jātyāvarasya rājarṣe doṣas tasya bhaven na vā
sūkṣmā gatir hi dharmasya yatra muhyanti mānavāḥ
ṛṣīṇāṃ vadatāṃ pūrvaṃ śrutam āsīd yathā mayā
upadeśe mahān doṣa upādhyāyasya bhāṣyate
duruktavacane rājan yathā pūrvaṃ yudhiṣṭhira
brahmāśramapade vṛttaṃ pārśve himavataḥ śubhe
bahugulmalatākīrṇaṃ mṛgadvijaniṣevitam
vratibhir bahubhiḥ kīrṇaṃ tāpasair upaśobhitam
niyamavratasaṃpannaiḥ samākīrṇaṃ tapasvibhiḥ
dīkṣitair bharataśreṣṭha yatāhāraiḥ kṛtātmabhiḥ
vālakhilyaiś ca bahubhir yatibhiś ca niṣevitam
āgato hy āśramapadaṃ pūjitaś ca tapasvibhiḥ
vahato vividhā dīkṣāḥ saṃprahṛṣyata bhārata
tato 'bravīt kulapatiṃ pādau saṃgṛhya bhārata
tan māṃ tvaṃ bhagavan vaktuṃ pravrājayitum arhasi
śuśrūṣāṃ kartum icchāmi prapannāya prasīda me
āsyatāṃ yadi te buddhiḥ śuśrūṣānirato bhava
katham atra mayā kāryaṃ śraddhā dharme parā ca me
vijñātam evaṃ bhavatu kariṣye priyam ātmanaḥ
tatra vediṃ ca bhūmiṃ ca devatāyatanāni ca
niveśya bharataśreṣṭha niyamastho 'bhavat sukham
baliṃ ca kṛtvā hutvā ca devatāṃ cāpy apūjayat
nityaṃ saṃnihitābhiś ca oṣadhībhiḥ phalais tathā
evaṃ hi sumahān kālo vyatyakrāmat sa tasya vai
saṃpūjya svāgatenarṣiṃ vidhivat paryatoṣayat
ṛṣiḥ paramatejasvī dharmātmā saṃyatendriyaḥ
so 'gacchad āśramam ṛṣiḥ śūdraṃ draṣṭuṃ nararṣabha
pitṛkāryaṃ kariṣyāmi tatra me 'nugrahaṃ kuru
śucir bhūtvā sa śūdras tu tasyarṣeḥ pādyam ānayat
pavitram āsanaṃ caiva bṛsīṃ ca samupānayat
kṛtām anyāyato dṛṣṭvā tatas tam ṛṣir abravīt
sa ca tat kṛtavāñ śūdraḥ sarvaṃ yad ṛṣir abravīt
havyakavyavidhiṃ kṛtsnam uktaṃ tena tapasvinā
pitṛkārye kṛte cāpi visṛṣṭaḥ sa jagāma ha
vane pañcatvam agamat sukṛtena ca tena vai
ajāyata mahārājarājavaṃśe mahādyutiḥ
purohitakule vipra ājāto bharatarṣabha
krameṇa vardhitau cāpi vidyāsu kuśalāv ubhau
kalpaprayoge cotpanne jyotiṣe ca paraṃ gataḥ
sakhye cāpi parā prītis tayoś cāpi vyavardhata
abhiṣiktaḥ prakṛtibhī rājaputraḥ sa pārthivaḥ
abhiṣiktena sa ṛṣir abhiṣiktaḥ purohitaḥ
rājyaṃ śaśāsa dharmeṇa prajāś ca paripālayan
utsmayan prāhasac cāpi dṛṣṭvā rājā purohitam
evaṃ sa bahuśo rājan purodhasam upāhasat
utsmayantaṃ ca satataṃ dṛṣṭvāsau manyumān abhūt
kathābhir anukūlābhī rājānam abhirāmayat
varam icchāmy ahaṃ tv ekaṃ tvayā dattaṃ mahādyute
snehāc ca bahumānāc ca nāsty adeyaṃ hi me tava
yad dadāsi mahārāja satyaṃ tad vada mānṛtam
yadi jñāsyāmi vakṣyāmi ajānan na tu saṃvade
śāntihomeṣu ca sadā kiṃ tvaṃ hasasi vīkṣya mām
kāmayā śāpito rājan nānyathā vaktum arhasi
kautūhalaṃ me subhṛśaṃ tattvena kathayasva me
avaśyam eva vaktavyaṃ śṛṇuṣvaikamanā dvija
jātiṃ smarāmy ahaṃ brahmann avadhānena me śṛṇu
ṛṣir ugratapās tvaṃ ca tadābhūr dvijasattama
pitṛkārye tvayā pūrvam upadeśaḥ kṛto 'nagha
bṛsyāṃ darbheṣu havye ca kavye ca munisattama
ahaṃ rājā ca viprendra paśya kālasya paryayam
matkṛte hy upadeśena tvayā prāptam idaṃ phalam
na tvāṃ paribhavan brahman prahasāmi gurur bhavān
jātiṃ smarāmy ahaṃ tubhyam atas tvāṃ prahasāmi vai
purohitatvam utsṛjya yatasva tvaṃ punarbhave
gṛhyatāṃ draviṇaṃ vipra pūtātmā bhava sattama
brāhmaṇebhyo dadau vittaṃ bhūmiṃ grāmāṃś ca sarvaśaḥ
tīrthāni cābhigatvā vai dānāni vividhāni ca
tam eva cāśramaṃ gatvā cacāra vipulaṃ tapaḥ
saṃmataś cābhavat teṣām āśrame 'śramavāsinām
brāhmaṇena na vaktavyaṃ tasmād varṇāvare jane
upadeśaṃ hi kurvāṇo dvijaḥ kṛcchram avāpnuyāt
na pravaktavyam iha hi kiṃ cid varṇāvare jane
eteṣu kathayan rājan brāhmaṇo na praduṣyati
sūkṣmā gatir hi dharmasya durjñeyā hy akṛtātmabhiḥ
duruktasya bhayād rājan nānubhāṣanti kiṃ cana
duruktavācābhihatāḥ prāpnuvantīha duṣkṛtam
upadeśād dhi tat pāpaṃ brāhmaṇaḥ samavāpnuyāt
satyānṛtena hi kṛta upadeśo hinasti vai
sa copadeśaḥ kartavyo yena dharmam avāpnuyāt
mahān kleśo hi bhavati tasmān nopadiśet kva cit