Kulasekhara: Mukundamala
Based on Stotramālā, ed. P.B. Anangaracarya,
Kanchipuram : Granthamala Office 1949, pp. 1-4.
Input by Aleksandar Uskokov
THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.
Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)
| description: | multibyte sequence: |
| long a | ā |
| long A | Ā |
| long i | ī |
| long I | Ī |
| long u | ū |
| long U | Ū |
| vocalic r | ṛ |
| vocalic R | Ṛ |
| long vocalic r | ṝ |
| vocalic l | ḷ |
| vocalic L | Ḷ |
| long vocalic l | ḹ |
| velar n | ṅ |
| velar N | Ṅ |
| palatal n | ñ |
| palatal N | Ñ |
| retroflex t | ṭ |
| retroflex T | Ṭ |
| retroflex d | ḍ |
| retroflex D | Ḍ |
| retroflex n | ṇ |
| retroflex N | Ṇ |
| palatal s | ś |
| palatal S | Ś |
| retroflex s | ṣ |
| retroflex S | Ṣ |
| anusvara | ṃ |
| visarga | ḥ |
| long e | ē |
| long o | ō |
| l underbar | ḻ |
| r underbar | ṟ |
| n underbar | ṉ |
| k underbar | ḵ |
| t underbar | ṯ |
Unless indicated otherwise, accents have been dropped in order
to facilitate word search.
For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf
For further information see:
http://gretil.sub.uni-goettingen.de/gretil.htm
ghuṣyate yasya nagare raṅgayātrā dine dine /
tam ahaṃ śirasā vande rājānaṃ kulaśekharam //
śrīvallabheti varadeti dayāpareti bhaktapriyeti bhavaluṇṭhanakovideti /
nātheti nāgaśayaneti jagannivāsety ālāpinaṃ pratidinaṃ kuru māṃ mukunda // KMukm_1 //
jayatu jayatu devo devakīnandano 'yaṃ jayatu jayatu kṛṣṇo vṛṣṇivaṃśapradīpaḥ /
jayatu jayatu meghaśyāmalaḥ komalāṅgo jayatu jayatu pṛthvībhāranāśo mukundaḥ // KMukm_2 //
mukunda mūrdhnā praṇipatya yāce bhavantam ekāntam iyantam artham /
avismṛtis tvaccaraṇāravinde bhave bhave me 'stu bhavatprasādāt // KMukm_3 //
nāhaṃ vande tava caraṇayor dvandvam advandvahetoḥ kumbhīpākaṃ gurum api hare nārakaṃ nāpanetum /
ramyā rāmā mṛdutanulatā nandane nāpi rantuṃ bhāve bhāve hṛdayabhavane bhāvayeyaṃ bhavantam // KMukm_4 //
nāsthā dharme na vasunicaye naiva kāmopabhoge yad bhāvyaṃ tad bhavatu bhagavan pūrvakarmānurūpam /
etat prārthyaṃ mama bahu-mataṃ janmajanmāntare 'pi tvatpādāmbhoruhayugagatā niścalā bhaktir astu // KMukm_5 //
divi vā bhuvi vā mamāstu vāso narake vā narakāntaka prakāmam /
avadhīritaśāradāravindau caraṇau te maraṇe 'pi cintayāmi // KMukm_6 //
kṛṣṇa tvadīyapadapaṅkajapañjarāntar adyaiva me viśatu mānasarājahaṃsaḥ /
prāṇaprayāṇasamaye kaphavātapittaiḥ kaṇṭhāvarodhanavidhau smaraṇaṃ kutas te // KMukm_7 //
cintayāmi harim eva santataṃ mandamandahāsitānanāmbujam /
nandagopatanayaṃ parāt paraṃ nāradādimunivṛndavanditam // KMukm_8 //
karacaraṇasaroje kāntimannetramīne śramamuṣi bhujavīcivyākule 'gādhamārge /
harisarasi vigāhyāpīya tejojalaughaṃ bhavamaruparikhinnaḥ khedam adya tyajāmi // KMukm_9 //
sarasijanayane saśaṅkhacakre murabhidi mā viramasva citta rantum /
sukhataram aparaṃ na jātu jāne haricaraṇasmaraṇāmṛtena tulyam // KMukm_10 //
mābhīr mandamano vicintya bahudhā yāmīś ciraṃ yātanā nāmī naḥ prabhavanti pāparipavaḥ svāmī nanu śrīdharaḥ /
ālasyaṃ vyapanīya bhaktisulabhaṃ dhyāyasva nārāyaṇaṃ lokasya vyasanāpanodanakaro dāsasya kiṃ na kṣamaḥ // KMukm_11 //
bhavajaladhigatānāṃ dvandvavātāhatānāṃ sutaduhitṛkalatratrāṇabhārārditānām /
viṣamaviṣayatoye majjatām aplavānāṃ bhavatu śaraṇam eko viṣṇupoto narāṇām // KMukm_12 //
bhavajaladhim agādhaṃ dustaraṃ nistareyaṃ katham aham iti ceto mā sma gāḥ kātaratvam /
sarasijadṛśi deve tāvakī bhaktir ekā narakabhidi niṣaṇṇā tārayiṣyaty avaśyam // KMukm_13 //
tṛṣṇātoye madanapavanoddhūtamohormimāle dārāvarte tanayasahajagrāhasaṅghākule ca /
saṃsārākhye mahati jaladhau majjatāṃ nas tridhāman pādāmbhoje varada bhavato bhaktināvaṃ prayaccha // KMukm_14 //
mā drākṣaṃ kṣīṇapuṇyān kṣaṇam api bhavato bhaktihīnān padābje mā śrauṣaṃ śrāvyabandhaṃ tava caritam apāsyānyad ākhyānajātam /
mā smārṣaṃ mādhava tvām api bhuvanapate cetasāpahnuvānān mā bhūvaṃ tvatsaparyāvyatikararahito janmajanmāntare 'pi // KMukm_15 //
jihve kīrtaya keśavaṃ muraripuṃ ceto bhaja śrīdharaṃ pāṇidvandva samarcayācyutakathāḥ śrotradvaya tvaṃ śṛṇu /
kṛṣṇaṃ lokaya locanadvaya harer gacchāṅghriyugmālayaṃ jighra ghrāṇa mukundapādatulasīṃ mūrdhan namādhokṣajam // KMukm_16 //
he lokāḥ śṛṇuta prasūtimaraṇavyādheś cikitsām imāṃ yogajñāḥ samudāharanti munayo yāṃ yājñavalkyādayaḥ /
antarjyotir ameyam ekam amṛtaṃ kṛṣṇākhyam āpīyatāṃ tat pītaṃ paramauṣadhaṃ vitanute nirvāṇam ātyantikam // KMukm_17 //
he martyāḥ paramaṃ hitaṃ śṛṇuta vo vakṣyāmi saṅkṣepataḥ saṃsārārṇavam āpadūrmibahulaṃ samyak praviśya sthitāḥ /
nānājñānam apāsya cetasi namo nārāyaṇāyety amuṃ mantraṃ sapraṇavaṃ praṇāmasahitaṃ prāvartayadhvaṃ muhuḥ // KMukm_18 //
pṛthvī reṇur aṇuḥ payāṃsi kaṇikāḥ phalguḥ sphuliṅgo laghuḥ tejo niḥśvasanaṃ marut tanutaraṃ randhraṃ susūkṣmaṃ nabhaḥ /
kṣudrā rudrapitāmahaprabhṛtayaḥ kīṭāḥ samastāḥ surāḥ dṛṣṭe yatra sa tāvako vijayate bhūmāvadhūtāvadhiḥ // KMukm_19 //
baddhenāñjalinā natena śirasā gātraiḥ saromodgamaiḥ kaṇṭhena svaragadgadena nayanenodgīrṇabāṣpāmbunā /
nityaṃ tvaccaraṇāravindayugaladhyānāmṛtāsvādinām asmākaṃ sarasīruhākṣa satataṃ sampadyatāṃ jīvitam // KMukm_20 //
he gopālaka he kṛpājalanidhe he sindhukanyāpate he kaṃsāntaka he gajendrakaruṇāpārīṇa he mādhava /
he rāmānuja he jagattrayaguro he puṇḍarīkākṣa māṃ he gopījananātha pālaya paraṃ jānāmi na tvāṃ vinā // KMukm_21 //
bhaktāpāyabhujāṅgagāruḍamaṇis trailokyarakṣāmaṇir gopīlocanacātakāmbudamaṇiḥ saundaryamudrāmaṇiḥ /
yaḥ kāntāmaṇirukmiṇīghanakucadvandvaikabhūṣāmaṇiḥ śreyo devaśikhāmaṇir diśatu no gopālacūḍāmaṇiḥ // KMukm_22 //
śatrucchedaikamantraṃ sakalam upaniṣadvākyasampūjyamantraṃ saṃsārottāramantraṃ samupacitatamasaḥ saṅghaniryāṇamantram /
sarvaiśvaryaikamantraṃ vyasanabhujagasandaṣṭasantrāṇamantraṃ jihve śrīkṛṣṇamantraṃ japa japa satataṃ janmasāphalyamantram // KMukm_23 //
vyāmohapraśamauṣadhaṃ munimanovṛttipravṛttyauṣadhaṃ daityendrārtikarauṣadhaṃ tribhuvane sañjīvanaikauṣadham /
bhaktātyantahitauṣadhaṃ bhavabhayapradhvaṃsanaikauṣadhaṃ śreyaḥprāptikarauṣadhaṃ piba manaḥ śrīkṛṣṇadivyauṣadham // KMukm_24 //
āmnāyābhyasanāny araṇyaruditaṃ vedavratāny anvahaṃ medaśchedaphalāni pūrtavidhayaḥ sarve hutaṃ bhasmani /
tīrthānām avagāhanāni ca gajasnānaṃ vinā yatpada-dvandvāmbhoruhasaṃsmṛtīr vijayate devaḥ sa nārāyaṇaḥ // KMukm_25 //
śrīmannāma procya nārāyaṇākhyaṃ ke na prāpur vāñchitaṃ pāpino 'pi /
hā naḥ pūrvaṃ vāk pravṛttā na tasmiṃs tena prāptaṃ garbhavāsādiduḥkham // KMukm_26 //
majjanmanaḥ phalam idaṃ madhukaiṭabhāre matprārthanīyamadanugraha eṣa eva /
tvadbhṛtyabhṛtyaparicārakabhṛtyabhṛtya-bhṛtyasya bhṛtya iti māṃ smara lokanātha // KMukm_27 //
nāthe naḥ puruṣottame trijagatāṃ ekādhipe cetasā sevye svasya padasya dātari sure nārāyaṇe tiṣṭhati /
yaṃ kañcit puruṣādhamaṃ katipayagrāmeśam alpārthadaṃ sevāyai mṛgayāmahe naram aho mūkā varākā vayam // KMukm_28 //
madana parihara sthitiṃ madīye manasi mukundapadāravindadhāmni /
haranayanakṛśānunā kṛśo 'si smarasi na cakraparākramaṃ murāreḥ // KMukm_29 //
tattvaṃ bruvāṇāni paraṃ parastān madhu kṣarantīva satāṃ phalāni /
prāvartaya prāñjalir asmi jihve nāmāni nārāyaṇagocarāṇi // KMukm_30 //
idaṃ śarīraṃ pariṇāmapeśalaṃ pataty avaśyaṃ ślathasandhijarjaram /
kim auṣadhaiḥ kliśyasi mūḍha durmate nirāmayaṃ kṛṣṇarasāyanaṃ piba // KMukm_31 //
dārā vārākaravarasutā te tanūjo viriñcaḥ stotā vedas tava suragaṇo bhṛtyavargaḥ prasādaḥ /
muktir māyā jagad avikalaṃ tāvakī devakī te mātā mitraṃ balaripusutas tvayy ato 'nyan na jāne // KMukm_32 //
kṛṣṇo rakṣatu no jagattrayaguruḥ kṛṣṇaṃ namasyāmy ahaṃ kṛṣṇenāmaraśatravo vinihatāḥ kṛṣṇāya tasmai namaḥ /
kṛṣṇād eva samutthitaṃ jagad idaṃ kṛṣṇasya dāso 'smy ahaṃ kṛṣṇe tiṣṭhati sarvam etad akhilaṃ he kṛṣṇa saṃrakṣa mām // KMukm_33 //
sa tvaṃ prasīda bhagavan kuru mayy anāthe viṣṇo kṛpāṃ paramakāruṇikaḥ kila tvam /
saṃsārasāgaranimagnam ananta dīnam uddhartum arhasi hare puruṣottamo 'si // KMukm_34 //
namāmi nārāyaṇapādapaṅkajaṃ karomi nārāyaṇapūjanaṃ sadā /
vadāmi nārāyaṇanāma nirmalaṃ smarāmi nārāyaṇatattvam avyayam // KMukm_35 //
śrīnātha nārāyaṇa vāsudeva śrīkṛṣṇa bhaktapriya cakrapāṇe /
śrīpadmanābhācyuta kaiṭabhāre śrīrāma padmākṣa hare murāre // KMukm_36 //
ananta vaikuṇṭha mukunda kṛṣṇa govinda dāmodara mādhaveti /
vaktuṃ samartho 'pi na vakti kaścid aho janānāṃ vyasanābhimukhyam // KMukm_37 //
dhyāyanti ye viṣṇum anantam avyayaṃ hṛtpadmamadhye satataṃ vyavasthitam /
samāhitānāṃ satatābhaya-pradaṃ te yānti siddhiṃ paramāṃ tu vaiṣṇavīm // KMukm_38 //
kṣīrasāgarataraṅgaśīkarā-sāratārakitacārumūrtaye /
bhogibhogaśayanīyaśāyine mādhavāya madhuvidviṣe namaḥ // KMukm_39 //
yasya priyau śrutidharau kavilokavīrau mitre dvijanmavarapadmaśarāv abhūtām /
tenāmbujākṣacaraṇāmbujaṣaṭpadena rājñā kṛtā kṛtir iyaṃ kulaśekhareṇa // KMukm_40 //