avidhyad bhṛśasaṃkruddhas tottrair iva mahādvipam
avākirad ameyātmā sarvalokasya paśyataḥ
saumadattiṃ raṇe yattaḥ samantāt paryavārayat
parivārya sthitāḥ saṃkhye samantāt sumahaujasaḥ
duryodhanamukhān sarvān putrāṃs te paryavārayat
nandakas tava putras tu bhīmasenaṃ mahābalam
vivyādha niśitaiḥ ṣaḍbhiḥ kaṅkapatraiḥ śilāśitaiḥ
ājaghānorasi kruddho mārgaṇair niśitais tribhiḥ
āruroha rathaśreṣṭhaṃ viśokaṃ cedam abravīt
mām eva bhṛśasaṃkruddhā hantum abhyudyatā yudhi
tasmān mamāśvān saṃgrāme yattaḥ saṃyaccha sārathe
vivyādha daśabhis tīkṣṇaiḥ śaraiḥ kanakabhūṣaṇaiḥ
nandakaṃ ca tribhir bāṇaiḥ pratyavidhyat stanāntare
tribhir anyaiḥ suniśitair viśokaṃ pratyavidhyata
muṣṭideśe śarais tīkṣṇais tribhī rājā hasann iva
pīḍitaṃ viśikhais tīkṣṇais tava putreṇa dhanvinā
putrasya te mahārāja vadhārthaṃ bharatarṣabha
tena ciccheda nṛpater bhīmaḥ kārmukam uttamam
anyat kārmukam ādatta satvaraṃ vegavattaram
tenājaghāna saṃkruddho bhīmasenaṃ stanāntare
sa niṣaṇṇo rathopasthe mūrchām abhijagāma ha
nāmṛṣyanta maheṣvāsāḥ pāṇḍavānāṃ mahārathāḥ
pātayām āsur avyagrāḥ putrasya tava mūrdhani
duryodhanaṃ tribhir viddhvā punar vivyādha pañcabhiḥ
rukmapuṅkhair maheṣvāsaḥ sa viddho vyapayād raṇāt
senāpatiḥ suṣeṇaś ca jalasaṃdhaḥ sulocanaḥ
durmukho duṣpradharṣaś ca vivitsur vikaṭaḥ samaḥ
bhīmasenam abhidrutya vivyadhuḥ sahitā bhṛśam
sṛkkiṇī vilihan vīraḥ paśumadhye vṛko yathā
senāpateḥ kṣurapreṇa śiraś ciccheda pāṇḍavaḥ
suṣeṇaṃ ca tato hatvā preṣayām āsa mṛtyave
pātayām āsa bhallena kuṇḍalābhyāṃ vibhūṣitam
nināya samare bhīmaḥ paralokāya māriṣa
bhrātarau rabhasau rājann anayad yamasādanam
miṣatāṃ sarvasainyānām anayad yamasādanam
śeṣā ye 'nye 'bhavaṃs tatra te bhīmasya bhayārditāḥ
vipradrutā diśo rājan vadhyamānā mahātmanā
eṣa bhīmo raṇe kruddho dhārtarāṣṭrān mahārathān
nipātayaty ugradhanvā taṃ pramathnīta pārthivāḥ
abhyadravanta saṃkruddhā bhīmasenaṃ mahābalam
apatat sahasā tatra yatra bhīmo vyavasthitaḥ
adṛśyaṃ samare cakre jīmūta iva bhāskaram
bhīmasyācchādanaṃ saṃkhye svabāhubalam āśritāḥ
gajaṃ ca śaravṛṣṭyā taṃ bibhidus te samantataḥ
prāgjyotiṣagajo rājan nānāliṅgaiḥ sutejanaiḥ
gabhastibhir ivārkasya saṃsyūto jalado mahān
abhyadhāvata tān sarvān kālotsṛṣṭa ivāntakaḥ
dviguṇaṃ javam āsthāya kampayaṃś caraṇair mahīm
asahyaṃ manyamānās te nātipramanaso 'bhavan
ājaghāna naravyāghra śareṇa nataparvaṇā
mūrchayābhiparītāṅgo dhvajayaṣṭim upāśritaḥ
nanāda balavan nādaṃ bhagadattaḥ pratāpavān
saṃkruddho rākṣaso ghoras tatraivāntaradhīyata
adṛśyata nimeṣārdhād ghorarūpaṃ samāśritaḥ
tasya cānye 'pi diṅnāgā babhūvur anuyāyinaḥ
traya ete mahānāgā rākṣasaiḥ samadhiṣṭhitāḥ
tejovīryabalopetā mahābalaparākramāḥ
sagajaṃ bhagadattaṃ tu hantukāmaḥ paraṃtapaḥ
paripetuḥ susaṃrabdhāś caturdaṃṣṭrāś caturdiśam
bhagadattasya taṃ nāgaṃ viṣāṇais te 'bhyapīḍayan
so 'nadat sumahānādam indrāśanisamasvanam
śrutvā bhīṣmo 'bravīd droṇaṃ rājānaṃ ca suyodhanam
bhagadatto maheṣvāsaḥ kṛcchreṇa parivartate
tau sametau mahāvīryau kālamṛtyusamāv ubhau
hastinaś caiva sumahān bhītasya ruvato dhvaniḥ
arakṣyamāṇaḥ samare kṣipraṃ prāṇān vimokṣyate
mahān hi vartate raudraḥ saṃgrāmo lomaharṣaṇaḥ
yuktaṃ tasya paritrāṇaṃ kartum asmābhir acyutāḥ
sahitāḥ sarvarājāno bhagadattaparīpsayā
uttamaṃ javam āsthāya prayayur yatra so 'bhavat
pāñcālāḥ pāṇḍavaiḥ sārdhaṃ pṛṣṭhato 'nuyayuḥ parān
nanāda sumahānādaṃ visphoṭam aśaner iva
bhīṣmaḥ śāṃtanavo bhūyo bhāradvājam abhāṣata
balavīryasamāviṣṭaḥ sasahāyaś ca sāṃpratam
labdhalakṣyaḥ prahārī ca vayaṃ ca śrāntavāhanāḥ
pāñcālaiḥ pāṇḍaveyaiś ca divasaṃ kṣatavikṣatāḥ
ghuṣyatām avahāro 'dya śvo yotsyāmaḥ paraiḥ saha
upāyenāpayānaṃ te ghaṭotkacabhayārditāḥ
siṃhanādam akurvanta śaṅkhaveṇusvanaiḥ saha
pāṇḍavānāṃ kurūṇāṃ ca puraskṛtya ghaṭotkacam
vrīḍamānā niśākāle pāṇḍaveyaiḥ parājitāḥ
yuddhe sumanaso bhūtvā śibirāyaiva jagmire
pūjayantas tadānyonyaṃ mudā paramayā yutāḥ
siṃhanādāṃś ca kurvāṇā vimiśrāñ śaṅkhanisvanaiḥ
ghaṭṭayantaś ca marmāṇi tava putrasya māriṣa
prayātāḥ śibirāyaiva niśākāle paraṃtapāḥ
muhūrtaṃ cintayām āsa bāṣpaśokasamākulaḥ
pradadhyau śokasaṃtapto bhrātṛvyasanakarśitaḥ