā /
ālasyād iyam avaniḥ sasāgarāntā
saṃpūrṇā narapaśubhiś ca nirdhanaiś ca // Mo_2,5.28 //
"narapaśubhiḥ" ajñānibhiḥ | "nirdhanaiḥ" daridraiḥ | tasmād dhanakāṅkṣibhiḥ mokṣakāṅkṣibhir vā pauruṣam eva kāryam iti bhāvaḥ || MoT_2,5.28 ||


pauruṣānuṣṭhānaprakāraṃ kathayati
bālye gate 'viratakalpitakelilole
paugaṇḍamaṇḍanavayaḥprabhṛti prayatnāt /
satsaṅgamaiḥ padapadārthavibuddhabuddhiḥ
kuryān naraḥ svaguṇadoṣavicāraṇāni // Mo_2,5.29 //
"avirataṃ kalpitā" yā "keliḥ" | tayā "lole bālye" | bālabhāve "gate" sati | puruṣaḥ "paugaṇḍasyā"vasthāviśeṣasya "maṇḍana"bhūtaṃ yat "vayaḥ" | tataḥ "prabhṛti" yauvanāt prabhṛti iti yāvat | "prayatnāt" yatnena | "svaguṇadoṣavicāraṇāni kuryāt" | kaiḥ kṛtvā | "satsaṅgamaiḥ" sādhusaṅgamaiḥ | satsaṅgamābhāve hi svaguṇadoṣavicāraṇam aśakyakriyam eva | puruṣaḥ kathaṃbhūtaḥ | "padapadārthavibuddhabuddhiḥ" | padapadārthayoḥ vibuddhā buddhiḥ yasya | tādṛśaḥ | padapadārthajña ity arthaḥ || MoT_2,5.29 ||



śrīvālmīkiḥ sargāntaślokena bharadvājaṃ prati tatratyaṃ dināvasānaṃ kathayati
ity uktavaty atha munau divaso jagāma
sāyantanāya vidhaye 'stam ino jagāma /
snātuṃ sabhā kṛtanamaskaraṇā jagāma
śyāmākṣaye ravikaraiś ca sahājagāma // Mo_2,5.30 //
"munau" vasiṣṭhe | "iti" evam | "uktavati" sati | "divasaḥ jagāma" avasānaṃ gataḥ | yataḥ "inaḥ" sūryaḥ | "astaṃ jagāma" | "sabhā" dāśarathī sabhā | "kṛtanamaskaraṇā" kṛtamuninamaskārā satī | "sāyantanāya" "vidhaye" sāyaṃ sandhyārthaṃ | "snātuṃ jagāma" | sā "sabhā śyāmākṣaye" rātrikṣaye | "ravikaraiḥ" sūryakaraiḥ | "saha ājagāma ca" | iti śivam || MoT_2,5.30 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe pañcamaḥ sargaḥ || 2,5 ||


************************************************************************

prabhāte śrīvasiṣṭhaḥ śrīrāmaṃ prati pūrvasargoktavastuphalitaṃ kathayati
tasmāt prākpauruṣaṃ daivaṃ nānyat tat projjhya dūrataḥ /
sādhusaṅgamasacchāstrair jīvam uttārayed balāt // Mo_2,6.1 //
"tasmāt" pūrvasargoktāt hetoḥ | "prākpauruṣaṃ" prāktanaṃ pauruṣaṃ | "daivam" bhavati | "anyat" pauruṣād bhinnaṃ kiṃcid daivam | "na" bhavati | ataḥ puruṣaḥ "tat" daivaṃ | "dūrataḥ projjhya" arthāt adyatanaṃ śubhaṃ pauruṣam āśritya | "sādhusaṅgamasacchāstraiḥ" hetubhūtaiḥ | "jīvam balāt" haṭhena | "uttārayet" | "saṃsārād" iti śeṣaḥ || MoT_2,6.1 ||



yathā yathā prayatnaḥ syād bhaved āśu phalaṃ tathā /
iti pauruṣam evāsti daivam astu tad eva vaḥ // Mo_2,6.2 //
"prayatnaḥ" pauruṣam | "tat" yuṣmābhiḥ aṅgīkṛtaṃ "daivam" | "vaḥ eva" yuṣmākam ev"āstu" || MoT_2,6.2 ||


duḥkhād yathā duḥkhakāle hā kaṣṭam iti kathyate /
hākaṣṭaśabdaparyāyas tathā hā daivam ity api // Mo_2,6.3 //
"tathā hā kaṣṭam iti"vat "hā daivam iti" dīnānām evoktir astīti bhāvaḥ || MoT_2,6.3 ||


prāksvakarmetarākāraṃ daivaṃ nāma na vidyate /
bālaḥ prabalapuṃseva taj jetum iva śakyate // Mo_2,6.4 //
"prāksvakarmaṇaḥ" prāktanasvakarmaṇaḥ | "itarākāram daivaṃ nāma na vidyate" | prāktanāt svakarmaṇaḥ pṛthaksattāṃ na bhajate ity arthaḥ | ataḥ puṃsā "tat" daivaṃ | "jetuṃ śakyate" ken"eva" | "prabalapuṃsā iva" | yathā tena "bālo jetuṃ śakyate" tathety arthaḥ || MoT_2,6.4 ||


hyastano duṣṭa ācāra ācāreṇādya cāruṇā /
yathāśu śubhatāṃ yāti prāktanaṃ kukṛtaṃ tathā // Mo_2,6.5 //
"adyācāreṇa" adya kṛtenācāreṇa | "tathā" tadvat | "prāktanaṃ kukṛtam" adyatanena sukṛtena "śubhatāṃ yāti" || MoT_2,6.5 ||


tajjayāya yatante ye na lābhalavalampaṭāḥ /
te mūḍhāḥ prākṛtā dīnāḥ sthitā daivaparāyaṇāḥ // Mo_2,6.6 //
"tajjayāya" kuvāsanārūpaprāktanāśubhapauruṣajayāya | "lābhalave" sāṃsārikapadārthāptirūpe lābhaleśe | "laṃpaṭāh" lobhayuktāḥ | "prākṛtāḥ" nīcāḥ || MoT_2,6.6 ||


pauruṣeṇa kṛtaṃ karma daivād yad abhinaśyati /
tatra nāśayitur jñeyaṃ pauruṣaṃ balavattaram // Mo_2,6.7 //
"nāśayituḥ" nāśakasya kālādeḥ || MoT_2,6.7 ||


yad ekavṛntaphalayor apy ekaṃ śūnyakoṭaram /
tatra prayatnaḥ sphuritas tathā tadrasasaṃvidaḥ // Mo_2,6.8 //
ekasmin vṛnte sthitau phalau "ekavṛntaphalau" | tayoḥ "api" madhyāt "eka"phalaṃ "śūnyakoṭaram" sārarahitamadhyaṃ "yat" bhavati | arthāt dvitīyaṃ sārabharitamadhyaṃ jñeyam | "tatra" tasmin sthāne | "tadrasasaṃvidaḥ" tayoḥ phalayoḥ yā rasarūpā saṃvit | tasyāḥ tadrasasyeti yāvat | "tathā" tena prakāreṇa | "yatnaḥ" pauruṣaṃ "sphuritaḥ" | raseneva tādṛśaṃ pauruṣaṃ kṛtaṃ yenaikaṃ phalaṃ sārarahitaṃ saṃpannaṃ | na tv anyaśaṅkitasya daivasyātra kāpi śaktir astīti bhāvaḥ || MoT_2,6.8 ||



yat prayānti jagadbhāvāḥ saṃsiddhā api saṃkṣayam /
kṣayakārakayatnasya tatra jñeyaṃ mahad balam // Mo_2,6.9 //
"kṣayakārakasya" nāśakartuḥ kālasya | yaḥ "yatnaḥ" pauruṣam | tasya || MoT_2,6.9 ||


bhikṣuko maṅgalebhena nṛpo yat kriyate balāt /
tad amātyebhapaurāṇāṃ prayatnasya mahat phalam // Mo_2,6.10 //
"maṅgalebhena" maṅgalahastinā | "bhikṣukaḥ nṛpaḥ" rājā | "balāt yat kriyate amātyebhapaurāṇāṃ" rājyapradātṝṇāṃ mantrimaṅgalahastināgarāṇāṃ | "prayatnasya" tadrājyadānarūpasya pauruṣasya saha"phalaṃ" bhavati | na daivasya || MoT_2,6.10 ||



pauruṣenānnam ākramya yathā dantair vicūrṇyate /
alpaṃ pauruṣam ākramya tathā śūreṇa cūrṇyate // Mo_2,6.11 //
"yathā dantaiḥ pauruṣeṇa annam ākramya" svavaśīkṛtya | "cūrṇyate" | "tathā śūreṇā"dyatanapauruṣayuktena puruṣeṇa | "alpaṃ" prāktanatvena jīrṇaprāyaṃ | "pauruṣaṃ ākramya cūrṇyate" || MoT_2,6.11 ||


anubhūtaṃ hi mahatāṃ lāghavaṃ yatnaśālināṃ /
yatheṣṭaṃ viniyujyante te taiḥ karmasu loṣṭavat // Mo_2,6.12 //
"hi" yasmāt | asmābhiḥ "yatnaśālināṃ" pauruṣaśālināṃ | "mahatāṃ lāghavaṃ" cāturyam | "anubhūtaṃ" pratyakṣaṃ dṛṣṭam | kathaṃ anubhūtam ity | atrāha | "yatheṣṭam" iti | yataḥ "taiḥ" yatnaśālibhiḥ | "te" arthāt pauruṣarahitāḥ puruṣāḥ | "yatheṣṭaṃ" svecchānusāreṇa | "loṣṭavat karmasu viniyujyante" || MoT_2,6.12 ||


śaktasya pauruṣaṃ dṛśyam adṛśyaṃ vāpi yad bhavet /
tad daivam ity aśaktena buddham ātmany abuddhinā // Mo_2,6.13 //
"śaktasya" mahatā pauruṣeṇa yuktasya | dṛśyasya puruṣāder adṛśyasya kālādeś ca | "dṛśyam adṛśyaṃ vā yat pauruṣaṃ bhavet" | "abuddhinā" samyagjñānarahitena | "aśaktena" tadapekṣayā śaktirahitena puruṣeṇa | "tat" śaktasya pauruṣam | "ātmani" svasmin viṣaye | "daivaṃ buddham" jñātam | anyathā daivena me kṛtam iti na brūyāt || MoT_2,6.13 ||



bhūtānāṃ balavadbhūtayatno daivam iti sthitam /
tasthuṣām apy adhiṣṭhātṛvatām etat sphuṭaṃ mithaḥ // Mo_2,6.14 //
"balavadbhūtayatnaḥ" | "bhūtānām" kṣudrabhūtānāṃ upari | "daivam iti sthitam" bhavati | puruṣo hi yatra na paryāpto bhavati tatraiva daivena me kṛtam iti kathayati | na kevalam etan mayaiva jñātaṃ kiṃtv anyair apīty āha | "tasthuṣām" iti | "api"śabdaḥ samuccaye | "mithaḥ" anyo'nyam | "adhiṣṭhātṛvatāṃ tasthuṣām" prerakayuktānāṃ sthitānām puruṣāṇām "api" | "etat" mayā uktaḥ arthaḥ | "sphuṭaṃ" prakaṭo bhavati | te hi parasparaṃ kṣudrataratamādibhedenādhiṣṭheyāḥ bhavanti | utkṛṣṭataratamādibhedena tv adhiṣṭhātāraḥ | adhiṣṭhātā eva cādhiṣṭheyaṃ prati daivam | ataḥ eteṣu madukto 'rthaḥ sphuṭa eva bhavati iti bhāvaḥ || MoT_2,6.14 ||



nanu bhikṣukarājyaviṣaye 'yaṃ nyāyo nāstīty | atrāha
śāstramātyebhapaurāṇām avikalpyā svabhāvadhīḥ /
sā yā bhikṣukarājyasya kartrī dhartrī prajāsthiteḥ // Mo_2,6.15 //
"śāstā" purohitaḥ | sa ca "amātyaś" ca | "ibhaś" ca maṅgalahastī ca | "paurāś" ca | teṣām | "sā svabhāvadhīḥ" svabhāvāt utthitā bhikṣurājyadānarūpā buddhiḥ | "avikalpyā" nāśayitum aśakyāśaktā iti yāvat bhavati | "sā" kā | "yā bhikṣukarājyasya kartrī" bhavati | taddvāreṇa "prajāsthiteḥ dhartrī" ca bhavati | ato 'trāpy ayam eva nyāya iti bhāvaḥ | iyaṃ hi rītiḥ | yatra deśe rājā mriyate | tasya putraś ca na syāt | tatra maṅgalahastī yaṃ namati | tam eva rājānaṃ kurvantīti || MoT_2,6.15 ||



aihikaḥ prāktanaṃ hanti prāktano 'dyatanaṃ balāt /
sarvadā puruṣaspandas tatrānudvegavāñ jayī // Mo_2,6.16 //
"puruṣaspandaḥ" pauruṣam | "tatra" dvayoḥ pauruṣayoḥ madhye | "anudvegavān" udvegarahitaḥ | lakṣaṇayā atibala ity arthaḥ || MoT_2,6.16 ||


nanu tatra kaḥ prāyaḥ balavān astīty | atrāha
dvayor adyatanasyaiva pratyakṣād balitā bhavet /
daivaṃ jetum ato yatnair bālo yūneva śakyate // Mo_2,6.17 //
"pratyakṣāt" pratyakṣapramāṇena | dṛśyate hi adyatanaḥ śubhācāraḥ hyastanam aśubhaṃ nāśayan | phalitam āha | "daivam" iti | "ataḥ yatnaiḥ" adyatanaiḥ pauruṣaiḥ | "daivaṃ" prāktanaṃ pauruṣaṃ | "jetum śakyate" | keneva | "yūneva" | yathā "yūnā bālaḥ jetuṃ śakyate" tathety arthaḥ || MoT_2,6.17 ||


meghena nīyate yad vā vatsaropārjitā kṛṣiḥ /
meghasya puruṣārtho 'sau jayaty adhikayatnavān // Mo_2,6.18 //
atrāpi na daivasya kācic chaktir astīti bhāvaḥ || MoT_2,6.18 ||


krameṇopārjite 'py arthe naṣṭe kāryā na kheditā /
na balaṃ yatra me śaktaṃ tatra kā paridevanā // Mo_2,6.19 //
"balam" pauruṣam | na hi janaḥ aśakyaḥ rājyādivastuprāptyarthaṃ pratyahaṃ "paridevanā"yukto bhavatīti bhāvaḥ || MoT_2,6.19 ||



yan na śaknomi tasyārthe yadi duḥkhaṃ karomy aham /
tad amānitamṛtyor me yuktaṃ pratyaharodanam // Mo_2,6.20 //
"amānitamṛtyoḥ" tāvad mṛtyupātam api anaṅgīkurvataḥ || MoT_2,6.20 ||



deśakālakriyādravyavaśato visphuranty amī /
sarva eva jagadbhāvā jayaty adhikayatnavān // Mo_2,6.21 //
"bhāvāḥ" mṛtyvādirūpāḥ padārthāḥ || MoT_2,6.21 ||


phalitaṃ kathayati
tasmāt pauruṣam āśritya sacchāstraiḥ satsamāgamaiḥ /
prajñām amalatāṃ nītvā saṃsārāmbunidhiṃ tara // Mo_2,6.22 //
"amalatām" rāgādimalarāhityam || MoT_2,6.22 ||

prāktanaś caihikaś cāsau puruṣārthau phaladrumau /
aihikaḥ puruṣārthaś ca jagaty abhyadhikas tayoḥ // Mo_2,6.23 //
phalotpādakau drumau "phaladrumau" || MoT_2,6.23 ||


karma yaḥ prāktanaṃ tucchaṃ na nihanti śubhehitaiḥ /
ajño jantur anīśo 'sau vāṅmanaḥsukhaduḥkhayoḥ // Mo_2,6.24 //
"karma" pauruṣam | "anīśaḥ" asamarthaḥ | "vāṅmanaḥsukhaduḥkhau" apy "asau" nāśayituṃ na śaknoti | śarīraduḥkhanāśe tu kā katheti bhāvaḥ || MoT_2,6.24 ||


yas tūdāracamatkāraḥ sadācāravihāravān /
sa niryāti jaganmohān mṛgendraḥ pañjarād iva // Mo_2,6.25 //
"sadācāreṇa" sādhvācāreṇa | "vihāraḥ" vidyate yasya | tādṛśaḥ | "sa" iti | "sa" eva śubhapauruṣabhājanam iti bhāvaḥ || MoT_2,6.25 ||


kaścin māṃ prerayaty evam ity anarthakukalpane /
yaḥ sthito dṛṣṭam utsṛjya tyājyo 'sau dūrato 'dhamaḥ // Mo_2,6.26 //
"dṛṣṭam" pratyakṣadṛṣṭaphalaṃ pauruṣam || MoT_2,6.26 ||


vyavahārasahasrāṇi yāny upāyānti yānti ca /
yathāśāstraṃ vihartavyaṃ teṣu tyaktvā sukhāsukhe // Mo_2,6.27 //
"yathāśāstram" svaśāstrānatikrameṇa | "vihartavyaṃ" vihāraḥ kāryaḥ || MoT_2,6.27 ||


yathāśāstram anucchinnāṃ maryādāṃ svām anujjhataḥ /
upatiṣṭhanti sarvāṇi ratnāny ambunidher iva // Mo_2,6.28 //
"svām" svajātyanusāriṇīm | "upatiṣṭhanti" samīpam āgacchanti | "sarvāṇi" sakalāni śreyāṃsi || MoT_2,6.28 ||



svārthaprāpakakāryaikaprayatnaparatā budhaiḥ /
proktā pauruṣaśabdena sā siddhyai śāstrayantritā // Mo_2,6.29 //
"svārthaprāpake" svaprayojanasādhake "kārye" | "ekam" atyantaṃ | "prayatnaparatā" "śāstrayantritā" śāstrabuddhā || MoT_2,6.29 ||


kriyāyāḥ spandadharmiṇyāḥ svārthasādhakatā svayam /
sādhusaṅgamaśāstrārthatīkṣṇayābhyūhyate dhiyā // Mo_2,6.30 //
"spandadharmiṇyāḥ" spandasvarūpāyāḥ "kriyāyāḥ" | "svārthasādhakatā svayam" anyanirapekṣaṃ bhavati | "sādhusaṅgamaśāstrārthatīkṣṇayā dhiyā" sambandhinī "svārthasādhakatā" "abhyūhyate" vivecyate | kā "svārthasādhakatā" | śubhā | kā śubheti vyavasthāpyate ity arthaḥ || MoT_2,6.30 ||



anantaṃ samatānandaṃ paramārthaṃ vidur budhāḥ /
sa yebhyaḥ prāpyate 'nantaṃ te sevyāḥ śāstrasādhavaḥ // Mo_2,6.31 //
sarvatra samadarśitvaṃ "samatā" | tadrūpaḥ "ānandaḥ" "samatānandaḥ" | "paramārtham" paramopādeyaṃ | "saḥ" samatānandaḥ | pauruṣam āśrityopāsyaḥ || MoT_2,6.31 ||


prāktanaṃ pauruṣaṃ tac ced daivaśabdena kathyate /
tad yuktam etad etasmin nāsti nāpavadāmahe // Mo_2,6.32 //
"tat" prasiddhaṃ | "prāktanaṃ pauruṣaṃ daivaśabdena cet" yadi | "kathyate" | "yuṣmābhir" iti śeṣaḥ | "tat" kathanaṃ | "yuktaṃ" bhavati | yata "etat" samatānandaprāptyupāyatvam | "etasmin nāsti" | ataḥ vayaṃ "nāpavadāmahe" tadapavādaṃ na kurmaḥ | upekṣāviṣayatvād iti bhāvaḥ || MoT_2,6.32 ||



mūḍhaiḥ prakalpitaṃ daivam anyad yais te kṣayaṃ gatāḥ /
nityaṃ svapauruṣād eva lokadvayahitaṃ bhavet // Mo_2,6.33 //
"anyat" prāktanapauruṣāt | "kṣayam" anudyogakṛtaṃ nāśam || MoT_2,6.33 ||


hyastanī duṣkriyābhyeti śobhāṃ satkriyayā yathā /
adyaivaṃ prāktanī tasmād yatnāt satkāryavān bhava // Mo_2,6.34 //
"adyatanaye"ti śeṣaḥ | "yathā" adyatanayā "satkriyayā hyastanī duṣkriyā śobhāṃ abhyeti" | "evam" tathā | "prāktanī" prāgjanmabhavā vāsanārūpā "duṣkriyā" | "adya" adyatanayā sacchāstrasevanādirūpayā "satkriyayā" | "śobhām" śuddhatvam "abhyeti" | ataḥ tvam "satkāryavān bhava" || MoT_2,6.34 ||



karāmalakavad dṛṣṭaṃ pauruṣād eva yat phalam /
mūḍhaḥ pratyakṣam utsṛjya daivamohe nimajjati // Mo_2,6.35 //
"mūḍhaḥ" daivāt phalavādī ajñānī | "pratyakṣam" pratyakṣapramāṇasiddhaṃ pauruṣam "utsṛjya" | "daivamohe" daivarūpe bhrame "majjati" | kutaḥ tat | tat kutaḥ "yat" yataḥ | asmābhiḥ "phalam karāmalakavat pauruṣād eva dṛṣṭam" pratyakṣam anubhūtam || MoT_2,6.35 ||



sakalakāraṇakāryavivarjitaṃ
nijavikalpabalād upakalpitam /
tad anapekṣya hi daivam asanmayaṃ
śraya śubhāśaya pauruṣam ātmanaḥ // Mo_2,6.36 //
"sakalāni" yāni "kāryakāraṇāni" | taiḥ "varjitam" | atyantāsatsvarūpam ity arthaḥ | ata eva "nijavikalpabalāt upakalpitam" saṃpāditaṃ | "tat asanmayaṃ daivam anapekṣya" | he "śubhāśaya" | tvam "ātmanaḥ pauruṣaṃ āśraya" | daivavaśo mā bhaveti bhāvaḥ || MoT_2,6.36 ||


śāstraiḥ sadācaritajṛṃbhitadeśadharmair
yat kalpitaṃ phalam atīva ciraprarūḍham /
tasmin hṛdi sphurati no 'param eti cittam
aṅgāvalī tad anu pauruṣam etad āhuḥ // Mo_2,6.37 //
"śāstraiḥ" sacchāstraiḥ | "satāṃ" sādhūnāṃ | yat "ācaritaṃ" ācāraḥ | tena pravṛttaḥ | avicchinnapravāheṇāgatāḥ ye "deśadharmāḥ" | taiḥ c"ātīva ciraprarūḍhaṃ" atyantabahukālāt prabhṛti prasiddhaṃ | "yat phalaṃ kalpitam" sādhyatvena niścitaṃ bhavati | "tasmin" phale | "hṛdi sphurati" saṃpādanīyatayā vilasati sati | "cittam" "aparam" proktaphaletaraṃ vastu yat | "no eti" na gacchati | "tad anu" cittānantaraṃ | "aṅgāvalī" hastādyavayavapaṅktir | api "aparaṃ" yat | "no eti" | api tu tatsādhanaikaparaṃ bhavati | paṇḍitāḥ "etat pauruṣam āhuḥ" kathayanti | na tu yathā tathā hastādicālanam iti bhāvaḥ || MoT_2,6.37 ||



buddhvaiva pauruṣaphalaṃ puruṣatvam etad
ātmaprayatnaparataiva sadaiva kāryā /
neyā tataḥ saphalatāṃ paramām athāsau
sacchāstrasādhujanapaṇḍitasevanena // Mo_2,6.38 //
puruṣeṇa "etat" svenānubhūyamānaṃ | "puruṣatvam" puruṣabhāvam | "pauruṣaphalaṃ" | "pauruṣaṃ" pūrvaślokoktasvarūpapauruṣaṃ | "phalaṃ" yasya | tādṛk | "buddhvā" eva | "ātmaprayatnaparatā" pauruṣanirvṛttatvam | "sadā eva kāryā" | "tataḥ" karaṇānantaraṃ | puruṣeṇ"āsau" ātmaprayatnaparatā | "sacchāstrasādhujanapaṇḍitasevanena" "paramām" utkṛṣṭām | "saphalatām" mokṣākhyaphalayuktatām "neyā" | "atha"śabdaḥ pādapūraṇārthaḥ || MoT_2,6.38 ||



daivapauruṣavicāracārubhiś cetasā caritam ātmapauruṣam /
nityam eva jayatīti bhāvitaiḥ kārya āryajanasevanodyamaḥ // Mo_2,6.39 //
puruṣaiḥ "āryajanasevanodyamaḥ kāryaḥ" | kathaṃbhūtaiḥ | "daivapauruṣayoḥ" yaḥ "vicāraḥ" svarūpavivecanaṃ | tena "cārubhiḥ " | punaḥ kathaṃbhūtaiḥ | manasā "iti" evam | "bhāvitaiḥ" niścitaiḥ iti | kim "iti" | "caritam" anuṣṭhitam | "ātmapauruṣam nityam" sadā "jayati" | sarvaphalajanakatvāt sarvotkarṣeṇa vartata iti || MoT_2,6.39 ||


sargāntaślokenāpy etad eva kathayati
janmaprabandhamayam āmayam eṣa jīvo
buddhvaihikaṃ sahajapauruṣam eva siddhyai /
śāntiṃ nayatv avitathena varauṣadhena
pṛṣṭena tuṣṭiparapaṇḍitasevanena // Mo_2,6.40 //
"jīvaḥ" puruṣaḥ | "aihikaṃ" iha loke śakyatvena sthitaṃ "pauruṣaṃ" | "siddhyai" siddhyarthaṃ "buddhvā" | tataḥ tadāśrayaṇenānuṣṭhitena "tuṣṭiparapaṇḍitasevanena" hetunā | "pṛṣṭena" tasmād eva paṇḍitāt "pṛṣṭena" | "avitathena" saphalena | "varauṣadhena" samyagjñānākhyavarauṣadhena | "janmaprabandhamayam" janmasantānarūpaṃ | "āmayam" rogaṃ | "śāntiṃ nayatu" | iti śivam || MoT_2,6.40 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuvyavahāraprakaraṇe ṣaṣṭhaḥ sargaḥ || 2,6 ||


************************************************************************

oṃ atyantopādeyatvena punar api pauruṣacarcām eva prastauti
prāpya vyādhivinirmuktaṃ deham alpādhivedhitam /
tathātmānaṃ samādadhyād yathā bhūyo na jāyate // Mo_2,7.1 //
"alpo" yaḥ "ādhiḥ" jīvanopāyādinimittā cittapīḍā | tena "vedhitam" tāḍanāyuktam kṛtam | "samādadhyāt" cinmātratattve samādhānayuktaṃ kuryāt || MoT_2,7.1 ||



daivaṃ puruṣakāreṇa yo 'tivartitum icchati /
iha cāmutra ca jayet sa saṃpūrṇābhivāñchitaḥ // Mo_2,7.2 //
"daivam" anudyogarūpam daivam | "saṃpūrṇe abhivāñchite" bhogamokṣarūpe kāṅkṣite yasya "saḥ" || MoT_2,7.2 ||



ye samudyogam utsṛjya sthitā daivaparāyaṇāḥ /
te dharmam arthakāmau ca nāśayanty ātmavidviṣaḥ // Mo_2,7.3 //
"ātmavidviṭtvaṃ" ca teṣāṃ bhogamokṣarūpātmakakāryanāśakatvāj jñeyam || MoT_2,7.3 ||



saṃvitspando manaḥspanda indriyaspanda eva ca /
etāni puruṣārthasya rūpāṇy ebhyaḥ phalodayaḥ // Mo_2,7.4 //
"ebhyaḥ" saṃvidādispandebhyaḥ || MoT_2,7.4 ||


saṃvittattvād eva pauruṣotthānaṃ kathayati
yathā saṃvedanaṃ cetas tathāntaḥspandam ṛcchati /
tathaiva kāyaś calati tathaiva phalabhoktṛtā // Mo_2,7.5 //
"yathā" yena prakāreṇa | "saṃvedanam" saṃvidaḥ sphuraṇam syāt | "tathā" tena prakāreṇa | "cetaḥ antaḥspandam" saṃkalpākhyām ceṣṭām | "ṛcchati" gacchati | "tathaiva" cittaspandānusāreṇa eva | "kāyaḥ calati" hitāhitaprāptiparihārarūpāṃ kriyāṃ prati ceṣṭate | tataḥ "tathaiva" kāyacalanānusāreṇaiva | "phalabhoktṛtā" bhavati | "jīvasye"ti śeṣaḥ || MoT_2,7.5 ||



ābālam etat saṃsiddhaṃ yatra yatra yathā tathā /
daivaṃ tu na kvacid dṛṣṭam ato jayati pauruṣam // Mo_2,7.6 //
"ābālaṃ" bālaparyantam | "etat" maduktam | phalitam āh"āta" iti || MoT_2,7.6 ||



puruṣārthena deveśagurur eṣa bṛhaspatiḥ /
śukro daityendragurutāṃ puruṣārthena cāsthitaḥ // Mo_2,7.7 //
deveśasya guruḥ "deveśaguruḥ" || MoT_2,7.7 ||


dainyadāridryaduḥkhārtā api sādho narottamāḥ /
pauruṣeṇaiva yatnena yātā devendratulyatām // Mo_2,7.8 //
"devendratulyatām" indrasāmyam || MoT_2,7.8 ||


mahānto vibhavāḍhyā ye nānāścaryasamāśrayāḥ /
pauruṣeṇaiva doṣeṇa narakātithitāṃ gatāḥ // Mo_2,7.9 //
"doṣeṇa" doṣahetunā | ucchāstriteneti yāvat || MoT_2,7.9 ||



bhāvābhāvasahasreṣu daśāsu vividhāsu ca /
svapauruṣavaśād eva vivṛttā bhūtajātayaḥ // Mo_2,7.10 //
"vivṛttāḥ" rūpāntaraṃ gatāḥ | "bhāvābhāvā"dyāviṣṭāḥ saṃpannā iti yāvat || MoT_2,7.10 ||


śāstrato gurutaś caiva svataś ceti trisiddhitā /
sarvatra puruṣārthasya na daivasya kadācana // Mo_2,7.11 //
tribhiḥ prakāraiḥ siddhitā "trisiddhitā" | "phalam" iti śeṣaḥ | "svataḥ" śāstrādi vinā svapratibhāmātrād eva | kecid dhi "śāstrāt" siddhā bhavanti | kecit "gurutaḥ" | kecit "svataḥ" || MoT_2,7.11 ||



aśubheṣu samāviṣṭaṃ śubheṣv evāvatārayet /
yatnena cittam ity āśu sarvaśāstrārthasaṃgrahaḥ // Mo_2,7.12 //
"aśubheṣu" bhogārjanarūpeṣv aśubhakāryeṣu || MoT_2,7.12 ||


yac chreyo yad atucchaṃ ca yad apāyavivarjitam /
tat tad ācara yatnena putreti guravaḥ sthitāḥ // Mo_2,7.13 //
"putra" he śiṣya | "sthitāḥ" | "upadeṣṭṛtvene"ti śeṣaḥ || MoT_2,7.13 ||


yathā yathā prayatno me phalam āśu tathā tathā /
ity ahaṃ pauruṣād eva phalabhāṅ na tu daivataḥ // Mo_2,7.14 //
"ity" evaṃ | niścayavān bhaved iti bhāvaḥ || MoT_2,7.14 ||


pauruṣād dṛśyate siddhiḥ pauruṣaṃ dhīmatāṃ kramaḥ /
daivam āśvāsanāmātraṃ duḥkhapelavabuddhiṣu // Mo_2,7.15 //
"duḥkhena pelavā" udyogāsahā | "buddhiḥ" yeṣāṃ teṣu || MoT_2,7.15 ||


pratyakṣapramukhān nityaṃ pramāṇaṃ pauruṣaḥ kramaḥ /
phalato dṛśyate loke deśāntaragamādikāt // Mo_2,7.16 //
asmābhiḥ "pauruṣaḥ" puruṣasambandhī "kramaḥ" | pādacālanādirūpaṃ pauruṣam iti yāvat | "deśāntaragamādikāt phalataḥ" phalāt | "nityaṃ pramāṇaṃ" arthakriyākāri "dṛśyate" | "phalataḥ" kathaṃbhūtāt | "pratyakṣaṃ" pratyakṣapramāṇaṃ | "pramukhaṃ" grāhakatvena pradhānaṃ yasya | tādṛśāt pratyakṣadṛṣṭād ity arthaḥ | ataḥ pauruṣam eva saphalaṃ | na daivam iti bhāvaḥ || MoT_2,7.16 ||



bhoktā tṛpyati nābhoktā gantā gacchati nāgatiḥ /
vaktā vakti na cāvaktā pauruṣaṃ saphalaṃ nṛṇām // Mo_2,7.17 //
spaṣṭam || MoT_2,7.17 ||


pauruṣeṇa durantebhyaḥ saṃkaṭebhyaḥ subuddhayaḥ /
samuttaranty ayatnena na tu mūkatayānayā // Mo_2,7.18 //
"mūkatayā" daivaparatvarūpeṇa udyogarāhityena || MoT_2,7.18 ||



yo yo yathā prayatate sa sa tadvat phalaikabhāk /
na tu tūṣṇīṃ sthiteneha kenacit prāpyate phalam // Mo_2,7.19 //
"tadvat" tathā | "tūṣṇīṃ sthitena" udyogarahitena tiṣṭhatā || MoT_2,7.19 ||



śubhena puruṣārthena śubham āsādyate phalam /
aśubhenāśubhaṃ rāma yathecchasi tathā kuru // Mo_2,7.20 //
spaṣṭam || MoT_2,7.20 ||


puruṣārthaphalaprāptir deśakālavaśād iha /
prāptā cireṇa śīghraṃ vā yāsau daivam iti smṛtā // Mo_2,7.21 //
"prāptiḥ" "prāpte"ti kāryaṃ karoti itivat prayogaḥ | "asau" "puruṣārthaphalaprāptiḥ" || MoT_2,7.21 ||


na daivaṃ dṛśyate dṛṣṭyā na ca lokāntare sthitam /
uktaṃ daivābhidhānena svaṃ loke karmaṇaḥ phalam // Mo_2,7.22 //
spaṣṭam || MoT_2,7.22 ||


puruṣo jāyate loke vardhate kṣīyate punaḥ /
na tatra dṛśyate daivaṃ jarāyauvanabālyavān // Mo_2,7.23 //
"tatra" puruṣe || MoT_2,7.23 ||
deśād deśāntaraprāptir hastasthadravyadhāraṇam /
vyāpāraś ca tathāṅgānāṃ pauruṣeṇa na daivataḥ // Mo_2,7.24 //
spaṣṭam || MoT_2,7.24 ||
arthaprāpakakāryaikaprayatnaparatā budhaiḥ /
proktā pauruṣaśabdena sarvam āsādyate 'nayā // Mo_2,7.25 //
"arthaprāpakaṃ" yat "kāryaṃ" | tatra "ekam" kevalaṃ | "prayatnaparatā" || MoT_2,7.25 ||


anarthaprāptikāryaikaprayatnaparatā tu yā /
soktā pronmattaceṣṭeti na kiṃcit prāpyate 'nayā // Mo_2,7.26 //
"anarthaprāptau" anarthaprāptyarthaṃ yat "kāryam" | tatra "ekam prayatnaparatā" || MoT_2,7.26 ||


kriyāyāḥ spandadharmiṇyāḥ svārthasādhakatā svayam /
sādhusaṅgamasacchāstratīkṣṇayonnīyate dhiyā // Mo_2,7.27 //
"unnīyate" niścīyate || MoT_2,7.27 ||


anantaṃ samatānandaṃ paramārthaṃ svakaṃ viduḥ /
tad yebhyaḥ prāpyate yatnāt sevyās te śāstrasādhavaḥ // Mo_2,7.28 //
"svakam paramārtham" nijaṃ paramaprayojanam || MoT_2,7.28 ||


sacchāstrādiguṇo matyā sacchāstrādiguṇān matiḥ /
vardhete te mitho 'bhyāsāt sarobdāv iva kālataḥ // Mo_2,7.29 //
"sacchāstrādi"rūpaḥ "guṇaḥ matyā" bhavati | buddhirahitasya "sacchāstrādau" pravṛttyabhāvāt | "matiḥ sacchāstrādiguṇāt" bhavati | "te" sacchāstrādiguṇamatī | "mithaḥ" anyonyaṃ | "abhyāsāt vardhete" vṛddhiṃ gacchataḥ | kāv "iva" | "sarobdāv iva" | yathā "sarobdau" saromeghau | "kālataḥ mithaḥ vardhete" tathety arthaḥ | kadācid dhi saraḥ meghavṛṣṭena jalena vardhate | kadācit tu meghaḥ sarasaḥ gṛhītena jaleneti || MoT_2,7.29 ||



ābālyād alam abhyastaiḥ śāstrasatsaṃgamādibhiḥ /
guṇaiḥ puruṣayatnena svo 'rthaḥ saṃprāpyate hitaḥ // Mo_2,7.30 //
"puruṣayatnena" pauruṣeṇ"ābhyastaiḥ" anuśīlitaiḥ | "svaḥ arthaḥ" mokṣākhyaṃ nijaṃ prayojanam || MoT_2,7.30 ||


pauruṣeṇa jitā daityāḥ sthāpitā bhuvanakriyāḥ /
racitāni jagantīha viṣṇunā na tu daivataḥ // Mo_2,7.31 //
spaṣṭam || MoT_2,7.31 ||


sargāntaślokena śrīrāmasya pauruṣaṃ kartavyatvenopadiśati
jagati puruṣakārakāraṇe 'smin
kuru raghunātha ciraṃ tathā prayatnam /
vrajasi tarusarīsṛpābhidhānāṃ
subhaga yathā na daśām aśaṅkam eva // Mo_2,7.32 //
"jagati" kathaṃbhūte | "puruṣakāraḥ" pauruṣaṃ "kāraṇaṃ" yasya | tādṛśe | cinmātrapauruṣād eva hi jagad utpannam | "prayatnam" pauruṣam | "tarusarīsṛpābhidhānāṃ daśāṃ" tarvādirūpatām ity arthaḥ | tarvādayo hi pauruṣarāhityenaiva duḥkham anubhavantīti teṣāṃ grahaṇaṃ kṛtam | iti śivam || MoT_2,7.32 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuvyavahāraprakaraṇe saptamaḥ sargaḥ || 2,7 ||


************************************************************************

oṃ punaḥ daivanirākaraṇaṃ karoti | oṃ
nākṛtir na ca karmāṇi nāspadaṃ na parākramaḥ /
tan mithyājñānavat prauḍhaṃ daivaṃ nāma kim ucyate // Mo_2,8.1 //
pūrvārdhe "yasye"ti śeṣaḥ || MoT_2,8.1 ||


svakarmaphalasaṃprāptāv idam ittham itīha yāḥ /
giras tā daivanāmnaitāḥ prasiddhiṃ samupāgatāḥ // Mo_2,8.2 //
"idam ittham iti gira" idaṃ itthaṃ saṃpannam iti vācaḥ || MoT_2,8.2 ||



tathaiva mūḍhamatibhir daivam astīti niścayaḥ /
ātto duravabodhena rajjāv iva bhujaṅgamaḥ // Mo_2,8.3 //
"ātto" gṛhītaḥ | "duravabodhena" ajñānena | "iva"śabdaḥ yathāśābdārthe || MoT_2,8.3 ||



hyastanī duṣkriyābhyeti śobhāṃ satkriyayā yathā /
adyaivaṃ prāktanī tasmād yatnāt satkāryavān bhava // Mo_2,8.4 //
gatārtho 'yam || MoT_2,8.4 ||


mūḍhānumānasaṃsiddhaṃ daivaṃ yasyāsti durmateḥ /
daivād dāho 'stu mā veti vaktavyaṃ tena pāvake // Mo_2,8.5 //
"mūḍhānumānasaṃsiddhaṃ daivaṃ yasya durmateḥ" ajñāninaḥ | "asti" paramārthasad asti | "tena" durmatinā | "pāvake" agnau sthitvā | "daivād dāhaḥ astu mā"stu "veti vaktavyam" | tatra tv asau naitad vaktuṃ śaknoti dāhaikalabdher iti bhāvaḥ || MoT_2,8.5 ||



daivam eveha cet karma puṃsaḥ kim iva ceṣṭayā /
snānadānāśanādārān daivam eva kariṣyati // Mo_2,8.6 //
"karma" karmasaṃpādakam ity arthaḥ | na caitat saṃbhavati akiṃcitkurvataḥ "snānā"dyanupapatter iti bhāvaḥ || MoT_2,8.6 ||



kiṃ vā śāstropadeśena mūko 'yaṃ puruṣaḥ kila /
saṃcāryate tu daivena kiṃ kasyehopadiśyate // Mo_2,8.7 //
"saṃcāryate" saṃcaraṇaśīlaḥ saṃpādyate | "kim" iti | "kena" iti śeṣaḥ | daivāṅgīkāre na ko 'pi "kasyā"py upadeśaṃ kuryād iti bhāvaḥ || MoT_2,8.7 ||


na ca niḥspandatā loke dṛṣṭeha śavatāṃ vinā /
spandaś ca phalasaṃprāptis tasmād daivaṃ nirarthakam // Mo_2,8.8 //
spaṣṭam || MoT_2,8.8 ||


nanu daivena sahaiva puruṣaḥ kāryaṃ karotīty | atrāha
na cāmūrtena daivena mūrtasya sahakartṛtā |
hastādīn īhataś caiva na daivena kvacit kṛtam || MoT_2,8.9 ||


"amūrtena" mūrtirahitena "daivena" | "hastādīn īhataḥ" ceṣṭataḥ | "mūrtasya" puruṣasya | "sahakartṛtā ca na" bhavati | ataḥ "daivena kṛtam" daivakartṛkaṃ kāryaṃ | "kvacit na" bhavati || MoT_2,8.9 ||



nanu manobuddhyādivad amūrtasyāpi daivasya mūrtena saha kartṛtvam asty evety | atrāha
manobuddhivad apy etad daivaṃ nehānubhūyate /
āgopālaṃ kila prājñais tena daivam asat sadā // Mo_2,8.10 //
mṛtaśarīre kartṛtvādarśanān "manobuddhī" kalpyete | na ca daivasyātra kaścid upayoga iti | na tatkalpanāvasara iti bhāvaḥ || MoT_2,8.10 ||


nanu kadācit tasmād eva dṛśyāt śarīrādeḥ kāryaṃ dṛṣṭaṃ kadācin na dṛṣṭam iti adṛṣṭasya daivasya kalpanā yuktaivety | atrāha
pṛthak ced buddhir anyo 'rthaḥ saiva cet kānyatā tayoḥ /
kalpanā vā pramāṇaṃ cet pauruṣaṃ kiṃ na kalpyate // Mo_2,8.11 //
"buddhiḥ" jñānaṃ | "pṛthak cet" yady asti | tad"ārthaḥ anya" ekasmāt dvitīyaḥ pṛthag iti yāvat | asti buddhiḥ "sā eva" | na tu bhinnā "ced" bhavati | tadā "tayoḥ" arthayoḥ "kā anyatā" bhavati | ato 'tra kevalasaddṛśyāc charīrāder eva kāryaṃ bhavatv iti bhāvaḥ | nanv atra buddhipṛthaktvopayogo nāsti | kalpanāyā eva pramāṇatvād ity | atrāha | "kalpane"ti | "kalpanā" prathamaṃ "pramāṇaṃ" nāsti "ced" | "vā"sti | tadā "pauruṣaṃ kiṃ na kalpyate" | kalpanayā saṃbhāvyate samānanyāyatvāt || MoT_2,8.11 ||



punar api prakṛtaṃ mūrtāmūrtayoḥ sahakartṛtvāsaṃbhavam eva kathayati
nāmūrtena ca saṅgo 'sti nabhaseva vapuṣmataḥ /
mūrtaṃ ca dṛśyate lagnaṃ tasmād daivaṃ na vidyate // Mo_2,8.12 //
"vapuṣmataḥ" mūrtasya śarīriṇaḥ | "amūrtena" mūrtirahitena daivena | "saṅgaḥ" sahakartṛtvaṃ "nāsti" | ken"eva" | "nabhasā iva" | nanu tathāpi amūrtam eva kartṛ bhavatv ity | atrāha | "mūrtaṃ ce"ti | asmābhiḥ "mūrtam" eva "lagnaṃ" kāryalagnaṃ "dṛśyate" | ataḥ tasyaiva kartṛtvaṃ yuktam iti bhāvaḥ | phalitaṃ kathayati | "tasmād" iti | "tasmāt" tato hetoḥ | "daivaṃ na vidyate" | tatkalpanāyāḥ nirastatvāt || MoT_2,8.12 ||



viniyoktātha bhūtānām asty anyat tajjagattraye /
śeratāṃ bhūtavṛndāni daivaṃ sarvaṃ kariṣyati // Mo_2,8.13 //
"viniyoktā" prerakaḥ | "anyad" daivākhyaṃ anyat vastu | "śeratām" kāryeṣv anudyogaṃ bhajantām || MoT_2,8.13 ||



daivenetthaṃ niyukto 'smi kiṃ karomīdṛśaṃ sthitam /
samāśvāsanavāg eṣā na daivaṃ paramārthataḥ // Mo_2,8.14 //
"īdṛśam sthitam" īdṛśam saṃpannam || MoT_2,8.14 ||



mūḍhaiḥ prakalpitaṃ daivaṃ tatparās te kṣayaṃ gatāḥ /
prājñās tu puruṣārthena padam uttamam āgatāḥ // Mo_2,8.15 //
"tatparāḥ" svayaṃkalpitadaivaparāḥ | "te" mūḍhāḥ | "puruṣārthena" pauruṣeṇa | "uttamaṃ padam" mokṣākhyam utkṛṣṭaṃ sthānam || MoT_2,8.15 ||



ye śūrā ye ca vikrāntā ye prājñā ye ca paṇḍitāḥ /
tais taiḥ kair iva loke 'smin vada daivaṃ pracakṣyate // Mo_2,8.16 //
"pracakṣyate" kathyate | na kenāpi pracakṣyate iti bhāvaḥ || MoT_2,8.<16 ||


     kālavidbhir vinirṇītā yasyāsti cirajīvitā /
     sa cej jīvati saṃchinnaśirās tad daivam uttamam // Mo_2,8.17 //
"kālavidbhiḥ" daivajñaiḥ || MoT_2,8.17 ||


     kālavidbhir vinirṇītaṃ pāṇḍityaṃ yasya rāghava /
     anadhyāpita evāsau tajjñaś ced daivam uttamam // Mo_2,8.18 //
"tajjñaḥ" paṇḍitaḥ || MoT_2,8.18 ||


     viśvāmitreṇa muninā daivam utsṛjya dūrataḥ /
     pauruṣeṇaiva saṃprāptaṃ brāhmaṇyaṃ rāma nānyathā // Mo_2,8.19 //
spaṣṭam || MoT_2,8.19 ||



     amībhir na parai rāma puruṣair munitāṃ gataiḥ /
     pauruṣeṇaiva saṃprāptā ciraṃ gaganagamitā // Mo_2,8.20 //
"amībhiḥ" pauruṣayuktair ebhir eva | "paraiḥ" pauruṣarahitaiḥ sāmānyajantubhiḥ | "gaganagamitā" paramākāśacāritvam || MoT_2,8.20 ||


     utsādya devasaṃghātāṃś cakrus tribhuvanodare /
     pauruṣeṇaiva yatnena sāmrājyaṃ dānaveśvarāḥ // Mo_2,8.21 //
"utsādya" bādhitvā | "devasaṃghātān" devasamūhān | "dānaveśvarāḥ" hiraṇyākṣyādayaḥ || MoT_2,8.21 ||


     ālūnaśīrṇam ābhogi jagad ājahrur ojasā /
     pauruṣeṇaiva yatnena dānavebhyaḥ sureśvarāḥ // Mo_2,8.22 //
"ālūnaśīrṇam" aticañcalam || MoT_2,8.22 ||



     rāma pauruṣayuktyaiva salilaṃ dhāryate na vā /
     ciraṃ karaṇḍake yuktyā na daivaṃ tatra kāraṇam // Mo_2,8.23 //
"karaṇḍake" randhrayukte kāṇḍasādhite dravyaviśeṣe | kenacit prayogena hi karaṇḍe 'pi jalaṃ tiṣṭhati || MoT_2,8.23 ||


     haraṇādānasaṃrambhavibhramabhramabhūmiṣu /
     śaktatā dṛśyate rāma na daivasyauṣadher iva // Mo_2,8.24 //
"haraṇe"tyādy upalakṣaṇaṃ sarvakriyāṇām || MoT_2,8.24 ||



sargāntaślokenaitat samāpayati
     sakalakāraṇakāryavivarjitaṃ
     nijavikalpavaśād upakalpitam /
     tvam anavekṣya hi daivam asanmayaṃ
     śraya śubhāśaya pauruṣam uttamam // Mo_2,8.25 //
gatārtho 'yam | iti śivam || MoT_2,8.25 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe 'ṣṭamaḥ sargaḥ || 2,8 ||


************************************************************************

oṃ atra śrīrāmaḥ pṛcchati
     bhagavan sarvadharmajña pratiṣṭhām alam āgatam /
     yal loke tad vada brahman daivam evaṃ kim ucyate // Mo_2,9.1 //
he "bhagavan" | "brahman" vasiṣṭha | kathaṃbhūta | "sarvadharmajña" | tvam "vada" | "yat daivam loke evam pratiṣṭhām" prasiddhim | "āgataṃ" | "tat" paṇḍitaiḥ "kiṃ"rūpaṃ kathyate | na hi asiddhaṃ vastu prasiddhim āyāti iti bhāvaḥ || MoT_2,9.1 ||


śrīvasiṣṭhaḥ uttaraṃ kathayati
     pauruṣaṃ sarvakāryāṇāṃ kartṛ rāghava netarat /
     phalabhoktṛ ca sarvatra na daivaṃ tatra kāraṇam // Mo_2,9.2 //
he "rāghava" | "pauruṣaṃ sarvakāryāṇāṃ kartṛ" bhavati | "itarat" anyat daivādi | kartṛ "na" bhavati | na kevalaṃ kartr eva | kiṃ tu "phalabhoktṛ ca" bhavati | svāviṣṭapuruṣadvāreṇeti bhāvaḥ | "daivaṃ tatra kāraṇaṃ na" bhavati | ato daivaṃ nāstīti bhāvaḥ || MoT_2,9.2 ||


     daivaṃ na kiṃcit kurute na ca bhuṅkte na vidyate /
     na dṛśyate nādriyate kevalaṃ kalpanedṛśī // Mo_2,9.3 //
"īdṛśī" daivam eva sarvaṃ karotīty evaṃrūpā | na ca kalpanāyāḥ satyatvam iti bhāvaḥ || MoT_2,9.3 ||



     siddhasya pauruṣeṇeha phalasya phalaśālinām /
     śubhāśubhā vā saṃpattir daivaśabdena kathyate // Mo_2,9.4 //
paṇḍitaiḥ "phalaśālināṃ" phalabhājāṃ | "pauruṣeṇa" śubhāśubhena pauruṣeṇa | "siddhasya phalasya śubhā aśubhā vā saṃpattiḥ daivaśabdena kathyate" | "ajñavyavahārārtham" iti śeṣaḥ || MoT_2,9.4 ||


     pauruṣoparatā nityam iṣṭāniṣṭasya vastunaḥ /
     prāptir iṣṭāpy aniṣṭā vā daivaśabdena kathyate // Mo_2,9.5 //
paṇḍitaiḥ "pauruṣe uparatā" niṣṭhāṃ gatā | "iṣṭāniṣṭasya vastunaḥ iṣṭā aniṣṭā vā prāptiḥ daivaśabdena kathyate" | "api"śabdaḥ pādapūraṇārthaḥ || MoT_2,9.5 ||



     bhāvī tv avaśyam evārthaḥ puruṣārthaikasādhanaḥ /
     yaḥ so 'smiṃl lokasaṃghāte daivaśabdena kathyate // Mo_2,9.6 //
"bhāvī" bhavanaśīlaḥ | "puruṣārthaḥ" pauruṣam "ekaṃ sādhanaṃ" yasya | tādṛśaḥ | "lokasaṃghāte" lokasamūhe || MoT_2,9.6 ||


     na tu rāghava lokasya kasyacit kiṃcid eva hi /
     daivam ākāśakalpaṃ hi karoti na karoti vā // Mo_2,9.7 //
"hi" yasmādarthe | "ākāśakalpam" ākāśavad atyantatuccham | na hi vandhyāsutaḥ "kasyacit kiṃcit" "karoti na karoti ve"ti bhāvaḥ | dvitīyo "hi"śabdaḥ niścaye || MoT_2,9.7 ||



     puruṣārthasya siddhasya śubhāśubhaphalodaye
     idam itthaṃ sthitam iti yoktis tad daivam ucyate || MoT_2,9.8 ||


"ukteḥ" svarūpaṃ kathayati | "idam itthaṃ sthitam" " itī"ti | "siddham" saṃpannam || MoT_2,9.8 ||



     itthaṃ mamābhavad buddhir itthaṃ me niścayo hy abhūt /
     iti karmaphalāvāptau yoktis tad daivam ucyate // Mo_2,9.9 //
"itthaṃ" karmaphalasādhanarūpā | "karmaphalasyāvāptau" prāptau | "ukti"mātram eva "daivam" iti bhāvaḥ || MoT_2,9.9 ||


     iṣṭāniṣṭaphalaprāptāv evam ityarthavācakam /
     āśvāsanāmātravaco daivam ity eva kathyate // Mo_2,9.10 //
"āśvāsanāmātravacaḥ" kathaṃbhūtaṃ | "evam" | "iti" yaḥ "arthaḥ" | tasya "vācakam" niyamavācakam ity arthaḥ || MoT_2,9.10 ||


śrīrāmaḥ pṛcchati
     bhagavan sarvadharmajña prāg yat karmopasaṃcitam | /     tad etad daivam ity uktam apamṛṣṭaṃ kathaṃ tvayā // Mo_2,9.11 //
"prāk" pitrantargatabījatāvasthāyām | "apamṛṣṭam" nāśitam || MoT_2,9.11 ||


śrīvasiṣṭhaḥ uttaraṃ kathayati
     sādhu rāghava jānāsi śṛṇu vakṣyāmi te 'khilam /
     daivaṃ nāstīti te yena sthirā buddhir bhaviṣyati // Mo_2,9.12 //
spaṣṭam || MoT_2,9.12 ||


tad eva kathayati
     yā magnā vāsanā pūrvaṃ babhūva kila bhūriśaḥ /
     saiveyaṃ karmabhāvena nṝṇāṃ pariṇatiṃ gatā // Mo_2,9.13 //
"pūrvam" pitrantargatabījatāvasthāyām | "bhūriśaḥ" bhūriprakāreṇa | vartamānā "yā vāsanā" śubhāśubhā vā bhāvanā | "magnā" | "bīje" iti śeṣaḥ bhavati | "sā eveyaṃ nṝṇāṃ karmabhāvena" karmarūpeṇa | "pariṇatiṃ" rūpāntaraṃ | "gatā" | tadanurūpam eva sarve karma kurvantīti bhāvaḥ || MoT_2,9.13 ||


     jantur yadvāsano nāma tatkarmā bhavati kṣaṇāt /
     anyakarmānyabhāvaś cety etan naivopapadyate // Mo_2,9.14 //
"anyabhāvaḥ" anyavāsanā || MoT_2,9.14 ||


     grāmago grāmam āpnoti pattanārthī ca pattanam /
     yo yo yadvāsanas tat tat sa sa prayatate tathā // Mo_2,9.15 //
"grāmagasya ca " grāmagamanavāsanā sphuṭā evānyathā na yāyāt || MoT_2,9.15 ||


     yad eva tīvrasaṃvegād iha karma kṛtaṃ purā /
     tad eva daivaśabdena paryāyeṇa hi kathyate // Mo_2,9.16 //
"iha" ihalokaparalokatayā dvirūpe saṃsāre | "purā" pitrantargatabījatāvasthāyām | "karma"karaṇaṃ cātra pitṛdvāreṇaiva jñeyam || MoT_2,9.16 ||


upasaṃhāraṃ karoti
     evaṃ daivaṃ svakarmāṇi karma prauḍhā svavāsanā /
     vāsanā manaso nānyā mano hi puruṣaḥ smṛtaḥ // Mo_2,9.17 //
"evam" anena prakāreṇa | "svakarmāṇi" prāk kṛtāni nijakarmāṇi | "daivaṃ" bhavati | "prauḍhā vāsanā karma" bhavati | tadanusāreṇaiva tasya prakṛtatvāt | "vāsanā manasaḥ anyā na" bhavati | "hi" niścaye | "manaḥ puruṣaḥ" bhavati | ataḥ daivasya puruṣād vyatiriktā sattā nāstīti bhāvaḥ || MoT_2,9.17 ||



punar apy etad eva kathayati
     yad daivaṃ tāni karmāṇi karma sādho mano hi tat /
     mano hi puruṣas tasmād daivaṃ nāstīti niścayaḥ // Mo_2,9.18 //
"karme"ty atra yacchabdādhyāhāraḥ | "yat" "karma" | "tat mano" bhavati || MoT_2,9.18 ||


     ekam eva mano jantor yathā prayatate hi yat /
     nūnaṃ tat tad avāpnoti svata eva na daivataḥ // Mo_2,9.19 //
spaṣṭam || MoT_2,9.19 ||


     manaś cittaṃ vāsanā ca karma daivaṃ svaniścayaḥ /
     rāma puṃniścayasyaitāḥ saṃjñāḥ sadbhir udāhṛtāḥ // Mo_2,9.20 //
"puṃniścayasya" puṃrūpasya niścayasya | puruṣasyeti yāvat || MoT_2,9.20 ||



     evaṃnāmā hi puruṣo dṛḍhabhāvanayā yathā /
     nityaṃ prayatate rāma phalam āpnoty alaṃ tathā // Mo_2,9.21 //
"evaṃnāmā" mana ityādināmayuktaḥ || MoT_2,9.21 ||


upasaṃhāraṃ karoti
     evaṃ puruṣakāreṇa sarvam eva raghūdvaha /
     prāpyate netareṇeha tasmāt sa śubhado 'stu te // Mo_2,9.22 //
"saḥ" puruṣakāraḥ | "śubhado" jīvanmuktākhyaśubhaphalapradaḥ | "te" ity upalakṣaṇam | tena sarveṣāṃ śubhaphalapradaḥ bhavatu ity arthaḥ || MoT_2,9.22 ||



śrīrāmaḥ pṛcchati
     prāktanaṃ vāsanājālaṃ niyojayati māṃ yathā /
     mune tathaiva tiṣṭhāmi kṛpaṇaḥ kiṃ karomy aham // Mo_2,9.23 //
ataḥ pauruṣaṃ kiṃcid api nāstīti bhāvaḥ || MoT_2,9.23 ||


śrīvasiṣṭhaḥ uttaraṃ kathayati
     ata eva hi he rāma śreyaḥ prāpnoṣi śāśvatam /
     svaprayatnopanītena pauruṣeṇaiva nānyathā // Mo_2,9.24 //
"hi" niścaye | "ata eva" pūrvoktāt kāraṇād eva | "pauruṣeṇa" kathaṃbhūtena | "svaprayatnopanītena" | rāhoḥ śira itivad ayaṃ prayogaḥ || MoT_2,9.24 ||


     dvividho vāsanāvyūhaḥ śubhaś caivāśubhaś ca te /
     prāktano vidyate rāma dvayor ekataro 'tha vā // Mo_2,9.25 //
"vāsanāvyūhaḥ" vāsanāsamūhaḥ | "atha vā" pakṣāntare | "dvayoḥ" madhye | "ekataraḥ" śubhaḥ aśubho vā asti || MoT_2,9.25 ||


     vāsanaughena śuddhena tatra ced adya nīyase /
     tat krameṇa śubhenaiva padaṃ prāpnoṣi śāśvatam // Mo_2,9.26 //
"nīyase" svānusāreṇa karma kāryase | "padam" mokṣākhyaṃ sthānaṃ || MoT_2,9.26 ||



     atha ced aśubho bhāvas tvāṃ yojayati saṅkaṭe /
     prāktanas tad asau yatnāj jetavyo bhavatā balāt // Mo_2,9.27 //
"aśubho bhāvaḥ" aśubhā vāsanā | "balāt" haṭhāt || MoT_2,9.27 ||


nanv anyaḥ cetanārūpaḥ kaścin māṃ prerayati | tat katham ahaṃ svayaṃ kiṃcit kartuṃ śaknomīty | atrāha
     prājña cetanāmātras tvaṃ na dehas tvaṃ jaḍātmakaḥ /
     tad eva cetasy anyena cet tat tvaṃ kveva vidyase // Mo_2,9.28 //
he "prājña" | asmiñ śloke vakṣyamāṇe upadeśe yogyatvam | "cetanāmātraḥ" asi "tvam" | "jaḍaḥ dehaḥ nā"si | "tad eva" cetanāmātram eva san | "tvam anyena" hetukartṛbhūtena kṛtvā | "cet" yadi | "cetasi" citikriyāṃ prati kartṛtvaṃ bhajasi | "tat" tadā | "tvam" na "vidyase" nāsi | tasyaiva sattvāt | na hi dvayoḥ sattā yuktā vyarthatvāt || MoT_2,9.28 ||



punar api pūrvaślokottarārdhaniścitam artham eva kathayati
     anyas tvāṃ cetayati cet tat tvayy asati ko 'paraḥ /
     kam imaṃ cetayet tasmād anavasthā na vāstavī // Mo_2,9.29 //
"anyaḥ tvām cet cetayati" citikriyākartṛtvam prerayati | "tat" tadā | "tvayi asati" pūrvoktayuktyā sattām abhajati sati | sa iti "kam imam" kiṃrūpam | idantāspandaṃ tvāṃ | "cetayet" citikriyākartṛtvaṃ prati prerayet | na hy asataḥ preraṇaṃ yuktam iti bhāvaḥ | ataḥ anyaḥ kaścit preryaḥ kalpanīyaḥ | so 'pi tvatsamānayogakṣema eveti kutrāpi preryatayā viśrāntir na syād | ataḥ tvam eva preryaprerakabhāvena sthito 'sīty abhiprāyeṇopasaṃhāraṃ karoti | "tasmād" iti | "tasmāt" tato hetoḥ | "anavasthā" preryānavasthitiḥ | "vāstavī" paramārthabhūtā | "na" bhavati | tavaiva preryaprerakatvābhyāṃ sthitatvāt | ato na kaścit tavānyaḥ prerakaḥ astīti bhāvaḥ || MoT_2,9.29 ||



prakṛtam anusarati
     śubhāśubhābhyāṃ mārgābhyāṃ vahantī vāsanāsarit /
     pauruṣeṇa prayatnena yojanīyā śubhe pathi // Mo_2,9.30 //
"yojanīyā" pravartanīyā | bhogatyāgaparāmarśākhyaṃ śubhānusandhānam eva satataṃ kāryam iti bhāvaḥ || MoT_2,9.30 ||


     aśubheṣu samāviṣṭaṃ śubheṣv evāvatārayet /
     svamanaḥ puruṣārthena balena balināṃ vara // Mo_2,9.31 //
"samāviṣṭam" saṃlīnam | "avatārayet" nayet || MoT_2,9.31 ||


     aśubhāc calitaṃ yāti śubhaṃ tasmād apītarat /
     jantoś cittaṃ tu paśuvat tasmāt tat pālayed balāt // Mo_2,9.32 //
"aśubhāt" bhogārjanaparāmarśarūpāt aśubhānusandhānāt | "tasmād api" śubhād api | "pālayed" aśubhāt rakṣet || MoT_2,9.32 ||



     samatāsāntvanenāśu na drāg iti śanaiḥ śanaiḥ /
     pauruṣeṇa prayatnena pālayec cittabālakam // Mo_2,9.33 //
"samatā" sarvam idaṃ brahmety evaṃrūpā buddhiḥ | tayā yat "sāntvanam" samāśvāsanaṃ tena | "na drāg iti" na jhaṭiti | etasyārthaṃ svakaṇṭhena kathayati | "śanaiḥ śanair" iti samyagvicāreṇa | na tu prāṇarodhanādirūpeṇa haṭhenety arthaḥ || MoT_2,9.33 ||



     vāsanaughas tvayā pūrvam abhyāsena ghanīkṛtaḥ /
     śubho vāpy aśubho rāma śubham adya ghanīkuru // Mo_2,9.34 //
"adya" | "madupadeśene"ti śeṣaḥ || MoT_2,9.34 ||


     prāgabhyāsavaśād yātā yadā te vāsanodayam /
     tadābhyāsasya sāphalyaṃ viddhi tvam arimardana // Mo_2,9.35 //
"abhyāsasya" samastasyābhyāsasya || MoT_2,9.35 ||


     idānīm api te yāti ghanatāṃ vāsanānagha /
     abhyāsavaśatas tasmāc chubhābhyāsam upāhara // Mo_2,9.36 //
"idānīm" asmin janmani | "upāhara" ānaya || MoT_2,9.36 ||


     pūrvaṃ ced ghanatāṃ yātā nābhyāsāt tava vāsanā /
     vardhiṣyate tu nedānīm api tāta sukhī bhava // Mo_2,9.37 //
vāsanārāhityamātrasyaiva parame pade yatatvāt iti bhāvaḥ || MoT_2,9.37 ||



     saṃdigdhāyām api bhṛśaṃ śubham eva samāhara /
     asyāṃ tu vāsanāvṛddhau śubhād doṣo na kaścana // Mo_2,9.38 //
"asyāṃ vāsanāvṛddhau saṃdigdhāyām" kim abhyāsād vardhate na veti sandehaviṣayāyām "api" satyāṃ | tvaṃ "bhṛśaṃ śubham eva samāhara" abhyāsaviṣayīkuru | yataḥ "śubhāt kaścana doṣo na" bhavati || MoT_2,9.38 ||



sandehasyāyuktatāṃ kathayati
     yad yad abhyasyate loke tanmayenaiva bhūyate /
     ity ākumāraṃ prajñeṣu dṛṣṭaṃ sandehavarjitam // Mo_2,9.39 //
"loke" saṃsāre | "puruṣeṇe"ti śeṣaḥ || MoT_2,9.39 ||



     śubhavāsanayā yuktas tad atra bhava bhūtaye /
     paraṃ pauruṣam āśritya vijityendriyapañcakam // Mo_2,9.40 //
"bhūtaye" jīvanmuktākhyasaṃpatprāptaye || MoT_2,9.40 ||


     avyutpannamanā yāvad bhavān ajñātatatpadaḥ /
     guruśāstrapramāṇais tu nirṇītaṃ tāvad ācara // Mo_2,9.41 //
"avyutpannamanāḥ" jñānarahitaḥ | ata ev"ājñātatatpadaḥ" ajñātabrahmākhyotkṛṣṭasthānaḥ | "nirṇītam" tatpadanirṇayam | bhāve ktaprayoge "nirṇītam" iti siddham || MoT_2,9.41 ||


     tataḥ kaṣāyapākena nūnaṃ vijñātavastunā /
     śubho 'py asau tvayā tyājyo bhāvanaugho nirādhinā // Mo_2,9.42 //
"kaṣāyapākena" lakṣaṇayā parakoṭiprāptyā | "bhāvanaughaḥ" nirṇayarūpaḥ vāsanāsamūhaḥ | "nirādhinā" śubhavāsanākhyacittapīḍārahitena || MoT_2,9.42 ||


sargāntaślokena śrīrāmasyāvasthānam anuṣṭheyatvenopadiśati
     yad atisubhagam āryasevitaṃ tac
     chubham anusṛtya manojñabhāvabuddhyā /
     adhigamaya padaṃ sadāviśokaṃ
     tad anu tad apy avamucya sādhu tiṣṭha // Mo_2,9.43 //
tvaṃ | "yat atisubhagam" ata ev"āryasevitam" bhavati | "tac chubhaṃ" pauruṣam | "manojñabhāvā" śubhavāsanā yā matiḥ | tayā karaṇabhūtayā | "anusṛtya" satatānuṣṭhānaviṣayatāṃ nītvā | "aviśokaṃ" duḥkharahitaṃ | "padaṃ" jīvanmuktirūpaṃ sthānaṃ | "adhigamaya" prāpnuhi | ārṣaḥ svārthe ṇic | "tad anu" kālāntare | "tad api" jīvanmuktipadam api "avamucya" | "sādhu" samyak | "tiṣṭha" videhamuktau sthirībhavety arthaḥ | iti śivam || MoT_2,9.43 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe navamaḥ sargaḥ || 2,9 ||


************************************************************************

oṃ paramam upasaṃhāraṃ karoti
     ataḥ pauruṣam āśritya śreyase nityabāndhavam /
     ekāgraṃ kuru cittaṃ tvaṃ śṛṇu coktam idaṃ mama // Mo_2,10.1 //
"uktam" upadeśam || MoT_2,10.1 ||


     avāntarābhipātīni svārūḍhāni manoratham /
     pauruṣeṇendriyāṇy āśu saṃyamya samatāṃ naya // Mo_2,10.2 //
"avāntareṣu" bhogarūpeṣu madhyameṣu viśrāntisthāneṣu | na tu paramātmarūpe parame viśrāntisthāne | "abhipātīni" patanaśīlāni | "manorathaṃ" cittānusandhānam | "svārūḍhāni" suṣṭhu ārūḍhāni | "indriyāṇi saṃyamya" pratyāhṛtya | "samatāṃ" rāgadveṣarahitatvam "naya" | anyathā na śroṣyasīti bhāvaḥ || MoT_2,10.2 ||


     ihāmutra ca siddhyarthaṃ puruṣārthaphalapradām /
     mokṣopāyamayīṃ vakṣye saṃhitāṃ sārasammitām // Mo_2,10.3 //
"mokṣopāyamayīṃ" mokṣasya yaḥ upāyaḥ tanmayīm tadvācakām ity arthaḥ | "saṃhitām" śāstram | "sārasammitām" sāratulyām || MoT_2,10.3 ||


     apunargrahaṇāyāntas tyaktvā saṃsāravāsanām /
     saṃpūrṇau śamasantoṣāv ādāyodārayā dhiyā // Mo_2,10.4 //
     sapūrvāparavākyārthavicāraviṣayādṛtam /
     manaḥ samarasaṃ kṛtvā sānusandhānam ātmani // Mo_2,10.5 //
     sukhaduḥkhakṣayakaraṃ mahānandaikasādhanam /
     mokṣopāyam imaṃ rāma vakṣyamāṇaṃ mayā śṛṇu // Mo_2,10.6 //
he "rāma" | tvaṃ "mayā vakṣyamāṇaṃ mokṣopāyaṃ śṛṇu" | kiṃ kṛtvā | "apunargrahaṇāye"tyādi | suṣuptau tyaktām api vāsanāṃ puruṣaḥ punaḥ gṛhṇātīti "apunargrahaṇāye"ty uktam | "antaḥ" manasi | anyathā na śrotuṃ śaknoṣīti bhāvaḥ | "ādāya" gṛhītvā | "manaḥ" kathaṃbhūtaṃ | "ātmani samarasam" ekarasam | na tu viṣayeṣu vikṣiptaṃ | tathā "sapūrvāparaḥ" saṃpūrṇaḥ yaḥ "vākyārthavicāraḥ" | sa eva "viṣayaḥ" saṃcārasthānam | tatr"ādṛtam" || MoT_2,10.4-6 ||


     imāṃ mokṣakathāṃ śrutvā saha sarvair vivekibhiḥ /
     padaṃ yāsyasi nirduḥkhaṃ nāśo yatra na vidyate // Mo_2,10.7 //
"padam" viśrāntisthānam || MoT_2,10.7 ||


evaṃ śrīrāmasya pauruṣam āśrayaṇīyatvenopadiśya viśvāmitrapreraṇayā smṛtaṃ brahmoktam upadeśaṃ kathayituṃ prastāvaṃ karoti
     idam uktaṃ purākalpe brahmaṇā parameṣṭhinā /
     sarvaduḥkhakṣayakaraṃ paramāśvāsanaṃ dhiyaḥ // Mo_2,10.8 //
"idaṃ" vakṣyamāṇaṃ | "dhiyaḥ" buddheḥ | "paramāśvāsanam" utkṛṣṭaṃ āśvāsanakāri || MoT_2,10.8 ||



śrīrāmaḥ pṛcchati
     kenoktaṃ kāraṇenedaṃ brahman pūrvaṃ svayaṃbhuvā /
     kathaṃ ca bhavatā prāptam etat kathaya me prabho // Mo_2,10.9 //
"idaṃ" vakṣyamāṇaṃ jñānam || MoT_2,10.9 ||


śrīvasiṣṭhaḥ uttaraṃ kathayati
     asty anantavilāsātmā sarvagaḥ sarvasaṃśrayaḥ /
     cidākāśo 'vināśātmā pradīpaḥ sarvavastuṣu // Mo_2,10.10 //
"cidākāśaḥ" cid iti nāmadheyaḥ ākāśaḥ "cidākāśaḥ" | saḥ "asti" paramārthasan bhavati | kathaṃbhūtaḥ | "anantāḥ" aparicchinnāḥ | ye "vilāsāḥ" sargāvabhāsanasaṃkocanarūpāḥ vilāsāḥ te | "ātmā" svarūpaṃ yasya saḥ | tathā "sarvagaḥ" sarvavyāpakatvāt upacāreṇa sarvagantā | na hi mukhyaṃ sarvagatvam asya saṃbhavati niṣkriyatvena gamikriyānāśrayatvāt | punaḥ kathaṃbhūtaḥ | "sarveṣām" samastānāṃ bhāvābhāvasvarūpāṇāṃ padārthānāṃ | "saṃśrayaḥ" sphūrtipradatvena sattāpradatvena cāśrayaḥ | punaḥ kathaṃbhūtaḥ | "avināśātmā" vināśasyāpi sākṣitayā sattāpradatvena ca tena rahitaḥ ātmā yasya saḥ | na hi svasphūrtipradasya svasattāpādakasya ca kaścit āvaraṇaṃ kartuṃ śaktaḥ tadāvṛtau svasyāpy asiddhatvāt | punaḥ kathaṃbhūtaḥ | "sarvavastuṣu pradīpaḥ" prakāśakatvāt | nanu kutrāsāv astīti cen | na | sarvatra vartamānasya kutreti vaktum aśakyatvāt | nanu tathāpi kathaṃ nāsau sarvatra dṛśyate iti ced | asad etat | draṣṭrekasvarūpe tasmin kathaṃ na dṛśyata ity asyāpi vaktum aśakyatvāt | tathāpi ko 'sāv iti cet | yaḥ pṛcchati sa eveti brūmaḥ | nanu kaḥ pṛcchati iti cet | ahantayā atiprākaṭyena bhāsamānaḥ saḥ svayam eva svāntaḥ vicāryatām ity alaṃ rahasyodghāṭanena || MoT_2,10.10 ||



tataḥ kim ity | atrāha
     spandāspandasamākārāt tato viṣṇur ajāyata /
     spandamānarasāpūrāt taraṅgaḥ sāgarād iva // Mo_2,10.11 //
"spandāspandayoḥ" sṛṣṭyāveśaudāsīnyayoḥ "samākārāt" cittvākhyasamānākārayuktāt | "tataḥ" tasmāc cidākāśāt | "viṣṇuḥ" bhāvisṛṣṭisthitikārī nārāyaṇākhyo devatāviśeṣaḥ | samaṣṭirūpaṃ śuddhabuddhitattvaṃ c"ājāyata" | saṃhārakāraṇasya śuddhāhaṅkārarūpasya rudrasya kathanaṃ sṛṣṭimātrakathanākāṅkṣayā na kṛtam | viṣṇuḥ ka "iva" | "taraṅga iva" | yathā "spandamānarasāpūrāt sāgarāt taraṅgaḥ" jāyate tathety arthaḥ || MoT_2,10.11 ||



     sumerukarṇikāt tasya digdalād dhṛdayāmbujāt /
     tārakākesaravataḥ parameṣṭhī vyajāyata // Mo_2,10.12 //
"tasya" nārāyaṇasya śuddhabuddhitattvasya ca | "sumerukarṇikāt" tathā "tārakākesarāt hṛdayāmbujāt" hṛtkamalāt tadantargatāt brahmāṇḍāt iti yāvat | bhāvisarvajagadādhāratvayogyāt svarūpaleśāc ca | "parameṣṭhī" bhāvisṛṣṭyutpattikārī brahmākhyo devatāviśeṣaḥ | samaṣṭirūpaṃ śuddhamanastattvaṃ ca "vyajāyata" || MoT_2,10.12 ||



     vedavedārthadeveśamunimaṇḍalamālitam /
     so 'sṛjat sakalaṃ sargaṃ vikalpaughaṃ yathā manaḥ // Mo_2,10.13 //
"sakalaṃ" jagat bāhyatvena bhāsamānaṃ samastaṃ jagat | samaṣṭibhūtaśuddhamanastattvarūpāt | parameṣṭhina eva hi sarvaṃ jagad utpannam | atropamānatvaṃ vyaṣṭirūpasya "manasaḥ" jñeyam | samaṣṭirūpasya manasaḥ upameyatvāt || MoT_2,10.13 ||



     jambudvīpasya koṇe 'smin varṣe bhāratanāmani /
     sa sasarja janaṃ putrair ādhivyādhipariplutam // Mo_2,10.14 //
"janam" mānavajanam | "putraiḥ" prajāpatibhiḥ kṛtvā sāmānyajanaiś ca || MoT_2,10.14 ||


janaṃ viśinaṣṭi
     bhāvābhāvaviṣaṇṇāṅgam utpātadhvaṃsatatparam /
     sarge 'smin bhūtajātīnām āpyāyanakaraṃ param // Mo_2,10.15 //
"bhūtajātīnāṃ" devādīnām | "āpyāyanakaram" havyakavyādidvāreṇa tṛptikaram || MoT_2,10.15 ||


     janasya tasya duḥkhaṃ sad dṛṣṭvā sakalalokakṛt /
     jagāma karuṇām īśaḥ putraduḥkhād yathā pitā // Mo_2,10.16 //
"tasya janasya" mānavajanasya | "īśaḥ" brahmā śuddhamanastattvaṃ ca | "karuṇāṃ" dayām | atra ca śuddhamanasaḥ karuṇā sṛjyamānasmṛtikāracittāveśadvāreṇa jñeyety alaṃ rahasyodghāṭanena || MoT_2,10.16 ||


nanu tataḥ kim akarod ity | atrāha
     ka eteṣāṃ hatāśānāṃ duḥkhasyānto hatāyuṣām /
     syād iti kṣaṇam ekāgraś cintayām āsa bhūtapaḥ // Mo_2,10.17 //
"hatāśānāṃ" naṣṭānāṃ | "hatāyuṣāṃ" naśvarāṇāṃ | "antaḥ" avasānaṃ || MoT_2,10.17 ||


brahmaṇaḥ cintām upasaṃharati
     iti saṃcintya bhagavān sasarja punar īśvaraḥ /
     tapo dharmaṃ ca dānaṃ ca satyaṃ tīrthāni caiva ha // Mo_2,10.18 //
"sasarja" svayaṃ | kṛteṣu smṛtiśāstreṣu janān prati kartavyatvena dṛṣṭavān ity arthaḥ || MoT_2,10.18 ||


     etat sṛṣṭvā punar devaś cintayām āsa bhūtakṛt /
     puṃsāṃ nānena sarvasya duḥkhasyānta iti svayam // Mo_2,10.19 //
spaṣṭam || MoT_2,10.19 ||


punaḥ kena puṃsāṃ sarvasya duḥkhasyāntaḥ bhaviṣyatīty āśaṅkya cintayati
     nirvāṇaṃ nāma paramaṃ sukhaṃ yena punar janaḥ /
     na jāyate na mriyate taj jñānād eva labhyate // Mo_2,10.20 //
tan nirvāṇaṃ kena syād ity āśaṅkya cintayati | "taj jñānād" iti | "tat" nirvāṇam | "jñānāt eva" paramātmatattvajñānāt eva | na tu tapaḥprabhṛtibhyaḥ "labhyate" || MoT_2,10.20 ||


"eva"kāraprayogayogyatāṃ svayam eva sādhayati
     saṃsārottaraṇe jantor upāyo jñānam eva hi /
     tapo dānaṃ tathā tīrtham aṇūpāyaḥ prakīrtitaḥ // Mo_2,10.21 //
"aṇūpāyaḥ" avāntaropāyaḥ || MoT_2,10.21 ||



tarhi janānāṃ jñānaṃ kathaṃ setsyatīty āśaṅkya cintayati
     tat tāvad duḥkhamokṣārthaṃ janasyāsya mahātmanaḥ /
     pratyagraṃ taruṇopāyam āśu prakaṭayāmy aham // Mo_2,10.22 //
iyaṃ cintā tu utpādayiṣyamāṇajñānopadeśakāracintāveśadvāreṇa jñeyā || MoT_2,10.22 ||


parameṣṭhicintām upasaṃharati
     iti saṃcintya bhagavān brahmā kamalasaṃbhavaḥ /
     manasā parisaṃkalpya mām utpāditavān imam // Mo_2,10.23 //
"mām" proktasvacintodbhavasthānabhūtānām upadeśakārāṇāṃ madhye mukhyabhūtaṃ tvādṛśajanajñānotpādanasamarthaṃ mokṣopāyākhyaśāstropadeśakaṃ vasiṣṭhākhyaṃ "mām" | "manase"ti rāhoḥ śira itivat prayogaḥ || MoT_2,10.23 ||



nanu kenopādānakāraṇena tvam utpanna ity | atrāha
     kuto 'py utpanna evāśu tato 'haṃ samupasthitaḥ /
     pitus tasya puraḥ śīghram ūrmir ūrmer ivānagha // Mo_2,10.24 //
"kuto 'pi" anirvācyāt kasmāccid upādānakāraṇāt | "utpannaḥ aham" | "tataḥ tasya pituḥ puraḥ śīghram upasthitaḥ" prāptaḥ | ka "ivo"tpannaḥ | "ūrmir ūrmer iva" paramārthavicāre sarveṣām utpattir adṛśyeveti sāmānyotpattir evātroktety alaṃ rahasyodghāṭanena || MoT_2,10.24 ||     
kīdṛśaḥ tvam upasthitaḥ kiṃ ca kṛtavān ity | atrāha
     kamaṇḍaludharo nāthaḥ sakamaṇḍalunā mayā /
     sākṣamālaḥ sākṣamālaṃ sa praṇamyābhivāditaḥ // Mo_2,10.25 //
"sākṣamālam" iti pūrvakālakriyāviśeṣaṇam | etena svasya dhyānam uktam || MoT_2,10.25 ||



tataḥ tava tena kim uktaṃ kṛtaṃ cety | atrāha
     ehi putreti mām uktvā sa svābjasyottare dale /
     śukle 'bhra iva śītāṃśuṃ yojayām āsa pāṇinā // Mo_2,10.26 //
atra śuddhamanaḥsparśaḥ mayi jātaḥ iti bhaṅgyā uktam || MoT_2,10.26 ||


     mṛgakṛttiparīdhāno mṛgakṛttinijāmbaram /
     mām uvāca pitā brahmā sa haṃsaḥ sārasaṃ yathā // Mo_2,10.27 //
"mām" vasiṣṭhākhyaṃ mām | vacanaṃ cātrāntaraḥ parāmarśaḥ jñeyaḥ || MoT_2,10.27 ||



kim uvācety | atrāha
     muhūrtamātraṃ te putra ceto vānaracañcalam /
     ajñānam abhyāviśatu śaśaḥ śaśadharaṃ yathā // Mo_2,10.28 //
āntarabhāvena sthitaśuddhacittavaśenaiva hi sarveṣām ajñānitvaṃ jñānitvaṃ ca bhavati | etena prathamaṃ svasya jñānitvaṃ dyotitam || MoT_2,10.28 ||


brahmavacanam upasaṃharati
     iti tenāśu śaptaḥ san vicārasamanantaram /
     ahaṃ vismṛtavān sarvaṃ svarūpam amalaṃ dvijaḥ // Mo_2,10.29 //
"ahaṃ dvijaḥ" vasiṣṭhākhyaḥ brāhmaṇaḥ | svaṃ "svarūpaṃ" | "vismṛtavān" vyasmārṣam iti sambandhaḥ || MoT_2,10.29 ||


     athāhaṃ dīnatāṃ yātaḥ sthito 'saṃbuddhayā dhiyā /
     duḥkhaśokābhisaṃtapto jāto jana ivādhamaḥ // Mo_2,10.30 //
"asaṃbuddhayā" niścayarahitayā || MoT_2,10.30 ||


     kaṣṭaṃ saṃsāranāmāyaṃ doṣaḥ katham ivāgataḥ /
     iti cintitavān antas tūṣṇīm eva vyavasthitaḥ // Mo_2,10.31 //
aham "iti cintitavān" iti saṃbandhaḥ | etena ajñānitvānantaram svasya vairāgyaprādurbhāvaḥ sūcitaḥ || MoT_2,10.31 ||



     athābhyadhāt sa māṃ tātaḥ putra kiṃ duḥkhavān asi /
     duḥkhopaghātaṃ māṃ pṛccha sukhī nityaṃ bhaviṣyasi // Mo_2,10.32 //
"athābhyadhāt" uktavān | etena vairāgyānantaram mama jñānaṃ prati aunmukhyaṃ jātam iti sūcitam || MoT_2,10.32 ||


nanu tatas tvayā kiṃ kṛtam ity | atrāha
     tataḥ pṛṣṭaḥ sa bhagavān mayā sakalalokakṛt /
     hemapadmadalasthena saṃsāravyādhibheṣajam // Mo_2,10.33 //
etena "mayā" svayam eva vimarṣaḥ kṛta iti sūcitam || MoT_2,10.33 ||


nanu tvayāsau kiṃ pṛṣṭas tena ca kim uktaṃ ity | atrāha
     kathaṃ nātha mahad duḥkham ayaṃ saṃsāra āgataḥ /
     kathaṃ ca kṣīyate jantor iti pṛṣṭena tena me // Mo_2,10.34 //
     taj jñānaṃ subahu proktaṃ yaj jñātvā pāvanaṃ param /
     ahaṃ pitur api prāyaḥ kilādhika iva sthitaḥ // Mo_2,10.35 //
"pituḥ" ādhikyam śuddhamanastattvātilaṅghanena prāptā cinmātratā jñeyā | etena svasya svataḥsiddhatvam uktam | trividhā hi siddhāḥ uttarottaram utkarṣavantaḥ santi | gurutaḥ śāstrataḥ svata iti || MoT_2,10.34-35 ||



     tato viditavedyaṃ māṃ nijaprakṛtim āsthitam /
     sa uvāca jagatkartā vaktā sakalakāraṇam // Mo_2,10.36 //
mayi idaṃ sphuritam ity āntaro 'bhiprāyaḥ || MoT_2,10.36 ||


kim uvācety | atrāha
     śāpenājñapadaṃ nītvā pṛcchakas tvaṃ mayā kṛtaḥ /
     putrāsya jñānasārasya samastajanasiddhaye // Mo_2,10.37 //
mama madhye evedam ajñatvaṃ prādurbhūtam āsīt iti mama sphuritam iti bhāvaḥ || MoT_2,10.37 ||



punaḥ kim uvācety | atrāha
     idānīṃ śāntaśāpas tvaṃ paraṃ bodham upāgataḥ /
     saṃsthito 'ham ivaikātmā kanakaṃ kanakād iva // Mo_2,10.38 //
"idānīm ahaṃ" jñānī jāta ity api mama sphuritam iti bhāvaḥ || MoT_2,10.38 ||


tato 'pi punaḥ kim uvācety | atrāha
     gacchedānīṃ mahāpīṭhe jambudvīpāntarasthitam /
     sādho bhāratavarṣaṃ tvaṃ lokānugrahahetunā // Mo_2,10.39 //
spaṣṭaṃ || MoT_2,10.39 ||



     tatra kriyākāṇḍaparās tvayā putra mahādhiyaḥ /
     upadeśyāḥ kriyākāṇḍakrameṇa kramaśālinaḥ // Mo_2,10.40 //
spaṣṭam || MoT_2,10.40 ||


     viraktacittāś ca tathā mahāprājñā virāgiṇaḥ /
     upadeśyās tvayā sādho jñānenānandadāyinā // Mo_2,10.41 //
tataḥ ahaṃ vairāgyarahitānāṃ karmakāṇḍadvāreṇopadeśaṃ karomi | viraktānāṃ tu jñānakāṇḍadvāreṇety api sphuritam | anyathā tvadupadeśe 'py ahaṃ na pravarteyam iti bhāvaḥ || MoT_2,10.41 ||


brahmavākyam upasaṃharati
     iti tena niyukto 'haṃ pitrā kamalayoninā /
     iha rāghava tiṣṭhāmi yāvad bhūtaparaṃparā // Mo_2,10.42 //
"yāvad bhūtaparaṃpare"ty upadeṣṭṛbhūtajñānisāmānyenoktam svasya cirajīvitvena vā | bāhya arthas tu sphuṭatayā na pratipadam uktaḥ || MoT_2,10.42 ||



sargāntaślokenaitat samāpayati
     kartavyam asti mama neha hi kiṃcid eva
     sthātavyam ity abhimanā bhuvi saṃsthito 'smi /
     saṃśāntayā satatasuptadhiyeva vṛttyā
     kāryaṃ karomi na ca kiṃcid ahaṃ karomi // Mo_2,10.43 //
"hi" niścaye | "mama" samastajñānisantānasya vasiṣṭhākhyasya ca | "iha" loke | "kiṃcit" "eva kartavyaṃ nāsti" paramātmatattvaprāptyā kṛtakṛtyatvāt | tathāpi "aham bhuvi" bhūmau | "saṃsthitaḥ asmi" | kathaṃbhūtaḥ | sthātavyam mayā ihāvaśyaṃ | niyatyanurodhena "sthātavyam iti" evam "abhimanāḥ" abhiniviṣṭamanāḥ niścitamanā iti yāvat | "ahaṃ saṃśāntayā" lābhālābhānusandhānarūpakṣobharahitayā "vṛttyā" vā | pāreṇa "kāryam" śarīrayātrānimittaṃ karma | akaraṇe pratyavāyanimittaṃ nityaṃ karma ca "karomi" | "vṛttyā" kayā "iva" | "satatasuptā" yā "dhīḥ" | tayā "ivā"tyantaśāntayety arthaḥ | tathāpi "ahaṃ kiṃcid" api "na ca karomi" nāhaṃ karteti niścayānubhāvād ity arthaḥ | iti śivam || MoT_2,10.43 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe daśamaḥ sargaḥ || 2,10 ||


************************************************************************

pūrvasargoktasyopasaṃhārakāṅkṣayā parāmarśaṃ karoti
     etat te kathitaṃ sarvaṃ jñānāvataraṇaṃ bhuvi /
     mayā svam īhitaṃ caiva kamalodbhavakalpitam // Mo_2,11.1 //
"svam īhitam" nijaceṣṭitam | "kamalodbhavena" brahmaṇā śuddhamanastattvena ca | "kalpitam" āvirbhāvitaṃ iti | anena prakāreṇaiveha jñānam ihāvatīrṇam iti bhāvaḥ || MoT_2,11.1 ||



     tad idaṃ paramaṃ jñānaṃ śrotum adya tavānagha /
     bhṛśam utkaṇṭhitaṃ ceto mahataḥ sukṛtodayāt // Mo_2,11.2 //
"tat" brahmaṇā uktam || MoT_2,11.2 ||


śrīrāmaḥ pṛcchati
     kathaṃ brahman bhagavato loke jñānāvatāraṇe /
     sargād anantaraṃ buddhiḥ pravṛttā parameṣṭhinaḥ // Mo_2,11.3 //
"kathaṃ" kimarthaṃ ity arthaḥ || MoT_2,11.3 ||



śrīvasiṣṭhaḥ uttaraṃ kathayati
     parame brahmaṇi brahmā svabhāvavaśataḥ svayam /
     jātaḥ spandamayo nityam ūrmir ambunidhāv iva // Mo_2,11.4 //
"parame" utkṛṣṭacinmātrasvarūpe | "spandamayaḥ" parimitāhaṃparāmarśamayaḥ || MoT_2,11.4 ||



     sṛṣṭvaivam ātataṃ sargaṃ sargasya sakalā gatīḥ /
     bhūtabhavyabhaviṣyatsthā dadarśa parameśvaraḥ // Mo_2,11.5 //
"dadarśa" | "jñānanetreṇe"ti śeṣaḥ || MoT_2,11.5 ||


     satkriyākramakālasya kṛtādeḥ kṣaya āgate /
     moham ālokya lokānāṃ kāruṇyam agamat prabhuḥ // Mo_2,11.6 //
"moham" bhaviṣyantam ity arthaḥ || MoT_2,11.6 ||


     tato mām īśvaraḥ sṛṣṭvā jñānenāyojya cāsakṛt /
     visasarja mahīpīṭhe lokasyājñānaśāntaye // Mo_2,11.7 //
"mām" vasiṣṭhākhyaṃ "mām" | "jñānena" paramātmajñānena | "āyojya" saṃyojya || MoT_2,11.7 ||


     yathāhaṃ prahitas tena tathānye 'pi maharṣayaḥ /
     sanatkumārapramukhā nāradādyāś ca bhūriśaḥ // Mo_2,11.8 //
etena ye bhūtā bhaviṣyantaś copadeṣṭāraḥ santi tatrāpīyam eva rītir astīti sūcitam || MoT_2,11.8 ||


     kriyākrameṇa puṇyena tathā jñānakrameṇa ca /
     manomahāmayottabdham uddhartuṃ lokam īritāḥ // Mo_2,11.9 //
"īritāḥ" visarjitāḥ | kiṃ kartum | "lokam" adhikāribhedāt "kriyākrameṇa jñānakrameṇa ca uddhartum" | "lokaṃ" kathaṃbhūtam | "mana" eva "mahāmayaḥ" mahārogaḥ | ten"ottabdham" baddham || MoT_2,11.9 ||


     maharṣibhis tatas tais tu kṣīṇe kṛtayuge purā /
     kramāt kriyākrame śuddhe pṛthivyāṃ tanutāṃ gate // Mo_2,11.10 //
     kriyākramavidhānārthaṃ maryādāniyamāya ca | /     pṛthagdeśavibhāgena bhūpālāḥ parikalpitāḥ // Mo_2,11.11 //
spaṣṭam || MoT_2,11.10-11 ||


     bahūni smṛtiśāstrāṇi yajñaśāstrāṇi cāvanau /
     dharmakāmārthe siddhyarthaṃ kalpitāny uditāny atha // Mo_2,11.12 //
pari"kalpitāni" kṛtāni | "maharṣibhir" iti śeṣaḥ | yal lokaiḥ teṣām upadeśaḥ na śruta iti bhāvaḥ | "atha"śabdaḥ uttaraślokena saṃbandhanīyaḥ || MoT_2,11.12 ||



     kālacakre vahaty asmiṃs tato vigalite krame /
     pratyahaṃ bhojanapare jane śālyarjanonmukhe // Mo_2,11.13 //
     dvandvāni saṃpravṛttāni viṣayārthaṃ mahībhujām /
     daṇḍyatāṃ saṃprayātāni bhūtāni bhuvi bhūriśaḥ // Mo_2,11.14 //
"dvandvāni" dvandvayuddhāni | "viṣayārtham" deśārtham | "daṇḍyatāṃ" daṇḍayogyatām | paradāragamanādipāpakaraṇāt iti bhāvaḥ || MoT_2,11.13-14 ||


     tato yuddhaṃ vinā bhūpā mahīṃ pālayituṃ kramāt /
     asamarthās tad āyātāḥ prajābhiḥ saha dīnatām // Mo_2,11.15 //
spaṣṭam || MoT_2,11.15 ||



     teṣāṃ dainyāpanodārthaṃ samyaksṛṣṭikramāya ca /
     tato 'smadādibhiḥ proktā mahatyo jñānadṛṣṭayaḥ // Mo_2,11.16 //
"teṣām" rājñām || MoT_2,11.16 ||


     adhyātmavidyā teneyaṃ pūrvaṃ rājasu varṇitā /
     tad anu prasṛtā loke rājavidyety udāhṛtā // Mo_2,11.17 //
"rājavidyā rājaguhyam" ityādinā gītādau "rājavidyā"śabdena vyavahārāt iti bhāvaḥ || MoT_2,11.17 ||


     rājavidyā rājaguhyam adhyātmagrantham uttamam /
     jñātvā rāghava rājānaḥ parāṃ nirduḥkhatāṃ gatāḥ // Mo_2,11.18 //
"rājaguhyam" iti adhyātmavidyāyāḥ aparaṃ nāma || MoT_2,11.18 ||



     atha rājasv atīteṣu bahuṣv amalakīrtiṣu /
     asmād daśarathād rāma jāto 'dya tvam ihāvanau // Mo_2,11.19 //
spaṣṭam || MoT_2,11.19 ||


     tava cātiprasanne 'smiñ jātaṃ manasi pāvanam /
     nirnimittam idaṃ cāru vairāgyam arimardana // Mo_2,11.20 //
"nirnimittam" bībhatsādirūpaṃ nimittaṃ vinā || MoT_2,11.20 ||



nanu nirnimittavairāgyena ko 'tiśayaḥ mamāstīty | atrāha
     sarvasyaiva hi bhavyasya sādhor api vivekinaḥ /
     nimittapūrvaṃ vairāgyaṃ jāyate rāma rājasam // Mo_2,11.21 //
spaṣṭam || MoT_2,11.21 ||


     idaṃ tv apūrvam utpannaṃ camatkārakaraṃ satām |
     tavānimittaṃ vairāgyaṃ sāttvikaṃ svavivekajam || MoT_2,11.22 ||


spaṣṭam || MoT_2,11.22 ||


     bībhatsaṃ viṣamaṃ dṛṣṭvā ko nāma na virajyate /
     satāṃ tūttamavairāgyaṃ vivekād eva jāyate // Mo_2,11.23 //
"bībhatsam" bībhatsarasālambanam dravyam || MoT_2,11.23 ||


     te mahānto mahāprajñā nimittena vinaiva hi /
     vairāgyaṃ jāyate yeṣāṃ ta evāmalamānasāḥ // Mo_2,11.24 //
amalamānasatvaṃ vinā hi nirnimittaṃ vairāgyaṃ notpadyate iti bhāvaḥ || MoT_2,11.24 ||


     svavivekacamatkāraparāmarśaviraktayā /
     rājate hi dhiyā jantur yuveva vanamālayā // Mo_2,11.25 //
"svavivekasya" yaḥ "camatkāraḥ" | tasya yaḥ "parāmarśaḥ" | tena "viraktayā" bāhyapadārtharāgarahitayā | na tu bībhatsena viraktayā || MoT_2,11.25 ||


     parāmṛśya vivekena saṃsāraracanām imām /
     virāgaṃ ye 'dhigacchanti ta eva puruṣottamāḥ // Mo_2,11.26 //
spaṣṭam || MoT_2,11.26 ||


     svavivekavaśād eva vicāryedaṃ punaḥ punaḥ /
     indrajālaṃ parityājyaṃ sabāhyābhyantaraṃ balāt // Mo_2,11.27 //
"indrajālam " saṃsārākhyam indrajālam | "parityājyam" samantāt tyāgaviṣayatāṃ neyam || MoT_2,11.27 ||


     śmaśānam āpadaṃ dainyaṃ dṛṣṭvā ko na virajyate /
     tad vairāgyaṃ paraṃ śreyaḥ svato yad abhijāyate // Mo_2,11.28 //
spaṣṭam || MoT_2,11.28 ||     
     akṛtrimavirāgas tvaṃ mahattām alam āgataḥ /
     yogyo 'si jñānasārasya bījasyeva mṛdusthalam // Mo_2,11.29 //
spaṣṭam || MoT_2,11.29 ||



     prasādāt parameśasya nāthasya paramātmanaḥ /
     tvādṛśasya śubhā buddhir vivekam anudhāvati // Mo_2,11.30 //
na tv atrātmaprayatnaḥ kaścit prabhavatīti bhāvaḥ || MoT_2,11.30 ||


     kriyākrameṇa mahatā tapasā niyamena ca /
     dānena tīrthayātrābhiś cirakālavivekataḥ // Mo_2,11.31 //
     duṣkṛte kṣayam āpanne paramārthavicāraṇe /
     kākatālīyayogena buddhir jantoḥ pravartate // Mo_2,11.32 //
"kākatālīyayogene"ty anena "kriyākramā"deḥ śaithilyaṃ sūcitam | "kākatālīyena" "paramā"tma"vicāraṇa"nimitta"buddhiyogaḥ" | tāvat tu kriyākramādir avaśyam anuṣṭheyaḥ | tasyāpi leśataḥ taṃ praty upāyatvāt | na ca tatraiva maṅktavyam | sadgurūpāsāder anyasya mukhyasyopāyasyāpi sattvāt ity alam || MoT_2,11.32 ||



     kriyāparās tāvad alaṃ cakrāvṛttibhir ādṛtāḥ /
     bhramantīha janā yāvan na paśyanti paraṃ padam // Mo_2,11.33 //
"kriyāparāḥ" kriyām evopāyatvena manyamānāḥ | "param padam" cinmātrākhyam utkṛṣṭaṃ sthānam | "cakrāvṛttibhiḥ kriyāparāḥ" paunaḥpunyena sakriyāratā ity arthaḥ || MoT_2,11.33 ||



     yathābhūtam imaṃ dṛṣṭvā saṃsāraṃ tanmayīṃ dhiyam /
     parityajya paraṃ yānti nirālānā gajā iva // Mo_2,11.34 //
"yathābhūtam dṛṣṭvā" yathāsti tathā dṛṣṭvā | "tanmayīṃ" saṃsāramayīm | "param" uttīrṇam śuddhacinmātratattvam | "yānti" tadrūpaṃ svātmānam anubhavanti || MoT_2,11.34 ||
     viṣameyam anantehā rāma saṃsārasaṃsṛtiḥ /
     dehamuktā mahātantur vinā jñānaṃ na naśyati // Mo_2,11.35 //
"anantāḥ īhāḥ" bhāvābhāvarūpāḥ ceṣṭāḥ yasyāḥ | tādṛśī "saṃsārasaṃsṛtiḥ" saṃsārasaraṇiḥ | dehamuktā nāma mahātantuḥ "dehamuktā mahātantuḥ" | "jñānam" cinmātratattvajñānam || MoT_2,11.35 ||



     jñānayuktiplavenaiva saṃsārābdhiṃ sudustaram /
     mahādhiyaḥ samuttīrṇā netareṇa raghūdvaha // Mo_2,11.36 //
"jñāna"rūpā yā "yuktiḥ" upāyaḥ | sa eva "plavaḥ" | tena || MoT_2,11.36 ||



     tām imāṃ jñānayuktiṃ tvaṃ saṃsārāṃbhodhitāriṇīm /
     śṛṇuṣvāvahito buddhyā nityāvahitayānayā // Mo_2,11.37 //
"avahitayā buddhyā" vinā śrotuṃ na śaknoṣīti bhāvaḥ || MoT_2,11.37 ||



     yasmād anantasaṃrambhā jagato duḥkharītayaḥ /
     cirāyāntar dahanty etā vinā yuktim anindita // Mo_2,11.38 //
"yuktim" jñānākhyāṃ yuktim || MoT_2,11.38 ||


     śītavātātapādīni dvandvaduḥkhāni rāghava /
     jñānayuktiṃ vinā kena sahyatāṃ yānti sādhuṣu // Mo_2,11.39 //
"kena" kenānyenopāyena | na kenāpīty arthaḥ | atra tu bālavṛddhayoḥ maricabhakṣaṇaṃ dṛṣṭāntatvena yojyam || MoT_2,11.39 ||



     āpatanti pratipadaṃ yathākālaṃ dahanti ca /
     duḥkhacintā naraṃ mūḍhaṃ tṛṇam agniśikhā iva // Mo_2,11.40 //
duḥkhadāyinyaḥ cintāḥ "duḥkhacintāḥ" | tāś ca bhogaviṣayāḥ jñeyāḥ || MoT_2,11.40 ||


     prājñaṃ vijñātavijñānaṃ samyagdarśinam ādhayaḥ /
     na dahanti vanaṃ varṣadabdam agniśikhā iva // Mo_2,11.41 //
"prājñaṃ" kathaṃbhūtam | "vijñātam" anubhūtam | "vijñānaṃ" vijñānarūpam ātmatattvaṃ yena tam | "ādhayaḥ" cintāḥ | "vanaṃ" kathambhūtam | "varṣantaḥ abdāḥ" meghāḥ yasya tat || MoT_2,11.41 ||



     ādhivyādhiparāvarte saṃsāramarumārute /
     kṣubhite 'pi na tattvajño bhajyate kalpavṛkṣavat // Mo_2,11.42 //
"ādhivyādhyoḥ parāvartaḥ" paunaḥpunyenāvṛttiḥ yasmin | tādṛśe "kṣubhite" bhāvābhāvākhyaḥ kṣobhayukte | "na" "bhajyate" harṣaśokavaśaṃ na yāti | "saṃsāramarumārute kṣubhite" satīti yojyam | "kalpavṛkṣo 'pi mārute kṣubhite" sati "na bhajyate" || MoT_2,11.42 ||



     tattvaṃ jñātum ato yatnād dhīmān eva hi dhīmatā /
     prāmāṇikaḥ prabuddhātmā praṣṭavyaḥ praṇayānvitaṃ // Mo_2,11.43 //
"prāmāṇikaḥ" pramāṇavaktā | "prabuddhaḥ" jñātaḥ | "ātmā" cinmātrarūpaḥ paramātmā yena | saḥ "prabuddhātmā" | "praṇayānvitam" yācñāsahitam | etadvyatiriktas tu pṛṣṭaḥ viruddham eva kiṃcid brūyād iti bhāvaḥ || MoT_2,11.43 ||



     prāmāṇikasya pṛṣṭasya vaktur uttamacetasā /
     yatnena vacanaṃ grāhyam aṃśukeneva kuṅkumam // Mo_2,11.44 //
"yatnenā"vadhānena || MoT_2,11.44 ||


     atattvajñam anādeyavacanaṃ vāgvidāṃ vara /
     yaḥ pṛcchati naraṃ tasmān nāsti mūḍhataro 'paraḥ // Mo_2,11.45 //
na tattvaṃ jānātīti tādṛśam | dehādāv ātmābhimāninam ity arthaḥ || MoT_2,11.45 ||


     prāmāṇikasya tajjñasya vaktuḥ pṛṣṭasya yatnataḥ /
     nānutiṣṭhati yo vākyaṃ nānyas tasmān narādhamaḥ // Mo_2,11.46 //
"vākyaṃ nānutiṣṭhati" taduktavākyavācyam arthaṃ na saṃpādayati || MoT_2,11.46 ||



     tajjñatātajjñate pūrvaṃ vaktur nirṇīya kāryataḥ /
     yaḥ karoti naraḥ praśnaṃ pṛcchakaḥ sa mahāmatiḥ // Mo_2,11.47 //
"kāryataḥ" na tu vacanamātrāt | vacanamātreṇa hi bahavaḥ brahmajñāninam ātmānam darśayanti || MoT_2,11.47 ||


     anirṇīya pravaktāraṃ bālaḥ praśnaṃ karoti yaḥ /
     adhamaḥ pṛcchakaḥ sa syān na mahārthasya bhājanam // Mo_2,11.48 //
"bālaḥ" bālavat mūḍhaḥ | "mahārthasya" mokṣākhyasya paramaprayojanasya || MoT_2,11.48 ||


     pūrvāparasamādhānakṣamabuddhāv anindite /
     pṛṣṭaṃ prājñena vaktavyaṃ nādhame paśudharmiṇi // Mo_2,11.49 //
"prājñena" buddhimatā guruṇā | "pṛṣṭaṃ" praśnaviṣayīkṛtaṃ vastu | "anindite" | tathā "pūrvāparayoḥ" pūrvāparavākyabhāgārthayoḥ | yat "samādhānam" anyo'nyaviruddhatāpanayanam | tatra "kṣamā buddhiḥ" yasya | tādṛśe praṣṭari vaktavyam | "adhame" ata eva "paśudharmiṇi" mūḍhatayā paśusadṛśe praṣṭari | "na" vaktavyam vyarthatvāt || MoT_2,11.49 ||



     prāmāṇikārthayogyatvaṃ pṛcchakasyāvicārya vā /
     yo vakti tam iha prājñāḥ prāhur mūḍhatamaṃ naram // Mo_2,11.50 //
"pṛcchakasya" mūḍhataratvāt asya "mūḍhatamatvam" | bahūnāṃ jātiparipraśne hi mūḍhatamaḥ | pṛcchakād api mūḍhaḥ asau kiṃ brūyād iti bhāvaḥ || MoT_2,11.50 ||



     tvam atīva guṇādhāraḥ pṛcchako raghunandana /
     ahaṃ ca vaktuṃ jānāmi sa ca yogo 'yam āvayoḥ // Mo_2,11.51 //
"saḥ" tava "guṇādhāra"pṛcchakatvam mama tādṛk vaktṛtvam iti "yogaḥ" sadṛśasaṃbandhaḥ || MoT_2,11.51 ||


     yad ahaṃ vacmi tad yatnāt tvayā śabdārthakovida /
     etad vastv iti nirṇīya hṛdi kāryam akhaṇḍitaṃ // Mo_2,11.52 //
nirṇayasvarūpaṃ kathayati | "etad" iti | "etat" śrīvasiṣṭhoktaṃ "vastu" | paramārthasatyam bhavati | pūrvaṃ bhaktimātreṇaiva madvacanaṃ satyatayā grāhyaṃ | tataḥ tatsatyatā svayam eva prakaṭībhaviṣyati | anyathāraṃbhamātre eva svavikalpakṛtābhiḥ sūkṣmekṣikābhiḥ tava kiṃcid api na setsyatīti bhāvaḥ || MoT_2,11.52 ||



nanu yadi tvaduktaṃmayi na lagati tadā kiṃ kāryam ity | atrāha
     mahān asi virakto 'si tajjño 'si janatāsthitau /
     tvayi vastu lagaty antaḥ kuṅkumāmbu yathāṃśuke // Mo_2,11.53 //
yataḥ tvam "mahān" na tu nīcaḥ "asi" | nīco hi nīcatayā svalpenāpi kṣubhyati | tathā "viraktaḥ" saṃsārikapadārtheṣu viraktaḥ "asi" | anyathā hi padārthāviṣṭabuddheḥ te yogyatā na syāt | tathā "janatāyāḥ sthitau" racanāyāṃ | "tajjñaḥ" nipuṇaḥ "asi" | anyathā hi taddṛṣṭāntānusāreṇa proktaḥ upadeśaḥ tvayi na laget | ataḥ "vastu" maduktaparamārthatattvaṃ | "tvayi lagati" | kiṃ "yathā" | "kuṅkumāmbu" "yathā" | yathā tat "aṃśuke" lagati tathety arthaḥ || MoT_2,11.53 ||



     uktāvadhānaparamā paramārthavivecinī /
     viśaty arthaṃ tava prajñā jalamadhyam ivārkabhā // Mo_2,11.54 //
"ukte" madukte | yat "avadhānam" | tad eva "paramam" grāhyatvenotkṛṣṭaṃ yasyāḥ | tādṛśī | tathā "paramārthasya" maduktavākyāntarārthasya | "vivecinī tava prajñā artham" madvākyārthaṃ | "viśati" vartamānasamīpe vartamānā | atra dṛṣṭāntam āha | "jale"ti || MoT_2,11.55 ||



     yad yad vacmi tavādeyaṃ hṛdi kāryaṃ prayatnataḥ /
     na cet praṣṭavya evāhaṃ na tvayeha nirarthakam // Mo_2,11.55 //
"ādeyaṃ" ādānārham tat tad ity adhyāhāryam || MoT_2,11.55 ||


nanu tvadvākyahṛtkaraṇe kaḥ prayāsaḥ asti yenaivaṃ bravīṣīty | atrāha
     mano hi capalaṃ rāma saṃsāravanamarkaṭam /
     saṃrodhya hṛdi yatnena śrotavyā paramārthagīḥ // Mo_2,11.56 //
"hi" yasmāt | "mano"nirodhe 'vaśyaṃ prayāsaḥ | taṃ vinā ca madvākyahṛtkaraṇaṃ na saṃbhavati | ato 'sty eva madvākyahṛtkaraṇe prayāsa iti bhāvaḥ || MoT_2,11.56 ||


nanu svakīyaṃ bāndhavajanaṃ tyaktvā kathaṃ tvadvākyamātraparo bhaveyam ity | atrāha
     avivekinam ajñānam asajjanaratiṃ janam /
     ciraṃ dūrataraṃ kṛtvā pūjanīyā hi sādhavaḥ // Mo_2,11.57 //
avidyamānam jñānaṃ yasya tam "ajñānam" | "asajjanebhyaḥ" viratiḥ sajjaneṣu "ratiś" ca prathamaṃ mokṣasādhanam iti bhāvaḥ || MoT_2,11.57 ||



nanu sādhupūjanena mama kiṃ setsyatīty | atrāha
     nityaṃ sajjanasaṃparkād viveka upajāyate /
     vivekapādapasyaite bhogamokṣau phale smṛte // Mo_2,11.58 //
spaṣṭam || MoT_2,11.58 ||


kathaṃ vivekasyedṛśaḥ prabhāvo 'stīty | atrāha
     mokṣadvāre dvārapālāś catvāraḥ parikīrtitāḥ /
     śamo vicāraḥ saṃtoṣaś caturthaḥ sādhusaṃgamaḥ // Mo_2,11.59 //
etaiḥ vyastaiḥ samastair vā vinā na kaścin mokṣaṃ prāpnotīti vivekasya mokṣasādhakatvam astīti bhāvaḥ || MoT_2,11.59 ||



     ete sevyāḥ prayatnena catvāro dvau trayo 'thavā /
     dvāram udghāṭayanty ete mokṣarājagṛhe balāt // Mo_2,11.60 //
spaṣṭam || MoT_2,11.60 ||



     ekaṃ vā sarvayatnena prāṇāṃs tyaktvā samāśrayet /
     etasmin vaśage yānti catvāro 'pi vaśaṃ yataḥ // Mo_2,11.61 //
"etasmin" ekasmin | "ekaś" cātrottaraślokānurodhena vivekī jñeyaḥ || MoT_2,11.61 ||


nanu katham ekenaiva kāryaṃ setsyatīty | atrāha
     saviveko hi śāstrasya jñānasya tapaso dyuteḥ /
     bhājanaṃ bhūṣaṇākāro bhāskaras tejasām iva // Mo_2,11.62 //
"bhūṣaṇa"bhūtaḥ "ākāraḥ" yasya | tādṛśaḥ || MoT_2,11.62 ||


vivekaparipanthinaḥ prajñāmāndyasyānarthotpādakatvaṃ kathayati
     ghanatām upayātaṃ hi prajñāmāndyam acetasāṃ /
     yāti sthāvaratām ambu jāḍyāt pāṣāṇatām iva // Mo_2,11.63 //
"prajñāmāndyam ghanatām upayātaṃ" sat | "sthāvaratām yāti" iti saṃbaddhaḥ || MoT_2,11.63 ||


nanu yady ahaṃ prajñāmāndyena vivekayogyo na syāṃ tarhi kiṃ kāryam ity | atrāha
     tvaṃ tu rāghava saujanyaguṇaśāstrārthadṛṣṭibhiḥ /
     vikāsitāntaḥkaraṇaḥ sthitaḥ padma ivodaye // Mo_2,11.64 //
     imāṃ jñānadṛśaṃ śrotum avaboddhuṃ ca sanmate /
     arhasy uddhṛtakarṇasthajantur vīṇādhvaniṃ yathā // Mo_2,11.65 //
sujanasya bhāvaḥ "saujanyam" | tadyuktāḥ guṇāḥ "saujanyaguṇāḥ" | te ca "śāstrārthadṛṣṭayaś" ca | tābhiḥ "vikāsitaṃ" prajñāmāndyarahitam "antaḥkaraṇaṃ" yasya saḥ | tathā "uddhṛtaṃ" niṣkāsitaṃ | "karṇasthaṃ jantu"malaṃ yasya saḥ | tādṛśaḥ | ato vivekayogya evāsīti bhāvaḥ || MoT_2,11.64-65 ||



nanu katham etad ity | atrāha
     vairāgyābhyāsayogena samasaujanyasaṃpadā /
     tat padaṃ prāpyate rāma yatra nāśo na vidyate // Mo_2,11.66 //
"abhyāsaḥ" sacchāstrābhyāsaḥ | "tat padam" vivekākhyaṃ sthānam || MoT_2,11.66 ||


atyantamukhyabhūtasya vivekasya vardhanopāyam āha
     śāstraiḥ sajjanasaṃparkapūrvakais sutapodamaiḥ /
     ādau saṃsāramuktyarthaṃ prajñām evābhivardhayet // Mo_2,11.67 //
"tapaḥ" bāhyendriyāṇāṃ nigrahaḥ | "damaḥ" āntarāṇāṃ || MoT_2,11.67 ||



     saṃsāraviṣavṛkṣo 'grasekam āspadam āpadām |
     añjanaṃ mohayāminyā maurkhyaṃ yatnena nāśayet || MoT_2,11.68 ||


"mohaḥ" viparyāsaḥ | "añjanena" hi māntrikāḥ divāpi "yāminīṃ" prakaṭayanti ity "añjanam" ity uktam || MoT_2,11.68 ||


nanu mama maurkhyaṃ kathaṃ naśyatīty | atrāha
     etad eva ca maurkhyasya paramaṃ viddhi nāśanam /
     yad idaṃ prekṣyate śāstraṃ kiṃcitsaṃskṛtayā dhiyā // Mo_2,11.69 //
"nāśanam" nāśakaraṇam | "kiṃcitsaṃskṛtayā" kiṃcitpadapadārthajñānamātreṇa | na tu kṣobhotpādakena mahatā vyākaraṇajālajñānena | "saṃskṛtayā" saṃskārayuktayā || MoT_2,11.69 ||



     durāśāsarpagatena maurkhyena hṛdi valgatā /
     cetaḥ saṃkocam āyāti carmāgnāv iva yojitam // Mo_2,11.70 //
"durāśāḥ" bhogāśāḥ eva "sarpāḥ" | tāsāṃ "gatena" | maurkhyād eva durāśā niryāntīti bhāvaḥ | "saṃkocam" cidvimarśākhyavikāsarāhityam || MoT_2,11.70 ||



     prājñe yathārthabhūteyaṃ vastudṛṣṭiḥ prasīdati /
     dṛg ivendau nirambhodasakalāmalamaṇḍale // Mo_2,11.71 //
"iyaṃ" mayā vakṣyamāṇā | "vastudṛṣṭiḥ" paramārthadṛṣṭiḥ | "prasīdati" prasannā bhavati | tasmin naiva viśrāntiṃ bhajatīti bhāvaḥ || MoT_2,11.71 ||


     pūrvāparavicārārthacārucāturyaśālinī /
     savikāsā matir yasya sa pumān iti kathyate // Mo_2,11.72 //
pūrvāparavicāraviṣayīkṛtaḥ arthaḥ "pūrvāparavicārārthaḥ" | tatra yat "cārucāturyaṃ" | tena "śālinī" || MoT_2,11.72 ||


tvam apīdṛśo 'sīti sargāntaślokena kathayati
          vikasitena sitena manomuṣā
          varavicāraṇaśītalarociṣā /
          guṇavatā hṛdayena virājase
          tvam amalena nabhaḥ śaśinā yathā // Mo_2,11.73 //
"vikasitena" vivekākhyavikāsayuktena | "sitena" malarāhitena | "manomuṣā" manohāriṇā | "varavicāraṇam" eva "śītalā" "ruk" yasya | tādṛśena "guṇavatā" maitryādiguṇayuktena "hṛdayena" | tvaṃ "virājase" | kiṃ "yathā" | "nabho" yathā | "yathā" tat "amalena" nīhārādimalādūṣitena | "śaśinā" virājate tathety arthaḥ | iti śivam || MoT_2,11.73 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuvyavahāraprakaraṇe ekādaśaḥ sargaḥ || 2,11 ||


************************************************************************

śrīrāmasya buddhisamādhānāya punar api śrīrāme samyakpraṣṭṛtvaṃ svasmiṃś ca samyagvaktṛtvaṃ kathayati
     paripūrṇamanā mānyaḥ praṣṭuṃ jānāsi rāghava /
     vetsi coktaṃ ca tenāhaṃ pravṛtto vaktum ādarāt // Mo_2,12.1 //
he "rāghava" | "paripūrṇam" bhogāśārāhityena tṛptaṃ | "manaḥ" yasya | tādṛśaḥ | ata eva "mānyaḥ" tvam | "praṣṭuṃ jānāsi" | "uktaṃ" maduktaṃ | "vetsi ca" | "tenāhaṃ" tava "vaktum ādarāt pravṛttaḥ" | anyathā na brūyām iti bhāvaḥ || MoT_2,12.1 ||



     rajastamobhyāṃ rahitāṃ śuddhasattvānupātinīm /
     matim ātmani saṃsthāpya jñānaṃ śrotuṃ sthiro bhava // Mo_2,12.2 //
"ātmani" na tu bāhyavastuṣu | "saṃsthāpya" samyak sthāpayitvā || MoT_2,12.2 ||



     vidyate tvayi sarvaiva pṛcchakasya guṇāvalī /
     vaktur guṇālī ca mayi ratnaśrīr jaladhau yathā // Mo_2,12.3 //
spaṣṭam || MoT_2,12.3 ||


     āttavān asi vairāgyaṃ vivekāt saṅgajaṃ muneḥ |
     candrakānta ivārdratvaṃ lagnacandrakarotkaraḥ || MoT_2,12.4 ||


"āttavān" gṛhītavān | "asi" tvam || MoT_2,12.4 ||


     ciram ā śaiśavād eva tavābhyāso 'sti sadguṇaiḥ /
     śuddhaḥ śuddhasya dīrghaiś ca padmasyevātisaṃtataiḥ // Mo_2,12.5 //
"guṇaiḥ" vairāgyādibhiḥ | tantubhiś "ca" | "atisaṃtataiḥ" atiśayenāvicchinnaiḥ || MoT_2,12.5 ||



phalitam āha
     ataḥ śṛṇu kathāṃ vakṣye tvam evāsyā hi bhājanam /
     na hi candraṃ vinā śuddhā savikāsā kumudvatī // Mo_2,12.6 //
"kathāṃ" brahmoktāṃ svataḥsphuritāṃ vā mokṣakathāṃ | itaḥ paraṃ brahmoktam evopadeśaṃ śrīvasiṣṭhaḥ śrīrāmāya karotīti jñeyam || MoT_2,12.6 ||



brahmoktāṃ mokṣakathāṃ prastauti
     ye kecana samārambhā yāś ca kāścana dṛṣṭayaḥ /
     te ca tāś ca pade dṛṣṭe niḥśeṣaṃ yānti vai śamam // Mo_2,12.7 //
"pade" cinmātrākhye | "dṛṣṭe" svātmatayā anubhūte | "vai" niścaye | "śamam" śāntim || MoT_2,12.7 ||



nanu etā dṛṣṭayaḥ adya tāvat kasyacic chāntiṃ gatā adya vā nety | atrāha
     yadi vijñānaviśrāntir na bhaved bhavyacetasaḥ /
     tad asyāṃ saṃsṛtau sādhuś cintāṃ soḍhuṃ saheta kaḥ // Mo_2,12.8 //
"bhavyacetasaḥ" sādhoḥ | "yadi vijñānaviśrāntiḥ vijñāne" vijñānasvarūpe ātmani | "viśrāntiḥ" saṃsāradṛṣṭināśadvāreṇa viśrāmaḥ | "na bhavet" | "tat" tadā | "asyāṃ" etādṛgduḥkharūpāyāṃ | "saṃsṛtau" saṃsāre | "kaḥ sādhuḥ cintāṃ" viśrāmānāsādanāvyabhicāriṇīṃ saṃsāracintāṃ "saheta" | na ko 'pīty arthaḥ | "asmadādivad" iti śeṣaḥ | viśrāmāsādanena tasya cintā eva nāsti yenāsau iha tiṣṭhatīti bhāvaḥ || MoT_2,12.8 ||



nanu bhavyasya cintā kutra gacchatīty | āha
     paraprāptyā vilīyante sarvā mananavṛttayaḥ /
     kalpāntārkagaṇāsaṅgāt kulaśailaśilā ivā // Mo_2,12.9 //
"parasya" paramātmanaḥ "prāptyā" | "sarvāḥ mananavṛttayaḥ" manomananavyāpārāḥ cintā iti yāvat | bhavyasya "vilīyante" | atra dṛṣṭāntam āha | "kalpānte"ti || MoT_2,12.9 ||


     duḥsahā rāma saṃsāraviṣāveśaviṣūcikā /
     yogagāruḍamantreṇa pāvanena praśāmyati // Mo_2,12.10 //
"saṃsāra" eva "viṣāveśa"kṛtā "viṣūcikā" viṣūcikākhyo rogaviśeṣaḥ | sā "saṃsāraviṣāveśaviṣūcikā" | "gāruḍamantreṇa" hi "viṣāveśaḥ" naśyati || MoT_2,12.10 ||



saḥ yogaḥ kathaṃ prāpyata ity apekṣāyāṃ gadyena kathayati
     sa ca yogaḥ sujanena saha śāstrārthavicārāt /
     paramārthajñānamayo labhyata eva // Mo_2,12.11 //

"labhyata eve"tyantaṃ | ṭīkā | "saḥ" mananavṛttivilayahetuḥ "yogaḥ sujanena saha śāstrārthavicārāt labhyata eva" | na tu na labhyate | "saḥ" kathaṃbhūtaḥ | "paramārthasya" cinmātratattvasya | yat "jñānaṃ" tan"mayaḥ" | na tu prāṇarodhanādirūpaḥ || MoT_2,12.11 ||




nanu yadi vicāreṇāpi na kiṃcit setsyati tarhi kiṃ kāryam ity /
atrāhaavaśyam iha hi vicāre kṛte sakaladuḥkhakṣayo bhavatīti mantavyam  // MoT_2,12.12 //



"mantavyam" ityantaṃ | spaṣṭam || MoT_2,12.12 ||


phalitaṃ kathayati
     nāto vicāradṛṣṭayo 'vahelayā draṣṭavyāḥ / vicāravaśataḥ puruṣeṇa sakalam idam ādhipañjaraṃ sarpeṇa tvacam iva paripakvāṃ parityajya vigatajvareṇa śītalāntaḥkaraṇena vinoda iva jagad akhilam ālokyate samyagdarśanavatā // Mo_2,12.13 //

"samyagdarśanavate"tyantaṃ | ṭīkā | yataḥ paramārthatattvaṃ vicārād eva labhyate "ataḥ vicāradṛṣṭayaḥ" vicārākhyāḥ dṛṣṭayaḥ | "avahelayā" anādareṇa | "na draṣṭavyāḥ" | nanu kiṃ vicāreṇa setsyatīty | atrāha | "vicāre"ti | "vicāravaśataḥ" "samyagdarśanavatā" samyagdarśanayuktena satā "puruṣeṇa" |" akhilam" bāhyam ābhyantaraṃ ca sarvaṃ | "jagat vinoda iva" krīḍā iv"ālokyate" | tadbhāvābhāvaprayuktaharṣaśokarahitatvāt | "puruṣeṇa" kathaṃbhūtena | "sakalam idam" anubhūyamānam | "ādhipañjaram" vikalpākhyaṃ pañjaram | "sarpeṇa paripakvāṃ tvacam iva parityajya vigatajvareṇa" tāparahitenāta eva "śītalāntaḥkaraṇena" || MoT_2,12.13 ||



nanv asamyagdarśanavattvasya ko doṣo yena vicārāt samyagdarśanavattvam āśrīyate ity | atrāha
     asamyagdarśanavato hi paraṃ duḥkham idaṃ / viṣamo hy atitarāṃ saṃsārarogo bhogīva daśati / asir iva cchinatti / śara iva vedhayati / rajjur iva veṣṭayati / pāvaka iva dahati / rātrir ivāndhayati / aśaṅkitaparipātitaparuṣapāṣāṇa iva vivaśīkaroti / harati prajñāṃ / nāśayati sthitim / pātayati mohāndhakūpe / tṛṣṇayā jarjarīkaroti / na tad asti kiṃcid duḥkhaṃ saṃsārī yan na prāpnoti // MoT_2,12.14 //

"prāpnotī"tyantaṃ | ṭīkā | "param" agrakoṭiṃ yātam | nanu kena kṛtaṃ "duḥkham" asy"āsamyagdarśanavataḥ" syād ity | atrāha | "viṣama" iti | "vedhayati" tāḍayati | viśeṣeṇa kathanam aśakyaṃ jñātvā sāmānyena kathayati | "na tad" iti | "saṃsārī" saṃsārayuktaḥ | ataḥ saṃsārakṛtam eveh"āsamyagdarśanavato duḥkham" astīti bhāvaḥ || MoT_2,12.14 ||





nanu viṣayarūpo 'yaṃ saṃsāra evam eva bhavati | kim asmākaṃ karotīty | atrāha
     duranteyaṃ kila viṣayaviṣamaviṣaviṣūcikā | yadi na cikitsyate tad atitarāṃ narakanagaranikaraphalānubandhinī tat tat karoti | yatra śitāsiśatapāta utpalatāḍanam | agnidāho himāvaseko | 'ṅgavikartanaṃ candanacakrakaracanā | ghūrṇadvātāntaḥ paripeṣo 'ṅgaparimālanam | anavaratānalajvālāvicalitacāmaranārācanikaranipāto nidāghavinodanadhārāgṛhaśīkaravarṣaṇam | śiraśchedaḥ sukhanidrā | mūkīkaraṇaṃ pāṭavamudrā mahān upacayaḥ || Mo_2,12.15 ||



"mahān upacaya" ityantaṃ | ṭīkā | "durantā" nāśayitum aśakyā | "viṣayāḥ" saṃsārikāḥ bhogāḥ | te eva "viṣamaviṣaviṣūcikā" | sā "yadi na cikitsyate" | "tat" tadā | "atitarām narakanagarāṇāṃ" yaḥ "nikaraḥ" samūhaḥ | sa eva "phalaṃ" | tasya "anubandhaḥ" pravāhena pravartanaṃ | saḥ asyām astīti tādṛśī satī sā | "tat tat" tādṛśaṃ tādṛśaṃ duḥkhaṃ "karoti" | tat kim ity apekṣāyām āha | "yatre"ti | "yatra" yasmin duḥkhe sati | yadduḥkham apekṣyeti yāvat |" ghūrṇan" sphuran yaḥ "vātaḥ" | tasy"āntaḥ" madhye | "paripeṣaḥ" cūrṇībhāvaḥ | "aṅgaparimālanam" aṅgakomalatāpādakaṃ mardanaṃ bhavati | vātamadhye cūrṇībhāvād api tatkaṣṭataram iti bhāvaḥ | "anavaratāḥ" yāḥ "analajvālāḥ" | tā eva "vicalitacāmarāṇi" yasmin | tādṛśaḥ yaḥ "nārācanikaraḥ" | tasya "nipātaḥ" | "nidāghasya" arthāt "nidāgha"kṛtatāpasya | "vinodanā"rthaṃ dūrīkaraṇārthaṃ yāni "dhārāgṛhāṇi" | teṣāṃ ye "śīkarāḥ" | teṣāṃ "varṣaṇaṃ" bhavati | "pāṭavamudrāḥ pāṭavasya" cāturyasya | "mudrā" saṃkocaḥ | kṛśateti yāvat | "mahān upacayaḥ" vṛddhiḥ bhavati || MoT_2,12.15 ||



phalitaṃ kathayati
     tad evaṃvidhe kaṣṭaceṣṭāsahasradāruṇe saṃsāracapalayantre 'smin rāghava nāvahelā kartavyā | avaśyam idaṃ hi vicāraṇīyam || Mo_2,12.16 ||


"vicāraṇīyam" ityantaṃ | ṭīkā | "tat" tato hetoḥ | he "rāghava" | "evaṃvidhe" pūrvoktamahākaṭhinaduḥkhadāyini | ata eva "kaṣṭaceṣṭāsahasradāruṇe asmin" anubhūyamāne | "saṃsāra" eva "capalayantram" tasmin | "avahelā" kiṃ mamāyaṃ karotīti anādaraḥ | "na kartavyā" | punaḥ kiṃ kāryam ity | atrāh"āvaśyam" iti | paṇḍitaiḥ "avaśyam idam "ayaṃ saṃsāraḥ | "vicāraṇīyam" | kim ayam | idam iti vicāraviṣayatāṃ nayet || MoT_2,12.16 ||


anyat kiṃ karaṇīyam ity | atrāha
     evaṃ cāvaboddhavyam yathā kilāsti vicārāc chreyo'vāptir iti || Mo_2,12.17 ||


"itī"tyantaṃ | ṭīkā | puruṣeṇ"aivaṃ ca boddhavyam" niśceyam | evaṃ kathaṃ | "yathā kila" niścaye | "vicārāt śreyo'vāptiḥ" mokṣaprāptir "astī"ti || MoT_2,12.17 ||


nanv ayaṃ vivekaḥ kasyacid asty athavā nety | atrāha
     anyac ca raghukulendo | yadi naite mahānto munayo maharṣayaś ca viprāś ca rājānaś ca jñānakavacenāvaguṇṭhitaśarīrās tat katham aduḥkhakṣamā api duḥkhamayīṃ tamovṛttipūrvakasaṃsārakadarthanām anubhavantaḥ satatam eva muditamanasas tiṣṭhanti || Mo_2,12.18 ||


"tiṣṭhantī"tyantaṃ | ṭīkā | he "raghukulendo" | aham "anyac ca" | "bravīmī"ti śeṣaḥ | "yadi ete" puraḥsthāḥ | "mahāntaḥ munayaḥ maharṣayaś ca viprāś ca rājānaś ca jñānakavacena" vivekākhyakavacen"āvaguṇṭhitāni" valitāni | "śarīrāṇi" yeṣāṃ te | tādṛśāḥ jñānayuktā iti yāvat | "na" bhavanti | "tat" tadā | ete munyādayaḥ "aduḥkhakṣamāḥ api katham duḥkhamayīṃ" | tathā "tamovṛttipūrvikā" tamovṛttikāraṇā | yā "saṃsārakadarthanā" saṃsārakleśaḥ | tām "anubhavantaḥ" | "satatam eva" na tu abhimataprāptyā kadācid eva | "muditamanasaḥ tiṣṭhanti" | ataḥ asty evaiṣāṃ viveka iti bhāvaḥ || MoT_2,12.18 ||



gadyāṃśayuktena padyenātra hetuṃ kathayati
     iha hi
     vikautukā vigatavikalpaviplavā
     yathā sthitā hariharapadmajādayaḥ /
     narottamāḥ samadhigatātmadīpakās
     tathā sthitā jagati vibuddhabuddhayaḥ // Mo_2,12.19 //
padyāntaṃ | ṭīkā | "hi" yasmāt |" iha jagati" | "narottamāḥ" narebhyaḥ samastamanuṣyebhyaḥ teṣāṃ madhye vā "uttamāḥ" śreṣṭhāḥ | tathā "samadhigataḥ" vivekavibhavena samyag anubhūtaḥ | "ātmā" eva paramātmā eva | "dīpaḥ" yaiḥ te | tādṛśāḥ "vibuddhabuddhayaḥ" vivekayuktabuddhayaḥ pūrvoktāḥ munyādayaḥ | "tathā" tiṣṭhanti | tathā katham ity apekṣāyām āha | "vikautukā" iti | "vikautukāḥ" viṣayākāṅkṣārahitāḥ | "ādi"śabdenendrādīnāṃ grahaṇam || MoT_2,12.19 ||


phalitaṃ kathayati
     tathā ca
     parikṣīṇe mohe galati ca ghane 'jñānajalade
     parijñāte tattve samadhigata ātmany abhimate /
     vicāryāryaiḥ sārdhaṃ galitavapuṣor vai sadasator
     dhiyā dṛṣṭe tattve ramaṇam aṭanaṃ jāgatam idam // Mo_2,12.20 //
padyāntaṃ | ṭīkā | "tathā ca" sati | "vai" niścaye | "āryaiḥ" sadbhiḥ "sārdham" | "vicārya" saṃsāram ātmatattvaṃ ca vicārya | "mohe" ajñānakārye sāvadhānatve "pari"galite sati | tataḥ "ghane" nibiḍe | "ajñānajalade" ajñānam eva ca | "galati" sati | tataḥ "sadasatoḥ" sadasadbuddhiviṣayībhūtayoḥ arthayoḥ | sadasadbuddhiparigalanena "galitavapuṣoḥ" satoḥ | tataḥ "abhimate" paramopādeye | "ātmani tattve" jīvākhye tattve | "parijñāte" dehādivyatiriktatayā samyak niścite sati | na kevalaṃ parijñāte kiṃ tu "samadhigate" dehādityāgena svātmatayā samyag anubhūte sati | tataḥ "tattve" jīvādisākṣitayā sthite śuddhacinmātratattve | "dhiyā" galanonmukhayā buddhyā | "dṛṣṭe" jīvasattāpradatvena dṛṣṭe sati | "idam" kriyamāṇam | "jāgataṃ" jagatsaṃbandhi | "aṭanam" śarīrayātrānimittaṃ vyavaharaṇam | "ramaṇam" krīḍā bhavati | padārthaniṣṭabhāvābhāvakṛtaharṣaśokasparśakāritvābhāvād iti bhāvaḥ || MoT_2,12.20 ||



anyac ca kathayāmīty āha
     anyac ca rāghava
     prasanne cittattve hṛdi savibhave valgati pare
     samābhogībhūtāsv akhilakalanādṛṣṭiṣu puraḥ /
     śamaṃ yāntīṣv antaḥkaraṇaghaṭanāsv āhitarasaṃ
     dhiyā dṛṣṭe tattve ramaṇam aṭanaṃ jāgatam idam // Mo_2,12.21 //
padyāntaṃ | ṭīkā | he "rāghavā"ham "anyac ca" bravīmi | kiṃ bravīṣīty | atrāha | "prasanne" iti | "pare" uttīrṇe | "cittattve" śuddhacinmātrākhye tattve | "prasanne" svaprakāśanaparatayā prasādonmukhe sati | ata eva tasmin pare cittattve "savibhave" śaktisahite | "hṛdi" sattvabhāvena sthite | "hṛdi valgati" sphurati sati | vimarśaviṣayatām āyāte satīti yāvat | tataḥ "akhilakalanādṛṣṭiṣu" samastajīvādikalanārūpāsu dṛṣṭiṣu | "samābhogībhūtāsu" satīṣu | vyāpakacinmātrasvarūpatāsādanena vistārarahitāsv api vistārayuktāsu saṃpannāsu satīṣu | tataḥ "antaḥkaraṇaghaṭanāsu" antaḥkaraṇaracanāsu | "āhitarasaṃ" svecchayā | "śamaṃ" cinmātrasvarūpe layaṃ | "puraḥ" agre "yāntīṣu" | tataś ca "dhiyā" galanonmukhayā buddhyā | "tattve" śuddhacinmātrākhye tattve | "dṛṣṭe" ātmatayānubhūte sati | "idaṃ jāgatam aṭanaṃ ramaṇaṃ" bhavati || MoT_2,12.21 ||



punar api pūrvābhiprāyeṇaivāha
     anyac ca
     rathaḥ sphāro dehas turagaracanā cendriyagatiḥ
     parispando vātād aham akalitānantaviṣamaḥ | /     paro vārvā dehī jagati viharāmīty anaghayā
     dhiyā dṛṣṭe tattve ramaṇam aṭanaṃ jāgatam idaṃ // Mo_2,12.22 //
sargāntaślokaṃ tāvat | ṭīkā | "dehaḥ" sthūladehaḥ | "sphāraḥ" sarvatra sphuraṇaśīlaḥ | "rathaḥ" bhavati | "indriyagatiḥ" indriyaracanā "turagaracanā" bhavati | heyopādeyarūpādiprāptiparihārārthaṃ darśanādidvāreṇa deharathacālakatvāt | "parispandaḥ" "turagaracanā"bhūtānāṃ indriyagatīnāṃ ceṣṭā dehaṃ prati preraṇasāmarthyaṃ "vātāt" bhavati | vātena hi indriyāṇi darśanādikriyābhāñji santi dehaṃ cālayanti | "vā" pakṣāntare | "dehī" dehābhimānī jīvaḥ | "arvā" turagaḥ bhavati | paryantataḥ tasyaiva dehacālakatvāt | puraḥ dehādibhyaḥ uttīrṇaśuddhacinmātrarūpaḥ "aham jagati viharāmi" vihāraṃ karomi | "ahaṃ" kathaṃbhūtaḥ | "akalitāni" svātmatvaniścayena duḥkhadatvenāniścitāni | "anantāni viṣamāni" sukhaduḥkharūpāḥ saṃkaṭāḥ yena | tādṛśaḥ | rājā hi rathādibhyaḥ paraḥ san akalitānantanimnonnataś ca bhavati | "iti" anena niścayena | "anaghayā" svasmin baddhatvajñānādidoṣarahitayā | "dhiyā" galanonmukhayā buddhyā | "tattve" proktasvarūpe tattve | "dṛṣṭe" sati | "idam jāgatam aṭanaṃ ramaṇaṃ" bhavati | iti śivam || MoT_2,12.22 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe dvādaśaḥ sargaḥ || 2,12 ||


************************************************************************

oṃ pūrvoktāṃ dṛṣṭim anūdya tadavaṣṭaṃbhena subuddhīnāṃ vicaraṇaṃ kathayati
     etāṃ dṛṣṭim avaṣṭabhya puṣṭātmānaḥ subuddhayaḥ /
     vicaranty asamunnaddhā mahānto 'bhyuditā iva // Mo_2,13.1 //
"etāṃ" pūrvasargoktām | "avaṣṭabhya" satataṃ vimarṣaviṣayaṃ kṛtvā | "puṣṭātmānaḥ" | "puṣṭaḥ" atyantābhivyaktiyogyatāṃ gataḥ | "ātmā" śuddhacinmātrākhya ātmā yeṣāṃ te | tādṛśāḥ "asamunnaddhāḥ" darparahitāḥ | "abhyuditāḥ iva" prāptarājyā iva || MoT_2,13.1 ||



     na śocanti na yācante na vāñchanti śubhāśubham /
     sarvam eva ca kurvanti kurvanti na ca kiṃcana // Mo_2,13.2 //
"sarvam eva" pravāhāgataṃ sarvam eva | "kurvanti" kartavyam iti niścayena "kurvanti" | "kiṃcana na kurvanti" svasmin kartṛtvābhimānābhāvāt || MoT_2,13.2 ||


     svastham evāvatiṣṭhanti svasthaṃ kurvanti yānti ca /
     heyopādeyatāpakṣarahitāḥ svātmani sthitāḥ // Mo_2,13.3 //
"svastham" ity ubhayatra kriyāviśeṣaṇaṃ niścitam ity arthaḥ | "heyopādeyatāpakṣarahitāḥ" upekṣāpakṣe sthitā ity arthaḥ || MoT_2,13.3 ||


     āyānti ca na cāyānti vanaṃ yānti na yānti ca /
     na kurvanty api kurvanti na vadanti vadanti ca // Mo_2,13.4 //
atra sarvatrāpi kriyākaraṇaṃ jīvanmuktatayāśritadehādidvāreṇa jñeyam | akaraṇaṃ tv aśuddhacinmātratvadvāreṇety alam || MoT_2,13.4 ||


     ye kecana samārambhā yāś ca kāścana dṛṣṭayaḥ /
     heyādeyadṛśo yās tāḥ kṣīyante 'dhigate pade // Mo_2,13.5 //
"kṣīyante" līyante | parapadarūpatayaiva sphuranti iti yāvat || MoT_2,13.5 ||



     parityaktasamastehaṃ mano madhuravṛttimat /
     sarvataḥ sukham abhyeti candrabimba iva sthitam // Mo_2,13.6 //
"madhuravṛttimat" maitrīyuktam || MoT_2,13.6 ||


     api nirmananārambham apy astākhilakautukam /
     ātmany eva na māty antar indāv iva rasāyanam // Mo_2,13.7 //
"ātmany eva na māti" na prabhavati | atyantānandamayatvād iti bhāvaḥ | "mananārambha"rahitasya "kautukarahitasya" ca ānandena sv"ātmani" amānaṃ na yuktam iti lokaprasiddhir "api"śabdābhiprāyaḥ | rasāyanam amṛtam || MoT_2,13.7 ||


     na karotīndrajālāni nānudhāvati vāsanām /
     bālacāpalam utsṛjya pūrṇam eva virājate // Mo_2,13.8 //
"indrajālāni" mantrādiprabhāvena siddhāni ākāśagamanādīni | "vāsanām nānudhāvati" api tu tato nivṛttim eva karoti | bālavat cāpalam "bālacāpalam utsṛjya" | "pūrṇam" tṛptisahitaṃ yathā bhavati | tathā "virājate" || MoT_2,13.8 ||

ātmatattvāvalokanasyaiva pūrvoktāsu vṛttiṣu kāraṇatvaṃ gadyena kathayati
     evaṃvidhā hi vṛttaya ātmatattvāvalokanāl labhyante | nānyatas | tasmād vicāreṇātmaivānveṣṭavya upāsanīyo jñātavyo yāvajjīvaṃ puruṣena netarad iti // MoT_2,13.9 //
"itī"tyantaṃ | ṭīkā | "hi" yasmāt | "evaṃvidhāḥ" pūrvoktāḥ | vṛttayaḥ vyāpārāḥ | "ātmatattvasya" paramātmasvarūpasya | yad "avalokanaṃ" | tasmād eva | "puruṣeṇa labhyante" | "nānyataḥ" | "tasmād puruṣeṇa yāvajjīvaṃ vicāreṇātmaivānveṣṭavyaḥ" | kiṃrūpo 'sāv iti vimarśanīyaḥ | tataḥ "upāsanīyaḥ" | upāsanaṃ cātra avicchinnapravāheṇānusandhānaviṣayīkaraṇam eva jñeyam | tataḥ "jñātavyaḥ" | sthūladehādivyatirekena sthūladehavat niḥsaṃśayam ātmatattvena jñātavyaḥ | "itarat" sthūladehādi | "na" jñātavyam | "iti"śabdaḥ gadyasamāptau || MoT_2,13.9 ||


nanv ātmāvalokanaṃ kartavyatvena tvayā pratipāditaṃ | tadavalokanaṃ kathaṃ setsyatīty | atra padyenāha
     svānubhūteḥ suśāstrasya guroś caivaikavākyatā /
     yatrābhyāsena tenātmā santatenāvalokyate // Mo_2,13.10 //
"svā" nijā | yā "anubhūtiḥ" | tasyāḥ | "suśāstrasya" śobhanaśāstrasya | "guroḥ" sadguroś | "ca" iti trayasya | "yatra" yasmin abhyāse | "ekavākyatā" arthāt melanaṃ syāt | "santatenā"vicchinnena | "tenābhyāsena" karaṇena | puruṣeṇa kartrā | "ātmāvalokyate" || MoT_2,13.10 ||


     avahelitaśāstrārthair avajñātamahājanaiḥ /
     kaṣṭām apy āpadaṃ prāpto na mūḍhaiḥ samatām iyāt // Mo_2,13.11 //
svasthas tu katham "iyād" ity "api"śabdābhiprāyaḥ || MoT_2,13.11 ||



etatprasaṅgena maurkhyaṃ nindati
     na vyādhir na viṣaṃ nāpat tathā nāmāsti bhūtale /
     khedāya svaśarīrasthaṃ maurkhyam eva yathā nṛṇām // Mo_2,13.12 //
spaṣṭam || MoT_2,13.12 ||


     kiṃcitsaṃskṛtabuddhīnāṃ śravyaṃ śāstram idaṃ yathā /
     maurkhyāpahaṃ tathā śāstram anyad asti na kiṃcana // Mo_2,13.13 //
"kiṃcitsaṃskṛtabuddhīnām" padapadārthajñānām ity arthaḥ | "śravyam" śravaṇārham | "idaṃ" mokṣopāyākhyam | "maurkhyāpahaṃ" maurkhyam upahantīti "maurkhyāpaham" || MoT_2,13.13 ||


     idaṃ śravyaṃ sukhakaraṃ kathādṛṣṭāntasundaram /
     aviruddham aśeṣeṇa śāstravākyārthabandhunā // Mo_2,13.14 //
kathābhiḥ vakṣyamāṇāḥ dṛṣṭāntāḥ "kathādṛṣṭāntāḥ" | taiḥ "sundaram" | "śāstravākyānāṃ" yaḥ "arthaḥ" | sa eva "bandhuḥ" | tena "aviruddham" | śāstrārthānusārīty arthaḥ || MoT_2,13.14 ||


     āpado yā duruttārā yāś ca tucchāḥ kuyonayaḥ /
     tās tā maurkhyāt prasūyante khadirāt kaṇṭhakā iva // Mo_2,13.15 //
spaṣṭam || MoT_2,13.15 ||


     varaṃ śarāvahastasya caṇḍālāgāravīthiṣu /
     bhikṣārtham aṭanaṃ rāma na maurkhyahatajīvitam // Mo_2,13.16 //
"aṭanaṃ" bhramaṇam || MoT_2,13.16 ||


     imam ālokam āsādya mokṣopāyamayaṃ janaḥ /
     andhatām eti na punaḥ kaścin mohatamasy api // Mo_2,13.17 //
"ālokam" paratattvaprakāśakatvāt ālokasvarūpam || MoT_2,13.17 ||


     tāvan nayati saṃkocaṃ tṛṣṇā śyāmā narāmbujam /
     yāvad vivekasūryasya noditā vimalā prabhā // Mo_2,13.18 //
spaṣṭam || MoT_2,13.18 ||


     saṃsāraduḥkhamokṣārthaṃ mādṛśaiḥ saha bandhubhiḥ /
     svarūpam ātmano jñātvā guruśāstrapramāṇataḥ // Mo_2,13.19 //
"mādṛśaiḥ" sādhubhir ity arthaḥ | guruśāstrākhyaṃ yat "pramāṇaṃ" pramākaraṇaṃ | tasmāt "guruśāstrapramāṇataḥ" | "jñātve"ty asyānantaraṃ stheyam iti śeṣaḥ || MoT_2,13.19 ||



     jīvanmuktāś carantīha yathā hariharādayaḥ /
     yathā brahmarṣayaś cānye tathā vihara rāghava // Mo_2,13.20 //
"vihara" harṣāmarṣarahitatvena krīḍāṃ kuru || MoT_2,13.20 ||


     anantānīha duḥkhāni sukhaṃ kṣaṇalavopamam /
     nātaḥ sukheṣu badhnīyād dṛṣṭiṃ duḥkhānubandhiṣu // Mo_2,13.21 //
"duḥkhānubandhiṣu" duḥkhānuviddheṣu || MoT_2,13.21 ||


punaḥ kiṃ kāryam ity | atrāha
     yad anantam anāyāsaṃ tat padaṃ sārasiddhaye /
     sādhanīyaṃ prayatnena puruṣeṇa vijānatā // Mo_2,13.22 //
"anantam" trividhaparicchedarahitam | "anāyāsaṃ" āyāsasādhyatvābhāvāt | "sārasiddhaye" paramapuruṣārthasiddhaye | "sādhanīyaṃ" svopalabdhiviṣayatāṃ neyam | "vijānatā" kiṃcinmātrajñānayuktena mūrkhasyātrānadhikaratvāt || MoT_2,13.22 ||


     ta eva puruṣārthasya bhājanaṃ puruṣottamāḥ /
     anuttamapadālambi mano yeṣāṃ gatajvaram // Mo_2,13.23 //
avidyamāna uttamaḥ yasmāt tat "anuttamam" niratiśayam iti yāvat | tādṛśaṃ yat "padam" | tat "ālambate" iti tādṛśam || MoT_2,13.23 ||


     saṃbhogāśanamātreṣu rājyādiṣu sukheṣu ye /
     saṃtuṣṭā duṣṭamanaso viddhi tān andhadundubhān // Mo_2,13.24 //
"andhadundubhān" andharājilān | asamyag darśitvād ity arthaḥ || MoT_2,13.24 ||



     ye śaṭheṣu duranteṣu duṣkṛtārambhaśāliṣu /
     dviṣatsu mitrarūpeṣu bhaktā vai bhogabhogiṣu // Mo_2,13.25 //
     te yānti durgamād durgaṃ duḥkhād duḥkhaṃ bhayād bhayam /
     narakān narakaṃ mūḍhā mohamantharabuddhayaḥ // Mo_2,13.26 //
"mitrarūpeṣu dviṣatsu" ā mukhe sukhakāritvāt "mohamantharā" mohanirbharā | "buddhiḥ" yeṣāṃ te | tādṛśāḥ || MoT_2,13.25-26 ||


     parasparavināśotke śreyasyau na kadācana /
     sukhaduḥkhadaśe rāma taḍitprasarabhaṅgure // Mo_2,13.27 //
spaṣṭam || MoT_2,13.27 ||


     ye viraktā mahātmānaḥ suviviktā bhavādṛśaḥ /
     puruṣān viddhi tān vandyān bhogamokṣaikabhāginaḥ // Mo_2,13.28 //
"bhogabhāktvaṃ" caiṣāṃ pravāhagatam eva jñeyaṃ | na yatnasādhitam || MoT_2,13.28 ||


     vivekaṃ param āśritya vairāgyābhyāsayogataḥ /
     saṃsārasaritaṃ ghorām imām āpadam uttaret // Mo_2,13.29 //
"abhyāsaḥ" sacchāstrābhyāsaḥ | "āpadam" āpadrūpām || MoT_2,13.29 ||



     na suptavyaṃ tu saṃsāramāyāsv iha hi jānatā /
     viṣamūrcchanasaṃmohadāyinīṣu vivekinā // Mo_2,13.30 //
"na suptavyam" avahelā na kartavyā || MoT_2,13.30 ||


     saṃsāram imam āsādya yas tiṣṭhaty avahelayā /
     jvalitasya gṛhasyoccaiḥ śete tārṇasya so 'ntare // Mo_2,13.31 //
"tārṇasya" tṛṇanirmitasya || MoT_2,13.31 ||


     yat prāpya na nivartante yad āsādya na śocyate /
     tat padaṃ śemuṣīlabhyam asty evātra na saṃśayaḥ // Mo_2,13.32 //
"śemuṣīlabhyam eva" buddhilabhyam eva | na tu bāhyayatnalabhyam || MoT_2,13.32 ||


nanu yadi tat padaṃ nāsti tat kiṃ śemuṣyā labhyate ity | atrāha
     nāsti cet tad vicāreṇa doṣaḥ ko bhavatāṃ bhavet /
     asti cet tat samuttīrṇā bhaviṣyatha bhavārṇavāt // Mo_2,13.33 //
spaṣṭam || MoT_2,13.33 ||


     pravṛttiḥ puruṣasyeha mokṣopāyavicāraṇe /
     yadā bhavaty āśu tadā mokṣabhāgī sa ucyate // Mo_2,13.34 //
spaṣṭam || MoT_2,13.34 ||


     anapāyi nirāśaṅkaṃ svāsthyaṃ vigatavibhramam /
     na vinā kevalībhāvaṃ vidyate bhuvanatraye // Mo_2,13.35 //
"svāsthyam" svasthatā | "kevalībhāvaṃ vinā" advitīyatāṃ vinā || MoT_2,13.35 ||


     tatprāptāv uttamaprāptau na kleśa upayujyate /
     na mitrāṇy upakurvanti na dhanāni na bāndhavāḥ // Mo_2,13.36 //
"tatprāptau" kevalībhāvaprāptau | "kleśaḥ" śārīrikaḥ kleśaḥ || MoT_2,13.36 ||


     na hastapādacalanaṃ na deśāntarasaṃgamaḥ /
     kleśātiśayasādhyo vā na tīrthāyatanāśrayaḥ // Mo_2,13.37 //
asminn arthe "hastapādā"di"calanaṃ na" bhavati | "deśāntarasaṃgamaḥ" ca "na" bhavati | ayam arthaḥ "kleśātiśayasādhyaḥ na" bhavati | "tīrthāyatanāśrayaḥ" ca "na" bhavati || MoT_2,13.37 ||



     puruṣārthaikasādhyena vāsanaikārthakarmaṇā /
     kevalaṃ tan manomātrajayenāsādyate padam // Mo_2,13.38 //
puruṣeṇa "tat" kevalībhāvākhyaṃ "padam" | "evalam manomātrajayena āsādyate" prāpyate | "manomātrajayena" kathaṃbhūtena | "puruṣārthena" pauruṣeṇa | "ekam" kevalaṃ "sādhyena" | punaḥ kathaṃbhūtena "vāsanaikārthakarmaṇā" | "vāsanā" bhāvanā | sā eva "ekārthaḥ" | tasya "karmaṇā" | bhāvanāmātrasādhyenety arthaḥ || MoT_2,13.38 ||


     vivekamātrasādhyaṃ tadvicāraikāntaniścayam /
     tyajatā duḥkhajālāni nareṇa tad avāpyate // Mo_2,13.39 //
"tadvicāreṇa" tadviṣayeṇa vivekena | "ekaṃ" kevalaṃ | "niścayaḥ" yasya | tam | vicāraniśceyam ity arthaḥ | "tat" kevalībhāvākhyaṃ padam || MoT_2,13.39 ||


     sukhasevyāsanasthena tadvicāravatā svayam /
     na śocyate padaṃ prāpya na ca bhūyo 'bhijāyate // Mo_2,13.40 //
"tadvicāravatā" kevalībhāvavicārayuktena | tat "padaṃ" kevalībhāvākhyaṃ padam || MoT_2,13.40 ||


     tat samastasukhāsārasīmāntaṃ sādhavo viduḥ /
     tad anuttamaniṣṣyandaṃ param āhū rasāyanam // Mo_2,13.41 //
spaṣṭam || MoT_2,13.41 ||


     kṣayitvāt sarvabhāvānāṃ svargamānuṣyayor dvayoḥ /
     sukhaṃ nāsty eva salilaṃ mṛgatṛṣṇāsv ivaitayoḥ // Mo_2,13.42 //
"svargamānuṣyayoḥ" svarlokamanuṣyalokayoḥ || MoT_2,13.42 ||


     ato manojayaś cintyaḥ śamasaṃtoṣasādhanaḥ /
     anantaśamasaṃbhogas tasmād ānanda āpyate // Mo_2,13.43 //
"ataḥ" kāraṇāt | puruṣeṇa "manojayaḥ cintyaḥ" | kathaṃbhūtaḥ | "śamasaṃtoṣau sādhanaṃ" yasya | tādṛśaḥ puruṣaḥ | "tasmāt" manojayāt | "anantaśamasya saṃbhogaḥ" camatkāraḥ | śamāsvādarūpaḥ iti yāvat | "ānandaḥ āpyate" prāpyate || MoT_2,13.43 ||
     jīvatā gacchatā caiva bhramatā patatā tathā /
     rakṣasā dānavenāpi devena puruṣeṇa vā // Mo_2,13.44 //
     manaḥpraśamanodbhūtaṃ tat prāpya paramaṃ sukhaṃ /
     vikāsiśamapuṣpasya vivekoccataroḥ phalam // Mo_2,13.45 //
     vyavahārapareṇāpi kāryavṛndam acinvatā /
     bhānunevāmbarasthena nojjhyate na ca vāñchyate // Mo_2,13.46 //
"jīvatā gacchatā bhramatā" | atha "patatā" | upalakṣaṇaṃ caitat | sarvāḥ kriyāḥ kurvateti yāvat | "rakṣasā dānavenāpi devena puruṣeṇa vā manaḥpraśamanodbhūtaṃ" tathā "vikāsiśamapuṣpasya" "vivekoccataroḥ" phalam | tat paramaṃ sukham nirvāṇākhyaṃ sukhaṃ | "prāpyāmbarasthena bhānunā iva nojjhyate na ca vāñchyate" sūryavat upekṣām eva sarvatra kriyate ity arthaḥ | rakṣaḥprabhṛtinā kathaṃbhūtena | "vyavahārapareṇāpi kāryavṛndam" kāryasamūham | "acinvatā" nāhaṃkarteti niścayāt svakṛtatvenānanubhavatā || MoT_2,13.44-46 ||



     manaḥ praśāntam atyacchaṃ viśrāntaṃ gatavibhramam /
     anīhaṃ vigatābhīṣṭaṃ nābhivāñchati nojjhati // Mo_2,13.47 //
"anīham" vikalpākhyaceṣṭārahitam | "vigatābhīṣṭam" abhīṣṭam idam iti niścayarahitam | pravāhāgatam upekṣayā eva karotīti bhāvaḥ || MoT_2,13.47 ||


pūrvataraṃ prakṛtānāṃ śamādidvārapālānāṃ nirṇayaṃ prastauti
     mokṣadvāre dvārapālān imāñ śṛṇu yathākramam /
     yeṣām ekatamāsaktyā mokṣadvāre praviśyate // Mo_2,13.48 //
"ekatamāsaktyā" ekatamāsevanena || MoT_2,13.48 ||



tatrāpi prathamoddiṣṭaṃ śamaṃ nirūpayati
     duḥkhadoṣadaśā dīrghā saṃsāramarumaṇḍalī /
     jantoḥ śītalatām eti śītalena śamāmbunā // Mo_2,13.49 //
duḥkhadoṣarūpā daśā yasyāṃ sā "duḥkhadoṣadaśā" || MoT_2,13.49 ||


     śamenāsādyate śreyaḥ śamo hi paramaṃ padam /
     śamaḥ śivaṃ śamaḥ śāntiḥ śamo bhrāntinivāraṇam // Mo_2,13.50 //
"paramaṃ padam" cinmātrākhyam utkṛṣṭaṃ sthānam || MoT_2,13.50 ||


     puṃsaḥ praśamatṛptasya śītalācchatarātmanaḥ /
     śamatoṣitacittasya śatrur apy eti mitratām // Mo_2,13.51 //
dveṣeṇaiva hi śatruḥ śatruḥ bhavati | sa ca tasya nāstīti tasya "śatruḥ mitratām etī"ti bhāvaḥ || MoT_2,13.51 ||


     śamacandramasā yeṣām āśayaḥ samalaṃkṛtaḥ /
     kṣīrābdhīnām ivodeti teṣāṃ paramaśuddhatā // Mo_2,13.52 //
"paramaśuddhatā" vāsanākhyamalarāhityam || MoT_2,13.52 ||



     hṛtkuśeśayakośeṣu yeṣāṃ śamakuśeśayam /
     satāṃ vikasitaṃ te hi dvihṛtpadmāḥ samā hareḥ // Mo_2,13.53 //
"harer dvihṛtpadmatvaṃ" nābhisthasya padmasya sthitatvāj jñeyam || MoT_2,13.53 ||



     śamaśrīḥ śobhate yeṣāṃ mukhendāv akalaṅkite /
     te 'mī kulendavo vandyāḥ saundaryavijitendavaḥ // Mo_2,13.54 //
"akalaṅkitatvam" evātra indujaye hetuḥ || MoT_2,13.54 ||


     trailokyodaravartinyo nānandāya tathā śriyaḥ /
     sāmrājyasaṃpatpratimā yathā śamavibhūtayaḥ // Mo_2,13.55 //
spaṣṭam || MoT_2,13.55 ||


     yāni duḥkhāni yās tṛṣṇā duḥsahā ye durādhayaḥ /
      tat sarvaṃ śāntacetassu tamo 'rkeṣv iva naśyati // Mo_2,13.56 //
spaṣṭam || MoT_2,13.56 ||


     mano hi sarvabhūtānāṃ prasādam anugacchati /
     na tathendau yathā śānte jane janitakautukam // Mo_2,13.57 //
"prasādam" prasannatām || MoT_2,13.57 ||


     śamaśālini sauhārdavati sarveṣu jantuṣu /
     sujane paramaṃ tattvaṃ svayam eva prasīdati // Mo_2,13.58 //
"paramaṃ tattvam" paramātmatattvaṃ | "svayam evā"yatnam eva | "prasīdati" svarūpadarśanākhyaṃ prasādaṃ karotīty arthaḥ || MoT_2,13.58 ||



     mātarīva paraṃ yānti viṣamāṇi mṛdūni ca /
     viśvāsam iha bhūtāni sarvāṇi śamaśālini // Mo_2,13.59 //
"viṣamāṇi" hiṃsāni | "mṛdūni" komalāni || MoT_2,13.59 ||



     na rasāyanapānena na lakṣmyāliṅganena ca /
     tathā sukham avāpnoti śamenāntar yathā janaḥ // Mo_2,13.60 //
"antaḥ" manasi || MoT_2,13.60 ||


     sarvādhivyādhivalitaṃ krāntaṃ tṛṣṇāvaratrayā /
     manaḥ śamāmṛtāsekaiḥ samāśvāsaya rāghava // Mo_2,13.61 //
"samāśvāsaya" śītalaya || MoT_2,13.61 ||



     yat karoṣi yad aśnāsi śamaśītalayā dhiyā /
     tat te 'tisvadate svādu netarat tāntamānasam // Mo_2,13.62 //
"svadate" rocate | camatkāraṃ karotīti yāvat | "tāntam" mlāniyuktaṃ kṛtaṃ | "mānasaṃ" yena tat || MoT_2,13.62 ||



     śamāmṛtarasāsnātaṃ mano yām eti nirvṛtim /
     chinnāny api tayāṅgāni manye rohanti rāghava // Mo_2,13.63 //
"śamāmṛtarasāsnātaṃ manaḥ yāṃ nirvṛtiṃ eti" | he "rāghavā"haṃ "manye" | "tayā" nirvṛtyā | "chinnāny api aṅgāni rohanti" || MoT_2,13.63 ||



     na piśācā na rakṣāṃsi na daityā na ca śatravaḥ /
     na ca vyāghrabhujaṅgādyā dviṣanti śamaśālinam // Mo_2,13.64 //
spaṣṭam || MoT_2,13.64 ||


     susaṃnaddhasamastāṅgaṃ praśamāmṛtavarmaṇā /
     vedhayanti na duḥkhāni śarā vajraśilāṃ iva // Mo_2,13.65 //
"vedhayanti" tāḍayanti || MoT_2,13.65 ||


     na tathā rājate rājā mānyāntaḥpurasaṃsthitaḥ /
     samayā svasthayā vṛttyā yathopaśamaśobhitaḥ // Mo_2,13.66 //
"vṛttyā" vyāpāreṇa || MoT_2,13.66 ||



     prāṇāt priyataraṃ dṛṣṭvā tuṣṭim eti na tāṃ janaḥ /
     yām āyāti janaṃ śāntam avalokya samāśayam // Mo_2,13.67 //
"samāśayam" samacetasam || MoT_2,13.67 ||



     samayā śamaśālinyā vṛttyā yaḥ sādhu vartate /
     abhinanditayā loke jīvatīha sa netaraḥ // Mo_2,13.68 //
"vartate" tiṣṭhati | "itaraḥ" aśāntaḥ || MoT_2,13.68 ||


     anuddhatamanāḥ śāntaḥ sādhu karma karoti yat /
     tat sarvam abhinandanti tasyemā bhūtajātayaḥ // Mo_2,13.69 //
"abhinandanti" stuvanti || MoT_2,13.69 ||


śāntasvarūpanirṇayadvāreṇa śamasvarūpaṃ niścinoti
     śrutvā spṛṣṭvā ca dṛṣṭvā ca bhuktvā ghrātvā śubhāśubham /
     na hṛṣyati glāyati yaḥ sa śānta iti kathyate // Mo_2,13.70 //
upekṣā eva śāntir iti bhāvaḥ || MoT_2,13.70 ||


     yaḥ samaḥ sarvabhāveṣu nābhivāñchati nojjhati /
     jitvendriyāṇi yatnena sa śānta iti kathyate // Mo_2,13.71 //
spaṣṭam || MoT_2,13.71 ||


     tuṣārakarabimbācchaṃ mano yasya nirākulam /
     maraṇotsavayuddheṣu sa śānta iti kathyate // Mo_2,13.72 //
spaṣṭam || MoT_2,13.72 ||


     sthito 'pi na sthita iva na hṛṣyati na kupyati /
     yaḥ suṣuptamanāḥ svasthaḥ sa śānta iti kathyate // Mo_2,13.73 //
"suṣuptamanāḥ" harṣāmarṣānusandhānarahitaḥ || MoT_2,13.73 ||



     amṛtasyandasubhagā yasya sarvajanaṃ prati /
     dṛṣṭiḥ prasarati prītā sa śānta iti kathyate // Mo_2,13.74 //
spaṣṭam || MoT_2,13.74 ||


     spaṣṭāvadātayā buddhyā yathaivāntas tathā bahiḥ /
     dṛśyante yasya kāryāṇi sa śānta iti kathyate // Mo_2,13.75 //
kapaṭarāhityād iti bhāvaḥ || MoT_2,13.75 ||


     apy āpatsu durantāsu kalpānteṣu dahatsv api /
     tucchehaṃ na mano yasya sa śānta iti kathyate // Mo_2,13.76 //
"tuccheham" tucchopāyaparam || MoT_2,13.76 ||


     yo 'ntaḥ śītalatāṃ yāto yo bhāveṣu na majjati /
     vyavahārī na saṃmūḍhaḥ sa śānta iti kathyate // Mo_2,13.77 //
"na majjati" rāgodrekeṇāsakto na bhavati | "vyavahārī" vyavahārakārī | "na saṃmūḍhaḥ" na vyavahārarahitaḥ | vyavahārarahitasya hi amajjanaṃ vyavahārābhāvakṛtam eva na śāntikṛtam || MoT_2,13.77 ||



     ākāśasadṛśī yasya nityaṃ svavyavahāriṇaḥ /
     kalaṅkam eti na matiḥ sa śānta iti kathyate // Mo_2,13.78 //
"svaḥ" nijaḥ | "vyavahāraḥ" asyāstīti tādṛśasya || MoT_2,13.78 ||


     tapasviṣu bahujñeṣu yājakeṣu nṛpeṣu ca /
     balavatsu guṇāḍhyeṣu śamavān eva rājate // Mo_2,13.79 //
spaṣṭam || MoT_2,13.79 ||


     śamasaṃsaktamanasāṃ mahatāṃ guṇaśālinām /
     udeti nirvṛtiś cittāj jyotsneva himarociṣaḥ // Mo_2,13.80 //
spaṣṭam || MoT_2,13.80 ||


     sīmānto guṇapūgānāṃ pauruṣaikāntabhūṣaṇam /
     saṃkaṭeṣv abhayasthānaṃ śamaḥ śrīmān virājate // Mo_2,13.81 //
spaṣṭam || MoT_2,13.81 ||


sargāntaślokena śamanirūpaṇaṃ samāpayati
          śamam amṛtam ahāryam āryajuṣṭaṃ
          param avalambya padaṃ paraṃ prayātāḥ /
          raghutanaya yathā mahānubhāvāḥ
          kramam anupālaya siddhaye tam eva // Mo_2,13.82 //
he "raghutanaya" | "mahānubhāvāḥ" puruṣāḥ | "amṛtam" amṛtarūpam | "ahāryam" anāśyam "āryajuṣṭam" |" śamaṃ" pūrvoktasvarūpaṃ śamaṃ "avalambya" | "paraṃ" padaṃ paracitsvarūpam utkṛṣṭaṃ sthānaṃ | yathā "prayātāḥ" | tvam "tam" tathāvidham | "kramam siddhaye anupālaya" | iti śivam || MoT_2,13.82 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe trayodaśaḥ sargaḥ || 2,13 ||


************************************************************************

oṃ vivekanirṇayaṃ prastauti
     śāstrāvabodhāmalayā dhiyā paramapūtayā | /
     kartavyaḥ kāraṇajñena vicāro 'niśam ātmanaḥ // Mo_2,14.1 //"
kāraṇajñena" kiṃ | kena saṃpadyate iti jānatā puruṣeṇa | "dhiyā ātmanaḥ vicāraḥ aniśam kartavyaḥ" || MoT_2,14.1 ||


nanu vicāreṇa kiṃ setsyati ity | atrāha
     vicārāt tīkṣṇatām etya dhīḥ paśyati paraṃ padam /
     dīrghasaṃsārarogasya vicāro hi mahauṣadham // Mo_2,14.2 //
"param padam" śuddhacinmātrākhyaṃ mahāsthānam || MoT_2,14.2 ||


     āpadvanam anantehāparipallavitākṛti /
     vicārakrakacacchinnaṃ naiva bhūyaḥ prarohati // Mo_2,14.3 //
"anantāḥ" yāḥ "īhāḥ" ceṣṭāḥ | tābhiḥ "paripallavitā" puṣṭībhūtā | "ākṛtiḥ" yasya tat || MoT_2,14.3 ||



     moheṣu bandhunāśeṣu saṃkaṭeṣu bhrameṣu ca /
     sarveṣv eva mahāprājña vicāro hi satāṃ gatiḥ // Mo_2,14.4 //
"gatiḥ" śaraṇam || MoT_2,14.4 ||


     na vicāraṃ vinā kaścid upāyo 'sti vipacchame /
     vicārād aśubhaṃ tyaktvā śubham āyāti dhīḥ satām // Mo_2,14.5 //
spaṣṭam || MoT_2,14.5 ||


     balaṃ buddhiś ca tejaś ca pratipattiḥ kriyāphalam /
     phalanty etāni sarvāṇi vicāreṇaiva dhīmataḥ // Mo_2,14.6 //
"pratipattiḥ" jñānam | avivekena tu kṛtāni "etāni" anartham evotpādayantīti bhāvaḥ || MoT_2,14.6 ||



     yuktāyuktamahādīpam abhivāñchitasādhakam /
     sphāraṃ vicāram āśritya saṃsārajaladhiṃ taret // Mo_2,14.7 //
"yuktāyuktamahādīpaṃ" idaṃ yuktaṃ idaṃ tv ayuktam iti prakāśakam ity arthaḥ | "sphāraṃ" vistīrṇam || MoT_2,14.7 ||


     ālūnahṛdayāmbhojaṃ mahāmohamataṅgajam /
     vidārayati śuddhātmā vicārodārakesarī // Mo_2,14.8 //
"vidārayati" vināśayati || MoT_2,14.8 ||


     mūḍhāḥ kālavaśeneha yad gatāḥ paramaṃ padam /
     tad vicārapradīpasya vijṛmbhitam anuttamam // Mo_2,14.9 //
"kālena" hi "mūḍhā" api śuddhacinmātrākhyaṃ "paramaṃ padaṃ" prāpnuvanti | "vijṛmbhitam" vilasitam | "anuttamam" niratiśayam || MoT_2,14.9 ||


     rājyāni saṃpadaḥ sphāro bhogo mokṣaś ca śāśvataḥ /
     vicārakalpavṛkṣasya phalāny etāni rāghava // Mo_2,14.10 //
spaṣṭam || MoT_2,14.10 ||



     yā vivekavilāsinyo matayo mahatām iha /
     na tā vipadi majjanti tumbakānīva vāriṇi // Mo_2,14.11 //
vivekavilāsaḥ āsām astīti "vivekavilāsinyaḥ" || MoT_2,14.11 ||


     vicārodayahāriṇyā dhiyā vyavaharanti ye /
     phalānām atyudārāṇāṃ bhājanaṃ hi bhavanti te // Mo_2,14.12 //
"vicārodayena hāriṇyā" manoharayā || MoT_2,14.12 ||


     mūrkhahṛtkānanasthānām āśāprasararodhinām /
     avicārakarañjānāṃ mañjaryo duḥkharītayaḥ // Mo_2,14.13 //
"āśā" mokṣāśā | tasyāḥ yaḥ "prasaraḥ" | taṃ rundhantīti tādṛśānām dik"prasararodhināṃ" ca | "karañjānāṃ" kaṇṭakavṛkṣāṇām | "duḥkharītayaḥ" duḥkharacanāḥ || MoT_2,14.13 ||



     kajjalakṣodamalinā madirāmodadhāriṇī /
     avicāramayī nidrā yātu te rāghava kṣayam // Mo_2,14.14 //
"kajjalakṣodena" mantrasaṃskṛtena | "kajjalakṣodena malinā" ghanā | kajjalakṣodavat "malinā" cātyantakāluṣyāt | "madirā modaṃ dhārayatī"ti tādṛśī | madirāmodenāpi "nidrā" ghanībhavati | "avicāramayī" avicārasvarūpā tām eva "kṣayaṃ" nayeti bhāvaḥ || MoT_2,14.14 ||


     mahāpady api dīrgheṣu sadvicāraparo naraḥ /
     na nimajjati moheṣu tejorāśis tamassv iva // Mo_2,14.15 //
"moheṣu" kiṃ karomīty evaṃrūpeṣu || MoT_2,14.15 ||



     mānase sarasi svacche vicārakamalotkaraḥ /
     nūnaṃ vikasito yasya himavān iva bhāti saḥ // Mo_2,14.16 //
"mānase sarasi" hṛdayākhye sarasi mānasākhye sarasīti ca || MoT_2,14.16 ||


     vicāravikalā yasya matir māndyam upeyuṣaḥ /
     tasyodety aśaniś candrān mudhā yakṣaḥ śiśor iva // Mo_2,14.17 //
"vicāravikalā" vicārarahitā | "māndyaṃ" jāḍyaṃ | "candrāt" citsūryapratibimbarūpatvena candratulyāt saṃsārāt | "aśaniḥ" bhāvābhāvakṛtaharṣāmarṣarūpaṃ vajram āścaryaṃ ca candrād aśaner utpādaḥ || MoT_2,14.17 ||



     duḥkhaṣaṇḍakavalmīkaṃ vipannavalatāmadhuḥ /
     rāma dūre parityājyo nirviveko narādhamaḥ // Mo_2,14.18 //
"narādhamaḥ" kiṃ | "duḥkhaḥ ṣaṇḍakānāṃ valmīkam" | valmīke hi kaṇṭakaṣaṇḍakāni bhavanti | punaḥ kaḥ | "vipad" eva "navalatā" | tasyāḥ "madhuḥ" vasantaḥ || MoT_2,14.18 ||


     ye kecana durārambhā durācārā durādhayaḥ /
     avicāreṇa te bhānti vetālās tamasā yathā // Mo_2,14.19 //
"durārambhāḥ" kutsitāḥ kāryārambhāḥ || MoT_2,14.19 ||


     avicāriṇam ekāntajaraddrumasadharmakam /
     akṣamaṃ sādhukāryeṣu dūre kuru raghūdvaha // Mo_2,14.20 //
"ekānte" janarahite deśe | sthitaḥ "jaraddrumaḥ" | tasya "sadharmakam" sadṛśam | "sādhukāryeṣu" cittanirodhādiṣu | phaladānena paropakārarūpeṣu ca śubhakāryeṣu || MoT_2,14.20 ||



     viviktaṃ hi mano jantor āśāvaivaśyavarjitam /
     parāṃ nirvṛtim abhyeti pūrṇaś candra ivātmani // Mo_2,14.21 //
"viviktam" vivekayuktam | "āśāvaivaśyavarjitam" iti viśeṣaṇadvāreṇa hetuḥ | āśāvaivaśyasyaiva nirvṛtirodhakatvāt || MoT_2,14.21 ||


     vivekitoditā dehaṃ sarvaṃ śītalayaty alam /
     alaṃkaroti cātyantaṃ jyotsneva bhuvanam navā // Mo_2,14.22 //
"navā" śaratkālīnā || MoT_2,14.22 ||


     paramārthapatākāyā dhiyo dhavalacāmaram /
     vicāro rājate janto rajanyām iva candramāḥ // Mo_2,14.23 //
"paramārthasya" śuddhacinmātratattvākhyaparamārthasya | "patākāyāḥ" pradarśakatvasāmānyena cihṇabhūtapatākārūpāyāḥ "dhiyaḥ" | "dhavalacāmaram" śobhādāyakatvena dhavalacāmararūpam || MoT_2,14.23 ||



     vicāracāravo bhāvā bhāsayanto diśo daśa /
     bhānti bhāskaravad bhagnabhūyobhavabhayāmayāḥ // Mo_2,14.24 //
"bhāvāḥ" manuṣyādirūpāḥ padārthāḥ | "bhāvāḥ" kathaṃbhūtāḥ | "bhagnāḥ bhūyāṃsi bhavabhayāni" ev"āmayāḥ" yaiḥ te | "bhāskaro" 'pi "daśa diśaḥ" bhāsayati || MoT_2,14.24 ||


     bālasya svamanomohakalpitaḥ prāṇahārakaḥ /
     rātrau tamasi vetālo vicāreṇa vilīyate // Mo_2,14.25 //
spaṣṭam || MoT_2,14.25 ||


     sarva eva jagadbhāvā avicāreṇa cāravaḥ /
     avidyamānasadbhāvā vicāraviśarāravaḥ // Mo_2,14.26 //
"sarva eva jagadbhāvāḥ" jagatpadārthāḥ | "avicāreṇa" vicārarāhityena | "cāravaḥ" bhavanti | kathaṃbhūtāḥ | "avidyamānasadbhāvāḥ" | ata eva ca "vicāraviśarāravaś" ca vicārāsahatvāt || MoT_2,14.26 ||



     puṃso nijamanomohakalpito 'nalpaduḥkhadaḥ /
     saṃsāraciravetālo vicāreṇa vilīyate // Mo_2,14.27 //
spaṣṭam || MoT_2,14.27 ||


     samasvacchaṃ nirābādham anantamananāśrayam /
     viddhīmaṃ kevalībhāvaṃ vicāro 'grataroḥ phalam // Mo_2,14.28 //
samaṃ ca tat svacchaṃ "samasvacchaṃ" | "nirābādham" kenāpi pramāṇena bādhayitum aśakyam | "anantasyā"paricchinnasya svātmatattvasya | yat "mananam" parāmarśaḥ | tasy"āśrayam" lakṣaṇayā sādhakam || MoT_2,14.28 ||


     acalasthitinodāraprakaṭābhogatejasā /
     tena niṣkāmatodeti śītatevoditendunā // Mo_2,14.29 //
"udāraprakaṭābhogaṃ" udbhaṭaprakaṭavistāraṃ | "tejaḥ" yasya | tādṛśena | "niṣkāmatā" kāmanārāhityam | "uditaś" cāsāv "induḥ" | tena || MoT_2,14.29 ||


nanu niṣkāmatayā kiṃ setsyatīty | atrāha
     cintājvaramahauṣadhyā sādhuś cittaniṣaṇṇayā /
     tayottamatvapradayā nābhivāñchati nojjhati // Mo_2,14.30 //
"tayā" niṣkāmatayā | "nābhivāñchati nojjhati" sarvatropekṣām eva bhajate ity arthaḥ || MoT_2,14.30 ||


punaḥ kiṃ karotīty | atrāha
     tatsadālambanaṃ cetaḥ sphāram ābhāsam āgatam /
     nāstam eti na codeti kham ivātitatāntaram // Mo_2,14.31 //
sā niṣkāmatā "sadā ālambanam" āśrayo yasya | tat "tatsadālambanam" | tathā "sphāraṃ" sphuraṇaśīlaṃ | "ābhāsam āgatam" vivekayuktaṃ jātam ity arthaḥ || MoT_2,14.31 ||


     na jahāti na cādatte nottāmyati na śāmyati /
     kevalaṃ sākṣivat paśyañ jagad ātmani tiṣṭhati // Mo_2,14.32 //
"nottāmyati" na kṣubhyati || MoT_2,14.32 ||



     na ca śāmyati nāpy antar nāpi bāhye 'vatiṣṭhati /
     na ca naiṣkarmyam ādatte na ca karmāṇi majjati // Mo_2,14.33 //
sarvatropekṣayaiva vartate iti bhāvaḥ || MoT_2,14.33 ||


     upekṣate gataṃ vastu saṃprāptam anuvartate /
     na kṣubdho nāti cākṣubdho bhāti pūrṇa ivārṇavaḥ // Mo_2,14.34 //
"anuvartate" niranusandhānam pravartate | "ati" atiśayena || MoT_2,14.34 ||


     evaṃrūpeṇa manasā mahātmāno mahāśayāḥ /
     jīvanmuktā jagaty asmin viharanti hi yoginaḥ // Mo_2,14.35 //
spaṣṭam || MoT_2,14.35 ||


     uṣitvā suciraṃ kālaṃ dhīrās te yāvadīpsitam /
     tanum ante parityajya yānti kevalatāṃ tatām // Mo_2,14.36 //
"kevalatām" videhamuktatām | "yāvadīpsitam" ity anena sarvam eva bhagavatkṛtam teṣām īpsitam evāstīti sūcitam || MoT_2,14.36 ||


     ko 'haṃ kasya ca saṃsāra ity āpady api dhīmatā /
     cintanīyaṃ prayatnena sapratīkāram ātmanā // Mo_2,14.37 //
kim uta vaktavyaṃ saṃpadīty "api"śabdābhiprāyaḥ | "sapratīkāram" pratīkārasahitam | na tu cintanamātreṇaiva | pratīkāraś cātra bhogatyāga eva jñeyaḥ || MoT_2,14.37 ||


     kāryasaṃkaṭasandehaṃ rājā jānāti rāghava /
     niṣphalaṃ saphalaṃ vāpi vicāreṇaiva nānyathā // Mo_2,14.38 //
bahir api vicārasyaiva sāmrājyam iti bhāvaḥ || MoT_2,14.38 ||


     vedavedāntasiddhāntasthitayaḥ sthitikāraṇam /
     nirṇīyante vicāreṇa dīpeneva bhuvo niśi // Mo_2,14.39 //
vedavedāntarūpāḥ sthitayaḥ maryādāḥ "vedavedāntasthitayaḥ" | "sthitikāraṇam" saṃsāramaryādākāraṇabhūtāḥ || MoT_2,14.39 ||



     anaṣṭam andhakāreṣu bahutejassv ajihmitam /
     paśyaty api vyavahitaṃ vicāraś cārulocanam // Mo_2,14.40 //
"ajihmitam" tejo'bhimukhe hi cakṣuṣi pratīghātena jihmitatvaṃ parivartitatvaṃ bhavati | tac cātra nāstīty arthaḥ || MoT_2,14.40 ||


     vivekāndho hi jātyandhaḥ śocyaḥ sarvasya durmatiḥ /
     divyacakṣur vivekātmā jayaty akhilavastuṣu // Mo_2,14.41 //
"sarvasya śocyaḥ" sarvaiḥ śocanīya ity arthaḥ | "vivekaḥ ātmā" pradhānaṃ yasya saḥ "vivekātmā" vivekānvita ity arthaḥ | "jayati" sarvotkarṣeṇa vartate ity arthaḥ || MoT_2,14.41 ||


     paramātmamayī pālyā mahānandaikasādhanī /
     kṣaṇam ekaṃ parityājyā na vicāracamatkṛtiḥ // Mo_2,14.42 //
"pālyā" rakṣaṇīyā || MoT_2,14.42 ||


     vicāracāruḥ puruṣo mahatām api rocate /
     paripakvaṃ camatkāri sahakāraphalaṃ yathā // Mo_2,14.43 //
spaṣṭam || MoT_2,14.43 ||


     vicārakāntamatayo nānekeṣu punaḥ punaḥ /
     luṭhanti duḥkhaśvabhreṣu jñātordhvagatayo narāḥ // Mo_2,14.44 //
"jñātāḥ" adhigatā | "ūrdhve" uttīrṇe cinmātre | "gatiḥ" yaite || MoT_2,14.44 ||


     na virauti tathā rogī nānarthaśatajarjaraḥ /
     avicāravinaṣṭātmā yathājñaḥ pariroditi // Mo_2,14.45 //
"nānarthaśatajarjara" ity atra "ca"śabdo 'dhyāhāryaḥ | "avicāreṇā"vivekena "vinaṣṭaḥ" vismṛtaḥ | "ātmā" pāramārthikaṃ svarūpaṃ yasya | tādṛśaḥ || MoT_2,14.45 ||


     varaṃ kardamakīṭatvaṃ śvabhrakaṇṭakatā varam /
     varam andhaguhāhitvaṃ na narasyāvicāritā // Mo_2,14.46 //
spaṣṭam || MoT_2,14.46 ||


     sarvānarthanijāvāsaṃ sarvasādhutiraskṛtam /
     sarvadauḥsthityasīmāntam avicāraṃ parityajet // Mo_2,14.47 //
"sarve" ye "anarthāḥ" | teṣāṃ "nijaḥ" svakīyaḥ | "āvāsaḥ" sarvānarthaśrayam ity arthaḥ || MoT_2,14.47 ||


     nityaṃ vicārayuktena bhavitavyaṃ mahātmanā /
     bhavāndhakūpe patatāṃ vicāro hy avalambanam // Mo_2,14.48 //
"hi" yasmādarthe | "avalambanam" ādhāraḥ || MoT_2,14.48 ||


     svayam evātmanātmānam avaṣṭabhya vicārataḥ /
     saṃsāramohajaladhes tārayet svamanomṛgam // Mo_2,14.49 //
"ātmanā" manasā | "ātmānaṃ" paramātmānam | "avaṣṭabhya" bhāvanayā gṛhītvā || MoT_2,14.49 ||


vicārasya svarūpaṃ kathayati
     ko 'haṃ katham ayaṃ doṣaḥ saṃsārākhya upāgataḥ /
     nyāyeneti parāmarśo vicāra iti kathyate // Mo_2,14.50 //
"nyāyena" yuktyā | "parāmarśaḥ" santatabhāvanam || MoT_2,14.50 ||


     andhāndhamohamukharaṃ ciraṃ duḥkhāya kevalam /
     kṛtaṃ śilāyā hṛdayaṃ durmateś cāvicāriṇaḥ // Mo_2,14.51 //
atiṣayenāndham "andhāndham" | tādṛśaṃ ca tat "mohamukharaṃ" ca | jāḍyena viparyāsayuktam ity arthaḥ | "duḥkhāya" svasya parasya ceti jñeyam || MoT_2,14.51 ||



     bhāvābhāvagrahotsargadṛśām iha hi rāghava /
     na vicārād ṛte tattvaṃ jñāyate sādhu kiṃcana // Mo_2,14.52 //
"grahaḥ" grahaṇaṃ | "utsargaḥ" tyāgaḥ || MoT_2,14.52 ||



     vicārāj jñāyate tattvaṃ tattvād viśrāntir ātmani /
     tato manasi śāntatvaṃ sarvaduḥkhaparikṣayaḥ // Mo_2,14.53 //
"tattvam" cinmātrākhyaṃ paramaṃ tattvam | "ātmani" śuddhacinmātrarūpe ātmani | "śāntatvasya" svarūpaṃ kathayati | "sarve"ti | "sarvaduḥkhakṣayasyai"va śāntirūpatvāt || MoT_2,14.53 ||

sargāntaślokena vicāranirūpaṇaṃ samāpayati
          saphalatā phalate bhuvi karmaṇāṃ
          prakaṭatāṃ kila gacchata uttamāt /
          sphuṭavicāradṛśaiva vicāritā
          śamavate bhavate 'pi virocatām // Mo_2,14.54 //
"kila" niścaye | "bhuvi karmaṇāṃ saphalatā phalate" | "sphuṭavicāradṛśaiva" "sphuṭā" yā "vicāradṛk" | tayaiva | "uttamāt" viśeṣataḥ | "prakaṭatāṃ" "gacchataḥ" vivekasyaiva sarvaprakaṭane śaktatvāt | ataḥ iyaṃ "vicāritā" "śamavate bhavate 'pi virocatām" | iti śivam || MoT_2,14.54 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe caturdaśaḥ sargaḥ || 2,14 ||


************************************************************************

oṃ evaṃ vicārasvarūpaṃ nirṇīya tṛtīyasya saṃtoṣasya svarūpaṃ kathayati
     saṃtoṣo 'pi paraṃ śreyaḥ saṃtoṣaḥ sukham ucyate /
     saṃtuṣṭaḥ param abhyeti viśrāmam arisūdana // Mo_2,15.1 //
"saṃtuṣṭaḥ" saṃtoṣayuktaḥ puruṣaḥ || MoT_2,15.1 ||


     saṃtoṣaiśvaryasukhināṃ ciraviśrāntacetasām /
     sāmrājyam api sādhūnāṃ jarattṛṇalavāyate // Mo_2,15.2 //
spaṣṭam || MoT_2,15.2 ||


     saṃtoṣaśālinī buddhī rāma saṃsāravṛttiṣu /
     viṣamāsv apy anudvignā na kadācana dūyate // Mo_2,15.3 //
"na dūyate" saṃtapyate saṃtuṣṭavān || MoT_2,15.3 ||


     saṃtoṣāmṛtapānena ye parāṃ tṛptim āgatāḥ /
     bhogaśrīr atulā teṣām eṣā prativiṣāyate // Mo_2,15.4 //
prativiṣā ivācarate "prativiṣāyate" | prativiṣā tiktadravyaviśeṣaḥ || MoT_2,15.4 ||


     na tathā tarpayanty etāḥ pīyūṣarasavīcayaḥ /
     yathā hi madhurāsvādaḥ saṃtoṣo doṣanāśanaḥ // Mo_2,15.5 //
spaṣṭam || MoT_2,15.5 ||


saṃtuṣṭasvarūpakathanadvāreṇa saṃtoṣasvarūpaṃ kathayati
     aprāptavāñchām utsṛjya saṃprāpte samatāṃ gataḥ /
     adṛṣṭakhedākhedo 'ntaḥ sa saṃtuṣṭa ihocyate // Mo_2,15.6 //
"saṃprāpte" pravāhāgate || MoT_2,15.6 ||


     ātmanātmani saṃtoṣaṃ yāvad yāti na mānasam /
     udbhavanty āpadas tāval latā iva manovanāt // Mo_2,15.7 //
"ātmanā" svena | na tu bhogādinā || MoT_2,15.7 ||


     saṃtoṣaśītalaṃ cetaḥ śuddhavijñānadṛṣṭibhiḥ /
     bhṛśaṃ vikāsam āyāti sūryāṃśubhir ivāmbujam // Mo_2,15.8 //
saṃtuṣṭasyaiva jñāne adhikāra iti bhāvaḥ || MoT_2,15.8 ||


     āśāvaivaśyavivaśe citte saṃtoṣavarjite /
     mlāne vaktram ivādarśe na jñānaṃ pratibimbati // Mo_2,15.9 //
"pratibimbati" lagati || MoT_2,15.9 ||



     ajñānaghanayāminyā saṃkocaṃ na narāmbujam /
     yāty asāv udito yasya nityaṃ saṃtoṣabhāskaraḥ // Mo_2,15.10 //
tat "narāmbujam ajñānaghanayāminyā saṃkocaṃ na yāti" | tat kim | "yasyāsau saṃtoṣabhāskaraḥ nityam udito" bhavati || MoT_2,15.10 ||


     akiṃcano 'py asau jantuḥ sāmrājyasukham aśnute /
     ādhivyādhivinirmuktaṃ saṃtuṣṭaṃ yasya mānasam // Mo_2,15.11 //
spaṣṭam || MoT_2,15.11 ||


     nābhivāñchaty asaṃprāptaṃ prāptaṃ bhuṅkte yathākramam /
     yaḥ sasomyaḥ sadācāraḥ saṃtuṣṭa iti kathyate // Mo_2,15.12 //
spaṣṭam || MoT_2,15.12 ||


     saṃtoṣaparitṛptasya mahataḥ pūrṇacetasaḥ /
     kṣīrābdher iva śuddhasya mukhe lakṣmīr virājate // Mo_2,15.13 //
spaṣṭam || MoT_2,15.13 ||


     pūrṇatām alam āśritya svātmany evātmanā svayam /
     pauruṣeṇa prayatnena tṛṣṇāṃ sarvatra varjayet // Mo_2,15.14 //
"pūrṇatāṃ" tṛptatām | "ātmanā eva" | na tu bhogair ity arthaḥ || MoT_2,15.14 ||


     saṃtoṣāmṛtapūrṇasya svāntaḥ śītalatā svayam /
     sthairyam āyāty ariktasya śītāṃśor iva śāśvatam // Mo_2,15.15 //
"svāntaḥ" svamanasi | "ariktasya" pūrṇasya || MoT_2,15.15 ||


     saṃtoṣapuṣṭamanasaṃ bhṛtyā iva maharddhayaḥ /
     rājānam upatiṣṭhante kiṃkaratvam upāgatāḥ // Mo_2,15.16 //
yathā "kiṃkaratvam upāgatāḥ bhṛtyāḥ rājānam upatiṣṭhante" tathā "saṃtoṣapuṣṭamanasaṃ" "maharddhayaḥ upatiṣṭhante" || MoT_2,15.16 ||



     ātmanaivātmani svacche saṃtuṣṭe puruṣe sthite /
     praśāmyanty ādhayaḥ sarve prāvṛṣīvāśu pāṃsavaḥ // Mo_2,15.17 //
"svacche" rāgādimalarahite || MoT_2,15.17 ||


     nityaṃ śītalayā nāma kalaṅkaparihīnayā /
     puruṣaḥ śuddhayā vṛttyā bhāti pūrṇatayenduvat // Mo_2,15.18 //
"nāma" niścaye | "kalaṅkahīnayā" asantoṣākhyamalarahitayā || MoT_2,15.18 ||


saṃtoṣavivecanaṃ sargāntaślokena samāpayati
          samatayā matayā guṇaśālināṃ
          puruṣarāḍ iha yaḥ samalaṃkṛtaḥ /
          tam amalaṃ praṇamanti nabhaścarā
          api mahāmunayo raghunandana // Mo_2,15.19 //
spaṣṭam | iti śivam || MoT_2,15.19 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe pañcadaśaḥ sargaḥ || 2,15 ||


************************************************************************

oṃ evaṃ saṃtoṣasvarūpaṃ nirṇīya caturthaṃ satsaṃgaṃ nirūpayati
     viśeṣeṇa mahābuddhe saṃsārottaraṇe nṛṇām /
     sarvatropakarotīha sādhuḥ sādhusamāgamaḥ // Mo_2,16.1 //
spaṣṭam || MoT_2,16.1 ||


     sādhusaṃgataror jātaṃ vivekakusumaṃ śubham /
     rakṣanti ye mahātmāno bhājanaṃ te phalaśriyaḥ // Mo_2,16.2 //
"phalaśriyaḥ" mokṣākhyaphalalakṣmyāḥ || MoT_2,16.2 ||


     śūnyam ākīrṇatām eti mṛtir apy utsavāyate /
     āpat saṃpad ivābhāti vidvajjanasamāgame // Mo_2,16.3 //
"śūnyaṃ" śūnyadeśaḥ | "ākīrṇatām" lokabharitadeśatām || MoT_2,16.3 ||



     himam āpatsarojinyā mohanīhāramārutaḥ /
     jayaty eko jagaty asmin sādhu sādhusamāgamaḥ // Mo_2,16.4 //
"sādhu" samyak || MoT_2,16.4 ||



     paraṃ vivardhanaṃ buddher ajñānatarunāśanam /
     samutsāraṇam ādhīnāṃ viddhi sādhusamāgamam // Mo_2,16.5 //
"samutsāraṇam" nāśanam || MoT_2,16.5 ||


     vivekaḥ paramo dīpo jāyate sādhusaṃgamāt /
     manoharojjvalo nūnam aśokād iva gucchakam // Mo_2,16.6 //
spaṣṭam || MoT_2,16.6 ||


     nirāmayāṃ nirābādhāṃ nirvṛtiṃ nityapīvarīṃ /
     anuttamāṃ prayacchanti sādhusaṃgavibhūtayaḥ // Mo_2,16.7 //
spaṣṭam || MoT_2,16.7 ||



     api kaṣṭatarāṃ prāptair daśāṃ vivaśatāṃ gataiḥ /
     manāg api na saṃtyājyā mānavaiḥ sādhusaṃgatiḥ // Mo_2,16.8 //
spaṣṭam || MoT_2,16.8 ||


     sādhusaṃgatayo loke sanmārgaśubhadīpakāḥ /
     hārdāndhakārahāriṇyo bhāso jñānavivasvataḥ // Mo_2,16.9 //
spaṣṭam || MoT_2,16.9 ||


     yaḥ snātaḥ śītasitayā sādhusaṃgatigaṅgayā /
     kiṃ tasya dānaiḥ kiṃ tīrthaiḥ kiṃ tapobhiḥ kim adhvaraiḥ // Mo_2,16.10 //
spaṣṭam || MoT_2,16.10 ||



     nīrāgāś chinnasaṃdehā galitagranthayo 'nagha /
     sādhavo yadi vidyante kiṃ tapastīrthasaṃgrahaiḥ // Mo_2,16.11 //
"galitagranthayaḥ" naṣṭakāmākhyagranthayaḥ || MoT_2,16.11 ||



     viśrāntamanaso vandyāḥ prayatnena pareṇa hi /
     daridreṇeva maṇayaḥ prekṣaṇīyā hi sādhavaḥ // Mo_2,16.12 //
spaṣṭam || MoT_2,16.12 ||


     satsamāgamasaundaryaśālinī dhīmatāṃ matiḥ /
     kamalevāpsarovṛnde sarvadaiva virājate // Mo_2,16.13 //
"kamalā" lakṣmīḥ || MoT_2,16.13 ||


     tenāmalavilāsasya padasyāgrāvacūlatā /
     grathitā yena bhavyena na tyaktā sādhusaṃgatiḥ // Mo_2,16.14 //
"tena" puruṣeṇa | "amalavilāsasya" śuddhasphuraṇayuktasya | "padasya" cinmātrākhyasya sthānasya | "agrāvacūlatā" śirobhūṣaṇatā | "grathitā yena bhavyena" daivaprakṛtikena | "sādhusaṃgatiḥ na tyaktā" sādhusaṃgatiḥ kāryaiva cinmātrākhye pade rājate iti bhāvaḥ || MoT_2,16.14 ||



     vicchinnagranthayas tajjñāḥ sādhavaḥ sarvasammatāḥ /
     sarvopāyena saṃsevyās te hy upāyā bhavāmbudhau // Mo_2,16.15 //
spaṣṭam || MoT_2,16.15 ||



     ta ete narakāgnīnāṃ saṃśuṣkendhanatāṃ gatāḥ /
     yair dṛṣṭā helayā santo narakānalavāridāḥ // Mo_2,16.16 //
spaṣṭam || MoT_2,16.16 ||


     dāridryaṃ maraṇaṃ duḥkham ityādiviṣamo bhramaḥ /
     saṃpraśāmyaty aśeṣeṇa sādhusaṃgamabheṣajaiḥ // Mo_2,16.17 //
spaṣṭam || MoT_2,16.17 ||


sarvān upāyān saṃkalpayati
     saṃtoṣaḥ sādhusaṃgaś ca vicāro 'tha śamas tathā /
     eta eva bhavāmbhodhāv upāyās taraṇe nṛṇām // Mo_2,16.18 //
spaṣṭam || MoT_2,16.18 ||


     saṃtoṣaḥ paramo lābhaḥ satsaṃgaḥ paramā gatiḥ /
     vicāraḥ paramaṃ jñānaṃ śamo hi paramaṃ sukhaṃ // Mo_2,16.19 //
ataḥ paraṃ lābhādi nāstīti "para"padābhiprāyaḥ || MoT_2,16.19 ||

     catvāra ete vimalā upāyā bhavabhedane /
     yair abhyastās ta uttīrṇā mohavārer bhavārṇavāt // Mo_2,16.20 //
"mohavāreḥ" mohākhyajalayuktāt || MoT_2,16.20 ||


     ekasminn eva caiteṣām abhyaste vimalodaye /
     catvāro 'pi kilābhyastā bhavanti sudhiyāṃ vara // Mo_2,16.21 //
spaṣṭam || MoT_2,16.21 ||


     eko 'py eko 'pi sarveṣāṃ eṣāṃ prasavabhūr iva /
     sarvasaṃsiddhaye tasmād yatnenaikaṃ samāśrayet // Mo_2,16.22 //
"prasavabhūḥ" utpattisthānam || MoT_2,16.22 ||


     satsamāgamasaṃtoṣavicārās tv avicāritam /
     pravartante śamasvacche vahanānīva sāgare // Mo_2,16.23 //
"vahanāni" jalaspandāḥ | "avicāritam" asandeham || MoT_2,16.23 ||


     vicārasaṃtoṣaśamāḥ satsamāgamaśālini /
     pravartante śriyo jantau kalpavṛkṣāśrite yathā // Mo_2,16.24 //
spaṣṭam || MoT_2,16.24 ||


     vicāraśamasatsaṃgāḥ saṃtoṣavati mānave /
     pravartante prapūrṇendau saundaryādyā guṇā iva // Mo_2,16.25 //
spaṣṭam || MoT_2,16.25 ||



     satsaṃgasaṃtoṣaśamā vicāravati sanmatau /
     pravartante mantrivare rājanīva jayaśriyaḥ // Mo_2,16.26 //
"mantriṇāṃ" mantrajñānāṃ | "vare" śreṣṭhe || MoT_2,16.26 ||


phalitam āha
     tasmād ekatamaṃ nityam eteṣāṃ raghunandana /
     pauruṣeṇa mano jitvā yatnenābhyāhared guṇam // Mo_2,16.27 //
"tasmāt eteṣāṃ" caturṇāṃ madhye | "ekatamaṃ guṇaṃ" saṃtoṣādirūpaṃ guṇaṃ | "abhyāharet" arjayet || MoT_2,16.27 ||



     paraṃ pauruṣam āśritya jitvā cittamataṅgajam /
     yāvad eko guṇo nāptas tāvan nāsty uttamā gatiḥ // Mo_2,16.28 //
spaṣṭam || MoT_2,16.28 ||


     pauruṣeṇa prayatnena dantair dantān vicūrṇayan /
     yāvan nābhiniviṣṭaṃ te mano rāma guṇārjane // Mo_2,16.29 //
     devo bhavātha yakṣo vā puruṣaḥ pādapo 'tha vā /
     tāvat tava mahābāho nopāyo 'stīha kaścana // Mo_2,16.30 //
"guṇārjane" saṃtoṣādyarjane || MoT_2,16.29-30 ||


     ekasminn eva phalite guṇe balam upāgate /
     kṣīyante sarva evāśu doṣā viṣadacetasaḥ // Mo_2,16.31 //
"doṣāḥ" rāgādayaḥ || MoT_2,16.31 ||



     guṇe vivṛddhe vardhante guṇā doṣakṣayāvahāḥ /
     doṣe vivṛddhe vardhante doṣā guṇavināśinaḥ // Mo_2,16.32 //
spaṣṭam || MoT_2,16.32 ||


     manomahāvane hy asmin veginī vāsanāsarit /
     śubhāśubhabṛhatkūlā nityaṃ vahati jantuṣu // Mo_2,16.33 //
spaṣṭam || MoT_2,16.33 ||


     sā hi svena prayatnena yasminn eva nipātyate /
     kūle tenaiva vahati yathecchasi tathā kuru // Mo_2,16.34 //
"hi" niścaye | "sā" vāsanāsarit || MoT_2,16.34 ||


sargāntaślokenaitat samāpayati
          puruṣayatnajavena manovane
          śubhataṭānugatāṃ kramaśaḥ kuru /
          varamate nijabhāvamahānadīm
          iha hi tena manāg api nohyase // Mo_2,16.35 //
"puruṣayatnajavena" pauruṣavegena | "nijabhāvanadīṃ" svavāsanā"mahānadīṃ" | nanu kimarthaṃ tāṃ taṭagatāṃ karomīty apekṣāyām āha | "iha hī"ti | "hi" yasmāt | "tena" tasyāḥ "śubhataṭānugamanena" | tayā nijabhāvamahānadyā tvam "na uhyase" vivaśatayā yatra tatra na nīyase | taṭagatayā ca nadyā na kiṃcit uhyate | iti śivam || MoT_2,16.35 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe ṣoḍaśaḥ sargaḥ || 2,16 ||


************************************************************************

phalitaṃ kathayati
     evam āttaviveko yaḥ sa bhavān iva rāghava /
     yogyo jñānagiraḥ śrotuṃ rājeva nayabhāratīḥ // Mo_2,17.1 //
he "rāghava" | "evaṃ" sati | "yaḥ" puruṣaḥ | "āttaviveko" bhavati | "saḥ" | "bhavān iva" | "jñānagiraḥ śrotuṃ yogyo" bhavati| ka iva | "rājā iva" yathā "rājā nayabhāratīḥ" nītivākyāni "śrotuṃ yogyaḥ" bhavati | tathety arthaḥ || MoT_2,17.1 ||



     avadāto 'vadātasya vijñānasya mahāśayaḥ /
     jaḍasaṅgojjhito yogyaḥ śaradīndor yathā nabhaḥ // Mo_2,17.2 //
"avadātaḥ" śamādisevanena rāgādimalarahitaḥ nirmalaś ca | "avadātasya" śuddhacinmātraviṣayatvena śuddhasya sitasya ca | "jaḍasaṅgena" mūḍhasaṅgen"ojjhitaḥ" tyaktaḥ | tam akurvāṇa ity arthaḥ | jaḍānāṃ lakṣaṇayā meghānāṃ "saṅgena ujjhitaḥ" iti ca || MoT_2,17.2 ||


     tvam etayākhaṇḍitayā guṇalakṣmyā samāśritaḥ /
     manomohaharaṃ vākyaṃ vakṣyamāṇam idaṃ śṛṇu // Mo_2,17.3 //
spaṣṭam || MoT_2,17.3 ||


     puṇyakalpadrumo yasya phalabhārānataḥ sthitaḥ /
     muktaye jāyate jantos tasyedaṃ śrotum udyamaḥ // Mo_2,17.4 //
"idam" etat śāstram || MoT_2,17.4 ||


     pāvanānām udārāṇāṃ parabodhaikadāyinām /
     vacasāṃ bhājanaṃ bhūtyai bhavyo bhavati nādhamaḥ // Mo_2,17.5 //
"bhavyaḥ" divyaprakṛtiḥ || MoT_2,17.5 ||



     mokṣopāyābhidhāneyaṃ saṃhitā sārasammitā /
     triṃśad dve ca sahasrāṇi jñātā nirvāṇadāyinī // Mo_2,17.6 //
"saṃhitā" śāstram | "sārasammitā" sāratulyā | "jñātā" samyak vicāritā || MoT_2,17.6 ||


nanu kim anayā setsyatīty | atrāha
     dīpe yathā vinidrasya jvalite saṃpravartate /
     āloko 'nicchato 'py evaṃ nirvāṇam anayā bhavet // Mo_2,17.7 //
"yathā dīpe" pra"jvalite" | "anicchataḥ api" ālokānākāṅkṣiṇo 'pi | ardha"nidrasyā"rdhaprabuddhasya | "ālokaḥ saṃpravartate" | "evam anayā" saṃhitayā | "nirvāṇam" brahmaṇy ātyantiko layo | "bhavet" || MoT_2,17.7 ||



     svayaṃ jñātā śrutā vāpi bhrāntiśāntyaiva saukhyadā /
     āptoktivarṇitā sadyo yathāmṛtataraṅgiṇī // Mo_2,17.8 //
"āptoktivarṇite"ti "śrute"ty asya viśeṣaṇadvāreṇa hetuḥ |8|| MoT_2,17.
     yathā rajjvām ahibhrāntir vinaśyaty avalokanāt /
     tathaitatprekṣaṇāc chāntim eti saṃsāraduḥkhitā // Mo_2,17.9 //
"etasyāḥ" saṃhitāyāḥ "prekṣaṇam" vicāraṇam "etatprekṣaṇam" | tasmāt ||9|| MoT_2,17.
     yuktiyuktārthavākyāni kalpitāni pṛthak pṛthak /
     dṛṣṭāntasārasūktāni cāsyāṃ prakaraṇāni ṣaṭ // Mo_2,17.10 //
mayā "ṣaṭ prakaraṇāni asyāṃ kalpitāni" vihitāni| kathaṃbhūtāni | arthasahitāni vākyāni "arthavākyāni" | "yuktiyuktāni" arthavākyāni yeṣu | tāni| punaḥ kathaṃbhūtāni | "dṛṣṭāntaiḥ sāram" śreṣṭham "sūktaṃ" yeṣu | tāni ||10|| MoT_2,17.
prakaraṇaṣaṭkam viśeṣato nirdiśati
     vairāgyākhyaṃ prakaraṇaṃ prathamaṃ parikīrtitam /
     vairāgyaṃ vardhate yena sekeneva marau taruḥ // Mo_2,17.11 //
nanu kiṃ tena saṃpadyata ity | atrāha | "vairāgyam" iti ||11|| MoT_2,17.
kiyatpramāṇaṃ tat kṛtam ity apekṣāyām āha
     sārdhaṃ sahasraṃ granthasya yasmin hṛdi vicārite | /
     prakāśā śuddhatodeti maṇāv iva vimārjite // Mo_2,17.12 //
"granthasye"ti jātāv ekavacanam| tat vairāgyaprakaraṇaṃ "granthasya" ślokānāṃ "sārdhaṃ sahasraṃ" bhavati| tat kiṃ | "yasmin hṛdi vicārite" sati | "prakāśā" prakaṭā | "śuddhatā" rāgādimalarāhityaṃ "udeti" | kasminn iva | "mārjite" śodhite "maṇau iva" | yathā "vimārjite maṇau śuddhatodeti" | tathety arthaḥ ||12|| MoT_2,17.
     mumukṣuvyavahārākhyaṃ tataḥ prakaraṇaṃ kṛtam /
     sahasramātraṃ granthasya sūktigranthena sundaram // Mo_2,17.13 //
"sūkti"rūpaḥ yaḥ "granthaḥ" vākyam | tena "sundaram" | tadyuktam ity arthaḥ ||13|| MoT_2,17.
nanu kiṃ tatra kathyate ity | atrāha
     svabhāvo hi mumukṣūṇāṃ narāṇāṃ yatra varṇyate /
     evaṃsvabhāvo mokṣasya yogya ity avagamyate // Mo_2,17.14 //
nanu varṇanena kiṃ setsyatīty | atrāha | "evaṃsvabhāva" iti ||14|| MoT_2,17.
     athotpattiprakaraṇaṃ dṛṣṭāntākhyāyikāmayam /
     pañcagranthasahasrāṇi vijñānapratipādanam // Mo_2,17.15 //
"vijñānapratipādanam" vijñānapratipādakam ity arthaḥ ||15|| MoT_2,17.
     jāgatī draṣṭṛdṛśyaśrīr ahaṃ tvam itirūpiṇī /
     anutthitaivotthiteva yatreti parivarṇyate // Mo_2,17.16 //
spaṣṭam ||16|| MoT_2,17.
     yasmiñ śrute jagad idaṃ śrotrāntar budhyate 'khilam /
     sāsmadyuṣmat savistāraṃ salokākāśaparvatam // Mo_2,17.17 //
     piṇḍagrahavinirmuktaṃ nirbhittikam aparvatam /
     pṛthvyādibhūtarahitaṃ saṃkalpa iva pattanam // Mo_2,17.18 //
"yasmin" yasmin utpattiprakaraṇe | "sāsmadyuṣmat" ahaṃtvaṃyuktam | "budhyate" ity | atra "śrotre"ti kartṛtvenādhyāhāryam| kīdṛśaṃ budhyate ity apekṣāyām āha | "piṇḍagrahe"tyādi | "saṃkalpe" hi "pattanam" īdṛg eva bhātīti dṛṣṭāntatvenopāttam  ||17-18|| MoT_2,17.
punaḥ kīdṛg budhyate ity | atrāha
     svapnopalabdhabhāvābhaṃ manorājyavad ātatam /
     gandharvanagaraprakhyam arthaśūnyopalambanam // Mo_2,17.19 //
"svapnopalabdhabhāvābhaṃ" svapnadṛṣṭapadārthasadṛśam ity arthaḥ | gandharvāḥ svāvāsārthaṃ kalpanayākāśe nagaraṃ kalpayanti | tad eva "gandharvanagaram" | "arthaśūnyaṃ" satyabhūtaghaṭādyartharahitaṃ | "upalambanaṃ" jñānaṃ yasmin  ||19|| MoT_2,17.
     dvicandravibhramābhāsaṃ mṛgatṛṣṇāmbuvat tatam /
     nauyānalolaśailābhaṃ satyalābhavivarjitam // Mo_2,17.20 //
spaṣṭam ||20|| MoT_2,17.
     cittabhramapiśācābhaṃ nirbījam api bhāsuram /
     kathārthapratibhānābhaṃ vyomamuktāvalīnibham // Mo_2,17.21 //
"nirbījaṃ" kāraṇarahitaṃ | "kathāyāḥ" yaḥ "arthaḥ" varṇanīyaḥ padārthaḥ | tasya yat "pratibhānaṃ" pura iva sphuraṇaṃ | ten"ābhā" yasya | tat | kathāyāṃ hi varṇanīyaḥ padārthaḥ puraḥstha iva pratibhāti | "vyome"ti | bhrameṇa hi vyomni "muktāvalī" dṛśyate ||21|| MoT_2,17.
     kaṭakatvaṃ yathā hemni taraṅgatvaṃ yathāmbhasi /
     yathā nabhasi nīlatvam asad evotthitaṃ tathā // Mo_2,17.22 //
"kaṭakā"di "yathā hemni asad evotthitaṃ" bhavati "tathāsad evotthitaṃ" jagad budhyate iti pūrveṇaiva sambandhaḥ ||22|| MoT_2,17.
     abhitti raṅgarahitam upalabdhimanoharam /
     svapne vā vyomni vā citram akarma cirabhāsuram // Mo_2,17.23 //
"vā"śabdadvayaṃ pakṣāntaradyotakaṃ | "svapne" dṛṣṭaṃ "citram" "vā" budhyate | "vyomni" bhrameṇa dṛṣṭaṃ "citram" "vā" budhyate | citraṃ kathaṃbhūtaṃ | "abhitti" bhittirahitaṃ | tathā "raṅgarahitam" raṅgadravyarahitam | punaḥ kathaṃbhūtaṃ | "akarma" anirmiti | tathā ciraṃ bhāsvaram "cirabhāsuram" | etaiḥ viśeṣaṇaiś ca citrasya lokottaratvam uktam ||23|| MoT_2,17.
     avahnir eva vahnitvaṃ dhatte citrānalo yathā /
     tathā dadhaj jagacchabdarūpārtham asadātmakam // Mo_2,17.24 //
"tathā" tadvat | "asadātmakam" asatsvarūpam | "jagacchabdarūpārtham" bhāvapradhāno nirdeśaḥ | jagad iti yacchabdarūpaṃ tasyārthatvaṃ "dadhat" budhyate "tathā" | kathaṃ | "yathā citrānalaḥ avahniḥ" adāhakatā anagniḥ san | "asadātmakaṃ vahnitvaṃ dhatte" dhārayati ||24|| MoT_2,17.
     taraṅgotpalamālāḍhyadṛṣatpattram ivotthitam /
     cakraśūtkāracūrṇasya malarāśim ivoditam // Mo_2,17.25 //
"taraṅgotpalamālābhiḥ āḍhyaṃ" yat "dṛṣatpattram" śilāpattram | tad "ivotthitaṃ" budhyate | śilāpattre hi taraṅgākāraḥ utpalākārāś ca rekhāḥ bhavanti | tā evātra "taraṅgotpalamālāḥ" jñeyāḥ | padārthāś cātra "taraṅgotpalamālāsthānīyāh" | punaḥ kīdṛg budhyate ity | atrāha | "cakre"ti | "cakrasya" bhrāmyamāṇasya cakrasya | yat "śūtkāracūrṇam" | tasya "malarāśim iva uditaṃ" budhyate | bhrāmyamāṇena cakreṇa hi saśūtkāraṃ bhūmeḥ rajaḥ uttiṣṭhati ||25|| MoT_2,17.
     śīrṇaparṇaṃ bhraṣṭanaṣṭaṃ grīṣme vanam ivārasam /
     maraṇavyagranṛttābhaṃ śilāstrīhāsyahāsadam // Mo_2,17.26 //
"śilāstrīhāsya"vat "hāsadam" ||26|| MoT_2,17.
     andhakāragṛhaikaikanṛttam unmattaceṣṭitam /
     praśāntājñānanīhāraṃ vijñānaśaradambaram // Mo_2,17.27 //
"andhakāragṛhe" yat "ekaikasya nṛttam" tadrūpaṃ budhyate | sarvathā cāsatyataram eva budhyate iti iha tāvad abhiprāyaḥ | itaḥ paraṃ cinmātramayaṃ cinmātrasthaṃ ca budhyata ity abhiprāyeṇāha | "praśānte"ti | śrotrā asminn utpattiprakaraṇe śrute sati idaṃ "praśāntājñānanīhāraṃ jñānaśaradambaraṃ" budhyate ||27|| MoT_2,17.
     samutkīrṇam iva stambhe citraṃ bhittāv ivāhitam /
     paṅkād ivābhiracitaṃ sacetanam acetanam // Mo_2,17.28 //
"stambhe" cinmātrākhye stambhe | "samutkīrṇam iva" budhyate | tathā "bhittau" cinmātrākhyāyāṃ bhittau | "citram ivāhitaṃ" kṛtaṃ budhyate | "paṅko" 'tra cinmātrasvarūpaṃ jñeyaṃ | "sacetanaṃ" cinmātrasāratvāt | "acetanaṃ" grāhyatvāt ||28|| MoT_2,17.
     tataḥ sthitiprakaraṇaṃ caturthaṃ parikalpitam /
     trīṇi granthasahasrāṇi svākhyānākhyāyikāmayam // Mo_2,17.29 //
śobhanākhyāḥ "ākhyānākhyāyikāḥ" | tan"mayam" ||29|| MoT_2,17.
nanu sthitiprakaraṇe kim uktam ity | atrāha
     itthaṃ jagad ahaṃbhāvarūpaṃ sthitim upāgatam /
     draṣṭṛdṛśyakramaprauḍham ity atra parivarṇitam // Mo_2,17.30 //
"ahaṃbhāvarūpasya" "jagataḥ" "sthitir" evātra prāyaśo nirṇīyate iti bhāvaḥ ||30|| MoT_2,17.
     daśadiṅmaṇḍalābhogabhāsuro 'yaṃ jagadbhramaḥ /
     ittham abhyāgato vṛddhim iti tatrocyate ciram // Mo_2,17.31 //
"ciram" bahukālam | bāhulyeneti yāvat ||31|| MoT_2,17.
     upaśāntiprakaraṇaṃ tataḥ pañcasahasrikam /
     pañcamaṃ pāvanaṃ proktaṃ munisantatisundaram // Mo_2,17.32 //
"munisantatibhiḥ" dṛṣṭāntatayā vakṣyamāṇābhiḥ munisantatibhiḥ | "sundaram" ramaṇīyam ||32|| MoT_2,17.
nanv atra kiṃ varṇyata ity apekṣāyām āha
     idaṃ jagad ahaṃ tvaṃ ca sa iti bhrāntir utthitā /
     ity asau śāmyatīty asmin kathyate ślokasaṅgrahe // Mo_2,17.33 //
"idaṃ jagat ahaṃ tvaṃ ca saḥ" | "iti" evaṃrūpā | "bhrāntiḥ utthitā" | iti satī eva | "śāmyati" | "iti" evam | "asmin" upaśāntiprakaraṇe "kathyate" | "asmin" kathaṃbhūte | "ślokānāṃ saṅgrahaḥ" yasmin saḥ | tādṛśe | "sa" iti paramakāraṇaparāmarśaḥ  ||33|| MoT_2,17.
nanv etacchravaṇena kiṃ setsyatīty | atrāha
     upaśāntiprakaraṇe śrute śāmyati saṃsṛtiḥ /
     praspaṣṭā vibhrameṇaiva kiṃcillabhyopalambhanā // Mo_2,17.34 //
"saṃsṛtiḥ" kathaṃbhūtā | "vibhrameṇaiva" viparyayajñānenaiva "praspaṣṭā" | punaḥ kathaṃbhūtā | "kiṃcit" leśena | "labhyam upalambhanaṃ" sparśaḥ yasyāḥ sā | anyathā nirvāṇaprakaraṇaṃ vyarthaṃ syāt iti bhāvaḥ ||34|| MoT_2,17.
nanu tataḥ saṃsṛtiḥ kīdṛśī tiṣṭhatīty apekṣāyām āha
     śatāṃśaśiṣṭā bhavati saṃśāntabhrāntirūpiṇī /
     anyasaṃkalpacittasthā nagaraśrīr ivāsatī // Mo_2,17.35 //
spaṣṭam ||35|| MoT_2,17.
     alabhyaiva svapārśvasthasvapnayuddhavirāvavat /
     śāntasaṃkalpamattābhrabhīṣaṇāśaniśabdavat // Mo_2,17.36 //
saṃkalpe dṛṣṭaṃ mattābhram "saṃkalpamattābhram" | "śāntaṃ" yat "saṃkalpamattābhram" | tasya yaḥ "bhīṣaṇaḥ aśaniśabdaḥ" | tad"vat" ||36|| MoT_2,17.
     vismṛtasvapnasaṃkalpanirmāṇanagaropamā /
     bhaviṣyannagarodyānasotsavaśyāmalāṅgikā // Mo_2,17.37 //
"vismṛtau" yau "svapnasaṃkalpau" | tayoḥ "nirmāṇaṃ" yasya | tādṛśaṃ yat "nagaraṃ" | ten"opamā" yasyāḥ sā | tathā "bhaviṣyannagarodyāne sotsavā" samadanā | yā "śyāmalā" śyāmākhyā strī | tadvat "aṅgaṃ" svarūpaṃ yasyāṃ sā | tādṛśī ||37|| MoT_2,17.
     naśyajjihvocyamānograkathārthānubhavopamam /
     anullikhitacittasthacitravyāpteva bhittibhūḥ // Mo_2,17.38 //
punaḥ kathaṃbhūtā | "naśyajjihvena" | na tu naṣṭajihvena | "ucyamānā" yā "ugrakathā" | tasyāḥ yaḥ "arthaḥ" | tasya yaḥ "anubhavaḥ" | ten"opamā" yatra tat | tādrśam | kā iva | "anullikhitāni" "cittasthāni" ca tāni citrakṛc"cittasthāni" ca yāni "citrāṇi" | taiḥ "vyāptā bhittibhūr iva" ||38|| MoT_2,17.
     parivismāryamāṇācchakalpanānagarīnibhā /
     sarvartumadanutpannavaramardāsphuṭākṛtiḥ // Mo_2,17.39 //
"parivismāryamāṇā" | na tu vismāritā | yā "acchā" bhittirahitā | "kalpanānagarī" | tasyāḥ "nibhā" sadṛśī | "sarvāsām ṛtumatīnām anutpannasya" "varasya mardaḥ" mardanam | tadvat "asphuṭā ākṛtiḥ" yasyāḥ sā | nikaṭavartitvena buddhāv ārūḍhatvajñāpanārtham ṛtumatīnām ity uktam ||39|| MoT_2,17.
     bhāvipuṣpavarākāravasantarasarañjanā /
     antarlīnataraṅgaughasaumyavārisaritsamā // Mo_2,17.40 //
"bhāvī puṣpā"khyo "varākāraḥ" yasya saḥ | tādṛśo yaḥ "vasantarasaḥ" | tadvat "rañjanā" yasyāḥ sā | tatsadṛśīty arthaḥ | "antarlīnaḥ taraṅgaughaḥ" yasyāḥ sā "antarlīnataraṅgaughā" | tādṛśī cāsau "saumyavārisarit" saumyavāriyuktā nadī | tayā "samā" sadṛśī | etair viśeṣaṇaiś copaśāntiprakaraṇaśravaṇānantaraṃ buddhyārohamātrasvarūpā sṛṣṭis tiṣṭhatīti sūcitam ||40|| MoT_2,17.
     nirvāṇākhyaṃ prakaraṇaṃ tataḥ ṣaṣṭham udāhṛtam /
     śiṣṭo granthaḥ parīmāṇaṃ tasya jñeyaṃ mahārthadam // Mo_2,17.41 //
"tataḥ" upaśāntiprakaraṇānantaraṃ | "śiṣṭaḥ granthaḥ" sārdhaṣoḍaśasahasrāṇi "parīmāṇam" ||41|| MoT_2,17.
nanu kiṃ tacchravaṇena setsyatīty | atrāha
     buddhe tasmin bhavec chrotā nirvāṇaḥ śāntakalpanaḥ /
     acetyacitprakāśātmā vijñānātmā nirāmayaḥ // Mo_2,17.42 //
"nirvāṇaḥ" brahmaṇi līnaḥ | "vijñānātmā" śuddhajñānasvarūpaḥ | "nirāmayaḥ" dṛśyākhyāmayarahitaḥ ||42|| MoT_2,17.
     paramākāśakośācchaḥ śāntasarvabhavabhramaḥ /
     nirvāhitajagadyātraḥ kṛtakartavyasusthitaḥ // Mo_2,17.43 //
"nirvāhitā" avasānaṃ nītā "jagadyātrā" yena saḥ | tādṛśaḥ | "kṛtaṃ" samāptaṃ | kartavyaṃ yena "kṛtakartavyaḥ" | tādṛśaś cāsāv | ata eva "susthitaś" ca ||43|| MoT_2,17.
     samastavitatārambhavajrastambho nabhonibhaḥ /
     vinigīrṇayathāsaṃsthajagajjālātitṛptimān // Mo_2,17.44 //
"samastāḥ" ye "vitatārambhāḥ" | teṣu "vajrastambhaḥ" avicala ity arthaḥ | "nabhonibhaḥ" śarīrayātrārthaṃ kṛtair api karmabhir aliptatvāt ākāśasadṛśaḥ | "vinigīrṇaṃ" citsvarūpe svātmani līnīkṛtaṃ | yat "jagajjālaṃ" | ten"ātitṛptimān" nirapekṣa ity arthaḥ ||44|| MoT_2,17.
     ākāśībhūtaniḥśeṣarūpālokamanaskṛtiḥ /
     kāryakāraṇakartṛtvaheyādeyadaśojjhitaḥ // Mo_2,17.45 //
"rūpam" viṣayaḥ | "ālokaḥ" tadgrahaṇopāyaḥ | "manaskṛtiḥ" manaskāraḥ | ālokena gṛhītasya rūpasya manasi anusandhānam iti yāvat ||45|| MoT_2,17.
     sadeha eva nirdehaḥ sasaṃsāro 'py asaṃsṛtiḥ /
     cinmayo //hanapāṣāṇajaṭharajaṭharopamaḥ // Mo_2,17.46 ||
"sadehaḥ" sattvaśeṣaṃ tāvat śarīrasya sthitatvāt | "nirdehaḥ" śarīre 'bhimānābhāvāt | "cinmayaḥ" citsvarūpa aham iti niścayāt | "ghanapāṣāṇasya" yat "jaṭharam" | tasya yat "jaṭharam" | ten"opamā" yasya saḥ | tādṛśaḥ acetyacinmayatvāt || MoT_2,17.46 ||



     cidādityas tapaṃl loke 'py andhakārodaropamaḥ /
     paraprakāśarūpo 'pi param āndhyam ivāgataḥ // Mo_2,17.47 //
"cidādityaḥ" cidādityasvarūpaḥ | ata eva "loke tapann api" | na hi citsparśarahitaḥ kaścit bhāvaḥ saṃbhavati | sattve 'pi tasya asaṃkalpatvaprasaṅgāt | "andhakārodaropamaḥ" andhakārasya yat udaraṃ | tenopamā yasya | tādṛśaḥ padārthavibhāgarahitatvāt | na hi andhakārodare padārthavibhāgaḥ bhavati | "paraprakāśarūpo 'pi" uttīrṇacitprakāśarūpo 'pi | "param āndhyam" "āgataḥ iva" na kiṃciddraṣṭṛtvāt || MoT_2,17.47 ||



     ruddhasaṃsṛtidurlīlaḥ prakṣīṇāśāviṣūcikāḥ /
     naṣṭāhaṃkāravetālo dehavān akalevaraḥ // Mo_2,17.48 //
spaṣṭam || MoT_2,17.48 ||


     kasmiṃścid romakoṭyagre tasyeyam avatiṣṭhate /
     jagallakṣmīr mahāmeroḥ puṣpe kvacid ivālinī // Mo_2,17.49 //
"kaśmiṃscit" atisūkṣmatayā vaktum aśakye "svapnavad" iti śeṣaḥ | svapne hi puruṣasya kasmiṃścid aṃśe svapnajagad "avatiṣṭhate" || MoT_2,17.49 ||


     paramāṇau paramāṇau cidākāśasya koṭare /
     jagallakṣmīsahasrāṇi dhatte kṛtvā ca paśyati // Mo_2,17.50 //
"cidākāśasya" svarūpabhūtasya cinmātrākāśasya | "koṭare" madhye sthite | "paramāṇau paramāṇau jagallakṣmīsahasrāṇi kṛtvā dhatte" dhārayati | na kevalaṃ dhatte | kiṃ tu sākṣitayā sthitatvāt "paśyati ca" || MoT_2,17.50 ||


nanu katham asau jagallakṣmīsahasrāṇy antarvartayatīty | atra sargāntaślokenāha
          pravitatā hṛdayasya mahāmate
          hariharābjajalakṣaśatair api /
          tulanam eti na muktimato bata
          pravitatāsti na nūnam avastunaḥ // Mo_2,17.51 //
"bata" niścaye | he "mahāmate" | "muktimataḥ" nirvāṇaprakaraṇaśravaṇadvāreṇa muktiyuktasya puruṣasya | "hṛdayasya pravitataḥ" bhāvapradhāno nirdeśaḥ | tena "hṛdayasya pravitate"ti arthaḥ | sā "hariharābjajalakṣaśatair api tulanaṃ" māpanaviṣayatāṃ "na eti" | yataḥ "avastunaḥ" avastubhūtasya hariharābjādirūpasya bhāvavṛndasya "pravitatā" | "nūnaṃ" niścaye | "nāsti" | na cāvastunā vastumāpanaṃ yuktaṃ | tathā ca noktadeśaprasaṅga iti bhāvaḥ | iti śivam || MoT_2,17.51 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe saptadaśaḥ sargaḥ || 2,17 ||


************************************************************************

oṃ śrotṛpravṛttyarthaṃ svena kriyamāṇasya granthasyānyavilakṣaṇatvena samyagjñānaṃ prati paropāyatvaṃ kathayati
     asyāṃ vācitamātrāyāṃ paro bodhaḥ pravartate /
     bījād iva yato vyuptād avaśyaṃbhāvi satphalam // Mo_2,18.1 //
"asyāṃ" mokṣopāyābhidhāyāṃ saṃhitāyāṃ | "bodhaḥ" kaḥ | "yataḥ" yasmāt bodhāt | "satphalaṃ" mokṣākhyaṃ śubhaṃ phalam | "avaśyaṃbhāvi" bhavati | kasmād iva | "vyuptād bījād iva" || MoT_2,18.1 ||


nanu mahāmunipraṇītāni śāstrāntarāṇi tyaktvā kim iti idam eva śāstraṃ gṛhṇāmīty | atrāha
     api pauruṣam ādeyaṃ śāstraṃ ced yuktibodhakam /
     anyat tv ārṣam api tyājyaṃ bhāvyaṃ nyāyaikasevinā // Mo_2,18.2 //
"pauruṣam" puruṣanirmitam | "ādeyaṃ" grahītavyaṃ | "yuktibodhakam" sattarkabodhakam | "anyat" yuktyabodhakam | "ārṣam" ṛṣinirmitam | atra ca pratibhānvitaiḥ kaścid abhiprāyo boddhavyaḥ yo 'smābhiḥ ārambha eva pratibhāvatāṃ svayaṃ jñeyatvena tadrahitānām akathanīyatvena coktaḥ || MoT_2,18.2 ||



     yuktiyuktam upādeyaṃ vacanaṃ bālakād api /
     anyat tṛṇam iva tyājyam apy uktaṃ padmajanmanā // Mo_2,18.3 //
atrāpi pratibhāvadbhiḥ ārambhe svayaṃ jñeyatvenokto 'rthaḥ svayaṃ boddhavyaḥ | na ca tadbodhenāsmiñ śāstre anādaraḥ kāryaḥ pratibhāvattvahāneḥ | evam uttaratrāpi yatra tatra svayam abhyūhyam || MoT_2,18.3 ||


punar apy etad eva bhaṅgyantareṇa kathayati
     yo 'mbhas tātasya kūpo 'yam iti kaupaṃ pibet kaṭu /
     tyaktvā gāṅgaṃ puraḥsthaṃ taṃ ko 'nuśāsati rāgiṇam // Mo_2,18.4 //
"yaḥ" puruṣaḥ | "puraḥsthaṃ gāṅgaṃ" toyaṃ "tyaktvā" | "ayaṃ kūpaḥ tātasya" nijasya pituḥ bhavati | "iti" etadarthaṃ | "kaupaṃ" kūpasambandhi | "kaṭu ambhaḥ pibet" | "tam" anu"rāgiṇaṃ" pitṛviṣayarāgākhyadoṣayuktaṃ | "kaḥ anuśāsati" upadiśati | nāsāv upadeśārhaḥ iti bhāvaḥ | ayam atrābhiprāyaḥ | "yaḥ" puruṣaḥ | sadyuktiyuktam "api pauruṣaṃ" vacanaṃ | "pauruṣeyam idam" iti tyajati | tadrahitam api "ārṣaṃ" vacanaṃ | "ārṣam" ity etāvanmātreṇa gṛhṇāti | tasyopadeśo na kāryaḥ iti || MoT_2,18.4 ||



prakṛtam evānusarati
     yathoṣasi pravṛttāyām āloko 'vaśyam eṣyati /
     asyāṃ vācitamātrāyāṃ svavivekas tathaiṣyati // Mo_2,18.5 //
"uṣasī"ty ārṣaṃ strītvam | "svavivekaḥ" ātmavivekaḥ || MoT_2,18.5 ||


     śrutāyāṃ prājñavadanād buddhāyāṃ svayam eva vā /
     śanaiḥ śanair vicāreṇa buddhau saṃskāra āgate // Mo_2,18.6 //
     pūrvaṃ tāvad udety antar bhṛśaṃ saṃskṛtavākyatā /
     śuddhā muktā latevoccair yā sabhāsthānabhūṣaṇam // Mo_2,18.7 //
spaṣṭam || MoT_2,18.6-7 ||


nanu viraktasya mama kiṃ saṃskṛtavākyatayā prayojanam ity | atrāha
     parā virāgatodeti mahattvaguṇaśālinī /
     sā yayā sneham āyānti rājāno 'jagarā api // Mo_2,18.8 //
virakteṣu hi "ajagara"tulyāḥ "rājāno 'pi sneham āyānti" || MoT_2,18.8 ||


     pūrvāparajñaḥ sarvatra naro bhavati buddhimān /
     padārthānāṃ yathā dīpahasto niśi sulocanaḥ // Mo_2,18.9 //
"sarvatra" sarveṣu vyavahāreṣu || MoT_2,18.9 ||


     lobhamohādayo doṣās tānavaṃ yānty alaṃ śanaiḥ /
     dhiyo diśaḥ samāsannaśarado mihikā yathā // Mo_2,18.10 //
"lobhamohādayaḥ" kāḥ | "yathā mihikāḥ" "samāsannaśaradaḥ" pratyāsannaśaratkālāyāḥ "diśaḥ tānavaṃ yānti" | tathety arthaḥ || MoT_2,18.10 ||



     kevalaṃ samapekṣante vivekābhyasanaṃ dhiyaḥ /
     na kācana phalaṃ dhatte svabhyāsena vinā kriyā // Mo_2,18.11 //
nanu kimarthaṃ "vivekābhyāsam apekṣante" ity | atrāha | "na kācane"ti || MoT_2,18.11 ||


     manaḥ prasādam āyāti śaradīva mahat saraḥ /
     paraṃ sāmyam upādhatte nirmandara ivārṇavaḥ // Mo_2,18.12 //
"prasādaṃ" rāgādimalarahitatvāt nairmalyam | "param" niratiśayam | "sāmyaṃ" samatākhyaṃ guṇam | "upādhatte" dhārayati | atrāpi manasa eva kartṛtvam || MoT_2,18.12 ||


     nirastakālimā vajraśikhevāstatamaḥpaṭā /
     parijvalaty alaṃ prajñā padārthapravibhāginī // Mo_2,18.13 //
"nirastaḥ" dūre gataḥ | "kālimā" kāluṣaṃ | yasyāḥ sā || MoT_2,18.13 ||


     dainyadāridryadoṣādyā dṛṣṭayo darśitāntarāḥ /
     na nikṛntanti marmāṇi sasaṃnāham iveṣavaḥ // Mo_2,18.14 //
"darśitaṃ" vivecitaṃ | antaram sārākhyaḥ "āntaraḥ" bhāgaḥ yāsāṃ tāḥ | niḥsāratvena jñātā ity arthaḥ || MoT_2,18.14 ||


     hṛdayaṃ nāvalumpanti bhīmāḥ saṃsṛtibhītayaḥ /
     puraḥsthitam api prājñaṃ mahopalam ivākhavaḥ // Mo_2,18.15 //
"hṛdayaṃ" kathaṃbhūtam "api" | "puraḥsthitam api" agre sthitam api | punaḥ kathaṃbhūtam | "prājñam" || MoT_2,18.15 ||


     kathaṃ syād āditā janmakarmaṇor daivapuṃstvayoḥ /
     ityādisaṃśayagaṇaḥ śāmyaty ahni yathā tamaḥ // Mo_2,18.16 //
"daivapuṃstvayoḥ" daivapauruṣayoḥ | "āditā" kāraṇatvam || MoT_2,18.16 ||


     sarvathā sarvabhāveṣu saṃgatir upaśāmyati /
     yāminyām iva yātāyāṃ prajñāloka upāgate // Mo_2,18.17 //
"sarvabhāveṣu" tyāgādānārheṣu samasteṣu padārtheṣu | "sarvathā saṃgatiḥ" tyāgādānārūpā sambandhaḥ "upaśāmyati" | kasmin sati | "pra"ti"jñāloka upāgate" sati | kadeva | "yāminyāṃ" rātrau "yātāyām iva" satyām | upekṣā eva sarvatrāyātīti bhāvaḥ || MoT_2,18.17 ||


     samudrasyeva gāmbhīryaṃ sthairyaṃ meror iva sthitam /
     antaḥśītalatā cendor ivodeti vicāriṇaḥ // Mo_2,18.18 //
spaṣṭam || MoT_2,18.18 ||


     sā jīvanmuktatā tasya śanaiḥ pariṇatiṃ gatā /
     śāntāśeṣavikalpasya bhavaty āviśya yoginaḥ // Mo_2,18.19 //
"sā" prasiddhā | "āviśya" āveśaṃ kṛtvā || MoT_2,18.19 ||



     sarvārthaśītalā śuddhā paramālokadā sudhīḥ /
     paraṃ prakāśam āyāti jyotsneva sakalaindavī // Mo_2,18.20 //
"sarvārtheṣu" bhāvābhāvayukteṣu samasteṣu pad"ārtheṣu" | "śītalā" harṣāmarṣākhyatāparahitā | "śuddhā" rāgādirahitā | "paramālokaṃ" cinmātrālokaṃ "dadhātī"ti tādṛśī | śobhanā cāsau dhīḥ "sudhīḥ" | "aindavī" indusambandhinī || MoT_2,18.20 ||


     hṛdyākāśe vivekārke śamālokini nirmale |
     anarthasārthakartāro nodyanti kaliketavaḥ || MoT_2,18.21 ||


"śama" eva "ālokaḥ" asyāstīti tādṛśe | "kaleḥ" kalahasya kṣobhasya | "ketavaḥ" cihnabhūtāḥ rāgādayo doṣāḥ | sūryodaye ca "ketavaḥ" dhūmaketavaḥ "nodyanti" || MoT_2,18.21 ||


     śāmyanti śuddhim āyānti saumyās tiṣṭhanti sūnnate /
     acañcalajaḍās tṛṣṇāḥ śaradīvābhramālikāḥ // Mo_2,18.22 //
na cañcalajaḍāḥ "acañcalajaḍāḥ" || MoT_2,18.22 ||


     yatkiṃcanakarī krūrā grāmyatā vinivartate /
     dīnānanā piśācānāṃ līleva divasāgame // Mo_2,18.23 //
"yatkiṃcanakarī" ayuktakāriṇī | "grāmyatayā" hi puruṣaḥ yatkiṃcid eva karoti || MoT_2,18.23 ||



     dharmabhittau bhṛśaṃ lagnāṃ dhiyaṃ dhairyadhuraṃ gatām /
     ādhayo na vilumpanti vātāś citralatām iva // Mo_2,18.24 //
"dharma" eva "bhittiḥ" | tasyāṃ "lagnāṃ" | ata eva "dhairyadhuraṃ gatām" dhairyayuktām iti yāvat | dharmayukto hi dhīro bhavati | citrarūpā latā "citralatā" | tām || MoT_2,18.24 ||



     na pataty avaṭe jantur viṣayāsaṅgarūpiṇi /
     kaḥ kila jñātasaraṇiḥ śvabhre samanudhāvati // Mo_2,18.25 //
"viṣayāsaṅgarūpiṇi" bhogāsaktirūpe | etad eva uttarārdhena samarthayati | "kaḥ kile"ti || MoT_2,18.25 ||



     sacchāstrasādhuvṛttānām avirodhini karmaṇi /
     ramate dhīr yathāprāpte sādhvīvāntaḥpurājire // Mo_2,18.26 //
"sacchāstreṇa" mokṣopāyākhyasacchāstrāvagāhanena "sādhuvṛttaṃ" caritaṃ yeṣāṃ te | tādṛśānāṃ | "yathāprāpte" pravāhāgate | na tu yatnād ṛte || MoT_2,18.26 ||


     jagatāṃ koṭilakṣyeṣu yāvantaḥ paramāṇavaḥ /
     teṣām ekaikaśo 'ntaḥsthān sargān paśyaty asargadhīḥ // Mo_2,18.27 //
"asargā dhīḥ" yasya saḥ | āścaryaṃ cāsargadhiyaḥ paramāṇau paramāṇau sargadarśanam | sargabījabhūtacinmātravyāptijñānena paramāṇau paramāṇau sargadarśanaṃ jñeyam || MoT_2,18.27 ||


     mokṣopāyāvabodhena śuddhāntaḥkaraṇaṃ janam /
     na khedayati bhogaugho na cānandayati kvacit // Mo_2,18.28 //
bhogeṣūpekṣām evāsau bhajate iti bhāvaḥ || MoT_2,18.28 ||

     paramāṇau paramāṇau sargavargā nirargalam /
     ye patanty utpatanty ambuvīcivat tān sa paśyati // Mo_2,18.29 //
"patanti" līnā bhavanti | "utpatanti" prādurbhavanti || MoT_2,18.29 ||

     na dveṣṭi saṃpravṛttāni na nivṛttāni kāṅkṣati /
     kāryāṇy eṣa prabuddho 'pi niṣprabuddha iva drumaḥ // Mo_2,18.30 //
abuddhatvam asya svātmani "niṣprabuddhatvaṃ" saṃsāre jñeyam || MoT_2,18.30 ||


nanu kīdṛg atiśayo 'sya syād ity | atrāha
     dṛśyate lokasāmānyo yathāprāptānuvṛttimān /
     iṣṭāniṣṭaphalaprāptau hṛdaye na parājitaḥ // Mo_2,18.31 //
"lokasāmānyaḥ" na tv atiśayavān | "yathāprāpte" pravāhāgate | "anuvṛttiḥ" anuvartanaṃ | vidyate yasya | saḥ "yathāprāptānuvṛttimān" | "hṛdaye" manasi | "na parājitaḥ" harṣāmarṣāvaśībhūtaḥ || MoT_2,18.31 ||



     buddhvedam akhilaṃ śāstraṃ vācayitvā vivecya vā /
     anubhūyata evaitan na tūktaṃ varaśāpavat // Mo_2,18.32 //
yuṣmābhiḥ "etat" pūrvoktaṃ phalaṃ "anubhūyata eva" | nanu pratyavāyaśaṅkayā katham etadanubhave śaktā bhavāma ity apekṣāyām āha | "na tūktam" iti | "mantrādivad" iti śeṣaḥ || MoT_2,18.32 ||


nanu durbodhe 'smin kathaṃ pravṛttiṃ kurma ity | atrāha
     śāstraṃ subodham evedaṃ nānālaṃkārabhūṣitam /
     kāvyaṃ rasaghanaṃ cāru dṛṣṭāntaiḥ pratipādakam // Mo_2,18.33 //
"dṛṣṭāntaiḥ pratipādakam" iti subodhatve viśeṣaṇadvāreṇa hetuḥ || MoT_2,18.33 ||


     budhyate svayam evedaṃ kiṃcitpadapadārthavit /
     svayaṃ yas tu na vettīdaṃ śrotavyaṃ tena paṇḍitāt // Mo_2,18.34 //
"budhyate" jānāti | nanu yasya padapadārthavittvaṃ nāsti tasya kiṃ kāryam ity | atrāha "svayam" iti || MoT_2,18.34 ||



nanv etacchravaṇena kiṃ setsyatīty | atrāha
     asmiñ śrute mate jñāte tapodhyānajapādikam /
     mokṣaprāptau tu tasyeha na kiṃcid upayujyate // Mo_2,18.35 //
"śrute" śravaṇaviṣayatāṃ nīte | "mate" mananaviṣayatāṃ nīte | "jñāte" nidadhyāsite | "tasya" śravaṇādau pravṛttasya || MoT_2,18.35 ||


     etacchāstraghanābhyāsāt paunaḥpunyena vīkṣitāt /
     jantoḥ pāṇḍityapūrvaṃ hi cittasaṃskārapūrvakam // Mo_2,18.36 //
     ahaṃ jagad iti prauḍho draṣṭṛdṛśyapiśācakaḥ /
     piśāco 'rkodayeneva svayaṃ śāmyaty avighnataḥ // Mo_2,18.37 //
etena bāhyam api prayojanam āntaram api ca setsyatīti kathitam || MoT_2,18.36-37 ||



     bhramo jagad ahaṃ ceti sthita evopaśāmyati /
     svapnamohaḥ parijñāta iva no ramayaty alam // Mo_2,18.38 //
"sthita eva" | na tu mantrādiprayogavaśenāntarbhūtiṃ gataḥ | nanu sthitasyopaśamanaṃ katham ity | atrāha | "svapnamoha" iti | arasakasya sthitasyāpi śāntir eva jñeyā kṣobhakāritvābhāvāt iti bhāvaḥ || MoT_2,18.38 ||


     yathā saṃkalpanagare puṃso harṣaviṣāditā /
     na bādhate tathaivāntaḥ parijñāte jagadbhrame // Mo_2,18.39 //
"antaḥ" manasi | "parijñāte" samyak niścite | "harṣaviṣāditā na bādhate" iti "tathā"śabdenānukṛṣyate || MoT_2,18.39 ||


     citrasarpaḥ parijñāto na sarpabhayado yathā /
     dṛśyasarpaḥ parijñātas tathā na sukhaduḥkhadaḥ // Mo_2,18.40 //
"parijñātaḥ citrasarpo" 'yam iti samyaṅ niścitaḥ | dṛśyākhyaḥ sarpaḥ "dṛśyasarpaḥ" || MoT_2,18.40 ||


     parijñānena sarpatvaṃ citrasarpasya naśyati /
     yathā tathaiva saṃsāraḥ sthita evopaśāmyati // Mo_2,18.41 //
spaṣṭam || MoT_2,18.41 ||


nanu paramārthaprāptir asmākam atiduṣkaraiva | tathā ca tatprāptyartham etacchāstrāvagāhanam ayuktam evety | atrāha
     sumanaḥpallavāmarśe kiṃcidvyatikaro bhavet /
     paramārthapadaprāptau na tu vyatikaro 'sti naḥ // Mo_2,18.42 //
"sumanaḥpallavāmarśe" puṣpapallavāmarde | "vyatikaraḥ" yatnaḥ | "naḥ" yuktijñānām asmākam | na tv ayuktijñānāṃ bhavatām ity arthaḥ || MoT_2,18.42 ||



vyatikarābhāvam eva kathayati
     gacchaty avayavaspandaḥ sumanaḥpatramardane /
     iha dhīmātrabodhas tu nāṅgāvayavabodhanam // Mo_2,18.43 //
"gacchati" upayukto bhavati | anekārthatvād dhātūnāṃ "gacchatir" atrāsminn arthe vartate | "aṅgāvayavānāṃ" śarīrāvayavānām | "bodhanam" cālanam || MoT_2,18.43 ||


     sukhāsanopaviṣṭena yathāsambhavam aśnatā /
     bhogajālaṃ sadācāraviruddheṣu na tiṣṭhatā // Mo_2,18.44 //
     yathākṣaṇaṃ yathādeśaṃ pravicārayatā sukham /
     yathāsambhavasatsaṅgam idaṃ śāstram athetarat // Mo_2,18.45 //
     āsādyate mahājñānabodhaḥ saṃsāraśāntidaḥ /
     sa bhūyo yena nāyāti yoniyantraprapīḍanam // Mo_2,18.46 //
"yathāsambhavam" na tu prayatnasādhitam | "sadācāraviruddheṣu" tiṣṭhato hi hānopādānakāritvarūpo doṣaḥ āyātīti "na tiṣṭhate"ty uktam | "yathākṣaṇam" pratikṣaṇam | "sukham" sukhadāyi | "yathāsambhavaḥ satsaṅgo" yatra tat | "idaṃ śāstraṃ" mayā vakṣyamāṇamokṣopāyākhyam śāstraṃ | "itarat" etatsadṛśam anyacchāstraṃ vā | mahājñānarūpaḥ bodhaḥ "mahājñānabodhaḥ" | "sa" ity asya pūrvārdhena sambandhaḥ || MoT_2,18.44-46 ||



     etāvaty eva ye bhūtā bhogān prāpya rase sthitāḥ /
     svamātṛviṣṭhākrimayaḥ kīrtanīyā na te 'dhamāḥ // Mo_2,18.47 //
"etāvati rase" parimite rase | "bhūtāḥ" sāmānyajantavaḥ || MoT_2,18.47 ||


evaṃ śāstramāhātmyam uktvā śrīrāmaṃ saṃmukhīkaroti
     śṛṇu tāvad idānīṃ tvaṃ kathyamānam idaṃ mayā /
     rāghava jñānavistāraṃ buddhisāratarāntaram // Mo_2,18.48 //
"buddheḥ sārataram antaram" yasya tat | buddhyatiśāyīty arthaḥ || MoT_2,18.48 ||



madhye śrīrāmakṛtāṃś codyān āśaṅkyāha
     yayedaṃ śrūyate śāstraṃ tāṃ tu vistarataḥ śṛṇu /
     vicāryate tathārtho 'yaṃ yayā ca paribhāṣayā // Mo_2,18.49 //
"yayā paribhāṣayā" yuktyā | "idaṃ śāstraṃ śrūyate" | tvaṃ "tāṃ vistarataḥ śṛṇu" | "tathā" "yayā ca vicāryate" | tāṃ ca śṛṇv iti pūrveṇa sambandhaḥ || MoT_2,18.49 ||


paribhāṣām eva kathayati
     yenehānanubhūte 'rthe dṛṣṭenārthāvabodhanam /
     bodhopakāraphaladaṃ taṃ dṛṣṭāntaṃ vidur budhāḥ // Mo_2,18.50 //
"yena dṛṣṭenā"rthena | "ananubhūte arthe arthāvabodhanam" jñānam bhavati | "budhāḥ tam dṛṣṭāntam āhuḥ" | kathaṃbhūtaṃ | "bodhā"khyaḥ ya "upakāraḥ" | tad eva "phalaṃ" | tad "dadhātī"ti tādṛśam || MoT_2,18.50 ||



dṛṣṭāntadāne kiṃ phalam ity | atrāha
     dṛṣṭāntena vinā rāma nāpūrvo 'rtho 'vabudhyate /
     yathā dīpaṃ vinā rātrau bhāṇḍopakaraṇaṃ gṛhe // Mo_2,18.51 //
"bhāṇḍopakaraṇaṃ" bhāṇḍasāmagrī || MoT_2,18.51 ||


     yair yaiḥ kākutstha dṛṣṭāntais tvaṃ mayehāvabudhyase /
     sarve sakāraṇās te hi prāpyaṃ tu sad akāraṇam // Mo_2,18.52 //
"prāpyam" prāpaṇīyaṃ | "sat" sanmātrākhyaṃ vastu || MoT_2,18.52 ||



nanu sarvāṇi dārṣṭāntikāni etādṛśāni eva santy utānyāny athety apekṣāyām āha
     upamānopameyānāṃ kāryakāraṇatoditā /
     varjayitvā paraṃ brahma sarveṣām eva vidyate // Mo_2,18.53 //
dṛṣṭāntadārṣṭāntikānām "paraṃ brahma varjayitvā" | "uditā" udayanaśīlā | "kāryakāraṇatā vidyate" | brahma na kāryam asti nāpi kāraṇam ity arthaḥ | ato na brahmasadṛśāni sarvāṇi dārṣṭāntikāni iti bhāvaḥ || MoT_2,18.53 ||



phalitaṃ kathayati
     brahmopadeśadṛṣṭānto yasya veha hi kathyate /
     ekadeśasadharmatvaṃ tatrātaḥ parigṛhyate // Mo_2,18.54 //
"hi" niścaye | "ataḥ" kāraṇāt | "iha" loke | "yasya vā brahmopadeśadṛṣṭāntaḥ kathyate tatra" brahmadṛṣṭānte | "ekadeśasadharmatvaṃ" ekadeśasadṛśatvaṃ | "parigṛhyate" | na tu sarvathā sadṛśatvam dārṣṭāntikasya brahmaṇaḥ kāryakāraṇatvāyogyāt | dṛṣṭāntasya tu kāryatayā kāraṇatayā ca sthitatvād iti bhāvaḥ || MoT_2,18.54 ||



     yo yo nāmeha dṛṣṭānto brahmatattvāvabodhane /
     dīyate sa sa boddhavyaḥ svapnadṛṣṭajagadgataḥ // Mo_2,18.55 //
"svapnadṛṣṭajagadgataḥ" bhramarūpaḥ ity arthaḥ || MoT_2,18.55 ||



phalitam āha
     evaṃ sati nirākāre brahmaṇy ākāravān katham /
     dṛṣṭānta iti nodyanti mūrkhavaikalpikoktayaḥ // Mo_2,18.56 //
"nodyanti" nottiṣṭhanti | asmābhir ata eva pratyuktatvād iti bhāvaḥ || MoT_2,18.56 ||



     anyā siddhaviruddhādidṛk dṛṣṭāntapradūṣaṇe /
     svapnopamatvāj jagataḥ samudeti na kācana // Mo_2,18.57 //
"anyā" pūrvoktāyāḥ dṛṣṭeḥ sakāśāt itarā kā | "na kā"pi | "siddhaviruddhādidṛk" idaṃ siddhaṃ idaṃ viruddham ityādirūpā uktiḥ | "jagataḥ svapnopamatvāt dṛṣṭāntapradūṣaṇe" dṛṣṭāntapradūṣaṇārtham "na samudeti" | "ādi"śabdenedaṃ leśena siddhaṃ viruddhaṃ veti dṛṣṭer grahaṇam | svapnopame jagati idaṃ siddhaṃ idam viruddham iti | kathanaṃ na yuktaṃ sarvasyāyuktatvād iti bhāvaḥ || MoT_2,18.57 ||



     avastu pūrvāparayor vartamānavicāritaṃ /
     yathā jāgrat tathā svapnaḥ siddham ābālam akṣatam // Mo_2,18.58 //
"pūrvāparayoḥ" bhūtabhaviṣyator arthayoḥ | "avastu" bhāvapradhāno nirdeśaḥ | "avastutvam" asattvam "vartamānavicāritaṃ" bhavati | vartamāne hi bhūtasya gatatvāt bhaviṣyataḥ anāgatatvāt asattvaṃ vicārapadavīm āyāti | tadabhinnasya vartamānasyāpi avastutvam aparihāryam eveti svayam eva jñeyam | ataḥ "ābālam" bālaparyantaṃ | "yathā svapnaḥ tathā jāgrad" iti | "akṣataṃ" samyak | "siddham" bhavati || MoT_2,18.58 ||



     svapnasaṃkalpanadhyānavaraśāpauṣadhādibhiḥ /
     ye 'rthās ta iha dṛṣṭāntās tadrūpatvāj jagatsthiteḥ // Mo_2,18.59 //
"ye 'rthā" ity | atra "dṛṣṭā" iti śeṣaḥ | "tadrūpatvāt" svapnādyartharūpatvāt | ata "ihā"satyaiḥ padārthaiḥ satyasya brahmaṇaḥ upamānopameyabhāvaḥ ekadeśasādharmyeṇeti bhāvaḥ || MoT_2,18.59 ||



nanu tvayā kṛteṣv anyeṣu grantheṣu kā vārtety | atrāha
     mokṣopāyakṛtā granthakāreṇānye 'pi ye kṛtāḥ /
     granthās teṣv iyam evaikā vyavasthā bodhyabodhane // Mo_2,18.60 //
"mokṣopāyakṛtā granthakāreṇa" mayety arthaḥ | "bodhyasya" bodhanīyasya brahmatattvasya | "bodhane" kathane | "vyavasthā" rītiḥ || MoT_2,18.60 ||



nanu kathaṃ svapnasadṛśatvaṃ jagato 'stīty | atrāha
     svapnābhatvaṃ ca jagataḥ śrute śāstre 'vabhotsyate /
     śīghraṃ na pāryate vaktuṃ vāk kila kramavartinī // Mo_2,18.61 //
"avabhotsyate" jñātuṃ śakyate | tarhi yugapad eva sarvaṃ śāstraṃ kathayety | atrāha | "śīghram" iti | "vācaḥ kramavartitvaṃ" sphuṭam eva | "na" hi ekaṃ vākyam anirvāhya dvitīyādikaṃ vākyaṃ "vaktuṃ" śakyate || MoT_2,18.61 ||



     svapnasaṃkalpasudhyānanagarādyupamaṃ jagat /
     yatas ta eva dṛṣṭāntās tasmād bhāntīha netare // Mo_2,18.62 //
"yataḥ jagat" | "svapnasaṃkalpasudhyāneṣu" dṛṣṭāḥ ye "nagarādayaḥ" | teṣāṃ "upamā" yasya | tādṛśaṃ bhavati | "tasmāt ta eva sudhyānanagarādaya" eva "dṛṣṭāntāḥ bhānti" asmākaṃ buddhau sphuranti | "itare" satyabhūtāḥ nagarādayaḥ | "na" bhānti ayuktatvāt || MoT_2,18.62 ||



     akāraṇaṃ kāraṇinā yad bodhāyopamīyate /
     na tatra sarvasādharmyaṃ sambhavaty upamābhramaiḥ // Mo_2,18.63 //
"akāraṇaṃ" kāraṇarahitaṃ brahma | "kāraṇinā" kāraṇayuktenākāśādinā | "upamābhramaiḥ" anyopamādṛṣṭasarvathāsādharmyarūpaiḥ viparyayaiḥ || MoT_2,18.63 ||


     upameyasyopamānād ekāṃśena sadharmatā /
     aṅgīkāryāvabodhāya dhīmatā nirvivādinā // Mo_2,18.64 //
"dhīmatā" na tv adhīmatā | sa hi ārambha eva vivādapara eva tiṣṭhatīti bhāvaḥ || MoT_2,18.64 ||


nanv ekena dharmeṇa sadṛśena upamānaṃ katham upameyasya pratītiṃ kartuṃ śaknotīty | atra dṛṣṭāntaṃ sādhayati
     arthāvalokane dīpād ābhāmātrād ṛte kila /
     na sthālatailavartyādi kiṃcid apy upajāyate // Mo_2,18.65 //
"ābhāmātrāt" prakāśamātrarūpāt | "sthālam" pātram || MoT_2,18.65 ||



etad eva dārṣṭāntikayuktaṃ kathayati
     ekadeśasadharmatvād upameyāvabodhanam /
     upamānaṃ karoty aṅga dīpo 'rthaṃ prabhayā yathā // Mo_2,18.66 //
"prabhayā" prabhākhyenaikadeśena || MoT_2,18.66 ||


     dṛṣṭāntasyāṃśamātreṇa bodhyabodhodaye sati /
     upādeyatayā grāhyo mahāvākyārthaniścayaḥ // Mo_2,18.67 //
na tu dṛṣṭāntamātra eva sthātavyam iti bhāvaḥ || MoT_2,18.67 ||


     na kutārkikatām etya nāśanīyā prabuddhatā /
     anubhūtyapalāpāttair apavitrair vikalpitaiḥ // Mo_2,18.68 //
"prabuddhatā" jñānitā | "kutārkikāḥ" hi ārambha eva codyān dattvā prabuddhatāṃ nāśayanti | "vikalpitaiḥ" kathaṃbhūtaiḥ | "anubhūte" yaḥ "apalāpaḥ" nihnavaḥ | tena "āttaiḥ" gṛhītaiḥ || MoT_2,18.68 ||


nanu purāṇāni śāstrāṇi ca tyaktvā kimarthaṃ tvaduktaṃ śāstraṃ gṛhṇīmaḥ ity | atrāha
          vicāraṇād anubhavakāri vāṅmaya-
          prasaṅgatām upagatam asmadādiṣu /
          striyoktam apy aparam athāpi vaidikaṃ
          vaco vacaḥpralapanam eva nāgamaḥ // Mo_2,18.69 //
"asmadādiṣu" prāmāṇikeṣu | "striyā uktam api" strīkartṛkaṃ pralapitam api | "vāṅmayaprasaṅgatām" śāstraprasaṅgatām | śāstratvam iti yāvat | "upagatam" | kathaṃbhūtaṃ tat | "vicāraṇāt anubhavakāri" | "atha" pakṣāntare | "vaidikaṃ vacaḥ api vacaḥpralapanam eva" pralāpa eva bhavati | "nāgamaḥ" bhavati anubhavakāritvābhāvād ity arthaḥ || MoT_2,18.69 ||


sargāntaślokenāpy etad eva kathayati
          asmākam asti matir aṅga tayeti sarva-
          śāstraikavākyakaraṇaṃ phalitaṃ yato 'taḥ /
          prātītikārthamayaśāstranijāṅgapuṣṭāt
          saṃvedanād itarad asti na naḥ pramāṇam // Mo_2,18.70 //
he "aṅga" | "asmākaṃ matir asti iti" | "ataḥ" hetoḥ | "asmākaṃ tayā" buddhyā | "sarvaśāstraikavākyakaraṇaṃ yataḥ phalitam" | "ataḥ" hetoḥ | "naḥ" asmākaṃ | "saṃvedanāt" jñānāt | anyat "pramāṇaṃ nāsti" | sarvasmiñ śāstre saṃvedanam evāsmābhiḥ pramāṇaṃ dṛṣṭam | ato 'smākam api tad eva pramāṇam iti bhāvaḥ | "saṃvedanāt" kathaṃbhūtāt | "prātītikaḥ" pratīter āgataḥ | na tu kalpitaḥ | yaḥ "arthaḥ" | tan"mayam" yat "śāstraṃ" | tad eva "nijāṅgam" upakārakatvāt svāṅgaṃ | tena "puṣṭāt" vṛddhiṃ gatāt || MoT_2,18.70 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe aṣṭādaśaḥ sargaḥ || 2,18 ||


************************************************************************

oṃ pūrvoktam evārthaṃ punar api spaṣṭayati
     viśiṣṭāṃśasadharmatvam upamāneṣu gṛhyate /
     ko bhedaḥ sarvasādṛśye tūpamānopameyayoḥ // Mo_2,19.1 //
"viśiṣṭāṃśena" kāryasādhakenāṃśena | "sādharmyaṃ" sādṛśyam | ekāṃśenāpi kāryasya siddhatvān na ko 'pīty arthaḥ || MoT_2,19.1 ||


     dṛṣṭāntabuddhād ekātmajñānaśāstrārthavedanāt /
     mahāvākyārthasaṃvittyā śāntir nirvāṇam ucyate // Mo_2,19.2 //
"ekam" kevalam | "ātmajñānaṃ" pratipādyatvena yasmin | tādṛśaṃ yat "śāstraṃ" | tasya yo "'rthaḥ" | tasya "vedanāt" vicārāt | utpannayā "mahāvākyārthasaṃvittyā" | garbhīkṛtāvāntaravākyamahāvākyārthaparicchedena | siddhā "śāntiḥ" manaḥkṣobharāhityaṃ | paṇḍitaiḥ "nirvāṇam ucyate" | "vedanāt" kathaṃbhūtāt | "dṛṣṭāntaiḥ buddhāt" jñātāt siddhād iti yāvat || MoT_2,19.2 ||



upasaṃhāraṃ karoti
     tasmād dṛṣṭāntadārṣṭāntavikalpollasitair alam /
     yayā kayācid yuktyāśu mahāvākyārtham āśrayet // Mo_2,19.3 //
"alam" kṛtam | naitaiḥ prayojanam ity arthaḥ || MoT_2,19.3 ||


     śāntiḥ śreyaḥ paraṃ viddhi tatprāptau yatnavān bhavet /
     bhoktavya odanaḥ prāptaḥ kiṃ tatsiddhivikalpitaiḥ // Mo_2,19.4 //
"śāntiḥ" manovikalparūpakṣobharāhityam | "siddhivikalpitaiḥ" katham etat sampannam iti vikalpaiḥ || MoT_2,19.4 ||


     akāraṇaṃ kāraṇibhir bodhārtham upamīyate /
     upamānais tūpameyasadṛśair ekadeśataḥ // Mo_2,19.5 //
"akāraṇaṃ" kāraṇarahitabrahma | "ekadeśataḥ" ekena dharmeṇa || MoT_2,19.5 ||


     sthātavyaṃ neha bhogeṣu vivekavikalātmanā /
     upalodarasaṃjātaparipīnāndhabhekavat // Mo_2,19.6 //
spaṣṭam || MoT_2,19.6 ||


     dṛṣṭāntair yuktibhir yatnād vāñchitaṃ tyajatetarat /
     vicāraṇavatā bhāvyaṃ śāntiśāstrārthaśālinā // Mo_2,19.7 //
"vāñchitaṃ" abhilaṣitam | "itarat" vicāravyatiriktam | "śāntiś" ca "śāstrārthaś" ca tābhyāṃ śālate iti tādṛśena || MoT_2,19.7 ||


     śāstropaśamasaujanyaprajñātajjñasamāgamaiḥ /
     antarāntarasampannadharmyārthopārjanakriyaḥ // Mo_2,19.8 //
     tāvad vicārayet prājño yāvad viśrāntim ātmani /
     samprayāty apunarnāśāṃ śāntiṃ turyapadābhidhām // Mo_2,19.9 //
"śāstraṃ" ca "upaśamaś" ca "saujanyaṃ" ca "prajñā" ca "tajjñasamāgamaś" ca | taiḥ upalakṣitaḥ | "antarāntare" madhye madhye "sampannāḥ" | "dharmyānāṃ" dharmād anapetānāṃ "arthānām upārjanam" | tasya "kriyāḥ" yasya saḥ | tādṛśaḥ "prājñaḥ tāvat vicārayet" | "yāvat apunarnāśāṃ" pradhvaṃsābhāvarahitāṃ | "turyapadābhidhāṃ" turyapadeti nāmadheyām | "ātmani viśrāntiṃ" ātmaviśrāntilakṣaṇāṃ śāntim | "samprayāti" || MoT_2,19.8-9 ||



nanv ātmani viśrāntyā kiṃ setsyatīty | atrāha
     turyaviśrāntiyuktasya pratīrṇasya bhavārṇavāt /
     jīvato 'jīvataś caiva gṛhasthasyātha vā yateḥ // Mo_2,19.10 //
     na kṛtenākṛtenārtho na śrutismṛtivibhramaiḥ /
     nirmandara ivāṃbhodhiḥ sa tiṣṭhati yathāsthitam // Mo_2,19.11 //
"jīvataḥ" jīvanmuktasy"ājīvataḥ" videhamuktasya | "arthaḥ" prayojanam | nanu katham asau tiṣṭhatīty | atrāha | "nirmandara" iti | "saḥ" viśrāntiyuktaḥ || MoT_2,19.10-11 ||


     ekāṃśenopamānānām upameyasadharmatā /
     boddhavyā bodhyabodhāya na stheyaṃ codyacañcunā // Mo_2,19.12 //
"codyena cañcuḥ" vittaḥ | prasiddha iti yāvat | iti "codyacañcuḥ" codyaśīlenety arthaḥ || MoT_2,19.12 ||



     yayā kayācid yuktyāśu boddhavyaṃ bodhyam eva te /
     muktaye tan na paśyanti vyākulāś codyacañcavaḥ // Mo_2,19.13 //
"te" iti kartari ṣaṣṭhī | "tvām" iti śeṣaḥ | "vyākulāḥ codyacañcavaḥ" | "tat" tadā | tvām "na paśyanti" | kim utādhigacchantīti bhāvaḥ || MoT_2,19.13 ||



codyacañcoḥ lakṣaṇaṃ kathayati
     hṛdaye saṃvidākāśe viśrānte 'nubhavātmani /
     vastuny anarthaṃ yaḥ praṣṭā codyacañcuḥ sa ucyate // Mo_2,19.14 //
"hṛdaye" manasi | "viśrānte" 'pi "anubhavātmani saṃvidākāśe" cidākāśe | "vastuni yaḥ anartham" saṃśayarūpam anartham | "praṣṭā" pṛcchakaḥ bhavati | paṇḍitaiḥ "saḥ codyacañcuḥ ucyate" | svānubhavāviṣṭe 'pi vastuni yaḥ punaḥ punaḥ codyān utpādayati saḥ codyacañcur iti bhāvaḥ || MoT_2,19.14 ||



     abhimānavikalpāṃśair ajño jñaptiṃ vikalpayan /
     bodhaṃ malinayaty antar mukhaṃ sarpa ivāmalam // Mo_2,19.15 //
"abhimānenā"haṃ samyak codanaśīla ity abhimānena kṛtaiḥ "vikalpāṃśaiḥ" | codyarūpaiḥ vikalpāṃśaiḥ | "antaḥ" svasmin | "ajñaḥ" svām "jñaptiṃ" buddhiṃ | "vikalpayan" vikalpayuktāṃ kurvan | "bodhaṃ malinayati" bhedamālinyadūṣitaṃ karoti | ataḥ tvayā vyarhāḥ vikalpāḥ | na kāryā iti bhāvaḥ || MoT_2,19.15 ||


upadeśe upayogyānāṃ pramāṇāṃ nirṇayaṃ prastauti
     sarvapramāṇasattānāṃ padam abdhir apām iva /
     pramāṇam ekam eveha pratyakṣaṃ rāma tac chṛṇu // Mo_2,19.16 //
"sarvāsām" anumānādibhedabhinnānām samastānāṃ "pramāṇasattānāṃ" | "abdhir ivāpāṃ" sthānaṃ āśrayaṃ | "ekam pratyakṣam eva iha" loke "pramāṇam" asti | na hi anumānādayaḥ pratyakṣaṃ vinā sthātuṃ śaknuvanti | he "rāma" | tvam "tat" pratyakṣaṃ nāma pramāṇaṃ | "śṛṇu" || MoT_2,19.16 ||



pratyakṣam eva kathayati
     sarvārthasāram adhyakṣaṃ vedanaṃ vidur uttamāḥ /
     nūnaṃ tat prati yat siddhaṃ tat pratyakṣam udāhṛtam // Mo_2,19.17 //
"uttamāḥ" śreṣṭhāḥ | "sarvārthānāṃ sāra"prakāśanadvāreṇa siddhipradatvāt sārabhūtaṃ "vedanaṃ" jñānam eva | "adhyakṣaṃ viduḥ" sārabhūtavastuvācakatvād "adhyakṣa"śabdasya | he rāma | "nūnaṃ" niścaye | "tat prati" vedanarūpaṃ adhyakṣaṃ prati | "yat siddhaṃ" bhavati | paṇḍitaiḥ "tad" vastu "pratyakṣam udāhṛtam" | akṣaṃ prati siddhaṃ pratyakṣam iti vyutpatteḥ | akṣaśabdasya ca bhāmetivad adhyakṣavācakatvam || MoT_2,19.17 ||


tataḥ kim ity | atrāha
     anubhūter vedanasya pratipatter yathāsthitam /
     pratyakṣam iti nāmeha kṛtaṃ jīvaḥ sa eva ca // Mo_2,19.18 //
ataḥ paṇḍitaiḥ | "anubhūteḥ" anubhūtirūpasya | "pratipatteḥ" pratipattirūpasya | "vedanasya" | "iha" loke | "yathāsthitam" na tv anyathā saṃbhāvitaṃ | "pratyakṣam iti nāma kṛtam" | vedanasyaiva vedanaṃ prati siddhatvād anyasya sarvasya tasmiṃl layāsādanāt "sa eva jīvaḥ" bhavati | vedanād anyasya śarīrādeḥ pāṣāṇatulyatvena jīvatvāyogāt anubhūtipratipattyoḥ sphuṭatvāsphuṭatvakṛto bhedo jñeyaḥ || MoT_2,19.18 ||


padārthānām etadrūpatvam eva kathayati
     sa eva saṃvit sa punar ahaṃtāpratyayātmakaḥ /
     sa yayodeti saṃvittyā sā padārtha iti smṛtā // Mo_2,19.19 //
"sa eva" jīva eva | ārohāvasthāyāṃ "saṃvit" bhavati | "sa" evāvarohāvasthāyāṃ "ahaṃtāpratyayātmakaḥ" bhavati | "saḥ" ahaṃtāpratyayātmakaḥ jīvaḥ | "yayā saṃvittyā" yena ghaṭādisaṃvedanena rūpeṇa | "udeti" sphurati | "sā" saṃvittiḥ | paṇḍitaiḥ "padārtha iti smṛtā" | na hi padārthasya saṃvittivyatirekeṇa pṛthaksvarūpam asti | sattve 'py asan kalpatvāt | na hi saṃvittiṃ vinā sat sat bhavati || MoT_2,19.19 ||



padārthānāṃ jagattvaṃ kathayati
     sa saṃkalpavikalpādyaiḥ kṛtanānākramo bhramaiḥ /
     jagattayā sphuraty ambu taraṅgāditayā yathā // Mo_2,19.20 //
"saḥ" padārthaḥ | "saṃkalpavikalpādyaiḥ" saṃkalpavikalpaprabhṛtibhiḥ pramātṛniṣṭaiḥ viparyayajñānaiḥ | "kṛtanānākramaḥ" san | "jagattayā sphurati" | kiṃ "yathā" | "ambu yathā" | "yathā" tat "taraṅgāditayā" sphurati tathety arthaḥ || MoT_2,19.20 ||


nanu śuddhasya vedanasya katham evaṃrūpatā sampannety | atrāha
     prāg akāraṇam evāśu sargādau sargalīlayā /
     sphuritvā kāraṇībhūtaṃ pratyakṣaṃ svayam ātmani // Mo_2,19.21 //
"pratyakṣaṃ" vedanarūpaṃ pratyakṣaṃ | "prāk" sargāt prāk | "akāraṇam eva" sat | "sargādau" sargonmukhatāsamaye | "sargalīlayā sphuritvā" | "ātmani" sargarūpe svātmani | "svayaṃ" svātantryeṇa | "kāraṇībhūtam" | na ca svātantryakṛte katham iti paryanuyogaḥ yuktaḥ iti bhāvaḥ || MoT_2,19.21 ||



nanu vedanarūpasya jīvasya kāraṇatvaṃ kiṃrūpam astīty | atrāha
     kāraṇatvaṃ vicāro 'sya jīvasyāsad api sthitaṃ /
     sad ivāsyāṃ jagadrūpasampattau vyaktim āgatam // Mo_2,19.22 //
"jagadrūpasampattau vicāraḥ" vimarśaḥ | "asya" śuddhavedanarūpasya "jīvasya" | vā "kāraṇatvaṃ" bhavati | kathambhūtaṃ "kāranatvaṃ" | "asad api" paramārthataḥ asatsvarūpam api | "sad iva sthitam" | punaḥ kathambhūtaṃ | abhi"vyaktiṃ" prākaṭyaṃ "gatam" || MoT_2,19.22 ||


nanu punar api kiṃ tasya jīvasya kāraṇatvaṃ naśyaty atha vā nety | atrāha
     svayam eva vicāras tu sanañarthaṃ svakaṃ vapuḥ /
     nāśayitvā karoty āśu pratyakṣaṃ paramaṃ padam // Mo_2,19.23 //
"svayam eva vicāraḥ sanañarthaṃ" svābhāvayuktaṃ | "svakaṃ vapuḥ" nijavicārākhyaṃ svarūpaṃ "nāśayitvā" | "paramaṃ padaṃ" kāraṇatvānavacchinnaṃ svasvarūpaṃ | "pratyakṣaṃ" "karoti" | vicāravaśād eva | punar api jīvasya kāraṇatvaṃ naśyatīti bhāvaḥ || MoT_2,19.23 ||


nanu vicāraḥ kathaṃ paramaṃ padaṃ pratyakṣīkarotīty apekṣāyām āha
     vicārayan vicāro 'pi nātmānam adhigacchati /
     yadā tadā nirullekhaṃ param evāvaśiṣyate // Mo_2,19.24 //
"vicāraḥ" vimarśaḥ | "ātmānaṃ vicārayan" kiṃrūpo 'ham iti vimarśaviṣayīkurvan | "yadā ātmānaṃ nādhigacchati" na kiṃcidrūpatvāt na labhate | "tadā nirullekhaṃ" vimarśarahitaṃ | "paraṃ" padaṃ śuddhacinmātrākhyaśreṣṭhaṃ svarūpam | "evāva"tiṣṭhate vicāraṇīyābhāvād ity arthaḥ || MoT_2,19.24 ||



nanu puruṣa etasyām avasthāyāṃ buddhīndriyakarmāṇi karoti na vety | atrāha
     manasy anīhite śānte tair buddhīndriyakarmabhiḥ /
     neha kaiścit kṛtair artho nākṛtair apy abhāvanāt // Mo_2,19.25 //
"manasi" vicārasvarūpe manasi | "anīhite" svakriyām akurvati | ata eva "śānte" sati | puruṣasya "taiḥ" prasiddhaiḥ | "kaiścid" "buddhīndriyakarmabhiḥ" "kṛtaiḥ" | "arthaḥ na" bhavati | "akṛtaiś" c"ārthaḥ na" bhavati | kutaḥ | "abhāvanāt" bhāvanārāhityāt | nairapekṣyād iti yāvat || MoT_2,19.25 ||
nanu tadā karmendriyāṇāṃ kā vārtety | atrāha
     manasy anīhite śānte na pravartanta eva te /
     karmendriyāṇi karmādāv asaṃcāritayantravat // Mo_2,19.26 //
"karmendriyāṇāṃ" tasyām avasthāyāṃ "pravartanam eva nā"sti | kā vārtā tatkarmaṇāṃ syād iti bhāvaḥ | etādṛśī cāvasthā jīvanmuktānāṃ durlabhaiva | na hi sarvadā te atraiva tiṣṭhanti | videhamuktās tu sarvadā etanmayā evety alaṃ bahunā || MoT_2,19.26 ||



vedanarūpavicāraśāntyaiva manaḥśāntir bhaviṣyatīty abhiprāyeṇāha
     manoyantrasya calane kāraṇaṃ vedanaṃ viduḥ /
     prāṇālī dārumeṣasya rajjur antargatā yathā // Mo_2,19.27 //
paṇḍitāḥ "manomantrasya calane vedanam" eva "kāraṇaṃ viduḥ" | vedanānantaram eva hi manaḥ calati | "prāṇālī" asya manasaḥ "antargatā rajjuḥ" bhavati | kasya | yasya "dārumeṣasya yathā" | ayaṃ bhāvaḥ | "manaḥ" dārumeṣatulyam | "prāṇālī" rajjutulyā | "vedanam" rajjugrāhakatulyam | iti vedanasyaiva manaḥpravṛttau kāraṇatvāt | yuktā tacchāntau tacchāntir iti || MoT_2,19.27 ||



nanu bhavatu vedanaśāntyā manaḥśāntiḥ | vedanakṣobhena manasaḥ kṣobhe sati jagat kuto niryātīty | atrāha
     rūpālokamanaskārapadārthādyākulaṃ jagat /
     vidyate vedanasyāntar vāte 'ntaḥ spandanaṃ yathā // Mo_2,19.28 //
"padārthāḥ" rūpādhārabhūtāni dravyāṇi | ato vedanād eva "rūpādi"rūpam "jagan" niryātīti bhāvaḥ || MoT_2,19.28 ||


nanu svabhāvataḥ śuddhasya vedanasyāntaḥ katham etad astīty | atrāha
     sarvātmavedanaṃ śuddhaṃ yathodeti tadātmakam /
     bhāti prasṛtadikkālabāhyāntārūpadehakam // Mo_2,19.29 //
"śuddham" kenāpi rūpeṇāpariniṣṭhitam | ata eva "sarvātmavedanam yathodeti tadātmakaṃ bhāti" sphurati | na tu tanmadhye malam iva jagad astīti bhāvaḥ | kathambhūtaṃ "vedanaṃ" | "dik kālaś" ca "bāhyaṃ" c"āntaś" ca | tat digādi | "prasṛtaḥ" vistāraṃ gataḥ | digādirūpaḥ "dehaḥ" svarūpaṃ yasya | tat "prasṛtadikkālabāhyāntārūpadehakam" || MoT_2,19.29 ||



punaḥ punaḥ ślokāntareṇa tad eva pratipādayati
     draṣṭaiva dṛśyatābhāsaṃ svaṃ rūpaṃ dhārayan sthitaḥ /
     svaṃ yathā tatra yad rūpaṃ pratibhāti tathaiva tat // Mo_2,19.30 //
"draṣṭā eva" vedanasvarūpaḥ "draṣṭā eva" | "dṛśyatayā bhāsate" | iti tādṛśaṃ "svarūpaṃ dhārayan sthitaḥ" bhavati | "tatra" sati "tasye"ti śeṣaḥ | tasya draṣṭuḥ "svaṃ rūpaṃ yathā bhāti" sphurati | "tat" svaṃ rūpaṃ | "tathaiva" bhavati | nānyathā svapnavad iti śeṣaḥ || MoT_2,19.30 ||



     sarvam ātmā yathā yatra saṃkalpatvam ivāgataḥ /
     tiṣṭhaty āśu tathā tatra tadrūpa iva rājate // Mo_2,19.31 //
"sarvam ātmā" bhavati | ataḥ sa ātmā "yatra yathā tiṣṭhati tatra tathā tadrūpa iva rājate" | paramārthatas tu na rājate | svarūpe tathaiva sthitatvād it"īva"śabdopādānam | "ātmā" kathambhūta iva | "saṃkalpatvaṃ" saṃkalpabhāvaṃ | "gata ivā"nyathā nānārūpatvam asya na yujyeteti bhāvaḥ || MoT_2,19.31 ||



     sarvātmakatayā draṣṭur dṛśyatvam iva yujyate /
     draṣṭṛtvaṃ draṣṭṛsadbhāve dṛśyasya tv asti nāsataḥ // Mo_2,19.32 //
"draṣṭuḥ sarvātmakatayā" śuddhatayā sthitena "sarva"bhāvena | "dṛśyatvaṃ yujyata iva" | paramārthatas tu na yujyate draṣṭṛtvād apracyuter it"īva"śabdopādānaṃ | "asataḥ" svarūpeṇāsataḥ | "dṛśyasya draṣṭṛtvaṃ" "nāsti" | "draṣṭṛtayā" "sambhāvite" svasmin svāpekṣatvenātmāśrayāpatteḥ || MoT_2,19.32 ||



phalitaṃ kathayati
     akāraṇakam evāto brahmakalpam idaṃ sthitam /
     pratyakṣam eva nirmātṛ tasyāṃśās tv anupādhayaḥ // Mo_2,19.33 //
"ataḥ akāraṇakam" paramārthataḥ śuddhasya brahmaṇaḥ akartṛkatvāt kāraṇarahitam | "idaṃ" jagat | "brahmakalpam" brahmasadṛśaṃ | "sthitaṃ" bhavati | kathambhūtam jagat | "pratyakṣam eva" sphuṭam eva | "nirmātṛ" pramātṛrahitam śuddhasya brahmaṇo mātṛtāyogād | anyathā aśuddhatāpatteḥ | nanu mā bhavatu brahmaṇaḥ kāraṇatvaṃ mātṛtvaṃ vā | tadaṃśānāṃ tu tad bhavatv ity | atrāha | "tasyāṃśā" iti | "tu" pakṣāntare | "tasya" brahmaṇaḥ | "aṃśāḥ anupādhayaḥ" kāraṇatvādirūpopādhirahitā bhavanti | anyathā taddvāreṇa tasyāpi sopādhitvaprasaṅgāt || MoT_2,19.33 ||



evaṃ prāsaṅgitvaṃ parityajya prakṛtam evānusarati
          svayatnamātretararūpako yas
          tad daivaśabdārtham apāsya dūre /
          śūreṇa sādho padam uttamaṃ tat
          svapauruṣeṇaiva hi labhyate 'ntaḥ // Mo_2,19.34 //
"yaḥ svayatnamātrakāt itararūpakaḥ" itararūpatvena kalpitaḥ | "tad daivaśabdārthaṃ dūre apāsya" | he "sādho" | "śūreṇa tat uttamaṃ padaṃ antaḥ svapauruṣeṇa" mānasikena pauruṣeṇa | "labhyate" || MoT_2,19.34 ||

sargāntaślokena vicārāvadhiṃ kathayati
          vicārayācāryaparamparāṇāṃ
          matena satyena sitena tāvat /
          yāvad viśuddhāṃ svayam eva buddhām
          anantarūpāṃ paratām upaiṣi // Mo_2,19.35 //
tvam "satyena sitena" doṣarahitena | "ācāryaparamparāṇāṃ matena" matānusāreṇa | "tāvat" tāvatkālaṃ "vicāraya" | "yāvat paratām" uttīrṇacidrūpatām "upaiṣi" | "paratām" kathambhūtām | "viśuddhām" cetyākhyamalarahitām | punaḥ kathambhūtām | "svayam evā"va"buddhām" anubuddhām | punaḥ kathambhūtām | "anantarūpām" aparicchinnasvarūpām | iti śivam || MoT_2,19.35 ||


iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe ekonaviṃśaḥ sargaḥ || 2,19 ||


************************************************************************

mumukṣor vyavahāraṃ saṃgṛhya kathayati
     āryasaṃgamayuktyādau prajñāṃ vṛddhiṃ nayed balāt /
     tato mahāpuruṣatā mahāpuruṣalakṣaṇaiḥ // Mo_2,20.1 //
puruṣaḥ "ādau āryasaṃgamayuktyā" sādhusaṃgākhyenopāyena | buddhiṃ "vṛddhiṃ" vivekakṣamatvaṃ "nayet" | "tataḥ" buddhyāsādhitaiḥ "mahāpuruṣalakṣaṇaiḥ mahāpuruṣatā" bhavet || MoT_2,20.1 ||


nanu mahāpuruṣaguṇair vinā mahāpuruṣatā kathaṃ sidhyatīty apekṣāyāṃ tadguṇāharaṇam eva kartavyatvena kathayati
     yo yo yena guṇeneha puruṣaḥ pravirājate /
     śikṣeta taṃ tam evāśu tasmād buddhivivṛddhaye // Mo_2,20.2 //
"buddhyā vivṛddhaye"ti vā pāṭhaḥ | āryasaṃgamayuktyā vivṛddhayā buddhyā ity arthaḥ | anyathā buddhivṛddhyabhāve kathaṃ paraguṇagrahaṇasāmarthyaṃ syāt || MoT_2,20.2 ||



nanu tarhi guṇagrahaṇaṃ suṣamam eveti mahāpuruṣatāpi susādhyaiva syād | ity atrāha
     mahāpuruṣatā tv eṣā śamādiguṇaśālinī /
     samyagjñānaṃ vinā rāma siddhim eti na kasyacit // Mo_2,20.3 //
ataḥ "samyagjñānam" evāryasaṃgamayuktyā prathamaṃ sādhyam iti bhāvaḥ || MoT_2,20.3 ||



nanu samyagjñānena kiṃ setsyatīty | atrāha
     jñānāc chamādayo yānti vṛddhiṃ satpuruṣakramāt /
     ślāghanīyāḥ phalenāntar vṛṣṭer iva navāṅkurāḥ // Mo_2,20.4 //
"jñānāt" kathambhūtāt | "satpuruṣakramāt" | na tv asatpuruṣakramāt | "kramaḥ" paripāṭī | "ādi"śabdena damādīnāṃ grahaṇam | "vṛṣṭer" iti pañcamī || MoT_2,20.4 ||


nanu śamādibhir api kiṃ syād ity apekṣāyām āha
     śamādibhyo guṇebhyaś ca vardhate jñānam uttamam /
     annātmakebhyo yajñebhyaḥ śālivṛṣṭir ivottamā // Mo_2,20.5 //
"uttamam" paramātmaviṣayatvena sarvebhyo jñānebhyaḥ śreṣṭham || MoT_2,20.5 ||


phalitam āha
     guṇāḥ śamādayo jñānāc chamādibhyas tathā jñatā /
     parasparaṃ vivardhete ete 'bdasarasī yathā // Mo_2,20.6 //
ataḥ "jñānāc chamādayaḥ" | "śamādibhyo" "jñānaṃ" | "yathā abdebhyo" meghebhyaḥ saraḥ | sarasaḥ meghā iti piṇḍārthaḥ || MoT_2,20.6 ||



punar apy etad eva kathayati
     jñānaṃ satpuruṣācārāj jñānāt satpuruṣakramaḥ /
     parasparaṃ gatau vṛddhiṃ jñānasatpuruṣakramau // Mo_2,20.7 //
"satpuruṣācārāt" śamāder ity arthaḥ || MoT_2,20.7 ||


nanu jñānaśamayoḥ saṃpattau puruṣasya kena yatnenottamapadaprāptir bhavatīty | atra sadṛṣṭāntam uttaraṃ kathayati
     yathā kamalarakṣiṇyā gītyā vitatatārayā /
     khagotsādena sahito gītānandaḥ prasādhyate // Mo_2,20.8 //
     jñānasatpuruṣehābhyām akartrā kartṛrūpiṇā /
     tathā puṃsā niricchena samam āsādyate padam // Mo_2,20.9 //
"yathā kamalarakṣiṇyā" gopikayā kartryā | "vitatā" cāsau "tārā" ceti tādṛśyā "gītyā" karaṇabhūtayā | "khagānāṃ" yaḥ "utsādaḥ" dhānyād apāsanaṃ | tena "sahitaḥ" "gītānandaḥ prasādhyate" | na hi tasyāḥ tatra yatno 'sti | gītimātreṇaiva gītānandakhagotsādayoḥ siddhatvāt | mṛgāṇāṃ hi ayaṃ svabhāva eṣa yat gītiṃ śrutvā bhakṣyam api tyajantīti | tathā kartrā nāhaṃ karteti niścayāt kartṛtvaleparahitena "kartṛrūpiṇā" kartṛvad bhāsamāneneti yāvat | "puruṣeṇa" kartrā | "jñānasatpuruṣehābhyāṃ" jñānaśamādibhyāṃ karaṇābhyāṃ | "ayatnena" yatnarahitam eva | "padam" śuddhacinmātrākhyam uttamaṃ padaṃ | "samāsādyate" prāpyate | jñānaṃ śamādikaṃ cety etanmātrakam evātropāyaḥ | nānyat kiṃcid iti bhāvaḥ | "puruṣeṇa" kathambhūtena | "niricchena" jñānaśamādipūrṇatayā padaprāptāv apīcchārahitena | anyathecchārūpasya kṣobhasya sthitatvāt pūrṇatā na syād iti bhāvaḥ || MoT_2,20.8-9 ||



mumukṣuvyavahāraprakaraṇābhidheyaṃ vastūpasaṃharati
     sadācārakramaḥ prokto mayaiṣa raghunandana /
     tathopadiśyate samyag ayaṃ jñānakramo 'dhunā // Mo_2,20.10 //
"proktaḥ" etadyuktasyaiva vakṣyamāṇe jñānakrame 'dhikāritvād iti bhāvaḥ | nanv adhunā kiṃ karoṣīty apekṣāyām āha | "tathopadiśyata" iti | "tathā" sadācārakramavat | "jñānakramaḥ" brahmopadiṣṭā svātmajñānaparipāṭī || MoT_2,20.10 ||


prakaraṇamāhātmyaṃ kathayati
     idaṃ yaśasyam āyuṣyaṃ puruṣārthaphalapradam /
     tajjñād āptātmaśāstrārthāc chrotavyaṃ kila dhīmatā // Mo_2,20.11 //
bāhyadṛṣṭīn saṃmukhīkartum iti "āyuṣyam" iti ca "idaṃ" mumukṣuvyavahārākhyaṃ prakaraṇam | "puruṣārthaphalapradam" mokṣadam | "tajjñāt" kathambhūtāt | "āptaḥ" samyaṅ niścitaḥ | "ātmaśāstrāṇām" adhyātmaśāstrāṇām | "arthaḥ" yena | tasmāt || MoT_2,20.11 ||


nanv etacchravaṇena kiṃ syād ity | atrāha
     śrutvā tu buddhinairmalyād balād yāsyasi satpadam /
     yathā katakasaṃśleṣāt prasādam avaśam payaḥ // Mo_2,20.12 //
tvam etac "chrutvā" | siddhāt "buddhinairmalyāt" | "balāt" ayatnam eva | "satpadaṃ yāsyasi" | atrottarārdhena dṛṣṭāntam āha | "yathe"ti | "katakam" jalaśuddhikārī dravyaviśeṣaḥ || MoT_2,20.12 ||


nanu katham etacchravaṇena puruṣaḥ satpadaṃ yātīty | atra sargāntaślokenottaraṃ kathayati
     viditavedyam idaṃ hi mano mune
     vivaśam eva hi yāti paraṃ padam /
     yad avabuddham akhaṇḍitam uttamaṃ
     tad avabodhadaśāṃ na jahāti hi // Mo_2,20.13 //
he "mune" munikarmānvitatvāt munirūpaśrīrāma | "hi" yasmāt | "viditavedyaṃ manaḥ vivaśam eva paraṃ padaṃ yāti" | ato viditavedyatvakāriṇaḥ etacchāstraśravaṇāt satpadaprāptir yuktaiveti bhāvaḥ | nanu viditavedyam api manaḥ yadi kadācid viditavedyatāṃ jahāti tadā kiṃ kāryam | ity atrāha | "yad" iti | manasā "yat uttamaṃ" na tv adharaṃ bhogarūpaṃ vastu | "avabuddhaṃ" samyaṅ niścitam | "tat" manaḥ | tad"avabodhadaśāṃ" tasyottamasya vastunaḥ | yo "'vabodhaḥ" tasya "daśāṃ" | "hi" niścayena | "na jahāti" | viditavedyo hi kadācid api viditavedyatāṃ "na jahātī"ti tātparyam | iti śivaṃ śivaṃ śivam iti || MoT_2,20.13 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuprakaraṇe viṃśaḥ sargaḥ || 2,20 ||


     śrotṝṇāṃ bhāvanāveśasatkṛtasvāntaśālinām |
     mumukṣuvyavahāroktivyākhyā satphaladāstv iyam || 1 ||


     yacchaktyāveśavaśataḥ sāmarthyaṃ kāryagocaram |
     bhāvānām astu yatno 'yaṃ tatkāryatvena niścitaḥ || 2 ||
     svātmalābhamahodāraphalayogyatvabhāvanaḥ |
     mumukṣuvyavahāro 'yaṃ sphuratān mama mānase || 3 ||

iti śivam ||


     
iti śrīkāśmīramaṇḍalāntarvartyārādhyapādamahāmāheśvaravaiḍūryakaṇṭhātmajaśrīmadavatārakaṇṭhaputraśrībhāskarakaṇṭhaviracitāyāṃ śrīmokṣopāyaṭīkāyāṃ mumukṣuvyavahāraprakaraṇaṃ samāptam | iti śivam ||




______________________________________________________________________________



3. Utpattiprakarana (3,1.1-41; 3,3.13-3,12.4; 3,13.50-3,16.41)



śrīrāmāya namaḥ | oṃ
     kṛtvā cittaṃ svabodhasmaraṇavinihataṃ prauḍhamohāndhakāraṃ
     smṛtvā jñānapradāṃ tāṃ sumahitavibhavāṃ śrīguroḥ pādukāṃ ca  /
     dhyātvā vighnāntakaṃ taṃ śivasutam anaghaṃ śrīgaṇeśaṃ sureśam
     utpattyākhyāvagāhiprakaraṇavivṛtis tanyate bhāskareṇa //
evaṃ mumukṣuvyavahārākhye prakaraṇe vakṣyamāṇopadeśādhikāritvasampādananimittaṃ vyavahāraṃ pratipādya tacchravaṇamātreṇa ca śrīrāmaṃ prāptatadanuṣṭhānaphalaṃ vibhāvya prapañcasyānutpattisatattvotpattijñānam upādeyabhūtamokṣaprāptau mūlakāraṇatayā niścitya tadupapādakam utpattiprakaraṇam ārabhamāṇaḥ vakṣyamāṇabrahmaikatvāśrayaṇena guruśiṣyabhāvānupapattiṃ puraskṛtya svavyatiriktaśiṣyopadeśabhāvena paraprayuktaṃ codyam abhiśaṅkamānaḥ taduddhāranimittabhūtaṃ brahmaikatve 'pi svapnadṛṣṭāntena padārthabhedagrāhakaṃ brahmavidanubhavaṃ prathamaṃ kathayati ||



     vāgbhābhir brahmavid brahma bhāti svapna ivātmani /
     yad-idaṃ-tat-sva-śabdārthair yo yad vetti sa vettu tat // Mo_3,1.1 //
uttaravākyasthaṃ "vettī"ti padaṃ pūrvavākye 'pi yojanīyaṃ | tenāyam arthaḥ | "brahmavit" brahmajñānī | "vetti" anubhavati | kim iti karmāpekṣāyāṃ paśya mṛgo dhāvatītivat vākyaṃ karmatvena kathayati "vāgbhābhir" iti | "brahma" nānāpadārthabhāvena bṛṃhitaṃ kim api sūkṣmaṃ vastu | "bhāti" vilasati | sphuratīti yāvat | kaiḥ bhāti | "yad-idaṃ-tat-sva-śabdārthaiḥ" | "yad"ādisarvanāmaśabdavācyabhūtaiḥ padārthaiḥ | tadrūpeṇeti yāvat | itthambhāve tṛtīyā | padārthānāṃ ca "yad"ādisarvanāmavācyatvaṃ vastūpalakṣaṇaṃ | yatra sarvanāma prayujyate dravyam ity ucyate | so 'rthaḥ bhedyatvena vivakṣita ity abhiyuktasmaraṇāt jñeyam | kutrādhāre bhāti | "ātmani" svabhittau | tadvyatiriktasya dvitīyasyābhāvāt | idaṃ bhānaṃ ca arthāt jāgratkālīnaṃ jñeyam | svapnasya dṛṣṭāntatayopādānāt suṣupteḥ śūnyamātrabhānāspadatvāc ca | "yad-idaṃ-tat-sva-śabdārthaiḥ" kābhiḥ | "vāgbhābhiḥ" | vāg atra samānaviṣayatvena vikalpaḥ abhipretaḥ | tena vikalpabhānarūpair ity arthaḥ | bhāsamānā ete padārthāḥ hi svapnapadārthavat vikalparūpā eva | tatsāratayā sthitasya śuddhacinmātrasyaiva vastutaḥ arthatvāt | kasminn "iva" bhāti | "svapne" "iva" | yathā "svapne" | "brahma" svapnapadārthatayā bṛṃhitam | ātmākhye vastuni | "ātmani" svabhittau | "vāgbhābhiḥ" vikalpabhānabhūtaiḥ | "yad-idaṃ-tat-sva-śabdārthaiḥ bhāti" | tathā ity arthaḥ | svapne hi ātmabhāvena sthitasya brahmaṇaḥ padārthabhāvena bhānaṃ sarvasākṣikam eva | nanv anye bauddhādayaḥ sarvathā padārthāpahnavaṃ kurvanti | tat kathaṃ tvayaivam uktam ity āha "yo yad" iti | yaḥ yaḥ kaścit brahmavidaḥ bauddhādiḥ yat yat padārthānāṃ sarvathā asattvādi "vetti" anubhavati | "saḥ tat vettu" anubhavatu | kim asmākaṃ tadvedanena | brahmavidvedane eva tātparyāt iti bhāvaḥ | atra ca "yac"chabdaḥ "idam"āditrayeṇa saha samānādhikaraṇyadarśanāt sāmānyaniṣṭhaḥ | śiṣṭāḥ "idam"ādayaḥ trayaḥ viśeṣaniṣṭhāḥ | tatrāpi "idaṃ"śabdaḥ pratyakṣavedyaniṣṭhaḥ iti sarvanāmacatuṣkenaiva sarvapadārthākṣepasiddhāv anupayuktatvād anyeṣām akathanam iti jñeyam | atha vā "brahmavid" ity āmantraṇapadaṃ brahmajñānādhikṛte śrīrāme viśiṣṭādhikāritvasūcanāya prayuktaṃ | tathā ca sphuṭa evārthaḥ | nāpi duryojakatvākhyadoṣāpattiḥ || MoT_3,1.1 ||



proktabrahmavidanubhavāśrayaṇena śaṅkāviṣayīkṛtaṃ paraprayuktaṃ codyaṃ pariharati
     nyāyenānena sarvasmin sarge brahmāmbare sati /
     kim idaṃ kasya vakṣīti codyacañcur nirākṛtaḥ // Mo_3,1.2 //
"anena nyāyena" anayā padārthānāṃ brahmamayatve 'pi bhedasādhikayā brahmavidanubhavarūpayā yuktyā | na tu padārthānāṃ sarvathāpahnavakāriṇyā bauddhādiyuktyā | "sarge" sṛjikriyākarmaṇi bhāvajāte | "brahmāmbare" brahmākāśarūpe | "sati" | tvam kiṃrūpaḥ | tvam "kim idaṃ" kiṃrūpam "idaṃ" śāstraṃ | "kasya" kiṃrūpasya śiṣyasya | "vakṣi" kathayasi | sarvasya brahmaikarūpatvāt | "iti" evaṃrūpaṃ | yat "codyam" ākṣepaḥ | tena "cañcuḥ" prasiddhaḥ | evaṃrūpacodyakārīti yāvat | "nirākṛtaḥ" pratikṣiptaḥ bhavati | tena vitta iti cañcuppratyayaḥ | vittaḥ prasiddha ity arthaḥ | nanu katham etena codyanirāsaḥ | ucyate | brahmavidā paramārthena brahmaikatve 'pi vyavahāradaśāyāṃ svapnatulyasya śiṣyasya yādṛśo yakṣaḥ tādṛśo balir iti nyāyāśrayaṇena tadrūpopadeśakaraṇaṃ yuktam eva svapnatulyasya jagataḥ aṅgīkaraṇāt | sarvathā padārthāpahnavakāriṇāṃ bauddhādīnām evedaṃ codyaṃ yuktam iti || MoT_3,1.2 ||



evaṃ śaṅkitacodyanirāsaṃ kṛtvā svopadeśaṃ prati śrotṝn saṃmukhīkaroti
     ahaṃ tāvad yathājñānaṃ yathāvastu yathākramam /
     yathāsvabhāvaṃ vacmīdaṃ tat sarvaṃ śrūyatāṃ budhāḥ // Mo_3,1.3 //
"tāvac"chabdaḥ sākalye | "ahaṃ" vasiṣṭhākhyaḥ guruḥ | "idaṃ" mokṣopāyābhidhaṃ śāstraṃ | "tāvat" sākalyena | "vacmi" kathayāmi | kathaṃ vacmi | "yathājñānam" jñānānusāreṇa | tathā "yathāvastu" vastvanusāreṇa | tadvat "yathākramam" kramānusāreṇa | punaḥ katham | "yathāsvabhāvaṃ" svabhāvānusāreṇa | jñānādayaḥ catvāra eva hi śāstrapravṛttinimittabhūtāḥ | "tat" tato hetoḥ | he "budhāḥ" | yuṣmābhiḥ "sarvam śrūyatām" śravaṇagocarīkriyatām | "budhā" ity āmantraṇapadaṃ budhānām evaitacchāstraśravaṇe adhikāritvaṃ sūcayati | "sarvam" ity anena sakalam idaṃ śrutvā paramaprayojanāvāptiḥ bhaviṣyatīty ardhād utthāya na gantavyam iti sūcitam || MoT_3,1.3 ||



evaṃ śravaṇayogyaṃ budhavargaṃ saṃmukhīkṛtyotpattiprakaraṇatātparyārthaṃ ślokena saṅgṛhya kathayati
     svapnavat paśyati jagac cinnabho dehavinmayam /
     svapnasaṃsāradṛṣṭāntā ihaivāntaḥ samanvitāḥ // Mo_3,1.4 //
cetayati pāṣāṇaprakhyaṃ karaṇavargaṃ svāveśena cetanakriyākartṛtve prerayatīti "cit" sarvāntargataṃ kim api śuddhaṃ tattvaṃ | atha vā cetatīti "cit" citikriyākartṛbhūtaṃ kim api tattvam | sā eva "nabhaḥ" sarvavyāpakatvāt ākāśaṃ | tat "cinnabhaḥ" cidākāśaḥ | "jagat" gamanaśīlam dṛśyaprapañcaṃ | "svapnavat paśyati" svapnavat svayaṃ kalpayitvā anubhavati | kīdṛśaṃ "jagat" | "dehavinmayaṃ" | "dehavit" deho 'ham iti jñānam | ahaṅkāra iti yāvat | tasya vikāraḥ "dehavinmayaṃ" ahaṅkārasvarūpaṃ | na tu śuddham ity arthaḥ | nanu svapnaḥ kim iha dṛṣṭāntatvena datta ity | atrāha "svapne"ti | svapne dṛṣṭāḥ saṃsārāḥ "svapnasaṃsārāḥ" | te eva "dṛṣṭāntāḥ" nirṇayasthānāni | te "svapnasaṃsāradṛṣṭāntāḥ ihaivā"smin jāgratprapañce ev"āntaḥ" | "sam"yak | na tu āmukha eva | "anvitāḥ" sambaddhāḥ bhavanti | kalpanāmātrasiddhatvāt | ataḥ svapnasya dṛṣṭāntatvam uktam iti bhāvaḥ || MoT_3,1.4 ||


saṅgraheṇoktam arthaṃ mūḍhabuddhiṣu praveśanāya svataḥ sarvajñaṃ śrīrāmaṃ madhyekṛtya vistārayituṃ prastauti
     mumukṣuvyavahāroktimayāt prakaraṇāt param /
     athotpattiprakaraṇaṃ mayedaṃ parikathyate // Mo_3,1.5 //
"mumukṣuvyavahārasyoktiḥ" prācuryeṇa prastutā yasmin | tat "mumukṣuvyavahāroktimayaṃ" | tādṛśāt "prakaraṇāt" | mumukṣuvyavahārākhyāt prakaraṇād iti yāvat | "param" anyat | "parikathyate" samyak kathyate || MoT_3,1.5 ||



pratijñātaprakaraṇārambhaṃ karoti
     bandho 'yaṃ dṛśyasadbhāvo dṛśyābhāve na bandhanam /
     na sambhavati dṛśyaṃ tu yathedaṃ tac chṛṇu kramāt // Mo_3,1.6 //
"ayam" anubhūyamānaḥ | "bandhaḥ" dṛśyāsaktatvaṃ | "dṛśyasadbhāvaḥ" dṛśyena dṛśikriyāviṣayeṇa bhāvajātena | "sadbhāvaḥ" svarūpalābhaḥ | draṣṭāraṃ prati sphuraṇam iti yāvat | yasya | saḥ tādṛśaḥ bhavati | "dṛśyābhāve" sati "bandhanaṃ" bandhaḥ | "na" bhavati | na hi rajjvabhāve bandhanaṃ dṛṣṭam | nanu sato dṛśyasya katham abhāvaḥ setsyatīty | atrāha "na sambhavatī"ti | "tu"śabdaḥ sambhavinaḥ śuddhadraṣṭuḥ sakāśāt dṛśyasya vyatirekadyotakaḥ | "dṛśyaṃ na sambhavati" sambhavanakriyākartṛtvaṃ na bhajati | svapnanyāyena pratītimātrasiddhatvāt | nanu katham etad ity | atrāha "yathedam" iti | "idaṃ" dṛśyāsambhavanaṃ | "yathā" bhavati | "tat kramāt śṛṇu" || MoT_3,1.6 ||


nanu kimartham utpattiprakaraṇam eva prathamaṃ kathayasīty apekṣāyām āha
     utpadyate yo jagati sa eva kila vardhate /
     sa eva mokṣam āpnoti svargaṃ vā narakaṃ ca vā // Mo_3,1.7 //
dharmādharmollaṅghanena "mokṣam" | dharmeṇa "svargam" | adharmeṇa "narakam" iti vibhāgaḥ || MoT_3,1.7 ||


nanu tataḥ kim ity | atrāha
     atas teṣv avabodhārthaṃ tat tāvat kathayāmy aham /
     utpattiṃ saṃsṛtāv eti pūrvam eva hi yo yathā // Mo_3,1.8 //
yataḥ utpattyādīnām ekādhikaraṇatvaṃ asti | "ataḥ teṣu" kramabhāviṣu utpattyādiṣu madhye | "avabodhārthaṃ" tvajjñānārthaṃ | ihāsmin prakaraṇe | "aham tāvat" prathamaṃ | "tat kathayāmi" | "tat" kiṃ | "yaḥ" puruṣaḥ | "yathā" yena prakāreṇa | "saṃsṛtau" saṃsaraṇasvabhāve saṃsāre | "pūrvam eva" sargādau eva | "utpattim eti" brahmaṇaḥ vyatiriktatvena sattāṃ bhajati | tato 'nantaraṃ sthitiprakaraṇādau vardhanādikam api kathayāmīti bhāvaḥ | "hi"śabdaḥ niścaye | ata evāsya prakaraṇasyotpattiprakaraṇam iti nāmāpi bhavatīti jñeyam || MoT_3,1.8 ||



tatra tāvat saṅkṣepakathanaṃ pratijānīte
     idaṃ prakaraṇārthaṃ tvaṃ saṅkṣepāc chṛṇu rāghava /
     tataḥ prakathayiṣyāmi vistaraṃ te yathepsitam // Mo_3,1.9 //
he "rāghava" | "tvam idam" jagadutpattirūpaṃ | "prakaraṇārthaṃ" utpattiprakaraṇābhidheyaṃ | "saṅkṣepāt" saṅkṣepeṇa "śṛṇu" | "tataḥ" saṅkṣepānantaram | "yathepsitaṃ" īpsitānusāri "vistaraṃ" "kathayiṣyāmi" | saṅkṣepakathanena vinā tvatsandehānutthānāt vistareṇa kathanaṃ na sambhavati | sandehaviṣayatvāt vistarasyeti bhāvaḥ || MoT_3,1.9 ||



pratijñātāṃ saṅkṣepataḥ jagadutpattiṃ kathayiṣyan prapañcākrāntabuddheḥ śiṣyasya vidhimukhena mūlakāraṇasvarūpakathanam ayuktaṃ jñātvā sthūṇānikhanananyāyam āśritya jagannāśamukhena mūlakāraṇasvarūpaṃ kathayituṃ prastauti
     yad idaṃ dṛśyate sarvaṃ jagat sthāvarajaṅgamam | /
     tat suṣupta iva svapnaḥ kalpānte pravinaśyati // Mo_3,1.10 //
asmābhiḥ "yat" | "idam" purovarti | "sthāvarajaṅgamaṃ" sthāvarajaṅgamasvarūpa | "jagat" naśvaraṃ bhāvajātaṃ | "dṛśyate" anubhūyate | "tat kalpānte" āntarārthavivakṣāyāṃ sarvadṛśyakṣayarūpāyāṃ turyāvasthāyāṃ viśeṣataḥ tadatītāvasthāyāṃ ca | bāhyārthavivakṣāyāṃ tu kālāntarabhāvini pralayakāle | "pravinaśyati" prakarṣeṇa saṃskārākhyāt mūlād ādhārād naśyati | mūlakāraṇabhāvenāvasthānāt adarśanaṃ yāti | ka "iva" | "svapna iva" | yathā "suṣupte svapnaḥ" naśyati | tathety arthaḥ | nanu suṣuptau jagato bījabhāvenāvasthānāt anyathā punarbhavāyogāt katham ayam upamānopameyabhāvaḥ siddhyatīti cen | na | staimityākhyasya sāmānyadharmasyobhayatrāpy avasthānāt sāmānyadharmamātrāśrayaṇenaiva hi upamānopameyabhāvaḥ uttiṣṭhati | iti na ko 'pi virodhaḥ || MoT_3,1.10 ||



yatsvarūpaprakaṭanārtham ayaṃ yatnaḥ kṛtaḥ tan mūlakāraṇaṃ śeṣatvena kathayati
      tataḥ stimitagambhīraṃ na tejo na tamas tatam /
     anākhyam anabhivyaktaṃ yat kiñcid avaśiṣyate // Mo_3,1.11 //
"tataḥ" prapañcanāśānantaram | "yat kiñcit" kenāpi nāmnā vaktum aśākyaṃ kim api sūkṣmaṃ vastu | "śiṣyate" śeṣatayā tiṣṭhati | tasyāpi nāśe nāśopalabdhur abhāvena sampanno 'pi prapañcanāśaḥ | asatkalpa eva syād iti bhāvaḥ | nanu nāmataḥ tad vastu kathaṃ noktam ity | atra viśeṣaṇadvāreṇa hetum āh"ānākhyam" iti | "anākhyam" ākhyākartṛtvena sthitatvāt ākhyākarmatāṃ netum aśakyam | nanu kathaṃ tad anākhyam astīty | atrāpi viśeṣaṇadvāreṇa hetum āh"ānabhivyaktam" iti | "anabhivyaktam" atisūkṣmatvāt | bāhyāntaratvena sthitair indriyair apratyakṣīkṛtam ity arthaḥ | bāhyāntarendriyāpratyakṣasya cānākhyatvaṃ sphuṭam eva | vāgindriyasyāpi agamyatvāt | nanv anabhivyaktatvam api kathaṃ tasyāstīty | atrāpi viśeṣaṇadvāreṇa hetum āha "na tejo na tama" iti | cetyakalitaṃ cinmātraṃ "tejaḥ" | taccetyaṃ "tamaḥ" | atha vā sūryādikaṃ "tejaḥ" | andhakāraḥ "tamaḥ" tadvyatiriktasvarūpam ity arthaḥ | tathā ca tasyānabhivyaktatvam eva | tejastamasor eva abhivyaktiviṣayatvāt | tathāpi śūnyatāpattim āśaṅkya viśeṣaṇam āha "tatam" iti | sarvatra protasvarūpam ity arthaḥ | śūnyatve kathaṃ tatatvaṃ syād iti bhāvaḥ | kena svarūpeṇa tasya protatvam astīty | atrāha "stimitagambhīram" iti | stimitaṃ ca tat gambhīraṃ ceti "stimitagambhīram" | cinmātrarūpatvena cetyabhāvarūpasya prasaraṇasyābhāvāt niḥspandam | nirālambanatvena svabhinnasyāvagāḍhuḥ abhāvāt duravagāhaṃ cety arthaḥ | ataś ca nirālambaśuddhacinmātrarūpatayā protam astīti bhāvaḥ | yady api nāsargaṃ tiṣṭhati | "param" iti vakṣyamāṇanītyā tasya tattvasya prapañcodbhāvanaṃ prati sarvadaiva spando vartata eveti | śuddhatayā sthitasya tasyopalabdhiḥ kadāpi na sambhavaty eva | tathāpi "deśād deśāntaraṃ dūram" ityādivakṣyamāṇanītyā madhyavṛttiṣu sadā tadupalabdhiḥ sambhavaty eveti na vimukhena bhavitavyam | videhamuktānāṃ tu sarvadā tanmayatvam api sambhavati | yataḥ asya cinmātratattvasyedṛśa eva mahimā bhavati | yat sarvadā viśvamayaṃ tad uttīrṇaṃ ca bhavatīti na kiñcid viruddham || MoT_3,1.11 ||



nanu yadi tat tattvam anākhyam asti tat kathaṃ budhaiḥ tasya tattvasya "ṛtaṃ ātme"tyādikāḥ sañjñāḥ kṛtāḥ ity | atrāha
     ṛtam ātmā paraṃ brahma satyam ityādikā budhaiḥ /
     kalpitā vyavahārārthaṃ yasya sañjñā mahātmanaḥ // Mo_3,1.12 //
"budhaiḥ" tatsākṣātkāravadbhiḥ | "kalpitāḥ" kalpanayā bhāvitāḥ | "vyavahārārthaṃ" śiṣyopadeśākhyavyavahārasampādanārtham | na tu kiñcit pravṛttinimittam upādāya "ṛtā"dikāḥ "sañjñāḥ" tatra pravartante iti bhāvaḥ || MoT_3,1.12 ||


nanu tat īdṛśaṃ bhavatu | kiṃ tata ity | atrāha
     sa tathābhūta evātmā svayam anya ivollasan /
     jīvatām upayātīva bhāvināmakadarthanām // Mo_3,1.13 //
"tathābhūta eva" paramārthataḥ proktāt svarūpād apracyuta eva | "saḥ ātmā" proktaviśeṣaṇayuktam sarvadā bhātatvena sātatyagamanakriyākartṛbhūtaṃ cinmātrākhyaṃ tattvam | "jīvatām" sātatyagamanaviruddhasvabhāvaprāṇadhāraṇakriyākartṛbhūtaṃ jīvabhāvam | "upayātīva" gacchatīva | "saḥ" ātmā kim kurvan | "anya ivollasan" | "svayaṃ" svaviṣayatāsādanena svavyatiriktaṃ | cetyarūpa iva "ullasan" | svaparāmarśanamātreṇaiva hi cinmātrasya cetyarūpo jīvādibhāvaḥ bhavati | "tathābhūta" iti padam "iva"śabdadvayasya yogyatāṃ kathayati | na hi tathābhūtasya paramārthataḥ atathābhāvo yuktaḥ | na hi sadā jalabhāvāt apracyutasya jalasya taraṅgatāsādane 'pi paramārthataḥ ajalabhāvo yuktaḥ | "jīvatāṃ" kathambhūtāṃ | "bhāvināmakadarthanām" | "bhāvinīṃ" agre | bhavanaśīlā "nāmakadarthanā" jīveti nāmarūpā | "kadarthanā" mālinyaṃ yasyāḥ | tām | jīveti nāmayogyām ity arthaḥ | bhāvitvaṃ ca nāmnaḥ vaikharīprādurbhāve jñeyam || MoT_3,1.13 ||



adhunā tasyaiva jīvatvānantarabhāvinīṃ manastāṃ kathayati
     tataḥ sa jīvaśabdārthakalanākulatāṃ gataḥ /
     mano bhavati maunātma mananān mantharībhavan // Mo_3,1.14 //
"tataḥ" jīvabhāvānantaram | "saḥ" ātmā | "manaḥ bhavati" | kīdṛśaṃ "manaḥ" | "maunātma" | sahajasvarūpavimarśāsāmarthyaṃ "maunaṃ" | tadrūpam kutaḥ bhavatīty | atra hetugarbhaṃ viśeṣaṇam āha | "mantharībhavann" iti | yataḥ "mantharībhavan" alasībhavan bhavati ity arthaḥ | kutaḥ "mantharībhavan" ity apekṣāyām āha | "mananād" iti | "mananāj" jīvatvamananākhyāt dharmāt | mananaparatvenaiva hi ātmā svaparāmarśaṃ prati "mantharībhavati" | tataḥ manorūpaṃ bhavati | kathambhūtaḥ "saḥ" | "jīvaśabdārthakalanākulatām" | jīvasya vācakaḥ śabdaḥ "jīvaśabdaḥ" | tasya yaḥ "arthaḥ" aṇurūpaḥ jīvaḥ | tasya yaḥ "kalanā "svarūpatayā parāmarśaḥ | tayā yā "ākulatā" | "tām gataḥ" | ayaṃ bhāvaḥ | sarvathā cetyavyatiriktasvarūpaṃ cinmātraṃ prathamaṃ cittvenāham iti svaparā-marśaṃ karoti | tatra grāhakatayā sthitasya bhāgasya cid iti nāma | grāhyatayā sthitasya tu jīvatvaṃ | tataḥ tasya jīvasya svasmin aṇutvaparāmarśo bhavati | tad eva ca tasya manastvam iti || MoT_3,1.14 ||



phalitaṃ kathayati
     manaḥ sampadyate tena mahataḥ paramātmanaḥ /
     susthirād asthirākāras taraṅga iva vāridheḥ // Mo_3,1.15 //
"tena" tataḥ hetoḥ | "manaḥ" aṇurūpaṃ cittaṃ | "mahataḥ" vyāpakāt | "paramātmanaḥ sampadyate" prādurbhavati | ka "iva" | "taraṅga iva" | yathā "susthirāt" "vāridheḥ" samudrāt | "asthirākāraḥ taraṅgaḥ sampadyate" | tathety arthaḥ | atra ca susthiratvaṃ taraṅgāpekṣayā jñeyam || MoT_3,1.15 ||



manasaḥ utpattim uktvā tatkāryabhūtasya jagataḥ utpattiṃ kathayati
     tat svayaṃ svairam evāśu saṅkalpayati nityaśaḥ /
     teneyam indrajālaśrīr vitateva vitanyate // Mo_3,1.16 //
"tat" paramātmoktaṃ manaḥ | "svayam" | na tu anyat kiñcit madhyekṛtya | "svairam" svecchayā | na tu parapreraṇayā | "saṅkalpayati" saṅkalpaṃ karoti | ataḥ "tena" manasā | "iyam" anubhūyamānā | "indrajālaśrīḥ" mithyābhātattvena indrajālavat bhāsamānatvāt indriyajālasampadrūpā sṛṣṭiḥ | "vitanyate" vistāryate | kathambhūt"eva" | "vitateva" vistīrṇā iva | paramārthataḥ aṇusvarūpe manasi sthitatvāt vaitatyarahitet"īva"śabdopādānam || MoT_3,1.16 ||



paramātmotthān manasaḥ sṛṣṭyutthānakathanaphalam āha
     yathā kaṭakaśabdārthaḥ pṛthaktvārho 'sti kānake /
     na nāma kaṭake tadvaj jagacchabdārthatā pare // Mo_3,1.17 //
"yathā kaṭakaśabdārthaḥ" kaṭakaśabdābhidheyabhūtaḥ sanniveśaviśeṣaḥ | "pṛthaktvārhaḥ" | arthāt kānakāt pṛthaktvayogyaḥ "na" bhavati | kva sthitasya kaṭakaśabdasyārthaḥ | "kānake" "kaṭake" kanakanirmite kaṭake ity arthaḥ | "tadvat pare jagacchabdārthatā" bhavati | "tadvad" ity anena dṛṣṭāntagataṃ sarvam ākṣipyate | tenāyam arthaḥ | "tadvat" tathā | "pare" | arthāt proktanītyā jagattayā sthite uttīrṇe cinmātre | sthitasya jagacchabdasyārthaḥ parāt "pṛthaktvārhaḥ na" bhavati || MoT_3,1.17 ||



mūḍhabuddhiṣu saṅkramaṇārthaṃ punar apy etad eva kathayati
     brahmaṇy evāsty ananyātma yathāsthitam idaṃ jagat /
     na jagacchabdakārtho 'sti hemnīva kaṭakāditā // Mo_3,1.18 //
"yathāsthitam" anena prakāreṇaiva sthitaṃ | na tv anyaṃ prakāram āsādyeti yāvat | "idaṃ jagat brahmaṇi" bṛṃhite cinmātre | "ananyātma" ananyasvarūpaṃ "asti" | tatra "jagacchabdakārthaḥ" | "jagacchabdakasya" jagad iti śabdasya | "arthaḥ" brahmavyatiriktapadārtharacanārūpaṃ abhidheyam | "na" bhavati | tattayābhimatasya jagataḥ brahmatvasādhanāt | "jagacchabdakārthaḥ" kā "iva" | "kaṭakāditā iva" | yathā "kaṭakāditā" kaṭakādibhāvaḥ | "hemni nāsti" | tathety arthaḥ || MoT_3,1.18 ||



asattvasādhikām ata evoktārthadārḍhyakāriṇīṃ manasaḥ sakāśāt jagadutpattim anuvadati
     asataivāsatī tāpanadyeva laharī calā /
     manasaivendrajālaśrīr jāgatī pravitanyate // Mo_3,1.19 //
"manasā eva" | na tv anyena kenacit | "jāgatī" jagatsambandhinī | jagatsvarūpeti yāvat | "indrajālaśrīḥ" indrajālasampat | "pravitanyate" | kathambhūten"aiva" | "asatā" "eva" asatsvarūpeṇaiva | na hi brahmavyatirekeṇa manasaḥ pṛthak sattā asti | kathambhūt"endrajālaśrīḥ" | "asatī" svakāraṇabhūtamanovat asatsvarūpā | manasā kay"eva" | tāpe bhāsamānā nadī "tāpanadī" | tayā "iva" | yathā asatyā tāpanadyā "asatī calā laharī pravitanyate" | tathety arthaḥ | nanu kathaṃ pūrvaśloke kanakakaṭakasya dṛṣṭāntatvaṃ iha tāpanadīlaharyāḥ iti cet | satyam | pūrvaśloke jagataḥ paramārthataḥ brahmarūpatvakathanārthaṃ kanakakaṭakasya dṛṣṭāntatvaṃ | asmin śloke tu tasyaivānupapattinivāraṇāya brahmavyatirekeṇāsattvakathanārthaṃ tāpanadīlaharyāḥ dṛṣṭāntatvam ity ekaphalasādhakatvān na dṛṣṭāntadvayasya vaiṣamyam | jagataḥ manonirmāṇatvābhāve hi paramārthasattvaṃ prāpnoti | tathā ca bhinnasattābhājaḥ tasya brahmatvakathanam ayuktaṃ syāt | na hi ghaṭe paṭo 'yam iti vaktuṃ yuktam | ity anupapattinivāraṇāyāsya ślokasyopanyāsaḥ | iti tadantargatasya dṛṣṭāntasyāpi tadartham eva saḥ yuktaḥ || MoT_3,1.19 ||



jāgatīm indrajālaśriyaṃ viśinaṣṭi
     avidyā saṃsṛtir bandho māyā moho mahat tamaḥ /
     kalpitānīti nāmāni yasyāḥ sakalavedibhiḥ // Mo_3,1.20 //
"sakalavedibhiḥ" sarvajñaiḥ || MoT_3,1.20 ||


adhunā proktāyāḥ indrajālaśriyāḥ sakāśāt mokṣakāṅkṣiṇaṃ śiṣyaṃ jñātvā mokṣasvarūpanirūpaṇaṃ vinā śiṣyasya mokṣāvāptim ajānan mokṣasvarūpanirūpaṇam api tadviruddhabandhasvarūpajñānaṃ vināśakyaṃ manyamānaḥ tatsvarūpanirūpaṇaṃ pratijānīte | "bandhasye"ti /
     bandhasya tāvad rūpaṃ tvaṃ kathyamānam idaṃ śṛṇu |
     tataḥ svarūpaṃ mokṣasya jñāsyasīndusamānana // Mo_3,1.21 //
"bandhasya" indrajālaśrīsvarūpadṛśyāsaktatvasya | anupādeyabandhasvarūpanirūpaṇapratijñayā vyākulībhūtaṃ śiṣyaṃ samāśvāsayati "tata" iti | "tataḥ" bandhasvarūpakathanānantaram | "mokṣasya" dṛśyanairapekṣasya | heyanirūpaṇānantaram upādeyanirūpaṇasya yuktatvād iti bhāvaḥ || MoT_3,1.21 ||



bandhasvarūpaṃ kathayati
     draṣṭur dṛśyatvasattāṅga bandha ity abhidhīyate /
     draṣṭā dṛśyavaśād baddho dṛśyābhāvād vimucyate // Mo_3,1.22 //
he "aṅga" | paṇḍitaiḥ "dṛśyasattā" dṛśyasadbhāvaḥ | "draṣṭuḥ" dṛśikriyākartuḥ | "bandhaḥ abhidhīyate" | bhāvapratyayaḥ pādapūraṇārthaḥ | etad evānvayavyatirekābhyāṃ āśvāsayogyaṃ karoti "draṣṭe"ti | "dṛśyavaśāt" dṛśyavaśena | dṛśyasattāvaśeneti yāvat | "dṛśyābhāvāt" dṛśyāsattayā | viṣayasya bhāve viṣayiṇo 'pi bhāvāt | tadabhāve tasyāpy abhāvāt iti hetudvayaṃ vākyadvaye svayaṃ yojyam || MoT_3,1.22 ||


tatra dṛśyasvarūpaṃ kathayati
     jagat tvam aham ityādi sargātmā dṛśyam ucyate /
     yāvad etat sambhavati tāvan mokṣo na vidyate // Mo_3,1.23 //
"jagat" bandhahetuḥ dṛśyaprapañcaḥ | "tvam" tato mokṣākāṅkṣī śiṣyaḥ | "aham" ity upadeṣṭā | "ādi"śabdena mokṣasya grahaṇam | tasyāpi dṛśyatvānapāyāt | paṇḍitaiḥ "jagat tvam aham ityādi dṛśyam" dṛśikriyākarm"ocyate" | kuta ity ākāṅkṣāyām viśeṣaṇadvāreṇa hetuṃ kathayati | "sargātme"ti | sṛjyamānasvarūpa ity arthaḥ | sṛjyamānasya ca dṛśyatvaṃ sphuṭam eva darśanapūrvakatvāt | sarjanasya ca darśanapūrvakatvaṃ "tad aikṣate"tyādiśrutisāmarthyāt jñeyam | asya bandhahetutvam anuvadati | "yāvad" iti | "yāvat etat" idaṃ jagadādidṛśyam | "sambhavati" sattāyuktaṃ bhavati | "tāvat mokṣaḥ na vidyate" | bandhanimittasya sthitatvāt | sattāmātreṇaiva ca dṛśyasya bandhanimittatvasvabhāvatvāt || MoT_3,1.23 ||



nedam iti vacanakathanamātreṇaiva śāntadṛśyatvābhimānayuktaṃ śiṣyaṃ prati āha
     nedaṃ nedam iti vyarthaiḥ pralāpair nopaśāmyati /
     saṅkalpajanakair dṛśyavyādhiḥ pratyuta vardhate // Mo_3,1.24 //
"idam" anubhūyamānaṃ | "idaṃ" dṛśyam | "na" bhavati | "idaṃ" dṛśyaṃ "na" bhavati "iti" evaṃrūpeṇa sthitaiḥ "vyarthaiḥ" dṛśyaśāntyākhyaphalarahitaiḥ | tathā "saṅkalpajanakaiḥ" niṣedhākhyasaṅkalpotpādakaiḥ | "pralāpaiḥ" unmattapralāpaiḥ | "dṛśyavyādhiḥ" dṛśyākhyo rogaḥ | "nopaśāmyati" niṣedharūpatayā sthitatvāt | "pratyuta vardhate" vṛddhiṃ yāti | niṣedhākhyasaṅkalpavardhakatvāt | nanu kathaṃ niṣedhasya dṛśyatvaṃ | satyam | draṣṭṛviṣayatvāt niṣedho 'pi hi draṣṭuḥ svataḥ bhinnatayā bhāti || MoT_3,1.24 ||



nanu "nedam" iti vacanamātreṇa dṛśyaśāntiḥ mā bhavatu | tarkādibhiḥ tacchāntiṃ sādhayāmaḥ ity | atrāha
     na ca tarkabharakṣodair na tīrthaniyamādibhiḥ /
     sato dṛśyasya jagato yasmād ete vicārakāḥ // Mo_3,1.25 //
"tarkabharāṇāṃ" bhedapradhānatvena dṛśyasatyatvāpādakānāṃ tarkasamūhānāṃ | ye "kṣodāḥ" vicāraṇāni | taiḥ "dṛśyavyādhiḥ nopaśāmyati" | tathā "tīrthaniyamādibhiḥ dṛśyavyādhiḥ nopaśāmyati" | yataḥ "ete" "tarkabharā"dayaḥ "dṛśyasya" "jagataḥ" "sataḥ vicārakāḥ" satyatvavicārakā bhavanti | tatra tarkāṇāṃ sākṣād eva padārthasādhakatvaṃ | tīrthādīnāṃ tu svargādiphalaniṣṭhatvāt | na hy asatyaniṣṭhatvaṃ yuktam || MoT_3,1.25 ||



nanu tarkāḥ sad api jagat paryante bhāgataḥ anityatvena kathayantīti teṣām api bhāgataḥ dṛśyaśāntyupapādakatvam asty evety | atrāha
     jagad dṛśyaṃ tu yady asti na śāmyaty eva tat kvacit /
     nāsato vidyate bhāvo nābhāvo vidyate sataḥ // Mo_3,1.26 //
"dṛśyam" dṛśikriyāviṣayībhūtaṃ | "jagat" naśvarasvabhāvaṃ bhāvajātaṃ | "yady asti" yadi paramārthasat bhavati | "tat" tadā | "kvacit" kutrāpi deśe kāle vā | "na śāmyati" śāntiṃ na vrajati | yataḥ "asataḥ" astikriyākartṛtvam abhajataḥ | "bhāvaḥ" sattā | "na" bhavati | tathā "sataḥ" astikriyākartṛtvaṃ bhajataḥ | "abhāvaḥ" asattā | "nā"sti | svarūpahāniprasaṅgād iti bhāvaḥ || MoT_3,1.26 ||



dṛśyaparamārthasattve doṣam āha
     acetyacitsvarūpātmā yatra yatraiṣa tiṣṭhati /
     draṣṭā tatrāsya dṛśyaśrīḥ samudety apy aṇūdare // Mo_3,1.27 //
citā svayam āvirbhāvyasvaviṣayīkṛtaṃ bhāvajātaṃ "cetyaṃ" | avidyamānaṃ cetyaṃ yasyāṃ | sā "acetyā" | proktasvarūpacetyavyatirikteti yāvat | tādṛśī yā "cit" | tat"svarūpaḥ" tanmayaḥ | "ātmā" svarūpaṃ yasya | saḥ "acetyacitsvarūpātmā" | "yatra yatra" yasmin yasmin deśe | yasyāṃ yasyām avasthāyām iti yāvat | "tiṣṭhati" | "aṇūdare 'pi" paramasūkṣmodare 'pi | "tatra" tasmin deśe | "asya" draṣṭuḥ | "dṛśyaśrīḥ samudeti" prādurbhavati | nanu tādṛśe sūkṣmatare deśe 'rme katham etādṛśasya prapañcasyāvasthānaṃ sambhavati | satyam | sthūladṛśyasaṃskārotpāditayā smṛtyā tatra tasya prādurbhāvaḥ sidhyaty eva [---]tvāt || MoT_3,1.27 ||



atha tapodhyānādibhiḥ satyadṛśyaśāntyabhimānagrastān prati kathayati
     draṣṭur asti jagad dṛśyaṃ tat pramṛṣṭam idaṃ mayā /
     tyaktaṃ tapodhyānajapair iti kāñcikatṛptivat // Mo_3,1.28 //
"draṣṭuḥ" dṛśikriyākartuḥ | "jagat dṛśyam" svabhinnatayā dṛśikriyāviṣayo bhavati | "tat" jagadrūpaṃ dṛśyaṃ | "mayā tapodhyānajapaiḥ tyaktam" śāntiṃ nītam | "iti" etat | "kāñcikatṛptivat" kāñcikadravyeṇa mama tṛptir jāteti vacanavat bhavati | yathā tṛptyarthaṃ bhakṣitena kāñcikadravyeṇa pratyuta kṣut eva jāyate | tathā svabhinnadevatārādhanārtham anuṣṭhitaiḥ tapaḥprabhṛtibhiḥ api dṛśyavṛddhir eva jāyate iti bhāvaḥ || MoT_3,1.28 ||



nanu dṛśyaṃ satyaṃ bhavatu | mokṣāvasthāyāṃ dṛśyān nirgatasyāta eva viśeṣaguṇāsaṃvedanapātratāṃ gatasyātisūkṣmasya jīvasyedaṃ dṛśyaṃ kiṃ karoti | na hi suptasya bāhyajagatkṛtaṃ vyākulatvaṃ dṛśyate ity | atrāha
     yadi nāma jagad dṛśyam asti tat pratibimbati /
     paramāṇūdare 'py asmiṃś cidādarśe na saṃśayaḥ // Mo_3,1.29 //
"jagat" naśvaram dṛśyajātam | "yadi nāmāsti" yadi nāma paramārthasat bhavati | "tadā" "paramāṇūdare" "'pi" atisūkṣmamadhye 'pi | "asmin" ātmatvena sthite | "cidādarśe" cinmakure | "pratibimbati" pratibimbatvena saṅkrāmati || MoT_3,1.29 ||



katham etad ity | atrāha
     yatra tatra sthitaṃ rāma yathādarśe prabimbati /
     adridyūrvīnadīśādi cidādarśe tathaiva hi // Mo_3,1.30 //
he "rāma" | "hi" yasmāt kāraṇāt | "yathā" "yatra tatra" "sthitaṃ" vastu | "ādarśe prabimbati" pratibimbati | "tathaiva" tadvat eva | "adridyūrvīnadīśādi" adrayaś ca dyauś ca ūrvī ca "nadīśāḥ" samudrāś ca | te "adridyūrvīnadīśāḥ" | te "ādiḥ" yasya jagataḥ | tat "adridyūrvīnadīśādi" | tādṛśaṃ jagat | "cidādarśe" cinmakure | pratibimbati | svabhāvasya tyaktum aśakyatvāt | ayaṃ bhāvaḥ | sphurattā eva hi sattā bhavati | sā ced dṛśye paramārthataḥ asti tadā sphurattāmātramayī cinmātratvāt | sā svasphurattātvataḥ kadāpi na vyatiriktā bhavet iti kadāpi cidādarśaḥ dṛśyapratibimbarahito na bhavet iti || MoT_3,1.30 ||



tathā ca mokṣābhāvaprasaṅga ity abhiprāyeṇāha
     tatas tatra punar duḥkhaṃ jarā maraṇajanmanī /
     bhāvābhāvagrahotsargāḥ sthūlasūkṣmacalācalāḥ // Mo_3,1.31 //
"tataḥ" yadi cidādarśaḥ dṛśyasadbhāvena punaḥ punaḥ pratibimbayukto bhavet | tadā "tatra" tasmin cinmātre | "punaḥ duḥkhaṃ" bhavet | tathā "jarā" bhavet | tadvat "maraṇajanmanī" bhavetāṃ | tathā "bhāvābhāvagrahotsargāḥ" prādurbhāvanāśādānatyāgāḥ bhaveyuḥ | saṃsārasyaitatsvarūpatvāt | duḥkhādayaḥ kathambhūtāḥ | "sthūlasūkṣmacalācalāḥ" | tatra jāgratkālīnānāṃ sthūlatvam acalatvaṃ ca | svapnakālīnānāṃ sūkṣmatvam calatvaṃ ceti vibhāgaḥ | suṣuptau duḥkhādibhānābhāvāt | tathā ca sthūlasūkṣmaduḥkhādirūpasaṃsāragrastatvena jīvasya kadāpi muktiḥ na syād iti bhāvaḥ || MoT_3,1.31 ||


nanu bhavatu dṛśyaṃ paramārthasat | tathāpi samādhiparāṇām anartham utpādayituṃ kāsya śaktir ity | atrāha
     idaṃ pramārjitaṃ dṛśyaṃ mayā nātrāham āsthitaḥ /
     etad evākṣayaṃ bījaṃ samādhau saṃsṛtismṛteḥ // Mo_3,1.32 //
"mayā idam dṛśyam pramārjitam" samādhyupāyena nāśitam | yataḥ "aham atra āsthitaḥ" āsthāyuktaḥ "nā"smi | "etad eva" pūrvārdhoktaṃ vastu eva | "samādhau" dṛśyoparamasvarūpe samādhāne | "saṃsṛtismṛteḥ" dṛśyasmṛteḥ | "akṣayaṃ bījaṃ" syāt | saṃsṛtiviṣayasya dṛśyasya saṃsṛtiśabdavācyatvaṃ lakṣaṇayā jñeyam | ayaṃ bhāvaḥ | samādhipariṇatasya dṛśyapramārjanaṃ tadanāsthā ca siddhatvena sphurati na vā | na cet tadā sampannam apy etad dvayam asad eva | sphurattāyāḥ eva paramārthataḥ sattāsvarūpatvāt | sphurati cet tadāsthitā eva saṃsṛtismṛtiḥ | tadbījasya sphuraṇasya sthitatvāt | nanu tvadabhimate dṛśyātyantābhāve 'pi ayaṃ doṣaḥ prasajati | sphurati cet dṛśyātyantābhāvaḥ tat sthitam eva dṛśyaṃ | sphuraṇākhyasya bījasya sthitatvāt | na cet tad asann eva dṛśyātyantābhāvaḥ | iti cen | na | na hi dṛśyātyantābhāvavādinaḥ sarvoparamasvarūpaḥ samādhiḥ dṛśyātyantābhāvatayā abhipretaḥ yena proktadoṣaprasaṅgaḥ syāt | kiṃ tu dṛśyātyantābhāvaniścayamātram eva tasyopayogi | na hi rajjusarpanivāraṇārthaṃ mantrapaṭhanaṃ yuktam | api tu nāyaṃ sarpa iti sarpātyantābhāvaniścayamātrasyaiva tatropayogaḥ | atyantābhāvaniścayaś ca guruśāstrasaṅgodbhūtenādhiṣṭhānabhūtacinmātravijñānenaiva sidhyati | na pāṣāṇabhāvāpādakaiḥ samādhibhir ity alaṃ prapañcena || MoT_3,1.32 ||



na kevalaṃ jagatsatyatvavācyabhyupagatadṛśyoparamasvarūpasya samādheḥ dṛśyabījadhāratvamātram evāsty | api tu kāryakaraṇe asāmarthyam apy astīty abhiprāyeṇāha
     sati tv asmiñ jagaddṛśye nirvikalpasamādhinā /
     na cākṣayasuṣuptatvaṃ turyaṃ vāpy upapadyate // Mo_3,1.33 //
"tu" pakṣāntare | "asmin jagaddṛśye" jagatsvarūpe dṛśye "sati" | "sati" paramārthasati sati | "nirvikalpasamādhinā" sarvoparamasvarūpeṇa samādhānena | "akṣayasuṣuptatvaṃ turyaṃ vāpi nopapadyate" na sidhyati | "akṣayasuṣuptatvaṃ" videhamuktagocarā turyātītāvasthā | "turyaṃ" jīvanmuktagocarā turyāvasthā || MoT_3,1.33 ||



anupapattim eva sādhayati
     vyutthāne hi samādhīnāṃ suṣuptānta ivākhilam /
     jagadduḥkham idam bhāti yathāsthitam akhaṇḍitam // Mo_3,1.34 //
"hi" yasmāt kāraṇāt | "samādhīnāṃ vyutthāne" avaśyabhāvini samādhibhyaḥ vyutthāne | samādheḥ vyutthānāvasthāyām iti yāvat | "yathāsthitam" pūrvavat sthitam | ata eva "akhaṇḍitam" kenāpy aṃśena na nyūnam | "akhilaṃ" samastaṃ | "idam jagadduḥkham bhāti" sphurati | kasminn "iva" | "suṣuptānta iva" | ayaṃ bhāvaḥ | yathā rātrau suṣuptiṃ gatasyāta eva vismṛtasamastajagatprapañcasya tataḥ prabhāte prabuddhasya puruṣasya punaḥ api pūrvavat jagatprapañcaḥ sphurati | tathā yena tenopāyena sarvoparamasvarūpasamādhiṃ gatasya puruṣasyāvaśyambhāvini vyutthānasamaye punar api pūrvavat jagatprapañcaḥ avaśyaṃ sphuraty eva | anyathā asmadabhimatātyantābhāvaprasaṅgāt | tathā ca mātulānībhakṣaṇavat kṣaṇamātraṃ jagaduparamasādhakena samādhinā sarvadā jagadabhāvasvarūpasya turyasya tadatītasya ca siddhir na yukteti || MoT_3,1.34 ||



etenāyātāṃ samādheḥ niṣphalatāṃ kathayati
     prāptaṃ bhavati he rāma tat kiṃ nāma samādhibhiḥ /
     bhūyo 'narthanipāte 'pi kṣaṇasāmye hi kiṃ sukham // Mo_3,1.35 //
"kiṃ nāma prāptaṃ bhavati" | kiñcid api prāptaṃ na bhavatīty arthaḥ | katham etad ity atrāha "bhūya" iti | "hi" yasmāt | "bhūyo 'narthapāte" | "bhūyaḥ anarthanipātaḥ" bhedarūpānarthanipātaḥ | yasmin | tādṛśe "kṣaṇasāmye 'pi" kṣaṇaṃ sphuraṇaśīlāyāṃ samatāyām api | "kiṃ sukhaṃ" bhavati | yataḥ kṣaṇabhātaṃ sāmyaṃ sukhadaṃ na bhavati | tataḥ tatprāptyāpi kiñcit prāptaṃ na bhavatīti bhāvaḥ | "api"śabdaḥ sāmyasya asandigdham sukhāspadatvaṃ dyotayati || MoT_3,1.35 ||


nanu samādhau satataṃ līnasya vyutthānābhāvena kathaṃ bhūyaḥ jarāduḥkhaprādurbhāvaḥ syād ity | atrāha
     yadi vāpi samādhāne nirvikalpe sthitiṃ vrajet /
     tad akṣayasuṣuptābhaṃ tan manye nāmalaṃ padam // Mo_3,1.36 //
puruṣaḥ "nirvikalpe samādhāne" nirvikalpasamādhau | "sthitiṃ" satataṃ līnatāṃ | "yadi vā vrajet" yadi vā gacchet | ahaṃ "manye" | "tat" tadāpi | "tat" nirvikalpasamādhānam | "amalaṃ padam" jāḍyamalarahitaṃ śuddhacinmātrākhyaṃ mahāsthānaṃ | "na" bhavati | dṛśyadarśanāsāmarthyarūpasya jāḍyākhyasya malasya suptivat sthitatvāt | "tat" kathambhūtam | "akṣayasuṣuptābham" turyātītāvasthāvat bhāsamānaṃ | na tu tatsvarūpam | kālāntare 'vaśyambhāvinaḥ vyutthānasya sthitatvāt | na ca turyātītāvasthāyāḥ vyutthānaṃ kadāpi sambhavati | cinmātre atyantalayībhāvāt || MoT_3,1.36 ||



dṛśyasatyatvavādinaḥ nirvikalpasamādhir eva na sambhavati | sthitivrajanasya tu kā kathety abhiprāyeṇāha
     prāpyate sati dṛśye 'smin na ca tan nāma kenacit /
     yatra tatra kilāyāti cittabhrāntyā jagadbhramaḥ // Mo_3,1.37 //
"nāma" niścaye | "asmin" anubhūyamāne jagati "sati" | "sati" paramārthe sati | "kenacit" kenāpi puruṣeṇa | "tat" nirvikalpasamādhānaṃ | "na prāpyate" | yataḥ "yatra tatra" sthitasyāpi samādhideśe taditaradeśe vā sthitasya puruṣasya | "cittabhrāntyā" | citte sthitā "bhrāntiḥ" jagatsatyatvabhramaḥ "cittabhrāntiḥ" | tayā "jagadbhramaḥ" | "kila" niścaye | "āyāti" | ayaṃ bhāvaḥ | yathā dṛśyasatyatāyāṃ niścitaḥ puruṣaḥ rātrau supto 'pi dṛśyaṃ paśyaty eva | tathā samādhiṃ gato 'pi paśyed eva samānanyāyatvāt | tathā ca dṛśyasatyatvavādinaḥ nirvikalpasamādhir eva na sambhavati | tatra sthitivrajanasya tu kā katheti || MoT_3,1.37 ||


nanu dṛśyasatyatve niścitasyāpi yathā tathā prayuktena dhāraṇopāyena na kiñcid bhānarūpo nirvikalpasamādhiḥ sidhyaty evety | atrāha
     draṣṭātha yadi pāṣāṇarūpatāṃ bhāvayan balāt /
     kilāste tat tadante 'pi bhūyo 'syodeti dṛśyatā // Mo_3,1.38 //
"draṣṭā" pramātā | "yadi balāt" kenāpi haṭhaprayogena | "pāṣāṇarūpatāṃ bhāvayan āste" tiṣṭhati | "tad api" tadāpi | "asya" svasmin pāṣāṇabhāvaṃ bhāvayataḥ draṣṭuḥ | "tadante" avaśyabhāvini pāṣāṇabhāvānte | "dṛṣyatā" paṭādiviṣayaḥ dṛśyabhāvaḥ | "udeti" sphurati | na hi jīvataḥ sarvadā pāṣāṇabhāvabhāvanaṃ śakyaṃ | tathā ca dṛśyatve niścitasya sthiraḥ nirvikalpasamādhiḥ na sidhyaty eveti bhāvaḥ || MoT_3,1.38 ||



pāṣāṇarūpatāgamanasyāsambhavaṃ kathayati
     na ca pāṣāṇatātulyā nirvikalpasamādhayaḥ /
     keṣāñcit sthitim āyānti sarvair ity anubhūyate // Mo_3,1.39 //
pāṣāṇatāyāḥ tulyāḥ "pāṣāṇatātulyāḥ" | vikalparahitā ity arthaḥ | pāṣāṇatābhāvanam eva tasya draṣṭuḥ pāṣāṇabhāvaṃ nāśayati | na hi pāṣāṇaḥ svaṃ pāṣāṇatvaṃ bhāvayituṃ śaknotīti bhāvaḥ || MoT_3,1.39 ||



yathātathāsiddhasyāpi pāṣāṇabhāvasya na paramapadatvaṃ yuktaṃ jaḍatvānapāyād | iti kathayati
     na ca pāṣāṇatātulyā rūḍhiṃ yātāḥ samādhayaḥ /
     bhavanty agryaṃ padaṃ śāntaṃ cidrūpam ajam avyayam // Mo_3,1.40 //
"rūḍhiṃ" pariṇāmam | ayaṃ bhāvaḥ | dṛśyadarśanāsāmarthyena jaḍatvānapāyāt pāṣāṇabhāvasya cinmātratvam ayuktam | cinmātraṃ hi sarvadā cetyacetanasamartham eva bhavati | svātantryeṇa tu yadi kadācit tac cetanaṃ na karoti tena nāsya jāḍyāpātaḥ | na hi śaktaḥ puruṣaḥ svātantryeṇa kāryam akurvan aśakta iti vaktuṃ yujyate iti || MoT_3,1.40 ||


pūrvoktam upasaṃharati
     tasmād yadīdaṃ sad dṛśyaṃ tan na śāmyet kadācana /
     śāmyet tapojapadhyānair dṛḍham ity ajñakalpanā // Mo_3,1.41 //
"tasmāt" uktahetoḥ | "yadi dṛśyaṃ sat" bhavati ...


*********************************************************************

... yatvena parabodhatvāyogāt | tad eva "nirvāṇamātram" eva | "cittamātraṃ" padmajabhāvena sthitaṃ śuddhaṃ cittaṃ | "āste" | "tat" cittamātram | "vasudhāditām" paramārthasantaṃ pṛthvyādibhāvaṃ | "na yāti" | nirvāṇasvarūpaśuddhabodhamayatvāt | ata eva padmajasya ādhibhautikadehābhāva iti bhāvaḥ || MoT_3,3.13 ||



nanu pratijīvaṃ manobhedasya sthitatvān nānāvidhāni manāṃsi santi | tat kathaṃ padmajarūpāt manasaḥ eva jagadutpattiḥ uktety | atrāha
     sarveṣāṃ bhūtamanasāṃ saṃsāravyavahāriṇām /
     prathamo 'sau praticchandaś cittadehaḥ svatodayaḥ // Mo_3,3.14 //
saṃsāre vyavaharantīti tādṛśānāṃ "sarveṣāṃ bhūtamanasāṃ" madhye | "asau" padmajaḥ | "prathamaḥ praticchandaḥ" bhāvimanaḥsṛṣṭikāraṇaṃ prathamaṃ pratibhānam bhavati | cinmātrasyeti śeṣaḥ | "asau" kathambhūtaḥ | "cittadehaḥ" śuddhamanorūpaḥ | punaḥ kathambhūtaḥ | "svatodayaḥ" | "svatayā" svabhāvena | na tu anyatayā | "udayaḥ" navīnaḥ prādurbhāvaḥ yasya | saḥ | udayānantaram api pūrvabhāvenaiva sthita ity arthaḥ | ata eva asmād evotpattikathanam iti bhāvaḥ || MoT_3,3.14 ||


prathamapraticchandatvam asya sādhayati
     asmāt pūrvāt praticchandād ananyaitatsvarūpiṇī /
     iyaṃ pravisṛtā sṛṣṭiḥ spandadṛṣṭir ivānilāt // Mo_3,3.15 //
"asmāt" padmajākhyāt | "pūrvāt" prathamāt | "praticchandāt" | "iyam" anubhūyamānā | "sṛṣṭiḥ" | "pravisṛtā" prasāraṃ gatā | kathambhūtā | "ananyā" etasmād avyatiriktā | ata eva "etatsvarūpiṇī" etanmayī | kā "iva" | "spandadṛṣṭir iva" | yathā spandarūpā dṛṣṭiḥ | spanda iti yāvat | "anilāt" pravisṛtā bhavati | tathety arthaḥ | ato 'syaiva prathamapraticchandatvaṃ yuktam iti bhāvaḥ || MoT_3,3.15 ||


upasaṃhāraṃ karoti
     pratibhānākṛter asmāt pratibhāmātrarūpadhṛt /
     vibhāty evam ayaṃ sargaḥ satyānubhavavat sthitaḥ // Mo_3,3.16 //
"evaṃ" sati | "pratibhānākṛteḥ" pratibhānasvarūpāt | "asmāt" padmajāt | "ayaṃ sargaḥ" idaṃ sṛjikriyāviṣayo dṛśyamaṇḍalaṃ | "pratibhāmātrarūpadhṛt" eva pratibhānamātrarūpadhārī eva | na tu sthūlabhūtamayarūpadhārī | "vibhāti" sphurati | na hi dravaguṇayuktāt jalāt dravaguṇarahitaḥ taraṅgaḥ utpadyate | "ayaṃ sargaḥ" kathambhūtaḥ | "sthitaḥ" | kathaṃ | "satyānubhavavat" satyaḥ anubhavaḥ yasya | saḥ "satyānubhavaḥ" | sa iva tad"vat" | paramārthatas tu svapnavat pratibhānamātram eveti "vat"igrahaṇam || MoT_3,3.16 ||


atra dṛṣṭāntadvayaṃ kathayati
     dṛṣṭānto 'tra svapnapuraṃ svapnastrīsurataṃ tathā /
     asad apy arthasampattyā satyānubhavabhāsvaram // Mo_3,3.17 //
"atrā"smin sthāne | sargasya pratibhānamātrarūpatāyām iti yāvat | "svapnapuraṃ" svapnadṛṣṭaṃ puraṃ | "tathā" tadvat | "svapnastrīsurataṃ" svapnadṛṣṭastrīsurataṃ | "dṛṣṭāntaḥ" bhavati | kathambhūtam | "asad api" pratītimātrasāratvenāsatsvarūpam api | "arthasampattyā" arthakriyāsampādanena | "satyānubhavabhāsvaram" satyānubhavayuktavastuvat bhāsanaśīlam || MoT_3,3.17 ||



padmajasya dehābhāve 'pi dehabhānaṃ kathayati
     apṛthvyādimayo bhāti vyomākṛtir adehakaḥ /
     sadeha iva bhūteśaḥ svātmabhūḥ puruṣākṛtiḥ // Mo_3,3.18 //
"apṛthvyādimayaḥ" pṛthvyādivyatiriktasvarūpaḥ | ata eva "vyomākṛtiḥ" ākāśākṛtiḥ | ata eva ca "adehaḥ" ādhibhautikadeharahitaḥ | "svātmabhūḥ" padmajaḥ | "sadeha iva bhāti" sphurati | sadehakāryanānāvidhaprapañcakartṛtvāt | "svātmabhūḥ" kathambhūtaḥ | "bhūteśaḥ" sarvabhūtotpādakatvena sarvabhūtasvāmī | punaḥ kathambhūtaḥ | "puruṣākṛtiḥ" puruṣavat ākṛtiḥ yasya | saḥ tādṛśaḥ | anyathā śāstreṣu caturmukhatvakalpanāṃ na kuryād ity arthaḥ || MoT_3,3.18 ||


asyodayaśāntī tadabhāvaṃ ca kathayati
     sa cit saṅkalparūpatvād udety apy atha śāmyati /
     svāyattatvāt svabhāvasya nodeti na ca śāmyati // Mo_3,3.19 //
"cit" paramārthataḥ citsvarūpaḥ | "saḥ" padmajaḥ | "saṅkalparūpatvāt" cinmātrāśrayasvaparāmarśasvarūpasaṅkalparūpatven"odeti" prādurbhavati | "atha" udayānantaram | upa"śāmyaty" "api" śāntiṃ vrajati ca | saṅkalpasyodayaśāntiniyatādhāratvāt | tathā "saḥ" padmajaḥ | "svabhāvasya" cinmātrākhyasya svarūpasya | "svāyattatvāt" tad evāham iti parāmarśaviṣayatvāt | "na udeti na ca śāmyati" | na hi svabhāvāparaparyāyasya sadābhātasya cinmātrasyodayaśāntī yukte iti | tatra svātmatve niścitasya tatsvarūpasya ca padmajasyāpi te na yukte iti bhāvaḥ || MoT_3,3.19 ||



athāsyaiva jagatkāraṇatvaṃ kathayati
     brahmā saṅkalparahitaḥ pṛthvyādirahitākṛtiḥ /
     kevalaś cittamātrātmā kāraṇaṃ trijagatsthiteḥ // Mo_3,3.20 //
"saṅkalparahitaḥ" ātivāhikadeharahitaḥ | tathā "pṛthvyādirahitākṛtiḥ" sthūladeharahitaḥ | ata eva "kevalaḥ" advitīyaḥ | cinmātrarūpa iti yāvat | tathātve 'pi "cittamātrātmā" śuddhasaṅkalparūpaśuddhacittasvarūpaḥ | "brahmā" padmajaḥ | "trijagatsthiteḥ" trijagatsattāyāḥ | "kāraṇam" bhavati || MoT_3,3.20 ||



nanu advitīyāc cinmātrāt kasya preraṇayā śuddhamanorūpaḥ padmajaḥ uttiṣṭhatīty | atrāha
     saṅkalpa eṣa kacati yathā nāma svasambhavaḥ /
     vyomātmaiṣa tathā bhāti bhavatsaṅkalpaśailavat // Mo_3,3.21 //
"nāma" niścaye | "yathā eṣaḥ" sarvaiḥ anubhūyamānaḥ "saṅkalpaḥ" | "svasambhavaḥ" svotthaḥ | na tu parasambhavaḥ | "kacati" sphurati | "tathā eṣaḥ" śuddhamanorūpaḥ padmajaḥ "svasambhavaḥ" | "bhāti" sphurati | kathaṃ | "bhavatsaṅkalpaśailavat" | saṅkalpe dṛṣṭaḥ śailaḥ "saṅkalpaśailaḥ" | bhavataḥ saṅkalpaśailaḥ "bhavatsaṅkalpaśailaḥ" | sa iva "bhavatsaṅkalpaśailavat" | yathā bhavataḥ saṅkalpaśailaḥ svasambhavaḥ bhāti | tathety arthaḥ | saṅkalpasya ca svataḥ sphuraṇaṃ sarveṣu prasiddham eveti | sa eva sāmānyaviśeṣabhāvābhyāṃ dvir upamānatvenopāttaḥ || MoT_3,3.21 ||


asya padmajasyādhibhautikadeharāhityaṃ tribhiḥ ślokaiḥ sahetukaṃ kathayati
     ātivāhikataikāntavismṛtyā dṛḍharūḍhayā /
     ādhibhautikatā yena mudhā bhāti piśācavat // Mo_3,3.22 //
     idamprathamatodyogasamprabuddhamahāciteḥ |
     nodeti śuddhasaṃvittvād ātivāhikavismṛtiḥ || MoT_3,3.23 ||



     ādhibhautikatā tena nāsyodeti piśācikā /
     asatyā mṛgatṛṣṇeva mithyā jāḍyabhramapradā // Mo_3,3.24 //
"yena" yataḥ hetoḥ | "dṛḍharūḍhayā" prauḍhiṃ gatayā | "ātivāhikataikāntavismṛtyā" | "ātivāhikatāyāḥ" ātivāhikabhāvasya | sūkṣmatāyā iti yāvat | yā "ekāntavismṛtiḥ" atyantavismaraṇaṃ | tayā | "ādhibhautikatā" ādhibhautikabhāvaḥ | sthūlatā iti yāvat | "piśācavat mudhā" asatyaṃ | "bhāti" sphurati | aśuddhasya manasaḥ iti śeṣaḥ | "tena" tataḥ kāraṇāt | "asya" śuddhamanorūpasya padmajasya | "piśācikā" mithyābhūtapiśācarūpā | "ādhibhautikatā" ādhibhautikabhāvaḥ | sthūlabhāva iti yāvat | "na" "bhāti" na sphurati | "ādhibhautikatā" kathambhūtā | "jāḍyasya" jaḍatāyāḥ | "bhramaṃ" vaipulyaṃ | "pra"karṣeṇa da"dā"tīti tādṛśī | ādhibhautikatāsādanena hi manasaḥ jāḍyam adhikībhavati | "ādhibhautikatā" punaḥ kathambhūtā | "asatyā" asatyaṃ bhātety arthaḥ | kā "iva" | "mṛgatṛṣṇā iva" | yathā mṛgatṛṣṇā asatyā bhavati | tathety arthaḥ | nanu ādhibhautikatā ātivāhikatāvismṛtikāraṇikā bhavatu | kathaṃ sā tena śuddhamanorūpe padmaje na bhavatīty | atra ślokatrayamadhyagaṃ dvitīyaṃ ślokaṃ samarthakatvena kathayati "idam" iti | "idamprathamatayā" tatpūrvaṃ | yaḥ "udyogaḥ" svaparāmarśaṃ prati ābhimukhyaṃ | tena "samprabuddhā" svaparāmarśayuktā | yā "mahācitiḥ" cinmātram | tasya | tatsvarūpasyeti yāvat | "asya" śuddhamanorūpasya padmajasya | "śuddhasaṃvittvāt" bhedamalārūṣitasaṃvidyuktatvena | "ātivāhikavismṛtiḥ" bhāvapradhānanirdeśāśrayaṇena ātivāhikatāvismaraṇam | "nodeti" na sphurati | ata evāsyātivāhikatāvismṛtikāraṇikā ādhibhautikatā na bhavatīti bhāvaḥ | dṛṣṭaṃ hi svam eva bhedarūṣitasaṃvidaḥ aśuddhasya manasa eva sthūlapurādibhāvena bhānam iti nātrāyastam || MoT_3,3.22-24 ||



padmajasya manomātrarūpatvena tatkāryasya jagato 'pi manomātrarūpatvaṃ yogyatayā atidiśati
     manomātraṃ yadā brahmā na pṛthvyādimayātmakaḥ /
     manomātram ato viśvaṃ yad yatas tat tad eva hi // Mo_3,3.25 //
"yade"ti yata ity asyārthe | "yadā" yataḥ | "brahmā" padmajaḥ | manomātraṃ" śuddhamanomātraṃ" bhavati | "ataḥ viśvaṃ manomātraṃ" bhavati | "yataḥ" | "yat" vastu | "yataḥ" yasmāt vastunaḥ | bhavati | sattākartṛtāṃ bhajati | "tat" vastu | "tad eva" bhavati | mṛdaḥ sattākartṛtvaṃ bhajataḥ ghaṭasya mṛttvadarśanāt | "ato" jagataḥ manovat anutpattisatattvā evotpattir iti bhāvaḥ || MoT_3,3.25 ||



nanu padmajasya svakāraṇabhūtacinmātravyatiriktasahakārikāraṇābhāvena cinmātrasthūlatāmātrarūpam manomātrarūpatvam astu | tajjasya jagataḥ adṛṣṭādisahakārikāraṇasadbhāvāt kathaṃ manomātrarūpatvaṃ yujyate ity | atrāha
     ajasya sahakārīṇi kāraṇāni na santi yat /
     tajjasyāpi na santy eva tāni tasmāt tu kānicit // Mo_3,3.26 //
"ajasya" padmajasya | "yat" yataḥ kāraṇāt | "sahakārīṇi kāraṇāni na santi" | "tu" niścaye | "tasmāt" tataḥ kāraṇāt | "tajjasya" tasmād utpannasya jagataḥ | "kānicit" "tāni" kānicit sahakārīṇi | "na santy eva" | manaḥkāryāṇām adṛṣṭādīnāṃ manaḥ prati sahakāritvāyogāt | na hi yo yasmāt utpadyate sa eva tatsahakārī bhavitum arhati | svotpattisamaye svayam asattvāt | anyān praty eva sahakārikāraṇatvābhyupagame svotpattau sahakārikāraṇāntarāpekṣāyāḥ sthitatvāt | anyathā svasyāpi parān prati sahakārikāraṇatvāyogāt || MoT_3,3.26 ||



nanu tato 'pi kim ity | atrāha
     kāraṇāt kāryavaicitryaṃ tenātrāsti na kiñcana /
     yādṛśaṃ kāraṇaṃ śuddhaṃ kāryaṃ tādṛg iha sthitam // Mo_3,3.27 //
"tena" | yataḥ jagataḥ sahakārikāraṇāni na santi | tasmāt | "atra" padmajajagadviṣaye | "kāraṇāt" "kāryavaicitryaṃ" kāryabhedaḥ | "kiñcana" leśenāpi | "nāsti" | daṇḍādisahakārikāraṇasānnidhye eva mṛdo ghaṭākhyakāryavaicitryasya dṛṣṭatvāt | ataḥ "iha" "kāraṇaṃ yādṛśaṃ śuddhaṃ" bhavati | "kāryam tādṛk sthitaṃ" bhavati | bhinnatāpādakānāṃ sahakārikāraṇānām abhāvāt | ataḥ cinmātram eva jagad iti bhāvaḥ || MoT_3,3.27 ||



phalitaṃ siddhāntaṃ kathayati
     kāryakāraṇatādy atra na kiñcid upapadyate /
     yādṛg eva paraṃ brahma tādṛg eva jagattrayam // Mo_3,3.28 //
yataḥ "atra" cinmātrapadmajayoḥ padmajajagatoś ca | "kāryakāraṇatādi" kāryakāraṇabhāvādi | "kiñcit" leśenāpi | "nopapadyate" | ataḥ "paraṃ brahma" śuddhacinmātraṃ | "yādṛśaṃ" bhavati | "jagattrayam" padmajādirūpam jagattrayam | "tādṛśaṃ" bhavati | kāryakāraṇabhāvāder eva bhedāpādakatvāt || MoT_3,3.28 ||


nanu cinmātrād utpannasya śuddhamanorūpasya padmajasya cinmātrarūpatvaṃ bhavatu | śuddhamanorūpāt padmajād utpannasya trailokyasya tu kathaṃ tad yuktam ity | atrāha
     manastām iva yātena brahmaṇā tanyate jagat /
     ananyad ātmanaḥ śuddhād dravatvam iva vāriṇā // Mo_3,3.29 //
"manastām" padmajety aparanāmadheyayuktaśuddhamanobhāvam | "yāteneva" gateneva | "brahmaṇā" padārtharūpatayā bṛṃhitena śuddhacinmātreṇa | "śuddhāt ātmanaḥ" svasmāt | "ananyat" abhinnam | idaṃ "jagat tanyate" vistāryate | svātmani prakaṭīkriyata iti yāvat | ken"eva" | "vāriṇeva" yathā "vāriṇā" | "ātmanaḥ ananyat dravatvam" ādyaspandanāsamavāyikāraṇabhūtaḥ dravatvākhyaḥ guṇaḥ | vistāryate | tathety arthaḥ | manastāyām api paramārthataḥ cinmātratvānapāyād "iva"śabdopādānam | ataḥ jagato 'pi cinmātrād utpannatvena cinmātratvam eva yuktam iti bhāvaḥ || MoT_3,3.29 ||


nanu tarhi katham ayaṃ bhedo bhāsate ity | atrāha
     manasā tanyate sarvam asad evedam ātatam /
     yathā saṅkalpanagaraṃ yathā gandharvapattanam // Mo_3,3.30 //
"manasā" padmajeti prasiddhena śuddhamanasā | "ātataṃ" samantāt sphurat | "idam" tanuḥ bhāsamānaṃ | "idaṃ" samastaṃ jagat | "tanyate" paraṃ brahmaṇaḥ bhinnayā sattayā prakaṭīkriyate | "idaṃ sarvaṃ" kathambhūtam | "asad eva" asatsvarūpam eva | na tu satsvarūpaṃ | kiṃ "yathā" | "saṅkalpanagaraṃ yathā" | yathā saṅkalpanagaraṃ asad eva bhavati | tathety arthaḥ | punaḥ kiṃ "yathā" | "gandharvapattanaṃ yathā" | yathā gandharvapattanaṃ | yathā gandharvapattanaṃ sad eva bhavati | tathety arthaḥ | gandharvāḥ hi svāvāsārthaṃ kalpanayā śūnye nagaraṃ racayanti | tad eva gandharvanagaram ucyate | cinmātrād utthitena "manasā" eva "idaṃ" bhinnatayā vistāryate | anyathā manasaḥ kimartham utthānaṃ syād iti bhāvaḥ || MoT_3,3.30 ||



atyantaniścayatvena punar api ādhibhautikatāyāḥ asatyatvaṃ kathayati
     ādhibhautikatā nāsti rajjvām iva bhujaṅgatā /
     brahmādayaḥ prabuddhās tu kathaṃ tiṣṭhantu tatra te // Mo_3,3.31 //
"brahmādaya" ity | "ādi"śabdena śuddhabuddhirūpasya viṣṇoḥ śuddhāhaṅkārarūpasya rudrasya ca grahaṇam | "prabuddhāḥ" atyantaśuddhatvena prakṛṣṭena bodhena yuktāḥ || MoT_3,3.31 ||


daṇḍāpūpikānyāyenādhibhautikatāyāḥ asatyatāṃ punar api kathayati
     ātivāhika evāsti na prabuddhamateḥ kila /
     ādhibhautikadehasya carcaivātra kutaḥ kathaṃ // Mo_3,3.32 //
"kile"ti niścaye | "prabuddhamateḥ" samyak niścitamateḥ puruṣasya | "ātivāhika eva" ativahanaśīlaḥ sūkṣmaḥ deha eva | "nāsti" | svasmin cinmātrarūpatājñānāt | "atrā"smin prabuddhamatau | "ādhibhautikadehasya" "carcā eva" kathā eva | "kutaḥ" syāt | "kathaṃ" syāt || MoT_3,3.32 ||


ādhibhautikadeharahitāt padmajād utpannasya jagataḥ asatyatvaṃ kathayati
     manonāmno manuṣyasya vividhākāradhāriṇaḥ /
     manorājyaṃ jagad iti satyarūpam iva sthitam // Mo_3,3.33 //
"vividhān ākārān" "dhār"ayatīti tādṛśasya "manonāmnaḥ" mana iti nāmadheyayuktasya | "manuṣyasya" ādhibhautikadeharahitasya padmajākhyasya manuṣyasya | "manorājyam" manaḥkalpanā | "jagad" "iti sthitam" jagadrūpeṇa sthitam | bhavati | "jagat" kathambhūtam "iva" | "satyarūpam iva" | paramārthatas tu kalpanāmātrarūpatvān na satyarūpam it"īva"śabdopādānam | svapnasya cātra dṛṣṭāntatvaṃ sphuṭam eveti nātrāyastam | "manonāmnaḥ manuṣyasya manorājyam" iti rāhoḥ śira itivaj jñeyam || MoT_3,3.33 ||


nanu śāstreṣu caturmukhasya kasyāpi devaviśeṣasyaiva padmajatvam uktam asti | tat kathaṃ tvayā śuddhasya manasa eva tad uktam ity | atrāha
     mana eva viriñcaṃ tvaṃ viddhi saṅkalpanātmakam /
     svavapuḥ sphāratāṃ nītvā manasedaṃ vitanyate // Mo_3,3.34 //
"tvam" | "saṅkalpanātmakam" cinmātroktasvaparāmarśasvarūpam | "manaḥ" śuddhaṃ manaḥ | "viriñcaṃ" padmajaṃ | "viddhi" jānīhi | yataḥ "svavapuḥ" svasvarūpam | "sphāratāṃ" vistīrṇatāṃ | "nītvā" | "manasā idaṃ" jagat | "vitanyate" vistāryate | utpādyate iti yāvat | viriñcasya hi viriñcatvam etad eva | yaj jagad utpādyate tac ca manasā eva svapnanyāyena sphuṭam utpādyate | iti tasyaiva viriñcatvam yuktam | caturmukhadevaviśeṣakalpanā tu sthūladṛṣṭīn praty eveti bhāvaḥ || MoT_3,3.34 ||


viriñcamanasoḥ atyantam abhinnatvaṃ kathayati
     viriñco manaso rūpaṃ viriñcasya mano vapuḥ /
     pṛthvyādi vidyate nātra tena pṛthvyādi kalpitam // Mo_3,3.35 //
"viriñcaḥ" padmajaḥ | "manasaḥ" śuddhasya manasaḥ | "rūpaṃ" svarūpaṃ | bhavati | "manaḥ" śuddhaṃ manaḥ | "viriñcasya" padmajasya | "vapuḥ" svarūpaṃ | bhavati | utpādanākhyaikakāryakāritvāt | "atrā"nayoḥ viriñcamanasoḥ | "pṛthvyādi na vidyate" | śuddhacinmātrotthitatvena śuddhacinmātratvānapāyāt | "tena" tataḥ kāraṇāt | "pṛthvyādi" bhūmyādi | "kalpitam" kalpanāyām bhāvitaṃ bhavati | svapnavad iti śeṣaḥ || MoT_3,3.35 ||



nanu viriñcarūpaṃ manaḥ upādānakāraṇaṃ vinā kathaṃ jagad utpādayati | na hi kuśalasyāpi kulālasya mṛdākhyam upādānakāraṇaṃ vinā ghaṭodbhāvane śaktir astīty | atrāha
     padmākṣe padminīvāntar manohṛdy asti dṛśyatā /
     manodṛśyadṛśau bhinne na kadācana kiñcana // Mo_3,3.36 //
svārthe bhāvapratyayaḥ ārṣaḥ | tenāyam arthaḥ | "dṛśyatā" dṛśyam | "manohṛdi" manaso 'ntaḥ | "asti" tiṣṭhati | sarvaśaktiyuktāc cinmātrāt tathaivotthānāt | anyathā dṛśyabhāvena sphuraṇāyogāt | kā "iva" | "padminīva" | yathā "padminī" kamalinī | "padmākṣe" padmabīje | "antaḥ asti" | tathety arthaḥ | padminyāś ca padmākṣāntargatatvaṃ tataḥ nirgamenānumeyam | na hi yat yadantar na bhavati tat tataḥ niryāti | nirjalāt ghaṭād iva jalam | ataḥ "manodṛśyadṛśau" manodṛk dṛśyadṛk ca | "kadācana" jātu | "kiñcana" leśenāpi | "bhinne na" bhavataḥ | upādānopādeyabhāvena sthitatvāt | ataḥ svato bhinnasyopādānakāraṇasyātrāpekṣā nāstīti bhāvaḥ || MoT_3,3.36 ||



etad eva dṛṣṭāntāntareṇa dṛḍhayati
     tathā cātra bhavatsvapnasaṅkalpaś cittarājyadhīḥ /
     svānubhūtyaiva dṛṣṭāntas tasmād dhṛdy asti dṛśyabhūḥ // Mo_3,3.37 //
spaṣṭam || MoT_3,3.37 ||



     tasmāc cittavikalpasthaḥ piśāco bālakaṃ yathā /
     vinihanty evam eṣāntar draṣṭāraṃ dṛśyarūpikā // Mo_3,3.38 //
"draṣṭāram" manorūpaṃ draṣṭāram || MoT_3,3.38 ||


     yathāṅkuro 'ntar bījasya saṃsthito deśakālataḥ /
     karoti bhāsuraṃ dehaṃ tanoty evaṃ hi dṛśyadhīḥ // Mo_3,3.39 //
idaṃ ślokatrayaṃ ca prathamasargāntyabhāge gatam iti na punar āyastam || MoT_3,3.39 ||



sargāntaślokena siddhāntaṃ kathayati
     sac cen na śāmyati kadācana dṛśyaduḥkhaṃ
     dṛśye tv aśāmyati na boddhari kevalatvam /
     dṛśye tv asambhavati boddhari boddhṛbhāvaḥ
     śāmyet sthite 'pi hi tad asya vimokṣam āhuḥ // Mo_3,3.40 //
idam anubhūyamānam "dṛśyaduḥkham" dṛśyākāraṃ duḥkham | "sat" paramārthasat | "cet" bhavati | tadā "kadā"cit na śāmyati | nābhāvo vidyate sata iti nyāyād ity arthaḥ | "dṛśye aśāmyati" sati | "boddhari" draṣṭari | "kevalatvaṃ" kevalībhāvaḥ | aboddhṛrūpateti yāvat | "na" bhavati | svavyatiriktasya dṛśyasthabodhyatayā sthitatvāt | mokṣābhāvaprakāram uktvā mokṣaṃ kathayati | "dṛśya" iti | "tu" pakṣāntare | "dṛśye asambhavati" sati | uktanyāyena anutpattisatattvotpattiyukte sati | "boddhari" draṣṭari | "boddhṛbhāvaḥ śāmyet" śāntiṃ vrajet | na hi dṛśyarahitasya draṣṭuḥ draṣṭṛtvaṃ nāma kiñcid asti | "dṛśye" kathambhūte "'pi" | "sthite 'pi" | bhāsamānatvāt sthitiṃ bhajaty api | nanu tena boddhṛbhāvaśamanena kiṃ setsyatīty | atrāha | "hi tad asye"ti | "hi" niścaye | paṇḍitāḥ "tat" boddhṛbhāvaśamanam | "asya" boddhuḥ | "vimokṣaṃ" viśiṣṭāṃ muktim | "āhuḥ" kathayanti | dṛśyānaunmukhyasyaiva mokṣatvād | iti śivam || MoT_3,3.40 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe tṛtīyaḥ sargaḥ || 3,3 ||

*********************************************************************

oṃ śrīvālmīkiḥ bharadvājaṃ prati kathayati
     kathayaty evam uddāmavacanaṃ munināyake /
     śrotum ekarase jāte jane mauna iva sthite // Mo_3,4.1 //
     śānteṣu kiṅkiṇījālasvaneṣu spandanaṃ vinā /
     pañjarāntarahārītaśukeṣv apy astakeliṣu // Mo_3,4.2 //
     suvismṛtavilāsāsu sthitāsu lalanāsv api /
     citrabhittāv iva nyaste samaste rājasadmani // Mo_3,4.3 //
     muhūrtaśeṣam abhavad divasaṃ madhurātapam /
     vyavahāro ravikaraiḥ saha tānavam āyayau // Mo_3,4.4 //
"munināyake" śrīvasiṣṭhe | "evam" anena prakāreṇa | "uddāmavacanam" arthagūḍhaṃ vacanaṃ | "kathayati" sati | ata eva "maune iva sthite" maunākhyavratayukta iva sthite | "jane" sabhājane | "śrotum ekarase" kevalāsvādayukte | "jāte" sati | tathā "spandanaṃ vinā" svādhārabhūtastryādikṛtaṃ spandanaṃ vinā | svādhārabhūtastryādikṛtaspandarāhityenety arthaḥ | "kiṅkiṇījālasvaneṣu" satsu | tathā "pañjarāntareṣu" sthitāḥ ye "hārītaśukāḥ" | teṣu "api astakeliṣu" tyaktakrīḍeṣu satsu | tathā "lalanāsu suvismṛtavilāsāsu" atyantavismṛtavilāsāsu | "sthitāsu" satīṣu | tathā "samaste rājasadmani" sakale rājagṛhe | "citrabhittau nyaste iva" citralikhite iva sati | "madhurātapam" mandātapam | "divasam muhūrtaśeṣam" ghaṭikādvayaśeṣam | "abhavat" | tathā "vyavahāraḥ" lokavyavahāraḥ | "ravikaraiḥ saha tānavam āyayau" || MoT_3,4.1-4 ||



anyat kiṃ tadābhūd ity apekṣāyām āha
     vavur utphullakamalaprakaronmadamāṃsalāḥ /
     vāyavo madhuraspandaṃ śravaṇārtham ivāgatāḥ // Mo_3,4.5 //
"vāyavaḥ madhuraspandam" komalaspandam | "vavuḥ" vānti sma | kathambhūtāḥ | "utphullāḥ" ye "kamalaprakarāḥ" kamalasamūhāḥ | teṣu "unmadāḥ" saṅkocakāritvāt udgatarūpāḥ ca te "māṃsalāś" ca | tādṛśāḥ "vāyavaḥ" | kathambhūtā "iva" | "śravaṇārtham" munivākśravaṇārtham | "āgatā iva" | yo 'pi śravaṇārtham āgacchati so 'pi madhuraspandam eva vāti || MoT_3,4.5 ||



     śrutaṃ cintayituṃ bhānur ivāhoracanābhramam /
     tatyājaikāntam agamac chūnyam astagires taṭam // Mo_3,4.6 //
"bhānuḥ" sūryaḥ | "ahoracanābhramam" dinanirmāṇārthaṃ bhramaṇam | "tatyāja" tyaktavān | tathā "śūnyaṃ" | ata eva "ekāntam" vijanam | "astagireḥ taṭam agamat" gatavān | kiṃ kartum "iva" | "śrutam" śravaṇaviṣayīkṛtam munivākkadambakam | "cintayitum iva" mananaviṣayīkartum iva | yo 'pi hi śrutaṃ kiñcid upadeśādikaṃ cintayitum icchati so 'pi kriyārūpam bhramam tyajati | ekāntaṃ ca gacchati || MoT_3,4.6 ||


     uttasthur mihikārambhaśyāmatā vanabhūmiṣu /
     vijñānaśravaṇād antaḥ śītalāḥ śāntatā iva // Mo_3,4.7 //
"vanabhūmiṣu mihikārambhaśyāmatāḥ" nīhārārambhaśyāmatāḥ | "uttasthuḥ" prādurbhūtāḥ | dināvasāne hi mihikāḥ uttiṣṭhanti | "mihikārambhaśyāmatāḥ" kā "iva" | "śāntatāḥ iva" kṣobharāhityānīva | yathā "śītalāḥ" santāpanāśakatvena śītalasvabhāvāḥ | "śāntatāḥ" | "vijñānaśravaṇāt" śrīvasiṣṭhoktavijñānaśravaṇena | "antaḥ" śrotṛjanamanassu | "uttasthuḥ" | tathety arthaḥ || MoT_3,4.7 ||


     babhūvur alpasañcārā janā daśasu dikṣv api /
     sāvadhānatayā śrotum iva santyaktaceṣṭitāḥ // Mo_3,4.8 //
dināvasāne svabhāvasiddhaṃ "janānām alpasañcāritvam" śravaṇārtham kṛtena ceṣṭitatyāgenotprekṣitam || MoT_3,4.8 ||



     chāyā dīrghatvam ājagmur vāsiṣṭhaṃ varṇanakramam /
     iva śrotum aśeṣāṇāṃ vastūnāṃ dīrghakandharāḥ // Mo_3,4.9 //
sāyaṃsamaye hi "chāyāḥ dīrghībhavanti" | yo 'pi kiñcic chrotum icchati so 'pi "dīrghakandharo" bhavatīti svabhāvadvayakathanam || MoT_3,4.9 ||


     pratīhāraḥ puraḥ prahvo bhūtvāha vasudhādhipam /
     deva snānadvijārcāsu kālo hy atigato bhṛśam // Mo_3,4.10 //
"prahvo bhūtvā" namno bhūtvā | kim "āhe"ti karmāpekṣāyām uttarārdham karmatvena kathayati "deve"ti | "hi" niścaye || MoT_3,4.10 ||



śrīvasiṣṭhakṛtaṃ vāksaṃharaṇaṃ kathayati
     tato vasiṣṭho bhagavān saṃhṛtya madhurāṃ giram /
     adya tāvan mahārāja śrutam etāvad astu vaḥ // Mo_3,4.11 //
     prātar anyad vadiṣyāma ity uktvā maunavān abhūt /
     ity ākarṇyaivam astūktvā bhūpatir bhūtivṛddhaye // Mo_3,4.12 //
     puṣpārghyapādyasammānadakṣiṇādānapūjayā /
     sa devarṣimunīn viprān pūjayām āsa sādaram // Mo_3,4.13 //
śrotṝn śravaṇotsukān jñātvā āha "prātar" iti | "ākarṇyaiva" | na tu prativādaṃ kṛtvā | "saḥ" daśarathaḥ || MoT_3,4.11-13 ||



     athottasthau sabhā sarvā sarājamunimaṇḍalā /
     kuṇḍalākīrṇaraśmyoghapariveśāvṛtānanā // Mo_3,4.14 //
"sabhā" janasamūhaḥ | sabhāṃ viśinaṣṭi | "kuṇḍale"ti | "kuṇḍalānām ākīrṇaḥ" samantāt visārī yaḥ "raśmyoghaḥ" kiraṇasamūhaḥ | tasya yaḥ "pariveśaḥ" maṇḍalaṃ | ten"āvṛtāni" janamukhāni | sabhāsamukhāni yasyāṃ | sā || MoT_3,4.14 ||



     parasparāṃsasaṅghaṭṭaraṇatkeyūrakaṅkaṇā /
     hārabhārāhatasvarṇapaṭṭābhorastaṭāntarā // Mo_3,4.15 //
"parasparaṃ aṃsasaṅghaṭṭāḥ" | tena milantaḥ | ata eva "raṇantaḥ" "keyūrāḥ kaṅkaṇāni" ca yasyāṃ | sā | "hārabhāraiḥ āhatāni suvarṇapaṭṭābhāni" "urastaṭāntarāṇi" urastaṭamadhyāni yasyāṃ | sā || MoT_3,4.15 ||



     śekharotsargaviśrāntaprabuddhamadhupavrajaiḥ /
     saghuṅghumaśirobhāgā patadbhir iva mūrdhajaiḥ // Mo_3,4.16 //
"śekhareṣu" sabhāsadapuṣpaśekhareṣu | "utsargeṇa" gandhodgiraṇena | "viśrāntāḥ" viśrāntiyuktāḥ | tathā "prabuddhāḥ" gandhaghrāṇane caturāḥ | ye "madhupāḥ" bhramarāḥ | teṣāṃ "vrajaiḥ" samūhaiḥ | "saghuṅghumaśirobhāgā" ghuṅghumaśabdayuktajanaśirodeśayuktā | "madhupavrajaiḥ" kair "iva" | "patadbhiḥ" patanaśīlaiḥ | "mūrdhajaiḥ" keśair "iva" kṛṣṇavarṇatvāt || MoT_3,4.16 ||


     kāñcanābharaṇoddyotakanakīkṛtadiṅmukhāḥ /
     buddhisthamunivāgarthasaṃśāntendriyavṛttayaḥ // Mo_3,4.17 //
     jagmur nabhaścarā vyoma bhūcarā bhūmimaṇḍalam /
     cakrur dinasamācāraṃ svaṃ sarve sveṣu sadmasu // Mo_3,4.18 //
"kāñcanābharaṇānāṃ" yaḥ "uddyotaḥ" prakāśaḥ | tena "kanakīkṛtāni" kanakarūpāṇi kṛtāni | "diṅmukhāni" yaiḥ | te tādṛśāḥ | tathā "buddhisthaḥ" buddhau sphuraṇaśīlaḥ | na tu vismāritaḥ | yaḥ "munivāgarthaḥ" | tena "saṃśāntāḥ" svaviṣayān prati anaunmukhyaṃ gatāḥ | "indriyavṛttayaḥ" indriyavyāpārāḥ ye | te tādṛśāḥ | "nabhaścarāḥ" ākāśacāriṇaḥ | "vyoma jagmuḥ" | "bhūcarāḥ bhūmimaṇḍalam jagmuḥ" | tataḥ "sarve" samastāḥ nabhaścarādayaḥ | "sveṣu sadmasu" nijeṣu gṛheṣu | "svaṃ dinasamācāraṃ cakruḥ" || MoT_3,4.17-18 ||



     etasminn antare śyāmā yāminī samadṛśyata /
     janasaṅghātanirmukte gṛhe bālāṅganā yathā // Mo_3,4.19 //
"etasmin antare" asmin samaye | "śyāmā" rātriḥ | "yāminī" yāmayuktā | "janasaṅghātanirmukte" janasamūhatyakte || MoT_3,4.19 ||



     deśāntaraṃ bhāsayituṃ yayau divasanāyakaḥ /
     sarvatrālokakartṛtvam eva sātpuruṣaṃ vratam // Mo_3,4.20 //
"ālokakartṛtvam" ālokakartṛbhāvaḥ | "sātpuruṣaṃ" satpuruṣasambandhinam || MoT_3,4.20 ||



     udabhūd abhitaḥ sandhyā tārānikaradhāriṇī /
     utphullakiṃśukavanā vasantaśrīr ivoditā // Mo_3,4.21 //
"udabhūt" prādurbhūtā || MoT_3,4.21 ||


     cūtanīpakadambāgragrāmacaityagṛhodare /
     nililyire khagāś citte tadaṇḍavṛttayo yathā // Mo_3,4.22 //
"khagāḥ" pakṣiṇaḥ | "nililyire" nilīnāḥ | kutra | "cūtanīpakadambāgragrāmacaityagṛhodare" | "cūtāś" ca "nīpāś" ca "kadambāgrāṇi" ca "grāmacaityāni" ca "gṛhodarāṇi" ca | tatra | "khagāḥ" kāḥ "yathā" | "tāḥ" "vṛttayaḥ" "yathā" | "yathā tāḥ vṛttayaḥ" śrāvakajanamanovyāpārāḥ | "citte nililyire" | tathety arthaḥ || MoT_3,4.22 ||



sandhyārāgāvirbhāvaṃ kathayati
     bhānor bhāsā bhūṣitair meghaleśaiḥ
     kiñcit kiñcit kuṅkumacchāyayeva /
     pāścātyo 'driḥ pītavāsās tamo'bdhes
     tārāhāraśrīyutaḥ khaṃ sametaḥ // Mo_3,4.23 //
"kuṅkumacchāyayā" "iva" kuṅkumaracanāsadṛśayā | "bhānoḥ bhāsā" sūryasya bhāsā | "kiñcit kiñcit bhūṣitaiḥ" | pītatāṃ nītair iti yāvat |" meghaleśaiḥ" meghakhaṇḍaiḥ | upalakṣitaḥ "pāścātyaḥ" "adriḥ" astaśailaḥ | "tamo'bdheḥ" tamaḥākhyasya samudrasya | "pītavāsāḥ" śrīnārāyaṇaḥ āsīt | "pītavāsoyuktaś" cāsīt | bhānoḥ bhāsā bhūṣitānāṃ meghaleśānām eva pītavāsorūpatvāt | abdheś ca pītavāsasā śrīnārāyaṇena yuktatvaṃ yuktaṃ eva | "pāścātyaḥ adriḥ" kathambhūtaḥ | "tārāhāraśrīyutaḥ" | "tārā" eva "hāraḥ" yasya | saḥ "tārāhāraḥ" | "śriyā" śobhayā | yutaḥ | "śrīyutaḥ" | tārāhāraś cāsau śrīyutaś ca "tārāhāraśrīyutaḥ" | punaḥ kathambhūtaḥ | "kham" ākāśaṃ | "sametaḥ" gataḥ | ākāśavyāpīty arthaḥ | anyathā tārāhāratvam asambhavi syāt | śrīnārāyaṇasya ca tārāhārayuktatvaṃ lakṣmīyuktatvaṃ balyākramaṇena khasametatvaṃ ca sthitam eva || MoT_3,4.23 ||



sandhyāśāntipūrvaṃ tamaḥsamutthānam kathayati
     pūjām ādāya sandhyāyāṃ prayātāyāṃ yathāgatam /
     andhakārāḥ samuttasthur vetālavalayā iva // Mo_3,4.24 //
spaṣṭam || MoT_3,4.24 ||



     avaśyāyakaṇaspandī helāvidhutapallavaḥ /
     komalaḥ kumudāśaṃsī vavāv āśītalo 'nilaḥ // Mo_3,4.25 //
"kumudāśaṃsī" kumudagandheneti bhāvaḥ || MoT_3,4.25 ||


     paramāndhyam upājagmur diśo 'pi sphuṭatārakāḥ /
     lambadīrghatamaḥkeśyo vidhavā iva yoṣitaḥ // Mo_3,4.26 //
"lambāni dīrghatamāṃsy" eva "keśāḥ" yāsāṃ | tāḥ || MoT_3,4.26 ||



     āyayau bhuvanaṃ tejaḥkṣīrapūreṇa pūrayan /
     rasāyanamayākāraḥ śaśikṣīrārṇavo nabhaḥ // Mo_3,4.27 //
"tejaḥ" eva "kṣīrapūraḥ" | tena | "rasāyanamayākāraḥ" amṛtamayākāraḥ || MoT_3,4.27 ||



     jagmus timirasaṅghātāḥ palāyya kvāpy adṛśyatām /
     śrutajñānagiraś cittān mahīpānām ivājñatāḥ // Mo_3,4.28 //
"śrutāḥ jñānagiraḥ" vasiṣṭhoktāḥ jñānavācaḥ yena | tat | tādṛśāt | "mahīpānāṃ" daśarathaprabhṛtīnāṃ | "ajñatāḥ" maurkhyāṇi || MoT_3,4.28 ||


     ṛṣayo bhūmipālāś ca munayo brāhmaṇās tathā /
     cetasīva vicitrārthāḥ svāspadeṣu viśaśramuḥ // Mo_3,4.29 //
"vicitrārthāḥ" śrīvasiṣṭhagirāṃ sambandhino nānāvidhā arthāḥ | "svāspadeṣu" svagṛheṣu | "viśaśramuḥ" viśrāntiṃ cakruḥ || MoT_3,4.29 ||



     yamakāyopamā śyāmā yayau timiramāṃsalā /
     āyayau mihikākārā tatra teṣām uṣā śanaiḥ // Mo_3,4.30 //
"yamakāyopamā" yamaśarīrasadṛśī | "uṣā" | "teṣām" ṛṣīṇāṃ bhūmipālānāṃ ca || MoT_3,4.30 ||


     alakṣyatām upājagmus tārā nabhasi bhāsurāḥ /
     prabhātapavaneneva hṛtāḥ kuṅkumavṛṣṭayaḥ // Mo_3,4.31 //
spaṣṭam || MoT_3,4.31 ||


     dṛśyatām ājagāmārkaprabhonmīlitalocanā /
     vivekavṛttir mahatāṃ manasīva navodgatā // Mo_3,4.32 //
"vivekavṛttiḥ" vivekākhyo manovyāpāraḥ || MoT_3,4.32 ||



     sabhāṃ punar upājagmur nabhaścaramahīcarāḥ /
     hyastanena krameṇaiva kṛtaprātastanakramāḥ // Mo_3,4.33 //
"nabhaścaramahīcarāḥ hyastanena krameṇa eva sabhām ājagmur" iti sambandhaḥ || MoT_3,4.33 ||


     sā pūrvasanniveśena viveśa vipulā sabhā /
     babhūvāspanditākārā vātamukteva padminī // Mo_3,4.34 //
"pūrvasanniveśena" pūrvaracanayā | "aspanditākāratvaṃ" ca "sabhāyāḥ" śrīvasiṣṭhopadeśaśravaṇakutūhalena jñeyam || MoT_3,4.34 ||


     atha prasaṅgam āsādya rāmo madhurayā girā /
     uvāca muniśārdūlaṃ vasiṣṭhaṃ vadatāṃ varam // Mo_3,4.35 //
"prasaṅgam āsādya" | anyathā dhārṣṭyākhyadoṣaprasaṅgaḥ syād iti bhāvaḥ || MoT_3,4.35 ||


kim uvācety apekṣāyām āha
     bhagavan manaso rūpaṃ kīdṛśaṃ vada me sphuṭam /
     yasmāt teneyam akhilā tanyate doṣamañjarī // Mo_3,4.36 //
kiṃ tava manorūpakathanenety | atrāha "yasmād" iti | "tena" manasā | "iyam" sṛṣṭirūpā || MoT_3,4.36 ||


śrīvasiṣṭhaḥ uttaraṃ kathayati
     rāmāsya manaso rūpaṃ na kiñcid api dṛśyate /
     nāmamātrād ṛte vyomno yathā śūnyajaḍākṛteḥ // Mo_3,4.37 //
he "rāmā"smābhiḥ "asya manasaḥ nāmamātrād ṛte" nāmamātravyatirekeṇa | "kiñcid api rūpaṃ na dṛśyate" | nāmamātram eva manasaḥ asti na rūpam iti bhāvaḥ | "asya manasaḥ" kathambhūtasya | "śūnyā" vicārāsahatvena na kiñcidrūpā | "jaḍā" sākṣigrahaṇāpekṣasiddhikatvena jāḍyaguṇayuktā | "ākṛtiḥ" svarūpaṃ yasya | tat | tādṛśasya kasya "yathā" | "vyomnaḥ yathā" | yathā vyoma śūnyajaḍākṛti bhavati | tathety arthaḥ || MoT_3,4.37 ||



etad eva dṛḍhīkaroti
     na bāhye nāpi hṛdaye sadrūpaṃ vidyate manaḥ /
     sarvatraiva sthitaṃ caitad viddhi rāma yathā nabhaḥ // Mo_3,4.38 //
"manaḥ bāhye sadrūpaṃ na vidyate" bāhyendriyaiḥ adṛśyamānatvāt | "hṛdaye 'pi" hṛdayadeśe 'pi | "sadrūpaṃ na vidyate" | na hi hṛdayadeśe mano nāma kiñcil labhyate | he "rāma" | tvam | "etat" manaḥ | "sarvatraiva" bāhye hṛdaye ca | "sthitaṃ viddhi" jānīhi | saṅkalpākhyasya tatkāryasya bāhye hṛdaye ca sphuramāṇatvāt | saṅkalpo 'pi hi bāhyaṃ ghaṭādikaṃ hṛdayasthaṃ sukhādikaṃ ca viṣayīkaroti | "manaḥ" kiṃ "yathā" | "nabho yathā" | yathā nabhaḥ "sarvatraiva sthitaṃ" bhavati | tathety arthaḥ || MoT_3,4.38 ||



nanu tathāpy asya svarūpaṃ vaktavyaṃ | na hi sarvathā asataḥ sarvatra sthitatvaṃ yuktam ity | atrāha
     idam asyāsad utpannaṃ mṛgatṛṣṇāmbusannibham /
     rūpaṃ tu śṛṇu saṅkṣepād dvitīyendubhramopamam // Mo_3,4.39 //
tvaṃ | "asya" manasaḥ | "asat utpannam" mithyā prādurbhūtam | ata eva "mṛgatṛṣṇāmbusannibham" | tathā "dvitīyendubhramopamam" | "idam" anubhūyamānam | "rūpaṃ" svarūpaṃ | "saṅkṣepāt śṛṇu" || MoT_3,4.39 ||



manaḥsvarūpam eva kathayati
     sādho yad etad arthasya pratibhānaṃ prathāṃ gatam /
     sato vāpy asato vāpi tan mano viddhi netarat // Mo_3,4.40 //
he "sādho" | "sataḥ" "asataḥ vā arthasya" padārthasya | "yat etat pratibhānam" sphuraṇam | padārthatayā anusandhānam iti yāvat | "prathāṃ" dārḍhyaṃ | "gataṃ" bhavati | tvaṃ "tat manaḥ viddhi" | "itarat" tārkikādibhiḥ vikalpitaṃ paramāṇvādirūpaṃ | "manaḥ" "na" bhavati | "sataḥ asato ve"ti vādibhedam āśrityoktam || MoT_3,4.40 ||


punaḥ punaḥ etad eva kathayati
     yad arthapratibhānaṃ tan mana ity abhidhīyate /
     anyan na kiñcid apy asti mano nāma kadācana // Mo_3,4.41 //
"arthapratibhānam" artheṣv arthatāsphuraṇam || MoT_3,4.41 ||
     saṅkalpanaṃ mano viddhi saṅkalpāt tan na bhidyate /
     yathā dravatvāt salilaṃ tathā spando yathānilāt // Mo_3,4.42 //
spaṣṭam || MoT_3,4.42 ||


     yatra saṅkalpanaṃ tatra tan mano 'ṅga tathā sthitam /
     saṅkalpamanasī bhinne na kadācana kecana // Mo_3,4.43 //
"yatra" yasyām avasthāyāṃ | "saṅkalpanaṃ" bhavati | he "aṅga" | "tatra" tasyām avasthāyāṃ | "tat" prasiddhaṃ | "manaḥ" "tathā" tena saṅkalpanākhyena rūpeṇa | "sthitaṃ" bhavati | "kecana" anirvācye | "saṅkalpamanasī" | "kadācana" jātu | "bhinne na" bhavataḥ | ekasvarūpatvāt || MoT_3,4.43 ||


     satyam asty athavāsatyaṃ yad arthapratibhāsanam /
     tāvanmātraṃ mano viddhi tad brahmaiṣa pitāmahaḥ // Mo_3,4.44 //
"satyam athavā asatyaṃ yat arthapratibhāsanam" arthasphuraṇam | "asti" | tvaṃ | "tāvanmātraṃ tat" arthapratibhāsanam | "manaḥ" cittaṃ | "viddhi" jānīhi | "tat" arthapratibhāsanarūpaṃ manaḥ | "eṣaḥ" śāstreṣu kathitaḥ | "pitāmahaḥ" pitāmahety aparaparyāyaḥ "brahmā" bhavati | sarvasṛṣṭikāraṇatvāt | sṛṣṭikāraṇasyaiva śāstreṣv api brahmatvakathanāt || MoT_3,4.44 ||


svapnādau sarvair anubhūyamānātivāhikadeharūpatvaṃ manasaḥ kathayati
     ātivāhikadehātmā mana ity abhidhīyate /
     ādhibhautikabuddhis tu sadā dhīs tu cirasthitiḥ // Mo_3,4.45 //
paṇḍitaiḥ "ātivāhikasya" kṣaṇāntare varṣaprāpyadeśaprāptyā sphuṭam ativahanaśīlasya | "dehasyā"rthāt svapnasaṅkalpādau pratibhāsamānasya dehasy"ātmā" svarūpaṃ | "mana ity abhidhīyate" | na tu tārkikābhimataḥ paramāṇuḥ | na hi tasya proktasvarūpam ativahanaṃ yujyate | tadārabdhe sthūladehe tadadarśanāt | etatprasaṅgena buddhidārḍhyasyādhibhautikadehatvaṃ sādhayati "ādhibhautike"ti | "tu" vyatireke | paṇḍitaiḥ "ādhibhautikabuddhiḥ" ādhibhautikadehākārā buddhiḥ | ādhibhautikadehasvarūpam iti yāvat | "cirasthitiḥ dhīḥ" iti dārḍhyaṃ gatā ātivāhikadehaviṣayā buddhir iti | "sadābhidhīyate" | manaḥsvarūpātivāhikadehaviṣayā buddhir eva hi dārḍhyaṃ gatādhibhautikabhāvena sphurati | na tu māṃsamayaḥ ādhibhautiko nāma kaścit pṛthag asti yathā tathā sato 'pi tasya buddhiviṣayatvaṃ vinā asatkalpatvāt | buddhiviṣayatve tu buddhirūpatvānapāyāt | viṣayo hi sa evocyate yaḥ viṣayyagrastha iva bhāsate | anyathā pītadravyasyāpi nīlajñānaviṣayatvāpātāt | dvitīyaḥ "tu"śabdaḥ pādapūraṇārthaḥ || MoT_3,4.45 ||



dṛśyatvasādhanārthaṃ manasaḥ dṛśyaparyāyatvaṃ kathayati
     avidyā saṃsṛtiś cittaṃ mano bandho malaṃ tamaḥ /
     iti paryāyanāmāni dṛśyasya vidur uttamāḥ // Mo_3,4.46 //
ataḥ manaḥ dṛśyam evānyathā dṛśyaparyāyatvam asya na syād iti || MoT_3,4.46 ||


nanu padārthagrāhakatayā bhāsamānasya manasaḥ kathaṃ dṛśyaparyāyatvaṃ yuktam ity | atrāha
     na hi dṛśyād ṛte kiñcin manaso rūpam asti hi /
     dṛśyaṃ cotpannam evaitan neti vakṣyāmy ahaṃ punaḥ // Mo_3,4.47 //
"hi" yasmāt kāraṇāt | "dṛśyād ṛte kiñcit" dṛśyavyatiriktaṃ kiñcit | "manasaḥ rūpaṃ" | "hi" niścayena | "nāsti" | ataḥ manasaḥ dṛśyaparyāyatvaṃ yuktam iti bhāvaḥ | nanu tato 'pi kim ity | atrāha "dṛśyaṃ ce"ti | "etat dṛśyaṃ ca utpannaṃ na" bhavati | pūrvam uktatvāt | ataḥ manaḥ api anutpannam eva bhavatīti bhāvaḥ | nanu dṛśyānutpannatve mama pūrvaṃ niścayo na jāta ity atrāh"etī"ti | "aham" "iti" etat dṛśyānutpannatvam | "punaḥ vakṣyāmi" | durbodhatvād iti bhāvaḥ || MoT_3,4.47 ||



dṛśyānutpannatvam eva kathayati
     yathā kamalabīje 'ntaḥ sthitā kamalamañjarī /
     mahācitparamāṇvantas tathā dṛśyaṃ jagat sthitam // Mo_3,4.48 //
"yathā kamalamañjarī kamalabīje" padmākṣe | "antaḥ sthitā" bhavati | anyathā agre nirgamāsambhavaprasaṅgāt | "tathā dṛśyam jagat" dṛśikriyāviṣayībhūtaṃ jagat | "mahācitparamāṇvantaḥ" | "mahācit" aparicchinnā cit | sā evātisūkṣmatvāt "paramāṇuḥ" | tasy"āntaḥ" madhye | "sthitaṃ" bhavati | anyathā kutaḥ asyāḥ nirgamaḥ syāt iti bhāvaḥ | ato dṛśyasya mahācitaḥ pṛthaktvābhāvenānutpannatvam eveti paramo bhāvaḥ || MoT_3,4.48 ||


etad eva punaḥ punaḥ kathayati
     prakāśasya yathāloko yathā vātasya copanam /
     yathā dravatvaṃ payaso dṛśyatvaṃ draṣṭur īdṛśam // Mo_3,4.49 //
"ālokaḥ" arthaprākaṭyahetuḥ guṇaviśeṣaḥ | "copanaṃ" spandaḥ | draṣṭṛvyatiriktadṛśyasya sattā nāstīti bhāvaḥ || MoT_3,4.49 ||



     aṅgadatvaṃ yathā hemni mṛganadyāṃ yathā jalam /
     bhittir yathā svapnapure tathā draṣṭari dṛśyadhīḥ // Mo_3,4.50 //
spaṣṭam || MoT_3,4.50 ||


anena nyāyena draṣṭuḥ dṛśyamayatvaṃ yat siddhaṃ tad api malatvenonmṛjyatayā pratijānīte
     evaṃ draṣṭari dṛśyatvam ananyad iva yat sthitam /
     tad apy unmārjayāmy āśu tvaccittādarśato malam // Mo_3,4.51 //
"evaṃ" sati | "draṣṭari" dṛśikriyākartari | "ananyat" uktanyāyenābhinnaṃ | "yat dṛśyatvam" dṛśikriyāviṣayatvaṃ | "sthitam iva" bhavati | ahaṃ | "malam" malabhāvena sthitam | "tat api" draṣṭur abhinnaṃ dṛśyatvam api | "tvaccittādarśataḥ" tvaccittadarpaṇāt | "unmārjayāmi" | yena sarvathā tvanmanasi dṛśyasparśo na syād | asattvenāpi bhāsamānaṃ dṛśyaṃ leśato duḥkhadam eva bhavatīti bhāvaḥ | nanu draṣṭur abhinnasya dṛśyatvasya kathaṃ malatvaṃ | vyatiriktasyaiva malatvād iti cet | satyam | draṣṭā svābhinnatvenāpi niścitaṃ dṛśyatvaṃ svabhinnatvam api āpādayati | svabhinnatvākhyaṃ pratiyoginaṃ vinā svābhinnatvasyāsiddher iti svabhinnatvāpādakasya dṛśyasya malatvaṃ sphuṭam eveti na ko 'pi virodhaḥ || MoT_3,4.51 ||



nanu kimarthaṃ draṣṭur ananyatvena sthitasya malarūpasya api dṛśyatvasyonmārjanaṃ karoṣīty | atrāha
     yad draṣṭur asyādraṣṭṛtvaṃ dṛśyābhāve bhaved balāt /
     tad viddhi kevalībhāvam ata evāsataḥ sataḥ // Mo_3,4.52 //
"asya" ātmatvena sthitasya | "draṣṭuḥ" dṛśikriyākartuḥ | "dṛśyābhāve" sati | "balāt" balena | svaprayatnaṃ vineti yāvat | "yat adraṣṭṛtvaṃ" "bhavet" | na hi dṛśyaṃ vinā draṣṭuḥ draṣṭṛtvaṃ nāma kiñcid asti | śaktibhāvena sthitasyāpi tasya svarūpatvānapāyāt | tvam | "tat" adraṣṭṛtvaṃ | "kevalībhāvam" muktiṃ | "viddhi" jānīhi | draṣṭuḥ dṛśyānaunmukhyamātrasyaiva muktitvāt | "draṣṭuḥ" kathambhūtasya | "ata evāsataḥ" "sataḥ" | draṣṭṛtvāpekṣayā "asataḥ" | kevalībhāvāpekṣayā "sataḥ" | na hy asataḥ kevalībhāvaḥ yuktaḥ | tathā cānirvācyasyety arthaḥ | ataḥ kevalībhāvasiddhaye sarvathā dṛśyonmārjanam eva kāryam iti bhāvaḥ || MoT_3,4.52 ||



nanu dṛśyābhāvaprabhāvāt siddhe 'pi adraṣṭṛtve kevalībhāvo na sidhyati | dṛśyaviṣayasya rāgādeḥ suṣuptivat vāsanābhāvena sthitatvād ity | atrāha
     tattām upagate bhāve rāgadveṣādivāsanā /
     śāmyaty aspandite vāte spandasaṅkṣubdhatā yathā // Mo_3,4.53 //
"bhāve" antare tattve | "tattām" dṛśyābhāvakṛtāṃ adraṣṭṛtām | "upagate" sati | "rāgadveṣādivāsanā" pūrvaṃ bhātadṛśyaviṣayarāgadveṣādisaṃskāraḥ | "śāmyati" śāntiṃ vrajati | āśrayaviṣayayoḥ abhāvāt | suṣuptau tu āśrayaviṣayayoḥ vāsanābhāvena sthitatvāt tadanugatayoḥ rāgadveṣādikayor api vāsanābhāvenāvasthānam asti | na hi suṣuptau draṣṭṛdṛśyayoḥ samūlaṃ nāśaḥ asti | tataḥ utthitasya punaḥ tadāsthābhāvaprasaṅgāt | na hi samūlaṃ naṣṭe āsthā yuktā | dṛśyābhāve niścitānāṃ tu bhāsamāne 'pi dṛśye kadācid āsthā na vidyate | atra svamana eva sākṣikam ity alaṃ prapañcena | "rāgadveṣādivāsanā" kā "yathā" | "spandasaṅkṣubdhatā yathā" | yathā "vāte aspandite" sati | vātakṛtā "spandasaṅkṣubdhatā" spandarūpā saṅkṣubdhatā | naśyati | tathety arthaḥ | ataḥ dṛśyābhāvakṛtasyādraṣṭṛtvasya kevalībhāvatvaṃ yuktam eveti bhāvaḥ || MoT_3,4.53 ||



etad eva atidurbodhatvāt punaḥ punaḥ kathayati
     asambhavati sarvasmin digbhūmyākāśarūpiṇi /
     prakāśye yādṛśaṃ rūpaṃ prakāśasyāmalaṃ bhavet // Mo_3,4.54 //
     trijagat tvam ahaṃ ceti dṛśye 'sattām upāgate /
     draṣṭuḥ syāt kevalībhāvas tādṛśo vimalātmanaḥ // Mo_3,4.55 //
"digbhūmyākāśarūpiṇi" digbhūmyākāśasvarūpe | "prakāśye" prakāśanīye vastujāte | "asambhavati" sati | sambhavakriyākartṛtvam abhajati sati | "prakāśasya" sūryaprakāśasya | "yādṛśam amalaṃ" śuddham | indriyātītam iti yāvat | "rūpaṃ bhavet" | na hi sūryamaṇḍalāt niṣkrāntaḥ bhittau apatitaḥ prakāśaḥ netragamyaḥ bhavati | "trijagat tvaṃ ahaṃ ceti dṛśye asattām" abhāvam | "upāgate" sati | "draṣṭuḥ" dṛśyaprakāśakatayā sthitasya draṣṭuḥ | "tādṛśaḥ kevalībhāvaḥ" amalarūpatvaṃ | "syāt" bhavet | "draṣṭuḥ" kathambhūtasya | "amalātmanaḥ" cetyamalarūṣitacinmātrasvarūpasyānyathā kevalībhāvāparaparyāyaḥ nirmalībhāvaḥ ayuktaḥ syāt || MoT_3,4.54-55 ||



     anantākhilaśailādipratibimbe hi yādṛśī /
     syād darpaṇe darpaṇatā kevalātmasvarūpiṇī // Mo_3,4.56 //
     ahaṃ tvaṃ jagad ityādau praśānte dṛśyasambhrame /
     syāt tādṛśī kevalatā sthite draṣṭary avīkṣake // Mo_3,4.57 //
dārṣṭāntikagataṃ "praśānte" iti padaṃ dṛṣṭānte 'pi yojanīyaṃ | tenāyam arthaḥ | "hi" niścaye | "anantāḥ" ye "akhilāḥ śailādayaḥ" | tadrūpe "pratibimbe praśānte" sati | dārṣṭāntikatayā gṛhīte "darpaṇe" pratibimbabhāvam abhajati sati iti yāvat | "darpaṇe kevalātmasvarūpiṇī" kevaladarpaṇākhyasvarūpamayī | "yādṛśī darpaṇatā syāt" | "ahaṃ tvaṃ jagad ityādau dṛśyasambhrame" dṛśyākāre sambhrame | dṛśye iti yāvat | "praśānte" sati | tataḥ "avīkṣake" dṛśikriyām akurvati | "sthite draṣṭari" | "tādṛśī kevalatā syāt" | yathā pratibimbābhāve śuddhaṃ darpaṇamātram eva tiṣṭhati tathā dṛśyābhāve śuddhaḥ draṣṭā eva tiṣṭhatīti bhāvaḥ || MoT_3,4.56-57 ||



dṛśyābhāvāsambhavaṃ manyamānaḥ śrīrāmaḥ pṛcchati
     sac cen na śāmyatīdaṃ vā nābhāvo vidyate sataḥ /
     asattāṃ ca na vidmo 'smin dṛśye doṣapradāyini // Mo_3,4.58 //
"vā"śabdaḥ yataḥśabdārthe | "idaṃ" dṛśyaṃ | "sat" sattābhāk "cet" | "cet" yadi bhavati | tadā "na śāmyati" | yataḥ "sataḥ" sattābhajataḥ | "abhāvaḥ na vidyate" | svarūpahāniprasaṅgāt | anyathā vahner api dāhakatvahāniḥ syāt | nanu tarhi asad eva bhavatv ity | atrāha "asattāṃ ce"ti | "doṣapradāyini" rāgādisvarūpadoṣapradāyini | asataḥ doṣapradāyitvaṃ na yuktaṃ vandhyāsutasyāpi tattvāpatter iti bhāvaḥ || MoT_3,4.58 ||


phalitam āha
     tasmāt katham iyaṃ śāmyed brahman dṛśyaviṣūcikā /
     nānodbhavabhramakarī duḥkhasantatidāyinī // Mo_3,4.59 //
"nānodbhavaḥ" citrotpattiḥ | yaḥ "bhramaḥ" mithyājñānam | taṃ "karotī"ti tādṛśī || MoT_3,4.59 ||


"unmārjayāmī"ti pratijñāṃ saphalīkartuṃ śrīvasiṣṭhaḥ uttaraṃ kathayati
     asya dṛśyapiśācasya śāntyai mantram imaṃ śṛṇu /
     rāmātyantam ayaṃ yena mṛtim eṣyati naṅkṣyati // Mo_3,4.60 //
he "rāma" | tvam | "asya" puraḥsphurataḥ | "dṛśyapiśācasya śāntyai" | "imam" vakṣyamāṇavākyakadambakasvarūpaṃ | "mantraṃ" "śṛṇu" | "yena" mantreṇa | "ayaṃ" dṛśyapiśācaḥ | "atyantam mṛtim" traikālikam abhāvam | "eti" gacchati | tataḥ vi"naṅkṣyati" adarśanaṃ yāti | yuktaṃ ca piśācasya mantreṇa maraṇam adarśanaṃ ca || MoT_3,4.60 ||



mantram eva kathayati
     yad asti tasya nāśo 'sti na kadācana rāghava /
     yasmāt tan naṣṭam apy antar bījabhūtaṃ bhaved dhṛdi // Mo_3,4.61 //
he "rāghava" | "yat" vastu | sattāṃ bhajati | "tasya nāśaḥ kadācana" jātu | "na" sambhavati | "yasmāt tat" vastu | "naṣṭam api" kenacit parābhimatena samavāyikāraṇanāśādinā naṣṭam api | "hṛdi antaḥ" mānasāntaḥ | "bījabhūtam" | bījabhāvena sthitam vā sattārūpeṇa sthitam iti yāvat | "bhavati" | dṛśyate hi naṣṭam api vastu hṛdi punaḥ punaḥ āvartamānam || MoT_3,4.61 ||



nanu tataḥ ko doṣaḥ ity | atrāha
     smṛtibījā cidākāśe punar udbhūya dṛśyadhīḥ /
     lokaśāilāmbarākāraṃ doṣaṃ vitanute 'tanum // Mo_3,4.62 //
"smṛtibījā" smṛtikāraṇikā | "dṛśyadhīḥ" dṛśyākārā dhīḥ | dṛśyam iti yāvat | "cidākāśe udbhūya" prādurbhūya | "atanum" mahāntam | "lokaśailāmbarākāram doṣam" "punaḥ vitanute" sūkṣmaprapañcabhāvena viśeṣeṇa vistārayati | svapne dṛṣṭatvāt || MoT_3,4.62 ||



nanu tato 'pi kim ity | atrāha
     itthaṃ nirmokṣadoṣaḥ syān na ca tasyāṃśasambhavaḥ /
     yasmād devarṣimunayo dṛśyante muktibhājanam // Mo_3,4.63 //
"itthaṃ" sati | "nirmokṣadoṣaḥ" mokṣābhāvaprasaṅgarūpaḥ doṣaḥ | "syāt" | sthūlasūkṣmabhāvena dvividhasya dṛśyābhāvasyaiva mokṣatvāt | nanu bhavatu saḥ doṣaḥ | kim asmākaṃ kariṣyatīty | atrāha "na ce"ti | "tasya" nirmokṣadoṣasya | "aṃśenā"pi "sambhavaḥ na ca" bhavati | "yasmāt devarṣimunayaḥ muktibhājanaṃ dṛśyante" || MoT_3,4.63 ||


punar apy etad eva kathayati
     yadi syāj jagadādīdaṃ tat syān mokṣo na kasyacit /
     bāhyastham astu hṛtsthaṃ vā dṛśyaṃ nāśāya kevalam // Mo_3,4.64 //
"yadi idam jagadādi syāt" sattāṃ bhajet | tadā "kasyacit" kasyāpi pramātuḥ | "mokṣaḥ" dṛśyān muktiḥ | "na syāt" | yathā tathā sambhāvite 'pi dṛśyanāśe smṛtiprabhāvāt sūkṣmatayā punaḥ dṛśyasphuraṇāt | yataḥ "dṛśyam bāhyastham" sthūlarūpam "astu" | "hṛtstham" sūkṣmarūpaṃ "vā astu" | "nāśāya" bandhākhyanāśotpādārtham bhavati | kṣobhakatvāviśeṣād iti bhāvaḥ | "ādi"śabdena suṣuptistaimityādeḥ grahaṇam | tasyāpi dṛśyatvād || MoT_3,4.64 ||


nanu tarhi kiṃ kāryam ity | atrāha
     tasmād imāṃ pratijñāṃ tvaṃ śṛṇu rāmātibhīṣaṇām /
     yām uttareṇa granthena nūnaṃ tvam avabudhyase // Mo_3,4.65 //
"atibhīṣaṇatvaṃ" ca "pratijñāyāḥ" asambhavapravṛttatvena jñeyam || MoT_3,4.65 ||


śrīrāmāvabodhanimittam "uttaragrantham" eva kathayati
     ayam ākāśabhūtādirūpo 'haṃ ceti lakṣitaḥ /
     jagacchabdasya rāmārtho nanu nāsty eva kaścana // Mo_3,4.66 //
he "rāma" | "nanu" niścaye | "ākāśabhūtādirūpaḥ" | tathā "ahaṃ ceti lakṣitaḥ" niścitaḥ | "ayam jagacchabdasyārthaḥ" abhidheyam | paramārthataḥ "nāsty eva" sattāṃ na bhajati eva | na tu sattābhāg bhūtvā naśyati | tathā ca sati na nirmokṣadoṣaprasaṅgaḥ | na hi asataḥ bandhakatvaṃ dṛṣṭam iti bhāvaḥ | "ākāśasya bhūtatve" 'pi prādhānyena pṛthaṅnirdeśaḥ | "ādi"śabdena bhūtakāryāṇāṃ grahaṇam || MoT_3,4.66 ||


nanu puraḥsphurataḥ ahamādikasya jagataḥ kathaṃ sarvathā sattvaṃ yuktam ity | atrāha
     yad idaṃ dṛśyate kiñcid dṛśyajālaṃ purogatam /
     evaṃ brahmaiva tat sarvam ajarāmaram avyayam // Mo_3,4.67 //
asmābhiḥ "yad idaṃ purogataṃ dṛśyajālaṃ" nīlasukhādirūpaḥ dṛśyasamūhaḥ | "dṛśyate" anubhūyate | "tat sarvam ajarāmaram" deharahitatvāt tanmātragatajarādirahitam | tathā "avyayam" nāśarahitam | "brahmaiva" jagattayā bṛṃhitaṃ śuddhacittattvam eva | "evam" jagadbhāvena bhavati | dṛśyate hi jalasya taraṅgabhāvena bhavanam | tathā ca sati bhāsamānasyāpi jagataḥ asattvaṃ yuktam eva | na hi jale bhāsamānasyāpi taraṅgasya sattvaṃ dṛṣṭam iti bhāvaḥ || MoT_3,4.67 ||



dṛśyasya brahmamātratvam eva dṛḍhīkaroti
     pūrṇe pūrṇaṃ prasarati pare śāntaṃ paraṃ sthitam /
     vyomany evoditaṃ vyoma brahma brahmaṇi tiṣṭhati // Mo_3,4.68 //
"pūrṇe" nirapekṣe | "prasarati" sañcāraṃ karoti | svarūpasthe "pare" uttīrṇe | "brahmaṇi" bṛṃhite vastuni | atra saptamyantaiḥ śuddhacittattvasya kathanaṃ | prathamāntaiḥ tadrūpasya jagataḥ jñeyam | nanu kathaṃ pūrṇatvādiguṇayukte śuddhacittattve 'vasthānaṃ yuktam | nyūnasyādhike avasthānadarśanāt | sat-yam | avasthānam atrādheyabhāvena nāsti yenoktadoṣaprasaṅgaḥ syāt | kiṃ tu tanmātratābhāveneti nātra doṣaprasaṅgaḥ | ity alaṃ prapañcaiḥ || MoT_3,4.68 ||



     na dṛśyam asti no dṛk ca na draṣṭā na ca darśanam /
     na śūnyaṃ na jaḍaṃ no cic chāntam evedam ātatam // Mo_3,4.69 //
"dṛśyam" dṛśikriyākarma | "nāsti" sattāṃ na bhajati | "dṛk" dṛśikriyā | "no" asti | "draṣṭā" dṛśikriyākartā | "ca nā"sti | "darśanam" dṛśikriyāsādhyaṃ phalaṃ | "ca nā"sti | sarveṣāṃ eṣāṃ pratītimātrasāratvāt | nanu tarhi etad abhāva evāstī-ty | atrāha "na śūnyam" iti | "śūnyam" dṛśyādyabhāvaḥ | ca "nā"sti | na hi sar-vathā asataḥ bhānaṃ yuktaṃ | śaśiśṛṅgāder api bhānāpatteḥ | nanu tarhi jāḍyam eva syāt | jāḍye hi sarveṣām asattā eva bhavatīty | atrāha "na jaḍam" iti | bhāvapradhānanirdeśaḥ "jaḍam" jaḍatvam | "nā"sti | tattve hi dṛśyādibhānam ayuktaṃ syāt | nanu tarhi śiṣṭā cid eva syād ity | atrāha "no cid" iti | "cit" cinmātram | "no" asti | cetyāpekṣatvena tasyāḥ sthitatvāt | cetyasya coktanyāyenāsambhavāt | nanu tarhi kim asti | na hi sarvathā asattā buddhyai ārohatīty | atrāha "śāntam" iti | "ātataṃ" samantāt sphuratsvarūpam | "idam" sarvam dṛśyādikam | "śāntam" | bhavati | cetyakṣobharahitaṃ cinmātraṃ bhavati || MoT_3,4.69 ||



atra niścayam anāpnuvan śrīrāmaḥ muneḥ asambhavārthābhidhāyitvam āsañjayati
     vandhyāputreṇa piṣṭo 'driḥ śaśaśṛṅgaṃ pramāyate /
     prasārya bhujasaṅghātaṃ śilā nṛtyati tāṇḍavam // Mo_3,4.70 //
     sravanti sikatās tailaṃ paṭhanty upalaputrikāḥ /
     garjanti citrajaladā itīvedaṃ vacaḥ prabho // Mo_3,4.71 //
"tave"ti śeṣaḥ | he "prabho" | "idam" tava "vacaḥ" | "iti" bhavati | evaṃrūpaṃ bhavati iti | kim "iti" | "vandhyāputreṇe"tyādi | janaiḥ "śaśaśṛṅgaṃ pramāyate" pramātum ārabhyate ity arthaḥ | "pramāyate" iti prayogaḥ ārṣaḥ | sarvathā asambaddhārthābhidhāyy eva tava vacanam iti bhāvaḥ | asambhavārthapratipādakatvāropaprakāśitāvinayanirāsanārthaṃ "prabho" ity āmantraṇam || MoT_3,4.70-71 ||


     jarāmaraṇaduḥkhādiśailākāśamayaṃ jagat /
     nāstīti kim idaṃ nāma bhavatāpi mamocyate // Mo_3,4.72 //
na hi pratyakṣam anubhūyamānasya jarādirūpasya bhāvajātasyāpahnavaḥ yukta iti bhāvaḥ | "api"śabdaḥ śrīvasiṣṭhasyāsambhavavāditvāyogyatvasūcanārthaḥ | "mame"ty anena svasya sacchiṣyatvaṃ dyotayati || MoT_3,4.72 ||



"yathe"ty etat satyam evāsti tarhi yuktaṃ "kathaye"ty | anenābhiprāyeṇāha
     yathedaṃ na sthitaṃ viśvaṃ notpannaṃ na ca vidyate /
     tathā kathaya me brahman yenaitan niścitaṃ bhavet // Mo_3,4.73 //
"etat" sthityādyabhāvaḥ || MoT_3,4.73 ||


śrīvasiṣṭha uttaraṃ kathayati
     nāsamanvitavāg asmi śṛṇu rāghava kathyate /
     yathedam asad ābhāti vandhyāputra ivāravī // Mo_3,4.74 //
"aham" vasiṣṭhākhyaḥ aham | "asamanvitā" asambaddhā | "vāg" yasya | saḥ | tādṛśaḥ "nāsmi" | he "rāghava" | tvaṃ "śṛṇu" | "idaṃ" jagat | "yathā" yena prakāreṇa | "asat bhāti" | tvāṃ prati sphurati | mayā tathā "kathyate" | "idaṃ" ka "iva" | "āravī vandhyāputra iva" | āravakārī vandhyāputra iva | yathā saḥ asat bhāti | tathety arthaḥ || MoT_3,4.74 ||


tad eva kathayati
     idam ādāv anutpannaṃ sargādau tena nāsty alam /
     idaṃ hi manasā bhāti svapnādau pattanaṃ yathā // Mo_3,4.75 //
"idam" dṛśyaṃ jagat | "ādau" ādibhūte | "sargādau" cinmātrasya cetyonmukhatārūpe sargārambhe | anudbhūtaṃ āsīt | paramārthataḥ cinmātrabhāvād acyuteḥ | tataḥ bhinnayā sattayāśritaṃ na āsīt | na hi bahir api mṛdaḥ utpadyamānasya ghaṭasya mṛdaḥ bhinnā sattā dṛśyate | "tena" tataḥ kāraṇāt | "idam" jagat | "alam" atiśayena | "nāsti" sattāṃ na bhajati | "svapnapattanavat" cinmātrasākṣitāmātreṇa labdhasattākatvāt | nanu tarhi katham idaṃ bhāsate ity | atrāha "idam" iti | "hi" niścaye | "idaṃ" dṛśyam jagat | "manasā" vikalpena | "bhāti" dṛśyatayā sphurati | kim iva | "pattanam" iva | "yathā" "svapnādau pattanaṃ manasā bhāti" | tathety arthaḥ || MoT_3,4.75 ||



nanu satsvarūpeṇa manasā bhātasya dṛśyasya sattvaṃ yuktam evety | atrāha
     mana eva ca sargādāv anutpannam asadvapuḥ /
     tathaitac chṛṇu vakṣyāmi yathaitad anubhūyate // Mo_3,4.76 //
"sargādau" proktasvarūpe sargārambhe | "manaḥ eva anutpannam" | ata ev"āsadvapuḥ" asatsvarūpaṃ bhavati | tvaṃ "śṛṇu" | "yathā" tvayā "etat anubhūyate" | aham "tathā etat vakṣyāmi" || MoT_3,4.76 ||



nanu prakṛtaṃ dṛśyāsattvakathanaṃ vihāya mano'sattvakathanam ayuktam ity | atrāha
     mano dṛśyamayaṃ doṣaṃ tanotīmaṃ kṣayātmakam /
     asad evāsadākāraṃ svapnaḥ svapnāntaraṃ yathā // Mo_3,4.77 //
"manaḥ imam" puraḥ bhāsamānam | "kṣayātmakam" naśvarasvabhāvam | "dṛśyamayaṃ doṣam" dṛśyasvarūpaṃ doṣaṃ | "tanoti" vistārayati | "manaḥ" kathambhūtam | "asad eva" sphuraṇamātrarūpatvāt asatsvarūpam eva | "dṛśyamayaṃ doṣaṃ" kathambhūtam | "asadākāram" asatsvarūpam | asatā vistāryamāṇatvāt | na hy asatā vistāritaṃ sat bhavituṃ yogyam | vandhyāputravistāritasya vāgjālasyāpi sattāpatteḥ | "manaḥ" kaḥ "yathā" | "svapno" "yathā" | yathā asatsvarūpaḥ "svapnaḥ" "asadākāraṃ svapnāntaraṃ tanoti" | tathety arthaḥ | dṛśyate hi svapne svapnāntaram iti nātra vivādaḥ || MoT_3,4.77 ||


svāśrayabhūtaṃ dehaṃ praty api asyaiva kāraṇatvaṃ kathayati
     tat svayaṃ svairam evāśu saṅkalpayati dehakam /
     teneyam indrajālaśrīr vitatena vitanyate // Mo_3,4.78 //
"tat" manaḥ | idaṃ "dehakam" ātmatayā bhāsamānaṃ sthūladeham | "āśu" śīghraṃ | "svayam" anyasāhāyyānapekṣaṃ | "svairam" svecchayā | "saṅkalpayati" saṅkalpamātreṇa sampādayati | punar api prakṛtam eva kathayati "teneyam" iti | "tena" manasā | "iyam" dṛśyatvena bhāsamānā || MoT_3,4.78 ||


uktam arthaṃ sargāntaślokena saṅgṛhya kathayati
     sphurati gacchati valgati yācate bhavati majjati saṃharati svayam /
     aparatām upayāty api kevalaṃ calati cañcalaśaktitayā manaḥ // Mo_3,4.79 //
upalakṣaṇaṃ caitat | tena yā kācit kriyā iha bhavati sā manaḥkṛtā eva bhavatīti saṅkṣiptārtha iti śivam || MoT_3,4.79 ||


iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe caturthaḥ sargaḥ ||


*********************************************************************

evaṃ manonirṇayam avaśyakartavyatayā śrutvā śrīrāmaḥ pṛcchati
     bhagavan muniśārdūla kim iveha mano bhrame /
     vidyate katham utpannaṃ mano māyāmayaṃ kutaḥ // Mo_3,5.1 //
"bhagavan muniśārdūla" he bhagavan muniśreṣṭha | "iha bhrame" asmin jagadrūpe bhrame | "manaḥ kim iva vidyate" kiṃsvarūpam ivāsti | tathā "katham utpannam" kena prakāreṇa prādurbhūtam | "manaḥ māyāmayaṃ" māyāsvarūpaṃ "kutaḥ" bhavati || MoT_3,5.1 ||


tatrāpy "ādau utpattim" eva kathayety abhiprāyeṇāha
     utpattim ādāv iti me samāsena vada prabho /
     pravakṣyasi tataḥ śiṣṭaṃ vaktavyaṃ vadatāṃ vara // Mo_3,5.2 //
he "prabho" | tvam | "me iti utpattim" manoniṣṭhām utpattim | matpṛṣṭaṃ "śiṣṭaṃ" syāt | tat "pravakṣyasi" kathayiṣyasi | svayam eva śiṣṭatvād iti bhāvaḥ || MoT_3,5.2 ||



śrīvasiṣṭha uttaraṃ kathayati
     mahāpralayasampattāv asattāṃ samupāgate /
     aśeṣadṛśye sargādau śāntam evāvaśiṣyate // Mo_3,5.3 //
"mahāpralayasya" turyākhyasyāvasthāviśeṣasya mahākalpāntasamayasya vā | "sampattau" pūrṇatāyāṃ satyāṃ | "sargādau aśeṣadṛśye" sṛṣṭisaṃhāratatsaṃskārarūpe samaste dṛśye | "asattām" adarśanam | "samupāgate" sati | "śāntam eva" śanaiḥ śanaiḥ sargādināśasākṣitākhyāt kṣobhād api niṣkrāntam kim apy anirvācyaṃ tattvam ev"āvaśiṣyate" śiṣṭam bhavati | atra sargaḥ svaviṣayaṃ padārthajātasākṣi prati | saṃhāraḥ svasādhyam padārthābhāvaṃ | saṃskāraḥ padārthasaṃskāraṃ padārthābhāvaṃ | tayoḥ saṃskāraḥ padārthasaṃskāraṃ padārthābhāvasaṃskāraṃ ceti vibhāgo jñātavyaḥ || MoT_3,5.3 ||



śāntāvaśiṣṭam eva sphuṭaṃ kathayati
     āste 'nastamito bhāsvān ajo devo nirāmayaḥ /
     sarvadā sarvakṛt sarvaḥ paramātmā maheśvaraḥ // Mo_3,5.4 //
"paramātmā" sarveṣāṃ paramārthataḥ ahantāviṣayatayā bhāsamānam kim apy āntaraṃ tattvam | "āste" tiṣṭhati | prathamam mahāpralayasākṣibhāvena tadanantaram api yathā tathā kalpyamānānāṃ svābhāvānāṃ sākṣibhāvena sthitatvāt | atra "sarvadā" sthitasyātmanaḥ sthitivartamānatākathanaṃ pramātrapekṣayā prayuktatvāt na doṣāvaham | kathambhūtaḥ asau "paramātme"ty apekṣāyāṃ viśeṣaṇāni kathayati "anastamita" iti | "anastamitaḥ" yathā tathā kalpitasya svāstasyāpi grāhakatvena sthitatvāt phalataḥ astarahitaḥ | "bhāsvān" sākṣitayā sarvaprakāśakatvāt sūryasvarūpaḥ | āścaryaṃ ca bhāsvataḥ anastamitatvam | "ajaḥ" janmarahitaḥ | prādurbhūtiḥ hi janma | sā ca tasya na yuktā | ātmatvena sadā prādurbhūtatvāt | na hy ātmanaḥ aprādurbhūtatvaṃ kadāpi yuktam | svāprādurbhūter api grāhakatayā sthitatvāt | "devaḥ" krīḍāśīlaḥ | anyathā etādṛśaṃ jagat kathaṃ prādurbhavet | akrīḍāśīlo hi hastacālanamātrād api parāṅmukho bhavati | "nirāmayaḥ" māyākhyarogāt niṣkrāntaḥ | anyathā māyākhyāmayagrastatvāt māyāprerakatvam ayuktam syāt | na hi āmayagrastaḥ āmayaprerako bhavati | "sarvadā sarvakṛt" sarveṣu deśeṣu kāleṣu ca sarvakārī | anyathā anubhūyamānaḥ sarvadā sarvodbhavaḥ ayuktaḥ syāt | "sarvaḥ" sarvasvarūpaḥ | anyathā padārthānāṃ kiṃmayatvaṃ syāt | "maheśvaraḥ" paramaniyantā | anyathā sarve svasvabhāve niyatāḥ na syuḥ || MoT_3,5.4 ||



punar api tam eva viśinaṣṭi
     yato vāco nivartante yo muktair avagamyate /
     yasya cātmādikāḥ sañjñāḥ kalpitā na svabhāvajāḥ // Mo_3,5.5 //
"vācaḥ" samastāḥ laukikāḥ vaidikāś ca vācaḥ | "yataḥ" yasmāt paramātmanaḥ | "nivartante" | vāk hi saṅketaṃ puraskṛtya vastuni pravartate | saṅketaś ca paramātmani kartum aśakyaḥ | bāhyāntaḥkaraṇāgocaratvāt | indriyagocare eva vastuni hastagrāhikayā saṅketakaraṇaṃ dṛśyate | tarhi asau nāstīty | atrāha "yo muktair" iti | "muktaiḥ" eva dṛśyānāsaktacittaiḥ eva | na tu laukikaiḥ | "yaḥ avagamyate" ātmatayā jñāyate | muktāḥ hi śuddhaṃ kim api tattvaṃ ātmatayā jānanti | anyathā muktatvāyogāt | tathā cāsattā asya na yukteti bhāvaḥ | nanu vācāṃ tataḥ nivartanakathanam ayuktaṃ ātmādiśabdānāṃ tadvācakatvāt ity | atrāha "yasya ce"ti | tattvajñair iti śeṣaḥ | "kalpitāḥ" pravṛttinimittam anapekṣyaiva tailapāyikādisañjñāvat kalpanayā sthāpitāḥ || MoT_3,5.5 ||
nanu yadi saḥ eka evāsti tat kathaṃ sāṅkhyādibhiḥ puruṣādayaḥ kathitā ity | atrāha
     yaḥ pumān sāṅkhyadṛṣṭīnāṃ brahma vedāntavādinām /
     vijñānamātraṃ vijñānavidām ekāntanirmalam // Mo_3,5.6 //
"sāṅkhyadṛṣṭīnāṃ" sāṅkhyadarśanaratānām | sāṅkhyāḥ hi prakṛtivyatiriktam jīvāparaparyāyaṃ puruṣam eva śeṣatvena kathayanti | sa ca vicāryamāṇaḥ uktaparamātmarūpatve eva viśrāmyatīti yuktam uktaṃ "yaḥ pumān sāṅkhyadṛṣṭīnām" iti | evaṃ sarvatra yojyam | tathā ca nāmabhedasyaiva sthitatvān noktadoṣaprasaṅga iti bhāvaḥ | nanu śrīvasiṣṭhena kiṃ darśanam āśrityedaṃ śāstram uktam iti cet | satyam | sarveṣāṃ darśanānāṃ sāram āśritya etenedaṃ śāstraṃ kṛtam | anyathā sarvamatāṅgīkāraḥ ayuktaḥ syāt | bāhulyena vedāntaśāstracarcā atra dṛśyate | tadapekṣayā stokena mahārahasyabhūtasya śivaśāstrasyāpi ity alam aprakṛtacintanena | "brahma" ajñānāśrayaviṣayībhūtam śāntam cittattvam | "vijñānamātram" ghaṭapaṭādiviṣayaṃ nirākāraṃ jñānam || MoT_3,5.6 ||



     yaḥ śūnyavādināṃ śūnyaṃ bhāsako yo 'rkatejasām /
     vaktā smartā ṛtaṃ bhoktā draṣṭā kartā sadaiva yaḥ // Mo_3,5.7 //
"śūnyam" suṣuptau anubhūyamānaṃ na kiñcittvaṃ | upalakṣaṇaṃ caitat | tena sarveṣāṃ darśanānāṃ yat vastu viśrāntisthānaṃ bhavati tad asāv eveti jñeyam | punaḥ kathambhūto 'sau bhavatīty | atrāha "bhāsaka" iti | "yaḥ arkatejasām" arkādisvarūpāṇāṃ tejasāṃ | "bhāsakaḥ" netrākhyādhiṣṭhānaviśeṣādhiśrayaṇena prakāśakaḥ bhavati | tathā "yaḥ sadā eva" nityam eva | "ṛtam" satyatayā | paramārthataḥ iti yāvat | "vaktā smartā bhoktā draṣṭā kartā" bhavati | samastavaktrādyātmatvena sthitatvāt | "ṛtam" iti kriyāviśeṣaṇam || MoT_3,5.7 ||



     sad apy asad yo jagati yo dehastho 'pi dūragaḥ /
     citprakāśo hy ayaṃ yasmād āloka iva bhāsvataḥ // Mo_3,5.8 //
"yaḥ" ātmā | "sad api" etāvataḥ jagadbhramasyādhiṣṭhānatayā sthitatvāt satsvarūpam api | "asat" bhavati | bāhyāntaḥkaraṇāgocaratvāt | "yaḥ" ātmā | "dehasthaḥ api" pāṣāṇarūpasya dehasyānyathā ceṣṭāśrayatvāyogāt tatrastho 'pi | "dūragaḥ" bhavati | anyathākāśasthitānāṃ sūryādīnāṃ grahaṇaṃ na syāt | "hi" niścaye | "ayaṃ citprakāśaḥ" padārthacetanarūpaḥ prakāśaḥ | "yasmāt" bhavati | ka "iva" | "āloka iva" | yathā "ālokaḥ" padārthadarśanam | "bhāsvataḥ" sūryād | bhavati | tathety arthaḥ || MoT_3,5.8 ||



     yasmād viṣṇvādayo devāḥ sūryād iva marīcayaḥ /
     yasmāj jaganty anantāni budbudā jaladher iva // Mo_3,5.9 //
"devāś" cādhyātmikāḥ ādhidaivikāś ceti dvividhāḥ jñeyāḥ | tatra ādhidaivikāḥ prasiddhāḥ | ādhyātmikā yathā | manaḥ brahmā | buddhiḥ "viṣṇuḥ" | ahaṅkāraḥ rudraḥ | indriy"ādayaḥ" "devā" iti | "jaganty" api evaṃ dvividhāni jñeyāni | tāny api ādhidaivikāni prasiddhāni | ādhyātmikāni tu mānasikāḥ saṅkalpāḥ jñeyāḥ || MoT_3,5.9 ||



     yaṃ yānti dṛśyavṛndāni payāṃsīva mahārṇavam /
     ya ātmānaṃ padārthaṃ ca prakāśayati dīpavat // Mo_3,5.10 //
"dṛśyavṛndāni yam" draṣṭṛrūpam yaṃ | "yānti" yasmin layībhavantīty arthaḥ | "yaḥ" śuddhacitsvarūpaḥ yaḥ |" ātmānam" cinmātrasvarūpam svātmānam | tathā "padārthaṃ" jātau ekavacanam | padārthāṃś ca "dīpavat prakāśayati" prakaṭīkaroti || MoT_3,5.10 ||



     ākāśe yaḥ śarīre ca dṛśatsv apsu latāsu ca /
     pāṃsuṣv adriṣu vāteṣu pātāleṣu ca saṃsthitaḥ // Mo_3,5.11 //
"yaḥ" ātmā | "ākāśe śarīre ca" | tathā "dṛśatsu" śilāsu | "apsu latāsu ca pāṃsuṣu" rajassu | "adriṣu" parvateṣu | "vāteṣu pātāleṣu ca saṃsthitaḥ" bhavati | upalakṣaṇaṃ caitat | tena sarvatra sthāvare sthita iti jñeyam | sthāvareṣu sthitatvaṃ ātmanaḥ katham astīti cet | satyam | sarve sthāvarāḥ tāvat vicāryamāṇāḥ anirvācyatāyām eva viśrāmyanti | anirvācyatā eva ca ātmanaḥ svarūpam iti na kaścid virodhaḥ | atha vā sthāvarāḥ tāvat ātmayuktāḥ nirātmakāḥ vā | nirātmakatve kiṃrūpatvaṃ teṣāṃ syāt | sātmakatve tu sphuṭam eva teṣv ātmanaḥ avasthānam iti yojyam || MoT_3,5.11 ||


     yaḥ plāvayati saṃrabdhaṃ puryaṣṭakam itas tataḥ /
     yena mūkīkṛtā mūḍhāḥ śilādhyānam ivāsthitāḥ // Mo_3,5.12 //
"yaḥ" ātmā | "puryaṣṭakam" antaḥkaraṇatrayaṃ tanmātrapañcakam itisvarūpaṃ puryaṣṭakaṃ | arthāc cetanavargam | "itaḥ tataḥ plāvayati" yatra tatra gamayati | ceṣṭāṃ kārayatīti yāvat | "mūḍhāḥ" jaḍāḥ | "yena" sāratayā sthitena ātmanā | "mūkīkṛtāḥ" vimarśāsamarthāḥ kṛtāḥ santaḥ | "śilādhyānam" śilāvat dhyānam | "āsthitāḥ iva" bhavanti | atyantajaḍā iva bhavantīti yāvat | mūḍhānām api paramārthataḥ śuddhacinmātrarūpatvāt "iva"śabdaprayogaḥ || MoT_3,5.12 ||



     vyoma yena kṛtaṃ śūnyaṃ śailā yena ghanīkṛtāḥ /
     āpo drutāḥ kṛtā yena dīpto yasya vaśād raviḥ // Mo_3,5.13 //
"yena" sarvaśaktitvāt nistattvarūpatām āśritena yenātmanā | "vyoma" vyāpyatayā sthitam ākāśam | "śūnyam" nistattvasvarūpaṃ | "kṛtam" | tathā "yena" mṛcchilābhāvaṃ śritena yenātmanā | "śailāḥ" svavyāpyāḥ parvatāḥ | "ghanīkṛtāḥ" nibiḍāḥ sampāditāḥ | tathā "yena" dravatvabhāvaṃ gatena yenātmanā | "āpaḥ" svavyāpyāni jalāni | "drutāḥ" dravatvākhyaguṇayuktāḥ | "kṛtāḥ" | tathā "raviḥ" vyāpyabhāvena sthitaḥ sūryaḥ | "yasya vaśāt" dīpanaśīlatejobhāvaṃ gatasya yasyātmanaḥ vaśena | "dīpto" bhavati | upalakṣaṇaṃ caitat || MoT_3,5.13 ||


     prasaranti yataś citrāḥ saṃsārāsāravṛṣṭayaḥ /
     akṣayāmṛtasampūrṇād ambhodād iva vṛṣṭayaḥ // Mo_3,5.14 //
"akṣayam" nāśarahitam | yat "amṛtam" ānandarasaḥ | tena "sampūrṇāt" nirbharāt | "yataḥ" yasmāt ātmanaḥ | "saṃsārāsāravṛṣṭayaḥ" saṃsārarūpāḥ dhārāsāravṛṣṭayaḥ | "prasaranti" sañcaraṃ yānti | kā "iva" | "vṛṣṭayaḥ iva" | yathā "akṣayāmṛtasampūrṇāt" avināśijalapūrṇāt | "ambhodāt" meghāt | "vṛṣṭayaḥ prasaranti" | tathety arthaḥ || MoT_3,5.14 ||


     āvirbhāvatirobhāvamayyas tribhuvanormayaḥ /
     sphuranty avirataṃ yasmin ghṛṇāv iva marīcayaḥ // Mo_3,5.15 //
"āvirbhāvatirobhāvamayyaḥ" āvirbhāvatirobhāvayuktāḥ | "tribhuvanormayaḥ" | "yasmin" arthāt samudrarūpe | "yasmin aviratam sphuranti" | kā "iva" | "marīcayaḥ iva" | yathā "ghṛṇau" sūrye | "marīcayaḥ sphuranti" | tathety arthaḥ || MoT_3,5.15 ||



     nāśarūpo 'vināśātmā yo 'ntaḥsthaḥ sarvavastuṣu /
     gupto yo vyatirikto 'pi sarvabhāveṣu saṃsthitaḥ // Mo_3,5.16 //
"avināśātmā" yathā tathā sambhāvitasya svanāśasyāpi sākṣitayā sthitatvāt vināśarahitaḥ | "yaḥ" ātmā | "nāśarūpaḥ" bhavati | nāśabhāvenāpi sthitatvāt | anyathā ātmarahitasya nāśasya kena rūpeṇa bhānaṃ syāt | tathā "vyatiriktaḥ api" śuddhacinmātrarūpatvena samastapadārthottīrṇasvarūpaḥ api | "yaḥ" ātmā | "sarvabhāveṣu saṃsthitaḥ" bhavati | sāratayā sthitatvāt | viruddhaṃ ca avināśinaḥ vināśarūpatvam sarvabhāvavyatiriktasya "sarvabhāveṣu" saṃsthitatvam | "yaḥ" ātmā kathambhūtaḥ | "sarvavastuṣu antaḥsthaḥ" | "antaḥ" niyāmakatvena sthitaḥ | ata eva "guptaḥ" bahiḥ adṛśyaḥ || MoT_3,5.16 ||


     prakṛtivratatir vyomni jātā brahmāṇḍasatphalā /
     cittamūlendriyadalā yena nṛtyati vāyunā // Mo_3,5.17 //
"prakṛtiḥ" jaganmūlakāraṇabhūtaṃ kim api tattvam | sā eva "vratatiḥ" latā | "yena vāyunā" yenātmarūpeṇa vātena | "nṛtyati" kāryabhāvena pariṇāme kartṛtvaṃ bhajati | anyathā kāryavargagatajaḍatvānyathānupapattyā jaḍarūpāyāḥ tasyāḥ kāryabhāvena pariṇāmaṃ prati kartṛtvāyogāt | "prakṛtivratatiḥ" kathambhūtā | "vyomni" na kiñcidrūpatayā ākāśasvarūpe cinmātre | "jātā" prādurbhūtā | tathā "brahmāṇḍam" eva "satphalaṃ" yasyāḥ | sā | tādṛśī | tathā "cittam" eva "mūlaṃ" yasyāḥ | sā | tādṛśī | tathā "indriyāṇy" eva "dalāṇi" yasyāḥ | sā | tādṛśī | cittamūlatvena prakṛteḥ pratītimātrasiddhatvamātram uktam iti brahmāṇḍamūlakāraṇabhūtāyāḥ prakṛteḥ kathaṃ tadantargatapuruṣacinmātramūlatvam uktam iti na paryanuyojyam || MoT_3,5.17 ||



     yaś cinmaṇiḥ prakacati pratidehasamudgakam /
     yasminn indau sphuranty etā jagajjālamarīcayaḥ // Mo_3,5.18 //
"cinmaṇiḥ" cid eva maṇiḥ | prakāśakatvāt ratnam | tatsvarūpaḥ "yaḥ" ātmā | "pratidehasamudgakam" sarveṣu dehasamudgeṣu | "prakacati" jīvabhāvena sphura-ti | anyathā dehāntargatānāṃ jīvānāṃ kiṃrūpatvaṃ syāt | yuktaṃ ca samudgake ratnaprakacanam | "etāḥ" puraḥ dṛśyamānāḥ | "jagajjālamarīcayaḥ" | "yasmin indau sphuranti" | anyathā kimādhāram āsāṃ bhānaṃ syāt | na hi nirādhārasya jagajjālasya sphuraṇaṃ buddhim ārohati | marīcitvaṃ ca jagajjālasya citprakāśaviṣayatvena citprakāśatānapāyāj jñeyam | acidrūpo hi cidviṣayatāyogyo na bhavati | viruddhatvena tatsānnidhye tasya sannidhānāsambhavāt || MoT_3,5.18 ||



     praśāntacidghane yasmin sphuranty amṛtavarṣiṇi /
     dhārājalāni bhūtāni dṛṣṭayas taḍitaḥ sphuṭāḥ // Mo_3,5.19 //
"amṛtavarṣiṇi" ānandavarṣiṇi | "praśāntacidghane yasmin" nirapekṣaśuddhacidākhyameghasvarūpe yasmin ātmani | "bhūtāni" samastāḥ padārthāḥ | "dhārājalāni" | "dṛṣṭayaḥ" tadviṣayāṇi jñānāni | "sphuṭāḥ" prakaṭāḥ | "taḍitaḥ" "sphuranti" | yuktaṃ ca jalavarṣiṇi meghe dhārājalānāṃ taḍitāṃ ca sphuraṇam | ānandavarṣitvaṃ cātmanaḥ parapremāspadatvena jñeyam | na hi ānandāvarṣī parapremāspado bhavati | ānandavarṣiṇi putrādau eva premāspadatvadarśanāt | ātmanaḥ parapremāspadatvaṃ ca sarveṣu svasākṣikam eveti nāyastam || MoT_3,5.19 ||



     camatkurvanti vastūni yadālokanayā mithaḥ /
     asaj jātam asad yena yena sat sattvam āgatam // Mo_3,5.20 //
"vastūni" bhoktṛbhogyarūpāṇi bhāvajātāni | "mithaḥ" anyo'nyasmin | "yadālokanayā" yaddarśanena | yaddarśanabhāveneti yāvat | "camatkurvanti" ānandam anubhavanti | yaddarśanam eva teṣāṃ camatkārakāraṇam astīti yāvat | mithyā iti sāmānyākṣepeṇoktam | ayaṃ bhāvaḥ | bhoktāraḥ tāvat iṣṭāniṣṭān bhogyān anubhūya bhogyāntaranirapekṣā jāyante | anyathā tatkālaṃ viṣayīkṛtasya bhogyasya bhogaḥ samāptiṃ na vrajet | tatkālaṃ bhogyāntaranirapekṣatvaṃ ca tatra teṣāṃ camatkārānubhavanaṃ vinā na sidhyati | ekasmin viṣaye anubhūyamānena camatkāreṇaiva hi puruṣaḥ anyeṣu viṣayeṣu nirapekṣo bhavati | sa ca camatkāraḥ vicāryamāṇaḥ nairapekṣyakāraṇatvāt ātmasvarūpa eva bhavati | paramaviśrāntipadasvarūpasya ātmana eva nairapekṣyakāraṇatvāt iti yuktam eva bhoktuḥ bhogyeṣu yaddarśanarūpaṃ camatkārakāraṇam iti | anubhavamātragamye 'smin vastuni pratibhāvadbhiḥ svayam api yatanīyam ity alaṃ prapañcena | tathā "yena" sākṣitayā sthitena yenātmanā | "asat" "asat" "jātam" | tathā "yena" tādṛśena yenātmanā | "sat sattvam āgatam" | sākṣiṇaṃ vinā sadasadgatayoḥ sattvāsattvayoḥ asaṅkalpatvāt || MoT_3,5.20 ||



     calatīdam anicchasya kāyāyo yasya sannidhau /
     jaḍaṃ paramaratnasya śāntam ātmani tiṣṭhataḥ // Mo_3,5.21 //
"anicchasya" icchādhāramate rahitatvāt icchārahitasya | ata ev"ātmani" śānte | "tiṣṭhataś" calanecchākhyakṣobharahitaṃ tiṣṭhataḥ | "yasya paramaratnasya sannidhau jaḍaṃ" grāhyaikarūpatvena acetanam | "idaṃ kāyāyaḥ" śarīrākhyam "ayaḥ" | "calati" ceṣṭāṃ karoti | kāyaceṣṭākāraṇatvenābhimatasya prāṇasyāpi ātmaśaktiyuktatvena paramārthataḥ kāyacalanakāraṇatvāyogāt | bāhyaratnagatajaḍatvarāhityadyotanārthaṃ "parama"padopādānam | yuktam ca "ayasaḥ" ayaskāntākhyaratnasannidhāne calanam || MoT_3,5.21 ||



     niyatir deśakālau ca calanaṃ spandanaṃ kriyāḥ /
     iti yena gataṃ sattāṃ sarvasattvābhigāminā // Mo_3,5.22 //
"niyatiḥ" padārtheṣu niyamādāyakaḥ śaktiviśeṣaḥ | "deśaḥ" padārthādhārabhūtaḥ vastuviśeṣaḥ | "kālaḥ" sūryacārādyanumeyaḥ kalanāmātrasvarūpaḥ padārthaparivartikārakaḥ ko 'pi vastuviśeṣaḥ | "calanam" sāmānyacalanam | "spandanaṃ" kriyāviṣayā ceṣṭā | "kriyā" pākādirūpaṃ karma | upalakṣaṇaṃ caitat | "iti" etat | "sarvasattvābhigāminā" samastasattāviṣayapadārthavyāpakena | "yenā"tmanā | "sattāṃ gatam" | vyāpakenaiva hi vyāpyaṃ sattāṃ labhate || MoT_3,5.22 ||



     śuddhasaṃvinmayatvād yaḥ khaṃ bhaved vyomavittayā /
     padārthavittayārthatvam avatiṣṭhaty aniṣṭhitaḥ // Mo_3,5.23 //
"śuddhasaṃvinmayatvāt" | "śuddhā" kenāpi rūpeṇa niṣṭhāṃ na gatā | yā "saṃvit" saṃvedanaṃ | tatsvarūpatvāt | "aniṣṭhitaḥ" kenāpi rūpeṇa niṣṭhāṃ na gataḥ | "yaḥ" | "vyomavittayā" vyomāham iti saṃvidyuktatvena | "khaṃ" vyoma | bhavati | padārthābhāvarūpaṃ bhavatīty arthaḥ | "padārthavittayā" padārtho 'ham iti saṃvidyuktatvena | "arthatvam" padārthabhāvam | "avatiṣṭhati" āśrayati | upasargasāmarthyāt "tiṣṭhater" āśrayaṇam arthaḥ | ghaṭatve niṣṭhitaḥ ghaṭaḥ paṭatāṃ na yātīti "aniṣṭhita" ity uktam || MoT_3,5.23 ||


sargāntaślokenātmamāhātmyavarṇanaṃ samāpayati
     kurvann apīva jagatāṃ mahatām ananta-
     spandaṃ na kiñcana karoti kadācanāpi /
     svātmany anastamayasaṃvidi nirvikāre
     tyaktodayasthitimatiḥ sthita eka eva // Mo_3,5.24 //


"ya" iti śeṣaḥ | yaḥ ātmā "mahatām jagatām anantaspandam kurvan api iva" jagatprādurbhāvānyathānupapattyā mahājagadviṣayam "anantaṃ spandaṃ" "kurvann apīva" | "kadācana kiñcana na karoti" atiśuddhena kartṛtvābhimānābhāvāt | anyathā "iva"śabdaprayogāyogāt | yaḥ kathambhūtaḥ | "anastamayasaṃvidi" | "anastamayā" yathā tathā kalpitasya svāstamayasyāpi sākṣitvenāvasthānāt paramārthataḥ astamayarahitā | yā "saṃvit" | tatsvarūpe | tathā "nirvikāre" rāgadveṣādirūpebhyaḥ vikārebhyaḥ niṣkrānte | "svātmani" svasvarūpe | "sthitaḥ" | punaḥ kathambhūtaḥ | "tyaktā udayasthityoḥ" jagadviṣayoḥ udayasthityoḥ | "matiḥ" yena | saḥ | tādṛśaḥ | jagataḥ udaye sthitau arthāt saṃhāre ca nirapekṣa ity arthaḥ | iti śivam || MoT_3,5.24 ||


iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe pañcamaḥ sargaḥ || 3,5 ||

*********************************************************************

oṃ evaṃ paramātmanaḥ svarūpaṃ māhātmyaṃ ca pratipādya śrīrāmaṃ tatprāptiṃ prati tvaramāṇaṃ jñātvā sugamaṃ tatprāptyupāyaṃ kathayati
     asya devātidevasya parasya paramātmanaḥ /
     jñānād eva parā siddhir na tv anuṣṭhānakhedadā // Mo_3,6.1 //
"asya" proktasvarūpasya | "devātidevasya" niratiśayakrīḍāśīlasya dyotanaśīlasya ca niratiśaya"paramātmanaḥ" | "jñānād eva" jñānākhyād upāyād eva | "siddhiḥ" prāptirūpā siddhiḥ | bhavati | "asya siddhiḥ anuṣṭhānakhedadā" | "anuṣṭhānena" yaḥ "khedaḥ" | taṃ da"dā"tīti tādṛśī | "na" bhavati || MoT_3,6.1 ||



nanv anuṣṭhānaṃ vinā kathaṃ yuktatā syād ity | atrāha
     atra jñānam anuṣṭhānaṃ na tv anyad upayujyate /
     mṛgatṛṣṇājalabhrāntiśāntivedanarūpi tat // Mo_3,6.2 //
"atra" asyāṃ ātmaprāptirūpāyāṃ siddhau | "jñānam anuṣṭhānaṃ" siddheḥ kāryasādhakaḥ prayatnaḥ | bhavati | "anyat" jñānākhyānuṣṭhānavyatiriktaṃ kāyavyāpārākhyaṃ | "anuṣṭhānaṃ nopayujyate" | "tat" jñānam | "mṛgatṛṣṇāyāṃ" yā "jalabhrāntiḥ" | tasyāḥ "śāntiḥ" | yena | tat | tādṛśaṃ yat "vedanam" | tadvat "rūpam" | asyāstīti tādṛśaṃ bhavati | samyagjñānarūpaṃ bhavatīty arthaḥ || MoT_3,6.2 ||


nanv īdṛśo 'sāv ātmā kutra tiṣṭhatīty | atrāha
     na caiṣa dūre nākāśe nālabhyo viṣamo na ca /
     svānandabhāsarūpo 'sau svadehād eva labhyate // Mo_3,6.3 //
"eṣaḥ" ātmā | "dūre na ca" bhavati | svaśarīrāntarvartitvāt | etena dūrasthamahātīrthāśrayatvaśaṅkā nivāritā | "eṣaḥ" ātmā | "ākāśe na" bhavati | etena uparisthabhuvanāśrayatvaśaṅkā nivāritā | "eṣaḥ" ātmā | "alabhyaḥ" labdhum aśakyaḥ | "na" bhavati | sadā labdhatvāt | anyathā ātmatvāyogyatvāt | etena durlabhatvaśaṅkā nivāritā | "eṣaḥ" ātmā | "viṣamaḥ" kaṭhinaḥ | "na ca" bhavati | parapremāspadatvāt | na hi kaṭhine premāspadatvaṃ yuktam | paratvaviśeṣitasya tu premnaḥ kā kathā | etena aiśvaryaleśamadagrastarājādivat krauryāśaṅkā nivāritā | puruṣeṇa "svānandabhāsarūpaḥ" bhogādiviṣayanirapekṣasvayambhātānandapratibhāsasvarūpaḥ | "asau" ātmā | "svadehād eva" "labhyate" | "svānandabhāsarūpa" ity anena viṣamatvanirāsaḥ | "svadehād" ity anena dūrasthatvākāśasthatvayoḥ nirāsaḥ | "labhyate" ity anena alabhyatvanirāsaḥ || MoT_3,6.3 ||



nanu tapaḥprabhṛtināpi kecid ātmaprāptiṃ kathayantīty | atrāha
     kiñcin nopakaroty atra tapodānavratādikam /
     svabhāvamātraviśrāntim ṛte nātrāsti sādhanam // Mo_3,6.4 //
"atra" asyāṃ ātmaprāptirūpāyāṃ siddhau | "tapodānavratādikam kiñcit nopakaroti" leśenāpi upakāraṃ na karoti | bāhyāṅgatvena ārādupakārakatvāt | tapaḥprabhṛtinā hi sattvaśuddhir eva bhavati | nātmaprāptiḥ | "atra" asyāṃ ātmaprāptau | "svabhāvaviśrāntim ṛte" svarūpaviśrāntiṃ vihāya | "sādhanaṃ na" bhavati || MoT_3,6.4 ||



svabhāvaviśrāntau asamarthān prati upāyaṃ kathayati
     śāstrasatsaṅgasadyogiparataivātra kevalam /
     sādhanaṃ bodhanaṃ mohajālasya yad akṛtrimam // Mo_3,6.5 //
"atra" asyām ātmaprāptau | "śāstraṃ" ca adhyātmaśāstraṃ | tac ca "satsaṅgasadyoginaḥ" ca "śāstrasatsaṅgasadyoginaḥ" | tatra "paratā" ekaniṣṭhatvam | "eva" | na tu tapaḥprabhṛtikam | "sādhanaṃ" upāyaḥ | bhavati | "sādhanaṃ" kiṃ | "yat mohajālasya" jagati jagattvajñānākhyasya mithyājñānaprapañcasya | lakṣaṇayā jagati jagattvajñānākhyasya mohajālayuktasya puruṣasy"ākṛtrimaṃ" sahajaṃ | "bodhanaṃ" brahmaivedam ity | evaṃbodhakāri bhavati || MoT_3,6.5 ||



śāstrādiparatāphalabhūtasyātmaviśrāntim prati sādhanabhūtasya mukhyam upāyatvaṃ kathayati
     ayaṃ sa deva ity eva samparijñānamātrataḥ /
     jantor na jāyate duḥkhaṃ jīvanmuktatvam eti ca // Mo_3,6.6 //
"ayam" ahantayā idantayā ca puraḥsphuraṇaśīlaḥ ahaṅkārādikaḥ saṃsāraḥ | "saḥ" sarveṣāṃ paramārthataḥ ātmabhāvena sthitatvāt prasiddhaḥ | "devaḥ" dyotanaśīlaṃ krīḍāśīlaṃ ca cittattvaṃ bhavati | "ity eva" etāvanmātreṇaiva | "samparijñānamātrataḥ" samyagjñānamātreṇa | "jantoḥ duḥkhaṃ na jāyate" | pravāhāgatasya duḥkhasyāpi cinmātratvajñānāt | saḥ jantuḥ "jīvanmuktatvaṃ caiti" prāpnoti | śarīrasānnidhye 'pi muktatvāt || MoT_3,6.6 ||



sādhanabhāvena prasiddhasya tapaḥprabhṛtikasyāsādhanatvam asahamānaḥ ātmanaḥ sulabhatve nikaṭavartitve ca sandihānaś ca śrīrāmaḥ pṛcchati
     samparijñātamātreṇa kilānenātmanātmani /
     punar doṣā na bādhante maraṇādyāḥ kadācana // Mo_3,6.7 //
"ātmani" svasmin | "samparijñātamātreṇa" ahamādijagadadhiṣṭhānatayā samyaṅniścitena | "anena ātmanā maraṇādyāḥ doṣāḥ na bādhante" | na hi cinmātratāṃ gatasya dehagatāḥ "maraṇādyāḥ" bādhāṃ kartuṃ samarthāḥ bhavanti || MoT_3,6.7 ||
tarhi jñātajñeyatvena maunam eva kurv ity | atrāha
     devadevo mahān eṣa kuto dūrād avāpyate /
     tapasā kena tīvreṇa kleśena kiyatātha vā // Mo_3,6.8 //
asmābhiḥ "eṣaḥ devadevaḥ kutaḥ dūrāt" kiyataḥ dūrāt | "avāpyate" | tathā "kena tīvreṇa tapasā avāpyata atha vā kiyatā kleśena" prāṇarodhanādirūpeṇa kleśena | "avāpyate" | na hi īdṛśasya devadevasya tapaādikaṃ prāṇarodhanādikaṃ ca vinā prāptiḥ yujyate | sarveṣāṃ tatprāptiprasaṅgāt | na hi sarve tatprāptibhājaḥ dṛśyante | na cānavāptasya jñānaviṣayatvaṃ yuktaṃ | prāptasya ghaṭāder eva tadviṣayatādarśanād iti bhāvaḥ || MoT_3,6.8 ||



śrīvasiṣṭhaḥ uttaraṃ kathayati
     svapauruṣaprayatnena vivekena vikāsinā /
     sa devo jñāyate rāma na tapassnānakarmabhiḥ // Mo_3,6.9 //
he "rāma" | "svapauruṣaprayatnena" nijamānasikapauruṣākhyaprayatnasvarūpeṇa | tathā "vikāsinā" vikāsayuktena vicāreṇa | ko 'ham idaṃ jagac ca kim ity evaṃrūpeṇa "vivekena" | puruṣeṇa "sa devaḥ jñāyate" | "tapaḥsnānakarmabhiḥ na jñāyate" | cittādiśodhanamātraparatvāt teṣām | "jñāyate" ity anena jñānamātram evātra sādhanīyaṃ | nāvāptiḥ | na hi puraḥsthāyāṃ śuktau rajatabhramayuktasya śuktyavāptiṃ kāṅkṣamāṇasyāpi śuktyavāptiḥ sadhanīyā | śuktir eveyam ity evaṃrūpasya jñānamātrasyaiva sādhanīyatvāt iti dyotitam | "kuto dūrād" ity asyātyantāsaṅgatattvenottarākathanam || MoT_3,6.9 ||



rāgādiyuktasya tapaādeḥ sphuṭam eva asādhanatvam | tadrahitasya tu sādhanatve 'pi rāgādirāhityasyaiva sādhanatvaṃ yuktam ity abhiprāyeṇāha
     rāgadveṣatamaḥkrodhamadamātsaryavarjanam /
     vinā rāma tapodānaṃ kleśa eva na vāstavam // Mo_3,6.10 //
tapaś ca dānaṃ ca tat "tapodānaṃ" | "vāstavam" sahajabhāvakṛtaṃ || MoT_3,6.10 ||


     rāgādyupahate citte vañcayitvā paraṃ dhanam /
     yad arjyate tato dānād yasyārthas tasya tat phalam // Mo_3,6.11 //
"tataḥ" tasya dhanasya | sārvavibhaktikaḥ tasil || MoT_3,6.11 ||



     rāgādyupahate citte vratādi kriyate ca yat /
     sa dambhaḥ procyate tasya phalam asti manāṅ na vā // Mo_3,6.12 //
"vā"śabdaḥ pakṣāntare || MoT_3,6.12 ||


phalitaṃ kathayati
     tasmāt puruṣayatnena mukhyam auṣadham āharet /
     sacchāstrasajjanāsaṅgaṃ saṃsṛtivyādhināśane // Mo_3,6.13 //
"āharet" arjayet | kuryād iti yāvat | "saṃsṛtivyādhināśane" saṃsṛtyākhyavyādhināśanārtham || MoT_3,6.13 ||



     atraikaṃ pauruṣaṃ yatnaṃ varjayitvetarā gatiḥ /
     sarvaduḥkhakṣayaprāptau na kācid upapadyate // Mo_3,6.14 //
"atrā"syām ātmaprāptau | "pauruṣaṃ yatnam" sacchāstravicārādirūpaṃ | "gatiḥ" upāyaḥ | "sarvaduḥkhakṣayaprāptau" samastaduḥkhakṣayaprāptirūpāyāṃ || MoT_3,6.14 ||


nanu tat pauruṣaṃ kīdṛg astīty | atrāha
     śṛṇu tat pauruṣaṃ kīdṛg ātmajñānasya labdhaye /
     yena śāmyanty aśeṣeṇa rāgadveṣaviṣūcikāḥ // Mo_3,6.15 //
tvaṃ "śṛṇu" | "kīdṛk" kīdṛśaṃ | "tat pauruṣaṃ ātmajñānasya labdhaye" bhavati | "yena" pauruṣeṇa | "rāgadveṣaviṣūcikāḥ aśeṣeṇa śāmyanti" | anyathā ātmajñānalabdhihetutvaṃ tasya na syād iti bhāvaḥ || MoT_3,6.15 ||


pratijñātaṃ pauruṣasvarūpakathanam eva karoti
     yathāsambhavayā vṛttyā lokaśāstrāviruddhayā /
     santoṣasantuṣṭamanā bhogagardhaṃ parityajan // Mo_3,6.16 //
     yathāsambhavam udyogād anudvignatayā svayā /
     sādhusaṅgamasacchāstraparatāṃ prathamaṃ śrayet // Mo_3,6.17 //
"yathāsambhavayā" sambhavānusariṇyā | na tu prayatnasādhitayā | "vṛttyā" jīvikayā | "bhogagardhaṃ" bhogalobham || MoT_3,6.16-17 ||



     yathāprāptārthasantuṣṭo yo garhitam upekṣate /
     sādhusaṅgamasacchāstrarataḥ śīghraṃ sa mucyate // Mo_3,6.18 //
"garhitam" anyāyāgatam dhanādikam || MoT_3,6.18 ||


nanu kathaṃ "saḥ śīghraṃ mucyate" ity | atrāha
     vicāraṇāparijñātasvabhāvasya mahāmateḥ /
     anukampyā bhavanty ete brahmaviṣṇvindraśaṅkarāḥ // Mo_3,6.19 //
"vicāraṇayā" sādhusaṅgādiprabhāvasiddhena vicāreṇa | "parijñātaḥ" dehādivyatiriktatvena niścitaḥ | "svabhāvaḥ" svarūpaṃ | yena | saḥ | tādṛśasya "mahāmateḥ" buddhiyuktasya puruṣasya | "ete brahmaviṣṇvindraśaṅkarāḥ anukampyāḥ" | kīdṛśāḥ | eṣāṃ jagajjananādivyāpāraparatārūpā vipad astīty evaṃrūpānukampāviṣayāḥ "bhavanti" | kim u vaktavyaṃ tasya śīghraṃ mokṣaḥ kathaṃ syād iti bhāvaḥ || MoT_3,6.19 ||



nanu prathamaṃ tāvat tvayā sādhusaṅgatir evopāyatvenoktā | sa sādhur eva kaḥ syād yasya saṅgatiḥ kriyate ity | atrāha
     bhṛśaṃ yaṃ sujanaprāyaṃ lokāḥ sādhuṃ pracakṣate /
     sa viśiṣṭaḥ sa sādhuḥ syāt taṃ prayatnena saṃśrayet // Mo_3,6.20 //
"sujanaprāyam" bāhulyena sujanam | "prāya"padenāsādhutve 'pi | prayojanavaśād bāndhavaiḥ uktasujanatve puruṣe sādhutve 'pi paranindaikarasikakhalajanaproktāsādhujanatve puruṣe sādhutvāsādhutvayoḥ nirāsaḥ || MoT_3,6.20 ||


sādhunirṇayaṃ kṛtvā śāstranirṇayaṃ karoti
     adhyātmavidyā vidyānāṃ pradhānaṃ tatkathāśrayam /
     śāstraṃ sacchāstram ity āhur mucyate tadvicāravān // Mo_3,6.21 //
"vidyānām" samastajñānānāṃ madhye | "adhyātmavidyā" ātmajñānaṃ | "pradhānaṃ" bhavati | ataḥ paṇḍitāḥ "tatkathāśrayam" adhyātmavidyākathāvācakam | "śāstram sacchāstram ity āhuḥ" | "tadvicāravān" proktasacchāstravicārayuktaḥ puruṣaḥ | "mucyate" saṃsārakṛtāt bandhanāt mukto bhavati | ataḥ adhyātmaśāstram evātropayuktam astīti bhāvaḥ || MoT_3,6.21 ||



sacchāstrādeḥ utpannasya vivekasya mukhyopāyatvaṃ sargāntaślokena sphuṭīkṛtya kathayati
     sacchāstrasatsaṅgamajair vivekais
     tathā vinaśyanti balān malāni /
     yathā jalānāṃ katakānuṣaṅgād
     yathā jaḍānām abhayopayogāt // Mo_3,6.22 //
"malāni" rāgādirūpāṇi | janapakṣe rajorūpāṇi | "katakam" jalaśuddhikārī dravyaviśeṣaḥ | dvitīyaṃ dṛṣṭāntaṃ kathayati | "yathā jaḍānām" iti | "jaḍānāṃ" svavivekahīnānām | "abhayopayogāt" | "abhayena" kenacid dattenābhayena | kṛtaḥ yaḥ "upayogaḥ" samāśvāsanākhyaḥ upayogaḥ | tasmāt "malāni" rajjusarpādikṛtabhayarūpāṇi malāni | "vinaśyanti" | tathety arthaḥ | vivekināṃ abhayaṃ svavicāreṇa vinaśyantīti "jaḍānām" ity uktam | iti śivam || MoT_3,6.22 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe ṣaṣṭhaḥ sargaḥ || 3,6 ||

*********************************************************************

dūradeśagamanaṃ upāyajālaprayogaṃ ca vinātmāvāptim amanyamānaḥ śrīrāmaḥ punar api pūrvoktam eva praśnaṃ karoti
     ya eṣa devaḥ kathito yasmiñ jñāte vimucyate /
     vada kvāsau sthito devaḥ katham enam ahaṃ labhe // Mo_3,7.1 //
tvayā "yaḥ eṣaḥ devaḥ kathitaḥ" | tathā "yasmin" deve | "jñāte" sati | puruṣeṇa "vimucyate" muktiḥ prāpyate | tvam "vada" | "asau" "devaḥ" "kva sthitaḥ" bhavati | "aham enam" amuṃ devaṃ | "katham" kaiḥ upāyaiḥ | "labhe" prāpnomi || MoT_3,7.1 ||



śrīvasiṣṭhaḥ uttaraṃ kathayati
     ya eṣa devaḥ kathito naiṣa dūre 'vatiṣṭhate /
     śarīre saṃsthito nityaṃ cinmātram iti viśrutaḥ // Mo_3,7.2 //
mayā "yaḥ eṣaḥ devaḥ kathitaḥ" | "eṣaḥ dūre" dūradeśe | "nāvatiṣṭhate" | yataḥ "cinmātram iti viśrutaḥ" prasiddhaḥ | eṣaḥ "nityaṃ śarīre sthitaḥ" bhavati | anyathā pāṣāṇatulyasya śarīrasyāpi mṛtaśarīravat ceṣṭāśrayatvaṃ na syāt | na ca śarīrasthasya dūrasthatvaṃ vaktuṃ yuktaṃ | svahastayor api dūrasthatvāsaṃyogāt iti bhāvaḥ || MoT_3,7.2 ||


nanu tarhi dehaparimāṇaḥ evāsau syāt | tathā ca dehavad anityatvam apy asya syād ity | atrāha
     eṣa sarvam idaṃ viśvaṃ na viśvaṃ tv eṣa sarvagaḥ /
     vidyate hy eṣa evaiko na tu viśvābhidhāsti dṛk // Mo_3,7.3 //
"eṣaḥ" ātmā | "sarvam idam viśvam" sarvam idaṃ jagat | bhavati | "sarvaṃ" sāratvena sthitatvāt | "tu" pakṣāntare | "sarvagaḥ" sa ca sāratvena sarvapadārthagaḥ | "eṣaḥ viśvaṃ na" bhavati | "hi" yasmāt | "eṣa eka eva vidyate" | "viśvābhidhā dṛk" viśvanāmā dṛṣṭiḥ | viśvam iti yāvat | "na asti" | bhāsamānasyāpi viśvasya taddṛṣṭyā etadrūpatvānapāyāt | na hi taraṅgākrānte jale taraṅgābhidhā dṛk bhavati | bhāsamāneṣv api taraṅgeṣu vivekijanadṛṣṭyā jalatvānapāyāt || MoT_3,7.3 ||



nanu śaśibhṛdādayo 'pi mahādevatāsvarūpāḥ santy | tat katham tvayā "vidyate hy" "eṣa evaika" ity uktam ity | atrāha
     cinmātram eṣa śaśibhṛc cinmātraṃ garuḍadhvajaḥ /
     cinmātram eva tapanaś cinmātraṃ kamalodbhavaḥ // Mo_3,7.4 //
"eṣaḥ" sṛṣṭisaṃhārakatvena prasiddhaḥ | "śaśibhṛt" śrīmahādevaḥ | "cinmātraṃ" bhavati | nanu katham etad iti cet | satyaṃ | "śaśibhṛt" sacetano 'sti cetanārahito vā | acetanatve pāṣāṇarūpasya tasya jagadgatasyāvaratulyayogakṣematvam eva | sacetanatve tu sphuṭam cinmātram eva tadbhāvena sphurati | nanu tarhi śaśibhṛtkīṭayoḥ samatvam eva syād iti cet | kenoktaṃ nāstīti | nanu kāryavilakṣaṇatādarśanād bhedaḥ kalpyate | ayuktam eva kalpyate | na hi agnikaṇamahāgnicayayoḥ kāryavailakṣaṇyena bhedaḥ kalpayituṃ yuktaḥ | nanu agnikaṇamahāgnicayayoḥ kāryavailakṣaṇyaṃ nāsti dāhākhyasyaikasya kāryasya darśanāt iti cet | śaśibhṛtkīṭayor api | kiṃrūpaṃ kāryavailakṣaṇyam asti jñānakriyāyāḥ karaṇakriyāyāś caikatvāt | yas tu bahvalpatākṛto bhedaḥ asti | saḥ dṛṣṭānte 'py astīti na ko 'pi virodhaḥ | evam anyatrāpi yojyam | "garuḍadhvajaḥ" sthityadhikārī | "tapanaḥ" brahmāṇḍagatavastupākakārī sūryaḥ | "kamalodbhavaḥ" sargādhikārī śrībrahmā | ābhyantarārthavivakṣāyāṃ "śaśibhṛt" ahaṅkāraḥ | "garuḍadhvajaḥ" buddhiḥ | "tapanaḥ" prāṇaḥ | "kamalodbhavaḥ" manaḥ | iti yojyam || MoT_3,7.4 ||



śrīrāmaḥ pṛcchati
     bālā api vadanty etad yadi cetanamātrakam /
     jagad ity eva kevātra nāma syād upadeśatā // Mo_3,7.5 //
"yadi jagat cetanamātrakam" bhavati | "ity eva" bhavati | etad eva satyaṃ bhavatīti yāvat | tadā "bālā api etat vadanti" | sarve eva hi cetanāparaparyāyajīvamayaṃ "jagat" kathayanti | ataḥ "atra upadeśatā nāma kā syāt" | ajñātajñāpanasyaivopadeśatvāt | atra "bālā" ity anena vijñānavādināṃ bauddhānāṃ grahaṇam | te eva hi vijñānāparaparyāyasya cetanasyātmatvaṃ kathayanti || MoT_3,7.5 ||


śrīvasiṣṭhaḥ uttaraṃ kathayati
     cinmātraṃ cetanaṃ viśvam iti yaj jñātavān asi /
     na kiñcid etad vijñātaṃ bhavatā bhavatāraṇam // Mo_3,7.6 //
"cetanaṃ cinmātraṃ" cetanākhyaṃ cinmātram | "viśvaṃ" bhavati | "iti" evam | "asi" tvam | "yat jñātavān" | "bhavatā etat kiñcit" leśenāpi | "bhavatāraṇam" saṃsārāt tārakaṃ | "na vijñātam" | cinmātrapadārthānabhijñatvāt | cinmātrapadārthajñānamātreṇaiva hi ca saṃsāraḥ naśyati || MoT_3,7.6 ||


katham etad ity | atrāha
     cetanaṃ nāma saṃsāro jīva eṣa paśuḥ smṛtaḥ /
     etasmād eva niryānti jarāmaraṇavīcayaḥ // Mo_3,7.7 //
"nāma" niścaye | "cetanaṃ saṃsāraḥ" bhavati | cinmātrasthasya cetyaunmukhyasyaiva cetanatvāt cetyaunmukhyasyaiva ca saṃsāratvāt | "saṃsāro" hi saṃsaraṇam ucyate | saṃsaraṇaṃ ca svasthānāt utthānaṃ | cinmātrasya ca cetyaunmukhyasamaye śuddhacinmātratārūpāt svasthānāt utthānaṃ bhavaty evānyathā cetyaunmukhyatvaṃ nāma kiṃ syāt | paṇḍitaiḥ "eṣaḥ" cetanarūpaḥ saṃsāraḥ | "paśuḥ" svarūpajñānarahitatvena paśutulyaḥ | "jīvaḥ smṛtaḥ" | jīvanakriyākartā hi "jīvaḥ" ucyate | "cetanaṃ" ca jīvanam eva | ataḥ tadvati tadupacārāt cetanasyaiva jīvatvam bhavati | tadvati tadupacārāśrayaṇaṃ tv atra paramārthataḥ śuddhacinmātrarūpasya jīvasya jīvatve jīvanakriyāvyatiriktasādhanāntarabuddhinirāsārthaṃ kṛtam | nanu tato 'pi kim ity | atrāh"aitasmād eve"ti | "jarāmaraṇavīcayaḥ" śarīrādigatāḥ jarāmaraṇataraṅgāḥ | "etasmād eva" asmāc cetanāt eva | "niryānti" nirgacchanti | prādurbhavantīti yāvat | svapnadraṣṭari na svapnaśarīragatāḥ jarāmaraṇavīcaya iti bhāvaḥ || MoT_3,7.7 ||



punar apy etad eva kathayati
     paśur ajño hy amūrto 'pi duḥkhasyaivaiṣa bhājanam /
     cetanatvāc cetatīdam atyanarthaḥ svayaṃ sthitaḥ // Mo_3,7.8 //
"amūrtaḥ" sthūlasūkṣmaśarīravyatiriktaḥ | tathā "duḥkhasyaiva" svayam utpādyamānaprapañcarūpasya duḥkhasyaiva | "bhājanaṃ" pātrabhūtaḥ | tadrūpatayā śuddhacinmātrāt utthānāt | anyathā utthānasyāpi vyarthatvāt | tathā "ajñaḥ" śuddhacinmātrākhyasvasvarūpaparāmarśahīnaḥ | ata eva "paśuḥ" "api" paśutulyo 'pi san | "eṣaḥ" jīvaḥ | "cetanatvāt" cetanamātrasvarūpatvāt | "idam" agre sphuratsvarūpam ahaṅkārādikaṃ jagat | "cetati" svasphūrtiviṣayaṃ karoti | cetanasya hy etad eva cetanatvaṃ yat kiñcic "cetatī"ti "cetanatvād" ity uktam | nanu taccetanena kiṃ sampannam ity | atrāh"ātī"ti | tataḥ "atyanarthaḥ" jagadrūpaḥ mahān anarthaḥ | "svayaṃ" tadicchāṃ vinā | "sthitaḥ" prādurbhūtaḥ | atra ca svapnasya dṛṣṭāntatvaṃ sphuṭam eveti nāyastam || MoT_3,7.8 ||



nanv asya cetanasyedaṃ duḥkhaṃ kiṃ kadācic chrāmyed apīty | atrāha
     cetyanirmuktatā yā syād acetyonmukhatātha vā /
     asya sā bharitāvasthā tāṃ jñātvā nānuśocati // Mo_3,7.9 //
"cetyāt nirmuktatā" prathamaṃ svātantryeṇa cetyābhimukhībhūya tataḥ vicāradvāreṇa tataḥ niṣkrāntiḥ | "yā" bhavati | "atha vā acetyonmukhatā" cetyānaunmukhyam eva | "yā" bhavati | "asya" cetanasya | "sā bharitāvasthā" pūrṇāvasthā | bhavati | svarūpabhūtena cinmātratvena pūrṇatvāt | "tāṃ" bharitāvasthāṃ | "jñātvā" paramārthasvarūpatvena niścitya | "nānuśocati" saṃsārākhyaduḥkhabhāk na bhavati | bharitāvasthānena svasmin sthitāyāḥ cetanatāyāḥ asatyatvajñānena tadukte duḥkhe 'py asatyatvajñānāt | atra ca "cetyanirmuktatā" jīvanmuktatāvasthāyāṃ bhavati | "acetyonmukhatā" videhamuktatāvasthāyām iti vibhāgo jñeyaḥ || MoT_3,7.9 ||



nanu tadā asya cetanasya kīdṛśī avasthā bhaviṣyatīty | atrāha
     bhidyate hṛdayagranthiś chidyante sarvasaṃśayāḥ /
     kṣīyante cāsya karmāṇi tasmin dṛṣṭe parāpare // Mo_3,7.10 //
"tasmin" sarvātmatvena sthitatvāt prasiddhe | "parāpare" pararūpacinmātrāpararūpacetanasvarūpe mahācinmātre | "dṛṣṭe" paramārthataḥ ātmabhāvena niścite sati | asyāṃ bharitāvasthāyāṃ jñātāyām iti yāvat | "asya" cetanasya | "hṛdayagranthiḥ" bhogādiviṣayā | "bhidyate" naśyate | tṛptatvāt | tathā "sarvasaṃśayāḥ" padārthasvarūpaviṣayāḥ sarve sandehāḥ | "chidyante" | cinmātrasāratāniścayāt | tathā "karmāṇi" śarīrayātrānimittaṃ kṛtāni karmāṇi | "kṣīyante" | lepānādāyakatvāt || MoT_3,7.10 ||



nanu tarhi atyantopādeyabhūtaṃ acetyonmukhatvam evāhaṃ sādhayāmīty | atrāha
     tasya cetyonmukhatvaṃ tu cetyāsambhavanaṃ vinā /
     roddhuṃ na śakyaṃ dṛśyaṃ tu cetyaṃ śāmyatu vai katham // Mo_3,7.11 //
"tasya" cetanasya | "cetyonmukhatvam" cetanatvāpādakaṃ cetyaunmukhyam | "cetyāsambhavanaṃ vinā roddhuṃ śakyaṃ na" bhavati | na hi tūlapiṇḍe patitaḥ agniḥ śānto bhavati | nanu tarhi cetyam eva nāśayāmi ity | atrāha "cetyam" iti | "dṛśyaṃ" dṛśyasvarūpaṃ cetyam | "kathaṃ śāmyatu" | na śāmyaty eva sataḥ nāśāyogāt | ayaṃ bhāvaḥ | cetyaṃ yadi asti tarhi kathaṃ śāmyet | yadi nāsti tadā cetyānaunmukhyaṃ svayam eva siddhaṃ bhavatīti | na tadāharaṇe jñānamātraṃ vinā prayatno yuktaḥ | na hi vandhyāputranāśacintā kenāpi kriyate iti || MoT_3,7.11 ||



atra śrīrāmaḥ pṛcchati
     sādhusaṅgamasacchāstraiḥ saṃsārārṇavatārakaḥ /
     dṛśyate paramātmā yaḥ sa brahman vada kīdṛśaḥ // Mo_3,7.12 //
he "brahman" | puruṣeṇa "sādhusaṅgamasacchāstraiḥ" | "saṃsāra" eva durlaṅghyatvena "arṇavaḥ" | tasmāt "tārakaḥ" | "yaḥ paramātmā dṛśyate" | tvam "vada" | "saḥ kīdṛśaḥ" bhavati || MoT_3,7.12 ||



śrīvasiṣṭhaḥ śrīrāmapraśnam anādṛtya pūrvoktam evārthaṃ kathayati
     yad etac cetanaṃ jīvo viśīrṇo janmajaṅgale /
     etam ātmānam icchanti ye te 'jñāḥ paṇḍitā api // Mo_3,7.13 //
"yad etat cetanam janmajaṅgale viśīrṇaḥ" paricchinnatāṃ gataḥ | "jīvaḥ" bhavati | "etam ye ātmānam icchanti te paṇḍitāḥ api" dehātmābhimānibhyaḥ sakāśāt kiñcinmātram vicāriṇaḥ api | "ajñāḥ" bhavanti | anātmani "jīvo" ātmatvadarśanāt || MoT_3,7.13 ||



katham etad ity | atrāha
     jīva eveha saṃsārāś cetanād duḥkhasantateḥ /
     asmiñ jñāte na vijñātaṃ kiñcid bhavati kutracit // Mo_3,7.14 //
"saṃsārāḥ" jāgradādibhedabhinnāḥ saṃsārāḥ | "duḥkhasantateḥ" "cetanāt" saṃsāragataduḥkhasantateḥ | svāśrayatayā anubhavanāt "jīve eva" bhavanti | ataḥ "asmin" saṃsārāśraye jīve | "jñāte" sati | lakṣaṇayā prāpte sati | "kiñcit vijñātaṃ" jñānaviṣayīkṛtaṃ | lakṣaṇayā prāptaṃ | "na bhavati" || MoT_3,7.14 ||



tarhi kasya jñānena kiñcit prāptaṃ bhavatīty | atrāha
     jñāyate paramātmā ced rāma tad duḥkhasantatiḥ /
     kṣayam eti viṣāveśaśāntāv iva viṣūcikā // Mo_3,7.15 //
he "rāma" | "paramātmā" proktasya jīvasya sāratayā sthitam paramātmatattvam | "cet" yadi | "jñāyate" | lakṣaṇayā prāpyate | "tat" tadā | "duḥkhasantatiḥ" saṃsārarūpā duḥkhasantatiḥ | "kṣayam" nāśam | "eti" gacchati | tadaiva kiñcit prāptaṃ bhavatīty arthaḥ | kā "iva" | "viṣūcikā iva" | yathā sā "viṣāveśaśāntau kṣayam eti" | tathety arthaḥ || MoT_3,7.15 ||


śrīrāmaḥ paramātmasvarūpaśravaṇākāṅkṣānirbharatvena kathanāyogyatvāc chrīvasiṣṭhenānādṛtam api ātmasvarūpapraśnaṃ punaḥ karoti
     rūpaṃ kathaya me brahman yathāvat paramātmanaḥ /
     yasmin dṛṣṭe naro mohāt samagrāt santariṣyati // Mo_3,7.16 //
"rūpam" svarūpam | "yathāvat" samyak || MoT_3,7.16 ||



śrīvasiṣṭhaḥ ākāṅkṣānirbharatvena śrīrāmasyādhikāritvaṃ niścityottaraṃ kathayati
     deśād deśāntaraṃ dūraṃ prāptāyāḥ saṃvido vapuḥ /
     nimeṣeṇaiva yan madhye tad rūpaṃ paramātmanaḥ // Mo_3,7.17 //
"deśāt" ālambanīkṛtāt ekasmāt saṃvedyarūpāt deśāt | "dūraṃ" atyantavilakṣaṇam | "deśāntaram" ālambanaviṣayīkriyamāṇam anyasaṃvedyākhyam deśāntaram | "nimeṣeṇaiva" ekasmin nimeṣe eva | na tu madhye mauḍhyam anubhūya | "prāptāyāḥ" ālambanabhāvena gṛhṇantyāḥ | "saṃvidaḥ" dṛśyagrahaṇonmukhāyāḥ citaḥ | "madhye" pūrvāparasaṃvedyarāgārūṣitāyāṃ madhyāvasthāyāṃ | "yat vapuḥ" bhavati yat anirvācyaṃ svarūpaṃ bhavati | "tad" eva | na tu tatsadṛśam anyat | "paramātmanaḥ" samastajīvātmasārabhūtasya paramātmatattvasya | "rūpaṃ" bhavati | sarvamayatve 'pi sarvottīrṇatvāt | nanu pūrvasaṃvedyam ālambanīkṛtya tadaivottarasaṃvedyam ālambanīkurvantyāḥ saṃvidaḥ kim idaṃ madhyaṃ nāma yatrasthāyāḥ citaḥ paramātmarūpatā uktā | ucyate | pūrvasaṃvedyena rañjitāyāḥ saṃvidaḥ svaṃ nirmalaṃ rūpam aprāpyottarasaṃvedyena kariṣyamāṇasya rāgasyāyuktatvāt nirmalasvarūpatāmayaṃ madhyam avaśyam evāstīti jñātavyam | yathā nīlīrāgarañjitasya paṭasya pītarāgakaraṇecchayā prakṣālaṇena sphuṭīkṛtaṃ śuddhapaṭatāmayaṃ madhyaṃ bhavati | anyathā kariṣyamāṇasya pītarāgasya karaṇāsambhavāt | nanu pūrvasaṃvedyaviṣayā saṃvit pūrvam eva kṣīṇā | uttarasaṃvedyaviṣayā tu navīnā jātā | tathā ca madhyaṃ nāma śūnyam evāstīti | kiṃ śūnyarūpa evātmāstīti cet | na | uttarasaṃvedyagrahaṇakāle pūrvasaṃvedyasmṛtyanupapatteḥ | na hi pūrvasaṃvedyagrahaṇakālasthāṃ madhye śuddharūpatayā sthitāṃ uttarasaṃvedyagrahaṇakāle 'pi sthitām ekāṃ saṃvidam antareṇa pūrvasaṃvedyaviṣayā smṛtiḥ upapadyate | etena saṃvedyoparāgarahitaṃ jāḍyārūṣitaṃ saṃvittattvaṃ paramātmatvenoktam | atra cābhyāsaṃ kurvatām acirād ayatnenaiva paramātmalābho bhaviṣyaty | asyaiva ca madhyadhāmāveśa iti nāmāstīty alaṃ rahasyodghāṭanena | atra ca sadṛśayoḥ saṃvedyayoḥ madhyam atidurlabham iti "dūram" ity uktam || MoT_3,7.17 ||



     atyantābhāva evāsti saṃsārasya jagatsthiteḥ /
     yasmin bodhamahāmbhodhau tad rūpaṃ paramātmanaḥ // Mo_3,7.18 //
"yasmin bodhamahāmbhodhau" bodhākhye mahāsamudre | "jagatsthiteḥ" jagatsattāsvarūpasya | "saṃsārasya" | "atyantābhāva eva" budbudavat traikālikaḥ abhāvaḥ eva | "asti" | "tat paramātmanaḥ rūpaṃ" bhavati | ayaṃ bhāvaḥ | mumukṣuḥ sacchāstrādibhiḥ prathamaṃ rajjusarpādidṛṣṭāntena tataḥ kanakakaṭakādidṛṣṭāntena dṛśyasya brahmavyatiriktasattābhāvaṃ niścitya śuddhacittattvaikye jātaniścayaḥ yadā abhyāsabalena sarvatra śuddhacittattvamātram evānubhavati suvarṇakāra iva kaṭakādiṣu suvarṇatām tadā tasya jñānam yatsvarūpaṃ bhavati tad eva paramātmasvarūpam iti | nanu jagatpratiyogikaḥ atyantābhāvaḥ na sambhavati | pūrvaṃ bhūtatvāt jagataḥ jagadatyantābhāve niścitasyāpi hi pūrvaṃ jagad bhāsamānam āsīd eveti ced | asat etat | paurvakālikaṃ mithyābhānaṃ hi vastunaḥ uttarakāle niścitaṃ traikālikābhāvapratiyogitvaṃ na nihanti | pūrvaṃ rajjau bhāte sarpe 'pi atyantābhāvapratiyogitvaghātitvaprasaṅgāt | pūrvaṃ sarpatvena bhātāyāṃ rajjau tu sarve sarpasya traikālikātyantābhāvapratiyogitvaṃ sphuṭam eva paśyantīti na ko 'pi virodhaḥ || MoT_3,7.18 ||



     draṣṭṛdṛśyakramo yatra sthito 'py astam alaṃ gataḥ /
     yad anākāśam ākāśas tad rūpaṃ paramātmanaḥ // Mo_3,7.19 //
"sthitaḥ api" pratyakṣaṃ bhāsamāno 'pi | "draṣṭṛdṛśyakramaḥ" ayaṃ draṣṭā idaṃ dṛśyam ity evaṃrūpaḥ kramaḥ | "yatra" yasmin vastuni | "alaṃ" atiśayena | samyag iti yāvat | "astaṃ" layaṃ | "gataḥ" bhavati | nanu sthitasya draṣṭṛdṛśyakramasya katham anyasmin layasambhavaḥ | tathā cānena dvāreṇa paramātmasvarūpakathanam ayuktam eveti cen | na | draṣṭṛdṛśyau tāvat kasyacit sākṣiṇaḥ bhātau bhavataḥ na vā | na cet kathaṃ tarhi tayoḥ draṣṭṛdṛśyatve sidhyataḥ | yathā tathā tatsiddhau api kathaṃ tayoḥ vyavasthā sidhyati | ayaṃ draṣṭaivedaṃ dṛśyam eveti bhātau cet tarhi tasmin layaḥ tayoḥ sukaraḥ eva | na hi svapnasākṣiṇam atikramya svapnabhāte draṣṭṛdṛśye kenāpi svarūpeṇa yukte sambhavataḥ iti na kaścid virodhaḥ | tathā "yat" vastu | "anākāśam" grāhakaikasvabhāvatvena grāhyatvābhāvāt grāhyaikasvarūpākāśavyatiriktam api sat | "ākāśaḥ" bhavati | vyāpakatvasvacchatvādiguṇaiḥ "ākāśa"śabdavācyo bhavatīty arthaḥ | "tat" tad eva vastu | na tu tatsadṛśam anyat kiñcit | "paramātmanaḥ rūpaṃ" bhavati || MoT_3,7.19 ||



     aśūnyam iva yac chūnyaṃ yasmiñ śūnye jagat sthitam /
     sargaughe sati yac chūnyaṃ tad rūpaṃ paramātmanaḥ // Mo_3,7.20 //
"śūnyam" bāhyāntaḥkaraṇāgrāhyatvena na kiñcid rūpaṃ | "yat" vastu | "aśūnyam iva" kiñcid iva | bhavati | anyathā jagadrūpabhramādhiṣṭhānatvāsambhavāt | na hi asad vastu kasyacid adhiṣṭhānībhavitum arhati | vandhyāputrasyāpi maitrabhramādhiṣṭhānatvaprasaṅgāt | tathā "śūnye" proktanyāyena śūnyasvarūpe | "yasmin" | "jagat sthitaṃ" sattābhāk bhavati | mṛdīva ghaṭādayaḥ | anyathā jagataḥ kiṃrūpatvaṃ syāt iti bhāvaḥ | tathā "sargaughe" sṛṣṭisamūhe | "sati" adhiṣṭheyatayā kāryatayā vā sthitiṃ bhajati sati | "yat śūnyam" svavyatiriktavasturahitam eva | bhavati | na hi rajjau sarpāvasthānena mṛdi vā ghaṭāvasthānena svavyatiriktavastuyuktatvaṃ kalpayituṃ śakyate | "tat paramātmanaḥ rūpaṃ" bhavati || MoT_3,7.20 ||



     yan mahācinmayam api bṛhatpāṣāṇavat sthitam /
     jaḍaṃ tv ajaḍam evāntas tad rūpaṃ paramātmanaḥ // Mo_3,7.21 //
"yat" yat vastu | "mahācinmayam api" samastajagatsākṣitānyathānupapattyā mahācitprakāśasvarūpam api sat | "bṛhatpāṣāṇavat sthitaṃ" bhavati | mahājaḍam iva bhavati | atiśāntatvena svaparāmarśe 'pi svātantryeṇa vimukhatvāt | "yat" kathambhūtaṃ "tu" | "antaḥ" pāramārthike svarūpe | "ajaḍam eva" sat | "jaḍaṃ tu" jaḍam iva ity arthaḥ | idaṃ viśeṣaṇadvayam yathāsaṅkhyātikrameṇa pūrvārdhoktasyārthasya samarthakatvena jñeyam | "tat paramātmanaḥ rūpaṃ" bhavati || MoT_3,7.21 ||



     sabāhyābhyantaraṃ sarvaṃ yena samprāpya saṅgamam /
     svarūpasattām āpnoti tad rūpaṃ paramātmanaḥ // Mo_3,7.22 //
"sarvaṃ sabāhyābhyantaraṃ" bāhyābhyantaratvena vartamānaṃ samastaṃ jagat | "yena" sākṣitayā sthitena yena vastunā | "saṅgamaṃ" sambandhaṃ | "prāpya" | yadviṣayatvaṃ prāpyeti yāvat | "svarūpasattām" prātisvikasya rūpasya sattām | pr"āpnoti" | sākṣipratītau sphuraṇaṃ vinā hi sato 'pi nīlasukhādeḥ sattā asatkalpā eva dṛśyate | "tat paramātmanaḥ rūpaṃ" bhavati || MoT_3,7.22 ||


     prakāśasya yathāloko yathā śūnyatvam ambare /
     tathedaṃ saṃsthitaṃ yatra tad rūpaṃ paramātmanaḥ // Mo_3,7.23 //
"prakāśasya" tejasaḥ | "yathā ālokaḥ" padārthaprākaṭyahetuḥ bhāsvaratākhyo guṇaviśeṣaḥ bhavati | "yathā" vā "śūnyatvam" śūnyabhāvaḥ | "ambare" ākāśe | bhavati | "tathā" tadvat | "idam" jagat | "yatra" yasmin adṛśye vastuni | "sthitaṃ" bhavati | "tat paramātmanaḥ rūpaṃ" bhavati | ayaṃ bhāvaḥ | yathā bhāsamānaḥ ālokaḥ svapradhānatvena na kathyate | anyathā prakāśaguṇatvakathanānupapatteḥ | prakāśaś ca vicāryamāṇaḥ anirvācyatām evāvagāhate | tathā bhāsamānam idaṃ jagat api anirvācye kasmin citsārabhūte pradhāne sthitam iti jñeyam | yasmin tu sthitam asti tad eva paramātmā bhavatīti | nanv etaiḥ anumānagamyasya kasyāpi vastunaḥ paramātmatvaṃ sādhitam | tathā cāsau paramātmā kalpita iti jñeyam | anumānagamyasya kalpitatvāt | nirvikalpapratyakṣamātragamyasya svalakṣaṇasyaiva paramārthasattvād iti ced | asad etat | upadeśyasya pratikṣaṇaṃ madhyāvasthāsu ātmatvena pratyakṣaṃ sphuraṇaśīlam apy ātmatayā ajñātam paramātmasvarūpaṃ | ciravismṛtapuraḥsthitabāndhavavat tavātmā bhavatīti na ko 'py atra pratibhāvataḥ prati anumānasparśaḥ | apratibhāvatāṃ tv atrādhikāra eva nāstīty alaṃ paradoṣaguṇavicāraṇena || MoT_3,7.23 ||



śrīrāmaḥ pṛcchati
     sarvataḥ paramātmaiṣa kathaṃ nāmābhibudhyate /
     iyato 'sya jagannāmno dṛśyasyāsambhavaḥ kutaḥ // Mo_3,7.24 //
asmābhiḥ | "eṣaḥ" jagadvyatiriktasvarūpaḥ | "paramātmā" | "sarvataḥ" sarvatra | sarvāsv avasthāsv iti yāvat | "kathaṃ nāma abhibudhyate" | yataḥ "iyataḥ" bāhyāntaravyāpakasya | "asya dṛśyasya asambhavaḥ" "kutaḥ" syāt | jāgrati hi sthūlaṃ jagat sphurati | svapne svapnajagat | suṣuptau jāḍyam | etābhyaḥ vyatiriktā tu avasthā nāstīti | ayaṃ ca praśnaḥ sarvadā paramātmamayatvāsādanākāṅkṣiṇā śrīrāmeṇa jāgrati pratikṣaṇaṃ sphuramāṇāḥ śuddhaparamātmasvarūpamayyaḥ madhyāvasthāḥ anāśritya kṛtaḥ || MoT_3,7.24 ||



śrīvasiṣṭhaḥ uttaraṃ kathayati
     bhramasya jāgatasyāsya jātasyākāśavarṇavat /
     atyantābhāvasambodho yadi rūḍhibalaṃ bhavet // Mo_3,7.25 //
     taj jñātaṃ brahmaṇo rūpaṃ bhaven nānyena karmaṇā /
     dṛśyātyantābhāvatas tu ṛte nānyā śubhā gatiḥ // Mo_3,7.26 //
"ākāśavarṇavat jātasya" prādurbhūtasya | "asya" puraḥsphurataḥ | jagata iti yāvat | "atyantābhāvasambodhaḥ" atyantābhāvajñānam | na tu nāśanākhyaḥ | "rūḍhi" siddhiyuktaṃ | "balaṃ" yatra | tat | tādṛśaṃ | "bhavet" "yadi" syāt | "tat" tadā | "brahmaṇaḥ" paramātmanaḥ | "rūpaṃ" svarūpaṃ | "jñātaṃ bhavet" | "anyena karmaṇā" etadvyatiriktena tapaḥprabhṛtinā | "na" bhavet | yataḥ "dṛśyātyantābhāvataḥ ṛte" dṛśyātyantābhāvād ṛte | "anyā śubhā gatiḥ" śubhaḥ upāyaḥ | "na" bhavati | dṛśyātyantābhāvaś ca jñānadvāreṇaiva sidhyati | prayatnasādhitasya abhāvasya pradhvaṃsābhāvatvād iti śuktau rajatātyantābhāvavat mṛdi ghaṭātyantābhāvavad vātyantābhāvasambodhasyopāyatvakathanam || MoT_3,7.25-26 ||



nanu samyagjñānadvāreṇa siddhasya dṛśyatvarūpajagadatyantābhāvasyaiva kathaṃ paramātmaprāptau upāyatvam astīty | atrāha
     atyantābhāvasampattau dṛśyasyāsya yathāsthiteḥ /
     śiṣyate paramārtho 'sau budhyate jñāyate tataḥ // Mo_3,7.27 //
"yathāsthiteḥ" evam eva vartamānasya | na tu prayatnanāśitasya | "asya dṛśyasya" jagadrūpasya dṛśyasya | "atyantābhāvasampattau" atyantābhāvasya sampattau | śuktau bhātarajatātyantābhāvavat mṛdi bhātaghaṭātyantābhāvavad vā siddhau satyāṃ | "asau paramārthaḥ" dṛśyādhiṣṭhānabhūtaḥ dṛśyasārabhūtaḥ vā asau paramātmā | "śiṣyate" śeṣatvena sthito bhavati | rajatātyantābhāvajñāne iva śuktiḥ ghaṭātyantābhāvajñāne iva vā mṛt | tadvyatirekeṇānyasya kasyāpy asattvāt tataḥ puruṣeṇ"āsau budhyate" | astīti parokṣapratītyā niścīyate | "tataḥ" tadanantaram | "jñāyate" | aham ity aparokṣapratītyā niścīyate || MoT_3,7.27 ||



nanu jñānopāyikaḥ dṛśyātyantābhāvo mā sidhyatu prāṇarodhanādyupāyajālasādhitayā vismṛtyā eva paramātmajñānaṃ bhaviṣyatīty | atrāha
     na cid apratibimbāsti dṛśyābhāvād ṛte kvacit /
     kva vinā pratibimbena kilādarśo 'vatiṣṭhate // Mo_3,7.28 //
"cit" sākṣibhāvena sthitam cittattvam | "dṛśyābhāvād ṛte" svasākṣibhāvasiddhāt dṛśyābhāvāt ṛte | "apratibimbā" dṛśyapratibimbarahitā | dṛśyasākṣitām akurvatīti yāvat | "kvacin na" bhavati | svabhāvatyāgaprasaṅgāt | atra samarthakaṃ dṛṣṭāntaṃ kathayati | "kva vine"ti | na hi bimbasattāyāṃ pratibimbarahitaḥ "ādarśaḥ" dṛśyate iti bhāvaḥ | nanv anyadeśasthe bimbe sattāṃ bhajaty api ādarśaḥ pratibimbarahitaḥ dṛśyate | tathā bahiḥ dṛśyasattā bhavatu | prāṇarodhādidvāreṇa bahiḥ aprasarantī cit dṛśyasparśarahitā bhaviṣyatīti cet | asad etat | atyantābhāvajñānaṃ vinā dṛśyabījasya nāśayitum aśakyatvāt | anyathā nidritasyāntaḥ svapnaprapañcabhānaṃ na syāt | nanu tasya prāṇarodhādyupāyarāhityāt svapnapratibhānam astīti cet | tarhi dṛśyātyantābhāvajñānahīnān kapaṭarahitān prāṇarodhādikāriṇaḥ eva pṛccha | kiṃ yuṣmākaṃ svapnapratibhānam asti na veti | nanu kapaṭarahitāḥ dṛśyātyantābhāvajñānayuktā api asmābhiḥ pṛṣṭā eva | tair api svasya svapnapradarśakatvam uktam | ucyatāṃ nāma kā hāniḥ | yathā jāgrati bhāsata eva jagataḥ atyantābhāvajñānaṃ teṣām asti tathā svapne 'pi | na hi te bhāsamānam eva dṛśyaṃ dṛśyatayā paśyanti | kiṃ tu brahmatayety alaṃ prapañcena || MoT_3,7.28 ||



nanu tathāpi dṛśyātyantābhāvena vinaivātmatattvaṃ paśyāma ity | atrāha
     jagannāmno 'sya dṛśyasya sattāsambhavanaṃ vinā /
     budhyate paramaṃ tattvaṃ na kadācana kenacit // Mo_3,7.29 //
"asya" puraḥsphurataḥ | "jagannāmnaḥ" jagad iti nāmadheyayuktasya | "dṛśyasya" dṛśikriyāviṣayasya bhāvajātasya | "sattāsambhavanaṃ vinā" atyantābhāvaṃ vinā | "kenacit" puruṣeṇa | "kadācit" | "paramaṃ tattvam" paramātmākhyaṃ tattvam | "na budhyate" na jñāyate | tasmāt dṛśyātyantābhāvaḥ samyagjñānopāyena sādhyaḥ iti bhāvaḥ || MoT_3,7.29 ||



dṛśyāsattāyāṃ sandihānaḥ śrīrāmaḥ pṛcchati
     iyato dṛśyajālasya brahmāṇḍasya jagatsthiteḥ /
     mune katham asattāsti kva meruḥ sarṣapodare // Mo_3,7.30 //
vaipulyakathanam | yathā "meruḥ sarṣapodare" astīti kenacid ukte sati | tasmin asambhavārthapratipādakatvam eva viśrāmyati | tathā jagataḥ sattā nāstīti pratipādake tvayy apīti bhāvaḥ || MoT_3,7.30 ||


śrīvasiṣṭhaḥ uttaraṃ kathayati
     dināni katicid rāma yadi tiṣṭhasy akhinnadhīḥ /
     sādhusaṅgamasacchāstraparamas tad aham kṣaṇāt // Mo_3,7.31 //
     pramārjayāmi te dṛśyaṃ bodho mṛgajalaṃ yathā /
     dṛśyābhāve draṣṭṛtā ca śāmyed bodho 'vaśiṣyate // Mo_3,7.32 //
he "rāma" | tvaṃ | cet "yadi katicit dināni" kiyanti dināni | "akhinnadhīḥ" anudvignamatiḥ san | saṃmukhadhīḥ sann iti yāvat | "sādhusaṅgamasacchāstraparamaḥ tiṣṭhasi" | "tat" tadā | "ahaṃ kṣaṇāt te" tava | tvāṃ pratīti yāvat | "dṛśyam" dṛśyarūpaṃ jagat | "pramārjayāmi" nāśayāmi | jñānadvāreṇātyantābhāvayuktatvaṃ sampādayāmīti yāvat | kaḥ "yathā" | "bodho yathā" | "yathā bodhaḥ" samyagjñānam | "mṛga"tṛṣṇā"jalaṃ" pramārjayati | tathety arthaḥ | anena sādhusaṅgādeḥ dṛśyātyantābhāvajñānaṃ prati mukhyam upāyatvam uktam | nanu dṛśyamārjanena kiṃ setsyatīty | atrāha "dṛśyābhāve" iti | "dṛśyābhāve" jñānadvāreṇa dṛśyābhāve siddhe sati | "draṣṭṛtā ca śāmyet" layaṃ vrajet | nanu tarhi abhāva eva śiṣyate ity | atrāha "bodha" iti | "bodhaḥ" dṛśyadraṣṭratyantābhāvasākṣibhūtaṃ śuddhacittattvaṃ | "śiṣyate" avaśiṣṭaṃ bhavati | anyathā siddhasyāpi dṛśyātyantābhāvasya asatkalpatvaṃ syāt || MoT_3,7.31-32 ||



nanu kathaṃ dṛśyamātrātyantābhāvenaiva draṣṭṛtā śāntiṃ vrajatīty | atrāha
     draṣṭṛtvaṃ sati dṛśye 'smin dṛśyatvaṃ saty avekṣake /
     ekatvaṃ sati hi dvitve dvitvaṃ caikatvavedane // Mo_3,7.33 //
"asmin" puraḥsphuraṇaśīle | "dṛśye" dṛśikriyāviṣaye bhāvajāte | "sati" sattāṃ bhajati sati | "draṣṭṛtvam" paramārthataḥ śuddhacinmātrasvarūpadraṣṭṛviṣayaḥ draṣṭṛbhāvaḥ syāt | viṣayasadbhāvena dṛśikriyāṃ prati kartṛtvasambhavāt | taṇḍulādiṣu hi satsu tadviṣayāṃ pākakriyāṃ prati kartṛtvaṃ bhajataḥ puruṣasyaiva pācakatvaṃ bhavati | na kevalaṃ dṛśyasattayā draṣṭuḥ eva draṣṭṛtā bhavati | api tu draṣṭṛsattayāpi dṛśyasya dṛśyatvam astīty abhiprāyeṇāha "dṛśyatvam" iti | "avekṣake" prekṣake | draṣṭarīti yāvat | "sati" sattām bhajati sati | "dṛśyatvam" paramārthataḥ śuddhacinmātrasvarūpadṛśyāśrayaḥ dṛśyabhāvaḥ syāt | na hi pācakena pākakriyāviṣayīkṛtaṃ taṇḍulādikam odanāvasthādyaparaparyāyaṃ pācyabhāvam avalambate | ataḥ anyo'nyāpekṣatvena dṛśyamātrātyantābhāvena draṣṭṛviṣayā draṣṭṛtā naśyaty eveti bhāvaḥ | draṣṭṛtvadṛśyatvānyo'nyāśrayakathanaprasaṅgena tayoḥ ekatvadvitvayor api anyo'nyāśrayaṃ kathayati "ekatvam" iti | "ekatvam" mukhyatayā pūrvaṃ gaṇanārhe draṣṭari gatam ekatvam | "dvitve" avaratayā paścād gaṇanārhadṛśyagate dvitve | "sati" sattāṃ bhajati sati | syāt | dvitvābhāve gaṇanasyaiva apravṛtteḥ | gaṇanaṃ hi dvitvādikaṃ vīkṣyaiva vyavasthātuṃ pravartate | dvitvādyabhāve tu kimarthaṃ tasya pravartanaṃ syāt | vyavasthāyāḥ svayaṃ vṛttau ca tatprathamāvayavabhūtasya ekatvasya sphuṭā evāsiddhiḥ | tathā "dvitvam" dṛśyagataṃ dvitvam | "ekatvavedane" ekatvākāre vedane | draṣṭṛgate ekatve iti yāvat | "sati" | syāt | ekaṃ vigaṇayyaiva dvitīyo gaṇanaviṣayatāṃ yātīti sphuṭā eva hi ekatvaṃ vinā dvitvasya anupapattiḥ || MoT_3,7.33 ||



phalitaṃ kathayati
     ekābhāve dvayor eva siddhir bhavati nātra hi /
     dvitvaikyadraṣṭṛdṛśyatvakṣaye sad avaśiṣyate // Mo_3,7.34 //
"hi" niścaye | ataḥ "atra" anayoḥ ekatvadvitvayoḥ madhye | "ekābhāve" ekasya dvitvasya vā abhāve sati | "dvayoḥ eva" ubhayoḥ dvitvaikatvayoḥ eva | "siddhiḥ na bhavati" | nanu tataḥ kiṃ setsyatīty | atrāha "dvitvaikye"ti | dvitvaikyayoḥ draṣṭṛdṛśyayoś ca kṣayaḥ "dvitvaikyadraṣṭṛdṛśyakṣayaḥ" | tasmin sati "sat" dvitvādisākṣitvena sthitaṃ sadākhyaṃ vastu | "avaśiṣyate" avaśiṣṭaṃ bhavati || MoT_3,7.34 ||



vyavahitaṃ dṛśyapramārjanapratijñāṃ punar api karoti
     ahantādi jagad dṛśyaṃ sarvaṃ te mārjayāmy aham /
     atyantāsattvasaṃvittyā manomakurato malam // Mo_3,7.35 //
"aham" | "ahantādi" ahambhāvapramukham | "malaṃ" malabhūtaṃ | "sarvaṃ dṛśyaṃ jagat" | "te manomakurataḥ" tvanmanodarpaṇāt | "atyantāsattvasaṃvittyā" atyantābhāvajñānena | dṛśyaviṣayātyantābhāvajñānotpādaneneti yāvat | pra"mārjayāmi" | yuktaṃ ca makurāt malāpamārjanam || MoT_3,7.35 ||



nanv etāvataḥ dṛśyasya pramārjanaṃ kathaṃ kartuṃ śaknoṣīty | atrāha
     nāsato vidyate bhāvo nābhāvo vidyate sataḥ | /
     yat tu nāsti svabhāvena kaḥ kleśas tatpramārjane // Mo_3,7.36 //
"asataḥ" sattākartṛtvam abhajataḥ | "bhāvaḥ" sattā | "na vidyate" | śaśaśṛṅgasyāpi sattāpatteḥ | "sataḥ" sattākartṛtvaṃ bhajataḥ | "abhāvaḥ" asattā | "na vidyate" | svarūpahāniprasaṅgāt | na ca svarūpahāniḥ yuktā | agner api agnitvahāniprasaṅgāt | "yat" svarūpeṇa "nāsti" | "tatpramārjane kaḥ kleśaḥ" bhavati | na hi śaśiśṛṅgatroṭane kasyāpi yatnaḥ dṛṣṭaḥ || MoT_3,7.36 ||



nanu tathāpi pravartane kim āyātam ity | atrāha
     jagad ādāv anutpannam yac cedaṃ dṛśyate tatam /
     tat svātmany eva vimale brahma cittvāt svabṛṃhitam // Mo_3,7.37 //
"jagat ādau" prathamaṃ eva | "anutpannaṃ" bhavati | ataḥ jagatpramārjane kleśo nāstīti bhāvaḥ | nanu yadi jagat prathamam evānutpannaṃ bhavati tarhi kim idaṃ bhāsata ity | atrāha "yac cedam" iti | "yac cedam" yac caitat | "tatam" vistāritasvarūpaṃ kiñcit "dṛśyate" | "tat brahma" "eva" brahmākhyaṃ vastu eva | "vimale svātmani" śuddhacinmātrasvarūpāyāṃ svabhittau | "cittvāt svabṛṃhitaṃ" atiśayena bṛṃhāgataṃ bhavati | anyathā brahmatvāyogāt | bṛṃhāyuktam eva hi brahmocyate | na ca vastuni bṛṃhaṇaṃ nāmānyavastunaḥ utpattiḥ vaktuṃ śakyate | jale 'pi dravatvāt prādurbhūtasya taraṅgatayā bṛṃhaṇasyānyavastūtpattitvaprasaṅgāt | na ca mūrkho 'pi jale taraṅgānām anyatvam aṅgīkaroti | cidrūpasyātmana eva svapnapadārthabhāvena bṛṃhaṇaṃ dṛṣṭam iti "cittvād" ity uktam || MoT_3,7.37 ||



punaḥ punar etad eva kathayati
     jagan nāma na cotpannaṃ na cāsti na ca dṛśyate /
     hemnīva kaṭakāditvaṃ kim etanmārjane śramaḥ // Mo_3,7.38 //
"nāma" niścaye | "jagat na cotpannaṃ" bhavati | "na ca asti" | "na ca dṛśyate" | brahmaṇa evaitadrūpatayā sthitatvāt | jagat kim "iva" | "kaṭakāditvam iva" | yathā "hemni" bhāsamānaṃ "kaṭakāditvaṃ" nāsti | hemnaḥ eva tadrūpatayā sthitatvāt | tathā ity arthaḥ | ataḥ "etat"pra"mārjane" śramaḥ kiṃ bhavati | brahmatājñānamātreṇaiva pramārjitatvāt | na hi hemni bhāsamānaṃ kaṭakāditvaṃ aśakyapramārjanaṃ bhavati | hematājñānamātreṇaiva tasya pramārjitatvāt || MoT_3,7.38 ||


etāvata āśvāsarahitaṃ śiṣyaṃ jñātvā tasya samāśvāsanaṃ karoti
     tathaitad vistareṇeha vakṣyāmo bahuyuktibhiḥ /
     abādhitaṃ yathā nūnaṃ svayam evānubhūyate // Mo_3,7.39 //
vayam | "etat" pūrvoktaṃ vastu | "vistareṇa bahuyuktibhiḥ tathā ihā"smin śāstre | "vakṣyāmaḥ" | "nūnaṃ" niścaye | "yathā" tvayā "etat abādhitaṃ svayam evānubhūyate" || MoT_3,7.39 ||


prakṛtam eva kathayati
     ādāv eva hi notpannaṃ yat tasyehāstitā kutaḥ /
     kuto marau jalasarid dvitīyendau kuto grahaḥ // Mo_3,7.40 //
"hi" niścaye | "yat" vastu | "ādāv eva utpannaṃ na" bhavati | "tasyehāstitā" sattvam | "kutaḥ" bhavati | atra dṛṣṭāntadvayam kathayati "kuta" ityādi || MoT_3,7.40 ||



     yathā vandhyāsuto nāsti yathā nāsti marau jalam /
     yathā nāsti nabhovṛkṣas tathā nāsti jagadbhramaḥ // Mo_3,7.41 //
"jagadbhramaḥ" jagadrūpaḥ bhramaḥ | jagad iti yāvat || MoT_3,7.41 ||



tarhi kim idaṃ bhāsate ity | atrāha
     yad idaṃ dṛśyate rāma tad brahmaiva nirāmayam /
     etat purastād vakṣyāmo yuktito na giraiva vaḥ // Mo_3,7.42 //
asmābhiḥ "yat idaṃ dṛśyate" | "tat nirāmayam" bhāvābhāvākhyāmayarahitam | "brahmaiva" bhavati | vayam | "etat purastāt" agre | "yuktitaḥ" yuktibhiḥ | "vaḥ" yuṣmākam | "vakṣyāmaḥ" | "na girā eva vakṣyāmaḥ" | sārvavibhaktikas tasil || MoT_3,7.42 ||



sargāntaślokena yuktiyuktavākyopekṣāṃ tyājyatvena kathayati
     yan nāma yuktibhir iha pravadanti tajjñās
     tatrāvahelanam ayuktam udārabuddheḥ | /
     yo yuktiyuktam avamatya vimūḍhabuddhyā
     kaṣṭāvaho bhavati taṃ vidur ajñam eva // Mo_3,7.43 //
"nāma" niścaye | "avahelanam" upekṣā | "kaṣṭāvahaḥ" kaṣṭadāyī | asambhavaprayatnair ātmana iti śeṣaḥ | iti śivam || MoT_3,7.43 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe saptamaḥ sargaḥ || 3,7 ||

*********************************************************************

śrīrāmaḥ pṛcchati
     kayaitaj jñāyate yuktyā katham etat prasidhyati /
     nyāye 'nubhūta etasmin na jñeyam avaśiṣyate // Mo_3,8.1 //
"etat" dṛśyāsatyatvam | nanu kimartham atra yuktiṃ pṛcchasīty | atrāha "nyāye"ti | yataḥ "etasmin nyāye" | nyāyena "anubhūte" sati | "jñeyam nāvaśiṣyate" | yuktiśravaṇena sarvasya jñātatvāt || MoT_3,8.1 ||


śrīvasiṣṭhaḥ vistarakathanapratijñāṃ sampādayiṣyann uttaraṃ kathayati
     bahukālam iyaṃ rūḍhā mithyājñānaviṣūcikā /
     jagannāmnī vicārākhyād ṛte mantrān na śāmyati // Mo_3,8.2 //
ā"rūḍhā" buddhau satyatayā sphuritā | jagataś ca mithyājñānarūpatvaṃ śuktirajatavaj jñeyam | yuktaś ca "viṣūcikāyāḥ mantreṇa" nāśaḥ || MoT_3,8.2 ||


vakṣyamāṇopadeśaśravaṇaṃ prati śrīrāmaṃ dṛḍhīkaroti
     vadāmy ākhyāyikā rāma yā imā bodhasiddhaye /
     tāś cec chṛṇoṣi tat sādho mukta evāsi buddhimān // Mo_3,8.3 //
"ākhyāyikāḥ" upadeśakārīṇi ākhyānāni | "bodhasiddhaye" dṛśyātyantābhāvajñānasiddhaye | "muktaḥ" dṛśyenāspṛṣṭaḥ || MoT_3,8.3 ||



aśravaṇe daṇḍaṃ kathayati
     no ced udvegaśīlatvād ardhād utthāya gacchasi /
     tat tiryagdharmiṇas te 'dya kiñcin nāpi tu setsyati // Mo_3,8.4 //
tvaṃ "no cet" śṛṇoṣi | atha vā "udvegaśīlatvāt ardhād utthāya gacchasi" | "tat" tadā | "tiryagdharmiṇaḥ" paśutulyasya | "te" | "kiñcid api na setsyati" || MoT_3,8.4 ||



nanu dṛḍhatayā śravaṇenāpi yadi kiñcin na setsyati tadā kiṃ kāryam ity | atrāha
     yo yam arthaṃ prārthayate tadarthaṃ yatate tathā /
     so 'vaśyaṃ tad avāpnoti na cec chrānto nivartate // Mo_3,8.5 //
"yaḥ" puruṣaḥ | "yam artham" yat vastu | "prārthayate" prārthanāviṣayaṃ karoti | "tathā" tadanukalpena | na tv anyathā | "yatate" | "saḥ avaśyaṃ tat āpnoti" | "cet" yadi | "śrāntaḥ na nivartate" || MoT_3,8.5 ||



nanv aham asmin prārthite vastuni kiṃrūpaṃ yatnaṃ karomīty | atrāha
     sādhusaṅgamasacchāstraparo bhavasi rāma cet /
     tad dinair eva vā māsaiḥ prāpnoṣi paramaṃ padam // Mo_3,8.6 //
niratiśayapratibhāvattve "dinaiḥ" | anyathā "māsair" | iti vibhāgaḥ || MoT_3,8.6 ||


śrīvasiṣṭhasādhutve niścitaḥ śrīrāmaḥ ātmajñānaprabodhanimittaṃ śāstraṃ pṛcchati
     ātmajñānaprabodhāya śāstraṃ śāstravidāṃ vara /
     kiṃnāma tatpradhānaṃ syād yasmiñ jñāte na śocyate // Mo_3,8.7 //
"ātmajñānaprabodhāya" ātmajñānāvirbhāvārtham | "na śocyate" dṛśyāsaktirūpaṃ śocanaṃ nānubhūyate || MoT_3,8.7 ||



śrīvasiṣṭha uttaraṃ kathayati
     ātmajñānapradhānānām idam eva mahāmate /
     śāstrāṇāṃ paramaṃ śāstraṃ mahārāmāyaṇābhidham // Mo_3,8.8 //
"ātmajñānaṃ pradhānaṃ" vācyatayā sārabhūtaṃ yeṣāṃ | te | tādṛśānām | "idaṃ rāmāyaṇābhidham" ayam mahārāmāyaṇākhyaḥ itihāsaḥ | nanu śrīvālmīkinā svenopanibaddhe śrīmahārāmāyaṇe śrīrāmavṛttāntakathanaprasaṅgataḥ śrīrāmaṃ prati śrīvasiṣṭhena kṛtaḥ upadeśaḥ nibaddhaḥ yaḥ kenāpi dayālunā asmāc chrīmahārāmāyaṇād uddhṛtaḥ tat katham upadeśakālānantarabhāvinaḥ śrīmahārāmāyaṇasya śrīvasiṣṭhena "idam" ity anena parāmarśaḥ kṛtaḥ | anena hi śrīmahārāmāyaṇasya śrīvasiṣṭhakṛtatvaṃ dyotate iti cet | ārambhe evāsmābhiḥ ayaṃ nirṇayaḥ kṛtaḥ | kiṃ punaḥ punaḥ pṛcchasi | yataḥ tatra pratibhāvatāṃ svayam asyārthasyāvabodhakatvaṃ uktam | tadrahitānāṃ tv anadhikāraḥ uktaḥ | iti pratibhām eva pṛccha | yadi na pratibhā asti tadānadhikāritvān maunam eva kāryam ity alaṃ prapañcena || MoT_3,8.8 ||



śrīmahārāmāyaṇam eva praśaṃsati
     itihāsottamād asmāt paro bodhaḥ pravartate /
     sarveṣām itihāsānām ayaṃ sāra udāhṛtaḥ // Mo_3,8.9 //
"asmāt" rāmāyaṇākhyāt || MoT_3,8.9 ||


     śrute 'smin vāṅmaye yasmāj jīvanmuktatvam akṣatam /
     udeti svayam evāta idam evātipāvanam // Mo_3,8.10 //
"vāṅmaye" śāstre || MoT_3,8.10 ||


     sthitam evāstam āyāti jagaddṛśyaṃ vicāraṇāt /
     yathā svapne parijñāte svapnārthād eva bhāvanā // Mo_3,8.11 //
"sthitam eva" na tu mudgarādiprahāraiḥ nāśaṃ nītam | atra dṛṣṭāntam āha "yathe"ti | "bhāvanā" satyatābhāvanā | "eva"kāraḥ pādapūraṇārthaḥ | ayaṃ bhāvaḥ | yathā svapne jāgradavasthāyāṃ asatyatayā parijñāte sati | tatrānubhūtaiḥ bhāvābhāvaiḥ harṣāmarṣau na jñāyete | anyathā hi jāgraty anubhūtair atītair api bhāvābhāvair iva tatratyaiḥ bhāvābhāvaiḥ harṣāmarṣotpādaḥ syāt | tathā mahārāmāyaṇavicāraṇena dṛśye asatyatayā jñāte sati dṛśyaviṣayaiḥ bhāvābhāvaiḥ harṣāmarṣau na jñāyete iti || MoT_3,8.11 ||


nanv anyāny api śāstrāṇi santy eva | tat katham asyaivāsādhāraṇakāraṇatvaṃ kathayasīty | atrāha
     yad ihāsti tad anyatra yan nehāsti na tat kvacit /
     idaṃ samastavijñānaśāstrakośaṃ vidur budhāḥ // Mo_3,8.12 //
"yat iha" asmin rāmāyaṇe | "asti" sāmastyena vidyate | "tat anyatra" anyaśāstreṣu | "asti" vyastatvena bhavatīty arthaḥ | "yat iha nāsti tat kvacit" kutrāpi śāstre | "nāsti" | ataḥ "budhāḥ" samastaśāstrasārajñāḥ | "idam" etat śrīmahārāmāyaṇaṃ | "samastavijñānaśāstrakośaṃ" sakalādhyātmaśāstrabhāṇḍāgāraṃ | "viduḥ" jānanti || MoT_3,8.12 ||



uktalakṣaṇaśrīmahārāmāyaṇaśravaṇe phalaṃ kathayati
     ya idaṃ śṛṇuyād nityaṃ tasyodāracamatkṛteḥ /
     bālasyāpi paraṃ bodhaṃ buddhir eti na saṃśayaḥ // Mo_3,8.13 //
"bālasyāpi" mūrkhasyāpīty arthaḥ | paṇḍitasya tu kā katheti bhāvaḥ || MoT_3,8.13 ||


etadvimukhasya kartavyaṃ kathayati
     yasmai nedaṃ tv abhavyāya rocate duṣkṛtodayāt /
     vicārayatu yatkiñcit sa śāstraṃ jñānavāṅmayam // Mo_3,8.14 //
"abhavyāya" āsurasvabhāvayuktāya | "jñānavāṅmayam" jñānavākyanirbharam || MoT_3,8.14 ||


nanu muktikāmasya mama kim etacchravaṇenety | atrāha
     jīvanmuktatvam asmiṃs tu śrute samanubhūyate /
     svayam eva yathā pīte nīrogatvaṃ varauṣadhe // Mo_3,8.15 //
"svayam eva" ayatnam eva || MoT_3,8.15 ||



     śrūyamāṇe hi śāstre 'smiñ śrotā vetty etad ātmanā /
     yathāvad idam asmābhir na tūktaṃ varaśāpavat // Mo_3,8.16 //
"etat" maduktaṃ vastu | nanu yady etacchravaṇe pravṛttasya kiñcit pratyavāyādi syāt tadā kiṃ kāryam ity | atrāha "idam" iti | "varaśāpavat" varaśāpayuktam | mantravad iti śeṣaḥ || MoT_3,8.16 ||


sargāntaślokena svātmavicārasya dṛśyātyantābhāvajñāne asādhāraṇakāraṇatvaṃ kathayati
     śāmyati saṃsṛtiduḥkham idaṃ te
     svātmavicāramahākathayaiva /
     no dhanadānatapaḥśrutavedais
     tatkathanojjhitayatnaśatena // Mo_3,8.17 //
"te" tava | "idaṃ" dṛśyasvarūpaṃ | "saṃsṛtiduḥkham" janmākhyaṃ duḥkhaṃ | "svātmavicāramahākathayā" | "svātmavicārasya" | yā "mahākathā" anyo'nyaṃ mahatī kathā | tay"aiva śāmyati" | "dhanadānatapaḥśrutavedaiḥ idaṃ saṃsṛtiduḥkham no śāmyati" | ataḥ bhavitavyam iti śeṣaḥ | ataḥ kāraṇāt puruṣeṇa | tasya "svātmavicārasya" | yat "kathanam" sādhubhiḥ saha anyo'nyakathanaṃ | tadarthaṃ "ujjhitāni" tyaktāni | "yatnaśatāni" kathanavyatiriktāni yatnaśatāni | yena | saḥ | tādṛśena bhavitavyam | iti śivam || MoT_3,8.17 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe 'ṣṭamaḥ sargaḥ || 3,8 ||

*********************************************************************

oṃ pūrvasargāntaślokārtham eva sphuṭaṃ kathayati
     taccittās tadgataprāṇā bodhayantaḥ parasparam /
     kathayantaś ca taṃ nityaṃ tuṣyanti ramayanti ye // Mo_3,9.1 //
     teṣāṃ jñānaikaniṣṭhānām ātmajñānavicāraṇāt /
     sā jīvanmuktatodeti videhonmuktataiva yā // Mo_3,9.2 //
"taccittāḥ" | "tasmin" svātmavicāre | "cittaṃ" yeṣāṃ | te | tādṛśāḥ | tathā "tasmin" svātmavicāre | "gatāḥ" niṣṭhāṃ gatāḥ | "prāṇāḥ" bāhyendriyāṇi yeṣāṃ | te | tādṛśāḥ | tathā "tam" ātmavicāraṃ | "parasparam bodhayantaḥ" | tathā "taṃ" ātmavicāraṃ | "kathayantaś" "ca ye" sādhavaḥ | "tuṣyanti" tuṣṭiyuktāḥ bhavanti | tathā "ramayanti" anyān tuṣṭiyuktān sampādayanti | ātma"jñānaikaniṣṭhānāṃ" ātmavicāraikaparāṇāṃ | "teṣāṃ" puruṣāṇām | "ātmajñānavicāraṇāt sā jīvanmuktatā udeti" prādurbhavati | "yā videhamuktataiva" bhavati | niḥśeṣaṃ dehābhimānābhāvāt || MoT_3,9.1-2 ||



śrīrāmaḥ pṛcchati
     brahman videhamuktasya jīvanmuktasya lakṣaṇam /
     brūhi yena tathaivāhaṃ yate śāstradṛśā dhiyā // Mo_3,9.3 //
"jīvanmuktasye"ty atra "ca"śabdo 'dhyāhāryaḥ | "yate" yatnaṃ karomi | "lakṣaṇam" svarūpapratiṣṭhāpakaḥ dharmaḥ | "dhiyā" buddhyā | kathambhūtayā | "śāstram" eva "dṛk" netre | yasyāḥ | sā | tādṛśyā | śāstrānusāriṇyety arthaḥ || MoT_3,9.3 ||



śrīvasiṣṭha uttaraṃ kathayati
     yathāsthitam idaṃ yasya vyavahāravato 'pi ca /
     astaṃ gataṃ sthitaṃ vyoma sa jīvanmukta ucyate // Mo_3,9.4 //
"vyavahāravato 'pi" viśvapadārtheṣu vyavahāraṃ kurvato 'pi | "yasya" puruṣasya | "yathāsthitam" anena prakāreṇaiva sthitam | na tu kenāpi prayatnena nāśitasvarūpaṃ | "idam" puraḥsphuraṇaśīlaṃ jagat | "astaṃ" "gataṃ" nāśaṃ gataṃ | ata eva "vyoma" śūnyarūpaṃ bhavati | paṇḍitaiḥ "sa jīvanmuktaḥ ucyate" | bhāsamānasya jagataḥ śuktikārajatavat asatyatvadarśitvaṃ jīvanmuktalakṣaṇam iti bhāvaḥ || MoT_3,9.4 ||



     bodhaikaniṣṭhatāṃ yāto jāgraty eva suṣuptavat /
     ya āste vyavahartaiva sa jīvanmukta ucyate // Mo_3,9.5 //
"bodhe" dṛśyātyantābhāvajñānapūrvake ātmajñāne | "ekaṃ" kevalaṃ | "niṣṭhā" ratiḥ yasya | saḥ "bodhaikaniṣṭhaḥ" | tasya bhāvaḥ tat"tā" | tām "yātaḥ" gataḥ | "yaḥ" puruṣaḥ | "jāgraty eva" jāgradavasthāyām eva | tatrāpi "vyavahartaiva" pravāhāgatavyavahārakāry eva | "suṣuptavat" suṣuptyāviṣṭa iva | "āste" | niranusandhāna āste iti yāvat | paṇḍitaiḥ "saḥ jīvanmuktaḥ ucyate" | dṛśyate ca stryādiniṣṭhasya puruṣasya jāgrati vyavahartur eva sataḥ suṣuptavad avasthitir iti nāyastam || MoT_3,9.5 ||



     nodeti nāstam āyāti sukhe duḥkhe mukhaprabhā /
     yathāprāptasthiter yasya sa jīvanmukta ucyate // Mo_3,9.6 //
"yathāprāptasthiteḥ" pravāhāgataniṣṭhasya | "yasya" | "sukhe duḥkhe" ca "mukhaprabhā nodeti nāstam āyāti" harṣāmarṣarāhityāt | paṇḍitaiḥ "saḥ jīvanmuktaḥ ucyate" || MoT_3,9.6 ||



     yo jāgarti suṣuptastho yasya jāgran na vidyate /
     yasya nirvāsano bodhaḥ sa jīvanmukta ucyate // Mo_3,9.7 //
"yaḥ" puruṣaḥ | "jāgarti" bāhyapadārthaviṣayaṃ bodhaṃ bhajati | kathambhūtaḥ | "suṣupte" suṣuptau iva tiṣṭhatīti | tādṛśaḥ | ekacinmātratāniścayena bāhyaprapañcānusandhānarahitatvāt | tathā "yasya" puruṣasya | "jāgrat" laukikā jāgradavasthā | "na vidyate" turyamayatvāt | jīvanmukto hi jāgrati sarvaṃ cinmātramayaṃ paśyan turyāvasthāviṣṭa eva bhavati | tathā "yasya nirvāsanaḥ" ahaṃmamatārūpavāsanārahitaḥ | "bodhaḥ" bāhyadehādipadārthajñānaṃ | bhavati | paṇḍitaiḥ "sa jīvanmukta ucyate" || MoT_3,9.7 ||



     rāgadveṣabhayādīnām anurūpaṃ carann api /
     yo 'ntar vyomavad atyacchaḥ sa jīvanmukta ucyate // Mo_3,9.8 //
"yaḥ" puruṣaḥ | "rāgadveṣabhayādīnām anurūpaṃ caran api" | rāgādhāre putrādau ratiṃ bhajan api | dveṣādhāre śatrau vimukho bhavan api | bhayakāraṇāt siṃhādeḥ calan api | "antaḥ" manasi | "vyomavat atyacchaḥ" atinirmalaḥ bhavati | putrādiviṣayasya ratyādeḥ pravāhabalena niranusandhānakaraṇāt | anusandhāna eva hi manasi malaṃ bhavati | paṇḍitaiḥ "saḥ jīvanmuktaḥ ucyate" | "ādi"śabdena dehādiviṣayāṇām asmitādīnāṃ grahaṇam || MoT_3,9.8 ||



     yasya nāhaṅkṛto bhāvo buddhir yasya na lipyate | /
     kurvato 'kurvato vāpi sa jīvanmukta ucyate // Mo_3,9.9 //
"yasya" puruṣasya | "ahaṅkṛtaḥ bhāvaḥ" ahaṅkāramayī cittavṛttiḥ | "nā"sti | sarvatra brahmakartṛtvadarśanāt | tathā "yasya" puruṣasya | "buddhiḥ na lipyate" lepayuktā na kriyate | rāgādirūpaiḥ pāpair iti śeṣaḥ | paṇḍitaiḥ "saḥ jīvanmukta ucyate" | "yasya" kathambhūtasya | "kurvataḥ" śarīrayātrānimittaṃ pravāhāgataṃ vā karma kurvataḥ | tathā kenāpi kāraṇena "akurvataḥ" vā | tatra karaṇakāle niranusandhānakaraṇāt akaraṇakāle śuddhacinmātraparāmarśaniṣṭhatvāt ahambhāvadhīleparāhityaṃ jñeyam || MoT_3,9.9 ||


     yaś conmeṣanimeṣābhyāṃ vidheḥ pralayasambhavau /
     paśyet trilokyāḥ khasamaḥ sa jīvanmukta ucyate // Mo_3,9.10 //
"khasamaḥ" ākāśasadṛśaḥ | "yaḥ" puruṣaḥ | "trilokyāḥ vidheḥ" bhvādibāhyatrilokīvidhānasya jāgradādyāntaratrilokīvidhānasya ca | "unmeṣanimeṣābhyāṃ" | arthāt paramātmatayā niścitasya cittattvasya "unmeṣeṇa" cetyānaunmukhyākhyena prādurbhāvena | "nimeṣeṇa" cetyaunmukhyākhyena svarūpagopanena | "pralayasambhavau" "paśyati" saṃhārotpattī | tathā tirobhāvāvirbhāvau paśyati | paṇḍitaiḥ "saḥ jīvanmuktaḥ ucyate" | atha vā svaparāmarśaḥ "unmeṣaḥ" | tatrāpi upekṣā "nimeṣaḥ" | tathā ca unmeṣeṇa sambhavaḥ | nimeṣeṇa pralayaḥ | iti yathāsaṅkhyaṃ vihāyaiva sambandhaḥ kāryaḥ || MoT_3,9.10 ||



     bhoktaiva yo na bhokteva śuddhabodhaikatāṃ gataḥ /
     buddhaḥ supta ivāste 'ntaḥ sa jīvanmukta ucyate // Mo_3,9.11 //
"śuddhabodhaikatāṃ" śuddhabodhenaikatvaṃ "gataḥ" | "yaḥ" puruṣaḥ | "buddhaḥ" bodhayuktaḥ san | "antaḥ suptaḥ iva āste" tiṣṭhati | niranusandhānatvāt | "yaḥ" kathambhūta "iva" | "bhoktā eva" bhujikriyākartṛtvaṃ bhajann eva | "abhoktā iva" svasmin śuddhabodhatājñānena bhoktāham ity abhimānābhāvāt | paṇḍitaiḥ "saḥ jīvanmuktaḥ ucyate" || MoT_3,9.11 ||



     nityaṃ draṣṭaiva cādraṣṭā jīvann eva mṛtopamaḥ /
     vyavahartaiva śailābhaḥ sa jīvanmukta ucyate // Mo_3,9.12 //
yaḥ "draṣṭaiva" dṛśikriyākartṛtvaṃ bhajann eva | na tv andhavat tiṣṭhan | "adraṣṭā" bhavati | tathā yaḥ "jīvann eva" jīvanakriyākartṛtvaṃ bhajann eva | "mṛtopamaḥ" bhavati | mṛtasadṛśaḥ bhavati | mṛtavat bhogādivāñchābhāvāt | tathā yaḥ "vyavahartā eva" vyavahāraṃ kurvan eva | "śailābhaḥ" bhavati | tattvataḥ kṣobharāhityāt | paṇḍitaiḥ "saḥ jīvanmuktaḥ ucyate" || MoT_3,9.12 ||



     yasmān nodvijate loko lokān nodvijate ca yaḥ /
     harṣāmarṣabhayonmuktaḥ sa jīvanmukta ucyate // Mo_3,9.13 //
"lokaḥ" sāmānyalokaḥ | "yasmāt nodvijate" udvegakāraṇābhāvena udvegaṃ na yāti | tathā "yaḥ lokāt na udvijate" niṣprayojanatvāt | svaprayojanaparaḥ eva hi yebhyaḥ svaprayojanaṃ na paśyati tebhyaḥ udvijate | "yaḥ" kathambhūtaḥ | "harṣāmarṣabhayonmuktaḥ" harṣāmarṣabhayarahitaḥ | svasmin śuddhabodhaikatājñānāt | paṇḍitaiḥ "saḥ jīvanmuktaḥ ucyate" || MoT_3,9.13 ||


     śāntasaṃsārakalanaḥ kalāvān api niṣkalaḥ /
     yaḥ sacitto 'pi niścittaḥ sa jīvanmukta ucyate // Mo_3,9.14 //
"śāntā" ātmani cinmātratādarśanena layaṃ gatā | "saṃsārakalanā" yasya | saḥ | tādṛśaḥ | "yaḥ" puruṣaḥ | "kalāvān api" jñānākhyakalāyukto 'pi | "niṣkalaḥ" kalābhyaḥ niṣkrāntaḥ bhavati | svasya niṣkalacinmātratājñānāt | tathā "yaḥ sacittaḥ api" śuddhasattvasvarūpacittayuktaḥ api | "niścittaḥ" cittān niṣkrāntaḥ bhavati | malinacittābhāvāt | paṇḍitaiḥ "saḥ jīvanmuktaḥ ucyate" || MoT_3,9.14 ||



     yaḥ samastārthajāteṣu vyavahāry api śītalaḥ /
     parārtheṣv iva pūrṇātmā sa jīvanmukta ucyate // Mo_3,9.15 //
"pūrṇātmā" nirapekṣaśāntacinmātratvena tṛptātmā | "yaḥ samastārthajāteṣu" pravāhāgateṣu sakaleṣu prayojanasamūheṣu | "śītalaḥ" kim ayaṃ sidhyati na veti santāparahitaḥ bhavati | keṣv "iva" | "parārtheṣv iva" | yathā laukikaḥ "parārtheṣu śītalaḥ" bhavati | tathety arthaḥ | paṇḍitaiḥ "sa jīvanmuktaḥ ucyate" || MoT_3,9.15 ||


jīvanmuktim uktvā kramaprāptāṃ videhamuktiṃ kathayati
     jīvanmuktapadaṃ tyaktvā dehe kālavaśāt kṣate /
     cid yāty adehamuktatvaṃ pavanaḥ spandanām iva // Mo_3,9.16 //
"cit" lakṣaṇayā cidbhāvatāgataḥ jīvanmuktaḥ | "dehe" śarīre | "kālavaśāt" niyativaśena | "kṣate" naṣṭe sati | "jīvanmuktapadam" jīvanmuktatāṃ | "tyaktvā" | "adehamuktatvaṃ" videhamuktabhāvaṃ | "yāti" | ka "iva" kāṃ "tyaktvā" | "pavana iva spandanām" | yathā "pavanaḥ spandanām" ceṣṭākaraṇam | tyajati | tathety arthaḥ | "pavanaḥ spandatām ive"ti vā pāṭhaḥ || MoT_3,9.16 ||



jīvanmuktavat tasyāpi lakṣaṇāni leśataḥ kathayati
     videhamukto nodeti nāstam eti na śāmyati /
     na san nāsan na dūrasthaṃ na cāhaṃ na ca vetarat // Mo_3,9.17 //
"videhamuktaḥ" anahambhāvena gṛhītasya dehasyāpy abhāvena videhamuktiṃ gataḥ puruṣaḥ | "na udeti" sadoditacinmātrabhāvena avasthānāt | tathā "astam na eti" | yathā tathā kalpitasya tadastasya tataḥ evotthānāt | anyathāsambhavāt | tathā "na śāmyati" saṃsārabhānābhāvaprasaṅgāt | "na sat" bhavati | bāhyāntarakaraṇāgocaratvāt | tathā "asat na" bhavati | etādṛkprapañcabhāvena bhānābhāvaprasaṅgāt | na hi śaśaśṛṅgaṃ kenāpi rūpeṇa bhātuṃ śaknoti | tathā "dūrasthaṃ na" bhavati | sarveṣām ahantāsāratvena sthitatvāt | tathā "ahaṃ na" bhavati | paricchinnaḥ pramātā na bhavati | aparimitapramātṛtvena sthitatvāt | tathā "itarat" parimitaṃ prameyaṃ | "na" bhavati | aparimitaprameyabhāvena sthitatvāt || MoT_3,9.17 ||



viśvottīrṇatām uktvā viśvamayatāṃ leśataḥ kathayati
     sūryo bhūtvā pratapati viṣṇuḥ pāti jagattrayam /
     rudraḥ sarvān saṃharati sarvān sṛjati padmajaḥ // Mo_3,9.18 //
asau śuddhacinmātratāṃ yātaḥ videhamuktaḥ "sūryo bhūtvā" sūryabhāvam āsādya | "pratapati" tāpakriyākartṛtvaṃ bhajati | tathā "viṣṇuḥ bhūtvā jagattrayaṃ pāti" rakṣati | evaṃ sarvatra yojyam | eṣāṃ sūryādīnāṃ ca bāhyāntaratvena dvaividhyaṃ jñeyam | bāhye hi "sūryaḥ" yaḥ vyomni dṛśyate | āntaras tu prāṇaḥ | sūryavat śarīrapākakāritvāt | tathā "viṣṇuḥ" buddhiḥ | tadvat saṅkalpasthitikāritvāt | tathā "rudraḥ" ahaṅkāraḥ | tadvat sarvasaṅkalpānāṃ svasmin layīkaraṇāt | tathā "padmajaḥ" manaḥ | tadvat saṅkalpotpādakatvāt | evaṃ yathāsambhavaṃ sarvatra yojyam | nanu kathaṃ videhamuktaḥ sūryādicarācarapadārthabhāvam āgatya tadgatāḥ sarvāḥ kriyāḥ karotīti cet | satyam | tatra carāḥ tāvat sphuṭam eva antaryāmiśuddhacittattvādhiṣṭhitāḥ lakṣyante | anyathā maraṇāvasthāṃ gateṣv api teṣu prāgvat kriyādhāratvaprasaṅgāt | nanu tatkriyāyāṃ prāṇa eva prerakaḥ dṛśyate | niṣprāṇānām acaraśarīrāṇāṃ niṣkriyatvadarśanāt | asad etat | na hi prāṇo nāmātra prerakatve samarthaḥ kaścic cetana iva lakṣyate | kiṃ tv anyasya kasyāpi svatantrasya cetanasya preraṇayā | devadattapreryamāṇakandukavat nirgamapraveśakārīva dṛśyate iti śuddhasya cinmātrasyaiva carāntaryāmitvena caragatakriyākartṛtvaṃ jñāyate | acareṣv api dṛśyamāṇā avasthitikriyā kriyātvāt caragatakriyāvat tatkṛtā eva jñeyā | yataḥ yatra sākṣāc cetanatayā bhāsamānānāṃ carāṇāṃ svakriyāyām asāmarthyam asti tatra sākṣāj jaḍatvena bhāsamānānāṃ acarāṇāṃ kā kathā kriyākāritve | tena yathā adhiṣṭhātṛbhūtena devadattena kvacit sthāpitāḥ stambhādayaḥ tiṣṭhanti tathā svāntargatena kenāpi tattvena sthāpitāḥ acarāḥ tiṣṭhantīti jñeyam | tatra devadattasya tebhyaḥ bahiḥsthatā pratyakṣam eva dṛśyate iti na tatra tasya tadantargatatvaṃ kalpyate | atra tu bahiḥ sthūlasya kasyāpy adarśanāt tadantargatatvaṃ kalpyate | bahirgatatvam api tasya na virudhyate ity āstām etat | evaṃ ca śuddhacinmātre paryavasitaṃ sarvakriyākartṛtvaṃ tanmayatāgate tasminn api siddham eva | samudre līnasya jalabindoḥ iva samudraguṇaviśiṣṭatvam | avaśiṣṭaṃ mṛtaśarīram api pakṣākṣiptam eva jñeyam | nanu tathāpi videhamuktaḥ sarvāḥ kriyāḥ karotīty etāvanmātram eva siddham | na tu sarvaṃ bhūtvety etat siddham | tatra kā vārteti cet | satyam | tatreyaṃ vārtā | carācarāḥ bhāvāḥ kimmayāḥ iti vicāryamāṇe tatsvarūpaṃ hastagrāhābhāvāt anirvācyatāyām eva viśrāmyati | anirvācyatā eva ca śuddhacittattvasya svarūpam iti śuddhacidrūpatāṃ gatasya videhamuktasya sarvabhāvo yukta eveti na ko 'pi virodhaḥ | etac ca śuddhacittattvasvarūpam anubhavatsu pratyakṣasiddham eva | tadavidvadarthe tu ayaṃ prayatnaḥ kṛta ity alaṃ prapañcena || MoT_3,9.18 ||



     khaṃ bhūtvā pavanaskandhān dhatte sarkṣasurāsurān /
     kulācalagaṇo bhūtvā lokapālapurāspadam // Mo_3,9.19 //
"sarkṣasurāsurān" nakṣatradevāsurasahitān | "kulācalagaṇaḥ bhūtvā lokapālapurāspadaṃ" bhavatīti sambandhaḥ || MoT_3,9.19 ||


     bhūmir bhūtvā bibhartīmāṃ lokasthitim akhaṇḍitām /
     tṛṇagulmalatā bhūtvā dadāti phalasantatim // Mo_3,9.20 //
spaṣṭam || MoT_3,9.20 ||


     bibhraj jalānalākāraṃ jvalati bhavati drutaḥ /
     candro 'mṛtaṃ prasravati mṛtiṃ hālāhalaṃ viṣam // Mo_3,9.21 //
"jalākāraṃ bibhrad drutaḥ" dravaguṇayuktaḥ | "bhavati" | "analākāraṃ bibhrat jvalatī"ty yojyam | "candro" bhūtvā "hālāhalaṃ" bhūtveti sambandhanīyam || MoT_3,9.21 ||



     tejaḥ prakaṭayaty āśās tanoty āndhyaṃ tamo bhavat /
     śūnyaṃ sad vyomatām eti giriḥ san rodhayaty alam // Mo_3,9.22 //
"rodhayati" rodhanaṃ karoti || MoT_3,9.22 ||


     karoti jaṅgamaṃ cittve sthāvaraṃ sthāvarākṛtiḥ /
     bhūtvārṇavo valayati bhūstriyaṃ valayo yathā // Mo_3,9.23 //
"cittve" cidbhāve sthitvā | cidbhāvayukto bhūtveti yāvat | "jaṅgamaṃ karoti" "sthāvarākṛtiḥ" san "sthāvaraṃ karoti" | "arṇavaḥ bhūtvā bhūstriyaṃ" bhūr eva strī | tām "valayati" samantāt paryanteṣu āvṛṇoti | ko "yathā" | "valayo yathā" | "yathā valayaḥ striyaṃ" | arthāt strībhujaṃ | "valayati" | tathety arthaḥ || MoT_3,9.23 ||



     paramārkavapur bhūtvā prakāśe 'ntar visārayan /
     trijagattrasareṇvoghaṃ śāntam evāvatiṣṭhati // Mo_3,9.24 //
"paramārkavapuḥ" citsūryavapuḥ | "bhūtvā" | "prakāśe" prakāśarūpāyāṃ svabhittau | "trijagattrasareṇvoghaṃ" trijagadākhyaṃ paramāṇusamūhaṃ | "visārayan" vistārayan | "śāntam eva" sākṣibhāvena sthitatvāt tatkṛtakṣobharahitam ev"āvatiṣṭhati" | yuktaṃ cārkasya prakāśe trasareṇvoghavisāraṇaṃ śāntam avasthānaṃ ca || MoT_3,9.24 ||


viśeṣakalanām aśakyāṃ jñātvā sāmānyena kathayati
     yat kiñcid idam ābhāti bhātaṃ vā bhām upaiṣyati /
     kālatrayagataṃ dṛśyaṃ tad asau sarvam eva vā // Mo_3,9.25 //
"vā" pakṣāntare | "yat kiñcit idaṃ" jagat | "bhātam" pūrvaṃ sphuritaṃ | tathā "ābhāti" adya sphurati | tathā "bhām" sphuraṇam | "upaiṣyati" agre āgamiṣyati | "tat kālatrayagatam sarvaṃ dṛśyam asau" uktaḥ videhamuktaḥ | bhavati || MoT_3,9.25 ||


atra śrīrāmaḥ pṛcchati
     katham evaṃ vada brahman bhūyate viṣamā hi me /
     dṛṣṭir eṣā tu duṣprāpā durākramyeti niścayaḥ // Mo_3,9.26 //
he "brahman" | tvaṃ "vada" kathaya | puruṣeṇa "evam" etādṛgguṇayuktena videhamuktena | "katham bhūyate" kathaṃ sampadyate | "hi" yasmāt kāraṇāt | "me niścayaḥ" | "iti" evaṃ | bhavati | "iti" kim | "iti viṣamā" kaṭhinā | "eṣā" pūrvoktā | "dṛṣṭiḥ" videhamuktirūpā dṛṣṭiḥ | "duṣprāpā durākramyā" ca bhavati || MoT_3,9.26 ||



śrīvasiṣṭha uttaraṃ kathayati
     muktir eṣocyate rāma brahmaitat samudāhṛtam /
     nirvāṇam etat kathitaṃ śṛṇu samprāpyate katham // Mo_3,9.27 //
he "rāma" | paṇḍitaiḥ "eṣā" etat videhamuktatvaṃ | "muktiḥ ucyate" | jīvanmuktatvasya sattvarūpacittāśrayatvenāmuktikalpatvāt | paṇḍitaiḥ "etat" "brahma samudāhṛtam" kathitam | sarvapadārthabhāvena bṛṃhaṇābhāktvāt | paṇḍitaiḥ "etat nirvāṇaṃ kathitam" sarvathā parimitāhantāyāḥ layībhāvāt | tvaṃ "śṛṇu etat" puruṣeṇa "kathaṃ prāpyate" || MoT_3,9.27 ||


     yad idaṃ dṛśyate dṛśyam ahaṃtvattādisaṃyutam /
     sato 'py asyāpy anutpattyā buddhyā vaitad avāpyate // Mo_3,9.28 //
asmābhiḥ | "ahaṃtvattādisaṃyutaṃ yad idam dṛśyaṃ" jagat | "dṛśyate" anubhūyate | "sataḥ api" evam eva sthitasyāpi | "asya" jagataḥ | "anutpattyāḥ buddhyā" anutpannam evedam ity evaṃrūpasya abhāvasya jñānenaiva | tajjagadviṣayānutpannatvajñāneneti yāvat | "etat" uktaguṇaṃ videhamuktatvam | "avāpyate" prāpyate | "apivā"śabdau evaśabdārthe | etena dṛśyātyantābhāvasya videhamuktiṃ prati kāraṇatvam uktam || MoT_3,9.28 ||


śrīrāmaḥ punaḥ pṛcchati
     videhamuktās trailokyaṃ sampadyante yadā tadā /
     manye te sargatām eva gatā vedyavidāṃ vara // Mo_3,9.29 //
"videhamuktāḥ yadā" yadi | "trailokyaṃ sampadyante" | he "vedyavidāṃ vara" | ahaṃ "manye" | "tadā te sargatām eva gatāḥ" sargabhāvam eva gatāḥ bhavanti | sargāntargatapadārthabhāvenaiva sphuraṇāt || MoT_3,9.29 ||


śrīvasiṣṭha uttaraṃ kathayati
     vidyate cet tribhuvanaṃ tat tattāṃ samprayāntu te /
     yatra trailokyaśabdārtho na sambhavati kaścana // Mo_3,9.30 //
     tatra trilokatāṃ yātaṃ brahmety uktyarthadhīḥ kutaḥ |
     tasmān no sambhavaty anyā jagacchabdārthakalpanā || MoT_3,9.31 ||


"tribhuvanaṃ" sargaḥ |"ced" yadi | "vidyate" satyaṃ bhavati | "tat" tadā | "te" videhamuktāḥ | "tattām" tribhuvanatāṃ | "samprayāntu" samyak gacchantu | "yatra" yasmin sthāne | "kaścana trailokyaśabdārthaḥ" trailokyaśabdayuktaḥ arthaḥ | "trailokyaśabdārthaḥ" trailokyākhyaḥ śabdaḥ tadarthaś ceti yāvat | "na sambhavati" | "tatra" tasmin sthāne | "ity uktyarthadhīḥ" evaṃrūpoktyarthākārā dhīḥ | evaṃrūpā uktiḥ evaṃrūpaḥ arthaś ceti yāvat | "kutaḥ" bhavati | trailokyaśabdārthayor asambhavāt | na sambhavatīty arthaḥ | "iti" kim | "iti" "brahma" lakṣaṇayā videhamuktaḥ | "trilokatāṃ" sargatāṃ | "yātaṃ" bhavati | upasaṃhāraṃ karoti "tasmād" iti | "tasmāt" tato hetoḥ | "anyā" brahmaṇaḥ anyā | "jagacchabdārthakalpanā" jagacchabdārtharūpā kalpanā | "na" bhavati || MoT_3,9.30-31 ||



anena prasaṅgena jagadbrahmaṇoḥ aikyam eva punaḥ punaḥ kathayati
     ananyac chāntam ābhāsamātram ākāśanirmalam /
     brahmaiva jagad ity eva satyaṃ satyāvabodhinaḥ // Mo_3,9.32 //
"jagat" kartṛ | "ananyat" sarvarūpatvena sthitatvāt svavyatiriktavasturahitaṃ | "śāntaṃ" svarūpe viśrāntam | "ābhāsamātrakam" ābhāsamātrasvarūpam | "ākāśanirmalam" ākāśavat svaccham | "brahma eva" bhavati | "ity eva" etad eva | "satyāvabodhinaḥ" satyajñānayuktasya | "satyaṃ" bhavati || MoT_3,9.32 ||


atra dṛṣṭāntaṃ kathayati
     yathā hi hemakaṭake vicāryāpi na dṛśyate /
     kaṭakatvaṃ kvacin nāma ṛte nirmalahāṭakam // Mo_3,9.33 //
"yathā hī"ti dṛṣṭāntatvadyotakam | asmābhiḥ | "hemakaṭake" suvarṇavalaye | "vicāryāpi" vicārayitvāpi | "nirmalahāṭakam ṛte kaṭakatvaṃ nāma kvacit na dṛśyate" | yathā kaṭakaṃ hemaiva bhavati tathā jagat brahmaiva bhavatīti pūrvaślokadṛṣṭāntatayā yojyam uttaraślokadvayaṃ ca || MoT_3,9.33 ||


dvitīyaṃ dṛṣṭāntaṃ kathayati
     jalād ṛte payovīcau nāhaṃ paśyāmi kiñcana /
     vīcitvaṃ tvādṛśair dṛṣṭaṃ yat tu nāsty eva tatra hi // Mo_3,9.34 //
"ahaṃ payovīcau" jalataraṅge | "jalād ṛte kiñcana na paśyāmi" payovīcau "nāsti" || MoT_3,9.34 ||



tṛtīyaṃ dṛṣṭāntaṃ kathayati
     spandatvaṃ pavanād anyan na kadācana kutracit /
     spanda eva sadā vāyur jagat tasmān na vidyate // Mo_3,9.35 //
"kadācana" kutrāpi kāle | "kutracit" kutrāpi deśe | "spandatvam pavanāt anyat na" bhavati | yataḥ "vāyuḥ spanda eva" bhavati | phalitaṃ kathayati "jagad" iti | yataḥ jagataḥ brahmatve dṛṣṭāntatrayam asti "tasmāt jagat na vidyate" | ataś ca videhamuktasya sargatāgamanaṃ kathaṃ bhavatīti bhāvaḥ || MoT_3,9.35 ||



punar api pūrvoktam artham eva sadṛṣṭāntaṃ kathayati
     yathā śūnyatvam ākāśas tāpa eva marau jalam /
     teja eva yathāloko brahmaiva trijagat tathā // Mo_3,9.36 //
spaṣṭam || MoT_3,9.36 ||


śrīrāmaḥ pṛcchati
     atyantābhāvasampattyā jagaddṛśyasya muktatā /
     yayodeti mune yuktyā tāṃ mamopadiśottamām // Mo_3,9.37 //
he "mune" | "jagaddṛśyasya" jagadrūpasya dṛśyasya | "yayā yuktyā atyantābhāvasampattyā" atyantābhāvasampādanena | "muktatā udeti" | tvam "mama uttamāṃ" niratiśayām | "tām" yuktiṃ | "upadiśa" | jagadviṣayasyātyantābhāvasya muktatāsādhane kathaṃ sāmarthyam astīty atra yuktiṃ kathayeti bhāvaḥ || MoT_3,9.37 ||



nanu yuktim eva kiṃ punaḥ punaḥ pṛcchasīty atrottarakathanapūrvaṃ praśnāntaraṃ karoti
     mithaḥ sampannayor draṣṭṛdṛśyayor ekasaṅkṣaye /
     dvayābhāve sthitiṃ yāte nirvāṇam avaśiṣyate // Mo_3,9.38 //
     dṛśyasya jagatas tasmād atyantānudbhavo yathā /
     brahma cetthaṃ svabhāvasthaṃ budhyate vada me tathā // Mo_3,9.39 //
uktanītyā "mithaḥ sampannayoḥ" yataḥ tvayaivaitad uktam iti śeṣaḥ | yataḥ tvayā eva uktaṃ "mithaḥ sampannayoḥ" uktanītyā mithaḥ siddhayoḥ | "draṣṭṛdṛśyayoḥ" madhye | "ekasaṅkṣaye" sati | tataḥ "dvayābhāve sthitiṃ yāte" sati | "nirvāṇaṃ" kaivalyam | "avaśiṣyate" | "tasmāt" tataḥ kāraṇāt | "dṛśyasya jagataḥ" dṛśyasvarūpasya jagataḥ | "atyantānudbhavaḥ" atyantābhāvasvarūpā atyantānutpattiḥ | "yathā" yayā yuktyā | "budhyate" jñāyate | "tathā brahma" jagadbhāvena bṛṃhitaṃ śuddhacittattvaṃ | "itthaṃ" jagadrūpeṇa | "svabhāvasthaṃ" svarūpasthaṃ | "yathā budhyate" | tvaṃ "tathā ca me vada" kathaya || MoT_3,9.38-39 ||


rasāveśenonmattavat punar api dṛśyātyantābhāvasiddhiyuktiṃ brahmaṇaḥ itthaṃsvabhāvāvasthitiyuktiṃ ca pṛcchati
     kayaitaj jñāyate yuktyā katham etat prasidhyati | /
     etasmiṃs tu mune siddhe na sādhyam avaśiṣyate // Mo_3,9.40 //
"etat" ayaṃ dṛśyātyantābhāvaḥ idam brahmaṇaḥ itthaṃsvabhāvāvasthānaṃ ca | nanu kimartham atra punaḥ punaḥ praśnān karoṣīty | atrāha "etasmin" iti | he "mune" | "etasmin siddhe" sati | "sādhyam" sādhanīyaṃ | "nāvaśiṣyate" avaśiṣṭaṃ na bhavati | muktimātrasyaivākāṅkṣitatvāt tasya cānenaiva siddhatvāt || MoT_3,9.40 ||


śrīvasiṣṭhaḥ uttaraṃ kathayati
     bahukālam iyaṃ rūḍhā mithyājñānaviṣūcikā | /
     nūnaṃ vicāramantreṇa nirmūlam upaśāmyati // Mo_3,9.41 //
"nūnaṃ" niścaye | "iyaṃ mithyājñānaviṣūcikā" śuddhacinmātre dṛśyam idam ity evaṃrūpo jñānaviśeṣaḥ | "rūḍhā" manasi satyatvena bhātā | yuktaṃ ca "mantreṇa" viṣūcikāyāḥ upaśamanam | "vicāraś" cātra kiṃrūpam idaṃ dṛśyam ity evaṃrūpo jñeyaḥ || MoT_3,9.41 ||


nanv asmin samaye mayā kṛta eva leśato vicāraḥ | tat katham idaṃ dṛśyaṃ na śāntam ity | atrāha
     na śakyate jhagity eva samucchedayituṃ kṣaṇāt /
     samaprayatane hy adrau samārohāvarohaṇe // Mo_3,9.42 //
"samucchedayituṃ" nāśayitum | uttarārdhenaitat samarthayati "same"ti | yathā kaścit parvatāgram ārūḍhaḥ tataś cāvataritum icchan "na jhagity evā"vatarituṃ śaknoti | tathā cirarūḍhā dṛśyasatyatāpratītiḥ "na jhagiti" dūrīkartuṃ "śakyate" iti bahukālaṃ vicāraḥ kartavya iti bhāvaḥ || MoT_3,9.42 ||


yuktikathanaṃ phalitatvena pratijānīte
     tasmād abhyāsayogena yuktyā nyāyopapattibhiḥ /
     jagadbhrāntir yathā śāmyet tathedaṃ kathyate śṛṇu // Mo_3,9.43 //
"tasmāt" tato hetoḥ | "abhyāsayogena" vicārābhyāsayuktyā | tathā "yuktyā" svabuddhikṛtayā yuktyā | tathā "nyāyopapattibhiḥ" nyāyaśāstreṣūktābhiḥ yuktibhiḥ | "jagadbhrāntiḥ" dṛśyasvarūpajagadbhramaḥ | "yathā" yena prakāreṇa | "śāmyet" | "tathā" tena prakāreṇa | "idam" vakṣyamāṇaṃ vāgjālaṃ | mayā "kathyate" | tvaṃ tat "śṛṇu" śravaṇaviṣayaṃ kuru || MoT_3,9.43 ||



nanu tacchravaṇena mama kiṃ setsyatīty | atrāha
     vadāmy ākhyāyikāṃ rāma yām imāṃ bodhasiddhaye /
     tāṃ cec chṛṇoṣi tat sādho mukta evāsi buddhimān // Mo_3,9.44 //
spaṣṭam || MoT_3,9.44 ||



samanantarakṛtāṃ pratijñāṃ sampādayan prakaraṇārambhe pratijñātaṃ savistarakathanaṃ prastauti
     athotpattiprakaraṇaṃ mayedaṃ tava kathyate | /
     yaḥ kilotpadyate rāma tena muktena bhūyate // Mo_3,9.45 //
"atha"śabdaḥ ānantaryārthaḥ saṅkṣepakathanānantaratāṃ dyotayati | kimartham utpattiprakaraṇam eva prathamaṃ kathyate ity | atrāha "yaḥ kile"ti | ataḥ muktikathane pravṛttair asmābhiḥ utpattiprakaraṇakathanam eva kāryam | anyathā nirādhārāyāḥ mukteḥ kathanam ayuktaṃ syād iti bhāvaḥ || MoT_3,9.45 ||



vistareṇa kathayiṣyamāṇe 'sminn utpattiprakaraṇe tvaṃ kiṃ kathayasīty | atrāha
     iyam itthaṃ jagadbhrāntir bhāty ajātaiva khātmikā /
     ity utpattiprakaraṇe kathyate 'smin mayādhunā // Mo_3,9.46 //
"iyam" puraḥsphuraṇaśīlā | "jagadbhrāntiḥ" jagadākāraḥ bhramaḥ | "itthaṃ" anayā yuktyā | "ajātā eva" anutpannā eva | ataḥ "khātmikā" ākāśasvarūpā satī | "bhāti" sphurati | "iti" etat | "mayā adhunā" "asmin utpattiprakaraṇe kathyate" || MoT_3,9.46 ||


utpattiprakaraṇam eva kathayiṣyan sthūṇānikhanananyāyenotpattimūlakāraṇabhūtaśuddhacinmātraprakaṭanārtham ādau tadāvarakaprapañcalayaṃ tāvat kathayati
     yad idaṃ dṛśyate kiñcij jagat sthāvarajaṅgamam | /
     sarvaṃ sarvaprakārāḍhyaṃ sasurāsurakiṃnaram // Mo_3,9.47 //
     tan mahāpralaye prāpte rudrādipariṇāmini /
     bhavaty asad adṛśyaṃ ca kvāpi yāti vinaśyati // Mo_3,9.48 //
"kiñcit" anirvācyasvarūpam | "sarvaprakārāḍhyaṃ" samastabhāvābhāvādiprakārayuktaṃ | "mahāpralaye" turyākhye avasthāviśeṣe mahākalpāntasamaye ca | "rudrādipariṇāmini" rudrādilayayukte | rudro 'tra ahaṅkāraḥ saṃhārādhikārī śrīmahādevo jñeyaḥ | "ādi"śabdena buddhyādeḥ sṛṣṭisthityadhikāriṇaḥ viṣṇvādeś ca grahaṇam | "adṛśyam" bāhyendriyāgocaram | nanu katham "adṛśyaṃ ca" "bhavatī"ty | atrāha "kvāpī"ti | "kvāpi yāti" anirvācye kasmin cittattve ekatāṃ yāti | anyatayā sphuratīti yāvat | ata eva "vinaśyati" adarśanaṃ gacchati | na hi bhāsamānasya sarvathā vināśo yuktaḥ | śuktikārajatasyāpi sarvathā vināśaprasaṅgāt | na hi śuktikārajataṃ sarvathā vinaśyati | kiṃ tu śuktibhāvena sphurati || MoT_3,9.47-48 ||



nanu bhāsamānasyaitasya jagataḥ nāśe kiṃ śiṣyate | bhāsamānasya śuktikārajatasya nāśe hi śuktikā śiṣyate ity | atrāha
     tataḥ stimitagambhīraṃ na tejo na tamas tatam /
     anākhyam anabhivyaktaṃ sat kiñcid avaśiṣyate // Mo_3,9.49 //
"tataḥ" dṛśyanāśānantaram | "kiñcit" arthāt dṛśyavināśasākṣisvarūpaṃ kim api anirvācyaṃ vastu | "śiṣyate" śiṣṭaṃ bhavati | anyathā bhāsamānasya iyataḥ jagataḥ kutrāvasthānaṃ syān | na hi bhāsamānasya vināśo ghaṭasvarūpanāśavat yuktaḥ | śuktikārajatanāśavad anyarūpatayā sphuraṇamātrarūpatvāt | anyarūpatayā sphuraṇaṃ prādhānyaṃ vinā nopapadyata iti | "kiñcit" kathambhūtam | "stimitagambhīram" | "stimitam" cetyaunmukhyākhyaspandarahitam | "gambhīram" svaviṣayāvagāhitrabhāvenāvagāhanakriyāviṣayatvābhāvena ca avagāhitum aśakyam | tādṛśaṃ ca tat tādṛśaṃ ceti | punaḥ kathambhūtaṃ | "na tejaḥ" śuddhacinmātrarūpatvena jīvādisvarūpalaukikacetanavyatiriktam ity arthaḥ | tathā "na tamaḥ" jaḍapadārthavyatiriktam ity arthaḥ | atha vā cinmātrarūpatvena cetyasvarūpabāhyatejastamovyatiriktam iti jñeyam | punaḥ kathambhūtam | sarvatrānusyūtam | punaḥ kathambhūtam | "anākhyam" ākhyākartṛtvenāvasthānāt ākhyāviṣayatvābhāvāc cākhyātum aśakyam ity arthaḥ | punaḥ kathambhūtaṃ | "anabhivyaktam" bāhyāntaḥkaraṇāgocaratvena aprakaṭasvarūpam | kṛtaś ca pūrvam eṣāṃ viśeṣaṇānāṃ hetuhetumadbhāvena śṛṅkhalābandha iti na punar āyastam || MoT_3,9.49 ||



avaśiṣṭatayā proktaṃ vastu punar api vistareṇa viśinaṣṭi
     na śūnyaṃ nāpi cākāśaṃ na dṛśyaṃ na ca darśanam /
     na ca bhūtapadārthaugho yad anantatayā sthitam // Mo_3,9.50 //
"anantatayā" anantabhāvena | "sthitaṃ yat" vastu | "śūnyaṃ na" bhavati | tattve hi jagadadhiṣṭhānatvam ayuktaṃ syāt | na hi śūnyaṃ kasyāpi adhiṣṭhānaṃ dṛṣṭam | tatra bhāsamānasya picchikādeḥ nāyanaraśmyadhiṣṭhānatvāt | tathā "yat" vastu | "ākāśaṃ na" bhavati | proktanyāyena śūnyavyatiriktatvāt | ākāśasya ca śūnyaikamayatvāt | "yat dṛśyaṃ na" bhavati | kevaladraṣṭṛsvarūpatvāt | "yat" vastu | "darśanam na" bhavati | draṣṭṛdṛśyānapekṣasiddhikatvāt | "yat bhūtapadārthaughaḥ na" bhavati | tattve hi jaḍaṃ syāt || MoT_3,9.50 ||



     kim apy avyapadeśātma pūrṇāt pūrṇatarākṛti /
     na san nāsan na sadasan nābhāvo bhavanaṃ na ca // Mo_3,9.51 //
"pūrṇāt" pūrṇatvenābhimatāt ākāśādeḥ | "pūrṇatarākṛti" pūrṇatarākāram | yat vastu | "kim apy avyapadeśātma" kim apy anirvācyasvarūpaṃ bhavati | tathā yat "sat na" bhavati | [...] jagadadhiṣṭhānatvāyogāt | tathā yat "sadasat na" bhavati | ubhayadoṣaprasaṅgāt | tathā yat "abhāvaḥ na" bhavati | tadviruddhābhāvatayāpy avasthānāt || MoT_3,9.51 ||


     cinmātraṃ cetyarahitam anantam ajaraṃ śivam /
     anādimadhyaparyantaṃ yad anādhi nirāmayam // Mo_3,9.52 //
"yat" evaṃvidhaṃ bhavati | evaṃvidhaṃ kīdṛg ity apekṣāyām āha "cinmātram" ityādi | "cinmātram" kevalaṃ citsvarūpam | ata eva "cetyarahitam" cetyārūṣitam | "anantam" svāntasyāpi sākṣitvena sthitatvāt | tatra hi "anādimadhyaparyantam" ādimadhyaparyantavyavasthākārideśakālabhāsakatvāt ādimadhyaparyantarahitam | "anādhi" cittābhāvena tadāśritādhirahitam | "nirāmayam" bhāvābhāvādisvarūparogarahitam || MoT_3,9.52 ||


     yasmiñ jagat prasphurati dṛṣṭimauktikahaṃsavat /
     yaś cedaṃ yaś ca naivedaṃ devaḥ sadasadātmakaḥ // Mo_3,9.53 //
"yasmin" vastuni | "jagat prasphurati" adhiṣṭheyatayā vilasati | kathaṃ | "dṛṣṭimauktikahaṃsavat" | dṛṣṭau sphuritau mauktikahaṃsau "dṛṣṭimauktikahaṃsau" | tāv iva tad"vat" | rogavaśena hi dṛṣṭyavayavabhūtāḥ raśmayaḥ mauktikabhāvena haṃsabhāvena cākāśe sphuranti | "sadasadātmakaḥ" sadasatsvarūpaḥ | anirvācya iti yāvat | "yaḥ devaḥ" | "yaḥ" krīḍāśīlaḥ dyotanaśīlaś "ca" | "idaṃ" idantayā viṣayīkṛtaṃ bhāvajātaṃ bhavati | sārabhāvena sthitatvāt | "yaḥ devaḥ idaṃ na" bhavati | ahantāsāratvena sthitatvāt || MoT_3,9.53 ||



     akarṇajihvo 'nāsātvaṅnetraḥ sarvatra sarvadā /
     yaḥ śṛṇoty āsvādayati jighran spṛśati paśyati // Mo_3,9.54 //
"akarṇajihvaḥ" śrotrendriyarasanendriyarahitaḥ | tathā "anāsātvaṅnetraḥ" ghrāṇendriyatvagindriyanetrendriyarahitaḥ | "yaḥ sarvatra" sarvadeśeṣu | "sarvadā" sarvakāleṣu | "śṛṇoti" samastaśabdaśravaṇakriyāṃ karoti | "āsvādayati" samastāsvādāsvādanakriyāṃ karoti | "jighran" bhavati | samastagandhaśiṅghaṇakriyāṃ kurvan bhavati | "spṛśati" samstasparśasparśanakriyāṃ karoti | "paśyati" samastarūpadarśanakriyāṃ karoti | samastadeśakālagatasamastaprasādasamastendriyasāratvena sthitatvāt śravaṇādikriyākartṛtvābhimānagrastasamastadeśakālagatasamastapramātṛbhāvena vā sthitatvāt | na cendriyasāratvena sthitasyāsyānyendriyāpekṣā yuktā | indriyāṇām indriyāntaranairapekṣyeṇa tatsārasyāpi tadvat tadapekṣāyāḥ ayuktavāt | kalpyamānānām api teṣāṃ etatsāratvaṃ vinā nakiñcidrūpatvāpatteḥ | etatsāratve tu etasyaiva tadbhāvenāpi sthitatvāt | sarvapramātṛbhāvena sthitatve api nendriyāntarāpekṣā | tadindriyair evendriyamattvena indriyāntarāṇām anupayogitvāt || MoT_3,9.54 ||



     sa eva sadasadrūpaṃ yenālokena lakṣyate /
     sargacitram anādyantaṃ kharūpaṃ cāpy arañjanam // Mo_3,9.55 //
"sa eva" cinmātrasvarūpaḥ san draṣṭṛtām āpannaḥ sa eva | na tv anyaḥ kaścit | "yenālokena" yatsvarūpeṇa | "sargacitraṃ" jagadrūpaṃ citram | citprakāśena "lakṣyate" dṛśyate | cidālokaṃ vinā draṣṭuḥ jagaddarśanāsambhavāt | kathambhūtaṃ "sargacitraṃ" | "sadasadrūpaṃ" | phalataḥ sadasadbhyām anirvacanīyam | punaḥ kathambhūtam | "anādyantam" anādyantacinmātrasāratvenādyantarahitam ity arthaḥ | punaḥ kathambhūtaṃ "ca" | "kharūpaṃ ca" | ābhāsamātrarūpatvena svapnavat ākāśarūpaṃ cety arthaḥ | punaḥ kathambhūtam | "arañjanam" bhāsamānābhiḥ bhāvābhāvarañjanābhiḥ śuddhatvena paramārthato muktam ity arthaḥ | "api"śabdaḥ pādapūraṇārthaḥ || MoT_3,9.55 ||



     ardhonmīlitadṛgbhrūbhūmadhyatārakavaj jagat /
     vyomātmaiva sadābhāsaṃ svarūpaṃ yo 'bhipaśyati // Mo_3,9.56 //
"yaḥ svarūpaṃ" cinmātrākhyaṃ svabhāvaṃ | "jagat" naśvaracetyarūpaṃ | "paśyati" svagocarīkaroti | kathambhūtam "jagat" | "vyomātmaiva" paramārthato jagadrūpatābhāvāt nakiñcidrūpam eva | punaḥ kathambhūtaṃ | "sadābhāsaṃ" sad ivābhāsata iti "sadābhāsam" | paramārthato na sad ity arthaḥ | kathaṃ "paśyati" | "ardhonmīlitadṛgbhrūbhūmadhyatārakavat" | ardham unmīlitā dṛk yena | saḥ "ardhonmīlitadṛk" | "bhruvau" eva "bhūḥ" sthānaṃ | tasyā madhyaṃ "bhrūbhūmadhyaṃ" | ardhonmīlitadṛśaḥ bhrūbhūmadhye bhāsamānā yā "tārakā" | tad"vat" | ardhonmīlitanetraḥ puruṣaḥ svabhrūmadhye svadṛṣṭiraśmim eva tārakākārāṃ yathā paśyati | tathety arthaḥ | abhinayagamyaś cārthaḥ || MoT_3,9.56 ||



     yasyānyad asti na vibhoḥ kāraṇaṃ śaśaśṛṅgavat /
     yasyedaṃ ca jagat kāryaṃ taraṅgaugha ivāmbhasaḥ // Mo_3,9.57 //
"yasya vibhoḥ kāraṇaṃ nā"stīty arthaḥ | nanu kathaṃ nāsya kāraṇam asti | satyam | tatkāraṇaṃ cidrūpam acidrūpaṃ vā | nāntyaḥ cidrūpaṃ prati acidrūpakāraṇatvāyogāt | ādye tu sa eva cidrūpaḥ cidrūpasya svasya kāraṇaṃ kathaṃ syāt | iti sarvasya jagataḥ tatkāryatvaṃ kathayati "yasyedam" iti | jagataḥ cinmātrakāryatvaṃ svapnajagadvaj jñeyam || MoT_3,9.57 ||


     jvalataḥ sarvato 'jasraṃ cittasthālīṣu tiṣṭhataḥ /
     yasya cinmātradīpasya bhāsā bhāti jagattrayam // Mo_3,9.58 //
"yasya cinmātradīpasya" | dīpatvaṃ cāsya prakāśakatvena jñeyam | "bhāsā" indriyadvāranirgatayā citprabhayā | "jagattrayam" avasthātraye bhāsamānaṃ prapañcatrayaṃ | "bhāti" sphurati | kathambhūtasya | "sarvataḥ" sarvatra | "jvalataḥ" sarvaṃ prakaṭayituṃ samarthasyety arthaḥ | punaḥ kathambhūtasya | "cittasthālīṣu" cittarūpeṣu pātreṣu | "tiṣṭhataḥ" sārabhāvena sthitavataḥ | yuktaṃ ca dīpasya pātreṣv avasthānam | yady api suṣuptau cittaṃ līyata eva tathāpi bījatvenātrāsyāvasthānāt evam uktam | bahir api bhūrbhuvassvarākhyaṃ jagattrayaṃ cittenaiva bhāti || MoT_3,9.58 ||



     yaṃ vinārkādayo 'py ete prakāśās timiropamāḥ /
     sati yasmin pravartante trijaganmṛgatṛṣṇikāḥ // Mo_3,9.59 //
"yaṃ vinā" cakṣurindriyasārabhāvena sthitaṃ yaṃ vinā | "ete" dṛśyamānāḥ | "arkādayo 'pi timiropamā" andhakārasadṛśāḥ | bhavanti | cakṣuṣā aprakāśitāḥ sūryādayo hi sphuṭam evāndhakārasadṛśā eva | "satī"ti | yathā sūryasannidhāne "mṛgatṛṣṇikāḥ pravartante" | tathā yatsannidhāne "trijagad" ity arthaḥ || MoT_3,9.59 ||


     saspande samudetīva niḥspande 'ntargateva ca /
     iyaṃ yasmiñ jagallakṣmīr alāta iva cakratā // Mo_3,9.60 //
"yasmin saspande" dṛśyaunmukhyākhyaspandayukte sati | "jagallakṣmīḥ samudetīva" | "niḥspande" sati | "antargateva" tadantargateva "ca" bhavati | paramārthato nodeti nāntargacchatīti "iva"śabdopādānam | kasminn "ivālāta iva" | yath"ālāte saspande" bhrāmite sati | "cakratā" cakrākāratvam | "udeti" | "aspande" sati | alāt"āntargateva" bhavati | tathety arthaḥ || MoT_3,9.60 ||



     jagannirmāṇavilayavilāso vyāpako mahān /
     spandāspandātmako yasya svabhāvo nirmalo 'kṣayaḥ // Mo_3,9.61 //
"jagannirmāṇavilayavilāsaḥ" jagatsṛṣṭisaṃhāravilāsaḥ | "yasyākṣayaḥ" nāśarahitaḥ | "nirmalaḥ" bhedamālinyādūṣitaḥ | "mahān" mahattvayukta | ata eva "vyāpakaḥ" | "svabhāvaḥ" svarūpam eva | bhavati | na tv anyat | kathaṃ | sṛṣṭisaṃhāravilāsaḥ cetyamāno 'cetyamāno vā ity etasyāsatkalpatvād alaṃ taccintayādye cidviṣayatayā cidantargatatvāt tadrūpa eveti na virodhaḥ | kathambhūtaḥ | "spandāspandātmakaḥ" spandāspandasvarūpaḥ | tatra sṛṣṭivilāsaḥ spandamayaḥ | aspandamayaḥ saṃhāravilāsaḥ || MoT_3,9.61 ||



     spandāspandamayī yasya pavanasyeva sarvagā /
     sattā nāmnaiva bhinneva vyavahārān na vastutaḥ // Mo_3,9.62 //
"yasya spandāspandamayī sattā" | cetyaunmukhyayuktā sattā spandamayī | tadrahit"āspandamayī" | "vyavahārān nāmnaiva" vyavahārārthaṃ kṛtena nāmnā eva | "bhinnā iva" | kathambhūtā | "sarvagā" viśve taduttīrṇe ca svarūpe gatā | kasy"eva" | "pavanasyeva" | "pavanasya" spandamayī sattā yayā vṛkṣādayaḥ kampante | 'spandamayī ākāśasvarūpā | nanu kathaṃ spandāspandamayyāḥ sattāyā ekatvaṃ | satyaṃ | saspandasya niḥspandasya ca jalasyaikatvaṃ yathā nipuṇair niścīyate tathātrāpīti na virodhaḥ || MoT_3,9.62 ||



     sarvadaiva prabuddho yaḥ supto yaḥ sarvadaiva ca /
     na prasupto na buddhaś ca yaḥ sarvatraiva sarvadā // Mo_3,9.63 //
"yaḥ sarvadaiva" sarvāsu daśāsv eva | "prabuddhaḥ" sākṣitayāvasthānāt prakṛṣṭajñānayukta eva | "yaḥ sarvadā eva suptaś" ca | tatparāmarśarahitatvāt suptiṃ gataś ca bhavati | "yaḥ sarvatraiva" sarvadeśeṣu eva | "sarvadā" sarvāvasthāviśeṣeṣu | "prasupto na" bhavati | nityaṃ bodharūpatvāt | "buddhaś ca na" bhavati | upekṣayā svaparāmarśe 'pi vimukhatvāt || MoT_3,9.63 ||


     yadaspandaḥ śivaṃ śāntaṃ yatspandas trijagatsthitiḥ /
     spandāspandavilāsātmā ya eko bharitākṛtiḥ // Mo_3,9.64 //
iti | "yadaspandaḥ" yaccetyaunmukhyarāhityam | "śāntaṃ" kṣobharahitaṃ | "śivam" ānandaḥ | bhavati | "yatspandaḥ" yaccetyaunmukhyam | "trijagatsthitiḥ" trijagatsattā | bhavati | "yaḥ ekaḥ spandāspandavilāsātmā" cetyaunmukhyatāyuktatadrahitasvarūpaḥ | bhavati | kathambhūtaḥ | "bharitākṛtiḥ" | "bharitā" sarvamayī | "ākṛtiḥ" svarūpaṃ yasya | tādṛśaḥ | ekasya yugapatspandamayatvaṃ vaicitryāvaham || MoT_3,9.64 ||


     āmoda iva puṣpeṣu na naśyati vināśiṣu /
     pratyakṣastho 'py athāgrāhyaḥ śauklyaṃ śuklapaṭeṣv iva // Mo_3,9.65 //
yaḥ "vināśiṣu" padārtheṣu | "na naśyati" tannāśe 'pi tadupādānatayā sūkṣmatvenāvasthānāt | na hi ghaṭe naṣṭe 'pi tadapekṣayā sūkṣmam upādānabhūtaṃ mṛtsvarūpaṃ naśyati | ka "ivāmoda iva" | yathā "puṣpe" naṣṭe 'pi tadāmodaḥ ākāśe bhrāmyan kiñcit kālaṃ "na naśyati" | tathety arthaḥ | yaḥ "agrāhyaḥ" kenāpi bāhyenāntareṇa vendriyeṇa grahītuṃ śakyo na bhavati | kathambhūto "'pi" | "pratyakṣastho 'pi" pratyakṣe vartamāno 'pi | na hi kasyacit svātmāpratyakṣaḥ nāham atrāsmīti | kim "iva" | "śauklyam iva" | yathā paṭe vartamānaṃ śuklatvaṃ pratyakṣam api na hastena grāhyaṃ bhavati | tathety arthaḥ || MoT_3,9.65 ||



     mūkopamo 'pi yo vaktā mantā yo 'py upalopamaḥ /
     yo bhoktā nityatṛpto 'pi kartā yaś cāpy akiñcana // Mo_3,9.66 //
"yaḥ vaktā" bhavati | sarvavaktṛrūpatayā sthitatvāt | kathambhūto "'pi" | "mūkopamo 'pi" mūkopamatvaṃ cāsya nirvikalpatvāt | "yaḥ mantāpi" jñātā | na hi taṃ vinā ko 'py anyo mantā nāma syāt | "upalopamaḥ" bhavati | cinmātrasvarūpatvena mantṛtvaleparahitatvāt | "yaḥ nityatṛpto 'pi" parānandarūpatvena sarvadaiva svenaiva tṛpto 'pi | "bhoktā" bhavati | bhoktuḥ tadrūpatānapāyāt | "yaḥ kartāpi" sarvakartṝṇāṃ sāmarthyāpādakatvena kartṛtvam āpanno 'pi | "akiñcana" bhavati | kiñcanātra kartā jñeyaḥ | kartāto na bhavatīty arthaḥ | akartṛtvaṃ cāsya nakiñcanatvenaiva jñeyam | kartṛtvasya kiñcidrūpatvāt || MoT_3,9.66 ||



     yo 'naṅgo 'pi samastāṅgaḥ sahasrakaralocanaḥ /
     na kiñcit saṃsthitenāpi yena vyāptam idaṃ jagat // Mo_3,9.67 //
"yaḥ anaṅgo 'pi" śuddhacinmātratvenāṅgarahito 'pi | "samastāṅgo" bhavati | "yaḥ" kathambhūtaḥ | "sahasrakaralocanaḥ" | "sahasra"padam atrānantatāvācakaṃ | tena anantakaralocana ity arthaḥ | anantakaralocanatvaṃ cāsyānantadehe svātmabhūtatayā jñeyam | "sahasre"ti viśeṣaṇadvāreṇa hetuḥ | tathā "yena" sarvam "idaṃ vyāptam" | anyathā kiṃmayam etat syād iti bhāvaḥ | "yena" kathambhūten"āpi" | "na saṃsthitenāpi" kutrāpi na vartamānenāpi | kathaṃ | "kiñcit" leśenāpīty arthaḥ | nasaṃsthitatvaṃ vāsya grahītum aśakyatvāt || MoT_3,9.67 ||


     nirindriyabalasyāpi yasyāśeṣendriyakriyāḥ /
     yasya nirmanaso 'py etā manonirmāṇarītayaḥ // Mo_3,9.68 //
"yasyāśeṣendriyakriyāḥ" bhavanti | kathambhūtasy"āpi" | "nirindriyabalasyāpi" | aśeṣendriyakriyatvam asyendriyasārarūpatayā | "yasya nirmanaso 'pi" nirvikalpacinmātratayā manorūpasyāpi | "manonirmāṇarītayaḥ" bhavanti | anyathā yena tena rūpeṇa bhāsamānānām āsāṃ kuta utthānaṃ syāt || MoT_3,9.68 ||



     yadanālocanād bhānti saṃsāroragabhītayaḥ /
     yasmin dṛṣṭe palāyante sarvathā sarvadetayaḥ // Mo_3,9.69 //
"yadanālocanāt" yadviṣayasamyagjñānābhāvāt | "saṃsāroragabhītayaḥ" saṃsārākhyasarpodbhavāni bhayāni | "bhānti" vilasanti | yathā rajjusamyagjñānābhāvāt uragabhītayaḥ sphurantīty "uraga"padābhiprāyaḥ | paramātmājñānād eva hi tasmin saṃsāraḥ tadbhītayaś ca "bhānti" | "yasmin" paramātmani | "dṛṣṭe" svarūpatvenānubhūte sati | "sarvathā" sarvaprakāreṇa vartamānā | "ītayaḥ" bādhāḥ | "sarvadā" sarvakāleṣu | "palāyante" dūre gacchanti | ītīnāṃ palāyanam ītirūpatāviparyayeṇa paramātmarūpatājñānam eva | tāsām api paramārthataḥ tadrūpatvāt || MoT_3,9.69 ||



     sākṣiṇi sphāra ābhāse dhruve dīpa iva kriyāḥ /
     sati yasmin pravartante citrehāḥ spandapūrvikāḥ // Mo_3,9.70 //
"sākṣiṇi" sarvāsāṃ staimityaspandāvasthānāṃ grāhakatvena sākṣibhūte | "sphāre" vyāpake | "ābhāse" sphurattaikasāre | "dhruve" udāsīne | "yasmin sati" sannidhimātraṃ bhajati sati | "citrehāḥ" nānāvidhāḥ manovyāpārāḥ | kathambhūtāḥ | "spandapūrvikāḥ" śarīraceṣṭāḥ | "pravartante" | tatsahitā ity arthaḥ | asati āntare kasmin cittattve vikalpānāṃ śarīraceṣṭānāṃ cotthānaṃ yuktaṃ na syād iti bhāvaḥ | kā "iva" | "kriyā iva" lokakriyā iva | yathā "dīpe" sannidhimātraṃ bhajati lokakriyā svayam eva pravartante | tathety arthaḥ || MoT_3,9.70 ||



     yasmād ghaṭapaṭākārapadārthaśatapaṅktayaḥ /
     taraṅgakaṇakallolavīcayo vāridher iva // Mo_3,9.71 //
"yasmād" upādānabhūtāt | yataḥ "ghaṭapaṭākārapadārthaśatapaṅktayaḥ" ghaṭapaṭasvarūpāḥ padārthaśatasamūhāḥ | bhavanti | yady api paramāṇvāder evopādānatvam anyair uktaṃ tathāpi cetanān prati tasyopādānatvābhāvāt kim api cetanācetanasvarūpam upādānaṃ kalpyam iti na vivādaḥ | kā "iva" | "taraṅgakaṇakallolavīcaya iva" | yathā tāḥ ambudheḥ bhavanti | tathety arthaḥ || MoT_3,9.71 ||



     sa evānyatayodeti yaḥ padārthaśatabhramaiḥ /
     kaṭakāṅgadakeyūranūpurair iva kāñcanam // Mo_3,9.72 //
"sa eva" cidākhyo 'pūrvarūpeṇa vartamāna ev"ānyatayā"nyasvarūpeṇ"odeti" udayaṃ yāty | anyasvarūpatām iva bhajata ity arthaḥ | kaiḥ kṛtvā | "padārthaśatabhramaiḥ" padārthaśatarūpāḥ bhramāḥ | taiḥ | padārthaśatair ity arthaḥ | "śata"padaṃ cātrānantatāparam | kim "iva" | "kāñcanam iva" | yathā "kāñcanaṃ" | tad eva "kaṭakāṅgadakeyūranūpurair" udeti | tathety arthaḥ || MoT_3,9.72 ||


     yas tvam ekāvabhāsātmā yo 'ham ete janāś ca ye /
     yaś ca na tvam abuddhātman nāhaṃ naite janāś ca yaḥ // Mo_3,9.73 //
he "abuddhātman" adya tāvat ajñātaparamātmatattva | "ekāvabhāsātmā" kevalajñānasvarūpaḥ | "yaḥ tvam" upadeśyabhūtaḥ asti | tvattayā bhātīty arthaḥ | "yaḥ aham" upadeśakabhūtaḥ asti | mattayā bhātīty arthaḥ | "yaś ca ya ete janāḥ" asti | tattayā bhātīty arthaḥ | sarvatra sāratayā sthitatvāt | nanu paricchinna eva tarhy asau nety āha "yaś ce"ti | tvattādivikalparahitaśuddhacinmātrarūpeṇa paramārthataḥ sthitatvād ity arthaḥ || MoT_3,9.73 ||



     anyevāvyatiriktaiva saivāseva ca bhaṅgurā /
     payasīva taraṅgālī yasmin sphurati dṛśyabhūḥ // Mo_3,9.74 //
"bhaṅgurā" naśvarasvabhāvā | "dṛśyabhūḥ" | "dṛśyaṃ" dṛśikriyāviṣayo bhāvajātaṃ | tad eva "bhūḥ" nānāracanādhāratvāt bhūmiḥ | "sā yasminn" ādhārabhūte | "sphurati" vilasati | citsvarūpasya dṛśyādhāratvaṃ svapnadṛṣṭāntena jñeyaṃ | kathambhūt"aivāvyatiriktaiva" tato vyatirekam anāpannaiva | "anyevā"nyavat | bhāsamānety arthaḥ | avyatiriktasyānyatābhāsanaṃ vaicitryāvahaṃ | vyatirekābhāve 'pi jātivyaktyor iva aikyābhāvam āśaṅkya tanmayatāṃ kathayati "saive"ti | "saiva" na tu leśenāpy atadrūpatāmatī | "aseva" atadvad bhāsamānā | k"eva" | "taraṅgālīva" | taraṅgālyāḥ ca "payasi" tadrūpatāyām apy atadrūpatayeva bhāsanaṃ sarvapratītisiddham eva || MoT_3,9.74 ||



     yataḥ kālasya kalanā yato dṛśyasya dṛśyatā /
     mānasī kalanā yena yena bhāsāṃ vibhāsanam // Mo_3,9.75 //
"kālasya" vartamānādyupādhyasahitasya vastunaḥ | "yataḥ kalanā" kalpanā bhavati | na hy āntaraṃ kalpayitāraṃ vinā kālasya kalpanā yukteti bhāvaḥ | "yataḥ dṛśyasya dṛśyatā" bhavati | na hi draṣṭāraṃ vinā dṛśyasya dṛśyatvam upapadyate | "yena mānasī kalanā" bhavati | na hi sākṣiṇaṃ vinā mano 'pi sidhyati | "yena bhāsāṃ" ghaṭādijñānānāṃ | "vibhāsanaṃ" sphuraṇaṃ | bhavati | na hi jñātāraṃ vinā jñānāny utpadyante || MoT_3,9.75 ||



     kriyāṃ rūpaṃ rasaṃ gandhaṃ sparśaṃ śabdaṃ ca cetanam /
     yad vetsi tad asau devo yena vetsi tad apy asau // Mo_3,9.76 //
"kriyām" ity anena "vetsī"ty asya sthāne karoṣīty etat sambandhanīyam | tenāyam arthaḥ | tvaṃ | "kriyāṃ yat" karoṣi | "tat" karaṇam | "api asau" pūrvoktaḥ | "devaḥ" krīḍākārī | bhavati | "yena" karmendriyeṇa karoṣi | "tat" karmendriyam | "apy asau devaḥ" bhavati | tathā "rūpaṃ rasaṃ gandhaṃ sparśaṃ śabdaṃ yad vetsi tad" vedanam | "asau devaḥ" bhavati | "yena" dhīndriyapañcakena "vetsi tad apy asau devaḥ" bhavati | tathā "cetanam" saṅkalpādikaṃ | "yad vetsi tad asau devaḥ" bhavati | "yenā"ntaḥkaraṇena | "vetsi tad apy asau devaḥ" bhavati | etena kriyāphalasya tatkaraṇasya ca tanmayatā kathitā | kartus tu sā nirvivādasiddhaiva || MoT_3,9.76 ||



evaṃ viśeṣaṇadvāreṇa tatsvarūpam uktvā tatpraveśopāyam āha
     draṣṭṛdarśanadṛśyānāṃ madhye yad darśanaṃ sthitam /
     sādho tadavadhānena svātmānam avabudhyase // Mo_3,9.77 //
he "sādho" paramātmabodhārha | tvaṃ "tadavadhānena" tatrāvadhānadānena | "svātmānaṃ" svarūpabhūtaṃ paramātmānam | "avabudhyase" jānāsi | tatra kutra | "draṣṭṛdarśanadṛśyānāṃ" trayāṇāṃ | "madhye" | "yad darśanaṃ sthitaṃ" bhavati | ayam atra nirṇayaḥ | sarvo vyavahāraḥ tāvat tripuṭyām eva sampadyate | tatra "draṣṭā" kartā | "darśanaṃ" kriyā | "dṛśyam" ālambanabhūtaṃ karma | yadviṣayā kriyotpadyate | karaṇaṃ tv asādhāraṇakāraṇarūpam etebhyo na vyatiricyate | sāmagryā eva karaṇatvāt | tatrāhaṃ draṣṭety abhimānagrastād draṣṭuḥ grāhyaikarūpadṛśyaviṣayaṃ darśanam utpadyate | 'nyathā tayoḥ draṣṭṛdṛśyatāyogāt | draṣṭābhimānagrastatvān na jhagiti śuddhīkartuṃ śakyate | dṛśyaṃ tv atyantajaḍatayā tattulyayogakṣemam evātaḥ tau hitvā darśana evāvadhānaṃ vihitaṃ | nanu darśanam apy āśrayaviṣayadoṣeṇa dūṣitaṃ | natarāṃ śuddhīkartuṃ śakyate | satyaṃ | draṣṭari sthitāyā ahantāyāḥ dṛśyasthāyāḥ jaḍatāyāś ca nivāraṇam aśakyam eva | leśata ubhayasparśadūṣitasya darśanasya tu aṃśabhāvena sthitadoṣadvayanivāraṇaṃ suśakam eva | tatreyaṃ rītiḥ | darśanaṃ madrūpaṃ nāsti | sphuṭaṃ madvyatiriktatvāt | madvyatiriktatvaṃ cāsya draṣṭṛtvābhāvāt dṛśyarūpam api nāsti | grāhakatvāt | ataḥ tābhyāṃ vyatiriktaṃ kim api grahītum aśakyam avyapadeśyaṃ darśanaṃ nāmāstīti siddhā darśanasya paramātmarūpatā | tato draṣṭṛdṛśyayoś ca sā siddhataraiva | na hi darśanasambandhavilaye draṣṭṛdṛśyayoḥ sthitiḥ sambhavati | darśanāśrayatvenaiva draṣṭur draṣṭṛtvāt | tadviṣayatvena ca dṛśyasya dṛśyatvāt | athavā "darśanam" atra darśanecchākālīnaṃ jñeyaṃ | tad dhi tadā āśrayaviṣayoparāgābhāvena śuddhatayaiva sphurati | paścāt tu sthūlatāṃ yāti || MoT_3,9.77 ||



pūrvoktaṃ sargāntaślokena saṅgṛhṇāti
     ajam ajaram ajāḍyaṃ śāśvataṃ brahma nityaṃ
     śivam amalam anādyaṃ vandhyavedyair anindyam /
     sakalakalanaśūnyaṃ kāraṇaṃ kāraṇānām
     anubhavanam avedyaṃ vedanaṃ vittvam antaḥ // Mo_3,9.78 //
"vittvaṃ" vettīti yāvat | "antaḥ" bhavati | sarvasya dṛśyajātasya paryavasānarūpaṃ bhavati | mahāpralaye śiṣyate iti yāvat | kathambhūtaṃ | "ajam" sarvadaiva vartamānatvāt | "ajaraṃ" śarīravyatiriktatvāt | "ajāḍyaṃ" manovyatiriktatvāt | "śāśvataṃ" viśvātmakatve 'pi svarūpād acyutatvāt | "brahma" jagadrūpeṇa bṛṃhaṇāt | "nityaṃ" kālatrayānapāyitvāt | "śivaṃ" sukhaikarūpatvāt | "amalaṃ" bhedamālinyarahitatvāt | "anādyaṃ" kasyāpi tadādyatvenāvartamānatvāt | "vandhyavedyaiḥ" vyarthavedyair | "anindyam" akadarthitaṃ | tatsthair bhāvābhāvair adūṣitatvāt | "sakalakalanaśūnyaṃ" nirvikalpasvarūpatvāt | "kāraṇānāṃ" kāraṇatvenābhimatānāṃ brahmādīnāṃ | "kāraṇaṃ" | teṣām apy ākṛtimattvena sakāraṇatvāt | "anubhavanam" anubhavasvarūpaṃ | anubhava eva pūrvoktaviśeṣāṇāṃ sambhavāt | anubhavasvarūpatve 'pi vedyamālinyam āśaṅkyāh"āvedyam" iti | "avedyaṃ" vedyasparśādūṣitaṃ | "vedanam" | acetyacidrūpam iti yāvat | iti śivam || MoT_3,9.78 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe navamaḥ sargaḥ || 3,9 ||

*********************************************************************

oṃ | atra moham āpanna iva śrīrāmaḥ pṛcchati
     mahāpralayasampattau yad etad avaśiṣyate /
     bhavatv etad anākāraṃ nāma nāsty atra saṃśayaḥ // Mo_3,10.1 //
"atra saṃśayo nāsti" | "etat" vastu | "anākāram" ākārarahitaṃ | "bhavatu" | atra mamāpi viśvāso 'stītīti bhāvaḥ | "etat" kiṃ | "mahāpralayasampattau" sarvabhāvakṣaye | "yat etat" sad vastu | "avaśiṣyate" avaśiṣṭatayā tiṣṭhati || MoT_3,10.1 ||



bahir anubhūyamānākārarahitaśūnyādivasturūpatānirāsas tu tasya na yujyata iti kathayati
     na śūnyaṃ katham etat syān na prakāśaḥ kathaṃ bhavet /
     kathaṃ vā na tamorūpaṃ kathaṃ vā naiva khātmakam // Mo_3,10.2 //
tat "śūnyaṃ kathaṃ na bhavet" | tad eva bhavatv ity arthaḥ | evaṃ sarvatra yojyam | "prakāśaḥ" mahābhūtaprakāśaḥ | "khātmakam" ākāśarūpam || MoT_3,10.2 ||


     kathaṃ vā naiva cidrūpaṃ jīvo vā na kathaṃ bhavet /
     kathaṃ na buddhitattvaṃ syāt kathaṃ vā na mano bhavet // Mo_3,10.3 //
cidrūpatvasyāpi tatra paramārthatayā nivāraṇād etad uktam || MoT_3,10.3 ||


     kathaṃ vā na na kiñcit syāt kathaṃ vā sarvam ity api /
     anayā ca vacobhaṅgyā mama moha ivoditaḥ // Mo_3,10.4 //
"na kiñcit" kenāpi rūpeṇa sthitaṃ na bhavati | nakiñcittvasyāpi nirākaraṇāt | "sarvam ity api kathaṃ vā" na bhavati || MoT_3,10.4 ||


śrīvasiṣṭha uttaram āha
     viṣamo 'yam ati praśno bhavatā samudāhṛtaḥ /
     bhinadmy enaṃ tv ayatnena naiśaṃ tama ivāṃśumān // Mo_3,10.5 //
"ati"śabdo bhinnakramaḥ | "bhavatā ayaṃ praśnaḥ ativiṣamaḥ" durbodhataraḥ | "samudāhṛtaḥ" | "tu" viśeṣe | 'haṃ "enam ayatnena" sukhenaiva | "bhinadmi" | manogranthirūpatvāt praśnasya "bhinadmī"ti kathanam | ka "ivāṃśumān iva" sūrya iva | aṃśumān yathā "naiśaṃ" niśāsambandhi | "tamaḥ" bhinatti | tathety arthaḥ || MoT_3,10.5 ||


praśnam eva bhinatti
     mahākalpāntasampattau yat tat sad avaśiṣyate /
     tad rāma na yathā śūnyaṃ tad idaṃ śṛṇu kathyate // Mo_3,10.6 //
"mahākalpāntasampattau" turye turyātīte mahāpralayasamayaniṣpattau vā | "tat" prasiddhaṃ kenāpi apalapitum aśakyaṃ | he "rāma" | "tat" "yac"chabdakathitaṃ "sad" vastu | "yathā" yena prakāreṇa | "śūnyaṃ na" bhavati | "tat" tam eva prakāram | "idaṃ" samanantaram eva kathyamānaṃ | "śṛṇu" | yato mayā "kathyate" || MoT_3,10.6 ||


tad eva kathayati
     anutkīrṇā yathā stambhe saṃsthitā sālabhañjikā /
     tathā viśvaṃ sthitaṃ tatra tena śūnyaṃ na tat padam // Mo_3,10.7 //
"anutkīrṇā" takṣakāreṇa nistakṣya na prakaṭīkṛtā | stambhe saṃsthitatvam asyā agre prakaṭībhāvāt | viśvasya sadrūpe sthitatvam adyaiva bhāsamānatvād | iti tu viśeṣaḥ | "tat padaṃ" paramātmākhyaṃ padam | yadi tac "chūnyaṃ" syāt tadā jagat kutra bhūyāt | niradhiṣṭhānasya bhramasyāyuktatvād iti bhāvaḥ | bhedenaiva bhātīty "anutkīrṇe"ty uktam || MoT_3,10.7 ||



etad evam vistaraṃ kathayati
     ayam itthaṃ mahābhogo jagadākhyo 'vabhāsate /
     satyo bhavatv asatyo vā yatra tatra kva śūnyatā // Mo_3,10.8 //
"ayam" anubhūyamānaḥ vistāraḥ | "satyo bhavatu" satsvarūpo bhavākhyaḥ | "jagad" iti nāmadheyaḥ | "mahābhogaḥ" mahāvistāraḥ | "satyo bhavatu" satsvarūpo bhavatv| "asatyo vā"satsvarūpo vā bhavatu | saḥ "yatra" ādhārabhūte yasmin vastuni | "avabhāsate" sphurati | "tatra kva śūnyatā" | na yukteti bhāvaḥ || MoT_3,10.8 ||



     yathā na putrikāśūnyaḥ stambho 'nutkīrṇasālikaḥ /
     tathā tāta jagad brahma tena śūnyaṃ na tat padam // Mo_3,10.9 //
"anutkīrṇasālikaḥ" anutkīrṇaputrikaḥ | dārṣṭāntike yojayati "tathe"ti | he "tāta" he pūjya | "tathe"ty anena pūrvavākyasthaṃ "ne"ti "śūnya" iti ca padadvayam ākṛṣyate | tenāyam arthaḥ | "tathā brahma" "jagacchūnyaṃ na" bhavati | phalitam āha "tene"ti || MoT_3,10.9 ||



     somyāmbhasi yathā vīcir na cāsti na ca nāsti ca /
     tathā jagad brahmaṇīdaṃ śūnyāśūnyapadaṃ gatam // Mo_3,10.10 //
"somyāmbhasi" kṣobharahite jale | "na cāsti" | tadānīm alabhyatvāt | "na ca nāsti" | agre sphuṭībhaviṣyamāṇatvāt | dārṣṭāntikam āha "tathe"ti | bhāsamānatvād "aśūnyapadaṃ gataṃ" | paramārthato nakiñcidrūpatvāc "chūnyapadaṃ gatam" iti yojyam || MoT_3,10.10 ||


nanu tarhi putrikādisādṛśyena siddhā eva brahmaṇi jagatsthitir ity | atrāha
     deśakālādiśāntatvāt putrikāracanaṃ drume /
     sambhavaty ajadhātau tu kena nāntar vimuhyate // Mo_3,10.11 //
"drume" lakṣaṇayā stambhe | "putrikāracanaṃ" deśavaśena kālavaśena kartrādivaśena ca "sambhavati" | "tu" viśeṣe | "ajadhātau" navīnaprādurbhāvarahitacidākhyamūlakāraṇaviṣaye | "'ntaḥ" manasi | "kena" puruṣeṇa | "na muhyate" mohitena bhūyate | 'pi tu sarveṇaivety arthaḥ | kuto "muhyate" | "deśakālādiśāntatvāt" | "ādi"śabdena kartrādīnāṃ grahaṇam | deśakālakartrādiśānter ity arthaḥ | tacchāntiś cātra śuddhacinmātratayaiva jñeyā | mohaś ca deśakālādisparśarahite brahmaṇi kathaṃ jagad bhāti ity evaṃrūpo jñeyaḥ || MoT_3,10.11 ||



phalitam āha
     tat stambhaputrikādy etat paramārthajagatsthiteḥ /
     ekadeśena sadṛśam upamānaṃ na sarvataḥ // Mo_3,10.12 //
yataḥ deśakālādisambhavena stambhe putrikāracanaṃ yuktaṃ | tacchāntyā tu ciddhātau tu na yuktam | "tat" tato hetoḥ | "etat" samanantaram evoktaṃ "stambhaputrikādi" | "ādi"śabdena vīcyambhasor grahaṇam | "paramārthe" yā "jagatsthitis" | tasyāḥ "ekadeśena" śūnyatānivāraṇamātreṇa | "sadṛśam upamānaṃ" bhavati | "na sarvataḥ" na sarveṇa prakāreṇa | na bhavatīty arthaḥ || MoT_3,10.12 ||



jagadādhāratvena śūnyatvaṃ nirasya tadrūpatayā nirasyati
     na kadācid udetīdaṃ parasmān na ca śāmyati /
     idaṃrūpaṃ kevalaṃ sad brahma svātmani saṃsthitam // Mo_3,10.13 //
"parasmāt" paramātmanaḥ | nanu yadi jagan nodeti na ca śāmyati tarhi kim idaṃ bhāsata ity | atrāha "idam" iti | "kevalam" advitīyaṃ | "sat" satsvarūpaṃ | "brahma" bṛṃhitaṃ vastu | "svātmani" svasvarūpe | "saṃsthitaṃ" bhavati | kathambhūtaṃ "idaṃrūpaṃ" | "idaṃ" śāntyudayasahitaṃ jagat | "rūpaṃ" svarūpaṃ | yasya | tat | tādṛśaṃ | śāntyudayasahitasya jagato brahmatvaṃ brahmāśrayabṛṃhāviṣayatvena jñeyaṃ | bṛṃhāviṣayo hi brahmasvarūpam eva bhavati | tathā ca brahmaṇaḥ śūnyatvaṃ na yuktam iti bhāvaḥ || MoT_3,10.13 ||


aśūnyatvāsambhavena śūnyatvanirāsam āha
     aśūnyāpekṣayā śūnyaśabdārthaparikalpanā /
     aśūnyatvāsambhavataḥ śūnyatvāśūnyate kutaḥ // Mo_3,10.14 //
"aśūnyatvāpekṣayāśūnyatvasya" kiñcidrūpatvasy"āpeksayā" tad apekṣyety arthaḥ | "śūnyatvaparikalpanā "| "śūnyatvasya" nakiñcidrūpatvasya | "parikalpanā" kalpanaṃ | bhavati | tataḥ kim ity | atrāha "aśūnyatve"ti | "aśūnyatvāsambhavataḥ" uktayuktyā kiñcidrūpatvāsambhavena | "śūnyatvāśūnyate" nakiñcittvakiñcittve | "kutaḥ" | na sta ity arthaḥ | sāpekṣayor ekanāśe dvayor api nāśād iti bhāvaḥ | kiñcidrūpatvābhāvaś ca nirālambaśuddhacinmātratayā jñeyaḥ || MoT_3,10.14 ||



śūnyatvaṃ nivārya prakāśarūpatvaṃ nivārayati
     brahmaṇy ayaṃ prakāśo hi na sambhavati bhūtajaḥ /
     sūryānalendutārādi kutas tatra kilāvyaye // Mo_3,10.15 //
"ayaṃ" netreṇa dṛśyamāṇaḥ | "bhūtajaḥ" agnyādibhūtotpannaḥ | "prakāśaḥ" tejaḥ | "hi" niścaye | "brahmaṇi" vyāpake vastuni | "na sambhavati" | cinmātratayā taduttīrṇatvāt | atra hetutvenottarārdham āha "sūrye"ti | "kila"śabdo hetutvadyotanārthaḥ | "avyaye" nāśarahite | "sūryādīnām" ākṛtimattvena nāśasambhavān nātra sthitir yuktā | tadrūpatāyās tu kā kathā iti bhāvaḥ || MoT_3,10.15 ||



tamorūpatvaṃ nivārayati
     mahābhūtaprakāśānām abhāvas tama ucyate /
     mahābhūtābhāvajaṃ tu tenātra na tamaḥ kvacit // Mo_3,10.16 //
tejo'bhāvasyaiva tamastvaṃ vādibhiḥ pratipāditam iti bhāvaḥ | phalitam āha "mahābhūte"ti | "tu" viśeṣe | "mahābhūtābhāvajaṃ" lakṣaṇayā mahābhūtaprakāśābhāvāt jātaṃ | tadrūpam iti yāvat | "tamo" | "'tra" sadvastuni | "tena" mahābhūtaprakāśābhāvatvena hetunā | "nā"sti | kutra | "kvacit" kasminn apy aṃśe mahābhūtasthityāyatane | mahābhūtapratiyogikābhāvāsambhavena tamo 'py atra na yuktaṃ | tadrūpasya tu kā katheti bhāvaḥ || MoT_3,10.16 ||



nanu tejaso 'bhāve kathaṃ tat prakāśata ity | atrāha
     svānubhūtiprakāśo 'sya kevalaṃ vyomarūpiṇaḥ /
     yo 'ntar asti sa tenaiva na tv anyenānubhūyate // Mo_3,10.17 //
"vyomarūpiṇaḥ" nakiñcidrūpasy"āsya" sadvastunaḥ | "svānubhūtiḥ" svāsvarūpabhūtā cāsāv "anubhūtiḥ" anubhavaḥ | "svānubhūtiḥ" | saiva "prakāśaḥ" prākaṭyakaraṇabhūtaṃ tejaḥ | svānubhūtyaivāsau bhāti na bāhyatejasety arthaḥ | kathambhūtad ity | atrāha "yo 'ntar" iti | "yo 'ntar asti" | puruṣeṇa "sa tenaivā"karaṇabhūtena tenaiv"ānubhūyate" | svapratītiviṣayatāṃ nīyate | "na tv anyena" | anyasya tatra praveśāsambhavāt | svayam evāsāv anubhavo 'nubhavitānubhavanam anubhūtiviṣayaś ceti | na tatra kasyāpy apekṣeti bhāvaḥ || MoT_3,10.17 ||



prakṛtam anusandhatte
     muktaṃ tamaḥprakāśābhyām ity etad ajaraṃ padam /
     ākāśakośam evainaṃ viddhi kośaṃ jagatsthiteḥ // Mo_3,10.18 //
"iti" anena prakāreṇa | "etat" avaśeṣatayā kathyamānam | "ajaraṃ" jarādoṣarahitaṃ | "padaṃ" sthānaṃ | "tamaḥprakāśābhyāṃ" tamasā prakāśena ca | "muktaṃ" bhavati | khātmakatvam asya nivārayituṃ prastauti | "ākāśe"ti | tvam "enaṃ" paramātmānam | "ākāśakośam eva" ākāśamadhyam eva | "jagatsthiteḥ kośaṃ" bhāṇḍāgāraṃ | "viddhi" jānīhi || MoT_3,10.18 ||


dṛṣṭāntenaitad eva dṛḍhayati
     bilvasya bilvasaṃjñasya yathā bhedo na kaścana /
     tatheha brahmajagator na manāg api bhinnatā // Mo_3,10.19 //
"bilvasya" bilvaphalasya | "bilvasañjñasya" bilveti saṃjñāpravṛttinimittasya vastunaḥ | "yathā" yena prakāreṇa | "kaścana" ko 'pi | "bhedaḥ nā"sti | "tathā" tena prakāreṇ"ehā"smiṃl lokatraye | "brahmajagator" "manāg api bhinnatā na" bhavati | yad eva brahma tad eva jagat | yad eva jagat tad eva brahmeti bhāvaḥ | "bilvasya" "bilvamadhyasye"ti vā pāṭhaḥ || MoT_3,10.19 ||



nanu tathāpi prakṛte kim āyātam ity | atrāha
     salile 'ntar yathā vīcir mṛdo 'ntar ghaṭako yathā /
     tathā yatra jagatsattā tat kathaṃ khātmakaṃ bhavet // Mo_3,10.20 //
"salile" jale | "'ntaḥ vīciḥ yathā" bhavati | "tathā" tena prakāreṇa | "yatra" yasminn upādānabhūte | "jagatsattā" bhavati | "tad" vastu | "khātmakam" ākāśasvarūpaṃ | "kathaṃ bhavet" || MoT_3,10.20 ||


cidrūpatānivāraṇārthaṃ prakriyām ārabhate
     mṛjjalādyupamānaśrīḥ sākārātra samā na sā /
     brahma tv ākāśaviśadaṃ tasyāntaḥsthaṃ tathaiva tat // Mo_3,10.21 //
"mṛjjalādyupamānaśrīḥ" | "atra" brahmaviṣaye | "samā" yogyā | "na" bhavati | kuta ity apekṣāyām āha | "sākāre"ti | yataḥ "sākārā" ākārasahitā bhavati | sākāratvena kathaṃ mṛjjalāder upamānayogyatvam ity | atrāha "brahme"ti | "tuḥ" viśeṣe | "brahmākāśaviśadaṃ" nirākāraṃ | bhavati | sākārasya mṛdādeḥ nirākāraṃ brahma prati upamānatvaṃ na yuktam iti bhāvaḥ | phalitam āha | "tasye"ti | "tat" tato hetoḥ | tad"antaḥsthaṃ" tadantare sthitaṃ | jagat "tathaiva" nirākāraṃ bhavatīty arthaḥ || MoT_3,10.21 ||



punar apy upasaṃhāravyājena jagato nirākāratvaṃ sādhayati
     tasmād yādṛk cidākāśam ākāśād api nirmalam /
     tadantaḥsthaṃ tādṛg eva jagacchabdārthabhāg api // Mo_3,10.22 //
"ākāśād" "api" nirmalatvaṃ cidākāśasya jaḍatvābhāvena jñeyam | "tadantaḥsthaṃ" jagat | "tādṛg eva" nirākāram eva bhavati | kathambhūtam "api" | "jagacchabdārthabhāg api" | bhāvapradhāno nirdeśaḥ | tena jagadrūpatayā bhāsamānatvena jagacchabdārthatābhāg apīty arthaḥ || MoT_3,10.22 ||



     marice 'ntar yathā taikṣṇyam ṛte bhoktur na lakṣyate /
     cinmātratvaṃ parākāśe tathā cetyakalāṃ vinā // Mo_3,10.23 //
"yathā" kenacit "marice 'ntaḥ" maricāntare | sthitaṃ "taikṣṇyaṃ" tiktatā | "bhoktuḥ ṛte na lakṣyate" na dṛśyate | bhoktari tu sati tenaiva lakṣyate ity arthaḥ | "tathā parākāśe" paramātmani | sthitaṃ "cinmātratvaṃ" | "cetyakalāṃ" cetyāṃśaṃ "vinā" | "na lakṣyate" | cetyacarvaṇād eva hi cinmātrasya cinmātratā jñāyate || MoT_3,10.23 ||


phalitam āha
     tasmāc cid apy acidrūpā cetyariktatayātmani /
     jagattā tādṛśy eveyaṃ tādṛṅmātrātmatāvaśā // Mo_3,10.24 //
"tasmāt" tato hetoḥ | "cetyariktatayā" cetyarāhityen"ātmani" cinmātrākhye svasvarūpe | "cid api acid" eva bhavati | cetyasyaiva pūrvanayena cinmātratādṛḍhīkaraṇasāmarthyāt tasya cātrābhāvāt | tasyābhāvaś cātra brahmāntaḥsthatvena brahmatayaiva jñeyaḥ | brahmābhinne jagaty api acittvam atidiśati | "jagatte"ti | "iyaṃ" "jagattā"pi | "tādṛśī eva" cidrūpabrahmābhinnatvenācidrūpaiva bhavati | atra hetutayā viśeṣaṇam āha | "tādṛṅmātrātmatāvaśe"ti | yataḥ "tādṛṅmātrātmatāyāḥ" acidrūpabrahmamātrasvarūpatāyāḥ | "vaśā" āyattā | acidbrahmasvarūpiṇīty arthaḥ | etena brahmajagatoḥ sarvathābhedo 'pi sādhitaḥ | na brahmaṇo 'cidrūpamātratā | tasyā agre 'pi sādhyamānatvāt || MoT_3,10.24 ||



nanu jagataḥ sarvathābhinnatve rūpālokamanaskārāḥ kiṃrūpā ity | atrāha
     rūpālokamanaskārās tanmayā eva netarat /
     yathāsthitam ato viśvaṃ suṣuptaṃ turyam eva vā // Mo_3,10.25 //
"rūpālokamanaskārāḥ" | "rūpaṃ" nīlapītādi | "ālokaḥ" taddarśanam karaṇabhūtaḥ prakāśo vā | "manaskāraḥ" mānasaḥ parāmarśaḥ | tadviṣayāḥ ete "tanmayā eva" | "eva"śabdārtham āha "netarad" iti | tanmayatvaṃ caiṣāṃ tadviṣayatvaṃ vināsatkalpatvāt | phalitam āha "yathe"ti | "ato" hetoḥ | "viśvaṃ" jagat | "yathāsthitam" anena prakāreṇaiva vartamānaṃ | na tu yayā kayāpi śaktyāntardhim āpāditaṃ | "suṣuptaṃ" bhavati | suṣuptau bhedasaṃskāram āśaṅkyāha "turyam" iti | turyasvarūpacinmātraikamayam eva vā bhavatīty arthaḥ || MoT_3,10.25 ||


jagataḥ turyarūpabrahmatvena yogino vyavahāre 'pi brahmamayatām āha
     tena yogī suṣuptātmā vyavahāry api śāntadhīḥ /
     āste brahma nirābhāsaṃ sarvabhāsāṃ samudgakam // Mo_3,10.26 //
"tena" pūrvoktena hetunā | "yogī" jagadbrahmaikatve samāhitaḥ | "brahma" brahmasvarūpam | "āste" | kuta evaṃrūpa āste | yataḥ "vyavahāry api" vyavahāraṃ kurvāṇo 'pi | "śāntadhīḥ" kṣobharahitabuddhiḥ | īdṛśo 'pi kutaḥ | yataḥ "suṣuptātmā" prapañcaṃ prati suptāntaḥkaraṇaḥ | prapañcaṃ prati suptamanaso hi śāntadhītvaṃ yuktam eva | kathambhūtaṃ "brahma" | "nirābhāsaṃ" nānābhāsebhyo niṣkrāntaṃ | taduttīrṇam ity arthaḥ | punaḥ kathambhūtaṃ | "sarvabhāsāṃ" sarveṣāṃ ghaṭapaṭādijñānānāṃ | "samudgakam" udbhūtisthānam || MoT_3,10.26 ||



punar api prakṛtaṃ brahmajagadabhedam eva kathayati
     ākāriṇi yathā saumye sthitas toye dravakramaḥ /
     anākṛtau tathā viśvaṃ sthitaṃ tatsadṛśaṃ pare // Mo_3,10.27 //
"ākāriṇi" bāhyendriyagrāhyasvarūpayukte | "saumye" kṣobharahite | "toye" | "dravakramaḥ" ādyaspandanāsamavāyikāraṇabhūtaguṇaviśeṣaparipāṭī | "yathā sthitaḥ" bhavati | "tathānākṛtau pare" parabrahmaṇi | "viśvaṃ" "sthitaṃ" bhavati | kathambhūtaṃ | "tatsadṛśam" anākṛtīty arthaḥ | saumye jale yathā sphuṭībhaviṣyamāṇatvena kiñcittvārho 'pi dravākhyo guṇaḥ tanmayaḥ | tathā bhāsamānatvena bhinnatvārho 'pi prapañcaḥ brahmamaya iti bhāvaḥ || MoT_3,10.27 ||



abhedam uktvā tattvam eva kathayati
     pūrṇāt pūrṇaṃ prasarati nirākārān nirākṛti /
     brahmaṇo viśvam ābhātaṃ tad viśvārthavivarjitam // Mo_3,10.28 //
"pūrṇād" brahmaṇaḥ | "pūrṇa"rūpaṃ jagat | "prasarati" vilasati | prasaraṇaṃ cātra prapañcākrāntabuddhiṃ śiṣyaṃ prayuktam | "nirākārāt" brahmaṇaḥ | "nirākṛti" jagat | "prasarati" | ataḥ "brahmaṇaḥ" yad "viśvam ābhātaṃ" bhānam āgataṃ | tat "viśvārthavivarjitam" viśvārthaiḥ ghaṭapaṭādibhiḥ vivarjitaṃ bhavati | brahmaikamayaṃ bhavatīty arthaḥ || MoT_3,10.28 ||



     pūrṇāt pūrṇaṃ prasarati saṃsthitaṃ pūrṇam eva tat /
     ato viśvam anutpannaṃ yac cotpannaṃ tad eva tat // Mo_3,10.29 //
"pūrṇād" brahmaṇaḥ | "pūrṇa"rūpaṃ jagat | "prasarati" vilasati | prasaraṇaṃ "saṃsthitaṃ" bhavati | na tu tatprasaraṇena kācit khaṇḍanāsya jāyate ity arthaḥ | phalitam āh"āta" iti | "ataḥ" pūrvoktād dhetoḥ | "viśvam anutpannaṃ" bhavati | brahmatvena tasya sadā sthitatvāt | viśvānutpannatvam asahamānaṃ praty āha "yac ce"ti | "yat cotpannaṃ" bhavati | "tat tad eva" brahmaiva | bhavati | utpannasyāpi brahmatvāviruddhatvād ity arthaḥ || MoT_3,10.29 ||



etāvatyā prakriyayā siddham acidrūpatvaṃ brahmaṇaḥ kathayati
     cetyāsambhavatas tasmin pade keva cidarthatā /
     āsvādakāsambhavato marice keva tīkṣṇatā // Mo_3,10.30 //
ata ity adhyāhāryam | ato hetoḥ | "cetyāsambhavataḥ" | "cetyasya" cidviṣayasya jagato | "'sambhavataḥ" | "tasmin pade" brahmasvarūpe pade | "keva cidarthatā" cicchabdapravṛttinimittatā | bhavati | na kāpīty arthaḥ | cetyaviṣayīkaraṇenaiva hi citaḥ cid iti nāma yuktam | cetyābhāve tu tan na yuktam | cetyābhāvaś ca savistaraṃ pūrvaṃ sādhitaḥ | cidarthatāniṣedhaś cātra taduttīrṇatayā jñeyaḥ na jaḍatayeti | atra samarthakaṃ dṛṣṭāntam āha "āsvādake"ti | "keva" na kāpīty arthaḥ | "āsvādakāsambhavata" āsvādakāsambhavena ity arthaḥ || MoT_3,10.30 ||


punar apy etad eva kathayati
     satyeveyam asatyaiva citeś cittoditā pare /
     abhāvāt pratibimbasya pratibimbārhatā kutaḥ // Mo_3,10.31 //
"citeḥ" "cittā" citsambandhī cidbhāvaḥ | "pare" paramātmani | "asatyaiva" paramārthato 'satsvarūpaiva satī | "satyeva" satyavad | "uditā"tra dṛṣṭāntam āha "abhāvād" iti | darpaṇasyeti śeṣaḥ | yathā darpaṇasya "pratibimbārhatā" pratibimbenaiva jñāyate | tadabhāve tu sā na jñāyate | evaṃ parasya cittā cetyenaiva jñāyate | tadabhāve tu "kuto" jñāyate iti bhāvaḥ || MoT_3,10.31 ||



jīvādirūpatānirāsārthaṃ paramātmatattvaṃ viśinaṣṭi
     paramāṇor api paraṃ tad aṇīyo 'py aṇīyasaḥ /
     śuddhaṃ sūkṣmaṃ paraṃ śāntaṃ tad ākāśodarād api // Mo_3,10.32 //
"tat" brahma | "paramāṇor api param aṇīyaḥ" atisūkṣmaṃ | bhavati | kathambhūtād "api" | "aṇīyaso 'pi" dvyaṇukādyapekṣayā sūkṣmatarād api | sūkṣmataratvaṃ cāsya bāhyendriyāgrāhyatvena jñeyam | "tat" brahma | kathambhūtaṃ | "śuddhaṃ" rāgādirajo'dūṣitaṃ | "sūkṣmaṃ" | "param" uttīrṇaṃ | "śāntaṃ" sarvapracāraśūnyaṃ | kasmād "api" | "ākāśodarād api" || MoT_3,10.32 ||


     dikkālādyanavacchinnarūpatvād ativistṛtam /
     tad anādyantam ābhāsaṃ bhāsanīyavivarjitam // Mo_3,10.33 //
"tat" brahm"ātivistṛtam" ativistīrṇaṃ bhavati | kutaḥ | "dikkālādyanavacchinnarūpatvāt" | "ādi"śabdena vastuparigrahaḥ trividhaparicchedaśūnyatvād ity arthaḥ | nanu katham asya digādiparicchedaśūnyatvaṃ | tathātve 'py ativistṛtatvam iti cet | "dik" tāvat cetyamānā na vā | na cet tarhi svayam evāsiddhā katham anyaṃ paricchedayet | cetyamānā cet tarhi citaiva sā paricchinnā kathaṃ tāṃ paricchedayet | evaṃ "kālā"der api jñeyam | "dig"ādibhiḥ paricchinnam eva paricchinnaṃ bhavati | tadabhāve tv ativistṛtam eveti sthitam asyātivistṛtatvam | punaḥ kathambhūtam | "anādyantaṃ" yathā tathā kalpyamānayor apy ādyantayoḥ sākṣitvād ādyantarahitam | punaḥ kathambhūtaṃ | "bhāsanīyavivarjitam" ābhāsajñeyarahitajñānasvarūpam ity arthaḥ || MoT_3,10.33 ||



proktaviśeṣaṇāvaṣṭambhena jīvādirūpatām asya nivārayati
     cidrūpam eva no yatra labhyate tatra jīvatā /
     kathaṃ syāc cittatākārā vāsanānilarūpiṇī // Mo_3,10.34 //
"yatrai"vaṃvidhaguṇaviśiṣṭe brahmaṇi | "cidrūpam eva" bhāvapradhāno nirdeśaḥ cidrūpatvam eva | "no labhyate" pūrvanyāyena nānubhūyate | "tatra" tādṛśe brahmaṇi | "jīvatā" jīvabhāvaḥ | "kathaṃ syāt" | kathambhūtā | "cittatākārā" cetyaśayanāviṣṭaṃ cittatvaṃ cittaṃ | tadrūpiṇīty arthaḥ | punaḥ kathambhūtā | "vāsanānilarūpiṇī" | cetyabhāvanā "vāsanā" | saiva calattay"ānilaḥ" | tad"rūpiṇī" | śuddhā cidrūpatāpi yatra nāsti cetyaśayanāviṣṭāyā jīvatāyāḥ kā tatra vārteti bhāvaḥ || MoT_3,10.34 ||



cidrūpatvābhāvenaiva yugapajjīvāditāṃ nirākaroti
     cidrūpānudayād eva tatra nāsty eva jīvatā /
     na buddhitā na cittattvaṃ nendriyatvaṃ na vāsanāḥ // Mo_3,10.35 //
"cidrūpānudayād eva" citsvarūpānudbhūter eva | na tv anyena hetunā | tadrūpānudayas tu pūrvaṃ kathitaḥ | sūkṣmarūpeṇa sthitā cetyabhāvanā vāsanā | nanu cidrūpānudayena katham atra jīvāditā nāsti | satyaṃ | ciducchūnatāyā eva jīvādibhāvena tadrūpatvānudaye yuktam eva jīvatādyabhāvatvam iti na virodhaḥ || MoT_3,10.35 ||


phalitam āha
     evaṃ sthitaṃ layārambhapūrṇam apy ajaraṃ padam /
     asmaddṛṣṭyā sthitaṃ śāntaṃ śūnyam ākāśato 'dhikam // Mo_3,10.36 //
"layārambhapūrṇaṃ sthitam api ajaraṃ" jarākhyaśarīradharmarahitaṃ | "padaṃ" paramātmalakṣaṇaṃ sthānam | "asmaddṛṣṭyākāśataḥ" ākāśāpekṣay"ādhikaṃ śāntaṃ" | tathā "śūnyaṃ" nakiñcidrūpaṃ | "sthitaṃ" bhavati | katham | "evaṃ" pūrvoktayā yuktyety arthaḥ || MoT_3,10.36 ||


paramātmasvarūpaṃ durbodhaṃ jñātvā punar api śrīrāmaḥ pṛcchati
     paramārthasya kiṃ rūpaṃ tasyānantacidākṛteḥ /
     punar etat samācakṣva nipuṇaṃ bodhavṛddhaye // Mo_3,10.37 //
tvaṃ "punaḥ nipuṇaṃ" samyak | "bodhavṛddhaye" paramātmaviṣayajñānavṛddhaye | "etat samācakṣva" kathaya | "etat" kiṃ | "tasya" prasiddhasy"ānantacidākṛteḥ" digādyaparicchinnacitsvarūpasya | "paramārthasya" satyasvarūpasya paramātmanaḥ | "kiṃ rūpam" astīti || MoT_3,10.37 ||


śrīvasiṣṭha uttaram āha
     mahāpralayasampattau sarvakāraṇakāraṇam /
     śiṣyate yat paraṃ brahma tad idaṃ varṇyate śṛṇu // Mo_3,10.38 //
"mahāpralayasampattau" turye turyātīte mahākalpāntasamaye vā | "kāraṇakāraṇaṃ" mūlakāraṇaṃ | "yat paraṃ brahma" jagadbhāvena bṛṃhāṃ gataṃ paramātmalakṣaṇaṃ vastu | "śiṣyate" mahāpralayasākṣibhāvena śiṣṭaṃ bhavati | mayā "tad idaṃ varṇyate" | 'taḥ tvaṃ "śṛṇu" || MoT_3,10.38 ||


paramātmasvarūpam eva varṇayati
     nāśayitvā svam ātmānaṃ manaso vṛttisaṅkṣaye /
     yad rūpaṃ yad anākhyeyaṃ tad rūpaṃ tasya vastunaḥ // Mo_3,10.39 //
"tasya vastunaḥ" paraṃ brahmāparaparyāyasya paramātmalakṣaṇasya vastunaḥ | "tat rūpaṃ" bhavati | "tat" kiṃ | "yat tad rūpaṃ" | śiṣyata iti śeṣaḥ | "śiṣyate" svanāśasākṣibhāvena śiṣṭaṃ bhavati | kasya | "manasaḥ" | kiṃ kṛtvā | "svam ātmānaṃ nāśayitvā" śuddhacinmātre layaṃ nītvā | kasmin sati | "vṛttisaṅkṣaye" vṛttināśe sati ity arthaḥ | "tad rūpaṃ" kiṃ | "yat anākhyeyaṃ" bhavati | atiśuddhatvena ākhyāyogyaṃ na bhavatīty arthaḥ | ayaṃ bhāvaḥ | manasaiva manaḥ chittveti nyāyena kiñcinmātraṃ samyakjñānena saṃsārakalanābhyo niṣkrāntaṃ śuddhaṃ manaḥ bhāvanābalena śuddhāśuddhavṛttikṣayeṇa hetunā śuddhāśuddhaṃ svaṃ rūpaṃ nāśayati | tataḥ tan manaḥ śuddhatare kutrāpy anākhyeye layībhūtam anākhyeyaṃ bhavati | etadrūpatā ca suṣuptau sarvair anubhūyate | kiṃ tu mūḍhatāmiśrā | tac ca mano yadā tādṛk syāt tadāsya paramātmatābhāvaḥ bhavatīti | tatraiva yoginā sāvadhānena bhāvyam iti || MoT_3,10.39 ||



     nāsti dṛśyaṃ jagad draṣṭā dṛśyābhāvād vilīnavat /
     bhātīti bhāsanaṃ yat syāt tad rūpaṃ tasya vastunaḥ // Mo_3,10.40 //
"tasya vastunaḥ" paramātmalakṣaṇasya vastunaḥ | "tad rūpaṃ" bhavati | "tat" kiṃ | "yad" "iti" evaṃ | "bhāsanaṃ" sphuraṇaṃ "syāt" | "iti" kim | "iti dṛśyaṃ" dṛśikriyāviṣayo | "jagat nāsti" pratītimātrasiddhatvāt | "draṣṭā" dṛśikriyākartā | "dṛśyābhāvād vilīnavat" līna iva | "bhātī"ti | ayaṃ bhāvaḥ | pūrvaṃ samyagjñānena dṛśyātyantābhāvo yuktyā niśceyaḥ | tataḥ dṛśyātyantābhāvena draṣṭāpi layībhūta iva bhavati | tataś ca draṣṭā dṛśyaṃ ca nāstīti sphurati | tatsphuraṇaṃ ca draṣṭṛdṛśyaleparahitatvena nakiñcidrūpatvād anākhyeyaṃ bhavati | tad eva ca paramātmasvarūpam iti | tatra yoginā sāvadhānena bhāvyam iti || MoT_3,10.40 ||



     citer jīvasvabhāvo yo yadi cetyonmukho vapuḥ /
     cinmātraṃ vimalaṃ śāntaṃ tat tat kāraṇakāraṇam // Mo_3,10.41 //
"tat" prasiddhaṃ | "tac" cinmātraṃ | "kāraṇakāraṇaṃ" mūlakāraṇabhūtaṃ paramātmasvarūpaṃ bhavati | "tat cinmātraṃ" kiṃ | "citeḥ" jīvopādānakāraṇabhūtāyāḥ citeḥ | "vapuḥ" svarūpaṃ | cinmātrasvarūpatvāt citeḥ | punaḥ kathambhūtaṃ | "vimalaṃ" cetyamālinyenādūṣitaṃ | punaḥ kathambhūtaṃ | "śāntaṃ" cetyakṣatakṣobharahitaṃ | "tat cinmātraṃ" kiṃ | "yaḥ jīvasvabhāvaḥ" jīvasya rūpo | bhavati | "svabhāva"śabdāpekṣayā "yac"chabdasya puṃliṅgatā | nanu kadāsau jīvasvabhāvo bhavatīty āha "yadī"ti | "yadi cetyonmukhaḥ" syāt | cetyonmukhāyāḥ citer eva jīvatvāt | ayaṃ bhāvaḥ | yac cinmātraṃ cetyonmukhaṃ sat jīvatāṃ yāti tad eva samyagjñānena cetyāsattvaṃ niścitya śuddhīkṛtaṃ sat anākhyeyaṃ bhavati | tad eva ca paramātmarūpam iti | tatra yoginā sāvadhānena bhāvyam iti | citiś ca svaparāmarśakāritayā parāmarśakartṛtvena parāmarśaviṣayatvena ca dvividhāsti | tatra prathamāyāḥ cinmātram iti nāma dvitīyasyāḥ citir iti || MoT_3,10.41 ||



     aṅguṣṭhasyātha vāṅgulyā vātādyasparśane sati /
     jīvataś cetaso rūpaṃ yat tat paramam ātmanaḥ // Mo_3,10.42 //
rūpam iti śeṣaḥ | "tat paramam" utkṛṣṭaṃ vastu | param"ātmanaḥ" rūpaṃ bhavati | "tat" kiṃ | "cetasaḥ" manasaḥ | "yad rūpaṃ" bhavati | kathambhūtasya "cetasaḥ" | "jīvataḥ" svavyāpāraṃ prati samarthasya | na tu mūrchādyavasthāvat tatrāśaktasya | tadā hi tasya mūḍhatvam eva bhavati | na paramātmatvam | kasmin "sati" | "aṅguṣṭhasyātha vāṅgulyā" | upalakṣaṇaṃ caitat | sarvaśarīrāvayavānāṃ "vātādyasparśane sati" | "ādi"śabdena tejaḥprabhṛtīnāṃ grahaṇam | "asparśanam" asparśaḥ | ayaṃ bhāvaḥ | puruṣasya yasmin kasmiṃścic charīrāvayave kasyāpi dravyasya sparśe asati tadā nirālambam eva tad avayavavyāpi caitanyaṃ bhavet | tadā tadavayavamātrānusandhānaparasya tasya bāhyagrahaṇasamartham api manaḥ śuddhanirālambācetyacinmātrarūpaparamātmarūpam eva tiṣṭhatīti | tadaiva sarvāḥ manovṛttīḥ vihāya yoginā sāvadhānena parīkṣyam iti || MoT_3,10.42 ||


     asvapnāyā anantāyā ajaḍāyā ghanasthiteḥ /
     yad rūpaṃ ciracintāyās tat tadānagha śiṣyate // Mo_3,10.43 //
he "'nagha" rāgādidoṣarahita | "tat" vastu | "tadā" mahātmalayasamaye | "śiṣyate" | "tat" kiṃ | "yat rūpaṃ" bhavati | kasyāḥ | "ciracintāyāḥ" | "ciraṃ" sarvarātraṃ | kṛtā yā "cintā" prāpteṣṭaviṣayam ādhyānam | tasyāḥ cintāviśeṣaṇāny āh"āsvapnāyā" ityādi | "asvapnāyāḥ" svapnatvenāpariṇatāyāḥ | jāgrati kriyamāṇā cintā svapnatvena pariṇamate | svapnatayā pariṇatatve tu anāyattatayānyaviṣayiṇy api syād iti yuktam uktam "asvapnāyā" iti | "anantāyāḥ" acchinnasantānatvena pravṛttāyāḥ | anyā kācic cintā tatra madhye nāyātīty arthaḥ | "ajaḍāyāḥ" kācid dhi cintā nairantaryeṇa kriyamāṇā mūrchām āvahati | tannivāraṇārtham "ajaḍāyā" iti viśeṣaṇam | "ghanasthiteḥ" | "ghanā" nibiḍā | cintyamānasyāpi praveśam adadhatī | "sthitir" avasthānaṃ | yasyāḥ | sā | tādṛśyāḥ | nirālambāyā ity arthaḥ | ayaṃ bhāvaḥ | jāgrati kriyamāṇā chinnā jāḍyadoṣarahitā cintyamānasparśadūṣitā cintācchinnabodhamayācetyacinmayatām eva yāty | acetyacinmayam eva ca paramātmarūpam iti yoginā tatra sāvadhānena bhāvyam iti || MoT_3,10.43 ||



     yad vyomno hṛdayaṃ yad vā śilāyāḥ pavanasya ca /
     tasyācetyasya cidvyomnas tad rūpaṃ paramātmanaḥ // Mo_3,10.44 //
"tasya" prasiddhasya | "acetyasya" sparśādūṣitasya | "cidvyomnaḥ" bhānākāśarūpasya | "paramātmanaḥ rūpaṃ" svarūpaṃ | "tat" bhavati | "tat" kiṃ | "yat vyomnaḥ hṛdayaṃ" śūnyākhyaṃ | bhavati | "yad vā" | "yat" hṛdayaṃ | "śilāyāḥ pavanasya ca" bhavati | tatra "śilāyā hṛdayaṃ" anyasya praveśānarhaṃ sūkṣmāvayavanaividdhyarūpaṃ bhavati | "pavanasya" "hṛdayaṃ" mṛgyamānaṃ śūnyatāyām eva viśrāmyati | nanv etena jaḍatvam asyāyātam iti cen | na | "cidvyomna" iti nāmadheyakathanena tannivāraṇāt | vicāre kriyamāṇe vyomādīnāṃ hṛdayaṃ yathāyathaṃ śūnyarūpam anyapraveśām arhaṃ bhavati | tādṛg eva ca paramātmano rūpam iti yoginā tatra sāvadhānena bhāvyam || MoT_3,10.44 ||



     acetyasyāmanaskasya jīvato yā kriyāvataḥ /
     syāt sthitiḥ sā parā śāntā sattā tasyādyavastunaḥ // Mo_3,10.45 //
"parā" utkṛṣṭā | "śāntā" kṣobharahitā | "sattā"vasthitiḥ | "tasyādyavastunaḥ" paramātmalakṣaṇasya vastunaḥ | "sā syāt" | "sā" kā | "yā sthitiḥ sattā syāt" | kasya | "jīvataḥ" jīvayuktasya puruṣasya | na tu mṛtasya | kathambhūtasy"ācetyasya" | samyagjñānena cetyābhāve niścitatvāt | cetyarahitasyāta ev"āmanaskasya" manorahitasya | punaḥ kathambhūtasya | "kriyāvataḥ" calanādikriyākāriṇaḥ | ayaṃ bhāvaḥ | cetyaṃ prati manovyāpāram akurvan ata eva sarvathānusandhānaśūnyaḥ puruṣaḥ calanādikriyākārī yādṛśo bhavati tādṛg eva sṛṣṭyādivyāpārakāri param ātmatattvaṃ bhavatīti | tatra yoginā sāvadhānena bhāvyam iti || MoT_3,10.45 ||



     citprakāśasya yan madhyaṃ prakāśasya ghanasya ca /
     darśanasya ca yan madhyaṃ tad rūpaṃ brahmaṇo viduḥ // Mo_3,10.46 //
paṇḍitāḥ | "brahmaṇaḥ" nānāpadārthabhāvena bṛṃhitasya paramātmanaḥ | "tad rūpaṃ viduḥ" jānanti | "tat" kiṃ | "citprakāśasya" cita utthitasya cetyaprakāṭyarūpasya prakāśasya | "yat madhyaṃ" madhyāvasthā | bhavati | tathā "ghanasya" nibiḍasya | "prakāśasya" sūryamaṇḍalāder utthitasya | "yan madhyaṃ" madhyāvasthā | bhavati | tathā "darśanasya" draṣṭur utthitāyāḥ dṛśikriyāyāḥ | "yan madhyaṃ" madhyāvasthā | bhavati | ayaṃ bhāvaḥ | citprakāśasya bāhyaprakāśasya darśanasya ca tisro 'vasthā bhavanti | ādyāvasthā madhyāvasthāntyāvasthā | tatra bāhyaprakāśasyādityāder utthānasamaye yādyāvasthā sādityasparśadūṣitā | yā ca padārthaprakāśanasamaye 'ntyāvasthā sā padārthasparśadūṣitā | madhyāvasthā tu śuddhaprakāśasvarūpānākhyā ca bhavati | tādṛg eva ca paramātmasvarūpam iti | tatra yoginā sāvadhānena bhāvyam | citprakāśadarśanayor apy evaṃ yojyam | citprakāśasya darśanasya ca parimitatvāparimitatvamātrakṛto bhedo jñeyaḥ || MoT_3,10.46 ||


     vedanasya prakāśasya dṛśyasya tamasas tathā /
     vedanaṃ yad anādyantaṃ tad rūpaṃ paramātmanaḥ // Mo_3,10.47 //
"tat paramātmanaḥ rūpaṃ" bhavati | "tat" kiṃ | "yad vedanam" anusandhānaṃ | bhavati | kathambhūtam | "anādyantaṃ" nairantaryeṇa pravṛttam | sāntarasyaiva hi madhye punaḥ punaḥ sāditvaṃ sāntatvaṃ ca bhavati | kasya | "prakāśasyā"rthaprakāśarūpasya | "vedanasya" jñānasya | punaḥ kasya | "tamasaḥ" grāhyaikasvarūpasya | "dṛśyasya" avaśyadarśanīyatayā kalpitasya kasyacid devatāviśeṣasya | ayaṃ bhāvaḥ | jñānadhāraṇā jñeyaikarūpadevatādhāraṇā ca nairantaryeṇa pravartamānā jñānaikamayatayā devataikamayatayā ca pariṇatā satī ekasvarūpaparamātmarūpā bhavatīti | tatra yoginā sāvadhānena bhāvyam | atha vā "vedanasya" jñānakaraṇasya | "prakāśasya" | "dṛśyasyā"lokābhām [?]kṛtacakṣurgrāhyasya | "tamasaḥ" bāhyatamasa iti yojyam | bāhyatejasaḥ bāhyatamasaś ca dhāraṇāyāḥ kaiścid uktatvāt || MoT_3,10.47 ||



     yato jagad udetīva nityānuditarūpy api /
     vibhinnavad ivābhinnaṃ tad rūpaṃ pāramātmikam // Mo_3,10.48 //
"tat pāramātmikam" paramātmasambandhi | "rūpaṃ" bhavati | kiṃ "tat" | "yataḥ" yasmāt | "jagad udetīva" udayaṃ yātīva | bhāsamānatvāt | kathambhūtam "api" | "nityānuditarūpy api" nityam anuditaṃ | paramārthataḥ cinmātrarūpatayā jagadrūpeṇāprādurbhūtaṃ "rūpam" asyāstīti | tādṛśam "api" | punaḥ kathambhūtam | "abhinnaṃ" tanmayaṃ | punaḥ kathambhūtaṃ | sthitam iti śeṣaḥ | "sthitaṃ" vartamānaṃ | kathaṃ | "vibhinnavat" vibhinnam iva | paramārthataḥ bhinnatvanirāsāya "vat"iśabdopādānam | ayaṃ bhāvaḥ | yataḥ sūkṣmatarād vastuna idaṃ jagat payasa iva vīcikadambakaṃ niryāti | tad eva paramātmano rūpam iti | tatra yoginā sāvadhānena bhāvyam iti || MoT_3,10.48 ||


     vyavahāraparasyāpi yat pāṣāṇavad āsanam /
     avyomna eva vyomatvaṃ tad rūpaṃ pāramātmikam // Mo_3,10.49 //
"tat pāramātmikam" paramātmasambandhi | "rūpaṃ" bhavati | kiṃ "tat" | "yat vyavahāraparasyāpi" vyavahāraṃ kurvāṇasyāpi | "pāṣāṇavat āsanaṃ" sthitiḥ | bhavati | tad "āsanaṃ" kiṃ | "avyomna eva" jaḍatvādivyomadharmarahitatvenākāśasvarūpavyatiriktasya eva | "vyomatvaṃ" vyomabhāvaḥ | ayaṃ bhāvaḥ | vyavahāraṃ kurvann api puruṣaḥ tatratyasiddhyasiddhyanusandhānarahitaḥ paramātmarūpa eva bhavatīti | tatra yoginā sāvadhānena bhāvyam iti || MoT_3,10.49 ||


     vedyavedanavettṛtvarūpatrayam idaṃ punaḥ /
     yatrodety astam āyāti tat tat paramam uttamam // Mo_3,10.50 //
"tat tat" prasiddhaṃ | "paramam" utkṛṣṭaṃ | "uttamam" niratiśayam paramātmalakṣaṇaṃ vastu | bhavati | "tat" kiṃ | "yatra" yasmin | "idam" anubhūyamānaṃ | "vedyaṃ" vidikriyāviṣayo | "vedanaṃ" vidikriyā | "vettā" vidikriyākartā | teṣāṃ bhāvaḥ "vedyavedanavettṛtvam" | tadākhyaṃ "rūpatrayaṃ" "vedyavedanavettṛtvarūpatrayaṃ udeti astaṃ yāti" | ayaṃ bhāvaḥ | vedyāditripuṭī cetyamānatvena kutracic cinmātrākhye vastuni udeti layībhavati ca | tad eva paramātmano rūpam iti | yoginā tatra sāvadhānena bhāvyam iti || MoT_3,10.50 ||



     vedyavedanavettṛtvaṃ yatredaṃ pratibimbati /
     abuddhyādau mahādarśe tad rūpaṃ paramaṃ smṛtam // Mo_3,10.51 //
paṇḍitaiḥ | "tat paramaṃ" utkṛṣṭaṃ | "rūpaṃ" paramātmalakṣaṇaṃ svarūpaṃ | "smṛtam" | "tat" kiṃ | "yatra mahādarśe vedyavedanavettṛtvaṃ" vedyāditripuṭī | "pratibimbati" pratibimbatayā sphurati | kathambhūte | "'buddhyādau" buddhyādirahite | yuktaṃ cādarśasya buddhyādirahitatvam | ādarśasya jāḍyena buddhyādirahitatvam asya uttīrṇatveneti viśeṣaḥ | ayaṃ bhāvaḥ | vedyāditripuṭī kṣaṇa eva sphuramāṇā kṣaṇa eva ca layabhāginī svasphūrtyāśrayasya kim api mālinyam anādadhatī pratibimbatayaiva bhāti | yataḥ pratibimbam api kṣaṇa eva sphurati kṣaṇa eva ca layībhavati svāśrayasya makurādeḥ mālinyaṃ na dadhāti | tava vedyāditripuṭīpratibimbāśrayaṃ tripuṭīvyatiriktaṃ kim api vastu svīkāryam | anyathā tripuṭīpratibimbāyogāt | tac ca tādṛśaṃ svīkriyamāṇam anākhyam eva bhavati | tad eva ca paramātmatattvam iti | tatra yoginā sāvadhānena bhāvyam iti || MoT_3,10.51 ||


     manaṣṣaṣṭhendriyātītaṃ yad rūpaṃ syān mahāciteḥ /
     jaṅgame sthāvare vāpi tat sargānte 'vaśiṣyate // Mo_3,10.52 //
"tat" vastu | "sargānte" mahāpralaye | "'vaśiṣyate" | "tat" kiṃ | "yat mahāciteḥ" cinmātrasya | "rūpaṃ syāt" | kathambhūtaṃ | "manaṣṣaṣṭhendriyātītaṃ" | mana eva ṣaṣṭhaṃ yeṣāṃ | tāni "manaḥṣaṣṭhāni" | tāni ca tānīndriyāṇi "manaḥṣaṣṭhendriyāṇi" | tāny atītaṃ "manaḥṣaṣṭhendriyātītaṃ" | tadagocaram ity arthaḥ | kutra | "jaṅgame sthāvare vāpi" | ayaṃ bhāvaḥ | "jaṅgame" cittatvaṃ tāvan nirvivādam eva | "sthāvare" tṛṇādāv api tathaiva parvatādāv api | tṛṇādyudgamena naiva nirṇītam | na | na hi niścetanāt kasyāpy udgamo yuktaḥ | mṛtaśarīrād romādyudgamādarśanāt | tathā ca yena rūpeṇa sarvatra cid asti tad anākhyam eva | tad eva ca paramātmatattvam iti | tatra yoginā sāvadhānena bhāvyam iti || MoT_3,10.52 ||



     sthāvarāṇāṃ hi yad rūpaṃ tac ced bodhamayaṃ bhavet /
     manobuddhyādinirmuktaṃ tat pareṇa samaṃ bhavet // Mo_3,10.53 //
"hi"śabdopādānaṃ pādapūraṇārthaṃ | "tat pareṇa" paramātmanā | "samaṃ" tulyaṃ | "bhavet" syāt | "tat "tadā | kadā | "tat bodhamayaṃ" bodhanasvarūpaṃ | "cet" syāt | "tat" kiṃ | "sthāvarāṇāṃ yad rūpaṃ" bhavati | ayaṃ bhāvaḥ | sthāvarāṇāṃ rūpaṃ avaśyaṃ kṣobharahitam eva kiṃ tu jāḍyadūṣitam | ataḥ jāḍyaṃ vihāya jñeyāsparśenaiva svaṃ jñānatattvaṃ kṣobharahitaṃ kāryaṃ | tataś ca paramātmaprāptir bhavatīti | tatra yoginā sāvadhānena bhāvyam iti | etāś ca dhāraṇāḥ pratyekaṃ paramātmaprāptyupāyabhūtā iti sphuṭīkṛtāḥ iti || MoT_3,10.53 ||



sargāntaślokena pūrvoktam upasaṃharati
     brahmārkaśakraharaviṣṇusadāśivādi-
     śāntau śivaṃ paramam etad ihaikam āste /
     śiṣṭaṃ pradiṣṭam avinaṣṭam akaṣṭam
     iṣṭaṃ miśraṃ na miśram aṇunāśritam āśritena // Mo_3,10.54 //
"etat" svātmatvena sthitaṃ | "śivaṃ" parānandasvarūpaṃ | "paramam" utkṛṣtaṃ | vastu | "āste" svasvarūpe tathaiva tiṣṭhati | na tu naśyati | kasyāṃ satyāṃ | "brahmārkaśakraharaviṣṇusadāśivādiśāntau" satyāṃ | "ādi"śabdena surāditṛṇāntānāṃ grahaṇam | "brahmādīnāṃ" tattadbhuvanādhipatīnāṃ | "śānti"rūpe mahākalpāntasamaye sati | "haraḥ" saṃhārakārī | "sadāśivaḥ" sarvasya svamayatāpādanenānandakārī | atha vā "brahmādīnāṃ" saṅkalpotpattyādikāriṇāṃ manaḥprabhṛtīnāṃ | "śāntau" turyākhye satīty arthaḥ | kathambhūtaṃ | "śiṣṭaṃ pradiṣṭaṃ" sarvaśāntisākṣitayā śeṣatvena kathitaṃ | punaḥ kathambhūtam | "avinaṣṭam" nāśāgocaraṃ | punaḥ kathambhūtam | "akaṣṭaṃ" subodhaṃ | punaḥ kathambhūtam | "iṣṭaṃ" sarvasya priyatamaṃ | punaḥ kathambhūtaṃ | "miśraṃ" nānābhāvābhāvasvarūpaṃ | punaḥ kathambhūtaṃ | "na miśraṃ" śuddhacinmātrarūpaṃ | punaḥ kathambhūtam | "aṇunā" parimiten"āśritena" dharmabhūtena jagat"āśritam" ādhāratvena gṛhītam | iti śivam || MoT_3,10.54 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe daśamaḥ sargaḥ || 3,10 ||

*********************************************************************

oṃ śrīrāmaḥ pṛcchati
     idaṃrūpam idaṃ dṛśyaṃ jagan nāmāsti bhāsuram /
     mahāpralayasampattau bho brahman kva nu gacchati // Mo_3,11.1 //
"idaṃ" puraḥ sphurat | "dṛśyaṃ" dṛśikriyāviṣayo | "jagan nāma" jagadākhyaṃ vastu | "asti" paramārthata evāsti | anyathā bhāsamānatvāyogāt | kathambhūtam "idaṃrūpam" | "idam" anubhūyamānabhāvābhāvamayaṃ | "rūpaṃ" svarūpaṃ yasya | tat "idaṃrūpam" | tataḥ kim ity | atrāha "mahāpralaye"ti | "bho brahman" | idam eva jagat "mahāpralayasampattau kva nu gacchati" | kaṃ deśaṃ yātīty arthaḥ || MoT_3,11.1 ||


śrīvasiṣṭho 'py etatsadṛśaṃ kiñcit pṛcchati
     kuta āyāti kīdṛg vā vandhyāputraḥ kva gacchati /
     kva yāti kuta āyāti vada vā vyomakānanam // Mo_3,11.2 //
"kutaḥ āyāti" | utpattisamaye ity arthaḥ | "kīdṛg vā" kiṃsvarūpo vā | "yāti" | "kva gacchati" | nāśasamaya ity arthaḥ | etatsadṛśaḥ tava praśna iti bhāvaḥ || MoT_3,11.2 ||


śrīrāmo 'trottaraṃ dadhāti
     vandhyāputro vyomavanaṃ naivāsti na bhaviṣyati /
     kīdṛśī dṛśyatā tasya kīdṛśī tasya nāstitā // Mo_3,11.3 //
vartamānabhaviṣyanniṣedhena bhūtaniṣedho 'py ākṣiptaḥ | tataḥ kim ity | atrāha "kīdṛśī"ti | "dṛśyatā" darśanayogyatā | lakṣaṇayāstiteti yāvat || MoT_3,11.3 ||


śrīvasiṣṭhaḥ śrīrāmoktam uttaraṃ dṛṣṭāntīkṛtyottaram āha
      vandhyāputravyomavane yathā na staḥ kadācana /
     jagadādy akhilaṃ dṛśyaṃ tathā nāsti kadācana // Mo_3,11.4 //
"jagadādī"ty "ādi"śabdena pralayaḥ gṛhyate | "kadācana" kadāpīty arthaḥ || MoT_3,11.4 ||


phalitam āha
     na cotpannaṃ na ca dhvaṃsi yat kilādau na vidyate /
     utpattiḥ kīdṛśī tasya nāśaśabdasya kā kathā // Mo_3,11.5 //
"kile"ti niścaye | "yat" vastu | "ādau" pūrvaṃ | "na cotpannaṃ" bhavati | "na ca dhvaṃsi" bhavati | nāśabhāg api na bhavati | tathā "na vidyate" sthitiviṣayatāṃ ca na yāti | "tasya kīdṛśī" kiṃrūpā | "utpattir" bhavati | utpattyabhāve ca "nāśaśabdasya kā kathā" | etad vaktum api na yuktam iti bhāvaḥ || MoT_3,11.5 ||



śrīrāmaḥ punaḥ pṛcchati
     vandhyāputranabhovṛkṣakalpanā tāvad asti hi /
     sā yathā nāśajanmāḍhyā tathaivedaṃ na kiṃ bhavet // Mo_3,11.6 //
"tāvac"chabdo vipratipattyabhāvadyotakaḥ | "hi" niścaye | vandhyāputrādikalpanābhāve vandhyāputretyādikathaiva na yuktā syād iti bhāvaḥ | tataḥ kim ity | atrāha "sā" iti | "sā" vandhyāputrādikalpanā | asatyatve 'pi "nāśajanmāḍhyā" nāśajanmayuktā | "yathā" bhavati | "tathedaṃ" dṛśyam | asatyatve 'pi nāśajanmāḍhyaṃ "kiṃ na bhavet" | bhavatv ity arthaḥ | tathā ca "kva nu gacchatī"ti praśno yukta eveti bhāvaḥ || MoT_3,11.6 ||


anyatra striyi dṛṣṭasya putrasyāropeṇa yuktaiva vandhyāputrakalpanātra tu dṛśyasya kva yatrāpi sattaiva nāstīti na tatkalpanā yuktety uttaraṃ śrīvasiṣṭho bhaṅgyāntareṇāha
     phullasyātulabhuḥ samyag ālakaiḥ kuru kolanam /
     niranvayā yathaivoktir jagatsattā tathaiva hi // Mo_3,11.7 //
"hi" niścaye | "jagatsattā tathaiva" tena prakāreṇaiva | "niranvayā" kam apy artham anuddiśya pravṛttā | vyartheti yāvat | bhavati | "tathā" kathaṃ | "phullasye"tyādi "kolanam" ityant"oktir yathā niranvayā" bhavati || MoT_3,11.7 ||



niranvayatvam eva dṛṣṭāntāntaraiḥ pratipādayati
     yathā sauvarṇakaṭake dṛśyamānam api sphuṭam /
     kaṭakatvaṃ tu nāsty eva jagattvaṃ tu tathā pare // Mo_3,11.8 //
"yathā sauvarṇakaṭake sphuṭaṃ dṛśyamānam api kaṭakatvaṃ nāsti" paramārthataḥ suvarṇaikamayatvāt | "pare" cinmātre | "jagattvaṃ tathai"va "nāstī"ty arthaḥ || MoT_3,11.8 ||


     ākāśe ca yathā nāsti śūnyatvaṃ vyatirekavat /
     jagattvaṃ brahmaṇi tathā nāsty evāpy upalabdhimat // Mo_3,11.9 //
"ca"śabdaḥ samuccaye | "vyatirekavat" vyatirekayuktam | ākāśaśūnyatvayoḥ vyatirekānupalabdher ity arthaḥ | dārṣṭāntikam āha "jagattvam" iti | "jagattvam" jagadrūpatvam | "tathā" tena prakāreṇa | "brahmaṇi" vyāpake citsvarūpe | "nāsty eva" | vicārāsahatvād ity arthaḥ | kathambhūtam "api" | "upalabdhimad api" bhāsamānatvena upalabdham apīty arthaḥ || MoT_3,11.9 ||



     kajjalān na yathā kārṣṇyaṃ śvaityaṃ ca na yathā himāt /
     pṛthag evaṃ bhaved buddhaṃ jagan nāsti pare pade // Mo_3,11.10 //
"yathā" "kārṣṇyaṃ" kṛṣṇatā | "kajjalāt pṛthak na" "bhavet" | tathā "śvaityaṃ" śvetatā | "himād yathā pṛthaṅ na" "bhavet" | "buddhaṃ" paramārthena niścitaṃ | "jagat" | "pare pade" paramātmani | "evaṃ" tathā | "pṛthak nāsti" | "pare pade" iti saptamīdvayaṃ pañcamīsthāne jñeyam || MoT_3,11.10 ||



     yathā śaityaṃ ca śaśino na himād vyatiricyate /
     brahmaṇo na tathā sargo vidyate vyatirekavān // Mo_3,11.11 //
"ca"śabdaḥ samuccaye | "yathā śaityaṃ" śītatā | "himāt" śītalāt | "śaśinaḥ" | "na vyatiricyate" nādhikā bhavati | "tathā sargaḥ brahmaṇaḥ vyatirekavān" bhedavān | "na" bhavati || MoT_3,11.11 ||



guṇiguṇanidarśanenaikyam uktvā jagato bhramasiddhatayā aikyaṃ kathayati
     marunadyāṃ yathā toyaṃ dvitīyendau yathendutā /
     nāsty evaivaṃ jagan nāsti dṛṣṭam apy amalātmani // Mo_3,11.12 //
dārṣṭāntikaṃ kathayati "evam" iti | "amalātmani" śuddhacitsvarūpe paramātmani | "evam" tathā | "dṛṣṭam api" bhātam api | "jagan nāstī"ty arthaḥ | nanu pūrvaṃ kaṭakādayaḥ dṛṣṭāntatvenopāttā iha tu marujalādīti vaiṣamyam āpatitam iti cen | na | pūrvadṛṣṭāntaiḥ brahmaikarūpatvaṃ jagata uktam | ihāsatyatvam | phalatas tu sarveṣāṃ dṛṣṭāntānāṃ brahmaikatāyām eva tātparyam iti na kiñcid viruddham || MoT_3,11.12 ||



punar apy etad eva dṛṣṭāntāntareṇa dṛḍhayati
     saṃvidvilocanāloko bhāty ayaṃ saṃvidambare /
     jagadākhye 'male vyomni dṛṣṭimuktāvalī yathā // Mo_3,11.13 //
"ayaṃ" ātmatvena pratyakṣe sthitaḥ | "saṃvidvilocanālokaḥ" | "saṃvid" eva cid eva | "vilocanaṃ" prakāśakatvasāmyena netraṃ | tasy"ālokaḥ" raśmiḥ | "bhāti" padārthabhāvena sphurati | kutra | "jagadākhye" jagannāmni | "saṃvidambare" cidākāśe | kā "yathā" | "dṛṣṭimuktāvalī yathā" | yathā sā "amale vyomni" bhūtākāśe | sphurati | tathety arthaḥ | ayaṃ bhāvaḥ | yathā netrān nirgatāḥ raśmayaḥ ākāśe sphurantaḥ muktāvalīrūpeṇa dṛśyante | tathā cita utthitāḥ cidālokākhyāḥ raśmayaḥ jagadākhye cidambare sphurantaḥ nānāpadārtharūpeṇa dṛśyante iti || MoT_3,11.13 ||



     cidākāśe cidākāśaś cittvād yaḥ kacati svayam /
     tad eva tena rūpaṃ svaṃ jagad ity avabudhyate // Mo_3,11.14 //
"cidākāśaḥ" "cidākāśe" cidākāśākhyāyāṃ svabhittau | "cittvāc" cidbhāvena | "kacati" sphurati | aham iti svaparāmarśaviṣayo bhavatīti yāvat | parāmarśābhāve hi tasya cittvam eva na syāt | "tena" tena cidākāśena | "tat" kacanākhyaṃ svaṃ rūpaṃ | "jagad ity avabudhyate" jñāyate | kacanarūpatvād eva jagataḥ || MoT_3,11.14 ||



prakṛtam anusarati
     ādāv eva hi yan nāsti kāraṇāsambhavāt svayam /
     vartamāne 'pi tan nāsti nāśaḥ syāt tatra kīdṛśaḥ // Mo_3,11.15 //
"hi" niścaye | "yat" yat jagadākhyaṃ vastu | "kāraṇāsambhavāt ādau eva svayaṃ nāsti" | "tat vartamāne 'pi nāsti" | "tatra" tasmin vastuni | "nāśaḥ" vandhyāputradṛṣṭāntena śaṅkitaḥ nāśaḥ | "kīdṛśaḥ" kiṃrūpaḥ | "syāt" viṣayābhāvenāyogyatvān na syād ity arthaḥ || MoT_3,11.15 ||


nanu paramātmalakṣaṇasya kāraṇasya sadbhāvāt kāraṇāsambhavaḥ katham udety | atrāha
     kvāsambhavadbhūtajāḍyaṃ pṛthvyāder jaḍavastunaḥ /
     kāraṇaṃ bhavituṃ śaktaṃ chāyāyā ātapo yathā // Mo_3,11.16 //
bhūteṣu dṛśyamānaṃ jāḍyaṃ "bhūtajāḍyam" | "asambhavat bhūtajāḍyaṃ" yasya | tat "asambhavadbhūtajāḍyaṃ" | arthāt cidākhyaṃ vastu | "pṛthvyādeḥ jaḍavastunaḥ kāraṇaṃ bhavituṃ kva śaktaṃ" | na śaktam ity arthaḥ | atra dṛṣṭāntam āha "chāyāyā" iti | ātapasya chāyāyā nāśakatvena sphuṭaṃ chāyākāraṇatvāyogād dṛṣṭāntatā || MoT_3,11.16 ||



nanu kāraṇābhāve 'pi jagad astu ity | atrāha
     kāraṇābhāvataḥ kāryaṃ nedaṃ tat kiñcanoditam /
     yat tatkāraṇam evāsti tad evettham avasthitam // Mo_3,11.17 //
"tat" pūrvoktād dhetoḥ | "kāraṇābhāvataḥ" kāraṇābhāvāt | "idam" anubhūyamānaṃ | "kāryaṃ" jagadākhyaṃ kāryam | "uditam" utpannaṃ | "nāsti" | kathaṃ | "kiñcana" leśenāpīty arthaḥ | punaḥ kim etad dṛśyata ity | atrāha "yad" iti | "tad eva" vastu | "itthaṃ" jagadrūpeṇ"āvasthitaṃ" vartamānaṃ bhavati | "tad eva" kiṃ | "yat" vastu | "tatkāraṇam" etasya jagataḥ kāraṇatvena śaṅkitaṃ vastu | "eva" bhavati | na tv anyat kiñcid iti bhāvaḥ || MoT_3,11.17 ||



     ajātam eva yad bhāti saṃvido bhānam eva tat /
     yaj jagad dṛśyate svapne saṃvitkacanam eva tat // Mo_3,11.18 //
"yad" vastu | "ajātam eva bhāti" | "tat saṃvido" jñānasya | "bhānam eva" tathātvena sphuraṇam eva | bhavati | atrānurūpaṃ dṛṣṭāntam āha "yad" iti | "tat" ity anena jagataḥ parāmarśaḥ | svapnasya saṃvitkacanarūpatvaṃ sarvapratītisiddham eveti dṛṣṭāntatvena gṛhītam || MoT_3,11.18 ||


     saṃvitkacanam evāntar yathā svapnajagadbhramaḥ /
     sargādau brahmaṇi tathā jagatkacanam ātatam // Mo_3,11.19 //
"antaḥ" manasi | "svapnajagadbhramaḥ" svapnajagadrūpo bhramaḥ | svapnajagad iti yāvat | "sargādau" buddhyāropite sargārambhe | "tathā"śabdena "saṃvitkacanam" ākṣipyate | "ātatam" vistīrṇam || MoT_3,11.19 ||



     yad idaṃ dṛśyate kiñcit tat sad evātmani sthitam /
     nāstam eti na codeti jagat kiñcit kadācana // Mo_3,11.20 //
"yat idam" anubhūyamānaṃ | "kiñcit" vastu | "dṛśyate" | "tat sad eva" sad vastv eva | sv"ātmani" cinmaye svasvarūpe | "sthitaṃ" bhavati | phalitam āha "nāstam" iti | ata ity adhyāhāryaṃ | cinmātrākhyena rūpeṇa sadaiva sthitatvād iti bhāvaḥ || MoT_3,11.20 ||


     yathā dravatvaṃ salilaṃ spandatvaṃ pavano yathā /
     yathā prakāśa ābhāso brahmaiva trijagat tathā // Mo_3,11.21 //
na hi kaścit "dravatvā"di "salilā"deḥ pṛthakkṛtya darśayituṃ samartha iti bhāvaḥ | "prakāśaḥ" sūryādiprakāśaḥ | "ābhāsaḥ" arthaprākaṭyaṃ || MoT_3,11.21 ||



     yathā puram ivāste 'ntar vid eva svapnasaṃvidi /
     tathā jagad ivābhāti svātmaiva paramātmani // Mo_3,11.22 //
"yathā svapnasaṃvidi" svapnajñāne | svapnāvasthāyām iti yāvat | "antaḥ" antaḥkaraṇe | "vid eva" jñānam eva | "puram ivābhāti" vilasati | "tathā svātmaiva paramātmani" | "paramātme"tyākhyāyāṃ svabhittau | "jagad ivābhāti" | na tv anyaj jagan nāmāstīti bhāvaḥ || MoT_3,11.22 ||



atra śrīrāmaḥ pṛcchati
     evaṃ cet tat kathaṃ brahman sughanapratyayaṃ vada /
     idaṃ dṛśyaviṣaṃ jātam asatsvapnānubhūtivat // Mo_3,11.23 //
he "brahman" | tvaṃ "vada" | "evaṃ cet" pūrvoktaḥ prakāro yadi bhavati | "tat" tarhi | "idam" anubhūyamānaṃ | "dṛśyaviṣaṃ" | "dṛśyam" eva mohādāyakatvena "viṣaṃ" viṣadravyaṃ | "sughanapratyayaṃ" | "sughanaḥ pratyayaḥ" āśvāsaḥ yasmin | tat | tādṛśaṃ | "kathaṃ" kena hetunā | "jātam" utpannaṃ | katham | "asatsvapnānubhūtivat" | "asatī" yā "svapnānubhūtiḥ" svapnākārā anubhūtiḥ | svapnam iti yāvat | tad"vat" || MoT_3,11.23 ||


dṛśyātyantāsambhavaṃ vinā muktim amanyamānaḥ tam eva vistareṇa pṛcchati
     sati dṛśye kila draṣṭā sati draṣṭari dṛśyatā /
     ekasattve dvayor bandho muktir ekakṣaye dvayoḥ // Mo_3,11.24 //
"kile"ti niścaye | dṛśyasattāyāṃ draṣṭṛsattā bhavati | draṣṭṛsattāyāṃ ca dṛśyasattā bhavati | yataḥ tvayaiveti bhāvaḥ | phalitam āha "ekasattve"ti | "dvayoḥ" madhye "ekasattve bandhaḥ" syāt | "dvayoḥ" madhye "ekakṣaye muktiḥ" syāt | tasmāt muktyartham ekakṣaya eva sādhyaḥ iti bhāvaḥ || MoT_3,11.24 ||


nanu tatrāpi kiṃ punaḥ punaḥ dṛśyātyantābhāvam eva pṛcchasīty | atrāha
     atyantāsambhavo yāvad buddho dṛśyasya nākṣayaḥ /
     tāvad draṣṭur adraṣṭṛtvaṃ na sambhavati mokṣadam // Mo_3,11.25 //
"buddhaḥ" samyak jñātaḥ | "akṣayaḥ" avicchinnaḥ | "adraṣṭṛtvaṃ" adraṣṭṛbhāvaḥ | śuddhacinmātrateti yāvat | dṛśyātyantābhāvasya sukaratvād draṣṭṛtānirāsasya ca dṛśyātyantābhāvaṃ vinā duṣkaratvāc ca punaḥ punaḥ dṛśyātyantābhāvapraśna iti bhāvaḥ || MoT_3,11.25 ||



nanu dṛśyātyantābhāve tava kiṃ prayojanaṃ | dṛśyadhvaṃsenāpi kāryasiddher ity | atrāha
     dṛśyaṃ cet sambhavaty ādau paścāt kṣayam upāgatam /
     tad dṛśyasmaraṇānartharūpo bandho na naśyati // Mo_3,11.26 //
"tat" tadā | "dṛśyasmaraṇānartharūpaḥ" dṛśyasmaraṇam evānarthaḥ | saḥ rūpaṃ yasya | saḥ tādṛśaḥ "bandhaḥ" | "na naśyati" nāśaṃ na yāti | pūrvaṃ satyatayā jñātasya tato naṣṭasyārthasya smaraṇaṃ hi durnivāram eva | yathā mātrāder iti bhāvaḥ | "tat" kadā | "cet" yadi | "ādau" pūrvaṃ | "dṛśyaṃ" "sambhavati" satyatayā upapattimad bhavati | "paścāt kṣayaṃ" nāśam | "upāgataṃ" bhavati | tasmāt traikālika evābhāvo 'trāṅgīkaraṇīya iti bhāvaḥ || MoT_3,11.26 ||



nanu naṣṭasya dṛśyasya kā smṛtir bhavatīty | atrāha
     yatra kvacana saṃsthasya svādarśasyeva cidgateḥ /
     pratibimbo lagaty eva sargasmṛtimayo hy ayam // Mo_3,11.27 //
"hi" niścaye | "ayaṃ" samanantaram uktaḥ | "sargasmṛtimayaḥ" sargasmaraṇasvarūpaḥ | "pratibimbaḥ lagaty evā"vaśyaṃ lagati | kasyāḥ | "cidgateḥ" citprakārasya | kasy"evādarśasyeva" | yathā yatra kvacana saṃsthitasyādarśasya padārthasānnidhye pratibimbo lagati tathā yatra kvacana sthitāyāḥ cidgateḥ sūkṣmatvena sthitadṛśyasānnidhyāt pratibimbo lagatīty arthaḥ || MoT_3,11.27 ||

tarhi muktiḥ kadā sambhavatīty | atrāha
     ādāv eva hi notpannaṃ dṛśyaṃ nāsty eva cet svayam /
     draṣṭṛdṛśyabhramābhāvāt tat sambhavati muktatā // Mo_3,11.28 //
"dṛśyaṃ" dṛśikriyāviṣayo bhāvajātaṃ | "ādāv eva" prathamam eva | "svayaṃ" svabhāven"ānutpannaṃ" ajātaṃ sat | "cet" yadi | "nāsty eva" | "tat" tadā | "muktatā" "sambhavati" upapattiyuktā bhavati | kutaḥ | "draṣṭṛdṛśyabhramābhāvāt" | ayaṃ bhāvaḥ | dṛśyātyantābhāve sati puruṣasyedaṃ dṛśyam iti bhramaḥ śāmyati | tacchāntau cāhaṃ draṣṭeti bhramo 'pi śāmyaty eva | tataś ca śuddhacinmātrasvarūpa evāsau śiṣyate | tad eva ca muktir iti || MoT_3,11.28 ||



praśnam upasaṃharati
     tasmād asambhavanmukter mama protsāhayuktitaḥ /
     atyantāsambhavaṃ dṛśye kathayātmavidāṃ vara // Mo_3,11.29 //
he "ātmavidāṃ vara" śreṣṭha | "tasmāt" tato hetoḥ | "asambhavanmukteḥ" dṛśyātyantābhāvajñānaṃ vinānupapadyamānamukteḥ | "mama" | "dṛśye" vartamānam "atyantāsambhavaṃ" | "kathaya" | kutaḥ | "protsāhayuktitaḥ" prakṛṣṭam udyogaṃ kṛtvety arthaḥ || MoT_3,11.29 ||


śrīvasiṣṭha uttaram āha
     asad eva yathā bhāti jagat sarvātmakaṃ tathā /
     śṛṇv ahaṃ kathayā rāma dīrghayā kathayāmi te // Mo_3,11.30 //
tvaṃ "śṛṇu" | "ahaṃ tathā" taṃ prakāraṃ | "kathayāmi" | kayā | "dīrghayā" savistarayā | "kathayā" vākyaprabandhena | "tathā" kathaṃ | "sarvātmakaṃ" samastadṛśyasvarūpaṃ | "jagat" | "yathā" yena prakāreṇa | "asad eva bhāti" budbudau asatyatayā sphurati || MoT_3,11.30 ||



nanu kimarthaṃ dīrghayā kathayā kathayasīty | atrāha
     vyavasāyakathāvākyair yāvat tan nānuvarṇitam /
     na viśrāmyati te tāvad dhṛdi pāṃsur yathā hrade // Mo_3,11.31 //
"vyavasāyakathāvākyaiḥ" | "vyavasāyasya" viśiṣṭasya niścayasyotpādikā "kathā" "vyavasāyakathā" | tadabhidhāyakaiḥ "vākyaiḥ" "vyavasāyakathāvākyaiḥ" | "tat" dṛśyāsattvaṃ | "yāvat nānuvarṇitaṃ" syāt | "tāvat te hṛdi na viśrāmyati" na sthitiṃ karoti | ko "yathā" | "pāṃsur yathā" | "yathā pāṃsū" rajaḥ | "hrade na viśrāmyati" | tathety arthaḥ || MoT_3,11.31 ||



nanu dṛśyātyantābhāvajñānena kiṃ mama setsyatīty | atrāha
     atyantābhāvam asyās tvaṃ jagatsargabhramasthiteḥ /
     buddhvaikadhyānaniṣṭhātmā vyavahāraṃ kariṣyasi // Mo_3,11.32 //
"tvaṃ vyavahāraṃ" paramparāyātaṃ rājyarūpaṃ vyavahāraṃ | "kariṣyasi" kūṭakārṣāpaṇavyavahāravat kariṣyasi | na tu vairāgyāvasthāvat tadvimukho bhaviṣyasi | mūḍhatvāvasthāvad vā tadāsaktaḥ | "tvaṃ" kathambhūtaḥ | "ekadhyānaniṣṭhātmā" | "ekasya" cinmātrākhyasya vastunaḥ | "dhyāne" cintāyāṃ | "niṣṭhā" yasya | tādṛśaḥ "ātmā" sattvarūpaṃ manaḥ yasya | saḥ | tādṛśaḥ | antaḥ cinmātradhyāna ekaniṣṭhaḥ | bahiḥ vyavahārabhāg api bhaviṣyasīty arthaḥ | kiṃ kṛtvā | "asyāḥ" anubhūyamānāyāḥ | "jagatsargabhramasthiteḥ" | "jagatsarga"rūpā jagatsṛṣṭirūpā | yā "bhramasthitiḥ" bhramadārḍhyaṃ | tasyāḥ "atyantābhāvaṃ" traikālikābhāvaṃ | "buddhvā" jñātvety arthaḥ || MoT_3,11.32 ||



nanu tato 'pi kim ity apekṣāyāṃ phalāntaram api kathayati
     bhāvābhāvagrahotsargasthūlasūkṣmacalācalāḥ /
     dṛśas tvāṃ vedhayiṣyanti na mahādrim iveṣavaḥ // Mo_3,11.33 //
dṛśyātyantābhāvajñāne sati "bhāvābhāvagrahotsargasthūlasūkṣmacalācalāḥ dṛśaḥ tvāṃ na vedhayiṣyanti" harṣāmarṣotpādanarūpāṃ tāḍanāṃ na kurvanti | "bhāvaḥ" udbhūtiḥ | "abhāvaḥ" antardhiḥ | "grahaḥ" grahaṇaṃ | "utsargaḥ" tyāgaḥ | bhāvādīnām api dṛśyatayātyantābhāvasya sampannatvān na tatkṛtā tāḍanā tava bhaviṣyati | na hi vandhyāputreṇa kaścit tāḍita iti bhāvaḥ | tāḥ kā "iva" | "iṣavaḥ iva" | yathā iṣavaḥ mahāntaṃ parvataṃ na vidhyanti | tathety arthaḥ || MoT_3,11.33 ||


dṛśyātyantābhāvakathanaṃ pratijānīte
     sa eṣo 'sty eka evātmā na dvitīyāsti kalpanā /
     jagad atra yathotpannaṃ tat te vakṣyāmi rāghava // Mo_3,11.34 //
"saḥ" prasiddhaḥ | "eṣaḥ" sarveṣām aparokṣatvena vartamānaḥ | "eka evāsti" | "eva"śabdārthaṃ sphuṭayati "ne"ti | "dvitīyā kalpanā" dṛśyamayī kalpanā | "nāsti" | tathā ca dṛśyātyantābhāvaḥ sphuṭa eveti bhāvaḥ | tarhi bhāsamānaṃ jagat katham astīty | atrāha "jagad" iti | "atrā"dvitīye brahmaṇi | "jagat yathā utpannaṃ tat te vakṣyāmi" | tenaiva dṛśyātyantābhāvaḥ sphuṭībhaviṣyatīti bhāvaḥ || MoT_3,11.34 ||


sargāntaślokenaitat saṅgṛhṇāti
     tasmād imāni sakalāni vijṛmbhitāni
     yo hīdam aṅga sakale sakalaṃ mahātmā /
     rūpāvalokanamanomananaprakāśa-
     kośāspadaṃ svayam udeti ca līyate ca // Mo_3,11.35 //
"tasmāt" paramātmalakṣaṇāt upādānakāraṇāt | "imāni" anubhūyamānāni | "vijṛmbhitāni" dṛśyarūpāṇi vilāsitāni | mṛda iva ghaṭā niryāntīti śeṣaḥ | "tasmāt" kasmāt | "hi" niścaye | he "aṅga" | "yaḥ sakalaṃ" samastadṛśyaprapañcarūpaṃ bhūtvā | "svayaṃ" svenaiv"odeti ca" udayaṃ yāti ca | "vilīyate" layaṃ yāti ca | "yaḥ mahātmā" kiṃ | "rūpāvalokanamanomananaṃ" manaskāraḥ | "prakāśaḥ" indriyeṇālokitasya rūpasya manomananadvāreṇa sākṣibhūte cinmātre sphuraṇam | teṣāṃ "kośa"rūpam "āspadaṃ" sthānaṃ | tatraivaite tiṣṭhanti | tata eva ca niryāntīty arthaḥ | iti śivam || MoT_3,11.35 ||




iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe ekādaśaḥ sargaḥ || 3,11 ||

*********************************************************************

oṃ | "vakṣyāmī"ti pratijñāṃ sampādayati
     etasmāt paramāc chāntāt padāt paramapāvanāt /
     yathedam utthitaṃ viśvaṃ tac chṛṇūttamayā dhiyā // Mo_3,12.1 //
"etasmāt" samanantaram eva pratipāditasvarūpāt | "paramāt" sarvotkṛṣṭāt | "śāntāt" prapañcakṣobharahitāt | "paramapāvanāt" pāvanānām api pāvakatvena niratiśayapāvanāt | "padāt" parātmalakṣaṇāt sthānāt | "yathā" yena prakāreṇ"edam" anubhūyamānaṃ | "viśvaṃ" jagat | "utthitaṃ" prādurbhūtaṃ | "tat" taṃ prakāram | "uttamayo"tkṛṣṭayā | "dhiyā" | "śṛṇu" | etenottamadhīr evādhikāritvenoktaḥ || MoT_3,12.1 ||



tad eva kathayati
     suṣuptaṃ svapnavad bhāti bhāti brahmaiva sargavat /
     sarvam ekaṃ ca tac chāntaṃ tatra tāvat kramaṃ śṛṇu // Mo_3,12.2 //
"suṣuptaṃ" suṣuptiḥ | "svapnavat" svapna iva | "bhāti" sphurati | ghananidrāta utthitasya eva svapnaprādurbhāvāt | "brahmaiva" sargabhāvena bṛṃhitaṃ cinmātrākhyaṃ vastu eva | "sargavat" sarga iva | "bhāti" | nanu tarhi jagadupādānabhūtaṃ brahma jagadvad eva jaḍaṃ syāt | kāryavaiguṇyayuktasya kāraṇasyādarśanāt ity | atrāha "sarvam" iti | "tat" brahma | "sarvaṃ" bhavati | "ekaṃ ca" bhavati | "śāntaṃ ca" bhavati | sarvathāścaryam eva tad iti bhāvaḥ | nanu katham utpadyata ity | atrāha "tatre"ti | "tāvac"chabdaḥ sākalye || MoT_3,12.2 ||


kramam eva kathayati
     tasyānantaprakāśātmarūpasyātatacinmaṇeḥ /
     sattāmātrātma kacanaṃ yad ajasraṃ svabhāvataḥ // Mo_3,12.3 //
     tad ātmani svayaṃ kiñcic cetyatām iva gacchati /
     agṛhītātmakaṃ saṃvidīhāmarṣaṇasūcakam // Mo_3,12.4 //
"tat" kacanaṃ | "kiñcit" leśena | "cetyatām iva gacchati" paramārthato na gacchatīt"īva"śabdopādānam | kathaṃ | "svayaṃ" svenaiva | na tu parapreraṇayā | parasya tatrābhāvāt | kasmin | "ātmani" sphuraṇākhyacetakasvabhāve kharūpe | tadvyatirekeṇa tadā kasyāpy abhāvāt | "tat" kiṃ | "yat" "kacanaṃ" sphuraṇam | aham iti parāmarśa iti yāvat | "ajasraṃ" santataṃ | "svabhāvataḥ" svabhāvenaiva | bhavati | kasya | "tasya" sarveṣv aham iti bhāsamānatvena prasiddhasy"ānantaprakāśātmarūpasyānantaḥ" aparicchinnaḥ | yaḥ "prakāśaḥ" tad"ātmā" | tadekamayaḥ svabhāvaḥ "svarūpaṃ" yasya | saḥ | tasyānantaprakāśarūpasyeti yāvat | "ātatacinmaṇeḥ" | "ātataḥ" sarvatra vyāptaḥ yaḥ "cinmaṇiḥ" | tasya | kathambhūtaṃ "kacanaṃ" | "sattāmātrātma" sattāmātrasvarūpaṃ | sphurattārūpe kacana eva sattāvyavahārāt | ayaṃ bhāvaḥ | śuddha ...




*********************************************************************

... mānatvaṃ ca cidviṣayatvaṃ | tac ca citsambandhaḥ | citāthācidrūpasya sambandho na yujyate viruddhatvāt | na hi tejastamasoḥ sambandhaḥ kvāpi dṛṣṭaḥ | citaś ca śāntatvam uktanyāyena cetyāsambhavenaiva siddham iti || MoT_3,13.50 ||



     brahmaiva kacati svaccham ittham ātmātmanātmani /
     cittvād dravatvāt salilam ivāvartatayātmani // Mo_3,13.51 //
"itthaṃ" jagadrūpatayā | "svacchaṃ" cetyamalarahitaṃ | "ātmanā" svayam | "ātmani" bhittibhūte svasvarūpe | "ātma" sarvātmabhūtaṃ | "brahmaiva kacati" bhāti | kutaḥ | "cittvāt" cidbhāvāt | cetyarūpajagattayābhāne cittvam eva tasya na syād iti bhāvaḥ | atra dṛṣṭāntam āha "dravatvād" iti | yathā "salilaṃ dravatvāt ātmani" salilākhye svarūpe | "āvarta"rūpeṇa sphurat bhavati | tathety arthaḥ || MoT_3,13.51 ||



     asad evedam ābhāti sad ivehānubhūyate /
     vinaśyaty asad evānte svapne svamaraṇaṃ yathā // Mo_3,13.52 //
"idaṃ" jagat | "asad eva bhāti" vilasati | asmābhiḥ "sad iva" sadvat | "iha" parātmasvarūpe | "'nubhūyate" | "'nte" saṃhāre | "asad eva vinaśyati" | atra dṛṣṭāntam āha "svapna" iti || MoT_3,13.52 ||


jagadatyantābhāvaṃ vistareṇoktvā siddhāntabhūtaṃ brahmamayatvaṃ tasya kathayati
     atha vājasvarūpatvāt sadaivedam anāmayam /
     akhaṇḍitam anādyantaṃ jñātamātrāmbarodaram // Mo_3,13.53 //
"atha vā idaṃ" jagat | "sadaivājasvarūpatvāt" janmarahitacinmātrasvarūpatvāt | "anāmayam" pūrvoktādhāratvādheyatvādirogarahitaṃ bhavati | na tv abhāvayuktam | tadabhāvaś ca tadākrāntabuddhīn satyaṃ tadrūpam apaśyataḥ praty evoktaḥ | kathambhūtam "idaṃ" | "akhaṇḍitaṃ" pūrṇasvarūpaṃ | "anādyantaṃ" ādyantarahitam | "jñātamātrāmbarodaram" | "jñātamātram" eva | na tu mudgarādiprahāraiḥ nāśitaṃ sat | "ambarodaram" samyagjñānenālocitaṃ hi jagat ambarodaram eva bhavati || MoT_3,13.53 ||



sargāntaślokena pūrvoktaṃ saṅgṛhṇāti
     ākāśa eva parame prathamaḥ prajeśo
     nityaṃ svayaṃ kacati śūnyatayā samānaḥ /
     sa hy ātivāhikavapur na tu bhūtarūpī
     pṛthvyādi tena na sad asti yadā na jātam // Mo_3,13.54 //
"prathamaḥ" ādyaḥ | "prajeśaḥ" brahmā | "parame" sarvottīrṇe | "ākāśe" cidākāśe | "nityaṃ" sadā | "svayaṃ" svenaiva | "kacati" sphurati | tathā ca pūrvoktā sarvā prakriyā sargārambhaṃ vinā atuṣṭamanasaḥ praty eveti bhāvaḥ | kathambhūtaḥ | "śūnyatayā" śūnyabhāvena | "samānaḥ" śuddhatvena tatsamānaḥ | na tu tadrūpaḥ jaḍatvāpatteḥ | "hi" niścaye | "saḥ" prajeśaḥ | "ātivāhikavapuḥ" sūkṣmaśarīramayaḥ | bhavati | "na tu bhūtarūpaḥ" | "tu" viśeṣe | saḥ sthūlapṛthvyādibhūtarūpī na bhavati | "tena" tadabhūtarūpitākhyena hetunā | "pṛthvyādi sat nāsti" | nanu prajeśasyāpṛthvyādirūpatayā kathaṃ na pṛthvyādi sat astīty | atrāha "yade"ti | yata ity asyārthe | yataḥ "jātam" utpannaṃ | "nā"sti | śuddhamanorūpasya prajeśasya tadrūpatāgrahaṇena pṛthvyāder jātatvaṃ syān | na tu pūrvanyāyena prajeśasya tadrūpatāgrahaṇaṃ sambhavaty | ataḥ pṛthvyāder api jātatvaṃ na sambhavatīti bhāvaḥ | iti śivam || MoT_3,13.54 ||


iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe trayodaśaḥ sargaḥ || 3,13 ||

*********************************************************************

oṃ | evaṃ jagato 'tyantābhāvaṃ paramātmaikamayatāṃ ca punaḥ punaḥ uktvā tāvanmātram eva sādhanīyaṃ jñātvā punar api tad eva kathayati
     itthaṃ jagad ahantādi dṛśyaṃ jātaṃ na kiñcana /
     ajātatvāc ca nāsty eva yac cāsti param eva tat // Mo_3,14.1 //
"ahantādi" ahantāprabhṛti | "dṛśyaṃ jagat itthaṃ" pūrvaprakāreṇa | "kiñcana" leśenāpi | "na jātaṃ" bhavati | tataḥ kim ity | atrāha "ajāte"ti | jagat "ajātatvāt" | "ca"śabdaḥ pādapūraṇārthaḥ | "nāsty eva" | nanu katham ajātatvena jagato 'sattvaṃ sādhayasi bhāsamānatvena sattvād ity | atrāha "yac ce"ti | "tat param eva" uttīrṇaṃ cinmātram eva | bhavati | na tu jagat | "tat" kiṃ | "yat asti" yat bhāsamānatvena nirākartuṃ na śakyata ity arthaḥ || MoT_3,14.1 ||



nanu tarhi pūrvaṃ sādhitā jīvatā katham astīty | atrāha
     paramākāśa evāsau jīvatāṃ cetati svayam /
     niḥspandāmbhodhijaṭhare salilaṃ spandatām iva // Mo_3,14.2 //
"asau" pūrvoktaḥ | "paramākāśa eva" cinmātrākāśa eva | "svayaṃ" svena | "jīvatāṃ" jīvabhāvaṃ | "cetati" anubhavati | kim "iva" | "salilam iva" | yathā "niḥspandāmbhodhijaṭhare" niḥspandasamudramadhye | sthitaṃ jalaṃ "spandatāṃ" | "spanda"śabdenātra spandayukto lakṣyate | spandayuktatāṃ | "cetati" | cetanaṃ cātra tadyogyatāmātram eva | na hi tatra salilasya saspandatā kenāpy aṃśena yuktā | evaṃ brahmaṇy api jīvatāyogyatvamātram eva | na tu tatra jīvatā nāma kācid asti | salile 'gre saspandatāyuktatvāt yogyatājñānaṃ | brahmaṇi jīvarūpatayā bhāsaneneti viśeṣaḥ || MoT_3,14.2 ||



etad eva nānābhaṅgībhiḥ pratipādayati
     ākāśarūpam ajahad eva vettīva dṛśyatām /
     svapnasaṅkalpaśailādāv iva cidvṛttir āntarī // Mo_3,14.3 //
asau paramākāśaḥ "dṛśyatām" dṛśyabhāvaṃ | "vetti iva" anubhavati iva | kathambhūta "eva" | "ākāśarūpaṃ" cinmātrākāśākhyaṃ rūpam | "ajahad eva" | tattyāge tu vedanam asya na syād iti bhāvaḥ | k"evāntarī" ahamparāmarśasya sārabhūtāntaḥkaraṇopahitā | "cidvṛttir iva" sā yathā | "svapnasaṅkalpaśailādau" svapne saṅkalpe ca svaviṣayīkṛte svasvarūpaparvatādau sthitāṃ | "dṛśyatāṃ vetti" | śailo 'yam iti | tathety arthaḥ || MoT_3,14.3 ||



     pṛthvyādirahito deho yo virāḍātmano mahān /
     ātivāhika evāsau cinmātrācchanabhomayaḥ // Mo_3,14.4 //
"pṛthvyādirahitaḥ" sthūlapṛthvyādisparśādūṣitaḥ | "virāḍātmanaḥ" virāṭsvarūpatayā sthitasya paramātmanaḥ | "mahān" vyāpakaḥ | "yo deho" 'sti | saḥ "ātivāhika eva" sūkṣma eva | bhavati | atra hetutvena viśeṣaṇam āha "cinmātre"ti | yataḥ cinmātrākhyanirmalākāśasvarūpaḥ | cinmātramayasya śarīrasyātivāhikatvaṃ svapne dṛṣṭam iti nāyastam || MoT_3,14.4 ||


     akṣayasvapnaśailābhaḥ sthirasvapnapuropamaḥ /
     citrakṛtsthitacittasthacitrasainyasamākṛtiḥ // Mo_3,14.5 //
     anikhātamahāstambhaputrikaughasamopamaḥ /
     brahmākāśe 'nikhātātmā sustambhe sālabhañjakaḥ // Mo_3,14.6 //
     ādyaḥ prajāpatiḥ pūrvaṃ svayambhūr iti viśrutaḥ /
     prāktanānāṃ svakāryāṇām abhāvād apakāraṇaḥ // Mo_3,14.7 //
"ādyaḥ" kāraṇabhūtaḥ | "svayambhūr iti viśrutaḥ" | svayambhūr iti nāmnā prasiddhaḥ | "prajāpatiḥ" | "pūrvaṃ" sargārambhe | "apakāraṇaḥ" kāraṇarahitaḥ | bhavati | kutaḥ | "prāktanānāṃ svakāryāṇāṃ" pūrvakalpakṛtakarmaṇām | "abhāvāt" | karmaṇāṃ ca janmahetutvaṃ sarvaśāstreṣu prasiddham eva | kāryāṇām abhāvaś cāsya cinmātrataḥ sadya utthitatvena jñeyaḥ | kiṃrūpo 'sau | "akṣaya" ityādi | "akṣayaḥ" itarasvapnaśailavat kṣaṇikatvadoṣarahitaḥ yaḥ svapnaśailaḥ | tadvad ābhā yasya | sa "akṣayasvapnaśailābhaḥ" | "sthirasvapnapuropamaḥ" | itarasvapnapuravailakṣyeṇa "sthiraṃ" sthirākāraṃ | yat "svapnapuraṃ" | tasy"opamā" yasya | saḥ | etena viśeṣaṇadvayenātivāhikatāyām apy asya sthiratoktā | citrakṛti sthitaṃ cittaṃ "citrakṛtsthitacittaṃ" | tatra"sthaṃ" yat "citrasainyam" agre prakaṭībhavad ālekhyasainyaṃ | tena "samākṛtiḥ" svarūpaṃ yasya | saḥ "citrakṛtsthitacittasthacitrasainyasamākṛtiḥ" | "anikhāto" 'nutkīrṇaḥ | yaḥ "mahāstambhaputrikaughaḥ" | tena "samā upamā" yasya | saḥ "anikhātamahāstambhaputrikaughasamopamaḥ" | "brahmākāśe sustambhe" "anikhātātmā" anutkīrṇasvarūpaḥ | "sālabhañjakaḥ" mahatī putrikā | "anikhāte"ti viśeṣaṇasyaiveyaṃ vyākhyā | etena viśeṣaṇadvayena brahmaikamayatāsyoktā || MoT_3,14.5-7 ||



     mahāpralayaparyanteṣv ādyāḥ kila pitāmahāḥ /
     mucyante sarva evātaḥ prāktanaṃ karma teṣu kim // Mo_3,14.8 //
"sarve eva ādyāḥ pitāmahāḥ mahāpralayaparyanteṣu" | "paryanta"śabdenātra udrekatā vivakṣitā | "mucyante" cinmātrākhye svarūpe layībhavanti | phalitam āh"ātaḥ" iti | "ato" hetoḥ | "teṣu" sarveṣu ādyeṣu pitāmaheṣu | "prāktanaṃ karma kiṃ" bhavati | na kiñcid apīty arthaḥ | tathā ca | sarve 'pi te 'pakāraṇā eveti bhāvaḥ || MoT_3,14.8 ||


     moktavya eva kuḍyātmā dṛśyo 'dṛśyaś ca saṃsthitaḥ /
     na ca dṛśyaṃ na ca draṣṭā na sraṣṭā sarvam eva ca // Mo_3,14.9 //
     praticchandaḥ padārthānāṃ sarveṣām eṣa eva saḥ /
     asmād udeti jīvālī dīpālī dīpakād iva // Mo_3,14.10 //
"eṣa sa eva" pūrvoktaḥ prajāpatir eva | "sarveṣāṃ padārthānāṃ praticchandaḥ" samaṣṭirūpaḥ ābhāsaḥ | bhavati | sarveṣām ābhāsānām etatsvarūpatvāt | kathambhūto 'sau | "moktavya eva" moktuṃ madhye gantuṃ śakya eva | "kuḍyātmā" | "kuḍyaṃ" hi rodhakatvena madhye gantuṃ na śakyate | 'yaṃ tu apūrvam eva kuḍyaḥ | moktavyatvam asya sarveṣāṃ dṛśyasañcārāṇāṃ praveśanirgamamahattvāt | kuḍyatvaṃ tu sarvādhāratvena | punaḥ kathambhūtaḥ | "dṛśyaḥ saṃsthitaḥ" dṛśyarūpeṇāsthitaḥ | "adṛśyaś ca sthitaḥ" draṣṭṛrūpeṇa ca sthitaḥ | cinmātrābhāsaśuddhamanorūpaprajāpatirūpatvād draṣṭṛdṛśyayoḥ | punaḥ kiṃ | "na dṛśyaṃ na ca draṣṭā na sraṣṭā" na sṛjikriyākartā sarvottīrṇarūpatvāt | punaḥ kiṃ | "sarvam eva ca" | nanu katham ayaṃ praticchandaḥ astīty | atrāha "asmād" iti | yataḥ "asmāt" prajāpateḥ | "jīvālī udeti" prādurbhavati | nanu mṛdo ghaṭālī rajjusamūhāt vā sarpālīnyaṃ tathā udeti | na tayoḥ tatpraticchandatvaṃ dṛśyate ity | atrāha "dīpālī"ti | vivartapariṇāmābhyām anya eva praticchandyapraticchandakarūpaḥ prakāraḥ atrāstīti bhāvaḥ || MoT_3,14.9-10 ||



     saṅkalpa eva saṅkalpāt kilaiti kṣmādivarjitaḥ /
     kṣmādimān iva niṣkuḍyaḥ svapnāt svapnāntaraṃ yathā // Mo_3,14.11 //
"kile"ti niścaye | "kṣmādivarjitaḥ" ābhāsarūpatvena sthūlapṛthvyādirahitaḥ | "kṣmādimān iva" bhāsamānatvena tatsahita iva bhāsamānaḥ | "niṣkuḍyaḥ" bhāsamānaiḥ kuḍyarūpaiḥ parvatādibhiḥ hīnaḥ | "saṅkalpaḥ" jagadākhyaḥ saṅkalpaḥ | "saṅkalpāt" śuddhamanorūpād brahmaṇaḥ | "eti" prādurbhavati | atra dṛṣṭāntam āha "svapnād" iti | "svapnāt" saṅkalparūpāt | "svapnāntaraṃ" saṅkalparūpam anyasvapnam | yathaiti | tathety arthaḥ || MoT_3,14.11 ||


     asmād eva praticchandāj jīvāḥ samprasaranty amī /
     sahakārikāraṇānām abhāvāc ca sa eva te // Mo_3,14.12 //
"asmāt" prajāpatināmnaḥ | "praticchandāt" ābhāsāt | "amī" pratyaksaṃ sphuramāṇāḥ | "jīvāḥ" | "samprasaranti" sañcāraṃ yānti | tarhi tata utpannatvena tato bhinnā eva syur ity | atrāha "sahakārī"ti | "te" jīvāḥ | "sa eva" bhavanti | na tu tato bhinnāḥ | kutaḥ | "sahakārikāraṇānām" prāktanakarmarūpāṇāṃ sahakārikāraṇānām | "abhāvāt" | sahakārikāraṇābhāve kāryaṃ kāraṇarūpam eveti hi prasiddhiḥ || MoT_3,14.12 ||



     sahakārikāraṇānām abhāve kāryakāraṇam /
     ekam etad ato nānyaḥ parasmāt sargavibhramaḥ // Mo_3,14.13 //
kāryaṃ ca tat kāraṇaṃ ca "kāryakāraṇaṃ" | "parasmāt" dṛśyāpekṣayā utkṛṣṭāt prajāpateḥ | "sargavibhramaḥ" sargavilāsaḥ || MoT_3,14.13 ||


     brahmaivādyo virāḍātmā virāḍātmaiva sargatā /
     jīvākāśaḥ sa evetthaṃ sthitaḥ pṛthvyādy asad yataḥ // Mo_3,14.14 //
"brahma eva" brahmatattvam ev"ādyaḥ virāḍātmā" virāṭsvarūpo paramātmā | bhavati | "virāḍātmā eva sargatā" sargaḥ | bhavati | pādapūraṇārtho bhāvapratyayaḥ | upasaṃhāraṃ karoti "jīve"ti | "sa" pūrvoktaḥ | "jīvākāśa" "eva" cetyatvāditanmātrāntavalitacinmātrākhyaḥ "jīvākāśa eva" | "itthaṃ" prajāpatyādisargarūpeṇa | "sthito" bhavati | atra hetum āha "pṛthvyādī"ti | "yataḥ" yasmāt kāraṇāt | "pṛthvyādi asat" bhavati || MoT_3,14.14 ||



jīvākāśa iti śrutvā kiñcit saṃśayam āpannaḥ śrīrāmaḥ pṛcchati
     kiṃ syāt parimito jīvarāśir āho anantakaḥ /
     āhosvid asty anantātmā jīvapiṇḍo 'calopamaḥ // Mo_3,14.15 //
"jīvarāśiḥ" jīvākāśatvenoktaḥ jīvapuñjaḥ | "parimitaḥ kiṃ syāt āho anantakaḥ" aparimitaḥ syāt | "āhosvit anantātmā jīvapiṇḍaḥ acalopamaḥ" parvataprakhyaḥ | "asti" | "rāśiḥ" bhinnatvena vartamānānāṃ samūhaḥ | "piṇḍaḥ" mṛtpiṇḍavat eka eva kaścij jīvamayaḥ piṇḍa iti bhedaḥ || MoT_3,14.15 ||



nanu kiṃ tava rāśipiṇḍatvayoḥ praśnenety āśaṅkyāha
     dhārāḥ payomuca iva śīkarā iva vāridheḥ /
     kaṇās taptāyasa iva kasmān niryānti jīvakāḥ // Mo_3,14.16 //
"dhārā" jaladhārāḥ | "śīkarāḥ" jalakaṇāḥ | "taptāyasaḥ" vahnyabhijvalitāt ayasaḥ | "kaṇāḥ" vahnimayāḥ leśāḥ | "kasmād" iti | jīvarāśeḥ jīvapiṇḍasya vānaṅgīkāre eteṣāṃ niryāṇaṃ na sambhavatīti bhāvaḥ || MoT_3,14.16 ||



praśnam upasaṃharati
     iti me bhagavan brūhi jīvajālavinirṇayam /
     jñātam etan mayā prāyas tad eva prakaṭīkuru // Mo_3,14.17 //
he "bhagavan" tvaṃ | "iti" pṛṣṭaṃ | "jīvajālavinirṇayaṃ me brūhi" | etāvad uktvā tvayā kiṃ na śrutam ity | atrāha "jñātam" iti | "mayā etat prāyaḥ" bāhulyena | "jñātam" | na tv aśeṣeṇātaḥ "tad eva prakaṭīkuru" yenāśeṣeṇa jānāmīti bhāvaḥ || MoT_3,14.17 ||



śrīvasiṣṭha uttaram āha
     eka eva na jīvo 'sti rāśīnāṃ sambhavaḥ kutaḥ /
     śaśaśṛṅgaṃ samuḍḍīya prayātītīva te vacaḥ // Mo_3,14.18 //
paramārthataḥ "eka eva jīvo nāsti" | tvatpṛṣṭānāṃ "rāśīnāṃ sambhavaḥ kutaḥ" syāt | etatpraśnasyāsambaddhārthatvaṃ kathayati "śaśe"ti | "śaśaśṛṅgaṃ samuḍḍīya prayāti iti" etadvacanasadṛśaṃ | "te vacaḥ" asti | ādau śaśaśṛṅgam eva nāsti | kā kathā taduḍḍayanasya | tathā jīva eva nāsti | kā kathā tadrāśyāder iti bhāvaḥ || MoT_3,14.18 ||



sarvam etat pṛṣṭaṃ nirākaroti
     na jīvo 'sti na jīvānāṃ rāśayaḥ santi rāghava /
     na caikaḥ parvataprakhyo jīvapiṇḍo 'sti kaścana // Mo_3,14.19 //
paramārthataḥ sarvasya śuddhacinmātraikamayatvāt "jīvo nāsti" | he "rāghava" | "jīvānāṃ" " rāśayo na santi" | "na ca ekaḥ kaścana parvataprakhyaḥ jīvapiṇḍo 'sti" | ataś ca tvatpraśno 'yaṃ na yukta iti bhāvaḥ || MoT_3,14.19 ||


āśīḥprakāreṇa niścayam asya kartavyatvena kathayati
     jīvaśabdārthakalanāḥ samastakalanānvitāḥ /
     na ca kāścana santīti niścayo 'stu tavācalaḥ // Mo_3,14.20 //
"taveti niścayaḥ" ayaṃ niścayaḥ | "acalaḥ" sthiro | "'stu" | "iti" kiṃ | "iti jīvaśabdārthakalanāḥ" | tāḥ "samastakalanānvitāḥ" samastābhiḥ ahambhāvādikalanābhiḥ anvitāḥ | "na santi" || MoT_3,14.20 ||



nanu jīvādīnāṃ pratyakṣeṇa sphuraṇāt katham ayaṃ niścayaḥ yuktaḥ syād ity | atrāha
     śuddhaṃ cinmātram amalaṃ brahmāstīha hi sarvagam /
     tad yathā sarvaśaktitvād vindate yāṃ svayaṃ kalām // Mo_3,14.21 //
     cinmātrānukrameṇaiva sampraphullāṃ latām iva |
     nanu mūrtām amūrtāṃ vā tām evāśu prapaśyati || MoT_3,14.22 ||



"hi" niścaye | "śuddhaṃ cinmātraṃ" śuddhacinmātrasvarūpam | ata ev"āmalaṃ brahmāsti" | kathambhūtaṃ | "sarvagam" samastadeśakālavyāpakam | tataḥ kim ity | atrāha "tad" iti | "tat" brahma | "sarvaśaktitvāt" yataḥ sarvaśaktir asti | tataḥ "yāṃ" jīvādimayīṃ | "kalāṃ" kalanāṃ | "yathā" yena prakāreṇa | "svayaṃ" svena | na tu pāratantryeṇa | "vindate" svopalabdhiviṣayaṃ karoti | kathambhūtāṃ "kalāṃ" | "cinmātrānukrameṇa" cinmātraparipāṭyā | "latām iva" latāvat | "sampraphullāṃ" vikasitāṃ | cinmātrasyaiva hīyaṃ paripāṭī yat kalanāḥ vikāsayati | "nanu" niścaye | "tāṃ" kalanāṃ | "mūrtām amūrtāṃ vā" sthūlāṃ sūkṣmāṃ v"āśu" tasminn eva kṣaṇe | "prapaśyati" sampannām eva paśyati | tathā ca | jīvaḥ paramārthataḥ svayaṃ siddho nāsti | kasya rāśitā piṇḍatā vā bhaved iti bhāvaḥ || MoT_3,14.21-22 ||



nanu yadi brahma jīvādi paśyati tadā tadbhinnam evaitat syāt | svabhinnasyaiva dṛṣṭigocaratvād ity | atrāha
     jīvo buddhiḥ kriyāspando mano dvitvaikyam ity api /
     svasattāṃ prakacantīṃ tāṃ niyojayati vedane // Mo_3,14.23 //
tat brahma | "tāṃ" prasiddhāṃ | "svasattāṃ" svasphurattāṃ | "vedane niyojayati" vedanaviṣayāṃ karoti | paśyatīti yāvat | "svasattāṃ" kathambhūtāṃ | "jīvaḥ buddhiḥ kriyāspandaḥ" hitāhitaprāptiparihārārthāś ceṣṭāḥ | "manaḥ" | dvitvaṃ ca tat aikyaṃ ca "dvitvaikyam" | "ity api" etadrūpeṇa | "kacantīṃ" sphurantīṃ | tathā ca | dṛṣṭigocaratve 'pi na jīvāder bhinnatvaṃ yuktam iti bhāvaḥ || MoT_3,14.23 ||



nanu brahmasattā kathaṃ jīvādibhāvena sphuratīty | atrāha
     sābuddhaivaṃ bhavaty eva bhaved brahmaiva bodhataḥ /
     abodhaḥ prekṣayā yāti nāśaṃ na tu sa budhyate // Mo_3,14.24 //
"sā" brahmasatt"ābuddhā" brahmasattābhāvenājñātā satī | "evaṃ bhavati eva" jīvādirūpatayā bhāsata eva | "bodhataḥ" brahmasattābhāvena jñānāt | "brahmaiva bhavet" | sattātadvatoḥ bhedābhāvāt | nanu jīvādeḥ brahmasattābhāvena brahmamayatve 'pi brahmasattāviṣayas tu yaḥ abodha āsīt saḥ abodhatvena jñātaḥ san ghaṭādivat tathaiva tiṣṭhati | tathā ca na brahmaikamayatā sidhyati ity | atrāha "abodha" iti | "abodhaḥ prekṣayā" bodhena | "nāśaṃ yāti" | "tu" pakṣāntare | "saḥ" abodhaḥ | "na budhyate" bodhaviṣayo na sampadyate viruddhatvāt tadudbodhakāle eva naṣṭatvāt | na hi tamaḥ tejoviṣayo bhavatīti bhāvaḥ || MoT_3,14.24 ||



etad eva dṛṣṭāntena dṛḍhīkaroti
     yathāndhakāro dīpena prekṣyamāṇaḥ praṇaśyati /
     na cāsya jñāyate tattvam abodhasyaivam eva hi // Mo_3,14.25 //
"yathāndhakāraḥ dīpena prekṣyamāṇaḥ" draṣṭum ārabdhaḥ | "praṇaśyati" | "asyā"ndhakārasya | "tattvaṃ" svarūpaṃ | "na ca jñāyate" | puruṣeṇeti śeṣaḥ | dārṣṭāntike yojayati "abodhasye"ti | "hi" niścaye | "'bodhasyā"jñānasy"aivam eva tattvaṃ na jñāyate" ity arthaḥ || MoT_3,14.25 ||


jīvasya brahmatvam upasaṃharati
     evaṃ brahmaiva jīvātmā nirvibhāgo nirantaraḥ /
     sarvaśaktir anādyanto mahācitsārarūpadhṛt // Mo_3,14.26 //
"evaṃ" pūrvoktaprakāreṇa | "jīvātmā brahmaiva" bhavati | brahmatvāpādakāny asya viśeṣaṇāny āha "nirvibhāga" iti | "nirvibhāgaḥ" vibhāgarahitaḥ | na hi jīvasvarūpe kaścid vibhāgo 'sti niravayavatvāt | "nirantaraḥ" prakāśanirbharitatvena madhye 'vakāśahīnaḥ | "sarvaśaktiḥ" sarvaśaktitvaṃ cāsya svapnādau pratyakṣadṛṣṭam eva | "anādyantaḥ" ādyantarahitatvaṃ cāsyādyantaparicchedakatvenaiva siddham | na hi paricchedyaḥ paricchedakasya paricchedaṃ kartuṃ śaknoti | "mahācitsārarūpadhṛt" | "mahācit" vimarśaśaktiḥ | tasyāḥ "sāraḥ" prakāśaḥ | tasya rūpaṃ dhārayati "mahācitsārarūpadhṛt" | prakāśasvarūpa ity arthaḥ || MoT_3,14.26 ||



sarvathaiva bhedakalanāṃ nirākaroti
     sarvānantatayā tv asya na kācid bhedakalpanā /
     vidyate yā hi kalanā sā tad evānubhūtitaḥ // Mo_3,14.27 //
"tu" viśeṣe | "'sya" brahmaṇaḥ | "sarvānantatayā" sarvaś cāsāv anantaś ca "sarvānantaḥ" | tasya bhāvaḥ "sarvānantatā" | tayā | "kācid bhedakalanā" bhedākārā kalanā | bheda iti yāvat | "nā"sti | sarvarūpasyānantasya ca bhedāyogāt | na hi ghaṭādyapekṣayānantasya ghaṭaśarāvādisarvarūpasya mṛdādeḥ ghaṭabhedo yuktaḥ | nanu sarvatvam anantatvaṃ ca asarvāt sāntāc ca bhedakam eva | tathā ca tābhyām eva tasya bhedaḥ sampadyata ity | atrāha "vidyata" iti | "hi" yasmādarthe | "yā kalanā" bhedakalanā | "vidyate" | "sā tad eva" brahmaiva | bhavati | kuto | "'nubhūtitaḥ" anubhūtisvarūpataḥ | ayaṃ bhāvaḥ | yā kācit kalanāsti sānubhūtā na vā | na cet sā svayam asiddhā brahmaṇi bhedaṃ kathaṃ kuryāt | anubhūtā cet tarhi anubhavarūpaivānubhavasya ca cidrūpatvena brahmatvaṃ siddham eveti | brahmaiva sā bhaved iti || MoT_3,14.27 ||



atra śrīrāmaḥ pṛcchati
     evam etat kathaṃ brahmann ekajīvecchayākhilāḥ /
     jagajjīvā na yujyante mahājīvaikatāvaśāt // Mo_3,14.28 //
he "brahman" | "etat" tvayoktam | "evaṃ" bhavati | satyam eva bhavatīty arthaḥ | sarveṣāṃ jīvānāṃ tatraikajīvecchānuvartitvam āśaṅkate | "katham" iti | "akhilāḥ jagajjīvāḥ" | jagati sthitā jīvāḥ "jagajjīvāḥ" | "mahājīvaikatāvaśāt" | "mahājīvena" cetyatvāditanmātrāntaprapañcavalitacinmātrākhyamahājīvena | yā "ekatā" aikyaṃ | tasyāḥ "vaśāt" vaśena | "ekajīvecchayā" ekasya kasyāpi sāmānyajīvasyecchayā | "kathaṃ na yujyante" | ayaṃ bhāvaḥ | sarveṣāṃ jīvānāṃ proktasvarūpamahājīvaikamayatve ekasmin jīve uditayecchayā sarveṣāṃ jīvānāṃ yogo yuktaḥ || MoT_3,14.28 ||



śrīvasiṣṭha uttaram āha
     mahājīvātma tad brahma sarvaśaktimayātmakam /
     sthitaṃ yatheccham eveha nirvibhāgaṃ nirantaram // Mo_3,14.29 //
"mahājīvātma" mahājīvaḥ | "tat brahma iha yathecchaṃ" svecchāsadṛśaṃ | "sthitaṃ" bhavati | "tat brahma" kathambhūtaṃ | "sarvaśaktimayātmakam" | "sarvaśaktimayaḥ" sarvaśaktinirbharaḥ | "ātmā" yasya | tat | tādṛśam | sarvaśaktimayātmakatvaṃ ca brahmaṇaḥ sarvaśaktīnāṃ tata evotthānāt | punaḥ kathambhūtaṃ | "nirvibhāgaṃ" akhaṇḍasvarūpatvena vibhāgān niṣkrāntam | punaḥ kathambhūtaṃ | "nirantaram" prakāśākhyasārabharitam || MoT_3,14.29 ||



nanu brahma yathecchaṃ sthitaṃ bhavatu | tataḥ kim ity | atrāha
     yad evecchati tat tasya bhavaty āśu mahātmanaḥ /
     pūrvaṃ tu naśyatīcchā cid ato dvitvam udeti tat // Mo_3,14.30 //
tat brahma | "yad evecchati" icchāviṣayaṃ karoti | "tad" eva | na tv anyat | "tasya mahātmanaḥ" vyāpakasvarūpasya brahmaṇaḥ | "āśu" icchākṣaṇe eva | "bhavati" sampadyate | ekatecchānāśena dvitvotpattim asmāt kathayati "pūrvam" iti | "cit" icchā | nīlam utpalam itivat cidviśeṣitecchā jñeyā | cidviśeṣitatvaṃ cātra cidviṣayatvaṃ jñeyam | yata ity adhyāhāryam | tenāyam arthaḥ | yataḥ "cit" icchā | cidrūpa eva bhavāmīty evaṃrūpā ekatecchā | "pūrvaṃ" prathamasargārambhe | "'taḥ" saptamyarthe tasil asmin brahmaṇi | "tu"śabdaḥ ivārthe | "naśyati tu" susphūrtyaviṣayatārūpaṃ nāśaṃ yātīva | paramārthataḥ tu na naśyati tasyāḥ sarvatrānugamāt | iti "tu"śabdopādānam | cidviṣayecchānāśaś ca cetyaviṣayecchodbhūter eva jñeyaḥ | "tat" tasmāt kāraṇāt | "dvitvaṃ" cetyasvarūpajīvādirūpeṇa sthito dvidhābhāvaḥ | "udeti" prādurbhavati | ekatecchānāśahetubhūtatayā dvitvecchayā eva dvitvam udetīti bhāvaḥ || MoT_3,14.30 ||



dvitvodayānantaraṃ śaktikriyākramakaraṇaṃ kathayati
     paścād dvitvavibhaktānāṃ svaśaktīnāṃ prakalpitaḥ /
     anenetthaṃ hi bhavatīty evaṃ tena kriyākramaḥ // Mo_3,14.31 //
"paścāt" | "tena" brahmaṇā | "dvitvavibhaktānāṃ" | "dvitvena" dvidhābhāvena | "vibhaktānāṃ" vibhāgena sthāpitānāṃ | "svaśaktīnāṃ" | "ity evaṃ" iti prakāreṇa | "kriyākramaḥ" "kalpitaḥ" | "hi" niścaye | "ity" "evaṃ" kathaṃ | "anena" sampadyate || MoT_3,14.31 ||



sampannaṃ sveṣṭaṃ kathayati
     śaktyādyayā tayā brāhmyā niyamo yaḥ prakalpitaḥ /
     taṃ vinā nodayo 'nyāsāṃ pradhānecchaiva rohati // Mo_3,14.32 //
"tayā" prasiddhay"ādyayā" mūlakāraṇabhūtayā | "brāhmyā" brahmasambandhinyā | "śaktyā" | "yaḥ niyamaḥ" svecchāsadṛśī niyatiḥ | "prakalpitaḥ" | "taṃ" niyamaṃ | "vinā" ṛte | "'nyāsāṃ" jīvasthānānām | "udayo na" syāt | ata ity adhyāhāryam | ataḥ "pradhānecchaiva rohati" | "pradhānasya" mahājīvātmabhūtasya brahmaṇaḥ | "icchaiva rohati" jīvecchārūpeṇa pariṇamate | tathā ca pradhānecchānuvartitvam eva | na sā niyamakāritvam uktam | iha tu tacchakter iti cen | na | śaktitadvator abhedāt || MoT_3,14.32 ||



etad eva nānāracanābhiḥ kathayati
     yasyā jīvābhidhānāyāḥ śaktyā yecchā phalaty asau /
     pradhānaśaktiniyamānuṣṭhānena vinā na tu // Mo_3,14.33 //
"yasyāḥ jīvābhidhānāyāḥ śaktyāḥ" śaktirūpasya yasya jīvasya | "yā icchā phalati" phalayuktā bhavati | tasyā ity adhyāhāryam | tasyāḥ śakteḥ "asau" icchā | "pradhānaśaktiniyamānuṣṭhānena vinā" | "pradhānaśakteḥ" brahmaśakteḥ | yat "niyamānuṣṭhānaṃ" niyamakaraṇaṃ | tad "vinā na" bhavati | svarūpam eva na labhate | kā kathā tatphalasyeti bhāvaḥ || MoT_3,14.33 ||



     pradhānaśaktiniyamaḥ supratiṣṭho bhaven na cet /
     tat phalaṃ śaktyaśaktatvān nehitānāṃ kvacid bhavet // Mo_3,14.34 //
"pradhānaśakteḥ" brahmaśakteḥ | niyamaḥ "pradhānaśaktiniyamaḥ" | "supratiṣṭhaḥ" susthiraḥ | "na ced bhavet" yadi na syāt | "tat" tadā | rohitānāṃ "kvacit" kutrāpi deśe kāle vā | "phalaṃ na" syāt | kutaḥ | "śaktyaśaktatvāt" | "śaktyā" brahmaśaktyā | lakṣaṇayā tanniyamena | yat "śaktatvaṃ" phalaṃ prati sāmarthyaṃ | tadabhāvaḥ "aśaktatvaṃ" | tasmāt "śaktyaśaktatvāt" | yataḥ rohitānāṃ nānāvidhānāṃ kriyāṇāṃ phalaṃ vidyate 'taḥ anumīyate ko 'pi niyamo 'sti yena kriyāṇāṃ phalotpādanaṃ prati sāmarthyam astīti bhāvaḥ || MoT_3,14.34 ||


prakṛtam anusarati
     evaṃ brahma mahājīvo vidyate 'ntādivarjitaḥ /
     jīvatkoṭimahākoṭī bhavaty atha na kiñcana // Mo_3,14.35 //
"evaṃ" pūrvoktaprakāreṇa | "brahmāntādivarjitaḥ" antamadhyādirahitaḥ | "mahājīvaḥ" "vidyate" | "kuto niryānti jīvakā" iti pūrvataroktasya praśnasyottaram āha "jīvatkoṭī"ti | tat brahma | "jīvatkoṭimahākoṭī" | "jīvatāṃ" jīvanakriyākartṛkāṇāṃ | "koṭimahākoṭī" koṭimahākoṭisaṅkhye | "bhavati" svayam eva tadrūpo bhavati | na tu tato jīvāḥ niryāntīti bhāvaḥ | "atha" tathāpi | "na kiñcana" "bhavati" | cinmaye svarūpe tathaiva sthitatvāt || MoT_3,14.35 ||



nanu brahma kena jīvatāṃ yātīty | atrāha
     cetyasaṃvedanāj jīvo bhavaty āyāti saṃsṛtim /
     tadasaṃvedanād rūpaṃ śamam āyāti saṃsṛteḥ // Mo_3,14.36 //
"cetyasaṃvedanāt" cidviṣayabhūtabhāvajātaparāmarśāt | brahma "jīvo bhavati" | tataḥ "saṃsṛtiṃ yāti" sukhaduḥkhalepasvarūpasaṃsārabhāk bhavati | nanu kadācit saṃsṛtir asya nivartate na vety | atrāha "tad" iti | "tadasaṃvedanāt" cetyāparāmarśāt | asyety adhyāhāryam | asya jīvasya | "saṃsṛteḥ" saṃsārasya | "rūpaṃ śamaṃ" śāntiṃ | "yāti" || MoT_3,14.36 ||



nanu saṃsṛtyupaśamena jīvasya kiṃ sampadyata ity | atrāha
     evaṃ kaniṣṭhajīvānāṃ jyeṣṭhajīvakriyākramaiḥ /
     samudety ādyajīvatvaṃ tāmrāṇām iva hematā // Mo_3,14.37 //
"evaṃ "sati saṃsṛtyupaśame sati | "jyeṣṭhajīvasya" brahmaṇaḥ | kriyākramaiḥ "jyeṣṭhajīvakriyākramaiḥ" | "kaniṣṭhajīvānām ādyajīvatvaṃ" brahmatvaṃ | "samudeti" prādurbhavati | "jyeṣṭhajīvakriyākramā" atra brahmakṛtāḥ kriyākramā jñātavyāḥ | brahmakṛtakriyākramasyaiva jīvānāṃ brahmatvāpādane samarthatvāt | atra dṛṣṭāntam āha "tāmrāṇām" iti | svarṇakārakriyākramaiḥ "tāmrāṇāṃ" yathā "hematvaṃ" samudeti | tathety arthaḥ || MoT_3,14.37 ||



pūrvataroktaṃ smarati
     atrānante parākāśe ittham eṣa gaṇo 'py asan /
     khātmaiva sann ivodeti ciccamatkaraṇātmakaḥ // Mo_3,14.38 //
"itthaṃ" pūrvoktakrameṇ"ātrānante parākāśe" prasiddhe 'parimeye cidākāśe | "eṣaḥ" pūrvoktaḥ | "gaṇaḥ" cetyatvādirūpaḥ prapañcaḥ | "asann api" "sann ivodeti" | kathambhūtaḥ | "khātmaiva" nakiñcidrūpa eva | punaḥ kathambhūtaḥ | "ciccamatkaraṇātmakaḥ" | "citaḥ" yat "camatkaraṇaṃ" svaśaktyāsvādakaraṇaṃ | tat "ātmā" svarūpaṃ yasya | saḥ "ciccamatkaraṇātmakaḥ" | "camatkaraṇaṃ" vinā svatantrāyāḥ citeḥ cetyonmukhatāyogāt || MoT_3,14.38 ||



nanu camatkaraṇārtham anyāpekṣāyā avaśyambhāvāt kuto 'syāḥ svatantrādīty | atrāha
     svayam eva camatkāro yaḥ samāgamyate citā /
     bhaviṣyannāmadehādi tad ahambhāvanaṃ viduḥ // Mo_3,14.39 //
"yaḥ camatkāraḥ citā" saha "svayaṃ" cidāśrayeṇa svaviṣayena ca yatnena vinā | "samāgamyate" svayaṃ samāgamaviṣayatāṃ bhajati | paṇḍitāḥ "tad ahambhāvanam" ahaṅkāraṃ | "viduḥ" | ahaṅkāro 'pi ciccamatkāra eva | kā kathā jīvasyeti ahambhāvagrahaṇābhiprāyaḥ | kathambhūtaṃ | "bhaviṣyannāmadehādi" | "bhaviṣyat nāma" ca "dehādi" ca yasya | tat | "nāmā"haṅkārety abhidhā | "dehaḥ" sthūlasūkṣmarūpaḥ | cinnairapekṣyadyotanāya "samāgamyata" iti karmakartṛvyapadeśaḥ || MoT_3,14.39 ||



prakṛtaṃ cidaikyaṃ bahuvistareṇa kathayati
     cito yaḥ syāc cidālokas tanmayatvād anantakaḥ /
     sa eṣa bhuvanābhoga iti tasyāḥ prabimbati // Mo_3,14.40 //
"citaḥ" anantasvabhāvasya citprakāśasya | "yaḥ ālokaḥ" bhāvaprakaṭanahetuḥ svabhāvaviśeṣaḥ | "syād" asti | kathambhūtaḥ | "tanmayatvāt" cinmayatvād | "anantakaḥ" cidvad aparimeyaḥ | aparimeyatvaṃ ca citaḥ parimātur abhāvena svayaṃ svasmin parimātṛtāsambhavāc ca jñeyam | "sa eṣaḥ" pūrvoktaḥ viṣayasya svavyatiriktasya cidālokaḥ | "tasyāḥ" citaḥ | "bhuvanābhoga iti" bhuvanavistāro 'yam iti | "pra"ti"bimbati" mālinyānādāyakatvena pratibimbabhāvena sphurati || MoT_3,14.40 ||



     pariṇāmavikārādiśabdaiḥ saiva cid avyayā /
     tādṛgrūpyād abhedyāpi svaśaktyaiva vibudhyate // Mo_3,14.41 //
"svaśaktyā eva" pramātṛbhāvena sphurantyā nijaśaktyā eva kartry"āvyayā" nāśarahitā | "saiva cit pariṇāmavikārādiśabdaiḥ" "vibudhyate" vijñāyate | śabdasyārthabodhaṃ prati kāraṇatvaṃ suprasiddham eveti nāyastam | kathambhūt"āpi" | "tādṛgrūpyāt" cidrūpatāyāḥ | "abhedyāpi" bhinnīkartum ayogyāpi | nanu svarūpād abhinnatve kathaṃ pariṇāmādiśabdavācyatvaṃ asyā iti cet | satyam | yathā toyaṃ svarūpād abhinnam api taraṅgatām āsādya toyapariṇāmaśabdena tadvikāraśabdena ca kathyate tatheyam apīti na virodhaḥ || MoT_3,14.41 ||



     avicchinnavilāsātma svato yat svadanaṃ citaḥ /
     acetyasya prakāśasya jagad ity eva tat sthitam // Mo_3,14.42 //
"acetyasya prakāśasya" cetyaleparahitaprakāśarūpāyāḥ "citaḥ" | "svayam" ayatnena | "yat svadanaṃ" svaśaktyāsvādaḥ bhavati | kathambhūtam | "avicchinnavilāsātma" | "avicchinavilāsaḥ" chedarahitasphuraṇayuktaḥ | "ātmā" yasya | tat "avicchinnavilāsātma" | tat "svadanaṃ jagad ity eva" jagatsvarūpeṇa | "sthitaṃ" bhavati || MoT_3,14.42 ||


     ākāśād api sūkṣmaiṣā yā śaktir vitatā citaḥ /
     sā svabhāvata evainām ahantāṃ paripaśyati // Mo_3,14.43 //
"yā eṣā ākāśād api sūkṣmā"paricchedyā | "vitatā" sarvatra vyāptā | "citaḥ śaktiḥ" sāmarthyaṃ asti | "sā" cit | "svabhāvata eva" svasattayaiva | na tu yatnādinā | "enāṃ" proktaviśeṣaṇāṃ | "ahantāṃ paripaśyati" ahaṅkārabhāvena cetati || MoT_3,14.43 ||



     ātmany ātmātmanaivāsyā yat prasphurati vārivat /
     jagadantam ahantāṇuṃ tad evāsau prapaśyati // Mo_3,14.44 //
"asyāḥ" citaḥ | "ātmā" sphurattākhyaṃ svarūpam | "ātmani" sphurattākhye svarūpe svasvarūpe | "ātmanā" svabhāvena | na tu yatnena | "yat sphurati" vilasati | kathaṃ | "vārivat" jalavat | "tad eva" sphuraṇam ev"āsau" cid | "ahantāṇuṃ prapaśyati" parimitāhantārūpatayā parāmṛśati | kīdṛśam "ahantāṇuṃ" | "jagadantam" jagatparyantam || MoT_3,14.44 ||



     camatkārakarī cāru yac camatkurute citiḥ /
     iyaṃ svātmani tasyaiva jagannāma kṛtaṃ tatam // Mo_3,14.45 //
"camatkārakarī" camatkārakaraṇa[ ? ]"syaiva" | "tataṃ" vistīrṇaṃ | "jagannāma" jagad iti nāma | "kṛtaṃ" | tayaiveti śeṣaḥ || MoT_3,14.45 ||



     citaś cittvam ahaṅkāraḥ saiva rāghava kalpanā /
     tanmātrādi cid evāto dvitvaikatve kva saṃsthite // Mo_3,14.46 //
"citaḥ cittvam ahaṅkāraḥ" bhavati | ahaṅkāratayā cittvasyaiva pariṇāmād ity arthaḥ | he "rāghava" | "saivā"haṅkāra eva | "kalpanā" bhavati | "kalpanā"padāpekṣaṃ strītvaṃ | "ataḥ tanmātrādi" ahaṅkārotpannaṃ tanmātrādikam | "cid eva" bhavati | tanmātrakāraṇasyāhaṅkārasya cittvāt | "dvitvaikatve kva saṃsthite" bhavataḥ | na sta iti bhāvaḥ | nanu dvitvaṃ mā bhavatu | ekatvaṃ kathaṃ nāstīti cen | maivaṃ | svapratipakṣaṃ dvitvaṃ vinaikatvasyāpy asiddheḥ | na hi chāyāṃ vinā prakāśaḥ prakāśo bhavati anirvācyatvāt || MoT_3,14.46 ||



evaṃ cidekamayatvaṃ sarvasya prasādhya bhedatyāgaṃ śiṣyaṃ prati anuṣṭheyatvena vidadhāti
     jīvahetāv asantyāge tvaṃ cāhaṃ ceti santyaja /
     śeṣaṃ sadasator madhye bhavetyarthātmako bhavet // Mo_3,14.47 //
puruṣaḥ | "ityarthātmakaḥ" | "iti"śabdākṣiptagurūpadeśavāky"ārthātmakaḥ" | tatpara iti yāvat | "bhavet" | "iti"śabdākṣiptaṃ gurūpadeśam āha "tvaṃ cāhaṃ ceti tyaja" | yena jīvatā dūre gacchatīti bhāvaḥ | punaḥ kiṃrūpaḥ tiṣṭhāmīty | atrāha "śeṣam" iti | "sadasatoḥ madhye" sthitaṃ sattvāsattvābhyām anirvacanārhaṃ | "śeṣaṃ" sarvaprapañcabādhe 'pi sākṣitayā śuddhaṃ cinmātraṃ | "bhava" || MoT_3,14.47 ||



evaṃ śiṣyaṃ prati abhedaṃ vidheyatvenoktvā tatkṛpayā punar apy abhedam eva kathayati
     citā yathādau kalitā svasattā sā tathoditā /
     abhinnā dṛśyate vyomnaḥ sattāsatte 'tha vedmy aham // Mo_3,14.48 //
"citādau" sargārambhe | "svasattā" sphurāmītirūpā nijā sattā | "yathā" yena jīvādirūpeṇa | "kalitā" | asyā ity adhyāhāryam | asyāḥ citaḥ "sā" sattā | "tathā" tena rūpeṇ"oditā" prādurbhūtā satī | cidākāśāt "abhinnā dṛśyate" | jñānibhir iti śeṣaḥ | "aham" ity anena sattāsāmānyapramātā kathitaḥ | "athāhaṃ sattāsatte vedmi" jānāmi | na tu tathāstīti bhāvaḥ || MoT_3,14.48 ||



     citkhaṃ khaṃ jagadīhāḥ khaṃ kham abdhivibudhācalāḥ /
     khākāraciccamatkārarūpatvān nānyad asti hi // Mo_3,14.49 //
"citkhaṃ" "kham" ākāśaṃ bhavati | "jagadīhāḥ" | "jagatāṃ" hitāhitaprāptiparihārārthāḥ ceṣṭāḥ | "khaṃ" bhavanti | "abdhiś" ca "vibudhāś" c"ācalāś" ca | te api "kham" eva bhavanti | atra hetutvenottarārdham āha "khākāre"ti | "hi" yasmādarthe | "khākāraḥ" yaḥ "ciccamatkāraḥ" | sa eva "rūpaṃ" yasya | saḥ | tasya bhāvaḥ tat"tvaṃ" | tasmāt "khākāraciccamatkārarūpatvāt" | "anyat nāsti" | yataḥ sarvaṃ kharūpaṃ ciccamatkāramātrarūpaṃ bhavatīty arthaḥ || MoT_3,14.49 ||



     yo yadvilāsas tasmāt sa na kadācana bhidyate /
     api sāvayavāt tattvāt kaivānavayave kathā // Mo_3,14.50 //
"yaḥ yadvilāsaḥ" yasya sphuraṇaṃ bhavati | "saḥ sāvayavāt" "tattvād api tasmāt kadā na" jātu na | "bhidyate" | na hi kaścit taraṅgaṃ toyāt bhinnaṃ vadatīti bhāvaḥ | "anavayave" avayavarahite | svapne 'pi tad vācyam iti bhāvaḥ || MoT_3,14.50 ||



nanu citaḥ jagadrūpatve 'pi tadgrāhiṇyā anyasyāś citaḥ sadbhāvāt nābhedamayatety | atrāha
     citer nityam acetyāyāś cin nāsty avitatākṛteḥ /
     yad rūpaṃ jagato rūpaṃ tattatsphuraṇarūpiṇaḥ // Mo_3,14.51 //
"nityam acetyāyāḥ" cetitum ayogyāyāḥ | "citeḥ cit" svagrāhiṇī cit | "nāsti" cidrūpatvahāner iti bhāvaḥ | "citeḥ" kathambhūtāyāḥ | "avitatākṛteḥ" | sūkṣmatay"āvitatā" kutrāpi na sthit"ākṛtiḥ "rūpaṃ yasyāḥ | sā | tasyāḥ | nanu etad asiddhaṃ | sphurāmītirūpeṇa yuktatvād ity | atrāha "yad rūpam" iti | "yad rūpaṃ" | "yat" sphurāmītyādikaṃ | "rūpaṃ" bhavati | tad ity adhyāhāryam | tat "jagata" eva "rūpam" | na tu citeḥ | mukhyataḥ cititvaṃ hi sphurāmīty asya grāhikāyāḥ citer eva | sphurāmīti grāhyarūpāyās tu gauṇaṃ cititvaṃ bhavad api na jagattvaṃ vyabhicarati | kathambhūtasya "jagataḥ" | "tattatsphuraṇarūpiṇaḥ" | "tattatsphuraṇāni" sphurāmītyādīni | "rūpaṃ" yasya | tat | tasya "tattatsphuraṇarūpiṇaḥ" | yat kiñcic cetyatām āyāti tat sarvaṃ jagad evety arthaḥ || MoT_3,14.51 ||



     mano buddhir ahaṅkāro bhūtāni girayo diśaḥ /
     iti paryāyaracanā citas tattvāj jagatsthiteḥ // Mo_3,14.52 //
"mano buddhir" ityādirūpeṇoktā śabdasantatiḥ | "citaḥ paryāyaracanā" bhavati | kutaḥ | "jagatsthiteḥ" manobuddhyādirūpāyāḥ jagatsthiteḥ | "tattvāt" cidrūpatvāt | sarve śabdāḥ cidvācakā eveti bhāvaḥ || MoT_3,14.52 ||


     citaś cittvaṃ jagad viddhi nājagac cittvam asti hi /
     ajagattvād acic cit syād bhāvābhedāj jagat kutaḥ // Mo_3,14.53 //
"citaḥ" sambandhi "cittvaṃ" cidbhāvaṃ | yena sā cid iti nāmayogyā bhavati sa ko 'pi dharmaḥ | tam iti yāvat | "jagat viddhi" jānīhi | atra hetum āha "ne"ti | "hi" yasmāt kāraṇāt | "cittvam ajagat" jagato vyatiriktaṃ | "nāsti" | cetyarūpajagadabhāve 'nirvācyāyāḥ citaḥ sphuṭaṃ cittvāyogyatvāt | avāntaraṃ phalitam āha "ajagad" iti | ata ity adhyāhāryam | ato hetoḥ | "cit ajagattvād" dhetor | "acit syāt" cinnāmayogyā na syāt | yadi jagan na syād anirvācyāyāḥ citer api cittvaṃ na syād iti bhāvaḥ | paramaṃ phalitam āha "bhāvābhedād" iti | "bhāvābhedāt" pūrvanyāyasiddhena cijjagator abhedena siddhāt padārthābhedāt | "jagat kutaḥ" kathaṃ | syāt | cittvajagator abhede sati cittvasya cidekamayatayā cita eva sarvathā sthitatvāt jagan nāstīti bhāvaḥ || MoT_3,14.53 ||



     citer maricabījasya nijā yāntaś camatkṛtiḥ /
     saivaiṣā jīvatanmātramātraṃ jagad iti sthitā // Mo_3,14.54 //
"citeḥ" cinnāmnaḥ | "maricabījasyāntaḥ" madhye | "yā camatkṛtiḥ" arthāt tīkṣṇatāsthānīyaḥ svaśaktyāsvādākhyaḥ camatkāraḥ | bhavati | "saivaiṣā jagad iti" jagadrūpeṇa | "sthitā" bhavati | kathambhūtaṃ "jagat" | "jīvatanmātramātraṃ" kevalaṃ jīvapañcatanmātrasvarūpaṃ | na tu sthūlabhūtamayaṃ | svapnanyāyena sthūlatāyā asatyatvāt || MoT_3,14.54 ||


     cittvāt svaśaktikacanaṃ yad ahambhāvanaṃ citeḥ /
     jīvaḥ spandātmakarmātmā bhaviṣyadabhidho hy asau // Mo_3,14.55 //
"citeḥ" "svaśaktikacanaṃ" svaśaktisphuraṇarūpaṃ | "ahambhāvanaṃ yad" asti | kutaḥ | "cittvāt" cidbhāvākhyāt hetoḥ | "hi" niścaye | "asau" svaśaktisphuraṇaṃ | "jīvaḥ" bhavati | "jīvā"pekṣayā puṃliṅgatā | kathambhūto "jīvaḥ" | "spandātma" kiñcitsphuraṇarūpaṃ | yat "karma" | tat "ātmā" svarūpaṃ | yasya | "spandātmakarmātmā" citspandarūpa evety arthaḥ | punaḥ kathambhūtaḥ | "bhaviṣyadabhidhaḥ" vaikharīprādurbhāva ity arthaḥ || MoT_3,14.55 ||


     yac cic cittvena kalanaṃ susampādyābhidhārthadik /
     vyavacchedavikārais tad bhidyate 'to na vidyate // Mo_3,14.56 //
"cit" ārṣaḥ ṣaṣṭhīlopaḥ citaḥ | "yat cittvena" cidbhāvena | "kalanaṃ" paricchedaḥ | bhavati | kathambhūtaṃ | "susampādyā" sukhena "sampādayituṃ" śaky"ābhidhārthadik" nāmārthaleśaḥ yena | tat "susampādyābhidhārthadik" | paricchinnasyaiva hi vastunaḥ nāma tadvācyatvaṃ ca kartuṃ śakyaṃ | "tat bhidyate" citaḥ bhinnatvena sthīyate | kaiḥ | "vyavacchedavikāraiḥ" | cittaṃ na spṛśatīti yāvat | bhavantu jaḍebhyaḥ bhinnatāpādanāni | ta eva vikārāḥ | taiḥ | tadyuktatvād iti yāvat | cito bhinnaṃ | kā hānir ity | atrāh"āta" iti | "ataḥ" cito bhinnatvāt | "na vidyate" | cidbhinnasya cetyamānatāyogāt | tadayoge ca sato 'pi | tasyāsaṅkalpatvāt | cidrūpatvena kalanābhāvena vyarthasya cittvasyāpy abhāvaḥ | cittvābhāve ca jagato 'bhāvaḥ | tadabhāve ca śuddhasya cinmātrasyaiva sāmrājyam iti bhāvaḥ || MoT_3,14.56 ||



nanu bhavatu cidekamayatvaṃ sarvasya | tadaṃśabhūtayoḥ kartṛkarmaṇos tu parasparaṃ bhedo durnivāra ity | atrāha
     citspandarūpiṇor asti na bhedaḥ kartṛkarmaṇoḥ /
     spandamātraṃ bhavet karma sa eva puruṣaḥ smṛtaḥ // Mo_3,14.57 //
"citspandarūpiṇoḥ" citsphūrtyākhyarūpayuktayoḥ | "kartṛkarmaṇoḥ bhedaḥ nāsti" | katham etad ity | atrāha "spande"ti | "spandamātraṃ karma bhavet" | bahiḥspandasyaiva karmatvadarśanāt | "sa eva puruṣaḥ smṛtaḥ" | paṇḍitair iti śeṣaḥ | ayaṃ bhāvaḥ | antaḥ vicāryamāṇaṃ jñānaṃ vinā na kiñcil labhyate | ghaṭapaṭādiś ca bahirbhūtaḥ | ataḥ jñānasya taiḥ saha ko 'pi sambandho nāstīti śuddhaṃ jñānaṃ śiṣṭaṃ | sa eva ca citaḥ sphuraṇākhyaḥ spandaḥ | tad eva karma | bahiḥsthitasya śarīracalanādirūpasya karmaṇo 'pi tatpūrvakatvāt | tat tattvam eva | sa eva ca puruṣaḥ | antar anyasyānupalambhāt bahiḥśarīrasya mṛtpiṇḍarūpasya puruṣatvāyogāt iti siddhaṃ karmaṇaḥ puruṣatvam || MoT_3,14.57 ||



sarvasya jīvāder vargasyaikatvaṃ sādhayati
     jīvaś cittve parispandaḥ puṃsāṃ cittaṃ sa eva ca /
     manas tv indriyarūpaṃ san nānānānaiva gacchati // Mo_3,14.58 //
"jīvaḥ cittve" cidbhāve | citsvarūpa iti yāvat | "parispandaḥ" bhavati | "puṃsāṃ sa eva" karmāparaparyāyaṃ "cittaṃ" bhavati | parispanda "eva ca" | citspandatvavyatiriktasya jīvasya cittasya vābhāvāt | "tu" viśeṣe | "mana" eva citspandarūpaṃ cittam | "indriyarūpaṃ sat" | "nānānānā"tvaṃ "gacchati" | "cittaṃ" kathambhūtam "eva" | "anānaiva" | paramārthataḥ ekatvāt nānātvarahitaṃ | idam atra tātparyam | "jīvas" tāvat citspanda eva | taccittam api vikalpātmakaṃ tathaiva | tad eva ca cittam indriyarūpeṇa pariṇamate | tataś ca svapariṇāmabhūtendriyadvāreṇa bahir nirgatya rūpādipañcakasvarūpaviṣayarūpatām āpadyate | tataś ca tadādhārabhūtapañcakatām āsādyate | tataś ca tatkāryabhāvena pariṇamate iti citspanda eva sthūlasūkṣmabhāvarūpeṇa sthitaḥ | sa ca cidavyatirikta iti sarvaṃ cidrūpam eva sthitam iti || MoT_3,14.58 ||



     śāntāśeṣaviśeṣaṃ hi citprakāśacchaṭā jagat /
     kāryakāraṇakāditvaṃ tasmād anyan na vidyate // Mo_3,14.59 //
"hi" yasmāt arthe | 'śeṣaṃ samastaṃ "jagat citprakāśacchaṭā" citprakāśe siddhapadārthapaṅktimayatvāt citprakāśapaṅktiḥ | bhavati | kathambhūtaṃ | "śāntāśeṣaviśeṣaṃ" | "śāntāḥ" cinmātre pralīnāḥ | "aśeṣāḥ" samastāḥ | "viśeṣāḥ" bhāvāḥ yasya | tat | "tasmāt" tato hetoḥ | "kāryakāraṇakāditvam anyat" cinmātrāt pṛthak | "na vidyate" | kāryakāraṇatvāder api jagattvena citprakāśacchaṭātvānapāyāt || MoT_3,14.59 ||



     acchedyo 'ham adāhyo 'yam akledyo 'śoṣya eva ca /
     nityaḥ satatagaḥ sthāṇur acalo 'ham iti sthitam // Mo_3,14.60 //
sarvasya jīvāder jagataḥ citprakāśamayatve sati "iti sthitam" bhavati | ayaṃ niścaya eva pratiṣṭhito bhavati iti | kim "iti" | "ahaṃ" citprakāśarūpaḥ aham | "acchedyaḥ" aśarīravat chedayogyo nāsmi | evam "adāhyo 'yam" ity ādāv api sambandhanīyam | "ahaṃ nityo" 'smi | nityatve viśeṣaṇadvāreṇa hetum āha "satataga" iti | sarvakālaga ity arthaḥ | punaḥ kathambhūtaḥ | "sthāṇuḥ" svasvarūpe dṛḍhaṃ sthitaḥ | atrāpi hetum viśeṣaṇatvenāh"ācala" iti | yataḥ niṣkampa ity arthaḥ || MoT_3,14.60 ||



nanu cidekamayatve sati vādinaḥ kimarthaṃ vivadanti ity | atrāha
     vivadante yathā hy atra vivadante tathā bhramaiḥ /
     bhramanto na vayaṃ tv ete jātā vigatavibhramāḥ // Mo_3,14.61 //
vādina iti śeṣaḥ | vādinaḥ tārkikādayaḥ | "atra" citprakāśe | "yathā" yena prakāreṇa | "vivadante" vivādaṃ kurvanti | "tathā bhramaiḥ" mithyājñānaiḥ | "vivadante" | jñātatattvānāṃ vivādābhāvāt | tathā hi | tārkikāḥ ātmānaṃ jñānaguṇaṃ saṃsāriṇaṃ ca kathayanti | sāṅkhyāḥ udāsīnaṃ jñānarūpam api paramāṇurūpam | cārvākā bhūtarūpaṃ | bauddhāḥ śūnyarūpaṃ | vedāntinaḥ śāntasvarūpaṃ | evam anye 'py anyat kiñcit | yady api ete 'dhikārikṛpayaiva vivadante tathāpi adhikāriṇāṃ tattatpadaniṣṭhānām adhaḥsthaṃ padaṃ parityajyordhvapadagamanārthaṃ vādināṃ bhramaḥ uktaḥ | yadi vādinaḥ bhrameṇa vivadante tarhi yūyaṃ kathaṃ sthitāḥ ity | atrāha "bhramanta" iti | "tu" vyatireke | "ete vayaṃ vigatabhramāḥ" vādyuktanānāguṇottīrṇaśuddhacinmātrāṅgīkārāt dūrībhūtamithyājñānāḥ | "jātāḥ" | kathambhūtāḥ | "na bhramanta" ity arthaḥ | nanu śrīvasiṣṭhena tanmatanirāsapareṇa vivāda eva kṛtaḥ | maivam | bodhanārthatanmatanirāse 'pi cinmātrāṅgīkāreṇaiva sarvamatāṅgīkārāt | cinmātraṃ hi sarve 'ṅgīkurvanty eva | kiṃ tu tadviśeṣeṣu vivadante || MoT_3,14.61 ||


punar api cidekamayatvam eva kathayati
     dṛśye mūrte 'jñasaṃrūḍhe vikārādi pṛthag bhavet /
     nāmūrte tajjñakacite citkhe sadasadātmani // Mo_3,14.62 //
"mūrte" sthūle | "dṛśye" dṛśikriyāviṣaye bhāvajāte | kathambhūte | "'jñasaṃrūḍhe" | "ajñeṣu" mūrkheṣu | "saṃrūḍhe" dṛḍhībhūte | mūrkhajñāte iti yāvat | "vikārādi" | "ādi"śabdāt pariṇāmāder grahaṇam | "pṛthak bhavet" | sthūlasya dṛśyasya vikārādidharmādhikaraṇatve yogyatāstīti bhāvaḥ | "amūrte" sūkṣme | "tajjñakacite" tattvajñeṣu sphurite | "citkhe" cidākāśe | vikārādi pṛthak "na" bhavet | kathambhūte "citkhe" | "sadasadātmani" sadasatsvarūpe | vikārādi yadi sat tadāpi tanmayam eva | yady asat tadāpi tathaiveti bhāvaḥ || MoT_3,14.62 ||



     cittattvaṃ cetyarasataḥ śaktīḥ kālādināmikāḥ /
     tanoty ākāśaviśadāś cinmadhuśrīḥ svamañjarīḥ // Mo_3,14.63 //
"cinmadhuśrīḥ" cidākhyāvasantalakṣmīḥ | "kālādināmikāḥ" kāladeśādināmayuktāḥ | "śaktīḥ svamañjarīḥ tanoti" vistārayati | kutaḥ | "cetyarasataḥ" cetyāsvādena yuktam | yuktaṃ ca vasantalakṣmyāḥ rasena mañjarītananam | "śaktīḥ" kiṃ | "cittattvam" cinmātrarūpiṇya eva | śaktitadvator abhedāt | punaḥ kathambhūtāḥ | "ākāśaviśadāḥ" | na tu bhāsamānasthūlarūpayuktāḥ || MoT_3,14.63 ||



svabhāvena cinmātrasya cetyarūpatayā sphuraṇaṃ kathayati
     svayaṃ vicitraṃ sphurati citkañcukam anāhatam /
     svayaṃ vicitraṃ kacati cidratnam apakāraṇam // Mo_3,14.64 //
"citkañcukam" | "kañcukaṃ" lakṣaṇayā paṭaḥ | cidākhyaḥ paṭaḥ | "svayaṃ" svabhāvena | "vicitraṃ sphurati" citrapaṭavat vicitratāyuktaṃ bhavatīty arthaḥ | vicitratā cārthacetyakṛtā jñeyā | tathā "cidratnaṃ svayaṃ vicitraṃ kacati" | ratnasya ca kacanaṃ yuktam eva | "svayam" ity asyārthaṃ svayam evāh"āpakāraṇaṃ" iti || MoT_3,14.64 ||


     svayaṃ vilakṣaṇaspandaś cidvāyur ajaḍātmakaḥ /
     svayaṃ vicitravalanaṃ cidvāri na nikhātagam // Mo_3,14.65 //
"vilakṣaṇaspandaḥ" bāhyavāyoḥ vyatiriktaspandayuktaḥ | atra hetutvena viśeṣaṇam āha "ajaḍātmaka" iti | jaḍājaḍayoḥ spando 'vaśyaṃ vilakṣaṇa eva syād iti bhāvaḥ | "vāri nikhātagaṃ" sat | "vicitravalanaṃ" vicitrasphuraṇaṃ bhavati | "cidvāri" tu "nikhātagaṃ" sat | "vicitravalanaṃ" "na" bhavati || MoT_3,14.65 ||



     svayaṃ vicitradhātūccaiś cicchṛṅgam apanirmitam /
     svayaṃ citrarasollāsā cijjyotsnā satatoditā // Mo_3,14.66 //
"uccaiḥ" "cicchṛṅgam apanirmitam" nirmāṇarahitam | "vicitradhātu" | "vicitrā" nānāvidhāḥ | "dhātavaḥ" bhūtākhyāni kāraṇadravyāṇi | yasmin | tat | bhavati | śṛṅgam api vicitradhātu vicitragairikādidhātuyuktaṃ bhavati | kiṃ tu nirmitam | "svayaṃ cijjyotsnā" "citrarasollāsā" nānāvidhacetyarasollāsayuktā | tayā "satatoditā" bhavati | bāhyajyotsnāpi vicitrāmṛtarasollāsayuktā bhavati | kiṃ tu śuklapakṣa evoditā bhavati || MoT_3,14.66 ||



     svayaṃ sadaiva prakaṭaś cidāloko 'malātmakaḥ /
     svayam astaṅgatevājñe jñe jñānād uditā citiḥ // Mo_3,14.67 //
ālokasya prakaṭatāguṇayuktatvāt iti bhāvaḥ | "svayam" iti | "citiḥ svayaṃ ajñe" mūrkhe | "'staṅgateva" bhavati | astaṅgatatvaṃ ca asyāḥ sthitāyāḥ api jñānāviṣayībhāva evāta "iva"śabdopādānam | "citiḥ svayaṃ jñe" jñānayukte | "jñānād uditā" bhavati | yathākāśe jvalann api sūryo 'ndhaṃ praty anuditaḥ | netrasahitaṃ prati tūditaḥ | evam iyam apīti bhāvaḥ || MoT_3,14.67 ||



     svayaṃ jaḍeṣu jāḍyena padaṃ sauṣuptam āgatā /
     svayaṃ spandi tathāspandi cittvāc citimahānabhaḥ // Mo_3,14.68 //
citiḥ "jaḍeṣu" sthāvarādiṣu | "jāḍyena" jaḍabhāvena | "svayaṃ sauṣuptapadaṃ" suṣuptisthānam | "āgatā" bhavati | "citimahānabhaḥ" cidākhyo mahākāśaḥ | "svayam spandi" sphurattāyuktaṃ bhavati | "tathā" tena prakāreṇ"āspandi" śāntatāyukto bhavati | bāhyākāśasya tu vātarūpeṇa saspandatvaṃ svarūpeṇāspandatvam || MoT_3,14.68 ||



guṇini guṇavat citi jagataḥ sadasattvaṃ kathayati
     citprakāśaprakāśo hi jagad asti ca nāsti ca /
     cidākāśaikaśūnyatvaṃ jagad asti ca nāsti ca // Mo_3,14.69 //
"hi" niścaye | "citprakāśaprakāśaḥ" | "citprakāśasya" cidākhyasya tejasaḥ | "prakāśaḥ" ālokākhyaguṇabhūtaḥ | "jagat asti ca nāsti ca" | "ca"kāraḥ svayaṃ astitvanāstitvayoḥ samapradhānatvaṃ dyotayati | ayaṃ bhāvaḥ | yathā tejorūpe guṇini ālokākhyo guṇaḥ bhedena bhāsamānatvāt asti | tato vyatirekeṇa labdhum aśakyatvān nāsti | tathā jagad api cidākhye ādhārabhūte guṇini bhāsamānatvād asti | tadvyatirekeṇa labdhum aśakyatvān nāstīti | evam agre 'pi yojyam | "cidākāśe"ti | cidākāśasyaikaṃ "śūnyatvaṃ" śūnyatvākhyo guṇaḥ | "cidākāśaikaśūnyatvam" || MoT_3,14.69 ||



     cidālokamahārūpaṃ jagad asti ca nāsti ca /
     cinmārutaghanaspando jagad asti ca nāsti ca // Mo_3,14.70 //
"mahārūpaṃ" bhāsuraḥ śuklākhyaguṇaḥ | "cinmārute"ti | spandasya ca vāyuguṇatvaṃ prasiddham eva || MoT_3,14.70 ||



     cidghanadhvāntakṛṣṇatvaṃ jagad asti ca nāsti ca /
     cidarkālokadivaso jagad asti ca nāsti ca // Mo_3,14.71 //
"dhvāntasya" ca "kṛṣṇatvaṃ" guṇaḥ | "cidarke"ti | divasasyārkālokānuvidhāyitvāt tadguṇatvam || MoT_3,14.71 ||


pūrvoktaṃ dṛḍhayituṃ sarvathā cidguṇatvam eva jagataḥ kathayati
     citkajjalarajaḥśailaparamāṇur jagadbhramaḥ /
     cidagnyauṣṇyaṃ jagallekhā jagac cicchaṅkhaśuklatā // Mo_3,14.72 //
"cit" eva "kajjalarajaḥśailaḥ" añjanādriḥ | tasya "paramāṇuḥ" | paramāṇoḥ parvataguṇatvaṃ tadāśritatvenopacārāj jñeyam | jagadākāraḥ "jagadbhramaḥ" | jagad iti yāvat | "jagallekhā" jagatpaṅktiḥ || MoT_3,14.72 ||



     jagac cicchailajaṭharaṃ cijjaladravatā jagat /
     jagac cidikṣumādhuryaṃ citkṣīrasnigdhatā jagat // Mo_3,14.73 //
"jagat cicchailasya jaṭharam" antaḥsthaḥ sārarūpaḥ bhāgaḥ | bhavati | "dravatā" dravatvaṃ | "snigdhatā" snehākhyo guṇaḥ || MoT_3,14.73 ||



     jagac ciddhimaśītatvaṃ cijjvālājvalanaṃ jagat /
     jagac citsarpiṣi sneho vīciś citsarito jagat // Mo_3,14.74 //
"cijjvālā" cidākhyāgniśikhā | tasyā "jvalanaṃ" jvalanakriyā | "vīceḥ" racanārūpatvāt jalaguṇatvam || MoT_3,14.74 ||



     jagac citkṣaudramādhuryaṃ jagac citkanakāṅgadam /
     jagac citpuṣpasaugandhyaṃ cillatāgraphalaṃ jagat // Mo_3,14.75 //
rūpatvena guṇatvam | phalasya latāguṇatvaṃ tadāśritatvenopacārāt || MoT_3,14.75 ||


phalitam āha
     citsattaiva jagatsattā jagatsattaiva cidvapuḥ /
     atra bhedavikārādi na khe malam iva sthitam // Mo_3,14.76 //
ataḥ "citsattaiva jagatsattā" bhavati | "jagatsattaiva cidvapur" bhavati | na hi guṇasattā guṇino bhinnā guṇisattā ca guṇād bhinnā bhavatīti bhāvaḥ | "atra" cijjagatoḥ | "bhedavikārādi" | "ādi"śabdena pariṇāmāder grahaṇam | "sthitaṃ na" bhava-ti | kim "iva" | "khe" ākāśe | "malam iva" || MoT_3,14.76 ||


jagataḥ sadasanmayatām upasaṃharati
     itīdaṃ sanmayatvena sadasad bhuvanatrayam /
     avikalpyatadātmatvāt sattāsatte tad eva vā // Mo_3,14.77 //
"iti" pūrvoktaprakāreṇa | "bhuvanatrayaṃ" bhūrbhuvaḥsvarākhyaṃ jāgradādikaṃ vā bhuvanatritayaṃ | "sanmayatvena" satsvarūpacidvikāratvena | "sadasad" bhavati | mūlakāraṇāyāḥ citaḥ sadasadasattve sattāsattādhāratvakṛtaṃ bhedam āśaṅkyāha "avikalpye"ti | "vā"śabdaḥ pakṣāntaradyotakaḥ | "tad eva" tribhuvanam eva | "sattāsatte" bhavati | kutaḥ | "avikalpyatadātmatvāt" | "avikalpyaḥ" sattvāsattvavikalpāyogyaḥ | yaḥ "tadātmā" cidātmā | tasya bhāvaḥ tat"tvaṃ"| tasmāt | ayaṃ bhāvaḥ | sadasad iti padadvayam astināstikriyākartāraṃ kathayati | tathā ca kartṛkarmavikalpaḥ durnivāraḥ | sattāsatte tu śuddhanirālambāstināstikriyāvācake 'vikalpyaṃ citsvarūpam eva kathayataḥ | tadabhinnasya tribhuvanasyāpi sattāsattātvam eva yuktaṃ | na sadasattvam iti || MoT_3,14.77 ||



nanu jagadbrahmaṇor avayavāvayavibhāvo 'stu ity | atrāha
     avayavāvayavitāśabdārthau śaśaśṛṅgavat /
     anubhūtyapalāpāya kalpitau yair dhig astu tān // Mo_3,14.78 //
"yaiḥ" jaḍaiḥ | "anubhūtyapalāpāya" jagaccidaikyākhyam anubhavam apalapituṃ | "avayavāvayavitāśabdaḥ" avayavāvayavibhāvākhyaḥ śabdaḥ | "arthaḥ" tadvācyaḥ sambandhaviśeṣaḥ | tau "avayavāvayavitāśabdārthau" | "kalpitau" svavikalpena sambhāvitau | kathaṃ "kalpitau" | "śaśaśṛṅgavat" | yathā kaścid bahir asad api śaśaśṛṅgaṃ kalpayati | tathety arthaḥ | "tān dhig astu" te dhikkāraviṣayā evety arthaḥ | dhikkāraviṣayatvaṃ ca teṣāṃ avayavābhinnasyāvayavinaḥ bhedena jñānāt | na hy avayavabhinno 'vayavī nāma kaścid astīti bhāvaḥ || MoT_3,14.78 ||



     na vidyate jagad yatra sādridyūrvīnadīśvaram /
     cidekatvāt prasaṅgaḥ syāt kas tatretaravibhrame // Mo_3,14.79 //
"yatra" yasmin cidrūpākhye sthāne | "sādridyūrvīnadīśvaram" parvatākāśabhūmisamudrasahitaṃ | "jagat" | "cidekatvāt" cidaikyāt | "na vidyate" | "tatretaravibhrame" ṣaṣṭhyarthe saptamī | "itarasya" tatkāryarūpasya "bhramasya" | "kaḥ prasaṅgaḥ" || MoT_3,14.79 ||



citaḥ sarvamayatvaṃ śilādṛṣṭāntena kathayati
     śilāhṛdayapīnāpi svākāśaviśadaiva cit /
     dhatte 'ntar akhilaṃ śāntaṃ sanniveṣaṃ yathā śilā // Mo_3,14.80 //
"cit śāntaṃ" paramārthato bhāvābhāvādikṣobharahitaṃ | "akhilaṃ" samastaṃ | "sanniveśaṃ" cetyākhyaṃ racanāviśeṣam | "antaḥ" svamadhya eva | "dhatte" | kathambhūt"aiva" | "śilāhṛdayapīnāpi" | prakāśākhyasārabharitatvena śilāhṛdayavat "pīnāpi" satī | "svākāśaviśadaiva" | "su"ṣṭhu "ākāśa"vat "viśadā" nirmalā "eva" | na tu jagadantardhāraṇe yogyā | atra dṛṣṭāntam āha "yathe"ti | "śilā yathā" sāreṇa pūritāpi lekhaughākhyaṃ "sanniveśaṃ antar dhatte" | tathety arthaḥ || MoT_3,14.80 ||


nanu tathāpy ahaṃ praṣṭā bhinna evāsmy | anyathā praśnāyogād ity | atrāha
     padārthanikarākāśe tvam ākāśalavopamaḥ /
     tvattāmattātmatātvattāmattollekhā na santi te // Mo_3,14.81 //
"padārthanikarākāśe" | "padārthānāṃ nikaraḥ" samūhaḥ | sa eva nakiñcidrūpatven"āvakāśaḥ" | tasmin | tanmadhya ity arthaḥ | "tvaṃ" praṣṭā | "ākāśalavopamaḥ" asi | phalitam āha "tvatte"ti | ataḥ "te" tava praṣṭuḥ | "tvattāmattātmatātvattāmattollekhāḥ" | "tvattāmattātmatayā" tvadbhāvamadbhāvarūpatvena | sthitāḥ ullekhāḥ | "tvattāmattollekhāḥ" tvadbhāvamadbhāvavikalpāḥ | tvadbhāvarūpatvena sthitāḥ tvattāvikalpāḥ | madbhāvarūpatvena sthitā mattāvikalpāḥ | "na santi" | ākāśarūpatvāt || MoT_3,14.81 ||



pallavadṛṣṭāntena prakṛtaṃ citaḥ sarvamayatvaṃ kathayati
     pallavāntaralekhaughasanniveśavad ātatam /
     anyānanyātmakam idaṃ dhatte 'ntaś cit svabhāvataḥ // Mo_3,14.82 //
"cit" | "idaṃ" cetyam | "antaḥ" svamadhye | "dhatte" | kutaḥ | "svabhāvataḥ" | nanu kayāpi prayojanāpekṣayā kathambhūtaṃ | "anyānanyātmakam" | "anyaḥ" svataḥ bhinnaḥ | "ananyaḥ" svato 'bhinnaḥ | "ātmā" yasya | tat "anyānanyātmakam" | punaḥ kathambhūtam | "ātataṃ" vistārayuktam | kathaṃ "dhatte" | "pallavāntare" pallavamadhye sthitaḥ | lekhaughasanniveśaḥ iva "pallavāntaralekhaughasanniveśavat" | pallave lekhaughasya ca bhāsamānatvena bhinnatvaṃ pṛthakkṛtya labdhum aśakyatvād abhinnatvaṃ ca sphuṭam sthitam evety upamānam || MoT_3,14.82 ||



     samastakāraṇaughānāṃ kāraṇādipitāmaham /
     svabhāvato 'kāraṇātma cittvaṃ viddhy anubhūtitaḥ // Mo_3,14.83 //
tvaṃ | "cittvaṃ" cidbhāvaṃ | "svabhāvataḥ" svarūpeṇ"ānubhūtitaḥ" svānubhavena | na tu matkathanamātreṇ"ākāraṇātma" akāraṇaḥ | kāraṇarahitaḥ "ātmā" svarūpaṃ yasya | tat | tādṛśaṃ | "viddhi" jānīhi | kathambhūtaṃ | kāraṇanāmn"ādi"bhūtaḥ yaḥ "pitāmahaḥ" | tatsvarūpaṃ "kāraṇādipitāmahaṃ" | keṣāṃ "kāraṇānāṃ" | "samastakāraṇaughānāṃ" | "samastasya" dṛśyasya | ye "kāraṇaughāḥ" | teṣām | ayaṃ bhāvaḥ | sarvasya dṛśyasya kāraṇāni pañcatanmātrāṇi | teṣāṃ kāraṇam ahaṅkāraḥ | tatkāraṇaṃ "cittvam" iti || MoT_3,14.83 ||



nanu jagadvat cid api asatyaiva bhavatv ity | atrāha
     na cāsattvam acetyāyāś cito vācāpi sidhyati /
     yad asti tad udetīti dṛṣṭaṃ bījād ivāṅkuram // Mo_3,14.84 //
"acetyāyāḥ" cetyamalādūṣitāyāḥ | "citaḥ asattvaṃ vācāpi na sidhyati" vaktum apīdaṃ na yogyam ity arthaḥ | atra hetutvenottarārdham āha "yad" iti | yataḥ "yad asti tad udeti" anyatayā prādurbhavati | "iti dṛṣṭam" asmābhir iti śeṣaḥ | atra dṛṣṭāntam āha "bījād" iti | ayaṃ bhāvaḥ | yathā bījabhāvena sthitam "aṅkuraṃ bījāt" udeti | tathā cinmātrasvarūpeṇa sthitaṃ cetyam api | tathā ca cetyānyathānupapattyā cinmātrasyāsatyatvaṃ na yuktam iti || MoT_3,14.84 ||


sargāntaślokena pūrvoktaṃ saṅgṛhṇāti
     gaganam iva suśūnyabhedam asti
     tribhuvanam aṅga mahācito 'ntar asyāḥ /
     paramapadamayaṃ samastadṛśyaṃ tv
     idam iti niścayavān bhavānubhūteḥ // Mo_3,14.85 //
he "aṅga" | "tribhuvanaṃ asyāḥ mahācitaḥ" cinmātrasy"āntaḥ" madhye | "suśūnyabhedam" | "suśūnyaḥ" atiśayena nakiñcidrūpaḥ | "bhedo" yasya | tat | sarvathā svarūpabhedarahitam ity arthaḥ | "asti" | kim "iva" | "gaganam iva" | yathā gaganaṃ bhedarahitam asti | tathety arthaḥ | phalitam āha "parame"ti | ataḥ tvaṃ "iti niścayavān" evaṃ niścayayukto | "bhava" | kuto | "'nubhūtitaḥ" svānubhavena | na tu maduktyā kṛtena śraddhāmātreṇa iti | kim "iti" | "samastadṛśyaṃ paramapadamayaṃ" sarvottīrṇacitsvarūpam eva | bhavati || MoT_3,14.85 ||



śrīvālmīkir bharadvājaṃ prati tatratyaṃ sargāntaślokena dināvasānaṃ kathayati
     ity uktavaty atha munau divaso jagāma
     sāyantanāya vidhaye 'stam ino jagāma /
     snātuṃ sabhā kṛtanamaskaraṇā jagāma
     śyāmākṣaye ravikaraiś ca sahājagāma // Mo_3,14.86 //
"iti" pūrvoktaṃ | "munau" śrīvasiṣṭhe | "uktavati" kathayati sati | "atha" pūrvaślokoktopadeśānantaram | "divasaḥ" dinaṃ | "jagāma" gataḥ | atra hetum āha "astam" iti | yataḥ "inaḥ" sūryaḥ | "astaṃ jagāma" | "sabhā" śrotṝṇāṃ sabhā | "sāyantanavidhaye" sāyantanāgnihotrādyarthaṃ | "snātuṃ jagāma" | snānaṃ vinā kutrāpi vidhāv adhikārābhāvāt | sā sabhā "śyāmākṣaye" rātryavasāne | dinādāv iti yāvat | "ravikaraiḥ" sūryakiraṇaiḥ | "saha" | punaḥ "ājagāmā"gatā | śravaṇārtham iti śeṣaḥ | iti śivam || MoT_3,14.86 ||



iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe caturdaśaḥ sargaḥ || 3,14 ||

*********************************************************************

oṃ śrīvasiṣṭhaḥ pūrvadine kathyamānam upastauti
     jagad ākāśam evedaṃ yathā hi vyomni mauktikam /
     vimale bhāti khātmaiva jagac cidgagane tathā // Mo_3,15.1 //
"idam" anubhūyamānaṃ | "jagat" | "ākāśam eva" bhavati | atra hetutvena dṛṣṭāntayuktaṃ vākyam āha "yathā hī"ti | "hi" yasmādarthe | yasmāt "jagat vimale cidgagane" cidākāśe | "tathā" "bhāti" | kathambhūtam "eva" | "khātmaiva" cidākāśasvarūpam eva | "tathā" kathaṃ | "yathā vyomni" bhūtākāśe | "mauktikaṃ" muktāsamūho | "bhāti" | ayaṃ bhāvaḥ | yathā gagane bhramadṛṣṭyā dṛśyamānaṃ mauktikam ākāśam eva tathā cidgagane dṛśyamānaṃ jagad api cidgaganam eveti || MoT_3,15.1 ||



     anutkīrṇaiva bhātīva trijagatsālabhañjikā /
     citstambhe na ca sotkīrṇā na cotkartātra vidyate // Mo_3,15.2 //
"citstambhe" cidākhye stambhe | "trijagatsālabhañjikā" trijagadākhyā putrik"ānutkīrṇaiva" satī | "bhātīva" | paramārthatas tu na bhātīt"īva"śabdopādānam | nanu kimarthaṃ notkīrṇāstīty | atrāha "na ce"ti | "sā" jagadākhyā putrikā | "na cotkīrṇā" | arhapratyayārtho 'tra svayaṃ boddhavyaḥ | utkartuṃ yogyā na bhavati | nakiñcidrūpatvāt | "na cātrotkartā" utkaraṇakartā | "vidyate" | dvaitābhāvāt || MoT_3,15.2 ||


     samudre 'ntar jalāspandāḥ svabhāvād acyutā api /
     vidi vedyā bhavantīva pare dṛśyavidas tathā // Mo_3,15.3 //
yathety adhyāhāryam | "samudre 'ntaḥ" samudrāntarbhāge sthitāḥ | "jalāspandāḥ" taraṅgāḥ | "svabhāvād acyutā api" jalākhyāt svarūpād abhraṣṭā api | yathā "vidi" jñāne viṣaye | "vedyāḥ" vīcitayā vedituṃ yogyā | "bhavantīva" | paramārthatas tu na bhavantīti "iva"śabdopādānam | "tathā pare" uttīrṇe citsvarūpe | "dṛśyavidaḥ" dṛśyarūpā vidaḥ | dṛśyānīti yāvat | "bhavantīva" || MoT_3,15.3 ||


     jalāntargatasūryābhājālakāracanāny api /
     jagadbhānaṃ prati sthūlāny aṇuṃ prati yathācalāḥ // Mo_3,15.4 //
jalasyāntargatā sūryābhā "jalāntargatasūryābhā" | tasyāḥ jālakāracanāni "jalāntargatasūryābhājālakāracanāny api" | svabhāvaś cāyaṃ jalāntargatā sūryābhā jālakarūpā sampadyate | tāni "jagadbhānaṃ prati" tathā "sthūlāni" bhavanti | "yathācalāḥ" parvatāḥ | "aṇuṃ prati" sthūlāḥ bhavanti || MoT_3,15.4 ||



uktaṃ dṛṣṭāntasthūlatvaṃ dṛḍhayati
     jagadbhānam abhānābhaṃ brahmaṇo 'vyatirekataḥ /
     jalasūryāṃśujālaṃ tu vyatirekānubhūtidam // Mo_3,15.5 //
"jagadbhānam abhānābhaṃ" bhavati | kutaḥ | "brahmaṇaḥ avyatirekataḥ" brahmarūpatvād ity arthaḥ | "tu" vyatireke | "jalasūryāṃśujālaṃ vyatirekānubhūtidam" bhedaprathākāri bhavati | ato 'tra sthūlatvaṃ yuktam iti bhāvaḥ || MoT_3,15.5 ||



     anubhūtāny apīmāni jagati vyomarūpiṇi /
     pṛthvyādīni na santy eva svapnasaṅkalpayor iva // Mo_3,15.6 //
"vyomarūpiṇi" cinmātrākāśasvarūpe | "jagati" | kayor "iva" | "svapnasaṅkalpayor iva" | svapne saṅkalpe ca "anubhūtāny api pṛthvyādīni" | yathā "na santi" | tathety arthaḥ || MoT_3,15.6 ||


     piṇḍagrāhaḥ sad ity asmin vijñānākāśarūpiṇi /
     marunadyāṃ jalam iva na sambhavati kutracit // Mo_3,15.7 //
grahaṇaṃ "grāhaḥ" | piṇḍavat grāhaḥ "piṇḍagrāhaḥ" | "sad iti" "piṇḍagrāhaḥ" sadvyavahārahetuḥ piṇḍagrāhaḥ | "vijñānākāśarūpiṇi asminn" anubhūyamāne | bhavati | "kutracit" kutrāpi | leśena "sambhavati" | atra dṛṣṭāntam āha "marunadyām" iti || MoT_3,15.7 ||



nanv asatsvarūpe jagati dṛśyatā kathaṃ bhāti ity | atrāha
     jagaty apiṇḍagrāhe 'smin saṅkalpanagaropame /
     marau sarid ivābhāti dṛśyatā bhrāntirūpiṇī // Mo_3,15.8 //
avidyamānaḥ piṇḍavat grāhaḥ yasya | tasmin "apiṇḍagrāhe" | "saṅkalpanagaropame" saṅkalpollikhitanagarasadṛśe | "'smin jagati dṛśyatā" dṛśyabhāvaḥ | "bhrāntirūpiṇī" mithyājñānarūpā | "bhāti" vilasati | k"eva" | "marau" marudeśe | "sarid iva" || MoT_3,15.8 ||


bhramarūpatvenāsadrūpasya jagataḥ svapnavat tulādeśāpūraṇaṃ kathayati
     svapnādriṇeva jagatā tulādeśau na kaucana /
     pūritau kalanonmuktā dṛśyaśrīr vyoma kevalam // Mo_3,15.9 //
"svapnādriṇeva" svapnādrivat | "jagatā tulādeśau pūritau na" bhavataḥ | gurutvasyāsadrūpatvāt "tulā"pūraṇaṃ | vistārasyāsadrūpatvāt "deśā"pūraṇaṃ | etac ca svapnādau sarvapratītisiddham eveti tasya dṛṣṭāntatā | phalitam āha "kalane"ti | "kalanonmuktā" dṛśyatvākhyakalanāmuktā || MoT_3,15.9 ||



     varjayitvājñavijñātajagacchabdārthabhāvanām /
     jagadbrahmakhaśabdānām arthe nāsty eva bhinnatā // Mo_3,15.10 //
"ajñaiḥ" citsvarūpajñānaśūnyaiḥ | "vijñātā" svānubhavaviṣayīkṛtā | "jagacchabdārthabhāvanā" | "jagad" iti "śabdasya" | tad"arthasya" ca "bhāvanā"nusandhānaṃ | tāṃ "ajñavijñātajagacchabdārthabhāvanāṃ varjayitvā" parityajya | "jagadbrahmakhaśabdānām arthe bhinnatā" bhedo | "nāsty eva" | paryāyarūpā evaite śabdā ity arthaḥ | ajñasyājñātatattvatayā jagataḥ ākāśarūpatvaṃ na siddham iti jagatsatyatvaniṣṭhāyāḥ tadbhāvanāyāḥ parityāga uktaḥ || MoT_3,15.10 ||



     idaṃ tv acetyacinmātrabhānor bhānaṃ nabhaḥ prati /
     tathā sūkṣmaṃ yathā meghaṃ prati saṅkalpavāridaḥ // Mo_3,15.11 //
"tu" viśeṣe | "acetyacinmātrabhānoḥ" cetyādūṣitacitsūryasya | "bhānam" ābhāsaḥ | "idaṃ" jagat | "nabhaḥ prati" bāhyākāśāpekṣayā | "tathā" tena prakāreṇa | "sūkṣmaṃ" bhavati | "yathā meghaṃ prati" jāgraddṛṣṭameghāpekṣayā | "saṅkalpavāridaḥ" svavikalpollekhitaḥ meghaḥ sūkṣmo bhavati || MoT_3,15.11 ||


     yathā svapnapuraṃ svacchaṃ jāgratpuravaraṃ prati /
     tathā jagad idaṃ svacchaṃ saṅkalpitajagat prati // Mo_3,15.12 //
"yathā" laukikabuddhyā | "jāgratpuravaraṃ prati svapnapuraṃ svacchaṃ" kevalābhāsarūpatvena sthūlatākhyamalarahitaṃ | bhavati | "tathā" jñānidṛṣṭyā | "idaṃ" jāgraty anubhūyamānaṃ | "jagat" | "saṅkalpitajagat prati svacchaṃ" saṅkalpākhyamalarahitaśuddhacinmātrarūpatvāt nirmalaṃ bhavati | yady api jñāninaḥ svapnapuram api tādṛśam eva tathāpy ajñabodhanārtham evam uktam || MoT_3,15.12 ||


     tasmād acetyacidrūpaṃ jagad vyomaiva kevalam /
     śūnyau vyomajagacchabdau paryāyau viddhi cinmayau // Mo_3,15.13 //
"tasmāt" pūrvoktāt hetoḥ | "acetyacidrūpaṃ" śuddhacinmātrarūpaṃ | "jagat" | "kevalaṃ vyomaiva" bhavati | phalitam āha "śūnyāv" iti | ataḥ "śūnyau" piṇḍagrāhābhāvena nakiñcidrūpau | "cinmayau" citsvarūpau | "vyomajagacchabdau paryāyau viddhi" ekārthavācakatvāt || MoT_3,15.13 ||



vakṣyamāṇavṛttāntākāṅkṣayā pūrvoktam upasaṃharati tribhiḥ
     tasmān na kiñcid utpannaṃ jagadādīha dṛśyakam /
     anākhyam anabhivyaktaṃ yathāsthitam avasthitam // Mo_3,15.14 //
"tasmāt" cidekamayatvāt hetoḥ | "jagadādi dṛśyaṃ kiñcit" leśenāpi | "utpannaṃ na" bhavati | kathambhūtaṃ | "anākhyaṃ" nāmānarham | atra hetutvena viśeṣaṇam āh"ānabhivyaktam" indriyāgocaram | anyarūpatvena anabhivyaktasya hi nāmāyuktam | nanu tarhi apūrvatvaṃ jagataḥ syād ity āśaṅkya viśeṣaṇam āh"āvasthitam" iti | "avasthitaṃ" tiṣṭhat | kathaṃ | "yathāsthitaṃ" | yathaiva pūrvaṃ tathaiva | na tv apūrvatayety arthaḥ | yathā pūrvaṃ sarpatayā jñātā rajjuḥ tataḥ rajjutayā jñātāpi pūrvavad eva tiṣṭhati | na tv anyarūpatāṃ prāpnoti | tathety bhāvaḥ || MoT_3,15.14 ||


     jagad eva mahākāśaṃ cidākāśam abhittimat /
     tad deśasyāṇumātrasya tulāyāś cāprapūrakam // Mo_3,15.15 //
"jagat" "cidākāśam eva" bhavati | kathambhūtaṃ "cidākāśaṃ" | "mahākāśaṃ" bāhyākāśāpekṣayā mahattvāt mahākāśākhyāyuktam | punaḥ kathambhūtam | "abhittimat" | jīvādiprapañcaḥ tattaddharmādhāratayā "bhittiḥ" | tadrahitam | phalitam āha "tad" iti | ataḥ "tat" cidākāśamayaṃ jagat | gurutvābhāvena vaipulyābhāvena c"āṇumātrasya deśasya tulāyāś cāpūrakam" bhavati | pūraṇakāri na bhavati || MoT_3,15.15 ||



tad eva punaḥ viśinaṣṭi
     ākāśarūpam evācchaṃ piṇḍagrahavivarjitam /
     vyomni vyomamayaṃ citraṃ saṅkalpapuravat sthitam // Mo_3,15.16 //
"ākāśarūpam eva" nakiñcidrūpam eva | "acchaṃ" śuddhabodhasvarūpaṃ | "piṇḍagrahavivarjitam" | "piṇḍa"vat yaḥ "grahaḥ" | tena "varjitam" | yuktaṃ cākāśasya piṇḍagraharahitatvaṃ | "vyomni" cidākāśe | "vyomamayaṃ" cidākāśamayaṃ | "citram" ālekhyaṃ | "saṅkalpapuravat" saṅkalpollikhitapuravat | "sthitam" vyavatiṣṭhamānaṃ | saṅkalpapurasya cākāśamayatvaṃ tulādeśāpūrakatvaṃ ca yuktam eveti siddhaḥ sarvasya jagataḥ vivakṣitaḥ atyantābhāvaḥ | yac cotpattiḥ pūrvam uktā sāpy anutpattikalpatvenātyantābhāvasyaiva sādhanīti na pūrvāparavirodhaḥ || MoT_3,15.16 ||



atha jagataḥ tulādeśādyapūrakatvasādhakaṃ mahāvṛttāntaṃ vṛttāntakāmān prati kṛpayā kathayati
     atredaṃ maṇḍapākhyānaṃ śṛṇu śravaṇabhūṣaṇam /
     niḥsandeho yathaiṣo 'rthaś citte viśrāntim eṣyati // Mo_3,15.17 //
tvam | "atra" jagato deśādyapūrakatve | "maṇḍapākhyānaṃ" | maṇḍapeti nāmnā prasiddham ākhyānaṃ "maṇḍapākhyānaṃ" | "śṛṇu" | kathambhūtaṃ | "śravaṇabhūṣaṇaṃ" śravaṇārham ity arthaḥ | tataḥ kim ity | atrāha "niḥsandeha" iti | "yathā" yena | "niḥsandehaḥ" sandehān niṣkrāntaḥ | "eṣaḥ" pūrvoktaḥ | "arthaḥ" | "citte" tvaccitte | "viśrāntim eṣyati" || MoT_3,15.17 ||



tvarayāviṣṭaḥ śrīrāmaḥ maṇḍapākhyānaṃ prati śrīvasiṣṭhaṃ prārthayati
     sadbodhavṛddhaye brahman samāsena vadāśu me /
     maṇḍapākhyānam akhilaṃ yena bodho vivardhate // Mo_3,15.18 //
jagataḥ tulādeśāpūrakatvajñānaṃ "sadbodhaḥ" | tasya "vṛddhaye" | phalitam āha "yene"ti | "yena" uditenety arthaḥ || MoT_3,15.18 ||



śrīvasiṣṭhaḥ maṇḍapākhyānam eva kathayati
     abhūd asmin mahīpīṭhe kulapadmo vikāsavān /
     padmo nāma nṛpaḥ śrīmān bahuputro 'tikośavān // Mo_3,15.19 //
"asmin mahīpīṭhe padmo nāma nṛpaḥ abhūt" | tasyaiva nānāvidhāni viśeṣaṇāny āha "kule"ti | "vikāsavān kulapadmaḥ" | padmasya ca vikāso yuktaḥ | "padma"śabdo 'tra lakṣaṇayā śreṣṭhavācakaḥ | "atikośavān" bahubhāṇḍāgārayuktaḥ || MoT_3,15.19 ||



     maryādāpālane 'mbhodhir dviṣattimirabhāskaraḥ /
     kāntākumudinīcandro doṣatṛṣṇāhutāśanaḥ // Mo_3,15.20 //
"ambhodheḥ maryādapālanaṃ" prasiddham eva | "kāntākumudinīcandraḥ" | "candratvam" asya tadvikāsakāritvena | "doṣatṛṣṇāhutāśanatvaṃ" doṣatṛṣṇādāhakatvena || MoT_3,15.20 ||



     merur vibudhavṛndānāṃ yaśaścandrodbhavārṇavaḥ /
     saraḥ sadguṇahaṃsānāṃ kalākamalabhāskaraḥ // Mo_3,15.21 //
"vibudhāḥ" paṇḍitāḥ | ta eva vibudhā devāḥ | teṣāṃ | "meruḥ" bahukāñcanapradatvenāśrayatvena ca meruparvatasadṛśaḥ | "yaśa" iti | "yaśaḥcandrodbhave 'rṇavaḥ" samudraḥ | "sadguṇa"rūpāṇāṃ "haṃsānāṃ saraḥ" | "kalā" eva "kamalāni" | teṣāṃ vikāsapradatvena "bhāskaraḥ" || MoT_3,15.21 ||


     śātravāmbhodapavano mattamātaṅgakesarī /
     samastavidyādayitaḥ sarvāścaryaguṇākaraḥ // Mo_3,15.22 //
"śātravaṃ" śatrusamūhaḥ | sa ev"āmbhodaḥ" meghaḥ | tasya "pavanaḥ" nāśakāritvāt | "mātaṅgā" atra śatrusenā yā vivakṣitāḥ | "samastā" yā "vidyā"rūpāḥ nāyikāḥ | tāsāṃ "dayitaḥ" patiḥ | "sarve" ca te "āścarya"bhūtāḥ "guṇāḥ" | teṣām "ākaraḥ" utpattisthānam || MoT_3,15.22 ||


     śūrārisāgarakṣobhavilasanmandarācalaḥ /
     vilāsapuṣpaughamadhuḥ saubhāgyakusumāyudhaḥ // Mo_3,15.23 //
"śūrāś" ca te "'rayaḥ" | tadrūpaḥ yaḥ "sāgaraḥ" | tasya "kṣobhe vilasan mandarācalaḥ" | "vilāsā" vibhramā eva | "puṣpāṇi" | teṣāṃ yaḥ "oghaḥ" | tasya "madhuḥ" vasantaḥ | vikāsakāritvāt | "saubhāgyena" subhagabhāvena | "kusumāyudhaḥ" kāmaḥ || MoT_3,15.23 ||



     līlālatālāsyamarut sāhasotsavakeśavaḥ /
     saujanyakairavaśaśī durlīlālatikānalaḥ // Mo_3,15.24 //
"līlā" iva "latā" | tasyā "lāsye" nartane | "marut" | līlāyukta ity arthaḥ | "sāhasam" eva hitāhitānapekṣaṃ karma eva | "utsavaḥ" mahaḥ | tasya "keśavaḥ" viṣṇuḥ | tasya hiraṇyākhyādivadhasāhasakāritvād upamānatvaṃ | "saujanyam" eva "kairavaṃ" | tasya vikāsakāritvāt "śaśī" candraḥ | "durlīlālatikānāṃ" dāhakatvād "analaḥ" agniḥ || MoT_3,15.24 ||



     tasyāsīt subhagā bhāryā līlā nāma vilāsinī /
     sarvasaubhāgyavalitā kamalevoditāvanau // Mo_3,15.25 //
"tasya" padmākhyasya rājñaḥ | "līlā nāma bhāryā" līlākhyā bhāry"āsīt" | asyā viśeṣaṇāny āha "subhage"ti | "subhagā" praśastarūpayuktā | "vilāsinī" vilāsayuktā | "sarvasaubhāgyaiḥ valitā" bharit"āvanau" bhūmau | "kamalevoditā" utpannā || MoT_3,15.25 ||


     sarvasampattivalitā līlāmadhurabhāṣiṇī /
     sānandamandacalitā dvitīyendūdayasmitā // Mo_3,15.26 //
"līle"ti | "līlayā madhuraṃ bhāṣiṇī" | "sānande"ti | "sānandaṃ mandaṃ calitaṃ" yasyāḥ | sā | "dvitīye"ti | "dvitīyendūdaya"bhūtaṃ "smitaṃ" yasyāḥ | sā || MoT_3,15.26 ||



     alakālimanohārivadanāmbhojaśālinī /
     śītāṅgī karṇikāgaurī jaṅgameva sarojinī // Mo_3,15.27 //
"alakālyā" "manohāri" yat "vadanāmbhojaṃ" | tena "śālinī" | "śītāṅgī" śiśirāṅgī | "karṇike"ti | "karṇikā"vad "gaurī" | k"eva" | "jaṅgamā" sañcāriṇī | "sarojinīva" | sarojiny api "alimanohāri" "ambhojaśālinī śītāṅgī karṇikayā gaurī" bhavati || MoT_3,15.27 ||



     latāvilāsakundaughahāsinī rasaśālinī /
     prabālahastā puṣpāḍhyā madhuśrīr iva dehinī // Mo_3,15.28 //
"śālinī" śṛṅgārasuśālinī | "prabāle"ti | prabālavat "hastau" yasyāḥ | sā | "puṣpe"ti | "puṣpair" ābharaṇabhūtaiḥ puṣpair | "āḍhyā "| k"eva" | "dehinī" mūrtimatī | "madhuśrīr iva" | sāpi "kundaughaiḥ hāsinī" | "rasena" vasantarasena | "śālinī" ca bhavati | śeṣaṃ samānam || MoT_3,15.28 ||



     avadātā tanuḥ puṇyā janatāhlādadāyinī /
     gaṅgeva gāṃ gatā devanadī haṃsavilāsinī // Mo_3,15.29 //
"avadātā tanuḥ" sitāṅgī | "puṇyā" bhāgyavatī | "janate"ti | "janatāyāḥ āhlādadāyinī" | "haṃse"ti | "haṃsa"vat "vilāsa"yuktā | k"eva" | "gāṃ" bhūmiṃ | "gatā" | "devanadī gaṅgeva" | sāpi tādṛśy eva bhavati || MoT_3,15.29 ||


     tasya bhūtalapuṣpeṣoḥ sakalāhlādadāyinaḥ /
     paricaryāṃ ciraṃ kartum anyā ratir ivoditā // Mo_3,15.30 //
"puṣpeṣoḥ" "rateḥ" "paricaryāṃ kartuṃ" yuktatvāt etad uktam || MoT_3,15.30 ||



sargāntaślokena tasyāḥ satīguṇān āha
     udvigne prodvignā muditā mudite samākulākulite /
     pratibimbasamā kāntā saṅkruddhe kevalaṃ bhītā // Mo_3,15.31 //
sā "kāntā" | tasyeti śeṣaḥ | tasya rājñaḥ | "pratibimbasamā"sīt | kathambhūtā | tasmin pr"odvigne" sati | "prodvignā" | tasmin "mudite" sati | "muditā" | tasmin sam"ākule" sati | "samākulā" | tasmin "saṅkruddhe" sati | "kevalaṃ bhītā" | etāvanmātreṇaiva "kevalaṃ" sā viruddhāsīd iti bhāvaḥ | iti śivam || MoT_3,15.31 ||


iti śrībhāskarakaṇṭhaviracitāyāṃ śrīmokṣopāyaṭīkāyām utpattiprakaraṇe pañcadaśaḥ sargaḥ || 3,15 ||

*********************************************************************

oṃ tasya rājñaḥ tayā rājñyā saha krīḍām āha
     bhūtalāpsarasā sārdham ananyavanitāpatiḥ /
     akṛtrimapremarasaṃ sa reme kāntayā tayā // Mo_3,16.1 //
"sa" rājā | "tayā" līlākhyayā | "kāntayā sahākṛtrimaḥ premarasaḥ" yatra tat "akṛtrimapremarasaṃ" | vakṣyamāṇeṣu sthāneṣu vakṣyamāṇaiḥ krīḍāviśeṣaiḥ | "reme" | "tayā" kiṃrūpayā | "bhūtalāpsarasā" | "sa" kathambhūtaḥ | "ananyavanitāpatiḥ" nānyavanitāyāḥ patiḥ | tasyām eva rata ity arthaḥ || MoT_3,16.1 ||



krīḍāsthānāny āha
     udyānavanagulmeṣu tamālagahaneṣu ca /
     puṣpamaṇḍapatalpeṣu latāvalayasadmasu // Mo_3,16.2 //
"udyānavaneṣu" vihitāni yāni "gulmāni" veśmāni | teṣu | "puṣpe"ti | "puṣpaiḥ" kṛtāni yāni "maṇḍapatalpāni" | teṣu | "maṇḍapaḥ" janāśrayaḥ | "latāvalayasadmasu" latāmaṇḍalagṛheṣu || MoT_3,16.2 ||



     puṣpāntaḥpuraśayyāsu puṣpasambhāravīthiṣu /
     vasantodyānadolāsu krīḍāpuṣkariṇīṣu ca // Mo_3,16.3 //
"puṣpaiḥ" racitā yāḥ "antaḥpuraśayyāḥ" | tāsu | "puṣpe"ti | "puṣpasambhāreṇa" puṣpasamūhena yuktāḥ "vīthyaḥ" mārgāḥ | tāsu | "vasante"ti | "vasante" racitāḥ "udyānadolāḥ" | tāsu || MoT_3,16.3 ||



     candanadrumaṣaṇḍeṣu santānakataleṣu ca /
     kadambanimbageheṣu pāribhadrodareṣu ca // Mo_3,16.4 //
"ṣaṇḍāḥ" samūhāḥ | "santānakāḥ" drumaviśeṣāḥ | "kadambe"ti | "kadambanimba"taleṣu racitāni yāni "gehāni" | teṣu | "pāribhadre"ti | "pāribhadrāḥ" vṛkṣaviśeṣāḥ || MoT_3,16.4 ||



     śailakandarakaccheṣu vātāyanapureṣu ca /
     sarittaṭakaṭapreṣu vāraṇoparisadmasu // Mo_3,16.5 //
"śailakandareṣu" sthitāḥ ye "kacchāḥ" | teṣu | "vātāyane"ti | "vātāyana"yuktāni ca tāni "purāṇi" gṛhoparigṛhāṇi | teṣu | "sarid" iti | "sarittaṭānāṃ" ye "kaṭaprāḥ" samūhāḥ | teṣu | "vāraṇe"ti | "vāraṇopari"kṛteṣu "sadmasu" || MoT_3,16.5 ||


     grīṣme tuṣāraharmyeṣu latāmaṇḍapakeṣu ca /
     hemamandiravṛkṣeṣu muktāmāṇikyabhittiṣu // Mo_3,16.6 //
"tuṣāraharmyeṣu" śītalagṛheṣu | "heme"ti | "hemamandiro"pariropitāḥ ye "hemamandiravṛkṣāḥ" | teṣu | "mukte"ti | "muktāmāṇikyaiḥ" racitāḥ "bhittayaḥ" yeṣāṃ gṛhāṇāṃ | teṣu || MoT_3,16.6 ||


     vikasatkundamandāramakarandasugandhiṣu /
     vasantavanajāleṣu kūjatkokilamāliṣu // Mo_3,16.7 //
"vasante" puṣpitāni yāni "vanajālāni" | teṣu | "vikasad" iti "kūjad" iti ca viśeṣaṇadvayaṃ "vasantavanajāleṣv" ity asyaiva || MoT_3,16.7 ||



     nānāratnatṛṇānāṃ ca sthaleṣu mṛdudīptiṣu /
     nirjhareṣu tarattāraśīkarāsāravarṣiṣu // Mo_3,16.8 //
"nānā" ca tāni "ratna"bhūtāni "tṛṇāni" | teṣāṃ | "sthaleṣu" kathambhūteṣu | "mṛdudīptiṣu" kamaleṣv ity arthaḥ | "nirjhare"ti | "nirjhareṣu" kathambhūteṣu | "tarad" iti | "tarantaḥ" utthitavantaḥ ye "tārāḥ" udbhaṭāḥ | "śīkarāḥ" jalakaṇāḥ | teṣām "āsāraḥ" dhārāsārāḥ | taṃ "varṣanti" | tādṛśeṣu || MoT_3,16.8 ||



     śailānāṃ hemamāṇikyaśilāphalahakeṣu ca /
     devarṣimunigeheṣu dūrapuṇyāśrameṣu ca // Mo_3,16.9 //
"śailānāṃ hemamāṇikyo"tpattisthānabhūtāni yāni "śilāphalahakāni" | teṣu || MoT_3,16.9 ||


     kumudvatīṣu phullāsu smerāsu nalinīṣu ca /
     vanasthalīṣu phullāsu phullāsūtpalinīṣu ca // Mo_3,16.10 //
"smerāsu" phullāsu || MoT_3,16.10 ||



krīḍāsthānāny uktvā krīḍāprakārān āha
     prahelikābhir ākhyānais tathaivākṣaramuṣṭibhiḥ /
     aṣṭāpadair bahūddyotais tathā gūḍhacaturthakaiḥ // Mo_3,16.11 //
"ākhyānaiḥ" vṛttāntakathanaiḥ | "akṣaramuṣṭibhiḥ" krīḍāviśeṣaiḥ || MoT_3,16.11 ||


     nāṭakākhyāyikābhiś ca ślokair bindumatībhramaiḥ /
     deśabhāṣāvibhāgaiś ca nagaragrāmaceṣṭitaiḥ // Mo_3,16.12 //
"nāṭakeṣū"ktā yā "ākhyāyikāḥ" | tābhiḥ | "bindumatībhramaiḥ" krīḍāviśeṣaiḥ | "deśe"ti | "deśabhāṣāṇāṃ vibhāgaiḥ" vibhāgakaraṇaiḥ | "nagare"ti | "nagaraceṣṭitaiḥ grāmaceṣṭitaiś" ceti yojyam || MoT_3,16.12 ||


     sragdāmamālyavalanair nānābharaṇayojanaiḥ /
     līlāvilolacalanair vicitrarasabhājanaiḥ // Mo_3,16.13 //
"valanaiḥ" parivartanaiḥ | "nāne"ti | "nānābharaṇānāṃ yojanaiḥ" anyo'nyaṃ saṃyojanaiḥ | "līle"ti | "līlayā vilolāni" yāni "calanāni" gamanāni | taiḥ kathambhūtaiḥ | "vicitre"ti | "vicitrāṇāṃ" nānāvidhānāṃ | "rasānāṃ" śṛṅgārādīnāṃ | "bhājanaiḥ" pātraiḥ || MoT_3,16.13 ||



     ārdrakramukakarpūratāmbūlīdalacarvaṇaiḥ /
     phullapuṣpalatākuñjadehagopanakharvaṇaiḥ // Mo_3,16.14 //
"carvaṇaiḥ" carvitaiḥ | "phulle"ti | "phullapuṣpāś" ca tāḥ "latāḥ" | tāsāṃ yāni "kuñjāni" | teṣu | "dehagopanā" śarīraguptikaraṇaṃ | tadarthaṃ yāni "kharvaṇāni" hrasvībhavanāni | taiḥ || MoT_3,16.14 ||



     samālambhanalīlābhir dolārohaṇavibhramaiḥ /
     gṛhe kusumadolābhir anyo'nyāndolanakramaiḥ // Mo_3,16.15 //
"samālambhanaṃ" aṅgarāgakaraṇam | "anyo'nye"ti | "anyo'nyaṃ" parasparam | "āndolanam" dolākampanaṃ | tasya "kramaiḥ" || MoT_3,16.15 ||



     nauyānayugyahastyaśvadāntoṣṭrādigamāgamaiḥ /
     jalakelivilāsena parasparasamukṣaṇaiḥ // Mo_3,16.16 //
"nauyānaṃ" ca "yugya"bhūtair vāhanabhūtaiḥ | "hastyaśvadāntoṣṭrādibhiḥ" | "gamāgamāś" ca | taiḥ | "dānto" valīvṛndaḥ | "paraspare"ti | "parasparam" anyo'nyaṃ | "samukṣaṇāni" secanāni | taiḥ || MoT_3,16.16 ||


     nṛttagītakalālāsyatāṇḍavodbhaṭavṛttibhiḥ /
     saṅgītakaiḥ saṅkathanair vīṇāmurajavādanaiḥ // Mo_3,16.17 //
"nṛttādyā" yā "udbhaṭāḥ" udriktāḥ | "vṛttayaḥ" vyāpārāḥ | tābhiḥ || MoT_3,16.17 ||


punar api krīḍāsthānāny āha
     udyāneṣu sarittīravṛkṣeṣu vanavīthiṣu /
     antaḥpureṣu harmyeṣu teṣu teṣu tathā tathā // Mo_3,16.18 //
"tathā tathā" pūrvoktaiḥ nānāvidhaiḥ krīḍāviśeṣaiḥ || MoT_3,16.18 ||


     sā bālā sukhasaṃvṛddhā tasya praṇayinī priyā /
     ekadā cintayām āsa śubhasaṅkalpaśālinī // Mo_3,16.19 //
"tasya" padmākhyasya rājñaḥ | "praṇayinī" patnī | "sā" līlākhyā | "bālā" | "ekadā" ekasmin dine | "cintayām āsa" cintāṃ kṛtavatī | kathambhūtā | "sukhasaṃvṛddhā" | punaḥ kathambhūtā | "śubhe"ti | "śubhasaṅkalpena" vakṣyamāṇena praśastena saṅkalpena | "śālinī" || MoT_3,16.19 ||



kiṃ cintayām āsety | atrāha
     prāṇebhyo 'pi priyo bhartā mamaiṣa jagatīpatiḥ /
     yauvanollāsalakṣmīvān kathaṃ syād ajarāmaraḥ // Mo_3,16.20 //
"mama esaḥ bhartā ajarāmaraḥ" jarāmaraṇākhyadoṣarahitaḥ | "kathaṃ syāt" kena hetunā syād ity anvayaḥ | "prāṇebhyaḥ" jīvebhyaḥ || MoT_3,16.20 ||


     bhartrānena sahottuṅgastanī kusumasadmasu /
     kathaṃ svairaṃ ciraṃ kāntā rameyābdaśatāny aham // Mo_3,16.21 //
"ahaṃ kāntānena bhartrā sahābdaśatāni kathaṃ rameya" kenopāyena varṣaśatāni krīḍāṃ kuryām ity arthaḥ || MoT_3,16.21 ||


     tathā yateya kramatas tapojapayamehitaiḥ /
     rajanīśarucī rājā yathā syād ajarāmaraḥ // Mo_3,16.22 //
ata ity adhyāhāryam | ato 'haṃ "tathā tapojapayamehitaiḥ" karaṇabhūtaiḥ | ato yatnaṃ karomi | "yathā rajanīśaruciḥ" candraprabhā | "rājājarāmaraḥ syāt" || MoT_3,16.22 ||



     jñānavṛddhāṃs tapovṛddhān vidyāvṛddhān ahaṃ dvijān /
     pṛcchāmi tāvan maraṇaṃ kathaṃ na syān nṛṇām iti // Mo_3,16.23 //
"ahaṃ jñānavṛddhān tapovṛddhān" tathā "vidyāvṛddhān dvijān iti tāvat pṛcchāmi iti" | kim "iti" | "nṛṇāṃ maraṇaṃ kathaṃ na syāt" kena hetunā na syāt || MoT_3,16.23 ||


tasyāḥ saṅkalpam uktvā bāhyaprayatnam āha
     athānāyyāśu sampūjya dvijān papraccha sānatā /
     amaratvaṃ kathaṃ viprā bhaved iti punaḥ punaḥ // Mo_3,16.24 //
"atha" saṅkalpānantaram | "ānāyye"ty atra | parijanair iti śeṣaḥ | "punaḥ punar" iti icchodrekadyotanaparam || MoT_3,16.24 ||


viprā uttaraṃ kathayanti
     tapojapayamair devi samastāḥ siddhasiddhayaḥ /
     samprāpyante 'maratvaṃ tu na kadācana labhyate // Mo_3,16.25 //
"siddhasiddhayaḥ" | "siddhānāṃ" siddhiyuktānāṃ | "siddhayaḥ" | "tu" vyatireke || MoT_3,16.25 ||


dvijebhyaḥ svepsitāsiddhiṃ śrutvā punar api taccintām āha
     ity ākarṇya dvijamukhāc cintayām āsa sā punaḥ /
     idaṃ svaprajñayaivāśu bhītā priyaviyogataḥ // Mo_3,16.26 //
"svaprajñayaiva" | na tu taduktānusāreṇa || MoT_3,16.26 ||



kiṃ cintayām āsety | atrāha
     maraṇaṃ bhartur agre me yadi daivād bhaviṣyati /
     tat sarvaduḥkhanirmuktā saṃsthāsye sukham ātmani // Mo_3,16.27 //
bhartṛmṛtiduḥkhādarśanād iti bhāvaḥ || MoT_3,16.27 ||


     atha varṣasahasreṇa bhartādau mriyate yadi /
     tat kariṣye tathā yena jīvo gehān na yāsyati // Mo_3,16.28 //
"varṣasahasreṇe"ti padam āśīrdyotakam | "atha yadi" " bhartādau" varṣasahasrānte "mriyate tat" tadā | "tathā" tam upāyaṃ | "kariṣye yena jīvaḥ" bhartṛjīvaḥ | "gehāt na yāsyati" || MoT_3,16.28 ||



tataḥ kim ity | atrāha
     tadbhramād bhartṛjīve 'smin nije śuddhāntamaṇḍape /
     bhartrāvalokitā nityaṃ nivatsyāmi yathāsukham // Mo_3,16.29 //
ahaṃ "tadbhramāt" | bhartāvalokate mām iti bhramāt | "nityaṃ" sadā | "yathāsukhaṃ nivartsyāmi" | kathambhūtāhaṃ | "asmin bhartṛjīve nije" svakīye | "śuddhāntamaṇḍape" mayā sādhitenopāyena sthite sati | "bhartrāvalokitā" vīkṣitā || MoT_3,16.29 ||



     adyaivārabhyaitadarthaṃ devīṃ jñaptiṃ sarasvatīm /
     japopavāsaniyamair ā toṣaṃ pūjayāmy aham // Mo_3,16.30 //
"adyaiva" | na tu śvaḥ | "etadarthaṃ" bhartṛjīvasya svagehān nirgamābhāvārtham | "jñaptiṃ devīṃ" svapratibhāṃ devīṃ | "ā toṣaṃ" prasādaparyantam | nanu jñaptyārādhanatayā kutaḥ śrutam | jñaptiprasādād eveti brūmaḥ | sarvatra jñaptiprasādasyaiva kāraṇatvāt | agre vakṣyamāṇaḥ jñaptyupadeśaś ca svapratibhākṛtaḥ jñeyaḥ | yataḥ yat yat līlayā kṛtaṃ śrutaṃ vā tat svapratibhayaiva | yad api gurvādimukhena śrūyate tad api svapratibhayaiva | sarvatra svapratibhāyāḥ sthitatvāt || MoT_3,16.30 ||


cintānantaraṃ tatprayatnaṃ kathayati
     iti niścitya sā nātham anuktvaiva varāṅganā /
     yathāśāstraṃ cacārograṃ tapo niyamam āsthitā // Mo_3,16.31 //
"niyamam āsthitā"śritā | taṃ vinā tapaso vyarthatvāt || MoT_3,16.31 ||



tat tapaḥ viśeṣaṇadvāreṇa kathayati
     trirātrasya trirātrasya paryante kṛtapāraṇā /
     devadvijaguruprājñavidvatpūjāparāyaṇā // Mo_3,16.32 //
"trirātrasya trirātrasye"ti vīpsāyāṃ dvitvam || MoT_3,16.32 ||



     snānadānatapodhyānanityodyuktaśarīrikā /
     sarvāstikyasadācārakāriṇī kleśakāriṇī // Mo_3,16.33 //
"snānādiṣu nityam udyuktaṃ" ceṣṭāyuktaṃ | śarīraṃ yasyāḥ | sā | "sarve"ti | "āstikyaḥ" āstikayogyaḥ | "kleśaḥ" taporūpaḥ || MoT_3,16.33 ||



     yathākālaṃ yathodyogaṃ yathāśāstraṃ yathākramam /
     toṣayām āsa bhartāram aparijñātatatsthitim // Mo_3,16.34 //
"aparijñātā" | "tasyā" līlāyāḥ | trayam etat tapaḥ karotīty evaṃrūpā "sthitir" | yena | saḥ || MoT_3,16.34 ||


     trirātraśatam evaṃ sā bālā niyamaśālinī /
     anāratataponiṣṭham atiṣṭhat kaṣṭaceṣṭayā // Mo_3,16.35 //
"anārate"ti | "anārataṃ tapasi niṣṭhā "yatra | tat | kriyāviśeṣaṇam etat | "kaṣṭaceṣṭayā" rātritrayānantaraṃ pāraṇādirūpayā duḥkhadayā ceṣṭayā || MoT_3,16.35 ||


atha jñaptiprasādam āha
     trirātrāṇāṃ śatenātha pūjitā pratimām itā /
     tuṣṭā bhagavatī gaurī vāgīśīdam uvāca tām // Mo_3,16.36 //
"atha" niyamānantaram | "vāgīśī" jñaptiḥ | "gaurī" śuddhasvarūpā | vāgīśītvam asyāḥ vācāṃ mūlakāraṇatvena jñeyaṃ | "pratimām itā" śilādipratimām āśritā | svayā pratibhayā pratimāyām ābhāsena tasyāḥ darśanaṃ dattavān iti bhāvaḥ || MoT_3,16.36 ||



jñaptyā kathyamānaṃ vākyam āha
     nirantareṇa tapasā bhartṛbhaktyatiśāyinā /
     parituṣṭāsmi te vatse gṛhāṇa varam īpsitam // Mo_3,16.37 //
"nirantareṇā"cchinnena || MoT_3,16.37 ||


jñaptivākyaṃ śrutvā rājñī tāṃ stauti
     jaya janmajarājvālādāhadoṣaśaśiprabhe /
     jaya hārdāndhakāraughanivāraṇaraviprabhe // Mo_3,16.38 //
"śaśiprabhāyāḥ dāhadoṣa"nivārakatvaṃ "raviprabhāyāḥ" c"āndhakāra"nivartakatvaṃ prasiddham eva || MoT_3,16.38 ||



     amba māṃ trijaganmātas trāyasva kṛpaṇām imām /
     idaṃ varadvayaṃ dehi yad iha prārthaye śubham // Mo_3,16.39 //
"kṛpaṇāṃ" dīnāṃ | "śubham" iti "varadvaya"viśeṣaṇam || MoT_3,16.39 ||


varadvayamadhye ekaṃ kathayati
     ekaṃ tāvad videhasya bhartur jīvo mamāmbike /
     asmād eva hi mā yāsīn nijāntaḥpuramaṇḍapāt // Mo_3,16.40 //
varadvayamadhye "ekam" idaṃ varaṃ dehi | kim ity apekṣāyām āha "videhe"ti | "videhasya" mṛtasya | "mā yāsīt" mā gacchatu || MoT_3,16.40 ||


dvitīyaṃ kathayati
     dvitīyaṃ tvāṃ mahādevi prārthaye 'haṃ yadā yadā /
     darśanāya varārthena tadā me dehi darśanam // Mo_3,16.41 //
"dvitīyam" idaṃ dehi | kim ity apekṣāyām āha "tvām" iti | he "devi" | "ahaṃ tvāṃ yadā darśanāya prārthaye tadā tvaṃ varārthena" varānurodhena | "darśanaṃ dehi" || MoT_3,16.41 ||


varadvayam aṅgīkṛtya jñaptya ...



______________________________________________________________________________



4. Stitiprakarana (1,1.1-4,24.19, 4,25.12-4,33.26)




oṃ atha sthitiprakaraṇaṃ vyākhyāyate | oṃ
     pratyakjyotiḥ kim api paramam bhāvayitvātha devaṃ
     dhyātvā citte bhavabhayaharaṃ śrīgaṇeśaṃ vibhuṃ ca /
     maulau kṛtvā gurucaraṇayor dhūlipuñjaṃ ca ṭīkā
     sthityākhye 'smin prakaraṇavare tanyate bhāskareṇa // Mo_4,1.0 //
evam utpattiprakaraṇe 'nutpattirūpāṃ jagadutpattim pratipādya tacchravaṇena ca tatra śrīrāmam pratītibhājaṃ nirvarṇya tadanantaraṃ yogyaṃ sthitiprakaraṇārambhaṃ karoti
     athotpattiprakaraṇād anantaram idaṃ śṛṇu /
     sthitiprakaraṇaṃ rāma jñātaṃ nirvāṇakāri yat // Mo_4,1.1 //
athaśabdo maṅgalamātraprayojanaḥ | idaṃ vakṣyamāṇam | sthitiprakaraṇaṃ kim | yat jñātaṃ śravaṇamanananidadhyāsanaviṣaye kṛtaṃ sat | nirvāṇam brahmaṇi ātyantikaṃ layaṃ karotīti tādṛśam | bhavati || MoT_4,1.1 ||



sthitiprakaraṇam eva kathayati
     evaṃ tāvad idaṃ viddhi dṛśyaṃ jagad iti sthitam /
     ahaṃ cetyādy anākāram bhrāntimātram asanmayam // Mo_4,1.2 //
tāvat tvam evaṃ viddhi | anyat svayam eva jñāsyasīti bhāvaḥ | evaṃ katham ity apekṣāyām āha idam iti | jagad iti | jagad iti nāmadheyena sthitam | idaṃ dṛśyam puraḥsphurat | dṛśikriyāviṣayo bhāvajātam | aham ityādi ca bhavati | kathambhūtam | anākāram bhrāntimātram asanmayaṃ ca || MoT_4,1.2 ||



     akartṛkam anaṅgaṃ ca gagane citram utthitam /
     adraṣṭṛkaṃ sānubhavam anidraṃ svapnadarśanam // Mo_4,1.3 //
gagane cidākāśe | citram ālekhyam iva | uditam prādurbhūtam | kīdṛk citram | akartṛkam kartṛrahitam | anaṅgam niḥsvarūpam | punaḥ kim | svapnadarśanam svapnadarśanasvarūpam | svapnadarśanam kathambhūtam | adraṣṭṛkam draṣṭṛrahitam | sānubhavam draṣṭranubhavaviṣayatāṃ gatam | anidram nidrādoṣādṛṣṭam | atrālaukikatvakathanena vismayakāritve eva bharaḥ kṛtaḥ || MoT_4,1.3 ||


     bhaviṣyatpuranirmāṇaṃ citrasaṃstham ivoditam /
     markaṭānalatāpābham ambvāvartavad āsthitam // Mo_4,1.4 //
bhaviṣyatpurasya ca nakiñcidrūpatvaṃ sphuṭam eva | markaṭasyānalatvenābhāsamānaḥ analaḥ markaṭānalaḥ | tasya yaḥ tāpaḥ | tasyābhā yasya | tat | markaṭo hi kam api phalaviśeṣam agnibhrameṇa gṛhṇāti | āsthitam sthitiyuktam || MoT_4,1.4 ||



     sadrūpam api niḥśūnyaṃ tejaḥ sauram ivāmbare /
     ratnābhājālam iva khe dṛśyamānam abhittimat // Mo_4,1.5 //
sadrūpam cinmātrasāratvāt | niḥśūnyam nakiñcittvāt | ambare hi sauraṃ tejaḥ sadrūpam api niḥśūnyam iva bhātīti tasyopamānatvena grahaṇam || MoT_4,1.5 ||



     saṅkalpapuravat prauḍham anubhūtam asanmayam /
     kathārthapratibhānātma na kvacit sthitam asti ca // Mo_4,1.6 //
kathāyāḥ anena kathyamānāyāḥ kathāyāḥ | yaḥ arthaḥ | tasya yat pratibhānam sphuraṇam | tadātma tatsvarūpam | kathāḥ śravaṇakāle hi śrotuḥ tadarthaḥ puraḥ iva pratibhāti | na kvacit sthitam vicārāsahatvāt | asti ca pratibhāsamānatvāt || MoT_4,1.6 ||



     niḥsāram apy atīvāntaḥsāraṃ svapnācalopamam /
     bhūtākāśam ivākārabhāsuraṃ śūnyamātrakam // Mo_4,1.7 //
niḥsāram piṇḍagrahābhāvāt | atīvātiśayenāntaḥsāram cinmātrasāratvāt | ākārabhāsuram nīlarūpayuktākārabhāsvaram || MoT_4,1.7 ||



     śaradabhram ivāgrastham alakṣyakṣayam ākṣayi /
     varṇo vyomatalasyeva dṛśyamānam avastukam // Mo_4,1.8 //
spaṣṭam || MoT_4,1.8 ||



     svapnāṅganāratākāram arthaniṣṭham anarthakam /
     citrodyānam ivotphullam arasaṃ sarasākṛti // Mo_4,1.9 //
arthaniṣṭham retaḥsravākhyārthakriyāratam | anarthakam prabhāte 'dṛśyamānatvāt vṛthābhātam | punaḥ kathambhūtam | arasam āsvādarahitam api | sarasākṛti sarasā ivākṛtiḥ yasya | tat | kim iva | utphullaṃ citrodyānam ālekhyodyānam | iva | tasyāpi arasatve 'pi sarasākṛtitvam prasiddham || MoT_4,1.9 ||



     prakāśam iva nistejaś citrārkānalavat sthitam /
     anubhūtam manorājyam ivāsatyam avāstavam // Mo_4,1.10 //
spaṣṭam || MoT_4,1.10 ||



     citrapadmākara iva sārasaugandhyavarjitam /
     śūnye prakacitaṃ nānāvarṇam ākāritātmakam // Mo_4,1.11 //
śūnye acetyacinmātrākhyāyāṃ śūnyabhittau | ākāritaḥ ākārayuktaḥ | ātmā yasya | tādṛśam || MoT_4,1.11 ||



     paramārthena śuṣyadbhir bhūtapelavapallavaiḥ /
     tataṃ jaḍam asārātma kadalīstambhabhāsuram // Mo_4,1.12 //
tataṃ vyāptam || MoT_4,1.12 ||



     sphāritekṣaṇadṛśyāndhakāracakrakavat tatam /
     atyantam abhavadrūpam api pratyakṣavat sthitam // Mo_4,1.13 //
sphāritekṣaṇasya dṛśyāni yāni andhakāracakrakāṇi | tadvat tatam | abhinayagamyaś cāyam arthaḥ || MoT_4,1.13 ||



     vār budbuda ivābhogi śūnyam antaḥ sphuradvapuḥ /
     rasātmakaṃ satyarasam avicchinnakṣayodayam // Mo_4,1.14 //
rasātmakam icchāsvarūpaṃ jalasvarūpaṃ ca | satyarasaṃ | satyasya cinmātratattvasya | rasaḥ yasya | tat | cinmātratattvenaiva puṣṭiṃ gatam ity arthaḥ || MoT_4,1.14 ||



     nīhāra iva vistāri gṛhītaṃ san na kiñcana /
     jaḍaṃ śūnyāspadaṃ śūnyaṃ keṣāñcit paramāṇuvat // Mo_4,1.15 //
keṣāñcit sthūlabuddhīnāṃ tārkikāṇām || MoT_4,1.15 ||



     kiñcid bhūtamayo 'stīti sthitaṃ śūnyam abhūtakam /
     gṛhyamāṇam asadrūpaṃ niśātama ivotthitam // Mo_4,1.16 //
ayaṃ saṃsāraḥ kiñcit bhūtamayaḥ astīti sthitam bhāsamānam | etair viśeṣaṇaiḥ samastaḥ sthitiprakaraṇārthaḥ saṅgṛhyoktaḥ | sthitiprakaraṇe evaṃrūpāyā jagatsthiter vaktum iṣṭatvāt || MoT_4,1.16 ||



śrīrāmaḥ pṛcchati
     mahākalpakṣaye dṛśyam āste bīja ivāṅkuram /
     pare bhūya udety etat tata eveti kiṃ vada // Mo_4,1.17 //
iti kim etad eva kim asti atha vā neti | vada kathaya || MoT_4,1.17 ||



     evambodhāḥ kim ajñāḥ syur uta tajjñā iti sphuṭam /
     yathāvad bhagavan brūhi sarvasaṃśayaśāntaye // Mo_4,1.18 //
evam pūrvaślokoktarūpaḥ | bodhaḥ yeṣāṃ | te | tādṛśāḥ || MoT_4,1.18 ||



śrīvasiṣṭha uttaram āha
     idam bīje 'ṅkura iva dṛśyam āste mahākṣaye /
     brūte yaḥ param ajñatvam etat tasyātiśaiśavāt // Mo_4,1.19 //
atiśaiśavāt atimaurkhyāt || MoT_4,1.19 ||



hetukathanam avaśyopadeśyatvenāha
     sparśe kiṃ tad asambaddhaṃ katham etad avāstavam /
     viparīto bodha eṣa vaktuḥ śrotuś ca maurkhyakṛt // Mo_4,1.20 //
asambaddhaṃ tat kim bhavati | na kiñcid apīty arthaḥ | etat avāstavam asambaddhaṃ | katham bhavati | sparśe āmukhe ity | eṣa viparītaḥ bodhaḥ vaktuḥ śrotuś ca maurkhyakṛt bhavati | etat anena hetunā asambaddham bhavati iti vaktuḥ vaktavyam | anena hetunā etat avāstavaṃ na bhavatīti śrotuḥ paryanuyogaḥ kāryaḥ | anyathā tayoḥ maurkhyam eveti bhāvaḥ || MoT_4,1.20 ||



phalitam āha
     bījakāle 'ṅkura iva jagad āste itīha yā /
     buddhiḥ sāsatpralāpārthā mūḍhā śṛṇu kathaṃ kila // Mo_4,1.21 //
ata ity adhyāhāryam | asatpralāpārthā asatpralāpasyevārthaḥ yasyāḥ | sā | asatpralāparūpeti yāvat | mūḍhā jaḍā | kathaṃ kena hetunā | hetvakathane mamāpi maurkhyāpātaḥ syād iti bhāvaḥ || MoT_4,1.21 ||



     bījam bhavet svayaṃ dṛśyaṃ cittādīndriyagocaraḥ /
     vaṭadhānādi dhānyādi yuktam atrāṅkurodbhavaḥ // Mo_4,1.22 //
cittādīndriyagocaraḥ | ata eva dṛśyam vaṭadhānādi tathā dhānyādi bījam bhavet | atra dhānādirūpe tathā dhānyādirūpe bīje | aṅkurodbhavaḥ yuktam bhavati || MoT_4,1.22 ||



     manaḥṣaṣṭhendriyātītaṃ yaḥ khād atitarām api /
     bījaṃ tad bhavituṃ śaktaṃ svayambhūr jagataḥ katham // Mo_4,1.23 //
manaḥ ṣaṣṭhaṃ yeṣām | tāni manaḥṣaṣṭhāni | tādṛśāni ca tānīndriyāṇi | tāny atītam | svayambhūḥ cinmātram || MoT_4,1.23 ||



     ākāśād api sūkṣmasya parasya paramātmanaḥ /
     sarvākṣānupalabhyasya kīdṛśī bījatā katham // Mo_4,1.24 //
spaṣṭam || MoT_4,1.24 ||



     sat sūkṣmam asadābhāsam asad eva hy ataddṛśām /
     kīdṛśī bījatā tatra bījābhāve kuto 'ṅkuraḥ // Mo_4,1.25 //
sat api yat cinmātrākhyaṃ vastu | ataddṛśām na tasmin dṛk yeṣām | te | tādṛśām | cinmātrajñānarahitānām iti yāvat | asad eva bhavati | atra hetum āha | asadābhāsam iti | asadvat ābhāsaḥ yasya | tat | tādṛśam | atrāpi hetutvena viśeṣaṇam āha sūkṣmam iti | sūkṣmatvād asadābhāsatvam | asadābhāsatvād asattvam ity arthaḥ | tatra tasmin cinmātrākhye vastuni | bījatā kīdṛśī bhavati | na bhavati | sthūlasyaiva bījatvayogād ity arthaḥ | bījābhāve aṅkuraḥ jagadākhyaḥ aṅkuraḥ | kutaḥ bhavati | naiva yukta ity arthaḥ || MoT_4,1.25 ||



     gaganāṅgād api svacche śūnye tatra pare pade /
     kathaṃ santi jaganmerusamudragaganādayaḥ // Mo_4,1.26 //
gaganāṅgāt svacchatvaṃ jāḍyākhyamālinyarahitatvāt jñeyam || MoT_4,1.26 ||



     nakiñcid yat kathaṃ kiñcit tatrāste vastv avastuni /
     asti cet tat kathaṃ tatra vidyamānaṃ na dṛśyate // Mo_4,1.27 //
yat cinmātram | bāhyāntaḥkaraṇātītatvāt nakiñcid bhavati | tatra tasmin | avastuni nakiñcidrūpe cinmātre | indriyagamyatvena kiñcidrūpaṃ vastu jagadākhyaṃ vastu | katham āste | tathāpi cet asti tatra vidyamānaṃ kathaṃ na dṛśyate | tarhi vidyamānatvam evāsya yuktaṃ syād iti bhāvaḥ | nanu jagataḥ vidyamānatvaṃ kathaṃ nāsti iti cet | vicārāsahatvān nāstīti brūmaḥ | yo hi vicāraṃ sahate tasyaiva vidyamānatvam | yathā rajjusarpāpekṣayā rajjoḥ || MoT_4,1.27 ||



     nakiñcidātmanaḥ kiñcit katham eti kuto 'tha vā /
     śūnyarūpād ghaṭākāśāj jāto 'driḥ kva kutaḥ kadā // Mo_4,1.28 //
pūrvaślokavyākhyayaiva gatārtho 'yaṃ ślokaḥ || MoT_4,1.28 ||



     pratipakṣe kathaṃ kiñcid āste chāyātape yathā /
     katham āste tamo bhānau katham āste hime 'nalaḥ // Mo_4,1.29 //
kiñcit kim api | pratipakṣe katham āste | pratipakṣe avasthānaṃ kasyāpi na yuktam iti bhāvaḥ | viśeṣeṇaitad eva darśayati cchāyetyādi || MoT_4,1.29 ||



     merur āste katham aṇau kutaḥ kiñcid anākṛtau /
     tadatadrūpayor aikyaṃ kva cchāyātapayor iva // Mo_4,1.30 //
dṛṣṭāntāni viśeṣatayoktvā dārṣṭāntikam api tattayaiva kathayati kutaḥ kiñcid iti | kiñcit indriyagamyatvāt kiñcidrūpaṃ jagat | anākṛtau indriyāgamyatvenākārarahite cinmātre | kutaḥ na yuktam etad iti bhāvaḥ | nanv ekatve na bījāṅkuratvam anayor astīty atrāha tadatad iti | tadatadrūpayoḥ atyantabhinnayoḥ || MoT_4,1.30 ||



     sākāre vaṭadhānādāv aṅkuro 'stīti yuktimat /
     anākāre mahākāraṃ jagad astīty ayuktimat // Mo_4,1.31 //
spaṣṭam || MoT_4,1.31 ||



     deśāntare yac ca narāntare ca
     buddhyādisarvendriyaśaktyadṛśyam /
     nāsty eva tattadvidhabuddhibodhe
     nakiñcid ity eva tad ucyate ca // Mo_4,1.32 //
deśāntare ca asmin deśe anyasmin deśe ca | narāntare ca tvayi anyeṣu nareṣu ca | kālasyāpy etad upalakṣaṇam | tena kālāntare cety api jñeyaṃ | tenāyam arthaḥ | buddhyādīnāṃ sarvendriyaśaktīnāṃ cādṛśyaṃ yat vastu | deśāntare narāntare ca tattadvidhabuddhibodhe | tattadvidhāḥ tattatprakārāḥ | yāḥ buddhayaḥ | tāsāṃ yaḥ bodhaḥ | tatra | nāsti | tadviṣayo nāstīti yāvat | paṇḍitaiḥ tat nakiñcid ity eva ucyate kathyate || MoT_4,1.32 ||



tataḥ kim ity atrāha
     kāryasya tat kāraṇatām prayātam
     vaktīti yas tasya vimūḍhabodhaḥ /
     kair nāma tatkāryam udeti tasmāt
     svaiḥ kāraṇaughaiḥ sahakārirūpaiḥ // Mo_4,1.33 //
tat nakiñcid iti nāmārhaṃ vastu | kāryasya kāraṇatām prayātam bhavati | iti yaḥ vakti | tasya vimūḍhabodhaḥ bhavati | nāsau tajjña iti bhāvaḥ | sahakārikāraṇābhāvena tasya kāraṇatāṃ nivārayati tatkāryam iti | svaiḥ nijaiḥ | sarvasya nakiñcidrūpacinmātrasvarūpatvena sahakārikāraṇasattā nāstīti bhāvaḥ || MoT_4,1.33 ||



etena siddhaṃ siddhāntaṃ sargāntaślokena kathayati
     durbuddhibhiḥ kāraṇakāryabhāvaṃ
     saṅkalpitaṃ dūratare vyudasya /
     yad eva tat satyam anādimadhyaṃ
     jagat tad eva sthitam ity avehi // Mo_4,1.34 //
durbuddhibhiḥ kubuddhiyuktaiḥ | saṅkalpitaṃ svasaṅkalpenollikhitam | na tu paramārthasantaṃ kāryakāraṇabhāvaṃ jagadbrahmaviṣayaṃ kāryakāraṇabhāvam | vyudasya parityajya | tvam iti avehi satyatayā niścinu iti | kim iti | anādimadhyam ādimadhyayor api sākṣitvena sthitatvāt ādimadhyarahitam | yat eva | tat prasiddham | satyam satyabhūtam cinmātrākhyaṃ vastu asti | tad eva na tu tatkāryam | jagat asti | iti śivam || MoT_4,1.34 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ janyajanakanirākaraṇaṃ sthitiprakaraṇe prathamaḥ sargaḥ ||1||



*********************************************************************



vasiṣṭha uvāca
     athaitadabhyupagame vacmi vedyavidāṃ vara /
     samastakalanātīte mahācidvyomni nirmale // Mo_4,2.1 //
     jagadādyaṅkuras tatra yady asti tad asau tadā /
     kair ivodeti kathaya kāraṇaiḥ sahakāribhiḥ // Mo_4,2.2 //
he vedyavidāṃ vara | athāham etat bījatvam | aṅgīkṛtya | vacmi kathayāmi | kiṃ vakṣīty apekṣāyām āha samasteti | samastakalanātīte sarvakāryakāraṇabhāvādikalanātīte | nirmale cetyākhyamalādūṣite | sahakāribhiḥ kāraṇaiḥ sahakārikāraṇaiḥ | yugmam || MoT_4,1-2 ||



     sahakārikāraṇānām abhāve vāṅkurodgatiḥ /
     vandhyākanyā ca dṛṣṭeha na kadācana kenacit // Mo_4,2.3 //
vāśabdaḥ pādapūraṇārthaḥ | caśabdaḥ samuccaye || MoT_4,1.3 ||



     sahakārikāraṇānām abhāve yac ca voditam /
     mūlakāraṇam evātmā tat svabhāve sthitaṃ tathā // Mo_4,2.4 //
yat ca jagadākhyaṃ kāryam | sahakārikāraṇānām abhāve uditam kāraṇāt anyatayā prādurbhūtam bhavati | tat tathā tena prakāreṇa | svabhāve svasvarūpe | sthitam | mūlakāraṇam ātmā mūlakāraṇabhūta ātmaiva bhavati | na kāryam | sahakārikāraṇasambhava eva kāryatvadarśanāt || MoT_4,1.4 ||



     sargādau sargarūpeṇa brahmaivātmani tiṣṭhati /
     yathāsthitam anākāraṃ kva janyajanakakramaḥ // Mo_4,2.5 //
sargādau cetyonmukhatāsamaye || MoT_4,1.5 ||



     atha pṛthvyādayo 'nye vā kuto 'py āgatya kurvate /
     sahakārikāraṇatvaṃ tat pūrvaivātra dūṣaṇā // Mo_4,2.6 //
pūrvā dūṣaṇeti | sargāgame yā dūṣaṇā asti sā eva sahakāryabhimatapṛthvyādyāgame 'py astīty arthaḥ || MoT_4,1.6 ||



phalitam āha
     tasmāt pare jagac chāntam āste tat sahakāraṇaiḥ /
     vinā prasaratīty uktir bālasya na vipaścitaḥ // Mo_4,2.7 //
tasmāt tato hetoḥ | jagat pare śāntam bījatvena sthitam asti | sahakāraṇaiḥ sahakārikāraṇaiḥ vinā | tat prasarati ity uktiḥ bālasya mūrkhasya | bhavati | vipaścitaḥ paṇḍitasya | na bhavati || MoT_4,1.7 ||



paramaphalitaṃ kathayati
     tasmād rāma jagan nāsīn na cāsti na bhaviṣyati /
     cetanākāśam evācchaṃ kacatīttham ivātmani // Mo_4,2.8 //
he rāma | tasmāt jagat nāsīt na cāsti na ca bhaviṣyati sahakārikāraṇābhāvāt | punaḥ kim etat sphuratīty | atrāha cetaneti | accham cetyarahitaṃ | cetanākāśam cinmātrākāśam | ātmani ittham jagadrūpeṇa | sphurati iva kacati iva || MoT_4,1.8 ||



     atyantābhāva evāsya jagato vidyate yadā /
     tadā brahmedam akhilam iti sad rāma nānyathā // Mo_4,2.9 //
anyathā asat || MoT_4,1.9 ||



nanu prāgabhāvādir eva kathaṃ nātrāsti | kim atyantābhāvenety | atrāha
     pūrvapradhvaṃsanānyo'nyābhāvair yad upaśāmyati /
     aśāntam eva tac citte na śāmyaty eva tad yataḥ // Mo_4,2.10 //
pūrvapradhvaṃsanānyo'nyābhāvaiḥ prāgabhāvena pradhvaṃsābhāvena anyo'nyābhāvena ca | yat śāmyati tat aśāntam eva bhavati | yataḥ tat vastu | citte manasi | na śāmyati saṃskāratvena sthitatvāt | tasmād atyantābhāva evātra yukta iti bhāvaḥ || MoT_4,1.10 ||



     atyantābhāvam evāto jagaddṛśyasya sarvadā /
     varjayitvetarā yuktir nāsty evānarthasaṅkṣaye // Mo_4,2.11 //
jagaddṛśyasyātyantābhāva eva jagadrūpasyānarthasya kṣaye yuktiḥ nānyat kiñcid iti piṇḍārthaḥ || MoT_4,1.11 ||



     cidākāśasya bodho 'yaṃ jagadādīti yat sthitam /
     ayaṃ so 'ham idaṃ rūpālokacittakalādy api // Mo_4,2.12 //
idaṃ jagadādīti yat sthitam asti | ayam cidākāśasya bodha eva bhavati | nānyat | ādiśabdena pralayasya grahaṇam | jagadādīti viśeṣeṇa kathayati ayaṃ so 'ham ityādi | cittakalā manaskāraḥ || MoT_4,1.12 ||



     idam arkādi pṛthvyādi tathedaṃ vatsarādi ca /
     ayaṃ kalpaḥ kṣaṇaś cāyam ime maraṇajanmane // Mo_4,2.13 //
spaṣṭam || MoT_4,1.13 ||



     ayaṃ kalpāntasaṃrambho mahākalpānta eṣa saḥ /
     ayaṃ sa sargaprārambho bhāvābhāvakramas tv asau // Mo_4,2.14 //
spaṣṭam || MoT_4,1.14 ||



     lakṣāṇīmāni kalpānām imā brahmāṇḍakoṭayaḥ /
     ime brahmendranicayā imā viṣṇvādiśaktayaḥ // Mo_4,2.15 //
viṣṇvādirūpāḥ śaktayaḥ viṣṇvādiśaktayaḥ || MoT_4,1.15 ||



     ete ceme pariṇatā ime bhūya upāgatāḥ /
     imāni dhiṣṇyajālāni deśakālakalā imāḥ // Mo_4,2.16 //
ete ime pariṇatāḥ mṛtāḥ || MoT_4,1.16 ||



upasaṃhāraṃ karoti
     mahācitparamākāśam anāvṛttam anantakam /
     yathā pūrvaṃ sthitaṃ śāntam ity evaṃ kacati svayam // Mo_4,2.17 //
anāvṛttam āvṛttirahitam | anantakam antarahitam | śāntam svasmin svarūpe eva sarvadā nilīnam | mahācitparamākāśam | iti anena prakāreṇa | evam jagadrūpeṇa | kacati sphurati || MoT_4,1.17 ||



     paramāṇusahasrāṃśabhāsa etā mahāciteḥ /
     svabhāvabhūtā evāntaḥsthitā nāyānti yānti no // Mo_4,2.18 //
mahāciteḥ antaḥsthitāḥ | ata eva svabhāvabhūtāḥ | paramāṇoḥ yaḥ sahasrāṃśaḥ | tatparimāṇāḥ bhāsaḥ dīptayaḥ | etāḥ sargaparamparāḥ | na āyānti no yānti sadā sthitatvāt || MoT_4,1.18 ||



     svayam antaś camatkāro yas samudgīryate citā /
     tat sargabhānam bhātīdam bhārūpaṃ na ca bhittimat // Mo_4,2.19 //
citā cinmātreṇa | antaḥsthitaḥ yaḥ camatkāraḥ svarūpaparāmarśarūpaḥ āsvādaḥ | bahiḥ samudgīryate samyak udgīryate | tat idaṃ samudgiraṇaṃ | sargabhānam bhāti | idaṃ kathambhūtam | bhārūpam jñānasvarūpam | na bhittimat bhittirahitam || MoT_4,1.19 ||



     nodyanti na ca naśyanti nāyānti na ca yānti ca /
     mahāśilāntarlekhānāṃ sanniveśa ivācalāḥ // Mo_4,2.20 //
sargā iti śeṣaḥ || MoT_4,1.20 ||



     ime sargāḥ prasphuranti svataḥ svātmani nirmale /
     nabhasīva nabhobhāgā nirākārā nirākṛtau // Mo_4,2.21 //
svataḥ svabhāvena || MoT_4,1.21 ||



     dravatvānīva toyasya spandā iva sadāgateḥ /
     āvartā iva vāmbhodher guṇino vāthavā guṇāḥ // Mo_4,2.22 //
pūrvaślokadṛṣṭāntatvenaiva yojyam || MoT_4,1.22 ||



      vijñānaghana evaikam idam ittham iva sthitam /
     sodayāstamayārambham anantaṃ śāntam ātatam // Mo_4,2.23 //
vijñānaghane jñānaikasvarūpe cinmātratattve | idam jagat || MoT_4,1.23 ||



     sahakāryādihetūnām abhāve śūnyatā jagat /
     svayambhūr jāyate ceti kilonmattakaphūtkṛtam // Mo_4,2.24 //
unmattakaphūtkṛtam unmattapralāpaḥ || MoT_4,1.24 ||



sargāntaślokena phalitaṃ kathayati
     praśāntasarvārthakalākalaṅko
     nirastaniḥśeṣavikalpatalpaḥ /
     cirāya vidrāvitadīrghanidro
     bhavābhayo bhūṣitabhūḥ prabuddhaḥ // Mo_4,2.25 //
tasmād ity adhyāhāryam | tasmāt tvam bhava | kīdṛśa ity apekṣāyāṃ viśeṣaṇāny āha praśānta ityādi | praśāntaḥ brahmaikatāvijñānena prakarṣeṇa śāntaḥ | sarvārtharūpaḥ kalaṅkaḥ yasya | saḥ | nirastā niḥśeṣavikalpā eva talpam yena | saḥ | vidrāvitā dīrghanidrā avidyārūpā dīrghanidrā yena | saḥ | ata eva prabuddhaḥ samyagjñānayuktaḥ | ataḥ abhayaḥ bhayarahitaḥ | iti śivam || MoT_4,1.25 ||




iti śrībhāskarakaṇṭhaviracitāyāṃ śrīmokṣopāyaṭīkāyāṃ sthitiprakaraṇe dvitīyaḥ sargaḥ ||2||



*********************************************************************



śrīrāmaḥ pṛcchati
     mahāpralayasargādau prathamo 'sau prajāpatiḥ /
     smṛtyātmā jāyate sarge smṛtyātmaiva tato jagat // Mo_4,3.1 //
prathamaḥ prajāpatiḥ śuddhamanorūpaḥ brahmā | smṛtyātma smṛtirūpam || MoT_4,3.1 ||



śrīvasiṣṭhaḥ uttaraṃ kathayati
     mahāpralayasargādāv evam etad raghūdvaha /
     smṛtyātmaiva bhavaty ādau prathamo 'sau prajāpatiḥ // Mo_4,3.2 //
evam etat etat satyam evety arthaḥ || MoT_4,3.2 ||



     tatsaṅkalpātma ca jagat smṛtyātmaivam idaṃ tataḥ /
     iti saṅkalpanagaraṃ sthitam pūrvaprajāpateḥ // Mo_4,3.3 //
tatsaṅkalpātma smṛtisvarūpaprajāpatisvarūpam || MoT_4,3.3 ||



     iti sthite 'pi sā rāma tasya pūrvaprajāpateḥ /
     sthitir na sambhavaty eva nabhasīva mahādrumaḥ // Mo_4,3.4 //
sā smṛtirūpā || MoT_4,3.4 ||



śrīrāmaḥ pṛcchati
     na sambhavati kim brahman sargādau prāktanī smṛtiḥ /
     mahāpralayasammohair naśyati prāksmṛtiḥ katham // Mo_4,3.5 //
mahāpralayasammohaiḥ mahāpralayakṛtābhiḥ mūrcchābhiḥ || MoT_4,3.5 ||



śrīvasiṣṭha uttaraṃ kathayati
     prāṅmahāpralaye prājña pūrve brahmādayaḥ purā /
     kila nirvāṇam āyātās te 'vaśyam brahmatāṃ gatāḥ // Mo_4,3.6 //
nirvāṇam muktim || MoT_4,3.6 ||



     prāktanyāḥ kaḥ smṛtes smartā tasmāt kathaya suvrata /
     smṛtir nirmūlatāṃ yātā smartur muktatayā yataḥ // Mo_4,3.7 //
spaṣṭam || MoT_4,3.7 ||



     ataḥ smartur abhāve sā smṛtiḥ kodetu kiṃ katham /
     avaśyaṃ hi mahākalpe sarve mokṣaikabhāginaḥ // Mo_4,3.8 //
spaṣṭam || MoT_4,3.8 ||



     nānubhūte 'nubhūte ca svataś cidvyomni yā smṛtiḥ /
     sā jagacchrīr iti prauḍhā dṛśyābhāve hi citprabhā // Mo_4,3.9 //
svataḥ na tu prajāpatirūpagrahāt | nānubhūte pūrvānanubhūte viṣaye | anubhūte pūrvam anubhūte viṣaye | cidvyomni yā smṛtiḥ bhavati | sā jagacchrīr iti prauḍhā bhavati | na prajāpatismṛtir iti bhāvaḥ | kuta etad ity | atrāha dṛśyeti | hi yasmāt | dṛśyābhāve smṛtirūpadṛśyābhāve | citprabhā eva bhavati | na prajāpatiprabhā || MoT_4,3.9 ||



athavālam anayā smṛtikalpanayā | yataḥ citprabhaiva jagad astīty abhiprāyenāha
     bhāti saṃvitprabhaivāccham anādyantāvabhāsinī /
     yat tad etaj jagad iti svayambhūr iti ca sthitam // Mo_4,3.10 //
anādyantāvabhāsinī sadā bhātatvenādyantāvabhāsarahitā | saṃvitprabhā eva acchaṃ yat bhāti tat etat jagad iti sthitam bhavati | svayambhūr iti ca sthitam bhavati | ataḥ smṛteḥ svayambhuvaś ca na kāpi sattāstīti bhāvaḥ || MoT_4,3.10 ||



     anādikālasaṃsiddhaṃ yad bhānam brahmaṇo nijam /
     sa ātivāhiko deho virājo jagadākṛtiḥ // Mo_4,3.11 //
anādikālasaṃsiddham satatasiddham | brahmaṇaḥ cinmātratattvasya | yat nijaṃ svasambandhi | bhānam bhavati | saḥ virājaḥ virāḍrūpasya prajāpateḥ | ātivāhikaḥ dehaḥ bhavati | kathambhūtaḥ | jagadākṛtiḥ samastajagatsvarūpaḥ || MoT_4,3.11 ||



     paramāṇāv idam bhāti jagat sabhuvanatrayam /
     deśakālakriyādravyadinarātrikramānvitam // Mo_4,3.12 //
dravyam kriyāviṣayaḥ padārthaḥ | paramāṇvantas tribhuvanābhānam indrasya nirvāṇaprakaraṇe vakṣyati || MoT_4,3.12 ||



     paramāṇum prati tatas tasyāntas tādṛg eva ca /
     bhāti bhāsvaritākāraṃ tādṛggirikulāvṛtam // Mo_4,3.13 //
tataḥ tato hetoḥ | tasya paramāṇvantarvartinaḥ tribhuvanasya | prati paramāṇum antaḥ pratiparamāṇumadhye | tādṛk eva na tv anyarūpam | bhāsvaritākāraṃ tādṛggirikulāvṛtam tādṛśaparvatasamūhākulam | arthāt tribhuvanam bhāti || MoT_4,3.13 ||



     tatrāpi tādṛgākāram evam praty aṇum ātatam /
     dṛśyam ābhāti bhārūpam etad aṅga na vāstavam // Mo_4,3.14 //
tatrāpi pratyaṇuvartini tribhuvane 'pi | bhārūpam jñānasvarūpam | phalitam āha etad iti | he aṅga | ataḥ etat tribhuvanam | vāstavam paramārthasat | na bhavati | svapnavad bhārūpatvāt || MoT_4,3.14 ||



     ity asty anto na saddṛṣṭer asaddṛṣṭeś ca vā kvacit /
     asyās tv abhyuditam buddham abuddham prati vānagha // Mo_4,3.15 //
iti anena prakāreṇa | saddṛṣṭeḥ cinmātradṛṣṭeḥ | asaddṛṣṭeḥ cetyadṛṣṭeḥ vā | anto 'vasānam | nāsti | asyāḥ saddṛṣṭer asaddṛṣṭeś ca | abhyuditam abhyudayaḥ | prādurbhāva iti yāvat | buddham prati abuddham prati vā bhavati | buddham prati saddṛṣṭeḥ abhyudayaḥ asaddṛṣṭeḥ abuddham pratīti kramo jñeyaḥ || MoT_4,3.15 ||



nanu ekā e