asiṃ jagrāha saṃkruddho jighāṃsur bharatarṣabham
uvāca kim idaṃ pārtha gṛhītaḥ khaḍga ity uta
te dhvastā dhārtarāṣṭrā hi sarve bhīmena dhīmatā
sa rājā bhavatā dṛṣṭaḥ kuśalī ca yudhiṣṭhiraḥ
harṣakāle tu saṃprāpte kasmāt tvā manyur āviśat
kasmād bhavān mahākhaḍgaṃ parigṛhṇāti satvaram
parāmṛśasi yat kruddhaḥ khaḍgam adbhutavikrama
arjunaḥ prāha govindaṃ kruddhaḥ sarpa iva śvasan
chindyām ahaṃ śiras tasya ity upāṃśuvrataṃ mama
samakṣaṃ tava govinda na tat kṣantum ihotsahe
pratijñāṃ pālayiṣyāmi hatvemaṃ narasattamam
etadarthaṃ mayā khaḍgo gṛhīto yadunandana
viśoko vijvaraś cāpi bhaviṣyāmi janārdana
tvam asya jagatas tāta vettha sarvaṃ gatāgatam
tat tathā prakariṣyāmi yathā māṃ vakṣyate bhavān
akāle puruṣavyāghra saṃrambhakriyayānayā
na hi dharmavibhāgajñaḥ kuryād evaṃ dhanaṃjaya
kāryāṇām akriyāṇāṃ ca sa pārtha puruṣādhamaḥ
samāsavistaravidāṃ na teṣāṃ vettha niścayam
avaśo muhyate pārtha yathā tvaṃ mūḍha eva tu
śrutena jñāyate sarvaṃ tac ca tvaṃ nāvabudhyase
prāṇināṃ hi vadhaṃ pārtha dhārmiko nāvabudhyate
anṛtaṃ tu bhaved vācyaṃ na ca hiṃsyāt kathaṃ cana
hanyād bhavān naraśreṣṭha prākṛto 'nyaḥ pumān iva
parāṅmukhasya dravataḥ śaraṇaṃ vābhigacchataḥ
kṛtāñjaleḥ prapannasya na vadhaḥ pūjyate budhaiḥ
tasmād adharmasaṃyuktaṃ mauḍhyāt karma vyavasyasi
asaṃpradhārya dharmāṇāṃ gatiṃ sūkṣmāṃ duranvayām
yad brūyāt tava bhīṣmo vā dharmajño vā yudhiṣṭhiraḥ
tat te vakṣyāmi tattvena tan nibodha dhanaṃjaya
tattvenaitat sudurjñeyaṃ yasya satyam anuṣṭhitam
sarvasvasyāpahāre tu vaktavyam anṛtaṃ bhavet
yatrānṛtaṃ bhavet satyaṃ satyaṃ cāpy anṛtaṃ bhavet
satyānṛte viniścitya tato bhavati dharmavit
sumahat prāpnuyāt puṇyaṃ balāko 'ndhavadhād iva
sumahat prāpnuyāt pāpam āpagām iva kauśikaḥ
balākāndhābhisaṃbaddhaṃ nadīnāṃ kauśikasya ca
yātrārthaṃ putradārasya mṛgān hanti na kāmataḥ
svadharmanirato nityaṃ satyavāg anasūyakaḥ
athāpaśyat sa pītodaṃ śvāpadaṃ ghrāṇacakṣuṣam
anv eva ca tato vyomnaḥ puṣpavarṣam avāpatat
vimānam āgamat svargān mṛgavyādhaninīṣayā
tapas taptvā varaṃ prāptaṃ kṛtam andhaṃ svayaṃbhuvā
tato balākaḥ svaragād evaṃ dharmaḥ sudurvidaḥ
nadīnāṃ saṃgame grāmād adūre sa kilāvasat
satyavādīti vikhyātaḥ sa tadāsīd dhanaṃjaya
dasyavo 'pi gatāḥ krūrā vyamārganta prayatnataḥ
katamena pathā yātā bhagavan bahavo janāḥ
satyena pṛṣṭaḥ prabrūhi yadi tān vettha śaṃsa naḥ
bahuvṛkṣalatāgulmam etad vanam upāśritāḥ
tatas te tān samāsādya krūrā jaghnur iti śrutiḥ
gataḥ sukaṣṭaṃ narakaṃ sūkṣmadharmeṣv akovidaḥ
aprabhūtaśruto mūḍho dharmāṇām avibhāgavit
tatra te lakṣaṇoddeśaḥ kaś cid eva bhaviṣyati
śrutir dharma iti hy eke vadanti bahavo janāḥ
prabhavārthāya bhūtānāṃ dharmapravacanaṃ kṛtam
yaḥ syād dhāraṇasaṃyuktaḥ sa dharma iti niścayaḥ
akūjanena cen mokṣo nātra kūjet kathaṃ cana
śreyas tatrānṛtaṃ vaktuṃ satyād iti vicāritam
narmaṇy abhipravṛtte vā pravaktavyaṃ mṛṣā bhavet
adharmaṃ nātra paśyanti dharmatattvārthadarśinaḥ
śreyas tatrānṛtaṃ vaktuṃ tat satyam avicāritam
pāpebhyo hi dhanaṃ dattaṃ dātāram api pīḍayet
tasmād dharmārtham anṛtam uktvā nānṛtavāg bhavet
etac chrutvā brūhi pārtha yadi vadhyo yudhiṣṭhiraḥ
hitaṃ caiva yathāsmākaṃ tathaitad vacanaṃ tava
gatiś ca paramā kṛṣṇa tena te vākyam adbhutam
tasmād bhavān paraṃ dharmaṃ veda sarvaṃ yathātatham
tasmin samayasaṃyoge brūhi kiṃ cid anugraham
idaṃ cāparam atraiva śṛṇu hṛtsthaṃ vivakṣitam
anyasmai tvaṃ gāṇḍivaṃ dehi pārtha; yas tvatto 'strair bhavitā vā viśiṣṭaḥ
tan me rājā proktavāṃs te samakṣaṃ; dhanur dehīty asakṛd vṛṣṇisiṃha
sā ca pratijñā mama lokaprabuddhā; bhavet satyā dharmabhṛtāṃ variṣṭha
yathā jīvet pāṇḍavo 'haṃ ca kṛṣṇa; tathā buddhiṃ dātum adyārhasi tvam
tasmāt pārtha tvāṃ paruṣāṇy avocat; karṇe dyūtaṃ hy adya raṇe nibaddham
yadāvamānaṃ labhate mahāntaṃ; tadā jīvan mṛta ity ucyate saḥ
vṛddhaiś ca loke puruṣapravīrais; tasyāvamānaṃ kalayā tvaṃ prayuṅkṣva
tvam ity ukto hi nihato gurur bhavati bhārata
adharmayuktaṃ saṃyogaṃ kuruṣvaivaṃ kurūdvaha
avicāryaiva kāryaiṣā śreyaḥkāmair naraiḥ sadā
tato 'sya pādāv abhivādya paścāc; chamaṃ brūyāḥ sāntvapūrvaṃ ca pārtham
mukto 'nṛtād bhrātṛvadhāc ca pārtha; hṛṣṭaḥ karṇaṃ tvaṃ jahi sūtaputram
tato 'bravīd arjuno dharmarājam; anuktapūrvaṃ paruṣaṃ prasahya
bhīmas tu mām arhati garhaṇāya; yo yudhyate sarvayodhapravīraḥ
yaḥ kuñjarāṇām adhikaṃ sahasraṃ; hatvānadat tumulaṃ siṃhanādam
rathād avaplutya gadāṃ parāmṛśaṃs; tayā nihanty aśvanaradvipān raṇe
pramṛdya padbhyām ahitān nihanti yaḥ; punaś ca dorbhyāṃ śatamanyuvikramaḥ
sa bhīmaseno 'rhati garhaṇāṃ me; na tvaṃ nityaṃ rakṣyase yaḥ suhṛdbhiḥ
eko bhīmo dhārtarāṣṭreṣu magnaḥ; sa mām upālabdhum ariṃdamo 'rhati
nihanti yaḥ śatrugaṇān anekaśaḥ; sa mābhivaktuṃ prabhavaty anāgasam
sṛjaty asau śaravarṣāṇi vīro; mahāhave megha ivāmbudhārāḥ
tvaṃ vāgbalo bhārata niṣṭhuraś ca; tvam eva māṃ vetsi yathāvidho 'ham
evaṃ ca māṃ vāgviśikhair nihaṃsi; tvattaḥ sukhaṃ na vayaṃ vidma kiṃ cit
tenātiśaṅkī bhārata niṣṭhuro 'si; tvattaḥ sukhaṃ nābhijānāmi kiṃ cit
vīraḥ śikhaṇḍī draupado 'sau mahātmā; mayābhiguptena hataś ca tena
svayaṃ kṛtvā pāpam anāryajuṣṭam; ebhir yuddhe tartum icchasy arīṃs tu
tān naiṣi saṃtartum asādhujuṣṭān; yena sma sarve nirayaṃ prapannāḥ
māsmān krūrair vākpratodais tuda tvaṃ; bhūyo rājan kopayann alpabhāgyān
tadānutepe surarājaputro; viniḥśvasaṃś cāpy asim udbabarha
prabrūhi satyaṃ punar uttaraṃ vidher; vacaḥ pravakṣyāmy aham arthasiddhaye
ahaṃ haniṣye svaśarīram eva; prasahya yenāhitam ācaraṃ vai
prabrūhi pārtha svaguṇān ihātmanas; tathā svahārdaṃ bhavatīha sadyaḥ
yudhiṣṭhiraṃ dharmabhṛtāṃ variṣṭhaṃ; śṛṇuṣva rājann iti śakrasūnuḥ
ahaṃ hi tenānumato mahātmanā; kṣaṇena hanyāṃ sacarācaraṃ jagat
sa rājasūyaś ca samāptadakṣiṇaḥ; sabhā ca divyā bhavato mamaujasā
pādau ca me saśarau sahadhvajau; na mādṛśaṃ yuddhagataṃ jayanti
saṃśaptakānāṃ kiṃ cid evāvaśiṣṭaṃ; sarvasya sainyasya hataṃ mayārdham
ye nāstrajñās tān ahaṃ hanmi śastrais; tasmāl lokaṃ neha karomi bhasmasāt
apy aputrā tena rādhā bhavitrī; kuntī mayā vā tad ṛtaṃ viddhi rājan
prasīda rājan kṣama yan mayoktaṃ; kāle bhavān vetsyati tan namas te
yāmy eṣa bhīmaṃ samarāt pramoktuṃ; sarvātmanā sūtaputraṃ ca hantum
iti prāyād upasaṃgṛhya pādau; samutthito dīptatejāḥ kirīṭī
nedaṃ cirāt kṣipram idaṃ bhaviṣyaty; āvartate 'sāv abhiyāmi cainam
utthāya tasmāc chayanād uvāca; pārthaṃ tato duḥkhaparītacetāḥ
tasmāc chiraś chinddhi mamedam adya; kulāntakasyādhamapūruṣasya
vṛddhāvamantuḥ paruṣasya caiva; kiṃ te ciraṃ mām anuvṛtya rūkṣam
yogyo rājā bhīmaseno mahātmā; klībasya vā mama kiṃ rājyakṛtyam
bhīmo 'stu rājā mama jīvitena; kiṃ kāryam adyāvamatasya vīra
iyeṣa nirgantum atho vanāya; taṃ vāsudevaḥ praṇato 'bhyuvāca
pratijñā satyasaṃdhasya gāṇḍīvaṃ prati viśrutā
sa vadhyo 'sya pumāṃl loke tvayā cokto 'yam īdṛśam
macchandād avamāno 'yaṃ kṛtas tava mahīpate
gurūṇām avamāno hi vadha ity abhidhīyate
vyatikramam imaṃ rājan saṃkṣamasvārjunaṃ prati
kṣantum arhasi me rājan praṇatasyābhiyācataḥ
satyaṃ te pratijānāmi hataṃ viddhy adya sūtajam
yasyecchasi vadhaṃ tasya gatam evādya jīvitam
sasaṃbhramaṃ hṛṣīkeśam utthāpya praṇataṃ tadā
kṛtāñjalim idaṃ vākyam uvācānantaraṃ vacaḥ
anunīto 'smi govinda tāritaś cādya mādhava
mokṣitā vyasanād ghorād vayam adya tvayācyuta
ghorād adya samuttīrṇāv ubhāv ajñānamohitau
samuttīrṇāḥ sahāmātyāḥ sanāthāḥ sma tvayācyuta