etat sarvaṃ yathānyāyaṃ śrotum icchāmahe vayam
samantapañcakākhyaṃ ca śrotum arhatha sattamāḥ
asakṛt pārthivaṃ kṣatraṃ jaghānāmarṣacoditaḥ
samantapañcake pañca cakāra rudhirahradān
pitṝn saṃtarpayām āsa rudhireṇeti naḥ śrutam
taṃ kṣamasveti siṣidhus tataḥ sa virarāma ha
samantapañcakam iti puṇyaṃ tatparikīrtitam
tenaiva nāmnā taṃ deśaṃ vācyam āhur manīṣiṇaḥ
samantapañcake yuddhaṃ kurupāṇḍavasenayoḥ
aṣṭādaśa samājagmur akṣauhiṇyo yuyutsayā
puṇyaś ca ramaṇīyaś ca sa deśo vaḥ prakīrtitaḥ
yathā deśaḥ sa vikhyātas triṣu lokeṣu viśrutaḥ
etad icchāmahe śrotuṃ sarvam eva yathātatham
yathāvac caiva no brūhi sarvaṃ hi viditaṃ tava
trayaś ca turagās tajjñaiḥ pattir ity abhidhīyate
trīṇi senāmukhāny eko gulma ity abhidhīyate
smṛtās tisras tu vāhinyaḥ pṛtaneti vicakṣaṇaiḥ
anīkinīṃ daśaguṇāṃ prāhur akṣauhiṇīṃ budhāḥ
saṃkhyāgaṇitatattvajñaiḥ sahasrāṇy ekaviṃśatiḥ
gajānāṃ tu parīmāṇam etad evātra nirdiśet
narāṇām api pañcāśac chatāni trīṇi cānaghāḥ
daśottarāṇi ṣaṭ prāhur yathāvad iha saṃkhyayā
yāṃ vaḥ kathitavān asmi vistareṇa dvijottamāḥ
akṣauhiṇyo dvijaśreṣṭhāḥ piṇḍenāṣṭādaśaiva tāḥ
kauravān kāraṇaṃ kṛtvā kālenādbhutakarmaṇā
ahāni pañca droṇas tu rarakṣa kuruvāhinīm
śalyo 'rdhadivasaṃ tv āsīd gadāyuddham ataḥ param
prasuptaṃ niśi viśvastaṃ jaghnur yaudhiṣṭhiraṃ balam
ākhyāsye tatra paulomam ākhyānaṃ cāditaḥ param
abhipannaṃ naraiḥ prājñair vairāgyam iva mokṣibhiḥ
itihāsaḥ pradhānārthaḥ śreṣṭhaḥ sarvāgameṣv ayam
svaravyañjanayoḥ kṛtsnā lokavedāśrayeva vāk
bhāratasyetihāsasya śrūyatāṃ parvasaṃgrahaḥ
pauṣyaṃ paulomam āstīkam ādivaṃśāvatāraṇam
dāho jatugṛhasyātra haiḍimbaṃ parva cocyate
tataḥ svayaṃvaraṃ devyāḥ pāñcālyāḥ parva cocyate
vidurāgamanaṃ parva rājyalambhas tathaiva ca
subhadrāharaṇād ūrdhvaṃ jñeyaṃ haraṇahārikam
sabhāparva tataḥ proktaṃ mantraparva tataḥ param
parva digvijayād ūrdhvaṃ rājasūyikam ucyate
dyūtaparva tataḥ proktam anudyūtam ataḥ param
īśvarārjunayor yuddhaṃ parva kairātasaṃjñitam
tīrthayātrā tataḥ parva kururājasya dhīmataḥ
tathaivājagaraṃ parva vijñeyaṃ tadanantaram
saṃvādaś ca tataḥ parva draupadīsatyabhāmayoḥ
vrīhidrauṇikam ākhyānaṃ tato 'nantaram ucyate
kuṇḍalāharaṇaṃ parva tataḥ param ihocyate
kīcakānāṃ vadhaḥ parva parva gograhaṇaṃ tataḥ
udyogaparva vijñeyam ata ūrdhvaṃ mahādbhutam
prajāgaraṃ tataḥ parva dhṛtarāṣṭrasya cintayā
yānasaṃdhis tataḥ parva bhagavad yānam eva ca
niryāṇaṃ parva ca tataḥ kurupāṇḍavasenayoḥ
ulūkadūtāgamanaṃ parvāmarṣavivardhanam
bhīṣmābhiṣecanaṃ parva jñeyam adbhutakāraṇam
bhūmiparva tato jñeyaṃ dvīpavistarakīrtanam
droṇābhiṣekaḥ parvoktaṃ saṃśaptakavadhas tataḥ
jayadrathavadhaḥ parva ghaṭotkacavadhas tataḥ
mokṣo nārāyaṇāstrasya parvānantaram ucyate
hradapraveśanaṃ parva gadāyuddham ataḥ param
ata ūrdhvaṃ tu bībhatsaṃ parva sauptikam ucyate
jalapradānikaṃ parva strīparva ca tataḥ param
ābhiṣecanikaṃ parva dharmarājasya dhīmataḥ
pravibhāgo gṛhāṇāṃ ca parvoktaṃ tadanantaram
āpaddharmaś ca parvoktaṃ mokṣadharmas tataḥ param
svargārohaṇikaṃ parva tato bhīṣmasya dhīmataḥ
anugītā tataḥ parva jñeyam adhyātmavācakam
nāradāgamanaṃ parva tataḥ param ihocyate
mahāprasthānikaṃ parva svargārohaṇikaṃ tataḥ
bhaviṣyatparva cāpy uktaṃ khileṣv evādbhutaṃ mahat
yathāvat sūtaputreṇa lomaharṣaṇinā punaḥ
samāso bhāratasyāyaṃ tatroktaḥ parvasaṃgrahaḥ
paulome bhṛguvaṃśasya vistāraḥ parikīrtitaḥ
kṣīrodamathanaṃ caiva janmocchaiḥśravasas tathā
katheyam abhinirvṛttā bhāratānāṃ mahātmanām
anyeṣāṃ caiva viprāṇām ṛṣer dvaipāyanasya ca
daityānāṃ dānavānāṃ ca yakṣāṇāṃ ca mahaujasām
anyeṣāṃ caiva bhūtānāṃ vividhānāṃ samudbhavaḥ
śaṃtanor veśmani punas teṣāṃ cārohaṇaṃ divi
rājyān nivartanaṃ caiva brahmacaryavrate sthitiḥ
hate citrāṅgade caiva rakṣā bhrātur yavīyasaḥ
dharmasya nṛṣu saṃbhūtir aṇīmāṇḍavyaśāpajā
dhṛtarāṣṭrasya pāṇḍoś ca pāṇḍavānāṃ ca saṃbhavaḥ
vidurasya ca vākyena suruṅgopakramakriyā
ghaṭotkacasya cotpattir atraiva parikīrtitā
bakasya nidhanaṃ caiva nāgarāṇāṃ ca vismayaḥ
bhrātṛbhiḥ sahitaḥ sarvaiḥ pāñcālān abhito yayau
pañcendrāṇām upākhyānam atraivādbhutam ucyate
draupadyā devavihito vivāhaś cāpy amānuṣaḥ
khāṇḍavaprasthavāsaś ca tathā rājyārdhaśāsanam
sundopasundayos tatra upākhyānaṃ prakīrtitam
puṇyatīrthānusaṃyānaṃ babhruvāhanajanma ca
vāsudevasyānumate prāptā caiva kirīṭinā
saṃprāptiś cakradhanuṣoḥ khāṇḍavasya ca dāhanam
mayasya mokṣo jvalanād bhujaṃgasya ca mokṣaṇam
maharṣer mandapālasya śārṅgyaṃ tanayasaṃbhavaḥ
adhyāyānāṃ śate dve tu saṃkhyāte paramarṣiṇā
aṣṭādaśaiva cādhyāyā vyāsenottamatejasā
ślokāś ca caturāśītir dṛṣṭo grantho mahātmanā
sabhākriyā pāṇḍavānāṃ kiṃkarāṇāṃ ca darśanam
rājasūyasya cārambho jarāsaṃdhavadhas tathā
rājasūye 'rghasaṃvāde śiśupālavadhas tathā
duryodhanasyāvahāso bhīmena ca sabhātale
yatra dharmasutaṃ dyūte śakuniḥ kitavo 'jayat
tārayām āsa tāṃs tīrṇāñ jñātvā duryodhano nṛpaḥ
punar eva tato dyūte samāhvayata pāṇḍavān
adhyāyāḥ saptatir jñeyās tathā dvau cātra saṃkhyayā
ślokāś caikādaśa jñeyāḥ parvaṇy asmin prakīrtitāḥ
paurānugamanaṃ caiva dharmaputrasya dhīmataḥ
yatra saubhavadhākhyānaṃ kirmīravadha eva ca
astrahetor vivāsaś ca pārthasyāmitatejasaḥ
darśanaṃ lokapālānāṃ svargārohaṇam eva ca
yudhiṣṭhirasya cārtasya vyasane paridevanam
damayantyāḥ sthitir yatra nalasya vyasanāgame
svarge pravṛttir ākhyātā lomaśenārjunasya vai
jaṭāsurasya tatraiva vadhaḥ samupavarṇyate
yatra mandārapuṣpārthaṃ nalinīṃ tām adharṣayat
yakṣaiś cāpi mahāvīryair maṇimatpramukhais tathā
lopāmudrābhigamanam apatyārtham ṛṣer api
indro 'gnir yatra dharmaś ca ajijñāsañ śibiṃ nṛpam
jāmadagnyasya rāmasya caritaṃ bhūritejasaḥ
saukanyam api cākhyānaṃ cyavano yatra bhārgavaḥ
tābhyāṃ ca yatra sa munir yauvanaṃ pratipāditaḥ
putrārtham ayajad rājā lebhe putraśataṃ ca saḥ
vijitya sāgaraṃ prāptaṃ pitaraṃ labdhavān ṛṣiḥ
nivātakavacair yuddhaṃ hiraṇyapuravāsibhiḥ
ghoṣayātrā ca gandharvair yatra yuddhaṃ kirīṭinaḥ
jayadrathenāpahāro draupadyāś cāśramāntarāt
mārkaṇḍeyasamasyāyām upākhyānāni bhāgaśaḥ
vrīhidrauṇikam ākhyānam aindradyumnaṃ tathaiva ca
rāmāyaṇam upākhyānam atraiva bahuvistaram
āraṇeyam upākhyānaṃ yatra dharmo 'nvaśāt sutam
jagmur labdhavarā yatra pāṇḍavāḥ paścimāṃ diśam
atrādhyāyaśate dve tu saṃkhyāte paramarṣiṇā
ekonasaptatiś caiva tathādhyāyāḥ prakīrtitāḥ
catuḥṣaṣṭis tathā ślokāḥ parvaitat parikīrtitam
virāṭanagaraṃ gatvā śmaśāne vipulāṃ śamīm
dṛṣṭvā saṃnidadhus tatra pāṇḍavā āyudhāny uta
durātmano vadho yatra kīcakasya vṛkodarāt
godhanaṃ ca virāṭasya mokṣitaṃ yatra pāṇḍavaiḥ
abhimanyuṃ samuddiśya saubhadram arighātinam
atrāpi parisaṃkhyātam adhyāyānāṃ mahātmanā
ślokānāṃ dve sahasre tu ślokāḥ pañcāśad eva tu
parvaṇy asmin samākhyātāḥ saṃkhyayā paramarṣiṇā
upaplavye niviṣṭeṣu pāṇḍaveṣu jigīṣayā
duryodhano 'rjunaś caiva vāsudevam upasthitau
ity ukte vacane kṛṣṇo yatrovāca mahāmatiḥ
akṣauhiṇīṃ vā sainyasya kasya vā kiṃ dadāmy aham
ayudhyamānaṃ sacivaṃ vavre kṛṣṇaṃ dhanaṃjayaḥ
yatra dūtaṃ mahārājo dhṛtarāṣṭraḥ pratāpavān
prajāgaraḥ saṃprajajñe dhṛtarāṣṭrasya cintayā
śrāvayām āsa rājānaṃ dhṛtarāṣṭraṃ manīṣiṇam
manastāpānvito rājā śrāvitaḥ śokalālasaḥ
aikātmyaṃ vāsudevasya proktavān arjunasya ca
svayam āgāc chamaṃ kartuṃ nagaraṃ nāgasāhvayam
śamārthaṃ yācamānasya pakṣayor ubhayor hitam
yogeśvaratvaṃ kṛṣṇena yatra rājasu darśitam
upāyapūrvaṃ śauṇḍīryāt pratyākhyātaś ca tena saḥ
nagarād dhāstinapurād balasaṃkhyānam eva ca
śvobhāvini mahāyuddhe dūtyena krūravādinā
rathātirathasaṃkhyānam ambopākhyānam eva ca
udyogaparva nirdiṣṭaṃ saṃdhivigrahasaṃśritam
ślokānāṃ ṣaṭ sahasrāṇi tāvanty eva śatāni ca
vyāsenodāramatinā parvaṇy asmiṃs tapodhanāḥ
jambūkhaṇḍavinirmāṇaṃ yatroktaṃ saṃjayena ha
yatra yaudhiṣṭhiraṃ sainyaṃ viṣādam agamat param
mohajaṃ nāśayām āsa hetubhir mokṣadarśanaiḥ
vinighnan niśitair bāṇai rathād bhīṣmam apātayat
adhyāyānāṃ śataṃ proktaṃ saptadaśa tathāpare
ślokāś ca caturāśītiḥ parvaṇy asmin prakīrtitāḥ
vyāsena vedaviduṣā saṃkhyātā bhīṣmaparvaṇi
yatra saṃśaptakāḥ pārtham apaninyū raṇājirāt
supratīkena nāgena saha śastaḥ kirīṭinā
jayadrathamukhā bālaṃ śūram aprāptayauvanam
akṣauhiṇīḥ sapta hatvā hato rājā jayadrathaḥ
saṃśaptakāvaśeṣaṃ ca kṛtaṃ niḥśeṣam āhave
saumadattir virāṭaś ca drupadaś ca mahārathaḥ
ghaṭotkacādayaś cānye nihatā droṇaparvaṇi
astraṃ prāduścakārograṃ nārāyaṇam amarṣitaḥ
atra te pṛthivīpālāḥ prāyaśo nidhanaṃ gatāḥ
droṇaparvaṇi ye śūrā nirdiṣṭāḥ puruṣarṣabhāḥ
aṣṭau ślokasahasrāṇi tathā nava śatāni ca
pārāśaryeṇa muninā saṃcintya droṇaparvaṇi
sārathye viniyogaś ca madrarājasya dhīmataḥ
ākhyātaṃ yatra paurāṇaṃ tripurasya nipātanam
haṃsakākīyam ākhyānam atraivākṣepasaṃhitam
dvairathe yatra pārthena hataḥ karṇo mahārathaḥ
ekonasaptatiḥ proktā adhyāyāḥ karṇaparvaṇi
catvāry eva sahasrāṇi nava ślokaśatāni ca
hatapravīre sainye tu netā madreśvaro 'bhavat
vināśaḥ kurumukhyānāṃ śalyaparvaṇi kīrtyate
gadāyuddhaṃ tu tumulam atraiva parikīrtitam
sarasvatyāś ca tīrthānāṃ puṇyatā parikīrtitā
ekonaṣaṣṭir adhyāyās tatra saṃkhyāviśāradaiḥ
trīṇi ślokasahasrāṇi dve śate viṃśatis tathā
muninā saṃpraṇītāni kauravāṇāṃ yaśobhṛtām
bhagnoruṃ yatra rājānaṃ duryodhanam amarṣaṇam
kṛtavarmā kṛpo drauṇiḥ sāyāhne rudhirokṣitāḥ
ahatvā sarvapāñcālān dhṛṣṭadyumnapurogamān
pāṇḍavāṃś ca sahāmātyān na vimokṣyāmi daṃśanam
pāñcālān saparīvārāñ jaghnur drauṇipurogamāḥ
sātyakiś ca maheṣvāsaḥ śeṣāś ca nidhanaṃ gatāḥ
kṛtānaśanasaṃkalpā yatra bhartṝn upāviśat
anvadhāvata saṃkruddho bhāradvājaṃ guroḥ sutam
apāṇḍavāyeti ruṣā drauṇir astram avāsṛjat
yatrāstram astreṇa ca tac chamayām āsa phālgunaḥ
toyakarmaṇi sarveṣāṃ rājñām udakadānike
sutasyaitad iha proktaṃ daśamaṃ parva sauptikam
ślokāgram atra kathitaṃ śatāny aṣṭau tathaiva ca
sauptikaiṣīkasaṃbandhe parvaṇy amitabuddhinā
vilāpo vīrapatnīnāṃ yatrātikaruṇaḥ smṛtaḥ
krodhāveśaḥ prasādaś ca gāndhārīdhṛtarāṣṭrayoḥ
putrān bhrātṝn pitṝṃś caiva dadṛśur nihatān raṇe
rājñāṃ tāni śarīrāṇi dāhayām āsa śāstrataḥ
saptaviṃśatir adhyāyāḥ parvaṇy asminn udāhṛtāḥ
saṃkhyayā bhāratākhyānaṃ kartrā hy atra mahātmanā
praṇītaṃ sajjanamanovaiklavyāśrupravartakam
yatra nirvedam āpanno dharmarājo yudhiṣṭhiraḥ
ghātayitvā pitṝn bhrātṝn putrān saṃbandhibāndhavān
rājabhir veditavyā ye samyaṅ nayabubhutsubhiḥ
yān buddhvā puruṣaḥ samyak sarvajñatvam avāpnuyāt
mokṣadharmāś ca kathitā vicitrā bahuvistarāḥ
parvaṇy atra parijñeyam adhyāyānāṃ śatatrayam
triṃśac caiva tathādhyāyā nava caiva tapodhanāḥ
pañca caiva śatāny āhuḥ pañcaviṃśatisaṃkhyayā
yatra prakṛtim āpannaḥ śrutvā dharmaviniścayam
bhīṣmād bhāgīrathīputrāt kururājo yudhiṣṭhiraḥ
vividhānāṃ ca dānānāṃ phalayogāḥ pṛthagvidhāḥ
ācāravidhiyogaś ca satyasya ca parā gatiḥ
bhīṣmasyātraiva saṃprāptiḥ svargasya parikīrtitā
adhyāyānāṃ śataṃ cātra ṣaṭcatvāriṃśad eva ca
ślokānāṃ tu sahasrāṇi ṣaṭ saptaiva śatāni ca
tat saṃvartamaruttīyaṃ yatrākhyānam anuttamam
dagdhasyāstrāgninā pūrvaṃ kṛṣṇāt saṃjīvanaṃ punaḥ
tatra tatra ca yuddhāni rājaputrair amarṣaṇaiḥ
saṃgrāme babhruvāhena saṃśayaṃ cātra darśitaḥ
aśvamedhe mahāyajñe nakulākhyānam eva ca
atrādhyāyaśataṃ triṃśat trayo 'dhyāyāś ca śabditāḥ
viṃśatiś ca tathā ślokāḥ saṃkhyātās tattvadarśinā
yatra rājyaṃ parityajya gāndhārīsahito nṛpaḥ
dhṛtarāṣṭrāśramapadaṃ viduraś ca jagāma ha
putrarājyaṃ parityajya guruśuśrūṣaṇe ratā
lokāntaragatān vīrān apaśyat punarāgatān
tyaktvā śokaṃ sadāraś ca siddhiṃ paramikāṃ gataḥ
saṃjayaś ca mahāmātro vidvān gāvalgaṇir vaśī
nāradāc caiva śuśrāva vṛṣṇīnāṃ kadanaṃ mahat
dvicatvāriṃśad adhyāyāḥ parvaitad abhisaṃkhyayā
ṣaḍ eva ca tathā ślokāḥ saṃkhyātās tattvadarśinā
yatra te puruṣavyāghrāḥ śastrasparśasahā yudhi
brahmadaṇḍaviniṣpiṣṭāḥ samīpe lavaṇāmbhasaḥ
erakārūpibhir vajrair nijaghnur itaretaram
nāticakramatuḥ kālaṃ prāptaṃ sarvaharaṃ samam
dṛṣṭvā viṣādam agamat parāṃ cārtiṃ nararṣabhaḥ
dadarśa yaduvīrāṇām āpāne vaiśasaṃ mahat
saṃskāraṃ lambhayām āsa vṛṣṇīnāṃ ca pradhānataḥ
dadarśāpadi kaṣṭāyāṃ gāṇḍīvasya parābhavam
nāśaṃ vṛṣṇikalatrāṇāṃ prabhāvānām anityatām
dharmarājaṃ samāsādya saṃnyāsaṃ samarocayet
adhyāyāṣṭau samākhyātāḥ ślokānāṃ ca śatatrayam
yatra rājyaṃ parityajya pāṇḍavāḥ puruṣarṣabhāḥ
draupadyā sahitā devyā siddhiṃ paramikāṃ gatāḥ
viṃśatiś ca tathā ślokāḥ saṃkhyātās tattvadarśinā
adhyāyāḥ pañca saṃkhyātāḥ parvaitad abhisaṃkhyayā
ślokānāṃ dve śate caiva prasaṃkhyāte tapodhanāḥ
khileṣu harivaṃśaś ca bhaviṣyac ca prakīrtitam
aṣṭādaśa samājagmur akṣauhiṇyo yuyutsayā
tan mahad dāruṇaṃ yuddham ahāny aṣṭādaśābhavat
na cākhyānam idaṃ vidyān naiva sa syād vicakṣaṇaḥ
puṃskokilarutaṃ śrutvā rūkṣā dhvāṅkṣasya vāg iva
pañcabhya iva bhūtebhyo lokasaṃvidhayas trayaḥ
antarikṣasya viṣaye prajā iva caturvidhāḥ
indriyāṇāṃ samastānāṃ citrā iva manaḥkriyāḥ
āhāram anapāśritya śarīrasyeva dhāraṇam
udayaprepsubhir bhṛtyair abhijāta iveśvaraḥ
yo bhārataṃ samadhigacchati vācyamānaṃ; kiṃ tasya puṣkarajalair abhiṣecanena
śrutvādau bhavati nṛṇāṃ sukhāvagāhaṃ; vistīrṇaṃ lavaṇajalaṃ yathā plavena