nārthānāṃ prakṛtiṃ vettha nānubandham avekṣase
teṣāṃ yuddhaṃ tu pāpiṣṭhaṃ vedayanti purāvidaḥ
hīnakālaṃ tad eveha phalavan na bhavaty uta
deśe kāle ca vikrāntaṃ kalyāṇāya vidhīyate
bhāraṃ hi rathakārasya na vyavasyanti paṇḍitāḥ
ekaḥ kurūn abhyarakṣad ekaś cāgnim atarpayat
ekaḥ subhadrām āropya dvairathe kṛṣṇam āhvayat
asminn eva vane kṛṣṇo hṛtāṃ kṛṣṇām avājayat
ekaḥ sāṃyaminīṃ jitvā kurūṇām akarod yaśaḥ
vijigye tarasā saṃkhye senāṃ cāsya sudurjayām
daivatair apy avadhyās te ekena yudhi pātitāḥ
ekaikena yathā teṣāṃ bhūmipālā vaśīkṛtāḥ
yas tenāśaṃsate yoddhuṃ kartavyaṃ tasya bheṣajam
avimṛśya pradeśinyā daṃṣṭrām ādātum icchasi
anaṅkuśaṃ samāruhya nagaraṃ gantum icchasi
ghṛtāktaś cīravāsās tvaṃ madhyenottartum icchasi
samudraṃ pratared dorbhyāṃ tatra kiṃ nāma pauruṣam
tādṛśaṃ karṇa yaḥ pārthaṃ yoddhum icchet sa durmatiḥ
siṃhaḥ pāśavinirmukto na naḥ śeṣaṃ kariṣyati
ajñānād abhyavaskandya prāptāḥ smo bhayam uttamam
sainyās tiṣṭhantu saṃnaddhā vyūḍhānīkāḥ prahāriṇaḥ
sarve yudhyāmahe pārthaṃ karṇa mā sāhasaṃ kṛthāḥ
ṣaḍrathāḥ pratiyudhyema tiṣṭhema yadi saṃhatāḥ
yudhyāmahe 'rjunaṃ saṃkhye dānavā vāsavaṃ yathā