ṣaḍrātram avasan vīrā dhanaṃjayadidṛkṣayā
tasmin viharamāṇāś ca ramamāṇāś ca pāṇḍavāḥ
pādapaiḥ puṣpavikacaiḥ phalabhārāvanāmitaiḥ
snigdhapatrair aviralaiḥ śītacchāyair manoramaiḥ
kamalaiḥ sotpalais tatra bhrājamānāni sarvaśaḥ
paśyantaś cārurūpāṇi remire tatra pāṇḍavāḥ
hlādayan pāṇḍavān sarvān sakṛṣṇān sadvijarṣabhān
sahasrapatram arkābhaṃ divyaṃ padmam udāvahat
anilenāhṛtaṃ bhūmau patitaṃ jalajaṃ śuci
atīva muditā rājan bhīmasenam athābravīt
gandhasaṃsthānasaṃpannaṃ manaso mama nandanam
harer idaṃ me kāmāya kāmyake punar āśrame
tāny ahaṃ netum icchāmi kāmyakaṃ punar āśramam
jagāma dharmarājāya puṣpam ādāya tat tadā
priyāyāḥ priyakāmaḥ sa bhīmo bhīmaparākramaḥ
ājihīrṣur jagāmāśu sa puṣpāṇy aparāṇy api
mṛgarāḍ iva saṃkruddhaḥ prabhinna iva kuñjaraḥ
vyapetabhayasaṃmohaḥ śailam abhyapatad balī
giriṃ cacārāriharaḥ kiṃnarācaritaṃ śubham
sarvabhūṣaṇasaṃpūrṇaṃ bhūmer bhujam ivocchritam
saktacakṣur abhiprāyaṃ hṛdayenānucintayan
baddhaśrotramanaścakṣur jagāmāmitavikramaḥ
gandham uddāmam uddāmo vane matta iva dvipaḥ
pituḥ saṃsparśaśītena gandhamādanavāyunā
viloḍayām āsa tadā puṣpahetor ariṃdamaḥ
vimalair dhātuvicchedaiḥ kāñcanāñjanarājataiḥ
muktāhārair iva citaṃ cyutaiḥ prasravaṇodakaiḥ
apsaronūpuraravaiḥ pranṛttabahubarhiṇam
srastāṃśukam ivākṣobhyair nimnagāniḥsṛtair jalaiḥ
bhayasyājñaiś ca hariṇaiḥ kautūhalanirīkṣitaḥ
ākrīḍamānaḥ kaunteyaḥ śrīmān vāyusuto yayau
prāṃśuḥ kanakatālābhaḥ siṃhasaṃhanano yuvā
mattavāraṇatāmrākṣo mattavāraṇavāraṇaḥ
yakṣagandharvayoṣābhir adṛśyābhir nirīkṣitaḥ
cacāra ramaṇīyeṣu gandhamādanasānuṣu
draupadyā vanavāsinyāḥ priyaṃ kartuṃ samudyataḥ
puṣpahetoḥ kathaṃ nv āryaḥ kariṣyati yudhiṣṭhiraḥ
nakulaṃ sahadevaṃ ca na mokṣyati yudhiṣṭhiraḥ
pratasthe naraśārdūlaḥ pakṣirāḍ iva vegitaḥ
trāsayan gajayūthāni vātaraṃhā vṛkodaraḥ
unmūlayan mahāvṛkṣān pothayaṃś corasā balī
upary upari śailāgram ārurukṣur iva dvipaḥ
vinardamāno 'tibhṛśaṃ savidyud iva toyadaḥ
trastāni mṛgayūthāni samantād vipradudruvuḥ
suramyaṃ kadalīṣaṇḍaṃ bahuyojanavistṛtam
mahāgaja ivāsrāvī prabhañjan vividhān drumān
cikṣepa tarasā bhīmaḥ samantād balināṃ varaḥ
ruruvāraṇasaṃghāś ca mahiṣāś ca jalāśrayāḥ
vyāditāsyā mahāraudrā vinadanto 'tibhīṣaṇāḥ
gajenāghnan gajaṃ bhīmaḥ siṃhaṃ siṃhena cābhibhūḥ
talaprahārair anyāṃś ca vyahanat pāṇḍavo balī
bhayād visasṛpuḥ sarve śakṛnmūtraṃ ca susruvuḥ
vanaṃ pāṇḍusutaḥ śrīmāñ śabdenāpūrayan diśaḥ
vanāntaragatāḥ sarve vitresur mṛgapakṣiṇaḥ
jalārdrapakṣā vihagāḥ samutpetuḥ sahasraśaḥ
tān evānusaran ramyaṃ dadarśa sumahat saraḥ
vījyamānam ivākṣobhyaṃ tīrāntaravisarpibhiḥ
mahāgaja ivoddāmaś cikrīḍa balavad balī
vikrīḍya tasmin suciram uttatārāmitadyutiḥ
dadhmau ca śaṅkhaṃ svanavat sarvaprāṇena pāṇḍavaḥ
bāhuśabdena cogreṇa nardantīva girer guhāḥ
śrutvā śailaguhāsuptaiḥ siṃhair mukto mahāsvanaḥ
mukto virāvaḥ sumahān parvato yena pūritaḥ
prājṛmbhata mahākāyo hanūmān nāma vānaraḥ
jṛmbhamāṇaḥ suvipulaṃ śakradhvajam ivocchritam
āsphoṭayata lāṅgūlam indrāśanisamasvanam
udgāram iva gaur nardam utsasarja samantataḥ
antardhāya vicitreṣu cacāra girisānuṣu
śabdaprabhavam anvicchaṃś cacāra kadalīvanam
sa dadarśa mahābāhur vānarādhipatiṃ sthitam
vidyutsaṃghātasadṛśaṃ vidyutsaṃghātacañcalam
skandhabhūyiṣṭhakāyatvāt tanumadhyakaṭītaṭam
lāṅgūlenordhvagatinā dhvajeneva virājitam
vadanaṃ vṛttadaṃṣṭrāgraṃ raśmivantam ivoḍupam
kesarotkarasaṃmiśram aśokānām ivotkaram
dīpyamānaṃ svavapuṣā arciṣmantam ivānalam
taṃ vānaravaraṃ vīram atikāyaṃ mahābalam
siṃhanādaṃ samakarod bodhayiṣyan kapiṃ tadā
hanūmāṃś ca mahāsattva īṣad unmīlya locane
avaikṣad atha sāvajñaṃ locanair madhupiṅgalaiḥ
kimarthaṃ sarujas te 'haṃ sukhasuptaḥ prabodhitaḥ
vayaṃ dharmaṃ na jānīmas tiryagyoniṃ samāśritāḥ
krūreṣu karmasu kathaṃ dehavākcittadūṣiṣu
dharmaghātiṣu sajjante buddhimanto bhavadvidhāḥ
alpabuddhitayā vanyān utsādayasi yan mṛgān
varjitaṃ mānuṣair bhāvais tathaiva puruṣair api
vinā siddhagatiṃ vīra gatir atra na vidyate
nātaḥ paraṃ tvayā śakyaṃ gantum āśvasihi prabho
bhakṣayitvā nivartasva grāhyaṃ yadi vaco mama