saṃspṛśya mūrdhni pāṇibhyām idaṃ vacanam abravīt
kiṃ punar mānuṣe loke mānuṣair akṛtātmabhiḥ
aprameyo 'pradhṛṣyaś ca yuddheṣv apratimas tathā
astrayuddhe samo vīra na te kaś cid bhaviṣyati
brahmaṇyaś cāstravic cāsi śūraś cāsi kurūdvaha
pañcabhir vidhibhiḥ pārtha na tvayā vidyate samaḥ
prāyaścittaṃ ca vettha tvaṃ pratighātaṃ ca sarvaśaḥ
pratijānīṣva taṃ kartum ato vetsyāmy ahaṃ param
viṣahyaṃ cen mayā kartuṃ kṛtam eva nibodha tat
nāviṣahyaṃ tavādyāsti triṣu lokeṣu kiṃ cana
samudrakukṣim āśritya durge prativasanty uta
tāṃs tatra jahi kaunteya gurvarthas te bhaviṣyati
hayair upetaṃ prādān me rathaṃ divyaṃ mahāprabham
svarūpasadṛśaṃ caiva prādād aṅgavibhūṣaṇam
ajarāṃ jyām imāṃ cāpi gāṇḍīve samayojayat
yenājayad devapatir baliṃ vairocaniṃ purā
manvānā devarājaṃ māṃ samājagmur viśāṃ pate
dṛṣṭvā ca mām apṛcchanta kiṃ kariṣyasi phalguna
nivātakavacānāṃ tu prasthitaṃ māṃ vadhaiṣiṇam
nibodhata mahābhāgāḥ śivaṃ cāśāsta me 'naghāḥ
rathenānena maghavā jitavāñ śambaraṃ yudhi
namuciṃ balavṛtrau ca prahlādanarakāv api
rathenānena daityānāṃ jitavān maghavān yudhi
vijetā yudhi vikramya pureva maghavān vaśī
anena vijitā lokāḥ śakreṇāpi mahātmanā
pratyagṛhṇaṃ jayāyainaṃ stūyamānas tadāmaraiḥ
dānavālayam atyugraṃ prayāto 'smi yuyutsayā