Bhuti(raja): Svabodhasiddhi
Based on Hanneder, Jürgen: Bhūtis Svabodhasiddhi. IN: ZDMG 167 (2017), 153-166
Input by Jürgen Hanneder
[GRETIL-Version: 2017-06-22]
THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.
Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)
| description: | multibyte sequence: |
| long a | ā |
| long A | Ā |
| long i | ī |
| long I | Ī |
| long u | ū |
| long U | Ū |
| vocalic r | ṛ |
| vocalic R | Ṛ |
| long vocalic r | ṝ |
| vocalic l | ḷ |
| vocalic L | Ḷ |
| long vocalic l | ḹ |
| velar n | ṅ |
| velar N | Ṅ |
| palatal n | ñ |
| palatal N | Ñ |
| retroflex t | ṭ |
| retroflex T | Ṭ |
| retroflex d | ḍ |
| retroflex D | Ḍ |
| retroflex n | ṇ |
| retroflex N | Ṇ |
| palatal s | ś |
| palatal S | Ś |
| retroflex s | ṣ |
| retroflex S | Ṣ |
| anusvara | ṃ |
| visarga | ḥ |
| long e | ē |
| long o | ō |
| l underbar | ḻ |
| r underbar | ṟ |
| n underbar | ṉ |
| k underbar | ḵ |
| t underbar | ṯ |
Unless indicated otherwise, accents have been dropped in order
to facilitate word search.
For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf
For further information see:
http://gretil.sub.uni-goettingen.de/gretil.htm
Bhūti(rāja): Svabodhasiddhi
namaḥ sakalakalyāṇamayakaivalyadāyine /
śivāya śamitāśeṣabhavādhvadhvāntabhānave //1//
aśeṣadarśanāveśaviśeṣādhivivarjitam /
svasaṃvedanasaṃvedyaṃ svasthaṃ vande paraṃ śivam //2//
nirastakalpanājālavikalpaughavighātine /
namo 'stu paramānandapadātītāya śambhave //3//
jayanty apārasaṃsārasārāsāravibhāgadāḥ /
kaivalyajñānasaṃbodhahetavaś śambhavāṅghrayaḥ //4//
mano buddhir ahaṃ prāṇās tanmātrendriyajīvanam /
yaṃ dṛṣṭvā vinivartante tam upāsyam upāsmahe //5//
mamāham iti hṛdgranthicchedanaikakṛpāṇikām /
spandāspandakṛtagrāsāṃ naumy ahaṃ śuddhasaṃvidam //6//
vyapadeśavihīnasya tattvasya kathanaṃ katham /
svasaṃvedanasadyuktyā gamyate yadi kenacit //7//
jñānayogopadeśena yasya nāśvāsa āntaraḥ /
samāśvāsavihīnatvāt kathaṃ naiḥśreyasaṃ phalam //8//
upeyaprāptyupāyo 'yaṃ svabodhe jāgarūkatā /
svabodhajāgarūkatvān nirvibhāgā sthitir muneḥ //9//
upāyo nāparaḥ kaścit svasattānugamād ṛte /
tām evānusaran yogī svastho yaḥ sa sukhī bhavet //10//
svasaṃkalpaparāmarśād viśuddhajñānasaṃśrayāt /
paramāhlādalābhāc ca bodhaikaghanatā muneḥ //11//
nigṛhīte svasaṃkalpe śakteḥ śaktimati sthitiḥ /
śaktiśaktimator aikyam ity upeyaṃ ca yoginām //12//
prāpte svarūpavijñāne santyakte tattvakañcuke /
udyogakāraṇe kīrṇe muktaḥ sa kila kathyate //13//
bodhamātre grahaḥ kāryaḥ suprabuddhena cetasā /
tāvad yāvat svasāmarthyāt svaniṣṭhaḥ kevalo bhavet //14//
sarvadā suprabuddhas san paśyaty ātmānam ātmanā /
draṣṭuḥ svarūpasaṃsthasya kim anyad avaśiṣyate //15//
sadaiva suprabuddhatvam etāvan manasaḥ kṣayaḥ /
tatkṣayād yogināṃ samyaksākṣātkāro bhavaty alam //16//
paryāvṛttaḥ svasaṃvittau vartate yas tv abhedataḥ /
sa samrāḍ yogayuktānām ajñānadhvāntabhāskaraḥ //17//
svarūpānubhavāhlādadaśātītendusaṃsthitiḥ /
avāptavyaṃ kim astīha kṣīṇāntaḥkaraṇasya me //18//
svaparijñaptiviśrāntī sudṛḍhe yasya susphuṭe /
tasya vṛttivimuktasya bhavet kevalatācirāt //19//
grāhyagrahaṇasaṃskāratiraskāraikacetasām /
yogināṃ svātmaniṣṭhānāṃ mokṣalakṣmīr na durlabhā //20//
labdhā svarūpaviśrāntir nirvṛttā kleśasantatiḥ /
grāhyagrāhakatā bhagnā svarūpastho' smi saṃsthitaḥ //21//
abhedabodhasaṃbodhasvarūpānubhavasthitim /
vyutthitaḥ sanniruddho vā labhate yaḥ sa tattvavit //22//
yasya sarvāsv avasthāsu svasthitir naiva lupyate /
tasya kiṃ nāma kurvanti śāstrabhramaṇavibhramāḥ //23//
vigalitasadasadvikalpasadasadbhramajanitamohamuktātmā /
jīvann api janamadhye vigatabhayaḥ sarvadā yogī //24//
nirastakaraṇo yena samādhiḥ sevitaḥ sakṛt /
paraḥ sākṣātkṛtas tena caritārthena yoginā //25//
ahamātmany asambhinnaḥ saṃgṛhya svaprayatnataḥ /
prabuddhaḥ syāt svaniṣṭhaḥ san yāvat sādāśivadyutiḥ //26//
nirastasarvārthaniraṃśavṛttir jñānī sakṛt svātmani labdhalābhaḥ /
samyaṅnibodhaikaparaḥ svaniṣṭhaḥ svakañcukaṃ hanta jahāti yogī //27//
vāganubhavasadyuktir yasyāsti nirantaraṃ svasaṃvittau /
tasyopadeśakaraṇaṃ yuktaṃ śiṣyeṣu bodhanaṃ samyak //28//
nairvāsanyāt svasaṃbodhāt tyāgād āśābhimānayoḥ /
sadasatpadavicchedān na punar vigrahagrahaḥ //29//
āśvastāntaḥkaraṇaḥ kṣīṇavikalpaḥ svarūpalābharataḥ /
svānubhavāmṛtatṛptaḥ kaivalyaṃ yāti caritārthaḥ //30//
ittham upeyaprāptau vigatamalā citprakāśikā satyā /
kaivalyabhūtijananī svabodhasiddhir mayā gaditā //31//
yenopadeśena nalabdhalābho bhavaty alaṃ saṃśayadoṣamuktaḥ /
tenopadeśena nasaṃśayena kiṃ nāma kuryād bahuśāstrapāṭhī //32//
aśeṣakṛtamaṅgalaṃ vividhakarmadāvānalaṃ svarūpapadadarśakaṃ sakalakalpanāvarjitam /
samastasukhamandiraṃ vividhaduḥkhamūlacchide namāmy asamasundaraṃ gurumukhopadiṣṭaṃ śivam //33//