nakulaḥ śaratalpastham idam āha pitāmaham
matas tu mama dharmajña khaḍga eva susaṃśitaḥ
khaḍgena śakyate yuddhe sādhv ātmā parirakṣitum
ekaḥ khaḍgadharo vīraḥ samarthaḥ pratibādhitum
kiṃ svit praharaṇaṃ śreṣṭhaṃ sarvayuddheṣu pārthiva
pūrvācāryaṃ ca khaḍgasya prabrūhi prapitāmaha
sarvakauśalasaṃyuktaṃ sūkṣmacitrārthavac chubham
śikṣānyāyopasaṃpannaṃ droṇaśiṣyāya pṛcchate
śaratalpagato bhīṣmo nakulāya mahātmane
prabodhito 'smi bhavatā dhātumān iva parvataḥ
niṣprakampam anākāśam anirdeśyamahītalam
niḥśabdaṃ cāprameyaṃ ca tatra jajñe pitāmahaḥ
ākāśam asṛjac cordhvam adho bhūmiṃ ca nairṛtim
saṃvatsarān ahorātrān ṛtūn atha lavān kṣaṇān
janayām āsa bhagavān putrān uttamatejasaḥ
vasiṣṭhāṅgirasau cobhau rudraṃ ca prabhum īśvaram
tā vai brahmarṣayaḥ sarvāḥ prajārthaṃ pratipedire
gandharvāpsarasaś caiva rakṣāṃsi vividhāni ca
nānākṛtibalāś cānye jalakṣitivicāriṇaḥ
jajñe tāta tathā sarvaṃ jagat sthāvarajaṅgamam
śāśvataṃ vedapaṭhitaṃ dharmaṃ ca yuyuje punaḥ
ādityā vasavo rudrāḥ sasādhyā marudaśvinaḥ
vasiṣṭhagautamāgastyās tathā nāradaparvatau
ghṛtācāḥ somavāyavyā vaikhānasamarīcipāḥ
vānaprasthāḥ pṛśnayaś ca sthitā brahmānuśāsane
dharmasyāpacayaṃ cakruḥ krodhalobhasamanvitāḥ
śambaro vipracittiś ca prahrādo namucir baliḥ
dharmasetum atikramya remire 'dharmaniścayāḥ
ity evaṃ hetum āsthāya spardhamānāḥ surarṣibhiḥ
trīn upāyān atikramya daṇḍena rurudhuḥ prajāḥ
na jagmuḥ saṃvidaṃ taiś ca darpād asurasattamāḥ
tadā himavataḥ pṛṣṭhe suramye padmatārake
tasmin girivare putra puṣpitadrumakānane
tasthau sa vibudhaśreṣṭho brahmā lokārthasiddhaye
vidhinā kalpadṛṣṭena yathoktenopapāditam
marudbhiḥ parisaṃstīrṇaṃ dīpyamānaiś ca pāvakaiḥ
vṛtaṃ devagaṇaiś caiva prababhau yajñamaṇḍalam
tatra ghoratamaṃ vṛttam ṛṣīṇāṃ me pariśrutam
vidāryāgniṃ tathā bhūtam utthitaṃ śrūyate tataḥ
prāṃśu durdarśanaṃ caivāpy atitejas tathaiva ca
tatrormikalilāvartaś cukṣubhe ca mahārṇavaḥ
aprasannā diśaḥ sarvāḥ pavanaś cāśivo vavau
muhur muhuś ca bhūtāni prāvyathanta bhayāt tathā
maharṣisuragandharvān uvācedaṃ pitāmahaḥ
rakṣaṇārthāya lokasya vadhāya ca suradviṣām
vimalas tīkṣṇadhāraś ca kālāntaka ivodyataḥ
brahmā dadāv asiṃ dīptam adharmaprativāraṇam
pragṛhyāsim ameyātmā rūpam anyac cakāra ha
ūrdhvadṛṣṭir mahāliṅgo mukhāj jvālāḥ samutsṛjan
vikurvan bahudhā varṇān nīlapāṇḍuralohitān
netraṃ caikaṃ lalāṭena bhāskarapratimaṃ mahat
śuśubhāte ca vimale dve netre kṛṣṇapiṅgale
saṃpragṛhya tu nistriṃśaṃ kālārkānalasaṃnibham
cacāra vividhān mārgān mahābalaparākramaḥ
vidhunvann asim ākāśe dānavāntacikīrṣayā
babhau pratibhayaṃ rūpaṃ tadā rudrasya bhārata
niśamya dānavāḥ sarve hṛṣṭāḥ samabhidudruvuḥ
ghoraiḥ praharaṇaiś cānyaiḥ śitadhārair ayomukhaiḥ
rudrakhaḍgabaloddhūtaṃ pracacāla mumoha ca
tam ekam asurāḥ sarve sahasram iti menire
acarad daityasaṃgheṣu rudro 'gnir iva kakṣagaḥ
saṃprakṛttottamāṅgāś ca petur urvyāṃ mahāsurāḥ
anyonyam abhinardanto diśaḥ saṃpratipedire
apare jagmur ākāśam apare 'mbhaḥ samāviśan
babhau bhūmiḥ pratibhayā tadā rudhirakardamā
samākīrṇā mahābāho śailair iva sakiṃśukaiḥ
raktārdravasanā śyāmā nārīva madavihvalā
raudraṃ rūpaṃ vihāyāśu cakre rūpaṃ śivaṃ śivaḥ
jayenādbhutakalpena devadevam athārcayan
asiṃ dharmasya goptāraṃ dadau satkṛtya viṣṇave
maharṣibhyo dadau khaḍgam ṛṣayo vāsavāya tu
manave sūryaputrāya daduḥ khaḍgaṃ suvistaram
asinā dharmagarbheṇa pālayasva prajā iti
vibhajya daṇḍaṃ rakṣyāḥ syur dharmato na yadṛcchayā
vyaṅganaṃ ca śarīrasya vadho vānalpakāraṇāt
aser eva pramāṇāni parimāṇavyatikramāt
manuḥ prajānāṃ rakṣārthaṃ kṣupāya pradadāv asim
āyuś ca tasmāl lebhe taṃ nahuṣaś ca tato bhuvi
āmūrtarayasas tasmāt tato bhūmiśayo nṛpaḥ
tasmāc ca lebhe dharmajño rājann aiḍabiḍas tathā
dhundhumārāc ca kāmbojo mucukundas tato 'labhat
raivatād yuvanāśvaś ca yuvanāśvāt tato raghuḥ
hariṇāśvād asiṃ lebhe śunakaḥ śunakād api
yadubhyaś ca śibir lebhe śibeś cāpi pratardanaḥ
ruśadaśvād bharadvājo droṇas tasmāt kṛpas tataḥ
tatas tvaṃ bhrātṛbhiḥ sārdhaṃ paramāsim avāptavān
rohiṇyo gotram asyātha rudraś ca gurur uttamaḥ
pāṇḍaveya sadā yāni kīrtayaṃl labhate jayam
śrīgarbho vijayaś caiva dharmapālas tathaiva ca
maheśvarapraṇītaś ca purāṇe niścayaṃ gataḥ
teneyaṃ pṛthivī pūrvaṃ vainyena parirakṣitā
aseś ca pūjā kartavyā sadā yuddhaviśāradaiḥ
aser utpattisaṃsargo yathāvad bharatarṣabha
labhate puruṣaḥ kīrtiṃ pretya cānantyam aśnute