yathā purā vṛttam idaṃ yuddhe devāsure vibho
tad aśeṣeṇa bruvato mama rājarṣisattama
tvaṃ nibodha na cāpy atra kartavyā te vicāraṇā
babhūva prathamo rājan saṃgrāmas tārakāmayaḥ
nirjitāś ca tadā daityā daivatair iti naḥ śrutam
tārākṣaḥ kamalākṣaś ca vidyunmālī ca pārthiva
tapasā karśayām āsur dehān svāñ śatrutāpana
teṣāṃ pitāmahaḥ prīto varadaḥ pradadau varān
sahitā varayām āsuḥ sarvalokapitāmaham
nāsti sarvāmaratvaṃ hi nivartadhvam ato 'surāḥ
varam anyaṃ vṛṇīdhvaṃ vai yādṛśaṃ saṃprarocate
sarvalokeśvaraṃ vākyaṃ praṇamyainam athābruvan
vayaṃ purāṇi trīṇy eva samāsthāya mahīm imām
vicariṣyāma loke 'smiṃs tvatprasādapuraskṛtāḥ
ekībhāvaṃ gamiṣyanti purāṇy etāni cānagha
ekeṣuṇā devavaraḥ sa no mṛtyur bhaviṣyati
evam astv iti tān devaḥ pratyuktvā prāviśad divam
puratrayavisṛṣṭyarthaṃ mayaṃ vavrur mahāsuram
viśvakarmāṇam ajaraṃ daityadānavapūjitam
trīṇi kāñcanam ekaṃ tu raupyaṃ kārṣṇāyasaṃ tathā
āyasaṃ cābhavad bhūmau cakrasthaṃ pṛthivīpate
gṛhāṭṭāṭṭālakayutaṃ bṛhatprākāratoraṇam
prāsādair vividhaiś caiva dvāraiś cāpy upaśobhitam
kāñcanaṃ tārakākṣasya citram āsīn mahātmanaḥ
rājataṃ kamalākṣasya vidyunmālina āyasam
ākramya tasthur varṣāṇāṃ pūgān nāma prajāpatiḥ
koṭyaś cāprativīrāṇāṃ samājagmus tatas tataḥ
mahad aiśvaryam icchantas tripuraṃ durgam āśritāḥ
tam āśritya hi te sarve avartantākutobhayāḥ
tasmai kāmaṃ mayas taṃ taṃ vidadhe māyayā tadā
tapas tepe paramakaṃ yenātuṣyat pitāmahaḥ
śastrair vinihatā yatra kṣiptāḥ syur balavattarāḥ
sasṛje tatra vāpīṃ tāṃ mṛtānāṃ jīvanīṃ prabho
mṛtas tasyāṃ parikṣiptas tādṛśenaiva jajñivān
mahatā tapasā siddhāḥ surāṇāṃ bhayavardhanāḥ
na teṣām abhavad rājan kṣayo yuddhe kathaṃ cana
nirhrīkāḥ saṃsthitiṃ sarve sthāpitāṃ samalūlupan
viceruḥ svena kāmena varadānena darpitāḥ
ṛṣīṇām āśramān puṇyān yūpāñ janapadāṃs tathā
vyanāśayanta maryādā dānavā duṣṭacāriṇaḥ
abhijagmus tadākhyātuṃ viprakāraṃ suretaraiḥ
vadhopāyam apṛcchanta bhagavantaṃ pitāmaham
asurāś ca durātmānas te cāpi vibudhadviṣaḥ
aparādhyanti satataṃ ye yuṣmān pīḍayanty uta
adhārmikās tu hantavyā ity ahaṃ prabravīmi vaḥ
yoddhāraṃ vṛṇutādityāḥ sa tān hantā suretarān
brahmāṇam agrataḥ kṛtvā vṛṣāṅkaṃ śaraṇaṃ yayuḥ
ṛṣibhiḥ saha dharmajñā bhavaṃ sarvātmanā gatāḥ
sarvātmānaṃ mahātmānaṃ yenāptaṃ sarvam ātmanā
yaḥ sāṃkhyam ātmano veda yasya cātmā vaśe sadā
ananyasadṛśaṃ loke vratavantam akalmaṣam
ātmanaḥ pratirūpāṇi rūpāṇy atha mahātmani
parasparasya cāpaśyan sarve paramavismitāḥ
devā brahmarṣayaś caiva śirobhir dharaṇīṃ gatāḥ
brūta brūteti bhagavān smayamāno 'bhyabhāṣata
namo namas te 'stu vibho tata ity abruvan bhavam
prajāpatimakhaghnāya prajāpatibhir īḍyase
vilohitāya rudrāya nīlagrīvāya śūline
durvāraṇāya śukrāya brahmaṇe brahmacāriṇe
taponityāya piṅgāya vratine kṛttivāsase
prapannārtivināśāya brahmadviṭsaṃghaghātine
gavāṃ ca pataye nityaṃ yajñānāṃ pataye namaḥ
manovākkarmabhir deva tvāṃ prapannān bhajasva naḥ
provāca vyetu vastrāso brūta kiṃ karavāṇi vaḥ
satkṛtya śaṃkaraṃ prāha brahmā lokahitaṃ vacaḥ
mayādhitiṣṭhatā datto dānavebhyo mahān varaḥ
tvām ṛte bhūtabhavyeśa tvaṃ hy eṣāṃ pratyarir vadhe
kuru prasādaṃ deveśa dānavāñ jahi śūlabhṛt
na tv eko 'haṃ vadhe teṣāṃ samartho vai suradviṣām
jayadhvaṃ yudhi tāñ śatrūn saṃghāto hi mahābalaḥ
teṣām iti ha manyāmo dṛṣṭatejobalā hi te
mama tejobalārdhena sarvāṃs tān ghnata śātravān
sarveṣāṃ no balārdhena tvam eva jahi śātravān
ardham ādāya sarvebhyas tejasābhyadhiko 'bhavat
mahādeva iti khyātas tadāprabhṛti śaṃkaraḥ
haniṣyāmi rathenājau tān ripūn vai divaukasaḥ
paśyadhvaṃ yāvad adyaitān pātayāmi mahītale
rathaṃ te kalpayiṣyāma deveśvara mahaujasam
tato vibudhaśārdūlās taṃ rathaṃ samakalpayan
saparvatavanadvīpāṃ cakrur bhūtadharāṃ tadā
diśaś ca pradiśaś caiva parivāraṃ rathasya hi
dharmārthakāmasaṃyuktaṃ triveṇuṃ cāpi bandhuram
oṣadhīr vividhās tatra nānāpuṣpaphalodgamāḥ
pakṣau pūrvāparau tatra kṛte rātryahanī śubhe
dyāṃ yugaṃ yugacarmāṇi saṃvartakabalāhakān
grahanakṣatratārābhiś carma citraṃ nabhastalam
sinīvālīm anumatiṃ kuhūṃ rākāṃ ca suvratām
yoktrāṇi cakrur vāhānāṃ rohakāṃś cāpi kaṇṭhakam
adhiṣṭhānaṃ manas tv āsīt parirathyaṃ sarasvatī
vidyudindradhanurnaddhaṃ rathaṃ dīptaṃ vyadīpayat
devair manujaśārdūla dviṣatām abhimardane
rathayaṣṭiṃ viyatkṛṣṭāṃ sthāpayām āsa govṛṣam
pariskandā rathasyāsya sarvatodiśam udyatāḥ
ṛgvedaḥ sāmavedaś ca purāṇaṃ ca puraḥsarāḥ
divyā vācaś ca vidyāś ca paripārśvacarāḥ kṛtāḥ
oṃkāraś ca mukhe rājann atiśobhākaro 'bhavat
tasmān nṝṇāṃ kālarātrir jyā kṛtā dhanuṣo 'jarā
agnīṣomau jagat kṛtsnaṃ vaiṣṇavaṃ cocyate jagat
tasmād dhanurjyāsaṃsparśaṃ na viṣehur harasya te
bhṛgvaṅgiromanyubhavaṃ krodhāgnim atiduḥsaham
ādityāyutasaṃkāśas tejojvālāvṛto jvalan
nityaṃ trātā ca hantā ca dharmādharmāśritāñ janān
vibhāti bhagavān sthāṇus tair evātmaguṇair vṛtaḥ
jaṅgamājaṅgamaṃ rājañ śuśubhe 'dbhutadarśanam
bāṇam ādatta taṃ divyaṃ somaviṣṇvagnisaṃbhavam
puṇyagandhavahaṃ rājañ śvasanaṃ rājasattama
āruroha tadā yattaḥ kampayann iva rodasī
hasann ivābravīd devo sārathiḥ ko bhaviṣyati
sa bhaviṣyati deveśa sārathis te na saṃśayaḥ
taṃ sārathiṃ kurudhvaṃ me svayaṃ saṃcintya māciram
gatvā pitāmahaṃ devaṃ prasādyaivaṃ vaco 'bruvan
tathā ca kṛtam asmābhiḥ prasanno vṛṣabhadhvajaḥ
sārathiṃ tu na jānīmaḥ kaḥ syāt tasmin rathottame
saphalāṃ tāṃ giraṃ deva kartum arhasi no vibho
hitaṃ kartāsmi bhavatām iti tat kartum arhasi
pinākapāṇir vihito 'tra yoddhā; vibhīṣayan dānavān udyato 'sau
nakṣatravaṃśo 'nugato varūthe; yasmin yoddhā sārathinābhirakṣyaḥ
tatpratiṣṭho ratho deva hayā yoddhā tathaiva ca
kavacāni ca śastrāṇi kārmukaṃ ca pitāmaha
tvaṃ hi sarvair guṇair yukto devatābhyo 'dhikaḥ prabho
sārathye tūrṇam āroha saṃyaccha paramān hayān
devāḥ prasādayām āsuḥ sārathyāyeti naḥ śrutam
saṃyacchāmi hayān eṣa yudhyato vai kapardinaḥ
sārathye kalpito devair īśānasya mahātmanaḥ
śirobhir agamaṃs tūrṇaṃ te hayā vātaraṃhasaḥ
tān aśvāṃś codayām āsa manomārutaraṃhasaḥ
sādhu sādhv iti viśveśaḥ smayamāno 'bhyabhāṣata
paśya bāhvor balaṃ me 'dya nighnataḥ śātravān raṇe
yena tat tripuraṃ rājan daityadānavarakṣitam
yuktvā pāśupatāstreṇa tripuraṃ samacintayat
purāṇi tāni kālena jagmur ekatvatāṃ tadā
babhūva tumulo harṣo daivatānāṃ mahātmanām
jayeti vāco mumucuḥ saṃstuvanto mudānvitāḥ
anirdeśyogravapuṣo devasyāsahyatejasaḥ
trailokyasāraṃ tam iṣuṃ mumoca tripuraṃ prati
tat sāsuragaṇaṃ dagdhvā prākṣipat paścimārṇave
maheśvareṇa kruddhena trailokyasya hitaiṣiṇā
mā kārṣīr bhasmasāl lokān iti tryakṣo 'bravīc ca tam
tuṣṭuvur vāgbhir arthyābhiḥ sthāṇum apratimaujasam
kṛtakāmāḥ prasannena prajāpatimukhāḥ surāḥ
saṃyaccha tvaṃ hayān asya rādheyasya mahātmanaḥ
viśiṣṭo rājaśārdūla nāsti tatra vicāraṇā
tasmāc chaktau yuvāṃ jetuṃ macchatrūṃs tāv ivāsurān
pramathya hanyāt kaunteyaṃ tathā śīghraṃ vidhīyatām
tvayi karṇaś ca rājyaṃ ca vayaṃ caiva pratiṣṭhitāḥ
pitur mama sakāśe yaṃ brāhmaṇaḥ prāha dharmavit
kuru śalya viniścitya mā bhūd atra vicāraṇā
tasya rāmeti vikhyātaḥ putras tejoguṇānvitaḥ
astrahetoḥ prasannātmā niyataḥ saṃyatendriyaḥ
hṛdgataṃ cāsya vijñāya darśayām āsa śaṃkaraḥ
kuruṣva pūtam ātmānaṃ sarvam etad avāpsyasi
apātram asamarthaṃ ca dahanty astrāṇi bhārgava
pratyuvāca mahātmānaṃ śirasāvanataḥ prabhum
tadā śuśrūṣate 'strāṇi bhavān me dātum arhati
pūjopahārabalibhir homamantrapuraskṛtaiḥ
prasannaś ca mahādevo bhārgavasya mahātmanaḥ
bhaktimān eṣa satataṃ mayi rāmo dṛḍhavrataḥ
devatānāṃ pitṝṇāṃ ca samakṣam arisūdanaḥ
tais tadā darpamohāndhair abādhyanta divaukasaḥ
cakruḥ śatruvadhe yatnaṃ na śekur jetum eva te
prasādayantas taṃ bhaktyā jahi śatrugaṇān iti
rāmaṃ bhārgavam āhūya so 'bhyabhāṣata śaṃkaraḥ
lokānāṃ hitakāmārthaṃ matprītyarthaṃ tathaiva ca
nihantuṃ dānavān sarvān kṛtāstrān yuddhadurmadān
vijitya ca ripūn sarvān guṇān prāpsyasi puṣkalān
rāmaḥ kṛtasvastyayanaḥ prayayau dānavān prati
vajrāśanisamasparśaiḥ prahārair eva bhārgavaḥ
saṃspṛṣṭaḥ sthāṇunā sadyo nirvraṇaḥ samajāyata
varān prādād brahmavide bhārgavāya mahātmane
nipātāt tava śastrāṇāṃ śarīre yābhavad rujā
gṛhāṇāstrāṇi divyāni matsakāśād yathepsitam
labdhvā bahuvidhān rāmaḥ praṇamya śirasā śivam
evam etat purāvṛttaṃ tadā kathitavān ṛṣiḥ
karṇāya puruṣavyāghra suprītenāntarātmanā
nāsmai hy astrāṇi divyāni prādāsyad bhṛgunandanaḥ
devaputram ahaṃ manye kṣatriyāṇāṃ kulodbhavam
katham ādityasadṛśaṃ mṛgī vyāghraṃ janiṣyati
vakṣaḥ paśya viśālaṃ ca sarvaśatrunibarhaṇam