Book 9 Chapter 25
1	saṃjaya uvāca
1	gajānīke hate tasmin pāṇḍuputreṇa bhārata vadhyamāne bale caiva bhīmasenena saṃyuge
2	carantaṃ ca tathā dṛṣṭvā bhīmasenam ariṃdamam daṇḍahastaṃ yathā kruddham antakaṃ prāṇahāriṇam
3	sametya samare rājan hataśeṣāḥ sutās tava adṛśyamāne kauravye putre duryodhane tava sodaryāḥ sahitā bhūtvā bhīmasenam upādravan
4	durmarṣaṇo mahārāja jaitro bhūribalo raviḥ ity ete sahitā bhūtvā tava putrāḥ samantataḥ bhīmasenam abhidrutya rurudhuḥ sarvatodiśam
5	tato bhīmo mahārāja svarathaṃ punar āsthitaḥ mumoca niśitān bāṇān putrāṇāṃ tava marmasu
6	te kīryamāṇā bhīmena putrās tava mahāraṇe bhīmasenam apāsedhan pravaṇād iva kuñjaram
7	tataḥ kruddho raṇe bhīmaḥ śiro durmarṣaṇasya ha kṣurapreṇa pramathyāśu pātayām āsa bhūtale
8	tato 'pareṇa bhallena sarvāvaraṇabhedinā śrutāntam avadhīd bhīmas tava putraṃ mahārathaḥ
9	jayatsenaṃ tato viddhvā nārācena hasann iva pātayām āsa kauravyaṃ rathopasthād ariṃdamaḥ sa papāta rathād rājan bhūmau tūrṇaṃ mamāra ca
10	śrutarvā tu tato bhīmaṃ kruddho vivyādha māriṣa śatena gṛdhravājānāṃ śarāṇāṃ nataparvaṇām
11	tataḥ kruddho raṇe bhīmo jaitraṃ bhūribalaṃ ravim trīn etāṃs tribhir ānarchad viṣāgnipratimaiḥ śaraiḥ
12	te hatā nyapatan bhūmau syandanebhyo mahārathāḥ vasante puṣpaśabalā nikṛttā iva kiṃśukāḥ
13	tato 'pareṇa tīkṣṇena nārācena paraṃtapaḥ durvimocanam āhatya preṣayām āsa mṛtyave
14	sa hataḥ prāpatad bhūmau svarathād rathināṃ varaḥ gires tu kūṭajo bhagno māruteneva pādapaḥ
15	duṣpradharṣaṃ tataś caiva sujātaṃ ca sutau tava ekaikaṃ nyavadhīt saṃkhye dvābhyāṃ dvābhyāṃ camūmukhe tau śilīmukhaviddhāṅgau petatū rathasattamau
16	tato yatantam aparam abhivīkṣya sutaṃ tava bhallena yudhi vivyādha bhīmo durviṣahaṃ raṇe sa papāta hato vāhāt paśyatāṃ sarvadhanvinām
17	dṛṣṭvā tu nihatān bhrātṝn bahūn ekena saṃyuge amarṣavaśam āpannaḥ śrutarvā bhīmam abhyayāt
18	vikṣipan sumahac cāpaṃ kārtasvaravibhūṣitam visṛjan sāyakāṃś caiva viṣāgnipratimān bahūn
19	sa tu rājan dhanuś chittvā pāṇḍavasya mahāmṛdhe athainaṃ chinnadhanvānaṃ viṃśatyā samavākirat
20	tato 'nyad dhanur ādāya bhīmaseno mahārathaḥ avākirat tava sutaṃ tiṣṭha tiṣṭheti cābravīt
21	mahad āsīt tayor yuddhaṃ citrarūpaṃ bhayānakam yādṛśaṃ samare pūrvaṃ jambhavāsavayor abhūt
22	tayos tatra śarair muktair yamadaṇḍanibhaiḥ śubhaiḥ samācchannā dharā sarvā khaṃ ca sarvā diśas tathā
23	tataḥ śrutarvā saṃkruddho dhanur āyamya sāyakaiḥ bhīmasenaṃ raṇe rājan bāhvor urasi cārpayat
24	so 'tividdho mahārāja tava putreṇa dhanvinā bhīmaḥ saṃcukṣubhe kruddhaḥ parvaṇīva mahodadhiḥ
25	tato bhīmo ruṣāviṣṭaḥ putrasya tava māriṣa sārathiṃ caturaś cāśvān bāṇair ninye yamakṣayam
26	virathaṃ taṃ samālakṣya viśikhair lomavāhibhiḥ avākirad ameyātmā darśayan pāṇilāghavam
27	śrutarvā viratho rājann ādade khaḍgacarmaṇī athāsyādadataḥ khaḍgaṃ śatacandraṃ ca bhānumat kṣurapreṇa śiraḥ kāyāt pātayām āsa pāṇḍavaḥ
28	chinnottamāṅgasya tataḥ kṣurapreṇa mahātmanaḥ papāta kāyaḥ sa rathād vasudhām anunādayan
29	tasmin nipatite vīre tāvakā bhayamohitāḥ abhyadravanta saṃgrāme bhīmasenaṃ yuyutsavaḥ
30	tān āpatata evāśu hataśeṣād balārṇavāt daṃśitaḥ pratijagrāha bhīmasenaḥ pratāpavān te tu taṃ vai samāsādya parivavruḥ samantataḥ
31	tatas tu saṃvṛto bhīmas tāvakair niśitaiḥ śaraiḥ pīḍayām āsa tān sarvān sahasrākṣa ivāsurān
32	tataḥ pañcaśatān hatvā savarūthān mahārathān jaghāna kuñjarānīkaṃ punaḥ saptaśataṃ yudhi
33	hatvā daśa sahasrāṇi pattīnāṃ parameṣubhiḥ vājināṃ ca śatāny aṣṭau pāṇḍavaḥ sma virājate
34	bhīmasenas tu kaunteyo hatvā yuddhe sutāṃs tava mene kṛtārtham ātmānaṃ saphalaṃ janma ca prabho
35	taṃ tathā yudhyamānaṃ ca vinighnantaṃ ca tāvakān īkṣituṃ notsahante sma tava sainyāni bhārata
36	vidrāvya tu kurūn sarvāṃs tāṃś ca hatvā padānugān dorbhyāṃ śabdaṃ tataś cakre trāsayāno mahādvipān
37	hatabhūyiṣṭhayodhā tu tava senā viśāṃ pate kiṃciccheṣā mahārāja kṛpaṇā samapadyata