yuddheṣu kuśalaṃ vīraṃ kulaputraṃ tanutyajam
api yaudhiṣṭhirāt sainyāt kaś cid anvapatad rathī
dhṛṣṭadyumno virāṭaś ca drupadaś ca sakekayaḥ
dhṛṣṭaketuś ca saṃrabdho matsyāś cānvapatan raṇe
tān dṛṣṭvā dravataḥ śūrāṃs tvadīyā vimukhābhavan
jāmātā tava tejasvī viṣṭambhayiṣur ādravat
sa putragṛddhinaḥ pārthān sahasainyān avārayat
vārdhakṣatrir upāsedhat pravaṇād iva kuñjarān
yad ekaḥ pāṇḍavān kruddhān putragṛddhīn avārayat
tad asya brūhi me vīryaṃ karma cāgryaṃ mahātmanaḥ
sindhurājena yenaikaḥ kruddhān pārthān avārayat
mānāt sa taptavān rājā varārthī sumahat tapaḥ
kṣutpipāsātapasahaḥ kṛśo dhamanisaṃtataḥ
devam ārādhayac charvaṃ gṛṇan brahma sanātanam
svapnānte 'py atha caivāha haraḥ sindhupateḥ sutam
varaṃ vṛṇīṣva prīto 'smi jayadratha kim icchasi
uvāca praṇato rudraṃ prāñjalir niyatātmavān
eko raṇe dhārayeyaṃ samastān iti bhārata
dadāmi te varaṃ saumya vinā pārthaṃ dhanaṃjayam
evam astv iti deveśam uktvābudhyata pārthivaḥ
ekaḥ saṃdhārayām āsa pāṇḍavānām anīkinīm
parāṃs tu tava sainyasya harṣaḥ paramako 'bhavat
utkruśyābhyadravan rājan yena yaudhiṣṭhiraṃ balam