Khandadeva: Bhattadipika, a commentary on Jaimini's Mimamsasutra,
Adhyaya 3, Adhikarana 3,
with Sambhubhatta's Prabhavali (subcomm.)
Based on the ed. by N.S. Ananta Krishna Sastri
Bombay 1921-1922 (Reprint: Delhi 1987)
(Sri Garib Dass Oriental Series, 50-)
Input by members of the Sansknet project
(www.sansknet.org) [server down!]
This GRETIL version has been converted from a custom Devanagari encoding.
Therefore, word boundaries are usually not marked by blanks.
These and other irregularities cannot be standardized at present.
An attempt to structure the text according to sutras had to be
abandoned for want of an adequate printed edition.
THE TEXT IS NOT PROOF-READ!
THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.
Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)
| description: | multibyte sequence: |
| long a | ā |
| long A | Ā |
| long i | ī |
| long I | Ī |
| long u | ū |
| long U | Ū |
| vocalic r | ṛ |
| vocalic R | Ṛ |
| long vocalic r | ṝ |
| vocalic l | ḷ |
| vocalic L | Ḷ |
| long vocalic l | ḹ |
| velar n | ṅ |
| velar N | Ṅ |
| palatal n | ñ |
| palatal N | Ñ |
| retroflex t | ṭ |
| retroflex T | Ṭ |
| retroflex d | ḍ |
| retroflex D | Ḍ |
| retroflex n | ṇ |
| retroflex N | Ṇ |
| palatal s | ś |
| palatal S | Ś |
| retroflex s | ṣ |
| retroflex S | Ṣ |
| anusvara | ṃ |
| visarga | ḥ |
| long e | ē |
| long o | ō |
| l underbar | ḻ |
| r underbar | ṟ |
| n underbar | ṉ |
| k underbar | ḵ |
| t underbar | ṯ |
Unless indicated otherwise, accents have been dropped in order
to facilitate word search.
For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf
For further information see:
http://gretil.sub.uni-goettingen.de/gretil.htm
<B1> atha tṛtīyaḥ pādaḥ /
(1 adhikaraṇam / ) (a.3 pā.3 adhi.1)
śruter jātādhikāraḥ syāt / Jaim_3,3.1 /
evaṃ liṅgaviniyoge nirūpite idānīṃ vākyādiviniyogo nirūpyate /
tatra vākyaṃ nāma aṅgatvaghaṭakībhūtaparoddeśyatākṛtikārakatvānyatarapadārthakalpanānukūlaśrutapadasannidhiḥ /
asti cedaṃ dhenurdakṣiṇā, uccairṛcā kriyate, prayājaśeṣeṇetyādau /
atra kalpanāśabdena karmatvakaraṇatvādiviṣayakaṃ saṃsargavidhā lakṣaṇādisādhāraṇyena śaktijanyapadārthopasthitibhinnabodhamātraṃ vivakṣitaṃ /
tena dhenurdakṣiṇetyādau saṃsargavidhayā bhāsamānakaraṇatāke nāvyāptiḥ /
vastutastu subantapadayoḥ parasparānvayasyāvyutpannatvādavaśyakalpyabhāvanānvayānurodhena dhenuriti prathamayā karaṇatvalakṣaṇāddakṣiṇāpadena ca tatkāryavṛttikarmatvalakṣaṇātkalpanāpadena lakṣaṇājanyopasthitirevābhipretā /
uccairityādau luptavibhaktyarthasya karaṇatvasya prātipadikenaiva lakṣaṇānnā'vyāptiḥ /
athavoccairityādau karaṇatvasya saṃsargavidhayaiva bhānopapatteḥ kalpanāpadenobhayaṃ vivakṣitam /
prayājaśeṣeṇetyādau tṛtīyayā karmatvasya dhātunā karaṇatvasya lakṣaṇātkalpanā sphuṭaiva /
śrutapadasannidheśca yogyatājñānaṃ vinā karmatvādikalpakatvānupapatteryogyatārūpaliṅgānumāpakatvam /
śrutasyaiva padasya karmatvādilakṣakatvāṅgīkāreṇa tadvācakapadarūpaśrutikalpakatvābhāve 'pi ca śrutapadasya tattātparyakatvarūpadharmavaiśiṣṭyarūpeṇa kalpanāt śrutikalpakatvopapattiḥ /
ataśca vākyaṃ liṅgaṃ śrutiṃ ca kalpayitvāṅgatve pramāṇam /
tadiha jyotiṣṭome śrutinoccairṛcākriyata ityādinā vākyena vidhīyamānasyoccaiṣṭvāderuddeśyasamarpakena ṛgādipadena kiṃ ṛ gādīnāṃ mantrāṇāmevoddeśyatvaṃ pratipādyate uta trayo vedā ajāyantetyādyupakramasthārthavādavaśena lakṣaṇayā ṛgvedādivihitakarmāṅgabhūtamantramātrasyeti cintāyām /
upakramasthasyāpi vedapadasya guṇabhūtānyaparārthaṃvādasthatvena pradhānabhūtavidhyuddeśasthaṛgādipade niḥsandigdhe 'ṅgaguṇavirodhanyāyena lakṣaṇātātparyagrāhakatvāyogādvedapada eva tadekadeśaṛgādilakṣaṇā /
vastutastu -------- vedaśabdasyāvayave 'pi na lakṣaṇā; vedatvasya pratyekavṛttitvāt /
itarathā śūdrasyaikavākyaśravaṇe doṣānāpatteriti prāpte ------- upakrame vedapadaśravaṇenaitāvadavagamyate nūnamatra vedasya stūyamānatvāduddeśyatvaṃ vidheyatvaṃ vā tasyāvaśyaṃ vākye vivakṣitamiti /
tatra ca vidheyasya uccaiṣṭvāderlābhātpariśeṣādeva tasyoddeśyatvāvagatervastuto ṛgādipadamanuvāda eva saduddeśyaparam /
ataścāsañjātavirodhina upakramasthasya vedapadasyaiva tātparyagrāhakasya sattvāt ṛgādipade tatpracuratvena ṛgvedādivihitakarmāṅgabhūtamantralakṣaṇā /
na copakramāvagatasyāpi apacchedādhikaraṇanyāyena pareṇa bādhaḥ; tasyeha, vidheḥ stutisāpekṣatvenārthavādaikavākyatāyā āvaśyakatvāt pūrvavirodhena parasyānutpannatvādevāpravṛtteḥ /
na ca vedatvasya ṛgādiṣvapi paryāptatvādupakramāvirodhaḥ; vedatvasya mantrabrāhmaṇasamudāyātmake granthaviśeṣe eva paryāptatvenāvayavaparyāptatvābhāvāt, itarathā ekavākyādhyayanenāpi adhyayanavidhyarthasaṃpattyāpatteḥ /
śūdrasyaikapadaśravaṇaniṣedhastu vṛntākāvayavādiniṣedhavannānupapannaḥ /
yathācaitādṛśaviṣaye niṣedhasya vidhyapekṣayā vailakṣaṇyaṃ, tathā kaustubhe draṣṭavyam /
tasmādupakramānusāreṇa ṛgvedavihitakarmāṅgabhūtamantrāṅgatvamevoccaiṣṭvādīnām /
evaṃ ca vedatvasya prakaraṇasthavākyamātreṣu aparyāptatvātprakaraṇena vākyasya svaviṣaye upasaṃhārānupapattervedatvāvacchinnavihitakarmamātroddeśena vākyena svaravidhānāvagateḥ prakaraṇabādhe 'pi na kṣatiḥ // 1 // 35 // //
iti prathamamuccaistvādīnāṃ vedadharmatādhikaraṇam //
<B2> oṃ ----- liṅgasya śrutikalpanayā viniyojakatvāt śrutipādānantaranirūpaṇīyatvasyeva vākyādīnāṃ caturṇāṃ liṅgaśrutikalpanayā viniyojakatvena liṅgapādānantaramevāvasaralābhāt nirūpaṇīyatvamityevamavasararūpāmanantarasaṅgatiṃ darśayan liṅgakalpakapramāṇagamyaviniyogopayogicintanasya pādārthatvaṃ pratijānīte --------- evamiti //
vākyādītyādipadena vākyaprakaraṇasthānasamākhyānāṃ caturṇāmihaiva pāde viniyojakatvanirūpaṇāt pādaprayojakatvasūcanena yat prakāśakāraiḥ vākyasya vicāryabāhulyena pādaprayojakatvaṃ prakaraṇādīnāṃ tadabhāvānna pādaprayojakatvam; teṣāmekaikādhikaraṇamātravicāryatayā vicāryabāhulyābhāvāt, balābalādhikaraṇacintāyāstu sarvasādhāraṇyādityuktaṃ tat --------- parāstam; caturṇāṃ pramāṇānāmiha nirūpaṇe upajīvyatayā prāthamyāccāvaśyakaprathamavākyavicārānuniṣpādite vicāryabāhulyasya tatprayojakatve pramāṇābhāvena sarveṣāmeva pādaprayojakatvasya nivārayitumaśakyatvādityarthaḥ /
tatroddiṣṭapramāṇacatuṣṭayamadhye upajīvyatvena prathamaṃ vākyakṛtaviniyogasya nirūpaṇāt //
bhāṭṭabhāskare padaikavākyatāvākyaikavākyatānyatarasvarūpaṃ vākyalakṣaṇaṃ kṛtamapi 'uccaiḥ ṛce' tyādau ṛgādimantradharmatvapūrvapakṣe 'pyetadvākyapramāṇaviniyojakatvasyaivāṅgīkāreṇa tatrāvyāpteḥ siddhānte 'pica padaikavākyatāyā uddeśyaviśeṣasamarpakatve 'pi viniyogasyoccairādivākyapramāṇakatvenaivāṅgīkārādavyāptera- yuktamityabhipretya svayaṃ vākyalakṣaṇamāha -------- tatra vākyaṃ nāmeti //
śrutapadasannidhiriti //
śrutayoḥ padayorekānvayabodhopayogisannidhiviśeṣeṇoccāraṇamityarthaḥ /
śrutāvativyāptivāraṇāya ------- kalpanānukūleti //
liṅge 'tivyāptivāraṇāya ------- śrutapadasannidhiriti padadvayopādānam //
asticedamiti //
uccaistvadhenvabhighāraṇavṛttikaraṇatvasya dakṣiṇāprayājaśeṣaṛgvṛttikarmatvasya ca kalpanā tadanukūlatvaṃ tādṛśapadasannidherityasti lakṣaṇamityarthaḥ /
saṃsargavidhayeti //
dakṣiṇāśabdenānatisādhanadravyavācinā samabhivyāhṛtasya dhenuśabdārthasya nīlo ghaṭa ityatrevābhedenānvaye dhenorānatisādhanadravyābhedasaṃsargavidhayā ānatisādhanatāpratītiḥ, evamuccairityatrāpi ṛcaḥ karaṇatve tatsamabhivyāhṛtoccaiḥ padārthasyābhedenānvaye abhedarūpasaṃsargabalāt karaṇatvamuccaistvasya pratīyata iti saṃsargavidhayā bhāsamānakaraṇatāke nāvyāptirityarthaḥ /
vakṣyamāṇaśrutikalpanasya saṃsargavidhayā bhāsamānakaraṇatāsthale vaktumaśakyatvāt śrutito daurbalyānāpatteḥ pakṣāntaramāha -------- vastutastviti //
lakṣaṇājanyopasthitireveti //
yadyapi "trivatsaḥ sāṇḍaḥ somakrayaṇaḥ" ityādau vākyīyaviniyoge somakrayasādhanatvaṃ lyuṭaivāvagamyata iti na tatra lakṣaṇājanyopasthitireveti niyantuṃ śakyate; tathāpi lyuṭaḥ sādhanatāśrayadravyavācitvenāṅgatvaghaṭakībhūtaniṣkṛṣṭaśaktirūpakārakānabhidhānāt sāṇḍena somakrayaṃ bhāvayedityevaṃvidhavibhaktyarthalakṣaṇāvaśyakatvānna doṣa iti bhāvaḥ //
prakaraṇādīnāṃ trayāṇāmagre svarūpalakṣaṇayorabhidhāsyamānatvena tānyupekṣya vākyasyaiva liṅgaśrutikalpakatvaṃ darśayati ------- śrutapadeti //
padārthānāmanvayayogyatāstītyevaṃ yogyatājñānaṃ vinetyarthaḥ /
tattātparyakatveti //
dhenurityādipadāni dhenvā dakṣiṇākāryaṃ sādhayediti padarūpatayā paṭhitānītyevaṃ śrutikalpakatvamityarthaḥ /
evaṃ liṅgaśrutī kalpayitvā vākyaṃ pūrvapakṣe siddhānteca viniyojakatayāviśiṣṭamiti tasya viniyojakatvaṃ vākyāntarādhikaraṇenaiva siddhamityataścetyanena sūcayitvā tadgamyaviniyogopayogyuddeśyatāvacchedaka- nirūpaṇārthametatpādādhikaraṇanirūpaṇamiti sūcayitumudāharati --------- tadiheti //
ityādineti //
ādipadena 'upāṃśu yajuṣā, uccaiḥ sāmnā' ityanayoḥ saṃgrahaḥ /
tathā "prajāpatirvā imāṃstrīnvedānasṛjata ta enaṃ sṛṣṭānādhinvaṃstānabhyapīḍayattebhyo bhūrbhuvaḥ svarityakṣaradbhūrityṛgbhyo 'kṣaratso 'yaṃ loko 'bhavat bhuvariti yajurbhyo 'kṣaratso 'ntarikṣaloko 'bhavatsvariti sāmabhyo 'kṣaratsvargo loko 'bhavattadyapṛkta ulbaṇaṃ kriyeta gārhapatyaṃ paretya bhūḥ svāheti juhuyādayaṃvai loko gārhapatyoyaṃ loka ṛgvedastadvāva imaṃ ca lokamṛgvedaṃ svena rasena samardhayati /
atha yadi yajuṣṭa ulbaṇaṃ kriyetānvāhāryapacanaṃ paretya bhuvaḥ svāheti juhuyādantarikṣaloko 'nvāhāryapacano 'ntarikṣaloko yajurvedaḥ tadvā vāntarikṣalokaṃ ca yajurvedaṃ ca svena rasena samardhayati atha yadi sāmata ulbaṇaṃ kriyetāhavanīyaṃ paretya svaḥsvāheti juhuyāt svargo vai loka āhavanīyaḥ svargo lokaḥ sāmavedastasmādvai svargaṃ lokaṃ sāmavedaṃ ca svena rasena samardhayatī"ti tāṇḍakibrāhmaṇaprathamādhyāyapañcamakhaṇḍagataprāyaścittabhāgānāmapi jñeyam /
uddeśyasamarpaketyanena pūrvapakṣe siddhānte coddeśyasamarpakamṛgādipadameva natu siddhānte vedaśabda ityukte tadarthaviśeṣamātrasya vicāra ityarthaḥ //
pratipādyata iti //
tataśca ṛṅmantreṇa yatkriyate taduccairityarthena yajurvedotpannānāmapyṛcāmuścaiṣṭvameva na tūpāṃśutvamityarthaparyavasānamityarthaḥ /
upakramasthārthavādeti //
"prajāpatirvā idameka āsīt sa tapo 'tapyata tasmāttapastepānāntrayo devā asṛjyantāgnirvāyurādityaste tapo 'tapyanta tebhyaḥ tapastepānebhyo hi trayo vedāḥ asṛjyanta agneḥ ṛgvedo vāyoḥ yajurveda ādityāt sāmavedaḥ" iti bhāṣyalikhita upakramasthārthavādaḥ /
tatra dvitīyāṣṭakatṛtīyapraśnanavamānuvāke "idaṃ vāgrenaiva kiñcanāsī"diti taittirīyabrāhmaṇagatatepānaśabdārtho vedabhāṣye tapaḥ kṛtavāniti tepānaḥ tasmāditi darśitaḥ /
tadvadihāpi tapastatāpetyarthe liṭaḥ śānaci etveca kṛte tepānaśabdaṃ prasādhya tadartho draṣṭavyaḥ /
mantramātrasyeti //
tataśca ṛkśabdasya vedaparatvāt ṛgvedena yatkarma kriyate taduccairiti vihite uccaistvasya sākṣātkarmaṇi niveśāsaṃbhavena tadvedavihitakarmāṅgabhūtamantradvārā niveśāt tadvedavihitakarmāṅgamantramātrasya uccaiṣṭvamityarthāt yājurvaidikakarmāṅgabhūtādhvaryupaṭhyamānarkṣu noccaiṣṭvam, apitu upāṃśutvamevetyarthaparyavasānamityerthaḥ /
mātraśabdo 'vadhāraṇārthe /
tatra vidheyāyā uccaiṣṭvabhāvanāyāḥ sannihitānanyapare uddeśyapratipādake saṃbhavati na tāvadarthavādagataṃ vedapadamuddeśyaparaṃ vaktuṃ śakyam /
atha tatpratipādakatvāsaṃbhave 'pi tasya tātparyagrāhakatvāṅgīkārādṛgādipadameva lakṣaṇayā tatparamityucyeta, tathāpi śrautārthasyaiva ṛgādyekatvoddeśyaghaṭakatvopapatternānvayānupapattestadbījatvam /
yadyapivā ṛgādipadavedapadayoḥ parasparaviruddhārthakatvāt arthavādagatavedapadasamabhivyāhārānupapattirbījatvena saṃbhavati tathāpi vedapada eva sā yuktetyabhipretya pūrvapakṣamāha -------- upakramastheti //
niḥsaṃdigdha iti //
"ṛcaḥ sāmāni yajūṃṣī"ti vede mantra eva prayogāt dvitīye prasādhitatvācca niḥsaṃdigdhatve ukte aktrādhikaraṇāviṣayatā sūcitā /
etena --------- ṛgvedaḥ ṛkśākhetyādāvṛgādipadānāṃ vede 'pi prayogāt sāmānyaviśeṣabhāvenānvayopapatteḥ pūrvapakṣānudayaḥ --------- parāstaḥ; mantramātraparatve niścite etādṛśaprayogāṇāṃ bhūmropapatterityarthaḥ //
nanu -------- "mukhyaṃ vā pūrvacodanāllokava"diti dvādaśādhyāyādhikaraṇe mukhyajaghanyayordharmavipratiṣedhe sati mukhyadharmānugrahasya vakṣyamāṇatvāt tannyāyena prakṛte 'pyarthavādasya mukhyatvātsa evānuroddhavya iti kathaṃ pūrvapakṣa ityata āha -------- aṅgaguṇeti //
yathā "ya iṣṭye" ti vākyena dīkṣaṇīyādīṣṭisomapradhānayāgayorvihitasya parvakālasya ekādidīkṣāpakṣe virodhe sati dīkṣaṇīyāderaṅgabhūtatvena tadīyakālaṃ bādhitvā mukhyasomayāgakālānugraha evā "ṅgaguṇavirodhe ca tādarthyā"diti pūrvādhikaraṇanyāyāpavādatayā vakṣyate, tadvadihāpi mukhyatve 'pi pradhānabhūtavidhigatapadānugraha eva yukta ityarthaḥ //
vastutastu --------- vedatvasya paryāptatvena vyāpyadharmāvacchinnasaṃbandhino 'pi vidheyasya vyāpakadharmavat saṃbandhitvena stutyupapatterna lakṣaṇā /
nahi vedatvaṃ mantrabrāhmaṇātmake granthe paryāptam; tathātve dvitrivākyādhyetari śūdre vedādhyayananiṣedhaprayuktadoṣānāpatteḥ /
astu vā tat /
tathāpyavayavasaṃbandhino 'pi vidheyasya paraṃparayā avayavisaṃbandhasyāpi sattvādapāṃ stutyā vetasāvakāstuterivehāpi vedapadena stutyupapatternaiva virodhaḥ /
yena tadanupapattyā ṛgādipade lakṣaṇāvaśyiketyabhipretyāha -------- vastutastviti //
tataśca ṛṅmantrasādhyakāryoddeśenoccaiṣṭvādividhānam; lakṣaṇāyāṃ pramāṇābhāvādityarthaḥ /
vedaśabdastāvadarthavādasthito 'pi prathamopasthitatvāt svārthasya stutiviṣayatvaṃ bodhayannavidheyasya stutyayogāt vidheyatvena pratibhāsamāno 'pi uccaiṣṭvādividheyāntarasattvena tadanākṣipan pariśeṣāduddeśyatāghaṭakatāṃ bodhayati /
ataśca vedapadārthasyoddeśyaghaṭakatve 'saṃjātavirodhitvena niścite taduddeśenaivāgre vidheyaniścayāt paścādupanipatadṛgādipadaṃ na svārthasyoddeśyatāghaṭakatvabodhanāyālamiti jaghanyatvāt sañjātavirodhitvādanuvādarūpatvādyo hotā so 'dhvaryurityatrādhvaryupadamiva lakṣaṇāṃ bhajate /
ataeva -------- vidheruddeśyāpekṣāyāṃ prathamopasthitārthavādonnītavedarūpoddeśyalābhe 'pi tasya stutiviṣayatvenānvitasyoddeśyaghaṭakatvenānvayāyogādu- pasthāpakapadāntarāpekṣāyāṃ samabhivyāhārādupasthitaṛgādipadānāmeva lakṣaṇayā tadupasthāpakatve na ko 'pi virodhaḥ /
ataścāpekṣākrameṇargādipadānāṃ pramāṇāntaropasthitoddeśyatāghaṭakatvasyāpramāpaṇāttadviṣaye 'nutpattilakṣaṇo bādha evopakramagatavedapadānurodhenāvagamyate /
ataeva ayamaprāptabādhatvena vyavahṛtaḥ /
ataeva vidheḥ pradhānabhūtasya vedapadārthoddeśyatāghaṭakatve 'pi avirodhāt viruddhargādipadānāṃ vidhyantarbhāvānnāṅgaguṇanyāyāvatāraḥ /
ataeva yatra some prādhānyasya dīkṣaṇīyādiṣvaṅgatvasya ca mānāntarasiddhatvāt pūrvottarapadagatabalābalānapekṣā tatraiva saḥ //
yattu ----- ya iṣṭyetivākye iṣṭipadasyopakramagatatvaṃ somapadasyopasaṃhāragatatvaṃ ca tatrottarasyāpi pūrvāvirodhena kāryāntaraparatvāsaṃbhavāt parasyāpi śakyārthaparatvāt tasya ca prādhānyāt bhavatyevopakramanyāyabādhako 'ṅgaguṇavirodhanyāya iti prakṛte tannyāyāpravṛtteḥṛgādipadaṃ tatprāyavede lākṣaṇikamityabhipretya siddhāntamāha ------- upakrama iti //
vākya iti //
agrimetiśeṣaḥ /
mantralakṣaṇeti //
yadyapi vedamātralakṣaṇayāpyānarthakyatadaṅganyāyena mantropasthitisaṃbhave na tadantalakṣaṇāyāṃ prayojanam; tathāpi lakṣaṇāvaśyakatve kimiti nyāyakṛtā vilambopasthitiḥ soḍhavyetyabhiprāyeṇa tadantalakṣaṇoktiḥ /
atra caikavākyatve upakramanyāyasya prābalyam /
yatra tu ya iṣṭyetyādau yajeta so 'omāvāsyāyāmityāditantrapadānāṃ pratyekamanuṣaṅgeṇa vākyatrayābhyupagamāt bhinnavākyatvaṃ tatra parasparanairapekṣyeṇāvagatitrayasyātmalābhādyuktamiṣṭikālabādhakatvamiti yat bhinnavākyatvābhyupagamenāṅga- guṇavirodhanyāyaviṣayopapādanaṃ prakāśakārāṇāṃ, taddūṣaṇaṃ kaustubhe draṣṭavyam //
nanu ------- yathā "paurvāparye pūrvadaurbalya"miti ṣaṣṭhādhikaraṇe "yadyudgātāpacchindyāt adakṣiṇena yajeta yadi pratihartā sarvasvadakṣiṇeneti" vihitaprayogayoḥ paurvāparyanimittajñānena prāptayoḥ pūrvābādhenottarasyānutpattestadupamardenaivātmalābhātpūrvādbalīyastvaṃ vakṣyate, tatheha kiṃ na syādityāśaṅkate -------- naceti //
pariharati ------- tasyeti //
tasyetyasya nyāyasyetyanenānvayaḥ /
yatra hi parasya sāmagrīsattvena svaviṣayapramājanakatvamapratibaddham, tatra tasyārthāntare pūrvasāpekṣatve 'pi svaviṣayapramotpatteḥ pratibandhādutpannena pareṇa svāvirodhiviṣayaparatvamupakalpya svavirodhiviṣaye mithyātvabodhanādyuktastatra pūrvabādhaḥ /
prakṛte tvekavākyatayā aikārthyālocanavelāyāṃ tadanurodhena tadavirodhiviṣayatayaiva uttarasyotpatsyamānatvenotpannatvābhāvānna bādhasaṃbhava iti na tannyāyapravṛttirityarthaḥ //
itaratheti //
nahi dvitrivākyādhyayanena pārāyaṇādividhyarthamanuṣṭhitaṃ manyante, ato mantrabrāhmaṇayoḥ vedanāmadheyamitivacanācca tāvatsamudāyātmakagranthavṛtti vedatvamityarthaḥ //
nanu ------- kūṣmāṇḍaṃ dadyāditi vidhau nāvayavadānamātreṇa śāstrārthasiddhiḥ niṣedhetvavayavabhakṣaṇamātreṇāpi tatsiddhiriti vaiṣamye kiṃ bījamityata āha ------- yathāceti //
vidhivākye jātestadavacchinnāvayavivyakteśca sādhanatvaṃ śrautaṃ tadākṣiptañca jātyanavacchinnānāmapyavayavānāṃ /
avayavāvayavisādhanatvayoścaikapadopādānādupādeyagatatvena ca sāhityasya vivakṣitatvānnāvayavopādānamātreṇa śāstrārthasiddhiḥ /
ataeva sāhityarūpāṅgāsaṃbhave vidhyādau tanmātropādānamiṣṭameva /
niṣedhetvanuvādyagatatvena sāsāhityasyāvivakṣitatvādavayavabhakṣaṇamātreṇāpi pratyavāya iti śūdrasya dvitrivākyādhyayane 'pi doṣaḥ /
pārāyaṇādau samastagrahaṇamiti siddhe yatra brahmayajñādau pratyahaṃ samastavedapāṭhāsaṃbhavastatraikadeśagrahaṇe 'pi na kṣatiriti kaustubhe draṣṭavyamityarthaḥ /
evañca vedaikadeśatvādṛgādīnāmupakrama eva "agneḥ ṛgveda" ityādinā vedānāmṛgādisaṃbandhasya kīrtitayā nātyantaparityaktopakramārthatvācca "ṛgbhiḥ pūrvāhṇe divi devar iyate /
yajurvede tiṣṭhati madhye ahnaḥ /
sāmavedenāstamaye mahīyate /
vedairaśūnyaḥ tribhireti sūryaḥ /
" ityādau vedaśabdāt vedairitibahuvacanācca ṛgādiśabdānāṃ vede lakṣaṇāyā dṛṣṭatvācca "ṛcaḥ sāmāni yajūṃṣi" iti prakṛtya "saiṣā trayyeva vidye"ti nirdiṣṭasya śabdasya traividyo 'yaṃ brāhmaṇa iti vedatrayābhijñanirdeśe vedaparatayā lokānāṃ prayogeṇa ṛgādiśabdānāṃ vede lakṣaṇāyā lokasaṃmatatvācca upakramagatā vedā upasaṃhāragataiḥ prāyaścittavākye madhyagatairvā ṛgādiśabdaiḥ śakyante 'nuvaditum /
tataścarcā yatkriyate vidhīyate taduccaiḥ kartavyamiti kartavyapadādhyāhāreṇa tattadvedavihitakarmamātrāṅgatvamiti siddhāntamupasaṃharati -------- tasmāditi //
prayojanaṃ mayā sūcitamapi prakaraṇasya vākyasaṃkocakatvānupapattipradarśanavyājena prayojanāntaramapi svayaṃ sūcayati --------- evaṃ ceti //
spaṣṭor'thaḥ //
tataśca pūrvapakṣe ṛṅmantrasādhye jyotiṣṭomikakāryamātre uccaiṣṭvādi, siddhānte tu tattadvedavihitakarmamātra iti prayojanaṃ sūcitam //
yetu -------- asminnadhikaraṇe upasaṃhāraprābalyamicchantaḥ upakramaprābalyānaṅgīkāreṇātratyena "dharmopadeśācca nahi dravyeṇa saṃbandha" iti guṇasūtreṇa darśitāmuccaiḥ sāmneti vākyavaiyarthyānupapattimeva mukhyahetutvenāṅgīkṛtya siddhāntamupapādayanti, te mīmāṃsakamūrdhanyairevopakramaparākramavāde śikṣitāḥ tatraiva1 draṣṭavyāḥ //
iti prathamamuccaistvādīnāṃ vedadharmatādhikaraṇam //
- - - - - - <B3> 1. tatra hi ṛcyadhyūḍhaṃ sāma gāyatīti ṛgārūḍhānāmeva sāmnāṃ gānāt uccairṛcā kriyate iti vidhinaiṃva gatārthatvāt ayaṃ vidhirvyartha ityāśaṅkya ṛganārūḍhānāmapi stobhādisāmnāṃ vartamānatvānna tadvaiyarthyamiti samāhitam //
<B1> (2 adhikaraṇam / ) (a.3 pā.3 adhi.2)
guṇamukhyavyatikrame tadarthatvān mukhyena vedasaṃyogaḥ / Jaim_3,3.9 /
yājurvedike ādhāne sāmavedapaṭhitāni vāravantīyādīni sāmānyaṅgatvena śrutāni /
teṣu sāmavaidikaḥ svaraḥ svavedanibandhanatvācchīghramupasthito na tu pradhānavidhinibandhano yājurvedikaḥ, pradhānaikavākyatāpekṣatvena vilambopasthitatvāditi prāpte -------- sāṅgasyaivādhānasya yajurvedena vidhānādaṅgeṣu vilambopasthitirapyayaṃ pradhānāśritatvādbalīyān /
atasteṣu yājurvedika eva svara upāṃśutvamiti bhāṣyakāraḥ /
vārtikakārastu ------ prayogavidhyāśritasvarasya pradhāne śrutasyāpyaṅge kalpyatvena daurbalyamava; itarathā jyotiṣṭomāṅgabhūtahautrāderapyadhvaryukartṛkatvāpatteḥ /
vāravantīyasyāpi yajurvede vāravantīyaṃ gāyatīti viniyogavidherāmnānāccaivañcintanīyam /
yatra vedāntare utpattirvedāntare ca viniyogastatra vāravantīyādau kaḥ svara iti cintāyām /
utpatteḥ pūrvabhāvitvādasañjātavirodhitvena tannibandhana eva svaro balīyān /
ataśca ṛcā ṛgvedena kriyate utpādyata iti śrutyartha iti prāpte ------- āmnānamātreṇa mantrasya prayojanānavagamena prayojyatvānavagateḥ svarānapekṣatvādviniyogottarakālameva svarasaṃbandhātkriyata ityasya prayujyata ityarthāvagateḥ prayogasya ca viniyogādhīnatvena viniyogasyaivāvyavahitapūrvaṃ puraḥ sphūrtikatvāttadvidhinibandhana eva svaro 'sat bādhike 'nuṣṭheyaḥ ------- ityāha // 3 // 36 //
// iti dvitīyaṃ ādhānagānasyopāṃśutādhikaraṇam //
<B2> pūrvādhikaraṇe uccaiṣṭvādividhau ṛgādipadārthe nirṇīte tatprasaṅgāttadanantaraśrutakaroteḥ ṛceti tṛtīyāntapadasamabhivyāhārādṛgvedādikaraṇakavyāpārābhidhāyitve 'pi sa kiṃ pāṭharūpotpattiruta viniyogo vā tataśca ṛgvedena yadutpādyate viniyujyate vetyarthādutpattiviniyoganibandhano 'ṅgeṣu svaraḥ athavā -------- prayogavidhānarūpo vā /
tataśca yattena prayujyate anuṣṭhāpyate ityarthāt prayogavidhinibandhano vā svara ityevaṃ karotyarthaviśeṣavicārātprāsaṅgikīṃ, athavā -------- utpattividhivedanibandhanasvarajñānasya prāthamikasya balavattvāpavādādāpavādakīmanantarasaṅgatiṃ vākyaviniyogopayogyuddeśyatāvacchedakatvaghaṭakaviśeṣa- cintanātpādasaṅgatiṃ ca spaṣṭatvādanuktvā viṣayaṃ darśayati --------- yājurvaidika iti //
vasantādivākyena ādhānasya dvitīye prasādhitatvāt tasyaca yajurvede pāṭhādyājurvaidikamādhānamityarthaḥ /
vāravantīyādīti //
"ya evaṃ vidvānagnimādhatte" ityanuvādasarūpavākyenādhānamanūdya "ya evaṃ vidvānvāravantīyaṃ gāyati" "ya evaṃ vidvānyajñāyajñīyaṃ gāyati" "ya evaṃ vidvānvāmadevyaṃ gāyati" ityādisāmavedapaṭhitavākyairviniyogavidhirūpairviniyuktānītyarthaḥ /
evaṃ sthite bhāṣyakāreṇa likhite "ya evaṃ vidvā" nityādhānavākye utpattividhitvālekhanabhrameṇotpattividhitvābhāvaparyanuyogakaraṇaṃ prakāśakārāṇāṃ apāstam; bhāṣyakṛtā vāravantīyādividhau śeṣitayopasthāpanārthamanuvādarūpasyaiva tasya vākyasya lekhanāditi kaustubhe pūjyapādaiḥ sūcitaṃ draṣṭavyam /
prayogavidherviniyogotpattisāpekṣatvāttayoḥ pūrvabhāvitvāt pūrvādhikaraṇanyāyenāsaṃjātavirodhitvāt śīghropasthitikatvācca tadvedanibandhana evasvaraḥ, natu pradhānasvara upāṃśutvam /
ataeva prayogavidhestatsāpekṣatvāt na tatrāpacchedanyāyaḥ, trayāṇāṃ madhye teṣāṃ sāmarūpāṅgaviṣayatvāt aṅgaguṇavirodhanyāyo 'pi na /
nahi pradhānabhūte ādhāne upāṃśutvasya bādhaḥ pūrvapakṣe //
kiñca utpattiviniyogayoḥ pratipadārthaṃ bhinnatvāttannibandhanasvarasya viśeṣavihitatvenaca anekāṅgapradhānasādhāraṇaprayogavidhisvarāt sāmānyavihitādanyatra sāvakāśāt balīyastvānna pradhānasvara ityabhipretya pūrvapakṣamāha --------- teṣviti //
yadyutpattiviniyogakāle svarāpekṣā bhavet, tadā upakramaprābalyanyāyāttatsvaraniyamo bhavet, na tadasti; svarasya prayogaviśeṣaṇatayā kālādivatprayoga evāpekṣitatvāt /
yadyapi vā na tadviśeṣaṇatvam, apitu prayogavidhyanantaramanuṣṭhānāya tasyāpekṣetyucyeta; tathāpi tadapekṣādaśāyāṃ prayogasyaivāvyavadhānena pūrvamupasthitatvātprameyabalābalasyeva tasyaiva prābalyam /
ataśca aṅgadharmasyāpyupāṃśutvasya yājurvaidikapradhānaprayogavidhirūpasamānapramāṇakapradhānavṛttitākatvātpradhānapratyāsannatvena tasyaiva prābalyamiti prayojyatayā avagatānāṃ mantrāṇāṃ svarāpekṣānurodhena prayogavidhinibandhana eva svara upāṃśutvamityabhipretya bhāṣyakāraḥ siddhāntamāha -------- sāṅgasyaiveti //
vārtikakārastviti //
asyetyasyāhetyanenānvayaḥ /
na prayogavidhirnāma vede pārthakyena kvacicchrutaḥ, aṅgavākyānāmeva pradhānavākyaikavākyatāpannānāṃ prayogavidhiśabdena vyavahārāt /
ataśca tattadvākyānāṃ svavedenaiva vedaviśeṣāvadhāraṇādyatrāṅgapradhānānāmekavedasthatvaṃ tatra prayogavidhinibandhanasvarāṅgīkāre 'virodhānnaiva kaścana vicāraḥ /
yatrāpi nānāvedasthatvaṃ tatrāpi prayogavidheḥ pradhānāṃśe anyavedīyatvenānyasvarāpādakatvādaṅgāṃśe ca vedāntarīyatvenotpattiviniyogavidhyanukūlasvarasyaivāpādānānna vicāraḥ //
naca -------- aṅgasya prayogavidhivedanibandhanasvarāntarāviṣayatve 'pi svarasya kālādivatprayogānvayitvāt tasya cāṅgapradhānasādhāraṇatvāt pradhānānvayisvarasyaiva vedāntarīyāṅgeṣu niveśopapattervedāntarīyaviniyogavidhinibandhanasvarasya bādhopapattiḥ -------- iti -------- vācyam; pradhānavidhinibandhanasvarasya pradhānoddeśenaiva vihitasyāṅgeṣu kalpyatvena tena kḷptotpattiviniyogavidhinibandhanasvarasya bādhānupapatteḥ /
anyathā jyotiṣṭome samākhyāprāptādhvaryurūpakartuḥ prayogānvayitvenāṅgapradhānasādhāraṇyāt hautrastotrādāvapi tadaṅge adhvaryukartṛtvāpattyā hotrādikartṛkatvabādhāpattiḥ /
ato yathātrādhvaryukartṛtvasya kalpyatvāttaddhautrādisamākhyāprāpitakḷptahotrādikartṛtvena bādhaḥ tadvadihāpi kalpyatvātpradhānasvarasya bādha eva /
ataeva kḷptakalpyatvābhyāmeva śyene udgātṛmātrakartṛkatvabādhena nānākartṛtvasiddhirvakṣyate //
vastutastu -------- ādhānasāmnāṃ pāṭhāparaparyāyotpattireva sāmavede, vāravantīyaṃ gāyatītyādiviniyogavidhistu yajurveda eveti nātra virodho 'pi /
ata upāṃśutvasya pradhānamātroddeśena vihitasyāṅgeṣu kalpanīyatvātpradhānaprayogavidheśca vedāntarīyāṅgāṃśe yājurvaidikatvābhāvena svata upāṃśutvāprāpakatvānnādhānasāmasūpāṃśutvasiddhiḥ /
ata evaṃ cintanīyamityāha vārtikakāra ityarthaḥ /
ataḥ prayogavidhivedanibandhanasvaropapādanaṃ bhāṣyakārakṛtamayuktamityupekṣya yaccintanīyaṃ tat darśayati -------- yatra vedāntareti //
utpādyate iti //
ajñātaṃ prajñāpyata ityarthaḥ /
viniyogottarakālameveti //
prayojyatve 'vagate satyapekṣayetiśeṣaḥ /
avyavahitapūrvamiti //
prayogakāle utpatteḥ vyavahitatvena viniyogasyāvyavahitapūrvamityarthaḥ //
nanu tarhi tulyanyāyatvāddarśapūrṇamāsāṅgeṣu jyotiṣṭomāṅgastotraśastrādāvapi viniyogavidhinibandhanasvarasyopāṃśutvasyaivāpattiḥ prasajyetetyata āha ---------- asati bādhaka iti //
ayamarthaḥ ------- darśapūrṇamāsayoḥ tāvat tattadviniyogavidhyanusāreṇa prayogavidhita upāṃśutve prāpte mandrayājyabhāgā tparaṃ madhyamottamayānuyājādīti vacanena prāptabādhavidhayā bhāgadharmasya svarasya vidhānāt mandrādisvaraḥ tatrāpi kvacit viśeṣavacanāt uccaiṣṭvādīti //
evaṃ tadvikṛtīnāmapi akāmyānāṃ pradhānāṃśe prākṛtāṅgāṃśe tatkāryāpannāṅgāṃśe ca kḷptopakāratvāt śyene kartrantaravat prākṛtasvara eva /
aprākṛtāṅgāṃśe 'pi prākṛta eva /
prakṛtau svarasya bhāgadharmatvena tadbhāgārambhakāprākṛtavṛttitve 'pyaprākṛtakāryakāritānāpatteḥ /
kāmyavikṛtīnāṃ tu 'yajñātharvaṇaṃ vai kāmyā iṣṭayastā upāṃśukartavyā' itivacanena vihitopāṃśutvasyāpyavabhṛthenetivat tṛtīyādyabhāvena sāṅgavidhyabhāvāt pradhānamātre upāṃśutvamaṅgeṣu prākṛta eva /
asyāpi viśeṣavacanaiḥ kvacit kvacit bādho draṣṭavyaḥ /
evaṃ jyotiṣṭome 'pi tattadviniyogavidhyanusāreṇa nānāvedasvare prāpte darśapūrṇamāsaprakṛtikāṅgaviṣaye śyenanyāyena prākṛtena svareṇa bādhaḥ /
tatrāpi "yatkiñcit prācīnamagnīṣomīyāt tenopāṃśu carantī" tyanenā'gnīṣomīyaprāgbhāvipadārthāṅgatvena vihitamupāṃśutvaṃ nānāvedasvaramiva prākṛtamapi svaraṃ bādhate /
tamapi "yāvatyā vācā kāmayeta tāvatyā dīkṣaṇīyāyāmanubrūyāt mandraṃ prāyaṇīyāyāṃ mandrataramātithyāyāmi"tyādiviśeṣavacanavihitā niravakāśāḥ svarāḥ tattaddīkṣaṇīyādipradhānamātrāṃśe bādhante /
ataeva --------- agnīṣomīyaprāgbhāvitvenaiva upasatsūpāṃśutvaprāpteḥ "upāṃśūpasatsvi"ti pṛthagvidhivaiyarthyamapi na śaṅkyam; upasatpadasya niravakāśaviṣayātiriktapadārthamātropalakṣaṇatvamaṅgīkṛtyaivaucityena dīkṣaṇīyādisvarastutyarthamanuvādamātratvāt /
ataeva -------- agnīṣomīyavākyasya nānenopasaṃhāraḥ /
agnīṣomīyādau darśapūrṇamāsaprakṛtike prākṛtatraisvaryameva /
atatprakṛtiketu tattadviniyogavidhyanusārānnānāvedasvara eva /
sutyāyāṃ tu aṅgapradhānasādhāraṇyena mandraṃ prātassavane carantītyādivacanavihitaiḥ savanakrameṇa mandramadhyamottamasvaraiḥ savanīyādau prākṛtasvaraḥstotrādau nānāvedasvarasya ca bādhaḥ //
naca --------- prātassavanādiśabdānāṃ iha tattatsomayāgābhyāsamātravācitvāt tadaṅgeṣu prāptasvarabādhakatvamiti -------- śaṅkyam; carantīti prayogavācidhātusamabhivyāhāreṇa prātaḥsavanādiśabdasyāpi svaśakyaghaṭitaprayogaikadeśalakṣakatvāvagateḥ prāyaṇīyādipadavailakṣaṇyāt sutyottarakālīneṣu darśapūrṇamāsaprakṛtikeṣu prākṛtaḥ; apūrveṣu tu nānāvedasvaraḥ /
evaṃ jyotiṣṭomavikāreṣvapi draṣṭavyam /
evañca yatraitādṛśaṃ viśeṣato vihitasvarādikaṃ bādhakamasti, tatra tattadviniyogavidhyanusārisvarabādhe 'pi yatraitādṛśaṃ bādhakaṃ na tatra viniyogavidhiprayukto nānāvedasvara eva /
yathā darvīhomeṣu yājurvaidikamupāṃśutvam; bādhakāntarābhāvāt /
tathā "mandraṃ prātaḥsavane" ityādīnāṃ nityavādanityaiḥ kāmyanaimittikairasaṃbandhānnityaviṣayatvenānityeṣvapravṛtterbādhakābhāvāt ṛgvedasāmavedābhyāṃ yatkiñcit kāmyaṃ naimittikaṃ vā anuṣṭhāpyate tatra tattadvaidikamuccaiṣṭvameva /
prakṛte tvādhānasāmnāṃviniyogavidhinibandhanaprayuktamupāṃśutvameveti dik //
atraca dūrasthasya śravaṇakaraprayoga uccaiṣṭvam /
prayatnavadaśabdamamanaḥprayoga upāṃśutvaṃ yatrorasi sthāne śabdasya prayoga upalabhyate sa mandraḥ svaraḥ /
yatra kaṇṭhasthāne śabdaprayoga upalabhyate sa krauñcakruṣṭasvarayoḥ madhyatanatvāt madhyamaḥ svaraḥ /
dūrasthasya śravaṇayogyaḥ krauñcaḥ /
sannikṛṣṭaśravaṇayogyaḥ kruṣṭo jñeyaḥ /
yatra śiraḥsthāne śabdaprayoga upalabhyate, sa tārakruṣṭāparaparyāya uttamaḥ svara ityādisvaralakṣaṇāni taittirīyaprātiśākhyādyājñikagranthebhyaścāvadheyāni //
iti dvitīyaṃ ādhāne gānasyopāṃśutādhikaraṇam //
- - - - - - - <B1> (3 adhikaraṇam / ) (a.3 pā.3 adhi.3)
bhūyastvenobhayaśruti / Jaim_3,3.10 /
yatraikameva karmānekeṣu śrutaṃ, tatra kvotpattiḥ kva ca tadanuvādena guṇārthaṃ śravaṇamiti jijñāsāyāṃ, yatrāṅgabāhulyaṃ tatrotpattiḥ; sevakabāhulyena rājāvasthānanirṇayavat /
vastutastu karmasvarūpaparicāyakadravyadevatādisākalyasyaiva nirṇāyakatvam /
tatrāpi dvaividhye, bahiraṅgatve 'pyavyabhicārāddevatāyā eva, na tu dravyasyetyādyūhyam /
ataścaivaṃ vidhaniścāyakasattve tatraivotpattiḥ /
anyatra tadanuvādenāvirodhiguṇāntaravidhānam /
virodhini tu guṇādbheda eva /
evaṃ yatra kasyacidapi niyāmakasyābhāvastatrāpyabhyāsādbhedaḥ /
na hyatra śākhāntaranyāyena satyapi sarveṣāmutpattiparatve karmaikatvam, tadvadihādhyetṛbhedābhāvāt /
ato niyāmakabalena yatraivotpattistadvedanibandhana eva svara iti siddham // 3 // 37 // iti tṛtīyaṃ jyotiṣṭomayājurvedikatādhikaraṇam //
<B2> uccaiḥ ṛcetyādivākyavihitasvaradvayamekasmin karmaṇi vikalpena viniyujyate, uta eka eva svaro niyamenetivicāraṇādadhyāyapādaprakaraṇasaṅgatīstathā prāsaṅgikīmanantarasaṅgatiṃ ca spaṣṭatvādanuktvā jyotiṣṭomasya tattatsavanapuraskāreṇa vihitasvarāvaruddhatvāt vikalpapūrvapakṣasya utpattividhinibandhanasvarasiddhāntasya cānavakāśāt bhāṣyādyudāhṛtamapi jyotiṣṭomodāharaṇamupekṣya agnihotrādikarmaviṣayatvenābhipretya viṣayāpradarśanena sāmānyato nyāyasvarūpaṃ vyutpādayati -------- yatraikameveti //
yadyapi ṛksāmayoruccaiṣṭvasyaiva vidhānānna tayoranyataratra karmaṇo vidheyatvanirṇayaḥ svaraviśeṣopayogītyabhipretya sūtre ubhayaśrutītyuktatvādanekeṣviti na yuktam; tathāpi tatsaṃgrahamātrabudhdyopāttaṃ jñeyam /
aniyamaniyamayoḥ kvacit vicāraviṣayatvena darśitayorapi tayoḥ vicāraprayojanatvāt tadviṣayatvābhāvasūcanāya taddhetubhūtasyaiva tadviṣayatvaṃ darśayati --------- tatreti //
pūrvapakṣasya phalgutāṃ matvā bhāṣyakārarītyā prathamataḥ siddhāntamevāha -------- yatrāṅgeti //
anumāpakena dhūmādinā bahunevālpenāpi vahnyanumitidarśanāt anumāpakagatālpatvabahutve na tantramiti bhāṣyakāroktaṃ niyāmakamayuktamabhipretya vārtikoktaṃ niyāmakamāha --------- vastutastviti //
dravyadevatādereva avyabhicārānnirṇāyakatvamityarthaḥ /
dvaividhya iti //
ekatra vede dravyamitaratra devatāmnānamityevaṃ dvaividhyamityarthaḥ /
āṣṭamikanyāyena dravyasyāntaraṅgatvamabhipretya devatāyāḥ bahiraṅgatve 'pītyuktam /
devatāyā evetyasyāgre nirṇāyakatvamityanuṣaṅgaḥ //
niyāmakasyābhāva iti //
ananyaparavidhipunaḥśravaṇasya sattvādityarthaḥ /
evaṃ yatrāpi svavākye karmamātraśravaṇam, vākyāntare caikatra devatāvidhiḥ, aparatra tadavidhāyaiva virodhiguṇāntaraśravaṇaṃ tatra satyubhayatrāpi liṅādiśravaṇāt vidhitve ekatraiva devatādividhisamabhivyāhāravati utpattividhitvamanyatra tūtpattitātparyakatvābhāve vākyāntaropāttaguṇaviniyogopayogiprakaraṇojjīvanārthatvamityādivistaraḥ kaustubhe draṣṭavyaḥ /
tadvedanibandhana eveti //
yatra dravyadevatādiśravaṇaṃ tatraiva tat kartavyatvena codyate /
ataḥ tadvedanibandhana eva svara ityarthaḥ /
prayojanaṃ spaṣṭatvāt noktam //
// iti tṛtīyaṃ jyotiṣṭomayājurvedikatādhikaraṇam //
- - - - - - <B1> (4 adhikaraṇam / ) (a.3 pā.3 adhi.4)
asaṃyuktaṃ prakaraṇād iti kartavyatārthitvāt / Jaim_3,3.11 /
evaṃ vākye nirūpite prakaraṇamidānīṃ nirūpyate /
nanu kimidaṃ prakaraṇaṃ nāma? na tāvatsannidhimātram; godohanāderapi darśāṅgatvāpatteḥ /
atha sākāṅkṣatvamātram; vikṛterapi prākṛtāṅgaviṣaye tadāpatteḥ /
nāpi sākāṅkṣatve sati sannidhipaṭhitatvam;upahomādāvapi tadāpatteḥ /
athobhayākāṅkṣatvaviśiṣṭaṃ tat; siddharūpāṇāṃ mantrādīnāmapi tadāpatteḥ /
prayājādīnāmanākāṅkṣitatvena tadanāpatteśca /
atha darśapūrṇamāsayoḥ prakārāntareṇa prayojanākāṅkṣatve 'pi itikartavyatātvena tadākāṅkṣopapatteryuktaṃ prakaraṇamiti cet, kimidamitikartavyatātvaṃ nāma? na tāvatphale apūrve vā sahakāritvam /
prādhānyāpatteḥ, prayājādivadāgneyasyāpi vikṛtāvatideśāpatteśca /
nāpi karaṇajanakatvam; prayājādiṣu bādhāditi cet, na; sannihitasya phalavato 'navagatāṅgatākapadārthaviṣaye itikartavyatātvenāpekṣaṇasyaiva prakaraṇapadārthatvāt /
atrāsannihitajyotiṣṭomādyaṅgatvasya prayājādau vāraṇāyādyaṃ viśeṣaṇam /
anūyājādyaṅgatvavāraṇāya phalavata iti dvitīyam /
prokṣaṇādeḥ śrutyāditrayaviniyuktasya prakaraṇaviṣayatvavāraṇāya tṛtīyam /
siddharūpasya liṅgāviniyuktamantrādeḥ prakaraṇāviṣayatvasiddhyarthamitikartavyatātveneti caturtham /
itikartavyatātvaṃ ca karaṇānugrāhakatvam /
sarvatra hi aśaktasya kāraṇatvāyogācchaktiḥ kāraṇaniṣṭhā samastīti nirvivādam /
sā ca kāraṇatāvacchedikā kāraṇarūpā vetyanyadetat /
tasyāśca janyavṛttitve janyataivetyutsargaḥ /
sāmagnyalābhe paramanāditetyapavādaḥ /
tatra tatsāmagryapekṣaivetikartavyatāpekṣā /
tayā ca sannihitaprayājāderaṅgatvabodhaḥ, prayājādestatsāmagrītvāt /
siddharūpasya ca dravyādervyāpārāveśaṃ vinā tatsāmagrītvāsaṃbhavāttayā agrahaṇam /
atra ca pradhānagatetikartavyatā'kāṅkṣāyāḥ prayājādigataprayojanākāṅkṣāsahakṛtāyāstattadvākyasya svasvāvāntaravākyārthe samāptasyāpi mahāvākyaikadeśarūpapāribhāṣikapadasannidhyākhyavākyakalpanayā, niruktapadānāṃ ca svārthopasthitidvārā tanniṣṭhāśrutapadāntarakalpanā'nukūlayogyatārūpaliṅgakalpanayā ca, samidho yajati itthaṃ darśapūrṇamāsābhyāṃ svargakāmo yajetetyaśrutetikartavyatātvavācipadarūpaśrutikalpanayā cetikartavyatātvarūpakṛtikārakatve prāmāṇyam /
saṃbhavati hi prayājādīnāmapi uktaśaktijanakatvena bhāvanāyāmanvayaḥ /
tasmātsiddhaṃ prakaraṇaṃ nāma caturthapramāṇam /
yattvatra pārthasārathinā ananugṛhītasyāpi karmādeḥ saṃyogavibhāgārambhakatvadarśanānnedaṃ prakaraṇam /
api tu vyāpārasāmānyasyākhyātārthatāmaṅgīkṛtya tadviśeṣāpekṣaivetikartavyatāpekṣā /
tayaiva ca prayājādīnāṃ tattvenānvaya iti tadeva ca prakaraṇamityuktam /
tanna; tathātve niruktaprakaraṇasya tadaghaṭitāṅgatvabodhakatvānupapatteḥ, prayājāderbhāvanātve tasyaiva phalasaṃbandhāpatteśca /
asmanmate tu yatnasyaiva bhāvanātvāttasya ca yāgajanakatvenaiva kṛtārthatvānna tadāpattiriti vaiṣamyam /
kiñcaivaṃ pradhānasya svato nirākāṅkṣasyānyatarākāṅkṣayaiva prakṛtau prayājādyaṅgakatvāpattiḥ, vikṛtau ca bhāvanāyā viśeṣāpekṣāyāṃ akḷptopakārairapi sannihitairupahomaireva nirākāṅkṣatvopapatternātideśakalpanāpattirityādi kaustubhe vistaraḥ // 3 // 38 //
// iti caturthaṃ prakaraṇaviniyojakatādhikaraṇam //
<B2> kartavyasya prakaraṇaviniyogavicārasya saṅgatiṃ darśayati -------- evamiti //
śeṣaḥ parārthatvādityatra pramāṇaṃ vinā pārārthyasya nirvaktumaśakyatvāt śrutyādiṣaṭpramāṇānyupakṣiptāni /
tatra śrutivākyayoḥ viniyojakatvasya tadbhūtādhikaraṇe liṅgasyaca sāmarthyādhakaraṇe viniyojakatvasyoktatvāt aṅgāṅgitayoravacchedakamātramādyapādadvaye nirūpitam /
asmiṃstu pāde vākyīyaviniyoge tannirūpaṇe kṛte adhunā avasaralābhāt prakaraṇasya svarūpalakṣaṇaviniyojakatvaprakārairajñātasya nirūpaṇaṃ kriyata ityarthaḥ /
prakaraṇāntaratvādanantarasaṅgatyabhāve 'pi nakṣatiḥ //
nanu -------- prakaraṇasvarūpasyaivāsiddheḥ kutaḥ tasyāṅgatvapramāṇatvenopakṣepo yena tannirūpaṇaṃ pratijñātaviṣayaṃ bhavedityabhipretyāśaṅkate --------- nanviti //
anākāṅkṣitatveneti //
darśapūrṇamāsayoriti śeṣaḥ /
āgneyasyāpīti //
agnīṣomīyādāgneyānapekṣāt paramāpūrvānutpattestasyāpi tatrāgnīṣomīyasahakāritvāditikartavyatātvāpattau prayājādivadatideśāpattirityarthaḥ /
bādhāditi //
dravyadevatayoḥ tajjanakatvena prayājādiṣu tasya bādhādityarthaḥ //
prakaraṇaviṣayatvavāraṇāyeti //
avaghātādīnāṃ vrīhyādyaṅgatvasya śrutyādibhireva bodhanāt sannidhirūpādhikārākhyaprakaraṇasya athavā -------- bhāṭṭālaṅkāroktarītyā sannidheḥ sthānatvena prakaraṇatvānupapatteranekārtheṣvavāntaratātparyavatāmanekavākyānāmekatra kvacinmahātātparyarūpādhikārākhyaprakaraṇasya vrīhyādipade 'ṅgitāvacchedakalakṣaṇātātparyagrāhakatve 'pītikartavyatāpekṣaṇarūpaprakaraṇaviṣayatvābhāvāttadvāraṇāyetyarthaḥ //
naca ------- apūrvasādhanībhūtāṅgatvasya śrutyādigamyatve 'pi yāgāṅgatvasyāpūrvāṅgatvasya vā kathaṃbhāvātmakaprakaraṇagamyatvaṃ iti --------- vācyam; apūrvasādhanībhūtāṅgatvasyāpūrvāṅgatvaṃ vinānupapattestasyārthasiddhatvena prakaraṇavyāpārānapekṣaṇāt //
ataeva -------- prokṣaṇādilope prakaraṇagamyāṅgatvapakṣe iva kratvaṅgabhreṣaprāyaścittamapi nāsulabhamiti bhāvaḥ //
atraca prakaraṇādīnāṃ vakṣyamāṇarītyā pūrvapūrvapramāṇakalpanenaivāṅgatābodhakatvena mantharapravṛttitvāt śrutyādiviṣaye aṅgatvabodhakatvānupapatteḥ svata eva prakaraṇāviṣayatvasiddheḥ anavagatāṅgaviṣaye iti spaṣṭārthamupāttamiti dhyeyam //
liṅgāviniyukteti //
mantrādhikaraṇe arthaprakāśanārthānāṃ mantrāṇāṃ nāvāntarakriyāyogādityācāryokta nyāyena arthaprakāśanakriyādvārā prakaraṇagrāhyatvasyābhihitatvāt tadvyatirekaṃ darśayituṃ liṅgāviniyuktetyuktam /
ataeva liṅgasya sāmānyasaṃbandhabodhakapramāṇasāpekṣatve kramasamākhyāvat prakaraṇamapi sāmānyasaṃbandhabodhakatvena liṅgapāde upanyastam //
etacca śrutyāditrayaviniyuktānāmavaghātādīnāṃ sannipātināṃ prakaraṇāviṣayatvaṃ sautramasaṃyuktapadamālambya nyāyasudhoktamanurudhyoktam /
prakāśakārāstu --------- sannipātyavaghātādīnāṃ prakaraṇagrāhyatvapradarśanaparaśāstradīpikāsvārasyena śrutyādīnāṃ dvāraidamarthyasamarpaṇamātraparatvamaṅgīkṛtya kathaṃbhāvākāṅkṣayaivāvaghātādīnāmaṅgatvamāhuḥ /
tatraitadadhikaraṇānte asaṃyuktagrahaṇaṃ kimartham? śrutiliṅgavākyaiḥ saṃyuktānāṃ dvibahutvayuktapratipadvidhīnāṃ pūṣādiśabdataccheṣāṇāṃ ca prakaraṇaviniyoganivṛttyartham, prakaraṇavirodhināvā asaṃyuktamavirodhisaṃyuktānāṃ vrīhīn prokṣati barhirdevasadanaṃ dāmi aruṇayā krīṇātītyādīnāṃ prakaraṇasthavrīhibarhiḥkrayaiḥ saṃbadhyamānānāṃ prakaraṇasamāveśopapatteḥ, tattu tatsāmarthyasiddhatvāt na sūtrakāreṇoktamiti vārtikameva matadvaye mūlamiti nehānyataramataniṣkarṣe yatnena prayojanamiti dik //
itikartavyatātvaṃ durnirūpamiti yaduktaṃ tat pariharati ---------- itikartavyatātvaṃ ceti //
svamate bhāvanāyā yatnarūpatvāt tatrānugrāhakāpekṣābhāvepi phaladvārā tatkaraṇībhūtasya dhātvarthasyāpūrvajanane astyeva tadapekṣetītikartavyatātvam /
karaṇānugrāhakatvaṃ nāma svakaraṇaniṣṭhaśaktijanakākāṅkṣatvaṃ yat bhāvanāyāḥ tadeva prakaraṇamityarthaḥ /
sāmagnyalābha iti //
yathā daṇḍādivṛttiśaktāvanavasthādoṣabhiyā sāmagnyalābhe 'nāditvam /
daṇḍavṛttiśakteḥ janyatve tasyāṃ daṇḍasya śaktimattvena kāraṇatve vaktavye tasyāṃ punaḥ tādṛśasya tena rūpeṇa kāraṇatve /
ānavasthāpattiḥ /
prakṛtetu apūrvajananānukūlāyāḥ yāganiṣṭhaśakteḥ kāraṇāpekṣāyāṃ yāgasyaiva kāraṇatve 'navasthāpatteḥ sannihitaṃ prayojanāpekṣaprayājādi kārakatvarūpāṅgatābodhakatvasya prakaraṇaniṣṭhatvāt karaṇaniṣṭhaśaktijanakatvarūpakārakatvena bhāvanā gṛhṇātītyevaṃrūpetikartavyatākāṅkṣā prakaraṇamityarthaḥ /
tayāgrahaṇamiti //
dravyadevatāvāmadevyādisiddhapadārthānāṃ dṛṣṭavidhayā ekakaraṇajanakatvāt prayojanānākāṅkṣatvena karaṇavṛttiśaktijanakatvenāgrahaṇam //
yattu tanniyamajanyamadṛṣṭaṃ tasya yāganiṣpattyanantaramutpatteḥ yāgaṃ pratyakāraṇatvāt tadvṛttiśaktijanakatvenānapekṣaṇāt niyamādṛṣṭopahitatvena rūpeṇeṣṭamevetikartavyatātvam, parantu tannodāsīnasya saṃbhavatītyavāntarakriyāyuktasya dravyāderitikartavyatātvavyavahāraḥ śāstra etanmūlaka evetyarthaḥ //
evaṃ pramāṇabhūtaprakaraṇasvarūpe 'bhihite 'dhunā tasya pūrvapūrvapramāṇakalpanatadviniyojakatāprakāraṃ darśayati --------- atraceti //
niruktapadānāmiti //
uktavidhapāribhāṣikapadasthānāpannānāmavāntaravākyānāmityarthaḥ /
tanniṣṭheti //
avāntaravākyārthaniṣṭhetyarthaḥ /
aṅgatvabodhakatāmabhinīya darśayati -------- saṃbhavati hīti //
mahāvākye itthamiti padopāttānāṃ prayājādīnāṃ svargakāmo yajetetyetatpadopāttabhāvanāyāṃ paraṃparayā janakatvenānvayādaṅgatvaghaṭakībhūtakṛtikārakatābodhakatvāt ubhayākāṅkṣālakṣaṇaprakaraṇasya prāmāṇyamityarthaḥ /
siddhāntamupasaṃharati ------tasmāditi //
evamanugrāhakākāṅkṣārūpasya prakaraṇatvaṃ pratipāditam sthirīkartuṃ yadetādṛśaprakaraṇadūṣaṇena pārthasārathinā anyadeva prakaraṇasvarūpamupapāditaṃ tadanūdya dūṣayati --------- yattvatreti //
prakaraṇasya prayājādiviśeṣasaṃbandhabodhakatve 'pyaṅgatvasya tadaghaṭitatvāt tadbodhakatvānupapattirityarthaḥ /
prayājāderiti //
tava mate 'nyotpādānukūlavyāpāraviśeṣatvaṃ prayājādīnāṃ yadi, tadā apūrvakalpanā ataḥ pūrvamākhyātārthopasthitidaśāyāṃ na tāvadapūrvasyānvayitvaṃ saṃbhavati; tasyaasattvāt /
nāpi yāgasya; tasya prayājādyajanyatvena bādhāt /
avaśiṣyate paraṃ phalam /
tatra yathā yāgabhāvanāyāḥ phalabhāvyakatvādyāgasya phalasaṃbandhaḥ tathā prayājādibhāvanānāmapi bhāvanātvāt tadviṣayaprayājādīnāmapi phalasaṃbandhāpattirdurnivārā //
naca samānapadaśrutyā phalaṃ prati yāgasyaiva karaṇatvaṃ iti niyantuṃ śakyam; prayājādīnāmapi svasvādṛṣṭarūpavyāpārasattvena karaṇatvasya durnivāratvāt /
yāgasya sākṣāt phale samānapadopāttatvābhāvena bhāvanādvāraiva tasya vācyatvāt tadapekṣayā sākṣāt bhāvanārūpāṇāṃ prayājādīnāmeva karaṇatvaucityācca /
ataḥ phalasaṃbandhāpattiranivāryetyarthaḥ /
kiñceti //
yāgasyānyotpādane svānuṣṭhānamātrasāpekṣasyāpyanyākāṅkṣābhāvena svato nirākāṅkṣatvādanyatarākāṅkṣyaiva prayājādyaṅgakatvāpattirityarthaḥ /
ato yāgasya anugrahākāṅkṣaiva prakaraṇaṃ yuktamiti //
prayojanaṃ prayājādīnāṃ viśvajinnyāyena rātrisatranyāyena vā phalārthatvāt vikṛtāvanatideśaḥ pūrvapakṣe, siddhānte tu sa iti spaṣṭatvānnoktam //
iti caturthaṃ prakaraṇaviniyojakatādhikaraṇam //
- - - - - - <B1> (5 adhikaraṇam / ) (a.3 pā.3 adhi.5)
kramaś ca deśasāmānyāt / Jaim_3,3.12 /
sthānaṃ cāṅgatve pañcamaṃ pramāṇam /
taccetikartavyatātvenāyogyasaṃbandhayorvākyārthayoḥ sannidhiḥ /
itikartavyatātvenāyogyatvaṃ dvedhā ------- kvacidākāṅkṣāvirahāt, yathā vikṛterupahomādiviṣaye, kḷptopakāraprākṛtāṅgaireva nirākāṅkṣatvāt /
kvacidavyāpārātmakatvāt /
yathā japādimantrādau /
atra caikavākyopāttavrīhiyāgādisannidherapi tathātvāpattervākyārthetyuktam /
prayājādīnāṃ sthānaviṣayatvāpattinirāsārthamādyaṃ viśeṣaṇam /
tatsādeśyāparaparyāyaṃ dvividhaṃ, pāṭhasādeśyamanuṣṭhānasādeśyaṃ ca /
ādyaṃ ca dvividham /
yathākramaṃ pāṭhaḥ sannidhau pāṭhaśca /
trayamapīdamubhayākāṅkṣayānyatarākāṅkṣayā ceti dvividham /
atrobhayākāṅkṣāghaṭakapradhānākāṅkṣā cetikartavyatā'kāṅkṣābhinnā draṣṭavyā /
tatra pāṭhakramātkāmyayājyānuvākyāmantrāṇāṃ kāmyeṣṭyaṅgatvam /
sannidhestu sānnyāyyapātraśundhanavidhisannidhau samāmnātasya śundhadhvamiti mantrasya tadaṅgatvam /
anuṣṭhānasādeśyāttu paśudharmāṇāṃ daikṣapaśvaṅgatvam /
yadyapi caiṣāṃ liṅgādipramāṇāntareṇaiva viniyogātkramādīnāṃ ca kvacidapūrvasādhanatvalakṣaṇātātparyagrāhakatvamātratvānnāṅgatve prāmāṇyam; tathāpi ṣaḍvidhasyāpi kramasyāsaṅkīrṇodāharaṇāni kaustubhoktarītyohanīyāni /
atra ṣaḍvidhe 'pi krame ārādupakārakasthale tāvaditikartavyatā'kāṅkṣāyāḥ kalpanīyatvātprakaraṇakalpakatvam /
mantrādirūpasannipatyopakārakasthale 'pi mantrādeḥ svarūpeṇa yāgājanakatve 'pi tattanniyamādṛṣṭopahitasya tajjanakatvātkaraṇaniṣṭhayogyatājanakatvarūpetikartavyatātvātmakaprakaraṇakalpanā- vaśyikaiva /
ataeva tadapekṣayā tasya daurbalyam /
ṣaḍvidhe tu krame ubhayākāṅkṣālakṣaṇādanyatarākāṅkṣālakṣaṇasya /
tatrāpi pāṭhakramādanuṣṭhānasādeśyasya /
vidhisannidhānasya puraḥ sphūrtikatvāt /
tayostu madhye sannidhānasya prābalyam /
ekagranthasyatvādityādi kaustubhe draṣṭavyam // 3 // 39 //
iti pañcamaṃ sthānaviniyojakatādhikaraṇam //
<B2> pūrvavadevopakṣiptasya kramapramāṇasya viniyojakatvanirūpaṇe avasarasaṅgatiṃ sūcayan sautrakramaśabdasya paryāyakathanavyājena kramanirūpaṇaṃ pratijānīte --------- sthānañceti //
pramāṇaśabdottaraṃ nirūpyata ityadhyāhāraḥ /
tasyaca svarūpeṇājñātasya lakṣaṇavyājena svarūpamāha ------ tacceti //
japādimantrādāviti //
ādipadenānumantraṇayājyādimantrasaṃgrahaḥ /
vākyārthetyatrārthapadenānuṣṭhānasādeśyasaṃgrahaḥ /
anyatarākāṅkṣayeti //
iti prakāreṇa ṣaḍvidhamityarthaḥ /
itikartavyatākāṅkṣābhinneti //
yā bhāvanāyāḥ sāmānyataḥ kathaṃbhāvākāṅkṣā tadbhinnā kevaladravyadevatāviṣayasmārakākāṅkṣā setyarthaḥ //
kāmyeṣṭyaṅgatvamiti //
prāgupapāditamiti śeṣaḥ /
liṅgakramasamākhyānādityatra liṅgasya kramādisāpekṣatvamuktam, ihatu kramasyaiva kvacit liṅgāpekṣaṇīyasya kathaṃ viniyojakatvamityākṣepasamādhānādapaunaruktyaṃ jñeyam //
idañcopalakṣaṇamanumantraṇamantrāṇāmapi /
yathādhvaryave kāṇḍe āgneyopāṃśuyājāgnīṣomīyakarmāṇi krameṇāmnātāni /
yājamāneca kāṇḍe tadviṣayā mantrāḥ krameṇāmnātāḥ /
"agnerahaṃ devayajyayānnādo bhūyāsaṃ" "dabdhirasyadabdho bhūyāsamamuṃ dabheyam" /
"agnīṣomayorahaṃ devayajyayā vṛtrahā bhūyāsaṃ," iti tatra vināpyanuṣṭhānasādeśyena yāvati pradeśe brāhmaṇe pradhānaṃ paṭhyate tāvatyeva mantreṣu mantraḥ /
tayoścāṅgāṅgyapekṣāyāṃ yathāsaṃkhyanyāyena samānadeśatvāt dvayoḥ vidhyoḥ sannidhānaṃ bhavati /
prathamasya pradhānasya mantramanvicchan mantrasya samāmnānamādita ārabhyālocayati, tataśca prathamamantro hṛdayamāgacchati /
naca tasyātikrame heturastīti sa eva gṛhyate /
tathā mantrasya śeṣiṇamapekṣamāṇasyānayaiva prakriyayā ādyena śeṣiṇā saha saṃbandho bhavati /
tataśca dvitīyasyāpyanenaiva nyāyena dvitīyena saha saṃbandhaḥ //
yadyapi ghātukāyudhavācidabdhipadopetamantrasāmarthyaṃ prakaraṇaṃ cā'gneyādiṣvapyavaśiṣṭam; tathāpi teṣāṃ vispaṣṭaliṅgakāgnyādimantrairavarodhe avispaṣṭaliṅgasyāsya viṣamaśiṣṭatvena vikalpāyogādanumantraṇamantrāṇāṃ kṛtākṛtayāgapratyavekṣaṇārthatvena dṛṣṭārthatvāt samuccayānupapatteḥ pāṭhakrameṇa madhyatanavartyupāṃśuyājārthatvamiti //
naca balīyasaḥ prakaraṇāt sarvārthatvam; mantrāṇāmakriyārūpatvena prakaraṇāgrāhyatvādaspaṣṭaliṅgatvena āgneyādiviṣayāyā abhidhānakriyāyā aniścaye taddvārāpi prakaraṇagrahaṇāyogāt /
ataḥ prakaraṇarūpasāmānyasaṃbandhabodhakapramāṇābhāvānnāgneyādyarthatvam /
yātu yāgānumantraṇasamākhyā sāpi nā'gneyādyasādhāriṇī /
evañca yuṣmadarthaviṣayamadhyamapuruṣāntatvenāsiśabdasya prakṛtasarvāgneyādiviṣayasādhāraṇa- prakāśanasāmarthyasaṃbhave 'pisādeśyenopāṃśuyājasyātyanta- sānnidhyādāmantraṇavibhakteścābhimukhaviṣayatvādupāṃśu- yājasyamantrākāṅkṣitvenamantrābhimukhyāvagaterupāṃśuyājamātraviṣayasyābh idhānasāmarthyākhyasya liṅgasya kalpanādabhidheyatvena upāṃśuyāja evātyantasānnidhyādupatiṣṭhata iti tadaṅgameva mantra iti //
sannidhestviti //
pātrāṇāmāsādanottarakālaṃ prokṣaṇaṃ śundhanaṃ tadvidhisannidhau "śundhadhvaṃ daivyāya karmaṇe devayajyāyai" iti paṭhitasya śundhanaprakāśanasāmarthyāt liṅgena sākṣāt prakaraṇaprāptasānnāyyayāgārthatābādhāt pātraviśeṣaviṣaye cāspaṣṭaliṅgatvāt sānnāyyapātraprokṣaṇavidhisannidhikrameṇa sānnāyyapātraprokṣaṇāṅgatvamityarthaḥ /
yadyapi adhikaraṇamālāyāmasya mantrasya sānnāyyapātraśundhanavidhisannidhyāmnānābhāvāt "mātariśvano gharmosī" tyādyuttaramantrāṇāṃ kumbhīpātrādisānnāyyapātraprakāśakatvāt tatsannidhāvāmnānena śundhanīyamātraprakāśakasyāpi sānnāyyapātraśavandhanāṅgatvamuktam, natu tadvidhisannidhyāmnānāditi pātraśundhanavidhisannidhāvityayuktam; tathāpi śākhāntarābhiprāyeṇa neyamiti na doṣaḥ //
paśudharmāṇāmiti //
krayasannidhāvutpannasyāpi daikṣasya vākyāntareṇa aupavasathye 'hani anuṣṭheyatvāvagamena buddhau viparivṛtteḥ paśudharmākāṅkṣitvācca yogyatvācca svasamānadeśe vidhipāṭhatvena kartavyatvāvagamāt prayojanākāṅkṣāyogyāṃścopākaraṇādīn paśudharmān pratyaṅgatvena grāhakatvamanuṣṭhānasādeśyādityarthaḥ /
paśusāmānavidhyādhikaraṇe tvetadeva prakaraṇāt sarvārthatvamavāntaraprakaraṇādvā savanīyamātrārthatvamityāśaṅkayākṣipya samādhīyate ityapaunaruktyaṃ veditavyam //
evaṃ prācāṃ rītyā kramodāharaṇāni uktāni, tānyākṣipanniva viśeṣamāha ------- yadyapi caiṣāmiti //
kāmyayājyānuvākyāmantrāṇāṃ pūrvoktarītyānumantraṇamantrāṇāṃ ca liṅgādviniyogaḥ spaṣṭa eva /
liṅgādītyādipadena paśudharmāṇāṃ dvitīyādiśrutyaiva paśvarthatvasaṃgrahaḥ /
kramādīnāmityatra yathākramapāṭhasyaiva kramaśabdena vivakṣitatvāt sannidhyanuṣṭhānasādeśyayorādipadena saṃgrahaḥ /
kvaciditi //
śundhanamantrasya taittirīyabrāhmaṇe "prajāpatiḥ yajñaṃ samasṛjattasyokhe astraṃsetāmi"ti paṭhitvā "śundhadhvaṃ daivyāya karmaṇe devayajyāyā" iti mantraviniyogamabhidhāya "mātariśvano gharmo 'sī" tyāmnātena vācanikasānnāyyāṅgasandaṃśasyaivāpūrvasādhanatvalakṣaṇātātparyagrāhakatvopapatteḥ sannidheḥ tattātparyagrāhakatvamapi nāstītyabhiprāyeṇa kvacidityuktam //
kiñca taittirīyabrāhmaṇa evāsya mantrasya pauroḍāśikapātraprokṣaṇe viniyogavidhānāt sannidhimātreṇa sānnāyyapātramātraprokṣaṇāṅgatvasiddhāntakaraṇamapyayuktamityarthaḥ /
vistarastu kaustubhe draṣṭavyaḥ //
kaustubhoktarītyeti //
sā caivam ------- yatra phalavadekaṃ karma samāmnātam, sthalāntare cānārabhyavidhayāphalamārādupakārakam, tayoścobhayorapi vacanadvayāt svatantraikakālakartavyatā, tatra tasyāphalasya phaladavaṅgatvamanuṣṭhānasādeśyamātrādeva /
tatra phalavato darvīhomatvenāpūrvatve ubhayākāṅkṣayā vikṛtitve 'nyatarākāṅkṣayeti vivekaḥ //
evañca yatra vibhinnaphalakānekapradhānāmnānaṃ brāhmaṇe mantrakāṇḍe anvitenaiva krameṇa liṅgāviṣayatayā japādimantroccāraṇavidhānaṃ tatra tattadvidhīnāṃ pāṭhakrameṇaiva tattatpradhānavidhyupasthāpakatvāt tattatpradhānāṅgatattanmantroccāraṇasya yathāsaṃkhyapāṭhāt /
tatrāpi vibhinnaphalakapramāṇānāṃ darvihomatvenāpūrvatve ubhayākāṅkṣayā vikṛtitvetvanyatarākāṅkṣayeti vivekaḥ /
evamupahomānāṃ vikṛtyaṅgatvaṃ sannidhipāṭhādityanayā rītyā asaṃkīrṇodāharaṇāni ūhanīyānītyarthaḥ //
evaṃ kramasya viniyojakatvamuktvā tasya prakaraṇakalpakatākathanavyājena prasaṅgādiha prābalyadaurbalye vicārayati -------- atreti //
prakaraṇakalpakatvamiti //
evañca nirākāṅkṣānuṣṭhānasādeśyasthale pradhānākāṅkṣāyā eva kalpanīyatvāt prakaraṇāt daurbalyam /
sākāṅkṣānuṣṭhānasādeśyasthale tu ārādupakārakaviṣaye na kiñcit kalpanīyam; tathāpi anuṣṭhānasādeśyasyārādupakārakāṅgavidhipaṭhitatvābhāvāt vidhipāṭhasannidhimātraghaṭitāt prakaraṇāt daurbalyam, vidhisannidhānasya puraḥsphūrtikatvādityarthaḥ /
evamanyakramaviniyojyārādupakārakasthale 'pi draṣṭavyam /
mantrādirūpeti //
tatraca pradhānatatsmārakākāṅkṣākalpanaṃ niyamādṛṣṭadvārā ca svākāṅkṣākalpanenetikartavyatātvakalpanamityubhayākāṅkṣārūpaprakaraṇakalpakatvāt tato daurbalyamityarthaḥ /
tadapekṣayeti //
tacchabdena prakaraṇasya tasyeti dvitīyatacchabdena kramasya grahaṇam //
tatrāpīti //
anyatarākāṅkṣālakṣaṇakramasya daurbalye yatra dvividhapāṭhasādeśyasyānuṣṭhānasādeśyena virodhaḥ tatretyarthaḥ /
puraḥsphūrtikatvāditi //
anuṣṭhānasādeśye anuṣṭhānameva pradhānasya puraḥsphūrtikaṃ na vidhiḥ, pāṭhakrametu vidhipāṭhasyaiva sannihitatvāt tasyānuṣṭhānāpekṣayā puraḥsphūrtikatvamityanuṣṭhānasādeśyasya daurbalyamityarthaḥ //
tayostviti //
pāṭhasādeśyayoḥ parasparavirodha ityarthaḥ /
yathākramapāṭhasyaikagranthasthatvābhāvena sannidhipāṭhasyaikagranthasthatayā puraḥsphūrtikatvāt sannidhipāṭhāpekṣayā yathākramapāṭhasya daurbalyamiti bhāvaḥ /
prayojanaṃ spaṣṭatvānnoktam //
iti pañcamaṃ sthānaviniyojakatādhikaraṇam //
- - - - - - - <B1> (6 adhikaraṇam / ) (a.3 pā.3 adhi.6)
ākhyā caivama tadarthatvāt / Jaim_3,3.13 /
ṛgvedādivihitapadārtheṣu hautrādhvaryavādisamākhyā vede yājñikaiśca prayujyate /
sāpyaṅgatve pramāṇam /
tathāhi /
sarvatra kḷptāvayavaśaktikaṃ dvividhaṃ padaṃ prakṛtavidhau vākyārthānvayyarthakaṃ tadbhinnaṃ ceti /
tatrādyaṃ "nirmanthyeneṣṭakāḥ pacati" "prokṣitābhyāmulūkhalamusalābhyāmavahantī" tyādau nirmanthyādipadam /
tatra vākyenaiva manthanādīnāṃ pākādyaṅgatvānna sāmākhyāniko viniyogaḥ /
dvitīyantu ādhvaryavamadhīte praitu hotuścamasa ityādau /
tatra viśeṣyasya kāṇḍasyaiva prakṛtavidhāvanvaye jāte viśeṣaṇasyādhvaryukartṛkatvādeḥ siddhavannirdeśānyathānupapattyā viniyogaḥ kalpyata iti tatra samākhyayā viniyogaḥ /
atra samākhyayāvayavārthayoḥ saṃbandhe saṃsargamaryādayā buddhe na tannirdeśānyathānupapattyā svatantravidhikalpanā; gauravāpatteḥ, kintvanvādhānādivākyasyādhvaryuṃ vṛṇīta iti vākyasya caikavākyatāsaṃpādakapadamātraṃ, yamadhvaryuṃ vṛṇīte so 'gnīnanvādadhātīti /
tacca dvayorvidhyoḥ kathañcidastyekabuddhisthatetyevaṃvidhasthānakalpanāpūrvakamadhvaryoriti kartavyatātvabodhakākāṅkṣārūpaprakaraṇakalpanayā tadvidhyormahāvākyaikadeśatvākhyapadasannidhirūpaṃ vākyaṃ kalpyate /
tena cādhvaryumātraniṣṭhayogyatārūpaliṅgakalpanayā ekavākyatāsaṃpādakapadarūpaśrutikalpanādyuktamasyāḥ ṣaṣṭhapramāṇatvam // 3 // 40 // //
iti ṣaṣṭhaṃ samākhyāviniyojakatādhikaraṇam //
<B2> pūrvavadevopakṣiptasya samākhyāpramāṇasya pañcāntaritaprāmāṇyanirūpaṇe 'vasaralābhāt pramāṇanirūpaṇena sahāvasarasaṅgatiṃ ca spaṣṭatvādanuktvā pramāṇabhūtasamākhyāsvarūpaṃ darśayati --------- ṛgvedādīti //
darśapūrṇamāsajyotiṣṭomādiṣu ṛgvedavihite karmaṇi hautraṃ, yajurvedavihitecā'dhvaryavaṃ, sāmavedavihitecaudgātraṃ ityevaṃ samākhyāḥ tathā hotṛcamasaḥ pauroḍāśikamityapi pātraviśeṣe dārśapaurṇamāsikapadārtheṣu ca vede prayuktāstathā somacamasa ityādi laukikaiḥ yājñiyaiśca prayuktā ityarthaḥ /
tatra samākhyāyā yaugikatvena viniyojakatvaṃ syāt,naca yaugikatvaṃ saṃbhavati; pāṭhakādiśabdānāṃ pratyakṣādinā pāṭhakriyākartroḥ saṃbandhāvagamena yuktāyaugikatvena pravṛttiḥ, ihatu samākhyātaḥ pūrvaṃ saṃbandhānavamānna tannimittaṃ yaugikatvamiti rūḍhameva ādhvaryavādipadam /
adhvaryukartṛkeṣu laukikapadārtheṣvādhvaryavasamākhyāyā adarśanena avayavayogasya vyabhicāritvācca /
ato na yaugikaśabdarūpasamākhyāsvarūpasaṃbhavaḥ /
kathañcit tatsaṃbhave 'pi vā tayā saṃbandhasāmānyapratīterna tādarthyākhyaśeṣatvapratītisaṃbhavaḥ /
varaṇabharaṇopāttasyādhvaryvādeḥ satyāmapi kaimarthyākāṅkṣāyāmanvādhānādeśca satyāmapi kartrapekṣāyāṃsamākhyāyāḥ padarūpatayā vidhitvābhāvāt na vidhirūpacodanāgamyatādarthyabodhakatvasaṃbhavaḥ /
pācakādivat kathañcit pramāṇāntareṇa saṃbandhābhyupagame na samākhyāyāḥ saṃbandhe prāmāṇyam /
samākhyābalādeva saṃbandhakalpane samākhyāyā api saṃbandhasidhdyadhīnatvāditaretarāśrayāpattirityaprāmāṇyapūrvapakṣanirāsāyāha -------- sāpīti //
kḷptāvayavaśaktikamityanena yaugikatāsaṃbhave rūḍhikalpanamanyāyyam /
atiprasaṅgaparihārastu udbhidadhikaraṇoktanyāyenāvagantavya iti yaugikatvasvarūpaṃ samākhyāyāḥ sūcitam //
nacehāśvakarṇādiśabdavat pratīyamānayogaparityāgakāraṇaṃ bādho 'saṃbhavo vāsti; tādarthyasya yogyatvena bādhāyogāt /
vakṣyamāṇavidhayā tādarthyapratipādanasyāpi saṃbhavāccetyarthaḥ /
yadihīyaṃ sādiḥ samākhyā bhavet, tadā prathamataḥ saṃbandhaṃ jñātvā sā pravartayitavyā, tatpravartakasyaca puruṣasya saṃbandhabodhane pramāṇāntarābhāvāt samākhyaiva tatra pramāṇamityanyonyāśrayaḥ syāt, iyañca saṅketayiturasmaraṇāt vede prayujyamānatvāccānādibhūteti bhramavipralipsādinimittatvānupapatteḥ pūrvapūrvaprayogadarśanādevottarottaraprayogopapatteḥ saṃbandhāvācyatvena samabhivyāhāramātragamyatvāt prāgapratītasyāpi pravṛttinimittatvopapatteḥ pūrvapratītatvāgrahe 'pi anuṣṭhānasyāpi pravāhānāditvāt pratyakṣeṇaiva kriyākārakabhāvasaṃbandhamavagatya prayogopapattau paścānnyāyavidāṃ anyamūlāsaṃbhave samākhyāta eva tatpratipattikalpanasaṃbhavāt gavādiśabdānāṃ saṃketagraha iva nātretaretarāśrayaprasaktirityabhipretya samākhyayā viniyogaṃ sādhayati -------- prakṛteti //
vākyenaiveti //
etacca śrutyādīnāmapyupalakṣaṇam /
ataeva āgneya ityādiyaugikeṣvapyagnyādīnāṃ devatātvasya taddhitaśrutyaiva pratipādanānna samākhyākṛto viniyogo 'gnyādīnām /
ataeva yatra yaugikapade tadavayavābhyāṃ śeṣaśeṣibhāvānvayayogyapadārthayorevopasthitiḥ, natu vrīhīn prokṣatītyādāvivaśeṣaśeṣitvanyatarasya tādṛkhotṛcamasādipadarūpasamākhyā ṣaṣṭhaṃ pramāṇamiti sāṃpradāyikāḥ //
yattu śivatattvaviveke samā cāsāvākhyāceti vyutpattyā anyatra pratipannasya anyatra pratipannena saṃbandhanimittaṃ saṃjñāsāmyaṃ samākhyā /
yathā agniryajñaṃ tapatu prajānan ityādimantrāṇāmatimuktihomānāṃ ca parasparasaṃbandhanimittamādhvaryavasaṃjñāsāmyamiti samākhyāsvarūpāntaraṃ svamatatvenoktam, tadadhvaryavādīnāṃ kartṛtvena viniyoge 'vyāpakatvādupekṣyam /
paśubandhaprakaraṇe catastro 'timuktīrjuhoti ityāmnātānāṃ caturṇāmatimuktihomānāṃ pūrvoktamantraiḥ saha saṃbandho na samākhyātaḥ, kintu āpastambasūtropātta eveti na tadarthamīdṛśaṃ mīmāṃsakaviruddhaṃ tatsvarūpaṃ pramāṇavaditi dhyeyam /
pākādyaṅgatvāditi //
tatra viśeṣyāṃśasya sāmarthyāt padāntaropādānataśca prāpteḥ viśeṣaṇāṅgatve tātparyāt vākyena viniyoga ityarthaḥ //
viśeṣaṇasyeti //
adhvaryvādeḥ kartuḥ camyarthabhakṣaṇasyaca viśeṣaṇībhūtasyādhyayanādyananvayāt tatkriyāvācakapadena viniyogāsaṃbhavāt viniyogavākyamākāṅkṣāyogyatādivaśena vakṣyamāṇavidhayā kalpayitvā kartṛtādirūpasaṃbandhapratītirityarthaḥ /
svatantravidhikalpaneti //
adhvaryuḥkāṇḍapaṭhitānanvādhānādipadārthān kuryādityevaṃvidhavidhikalpanetyarthaḥ /
so 'gnīniti //
etena -------- adhvaryukartṛtvavidhānābhāvasya prayogavidhividheyatvakleśasya ca parihāraḥ ------- sūcitaḥ //
vastutastu --------- aṅgavākyānāṃ bahutvāt tattadvākyaikavākyatāsaṃpādakatattacchabdānāṃ bahūnāṃ kalpanāpattergauravāviśeṣāt dharmigrāhakapramāṇena kāṇḍa eva svatantrādhvaryukartṛkatvaviniyogavidhyekakalpanā yuktā /
tatra yadyapi adhīte ityādividhau mantrārthavādādauca tattatsiddhavannirdeśadarśanena tadanyathānupapattyaiva etādṛśavidhikalpanānna samākhyayaiva tadvidhikalpanamupapadyata iti na samākhyāniko viniyoga iti śakyate vastum; tathāpi tatra viśiṣya yaugikapadānyathānupapattereva kāraṇatvāttayaiva vyavahāraḥ /
yatratu yājñikaprasiddhamātraṃ tatra vidherapi tadanyathānupapattimātrakalpyatvādyukta eva tayā vyavahāra iti draṣṭavyamiti //
atra prācīnaiḥ krame deśasāmānyalakṣaṇasaṃbandhaḥ pratyakṣa iti pradhānākāṅkṣāmātrotthāpanāt prakaraṇādikalpanena prāmāṇyam, samākhyāyāṃ tu viśiṣṭapadārthamātravācisamākhyābalāt nūnamanayoḥ kaścidasti saṃbandha iti saṃbandhakalpanā tataḥ phalavadbhāvanākathaṃbhāvatirohitāpyanvādhānāderākāṅkṣā kalpyetyevaṃ kramaprakaraṇakalpanena prāmāṇyamuktam, tadayuktam; ādhvaryavamityatra prakṛtipratyayābhyāṃ svaśakyārthasya saṃbandhasāmānyasya copasthitāvākāṅkṣāvaśena kartṛtādirūpasaṃbandhaviśeṣaparatvopapatteḥ saṃbandhakalpanāprasaṅgātsthānakalpakatvāyogāt /
ataḥ saṃbandhasya kḷptāmevopasthitimaṅgīkṛtya yatpadamātrakalpanamekavākyatāpādakamuktaṃ tadanukūlāṃ sthānakalpanāṃ darśayati -------- tacceti //
itikartavyatātveti //
adhvaryoḥ pūrvavadeva tanniyamādṛṣṭadvārā itikartavyatātvaṃ prakalpyānvādhānasyetādṛśetikartavyatākāṅkṣārūpaprakaraṇakalpanetyathraḥ //
spaṣṭārthamanyat //
prayojanaṃ pūrvapakṣe tattadvedavihitakarmasu jyotiṣṭomādyaṅgabhūteṣu ṛtvijāmaniyamaḥ, siddhāntetu niyama iti spaṣṭatvāt noktam // //
// iti ṣaṣṭhaṃ samākhyāviniyojakatādhikaraṇam //
- - - - - - <B1> (7 adhikaraṇam / ) (a.3 pā.3 adhi.7)
śruti-liṅga-vākya-prakaraṇa-sthāna-samākhyānāṃ samavāye pāradaurbalyam arthaviprakarṣāt / Jaim_3,3.14 /
tadevaṃ ṣaṭsu pramāṇeṣu nirūpiteṣu adhunā virodhe balābalaṃ nirūpyate /
virodhaścaikasya śeṣasya śeṣidvaye pramāṇadvayasattve yathaindrīmantrasya śrutyā gārhapatyāṅgatve liṅgāccendrāṅgatve /
athavā ekasmin śeṣiṇi śeṣadvayaviniyojakapramāṇadvaye /
yathā gārhapatye śrutyaindrīmantro liṅgādāgneyaḥ /
ayañca śeṣadvayaviniyogo dvāraikye satyeva balābalaprayojako na tu tadbhede 'pi; vākyaprakaraṇābhyāṃ vaimṛdhaprayājādīnāmekaśeṣyarthatve 'pi tadabhāvāt /
yatra tu ekasya śeṣasya ekasminneva śeṣiṇi pramāṇadvayaṃ, tatra vaiṣamye prabalasyaiva prayojanārthaṃ viniyojakatvaṃ, sāmye tvekasya viniyojakatvaṃ itarasya punaḥśrutitvena prayojanāntarakalpanam /
niyāmakābhāve dvayorabhyudayaśiraskatvakalpanaṃ karmāntarabodhakatvaṃ vā /
evaṃ yatrārūṇayā krīṇātītyādau āruṇyasyāpūrvasādhanībhūtakrayārthatve pramāṇatrayaṃ, tatrāpi śrutereva viniyojakatvaṃ na tvanyasya; vākyasyoddeśyasamarpakamātratvāt /
ataeva naindyetyatra liṅgavākyavirodhaḥ, vākyasyoddeśyamātrasamarpakatvena śrutisahakāritve 'pi kṛtikārakatvabodharūpaviniyojakatvābhāvāt /
prakaraṇaṃ tvapūrvasādhanatvalakṣaṇātātparyagrāhakamātraṃ na tu tadapi viniyojakam gauravāt /
ataeva viniyojakapramāṇabalābalavattātparyagrāhakapramāṇabalābalamapi nirūpyameva /
tadiha śrutyorvirodhe aindrīmantrasya tṛtīyayā gārhapatyāṅgatvameva natu taddhitaśrutyā indrādyaṅgatvam; tasya sūktataddhitatvena prādhānyena kṛtikārakatvavācitvābhāvāt /
ataśca tasya mukhyaśrutitvābhāvād durbalatvam /
evaṃ caitasya mantrasya liṅgādindrāṅgatvamiti śrutiliṅgavirodhe 'pyetadevodāharaṇam /
atra hi sarvatrottarottarasya pūrvapūrvakalpakatvena prāmāṇyasya tattannirūpaṇāvasare sthāpitatvāduttarottarasya śrutikalpanaṃ yāvadavagatasyaiva pūrvapūrveṇa śeṣaśeṣiṇornirākāṅkṣatvāpādanena bādhaḥ /
nacāṅgānāṃ prakṛtyarthatvena nirākāṅkṣāṇāmapi vikṛtyākāṅkṣayaivātideśakalpanavadindrādyākāṅkṣayaiva liṅgasya śrutikalpakatvopapattiḥ; tasya dhyānādyupāyāntareṇāpi smṛtisiddherniyamena vikṛtivadanākāṅkṣatvāt /
ataḥ śrutyā gārhapatyāṅgatvameva /
naca -------- śruteḥ karaṇatvamātrābhidhāyitvena gārhapatyanirūpitatvasya vākyādhīnatvānnāyaṃ śrutiliṅgavirodha iti ------- vācyam; tathātve 'pi brāhmaṇavākyatvena mantraliṅgāpekṣayā "yadyapyanyadevatyaḥ paśuri"tivatprabalatvopapatteḥ /
vastutastu yathā na kevalayā śrutyā virodho naivaṃ vākyenāpi; gārhapatyasamīpe ityevamupapatteḥ /
ataścobhayavirodhatve 'pi 'pradhānena vyapadeśā bhavantī'ti nyāyena śrutiliṅgavirodhodāharaṇatvam /
liṅgayorvirodhe mukhyasāmarthyena gauṇasya bādhaḥ /
liṅgavākyayostu 'syonaṃ te' iti sadanakaraṇaprakāśakasya pūrvārdhasya 'tasminsīde'tyuttarārdhena sādanaprakāśakena tasminkasminniti vibhāge sākāṅkṣeṇaikavākyatvātsakalasya mantrasya sadanasādanayoranyataratrobhayatra vā pratiṣṭhāpana eva vāsya tasminniti padasannidhirūpeṇa vākyena viniyoge prāripsite tataḥ pūrvapravṛttena liṅgena tattadākhyātasya mukhyaviśeṣyatvena svārthabodhakasya paropasarjanakatvakalpane pramāṇābhāvāttacchabdasya ca sā vaiśvadevītivadvākyāntaropasthitārthaparāmarśakatvenāpi caritārthatvātpratyekameva viniyoga iti /
vākyayorvirodhe upāṃśutvasya "tsarā vā eṣā yajñasye"ti vyavetayajñapadaikavākyatvādyajñabhāgadharmatvaṃ, tasmādyatkiñcitprācīnamagnīṣomīyāttenopāṃśu carantītyanena sannihitayatkiñcitpadaikavākyatayāvagatapadārtha- dharmatvena bādhyate /
vākyaprakaraṇayorvirodhe ca vaimṛdhasya vākyāvagatena paurṇamāsyaṅgatvena prakaraṇāvagatadarśāṅgatvabādhaḥ /
yattu agnīṣomādipadaikavākyatāpannānāṃ idaṃ havirityādipadānāmamāvāsyāṅgadevatāprakāśanārthatvaṃ prākaraṇikaṃ vākyena bādhyata ityudāharaṇamuktaṃ mūle, tacchrutiliṅgaviniyuktasya siddharūpatvena prakaraṇāviṣayasya ca sūktavākasya mukhyaprakaraṇaviniyojyatvaprasaktyabhāve 'pi adhikārākhyagauṇaprakaraṇasyāpūrvasādhanatvalakṣaṇātātparyagrāhakasya prasaktatvāttadbādhābhiprāyeṇa draṣṭavyam /
prakaraṇayorvirodhe mahāprakaraṇamavāntaraprakaraṇena /
prakaraṇakramayorvirodhe akṣairdīvyatītyādivihitavidevanādīnāṃ sannidhānādabhiṣecanīyākhyasomayāgāṅgatvaprasaktau prakaraṇādrājasūyāṅgatvam /
na cābhiṣecanīyasyāpi phalavattvena prakaraṇāśaṅkā, tasya vikṛtitvena kḷptopakāraprākṛtāṅganirākāṅkṣasya tadabhāvāt /
naca ------- vikṛtāvapi yatprākṛtāṅgānuvādena vaikṛtamaṅgaṃ vācanikaṃ vidhīyate yathā pṛṣattādi, tasyāpi vikṛtigatāṅgākāṅkṣāyāmanivṛttāyāmeva vidheyatvāttatsandaṣṭasya tatpūrvabhāvitvesati pradhānottarabhāvino 'pūrvāṅgasya vā prakaraṇenaiva grahaṇopapatteḥ videvanādīnāṃ cābhiṣecanīyottaramuktavidhābhiṣekapūrvabhāvitvena pāṭhātprakaraṇagrahaṇopapattiriti ------- vācyam; prākṛtāṅgānuvādena vihitasyāpyapūrvāṅgasyopahomavadvikṛtyākāṅkṣāyāṃ nivṛttāyāmeva vidhānāt /
yasya hi prākṛtakāryāpannatayā vaikṛtāṅgasya vidhānaṃ yathaudumbaratvaśarādestasyaivānivṛttākāṅkṣāyāṃ vidhānam, tatsandaṣṭasyaiva ca tatpūrvabhāvino vā pradhānottarāṅgasya vikṛtiprakaraṇena grahaṇam /
abhiṣekasya tu prākṛtakāryāpannatvābhāvānna tatpūrvapaṭhitānāṃ videvanādīnāmabhiṣecanīyaprakaraṇagrāhyatvopapattiḥ /
vastutastu abhiṣekasyāpi svatantrotpannasya prakaraṇādrājasūyāṅgatvāvagate r"māhendrastotraṃ pratyabhiṣicyate" ityatra pratiśabdayogena kālārthaḥ saṃyoga iti vakṣyate /
ato videvanādyabhiṣekāntānāṃ sarveṣāmeva sannidhānādinābhiṣecanīyāṅgatvaprasaktau prakaraṇena tadbādhaḥ /
naca rājasūyasyāpi pratyekaṃ vikṛtitvātprakaraṇābhāvaḥ; pavitrādārabhya kṣatrasya dhṛtiṃ yāvadrājasūyatvadharmapuraskāreṇa vācanikāṅgāmnānāttatsandaṣṭavidevanādīnāṃ prakaraṇagrāhyatvopapatteḥ /
evaṃ prakaraṇasya kramāntarairapi udāharaṇānyūhyāni /
evaṃ kramayorvirodhe sannidhānena yājyādvayasya kāmyaindrāgnadvayāṅgatve aniyamena prasakte yathākramapāṭhādādyasyādyāṅgatvam /
kramasamākhyayorvirodhe pauroḍāśikasamākhyāte kāṇḍe samāmnātasya śundhadhvamiti mantrādeḥ sannidhānātsānnāyyāṅgatvam /
naca māhadhikāreṇa sannidhibādhaḥ; tasyāpi vācanikāṅgasandaṣṭatvena balavattvāt /
nacaivaṃ tasya prakaraṇatvāpattiḥ; mantrasya siddharūpatvena liṅgāviniyojyatvena ca prakaraṇāviṣayatvāt /
sannidhānasyāpi samākhyāvadapūrvasādhanatvalakṣaṇātātparyagrāhakatva eva balābalaṃ na tu viniyoge /
tatra tūdāharaṇāntaraṃ mṛgyam /
evaṃ samākhyayorvirodhe ādhvaryavamiti sāmānyasamākhyāyā yajamānamiti viśeṣasabhākhyayā bādhaḥ /
evaṃ vdyantaritatryantaritādipramāṇasya pūrvaiḥ sahavirodhe śeṣānekatve ca udāharaṇāni kaustubhe draṣṭavyāni /
sa cāyaṃ śrutiliṅgādibādho 'prāptabādhaḥ /
tattvaṃ cāṅgatābodhakaliṅgādikalpyapramāṇapratibandhakatvam /
pūrvapūrvapramāṇena hi aṅgatve 'vadhārite nirākāṅkṣatvāduttarottarataḥ pūrvapūrvapramāṇakalpanaiva nodetīti so 'yamaprāptabādhaḥ /
evaṃ gṛhamedhīye ājyabhāgau yajatītyādāvapi /
anyatra sāmānyaviśeṣanityanaimittikabhāvādau prāptabādhaḥ /
kḷptasya bodhakasya viśeṣaviṣayatāpratibandhakatvam /
sāmānyaśāstrāderhi viśeṣaśāstrādinā padahomādiviṣayatāmātraṃ pratibadhyate, natu sāmānyaśāstramapi; tasya kḷptatvenākalpanīyatvāt, homāntareṣvapyāhavanīyābhāvāpattyā mithyātvasyāpi kalpayitumaśakyatvācca /
ataeva yena sāmānyaśāstrameva pūrvamālocitaṃ tasya viśeṣādarśanajanitabhrama eva viśeṣaviṣayako viśeṣaśāstreṇa bādhyate /
evaṃ yatrāpi "na tau paśau karotī" tyādau śāstraprāptasya niṣedhastatrāpi prāpakaśāstrasya yadyapi niṣedhasya prāptisāpekṣatvenopajīvyatvādatyantabādhānupapatterviśeṣaviṣayatvamāvaśyakam, tathāpi tatra vikalpāṅgīkārāttadabhāvapakṣe viśeṣaviṣayatvapratibandhānnoktalakṣaṇāvyāptiḥ /
yathā ca tatra rāgaprāptaniṣedhavat bhrāntiprāptasya bādhamaṅgīkṛtya na vikalpastathā kaustubhe draṣṭavyam /
vakṣyate cātrāpi daśame /
ataḥ siddhaṃ bādhasya dvaividhyam // 3 // 41 //
// iti saptamaṃ balābalādhikaraṇam //
- - - - - - <B2> adhyāyādāvathātaḥ śeṣalakṣaṇamityādyasūtre piṇḍīkṛtya kaḥ śeṣaḥ kena hetunā śeṣaḥ kathaṃ viniyujyate? śrutyādīnica viniyoge kāraṇāni, teṣāṃ ca virodhe balābalamiti pañcānāṃ pratijñāyā bhāṣyakāreṇa darśitatvāt tatra viniyogakāraṇaśrutyādinirūpaṇapratijñāntaṃ vicārya adhunāvasaralābhāt tadanantarapratijñātaṃ balābalaṃ durbalapramāṇakṛtaviniyogāpavādopayogitayā cintyate ityavasarasaṅgatyā sākṣādadhyāyasaṅgatimiha vākyapāde uktānāṃ vākyādisamākhyāntapramāṇānāmeva balābalavicārasya kartumucitatve 'pīhaiva śrutiliṅgapramāṇayorapi tadvicārasya buddhisthatvena buddhisthānātmikāṃ pādasaṅgatiṃ tathā sarvapramāṇanirūpaṇojjīvyatvāt balābalavicāraṃ prati samākhyāntapramāṇanirūpaṇasya hetutvāt hetuhetumadbhāvarūpāmanantarasaṅgatiṃ ca sūcayannadhikaraṇavicāraṇīyaṃ pratijānīte --------- tadevamiti //
virodha iti //
satyapi virodhe aśvamahiṣyādivadekaviṣayatvābhāve balābalasyābhāvāt satyapyaruṇāvākye āruṇyasyāpūrvasādhanībhūtakrayārthatvarūpaikārthaviṣayatve śrutivākyaprakaraṇānāṃ virodhābhāve tasyābhāvādvirodhe satyekaviṣayatve balābalaṃ nirūpyate ityarthena sūtragataṃ samavāyapadaṃ vyākhyātam /
etadeva virodhasyaikaviṣayatvapradarśanavyājena kathayati -------- virodhaśceti //
tadabhāvāditi //
yena prayojanena darśapūrṇamāsāṅgatvaṃ prayājādīnāṃ na tenaiva vaimṛdhasya, tattajjanyopakārabhede sati dvāraikyābhāvāditi na tatra samavāya ityarthaḥ /
evaṃ codāhṛtasamavāyadvayasthale pramāṇayoḥ prabaladurbalabhāve ekasya bādha eva, sāmyetu ādyasthale pramāṇadvayenobhayāṅgatvopapatteḥ samuccaye nobhayāṅgatvam /
dvitīyetu vikalpo yathā vrīhiyaveṣvitibhāvaḥ /
yatratviti //
yathā ekasvargarūpaṃ phalaṃ prati darśapūrṇamāsādeḥ śeṣatābodhakaṃ "sarvebhyo darśapūrṇamāsau" "darśapūrṇamāsābhyāṃ svargakāmo yajete" ti pramāṇadvayaṃ, tatraikasya sāmānyavākyatvādaparasya viśeṣavākyatvāt vaiṣamye sati viśeṣavākyasyaiva svargaṃ prati viniyojakatvakalpanāt sāmānyasyaiva taditaraviṣayatvakalpanam /
tatprayojanañca bhinnakāryatāvacchedakāvacchinnatvabodhanenaikasmāt prayogādekakāryatāvacchedakāvacchinnasyaikasya utpattiniyamenāvacchinnaputrapaśvādyanyataraphalotpattiniyamasiddhāvapi putrasvargarūpaphalotpattyavighātaḥ; svargasya bhinnakāryatāvacchedakāvacchinnatvenotpattau bādhakābhāvāt /
atastādṛśaprayojanāntarasidhyarthaṃ prabalasyaiva viniyojakatvamityarthaḥ /
prayojanāntarakalpanamiti //
yathā śākhābhedenāmnātayoḥ svargavākyayoḥ tattadadhyetṛbhedena jñāpanarūpaprayojanāntarakalpanam /
ataścaitādṛśasthale samavāyābhāvānna vicāraviṣayatvamityarthaḥ //
anyatrāpi samavāyābhāvānna vicāraviṣayatvamityatidiśati --------- evamiti //
atrahi tṛtīyāśrutyā kriyāsāmānyaṃ pratyaṅgatvamāruṇyasya krīṇātisamabhivyāhāralakṣaṇavākyena krayarūpakriyāviśeṣaṃ prati prakaraṇenāpūrvasādhanaviśeṣaṃ pratīti trayāṇāṃ samavāye 'pyaṅgatābodhakatvaṃ tṛtīyāśrutereva anyattu viśeṣaṇavidhikalpanāyāṃ uddeśyasamarpaṇārthamityekaviṣayatvābhāvānna samavāya ityarthaḥ //
yadyapi sarveṣāṃ pramāṇānāṃ samavāye pāradaurbalyamuktam, na dvayoḥ; tathāpi śrutyādisamudāyasyaikatra viniyojakatvābhāvāt tadgatabalābalasya pratipradhānāvṛttinyāyena pratyekameva viniyojakatvaparyavasānāt sūtrasvārasyāt ekaikasya daurbalye vaktavye aparatra prābalyopanyāsaḥ pratiyogividhayā kathyata iti dvayoḥ dvayoḥ balābalavicāro nāyuktaḥ /
tatra yathā prasaṅgādiha pāde śrutiliṅgayoḥ balābalavicāraḥ tathaiva tulyanyāyatvāt śrutyoḥ liṅgayoścāpi tadvicāraḥ prāsaṅgikaḥ kariṣyate /
tatra śrutiliṅgavirodhodāharaṇe "aindyā gārhapatyamupatiṣṭhata" ityasmin na svarūpeṇa tṛtīyādiśruteḥ mantraliṅgasya ca virodhaḥ; indraṃ pratyaṅgatvasya tṛtīyayā vārayitumaśakyatvāt /
gārhapatyamiti niyame sati tayoḥ virodhaprasaktiḥ /
tasya cāruṇyaikahāyanyoriva gārhapatyapadasamabhivyāhārarūpavākyakṛtatvāt vākyaliṅgayoriha virodho na śrutiliṅgavirodhaprasaktirityāśaṅkāṃ vakṣyamāṇaśrutiliṅgavirodhodāharaṇatādarthyādihaiva prasaṅgānnirākaroti -------- ataeveti //
aindrīnirūpitoddeśyatā yā gārhapatyasya sā paraṃ vākyagamyā syāt ; aṅgatvasya taduddeśapravṛttakṛtikārakatvāt bhāvanānvayitayā prādhānyena tadvācakatṛtīyāyāḥ prādhānyāt "pradhānena vyapadeśāḥ" iti nyāyāt liṅge balīyasi gārhapatyaindrīpadayoḥ pṛthak tṛtīyākṛtāṅgatvasyāvaśyakatayā mantraliṅgakṛtāṅgatvabodhena saha virodhāt śrutiliṅgavirodhodāharaṇavyapadeśa ityarthaḥ //
vastutastu ------- āgneyīṃ prati gārhapatyaśeṣitāyā ivendraṃ pratyeva liṅgādeva prāptervākyānarthakyāpatteḥ gārhapatyamiti śrutyuktaṃ śeṣitvamāgneyīvyatiriktaviṣayam, aindrīti śrutyuktañca karaṇatvamindravyatiriktaviṣayamityavaśyavaktavyatvāt śrutyuktasāmānyarūpasyāpi astyeva liṅgena virodhaḥ, natu vākyakṛta eveti na doṣaḥ /
viśiṣya cemāmāśaṅkāṃ svayameva prakārāntareṇa nirākariṣyate //
ata eveti //
apūrvasādhanatvalakṣaṇātātparyagrāhakatvaṃ prakaraṇādīnām /
ataeva teṣāmapyantyena viniyoge balābalaṃ prāpnoti tadapīha nirūpyameva /
yathā liṅgena pūṣānumantraṇamantrasya viniyoge darśapūrṇamāsaprakaraṇapaṭhitatvena tallakṣaṇātātparyagrāhakatve prakaraṇasya prāpteḥ liṅgavirodhāt samākhyāyā eva tattātparyagrāhakatvaṃ vakṣyate ityarthaḥ //
natu taddhitaśrutyeti //
indro devatā yasyāḥ saindrītyarthe aindrīti taddhitānuśāsanāt taddhitenendrasya prakāśyasvarūpadevatātvāvagamena prakāśyatayā indrasya prādhānyapratīteraṅgatvaghaṭakībhūtoddeśyatāvācitvāt mantrasya indraṃ pratyaṅgatābodhakatvaṃ netyarthaḥ //
naca ------- niveśanaḥ saṅgamano vasūnāmityaindyā gārhapatyopasthānaṃ cayane śrutam, kadācana starīrityaindyā gārhapatyopasthānaṃ cāgnihotre śrutam, tatrobhayatrāpīndrasyānuddeśyatayā aindropasthānasyānanuṣṭheyatayā kathaṃ taddhitaśrutyā indrāṅgatvaprasaktiḥ? ataeva śrutyoḥ virodha iva śrutiliṅgavirodhe 'pi nedamudāharaṇam, apitu aśvābhidhānīmādatte ityeva yuktamiti --------- vācyam; sadhyāsamiti liṅgāt bhakṣamantre grahaṇavidhikalpanayā tadaṅgatvasyevehāpi indraśrutyā liṅgenaca indropasthānavidhikalpanayā tadaṅgatvopapatteḥ /
tathāca gārhapatyasamīpe sthitvā aindyopasthānaṃ kartavyamityevaṃ prasakterna doṣa iti bhāvaḥ /
prādhānyena prakāśyatvasya taddhitārthatve 'pi prādhānyasya viśeṣyatayā taddhitādanupasthiterna tasya mukhyaśrautatvalakṣaṇākrāntatvam /
prādhānyamapica nāṅgatvaghaṭakībhūtepsitatvākhyaṃ tadartho 'pitu viśeṣaṇāntarāpekṣayā śābdabodhe viśeṣyatvamātram /
ataścoktaprādhānyena ripsitatvākhyaṃ tallakṣayitvā taddhitaśrutyā viniyogo na bodhyetetikārakaśrutyapekṣayā daurbalyamityāha tasyeti //
evaṃ kārakaśrutyoḥ vijātīyaśrutyoḥ samānajātīyaśrutyośca virodhe balābalodāharaṇāni kaustubhe draṣṭavyāni /
evamiti //
naca aindyadhikaraṇena paunaruktyam; tatra gauṇasāmarthyaśrutisahāyatvamātranirūpaṇeneha liṅgādindrāṅgatvaśaṅkānirāsena cāpaunaruktyāt //
na tāvat liṅgaṃ svata eva pramāṇam; vedo 'khilo dharmamūlamiti smṛtyā vedasyaiva kḷptasyānumānikasya vā dharmapramāṇatvaniyamāt, arthādhyāhāranirākaraṇācca //
kiñca vihitatvaghaṭitamaṅgatvaṃ na vidhikalpanaṃ vinā saṃbhavati /
saca liṅādiśabdaikagamya ityavaśyaṃ liṅādiśabdakalpane āvaśyake tatra śabdopasthitasyaiva kṛtikārakatvāderanvayārthaṃ tadvācakapadarūpaśrutikalpanenaiva liṅgasya viniyojakatvamityabhipretya daurbalyamupapādayati -------- atrahīti //
vikṛtivaditi //
vikṛtisthale devatādirūpāṅgāpekṣāyā ākṣepeṇānivṛtteḥ sādṛśyaviśeṣopasthāpitaprākṛtāṅganiyamo nāyukta iti vaiṣamyamityarthaḥ /
atraca bādhyaliṅgaviṣaya indrapadameva, avaśiṣṭapadānāṃ tadekavākyatayendrāṅgatvānna tadviṣayatvam, kintu indrapadaikavākyatāpannarūpavākyena śrutyā virodhaḥ /
athavā -------- śrutyā indrapadasya gārhapatyāṅgatve pramāpite avaśiṣṭapadānāṃ tadekavākyatayā gārhapatyāṅgatvasyaivāpatterna tadaṃśe 'pi śrutervyāpāra iti sā vastutastātparyagatyā indrapadamātraviṣayiṇyeveti na tadaṃśe śrutivākyavirodha iti dhyeyam //
vākyaliṅgavirodhamaṅgīkṛtyāpi liṅgabādhaṃ samarthayati -------- tathātve 'pīti //
yadyapyanyadevatya iti //
nahi mantraliṅgaṃ brāhmaṇavākyāpekṣayā prabalam /
mantrasya brāhmaṇavihitārthaprakāśakatvena tatparatantratvāt /
ato yathaiva manotāmantrasya dvidevatāprakāśanāsamarthasyāpi "yadyapyanyadevatya" iti vākyīyaviniyogabalāt lakṣaṇādinā sāmarthyamupakalpya agnīṣomīyāṅgatvamevamihāpi gārhapatyāṅgatvaṃ vākyenopapadyate //
naca "yadyapyanyadevatya" ityasya prakṛtāvavāyavyanigadatvenāprasaktavāyavyādipaśūhanivartakatvaṃ saṃbhavati /
ata utkarṣanivartakatayā prakṛtāvaṅgatvabodhakatvamevetyarthaḥ /
anayaiva rītyā "ityaśvābhidhānīmādatta" ityatra vākyīyaviniyogaṃ ye icchanti teṣāṃ mate 'pi liṅgabādha upapādanīyaḥ //
liṅgyoriti //
barhirdevasadanamityādimantrāṇāṃ gauṇasāmarthyena gauṇārthāṅgatve prasakte 'mukhyasāmarthyena mukhyārthāṅgatvāt tadbādha ityarthaḥ /
syonaṃ ta iti //
"syonaṃ te sadanaṃ karomi ghṛtasya dhārayā suśevaṃ kalpayāmi /
tasmin sīdāmṛte pratitiṣṭha vrīhīṇāṃ medhaḥ sumanasyamāna" iti mantraḥ pātryāmājyābhighāritāyāṃ puroḍāśasya sthāpane prayujyate /
asyārthaḥ :---- he vrīhīṇāṃ medhaḥ! vrīhivikārabhūtayāgārhadravya puroḍāśa te sadanaṃ sthānaṃ syonaṃ śrlakṣṇaṃ ghṛtasya dhārayā karomi yataḥ suśevaṃ sukhaśayanayogyaṃ kalpayāmi tasmin tasmin sadane amṛtaṃ nāsti mṛtaṃ dāhādikṛtamaraṇaṃ yasmin tathābhūte sumanasyamānaḥ prīyamāṇaḥ san tvaṃ pratitiṣṭha sthiro bhaveti /
atra pūrvārdhottarārdhayorekatra sannidhānātmakavākyena sadanakaraṇe sādanevāṅgatvena prasaktayoḥ liṅgena bādhe vaktavye kathamatra bhinnapratītiviṣayānekamukhyaviśeṣyarāhityarūpaikārthyasyā'khyātabhedenābhāvāt ekavākyatvasyāprasakteḥ kathamanyataramātre dvayoraprasaktiḥ? yena virodho nirūpyetetyata aikavākyatāṃ sādhayati -------- tasminkasminniti //
pratītita ekārthyābhāve 'pi tacchabdasya pūrvasāpekṣatvena "ye yajñapatiṃ vardhānī" tyādau yacchabdasyeva vibhajyamānasākāṅkṣatvāt tanmātreṇa tadvadevārthaikatvamapi prakalpyaikavākyatvopapattiḥ /
saṃbhavati hyākhyātopāttabhāvanāyā api sākāṅkṣatve paśya mṛgo dhāvatītyatreva bhāvanāntare prakāratayānvayena sā /
ataeva ākāṅkṣāvaśenā'khyātārthasya mukhyaviśeṣyatvabādhe 'pi na kṣitirityarthaḥ /
yadyapi asañjātavirodhitvāt ākāṅkṣotthāpakatacchabdaśravaṇābhāvācca na pūrvākhyātasya prakāratayā svārthabodhakatvakalpanā, apitur idṛśaṃ sadanakaraṇaṃ yasya tvatpratiṣṭhāpanaṃ sādhyamityevamuttarākhyāta eva prakāratvakalpanāduttarākhyātasyaiveti pūrvārdhasya sadanakaraṇe liṅgena viniyoge 'pyuttarārdhasya devasyatveti padānāṃ nirvāpādipadaikavākyatayā nirvāpa iva pūrvārdhaikavākyatayā sadanakaraṇa eva prāptirataḥ sadanasādanayoranyataratra ubhayatra pratiṣṭhāpana evetyuktiḥ saṃbhavamātreṇa kathañcinneyeti bhāvaḥ //
tacchabdabalādarthaikatvaṃ prakalpya ekavākyatvamityuktaṃ dūṣayati -------- tacchabdasyeti //
yacchabdasyaiva svavākyopasthitatacchabdopakṣiptaniyamasya "yena karmaṇertsettajjayā" nityādau vyutpattisiddhatvadarśane 'pi tacchabdasya vākyopasthitamātraparāmarśitvaniyamābhāve darśanādihāpi svavākyopasthitamātraparāmarśitvaniyamābhāve sati vibhajyamānasākāṅkṣatvānupapatteḥ arthaikatvakalpanāyogāt vibhajyaiva liṅgena viniyogaḥ pūrvārdhe sadanakaraṇe uttarārdhaṃ sādana iti //
evaṃ sati "yadi devasyatvā"dipadavadasya pṛthak prayoge ānarthakyaṃ bhavet, tadā naivaṃ viniyogaḥ syāt, astitu liṅgādapūrvasādhanībhūtasādanārthatvena sāmarthyam /
ato yukto liṅgena vākyabheda ityarthaḥ /
liṅgasya prakaraṇakramasaṅkhyābhirvirodhe balābalodāharaṇaṃ kaustubhe draṣṭavyam //
vākyayorvirodha iti //
vyavetiti //
"tsarā vā eṣā yajñasya tasmāt yatkiñcitprācīnami"ti vākye yajñaśabdasya prācīnapadenānvaye tacchabdayatkiñcitpadābhyāṃ vyavadhānādyajñapadasya vyavetatvamityarthaḥ //
vākyaprakaraṇayorvirodha iti //
yadyapi paurṇamāsīpadaṃ saṃsthāyāṃ pratiyogitvenānvitatvāt na uddeśyasamarpakam; tathāpyupasthitatvāt tadvācakapadāntarakalpanayā tadupapattervākyāvagatenetyuktam /
evaṃ ca sadapi paurṇamāsyaṃśe prakaraṇaṃ prāptānuvāda evetyarthaḥ /
yattviti //
"sūktavākena prastaraṃ praharatī" tyatra śrutyā viniyuktasya sūktavākanigadasya parvadvaye yathādevataṃ vibhajya viniyogaḥ pūrvapāde nirṇītaḥ /
tatra "agnīṣomāvidaṃhavirajuṣetāṃ avīvṛdhetāṃ maho jyāyo 'krātāṃ indrāgnī idaṃhavirajuṣetāṃ" ityādi paṭhyate /
tatrāgnīṣomendrāgnīpadayoḥ vibhajya viniyoge 'pyavaśiṣṭānāmidaṃ havirityādīnāmubhayatra paṭhitānāṃ padānāṃ prakaraṇādubhayārthatve sati "agnīṣomāvidaṃhavirajuṣetāṃ avīvṛdhetāṃ maho jyāyo 'krātāṃ" ityevaṃ kevalendrāgnipadasamabhivyāhārarūpavākyena tattaddevatāprakāśakapadaikavākyatayā bādhyate /
ataḥ tadvadeva vibhajya viniyoga ityarthaḥ /
sannipātināṃ naiva prakaraṇaṃ viniyojakamiti prakaraṇādhikaraṇe svopapāditarītyā ayuktaṃ matvānyathā samarthayati -------- tacchrutīti //
tattaddevatāvācipadasamabhivyāhārarūpavākyasyaiva tattadapūrvasādhanatvalakṣaṇātātparyagrāhakatvaṃnatvadhikārasyaivetyevaṃ tadbādhābhiprāyeṇetyarthaḥ //
yattu atra prakāśakāraiḥ śrautavrīhyarthatve ānarthakyāt kimākāṅkṣāyā anivṛtteravaghātādeḥ sannipātino 'pi prakaraṇaviniyojyatetyuktam, tat ------ na; adhikārākhyaprakaraṇenāpūrvasādhanatvalakṣaṇayā ānarthakyaparihāreṇa tādrūpyeṇa vrīhyarthatve sati kimākāṅkṣānivṛtteḥ śruteḥ prakaraṇāt balīyastvenaca prakaraṇaviniyojyatvānupapatteḥ /
etena -------- prathamata itikartavyatātvenānvayābhāve prakṛtakarmānanvayino 'vaghātasyānarthakyaparijihīrṣāyā evāpravṛtteḥ prakaraṇagrāhyatvaṃ somanāthoktaṃ ------ apāstam; prakaraṇenāvaghātādīnāmitikartavyatātvenānvaye prayājādīnāmiva tena teṣāmapyapūrvasaṃbandhāvagatāvapūrvārthānāṃ satāṃ vrīhyarthatvabodhane ānarthakyāprasakteḥ vrīhyādipadeṣu tatparihārāyāpūrvasādhanatvaṃ tattadvidhibhireva sidhyatīti vyarthaṃ prakaraṇaviniyojyatākalpanaṃ iti prakaraṇādhikaraṇa eva vaktavyamiha prasaṅgādāviṣkṛṣamiti //
prakaraṇayorvirodha iti //
yathābhikramaṇasya mahāprakaraṇāt darśapūrṇamāsāṅgatvaprasaktāvavāntaraprakaraṇena tat bādhitvā prayājāṅgatvamityarthaḥ //
prakaraṇakramayoriti //
akṣairdīvyatītyādīti //
anekeṣṭipaśusomayāgātmakarājasūyaprakaraṇe abhiṣecanīyākhyasomayāgasannidhau "akṣairdīvyati rājanyaṃ jināti śaunaḥśapamākhyāpayatī"tyādibhiḥ videvanādayo dharmā ākhyātāḥ /
jitāni janayatītyarthaḥ /
bahvṛcabrāhmaṇe samāmnātaṃ śunaḥśepaviṣayamupākhyānaṃ śaunaḥśepopākhyānamityarthaḥ /
teṣāṃ cāyāgatvāt rājasūyapadavācyatvābhāvāt phalavadrājasūyasannidhānāt cāturthikanyāyenāṅgatve nirvivāde sati sannidhānādabhiṣecanīyāṅgatvaṃ prāptaṃ rājasūyamahāprakaraṇena bādhitvā rājasūyāṅgatvamityarthaḥ //
kḷptopakāreti //
yadyapi prākṛtānāmaṅgānāṃ prakṛtyupakārakatayā ākāṅkṣābhāve vikṛtisaṃbandho vikṛtyanyatarākāṅkṣārūpasthānāt, vaikṛtānāṃ tūbhayākāṅkṣayā saṃbandhe sati prakaraṇena prabalena vikṛtyā apūrvāṅgagrahaṇameva prāpnoti; tathāpi pramāṇabalābalāpekṣayā prameyapadārthagatabalābalasya jyāyastvāt tadālocane kḷptopakārakatvena prākṛtāṅgagrahaṇameva prathamato yuktam /
nahi vikṛtiḥ padārthān ākāṅkṣati, kintu tajjanyānupakārān tatpṛṣṭhabhāvena ca padārthān /
ataeva yāvatpadārthānvayaṃ kathaṃbhāvākāṅkṣānuvṛtteḥ tayaiva padārthānāṃ prathamaṃ grahaṇāt vaikṛtopakārāṇāmutthāpyākāṅkṣayaiva grahaṇamiti nobhayākāṅkṣālakṣaṇaprakaraṇaṃ vikṛtāviti kḷptopakāretyanena sūcitam /
yathā pṛṣattādīti //
"pṛṣadājyonānūyājān yajatī"ti cāturmāsyagatavidhinā anūyājoddeśena pṛṣattāguṇo vidhīyate /
tatra vikṛteḥ kathaṃbhāvākāṅkṣā upakārapṛṣṭhabhāvena anūyājānvayaṃ yāvadanuvartataiti yāvadanūyājānvayo bhavati tāvadanūyājānāṃ svāṅgasaṃbandhaṃ vinānvayāyogāt tanmadhyapātitvāt pṛṣattāyā anivṛttākāṅkṣāyāmeva grahaṇādubhayākāṅkṣayā grahaṇāt prakaraṇenaiva grahaṇaṃ bhavati /
tatsaṃdaṃśamadhyavartino 'ṅgasya, yathā sāṃgrahaṇeṣṭyāṃ āmnātaprayājānūyājadharmāntarālavihitā'manahomādeḥ /
tathā tādṛśaprākṛtāṅgasaṃbadhyaṅgasaṃdaṣṭaṃ yat na bhavati prākṛtāṅgasaṃbadhyaṅgasaṃbandhātpūrvabhāvitayā pradhānottarāṅgānvayaṃ yāvadākāṅkṣāyā anivṛtteranivṛttākāṅkṣāyāmeva grahaṇāt prakaraṇena grahaṇamityarthaḥ //
vastutastu -------- āmanahomānāṃ naivānivṛttākāṅkṣayā prakaraṇena grahaṇamiti caturthe svayameva vakṣyate /
evañca prakṛte "māhendrasya stotraṃ pratyabhiṣicyate" iti vākyena prākṛtamāhendrastotrāṅgānuvādenābhiṣekasya abhiṣecanīyottāraṅgatayā vidhānārthasyānivṛttākāṅkṣāyāṃ grahaṇe sati tatpūrvabhāvitayā abhiṣecanīyottaramāmnātānāṃ videvanādīnāmapi paśvādiṣu sāmidhenyanuvādena vihitasāptadaśyavadanivṛttākāṅkṣayā grahaṇopapatteḥ prakaraṇenaivābhiṣecanīyāṅgatvāpattiḥ, ata āha -------- videvanādīnāṃ ceti //
yāvatā svāṅgena prakṛtau aṅgānāṃ kḷptopakārakatvaṃ tāvatsvāṅgasahitasyāṅgasya kḷptopakārakatvena vikṛtyākāṅkṣayā grahaṇam, tāvataiva tadākāṅkṣoparamāt /
yattu prākṛtāṅgānuvādenāprākṛtamaṅgaṃ tadvināpi prākṛtāṅgasya prakṛtau kḷptopakārakatvadarśanādihāpi tasyaiva vikṛtyākāṅkṣayā grahaṇāt ākāṅkṣāyā nivṛtteḥ anivṛttākāṅkṣāyāmagrahaṇāt upahomānāmivānyatarākāṅkṣayaiva grahaṇamiti na prakaraṇam /
etena -------- tatsandaṣṭasya prākṛtāṅgasaṃbandhyaṅgasaṃbandhāt pūrvabhāvinaḥ pradhānottarāpūrvāṅgasya vāpi naiva prakaraṇena grahaṇam iti sūcitam /
tathāca prakṛte satyapi abhiṣekasyāpūrvatve nivṛttākāṅkṣayaiva grahaṇāt nābhiṣecanīyaprakaraṇamityabhipretyāśaṅkāṃ nirasyati -------- prākṛtāṅgānuvādeneti //
kutra tarhi prakaraṇena vikṛtāvaṅgatvamityata āha -------- yasya hīti //
audumbaravākyena vihitasyaudumbaratvasya tena kiṃ bhāvayedityākāṅkṣāyāṃ dṛṣṭādṛṣṭarūpayūpamātrārthatvena prakṛtau taṃ vināpi jātatvenānarthakyāparihārādanivṛtterastyeva bhāvyākāṅkṣā /
vikṛterapyasti kathaṃbhāvākāṅkṣā /
sāca tadā śāmyati, yadopakārāstatpṛṣṭhabhāvenaca padārthā anvīyante natūpakārānvayena śāmyati /
ataśca yathā indriyabhāvanāyāḥ karaṇākāṅkṣā dadhnaḥ karaṇatvenānvaye jāte siddhasya karaṇatvānupapattyā homasyāśrayatvānvayaṃ yāvadanuvartate natu dadhyanvayamātreṇa nivartate /
āśrayatvenaca gṛhyamāṇo homaḥ karaṇākāṅkṣayaiva gṛhyate ityucyate, natvāśrayākāṅkṣā nāma caturthyasti; evaṃ vikṛteḥ kathaṃbhāvākāṅkṣā nopakārānvayamātreṇa nivartate /
upakārapṛṣṭhabhāvena gṛhyamāṇāḥ padārthāḥ kathaṃbhāvākāṅkṣayaiva gṛhyante /
tatra prākṛtāḥ padārthāḥ tayā gṛhyamāṇā api prakṛtyupakārakatayā teṣāṃ nirākāṅkṣatvānna prakaraṇena gṛhyante, ye tvaprākṛtāḥ prākṛtasthānāpannā audumbaratvādayo 'nyānupakārakatayā teṣāṃ nirākāṅkṣakṣatvānna sākāṅkṣāste paśuniyojanayūpapṛṣṭhabhāvena yāvat khādiratvamāyāti tāvadvidhīyante ityubhayākāṅkṣayā grahaṇāt prakaraṇena gṛhyanta iti tasyāṃ vikṛtāvasti prakaraṇam /
evaṃ śareṣvapi jñeyamityarthaḥ //
prakṛte vailakṣaṇyaṃ darśayati --------- abhiṣekasya tviti //
etena -------- abhiṣecanīyāṅgamāhendrastotrāṅgatayābhiṣekasya vidhānādabhiṣecanīyāvāntaraprakaraṇamiti ---------- nirastam; avāntaraprakaraṇatvenābhimatasyābhiṣecanīyasya sākāṅkṣatvaṃ śaunaḥśepapāṭhakāle yadi syāt tadā tatsannidhāvāmnātena śaunaḥśopākhyānādinā svavākyārthaparipūrṇenāpyavāntaraprakaraṇalakṣaṇā vākyaikavākyatā kalpyeta, tasya tvabhiṣecanīyasya videvanādibhyaḥ prāgeva prākṛtairaṅgaiḥ nirākāṅkṣatvena yāvadasatyākāṅkṣā kalpyā tataḥ prāgeva rājasūye kathaṃbhāvākāṅkṣayā siddhe viniyoge avāntaraprakaraṇavattvāyogādityarthaḥ //
evaṃ māhendrastotrāṅgatvamabhiṣekasyāṅgīkṛtyāpi prakaraṇāgrāhyatvamupapādyādhunā tadaṅgatvameva abhiṣekasyāyuktamityāha --------- vastutastviti //
śaunaḥśepamākhyāya pratyabhiṣicyata ityevaṃ videvanādyabhiṣekāntānāṃ svātantryeṇotpannānāṃ madhye abhiṣeke māhendrasya stotraṃ pratyabhiṣicyata ityanena māhendrastotrakālamātravidhānena māhendrastotrāṅgatvābhāvānna prākṛtāṅgānuvādenābhiṣekavidhiḥ /
ataḥ stotradvārā apūrvatvavidhayāpi kathaṃbhāvagrahaṇāyogānna prakaraṇavyāpāraḥ saṃbhavati ityutkarṣāpakarṣābhyāmanuṣṭheyatvāvagatau prayojanāpekṣābhāvena yatrotpattiḥ tatraiva prayojanāpekṣayā tatkalpane teṣāṃ mahāprakaraṇāt rājasūyāṅgatvameva natu sannidhānādabhiṣecanīyāṅgatvamityarthaḥ //
nanu ------- rājasūyo nāma nārthāntaram, apitu iṣṭipaśusomayāgā eva, teca sarve pratyekaṃ vikṛtitvānnirākāṅkṣā iti kathaṃ rājasūyamahāprakaraṇamityāśaṅkate -------- naceti //
samādhatte -------- pavitrādārabhyeti //
pavitrasaṃjñakāt somayāgādārabhya kṣatrāṇāṃ dhṛtāstriṣṭomāgniṣṭomaḥ tenāntato yajeteti vidhivihitaṃ kṣatrasya dhṛtiritisaṃjñakaṃ somayāgaṃ yāvadaṅgavidhiṣu rājasūyāya hyenā utpunātītyupakramāt rājasūyenejānaḥ sarvamāyuretītyupasaṃhārācca teṣāṃ rājasūyatvapuraskāreṇa vidhānapratīteḥ vācanikāṅgasandeśena rājasūyatvena rūpeṇa sarveṣāmevākāṅkṣāyā uttejanāttāvadantamākāṅkṣānuvṛtteḥ tatsaṃdaṃśapatitānāmapi tatprakaraṇagrāhyatvamevopapannamityarthaḥ //
etacca rājasūyāṅgamadhyapatitatvaṃ videvanādīnāṃ śākhāntaramanusṛtyoktam //
vastutastu ---------- taittirīyabrāhmaṇe ṣoḍaśagrahavartyabhiṣekārthāyāṃ "rājasūyāya hyenā utpunātī"tyanena hiraṇyakaraṇakamutpavanaṃ vidhāya madhye āsandyārohaṇādibahūnyaṅgāni vidhāya abhiṣekapūrvottarabhāvibhūtāveṣṭihomān rājasūyenejāna ityarthavādasahitavidhinā vidhāya "māhendrasya stotraṃ pratyabhiṣicyate" ityanenābhiṣekaṃ vidhāya bahūnāmaṅgānāmante "diśobhyayaṃrājābhūdi" tyādinā videvanaśaunaḥśepopākhyānavidhyāmnānāt kṣatrasya dhṛtiṃ yāvannaiva rājasūyaparāmarśena dharmāmnānaṃ navā rājasūyatvapuraskāreṇa vihitadharmamadhyapātitvaṃ videvanādīnāmasti /
ataeva --------"tadīyo hi kathaṃbhāvaḥ pavitrādārabhya kṣatrasya dhṛtiṃ yāvadanusṛtaḥ śaknoti videvanādīni saṃpraṣṭumi"tivārtikaṃ "prātyātmikāpūrvasidhdyai kathaṃbhāvasya prākṛtaiḥ nivṛttāvapi samastasādhyaphalāpūrvasidhyai kathaṃbhāvasya pavitrākhyāt somayāgādārabhya kṣatrasya dhṛtyākhyasomayāgaparyantamanuvṛttestanmadhyapātividevanādisparśāt tatkathaṃbhāvena viniyogaḥ siddha ityāśayaḥ" iti granthena nyāyasudhāyāṃ kathaṃbhāvānivṛttimadhyapātitvaparatayā vyākhyātam, natu videvanādīnāṃ rājasūyatvapuraskāreṇa vihitadharmasandaṃśapātitvaparatayā /
śāstradīpikāyāmapi keṣucidaṅgeṣu rājasūyārthatvaśravaṇena rājasūyatvena kathaṃbhāvākāṅkṣāmupapādya mahāprakaraṇenaiṣāṃ tadaṅgatvamuktam, natvavāntaraprakaraṇāditi //
nahi bhāṣyavārtikādyadarśite videvanādīnāṃ vācanikāṅgasandaṃśe śākhāntarīyatvakalpanā prabhavati /
ato 'tra sarveṣāṃ navīnanibandhakārāṇāṃ vācanikāṅgasandaṃśapaṭhitatve bhramaeva //
paramārthatastu --------- mahāprakaraṇāt rājasūyāṅgatvasiddhānto 'pi kṛtvācintayaivātra yuktaḥ, taittirīyaśākhāyāmabhiṣecanīyaprayogamadhye abhiṣekānantaraṃ "diśobhyayaṃrājābhūditi pañcākṣān prayacchati" "śaunaḥ śepamākhyāpayati" iti videvanādīnāmnāyamadhye bahūnyabhiṣecanīyāṅgāni "apāṃ naptre svāhorje naptre svāhāgnaye gṛhapataye svāheti tistra āhutīrjuhoti" ityādīnyāmnātāni /
teṣāmupahomanyāyena utthāpyākāṅkṣāyābhiṣecanīyena sahānvīyamānānāmantarāle 'bhiṣecanīyāṅgatvasyaivāpatteḥ /
āpastambādikalpasūtreṣu parimale vedhādyarthabhedādityadhikaraṇe 'pyevam /
yattu -------- abhiṣecanīyottaraṃ prāgdaśapeyādvidevanaprabhṛtyabhiṣekāntadharmāmnānamādāyābhiṣekāpakarṣe tadantāpakarṣanyāyena videvanādīnāmapakarṣābhidhānaṃ pāñcamikaṃ tadbhāṣyakāralekhanādastu śākhāntarīyapāṭhakalpanayā pramāṇam, parantu teṣāmabhiṣecanīyāṅgatvaṃ taittirīyaśākhādṛṣṭāvāntaraprakaraṇāt naiva vārayituṃ śakyam /
nahyapāṃ naptre svāhā ityādihomānāmabhiṣecanīyānvayāyābhiṣecanīyākāṅkṣotthāpanam, navā rājasūyāṅgatvaṃ teṣāṃ kasyacidiṣṭam /
evañcotpavanādivākye śrūyamāṇamapi rājasūyapadaṃ avāntaraprakaraṇādabhiṣecanīyākhyarājasūyaviśeṣayāgaparameveti alaṃ vistareṇa //
atra cānuṣṭhānasādeśyasthale prakaraṇasaṃbhāvanāyā evābhāvāt kadācitsaṃbhave paśusāmānyavidhyadhikaraṇe tena prakaraṇabādhasyaiva vakṣyamāṇatayā etadapavādānna prakaraṇabalīyastvodāharaṇam /
evaṃ yathākramapāṭhasthale aindrāgnādikarmabhiḥ tulyakramāṇāṃ yājyānuvākyāyugalānāṃ kasyacidapi prakaraṇe anāmnānāddabdhimantrasya śundhanamantrasyaca darśapūrṇamāsaprakaraṇāmnātasyāpi asi śundhadhvamiti sannihitopasaṃhāriyuṣmadarthaviṣayamadhyamapuruṣasāmarthyātmakaliṅgena virodhāt dabdhimantrasyāspaṣṭaliṅgatvenāpi prakaraṇaviniyojyatvāyogāt yathāsaṅkhyalakṣaṇakrameṇa sannidhinopāṃśuyāje sānnāyyapātraśundhaneca viniyogānnodāharaṇatvam, evaṃ nirākāṅkṣavikṛtisannihitānāṃ vikṛtau prakaraṇābhāve sthānādevāṅgatvāt prakaraṇasamavāyāsaṃbhavena nodāharaṇatvamityabhipretyāha -------- evaṃ prakaraṇasyeti //
prayojanaṃ videvanādyantarā somāṅgalopaprāyaścittaṃ pūrvapakṣe, siddhāntetu someṣṭyaṅgalopaprāyaścittaṃ samuccayeneti spaṣṭatvānnoktam //
yattu prakāśakāraiḥ ------ siddhānte someṣṭyaṅgalopaprāyaścittadvayasya vikalpatvamuktam, tadekatarānuṣṭhānenaikata ravaiguṇyaparihārāsaṃbhavāt ayuktamityupekṣyam /
prayojanāntaraṃ kaustubhe draṣṭavyam //
kramasamākhyayoriti //
pauroḍāśikakāṇḍe samāmnātasya mantrasya liṅgadarśapūrṇamāsādhikārābhyāṃ dārśapaurṇamāsikapātraśundhanārthatvena sāmānyato 'vagatasya viśeṣajijñāsāyāṃ samākhyayā puroḍāśāṅgatve tatsādhyāgneyādiyāgīyolūkhalamusalajuhvādipātraprokṣaṇāṅgatve ca prasakte sannidhānāt sānnāyyapātraśundhanāṅgatvam //
atraca pauroḍāśikaśabdo nyāyasudhākṛtā 'adhikṛtya kṛte grantha' ityanuvartamāne 'puroḍāśāt ṭhak' iti smṛteṣṭhagantatvena vyutpāditaḥ, tadayuktam; adhikṛtyetyadhikāre tādṛśasmṛteranupalambhāt /
ata etadaparitoṣeṇa yat "tasya vyākhyāna iti vyākyātavyanāmna" ityadhikāre "pauroḍāśapuroḍāśāt ṣṭhani" tipaṭhitasūtravihitaṣṭhanpratyayāntatvena vyutpādanaṃ somanāthena kṛtaṃ tadeva yuktam /
saṃbhavatica "tasya vyākhyāna" ityatra vyākhyāyate aneneti vyākhyānaṃ ityarthasya tathā dvitīyeca sūtre pauroḍāśāḥ piṣṭapiṇḍāḥ tatsaṃskārako mantraḥ pauroḍāśaḥ tasya vyākhyānaṃ tatra bhavo vā pauroḍāśika ityarthasya kāśikāvṛttau darśitatvāt vyākhyānaśabdasya pratipādanaparatvāvagateḥ tādṛśapratipādanarūpaṃ vyākhyānaṃ yena adhyāyena kāṇḍena vā kriyate tatparatvamataśca kāṇḍasya puroḍāśamantrapratipādakatve 'pi tasyā bādha evetyarthaḥ //
mantrasyeti //
tathāca yadyapi sannidhyapekṣayā mahāprakaraṇaṃ balavat; tathāpi avāntarasandaṃśenākāṅkṣottejanādavāntarasannidhānasya tadapekṣayā prābalyāttadbādha ityarthaḥ /
natu viniyoga iti //
liṅgenaiva viniyojyatvāt iti śeṣaḥ /
evañca yāvatsamākhyāmupalabhya nūnamanayoḥ prakṛtipratyayābhihitayoḥ puroḍāśakāṇḍayorasti saṃbandha ityanumāya kāṇḍāntargatamantrasya puroḍāśasyaca saṃbandhaṃ kalpayitvā taddvārā āgneyākāṅkṣākalpanāparaśrutyā śrutiṃ kalpayitvā āgneyāpūrvasaṃbandhaṃ vijñāya lakṣaṇayā tadapūrvasādhanībhūtapātraśundhanāṅgatvaṃ kalpyate, tāvadidhmabarhiḥ saṃpādanamuṣṭinirvāpayorantarālabhūto deśaḥ sānnāyyapātraśundhanavidheḥ pratyakṣa itīdhmabarhirnirvāpaviṣayamantrānuvākayoḥ madhyame anuvāke 'sya paṭhitatvena kḷptasannidhānena sānnāyyapātropasthityā tadapūrvasādhanatvalakṣaṇayā tatraivākāṅkṣadiparamparayā śrutikalpanayā liṅgena tadīyapātraśundhanāṅgatvam //
naca pauroḍāśikapātraśundhanārthatvābhāve samākhyāyā nirālambanatvam; tatkāṇḍagatasānnāyyayājyādeḥ puroḍāśasaṃbandha iva ihāpi bhūmnā kṛtsne kāṇḍe tadvyapadeśopapatteriti bhāvaḥ //
vastutastu ------ "devayajyāyā evaināni śundhatī" tyevaṃ taittirīyabrāhmaṇe vākyenaivāhatya viniyogānnātra sannidhernavā samākhyāyā viniyojakatvamiti kaustubhe draṣṭavyānīti tānyapīha vistarabhayāt nocyante, mūle tu bādhitabādhyadaurbalasya sujñātattvānnoktāni //
evaṃ viniyojakapramāṇānāṃ śrutyādīnāṃ madhye ------ "bādhikaiva śrutirnityaṃ samākhyā bādhyate sadā /
madhyamānāṃ tu bādhyatvaṃ bādhakatvamapekṣaye"ti vārtikoktarītyā bādhyabādhakabhāve paryavasite nanu liṅgādeḥ mantharapravṛttikatvena śrutisattve aṅgatvabodhakatvānupapatteḥ aprasaktasya viniyogasya kathaṃ bādha ityāśaṅkāṃ nirasituṃ sarvatra bādhasyaikarūpyābhāvaṃ sūcayannupapāditabādhasya svarūpaṃ darśayati -------- sacāyamiti //
pūrvapūrvapramāṇeneti //
tataścendrāṅgatvamaprāptameva bādhyate; kalpanāmūlocchedādityarthaḥ //
kathaṃ tarhi daśame 'pyaprāptabādhanirūpaṇamityāśaṅkāmutsargataḥ tatra prāptabādhanirūpaṇāt kvacideva prasaṅgato 'prāptabādhanirūpaṇe 'pi na kṣatiḥ, daśame prāptabādhasyaiva nirūpaṇamihāprāptabādhasyaiveti kuladharme mānābhāvena nirasyati -------- evamiti //
kḷptopakārājyabhāgapunarvidhinā vihitābhyāmājyabhāgābhyāmeva kḷptopakāratayā nirākāṅkṣīkṛte gṛhamedhīye prayājādijanyopakārānākāṅkṣaṇāt tatprāpakātideśapratibandhāt aprāptabādha eva gṛhamedhīya iti bhāvaḥ //
anyatra tviti //
yathā sāmānyaśāstraprāpta āhavanīyo viśeṣaśāstravihitapadena bādhyate /
yathāvā nityaṃ pāñcadaśyaṃ vaiśyanimittakasāptadaśyena bādhyate /
ādipadena prākṛtaṃ kuśādi vaikṛtaiḥ śaraiḥ sthānāpattyā bādhyate ityādayo vārtikoktetarabādhāḥ saṃgṛhītāḥ /
tatra prāptabādha ityarthaḥ //
nanu prāptabādhe sāmānyaśāstrādinā prāptasya kathaṃ bādhaḥ? nahyatra nedaṃ rajatamityādivat mithyātvarūpo bādhaḥ saṃbhavati, sāmānyaśāstrasyāpi nirduṣṭatvena tajjanyabodhasya doṣājanyatayā mithyātvāyogāt, yaditu karaṇaniṣṭhadoṣābhāve 'pi vastutaḥ karaṇe viśeṣātiriktaviṣayakatvena vidyamāne viśeṣādarśanakṛtapramādarūpapramātṛdoṣeṇa pramātuḥ bhramarūpatadviṣayakatvabodhopapattau viśeṣadarśanena tanmithyātvopapattirityucyeta, tadā śrutiliṅgādiṣvapi gārhapatyāṅgatārūpaviśeṣādarśane pramātuḥ liṅgamātradarśanena śrutikalpanadvārendrāṅgatāviṣayakatvabhramasya saṃbhavena sarvatraiva prāptabādhatvāpatteḥ kathamaprāptabādhatvamityāśaṅkānirāsāyāha ------- tattvaṃ ceti //
tasya kḷptatveneti //
nahi śrutiliṅgādiṣu liṅgādikalpyā śrutiḥ kḷptā; tasyāḥ pratyakṣaśrutivirodhe niyamenākalpanena tadabhāvāt, kadācit kalpitāyā api tasyāḥ pratyakṣaśrutyā mithyātvasyaiva kalpanācca /
sāmānyaśāstrādestu kḷptatvenākalpanīyatvānmithyātvakalpane homāntareṣvāhavanīyābhāvāpattestatkalpanāyogāt sāmānyaśāstre viśeṣaśāstrādinā viśeṣaviṣayatāmātrapratibandhācchrutiliṅgādivaiṣamyeṇa prāptabādhatvaṃ yuktamityarthaḥ //
bādhyata iti //
yenaca padaśāstrameva prathamato dṛṣṭam tasya padavidhānena sāmānyaśāstreṇa bhramāsaṃbhavānna viśeṣadarśanāt tannivṛttiḥ viśeṣādarśanābhāvena bhramakāraṇābhāvāt /
ataeva tadā sāmānyaśāstraṃ tadvyatiriktaviṣayatāṃ jhaṭityeva pratipadyate /
yenatu sāmānyeśāstraṃ pūrvamākalitaṃ tasya sāmagrīsattvādutpannasya bhramasya viśeṣadarśanānnivṛttiḥ; tadanantaraṃ tadvyatiriktaviṣayatvaṃ paścādevāvagamyate /
ator'thataḥ tasya bādhaḥ phalaṃ sidhyatītyarthaḥ //
nanu ------ evaṃ tarhi yatra "na tau paśau karotī"tyatra bādha eva śāstrārthastatra yasyātideśaśāstrasya prathamālocanaṃ tasya viśeṣādarśanasahakṛtaprāpakaśāstrādājyabhāgayorapi bhrāntiprāptimālocya niṣedhaśāstrāvagamopapatteḥ paścādviśeṣadarśane sati prāpakaśāstrasya tadvyatiriktaviṣayatvakalpanarūpasya bādhasya saṃbhave 'pi yadā niṣedhaśāstrasyaiva prathamālocanaṃ tadā tadarthālocanottaraṃ niṣedhyaprāptyapekṣayā sāmānyaśāstralocanāt tenaca viśeṣadarśanasattvenā'jyabhāgabhrāntijananāyogāt niṣedhaparyavasānānupapatte 'vaśyaṃ prāpakaśāstrasyā'jyabhāgapramājanakatvameva niṣedhāyābhyupagantavyam /
tasmāt śāstraprāptaniṣedhe pramārūpāyā eva prāpterabhyupeyatvāt ataeva tādṛśasthale mīmāṃsakaiḥ vikalpāṅgīkārāt kathaṃ prāptavādhatvāvacchedena prāpakaśāstrasya bādhakaśāstreṇa svaviṣayakatāpratibandhena tallakṣaṇasaṃbhava ityāśaṅkāṃ nirasitumāha ------ evaṃ yatrāpīti //
samādhatte ------- tathāpīti //
yato 'tra pramārūpaiva prāptiḥ ataeva vikalpāṅgīkārāt yasmin pakṣe ājyabhāgayorabhāvaḥ tasmin pakṣe niṣedhaśāstrasya tadupajīvyatvena tatpratibandhakatvāsaṃbhave 'pi sāmānyaśāstrasya viśeṣaviṣayatāpratibandhāt lakṣaṇasya nāvyāptirityarthaḥ //
nanu anayā rītyā viśeṣaśāstreṇa bādhe 'pi sāmānyaśāstrataḥ pramārūpaprāptimādāya vikalpāpattirityata āha ------- yathāceti //
taccopapāditaṃ prāk /
rāgasya na tāvadbalavadaniṣṭānanubandhitvapramājanakatvam /
balavadaniṣṭānanubandhitvajñānasya pravṛttiṃprati pratibandhakatvakalpanena tadabhāvasyaiva tatkāraṇatva kalpanayā pravṛttyupapatteḥ tadasaṃbhavāt /
yatratviṣṭasādhanatvāṃśe pramājanakatvaṃ tasya niṣedhāvagatāniṣṭasādhanatvena virodhābhāvādeva na tadaṃśe bādhakatvam /
yā tu tatra sāmagrīsattve pravṛttiḥ sā sāmagryabhāve paraṃ na jāyate iti daivavaśasaṃpannaṃ niṣedhasya bādhakatvaṃ rāgaprāptaniṣedhasthale iti na vikalpaḥ /
tathā ihāpi viśeṣādarśanajaniteṣṭasādhanatvasya bhramasya viśeṣadarśanenāpanayer'thāt padahome āhavanīyeṣṭasādhanatājñānasyāpanaye sāmagryabhāvādeva nāhavanīye pravṛttiḥ pravṛttiśca pada iti sāmagryabhāvasaṃpādanena svavaśasaṃpannapravṛttipratibandhakatvam /
niṣedhe tu prāpterupajīvyatvānna bhramatvamiti vikalpa ityarthaḥ //
evaṃ śrutyādīnāṃ parasyaiva daurbalyam pūrvasya prābalyam /
tathā parasya pratyakṣatve pūrvasyānumānikatve yathā vā parasyātyantānarthakye /
tatra "yatra punaḥ śrutirānumānikī liṅgaṃ pratyakṣaṃ tatra kathaṃ yathā smṛtivaidikaliṅgavirodhe tatra smṛteḥ mūlāntaramapi saṃbhāvyate natu liṅgasyeti tadeva balavadityanusartavyam /
durbalasyāpi pramāṇasya yadi kaścidanarthakaḥ tato viparīto bādho yojayitavyaḥ" iti vārtikoktarītyā parasya prābalye 'pyaprāptabādhatvamevetyabhipretyopapāditam /
bādhadvaividhyamupasaṃbarati -------- ataḥ siddhamiti //
atracapratyakṣaliṅgena ānumānikaśrutibādhe mātulakanyāpariṇayanamudāhṛtaṃ nyāyasudhākṛtā /
taddūṣaṇaṃ kaustubhe smṛtipāda eva kṛtaṃ draṣṭavyam /
udāharaṇāntaraṃ tu mṛgyam /
ānarthakyahetukaviparītaprābalyodāharaṇaṃ vārtike kaustubhe ca draṣṭavyam /
prayojanaṃ spaṣṭatvāt noktam //
saṃpradāyasya rakṣāyai yāvadbuddhibalodayam /
balābalavicārāntā vyākhyātā bhāṭṭadīpikā //
// iti saptamaṃ balābalādhikaraṇam //
- - - - - - <B1> (8 adhikaraṇam / ) (a.3 pā.3 adhi.8)
ahīno vā prakaraṇād gauṇaḥ / Jaim_3,3.15 /
evaṃ virodhe balābalaṃ nirūpyādhunā virodha eva kvāsti kva nāstīti cintārthaṃ uttaraḥ prapañco yāvadadhyāyasamāpti /
jyotiṣṭome upasado vidhāya "tistra eva sāhnasyopasado dvādaśāhīnasye"ti śrutam /
tatra dvādaśatvaṃ kiṃ dvādaśāhe niviśate, prakaraṇa eva veti cintāyāṃ, tritvasya tāvadupasadanuvādena vihitasya vāṅniyamanyāyena svāpūrvasādhanībhūtopasadarthatvādupasadāṃ ca prakaraṇājjyotiṣṭomamātrāṅgatvāvagateḥ sāhnapadaṃ ahnā samāpyamānatvāttadanuvādamātraṃ na tūddeśyaviśeṣaṇaṃ, vākyabhedādvaiyarthyācca /
ataśca tadvadeva dvādaśatvamapi tadanuvādena vidhīyamānamupasadarthameva /
na ca tasyāhīnoddeśena vidhiḥ; upasadupasarjanatvena śrutasya tasyāhīnasaṃbandhānupapatteḥ, tasyāvṛttyā dvādaśatvopapatteśca, dvādaśāhaprakaraṇapaṭhitavākyāntareṇa tasya tatra prāptatvācca /
ato 'syāpi tritvena vikalpaḥ /
ahīnapadaṃ ca na hīyata ityādivyutpattyā nañ samāsamaṅgīkṛtya jyotiṣṭomānuvādakam /
sarve hyanye kratavo vikṛtitvādenamapekṣamāṇā na jahati /
atha nāyaṃ nañsamāsastathātve tasya tatpuruṣatvāt "tatpuruṣe tulyārthatṛtīyāsaptamyupamānāvyayadvitīyākṛtyā" iti smṛtyā prakṛtyā pūrvapadamityanuvṛttisahitayā avyayākhyasya nañaḥ pūrvapadasyodāttākhyaprakṛtisvaratvavidhānādādyudāttatvāpatteḥ, api tu madhyodāttatvā 'dahnaḥ khaḥ kratau' iti smṛtyā 'tasya samūha' ityanuvṛttisahitayā ahaḥ śabdasya kratusamūhavāci -------- khapratyayāntatvavidhānāttasya ca "āyanenīyīyiyaḥ phaḍhakhachaghāṃ pratyayādīnāmi"ti smṛtyenādeśavidhānāt ayaṃ śabdaḥ khapratyayāntaḥ /
tathātve "ādyudāttaśce" ti sūtrāt pratyayāderīkārasyodāttasvarasiddhiḥ /
nacekārasyenādeśāvayavatvāt kathaṃ khapratyayāvayavatvamiti vācyam; āyanādiṣūpadeśivadvacanaṃ svarasiddhyarthamiti smṛtyā pratyayasvarasiddhyartharṃ inādeśasyāpi pratyayopadeśakālatvarūpopadeśivadbhāvasya vihitatvāt /
ato nāyaṃ nañsamāsa iti cet, tathāpi prakaraṇānurodhādahīnaśabdasya jyotiṣṭome bahudinakatvasādṛśyena gauṇatayopapattiḥ /
vastutastu ahaḥ sādhyakratusamūhatvasya śakyatāvacchedakasya jyotiṣṭome 'pyabhyāsasamūhātmakasya sattvādahīnaśabdasya mukhyavṛttyaivānuvādatvopapattiriti prāpte -------- āstāṃ tāvadahīnapadaṃ, evakāra eva tāvat tritvātiriktasaṅkhyāyāḥ sādhanatvābhāvamanuvadan dvādaśatvena na vikalpaṃ sahate /
kiñcaivaṃ prakaraṇādeva tritvadvādaśatvayorjyotiṣṭomasaṃbandhopapatteḥ sāhnāhīnaśabdayordvayorapi vaiyarthyaprasaṅgaḥ /
asminmate tu ekena ahnā samāpyamānatvena svalpakarmaṇaḥ svalpaiva saṅkhyociteti aucityena stutiparatayā sāhnaśabdasya na vaiyarthyam /
kiñca dvayoḥ saṅkhyayorekārthatvena vidhau śabdabhedo na yujyate /
ato 'hīnapadaṃ sāhnādarthāntaraparamityapyavivādam /
yuktañcaitat ------ 'tasya samūha' ityanuvṛttisahitayā 'ahnaḥ khaḥ kratā'viti smṛtyā vaidikaprayogācca ahaḥsamūhasādhyakratuviśeṣatvasyaiva satrādivyāvṛttasya yajaticodanācoditasutyāsamudāyātmakatvasyaiva yogarūḍhyāhīnapadaśakyatāvacchedakatvapratīterna dvādaśatvasya jyotiṣṭome niveśasaṃbhavaḥ /
ataścāhīnasaṃbandhyupasaduddeśena dvādaśatvavidhiḥ /
ṣaṣṭhīsthale ca parasparasaṃbandhasya prācīnamate vyutpannatvānna viśiṣṭoddeśe vākyabhedaḥ /
vastutastu ------- ahīnoddeśenātideśaprāpteḥ pūrvapravṛttyā dvādaśopasattvamevānena vākyena dvādaśatvaprāptiphalakaṃ, tāṃ caturbhiritivadvidhīyate /
dvādaśāhaprakaraṇasthavākyāntaraṃ tu śākhāntarīyatayā vā satramātraparatayā na virudhyata iti bhāṣyakārābhiprāyaḥ /
vastutastu dvādaśāhaprakaraṇasthavākyasya satrāhīnobhayasādhāraṇatvādevāhīne 'pi dvādaśatvaprāptyupapatterekavākyatālābhāya prakaraṇapāṭhārthavattvāya caucityena tritvavidherevāyamarthavādaḥ /
mahataḥ karmaṇo mahatī saṅkhyocitā na tu prakṛta iti ca stutiḥ /
ato vākyena prakaraṇaṃ bādhitvā dvādaśatvasyāhīnasaṃbandhāvagaterna tena jyotiṣṭome dvādaśatvam /
mūle tu ṣaṣṭhyā bhāktaśrutitvamādāya śrutiprakaraṇavirodhopanyāsa iti draṣṭavyam // 3 // 42 //
ityaṣṭamamahīnādhikaraṇam //
<B2>
<B1> (9 adhikaraṇam / ) (a.3 pā.3 adhi.9) dvitvabahutva //
jyotiṣṭoma eva "upāsmai gāyatā nara" iti nityāṃ pratipadaṃ vidhāya, "yuvaṃ hi sthaḥ svarpatī iti dvayoryajamānayoḥ pratipadaṃ kuryāt, ete asṛgramindava iti bahubhyo yajamānebhya," iti śrutam /
tatrādyavākye dvayoryajamānayoriti yadi saptamī, tadā sā nimittatvaparā /
yadyapi ca pṛthak vibhaktiśravaṇaṃ, tathāpi havirārttyadhikaraṇanyāyena pākṣikatvābhāvena pratyekaṃ nimittatvāparyavasānāt pradhānabhūtanimittatvānurodhena militayoreva dvitvāvacchinnayajamānatvāvacchinnayornimittatvaṃ pratipādyate /
yadi tu ṣaṣṭhī, tadādhikāritvākhyasaṃbandhānuvādikā satī svavaiyarthyaparihārārthaṃ padadvaye 'pi lakṣaṇāmaṅgīkṛtya lāghavāddvitvayajamānatvayorekaṃ vyāsajyavṛttinimittatvaṃ pratipādayati; viśeṣaṇaviśeṣyabhāve vinigamanāvirahāt /
evaṃ bahubhyo yajamānebhya iti tādarthyacaturthyā api adhikāritvasaṃbandhānuvādikāyā uktavidhe nimittatve lakṣaṇā /
ataśca nānyatarāvivakṣāprasaṅgaḥ /
nimitte ca pratipaduddeśena mantravidhāne 'pi vijātīyatvānnānekoddeśyatā /
prakaraṇādvā pratipatsaṃbandhalābha iti pakṣadvaye 'pyavivādam /
tadihemau mantrau jyotiṣṭoma eva niviśete uta dvibahuyajamānake kulāyāhīnādāviti cintāyām prakaraṇāvirodhāt prakṛta eva niveśaḥ /
naca tatra nimittābhāvaḥ; ākhyātena 'vasante vasante jyotiṣā yajete' tyādinā upādeyakartṛviśeṣaṇatvenoktasya vivakṣāyāmapi nityatvena jyotiṣṭome yathāśaktyupabandhasya vakṣyamāṇatvād yadyeko na śaknuyāt tadā dvibahuyajamānakatvaprāpteḥ pratipadvidhānasaṃbhavāt /
athavā yajamānaśabdasya yāgakartṛmātravacanasya patnyāmapi saṃbhavādādyavākye tāvat strīliṅgatve bādhakābhāvāt patnīdvitve sa mantraḥ /
dvitīyavākye 'pi pāśādhikaraṇanyāyena liṅgānurodhena prakaraṇabādhānupapattervyatyayānuśāsanena puṃliṅgasya strītvaparatvāvagateḥ patnībahutve dvitīyo mantraḥ /
nityā tu pratipat patnyekatve iti prāpte --------- nityatve 'pi jyotiṣṭomasya naikatve yathāśaktinyāyaviṣayatā; utpattyādivākyeṣu samānābhidhānaśrutyā bhāvanāyāmanvitasya tasyāntaraṅgatvenāśaktau dakṣiṇāparimāṇādyaṅgāntarabādhenāsyaivānugrāhyatvāt /
kiñca yat kṛtisādhyatvenānuṣṭheyatayā prasaktaṃ tatraiva yathāśaktyupabandho na tvananuṣṭheye kālādau /
ataśca tadvadevāsyāpi na tannyāyaviṣayateti na prakṛte yāge dvitvabahutve /
naca yajamānaśabdaḥ patnīparaḥ; puṃsyeva pracuraprayogeṇa śaktyavagamena lakṣaṇāyāṃ pramāṇābhāvāt /
yajamānebhya iti puṃlliṅgasya prāsmā ityasya meṣyāmiva niṣiddhatvenāgatikavyatyayānuśāsanāṅgīkārānupapatteśca /
ataśca vākyena prakaraṇabādhādyatra "etena rājapurohitau sāyujyakāmau yajeyātām, eko dvau bahavo vā yajeranni"tyāhatyaiva kulāyāhīnādiṣu dvitvabahutvavidhānaṃ tatraivāsyotkarṣaḥ /
nacātra tatkratūpasthāpakābhāvaḥ; pratipatsaṃbandhenaiva sāmānyataḥ kratusaṃbandhe 'vagate nimittabalena tadviśeṣopasthitau bādhakābhāvāt // 3 // 43 // //
iti navamaṃ pratipadutkarṣādhikaraṇam //
<B2> <B1> (10 adhikaraṇam / ) (a.3 pā.3 adhi.10)
jāghanī caikadeśatvāt / Jaim_3,3.20 /
darśapūrṇamāsayoḥ patnīsaṃyājāvāntaraprakaraṇe, "jāghanyā patnīḥ saṃyājayantī"ti śrutam /
tatra kimanena vākyenāgnīṣomīyapaśvanuniṣpannajāghanyuddeśena patnīsaṃyājā vidhīyante /
tataścaitasya vidhānasya prakaraṇādutkarṣaḥ, uta patnīsaṃyājoddeśena jāghanītvena dravyaṃ vidhīyata iti cintāyām --------- jāghanīśabdasyottarārdhādiśabdavadekadeśadravyavācitvena jāghanyāḥ paraprayuktatvāvagamāt prayojanavattvāvagamena prayājaśeṣavaduddeśyatvāvagatestṛtīyāyā dvitīyārthalakṣaṇāmapyaṅgīkṛtya patnīsaṃyājā eva taduddeśena vidhīyante /
evañca dvitīyavidhiprakārāṅgīkaraṇāllāghavam; itarathā tṛtīyavidhaprakārāpatteḥ /
evañca vākyena prakaraṇabādhāt patnīsaṃyājānāṃ paśvaṅgatvamātrapratītāvapi "ājyena patnīḥ saṃyājayantī"ti vacanasya nirviṣayatvāpatteḥ prakaraṇabādhāyogāttenārādupakārakatayā darśapūrṇamāsāṅgatvāvagame 'pyanena vacanena sannipatyopakārakatayā agnīṣomīyapaśuyāgāṅgatayā vidhirnānupapannaḥ /
na ca jāghanyāḥ paraprayuktapaśvanuniṣpannatvasya loke 'pi saṃbhavādavyabhicārikratusaṃbandhābhāvena kathaṃ yāgīyatvopasthitiḥ? agnīṣomīyaprakaraṇe śrutena jāghanyā patnīḥ saṃyājayantīti vākyāntareṇa prakṛtāpūrvasādhanībhūtajāghanyuddeśena patnīsaṃyājavidhāyakena yāgasaṃbandhopasthitau aṃśuṃ gṛhṇātītivadanārabhyāghīte 'pyasmin kratusaṃbandhāvagamopapatteḥ /
yattu kaiścidatideśādeva patnīsaṃyājānāṃ paśuyāgasaṃbandhāvagamāt prākaraṇikaṃ vākyaṃ taddharmakakarmāntaravidhāyakaṃ pūrvapakṣa ityuktam /
tadatideśena patnīsaṃyājānāmārādupakārakavidhayā paśuyāgasaṃbandhāvagame 'pi tātparyagrāhakābhāve anārabhyādhīte vākye jāghanyāstadīyatvopasthitau pramāṇābhāvādatideśena sannidhāne prakaraṇāntarāsaṃbhavena karmāntaratvānupapatteścopekṣitam /
tasmādvākyena prakaraṇaṃ bādhitvedaṃ vidhānaṃ agnīṣomīya utkṛṣyata iti prāpte --------- jāghanīśabdasya paśvavayavavācitve 'pi uttarārddhādiśabdavat sasaṃbandhikatvābhāvāt lokasiddhahaṭṭasthajāghanyā evājyavat patnīsaṃyājoddeśena vidhisaṃbhave tṛtīyāyā lakṣaṇāṅgīkaraṇe pramāṇābhāvaḥ /
atideśāt prāptānāṃ patnīsaṃyājānāmārādupakārakatvabādhena paśuprakaraṇasthavākyena sannipatyopakārakatvalābhe darśapūrṇamāsaprakaraṇasthavākyavaiyarthyāpattiśca /
ataḥ patnīsaṃyājoddeśenaiva jāghanīvidhiḥ /
na ca ------- prāptakarmānuvādena patnīnāmapi vidhāne devatātvena prāptyudbhāvane 'pi ca viśiṣṭoddeśena vākyabhedāpattiriti -------- vācyam; avāntaraprakaraṇādeva karmaviśeṣoddeśasaṃbhavenāvākyabhedāt /
ato nāsya prakaraṇādutkarṣaḥ /
agnīṣomīyaprakaraṇasthavākyaṃ tu vikalpena prāptāyāniyamārthamiti vakṣyate /
na caivaṃ tatra haṭaṭsthajāghanyā eva niyamasaṃbhavena paśvanuniṣpannāyā grahaṇe pramāṇābhāvaḥ /
pratipattyantarābhāvenopasthitāyāstasyāstyāge pramāṇābhāvāditi tatraiva vakṣyamāṇatvāt // 3 // 44 // //
iti daśamaṃ jāghanyadhikaraṇam //
<B2> <B1> (11 adhikaraṇam / ) (a.3 pā.3 adhi.11)
santardanaṃ prakṛtau krayaṇavadanarthalopāt syāt / Jaim_3,3.24 /
jyotiṣṭome abhiṣavaṇaphalake prakṛtya "na santṛṇattī" tyanenāsantardanaṃ vidhāyā "tho khalu dīrghasome santṛdye dhṛtyai" ityanena santardanaṃ vihitam /
santardanaṃ nāma dvayoḥ phalakayoḥ saṃśleṣapradeśe tanūkaraṇena ekoparyaparasya saṃśleṣaḥ /
tadidaṃ santardanaṃ kiṃ prakaraṇa eva niviśate utāgniṣṭomānyamātre utkṛṣyata iti cintāyām ---------- prakaraṇānugrahādanutkarṣaḥ /
na ca vākyavirodhaḥ; jyotiṣṭomasyāpi iṣṭyādyapekṣayā dīrghatvāt somadravyakatvācca dīrghasomatvopapatteḥ /
ataśca tatraiva vrīhiyavādivatsantardanāsantardanayorvikalpaḥ /
yastvatra sūtre krayavaditi krayadṛṣṭānto vikalpe dattaḥ sa dvādaśe daśamiḥ krīṇātīti vacanena samuccayasya vakṣyamāṇatvādvacanābhāvaṃ kṛtvā bodhyaḥ /
astu vā iṣṭyāderihānupādānāt tadapekṣayā dīrghatvasya ca nityatvena dīrghasomapadavaiyarthyāpatteraṣṭadoṣaduṣṭavikalpasya cānyāyyatvāddīrghasya yajamānasya somo dīrghasoma ityevaṃ ṣaṣṭhītatpuruṣamapi prakaraṇānurodhenāṅgīkṛtya yajamānadairdhye nimitte santardanavidhānam /
yadi tu niṣādasthapatyadhikaraṇanyāyena karmadhārayasyaiva nyāyyatvāt yajamānadairdhyeṇa ca phalakavidāraṇāprasaktestaddvārakatvena santardanastuterasaṃbhavena "dhṛtyā" ityarthavādānupapatterdīrghaścāsau somaśceti karmadhāraya evāṅgīkriyate tathāpi jyotiṣṭoma eva ukthyādisaṃsthāntarayukte pradānavivṛddhyā pradeyasomavivṛddherāvaśyakatvāt dīrghasomatvopapattervākyaprakaraṇayoravirodhānniveśaḥ /
na ca pradānavivṛddhestoyādinā saṃpādanam; somadravyakasya yāgasya vinā vacanaṃ dravyāntarasaṃsṛṣṭena somena karaṇāyogāt /
na ca triparvadaśamuṣṭitvarūpasomaparimāṇabādhaḥ; sthūladīrghaparvasomagrahaṇena tadbādhābhāvāt /
ata eva somapadena yāgalakṣaṇābhāvāt somadīrghaparvatvameva santardane nimittamityapi śakyaṃ vaktum /
vastutastu --------- triparvadaśamuṣṭiparimitasomagrahaṇottara "mavaśiṣṭānaṃśūnupasamūhatī" tyupasamūhanavidhānāttatra cārthavāde "yadvai tāvāneva somaḥ syādyāvantaṃ mimīte yajamānasyaiva syānnāpi sadasyānāṃ prajābhyastvetyavaśiṣṭānaṃśūnupasamūhatī"ti pūrvoktamānanindayottarādohanavadyāvadapekṣitaparatvapratīteḥ kapiñjalādhikaraṇanyāyasyāpyapravṛttyā parimāṇābhāvāt pradeyavivṛddhiḥ sulabhaiva /
na ca ------- evamapi agniṣṭomasaṃsthāyā aṅgatvādanyāsāṃ kāmyānāṃ tisṛṇāṃ saṃsthānāñca vikṛtitvena svataḥ prakaraṇābhāvāt jyotiṣṭome ca pradānavṛddhyabhāvena pradeyavṛddhyabhāvāt kathaṃ vākyaprakaraṇayoravirodha iti; vācyam ------- kāmyasaṃsthāsu grahaṇavivṛddhyā āśrayabhūtajyotiṣṭomābhyāse vivṛddherāvaśyakatvāt, saṃsthānāṃ caturṇāmapi svataḥprakaraṇābhāve 'pi ca jyotiṣṭomasya sarvatrānusyūtatvāt kāmyasaṃsthākajyotiṣṭomaprayoge santardanavidhānena prakaraṇānugrahopapatteḥ /
ata evāgniṣṭomasaṃsthākajyotiṣṭomaprayoge 'santardanaṃ pradānavivṛddhyabhāvāditi na vikalpo 'pi /
ata eva ca dīrghatvasyānuyoginaḥ kāmyasaṃsthākajyotiṣṭomasya pratiyoginaśca nityasaṃsthākajyotiṣṭomasya prakaraṇādeva lābhādatilāghavam /
na ca -------- evamitarasaṃsthākajyotiṣṭomasyāpi prakaraṇe aṅgīkriyamāṇe "eṣa vāva prathamo yajño yajñānāṃ yajjyotiṣṭo mo ya etenāniṣṭvā athānyena yajate garttapatyameva tadbhavatītyatrāpi etacchabdenetarasaṃsthākasya jyotiṣṭomasya grahaṇāpatteragniṣṭomasaṃsthākasyaiva prakaraṇāt grahaṇaṃ vakṣyamāṇaṃ virudhyetetivācyam; jyotiṣṭomatvāvacchedenaiva phalavattvena prakaraṇāṅgīkārāt, agniṣṭomasaṃsthāyā aṅgatvenetarāṅgavatprakaraṇāvacchedakatvānupapatteśca /
etacchabdena tu jyotiṣṭomatvāvacchinnasyoktāvapi anyaśabdena tadvikṛtimātravācakena saṃsthānāmapyuktatvāt tāsāmapi jyotiṣṭomottarakālavidhipratīterarthādagniṣṭomasaṃsthākasyaiva prathamaṃ karaṇopapatteḥ /
ato vākyaprakaraṇayoravirodhāt prakaraṇa eva santardanasya niveśa iti prāpte -------- bhāṣyakāreṇa tāvadiṣṭāpattyaiva siddhāntitam /
pūrvapakṣaścādyaprakāradvayenaiva kṛtaḥ, vārtikakāreṇa tu vikṛtimātre vivṛddhasomake niveśa ityuktam /
tasyāyamāśayaḥ -------- dīrghatvaṃ tāvat grahaṇavivṛddhiprayuktasomavivṛddhikṛtamiti bhavato 'pyavivādam /
vivṛddhagrahaṇāni ca saṃsthāṅgāni vacanānna tu jyotiṣṭomāṅgāni /
ataśca dīrghasomatvasya jyotiṣṭomasaṃbandhābhāvādvikṛtimātraparatvamiti /
na coktagrahaṇānāṃ jyotiṣṭomāṅgatvābhāve 'pi saṃsthādvārā tatsaṃbandhasattvāttasya dīrghasomatvopapattiḥ; sarvatomukhādau pūrvādidikṣu agniṣṭomādinānāsaṃsthāke digantare dīrghasomatvasya sattvādagniṣṭomasaṃsthāke 'pi santardanāpatteryadaṅgagrahaṇavivṛddhiprayuktavivṛddhapradeyakatvaṃ yatprayuktavivṛddhapradeyakatvameva vā yatra tatra tadapūrvasādhanībhūtaphalakasaṃskārakatayā santardanavidhyavagamāduktavivṛddheśca saṃsthāprayuktatvena jyotiṣṭomaprayuktatvābhāvāttadaṅgatvena santardanavidhyanupapattervākyena prakaraṇaṃ bādhitvoktavidhasarvavikṛtāveva niveśaḥ, natu saṃsthāsveva; tāsāṃ vikṛtitvena prakaraṇābhāvāditi /
ataeva santṛdyāditi dhātoḥ sakarmakatvādanuṣaktadvitīyāntapadena phalakasyaiva saṃskāryatvāvagamāddīrghasomasyoddeśyatvatadviśeṣaṇatvayorasaṃbhavena nimittatvameva /
ata eva nāyaṃ bahuvrīhirna vā somapadena yāgalakṣaṇayā svarākrānto 'pi tatpuruṣaḥ, api tu tena latāmevoktvā tatpuruṣaḥ; samāsatvācca na nimitte 'pi viśiṣṭoddeśe vākyabhedaḥ // 3 // 45 // //
ityekādaśaṃ santardanādhikaraṇam //
<B2> <B1> (12 adhikaraṇam / ) (a.3 pā.3 adhi.12)
saṅkhyāyuktaṃ kratoḥ prakaraṇāt syāt / Jaim_3,3.32 /
anārabhyādhītaḥ pravargyo "yatpravargyaṃ pravṛñjatī"ti śrutaḥ /
tasya ca "purastādupasadāṃ pravargyeṇa pravṛṇaktī"ti jyotiṣṭomāṅgatvena viniyogaḥ; avyabhicaritakratusaṃbandhasahakṛtadviruktatvanyāyena tadupasthiteḥ /
na ca upasadaṅgatvameva kiṃ na syāditi -------- vācyam; upasatpadasya punastāt kālapratiyogitvena svārthopasthāpakasyoddeśyasamarpakatvābhāvāt, upasthitatvāt tadvācakapadāntarakalpanayoddeśyatvāṅgīkāre tu upasadāṃ phalavattvajñānārthaṃ jyotiṣṭomopasthiterāvaśyakatvāt lāghavena tadarthatvopapatteḥ, kauṣitakibrāhmaṇe prakaraṇa eva pravargyāmnānācca /
tatra ca na prathamayajñe pravṛjyāditi śrutam /
tatra prathamayajñapadena sarvasaṃsthaḥ sarvāvasthaśca jyotiṣṭomo 'midhīyate uta tadīyaprathamaprayogamātramiti cintāyām ---------- prathamayajñaśabdo jyotiṣṭomanāmā, "eṣa vāva prathamo yajño yajñānāṃ yajjyotiṣṭoma" iti sāmānādhikaraṇyāt, tasya prathamaṃ prayujyamānatvena pravṛttinimittasattvācca /
yadyapi ca saṃsthānāmanyapadenābhidhānāt tāsu jyotiṣṭomottarakālatvavidhānāt na sarvasaṃsthākajyotiṣṭomasya prathamaṃ prayujyamānatvam; tathāpi jyotiṣṭomatvasāmānādhikaraṇyena tāvat tadastīti pravṛttinimittāvighātaḥ /
ato vākyāt prakaraṇācca jyotiṣṭomatvāvacchedenaivāyaṃ pratiṣedhaḥ, paryudāso vā jyotiṣṭomabhinne pravṛṇaktīti; anyathā vikalpaprāpteḥ /
yattva "gniṣṭome pravṛṇaktī"ti vacanaṃ tatparyudastapratiprasavārtham /
tadapi ca "kāmaṃ tu yo 'nūcānaḥ śrotriyaḥ syāt tasya pravṛjyādi"tyanenopasaṃhriyate /
tenānūcānasya śrotriyasyāgniṣṭomasaṃsthākajyotiṣṭome nityaṃ karaṇam, anyajyotiṣṭome tu nityamakaraṇam /
vikṛtiṣu nityaṃ karaṇamiti prāpte -------- pratyekaśaktyaivārthabodhopapattau atiriktaśaktikalpanāyāṃ pramāṇābhāvāt prathamaśabdasya cāpravṛttapravartanaviṣayavācitvādādyaprayogaparatvāvagateryajñaśabdasya ca lakṣaṇayā prayogaparatvaṃ prakaraṇājjyotiṣṭomarūpayajñaparatvameva vāṅgīkṛtya prathamayajñapadena jyotiṣṭomaprathamaprayogo 'bhidhīyate /
sa cāgniṣṭomasaṃsthākasya jyotiṣṭomasya pāñcamikanyāyena, "prathamaṃ yajamāno 'tirātreṇa yajete"ti vacanādatirātrasaṃsthākasya ca /
ata ubhayatrāpyanena vacanena pravargyasya pratiṣedhaḥ paryudāso vā, na tu vikṛtyantare; tatropadeśātideśābhyāṃ tadaprāpteḥ /
na ca ------- jyotiṣṭome dvitīyādiprayogāpekṣayā prāthemyasya vivakṣitatvādbikṛtāvapi taddvitīyādiprayogāpekṣayā prāthamyasya sattvāt kathaṃ na tatprāptiriti -------- vācyam; prāthamyasya nirūpakāpekṣāyāṃ dvitīyādiprayogasya nirūpakatvākalpanāt /
"eṣa vāva prathamo yajño yajñānā"miti vacanena jyotiṣṭomavikṛtimātrasyaiva tadavadhāraṇāt /
ata eva prathamaprayogaviṣayo 'pi jyotiṣṭoma eva bodhyaḥ /
tathāca prathamayajñaśabdo vākyaśeṣādvaidikaprayogācca nirūḍhalakṣaṇayā somāntaranirūpitaprāthamyavatprayogaviṣayajyotiṣṭomamevābhidhatte, anyathā sva -------- sva ------- dvitīyādiprayoganirūpitaprāthamyavatprayogaviṣayayajñemātrābhidhāne "āhitāgnaya iṣṭaprathamayajñā gṛhapatisaptadaśāḥ satramāsīranni"tyādau satre yajñamātrottarakālatā'patteḥ /
ata uktadvividhajyotiṣṭomaprathamaprayoge eva pravargyapratiṣedhaḥ /
vastutastu --------- nāyaṃ pratiṣedhastathātve "na tau paśau karotī" tivadatirātraprathamāhāre 'pi vikalpāpatteḥ /
na ca --------- kriyāyāḥ svarūpeṇoddeśyasaṃbandhitvena vā niṣedha eva vikalpo yathoktasthale, yatra tu kārakaniṣedho yathā "rātrau śrāddhaṃ na kurvīte" tyādau, tatra niṣedhasya kārakamātraviṣayatvena kriyāviṣayatvābhāvāt kriyāviṣayavidhivikalpāpādakatvānupapattiḥ; prakṛte ca prathamayajñaśabdasya noddeśyatvaparatvam, api tu mandraṃ prātaḥsavana itivadadhikaraṇakārakatvam /
ataśca na vikalpāpādakatvāpattiriti keṣāñciduktaṃ yuktamiti -------- vācyam; kārakasyāpi prathamaprayogādhikaraṇatvasya vidhitaḥ prāptau nyāyataulyena prathamaprayogādhikaraṇatvasyaiva vikalpāpatterāvaśyakatvāt /
ata evākṣepeṇa yatkiñcitkālaprāptau rātryupādānasyaicchikatvena rāgaprāptyā vaidhatvābhāvānna tanniṣedhasya vikalpāpādakatvam, prakṛte tu prathamaprayogādhikaraṇatvaṃ naicchikaṃ pratipradhānaṃ guṇānvayasya vaidhatvāt /
atastanniṣedho 'pi vikalpāpādaka eva /
vastutastu ------- prathamaprayogasya uddeśyatvameva śāstradīpikāyāmuktamiti na kiñcidetat /
ato "nānūyājeṣvi"tivatparyudāsa evāyamanārabhyavādavākyaśeṣaḥ -------- uktavidhaprathamaprayogabhinne pravṛñjyāditi /
tataśca prāpakapramāṇābhāvāt prathamaprayoge akaraṇaprasaktāvagniṣṭome pravṛṇaktīti vacanaṃ vastuto 'tyantāprāptaprāpakamapi pratiprasavaphalakaṃ sadagniṣṭomasaṃsthākatve nimitte prathamaprayoge 'pi nityaṃ pravargyavidhānārtham, na tu vikalpena; vikalpe pramāṇābhāvāt /
asya ca nānyaviṣayatā sāmānyavidhita eva sarvatra prāptatvāditi prathamaprayogaviṣayataiva /
anena ca kāmamityabhūcānavākyopasaṃhāraḥ /
tenāgniṣṭomasaṃsthākaprathamaprayoge anūcānasya nityakaraṇam /
tathā śrotriyasyāpi /
anūcāno vedādhyāpakaḥ /
tena kṣatriyavaiśyayornivṛttiḥ /
śrotriyaḥ prakarṣeṇa veda -------- tadartha -------- jñaḥ /
kāmaṃ padena prakarṣābhidhānāt /
tasyetyekapadenobhayoḥ kartrorvidhānācca na vidheyānekatvam /
tadanyeṣāmagniṣṭomaprathamāhāre 'pi nityamakaraṇam /
yattu vārtike anūcānādervikalpo 'nyeṣāṃ nityamakaraṇamityuktam, tatprauḍhimātram /
ata eva pārthasārathinā anūcānādernityameva prayoga ityuktam /
yadi tu tadeva samarthanīyamityāgrahastadā kāmaṃ padena vikalpābhidhānādagniṣṭomavākyasya ca tenopasaṃhārādanūcānādervikalpa ityevaṃ samarthanīyam /
sarvathā atirātraprathamāhāre pratiprasavābhāvānnityamevāprayogaḥ, vikṛtau tu prathamaprayoge nityaṃ karaṇamiti sthitam // 3 // 46 //
iti dvādaśaṃ pravargyādhikaraṇam //
<B2> <B1> (13 adhikaraṇam / ) (a.3 pā.3 adhi.13)
pauṣṇaṃ paiṣaṇaṃ vikṛtau pratīyetācodanāt prakṛtau / Jaim_3,3.34 /
darśapūrṇamāsaprakaraṇe -------- "pūṣā prapiṣṭabhāgo 'dantako hi saḥ" iti śrutam /
tatra kiṃ darśapūrṇamāsayorevāṅgatvena karmāntaravidhiruta pūṣadevatyayāge peṣaṇamātravidhiriti cintāyām --------- na tāvadbhāgaśabdalakṣitayāgoddeśena peṣaṇavidhiḥ; ekaprasaratābhaṅgāpatteḥ, pūṣapadena viśeṣaṇe vākyabhedācca, ktapratyayārthadravyopasarjanapeṣaṇasya yāgānvayānupapatteśca /
ata eva na pūṣapadameva śakyārthasya lakṣitapūṣadevatyayāgasya voddeśyatāparam, pūṣṇo 'vyabhicaritakratusaṃbandhābhāvena kratūpasthitau pramāṇābhāvācca /
ato guṇadravyadevatāviśiṣṭakarmāntaravidhirevāyamiti prāpte --------- prapiṣṭabhāgapadena tāvadbhāgo bhajanīyaṃ sevyaṃ asyeti vyutpattyā sevanāsaṃbhave 'pi saṃbandhamātraṃ devasvādivyavahārapramāṇakaṃ prapiṣṭapūṣṇoḥ pratīyate /
tacca yāgaṃ vinānupapannamiti yāgamanumāpayatītyetāvattu ubhayoravivādam /
tatra ca viśeṣaṇamātrasaṃbhave viśiṣṭavidhyādikalpanasyānyāyyatvāt pramāṇābhāvena nāpūrvayāgāntarānumitirityapi prathamato 'vagatameva /
ataścānumīyamānayāge anumāpakapūṣasaṃbandhena prasiddhapūṣadevatyayāgatvopasthitirapi sulabhaiva /
ataśca yāgaviśeṣānumitereva tātparyagrāhakatvāt pūṣapadaṃ vijātīyāpūrvasādhanībhūtapūṣadevatāparam /
taduddeśenaiva ca svajanyayāgapradeyacaruprakṛtikatvasaṃbandhena prapiṣṭadravyakatvaṃ prapiṣṭabhāgasamāsārtho vidhīyate /
saṃbhavati ca dravyoddeśena devatāvidhivaddevatoddeśenāpi niruktasaṃbandhena dravyavidhirviśeṣaṇamātravidhiphalakaḥ /
yadyapi ca prakṛtidravyasyāpyacatideśena saṃbhavatprāptikatā, tathāpi tataḥ pūrvaṃ vidhānāṅgīkārānnaikaprasaratābhaṅgādyāpattiḥ /
peṣaṇamātravidhiśca phalamiti guṇādipramāṇābhāvānna karmāntaratā /
etena pūṣapadena taddevatyakarmalakṣaṇayā taduddeśena prapiṣṭabhāgapadalakṣitapeṣaṇavidhiriti prakāśo 'pi niṣādasthapatyadhikaraṇanyāyena lakṣaṇāpekṣayā karmāntaravidhereva nyāyyatvā "dvaṣaṭkartuḥ prathamabhakṣa" ityādāvatiprasaṅgāpatteścopekṣitaḥ /
tatrāsmaduktaprakārastu bhakṣasya pratyakṣavidhinaiva prāptatvena tataḥ pūrvapravṛttyaṅgīkārānupapatterasaṃbhavī /
tadetatsarvaṃ siddhamevottaravivakṣayā smāryata iti prāñcaḥ // 3 // 47 //
// iti trayodaśaṃ pauṣṇapeṣaṇasya vikṛtyarthatādhikaraṇam //
<B2> atra bhāṣyakārādibhirdīrghasomapadāhīnapadayoḥ prakṛtau aniviśamānatvāt prakaraṇabādhenotkarṣasya pūrvaṃ sādhitatvāttenaiva nyāyena pūṣapadasya prakaraṇāniveśitvādutkarṣasyaiva siddhernātra pūrvaṃ pūrvapakṣasiddhāntaracanaṃ kartavyamityuttaravivakṣārthaṃ sūtrakṛtā smāryata ityuktam, tatra vakṣyamāṇayuktibhirvikṛtāvutkarṣe 'pi vākyārthānupapatterna tatra prakaraṇabādhena niveśaḥ, kintu tadavirodhena kathañcitpūṣapadasya gauṇīmanāśrityāpi prakaraṇe niveśo yukta ityadhikaśaṅkyā kleśena parihāryayā śakyata evādhikaraṇārambhaḥ kartumityabhiprāyeṇa pūrvapakṣamāracayati --------- na tāvaditi //
yatt.u bhāṭṭadinakare --------- caturthītaddhitādyabhāvena devatātvānupasthiterna taddevatyakarmāntaravidhitvam, peṣaṇamātravidhau tu devatātvenaiva prāptasya pūṣṇo 'nuvādāt devatātvenopasthitiriti vaiṣamyamupapāditam, tadayuktam; adhvarakalpanāyām -------- "sarasvatyājyabhāgaḥ syādi"ti vihitasyāpi yāgasya karmāntaratvena vidhānāpatteḥ, evaṃ sārasvatau bhavata ityatrāpi tadanāpatteśca /
yadi tu kathañcidarthavāde devatātvena kvacitsaṃkīrtanāt bhāgaśabdopādānāt devatātvaprāptirucyeta, tadehāpi adantakatvavākyaśeṣeṇa tadupasthite bhāgapadopādānācca tulyameva /
caruprakṛtikatvasaṃbandheneti /
uttarādhikaraṇasiddhāntālocanena saṃbandhe carupadopādānaṃ kṛtam /
saṃbhavati ceti /
abhyuditeṣṭivākye iti śeṣaḥ /
yadyapi ceti /
yathaiva "lohitoṣṇīṣā ṛtvijaścaranti ---------" iti vākye lohitoṣṇīṣapadopāttānāmṛtvijāmevātideśapravṛtteḥ pūrvapravṛttyaṅgīkāreṇa vidhiviśeṣaṇībhūtalohitoṣṇīṣatvavidhānaphalakaḥ tadvadihetyarthaḥ /
atiprasaṅgāpatteriti //
prāthamyavākye 'pi samastapadena prāthamyaṃ lakṣayitvā samākhyāprāptabhakṣyānuvādena tadvidhānāpattyā karmāntaratvānāpatterityarthaḥ //
nanu atra yathātideśaprāpteḥ pūrvaṃ prapiṣṭadravyaprakṛtitvavidhiḥ peṣaṇamātraphalakaḥ svīkriyate, tathā tatrāpi prāthamyaviśiṣṭabhakṣaṇasya vaṣaṭkartruddeśena naimittikabhakṣaprāpteḥ pūrvaṃ vidhiḥ prāthamyamātraphalaka iti na karmāntaratvaṃ syāt ityāśaṅkāṃ parihartuṃ vailakṣaṇyaṃ darśayati -------- tatrāsmaditi //
tatra prāthamyavākye /
asmaduktaprakāraḥ atra ya ukto 'smābhiḥ prakāraḥ sa ityarthaḥ /
tathāca vaṣaṭkartuḥ sarvanaimittikasya bhakṣasya tattatpratyakṣavidhinaiva vihitatvāt na tataḥ pūrvaṃ prāthamyavākyapravṛttyā viśiṣṭavidhiryukta ityarthaḥ /
evamadhikaraṇavicāre saṃbhavati sati prācīnānupahasitumiva prācāmuktamanuvadati -------- tadetatsarvamiti //
tadetaditi padābhyāṃ prāñca ityanena copahāsaḥ sūcitaḥ //
iti trayodaśaṃ pauṣṇapeṣaṇasya vikṛtyarthatādhikaraṇam //
- - - - - - - <B1> (14 adhikaraṇam / ) (a.3 pā.3 adhi.14)
tatsarvārtham aviśeṣāt / Jaim_3,3.35 /
tat peṣaṇaṃ pūṣadevatye carau paśau puroḍāśe ca syāduta carāveveti cintāyām -------- aviśeṣādadantakatvahetuvaśācca sarvatreti prāpte -------- puroḍāśe tāvatpākātpūrvaṃ peṣaṇasya prāptatvādeva vidhānaṃ vyartham, taduttaraṃ tu puroḍāśapadavācyākṛtivināśāpattiḥ /
evaṃ paśuhṛdayādāvapi; teṣāmapyākāraviśeṣaviśiṣṭamāṃsavācitvāt /
na cobhayatrāvadānottarakālaṃ peṣaṇavidhiḥ; atyantāprāptapeṣaṇavidhau gauravāpatteḥ, carāvatideśena prasaktasya prayojanābhāvena nivartamānasya pratiprasavamātrakaraṇe tu lāghavam /
prakṛtau hi pradeyapuroḍāśasiddheranyathopapādayitumaśakyatvādarthaprāptamapi peṣaṇaṃ adhvaryukartṛkatvādiprayojanasiddhyarthaṃ sadharmakaṃ vihitam /
taccarau pradeyasiddhestavdyatirekeṇa jāyamānatayā carutvāvacchinnaṃ prati peṣaṇasyākāraṇatvānnivartamānaṃ pratiprasūyate /
ata eva prasaktaprāptikasya kāraṇāntareṇa nivṛttiprasaktau vidhiḥ pratiprasavaḥ /
tatra cotpattiviniyogāṅgasaṃbandhādau yathāsaṃbhavaṃ vidhervyāpārābhāvāllāghavam /
ata eva peṣaṇasya pradeyasiddhirūpaprākṛtaprayojanalopenātrādṛṣṭaprayojanāntarakalpane 'pi na pratiprasavatvavighātaḥ /
dharmāṇāṃ tu peṣaṇasya karmāntaratvābhāvena pradhānaṃ nīyamānaṃ hi tatrāṅgānyapakarṣati iti nyāyena prākṛtapeṣaṇāṅgatayā prāptānāmatraivādṛṣṭarūpakāryāntarakalpanaṃ na doṣāya /
iṣyate cāyamartho 'gnisaṃskārakamanthanādeḥ paśuprakaraṇāmnātasya vacanāccāturmāsyāṅgatvena viniyoge taddharmāṇāṃ kāryāntaraprayuktatvakalpanādau /
vastutastu atra peṣaṇasya na kāryāntarakalpanāpi; pradeyasidhdyarthatvādeva /
yadyapi hi carutvāvacchinnaṃ prati peṣaṇasyākāraṇatvam; tathāpi piṣṭakacarāvapi caruśabdaprayogāt peṣaṇavidhibalena ca "pauṣṇaṃ carumi" tyatra sāmānyavācino 'pi caruśabdasya piṣṭakacaruviśeṣaparatvaniścayāt tasya pradeyasya peṣaṇamantareṇāsiddherna peṣaṇasya kāryāntarakalpanāpi /
ata eva carutvaṃ nāmānavastrāvitāntaruṣmapakkataṇḍulaprakṛtikatvam /
atra bhaktavyāvṛttyai anavastrāviteti /
maṇḍakavyāvṛttyai antariti /
sūpaśākādivyāvṛttyai taṇḍuleti /
ata eva piṣṭakacarāvapi tatsaṃbhavānna peṣaṇasya vighātakatvamiti tatraiva peṣaṇam // 3 // 48 //
// iti caturdaśaṃ pauṣṇapeṣaṇasya carāveva niveśādhikaraṇam //
<B2> adyāpyekadevatye eva peṣaṇamiti siddhāntābhāvāt dvidevatyā api ca puroḍāśapaśavo bhavantyevātrodāharaṇam /
tathā caikapūṣadevatyapuroḍāśapaśuyāgayoraprasiddhatve 'pi "somāpauṣṇaṃ traitamālabheta" "somāpauṣṇa ekādaśakapālaḥ" "aindrāpauṣṇaścaruḥ" iti vākyavihite paśau carau puroḍāśe ca peṣaṇaṃ bhavati vā na veti vicāraḥ saṃbhavatyevetyabhiprāyeṇa athavā ------ "pauṣṇaṃ carumanunirvapet" "pauṣṇaṃ śyāmamālabhetānnakāma" iti vākyavihitāvekapūṣadevatyau carupaśū tathā "paśumālabhya puroḍāśaṃ nirvapatī"tyanena kevalapūṣadevatyapaśuyāgāṅgatvena vihitasya puroḍāśasya pradhānayāgīyapūṣadevatākatvādekapūṣadevatyaḥ puroḍāśo 'pi saṃbhavatītyabhipretya vicāramārabhate ------- tatpeṣaṇamiti /
gauravāpatteriti /
pañcame avadānādipradānāntenānusamayasādhanāya tāvata ekapadārthatvokteḥ tāvanmadhye avadānottaraṃ peṣaṇānuṣṭhāne vyavadhānādekapadārthatābhaṅgāpatterapyetadupalakṣaṇaṃ draṣṭavyam /
lāghavamevopapādayati ------- prakṛtau hīti //
nan.u piṣṭakacarāvapi caruśabdaprayogāt tasyaiva pūṣadevatyayāge grahaṇe 'pekṣitaṃ peṣaṇaṃ na nivartamānamiti tatsidhyarthamaprāptapeṣaṇavidhānameva syādityāśaṅkāṃ nirākartuṃ piṣṭaṃ vināpyodane 'pi caruśabdaprayogāt tasyaiva grahaṇasiddheḥ peṣaṇasya prayojanābhāvena nivartamānatāstyeveti carutvāvacchinnaṃ prati peṣaṇasya kāraṇatvābhāvena darśayati -------- tavdyatirekeṇeti //
nyāyasudhākārādibhiḥ pūrvādhikaraṇe kṛtaṃ pratiprasavalakṣaṇamayuktamiti sūcayituṃ svayaṃ pratiprasavasvarūpaṃ darśayati -------- prasaktaprāptikasyeti /
tallakṣaṇopapādanaṃ taddūṣaṇaṃ ca prāgevoktam //
vyāpārābhāvāditi //
punaḥ karaṇamātre vyāpārāllāghavamityarthaḥ //
atredaṃ matadvayam --------- tatra nyāyasudhākārastāvat ------- avastrāvitānavastrāvitānuvṛttānyonyāsaṃlagnatvalakṣaṇaviśadapākanim ittamodanatvaṃ vaiśadyasāpekṣam, carutvaṃ tu vaiśadyānapekṣamevodane piṣṭasādhye carāvanuvṛttamanavastrāvitāntarūṣmapakvatvamātranimittamiti carau na vaiśadyāpekṣamodanatvam /
kathaṃ tarhi caroranodanatve "odano vā prayuktatvāt --------" iti daśamādhikaraṇasiddhāntasūtre caruśabdasyodanavācitvoktiriti cet, na; aditimodaneneti vākyaśeṣe odanapadasya vaiśadyākhyacaruviśeṣavidhisūcanārthatvena sthālīmātravācitvapūrvapakṣanivṛttitātparye 'pi athavā ------- caruśabdasyānavastrāvitāntarūṣmapakvatvamātravācitve sūpaśākāderapi carutvāpatteḥ tannivṛttyai odanaśabdasya sūpādivyatiriktatvopalakṣaṇārthatve 'pi caruśabdasya odanavācitvoktyarthatve mānābhāvāt, avastrāvitaudane caruśabdāprayogācca /
ataḥ vaiśadyābhāvavatyevaudanacarutvopapattiḥ /
tathā vaiśadyābhāvavatyeva taṇḍulacarāvapi carutvasiddhiḥ /
kvacit piṣṭakaudana iti piṣṭake odanaśabdaprayogo gauṇa eveti /
pārthasārathistu daśame trivṛccarvaśvavālādhikaraṇe arthavādādanavastrāvitāntarūṣmapakvaudane caruśabdasya yājñikānāṃ prayogāccaudanavācitvameva caruśabdasya siddhameva /
ataeva ------ vaiśadyasya piṣṭakacarāvapi saṃbhavādodanarūpa eva vaiśadyavati tasmin caruśabdaprayogasya mukhyatayaivāṅgīkārāt odanavācitātadavācitayoḥ svīkāre 'nuṣṭhānabhedābhāvāttatrāgrahamapradarśyaiva piṣṭakacarau caruśabdamātrapravṛttipradarśanena pradeyasiddhyarthatvaṃ peṣaṇasyopapādayati -------- vastutastviti //
piṣṭakacarugrahaṇ.e 'pi pauṣṇaṃ carumiti vākyārthāvirodhāt peṣaṇavidherdṛṣṭārthatālābhāya sāmānyaparasyāpi caruśabdasya viśeṣāvadhāraṇopapatteḥ peṣaṇaṃ pradeyapiṣṭacarusiddhyarthameveti nādṛṣṭarūpakāryāntarakalpanetyarthaḥ /
atredamavadheyam -------- yadi atra peṣaṇavidhibalāt sāmānyavācinaḥ caruśabdasya piṣṭakacaruviśeṣaparatvam, tadā naivāsya peṣaṇavidhitvaṃ kleśena svīkartumucitam; asya "nivītaṃ manuṣyāṇāmi"tyasyopavītavākyaśeṣatveneva taittirīyaśākhāyāṃ prāśitraharaṇavidhivākyaśeṣatvenāpi "aditimodanene" tivadiha niyāmakatvopapatteḥ /
nahi sannihitapaṭhitameva jñāpakamiti niyamaḥ; pramāṇābhāvena yathātathābhūtasya pradeśāntare sthitasyāpi jñāpakatvopapatteḥ /
ataeva ātithyavākyaśeṣabhūtasyāpi jñāpakatvopapattiḥ /
"nahyatrānūyājānyajanbhavatī" tyarthavādasya pradeśāntarasthasya "aṣṭāvupabhṛti gṛhṇātī"ti vākyagatāṣṭapadasya catuṣkadvayalakṣaṇājñāpakatvamiṣyata eva /
evañca piṣṭakacarau caruśabdaprayogānurodheneha tadgrahaṇapeṣaṇasya pradeyasiddhidvārātideśādeva prāpteḥ nirarthakameva tasya vidhitvāśrayaṇam /
nahyekavākyatvasaṃbhave vākyabhedamaṅgīkṛtya dvidevatye peṣaṇavāraṇāya vidhitvaṃ yuktam; jñāpakatvasyaivaikavākyatābhaṅgena yuktatvena dvidevatye taddvārā prayojanābhāvāt /
yadapyuktaṃ pārthasārathinā -------- piṣṭakacarāvapi viśadapākasaṃbhavāt caruśabdasyaudanavācitvamita, tat na; piṣṭasya jalapūritāyāṃ sthālyāṃ prakṣepeṇa pāke sati vaiśadyasyāsaṃbhavāt /
nahi piṣṭe jalena piṇḍībhūte anyonyabhāvasya pratiyogyanuyogyupalaṃbho jāyate, yena anyonyāsaṃlagnatvarūpaṃ vaiśadyaṃ prāpnuyāt /
ataeva odane taṇḍulānāmevānyonyatayā pṛthagavasthānāt tadasaṃlagnatvaṃ spaṣṭamevopalabhyate /
anavastrāvite taṇḍulacarau vaiśadyavyāvṛttyarthameva pracurajaladānasya tathābhūte odane ca tāvatparyāptamātrajaladānasya ca śiṣṭasaṃpradāye darśanāt parasparasaṃlagnatve sati anavastrāvitāntarūṣmapakvatvamātreṇaiva caruvyavahāra iti vaiśadyasyānapekṣaṇānna vaiśadyaprayuktamodanatvamiti tatraiva yājñikaprayogaḥ syāt /
tatratyabhāṣyavārtikanyāyasudhāgrantheṣūpalambhādanavastrāvitāntarūṣmapakvaudane yājñikānāṃ prayogopapādanamapi tadīyaṃ na yuktam //
yatt.u -------- atra prakāśakārairuktaṃ piṣṭake hi odanatve yathā laukikaprayogaprasaktā sthālīvācitār'thavādikodānavācitayā bādhyate, tathā tayaiva piṣṭakacaruḥ sādhyate iti prayogamūlānnodanapiṣṭakavācitāpi bādhyeta /
miśramate codanasāmānye śaktigrahe tadavirodhāt tadviśeṣānavastrāvitāntarūṣmapakvavācitā yājñikaprayogādyuktā, sāmānyagrahaṇe hi apekṣitaviśeṣasamarpakamanukūlameva natu viruddhaṃ ityuktama "ktādhikaraṇe /
tava tu laukikaprayogādiva yājñikaprayogādapyarthavādaprābalyāt tadviruddhānodanapiṣṭakavācitāyuktā --------" iti, tadetaddāśamikādhikaraṇaśāstradīpikāyā viruddham /
tatra hi anavastrāvitāntarūṣmapakvaudana evayājñikaprayogasyokteḥ tatraicār'thavādāt pūrvaṃ caruśabdaśravaṇānantaraṃ śaktigrahādarthavādasya tadupodbalatayā sthālīmātravācakatānirāsa eva tātparyapratīteḥ nirṇītopakramasthacaruśebdānurodhena sāmānyavacanasya viśeṣaparatvakalpanayāpyarthavādāvirodhena caruśabdaśaktigrāhakatve mānābhāvenārthavādavaśāt sāmānyata odanavācino viśeṣāpekṣayā yājñikaprayogagrahaṇamityarthakalpanasyāsaṅgatatvāt /
ataeva tadadhikaraṇer'thavādasamānakakṣyatayaiva yājñikaprayoga odanaparyantatvenoktomiśraiḥ, yasya tu nyāyasudhākṛto mate odanaparyante caruśabdasya śaktistasyāpi mate na trivṛccarvaśvavālādhikaraṇe caruśabdasya sthālīvācitānirāsenārthavādasyodanarūpārthaśaktigrāhakatayopanyāsaḥ; caruśabdārthanirṇayasya yājñikaprasidhyaiva siddheḥ prayojanābhāvāt //
ataev.a daśame śāstradīpikāyāṃ ------- viśvastatarayājñikaprayogasya sādhāraṇasthālīprayogāpekṣayā prābalyenāpi sthālīvācitvaṃ khaṇḍitam //
naca ------- odanaparyantavācitvābhāver'thavādavirodhāt sthālīvācitve lāghavāt yājñikaprayogasyāpi bādhāpattiriti -------- yuktam; avirodhāt /
yathaiva hi tava mate sāmānyāpekṣitvenāvirodhaḥ tathaiva odanasādṛśyavivakṣayā prāptāvaiśadyasūpaśākādivyāvṛttyarthatvenāvirodhaḥ saṃbhavatyeva /
itarathā prayogāviśeṣāt lokaprasiddhasthālyā yājñikaprasiddhasya ca madhye katarasya grahaṇamiti sandehanirākaraṇārthatvasyaivāpattyā "sandigdheṣu vākyaśeṣādi" tyanenaiva gatārthatvāpatteḥ /
tathāca nirṇītārthasyaiva caruśabdasyātrārthavādena nirṇayānna sandigdhanyāyaviṣayateti trivṛccarvaśvavālādhikaraṇaśāstradīpikoktaṃ virudhyeta /
ato laukikaprasiddhibādhena yājñikaprasidhyaiva nirṇītārthakatve vaktavye arthavādasya śaktigrahe 'nupayogādvaiśadyaprāptyarthameva tadupāsanam //
kiñca asmin mate ūṣmapakva odane iva piṣṭasādhye 'pi tasmin caruśabdārthatvāṅgīkārāt dvayorapyarthayoḥ sthālīvacanatvābādhena yājñikaprasidhyā grahaṇāpattinivāraṇaphalakaudanarūpacarutātparyatvakalpanayāpyupapadyata evatadavirodhaḥ //
vastutastu -------- sthālyāṃ caruśabdasya nirṇītaśaktikatve sati upakramagatanirṇayānurodhenopasaṃhāragataudanapada eva odanasādhanatvalakṣaṇayāpi stuterupapatternārthavādavaśena tadvācitvabādhaḥ śakyate kartumiti sthālīvacanatvanivṛttiḥ durghaṭaiva //
kiñca caruśabdasya sthālīvacanatvabādhenānavastrāvitaudanaviśeṣavācitvamarthavādapratīteḥ prāk nirṇītaṃ vā navā; ādye tenaivār'thavādagatasāmānyaśabdārthanirṇāyakatvāt arthavādena caruśabdanirṇaya ityetatparatā tadadhikaraṇe durupapādaiva /
dvitīye niścitena viśeṣaṇa sāmānyākāṅkṣānivṛttāvapi aniścitena tena tadayogāt viśeṣasamarpakatvenāvirodhopapādanaṃ yājñikaprasiddherayuktam; vācakatātātparyagrāhitvaṃ vinā kevalaṃ yājñikaprasiddhimātratvena niyāmakatvānupapatteḥ /
ato yathaiva mlecchaprasiddhiḥ āryaprasidhdyā bādhyate, evaṃ sādhāraṇāryaprasiddhirapi nyāyataulyāt karmānuṣṭhānavattvena viśvastatarāryaprasidhdyā bādhyate /
evaṃ sādhāraṇārthaprasiddherapītyevaṃ sthālīvācitvanirākaraṇenānavastrāvitāntarūṣmapakvamātravācitva evopakrame nirṇīte tadanusāreṇopasaṃhāragataudanapade sādṛśyalakṣaṇāyā ucitatvāt vaiśadyayuktataṇḍulaprakṛtikatvamevārthavādasya nyāyyam, natu etāvatāpi vaiśadyayuktataṇḍulaprakṛtikatvāṃśe śaktigrāhakatvam; tathātve maudgayavamayādicaruṣu carucabdānāmanantānāṃ gauṇatvāpatteḥ, vrīhiprakṛtikataṇḍuleṣveva lokaśāstraprasidhdyā taṇḍulatvāṅgīkārāt /
ataeva vārtikakṛtānavastrāvitāntarūṣmapakvamātrameva tacchabdapravṛttinimittamuktam /
etena -------- sūpaśākādivyāvṛttaye taṇḍulaprakṛtikatvaviśeṣaṇopādānaṃ sarvagranthalikhitamapi -------- parāstam; ativyāptiparihāre 'pi maudgādiṣvavyāptyāpatteḥ, loke phalatvena prasiddheṣu taṇḍulaprakṛtikeṣu vartulatvena dṛḍheṣvativyāptyāpatteśca /
ataḥ sūpaśākādivyatiriktatvopalakṣaṇatvāṅgīkāreṇa tadvyāvṛtteḥ vaktavyatayā tadupalakṣaṇasūcakatvamastu nāmārthavādasyeti yuktam /
nyāyasudhāgranthe 'pyanavastrāvitāntarūṣmapadadvayasārthakyapradarśanāvasare taṇḍulaprakṛtikapadānupādānātsūpaśākādivyatiriktatvopalakṣaṇārthatvasyaivārthavāda upapāditatvena maduktārthatātparyakatvapratīteḥ /
tasmānnārthavādasya śaktigrāhakatvamityeva nyāyasudhoktaṃ sādhu /
parantu ubhayamate 'pi prāyaṇīye anyatra sārasvatādicarupiṣṭakacaruvyāvṛttiḥ durghaṭaiva /
ataḥ sarvagranthāvirodhenaivaṃ parihartavyam /
piṣṭakacarau caruśabdo gauṇa eva na mukhyaḥ /
ataeva śrautasmārtakarmaṇoścarukartavyatāyāṃ piṣṭasyaiva tatkaraṇaṃ viśiṣṭānāmiti gauṇamukhyanyāyādeva sarvatra tasyāgrahaṇam /
pauṣṇe carau peṣaṇaṃ vinaiva pradeyasiddheḥ pratiprasavarūpeṇa peṣaṇavidhānādeva gauṇārthasya grahaṇāt piṣṭakacaruḥ saṃpadyata iti sarvaṃ samañjasamityalaṃ śrameṇa /
yasmātpiṣṭakacarāvapi caruśabdaprayogaḥ ata eva vaiśadyānapekṣaṃ carutvapravṛttinimittamidamityāha --------- ata eva carutvaṃ nāmeti //
spaṣṭamanyat /
// iti caturdaśaṃ pauṣṇapeṣaṇasya carāveva niveśādhikaraṇam //
- - - - - - <B1> (15 adhikaraṇam / ) (a.3 pā.3 adhi.15)
ekasminn ekasaṃyogāt / Jaim_3,3.39 /
yatrānyasahitaḥ pūṣā devatā; yathā rājasūye aindrāpauṣṇaścaruriti, tatrāpi peṣaṇamuta yatra kevala eva devatā tatraiveti cintāyām ------- "adantako hi sa" iti arthavādānusārāt peṣaṇasya pūṣasvarūpaprayuktatvāvagatestatsvarūpasya cānyasāhitye 'pi sattvādyuktameva peṣaṇam /
ata eva "somāpauṣṇaṃ caruṃ nirvapennemapiṣṭaṃ paśukāma" iti nemapadavācyārddhapiṣṭatvānuvādo 'pi saṅgacchate /
yadi tu navamādyanyāyena pūṣasvarūpe ānarthakyādapūrvasādhanatvalakṣaṇāyā āvaśyakatvamāśaṅkyeta, tadāstu pūrvoktavidhayā pūṣaprapiṣṭasaṃbandhajñānajanyayāgānumitereva tātparyagrāhikāyāḥ sattvāt sāpi pūṣapade /
paraṃ tvarthavādādyanurodhāt pūṣādhiṣṭhānakadevatātvaprayojyāpūrvīyatvalakṣaṇāyā evāṅgīkārād dvidevatye 'pi peṣaṇadharmaḥ saṃbhavati /
yathācaivaṃ sati pākasaṃpattistathā yatitavyaṃ antarāyakaraṇena vā krāmikanikṣepeṇa vā pātrabhedena veti prāpte --------- ānarthakyaparihārāyāpūrvasādhanatvalakṣaṇāyā āvaśyakatvādadhiṣṭhānadvārakatvakalpanasya ca pūṣṇo devatātvopasthitimantareṇānupapatteḥ tadupasthitau ca taddvārakatvamātrakalpanayaivānarthakyaparihārād dvidevatye ca caturdhākaraṇādhikaraṇanyāyena kevalasya pūṣṇo devatātvābhāvādyatra kevala eva pūṣā tatraiva peṣaṇam /
na ca --- apūrvasādhanībhūtadevatātvasyaiva prakāratayā pūṣapadena lakṣaṇe 'pi tasya pūṣopari bhāne svarūpasaṃbandhasyaiva saṃsargavidhayā vivakṣaṇena paryāpteravivakṣaṇāttasya ca dvidevatye 'pyekasmin pūṣṇi sattvena tasyāpyuddeśyerūpatvopapatteḥ kathaṃ na peṣaṇādīti -------- vācyam; vyāsajyavṛttidharmaparyāptaprakāratāyāṃ ekamātravṛttisaṃbandhasya saṃsargatvānupapatteḥ /
anyathā eko dvitvasamavāyavānitivadeko dvitvavāneko dvau ityādiśābdabodhāpatteḥ /
ato vyāsajyavṛttidevatātvasya paryāptisaṃbandhenaiva prakārakatvāt tasya ca pūṣṇi kevale bādhāt pūṣamātravṛttidevatātvasyaiva prakāratvena tatraiva peṣaṇādi /
adantakatvaṃ tvarthavādamātratvānna virudhyate /
nemapiṣṭatvasyāpi ca tatraiva vidheyatvāṅgīkārādviśiṣṭabhāvanāvidhānena cāvākyabhedādagamakatvam // 3 // 49 //
iti pañcadaśaṃ pauṣṇapeṣaṇasyaikadaivatyatvādhikaraṇam //
// iti śrīkhaṇḍadevaviracitāyāṃ bhāṭṭadīpikāyāṃ tṛtīyādhyāyasya tṛtīyaḥ pādaḥ //
<B2> atra nyāyasudhākṛtā "ānarthakyaparihārāya apūrvaprayukta eva peṣaṇe dvārāpekṣāyāṃ bahuvrīhiṇā pradhānabhūtaḥ pūṣaiva dvāram /
sa ca bhāgaviśiṣṭaḥ /
bhāgaśca bhajyate sevyate iti vyutpattyā sevyam /
devatāyāśca bhoktṛtvābhāvena tadasaṃbhavāllakṣaṇayā svatpaparatve miśroddeśenāpi tyakte samaṃ syāditi nyāyena lokavadardhe pūṣasvāmyasaṃbhave tasyāpi yatheṣṭaviniyojyatvarūpasya bhoktṛtvavadevāsaṃbhavāt jīvatpitṛkasyeva pitṛdhane anyaṃ prati yatheṣṭaviniyojyatvapratibandhākhyaṃ svāmyam "devasvaṃ brāhmaṇasvaṃ ca lobhenopahinasti yaḥ /
" itismṛtyuktaṃ bhāgaśabdoktaṃ dvāramityapūrvaprayuktatve 'pi dvidevatye peṣaṇamiti pūrvapakṣopapattirityuktam, tadidaṃ navame devatāvigrahanirāse sati bhoktṛtvayatheṣṭaviniyojyatvayorabhāvasyevānyaṃ prati viniyogapratibandhasyāpyabhāvenāyuktamityevaṃ nirākṛtya prakāśakṛtānyathopapāditam /
apūrvaprayuktatve 'pi yadyapi bahuvrīhiṇā pradhānabhūtaḥ pūṣaiva dvāraṃ śābdam; tathāpi sākṣātpūṣṇaḥ peṣaṇānarhatvādānarthakyādeva viparītaviśeṣaṇaviśeṣyatvena bhāgaśabdena yāgasādhanaṃ lakṣitaṃ havireva dvāram, na devatā; taddvāratve 'pi havirdvārasyāvaśyakatvāt /
pūṣā tu havirupalakṣaṇam; tatrāgneyendrapītādivatpūṣṇo nairapekṣyabodhakataddhitasamāsābhāvānnānyayogavyāvṛttyā viśeṣaṇatvam, kintvayogavyāvṛttimātreṇeti tadidaṃ dvidevatye 'pyastyeveti //
tadetannirāsāyāha -------- sāpi pūṣapade iti //
yena vākyena yaduddeśyasaṃbandhena yasya vidhānaṃ tasya śabdaśaktyupasthitataduddeśyasaṃbandhe ānarthakyaprasaktau tadvācakapade evāpūrvasādhanatvalakṣaṇayā tena rūpeṇoddeśye vidheye vihite tadevāpūrvaṃ prati dvāramiti "vrīhīnahanti;" ityādisaṃskāravākyeṣu kḷptaṃ nyāyyaṃ ca; prakaraṇādevāvaghātādīnāmapūrvasaṃbandhāvagame sati avaghātādivākyagatavrīhyādipadadvāraviśeṣasyaiva samarpaṇāt /
tadiha pūṣasaṃbandhenaiva bhāgaśabdena yāgalakṣaṇāttenopasthāpitamapyapūrvaṃ na sākṣāduddeśyam; tadvācakapadābhāvāt /
tathāca bhāgaśabdena yāgasādhanahaviṣo dvāratvam /
tadabhāve tasyaivoddeśyatvaṃ śābdaṃ bhavet /
naca tatsaṃbhavati, ekaprasaratābhaṅgāpatteḥ, pūṣṇo 'yogavyāvṛttimātreṇāpi viśeṣaṇatve viśiṣṭoddeśāpattereva hetorādyādhikaraṇe paramparāsaṃbandhena pūṣadevatoddeśenaiva vidhānasya bālaprakāśe bhavadbhiranyaiśca sthāpitatvena tadupajīvanenaivāgnimavicārakaraṇādatra haviṣa uddeśyatvānupapatteḥ /
evañcoddeśyasamarpake pūṣapade evāpūrvasādhanatvalakṣaṇayā devatādvāreṇaivāpūrvārthatvenānarthakyaparihāra iti na pūrvapakṣasiddhiḥ /
yadapi devatāvigrahanirāsānnānyaṃ prati yatheṣṭaviniyojyatvapratibandhasyāpyabhāvena tathābhūtasvatvaviśiṣṭasya pūṣṇo dvāratvamiti nyāyasudhākṛddūṣaṇam, tadapi śabdadevatātvavādināpi devatāvigrahānaṅgīkāre 'pi devasvādivyavahāratadaṅgīkārajanakasambandhaviśeṣasyāṅgīkāryatvāt ya eva tadupapādakaḥ saṃbandhaviśeṣaḥ kalpanīyaḥ tadviśiṣṭasyaiva pūṣṇo dvāratvamityevaṃ tadāśayādupekṣyam /
ataevānyaṃ prati yatheṣṭaviniyojyatvapratibandhākhyasvāmyasyāpūrvaṃ pratyupayogābhāvāt na dvāratvaṃ saṃbhavatīti nyāyasudhākṛduktereva pūṣapadeevāpūrvasādhanatvalakṣaṇāmaṅgīkṛtyaivānyathā pūrvapakṣaṃ sādhayati -------- paraṃ tviti ------- //
spaṣṭamanyat //
atra ca prayojanaṃ pūrvapakṣe dvidevatye 'pi peṣaṇadharmasyeti pūrvapakṣopapādanavelāyāmeva bhāṣakhyānusāreṇoktam /
siddhānte tu prāpakapramāṇābhāvānnaiva taditi spaṣṭameva /
tatra vārtikakṛtā pūrvapakṣe kāṃsyabhojinyāyenāmukhyānugrahasyāpyuktatvāt iha tu indrasamakakṣatayopāttapūṣānurodhātsutarāṃ sarvasyāpi peṣaṇaṃ śakyata eva kartumityapi prayojanāntaraṃ sūcitamityapi yatpūjyapādairuktam, tasyāyamevāśayaḥ ------ yat pūṣānurodhena sarvasyāpi peṣaṇe kṛte caruśabdasya piṣṭakacarāvapi prayogeṇendradevatādravyāvirodhopapatteḥ kāṃsyabhojinyāyena sarvasya peṣaṇam /
yadi ca caruśabdo 'navastrāvitaudane eva rūḍhaḥ syāt, tadāpi pūṣānurodhena peṣaṇakaraṇe indrasyaudanarūpasvadravyanāśāpatteḥ tatra kasyānugraha iti saṃdehe mukhyatvenāsaṃjātavirodhitvenādhvarakalpāyāṃ mukhyabhūtāgnāvaiṣṇavadharmānugrahasyeva, indradharmodanānugrahakartavyatāpattyā na sarvapeṣaṇaṃ prāpnoti, ataḥ piṣṭakacarugrahaṇe evāvirodhāt? kāṃsyabhojinyāyopapādane pūrvapakṣa iva siddhānte 'pi sarvapeṣaṇaṃ saṃbhavatyeveti na kaścana pūrvottarapakṣayoḥ prayojanabhedaḥ sidhyeti /
atastaṇḍulacarugrahaṇapakṣe virodhaprasaktāvapyardhapeṣaṇena tatparihārasaṃbhavānna tadanurodhenendradevatādravyavighātaḥ kartavya ityardhameva peṣaṇaṃ pūrvapakṣe prayojanaṃ bhinnaṃ sidhyati /
yatra hyamukhyasya sarvathā bādhastatra mukhyasyaivānugrahaḥ //
adhvarakalpāgatājyadravyagatamadhyatanasarasvatīyāgīyahavirabhimarśanasy.a sakṛddhavirabhimarśanasyaiva śāstrārthatvena vṛdhanvatīmantreṇāpi siddheḥ tadbādhābhāvāt iha tu mukhyendrānugrahe sarvathā pūṣāṅgapeṣaṇasya bādhaprasaṅgādardhapeṣaṇaṃ yuktamityeva prayojanaṃ kāṃsyabhojinyāyopapādanenāśrayaṇīyamiti tadevātra prayojanaṃ vaktumiti //
iti pañcadaśaṃ pauṣṇapeṣaṇasyaikadaivatyatvādhikaraṇam //
iti śrīmatpūrvottaramīmāṃsāpārāvārīṇadhurīṇa kavimaṇḍana-khaṇḍadevaśiṣya-śaṃbhubhaṭṭaviracitāyāṃ bhāṭṭadīpikāvyākhyāyāṃ prabhāvalyāṃ tṛtīyādhyāyasya tṛtīyaḥ pādaḥ //
atra navītāntaṃ samāptam //
adhyāyaḥ pādaḥ adhikaraṇasaṃkhyā ādito 'dhikaraṇasaṃkhyā 3 3 15 50 // // //