babhrave viśvamāyāya mahābhāgyaṃ ca tattvataḥ
śivāya viśvarūpāya yan māṃ pṛcchad yudhiṣṭhiraḥ
niveditaṃ brahmaloke brahmaṇo yat purābhavat
ṛṣayaḥ suvratā dāntāḥ śṛṇvantu gadatas tava
mahābhāgyaṃ vibho brūhi muṇḍine 'tha kapardine
na vidur yasya nidhanam ādiṃ vā sūkṣmadarśinaḥ
sa kathaṃ naramātreṇa śakyo jñātuṃ satāṃ gatiḥ
bhavatāṃ kīrtayiṣyāmi vrateśāya yathātatham
upaspṛśya śucir bhūtvā kathayām āsa dhīmataḥ
tvaṃ cāpageya nāmāni niśāmaya jagatpateḥ
yathā ca bhagavān dṛṣṭo mayā pūrvaṃ samādhinā
atīte dvādaśe varṣe jāmbavaty abravīd dhi mām
putrārthinī mām upetya vākyam āha yudhiṣṭhira
ātmatulyaṃ mama sutaṃ prayacchācyuta māciram
lokān sṛjes tvam aparān icchan yadukulodvaha
ārādhya paśubhartāraṃ rukmiṇyā janitāḥ sutāḥ
cāruśravāś cāruyaśāḥ pradyumnaḥ śaṃbhur eva ca
tathā mamāpi tanayaṃ prayaccha balaśālinam
anujānīhi māṃ rājñi kariṣye vacanaṃ tava
sā ca mām abravīd gaccha vijayāya śivāya ca
kṣetrauṣadhyo yajñavāhāc chandāṃsy ṛṣigaṇā dharā
devapatnyo devakanyā devamātara eva ca
sāvitrī brahmavidyā ca ṛtavo vatsarāḥ kṣapāḥ
rakṣantu sarvatra gataṃ tvāṃ yādava sukhāvaham
ariṣṭaṃ gaccha panthānam apramatto bhavānagha
pituḥ samīpe narasattamasya; mātuś ca rājñaś ca tathāhukasya
tān abhyanujñāya tadātiduḥkhād; gadaṃ tathaivātibalaṃ ca rāmam
so 'vahad dhimavantaṃ māṃ prāpya cainaṃ vyasarjayam
kṣetraṃ ca tapasāṃ śreṣṭhaṃ paśyāmy āśramam uttamam
pūjitaṃ devagandharvair brāhmyā lakṣmyā samanvitam
vaṭavaruṇakavatsanābhabilvaiḥ; saralakapitthapriyālasālatālaiḥ
bhallātakair madhūkaiś ca campakaiḥ panasais tathā
puṣpagulmalatākīrṇaṃ kadalīṣaṇḍaśobhitam
yathāsthānavinikṣiptair bhūṣitaṃ vanarājibhiḥ
kuraṅgabarhiṇākīrṇaṃ mārjārabhujagāvṛtam
pūgaiś ca mṛgajātīnāṃ mahiṣarkṣaniṣevitam
divyastrīgītabahulo māruto 'tra sukho vavau
gītais tathā kiṃnarāṇām udāraiḥ; śubhaiḥ svanaiḥ sāmagānāṃ ca vīra
viśālaiś cāgniśaraṇair bhūṣitaṃ kuśasaṃvṛtam
mahātmabhir dharmabhṛtāṃ variṣṭhair; maharṣibhir bhūṣitam agnikalpaiḥ
dhūmāśanair ūṣmapaiḥ kṣīrapaiś ca; vibhūṣitaṃ brāhmaṇendraiḥ samantāt
marīcipāḥ phenapāś ca tathaiva mṛgacāriṇaḥ
paśyann utphullanayanaḥ praveṣṭum upacakrame
rarāja tac cāśramamaṇḍalaṃ sadā; divīva rājan ravimaṇḍalaṃ yathā
prabhāvād dīptatapasaḥ saṃnikarṣaguṇānvitāḥ
sevite dvijaśārdūlair vedavedāṅgapāragaiḥ
praviśann eva cāpaśyaṃ jaṭācīradharaṃ prabhum
śiṣyamadhyagataṃ śāntaṃ yuvānaṃ brāhmaṇarṣabham
śirasā vandamānaṃ mām upamanyur abhāṣata
yat pūjyaḥ pūjayasi no draṣṭavyo draṣṭum icchasi
dharme ca śiṣyavarge ca samapṛccham anāmayam
lapsyase tanayaṃ kṛṣṇa ātmatulyam asaṃśayam
iha devaḥ sapatnīkaḥ samākrīḍaty adhokṣaja
tapasā brahmacaryeṇa satyena ca damena ca
toṣayitvā śubhān kāmān prāpnuvaṃs te janārdana
śubhāśubhānvitān bhāvān visṛjan saṃkṣipann api
āste devyā sahācintyo yaṃ prārthayasi śatruhan
tena sarvāmaraiśvaryaṃ śarvāt prāptaṃ samārbudam
mahādevavarāc chakraṃ varṣārbudam ayodhayat
śīrṇaṃ purābhavat tāta grahasyāṅgeṣu keśava
śivadattavarāñ jaghnur asurendrān surā bhṛśam
śataṃ varṣasahasrāṇāṃ sarvalokeśvaro 'bhavat
mamaivānucaro nityaṃ bhavitāsīti cābravīt
kuśadvīpaṃ ca sa dadau rājyena bhagavān ajaḥ
yena varṣaśataṃ sāgram ātmamāṃsair huto 'nalaḥ
taṃ prāha bhagavāṃs tuṣṭaḥ kiṃ karomīti śaṃkaraḥ
balaṃ ca daivataśreṣṭha śāśvataṃ saṃprayaccha me
āviśya yogenātmānaṃ trīṇi varṣaśatāny api
yogeśvaraṃ devagītaṃ vettha kṛṣṇa na saṃśayaḥ
taiḥ kruddhair bhagavān rudras tapasā toṣito hy abhūt
suparṇaṃ somahartāraṃ tapasotpādayiṣyatha
tāś ca saptakapālena devair anyāḥ pravartitāḥ
nāhaṃ tasya muner bhūyo vaśagā syāṃ kathaṃ cana
ity uktvā sā mahādevam agacchac charaṇaṃ kila
aśeta musaleṣv eva prasādārthaṃ bhavasya sā
vaṃśe tavaiva nāmnā tu khyātiṃ yāsyati cepsitām
ārādhayām āsa bhavaṃ manoyajñena keśava
vatsākṣayā ca te kīrtis trailokye vai bhaviṣyati
akṣayaṃ ca kulaṃ te 'stu maharṣibhir alaṃkṛtam
iha tena tapas taptaṃ ṣaṣṭiṃ varṣaśatāny atha
granthakṛl lokavikhyāto bhavitāsy ajarāmaraḥ
sākṣāt paśupatis tāta tac cāpi śṛṇu mādhava
ārādhito mahātejās tac cāpi śṛṇu vistaram
tat sarvam akhilenādya kathayiṣyāmi te 'nagha
vyāghrapāda iti khyāto vedavedāṅgapāragaḥ
tasyāham abhavaṃ putro dhaumyaś cāpi mamānujaḥ
āgaccham āśramaṃ krīḍan munīnāṃ bhāvitātmanām
lakṣitaṃ ca mayā kṣīraṃ svāduto hy amṛtopamam
āvayoḥ kṣīram ity eva pānārtham upanīyate
tataḥ piṣṭarasaṃ tāta na me prītim udāvahat
kṣīrodanasamāyuktaṃ bhojanaṃ ca prayaccha me
putrasnehāt pariṣvajya mūrdhni cāghrāya mādhava
vane nivasatāṃ nityaṃ kandamūlaphalāśinām
kutaḥ kṣīrodanaṃ vatsa sukhāni vasanāni ca
tatprasādāc ca kāmebhyaḥ phalaṃ prāpsyasi putraka
mama bhaktir mahādeve naiṣṭhikī samapadyata
divyaṃ varṣasahasraṃ tu pādāṅguṣṭhāgraviṣṭhitaḥ
dvitīyaṃ śīrṇaparṇāśī tṛtīyaṃ cāmbubhojanaḥ
śatāni sapta caivāhaṃ vāyubhakṣas tadābhavam
śakrarūpaṃ sa kṛtvā tu sarvair devagaṇair vṛtaḥ
sahasrākṣas tadā bhūtvā vajrapāṇir mahāyaśāḥ
āveṣṭitakaraṃ raudraṃ caturdaṃṣṭraṃ mahāgajam
ājagāma kirīṭī tu hārakeyūrabhūṣitaḥ
sevyamāno 'psarobhiś ca divyagandharvanāditaḥ
varaṃ vṛṇīṣva mattas tvaṃ yat te manasi vartate
abruvaṃ ca tadā kṛṣṇa devarājam idaṃ vacaḥ
mahādevād ṛte saumya satyam etad bravīmi te
apaśupativaraprasādajā me; tribhuvanarājyavibhūtir apy aniṣṭā
na tu śakra tvayā dattaṃ trailokyam api kāmaye
tāvaj jarāmaraṇajanmaśatābhighātair; duḥkhāni dehavihitāni samudvahāmi
ajaram amaram aprasādya rudraṃ; jagati pumān iha ko labheta śāntim
yena devād ṛte 'nyasmāt prasādaṃ nābhikāṅkṣasi
na śuśruma yad anyasya liṅgam abhyarcyate suraiḥ
arcyate 'rcitapūrvaṃ vā brūhi yady asti te śrutiḥ
arcayadhvaṃ sadā liṅgaṃ tasmāc chreṣṭhatamo hi saḥ
gaccha vā tiṣṭha vā śakra yatheṣṭaṃ balasūdana
na cānyāṃ devatāṃ kāṅkṣe sarvakāmaphalāny api
na prasīdati me rudraḥ kim etad iti cintayan
athāpaśyaṃ kṣaṇenaiva tam evairāvataṃ punaḥ
vṛṣarūpadharaṃ sākṣāt kṣīrodam iva sāgaram
jāmbūnadena dāmnā ca sarvataḥ samalaṃkṛtam
supārśvaṃ vipulaskandhaṃ surūpaṃ cārudarśanam
tuṣāragirikūṭābhaṃ sitābhraśikharopamam
aśobhata mahādevaḥ paurṇamāsyām ivoḍurāṭ
sahasram iva sūryāṇāṃ sarvam āvṛtya tiṣṭhati
yugānte sarvabhūtāni didhakṣur iva codyataḥ
punar udvignahṛdayaḥ kim etad iti cintayam
praśāntaṃ ca kṣaṇenaiva devadevasya māyayā
saurabheyagataṃ saumyaṃ vidhūmam iva pāvakam
sahitaṃ cārusarvāṅgyā pārvatyā parameśvaram
aṣṭādaśabhujaṃ sthāṇuṃ sarvābharaṇabhūṣitam
śukladhvajam anādhṛṣyaṃ śuklayajñopavītinam
vṛtaṃ pāriṣadair divyair ātmatulyaparākramaiḥ
tribhir netraiḥ kṛtoddyotaṃ tribhiḥ sūryair ivoditaiḥ
jātarūpamayaiḥ padmair grathitā ratnabhūṣitā
mayā dṛṣṭāni govinda bhavasyāmitatejasaḥ
pinākam iti vikhyātaṃ sa ca vai pannago mahān
jyāveṣṭitamahāgrīvaḥ sthitaḥ puruṣavigrahaḥ
yat tad astraṃ mahāghoraṃ divyaṃ pāśupataṃ mahat
sasphuliṅgaṃ mahākāyaṃ visṛjantam ivānalam
sahasrabhujajihvākṣam udgirantam ivānalam
yad viśiṣṭaṃ mahābāho sarvaśastravighātanam
śareṇaikena govinda mahādevena līlayā
maheśvarabhujotsṛṣṭaṃ nimeṣārdhān na saṃśayaḥ
tad ahaṃ dṛṣṭavāṃs tāta āścaryādbhutam uttamam
yat tac chūlam iti khyātaṃ sarvalokeṣu śūlinaḥ
saṃhared vā jagat kṛtsnaṃ visṛṣṭaṃ śūlapāṇinā
cakravartī mahātejās trilokavijayī nṛpaḥ
karasthenaiva govinda lavaṇasyeha rakṣasaḥ
triśikhāṃ bhrukuṭīṃ kṛtvā tarjamānam iva sthitam
sarpahastam anirdeśyaṃ pāśahastam ivāntakam
dṛṣṭavān asmi govinda tad astraṃ rudrasaṃnidhau
mahādevena tuṣṭena kṣatriyāṇāṃ kṣayaṃkaraḥ
kārtavīryo hato yena cakravartī mahāmṛdhe
jāmadagnyena govinda rāmeṇākliṣṭakarmaṇā
abhavac chūlino 'bhyāśe dīptavahniśikhopamaḥ
prādhānyato mayaitāni kīrtitāni tavānagha
divyaṃ vimānam āsthāya haṃsayuktaṃ manojavam
vainateyaṃ samāsthāya śaṅkhacakragadādharaḥ
śaktiṃ kaṇṭhe samādāya dvitīya iva pāvakaḥ
śūlaṃ viṣṭabhya tiṣṭhantaṃ dvitīyam iva śaṃkaram
śakrādyā devatāś caiva sarva eva samabhyayuḥ
astuvan vividhaiḥ stotrair mahādevaṃ surās tadā
jyeṣṭhasāmnā ca deveśaṃ jagau nārāyaṇas tadā
gṛṇañ śakraḥ paraṃ brahma śatarudrīyam uttamam
aśobhanta mahātmānas trayas traya ivāgnayaḥ
śaradghanavinirmuktaḥ pariviṣṭa ivāṃśumān
tato 'ham astuvaṃ devaṃ stavenānena suvratam
śakrāya śakrarūpāya śakraveṣadharāya ca
pinākapāṇaye nityaṃ khaḍgaśūladharāya ca
kṛṣṇājinottarīyāya kṛṣṇāṣṭam iratāya ca
śuklabhasmāvaliptāya śuklakarmaratāya ca
ātmā ca sarvabhūtānāṃ sāṃkhye puruṣa ucyase
āśramāṇāṃ gṛhasthas tvam īśvarāṇāṃ maheśvaraḥ
kuberaḥ sarvayakṣāṇāṃ kratūnāṃ viṣṇur ucyase
vasiṣṭhas tvam ṛṣīṇāṃ ca grahāṇāṃ sūrya ucyase
grāmyāṇāṃ govṛṣaś cāsi bhagavāṃl lokapūjitaḥ
pakṣiṇāṃ vainateyaś ca ananto bhujageṣu ca
sanatkumāro yogīnāṃ sāṃkhyānāṃ kapilo hy asi
brahmalokaś ca lokānāṃ gatīnāṃ mokṣa ucyase
varṇānāṃ brāhmaṇaś cāsi viprāṇāṃ dīkṣito dvijaḥ
ādis tvam asi lokānāṃ saṃhartā kāla eva ca
tat sarvaṃ bhagavān eva iti me niścitā matiḥ
yogeśvara namas te 'stu namas te viśvasaṃbhava
anaiśvaryeṇa yuktasya gatir bhava sanātana
madbhakta iti deveśa tat sarvaṃ kṣantum arhasi
tena nārghyaṃ mayā dattaṃ pādyaṃ cāpi sureśvara
kṛtāñjalipuṭo bhūtvā sarvaṃ tasmai nyavedayam
puṣpavṛṣṭiḥ śubhā tāta papāta mama mūrdhani
vavau ca mārutaḥ puṇyaḥ śucigandhaḥ sukhāvahaḥ
abravīt tridaśāṃs tatra harṣayann iva māṃ tadā
mayi bhaktiṃ parāṃ divyām ekabhāvād avasthitām
ūcuḥ prāñjalayaḥ sarve namaskṛtvā vṛṣadhvajam
labhatāṃ sarvakāmebhyaḥ phalaṃ tvatto dvijottamaḥ
āha māṃ bhagavān īśaḥ prahasann iva śaṃkaraḥ
dṛḍhabhakto 'si viprarṣe mayā jijñāsito hy asi
tasmāt sarvān dadāmy adya kāmāṃs tava yathepśitān
harṣād aśrūṇy avartanta lomaharṣaś ca jāyate
jānubhyām avaniṃ gatvā praṇamya ca punaḥ punaḥ
yan me sākṣān mahādevaḥ prasannas tiṣṭhate 'grataḥ
tam ahaṃ dṛṣṭavān devaṃ ko 'nyo dhanyataro mayā
ṣaḍviṃśakam iti khyātaṃ yat parātparam akṣaram
sarvatattvavidhānajñaḥ pradhānapuruṣeśvaraḥ
vāmapārśvāt tathā viṣṇuṃ lokarakṣārtham īśvaraḥ
yugānte caiva saṃprāpte rudram aṅgāt sṛjat prabhuḥ
kālo bhūtvā mahātejāḥ saṃvartaka ivānalaḥ
kalpānte caiva sarveṣāṃ smṛtim ākṣipya tiṣṭhati
āste sarvagato nityam adṛśyaḥ sarvadaivataiḥ
bhaktir bhavatu me nityaṃ śāśvatī tvayi śaṃkara
jānīyām iti me buddhis tvatprasādāt surottama
āśrame ca sadā mahyaṃ sāṃnidhyaṃ param astu te
maheśvaro mahātejāś carācaraguruḥ prabhuḥ
śīlavān guṇasaṃpannaḥ sarvajñaḥ priyadarśanaḥ
kṣīrodaḥ sāgaraś caiva yatra yatrecchase mune
kṣīrodanaṃ ca bhuṅkṣva tvam amṛtena samanvitam
sāṃnidhyam āśrame nityaṃ kariṣyāmi dvijottama
smṛtaḥ smṛtaś ca te vipra sadā dāsyāmi darśanam
mameśāno varaṃ dattvā tatraivāntaradhīyata
tad avāptaṃ ca me sarvaṃ yad uktaṃ tena dhīmatā
ṛṣīn vidyādharān yakṣān gandharvāpsarasas tathā
sarvartukusumair yuktān snigdhapatrān suśākhinaḥ
sarvam etan mahābāho divyabhāvasamanvitam