pārthaiḥ prītisamāyuktaiḥ pūjanārho 'bhipūjitaḥ
dharmarājam athāmantrya pṛthāṃ ca pṛthulocanaḥ
sa tayā mūrdhny upāghrātaḥ pariṣvaktaś ca keśavaḥ
tām upetya hṛṣīkeśaḥ prītyā bāṣpasamanvitaḥ
uvāca bhagavān bhadrāṃ subhadrāṃ bhadrabhāṣiṇīm
saṃpūjitaś cāpy asakṛc chirasā cābhivāditaḥ
dadarśānantaraṃ kṛṣṇāṃ dhaumyaṃ cāpi janārdanaḥ
draupadīṃ sāntvayitvā ca āmantrya ca janārdanaḥ
bhrātṛbhiḥ pañcabhiḥ kṛṣṇo vṛtaḥ śakra ivāmaraiḥ
mālyajapyanamaskārair gandhair uccāvacair api
sa kṛtvā sarvakāryāṇi pratasthe tasthuṣāṃ varaḥ
vasu pradāya ca tataḥ pradakṣiṇam avartata
gadācakrāsiśārṅgādyair āyudhaiś ca samanvitam
prayayau puṇḍarīkākṣaḥ sainyasugrīvavāhanaḥ
apāsya cāsya yantāraṃ dārukaṃ yantṛsattamam
abhīṣūn saṃprajagrāha svayaṃ kurupatis tadā
rukmadaṇḍaṃ bṛhan mūrdhni dudhāvābhipradakṣiṇam
pṛṣṭhato 'nuyayau kṛṣṇam ṛtvik paurajanair vṛtaḥ
anugamyamānaḥ śuśubhe śiṣyair iva guruḥ priyaiḥ
yudhiṣṭhiraṃ pūjayitvā bhīmasenaṃ yamau tathā
tatas taiḥ saṃvidaṃ kṛtvā yathāvan madhusūdanaḥ
svāṃ purīṃ prayayau kṛṣṇaḥ puraṃdara ivāparaḥ
manobhir anujagmus te kṛṣṇaṃ prītisamanvayāt
kṣipram antardadhe śauriś cakṣuṣāṃ priyadarśanaḥ
nivṛtyopayayuḥ sarve svapuraṃ puruṣarṣabhāḥ
syandanenātha kṛṣṇo 'pi samaye dvārakām agāt