bodhayaṃs tāpayaṃś caiva jagad uttiṣṭhataḥ pṛthak
agnīṣomakṛtair ebhiḥ karmabhiḥ pāṇḍunandana
hṛṣīkeśo 'ham īśāno varado lokabhāvanaḥ
varṇaś ca me hariśreṣṭhas tasmād dharir ahaṃ smṛtaḥ
ṛtadhāmā tato vipraiḥ satyaś cāhaṃ prakīrtitaḥ
govinda iti māṃ devā vāgbhiḥ samabhituṣṭuvuḥ
tenāviṣṭaṃ hi yat kiṃ cic chipiviṣṭaṃ hi tat smṛtam
śipiviṣṭa iti hy asmād guhyanāmadharo hy aham
matprasādād adho naṣṭaṃ niruktam abhijagmivān
kṣetrajñaḥ sarvabhūtānāṃ tasmād aham ajaḥ smṛtaḥ
ṛtā brahmasutā sā me satyā devī sarasvatī
pauṣkare brahmasadane satyaṃ mām ṛṣayo viduḥ
janmanīhābhavat sattvaṃ paurvikaṃ me dhanaṃjaya
sātvatajñānadṛṣṭo 'haṃ sātvataḥ sātvatāṃ patiḥ
kṛṣṇo varṇaś ca me yasmāt tasmāt kṛṣṇo 'ham arjuna
vāyuś ca tejasā sārdhaṃ vaikuṇṭhatvaṃ tato mama
tasmān na cyutapūrvo 'ham acyutas tena karmaṇā
tayoḥ saṃdhāraṇārthaṃ hi mām adhokṣajam añjasā
te māṃ gāyanti prāgvaṃśe adhokṣaja iti sthitiḥ
nānyo hy adhokṣajo loke ṛte nārāyaṇaṃ prabhum
ghṛtārcir aham avyagrair vedajñaiḥ parikīrtitaḥ
pittaṃ śleṣmā ca vāyuś ca eṣa saṃghāta ucyate
āyurvedavidas tasmāt tridhātuṃ māṃ pracakṣate
naighaṇṭukapadākhyātaṃ viddhi māṃ vṛṣam uttamam
tasmād vṛṣākapiṃ prāha kaśyapo māṃ prajāpatiḥ
anādyo hy amadhyas tathā cāpy anantaḥ; pragīto 'ham īśo vibhur lokasākṣī
na ca pāpāni gṛhṇāmi tato 'haṃ vai śuciśravāḥ
imām uddhṛtavān bhūmim ekaśṛṅgas tato hy aham
trikakut tena vikhyātaḥ śarīrasya tu māpanāt
sa prajāpatir evāhaṃ cetanāt sarvalokakṛt
kapilaṃ prāhur ācāryāḥ sāṃkhyā niścitaniścayāḥ
yogaiḥ saṃpūjyate nityaṃ sa evāhaṃ vibhuḥ smṛtaḥ
sahasraśākhaṃ yat sāma ye vai vedavido janāḥ
gāyanty āraṇyake viprā madbhaktās te 'pi durlabhāḥ
yasmiñ śākhā yajurvede so 'ham ādhvaryave smṛtaḥ
kalpayanti hi māṃ viprā atharvāṇavidas tathā
svaravarṇasamuccārāḥ sarvāṃs tān viddhi matkṛtān
so 'ham evottare bhāge kramākṣaravibhāgavit
pāñcālena kramaḥ prāptas tasmād bhūtāt sanātanāt
bābhravyagotraḥ sa babhau prathamaḥ kramapāragaḥ
kramaṃ praṇīya śikṣāṃ ca praṇayitvā sa gālavaḥ
jātīmaraṇajaṃ duḥkhaṃ smṛtvā smṛtvā punaḥ punaḥ
saptajātiṣu mukhyatvād yogānāṃ saṃpadaṃ gataḥ
dharmasya kuruśārdūla tato 'haṃ dharmajaḥ smṛtaḥ
dharmayānaṃ samārūḍhau parvate gandhamādane
na caivākalpayad bhāgaṃ dakṣo rudrasya bhārata
sasarja śūlaṃ krodhena prajvalantaṃ muhur muhuḥ
āvayoḥ sahasāgacchad badaryāśramam antikāt
vegena mahatā pārtha patan nārāyaṇorasi
babhūvur muñjavarṇās tu tato 'haṃ muñjakeśavān
jagāma śaṃkarakaraṃ nārāyaṇasamāhatam
tata enaṃ samuddhūtaṃ kaṇṭhe jagrāha pāṇinā
nārāyaṇaḥ sa viśvātmā tenāsya śitikaṇṭhatā
mantraiś ca saṃyuyojāśu so 'bhavat paraśur mahān
tato 'haṃ khaṇḍaparaśuḥ smṛtaḥ paraśukhaṇḍanāt
jayaṃ kaḥ prāptavāṃs tatra śaṃsaitan me janārdana
udvignāḥ sahasā kṛtsnā lokāḥ sarve 'bhavaṃs tadā
vedā na pratibhānti sma ṛṣīṇāṃ bhāvitātmanām
vasudhā saṃcakampe 'tha nabhaś ca vipaphāla ha
agāc choṣaṃ samudraś ca himavāṃś ca vyaśīryata
brahmā vṛto devagaṇair ṛṣibhiś ca mahātmabhiḥ
ājagāmāśu taṃ deśaṃ yatra yuddham avartata
uvāca vacanaṃ rudraṃ lokānām astu vai śivam
nyasyāyudhāni viśveśa jagato hitakāmyayā
kūṭasthaṃ kartṛnirdvaṃdvam akarteti ca yaṃ viduḥ
naro nārāyaṇaś caiva jātau dharmakulodvahau
ahaṃ prasādajas tasya kasmiṃś cit kāraṇāntare
tvaṃ caiva krodhajas tāta pūrvasarge sanātanaḥ
prasādayāśu lokānāṃ śāntir bhavatu māciram
prasādayām āsa tato devaṃ nārāyaṇaṃ prabhum
śaraṇaṃ ca jagāmādyaṃ vareṇyaṃ varadaṃ harim
prītimān abhavat tatra rudreṇa saha saṃgataḥ
uvāca devam īśānam īśaḥ sa jagato hariḥ
nāvayor antaraṃ kiṃ cin mā te bhūd buddhir anyathā
mama pāṇyaṅkitaś cāpi śrīkaṇṭhas tvaṃ bhaviṣyasi
sakhyaṃ caivātulaṃ kṛtvā rudreṇa sahitāv ṛṣī
tapas tepatur avyagrau visṛjya tridivaukasaḥ
nāmāni caiva guhyāni niruktāni ca bhārata
ṛṣibhiḥ kathitānīha yāni saṃkīrtitāni te
brahmalokaṃ ca kaunteya golokaṃ ca sanātanam
mayā tvaṃ rakṣito yuddhe mahāntaṃ prāptavāñ jayam
taṃ viddhi rudraṃ kaunteya devadevaṃ kapardinam
nihatāṃs tena vai pūrvaṃ hatavān asi vai ripūn
namasva devaṃ prayato viśveśaṃ haram avyayam