Rgveda
Based on the edition by Th. Aufrecht: Die Hymnen des Rig Veda, 2nd ed., Bonn 1877,
digitized by Barend A. Van Nooten and Gary B. Holland.


Revised and converted by Detlef Eichler.
(http://www.detlef108.de/Rigveda.htm)




THIS GRETIL TEXT FILE IS FOR REFERENCE PURPOSES ONLY!
COPYRIGHT AND TERMS OF USAGE AS FOR SOURCE FILE.

Text converted to Unicode (UTF-8).
(This file is to be used with a UTF-8 font and your browser's VIEW configuration
set to UTF-8.)

description:multibyte sequence:
long a ā
long A Ā
long i ī
long I Ī
long u ū
long U Ū
vocalic r
vocalic R
long vocalic r
vocalic l
vocalic L
long vocalic l
velar n
velar N
palatal n ñ
palatal N Ñ
retroflex t
retroflex T
retroflex d
retroflex D
retroflex n
retroflex N
palatal s ś
palatal S Ś
retroflex s
retroflex S
anusvara
visarga
long e ē
long o ō
l underbar
r underbar
n underbar
k underbar
t underbar

Unless indicated otherwise, accents have been dropped in order
to facilitate word search.

For a comprehensive list of GRETIL encodings and formats see:
http://gretil.sub.uni-goettingen.de/gretil/gretdiac.pdf
and
http://gretil.sub.uni-goettingen.de/gretil/gretdias.pdf

For further information see:
http://gretil.sub.uni-goettingen.de/gretil.htm









Ṛgveda 1


RV_1,001.01a agnim īḷe purohitaṃ yajñasya devam ṛtvijam |
RV_1,001.01c hotāraṃ ratnadhātamam ||
RV_1,001.02a agniḥ pūrvebhir ṛṣibhir īḍyo nūtanair uta |
RV_1,001.02c sa devāṃ eha vakṣati ||
RV_1,001.03a agninā rayim aśnavat poṣam eva dive-dive |
RV_1,001.03c yaśasaṃ vīravattamam ||
RV_1,001.04a agne yaṃ yajñam adhvaraṃ viśvataḥ paribhūr asi |
RV_1,001.04c sa id deveṣu gacchati ||
RV_1,001.05a agnir hotā kavikratuḥ satyaś citraśravastamaḥ |
RV_1,001.05c devo devebhir ā gamat ||
RV_1,001.06a yad aṅga dāśuṣe tvam agne bhadraṃ kariṣyasi |
RV_1,001.06c tavet tat satyam aṅgiraḥ ||
RV_1,001.07a upa tvāgne dive-dive doṣāvastar dhiyā vayam |
RV_1,001.07c namo bharanta emasi ||
RV_1,001.08a rājantam adhvarāṇāṃ gopām ṛtasya dīdivim |
RV_1,001.08c vardhamānaṃ sve dame ||
RV_1,001.09a sa naḥ piteva sūnave 'gne sūpāyano bhava |
RV_1,001.09c sacasvā naḥ svastaye ||

RV_1,002.01a vāyav ā yāhi darśateme somā araṅkṛtāḥ |
RV_1,002.01c teṣām pāhi śrudhī havam ||
RV_1,002.02a vāya ukthebhir jarante tvām acchā jaritāraḥ |
RV_1,002.02c sutasomā aharvidaḥ ||
RV_1,002.03a vāyo tava prapṛñcatī dhenā jigāti dāśuṣe |
RV_1,002.03c urūcī somapītaye ||
RV_1,002.04a indravāyū ime sutā upa prayobhir ā gatam |
RV_1,002.04c indavo vām uśanti hi ||
RV_1,002.05a vāyav indraś ca cetathaḥ sutānāṃ vājinīvasū |
RV_1,002.05c tāv ā yātam upa dravat ||
RV_1,002.06a vāyav indraś ca sunvata ā yātam upa niṣkṛtam |
RV_1,002.06c makṣv itthā dhiyā narā ||
RV_1,002.07a mitraṃ huve pūtadakṣaṃ varuṇaṃ ca riśādasam |
RV_1,002.07c dhiyaṃ ghṛtācīṃ sādhantā ||
RV_1,002.08a ṛtena mitrāvaruṇāv ṛtāvṛdhāv ṛtaspṛśā |
RV_1,002.08c kratum bṛhantam āśāthe ||
RV_1,002.09a kavī no mitrāvaruṇā tuvijātā urukṣayā |
RV_1,002.09c dakṣaṃ dadhāte apasam ||

RV_1,003.01a aśvinā yajvarīr iṣo dravatpāṇī śubhas patī |
RV_1,003.01c purubhujā canasyatam ||
RV_1,003.02a aśvinā purudaṃsasā narā śavīrayā dhiyā |
RV_1,003.02c dhiṣṇyā vanataṃ giraḥ ||
RV_1,003.03a dasrā yuvākavaḥ sutā nāsatyā vṛktabarhiṣaḥ |
RV_1,003.03c ā yātaṃ rudravartanī ||
RV_1,003.04a indrā yāhi citrabhāno sutā ime tvāyavaḥ |
RV_1,003.04c aṇvībhis tanā pūtāsaḥ ||
RV_1,003.05a indrā yāhi dhiyeṣito viprajūtaḥ sutāvataḥ |
RV_1,003.05c upa brahmāṇi vāghataḥ ||
RV_1,003.06a indrā yāhi tūtujāna upa brahmāṇi harivaḥ |
RV_1,003.06c sute dadhiṣva naś canaḥ ||
RV_1,003.07a omāsaś carṣaṇīdhṛto viśve devāsa ā gata |
RV_1,003.07c dāśvāṃso dāśuṣaḥ sutam ||
RV_1,003.08a viśve devāso apturaḥ sutam ā ganta tūrṇayaḥ |
RV_1,003.08c usrā iva svasarāṇi ||
RV_1,003.09a viśve devāso asridha ehimāyāso adruhaḥ |
RV_1,003.09c medhaṃ juṣanta vahnayaḥ ||
RV_1,003.10a pāvakā naḥ sarasvatī vājebhir vājinīvatī |
RV_1,003.10c yajñaṃ vaṣṭu dhiyāvasuḥ ||
RV_1,003.11a codayitrī sūnṛtānāṃ cetantī sumatīnām |
RV_1,003.11c yajñaṃ dadhe sarasvatī ||
RV_1,003.12a maho arṇaḥ sarasvatī pra cetayati ketunā |
RV_1,003.12c dhiyo viśvā vi rājati ||

RV_1,004.01a surūpakṛtnum ūtaye sudughām iva goduhe |
RV_1,004.01c juhūmasi dyavi-dyavi ||
RV_1,004.02a upa naḥ savanā gahi somasya somapāḥ piba |
RV_1,004.02c godā id revato madaḥ ||
RV_1,004.03a athā te antamānāṃ vidyāma sumatīnām |
RV_1,004.03c mā no ati khya ā gahi ||
RV_1,004.04a parehi vigram astṛtam indram pṛcchā vipaścitam |
RV_1,004.04c yas te sakhibhya ā varam ||
RV_1,004.05a uta bruvantu no nido nir anyataś cid ārata |
RV_1,004.05c dadhānā indra id duvaḥ ||
RV_1,004.06a uta naḥ subhagāṃ arir voceyur dasma kṛṣṭayaḥ |
RV_1,004.06c syāmed indrasya śarmaṇi ||
RV_1,004.07a em āśum āśave bhara yajñaśriyaṃ nṛmādanam |
RV_1,004.07c patayan mandayatsakham ||
RV_1,004.08a asya pītvā śatakrato ghano vṛtrāṇām abhavaḥ |
RV_1,004.08c prāvo vājeṣu vājinam ||
RV_1,004.09a taṃ tvā vājeṣu vājinaṃ vājayāmaḥ śatakrato |
RV_1,004.09c dhanānām indra sātaye ||
RV_1,004.10a yo rāyo 'vanir mahān supāraḥ sunvataḥ sakhā |
RV_1,004.10c tasmā indrāya gāyata ||

RV_1,005.01a ā tv etā ni ṣīdatendram abhi pra gāyata |
RV_1,005.01c sakhāya stomavāhasaḥ ||
RV_1,005.02a purūtamam purūṇām īśānaṃ vāryāṇām |
RV_1,005.02c indraṃ some sacā sute ||
RV_1,005.03a sa ghā no yoga ā bhuvat sa rāye sa purandhyām |
RV_1,005.03c gamad vājebhir ā sa naḥ ||
RV_1,005.04a yasya saṃsthe na vṛṇvate harī samatsu śatravaḥ |
RV_1,005.04c tasmā indrāya gāyata ||
RV_1,005.05a sutapāvne sutā ime śucayo yanti vītaye |
RV_1,005.05c somāso dadhyāśiraḥ ||
RV_1,005.06a tvaṃ sutasya pītaye sadyo vṛddho ajāyathāḥ |
RV_1,005.06c indra jyaiṣṭhyāya sukrato ||
RV_1,005.07a ā tvā viśantv āśavaḥ somāsa indra girvaṇaḥ |
RV_1,005.07c śaṃ te santu pracetase ||
RV_1,005.08a tvāṃ stomā avīvṛdhan tvām ukthā śatakrato |
RV_1,005.08c tvāṃ vardhantu no giraḥ ||
RV_1,005.09a akṣitotiḥ saned imaṃ vājam indraḥ sahasriṇam |
RV_1,005.09c yasmin viśvāni pauṃsyā ||
RV_1,005.10a mā no martā abhi druhan tanūnām indra girvaṇaḥ |
RV_1,005.10c īśāno yavayā vadham ||

RV_1,006.01a yuñjanti bradhnam aruṣaṃ carantam pari tasthuṣaḥ |
RV_1,006.01c rocante rocanā divi ||
RV_1,006.02a yuñjanty asya kāmyā harī vipakṣasā rathe |
RV_1,006.02c śoṇā dhṛṣṇū nṛvāhasā ||
RV_1,006.03a ketuṃ kṛṇvann aketave peśo maryā apeśase |
RV_1,006.03c sam uṣadbhir ajāyathāḥ ||
RV_1,006.04a ād aha svadhām anu punar garbhatvam erire |
RV_1,006.04c dadhānā nāma yajñiyam ||
RV_1,006.05a vīḷu cid ārujatnubhir guhā cid indra vahnibhiḥ |
RV_1,006.05c avinda usriyā anu ||
RV_1,006.06a devayanto yathā matim acchā vidadvasuṃ giraḥ |
RV_1,006.06c mahām anūṣata śrutam ||
RV_1,006.07a indreṇa saṃ hi dṛkṣase saṃjagmāno abibhyuṣā |
RV_1,006.07c mandū samānavarcasā ||
RV_1,006.08a anavadyair abhidyubhir makhaḥ sahasvad arcati |
RV_1,006.08c gaṇair indrasya kāmyaiḥ ||
RV_1,006.09a ataḥ parijmann ā gahi divo vā rocanād adhi |
RV_1,006.09c sam asminn ṛñjate giraḥ ||
RV_1,006.10a ito vā sātim īmahe divo vā pārthivād adhi |
RV_1,006.10c indram maho vā rajasaḥ ||

RV_1,007.01a indram id gāthino bṛhad indram arkebhir arkiṇaḥ |
RV_1,007.01c indraṃ vāṇīr anūṣata ||
RV_1,007.02a indra id dharyoḥ sacā sammiśla ā vacoyujā |
RV_1,007.02c indro vajrī hiraṇyayaḥ ||
RV_1,007.03a indro dīrghāya cakṣasa ā sūryaṃ rohayad divi |
RV_1,007.03c vi gobhir adrim airayat ||
RV_1,007.04a indra vājeṣu no 'va sahasrapradhaneṣu ca |
RV_1,007.04c ugra ugrābhir ūtibhiḥ ||
RV_1,007.05a indraṃ vayam mahādhana indram arbhe havāmahe |
RV_1,007.05c yujaṃ vṛtreṣu vajriṇam ||
RV_1,007.06a sa no vṛṣann amuṃ caruṃ satrādāvann apā vṛdhi |
RV_1,007.06c asmabhyam apratiṣkutaḥ ||
RV_1,007.07a tuñje-tuñje ya uttare stomā indrasya vajriṇaḥ |
RV_1,007.07c na vindhe asya suṣṭutim ||
RV_1,007.08a vṛṣā yūtheva vaṃsagaḥ kṛṣṭīr iyarty ojasā |
RV_1,007.08c īśāno apratiṣkutaḥ ||
RV_1,007.09a ya ekaś carṣaṇīnāṃ vasūnām irajyati |
RV_1,007.09c indraḥ pañca kṣitīnām ||
RV_1,007.10a indraṃ vo viśvatas pari havāmahe janebhyaḥ |
RV_1,007.10c asmākam astu kevalaḥ ||

RV_1,008.01a endra sānasiṃ rayiṃ sajitvānaṃ sadāsaham |
RV_1,008.01c varṣiṣṭham ūtaye bhara ||
RV_1,008.02a ni yena muṣṭihatyayā ni vṛtrā ruṇadhāmahai |
RV_1,008.02c tvotāso ny arvatā ||
RV_1,008.03a indra tvotāsa ā vayaṃ vajraṃ ghanā dadīmahi |
RV_1,008.03c jayema saṃ yudhi spṛdhaḥ ||
RV_1,008.04a vayaṃ śūrebhir astṛbhir indra tvayā yujā vayam |
RV_1,008.04c sāsahyāma pṛtanyataḥ ||
RV_1,008.05a mahāṃ indraḥ paraś ca nu mahitvam astu vajriṇe |
RV_1,008.05c dyaur na prathinā śavaḥ ||
RV_1,008.06a samohe vā ya āśata naras tokasya sanitau |
RV_1,008.06c viprāso vā dhiyāyavaḥ ||
RV_1,008.07a yaḥ kukṣiḥ somapātamaḥ samudra iva pinvate |
RV_1,008.07c urvīr āpo na kākudaḥ ||
RV_1,008.08a evā hy asya sūnṛtā virapśī gomatī mahī |
RV_1,008.08c pakvā śākhā na dāśuṣe ||
RV_1,008.09a evā hi te vibhūtaya ūtaya indra māvate |
RV_1,008.09c sadyaś cit santi dāśuṣe ||
RV_1,008.10a evā hy asya kāmyā stoma ukthaṃ ca śaṃsyā |
RV_1,008.10c indrāya somapītaye ||

RV_1,009.01a indrehi matsy andhaso viśvebhiḥ somaparvabhiḥ |
RV_1,009.01c mahāṃ abhiṣṭir ojasā ||
RV_1,009.02a em enaṃ sṛjatā sute mandim indrāya mandine |
RV_1,009.02c cakriṃ viśvāni cakraye ||
RV_1,009.03a matsvā suśipra mandibhi stomebhir viśvacarṣaṇe |
RV_1,009.03c sacaiṣu savaneṣv ā ||
RV_1,009.04a asṛgram indra te giraḥ prati tvām ud ahāsata |
RV_1,009.04c ajoṣā vṛṣabham patim ||
RV_1,009.05a saṃ codaya citram arvāg rādha indra vareṇyam |
RV_1,009.05c asad it te vibhu prabhu ||
RV_1,009.06a asmān su tatra codayendra rāye rabhasvataḥ |
RV_1,009.06c tuvidyumna yaśasvataḥ ||
RV_1,009.07a saṃ gomad indra vājavad asme pṛthu śravo bṛhat |
RV_1,009.07c viśvāyur dhehy akṣitam ||
RV_1,009.08a asme dhehi śravo bṛhad dyumnaṃ sahasrasātamam |
RV_1,009.08c indra tā rathinīr iṣaḥ ||
RV_1,009.09a vasor indraṃ vasupatiṃ gīrbhir gṛṇanta ṛgmiyam |
RV_1,009.09c homa gantāram ūtaye ||
RV_1,009.10a sute-sute nyokase bṛhad bṛhata ed ariḥ |
RV_1,009.10c indrāya śūṣam arcati ||

RV_1,010.01a gāyanti tvā gāyatriṇo 'rcanty arkam arkiṇaḥ |
RV_1,010.01c brahmāṇas tvā śatakrata ud vaṃśam iva yemire ||
RV_1,010.02a yat sānoḥ sānum āruhad bhūry aspaṣṭa kartvam |
RV_1,010.02c tad indro arthaṃ cetati yūthena vṛṣṇir ejati ||
RV_1,010.03a yukṣvā hi keśinā harī vṛṣaṇā kakṣyaprā |
RV_1,010.03c athā na indra somapā girām upaśrutiṃ cara ||
RV_1,010.04a ehi stomāṃ abhi svarābhi gṛṇīhy ā ruva |
RV_1,010.04c brahma ca no vaso sacendra yajñaṃ ca vardhaya ||
RV_1,010.05a uktham indrāya śaṃsyaṃ vardhanam puruniṣṣidhe |
RV_1,010.05c śakro yathā suteṣu ṇo rāraṇat sakhyeṣu ca ||
RV_1,010.06a tam it sakhitva īmahe taṃ rāye taṃ suvīrye |
RV_1,010.06c sa śakra uta naḥ śakad indro vasu dayamānaḥ ||
RV_1,010.07a suvivṛtaṃ sunirajam indra tvādātam id yaśaḥ |
RV_1,010.07c gavām apa vrajaṃ vṛdhi kṛṇuṣva rādho adrivaḥ ||
RV_1,010.08a nahi tvā rodasī ubhe ṛghāyamāṇam invataḥ |
RV_1,010.08c jeṣaḥ svarvatīr apaḥ saṃ gā asmabhyaṃ dhūnuhi ||
RV_1,010.09a āśrutkarṇa śrudhī havaṃ nū cid dadhiṣva me giraḥ |
RV_1,010.09c indra stomam imam mama kṛṣvā yujaś cid antaram ||
RV_1,010.10a vidmā hi tvā vṛṣantamaṃ vājeṣu havanaśrutam |
RV_1,010.10c vṛṣantamasya hūmaha ūtiṃ sahasrasātamām ||
RV_1,010.11a ā tū na indra kauśika mandasānaḥ sutam piba |
RV_1,010.11c navyam āyuḥ pra sū tira kṛdhī sahasrasām ṛṣim ||
RV_1,010.12a pari tvā girvaṇo gira imā bhavantu viśvataḥ |
RV_1,010.12c vṛddhāyum anu vṛddhayo juṣṭā bhavantu juṣṭayaḥ ||

RV_1,011.01a indraṃ viśvā avīvṛdhan samudravyacasaṃ giraḥ |
RV_1,011.01c rathītamaṃ rathīnāṃ vājānāṃ satpatim patim ||
RV_1,011.02a sakhye ta indra vājino mā bhema śavasas pate |
RV_1,011.02c tvām abhi pra ṇonumo jetāram aparājitam ||
RV_1,011.03a pūrvīr indrasya rātayo na vi dasyanty ūtayaḥ |
RV_1,011.03c yadī vājasya gomata stotṛbhyo maṃhate magham ||
RV_1,011.04a purām bhindur yuvā kavir amitaujā ajāyata |
RV_1,011.04c indro viśvasya karmaṇo dhartā vajrī puruṣṭutaḥ ||
RV_1,011.05a tvaṃ valasya gomato 'pāvar adrivo bilam |
RV_1,011.05c tvāṃ devā abibhyuṣas tujyamānāsa āviṣuḥ ||
RV_1,011.06a tavāhaṃ śūra rātibhiḥ praty āyaṃ sindhum āvadan |
RV_1,011.06c upātiṣṭhanta girvaṇo viduṣ ṭe tasya kāravaḥ ||
RV_1,011.07a māyābhir indra māyinaṃ tvaṃ śuṣṇam avātiraḥ |
RV_1,011.07c viduṣ ṭe tasya medhirās teṣāṃ śravāṃsy ut tira ||
RV_1,011.08a indram īśānam ojasābhi stomā anūṣata |
RV_1,011.08c sahasraṃ yasya rātaya uta vā santi bhūyasīḥ ||

RV_1,012.01a agniṃ dūtaṃ vṛṇīmahe hotāraṃ viśvavedasam |
RV_1,012.01c asya yajñasya sukratum ||
RV_1,012.02a agnim-agniṃ havīmabhiḥ sadā havanta viśpatim |
RV_1,012.02c havyavāham purupriyam ||
RV_1,012.03a agne devāṃ ihā vaha jajñāno vṛktabarhiṣe |
RV_1,012.03c asi hotā na īḍyaḥ ||
RV_1,012.04a tāṃ uśato vi bodhaya yad agne yāsi dūtyam |
RV_1,012.04c devair ā satsi barhiṣi ||
RV_1,012.05a ghṛtāhavana dīdivaḥ prati ṣma riṣato daha |
RV_1,012.05c agne tvaṃ rakṣasvinaḥ ||
RV_1,012.06a agnināgniḥ sam idhyate kavir gṛhapatir yuvā |
RV_1,012.06c havyavāḍ juhvāsyaḥ ||
RV_1,012.07a kavim agnim upa stuhi satyadharmāṇam adhvare |
RV_1,012.07c devam amīvacātanam ||
RV_1,012.08a yas tvām agne haviṣpatir dūtaṃ deva saparyati |
RV_1,012.08c tasya sma prāvitā bhava ||
RV_1,012.09a yo agniṃ devavītaye haviṣmāṃ āvivāsati |
RV_1,012.09c tasmai pāvaka mṛḷaya ||
RV_1,012.10a sa naḥ pāvaka dīdivo 'gne devāṃ ihā vaha |
RV_1,012.10c upa yajñaṃ haviś ca naḥ ||
RV_1,012.11a sa na stavāna ā bhara gāyatreṇa navīyasā |
RV_1,012.11c rayiṃ vīravatīm iṣam ||
RV_1,012.12a agne śukreṇa śociṣā viśvābhir devahūtibhiḥ |
RV_1,012.12c imaṃ stomaṃ juṣasva naḥ ||

RV_1,013.01a susamiddho na ā vaha devāṃ agne haviṣmate |
RV_1,013.01c hotaḥ pāvaka yakṣi ca ||
RV_1,013.02a madhumantaṃ tanūnapād yajñaṃ deveṣu naḥ kave |
RV_1,013.02c adyā kṛṇuhi vītaye ||
RV_1,013.03a narāśaṃsam iha priyam asmin yajña upa hvaye |
RV_1,013.03c madhujihvaṃ haviṣkṛtam ||
RV_1,013.04a agne sukhatame rathe devāṃ īḷita ā vaha |
RV_1,013.04c asi hotā manurhitaḥ ||
RV_1,013.05a stṛṇīta barhir ānuṣag ghṛtapṛṣṭham manīṣiṇaḥ |
RV_1,013.05c yatrāmṛtasya cakṣaṇam ||
RV_1,013.06a vi śrayantām ṛtāvṛdho dvāro devīr asaścataḥ |
RV_1,013.06c adyā nūnaṃ ca yaṣṭave ||
RV_1,013.07a naktoṣāsā supeśasāsmin yajña upa hvaye |
RV_1,013.07c idaṃ no barhir āsade ||
RV_1,013.08a tā sujihvā upa hvaye hotārā daivyā kavī |
RV_1,013.08c yajñaṃ no yakṣatām imam ||
RV_1,013.09a iḷā sarasvatī mahī tisro devīr mayobhuvaḥ |
RV_1,013.09c barhiḥ sīdantv asridhaḥ ||
RV_1,013.10a iha tvaṣṭāram agriyaṃ viśvarūpam upa hvaye |
RV_1,013.10c asmākam astu kevalaḥ ||
RV_1,013.11a ava sṛjā vanaspate deva devebhyo haviḥ |
RV_1,013.11c pra dātur astu cetanam ||
RV_1,013.12a svāhā yajñaṃ kṛṇotanendrāya yajvano gṛhe |
RV_1,013.12c tatra devāṃ upa hvaye ||

RV_1,014.01a aibhir agne duvo giro viśvebhiḥ somapītaye |
RV_1,014.01c devebhir yāhi yakṣi ca ||
RV_1,014.02a ā tvā kaṇvā ahūṣata gṛṇanti vipra te dhiyaḥ |
RV_1,014.02c devebhir agna ā gahi ||
RV_1,014.03a indravāyū bṛhaspatim mitrāgnim pūṣaṇam bhagam |
RV_1,014.03c ādityān mārutaṃ gaṇam ||
RV_1,014.04a pra vo bhriyanta indavo matsarā mādayiṣṇavaḥ |
RV_1,014.04c drapsā madhvaś camūṣadaḥ ||
RV_1,014.05a īḷate tvām avasyavaḥ kaṇvāso vṛktabarhiṣaḥ |
RV_1,014.05c haviṣmanto araṅkṛtaḥ ||
RV_1,014.06a ghṛtapṛṣṭhā manoyujo ye tvā vahanti vahnayaḥ |
RV_1,014.06c ā devān somapītaye ||
RV_1,014.07a tān yajatrāṃ ṛtāvṛdho 'gne patnīvatas kṛdhi |
RV_1,014.07c madhvaḥ sujihva pāyaya ||
RV_1,014.08a ye yajatrā ya īḍyās te te pibantu jihvayā |
RV_1,014.08c madhor agne vaṣaṭkṛti ||
RV_1,014.09a ākīṃ sūryasya rocanād viśvān devāṃ uṣarbudhaḥ |
RV_1,014.09c vipro hoteha vakṣati ||
RV_1,014.10a viśvebhiḥ somyam madhv agna indreṇa vāyunā |
RV_1,014.10c pibā mitrasya dhāmabhiḥ ||
RV_1,014.11a tvaṃ hotā manurhito 'gne yajñeṣu sīdasi |
RV_1,014.11c semaṃ no adhvaraṃ yaja ||
RV_1,014.12a yukṣvā hy aruṣī rathe harito deva rohitaḥ |
RV_1,014.12c tābhir devāṃ ihā vaha ||

RV_1,015.01a indra somam piba ṛtunā tvā viśantv indavaḥ |
RV_1,015.01c matsarāsas tadokasaḥ ||
RV_1,015.02a marutaḥ pibata ṛtunā potrād yajñam punītana |
RV_1,015.02c yūyaṃ hi ṣṭhā sudānavaḥ ||
RV_1,015.03a abhi yajñaṃ gṛṇīhi no gnāvo neṣṭaḥ piba ṛtunā |
RV_1,015.03c tvaṃ hi ratnadhā asi ||
RV_1,015.04a agne devāṃ ihā vaha sādayā yoniṣu triṣu |
RV_1,015.04c pari bhūṣa piba ṛtunā ||
RV_1,015.05a brāhmaṇād indra rādhasaḥ pibā somam ṛtūṃr anu |
RV_1,015.05c taved dhi sakhyam astṛtam ||
RV_1,015.06a yuvaṃ dakṣaṃ dhṛtavrata mitrāvaruṇa dūḷabham |
RV_1,015.06c ṛtunā yajñam āśāthe ||
RV_1,015.07a draviṇodā draviṇaso grāvahastāso adhvare |
RV_1,015.07c yajñeṣu devam īḷate ||
RV_1,015.08a draviṇodā dadātu no vasūni yāni śṛṇvire |
RV_1,015.08c deveṣu tā vanāmahe ||
RV_1,015.09a draviṇodāḥ pipīṣati juhota pra ca tiṣṭhata |
RV_1,015.09c neṣṭrād ṛtubhir iṣyata ||
RV_1,015.10a yat tvā turīyam ṛtubhir draviṇodo yajāmahe |
RV_1,015.10c adha smā no dadir bhava ||
RV_1,015.11a aśvinā pibatam madhu dīdyagnī śucivratā |
RV_1,015.11c ṛtunā yajñavāhasā ||
RV_1,015.12a gārhapatyena santya ṛtunā yajñanīr asi |
RV_1,015.12c devān devayate yaja ||

RV_1,016.01a ā tvā vahantu harayo vṛṣaṇaṃ somapītaye |
RV_1,016.01c indra tvā sūracakṣasaḥ ||
RV_1,016.02a imā dhānā ghṛtasnuvo harī ihopa vakṣataḥ |
RV_1,016.02c indraṃ sukhatame rathe ||
RV_1,016.03a indram prātar havāmaha indram prayaty adhvare |
RV_1,016.03c indraṃ somasya pītaye ||
RV_1,016.04a upa naḥ sutam ā gahi haribhir indra keśibhiḥ |
RV_1,016.04c sute hi tvā havāmahe ||
RV_1,016.05a semaṃ na stomam ā gahy upedaṃ savanaṃ sutam |
RV_1,016.05c gauro na tṛṣitaḥ piba ||
RV_1,016.06a ime somāsa indavaḥ sutāso adhi barhiṣi |
RV_1,016.06c tāṃ indra sahase piba ||
RV_1,016.07a ayaṃ te stomo agriyo hṛdispṛg astu śantamaḥ |
RV_1,016.07c athā somaṃ sutam piba ||
RV_1,016.08a viśvam it savanaṃ sutam indro madāya gacchati |
RV_1,016.08c vṛtrahā somapītaye ||
RV_1,016.09a semaṃ naḥ kāmam ā pṛṇa gobhir aśvaiḥ śatakrato |
RV_1,016.09c stavāma tvā svādhyaḥ ||

RV_1,017.01a indrāvaruṇayor ahaṃ samrājor ava ā vṛṇe |
RV_1,017.01c tā no mṛḷāta īdṛśe ||
RV_1,017.02a gantārā hi stho 'vase havaṃ viprasya māvataḥ |
RV_1,017.02c dhartārā carṣaṇīnām ||
RV_1,017.03a anukāmaṃ tarpayethām indrāvaruṇa rāya ā |
RV_1,017.03c tā vāṃ nediṣṭham īmahe ||
RV_1,017.04a yuvāku hi śacīnāṃ yuvāku sumatīnām |
RV_1,017.04c bhūyāma vājadāvnām ||
RV_1,017.05a indraḥ sahasradāvnāṃ varuṇaḥ śaṃsyānām |
RV_1,017.05c kratur bhavaty ukthyaḥ ||
RV_1,017.06a tayor id avasā vayaṃ sanema ni ca dhīmahi |
RV_1,017.06c syād uta prarecanam ||
RV_1,017.07a indrāvaruṇa vām ahaṃ huve citrāya rādhase |
RV_1,017.07c asmān su jigyuṣas kṛtam ||
RV_1,017.08a indrāvaruṇa nū nu vāṃ siṣāsantīṣu dhīṣv ā |
RV_1,017.08c asmabhyaṃ śarma yacchatam ||
RV_1,017.09a pra vām aśnotu suṣṭutir indrāvaruṇa yāṃ huve |
RV_1,017.09c yām ṛdhāthe sadhastutim ||

RV_1,018.01a somānaṃ svaraṇaṃ kṛṇuhi brahmaṇas pate |
RV_1,018.01c kakṣīvantaṃ ya auśijaḥ ||
RV_1,018.02a yo revān yo amīvahā vasuvit puṣṭivardhanaḥ |
RV_1,018.02c sa naḥ siṣaktu yas turaḥ ||
RV_1,018.03a mā naḥ śaṃso araruṣo dhūrtiḥ praṇaṅ martyasya |
RV_1,018.03c rakṣā ṇo brahmaṇas pate ||
RV_1,018.04a sa ghā vīro na riṣyati yam indro brahmaṇas patiḥ |
RV_1,018.04c somo hinoti martyam ||
RV_1,018.05a tvaṃ tam brahmaṇas pate soma indraś ca martyam |
RV_1,018.05c dakṣiṇā pātv aṃhasaḥ ||
RV_1,018.06a sadasas patim adbhutam priyam indrasya kāmyam |
RV_1,018.06c sanim medhām ayāsiṣam ||
RV_1,018.07a yasmād ṛte na sidhyati yajño vipaścitaś cana |
RV_1,018.07c sa dhīnāṃ yogam invati ||
RV_1,018.08a ād ṛdhnoti haviṣkṛtim prāñcaṃ kṛṇoty adhvaram |
RV_1,018.08c hotrā deveṣu gacchati ||
RV_1,018.09a narāśaṃsaṃ sudhṛṣṭamam apaśyaṃ saprathastamam |
RV_1,018.09c divo na sadmamakhasam ||

RV_1,019.01a prati tyaṃ cārum adhvaraṃ gopīthāya pra hūyase |
RV_1,019.01c marudbhir agna ā gahi ||
RV_1,019.02a nahi devo na martyo mahas tava kratum paraḥ |
RV_1,019.02c marudbhir agna ā gahi ||
RV_1,019.03a ye maho rajaso vidur viśve devāso adruhaḥ |
RV_1,019.03c marudbhir agna ā gahi ||
RV_1,019.04a ya ugrā arkam ānṛcur anādhṛṣṭāsa ojasā |
RV_1,019.04c marudbhir agna ā gahi ||
RV_1,019.05a ye śubhrā ghoravarpasaḥ sukṣatrāso riśādasaḥ |
RV_1,019.05c marudbhir agna ā gahi ||
RV_1,019.06a ye nākasyādhi rocane divi devāsa āsate |
RV_1,019.06c marudbhir agna ā gahi ||
RV_1,019.07a ya īṅkhayanti parvatān tiraḥ samudram arṇavam |
RV_1,019.07c marudbhir agna ā gahi ||
RV_1,019.08a ā ye tanvanti raśmibhis tiraḥ samudram ojasā |
RV_1,019.08c marudbhir agna ā gahi ||
RV_1,019.09a abhi tvā pūrvapītaye sṛjāmi somyam madhu |
RV_1,019.09c marudbhir agna ā gahi ||

RV_1,020.01a ayaṃ devāya janmane stomo viprebhir āsayā |
RV_1,020.01c akāri ratnadhātamaḥ ||
RV_1,020.02a ya indrāya vacoyujā tatakṣur manasā harī |
RV_1,020.02c śamībhir yajñam āśata ||
RV_1,020.03a takṣan nāsatyābhyām parijmānaṃ sukhaṃ ratham |
RV_1,020.03c takṣan dhenuṃ sabardughām ||
RV_1,020.04a yuvānā pitarā punaḥ satyamantrā ṛjūyavaḥ |
RV_1,020.04c ṛbhavo viṣṭy akrata ||
RV_1,020.05a saṃ vo madāso agmatendreṇa ca marutvatā |
RV_1,020.05c ādityebhiś ca rājabhiḥ ||
RV_1,020.06a uta tyaṃ camasaṃ navaṃ tvaṣṭur devasya niṣkṛtam |
RV_1,020.06c akarta caturaḥ punaḥ ||
RV_1,020.07a te no ratnāni dhattana trir ā sāptāni sunvate |
RV_1,020.07c ekam-ekaṃ suśastibhiḥ ||
RV_1,020.08a adhārayanta vahnayo 'bhajanta sukṛtyayā |
RV_1,020.08c bhāgaṃ deveṣu yajñiyam ||

RV_1,021.01a ihendrāgnī upa hvaye tayor it stomam uśmasi |
RV_1,021.01c tā somaṃ somapātamā ||
RV_1,021.02a tā yajñeṣu pra śaṃsatendrāgnī śumbhatā naraḥ |
RV_1,021.02c tā gāyatreṣu gāyata ||
RV_1,021.03a tā mitrasya praśastaya indrāgnī tā havāmahe |
RV_1,021.03c somapā somapītaye ||
RV_1,021.04a ugrā santā havāmaha upedaṃ savanaṃ sutam |
RV_1,021.04c indrāgnī eha gacchatām ||
RV_1,021.05a tā mahāntā sadaspatī indrāgnī rakṣa ubjatam |
RV_1,021.05c aprajāḥ santv atriṇaḥ ||
RV_1,021.06a tena satyena jāgṛtam adhi pracetune pade |
RV_1,021.06c indrāgnī śarma yacchatam ||

RV_1,022.01a prātaryujā vi bodhayāśvināv eha gacchatām |
RV_1,022.01c asya somasya pītaye ||
RV_1,022.02a yā surathā rathītamobhā devā divispṛśā |
RV_1,022.02c aśvinā tā havāmahe ||
RV_1,022.03a yā vāṃ kaśā madhumaty aśvinā sūnṛtāvatī |
RV_1,022.03c tayā yajñam mimikṣatam ||
RV_1,022.04a nahi vām asti dūrake yatrā rathena gacchathaḥ |
RV_1,022.04c aśvinā somino gṛham ||
RV_1,022.05a hiraṇyapāṇim ūtaye savitāram upa hvaye |
RV_1,022.05c sa cettā devatā padam ||
RV_1,022.06a apāṃ napātam avase savitāram upa stuhi |
RV_1,022.06c tasya vratāny uśmasi ||
RV_1,022.07a vibhaktāraṃ havāmahe vasoś citrasya rādhasaḥ |
RV_1,022.07c savitāraṃ nṛcakṣasam ||
RV_1,022.08a sakhāya ā ni ṣīdata savitā stomyo nu naḥ |
RV_1,022.08c dātā rādhāṃsi śumbhati ||
RV_1,022.09a agne patnīr ihā vaha devānām uśatīr upa |
RV_1,022.09c tvaṣṭāraṃ somapītaye ||
RV_1,022.10a ā gnā agna ihāvase hotrāṃ yaviṣṭha bhāratīm |
RV_1,022.10c varūtrīṃ dhiṣaṇāṃ vaha ||
RV_1,022.11a abhi no devīr avasā mahaḥ śarmaṇā nṛpatnīḥ |
RV_1,022.11c acchinnapatrāḥ sacantām ||
RV_1,022.12a ihendrāṇīm upa hvaye varuṇānīṃ svastaye |
RV_1,022.12c agnāyīṃ somapītaye ||
RV_1,022.13a mahī dyauḥ pṛthivī ca na imaṃ yajñam mimikṣatām |
RV_1,022.13c pipṛtāṃ no bharīmabhiḥ ||
RV_1,022.14a tayor id ghṛtavat payo viprā rihanti dhītibhiḥ |
RV_1,022.14c gandharvasya dhruve pade ||
RV_1,022.15a syonā pṛthivi bhavānṛkṣarā niveśanī |
RV_1,022.15c yacchā naḥ śarma saprathaḥ ||
RV_1,022.16a ato devā avantu no yato viṣṇur vicakrame |
RV_1,022.16c pṛthivyāḥ sapta dhāmabhiḥ ||
RV_1,022.17a idaṃ viṣṇur vi cakrame tredhā ni dadhe padam |
RV_1,022.17c samūḷham asya pāṃsure ||
RV_1,022.18a trīṇi padā vi cakrame viṣṇur gopā adābhyaḥ |
RV_1,022.18c ato dharmāṇi dhārayan ||
RV_1,022.19a viṣṇoḥ karmāṇi paśyata yato vratāni paspaśe |
RV_1,022.19c indrasya yujyaḥ sakhā ||
RV_1,022.20a tad viṣṇoḥ paramam padaṃ sadā paśyanti sūrayaḥ |
RV_1,022.20c divīva cakṣur ātatam ||
RV_1,022.21a tad viprāso vipanyavo jāgṛvāṃsaḥ sam indhate |
RV_1,022.21c viṣṇor yat paramam padam ||

RV_1,023.01a tīvrāḥ somāsa ā gahy āśīrvantaḥ sutā ime |
RV_1,023.01c vāyo tān prasthitān piba ||
RV_1,023.02a ubhā devā divispṛśendravāyū havāmahe |
RV_1,023.02c asya somasya pītaye ||
RV_1,023.03a indravāyū manojuvā viprā havanta ūtaye |
RV_1,023.03c sahasrākṣā dhiyas patī ||
RV_1,023.04a mitraṃ vayaṃ havāmahe varuṇaṃ somapītaye |
RV_1,023.04c jajñānā pūtadakṣasā ||
RV_1,023.05a ṛtena yāv ṛtāvṛdhāv ṛtasya jyotiṣas patī |
RV_1,023.05c tā mitrāvaruṇā huve ||
RV_1,023.06a varuṇaḥ prāvitā bhuvan mitro viśvābhir ūtibhiḥ |
RV_1,023.06c karatāṃ naḥ surādhasaḥ ||
RV_1,023.07a marutvantaṃ havāmaha indram ā somapītaye |
RV_1,023.07c sajūr gaṇena tṛmpatu ||
RV_1,023.08a indrajyeṣṭhā marudgaṇā devāsaḥ pūṣarātayaḥ |
RV_1,023.08c viśve mama śrutā havam ||
RV_1,023.09a hata vṛtraṃ sudānava indreṇa sahasā yujā |
RV_1,023.09c mā no duḥśaṃsa īśata ||
RV_1,023.10a viśvān devān havāmahe marutaḥ somapītaye |
RV_1,023.10c ugrā hi pṛśnimātaraḥ ||
RV_1,023.11a jayatām iva tanyatur marutām eti dhṛṣṇuyā |
RV_1,023.11c yac chubhaṃ yāthanā naraḥ ||
RV_1,023.12a haskārād vidyutas pary ato jātā avantu naḥ |
RV_1,023.12c maruto mṛḷayantu naḥ ||
RV_1,023.13a ā pūṣañ citrabarhiṣam āghṛṇe dharuṇaṃ divaḥ |
RV_1,023.13c ājā naṣṭaṃ yathā paśum ||
RV_1,023.14a pūṣā rājānam āghṛṇir apagūḷhaṃ guhā hitam |
RV_1,023.14c avindac citrabarhiṣam ||
RV_1,023.15a uto sa mahyam indubhiḥ ṣaḍ yuktāṃ anuseṣidhat |
RV_1,023.15c gobhir yavaṃ na carkṛṣat ||
RV_1,023.16a ambayo yanty adhvabhir jāmayo adhvarīyatām |
RV_1,023.16c pṛñcatīr madhunā payaḥ ||
RV_1,023.17a amūr yā upa sūrye yābhir vā sūryaḥ saha |
RV_1,023.17c tā no hinvantv adhvaram ||
RV_1,023.18a apo devīr upa hvaye yatra gāvaḥ pibanti naḥ |
RV_1,023.18c sindhubhyaḥ kartvaṃ haviḥ ||
RV_1,023.19a apsv antar amṛtam apsu bheṣajam apām uta praśastaye |
RV_1,023.19c devā bhavata vājinaḥ ||
RV_1,023.20a apsu me somo abravīd antar viśvāni bheṣajā |
RV_1,023.20c agniṃ ca viśvaśambhuvam āpaś ca viśvabheṣajīḥ ||
RV_1,023.21a āpaḥ pṛṇīta bheṣajaṃ varūthaṃ tanve mama |
RV_1,023.21c jyok ca sūryaṃ dṛśe ||
RV_1,023.22a idam āpaḥ pra vahata yat kiṃ ca duritam mayi |
RV_1,023.22c yad vāham abhidudroha yad vā śepa utānṛtam ||
RV_1,023.23a āpo adyānv acāriṣaṃ rasena sam agasmahi |
RV_1,023.23c payasvān agna ā gahi tam mā saṃ sṛja varcasā ||
RV_1,023.24a sam māgne varcasā sṛja sam prajayā sam āyuṣā |
RV_1,023.24c vidyur me asya devā indro vidyāt saha ṛṣibhiḥ ||

RV_1,024.01a kasya nūnaṃ katamasyāmṛtānām manāmahe cāru devasya nāma |
RV_1,024.01c ko no mahyā aditaye punar dāt pitaraṃ ca dṛśeyam mātaraṃ ca ||
RV_1,024.02a agner vayam prathamasyāmṛtānām manāmahe cāru devasya nāma |
RV_1,024.02c sa no mahyā aditaye punar dāt pitaraṃ ca dṛśeyam mātaraṃ ca ||
RV_1,024.03a abhi tvā deva savitar īśānaṃ vāryāṇām |
RV_1,024.03c sadāvan bhāgam īmahe ||
RV_1,024.04a yaś cid dhi ta itthā bhagaḥ śaśamānaḥ purā nidaḥ |
RV_1,024.04c adveṣo hastayor dadhe ||
RV_1,024.05a bhagabhaktasya te vayam ud aśema tavāvasā |
RV_1,024.05c mūrdhānaṃ rāya ārabhe ||
RV_1,024.06a nahi te kṣatraṃ na saho na manyuṃ vayaś canāmī patayanta āpuḥ |
RV_1,024.06c nemā āpo animiṣaṃ carantīr na ye vātasya praminanty abhvam ||
RV_1,024.07a abudhne rājā varuṇo vanasyordhvaṃ stūpaṃ dadate pūtadakṣaḥ |
RV_1,024.07c nīcīnā sthur upari budhna eṣām asme antar nihitāḥ ketavaḥ syuḥ ||
RV_1,024.08a uruṃ hi rājā varuṇaś cakāra sūryāya panthām anvetavā u |
RV_1,024.08c apade pādā pratidhātave 'kar utāpavaktā hṛdayāvidhaś cit ||
RV_1,024.09a śataṃ te rājan bhiṣajaḥ sahasram urvī gabhīrā sumatiṣ ṭe astu |
RV_1,024.09c bādhasva dūre nirṛtim parācaiḥ kṛtaṃ cid enaḥ pra mumugdhy asmat ||
RV_1,024.10a amī ya ṛkṣā nihitāsa uccā naktaṃ dadṛśre kuha cid diveyuḥ |
RV_1,024.10c adabdhāni varuṇasya vratāni vicākaśac candramā naktam eti ||
RV_1,024.11a tat tvā yāmi brahmaṇā vandamānas tad ā śāste yajamāno havirbhiḥ |
RV_1,024.11c aheḷamāno varuṇeha bodhy uruśaṃsa mā na āyuḥ pra moṣīḥ ||
RV_1,024.12a tad in naktaṃ tad divā mahyam āhus tad ayaṃ keto hṛda ā vi caṣṭe |
RV_1,024.12c śunaḥśepo yam ahvad gṛbhītaḥ so asmān rājā varuṇo mumoktu ||
RV_1,024.13a śunaḥśepo hy ahvad gṛbhītas triṣv ādityaṃ drupadeṣu baddhaḥ |
RV_1,024.13c avainaṃ rājā varuṇaḥ sasṛjyād vidvāṃ adabdho vi mumoktu pāśān ||
RV_1,024.14a ava te heḷo varuṇa namobhir ava yajñebhir īmahe havirbhiḥ |
RV_1,024.14c kṣayann asmabhyam asura pracetā rājann enāṃsi śiśrathaḥ kṛtāni ||
RV_1,024.15a ud uttamaṃ varuṇa pāśam asmad avādhamaṃ vi madhyamaṃ śrathāya |
RV_1,024.15c athā vayam āditya vrate tavānāgaso aditaye syāma ||

RV_1,025.01a yac cid dhi te viśo yathā pra deva varuṇa vratam |
RV_1,025.01c minīmasi dyavi-dyavi ||
RV_1,025.02a mā no vadhāya hatnave jihīḷānasya rīradhaḥ |
RV_1,025.02c mā hṛṇānasya manyave ||
RV_1,025.03a vi mṛḷīkāya te mano rathīr aśvaṃ na saṃditam |
RV_1,025.03c gīrbhir varuṇa sīmahi ||
RV_1,025.04a parā hi me vimanyavaḥ patanti vasyaiṣṭaye |
RV_1,025.04c vayo na vasatīr upa ||
RV_1,025.05a kadā kṣatraśriyaṃ naram ā varuṇaṃ karāmahe |
RV_1,025.05c mṛḷīkāyorucakṣasam ||
RV_1,025.06a tad it samānam āśāte venantā na pra yucchataḥ |
RV_1,025.06c dhṛtavratāya dāśuṣe ||
RV_1,025.07a vedā yo vīnām padam antarikṣeṇa patatām |
RV_1,025.07c veda nāvaḥ samudriyaḥ ||
RV_1,025.08a veda māso dhṛtavrato dvādaśa prajāvataḥ |
RV_1,025.08c vedā ya upajāyate ||
RV_1,025.09a veda vātasya vartanim uror ṛṣvasya bṛhataḥ |
RV_1,025.09c vedā ye adhyāsate ||
RV_1,025.10a ni ṣasāda dhṛtavrato varuṇaḥ pastyāsv ā |
RV_1,025.10c sāmrājyāya sukratuḥ ||
RV_1,025.11a ato viśvāny adbhutā cikitvāṃ abhi paśyati |
RV_1,025.11c kṛtāni yā ca kartvā ||
RV_1,025.12a sa no viśvāhā sukratur ādityaḥ supathā karat |
RV_1,025.12c pra ṇa āyūṃṣi tāriṣat ||
RV_1,025.13a bibhrad drāpiṃ hiraṇyayaṃ varuṇo vasta nirṇijam |
RV_1,025.13c pari spaśo ni ṣedire ||
RV_1,025.14a na yaṃ dipsanti dipsavo na druhvāṇo janānām |
RV_1,025.14c na devam abhimātayaḥ ||
RV_1,025.15a uta yo mānuṣeṣv ā yaśaś cakre asāmy ā |
RV_1,025.15c asmākam udareṣv ā ||
RV_1,025.16a parā me yanti dhītayo gāvo na gavyūtīr anu |
RV_1,025.16c icchantīr urucakṣasam ||
RV_1,025.17a saṃ nu vocāvahai punar yato me madhv ābhṛtam |
RV_1,025.17c hoteva kṣadase priyam ||
RV_1,025.18a darśaṃ nu viśvadarśataṃ darśaṃ ratham adhi kṣami |
RV_1,025.18c etā juṣata me giraḥ ||
RV_1,025.19a imam me varuṇa śrudhī havam adyā ca mṛḷaya |
RV_1,025.19c tvām avasyur ā cake ||
RV_1,025.20a tvaṃ viśvasya medhira divaś ca gmaś ca rājasi |
RV_1,025.20c sa yāmani prati śrudhi ||
RV_1,025.21a ud uttamam mumugdhi no vi pāśam madhyamaṃ cṛta |
RV_1,025.21c avādhamāni jīvase ||

RV_1,026.01a vasiṣvā hi miyedhya vastrāṇy ūrjām pate |
RV_1,026.01c semaṃ no adhvaraṃ yaja ||
RV_1,026.02a ni no hotā vareṇyaḥ sadā yaviṣṭha manmabhiḥ |
RV_1,026.02c agne divitmatā vacaḥ ||
RV_1,026.03a ā hi ṣmā sūnave pitāpir yajaty āpaye |
RV_1,026.03c sakhā sakhye vareṇyaḥ ||
RV_1,026.04a ā no barhī riśādaso varuṇo mitro aryamā |
RV_1,026.04c sīdantu manuṣo yathā ||
RV_1,026.05a pūrvya hotar asya no mandasva sakhyasya ca |
RV_1,026.05c imā u ṣu śrudhī giraḥ ||
RV_1,026.06a yac cid dhi śaśvatā tanā devaṃ-devaṃ yajāmahe |
RV_1,026.06c tve id dhūyate haviḥ ||
RV_1,026.07a priyo no astu viśpatir hotā mandro vareṇyaḥ |
RV_1,026.07c priyāḥ svagnayo vayam ||
RV_1,026.08a svagnayo hi vāryaṃ devāso dadhire ca naḥ |
RV_1,026.08c svagnayo manāmahe ||
RV_1,026.09a athā na ubhayeṣām amṛta martyānām |
RV_1,026.09c mithaḥ santu praśastayaḥ ||
RV_1,026.10a viśvebhir agne agnibhir imaṃ yajñam idaṃ vacaḥ |
RV_1,026.10c cano dhāḥ sahaso yaho ||

RV_1,027.01a aśvaṃ na tvā vāravantaṃ vandadhyā agniṃ namobhiḥ |
RV_1,027.01c samrājantam adhvarāṇām ||
RV_1,027.02a sa ghā naḥ sūnuḥ śavasā pṛthupragāmā suśevaḥ |
RV_1,027.02c mīḍhvāṃ asmākam babhūyāt ||
RV_1,027.03a sa no dūrāc cāsāc ca ni martyād aghāyoḥ |
RV_1,027.03c pāhi sadam id viśvāyuḥ ||
RV_1,027.04a imam ū ṣu tvam asmākaṃ saniṃ gāyatraṃ navyāṃsam |
RV_1,027.04c agne deveṣu pra vocaḥ ||
RV_1,027.05a ā no bhaja parameṣv ā vājeṣu madhyameṣu |
RV_1,027.05c śikṣā vasvo antamasya ||
RV_1,027.06a vibhaktāsi citrabhāno sindhor ūrmā upāka ā |
RV_1,027.06c sadyo dāśuṣe kṣarasi ||
RV_1,027.07a yam agne pṛtsu martyam avā vājeṣu yaṃ junāḥ |
RV_1,027.07c sa yantā śaśvatīr iṣaḥ ||
RV_1,027.08a nakir asya sahantya paryetā kayasya cit |
RV_1,027.08c vājo asti śravāyyaḥ ||
RV_1,027.09a sa vājaṃ viśvacarṣaṇir arvadbhir astu tarutā |
RV_1,027.09c viprebhir astu sanitā ||
RV_1,027.10a jarābodha tad viviḍḍhi viśe-viśe yajñiyāya |
RV_1,027.10c stomaṃ rudrāya dṛśīkam ||
RV_1,027.11a sa no mahāṃ animāno dhūmaketuḥ puruścandraḥ |
RV_1,027.11c dhiye vājāya hinvatu ||
RV_1,027.12a sa revāṃ iva viśpatir daivyaḥ ketuḥ śṛṇotu naḥ |
RV_1,027.12c ukthair agnir bṛhadbhānuḥ ||
RV_1,027.13a namo mahadbhyo namo arbhakebhyo namo yuvabhyo nama āśinebhyaḥ |
RV_1,027.13c yajāma devān yadi śaknavāma mā jyāyasaḥ śaṃsam ā vṛkṣi devāḥ ||

RV_1,028.01a yatra grāvā pṛthubudhna ūrdhvo bhavati sotave |
RV_1,028.01c ulūkhalasutānām aved v indra jalgulaḥ ||
RV_1,028.02a yatra dvāv iva jaghanādhiṣavaṇyā kṛtā |
RV_1,028.02c ulūkhalasutānām aved v indra jalgulaḥ ||
RV_1,028.03a yatra nāry apacyavam upacyavaṃ ca śikṣate |
RV_1,028.03c ulūkhalasutānām aved v indra jalgulaḥ ||
RV_1,028.04a yatra manthāṃ vibadhnate raśmīn yamitavā iva |
RV_1,028.04c ulūkhalasutānām aved v indra jalgulaḥ ||
RV_1,028.05a yac cid dhi tvaṃ gṛhe-gṛha ulūkhalaka yujyase |
RV_1,028.05c iha dyumattamaṃ vada jayatām iva dundubhiḥ ||
RV_1,028.06a uta sma te vanaspate vāto vi vāty agram it |
RV_1,028.06c atho indrāya pātave sunu somam ulūkhala ||
RV_1,028.07a āyajī vājasātamā tā hy uccā vijarbhṛtaḥ |
RV_1,028.07c harī ivāndhāṃsi bapsatā ||
RV_1,028.08a tā no adya vanaspatī ṛṣvāv ṛṣvebhiḥ sotṛbhiḥ |
RV_1,028.08c indrāya madhumat sutam ||
RV_1,028.09a uc chiṣṭaṃ camvor bhara somam pavitra ā sṛja |
RV_1,028.09c ni dhehi gor adhi tvaci ||

RV_1,029.01a yac cid dhi satya somapā anāśastā iva smasi |
RV_1,029.01c ā tū na indra śaṃsaya goṣv aśveṣu śubhriṣu sahasreṣu tuvīmagha ||
RV_1,029.02a śiprin vājānām pate śacīvas tava daṃsanā |
RV_1,029.02c ā tū na indra śaṃsaya goṣv aśveṣu śubhriṣu sahasreṣu tuvīmagha ||
RV_1,029.03a ni ṣvāpayā mithūdṛśā sastām abudhyamāne |
RV_1,029.03c ā tū na indra śaṃsaya goṣv aśveṣu śubhriṣu sahasreṣu tuvīmagha ||
RV_1,029.04a sasantu tyā arātayo bodhantu śūra rātayaḥ |
RV_1,029.04c ā tū na indra śaṃsaya goṣv aśveṣu śubhriṣu sahasreṣu tuvīmagha ||
RV_1,029.05a sam indra gardabham mṛṇa nuvantam pāpayāmuyā |
RV_1,029.05c ā tū na indra śaṃsaya goṣv aśveṣu śubhriṣu sahasreṣu tuvīmagha ||
RV_1,029.06a patāti kuṇḍṛṇācyā dūraṃ vāto vanād adhi |
RV_1,029.06c ā tū na indra śaṃsaya goṣv aśveṣu śubhriṣu sahasreṣu tuvīmagha ||
RV_1,029.07a sarvam parikrośaṃ jahi jambhayā kṛkadāśvam |
RV_1,029.07c ā tū na indra śaṃsaya goṣv aśveṣu śubhriṣu sahasreṣu tuvīmagha ||

RV_1,030.01a ā va indraṃ kriviṃ yathā vājayantaḥ śatakratum |
RV_1,030.01c maṃhiṣṭhaṃ siñca indubhiḥ ||
RV_1,030.02a śataṃ vā yaḥ śucīnāṃ sahasraṃ vā samāśirām |
RV_1,030.02c ed u nimnaṃ na rīyate ||
RV_1,030.03a saṃ yan madāya śuṣmiṇa enā hy asyodare |
RV_1,030.03c samudro na vyaco dadhe ||
RV_1,030.04a ayam u te sam atasi kapota iva garbhadhim |
RV_1,030.04c vacas tac cin na ohase ||
RV_1,030.05a stotraṃ rādhānām pate girvāho vīra yasya te |
RV_1,030.05c vibhūtir astu sūnṛtā ||
RV_1,030.06a ūrdhvas tiṣṭhā na ūtaye 'smin vāje śatakrato |
RV_1,030.06c sam anyeṣu bravāvahai ||
RV_1,030.07a yoge-yoge tavastaraṃ vāje-vāje havāmahe |
RV_1,030.07c sakhāya indram ūtaye ||
RV_1,030.08a ā ghā gamad yadi śravat sahasriṇībhir ūtibhiḥ |
RV_1,030.08c vājebhir upa no havam ||
RV_1,030.09a anu pratnasyaukaso huve tuvipratiṃ naram |
RV_1,030.09c yaṃ te pūrvam pitā huve ||
RV_1,030.10a taṃ tvā vayaṃ viśvavārā śāsmahe puruhūta |
RV_1,030.10c sakhe vaso jaritṛbhyaḥ ||
RV_1,030.11a asmākaṃ śipriṇīnāṃ somapāḥ somapāvnām |
RV_1,030.11c sakhe vajrin sakhīnām ||
RV_1,030.12a tathā tad astu somapāḥ sakhe vajrin tathā kṛṇu |
RV_1,030.12c yathā ta uśmasīṣṭaye ||
RV_1,030.13a revatīr naḥ sadhamāda indre santu tuvivājāḥ |
RV_1,030.13c kṣumanto yābhir madema ||
RV_1,030.14a ā gha tvāvān tmanāpta stotṛbhyo dhṛṣṇav iyānaḥ |
RV_1,030.14c ṛṇor akṣaṃ na cakryoḥ ||
RV_1,030.15a ā yad duvaḥ śatakratav ā kāmaṃ jaritṝṇām |
RV_1,030.15c ṛṇor akṣaṃ na śacībhiḥ ||
RV_1,030.16a śaśvad indraḥ popruthadbhir jigāya nānadadbhiḥ śāśvasadbhir dhanāni |
RV_1,030.16c sa no hiraṇyarathaṃ daṃsanāvān sa naḥ sanitā sanaye sa no 'dāt ||
RV_1,030.17a āśvināv aśvāvatyeṣā yātaṃ śavīrayā |
RV_1,030.17c gomad dasrā hiraṇyavat ||
RV_1,030.18a samānayojano hi vāṃ ratho dasrāv amartyaḥ |
RV_1,030.18c samudre aśvineyate ||
RV_1,030.19a ny aghnyasya mūrdhani cakraṃ rathasya yemathuḥ |
RV_1,030.19c pari dyām anyad īyate ||
RV_1,030.20a kas ta uṣaḥ kadhapriye bhuje marto amartye |
RV_1,030.20c kaṃ nakṣase vibhāvari ||
RV_1,030.21a vayaṃ hi te amanmahy āntād ā parākāt |
RV_1,030.21c aśve na citre aruṣi ||
RV_1,030.22a tvaṃ tyebhir ā gahi vājebhir duhitar divaḥ |
RV_1,030.22c asme rayiṃ ni dhāraya ||

RV_1,031.01a tvam agne prathamo aṅgirā ṛṣir devo devānām abhavaḥ śivaḥ sakhā |
RV_1,031.01c tava vrate kavayo vidmanāpaso 'jāyanta maruto bhrājadṛṣṭayaḥ ||
RV_1,031.02a tvam agne prathamo aṅgirastamaḥ kavir devānām pari bhūṣasi vratam |
RV_1,031.02c vibhur viśvasmai bhuvanāya medhiro dvimātā śayuḥ katidhā cid āyave ||
RV_1,031.03a tvam agne prathamo mātariśvana āvir bhava sukratūyā vivasvate |
RV_1,031.03c arejetāṃ rodasī hotṛvūrye 'saghnor bhāram ayajo maho vaso ||
RV_1,031.04a tvam agne manave dyām avāśayaḥ purūravase sukṛte sukṛttaraḥ |
RV_1,031.04c śvātreṇa yat pitror mucyase pary ā tvā pūrvam anayann āparam punaḥ ||
RV_1,031.05a tvam agne vṛṣabhaḥ puṣṭivardhana udyatasruce bhavasi śravāyyaḥ |
RV_1,031.05c ya āhutim pari vedā vaṣaṭkṛtim ekāyur agre viśa āvivāsasi ||
RV_1,031.06a tvam agne vṛjinavartaniṃ naraṃ sakman piparṣi vidathe vicarṣaṇe |
RV_1,031.06c yaḥ śūrasātā paritakmye dhane dabhrebhiś cit samṛtā haṃsi bhūyasaḥ ||
RV_1,031.07a tvaṃ tam agne amṛtatva uttame martaṃ dadhāsi śravase dive-dive |
RV_1,031.07c yas tātṛṣāṇa ubhayāya janmane mayaḥ kṛṇoṣi praya ā ca sūraye ||
RV_1,031.08a tvaṃ no agne sanaye dhanānāṃ yaśasaṃ kāruṃ kṛṇuhi stavānaḥ |
RV_1,031.08c ṛdhyāma karmāpasā navena devair dyāvāpṛthivī prāvataṃ naḥ ||
RV_1,031.09a tvaṃ no agne pitror upastha ā devo deveṣv anavadya jāgṛviḥ |
RV_1,031.09c tanūkṛd bodhi pramatiś ca kārave tvaṃ kalyāṇa vasu viśvam opiṣe ||
RV_1,031.10a tvam agne pramatis tvam pitāsi nas tvaṃ vayaskṛt tava jāmayo vayam |
RV_1,031.10c saṃ tvā rāyaḥ śatinaḥ saṃ sahasriṇaḥ suvīraṃ yanti vratapām adābhya ||
RV_1,031.11a tvām agne prathamam āyum āyave devā akṛṇvan nahuṣasya viśpatim |
RV_1,031.11c iḷām akṛṇvan manuṣasya śāsanīm pitur yat putro mamakasya jāyate ||
RV_1,031.12a tvaṃ no agne tava deva pāyubhir maghono rakṣa tanvaś ca vandya |
RV_1,031.12c trātā tokasya tanaye gavām asy animeṣaṃ rakṣamāṇas tava vrate ||
RV_1,031.13a tvam agne yajyave pāyur antaro 'niṣaṅgāya caturakṣa idhyase |
RV_1,031.13c yo rātahavyo 'vṛkāya dhāyase kīreś cin mantram manasā vanoṣi tam ||
RV_1,031.14a tvam agna uruśaṃsāya vāghate spārhaṃ yad rekṇaḥ paramaṃ vanoṣi tat |
RV_1,031.14c ādhrasya cit pramatir ucyase pitā pra pākaṃ śāssi pra diśo viduṣṭaraḥ ||
RV_1,031.15a tvam agne prayatadakṣiṇaṃ naraṃ varmeva syūtam pari pāsi viśvataḥ |
RV_1,031.15c svādukṣadmā yo vasatau syonakṛj jīvayājaṃ yajate sopamā divaḥ ||
RV_1,031.16a imām agne śaraṇim mīmṛṣo na imam adhvānaṃ yam agāma dūrāt |
RV_1,031.16c āpiḥ pitā pramatiḥ somyānām bhṛmir asy ṛṣikṛn martyānām ||
RV_1,031.17a manuṣvad agne aṅgirasvad aṅgiro yayātivat sadane pūrvavac chuce |
RV_1,031.17c accha yāhy ā vahā daivyaṃ janam ā sādaya barhiṣi yakṣi ca priyam ||
RV_1,031.18a etenāgne brahmaṇā vāvṛdhasva śaktī vā yat te cakṛmā vidā vā |
RV_1,031.18c uta pra ṇeṣy abhi vasyo asmān saṃ naḥ sṛja sumatyā vājavatyā ||

RV_1,032.01a indrasya nu vīryāṇi pra vocaṃ yāni cakāra prathamāni vajrī |
RV_1,032.01c ahann ahim anv apas tatarda pra vakṣaṇā abhinat parvatānām ||
RV_1,032.02a ahann ahim parvate śiśriyāṇaṃ tvaṣṭāsmai vajraṃ svaryaṃ tatakṣa |
RV_1,032.02c vāśrā iva dhenavaḥ syandamānā añjaḥ samudram ava jagmur āpaḥ ||
RV_1,032.03a vṛṣāyamāṇo 'vṛṇīta somaṃ trikadrukeṣv apibat sutasya |
RV_1,032.03c ā sāyakam maghavādatta vajram ahann enam prathamajām ahīnām ||
RV_1,032.04a yad indrāhan prathamajām ahīnām ān māyinām amināḥ prota māyāḥ |
RV_1,032.04c āt sūryaṃ janayan dyām uṣāsaṃ tādītnā śatruṃ na kilā vivitse ||
RV_1,032.05a ahan vṛtraṃ vṛtrataraṃ vyaṃsam indro vajreṇa mahatā vadhena |
RV_1,032.05c skandhāṃsīva kuliśenā vivṛkṇāhiḥ śayata upapṛk pṛthivyāḥ ||
RV_1,032.06a ayoddheva durmada ā hi juhve mahāvīraṃ tuvibādham ṛjīṣam |
RV_1,032.06c nātārīd asya samṛtiṃ vadhānāṃ saṃ rujānāḥ pipiṣa indraśatruḥ ||
RV_1,032.07a apād ahasto apṛtanyad indram āsya vajram adhi sānau jaghāna |
RV_1,032.07c vṛṣṇo vadhriḥ pratimānam bubhūṣan purutrā vṛtro aśayad vyastaḥ ||
RV_1,032.08a nadaṃ na bhinnam amuyā śayānam mano ruhāṇā ati yanty āpaḥ |
RV_1,032.08c yāś cid vṛtro mahinā paryatiṣṭhat tāsām ahiḥ patsutaḥśīr babhūva ||
RV_1,032.09a nīcāvayā abhavad vṛtraputrendro asyā ava vadhar jabhāra |
RV_1,032.09c uttarā sūr adharaḥ putra āsīd dānuḥ śaye sahavatsā na dhenuḥ ||
RV_1,032.10a atiṣṭhantīnām aniveśanānāṃ kāṣṭhānām madhye nihitaṃ śarīram |
RV_1,032.10c vṛtrasya niṇyaṃ vi caranty āpo dīrghaṃ tama āśayad indraśatruḥ ||
RV_1,032.11a dāsapatnīr ahigopā atiṣṭhan niruddhā āpaḥ paṇineva gāvaḥ |
RV_1,032.11c apām bilam apihitaṃ yad āsīd vṛtraṃ jaghanvāṃ apa tad vavāra ||
RV_1,032.12a aśvyo vāro abhavas tad indra sṛke yat tvā pratyahan deva ekaḥ |
RV_1,032.12c ajayo gā ajayaḥ śūra somam avāsṛjaḥ sartave sapta sindhūn ||
RV_1,032.13a nāsmai vidyun na tanyatuḥ siṣedha na yām miham akirad dhrāduniṃ ca |
RV_1,032.13c indraś ca yad yuyudhāte ahiś cotāparībhyo maghavā vi jigye ||
RV_1,032.14a aher yātāraṃ kam apaśya indra hṛdi yat te jaghnuṣo bhīr agacchat |
RV_1,032.14c nava ca yan navatiṃ ca sravantīḥ śyeno na bhīto ataro rajāṃsi ||
RV_1,032.15a indro yāto 'vasitasya rājā śamasya ca śṛṅgiṇo vajrabāhuḥ |
RV_1,032.15c sed u rājā kṣayati carṣaṇīnām arān na nemiḥ pari tā babhūva ||

RV_1,033.01a etāyāmopa gavyanta indram asmākaṃ su pramatiṃ vāvṛdhāti |
RV_1,033.01c anāmṛṇaḥ kuvid ād asya rāyo gavāṃ ketam param āvarjate naḥ ||
RV_1,033.02a uped ahaṃ dhanadām apratītaṃ juṣṭāṃ na śyeno vasatim patāmi |
RV_1,033.02c indraṃ namasyann upamebhir arkair ya stotṛbhyo havyo asti yāman ||
RV_1,033.03a ni sarvasena iṣudhīṃr asakta sam aryo gā ajati yasya vaṣṭi |
RV_1,033.03c coṣkūyamāṇa indra bhūri vāmam mā paṇir bhūr asmad adhi pravṛddha ||
RV_1,033.04a vadhīr hi dasyuṃ dhaninaṃ ghanenaṃ ekaś carann upaśākebhir indra |
RV_1,033.04c dhanor adhi viṣuṇak te vy āyann ayajvānaḥ sanakāḥ pretim īyuḥ ||
RV_1,033.05a parā cic chīrṣā vavṛjus ta indrāyajvāno yajvabhi spardhamānāḥ |
RV_1,033.05c pra yad divo hariva sthātar ugra nir avratāṃ adhamo rodasyoḥ ||
RV_1,033.06a ayuyutsann anavadyasya senām ayātayanta kṣitayo navagvāḥ |
RV_1,033.06c vṛṣāyudho na vadhrayo niraṣṭāḥ pravadbhir indrāc citayanta āyan ||
RV_1,033.07a tvam etān rudato jakṣataś cāyodhayo rajasa indra pāre |
RV_1,033.07c avādaho diva ā dasyum uccā pra sunvata stuvataḥ śaṃsam āvaḥ ||
RV_1,033.08a cakrāṇāsaḥ parīṇaham pṛthivyā hiraṇyena maṇinā śumbhamānāḥ |
RV_1,033.08c na hinvānāsas titirus ta indram pari spaśo adadhāt sūryeṇa ||
RV_1,033.09a pari yad indra rodasī ubhe abubhojīr mahinā viśvataḥ sīm |
RV_1,033.09c amanyamānāṃ abhi manyamānair nir brahmabhir adhamo dasyum indra ||
RV_1,033.10a na ye divaḥ pṛthivyā antam āpur na māyābhir dhanadām paryabhūvan |
RV_1,033.10c yujaṃ vajraṃ vṛṣabhaś cakra indro nir jyotiṣā tamaso gā adukṣat ||
RV_1,033.11a anu svadhām akṣarann āpo asyāvardhata madhya ā nāvyānām |
RV_1,033.11c sadhrīcīnena manasā tam indra ojiṣṭhena hanmanāhann abhi dyūn ||
RV_1,033.12a ny āvidhyad ilībiśasya dṛḷhā vi śṛṅgiṇam abhinac chuṣṇam indraḥ |
RV_1,033.12c yāvat taro maghavan yāvad ojo vajreṇa śatrum avadhīḥ pṛtanyum ||
RV_1,033.13a abhi sidhmo ajigād asya śatrūn vi tigmena vṛṣabheṇā puro 'bhet |
RV_1,033.13c saṃ vajreṇāsṛjad vṛtram indraḥ pra svām matim atirac chāśadānaḥ ||
RV_1,033.14a āvaḥ kutsam indra yasmiñ cākan prāvo yudhyantaṃ vṛṣabhaṃ daśadyum |
RV_1,033.14c śaphacyuto reṇur nakṣata dyām uc chvaitreyo nṛṣāhyāya tasthau ||
RV_1,033.15a āvaḥ śamaṃ vṛṣabhaṃ tugryāsu kṣetrajeṣe maghavañ chvitryaṃ gām |
RV_1,033.15c jyok cid atra tasthivāṃso akrañ chatrūyatām adharā vedanākaḥ ||

RV_1,034.01a triś cin no adyā bhavataṃ navedasā vibhur vāṃ yāma uta rātir aśvinā |
RV_1,034.01c yuvor hi yantraṃ himyeva vāsaso 'bhyāyaṃsenyā bhavatam manīṣibhiḥ ||
RV_1,034.02a trayaḥ pavayo madhuvāhane rathe somasya venām anu viśva id viduḥ |
RV_1,034.02c traya skambhāsa skabhitāsa ārabhe trir naktaṃ yāthas trir v aśvinā divā ||
RV_1,034.03a samāne ahan trir avadyagohanā trir adya yajñam madhunā mimikṣatam |
RV_1,034.03c trir vājavatīr iṣo aśvinā yuvaṃ doṣā asmabhyam uṣasaś ca pinvatam ||
RV_1,034.04a trir vartir yātaṃ trir anuvrate jane triḥ suprāvye tredheva śikṣatam |
RV_1,034.04c trir nāndyaṃ vahatam aśvinā yuvaṃ triḥ pṛkṣo asme akṣareva pinvatam ||
RV_1,034.05a trir no rayiṃ vahatam aśvinā yuvaṃ trir devatātā trir utāvataṃ dhiyaḥ |
RV_1,034.05c triḥ saubhagatvaṃ trir uta śravāṃsi nas triṣṭhaṃ vāṃ sūre duhitā ruhad ratham ||
RV_1,034.06a trir no aśvinā divyāni bheṣajā triḥ pārthivāni trir u dattam adbhyaḥ |
RV_1,034.06c omānaṃ śaṃyor mamakāya sūnave tridhātu śarma vahataṃ śubhas patī ||
RV_1,034.07a trir no aśvinā yajatā dive-dive pari tridhātu pṛthivīm aśāyatam |
RV_1,034.07c tisro nāsatyā rathyā parāvata ātmeva vātaḥ svasarāṇi gacchatam ||
RV_1,034.08a trir aśvinā sindhubhiḥ saptamātṛbhis traya āhāvās tredhā haviṣ kṛtam |
RV_1,034.08c tisraḥ pṛthivīr upari pravā divo nākaṃ rakṣethe dyubhir aktubhir hitam ||
RV_1,034.09a kva trī cakrā trivṛto rathasya kva trayo vandhuro ye sanīḷāḥ |
RV_1,034.09c kadā yogo vājino rāsabhasya yena yajñaṃ nāsatyopayāthaḥ ||
RV_1,034.10a ā nāsatyā gacchataṃ hūyate havir madhvaḥ pibatam madhupebhir āsabhiḥ |
RV_1,034.10c yuvor hi pūrvaṃ savitoṣaso ratham ṛtāya citraṃ ghṛtavantam iṣyati ||
RV_1,034.11a ā nāsatyā tribhir ekādaśair iha devebhir yātam madhupeyam aśvinā |
RV_1,034.11c prāyus tāriṣṭaṃ nī rapāṃsi mṛkṣataṃ sedhataṃ dveṣo bhavataṃ sacābhuvā ||
RV_1,034.12a ā no aśvinā trivṛtā rathenārvāñcaṃ rayiṃ vahataṃ suvīram |
RV_1,034.12c śṛṇvantā vām avase johavīmi vṛdhe ca no bhavataṃ vājasātau ||

RV_1,035.01a hvayāmy agnim prathamaṃ svastaye hvayāmi mitrāvaruṇāv ihāvase |
RV_1,035.01c hvayāmi rātrīṃ jagato niveśanīṃ hvayāmi devaṃ savitāram ūtaye ||
RV_1,035.02a ā kṛṣṇena rajasā vartamāno niveśayann amṛtam martyaṃ ca |
RV_1,035.02c hiraṇyayena savitā rathenā devo yāti bhuvanāni paśyan ||
RV_1,035.03a yāti devaḥ pravatā yāty udvatā yāti śubhrābhyāṃ yajato haribhyām |
RV_1,035.03c ā devo yāti savitā parāvato 'pa viśvā duritā bādhamānaḥ ||
RV_1,035.04a abhīvṛtaṃ kṛśanair viśvarūpaṃ hiraṇyaśamyaṃ yajato bṛhantam |
RV_1,035.04c āsthād rathaṃ savitā citrabhānuḥ kṛṣṇā rajāṃsi taviṣīṃ dadhānaḥ ||
RV_1,035.05a vi janāñ chyāvāḥ śitipādo akhyan rathaṃ hiraṇyapraugaṃ vahantaḥ |
RV_1,035.05c śaśvad viśaḥ savitur daivyasyopasthe viśvā bhuvanāni tasthuḥ ||
RV_1,035.06a tisro dyāvaḥ savitur dvā upasthāṃ ekā yamasya bhuvane virāṣāṭ |
RV_1,035.06c āṇiṃ na rathyam amṛtādhi tasthur iha bravītu ya u tac ciketat ||
RV_1,035.07a vi suparṇo antarikṣāṇy akhyad gabhīravepā asuraḥ sunīthaḥ |
RV_1,035.07c kvedānīṃ sūryaḥ kaś ciketa katamāṃ dyāṃ raśmir asyā tatāna ||
RV_1,035.08a aṣṭau vy akhyat kakubhaḥ pṛthivyās trī dhanva yojanā sapta sindhūn |
RV_1,035.08c hiraṇyākṣaḥ savitā deva āgād dadhad ratnā dāśuṣe vāryāṇi ||
RV_1,035.09a hiraṇyapāṇiḥ savitā vicarṣaṇir ubhe dyāvāpṛthivī antar īyate |
RV_1,035.09c apāmīvām bādhate veti sūryam abhi kṛṣṇena rajasā dyām ṛṇoti ||
RV_1,035.10a hiraṇyahasto asuraḥ sunīthaḥ sumṛḷīkaḥ svavāṃ yātv arvāṅ |
RV_1,035.10c apasedhan rakṣaso yātudhānān asthād devaḥ pratidoṣaṃ gṛṇānaḥ ||
RV_1,035.11a ye te panthāḥ savitaḥ pūrvyāso 'reṇavaḥ sukṛtā antarikṣe |
RV_1,035.11c tebhir no adya pathibhiḥ sugebhī rakṣā ca no adhi ca brūhi deva ||

RV_1,036.01a pra vo yahvam purūṇāṃ viśāṃ devayatīnām |
RV_1,036.01c agniṃ sūktebhir vacobhir īmahe yaṃ sīm id anya īḷate ||
RV_1,036.02a janāso agniṃ dadhire sahovṛdhaṃ haviṣmanto vidhema te |
RV_1,036.02c sa tvaṃ no adya sumanā ihāvitā bhavā vājeṣu santya ||
RV_1,036.03a pra tvā dūtaṃ vṛṇīmahe hotāraṃ viśvavedasam |
RV_1,036.03c mahas te sato vi caranty arcayo divi spṛśanti bhānavaḥ ||
RV_1,036.04a devāsas tvā varuṇo mitro aryamā saṃ dūtam pratnam indhate |
RV_1,036.04c viśvaṃ so agne jayati tvayā dhanaṃ yas te dadāśa martyaḥ ||
RV_1,036.05a mandro hotā gṛhapatir agne dūto viśām asi |
RV_1,036.05c tve viśvā saṃgatāni vratā dhruvā yāni devā akṛṇvata ||
RV_1,036.06a tve id agne subhage yaviṣṭhya viśvam ā hūyate haviḥ |
RV_1,036.06c sa tvaṃ no adya sumanā utāparaṃ yakṣi devān suvīryā ||
RV_1,036.07a taṃ ghem itthā namasvina upa svarājam āsate |
RV_1,036.07c hotrābhir agnim manuṣaḥ sam indhate titirvāṃso ati sridhaḥ ||
RV_1,036.08a ghnanto vṛtram ataran rodasī apa uru kṣayāya cakrire |
RV_1,036.08c bhuvat kaṇve vṛṣā dyumny āhutaḥ krandad aśvo gaviṣṭiṣu ||
RV_1,036.09a saṃ sīdasva mahāṃ asi śocasva devavītamaḥ |
RV_1,036.09c vi dhūmam agne aruṣam miyedhya sṛja praśasta darśatam ||
RV_1,036.10a yaṃ tvā devāso manave dadhur iha yajiṣṭhaṃ havyavāhana |
RV_1,036.10c yaṃ kaṇvo medhyātithir dhanaspṛtaṃ yaṃ vṛṣā yam upastutaḥ ||
RV_1,036.11a yam agnim medhyātithiḥ kaṇva īdha ṛtād adhi |
RV_1,036.11c tasya preṣo dīdiyus tam imā ṛcas tam agniṃ vardhayāmasi ||
RV_1,036.12a rāyas pūrdhi svadhāvo 'sti hi te 'gne deveṣv āpyam |
RV_1,036.12c tvaṃ vājasya śrutyasya rājasi sa no mṛḷa mahāṃ asi ||
RV_1,036.13a ūrdhva ū ṣu ṇa ūtaye tiṣṭhā devo na savitā |
RV_1,036.13c ūrdhvo vājasya sanitā yad añjibhir vāghadbhir vihvayāmahe ||
RV_1,036.14a ūrdhvo naḥ pāhy aṃhaso ni ketunā viśvaṃ sam atriṇaṃ daha |
RV_1,036.14c kṛdhī na ūrdhvāñ carathāya jīvase vidā deveṣu no duvaḥ ||
RV_1,036.15a pāhi no agne rakṣasaḥ pāhi dhūrter arāvṇaḥ |
RV_1,036.15c pāhi rīṣata uta vā jighāṃsato bṛhadbhāno yaviṣṭhya ||
RV_1,036.16a ghaneva viṣvag vi jahy arāvṇas tapurjambha yo asmadhruk |
RV_1,036.16c yo martyaḥ śiśīte aty aktubhir mā naḥ sa ripur īśata ||
RV_1,036.17a agnir vavne suvīryam agniḥ kaṇvāya saubhagam |
RV_1,036.17c agniḥ prāvan mitrota medhyātithim agniḥ sātā upastutam ||
RV_1,036.18a agninā turvaśaṃ yadum parāvata ugrādevaṃ havāmahe |
RV_1,036.18c agnir nayan navavāstvam bṛhadrathaṃ turvītiṃ dasyave sahaḥ ||
RV_1,036.19a ni tvām agne manur dadhe jyotir janāya śaśvate |
RV_1,036.19c dīdetha kaṇva ṛtajāta ukṣito yaṃ namasyanti kṛṣṭayaḥ ||
RV_1,036.20a tveṣāso agner amavanto arcayo bhīmāso na pratītaye |
RV_1,036.20c rakṣasvinaḥ sadam id yātumāvato viśvaṃ sam atriṇaṃ daha ||

RV_1,037.01a krīḷaṃ vaḥ śardho mārutam anarvāṇaṃ ratheśubham |
RV_1,037.01c kaṇvā abhi pra gāyata ||
RV_1,037.02a ye pṛṣatībhir ṛṣṭibhiḥ sākaṃ vāśībhir añjibhiḥ |
RV_1,037.02c ajāyanta svabhānavaḥ ||
RV_1,037.03a iheva śṛṇva eṣāṃ kaśā hasteṣu yad vadān |
RV_1,037.03c ni yāmañ citram ṛñjate ||
RV_1,037.04a pra vaḥ śardhāya ghṛṣvaye tveṣadyumnāya śuṣmiṇe |
RV_1,037.04c devattam brahma gāyata ||
RV_1,037.05a pra śaṃsā goṣv aghnyaṃ krīḷaṃ yac chardho mārutam |
RV_1,037.05c jambhe rasasya vāvṛdhe ||
RV_1,037.06a ko vo varṣiṣṭha ā naro divaś ca gmaś ca dhūtayaḥ |
RV_1,037.06c yat sīm antaṃ na dhūnutha ||
RV_1,037.07a ni vo yāmāya mānuṣo dadhra ugrāya manyave |
RV_1,037.07c jihīta parvato giriḥ ||
RV_1,037.08a yeṣām ajmeṣu pṛthivī jujurvāṃ iva viśpatiḥ |
RV_1,037.08c bhiyā yāmeṣu rejate ||
RV_1,037.09a sthiraṃ hi jānam eṣāṃ vayo mātur niretave |
RV_1,037.09c yat sīm anu dvitā śavaḥ ||
RV_1,037.10a ud u tye sūnavo giraḥ kāṣṭhā ajmeṣv atnata |
RV_1,037.10c vāśrā abhijñu yātave ||
RV_1,037.11a tyaṃ cid ghā dīrgham pṛthum miho napātam amṛdhram |
RV_1,037.11c pra cyāvayanti yāmabhiḥ ||
RV_1,037.12a maruto yad dha vo balaṃ janāṃ acucyavītana |
RV_1,037.12c girīṃr acucyavītana ||
RV_1,037.13a yad dha yānti marutaḥ saṃ ha bruvate 'dhvann ā |
RV_1,037.13c śṛṇoti kaś cid eṣām ||
RV_1,037.14a pra yāta śībham āśubhiḥ santi kaṇveṣu vo duvaḥ |
RV_1,037.14c tatro ṣu mādayādhvai ||
RV_1,037.15a asti hi ṣmā madāya vaḥ smasi ṣmā vayam eṣām |
RV_1,037.15c viśvaṃ cid āyur jīvase ||

RV_1,038.01a kad dha nūnaṃ kadhapriyaḥ pitā putraṃ na hastayoḥ |
RV_1,038.01c dadhidhve vṛktabarhiṣaḥ ||
RV_1,038.02a kva nūnaṃ kad vo arthaṃ gantā divo na pṛthivyāḥ |
RV_1,038.02c kva vo gāvo na raṇyanti ||
RV_1,038.03a kva vaḥ sumnā navyāṃsi marutaḥ kva suvitā |
RV_1,038.03c kvo viśvāni saubhagā ||
RV_1,038.04a yad yūyam pṛśnimātaro martāsaḥ syātana |
RV_1,038.04c stotā vo amṛtaḥ syāt ||
RV_1,038.05a mā vo mṛgo na yavase jaritā bhūd ajoṣyaḥ |
RV_1,038.05c pathā yamasya gād upa ||
RV_1,038.06a mo ṣu ṇaḥ parā-parā nirṛtir durhaṇā vadhīt |
RV_1,038.06c padīṣṭa tṛṣṇayā saha ||
RV_1,038.07a satyaṃ tveṣā amavanto dhanvañ cid ā rudriyāsaḥ |
RV_1,038.07c mihaṃ kṛṇvanty avātām ||
RV_1,038.08a vāśreva vidyun mimāti vatsaṃ na mātā siṣakti |
RV_1,038.08c yad eṣāṃ vṛṣṭir asarji ||
RV_1,038.09a divā cit tamaḥ kṛṇvanti parjanyenodavāhena |
RV_1,038.09c yat pṛthivīṃ vyundanti ||
RV_1,038.10a adha svanān marutāṃ viśvam ā sadma pārthivam |
RV_1,038.10c arejanta pra mānuṣāḥ ||
RV_1,038.11a maruto vīḷupāṇibhiś citrā rodhasvatīr anu |
RV_1,038.11c yātem akhidrayāmabhiḥ ||
RV_1,038.12a sthirā vaḥ santu nemayo rathā aśvāsa eṣām |
RV_1,038.12c susaṃskṛtā abhīśavaḥ ||
RV_1,038.13a acchā vadā tanā girā jarāyai brahmaṇas patim |
RV_1,038.13c agnim mitraṃ na darśatam ||
RV_1,038.14a mimīhi ślokam āsye parjanya iva tatanaḥ |
RV_1,038.14c gāya gāyatram ukthyam ||
RV_1,038.15a vandasva mārutaṃ gaṇaṃ tveṣam panasyum arkiṇam |
RV_1,038.15c asme vṛddhā asann iha ||

RV_1,039.01a pra yad itthā parāvataḥ śocir na mānam asyatha |
RV_1,039.01c kasya kratvā marutaḥ kasya varpasā kaṃ yātha kaṃ ha dhūtayaḥ ||
RV_1,039.02a sthirā vaḥ santv āyudhā parāṇude vīḷū uta pratiṣkabhe |
RV_1,039.02c yuṣmākam astu taviṣī panīyasī mā martyasya māyinaḥ ||
RV_1,039.03a parā ha yat sthiraṃ hatha naro vartayathā guru |
RV_1,039.03c vi yāthana vaninaḥ pṛthivyā vy āśāḥ parvatānām ||
RV_1,039.04a nahi vaḥ śatrur vivide adhi dyavi na bhūmyāṃ riśādasaḥ |
RV_1,039.04c yuṣmākam astu taviṣī tanā yujā rudrāso nū cid ādhṛṣe ||
RV_1,039.05a pra vepayanti parvatān vi viñcanti vanaspatīn |
RV_1,039.05c pro ārata maruto durmadā iva devāsaḥ sarvayā viśā ||
RV_1,039.06a upo ratheṣu pṛṣatīr ayugdhvam praṣṭir vahati rohitaḥ |
RV_1,039.06c ā vo yāmāya pṛthivī cid aśrod abībhayanta mānuṣāḥ ||
RV_1,039.07a ā vo makṣū tanāya kaṃ rudrā avo vṛṇīmahe |
RV_1,039.07c gantā nūnaṃ no 'vasā yathā puretthā kaṇvāya bibhyuṣe ||
RV_1,039.08a yuṣmeṣito maruto martyeṣita ā yo no abhva īṣate |
RV_1,039.08c vi taṃ yuyota śavasā vy ojasā vi yuṣmākābhir ūtibhiḥ ||
RV_1,039.09a asāmi hi prayajyavaḥ kaṇvaṃ dada pracetasaḥ |
RV_1,039.09c asāmibhir maruta ā na ūtibhir gantā vṛṣṭiṃ na vidyutaḥ ||
RV_1,039.10a asāmy ojo bibhṛthā sudānavo 'sāmi dhūtayaḥ śavaḥ |
RV_1,039.10c ṛṣidviṣe marutaḥ parimanyava iṣuṃ na sṛjata dviṣam ||

RV_1,040.01a ut tiṣṭha brahmaṇas pate devayantas tvemahe |
RV_1,040.01c upa pra yantu marutaḥ sudānava indra prāśūr bhavā sacā ||
RV_1,040.02a tvām id dhi sahasas putra martya upabrūte dhane hite |
RV_1,040.02c suvīryam maruta ā svaśvyaṃ dadhīta yo va ācake ||
RV_1,040.03a praitu brahmaṇas patiḥ pra devy etu sūnṛtā |
RV_1,040.03c acchā vīraṃ naryam paṅktirādhasaṃ devā yajñaṃ nayantu naḥ ||
RV_1,040.04a yo vāghate dadāti sūnaraṃ vasu sa dhatte akṣiti śravaḥ |
RV_1,040.04c tasmā iḷāṃ suvīrām ā yajāmahe supratūrtim anehasam ||
RV_1,040.05a pra nūnam brahmaṇas patir mantraṃ vadaty ukthyam |
RV_1,040.05c yasminn indro varuṇo mitro aryamā devā okāṃsi cakrire ||
RV_1,040.06a tam id vocemā vidatheṣu śambhuvam mantraṃ devā anehasam |
RV_1,040.06c imāṃ ca vācam pratiharyathā naro viśved vāmā vo aśnavat ||
RV_1,040.07a ko devayantam aśnavaj janaṃ ko vṛktabarhiṣam |
RV_1,040.07c pra-pra dāśvān pastyābhir asthitāntarvāvat kṣayaṃ dadhe ||
RV_1,040.08a upa kṣatram pṛñcīta hanti rājabhir bhaye cit sukṣitiṃ dadhe |
RV_1,040.08c nāsya vartā na tarutā mahādhane nārbhe asti vajriṇaḥ ||

RV_1,041.01a yaṃ rakṣanti pracetaso varuṇo mitro aryamā |
RV_1,041.01c nū cit sa dabhyate janaḥ ||
RV_1,041.02a yam bāhuteva piprati pānti martyaṃ riṣaḥ |
RV_1,041.02c ariṣṭaḥ sarva edhate ||
RV_1,041.03a vi durgā vi dviṣaḥ puro ghnanti rājāna eṣām |
RV_1,041.03c nayanti duritā tiraḥ ||
RV_1,041.04a sugaḥ panthā anṛkṣara ādityāsa ṛtaṃ yate |
RV_1,041.04c nātrāvakhādo asti vaḥ ||
RV_1,041.05a yaṃ yajñaṃ nayathā nara ādityā ṛjunā pathā |
RV_1,041.05c pra vaḥ sa dhītaye naśat ||
RV_1,041.06a sa ratnam martyo vasu viśvaṃ tokam uta tmanā |
RV_1,041.06c acchā gacchaty astṛtaḥ ||
RV_1,041.07a kathā rādhāma sakhāya stomam mitrasyāryamṇaḥ |
RV_1,041.07c mahi psaro varuṇasya ||
RV_1,041.08a mā vo ghnantam mā śapantam prati voce devayantam |
RV_1,041.08c sumnair id va ā vivāse ||
RV_1,041.09a caturaś cid dadamānād bibhīyād ā nidhātoḥ |
RV_1,041.09c na duruktāya spṛhayet ||

RV_1,042.01a sam pūṣann adhvanas tira vy aṃho vimuco napāt |
RV_1,042.01c sakṣvā deva pra ṇas puraḥ ||
RV_1,042.02a yo naḥ pūṣann agho vṛko duḥśeva ādideśati |
RV_1,042.02c apa sma tam patho jahi ||
RV_1,042.03a apa tyam paripanthinam muṣīvāṇaṃ huraścitam |
RV_1,042.03c dūram adhi sruter aja ||
RV_1,042.04a tvaṃ tasya dvayāvino 'ghaśaṃsasya kasya cit |
RV_1,042.04c padābhi tiṣṭha tapuṣim ||
RV_1,042.05a ā tat te dasra mantumaḥ pūṣann avo vṛṇīmahe |
RV_1,042.05c yena pitṝn acodayaḥ ||
RV_1,042.06a adhā no viśvasaubhaga hiraṇyavāśīmattama |
RV_1,042.06c dhanāni suṣaṇā kṛdhi ||
RV_1,042.07a ati naḥ saścato naya sugā naḥ supathā kṛṇu |
RV_1,042.07c pūṣann iha kratuṃ vidaḥ ||
RV_1,042.08a abhi sūyavasaṃ naya na navajvāro adhvane |
RV_1,042.08c pūṣann iha kratuṃ vidaḥ ||
RV_1,042.09a śagdhi pūrdhi pra yaṃsi ca śiśīhi prāsy udaram |
RV_1,042.09c pūṣann iha kratuṃ vidaḥ ||
RV_1,042.10a na pūṣaṇam methāmasi sūktair abhi gṛṇīmasi |
RV_1,042.10c vasūni dasmam īmahe ||

RV_1,043.01a kad rudrāya pracetase mīḷhuṣṭamāya tavyase |
RV_1,043.01c vocema śantamaṃ hṛde ||
RV_1,043.02a yathā no aditiḥ karat paśve nṛbhyo yathā gave |
RV_1,043.02c yathā tokāya rudriyam ||
RV_1,043.03a yathā no mitro varuṇo yathā rudraś ciketati |
RV_1,043.03c yathā viśve sajoṣasaḥ ||
RV_1,043.04a gāthapatim medhapatiṃ rudraṃ jalāṣabheṣajam |
RV_1,043.04c tac chaṃyoḥ sumnam īmahe ||
RV_1,043.05a yaḥ śukra iva sūryo hiraṇyam iva rocate |
RV_1,043.05c śreṣṭho devānāṃ vasuḥ ||
RV_1,043.06a śaṃ naḥ karaty arvate sugam meṣāya meṣye |
RV_1,043.06c nṛbhyo nāribhyo gave ||
RV_1,043.07a asme soma śriyam adhi ni dhehi śatasya nṛṇām |
RV_1,043.07c mahi śravas tuvinṛmṇam ||
RV_1,043.08a mā naḥ somaparibādho mārātayo juhuranta |
RV_1,043.08c ā na indo vāje bhaja ||
RV_1,043.09a yās te prajā amṛtasya parasmin dhāmann ṛtasya |
RV_1,043.09c mūrdhā nābhā soma vena ābhūṣantīḥ soma vedaḥ ||

RV_1,044.01a agne vivasvad uṣasaś citraṃ rādho amartya |
RV_1,044.01c ā dāśuṣe jātavedo vahā tvam adyā devāṃ uṣarbudhaḥ ||
RV_1,044.02a juṣṭo hi dūto asi havyavāhano 'gne rathīr adhvarāṇām |
RV_1,044.02c sajūr aśvibhyām uṣasā suvīryam asme dhehi śravo bṛhat ||
RV_1,044.03a adyā dūtaṃ vṛṇīmahe vasum agnim purupriyam |
RV_1,044.03c dhūmaketum bhāṛjīkaṃ vyuṣṭiṣu yajñānām adhvaraśriyam ||
RV_1,044.04a śreṣṭhaṃ yaviṣṭham atithiṃ svāhutaṃ juṣṭaṃ janāya dāśuṣe |
RV_1,044.04c devāṃ acchā yātave jātavedasam agnim īḷe vyuṣṭiṣu ||
RV_1,044.05a staviṣyāmi tvām ahaṃ viśvasyāmṛta bhojana |
RV_1,044.05c agne trātāram amṛtam miyedhya yajiṣṭhaṃ havyavāhana ||
RV_1,044.06a suśaṃso bodhi gṛṇate yaviṣṭhya madhujihvaḥ svāhutaḥ |
RV_1,044.06c praskaṇvasya pratirann āyur jīvase namasyā daivyaṃ janam ||
RV_1,044.07a hotāraṃ viśvavedasaṃ saṃ hi tvā viśa indhate |
RV_1,044.07c sa ā vaha puruhūta pracetaso 'gne devāṃ iha dravat ||
RV_1,044.08a savitāram uṣasam aśvinā bhagam agniṃ vyuṣṭiṣu kṣapaḥ |
RV_1,044.08c kaṇvāsas tvā sutasomāsa indhate havyavāhaṃ svadhvara ||
RV_1,044.09a patir hy adhvarāṇām agne dūto viśām asi |
RV_1,044.09c uṣarbudha ā vaha somapītaye devāṃ adya svardṛśaḥ ||
RV_1,044.10a agne pūrvā anūṣaso vibhāvaso dīdetha viśvadarśataḥ |
RV_1,044.10c asi grāmeṣv avitā purohito 'si yajñeṣu mānuṣaḥ ||
RV_1,044.11a ni tvā yajñasya sādhanam agne hotāram ṛtvijam |
RV_1,044.11c manuṣvad deva dhīmahi pracetasaṃ jīraṃ dūtam amartyam ||
RV_1,044.12a yad devānām mitramahaḥ purohito 'ntaro yāsi dūtyam |
RV_1,044.12c sindhor iva prasvanitāsa ūrmayo 'gner bhrājante arcayaḥ ||
RV_1,044.13a śrudhi śrutkarṇa vahnibhir devair agne sayāvabhiḥ |
RV_1,044.13c ā sīdantu barhiṣi mitro aryamā prātaryāvāṇo adhvaram ||
RV_1,044.14a śṛṇvantu stomam marutaḥ sudānavo 'gnijihvā ṛtāvṛdhaḥ |
RV_1,044.14c pibatu somaṃ varuṇo dhṛtavrato 'śvibhyām uṣasā sajūḥ ||

RV_1,045.01a tvam agne vasūṃr iha rudrāṃ ādityāṃ uta |
RV_1,045.01c yajā svadhvaraṃ janam manujātaṃ ghṛtapruṣam ||
RV_1,045.02a śruṣṭīvāno hi dāśuṣe devā agne vicetasaḥ |
RV_1,045.02c tān rohidaśva girvaṇas trayastriṃśatam ā vaha ||
RV_1,045.03a priyamedhavad atrivaj jātavedo virūpavat |
RV_1,045.03c aṅgirasvan mahivrata praskaṇvasya śrudhī havam ||
RV_1,045.04a mahikerava ūtaye priyamedhā ahūṣata |
RV_1,045.04c rājantam adhvarāṇām agniṃ śukreṇa śociṣā ||
RV_1,045.05a ghṛtāhavana santyemā u ṣu śrudhī giraḥ |
RV_1,045.05c yābhiḥ kaṇvasya sūnavo havante 'vase tvā ||
RV_1,045.06a tvāṃ citraśravastama havante vikṣu jantavaḥ |
RV_1,045.06c śociṣkeśam purupriyāgne havyāya voḷhave ||
RV_1,045.07a ni tvā hotāram ṛtvijaṃ dadhire vasuvittamam |
RV_1,045.07c śrutkarṇaṃ saprathastamaṃ viprā agne diviṣṭiṣu ||
RV_1,045.08a ā tvā viprā acucyavuḥ sutasomā abhi prayaḥ |
RV_1,045.08c bṛhad bhā bibhrato havir agne martāya dāśuṣe ||
RV_1,045.09a prātaryāvṇaḥ sahaskṛta somapeyāya santya |
RV_1,045.09c ihādya daivyaṃ janam barhir ā sādayā vaso ||
RV_1,045.10a arvāñcaṃ daivyaṃ janam agne yakṣva sahūtibhiḥ |
RV_1,045.10c ayaṃ somaḥ sudānavas tam pāta tiroahnyam ||

RV_1,046.01a eṣo uṣā apūrvyā vy ucchati priyā divaḥ |
RV_1,046.01c stuṣe vām aśvinā bṛhat ||
RV_1,046.02a yā dasrā sindhumātarā manotarā rayīṇām |
RV_1,046.02c dhiyā devā vasuvidā ||
RV_1,046.03a vacyante vāṃ kakuhāso jūrṇāyām adhi viṣṭapi |
RV_1,046.03c yad vāṃ ratho vibhiṣ patāt ||
RV_1,046.04a haviṣā jāro apām piparti papurir narā |
RV_1,046.04c pitā kuṭasya carṣaṇiḥ ||
RV_1,046.05a ādāro vām matīnāṃ nāsatyā matavacasā |
RV_1,046.05c pātaṃ somasya dhṛṣṇuyā ||
RV_1,046.06a yā naḥ pīparad aśvinā jyotiṣmatī tamas tiraḥ |
RV_1,046.06c tām asme rāsāthām iṣam ||
RV_1,046.07a ā no nāvā matīnāṃ yātam pārāya gantave |
RV_1,046.07c yuñjāthām aśvinā ratham ||
RV_1,046.08a aritraṃ vāṃ divas pṛthu tīrthe sindhūnāṃ rathaḥ |
RV_1,046.08c dhiyā yuyujra indavaḥ ||
RV_1,046.09a divas kaṇvāsa indavo vasu sindhūnām pade |
RV_1,046.09c svaṃ vavriṃ kuha dhitsathaḥ ||
RV_1,046.10a abhūd u bhā u aṃśave hiraṇyam prati sūryaḥ |
RV_1,046.10c vy akhyaj jihvayāsitaḥ ||
RV_1,046.11a abhūd u pāram etave panthā ṛtasya sādhuyā |
RV_1,046.11c adarśi vi srutir divaḥ ||
RV_1,046.12a tat-tad id aśvinor avo jaritā prati bhūṣati |
RV_1,046.12c made somasya pipratoḥ ||
RV_1,046.13a vāvasānā vivasvati somasya pītyā girā |
RV_1,046.13c manuṣvac chambhū ā gatam ||
RV_1,046.14a yuvor uṣā anu śriyam parijmanor upācarat |
RV_1,046.14c ṛtā vanatho aktubhiḥ ||
RV_1,046.15a ubhā pibatam aśvinobhā naḥ śarma yacchatam |
RV_1,046.15c avidriyābhir ūtibhiḥ ||

RV_1,047.01a ayaṃ vām madhumattamaḥ sutaḥ soma ṛtāvṛdhā |
RV_1,047.01c tam aśvinā pibataṃ tiroahnyaṃ dhattaṃ ratnāni dāśuṣe ||
RV_1,047.02a trivandhureṇa trivṛtā supeśasā rathenā yātam aśvinā |
RV_1,047.02c kaṇvāso vām brahma kṛṇvanty adhvare teṣāṃ su śṛṇutaṃ havam ||
RV_1,047.03a aśvinā madhumattamam pātaṃ somam ṛtāvṛdhā |
RV_1,047.03c athādya dasrā vasu bibhratā rathe dāśvāṃsam upa gacchatam ||
RV_1,047.04a triṣadhasthe barhiṣi viśvavedasā madhvā yajñam mimikṣatam |
RV_1,047.04c kaṇvāso vāṃ sutasomā abhidyavo yuvāṃ havante aśvinā ||
RV_1,047.05a yābhiḥ kaṇvam abhiṣṭibhiḥ prāvataṃ yuvam aśvinā |
RV_1,047.05c tābhiḥ ṣv asmāṃ avataṃ śubhas patī pātaṃ somam ṛtāvṛdhā ||
RV_1,047.06a sudāse dasrā vasu bibhratā rathe pṛkṣo vahatam aśvinā |
RV_1,047.06c rayiṃ samudrād uta vā divas pary asme dhattam puruspṛham ||
RV_1,047.07a yan nāsatyā parāvati yad vā stho adhi turvaśe |
RV_1,047.07c ato rathena suvṛtā na ā gataṃ sākaṃ sūryasya raśmibhiḥ ||
RV_1,047.08a arvāñcā vāṃ saptayo 'dhvaraśriyo vahantu savaned upa |
RV_1,047.08c iṣam pṛñcantā sukṛte sudānava ā barhiḥ sīdataṃ narā ||
RV_1,047.09a tena nāsatyā gataṃ rathena sūryatvacā |
RV_1,047.09c yena śaśvad ūhathur dāśuṣe vasu madhvaḥ somasya pītaye ||
RV_1,047.10a ukthebhir arvāg avase purūvasū arkaiś ca ni hvayāmahe |
RV_1,047.10c śaśvat kaṇvānāṃ sadasi priye hi kaṃ somam papathur aśvinā ||

RV_1,048.01a saha vāmena na uṣo vy ucchā duhitar divaḥ |
RV_1,048.01c saha dyumnena bṛhatā vibhāvari rāyā devi dāsvatī ||
RV_1,048.02a aśvāvatīr gomatīr viśvasuvido bhūri cyavanta vastave |
RV_1,048.02c ud īraya prati mā sūnṛtā uṣaś coda rādho maghonām ||
RV_1,048.03a uvāsoṣā ucchāc ca nu devī jīrā rathānām |
RV_1,048.03c ye asyā ācaraṇeṣu dadhrire samudre na śravasyavaḥ ||
RV_1,048.04a uṣo ye te pra yāmeṣu yuñjate mano dānāya sūrayaḥ |
RV_1,048.04c atrāha tat kaṇva eṣāṃ kaṇvatamo nāma gṛṇāti nṛṇām ||
RV_1,048.05a ā ghā yoṣeva sūnary uṣā yāti prabhuñjatī |
RV_1,048.05c jarayantī vṛjanam padvad īyata ut pātayati pakṣiṇaḥ ||
RV_1,048.06a vi yā sṛjati samanaṃ vy arthinaḥ padaṃ na vety odatī |
RV_1,048.06c vayo nakiṣ ṭe paptivāṃsa āsate vyuṣṭau vājinīvati ||
RV_1,048.07a eṣāyukta parāvataḥ sūryasyodayanād adhi |
RV_1,048.07c śataṃ rathebhiḥ subhagoṣā iyaṃ vi yāty abhi mānuṣān ||
RV_1,048.08a viśvam asyā nānāma cakṣase jagaj jyotiṣ kṛṇoti sūnarī |
RV_1,048.08c apa dveṣo maghonī duhitā diva uṣā ucchad apa sridhaḥ ||
RV_1,048.09a uṣa ā bhāhi bhānunā candreṇa duhitar divaḥ |
RV_1,048.09c āvahantī bhūry asmabhyaṃ saubhagaṃ vyucchantī diviṣṭiṣu ||
RV_1,048.10a viśvasya hi prāṇanaṃ jīvanaṃ tve vi yad ucchasi sūnari |
RV_1,048.10c sā no rathena bṛhatā vibhāvari śrudhi citrāmaghe havam ||
RV_1,048.11a uṣo vājaṃ hi vaṃsva yaś citro mānuṣe jane |
RV_1,048.11c tenā vaha sukṛto adhvarāṃ upa ye tvā gṛṇanti vahnayaḥ ||
RV_1,048.12a viśvān devāṃ ā vaha somapītaye 'ntarikṣād uṣas tvam |
RV_1,048.12c sāsmāsu dhā gomad aśvāvad ukthyam uṣo vājaṃ suvīryam ||
RV_1,048.13a yasyā ruśanto arcayaḥ prati bhadrā adṛkṣata |
RV_1,048.13c sā no rayiṃ viśvavāraṃ supeśasam uṣā dadātu sugmyam ||
RV_1,048.14a ye cid dhi tvām ṛṣayaḥ pūrva ūtaye juhūre 'vase mahi |
RV_1,048.14c sā na stomāṃ abhi gṛṇīhi rādhasoṣaḥ śukreṇa śociṣā ||
RV_1,048.15a uṣo yad adya bhānunā vi dvārāv ṛṇavo divaḥ |
RV_1,048.15c pra no yacchatād avṛkam pṛthu cchardiḥ pra devi gomatīr iṣaḥ ||
RV_1,048.16a saṃ no rāyā bṛhatā viśvapeśasā mimikṣvā sam iḷābhir ā |
RV_1,048.16c saṃ dyumnena viśvaturoṣo mahi saṃ vājair vājinīvati ||

RV_1,049.01a uṣo bhadrebhir ā gahi divaś cid rocanād adhi |
RV_1,049.01c vahantv aruṇapsava upa tvā somino gṛham ||
RV_1,049.02a supeśasaṃ sukhaṃ rathaṃ yam adhyasthā uṣas tvam |
RV_1,049.02c tenā suśravasaṃ janam prāvādya duhitar divaḥ ||
RV_1,049.03a vayaś cit te patatriṇo dvipac catuṣpad arjuni |
RV_1,049.03c uṣaḥ prārann ṛtūṃr anu divo antebhyas pari ||
RV_1,049.04a vyucchantī hi raśmibhir viśvam ābhāsi rocanam |
RV_1,049.04c tāṃ tvām uṣar vasūyavo gīrbhiḥ kaṇvā ahūṣata ||

RV_1,050.01a ud u tyaṃ jātavedasaṃ devaṃ vahanti ketavaḥ |
RV_1,050.01c dṛśe viśvāya sūryam ||
RV_1,050.02a apa tye tāyavo yathā nakṣatrā yanty aktubhiḥ |
RV_1,050.02c sūrāya viśvacakṣase ||
RV_1,050.03a adṛśram asya ketavo vi raśmayo janāṃ anu |
RV_1,050.03c bhrājanto agnayo yathā ||
RV_1,050.04a taraṇir viśvadarśato jyotiṣkṛd asi sūrya |
RV_1,050.04c viśvam ā bhāsi rocanam ||
RV_1,050.05a pratyaṅ devānāṃ viśaḥ pratyaṅṅ ud eṣi mānuṣān |
RV_1,050.05c pratyaṅ viśvaṃ svar dṛśe ||
RV_1,050.06a yenā pāvaka cakṣasā bhuraṇyantaṃ janāṃ anu |
RV_1,050.06c tvaṃ varuṇa paśyasi ||
RV_1,050.07a vi dyām eṣi rajas pṛthv ahā mimāno aktubhiḥ |
RV_1,050.07c paśyañ janmāni sūrya ||
RV_1,050.08a sapta tvā harito rathe vahanti deva sūrya |
RV_1,050.08c śociṣkeśaṃ vicakṣaṇa ||
RV_1,050.09a ayukta sapta śundhyuvaḥ sūro rathasya naptyaḥ |
RV_1,050.09c tābhir yāti svayuktibhiḥ ||
RV_1,050.10a ud vayaṃ tamasas pari jyotiṣ paśyanta uttaram |
RV_1,050.10c devaṃ devatrā sūryam aganma jyotir uttamam ||
RV_1,050.11a udyann adya mitramaha ārohann uttarāṃ divam |
RV_1,050.11c hṛdrogam mama sūrya harimāṇaṃ ca nāśaya ||
RV_1,050.12a śukeṣu me harimāṇaṃ ropaṇākāsu dadhmasi |
RV_1,050.12c atho hāridraveṣu me harimāṇaṃ ni dadhmasi ||
RV_1,050.13a ud agād ayam ādityo viśvena sahasā saha |
RV_1,050.13c dviṣantam mahyaṃ randhayan mo ahaṃ dviṣate radham ||

RV_1,051.01a abhi tyam meṣam puruhūtam ṛgmiyam indraṃ gīrbhir madatā vasvo arṇavam |
RV_1,051.01c yasya dyāvo na vicaranti mānuṣā bhuje maṃhiṣṭham abhi vipram arcata ||
RV_1,051.02a abhīm avanvan svabhiṣṭim ūtayo 'ntarikṣaprāṃ taviṣībhir āvṛtam |
RV_1,051.02c indraṃ dakṣāsa ṛbhavo madacyutaṃ śatakratuṃ javanī sūnṛtāruhat ||
RV_1,051.03a tvaṃ gotram aṅgirobhyo 'vṛṇor apotātraye śatadureṣu gātuvit |
RV_1,051.03c sasena cid vimadāyāvaho vasv ājāv adriṃ vāvasānasya nartayan ||
RV_1,051.04a tvam apām apidhānāvṛṇor apādhārayaḥ parvate dānumad vasu |
RV_1,051.04c vṛtraṃ yad indra śavasāvadhīr ahim ād it sūryaṃ divy ārohayo dṛśe ||
RV_1,051.05a tvam māyābhir apa māyino 'dhamaḥ svadhābhir ye adhi śuptāv ajuhvata |
RV_1,051.05c tvam pipror nṛmaṇaḥ prārujaḥ puraḥ pra ṛjiśvānaṃ dasyuhatyeṣv āvitha ||
RV_1,051.06a tvaṃ kutsaṃ śuṣṇahatyeṣv āvithārandhayo 'tithigvāya śambaram |
RV_1,051.06c mahāntaṃ cid arbudaṃ ni kramīḥ padā sanād eva dasyuhatyāya jajñiṣe ||
RV_1,051.07a tve viśvā taviṣī sadhryag ghitā tava rādhaḥ somapīthāya harṣate |
RV_1,051.07c tava vajraś cikite bāhvor hito vṛścā śatror ava viśvāni vṛṣṇyā ||
RV_1,051.08a vi jānīhy āryān ye ca dasyavo barhiṣmate randhayā śāsad avratān |
RV_1,051.08c śākī bhava yajamānasya coditā viśvet tā te sadhamādeṣu cākana ||
RV_1,051.09a anuvratāya randhayann apavratān ābhūbhir indraḥ śnathayann anābhuvaḥ |
RV_1,051.09c vṛddhasya cid vardhato dyām inakṣata stavāno vamro vi jaghāna saṃdihaḥ ||
RV_1,051.10a takṣad yat ta uśanā sahasā saho vi rodasī majmanā bādhate śavaḥ |
RV_1,051.10c ā tvā vātasya nṛmaṇo manoyuja ā pūryamāṇam avahann abhi śravaḥ ||
RV_1,051.11a mandiṣṭa yad uśane kāvye sacāṃ indro vaṅkū vaṅkutarādhi tiṣṭhati |
RV_1,051.11c ugro yayiṃ nir apaḥ srotasāsṛjad vi śuṣṇasya dṛṃhitā airayat puraḥ ||
RV_1,051.12a ā smā rathaṃ vṛṣapāṇeṣu tiṣṭhasi śāryātasya prabhṛtā yeṣu mandase |
RV_1,051.12c indra yathā sutasomeṣu cākano 'narvāṇaṃ ślokam ā rohase divi ||
RV_1,051.13a adadā arbhām mahate vacasyave kakṣīvate vṛcayām indra sunvate |
RV_1,051.13c menābhavo vṛṣaṇaśvasya sukrato viśvet tā te savaneṣu pravācyā ||
RV_1,051.14a indro aśrāyi sudhyo nireke pajreṣu stomo duryo na yūpaḥ |
RV_1,051.14c aśvayur gavyū rathayur vasūyur indra id rāyaḥ kṣayati prayantā ||
RV_1,051.15a idaṃ namo vṛṣabhāya svarāje satyaśuṣmāya tavase 'vāci |
RV_1,051.15c asminn indra vṛjane sarvavīrāḥ smat sūribhis tava śarman syāma ||

RV_1,052.01a tyaṃ su meṣam mahayā svarvidaṃ śataṃ yasya subhvaḥ sākam īrate |
RV_1,052.01c atyaṃ na vājaṃ havanasyadaṃ ratham endraṃ vavṛtyām avase suvṛktibhiḥ ||
RV_1,052.02a sa parvato na dharuṇeṣv acyutaḥ sahasramūtis taviṣīṣu vāvṛdhe |
RV_1,052.02c indro yad vṛtram avadhīn nadīvṛtam ubjann arṇāṃsi jarhṛṣāṇo andhasā ||
RV_1,052.03a sa hi dvaro dvariṣu vavra ūdhani candrabudhno madavṛddho manīṣibhiḥ |
RV_1,052.03c indraṃ tam ahve svapasyayā dhiyā maṃhiṣṭharātiṃ sa hi paprir andhasaḥ ||
RV_1,052.04a ā yam pṛṇanti divi sadmabarhiṣaḥ samudraṃ na subhvaḥ svā abhiṣṭayaḥ |
RV_1,052.04c taṃ vṛtrahatye anu tasthur ūtayaḥ śuṣmā indram avātā ahrutapsavaḥ ||
RV_1,052.05a abhi svavṛṣṭim made asya yudhyato raghvīr iva pravaṇe sasrur ūtayaḥ |
RV_1,052.05c indro yad vajrī dhṛṣamāṇo andhasā bhinad valasya paridhīṃr iva tritaḥ ||
RV_1,052.06a parīṃ ghṛṇā carati titviṣe śavo 'po vṛtvī rajaso budhnam āśayat |
RV_1,052.06c vṛtrasya yat pravaṇe durgṛbhiśvano nijaghantha hanvor indra tanyatum ||
RV_1,052.07a hradaṃ na hi tvā nyṛṣanty ūrmayo brahmāṇīndra tava yāni vardhanā |
RV_1,052.07c tvaṣṭā cit te yujyaṃ vāvṛdhe śavas tatakṣa vajram abhibhūtyojasam ||
RV_1,052.08a jaghanvāṃ u haribhiḥ sambhṛtakratav indra vṛtram manuṣe gātuyann apaḥ |
RV_1,052.08c ayacchathā bāhvor vajram āyasam adhārayo divy ā sūryaṃ dṛśe ||
RV_1,052.09a bṛhat svaścandram amavad yad ukthyam akṛṇvata bhiyasā rohaṇaṃ divaḥ |
RV_1,052.09c yan mānuṣapradhanā indram ūtayaḥ svar nṛṣāco maruto 'madann anu ||
RV_1,052.10a dyauś cid asyāmavāṃ aheḥ svanād ayoyavīd bhiyasā vajra indra te |
RV_1,052.10c vṛtrasya yad badbadhānasya rodasī made sutasya śavasābhinac chiraḥ ||
RV_1,052.11a yad in nv indra pṛthivī daśabhujir ahāni viśvā tatananta kṛṣṭayaḥ |
RV_1,052.11c atrāha te maghavan viśrutaṃ saho dyām anu śavasā barhaṇā bhuvat ||
RV_1,052.12a tvam asya pāre rajaso vyomanaḥ svabhūtyojā avase dhṛṣanmanaḥ |
RV_1,052.12c cakṛṣe bhūmim pratimānam ojaso 'paḥ svaḥ paribhūr eṣy ā divam ||
RV_1,052.13a tvam bhuvaḥ pratimānam pṛthivyā ṛṣvavīrasya bṛhataḥ patir bhūḥ |
RV_1,052.13c viśvam āprā antarikṣam mahitvā satyam addhā nakir anyas tvāvān ||
RV_1,052.14a na yasya dyāvāpṛthivī anu vyaco na sindhavo rajaso antam ānaśuḥ |
RV_1,052.14c nota svavṛṣṭim made asya yudhyata eko anyac cakṛṣe viśvam ānuṣak ||
RV_1,052.15a ārcann atra marutaḥ sasminn ājau viśve devāso amadann anu tvā |
RV_1,052.15c vṛtrasya yad bhṛṣṭimatā vadhena ni tvam indra praty ānaṃ jaghantha ||

RV_1,053.01a ny ū ṣu vācam pra mahe bharāmahe gira indrāya sadane vivasvataḥ |
RV_1,053.01c nū cid dhi ratnaṃ sasatām ivāvidan na duṣṭutir draviṇodeṣu śasyate ||
RV_1,053.02a duro aśvasya dura indra gor asi duro yavasya vasuna inas patiḥ |
RV_1,053.02c śikṣānaraḥ pradivo akāmakarśanaḥ sakhā sakhibhyas tam idaṃ gṛṇīmasi ||
RV_1,053.03a śacīva indra purukṛd dyumattama taved idam abhitaś cekite vasu |
RV_1,053.03c ataḥ saṃgṛbhyābhibhūta ā bhara mā tvāyato jarituḥ kāmam ūnayīḥ ||
RV_1,053.04a ebhir dyubhiḥ sumanā ebhir indubhir nirundhāno amatiṃ gobhir aśvinā |
RV_1,053.04c indreṇa dasyuṃ darayanta indubhir yutadveṣasaḥ sam iṣā rabhemahi ||
RV_1,053.05a sam indra rāyā sam iṣā rabhemahi saṃ vājebhiḥ puruścandrair abhidyubhiḥ |
RV_1,053.05c saṃ devyā pramatyā vīraśuṣmayā goagrayāśvāvatyā rabhemahi ||
RV_1,053.06a te tvā madā amadan tāni vṛṣṇyā te somāso vṛtrahatyeṣu satpate |
RV_1,053.06c yat kārave daśa vṛtrāṇy aprati barhiṣmate ni sahasrāṇi barhayaḥ ||
RV_1,053.07a yudhā yudham upa ghed eṣi dhṛṣṇuyā purā puraṃ sam idaṃ haṃsy ojasā |
RV_1,053.07c namyā yad indra sakhyā parāvati nibarhayo namuciṃ nāma māyinam ||
RV_1,053.08a tvaṃ karañjam uta parṇayaṃ vadhīs tejiṣṭhayātithigvasya vartanī |
RV_1,053.08c tvaṃ śatā vaṅgṛdasyābhinat puro 'nānudaḥ pariṣūtā ṛjiśvanā ||
RV_1,053.09a tvam etāñ janarājño dvir daśābandhunā suśravasopajagmuṣaḥ |
RV_1,053.09c ṣaṣṭiṃ sahasrā navatiṃ nava śruto ni cakreṇa rathyā duṣpadāvṛṇak ||
RV_1,053.10a tvam āvitha suśravasaṃ tavotibhis tava trāmabhir indra tūrvayāṇam |
RV_1,053.10c tvam asmai kutsam atithigvam āyum mahe rājñe yūne arandhanāyaḥ ||
RV_1,053.11a ya udṛcīndra devagopāḥ sakhāyas te śivatamā asāma |
RV_1,053.11c tvāṃ stoṣāma tvayā suvīrā drāghīya āyuḥ prataraṃ dadhānāḥ ||

RV_1,054.01a mā no asmin maghavan pṛtsv aṃhasi nahi te antaḥ śavasaḥ parīṇaśe |
RV_1,054.01c akrandayo nadyo roruvad vanā kathā na kṣoṇīr bhiyasā sam ārata ||
RV_1,054.02a arcā śakrāya śākine śacīvate śṛṇvantam indram mahayann abhi ṣṭuhi |
RV_1,054.02c yo dhṛṣṇunā śavasā rodasī ubhe vṛṣā vṛṣatvā vṛṣabho nyṛñjate ||
RV_1,054.03a arcā dive bṛhate śūṣyaṃ vacaḥ svakṣatraṃ yasya dhṛṣato dhṛṣan manaḥ |
RV_1,054.03c bṛhacchravā asuro barhaṇā kṛtaḥ puro haribhyāṃ vṛṣabho ratho hi ṣaḥ ||
RV_1,054.04a tvaṃ divo bṛhataḥ sānu kopayo 'va tmanā dhṛṣatā śambaram bhinat |
RV_1,054.04c yan māyino vrandino mandinā dhṛṣac chitāṃ gabhastim aśanim pṛtanyasi ||
RV_1,054.05a ni yad vṛṇakṣi śvasanasya mūrdhani śuṣṇasya cid vrandino roruvad vanā |
RV_1,054.05c prācīnena manasā barhaṇāvatā yad adyā cit kṛṇavaḥ kas tvā pari ||
RV_1,054.06a tvam āvitha naryaṃ turvaśaṃ yaduṃ tvaṃ turvītiṃ vayyaṃ śatakrato |
RV_1,054.06c tvaṃ ratham etaśaṃ kṛtvye dhane tvam puro navatiṃ dambhayo nava ||
RV_1,054.07a sa ghā rājā satpatiḥ śūśuvaj jano rātahavyaḥ prati yaḥ śāsam invati |
RV_1,054.07c ukthā vā yo abhigṛṇāti rādhasā dānur asmā uparā pinvate divaḥ ||
RV_1,054.08a asamaṃ kṣatram asamā manīṣā pra somapā apasā santu neme |
RV_1,054.08c ye ta indra daduṣo vardhayanti mahi kṣatraṃ sthaviraṃ vṛṣṇyaṃ ca ||
RV_1,054.09a tubhyed ete bahulā adridugdhāś camūṣadaś camasā indrapānāḥ |
RV_1,054.09c vy aśnuhi tarpayā kāmam eṣām athā mano vasudeyāya kṛṣva ||
RV_1,054.10a apām atiṣṭhad dharuṇahvaraṃ tamo 'ntar vṛtrasya jaṭhareṣu parvataḥ |
RV_1,054.10c abhīm indro nadyo vavriṇā hitā viśvā anuṣṭhāḥ pravaṇeṣu jighnate ||
RV_1,054.11a sa śevṛdham adhi dhā dyumnam asme mahi kṣatraṃ janāṣāḷ indra tavyam |
RV_1,054.11c rakṣā ca no maghonaḥ pāhi sūrīn rāye ca naḥ svapatyā iṣe dhāḥ ||

RV_1,055.01a divaś cid asya varimā vi papratha indraṃ na mahnā pṛthivī cana prati |
RV_1,055.01c bhīmas tuviṣmāñ carṣaṇibhya ātapaḥ śiśīte vajraṃ tejase na vaṃsagaḥ ||
RV_1,055.02a so arṇavo na nadyaḥ samudriyaḥ prati gṛbhṇāti viśritā varīmabhiḥ |
RV_1,055.02c indraḥ somasya pītaye vṛṣāyate sanāt sa yudhma ojasā panasyate ||
RV_1,055.03a tvaṃ tam indra parvataṃ na bhojase maho nṛmṇasya dharmaṇām irajyasi |
RV_1,055.03c pra vīryeṇa devatāti cekite viśvasmā ugraḥ karmaṇe purohitaḥ ||
RV_1,055.04a sa id vane namasyubhir vacasyate cāru janeṣu prabruvāṇa indriyam |
RV_1,055.04c vṛṣā chandur bhavati haryato vṛṣā kṣemeṇa dhenām maghavā yad invati ||
RV_1,055.05a sa in mahāni samithāni majmanā kṛṇoti yudhma ojasā janebhyaḥ |
RV_1,055.05c adhā cana śrad dadhati tviṣīmata indrāya vajraṃ nighanighnate vadham ||
RV_1,055.06a sa hi śravasyuḥ sadanāni kṛtrimā kṣmayā vṛdhāna ojasā vināśayan |
RV_1,055.06c jyotīṃṣi kṛṇvann avṛkāṇi yajyave 'va sukratuḥ sartavā apaḥ sṛjat ||
RV_1,055.07a dānāya manaḥ somapāvann astu te 'rvāñcā harī vandanaśrud ā kṛdhi |
RV_1,055.07c yamiṣṭhāsaḥ sārathayo ya indra te na tvā ketā ā dabhnuvanti bhūrṇayaḥ ||
RV_1,055.08a aprakṣitaṃ vasu bibharṣi hastayor aṣāḷhaṃ sahas tanvi śruto dadhe |
RV_1,055.08c āvṛtāso 'vatāso na kartṛbhis tanūṣu te kratava indra bhūrayaḥ ||

RV_1,056.01a eṣa pra pūrvīr ava tasya camriṣo 'tyo na yoṣām ud ayaṃsta bhurvaṇiḥ |
RV_1,056.01c dakṣam mahe pāyayate hiraṇyayaṃ ratham āvṛtyā hariyogam ṛbhvasam ||
RV_1,056.02a taṃ gūrtayo nemanniṣaḥ parīṇasaḥ samudraṃ na saṃcaraṇe saniṣyavaḥ |
RV_1,056.02c patiṃ dakṣasya vidathasya nū saho giriṃ na venā adhi roha tejasā ||
RV_1,056.03a sa turvaṇir mahāṃ areṇu pauṃsye girer bhṛṣṭir na bhrājate tujā śavaḥ |
RV_1,056.03c yena śuṣṇam māyinam āyaso made dudhra ābhūṣu rāmayan ni dāmani ||
RV_1,056.04a devī yadi taviṣī tvāvṛdhotaya indraṃ siṣakty uṣasaṃ na sūryaḥ |
RV_1,056.04c yo dhṛṣṇunā śavasā bādhate tama iyarti reṇum bṛhad arhariṣvaṇiḥ ||
RV_1,056.05a vi yat tiro dharuṇam acyutaṃ rajo 'tiṣṭhipo diva ātāsu barhaṇā |
RV_1,056.05c svarmīḷhe yan mada indra harṣyāhan vṛtraṃ nir apām aubjo arṇavam ||
RV_1,056.06a tvaṃ divo dharuṇaṃ dhiṣa ojasā pṛthivyā indra sadaneṣu māhinaḥ |
RV_1,056.06c tvaṃ sutasya made ariṇā apo vi vṛtrasya samayā pāṣyārujaḥ ||

RV_1,057.01a pra maṃhiṣṭhāya bṛhate bṛhadraye satyaśuṣmāya tavase matim bhare |
RV_1,057.01c apām iva pravaṇe yasya durdharaṃ rādho viśvāyu śavase apāvṛtam ||
RV_1,057.02a adha te viśvam anu hāsad iṣṭaya āpo nimneva savanā haviṣmataḥ |
RV_1,057.02c yat parvate na samaśīta haryata indrasya vajraḥ śnathitā hiraṇyayaḥ ||
RV_1,057.03a asmai bhīmāya namasā sam adhvara uṣo na śubhra ā bharā panīyase |
RV_1,057.03c yasya dhāma śravase nāmendriyaṃ jyotir akāri harito nāyase ||
RV_1,057.04a ime ta indra te vayam puruṣṭuta ye tvārabhya carāmasi prabhūvaso |
RV_1,057.04c nahi tvad anyo girvaṇo giraḥ saghat kṣoṇīr iva prati no harya tad vacaḥ ||
RV_1,057.05a bhūri ta indra vīryaṃ tava smasy asya stotur maghavan kāmam ā pṛṇa |
RV_1,057.05c anu te dyaur bṛhatī vīryam mama iyaṃ ca te pṛthivī nema ojase ||
RV_1,057.06a tvaṃ tam indra parvatam mahām uruṃ vajreṇa vajrin parvaśaś cakartitha |
RV_1,057.06c avāsṛjo nivṛtāḥ sartavā apaḥ satrā viśvaṃ dadhiṣe kevalaṃ sahaḥ ||

RV_1,058.01a nū cit sahojā amṛto ni tundate hotā yad dūto abhavad vivasvataḥ |
RV_1,058.01c vi sādhiṣṭhebhiḥ pathibhī rajo mama ā devatātā haviṣā vivāsati ||
RV_1,058.02a ā svam adma yuvamāno ajaras tṛṣv aviṣyann ataseṣu tiṣṭhati |
RV_1,058.02c atyo na pṛṣṭham pruṣitasya rocate divo na sānu stanayann acikradat ||
RV_1,058.03a krāṇā rudrebhir vasubhiḥ purohito hotā niṣatto rayiṣāḷ amartyaḥ |
RV_1,058.03c ratho na vikṣv ṛñjasāna āyuṣu vy ānuṣag vāryā deva ṛṇvati ||
RV_1,058.04a vi vātajūto ataseṣu tiṣṭhate vṛthā juhūbhiḥ sṛṇyā tuviṣvaṇiḥ |
RV_1,058.04c tṛṣu yad agne vanino vṛṣāyase kṛṣṇaṃ ta ema ruśadūrme ajara ||
RV_1,058.05a tapurjambho vana ā vātacodito yūthe na sāhvāṃ ava vāti vaṃsagaḥ |
RV_1,058.05c abhivrajann akṣitam pājasā raja sthātuś caratham bhayate patatriṇaḥ ||
RV_1,058.06a dadhuṣ ṭvā bhṛgavo mānuṣeṣv ā rayiṃ na cāruṃ suhavaṃ janebhyaḥ |
RV_1,058.06c hotāram agne atithiṃ vareṇyam mitraṃ na śevaṃ divyāya janmane ||
RV_1,058.07a hotāraṃ sapta juhvo yajiṣṭhaṃ yaṃ vāghato vṛṇate adhvareṣu |
RV_1,058.07c agniṃ viśveṣām aratiṃ vasūnāṃ saparyāmi prayasā yāmi ratnam ||
RV_1,058.08a acchidrā sūno sahaso no adya stotṛbhyo mitramahaḥ śarma yaccha |
RV_1,058.08c agne gṛṇantam aṃhasa uruṣyorjo napāt pūrbhir āyasībhiḥ ||
RV_1,058.09a bhavā varūthaṃ gṛṇate vibhāvo bhavā maghavan maghavadbhyaḥ śarma |
RV_1,058.09c uruṣyāgne aṃhaso gṛṇantam prātar makṣū dhiyāvasur jagamyāt ||

RV_1,059.01a vayā id agne agnayas te anye tve viśve amṛtā mādayante |
RV_1,059.01c vaiśvānara nābhir asi kṣitīnāṃ sthūṇeva janāṃ upamid yayantha ||
RV_1,059.02a mūrdhā divo nābhir agniḥ pṛthivyā athābhavad aratī rodasyoḥ |
RV_1,059.02c taṃ tvā devāso 'janayanta devaṃ vaiśvānara jyotir id āryāya ||
RV_1,059.03a ā sūrye na raśmayo dhruvāso vaiśvānare dadhire 'gnā vasūni |
RV_1,059.03c yā parvateṣv oṣadhīṣv apsu yā mānuṣeṣv asi tasya rājā ||
RV_1,059.04a bṛhatī iva sūnave rodasī giro hotā manuṣyo na dakṣaḥ |
RV_1,059.04c svarvate satyaśuṣmāya pūrvīr vaiśvānarāya nṛtamāya yahvīḥ ||
RV_1,059.05a divaś cit te bṛhato jātavedo vaiśvānara pra ririce mahitvam |
RV_1,059.05c rājā kṛṣṭīnām asi mānuṣīṇāṃ yudhā devebhyo varivaś cakartha ||
RV_1,059.06a pra nū mahitvaṃ vṛṣabhasya vocaṃ yam pūravo vṛtrahaṇaṃ sacante |
RV_1,059.06c vaiśvānaro dasyum agnir jaghanvāṃ adhūnot kāṣṭhā ava śambaram bhet ||
RV_1,059.07a vaiśvānaro mahimnā viśvakṛṣṭir bharadvājeṣu yajato vibhāvā |
RV_1,059.07c śātavaneye śatinībhir agniḥ puruṇīthe jarate sūnṛtāvān ||

RV_1,060.01a vahniṃ yaśasaṃ vidathasya ketuṃ suprāvyaṃ dūtaṃ sadyoartham |
RV_1,060.01c dvijanmānaṃ rayim iva praśastaṃ rātim bharad bhṛgave mātariśvā ||
RV_1,060.02a asya śāsur ubhayāsaḥ sacante haviṣmanta uśijo ye ca martāḥ |
RV_1,060.02c divaś cit pūrvo ny asādi hotāpṛcchyo viśpatir vikṣu vedhāḥ ||
RV_1,060.03a taṃ navyasī hṛda ā jāyamānam asmat sukīrtir madhujihvam aśyāḥ |
RV_1,060.03c yam ṛtvijo vṛjane mānuṣāsaḥ prayasvanta āyavo jījananta ||
RV_1,060.04a uśik pāvako vasur mānuṣeṣu vareṇyo hotādhāyi vikṣu |
RV_1,060.04c damūnā gṛhapatir dama āṃ agnir bhuvad rayipatī rayīṇām ||
RV_1,060.05a taṃ tvā vayam patim agne rayīṇām pra śaṃsāmo matibhir gotamāsaḥ |
RV_1,060.05c āśuṃ na vājambharam marjayantaḥ prātar makṣū dhiyāvasur jagamyāt ||

RV_1,061.01a asmā id u pra tavase turāya prayo na harmi stomam māhināya |
RV_1,061.01c ṛcīṣamāyādhrigava oham indrāya brahmāṇi rātatamā ||
RV_1,061.02a asmā id u praya iva pra yaṃsi bharāmy āṅgūṣam bādhe suvṛkti |
RV_1,061.02c indrāya hṛdā manasā manīṣā pratnāya patye dhiyo marjayanta ||
RV_1,061.03a asmā id u tyam upamaṃ svarṣām bharāmy āṅgūṣam āsyena |
RV_1,061.03c maṃhiṣṭham acchoktibhir matīnāṃ suvṛktibhiḥ sūriṃ vāvṛdhadhyai ||
RV_1,061.04a asmā id u stomaṃ saṃ hinomi rathaṃ na taṣṭeva tatsināya |
RV_1,061.04c giraś ca girvāhase suvṛktīndrāya viśvaminvam medhirāya ||
RV_1,061.05a asmā id u saptim iva śravasyendrāyārkaṃ juhvā sam añje |
RV_1,061.05c vīraṃ dānaukasaṃ vandadhyai purāṃ gūrtaśravasaṃ darmāṇam ||
RV_1,061.06a asmā id u tvaṣṭā takṣad vajraṃ svapastamaṃ svaryaṃ raṇāya |
RV_1,061.06c vṛtrasya cid vidad yena marma tujann īśānas tujatā kiyedhāḥ ||
RV_1,061.07a asyed u mātuḥ savaneṣu sadyo mahaḥ pitum papivāñ cārv annā |
RV_1,061.07c muṣāyad viṣṇuḥ pacataṃ sahīyān vidhyad varāhaṃ tiro adrim astā ||
RV_1,061.08a asmā id u gnāś cid devapatnīr indrāyārkam ahihatya ūvuḥ |
RV_1,061.08c pari dyāvāpṛthivī jabhra urvī nāsya te mahimānam pari ṣṭaḥ ||
RV_1,061.09a asyed eva pra ririce mahitvaṃ divas pṛthivyāḥ pary antarikṣāt |
RV_1,061.09c svarāḷ indro dama ā viśvagūrtaḥ svarir amatro vavakṣe raṇāya ||
RV_1,061.10a asyed eva śavasā śuṣantaṃ vi vṛścad vajreṇa vṛtram indraḥ |
RV_1,061.10c gā na vrāṇā avanīr amuñcad abhi śravo dāvane sacetāḥ ||
RV_1,061.11a asyed u tveṣasā ranta sindhavaḥ pari yad vajreṇa sīm ayacchat |
RV_1,061.11c īśānakṛd dāśuṣe daśasyan turvītaye gādhaṃ turvaṇiḥ kaḥ ||
RV_1,061.12a asmā id u pra bharā tūtujāno vṛtrāya vajram īśānaḥ kiyedhāḥ |
RV_1,061.12c gor na parva vi radā tiraśceṣyann arṇāṃsy apāṃ caradhyai ||
RV_1,061.13a asyed u pra brūhi pūrvyāṇi turasya karmāṇi navya ukthaiḥ |
RV_1,061.13c yudhe yad iṣṇāna āyudhāny ṛghāyamāṇo niriṇāti śatrūn ||
RV_1,061.14a asyed u bhiyā girayaś ca dṛḷhā dyāvā ca bhūmā januṣas tujete |
RV_1,061.14c upo venasya joguvāna oṇiṃ sadyo bhuvad vīryāya nodhāḥ ||
RV_1,061.15a asmā id u tyad anu dāyy eṣām eko yad vavne bhūrer īśānaḥ |
RV_1,061.15c praitaśaṃ sūrye paspṛdhānaṃ sauvaśvye suṣvim āvad indraḥ ||
RV_1,061.16a evā te hāriyojanā suvṛktīndra brahmāṇi gotamāso akran |
RV_1,061.16c aiṣu viśvapeśasaṃ dhiyaṃ dhāḥ prātar makṣū dhiyāvasur jagamyāt ||

RV_1,062.01a pra manmahe śavasānāya śūṣam āṅgūṣaṃ girvaṇase aṅgirasvat |
RV_1,062.01c suvṛktibhi stuvata ṛgmiyāyārcāmārkaṃ nare viśrutāya ||
RV_1,062.02a pra vo mahe mahi namo bharadhvam āṅgūṣyaṃ śavasānāya sāma |
RV_1,062.02c yenā naḥ pūrve pitaraḥ padajñā arcanto aṅgiraso gā avindan ||
RV_1,062.03a indrasyāṅgirasāṃ ceṣṭau vidat saramā tanayāya dhāsim |
RV_1,062.03c bṛhaspatir bhinad adriṃ vidad gāḥ sam usriyābhir vāvaśanta naraḥ ||
RV_1,062.04a sa suṣṭubhā sa stubhā sapta vipraiḥ svareṇādriṃ svaryo navagvaiḥ |
RV_1,062.04c saraṇyubhiḥ phaligam indra śakra valaṃ raveṇa darayo daśagvaiḥ ||
RV_1,062.05a gṛṇāno aṅgirobhir dasma vi var uṣasā sūryeṇa gobhir andhaḥ |
RV_1,062.05c vi bhūmyā aprathaya indra sānu divo raja uparam astabhāyaḥ ||
RV_1,062.06a tad u prayakṣatamam asya karma dasmasya cārutamam asti daṃsaḥ |
RV_1,062.06c upahvare yad uparā apinvan madhvarṇaso nadyaś catasraḥ ||
RV_1,062.07a dvitā vi vavre sanajā sanīḷe ayāsya stavamānebhir arkaiḥ |
RV_1,062.07c bhago na mene parame vyomann adhārayad rodasī sudaṃsāḥ ||
RV_1,062.08a sanād divam pari bhūmā virūpe punarbhuvā yuvatī svebhir evaiḥ |
RV_1,062.08c kṛṣṇebhir aktoṣā ruśadbhir vapurbhir ā carato anyānyā ||
RV_1,062.09a sanemi sakhyaṃ svapasyamānaḥ sūnur dādhāra śavasā sudaṃsāḥ |
RV_1,062.09c āmāsu cid dadhiṣe pakvam antaḥ payaḥ kṛṣṇāsu ruśad rohiṇīṣu ||
RV_1,062.10a sanāt sanīḷā avanīr avātā vratā rakṣante amṛtāḥ sahobhiḥ |
RV_1,062.10c purū sahasrā janayo na patnīr duvasyanti svasāro ahrayāṇam ||
RV_1,062.11a sanāyuvo namasā navyo arkair vasūyavo matayo dasma dadruḥ |
RV_1,062.11c patiṃ na patnīr uśatīr uśantaṃ spṛśanti tvā śavasāvan manīṣāḥ ||
RV_1,062.12a sanād eva tava rāyo gabhastau na kṣīyante nopa dasyanti dasma |
RV_1,062.12c dyumāṃ asi kratumāṃ indra dhīraḥ śikṣā śacīvas tava naḥ śacībhiḥ ||
RV_1,062.13a sanāyate gotama indra navyam atakṣad brahma hariyojanāya |
RV_1,062.13c sunīthāya naḥ śavasāna nodhāḥ prātar makṣū dhiyāvasur jagamyāt ||

RV_1,063.01a tvam mahāṃ indra yo ha śuṣmair dyāvā jajñānaḥ pṛthivī ame dhāḥ |
RV_1,063.01c yad dha te viśvā girayaś cid abhvā bhiyā dṛḷhāsaḥ kiraṇā naijan ||
RV_1,063.02a ā yad dharī indra vivratā ver ā te vajraṃ jaritā bāhvor dhāt |
RV_1,063.02c yenāviharyatakrato amitrān pura iṣṇāsi puruhūta pūrvīḥ ||
RV_1,063.03a tvaṃ satya indra dhṛṣṇur etān tvam ṛbhukṣā naryas tvaṃ ṣāṭ |
RV_1,063.03c tvaṃ śuṣṇaṃ vṛjane pṛkṣa āṇau yūne kutsāya dyumate sacāhan ||
RV_1,063.04a tvaṃ ha tyad indra codīḥ sakhā vṛtraṃ yad vajrin vṛṣakarmann ubhnāḥ |
RV_1,063.04c yad dha śūra vṛṣamaṇaḥ parācair vi dasyūṃr yonāv akṛto vṛthāṣāṭ ||
RV_1,063.05a tvaṃ ha tyad indrāriṣaṇyan dṛḷhasya cin martānām ajuṣṭau |
RV_1,063.05c vy asmad ā kāṣṭhā arvate var ghaneva vajriñ chnathihy amitrān ||
RV_1,063.06a tvāṃ ha tyad indrārṇasātau svarmīḷhe nara ājā havante |
RV_1,063.06c tava svadhāva iyam ā samarya ūtir vājeṣv atasāyyā bhūt ||
RV_1,063.07a tvaṃ ha tyad indra sapta yudhyan puro vajrin purukutsāya dardaḥ |
RV_1,063.07c barhir na yat sudāse vṛthā varg aṃho rājan varivaḥ pūrave kaḥ ||
RV_1,063.08a tvaṃ tyāṃ na indra deva citrām iṣam āpo na pīpayaḥ parijman |
RV_1,063.08c yayā śūra praty asmabhyaṃ yaṃsi tmanam ūrjaṃ na viśvadha kṣaradhyai ||
RV_1,063.09a akāri ta indra gotamebhir brahmāṇy oktā namasā haribhyām |
RV_1,063.09c supeśasaṃ vājam ā bharā naḥ prātar makṣū dhiyāvasur jagamyāt ||

RV_1,064.01a vṛṣṇe śardhāya sumakhāya vedhase nodhaḥ suvṛktim pra bharā marudbhyaḥ |
RV_1,064.01c apo na dhīro manasā suhastyo giraḥ sam añje vidatheṣv ābhuvaḥ ||
RV_1,064.02a te jajñire diva ṛṣvāsa ukṣaṇo rudrasya maryā asurā arepasaḥ |
RV_1,064.02c pāvakāsaḥ śucayaḥ sūryā iva satvāno na drapsino ghoravarpasaḥ ||
RV_1,064.03a yuvāno rudrā ajarā abhogghano vavakṣur adhrigāvaḥ parvatā iva |
RV_1,064.03c dṛḷhā cid viśvā bhuvanāni pārthivā pra cyāvayanti divyāni majmanā ||
RV_1,064.04a citrair añjibhir vapuṣe vy añjate vakṣassu rukmāṃ adhi yetire śubhe |
RV_1,064.04c aṃseṣv eṣāṃ ni mimṛkṣur ṛṣṭayaḥ sākaṃ jajñire svadhayā divo naraḥ ||
RV_1,064.05a īśānakṛto dhunayo riśādaso vātān vidyutas taviṣībhir akrata |
RV_1,064.05c duhanty ūdhar divyāni dhūtayo bhūmim pinvanti payasā parijrayaḥ ||
RV_1,064.06a pinvanty apo marutaḥ sudānavaḥ payo ghṛtavad vidatheṣv ābhuvaḥ |
RV_1,064.06c atyaṃ na mihe vi nayanti vājinam utsaṃ duhanti stanayantam akṣitam ||
RV_1,064.07a mahiṣāso māyinaś citrabhānavo girayo na svatavaso raghuṣyadaḥ |
RV_1,064.07c mṛgā iva hastinaḥ khādathā vanā yad āruṇīṣu taviṣīr ayugdhvam ||
RV_1,064.08a siṃhā iva nānadati pracetasaḥ piśā iva supiśo viśvavedasaḥ |
RV_1,064.08c kṣapo jinvantaḥ pṛṣatībhir ṛṣṭibhiḥ sam it sabādhaḥ śavasāhimanyavaḥ ||
RV_1,064.09a rodasī ā vadatā gaṇaśriyo nṛṣācaḥ śūrāḥ śavasāhimanyavaḥ |
RV_1,064.09c ā vandhureṣv amatir na darśatā vidyun na tasthau maruto ratheṣu vaḥ ||
RV_1,064.10a viśvavedaso rayibhiḥ samokasaḥ sammiślāsas taviṣībhir virapśinaḥ |
RV_1,064.10c astāra iṣuṃ dadhire gabhastyor anantaśuṣmā vṛṣakhādayo naraḥ ||
RV_1,064.11a hiraṇyayebhiḥ pavibhiḥ payovṛdha ujjighnanta āpathyo na parvatān |
RV_1,064.11c makhā ayāsaḥ svasṛto dhruvacyuto dudhrakṛto maruto bhrājadṛṣṭayaḥ ||
RV_1,064.12a ghṛṣum pāvakaṃ vaninaṃ vicarṣaṇiṃ rudrasya sūnuṃ havasā gṛṇīmasi |
RV_1,064.12c rajasturaṃ tavasam mārutaṃ gaṇam ṛjīṣiṇaṃ vṛṣaṇaṃ saścata śriye ||
RV_1,064.13a pra nū sa martaḥ śavasā janāṃ ati tasthau va ūtī maruto yam āvata |
RV_1,064.13c arvadbhir vājam bharate dhanā nṛbhir āpṛcchyaṃ kratum ā kṣeti puṣyati ||
RV_1,064.14a carkṛtyam marutaḥ pṛtsu duṣṭaraṃ dyumantaṃ śuṣmam maghavatsu dhattana |
RV_1,064.14c dhanaspṛtam ukthyaṃ viśvacarṣaṇiṃ tokam puṣyema tanayaṃ śataṃ himāḥ ||
RV_1,064.15a nū ṣṭhiram maruto vīravantam ṛtīṣāhaṃ rayim asmāsu dhatta |
RV_1,064.15c sahasriṇaṃ śatinaṃ śūśuvāṃsam prātar makṣū dhiyāvasur jagamyāt ||

RV_1,065.01 paśvā na tāyuṃ guhā catantaṃ namo yujānaṃ namo vahantam ||
RV_1,065.02 sajoṣā dhīrāḥ padair anu gmann upa tvā sīdan viśve yajatrāḥ ||
RV_1,065.03 ṛtasya devā anu vratā gur bhuvat pariṣṭir dyaur na bhūma ||
RV_1,065.04 vardhantīm āpaḥ panvā suśiśvim ṛtasya yonā garbhe sujātam ||
RV_1,065.05 puṣṭir na raṇvā kṣitir na pṛthvī girir na bhujma kṣodo na śambhu ||
RV_1,065.06 atyo nājman sargaprataktaḥ sindhur na kṣodaḥ ka īṃ varāte ||
RV_1,065.07 jāmiḥ sindhūnām bhrāteva svasrām ibhyān na rājā vanāny atti ||
RV_1,065.08 yad vātajūto vanā vy asthād agnir ha dāti romā pṛthivyāḥ ||
RV_1,065.09 śvasity apsu haṃso na sīdan kratvā cetiṣṭho viśām uṣarbhut ||
RV_1,065.10 somo na vedhā ṛtaprajātaḥ paśur na śiśvā vibhur dūrebhāḥ ||

RV_1,066.01 rayir na citrā sūro na saṃdṛg āyur na prāṇo nityo na sūnuḥ ||
RV_1,066.02 takvā na bhūrṇir vanā siṣakti payo na dhenuḥ śucir vibhāvā ||
RV_1,066.03 dādhāra kṣemam oko na raṇvo yavo na pakvo jetā janānām ||
RV_1,066.04 ṛṣir na stubhvā vikṣu praśasto vājī na prīto vayo dadhāti ||
RV_1,066.05 durokaśociḥ kratur na nityo jāyeva yonāv araṃ viśvasmai ||
RV_1,066.06 citro yad abhrāṭ chveto na vikṣu ratho na rukmī tveṣaḥ samatsu ||
RV_1,066.07 seneva sṛṣṭāmaṃ dadhāty astur na didyut tveṣapratīkā ||
RV_1,066.08 yamo ha jāto yamo janitvaṃ jāraḥ kanīnām patir janīnām ||
RV_1,066.09 taṃ vaś carāthā vayaṃ vasatyāstaṃ na gāvo nakṣanta iddham ||
RV_1,066.10 sindhur na kṣodaḥ pra nīcīr ainon navanta gāvaḥ svar dṛśīke ||

RV_1,067.01 vaneṣu jāyur marteṣu mitro vṛṇīte śruṣṭiṃ rājevājuryam ||
RV_1,067.02 kṣemo na sādhuḥ kratur na bhadro bhuvat svādhīr hotā havyavāṭ ||
RV_1,067.03 haste dadhāno nṛmṇā viśvāny ame devān dhād guhā niṣīdan ||
RV_1,067.04 vidantīm atra naro dhiyandhā hṛdā yat taṣṭān mantrāṃ aśaṃsan ||
RV_1,067.05 ajo na kṣāṃ dādhāra pṛthivīṃ tastambha dyām mantrebhiḥ satyaiḥ ||
RV_1,067.06 priyā padāni paśvo ni pāhi viśvāyur agne guhā guhaṃ gāḥ ||
RV_1,067.07 ya īṃ ciketa guhā bhavantam ā yaḥ sasāda dhārām ṛtasya ||
RV_1,067.08 vi ye cṛtanty ṛtā sapanta ād id vasūni pra vavācāsmai ||
RV_1,067.09 vi yo vīrutsu rodhan mahitvota prajā uta prasūṣv antaḥ ||
RV_1,067.10 cittir apāṃ dame viśvāyuḥ sadmeva dhīrāḥ sammāya cakruḥ ||

RV_1,068.01 śrīṇann upa sthād divam bhuraṇyu sthātuś caratham aktūn vy ūrṇot ||
RV_1,068.02 pari yad eṣām eko viśveṣām bhuvad devo devānām mahitvā ||
RV_1,068.03 ād it te viśve kratuṃ juṣanta śuṣkād yad deva jīvo janiṣṭhāḥ ||
RV_1,068.04 bhajanta viśve devatvaṃ nāma ṛtaṃ sapanto amṛtam evaiḥ ||
RV_1,068.05 ṛtasya preṣā ṛtasya dhītir viśvāyur viśve apāṃsi cakruḥ ||
RV_1,068.06 yas tubhyaṃ dāśād yo vā te śikṣāt tasmai cikitvān rayiṃ dayasva ||
RV_1,068.07 hotā niṣatto manor apatye sa cin nv āsām patī rayīṇām ||
RV_1,068.08 icchanta reto mithas tanūṣu saṃ jānata svair dakṣair amūrāḥ ||
RV_1,068.09 pitur na putrāḥ kratuṃ juṣanta śroṣan ye asya śāsaṃ turāsaḥ ||
RV_1,068.10 vi rāya aurṇod duraḥ purukṣuḥ pipeśa nākaṃ stṛbhir damūnāḥ ||

RV_1,069.01 śukraḥ śuśukvāṃ uṣo na jāraḥ paprā samīcī divo na jyotiḥ ||
RV_1,069.02 pari prajātaḥ kratvā babhūtha bhuvo devānām pitā putraḥ san ||
RV_1,069.03 vedhā adṛpto agnir vijānann ūdhar na gonāṃ svādmā pitūnām ||
RV_1,069.04 jane na śeva āhūryaḥ san madhye niṣatto raṇvo duroṇe ||
RV_1,069.05 putro na jāto raṇvo duroṇe vājī na prīto viśo vi tārīt ||
RV_1,069.06 viśo yad ahve nṛbhiḥ sanīḷā agnir devatvā viśvāny aśyāḥ ||
RV_1,069.07 nakiṣ ṭa etā vratā minanti nṛbhyo yad ebhyaḥ śruṣṭiṃ cakartha ||
RV_1,069.08 tat tu te daṃso yad ahan samānair nṛbhir yad yukto vive rapāṃsi ||
RV_1,069.09 uṣo na jāro vibhāvosraḥ saṃjñātarūpaś ciketad asmai ||
RV_1,069.10 tmanā vahanto duro vy ṛṇvan navanta viśve svar dṛśīke ||

RV_1,070.01 vanema pūrvīr aryo manīṣā agniḥ suśoko viśvāny aśyāḥ ||
RV_1,070.02 ā daivyāni vratā cikitvān ā mānuṣasya janasya janma ||
RV_1,070.03 garbho yo apāṃ garbho vanānāṃ garbhaś ca sthātāṃ garbhaś carathām ||
RV_1,070.04 adrau cid asmā antar duroṇe viśāṃ na viśvo amṛtaḥ svādhīḥ ||
RV_1,070.05 sa hi kṣapāvāṃ agnī rayīṇāṃ dāśad yo asmā araṃ sūktaiḥ ||
RV_1,070.06 etā cikitvo bhūmā ni pāhi devānāṃ janma martāṃś ca vidvān ||
RV_1,070.07 vardhān yam pūrvīḥ kṣapo virūpā sthātuś ca ratham ṛtapravītam ||
RV_1,070.08 arādhi hotā svar niṣattaḥ kṛṇvan viśvāny apāṃsi satyā ||
RV_1,070.09 goṣu praśastiṃ vaneṣu dhiṣe bharanta viśve baliṃ svar ṇaḥ ||
RV_1,070.10 vi tvā naraḥ purutrā saparyan pitur na jivrer vi vedo bharanta ||
RV_1,070.11 sādhur na gṛdhnur asteva śūro yāteva bhīmas tveṣaḥ samatsu ||

RV_1,071.01a upa pra jinvann uśatīr uśantam patiṃ na nityaṃ janayaḥ sanīḷāḥ |
RV_1,071.01c svasāraḥ śyāvīm aruṣīm ajuṣrañ citram ucchantīm uṣasaṃ na gāvaḥ ||
RV_1,071.02a vīḷu cid dṛḷhā pitaro na ukthair adriṃ rujann aṅgiraso raveṇa |
RV_1,071.02c cakrur divo bṛhato gātum asme ahaḥ svar vividuḥ ketum usrāḥ ||
RV_1,071.03a dadhann ṛtaṃ dhanayann asya dhītim ād id aryo didhiṣvo vibhṛtrāḥ |
RV_1,071.03c atṛṣyantīr apaso yanty acchā devāñ janma prayasā vardhayantīḥ ||
RV_1,071.04a mathīd yad īṃ vibhṛto mātariśvā gṛhe-gṛhe śyeto jenyo bhūt |
RV_1,071.04c ād īṃ rājñe na sahīyase sacā sann ā dūtyam bhṛgavāṇo vivāya ||
RV_1,071.05a mahe yat pitra īṃ rasaṃ dive kar ava tsarat pṛśanyaś cikitvān |
RV_1,071.05c sṛjad astā dhṛṣatā didyum asmai svāyāṃ devo duhitari tviṣiṃ dhāt ||
RV_1,071.06a sva ā yas tubhyaṃ dama ā vibhāti namo vā dāśād uśato anu dyūn |
RV_1,071.06c vardho agne vayo asya dvibarhā yāsad rāyā sarathaṃ yaṃ junāsi ||
RV_1,071.07a agniṃ viśvā abhi pṛkṣaḥ sacante samudraṃ na sravataḥ sapta yahvīḥ |
RV_1,071.07c na jāmibhir vi cikite vayo no vidā deveṣu pramatiṃ cikitvān ||
RV_1,071.08a ā yad iṣe nṛpatiṃ teja ānaṭ chuci reto niṣiktaṃ dyaur abhīke |
RV_1,071.08c agniḥ śardham anavadyaṃ yuvānaṃ svādhyaṃ janayat sūdayac ca ||
RV_1,071.09a mano na yo 'dhvanaḥ sadya ety ekaḥ satrā sūro vasva īśe |
RV_1,071.09c rājānā mitrāvaruṇā supāṇī goṣu priyam amṛtaṃ rakṣamāṇā ||
RV_1,071.10a mā no agne sakhyā pitryāṇi pra marṣiṣṭhā abhi viduṣ kaviḥ san |
RV_1,071.10c nabho na rūpaṃ jarimā mināti purā tasyā abhiśaster adhīhi ||

RV_1,072.01a ni kāvyā vedhasaḥ śaśvatas kar haste dadhāno naryā purūṇi |
RV_1,072.01c agnir bhuvad rayipatī rayīṇāṃ satrā cakrāṇo amṛtāni viśvā ||
RV_1,072.02a asme vatsam pari ṣantaṃ na vindann icchanto viśve amṛtā amūrāḥ |
RV_1,072.02c śramayuvaḥ padavyo dhiyandhās tasthuḥ pade parame cārv agneḥ ||
RV_1,072.03a tisro yad agne śaradas tvām ic chuciṃ ghṛtena śucayaḥ saparyān |
RV_1,072.03c nāmāni cid dadhire yajñiyāny asūdayanta tanvaḥ sujātāḥ ||
RV_1,072.04a ā rodasī bṛhatī vevidānāḥ pra rudriyā jabhrire yajñiyāsaḥ |
RV_1,072.04c vidan marto nemadhitā cikitvān agnim pade parame tasthivāṃsam ||
RV_1,072.05a saṃjānānā upa sīdann abhijñu patnīvanto namasyaṃ namasyan |
RV_1,072.05c ririkvāṃsas tanvaḥ kṛṇvata svāḥ sakhā sakhyur nimiṣi rakṣamāṇāḥ ||
RV_1,072.06a triḥ sapta yad guhyāni tve it padāvidan nihitā yajñiyāsaḥ |
RV_1,072.06c tebhī rakṣante amṛtaṃ sajoṣāḥ paśūñ ca sthātṝñ carathaṃ ca pāhi ||
RV_1,072.07a vidvāṃ agne vayunāni kṣitīnāṃ vy ānuṣak churudho jīvase dhāḥ |
RV_1,072.07c antarvidvāṃ adhvano devayānān atandro dūto abhavo havirvāṭ ||
RV_1,072.08a svādhyo diva ā sapta yahvī rāyo duro vy ṛtajñā ajānan |
RV_1,072.08c vidad gavyaṃ saramā dṛḷham ūrvaṃ yenā nu kam mānuṣī bhojate viṭ ||
RV_1,072.09a ā ye viśvā svapatyāni tasthuḥ kṛṇvānāso amṛtatvāya gātum |
RV_1,072.09c mahnā mahadbhiḥ pṛthivī vi tasthe mātā putrair aditir dhāyase veḥ ||
RV_1,072.10a adhi śriyaṃ ni dadhuś cārum asmin divo yad akṣī amṛtā akṛṇvan |
RV_1,072.10c adha kṣaranti sindhavo na sṛṣṭāḥ pra nīcīr agne aruṣīr ajānan ||

RV_1,073.01a rayir na yaḥ pitṛvitto vayodhāḥ supraṇītiś cikituṣo na śāsuḥ |
RV_1,073.01c syonaśīr atithir na prīṇāno hoteva sadma vidhato vi tārīt ||
RV_1,073.02a devo na yaḥ savitā satyamanmā kratvā nipāti vṛjanāni viśvā |
RV_1,073.02c purupraśasto amatir na satya ātmeva śevo didhiṣāyyo bhūt ||
RV_1,073.03a devo na yaḥ pṛthivīṃ viśvadhāyā upakṣeti hitamitro na rājā |
RV_1,073.03c puraḥsadaḥ śarmasado na vīrā anavadyā patijuṣṭeva nārī ||
RV_1,073.04a taṃ tvā naro dama ā nityam iddham agne sacanta kṣitiṣu dhruvāsu |
RV_1,073.04c adhi dyumnaṃ ni dadhur bhūry asmin bhavā viśvāyur dharuṇo rayīṇām ||
RV_1,073.05a vi pṛkṣo agne maghavāno aśyur vi sūrayo dadato viśvam āyuḥ |
RV_1,073.05c sanema vājaṃ samitheṣv aryo bhāgaṃ deveṣu śravase dadhānāḥ ||
RV_1,073.06a ṛtasya hi dhenavo vāvaśānāḥ smadūdhnīḥ pīpayanta dyubhaktāḥ |
RV_1,073.06c parāvataḥ sumatim bhikṣamāṇā vi sindhavaḥ samayā sasrur adrim ||
RV_1,073.07a tve agne sumatim bhikṣamāṇā divi śravo dadhire yajñiyāsaḥ |
RV_1,073.07c naktā ca cakrur uṣasā virūpe kṛṣṇaṃ ca varṇam aruṇaṃ ca saṃ dhuḥ ||
RV_1,073.08a yān rāye martān suṣūdo agne te syāma maghavāno vayaṃ ca |
RV_1,073.08c chāyeva viśvam bhuvanaṃ sisakṣy āpaprivān rodasī antarikṣam ||
RV_1,073.09a arvadbhir agne arvato nṛbhir nṝn vīrair vīrān vanuyāmā tvotāḥ |
RV_1,073.09c īśānāsaḥ pitṛvittasya rāyo vi sūrayaḥ śatahimā no aśyuḥ ||
RV_1,073.10a etā te agna ucathāni vedho juṣṭāni santu manase hṛde ca |
RV_1,073.10c śakema rāyaḥ sudhuro yamaṃ te 'dhi śravo devabhaktaṃ dadhānāḥ ||

RV_1,074.01a upaprayanto adhvaram mantraṃ vocemāgnaye |
RV_1,074.01c āre asme ca śṛṇvate ||
RV_1,074.02a yaḥ snīhitīṣu pūrvyaḥ saṃjagmānāsu kṛṣṭiṣu |
RV_1,074.02c arakṣad dāśuṣe gayam ||
RV_1,074.03a uta bruvantu jantava ud agnir vṛtrahājani |
RV_1,074.03c dhanañjayo raṇe-raṇe ||
RV_1,074.04a yasya dūto asi kṣaye veṣi havyāni vītaye |
RV_1,074.04c dasmat kṛṇoṣy adhvaram ||
RV_1,074.05a tam it suhavyam aṅgiraḥ sudevaṃ sahaso yaho |
RV_1,074.05c janā āhuḥ subarhiṣam ||
RV_1,074.06a ā ca vahāsi tāṃ iha devāṃ upa praśastaye |
RV_1,074.06c havyā suścandra vītaye ||
RV_1,074.07a na yor upabdir aśvyaḥ śṛṇve rathasya kac cana |
RV_1,074.07c yad agne yāsi dūtyam ||
RV_1,074.08a tvoto vājy ahrayo 'bhi pūrvasmād aparaḥ |
RV_1,074.08c pra dāśvāṃ agne asthāt ||
RV_1,074.09a uta dyumat suvīryam bṛhad agne vivāsasi |
RV_1,074.09c devebhyo deva dāśuṣe ||

RV_1,075.01a juṣasva saprathastamaṃ vaco devapsarastamam |
RV_1,075.01c havyā juhvāna āsani ||
RV_1,075.02a athā te aṅgirastamāgne vedhastama priyam |
RV_1,075.02c vocema brahma sānasi ||
RV_1,075.03a kas te jāmir janānām agne ko dāśvadhvaraḥ |
RV_1,075.03c ko ha kasminn asi śritaḥ ||
RV_1,075.04a tvaṃ jāmir janānām agne mitro asi priyaḥ |
RV_1,075.04c sakhā sakhibhya īḍyaḥ ||
RV_1,075.05a yajā no mitrāvaruṇā yajā devāṃ ṛtam bṛhat |
RV_1,075.05c agne yakṣi svaṃ damam ||

RV_1,076.01a kā ta upetir manaso varāya bhuvad agne śantamā kā manīṣā |
RV_1,076.01c ko vā yajñaiḥ pari dakṣaṃ ta āpa kena vā te manasā dāśema ||
RV_1,076.02a ehy agna iha hotā ni ṣīdādabdhaḥ su puraetā bhavā naḥ |
RV_1,076.02c avatāṃ tvā rodasī viśvaminve yajā mahe saumanasāya devān ||
RV_1,076.03a pra su viśvān rakṣaso dhakṣy agne bhavā yajñānām abhiśastipāvā |
RV_1,076.03c athā vaha somapatiṃ haribhyām ātithyam asmai cakṛmā sudāvne ||
RV_1,076.04a prajāvatā vacasā vahnir āsā ca huve ni ca satsīha devaiḥ |
RV_1,076.04c veṣi hotram uta potraṃ yajatra bodhi prayantar janitar vasūnām ||
RV_1,076.05a yathā viprasya manuṣo havirbhir devāṃ ayajaḥ kavibhiḥ kaviḥ san |
RV_1,076.05c evā hotaḥ satyatara tvam adyāgne mandrayā juhvā yajasva ||

RV_1,077.01a kathā dāśemāgnaye kāsmai devajuṣṭocyate bhāmine gīḥ |
RV_1,077.01c yo martyeṣv amṛta ṛtāvā hotā yajiṣṭha it kṛṇoti devān ||
RV_1,077.02a yo adhvareṣu śantama ṛtāvā hotā tam ū namobhir ā kṛṇudhvam |
RV_1,077.02c agnir yad ver martāya devān sa cā bodhāti manasā yajāti ||
RV_1,077.03a sa hi kratuḥ sa maryaḥ sa sādhur mitro na bhūd adbhutasya rathīḥ |
RV_1,077.03c tam medheṣu prathamaṃ devayantīr viśa upa bruvate dasmam ārīḥ ||
RV_1,077.04a sa no nṛṇāṃ nṛtamo riśādā agnir giro 'vasā vetu dhītim |
RV_1,077.04c tanā ca ye maghavānaḥ śaviṣṭhā vājaprasūtā iṣayanta manma ||
RV_1,077.05a evāgnir gotamebhir ṛtāvā viprebhir astoṣṭa jātavedāḥ |
RV_1,077.05c sa eṣu dyumnam pīpayat sa vājaṃ sa puṣṭiṃ yāti joṣam ā cikitvān ||

RV_1,078.01a abhi tvā gotamā girā jātavedo vicarṣaṇe |
RV_1,078.01c dyumnair abhi pra ṇonumaḥ ||
RV_1,078.02a tam u tvā gotamo girā rāyaskāmo duvasyati |
RV_1,078.02c dyumnair abhi pra ṇonumaḥ ||
RV_1,078.03a tam u tvā vājasātamam aṅgirasvad dhavāmahe |
RV_1,078.03c dyumnair abhi pra ṇonumaḥ ||
RV_1,078.04a tam u tvā vṛtrahantamaṃ yo dasyūṃr avadhūnuṣe |
RV_1,078.04c dyumnair abhi pra ṇonumaḥ ||
RV_1,078.05a avocāma rahūgaṇā agnaye madhumad vacaḥ |
RV_1,078.05c dyumnair abhi pra ṇonumaḥ ||

RV_1,079.01a hiraṇyakeśo rajaso visāre 'hir dhunir vāta iva dhrajīmān |
RV_1,079.01c śucibhrājā uṣaso navedā yaśasvatīr apasyuvo na satyāḥ ||
RV_1,079.02a ā te suparṇā aminantaṃ evaiḥ kṛṣṇo nonāva vṛṣabho yadīdam |
RV_1,079.02c śivābhir na smayamānābhir āgāt patanti miha stanayanty abhrā ||
RV_1,079.03a yad īm ṛtasya payasā piyāno nayann ṛtasya pathibhī rajiṣṭhaiḥ |
RV_1,079.03c aryamā mitro varuṇaḥ parijmā tvacam pṛñcanty uparasya yonau ||
RV_1,079.04a agne vājasya gomata īśānaḥ sahaso yaho |
RV_1,079.04c asme dhehi jātavedo mahi śravaḥ ||
RV_1,079.05a sa idhāno vasuṣ kavir agnir īḷenyo girā |
RV_1,079.05c revad asmabhyam purvaṇīka dīdihi ||
RV_1,079.06a kṣapo rājann uta tmanāgne vastor utoṣasaḥ |
RV_1,079.06c sa tigmajambha rakṣaso daha prati ||
RV_1,079.07a avā no agna ūtibhir gāyatrasya prabharmaṇi |
RV_1,079.07c viśvāsu dhīṣu vandya ||
RV_1,079.08a ā no agne rayim bhara satrāsāhaṃ vareṇyam |
RV_1,079.08c viśvāsu pṛtsu duṣṭaram ||
RV_1,079.09a ā no agne sucetunā rayiṃ viśvāyupoṣasam |
RV_1,079.09c mārḍīkaṃ dhehi jīvase ||
RV_1,079.10a pra pūtās tigmaśociṣe vāco gotamāgnaye |
RV_1,079.10c bharasva sumnayur giraḥ ||
RV_1,079.11a yo no agne 'bhidāsaty anti dūre padīṣṭa saḥ |
RV_1,079.11c asmākam id vṛdhe bhava ||
RV_1,079.12a sahasrākṣo vicarṣaṇir agnī rakṣāṃsi sedhati |
RV_1,079.12c hotā gṛṇīta ukthyaḥ ||

RV_1,080.01a itthā hi soma in made brahmā cakāra vardhanam |
RV_1,080.01c śaviṣṭha vajrinn ojasā pṛthivyā niḥ śaśā ahim arcann anu svarājyam ||
RV_1,080.02a sa tvāmadad vṛṣā madaḥ somaḥ śyenābhṛtaḥ sutaḥ |
RV_1,080.02c yenā vṛtraṃ nir adbhyo jaghantha vajrinn ojasārcann anu svarājyam ||
RV_1,080.03a prehy abhīhi dhṛṣṇuhi na te vajro ni yaṃsate |
RV_1,080.03c indra nṛmṇaṃ hi te śavo hano vṛtraṃ jayā apo 'rcann anu svarājyam ||
RV_1,080.04a nir indra bhūmyā adhi vṛtraṃ jaghantha nir divaḥ |
RV_1,080.04c sṛjā marutvatīr ava jīvadhanyā imā apo 'rcann anu svarājyam ||
RV_1,080.05a indro vṛtrasya dodhataḥ sānuṃ vajreṇa hīḷitaḥ |
RV_1,080.05c abhikramyāva jighnate 'paḥ sarmāya codayann arcann anu svarājyam ||
RV_1,080.06a adhi sānau ni jighnate vajreṇa śataparvaṇā |
RV_1,080.06c mandāna indro andhasaḥ sakhibhyo gātum icchaty arcann anu svarājyam ||
RV_1,080.07a indra tubhyam id adrivo 'nuttaṃ vajrin vīryam |
RV_1,080.07c yad dha tyam māyinam mṛgaṃ tam u tvam māyayāvadhīr arcann anu svarājyam ||
RV_1,080.08a vi te vajrāso asthiran navatiṃ nāvyā anu |
RV_1,080.08c mahat ta indra vīryam bāhvos te balaṃ hitam arcann anu svarājyam ||
RV_1,080.09a sahasraṃ sākam arcata pari ṣṭobhata viṃśatiḥ |
RV_1,080.09c śatainam anv anonavur indrāya brahmodyatam arcann anu svarājyam ||
RV_1,080.10a indro vṛtrasya taviṣīṃ nir ahan sahasā sahaḥ |
RV_1,080.10c mahat tad asya pauṃsyaṃ vṛtraṃ jaghanvāṃ asṛjad arcann anu svarājyam ||
RV_1,080.11a ime cit tava manyave vepete bhiyasā mahī |
RV_1,080.11c yad indra vajrinn ojasā vṛtram marutvāṃ avadhīr arcann anu svarājyam ||
RV_1,080.12a na vepasā na tanyatendraṃ vṛtro vi bībhayat |
RV_1,080.12c abhy enaṃ vajra āyasaḥ sahasrabhṛṣṭir āyatārcann anu svarājyam ||
RV_1,080.13a yad vṛtraṃ tava cāśaniṃ vajreṇa samayodhayaḥ |
RV_1,080.13c ahim indra jighāṃsato divi te badbadhe śavo 'rcann anu svarājyam ||
RV_1,080.14a abhiṣṭane te adrivo yat sthā jagac ca rejate |
RV_1,080.14c tvaṣṭā cit tava manyava indra vevijyate bhiyārcann anu svarājyam ||
RV_1,080.15a nahi nu yād adhīmasīndraṃ ko vīryā paraḥ |
RV_1,080.15c tasmin nṛmṇam uta kratuṃ devā ojāṃsi saṃ dadhur arcann anu svarājyam ||
RV_1,080.16a yām atharvā manuṣ pitā dadhyaṅ dhiyam atnata |
RV_1,080.16c tasmin brahmāṇi pūrvathendra ukthā sam agmatārcann anu svarājyam ||

RV_1,081.01a indro madāya vāvṛdhe śavase vṛtrahā nṛbhiḥ |
RV_1,081.01c tam in mahatsv ājiṣūtem arbhe havāmahe sa vājeṣu pra no 'viṣat ||
RV_1,081.02a asi hi vīra senyo 'si bhūri parādadiḥ |
RV_1,081.02c asi dabhrasya cid vṛdho yajamānāya śikṣasi sunvate bhūri te vasu ||
RV_1,081.03a yad udīrata ājayo dhṛṣṇave dhīyate dhanā |
RV_1,081.03c yukṣvā madacyutā harī kaṃ hanaḥ kaṃ vasau dadho 'smāṃ indra vasau dadhaḥ ||
RV_1,081.04a kratvā mahāṃ anuṣvadham bhīma ā vāvṛdhe śavaḥ |
RV_1,081.04c śriya ṛṣva upākayor ni śiprī harivān dadhe hastayor vajram āyasam ||
RV_1,081.05a ā paprau pārthivaṃ rajo badbadhe rocanā divi |
RV_1,081.05c na tvāvāṃ indra kaś cana na jāto na janiṣyate 'ti viśvaṃ vavakṣitha ||
RV_1,081.06a yo aryo martabhojanam parādadāti dāśuṣe |
RV_1,081.06c indro asmabhyaṃ śikṣatu vi bhajā bhūri te vasu bhakṣīya tava rādhasaḥ ||
RV_1,081.07a made-made hi no dadir yūthā gavām ṛjukratuḥ |
RV_1,081.07c saṃ gṛbhāya purū śatobhayāhastyā vasu śiśīhi rāya ā bhara ||
RV_1,081.08a mādayasva sute sacā śavase śūra rādhase |
RV_1,081.08c vidmā hi tvā purūvasum upa kāmān sasṛjmahe 'thā no 'vitā bhava ||
RV_1,081.09a ete ta indra jantavo viśvam puṣyanti vāryam |
RV_1,081.09c antar hi khyo janānām aryo vedo adāśuṣāṃ teṣāṃ no veda ā bhara ||

RV_1,082.01a upo ṣu śṛṇuhī giro maghavan mātathā iva |
RV_1,082.01c yadā naḥ sūnṛtāvataḥ kara ād arthayāsa id yojā nv indra te harī ||
RV_1,082.02a akṣann amīmadanta hy ava priyā adhūṣata |
RV_1,082.02c astoṣata svabhānavo viprā naviṣṭhayā matī yojā nv indra te harī ||
RV_1,082.03a susaṃdṛśaṃ tvā vayam maghavan vandiṣīmahi |
RV_1,082.03c pra nūnam pūrṇavandhura stuto yāhi vaśāṃ anu yojā nv indra te harī ||
RV_1,082.04a sa ghā taṃ vṛṣaṇaṃ ratham adhi tiṣṭhāti govidam |
RV_1,082.04c yaḥ pātraṃ hāriyojanam pūrṇam indra ciketati yojā nv indra te harī ||
RV_1,082.05a yuktas te astu dakṣiṇa uta savyaḥ śatakrato |
RV_1,082.05c tena jāyām upa priyām mandāno yāhy andhaso yojā nv indra te harī ||
RV_1,082.06a yunajmi te brahmaṇā keśinā harī upa pra yāhi dadhiṣe gabhastyoḥ |
RV_1,082.06c ut tvā sutāso rabhasā amandiṣuḥ pūṣaṇvān vajrin sam u patnyāmadaḥ ||

RV_1,083.01a aśvāvati prathamo goṣu gacchati suprāvīr indra martyas tavotibhiḥ |
RV_1,083.01c tam it pṛṇakṣi vasunā bhavīyasā sindhum āpo yathābhito vicetasaḥ ||
RV_1,083.02a āpo na devīr upa yanti hotriyam avaḥ paśyanti vitataṃ yathā rajaḥ |
RV_1,083.02c prācair devāsaḥ pra ṇayanti devayum brahmapriyaṃ joṣayante varā iva ||
RV_1,083.03a adhi dvayor adadhā ukthyaṃ vaco yatasrucā mithunā yā saparyataḥ |
RV_1,083.03c asaṃyatto vrate te kṣeti puṣyati bhadrā śaktir yajamānāya sunvate ||
RV_1,083.04a ād aṅgirāḥ prathamaṃ dadhire vaya iddhāgnayaḥ śamyā ye sukṛtyayā |
RV_1,083.04c sarvam paṇeḥ sam avindanta bhojanam aśvāvantaṃ gomantam ā paśuṃ naraḥ ||
RV_1,083.05a yajñair atharvā prathamaḥ pathas tate tataḥ sūryo vratapā vena ājani |
RV_1,083.05c ā gā ājad uśanā kāvyaḥ sacā yamasya jātam amṛtaṃ yajāmahe ||
RV_1,083.06a barhir vā yat svapatyāya vṛjyate 'rko vā ślokam āghoṣate divi |
RV_1,083.06c grāvā yatra vadati kārur ukthyas tasyed indro abhipitveṣu raṇyati ||

RV_1,084.01a asāvi soma indra te śaviṣṭha dhṛṣṇav ā gahi |
RV_1,084.01c ā tvā pṛṇaktv indriyaṃ rajaḥ sūryo na raśmibhiḥ ||
RV_1,084.02a indram id dharī vahato 'pratidhṛṣṭaśavasam |
RV_1,084.02c ṛṣīṇāṃ ca stutīr upa yajñaṃ ca mānuṣāṇām ||
RV_1,084.03a ā tiṣṭha vṛtrahan rathaṃ yuktā te brahmaṇā harī |
RV_1,084.03c arvācīnaṃ su te mano grāvā kṛṇotu vagnunā ||
RV_1,084.04a imam indra sutam piba jyeṣṭham amartyam madam |
RV_1,084.04c śukrasya tvābhy akṣaran dhārā ṛtasya sādane ||
RV_1,084.05a indrāya nūnam arcatokthāni ca bravītana |
RV_1,084.05c sutā amatsur indavo jyeṣṭhaṃ namasyatā sahaḥ ||
RV_1,084.06a nakiṣ ṭvad rathītaro harī yad indra yacchase |
RV_1,084.06c nakiṣ ṭvānu majmanā nakiḥ svaśva ānaśe ||
RV_1,084.07a ya eka id vidayate vasu martāya dāśuṣe |
RV_1,084.07c īśāno apratiṣkuta indro aṅga ||
RV_1,084.08a kadā martam arādhasam padā kṣumpam iva sphurat |
RV_1,084.08c kadā naḥ śuśravad gira indro aṅga ||
RV_1,084.09a yaś cid dhi tvā bahubhya ā sutāvāṃ āvivāsati |
RV_1,084.09c ugraṃ tat patyate śava indro aṅga ||
RV_1,084.10a svādor itthā viṣūvato madhvaḥ pibanti gauryaḥ |
RV_1,084.10c yā indreṇa sayāvarīr vṛṣṇā madanti śobhase vasvīr anu svarājyam ||
RV_1,084.11a tā asya pṛśanāyuvaḥ somaṃ śrīṇanti pṛśnayaḥ |
RV_1,084.11c priyā indrasya dhenavo vajraṃ hinvanti sāyakaṃ vasvīr anu svarājyam ||
RV_1,084.12a tā asya namasā sahaḥ saparyanti pracetasaḥ |
RV_1,084.12c vratāny asya saścire purūṇi pūrvacittaye vasvīr anu svarājyam ||
RV_1,084.13a indro dadhīco asthabhir vṛtrāṇy apratiṣkutaḥ |
RV_1,084.13c jaghāna navatīr nava ||
RV_1,084.14a icchann aśvasya yac chiraḥ parvateṣv apaśritam |
RV_1,084.14c tad vidac charyaṇāvati ||
RV_1,084.15a atrāha gor amanvata nāma tvaṣṭur apīcyam |
RV_1,084.15c itthā candramaso gṛhe ||
RV_1,084.16a ko adya yuṅkte dhuri gā ṛtasya śimīvato bhāmino durhṛṇāyūn |
RV_1,084.16c āsanniṣūn hṛtsvaso mayobhūn ya eṣām bhṛtyām ṛṇadhat sa jīvāt ||
RV_1,084.17a ka īṣate tujyate ko bibhāya ko maṃsate santam indraṃ ko anti |
RV_1,084.17c kas tokāya ka ibhāyota rāye 'dhi bravat tanve ko janāya ||
RV_1,084.18a ko agnim īṭṭe haviṣā ghṛtena srucā yajātā ṛtubhir dhruvebhiḥ |
RV_1,084.18c kasmai devā ā vahān āśu homa ko maṃsate vītihotraḥ sudevaḥ ||
RV_1,084.19a tvam aṅga pra śaṃsiṣo devaḥ śaviṣṭha martyam |
RV_1,084.19c na tvad anyo maghavann asti marḍitendra bravīmi te vacaḥ ||
RV_1,084.20a mā te rādhāṃsi mā ta ūtayo vaso 'smān kadā canā dabhan |
RV_1,084.20c viśvā ca na upamimīhi mānuṣa vasūni carṣaṇibhya ā ||

RV_1,085.01a pra ye śumbhante janayo na saptayo yāman rudrasya sūnavaḥ sudaṃsasaḥ |
RV_1,085.01c rodasī hi marutaś cakrire vṛdhe madanti vīrā vidatheṣu ghṛṣvayaḥ ||
RV_1,085.02a ta ukṣitāso mahimānam āśata divi rudrāso adhi cakrire sadaḥ |
RV_1,085.02c arcanto arkaṃ janayanta indriyam adhi śriyo dadhire pṛśnimātaraḥ ||
RV_1,085.03a gomātaro yac chubhayante añjibhis tanūṣu śubhrā dadhire virukmataḥ |
RV_1,085.03c bādhante viśvam abhimātinam apa vartmāny eṣām anu rīyate ghṛtam ||
RV_1,085.04a vi ye bhrājante sumakhāsa ṛṣṭibhiḥ pracyāvayanto acyutā cid ojasā |
RV_1,085.04c manojuvo yan maruto ratheṣv ā vṛṣavrātāsaḥ pṛṣatīr ayugdhvam ||
RV_1,085.05a pra yad ratheṣu pṛṣatīr ayugdhvaṃ vāje adrim maruto raṃhayantaḥ |
RV_1,085.05c utāruṣasya vi ṣyanti dhārāś carmevodabhir vy undanti bhūma ||
RV_1,085.06a ā vo vahantu saptayo raghuṣyado raghupatvānaḥ pra jigāta bāhubhiḥ |
RV_1,085.06c sīdatā barhir uru vaḥ sadas kṛtam mādayadhvam maruto madhvo andhasaḥ ||
RV_1,085.07a te 'vardhanta svatavaso mahitvanā nākaṃ tasthur uru cakrire sadaḥ |
RV_1,085.07c viṣṇur yad dhāvad vṛṣaṇam madacyutaṃ vayo na sīdann adhi barhiṣi priye ||
RV_1,085.08a śūrā ived yuyudhayo na jagmayaḥ śravasyavo na pṛtanāsu yetire |
RV_1,085.08c bhayante viśvā bhuvanā marudbhyo rājāna iva tveṣasaṃdṛśo naraḥ ||
RV_1,085.09a tvaṣṭā yad vajraṃ sukṛtaṃ hiraṇyayaṃ sahasrabhṛṣṭiṃ svapā avartayat |
RV_1,085.09c dhatta indro nary apāṃsi kartave 'han vṛtraṃ nir apām aubjad arṇavam ||
RV_1,085.10a ūrdhvaṃ nunudre 'vataṃ ta ojasā dādṛhāṇaṃ cid bibhidur vi parvatam |
RV_1,085.10c dhamanto vāṇam marutaḥ sudānavo made somasya raṇyāni cakrire ||
RV_1,085.11a jihmaṃ nunudre 'vataṃ tayā diśāsiñcann utsaṃ gotamāya tṛṣṇaje |
RV_1,085.11c ā gacchantīm avasā citrabhānavaḥ kāmaṃ viprasya tarpayanta dhāmabhiḥ ||
RV_1,085.12a yā vaḥ śarma śaśamānāya santi tridhātūni dāśuṣe yacchatādhi |
RV_1,085.12c asmabhyaṃ tāni maruto vi yanta rayiṃ no dhatta vṛṣaṇaḥ suvīram ||

RV_1,086.01a maruto yasya hi kṣaye pāthā divo vimahasaḥ |
RV_1,086.01c sa sugopātamo janaḥ ||
RV_1,086.02a yajñair vā yajñavāhaso viprasya vā matīnām |
RV_1,086.02c marutaḥ śṛṇutā havam ||
RV_1,086.03a uta vā yasya vājino 'nu vipram atakṣata |
RV_1,086.03c sa gantā gomati vraje ||
RV_1,086.04a asya vīrasya barhiṣi sutaḥ somo diviṣṭiṣu |
RV_1,086.04c uktham madaś ca śasyate ||
RV_1,086.05a asya śroṣantv ā bhuvo viśvā yaś carṣaṇīr abhi |
RV_1,086.05c sūraṃ cit sasruṣīr iṣaḥ ||
RV_1,086.06a pūrvībhir hi dadāśima śaradbhir maruto vayam |
RV_1,086.06c avobhiś carṣaṇīnām ||
RV_1,086.07a subhagaḥ sa prayajyavo maruto astu martyaḥ |
RV_1,086.07c yasya prayāṃsi parṣatha ||
RV_1,086.08a śaśamānasya vā naraḥ svedasya satyaśavasaḥ |
RV_1,086.08c vidā kāmasya venataḥ ||
RV_1,086.09a yūyaṃ tat satyaśavasa āviṣ karta mahitvanā |
RV_1,086.09c vidhyatā vidyutā rakṣaḥ ||
RV_1,086.10a gūhatā guhyaṃ tamo vi yāta viśvam atriṇam |
RV_1,086.10c jyotiṣ kartā yad uśmasi ||

RV_1,087.01a pratvakṣasaḥ pratavaso virapśino 'nānatā avithurā ṛjīṣiṇaḥ |
RV_1,087.01c juṣṭatamāso nṛtamāso añjibhir vy ānajre ke cid usrā iva stṛbhiḥ ||
RV_1,087.02a upahvareṣu yad acidhvaṃ yayiṃ vaya iva marutaḥ kena cit pathā |
RV_1,087.02c ścotanti kośā upa vo ratheṣv ā ghṛtam ukṣatā madhuvarṇam arcate ||
RV_1,087.03a praiṣām ajmeṣu vithureva rejate bhūmir yāmeṣu yad dha yuñjate śubhe |
RV_1,087.03c te krīḷayo dhunayo bhrājadṛṣṭayaḥ svayam mahitvam panayanta dhūtayaḥ ||
RV_1,087.04a sa hi svasṛt pṛṣadaśvo yuvā gaṇo 'yā īśānas taviṣībhir āvṛtaḥ |
RV_1,087.04c asi satya ṛṇayāvānedyo 'syā dhiyaḥ prāvitāthā vṛṣā gaṇaḥ ||
RV_1,087.05a pituḥ pratnasya janmanā vadāmasi somasya jihvā pra jigāti cakṣasā |
RV_1,087.05c yad īm indraṃ śamy ṛkvāṇa āśatād in nāmāni yajñiyāni dadhire ||
RV_1,087.06a śriyase kam bhānubhiḥ sam mimikṣire te raśmibhis ta ṛkvabhiḥ sukhādayaḥ |
RV_1,087.06c te vāśīmanta iṣmiṇo abhīravo vidre priyasya mārutasya dhāmnaḥ ||

RV_1,088.01a ā vidyunmadbhir marutaḥ svarkai rathebhir yāta ṛṣṭimadbhir aśvaparṇaiḥ |
RV_1,088.01c ā varṣiṣṭhayā na iṣā vayo na paptatā sumāyāḥ ||
RV_1,088.02a te 'ruṇebhir varam ā piśaṅgaiḥ śubhe kaṃ yānti rathatūrbhir aśvaiḥ |
RV_1,088.02c rukmo na citraḥ svadhitīvān pavyā rathasya jaṅghananta bhūma ||
RV_1,088.03a śriye kaṃ vo adhi tanūṣu vāśīr medhā vanā na kṛṇavanta ūrdhvā |
RV_1,088.03c yuṣmabhyaṃ kam marutaḥ sujātās tuvidyumnāso dhanayante adrim ||
RV_1,088.04a ahāni gṛdhrāḥ pary ā va āgur imāṃ dhiyaṃ vārkāryāṃ ca devīm |
RV_1,088.04c brahma kṛṇvanto gotamāso arkair ūrdhvaṃ nunudra utsadhim pibadhyai ||
RV_1,088.05a etat tyan na yojanam aceti sasvar ha yan maruto gotamo vaḥ |
RV_1,088.05c paśyan hiraṇyacakrān ayodaṃṣṭrān vidhāvato varāhūn ||
RV_1,088.06a eṣā syā vo maruto 'nubhartrī prati ṣṭobhati vāghato na vāṇī |
RV_1,088.06c astobhayad vṛthāsām anu svadhāṃ gabhastyoḥ ||

RV_1,089.01a ā no bhadrāḥ kratavo yantu viśvato 'dabdhāso aparītāsa udbhidaḥ |
RV_1,089.01c devā no yathā sadam id vṛdhe asann aprāyuvo rakṣitāro dive-dive ||
RV_1,089.02a devānām bhadrā sumatir ṛjūyatāṃ devānāṃ rātir abhi no ni vartatām |
RV_1,089.02c devānāṃ sakhyam upa sedimā vayaṃ devā na āyuḥ pra tirantu jīvase ||
RV_1,089.03a tān pūrvayā nividā hūmahe vayam bhagam mitram aditiṃ dakṣam asridham |
RV_1,089.03c aryamaṇaṃ varuṇaṃ somam aśvinā sarasvatī naḥ subhagā mayas karat ||
RV_1,089.04a tan no vāto mayobhu vātu bheṣajaṃ tan mātā pṛthivī tat pitā dyauḥ |
RV_1,089.04c tad grāvāṇaḥ somasuto mayobhuvas tad aśvinā śṛṇutaṃ dhiṣṇyā yuvam ||
RV_1,089.05a tam īśānaṃ jagatas tasthuṣas patiṃ dhiyañjinvam avase hūmahe vayam |
RV_1,089.05c pūṣā no yathā vedasām asad vṛdhe rakṣitā pāyur adabdhaḥ svastaye ||
RV_1,089.06a svasti na indro vṛddhaśravāḥ svasti naḥ pūṣā viśvavedāḥ |
RV_1,089.06c svasti nas tārkṣyo ariṣṭanemiḥ svasti no bṛhaspatir dadhātu ||
RV_1,089.07a pṛṣadaśvā marutaḥ pṛśnimātaraḥ śubhaṃyāvāno vidatheṣu jagmayaḥ |
RV_1,089.07c agnijihvā manavaḥ sūracakṣaso viśve no devā avasā gamann iha ||
RV_1,089.08a bhadraṃ karṇebhiḥ śṛṇuyāma devā bhadram paśyemākṣabhir yajatrāḥ |
RV_1,089.08c sthirair aṅgais tuṣṭuvāṃsas tanūbhir vy aśema devahitaṃ yad āyuḥ ||
RV_1,089.09a śatam in nu śarado anti devā yatrā naś cakrā jarasaṃ tanūnām |
RV_1,089.09c putrāso yatra pitaro bhavanti mā no madhyā rīriṣatāyur gantoḥ ||
RV_1,089.10a aditir dyaur aditir antarikṣam aditir mātā sa pitā sa putraḥ |
RV_1,089.10c viśve devā aditiḥ pañca janā aditir jātam aditir janitvam ||

RV_1,090.01a ṛjunītī no varuṇo mitro nayatu vidvān |
RV_1,090.01c aryamā devaiḥ sajoṣāḥ ||
RV_1,090.02a te hi vasvo vasavānās te apramūrā mahobhiḥ |
RV_1,090.02c vratā rakṣante viśvāhā ||
RV_1,090.03a te asmabhyaṃ śarma yaṃsann amṛtā martyebhyaḥ |
RV_1,090.03c bādhamānā apa dviṣaḥ ||
RV_1,090.04a vi naḥ pathaḥ suvitāya ciyantv indro marutaḥ |
RV_1,090.04c pūṣā bhago vandyāsaḥ ||
RV_1,090.05a uta no dhiyo goagrāḥ pūṣan viṣṇav evayāvaḥ |
RV_1,090.05c kartā naḥ svastimataḥ ||
RV_1,090.06a madhu vātā ṛtāyate madhu kṣaranti sindhavaḥ |
RV_1,090.06c mādhvīr naḥ santv oṣadhīḥ ||
RV_1,090.07a madhu naktam utoṣaso madhumat pārthivaṃ rajaḥ |
RV_1,090.07c madhu dyaur astu naḥ pitā ||
RV_1,090.08a madhumān no vanaspatir madhumāṃ astu sūryaḥ |
RV_1,090.08c mādhvīr gāvo bhavantu naḥ ||
RV_1,090.09a śaṃ no mitraḥ śaṃ varuṇaḥ śaṃ no bhavatv aryamā |
RV_1,090.09c śaṃ na indro bṛhaspatiḥ śaṃ no viṣṇur urukramaḥ ||

RV_1,091.01a tvaṃ soma pra cikito manīṣā tvaṃ rajiṣṭham anu neṣi panthām |
RV_1,091.01c tava praṇītī pitaro na indo deveṣu ratnam abhajanta dhīrāḥ ||
RV_1,091.02a tvaṃ soma kratubhiḥ sukratur bhūs tvaṃ dakṣaiḥ sudakṣo viśvavedāḥ |
RV_1,091.02c tvaṃ vṛṣā vṛṣatvebhir mahitvā dyumnebhir dyumny abhavo nṛcakṣāḥ ||
RV_1,091.03a rājño nu te varuṇasya vratāni bṛhad gabhīraṃ tava soma dhāma |
RV_1,091.03c śuciṣ ṭvam asi priyo na mitro dakṣāyyo aryamevāsi soma ||
RV_1,091.04a yā te dhāmāni divi yā pṛthivyāṃ yā parvateṣv oṣadhīṣv apsu |
RV_1,091.04c tebhir no viśvaiḥ sumanā aheḷan rājan soma prati havyā gṛbhāya ||
RV_1,091.05a tvaṃ somāsi satpatis tvaṃ rājota vṛtrahā |
RV_1,091.05c tvam bhadro asi kratuḥ ||
RV_1,091.06a tvaṃ ca soma no vaśo jīvātuṃ na marāmahe |
RV_1,091.06c priyastotro vanaspatiḥ ||
RV_1,091.07a tvaṃ soma mahe bhagaṃ tvaṃ yūna ṛtāyate |
RV_1,091.07c dakṣaṃ dadhāsi jīvase ||
RV_1,091.08a tvaṃ naḥ soma viśvato rakṣā rājann aghāyataḥ |
RV_1,091.08c na riṣyet tvāvataḥ sakhā ||
RV_1,091.09a soma yās te mayobhuva ūtayaḥ santi dāśuṣe |
RV_1,091.09c tābhir no 'vitā bhava ||
RV_1,091.10a imaṃ yajñam idaṃ vaco jujuṣāṇa upāgahi |
RV_1,091.10c soma tvaṃ no vṛdhe bhava ||
RV_1,091.11a soma gīrbhiṣ ṭvā vayaṃ vardhayāmo vacovidaḥ |
RV_1,091.11c sumṛḷīko na ā viśa ||
RV_1,091.12a gayasphāno amīvahā vasuvit puṣṭivardhanaḥ |
RV_1,091.12c sumitraḥ soma no bhava ||
RV_1,091.13a soma rārandhi no hṛdi gāvo na yavaseṣv ā |
RV_1,091.13c marya iva sva okye ||
RV_1,091.14a yaḥ soma sakhye tava rāraṇad deva martyaḥ |
RV_1,091.14c taṃ dakṣaḥ sacate kaviḥ ||
RV_1,091.15a uruṣyā ṇo abhiśasteḥ soma ni pāhy aṃhasaḥ |
RV_1,091.15c sakhā suśeva edhi naḥ ||
RV_1,091.16a ā pyāyasva sam etu te viśvataḥ soma vṛṣṇyam |
RV_1,091.16c bhavā vājasya saṃgathe ||
RV_1,091.17a ā pyāyasva madintama soma viśvebhir aṃśubhiḥ |
RV_1,091.17c bhavā naḥ suśravastamaḥ sakhā vṛdhe ||
RV_1,091.18a saṃ te payāṃsi sam u yantu vājāḥ saṃ vṛṣṇyāny abhimātiṣāhaḥ |
RV_1,091.18c āpyāyamāno amṛtāya soma divi śravāṃsy uttamāni dhiṣva ||
RV_1,091.19a yā te dhāmāni haviṣā yajanti tā te viśvā paribhūr astu yajñam |
RV_1,091.19c gayasphānaḥ prataraṇaḥ suvīro 'vīrahā pra carā soma duryān ||
RV_1,091.20a somo dhenuṃ somo arvantam āśuṃ somo vīraṃ karmaṇyaṃ dadāti |
RV_1,091.20c sādanyaṃ vidathyaṃ sabheyam pitṛśravaṇaṃ yo dadāśad asmai ||
RV_1,091.21a aṣāḷhaṃ yutsu pṛtanāsu papriṃ svarṣām apsāṃ vṛjanasya gopām |
RV_1,091.21c bhareṣujāṃ sukṣitiṃ suśravasaṃ jayantaṃ tvām anu madema soma ||
RV_1,091.22a tvam imā oṣadhīḥ soma viśvās tvam apo ajanayas tvaṃ gāḥ |
RV_1,091.22c tvam ā tatanthorv antarikṣaṃ tvaṃ jyotiṣā vi tamo vavartha ||
RV_1,091.23a devena no manasā deva soma rāyo bhāgaṃ sahasāvann abhi yudhya |
RV_1,091.23c mā tvā tanad īśiṣe vīryasyobhayebhyaḥ pra cikitsā gaviṣṭau ||

RV_1,092.01a etā u tyā uṣasaḥ ketum akrata pūrve ardhe rajaso bhānum añjate |
RV_1,092.01c niṣkṛṇvānā āyudhānīva dhṛṣṇavaḥ prati gāvo 'ruṣīr yanti mātaraḥ ||
RV_1,092.02a ud apaptann aruṇā bhānavo vṛthā svāyujo aruṣīr gā ayukṣata |
RV_1,092.02c akrann uṣāso vayunāni pūrvathā ruśantam bhānum aruṣīr aśiśrayuḥ ||
RV_1,092.03a arcanti nārīr apaso na viṣṭibhiḥ samānena yojanenā parāvataḥ |
RV_1,092.03c iṣaṃ vahantīḥ sukṛte sudānave viśved aha yajamānāya sunvate ||
RV_1,092.04a adhi peśāṃsi vapate nṛtūr ivāporṇute vakṣa usreva barjaham |
RV_1,092.04c jyotir viśvasmai bhuvanāya kṛṇvatī gāvo na vrajaṃ vy uṣā āvar tamaḥ ||
RV_1,092.05a praty arcī ruśad asyā adarśi vi tiṣṭhate bādhate kṛṣṇam abhvam |
RV_1,092.05c svaruṃ na peśo vidatheṣv añjañ citraṃ divo duhitā bhānum aśret ||
RV_1,092.06a atāriṣma tamasas pāram asyoṣā ucchantī vayunā kṛṇoti |
RV_1,092.06c śriye chando na smayate vibhātī supratīkā saumanasāyājīgaḥ ||
RV_1,092.07a bhāsvatī netrī sūnṛtānāṃ diva stave duhitā gotamebhiḥ |
RV_1,092.07c prajāvato nṛvato aśvabudhyān uṣo goagrāṃ upa māsi vājān ||
RV_1,092.08a uṣas tam aśyāṃ yaśasaṃ suvīraṃ dāsapravargaṃ rayim aśvabudhyam |
RV_1,092.08c sudaṃsasā śravasā yā vibhāsi vājaprasūtā subhage bṛhantam ||
RV_1,092.09a viśvāni devī bhuvanābhicakṣyā pratīcī cakṣur urviyā vi bhāti |
RV_1,092.09c viśvaṃ jīvaṃ carase bodhayantī viśvasya vācam avidan manāyoḥ ||
RV_1,092.10a punaḥ-punar jāyamānā purāṇī samānaṃ varṇam abhi śumbhamānā |
RV_1,092.10c śvaghnīva kṛtnur vija āminānā martasya devī jarayanty āyuḥ ||
RV_1,092.11a vyūrṇvatī divo antāṃ abodhy apa svasāraṃ sanutar yuyoti |
RV_1,092.11c praminatī manuṣyā yugāni yoṣā jārasya cakṣasā vi bhāti ||
RV_1,092.12a paśūn na citrā subhagā prathānā sindhur na kṣoda urviyā vy aśvait |
RV_1,092.12c aminatī daivyāni vratāni sūryasya ceti raśmibhir dṛśānā ||
RV_1,092.13a uṣas tac citram ā bharāsmabhyaṃ vājinīvati |
RV_1,092.13c yena tokaṃ ca tanayaṃ ca dhāmahe ||
RV_1,092.14a uṣo adyeha gomaty aśvāvati vibhāvari |
RV_1,092.14c revad asme vy uccha sūnṛtāvati ||
RV_1,092.15a yukṣvā hi vājinīvaty aśvāṃ adyāruṇāṃ uṣaḥ |
RV_1,092.15c athā no viśvā saubhagāny ā vaha ||
RV_1,092.16a aśvinā vartir asmad ā gomad dasrā hiraṇyavat |
RV_1,092.16c arvāg rathaṃ samanasā ni yacchatam ||
RV_1,092.17a yāv itthā ślokam ā divo jyotir janāya cakrathuḥ |
RV_1,092.17c ā na ūrjaṃ vahatam aśvinā yuvam ||
RV_1,092.18a eha devā mayobhuvā dasrā hiraṇyavartanī |
RV_1,092.18c uṣarbudho vahantu somapītaye ||

RV_1,093.01a agnīṣomāv imaṃ su me śṛṇutaṃ vṛṣaṇā havam |
RV_1,093.01c prati sūktāni haryatam bhavataṃ dāśuṣe mayaḥ ||
RV_1,093.02a agnīṣomā yo adya vām idaṃ vacaḥ saparyati |
RV_1,093.02c tasmai dhattaṃ suvīryaṃ gavām poṣaṃ svaśvyam ||
RV_1,093.03a agnīṣomā ya āhutiṃ yo vāṃ dāśād dhaviṣkṛtim |
RV_1,093.03c sa prajayā suvīryaṃ viśvam āyur vy aśnavat ||
RV_1,093.04a agnīṣomā ceti tad vīryaṃ vāṃ yad amuṣṇītam avasam paṇiṃ gāḥ |
RV_1,093.04c avātiratam bṛsayasya śeṣo 'vindataṃ jyotir ekam bahubhyaḥ ||
RV_1,093.05a yuvam etāni divi rocanāny agniś ca soma sakratū adhattam |
RV_1,093.05c yuvaṃ sindhūṃr abhiśaster avadyād agnīṣomāv amuñcataṃ gṛbhītān ||
RV_1,093.06a ānyaṃ divo mātariśvā jabhārāmathnād anyam pari śyeno adreḥ |
RV_1,093.06c agnīṣomā brahmaṇā vāvṛdhānoruṃ yajñāya cakrathur u lokam ||
RV_1,093.07a agnīṣomā haviṣaḥ prasthitasya vītaṃ haryataṃ vṛṣaṇā juṣethām |
RV_1,093.07c suśarmāṇā svavasā hi bhūtam athā dhattaṃ yajamānāya śaṃ yoḥ ||
RV_1,093.08a yo agnīṣomā haviṣā saparyād devadrīcā manasā yo ghṛtena |
RV_1,093.08c tasya vrataṃ rakṣatam pātam aṃhaso viśe janāya mahi śarma yacchatam ||
RV_1,093.09a agnīṣomā savedasā sahūtī vanataṃ giraḥ |
RV_1,093.09c saṃ devatrā babhūvathuḥ ||
RV_1,093.10a agnīṣomāv anena vāṃ yo vāṃ ghṛtena dāśati |
RV_1,093.10c tasmai dīdayatam bṛhat ||
RV_1,093.11a agnīṣomāv imāni no yuvaṃ havyā jujoṣatam |
RV_1,093.11c ā yātam upa naḥ sacā ||
RV_1,093.12a agnīṣomā pipṛtam arvato na ā pyāyantām usriyā havyasūdaḥ |
RV_1,093.12c asme balāni maghavatsu dhattaṃ kṛṇutaṃ no adhvaraṃ śruṣṭimantam ||

RV_1,094.01a imaṃ stomam arhate jātavedase ratham iva sam mahemā manīṣayā |
RV_1,094.01c bhadrā hi naḥ pramatir asya saṃsady agne sakhye mā riṣāmā vayaṃ tava ||
RV_1,094.02a yasmai tvam āyajase sa sādhaty anarvā kṣeti dadhate suvīryam |
RV_1,094.02c sa tūtāva nainam aśnoty aṃhatir agne sakhye mā riṣāmā vayaṃ tava ||
RV_1,094.03a śakema tvā samidhaṃ sādhayā dhiyas tve devā havir adanty āhutam |
RV_1,094.03c tvam ādityāṃ ā vaha tān hy uśmasy agne sakhye mā riṣāmā vayaṃ tava ||
RV_1,094.04a bharāmedhmaṃ kṛṇavāmā havīṃṣi te citayantaḥ parvaṇā-parvaṇā vayam |
RV_1,094.04c jīvātave prataraṃ sādhayā dhiyo 'gne sakhye mā riṣāmā vayaṃ tava ||
RV_1,094.05a viśāṃ gopā asya caranti jantavo dvipac ca yad uta catuṣpad aktubhiḥ |
RV_1,094.05c citraḥ praketa uṣaso mahāṃ asy agne sakhye mā riṣāmā vayaṃ tava ||
RV_1,094.06a tvam adhvaryur uta hotāsi pūrvyaḥ praśāstā potā januṣā purohitaḥ |
RV_1,094.06c viśvā vidvāṃ ārtvijyā dhīra puṣyasy agne sakhye mā riṣāmā vayaṃ tava ||
RV_1,094.07a yo viśvataḥ supratīkaḥ sadṛṅṅ asi dūre cit san taḷid ivāti rocase |
RV_1,094.07c rātryāś cid andho ati deva paśyasy agne sakhye mā riṣāmā vayaṃ tava ||
RV_1,094.08a pūrvo devā bhavatu sunvato ratho 'smākaṃ śaṃso abhy astu dūḍhyaḥ |
RV_1,094.08c tad ā jānītota puṣyatā vaco 'gne sakhye mā riṣāmā vayaṃ tava ||
RV_1,094.09a vadhair duḥśaṃsāṃ apa dūḍhyo jahi dūre vā ye anti vā ke cid atriṇaḥ |
RV_1,094.09c athā yajñāya gṛṇate sugaṃ kṛdhy agne sakhye mā riṣāmā vayaṃ tava ||
RV_1,094.10a yad ayukthā aruṣā rohitā rathe vātajūtā vṛṣabhasyeva te ravaḥ |
RV_1,094.10c ād invasi vanino dhūmaketunāgne sakhye mā riṣāmā vayaṃ tava ||
RV_1,094.11a adha svanād uta bibhyuḥ patatriṇo drapsā yat te yavasādo vy asthiran |
RV_1,094.11c sugaṃ tat te tāvakebhyo rathebhyo 'gne sakhye mā riṣāmā vayaṃ tava ||
RV_1,094.12a ayam mitrasya varuṇasya dhāyase 'vayātām marutāṃ heḷo adbhutaḥ |
RV_1,094.12c mṛḷā su no bhūtv eṣām manaḥ punar agne sakhye mā riṣāmā vayaṃ tava ||
RV_1,094.13a devo devānām asi mitro adbhuto vasur vasūnām asi cārur adhvare |
RV_1,094.13c śarman syāma tava saprathastame 'gne sakhye mā riṣāmā vayaṃ tava ||
RV_1,094.14a tat te bhadraṃ yat samiddhaḥ sve dame somāhuto jarase mṛḷayattamaḥ |
RV_1,094.14c dadhāsi ratnaṃ draviṇaṃ ca dāśuṣe 'gne sakhye mā riṣāmā vayaṃ tava ||
RV_1,094.15a yasmai tvaṃ sudraviṇo dadāśo 'nāgāstvam adite sarvatātā |
RV_1,094.15c yam bhadreṇa śavasā codayāsi prajāvatā rādhasā te syāma ||
RV_1,094.16a sa tvam agne saubhagatvasya vidvān asmākam āyuḥ pra tireha deva |
RV_1,094.16c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,095.01a dve virūpe carataḥ svarthe anyānyā vatsam upa dhāpayete |
RV_1,095.01c harir anyasyām bhavati svadhāvāñ chukro anyasyāṃ dadṛśe suvarcāḥ ||
RV_1,095.02a daśemaṃ tvaṣṭur janayanta garbham atandrāso yuvatayo vibhṛtram |
RV_1,095.02c tigmānīkaṃ svayaśasaṃ janeṣu virocamānam pari ṣīṃ nayanti ||
RV_1,095.03a trīṇi jānā pari bhūṣanty asya samudra ekaṃ divy ekam apsu |
RV_1,095.03c pūrvām anu pra diśam pārthivānām ṛtūn praśāsad vi dadhāv anuṣṭhu ||
RV_1,095.04a ka imaṃ vo niṇyam ā ciketa vatso mātṝr janayata svadhābhiḥ |
RV_1,095.04c bahvīnāṃ garbho apasām upasthān mahān kavir niś carati svadhāvān ||
RV_1,095.05a āviṣṭyo vardhate cārur āsu jihmānām ūrdhvaḥ svayaśā upasthe |
RV_1,095.05c ubhe tvaṣṭur bibhyatur jāyamānāt pratīcī siṃham prati joṣayete ||
RV_1,095.06a ubhe bhadre joṣayete na mene gāvo na vāśrā upa tasthur evaiḥ |
RV_1,095.06c sa dakṣāṇāṃ dakṣapatir babhūvāñjanti yaṃ dakṣiṇato havirbhiḥ ||
RV_1,095.07a ud yaṃyamīti saviteva bāhū ubhe sicau yatate bhīma ṛñjan |
RV_1,095.07c uc chukram atkam ajate simasmān navā mātṛbhyo vasanā jahāti ||
RV_1,095.08a tveṣaṃ rūpaṃ kṛṇuta uttaraṃ yat sampṛñcānaḥ sadane gobhir adbhiḥ |
RV_1,095.08c kavir budhnam pari marmṛjyate dhīḥ sā devatātā samitir babhūva ||
RV_1,095.09a uru te jrayaḥ pary eti budhnaṃ virocamānam mahiṣasya dhāma |
RV_1,095.09c viśvebhir agne svayaśobhir iddho 'dabdhebhiḥ pāyubhiḥ pāhy asmān ||
RV_1,095.10a dhanvan srotaḥ kṛṇute gātum ūrmiṃ śukrair ūrmibhir abhi nakṣati kṣām |
RV_1,095.10c viśvā sanāni jaṭhareṣu dhatte 'ntar navāsu carati prasūṣu ||
RV_1,095.11a evā no agne samidhā vṛdhāno revat pāvaka śravase vi bhāhi |
RV_1,095.11c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,096.01a sa pratnathā sahasā jāyamānaḥ sadyaḥ kāvyāni baḷ adhatta viśvā |
RV_1,096.01c āpaś ca mitraṃ dhiṣaṇā ca sādhan devā agniṃ dhārayan draviṇodām ||
RV_1,096.02a sa pūrvayā nividā kavyatāyor imāḥ prajā ajanayan manūnām |
RV_1,096.02c vivasvatā cakṣasā dyām apaś ca devā agniṃ dhārayan draviṇodām ||
RV_1,096.03a tam īḷata prathamaṃ yajñasādhaṃ viśa ārīr āhutam ṛñjasānam |
RV_1,096.03c ūrjaḥ putram bharataṃ sṛpradānuṃ devā agniṃ dhārayan draviṇodām ||
RV_1,096.04a sa mātariśvā puruvārapuṣṭir vidad gātuṃ tanayāya svarvit |
RV_1,096.04c viśāṃ gopā janitā rodasyor devā agniṃ dhārayan draviṇodām ||
RV_1,096.05a naktoṣāsā varṇam āmemyāne dhāpayete śiśum ekaṃ samīcī |
RV_1,096.05c dyāvākṣāmā rukmo antar vi bhāti devā agniṃ dhārayan draviṇodām ||
RV_1,096.06a rāyo budhnaḥ saṃgamano vasūnāṃ yajñasya ketur manmasādhano veḥ |
RV_1,096.06c amṛtatvaṃ rakṣamāṇāsa enaṃ devā agniṃ dhārayan draviṇodām ||
RV_1,096.07a nū ca purā ca sadanaṃ rayīṇāṃ jātasya ca jāyamānasya ca kṣām |
RV_1,096.07c sataś ca gopām bhavataś ca bhūrer devā agniṃ dhārayan draviṇodām ||
RV_1,096.08a draviṇodā draviṇasas turasya draviṇodāḥ sanarasya pra yaṃsat |
RV_1,096.08c draviṇodā vīravatīm iṣaṃ no draviṇodā rāsate dīrgham āyuḥ ||
RV_1,096.09a evā no agne samidhā vṛdhāno revat pāvaka śravase vi bhāhi |
RV_1,096.09c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,097.01a apa naḥ śośucad agham agne śuśugdhy ā rayim |
RV_1,097.01c apa naḥ śośucad agham ||
RV_1,097.02a sukṣetriyā sugātuyā vasūyā ca yajāmahe |
RV_1,097.02c apa naḥ śośucad agham ||
RV_1,097.03a pra yad bhandiṣṭha eṣām prāsmākāsaś ca sūrayaḥ |
RV_1,097.03c apa naḥ śośucad agham ||
RV_1,097.04a pra yat te agne sūrayo jāyemahi pra te vayam |
RV_1,097.04c apa naḥ śośucad agham ||
RV_1,097.05a pra yad agneḥ sahasvato viśvato yanti bhānavaḥ |
RV_1,097.05c apa naḥ śośucad agham ||
RV_1,097.06a tvaṃ hi viśvatomukha viśvataḥ paribhūr asi |
RV_1,097.06c apa naḥ śośucad agham ||
RV_1,097.07a dviṣo no viśvatomukhāti nāveva pāraya |
RV_1,097.07c apa naḥ śośucad agham ||
RV_1,097.08a sa naḥ sindhum iva nāvayāti parṣā svastaye |
RV_1,097.08c apa naḥ śośucad agham ||

RV_1,098.01a vaiśvānarasya sumatau syāma rājā hi kam bhuvanānām abhiśrīḥ |
RV_1,098.01c ito jāto viśvam idaṃ vi caṣṭe vaiśvānaro yatate sūryeṇa ||
RV_1,098.02a pṛṣṭo divi pṛṣṭo agniḥ pṛthivyām pṛṣṭo viśvā oṣadhīr ā viveśa |
RV_1,098.02c vaiśvānaraḥ sahasā pṛṣṭo agniḥ sa no divā sa riṣaḥ pātu naktam ||
RV_1,098.03a vaiśvānara tava tat satyam astv asmān rāyo maghavānaḥ sacantām |
RV_1,098.03c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,099.01a jātavedase sunavāma somam arātīyato ni dahāti vedaḥ |
RV_1,099.01c sa naḥ parṣad ati durgāṇi viśvā nāveva sindhuṃ duritāty agniḥ ||

RV_1,100.01a sa yo vṛṣā vṛṣṇyebhiḥ samokā maho divaḥ pṛthivyāś ca samrāṭ |
RV_1,100.01c satīnasatvā havyo bhareṣu marutvān no bhavatv indra ūtī ||
RV_1,100.02a yasyānāptaḥ sūryasyeva yāmo bhare-bhare vṛtrahā śuṣmo asti |
RV_1,100.02c vṛṣantamaḥ sakhibhiḥ svebhir evair marutvān no bhavatv indra ūtī ||
RV_1,100.03a divo na yasya retaso dughānāḥ panthāso yanti śavasāparītāḥ |
RV_1,100.03c taraddveṣāḥ sāsahiḥ pauṃsyebhir marutvān no bhavatv indra ūtī ||
RV_1,100.04a so aṅgirobhir aṅgirastamo bhūd vṛṣā vṛṣabhiḥ sakhibhiḥ sakhā san |
RV_1,100.04c ṛgmibhir ṛgmī gātubhir jyeṣṭho marutvān no bhavatv indra ūtī ||
RV_1,100.05a sa sūnubhir na rudrebhir ṛbhvā nṛṣāhye sāsahvāṃ amitrān |
RV_1,100.05c sanīḷebhiḥ śravasyāni tūrvan marutvān no bhavatv indra ūtī ||
RV_1,100.06a sa manyumīḥ samadanasya kartāsmākebhir nṛbhiḥ sūryaṃ sanat |
RV_1,100.06c asminn ahan satpatiḥ puruhūto marutvān no bhavatv indra ūtī ||
RV_1,100.07a tam ūtayo raṇayañ chūrasātau taṃ kṣemasya kṣitayaḥ kṛṇvata trām |
RV_1,100.07c sa viśvasya karuṇasyeśa eko marutvān no bhavatv indra ūtī ||
RV_1,100.08a tam apsanta śavasa utsaveṣu naro naram avase taṃ dhanāya |
RV_1,100.08c so andhe cit tamasi jyotir vidan marutvān no bhavatv indra ūtī ||
RV_1,100.09a sa savyena yamati vrādhataś cit sa dakṣiṇe saṃgṛbhītā kṛtāni |
RV_1,100.09c sa kīriṇā cit sanitā dhanāni marutvān no bhavatv indra ūtī ||
RV_1,100.10a sa grāmebhiḥ sanitā sa rathebhir vide viśvābhiḥ kṛṣṭibhir nv adya |
RV_1,100.10c sa pauṃsyebhir abhibhūr aśastīr marutvān no bhavatv indra ūtī ||
RV_1,100.11a sa jāmibhir yat samajāti mīḷhe 'jāmibhir vā puruhūta evaiḥ |
RV_1,100.11c apāṃ tokasya tanayasya jeṣe marutvān no bhavatv indra ūtī ||
RV_1,100.12a sa vajrabhṛd dasyuhā bhīma ugraḥ sahasracetāḥ śatanītha ṛbhvā |
RV_1,100.12c camrīṣo na śavasā pāñcajanyo marutvān no bhavatv indra ūtī ||
RV_1,100.13a tasya vajraḥ krandati smat svarṣā divo na tveṣo ravathaḥ śimīvān |
RV_1,100.13c taṃ sacante sanayas taṃ dhanāni marutvān no bhavatv indra ūtī ||
RV_1,100.14a yasyājasraṃ śavasā mānam uktham paribhujad rodasī viśvataḥ sīm |
RV_1,100.14c sa pāriṣat kratubhir mandasāno marutvān no bhavatv indra ūtī ||
RV_1,100.15a na yasya devā devatā na martā āpaś cana śavaso antam āpuḥ |
RV_1,100.15c sa prarikvā tvakṣasā kṣmo divaś ca marutvān no bhavatv indra ūtī ||
RV_1,100.16a rohic chyāvā sumadaṃśur lalāmīr dyukṣā rāya ṛjrāśvasya |
RV_1,100.16c vṛṣaṇvantam bibhratī dhūrṣu ratham mandrā ciketa nāhuṣīṣu vikṣu ||
RV_1,100.17a etat tyat ta indra vṛṣṇa ukthaṃ vārṣāgirā abhi gṛṇanti rādhaḥ |
RV_1,100.17c ṛjrāśvaḥ praṣṭibhir ambarīṣaḥ sahadevo bhayamānaḥ surādhāḥ ||
RV_1,100.18a dasyūñ chimyūṃś ca puruhūta evair hatvā pṛthivyāṃ śarvā ni barhīt |
RV_1,100.18c sanat kṣetraṃ sakhibhiḥ śvitnyebhiḥ sanat sūryaṃ sanad apaḥ suvajraḥ ||
RV_1,100.19a viśvāhendro adhivaktā no astv aparihvṛtāḥ sanuyāma vājam |
RV_1,100.19c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,101.01a pra mandine pitumad arcatā vaco yaḥ kṛṣṇagarbhā nirahann ṛjiśvanā |
RV_1,101.01c avasyavo vṛṣaṇaṃ vajradakṣiṇam marutvantaṃ sakhyāya havāmahe ||
RV_1,101.02a yo vyaṃsaṃ jāhṛṣāṇena manyunā yaḥ śambaraṃ yo ahan piprum avratam |
RV_1,101.02c indro yaḥ śuṣṇam aśuṣaṃ ny āvṛṇaṅ marutvantaṃ sakhyāya havāmahe ||
RV_1,101.03a yasya dyāvāpṛthivī pauṃsyam mahad yasya vrate varuṇo yasya sūryaḥ |
RV_1,101.03c yasyendrasya sindhavaḥ saścati vratam marutvantaṃ sakhyāya havāmahe ||
RV_1,101.04a yo aśvānāṃ yo gavāṃ gopatir vaśī ya āritaḥ karmaṇi-karmaṇi sthiraḥ |
RV_1,101.04c vīḷoś cid indro yo asunvato vadho marutvantaṃ sakhyāya havāmahe ||
RV_1,101.05a yo viśvasya jagataḥ prāṇatas patir yo brahmaṇe prathamo gā avindat |
RV_1,101.05c indro yo dasyūṃr adharāṃ avātiran marutvantaṃ sakhyāya havāmahe ||
RV_1,101.06a yaḥ śūrebhir havyo yaś ca bhīrubhir yo dhāvadbhir hūyate yaś ca jigyubhiḥ |
RV_1,101.06c indraṃ yaṃ viśvā bhuvanābhi saṃdadhur marutvantaṃ sakhyāya havāmahe ||
RV_1,101.07a rudrāṇām eti pradiśā vicakṣaṇo rudrebhir yoṣā tanute pṛthu jrayaḥ |
RV_1,101.07c indram manīṣā abhy arcati śrutam marutvantaṃ sakhyāya havāmahe ||
RV_1,101.08a yad vā marutvaḥ parame sadhasthe yad vāvame vṛjane mādayāse |
RV_1,101.08c ata ā yāhy adhvaraṃ no acchā tvāyā haviś cakṛmā satyarādhaḥ ||
RV_1,101.09a tvāyendra somaṃ suṣumā sudakṣa tvāyā haviś cakṛmā brahmavāhaḥ |
RV_1,101.09c adhā niyutvaḥ sagaṇo marudbhir asmin yajñe barhiṣi mādayasva ||
RV_1,101.10a mādayasva haribhir ye ta indra vi ṣyasva śipre vi sṛjasva dhene |
RV_1,101.10c ā tvā suśipra harayo vahantūśan havyāni prati no juṣasva ||
RV_1,101.11a marutstotrasya vṛjanasya gopā vayam indreṇa sanuyāma vājam |
RV_1,101.11c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,102.01a imāṃ te dhiyam pra bhare maho mahīm asya stotre dhiṣaṇā yat ta ānaje |
RV_1,102.01c tam utsave ca prasave ca sāsahim indraṃ devāsaḥ śavasāmadann anu ||
RV_1,102.02a asya śravo nadyaḥ sapta bibhrati dyāvākṣāmā pṛthivī darśataṃ vapuḥ |
RV_1,102.02c asme sūryācandramasābhicakṣe śraddhe kam indra carato vitarturam ||
RV_1,102.03a taṃ smā ratham maghavan prāva sātaye jaitraṃ yaṃ te anumadāma saṃgame |
RV_1,102.03c ājā na indra manasā puruṣṭuta tvāyadbhyo maghavañ charma yaccha naḥ ||
RV_1,102.04a vayaṃ jayema tvayā yujā vṛtam asmākam aṃśam ud avā bhare-bhare |
RV_1,102.04c asmabhyam indra varivaḥ sugaṃ kṛdhi pra śatrūṇām maghavan vṛṣṇyā ruja ||
RV_1,102.05a nānā hi tvā havamānā janā ime dhanānāṃ dhartar avasā vipanyavaḥ |
RV_1,102.05c asmākaṃ smā ratham ā tiṣṭha sātaye jaitraṃ hīndra nibhṛtam manas tava ||
RV_1,102.06a gojitā bāhū amitakratuḥ simaḥ karman-karmañ chatamūtiḥ khajaṅkaraḥ |
RV_1,102.06c akalpa indraḥ pratimānam ojasāthā janā vi hvayante siṣāsavaḥ ||
RV_1,102.07a ut te śatān maghavann uc ca bhūyasa ut sahasrād ririce kṛṣṭiṣu śravaḥ |
RV_1,102.07c amātraṃ tvā dhiṣaṇā titviṣe mahy adhā vṛtrāṇi jighnase purandara ||
RV_1,102.08a triviṣṭidhātu pratimānam ojasas tisro bhūmīr nṛpate trīṇi rocanā |
RV_1,102.08c atīdaṃ viśvam bhuvanaṃ vavakṣithāśatrur indra januṣā sanād asi ||
RV_1,102.09a tvāṃ deveṣu prathamaṃ havāmahe tvam babhūtha pṛtanāsu sāsahiḥ |
RV_1,102.09c semaṃ naḥ kārum upamanyum udbhidam indraḥ kṛṇotu prasave ratham puraḥ ||
RV_1,102.10a tvaṃ jigetha na dhanā rurodhithārbheṣv ājā maghavan mahatsu ca |
RV_1,102.10c tvām ugram avase saṃ śiśīmasy athā na indra havaneṣu codaya ||
RV_1,102.11a viśvāhendro adhivaktā no astv aparihvṛtāḥ sanuyāma vājam |
RV_1,102.11c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,103.01a tat ta indriyam paramam parācair adhārayanta kavayaḥ puredam |
RV_1,103.01c kṣamedam anyad divy anyad asya sam ī pṛcyate samaneva ketuḥ ||
RV_1,103.02a sa dhārayat pṛthivīm paprathac ca vajreṇa hatvā nir apaḥ sasarja |
RV_1,103.02c ahann ahim abhinad rauhiṇaṃ vy ahan vyaṃsam maghavā śacībhiḥ ||
RV_1,103.03a sa jātūbharmā śraddadhāna ojaḥ puro vibhindann acarad vi dāsīḥ |
RV_1,103.03c vidvān vajrin dasyave hetim asyāryaṃ saho vardhayā dyumnam indra ||
RV_1,103.04a tad ūcuṣe mānuṣemā yugāni kīrtenyam maghavā nāma bibhrat |
RV_1,103.04c upaprayan dasyuhatyāya vajrī yad dha sūnuḥ śravase nāma dadhe ||
RV_1,103.05a tad asyedam paśyatā bhūri puṣṭaṃ śrad indrasya dhattana vīryāya |
RV_1,103.05c sa gā avindat so avindad aśvān sa oṣadhīḥ so apaḥ sa vanāni ||
RV_1,103.06a bhūrikarmaṇe vṛṣabhāya vṛṣṇe satyaśuṣmāya sunavāma somam |
RV_1,103.06c ya ādṛtyā paripanthīva śūro 'yajvano vibhajann eti vedaḥ ||
RV_1,103.07a tad indra preva vīryaṃ cakartha yat sasantaṃ vajreṇābodhayo 'him |
RV_1,103.07c anu tvā patnīr hṛṣitaṃ vayaś ca viśve devāso amadann anu tvā ||
RV_1,103.08a śuṣṇam pipruṃ kuyavaṃ vṛtram indra yadāvadhīr vi puraḥ śambarasya |
RV_1,103.08c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,104.01a yoniṣ ṭa indra niṣade akāri tam ā ni ṣīda svāno nārvā |
RV_1,104.01c vimucyā vayo 'vasāyāśvān doṣā vastor vahīyasaḥ prapitve ||
RV_1,104.02a o tye nara indram ūtaye gur nū cit tān sadyo adhvano jagamyāt |
RV_1,104.02c devāso manyuṃ dāsasya ścamnan te na ā vakṣan suvitāya varṇam ||
RV_1,104.03a ava tmanā bharate ketavedā ava tmanā bharate phenam udan |
RV_1,104.03c kṣīreṇa snātaḥ kuyavasya yoṣe hate te syātām pravaṇe śiphāyāḥ ||
RV_1,104.04a yuyopa nābhir uparasyāyoḥ pra pūrvābhis tirate rāṣṭi śūraḥ |
RV_1,104.04c añjasī kuliśī vīrapatnī payo hinvānā udabhir bharante ||
RV_1,104.05a prati yat syā nīthādarśi dasyor oko nācchā sadanaṃ jānatī gāt |
RV_1,104.05c adha smā no maghavañ carkṛtād in mā no magheva niṣṣapī parā dāḥ ||
RV_1,104.06a sa tvaṃ na indra sūrye so apsv anāgāstva ā bhaja jīvaśaṃse |
RV_1,104.06c māntarām bhujam ā rīriṣo naḥ śraddhitaṃ te mahata indriyāya ||
RV_1,104.07a adhā manye śrat te asmā adhāyi vṛṣā codasva mahate dhanāya |
RV_1,104.07c mā no akṛte puruhūta yonāv indra kṣudhyadbhyo vaya āsutiṃ dāḥ ||
RV_1,104.08a mā no vadhīr indra mā parā dā mā naḥ priyā bhojanāni pra moṣīḥ |
RV_1,104.08c āṇḍā mā no maghavañ chakra nir bhen mā naḥ pātrā bhet sahajānuṣāṇi ||
RV_1,104.09a arvāṅ ehi somakāmaṃ tvāhur ayaṃ sutas tasya pibā madāya |
RV_1,104.09c uruvyacā jaṭhara ā vṛṣasva piteva naḥ śṛṇuhi hūyamānaḥ ||

RV_1,105.01a candramā apsv antar ā suparṇo dhāvate divi |
RV_1,105.01c na vo hiraṇyanemayaḥ padaṃ vindanti vidyuto vittam me asya rodasī ||
RV_1,105.02a artham id vā u arthina ā jāyā yuvate patim |
RV_1,105.02c tuñjāte vṛṣṇyam payaḥ paridāya rasaṃ duhe vittam me asya rodasī ||
RV_1,105.03a mo ṣu devā adaḥ svar ava pādi divas pari |
RV_1,105.03c mā somyasya śambhuvaḥ śūne bhūma kadā cana vittam me asya rodasī ||
RV_1,105.04a yajñam pṛcchāmy avamaṃ sa tad dūto vi vocati |
RV_1,105.04c kva ṛtam pūrvyaṃ gataṃ kas tad bibharti nūtano vittam me asya rodasī ||
RV_1,105.05a amī ye devā sthana triṣv ā rocane divaḥ |
RV_1,105.05c kad va ṛtaṃ kad anṛtaṃ kva pratnā va āhutir vittam me asya rodasī ||
RV_1,105.06a kad va ṛtasya dharṇasi kad varuṇasya cakṣaṇam |
RV_1,105.06c kad aryamṇo mahas pathāti krāmema dūḍhyo vittam me asya rodasī ||
RV_1,105.07a ahaṃ so asmi yaḥ purā sute vadāmi kāni cit |
RV_1,105.07c tam mā vyanty ādhyo vṛko na tṛṣṇajam mṛgaṃ vittam me asya rodasī ||
RV_1,105.08a sam mā tapanty abhitaḥ sapatnīr iva parśavaḥ |
RV_1,105.08c mūṣo na śiśnā vy adanti mādhya stotāraṃ te śatakrato vittam me asya rodasī ||
RV_1,105.09a amī ye sapta raśmayas tatrā me nābhir ātatā |
RV_1,105.09c tritas tad vedāptyaḥ sa jāmitvāya rebhati vittam me asya rodasī ||
RV_1,105.10a amī ye pañcokṣaṇo madhye tasthur maho divaḥ |
RV_1,105.10c devatrā nu pravācyaṃ sadhrīcīnā ni vāvṛtur vittam me asya rodasī ||
RV_1,105.11a suparṇā eta āsate madhya ārodhane divaḥ |
RV_1,105.11c te sedhanti patho vṛkaṃ tarantaṃ yahvatīr apo vittam me asya rodasī ||
RV_1,105.12a navyaṃ tad ukthyaṃ hitaṃ devāsaḥ supravācanam |
RV_1,105.12c ṛtam arṣanti sindhavaḥ satyaṃ tātāna sūryo vittam me asya rodasī ||
RV_1,105.13a agne tava tyad ukthyaṃ deveṣv asty āpyam |
RV_1,105.13c sa naḥ satto manuṣvad ā devān yakṣi viduṣṭaro vittam me asya rodasī ||
RV_1,105.14a satto hotā manuṣvad ā devāṃ acchā viduṣṭaraḥ |
RV_1,105.14c agnir havyā suṣūdati devo deveṣu medhiro vittam me asya rodasī ||
RV_1,105.15a brahmā kṛṇoti varuṇo gātuvidaṃ tam īmahe |
RV_1,105.15c vy ūrṇoti hṛdā matiṃ navyo jāyatām ṛtaṃ vittam me asya rodasī ||
RV_1,105.16a asau yaḥ panthā ādityo divi pravācyaṃ kṛtaḥ |
RV_1,105.16c na sa devā atikrame tam martāso na paśyatha vittam me asya rodasī ||
RV_1,105.17a tritaḥ kūpe 'vahito devān havata ūtaye |
RV_1,105.17c tac chuśrāva bṛhaspatiḥ kṛṇvann aṃhūraṇād uru vittam me asya rodasī ||
RV_1,105.18a aruṇo mā sakṛd vṛkaḥ pathā yantaṃ dadarśa hi |
RV_1,105.18c uj jihīte nicāyyā taṣṭeva pṛṣṭyāmayī vittam me asya rodasī ||
RV_1,105.19a enāṅgūṣeṇa vayam indravanto 'bhi ṣyāma vṛjane sarvavīrāḥ |
RV_1,105.19c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,106.01a indram mitraṃ varuṇam agnim ūtaye mārutaṃ śardho aditiṃ havāmahe |
RV_1,106.01c rathaṃ na durgād vasavaḥ sudānavo viśvasmān no aṃhaso niṣ pipartana ||
RV_1,106.02a ta ādityā ā gatā sarvatātaye bhūta devā vṛtratūryeṣu śambhuvaḥ |
RV_1,106.02c rathaṃ na durgād vasavaḥ sudānavo viśvasmān no aṃhaso niṣ pipartana ||
RV_1,106.03a avantu naḥ pitaraḥ supravācanā uta devī devaputre ṛtāvṛdhā |
RV_1,106.03c rathaṃ na durgād vasavaḥ sudānavo viśvasmān no aṃhaso niṣ pipartana ||
RV_1,106.04a narāśaṃsaṃ vājinaṃ vājayann iha kṣayadvīram pūṣaṇaṃ sumnair īmahe |
RV_1,106.04c rathaṃ na durgād vasavaḥ sudānavo viśvasmān no aṃhaso niṣ pipartana ||
RV_1,106.05a bṛhaspate sadam in naḥ sugaṃ kṛdhi śaṃ yor yat te manurhitaṃ tad īmahe |
RV_1,106.05c rathaṃ na durgād vasavaḥ sudānavo viśvasmān no aṃhaso niṣ pipartana ||
RV_1,106.06a indraṃ kutso vṛtrahaṇaṃ śacīpatiṃ kāṭe nibāḷha ṛṣir ahvad ūtaye |
RV_1,106.06c rathaṃ na durgād vasavaḥ sudānavo viśvasmān no aṃhaso niṣ pipartana ||
RV_1,106.07a devair no devy aditir ni pātu devas trātā trāyatām aprayucchan |
RV_1,106.07c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,107.01a yajño devānām praty eti sumnam ādityāso bhavatā mṛḷayantaḥ |
RV_1,107.01c ā vo 'rvācī sumatir vavṛtyād aṃhoś cid yā varivovittarāsat ||
RV_1,107.02a upa no devā avasā gamantv aṅgirasāṃ sāmabhi stūyamānāḥ |
RV_1,107.02c indra indriyair maruto marudbhir ādityair no aditiḥ śarma yaṃsat ||
RV_1,107.03a tan na indras tad varuṇas tad agnis tad aryamā tat savitā cano dhāt |
RV_1,107.03c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,108.01a ya indrāgnī citratamo ratho vām abhi viśvāni bhuvanāni caṣṭe |
RV_1,108.01c tenā yātaṃ sarathaṃ tasthivāṃsāthā somasya pibataṃ sutasya ||
RV_1,108.02a yāvad idam bhuvanaṃ viśvam asty uruvyacā varimatā gabhīram |
RV_1,108.02c tāvāṃ ayam pātave somo astv aram indrāgnī manase yuvabhyām ||
RV_1,108.03a cakrāthe hi sadhryaṅ nāma bhadraṃ sadhrīcīnā vṛtrahaṇā uta sthaḥ |
RV_1,108.03c tāv indrāgnī sadhryañcā niṣadyā vṛṣṇaḥ somasya vṛṣaṇā vṛṣethām ||
RV_1,108.04a samiddheṣv agniṣv ānajānā yatasrucā barhir u tistirāṇā |
RV_1,108.04c tīvraiḥ somaiḥ pariṣiktebhir arvāg endrāgnī saumanasāya yātam ||
RV_1,108.05a yānīndrāgnī cakrathur vīryāṇi yāni rūpāṇy uta vṛṣṇyāni |
RV_1,108.05c yā vām pratnāni sakhyā śivāni tebhiḥ somasya pibataṃ sutasya ||
RV_1,108.06a yad abravam prathamaṃ vāṃ vṛṇāno 'yaṃ somo asurair no vihavyaḥ |
RV_1,108.06c tāṃ satyāṃ śraddhām abhy ā hi yātam athā somasya pibataṃ sutasya ||
RV_1,108.07a yad indrāgnī madathaḥ sve duroṇe yad brahmaṇi rājani vā yajatrā |
RV_1,108.07c ataḥ pari vṛṣaṇāv ā hi yātam athā somasya pibataṃ sutasya ||
RV_1,108.08a yad indrāgnī yaduṣu turvaśeṣu yad druhyuṣv anuṣu pūruṣu sthaḥ |
RV_1,108.08c ataḥ pari vṛṣaṇāv ā hi yātam athā somasya pibataṃ sutasya ||
RV_1,108.09a yad indrāgnī avamasyām pṛthivyām madhyamasyām paramasyām uta sthaḥ |
RV_1,108.09c ataḥ pari vṛṣaṇāv ā hi yātam athā somasya pibataṃ sutasya ||
RV_1,108.10a yad indrāgnī paramasyām pṛthivyām madhyamasyām avamasyām uta sthaḥ |
RV_1,108.10c ataḥ pari vṛṣaṇāv ā hi yātam athā somasya pibataṃ sutasya ||
RV_1,108.11a yad indrāgnī divi ṣṭho yat pṛthivyāṃ yat parvateṣv oṣadhīṣv apsu |
RV_1,108.11c ataḥ pari vṛṣaṇāv ā hi yātam athā somasya pibataṃ sutasya ||
RV_1,108.12a yad indrāgnī uditā sūryasya madhye divaḥ svadhayā mādayethe |
RV_1,108.12c ataḥ pari vṛṣaṇāv ā hi yātam athā somasya pibataṃ sutasya ||
RV_1,108.13a evendrāgnī papivāṃsā sutasya viśvāsmabhyaṃ saṃ jayataṃ dhanāni |
RV_1,108.13c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,109.01a vi hy akhyam manasā vasya icchann indrāgnī jñāsa uta vā sajātān |
RV_1,109.01c nānyā yuvat pramatir asti mahyaṃ sa vāṃ dhiyaṃ vājayantīm atakṣam ||
RV_1,109.02a aśravaṃ hi bhūridāvattarā vāṃ vijāmātur uta vā ghā syālāt |
RV_1,109.02c athā somasya prayatī yuvabhyām indrāgnī stomaṃ janayāmi navyam ||
RV_1,109.03a mā cchedma raśmīṃr iti nādhamānāḥ pitṝṇāṃ śaktīr anuyacchamānāḥ |
RV_1,109.03c indrāgnibhyāṃ kaṃ vṛṣaṇo madanti tā hy adrī dhiṣaṇāyā upasthe ||
RV_1,109.04a yuvābhyāṃ devī dhiṣaṇā madāyendrāgnī somam uśatī sunoti |
RV_1,109.04c tāv aśvinā bhadrahastā supāṇī ā dhāvatam madhunā pṛṅktam apsu ||
RV_1,109.05a yuvām indrāgnī vasuno vibhāge tavastamā śuśrava vṛtrahatye |
RV_1,109.05c tāv āsadyā barhiṣi yajñe asmin pra carṣaṇī mādayethāṃ sutasya ||
RV_1,109.06a pra carṣaṇibhyaḥ pṛtanāhaveṣu pra pṛthivyā riricāthe divaś ca |
RV_1,109.06c pra sindhubhyaḥ pra giribhyo mahitvā prendrāgnī viśvā bhuvanāty anyā ||
RV_1,109.07a ā bharataṃ śikṣataṃ vajrabāhū asmāṃ indrāgnī avataṃ śacībhiḥ |
RV_1,109.07c ime nu te raśmayaḥ sūryasya yebhiḥ sapitvam pitaro na āsan ||
RV_1,109.08a purandarā śikṣataṃ vajrahastāsmāṃ indrāgnī avatam bhareṣu |
RV_1,109.08c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,110.01a tatam me apas tad u tāyate punaḥ svādiṣṭhā dhītir ucathāya śasyate |
RV_1,110.01c ayaṃ samudra iha viśvadevyaḥ svāhākṛtasya sam u tṛpṇuta ṛbhavaḥ ||
RV_1,110.02a ābhogayam pra yad icchanta aitanāpākāḥ prāñco mama ke cid āpayaḥ |
RV_1,110.02c saudhanvanāsaś caritasya bhūmanāgacchata savitur dāśuṣo gṛham ||
RV_1,110.03a tat savitā vo 'mṛtatvam āsuvad agohyaṃ yac chravayanta aitana |
RV_1,110.03c tyaṃ cic camasam asurasya bhakṣaṇam ekaṃ santam akṛṇutā caturvayam ||
RV_1,110.04a viṣṭvī śamī taraṇitvena vāghato martāsaḥ santo amṛtatvam ānaśuḥ |
RV_1,110.04c saudhanvanā ṛbhavaḥ sūracakṣasaḥ saṃvatsare sam apṛcyanta dhītibhiḥ ||
RV_1,110.05a kṣetram iva vi mamus tejanenaṃ ekam pātram ṛbhavo jehamānam |
RV_1,110.05c upastutā upamaṃ nādhamānā amartyeṣu śrava icchamānāḥ ||
RV_1,110.06a ā manīṣām antarikṣasya nṛbhyaḥ sruceva ghṛtaṃ juhavāma vidmanā |
RV_1,110.06c taraṇitvā ye pitur asya saścira ṛbhavo vājam aruhan divo rajaḥ ||
RV_1,110.07a ṛbhur na indraḥ śavasā navīyān ṛbhur vājebhir vasubhir vasur dadiḥ |
RV_1,110.07c yuṣmākaṃ devā avasāhani priye 'bhi tiṣṭhema pṛtsutīr asunvatām ||
RV_1,110.08a niś carmaṇa ṛbhavo gām apiṃśata saṃ vatsenāsṛjatā mātaram punaḥ |
RV_1,110.08c saudhanvanāsaḥ svapasyayā naro jivrī yuvānā pitarākṛṇotana ||
RV_1,110.09a vājebhir no vājasātāv aviḍḍhy ṛbhumāṃ indra citram ā darṣi rādhaḥ |
RV_1,110.09c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,111.01a takṣan rathaṃ suvṛtaṃ vidmanāpasas takṣan harī indravāhā vṛṣaṇvasū |
RV_1,111.01c takṣan pitṛbhyām ṛbhavo yuvad vayas takṣan vatsāya mātaraṃ sacābhuvam ||
RV_1,111.02a ā no yajñāya takṣata ṛbhumad vayaḥ kratve dakṣāya suprajāvatīm iṣam |
RV_1,111.02c yathā kṣayāma sarvavīrayā viśā tan naḥ śardhāya dhāsathā sv indriyam ||
RV_1,111.03a ā takṣata sātim asmabhyam ṛbhavaḥ sātiṃ rathāya sātim arvate naraḥ |
RV_1,111.03c sātiṃ no jaitrīṃ sam maheta viśvahā jāmim ajāmim pṛtanāsu sakṣaṇim ||
RV_1,111.04a ṛbhukṣaṇam indram ā huva ūtaya ṛbhūn vājān marutaḥ somapītaye |
RV_1,111.04c ubhā mitrāvaruṇā nūnam aśvinā te no hinvantu sātaye dhiye jiṣe ||
RV_1,111.05a ṛbhur bharāya saṃ śiśātu sātiṃ samaryajid vājo asmāṃ aviṣṭu |
RV_1,111.05c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,112.01a īḷe dyāvāpṛthivī pūrvacittaye 'gniṃ gharmaṃ surucaṃ yāmann iṣṭaye |
RV_1,112.01c yābhir bhare kāram aṃśāya jinvathas tābhir ū ṣu ūtibhir aśvinā gatam ||
RV_1,112.02a yuvor dānāya subharā asaścato ratham ā tasthur vacasaṃ na mantave |
RV_1,112.02c yābhir dhiyo 'vathaḥ karmann iṣṭaye tābhir ū ṣu ūtibhir aśvinā gatam ||
RV_1,112.03a yuvaṃ tāsāṃ divyasya praśāsane viśāṃ kṣayatho amṛtasya majmanā |
RV_1,112.03c yābhir dhenum asvam pinvatho narā tābhir ū ṣu ūtibhir aśvinā gatam ||
RV_1,112.04a yābhiḥ parijmā tanayasya majmanā dvimātā tūrṣu taraṇir vibhūṣati |
RV_1,112.04c yābhis trimantur abhavad vicakṣaṇas tābhir ū ṣu ūtibhir aśvinā gatam ||
RV_1,112.05a yābhī rebhaṃ nivṛtaṃ sitam adbhya ud vandanam airayataṃ svar dṛśe |
RV_1,112.05c yābhiḥ kaṇvam pra siṣāsantam āvataṃ tābhir ū ṣu ūtibhir aśvinā gatam ||
RV_1,112.06a yābhir antakaṃ jasamānam āraṇe bhujyuṃ yābhir avyathibhir jijinvathuḥ |
RV_1,112.06c yābhiḥ karkandhuṃ vayyaṃ ca jinvathas tābhir ū ṣu ūtibhir aśvinā gatam ||
RV_1,112.07a yābhiḥ śucantiṃ dhanasāṃ suṣaṃsadaṃ taptaṃ gharmam omyāvantam atraye |
RV_1,112.07c yābhiḥ pṛśnigum purukutsam āvataṃ tābhir ū ṣu ūtibhir aśvinā gatam ||
RV_1,112.08a yābhiḥ śacībhir vṛṣaṇā parāvṛjam prāndhaṃ śroṇaṃ cakṣasa etave kṛthaḥ |
RV_1,112.08c yābhir vartikāṃ grasitām amuñcataṃ tābhir ū ṣu ūtibhir aśvinā gatam ||
RV_1,112.09a yābhiḥ sindhum madhumantam asaścataṃ vasiṣṭhaṃ yābhir ajarāv ajinvatam |
RV_1,112.09c yābhiḥ kutsaṃ śrutaryaṃ naryam āvataṃ tābhir ū ṣu ūtibhir aśvinā gatam ||
RV_1,112.10a yābhir viśpalāṃ dhanasām atharvyaṃ sahasramīḷha ājāv ajinvatam |
RV_1,112.10c yābhir vaśam aśvyam preṇim āvataṃ tābhir ū ṣu ūtibhir aśvinā gatam ||
RV_1,112.11a yābhiḥ sudānū auśijāya vaṇije dīrghaśravase madhu kośo akṣarat |
RV_1,112.11c kakṣīvantaṃ stotāraṃ yābhir āvataṃ tābhir ū ṣu ūtibhir aśvinā gatam ||
RV_1,112.12a yābhī rasāṃ kṣodasodnaḥ pipinvathur anaśvaṃ yābhī ratham āvataṃ jiṣe |
RV_1,112.12c yābhis triśoka usriyā udājata tābhir ū ṣu ūtibhir aśvinā gatam ||
RV_1,112.13a yābhiḥ sūryam pariyāthaḥ parāvati mandhātāraṃ kṣaitrapatyeṣv āvatam |
RV_1,112.13c yābhir vipram pra bharadvājam āvataṃ tābhir ū ṣu ūtibhir aśvinā gatam ||
RV_1,112.14a yābhir mahām atithigvaṃ kaśojuvaṃ divodāsaṃ śambarahatya āvatam |
RV_1,112.14c yābhiḥ pūrbhidye trasadasyum āvataṃ tābhir ū ṣu ūtibhir aśvinā gatam ||
RV_1,112.15a yābhir vamraṃ vipipānam upastutaṃ kaliṃ yābhir vittajāniṃ duvasyathaḥ |
RV_1,112.15c yābhir vyaśvam uta pṛthim āvataṃ tābhir ū ṣu ūtibhir aśvinā gatam ||
RV_1,112.16a yābhir narā śayave yābhir atraye yābhiḥ purā manave gātum īṣathuḥ |
RV_1,112.16c yābhiḥ śārīr ājataṃ syūmaraśmaye tābhir ū ṣu ūtibhir aśvinā gatam ||
RV_1,112.17a yābhiḥ paṭharvā jaṭharasya majmanāgnir nādīdec cita iddho ajmann ā |
RV_1,112.17c yābhiḥ śaryātam avatho mahādhane tābhir ū ṣu ūtibhir aśvinā gatam ||
RV_1,112.18a yābhir aṅgiro manasā niraṇyatho 'graṃ gacchatho vivare goarṇasaḥ |
RV_1,112.18c yābhir manuṃ śūram iṣā samāvataṃ tābhir ū ṣu ūtibhir aśvinā gatam ||
RV_1,112.19a yābhiḥ patnīr vimadāya nyūhathur ā gha vā yābhir aruṇīr aśikṣatam |
RV_1,112.19c yābhiḥ sudāsa ūhathuḥ sudevyaṃ tābhir ū ṣu ūtibhir aśvinā gatam ||
RV_1,112.20a yābhiḥ śantātī bhavatho dadāśuṣe bhujyuṃ yābhir avatho yābhir adhrigum |
RV_1,112.20c omyāvatīṃ subharām ṛtastubhaṃ tābhir ū ṣu ūtibhir aśvinā gatam ||
RV_1,112.21a yābhiḥ kṛśānum asane duvasyatho jave yābhir yūno arvantam āvatam |
RV_1,112.21c madhu priyam bharatho yat saraḍbhyas tābhir ū ṣu ūtibhir aśvinā gatam ||
RV_1,112.22a yābhir naraṃ goṣuyudhaṃ nṛṣāhye kṣetrasya sātā tanayasya jinvathaḥ |
RV_1,112.22c yābhī rathāṃ avatho yābhir arvatas tābhir ū ṣu ūtibhir aśvinā gatam ||
RV_1,112.23a yābhiḥ kutsam ārjuneyaṃ śatakratū pra turvītim pra ca dabhītim āvatam |
RV_1,112.23c yābhir dhvasantim puruṣantim āvataṃ tābhir ū ṣu ūtibhir aśvinā gatam ||
RV_1,112.24a apnasvatīm aśvinā vācam asme kṛtaṃ no dasrā vṛṣaṇā manīṣām |
RV_1,112.24c adyūtye 'vase ni hvaye vāṃ vṛdhe ca no bhavataṃ vājasātau ||
RV_1,112.25a dyubhir aktubhiḥ pari pātam asmān ariṣṭebhir aśvinā saubhagebhiḥ |
RV_1,112.25c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,113.01a idaṃ śreṣṭhaṃ jyotiṣāṃ jyotir āgāc citraḥ praketo ajaniṣṭa vibhvā |
RV_1,113.01c yathā prasūtā savituḥ savāyaṃ evā rātry uṣase yonim āraik ||
RV_1,113.02a ruśadvatsā ruśatī śvetyāgād āraig u kṛṣṇā sadanāny asyāḥ |
RV_1,113.02c samānabandhū amṛte anūcī dyāvā varṇaṃ carata āmināne ||
RV_1,113.03a samāno adhvā svasror anantas tam anyānyā carato devaśiṣṭe |
RV_1,113.03c na methete na tasthatuḥ sumeke naktoṣāsā samanasā virūpe ||
RV_1,113.04a bhāsvatī netrī sūnṛtānām aceti citrā vi duro na āvaḥ |
RV_1,113.04c prārpyā jagad vy u no rāyo akhyad uṣā ajīgar bhuvanāni viśvā ||
RV_1,113.05a jihmaśye caritave maghony ābhogaya iṣṭaye rāya u tvam |
RV_1,113.05c dabhram paśyadbhya urviyā vicakṣa uṣā ajīgar bhuvanāni viśvā ||
RV_1,113.06a kṣatrāya tvaṃ śravase tvam mahīyā iṣṭaye tvam artham iva tvam ityai |
RV_1,113.06c visadṛśā jīvitābhipracakṣa uṣā ajīgar bhuvanāni viśvā ||
RV_1,113.07a eṣā divo duhitā praty adarśi vyucchantī yuvatiḥ śukravāsāḥ |
RV_1,113.07c viśvasyeśānā pārthivasya vasva uṣo adyeha subhage vy uccha ||
RV_1,113.08a parāyatīnām anv eti pātha āyatīnām prathamā śaśvatīnām |
RV_1,113.08c vyucchantī jīvam udīrayanty uṣā mṛtaṃ kaṃ cana bodhayantī ||
RV_1,113.09a uṣo yad agniṃ samidhe cakartha vi yad āvaś cakṣasā sūryasya |
RV_1,113.09c yan mānuṣān yakṣyamāṇāṃ ajīgas tad deveṣu cakṛṣe bhadram apnaḥ ||
RV_1,113.10a kiyāty ā yat samayā bhavāti yā vyūṣur yāś ca nūnaṃ vyucchān |
RV_1,113.10c anu pūrvāḥ kṛpate vāvaśānā pradīdhyānā joṣam anyābhir eti ||
RV_1,113.11a īyuṣ ṭe ye pūrvatarām apaśyan vyucchantīm uṣasam martyāsaḥ |
RV_1,113.11c asmābhir ū nu praticakṣyābhūd o te yanti ye aparīṣu paśyān ||
RV_1,113.12a yāvayaddveṣā ṛtapā ṛtejāḥ sumnāvarī sūnṛtā īrayantī |
RV_1,113.12c sumaṅgalīr bibhratī devavītim ihādyoṣaḥ śreṣṭhatamā vy uccha ||
RV_1,113.13a śaśvat puroṣā vy uvāsa devy atho adyedaṃ vy āvo maghonī |
RV_1,113.13c atho vy ucchād uttarāṃ anu dyūn ajarāmṛtā carati svadhābhiḥ ||
RV_1,113.14a vy añjibhir diva ātāsv adyaud apa kṛṣṇāṃ nirṇijaṃ devy āvaḥ |
RV_1,113.14c prabodhayanty aruṇebhir aśvair oṣā yāti suyujā rathena ||
RV_1,113.15a āvahantī poṣyā vāryāṇi citraṃ ketuṃ kṛṇute cekitānā |
RV_1,113.15c īyuṣīṇām upamā śaśvatīnāṃ vibhātīnām prathamoṣā vy aśvait ||
RV_1,113.16a ud īrdhvaṃ jīvo asur na āgād apa prāgāt tama ā jyotir eti |
RV_1,113.16c āraik panthāṃ yātave sūryāyāganma yatra pratiranta āyuḥ ||
RV_1,113.17a syūmanā vāca ud iyarti vahni stavāno rebha uṣaso vibhātīḥ |
RV_1,113.17c adyā tad uccha gṛṇate maghony asme āyur ni didīhi prajāvat ||
RV_1,113.18a yā gomatīr uṣasaḥ sarvavīrā vyucchanti dāśuṣe martyāya |
RV_1,113.18c vāyor iva sūnṛtānām udarke tā aśvadā aśnavat somasutvā ||
RV_1,113.19a mātā devānām aditer anīkaṃ yajñasya ketur bṛhatī vi bhāhi |
RV_1,113.19c praśastikṛd brahmaṇe no vy ucchā no jane janaya viśvavāre ||
RV_1,113.20a yac citram apna uṣaso vahantījānāya śaśamānāya bhadram |
RV_1,113.20c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,114.01a imā rudrāya tavase kapardine kṣayadvīrāya pra bharāmahe matīḥ |
RV_1,114.01c yathā śam asad dvipade catuṣpade viśvam puṣṭaṃ grāme asminn anāturam ||
RV_1,114.02a mṛḷā no rudrota no mayas kṛdhi kṣayadvīrāya namasā vidhema te |
RV_1,114.02c yac chaṃ ca yoś ca manur āyeje pitā tad aśyāma tava rudra praṇītiṣu ||
RV_1,114.03a aśyāma te sumatiṃ devayajyayā kṣayadvīrasya tava rudra mīḍhvaḥ |
RV_1,114.03c sumnāyann id viśo asmākam ā carāriṣṭavīrā juhavāma te haviḥ ||
RV_1,114.04a tveṣaṃ vayaṃ rudraṃ yajñasādhaṃ vaṅkuṃ kavim avase ni hvayāmahe |
RV_1,114.04c āre asmad daivyaṃ heḷo asyatu sumatim id vayam asyā vṛṇīmahe ||
RV_1,114.05a divo varāham aruṣaṃ kapardinaṃ tveṣaṃ rūpaṃ namasā ni hvayāmahe |
RV_1,114.05c haste bibhrad bheṣajā vāryāṇi śarma varma cchardir asmabhyaṃ yaṃsat ||
RV_1,114.06a idam pitre marutām ucyate vacaḥ svādoḥ svādīyo rudrāya vardhanam |
RV_1,114.06c rāsvā ca no amṛta martabhojanaṃ tmane tokāya tanayāya mṛḷa ||
RV_1,114.07a mā no mahāntam uta mā no arbhakam mā na ukṣantam uta mā na ukṣitam |
RV_1,114.07c mā no vadhīḥ pitaram mota mātaram mā naḥ priyās tanvo rudra rīriṣaḥ ||
RV_1,114.08a mā nas toke tanaye mā na āyau mā no goṣu mā no aśveṣu rīriṣaḥ |
RV_1,114.08c vīrān mā no rudra bhāmito vadhīr haviṣmantaḥ sadam it tvā havāmahe ||
RV_1,114.09a upa te stomān paśupā ivākaraṃ rāsvā pitar marutāṃ sumnam asme |
RV_1,114.09c bhadrā hi te sumatir mṛḷayattamāthā vayam ava it te vṛṇīmahe ||
RV_1,114.10a āre te goghnam uta pūruṣaghnaṃ kṣayadvīra sumnam asme te astu |
RV_1,114.10c mṛḷā ca no adhi ca brūhi devādhā ca naḥ śarma yaccha dvibarhāḥ ||
RV_1,114.11a avocāma namo asmā avasyavaḥ śṛṇotu no havaṃ rudro marutvān |
RV_1,114.11c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,115.01a citraṃ devānām ud agād anīkaṃ cakṣur mitrasya varuṇasyāgneḥ |
RV_1,115.01c āprā dyāvāpṛthivī antarikṣaṃ sūrya ātmā jagatas tasthuṣaś ca ||
RV_1,115.02a sūryo devīm uṣasaṃ rocamānām maryo na yoṣām abhy eti paścāt |
RV_1,115.02c yatrā naro devayanto yugāni vitanvate prati bhadrāya bhadram ||
RV_1,115.03a bhadrā aśvā haritaḥ sūryasya citrā etagvā anumādyāsaḥ |
RV_1,115.03c namasyanto diva ā pṛṣṭham asthuḥ pari dyāvāpṛthivī yanti sadyaḥ ||
RV_1,115.04a tat sūryasya devatvaṃ tan mahitvam madhyā kartor vitataṃ saṃ jabhāra |
RV_1,115.04c yaded ayukta haritaḥ sadhasthād ād rātrī vāsas tanute simasmai ||
RV_1,115.05a tan mitrasya varuṇasyābhicakṣe sūryo rūpaṃ kṛṇute dyor upasthe |
RV_1,115.05c anantam anyad ruśad asya pājaḥ kṛṣṇam anyad dharitaḥ sam bharanti ||
RV_1,115.06a adyā devā uditā sūryasya nir aṃhasaḥ pipṛtā nir avadyāt |
RV_1,115.06c tan no mitro varuṇo māmahantām aditiḥ sindhuḥ pṛthivī uta dyauḥ ||

RV_1,116.01a nāsatyābhyām barhir iva pra vṛñje stomāṃ iyarmy abhriyeva vātaḥ |
RV_1,116.01c yāv arbhagāya vimadāya jāyāṃ senājuvā nyūhatū rathena ||
RV_1,116.02a vīḷupatmabhir āśuhemabhir vā devānāṃ vā jūtibhiḥ śāśadānā |
RV_1,116.02c tad rāsabho nāsatyā sahasram ājā yamasya pradhane jigāya ||
RV_1,116.03a tugro ha bhujyum aśvinodameghe rayiṃ na kaś cin mamṛvāṃ avāhāḥ |
RV_1,116.03c tam ūhathur naubhir ātmanvatībhir antarikṣaprudbhir apodakābhiḥ ||
RV_1,116.04a tisraḥ kṣapas trir ahātivrajadbhir nāsatyā bhujyum ūhathuḥ pataṅgaiḥ |
RV_1,116.04c samudrasya dhanvann ārdrasya pāre tribhī rathaiḥ śatapadbhiḥ ṣaḷaśvaiḥ ||
RV_1,116.05a anārambhaṇe tad avīrayethām anāsthāne agrabhaṇe samudre |
RV_1,116.05c yad aśvinā ūhathur bhujyum astaṃ śatāritrāṃ nāvam ātasthivāṃsam ||
RV_1,116.06a yam aśvinā dadathuḥ śvetam aśvam aghāśvāya śaśvad it svasti |
RV_1,116.06c tad vāṃ dātram mahi kīrtenyam bhūt paidvo vājī sadam id dhavyo aryaḥ ||
RV_1,116.07a yuvaṃ narā stuvate pajriyāya kakṣīvate aradatam purandhim |
RV_1,116.07c kārotarāc chaphād aśvasya vṛṣṇaḥ śataṃ kumbhāṃ asiñcataṃ surāyāḥ ||
RV_1,116.08a himenāgniṃ ghraṃsam avārayethām pitumatīm ūrjam asmā adhattam |
RV_1,116.08c ṛbīse atrim aśvināvanītam un ninyathuḥ sarvagaṇaṃ svasti ||
RV_1,116.09a parāvataṃ nāsatyānudethām uccābudhnaṃ cakrathur jihmabāram |
RV_1,116.09c kṣarann āpo na pāyanāya rāye sahasrāya tṛṣyate gotamasya ||
RV_1,116.10a jujuruṣo nāsatyota vavrim prāmuñcataṃ drāpim iva cyavānāt |
RV_1,116.10c prātirataṃ jahitasyāyur dasrād it patim akṛṇutaṃ kanīnām ||
RV_1,116.11a tad vāṃ narā śaṃsyaṃ rādhyaṃ cābhiṣṭiman nāsatyā varūtham |
RV_1,116.11c yad vidvāṃsā nidhim ivāpagūḷham ud darśatād ūpathur vandanāya ||
RV_1,116.12a tad vāṃ narā sanaye daṃsa ugram āviṣ kṛṇomi tanyatur na vṛṣṭim |
RV_1,116.12c dadhyaṅ ha yan madhv ātharvaṇo vām aśvasya śīrṣṇā pra yad īm uvāca ||
RV_1,116.13a ajohavīn nāsatyā karā vām mahe yāman purubhujā purandhiḥ |
RV_1,116.13c śrutaṃ tac chāsur iva vadhrimatyā hiraṇyahastam aśvināv adattam ||
RV_1,116.14a āsno vṛkasya vartikām abhīke yuvaṃ narā nāsatyāmumuktam |
RV_1,116.14c uto kavim purubhujā yuvaṃ ha kṛpamāṇam akṛṇutaṃ vicakṣe ||
RV_1,116.15a caritraṃ hi ver ivācchedi parṇam ājā khelasya paritakmyāyām |
RV_1,116.15c sadyo jaṅghām āyasīṃ viśpalāyai dhane hite sartave praty adhattam ||
RV_1,116.16a śatam meṣān vṛkye cakṣadānam ṛjrāśvaṃ tam pitāndhaṃ cakāra |
RV_1,116.16c tasmā akṣī nāsatyā vicakṣa ādhattaṃ dasrā bhiṣajāv anarvan ||
RV_1,116.17a ā vāṃ rathaṃ duhitā sūryasya kārṣmevātiṣṭhad arvatā jayantī |
RV_1,116.17c viśve devā anv amanyanta hṛdbhiḥ sam u śriyā nāsatyā sacethe ||
RV_1,116.18a yad ayātaṃ divodāsāya vartir bharadvājāyāśvinā hayantā |
RV_1,116.18c revad uvāha sacano ratho vāṃ vṛṣabhaś ca śiṃśumāraś ca yuktā ||
RV_1,116.19a rayiṃ sukṣatraṃ svapatyam āyuḥ suvīryaṃ nāsatyā vahantā |
RV_1,116.19c ā jahnāvīṃ samanasopa vājais trir ahno bhāgaṃ dadhatīm ayātam ||
RV_1,116.20a pariviṣṭaṃ jāhuṣaṃ viśvataḥ sīṃ sugebhir naktam ūhathū rajobhiḥ |
RV_1,116.20c vibhindunā nāsatyā rathena vi parvatāṃ ajarayū ayātam ||
RV_1,116.21a ekasyā vastor āvataṃ raṇāya vaśam aśvinā sanaye sahasrā |
RV_1,116.21c nir ahataṃ ducchunā indravantā pṛthuśravaso vṛṣaṇāv arātīḥ ||
RV_1,116.22a śarasya cid ārcatkasyāvatād ā nīcād uccā cakrathuḥ pātave vāḥ |
RV_1,116.22c śayave cin nāsatyā śacībhir jasuraye staryam pipyathur gām ||
RV_1,116.23a avasyate stuvate kṛṣṇiyāya ṛjūyate nāsatyā śacībhiḥ |
RV_1,116.23c paśuṃ na naṣṭam iva darśanāya viṣṇāpvaṃ dadathur viśvakāya ||
RV_1,116.24a daśa rātrīr aśivenā nava dyūn avanaddhaṃ śnathitam apsv antaḥ |
RV_1,116.24c viprutaṃ rebham udani pravṛktam un ninyathuḥ somam iva sruveṇa ||
RV_1,116.25a pra vāṃ daṃsāṃsy aśvināv avocam asya patiḥ syāṃ sugavaḥ suvīraḥ |
RV_1,116.25c uta paśyann aśnuvan dīrgham āyur astam ivej jarimāṇaṃ jagamyām ||

RV_1,117.01a madhvaḥ somasyāśvinā madāya pratno hotā vivāsate vām |
RV_1,117.01c barhiṣmatī rātir viśritā gīr iṣā yātaṃ nāsatyopa vājaiḥ ||
RV_1,117.02a yo vām aśvinā manaso javīyān rathaḥ svaśvo viśa ājigāti |
RV_1,117.02c yena gacchathaḥ sukṛto duroṇaṃ tena narā vartir asmabhyaṃ yātam ||
RV_1,117.03a ṛṣiṃ narāv aṃhasaḥ pāñcajanyam ṛbīsād atrim muñcatho gaṇena |
RV_1,117.03c minantā dasyor aśivasya māyā anupūrvaṃ vṛṣaṇā codayantā ||
RV_1,117.04a aśvaṃ na gūḷham aśvinā durevair ṛṣiṃ narā vṛṣaṇā rebham apsu |
RV_1,117.04c saṃ taṃ riṇītho viprutaṃ daṃsobhir na vāṃ jūryanti pūrvyā kṛtāni ||
RV_1,117.05a suṣupvāṃsaṃ na nirṛter upasthe sūryaṃ na dasrā tamasi kṣiyantam |
RV_1,117.05c śubhe rukmaṃ na darśataṃ nikhātam ud ūpathur aśvinā vandanāya ||
RV_1,117.06a tad vāṃ narā śaṃsyam pajriyeṇa kakṣīvatā nāsatyā parijman |
RV_1,117.06c śaphād aśvasya vājino janāya śataṃ kumbhāṃ asiñcatam madhūnām ||
RV_1,117.07a yuvaṃ narā stuvate kṛṣṇiyāya viṣṇāpvaṃ dadathur viśvakāya |
RV_1,117.07c ghoṣāyai cit pitṛṣade duroṇe patiṃ jūryantyā aśvināv adattam ||
RV_1,117.08a yuvaṃ śyāvāya ruśatīm adattam mahaḥ kṣoṇasyāśvinā kaṇvāya |
RV_1,117.08c pravācyaṃ tad vṛṣaṇā kṛtaṃ vāṃ yan nārṣadāya śravo adhyadhattam ||
RV_1,117.09a purū varpāṃsy aśvinā dadhānā ni pedava ūhathur āśum aśvam |
RV_1,117.09c sahasrasāṃ vājinam apratītam ahihanaṃ śravasyaṃ tarutram ||
RV_1,117.10a etāni vāṃ śravasyā sudānū brahmāṅgūṣaṃ sadanaṃ rodasyoḥ |
RV_1,117.10c yad vām pajrāso aśvinā havante yātam iṣā ca viduṣe ca vājam ||
RV_1,117.11a sūnor mānenāśvinā gṛṇānā vājaṃ viprāya bhuraṇā radantā |
RV_1,117.11c agastye brahmaṇā vāvṛdhānā saṃ viśpalāṃ nāsatyāriṇītam ||
RV_1,117.12a kuha yāntā suṣṭutiṃ kāvyasya divo napātā vṛṣaṇā śayutrā |
RV_1,117.12c hiraṇyasyeva kalaśaṃ nikhātam ud ūpathur daśame aśvināhan ||
RV_1,117.13a yuvaṃ cyavānam aśvinā jarantam punar yuvānaṃ cakrathuḥ śacībhiḥ |
RV_1,117.13c yuvo rathaṃ duhitā sūryasya saha śriyā nāsatyāvṛṇīta ||
RV_1,117.14a yuvaṃ tugrāya pūrvyebhir evaiḥ punarmanyāv abhavataṃ yuvānā |
RV_1,117.14c yuvam bhujyum arṇaso niḥ samudrād vibhir ūhathur ṛjrebhir aśvaiḥ ||
RV_1,117.15a ajohavīd aśvinā taugryo vām proḷhaḥ samudram avyathir jaganvān |
RV_1,117.15c niṣ ṭam ūhathuḥ suyujā rathena manojavasā vṛṣaṇā svasti ||
RV_1,117.16a ajohavīd aśvinā vartikā vām āsno yat sīm amuñcataṃ vṛkasya |
RV_1,117.16c vi jayuṣā yayathuḥ sānv adrer jātaṃ viṣvāco ahataṃ viṣeṇa ||
RV_1,117.17a śatam meṣān vṛkye māmahānaṃ tamaḥ praṇītam aśivena pitrā |
RV_1,117.17c ākṣī ṛjrāśve aśvināv adhattaṃ jyotir andhāya cakrathur vicakṣe ||
RV_1,117.18a śunam andhāya bharam ahvayat sā vṛkīr aśvinā vṛṣaṇā nareti |
RV_1,117.18c jāraḥ kanīna iva cakṣadāna ṛjrāśvaḥ śatam ekaṃ ca meṣān ||
RV_1,117.19a mahī vām ūtir aśvinā mayobhūr uta srāmaṃ dhiṣṇyā saṃ riṇīthaḥ |
RV_1,117.19c athā yuvām id ahvayat purandhir āgacchataṃ sīṃ vṛṣaṇāv avobhiḥ ||
RV_1,117.20a adhenuṃ dasrā staryaṃ viṣaktām apinvataṃ śayave aśvinā gām |
RV_1,117.20c yuvaṃ śacībhir vimadāya jāyāṃ ny ūhathuḥ purumitrasya yoṣām ||
RV_1,117.21a yavaṃ vṛkeṇāśvinā vapanteṣaṃ duhantā manuṣāya dasrā |
RV_1,117.21c abhi dasyum bakureṇā dhamantoru jyotiś cakrathur āryāya ||
RV_1,117.22a ātharvaṇāyāśvinā dadhīce 'śvyaṃ śiraḥ praty airayatam |
RV_1,117.22c sa vām madhu pra vocad ṛtāyan tvāṣṭraṃ yad dasrāv apikakṣyaṃ vām ||
RV_1,117.23a sadā kavī sumatim ā cake vāṃ viśvā dhiyo aśvinā prāvatam me |
RV_1,117.23c asme rayiṃ nāsatyā bṛhantam apatyasācaṃ śrutyaṃ rarāthām ||
RV_1,117.24a hiraṇyahastam aśvinā rarāṇā putraṃ narā vadhrimatyā adattam |
RV_1,117.24c tridhā ha śyāvam aśvinā vikastam uj jīvasa airayataṃ sudānū ||
RV_1,117.25a etāni vām aśvinā vīryāṇi pra pūrvyāṇy āyavo 'vocan |
RV_1,117.25c brahma kṛṇvanto vṛṣaṇā yuvabhyāṃ suvīrāso vidatham ā vadema ||

RV_1,118.01a ā vāṃ ratho aśvinā śyenapatvā sumṛḷīkaḥ svavāṃ yātv arvāṅ |
RV_1,118.01c yo martyasya manaso javīyān trivandhuro vṛṣaṇā vātaraṃhāḥ ||
RV_1,118.02a trivandhureṇa trivṛtā rathena tricakreṇa suvṛtā yātam arvāk |
RV_1,118.02c pinvataṃ gā jinvatam arvato no vardhayatam aśvinā vīram asme ||
RV_1,118.03a pravadyāmanā suvṛtā rathena dasrāv imaṃ śṛṇutaṃ ślokam adreḥ |
RV_1,118.03c kim aṅga vām praty avartiṃ gamiṣṭhāhur viprāso aśvinā purājāḥ ||
RV_1,118.04a ā vāṃ śyenāso aśvinā vahantu rathe yuktāsa āśavaḥ pataṅgāḥ |
RV_1,118.04c ye apturo divyāso na gṛdhrā abhi prayo nāsatyā vahanti ||
RV_1,118.05a ā vāṃ rathaṃ yuvatis tiṣṭhad atra juṣṭvī narā duhitā sūryasya |
RV_1,118.05c pari vām aśvā vapuṣaḥ pataṅgā vayo vahantv aruṣā abhīke ||
RV_1,118.06a ud vandanam airataṃ daṃsanābhir ud rebhaṃ dasrā vṛṣaṇā śacībhiḥ |
RV_1,118.06c niṣ ṭaugryam pārayathaḥ samudrāt punaś cyavānaṃ cakrathur yuvānam ||
RV_1,118.07a yuvam atraye 'vanītāya taptam ūrjam omānam aśvināv adhattam |
RV_1,118.07c yuvaṃ kaṇvāyāpiriptāya cakṣuḥ praty adhattaṃ suṣṭutiṃ jujuṣāṇā ||
RV_1,118.08a yuvaṃ dhenuṃ śayave nādhitāyāpinvatam aśvinā pūrvyāya |
RV_1,118.08c amuñcataṃ vartikām aṃhaso niḥ prati jaṅghāṃ viśpalāyā adhattam ||
RV_1,118.09a yuvaṃ śvetam pedava indrajūtam ahihanam aśvinādattam aśvam |
RV_1,118.09c johūtram aryo abhibhūtim ugraṃ sahasrasāṃ vṛṣaṇaṃ vīḍvaṅgam ||
RV_1,118.10a tā vāṃ narā sv avase sujātā havāmahe aśvinā nādhamānāḥ |
RV_1,118.10c ā na upa vasumatā rathena giro juṣāṇā suvitāya yātam ||
RV_1,118.11a ā śyenasya javasā nūtanenāsme yātaṃ nāsatyā sajoṣāḥ |
RV_1,118.11c have hi vām aśvinā rātahavyaḥ śaśvattamāyā uṣaso vyuṣṭau ||

RV_1,119.01a ā vāṃ ratham purumāyam manojuvaṃ jīrāśvaṃ yajñiyaṃ jīvase huve |
RV_1,119.01c sahasraketuṃ vaninaṃ śatadvasuṃ śruṣṭīvānaṃ varivodhām abhi prayaḥ ||
RV_1,119.02a ūrdhvā dhītiḥ praty asya prayāmany adhāyi śasman sam ayanta ā diśaḥ |
RV_1,119.02c svadāmi gharmam prati yanty ūtaya ā vām ūrjānī ratham aśvināruhat ||
RV_1,119.03a saṃ yan mithaḥ paspṛdhānāso agmata śubhe makhā amitā jāyavo raṇe |
RV_1,119.03c yuvor aha pravaṇe cekite ratho yad aśvinā vahathaḥ sūrim ā varam ||
RV_1,119.04a yuvam bhujyum bhuramāṇaṃ vibhir gataṃ svayuktibhir nivahantā pitṛbhya ā |
RV_1,119.04c yāsiṣṭaṃ vartir vṛṣaṇā vijenyaṃ divodāsāya mahi ceti vām avaḥ ||
RV_1,119.05a yuvor aśvinā vapuṣe yuvāyujaṃ rathaṃ vāṇī yematur asya śardhyam |
RV_1,119.05c ā vām patitvaṃ sakhyāya jagmuṣī yoṣāvṛṇīta jenyā yuvām patī ||
RV_1,119.06a yuvaṃ rebham pariṣūter uruṣyatho himena gharmam paritaptam atraye |
RV_1,119.06c yuvaṃ śayor avasam pipyathur gavi pra dīrgheṇa vandanas tāry āyuṣā ||
RV_1,119.07a yuvaṃ vandanaṃ nirṛtaṃ jaraṇyayā rathaṃ na dasrā karaṇā sam invathaḥ |
RV_1,119.07c kṣetrād ā vipraṃ janatho vipanyayā pra vām atra vidhate daṃsanā bhuvat ||
RV_1,119.08a agacchataṃ kṛpamāṇam parāvati pituḥ svasya tyajasā nibādhitam |
RV_1,119.08c svarvatīr ita ūtīr yuvor aha citrā abhīke abhavann abhiṣṭayaḥ ||
RV_1,119.09a uta syā vām madhuman makṣikārapan made somasyauśijo huvanyati |
RV_1,119.09c yuvaṃ dadhīco mana ā vivāsatho 'thā śiraḥ prati vām aśvyaṃ vadat ||
RV_1,119.10a yuvam pedave puruvāram aśvinā spṛdhāṃ śvetaṃ tarutāraṃ duvasyathaḥ |
RV_1,119.10c śaryair abhidyum pṛtanāsu duṣṭaraṃ carkṛtyam indram iva carṣaṇīsaham ||

RV_1,120.01a kā rādhad dhotrāśvinā vāṃ ko vāṃ joṣa ubhayoḥ |
RV_1,120.01c kathā vidhāty apracetāḥ ||
RV_1,120.02a vidvāṃsāv id duraḥ pṛcched avidvān itthāparo acetāḥ |
RV_1,120.02c nū cin nu marte akrau ||
RV_1,120.03a tā vidvāṃsā havāmahe vāṃ tā no vidvāṃsā manma vocetam adya |
RV_1,120.03c prārcad dayamāno yuvākuḥ ||
RV_1,120.04a vi pṛcchāmi pākyā na devān vaṣaṭkṛtasyādbhutasya dasrā |
RV_1,120.04c pātaṃ ca sahyaso yuvaṃ ca rabhyaso naḥ ||
RV_1,120.05a pra yā ghoṣe bhṛgavāṇe na śobhe yayā vācā yajati pajriyo vām |
RV_1,120.05c praiṣayur na vidvān ||
RV_1,120.06a śrutaṃ gāyatraṃ takavānasyāhaṃ cid dhi rirebhāśvinā vām |
RV_1,120.06c ākṣī śubhas patī dan ||
RV_1,120.07a yuvaṃ hy āstam maho ran yuvaṃ vā yan niratataṃsatam |
RV_1,120.07c tā no vasū sugopā syātam pātaṃ no vṛkād aghāyoḥ ||
RV_1,120.08a mā kasmai dhātam abhy amitriṇe no mākutrā no gṛhebhyo dhenavo guḥ |
RV_1,120.08c stanābhujo aśiśvīḥ ||
RV_1,120.09a duhīyan mitradhitaye yuvāku rāye ca no mimītaṃ vājavatyai |
RV_1,120.09c iṣe ca no mimītaṃ dhenumatyai ||
RV_1,120.10a aśvinor asanaṃ ratham anaśvaṃ vājinīvatoḥ |
RV_1,120.10c tenāham bhūri cākana ||
RV_1,120.11a ayaṃ samaha mā tanūhyāte janāṃ anu |
RV_1,120.11c somapeyaṃ sukho rathaḥ ||
RV_1,120.12a adha svapnasya nir vide 'bhuñjataś ca revataḥ |
RV_1,120.12c ubhā tā basri naśyataḥ ||

RV_1,121.01a kad itthā nṝṃḥ pātraṃ devayatāṃ śravad giro aṅgirasāṃ turaṇyan |
RV_1,121.01c pra yad ānaḍ viśa ā harmyasyoru kraṃsate adhvare yajatraḥ ||
RV_1,121.02a stambhīd dha dyāṃ sa dharuṇam pruṣāyad ṛbhur vājāya draviṇaṃ naro goḥ |
RV_1,121.02c anu svajām mahiṣaś cakṣata vrām menām aśvasya pari mātaraṃ goḥ ||
RV_1,121.03a nakṣad dhavam aruṇīḥ pūrvyaṃ rāṭ turo viśām aṅgirasām anu dyūn |
RV_1,121.03c takṣad vajraṃ niyutaṃ tastambhad dyāṃ catuṣpade naryāya dvipāde ||
RV_1,121.04a asya made svaryaṃ dā ṛtāyāpīvṛtam usriyāṇām anīkam |
RV_1,121.04c yad dha prasarge trikakum nivartad apa druho mānuṣasya duro vaḥ ||
RV_1,121.05a tubhyam payo yat pitarāv anītāṃ rādhaḥ suretas turaṇe bhuraṇyū |
RV_1,121.05c śuci yat te rekṇa āyajanta sabardughāyāḥ paya usriyāyāḥ ||
RV_1,121.06a adha pra jajñe taraṇir mamattu pra rocy asyā uṣaso na sūraḥ |
RV_1,121.06c indur yebhir āṣṭa sveduhavyaiḥ sruveṇa siñcañ jaraṇābhi dhāma ||
RV_1,121.07a svidhmā yad vanadhitir apasyāt sūro adhvare pari rodhanā goḥ |
RV_1,121.07c yad dha prabhāsi kṛtvyāṃ anu dyūn anarviśe paśviṣe turāya ||
RV_1,121.08a aṣṭā maho diva ādo harī iha dyumnāsāham abhi yodhāna utsam |
RV_1,121.08c hariṃ yat te mandinaṃ dukṣan vṛdhe gorabhasam adribhir vātāpyam ||
RV_1,121.09a tvam āyasam prati vartayo gor divo aśmānam upanītam ṛbhvā |
RV_1,121.09c kutsāya yatra puruhūta vanvañ chuṣṇam anantaiḥ pariyāsi vadhaiḥ ||
RV_1,121.10a purā yat sūras tamaso apītes tam adrivaḥ phaligaṃ hetim asya |
RV_1,121.10c śuṣṇasya cit parihitaṃ yad ojo divas pari sugrathitaṃ tad ādaḥ ||
RV_1,121.11a anu tvā mahī pājasī acakre dyāvākṣāmā madatām indra karman |
RV_1,121.11c tvaṃ vṛtram āśayānaṃ sirāsu maho vajreṇa siṣvapo varāhum ||
RV_1,121.12a tvam indra naryo yāṃ avo nṝn tiṣṭhā vātasya suyujo vahiṣṭhān |
RV_1,121.12c yaṃ te kāvya uśanā mandinaṃ dād vṛtrahaṇam pāryaṃ tatakṣa vajram ||
RV_1,121.13a tvaṃ sūro harito rāmayo nṝn bharac cakram etaśo nāyam indra |
RV_1,121.13c prāsya pāraṃ navatiṃ nāvyānām api kartam avartayo 'yajyūn ||
RV_1,121.14a tvaṃ no asyā indra durhaṇāyāḥ pāhi vajrivo duritād abhīke |
RV_1,121.14c pra no vājān rathyo aśvabudhyān iṣe yandhi śravase sūnṛtāyai ||
RV_1,121.15a mā sā te asmat sumatir vi dasad vājapramahaḥ sam iṣo varanta |
RV_1,121.15c ā no bhaja maghavan goṣv aryo maṃhiṣṭhās te sadhamādaḥ syāma ||

RV_1,122.01a pra vaḥ pāntaṃ raghumanyavo 'ndho yajñaṃ rudrāya mīḷhuṣe bharadhvam |
RV_1,122.01c divo astoṣy asurasya vīrair iṣudhyeva maruto rodasyoḥ ||
RV_1,122.02a patnīva pūrvahūtiṃ vāvṛdhadhyā uṣāsānaktā purudhā vidāne |
RV_1,122.02c starīr nātkaṃ vyutaṃ vasānā sūryasya śriyā sudṛśī hiraṇyaiḥ ||
RV_1,122.03a mamattu naḥ parijmā vasarhā mamattu vāto apāṃ vṛṣaṇvān |
RV_1,122.03c śiśītam indrāparvatā yuvaṃ nas tan no viśve varivasyantu devāḥ ||
RV_1,122.04a uta tyā me yaśasā śvetanāyai vyantā pāntauśijo huvadhyai |
RV_1,122.04c pra vo napātam apāṃ kṛṇudhvam pra mātarā rāspinasyāyoḥ ||
RV_1,122.05a ā vo ruvaṇyum auśijo huvadhyai ghoṣeva śaṃsam arjunasya naṃśe |
RV_1,122.05c pra vaḥ pūṣṇe dāvana āṃ acchā voceya vasutātim agneḥ ||
RV_1,122.06a śrutam me mitrāvaruṇā havemota śrutaṃ sadane viśvataḥ sīm |
RV_1,122.06c śrotu naḥ śroturātiḥ suśrotuḥ sukṣetrā sindhur adbhiḥ ||
RV_1,122.07a stuṣe sā vāṃ varuṇa mitra rātir gavāṃ śatā pṛkṣayāmeṣu pajre |
RV_1,122.07c śrutarathe priyarathe dadhānāḥ sadyaḥ puṣṭiṃ nirundhānāso agman ||
RV_1,122.08a asya stuṣe mahimaghasya rādhaḥ sacā sanema nahuṣaḥ suvīrāḥ |
RV_1,122.08c jano yaḥ pajrebhyo vājinīvān aśvāvato rathino mahyaṃ sūriḥ ||
RV_1,122.09a jano yo mitrāvaruṇāv abhidhrug apo na vāṃ sunoty akṣṇayādhruk |
RV_1,122.09c svayaṃ sa yakṣmaṃ hṛdaye ni dhatta āpa yad īṃ hotrābhir ṛtāvā ||
RV_1,122.10a sa vrādhato nahuṣo daṃsujūtaḥ śardhastaro narāṃ gūrtaśravāḥ |
RV_1,122.10c visṛṣṭarātir yāti bāḷhasṛtvā viśvāsu pṛtsu sadam ic chūraḥ ||
RV_1,122.11a adha gmantā nahuṣo havaṃ sūreḥ śrotā rājāno amṛtasya mandrāḥ |
RV_1,122.11c nabhojuvo yan niravasya rādhaḥ praśastaye mahinā rathavate ||
RV_1,122.12a etaṃ śardhaṃ dhāma yasya sūrer ity avocan daśatayasya naṃśe |
RV_1,122.12c dyumnāni yeṣu vasutātī rāran viśve sanvantu prabhṛtheṣu vājam ||
RV_1,122.13a mandāmahe daśatayasya dhāser dvir yat pañca bibhrato yanty annā |
RV_1,122.13c kim iṣṭāśva iṣṭaraśmir eta īśānāsas taruṣa ṛñjate nṝn ||
RV_1,122.14a hiraṇyakarṇam maṇigrīvam arṇas tan no viśve varivasyantu devāḥ |
RV_1,122.14c aryo giraḥ sadya ā jagmuṣīr osrāś cākantūbhayeṣv asme ||
RV_1,122.15a catvāro mā maśarśārasya śiśvas trayo rājña āyavasasya jiṣṇoḥ |
RV_1,122.15c ratho vām mitrāvaruṇā dīrghāpsāḥ syūmagabhastiḥ sūro nādyaut ||

RV_1,123.01a pṛthū ratho dakṣiṇāyā ayojy ainaṃ devāso amṛtāso asthuḥ |
RV_1,123.01c kṛṣṇād ud asthād aryā vihāyāś cikitsantī mānuṣāya kṣayāya ||
RV_1,123.02a pūrvā viśvasmād bhuvanād abodhi jayantī vājam bṛhatī sanutrī |
RV_1,123.02c uccā vy akhyad yuvatiḥ punarbhūr oṣā agan prathamā pūrvahūtau ||
RV_1,123.03a yad adya bhāgaṃ vibhajāsi nṛbhya uṣo devi martyatrā sujāte |
RV_1,123.03c devo no atra savitā damūnā anāgaso vocati sūryāya ||
RV_1,123.04a gṛhaṃ-gṛham ahanā yāty acchā dive-dive adhi nāmā dadhānā |
RV_1,123.04c siṣāsantī dyotanā śaśvad āgād agram-agram id bhajate vasūnām ||
RV_1,123.05a bhagasya svasā varuṇasya jāmir uṣaḥ sūnṛte prathamā jarasva |
RV_1,123.05c paścā sa daghyā yo aghasya dhātā jayema taṃ dakṣiṇayā rathena ||
RV_1,123.06a ud īratāṃ sūnṛtā ut purandhīr ud agnayaḥ śuśucānāso asthuḥ |
RV_1,123.06c spārhā vasūni tamasāpagūḷhāviṣ kṛṇvanty uṣaso vibhātīḥ ||
RV_1,123.07a apānyad ety abhy anyad eti viṣurūpe ahanī saṃ carete |
RV_1,123.07c parikṣitos tamo anyā guhākar adyaud uṣāḥ śośucatā rathena ||
RV_1,123.08a sadṛśīr adya sadṛśīr id u śvo dīrghaṃ sacante varuṇasya dhāma |
RV_1,123.08c anavadyās triṃśataṃ yojanāny ekaikā kratum pari yanti sadyaḥ ||
RV_1,123.09a jānaty ahnaḥ prathamasya nāma śukrā kṛṣṇād ajaniṣṭa śvitīcī |
RV_1,123.09c ṛtasya yoṣā na mināti dhāmāhar-ahar niṣkṛtam ācarantī ||
RV_1,123.10a kanyeva tanvā śāśadānāṃ eṣi devi devam iyakṣamāṇam |
RV_1,123.10c saṃsmayamānā yuvatiḥ purastād āvir vakṣāṃsi kṛṇuṣe vibhātī ||
RV_1,123.11a susaṃkāśā mātṛmṛṣṭeva yoṣāvis tanvaṃ kṛṇuṣe dṛśe kam |
RV_1,123.11c bhadrā tvam uṣo vitaraṃ vy uccha na tat te anyā uṣaso naśanta ||
RV_1,123.12a aśvāvatīr gomatīr viśvavārā yatamānā raśmibhiḥ sūryasya |
RV_1,123.12c parā ca yanti punar ā ca yanti bhadrā nāma vahamānā uṣāsaḥ ||
RV_1,123.13a ṛtasya raśmim anuyacchamānā bhadram-bhadraṃ kratum asmāsu dhehi |
RV_1,123.13c uṣo no adya suhavā vy ucchāsmāsu rāyo maghavatsu ca syuḥ ||

RV_1,124.01a uṣā ucchantī samidhāne agnā udyan sūrya urviyā jyotir aśret |
RV_1,124.01c devo no atra savitā nv artham prāsāvīd dvipat pra catuṣpad ityai ||
RV_1,124.02a aminatī daivyāni vratāni praminatī manuṣyā yugāni |
RV_1,124.02c īyuṣīṇām upamā śaśvatīnām āyatīnām prathamoṣā vy adyaut ||
RV_1,124.03a eṣā divo duhitā praty adarśi jyotir vasānā samanā purastāt |
RV_1,124.03c ṛtasya panthām anv eti sādhu prajānatīva na diśo mināti ||
RV_1,124.04a upo adarśi śundhyuvo na vakṣo nodhā ivāvir akṛta priyāṇi |
RV_1,124.04c admasan na sasato bodhayantī śaśvattamāgāt punar eyuṣīṇām ||
RV_1,124.05a pūrve ardhe rajaso aptyasya gavāṃ janitry akṛta pra ketum |
RV_1,124.05c vy u prathate vitaraṃ varīya obhā pṛṇantī pitror upasthā ||
RV_1,124.06a eved eṣā purutamā dṛśe kaṃ nājāmiṃ na pari vṛṇakti jāmim |
RV_1,124.06c arepasā tanvā śāśadānā nārbhād īṣate na maho vibhātī ||
RV_1,124.07a abhrāteva puṃsa eti pratīcī gartārug iva sanaye dhanānām |
RV_1,124.07c jāyeva patya uśatī suvāsā uṣā hasreva ni riṇīte apsaḥ ||
RV_1,124.08a svasā svasre jyāyasyai yonim āraig apaity asyāḥ praticakṣyeva |
RV_1,124.08c vyucchantī raśmibhiḥ sūryasyāñjy aṅkte samanagā iva vrāḥ ||
RV_1,124.09a āsām pūrvāsām ahasu svasṝṇām aparā pūrvām abhy eti paścāt |
RV_1,124.09c tāḥ pratnavan navyasīr nūnam asme revad ucchantu sudinā uṣāsaḥ ||
RV_1,124.10a pra bodhayoṣaḥ pṛṇato maghony abudhyamānāḥ paṇayaḥ sasantu |
RV_1,124.10c revad uccha maghavadbhyo maghoni revat stotre sūnṛte jārayantī ||
RV_1,124.11a aveyam aśvaid yuvatiḥ purastād yuṅkte gavām aruṇānām anīkam |
RV_1,124.11c vi nūnam ucchād asati pra ketur gṛhaṃ-gṛham upa tiṣṭhāte agniḥ ||
RV_1,124.12a ut te vayaś cid vasater apaptan naraś ca ye pitubhājo vyuṣṭau |
RV_1,124.12c amā sate vahasi bhūri vāmam uṣo devi dāśuṣe martyāya ||
RV_1,124.13a astoḍhvaṃ stomyā brahmaṇā me 'vīvṛdhadhvam uśatīr uṣāsaḥ |
RV_1,124.13c yuṣmākaṃ devīr avasā sanema sahasriṇaṃ ca śatinaṃ ca vājam ||

RV_1,125.01a prātā ratnam prātaritvā dadhāti taṃ cikitvān pratigṛhyā ni dhatte |
RV_1,125.01c tena prajāṃ vardhayamāna āyū rāyas poṣeṇa sacate suvīraḥ ||
RV_1,125.02a sugur asat suhiraṇyaḥ svaśvo bṛhad asmai vaya indro dadhāti |
RV_1,125.02c yas tvāyantaṃ vasunā prātaritvo mukṣījayeva padim utsināti ||
RV_1,125.03a āyam adya sukṛtam prātar icchann iṣṭeḥ putraṃ vasumatā rathena |
RV_1,125.03c aṃśoḥ sutam pāyaya matsarasya kṣayadvīraṃ vardhaya sūnṛtābhiḥ ||
RV_1,125.04a upa kṣaranti sindhavo mayobhuva ījānaṃ ca yakṣyamāṇaṃ ca dhenavaḥ |
RV_1,125.04c pṛṇantaṃ ca papuriṃ ca śravasyavo ghṛtasya dhārā upa yanti viśvataḥ ||
RV_1,125.05a nākasya pṛṣṭhe adhi tiṣṭhati śrito yaḥ pṛṇāti sa ha deveṣu gacchati |
RV_1,125.05c tasmā āpo ghṛtam arṣanti sindhavas tasmā iyaṃ dakṣiṇā pinvate sadā ||
RV_1,125.06a dakṣiṇāvatām id imāni citrā dakṣiṇāvatāṃ divi sūryāsaḥ |
RV_1,125.06c dakṣiṇāvanto amṛtam bhajante dakṣiṇāvantaḥ pra tiranta āyuḥ ||
RV_1,125.07a mā pṛṇanto duritam ena āran mā jāriṣuḥ sūrayaḥ suvratāsaḥ |
RV_1,125.07c anyas teṣām paridhir astu kaś cid apṛṇantam abhi saṃ yantu śokāḥ ||

RV_1,126.01a amandān stomān pra bhare manīṣā sindhāv adhi kṣiyato bhāvyasya |
RV_1,126.01c yo me sahasram amimīta savān atūrto rājā śrava icchamānaḥ ||
RV_1,126.02a śataṃ rājño nādhamānasya niṣkāñ chatam aśvān prayatān sadya ādam |
RV_1,126.02c śataṃ kakṣīvāṃ asurasya gonāṃ divi śravo 'jaram ā tatāna ||
RV_1,126.03a upa mā śyāvāḥ svanayena dattā vadhūmanto daśa rathāso asthuḥ |
RV_1,126.03c ṣaṣṭiḥ sahasram anu gavyam āgāt sanat kakṣīvāṃ abhipitve ahnām ||
RV_1,126.04a catvāriṃśad daśarathasya śoṇāḥ sahasrasyāgre śreṇiṃ nayanti |
RV_1,126.04c madacyutaḥ kṛśanāvato atyān kakṣīvanta ud amṛkṣanta pajrāḥ ||
RV_1,126.05a pūrvām anu prayatim ā dade vas trīn yuktāṃ aṣṭāv aridhāyaso gāḥ |
RV_1,126.05c subandhavo ye viśyā iva vrā anasvantaḥ śrava aiṣanta pajrāḥ ||
RV_1,126.06a āgadhitā parigadhitā yā kaśīkeva jaṅgahe |
RV_1,126.06c dadāti mahyaṃ yādurī yāśūnām bhojyā śatā ||
RV_1,126.07a upopa me parā mṛśa mā me dabhrāṇi manyathāḥ |
RV_1,126.07c sarvāham asmi romaśā gandhārīṇām ivāvikā ||

RV_1,127.01a agniṃ hotāram manye dāsvantaṃ vasuṃ sūnuṃ sahaso jātavedasaṃ vipraṃ na jātavedasam |
RV_1,127.01d ya ūrdhvayā svadhvaro devo devācyā kṛpā |
RV_1,127.01f ghṛtasya vibhrāṣṭim anu vaṣṭi śociṣājuhvānasya sarpiṣaḥ ||
RV_1,127.02a yajiṣṭhaṃ tvā yajamānā huvema jyeṣṭham aṅgirasāṃ vipra manmabhir viprebhiḥ śukra manmabhiḥ |
RV_1,127.02d parijmānam iva dyāṃ hotāraṃ carṣaṇīnām |
RV_1,127.02f śociṣkeśaṃ vṛṣaṇaṃ yam imā viśaḥ prāvantu jūtaye viśaḥ ||
RV_1,127.03a sa hi purū cid ojasā virukmatā dīdyāno bhavati druhantaraḥ paraśur na druhantaraḥ |
RV_1,127.03d vīḷu cid yasya samṛtau śruvad vaneva yat sthiram |
RV_1,127.03f niḥṣahamāṇo yamate nāyate dhanvāsahā nāyate ||
RV_1,127.04a dṛḷhā cid asmā anu dur yathā vide tejiṣṭhābhir araṇibhir dāṣṭy avase 'gnaye dāṣṭy avase |
RV_1,127.04d pra yaḥ purūṇi gāhate takṣad vaneva śociṣā |
RV_1,127.04f sthirā cid annā ni riṇāty ojasā ni sthirāṇi cid ojasā ||
RV_1,127.05a tam asya pṛkṣam uparāsu dhīmahi naktaṃ yaḥ sudarśataro divātarād aprāyuṣe divātarāt |
RV_1,127.05d ād asyāyur grabhaṇavad vīḷu śarma na sūnave |
RV_1,127.05f bhaktam abhaktam avo vyanto ajarā agnayo vyanto ajarāḥ ||
RV_1,127.06a sa hi śardho na mārutaṃ tuviṣvaṇir apnasvatīṣūrvarāsv iṣṭanir ārtanāsv iṣṭaniḥ |
RV_1,127.06d ādad dhavyāny ādadir yajñasya ketur arhaṇā |
RV_1,127.06f adha smāsya harṣato hṛṣīvato viśve juṣanta panthāṃ naraḥ śubhe na panthām ||
RV_1,127.07a dvitā yad īṃ kīstāso abhidyavo namasyanta upavocanta bhṛgavo mathnanto dāśā bhṛgavaḥ |
RV_1,127.07d agnir īśe vasūnāṃ śucir yo dharṇir eṣām |
RV_1,127.07f priyāṃ apidhīṃr vaniṣīṣṭa medhira ā vaniṣīṣṭa medhiraḥ ||
RV_1,127.08a viśvāsāṃ tvā viśām patiṃ havāmahe sarvāsāṃ samānaṃ dampatim bhuje satyagirvāhasam bhuje |
RV_1,127.08d atithim mānuṣāṇām pitur na yasyāsayā |
RV_1,127.08f amī ca viśve amṛtāsa ā vayo havyā deveṣv ā vayaḥ ||
RV_1,127.09a tvam agne sahasā sahantamaḥ śuṣmintamo jāyase devatātaye rayir na devatātaye |
RV_1,127.09d śuṣmintamo hi te mado dyumnintama uta kratuḥ |
RV_1,127.09f adha smā te pari caranty ajara śruṣṭīvāno nājara ||
RV_1,127.10a pra vo mahe sahasā sahasvata uṣarbudhe paśuṣe nāgnaye stomo babhūtv agnaye |
RV_1,127.10d prati yad īṃ haviṣmān viśvāsu kṣāsu joguve |
RV_1,127.10f agre rebho na jarata ṛṣūṇāṃ jūrṇir hota ṛṣūṇām ||
RV_1,127.11a sa no nediṣṭhaṃ dadṛśāna ā bharāgne devebhiḥ sacanāḥ sucetunā maho rāyaḥ sucetunā |
RV_1,127.11d mahi śaviṣṭha nas kṛdhi saṃcakṣe bhuje asyai |
RV_1,127.11f mahi stotṛbhyo maghavan suvīryam mathīr ugro na śavasā ||

RV_1,128.01a ayaṃ jāyata manuṣo dharīmaṇi hotā yajiṣṭha uśijām anu vratam agniḥ svam anu vratam |
RV_1,128.01d viśvaśruṣṭiḥ sakhīyate rayir iva śravasyate |
RV_1,128.01f adabdho hotā ni ṣadad iḷas pade parivīta iḷas pade ||
RV_1,128.02a taṃ yajñasādham api vātayāmasy ṛtasya pathā namasā haviṣmatā devatātā haviṣmatā |
RV_1,128.02d sa na ūrjām upābhṛty ayā kṛpā na jūryati |
RV_1,128.02f yam mātariśvā manave parāvato devam bhāḥ parāvataḥ ||
RV_1,128.03a evena sadyaḥ pary eti pārthivam muhurgī reto vṛṣabhaḥ kanikradad dadhad retaḥ kanikradat |
RV_1,128.03d śataṃ cakṣāṇo akṣabhir devo vaneṣu turvaṇiḥ |
RV_1,128.03f sado dadhāna upareṣu sānuṣv agniḥ pareṣu sānuṣu ||
RV_1,128.04a sa sukratuḥ purohito dame-dame 'gnir yajñasyādhvarasya cetati kratvā yajñasya cetati |
RV_1,128.04d kratvā vedhā iṣūyate viśvā jātāni paspaśe |
RV_1,128.04f yato ghṛtaśrīr atithir ajāyata vahnir vedhā ajāyata ||
RV_1,128.05a kratvā yad asya taviṣīṣu pṛñcate 'gner aveṇa marutāṃ na bhojyeṣirāya na bhojyā |
RV_1,128.05d sa hi ṣmā dānam invati vasūnāṃ ca majmanā |
RV_1,128.05f sa nas trāsate duritād abhihrutaḥ śaṃsād aghād abhihrutaḥ ||
RV_1,128.06a viśvo vihāyā aratir vasur dadhe haste dakṣiṇe taraṇir na śiśrathac chravasyayā na śiśrathat |
RV_1,128.06d viśvasmā id iṣudhyate devatrā havyam ohiṣe |
RV_1,128.06f viśvasmā it sukṛte vāram ṛṇvaty agnir dvārā vy ṛṇvati ||
RV_1,128.07a sa mānuṣe vṛjane śantamo hito 'gnir yajñeṣu jenyo na viśpatiḥ priyo yajñeṣu viśpatiḥ |
RV_1,128.07d sa havyā mānuṣāṇām iḷā kṛtāni patyate |
RV_1,128.07f sa nas trāsate varuṇasya dhūrter maho devasya dhūrteḥ ||
RV_1,128.08a agniṃ hotāram īḷate vasudhitim priyaṃ cetiṣṭham aratiṃ ny erire havyavāhaṃ ny erire |
RV_1,128.08d viśvāyuṃ viśvavedasaṃ hotāraṃ yajataṃ kavim |
RV_1,128.08f devāso raṇvam avase vasūyavo gīrbhī raṇvaṃ vasūyavaḥ ||

RV_1,129.01a yaṃ tvaṃ ratham indra medhasātaye 'pākā santam iṣira praṇayasi prānavadya nayasi |
RV_1,129.01d sadyaś cit tam abhiṣṭaye karo vaśaś ca vājinam |
RV_1,129.01f sāsmākam anavadya tūtujāna vedhasām imāṃ vācaṃ na vedhasām ||
RV_1,129.02a sa śrudhi yaḥ smā pṛtanāsu kāsu cid dakṣāyya indra bharahūtaye nṛbhir asi pratūrtaye nṛbhiḥ |
RV_1,129.02d yaḥ śūraiḥ svaḥ sanitā yo viprair vājaṃ tarutā |
RV_1,129.02f tam īśānāsa iradhanta vājinam pṛkṣam atyaṃ na vājinam ||
RV_1,129.03a dasmo hi ṣmā vṛṣaṇam pinvasi tvacaṃ kaṃ cid yāvīr araruṃ śūra martyam parivṛṇakṣi martyam |
RV_1,129.03d indrota tubhyaṃ tad dive tad rudrāya svayaśase |
RV_1,129.03f mitrāya vocaṃ varuṇāya saprathaḥ sumṛḷīkāya saprathaḥ ||
RV_1,129.04a asmākaṃ va indram uśmasīṣṭaye sakhāyaṃ viśvāyum prāsahaṃ yujaṃ vājeṣu prāsahaṃ yujam |
RV_1,129.04d asmākam brahmotaye 'vā pṛtsuṣu kāsu cit |
RV_1,129.04f nahi tvā śatru starate stṛṇoṣi yaṃ viśvaṃ śatruṃ stṛṇoṣi yam ||
RV_1,129.05a ni ṣū namātimatiṃ kayasya cit tejiṣṭhābhir araṇibhir notibhir ugrābhir ugrotibhiḥ |
RV_1,129.05d neṣi ṇo yathā purānenāḥ śūra manyase |
RV_1,129.05f viśvāni pūror apa parṣi vahnir āsā vahnir no accha ||
RV_1,129.06a pra tad voceyam bhavyāyendave havyo na ya iṣavān manma rejati rakṣohā manma rejati |
RV_1,129.06d svayaṃ so asmad ā nido vadhair ajeta durmatim |
RV_1,129.06f ava sraved aghaśaṃso 'vataram ava kṣudram iva sravet ||
RV_1,129.07a vanema tad dhotrayā citantyā vanema rayiṃ rayivaḥ suvīryaṃ raṇvaṃ santaṃ suvīryam |
RV_1,129.07d durmanmānaṃ sumantubhir em iṣā pṛcīmahi |
RV_1,129.07f ā satyābhir indraṃ dyumnahūtibhir yajatraṃ dyumnahūtibhiḥ ||
RV_1,129.08a pra-prā vo asme svayaśobhir ūtī parivarga indro durmatīnāṃ darīman durmatīnām |
RV_1,129.08d svayaṃ sā riṣayadhyai yā na upeṣe atraiḥ |
RV_1,129.08f hatem asan na vakṣati kṣiptā jūrṇir na vakṣati ||
RV_1,129.09a tvaṃ na indra rāyā parīṇasā yāhi pathāṃ anehasā puro yāhy arakṣasā |
RV_1,129.09d sacasva naḥ parāka ā sacasvāstamīka ā |
RV_1,129.09f pāhi no dūrād ārād abhiṣṭibhiḥ sadā pāhy abhiṣṭibhiḥ ||
RV_1,129.10a tvaṃ na indra rāyā tarūṣasograṃ cit tvā mahimā sakṣad avase mahe mitraṃ nāvase |
RV_1,129.10d ojiṣṭha trātar avitā rathaṃ kaṃ cid amartya |
RV_1,129.10f anyam asmad ririṣeḥ kaṃ cid adrivo ririkṣantaṃ cid adrivaḥ ||
RV_1,129.11a pāhi na indra suṣṭuta sridho 'vayātā sadam id durmatīnāṃ devaḥ san durmatīnām |
RV_1,129.11d hantā pāpasya rakṣasas trātā viprasya māvataḥ |
RV_1,129.11f adhā hi tvā janitā jījanad vaso rakṣohaṇaṃ tvā jījanad vaso ||

RV_1,130.01a endra yāhy upa naḥ parāvato nāyam acchā vidathānīva satpatir astaṃ rājeva satpatiḥ |
RV_1,130.01d havāmahe tvā vayam prayasvantaḥ sute sacā |
RV_1,130.01f putrāso na pitaraṃ vājasātaye maṃhiṣṭhaṃ vājasātaye ||
RV_1,130.02a pibā somam indra suvānam adribhiḥ kośena siktam avataṃ na vaṃsagas tātṛṣāṇo na vaṃsagaḥ |
RV_1,130.02d madāya haryatāya te tuviṣṭamāya dhāyase |
RV_1,130.02f ā tvā yacchantu harito na sūryam ahā viśveva sūryam ||
RV_1,130.03a avindad divo nihitaṃ guhā nidhiṃ ver na garbham parivītam aśmany anante antar aśmani |
RV_1,130.03d vrajaṃ vajrī gavām iva siṣāsann aṅgirastamaḥ |
RV_1,130.03f apāvṛṇod iṣa indraḥ parīvṛtā dvāra iṣaḥ parīvṛtāḥ ||
RV_1,130.04a dādṛhāṇo vajram indro gabhastyoḥ kṣadmeva tigmam asanāya saṃ śyad ahihatyāya saṃ śyat |
RV_1,130.04d saṃvivyāna ojasā śavobhir indra majmanā |
RV_1,130.04f taṣṭeva vṛkṣaṃ vanino ni vṛścasi paraśveva ni vṛścasi ||
RV_1,130.05a tvaṃ vṛthā nadya indra sartave 'cchā samudram asṛjo rathāṃ iva vājayato rathāṃ iva |
RV_1,130.05d ita ūtīr ayuñjata samānam artham akṣitam |
RV_1,130.05f dhenūr iva manave viśvadohaso janāya viśvadohasaḥ ||
RV_1,130.06a imāṃ te vācaṃ vasūyanta āyavo rathaṃ na dhīraḥ svapā atakṣiṣuḥ sumnāya tvām atakṣiṣuḥ |
RV_1,130.06d śumbhanto jenyaṃ yathā vājeṣu vipra vājinam |
RV_1,130.06f atyam iva śavase sātaye dhanā viśvā dhanāni sātaye ||
RV_1,130.07a bhinat puro navatim indra pūrave divodāsāya mahi dāśuṣe nṛto vajreṇa dāśuṣe nṛto |
RV_1,130.07d atithigvāya śambaraṃ girer ugro avābharat |
RV_1,130.07f maho dhanāni dayamāna ojasā viśvā dhanāny ojasā ||
RV_1,130.08a indraḥ samatsu yajamānam āryam prāvad viśveṣu śatamūtir ājiṣu svarmīḷheṣv ājiṣu |
RV_1,130.08d manave śāsad avratān tvacaṃ kṛṣṇām arandhayat |
RV_1,130.08f dakṣan na viśvaṃ tatṛṣāṇam oṣati ny arśasānam oṣati ||
RV_1,130.09a sūraś cakram pra vṛhaj jāta ojasā prapitve vācam aruṇo muṣāyatīśāna ā muṣāyati |
RV_1,130.09d uśanā yat parāvato 'jagann ūtaye kave |
RV_1,130.09f sumnāni viśvā manuṣeva turvaṇir ahā viśveva turvaṇiḥ ||
RV_1,130.10a sa no navyebhir vṛṣakarmann ukthaiḥ purāṃ dartaḥ pāyubhiḥ pāhi śagmaiḥ |
RV_1,130.10b divodāsebhir indra stavāno vāvṛdhīthā ahobhir iva dyauḥ ||

RV_1,131.01a indrāya hi dyaur asuro anamnatendrāya mahī pṛthivī varīmabhir dyumnasātā varīmabhiḥ |
RV_1,131.01d indraṃ viśve sajoṣaso devāso dadhire puraḥ |
RV_1,131.01f indrāya viśvā savanāni mānuṣā rātāni santu mānuṣā ||
RV_1,131.02a viśveṣu hi tvā savaneṣu tuñjate samānam ekaṃ vṛṣamaṇyavaḥ pṛthak svaḥ saniṣyavaḥ pṛthak |
RV_1,131.02d taṃ tvā nāvaṃ na parṣaṇiṃ śūṣasya dhuri dhīmahi |
RV_1,131.02f indraṃ na yajñaiś citayanta āyava stomebhir indram āyavaḥ ||
RV_1,131.03a vi tvā tatasre mithunā avasyavo vrajasya sātā gavyasya niḥsṛjaḥ sakṣanta indra niḥsṛjaḥ |
RV_1,131.03d yad gavyantā dvā janā svar yantā samūhasi |
RV_1,131.03f āviṣ karikrad vṛṣaṇaṃ sacābhuvaṃ vajram indra sacābhuvam ||
RV_1,131.04a viduṣ ṭe asya vīryasya pūravaḥ puro yad indra śāradīr avātiraḥ sāsahāno avātiraḥ |
RV_1,131.04d śāsas tam indra martyam ayajyuṃ śavasas pate |
RV_1,131.04f mahīm amuṣṇāḥ pṛthivīm imā apo mandasāna imā apaḥ ||
RV_1,131.05a ād it te asya vīryasya carkiran madeṣu vṛṣann uśijo yad āvitha sakhīyato yad āvitha |
RV_1,131.05d cakartha kāram ebhyaḥ pṛtanāsu pravantave |
RV_1,131.05f te anyām-anyāṃ nadyaṃ saniṣṇata śravasyantaḥ saniṣṇata ||
RV_1,131.06a uto no asyā uṣaso juṣeta hy arkasya bodhi haviṣo havīmabhiḥ svarṣātā havīmabhiḥ |
RV_1,131.06d yad indra hantave mṛdho vṛṣā vajriñ ciketasi |
RV_1,131.06f ā me asya vedhaso navīyaso manma śrudhi navīyasaḥ ||
RV_1,131.07a tvaṃ tam indra vāvṛdhāno asmayur amitrayantaṃ tuvijāta martyaṃ vajreṇa śūra martyam |
RV_1,131.07d jahi yo no aghāyati śṛṇuṣva suśravastamaḥ |
RV_1,131.07f riṣṭaṃ na yāmann apa bhūtu durmatir viśvāpa bhūtu durmatiḥ ||

RV_1,132.01a tvayā vayam maghavan pūrvye dhana indratvotāḥ sāsahyāma pṛtanyato vanuyāma vanuṣyataḥ |
RV_1,132.01d nediṣṭhe asminn ahany adhi vocā nu sunvate |
RV_1,132.01f asmin yajñe vi cayemā bhare kṛtaṃ vājayanto bhare kṛtam ||
RV_1,132.02a svarjeṣe bhara āprasya vakmany uṣarbudhaḥ svasminn añjasi krāṇasya svasminn añjasi |
RV_1,132.02d ahann indro yathā vide śīrṣṇā-śīrṣṇopavācyaḥ |
RV_1,132.02f asmatrā te sadhryak santu rātayo bhadrā bhadrasya rātayaḥ ||
RV_1,132.03a tat tu prayaḥ pratnathā te śuśukvanaṃ yasmin yajñe vāram akṛṇvata kṣayam ṛtasya vār asi kṣayam |
RV_1,132.03d vi tad vocer adha dvitāntaḥ paśyanti raśmibhiḥ |
RV_1,132.03f sa ghā vide anv indro gaveṣaṇo bandhukṣidbhyo gaveṣaṇaḥ ||
RV_1,132.04a nū itthā te pūrvathā ca pravācyaṃ yad aṅgirobhyo 'vṛṇor apa vrajam indra śikṣann apa vrajam |
RV_1,132.04d aibhyaḥ samānyā diśāsmabhyaṃ jeṣi yotsi ca |
RV_1,132.04f sunvadbhyo randhayā kaṃ cid avrataṃ hṛṇāyantaṃ cid avratam ||
RV_1,132.05a saṃ yaj janān kratubhiḥ śūra īkṣayad dhane hite taruṣanta śravasyavaḥ pra yakṣanta śravasyavaḥ |
RV_1,132.05d tasmā āyuḥ prajāvad id bādhe arcanty ojasā |
RV_1,132.05f indra okyaṃ didhiṣanta dhītayo devāṃ acchā na dhītayaḥ ||
RV_1,132.06a yuvaṃ tam indrāparvatā puroyudhā yo naḥ pṛtanyād apa taṃ-tam id dhataṃ vajreṇa taṃ-tam id dhatam |
RV_1,132.06d dūre cattāya cchantsad gahanaṃ yad inakṣat |
RV_1,132.06f asmākaṃ śatrūn pari śūra viśvato darmā darṣīṣṭa viśvataḥ ||

RV_1,133.01a ubhe punāmi rodasī ṛtena druho dahāmi sam mahīr anindrāḥ |
RV_1,133.01c abhivlagya yatra hatā amitrā vailasthānam pari tṛḷhā aśeran ||
RV_1,133.02a abhivlagyā cid adrivaḥ śīrṣā yātumatīnām |
RV_1,133.02c chindhi vaṭūriṇā padā mahāvaṭūriṇā padā ||
RV_1,133.03a avāsām maghavañ jahi śardho yātumatīnām |
RV_1,133.03c vailasthānake armake mahāvailasthe armake ||
RV_1,133.04a yāsāṃ tisraḥ pañcāśato 'bhivlaṅgair apāvapaḥ |
RV_1,133.04c tat su te manāyati takat su te manāyati ||
RV_1,133.05a piśaṅgabhṛṣṭim ambhṛṇam piśācim indra sam mṛṇa |
RV_1,133.05c sarvaṃ rakṣo ni barhaya ||
RV_1,133.06a avar maha indra dādṛhi śrudhī naḥ śuśoca hi dyauḥ kṣā na bhīṣāṃ adrivo ghṛṇān na bhīṣāṃ adrivaḥ |
RV_1,133.06d śuṣmintamo hi śuṣmibhir vadhair ugrebhir īyase |
RV_1,133.06f apūruṣaghno apratīta śūra satvabhis trisaptaiḥ śūra satvabhiḥ ||
RV_1,133.07a vanoti hi sunvan kṣayam parīṇasaḥ sunvāno hi ṣmā yajaty ava dviṣo devānām ava dviṣaḥ |
RV_1,133.07d sunvāna it siṣāsati sahasrā vājy avṛtaḥ |
RV_1,133.07f sunvānāyendro dadāty ābhuvaṃ rayiṃ dadāty ābhuvam ||

RV_1,134.01a ā tvā juvo rārahāṇā abhi prayo vāyo vahantv iha pūrvapītaye somasya pūrvapītaye |
RV_1,134.01d ūrdhvā te anu sūnṛtā manas tiṣṭhatu jānatī |
RV_1,134.01f niyutvatā rathenā yāhi dāvane vāyo makhasya dāvane ||
RV_1,134.02a mandantu tvā mandino vāyav indavo 'smat krāṇāsaḥ sukṛtā abhidyavo gobhiḥ krāṇā abhidyavaḥ |
RV_1,134.02d yad dha krāṇā iradhyai dakṣaṃ sacanta ūtayaḥ |
RV_1,134.02f sadhrīcīnā niyuto dāvane dhiya upa bruvata īṃ dhiyaḥ ||
RV_1,134.03a vāyur yuṅkte rohitā vāyur aruṇā vāyū rathe ajirā dhuri voḷhave vahiṣṭhā dhuri voḷhave |
RV_1,134.03d pra bodhayā purandhiṃ jāra ā sasatīm iva |
RV_1,134.03f pra cakṣaya rodasī vāsayoṣasaḥ śravase vāsayoṣasaḥ ||
RV_1,134.04a tubhyam uṣāsaḥ śucayaḥ parāvati bhadrā vastrā tanvate daṃsu raśmiṣu citrā navyeṣu raśmiṣu |
RV_1,134.04d tubhyaṃ dhenuḥ sabardughā viśvā vasūni dohate |
RV_1,134.04f ajanayo maruto vakṣaṇābhyo diva ā vakṣaṇābhyaḥ ||
RV_1,134.05a tubhyaṃ śukrāsaḥ śucayas turaṇyavo madeṣūgrā iṣaṇanta bhurvaṇy apām iṣanta bhurvaṇi |
RV_1,134.05d tvāṃ tsārī dasamāno bhagam īṭṭe takvavīye |
RV_1,134.05f tvaṃ viśvasmād bhuvanāt pāsi dharmaṇāsuryāt pāsi dharmaṇā ||
RV_1,134.06a tvaṃ no vāyav eṣām apūrvyaḥ somānām prathamaḥ pītim arhasi sutānām pītim arhasi |
RV_1,134.06d uto vihutmatīnāṃ viśāṃ vavarjuṣīṇām |
RV_1,134.06f viśvā it te dhenavo duhra āśiraṃ ghṛtaṃ duhrata āśiram ||

RV_1,135.01a stīrṇam barhir upa no yāhi vītaye sahasreṇa niyutā niyutvate śatinībhir niyutvate |
RV_1,135.01d tubhyaṃ hi pūrvapītaye devā devāya yemire |
RV_1,135.01f pra te sutāso madhumanto asthiran madāya kratve asthiran ||
RV_1,135.02a tubhyāyaṃ somaḥ paripūto adribhi spārhā vasānaḥ pari kośam arṣati śukrā vasāno arṣati |
RV_1,135.02d tavāyam bhāga āyuṣu somo deveṣu hūyate |
RV_1,135.02f vaha vāyo niyuto yāhy asmayur juṣāṇo yāhy asmayuḥ ||
RV_1,135.03a ā no niyudbhiḥ śatinībhir adhvaraṃ sahasriṇībhir upa yāhi vītaye vāyo havyāni vītaye |
RV_1,135.03d tavāyam bhāga ṛtviyaḥ saraśmiḥ sūrye sacā |
RV_1,135.03f adhvaryubhir bharamāṇā ayaṃsata vāyo śukrā ayaṃsata ||
RV_1,135.04a ā vāṃ ratho niyutvān vakṣad avase 'bhi prayāṃsi sudhitāni vītaye vāyo havyāni vītaye |
RV_1,135.04d pibatam madhvo andhasaḥ pūrvapeyaṃ hi vāṃ hitam |
RV_1,135.04f vāyav ā candreṇa rādhasā gatam indraś ca rādhasā gatam ||
RV_1,135.05a ā vāṃ dhiyo vavṛtyur adhvarāṃ upemam indum marmṛjanta vājinam āśum atyaṃ na vājinam |
RV_1,135.05d teṣām pibatam asmayū ā no gantam ihotyā |
RV_1,135.05f indravāyū sutānām adribhir yuvam madāya vājadā yuvam ||
RV_1,135.06a ime vāṃ somā apsv ā sutā ihādhvaryubhir bharamāṇā ayaṃsata vāyo śukrā ayaṃsata |
RV_1,135.06d ete vām abhy asṛkṣata tiraḥ pavitram āśavaḥ |
RV_1,135.06f yuvāyavo 'ti romāṇy avyayā somāso aty avyayā ||
RV_1,135.07a ati vāyo sasato yāhi śaśvato yatra grāvā vadati tatra gacchataṃ gṛham indraś ca gacchatam |
RV_1,135.07d vi sūnṛtā dadṛśe rīyate ghṛtam ā pūrṇayā niyutā yātho adhvaram indraś ca yātho adhvaram ||
RV_1,135.08a atrāha tad vahethe madhva āhutiṃ yam aśvattham upatiṣṭhanta jāyavo 'sme te santu jāyavaḥ |
RV_1,135.08d sākaṃ gāvaḥ suvate pacyate yavo na te vāya upa dasyanti dhenavo nāpa dasyanti dhenavaḥ ||
RV_1,135.09a ime ye te su vāyo bāhvojaso 'ntar nadī te patayanty ukṣaṇo mahi vrādhanta ukṣaṇaḥ |
RV_1,135.09d dhanvañ cid ye anāśavo jīrāś cid agiraukasaḥ |
RV_1,135.09f sūryasyeva raśmayo durniyantavo hastayor durniyantavaḥ ||

RV_1,136.01a pra su jyeṣṭhaṃ nicirābhyām bṛhan namo havyam matim bharatā mṛḷayadbhyāṃ svādiṣṭham mṛḷayadbhyām |
RV_1,136.01d tā samrājā ghṛtāsutī yajñe-yajña upastutā |
RV_1,136.01f athainoḥ kṣatraṃ na kutaś canādhṛṣe devatvaṃ nū cid ādhṛṣe ||
RV_1,136.02a adarśi gātur urave varīyasī panthā ṛtasya sam ayaṃsta raśmibhiś cakṣur bhagasya raśmibhiḥ |
RV_1,136.02d dyukṣam mitrasya sādanam aryamṇo varuṇasya ca |
RV_1,136.02f athā dadhāte bṛhad ukthyaṃ vaya upastutyam bṛhad vayaḥ ||
RV_1,136.03a jyotiṣmatīm aditiṃ dhārayatkṣitiṃ svarvatīm ā sacete dive-dive jāgṛvāṃsā dive-dive |
RV_1,136.03d jyotiṣmat kṣatram āśāte ādityā dānunas patī |
RV_1,136.03f mitras tayor varuṇo yātayajjano 'ryamā yātayajjanaḥ ||
RV_1,136.04a ayam mitrāya varuṇāya śantamaḥ somo bhūtv avapāneṣv ābhago devo deveṣv ābhagaḥ |
RV_1,136.04d taṃ devāso juṣerata viśve adya sajoṣasaḥ |
RV_1,136.04f tathā rājānā karatho yad īmaha ṛtāvānā yad īmahe ||
RV_1,136.05a yo mitrāya varuṇāyāvidhaj jano 'narvāṇaṃ tam pari pāto aṃhaso dāśvāṃsam martam aṃhasaḥ |
RV_1,136.05d tam aryamābhi rakṣaty ṛjūyantam anu vratam |
RV_1,136.05f ukthair ya enoḥ paribhūṣati vrataṃ stomair ābhūṣati vratam ||
RV_1,136.06a namo dive bṛhate rodasībhyām mitrāya vocaṃ varuṇāya mīḷhuṣe sumṛḷīkāya mīḷhuṣe |
RV_1,136.06d indram agnim upa stuhi dyukṣam aryamaṇam bhagam |
RV_1,136.06f jyog jīvantaḥ prajayā sacemahi somasyotī sacemahi ||
RV_1,136.07a ūtī devānāṃ vayam indravanto maṃsīmahi svayaśaso marudbhiḥ |
RV_1,136.07c agnir mitro varuṇaḥ śarma yaṃsan tad aśyāma maghavāno vayaṃ ca ||

RV_1,137.01a suṣumā yātam adribhir gośrītā matsarā ime somāso matsarā ime |
RV_1,137.01d ā rājānā divispṛśāsmatrā gantam upa naḥ |
RV_1,137.01f ime vām mitrāvaruṇā gavāśiraḥ somāḥ śukrā gavāśiraḥ ||
RV_1,137.02a ima ā yātam indavaḥ somāso dadhyāśiraḥ sutāso dadhyāśiraḥ |
RV_1,137.02d uta vām uṣaso budhi sākaṃ sūryasya raśmibhiḥ |
RV_1,137.02f suto mitrāya varuṇāya pītaye cārur ṛtāya pītaye ||
RV_1,137.03a tāṃ vāṃ dhenuṃ na vāsarīm aṃśuṃ duhanty adribhiḥ somaṃ duhanty adribhiḥ |
RV_1,137.03d asmatrā gantam upa no 'rvāñcā somapītaye |
RV_1,137.03f ayaṃ vām mitrāvaruṇā nṛbhiḥ sutaḥ soma ā pītaye sutaḥ ||

RV_1,138.01a pra-pra pūṣṇas tuvijātasya śasyate mahitvam asya tavaso na tandate stotram asya na tandate |
RV_1,138.01d arcāmi sumnayann aham antyūtim mayobhuvam |
RV_1,138.01f viśvasya yo mana āyuyuve makho deva āyuyuve makhaḥ ||
RV_1,138.02a pra hi tvā pūṣann ajiraṃ na yāmani stomebhiḥ kṛṇva ṛṇavo yathā mṛdha uṣṭro na pīparo mṛdhaḥ |
RV_1,138.02d huve yat tvā mayobhuvaṃ devaṃ sakhyāya martyaḥ |
RV_1,138.02f asmākam āṅgūṣān dyumninas kṛdhi vājeṣu dyumninas kṛdhi ||
RV_1,138.03a yasya te pūṣan sakhye vipanyavaḥ kratvā cit santo 'vasā bubhujrira iti kratvā bubhujrire |
RV_1,138.03d tām anu tvā navīyasīṃ niyutaṃ rāya īmahe |
RV_1,138.03f aheḷamāna uruśaṃsa sarī bhava vāje-vāje sarī bhava ||
RV_1,138.04a asyā ū ṣu ṇa upa sātaye bhuvo 'heḷamāno rarivāṃ ajāśva śravasyatām ajāśva |
RV_1,138.04d o ṣu tvā vavṛtīmahi stomebhir dasma sādhubhiḥ |
RV_1,138.04f nahi tvā pūṣann atimanya āghṛṇe na te sakhyam apahnuve ||

RV_1,139.01a astu śrauṣaṭ puro agnīṃ dhiyā dadha ā nu tac chardho divyaṃ vṛṇīmaha indravāyū vṛṇīmahe |
RV_1,139.01d yad dha krāṇā vivasvati nābhā saṃdāyi navyasī |
RV_1,139.01f adha pra sū na upa yantu dhītayo devāṃ acchā na dhītayaḥ ||
RV_1,139.02a yad dha tyan mitrāvaruṇāv ṛtād adhy ādadāthe anṛtaṃ svena manyunā dakṣasya svena manyunā |
RV_1,139.02d yuvor itthādhi sadmasv apaśyāma hiraṇyayam |
RV_1,139.02f dhībhiś cana manasā svebhir akṣabhiḥ somasya svebhir akṣabhiḥ ||
RV_1,139.03a yuvāṃ stomebhir devayanto aśvināśrāvayanta iva ślokam āyavo yuvāṃ havyābhy āyavaḥ |
RV_1,139.03d yuvor viśvā adhi śriyaḥ pṛkṣaś ca viśvavedasā |
RV_1,139.03f pruṣāyante vām pavayo hiraṇyaye rathe dasrā hiraṇyaye ||
RV_1,139.04a aceti dasrā vy u nākam ṛṇvatho yuñjate vāṃ rathayujo diviṣṭiṣv adhvasmāno diviṣṭiṣu |
RV_1,139.04d adhi vāṃ sthāma vandhure rathe dasrā hiraṇyaye |
RV_1,139.04f patheva yantāv anuśāsatā rajo 'ñjasā śāsatā rajaḥ ||
RV_1,139.05a śacībhir naḥ śacīvasū divā naktaṃ daśasyatam |
RV_1,139.05c mā vāṃ rātir upa dasat kadā canāsmad rātiḥ kadā cana ||
RV_1,139.06a vṛṣann indra vṛṣapāṇāsa indava ime sutā adriṣutāsa udbhidas tubhyaṃ sutāsa udbhidaḥ |
RV_1,139.06d te tvā mandantu dāvane mahe citrāya rādhase |
RV_1,139.06f gīrbhir girvāha stavamāna ā gahi sumṛḷīko na ā gahi ||
RV_1,139.07a o ṣū ṇo agne śṛṇuhi tvam īḷito devebhyo bravasi yajñiyebhyo rājabhyo yajñiyebhyaḥ |
RV_1,139.07d yad dha tyām aṅgirobhyo dhenuṃ devā adattana |
RV_1,139.07f vi tāṃ duhre aryamā kartarī sacāṃ eṣa tāṃ veda me sacā ||
RV_1,139.08a mo ṣu vo asmad abhi tāni pauṃsyā sanā bhūvan dyumnāni mota jāriṣur asmat purota jāriṣuḥ |
RV_1,139.08d yad vaś citraṃ yuge-yuge navyaṃ ghoṣād amartyam |
RV_1,139.08f asmāsu tan maruto yac ca duṣṭaraṃ didhṛtā yac ca duṣṭaram ||
RV_1,139.09a dadhyaṅ ha me januṣam pūrvo aṅgirāḥ priyamedhaḥ kaṇvo atrir manur vidus te me pūrve manur viduḥ |
RV_1,139.09d teṣāṃ deveṣv āyatir asmākaṃ teṣu nābhayaḥ |
RV_1,139.09f teṣām padena mahy ā name girendrāgnī ā name girā ||
RV_1,139.10a hotā yakṣad vanino vanta vāryam bṛhaspatir yajati vena ukṣabhiḥ puruvārebhir ukṣabhiḥ |
RV_1,139.10d jagṛbhmā dūraādiśaṃ ślokam adrer adha tmanā |
RV_1,139.10f adhārayad ararindāni sukratuḥ purū sadmāni sukratuḥ ||
RV_1,139.11a ye devāso divy ekādaśa stha pṛthivyām adhy ekādaśa stha |
RV_1,139.11c apsukṣito mahinaikādaśa stha te devāso yajñam imaṃ juṣadhvam ||

RV_1,140.01a vediṣade priyadhāmāya sudyute dhāsim iva pra bharā yonim agnaye |
RV_1,140.01c vastreṇeva vāsayā manmanā śuciṃ jyotīrathaṃ śukravarṇaṃ tamohanam ||
RV_1,140.02a abhi dvijanmā trivṛd annam ṛjyate saṃvatsare vāvṛdhe jagdham ī punaḥ |
RV_1,140.02c anyasyāsā jihvayā jenyo vṛṣā ny anyena vanino mṛṣṭa vāraṇaḥ ||
RV_1,140.03a kṛṣṇaprutau vevije asya sakṣitā ubhā tarete abhi mātarā śiśum |
RV_1,140.03c prācājihvaṃ dhvasayantaṃ tṛṣucyutam ā sācyaṃ kupayaṃ vardhanam pituḥ ||
RV_1,140.04a mumukṣvo manave mānavasyate raghudruvaḥ kṛṣṇasītāsa ū juvaḥ |
RV_1,140.04c asamanā ajirāso raghuṣyado vātajūtā upa yujyanta āśavaḥ ||
RV_1,140.05a ād asya te dhvasayanto vṛtherate kṛṣṇam abhvam mahi varpaḥ karikrataḥ |
RV_1,140.05c yat sīm mahīm avanim prābhi marmṛśad abhiśvasan stanayann eti nānadat ||
RV_1,140.06a bhūṣan na yo 'dhi babhrūṣu namnate vṛṣeva patnīr abhy eti roruvat |
RV_1,140.06c ojāyamānas tanvaś ca śumbhate bhīmo na śṛṅgā davidhāva durgṛbhiḥ ||
RV_1,140.07a sa saṃstiro viṣṭiraḥ saṃ gṛbhāyati jānann eva jānatīr nitya ā śaye |
RV_1,140.07c punar vardhante api yanti devyam anyad varpaḥ pitroḥ kṛṇvate sacā ||
RV_1,140.08a tam agruvaḥ keśinīḥ saṃ hi rebhira ūrdhvās tasthur mamruṣīḥ prāyave punaḥ |
RV_1,140.08c tāsāṃ jarām pramuñcann eti nānadad asum paraṃ janayañ jīvam astṛtam ||
RV_1,140.09a adhīvāsam pari mātū rihann aha tuvigrebhiḥ satvabhir yāti vi jrayaḥ |
RV_1,140.09c vayo dadhat padvate rerihat sadānu śyenī sacate vartanīr aha ||
RV_1,140.10a asmākam agne maghavatsu dīdihy adha śvasīvān vṛṣabho damūnāḥ |
RV_1,140.10c avāsyā śiśumatīr adīder varmeva yutsu parijarbhurāṇaḥ ||
RV_1,140.11a idam agne sudhitaṃ durdhitād adhi priyād u cin manmanaḥ preyo astu te |
RV_1,140.11c yat te śukraṃ tanvo rocate śuci tenāsmabhyaṃ vanase ratnam ā tvam ||
RV_1,140.12a rathāya nāvam uta no gṛhāya nityāritrām padvatīṃ rāsy agne |
RV_1,140.12c asmākaṃ vīrāṃ uta no maghono janāṃś ca yā pārayāc charma yā ca ||
RV_1,140.13a abhī no agna uktham ij juguryā dyāvākṣāmā sindhavaś ca svagūrtāḥ |
RV_1,140.13c gavyaṃ yavyaṃ yanto dīrghāheṣaṃ varam aruṇyo varanta ||

RV_1,141.01a baḷ itthā tad vapuṣe dhāyi darśataṃ devasya bhargaḥ sahaso yato jani |
RV_1,141.01c yad īm upa hvarate sādhate matir ṛtasya dhenā anayanta sasrutaḥ ||
RV_1,141.02a pṛkṣo vapuḥ pitumān nitya ā śaye dvitīyam ā saptaśivāsu mātṛṣu |
RV_1,141.02c tṛtīyam asya vṛṣabhasya dohase daśapramatiṃ janayanta yoṣaṇaḥ ||
RV_1,141.03a nir yad īm budhnān mahiṣasya varpasa īśānāsaḥ śavasā kranta sūrayaḥ |
RV_1,141.03c yad īm anu pradivo madhva ādhave guhā santam mātariśvā mathāyati ||
RV_1,141.04a pra yat pituḥ paramān nīyate pary ā pṛkṣudho vīrudho daṃsu rohati |
RV_1,141.04c ubhā yad asya januṣaṃ yad invata ād id yaviṣṭho abhavad ghṛṇā śuciḥ ||
RV_1,141.05a ād in mātṝr āviśad yāsv ā śucir ahiṃsyamāna urviyā vi vāvṛdhe |
RV_1,141.05c anu yat pūrvā aruhat sanājuvo ni navyasīṣv avarāsu dhāvate ||
RV_1,141.06a ād id dhotāraṃ vṛṇate diviṣṭiṣu bhagam iva papṛcānāsa ṛñjate |
RV_1,141.06c devān yat kratvā majmanā puruṣṭuto martaṃ śaṃsaṃ viśvadhā veti dhāyase ||
RV_1,141.07a vi yad asthād yajato vātacodito hvāro na vakvā jaraṇā anākṛtaḥ |
RV_1,141.07c tasya patman dakṣuṣaḥ kṛṣṇajaṃhasaḥ śucijanmano raja ā vyadhvanaḥ ||
RV_1,141.08a ratho na yātaḥ śikvabhiḥ kṛto dyām aṅgebhir aruṣebhir īyate |
RV_1,141.08c ād asya te kṛṣṇāso dakṣi sūrayaḥ śūrasyeva tveṣathād īṣate vayaḥ ||
RV_1,141.09a tvayā hy agne varuṇo dhṛtavrato mitraḥ śāśadre aryamā sudānavaḥ |
RV_1,141.09c yat sīm anu kratunā viśvathā vibhur arān na nemiḥ paribhūr ajāyathāḥ ||
RV_1,141.10a tvam agne śaśamānāya sunvate ratnaṃ yaviṣṭha devatātim invasi |
RV_1,141.10c taṃ tvā nu navyaṃ sahaso yuvan vayam bhagaṃ na kāre mahiratna dhīmahi ||
RV_1,141.11a asme rayiṃ na svarthaṃ damūnasam bhagaṃ dakṣaṃ na papṛcāsi dharṇasim |
RV_1,141.11c raśmīṃr iva yo yamati janmanī ubhe devānāṃ śaṃsam ṛta ā ca sukratuḥ ||
RV_1,141.12a uta naḥ sudyotmā jīrāśvo hotā mandraḥ śṛṇavac candrarathaḥ |
RV_1,141.12c sa no neṣan neṣatamair amūro 'gnir vāmaṃ suvitaṃ vasyo accha ||
RV_1,141.13a astāvy agniḥ śimīvadbhir arkaiḥ sāmrājyāya prataraṃ dadhānaḥ |
RV_1,141.13c amī ca ye maghavāno vayaṃ ca mihaṃ na sūro ati niṣ ṭatanyuḥ ||

RV_1,142.01a samiddho agna ā vaha devāṃ adya yatasruce |
RV_1,142.01c tantuṃ tanuṣva pūrvyaṃ sutasomāya dāśuṣe ||
RV_1,142.02a ghṛtavantam upa māsi madhumantaṃ tanūnapāt |
RV_1,142.02c yajñaṃ viprasya māvataḥ śaśamānasya dāśuṣaḥ ||
RV_1,142.03a śuciḥ pāvako adbhuto madhvā yajñam mimikṣati |
RV_1,142.03c narāśaṃsas trir ā divo devo deveṣu yajñiyaḥ ||
RV_1,142.04a īḷito agna ā vahendraṃ citram iha priyam |
RV_1,142.04c iyaṃ hi tvā matir mamācchā sujihva vacyate ||
RV_1,142.05a stṛṇānāso yatasruco barhir yajñe svadhvare |
RV_1,142.05c vṛñje devavyacastamam indrāya śarma saprathaḥ ||
RV_1,142.06a vi śrayantām ṛtāvṛdhaḥ prayai devebhyo mahīḥ |
RV_1,142.06c pāvakāsaḥ puruspṛho dvāro devīr asaścataḥ ||
RV_1,142.07a ā bhandamāne upāke naktoṣāsā supeśasā |
RV_1,142.07c yahvī ṛtasya mātarā sīdatām barhir ā sumat ||
RV_1,142.08a mandrajihvā jugurvaṇī hotārā daivyā kavī |
RV_1,142.08c yajñaṃ no yakṣatām imaṃ sidhram adya divispṛśam ||
RV_1,142.09a śucir deveṣv arpitā hotrā marutsu bhāratī |
RV_1,142.09c iḷā sarasvatī mahī barhiḥ sīdantu yajñiyāḥ ||
RV_1,142.10a tan nas turīpam adbhutam puru vāram puru tmanā |
RV_1,142.10c tvaṣṭā poṣāya vi ṣyatu rāye nābhā no asmayuḥ ||
RV_1,142.11a avasṛjann upa tmanā devān yakṣi vanaspate |
RV_1,142.11c agnir havyā suṣūdati devo deveṣu medhiraḥ ||
RV_1,142.12a pūṣaṇvate marutvate viśvadevāya vāyave |
RV_1,142.12c svāhā gāyatravepase havyam indrāya kartana ||
RV_1,142.13a svāhākṛtāny ā gahy upa havyāni vītaye |
RV_1,142.13c indrā gahi śrudhī havaṃ tvāṃ havante adhvare ||

RV_1,143.01a pra tavyasīṃ navyasīṃ dhītim agnaye vāco matiṃ sahasaḥ sūnave bhare |
RV_1,143.01c apāṃ napād yo vasubhiḥ saha priyo hotā pṛthivyāṃ ny asīdad ṛtviyaḥ ||
RV_1,143.02a sa jāyamānaḥ parame vyomany āvir agnir abhavan mātariśvane |
RV_1,143.02c asya kratvā samidhānasya majmanā pra dyāvā śociḥ pṛthivī arocayat ||
RV_1,143.03a asya tveṣā ajarā asya bhānavaḥ susaṃdṛśaḥ supratīkasya sudyutaḥ |
RV_1,143.03c bhātvakṣaso aty aktur na sindhavo 'gne rejante asasanto ajarāḥ ||
RV_1,143.04a yam erire bhṛgavo viśvavedasaṃ nābhā pṛthivyā bhuvanasya majmanā |
RV_1,143.04c agniṃ taṃ gīrbhir hinuhi sva ā dame ya eko vasvo varuṇo na rājati ||
RV_1,143.05a na yo varāya marutām iva svanaḥ seneva sṛṣṭā divyā yathāśaniḥ |
RV_1,143.05c agnir jambhais tigitair atti bharvati yodho na śatrūn sa vanā ny ṛñjate ||
RV_1,143.06a kuvin no agnir ucathasya vīr asad vasuṣ kuvid vasubhiḥ kāmam āvarat |
RV_1,143.06c codaḥ kuvit tutujyāt sātaye dhiyaḥ śucipratīkaṃ tam ayā dhiyā gṛṇe ||
RV_1,143.07a ghṛtapratīkaṃ va ṛtasya dhūrṣadam agnim mitraṃ na samidhāna ṛñjate |
RV_1,143.07c indhāno akro vidatheṣu dīdyac chukravarṇām ud u no yaṃsate dhiyam ||
RV_1,143.08a aprayucchann aprayucchadbhir agne śivebhir naḥ pāyubhiḥ pāhi śagmaiḥ |
RV_1,143.08c adabdhebhir adṛpitebhir iṣṭe 'nimiṣadbhiḥ pari pāhi no jāḥ ||

RV_1,144.01a eti pra hotā vratam asya māyayordhvāṃ dadhānaḥ śucipeśasaṃ dhiyam |
RV_1,144.01c abhi srucaḥ kramate dakṣiṇāvṛto yā asya dhāma prathamaṃ ha niṃsate ||
RV_1,144.02a abhīm ṛtasya dohanā anūṣata yonau devasya sadane parīvṛtāḥ |
RV_1,144.02c apām upasthe vibhṛto yad āvasad adha svadhā adhayad yābhir īyate ||
RV_1,144.03a yuyūṣataḥ savayasā tad id vapuḥ samānam arthaṃ vitaritratā mithaḥ |
RV_1,144.03c ād īm bhago na havyaḥ sam asmad ā voḷhur na raśmīn sam ayaṃsta sārathiḥ ||
RV_1,144.04a yam īṃ dvā savayasā saparyataḥ samāne yonā mithunā samokasā |
RV_1,144.04c divā na naktam palito yuvājani purū carann ajaro mānuṣā yugā ||
RV_1,144.05a tam īṃ hinvanti dhītayo daśa vriśo devam martāsa ūtaye havāmahe |
RV_1,144.05c dhanor adhi pravata ā sa ṛṇvaty abhivrajadbhir vayunā navādhita ||
RV_1,144.06a tvaṃ hy agne divyasya rājasi tvam pārthivasya paśupā iva tmanā |
RV_1,144.06c enī ta ete bṛhatī abhiśriyā hiraṇyayī vakvarī barhir āśāte ||
RV_1,144.07a agne juṣasva prati harya tad vaco mandra svadhāva ṛtajāta sukrato |
RV_1,144.07c yo viśvataḥ pratyaṅṅ asi darśato raṇvaḥ saṃdṛṣṭau pitumāṃ iva kṣayaḥ ||

RV_1,145.01a tam pṛcchatā sa jagāmā sa veda sa cikitvāṃ īyate sā nv īyate |
RV_1,145.01c tasmin santi praśiṣas tasminn iṣṭayaḥ sa vājasya śavasaḥ śuṣmiṇas patiḥ ||
RV_1,145.02a tam it pṛcchanti na simo vi pṛcchati sveneva dhīro manasā yad agrabhīt |
RV_1,145.02c na mṛṣyate prathamaṃ nāparaṃ vaco 'sya kratvā sacate apradṛpitaḥ ||
RV_1,145.03a tam id gacchanti juhvas tam arvatīr viśvāny ekaḥ śṛṇavad vacāṃsi me |
RV_1,145.03c purupraiṣas taturir yajñasādhano 'cchidrotiḥ śiśur ādatta saṃ rabhaḥ ||
RV_1,145.04a upasthāyaṃ carati yat samārata sadyo jātas tatsāra yujyebhiḥ |
RV_1,145.04c abhi śvāntam mṛśate nāndye mude yad īṃ gacchanty uśatīr apiṣṭhitam ||
RV_1,145.05a sa īm mṛgo apyo vanargur upa tvacy upamasyāṃ ni dhāyi |
RV_1,145.05c vy abravīd vayunā martyebhyo 'gnir vidvāṃ ṛtacid dhi satyaḥ ||

RV_1,146.01a trimūrdhānaṃ saptaraśmiṃ gṛṇīṣe 'nūnam agnim pitror upasthe |
RV_1,146.01c niṣattam asya carato dhruvasya viśvā divo rocanāpaprivāṃsam ||
RV_1,146.02a ukṣā mahāṃ abhi vavakṣa ene ajaras tasthāv itaūtir ṛṣvaḥ |
RV_1,146.02c urvyāḥ pado ni dadhāti sānau rihanty ūdho aruṣāso asya ||
RV_1,146.03a samānaṃ vatsam abhi saṃcarantī viṣvag dhenū vi carataḥ sumeke |
RV_1,146.03c anapavṛjyāṃ adhvano mimāne viśvān ketāṃ adhi maho dadhāne ||
RV_1,146.04a dhīrāsaḥ padaṃ kavayo nayanti nānā hṛdā rakṣamāṇā ajuryam |
RV_1,146.04c siṣāsantaḥ pary apaśyanta sindhum āvir ebhyo abhavat sūryo nṝn ||
RV_1,146.05a didṛkṣeṇyaḥ pari kāṣṭhāsu jenya īḷenyo maho arbhāya jīvase |
RV_1,146.05c purutrā yad abhavat sūr ahaibhyo garbhebhyo maghavā viśvadarśataḥ ||

RV_1,147.01a kathā te agne śucayanta āyor dadāśur vājebhir āśuṣāṇāḥ |
RV_1,147.01c ubhe yat toke tanaye dadhānā ṛtasya sāman raṇayanta devāḥ ||
RV_1,147.02a bodhā me asya vacaso yaviṣṭha maṃhiṣṭhasya prabhṛtasya svadhāvaḥ |
RV_1,147.02c pīyati tvo anu tvo gṛṇāti vandārus te tanvaṃ vande agne ||
RV_1,147.03a ye pāyavo māmateyaṃ te agne paśyanto andhaṃ duritād arakṣan |
RV_1,147.03c rarakṣa tān sukṛto viśvavedā dipsanta id ripavo nāha debhuḥ ||
RV_1,147.04a yo no agne ararivāṃ aghāyur arātīvā marcayati dvayena |
RV_1,147.04c mantro guruḥ punar astu so asmā anu mṛkṣīṣṭa tanvaṃ duruktaiḥ ||
RV_1,147.05a uta vā yaḥ sahasya pravidvān marto martam marcayati dvayena |
RV_1,147.05c ataḥ pāhi stavamāna stuvantam agne mākir no duritāya dhāyīḥ ||

RV_1,148.01a mathīd yad īṃ viṣṭo mātariśvā hotāraṃ viśvāpsuṃ viśvadevyam |
RV_1,148.01c ni yaṃ dadhur manuṣyāsu vikṣu svar ṇa citraṃ vapuṣe vibhāvam ||
RV_1,148.02a dadānam in na dadabhanta manmāgnir varūtham mama tasya cākan |
RV_1,148.02c juṣanta viśvāny asya karmopastutim bharamāṇasya kāroḥ ||
RV_1,148.03a nitye cin nu yaṃ sadane jagṛbhre praśastibhir dadhire yajñiyāsaḥ |
RV_1,148.03c pra sū nayanta gṛbhayanta iṣṭāv aśvāso na rathyo rārahāṇāḥ ||
RV_1,148.04a purūṇi dasmo ni riṇāti jambhair ād rocate vana ā vibhāvā |
RV_1,148.04c ād asya vāto anu vāti śocir astur na śaryām asanām anu dyūn ||
RV_1,148.05a na yaṃ ripavo na riṣaṇyavo garbhe santaṃ reṣaṇā reṣayanti |
RV_1,148.05c andhā apaśyā na dabhann abhikhyā nityāsa īm pretāro arakṣan ||

RV_1,149.01a mahaḥ sa rāya eṣate patir dann ina inasya vasunaḥ pada ā |
RV_1,149.01c upa dhrajantam adrayo vidhann it ||
RV_1,149.02a sa yo vṛṣā narāṃ na rodasyoḥ śravobhir asti jīvapītasargaḥ |
RV_1,149.02c pra yaḥ sasrāṇaḥ śiśrīta yonau ||
RV_1,149.03a ā yaḥ puraṃ nārmiṇīm adīded atyaḥ kavir nabhanyo nārvā |
RV_1,149.03c sūro na rurukvāñ chatātmā ||
RV_1,149.04a abhi dvijanmā trī rocanāni viśvā rajāṃsi śuśucāno asthāt |
RV_1,149.04c hotā yajiṣṭho apāṃ sadhasthe ||
RV_1,149.05a ayaṃ sa hotā yo dvijanmā viśvā dadhe vāryāṇi śravasyā |
RV_1,149.05c marto yo asmai sutuko dadāśa ||

RV_1,150.01a puru tvā dāśvān voce 'rir agne tava svid ā |
RV_1,150.01c todasyeva śaraṇa ā mahasya ||
RV_1,150.02a vy aninasya dhaninaḥ prahoṣe cid araruṣaḥ |
RV_1,150.02c kadā cana prajigato adevayoḥ ||
RV_1,150.03a sa candro vipra martyo maho vrādhantamo divi |
RV_1,150.03c pra-pret te agne vanuṣaḥ syāma ||

RV_1,151.01a mitraṃ na yaṃ śimyā goṣu gavyavaḥ svādhyo vidathe apsu jījanan |
RV_1,151.01c arejetāṃ rodasī pājasā girā prati priyaṃ yajataṃ januṣām avaḥ ||
RV_1,151.02a yad dha tyad vām purumīḷhasya sominaḥ pra mitrāso na dadhire svābhuvaḥ |
RV_1,151.02c adha kratuṃ vidataṃ gātum arcata uta śrutaṃ vṛṣaṇā pastyāvataḥ ||
RV_1,151.03a ā vām bhūṣan kṣitayo janma rodasyoḥ pravācyaṃ vṛṣaṇā dakṣase mahe |
RV_1,151.03c yad īm ṛtāya bharatho yad arvate pra hotrayā śimyā vītho adhvaram ||
RV_1,151.04a pra sā kṣitir asura yā mahi priya ṛtāvānāv ṛtam ā ghoṣatho bṛhat |
RV_1,151.04c yuvaṃ divo bṛhato dakṣam ābhuvaṃ gāṃ na dhury upa yuñjāthe apaḥ ||
RV_1,151.05a mahī atra mahinā vāram ṛṇvatho 'reṇavas tuja ā sadman dhenavaḥ |
RV_1,151.05c svaranti tā uparatāti sūryam ā nimruca uṣasas takvavīr iva ||
RV_1,151.06a ā vām ṛtāya keśinīr anūṣata mitra yatra varuṇa gātum arcathaḥ |
RV_1,151.06c ava tmanā sṛjatam pinvataṃ dhiyo yuvaṃ viprasya manmanām irajyathaḥ ||
RV_1,151.07a yo vāṃ yajñaiḥ śaśamāno ha dāśati kavir hotā yajati manmasādhanaḥ |
RV_1,151.07c upāha taṃ gacchatho vītho adhvaram acchā giraḥ sumatiṃ gantam asmayū ||
RV_1,151.08a yuvāṃ yajñaiḥ prathamā gobhir añjata ṛtāvānā manaso na prayuktiṣu |
RV_1,151.08c bharanti vām manmanā saṃyatā giro 'dṛpyatā manasā revad āśāthe ||
RV_1,151.09a revad vayo dadhāthe revad āśāthe narā māyābhir itaūti māhinam |
RV_1,151.09c na vāṃ dyāvo 'habhir nota sindhavo na devatvam paṇayo nānaśur magham ||

RV_1,152.01a yuvaṃ vastrāṇi pīvasā vasāthe yuvor acchidrā mantavo ha sargāḥ |
RV_1,152.01c avātiratam anṛtāni viśva ṛtena mitrāvaruṇā sacethe ||
RV_1,152.02a etac cana tvo vi ciketad eṣāṃ satyo mantraḥ kaviśasta ṛghāvān |
RV_1,152.02c triraśriṃ hanti caturaśrir ugro devanido ha prathamā ajūryan ||
RV_1,152.03a apād eti prathamā padvatīnāṃ kas tad vām mitrāvaruṇā ciketa |
RV_1,152.03c garbho bhāram bharaty ā cid asya ṛtam piparty anṛtaṃ ni tārīt ||
RV_1,152.04a prayantam it pari jāraṃ kanīnām paśyāmasi nopanipadyamānam |
RV_1,152.04c anavapṛgṇā vitatā vasānam priyam mitrasya varuṇasya dhāma ||
RV_1,152.05a anaśvo jāto anabhīśur arvā kanikradat patayad ūrdhvasānuḥ |
RV_1,152.05c acittam brahma jujuṣur yuvānaḥ pra mitre dhāma varuṇe gṛṇantaḥ ||
RV_1,152.06a ā dhenavo māmateyam avantīr brahmapriyam pīpayan sasminn ūdhan |
RV_1,152.06c pitvo bhikṣeta vayunāni vidvān āsāvivāsann aditim uruṣyet ||
RV_1,152.07a ā vām mitrāvaruṇā havyajuṣṭiṃ namasā devāv avasā vavṛtyām |
RV_1,152.07c asmākam brahma pṛtanāsu sahyā asmākaṃ vṛṣṭir divyā supārā ||

RV_1,153.01a yajāmahe vām mahaḥ sajoṣā havyebhir mitrāvaruṇā namobhiḥ |
RV_1,153.01c ghṛtair ghṛtasnū adha yad vām asme adhvaryavo na dhītibhir bharanti ||
RV_1,153.02a prastutir vāṃ dhāma na prayuktir ayāmi mitrāvaruṇā suvṛktiḥ |
RV_1,153.02c anakti yad vāṃ vidatheṣu hotā sumnaṃ vāṃ sūrir vṛṣaṇāv iyakṣan ||
RV_1,153.03a pīpāya dhenur aditir ṛtāya janāya mitrāvaruṇā havirde |
RV_1,153.03c hinoti yad vāṃ vidathe saparyan sa rātahavyo mānuṣo na hotā ||
RV_1,153.04a uta vāṃ vikṣu madyāsv andho gāva āpaś ca pīpayanta devīḥ |
RV_1,153.04c uto no asya pūrvyaḥ patir dan vītam pātam payasa usriyāyāḥ ||

RV_1,154.01a viṣṇor nu kaṃ vīryāṇi pra vocaṃ yaḥ pārthivāni vimame rajāṃsi |
RV_1,154.01c yo askabhāyad uttaraṃ sadhasthaṃ vicakramāṇas tredhorugāyaḥ ||
RV_1,154.02a pra tad viṣṇu stavate vīryeṇa mṛgo na bhīmaḥ kucaro giriṣṭhāḥ |
RV_1,154.02c yasyoruṣu triṣu vikramaṇeṣv adhikṣiyanti bhuvanāni viśvā ||
RV_1,154.03a pra viṣṇave śūṣam etu manma girikṣita urugāyāya vṛṣṇe |
RV_1,154.03c ya idaṃ dīrgham prayataṃ sadhastham eko vimame tribhir it padebhiḥ ||
RV_1,154.04a yasya trī pūrṇā madhunā padāny akṣīyamāṇā svadhayā madanti |
RV_1,154.04c ya u tridhātu pṛthivīm uta dyām eko dādhāra bhuvanāni viśvā ||
RV_1,154.05a tad asya priyam abhi pātho aśyāṃ naro yatra devayavo madanti |
RV_1,154.05c urukramasya sa hi bandhur itthā viṣṇoḥ pade parame madhva utsaḥ ||
RV_1,154.06a tā vāṃ vāstūny uśmasi gamadhyai yatra gāvo bhūriśṛṅgā ayāsaḥ |
RV_1,154.06c atrāha tad urugāyasya vṛṣṇaḥ paramam padam ava bhāti bhūri ||

RV_1,155.01a pra vaḥ pāntam andhaso dhiyāyate mahe śūrāya viṣṇave cārcata |
RV_1,155.01c yā sānuni parvatānām adābhyā mahas tasthatur arvateva sādhunā ||
RV_1,155.02a tveṣam itthā samaraṇaṃ śimīvator indrāviṣṇū sutapā vām uruṣyati |
RV_1,155.02c yā martyāya pratidhīyamānam it kṛśānor astur asanām uruṣyathaḥ ||
RV_1,155.03a tā īṃ vardhanti mahy asya pauṃsyaṃ ni mātarā nayati retase bhuje |
RV_1,155.03c dadhāti putro 'varam param pitur nāma tṛtīyam adhi rocane divaḥ ||
RV_1,155.04a tat-tad id asya pauṃsyaṃ gṛṇīmasīnasya trātur avṛkasya mīḷhuṣaḥ |
RV_1,155.04c yaḥ pārthivāni tribhir id vigāmabhir uru kramiṣṭorugāyāya jīvase ||
RV_1,155.05a dve id asya kramaṇe svardṛśo 'bhikhyāya martyo bhuraṇyati |
RV_1,155.05c tṛtīyam asya nakir ā dadharṣati vayaś cana patayantaḥ patatriṇaḥ ||
RV_1,155.06a caturbhiḥ sākaṃ navatiṃ ca nāmabhiś cakraṃ na vṛttaṃ vyatīṃr avīvipat |
RV_1,155.06c bṛhaccharīro vimimāna ṛkvabhir yuvākumāraḥ praty ety āhavam ||

RV_1,156.01a bhavā mitro na śevyo ghṛtāsutir vibhūtadyumna evayā u saprathāḥ |
RV_1,156.01c adhā te viṣṇo viduṣā cid ardhya stomo yajñaś ca rādhyo haviṣmatā ||
RV_1,156.02a yaḥ pūrvyāya vedhase navīyase sumajjānaye viṣṇave dadāśati |
RV_1,156.02c yo jātam asya mahato mahi bravat sed u śravobhir yujyaṃ cid abhy asat ||
RV_1,156.03a tam u stotāraḥ pūrvyaṃ yathā vida ṛtasya garbhaṃ januṣā pipartana |
RV_1,156.03c āsya jānanto nāma cid vivaktana mahas te viṣṇo sumatim bhajāmahe ||
RV_1,156.04a tam asya rājā varuṇas tam aśvinā kratuṃ sacanta mārutasya vedhasaḥ |
RV_1,156.04c dādhāra dakṣam uttamam aharvidaṃ vrajaṃ ca viṣṇuḥ sakhivāṃ aporṇute ||
RV_1,156.05a ā yo vivāya sacathāya daivya indrāya viṣṇuḥ sukṛte sukṛttaraḥ |
RV_1,156.05c vedhā ajinvat triṣadhastha āryam ṛtasya bhāge yajamānam ābhajat ||

RV_1,157.01a abodhy agnir jma ud eti sūryo vy uṣāś candrā mahy āvo arciṣā |
RV_1,157.01c āyukṣātām aśvinā yātave ratham prāsāvīd devaḥ savitā jagat pṛthak ||
RV_1,157.02a yad yuñjāthe vṛṣaṇam aśvinā rathaṃ ghṛtena no madhunā kṣatram ukṣatam |
RV_1,157.02c asmākam brahma pṛtanāsu jinvataṃ vayaṃ dhanā śūrasātā bhajemahi ||
RV_1,157.03a arvāṅ tricakro madhuvāhano ratho jīrāśvo aśvinor yātu suṣṭutaḥ |
RV_1,157.03c trivandhuro maghavā viśvasaubhagaḥ śaṃ na ā vakṣad dvipade catuṣpade ||
RV_1,157.04a ā na ūrjaṃ vahatam aśvinā yuvam madhumatyā naḥ kaśayā mimikṣatam |
RV_1,157.04c prāyus tāriṣṭaṃ nī rapāṃsi mṛkṣataṃ sedhataṃ dveṣo bhavataṃ sacābhuvā ||
RV_1,157.05a yuvaṃ ha garbhaṃ jagatīṣu dhattho yuvaṃ viśveṣu bhuvaneṣv antaḥ |
RV_1,157.05c yuvam agniṃ ca vṛṣaṇāv apaś ca vanaspatīṃr aśvināv airayethām ||
RV_1,157.06a yuvaṃ ha stho bhiṣajā bheṣajebhir atho ha stho rathyā rāthyebhiḥ |
RV_1,157.06c atho ha kṣatram adhi dhattha ugrā yo vāṃ haviṣmān manasā dadāśa ||

RV_1,158.01a vasū rudrā purumantū vṛdhantā daśasyataṃ no vṛṣaṇāv abhiṣṭau |
RV_1,158.01c dasrā ha yad rekṇa aucathyo vām pra yat sasrāthe akavābhir ūtī ||
RV_1,158.02a ko vāṃ dāśat sumataye cid asyai vasū yad dhethe namasā pade goḥ |
RV_1,158.02c jigṛtam asme revatīḥ purandhīḥ kāmapreṇeva manasā carantā ||
RV_1,158.03a yukto ha yad vāṃ taugryāya perur vi madhye arṇaso dhāyi pajraḥ |
RV_1,158.03c upa vām avaḥ śaraṇaṃ gameyaṃ śūro nājma patayadbhir evaiḥ ||
RV_1,158.04a upastutir aucathyam uruṣyen mā mām ime patatriṇī vi dugdhām |
RV_1,158.04c mā mām edho daśatayaś cito dhāk pra yad vām baddhas tmani khādati kṣām ||
RV_1,158.05a na mā garan nadyo mātṛtamā dāsā yad īṃ susamubdham avādhuḥ |
RV_1,158.05c śiro yad asya traitano vitakṣat svayaṃ dāsa uro aṃsāv api gdha ||
RV_1,158.06a dīrghatamā māmateyo jujurvān daśame yuge |
RV_1,158.06c apām arthaṃ yatīnām brahmā bhavati sārathiḥ ||

RV_1,159.01a pra dyāvā yajñaiḥ pṛthivī ṛtāvṛdhā mahī stuṣe vidatheṣu pracetasā |
RV_1,159.01c devebhir ye devaputre sudaṃsasetthā dhiyā vāryāṇi prabhūṣataḥ ||
RV_1,159.02a uta manye pitur adruho mano mātur mahi svatavas tad dhavīmabhiḥ |
RV_1,159.02c suretasā pitarā bhūma cakratur uru prajāyā amṛtaṃ varīmabhiḥ ||
RV_1,159.03a te sūnavaḥ svapasaḥ sudaṃsaso mahī jajñur mātarā pūrvacittaye |
RV_1,159.03c sthātuś ca satyaṃ jagataś ca dharmaṇi putrasya pāthaḥ padam advayāvinaḥ ||
RV_1,159.04a te māyino mamire supracetaso jāmī sayonī mithunā samokasā |
RV_1,159.04c navyaṃ-navyaṃ tantum ā tanvate divi samudre antaḥ kavayaḥ sudītayaḥ ||
RV_1,159.05a tad rādho adya savitur vareṇyaṃ vayaṃ devasya prasave manāmahe |
RV_1,159.05c asmabhyaṃ dyāvāpṛthivī sucetunā rayiṃ dhattaṃ vasumantaṃ śatagvinam ||

RV_1,160.01a te hi dyāvāpṛthivī viśvaśambhuva ṛtāvarī rajaso dhārayatkavī |
RV_1,160.01c sujanmanī dhiṣaṇe antar īyate devo devī dharmaṇā sūryaḥ śuciḥ ||
RV_1,160.02a uruvyacasā mahinī asaścatā pitā mātā ca bhuvanāni rakṣataḥ |
RV_1,160.02c sudhṛṣṭame vapuṣye na rodasī pitā yat sīm abhi rūpair avāsayat ||
RV_1,160.03a sa vahniḥ putraḥ pitroḥ pavitravān punāti dhīro bhuvanāni māyayā |
RV_1,160.03c dhenuṃ ca pṛśniṃ vṛṣabhaṃ suretasaṃ viśvāhā śukram payo asya dukṣata ||
RV_1,160.04a ayaṃ devānām apasām apastamo yo jajāna rodasī viśvaśambhuvā |
RV_1,160.04c vi yo mame rajasī sukratūyayājarebhi skambhanebhiḥ sam ānṛce ||
RV_1,160.05a te no gṛṇāne mahinī mahi śravaḥ kṣatraṃ dyāvāpṛthivī dhāsatho bṛhat |
RV_1,160.05c yenābhi kṛṣṭīs tatanāma viśvahā panāyyam ojo asme sam invatam ||

RV_1,161.01a kim u śreṣṭhaḥ kiṃ yaviṣṭho na ājagan kim īyate dūtyaṃ kad yad ūcima |
RV_1,161.01c na nindima camasaṃ yo mahākulo 'gne bhrātar druṇa id bhūtim ūdima ||
RV_1,161.02a ekaṃ camasaṃ caturaḥ kṛṇotana tad vo devā abruvan tad va āgamam |
RV_1,161.02c saudhanvanā yady evā kariṣyatha sākaṃ devair yajñiyāso bhaviṣyatha ||
RV_1,161.03a agniṃ dūtam prati yad abravītanāśvaḥ kartvo ratha uteha kartvaḥ |
RV_1,161.03c dhenuḥ kartvā yuvaśā kartvā dvā tāni bhrātar anu vaḥ kṛtvy emasi ||
RV_1,161.04a cakṛvāṃsa ṛbhavas tad apṛcchata kved abhūd yaḥ sya dūto na ājagan |
RV_1,161.04c yadāvākhyac camasāñ caturaḥ kṛtān ād it tvaṣṭā gnāsv antar ny ānaje ||
RV_1,161.05a hanāmaināṃ iti tvaṣṭā yad abravīc camasaṃ ye devapānam anindiṣuḥ |
RV_1,161.05c anyā nāmāni kṛṇvate sute sacāṃ anyair enān kanyā nāmabhi sparat ||
RV_1,161.06a indro harī yuyuje aśvinā ratham bṛhaspatir viśvarūpām upājata |
RV_1,161.06c ṛbhur vibhvā vājo devāṃ agacchata svapaso yajñiyam bhāgam aitana ||
RV_1,161.07a niś carmaṇo gām ariṇīta dhītibhir yā jarantā yuvaśā tākṛṇotana |
RV_1,161.07c saudhanvanā aśvād aśvam atakṣata yuktvā ratham upa devāṃ ayātana ||
RV_1,161.08a idam udakam pibatety abravītanedaṃ vā ghā pibatā muñjanejanam |
RV_1,161.08c saudhanvanā yadi tan neva haryatha tṛtīye ghā savane mādayādhvai ||
RV_1,161.09a āpo bhūyiṣṭhā ity eko abravīd agnir bhūyiṣṭha ity anyo abravīt |
RV_1,161.09c vadharyantīm bahubhyaḥ praiko abravīd ṛtā vadantaś camasāṃ apiṃśata ||
RV_1,161.10a śroṇām eka udakaṃ gām avājati māṃsam ekaḥ piṃśati sūnayābhṛtam |
RV_1,161.10c ā nimrucaḥ śakṛd eko apābharat kiṃ svit putrebhyaḥ pitarā upāvatuḥ ||
RV_1,161.11a udvatsv asmā akṛṇotanā tṛṇaṃ nivatsv apaḥ svapasyayā naraḥ |
RV_1,161.11c agohyasya yad asastanā gṛhe tad adyedam ṛbhavo nānu gacchatha ||
RV_1,161.12a sammīlya yad bhuvanā paryasarpata kva svit tātyā pitarā va āsatuḥ |
RV_1,161.12c aśapata yaḥ karasnaṃ va ādade yaḥ prābravīt pro tasmā abravītana ||
RV_1,161.13a suṣupvāṃsa ṛbhavas tad apṛcchatāgohya ka idaṃ no abūbudhat |
RV_1,161.13c śvānam basto bodhayitāram abravīt saṃvatsara idam adyā vy akhyata ||
RV_1,161.14a divā yānti maruto bhūmyāgnir ayaṃ vāto antarikṣeṇa yāti |
RV_1,161.14c adbhir yāti varuṇaḥ samudrair yuṣmāṃ icchantaḥ śavaso napātaḥ ||

RV_1,162.01a mā no mitro varuṇo aryamāyur indra ṛbhukṣā marutaḥ pari khyan |
RV_1,162.01c yad vājino devajātasya sapteḥ pravakṣyāmo vidathe vīryāṇi ||
RV_1,162.02a yan nirṇijā rekṇasā prāvṛtasya rātiṃ gṛbhītām mukhato nayanti |
RV_1,162.02c suprāṅ ajo memyad viśvarūpa indrāpūṣṇoḥ priyam apy eti pāthaḥ ||
RV_1,162.03a eṣa cchāgaḥ puro aśvena vājinā pūṣṇo bhāgo nīyate viśvadevyaḥ |
RV_1,162.03c abhipriyaṃ yat puroḷāśam arvatā tvaṣṭed enaṃ sauśravasāya jinvati ||
RV_1,162.04a yad dhaviṣyam ṛtuśo devayānaṃ trir mānuṣāḥ pary aśvaṃ nayanti |
RV_1,162.04c atrā pūṣṇaḥ prathamo bhāga eti yajñaṃ devebhyaḥ prativedayann ajaḥ ||
RV_1,162.05a hotādhvaryur āvayā agnimindho grāvagrābha uta śaṃstā suvipraḥ |
RV_1,162.05c tena yajñena svaraṅkṛtena sviṣṭena vakṣaṇā ā pṛṇadhvam ||
RV_1,162.06a yūpavraskā uta ye yūpavāhāś caṣālaṃ ye aśvayūpāya takṣati |
RV_1,162.06c ye cārvate pacanaṃ sambharanty uto teṣām abhigūrtir na invatu ||
RV_1,162.07a upa prāgāt suman me 'dhāyi manma devānām āśā upa vītapṛṣṭhaḥ |
RV_1,162.07c anv enaṃ viprā ṛṣayo madanti devānām puṣṭe cakṛmā subandhum ||
RV_1,162.08a yad vājino dāma saṃdānam arvato yā śīrṣaṇyā raśanā rajjur asya |
RV_1,162.08c yad vā ghāsya prabhṛtam āsye tṛṇaṃ sarvā tā te api deveṣv astu ||
RV_1,162.09a yad aśvasya kraviṣo makṣikāśa yad vā svarau svadhitau riptam asti |
RV_1,162.09c yad dhastayoḥ śamitur yan nakheṣu sarvā tā te api deveṣv astu ||
RV_1,162.10a yad ūvadhyam udarasyāpavāti ya āmasya kraviṣo gandho asti |
RV_1,162.10c sukṛtā tac chamitāraḥ kṛṇvantūta medhaṃ śṛtapākam pacantu ||
RV_1,162.11a yat te gātrād agninā pacyamānād abhi śūlaṃ nihatasyāvadhāvati |
RV_1,162.11c mā tad bhūmyām ā śriṣan mā tṛṇeṣu devebhyas tad uśadbhyo rātam astu ||
RV_1,162.12a ye vājinam paripaśyanti pakvaṃ ya īm āhuḥ surabhir nir hareti |
RV_1,162.12c ye cārvato māṃsabhikṣām upāsata uto teṣām abhigūrtir na invatu ||
RV_1,162.13a yan nīkṣaṇam māṃspacanyā ukhāyā yā pātrāṇi yūṣṇa āsecanāni |
RV_1,162.13c ūṣmaṇyāpidhānā carūṇām aṅkāḥ sūnāḥ pari bhūṣanty aśvam ||
RV_1,162.14a nikramaṇaṃ niṣadanaṃ vivartanaṃ yac ca paḍbīśam arvataḥ |
RV_1,162.14c yac ca papau yac ca ghāsiṃ jaghāsa sarvā tā te api deveṣv astu ||
RV_1,162.15a mā tvāgnir dhvanayīd dhūmagandhir mokhā bhrājanty abhi vikta jaghriḥ |
RV_1,162.15c iṣṭaṃ vītam abhigūrtaṃ vaṣaṭkṛtaṃ taṃ devāsaḥ prati gṛbhṇanty aśvam ||
RV_1,162.16a yad aśvāya vāsa upastṛṇanty adhīvāsaṃ yā hiraṇyāny asmai |
RV_1,162.16c saṃdānam arvantam paḍbīśam priyā deveṣv ā yāmayanti ||
RV_1,162.17a yat te sāde mahasā śūkṛtasya pārṣṇyā vā kaśayā vā tutoda |
RV_1,162.17c sruceva tā haviṣo adhvareṣu sarvā tā te brahmaṇā sūdayāmi ||
RV_1,162.18a catustriṃśad vājino devabandhor vaṅkrīr aśvasya svadhitiḥ sam eti |
RV_1,162.18c acchidrā gātrā vayunā kṛṇota paruṣ-parur anughuṣyā vi śasta ||
RV_1,162.19a ekas tvaṣṭur aśvasyā viśastā dvā yantārā bhavatas tatha ṛtuḥ |
RV_1,162.19c yā te gātrāṇām ṛtuthā kṛṇomi tā-tā piṇḍānām pra juhomy agnau ||
RV_1,162.20a mā tvā tapat priya ātmāpiyantam mā svadhitis tanva ā tiṣṭhipat te |
RV_1,162.20c mā te gṛdhnur aviśastātihāya chidrā gātrāṇy asinā mithū kaḥ ||
RV_1,162.21a na vā u etan mriyase na riṣyasi devāṃ id eṣi pathibhiḥ sugebhiḥ |
RV_1,162.21c harī te yuñjā pṛṣatī abhūtām upāsthād vājī dhuri rāsabhasya ||
RV_1,162.22a sugavyaṃ no vājī svaśvyam puṃsaḥ putrāṃ uta viśvāpuṣaṃ rayim |
RV_1,162.22c anāgāstvaṃ no aditiḥ kṛṇotu kṣatraṃ no aśvo vanatāṃ haviṣmān ||

RV_1,163.01a yad akrandaḥ prathamaṃ jāyamāna udyan samudrād uta vā purīṣāt |
RV_1,163.01c śyenasya pakṣā hariṇasya bāhū upastutyam mahi jātaṃ te arvan ||
RV_1,163.02a yamena dattaṃ trita enam āyunag indra eṇam prathamo adhy atiṣṭhat |
RV_1,163.02c gandharvo asya raśanām agṛbhṇāt sūrād aśvaṃ vasavo nir ataṣṭa ||
RV_1,163.03a asi yamo asy ādityo arvann asi trito guhyena vratena |
RV_1,163.03c asi somena samayā vipṛkta āhus te trīṇi divi bandhanāni ||
RV_1,163.04a trīṇi ta āhur divi bandhanāni trīṇy apsu trīṇy antaḥ samudre |
RV_1,163.04c uteva me varuṇaś chantsy arvan yatrā ta āhuḥ paramaṃ janitram ||
RV_1,163.05a imā te vājinn avamārjanānīmā śaphānāṃ sanitur nidhānā |
RV_1,163.05c atrā te bhadrā raśanā apaśyam ṛtasya yā abhirakṣanti gopāḥ ||
RV_1,163.06a ātmānaṃ te manasārād ajānām avo divā patayantam pataṅgam |
RV_1,163.06c śiro apaśyam pathibhiḥ sugebhir areṇubhir jehamānam patatri ||
RV_1,163.07a atrā te rūpam uttamam apaśyaṃ jigīṣamāṇam iṣa ā pade goḥ |
RV_1,163.07c yadā te marto anu bhogam ānaḷ ād id grasiṣṭha oṣadhīr ajīgaḥ ||
RV_1,163.08a anu tvā ratho anu maryo arvann anu gāvo 'nu bhagaḥ kanīnām |
RV_1,163.08c anu vrātāsas tava sakhyam īyur anu devā mamire vīryaṃ te ||
RV_1,163.09a hiraṇyaśṛṅgo 'yo asya pādā manojavā avara indra āsīt |
RV_1,163.09c devā id asya haviradyam āyan yo arvantam prathamo adhyatiṣṭhat ||
RV_1,163.10a īrmāntāsaḥ silikamadhyamāsaḥ saṃ śūraṇāso divyāso atyāḥ |
RV_1,163.10c haṃsā iva śreṇiśo yatante yad ākṣiṣur divyam ajmam aśvāḥ ||
RV_1,163.11a tava śarīram patayiṣṇv arvan tava cittaṃ vāta iva dhrajīmān |
RV_1,163.11c tava śṛṅgāṇi viṣṭhitā purutrāraṇyeṣu jarbhurāṇā caranti ||
RV_1,163.12a upa prāgāc chasanaṃ vājy arvā devadrīcā manasā dīdhyānaḥ |
RV_1,163.12c ajaḥ puro nīyate nābhir asyānu paścāt kavayo yanti rebhāḥ ||
RV_1,163.13a upa prāgāt paramaṃ yat sadhastham arvāṃ acchā pitaram mātaraṃ ca |
RV_1,163.13c adyā devāñ juṣṭatamo hi gamyā athā śāste dāśuṣe vāryāṇi ||

RV_1,164.01a asya vāmasya palitasya hotus tasya bhrātā madhyamo asty aśnaḥ |
RV_1,164.01c tṛtīyo bhrātā ghṛtapṛṣṭho asyātrāpaśyaṃ viśpatiṃ saptaputram ||
RV_1,164.02a sapta yuñjanti ratham ekacakram eko aśvo vahati saptanāmā |
RV_1,164.02c trinābhi cakram ajaram anarvaṃ yatremā viśvā bhuvanādhi tasthuḥ ||
RV_1,164.03a imaṃ ratham adhi ye sapta tasthuḥ saptacakraṃ sapta vahanty aśvāḥ |
RV_1,164.03c sapta svasāro abhi saṃ navante yatra gavāṃ nihitā sapta nāma ||
RV_1,164.04a ko dadarśa prathamaṃ jāyamānam asthanvantaṃ yad anasthā bibharti |
RV_1,164.04c bhūmyā asur asṛg ātmā kva svit ko vidvāṃsam upa gāt praṣṭum etat ||
RV_1,164.05a pākaḥ pṛcchāmi manasāvijānan devānām enā nihitā padāni |
RV_1,164.05c vatse baṣkaye 'dhi sapta tantūn vi tatnire kavaya otavā u ||
RV_1,164.06a acikitvāñ cikituṣaś cid atra kavīn pṛcchāmi vidmane na vidvān |
RV_1,164.06c vi yas tastambha ṣaḷ imā rajāṃsy ajasya rūpe kim api svid ekam ||
RV_1,164.07a iha bravītu ya īm aṅga vedāsya vāmasya nihitam padaṃ veḥ |
RV_1,164.07c śīrṣṇaḥ kṣīraṃ duhrate gāvo asya vavriṃ vasānā udakam padāpuḥ ||
RV_1,164.08a mātā pitaram ṛta ā babhāja dhīty agre manasā saṃ hi jagme |
RV_1,164.08c sā bībhatsur garbharasā nividdhā namasvanta id upavākam īyuḥ ||
RV_1,164.09a yuktā mātāsīd dhuri dakṣiṇāyā atiṣṭhad garbho vṛjanīṣv antaḥ |
RV_1,164.09c amīmed vatso anu gām apaśyad viśvarūpyaṃ triṣu yojaneṣu ||
RV_1,164.10a tisro mātṝs trīn pitṝn bibhrad eka ūrdhvas tasthau nem ava glāpayanti |
RV_1,164.10c mantrayante divo amuṣya pṛṣṭhe viśvavidaṃ vācam aviśvaminvām ||
RV_1,164.11a dvādaśāraṃ nahi taj jarāya varvarti cakram pari dyām ṛtasya |
RV_1,164.11c ā putrā agne mithunāso atra sapta śatāni viṃśatiś ca tasthuḥ ||
RV_1,164.12a pañcapādam pitaraṃ dvādaśākṛtiṃ diva āhuḥ pare ardhe purīṣiṇam |
RV_1,164.12c atheme anya upare vicakṣaṇaṃ saptacakre ṣaḷara āhur arpitam ||
RV_1,164.13a pañcāre cakre parivartamāne tasminn ā tasthur bhuvanāni viśvā |
RV_1,164.13c tasya nākṣas tapyate bhūribhāraḥ sanād eva na śīryate sanābhiḥ ||
RV_1,164.14a sanemi cakram ajaraṃ vi vāvṛta uttānāyāṃ daśa yuktā vahanti |
RV_1,164.14c sūryasya cakṣū rajasaity āvṛtaṃ tasminn ārpitā bhuvanāni viśvā ||
RV_1,164.15a sākañjānāṃ saptatham āhur ekajaṃ ṣaḷ id yamā ṛṣayo devajā iti |
RV_1,164.15c teṣām iṣṭāni vihitāni dhāmaśa sthātre rejante vikṛtāni rūpaśaḥ ||
RV_1,164.16a striyaḥ satīs tāṃ u me puṃsa āhuḥ paśyad akṣaṇvān na vi cetad andhaḥ |
RV_1,164.16c kavir yaḥ putraḥ sa īm ā ciketa yas tā vijānāt sa pituṣ pitāsat ||
RV_1,164.17a avaḥ pareṇa para enāvareṇa padā vatsam bibhratī gaur ud asthāt |
RV_1,164.17c sā kadrīcī kaṃ svid ardham parāgāt kva svit sūte nahi yūthe antaḥ ||
RV_1,164.18a avaḥ pareṇa pitaraṃ yo asyānuveda para enāvareṇa |
RV_1,164.18c kavīyamānaḥ ka iha pra vocad devam manaḥ kuto adhi prajātam ||
RV_1,164.19a ye arvāñcas tāṃ u parāca āhur ye parāñcas tāṃ u arvāca āhuḥ |
RV_1,164.19c indraś ca yā cakrathuḥ soma tāni dhurā na yuktā rajaso vahanti ||
RV_1,164.20a dvā suparṇā sayujā sakhāyā samānaṃ vṛkṣam pari ṣasvajāte |
RV_1,164.20c tayor anyaḥ pippalaṃ svādv atty anaśnann anyo abhi cākaśīti ||
RV_1,164.21a yatrā suparṇā amṛtasya bhāgam animeṣaṃ vidathābhisvaranti |
RV_1,164.21c ino viśvasya bhuvanasya gopāḥ sa mā dhīraḥ pākam atrā viveśa ||
RV_1,164.22a yasmin vṛkṣe madhvadaḥ suparṇā niviśante suvate cādhi viśve |
RV_1,164.22c tasyed āhuḥ pippalaṃ svādv agre tan non naśad yaḥ pitaraṃ na veda ||
RV_1,164.23a yad gāyatre adhi gāyatram āhitaṃ traiṣṭubhād vā traiṣṭubhaṃ niratakṣata |
RV_1,164.23c yad vā jagaj jagaty āhitam padaṃ ya it tad vidus te amṛtatvam ānaśuḥ ||
RV_1,164.24a gāyatreṇa prati mimīte arkam arkeṇa sāma traiṣṭubhena vākam |
RV_1,164.24c vākena vākaṃ dvipadā catuṣpadākṣareṇa mimate sapta vāṇīḥ ||
RV_1,164.25a jagatā sindhuṃ divy astabhāyad rathantare sūryam pary apaśyat |
RV_1,164.25c gāyatrasya samidhas tisra āhus tato mahnā pra ririce mahitvā ||
RV_1,164.26a upa hvaye sudughāṃ dhenum etāṃ suhasto godhug uta dohad enām |
RV_1,164.26c śreṣṭhaṃ savaṃ savitā sāviṣan no 'bhīddho gharmas tad u ṣu pra vocam ||
RV_1,164.27a hiṅkṛṇvatī vasupatnī vasūnāṃ vatsam icchantī manasābhy āgāt |
RV_1,164.27c duhām aśvibhyām payo aghnyeyaṃ sā vardhatām mahate saubhagāya ||
RV_1,164.28a gaur amīmed anu vatsam miṣantam mūrdhānaṃ hiṅṅ akṛṇon mātavā u |
RV_1,164.28c sṛkvāṇaṃ gharmam abhi vāvaśānā mimāti māyum payate payobhiḥ ||
RV_1,164.29a ayaṃ sa śiṅkte yena gaur abhīvṛtā mimāti māyuṃ dhvasanāv adhi śritā |
RV_1,164.29c sā cittibhir ni hi cakāra martyaṃ vidyud bhavantī prati vavrim auhata ||
RV_1,164.30a anac chaye turagātu jīvam ejad dhruvam madhya ā pastyānām |
RV_1,164.30c jīvo mṛtasya carati svadhābhir amartyo martyenā sayoniḥ ||
RV_1,164.31a apaśyaṃ gopām anipadyamānam ā ca parā ca pathibhiś carantam |
RV_1,164.31c sa sadhrīcīḥ sa viṣūcīr vasāna ā varīvarti bhuvaneṣv antaḥ ||
RV_1,164.32a ya īṃ cakāra na so asya veda ya īṃ dadarśa hirug in nu tasmāt |
RV_1,164.32c sa mātur yonā parivīto antar bahuprajā nirṛtim ā viveśa ||
RV_1,164.33a dyaur me pitā janitā nābhir atra bandhur me mātā pṛthivī mahīyam |
RV_1,164.33c uttānayoś camvor yonir antar atrā pitā duhitur garbham ādhāt ||
RV_1,164.34a pṛcchāmi tvā param antam pṛthivyāḥ pṛcchāmi yatra bhuvanasya nābhiḥ |
RV_1,164.34c pṛcchāmi tvā vṛṣṇo aśvasya retaḥ pṛcchāmi vācaḥ paramaṃ vyoma ||
RV_1,164.35a iyaṃ vediḥ paro antaḥ pṛthivyā ayaṃ yajño bhuvanasya nābhiḥ |
RV_1,164.35c ayaṃ somo vṛṣṇo aśvasya reto brahmāyaṃ vācaḥ paramaṃ vyoma ||
RV_1,164.36a saptārdhagarbhā bhuvanasya reto viṣṇos tiṣṭhanti pradiśā vidharmaṇi |
RV_1,164.36c te dhītibhir manasā te vipaścitaḥ paribhuvaḥ pari bhavanti viśvataḥ ||
RV_1,164.37a na vi jānāmi yad ivedam asmi niṇyaḥ saṃnaddho manasā carāmi |
RV_1,164.37c yadā māgan prathamajā ṛtasyād id vāco aśnuve bhāgam asyāḥ ||
RV_1,164.38a apāṅ prāṅ eti svadhayā gṛbhīto 'martyo martyenā sayoniḥ |
RV_1,164.38c tā śaśvantā viṣūcīnā viyantā ny anyaṃ cikyur na ni cikyur anyam ||
RV_1,164.39a ṛco akṣare parame vyoman yasmin devā adhi viśve niṣeduḥ |
RV_1,164.39c yas tan na veda kim ṛcā kariṣyati ya it tad vidus ta ime sam āsate ||
RV_1,164.40a sūyavasād bhagavatī hi bhūyā atho vayam bhagavantaḥ syāma |
RV_1,164.40c addhi tṛṇam aghnye viśvadānīm piba śuddham udakam ācarantī ||
RV_1,164.41a gaurīr mimāya salilāni takṣaty ekapadī dvipadī sā catuṣpadī |
RV_1,164.41c aṣṭāpadī navapadī babhūvuṣī sahasrākṣarā parame vyoman ||
RV_1,164.42a tasyāḥ samudrā adhi vi kṣaranti tena jīvanti pradiśaś catasraḥ |
RV_1,164.42c tataḥ kṣaraty akṣaraṃ tad viśvam upa jīvati ||
RV_1,164.43a śakamayaṃ dhūmam ārād apaśyaṃ viṣūvatā para enāvareṇa |
RV_1,164.43c ukṣāṇam pṛśnim apacanta vīrās tāni dharmāṇi prathamāny āsan ||
RV_1,164.44a trayaḥ keśina ṛtuthā vi cakṣate saṃvatsare vapata eka eṣām |
RV_1,164.44c viśvam eko abhi caṣṭe śacībhir dhrājir ekasya dadṛśe na rūpam ||
RV_1,164.45a catvāri vāk parimitā padāni tāni vidur brāhmaṇā ye manīṣiṇaḥ |
RV_1,164.45c guhā trīṇi nihitā neṅgayanti turīyaṃ vāco manuṣyā vadanti ||
RV_1,164.46a indram mitraṃ varuṇam agnim āhur atho divyaḥ sa suparṇo garutmān |
RV_1,164.46c ekaṃ sad viprā bahudhā vadanty agniṃ yamam mātariśvānam āhuḥ ||
RV_1,164.47a kṛṣṇaṃ niyānaṃ harayaḥ suparṇā apo vasānā divam ut patanti |
RV_1,164.47c ta āvavṛtran sadanād ṛtasyād id ghṛtena pṛthivī vy udyate ||
RV_1,164.48a dvādaśa pradhayaś cakram ekaṃ trīṇi nabhyāni ka u tac ciketa |
RV_1,164.48c tasmin sākaṃ triśatā na śaṅkavo 'rpitāḥ ṣaṣṭir na calācalāsaḥ ||
RV_1,164.49a yas te stanaḥ śaśayo yo mayobhūr yena viśvā puṣyasi vāryāṇi |
RV_1,164.49c yo ratnadhā vasuvid yaḥ sudatraḥ sarasvati tam iha dhātave kaḥ ||
RV_1,164.50a yajñena yajñam ayajanta devās tāni dharmāṇi prathamāny āsan |
RV_1,164.50c te ha nākam mahimānaḥ sacanta yatra pūrve sādhyāḥ santi devāḥ ||
RV_1,164.51a samānam etad udakam uc caity ava cāhabhiḥ |
RV_1,164.51c bhūmim parjanyā jinvanti divaṃ jinvanty agnayaḥ ||
RV_1,164.52a divyaṃ suparṇaṃ vāyasam bṛhantam apāṃ garbhaṃ darśatam oṣadhīnām |
RV_1,164.52c abhīpato vṛṣṭibhis tarpayantaṃ sarasvantam avase johavīmi ||

RV_1,165.01a kayā śubhā savayasaḥ sanīḷāḥ samānyā marutaḥ sam mimikṣuḥ |
RV_1,165.01c kayā matī kuta etāsa ete 'rcanti śuṣmaṃ vṛṣaṇo vasūyā ||
RV_1,165.02a kasya brahmāṇi jujuṣur yuvānaḥ ko adhvare maruta ā vavarta |
RV_1,165.02c śyenāṃ iva dhrajato antarikṣe kena mahā manasā rīramāma ||
RV_1,165.03a kutas tvam indra māhinaḥ sann eko yāsi satpate kiṃ ta itthā |
RV_1,165.03c sam pṛcchase samarāṇaḥ śubhānair voces tan no harivo yat te asme ||
RV_1,165.04a brahmāṇi me matayaḥ śaṃ sutāsaḥ śuṣma iyarti prabhṛto me adriḥ |
RV_1,165.04c ā śāsate prati haryanty ukthemā harī vahatas tā no accha ||
RV_1,165.05a ato vayam antamebhir yujānāḥ svakṣatrebhis tanvaḥ śumbhamānāḥ |
RV_1,165.05c mahobhir etāṃ upa yujmahe nv indra svadhām anu hi no babhūtha ||
RV_1,165.06a kva syā vo marutaḥ svadhāsīd yan mām ekaṃ samadhattāhihatye |
RV_1,165.06c ahaṃ hy ugras taviṣas tuviṣmān viśvasya śatror anamaṃ vadhasnaiḥ ||
RV_1,165.07a bhūri cakartha yujyebhir asme samānebhir vṛṣabha pauṃsyebhiḥ |
RV_1,165.07c bhūrīṇi hi kṛṇavāmā śaviṣṭhendra kratvā maruto yad vaśāma ||
RV_1,165.08a vadhīṃ vṛtram maruta indriyeṇa svena bhāmena taviṣo babhūvān |
RV_1,165.08c aham etā manave viśvaścandrāḥ sugā apaś cakara vajrabāhuḥ ||
RV_1,165.09a anuttam ā te maghavan nakir nu na tvāvāṃ asti devatā vidānaḥ |
RV_1,165.09c na jāyamāno naśate na jāto yāni kariṣyā kṛṇuhi pravṛddha ||
RV_1,165.10a ekasya cin me vibhv astv ojo yā nu dadhṛṣvān kṛṇavai manīṣā |
RV_1,165.10c ahaṃ hy ugro maruto vidāno yāni cyavam indra id īśa eṣām ||
RV_1,165.11a amandan mā maruta stomo atra yan me naraḥ śrutyam brahma cakra |
RV_1,165.11c indrāya vṛṣṇe sumakhāya mahyaṃ sakhye sakhāyas tanve tanūbhiḥ ||
RV_1,165.12a eved ete prati mā rocamānā anedyaḥ śrava eṣo dadhānāḥ |
RV_1,165.12c saṃcakṣyā marutaś candravarṇā acchānta me chadayāthā ca nūnam ||
RV_1,165.13a ko nv atra maruto māmahe vaḥ pra yātana sakhīṃr acchā sakhāyaḥ |
RV_1,165.13c manmāni citrā apivātayanta eṣām bhūta navedā ma ṛtānām ||
RV_1,165.14a ā yad duvasyād duvase na kārur asmāñ cakre mānyasya medhā |
RV_1,165.14c o ṣu vartta maruto vipram acchemā brahmāṇi jaritā vo arcat ||
RV_1,165.15a eṣa va stomo maruta iyaṃ gīr māndāryasya mānyasya kāroḥ |
RV_1,165.15c eṣā yāsīṣṭa tanve vayāṃ vidyāmeṣaṃ vṛjanaṃ jīradānum ||

RV_1,166.01a tan nu vocāma rabhasāya janmane pūrvam mahitvaṃ vṛṣabhasya ketave |
RV_1,166.01c aidheva yāman marutas tuviṣvaṇo yudheva śakrās taviṣāṇi kartana ||
RV_1,166.02a nityaṃ na sūnum madhu bibhrata upa krīḷanti krīḷā vidatheṣu ghṛṣvayaḥ |
RV_1,166.02c nakṣanti rudrā avasā namasvinaṃ na mardhanti svatavaso haviṣkṛtam ||
RV_1,166.03a yasmā ūmāso amṛtā arāsata rāyas poṣaṃ ca haviṣā dadāśuṣe |
RV_1,166.03c ukṣanty asmai maruto hitā iva purū rajāṃsi payasā mayobhuvaḥ ||
RV_1,166.04a ā ye rajāṃsi taviṣībhir avyata pra va evāsaḥ svayatāso adhrajan |
RV_1,166.04c bhayante viśvā bhuvanāni harmyā citro vo yāmaḥ prayatāsv ṛṣṭiṣu ||
RV_1,166.05a yat tveṣayāmā nadayanta parvatān divo vā pṛṣṭhaṃ naryā acucyavuḥ |
RV_1,166.05c viśvo vo ajman bhayate vanaspatī rathīyantīva pra jihīta oṣadhiḥ ||
RV_1,166.06a yūyaṃ na ugrā marutaḥ sucetunāriṣṭagrāmāḥ sumatim pipartana |
RV_1,166.06c yatrā vo didyud radati krivirdatī riṇāti paśvaḥ sudhiteva barhaṇā ||
RV_1,166.07a pra skambhadeṣṇā anavabhrarādhaso 'lātṛṇāso vidatheṣu suṣṭutāḥ |
RV_1,166.07c arcanty arkam madirasya pītaye vidur vīrasya prathamāni pauṃsyā ||
RV_1,166.08a śatabhujibhis tam abhihruter aghāt pūrbhī rakṣatā maruto yam āvata |
RV_1,166.08c janaṃ yam ugrās tavaso virapśinaḥ pāthanā śaṃsāt tanayasya puṣṭiṣu ||
RV_1,166.09a viśvāni bhadrā maruto ratheṣu vo mithaspṛdhyeva taviṣāṇy āhitā |
RV_1,166.09c aṃseṣv ā vaḥ prapatheṣu khādayo 'kṣo vaś cakrā samayā vi vāvṛte ||
RV_1,166.10a bhūrīṇi bhadrā naryeṣu bāhuṣu vakṣassu rukmā rabhasāso añjayaḥ |
RV_1,166.10c aṃseṣv etāḥ paviṣu kṣurā adhi vayo na pakṣān vy anu śriyo dhire ||
RV_1,166.11a mahānto mahnā vibhvo vibhūtayo dūredṛśo ye divyā iva stṛbhiḥ |
RV_1,166.11c mandrāḥ sujihvāḥ svaritāra āsabhiḥ sammiślā indre marutaḥ pariṣṭubhaḥ ||
RV_1,166.12a tad vaḥ sujātā maruto mahitvanaṃ dīrghaṃ vo dātram aditer iva vratam |
RV_1,166.12c indraś cana tyajasā vi hruṇāti taj janāya yasmai sukṛte arādhvam ||
RV_1,166.13a tad vo jāmitvam marutaḥ pare yuge purū yac chaṃsam amṛtāsa āvata |
RV_1,166.13c ayā dhiyā manave śruṣṭim āvyā sākaṃ naro daṃsanair ā cikitrire ||
RV_1,166.14a yena dīrgham marutaḥ śūśavāma yuṣmākena parīṇasā turāsaḥ |
RV_1,166.14c ā yat tatanan vṛjane janāsa ebhir yajñebhis tad abhīṣṭim aśyām ||
RV_1,166.15a eṣa va stomo maruta iyaṃ gīr māndāryasya mānyasya kāroḥ |
RV_1,166.15c eṣā yāsīṣṭa tanve vayāṃ vidyāmeṣaṃ vṛjanaṃ jīradānum ||

RV_1,167.01a sahasraṃ ta indrotayo naḥ sahasram iṣo harivo gūrtatamāḥ |
RV_1,167.01c sahasraṃ rāyo mādayadhyai sahasriṇa upa no yantu vājāḥ ||
RV_1,167.02a ā no 'vobhir maruto yāntv acchā jyeṣṭhebhir vā bṛhaddivaiḥ sumāyāḥ |
RV_1,167.02c adha yad eṣāṃ niyutaḥ paramāḥ samudrasya cid dhanayanta pāre ||
RV_1,167.03a mimyakṣa yeṣu sudhitā ghṛtācī hiraṇyanirṇig uparā na ṛṣṭiḥ |
RV_1,167.03c guhā carantī manuṣo na yoṣā sabhāvatī vidathyeva saṃ vāk ||
RV_1,167.04a parā śubhrā ayāso yavyā sādhāraṇyeva maruto mimikṣuḥ |
RV_1,167.04c na rodasī apa nudanta ghorā juṣanta vṛdhaṃ sakhyāya devāḥ ||
RV_1,167.05a joṣad yad īm asuryā sacadhyai viṣitastukā rodasī nṛmaṇāḥ |
RV_1,167.05c ā sūryeva vidhato rathaṃ gāt tveṣapratīkā nabhaso netyā ||
RV_1,167.06a āsthāpayanta yuvatiṃ yuvānaḥ śubhe nimiślāṃ vidatheṣu pajrām |
RV_1,167.06c arko yad vo maruto haviṣmān gāyad gāthaṃ sutasomo duvasyan ||
RV_1,167.07a pra taṃ vivakmi vakmyo ya eṣām marutām mahimā satyo asti |
RV_1,167.07c sacā yad īṃ vṛṣamaṇā ahaṃyu sthirā cij janīr vahate subhāgāḥ ||
RV_1,167.08a pānti mitrāvaruṇāv avadyāc cayata īm aryamo apraśastān |
RV_1,167.08c uta cyavante acyutā dhruvāṇi vāvṛdha īm maruto dātivāraḥ ||
RV_1,167.09a nahī nu vo maruto anty asme ārāttāc cic chavaso antam āpuḥ |
RV_1,167.09c te dhṛṣṇunā śavasā śūśuvāṃso 'rṇo na dveṣo dhṛṣatā pari ṣṭhuḥ ||
RV_1,167.10a vayam adyendrasya preṣṭhā vayaṃ śvo vocemahi samarye |
RV_1,167.10c vayam purā mahi ca no anu dyūn tan na ṛbhukṣā narām anu ṣyāt ||
RV_1,167.11a eṣa va stomo maruta iyaṃ gīr māndāryasya mānyasya kāroḥ |
RV_1,167.11c eṣā yāsīṣṭa tanve vayāṃ vidyāmeṣaṃ vṛjanaṃ jīradānum ||

RV_1,168.01a yajñā-yajñā vaḥ samanā tuturvaṇir dhiyaṃ-dhiyaṃ vo devayā u dadhidhve |
RV_1,168.01c ā vo 'rvācaḥ suvitāya rodasyor mahe vavṛtyām avase suvṛktibhiḥ ||
RV_1,168.02a vavrāso na ye svajāḥ svatavasa iṣaṃ svar abhijāyanta dhūtayaḥ |
RV_1,168.02c sahasriyāso apāṃ normaya āsā gāvo vandyāso nokṣaṇaḥ ||
RV_1,168.03a somāso na ye sutās tṛptāṃśavo hṛtsu pītāso duvaso nāsate |
RV_1,168.03c aiṣām aṃseṣu rambhiṇīva rārabhe hasteṣu khādiś ca kṛtiś ca saṃ dadhe ||
RV_1,168.04a ava svayuktā diva ā vṛthā yayur amartyāḥ kaśayā codata tmanā |
RV_1,168.04c areṇavas tuvijātā acucyavur dṛḷhāni cin maruto bhrājadṛṣṭayaḥ ||
RV_1,168.05a ko vo 'ntar maruta ṛṣṭividyuto rejati tmanā hanveva jihvayā |
RV_1,168.05c dhanvacyuta iṣāṃ na yāmani purupraiṣā ahanyo naitaśaḥ ||
RV_1,168.06a kva svid asya rajaso mahas paraṃ kvāvaram maruto yasminn āyaya |
RV_1,168.06c yac cyāvayatha vithureva saṃhitaṃ vy adriṇā patatha tveṣam arṇavam ||
RV_1,168.07a sātir na vo 'mavatī svarvatī tveṣā vipākā marutaḥ pipiṣvatī |
RV_1,168.07c bhadrā vo rātiḥ pṛṇato na dakṣiṇā pṛthujrayī asuryeva jañjatī ||
RV_1,168.08a prati ṣṭobhanti sindhavaḥ pavibhyo yad abhriyāṃ vācam udīrayanti |
RV_1,168.08c ava smayanta vidyutaḥ pṛthivyāṃ yadī ghṛtam marutaḥ pruṣṇuvanti ||
RV_1,168.09a asūta pṛśnir mahate raṇāya tveṣam ayāsām marutām anīkam |
RV_1,168.09c te sapsarāso 'janayantābhvam ād it svadhām iṣirām pary apaśyan ||
RV_1,168.10a eṣa va stomo maruta iyaṃ gīr māndāryasya mānyasya kāroḥ |
RV_1,168.10c eṣā yāsīṣṭa tanve vayāṃ vidyāmeṣaṃ vṛjanaṃ jīradānum ||

RV_1,169.01a mahaś cit tvam indra yata etān mahaś cid asi tyajaso varūtā |
RV_1,169.01c sa no vedho marutāṃ cikitvān sumnā vanuṣva tava hi preṣṭhā ||
RV_1,169.02a ayujran ta indra viśvakṛṣṭīr vidānāso niṣṣidho martyatrā |
RV_1,169.02c marutām pṛtsutir hāsamānā svarmīḷhasya pradhanasya sātau ||
RV_1,169.03a amyak sā ta indra ṛṣṭir asme sanemy abhvam maruto junanti |
RV_1,169.03c agniś cid dhi ṣmātase śuśukvān āpo na dvīpaṃ dadhati prayāṃsi ||
RV_1,169.04a tvaṃ tū na indra taṃ rayiṃ dā ojiṣṭhayā dakṣiṇayeva rātim |
RV_1,169.04c stutaś ca yās te cakananta vāyo stanaṃ na madhvaḥ pīpayanta vājaiḥ ||
RV_1,169.05a tve rāya indra tośatamāḥ praṇetāraḥ kasya cid ṛtāyoḥ |
RV_1,169.05c te ṣu ṇo maruto mṛḷayantu ye smā purā gātūyantīva devāḥ ||
RV_1,169.06a prati pra yāhīndra mīḷhuṣo nṝn mahaḥ pārthive sadane yatasva |
RV_1,169.06c adha yad eṣām pṛthubudhnāsa etās tīrthe nāryaḥ pauṃsyāni tasthuḥ ||
RV_1,169.07a prati ghorāṇām etānām ayāsām marutāṃ śṛṇva āyatām upabdiḥ |
RV_1,169.07c ye martyam pṛtanāyantam ūmair ṛṇāvānaṃ na patayanta sargaiḥ ||
RV_1,169.08a tvam mānebhya indra viśvajanyā radā marudbhiḥ śurudho goagrāḥ |
RV_1,169.08c stavānebhi stavase deva devair vidyāmeṣaṃ vṛjanaṃ jīradānum ||

RV_1,170.01a na nūnam asti no śvaḥ kas tad veda yad adbhutam |
RV_1,170.01c anyasya cittam abhi saṃcareṇyam utādhītaṃ vi naśyati ||
RV_1,170.02a kiṃ na indra jighāṃsasi bhrātaro marutas tava |
RV_1,170.02c tebhiḥ kalpasva sādhuyā mā naḥ samaraṇe vadhīḥ ||
RV_1,170.03a kiṃ no bhrātar agastya sakhā sann ati manyase |
RV_1,170.03c vidmā hi te yathā mano 'smabhyam in na ditsasi ||
RV_1,170.04a araṃ kṛṇvantu vediṃ sam agnim indhatām puraḥ |
RV_1,170.04c tatrāmṛtasya cetanaṃ yajñaṃ te tanavāvahai ||
RV_1,170.05a tvam īśiṣe vasupate vasūnāṃ tvam mitrāṇām mitrapate dheṣṭhaḥ |
RV_1,170.05c indra tvam marudbhiḥ saṃ vadasvādha prāśāna ṛtuthā havīṃṣi ||

RV_1,171.01a prati va enā namasāham emi sūktena bhikṣe sumatiṃ turāṇām |
RV_1,171.01c rarāṇatā maruto vedyābhir ni heḷo dhatta vi mucadhvam aśvān ||
RV_1,171.02a eṣa va stomo maruto namasvān hṛdā taṣṭo manasā dhāyi devāḥ |
RV_1,171.02c upem ā yāta manasā juṣāṇā yūyaṃ hi ṣṭhā namasa id vṛdhāsaḥ ||
RV_1,171.03a stutāso no maruto mṛḷayantūta stuto maghavā śambhaviṣṭhaḥ |
RV_1,171.03c ūrdhvā naḥ santu komyā vanāny ahāni viśvā maruto jigīṣā ||
RV_1,171.04a asmād ahaṃ taviṣād īṣamāṇa indrād bhiyā maruto rejamānaḥ |
RV_1,171.04c yuṣmabhyaṃ havyā niśitāny āsan tāny āre cakṛmā mṛḷatā naḥ ||
RV_1,171.05a yena mānāsaś citayanta usrā vyuṣṭiṣu śavasā śaśvatīnām |
RV_1,171.05c sa no marudbhir vṛṣabha śravo dhā ugra ugrebhi sthaviraḥ sahodāḥ ||
RV_1,171.06a tvam pāhīndra sahīyaso nṝn bhavā marudbhir avayātaheḷāḥ |
RV_1,171.06c supraketebhiḥ sāsahir dadhāno vidyāmeṣaṃ vṛjanaṃ jīradānum ||

RV_1,172.01a citro vo 'stu yāmaś citra ūtī sudānavaḥ |
RV_1,172.01c maruto ahibhānavaḥ ||
RV_1,172.02a āre sā vaḥ sudānavo maruta ṛñjatī śaruḥ |
RV_1,172.02c āre aśmā yam asyatha ||
RV_1,172.03a tṛṇaskandasya nu viśaḥ pari vṛṅkta sudānavaḥ |
RV_1,172.03c ūrdhvān naḥ karta jīvase ||

RV_1,173.01a gāyat sāma nabhanyaṃ yathā ver arcāma tad vāvṛdhānaṃ svarvat |
RV_1,173.01c gāvo dhenavo barhiṣy adabdhā ā yat sadmānaṃ divyaṃ vivāsān ||
RV_1,173.02a arcad vṛṣā vṛṣabhiḥ sveduhavyair mṛgo nāśno ati yaj juguryāt |
RV_1,173.02c pra mandayur manāṃ gūrta hotā bharate maryo mithunā yajatraḥ ||
RV_1,173.03a nakṣad dhotā pari sadma mitā yan bharad garbham ā śaradaḥ pṛthivyāḥ |
RV_1,173.03c krandad aśvo nayamāno ruvad gaur antar dūto na rodasī carad vāk ||
RV_1,173.04a tā karmāṣatarāsmai pra cyautnāni devayanto bharante |
RV_1,173.04c jujoṣad indro dasmavarcā nāsatyeva sugmyo ratheṣṭhāḥ ||
RV_1,173.05a tam u ṣṭuhīndraṃ yo ha satvā yaḥ śūro maghavā yo ratheṣṭhāḥ |
RV_1,173.05c pratīcaś cid yodhīyān vṛṣaṇvān vavavruṣaś cit tamaso vihantā ||
RV_1,173.06a pra yad itthā mahinā nṛbhyo asty araṃ rodasī kakṣye nāsmai |
RV_1,173.06c saṃ vivya indro vṛjanaṃ na bhūmā bharti svadhāvāṃ opaśam iva dyām ||
RV_1,173.07a samatsu tvā śūra satām urāṇam prapathintamam paritaṃsayadhyai |
RV_1,173.07c sajoṣasa indram made kṣoṇīḥ sūriṃ cid ye anumadanti vājaiḥ ||
RV_1,173.08a evā hi te śaṃ savanā samudra āpo yat ta āsu madanti devīḥ |
RV_1,173.08c viśvā te anu joṣyā bhūd gauḥ sūrīṃś cid yadi dhiṣā veṣi janān ||
RV_1,173.09a asāma yathā suṣakhāya ena svabhiṣṭayo narāṃ na śaṃsaiḥ |
RV_1,173.09c asad yathā na indro vandaneṣṭhās turo na karma nayamāna ukthā ||
RV_1,173.10a viṣpardhaso narāṃ na śaṃsair asmākāsad indro vajrahastaḥ |
RV_1,173.10c mitrāyuvo na pūrpatiṃ suśiṣṭau madhyāyuva upa śikṣanti yajñaiḥ ||
RV_1,173.11a yajño hi ṣmendraṃ kaś cid ṛndhañ juhurāṇaś cin manasā pariyan |
RV_1,173.11c tīrthe nācchā tātṛṣāṇam oko dīrgho na sidhram ā kṛṇoty adhvā ||
RV_1,173.12a mo ṣū ṇa indrātra pṛtsu devair asti hi ṣmā te śuṣminn avayāḥ |
RV_1,173.12c mahaś cid yasya mīḷhuṣo yavyā haviṣmato maruto vandate gīḥ ||
RV_1,173.13a eṣa stoma indra tubhyam asme etena gātuṃ harivo vido naḥ |
RV_1,173.13c ā no vavṛtyāḥ suvitāya deva vidyāmeṣaṃ vṛjanaṃ jīradānum ||

RV_1,174.01a tvaṃ rājendra ye ca devā rakṣā nṝn pāhy asura tvam asmān |
RV_1,174.01c tvaṃ satpatir maghavā nas tarutras tvaṃ satyo vasavānaḥ sahodāḥ ||
RV_1,174.02a dano viśa indra mṛdhravācaḥ sapta yat puraḥ śarma śāradīr dart |
RV_1,174.02c ṛṇor apo anavadyārṇā yūne vṛtram purukutsāya randhīḥ ||
RV_1,174.03a ajā vṛta indra śūrapatnīr dyāṃ ca yebhiḥ puruhūta nūnam |
RV_1,174.03c rakṣo agnim aśuṣaṃ tūrvayāṇaṃ siṃho na dame apāṃsi vastoḥ ||
RV_1,174.04a śeṣan nu ta indra sasmin yonau praśastaye pavīravasya mahnā |
RV_1,174.04c sṛjad arṇāṃsy ava yad yudhā gās tiṣṭhad dharī dhṛṣatā mṛṣṭa vājān ||
RV_1,174.05a vaha kutsam indra yasmiñ cākan syūmanyū ṛjrā vātasyāśvā |
RV_1,174.05c pra sūraś cakraṃ vṛhatād abhīke 'bhi spṛdho yāsiṣad vajrabāhuḥ ||
RV_1,174.06a jaghanvāṃ indra mitrerūñ codapravṛddho harivo adāśūn |
RV_1,174.06c pra ye paśyann aryamaṇaṃ sacāyos tvayā śūrtā vahamānā apatyam ||
RV_1,174.07a rapat kavir indrārkasātau kṣāṃ dāsāyopabarhaṇīṃ kaḥ |
RV_1,174.07c karat tisro maghavā dānucitrā ni duryoṇe kuyavācam mṛdhi śret ||
RV_1,174.08a sanā tā ta indra navyā āguḥ saho nabho 'viraṇāya pūrvīḥ |
RV_1,174.08c bhinat puro na bhido adevīr nanamo vadhar adevasya pīyoḥ ||
RV_1,174.09a tvaṃ dhunir indra dhunimatīr ṛṇor apaḥ sīrā na sravantīḥ |
RV_1,174.09c pra yat samudram ati śūra parṣi pārayā turvaśaṃ yaduṃ svasti ||
RV_1,174.10a tvam asmākam indra viśvadha syā avṛkatamo narāṃ nṛpātā |
RV_1,174.10c sa no viśvāsāṃ spṛdhāṃ sahodā vidyāmeṣaṃ vṛjanaṃ jīradānum ||

RV_1,175.01a matsy apāyi te mahaḥ pātrasyeva harivo matsaro madaḥ |
RV_1,175.01c vṛṣā te vṛṣṇa indur vājī sahasrasātamaḥ ||
RV_1,175.02a ā nas te gantu matsaro vṛṣā mado vareṇyaḥ |
RV_1,175.02c sahāvāṃ indra sānasiḥ pṛtanāṣāḷ amartyaḥ ||
RV_1,175.03a tvaṃ hi śūraḥ sanitā codayo manuṣo ratham |
RV_1,175.03c sahāvān dasyum avratam oṣaḥ pātraṃ na śociṣā ||
RV_1,175.04a muṣāya sūryaṃ kave cakram īśāna ojasā |
RV_1,175.04c vaha śuṣṇāya vadhaṃ kutsaṃ vātasyāśvaiḥ ||
RV_1,175.05a śuṣmintamo hi te mado dyumnintama uta kratuḥ |
RV_1,175.05c vṛtraghnā varivovidā maṃsīṣṭhā aśvasātamaḥ ||
RV_1,175.06a yathā pūrvebhyo jaritṛbhya indra maya ivāpo na tṛṣyate babhūtha |
RV_1,175.06c tām anu tvā nividaṃ johavīmi vidyāmeṣaṃ vṛjanaṃ jīradānum ||

RV_1,176.01a matsi no vasyaiṣṭaya indram indo vṛṣā viśa |
RV_1,176.01c ṛghāyamāṇa invasi śatrum anti na vindasi ||
RV_1,176.02a tasminn ā veśayā giro ya ekaś carṣaṇīnām |
RV_1,176.02c anu svadhā yam upyate yavaṃ na carkṛṣad vṛṣā ||
RV_1,176.03a yasya viśvāni hastayoḥ pañca kṣitīnāṃ vasu |
RV_1,176.03c spāśayasva yo asmadhrug divyevāśanir jahi ||
RV_1,176.04a asunvantaṃ samaṃ jahi dūṇāśaṃ yo na te mayaḥ |
RV_1,176.04c asmabhyam asya vedanaṃ daddhi sūriś cid ohate ||
RV_1,176.05a āvo yasya dvibarhaso 'rkeṣu sānuṣag asat |
RV_1,176.05c ājāv indrasyendo prāvo vājeṣu vājinam ||
RV_1,176.06a yathā pūrvebhyo jaritṛbhya indra maya ivāpo na tṛṣyate babhūtha |
RV_1,176.06c tām anu tvā nividaṃ johavīmi vidyāmeṣaṃ vṛjanaṃ jīradānum ||

RV_1,177.01a ā carṣaṇiprā vṛṣabho janānāṃ rājā kṛṣṭīnām puruhūta indraḥ |
RV_1,177.01c stutaḥ śravasyann avasopa madrig yuktvā harī vṛṣaṇā yāhy arvāṅ ||
RV_1,177.02a ye te vṛṣaṇo vṛṣabhāsa indra brahmayujo vṛṣarathāso atyāḥ |
RV_1,177.02c tāṃ ā tiṣṭha tebhir ā yāhy arvāṅ havāmahe tvā suta indra some ||
RV_1,177.03a ā tiṣṭha rathaṃ vṛṣaṇaṃ vṛṣā te sutaḥ somaḥ pariṣiktā madhūni |
RV_1,177.03c yuktvā vṛṣabhyāṃ vṛṣabha kṣitīnāṃ haribhyāṃ yāhi pravatopa madrik ||
RV_1,177.04a ayaṃ yajño devayā ayam miyedha imā brahmāṇy ayam indra somaḥ |
RV_1,177.04c stīrṇam barhir ā tu śakra pra yāhi pibā niṣadya vi mucā harī iha ||
RV_1,177.05a o suṣṭuta indra yāhy arvāṅ upa brahmāṇi mānyasya kāroḥ |
RV_1,177.05c vidyāma vastor avasā gṛṇanto vidyāmeṣaṃ vṛjanaṃ jīradānum ||

RV_1,178.01a yad dha syā ta indra śruṣṭir asti yayā babhūtha jaritṛbhya ūtī |
RV_1,178.01c mā naḥ kāmam mahayantam ā dhag viśvā te aśyām pary āpa āyoḥ ||
RV_1,178.02a na ghā rājendra ā dabhan no yā nu svasārā kṛṇavanta yonau |
RV_1,178.02c āpaś cid asmai sutukā aveṣan gaman na indraḥ sakhyā vayaś ca ||
RV_1,178.03a jetā nṛbhir indraḥ pṛtsu śūraḥ śrotā havaṃ nādhamānasya kāroḥ |
RV_1,178.03c prabhartā rathaṃ dāśuṣa upāka udyantā giro yadi ca tmanā bhūt ||
RV_1,178.04a evā nṛbhir indraḥ suśravasyā prakhādaḥ pṛkṣo abhi mitriṇo bhūt |
RV_1,178.04c samarya iṣa stavate vivāci satrākaro yajamānasya śaṃsaḥ ||
RV_1,178.05a tvayā vayam maghavann indra śatrūn abhi ṣyāma mahato manyamānān |
RV_1,178.05c tvaṃ trātā tvam u no vṛdhe bhūr vidyāmeṣaṃ vṛjanaṃ jīradānum ||

RV_1,179.01a pūrvīr ahaṃ śaradaḥ śaśramāṇā doṣā vastor uṣaso jarayantīḥ |
RV_1,179.01c mināti śriyaṃ jarimā tanūnām apy ū nu patnīr vṛṣaṇo jagamyuḥ ||
RV_1,179.02a ye cid dhi pūrva ṛtasāpa āsan sākaṃ devebhir avadann ṛtāni |
RV_1,179.02c te cid avāsur nahy antam āpuḥ sam ū nu patnīr vṛṣabhir jagamyuḥ ||
RV_1,179.03a na mṛṣā śrāntaṃ yad avanti devā viśvā it spṛdho abhy aśnavāva |
RV_1,179.03c jayāved atra śatanītham ājiṃ yat samyañcā mithunāv abhy ajāva ||
RV_1,179.04a nadasya mā rudhataḥ kāma āgann ita ājāto amutaḥ kutaś cit |
RV_1,179.04c lopāmudrā vṛṣaṇaṃ nī riṇāti dhīram adhīrā dhayati śvasantam ||
RV_1,179.05a imaṃ nu somam antito hṛtsu pītam upa bruve |
RV_1,179.05c yat sīm āgaś cakṛmā tat su mṛḷatu pulukāmo hi martyaḥ ||
RV_1,179.06a agastyaḥ khanamānaḥ khanitraiḥ prajām apatyam balam icchamānaḥ |
RV_1,179.06c ubhau varṇāv ṛṣir ugraḥ pupoṣa satyā deveṣv āśiṣo jagāma ||

RV_1,180.01a yuvo rajāṃsi suyamāso aśvā ratho yad vām pary arṇāṃsi dīyat |
RV_1,180.01c hiraṇyayā vām pavayaḥ pruṣāyan madhvaḥ pibantā uṣasaḥ sacethe ||
RV_1,180.02a yuvam atyasyāva nakṣatho yad vipatmano naryasya prayajyoḥ |
RV_1,180.02c svasā yad vāṃ viśvagūrtī bharāti vājāyeṭṭe madhupāv iṣe ca ||
RV_1,180.03a yuvam paya usriyāyām adhattam pakvam āmāyām ava pūrvyaṃ goḥ |
RV_1,180.03c antar yad vanino vām ṛtapsū hvāro na śucir yajate haviṣmān ||
RV_1,180.04a yuvaṃ ha gharmam madhumantam atraye 'po na kṣodo 'vṛṇītam eṣe |
RV_1,180.04c tad vāṃ narāv aśvinā paśvaiṣṭī rathyeva cakrā prati yanti madhvaḥ ||
RV_1,180.05a ā vāṃ dānāya vavṛtīya dasrā gor oheṇa taugryo na jivriḥ |
RV_1,180.05c apaḥ kṣoṇī sacate māhinā vāṃ jūrṇo vām akṣur aṃhaso yajatrā ||
RV_1,180.06a ni yad yuvethe niyutaḥ sudānū upa svadhābhiḥ sṛjathaḥ purandhim |
RV_1,180.06c preṣad veṣad vāto na sūrir ā mahe dade suvrato na vājam ||
RV_1,180.07a vayaṃ cid dhi vāṃ jaritāraḥ satyā vipanyāmahe vi paṇir hitāvān |
RV_1,180.07c adhā cid dhi ṣmāśvināv anindyā pātho hi ṣmā vṛṣaṇāv antidevam ||
RV_1,180.08a yuvāṃ cid dhi ṣmāśvināv anu dyūn virudrasya prasravaṇasya sātau |
RV_1,180.08c agastyo narāṃ nṛṣu praśastaḥ kārādhunīva citayat sahasraiḥ ||
RV_1,180.09a pra yad vahethe mahinā rathasya pra syandrā yātho manuṣo na hotā |
RV_1,180.09c dhattaṃ sūribhya uta vā svaśvyaṃ nāsatyā rayiṣācaḥ syāma ||
RV_1,180.10a taṃ vāṃ rathaṃ vayam adyā huvema stomair aśvinā suvitāya navyam |
RV_1,180.10c ariṣṭanemim pari dyām iyānaṃ vidyāmeṣaṃ vṛjanaṃ jīradānum ||

RV_1,181.01a kad u preṣṭāv iṣāṃ rayīṇām adhvaryantā yad unninītho apām |
RV_1,181.01c ayaṃ vāṃ yajño akṛta praśastiṃ vasudhitī avitārā janānām ||
RV_1,181.02a ā vām aśvāsaḥ śucayaḥ payaspā vātaraṃhaso divyāso atyāḥ |
RV_1,181.02c manojuvo vṛṣaṇo vītapṛṣṭhā eha svarājo aśvinā vahantu ||
RV_1,181.03a ā vāṃ ratho 'vanir na pravatvān sṛpravandhuraḥ suvitāya gamyāḥ |
RV_1,181.03c vṛṣṇa sthātārā manaso javīyān ahampūrvo yajato dhiṣṇyā yaḥ ||
RV_1,181.04a iheha jātā sam avāvaśītām arepasā tanvā nāmabhiḥ svaiḥ |
RV_1,181.04c jiṣṇur vām anyaḥ sumakhasya sūrir divo anyaḥ subhagaḥ putra ūhe ||
RV_1,181.05a pra vāṃ niceruḥ kakuho vaśāṃ anu piśaṅgarūpaḥ sadanāni gamyāḥ |
RV_1,181.05c harī anyasya pīpayanta vājair mathrā rajāṃsy aśvinā vi ghoṣaiḥ ||
RV_1,181.06a pra vāṃ śaradvān vṛṣabho na niṣṣāṭ pūrvīr iṣaś carati madhva iṣṇan |
RV_1,181.06c evair anyasya pīpayanta vājair veṣantīr ūrdhvā nadyo na āguḥ ||
RV_1,181.07a asarji vāṃ sthavirā vedhasā gīr bāḷhe aśvinā tredhā kṣarantī |
RV_1,181.07c upastutāv avataṃ nādhamānaṃ yāmann ayāmañ chṛṇutaṃ havam me ||
RV_1,181.08a uta syā vāṃ ruśato vapsaso gīs tribarhiṣi sadasi pinvate nṝn |
RV_1,181.08c vṛṣā vām megho vṛṣaṇā pīpāya gor na seke manuṣo daśasyan ||
RV_1,181.09a yuvām pūṣevāśvinā purandhir agnim uṣāṃ na jarate haviṣmān |
RV_1,181.09c huve yad vāṃ varivasyā gṛṇāno vidyāmeṣaṃ vṛjanaṃ jīradānum ||

RV_1,182.01a abhūd idaṃ vayunam o ṣu bhūṣatā ratho vṛṣaṇvān madatā manīṣiṇaḥ |
RV_1,182.01c dhiyañjinvā dhiṣṇyā viśpalāvasū divo napātā sukṛte śucivratā ||
RV_1,182.02a indratamā hi dhiṣṇyā maruttamā dasrā daṃsiṣṭhā rathyā rathītamā |
RV_1,182.02c pūrṇaṃ rathaṃ vahethe madhva ācitaṃ tena dāśvāṃsam upa yātho aśvinā ||
RV_1,182.03a kim atra dasrā kṛṇuthaḥ kim āsāthe jano yaḥ kaś cid ahavir mahīyate |
RV_1,182.03c ati kramiṣṭaṃ juratam paṇer asuṃ jyotir viprāya kṛṇutaṃ vacasyave ||
RV_1,182.04a jambhayatam abhito rāyataḥ śuno hatam mṛdho vidathus tāny aśvinā |
RV_1,182.04c vācaṃ-vācaṃ jaritū ratninīṃ kṛtam ubhā śaṃsaṃ nāsatyāvatam mama ||
RV_1,182.05a yuvam etaṃ cakrathuḥ sindhuṣu plavam ātmanvantam pakṣiṇaṃ taugryāya kam |
RV_1,182.05c yena devatrā manasā nirūhathuḥ supaptanī petathuḥ kṣodaso mahaḥ ||
RV_1,182.06a avaviddhaṃ taugryam apsv antar anārambhaṇe tamasi praviddham |
RV_1,182.06c catasro nāvo jaṭhalasya juṣṭā ud aśvibhyām iṣitāḥ pārayanti ||
RV_1,182.07a kaḥ svid vṛkṣo niṣṭhito madhye arṇaso yaṃ taugryo nādhitaḥ paryaṣasvajat |
RV_1,182.07c parṇā mṛgasya pataror ivārabha ud aśvinā ūhathuḥ śromatāya kam ||
RV_1,182.08a tad vāṃ narā nāsatyāv anu ṣyād yad vām mānāsa ucatham avocan |
RV_1,182.08c asmād adya sadasaḥ somyād ā vidyāmeṣaṃ vṛjanaṃ jīradānum ||

RV_1,183.01a taṃ yuñjāthām manaso yo javīyān trivandhuro vṛṣaṇā yas tricakraḥ |
RV_1,183.01c yenopayāthaḥ sukṛto duroṇaṃ tridhātunā patatho vir na parṇaiḥ ||
RV_1,183.02a suvṛd ratho vartate yann abhi kṣāṃ yat tiṣṭhathaḥ kratumantānu pṛkṣe |
RV_1,183.02c vapur vapuṣyā sacatām iyaṃ gīr divo duhitroṣasā sacethe ||
RV_1,183.03a ā tiṣṭhataṃ suvṛtaṃ yo ratho vām anu vratāni vartate haviṣmān |
RV_1,183.03c yena narā nāsatyeṣayadhyai vartir yāthas tanayāya tmane ca ||
RV_1,183.04a mā vāṃ vṛko mā vṛkīr ā dadharṣīn mā pari varktam uta māti dhaktam |
RV_1,183.04c ayaṃ vām bhāgo nihita iyaṃ gīr dasrāv ime vāṃ nidhayo madhūnām ||
RV_1,183.05a yuvāṃ gotamaḥ purumīḷho atrir dasrā havate 'vase haviṣmān |
RV_1,183.05c diśaṃ na diṣṭām ṛjūyeva yantā me havaṃ nāsatyopa yātam ||
RV_1,183.06a atāriṣma tamasas pāram asya prati vāṃ stomo aśvināv adhāyi |
RV_1,183.06c eha yātam pathibhir devayānair vidyāmeṣaṃ vṛjanaṃ jīradānum ||

RV_1,184.01a tā vām adya tāv aparaṃ huvemocchantyām uṣasi vahnir ukthaiḥ |
RV_1,184.01c nāsatyā kuha cit santāv aryo divo napātā sudāstarāya ||
RV_1,184.02a asme ū ṣu vṛṣaṇā mādayethām ut paṇīṃr hatam ūrmyā madantā |
RV_1,184.02c śrutam me acchoktibhir matīnām eṣṭā narā nicetārā ca karṇaiḥ ||
RV_1,184.03a śriye pūṣann iṣukṛteva devā nāsatyā vahatuṃ sūryāyāḥ |
RV_1,184.03c vacyante vāṃ kakuhā apsu jātā yugā jūrṇeva varuṇasya bhūreḥ ||
RV_1,184.04a asme sā vām mādhvī rātir astu stomaṃ hinotam mānyasya kāroḥ |
RV_1,184.04c anu yad vāṃ śravasyā sudānū suvīryāya carṣaṇayo madanti ||
RV_1,184.05a eṣa vāṃ stomo aśvināv akāri mānebhir maghavānā suvṛkti |
RV_1,184.05c yātaṃ vartis tanayāya tmane cāgastye nāsatyā madantā ||
RV_1,184.06a atāriṣma tamasas pāram asya prati vāṃ stomo aśvināv adhāyi |
RV_1,184.06c eha yātam pathibhir devayānair vidyāmeṣaṃ vṛjanaṃ jīradānum ||

RV_1,185.01a katarā pūrvā katarāparāyoḥ kathā jāte kavayaḥ ko vi veda |
RV_1,185.01c viśvaṃ tmanā bibhṛto yad dha nāma vi vartete ahanī cakriyeva ||
RV_1,185.02a bhūriṃ dve acarantī carantam padvantaṃ garbham apadī dadhāte |
RV_1,185.02c nityaṃ na sūnum pitror upasthe dyāvā rakṣatam pṛthivī no abhvāt ||
RV_1,185.03a aneho dātram aditer anarvaṃ huve svarvad avadhaṃ namasvat |
RV_1,185.03c tad rodasī janayataṃ jaritre dyāvā rakṣatam pṛthivī no abhvāt ||
RV_1,185.04a atapyamāne avasāvantī anu ṣyāma rodasī devaputre |
RV_1,185.04c ubhe devānām ubhayebhir ahnāṃ dyāvā rakṣatam pṛthivī no abhvāt ||
RV_1,185.05a saṃgacchamāne yuvatī samante svasārā jāmī pitror upasthe |
RV_1,185.05c abhijighrantī bhuvanasya nābhiṃ dyāvā rakṣatam pṛthivī no abhvāt ||
RV_1,185.06a urvī sadmanī bṛhatī ṛtena huve devānām avasā janitrī |
RV_1,185.06c dadhāte ye amṛtaṃ supratīke dyāvā rakṣatam pṛthivī no abhvāt ||
RV_1,185.07a urvī pṛthvī bahule dūreante upa bruve namasā yajñe asmin |
RV_1,185.07c dadhāte ye subhage supratūrtī dyāvā rakṣatam pṛthivī no abhvāt ||
RV_1,185.08a devān vā yac cakṛmā kac cid āgaḥ sakhāyaṃ vā sadam ij jāspatiṃ vā |
RV_1,185.08c iyaṃ dhīr bhūyā avayānam eṣāṃ dyāvā rakṣatam pṛthivī no abhvāt ||
RV_1,185.09a ubhā śaṃsā naryā mām aviṣṭām ubhe mām ūtī avasā sacetām |
RV_1,185.09c bhūri cid aryaḥ sudāstarāyeṣā madanta iṣayema devāḥ ||
RV_1,185.10a ṛtaṃ dive tad avocam pṛthivyā abhiśrāvāya prathamaṃ sumedhāḥ |
RV_1,185.10c pātām avadyād duritād abhīke pitā mātā ca rakṣatām avobhiḥ ||
RV_1,185.11a idaṃ dyāvāpṛthivī satyam astu pitar mātar yad ihopabruve vām |
RV_1,185.11c bhūtaṃ devānām avame avobhir vidyāmeṣaṃ vṛjanaṃ jīradānum ||

RV_1,186.01a ā na iḷābhir vidathe suśasti viśvānaraḥ savitā deva etu |
RV_1,186.01c api yathā yuvāno matsathā no viśvaṃ jagad abhipitve manīṣā ||
RV_1,186.02a ā no viśva āskrā gamantu devā mitro aryamā varuṇaḥ sajoṣāḥ |
RV_1,186.02c bhuvan yathā no viśve vṛdhāsaḥ karan suṣāhā vithuraṃ na śavaḥ ||
RV_1,186.03a preṣṭhaṃ vo atithiṃ gṛṇīṣe 'gniṃ śastibhis turvaṇiḥ sajoṣāḥ |
RV_1,186.03c asad yathā no varuṇaḥ sukīrtir iṣaś ca parṣad arigūrtaḥ sūriḥ ||
RV_1,186.04a upa va eṣe namasā jigīṣoṣāsānaktā sudugheva dhenuḥ |
RV_1,186.04c samāne ahan vimimāno arkaṃ viṣurūpe payasi sasminn ūdhan ||
RV_1,186.05a uta no 'hir budhnyo mayas kaḥ śiśuṃ na pipyuṣīva veti sindhuḥ |
RV_1,186.05c yena napātam apāṃ junāma manojuvo vṛṣaṇo yaṃ vahanti ||
RV_1,186.06a uta na īṃ tvaṣṭā gantv acchā smat sūribhir abhipitve sajoṣāḥ |
RV_1,186.06c ā vṛtrahendraś carṣaṇiprās tuviṣṭamo narāṃ na iha gamyāḥ ||
RV_1,186.07a uta na īm matayo 'śvayogāḥ śiśuṃ na gāvas taruṇaṃ rihanti |
RV_1,186.07c tam īṃ giro janayo na patnīḥ surabhiṣṭamaṃ narāṃ nasanta ||
RV_1,186.08a uta na īm maruto vṛddhasenāḥ smad rodasī samanasaḥ sadantu |
RV_1,186.08c pṛṣadaśvāso 'vanayo na rathā riśādaso mitrayujo na devāḥ ||
RV_1,186.09a pra nu yad eṣām mahinā cikitre pra yuñjate prayujas te suvṛkti |
RV_1,186.09c adha yad eṣāṃ sudine na śarur viśvam eriṇam pruṣāyanta senāḥ ||
RV_1,186.10a pro aśvināv avase kṛṇudhvam pra pūṣaṇaṃ svatavaso hi santi |
RV_1,186.10c adveṣo viṣṇur vāta ṛbhukṣā acchā sumnāya vavṛtīya devān ||
RV_1,186.11a iyaṃ sā vo asme dīdhitir yajatrā apiprāṇī ca sadanī ca bhūyāḥ |
RV_1,186.11c ni yā deveṣu yatate vasūyur vidyāmeṣaṃ vṛjanaṃ jīradānum ||

RV_1,187.01a pituṃ nu stoṣam maho dharmāṇaṃ taviṣīm |
RV_1,187.01c yasya trito vy ojasā vṛtraṃ viparvam ardayat ||
RV_1,187.02a svādo pito madho pito vayaṃ tvā vavṛmahe |
RV_1,187.02c asmākam avitā bhava ||
RV_1,187.03a upa naḥ pitav ā cara śivaḥ śivābhir ūtibhiḥ |
RV_1,187.03c mayobhur adviṣeṇyaḥ sakhā suśevo advayāḥ ||
RV_1,187.04a tava tye pito rasā rajāṃsy anu viṣṭhitāḥ |
RV_1,187.04c divi vātā iva śritāḥ ||
RV_1,187.05a tava tye pito dadatas tava svādiṣṭha te pito |
RV_1,187.05c pra svādmāno rasānāṃ tuvigrīvā iverate ||
RV_1,187.06a tve pito mahānāṃ devānām mano hitam |
RV_1,187.06c akāri cāru ketunā tavāhim avasāvadhīt ||
RV_1,187.07a yad ado pito ajagan vivasva parvatānām |
RV_1,187.07c atrā cin no madho pito 'ram bhakṣāya gamyāḥ ||
RV_1,187.08a yad apām oṣadhīnām pariṃśam āriśāmahe |
RV_1,187.08c vātāpe pīva id bhava ||
RV_1,187.09a yat te soma gavāśiro yavāśiro bhajāmahe |
RV_1,187.09c vātāpe pīva id bhava ||
RV_1,187.10a karambha oṣadhe bhava pīvo vṛkka udārathiḥ |
RV_1,187.10c vātāpe pīva id bhava ||
RV_1,187.11a taṃ tvā vayam pito vacobhir gāvo na havyā suṣūdima |
RV_1,187.11c devebhyas tvā sadhamādam asmabhyaṃ tvā sadhamādam ||

RV_1,188.01a samiddho adya rājasi devo devaiḥ sahasrajit |
RV_1,188.01c dūto havyā kavir vaha ||
RV_1,188.02a tanūnapād ṛtaṃ yate madhvā yajñaḥ sam ajyate |
RV_1,188.02c dadhat sahasriṇīr iṣaḥ ||
RV_1,188.03a ājuhvāno na īḍyo devāṃ ā vakṣi yajñiyān |
RV_1,188.03c agne sahasrasā asi ||
RV_1,188.04a prācīnam barhir ojasā sahasravīram astṛṇan |
RV_1,188.04c yatrādityā virājatha ||
RV_1,188.05a virāṭ samrāḍ vibhvīḥ prabhvīr bahvīś ca bhūyasīś ca yāḥ |
RV_1,188.05c duro ghṛtāny akṣaran ||
RV_1,188.06a surukme hi supeśasādhi śriyā virājataḥ |
RV_1,188.06c uṣāsāv eha sīdatām ||
RV_1,188.07a prathamā hi suvācasā hotārā daivyā kavī |
RV_1,188.07c yajñaṃ no yakṣatām imam ||
RV_1,188.08a bhāratīḷe sarasvati yā vaḥ sarvā upabruve |
RV_1,188.08c tā naś codayata śriye ||
RV_1,188.09a tvaṣṭā rūpāṇi hi prabhuḥ paśūn viśvān samānaje |
RV_1,188.09c teṣāṃ na sphātim ā yaja ||
RV_1,188.10a upa tmanyā vanaspate pātho devebhyaḥ sṛja |
RV_1,188.10c agnir havyāni siṣvadat ||
RV_1,188.11a purogā agnir devānāṃ gāyatreṇa sam ajyate |
RV_1,188.11c svāhākṛtīṣu rocate ||

RV_1,189.01a agne naya supathā rāye asmān viśvāni deva vayunāni vidvān |
RV_1,189.01c yuyodhy asmaj juhurāṇam eno bhūyiṣṭhāṃ te namauktiṃ vidhema ||
RV_1,189.02a agne tvam pārayā navyo asmān svastibhir ati durgāṇi viśvā |
RV_1,189.02c pūś ca pṛthvī bahulā na urvī bhavā tokāya tanayāya śaṃ yoḥ ||
RV_1,189.03a agne tvam asmad yuyodhy amīvā anagnitrā abhy amanta kṛṣṭīḥ |
RV_1,189.03c punar asmabhyaṃ suvitāya deva kṣāṃ viśvebhir amṛtebhir yajatra ||
RV_1,189.04a pāhi no agne pāyubhir ajasrair uta priye sadana ā śuśukvān |
RV_1,189.04c mā te bhayaṃ jaritāraṃ yaviṣṭha nūnaṃ vidan māparaṃ sahasvaḥ ||
RV_1,189.05a mā no agne 'va sṛjo aghāyāviṣyave ripave ducchunāyai |
RV_1,189.05c mā datvate daśate mādate no mā rīṣate sahasāvan parā dāḥ ||
RV_1,189.06a vi gha tvāvāṃ ṛtajāta yaṃsad gṛṇāno agne tanve varūtham |
RV_1,189.06c viśvād ririkṣor uta vā ninitsor abhihrutām asi hi deva viṣpaṭ ||
RV_1,189.07a tvaṃ tāṃ agna ubhayān vi vidvān veṣi prapitve manuṣo yajatra |
RV_1,189.07c abhipitve manave śāsyo bhūr marmṛjenya uśigbhir nākraḥ ||
RV_1,189.08a avocāma nivacanāny asmin mānasya sūnuḥ sahasāne agnau |
RV_1,189.08c vayaṃ sahasram ṛṣibhiḥ sanema vidyāmeṣaṃ vṛjanaṃ jīradānum ||

RV_1,190.01a anarvāṇaṃ vṛṣabham mandrajihvam bṛhaspatiṃ vardhayā navyam arkaiḥ |
RV_1,190.01c gāthānyaḥ suruco yasya devā āśṛṇvanti navamānasya martāḥ ||
RV_1,190.02a tam ṛtviyā upa vācaḥ sacante sargo na yo devayatām asarji |
RV_1,190.02c bṛhaspatiḥ sa hy añjo varāṃsi vibhvābhavat sam ṛte mātariśvā ||
RV_1,190.03a upastutiṃ namasa udyatiṃ ca ślokaṃ yaṃsat saviteva pra bāhū |
RV_1,190.03c asya kratvāhanyo yo asti mṛgo na bhīmo arakṣasas tuviṣmān ||
RV_1,190.04a asya śloko divīyate pṛthivyām atyo na yaṃsad yakṣabhṛd vicetāḥ |
RV_1,190.04c mṛgāṇāṃ na hetayo yanti cemā bṛhaspater ahimāyāṃ abhi dyūn ||
RV_1,190.05a ye tvā devosrikam manyamānāḥ pāpā bhadram upajīvanti pajrāḥ |
RV_1,190.05c na dūḍhye anu dadāsi vāmam bṛhaspate cayasa it piyārum ||
RV_1,190.06a supraituḥ sūyavaso na panthā durniyantuḥ pariprīto na mitraḥ |
RV_1,190.06c anarvāṇo abhi ye cakṣate no 'pīvṛtā aporṇuvanto asthuḥ ||
RV_1,190.07a saṃ yaṃ stubho 'vanayo na yanti samudraṃ na sravato rodhacakrāḥ |
RV_1,190.07c sa vidvāṃ ubhayaṃ caṣṭe antar bṛhaspatis tara āpaś ca gṛdhraḥ ||
RV_1,190.08a evā mahas tuvijātas tuviṣmān bṛhaspatir vṛṣabho dhāyi devaḥ |
RV_1,190.08c sa na stuto vīravad dhātu gomad vidyāmeṣaṃ vṛjanaṃ jīradānum ||

RV_1,191.01a kaṅkato na kaṅkato 'tho satīnakaṅkataḥ |
RV_1,191.01c dvāv iti pluṣī iti ny adṛṣṭā alipsata ||
RV_1,191.02a adṛṣṭān hanty āyaty atho hanti parāyatī |
RV_1,191.02c atho avaghnatī hanty atho pinaṣṭi piṃṣatī ||
RV_1,191.03a śarāsaḥ kuśarāso darbhāsaḥ sairyā uta |
RV_1,191.03c mauñjā adṛṣṭā vairiṇāḥ sarve sākaṃ ny alipsata ||
RV_1,191.04a ni gāvo goṣṭhe asadan ni mṛgāso avikṣata |
RV_1,191.04c ni ketavo janānāṃ ny adṛṣṭā alipsata ||
RV_1,191.05a eta u tye praty adṛśran pradoṣaṃ taskarā iva |
RV_1,191.05c adṛṣṭā viśvadṛṣṭāḥ pratibuddhā abhūtana ||
RV_1,191.06a dyaur vaḥ pitā pṛthivī mātā somo bhrātāditiḥ svasā |
RV_1,191.06c adṛṣṭā viśvadṛṣṭās tiṣṭhatelayatā su kam ||
RV_1,191.07a ye aṃsyā ye aṅgyāḥ sūcīkā ye prakaṅkatāḥ |
RV_1,191.07c adṛṣṭāḥ kiṃ caneha vaḥ sarve sākaṃ ni jasyata ||
RV_1,191.08a ut purastāt sūrya eti viśvadṛṣṭo adṛṣṭahā |
RV_1,191.08c adṛṣṭān sarvāñ jambhayan sarvāś ca yātudhānyaḥ ||
RV_1,191.09a ud apaptad asau sūryaḥ puru viśvāni jūrvan |
RV_1,191.09c ādityaḥ parvatebhyo viśvadṛṣṭo adṛṣṭahā ||
RV_1,191.10a sūrye viṣam ā sajāmi dṛtiṃ surāvato gṛhe |
RV_1,191.10c so cin nu na marāti no vayam marāmāre asya yojanaṃ hariṣṭhā madhu tvā madhulā cakāra ||
RV_1,191.11a iyattikā śakuntikā sakā jaghāsa te viṣam |
RV_1,191.11c so cin nu na marāti no vayam marāmāre asya yojanaṃ hariṣṭhā madhu tvā madhulā cakāra ||
RV_1,191.12a triḥ sapta viṣpuliṅgakā viṣasya puṣyam akṣan |
RV_1,191.12c tāś cin nu na maranti no vayam marāmāre asya yojanaṃ hariṣṭhā madhu tvā madhulā cakāra ||
RV_1,191.13a navānāṃ navatīnāṃ viṣasya ropuṣīṇām |
RV_1,191.13c sarvāsām agrabhaṃ nāmāre asya yojanaṃ hariṣṭhā madhu tvā madhulā cakāra ||
RV_1,191.14a triḥ sapta mayūryaḥ sapta svasāro agruvaḥ |
RV_1,191.14c tās te viṣaṃ vi jabhrira udakaṃ kumbhinīr iva ||
RV_1,191.15a iyattakaḥ kuṣumbhakas takam bhinadmy aśmanā |
RV_1,191.15c tato viṣam pra vāvṛte parācīr anu saṃvataḥ ||
RV_1,191.16a kuṣumbhakas tad abravīd gireḥ pravartamānakaḥ |
RV_1,191.16c vṛścikasyārasaṃ viṣam arasaṃ vṛścika te viṣam ||



_____________________________________________________________




Ṛgveda 2



RV_2,001.01a tvam agne dyubhis tvam āśuśukṣaṇis tvam adbhyas tvam aśmanas pari |
RV_2,001.01c tvaṃ vanebhyas tvam oṣadhībhyas tvaṃ nṛṇāṃ nṛpate jāyase śuciḥ ||
RV_2,001.02a tavāgne hotraṃ tava potram ṛtviyaṃ tava neṣṭraṃ tvam agnid ṛtāyataḥ |
RV_2,001.02c tava praśāstraṃ tvam adhvarīyasi brahmā cāsi gṛhapatiś ca no dame ||
RV_2,001.03a tvam agna indro vṛṣabhaḥ satām asi tvaṃ viṣṇur urugāyo namasyaḥ |
RV_2,001.03c tvam brahmā rayivid brahmaṇas pate tvaṃ vidhartaḥ sacase purandhyā ||
RV_2,001.04a tvam agne rājā varuṇo dhṛtavratas tvam mitro bhavasi dasma īḍyaḥ |
RV_2,001.04c tvam aryamā satpatir yasya sambhujaṃ tvam aṃśo vidathe deva bhājayuḥ ||
RV_2,001.05a tvam agne tvaṣṭā vidhate suvīryaṃ tava gnāvo mitramahaḥ sajātyam |
RV_2,001.05c tvam āśuhemā rariṣe svaśvyaṃ tvaṃ narāṃ śardho asi purūvasuḥ ||
RV_2,001.06a tvam agne rudro asuro maho divas tvaṃ śardho mārutam pṛkṣa īśiṣe |
RV_2,001.06c tvaṃ vātair aruṇair yāsi śaṅgayas tvam pūṣā vidhataḥ pāsi nu tmanā ||
RV_2,001.07a tvam agne draviṇodā araṅkṛte tvaṃ devaḥ savitā ratnadhā asi |
RV_2,001.07c tvam bhago nṛpate vasva īśiṣe tvam pāyur dame yas te 'vidhat ||
RV_2,001.08a tvām agne dama ā viśpatiṃ viśas tvāṃ rājānaṃ suvidatram ṛñjate |
RV_2,001.08c tvaṃ viśvāni svanīka patyase tvaṃ sahasrāṇi śatā daśa prati ||
RV_2,001.09a tvām agne pitaram iṣṭibhir naras tvām bhrātrāya śamyā tanūrucam |
RV_2,001.09c tvam putro bhavasi yas te 'vidhat tvaṃ sakhā suśevaḥ pāsy ādhṛṣaḥ ||
RV_2,001.10a tvam agna ṛbhur āke namasyas tvaṃ vājasya kṣumato rāya īśiṣe |
RV_2,001.10c tvaṃ vi bhāsy anu dakṣi dāvane tvaṃ viśikṣur asi yajñam ātaniḥ ||
RV_2,001.11a tvam agne aditir deva dāśuṣe tvaṃ hotrā bhāratī vardhase girā |
RV_2,001.11c tvam iḷā śatahimāsi dakṣase tvaṃ vṛtrahā vasupate sarasvatī ||
RV_2,001.12a tvam agne subhṛta uttamaṃ vayas tava spārhe varṇa ā saṃdṛśi śriyaḥ |
RV_2,001.12c tvaṃ vājaḥ prataraṇo bṛhann asi tvaṃ rayir bahulo viśvatas pṛthuḥ ||
RV_2,001.13a tvām agna ādityāsa āsyaṃ tvāṃ jihvāṃ śucayaś cakrire kave |
RV_2,001.13c tvāṃ rātiṣāco adhvareṣu saścire tve devā havir adanty āhutam ||
RV_2,001.14a tve agne viśve amṛtāso adruha āsā devā havir adanty āhutam |
RV_2,001.14c tvayā martāsaḥ svadanta āsutiṃ tvaṃ garbho vīrudhāṃ jajñiṣe śuciḥ ||
RV_2,001.15a tvaṃ tān saṃ ca prati cāsi majmanāgne sujāta pra ca deva ricyase |
RV_2,001.15c pṛkṣo yad atra mahinā vi te bhuvad anu dyāvāpṛthivī rodasī ubhe ||
RV_2,001.16a ye stotṛbhyo goagrām aśvapeśasam agne rātim upasṛjanti sūrayaḥ |
RV_2,001.16c asmāñ ca tāṃś ca pra hi neṣi vasya ā bṛhad vadema vidathe suvīrāḥ ||

RV_2,002.01a yajñena vardhata jātavedasam agniṃ yajadhvaṃ haviṣā tanā girā |
RV_2,002.01c samidhānaṃ suprayasaṃ svarṇaraṃ dyukṣaṃ hotāraṃ vṛjaneṣu dhūrṣadam ||
RV_2,002.02a abhi tvā naktīr uṣaso vavāśire 'gne vatsaṃ na svasareṣu dhenavaḥ |
RV_2,002.02c diva ived aratir mānuṣā yugā kṣapo bhāsi puruvāra saṃyataḥ ||
RV_2,002.03a taṃ devā budhne rajasaḥ sudaṃsasaṃ divaspṛthivyor aratiṃ ny erire |
RV_2,002.03c ratham iva vedyaṃ śukraśociṣam agnim mitraṃ na kṣitiṣu praśaṃsyam ||
RV_2,002.04a tam ukṣamāṇaṃ rajasi sva ā dame candram iva surucaṃ hvāra ā dadhuḥ |
RV_2,002.04c pṛśnyāḥ pataraṃ citayantam akṣabhiḥ pātho na pāyuṃ janasī ubhe anu ||
RV_2,002.05a sa hotā viśvam pari bhūtv adhvaraṃ tam u havyair manuṣa ṛñjate girā |
RV_2,002.05c hiriśipro vṛdhasānāsu jarbhurad dyaur na stṛbhiś citayad rodasī anu ||
RV_2,002.06a sa no revat samidhānaḥ svastaye saṃdadasvān rayim asmāsu dīdihi |
RV_2,002.06c ā naḥ kṛṇuṣva suvitāya rodasī agne havyā manuṣo deva vītaye ||
RV_2,002.07a dā no agne bṛhato dāḥ sahasriṇo duro na vājaṃ śrutyā apā vṛdhi |
RV_2,002.07c prācī dyāvāpṛthivī brahmaṇā kṛdhi svar ṇa śukram uṣaso vi didyutaḥ ||
RV_2,002.08a sa idhāna uṣaso rāmyā anu svar ṇa dīded aruṣeṇa bhānunā |
RV_2,002.08c hotrābhir agnir manuṣaḥ svadhvaro rājā viśām atithiś cārur āyave ||
RV_2,002.09a evā no agne amṛteṣu pūrvya dhīṣ pīpāya bṛhaddiveṣu mānuṣā |
RV_2,002.09c duhānā dhenur vṛjaneṣu kārave tmanā śatinam pururūpam iṣaṇi ||
RV_2,002.10a vayam agne arvatā vā suvīryam brahmaṇā vā citayemā janāṃ ati |
RV_2,002.10c asmākaṃ dyumnam adhi pañca kṛṣṭiṣūccā svar ṇa śuśucīta duṣṭaram ||
RV_2,002.11a sa no bodhi sahasya praśaṃsyo yasmin sujātā iṣayanta sūrayaḥ |
RV_2,002.11c yam agne yajñam upayanti vājino nitye toke dīdivāṃsaṃ sve dame ||
RV_2,002.12a ubhayāso jātavedaḥ syāma te stotāro agne sūrayaś ca śarmaṇi |
RV_2,002.12c vasvo rāyaḥ puruścandrasya bhūyasaḥ prajāvataḥ svapatyasya śagdhi naḥ ||
RV_2,002.13a ye stotṛbhyo goagrām aśvapeśasam agne rātim upasṛjanti sūrayaḥ |
RV_2,002.13c asmāñ ca tāṃś ca pra hi neṣi vasya ā bṛhad vadema vidathe suvīrāḥ ||

RV_2,003.01a samiddho agnir nihitaḥ pṛthivyām pratyaṅ viśvāni bhuvanāny asthāt |
RV_2,003.01c hotā pāvakaḥ pradivaḥ sumedhā devo devān yajatv agnir arhan ||
RV_2,003.02a narāśaṃsaḥ prati dhāmāny añjan tisro divaḥ prati mahnā svarciḥ |
RV_2,003.02c ghṛtapruṣā manasā havyam undan mūrdhan yajñasya sam anaktu devān ||
RV_2,003.03a īḷito agne manasā no arhan devān yakṣi mānuṣāt pūrvo adya |
RV_2,003.03c sa ā vaha marutāṃ śardho acyutam indraṃ naro barhiṣadaṃ yajadhvam ||
RV_2,003.04a deva barhir vardhamānaṃ suvīraṃ stīrṇaṃ rāye subharaṃ vedy asyām |
RV_2,003.04c ghṛtenāktaṃ vasavaḥ sīdatedaṃ viśve devā ādityā yajñiyāsaḥ ||
RV_2,003.05a vi śrayantām urviyā hūyamānā dvāro devīḥ suprāyaṇā namobhiḥ |
RV_2,003.05c vyacasvatīr vi prathantām ajuryā varṇam punānā yaśasaṃ suvīram ||
RV_2,003.06a sādhv apāṃsi sanatā na ukṣite uṣāsānaktā vayyeva raṇvite |
RV_2,003.06c tantuṃ tataṃ saṃvayantī samīcī yajñasya peśaḥ sudughe payasvatī ||
RV_2,003.07a daivyā hotārā prathamā viduṣṭara ṛju yakṣataḥ sam ṛcā vapuṣṭarā |
RV_2,003.07c devān yajantāv ṛtuthā sam añjato nābhā pṛthivyā adhi sānuṣu triṣu ||
RV_2,003.08a sarasvatī sādhayantī dhiyaṃ na iḷā devī bhāratī viśvatūrtiḥ |
RV_2,003.08c tisro devīḥ svadhayā barhir edam acchidram pāntu śaraṇaṃ niṣadya ||
RV_2,003.09a piśaṅgarūpaḥ subharo vayodhāḥ śruṣṭī vīro jāyate devakāmaḥ |
RV_2,003.09c prajāṃ tvaṣṭā vi ṣyatu nābhim asme athā devānām apy etu pāthaḥ ||
RV_2,003.10a vanaspatir avasṛjann upa sthād agnir haviḥ sūdayāti pra dhībhiḥ |
RV_2,003.10c tridhā samaktaṃ nayatu prajānan devebhyo daivyaḥ śamitopa havyam ||
RV_2,003.11a ghṛtam mimikṣe ghṛtam asya yonir ghṛte śrito ghṛtam v asya dhāma |
RV_2,003.11c anuṣvadham ā vaha mādayasva svāhākṛtaṃ vṛṣabha vakṣi havyam ||

RV_2,004.01a huve vaḥ sudyotmānaṃ suvṛktiṃ viśām agnim atithiṃ suprayasam |
RV_2,004.01c mitra iva yo didhiṣāyyo bhūd deva ādeve jane jātavedāḥ ||
RV_2,004.02a imaṃ vidhanto apāṃ sadhasthe dvitādadhur bhṛgavo vikṣv āyoḥ |
RV_2,004.02c eṣa viśvāny abhy astu bhūmā devānām agnir aratir jīrāśvaḥ ||
RV_2,004.03a agniṃ devāso mānuṣīṣu vikṣu priyaṃ dhuḥ kṣeṣyanto na mitram |
RV_2,004.03c sa dīdayad uśatīr ūrmyā ā dakṣāyyo yo dāsvate dama ā ||
RV_2,004.04a asya raṇvā svasyeva puṣṭiḥ saṃdṛṣṭir asya hiyānasya dakṣoḥ |
RV_2,004.04c vi yo bharibhrad oṣadhīṣu jihvām atyo na rathyo dodhavīti vārān ||
RV_2,004.05a ā yan me abhvaṃ vanadaḥ panantośigbhyo nāmimīta varṇam |
RV_2,004.05c sa citreṇa cikite raṃsu bhāsā jujurvāṃ yo muhur ā yuvā bhūt ||
RV_2,004.06a ā yo vanā tātṛṣāṇo na bhāti vār ṇa pathā rathyeva svānīt |
RV_2,004.06c kṛṣṇādhvā tapū raṇvaś ciketa dyaur iva smayamāno nabhobhiḥ ||
RV_2,004.07a sa yo vy asthād abhi dakṣad urvīm paśur naiti svayur agopāḥ |
RV_2,004.07c agniḥ śociṣmāṃ atasāny uṣṇan kṛṣṇavyathir asvadayan na bhūma ||
RV_2,004.08a nū te pūrvasyāvaso adhītau tṛtīye vidathe manma śaṃsi |
RV_2,004.08c asme agne saṃyadvīram bṛhantaṃ kṣumantaṃ vājaṃ svapatyaṃ rayiṃ dāḥ ||
RV_2,004.09a tvayā yathā gṛtsamadāso agne guhā vanvanta uparāṃ abhi ṣyuḥ |
RV_2,004.09c suvīrāso abhimātiṣāhaḥ smat sūribhyo gṛṇate tad vayo dhāḥ ||

RV_2,005.01a hotājaniṣṭa cetanaḥ pitā pitṛbhya ūtaye |
RV_2,005.01c prayakṣañ jenyaṃ vasu śakema vājino yamam ||
RV_2,005.02a ā yasmin sapta raśmayas tatā yajñasya netari |
RV_2,005.02c manuṣvad daivyam aṣṭamam potā viśvaṃ tad invati ||
RV_2,005.03a dadhanve vā yad īm anu vocad brahmāṇi ver u tat |
RV_2,005.03c pari viśvāni kāvyā nemiś cakram ivābhavat ||
RV_2,005.04a sākaṃ hi śucinā śuciḥ praśāstā kratunājani |
RV_2,005.04c vidvāṃ asya vratā dhruvā vayā ivānu rohate ||
RV_2,005.05a tā asya varṇam āyuvo neṣṭuḥ sacanta dhenavaḥ |
RV_2,005.05c kuvit tisṛbhya ā varaṃ svasāro yā idaṃ yayuḥ ||
RV_2,005.06a yadī mātur upa svasā ghṛtam bharanty asthita |
RV_2,005.06c tāsām adhvaryur āgatau yavo vṛṣṭīva modate ||
RV_2,005.07a svaḥ svāya dhāyase kṛṇutām ṛtvig ṛtvijam |
RV_2,005.07c stomaṃ yajñaṃ cād araṃ vanemā rarimā vayam ||
RV_2,005.08a yathā vidvāṃ araṃ karad viśvebhyo yajatebhyaḥ |
RV_2,005.08c ayam agne tve api yaṃ yajñaṃ cakṛmā vayam ||

RV_2,006.01a imām me agne samidham imām upasadaṃ vaneḥ |
RV_2,006.01c imā u ṣu śrudhī giraḥ ||
RV_2,006.02a ayā te agne vidhemorjo napād aśvamiṣṭe |
RV_2,006.02c enā sūktena sujāta ||
RV_2,006.03a taṃ tvā gīrbhir girvaṇasaṃ draviṇasyuṃ draviṇodaḥ |
RV_2,006.03c saparyema saparyavaḥ ||
RV_2,006.04a sa bodhi sūrir maghavā vasupate vasudāvan |
RV_2,006.04c yuyodhy asmad dveṣāṃsi ||
RV_2,006.05a sa no vṛṣṭiṃ divas pari sa no vājam anarvāṇam |
RV_2,006.05c sa naḥ sahasriṇīr iṣaḥ ||
RV_2,006.06a īḷānāyāvasyave yaviṣṭha dūta no girā |
RV_2,006.06c yajiṣṭha hotar ā gahi ||
RV_2,006.07a antar hy agna īyase vidvāñ janmobhayā kave |
RV_2,006.07c dūto janyeva mitryaḥ ||
RV_2,006.08a sa vidvāṃ ā ca piprayo yakṣi cikitva ānuṣak |
RV_2,006.08c ā cāsmin satsi barhiṣi ||

RV_2,007.01a śreṣṭhaṃ yaviṣṭha bhāratāgne dyumantam ā bhara |
RV_2,007.01c vaso puruspṛhaṃ rayim ||
RV_2,007.02a mā no arātir īśata devasya martyasya ca |
RV_2,007.02c parṣi tasyā uta dviṣaḥ ||
RV_2,007.03a viśvā uta tvayā vayaṃ dhārā udanyā iva |
RV_2,007.03c ati gāhemahi dviṣaḥ ||
RV_2,007.04a śuciḥ pāvaka vandyo 'gne bṛhad vi rocase |
RV_2,007.04c tvaṃ ghṛtebhir āhutaḥ ||
RV_2,007.05a tvaṃ no asi bhāratāgne vaśābhir ukṣabhiḥ |
RV_2,007.05c aṣṭāpadībhir āhutaḥ ||
RV_2,007.06a drvannaḥ sarpirāsutiḥ pratno hotā vareṇyaḥ |
RV_2,007.06c sahasas putro adbhutaḥ ||

RV_2,008.01a vājayann iva nū rathān yogāṃ agner upa stuhi |
RV_2,008.01c yaśastamasya mīḷhuṣaḥ ||
RV_2,008.02a yaḥ sunītho dadāśuṣe 'juryo jarayann arim |
RV_2,008.02c cārupratīka āhutaḥ ||
RV_2,008.03a ya u śriyā dameṣv ā doṣoṣasi praśasyate |
RV_2,008.03c yasya vrataṃ na mīyate ||
RV_2,008.04a ā yaḥ svar ṇa bhānunā citro vibhāty arciṣā |
RV_2,008.04c añjāno ajarair abhi ||
RV_2,008.05a atrim anu svarājyam agnim ukthāni vāvṛdhuḥ |
RV_2,008.05c viśvā adhi śriyo dadhe ||
RV_2,008.06a agner indrasya somasya devānām ūtibhir vayam |
RV_2,008.06c ariṣyantaḥ sacemahy abhi ṣyāma pṛtanyataḥ ||

RV_2,009.01a ni hotā hotṛṣadane vidānas tveṣo dīdivāṃ asadat sudakṣaḥ |
RV_2,009.01c adabdhavratapramatir vasiṣṭhaḥ sahasrambharaḥ śucijihvo agniḥ ||
RV_2,009.02a tvaṃ dūtas tvam u naḥ paraspās tvaṃ vasya ā vṛṣabha praṇetā |
RV_2,009.02c agne tokasya nas tane tanūnām aprayucchan dīdyad bodhi gopāḥ ||
RV_2,009.03a vidhema te parame janmann agne vidhema stomair avare sadhasthe |
RV_2,009.03c yasmād yoner udārithā yaje tam pra tve havīṃṣi juhure samiddhe ||
RV_2,009.04a agne yajasva haviṣā yajīyāñ chruṣṭī deṣṇam abhi gṛṇīhi rādhaḥ |
RV_2,009.04c tvaṃ hy asi rayipatī rayīṇāṃ tvaṃ śukrasya vacaso manotā ||
RV_2,009.05a ubhayaṃ te na kṣīyate vasavyaṃ dive-dive jāyamānasya dasma |
RV_2,009.05c kṛdhi kṣumantaṃ jaritāram agne kṛdhi patiṃ svapatyasya rāyaḥ ||
RV_2,009.06a sainānīkena suvidatro asme yaṣṭā devāṃ āyajiṣṭhaḥ svasti |
RV_2,009.06c adabdho gopā uta naḥ paraspā agne dyumad uta revad didīhi ||

RV_2,010.01a johūtro agniḥ prathamaḥ piteveḷas pade manuṣā yat samiddhaḥ |
RV_2,010.01c śriyaṃ vasāno amṛto vicetā marmṛjenyaḥ śravasyaḥ sa vājī ||
RV_2,010.02a śrūyā agniś citrabhānur havam me viśvābhir gīrbhir amṛto vicetāḥ |
RV_2,010.02c śyāvā rathaṃ vahato rohitā votāruṣāha cakre vibhṛtraḥ ||
RV_2,010.03a uttānāyām ajanayan suṣūtam bhuvad agniḥ purupeśāsu garbhaḥ |
RV_2,010.03c śiriṇāyāṃ cid aktunā mahobhir aparīvṛto vasati pracetāḥ ||
RV_2,010.04a jigharmy agniṃ haviṣā ghṛtena pratikṣiyantam bhuvanāni viśvā |
RV_2,010.04c pṛthuṃ tiraścā vayasā bṛhantaṃ vyaciṣṭham annai rabhasaṃ dṛśānam ||
RV_2,010.05a ā viśvataḥ pratyañcaṃ jigharmy arakṣasā manasā taj juṣeta |
RV_2,010.05c maryaśrī spṛhayadvarṇo agnir nābhimṛśe tanvā jarbhurāṇaḥ ||
RV_2,010.06a jñeyā bhāgaṃ sahasāno vareṇa tvādūtāso manuvad vadema |
RV_2,010.06c anūnam agniṃ juhvā vacasyā madhupṛcaṃ dhanasā johavīmi ||

RV_2,011.01a śrudhī havam indra mā riṣaṇyaḥ syāma te dāvane vasūnām |
RV_2,011.01c imā hi tvām ūrjo vardhayanti vasūyavaḥ sindhavo na kṣarantaḥ ||
RV_2,011.02a sṛjo mahīr indra yā apinvaḥ pariṣṭhitā ahinā śūra pūrvīḥ |
RV_2,011.02c amartyaṃ cid dāsam manyamānam avābhinad ukthair vāvṛdhānaḥ ||
RV_2,011.03a uktheṣv in nu śūra yeṣu cākan stomeṣv indra rudriyeṣu ca |
RV_2,011.03c tubhyed etā yāsu mandasānaḥ pra vāyave sisrate na śubhrāḥ ||
RV_2,011.04a śubhraṃ nu te śuṣmaṃ vardhayantaḥ śubhraṃ vajram bāhvor dadhānāḥ |
RV_2,011.04c śubhras tvam indra vāvṛdhāno asme dāsīr viśaḥ sūryeṇa sahyāḥ ||
RV_2,011.05a guhā hitaṃ guhyaṃ gūḷham apsv apīvṛtam māyinaṃ kṣiyantam |
RV_2,011.05c uto apo dyāṃ tastabhvāṃsam ahann ahiṃ śūra vīryeṇa ||
RV_2,011.06a stavā nu ta indra pūrvyā mahāny uta stavāma nūtanā kṛtāni |
RV_2,011.06c stavā vajram bāhvor uśantaṃ stavā harī sūryasya ketū ||
RV_2,011.07a harī nu ta indra vājayantā ghṛtaścutaṃ svāram asvārṣṭām |
RV_2,011.07c vi samanā bhūmir aprathiṣṭāraṃsta parvataś cit sariṣyan ||
RV_2,011.08a ni parvataḥ sādy aprayucchan sam mātṛbhir vāvaśāno akrān |
RV_2,011.08c dūre pāre vāṇīṃ vardhayanta indreṣitāṃ dhamanim paprathan ni ||
RV_2,011.09a indro mahāṃ sindhum āśayānam māyāvinaṃ vṛtram asphuran niḥ |
RV_2,011.09c arejetāṃ rodasī bhiyāne kanikradato vṛṣṇo asya vajrāt ||
RV_2,011.10a aroravīd vṛṣṇo asya vajro 'mānuṣaṃ yan mānuṣo nijūrvāt |
RV_2,011.10c ni māyino dānavasya māyā apādayat papivān sutasya ||
RV_2,011.11a pibā-pibed indra śūra somam mandantu tvā mandinaḥ sutāsaḥ |
RV_2,011.11c pṛṇantas te kukṣī vardhayantv itthā sutaḥ paura indram āva ||
RV_2,011.12a tve indrāpy abhūma viprā dhiyaṃ vanema ṛtayā sapantaḥ |
RV_2,011.12c avasyavo dhīmahi praśastiṃ sadyas te rāyo dāvane syāma ||
RV_2,011.13a syāma te ta indra ye ta ūtī avasyava ūrjaṃ vardhayantaḥ |
RV_2,011.13c śuṣmintamaṃ yaṃ cākanāma devāsme rayiṃ rāsi vīravantam ||
RV_2,011.14a rāsi kṣayaṃ rāsi mitram asme rāsi śardha indra mārutaṃ naḥ |
RV_2,011.14c sajoṣaso ye ca mandasānāḥ pra vāyavaḥ pānty agraṇītim ||
RV_2,011.15a vyantv in nu yeṣu mandasānas tṛpat somam pāhi drahyad indra |
RV_2,011.15c asmān su pṛtsv ā tarutrāvardhayo dyām bṛhadbhir arkaiḥ ||
RV_2,011.16a bṛhanta in nu ye te tarutrokthebhir vā sumnam āvivāsān |
RV_2,011.16c stṛṇānāso barhiḥ pastyāvat tvotā id indra vājam agman ||
RV_2,011.17a ugreṣv in nu śūra mandasānas trikadrukeṣu pāhi somam indra |
RV_2,011.17c pradodhuvac chmaśruṣu prīṇāno yāhi haribhyāṃ sutasya pītim ||
RV_2,011.18a dhiṣvā śavaḥ śūra yena vṛtram avābhinad dānum aurṇavābham |
RV_2,011.18c apāvṛṇor jyotir āryāya ni savyataḥ sādi dasyur indra ||
RV_2,011.19a sanema ye ta ūtibhis taranto viśvā spṛdha āryeṇa dasyūn |
RV_2,011.19c asmabhyaṃ tat tvāṣṭraṃ viśvarūpam arandhayaḥ sākhyasya tritāya ||
RV_2,011.20a asya suvānasya mandinas tritasya ny arbudaṃ vāvṛdhāno astaḥ |
RV_2,011.20c avartayat sūryo na cakram bhinad valam indro aṅgirasvān ||
RV_2,011.21a nūnaṃ sā te prati varaṃ jaritre duhīyad indra dakṣiṇā maghonī |
RV_2,011.21c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,012.01a yo jāta eva prathamo manasvān devo devān kratunā paryabhūṣat |
RV_2,012.01c yasya śuṣmād rodasī abhyasetāṃ nṛmṇasya mahnā sa janāsa indraḥ ||
RV_2,012.02a yaḥ pṛthivīṃ vyathamānām adṛṃhad yaḥ parvatān prakupitāṃ aramṇāt |
RV_2,012.02c yo antarikṣaṃ vimame varīyo yo dyām astabhnāt sa janāsa indraḥ ||
RV_2,012.03a yo hatvāhim ariṇāt sapta sindhūn yo gā udājad apadhā valasya |
RV_2,012.03c yo aśmanor antar agniṃ jajāna saṃvṛk samatsu sa janāsa indraḥ ||
RV_2,012.04a yenemā viśvā cyavanā kṛtāni yo dāsaṃ varṇam adharaṃ guhākaḥ |
RV_2,012.04c śvaghnīva yo jigīvāṃl lakṣam ādad aryaḥ puṣṭāni sa janāsa indraḥ ||
RV_2,012.05a yaṃ smā pṛcchanti kuha seti ghoram utem āhur naiṣo astīty enam |
RV_2,012.05c so aryaḥ puṣṭīr vija ivā mināti śrad asmai dhatta sa janāsa indraḥ ||
RV_2,012.06a yo radhrasya coditā yaḥ kṛśasya yo brahmaṇo nādhamānasya kīreḥ |
RV_2,012.06c yuktagrāvṇo yo 'vitā suśipraḥ sutasomasya sa janāsa indraḥ ||
RV_2,012.07a yasyāśvāsaḥ pradiśi yasya gāvo yasya grāmā yasya viśve rathāsaḥ |
RV_2,012.07c yaḥ sūryaṃ ya uṣasaṃ jajāna yo apāṃ netā sa janāsa indraḥ ||
RV_2,012.08a yaṃ krandasī saṃyatī vihvayete pare 'vara ubhayā amitrāḥ |
RV_2,012.08c samānaṃ cid ratham ātasthivāṃsā nānā havete sa janāsa indraḥ ||
RV_2,012.09a yasmān na ṛte vijayante janāso yaṃ yudhyamānā avase havante |
RV_2,012.09c yo viśvasya pratimānam babhūva yo acyutacyut sa janāsa indraḥ ||
RV_2,012.10a yaḥ śaśvato mahy eno dadhānān amanyamānāñ charvā jaghāna |
RV_2,012.10c yaḥ śardhate nānudadāti śṛdhyāṃ yo dasyor hantā sa janāsa indraḥ ||
RV_2,012.11a yaḥ śambaram parvateṣu kṣiyantaṃ catvāriṃśyāṃ śarady anvavindat |
RV_2,012.11c ojāyamānaṃ yo ahiṃ jaghāna dānuṃ śayānaṃ sa janāsa indraḥ ||
RV_2,012.12a yaḥ saptaraśmir vṛṣabhas tuviṣmān avāsṛjat sartave sapta sindhūn |
RV_2,012.12c yo rauhiṇam asphurad vajrabāhur dyām ārohantaṃ sa janāsa indraḥ ||
RV_2,012.13a dyāvā cid asmai pṛthivī namete śuṣmāc cid asya parvatā bhayante |
RV_2,012.13c yaḥ somapā nicito vajrabāhur yo vajrahastaḥ sa janāsa indraḥ ||
RV_2,012.14a yaḥ sunvantam avati yaḥ pacantaṃ yaḥ śaṃsantaṃ yaḥ śaśamānam ūtī |
RV_2,012.14c yasya brahma vardhanaṃ yasya somo yasyedaṃ rādhaḥ sa janāsa indraḥ ||
RV_2,012.15a yaḥ sunvate pacate dudhra ā cid vājaṃ dardarṣi sa kilāsi satyaḥ |
RV_2,012.15c vayaṃ ta indra viśvaha priyāsaḥ suvīrāso vidatham ā vadema ||

RV_2,013.01a ṛtur janitrī tasyā apas pari makṣū jāta āviśad yāsu vardhate |
RV_2,013.01c tad āhanā abhavat pipyuṣī payo 'ṃśoḥ pīyūṣam prathamaṃ tad ukthyam ||
RV_2,013.02a sadhrīm ā yanti pari bibhratīḥ payo viśvapsnyāya pra bharanta bhojanam |
RV_2,013.02c samāno adhvā pravatām anuṣyade yas tākṛṇoḥ prathamaṃ sāsy ukthyaḥ ||
RV_2,013.03a anv eko vadati yad dadāti tad rūpā minan tadapā eka īyate |
RV_2,013.03c viśvā ekasya vinudas titikṣate yas tākṛṇoḥ prathamaṃ sāsy ukthyaḥ ||
RV_2,013.04a prajābhyaḥ puṣṭiṃ vibhajanta āsate rayim iva pṛṣṭham prabhavantam āyate |
RV_2,013.04c asinvan daṃṣṭraiḥ pitur atti bhojanaṃ yas tākṛṇoḥ prathamaṃ sāsy ukthyaḥ ||
RV_2,013.05a adhākṛṇoḥ pṛthivīṃ saṃdṛśe dive yo dhautīnām ahihann āriṇak pathaḥ |
RV_2,013.05c taṃ tvā stomebhir udabhir na vājinaṃ devaṃ devā ajanan sāsy ukthyaḥ ||
RV_2,013.06a yo bhojanaṃ ca dayase ca vardhanam ārdrād ā śuṣkam madhumad dudohitha |
RV_2,013.06c sa śevadhiṃ ni dadhiṣe vivasvati viśvasyaika īśiṣe sāsy ukthyaḥ ||
RV_2,013.07a yaḥ puṣpiṇīś ca prasvaś ca dharmaṇādhi dāne vy avanīr adhārayaḥ |
RV_2,013.07c yaś cāsamā ajano didyuto diva urur ūrvāṃ abhitaḥ sāsy ukthyaḥ ||
RV_2,013.08a yo nārmaraṃ sahavasuṃ nihantave pṛkṣāya ca dāsaveśāya cāvahaḥ |
RV_2,013.08c ūrjayantyā apariviṣṭam āsyam utaivādya purukṛt sāsy ukthyaḥ ||
RV_2,013.09a śataṃ vā yasya daśa sākam ādya ekasya śruṣṭau yad dha codam āvitha |
RV_2,013.09c arajjau dasyūn sam unab dabhītaye suprāvyo abhavaḥ sāsy ukthyaḥ ||
RV_2,013.10a viśved anu rodhanā asya pauṃsyaṃ dadur asmai dadhire kṛtnave dhanam |
RV_2,013.10c ṣaḷ astabhnā viṣṭiraḥ pañca saṃdṛśaḥ pari paro abhavaḥ sāsy ukthyaḥ ||
RV_2,013.11a supravācanaṃ tava vīra vīryaṃ yad ekena kratunā vindase vasu |
RV_2,013.11c jātūṣṭhirasya pra vayaḥ sahasvato yā cakartha sendra viśvāsy ukthyaḥ ||
RV_2,013.12a aramayaḥ sarapasas tarāya kaṃ turvītaye ca vayyāya ca srutim |
RV_2,013.12c nīcā santam ud anayaḥ parāvṛjam prāndhaṃ śroṇaṃ śravayan sāsy ukthyaḥ ||
RV_2,013.13a asmabhyaṃ tad vaso dānāya rādhaḥ sam arthayasva bahu te vasavyam |
RV_2,013.13c indra yac citraṃ śravasyā anu dyūn bṛhad vadema vidathe suvīrāḥ ||

RV_2,014.01a adhvaryavo bharatendrāya somam āmatrebhiḥ siñcatā madyam andhaḥ |
RV_2,014.01c kāmī hi vīraḥ sadam asya pītiṃ juhota vṛṣṇe tad id eṣa vaṣṭi ||
RV_2,014.02a adhvaryavo yo apo vavrivāṃsaṃ vṛtraṃ jaghānāśanyeva vṛkṣam |
RV_2,014.02c tasmā etam bharata tadvaśāyaṃ eṣa indro arhati pītim asya ||
RV_2,014.03a adhvaryavo yo dṛbhīkaṃ jaghāna yo gā udājad apa hi valaṃ vaḥ |
RV_2,014.03c tasmā etam antarikṣe na vātam indraṃ somair orṇuta jūr na vastraiḥ ||
RV_2,014.04a adhvaryavo ya uraṇaṃ jaghāna nava cakhvāṃsaṃ navatiṃ ca bāhūn |
RV_2,014.04c yo arbudam ava nīcā babādhe tam indraṃ somasya bhṛthe hinota ||
RV_2,014.05a adhvaryavo yaḥ sv aśnaṃ jaghāna yaḥ śuṣṇam aśuṣaṃ yo vyaṃsam |
RV_2,014.05c yaḥ pipruṃ namuciṃ yo rudhikrāṃ tasmā indrāyāndhaso juhota ||
RV_2,014.06a adhvaryavo yaḥ śataṃ śambarasya puro bibhedāśmaneva pūrvīḥ |
RV_2,014.06c yo varcinaḥ śatam indraḥ sahasram apāvapad bharatā somam asmai ||
RV_2,014.07a adhvaryavo yaḥ śatam ā sahasram bhūmyā upasthe 'vapaj jaghanvān |
RV_2,014.07c kutsasyāyor atithigvasya vīrān ny āvṛṇag bharatā somam asmai ||
RV_2,014.08a adhvaryavo yan naraḥ kāmayādhve śruṣṭī vahanto naśathā tad indre |
RV_2,014.08c gabhastipūtam bharata śrutāyendrāya somaṃ yajyavo juhota ||
RV_2,014.09a adhvaryavaḥ kartanā śruṣṭim asmai vane nipūtaṃ vana un nayadhvam |
RV_2,014.09c juṣāṇo hastyam abhi vāvaśe va indrāya somam madiraṃ juhota ||
RV_2,014.10a adhvaryavaḥ payasodhar yathā goḥ somebhir īm pṛṇatā bhojam indram |
RV_2,014.10c vedāham asya nibhṛtam ma etad ditsantam bhūyo yajataś ciketa ||
RV_2,014.11a adhvaryavo yo divyasya vasvo yaḥ pārthivasya kṣamyasya rājā |
RV_2,014.11c tam ūrdaraṃ na pṛṇatā yavenendraṃ somebhis tad apo vo astu ||
RV_2,014.12a asmabhyaṃ tad vaso dānāya rādhaḥ sam arthayasva bahu te vasavyam |
RV_2,014.12c indra yac citraṃ śravasyā anu dyūn bṛhad vadema vidathe suvīrāḥ ||

RV_2,015.01a pra ghā nv asya mahato mahāni satyā satyasya karaṇāni vocam |
RV_2,015.01c trikadrukeṣv apibat sutasyāsya made ahim indro jaghāna ||
RV_2,015.02a avaṃśe dyām astabhāyad bṛhantam ā rodasī apṛṇad antarikṣam |
RV_2,015.02c sa dhārayat pṛthivīm paprathac ca somasya tā mada indraś cakāra ||
RV_2,015.03a sadmeva prāco vi mimāya mānair vajreṇa khāny atṛṇan nadīnām |
RV_2,015.03c vṛthāsṛjat pathibhir dīrghayāthaiḥ somasya tā mada indraś cakāra ||
RV_2,015.04a sa pravoḷhṝn parigatyā dabhīter viśvam adhāg āyudham iddhe agnau |
RV_2,015.04c saṃ gobhir aśvair asṛjad rathebhiḥ somasya tā mada indraś cakāra ||
RV_2,015.05a sa īm mahīṃ dhunim etor aramṇāt so asnātṝn apārayat svasti |
RV_2,015.05c ta utsnāya rayim abhi pra tasthuḥ somasya tā mada indraś cakāra ||
RV_2,015.06a sodañcaṃ sindhum ariṇān mahitvā vajreṇāna uṣasaḥ sam pipeṣa |
RV_2,015.06c ajavaso javinībhir vivṛścan somasya tā mada indraś cakāra ||
RV_2,015.07a sa vidvāṃ apagohaṃ kanīnām āvir bhavann ud atiṣṭhat parāvṛk |
RV_2,015.07c prati śroṇa sthād vy anag acaṣṭa somasya tā mada indraś cakāra ||
RV_2,015.08a bhinad valam aṅgirobhir gṛṇāno vi parvatasya dṛṃhitāny airat |
RV_2,015.08c riṇag rodhāṃsi kṛtrimāṇy eṣāṃ somasya tā mada indraś cakāra ||
RV_2,015.09a svapnenābhyupyā cumuriṃ dhuniṃ ca jaghantha dasyum pra dabhītim āvaḥ |
RV_2,015.09c rambhī cid atra vivide hiraṇyaṃ somasya tā mada indraś cakāra ||
RV_2,015.10a nūnaṃ sā te prati varaṃ jaritre duhīyad indra dakṣiṇā maghonī |
RV_2,015.10c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,016.01a pra vaḥ satāṃ jyeṣṭhatamāya suṣṭutim agnāv iva samidhāne havir bhare |
RV_2,016.01c indram ajuryaṃ jarayantam ukṣitaṃ sanād yuvānam avase havāmahe ||
RV_2,016.02a yasmād indrād bṛhataḥ kiṃ canem ṛte viśvāny asmin sambhṛtādhi vīryā |
RV_2,016.02c jaṭhare somaṃ tanvī saho maho haste vajram bharati śīrṣaṇi kratum ||
RV_2,016.03a na kṣoṇībhyām paribhve ta indriyaṃ na samudraiḥ parvatair indra te rathaḥ |
RV_2,016.03c na te vajram anv aśnoti kaś cana yad āśubhiḥ patasi yojanā puru ||
RV_2,016.04a viśve hy asmai yajatāya dhṛṣṇave kratum bharanti vṛṣabhāya saścate |
RV_2,016.04c vṛṣā yajasva haviṣā viduṣṭaraḥ pibendra somaṃ vṛṣabheṇa bhānunā ||
RV_2,016.05a vṛṣṇaḥ kośaḥ pavate madhva ūrmir vṛṣabhānnāya vṛṣabhāya pātave |
RV_2,016.05c vṛṣaṇādhvaryū vṛṣabhāso adrayo vṛṣaṇaṃ somaṃ vṛṣabhāya suṣvati ||
RV_2,016.06a vṛṣā te vajra uta te vṛṣā ratho vṛṣaṇā harī vṛṣabhāṇy āyudhā |
RV_2,016.06c vṛṣṇo madasya vṛṣabha tvam īśiṣa indra somasya vṛṣabhasya tṛpṇuhi ||
RV_2,016.07a pra te nāvaṃ na samane vacasyuvam brahmaṇā yāmi savaneṣu dādhṛṣiḥ |
RV_2,016.07c kuvin no asya vacaso nibodhiṣad indram utsaṃ na vasunaḥ sicāmahe ||
RV_2,016.08a purā sambādhād abhy ā vavṛtsva no dhenur na vatsaṃ yavasasya pipyuṣī |
RV_2,016.08c sakṛt su te sumatibhiḥ śatakrato sam patnībhir na vṛṣaṇo nasīmahi ||
RV_2,016.09a nūnaṃ sā te prati varaṃ jaritre duhīyad indra dakṣiṇā maghonī |
RV_2,016.09c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,017.01a tad asmai navyam aṅgirasvad arcata śuṣmā yad asya pratnathodīrate |
RV_2,017.01c viśvā yad gotrā sahasā parīvṛtā made somasya dṛṃhitāny airayat ||
RV_2,017.02a sa bhūtu yo ha prathamāya dhāyasa ojo mimāno mahimānam ātirat |
RV_2,017.02c śūro yo yutsu tanvam parivyata śīrṣaṇi dyām mahinā praty amuñcata ||
RV_2,017.03a adhākṛṇoḥ prathamaṃ vīryam mahad yad asyāgre brahmaṇā śuṣmam airayaḥ |
RV_2,017.03c ratheṣṭhena haryaśvena vicyutāḥ pra jīrayaḥ sisrate sadhryak pṛthak ||
RV_2,017.04a adhā yo viśvā bhuvanābhi majmaneśānakṛt pravayā abhy avardhata |
RV_2,017.04c ād rodasī jyotiṣā vahnir ātanot sīvyan tamāṃsi dudhitā sam avyayat ||
RV_2,017.05a sa prācīnān parvatān dṛṃhad ojasādharācīnam akṛṇod apām apaḥ |
RV_2,017.05c adhārayat pṛthivīṃ viśvadhāyasam astabhnān māyayā dyām avasrasaḥ ||
RV_2,017.06a sāsmā aram bāhubhyāṃ yam pitākṛṇod viśvasmād ā januṣo vedasas pari |
RV_2,017.06c yenā pṛthivyāṃ ni kriviṃ śayadhyai vajreṇa hatvy avṛṇak tuviṣvaṇiḥ ||
RV_2,017.07a amājūr iva pitroḥ sacā satī samānād ā sadasas tvām iye bhagam |
RV_2,017.07c kṛdhi praketam upa māsy ā bhara daddhi bhāgaṃ tanvo yena māmahaḥ ||
RV_2,017.08a bhojaṃ tvām indra vayaṃ huvema dadiṣ ṭvam indrāpāṃsi vājān |
RV_2,017.08c aviḍḍhīndra citrayā na ūtī kṛdhi vṛṣann indra vasyaso naḥ ||
RV_2,017.09a nūnaṃ sā te prati varaṃ jaritre duhīyad indra dakṣiṇā maghonī |
RV_2,017.09c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,018.01a prātā ratho navo yoji sasniś caturyugas trikaśaḥ saptaraśmiḥ |
RV_2,018.01c daśāritro manuṣyaḥ svarṣāḥ sa iṣṭibhir matibhī raṃhyo bhūt ||
RV_2,018.02a sāsmā aram prathamaṃ sa dvitīyam uto tṛtīyam manuṣaḥ sa hotā |
RV_2,018.02c anyasyā garbham anya ū jananta so anyebhiḥ sacate jenyo vṛṣā ||
RV_2,018.03a harī nu kaṃ ratha indrasya yojam āyai sūktena vacasā navena |
RV_2,018.03c mo ṣu tvām atra bahavo hi viprā ni rīraman yajamānāso anye ||
RV_2,018.04a ā dvābhyāṃ haribhyām indra yāhy ā caturbhir ā ṣaḍbhir hūyamānaḥ |
RV_2,018.04c āṣṭābhir daśabhiḥ somapeyam ayaṃ sutaḥ sumakha mā mṛdhas kaḥ ||
RV_2,018.05a ā viṃśatyā triṃśatā yāhy arvāṅ ā catvāriṃśatā haribhir yujānaḥ |
RV_2,018.05c ā pañcāśatā surathebhir indrā ṣaṣṭyā saptatyā somapeyam ||
RV_2,018.06a āśītyā navatyā yāhy arvāṅ ā śatena haribhir uhyamānaḥ |
RV_2,018.06c ayaṃ hi te śunahotreṣu soma indra tvāyā pariṣikto madāya ||
RV_2,018.07a mama brahmendra yāhy acchā viśvā harī dhuri dhiṣvā rathasya |
RV_2,018.07c purutrā hi vihavyo babhūthāsmiñ chūra savane mādayasva ||
RV_2,018.08a na ma indreṇa sakhyaṃ vi yoṣad asmabhyam asya dakṣiṇā duhīta |
RV_2,018.08c upa jyeṣṭhe varūthe gabhastau prāye-prāye jigīvāṃsaḥ syāma ||
RV_2,018.09a nūnaṃ sā te prati varaṃ jaritre duhīyad indra dakṣiṇā maghonī |
RV_2,018.09c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,019.01a apāyy asyāndhaso madāya manīṣiṇaḥ suvānasya prayasaḥ |
RV_2,019.01c yasminn indraḥ pradivi vāvṛdhāna oko dadhe brahmaṇyantaś ca naraḥ ||
RV_2,019.02a asya mandāno madhvo vajrahasto 'him indro arṇovṛtaṃ vi vṛścat |
RV_2,019.02c pra yad vayo na svasarāṇy acchā prayāṃsi ca nadīnāṃ cakramanta ||
RV_2,019.03a sa māhina indro arṇo apām prairayad ahihācchā samudram |
RV_2,019.03c ajanayat sūryaṃ vidad gā aktunāhnāṃ vayunāni sādhat ||
RV_2,019.04a so apratīni manave purūṇīndro dāśad dāśuṣe hanti vṛtram |
RV_2,019.04c sadyo yo nṛbhyo atasāyyo bhūt paspṛdhānebhyaḥ sūryasya sātau ||
RV_2,019.05a sa sunvata indraḥ sūryam ā devo riṇaṅ martyāya stavān |
RV_2,019.05c ā yad rayiṃ guhadavadyam asmai bharad aṃśaṃ naitaśo daśasyan ||
RV_2,019.06a sa randhayat sadivaḥ sārathaye śuṣṇam aśuṣaṃ kuyavaṃ kutsāya |
RV_2,019.06c divodāsāya navatiṃ ca navendraḥ puro vy airac chambarasya ||
RV_2,019.07a evā ta indrocatham ahema śravasyā na tmanā vājayantaḥ |
RV_2,019.07c aśyāma tat sāptam āśuṣāṇā nanamo vadhar adevasya pīyoḥ ||
RV_2,019.08a evā te gṛtsamadāḥ śūra manmāvasyavo na vayunāni takṣuḥ |
RV_2,019.08c brahmaṇyanta indra te navīya iṣam ūrjaṃ sukṣitiṃ sumnam aśyuḥ ||
RV_2,019.09a nūnaṃ sā te prati varaṃ jaritre duhīyad indra dakṣiṇā maghonī |
RV_2,019.09c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,020.01a vayaṃ te vaya indra viddhi ṣu ṇaḥ pra bharāmahe vājayur na ratham |
RV_2,020.01c vipanyavo dīdhyato manīṣā sumnam iyakṣantas tvāvato nṝn ||
RV_2,020.02a tvaṃ na indra tvābhir ūtī tvāyato abhiṣṭipāsi janān |
RV_2,020.02c tvam ino dāśuṣo varūtetthādhīr abhi yo nakṣati tvā ||
RV_2,020.03a sa no yuvendro johūtraḥ sakhā śivo narām astu pātā |
RV_2,020.03c yaḥ śaṃsantaṃ yaḥ śaśamānam ūtī pacantaṃ ca stuvantaṃ ca praṇeṣat ||
RV_2,020.04a tam u stuṣa indraṃ taṃ gṛṇīṣe yasmin purā vāvṛdhuḥ śāśaduś ca |
RV_2,020.04c sa vasvaḥ kāmam pīparad iyāno brahmaṇyato nūtanasyāyoḥ ||
RV_2,020.05a so aṅgirasām ucathā jujuṣvān brahmā tūtod indro gātum iṣṇan |
RV_2,020.05c muṣṇann uṣasaḥ sūryeṇa stavān aśnasya cic chiśnathat pūrvyāṇi ||
RV_2,020.06a sa ha śruta indro nāma deva ūrdhvo bhuvan manuṣe dasmatamaḥ |
RV_2,020.06c ava priyam arśasānasya sāhvāñ chiro bharad dāsasya svadhāvān ||
RV_2,020.07a sa vṛtrahendraḥ kṛṣṇayonīḥ purandaro dāsīr airayad vi |
RV_2,020.07c ajanayan manave kṣām apaś ca satrā śaṃsaṃ yajamānasya tūtot ||
RV_2,020.08a tasmai tavasyam anu dāyi satrendrāya devebhir arṇasātau |
RV_2,020.08c prati yad asya vajram bāhvor dhur hatvī dasyūn pura āyasīr ni tārīt ||
RV_2,020.09a nūnaṃ sā te prati varaṃ jaritre duhīyad indra dakṣiṇā maghonī |
RV_2,020.09c śikṣā stotṛbhyo māti dhag bhago no bṛhad vadema vidathe suvīrāḥ ||

RV_2,021.01a viśvajite dhanajite svarjite satrājite nṛjita urvarājite |
RV_2,021.01c aśvajite gojite abjite bharendrāya somaṃ yajatāya haryatam ||
RV_2,021.02a abhibhuve 'bhibhaṅgāya vanvate 'ṣāḷhāya sahamānāya vedhase |
RV_2,021.02c tuvigraye vahnaye duṣṭarītave satrāsāhe nama indrāya vocata ||
RV_2,021.03a satrāsāho janabhakṣo janaṃsahaś cyavano yudhmo anu joṣam ukṣitaḥ |
RV_2,021.03c vṛtañcayaḥ sahurir vikṣv ārita indrasya vocam pra kṛtāni vīryā ||
RV_2,021.04a anānudo vṛṣabho dodhato vadho gambhīra ṛṣvo asamaṣṭakāvyaḥ |
RV_2,021.04c radhracodaḥ śnathano vīḷitas pṛthur indraḥ suyajña uṣasaḥ svar janat ||
RV_2,021.05a yajñena gātum apturo vividrire dhiyo hinvānā uśijo manīṣiṇaḥ |
RV_2,021.05c abhisvarā niṣadā gā avasyava indre hinvānā draviṇāny āśata ||
RV_2,021.06a indra śreṣṭhāni draviṇāni dhehi cittiṃ dakṣasya subhagatvam asme |
RV_2,021.06c poṣaṃ rayīṇām ariṣṭiṃ tanūnāṃ svādmānaṃ vācaḥ sudinatvam ahnām ||

RV_2,022.01a trikadrukeṣu mahiṣo yavāśiraṃ tuviśuṣmas tṛpat somam apibad viṣṇunā sutaṃ yathāvaśat |
RV_2,022.01e sa īm mamāda mahi karma kartave mahām uruṃ sainaṃ saścad devo devaṃ satyam indraṃ satya induḥ ||
RV_2,022.02a adha tviṣīmāṃ abhy ojasā kriviṃ yudhābhavad ā rodasī apṛṇad asya majmanā pra vāvṛdhe |
RV_2,022.02e adhattānyaṃ jaṭhare prem aricyata sainaṃ saścad devo devaṃ satyam indraṃ satya induḥ ||
RV_2,022.03a sākaṃ jātaḥ kratunā sākam ojasā vavakṣitha sākaṃ vṛddho vīryaiḥ sāsahir mṛdho vicarṣaṇiḥ |
RV_2,022.03e dātā rādha stuvate kāmyaṃ vasu sainaṃ saścad devo devaṃ satyam indraṃ satya induḥ ||
RV_2,022.04a tava tyan naryaṃ nṛto 'pa indra prathamam pūrvyaṃ divi pravācyaṃ kṛtam |
RV_2,022.04c yad devasya śavasā prāriṇā asuṃ riṇann apaḥ |
RV_2,022.04e bhuvad viśvam abhy ādevam ojasā vidād ūrjaṃ śatakratur vidād iṣam ||

RV_2,023.01a gaṇānāṃ tvā gaṇapatiṃ havāmahe kaviṃ kavīnām upamaśravastamam |
RV_2,023.01c jyeṣṭharājam brahmaṇām brahmaṇas pata ā naḥ śṛṇvann ūtibhiḥ sīda sādanam ||
RV_2,023.02a devāś cit te asurya pracetaso bṛhaspate yajñiyam bhāgam ānaśuḥ |
RV_2,023.02c usrā iva sūryo jyotiṣā maho viśveṣām ij janitā brahmaṇām asi ||
RV_2,023.03a ā vibādhyā parirāpas tamāṃsi ca jyotiṣmantaṃ ratham ṛtasya tiṣṭhasi |
RV_2,023.03c bṛhaspate bhīmam amitradambhanaṃ rakṣohaṇaṃ gotrabhidaṃ svarvidam ||
RV_2,023.04a sunītibhir nayasi trāyase janaṃ yas tubhyaṃ dāśān na tam aṃho aśnavat |
RV_2,023.04c brahmadviṣas tapano manyumīr asi bṛhaspate mahi tat te mahitvanam ||
RV_2,023.05a na tam aṃho na duritaṃ kutaś cana nārātayas titirur na dvayāvinaḥ |
RV_2,023.05c viśvā id asmād dhvaraso vi bādhase yaṃ sugopā rakṣasi brahmaṇas pate ||
RV_2,023.06a tvaṃ no gopāḥ pathikṛd vicakṣaṇas tava vratāya matibhir jarāmahe |
RV_2,023.06c bṛhaspate yo no abhi hvaro dadhe svā tam marmartu ducchunā harasvatī ||
RV_2,023.07a uta vā yo no marcayād anāgaso 'rātīvā martaḥ sānuko vṛkaḥ |
RV_2,023.07c bṛhaspate apa taṃ vartayā pathaḥ sugaṃ no asyai devavītaye kṛdhi ||
RV_2,023.08a trātāraṃ tvā tanūnāṃ havāmahe 'vaspartar adhivaktāram asmayum |
RV_2,023.08c bṛhaspate devanido ni barhaya mā durevā uttaraṃ sumnam un naśan ||
RV_2,023.09a tvayā vayaṃ suvṛdhā brahmaṇas pate spārhā vasu manuṣyā dadīmahi |
RV_2,023.09c yā no dūre taḷito yā arātayo 'bhi santi jambhayā tā anapnasaḥ ||
RV_2,023.10a tvayā vayam uttamaṃ dhīmahe vayo bṛhaspate papriṇā sasninā yujā |
RV_2,023.10c mā no duḥśaṃso abhidipsur īśata pra suśaṃsā matibhis tāriṣīmahi ||
RV_2,023.11a anānudo vṛṣabho jagmir āhavaṃ niṣṭaptā śatrum pṛtanāsu sāsahiḥ |
RV_2,023.11c asi satya ṛṇayā brahmaṇas pata ugrasya cid damitā vīḷuharṣiṇaḥ ||
RV_2,023.12a adevena manasā yo riṣaṇyati śāsām ugro manyamāno jighāṃsati |
RV_2,023.12c bṛhaspate mā praṇak tasya no vadho ni karma manyuṃ durevasya śardhataḥ ||
RV_2,023.13a bhareṣu havyo namasopasadyo gantā vājeṣu sanitā dhanaṃ-dhanam |
RV_2,023.13c viśvā id aryo abhidipsvo mṛdho bṛhaspatir vi vavarhā rathāṃ iva ||
RV_2,023.14a tejiṣṭhayā tapanī rakṣasas tapa ye tvā nide dadhire dṛṣṭavīryam |
RV_2,023.14c āvis tat kṛṣva yad asat ta ukthyam bṛhaspate vi parirāpo ardaya ||
RV_2,023.15a bṛhaspate ati yad aryo arhād dyumad vibhāti kratumaj janeṣu |
RV_2,023.15c yad dīdayac chavasa ṛtaprajāta tad asmāsu draviṇaṃ dhehi citram ||
RV_2,023.16a mā na stenebhyo ye abhi druhas pade nirāmiṇo ripavo 'nneṣu jāgṛdhuḥ |
RV_2,023.16c ā devānām ohate vi vrayo hṛdi bṛhaspate na paraḥ sāmno viduḥ ||
RV_2,023.17a viśvebhyo hi tvā bhuvanebhyas pari tvaṣṭājanat sāmnaḥ-sāmnaḥ kaviḥ |
RV_2,023.17c sa ṛṇacid ṛṇayā brahmaṇas patir druho hantā maha ṛtasya dhartari ||
RV_2,023.18a tava śriye vy ajihīta parvato gavāṃ gotram udasṛjo yad aṅgiraḥ |
RV_2,023.18c indreṇa yujā tamasā parīvṛtam bṛhaspate nir apām aubjo arṇavam ||
RV_2,023.19a brahmaṇas pate tvam asya yantā sūktasya bodhi tanayaṃ ca jinva |
RV_2,023.19c viśvaṃ tad bhadraṃ yad avanti devā bṛhad vadema vidathe suvīrāḥ ||

RV_2,024.01a semām aviḍḍhi prabhṛtiṃ ya īśiṣe 'yā vidhema navayā mahā girā |
RV_2,024.01c yathā no mīḍhvān stavate sakhā tava bṛhaspate sīṣadhaḥ sota no matim ||
RV_2,024.02a yo nantvāny anaman ny ojasotādardar manyunā śambarāṇi vi |
RV_2,024.02c prācyāvayad acyutā brahmaṇas patir ā cāviśad vasumantaṃ vi parvatam ||
RV_2,024.03a tad devānāṃ devatamāya kartvam aśrathnan dṛḷhāvradanta vīḷitā |
RV_2,024.03c ud gā ājad abhinad brahmaṇā valam agūhat tamo vy acakṣayat svaḥ ||
RV_2,024.04a aśmāsyam avatam brahmaṇas patir madhudhāram abhi yam ojasātṛṇat |
RV_2,024.04c tam eva viśve papire svardṛśo bahu sākaṃ sisicur utsam udriṇam ||
RV_2,024.05a sanā tā kā cid bhuvanā bhavītvā mādbhiḥ śaradbhir duro varanta vaḥ |
RV_2,024.05c ayatantā carato anyad-anyad id yā cakāra vayunā brahmaṇas patiḥ ||
RV_2,024.06a abhinakṣanto abhi ye tam ānaśur nidhim paṇīnām paramaṃ guhā hitam |
RV_2,024.06c te vidvāṃsaḥ praticakṣyānṛtā punar yata u āyan tad ud īyur āviśam ||
RV_2,024.07a ṛtāvānaḥ praticakṣyānṛtā punar āta ā tasthuḥ kavayo mahas pathaḥ |
RV_2,024.07c te bāhubhyāṃ dhamitam agnim aśmani nakiḥ ṣo asty araṇo jahur hi tam ||
RV_2,024.08a ṛtajyena kṣipreṇa brahmaṇas patir yatra vaṣṭi pra tad aśnoti dhanvanā |
RV_2,024.08c tasya sādhvīr iṣavo yābhir asyati nṛcakṣaso dṛśaye karṇayonayaḥ ||
RV_2,024.09a sa saṃnayaḥ sa vinayaḥ purohitaḥ sa suṣṭutaḥ sa yudhi brahmaṇas patiḥ |
RV_2,024.09c cākṣmo yad vājam bharate matī dhanād it sūryas tapati tapyatur vṛthā ||
RV_2,024.10a vibhu prabhu prathamam mehanāvato bṛhaspateḥ suvidatrāṇi rādhyā |
RV_2,024.10c imā sātāni venyasya vājino yena janā ubhaye bhuñjate viśaḥ ||
RV_2,024.11a yo 'vare vṛjane viśvathā vibhur mahām u raṇvaḥ śavasā vavakṣitha |
RV_2,024.11c sa devo devān prati paprathe pṛthu viśved u tā paribhūr brahmaṇas patiḥ ||
RV_2,024.12a viśvaṃ satyam maghavānā yuvor id āpaś cana pra minanti vrataṃ vām |
RV_2,024.12c acchendrābrahmaṇaspatī havir no 'nnaṃ yujeva vājinā jigātam ||
RV_2,024.13a utāśiṣṭhā anu śṛṇvanti vahnayaḥ sabheyo vipro bharate matī dhanā |
RV_2,024.13c vīḷudveṣā anu vaśa ṛṇam ādadiḥ sa ha vājī samithe brahmaṇas patiḥ ||
RV_2,024.14a brahmaṇas pater abhavad yathāvaśaṃ satyo manyur mahi karmā kariṣyataḥ |
RV_2,024.14c yo gā udājat sa dive vi cābhajan mahīva rītiḥ śavasāsarat pṛthak ||
RV_2,024.15a brahmaṇas pate suyamasya viśvahā rāyaḥ syāma rathyo vayasvataḥ |
RV_2,024.15c vīreṣu vīrāṃ upa pṛṅdhi nas tvaṃ yad īśāno brahmaṇā veṣi me havam ||
RV_2,024.16a brahmaṇas pate tvam asya yantā sūktasya bodhi tanayaṃ ca jinva |
RV_2,024.16c viśvaṃ tad bhadraṃ yad avanti devā bṛhad vadema vidathe suvīrāḥ ||

RV_2,025.01a indhāno agniṃ vanavad vanuṣyataḥ kṛtabrahmā śūśuvad rātahavya it |
RV_2,025.01c jātena jātam ati sa pra sarsṛte yaṃ-yaṃ yujaṃ kṛṇute brahmaṇas patiḥ ||
RV_2,025.02a vīrebhir vīrān vanavad vanuṣyato gobhī rayim paprathad bodhati tmanā |
RV_2,025.02c tokaṃ ca tasya tanayaṃ ca vardhate yaṃ-yaṃ yujaṃ kṛṇute brahmaṇas patiḥ ||
RV_2,025.03a sindhur na kṣodaḥ śimīvāṃ ṛghāyato vṛṣeva vadhrīṃr abhi vaṣṭy ojasā |
RV_2,025.03c agner iva prasitir nāha vartave yaṃ-yaṃ yujaṃ kṛṇute brahmaṇas patiḥ ||
RV_2,025.04a tasmā arṣanti divyā asaścataḥ sa satvabhiḥ prathamo goṣu gacchati |
RV_2,025.04c anibhṛṣṭataviṣir hanty ojasā yaṃ-yaṃ yujaṃ kṛṇute brahmaṇas patiḥ ||
RV_2,025.05a tasmā id viśve dhunayanta sindhavo 'cchidrā śarma dadhire purūṇi |
RV_2,025.05c devānāṃ sumne subhagaḥ sa edhate yaṃ-yaṃ yujaṃ kṛṇute brahmaṇas patiḥ ||

RV_2,026.01a ṛjur ic chaṃso vanavad vanuṣyato devayann id adevayantam abhy asat |
RV_2,026.01c suprāvīr id vanavat pṛtsu duṣṭaraṃ yajved ayajyor vi bhajāti bhojanam ||
RV_2,026.02a yajasva vīra pra vihi manāyato bhadram manaḥ kṛṇuṣva vṛtratūrye |
RV_2,026.02c haviṣ kṛṇuṣva subhago yathāsasi brahmaṇas pater ava ā vṛṇīmahe ||
RV_2,026.03a sa ij janena sa viśā sa janmanā sa putrair vājam bharate dhanā nṛbhiḥ |
RV_2,026.03c devānāṃ yaḥ pitaram āvivāsati śraddhāmanā haviṣā brahmaṇas patim ||
RV_2,026.04a yo asmai havyair ghṛtavadbhir avidhat pra tam prācā nayati brahmaṇas patiḥ |
RV_2,026.04c uruṣyatīm aṃhaso rakṣatī riṣo 'ṃhoś cid asmā urucakrir adbhutaḥ ||

RV_2,027.01a imā gira ādityebhyo ghṛtasnūḥ sanād rājabhyo juhvā juhomi |
RV_2,027.01c śṛṇotu mitro aryamā bhago nas tuvijāto varuṇo dakṣo aṃśaḥ ||
RV_2,027.02a imaṃ stomaṃ sakratavo me adya mitro aryamā varuṇo juṣanta |
RV_2,027.02c ādityāsaḥ śucayo dhārapūtā avṛjinā anavadyā ariṣṭāḥ ||
RV_2,027.03a ta ādityāsa uravo gabhīrā adabdhāso dipsanto bhūryakṣāḥ |
RV_2,027.03c antaḥ paśyanti vṛjinota sādhu sarvaṃ rājabhyaḥ paramā cid anti ||
RV_2,027.04a dhārayanta ādityāso jagat sthā devā viśvasya bhuvanasya gopāḥ |
RV_2,027.04c dīrghādhiyo rakṣamāṇā asuryam ṛtāvānaś cayamānā ṛṇāni ||
RV_2,027.05a vidyām ādityā avaso vo asya yad aryaman bhaya ā cin mayobhu |
RV_2,027.05c yuṣmākam mitrāvaruṇā praṇītau pari śvabhreva duritāni vṛjyām ||
RV_2,027.06a sugo hi vo aryaman mitra panthā anṛkṣaro varuṇa sādhur asti |
RV_2,027.06c tenādityā adhi vocatā no yacchatā no duṣparihantu śarma ||
RV_2,027.07a pipartu no aditī rājaputrāti dveṣāṃsy aryamā sugebhiḥ |
RV_2,027.07c bṛhan mitrasya varuṇasya śarmopa syāma puruvīrā ariṣṭāḥ ||
RV_2,027.08a tisro bhūmīr dhārayan trīṃr uta dyūn trīṇi vratā vidathe antar eṣām |
RV_2,027.08c ṛtenādityā mahi vo mahitvaṃ tad aryaman varuṇa mitra cāru ||
RV_2,027.09a trī rocanā divyā dhārayanta hiraṇyayāḥ śucayo dhārapūtāḥ |
RV_2,027.09c asvapnajo animiṣā adabdhā uruśaṃsā ṛjave martyāya ||
RV_2,027.10a tvaṃ viśveṣāṃ varuṇāsi rājā ye ca devā asura ye ca martāḥ |
RV_2,027.10c śataṃ no rāsva śarado vicakṣe 'śyāmāyūṃṣi sudhitāni pūrvā ||
RV_2,027.11a na dakṣiṇā vi cikite na savyā na prācīnam ādityā nota paścā |
RV_2,027.11c pākyā cid vasavo dhīryā cid yuṣmānīto abhayaṃ jyotir aśyām ||
RV_2,027.12a yo rājabhya ṛtanibhyo dadāśa yaṃ vardhayanti puṣṭayaś ca nityāḥ |
RV_2,027.12c sa revān yāti prathamo rathena vasudāvā vidatheṣu praśastaḥ ||
RV_2,027.13a śucir apaḥ sūyavasā adabdha upa kṣeti vṛddhavayāḥ suvīraḥ |
RV_2,027.13c nakiṣ ṭaṃ ghnanty antito na dūrād ya ādityānām bhavati praṇītau ||
RV_2,027.14a adite mitra varuṇota mṛḷa yad vo vayaṃ cakṛmā kac cid āgaḥ |
RV_2,027.14c urv aśyām abhayaṃ jyotir indra mā no dīrghā abhi naśan tamisrāḥ ||
RV_2,027.15a ubhe asmai pīpayataḥ samīcī divo vṛṣṭiṃ subhago nāma puṣyan |
RV_2,027.15c ubhā kṣayāv ājayan yāti pṛtsūbhāv ardhau bhavataḥ sādhū asmai ||
RV_2,027.16a yā vo māyā abhidruhe yajatrāḥ pāśā ādityā ripave vicṛttāḥ |
RV_2,027.16c aśvīva tāṃ ati yeṣaṃ rathenāriṣṭā urāv ā śarman syāma ||
RV_2,027.17a māham maghono varuṇa priyasya bhūridāvna ā vidaṃ śūnam āpeḥ |
RV_2,027.17c mā rāyo rājan suyamād ava sthām bṛhad vadema vidathe suvīrāḥ ||

RV_2,028.01a idaṃ kaver ādityasya svarājo viśvāni sānty abhy astu mahnā |
RV_2,028.01c ati yo mandro yajathāya devaḥ sukīrtim bhikṣe varuṇasya bhūreḥ ||
RV_2,028.02a tava vrate subhagāsaḥ syāma svādhyo varuṇa tuṣṭuvāṃsaḥ |
RV_2,028.02c upāyana uṣasāṃ gomatīnām agnayo na jaramāṇā anu dyūn ||
RV_2,028.03a tava syāma puruvīrasya śarmann uruśaṃsasya varuṇa praṇetaḥ |
RV_2,028.03c yūyaṃ naḥ putrā aditer adabdhā abhi kṣamadhvaṃ yujyāya devāḥ ||
RV_2,028.04a pra sīm ādityo asṛjad vidhartāṃ ṛtaṃ sindhavo varuṇasya yanti |
RV_2,028.04c na śrāmyanti na vi mucanty ete vayo na paptū raghuyā parijman ||
RV_2,028.05a vi mac chrathāya raśanām ivāga ṛdhyāma te varuṇa khām ṛtasya |
RV_2,028.05c mā tantuś chedi vayato dhiyam me mā mātrā śāry apasaḥ pura ṛtoḥ ||
RV_2,028.06a apo su myakṣa varuṇa bhiyasam mat samrāḷ ṛtāvo 'nu mā gṛbhāya |
RV_2,028.06c dāmeva vatsād vi mumugdhy aṃho nahi tvad āre nimiṣaś caneśe ||
RV_2,028.07a mā no vadhair varuṇa ye ta iṣṭāv enaḥ kṛṇvantam asura bhrīṇanti |
RV_2,028.07c mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ||
RV_2,028.08a namaḥ purā te varuṇota nūnam utāparaṃ tuvijāta bravāma |
RV_2,028.08c tve hi kam parvate na śritāny apracyutāni dūḷabha vratāni ||
RV_2,028.09a para ṛṇā sāvīr adha matkṛtāni māhaṃ rājann anyakṛtena bhojam |
RV_2,028.09c avyuṣṭā in nu bhūyasīr uṣāsa ā no jīvān varuṇa tāsu śādhi ||
RV_2,028.10a yo me rājan yujyo vā sakhā vā svapne bhayam bhīrave mahyam āha |
RV_2,028.10c steno vā yo dipsati no vṛko vā tvaṃ tasmād varuṇa pāhy asmān ||
RV_2,028.11a māham maghono varuṇa priyasya bhūridāvna ā vidaṃ śūnam āpeḥ |
RV_2,028.11c mā rāyo rājan suyamād ava sthām bṛhad vadema vidathe suvīrāḥ ||

RV_2,029.01a dhṛtavratā ādityā iṣirā āre mat karta rahasūr ivāgaḥ |
RV_2,029.01c śṛṇvato vo varuṇa mitra devā bhadrasya vidvāṃ avase huve vaḥ ||
RV_2,029.02a yūyaṃ devāḥ pramatir yūyam ojo yūyaṃ dveṣāṃsi sanutar yuyota |
RV_2,029.02c abhikṣattāro abhi ca kṣamadhvam adyā ca no mṛḷayatāparaṃ ca ||
RV_2,029.03a kim ū nu vaḥ kṛṇavāmāpareṇa kiṃ sanena vasava āpyena |
RV_2,029.03c yūyaṃ no mitrāvaruṇādite ca svastim indrāmaruto dadhāta ||
RV_2,029.04a haye devā yūyam id āpaya stha te mṛḷata nādhamānāya mahyam |
RV_2,029.04c mā vo ratho madhyamavāḷ ṛte bhūn mā yuṣmāvatsv āpiṣu śramiṣma ||
RV_2,029.05a pra va eko mimaya bhūry āgo yan mā piteva kitavaṃ śaśāsa |
RV_2,029.05c āre pāśā āre aghāni devā mā mādhi putre vim iva grabhīṣṭa ||
RV_2,029.06a arvāñco adyā bhavatā yajatrā ā vo hārdi bhayamāno vyayeyam |
RV_2,029.06c trādhvaṃ no devā nijuro vṛkasya trādhvaṃ kartād avapado yajatrāḥ ||
RV_2,029.07a māham maghono varuṇa priyasya bhūridāvna ā vidaṃ śūnam āpeḥ |
RV_2,029.07c mā rāyo rājan suyamād ava sthām bṛhad vadema vidathe suvīrāḥ ||

RV_2,030.01a ṛtaṃ devāya kṛṇvate savitra indrāyāhighne na ramanta āpaḥ |
RV_2,030.01c ahar-ahar yāty aktur apāṃ kiyāty ā prathamaḥ sarga āsām ||
RV_2,030.02a yo vṛtrāya sinam atrābhariṣyat pra taṃ janitrī viduṣa uvāca |
RV_2,030.02c patho radantīr anu joṣam asmai dive-dive dhunayo yanty artham ||
RV_2,030.03a ūrdhvo hy asthād adhy antarikṣe 'dhā vṛtrāya pra vadhaṃ jabhāra |
RV_2,030.03c mihaṃ vasāna upa hīm adudrot tigmāyudho ajayac chatrum indraḥ ||
RV_2,030.04a bṛhaspate tapuṣāśneva vidhya vṛkadvaraso asurasya vīrān |
RV_2,030.04c yathā jaghantha dhṛṣatā purā cid evā jahi śatrum asmākam indra ||
RV_2,030.05a ava kṣipa divo aśmānam uccā yena śatrum mandasāno nijūrvāḥ |
RV_2,030.05c tokasya sātau tanayasya bhūrer asmāṃ ardhaṃ kṛṇutād indra gonām ||
RV_2,030.06a pra hi kratuṃ vṛhatho yaṃ vanutho radhrasya stho yajamānasya codau |
RV_2,030.06c indrāsomā yuvam asmāṃ aviṣṭam asmin bhayasthe kṛṇutam u lokam ||
RV_2,030.07a na mā taman na śraman nota tandran na vocāma mā sunoteti somam |
RV_2,030.07c yo me pṛṇād yo dadad yo nibodhād yo mā sunvantam upa gobhir āyat ||
RV_2,030.08a sarasvati tvam asmāṃ aviḍḍhi marutvatī dhṛṣatī jeṣi śatrūn |
RV_2,030.08c tyaṃ cic chardhantaṃ taviṣīyamāṇam indro hanti vṛṣabhaṃ śaṇḍikānām ||
RV_2,030.09a yo naḥ sanutya uta vā jighatnur abhikhyāya taṃ tigitena vidhya |
RV_2,030.09c bṛhaspata āyudhair jeṣi śatrūn druhe rīṣantam pari dhehi rājan ||
RV_2,030.10a asmākebhiḥ satvabhiḥ śūra śūrair vīryā kṛdhi yāni te kartvāni |
RV_2,030.10c jyog abhūvann anudhūpitāso hatvī teṣām ā bharā no vasūni ||
RV_2,030.11a taṃ vaḥ śardham mārutaṃ sumnayur giropa bruve namasā daivyaṃ janam |
RV_2,030.11c yathā rayiṃ sarvavīraṃ naśāmahā apatyasācaṃ śrutyaṃ dive-dive ||

RV_2,031.01a asmākam mitrāvaruṇāvataṃ ratham ādityai rudrair vasubhiḥ sacābhuvā |
RV_2,031.01c pra yad vayo na paptan vasmanas pari śravasyavo hṛṣīvanto vanarṣadaḥ ||
RV_2,031.02a adha smā na ud avatā sajoṣaso rathaṃ devāso abhi vikṣu vājayum |
RV_2,031.02c yad āśavaḥ padyābhis titrato rajaḥ pṛthivyāḥ sānau jaṅghananta pāṇibhiḥ ||
RV_2,031.03a uta sya na indro viśvacarṣaṇir divaḥ śardhena mārutena sukratuḥ |
RV_2,031.03c anu nu sthāty avṛkābhir ūtibhī ratham mahe sanaye vājasātaye ||
RV_2,031.04a uta sya devo bhuvanasya sakṣaṇis tvaṣṭā gnābhiḥ sajoṣā jūjuvad ratham |
RV_2,031.04c iḷā bhago bṛhaddivota rodasī pūṣā purandhir aśvināv adhā patī ||
RV_2,031.05a uta tye devī subhage mithūdṛśoṣāsānaktā jagatām apījuvā |
RV_2,031.05c stuṣe yad vām pṛthivi navyasā vaca sthātuś ca vayas trivayā upastire ||
RV_2,031.06a uta vaḥ śaṃsam uśijām iva śmasy ahir budhnyo 'ja ekapād uta |
RV_2,031.06c trita ṛbhukṣāḥ savitā cano dadhe 'pāṃ napād āśuhemā dhiyā śami ||
RV_2,031.07a etā vo vaśmy udyatā yajatrā atakṣann āyavo navyase sam |
RV_2,031.07c śravasyavo vājaṃ cakānāḥ saptir na rathyo aha dhītim aśyāḥ ||

RV_2,032.01a asya me dyāvāpṛthivī ṛtāyato bhūtam avitrī vacasaḥ siṣāsataḥ |
RV_2,032.01c yayor āyuḥ prataraṃ te idam pura upastute vasūyur vām maho dadhe ||
RV_2,032.02a mā no guhyā ripa āyor ahan dabhan mā na ābhyo rīradho ducchunābhyaḥ |
RV_2,032.02c mā no vi yauḥ sakhyā viddhi tasya naḥ sumnāyatā manasā tat tvemahe ||
RV_2,032.03a aheḷatā manasā śruṣṭim ā vaha duhānāṃ dhenum pipyuṣīm asaścatam |
RV_2,032.03c padyābhir āśuṃ vacasā ca vājinaṃ tvāṃ hinomi puruhūta viśvahā ||
RV_2,032.04a rākām ahaṃ suhavāṃ suṣṭutī huve śṛṇotu naḥ subhagā bodhatu tmanā |
RV_2,032.04c sīvyatv apaḥ sūcyācchidyamānayā dadātu vīraṃ śatadāyam ukthyam ||
RV_2,032.05a yās te rāke sumatayaḥ supeśaso yābhir dadāsi dāśuṣe vasūni |
RV_2,032.05c tābhir no adya sumanā upāgahi sahasrapoṣaṃ subhage rarāṇā ||
RV_2,032.06a sinīvāli pṛthuṣṭuke yā devānām asi svasā |
RV_2,032.06c juṣasva havyam āhutam prajāṃ devi didiḍḍhi naḥ ||
RV_2,032.07a yā subāhuḥ svaṅguriḥ suṣūmā bahusūvarī |
RV_2,032.07c tasyai viśpatnyai haviḥ sinīvālyai juhotana ||
RV_2,032.08a yā guṅgūr yā sinīvālī yā rākā yā sarasvatī |
RV_2,032.08c indrāṇīm ahva ūtaye varuṇānīṃ svastaye ||

RV_2,033.01a ā te pitar marutāṃ sumnam etu mā naḥ sūryasya saṃdṛśo yuyothāḥ |
RV_2,033.01c abhi no vīro arvati kṣameta pra jāyemahi rudra prajābhiḥ ||
RV_2,033.02a tvādattebhī rudra śantamebhiḥ śataṃ himā aśīya bheṣajebhiḥ |
RV_2,033.02c vy asmad dveṣo vitaraṃ vy aṃho vy amīvāś cātayasvā viṣūcīḥ ||
RV_2,033.03a śreṣṭho jātasya rudra śriyāsi tavastamas tavasāṃ vajrabāho |
RV_2,033.03c parṣi ṇaḥ pāram aṃhasaḥ svasti viśvā abhītī rapaso yuyodhi ||
RV_2,033.04a mā tvā rudra cukrudhāmā namobhir mā duṣṭutī vṛṣabha mā sahūtī |
RV_2,033.04c un no vīrāṃ arpaya bheṣajebhir bhiṣaktamaṃ tvā bhiṣajāṃ śṛṇomi ||
RV_2,033.05a havīmabhir havate yo havirbhir ava stomebhī rudraṃ diṣīya |
RV_2,033.05c ṛdūdaraḥ suhavo mā no asyai babhruḥ suśipro rīradhan manāyai ||
RV_2,033.06a un mā mamanda vṛṣabho marutvān tvakṣīyasā vayasā nādhamānam |
RV_2,033.06c ghṛṇīva cchāyām arapā aśīyā vivāseyaṃ rudrasya sumnam ||
RV_2,033.07a kva sya te rudra mṛḷayākur hasto yo asti bheṣajo jalāṣaḥ |
RV_2,033.07c apabhartā rapaso daivyasyābhī nu mā vṛṣabha cakṣamīthāḥ ||
RV_2,033.08a pra babhrave vṛṣabhāya śvitīce maho mahīṃ suṣṭutim īrayāmi |
RV_2,033.08c namasyā kalmalīkinaṃ namobhir gṛṇīmasi tveṣaṃ rudrasya nāma ||
RV_2,033.09a sthirebhir aṅgaiḥ pururūpa ugro babhruḥ śukrebhiḥ pipiśe hiraṇyaiḥ |
RV_2,033.09c īśānād asya bhuvanasya bhūrer na vā u yoṣad rudrād asuryam ||
RV_2,033.10a arhan bibharṣi sāyakāni dhanvārhan niṣkaṃ yajataṃ viśvarūpam |
RV_2,033.10c arhann idaṃ dayase viśvam abhvaṃ na vā ojīyo rudra tvad asti ||
RV_2,033.11a stuhi śrutaṃ gartasadaṃ yuvānam mṛgaṃ na bhīmam upahatnum ugram |
RV_2,033.11c mṛḷā jaritre rudra stavāno 'nyaṃ te asman ni vapantu senāḥ ||
RV_2,033.12a kumāraś cit pitaraṃ vandamānam prati nānāma rudropayantam |
RV_2,033.12c bhūrer dātāraṃ satpatiṃ gṛṇīṣe stutas tvam bheṣajā rāsy asme ||
RV_2,033.13a yā vo bheṣajā marutaḥ śucīni yā śantamā vṛṣaṇo yā mayobhu |
RV_2,033.13c yāni manur avṛṇītā pitā nas tā śaṃ ca yoś ca rudrasya vaśmi ||
RV_2,033.14a pari ṇo hetī rudrasya vṛjyāḥ pari tveṣasya durmatir mahī gāt |
RV_2,033.14c ava sthirā maghavadbhyas tanuṣva mīḍhvas tokāya tanayāya mṛḷa ||
RV_2,033.15a evā babhro vṛṣabha cekitāna yathā deva na hṛṇīṣe na haṃsi |
RV_2,033.15c havanaśrun no rudreha bodhi bṛhad vadema vidathe suvīrāḥ ||

RV_2,034.01a dhārāvarā maruto dhṛṣṇvojaso mṛgā na bhīmās taviṣībhir arcinaḥ |
RV_2,034.01c agnayo na śuśucānā ṛjīṣiṇo bhṛmiṃ dhamanto apa gā avṛṇvata ||
RV_2,034.02a dyāvo na stṛbhiś citayanta khādino vy abhriyā na dyutayanta vṛṣṭayaḥ |
RV_2,034.02c rudro yad vo maruto rukmavakṣaso vṛṣājani pṛśnyāḥ śukra ūdhani ||
RV_2,034.03a ukṣante aśvāṃ atyāṃ ivājiṣu nadasya karṇais turayanta āśubhiḥ |
RV_2,034.03c hiraṇyaśiprā maruto davidhvataḥ pṛkṣaṃ yātha pṛṣatībhiḥ samanyavaḥ ||
RV_2,034.04a pṛkṣe tā viśvā bhuvanā vavakṣire mitrāya vā sadam ā jīradānavaḥ |
RV_2,034.04c pṛṣadaśvāso anavabhrarādhasa ṛjipyāso na vayuneṣu dhūrṣadaḥ ||
RV_2,034.05a indhanvabhir dhenubhī rapśadūdhabhir adhvasmabhiḥ pathibhir bhrājadṛṣṭayaḥ |
RV_2,034.05c ā haṃsāso na svasarāṇi gantana madhor madāya marutaḥ samanyavaḥ ||
RV_2,034.06a ā no brahmāṇi marutaḥ samanyavo narāṃ na śaṃsaḥ savanāni gantana |
RV_2,034.06c aśvām iva pipyata dhenum ūdhani kartā dhiyaṃ jaritre vājapeśasam ||
RV_2,034.07a taṃ no dāta maruto vājinaṃ ratha āpānam brahma citayad dive-dive |
RV_2,034.07c iṣaṃ stotṛbhyo vṛjaneṣu kārave sanim medhām ariṣṭaṃ duṣṭaraṃ sahaḥ ||
RV_2,034.08a yad yuñjate maruto rukmavakṣaso 'śvān ratheṣu bhaga ā sudānavaḥ |
RV_2,034.08c dhenur na śiśve svasareṣu pinvate janāya rātahaviṣe mahīm iṣam ||
RV_2,034.09a yo no maruto vṛkatāti martyo ripur dadhe vasavo rakṣatā riṣaḥ |
RV_2,034.09c vartayata tapuṣā cakriyābhi tam ava rudrā aśaso hantanā vadhaḥ ||
RV_2,034.10a citraṃ tad vo maruto yāma cekite pṛśnyā yad ūdhar apy āpayo duhuḥ |
RV_2,034.10c yad vā nide navamānasya rudriyās tritaṃ jarāya juratām adābhyāḥ ||
RV_2,034.11a tān vo maho maruta evayāvno viṣṇor eṣasya prabhṛthe havāmahe |
RV_2,034.11c hiraṇyavarṇān kakuhān yatasruco brahmaṇyantaḥ śaṃsyaṃ rādha īmahe ||
RV_2,034.12a te daśagvāḥ prathamā yajñam ūhire te no hinvantūṣaso vyuṣṭiṣu |
RV_2,034.12c uṣā na rāmīr aruṇair aporṇute maho jyotiṣā śucatā goarṇasā ||
RV_2,034.13a te kṣoṇībhir aruṇebhir nāñjibhī rudrā ṛtasya sadaneṣu vāvṛdhuḥ |
RV_2,034.13c nimeghamānā atyena pājasā suścandraṃ varṇaṃ dadhire supeśasam ||
RV_2,034.14a tāṃ iyāno mahi varūtham ūtaya upa ghed enā namasā gṛṇīmasi |
RV_2,034.14c trito na yān pañca hotṝn abhiṣṭaya āvavartad avarāñ cakriyāvase ||
RV_2,034.15a yayā radhram pārayathāty aṃho yayā nido muñcatha vanditāram |
RV_2,034.15c arvācī sā maruto yā va ūtir o ṣu vāśreva sumatir jigātu ||

RV_2,035.01a upem asṛkṣi vājayur vacasyāṃ cano dadhīta nādyo giro me |
RV_2,035.01c apāṃ napād āśuhemā kuvit sa supeśasas karati joṣiṣad dhi ||
RV_2,035.02a imaṃ sv asmai hṛda ā sutaṣṭam mantraṃ vocema kuvid asya vedat |
RV_2,035.02c apāṃ napād asuryasya mahnā viśvāny aryo bhuvanā jajāna ||
RV_2,035.03a sam anyā yanty upa yanty anyāḥ samānam ūrvaṃ nadyaḥ pṛṇanti |
RV_2,035.03c tam ū śuciṃ śucayo dīdivāṃsam apāṃ napātam pari tasthur āpaḥ ||
RV_2,035.04a tam asmerā yuvatayo yuvānam marmṛjyamānāḥ pari yanty āpaḥ |
RV_2,035.04c sa śukrebhiḥ śikvabhī revad asme dīdāyānidhmo ghṛtanirṇig apsu ||
RV_2,035.05a asmai tisro avyathyāya nārīr devāya devīr didhiṣanty annam |
RV_2,035.05c kṛtā ivopa hi prasarsre apsu sa pīyūṣaṃ dhayati pūrvasūnām ||
RV_2,035.06a aśvasyātra janimāsya ca svar druho riṣaḥ sampṛcaḥ pāhi sūrīn |
RV_2,035.06c āmāsu pūrṣu paro apramṛṣyaṃ nārātayo vi naśan nānṛtāni ||
RV_2,035.07a sva ā dame sudughā yasya dhenuḥ svadhām pīpāya subhv annam atti |
RV_2,035.07c so apāṃ napād ūrjayann apsv antar vasudeyāya vidhate vi bhāti ||
RV_2,035.08a yo apsv ā śucinā daivyena ṛtāvājasra urviyā vibhāti |
RV_2,035.08c vayā id anyā bhuvanāny asya pra jāyante vīrudhaś ca prajābhiḥ ||
RV_2,035.09a apāṃ napād ā hy asthād upasthaṃ jihmānām ūrdhvo vidyutaṃ vasānaḥ |
RV_2,035.09c tasya jyeṣṭham mahimānaṃ vahantīr hiraṇyavarṇāḥ pari yanti yahvīḥ ||
RV_2,035.10a hiraṇyarūpaḥ sa hiraṇyasaṃdṛg apāṃ napāt sed u hiraṇyavarṇaḥ |
RV_2,035.10c hiraṇyayāt pari yoner niṣadyā hiraṇyadā dadaty annam asmai ||
RV_2,035.11a tad asyānīkam uta cāru nāmāpīcyaṃ vardhate naptur apām |
RV_2,035.11c yam indhate yuvatayaḥ sam itthā hiraṇyavarṇaṃ ghṛtam annam asya ||
RV_2,035.12a asmai bahūnām avamāya sakhye yajñair vidhema namasā havirbhiḥ |
RV_2,035.12c saṃ sānu mārjmi didhiṣāmi bilmair dadhāmy annaiḥ pari vanda ṛgbhiḥ ||
RV_2,035.13a sa īṃ vṛṣājanayat tāsu garbhaṃ sa īṃ śiśur dhayati taṃ rihanti |
RV_2,035.13c so apāṃ napād anabhimlātavarṇo 'nyasyeveha tanvā viveṣa ||
RV_2,035.14a asmin pade parame tasthivāṃsam adhvasmabhir viśvahā dīdivāṃsam |
RV_2,035.14c āpo naptre ghṛtam annaṃ vahantīḥ svayam atkaiḥ pari dīyanti yahvīḥ ||
RV_2,035.15a ayāṃsam agne sukṣitiṃ janāyāyāṃsam u maghavadbhyaḥ suvṛktim |
RV_2,035.15c viśvaṃ tad bhadraṃ yad avanti devā bṛhad vadema vidathe suvīrāḥ ||

RV_2,036.01a tubhyaṃ hinvāno vasiṣṭa gā apo 'dhukṣan sīm avibhir adribhir naraḥ |
RV_2,036.01c pibendra svāhā prahutaṃ vaṣaṭkṛtaṃ hotrād ā somam prathamo ya īśiṣe ||
RV_2,036.02a yajñaiḥ sammiślāḥ pṛṣatībhir ṛṣṭibhir yāmañ chubhrāso añjiṣu priyā uta |
RV_2,036.02c āsadyā barhir bharatasya sūnavaḥ potrād ā somam pibatā divo naraḥ ||
RV_2,036.03a ameva naḥ suhavā ā hi gantana ni barhiṣi sadatanā raṇiṣṭana |
RV_2,036.03c athā mandasva jujuṣāṇo andhasas tvaṣṭar devebhir janibhiḥ sumadgaṇaḥ ||
RV_2,036.04a ā vakṣi devāṃ iha vipra yakṣi cośan hotar ni ṣadā yoniṣu triṣu |
RV_2,036.04c prati vīhi prasthitaṃ somyam madhu pibāgnīdhrāt tava bhāgasya tṛpṇuhi ||
RV_2,036.05a eṣa sya te tanvo nṛmṇavardhanaḥ saha ojaḥ pradivi bāhvor hitaḥ |
RV_2,036.05c tubhyaṃ suto maghavan tubhyam ābhṛtas tvam asya brāhmaṇād ā tṛpat piba ||
RV_2,036.06a juṣethāṃ yajñam bodhataṃ havasya me satto hotā nividaḥ pūrvyā anu |
RV_2,036.06c acchā rājānā nama ety āvṛtam praśāstrād ā pibataṃ somyam madhu ||

RV_2,037.01a mandasva hotrād anu joṣam andhaso 'dhvaryavaḥ sa pūrṇāṃ vaṣṭy āsicam |
RV_2,037.01c tasmā etam bharata tadvaśo dadir hotrāt somaṃ draviṇodaḥ piba ṛtubhiḥ ||
RV_2,037.02a yam u pūrvam ahuve tam idaṃ huve sed u havyo dadir yo nāma patyate |
RV_2,037.02c adhvaryubhiḥ prasthitaṃ somyam madhu potrāt somaṃ draviṇodaḥ piba ṛtubhiḥ ||
RV_2,037.03a medyantu te vahnayo yebhir īyase 'riṣaṇyan vīḷayasvā vanaspate |
RV_2,037.03c āyūyā dhṛṣṇo abhigūryā tvaṃ neṣṭrāt somaṃ draviṇodaḥ piba ṛtubhiḥ ||
RV_2,037.04a apād dhotrād uta potrād amattota neṣṭrād ajuṣata prayo hitam |
RV_2,037.04c turīyam pātram amṛktam amartyaṃ draviṇodāḥ pibatu drāviṇodasaḥ ||
RV_2,037.05a arvāñcam adya yayyaṃ nṛvāhaṇaṃ rathaṃ yuñjāthām iha vāṃ vimocanam |
RV_2,037.05c pṛṅktaṃ havīṃṣi madhunā hi kaṃ gatam athā somam pibataṃ vājinīvasū ||
RV_2,037.06a joṣy agne samidhaṃ joṣy āhutiṃ joṣi brahma janyaṃ joṣi suṣṭutim |
RV_2,037.06c viśvebhir viśvāṃ ṛtunā vaso maha uśan devāṃ uśataḥ pāyayā haviḥ ||

RV_2,038.01a ud u ṣya devaḥ savitā savāya śaśvattamaṃ tadapā vahnir asthāt |
RV_2,038.01c nūnaṃ devebhyo vi hi dhāti ratnam athābhajad vītihotraṃ svastau ||
RV_2,038.02a viśvasya hi śruṣṭaye deva ūrdhvaḥ pra bāhavā pṛthupāṇiḥ sisarti |
RV_2,038.02c āpaś cid asya vrata ā nimṛgrā ayaṃ cid vāto ramate parijman ||
RV_2,038.03a āśubhiś cid yān vi mucāti nūnam arīramad atamānaṃ cid etoḥ |
RV_2,038.03c ahyarṣūṇāṃ cin ny ayāṃ aviṣyām anu vrataṃ savitur moky āgāt ||
RV_2,038.04a punaḥ sam avyad vitataṃ vayantī madhyā kartor ny adhāc chakma dhīraḥ |
RV_2,038.04c ut saṃhāyāsthād vy ṛtūṃr adardhar aramatiḥ savitā deva āgāt ||
RV_2,038.05a nānaukāṃsi duryo viśvam āyur vi tiṣṭhate prabhavaḥ śoko agneḥ |
RV_2,038.05c jyeṣṭham mātā sūnave bhāgam ādhād anv asya ketam iṣitaṃ savitrā ||
RV_2,038.06a samāvavarti viṣṭhito jigīṣur viśveṣāṃ kāmaś caratām amābhūt |
RV_2,038.06c śaśvāṃ apo vikṛtaṃ hitvy āgād anu vrataṃ savitur daivyasya ||
RV_2,038.07a tvayā hitam apyam apsu bhāgaṃ dhanvānv ā mṛgayaso vi tasthuḥ |
RV_2,038.07c vanāni vibhyo nakir asya tāni vratā devasya savitur minanti ||
RV_2,038.08a yādrādhyaṃ varuṇo yonim apyam aniśitaṃ nimiṣi jarbhurāṇaḥ |
RV_2,038.08c viśvo mārtāṇḍo vrajam ā paśur gāt sthaśo janmāni savitā vy ākaḥ ||
RV_2,038.09a na yasyendro varuṇo na mitro vratam aryamā na minanti rudraḥ |
RV_2,038.09c nārātayas tam idaṃ svasti huve devaṃ savitāraṃ namobhiḥ ||
RV_2,038.10a bhagaṃ dhiyaṃ vājayantaḥ purandhiṃ narāśaṃso gnāspatir no avyāḥ |
RV_2,038.10c āye vāmasya saṃgathe rayīṇām priyā devasya savituḥ syāma ||
RV_2,038.11a asmabhyaṃ tad divo adbhyaḥ pṛthivyās tvayā dattaṃ kāmyaṃ rādha ā gāt |
RV_2,038.11c śaṃ yat stotṛbhya āpaye bhavāty uruśaṃsāya savitar jaritre ||

RV_2,039.01a grāvāṇeva tad id arthaṃ jarethe gṛdhreva vṛkṣaṃ nidhimantam accha |
RV_2,039.01c brahmāṇeva vidatha ukthaśāsā dūteva havyā janyā purutrā ||
RV_2,039.02a prātaryāvāṇā rathyeva vīrājeva yamā varam ā sacethe |
RV_2,039.02c mene iva tanvā śumbhamāne dampatīva kratuvidā janeṣu ||
RV_2,039.03a śṛṅgeva naḥ prathamā gantam arvāk chaphāv iva jarbhurāṇā tarobhiḥ |
RV_2,039.03c cakravākeva prati vastor usrārvāñcā yātaṃ rathyeva śakrā ||
RV_2,039.04a nāveva naḥ pārayataṃ yugeva nabhyeva na upadhīva pradhīva |
RV_2,039.04c śvāneva no ariṣaṇyā tanūnāṃ khṛgaleva visrasaḥ pātam asmān ||
RV_2,039.05a vātevājuryā nadyeva rītir akṣī iva cakṣuṣā yātam arvāk |
RV_2,039.05c hastāv iva tanve śambhaviṣṭhā pādeva no nayataṃ vasyo accha ||
RV_2,039.06a oṣṭhāv iva madhv āsne vadantā stanāv iva pipyataṃ jīvase naḥ |
RV_2,039.06c nāseva nas tanvo rakṣitārā karṇāv iva suśrutā bhūtam asme ||
RV_2,039.07a hasteva śaktim abhi saṃdadī naḥ kṣāmeva naḥ sam ajataṃ rajāṃsi |
RV_2,039.07c imā giro aśvinā yuṣmayantīḥ kṣṇotreṇeva svadhitiṃ saṃ śiśītam ||
RV_2,039.08a etāni vām aśvinā vardhanāni brahma stomaṃ gṛtsamadāso akran |
RV_2,039.08c tāni narā jujuṣāṇopa yātam bṛhad vadema vidathe suvīrāḥ ||

RV_2,040.01a somāpūṣaṇā jananā rayīṇāṃ jananā divo jananā pṛthivyāḥ |
RV_2,040.01c jātau viśvasya bhuvanasya gopau devā akṛṇvann amṛtasya nābhim ||
RV_2,040.02a imau devau jāyamānau juṣantemau tamāṃsi gūhatām ajuṣṭā |
RV_2,040.02c ābhyām indraḥ pakvam āmāsv antaḥ somāpūṣabhyāṃ janad usriyāsu ||
RV_2,040.03a somāpūṣaṇā rajaso vimānaṃ saptacakraṃ ratham aviśvaminvam |
RV_2,040.03c viṣūvṛtam manasā yujyamānaṃ taṃ jinvatho vṛṣaṇā pañcaraśmim ||
RV_2,040.04a divy anyaḥ sadanaṃ cakra uccā pṛthivyām anyo adhy antarikṣe |
RV_2,040.04c tāv asmabhyam puruvāram purukṣuṃ rāyas poṣaṃ vi ṣyatāṃ nābhim asme ||
RV_2,040.05a viśvāny anyo bhuvanā jajāna viśvam anyo abhicakṣāṇa eti |
RV_2,040.05c somāpūṣaṇāv avataṃ dhiyam me yuvābhyāṃ viśvāḥ pṛtanā jayema ||
RV_2,040.06a dhiyam pūṣā jinvatu viśvaminvo rayiṃ somo rayipatir dadhātu |
RV_2,040.06c avatu devy aditir anarvā bṛhad vadema vidathe suvīrāḥ ||

RV_2,041.01a vāyo ye te sahasriṇo rathāsas tebhir ā gahi |
RV_2,041.01c niyutvān somapītaye ||
RV_2,041.02a niyutvān vāyav ā gahy ayaṃ śukro ayāmi te |
RV_2,041.02c gantāsi sunvato gṛham ||
RV_2,041.03a śukrasyādya gavāśira indravāyū niyutvataḥ |
RV_2,041.03c ā yātam pibataṃ narā ||
RV_2,041.04a ayaṃ vām mitrāvaruṇā sutaḥ soma ṛtāvṛdhā |
RV_2,041.04c mamed iha śrutaṃ havam ||
RV_2,041.05a rājānāv anabhidruhā dhruve sadasy uttame |
RV_2,041.05c sahasrasthūṇa āsāte ||
RV_2,041.06a tā samrājā ghṛtāsutī ādityā dānunas patī |
RV_2,041.06c sacete anavahvaram ||
RV_2,041.07a gomad ū ṣu nāsatyāśvāvad yātam aśvinā |
RV_2,041.07c vartī rudrā nṛpāyyam ||
RV_2,041.08a na yat paro nāntara ādadharṣad vṛṣaṇvasū |
RV_2,041.08c duḥśaṃso martyo ripuḥ ||
RV_2,041.09a tā na ā voḷham aśvinā rayim piśaṅgasaṃdṛśam |
RV_2,041.09c dhiṣṇyā varivovidam ||
RV_2,041.10a indro aṅga mahad bhayam abhī ṣad apa cucyavat |
RV_2,041.10c sa hi sthiro vicarṣaṇiḥ ||
RV_2,041.11a indraś ca mṛḷayāti no na naḥ paścād aghaṃ naśat |
RV_2,041.11c bhadram bhavāti naḥ puraḥ ||
RV_2,041.12a indra āśābhyas pari sarvābhyo abhayaṃ karat |
RV_2,041.12c jetā śatrūn vicarṣaṇiḥ ||
RV_2,041.13a viśve devāsa ā gata śṛṇutā ma imaṃ havam |
RV_2,041.13c edam barhir ni ṣīdata ||
RV_2,041.14a tīvro vo madhumāṃ ayaṃ śunahotreṣu matsaraḥ |
RV_2,041.14c etam pibata kāmyam ||
RV_2,041.15a indrajyeṣṭhā marudgaṇā devāsaḥ pūṣarātayaḥ |
RV_2,041.15c viśve mama śrutā havam ||
RV_2,041.16a ambitame nadītame devitame sarasvati |
RV_2,041.16c apraśastā iva smasi praśastim amba nas kṛdhi ||
RV_2,041.17a tve viśvā sarasvati śritāyūṃṣi devyām |
RV_2,041.17c śunahotreṣu matsva prajāṃ devi didiḍḍhi naḥ ||
RV_2,041.18a imā brahma sarasvati juṣasva vājinīvati |
RV_2,041.18c yā te manma gṛtsamadā ṛtāvari priyā deveṣu juhvati ||
RV_2,041.19a pretāṃ yajñasya śambhuvā yuvām id ā vṛṇīmahe |
RV_2,041.19c agniṃ ca havyavāhanam ||
RV_2,041.20a dyāvā naḥ pṛthivī imaṃ sidhram adya divispṛśam |
RV_2,041.20c yajñaṃ deveṣu yacchatām ||
RV_2,041.21a ā vām upastham adruhā devāḥ sīdantu yajñiyāḥ |
RV_2,041.21c ihādya somapītaye ||

RV_2,042.01a kanikradaj januṣam prabruvāṇa iyarti vācam ariteva nāvam |
RV_2,042.01c sumaṅgalaś ca śakune bhavāsi mā tvā kā cid abhibhā viśvyā vidat ||
RV_2,042.02a mā tvā śyena ud vadhīn mā suparṇo mā tvā vidad iṣumān vīro astā |
RV_2,042.02c pitryām anu pradiśaṃ kanikradat sumaṅgalo bhadravādī vadeha ||
RV_2,042.03a ava kranda dakṣiṇato gṛhāṇāṃ sumaṅgalo bhadravādī śakunte |
RV_2,042.03c mā na stena īśata māghaśaṃso bṛhad vadema vidathe suvīrāḥ ||

RV_2,043.01a pradakṣiṇid abhi gṛṇanti kāravo vayo vadanta ṛtuthā śakuntayaḥ |
RV_2,043.01c ubhe vācau vadati sāmagā iva gāyatraṃ ca traiṣṭubhaṃ cānu rājati ||
RV_2,043.02a udgāteva śakune sāma gāyasi brahmaputra iva savaneṣu śaṃsasi |
RV_2,043.02c vṛṣeva vājī śiśumatīr apītyā sarvato naḥ śakune bhadram ā vada viśvato naḥ śakune puṇyam ā vada ||
RV_2,043.03a āvadaṃs tvaṃ śakune bhadram ā vada tūṣṇīm āsīnaḥ sumatiṃ cikiddhi naḥ |
RV_2,043.03c yad utpatan vadasi karkarir yathā bṛhad vadema vidathe suvīrāḥ ||



_____________________________________________________________




Ṛgveda 3




RV_3,001.01a somasya mā tavasaṃ vakṣy agne vahniṃ cakartha vidathe yajadhyai |
RV_3,001.01c devāṃ acchā dīdyad yuñje adriṃ śamāye agne tanvaṃ juṣasva ||
RV_3,001.02a prāñcaṃ yajñaṃ cakṛma vardhatāṃ gīḥ samidbhir agniṃ namasā duvasyan |
RV_3,001.02c divaḥ śaśāsur vidathā kavīnāṃ gṛtsāya cit tavase gātum īṣuḥ ||
RV_3,001.03a mayo dadhe medhiraḥ pūtadakṣo divaḥ subandhur januṣā pṛthivyāḥ |
RV_3,001.03c avindann u darśatam apsv antar devāso agnim apasi svasṝṇām ||
RV_3,001.04a avardhayan subhagaṃ sapta yahvīḥ śvetaṃ jajñānam aruṣam mahitvā |
RV_3,001.04c śiśuṃ na jātam abhy ārur aśvā devāso agniṃ janiman vapuṣyan ||
RV_3,001.05a śukrebhir aṅgai raja ātatanvān kratum punānaḥ kavibhiḥ pavitraiḥ |
RV_3,001.05c śocir vasānaḥ pary āyur apāṃ śriyo mimīte bṛhatīr anūnāḥ ||
RV_3,001.06a vavrājā sīm anadatīr adabdhā divo yahvīr avasānā anagnāḥ |
RV_3,001.06c sanā atra yuvatayaḥ sayonīr ekaṃ garbhaṃ dadhire sapta vāṇīḥ ||
RV_3,001.07a stīrṇā asya saṃhato viśvarūpā ghṛtasya yonau sravathe madhūnām |
RV_3,001.07c asthur atra dhenavaḥ pinvamānā mahī dasmasya mātarā samīcī ||
RV_3,001.08a babhrāṇaḥ sūno sahaso vy adyaud dadhānaḥ śukrā rabhasā vapūṃṣi |
RV_3,001.08c ścotanti dhārā madhuno ghṛtasya vṛṣā yatra vāvṛdhe kāvyena ||
RV_3,001.09a pituś cid ūdhar januṣā viveda vy asya dhārā asṛjad vi dhenāḥ |
RV_3,001.09c guhā carantaṃ sakhibhiḥ śivebhir divo yahvībhir na guhā babhūva ||
RV_3,001.10a pituś ca garbhaṃ janituś ca babhre pūrvīr eko adhayat pīpyānāḥ |
RV_3,001.10c vṛṣṇe sapatnī śucaye sabandhū ubhe asmai manuṣye ni pāhi ||
RV_3,001.11a urau mahāṃ anibādhe vavardhāpo agniṃ yaśasaḥ saṃ hi pūrvīḥ |
RV_3,001.11c ṛtasya yonāv aśayad damūnā jāmīnām agnir apasi svasṝṇām ||
RV_3,001.12a akro na babhriḥ samithe mahīnāṃ didṛkṣeyaḥ sūnave bhāṛjīkaḥ |
RV_3,001.12c ud usriyā janitā yo jajānāpāṃ garbho nṛtamo yahvo agniḥ ||
RV_3,001.13a apāṃ garbhaṃ darśatam oṣadhīnāṃ vanā jajāna subhagā virūpam |
RV_3,001.13c devāsaś cin manasā saṃ hi jagmuḥ paniṣṭhaṃ jātaṃ tavasaṃ duvasyan ||
RV_3,001.14a bṛhanta id bhānavo bhāṛjīkam agniṃ sacanta vidyuto na śukrāḥ |
RV_3,001.14c guheva vṛddhaṃ sadasi sve antar apāra ūrve amṛtaṃ duhānāḥ ||
RV_3,001.15a īḷe ca tvā yajamāno havirbhir īḷe sakhitvaṃ sumatiṃ nikāmaḥ |
RV_3,001.15c devair avo mimīhi saṃ jaritre rakṣā ca no damyebhir anīkaiḥ ||
RV_3,001.16a upakṣetāras tava supraṇīte 'gne viśvāni dhanyā dadhānāḥ |
RV_3,001.16c suretasā śravasā tuñjamānā abhi ṣyāma pṛtanāyūṃr adevān ||
RV_3,001.17a ā devānām abhavaḥ ketur agne mandro viśvāni kāvyāni vidvān |
RV_3,001.17c prati martāṃ avāsayo damūnā anu devān rathiro yāsi sādhan ||
RV_3,001.18a ni duroṇe amṛto martyānāṃ rājā sasāda vidathāni sādhan |
RV_3,001.18c ghṛtapratīka urviyā vy adyaud agnir viśvāni kāvyāni vidvān ||
RV_3,001.19a ā no gahi sakhyebhiḥ śivebhir mahān mahībhir ūtibhiḥ saraṇyan |
RV_3,001.19c asme rayim bahulaṃ saṃtarutraṃ suvācam bhāgaṃ yaśasaṃ kṛdhī naḥ ||
RV_3,001.20a etā te agne janimā sanāni pra pūrvyāya nūtanāni vocam |
RV_3,001.20c mahānti vṛṣṇe savanā kṛtemā janmañ-janman nihito jātavedāḥ ||
RV_3,001.21a janmañ-janman nihito jātavedā viśvāmitrebhir idhyate ajasraḥ |
RV_3,001.21c tasya vayaṃ sumatau yajñiyasyāpi bhadre saumanase syāma ||
RV_3,001.22a imaṃ yajñaṃ sahasāvan tvaṃ no devatrā dhehi sukrato rarāṇaḥ |
RV_3,001.22c pra yaṃsi hotar bṛhatīr iṣo no 'gne mahi draviṇam ā yajasva ||
RV_3,001.23a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,001.23c syān naḥ sūnus tanayo vijāvāgne sā te sumatir bhūtv asme ||

RV_3,002.01a vaiśvānarāya dhiṣaṇām ṛtāvṛdhe ghṛtaṃ na pūtam agnaye janāmasi |
RV_3,002.01c dvitā hotāram manuṣaś ca vāghato dhiyā rathaṃ na kuliśaḥ sam ṛṇvati ||
RV_3,002.02a sa rocayaj januṣā rodasī ubhe sa mātror abhavat putra īḍyaḥ |
RV_3,002.02c havyavāḷ agnir ajaraś canohito dūḷabho viśām atithir vibhāvasuḥ ||
RV_3,002.03a kratvā dakṣasya taruṣo vidharmaṇi devāso agniṃ janayanta cittibhiḥ |
RV_3,002.03c rurucānam bhānunā jyotiṣā mahām atyaṃ na vājaṃ saniṣyann upa bruve ||
RV_3,002.04a ā mandrasya saniṣyanto vareṇyaṃ vṛṇīmahe ahrayaṃ vājam ṛgmiyam |
RV_3,002.04c rātim bhṛgūṇām uśijaṃ kavikratum agniṃ rājantaṃ divyena śociṣā ||
RV_3,002.05a agniṃ sumnāya dadhire puro janā vājaśravasam iha vṛktabarhiṣaḥ |
RV_3,002.05c yatasrucaḥ surucaṃ viśvadevyaṃ rudraṃ yajñānāṃ sādhadiṣṭim apasām ||
RV_3,002.06a pāvakaśoce tava hi kṣayam pari hotar yajñeṣu vṛktabarhiṣo naraḥ |
RV_3,002.06c agne duva icchamānāsa āpyam upāsate draviṇaṃ dhehi tebhyaḥ ||
RV_3,002.07a ā rodasī apṛṇad ā svar mahaj jātaṃ yad enam apaso adhārayan |
RV_3,002.07c so adhvarāya pari ṇīyate kavir atyo na vājasātaye canohitaḥ ||
RV_3,002.08a namasyata havyadātiṃ svadhvaraṃ duvasyata damyaṃ jātavedasam |
RV_3,002.08c rathīr ṛtasya bṛhato vicarṣaṇir agnir devānām abhavat purohitaḥ ||
RV_3,002.09a tisro yahvasya samidhaḥ parijmano 'gner apunann uśijo amṛtyavaḥ |
RV_3,002.09c tāsām ekām adadhur martye bhujam u lokam u dve upa jāmim īyatuḥ ||
RV_3,002.10a viśāṃ kaviṃ viśpatim mānuṣīr iṣaḥ saṃ sīm akṛṇvan svadhitiṃ na tejase |
RV_3,002.10c sa udvato nivato yāti veviṣat sa garbham eṣu bhuvaneṣu dīdharat ||
RV_3,002.11a sa jinvate jaṭhareṣu prajajñivān vṛṣā citreṣu nānadan na siṃhaḥ |
RV_3,002.11c vaiśvānaraḥ pṛthupājā amartyo vasu ratnā dayamāno vi dāśuṣe ||
RV_3,002.12a vaiśvānaraḥ pratnathā nākam āruhad divas pṛṣṭham bhandamānaḥ sumanmabhiḥ |
RV_3,002.12c sa pūrvavaj janayañ jantave dhanaṃ samānam ajmam pary eti jāgṛviḥ ||
RV_3,002.13a ṛtāvānaṃ yajñiyaṃ vipram ukthyam ā yaṃ dadhe mātariśvā divi kṣayam |
RV_3,002.13c taṃ citrayāmaṃ harikeśam īmahe sudītim agniṃ suvitāya navyase ||
RV_3,002.14a śuciṃ na yāmann iṣiraṃ svardṛśaṃ ketuṃ divo rocanasthām uṣarbudham |
RV_3,002.14c agnim mūrdhānaṃ divo apratiṣkutaṃ tam īmahe namasā vājinam bṛhat ||
RV_3,002.15a mandraṃ hotāraṃ śucim advayāvinaṃ damūnasam ukthyaṃ viśvacarṣaṇim |
RV_3,002.15c rathaṃ na citraṃ vapuṣāya darśatam manurhitaṃ sadam id rāya īmahe ||

RV_3,003.01a vaiśvānarāya pṛthupājase vipo ratnā vidhanta dharuṇeṣu gātave |
RV_3,003.01c agnir hi devāṃ amṛto duvasyaty athā dharmāṇi sanatā na dūduṣat ||
RV_3,003.02a antar dūto rodasī dasma īyate hotā niṣatto manuṣaḥ purohitaḥ |
RV_3,003.02c kṣayam bṛhantam pari bhūṣati dyubhir devebhir agnir iṣito dhiyāvasuḥ ||
RV_3,003.03a ketuṃ yajñānāṃ vidathasya sādhanaṃ viprāso agnim mahayanta cittibhiḥ |
RV_3,003.03c apāṃsi yasminn adhi saṃdadhur giras tasmin sumnāni yajamāna ā cake ||
RV_3,003.04a pitā yajñānām asuro vipaścitāṃ vimānam agnir vayunaṃ ca vāghatām |
RV_3,003.04c ā viveśa rodasī bhūrivarpasā purupriyo bhandate dhāmabhiḥ kaviḥ ||
RV_3,003.05a candram agniṃ candrarathaṃ harivrataṃ vaiśvānaram apsuṣadaṃ svarvidam |
RV_3,003.05c vigāhaṃ tūrṇiṃ taviṣībhir āvṛtam bhūrṇiṃ devāsa iha suśriyaṃ dadhuḥ ||
RV_3,003.06a agnir devebhir manuṣaś ca jantubhis tanvāno yajñam purupeśasaṃ dhiyā |
RV_3,003.06c rathīr antar īyate sādhadiṣṭibhir jīro damūnā abhiśasticātanaḥ ||
RV_3,003.07a agne jarasva svapatya āyuny ūrjā pinvasva sam iṣo didīhi naḥ |
RV_3,003.07c vayāṃsi jinva bṛhataś ca jāgṛva uśig devānām asi sukratur vipām ||
RV_3,003.08a viśpatiṃ yahvam atithiṃ naraḥ sadā yantāraṃ dhīnām uśijaṃ ca vāghatām |
RV_3,003.08c adhvarāṇāṃ cetanaṃ jātavedasam pra śaṃsanti namasā jūtibhir vṛdhe ||
RV_3,003.09a vibhāvā devaḥ suraṇaḥ pari kṣitīr agnir babhūva śavasā sumadrathaḥ |
RV_3,003.09c tasya vratāni bhūripoṣiṇo vayam upa bhūṣema dama ā suvṛktibhiḥ ||
RV_3,003.10a vaiśvānara tava dhāmāny ā cake yebhiḥ svarvid abhavo vicakṣaṇa |
RV_3,003.10c jāta āpṛṇo bhuvanāni rodasī agne tā viśvā paribhūr asi tmanā ||
RV_3,003.11a vaiśvānarasya daṃsanābhyo bṛhad ariṇād ekaḥ svapasyayā kaviḥ |
RV_3,003.11c ubhā pitarā mahayann ajāyatāgnir dyāvāpṛthivī bhūriretasā ||

RV_3,004.01a samit-samit sumanā bodhy asme śucā-śucā sumatiṃ rāsi vasvaḥ |
RV_3,004.01c ā deva devān yajathāya vakṣi sakhā sakhīn sumanā yakṣy agne ||
RV_3,004.02a yaṃ devāsas trir ahann āyajante dive-dive varuṇo mitro agniḥ |
RV_3,004.02c semaṃ yajñam madhumantaṃ kṛdhī nas tanūnapād ghṛtayoniṃ vidhantam ||
RV_3,004.03a pra dīdhitir viśvavārā jigāti hotāram iḷaḥ prathamaṃ yajadhyai |
RV_3,004.03c acchā namobhir vṛṣabhaṃ vandadhyai sa devān yakṣad iṣito yajīyān ||
RV_3,004.04a ūrdhvo vāṃ gātur adhvare akāry ūrdhvā śocīṃṣi prasthitā rajāṃsi |
RV_3,004.04c divo vā nābhā ny asādi hotā stṛṇīmahi devavyacā vi barhiḥ ||
RV_3,004.05a sapta hotrāṇi manasā vṛṇānā invanto viśvam prati yann ṛtena |
RV_3,004.05c nṛpeśaso vidatheṣu pra jātā abhīmaṃ yajñaṃ vi caranta pūrvīḥ ||
RV_3,004.06a ā bhandamāne uṣasā upāke uta smayete tanvā virūpe |
RV_3,004.06c yathā no mitro varuṇo jujoṣad indro marutvāṃ uta vā mahobhiḥ ||
RV_3,004.07a daivyā hotārā prathamā ny ṛñje sapta pṛkṣāsaḥ svadhayā madanti |
RV_3,004.07c ṛtaṃ śaṃsanta ṛtam it ta āhur anu vrataṃ vratapā dīdhyānāḥ ||
RV_3,004.08a ā bhāratī bhāratībhiḥ sajoṣā iḷā devair manuṣyebhir agniḥ |
RV_3,004.08c sarasvatī sārasvatebhir arvāk tisro devīr barhir edaṃ sadantu ||
RV_3,004.09a tan nas turīpam adha poṣayitnu deva tvaṣṭar vi rarāṇaḥ syasva |
RV_3,004.09c yato vīraḥ karmaṇyaḥ sudakṣo yuktagrāvā jāyate devakāmaḥ ||
RV_3,004.10a vanaspate 'va sṛjopa devān agnir haviḥ śamitā sūdayāti |
RV_3,004.10c sed u hotā satyataro yajāti yathā devānāṃ janimāni veda ||
RV_3,004.11a ā yāhy agne samidhāno arvāṅ indreṇa devaiḥ sarathaṃ turebhiḥ |
RV_3,004.11c barhir na āstām aditiḥ suputrā svāhā devā amṛtā mādayantām ||

RV_3,005.01a praty agnir uṣasaś cekitāno 'bodhi vipraḥ padavīḥ kavīnām |
RV_3,005.01c pṛthupājā devayadbhiḥ samiddho 'pa dvārā tamaso vahnir āvaḥ ||
RV_3,005.02a pred v agnir vāvṛdhe stomebhir gīrbhi stotṝṇāṃ namasya ukthaiḥ |
RV_3,005.02c pūrvīr ṛtasya saṃdṛśaś cakānaḥ saṃ dūto adyaud uṣaso viroke ||
RV_3,005.03a adhāyy agnir mānuṣīṣu vikṣv apāṃ garbho mitra ṛtena sādhan |
RV_3,005.03c ā haryato yajataḥ sānv asthād abhūd u vipro havyo matīnām ||
RV_3,005.04a mitro agnir bhavati yat samiddho mitro hotā varuṇo jātavedāḥ |
RV_3,005.04c mitro adhvaryur iṣiro damūnā mitraḥ sindhūnām uta parvatānām ||
RV_3,005.05a pāti priyaṃ ripo agram padaṃ veḥ pāti yahvaś caraṇaṃ sūryasya |
RV_3,005.05c pāti nābhā saptaśīrṣāṇam agniḥ pāti devānām upamādam ṛṣvaḥ ||
RV_3,005.06a ṛbhuś cakra īḍyaṃ cāru nāma viśvāni devo vayunāni vidvān |
RV_3,005.06c sasasya carma ghṛtavat padaṃ ves tad id agnī rakṣaty aprayucchan ||
RV_3,005.07a ā yonim agnir ghṛtavantam asthāt pṛthupragāṇam uśantam uśānaḥ |
RV_3,005.07c dīdyānaḥ śucir ṛṣvaḥ pāvakaḥ punaḥ-punar mātarā navyasī kaḥ ||
RV_3,005.08a sadyo jāta oṣadhībhir vavakṣe yadī vardhanti prasvo ghṛtena |
RV_3,005.08c āpa iva pravatā śumbhamānā uruṣyad agniḥ pitror upasthe ||
RV_3,005.09a ud u ṣṭutaḥ samidhā yahvo adyaud varṣman divo adhi nābhā pṛthivyāḥ |
RV_3,005.09c mitro agnir īḍyo mātariśvā dūto vakṣad yajathāya devān ||
RV_3,005.10a ud astambhīt samidhā nākam ṛṣvo 'gnir bhavann uttamo rocanānām |
RV_3,005.10c yadī bhṛgubhyaḥ pari mātariśvā guhā santaṃ havyavāhaṃ samīdhe ||
RV_3,005.11a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,005.11c syān naḥ sūnus tanayo vijāvāgne sā te sumatir bhūtv asme ||

RV_3,006.01a pra kāravo mananā vacyamānā devadrīcīṃ nayata devayantaḥ |
RV_3,006.01c dakṣiṇāvāḍ vājinī prācy eti havir bharanty agnaye ghṛtācī ||
RV_3,006.02a ā rodasī apṛṇā jāyamāna uta pra rikthā adha nu prayajyo |
RV_3,006.02c divaś cid agne mahinā pṛthivyā vacyantāṃ te vahnayaḥ saptajihvāḥ ||
RV_3,006.03a dyauś ca tvā pṛthivī yajñiyāso ni hotāraṃ sādayante damāya |
RV_3,006.03c yadī viśo mānuṣīr devayantīḥ prayasvatīr īḷate śukram arciḥ ||
RV_3,006.04a mahān sadhasthe dhruva ā niṣatto 'ntar dyāvā māhine haryamāṇaḥ |
RV_3,006.04c āskre sapatnī ajare amṛkte sabardughe urugāyasya dhenū ||
RV_3,006.05a vratā te agne mahato mahāni tava kratvā rodasī ā tatantha |
RV_3,006.05c tvaṃ dūto abhavo jāyamānas tvaṃ netā vṛṣabha carṣaṇīnām ||
RV_3,006.06a ṛtasya vā keśinā yogyābhir ghṛtasnuvā rohitā dhuri dhiṣva |
RV_3,006.06c athā vaha devān deva viśvān svadhvarā kṛṇuhi jātavedaḥ ||
RV_3,006.07a divaś cid ā te rucayanta rokā uṣo vibhātīr anu bhāsi pūrvīḥ |
RV_3,006.07c apo yad agna uśadhag vaneṣu hotur mandrasya panayanta devāḥ ||
RV_3,006.08a urau vā ye antarikṣe madanti divo vā ye rocane santi devāḥ |
RV_3,006.08c ūmā vā ye suhavāso yajatrā āyemire rathyo agne aśvāḥ ||
RV_3,006.09a aibhir agne sarathaṃ yāhy arvāṅ nānārathaṃ vā vibhavo hy aśvāḥ |
RV_3,006.09c patnīvatas triṃśataṃ trīṃś ca devān anuṣvadham ā vaha mādayasva ||
RV_3,006.10a sa hotā yasya rodasī cid urvī yajñaṃ-yajñam abhi vṛdhe gṛṇītaḥ |
RV_3,006.10c prācī adhvareva tasthatuḥ sumeke ṛtāvarī ṛtajātasya satye ||
RV_3,006.11a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,006.11c syān naḥ sūnus tanayo vijāvāgne sā te sumatir bhūtv asme ||

RV_3,007.01a pra ya āruḥ śitipṛṣṭhasya dhāser ā mātarā viviśuḥ sapta vāṇīḥ |
RV_3,007.01c parikṣitā pitarā saṃ carete pra sarsrāte dīrgham āyuḥ prayakṣe ||
RV_3,007.02a divakṣaso dhenavo vṛṣṇo aśvā devīr ā tasthau madhumad vahantīḥ |
RV_3,007.02c ṛtasya tvā sadasi kṣemayantam pary ekā carati vartaniṃ gauḥ ||
RV_3,007.03a ā sīm arohat suyamā bhavantīḥ patiś cikitvān rayivid rayīṇām |
RV_3,007.03c pra nīlapṛṣṭho atasasya dhāses tā avāsayat purudhapratīkaḥ ||
RV_3,007.04a mahi tvāṣṭram ūrjayantīr ajuryaṃ stabhūyamānaṃ vahato vahanti |
RV_3,007.04c vy aṅgebhir didyutānaḥ sadhastha ekām iva rodasī ā viveśa ||
RV_3,007.05a jānanti vṛṣṇo aruṣasya śevam uta bradhnasya śāsane raṇanti |
RV_3,007.05c divorucaḥ suruco rocamānā iḷā yeṣāṃ gaṇyā māhinā gīḥ ||
RV_3,007.06a uto pitṛbhyām pravidānu ghoṣam maho mahadbhyām anayanta śūṣam |
RV_3,007.06c ukṣā ha yatra pari dhānam aktor anu svaṃ dhāma jaritur vavakṣa ||
RV_3,007.07a adhvaryubhiḥ pañcabhiḥ sapta viprāḥ priyaṃ rakṣante nihitam padaṃ veḥ |
RV_3,007.07c prāñco madanty ukṣaṇo ajuryā devā devānām anu hi vratā guḥ ||
RV_3,007.08a daivyā hotārā prathamā ny ṛñje sapta pṛkṣāsaḥ svadhayā madanti |
RV_3,007.08c ṛtaṃ śaṃsanta ṛtam it ta āhur anu vrataṃ vratapā dīdhyānāḥ ||
RV_3,007.09a vṛṣāyante mahe atyāya pūrvīr vṛṣṇe citrāya raśmayaḥ suyāmāḥ |
RV_3,007.09c deva hotar mandrataraś cikitvān maho devān rodasī eha vakṣi ||
RV_3,007.10a pṛkṣaprayajo draviṇaḥ suvācaḥ suketava uṣaso revad ūṣuḥ |
RV_3,007.10c uto cid agne mahinā pṛthivyāḥ kṛtaṃ cid enaḥ sam mahe daśasya ||
RV_3,007.11a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,007.11c syān naḥ sūnus tanayo vijāvāgne sā te sumatir bhūtv asme ||

RV_3,008.01a añjanti tvām adhvare devayanto vanaspate madhunā daivyena |
RV_3,008.01c yad ūrdhvas tiṣṭhā draviṇeha dhattād yad vā kṣayo mātur asyā upasthe ||
RV_3,008.02a samiddhasya śrayamāṇaḥ purastād brahma vanvāno ajaraṃ suvīram |
RV_3,008.02c āre asmad amatim bādhamāna uc chrayasva mahate saubhagāya ||
RV_3,008.03a uc chrayasva vanaspate varṣman pṛthivyā adhi |
RV_3,008.03c sumitī mīyamāno varco dhā yajñavāhase ||
RV_3,008.04a yuvā suvāsāḥ parivīta āgāt sa u śreyān bhavati jāyamānaḥ |
RV_3,008.04c taṃ dhīrāsaḥ kavaya un nayanti svādhyo manasā devayantaḥ ||
RV_3,008.05a jāto jāyate sudinatve ahnāṃ samarya ā vidathe vardhamānaḥ |
RV_3,008.05c punanti dhīrā apaso manīṣā devayā vipra ud iyarti vācam ||
RV_3,008.06a yān vo naro devayanto nimimyur vanaspate svadhitir vā tatakṣa |
RV_3,008.06c te devāsaḥ svaravas tasthivāṃsaḥ prajāvad asme didhiṣantu ratnam ||
RV_3,008.07a ye vṛkṇāso adhi kṣami nimitāso yatasrucaḥ |
RV_3,008.07c te no vyantu vāryaṃ devatrā kṣetrasādhasaḥ ||
RV_3,008.08a ādityā rudrā vasavaḥ sunīthā dyāvākṣāmā pṛthivī antarikṣam |
RV_3,008.08c sajoṣaso yajñam avantu devā ūrdhvaṃ kṛṇvantv adhvarasya ketum ||
RV_3,008.09a haṃsā iva śreṇiśo yatānāḥ śukrā vasānāḥ svaravo na āguḥ |
RV_3,008.09c unnīyamānāḥ kavibhiḥ purastād devā devānām api yanti pāthaḥ ||
RV_3,008.10a śṛṅgāṇīvec chṛṅgiṇāṃ saṃ dadṛśre caṣālavantaḥ svaravaḥ pṛthivyām |
RV_3,008.10c vāghadbhir vā vihave śroṣamāṇā asmāṃ avantu pṛtanājyeṣu ||
RV_3,008.11a vanaspate śatavalśo vi roha sahasravalśā vi vayaṃ ruhema |
RV_3,008.11c yaṃ tvām ayaṃ svadhitis tejamānaḥ praṇināya mahate saubhagāya ||

RV_3,009.01a sakhāyas tvā vavṛmahe devam martāsa ūtaye |
RV_3,009.01c apāṃ napātaṃ subhagaṃ sudīditiṃ supratūrtim anehasam ||
RV_3,009.02a kāyamāno vanā tvaṃ yan mātṝr ajagann apaḥ |
RV_3,009.02c na tat te agne pramṛṣe nivartanaṃ yad dūre sann ihābhavaḥ ||
RV_3,009.03a ati tṛṣṭaṃ vavakṣithāthaiva sumanā asi |
RV_3,009.03c pra-prānye yanti pary anya āsate yeṣāṃ sakhye asi śritaḥ ||
RV_3,009.04a īyivāṃsam ati sridhaḥ śaśvatīr ati saścataḥ |
RV_3,009.04c anv īm avindan nicirāso adruho 'psu siṃham iva śritam ||
RV_3,009.05a sasṛvāṃsam iva tmanāgnim itthā tirohitam |
RV_3,009.05c ainaṃ nayan mātariśvā parāvato devebhyo mathitam pari ||
RV_3,009.06a taṃ tvā martā agṛbhṇata devebhyo havyavāhana |
RV_3,009.06c viśvān yad yajñāṃ abhipāsi mānuṣa tava kratvā yaviṣṭhya ||
RV_3,009.07a tad bhadraṃ tava daṃsanā pākāya cic chadayati |
RV_3,009.07c tvāṃ yad agne paśavaḥ samāsate samiddham apiśarvare ||
RV_3,009.08a ā juhotā svadhvaraṃ śīram pāvakaśociṣam |
RV_3,009.08c āśuṃ dūtam ajiram pratnam īḍyaṃ śruṣṭī devaṃ saparyata ||
RV_3,009.09a trīṇi śatā trī sahasrāṇy agniṃ triṃśac ca devā nava cāsaparyan |
RV_3,009.09c aukṣan ghṛtair astṛṇan barhir asmā ād id dhotāraṃ ny asādayanta ||

RV_3,010.01a tvām agne manīṣiṇaḥ samrājaṃ carṣaṇīnām |
RV_3,010.01c devam martāsa indhate sam adhvare ||
RV_3,010.02a tvāṃ yajñeṣv ṛtvijam agne hotāram īḷate |
RV_3,010.02c gopā ṛtasya dīdihi sve dame ||
RV_3,010.03a sa ghā yas te dadāśati samidhā jātavedase |
RV_3,010.03c so agne dhatte suvīryaṃ sa puṣyati ||
RV_3,010.04a sa ketur adhvarāṇām agnir devebhir ā gamat |
RV_3,010.04c añjānaḥ sapta hotṛbhir haviṣmate ||
RV_3,010.05a pra hotre pūrvyaṃ vaco 'gnaye bharatā bṛhat |
RV_3,010.05c vipāṃ jyotīṃṣi bibhrate na vedhase ||
RV_3,010.06a agniṃ vardhantu no giro yato jāyata ukthyaḥ |
RV_3,010.06c mahe vājāya draviṇāya darśataḥ ||
RV_3,010.07a agne yajiṣṭho adhvare devān devayate yaja |
RV_3,010.07c hotā mandro vi rājasy ati sridhaḥ ||
RV_3,010.08a sa naḥ pāvaka dīdihi dyumad asme suvīryam |
RV_3,010.08c bhavā stotṛbhyo antamaḥ svastaye ||
RV_3,010.09a taṃ tvā viprā vipanyavo jāgṛvāṃsaḥ sam indhate |
RV_3,010.09c havyavāham amartyaṃ sahovṛdham ||

RV_3,011.01a agnir hotā purohito 'dhvarasya vicarṣaṇiḥ |
RV_3,011.01c sa veda yajñam ānuṣak ||
RV_3,011.02a sa havyavāḷ amartya uśig dūtaś canohitaḥ |
RV_3,011.02c agnir dhiyā sam ṛṇvati ||
RV_3,011.03a agnir dhiyā sa cetati ketur yajñasya pūrvyaḥ |
RV_3,011.03c arthaṃ hy asya taraṇi ||
RV_3,011.04a agniṃ sūnuṃ sanaśrutaṃ sahaso jātavedasam |
RV_3,011.04c vahniṃ devā akṛṇvata ||
RV_3,011.05a adābhyaḥ puraetā viśām agnir mānuṣīṇām |
RV_3,011.05c tūrṇī rathaḥ sadā navaḥ ||
RV_3,011.06a sāhvān viśvā abhiyujaḥ kratur devānām amṛktaḥ |
RV_3,011.06c agnis tuviśravastamaḥ ||
RV_3,011.07a abhi prayāṃsi vāhasā dāśvāṃ aśnoti martyaḥ |
RV_3,011.07c kṣayam pāvakaśociṣaḥ ||
RV_3,011.08a pari viśvāni sudhitāgner aśyāma manmabhiḥ |
RV_3,011.08c viprāso jātavedasaḥ ||
RV_3,011.09a agne viśvāni vāryā vājeṣu saniṣāmahe |
RV_3,011.09c tve devāsa erire ||

RV_3,012.01a indrāgnī ā gataṃ sutaṃ gīrbhir nabho vareṇyam |
RV_3,012.01c asya pātaṃ dhiyeṣitā ||
RV_3,012.02a indrāgnī jarituḥ sacā yajño jigāti cetanaḥ |
RV_3,012.02c ayā pātam imaṃ sutam ||
RV_3,012.03a indram agniṃ kavicchadā yajñasya jūtyā vṛṇe |
RV_3,012.03c tā somasyeha tṛmpatām ||
RV_3,012.04a tośā vṛtrahaṇā huve sajitvānāparājitā |
RV_3,012.04c indrāgnī vājasātamā ||
RV_3,012.05a pra vām arcanty ukthino nīthāvido jaritāraḥ |
RV_3,012.05c indrāgnī iṣa ā vṛṇe ||
RV_3,012.06a indrāgnī navatim puro dāsapatnīr adhūnutam |
RV_3,012.06c sākam ekena karmaṇā ||
RV_3,012.07a indrāgnī apasas pary upa pra yanti dhītayaḥ |
RV_3,012.07c ṛtasya pathyā anu ||
RV_3,012.08a indrāgnī taviṣāṇi vāṃ sadhasthāni prayāṃsi ca |
RV_3,012.08c yuvor aptūryaṃ hitam ||
RV_3,012.09a indrāgnī rocanā divaḥ pari vājeṣu bhūṣathaḥ |
RV_3,012.09c tad vāṃ ceti pra vīryam ||

RV_3,013.01a pra vo devāyāgnaye barhiṣṭham arcāsmai |
RV_3,013.01c gamad devebhir ā sa no yajiṣṭho barhir ā sadat ||
RV_3,013.02a ṛtāvā yasya rodasī dakṣaṃ sacanta ūtayaḥ |
RV_3,013.02c haviṣmantas tam īḷate taṃ saniṣyanto 'vase ||
RV_3,013.03a sa yantā vipra eṣāṃ sa yajñānām athā hi ṣaḥ |
RV_3,013.03c agniṃ taṃ vo duvasyata dātā yo vanitā magham ||
RV_3,013.04a sa naḥ śarmāṇi vītaye 'gnir yacchatu śantamā |
RV_3,013.04c yato naḥ pruṣṇavad vasu divi kṣitibhyo apsv ā ||
RV_3,013.05a dīdivāṃsam apūrvyaṃ vasvībhir asya dhītibhiḥ |
RV_3,013.05c ṛkvāṇo agnim indhate hotāraṃ viśpatiṃ viśām ||
RV_3,013.06a uta no brahmann aviṣa uktheṣu devahūtamaḥ |
RV_3,013.06c śaṃ naḥ śocā marudvṛdho 'gne sahasrasātamaḥ ||
RV_3,013.07a nū no rāsva sahasravat tokavat puṣṭimad vasu |
RV_3,013.07c dyumad agne suvīryaṃ varṣiṣṭham anupakṣitam ||

RV_3,014.01a ā hotā mandro vidathāny asthāt satyo yajvā kavitamaḥ sa vedhāḥ |
RV_3,014.01c vidyudrathaḥ sahasas putro agniḥ śociṣkeśaḥ pṛthivyām pājo aśret ||
RV_3,014.02a ayāmi te namauktiṃ juṣasva ṛtāvas tubhyaṃ cetate sahasvaḥ |
RV_3,014.02c vidvāṃ ā vakṣi viduṣo ni ṣatsi madhya ā barhir ūtaye yajatra ||
RV_3,014.03a dravatāṃ ta uṣasā vājayantī agne vātasya pathyābhir accha |
RV_3,014.03c yat sīm añjanti pūrvyaṃ havirbhir ā vandhureva tasthatur duroṇe ||
RV_3,014.04a mitraś ca tubhyaṃ varuṇaḥ sahasvo 'gne viśve marutaḥ sumnam arcan |
RV_3,014.04c yac chociṣā sahasas putra tiṣṭhā abhi kṣitīḥ prathayan sūryo nṝn ||
RV_3,014.05a vayaṃ te adya rarimā hi kāmam uttānahastā namasopasadya |
RV_3,014.05c yajiṣṭhena manasā yakṣi devān asredhatā manmanā vipro agne ||
RV_3,014.06a tvad dhi putra sahaso vi pūrvīr devasya yanty ūtayo vi vājāḥ |
RV_3,014.06c tvaṃ dehi sahasriṇaṃ rayiṃ no 'drogheṇa vacasā satyam agne ||
RV_3,014.07a tubhyaṃ dakṣa kavikrato yānīmā deva martāso adhvare akarma |
RV_3,014.07c tvaṃ viśvasya surathasya bodhi sarvaṃ tad agne amṛta svadeha ||

RV_3,015.01a vi pājasā pṛthunā śośucāno bādhasva dviṣo rakṣaso amīvāḥ |
RV_3,015.01c suśarmaṇo bṛhataḥ śarmaṇi syām agner ahaṃ suhavasya praṇītau ||
RV_3,015.02a tvaṃ no asyā uṣaso vyuṣṭau tvaṃ sūra udite bodhi gopāḥ |
RV_3,015.02c janmeva nityaṃ tanayaṃ juṣasva stomam me agne tanvā sujāta ||
RV_3,015.03a tvaṃ nṛcakṣā vṛṣabhānu pūrvīḥ kṛṣṇāsv agne aruṣo vi bhāhi |
RV_3,015.03c vaso neṣi ca parṣi cāty aṃhaḥ kṛdhī no rāya uśijo yaviṣṭha ||
RV_3,015.04a aṣāḷho agne vṛṣabho didīhi puro viśvāḥ saubhagā saṃjigīvān |
RV_3,015.04c yajñasya netā prathamasya pāyor jātavedo bṛhataḥ supraṇīte ||
RV_3,015.05a acchidrā śarma jaritaḥ purūṇi devāṃ acchā dīdyānaḥ sumedhāḥ |
RV_3,015.05c ratho na sasnir abhi vakṣi vājam agne tvaṃ rodasī naḥ sumeke ||
RV_3,015.06a pra pīpaya vṛṣabha jinva vājān agne tvaṃ rodasī naḥ sudoghe |
RV_3,015.06c devebhir deva surucā rucāno mā no martasya durmatiḥ pari ṣṭhāt ||
RV_3,015.07a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,015.07c syān naḥ sūnus tanayo vijāvāgne sā te sumatir bhūtv asme ||

RV_3,016.01a ayam agniḥ suvīryasyeśe mahaḥ saubhagasya |
RV_3,016.01c rāya īśe svapatyasya gomata īśe vṛtrahathānām ||
RV_3,016.02a imaṃ naro marutaḥ saścatā vṛdhaṃ yasmin rāyaḥ śevṛdhāsaḥ |
RV_3,016.02c abhi ye santi pṛtanāsu dūḍhyo viśvāhā śatrum ādabhuḥ ||
RV_3,016.03a sa tvaṃ no rāyaḥ śiśīhi mīḍhvo agne suvīryasya |
RV_3,016.03c tuvidyumna varṣiṣṭhasya prajāvato 'namīvasya śuṣmiṇaḥ ||
RV_3,016.04a cakrir yo viśvā bhuvanābhi sāsahiś cakrir deveṣv ā duvaḥ |
RV_3,016.04c ā deveṣu yatata ā suvīrya ā śaṃsa uta nṛṇām ||
RV_3,016.05a mā no agne 'mataye māvīratāyai rīradhaḥ |
RV_3,016.05c māgotāyai sahasas putra mā nide 'pa dveṣāṃsy ā kṛdhi ||
RV_3,016.06a śagdhi vājasya subhaga prajāvato 'gne bṛhato adhvare |
RV_3,016.06c saṃ rāyā bhūyasā sṛja mayobhunā tuvidyumna yaśasvatā ||

RV_3,017.01a samidhyamānaḥ prathamānu dharmā sam aktubhir ajyate viśvavāraḥ |
RV_3,017.01c śociṣkeśo ghṛtanirṇik pāvakaḥ suyajño agnir yajathāya devān ||
RV_3,017.02a yathāyajo hotram agne pṛthivyā yathā divo jātavedaś cikitvān |
RV_3,017.02c evānena haviṣā yakṣi devān manuṣvad yajñam pra tiremam adya ||
RV_3,017.03a trīṇy āyūṃṣi tava jātavedas tisra ājānīr uṣasas te agne |
RV_3,017.03c tābhir devānām avo yakṣi vidvān athā bhava yajamānāya śaṃ yoḥ ||
RV_3,017.04a agniṃ sudītiṃ sudṛśaṃ gṛṇanto namasyāmas tveḍyaṃ jātavedaḥ |
RV_3,017.04c tvāṃ dūtam aratiṃ havyavāhaṃ devā akṛṇvann amṛtasya nābhim ||
RV_3,017.05a yas tvad dhotā pūrvo agne yajīyān dvitā ca sattā svadhayā ca śambhuḥ |
RV_3,017.05c tasyānu dharma pra yajā cikitvo 'tha no dhā adhvaraṃ devavītau ||

RV_3,018.01a bhavā no agne sumanā upetau sakheva sakhye pitareva sādhuḥ |
RV_3,018.01c purudruho hi kṣitayo janānām prati pratīcīr dahatād arātīḥ ||
RV_3,018.02a tapo ṣv agne antarāṃ amitrān tapā śaṃsam araruṣaḥ parasya |
RV_3,018.02c tapo vaso cikitāno acittān vi te tiṣṭhantām ajarā ayāsaḥ ||
RV_3,018.03a idhmenāgna icchamāno ghṛtena juhomi havyaṃ tarase balāya |
RV_3,018.03c yāvad īśe brahmaṇā vandamāna imāṃ dhiyaṃ śataseyāya devīm ||
RV_3,018.04a uc chociṣā sahasas putra stuto bṛhad vayaḥ śaśamāneṣu dhehi |
RV_3,018.04c revad agne viśvāmitreṣu śaṃ yor marmṛjmā te tanvam bhūri kṛtvaḥ ||
RV_3,018.05a kṛdhi ratnaṃ susanitar dhanānāṃ sa ghed agne bhavasi yat samiddhaḥ |
RV_3,018.05c stotur duroṇe subhagasya revat sṛprā karasnā dadhiṣe vapūṃṣi ||

RV_3,019.01a agniṃ hotāram pra vṛṇe miyedhe gṛtsaṃ kaviṃ viśvavidam amūram |
RV_3,019.01c sa no yakṣad devatātā yajīyān rāye vājāya vanate maghāni ||
RV_3,019.02a pra te agne haviṣmatīm iyarmy acchā sudyumnāṃ rātinīṃ ghṛtācīm |
RV_3,019.02c pradakṣiṇid devatātim urāṇaḥ saṃ rātibhir vasubhir yajñam aśret ||
RV_3,019.03a sa tejīyasā manasā tvota uta śikṣa svapatyasya śikṣoḥ |
RV_3,019.03c agne rāyo nṛtamasya prabhūtau bhūyāma te suṣṭutayaś ca vasvaḥ ||
RV_3,019.04a bhūrīṇi hi tve dadhire anīkāgne devasya yajyavo janāsaḥ |
RV_3,019.04c sa ā vaha devatātiṃ yaviṣṭha śardho yad adya divyaṃ yajāsi ||
RV_3,019.05a yat tvā hotāram anajan miyedhe niṣādayanto yajathāya devāḥ |
RV_3,019.05c sa tvaṃ no agne 'viteha bodhy adhi śravāṃsi dhehi nas tanūṣu ||

RV_3,020.01a agnim uṣasam aśvinā dadhikrāṃ vyuṣṭiṣu havate vahnir ukthaiḥ |
RV_3,020.01c sujyotiṣo naḥ śṛṇvantu devāḥ sajoṣaso adhvaraṃ vāvaśānāḥ ||
RV_3,020.02a agne trī te vājinā trī ṣadhasthā tisras te jihvā ṛtajāta pūrvīḥ |
RV_3,020.02c tisra u te tanvo devavātās tābhir naḥ pāhi giro aprayucchan ||
RV_3,020.03a agne bhūrīṇi tava jātavedo deva svadhāvo 'mṛtasya nāma |
RV_3,020.03c yāś ca māyā māyināṃ viśvaminva tve pūrvīḥ saṃdadhuḥ pṛṣṭabandho ||
RV_3,020.04a agnir netā bhaga iva kṣitīnāṃ daivīnāṃ deva ṛtupā ṛtāvā |
RV_3,020.04c sa vṛtrahā sanayo viśvavedāḥ parṣad viśvāti duritā gṛṇantam ||
RV_3,020.05a dadhikrām agnim uṣasaṃ ca devīm bṛhaspatiṃ savitāraṃ ca devam |
RV_3,020.05c aśvinā mitrāvaruṇā bhagaṃ ca vasūn rudrāṃ ādityāṃ iha huve ||

RV_3,021.01a imaṃ no yajñam amṛteṣu dhehīmā havyā jātavedo juṣasva |
RV_3,021.01c stokānām agne medaso ghṛtasya hotaḥ prāśāna prathamo niṣadya ||
RV_3,021.02a ghṛtavantaḥ pāvaka te stokā ścotanti medasaḥ |
RV_3,021.02c svadharman devavītaye śreṣṭhaṃ no dhehi vāryam ||
RV_3,021.03a tubhyaṃ stokā ghṛtaścuto 'gne viprāya santya |
RV_3,021.03c ṛṣiḥ śreṣṭhaḥ sam idhyase yajñasya prāvitā bhava ||
RV_3,021.04a tubhyaṃ ścotanty adhrigo śacīva stokāso agne medaso ghṛtasya |
RV_3,021.04c kaviśasto bṛhatā bhānunāgā havyā juṣasva medhira ||
RV_3,021.05a ojiṣṭhaṃ te madhyato meda udbhṛtam pra te vayaṃ dadāmahe |
RV_3,021.05c ścotanti te vaso stokā adhi tvaci prati tān devaśo vihi ||

RV_3,022.01a ayaṃ so agnir yasmin somam indraḥ sutaṃ dadhe jaṭhare vāvaśānaḥ |
RV_3,022.01c sahasriṇaṃ vājam atyaṃ na saptiṃ sasavān san stūyase jātavedaḥ ||
RV_3,022.02a agne yat te divi varcaḥ pṛthivyāṃ yad oṣadhīṣv apsv ā yajatra |
RV_3,022.02c yenāntarikṣam urv ātatantha tveṣaḥ sa bhānur arṇavo nṛcakṣāḥ ||
RV_3,022.03a agne divo arṇam acchā jigāsy acchā devāṃ ūciṣe dhiṣṇyā ye |
RV_3,022.03c yā rocane parastāt sūryasya yāś cāvastād upatiṣṭhanta āpaḥ ||
RV_3,022.04a purīṣyāso agnayaḥ prāvaṇebhiḥ sajoṣasaḥ |
RV_3,022.04c juṣantāṃ yajñam adruho 'namīvā iṣo mahīḥ ||
RV_3,022.05a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,022.05c syān naḥ sūnus tanayo vijāvāgne sā te sumatir bhūtv asme ||

RV_3,023.01a nirmathitaḥ sudhita ā sadhasthe yuvā kavir adhvarasya praṇetā |
RV_3,023.01c jūryatsv agnir ajaro vaneṣv atrā dadhe amṛtaṃ jātavedāḥ ||
RV_3,023.02a amanthiṣṭām bhāratā revad agniṃ devaśravā devavātaḥ sudakṣam |
RV_3,023.02c agne vi paśya bṛhatābhi rāyeṣāṃ no netā bhavatād anu dyūn ||
RV_3,023.03a daśa kṣipaḥ pūrvyaṃ sīm ajījanan sujātam mātṛṣu priyam |
RV_3,023.03c agniṃ stuhi daivavātaṃ devaśravo yo janānām asad vaśī ||
RV_3,023.04a ni tvā dadhe vara ā pṛthivyā iḷāyās pade sudinatve ahnām |
RV_3,023.04c dṛṣadvatyām mānuṣa āpayāyāṃ sarasvatyāṃ revad agne didīhi ||
RV_3,023.05a iḷām agne purudaṃsaṃ saniṃ goḥ śaśvattamaṃ havamānāya sādha |
RV_3,023.05c syān naḥ sūnus tanayo vijāvāgne sā te sumatir bhūtv asme ||

RV_3,024.01a agne sahasva pṛtanā abhimātīr apāsya |
RV_3,024.01c duṣṭaras tarann arātīr varco dhā yajñavāhase ||
RV_3,024.02a agna iḷā sam idhyase vītihotro amartyaḥ |
RV_3,024.02c juṣasva sū no adhvaram ||
RV_3,024.03a agne dyumnena jāgṛve sahasaḥ sūnav āhuta |
RV_3,024.03c edam barhiḥ sado mama ||
RV_3,024.04a agne viśvebhir agnibhir devebhir mahayā giraḥ |
RV_3,024.04c yajñeṣu ya u cāyavaḥ ||
RV_3,024.05a agne dā dāśuṣe rayiṃ vīravantam parīṇasam |
RV_3,024.05c śiśīhi naḥ sūnumataḥ ||

RV_3,025.01a agne divaḥ sūnur asi pracetās tanā pṛthivyā uta viśvavedāḥ |
RV_3,025.01c ṛdhag devāṃ iha yajā cikitvaḥ ||
RV_3,025.02a agniḥ sanoti vīryāṇi vidvān sanoti vājam amṛtāya bhūṣan |
RV_3,025.02c sa no devāṃ eha vahā purukṣo ||
RV_3,025.03a agnir dyāvāpṛthivī viśvajanye ā bhāti devī amṛte amūraḥ |
RV_3,025.03c kṣayan vājaiḥ puruścandro namobhiḥ ||
RV_3,025.04a agna indraś ca dāśuṣo duroṇe sutāvato yajñam ihopa yātam |
RV_3,025.04c amardhantā somapeyāya devā ||
RV_3,025.05a agne apāṃ sam idhyase duroṇe nityaḥ sūno sahaso jātavedaḥ |
RV_3,025.05c sadhasthāni mahayamāna ūtī ||

RV_3,026.01a vaiśvānaram manasāgniṃ nicāyyā haviṣmanto anuṣatyaṃ svarvidam |
RV_3,026.01c sudānuṃ devaṃ rathiraṃ vasūyavo gīrbhī raṇvaṃ kuśikāso havāmahe ||
RV_3,026.02a taṃ śubhram agnim avase havāmahe vaiśvānaram mātariśvānam ukthyam |
RV_3,026.02c bṛhaspatim manuṣo devatātaye vipraṃ śrotāram atithiṃ raghuṣyadam ||
RV_3,026.03a aśvo na krandañ janibhiḥ sam idhyate vaiśvānaraḥ kuśikebhir yuge-yuge |
RV_3,026.03c sa no agniḥ suvīryaṃ svaśvyaṃ dadhātu ratnam amṛteṣu jāgṛviḥ ||
RV_3,026.04a pra yantu vājās taviṣībhir agnayaḥ śubhe sammiślāḥ pṛṣatīr ayukṣata |
RV_3,026.04c bṛhadukṣo maruto viśvavedasaḥ pra vepayanti parvatāṃ adābhyāḥ ||
RV_3,026.05a agniśriyo maruto viśvakṛṣṭaya ā tveṣam ugram ava īmahe vayam |
RV_3,026.05c te svānino rudriyā varṣanirṇijaḥ siṃhā na heṣakratavaḥ sudānavaḥ ||
RV_3,026.06a vrātaṃ-vrātaṃ gaṇaṃ-gaṇaṃ suśastibhir agner bhāmam marutām oja īmahe |
RV_3,026.06c pṛṣadaśvāso anavabhrarādhaso gantāro yajñaṃ vidatheṣu dhīrāḥ ||
RV_3,026.07a agnir asmi janmanā jātavedā ghṛtam me cakṣur amṛtam ma āsan |
RV_3,026.07c arkas tridhātū rajaso vimāno 'jasro gharmo havir asmi nāma ||
RV_3,026.08a tribhiḥ pavitrair apupod dhy arkaṃ hṛdā matiṃ jyotir anu prajānan |
RV_3,026.08c varṣiṣṭhaṃ ratnam akṛta svadhābhir ād id dyāvāpṛthivī pary apaśyat ||
RV_3,026.09a śatadhāram utsam akṣīyamāṇaṃ vipaścitam pitaraṃ vaktvānām |
RV_3,026.09c meḷim madantam pitror upasthe taṃ rodasī pipṛtaṃ satyavācam ||

RV_3,027.01a pra vo vājā abhidyavo haviṣmanto ghṛtācyā |
RV_3,027.01c devāñ jigāti sumnayuḥ ||
RV_3,027.02a īḷe agniṃ vipaścitaṃ girā yajñasya sādhanam |
RV_3,027.02c śruṣṭīvānaṃ dhitāvānam ||
RV_3,027.03a agne śakema te vayaṃ yamaṃ devasya vājinaḥ |
RV_3,027.03c ati dveṣāṃsi tarema ||
RV_3,027.04a samidhyamāno adhvare 'gniḥ pāvaka īḍyaḥ |
RV_3,027.04c śociṣkeśas tam īmahe ||
RV_3,027.05a pṛthupājā amartyo ghṛtanirṇik svāhutaḥ |
RV_3,027.05c agnir yajñasya havyavāṭ ||
RV_3,027.06a taṃ sabādho yatasruca itthā dhiyā yajñavantaḥ |
RV_3,027.06c ā cakrur agnim ūtaye ||
RV_3,027.07a hotā devo amartyaḥ purastād eti māyayā |
RV_3,027.07c vidathāni pracodayan ||
RV_3,027.08a vājī vājeṣu dhīyate 'dhvareṣu pra ṇīyate |
RV_3,027.08c vipro yajñasya sādhanaḥ ||
RV_3,027.09a dhiyā cakre vareṇyo bhūtānāṃ garbham ā dadhe |
RV_3,027.09c dakṣasya pitaraṃ tanā ||
RV_3,027.10a ni tvā dadhe vareṇyaṃ dakṣasyeḷā sahaskṛta |
RV_3,027.10c agne sudītim uśijam ||
RV_3,027.11a agniṃ yanturam apturam ṛtasya yoge vanuṣaḥ |
RV_3,027.11c viprā vājaiḥ sam indhate ||
RV_3,027.12a ūrjo napātam adhvare dīdivāṃsam upa dyavi |
RV_3,027.12c agnim īḷe kavikratum ||
RV_3,027.13a īḷenyo namasyas tiras tamāṃsi darśataḥ |
RV_3,027.13c sam agnir idhyate vṛṣā ||
RV_3,027.14a vṛṣo agniḥ sam idhyate 'śvo na devavāhanaḥ |
RV_3,027.14c taṃ haviṣmanta īḷate ||
RV_3,027.15a vṛṣaṇaṃ tvā vayaṃ vṛṣan vṛṣaṇaḥ sam idhīmahi |
RV_3,027.15c agne dīdyatam bṛhat ||

RV_3,028.01a agne juṣasva no haviḥ puroḷāśaṃ jātavedaḥ |
RV_3,028.01c prātaḥsāve dhiyāvaso ||
RV_3,028.02a puroḷā agne pacatas tubhyaṃ vā ghā pariṣkṛtaḥ |
RV_3,028.02c taṃ juṣasva yaviṣṭhya ||
RV_3,028.03a agne vīhi puroḷāśam āhutaṃ tiroahnyam |
RV_3,028.03c sahasaḥ sūnur asy adhvare hitaḥ ||
RV_3,028.04a mādhyandine savane jātavedaḥ puroḷāśam iha kave juṣasva |
RV_3,028.04c agne yahvasya tava bhāgadheyaṃ na pra minanti vidatheṣu dhīrāḥ ||
RV_3,028.05a agne tṛtīye savane hi kāniṣaḥ puroḷāśaṃ sahasaḥ sūnav āhutam |
RV_3,028.05c athā deveṣv adhvaraṃ vipanyayā dhā ratnavantam amṛteṣu jāgṛvim ||
RV_3,028.06a agne vṛdhāna āhutim puroḷāśaṃ jātavedaḥ |
RV_3,028.06c juṣasva tiroahnyam ||

RV_3,029.01a astīdam adhimanthanam asti prajananaṃ kṛtam |
RV_3,029.01c etāṃ viśpatnīm ā bharāgnim manthāma pūrvathā ||
RV_3,029.02a araṇyor nihito jātavedā garbha iva sudhito garbhiṇīṣu |
RV_3,029.02c dive-diva īḍyo jāgṛvadbhir haviṣmadbhir manuṣyebhir agniḥ ||
RV_3,029.03a uttānāyām ava bharā cikitvān sadyaḥ pravītā vṛṣaṇaṃ jajāna |
RV_3,029.03c aruṣastūpo ruśad asya pāja iḷāyās putro vayune 'janiṣṭa ||
RV_3,029.04a iḷāyās tvā pade vayaṃ nābhā pṛthivyā adhi |
RV_3,029.04c jātavedo ni dhīmahy agne havyāya voḷhave ||
RV_3,029.05a manthatā naraḥ kavim advayantam pracetasam amṛtaṃ supratīkam |
RV_3,029.05c yajñasya ketum prathamam purastād agniṃ naro janayatā suśevam ||
RV_3,029.06a yadī manthanti bāhubhir vi rocate 'śvo na vājy aruṣo vaneṣv ā |
RV_3,029.06c citro na yāmann aśvinor anivṛtaḥ pari vṛṇakty aśmanas tṛṇā dahan ||
RV_3,029.07a jāto agnī rocate cekitāno vājī vipraḥ kaviśastaḥ sudānuḥ |
RV_3,029.07c yaṃ devāsa īḍyaṃ viśvavidaṃ havyavāham adadhur adhvareṣu ||
RV_3,029.08a sīda hotaḥ sva u loke cikitvān sādayā yajñaṃ sukṛtasya yonau |
RV_3,029.08c devāvīr devān haviṣā yajāsy agne bṛhad yajamāne vayo dhāḥ ||
RV_3,029.09a kṛṇota dhūmaṃ vṛṣaṇaṃ sakhāyo 'sredhanta itana vājam accha |
RV_3,029.09c ayam agniḥ pṛtanāṣāṭ suvīro yena devāso asahanta dasyūn ||
RV_3,029.10a ayaṃ te yonir ṛtviyo yato jāto arocathāḥ |
RV_3,029.10c taṃ jānann agna ā sīdāthā no vardhayā giraḥ ||
RV_3,029.11a tanūnapād ucyate garbha āsuro narāśaṃso bhavati yad vijāyate |
RV_3,029.11c mātariśvā yad amimīta mātari vātasya sargo abhavat sarīmaṇi ||
RV_3,029.12a sunirmathā nirmathitaḥ sunidhā nihitaḥ kaviḥ |
RV_3,029.12c agne svadhvarā kṛṇu devān devayate yaja ||
RV_3,029.13a ajījanann amṛtam martyāso 'sremāṇaṃ taraṇiṃ vīḷujambham |
RV_3,029.13c daśa svasāro agruvaḥ samīcīḥ pumāṃsaṃ jātam abhi saṃ rabhante ||
RV_3,029.14a pra saptahotā sanakād arocata mātur upasthe yad aśocad ūdhani |
RV_3,029.14c na ni miṣati suraṇo dive-dive yad asurasya jaṭharād ajāyata ||
RV_3,029.15a amitrāyudho marutām iva prayāḥ prathamajā brahmaṇo viśvam id viduḥ |
RV_3,029.15c dyumnavad brahma kuśikāsa erira eka-eko dame agniṃ sam īdhire ||
RV_3,029.16a yad adya tvā prayati yajñe asmin hotaś cikitvo 'vṛṇīmahīha |
RV_3,029.16c dhruvam ayā dhruvam utāśamiṣṭhāḥ prajānan vidvāṃ upa yāhi somam ||

RV_3,030.01a icchanti tvā somyāsaḥ sakhāyaḥ sunvanti somaṃ dadhati prayāṃsi |
RV_3,030.01c titikṣante abhiśastiṃ janānām indra tvad ā kaś cana hi praketaḥ ||
RV_3,030.02a na te dūre paramā cid rajāṃsy ā tu pra yāhi harivo haribhyām |
RV_3,030.02c sthirāya vṛṣṇe savanā kṛtemā yuktā grāvāṇaḥ samidhāne agnau ||
RV_3,030.03a indraḥ suśipro maghavā tarutro mahāvrātas tuvikūrmir ṛghāvān |
RV_3,030.03c yad ugro dhā bādhito martyeṣu kva tyā te vṛṣabha vīryāṇi ||
RV_3,030.04a tvaṃ hi ṣmā cyāvayann acyutāny eko vṛtrā carasi jighnamānaḥ |
RV_3,030.04c tava dyāvāpṛthivī parvatāso 'nu vratāya nimiteva tasthuḥ ||
RV_3,030.05a utābhaye puruhūta śravobhir eko dṛḷham avado vṛtrahā san |
RV_3,030.05c ime cid indra rodasī apāre yat saṃgṛbhṇā maghavan kāśir it te ||
RV_3,030.06a pra sū ta indra pravatā haribhyām pra te vajraḥ pramṛṇann etu śatrūn |
RV_3,030.06c jahi pratīco anūcaḥ parāco viśvaṃ satyaṃ kṛṇuhi viṣṭam astu ||
RV_3,030.07a yasmai dhāyur adadhā martyāyābhaktaṃ cid bhajate gehyaṃ saḥ |
RV_3,030.07c bhadrā ta indra sumatir ghṛtācī sahasradānā puruhūta rātiḥ ||
RV_3,030.08a sahadānum puruhūta kṣiyantam ahastam indra sam piṇak kuṇārum |
RV_3,030.08c abhi vṛtraṃ vardhamānam piyārum apādam indra tavasā jaghantha ||
RV_3,030.09a ni sāmanām iṣirām indra bhūmim mahīm apārāṃ sadane sasattha |
RV_3,030.09c astabhnād dyāṃ vṛṣabho antarikṣam arṣantv āpas tvayeha prasūtāḥ ||
RV_3,030.10a alātṛṇo vala indra vrajo goḥ purā hantor bhayamāno vy āra |
RV_3,030.10c sugān patho akṛṇon niraje gāḥ prāvan vāṇīḥ puruhūtaṃ dhamantīḥ ||
RV_3,030.11a eko dve vasumatī samīcī indra ā paprau pṛthivīm uta dyām |
RV_3,030.11c utāntarikṣād abhi naḥ samīka iṣo rathīḥ sayujaḥ śūra vājān ||
RV_3,030.12a diśaḥ sūryo na mināti pradiṣṭā dive-dive haryaśvaprasūtāḥ |
RV_3,030.12c saṃ yad ānaḷ adhvana ād id aśvair vimocanaṃ kṛṇute tat tv asya ||
RV_3,030.13a didṛkṣanta uṣaso yāmann aktor vivasvatyā mahi citram anīkam |
RV_3,030.13c viśve jānanti mahinā yad āgād indrasya karma sukṛtā purūṇi ||
RV_3,030.14a mahi jyotir nihitaṃ vakṣaṇāsv āmā pakvaṃ carati bibhratī gauḥ |
RV_3,030.14c viśvaṃ svādma sambhṛtam usriyāyāṃ yat sīm indro adadhād bhojanāya ||
RV_3,030.15a indra dṛhya yāmakośā abhūvan yajñāya śikṣa gṛṇate sakhibhyaḥ |
RV_3,030.15c durmāyavo durevā martyāso niṣaṅgiṇo ripavo hantvāsaḥ ||
RV_3,030.16a saṃ ghoṣaḥ śṛṇve 'vamair amitrair jahī ny eṣv aśaniṃ tapiṣṭhām |
RV_3,030.16c vṛścem adhastād vi rujā sahasva jahi rakṣo maghavan randhayasva ||
RV_3,030.17a ud vṛha rakṣaḥ sahamūlam indra vṛścā madhyam praty agraṃ śṛṇīhi |
RV_3,030.17c ā kīvataḥ salalūkaṃ cakartha brahmadviṣe tapuṣiṃ hetim asya ||
RV_3,030.18a svastaye vājibhiś ca praṇetaḥ saṃ yan mahīr iṣa āsatsi pūrvīḥ |
RV_3,030.18c rāyo vantāro bṛhataḥ syāmāsme astu bhaga indra prajāvān ||
RV_3,030.19a ā no bhara bhagam indra dyumantaṃ ni te deṣṇasya dhīmahi prareke |
RV_3,030.19c ūrva iva paprathe kāmo asme tam ā pṛṇa vasupate vasūnām ||
RV_3,030.20a imaṃ kāmam mandayā gobhir aśvaiś candravatā rādhasā paprathaś ca |
RV_3,030.20c svaryavo matibhis tubhyaṃ viprā indrāya vāhaḥ kuśikāso akran ||
RV_3,030.21a ā no gotrā dardṛhi gopate gāḥ sam asmabhyaṃ sanayo yantu vājāḥ |
RV_3,030.21c divakṣā asi vṛṣabha satyaśuṣmo 'smabhyaṃ su maghavan bodhi godāḥ ||
RV_3,030.22a śunaṃ huvema maghavānam indram asmin bhare nṛtamaṃ vājasātau |
RV_3,030.22c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,031.01a śāsad vahnir duhitur naptyaṃ gād vidvāṃ ṛtasya dīdhitiṃ saparyan |
RV_3,031.01c pitā yatra duhituḥ sekam ṛñjan saṃ śagmyena manasā dadhanve ||
RV_3,031.02a na jāmaye tānvo riktham āraik cakāra garbhaṃ sanitur nidhānam |
RV_3,031.02c yadī mātaro janayanta vahnim anyaḥ kartā sukṛtor anya ṛndhan ||
RV_3,031.03a agnir jajñe juhvā rejamāno mahas putrāṃ aruṣasya prayakṣe |
RV_3,031.03c mahān garbho mahy ā jātam eṣām mahī pravṛd dharyaśvasya yajñaiḥ ||
RV_3,031.04a abhi jaitrīr asacanta spṛdhānam mahi jyotis tamaso nir ajānan |
RV_3,031.04c taṃ jānatīḥ praty ud āyann uṣāsaḥ patir gavām abhavad eka indraḥ ||
RV_3,031.05a vīḷau satīr abhi dhīrā atṛndan prācāhinvan manasā sapta viprāḥ |
RV_3,031.05c viśvām avindan pathyām ṛtasya prajānann it tā namasā viveśa ||
RV_3,031.06a vidad yadī saramā rugṇam adrer mahi pāthaḥ pūrvyaṃ sadhryak kaḥ |
RV_3,031.06c agraṃ nayat supady akṣarāṇām acchā ravam prathamā jānatī gāt ||
RV_3,031.07a agacchad u vipratamaḥ sakhīyann asūdayat sukṛte garbham adriḥ |
RV_3,031.07c sasāna maryo yuvabhir makhasyann athābhavad aṅgirāḥ sadyo arcan ||
RV_3,031.08a sataḥ-sataḥ pratimānam purobhūr viśvā veda janimā hanti śuṣṇam |
RV_3,031.08c pra ṇo divaḥ padavīr gavyur arcan sakhā sakhīṃr amuñcan nir avadyāt ||
RV_3,031.09a ni gavyatā manasā sedur arkaiḥ kṛṇvānāso amṛtatvāya gātum |
RV_3,031.09c idaṃ cin nu sadanam bhūry eṣāṃ yena māsāṃ asiṣāsann ṛtena ||
RV_3,031.10a sampaśyamānā amadann abhi svam payaḥ pratnasya retaso dughānāḥ |
RV_3,031.10c vi rodasī atapad ghoṣa eṣāṃ jāte niṣṭhām adadhur goṣu vīrān ||
RV_3,031.11a sa jātebhir vṛtrahā sed u havyair ud usriyā asṛjad indro arkaiḥ |
RV_3,031.11c urūcy asmai ghṛtavad bharantī madhu svādma duduhe jenyā gauḥ ||
RV_3,031.12a pitre cic cakruḥ sadanaṃ sam asmai mahi tviṣīmat sukṛto vi hi khyan |
RV_3,031.12c viṣkabhnanta skambhanenā janitrī āsīnā ūrdhvaṃ rabhasaṃ vi minvan ||
RV_3,031.13a mahī yadi dhiṣaṇā śiśnathe dhāt sadyovṛdhaṃ vibhvaṃ rodasyoḥ |
RV_3,031.13c giro yasminn anavadyāḥ samīcīr viśvā indrāya taviṣīr anuttāḥ ||
RV_3,031.14a mahy ā te sakhyaṃ vaśmi śaktīr ā vṛtraghne niyuto yanti pūrvīḥ |
RV_3,031.14c mahi stotram ava āganma sūrer asmākaṃ su maghavan bodhi gopāḥ ||
RV_3,031.15a mahi kṣetram puru ścandraṃ vividvān ād it sakhibhyaś carathaṃ sam airat |
RV_3,031.15c indro nṛbhir ajanad dīdyānaḥ sākaṃ sūryam uṣasaṃ gātum agnim ||
RV_3,031.16a apaś cid eṣa vibhvo damūnāḥ pra sadhrīcīr asṛjad viśvaścandrāḥ |
RV_3,031.16c madhvaḥ punānāḥ kavibhiḥ pavitrair dyubhir hinvanty aktubhir dhanutrīḥ ||
RV_3,031.17a anu kṛṣṇe vasudhitī jihāte ubhe sūryasya maṃhanā yajatre |
RV_3,031.17c pari yat te mahimānaṃ vṛjadhyai sakhāya indra kāmyā ṛjipyāḥ ||
RV_3,031.18a patir bhava vṛtrahan sūnṛtānāṃ girāṃ viśvāyur vṛṣabho vayodhāḥ |
RV_3,031.18c ā no gahi sakhyebhiḥ śivebhir mahān mahībhir ūtibhiḥ saraṇyan ||
RV_3,031.19a tam aṅgirasvan namasā saparyan navyaṃ kṛṇomi sanyase purājām |
RV_3,031.19c druho vi yāhi bahulā adevīḥ svaś ca no maghavan sātaye dhāḥ ||
RV_3,031.20a mihaḥ pāvakāḥ pratatā abhūvan svasti naḥ pipṛhi pāram āsām |
RV_3,031.20c indra tvaṃ rathiraḥ pāhi no riṣo makṣū-makṣū kṛṇuhi gojito naḥ ||
RV_3,031.21a adediṣṭa vṛtrahā gopatir gā antaḥ kṛṣṇāṃ aruṣair dhāmabhir gāt |
RV_3,031.21c pra sūnṛtā diśamāna ṛtena duraś ca viśvā avṛṇod apa svāḥ ||
RV_3,031.22a śunaṃ huvema maghavānam indram asmin bhare nṛtamaṃ vājasātau |
RV_3,031.22c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,032.01a indra somaṃ somapate pibemam mādhyandinaṃ savanaṃ cāru yat te |
RV_3,032.01c prapruthyā śipre maghavann ṛjīṣin vimucyā harī iha mādayasva ||
RV_3,032.02a gavāśiram manthinam indra śukram pibā somaṃ rarimā te madāya |
RV_3,032.02c brahmakṛtā mārutenā gaṇena sajoṣā rudrais tṛpad ā vṛṣasva ||
RV_3,032.03a ye te śuṣmaṃ ye taviṣīm avardhann arcanta indra marutas ta ojaḥ |
RV_3,032.03c mādhyandine savane vajrahasta pibā rudrebhiḥ sagaṇaḥ suśipra ||
RV_3,032.04a ta in nv asya madhumad vivipra indrasya śardho maruto ya āsan |
RV_3,032.04c yebhir vṛtrasyeṣito vivedāmarmaṇo manyamānasya marma ||
RV_3,032.05a manuṣvad indra savanaṃ juṣāṇaḥ pibā somaṃ śaśvate vīryāya |
RV_3,032.05c sa ā vavṛtsva haryaśva yajñaiḥ saraṇyubhir apo arṇā sisarṣi ||
RV_3,032.06a tvam apo yad dha vṛtraṃ jaghanvāṃ atyāṃ iva prāsṛjaḥ sartavājau |
RV_3,032.06c śayānam indra caratā vadhena vavrivāṃsam pari devīr adevam ||
RV_3,032.07a yajāma in namasā vṛddham indram bṛhantam ṛṣvam ajaraṃ yuvānam |
RV_3,032.07c yasya priye mamatur yajñiyasya na rodasī mahimānam mamāte ||
RV_3,032.08a indrasya karma sukṛtā purūṇi vratāni devā na minanti viśve |
RV_3,032.08c dādhāra yaḥ pṛthivīṃ dyām utemāṃ jajāna sūryam uṣasaṃ sudaṃsāḥ ||
RV_3,032.09a adrogha satyaṃ tava tan mahitvaṃ sadyo yaj jāto apibo ha somam |
RV_3,032.09c na dyāva indra tavasas ta ojo nāhā na māsāḥ śarado varanta ||
RV_3,032.10a tvaṃ sadyo apibo jāta indra madāya somam parame vyoman |
RV_3,032.10c yad dha dyāvāpṛthivī āviveśīr athābhavaḥ pūrvyaḥ kārudhāyāḥ ||
RV_3,032.11a ahann ahim pariśayānam arṇa ojāyamānaṃ tuvijāta tavyān |
RV_3,032.11c na te mahitvam anu bhūd adha dyaur yad anyayā sphigyā kṣām avasthāḥ ||
RV_3,032.12a yajño hi ta indra vardhano bhūd uta priyaḥ sutasomo miyedhaḥ |
RV_3,032.12c yajñena yajñam ava yajñiyaḥ san yajñas te vajram ahihatya āvat ||
RV_3,032.13a yajñenendram avasā cakre arvāg ainaṃ sumnāya navyase vavṛtyām |
RV_3,032.13c ya stomebhir vāvṛdhe pūrvyebhir yo madhyamebhir uta nūtanebhiḥ ||
RV_3,032.14a viveṣa yan mā dhiṣaṇā jajāna stavai purā pāryād indram ahnaḥ |
RV_3,032.14c aṃhaso yatra pīparad yathā no nāveva yāntam ubhaye havante ||
RV_3,032.15a āpūrṇo asya kalaśaḥ svāhā sekteva kośaṃ sisice pibadhyai |
RV_3,032.15c sam u priyā āvavṛtran madāya pradakṣiṇid abhi somāsa indram ||
RV_3,032.16a na tvā gabhīraḥ puruhūta sindhur nādrayaḥ pari ṣanto varanta |
RV_3,032.16c itthā sakhibhya iṣito yad indrā dṛḷhaṃ cid arujo gavyam ūrvam ||
RV_3,032.17a śunaṃ huvema maghavānam indram asmin bhare nṛtamaṃ vājasātau |
RV_3,032.17c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,033.01a pra parvatānām uśatī upasthād aśve iva viṣite hāsamāne |
RV_3,033.01c gāveva śubhre mātarā rihāṇe vipāṭ chutudrī payasā javete ||
RV_3,033.02a indreṣite prasavam bhikṣamāṇe acchā samudraṃ rathyeva yāthaḥ |
RV_3,033.02c samārāṇe ūrmibhiḥ pinvamāne anyā vām anyām apy eti śubhre ||
RV_3,033.03a acchā sindhum mātṛtamām ayāsaṃ vipāśam urvīṃ subhagām aganma |
RV_3,033.03c vatsam iva mātarā saṃrihāṇe samānaṃ yonim anu saṃcarantī ||
RV_3,033.04a enā vayam payasā pinvamānā anu yoniṃ devakṛtaṃ carantīḥ |
RV_3,033.04c na vartave prasavaḥ sargataktaḥ kiṃyur vipro nadyo johavīti ||
RV_3,033.05a ramadhvam me vacase somyāya ṛtāvarīr upa muhūrtam evaiḥ |
RV_3,033.05c pra sindhum acchā bṛhatī manīṣāvasyur ahve kuśikasya sūnuḥ ||
RV_3,033.06a indro asmāṃ aradad vajrabāhur apāhan vṛtram paridhiṃ nadīnām |
RV_3,033.06c devo 'nayat savitā supāṇis tasya vayam prasave yāma urvīḥ ||
RV_3,033.07a pravācyaṃ śaśvadhā vīryaṃ tad indrasya karma yad ahiṃ vivṛścat |
RV_3,033.07c vi vajreṇa pariṣado jaghānāyann āpo 'yanam icchamānāḥ ||
RV_3,033.08a etad vaco jaritar māpi mṛṣṭhā ā yat te ghoṣān uttarā yugāni |
RV_3,033.08c uktheṣu kāro prati no juṣasva mā no ni kaḥ puruṣatrā namas te ||
RV_3,033.09a o ṣu svasāraḥ kārave śṛṇota yayau vo dūrād anasā rathena |
RV_3,033.09c ni ṣū namadhvam bhavatā supārā adhoakṣāḥ sindhavaḥ srotyābhiḥ ||
RV_3,033.10a ā te kāro śṛṇavāmā vacāṃsi yayātha dūrād anasā rathena |
RV_3,033.10c ni te naṃsai pīpyāneva yoṣā maryāyeva kanyā śaśvacai te ||
RV_3,033.11a yad aṅga tvā bharatāḥ saṃtareyur gavyan grāma iṣita indrajūtaḥ |
RV_3,033.11c arṣād aha prasavaḥ sargatakta ā vo vṛṇe sumatiṃ yajñiyānām ||
RV_3,033.12a atāriṣur bharatā gavyavaḥ sam abhakta vipraḥ sumatiṃ nadīnām |
RV_3,033.12c pra pinvadhvam iṣayantīḥ surādhā ā vakṣaṇāḥ pṛṇadhvaṃ yāta śībham ||
RV_3,033.13a ud va ūrmiḥ śamyā hantv āpo yoktrāṇi muñcata |
RV_3,033.13c māduṣkṛtau vyenasāghnyau śūnam āratām ||

RV_3,034.01a indraḥ pūrbhid ātirad dāsam arkair vidadvasur dayamāno vi śatrūn |
RV_3,034.01c brahmajūtas tanvā vāvṛdhāno bhūridātra āpṛṇad rodasī ubhe ||
RV_3,034.02a makhasya te taviṣasya pra jūtim iyarmi vācam amṛtāya bhūṣan |
RV_3,034.02c indra kṣitīnām asi mānuṣīṇāṃ viśāṃ daivīnām uta pūrvayāvā ||
RV_3,034.03a indro vṛtram avṛṇoc chardhanītiḥ pra māyinām aminād varpaṇītiḥ |
RV_3,034.03c ahan vyaṃsam uśadhag vaneṣv āvir dhenā akṛṇod rāmyāṇām ||
RV_3,034.04a indraḥ svarṣā janayann ahāni jigāyośigbhiḥ pṛtanā abhiṣṭiḥ |
RV_3,034.04c prārocayan manave ketum ahnām avindaj jyotir bṛhate raṇāya ||
RV_3,034.05a indras tujo barhaṇā ā viveśa nṛvad dadhāno naryā purūṇi |
RV_3,034.05c acetayad dhiya imā jaritre premaṃ varṇam atirac chukram āsām ||
RV_3,034.06a maho mahāni panayanty asyendrasya karma sukṛtā purūṇi |
RV_3,034.06c vṛjanena vṛjinān sam pipeṣa māyābhir dasyūṃr abhibhūtyojāḥ ||
RV_3,034.07a yudhendro mahnā varivaś cakāra devebhyaḥ satpatiś carṣaṇiprāḥ |
RV_3,034.07c vivasvataḥ sadane asya tāni viprā ukthebhiḥ kavayo gṛṇanti ||
RV_3,034.08a satrāsāhaṃ vareṇyaṃ sahodāṃ sasavāṃsaṃ svar apaś ca devīḥ |
RV_3,034.08c sasāna yaḥ pṛthivīṃ dyām utemām indram madanty anu dhīraṇāsaḥ ||
RV_3,034.09a sasānātyāṃ uta sūryaṃ sasānendraḥ sasāna purubhojasaṃ gām |
RV_3,034.09c hiraṇyayam uta bhogaṃ sasāna hatvī dasyūn prāryaṃ varṇam āvat ||
RV_3,034.10a indra oṣadhīr asanod ahāni vanaspatīṃr asanod antarikṣam |
RV_3,034.10c bibheda valaṃ nunude vivāco 'thābhavad damitābhikratūnām ||
RV_3,034.11a śunaṃ huvema maghavānam indram asmin bhare nṛtamaṃ vājasātau |
RV_3,034.11c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,035.01a tiṣṭhā harī ratha ā yujyamānā yāhi vāyur na niyuto no accha |
RV_3,035.01c pibāsy andho abhisṛṣṭo asme indra svāhā rarimā te madāya ||
RV_3,035.02a upājirā puruhūtāya saptī harī rathasya dhūrṣv ā yunajmi |
RV_3,035.02c dravad yathā sambhṛtaṃ viśvataś cid upemaṃ yajñam ā vahāta indram ||
RV_3,035.03a upo nayasva vṛṣaṇā tapuṣpotem ava tvaṃ vṛṣabha svadhāvaḥ |
RV_3,035.03c grasetām aśvā vi muceha śoṇā dive-dive sadṛśīr addhi dhānāḥ ||
RV_3,035.04a brahmaṇā te brahmayujā yunajmi harī sakhāyā sadhamāda āśū |
RV_3,035.04c sthiraṃ rathaṃ sukham indrādhitiṣṭhan prajānan vidvāṃ upa yāhi somam ||
RV_3,035.05a mā te harī vṛṣaṇā vītapṛṣṭhā ni rīraman yajamānāso anye |
RV_3,035.05c atyāyāhi śaśvato vayaṃ te 'raṃ sutebhiḥ kṛṇavāma somaiḥ ||
RV_3,035.06a tavāyaṃ somas tvam ehy arvāṅ chaśvattamaṃ sumanā asya pāhi |
RV_3,035.06c asmin yajñe barhiṣy ā niṣadyā dadhiṣvemaṃ jaṭhara indum indra ||
RV_3,035.07a stīrṇaṃ te barhiḥ suta indra somaḥ kṛtā dhānā attave te haribhyām |
RV_3,035.07c tadokase puruśākāya vṛṣṇe marutvate tubhyaṃ rātā havīṃṣi ||
RV_3,035.08a imaṃ naraḥ parvatās tubhyam āpaḥ sam indra gobhir madhumantam akran |
RV_3,035.08c tasyāgatyā sumanā ṛṣva pāhi prajānan vidvān pathyā anu svāḥ ||
RV_3,035.09a yāṃ ābhajo maruta indra some ye tvām avardhann abhavan gaṇas te |
RV_3,035.09c tebhir etaṃ sajoṣā vāvaśāno 'gneḥ piba jihvayā somam indra ||
RV_3,035.10a indra piba svadhayā cit sutasyāgner vā pāhi jihvayā yajatra |
RV_3,035.10c adhvaryor vā prayataṃ śakra hastād dhotur vā yajñaṃ haviṣo juṣasva ||
RV_3,035.11a śunaṃ huvema maghavānam indram asmin bhare nṛtamaṃ vājasātau |
RV_3,035.11c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,036.01a imām ū ṣu prabhṛtiṃ sātaye dhāḥ śaśvac-chaśvad ūtibhir yādamānaḥ |
RV_3,036.01c sute-sute vāvṛdhe vardhanebhir yaḥ karmabhir mahadbhiḥ suśruto bhūt ||
RV_3,036.02a indrāya somāḥ pradivo vidānā ṛbhur yebhir vṛṣaparvā vihāyāḥ |
RV_3,036.02c prayamyamānān prati ṣū gṛbhāyendra piba vṛṣadhūtasya vṛṣṇaḥ ||
RV_3,036.03a pibā vardhasva tava ghā sutāsa indra somāsaḥ prathamā uteme |
RV_3,036.03c yathāpibaḥ pūrvyāṃ indra somāṃ evā pāhi panyo adyā navīyān ||
RV_3,036.04a mahāṃ amatro vṛjane virapśy ugraṃ śavaḥ patyate dhṛṣṇv ojaḥ |
RV_3,036.04c nāha vivyāca pṛthivī canainaṃ yat somāso haryaśvam amandan ||
RV_3,036.05a mahāṃ ugro vāvṛdhe vīryāya samācakre vṛṣabhaḥ kāvyena |
RV_3,036.05c indro bhago vājadā asya gāvaḥ pra jāyante dakṣiṇā asya pūrvīḥ ||
RV_3,036.06a pra yat sindhavaḥ prasavaṃ yathāyann āpaḥ samudraṃ rathyeva jagmuḥ |
RV_3,036.06c ataś cid indraḥ sadaso varīyān yad īṃ somaḥ pṛṇati dugdho aṃśuḥ ||
RV_3,036.07a samudreṇa sindhavo yādamānā indrāya somaṃ suṣutam bharantaḥ |
RV_3,036.07c aṃśuṃ duhanti hastino bharitrair madhvaḥ punanti dhārayā pavitraiḥ ||
RV_3,036.08a hradā iva kukṣayaḥ somadhānāḥ sam ī vivyāca savanā purūṇi |
RV_3,036.08c annā yad indraḥ prathamā vy āśa vṛtraṃ jaghanvāṃ avṛṇīta somam ||
RV_3,036.09a ā tū bhara mākir etat pari ṣṭhād vidmā hi tvā vasupatiṃ vasūnām |
RV_3,036.09c indra yat te māhinaṃ datram asty asmabhyaṃ tad dharyaśva pra yandhi ||
RV_3,036.10a asme pra yandhi maghavann ṛjīṣinn indra rāyo viśvavārasya bhūreḥ |
RV_3,036.10c asme śataṃ śarado jīvase dhā asme vīrāñ chaśvata indra śiprin ||
RV_3,036.11a śunaṃ huvema maghavānam indram asmin bhare nṛtamaṃ vājasātau |
RV_3,036.11c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,037.01a vārtrahatyāya śavase pṛtanāṣāhyāya ca |
RV_3,037.01c indra tvā vartayāmasi ||
RV_3,037.02a arvācīnaṃ su te mana uta cakṣuḥ śatakrato |
RV_3,037.02c indra kṛṇvantu vāghataḥ ||
RV_3,037.03a nāmāni te śatakrato viśvābhir gīrbhir īmahe |
RV_3,037.03c indrābhimātiṣāhye ||
RV_3,037.04a puruṣṭutasya dhāmabhiḥ śatena mahayāmasi |
RV_3,037.04c indrasya carṣaṇīdhṛtaḥ ||
RV_3,037.05a indraṃ vṛtrāya hantave puruhūtam upa bruve |
RV_3,037.05c bhareṣu vājasātaye ||
RV_3,037.06a vājeṣu sāsahir bhava tvām īmahe śatakrato |
RV_3,037.06c indra vṛtrāya hantave ||
RV_3,037.07a dyumneṣu pṛtanājye pṛtsutūrṣu śravassu ca |
RV_3,037.07c indra sākṣvābhimātiṣu ||
RV_3,037.08a śuṣmintamaṃ na ūtaye dyumninam pāhi jāgṛvim |
RV_3,037.08c indra somaṃ śatakrato ||
RV_3,037.09a indriyāṇi śatakrato yā te janeṣu pañcasu |
RV_3,037.09c indra tāni ta ā vṛṇe ||
RV_3,037.10a agann indra śravo bṛhad dyumnaṃ dadhiṣva duṣṭaram |
RV_3,037.10c ut te śuṣmaṃ tirāmasi ||
RV_3,037.11a arvāvato na ā gahy atho śakra parāvataḥ |
RV_3,037.11c u loko yas te adriva indreha tata ā gahi ||

RV_3,038.01a abhi taṣṭeva dīdhayā manīṣām atyo na vājī sudhuro jihānaḥ |
RV_3,038.01c abhi priyāṇi marmṛśat parāṇi kavīṃr icchāmi saṃdṛśe sumedhāḥ ||
RV_3,038.02a inota pṛccha janimā kavīnām manodhṛtaḥ sukṛtas takṣata dyām |
RV_3,038.02c imā u te praṇyo vardhamānā manovātā adha nu dharmaṇi gman ||
RV_3,038.03a ni ṣīm id atra guhyā dadhānā uta kṣatrāya rodasī sam añjan |
RV_3,038.03c sam mātrābhir mamire yemur urvī antar mahī samṛte dhāyase dhuḥ ||
RV_3,038.04a ātiṣṭhantam pari viśve abhūṣañ chriyo vasānaś carati svarociḥ |
RV_3,038.04c mahat tad vṛṣṇo asurasya nāmā viśvarūpo amṛtāni tasthau ||
RV_3,038.05a asūta pūrvo vṛṣabho jyāyān imā asya śurudhaḥ santi pūrvīḥ |
RV_3,038.05c divo napātā vidathasya dhībhiḥ kṣatraṃ rājānā pradivo dadhāthe ||
RV_3,038.06a trīṇi rājānā vidathe purūṇi pari viśvāni bhūṣathaḥ sadāṃsi |
RV_3,038.06c apaśyam atra manasā jaganvān vrate gandharvāṃ api vāyukeśān ||
RV_3,038.07a tad in nv asya vṛṣabhasya dhenor ā nāmabhir mamire sakmyaṃ goḥ |
RV_3,038.07c anyad-anyad asuryaṃ vasānā ni māyino mamire rūpam asmin ||
RV_3,038.08a tad in nv asya savitur nakir me hiraṇyayīm amatiṃ yām aśiśret |
RV_3,038.08c ā suṣṭutī rodasī viśvaminve apīva yoṣā janimāni vavre ||
RV_3,038.09a yuvam pratnasya sādhatho maho yad daivī svastiḥ pari ṇaḥ syātam |
RV_3,038.09c gopājihvasya tasthuṣo virūpā viśve paśyanti māyinaḥ kṛtāni ||
RV_3,038.10a śunaṃ huvema maghavānam indram asmin bhare nṛtamaṃ vājasātau |
RV_3,038.10c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,039.01a indram matir hṛda ā vacyamānācchā patiṃ stomataṣṭā jigāti |
RV_3,039.01c yā jāgṛvir vidathe śasyamānendra yat te jāyate viddhi tasya ||
RV_3,039.02a divaś cid ā pūrvyā jāyamānā vi jāgṛvir vidathe śasyamānā |
RV_3,039.02c bhadrā vastrāṇy arjunā vasānā seyam asme sanajā pitryā dhīḥ ||
RV_3,039.03a yamā cid atra yamasūr asūta jihvāyā agram patad ā hy asthāt |
RV_3,039.03c vapūṃṣi jātā mithunā sacete tamohanā tapuṣo budhna etā ||
RV_3,039.04a nakir eṣāṃ ninditā martyeṣu ye asmākam pitaro goṣu yodhāḥ |
RV_3,039.04c indra eṣāṃ dṛṃhitā māhināvān ud gotrāṇi sasṛje daṃsanāvān ||
RV_3,039.05a sakhā ha yatra sakhibhir navagvair abhijñv ā satvabhir gā anugman |
RV_3,039.05c satyaṃ tad indro daśabhir daśagvaiḥ sūryaṃ viveda tamasi kṣiyantam ||
RV_3,039.06a indro madhu sambhṛtam usriyāyām padvad viveda śaphavan name goḥ |
RV_3,039.06c guhā hitaṃ guhyaṃ gūḷham apsu haste dadhe dakṣiṇe dakṣiṇāvān ||
RV_3,039.07a jyotir vṛṇīta tamaso vijānann āre syāma duritād abhīke |
RV_3,039.07c imā giraḥ somapāḥ somavṛddha juṣasvendra purutamasya kāroḥ ||
RV_3,039.08a jyotir yajñāya rodasī anu ṣyād āre syāma duritasya bhūreḥ |
RV_3,039.08c bhūri cid dhi tujato martyasya supārāso vasavo barhaṇāvat ||
RV_3,039.09a śunaṃ huvema maghavānam indram asmin bhare nṛtamaṃ vājasātau |
RV_3,039.09c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,040.01a indra tvā vṛṣabhaṃ vayaṃ sute some havāmahe |
RV_3,040.01c sa pāhi madhvo andhasaḥ ||
RV_3,040.02a indra kratuvidaṃ sutaṃ somaṃ harya puruṣṭuta |
RV_3,040.02c pibā vṛṣasva tātṛpim ||
RV_3,040.03a indra pra ṇo dhitāvānaṃ yajñaṃ viśvebhir devebhiḥ |
RV_3,040.03c tira stavāna viśpate ||
RV_3,040.04a indra somāḥ sutā ime tava pra yanti satpate |
RV_3,040.04c kṣayaṃ candrāsa indavaḥ ||
RV_3,040.05a dadhiṣvā jaṭhare sutaṃ somam indra vareṇyam |
RV_3,040.05c tava dyukṣāsa indavaḥ ||
RV_3,040.06a girvaṇaḥ pāhi naḥ sutam madhor dhārābhir ajyase |
RV_3,040.06c indra tvādātam id yaśaḥ ||
RV_3,040.07a abhi dyumnāni vanina indraṃ sacante akṣitā |
RV_3,040.07c pītvī somasya vāvṛdhe ||
RV_3,040.08a arvāvato na ā gahi parāvataś ca vṛtrahan |
RV_3,040.08c imā juṣasva no giraḥ ||
RV_3,040.09a yad antarā parāvatam arvāvataṃ ca hūyase |
RV_3,040.09c indreha tata ā gahi ||

RV_3,041.01a ā tū na indra madryag ghuvānaḥ somapītaye |
RV_3,041.01c haribhyāṃ yāhy adrivaḥ ||
RV_3,041.02a satto hotā na ṛtviyas tistire barhir ānuṣak |
RV_3,041.02c ayujran prātar adrayaḥ ||
RV_3,041.03a imā brahma brahmavāhaḥ kriyanta ā barhiḥ sīda |
RV_3,041.03c vīhi śūra puroḷāśam ||
RV_3,041.04a rārandhi savaneṣu ṇa eṣu stomeṣu vṛtrahan |
RV_3,041.04c uktheṣv indra girvaṇaḥ ||
RV_3,041.05a matayaḥ somapām uruṃ rihanti śavasas patim |
RV_3,041.05c indraṃ vatsaṃ na mātaraḥ ||
RV_3,041.06a sa mandasvā hy andhaso rādhase tanvā mahe |
RV_3,041.06c na stotāraṃ nide karaḥ ||
RV_3,041.07a vayam indra tvāyavo haviṣmanto jarāmahe |
RV_3,041.07c uta tvam asmayur vaso ||
RV_3,041.08a māre asmad vi mumuco haripriyārvāṅ yāhi |
RV_3,041.08c indra svadhāvo matsveha ||
RV_3,041.09a arvāñcaṃ tvā sukhe rathe vahatām indra keśinā |
RV_3,041.09c ghṛtasnū barhir āsade ||

RV_3,042.01a upa naḥ sutam ā gahi somam indra gavāśiram |
RV_3,042.01c haribhyāṃ yas te asmayuḥ ||
RV_3,042.02a tam indra madam ā gahi barhiṣṭhāṃ grāvabhiḥ sutam |
RV_3,042.02c kuvin nv asya tṛpṇavaḥ ||
RV_3,042.03a indram itthā giro mamācchāgur iṣitā itaḥ |
RV_3,042.03c āvṛte somapītaye ||
RV_3,042.04a indraṃ somasya pītaye stomair iha havāmahe |
RV_3,042.04c ukthebhiḥ kuvid āgamat ||
RV_3,042.05a indra somāḥ sutā ime tān dadhiṣva śatakrato |
RV_3,042.05c jaṭhare vājinīvaso ||
RV_3,042.06a vidmā hi tvā dhanañjayaṃ vājeṣu dadhṛṣaṃ kave |
RV_3,042.06c adhā te sumnam īmahe ||
RV_3,042.07a imam indra gavāśiraṃ yavāśiraṃ ca naḥ piba |
RV_3,042.07c āgatyā vṛṣabhiḥ sutam ||
RV_3,042.08a tubhyed indra sva okye somaṃ codāmi pītaye |
RV_3,042.08c eṣa rārantu te hṛdi ||
RV_3,042.09a tvāṃ sutasya pītaye pratnam indra havāmahe |
RV_3,042.09c kuśikāso avasyavaḥ ||

RV_3,043.01a ā yāhy arvāṅ upa vandhureṣṭhās taved anu pradivaḥ somapeyam |
RV_3,043.01c priyā sakhāyā vi mucopa barhis tvām ime havyavāho havante ||
RV_3,043.02a ā yāhi pūrvīr ati carṣaṇīr āṃ arya āśiṣa upa no haribhyām |
RV_3,043.02c imā hi tvā mataya stomataṣṭā indra havante sakhyaṃ juṣāṇāḥ ||
RV_3,043.03a ā no yajñaṃ namovṛdhaṃ sajoṣā indra deva haribhir yāhi tūyam |
RV_3,043.03c ahaṃ hi tvā matibhir johavīmi ghṛtaprayāḥ sadhamāde madhūnām ||
RV_3,043.04a ā ca tvām etā vṛṣaṇā vahāto harī sakhāyā sudhurā svaṅgā |
RV_3,043.04c dhānāvad indraḥ savanaṃ juṣāṇaḥ sakhā sakhyuḥ śṛṇavad vandanāni ||
RV_3,043.05a kuvin mā gopāṃ karase janasya kuvid rājānam maghavann ṛjīṣin |
RV_3,043.05c kuvin ma ṛṣim papivāṃsaṃ sutasya kuvin me vasvo amṛtasya śikṣāḥ ||
RV_3,043.06a ā tvā bṛhanto harayo yujānā arvāg indra sadhamādo vahantu |
RV_3,043.06c pra ye dvitā diva ṛñjanty ātāḥ susammṛṣṭāso vṛṣabhasya mūrāḥ ||
RV_3,043.07a indra piba vṛṣadhūtasya vṛṣṇa ā yaṃ te śyena uśate jabhāra |
RV_3,043.07c yasya made cyāvayasi pra kṛṣṭīr yasya made apa gotrā vavartha ||
RV_3,043.08a śunaṃ huvema maghavānam indram asmin bhare nṛtamaṃ vājasātau |
RV_3,043.08c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,044.01a ayaṃ te astu haryataḥ soma ā haribhiḥ sutaḥ |
RV_3,044.01c juṣāṇa indra haribhir na ā gahy ā tiṣṭha haritaṃ ratham ||
RV_3,044.02a haryann uṣasam arcayaḥ sūryaṃ haryann arocayaḥ |
RV_3,044.02c vidvāṃś cikitvān haryaśva vardhasa indra viśvā abhi śriyaḥ ||
RV_3,044.03a dyām indro haridhāyasam pṛthivīṃ harivarpasam |
RV_3,044.03c adhārayad dharitor bhūri bhojanaṃ yayor antar hariś carat ||
RV_3,044.04a jajñāno harito vṛṣā viśvam ā bhāti rocanam |
RV_3,044.04c haryaśvo haritaṃ dhatta āyudham ā vajram bāhvor harim ||
RV_3,044.05a indro haryantam arjunaṃ vajraṃ śukrair abhīvṛtam |
RV_3,044.05c apāvṛṇod dharibhir adribhiḥ sutam ud gā haribhir ājata ||

RV_3,045.01a ā mandrair indra haribhir yāhi mayūraromabhiḥ |
RV_3,045.01c mā tvā ke cin ni yaman viṃ na pāśino 'ti dhanveva tāṃ ihi ||
RV_3,045.02a vṛtrakhādo valaṃrujaḥ purāṃ darmo apām ajaḥ |
RV_3,045.02c sthātā rathasya haryor abhisvara indro dṛḷhā cid ārujaḥ ||
RV_3,045.03a gambhīrāṃ udadhīṃr iva kratum puṣyasi gā iva |
RV_3,045.03c pra sugopā yavasaṃ dhenavo yathā hradaṃ kulyā ivāśata ||
RV_3,045.04a ā nas tujaṃ rayim bharāṃśaṃ na pratijānate |
RV_3,045.04c vṛkṣam pakvam phalam aṅkīva dhūnuhīndra sampāraṇaṃ vasu ||
RV_3,045.05a svayur indra svarāḷ asi smaddiṣṭiḥ svayaśastaraḥ |
RV_3,045.05c sa vāvṛdhāna ojasā puruṣṭuta bhavā naḥ suśravastamaḥ ||

RV_3,046.01a yudhmasya te vṛṣabhasya svarāja ugrasya yūna sthavirasya ghṛṣveḥ |
RV_3,046.01c ajūryato vajriṇo vīryāṇīndra śrutasya mahato mahāni ||
RV_3,046.02a mahāṃ asi mahiṣa vṛṣṇyebhir dhanaspṛd ugra sahamāno anyān |
RV_3,046.02c eko viśvasya bhuvanasya rājā sa yodhayā ca kṣayayā ca janān ||
RV_3,046.03a pra mātrābhī ririce rocamānaḥ pra devebhir viśvato apratītaḥ |
RV_3,046.03c pra majmanā diva indraḥ pṛthivyāḥ proror maho antarikṣād ṛjīṣī ||
RV_3,046.04a uruṃ gabhīraṃ januṣābhy ugraṃ viśvavyacasam avatam matīnām |
RV_3,046.04c indraṃ somāsaḥ pradivi sutāsaḥ samudraṃ na sravata ā viśanti ||
RV_3,046.05a yaṃ somam indra pṛthivīdyāvā garbhaṃ na mātā bibhṛtas tvāyā |
RV_3,046.05c taṃ te hinvanti tam u te mṛjanty adhvaryavo vṛṣabha pātavā u ||

RV_3,047.01a marutvāṃ indra vṛṣabho raṇāya pibā somam anuṣvadham madāya |
RV_3,047.01c ā siñcasva jaṭhare madhva ūrmiṃ tvaṃ rājāsi pradivaḥ sutānām ||
RV_3,047.02a sajoṣā indra sagaṇo marudbhiḥ somam piba vṛtrahā śūra vidvān |
RV_3,047.02c jahi śatrūṃr apa mṛdho nudasvāthābhayaṃ kṛṇuhi viśvato naḥ ||
RV_3,047.03a uta ṛtubhir ṛtupāḥ pāhi somam indra devebhiḥ sakhibhiḥ sutaṃ naḥ |
RV_3,047.03c yāṃ ābhajo maruto ye tvānv ahan vṛtram adadhus tubhyam ojaḥ ||
RV_3,047.04a ye tvāhihatye maghavann avardhan ye śāmbare harivo ye gaviṣṭau |
RV_3,047.04c ye tvā nūnam anumadanti viprāḥ pibendra somaṃ sagaṇo marudbhiḥ ||
RV_3,047.05a marutvantaṃ vṛṣabhaṃ vāvṛdhānam akavāriṃ divyaṃ śāsam indram |
RV_3,047.05c viśvāsāham avase nūtanāyograṃ sahodām iha taṃ huvema ||
RV_3,048.01a sadyo ha jāto vṛṣabhaḥ kanīnaḥ prabhartum āvad andhasaḥ sutasya |
RV_3,048.01c sādhoḥ piba pratikāmaṃ yathā te rasāśiraḥ prathamaṃ somyasya ||
RV_3,048.02a yaj jāyathās tad ahar asya kāme 'ṃśoḥ pīyūṣam apibo giriṣṭhām |
RV_3,048.02c taṃ te mātā pari yoṣā janitrī mahaḥ pitur dama āsiñcad agre ||
RV_3,048.03a upasthāya mātaram annam aiṭṭa tigmam apaśyad abhi somam ūdhaḥ |
RV_3,048.03c prayāvayann acarad gṛtso anyān mahāni cakre purudhapratīkaḥ ||
RV_3,048.04a ugras turāṣāḷ abhibhūtyojā yathāvaśaṃ tanvaṃ cakra eṣaḥ |
RV_3,048.04c tvaṣṭāram indro januṣābhibhūyāmuṣyā somam apibac camūṣu ||
RV_3,048.05a śunaṃ huvema maghavānam indram asmin bhare nṛtamaṃ vājasātau |
RV_3,048.05c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,049.01a śaṃsā mahām indraṃ yasmin viśvā ā kṛṣṭayaḥ somapāḥ kāmam avyan |
RV_3,049.01c yaṃ sukratuṃ dhiṣaṇe vibhvataṣṭaṃ ghanaṃ vṛtrāṇāṃ janayanta devāḥ ||
RV_3,049.02a yaṃ nu nakiḥ pṛtanāsu svarājaṃ dvitā tarati nṛtamaṃ hariṣṭhām |
RV_3,049.02c inatamaḥ satvabhir yo ha śūṣaiḥ pṛthujrayā aminād āyur dasyoḥ ||
RV_3,049.03a sahāvā pṛtsu taraṇir nārvā vyānaśī rodasī mehanāvān |
RV_3,049.03c bhago na kāre havyo matīnām piteva cāruḥ suhavo vayodhāḥ ||
RV_3,049.04a dhartā divo rajasas pṛṣṭa ūrdhvo ratho na vāyur vasubhir niyutvān |
RV_3,049.04c kṣapāṃ vastā janitā sūryasya vibhaktā bhāgaṃ dhiṣaṇeva vājam ||
RV_3,049.05a śunaṃ huvema maghavānam indram asmin bhare nṛtamaṃ vājasātau |
RV_3,049.05c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,050.01a indraḥ svāhā pibatu yasya soma āgatyā tumro vṛṣabho marutvān |
RV_3,050.01c oruvyacāḥ pṛṇatām ebhir annair āsya havis tanvaḥ kāmam ṛdhyāḥ ||
RV_3,050.02a ā te saparyū javase yunajmi yayor anu pradivaḥ śruṣṭim āvaḥ |
RV_3,050.02c iha tvā dheyur harayaḥ suśipra pibā tv asya suṣutasya cāroḥ ||
RV_3,050.03a gobhir mimikṣuṃ dadhire supāram indraṃ jyaiṣṭhyāya dhāyase gṛṇānāḥ |
RV_3,050.03c mandānaḥ somam papivāṃ ṛjīṣin sam asmabhyam purudhā gā iṣaṇya ||
RV_3,050.04a imaṃ kāmam mandayā gobhir aśvaiś candravatā rādhasā paprathaś ca |
RV_3,050.04c svaryavo matibhis tubhyaṃ viprā indrāya vāhaḥ kuśikāso akran ||
RV_3,050.05a śunaṃ huvema maghavānam indram asmin bhare nṛtamaṃ vājasātau |
RV_3,050.05c śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

RV_3,051.01a carṣaṇīdhṛtam maghavānam ukthyam indraṃ giro bṛhatīr abhy anūṣata |
RV_3,051.01c vāvṛdhānam puruhūtaṃ suvṛktibhir amartyaṃ jaramāṇaṃ dive-dive ||
RV_3,051.02a śatakratum arṇavaṃ śākinaṃ naraṃ giro ma indram upa yanti viśvataḥ |
RV_3,051.02c vājasanim pūrbhidaṃ tūrṇim apturaṃ dhāmasācam abhiṣācaṃ svarvidam ||
RV_3,051.03a ākare vasor jaritā panasyate 'nehasa stubha indro duvasyati |
RV_3,051.03c vivasvataḥ sadana ā hi pipriye satrāsāham abhimātihanaṃ stuhi ||
RV_3,051.04a nṛṇām u tvā nṛtamaṃ gīrbhir ukthair abhi pra vīram arcatā sabādhaḥ |
RV_3,051.04c saṃ sahase purumāyo jihīte namo asya pradiva eka īśe ||
RV_3,051.05a pūrvīr asya niṣṣidho martyeṣu purū vasūni pṛthivī bibharti |
RV_3,051.05c indrāya dyāva oṣadhīr utāpo rayiṃ rakṣanti jīrayo vanāni ||
RV_3,051.06a tubhyam brahmāṇi gira indra tubhyaṃ satrā dadhire harivo juṣasva |
RV_3,051.06c bodhy āpir avaso nūtanasya sakhe vaso jaritṛbhyo vayo dhāḥ ||
RV_3,051.07a indra marutva iha pāhi somaṃ yathā śāryāte apibaḥ sutasya |
RV_3,051.07c tava praṇītī tava śūra śarmann ā vivāsanti kavayaḥ suyajñāḥ ||
RV_3,051.08a sa vāvaśāna iha pāhi somam marudbhir indra sakhibhiḥ sutaṃ naḥ |
RV_3,051.08c jātaṃ yat tvā pari devā abhūṣan mahe bharāya puruhūta viśve ||
RV_3,051.09a aptūrye maruta āpir eṣo 'mandann indram anu dātivārāḥ |
RV_3,051.09c tebhiḥ sākam pibatu vṛtrakhādaḥ sutaṃ somaṃ dāśuṣaḥ sve sadhasthe ||
RV_3,051.10a idaṃ hy anv ojasā sutaṃ rādhānām pate |
RV_3,051.10c pibā tv asya girvaṇaḥ ||
RV_3,051.11a yas te anu svadhām asat sute ni yaccha tanvam |
RV_3,051.11c sa tvā mamattu somyam ||
RV_3,051.12a pra te aśnotu kukṣyoḥ prendra brahmaṇā śiraḥ |
RV_3,051.12c pra bāhū śūra rādhase ||

RV_3,052.01a dhānāvantaṃ karambhiṇam apūpavantam ukthinam |
RV_3,052.01c indra prātar juṣasva naḥ ||
RV_3,052.02a puroḷāśam pacatyaṃ juṣasvendrā gurasva ca |
RV_3,052.02c tubhyaṃ havyāni sisrate ||
RV_3,052.03a puroḷāśaṃ ca no ghaso joṣayāse giraś ca naḥ |
RV_3,052.03c vadhūyur iva yoṣaṇām ||
RV_3,052.04a puroḷāśaṃ sanaśruta prātaḥsāve juṣasva naḥ |
RV_3,052.04c indra kratur hi te bṛhan ||
RV_3,052.05a mādhyandinasya savanasya dhānāḥ puroḷāśam indra kṛṣveha cārum |
RV_3,052.05c pra yat stotā jaritā tūrṇyartho vṛṣāyamāṇa upa gīrbhir īṭṭe ||
RV_3,052.06a tṛtīye dhānāḥ savane puruṣṭuta puroḷāśam āhutam māmahasva naḥ |
RV_3,052.06c ṛbhumantaṃ vājavantaṃ tvā kave prayasvanta upa śikṣema dhītibhiḥ ||
RV_3,052.07a pūṣaṇvate te cakṛmā karambhaṃ harivate haryaśvāya dhānāḥ |
RV_3,052.07c apūpam addhi sagaṇo marudbhiḥ somam piba vṛtrahā śūra vidvān ||
RV_3,052.08a prati dhānā bharata tūyam asmai puroḷāśaṃ vīratamāya nṛṇām |
RV_3,052.08c dive-dive sadṛśīr indra tubhyaṃ vardhantu tvā somapeyāya dhṛṣṇo ||

RV_3,053.01a indrāparvatā bṛhatā rathena vāmīr iṣa ā vahataṃ suvīrāḥ |
RV_3,053.01c vītaṃ havyāny adhvareṣu devā vardhethāṃ gīrbhir iḷayā madantā ||
RV_3,053.02a tiṣṭhā su kam maghavan mā parā gāḥ somasya nu tvā suṣutasya yakṣi |
RV_3,053.02c pitur na putraḥ sicam ā rabhe ta indra svādiṣṭhayā girā śacīvaḥ ||
RV_3,053.03a śaṃsāvādhvaryo prati me gṛṇīhīndrāya vāhaḥ kṛṇavāva juṣṭam |
RV_3,053.03c edam barhir yajamānasya sīdāthā ca bhūd uktham indrāya śastam ||
RV_3,053.04a jāyed astam maghavan sed u yonis tad it tvā yuktā harayo vahantu |
RV_3,053.04c yadā kadā ca sunavāma somam agniṣ ṭvā dūto dhanvāty accha ||
RV_3,053.05a parā yāhi maghavann ā ca yāhīndra bhrātar ubhayatrā te artham |
RV_3,053.05c yatrā rathasya bṛhato nidhānaṃ vimocanaṃ vājino rāsabhasya ||
RV_3,053.06a apāḥ somam astam indra pra yāhi kalyāṇīr jāyā suraṇaṃ gṛhe te |
RV_3,053.06c yatrā rathasya bṛhato nidhānaṃ vimocanaṃ vājino dakṣiṇāvat ||
RV_3,053.07a ime bhojā aṅgiraso virūpā divas putrāso asurasya vīrāḥ |
RV_3,053.07c viśvāmitrāya dadato maghāni sahasrasāve pra tiranta āyuḥ ||
RV_3,053.08a rūpaṃ-rūpam maghavā bobhavīti māyāḥ kṛṇvānas tanvam pari svām |
RV_3,053.08c trir yad divaḥ pari muhūrtam āgāt svair mantrair anṛtupā ṛtāvā ||
RV_3,053.09a mahāṃ ṛṣir devajā devajūto 'stabhnāt sindhum arṇavaṃ nṛcakṣāḥ |
RV_3,053.09c viśvāmitro yad avahat sudāsam apriyāyata kuśikebhir indraḥ ||
RV_3,053.10a haṃsā iva kṛṇutha ślokam adribhir madanto gīrbhir adhvare sute sacā |
RV_3,053.10c devebhir viprā ṛṣayo nṛcakṣaso vi pibadhvaṃ kuśikāḥ somyam madhu ||
RV_3,053.11a upa preta kuśikāś cetayadhvam aśvaṃ rāye pra muñcatā sudāsaḥ |
RV_3,053.11c rājā vṛtraṃ jaṅghanat prāg apāg udag athā yajāte vara ā pṛthivyāḥ ||
RV_3,053.12a ya ime rodasī ubhe aham indram atuṣṭavam |
RV_3,053.12c viśvāmitrasya rakṣati brahmedam bhārataṃ janam ||
RV_3,053.13a viśvāmitrā arāsata brahmendrāya vajriṇe |
RV_3,053.13c karad in naḥ surādhasaḥ ||
RV_3,053.14a kiṃ te kṛṇvanti kīkaṭeṣu gāvo nāśiraṃ duhre na tapanti gharmam |
RV_3,053.14c ā no bhara pramagandasya vedo naicāśākham maghavan randhayā naḥ ||
RV_3,053.15a sasarparīr amatim bādhamānā bṛhan mimāya jamadagnidattā |
RV_3,053.15c ā sūryasya duhitā tatāna śravo deveṣv amṛtam ajuryam ||
RV_3,053.16a sasarparīr abharat tūyam ebhyo 'dhi śravaḥ pāñcajanyāsu kṛṣṭiṣu |
RV_3,053.16c sā pakṣyā navyam āyur dadhānā yām me palastijamadagnayo daduḥ ||
RV_3,053.17a sthirau gāvau bhavatāṃ vīḷur akṣo meṣā vi varhi mā yugaṃ vi śāri |
RV_3,053.17c indraḥ pātalye dadatāṃ śarītor ariṣṭaneme abhi naḥ sacasva ||
RV_3,053.18a balaṃ dhehi tanūṣu no balam indrānaḷutsu naḥ |
RV_3,053.18c balaṃ tokāya tanayāya jīvase tvaṃ hi baladā asi ||
RV_3,053.19a abhi vyayasva khadirasya sāram ojo dhehi spandane śiṃśapāyām |
RV_3,053.19c akṣa vīḷo vīḷita vīḷayasva mā yāmād asmād ava jīhipo naḥ ||
RV_3,053.20a ayam asmān vanaspatir mā ca hā mā ca rīriṣat |
RV_3,053.20c svasty ā gṛhebhya āvasā ā vimocanāt ||
RV_3,053.21a indrotibhir bahulābhir no adya yācchreṣṭhābhir maghavañ chūra jinva |
RV_3,053.21c yo no dveṣṭy adharaḥ sas padīṣṭa yam u dviṣmas tam u prāṇo jahātu ||
RV_3,053.22a paraśuṃ cid vi tapati śimbalaṃ cid vi vṛścati |
RV_3,053.22c ukhā cid indra yeṣantī prayastā phenam asyati ||
RV_3,053.23a na sāyakasya cikite janāso lodhaṃ nayanti paśu manyamānāḥ |
RV_3,053.23c nāvājinaṃ vājinā hāsayanti na gardabham puro aśvān nayanti ||
RV_3,053.24a ima indra bharatasya putrā apapitvaṃ cikitur na prapitvam |
RV_3,053.24c hinvanty aśvam araṇaṃ na nityaṃ jyāvājam pari ṇayanty ājau ||

RV_3,054.01a imam mahe vidathyāya śūṣaṃ śaśvat kṛtva īḍyāya pra jabhruḥ |
RV_3,054.01c śṛṇotu no damyebhir anīkaiḥ śṛṇotv agnir divyair ajasraḥ ||
RV_3,054.02a mahi mahe dive arcā pṛthivyai kāmo ma icchañ carati prajānan |
RV_3,054.02c yayor ha stome vidatheṣu devāḥ saparyavo mādayante sacāyoḥ ||
RV_3,054.03a yuvor ṛtaṃ rodasī satyam astu mahe ṣu ṇaḥ suvitāya pra bhūtam |
RV_3,054.03c idaṃ dive namo agne pṛthivyai saparyāmi prayasā yāmi ratnam ||
RV_3,054.04a uto hi vām pūrvyā āvividra ṛtāvarī rodasī satyavācaḥ |
RV_3,054.04c naraś cid vāṃ samithe śūrasātau vavandire pṛthivi vevidānāḥ ||
RV_3,054.05a ko addhā veda ka iha pra vocad devāṃ acchā pathyā kā sam eti |
RV_3,054.05c dadṛśra eṣām avamā sadāṃsi pareṣu yā guhyeṣu vrateṣu ||
RV_3,054.06a kavir nṛcakṣā abhi ṣīm acaṣṭa ṛtasya yonā vighṛte madantī |
RV_3,054.06c nānā cakrāte sadanaṃ yathā veḥ samānena kratunā saṃvidāne ||
RV_3,054.07a samānyā viyute dūreante dhruve pade tasthatur jāgarūke |
RV_3,054.07c uta svasārā yuvatī bhavantī ād u bruvāte mithunāni nāma ||
RV_3,054.08a viśved ete janimā saṃ vivikto maho devān bibhratī na vyathete |
RV_3,054.08c ejad dhruvam patyate viśvam ekaṃ carat patatri viṣuṇaṃ vi jātam ||
RV_3,054.09a sanā purāṇam adhy emy ārān mahaḥ pitur janitur jāmi tan naḥ |
RV_3,054.09c devāso yatra panitāra evair urau pathi vyute tasthur antaḥ ||
RV_3,054.10a imaṃ stomaṃ rodasī pra bravīmy ṛdūdarāḥ śṛṇavann agnijihvāḥ |
RV_3,054.10c mitraḥ samrājo varuṇo yuvāna ādityāsaḥ kavayaḥ paprathānāḥ ||
RV_3,054.11a hiraṇyapāṇiḥ savitā sujihvas trir ā divo vidathe patyamānaḥ |
RV_3,054.11c deveṣu ca savitaḥ ślokam aśrer ād asmabhyam ā suva sarvatātim ||
RV_3,054.12a sukṛt supāṇiḥ svavāṃ ṛtāvā devas tvaṣṭāvase tāni no dhāt |
RV_3,054.12c pūṣaṇvanta ṛbhavo mādayadhvam ūrdhvagrāvāṇo adhvaram ataṣṭa ||
RV_3,054.13a vidyudrathā maruta ṛṣṭimanto divo maryā ṛtajātā ayāsaḥ |
RV_3,054.13c sarasvatī śṛṇavan yajñiyāso dhātā rayiṃ sahavīraṃ turāsaḥ ||
RV_3,054.14a viṣṇuṃ stomāsaḥ purudasmam arkā bhagasyeva kāriṇo yāmani gman |
RV_3,054.14c urukramaḥ kakuho yasya pūrvīr na mardhanti yuvatayo janitrīḥ ||
RV_3,054.15a indro viśvair vīryaiḥ patyamāna ubhe ā paprau rodasī mahitvā |
RV_3,054.15c purandaro vṛtrahā dhṛṣṇuṣeṇaḥ saṃgṛbhyā na ā bharā bhūri paśvaḥ ||
RV_3,054.16a nāsatyā me pitarā bandhupṛcchā sajātyam aśvinoś cāru nāma |
RV_3,054.16c yuvaṃ hi stho rayidau no rayīṇāṃ dātraṃ rakṣethe akavair adabdhā ||
RV_3,054.17a mahat tad vaḥ kavayaś cāru nāma yad dha devā bhavatha viśva indre |
RV_3,054.17c sakha ṛbhubhiḥ puruhūta priyebhir imāṃ dhiyaṃ sātaye takṣatā naḥ ||
RV_3,054.18a aryamā ṇo aditir yajñiyāso 'dabdhāni varuṇasya vratāni |
RV_3,054.18c yuyota no anapatyāni gantoḥ prajāvān naḥ paśumāṃ astu gātuḥ ||
RV_3,054.19a devānāṃ dūtaḥ purudha prasūto 'nāgān no vocatu sarvatātā |
RV_3,054.19c śṛṇotu naḥ pṛthivī dyaur utāpaḥ sūryo nakṣatrair urv antarikṣam ||
RV_3,054.20a śṛṇvantu no vṛṣaṇaḥ parvatāso dhruvakṣemāsa iḷayā madantaḥ |
RV_3,054.20c ādityair no aditiḥ śṛṇotu yacchantu no marutaḥ śarma bhadram ||
RV_3,054.21a sadā sugaḥ pitumāṃ astu panthā madhvā devā oṣadhīḥ sam pipṛkta |
RV_3,054.21c bhago me agne sakhye na mṛdhyā ud rāyo aśyāṃ sadanam purukṣoḥ ||
RV_3,054.22a svadasva havyā sam iṣo didīhy asmadryak sam mimīhi śravāṃsi |
RV_3,054.22c viśvāṃ agne pṛtsu tāñ jeṣi śatrūn ahā viśvā sumanā dīdihī naḥ ||

RV_3,055.01a uṣasaḥ pūrvā adha yad vyūṣur mahad vi jajñe akṣaram pade goḥ |
RV_3,055.01c vratā devānām upa nu prabhūṣan mahad devānām asuratvam ekam ||
RV_3,055.02a mo ṣū ṇo atra juhuranta devā mā pūrve agne pitaraḥ padajñāḥ |
RV_3,055.02c purāṇyoḥ sadmanoḥ ketur antar mahad devānām asuratvam ekam ||
RV_3,055.03a vi me purutrā patayanti kāmāḥ śamy acchā dīdye pūrvyāṇi |
RV_3,055.03c samiddhe agnāv ṛtam id vadema mahad devānām asuratvam ekam ||
RV_3,055.04a samāno rājā vibhṛtaḥ purutrā śaye śayāsu prayuto vanānu |
RV_3,055.04c anyā vatsam bharati kṣeti mātā mahad devānām asuratvam ekam ||
RV_3,055.05a ākṣit pūrvāsv aparā anūrut sadyo jātāsu taruṇīṣv antaḥ |
RV_3,055.05c antarvatīḥ suvate apravītā mahad devānām asuratvam ekam ||
RV_3,055.06a śayuḥ parastād adha nu dvimātābandhanaś carati vatsa ekaḥ |
RV_3,055.06c mitrasya tā varuṇasya vratāni mahad devānām asuratvam ekam ||
RV_3,055.07a dvimātā hotā vidatheṣu samrāḷ anv agraṃ carati kṣeti budhnaḥ |
RV_3,055.07c pra raṇyāni raṇyavāco bharante mahad devānām asuratvam ekam ||
RV_3,055.08a śūrasyeva yudhyato antamasya pratīcīnaṃ dadṛśe viśvam āyat |
RV_3,055.08c antar matiś carati niṣṣidhaṃ gor mahad devānām asuratvam ekam ||
RV_3,055.09a ni veveti palito dūta āsv antar mahāṃś carati rocanena |
RV_3,055.09c vapūṃṣi bibhrad abhi no vi caṣṭe mahad devānām asuratvam ekam ||
RV_3,055.10a viṣṇur gopāḥ paramam pāti pāthaḥ priyā dhāmāny amṛtā dadhānaḥ |
RV_3,055.10c agniṣ ṭā viśvā bhuvanāni veda mahad devānām asuratvam ekam ||
RV_3,055.11a nānā cakrāte yamyā vapūṃṣi tayor anyad rocate kṛṣṇam anyat |
RV_3,055.11c śyāvī ca yad aruṣī ca svasārau mahad devānām asuratvam ekam ||
RV_3,055.12a mātā ca yatra duhitā ca dhenū sabardughe dhāpayete samīcī |
RV_3,055.12c ṛtasya te sadasīḷe antar mahad devānām asuratvam ekam ||
RV_3,055.13a anyasyā vatsaṃ rihatī mimāya kayā bhuvā ni dadhe dhenur ūdhaḥ |
RV_3,055.13c ṛtasya sā payasāpinvateḷā mahad devānām asuratvam ekam ||
RV_3,055.14a padyā vaste pururūpā vapūṃṣy ūrdhvā tasthau tryaviṃ rerihāṇā |
RV_3,055.14c ṛtasya sadma vi carāmi vidvān mahad devānām asuratvam ekam ||
RV_3,055.15a pade iva nihite dasme antas tayor anyad guhyam āvir anyat |
RV_3,055.15c sadhrīcīnā pathyā sā viṣūcī mahad devānām asuratvam ekam ||
RV_3,055.16a ā dhenavo dhunayantām aśiśvīḥ sabardughāḥ śaśayā apradugdhāḥ |
RV_3,055.16c navyā-navyā yuvatayo bhavantīr mahad devānām asuratvam ekam ||
RV_3,055.17a yad anyāsu vṛṣabho roravīti so anyasmin yūthe ni dadhāti retaḥ |
RV_3,055.17c sa hi kṣapāvān sa bhagaḥ sa rājā mahad devānām asuratvam ekam ||
RV_3,055.18a vīrasya nu svaśvyaṃ janāsaḥ pra nu vocāma vidur asya devāḥ |
RV_3,055.18c ṣoḷhā yuktāḥ pañca-pañcā vahanti mahad devānām asuratvam ekam ||
RV_3,055.19a devas tvaṣṭā savitā viśvarūpaḥ pupoṣa prajāḥ purudhā jajāna |
RV_3,055.19c imā ca viśvā bhuvanāny asya mahad devānām asuratvam ekam ||
RV_3,055.20a mahī sam airac camvā samīcī ubhe te asya vasunā nyṛṣṭe |
RV_3,055.20c śṛṇve vīro vindamāno vasūni mahad devānām asuratvam ekam ||
RV_3,055.21a imāṃ ca naḥ pṛthivīṃ viśvadhāyā upa kṣeti hitamitro na rājā |
RV_3,055.21c puraḥsadaḥ śarmasado na vīrā mahad devānām asuratvam ekam ||
RV_3,055.22a niṣṣidhvarīs ta oṣadhīr utāpo rayiṃ ta indra pṛthivī bibharti |
RV_3,055.22c sakhāyas te vāmabhājaḥ syāma mahad devānām asuratvam ekam ||

RV_3,056.01a na tā minanti māyino na dhīrā vratā devānām prathamā dhruvāṇi |
RV_3,056.01c na rodasī adruhā vedyābhir na parvatā niname tasthivāṃsaḥ ||
RV_3,056.02a ṣaḍ bhārāṃ eko acaran bibharty ṛtaṃ varṣiṣṭham upa gāva āguḥ |
RV_3,056.02c tisro mahīr uparās tasthur atyā guhā dve nihite darśy ekā ||
RV_3,056.03a tripājasyo vṛṣabho viśvarūpa uta tryudhā purudha prajāvān |
RV_3,056.03c tryanīkaḥ patyate māhināvān sa retodhā vṛṣabhaḥ śaśvatīnām ||
RV_3,056.04a abhīka āsām padavīr abodhy ādityānām ahve cāru nāma |
RV_3,056.04c āpaś cid asmā aramanta devīḥ pṛthag vrajantīḥ pari ṣīm avṛñjan ||
RV_3,056.05a trī ṣadhasthā sindhavas triḥ kavīnām uta trimātā vidatheṣu samrāṭ |
RV_3,056.05c ṛtāvarīr yoṣaṇās tisro apyās trir ā divo vidathe patyamānāḥ ||
RV_3,056.06a trir ā divaḥ savitar vāryāṇi dive-diva ā suva trir no ahnaḥ |
RV_3,056.06c tridhātu rāya ā suvā vasūni bhaga trātar dhiṣaṇe sātaye dhāḥ ||
RV_3,056.07a trir ā divaḥ savitā soṣavīti rājānā mitrāvaruṇā supāṇī |
RV_3,056.07c āpaś cid asya rodasī cid urvī ratnam bhikṣanta savituḥ savāya ||
RV_3,056.08a trir uttamā dūṇaśā rocanāni trayo rājanty asurasya vīrāḥ |
RV_3,056.08c ṛtāvāna iṣirā dūḷabhāsas trir ā divo vidathe santu devāḥ ||

RV_3,057.01a pra me vivikvāṃ avidan manīṣāṃ dhenuṃ carantīm prayutām agopām |
RV_3,057.01c sadyaś cid yā duduhe bhūri dhāser indras tad agniḥ panitāro asyāḥ ||
RV_3,057.02a indraḥ su pūṣā vṛṣaṇā suhastā divo na prītāḥ śaśayaṃ duduhre |
RV_3,057.02c viśve yad asyāṃ raṇayanta devāḥ pra vo 'tra vasavaḥ sumnam aśyām ||
RV_3,057.03a yā jāmayo vṛṣṇa icchanti śaktiṃ namasyantīr jānate garbham asmin |
RV_3,057.03c acchā putraṃ dhenavo vāvaśānā mahaś caranti bibhrataṃ vapūṃṣi ||
RV_3,057.04a acchā vivakmi rodasī sumeke grāvṇo yujāno adhvare manīṣā |
RV_3,057.04c imā u te manave bhūrivārā ūrdhvā bhavanti darśatā yajatrāḥ ||
RV_3,057.05a yā te jihvā madhumatī sumedhā agne deveṣūcyata urūcī |
RV_3,057.05c tayeha viśvāṃ avase yajatrān ā sādaya pāyayā cā madhūni ||
RV_3,057.06a yā te agne parvatasyeva dhārāsaścantī pīpayad deva citrā |
RV_3,057.06c tām asmabhyam pramatiṃ jātavedo vaso rāsva sumatiṃ viśvajanyām ||

RV_3,058.01a dhenuḥ pratnasya kāmyaṃ duhānāntaḥ putraś carati dakṣiṇāyāḥ |
RV_3,058.01c ā dyotaniṃ vahati śubhrayāmoṣasa stomo aśvināv ajīgaḥ ||
RV_3,058.02a suyug vahanti prati vām ṛtenordhvā bhavanti pitareva medhāḥ |
RV_3,058.02c jarethām asmad vi paṇer manīṣāṃ yuvor avaś cakṛmā yātam arvāk ||
RV_3,058.03a suyugbhir aśvaiḥ suvṛtā rathena dasrāv imaṃ śṛṇutaṃ ślokam adreḥ |
RV_3,058.03c kim aṅga vām praty avartiṃ gamiṣṭhāhur viprāso aśvinā purājāḥ ||
RV_3,058.04a ā manyethām ā gataṃ kac cid evair viśve janāso aśvinā havante |
RV_3,058.04c imā hi vāṃ goṛjīkā madhūni pra mitrāso na dadur usro agre ||
RV_3,058.05a tiraḥ purū cid aśvinā rajāṃsy āṅgūṣo vām maghavānā janeṣu |
RV_3,058.05c eha yātam pathibhir devayānair dasrāv ime vāṃ nidhayo madhūnām ||
RV_3,058.06a purāṇam okaḥ sakhyaṃ śivaṃ vāṃ yuvor narā draviṇaṃ jahnāvyām |
RV_3,058.06c punaḥ kṛṇvānāḥ sakhyā śivāni madhvā madema saha nū samānāḥ ||
RV_3,058.07a aśvinā vāyunā yuvaṃ sudakṣā niyudbhiṣ ca sajoṣasā yuvānā |
RV_3,058.07c nāsatyā tiroahnyaṃ juṣāṇā somam pibatam asridhā sudānū ||
RV_3,058.08a aśvinā pari vām iṣaḥ purūcīr īyur gīrbhir yatamānā amṛdhrāḥ |
RV_3,058.08c ratho ha vām ṛtajā adrijūtaḥ pari dyāvāpṛthivī yāti sadyaḥ ||
RV_3,058.09a aśvinā madhuṣuttamo yuvākuḥ somas tam pātam ā gataṃ duroṇe |
RV_3,058.09c ratho ha vām bhūri varpaḥ karikrat sutāvato niṣkṛtam āgamiṣṭhaḥ ||

RV_3,059.01a mitro janān yātayati bruvāṇo mitro dādhāra pṛthivīm uta dyām |
RV_3,059.01c mitraḥ kṛṣṭīr animiṣābhi caṣṭe mitrāya havyaṃ ghṛtavaj juhota ||
RV_3,059.02a pra sa mitra marto astu prayasvān yas ta āditya śikṣati vratena |
RV_3,059.02c na hanyate na jīyate tvoto nainam aṃho aśnoty antito na dūrāt ||
RV_3,059.03a anamīvāsa iḷayā madanto mitajñavo varimann ā pṛthivyāḥ |
RV_3,059.03c ādityasya vratam upakṣiyanto vayam mitrasya sumatau syāma ||
RV_3,059.04a ayam mitro namasyaḥ suśevo rājā sukṣatro ajaniṣṭa vedhāḥ |
RV_3,059.04c tasya vayaṃ sumatau yajñiyasyāpi bhadre saumanase syāma ||
RV_3,059.05a mahāṃ ādityo namasopasadyo yātayajjano gṛṇate suśevaḥ |
RV_3,059.05c tasmā etat panyatamāya juṣṭam agnau mitrāya havir ā juhota ||
RV_3,059.06a mitrasya carṣaṇīdhṛto 'vo devasya sānasi |
RV_3,059.06c dyumnaṃ citraśravastamam ||
RV_3,059.07a abhi yo mahinā divam mitro babhūva saprathāḥ |
RV_3,059.07c abhi śravobhiḥ pṛthivīm ||
RV_3,059.08a mitrāya pañca yemire janā abhiṣṭiśavase |
RV_3,059.08c sa devān viśvān bibharti ||
RV_3,059.09a mitro deveṣv āyuṣu janāya vṛktabarhiṣe |
RV_3,059.09c iṣa iṣṭavratā akaḥ ||

RV_3,060.01a iheha vo manasā bandhutā nara uśijo jagmur abhi tāni vedasā |
RV_3,060.01c yābhir māyābhiḥ pratijūtivarpasaḥ saudhanvanā yajñiyam bhāgam ānaśa ||
RV_3,060.02a yābhiḥ śacībhiś camasāṃ apiṃśata yayā dhiyā gām ariṇīta carmaṇaḥ |
RV_3,060.02c yena harī manasā niratakṣata tena devatvam ṛbhavaḥ sam ānaśa ||
RV_3,060.03a indrasya sakhyam ṛbhavaḥ sam ānaśur manor napāto apaso dadhanvire |
RV_3,060.03c saudhanvanāso amṛtatvam erire viṣṭvī śamībhiḥ sukṛtaḥ sukṛtyayā ||
RV_3,060.04a indreṇa yātha sarathaṃ sute sacāṃ atho vaśānām bhavathā saha śriyā |
RV_3,060.04c na vaḥ pratimai sukṛtāni vāghataḥ saudhanvanā ṛbhavo vīryāṇi ca ||
RV_3,060.05a indra ṛbhubhir vājavadbhiḥ samukṣitaṃ sutaṃ somam ā vṛṣasvā gabhastyoḥ |
RV_3,060.05c dhiyeṣito maghavan dāśuṣo gṛhe saudhanvanebhiḥ saha matsvā nṛbhiḥ ||
RV_3,060.06a indra ṛbhumān vājavān matsveha no 'smin savane śacyā puruṣṭuta |
RV_3,060.06c imāni tubhyaṃ svasarāṇi yemire vratā devānām manuṣaś ca dharmabhiḥ ||
RV_3,060.07a indra ṛbhubhir vājibhir vājayann iha stomaṃ jaritur upa yāhi yajñiyam |
RV_3,060.07c śataṃ ketebhir iṣirebhir āyave sahasraṇītho adhvarasya homani ||

RV_3,061.01a uṣo vājena vājini pracetā stomaṃ juṣasva gṛṇato maghoni |
RV_3,061.01c purāṇī devi yuvatiḥ purandhir anu vrataṃ carasi viśvavāre ||
RV_3,061.02a uṣo devy amartyā vi bhāhi candrarathā sūnṛtā īrayantī |
RV_3,061.02c ā tvā vahantu suyamāso aśvā hiraṇyavarṇām pṛthupājaso ye ||
RV_3,061.03a uṣaḥ pratīcī bhuvanāni viśvordhvā tiṣṭhasy amṛtasya ketuḥ |
RV_3,061.03c samānam arthaṃ caraṇīyamānā cakram iva navyasy ā vavṛtsva ||
RV_3,061.04a ava syūmeva cinvatī maghony uṣā yāti svasarasya patnī |
RV_3,061.04c svar janantī subhagā sudaṃsā āntād divaḥ papratha ā pṛthivyāḥ ||
RV_3,061.05a acchā vo devīm uṣasaṃ vibhātīm pra vo bharadhvaṃ namasā suvṛktim |
RV_3,061.05c ūrdhvam madhudhā divi pājo aśret pra rocanā ruruce raṇvasaṃdṛk ||
RV_3,061.06a ṛtāvarī divo arkair abodhy ā revatī rodasī citram asthāt |
RV_3,061.06c āyatīm agna uṣasaṃ vibhātīṃ vāmam eṣi draviṇam bhikṣamāṇaḥ ||
RV_3,061.07a ṛtasya budhna uṣasām iṣaṇyan vṛṣā mahī rodasī ā viveśa |
RV_3,061.07c mahī mitrasya varuṇasya māyā candreva bhānuṃ vi dadhe purutrā ||

RV_3,062.01a imā u vām bhṛmayo manyamānā yuvāvate na tujyā abhūvan |
RV_3,062.01c kva tyad indrāvaruṇā yaśo vāṃ yena smā sinam bharathaḥ sakhibhyaḥ ||
RV_3,062.02a ayam u vām purutamo rayīyañ chaśvattamam avase johavīti |
RV_3,062.02c sajoṣāv indrāvaruṇā marudbhir divā pṛthivyā śṛṇutaṃ havam me ||
RV_3,062.03a asme tad indrāvaruṇā vasu ṣyād asme rayir marutaḥ sarvavīraḥ |
RV_3,062.03c asmān varūtrīḥ śaraṇair avantv asmān hotrā bhāratī dakṣiṇābhiḥ ||
RV_3,062.04a bṛhaspate juṣasva no havyāni viśvadevya |
RV_3,062.04c rāsva ratnāni dāśuṣe ||
RV_3,062.05a śucim arkair bṛhaspatim adhvareṣu namasyata |
RV_3,062.05c anāmy oja ā cake ||
RV_3,062.06a vṛṣabhaṃ carṣaṇīnāṃ viśvarūpam adābhyam |
RV_3,062.06c bṛhaspatiṃ vareṇyam ||
RV_3,062.07a iyaṃ te pūṣann āghṛṇe suṣṭutir deva navyasī |
RV_3,062.07c asmābhis tubhyaṃ śasyate ||
RV_3,062.08a tāṃ juṣasva giram mama vājayantīm avā dhiyam |
RV_3,062.08c vadhūyur iva yoṣaṇām ||
RV_3,062.09a yo viśvābhi vipaśyati bhuvanā saṃ ca paśyati |
RV_3,062.09c sa naḥ pūṣāvitā bhuvat ||
RV_3,062.10a tat savitur vareṇyam bhargo devasya dhīmahi |
RV_3,062.10c dhiyo yo naḥ pracodayāt ||
RV_3,062.11a devasya savitur vayaṃ vājayantaḥ purandhyā |
RV_3,062.11c bhagasya rātim īmahe ||
RV_3,062.12a devaṃ naraḥ savitāraṃ viprā yajñaiḥ suvṛktibhiḥ |
RV_3,062.12c namasyanti dhiyeṣitāḥ ||
RV_3,062.13a somo jigāti gātuvid devānām eti niṣkṛtam |
RV_3,062.13c ṛtasya yonim āsadam ||
RV_3,062.14a somo asmabhyaṃ dvipade catuṣpade ca paśave |
RV_3,062.14c anamīvā iṣas karat ||
RV_3,062.15a asmākam āyur vardhayann abhimātīḥ sahamānaḥ |
RV_3,062.15c somaḥ sadhastham āsadat ||
RV_3,062.16a ā no mitrāvaruṇā ghṛtair gavyūtim ukṣatam |
RV_3,062.16c madhvā rajāṃsi sukratū ||
RV_3,062.17a uruśaṃsā namovṛdhā mahnā dakṣasya rājathaḥ |
RV_3,062.17c drāghiṣṭhābhiḥ śucivratā ||
RV_3,062.18a gṛṇānā jamadagninā yonāv ṛtasya sīdatam |
RV_3,062.18c pātaṃ somam ṛtāvṛdhā ||




_____________________________________________________________




Ṛgveda 4




RV_4,001.01a tvāṃ hy agne sadam it samanyavo devāso devam aratiṃ nyerira iti kratvā nyerire |
RV_4,001.01c amartyaṃ yajata martyeṣv ā devam ādevaṃ janata pracetasaṃ viśvam ādevaṃ janata pracetasam ||
RV_4,001.02a sa bhrātaraṃ varuṇam agna ā vavṛtsva devāṃ acchā sumatī yajñavanasaṃ jyeṣṭhaṃ yajñavanasam |
RV_4,001.02c ṛtāvānam ādityaṃ carṣaṇīdhṛtaṃ rājānaṃ carṣaṇīdhṛtam ||
RV_4,001.03a sakhe sakhāyam abhy ā vavṛtsvāśuṃ na cakraṃ rathyeva raṃhyāsmabhyaṃ dasma raṃhyā |
RV_4,001.03c agne mṛḷīkaṃ varuṇe sacā vido marutsu viśvabhānuṣu |
RV_4,001.03d tokāya tuje śuśucāna śaṃ kṛdhy asmabhyaṃ dasma śaṃ kṛdhi ||
RV_4,001.04a tvaṃ no agne varuṇasya vidvān devasya heḷo 'va yāsisīṣṭhāḥ |
RV_4,001.04c yajiṣṭho vahnitamaḥ śośucāno viśvā dveṣāṃsi pra mumugdhy asmat ||
RV_4,001.05a sa tvaṃ no agne 'vamo bhavotī nediṣṭho asyā uṣaso vyuṣṭau |
RV_4,001.05c ava yakṣva no varuṇaṃ rarāṇo vīhi mṛḷīkaṃ suhavo na edhi ||
RV_4,001.06a asya śreṣṭhā subhagasya saṃdṛg devasya citratamā martyeṣu |
RV_4,001.06c śuci ghṛtaṃ na taptam aghnyāyā spārhā devasya maṃhaneva dhenoḥ ||
RV_4,001.07a trir asya tā paramā santi satyā spārhā devasya janimāny agneḥ |
RV_4,001.07c anante antaḥ parivīta āgāc chuciḥ śukro aryo rorucānaḥ ||
RV_4,001.08a sa dūto viśved abhi vaṣṭi sadmā hotā hiraṇyaratho raṃsujihvaḥ |
RV_4,001.08c rohidaśvo vapuṣyo vibhāvā sadā raṇvaḥ pitumatīva saṃsat ||
RV_4,001.09a sa cetayan manuṣo yajñabandhuḥ pra tam mahyā raśanayā nayanti |
RV_4,001.09c sa kṣety asya duryāsu sādhan devo martasya sadhanitvam āpa ||
RV_4,001.10a sa tū no agnir nayatu prajānann acchā ratnaṃ devabhaktaṃ yad asya |
RV_4,001.10c dhiyā yad viśve amṛtā akṛṇvan dyauṣ pitā janitā satyam ukṣan ||
RV_4,001.11a sa jāyata prathamaḥ pastyāsu maho budhne rajaso asya yonau |
RV_4,001.11b apād aśīrṣā guhamāno antāyoyuvāno vṛṣabhasya nīḷe ||
RV_4,001.12a pra śardha ārta prathamaṃ vipanyāṃ ṛtasya yonā vṛṣabhasya nīḷe |
RV_4,001.12c spārho yuvā vapuṣyo vibhāvā sapta priyāso 'janayanta vṛṣṇe ||
RV_4,001.13a asmākam atra pitaro manuṣyā abhi pra sedur ṛtam āśuṣāṇāḥ |
RV_4,001.13c aśmavrajāḥ sudughā vavre antar ud usrā ājann uṣaso huvānāḥ ||
RV_4,001.14a te marmṛjata dadṛvāṃso adriṃ tad eṣām anye abhito vi vocan |
RV_4,001.14c paśvayantrāso abhi kāram arcan vidanta jyotiś cakṛpanta dhībhiḥ ||
RV_4,001.15a te gavyatā manasā dṛdhram ubdhaṃ gā yemānam pari ṣantam adrim |
RV_4,001.15c dṛḷhaṃ naro vacasā daivyena vrajaṃ gomantam uśijo vi vavruḥ ||
RV_4,001.16a te manvata prathamaṃ nāma dhenos triḥ sapta mātuḥ paramāṇi vindan |
RV_4,001.16c taj jānatīr abhy anūṣata vrā āvir bhuvad aruṇīr yaśasā goḥ ||
RV_4,001.17a neśat tamo dudhitaṃ rocata dyaur ud devyā uṣaso bhānur arta |
RV_4,001.17c ā sūryo bṛhatas tiṣṭhad ajrāṃ ṛju marteṣu vṛjinā ca paśyan ||
RV_4,001.18a ād it paścā bubudhānā vy akhyann ād id ratnaṃ dhārayanta dyubhaktam |
RV_4,001.18c viśve viśvāsu duryāsu devā mitra dhiye varuṇa satyam astu ||
RV_4,001.19a acchā voceya śuśucānam agniṃ hotāraṃ viśvabharasaṃ yajiṣṭham |
RV_4,001.19c śucy ūdho atṛṇan na gavām andho na pūtam pariṣiktam aṃśoḥ ||
RV_4,001.20a viśveṣām aditir yajñiyānāṃ viśveṣām atithir mānuṣāṇām |
RV_4,001.20c agnir devānām ava āvṛṇānaḥ sumṛḷīko bhavatu jātavedāḥ ||

RV_4,002.01a yo martyeṣv amṛta ṛtāvā devo deveṣv aratir nidhāyi |
RV_4,002.01c hotā yajiṣṭho mahnā śucadhyai havyair agnir manuṣa īrayadhyai ||
RV_4,002.02a iha tvaṃ sūno sahaso no adya jāto jātāṃ ubhayāṃ antar agne |
RV_4,002.02c dūta īyase yuyujāna ṛṣva ṛjumuṣkān vṛṣaṇaḥ śukrāṃś ca ||
RV_4,002.03a atyā vṛdhasnū rohitā ghṛtasnū ṛtasya manye manasā javiṣṭhā |
RV_4,002.03c antar īyase aruṣā yujāno yuṣmāṃś ca devān viśa ā ca martān ||
RV_4,002.04a aryamaṇaṃ varuṇam mitram eṣām indrāviṣṇū maruto aśvinota |
RV_4,002.04c svaśvo agne surathaḥ surādhā ed u vaha suhaviṣe janāya ||
RV_4,002.05a gomāṃ agne 'vimāṃ aśvī yajño nṛvatsakhā sadam id apramṛṣyaḥ |
RV_4,002.05c iḷāvāṃ eṣo asura prajāvān dīrgho rayiḥ pṛthubudhnaḥ sabhāvān ||
RV_4,002.06a yas ta idhmaṃ jabharat siṣvidāno mūrdhānaṃ vā tatapate tvāyā |
RV_4,002.06c bhuvas tasya svatavāṃḥ pāyur agne viśvasmāt sīm aghāyata uruṣya ||
RV_4,002.07a yas te bharād anniyate cid annaṃ niśiṣan mandram atithim udīrat |
RV_4,002.07c ā devayur inadhate duroṇe tasmin rayir dhruvo astu dāsvān ||
RV_4,002.08a yas tvā doṣā ya uṣasi praśaṃsāt priyaṃ vā tvā kṛṇavate haviṣmān |
RV_4,002.08c aśvo na sve dama ā hemyāvān tam aṃhasaḥ pīparo dāśvāṃsam ||
RV_4,002.09a yas tubhyam agne amṛtāya dāśad duvas tve kṛṇavate yatasruk |
RV_4,002.09c na sa rāyā śaśamāno vi yoṣan nainam aṃhaḥ pari varad aghāyoḥ ||
RV_4,002.10a yasya tvam agne adhvaraṃ jujoṣo devo martasya sudhitaṃ rarāṇaḥ |
RV_4,002.10c prīted asad dhotrā sā yaviṣṭhāsāma yasya vidhato vṛdhāsaḥ ||
RV_4,002.11a cittim acittiṃ cinavad vi vidvān pṛṣṭheva vītā vṛjinā ca martān |
RV_4,002.11c rāye ca naḥ svapatyāya deva ditiṃ ca rāsvāditim uruṣya ||
RV_4,002.12a kaviṃ śaśāsuḥ kavayo 'dabdhā nidhārayanto duryāsv āyoḥ |
RV_4,002.12c atas tvaṃ dṛśyāṃ agna etān paḍbhiḥ paśyer adbhutāṃ arya evaiḥ ||
RV_4,002.13a tvam agne vāghate supraṇītiḥ sutasomāya vidhate yaviṣṭha |
RV_4,002.13c ratnam bhara śaśamānāya ghṛṣve pṛthu ścandram avase carṣaṇiprāḥ ||
RV_4,002.14a adhā ha yad vayam agne tvāyā paḍbhir hastebhiś cakṛmā tanūbhiḥ |
RV_4,002.14c rathaṃ na kranto apasā bhurijor ṛtaṃ yemuḥ sudhya āśuṣāṇāḥ ||
RV_4,002.15a adhā mātur uṣasaḥ sapta viprā jāyemahi prathamā vedhaso nṝn |
RV_4,002.15c divas putrā aṅgiraso bhavemādriṃ rujema dhaninaṃ śucantaḥ ||
RV_4,002.16a adhā yathā naḥ pitaraḥ parāsaḥ pratnāso agna ṛtam āśuṣāṇāḥ |
RV_4,002.16c śucīd ayan dīdhitim ukthaśāsaḥ kṣāmā bhindanto aruṇīr apa vran ||
RV_4,002.17a sukarmāṇaḥ suruco devayanto 'yo na devā janimā dhamantaḥ |
RV_4,002.17c śucanto agniṃ vavṛdhanta indram ūrvaṃ gavyam pariṣadanto agman ||
RV_4,002.18a ā yūtheva kṣumati paśvo akhyad devānāṃ yaj janimānty ugra |
RV_4,002.18c martānāṃ cid urvaśīr akṛpran vṛdhe cid arya uparasyāyoḥ ||
RV_4,002.19a akarma te svapaso abhūma ṛtam avasrann uṣaso vibhātīḥ |
RV_4,002.19c anūnam agnim purudhā suścandraṃ devasya marmṛjataś cāru cakṣuḥ ||
RV_4,002.20a etā te agna ucathāni vedho 'vocāma kavaye tā juṣasva |
RV_4,002.20c uc chocasva kṛṇuhi vasyaso no maho rāyaḥ puruvāra pra yandhi ||

RV_4,003.01a ā vo rājānam adhvarasya rudraṃ hotāraṃ satyayajaṃ rodasyoḥ |
RV_4,003.01c agnim purā tanayitnor acittād dhiraṇyarūpam avase kṛṇudhvam ||
RV_4,003.02a ayaṃ yoniś cakṛmā yaṃ vayaṃ te jāyeva patya uśatī suvāsāḥ |
RV_4,003.02c arvācīnaḥ parivīto ni ṣīdemā u te svapāka pratīcīḥ ||
RV_4,003.03a āśṛṇvate adṛpitāya manma nṛcakṣase sumṛḷīkāya vedhaḥ |
RV_4,003.03c devāya śastim amṛtāya śaṃsa grāveva sotā madhuṣud yam īḷe ||
RV_4,003.04a tvaṃ cin naḥ śamyā agne asyā ṛtasya bodhy ṛtacit svādhīḥ |
RV_4,003.04c kadā ta ukthā sadhamādyāni kadā bhavanti sakhyā gṛhe te ||
RV_4,003.05a kathā ha tad varuṇāya tvam agne kathā dive garhase kan na āgaḥ |
RV_4,003.05c kathā mitrāya mīḷhuṣe pṛthivyai bravaḥ kad aryamṇe kad bhagāya ||
RV_4,003.06a kad dhiṣṇyāsu vṛdhasāno agne kad vātāya pratavase śubhaṃye |
RV_4,003.06c parijmane nāsatyāya kṣe bravaḥ kad agne rudrāya nṛghne ||
RV_4,003.07a kathā mahe puṣṭimbharāya pūṣṇe kad rudrāya sumakhāya havirde |
RV_4,003.07c kad viṣṇava urugāyāya reto bravaḥ kad agne śarave bṛhatyai ||
RV_4,003.08a kathā śardhāya marutām ṛtāya kathā sūre bṛhate pṛcchyamānaḥ |
RV_4,003.08c prati bravo 'ditaye turāya sādhā divo jātavedaś cikitvān ||
RV_4,003.09a ṛtena ṛtaṃ niyatam īḷa ā gor āmā sacā madhumat pakvam agne |
RV_4,003.09c kṛṣṇā satī ruśatā dhāsinaiṣā jāmaryeṇa payasā pīpāya ||
RV_4,003.10a ṛtena hi ṣmā vṛṣabhaś cid aktaḥ pumāṃ agniḥ payasā pṛṣṭhyena |
RV_4,003.10c aspandamāno acarad vayodhā vṛṣā śukraṃ duduhe pṛśnir ūdhaḥ ||
RV_4,003.11a ṛtenādriṃ vy asan bhidantaḥ sam aṅgiraso navanta gobhiḥ |
RV_4,003.11c śunaṃ naraḥ pari ṣadann uṣāsam āviḥ svar abhavaj jāte agnau ||
RV_4,003.12a ṛtena devīr amṛtā amṛktā arṇobhir āpo madhumadbhir agne |
RV_4,003.12c vājī na sargeṣu prastubhānaḥ pra sadam it sravitave dadhanyuḥ ||
RV_4,003.13a mā kasya yakṣaṃ sadam id dhuro gā mā veśasya praminato māpeḥ |
RV_4,003.13c mā bhrātur agne anṛjor ṛṇaṃ ver mā sakhyur dakṣaṃ ripor bhujema ||
RV_4,003.14a rakṣā ṇo agne tava rakṣaṇebhī rārakṣāṇaḥ sumakha prīṇānaḥ |
RV_4,003.14c prati ṣphura vi ruja vīḍv aṃho jahi rakṣo mahi cid vāvṛdhānam ||
RV_4,003.15a ebhir bhava sumanā agne arkair imān spṛśa manmabhiḥ śūra vājān |
RV_4,003.15c uta brahmāṇy aṅgiro juṣasva saṃ te śastir devavātā jareta ||
RV_4,003.16a etā viśvā viduṣe tubhyaṃ vedho nīthāny agne niṇyā vacāṃsi |
RV_4,003.16c nivacanā kavaye kāvyāny aśaṃsiṣam matibhir vipra ukthaiḥ ||

RV_4,004.01a kṛṇuṣva pājaḥ prasitiṃ na pṛthvīṃ yāhi rājevāmavāṃ ibhena |
RV_4,004.01c tṛṣvīm anu prasitiṃ drūṇāno 'stāsi vidhya rakṣasas tapiṣṭhaiḥ ||
RV_4,004.02a tava bhramāsa āśuyā patanty anu spṛśa dhṛṣatā śośucānaḥ |
RV_4,004.02c tapūṃṣy agne juhvā pataṅgān asaṃdito vi sṛja viṣvag ulkāḥ ||
RV_4,004.03a prati spaśo vi sṛja tūrṇitamo bhavā pāyur viśo asyā adabdhaḥ |
RV_4,004.03c yo no dūre aghaśaṃso yo anty agne mākiṣ ṭe vyathir ā dadharṣīt ||
RV_4,004.04a ud agne tiṣṭha praty ā tanuṣva ny amitrāṃ oṣatāt tigmahete |
RV_4,004.04c yo no arātiṃ samidhāna cakre nīcā taṃ dhakṣy atasaṃ na śuṣkam ||
RV_4,004.05a ūrdhvo bhava prati vidhyādhy asmad āviṣ kṛṇuṣva daivyāny agne |
RV_4,004.05c ava sthirā tanuhi yātujūnāṃ jāmim ajāmim pra mṛṇīhi śatrūn ||
RV_4,004.06a sa te jānāti sumatiṃ yaviṣṭha ya īvate brahmaṇe gātum airat |
RV_4,004.06c viśvāny asmai sudināni rāyo dyumnāny aryo vi duro abhi dyaut ||
RV_4,004.07a sed agne astu subhagaḥ sudānur yas tvā nityena haviṣā ya ukthaiḥ |
RV_4,004.07c piprīṣati sva āyuṣi duroṇe viśved asmai sudinā sāsad iṣṭiḥ ||
RV_4,004.08a arcāmi te sumatiṃ ghoṣy arvāk saṃ te vāvātā jaratām iyaṃ gīḥ |
RV_4,004.08c svaśvās tvā surathā marjayemāsme kṣatrāṇi dhārayer anu dyūn ||
RV_4,004.09a iha tvā bhūry ā cared upa tman doṣāvastar dīdivāṃsam anu dyūn |
RV_4,004.09c krīḷantas tvā sumanasaḥ sapemābhi dyumnā tasthivāṃso janānām ||
RV_4,004.10a yas tvā svaśvaḥ suhiraṇyo agna upayāti vasumatā rathena |
RV_4,004.10c tasya trātā bhavasi tasya sakhā yas ta ātithyam ānuṣag jujoṣat ||
RV_4,004.11a maho rujāmi bandhutā vacobhis tan mā pitur gotamād anv iyāya |
RV_4,004.11c tvaṃ no asya vacasaś cikiddhi hotar yaviṣṭha sukrato damūnāḥ ||
RV_4,004.12a asvapnajas taraṇayaḥ suśevā atandrāso 'vṛkā aśramiṣṭhāḥ |
RV_4,004.12c te pāyavaḥ sadhryañco niṣadyāgne tava naḥ pāntv amūra ||
RV_4,004.13a ye pāyavo māmateyaṃ te agne paśyanto andhaṃ duritād arakṣan |
RV_4,004.13c rarakṣa tān sukṛto viśvavedā dipsanta id ripavo nāha debhuḥ ||
RV_4,004.14a tvayā vayaṃ sadhanyas tvotās tava praṇīty aśyāma vājān |
RV_4,004.14c ubhā śaṃsā sūdaya satyatāte 'nuṣṭhuyā kṛṇuhy ahrayāṇa ||
RV_4,004.15a ayā te agne samidhā vidhema prati stomaṃ śasyamānaṃ gṛbhāya |
RV_4,004.15c dahāśaso rakṣasaḥ pāhy asmān druho nido mitramaho avadyāt ||

RV_4,005.01a vaiśvānarāya mīḷhuṣe sajoṣāḥ kathā dāśemāgnaye bṛhad bhāḥ |
RV_4,005.01c anūnena bṛhatā vakṣathenopa stabhāyad upamin na rodhaḥ ||
RV_4,005.02a mā nindata ya imām mahyaṃ rātiṃ devo dadau martyāya svadhāvān |
RV_4,005.02c pākāya gṛtso amṛto vicetā vaiśvānaro nṛtamo yahvo agniḥ ||
RV_4,005.03a sāma dvibarhā mahi tigmabhṛṣṭiḥ sahasraretā vṛṣabhas tuviṣmān |
RV_4,005.03c padaṃ na gor apagūḷhaṃ vividvān agnir mahyam pred u vocan manīṣām ||
RV_4,005.04a pra tāṃ agnir babhasat tigmajambhas tapiṣṭhena śociṣā yaḥ surādhāḥ |
RV_4,005.04c pra ye minanti varuṇasya dhāma priyā mitrasya cetato dhruvāṇi ||
RV_4,005.05a abhrātaro na yoṣaṇo vyantaḥ patiripo na janayo durevāḥ |
RV_4,005.05c pāpāsaḥ santo anṛtā asatyā idam padam ajanatā gabhīram ||
RV_4,005.06a idam me agne kiyate pāvakāminate gurum bhāraṃ na manma |
RV_4,005.06c bṛhad dadhātha dhṛṣatā gabhīraṃ yahvam pṛṣṭham prayasā saptadhātu ||
RV_4,005.07a tam in nv eva samanā samānam abhi kratvā punatī dhītir aśyāḥ |
RV_4,005.07c sasasya carmann adhi cāru pṛśner agre rupa ārupitaṃ jabāru ||
RV_4,005.08a pravācyaṃ vacasaḥ kim me asya guhā hitam upa niṇig vadanti |
RV_4,005.08c yad usriyāṇām apa vār iva vran pāti priyaṃ rupo agram padaṃ veḥ ||
RV_4,005.09a idam u tyan mahi mahām anīkaṃ yad usriyā sacata pūrvyaṃ gauḥ |
RV_4,005.09c ṛtasya pade adhi dīdyānaṃ guhā raghuṣyad raghuyad viveda ||
RV_4,005.10a adha dyutānaḥ pitroḥ sacāsāmanuta guhyaṃ cāru pṛśneḥ |
RV_4,005.10c mātuṣ pade parame anti ṣad gor vṛṣṇaḥ śociṣaḥ prayatasya jihvā ||
RV_4,005.11a ṛtaṃ voce namasā pṛcchyamānas tavāśasā jātavedo yadīdam |
RV_4,005.11c tvam asya kṣayasi yad dha viśvaṃ divi yad u draviṇaṃ yat pṛthivyām ||
RV_4,005.12a kiṃ no asya draviṇaṃ kad dha ratnaṃ vi no voco jātavedaś cikitvān |
RV_4,005.12c guhādhvanaḥ paramaṃ yan no asya reku padaṃ na nidānā aganma ||
RV_4,005.13a kā maryādā vayunā kad dha vāmam acchā gamema raghavo na vājam |
RV_4,005.13c kadā no devīr amṛtasya patnīḥ sūro varṇena tatanann uṣāsaḥ ||
RV_4,005.14a anireṇa vacasā phalgvena pratītyena kṛdhunātṛpāsaḥ |
RV_4,005.14c adhā te agne kim ihā vadanty anāyudhāsa āsatā sacantām ||
RV_4,005.15a asya śriye samidhānasya vṛṣṇo vasor anīkaṃ dama ā ruroca |
RV_4,005.15c ruśad vasānaḥ sudṛśīkarūpaḥ kṣitir na rāyā puruvāro adyaut ||

RV_4,006.01a ūrdhva ū ṣu ṇo adhvarasya hotar agne tiṣṭha devatātā yajīyān |
RV_4,006.01c tvaṃ hi viśvam abhy asi manma pra vedhasaś cit tirasi manīṣām ||
RV_4,006.02a amūro hotā ny asādi vikṣv agnir mandro vidatheṣu pracetāḥ |
RV_4,006.02c ūrdhvam bhānuṃ savitevāśren meteva dhūmaṃ stabhāyad upa dyām ||
RV_4,006.03a yatā sujūrṇī rātinī ghṛtācī pradakṣiṇid devatātim urāṇaḥ |
RV_4,006.03c ud u svarur navajā nākraḥ paśvo anakti sudhitaḥ sumekaḥ ||
RV_4,006.04a stīrṇe barhiṣi samidhāne agnā ūrdhvo adhvaryur jujuṣāṇo asthāt |
RV_4,006.04c pary agniḥ paśupā na hotā triviṣṭy eti pradiva urāṇaḥ ||
RV_4,006.05a pari tmanā mitadrur eti hotāgnir mandro madhuvacā ṛtāvā |
RV_4,006.05c dravanty asya vājino na śokā bhayante viśvā bhuvanā yad abhrāṭ ||
RV_4,006.06a bhadrā te agne svanīka saṃdṛg ghorasya sato viṣuṇasya cāruḥ |
RV_4,006.06c na yat te śocis tamasā varanta na dhvasmānas tanvī repa ā dhuḥ ||
RV_4,006.07a na yasya sātur janitor avāri na mātarāpitarā nū cid iṣṭau |
RV_4,006.07c adhā mitro na sudhitaḥ pāvako 'gnir dīdāya mānuṣīṣu vikṣu ||
RV_4,006.08a dvir yam pañca jījanan saṃvasānāḥ svasāro agnim mānuṣīṣu vikṣu |
RV_4,006.08c uṣarbudham atharyo na dantaṃ śukraṃ svāsam paraśuṃ na tigmam ||
RV_4,006.09a tava tye agne harito ghṛtasnā rohitāsa ṛjvañcaḥ svañcaḥ |
RV_4,006.09c aruṣāso vṛṣaṇa ṛjumuṣkā ā devatātim ahvanta dasmāḥ ||
RV_4,006.10a ye ha tye te sahamānā ayāsas tveṣāso agne arcayaś caranti |
RV_4,006.10c śyenāso na duvasanāso arthaṃ tuviṣvaṇaso mārutaṃ na śardhaḥ ||
RV_4,006.11a akāri brahma samidhāna tubhyaṃ śaṃsāty ukthaṃ yajate vy ū dhāḥ |
RV_4,006.11c hotāram agnim manuṣo ni ṣedur namasyanta uśijaḥ śaṃsam āyoḥ ||

RV_4,007.01a ayam iha prathamo dhāyi dhātṛbhir hotā yajiṣṭho adhvareṣv īḍyaḥ |
RV_4,007.01c yam apnavāno bhṛgavo virurucur vaneṣu citraṃ vibhvaṃ viśe-viśe ||
RV_4,007.02a agne kadā ta ānuṣag bhuvad devasya cetanam |
RV_4,007.02c adhā hi tvā jagṛbhrire martāso vikṣv īḍyam ||
RV_4,007.03a ṛtāvānaṃ vicetasam paśyanto dyām iva stṛbhiḥ |
RV_4,007.03c viśveṣām adhvarāṇāṃ haskartāraṃ dame-dame ||
RV_4,007.04a āśuṃ dūtaṃ vivasvato viśvā yaś carṣaṇīr abhi |
RV_4,007.04c ā jabhruḥ ketum āyavo bhṛgavāṇaṃ viśe-viśe ||
RV_4,007.05a tam īṃ hotāram ānuṣak cikitvāṃsaṃ ni ṣedire |
RV_4,007.05c raṇvam pāvakaśociṣaṃ yajiṣṭhaṃ sapta dhāmabhiḥ ||
RV_4,007.06a taṃ śaśvatīṣu mātṛṣu vana ā vītam aśritam |
RV_4,007.06c citraṃ santaṃ guhā hitaṃ suvedaṃ kūcidarthinam ||
RV_4,007.07a sasasya yad viyutā sasminn ūdhann ṛtasya dhāman raṇayanta devāḥ |
RV_4,007.07c mahāṃ agnir namasā rātahavyo ver adhvarāya sadam id ṛtāvā ||
RV_4,007.08a ver adhvarasya dūtyāni vidvān ubhe antā rodasī saṃcikitvān |
RV_4,007.08c dūta īyase pradiva urāṇo viduṣṭaro diva ārodhanāni ||
RV_4,007.09a kṛṣṇaṃ ta ema ruśataḥ puro bhāś cariṣṇv arcir vapuṣām id ekam |
RV_4,007.09c yad apravītā dadhate ha garbhaṃ sadyaś cij jāto bhavasīd u dūtaḥ ||
RV_4,007.10a sadyo jātasya dadṛśānam ojo yad asya vāto anuvāti śociḥ |
RV_4,007.10c vṛṇakti tigmām ataseṣu jihvāṃ sthirā cid annā dayate vi jambhaiḥ ||
RV_4,007.11a tṛṣu yad annā tṛṣuṇā vavakṣa tṛṣuṃ dūtaṃ kṛṇute yahvo agniḥ |
RV_4,007.11c vātasya meḷiṃ sacate nijūrvann āśuṃ na vājayate hinve arvā ||

RV_4,008.01a dūtaṃ vo viśvavedasaṃ havyavāham amartyam |
RV_4,008.01c yajiṣṭham ṛñjase girā ||
RV_4,008.02a sa hi vedā vasudhitim mahāṃ ārodhanaṃ divaḥ |
RV_4,008.02c sa devāṃ eha vakṣati ||
RV_4,008.03a sa veda deva ānamaṃ devāṃ ṛtāyate dame |
RV_4,008.03c dāti priyāṇi cid vasu ||
RV_4,008.04a sa hotā sed u dūtyaṃ cikitvāṃ antar īyate |
RV_4,008.04c vidvāṃ ārodhanaṃ divaḥ ||
RV_4,008.05a te syāma ye agnaye dadāśur havyadātibhiḥ |
RV_4,008.05c ya īm puṣyanta indhate ||
RV_4,008.06a te rāyā te suvīryaiḥ sasavāṃso vi śṛṇvire |
RV_4,008.06c ye agnā dadhire duvaḥ ||
RV_4,008.07a asme rāyo dive-dive saṃ carantu puruspṛhaḥ |
RV_4,008.07c asme vājāsa īratām ||
RV_4,008.08a sa vipraś carṣaṇīnāṃ śavasā mānuṣāṇām |
RV_4,008.08c ati kṣipreva vidhyati ||

RV_4,009.01a agne mṛḷa mahāṃ asi ya īm ā devayuṃ janam |
RV_4,009.01c iyetha barhir āsadam ||
RV_4,009.02a sa mānuṣīṣu dūḷabho vikṣu prāvīr amartyaḥ |
RV_4,009.02c dūto viśveṣām bhuvat ||
RV_4,009.03a sa sadma pari ṇīyate hotā mandro diviṣṭiṣu |
RV_4,009.03c uta potā ni ṣīdati ||
RV_4,009.04a uta gnā agnir adhvara uto gṛhapatir dame |
RV_4,009.04c uta brahmā ni ṣīdati ||
RV_4,009.05a veṣi hy adhvarīyatām upavaktā janānām |
RV_4,009.05b havyā ca mānuṣāṇām ||
RV_4,009.06a veṣīd v asya dūtyaṃ yasya jujoṣo adhvaram |
RV_4,009.06b havyam martasya voḷhave ||
RV_4,009.07a asmākaṃ joṣy adhvaram asmākaṃ yajñam aṅgiraḥ |
RV_4,009.07c asmākaṃ śṛṇudhī havam ||
RV_4,009.08a pari te dūḷabho ratho 'smāṃ aśnotu viśvataḥ |
RV_4,009.08c yena rakṣasi dāśuṣaḥ ||

RV_4,010.01a agne tam adyāśvaṃ na stomaiḥ kratuṃ na bhadraṃ hṛdispṛśam |
RV_4,010.01c ṛdhyāmā ta ohaiḥ ||
RV_4,010.02a adhā hy agne krator bhadrasya dakṣasya sādhoḥ |
RV_4,010.02c rathīr ṛtasya bṛhato babhūtha ||
RV_4,010.03a ebhir no arkair bhavā no arvāṅ svar ṇa jyotiḥ |
RV_4,010.03c agne viśvebhiḥ sumanā anīkaiḥ ||
RV_4,010.04a ābhiṣ ṭe adya gīrbhir gṛṇanto 'gne dāśema |
RV_4,010.04c pra te divo na stanayanti śuṣmāḥ ||
RV_4,010.05a tava svādiṣṭhāgne saṃdṛṣṭir idā cid ahna idā cid aktoḥ |
RV_4,010.05c śriye rukmo na rocata upāke ||
RV_4,010.06a ghṛtaṃ na pūtaṃ tanūr arepāḥ śuci hiraṇyam |
RV_4,010.06c tat te rukmo na rocata svadhāvaḥ ||
RV_4,010.07a kṛtaṃ cid dhi ṣmā sanemi dveṣo 'gna inoṣi martāt |
RV_4,010.07c itthā yajamānād ṛtāvaḥ ||
RV_4,010.08a śivā naḥ sakhyā santu bhrātrāgne deveṣu yuṣme |
RV_4,010.08c sā no nābhiḥ sadane sasminn ūdhan ||

RV_4,011.01a bhadraṃ te agne sahasinn anīkam upāka ā rocate sūryasya |
RV_4,011.01c ruśad dṛśe dadṛśe naktayā cid arūkṣitaṃ dṛśa ā rūpe annam ||
RV_4,011.02a vi ṣāhy agne gṛṇate manīṣāṃ khaṃ vepasā tuvijāta stavānaḥ |
RV_4,011.02c viśvebhir yad vāvanaḥ śukra devais tan no rāsva sumaho bhūri manma ||
RV_4,011.03a tvad agne kāvyā tvan manīṣās tvad ukthā jāyante rādhyāni |
RV_4,011.03c tvad eti draviṇaṃ vīrapeśā itthādhiye dāśuṣe martyāya ||
RV_4,011.04a tvad vājī vājambharo vihāyā abhiṣṭikṛj jāyate satyaśuṣmaḥ |
RV_4,011.04c tvad rayir devajūto mayobhus tvad āśur jūjuvāṃ agne arvā ||
RV_4,011.05a tvām agne prathamaṃ devayanto devam martā amṛta mandrajihvam |
RV_4,011.05c dveṣoyutam ā vivāsanti dhībhir damūnasaṃ gṛhapatim amūram ||
RV_4,011.06a āre asmad amatim āre aṃha āre viśvāṃ durmatiṃ yan nipāsi |
RV_4,011.06c doṣā śivaḥ sahasaḥ sūno agne yaṃ deva ā cit sacase svasti ||

RV_4,012.01a yas tvām agna inadhate yatasruk tris te annaṃ kṛṇavat sasminn ahan |
RV_4,012.01c sa su dyumnair abhy astu prasakṣat tava kratvā jātavedaś cikitvān ||
RV_4,012.02a idhmaṃ yas te jabharac chaśramāṇo maho agne anīkam ā saparyan |
RV_4,012.02c sa idhānaḥ prati doṣām uṣāsam puṣyan rayiṃ sacate ghnann amitrān ||
RV_4,012.03a agnir īśe bṛhataḥ kṣatriyasyāgnir vājasya paramasya rāyaḥ |
RV_4,012.03c dadhāti ratnaṃ vidhate yaviṣṭho vy ānuṣaṅ martyāya svadhāvān ||
RV_4,012.04a yac cid dhi te puruṣatrā yaviṣṭhācittibhiś cakṛmā kac cid āgaḥ |
RV_4,012.04c kṛdhī ṣv asmāṃ aditer anāgān vy enāṃsi śiśratho viṣvag agne ||
RV_4,012.05a mahaś cid agna enaso abhīka ūrvād devānām uta martyānām |
RV_4,012.05c mā te sakhāyaḥ sadam id riṣāma yacchā tokāya tanayāya śaṃ yoḥ ||
RV_4,012.06a yathā ha tyad vasavo gauryaṃ cit padi ṣitām amuñcatā yajatrāḥ |
RV_4,012.06c evo ṣv asman muñcatā vy aṃhaḥ pra tāry agne prataraṃ na āyuḥ ||

RV_4,013.01a praty agnir uṣasām agram akhyad vibhātīnāṃ sumanā ratnadheyam |
RV_4,013.01c yātam aśvinā sukṛto duroṇam ut sūryo jyotiṣā deva eti ||
RV_4,013.02a ūrdhvam bhānuṃ savitā devo aśred drapsaṃ davidhvad gaviṣo na satvā |
RV_4,013.02c anu vrataṃ varuṇo yanti mitro yat sūryaṃ divy ārohayanti ||
RV_4,013.03a yaṃ sīm akṛṇvan tamase vipṛce dhruvakṣemā anavasyanto artham |
RV_4,013.03c taṃ sūryaṃ haritaḥ sapta yahvī spaśaṃ viśvasya jagato vahanti ||
RV_4,013.04a vahiṣṭhebhir viharan yāsi tantum avavyayann asitaṃ deva vasma |
RV_4,013.04c davidhvato raśmayaḥ sūryasya carmevāvādhus tamo apsv antaḥ ||
RV_4,013.05a anāyato anibaddhaḥ kathāyaṃ nyaṅṅ uttāno 'va padyate na |
RV_4,013.05c kayā yāti svadhayā ko dadarśa diva skambhaḥ samṛtaḥ pāti nākam ||

RV_4,014.01a praty agnir uṣaso jātavedā akhyad devo rocamānā mahobhiḥ |
RV_4,014.01c ā nāsatyorugāyā rathenemaṃ yajñam upa no yātam accha ||
RV_4,014.02a ūrdhvaṃ ketuṃ savitā devo aśrej jyotir viśvasmai bhuvanāya kṛṇvan |
RV_4,014.02c āprā dyāvāpṛthivī antarikṣaṃ vi sūryo raśmibhiś cekitānaḥ ||
RV_4,014.03a āvahanty aruṇīr jyotiṣāgān mahī citrā raśmibhiś cekitānā |
RV_4,014.03c prabodhayantī suvitāya devy uṣā īyate suyujā rathena ||
RV_4,014.04a ā vāṃ vahiṣṭhā iha te vahantu rathā aśvāsa uṣaso vyuṣṭau |
RV_4,014.04c ime hi vām madhupeyāya somā asmin yajñe vṛṣaṇā mādayethām ||
RV_4,014.05a anāyato anibaddhaḥ kathāyaṃ nyaṅṅ uttāno 'va padyate na |
RV_4,014.05c kayā yāti svadhayā ko dadarśa diva skambhaḥ samṛtaḥ pāti nākam ||

RV_4,015.01a agnir hotā no adhvare vājī san pari ṇīyate |
RV_4,015.01c devo deveṣu yajñiyaḥ ||
RV_4,015.02a pari triviṣṭy adhvaraṃ yāty agnī rathīr iva |
RV_4,015.02c ā deveṣu prayo dadhat ||
RV_4,015.03a pari vājapatiḥ kavir agnir havyāny akramīt |
RV_4,015.03c dadhad ratnāni dāśuṣe ||
RV_4,015.04a ayaṃ yaḥ sṛñjaye puro daivavāte samidhyate |
RV_4,015.04c dyumāṃ amitradambhanaḥ ||
RV_4,015.05a asya ghā vīra īvato 'gner īśīta martyaḥ |
RV_4,015.05c tigmajambhasya mīḷhuṣaḥ ||
RV_4,015.06a tam arvantaṃ na sānasim aruṣaṃ na divaḥ śiśum |
RV_4,015.06c marmṛjyante dive-dive ||
RV_4,015.07a bodhad yan mā haribhyāṃ kumāraḥ sāhadevyaḥ |
RV_4,015.07c acchā na hūta ud aram ||
RV_4,015.08a uta tyā yajatā harī kumārāt sāhadevyāt |
RV_4,015.08c prayatā sadya ā dade ||
RV_4,015.09a eṣa vāṃ devāv aśvinā kumāraḥ sāhadevyaḥ |
RV_4,015.09c dīrghāyur astu somakaḥ ||
RV_4,015.10a taṃ yuvaṃ devāv aśvinā kumāraṃ sāhadevyam |
RV_4,015.10c dīrghāyuṣaṃ kṛṇotana ||

RV_4,016.01a ā satyo yātu maghavāṃ ṛjīṣī dravantv asya haraya upa naḥ |
RV_4,016.01c tasmā id andhaḥ suṣumā sudakṣam ihābhipitvaṃ karate gṛṇānaḥ ||
RV_4,016.02a ava sya śūrādhvano nānte 'smin no adya savane mandadhyai |
RV_4,016.02c śaṃsāty uktham uśaneva vedhāś cikituṣe asuryāya manma ||
RV_4,016.03a kavir na niṇyaṃ vidathāni sādhan vṛṣā yat sekaṃ vipipāno arcāt |
RV_4,016.03c diva itthā jījanat sapta kārūn ahnā cic cakrur vayunā gṛṇantaḥ ||
RV_4,016.04a svar yad vedi sudṛśīkam arkair mahi jyotī rurucur yad dha vastoḥ |
RV_4,016.04c andhā tamāṃsi dudhitā vicakṣe nṛbhyaś cakāra nṛtamo abhiṣṭau ||
RV_4,016.05a vavakṣa indro amitam ṛjīṣy ubhe ā paprau rodasī mahitvā |
RV_4,016.05c ataś cid asya mahimā vi recy abhi yo viśvā bhuvanā babhūva ||
RV_4,016.06a viśvāni śakro naryāṇi vidvān apo rireca sakhibhir nikāmaiḥ |
RV_4,016.06c aśmānaṃ cid ye bibhidur vacobhir vrajaṃ gomantam uśijo vi vavruḥ ||
RV_4,016.07a apo vṛtraṃ vavrivāṃsam parāhan prāvat te vajram pṛthivī sacetāḥ |
RV_4,016.07c prārṇāṃsi samudriyāṇy ainoḥ patir bhavañ chavasā śūra dhṛṣṇo ||
RV_4,016.08a apo yad adrim puruhūta dardar āvir bhuvat saramā pūrvyaṃ te |
RV_4,016.08c sa no netā vājam ā darṣi bhūriṃ gotrā rujann aṅgirobhir gṛṇānaḥ ||
RV_4,016.09a acchā kaviṃ nṛmaṇo gā abhiṣṭau svarṣātā maghavan nādhamānam |
RV_4,016.09c ūtibhis tam iṣaṇo dyumnahūtau ni māyāvān abrahmā dasyur arta ||
RV_4,016.10a ā dasyughnā manasā yāhy astam bhuvat te kutsaḥ sakhye nikāmaḥ |
RV_4,016.10c sve yonau ni ṣadataṃ sarūpā vi vāṃ cikitsad ṛtacid dha nārī ||
RV_4,016.11a yāsi kutsena saratham avasyus todo vātasya haryor īśānaḥ |
RV_4,016.11c ṛjrā vājaṃ na gadhyaṃ yuyūṣan kavir yad ahan pāryāya bhūṣāt ||
RV_4,016.12a kutsāya śuṣṇam aśuṣaṃ ni barhīḥ prapitve ahnaḥ kuyavaṃ sahasrā |
RV_4,016.12c sadyo dasyūn pra mṛṇa kutsyena pra sūraś cakraṃ vṛhatād abhīke ||
RV_4,016.13a tvam piprum mṛgayaṃ śūśuvāṃsam ṛjiśvane vaidathināya randhīḥ |
RV_4,016.13c pañcāśat kṛṣṇā ni vapaḥ sahasrātkaṃ na puro jarimā vi dardaḥ ||
RV_4,016.14a sūra upāke tanvaṃ dadhāno vi yat te cety amṛtasya varpaḥ |
RV_4,016.14c mṛgo na hastī taviṣīm uṣāṇaḥ siṃho na bhīma āyudhāni bibhrat ||
RV_4,016.15a indraṃ kāmā vasūyanto agman svarmīḷhe na savane cakānāḥ |
RV_4,016.15c śravasyavaḥ śaśamānāsa ukthair oko na raṇvā sudṛśīva puṣṭiḥ ||
RV_4,016.16a tam id va indraṃ suhavaṃ huvema yas tā cakāra naryā purūṇi |
RV_4,016.16c yo māvate jaritre gadhyaṃ cin makṣū vājam bharati spārharādhāḥ ||
RV_4,016.17a tigmā yad antar aśaniḥ patāti kasmiñ cic chūra muhuke janānām |
RV_4,016.17c ghorā yad arya samṛtir bhavāty adha smā nas tanvo bodhi gopāḥ ||
RV_4,016.18a bhuvo 'vitā vāmadevasya dhīnām bhuvaḥ sakhāvṛko vājasātau |
RV_4,016.18c tvām anu pramatim ā jaganmoruśaṃso jaritre viśvadha syāḥ ||
RV_4,016.19a ebhir nṛbhir indra tvāyubhiṣ ṭvā maghavadbhir maghavan viśva ājau |
RV_4,016.19c dyāvo na dyumnair abhi santo aryaḥ kṣapo madema śaradaś ca pūrvīḥ ||
RV_4,016.20a eved indrāya vṛṣabhāya vṛṣṇe brahmākarma bhṛgavo na ratham |
RV_4,016.20c nū cid yathā naḥ sakhyā viyoṣad asan na ugro 'vitā tanūpāḥ ||
RV_4,016.21a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,016.21c akāri te harivo brahma navyaṃ dhiyā syāma rathyaḥ sadāsāḥ ||

RV_4,017.01a tvam mahāṃ indra tubhyaṃ ha kṣā anu kṣatram maṃhanā manyata dyauḥ |
RV_4,017.01c tvaṃ vṛtraṃ śavasā jaghanvān sṛjaḥ sindhūṃr ahinā jagrasānān ||
RV_4,017.02a tava tviṣo janiman rejata dyau rejad bhūmir bhiyasā svasya manyoḥ |
RV_4,017.02c ṛghāyanta subhvaḥ parvatāsa ārdan dhanvāni sarayanta āpaḥ ||
RV_4,017.03a bhinad giriṃ śavasā vajram iṣṇann āviṣkṛṇvānaḥ sahasāna ojaḥ |
RV_4,017.03c vadhīd vṛtraṃ vajreṇa mandasānaḥ sarann āpo javasā hatavṛṣṇīḥ ||
RV_4,017.04a suvīras te janitā manyata dyaur indrasya kartā svapastamo bhūt |
RV_4,017.04c ya īṃ jajāna svaryaṃ suvajram anapacyutaṃ sadaso na bhūma ||
RV_4,017.05a ya eka ic cyāvayati pra bhūmā rājā kṛṣṭīnām puruhūta indraḥ |
RV_4,017.05c satyam enam anu viśve madanti rātiṃ devasya gṛṇato maghonaḥ ||
RV_4,017.06a satrā somā abhavann asya viśve satrā madāso bṛhato madiṣṭhāḥ |
RV_4,017.06c satrābhavo vasupatir vasūnāṃ datre viśvā adhithā indra kṛṣṭīḥ ||
RV_4,017.07a tvam adha prathamaṃ jāyamāno 'me viśvā adhithā indra kṛṣṭīḥ |
RV_4,017.07c tvam prati pravata āśayānam ahiṃ vajreṇa maghavan vi vṛścaḥ ||
RV_4,017.08a satrāhaṇaṃ dādhṛṣiṃ tumram indram mahām apāraṃ vṛṣabhaṃ suvajram |
RV_4,017.08c hantā yo vṛtraṃ sanitota vājaṃ dātā maghāni maghavā surādhāḥ ||
RV_4,017.09a ayaṃ vṛtaś cātayate samīcīr ya ājiṣu maghavā śṛṇva ekaḥ |
RV_4,017.09c ayaṃ vājam bharati yaṃ sanoty asya priyāsaḥ sakhye syāma ||
RV_4,017.10a ayaṃ śṛṇve adha jayann uta ghnann ayam uta pra kṛṇute yudhā gāḥ |
RV_4,017.10c yadā satyaṃ kṛṇute manyum indro viśvaṃ dṛḷham bhayata ejad asmāt ||
RV_4,017.11a sam indro gā ajayat saṃ hiraṇyā sam aśviyā maghavā yo ha pūrvīḥ |
RV_4,017.11c ebhir nṛbhir nṛtamo asya śākai rāyo vibhaktā sambharaś ca vasvaḥ ||
RV_4,017.12a kiyat svid indro adhy eti mātuḥ kiyat pitur janitur yo jajāna |
RV_4,017.12c yo asya śuṣmam muhukair iyarti vāto na jūta stanayadbhir abhraiḥ ||
RV_4,017.13a kṣiyantaṃ tvam akṣiyantaṃ kṛṇotīyarti reṇum maghavā samoham |
RV_4,017.13c vibhañjanur aśanimāṃ iva dyaur uta stotāram maghavā vasau dhāt ||
RV_4,017.14a ayaṃ cakram iṣaṇat sūryasya ny etaśaṃ rīramat sasṛmāṇam |
RV_4,017.14b ā kṛṣṇa īṃ juhurāṇo jigharti tvaco budhne rajaso asya yonau ||
RV_4,017.15a asiknyāṃ yajamāno na hotā ||
RV_4,017.16a gavyanta indraṃ sakhyāya viprā aśvāyanto vṛṣaṇaṃ vājayantaḥ |
RV_4,017.16c janīyanto janidām akṣitotim ā cyāvayāmo 'vate na kośam ||
RV_4,017.17a trātā no bodhi dadṛśāna āpir abhikhyātā marḍitā somyānām |
RV_4,017.17c sakhā pitā pitṛtamaḥ pitṝṇāṃ kartem u lokam uśate vayodhāḥ ||
RV_4,017.18a sakhīyatām avitā bodhi sakhā gṛṇāna indra stuvate vayo dhāḥ |
RV_4,017.18c vayaṃ hy ā te cakṛmā sabādha ābhiḥ śamībhir mahayanta indra ||
RV_4,017.19a stuta indro maghavā yad dha vṛtrā bhūrīṇy eko apratīni hanti |
RV_4,017.19c asya priyo jaritā yasya śarman nakir devā vārayante na martāḥ ||
RV_4,017.20a evā na indro maghavā virapśī karat satyā carṣaṇīdhṛd anarvā |
RV_4,017.20c tvaṃ rājā januṣāṃ dhehy asme adhi śravo māhinaṃ yaj jaritre ||
RV_4,017.21a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,017.21c akāri te harivo brahma navyaṃ dhiyā syāma rathyaḥ sadāsāḥ ||

RV_4,018.01a ayam panthā anuvittaḥ purāṇo yato devā udajāyanta viśve |
RV_4,018.01c ataś cid ā janiṣīṣṭa pravṛddho mā mātaram amuyā pattave kaḥ ||
RV_4,018.02a nāham ato nir ayā durgahaitat tiraścatā pārśvān nir gamāṇi |
RV_4,018.02c bahūni me akṛtā kartvāni yudhyai tvena saṃ tvena pṛcchai ||
RV_4,018.03a parāyatīm mātaram anv acaṣṭa na nānu gāny anu nū gamāni |
RV_4,018.03c tvaṣṭur gṛhe apibat somam indraḥ śatadhanyaṃ camvoḥ sutasya ||
RV_4,018.04a kiṃ sa ṛdhak kṛṇavad yaṃ sahasram māso jabhāra śaradaś ca pūrvīḥ |
RV_4,018.04c nahī nv asya pratimānam asty antar jāteṣūta ye janitvāḥ ||
RV_4,018.05a avadyam iva manyamānā guhākar indram mātā vīryeṇā nyṛṣṭam |
RV_4,018.05c athod asthāt svayam atkaṃ vasāna ā rodasī apṛṇāj jāyamānaḥ ||
RV_4,018.06a etā arṣanty alalābhavantīr ṛtāvarīr iva saṃkrośamānāḥ |
RV_4,018.06c etā vi pṛccha kim idam bhananti kam āpo adrim paridhiṃ rujanti ||
RV_4,018.07a kim u ṣvid asmai nivido bhanantendrasyāvadyaṃ didhiṣanta āpaḥ |
RV_4,018.07c mamaitān putro mahatā vadhena vṛtraṃ jaghanvāṃ asṛjad vi sindhūn ||
RV_4,018.08a mamac cana tvā yuvatiḥ parāsa mamac cana tvā kuṣavā jagāra |
RV_4,018.08c mamac cid āpaḥ śiśave mamṛḍyur mamac cid indraḥ sahasod atiṣṭhat ||
RV_4,018.09a mamac cana te maghavan vyaṃso nivividhvāṃ apa hanū jaghāna |
RV_4,018.09c adhā nividdha uttaro babhūvāñ chiro dāsasya sam piṇag vadhena ||
RV_4,018.10a gṛṣṭiḥ sasūva sthaviraṃ tavāgām anādhṛṣyaṃ vṛṣabhaṃ tumram indram |
RV_4,018.10c arīḷhaṃ vatsaṃ carathāya mātā svayaṃ gātuṃ tanva icchamānam ||
RV_4,018.11a uta mātā mahiṣam anv avenad amī tvā jahati putra devāḥ |
RV_4,018.11c athābravīd vṛtram indro haniṣyan sakhe viṣṇo vitaraṃ vi kramasva ||
RV_4,018.12a kas te mātaraṃ vidhavām acakrac chayuṃ kas tvām ajighāṃsac carantam |
RV_4,018.12c kas te devo adhi mārḍīka āsīd yat prākṣiṇāḥ pitaram pādagṛhya ||
RV_4,018.13a avartyā śuna āntrāṇi pece na deveṣu vivide marḍitāram |
RV_4,018.13c apaśyaṃ jāyām amahīyamānām adhā me śyeno madhv ā jabhāra ||

RV_4,019.01a evā tvām indra vajrinn atra viśve devāsaḥ suhavāsa ūmāḥ |
RV_4,019.01c mahām ubhe rodasī vṛddham ṛṣvaṃ nir ekam id vṛṇate vṛtrahatye ||
RV_4,019.02a avāsṛjanta jivrayo na devā bhuvaḥ samrāḷ indra satyayoniḥ |
RV_4,019.02c ahann ahim pariśayānam arṇaḥ pra vartanīr arado viśvadhenāḥ ||
RV_4,019.03a atṛpṇuvantaṃ viyatam abudhyam abudhyamānaṃ suṣupāṇam indra |
RV_4,019.03c sapta prati pravata āśayānam ahiṃ vajreṇa vi riṇā aparvan ||
RV_4,019.04a akṣodayac chavasā kṣāma budhnaṃ vār ṇa vātas taviṣībhir indraḥ |
RV_4,019.04c dṛḷhāny aubhnād uśamāna ojo 'vābhinat kakubhaḥ parvatānām ||
RV_4,019.05a abhi pra dadrur janayo na garbhaṃ rathā iva pra yayuḥ sākam adrayaḥ |
RV_4,019.05c atarpayo visṛta ubja ūrmīn tvaṃ vṛtāṃ ariṇā indra sindhūn ||
RV_4,019.06a tvam mahīm avaniṃ viśvadhenāṃ turvītaye vayyāya kṣarantīm |
RV_4,019.06c aramayo namasaijad arṇaḥ sutaraṇāṃ akṛṇor indra sindhūn ||
RV_4,019.07a prāgruvo nabhanvo na vakvā dhvasrā apinvad yuvatīr ṛtajñāḥ |
RV_4,019.07c dhanvāny ajrāṃ apṛṇak tṛṣāṇāṃ adhog indra staryo daṃsupatnīḥ ||
RV_4,019.08a pūrvīr uṣasaḥ śaradaś ca gūrtā vṛtraṃ jaghanvāṃ asṛjad vi sindhūn |
RV_4,019.08c pariṣṭhitā atṛṇad badbadhānāḥ sīrā indraḥ sravitave pṛthivyā ||
RV_4,019.09a vamrībhiḥ putram agruvo adānaṃ niveśanād dhariva ā jabhartha |
RV_4,019.09c vy andho akhyad ahim ādadāno nir bhūd ukhacchit sam aranta parva ||
RV_4,019.10a pra te pūrvāṇi karaṇāni viprāvidvāṃ āha viduṣe karāṃsi |
RV_4,019.10c yathā-yathā vṛṣṇyāni svagūrtāpāṃsi rājan naryāviveṣīḥ ||
RV_4,019.11a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,019.11c akāri te harivo brahma navyaṃ dhiyā syāma rathyaḥ sadāsāḥ ||

RV_4,020.01a ā na indro dūrād ā na āsād abhiṣṭikṛd avase yāsad ugraḥ |
RV_4,020.01c ojiṣṭhebhir nṛpatir vajrabāhuḥ saṃge samatsu turvaṇiḥ pṛtanyūn ||
RV_4,020.02a ā na indro haribhir yātv acchārvācīno 'vase rādhase ca |
RV_4,020.02c tiṣṭhāti vajrī maghavā virapśīmaṃ yajñam anu no vājasātau ||
RV_4,020.03a imaṃ yajñaṃ tvam asmākam indra puro dadhat saniṣyasi kratuṃ naḥ |
RV_4,020.03c śvaghnīva vajrin sanaye dhanānāṃ tvayā vayam arya ājiṃ jayema ||
RV_4,020.04a uśann u ṣu ṇaḥ sumanā upāke somasya nu suṣutasya svadhāvaḥ |
RV_4,020.04c pā indra pratibhṛtasya madhvaḥ sam andhasā mamadaḥ pṛṣṭhyena ||
RV_4,020.05a vi yo rarapśa ṛṣibhir navebhir vṛkṣo na pakvaḥ sṛṇyo na jetā |
RV_4,020.05c maryo na yoṣām abhi manyamāno 'cchā vivakmi puruhūtam indram ||
RV_4,020.06a girir na yaḥ svatavāṃ ṛṣva indraḥ sanād eva sahase jāta ugraḥ |
RV_4,020.06c ādartā vajraṃ sthaviraṃ na bhīma udneva kośaṃ vasunā nyṛṣṭam ||
RV_4,020.07a na yasya vartā januṣā nv asti na rādhasa āmarītā maghasya |
RV_4,020.07c udvāvṛṣāṇas taviṣīva ugrāsmabhyaṃ daddhi puruhūta rāyaḥ ||
RV_4,020.08a īkṣe rāyaḥ kṣayasya carṣaṇīnām uta vrajam apavartāsi gonām |
RV_4,020.08c śikṣānaraḥ samitheṣu prahāvān vasvo rāśim abhinetāsi bhūrim ||
RV_4,020.09a kayā tac chṛṇve śacyā śaciṣṭho yayā kṛṇoti muhu kā cid ṛṣvaḥ |
RV_4,020.09c puru dāśuṣe vicayiṣṭho aṃho 'thā dadhāti draviṇaṃ jaritre ||
RV_4,020.10a mā no mardhīr ā bharā daddhi tan naḥ pra dāśuṣe dātave bhūri yat te |
RV_4,020.10c navye deṣṇe śaste asmin ta ukthe pra bravāma vayam indra stuvantaḥ ||
RV_4,020.11a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,020.11c akāri te harivo brahma navyaṃ dhiyā syāma rathyaḥ sadāsāḥ ||

RV_4,021.01a ā yātv indro 'vasa upa na iha stutaḥ sadhamād astu śūraḥ |
RV_4,021.01c vāvṛdhānas taviṣīr yasya pūrvīr dyaur na kṣatram abhibhūti puṣyāt ||
RV_4,021.02a tasyed iha stavatha vṛṣṇyāni tuvidyumnasya tuvirādhaso nṝn |
RV_4,021.02c yasya kratur vidathyo na samrāṭ sāhvān tarutro abhy asti kṛṣṭīḥ ||
RV_4,021.03a ā yātv indro diva ā pṛthivyā makṣū samudrād uta vā purīṣāt |
RV_4,021.03c svarṇarād avase no marutvān parāvato vā sadanād ṛtasya ||
RV_4,021.04a sthūrasya rāyo bṛhato ya īśe tam u ṣṭavāma vidatheṣv indram |
RV_4,021.04c yo vāyunā jayati gomatīṣu pra dhṛṣṇuyā nayati vasyo accha ||
RV_4,021.05a upa yo namo namasi stabhāyann iyarti vācaṃ janayan yajadhyai |
RV_4,021.05c ṛñjasānaḥ puruvāra ukthair endraṃ kṛṇvīta sadaneṣu hotā ||
RV_4,021.06a dhiṣā yadi dhiṣaṇyantaḥ saraṇyān sadanto adrim auśijasya gohe |
RV_4,021.06c ā duroṣāḥ pāstyasya hotā yo no mahān saṃvaraṇeṣu vahniḥ ||
RV_4,021.07a satrā yad īm bhārvarasya vṛṣṇaḥ siṣakti śuṣma stuvate bharāya |
RV_4,021.07c guhā yad īm auśijasya gohe pra yad dhiye prāyase madāya ||
RV_4,021.08a vi yad varāṃsi parvatasya vṛṇve payobhir jinve apāṃ javāṃsi |
RV_4,021.08c vidad gaurasya gavayasya gohe yadī vājāya sudhyo vahanti ||
RV_4,021.09a bhadrā te hastā sukṛtota pāṇī prayantārā stuvate rādha indra |
RV_4,021.09c kā te niṣattiḥ kim u no mamatsi kiṃ nod-ud u harṣase dātavā u ||
RV_4,021.10a evā vasva indraḥ satyaḥ samrāḍ ḍhantā vṛtraṃ varivaḥ pūrave kaḥ |
RV_4,021.10c puruṣṭuta kratvā naḥ śagdhi rāyo bhakṣīya te 'vaso daivyasya ||
RV_4,021.11a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,021.11c akāri te harivo brahma navyaṃ dhiyā syāma rathyaḥ sadāsāḥ ||

RV_4,022.01a yan na indro jujuṣe yac ca vaṣṭi tan no mahān karati śuṣmy ā cit |
RV_4,022.01c brahma stomam maghavā somam ukthā yo aśmānaṃ śavasā bibhrad eti ||
RV_4,022.02a vṛṣā vṛṣandhiṃ caturaśrim asyann ugro bāhubhyāṃ nṛtamaḥ śacīvān |
RV_4,022.02c śriye paruṣṇīm uṣamāṇa ūrṇāṃ yasyāḥ parvāṇi sakhyāya vivye ||
RV_4,022.03a yo devo devatamo jāyamāno maho vājebhir mahadbhiś ca śuṣmaiḥ |
RV_4,022.03c dadhāno vajram bāhvor uśantaṃ dyām amena rejayat pra bhūma ||
RV_4,022.04a viśvā rodhāṃsi pravataś ca pūrvīr dyaur ṛṣvāj janiman rejata kṣāḥ |
RV_4,022.04c ā mātarā bharati śuṣmy ā gor nṛvat parijman nonuvanta vātāḥ ||
RV_4,022.05a tā tū ta indra mahato mahāni viśveṣv it savaneṣu pravācyā |
RV_4,022.05c yac chūra dhṛṣṇo dhṛṣatā dadhṛṣvān ahiṃ vajreṇa śavasāviveṣīḥ ||
RV_4,022.06a tā tū te satyā tuvinṛmṇa viśvā pra dhenavaḥ sisrate vṛṣṇa ūdhnaḥ |
RV_4,022.06c adhā ha tvad vṛṣamaṇo bhiyānāḥ pra sindhavo javasā cakramanta ||
RV_4,022.07a atrāha te harivas tā u devīr avobhir indra stavanta svasāraḥ |
RV_4,022.07c yat sīm anu pra muco badbadhānā dīrghām anu prasitiṃ syandayadhyai ||
RV_4,022.08a pipīḷe aṃśur madyo na sindhur ā tvā śamī śaśamānasya śaktiḥ |
RV_4,022.08c asmadryak chuśucānasya yamyā āśur na raśmiṃ tuvyojasaṃ goḥ ||
RV_4,022.09a asme varṣiṣṭhā kṛṇuhi jyeṣṭhā nṛmṇāni satrā sahure sahāṃsi |
RV_4,022.09c asmabhyaṃ vṛtrā suhanāni randhi jahi vadhar vanuṣo martyasya ||
RV_4,022.10a asmākam it su śṛṇuhi tvam indrāsmabhyaṃ citrāṃ upa māhi vājān |
RV_4,022.10c asmabhyaṃ viśvā iṣaṇaḥ purandhīr asmākaṃ su maghavan bodhi godāḥ ||
RV_4,022.11a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,022.11c akāri te harivo brahma navyaṃ dhiyā syāma rathyaḥ sadāsāḥ ||

RV_4,023.01a kathā mahām avṛdhat kasya hotur yajñaṃ juṣāṇo abhi somam ūdhaḥ |
RV_4,023.01c pibann uśāno juṣamāṇo andho vavakṣa ṛṣvaḥ śucate dhanāya ||
RV_4,023.02a ko asya vīraḥ sadhamādam āpa sam ānaṃśa sumatibhiḥ ko asya |
RV_4,023.02c kad asya citraṃ cikite kad ūtī vṛdhe bhuvac chaśamānasya yajyoḥ ||
RV_4,023.03a kathā śṛṇoti hūyamānam indraḥ kathā śṛṇvann avasām asya veda |
RV_4,023.03c kā asya pūrvīr upamātayo ha kathainam āhuḥ papuriṃ jaritre ||
RV_4,023.04a kathā sabādhaḥ śaśamāno asya naśad abhi draviṇaṃ dīdhyānaḥ |
RV_4,023.04c devo bhuvan navedā ma ṛtānāṃ namo jagṛbhvāṃ abhi yaj jujoṣat ||
RV_4,023.05a kathā kad asyā uṣaso vyuṣṭau devo martasya sakhyaṃ jujoṣa |
RV_4,023.05c kathā kad asya sakhyaṃ sakhibhyo ye asmin kāmaṃ suyujaṃ tatasre ||
RV_4,023.06a kim ād amatraṃ sakhyaṃ sakhibhyaḥ kadā nu te bhrātram pra bravāma |
RV_4,023.06c śriye sudṛśo vapur asya sargāḥ svar ṇa citratamam iṣa ā goḥ ||
RV_4,023.07a druhaṃ jighāṃsan dhvarasam anindrāṃ tetikte tigmā tujase anīkā |
RV_4,023.07c ṛṇā cid yatra ṛṇayā na ugro dūre ajñātā uṣaso babādhe ||
RV_4,023.08a ṛtasya hi śurudhaḥ santi pūrvīr ṛtasya dhītir vṛjināni hanti |
RV_4,023.08c ṛtasya śloko badhirā tatarda karṇā budhānaḥ śucamāna āyoḥ ||
RV_4,023.09a ṛtasya dṛḷhā dharuṇāni santi purūṇi candrā vapuṣe vapūṃṣi |
RV_4,023.09c ṛtena dīrgham iṣaṇanta pṛkṣa ṛtena gāva ṛtam ā viveśuḥ ||
RV_4,023.10a ṛtaṃ yemāna ṛtam id vanoty ṛtasya śuṣmas turayā u gavyuḥ |
RV_4,023.10c ṛtāya pṛthvī bahule gabhīre ṛtāya dhenū parame duhāte ||
RV_4,023.11a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,023.11c akāri te harivo brahma navyaṃ dhiyā syāma rathyaḥ sadāsāḥ ||

RV_4,024.01a kā suṣṭutiḥ śavasaḥ sūnum indram arvācīnaṃ rādhasa ā vavartat |
RV_4,024.01c dadir hi vīro gṛṇate vasūni sa gopatir niṣṣidhāṃ no janāsaḥ ||
RV_4,024.02a sa vṛtrahatye havyaḥ sa īḍyaḥ sa suṣṭuta indraḥ satyarādhāḥ |
RV_4,024.02c sa yāmann ā maghavā martyāya brahmaṇyate suṣvaye varivo dhāt ||
RV_4,024.03a tam in naro vi hvayante samīke ririkvāṃsas tanvaḥ kṛṇvata trām |
RV_4,024.03c mitho yat tyāgam ubhayāso agman naras tokasya tanayasya sātau ||
RV_4,024.04a kratūyanti kṣitayo yoga ugrāśuṣāṇāso mitho arṇasātau |
RV_4,024.04c saṃ yad viśo 'vavṛtranta yudhmā ād in nema indrayante abhīke ||
RV_4,024.05a ād id dha nema indriyaṃ yajanta ād it paktiḥ puroḷāśaṃ riricyāt |
RV_4,024.05c ād it somo vi papṛcyād asuṣvīn ād ij jujoṣa vṛṣabhaṃ yajadhyai ||
RV_4,024.06a kṛṇoty asmai varivo ya itthendrāya somam uśate sunoti |
RV_4,024.06c sadhrīcīnena manasāvivenan tam it sakhāyaṃ kṛṇute samatsu ||
RV_4,024.07a ya indrāya sunavat somam adya pacāt paktīr uta bhṛjjāti dhānāḥ |
RV_4,024.07c prati manāyor ucathāni haryan tasmin dadhad vṛṣaṇaṃ śuṣmam indraḥ ||
RV_4,024.08a yadā samaryaṃ vy aced ṛghāvā dīrghaṃ yad ājim abhy akhyad aryaḥ |
RV_4,024.08c acikradad vṛṣaṇam patny acchā duroṇa ā niśitaṃ somasudbhiḥ ||
RV_4,024.09a bhūyasā vasnam acarat kanīyo 'vikrīto akāniṣam punar yan |
RV_4,024.09c sa bhūyasā kanīyo nārirecīd dīnā dakṣā vi duhanti pra vāṇam ||
RV_4,024.10a ka imaṃ daśabhir mamendraṃ krīṇāti dhenubhiḥ |
RV_4,024.10c yadā vṛtrāṇi jaṅghanad athainam me punar dadat ||
RV_4,024.11a nū ṣṭuta indra nū gṛṇāna iṣaṃ jaritre nadyo na pīpeḥ |
RV_4,024.11c akāri te harivo brahma navyaṃ dhiyā syāma rathyaḥ sadāsāḥ ||

RV_4,025.01a ko adya naryo devakāma uśann indrasya sakhyaṃ jujoṣa |
RV_4,025.01c ko vā mahe 'vase pāryāya samiddhe agnau sutasoma īṭṭe ||
RV_4,025.02a ko nānāma vacasā somyāya manāyur vā bhavati vasta usrāḥ |
RV_4,025.02c ka indrasya yujyaṃ kaḥ sakhitvaṃ ko bhrātraṃ vaṣṭi kavaye ka ūtī ||
RV_4,025.03a ko devānām avo adyā vṛṇīte ka ādityāṃ aditiṃ jyotir īṭṭe |
RV_4,025.03c kasyāśvināv indro agniḥ sutasyāṃśoḥ pibanti manasāvivenam ||
RV_4,025.04a tasmā agnir bhārataḥ śarma yaṃsaj jyok paśyāt sūryam uccarantam |
RV_4,025.04c ya indrāya sunavāmety āha nare naryāya nṛtamāya nṛṇām ||
RV_4,025.05a na taṃ jinanti bahavo na dabhrā urv asmā aditiḥ śarma yaṃsat |
RV_4,025.05c priyaḥ sukṛt priya indre manāyuḥ priyaḥ suprāvīḥ priyo asya somī ||
RV_4,025.06a suprāvyaḥ prāśuṣāḷ eṣa vīraḥ suṣveḥ paktiṃ kṛṇute kevalendraḥ |
RV_4,025.06c nāsuṣver āpir na sakhā na jāmir duṣprāvyo 'vahanted avācaḥ ||
RV_4,025.07a na revatā paṇinā sakhyam indro 'sunvatā sutapāḥ saṃ gṛṇīte |
RV_4,025.07c āsya vedaḥ khidati hanti nagnaṃ vi suṣvaye paktaye kevalo bhūt ||
RV_4,025.08a indram pare 'vare madhyamāsa indraṃ yānto 'vasitāsa indram |
RV_4,025.08c indraṃ kṣiyanta uta yudhyamānā indraṃ naro vājayanto havante ||

RV_4,026.01a aham manur abhavaṃ sūryaś cāhaṃ kakṣīvāṃ ṛṣir asmi vipraḥ |
RV_4,026.01c ahaṃ kutsam ārjuneyaṃ ny ṛñje 'haṃ kavir uśanā paśyatā mā ||
RV_4,026.02a aham bhūmim adadām āryāyāhaṃ vṛṣṭiṃ dāśuṣe martyāya |
RV_4,026.02c aham apo anayaṃ vāvaśānā mama devāso anu ketam āyan ||
RV_4,026.03a aham puro mandasāno vy airaṃ nava sākaṃ navatīḥ śambarasya |
RV_4,026.03c śatatamaṃ veśyaṃ sarvatātā divodāsam atithigvaṃ yad āvam ||
RV_4,026.04a pra su ṣa vibhyo maruto vir astu pra śyenaḥ śyenebhya āśupatvā |
RV_4,026.04c acakrayā yat svadhayā suparṇo havyam bharan manave devajuṣṭam ||
RV_4,026.05a bharad yadi vir ato vevijānaḥ pathoruṇā manojavā asarji |
RV_4,026.05c tūyaṃ yayau madhunā somyenota śravo vivide śyeno atra ||
RV_4,026.06a ṛjīpī śyeno dadamāno aṃśum parāvataḥ śakuno mandram madam |
RV_4,026.06c somam bharad dādṛhāṇo devāvān divo amuṣmād uttarād ādāya ||
RV_4,026.07a ādāya śyeno abharat somaṃ sahasraṃ savāṃ ayutaṃ ca sākam |
RV_4,026.07c atrā purandhir ajahād arātīr made somasya mūrā amūraḥ ||

RV_4,027.01a garbhe nu sann anv eṣām avedam ahaṃ devānāṃ janimāni viśvā |
RV_4,027.01c śatam mā pura āyasīr arakṣann adha śyeno javasā nir adīyam ||
RV_4,027.02a na ghā sa mām apa joṣaṃ jabhārābhīm āsa tvakṣasā vīryeṇa |
RV_4,027.02c īrmā purandhir ajahād arātīr uta vātāṃ atarac chūśuvānaḥ ||
RV_4,027.03a ava yac chyeno asvanīd adha dyor vi yad yadi vāta ūhuḥ purandhim |
RV_4,027.03c sṛjad yad asmā ava ha kṣipaj jyāṃ kṛśānur astā manasā bhuraṇyan ||
RV_4,027.04a ṛjipya īm indrāvato na bhujyuṃ śyeno jabhāra bṛhato adhi ṣṇoḥ |
RV_4,027.04c antaḥ patat patatry asya parṇam adha yāmani prasitasya tad veḥ ||
RV_4,027.05a adha śvetaṃ kalaśaṃ gobhir aktam āpipyānam maghavā śukram andhaḥ |
RV_4,027.05c adhvaryubhiḥ prayatam madhvo agram indro madāya prati dhat pibadhyai śūro madāya prati dhat pibadhyai ||

RV_4,028.01a tvā yujā tava tat soma sakhya indro apo manave sasrutas kaḥ |
RV_4,028.01c ahann ahim ariṇāt sapta sindhūn apāvṛṇod apihiteva khāni ||
RV_4,028.02a tvā yujā ni khidat sūryasyendraś cakraṃ sahasā sadya indo |
RV_4,028.02c adhi ṣṇunā bṛhatā vartamānam maho druho apa viśvāyu dhāyi ||
RV_4,028.03a ahann indro adahad agnir indo purā dasyūn madhyandinād abhīke |
RV_4,028.03c durge duroṇe kratvā na yātām purū sahasrā śarvā ni barhīt ||
RV_4,028.04a viśvasmāt sīm adhamāṃ indra dasyūn viśo dāsīr akṛṇor apraśastāḥ |
RV_4,028.04c abādhethām amṛṇataṃ ni śatrūn avindethām apacitiṃ vadhatraiḥ ||
RV_4,028.05a evā satyam maghavānā yuvaṃ tad indraś ca somorvam aśvyaṃ goḥ |
RV_4,028.05c ādardṛtam apihitāny aśnā riricathuḥ kṣāś cit tatṛdānā ||

RV_4,029.01a ā na stuta upa vājebhir ūtī indra yāhi haribhir mandasānaḥ |
RV_4,029.01c tiraś cid aryaḥ savanā purūṇy āṅgūṣebhir gṛṇānaḥ satyarādhāḥ ||
RV_4,029.02a ā hi ṣmā yāti naryaś cikitvān hūyamānaḥ sotṛbhir upa yajñam |
RV_4,029.02c svaśvo yo abhīrur manyamānaḥ suṣvāṇebhir madati saṃ ha vīraiḥ ||
RV_4,029.03a śrāvayed asya karṇā vājayadhyai juṣṭām anu pra diśam mandayadhyai |
RV_4,029.03c udvāvṛṣāṇo rādhase tuviṣmān karan na indraḥ sutīrthābhayaṃ ca ||
RV_4,029.04a acchā yo gantā nādhamānam ūtī itthā vipraṃ havamānaṃ gṛṇantam |
RV_4,029.04c upa tmani dadhāno dhury āśūn sahasrāṇi śatāni vajrabāhuḥ ||
RV_4,029.05a tvotāso maghavann indra viprā vayaṃ te syāma sūrayo gṛṇantaḥ |
RV_4,029.05c bhejānāso bṛhaddivasya rāya ākāyyasya dāvane purukṣoḥ ||

RV_4,030.01a nakir indra tvad uttaro na jyāyāṃ asti vṛtrahan |
RV_4,030.01c nakir evā yathā tvam ||
RV_4,030.02a satrā te anu kṛṣṭayo viśvā cakreva vāvṛtuḥ |
RV_4,030.02c satrā mahāṃ asi śrutaḥ ||
RV_4,030.03a viśve caned anā tvā devāsa indra yuyudhuḥ |
RV_4,030.03c yad ahā naktam ātiraḥ ||
RV_4,030.04a yatrota bādhitebhyaś cakraṃ kutsāya yudhyate |
RV_4,030.04c muṣāya indra sūryam ||
RV_4,030.05a yatra devāṃ ṛghāyato viśvāṃ ayudhya eka it |
RV_4,030.05c tvam indra vanūṃr ahan ||
RV_4,030.06a yatrota martyāya kam ariṇā indra sūryam |
RV_4,030.06c prāvaḥ śacībhir etaśam ||
RV_4,030.07a kim ād utāsi vṛtrahan maghavan manyumattamaḥ |
RV_4,030.07c atrāha dānum ātiraḥ ||
RV_4,030.08a etad ghed uta vīryam indra cakartha pauṃsyam |
RV_4,030.08c striyaṃ yad durhaṇāyuvaṃ vadhīr duhitaraṃ divaḥ ||
RV_4,030.09a divaś cid ghā duhitaram mahān mahīyamānām |
RV_4,030.09c uṣāsam indra sam piṇak ||
RV_4,030.10a apoṣā anasaḥ sarat sampiṣṭād aha bibhyuṣī |
RV_4,030.10c ni yat sīṃ śiśnathad vṛṣā ||
RV_4,030.11a etad asyā anaḥ śaye susampiṣṭaṃ vipāśy ā |
RV_4,030.11c sasāra sīm parāvataḥ ||
RV_4,030.12a uta sindhuṃ vibālyaṃ vitasthānām adhi kṣami |
RV_4,030.12c pari ṣṭhā indra māyayā ||
RV_4,030.13a uta śuṣṇasya dhṛṣṇuyā pra mṛkṣo abhi vedanam |
RV_4,030.13c puro yad asya sampiṇak ||
RV_4,030.14a uta dāsaṃ kaulitaram bṛhataḥ parvatād adhi |
RV_4,030.14c avāhann indra śambaram ||
RV_4,030.15a uta dāsasya varcinaḥ sahasrāṇi śatāvadhīḥ |
RV_4,030.15c adhi pañca pradhīṃr iva ||
RV_4,030.16a uta tyam putram agruvaḥ parāvṛktaṃ śatakratuḥ |
RV_4,030.16c uktheṣv indra ābhajat ||
RV_4,030.17a uta tyā turvaśāyadū asnātārā śacīpatiḥ |
RV_4,030.17c indro vidvāṃ apārayat ||
RV_4,030.18a uta tyā sadya āryā sarayor indra pārataḥ |
RV_4,030.18c arṇācitrarathāvadhīḥ ||
RV_4,030.19a anu dvā jahitā nayo 'ndhaṃ śroṇaṃ ca vṛtrahan |
RV_4,030.19c na tat te sumnam aṣṭave ||
RV_4,030.20a śatam aśmanmayīnām purām indro vy āsyat |
RV_4,030.20c divodāsāya dāśuṣe ||
RV_4,030.21a asvāpayad dabhītaye sahasrā triṃśataṃ hathaiḥ |
RV_4,030.21c dāsānām indro māyayā ||
RV_4,030.22a sa ghed utāsi vṛtrahan samāna indra gopatiḥ |
RV_4,030.22c yas tā viśvāni cicyuṣe ||
RV_4,030.23a uta nūnaṃ yad indriyaṃ kariṣyā indra pauṃsyam |
RV_4,030.23c adyā nakiṣ ṭad ā minat ||
RV_4,030.24a vāmaṃ-vāmaṃ ta ādure devo dadātv aryamā |
RV_4,030.24c vāmam pūṣā vāmam bhago vāmaṃ devaḥ karūḷatī ||

RV_4,031.01a kayā naś citra ā bhuvad ūtī sadāvṛdhaḥ sakhā |
RV_4,031.01c kayā śaciṣṭhayā vṛtā ||
RV_4,031.02a kas tvā satyo madānām maṃhiṣṭho matsad andhasaḥ |
RV_4,031.02c dṛḷhā cid āruje vasu ||
RV_4,031.03a abhī ṣu ṇaḥ sakhīnām avitā jaritṝṇām |
RV_4,031.03c śatam bhavāsy ūtibhiḥ ||
RV_4,031.04a abhī na ā vavṛtsva cakraṃ na vṛttam arvataḥ |
RV_4,031.04c niyudbhiś carṣaṇīnām ||
RV_4,031.05a pravatā hi kratūnām ā hā padeva gacchasi |
RV_4,031.05c abhakṣi sūrye sacā ||
RV_4,031.06a saṃ yat ta indra manyavaḥ saṃ cakrāṇi dadhanvire |
RV_4,031.06c adha tve adha sūrye ||
RV_4,031.07a uta smā hi tvām āhur in maghavānaṃ śacīpate |
RV_4,031.07c dātāram avidīdhayum ||
RV_4,031.08a uta smā sadya it pari śaśamānāya sunvate |
RV_4,031.08c purū cin maṃhase vasu ||
RV_4,031.09a nahi ṣmā te śataṃ cana rādho varanta āmuraḥ |
RV_4,031.09c na cyautnāni kariṣyataḥ ||
RV_4,031.10a asmāṃ avantu te śatam asmān sahasram ūtayaḥ |
RV_4,031.10c asmān viśvā abhiṣṭayaḥ ||
RV_4,031.11a asmāṃ ihā vṛṇīṣva sakhyāya svastaye |
RV_4,031.11c maho rāye divitmate ||
RV_4,031.12a asmāṃ aviḍḍhi viśvahendra rāyā parīṇasā |
RV_4,031.12c asmān viśvābhir ūtibhiḥ ||
RV_4,031.13a asmabhyaṃ tāṃ apā vṛdhi vrajāṃ asteva gomataḥ |
RV_4,031.13c navābhir indrotibhiḥ ||
RV_4,031.14a asmākaṃ dhṛṣṇuyā ratho dyumāṃ indrānapacyutaḥ |
RV_4,031.14c gavyur aśvayur īyate ||
RV_4,031.15a asmākam uttamaṃ kṛdhi śravo deveṣu sūrya |
RV_4,031.15c varṣiṣṭhaṃ dyām ivopari ||

RV_4,032.01a ā tū na indra vṛtrahann asmākam ardham ā gahi |
RV_4,032.01c mahān mahībhir ūtibhiḥ ||
RV_4,032.02a bhṛmiś cid ghāsi tūtujir ā citra citriṇīṣv ā |
RV_4,032.02c citraṃ kṛṇoṣy ūtaye ||
RV_4,032.03a dabhrebhiś cic chaśīyāṃsaṃ haṃsi vrādhantam ojasā |
RV_4,032.03c sakhibhir ye tve sacā ||
RV_4,032.04a vayam indra tve sacā vayaṃ tvābhi nonumaḥ |
RV_4,032.04c asmāṃ-asmāṃ id ud ava ||
RV_4,032.05a sa naś citrābhir adrivo 'navadyābhir ūtibhiḥ |
RV_4,032.05c anādhṛṣṭābhir ā gahi ||
RV_4,032.06a bhūyāmo ṣu tvāvataḥ sakhāya indra gomataḥ |
RV_4,032.06c yujo vājāya ghṛṣvaye ||
RV_4,032.07a tvaṃ hy eka īśiṣa indra vājasya gomataḥ |
RV_4,032.07c sa no yandhi mahīm iṣam ||
RV_4,032.08a na tvā varante anyathā yad ditsasi stuto magham |
RV_4,032.08c stotṛbhya indra girvaṇaḥ ||
RV_4,032.09a abhi tvā gotamā girānūṣata pra dāvane |
RV_4,032.09c indra vājāya ghṛṣvaye ||
RV_4,032.10a pra te vocāma vīryā yā mandasāna ārujaḥ |
RV_4,032.10c puro dāsīr abhītya ||
RV_4,032.11a tā te gṛṇanti vedhaso yāni cakartha pauṃsyā |
RV_4,032.11c suteṣv indra girvaṇaḥ ||
RV_4,032.12a avīvṛdhanta gotamā indra tve stomavāhasaḥ |
RV_4,032.12c aiṣu dhā vīravad yaśaḥ ||
RV_4,032.13a yac cid dhi śaśvatām asīndra sādhāraṇas tvam |
RV_4,032.13c taṃ tvā vayaṃ havāmahe ||
RV_4,032.14a arvācīno vaso bhavāsme su matsvāndhasaḥ |
RV_4,032.14c somānām indra somapāḥ ||
RV_4,032.15a asmākaṃ tvā matīnām ā stoma indra yacchatu |
RV_4,032.15c arvāg ā vartayā harī ||
RV_4,032.16a puroḷāśaṃ ca no ghaso joṣayāse giraś ca naḥ |
RV_4,032.16c vadhūyur iva yoṣaṇām ||
RV_4,032.17a sahasraṃ vyatīnāṃ yuktānām indram īmahe |
RV_4,032.17c śataṃ somasya khāryaḥ ||
RV_4,032.18a sahasrā te śatā vayaṃ gavām ā cyāvayāmasi |
RV_4,032.18c asmatrā rādha etu te ||
RV_4,032.19a daśa te kalaśānāṃ hiraṇyānām adhīmahi |
RV_4,032.19c bhūridā asi vṛtrahan ||
RV_4,032.20a bhūridā bhūri dehi no mā dabhram bhūry ā bhara |
RV_4,032.20c bhūri ghed indra ditsasi ||
RV_4,032.21a bhūridā hy asi śrutaḥ purutrā śūra vṛtrahan |
RV_4,032.21c ā no bhajasva rādhasi ||
RV_4,032.22a pra te babhrū vicakṣaṇa śaṃsāmi goṣaṇo napāt |
RV_4,032.22c mābhyāṃ gā anu śiśrathaḥ ||
RV_4,032.23a kanīnakeva vidradhe nave drupade arbhake |
RV_4,032.23c babhrū yāmeṣu śobhete ||
RV_4,032.24a aram ma usrayāmṇe 'ram anusrayāmṇe |
RV_4,032.24c babhrū yāmeṣv asridhā ||

RV_4,033.01a pra ṛbhubhyo dūtam iva vācam iṣya upastire śvaitarīṃ dhenum īḷe |
RV_4,033.01c ye vātajūtās taraṇibhir evaiḥ pari dyāṃ sadyo apaso babhūvuḥ ||
RV_4,033.02a yadāram akrann ṛbhavaḥ pitṛbhyām pariviṣṭī veṣaṇā daṃsanābhiḥ |
RV_4,033.02c ād id devānām upa sakhyam āyan dhīrāsaḥ puṣṭim avahan manāyai ||
RV_4,033.03a punar ye cakruḥ pitarā yuvānā sanā yūpeva jaraṇā śayānā |
RV_4,033.03c te vājo vibhvāṃ ṛbhur indravanto madhupsaraso no 'vantu yajñam ||
RV_4,033.04a yat saṃvatsam ṛbhavo gām arakṣan yat saṃvatsam ṛbhavo mā apiṃśan |
RV_4,033.04c yat saṃvatsam abharan bhāso asyās tābhiḥ śamībhir amṛtatvam āśuḥ ||
RV_4,033.05a jyeṣṭha āha camasā dvā kareti kanīyān trīn kṛṇavāmety āha |
RV_4,033.05c kaniṣṭha āha caturas kareti tvaṣṭa ṛbhavas tat panayad vaco vaḥ ||
RV_4,033.06a satyam ūcur nara evā hi cakrur anu svadhām ṛbhavo jagmur etām |
RV_4,033.06c vibhrājamānāṃś camasāṃ ahevāvenat tvaṣṭā caturo dadṛśvān ||
RV_4,033.07a dvādaśa dyūn yad agohyasyātithye raṇann ṛbhavaḥ sasantaḥ |
RV_4,033.07c sukṣetrākṛṇvann anayanta sindhūn dhanvātiṣṭhann oṣadhīr nimnam āpaḥ ||
RV_4,033.08a rathaṃ ye cakruḥ suvṛtaṃ nareṣṭhāṃ ye dhenuṃ viśvajuvaṃ viśvarūpām |
RV_4,033.08c ta ā takṣantv ṛbhavo rayiṃ naḥ svavasaḥ svapasaḥ suhastāḥ ||
RV_4,033.09a apo hy eṣām ajuṣanta devā abhi kratvā manasā dīdhyānāḥ |
RV_4,033.09c vājo devānām abhavat sukarmendrasya ṛbhukṣā varuṇasya vibhvā ||
RV_4,033.10a ye harī medhayokthā madanta indrāya cakruḥ suyujā ye aśvā |
RV_4,033.10c te rāyas poṣaṃ draviṇāny asme dhatta ṛbhavaḥ kṣemayanto na mitram ||
RV_4,033.11a idāhnaḥ pītim uta vo madaṃ dhur na ṛte śrāntasya sakhyāya devāḥ |
RV_4,033.11c te nūnam asme ṛbhavo vasūni tṛtīye asmin savane dadhāta ||

RV_4,034.01a ṛbhur vibhvā vāja indro no acchemaṃ yajñaṃ ratnadheyopa yāta |
RV_4,034.01c idā hi vo dhiṣaṇā devy ahnām adhāt pītiṃ sam madā agmatā vaḥ ||
RV_4,034.02a vidānāso janmano vājaratnā uta ṛtubhir ṛbhavo mādayadhvam |
RV_4,034.02c saṃ vo madā agmata sam purandhiḥ suvīrām asme rayim erayadhvam ||
RV_4,034.03a ayaṃ vo yajña ṛbhavo 'kāri yam ā manuṣvat pradivo dadhidhve |
RV_4,034.03c pra vo 'cchā jujuṣāṇāso asthur abhūta viśve agriyota vājāḥ ||
RV_4,034.04a abhūd u vo vidhate ratnadheyam idā naro dāśuṣe martyāya |
RV_4,034.04c pibata vājā ṛbhavo dade vo mahi tṛtīyaṃ savanam madāya ||
RV_4,034.05a ā vājā yātopa na ṛbhukṣā maho naro draviṇaso gṛṇānāḥ |
RV_4,034.05c ā vaḥ pītayo 'bhipitve ahnām imā astaṃ navasva iva gman ||
RV_4,034.06a ā napātaḥ śavaso yātanopemaṃ yajñaṃ namasā hūyamānāḥ |
RV_4,034.06c sajoṣasaḥ sūrayo yasya ca stha madhvaḥ pāta ratnadhā indravantaḥ ||
RV_4,034.07a sajoṣā indra varuṇena somaṃ sajoṣāḥ pāhi girvaṇo marudbhiḥ |
RV_4,034.07c agrepābhir ṛtupābhiḥ sajoṣā gnāspatnībhī ratnadhābhiḥ sajoṣāḥ ||
RV_4,034.08a sajoṣasa ādityair mādayadhvaṃ sajoṣasa ṛbhavaḥ parvatebhiḥ |
RV_4,034.08c sajoṣaso daivyenā savitrā sajoṣasaḥ sindhubhī ratnadhebhiḥ ||
RV_4,034.09a ye aśvinā ye pitarā ya ūtī dhenuṃ tatakṣur ṛbhavo ye aśvā |
RV_4,034.09c ye aṃsatrā ya ṛdhag rodasī ye vibhvo naraḥ svapatyāni cakruḥ ||
RV_4,034.10a ye gomantaṃ vājavantaṃ suvīraṃ rayiṃ dhattha vasumantam purukṣum |
RV_4,034.10c te agrepā ṛbhavo mandasānā asme dhatta ye ca rātiṃ gṛṇanti ||
RV_4,034.11a nāpābhūta na vo 'tītṛṣāmāniḥśastā ṛbhavo yajñe asmin |
RV_4,034.11c sam indreṇa madatha sam marudbhiḥ saṃ rājabhī ratnadheyāya devāḥ ||

RV_4,035.01a ihopa yāta śavaso napātaḥ saudhanvanā ṛbhavo māpa bhūta |
RV_4,035.01c asmin hi vaḥ savane ratnadheyaṃ gamantv indram anu vo madāsaḥ ||
RV_4,035.02a āgann ṛbhūṇām iha ratnadheyam abhūt somasya suṣutasya pītiḥ |
RV_4,035.02c sukṛtyayā yat svapasyayā caṃ ekaṃ vicakra camasaṃ caturdhā ||
RV_4,035.03a vy akṛṇota camasaṃ caturdhā sakhe vi śikṣety abravīta |
RV_4,035.03c athaita vājā amṛtasya panthāṃ gaṇaṃ devānām ṛbhavaḥ suhastāḥ ||
RV_4,035.04a kimmayaḥ svic camasa eṣa āsa yaṃ kāvyena caturo vicakra |
RV_4,035.04c athā sunudhvaṃ savanam madāya pāta ṛbhavo madhunaḥ somyasya ||
RV_4,035.05a śacyākarta pitarā yuvānā śacyākarta camasaṃ devapānam |
RV_4,035.05c śacyā harī dhanutarāv ataṣṭendravāhāv ṛbhavo vājaratnāḥ ||
RV_4,035.06a yo vaḥ sunoty abhipitve ahnāṃ tīvraṃ vājāsaḥ savanam madāya |
RV_4,035.06c tasmai rayim ṛbhavaḥ sarvavīram ā takṣata vṛṣaṇo mandasānāḥ ||
RV_4,035.07a prātaḥ sutam apibo haryaśva mādhyandinaṃ savanaṃ kevalaṃ te |
RV_4,035.07c sam ṛbhubhiḥ pibasva ratnadhebhiḥ sakhīṃr yāṃ indra cakṛṣe sukṛtyā ||
RV_4,035.08a ye devāso abhavatā sukṛtyā śyenā ived adhi divi niṣeda |
RV_4,035.08c te ratnaṃ dhāta śavaso napātaḥ saudhanvanā abhavatāmṛtāsaḥ ||
RV_4,035.09a yat tṛtīyaṃ savanaṃ ratnadheyam akṛṇudhvaṃ svapasyā suhastāḥ |
RV_4,035.09c tad ṛbhavaḥ pariṣiktaṃ va etat sam madebhir indriyebhiḥ pibadhvam ||

RV_4,036.01a anaśvo jāto anabhīśur ukthyo rathas tricakraḥ pari vartate rajaḥ |
RV_4,036.01c mahat tad vo devyasya pravācanaṃ dyām ṛbhavaḥ pṛthivīṃ yac ca puṣyatha ||
RV_4,036.02a rathaṃ ye cakruḥ suvṛtaṃ sucetaso 'vihvarantam manasas pari dhyayā |
RV_4,036.02c tāṃ ū nv asya savanasya pītaya ā vo vājā ṛbhavo vedayāmasi ||
RV_4,036.03a tad vo vājā ṛbhavaḥ supravācanaṃ deveṣu vibhvo abhavan mahitvanam |
RV_4,036.03c jivrī yat santā pitarā sanājurā punar yuvānā carathāya takṣatha ||
RV_4,036.04a ekaṃ vi cakra camasaṃ caturvayaṃ niś carmaṇo gām ariṇīta dhītibhiḥ |
RV_4,036.04c athā deveṣv amṛtatvam ānaśa śruṣṭī vājā ṛbhavas tad va ukthyam ||
RV_4,036.05a ṛbhuto rayiḥ prathamaśravastamo vājaśrutāso yam ajījanan naraḥ |
RV_4,036.05c vibhvataṣṭo vidatheṣu pravācyo yaṃ devāso 'vathā sa vicarṣaṇiḥ ||
RV_4,036.06a sa vājy arvā sa ṛṣir vacasyayā sa śūro astā pṛtanāsu duṣṭaraḥ |
RV_4,036.06c sa rāyas poṣaṃ sa suvīryaṃ dadhe yaṃ vājo vibhvāṃ ṛbhavo yam āviṣuḥ ||
RV_4,036.07a śreṣṭhaṃ vaḥ peśo adhi dhāyi darśataṃ stomo vājā ṛbhavas taṃ jujuṣṭana |
RV_4,036.07c dhīrāso hi ṣṭhā kavayo vipaścitas tān va enā brahmaṇā vedayāmasi ||
RV_4,036.08a yūyam asmabhyaṃ dhiṣaṇābhyas pari vidvāṃso viśvā naryāṇi bhojanā |
RV_4,036.08c dyumantaṃ vājaṃ vṛṣaśuṣmam uttamam ā no rayim ṛbhavas takṣatā vayaḥ ||
RV_4,036.09a iha prajām iha rayiṃ rarāṇā iha śravo vīravat takṣatā naḥ |
RV_4,036.09c yena vayaṃ citayemāty anyān taṃ vājaṃ citram ṛbhavo dadā naḥ ||

RV_4,037.01a upa no vājā adhvaram ṛbhukṣā devā yāta pathibhir devayānaiḥ |
RV_4,037.01c yathā yajñam manuṣo vikṣv āsu dadhidhve raṇvāḥ sudineṣv ahnām ||
RV_4,037.02a te vo hṛde manase santu yajñā juṣṭāso adya ghṛtanirṇijo guḥ |
RV_4,037.02c pra vaḥ sutāso harayanta pūrṇāḥ kratve dakṣāya harṣayanta pītāḥ ||
RV_4,037.03a tryudāyaṃ devahitaṃ yathā va stomo vājā ṛbhukṣaṇo dade vaḥ |
RV_4,037.03c juhve manuṣvad uparāsu vikṣu yuṣme sacā bṛhaddiveṣu somam ||
RV_4,037.04a pīvoaśvāḥ śucadrathā hi bhūtāyaḥśiprā vājinaḥ suniṣkāḥ |
RV_4,037.04c indrasya sūno śavaso napāto 'nu vaś cety agriyam madāya ||
RV_4,037.05a ṛbhum ṛbhukṣaṇo rayiṃ vāje vājintamaṃ yujam |
RV_4,037.05c indrasvantaṃ havāmahe sadāsātamam aśvinam ||
RV_4,037.06a sed ṛbhavo yam avatha yūyam indraś ca martyam |
RV_4,037.06c sa dhībhir astu sanitā medhasātā so arvatā ||
RV_4,037.07a vi no vājā ṛbhukṣaṇaḥ pathaś citana yaṣṭave |
RV_4,037.07c asmabhyaṃ sūraya stutā viśvā āśās tarīṣaṇi ||
RV_4,037.08a taṃ no vājā ṛbhukṣaṇa indra nāsatyā rayim |
RV_4,037.08c sam aśvaṃ carṣaṇibhya ā puru śasta maghattaye ||

RV_4,038.01a uto hi vāṃ dātrā santi pūrvā yā pūrubhyas trasadasyur nitośe |
RV_4,038.01c kṣetrāsāṃ dadathur urvarāsāṃ ghanaṃ dasyubhyo abhibhūtim ugram ||
RV_4,038.02a uta vājinam puruniṣṣidhvānaṃ dadhikrām u dadathur viśvakṛṣṭim |
RV_4,038.02c ṛjipyaṃ śyenam pruṣitapsum āśuṃ carkṛtyam aryo nṛpatiṃ na śūram ||
RV_4,038.03a yaṃ sīm anu pravateva dravantaṃ viśvaḥ pūrur madati harṣamāṇaḥ |
RV_4,038.03c paḍbhir gṛdhyantam medhayuṃ na śūraṃ rathaturaṃ vātam iva dhrajantam ||
RV_4,038.04a yaḥ smārundhāno gadhyā samatsu sanutaraś carati goṣu gacchan |
RV_4,038.04c āvirṛjīko vidathā nicikyat tiro aratim pary āpa āyoḥ ||
RV_4,038.05a uta smainaṃ vastramathiṃ na tāyum anu krośanti kṣitayo bhareṣu |
RV_4,038.05c nīcāyamānaṃ jasuriṃ na śyenaṃ śravaś cācchā paśumac ca yūtham ||
RV_4,038.06a uta smāsu prathamaḥ sariṣyan ni veveti śreṇibhī rathānām |
RV_4,038.06c srajaṃ kṛṇvāno janyo na śubhvā reṇuṃ rerihat kiraṇaṃ dadaśvān ||
RV_4,038.07a uta sya vājī sahurir ṛtāvā śuśrūṣamāṇas tanvā samarye |
RV_4,038.07c turaṃ yatīṣu turayann ṛjipyo 'dhi bhruvoḥ kirate reṇum ṛñjan ||
RV_4,038.08a uta smāsya tanyator iva dyor ṛghāyato abhiyujo bhayante |
RV_4,038.08c yadā sahasram abhi ṣīm ayodhīd durvartuḥ smā bhavati bhīma ṛñjan ||
RV_4,038.09a uta smāsya panayanti janā jūtiṃ kṛṣṭipro abhibhūtim āśoḥ |
RV_4,038.09c utainam āhuḥ samithe viyantaḥ parā dadhikrā asarat sahasraiḥ ||
RV_4,038.10a ā dadhikrāḥ śavasā pañca kṛṣṭīḥ sūrya iva jyotiṣāpas tatāna |
RV_4,038.10c sahasrasāḥ śatasā vājy arvā pṛṇaktu madhvā sam imā vacāṃsi ||

RV_4,039.01a āśuṃ dadhikrāṃ tam u nu ṣṭavāma divas pṛthivyā uta carkirāma |
RV_4,039.01c ucchantīr mām uṣasaḥ sūdayantv ati viśvāni duritāni parṣan ||
RV_4,039.02a mahaś carkarmy arvataḥ kratuprā dadhikrāvṇaḥ puruvārasya vṛṣṇaḥ |
RV_4,039.02c yam pūrubhyo dīdivāṃsaṃ nāgniṃ dadathur mitrāvaruṇā taturim ||
RV_4,039.03a yo aśvasya dadhikrāvṇo akārīt samiddhe agnā uṣaso vyuṣṭau |
RV_4,039.03c anāgasaṃ tam aditiḥ kṛṇotu sa mitreṇa varuṇenā sajoṣāḥ ||
RV_4,039.04a dadhikrāvṇa iṣa ūrjo maho yad amanmahi marutāṃ nāma bhadram |
RV_4,039.04c svastaye varuṇam mitram agniṃ havāmaha indraṃ vajrabāhum ||
RV_4,039.05a indram ived ubhaye vi hvayanta udīrāṇā yajñam upaprayantaḥ |
RV_4,039.05c dadhikrām u sūdanam martyāya dadathur mitrāvaruṇā no aśvam ||
RV_4,039.06a dadhikrāvṇo akāriṣaṃ jiṣṇor aśvasya vājinaḥ |
RV_4,039.06c surabhi no mukhā karat pra ṇa āyūṃṣi tāriṣat ||

RV_4,040.01a dadhikrāvṇa id u nu carkirāma viśvā in mām uṣasaḥ sūdayantu |
RV_4,040.01c apām agner uṣasaḥ sūryasya bṛhaspater āṅgirasasya jiṣṇoḥ ||
RV_4,040.02a satvā bhariṣo gaviṣo duvanyasac chravasyād iṣa uṣasas turaṇyasat |
RV_4,040.02c satyo dravo dravaraḥ pataṅgaro dadhikrāveṣam ūrjaṃ svar janat ||
RV_4,040.03a uta smāsya dravatas turaṇyataḥ parṇaṃ na ver anu vāti pragardhinaḥ |
RV_4,040.03c śyenasyeva dhrajato aṅkasam pari dadhikrāvṇaḥ sahorjā taritrataḥ ||
RV_4,040.04a uta sya vājī kṣipaṇiṃ turaṇyati grīvāyām baddho apikakṣa āsani |
RV_4,040.04c kratuṃ dadhikrā anu saṃtavītvat pathām aṅkāṃsy anv āpanīphaṇat ||
RV_4,040.05a haṃsaḥ śuciṣad vasur antarikṣasad dhotā vediṣad atithir duroṇasat |
RV_4,040.05c nṛṣad varasad ṛtasad vyomasad abjā gojā ṛtajā adrijā ṛtam ||

RV_4,041.01a indrā ko vāṃ varuṇā sumnam āpa stomo haviṣmāṃ amṛto na hotā |
RV_4,041.01c yo vāṃ hṛdi kratumāṃ asmad uktaḥ pasparśad indrāvaruṇā namasvān ||
RV_4,041.02a indrā ha yo varuṇā cakra āpī devau martaḥ sakhyāya prayasvān |
RV_4,041.02c sa hanti vṛtrā samitheṣu śatrūn avobhir vā mahadbhiḥ sa pra śṛṇve ||
RV_4,041.03a indrā ha ratnaṃ varuṇā dheṣṭhetthā nṛbhyaḥ śaśamānebhyas tā |
RV_4,041.03c yadī sakhāyā sakhyāya somaiḥ sutebhiḥ suprayasā mādayaite ||
RV_4,041.04a indrā yuvaṃ varuṇā didyum asminn ojiṣṭham ugrā ni vadhiṣṭaṃ vajram |
RV_4,041.04c yo no durevo vṛkatir dabhītis tasmin mimāthām abhibhūty ojaḥ ||
RV_4,041.05a indrā yuvaṃ varuṇā bhūtam asyā dhiyaḥ pretārā vṛṣabheva dhenoḥ |
RV_4,041.05c sā no duhīyad yavaseva gatvī sahasradhārā payasā mahī gauḥ ||
RV_4,041.06a toke hite tanaya urvarāsu sūro dṛśīke vṛṣaṇaś ca pauṃsye |
RV_4,041.06c indrā no atra varuṇā syātām avobhir dasmā paritakmyāyām ||
RV_4,041.07a yuvām id dhy avase pūrvyāya pari prabhūtī gaviṣaḥ svāpī |
RV_4,041.07c vṛṇīmahe sakhyāya priyāya śūrā maṃhiṣṭhā pitareva śambhū ||
RV_4,041.08a tā vāṃ dhiyo 'vase vājayantīr ājiṃ na jagmur yuvayūḥ sudānū |
RV_4,041.08c śriye na gāva upa somam asthur indraṃ giro varuṇam me manīṣāḥ ||
RV_4,041.09a imā indraṃ varuṇam me manīṣā agmann upa draviṇam icchamānāḥ |
RV_4,041.09c upem asthur joṣṭāra iva vasvo raghvīr iva śravaso bhikṣamāṇāḥ ||
RV_4,041.10a aśvyasya tmanā rathyasya puṣṭer nityasya rāyaḥ patayaḥ syāma |
RV_4,041.10c tā cakrāṇā ūtibhir navyasībhir asmatrā rāyo niyutaḥ sacantām ||
RV_4,041.11a ā no bṛhantā bṛhatībhir ūtī indra yātaṃ varuṇa vājasātau |
RV_4,041.11c yad didyavaḥ pṛtanāsu prakrīḷān tasya vāṃ syāma sanitāra ājeḥ ||

RV_4,042.01a mama dvitā rāṣṭraṃ kṣatriyasya viśvāyor viśve amṛtā yathā naḥ |
RV_4,042.01c kratuṃ sacante varuṇasya devā rājāmi kṛṣṭer upamasya vavreḥ ||
RV_4,042.02a ahaṃ rājā varuṇo mahyaṃ tāny asuryāṇi prathamā dhārayanta |
RV_4,042.02c kratuṃ sacante varuṇasya devā rājāmi kṛṣṭer upamasya vavreḥ ||
RV_4,042.03a aham indro varuṇas te mahitvorvī gabhīre rajasī sumeke |
RV_4,042.03c tvaṣṭeva viśvā bhuvanāni vidvān sam airayaṃ rodasī dhārayaṃ ca ||
RV_4,042.04a aham apo apinvam ukṣamāṇā dhārayaṃ divaṃ sadana ṛtasya |
RV_4,042.04c ṛtena putro aditer ṛtāvota tridhātu prathayad vi bhūma ||
RV_4,042.05a māṃ naraḥ svaśvā vājayanto māṃ vṛtāḥ samaraṇe havante |
RV_4,042.05c kṛṇomy ājim maghavāham indra iyarmi reṇum abhibhūtyojāḥ ||
RV_4,042.06a ahaṃ tā viśvā cakaraṃ nakir mā daivyaṃ saho varate apratītam |
RV_4,042.06c yan mā somāso mamadan yad ukthobhe bhayete rajasī apāre ||
RV_4,042.07a viduṣ ṭe viśvā bhuvanāni tasya tā pra bravīṣi varuṇāya vedhaḥ |
RV_4,042.07c tvaṃ vṛtrāṇi śṛṇviṣe jaghanvān tvaṃ vṛtāṃ ariṇā indra sindhūn ||
RV_4,042.08a asmākam atra pitaras ta āsan sapta ṛṣayo daurgahe badhyamāne |
RV_4,042.08c ta āyajanta trasadasyum asyā indraṃ na vṛtraturam ardhadevam ||
RV_4,042.09a purukutsānī hi vām adāśad dhavyebhir indrāvaruṇā namobhiḥ |
RV_4,042.09c athā rājānaṃ trasadasyum asyā vṛtrahaṇaṃ dadathur ardhadevam ||
RV_4,042.10a rāyā vayaṃ sasavāṃso madema havyena devā yavasena gāvaḥ |
RV_4,042.10c tāṃ dhenum indrāvaruṇā yuvaṃ no viśvāhā dhattam anapasphurantīm ||

RV_4,043.01a ka u śravat katamo yajñiyānāṃ vandāru devaḥ katamo juṣāte |
RV_4,043.01c kasyemāṃ devīm amṛteṣu preṣṭhāṃ hṛdi śreṣāma suṣṭutiṃ suhavyām ||
RV_4,043.02a ko mṛḷāti katama āgamiṣṭho devānām u katamaḥ śambhaviṣṭhaḥ |
RV_4,043.02c rathaṃ kam āhur dravadaśvam āśuṃ yaṃ sūryasya duhitāvṛṇīta ||
RV_4,043.03a makṣū hi ṣmā gacchatha īvato dyūn indro na śaktim paritakmyāyām |
RV_4,043.03c diva ājātā divyā suparṇā kayā śacīnām bhavathaḥ śaciṣṭhā ||
RV_4,043.04a kā vām bhūd upamātiḥ kayā na āśvinā gamatho hūyamānā |
RV_4,043.04c ko vām mahaś cit tyajaso abhīka uruṣyatam mādhvī dasrā na ūtī ||
RV_4,043.05a uru vāṃ rathaḥ pari nakṣati dyām ā yat samudrād abhi vartate vām |
RV_4,043.05c madhvā mādhvī madhu vām pruṣāyan yat sīṃ vām pṛkṣo bhurajanta pakvāḥ ||
RV_4,043.06a sindhur ha vāṃ rasayā siñcad aśvān ghṛṇā vayo 'ruṣāsaḥ pari gman |
RV_4,043.06c tad ū ṣu vām ajiraṃ ceti yānaṃ yena patī bhavathaḥ sūryāyāḥ ||
RV_4,043.07a iheha yad vāṃ samanā papṛkṣe seyam asme sumatir vājaratnā |
RV_4,043.07c uruṣyataṃ jaritāraṃ yuvaṃ ha śritaḥ kāmo nāsatyā yuvadrik ||

RV_4,044.01a taṃ vāṃ rathaṃ vayam adyā huvema pṛthujrayam aśvinā saṃgatiṃ goḥ |
RV_4,044.01c yaḥ sūryāṃ vahati vandhurāyur girvāhasam purutamaṃ vasūyum ||
RV_4,044.02a yuvaṃ śriyam aśvinā devatā tāṃ divo napātā vanathaḥ śacībhiḥ |
RV_4,044.02c yuvor vapur abhi pṛkṣaḥ sacante vahanti yat kakuhāso rathe vām ||
RV_4,044.03a ko vām adyā karate rātahavya ūtaye vā sutapeyāya vārkaiḥ |
RV_4,044.03c ṛtasya vā vanuṣe pūrvyāya namo yemāno aśvinā vavartat ||
RV_4,044.04a hiraṇyayena purubhū rathenemaṃ yajñaṃ nāsatyopa yātam |
RV_4,044.04c pibātha in madhunaḥ somyasya dadhatho ratnaṃ vidhate janāya ||
RV_4,044.05a ā no yātaṃ divo acchā pṛthivyā hiraṇyayena suvṛtā rathena |
RV_4,044.05c mā vām anye ni yaman devayantaḥ saṃ yad dade nābhiḥ pūrvyā vām ||
RV_4,044.06a nū no rayim puruvīram bṛhantaṃ dasrā mimāthām ubhayeṣv asme |
RV_4,044.06c naro yad vām aśvinā stomam āvan sadhastutim ājamīḷhāso agman ||
RV_4,044.07a iheha yad vāṃ samanā papṛkṣe seyam asme sumatir vājaratnā |
RV_4,044.07c uruṣyataṃ jaritāraṃ yuvaṃ ha śritaḥ kāmo nāsatyā yuvadrik ||

RV_4,045.01a eṣa sya bhānur ud iyarti yujyate rathaḥ parijmā divo asya sānavi |
RV_4,045.01c pṛkṣāso asmin mithunā adhi trayo dṛtis turīyo madhuno vi rapśate ||
RV_4,045.02a ud vām pṛkṣāso madhumanta īrate rathā aśvāsa uṣaso vyuṣṭiṣu |
RV_4,045.02c aporṇuvantas tama ā parīvṛtaṃ svar ṇa śukraṃ tanvanta ā rajaḥ ||
RV_4,045.03a madhvaḥ pibatam madhupebhir āsabhir uta priyam madhune yuñjāthāṃ ratham |
RV_4,045.03c ā vartanim madhunā jinvathas patho dṛtiṃ vahethe madhumantam aśvinā ||
RV_4,045.04a haṃsāso ye vām madhumanto asridho hiraṇyaparṇā uhuva uṣarbudhaḥ |
RV_4,045.04c udapruto mandino mandinispṛśo madhvo na makṣaḥ savanāni gacchathaḥ ||
RV_4,045.05a svadhvarāso madhumanto agnaya usrā jarante prati vastor aśvinā |
RV_4,045.05c yan niktahastas taraṇir vicakṣaṇaḥ somaṃ suṣāva madhumantam adribhiḥ ||
RV_4,045.06a ākenipāso ahabhir davidhvataḥ svar ṇa śukraṃ tanvanta ā rajaḥ |
RV_4,045.06c sūraś cid aśvān yuyujāna īyate viśvāṃ anu svadhayā cetathas pathaḥ ||
RV_4,045.07a pra vām avocam aśvinā dhiyandhā rathaḥ svaśvo ajaro yo asti |
RV_4,045.07c yena sadyaḥ pari rajāṃsi yātho haviṣmantaṃ taraṇim bhojam accha ||

RV_4,046.01a agram pibā madhūnāṃ sutaṃ vāyo diviṣṭiṣu |
RV_4,046.01c tvaṃ hi pūrvapā asi ||
RV_4,046.02a śatenā no abhiṣṭibhir niyutvāṃ indrasārathiḥ |
RV_4,046.02c vāyo sutasya tṛmpatam ||
RV_4,046.03a ā vāṃ sahasraṃ haraya indravāyū abhi prayaḥ |
RV_4,046.03c vahantu somapītaye ||
RV_4,046.04a rathaṃ hiraṇyavandhuram indravāyū svadhvaram |
RV_4,046.04c ā hi sthātho divispṛśam ||
RV_4,046.05a rathena pṛthupājasā dāśvāṃsam upa gacchatam |
RV_4,046.05c indravāyū ihā gatam ||
RV_4,046.06a indravāyū ayaṃ sutas taṃ devebhiḥ sajoṣasā |
RV_4,046.06c pibataṃ dāśuṣo gṛhe ||
RV_4,046.07a iha prayāṇam astu vām indravāyū vimocanam |
RV_4,046.07c iha vāṃ somapītaye ||

RV_4,047.01a vāyo śukro ayāmi te madhvo agraṃ diviṣṭiṣu |
RV_4,047.01c ā yāhi somapītaye spārho deva niyutvatā ||
RV_4,047.02a indraś ca vāyav eṣāṃ somānām pītim arhathaḥ |
RV_4,047.02c yuvāṃ hi yantīndavo nimnam āpo na sadhryak ||
RV_4,047.03a vāyav indraś ca śuṣmiṇā sarathaṃ śavasas patī |
RV_4,047.03c niyutvantā na ūtaya ā yātaṃ somapītaye ||
RV_4,047.04a yā vāṃ santi puruspṛho niyuto dāśuṣe narā |
RV_4,047.04c asme tā yajñavāhasendravāyū ni yacchatam ||

RV_4,048.01a vihi hotrā avītā vipo na rāyo aryaḥ |
RV_4,048.01c vāyav ā candreṇa rathena yāhi sutasya pītaye ||
RV_4,048.02a niryuvāṇo aśastīr niyutvāṃ indrasārathiḥ |
RV_4,048.02c vāyav ā candreṇa rathena yāhi sutasya pītaye ||
RV_4,048.03a anu kṛṣṇe vasudhitī yemāte viśvapeśasā |
RV_4,048.03c vāyav ā candreṇa rathena yāhi sutasya pītaye ||
RV_4,048.04a vahantu tvā manoyujo yuktāso navatir nava |
RV_4,048.04c vāyav ā candreṇa rathena yāhi sutasya pītaye ||
RV_4,048.05a vāyo śataṃ harīṇāṃ yuvasva poṣyāṇām |
RV_4,048.05c uta vā te sahasriṇo ratha ā yātu pājasā ||

RV_4,049.01a idaṃ vām āsye haviḥ priyam indrābṛhaspatī |
RV_4,049.01c uktham madaś ca śasyate ||
RV_4,049.02a ayaṃ vām pari ṣicyate soma indrābṛhaspatī |
RV_4,049.02c cārur madāya pītaye ||
RV_4,049.03a ā na indrābṛhaspatī gṛham indraś ca gacchatam |
RV_4,049.03c somapā somapītaye ||
RV_4,049.04a asme indrābṛhaspatī rayiṃ dhattaṃ śatagvinam |
RV_4,049.04c aśvāvantaṃ sahasriṇam ||
RV_4,049.05a indrābṛhaspatī vayaṃ sute gīrbhir havāmahe |
RV_4,049.05c asya somasya pītaye ||
RV_4,049.06a somam indrābṛhaspatī pibataṃ dāśuṣo gṛhe |
RV_4,049.06c mādayethāṃ tadokasā ||

RV_4,050.01a yas tastambha sahasā vi jmo antān bṛhaspatis triṣadhastho raveṇa |
RV_4,050.01c tam pratnāsa ṛṣayo dīdhyānāḥ puro viprā dadhire mandrajihvam ||
RV_4,050.02a dhunetayaḥ supraketam madanto bṛhaspate abhi ye nas tatasre |
RV_4,050.02c pṛṣantaṃ sṛpram adabdham ūrvam bṛhaspate rakṣatād asya yonim ||
RV_4,050.03a bṛhaspate yā paramā parāvad ata ā ta ṛtaspṛśo ni ṣeduḥ |
RV_4,050.03c tubhyaṃ khātā avatā adridugdhā madhva ścotanty abhito virapśam ||
RV_4,050.04a bṛhaspatiḥ prathamaṃ jāyamāno maho jyotiṣaḥ parame vyoman |
RV_4,050.04c saptāsyas tuvijāto raveṇa vi saptaraśmir adhamat tamāṃsi ||
RV_4,050.05a sa suṣṭubhā sa ṛkvatā gaṇena valaṃ ruroja phaligaṃ raveṇa |
RV_4,050.05c bṛhaspatir usriyā havyasūdaḥ kanikradad vāvaśatīr ud ājat ||
RV_4,050.06a evā pitre viśvadevāya vṛṣṇe yajñair vidhema namasā havirbhiḥ |
RV_4,050.06c bṛhaspate suprajā vīravanto vayaṃ syāma patayo rayīṇām ||
RV_4,050.07a sa id rājā pratijanyāni viśvā śuṣmeṇa tasthāv abhi vīryeṇa |
RV_4,050.07c bṛhaspatiṃ yaḥ subhṛtam bibharti valgūyati vandate pūrvabhājam ||
RV_4,050.08a sa it kṣeti sudhita okasi sve tasmā iḷā pinvate viśvadānīm |
RV_4,050.08c tasmai viśaḥ svayam evā namante yasmin brahmā rājani pūrva eti ||
RV_4,050.09a apratīto jayati saṃ dhanāni pratijanyāny uta yā sajanyā |
RV_4,050.09c avasyave yo varivaḥ kṛṇoti brahmaṇe rājā tam avanti devāḥ ||
RV_4,050.10a indraś ca somam pibatam bṛhaspate 'smin yajñe mandasānā vṛṣaṇvasū |
RV_4,050.10c ā vāṃ viśantv indavaḥ svābhuvo 'sme rayiṃ sarvavīraṃ ni yacchatam ||
RV_4,050.11a bṛhaspata indra vardhataṃ naḥ sacā sā vāṃ sumatir bhūtv asme |
RV_4,050.11c aviṣṭaṃ dhiyo jigṛtam purandhīr jajastam aryo vanuṣām arātīḥ ||

RV_4,051.01a idam u tyat purutamam purastāj jyotis tamaso vayunāvad asthāt |
RV_4,051.01c nūnaṃ divo duhitaro vibhātīr gātuṃ kṛṇavann uṣaso janāya ||
RV_4,051.02a asthur u citrā uṣasaḥ purastān mitā iva svaravo 'dhvareṣu |
RV_4,051.02c vy ū vrajasya tamaso dvārocchantīr avrañ chucayaḥ pāvakāḥ ||
RV_4,051.03a ucchantīr adya citayanta bhojān rādhodeyāyoṣaso maghonīḥ |
RV_4,051.03c acitre antaḥ paṇayaḥ sasantv abudhyamānās tamaso vimadhye ||
RV_4,051.04a kuvit sa devīḥ sanayo navo vā yāmo babhūyād uṣaso vo adya |
RV_4,051.04c yenā navagve aṅgire daśagve saptāsye revatī revad ūṣa ||
RV_4,051.05a yūyaṃ hi devīr ṛtayugbhir aśvaiḥ pariprayātha bhuvanāni sadyaḥ |
RV_4,051.05c prabodhayantīr uṣasaḥ sasantaṃ dvipāc catuṣpāc carathāya jīvam ||
RV_4,051.06a kva svid āsāṃ katamā purāṇī yayā vidhānā vidadhur ṛbhūṇām |
RV_4,051.06c śubhaṃ yac chubhrā uṣasaś caranti na vi jñāyante sadṛśīr ajuryāḥ ||
RV_4,051.07a tā ghā tā bhadrā uṣasaḥ purāsur abhiṣṭidyumnā ṛtajātasatyāḥ |
RV_4,051.07c yāsv ījānaḥ śaśamāna ukthai stuvañ chaṃsan draviṇaṃ sadya āpa ||
RV_4,051.08a tā ā caranti samanā purastāt samānataḥ samanā paprathānāḥ |
RV_4,051.08c ṛtasya devīḥ sadaso budhānā gavāṃ na sargā uṣaso jarante ||
RV_4,051.09a tā in nv eva samanā samānīr amītavarṇā uṣasaś caranti |
RV_4,051.09c gūhantīr abhvam asitaṃ ruśadbhiḥ śukrās tanūbhiḥ śucayo rucānāḥ ||
RV_4,051.10a rayiṃ divo duhitaro vibhātīḥ prajāvantaṃ yacchatāsmāsu devīḥ |
RV_4,051.10c syonād ā vaḥ pratibudhyamānāḥ suvīryasya patayaḥ syāma ||
RV_4,051.11a tad vo divo duhitaro vibhātīr upa bruva uṣaso yajñaketuḥ |
RV_4,051.11c vayaṃ syāma yaśaso janeṣu tad dyauś ca dhattām pṛthivī ca devī ||

RV_4,052.01a prati ṣyā sūnarī janī vyucchantī pari svasuḥ |
RV_4,052.01c divo adarśi duhitā ||
RV_4,052.02a aśveva citrāruṣī mātā gavām ṛtāvarī |
RV_4,052.02c sakhābhūd aśvinor uṣāḥ ||
RV_4,052.03a uta sakhāsy aśvinor uta mātā gavām asi |
RV_4,052.03c utoṣo vasva īśiṣe ||
RV_4,052.04a yāvayaddveṣasaṃ tvā cikitvit sūnṛtāvari |
RV_4,052.04c prati stomair abhutsmahi ||
RV_4,052.05a prati bhadrā adṛkṣata gavāṃ sargā na raśmayaḥ |
RV_4,052.05c oṣā aprā uru jrayaḥ ||
RV_4,052.06a āpapruṣī vibhāvari vy āvar jyotiṣā tamaḥ |
RV_4,052.06c uṣo anu svadhām ava ||
RV_4,052.07a ā dyāṃ tanoṣi raśmibhir āntarikṣam uru priyam |
RV_4,052.07c uṣaḥ śukreṇa śociṣā ||

RV_4,053.01a tad devasya savitur vāryam mahad vṛṇīmahe asurasya pracetasaḥ |
RV_4,053.01c chardir yena dāśuṣe yacchati tmanā tan no mahāṃ ud ayān devo aktubhiḥ ||
RV_4,053.02a divo dhartā bhuvanasya prajāpatiḥ piśaṅgaṃ drāpim prati muñcate kaviḥ |
RV_4,053.02c vicakṣaṇaḥ prathayann āpṛṇann urv ajījanat savitā sumnam ukthyam ||
RV_4,053.03a āprā rajāṃsi divyāni pārthivā ślokaṃ devaḥ kṛṇute svāya dharmaṇe |
RV_4,053.03c pra bāhū asrāk savitā savīmani niveśayan prasuvann aktubhir jagat ||
RV_4,053.04a adābhyo bhuvanāni pracākaśad vratāni devaḥ savitābhi rakṣate |
RV_4,053.04c prāsrāg bāhū bhuvanasya prajābhyo dhṛtavrato maho ajmasya rājati ||
RV_4,053.05a trir antarikṣaṃ savitā mahitvanā trī rajāṃsi paribhus trīṇi rocanā |
RV_4,053.05c tisro divaḥ pṛthivīs tisra invati tribhir vratair abhi no rakṣati tmanā ||
RV_4,053.06a bṛhatsumnaḥ prasavītā niveśano jagata sthātur ubhayasya yo vaśī |
RV_4,053.06c sa no devaḥ savitā śarma yacchatv asme kṣayāya trivarūtham aṃhasaḥ ||
RV_4,053.07a āgan deva ṛtubhir vardhatu kṣayaṃ dadhātu naḥ savitā suprajām iṣam |
RV_4,053.07c sa naḥ kṣapābhir ahabhiś ca jinvatu prajāvantaṃ rayim asme sam invatu ||

RV_4,054.01a abhūd devaḥ savitā vandyo nu na idānīm ahna upavācyo nṛbhiḥ |
RV_4,054.01c vi yo ratnā bhajati mānavebhyaḥ śreṣṭhaṃ no atra draviṇaṃ yathā dadhat ||
RV_4,054.02a devebhyo hi prathamaṃ yajñiyebhyo 'mṛtatvaṃ suvasi bhāgam uttamam |
RV_4,054.02c ād id dāmānaṃ savitar vy ūrṇuṣe 'nūcīnā jīvitā mānuṣebhyaḥ ||
RV_4,054.03a acittī yac cakṛmā daivye jane dīnair dakṣaiḥ prabhūtī pūruṣatvatā |
RV_4,054.03c deveṣu ca savitar mānuṣeṣu ca tvaṃ no atra suvatād anāgasaḥ ||
RV_4,054.04a na pramiye savitur daivyasya tad yathā viśvam bhuvanaṃ dhārayiṣyati |
RV_4,054.04c yat pṛthivyā varimann ā svaṅgurir varṣman divaḥ suvati satyam asya tat ||
RV_4,054.05a indrajyeṣṭhān bṛhadbhyaḥ parvatebhyaḥ kṣayāṃ ebhyaḥ suvasi pastyāvataḥ |
RV_4,054.05c yathā-yathā patayanto viyemira evaiva tasthuḥ savitaḥ savāya te ||
RV_4,054.06a ye te trir ahan savitaḥ savāso dive-dive saubhagam āsuvanti |
RV_4,054.06c indro dyāvāpṛthivī sindhur adbhir ādityair no aditiḥ śarma yaṃsat ||

RV_4,055.01a ko vas trātā vasavaḥ ko varūtā dyāvābhūmī adite trāsīthāṃ naḥ |
RV_4,055.01c sahīyaso varuṇa mitra martāt ko vo 'dhvare varivo dhāti devāḥ ||
RV_4,055.02a pra ye dhāmāni pūrvyāṇy arcān vi yad ucchān viyotāro amūrāḥ |
RV_4,055.02c vidhātāro vi te dadhur ajasrā ṛtadhītayo rurucanta dasmāḥ ||
RV_4,055.03a pra pastyām aditiṃ sindhum arkaiḥ svastim īḷe sakhyāya devīm |
RV_4,055.03c ubhe yathā no ahanī nipāta uṣāsānaktā karatām adabdhe ||
RV_4,055.04a vy aryamā varuṇaś ceti panthām iṣas patiḥ suvitaṃ gātum agniḥ |
RV_4,055.04c indrāviṣṇū nṛvad u ṣu stavānā śarma no yantam amavad varūtham ||
RV_4,055.05a ā parvatasya marutām avāṃsi devasya trātur avri bhagasya |
RV_4,055.05c pāt patir janyād aṃhaso no mitro mitriyād uta na uruṣyet ||
RV_4,055.06a nū rodasī ahinā budhnyena stuvīta devī apyebhir iṣṭaiḥ |
RV_4,055.06c samudraṃ na saṃcaraṇe saniṣyavo gharmasvaraso nadyo apa vran ||
RV_4,055.07a devair no devy aditir ni pātu devas trātā trāyatām aprayucchan |
RV_4,055.07c nahi mitrasya varuṇasya dhāsim arhāmasi pramiyaṃ sānv agneḥ ||
RV_4,055.08a agnir īśe vasavyasyāgnir mahaḥ saubhagasya |
RV_4,055.08c tāny asmabhyaṃ rāsate ||
RV_4,055.09a uṣo maghony ā vaha sūnṛte vāryā puru |
RV_4,055.09c asmabhyaṃ vājinīvati ||
RV_4,055.10a tat su naḥ savitā bhago varuṇo mitro aryamā |
RV_4,055.10c indro no rādhasā gamat ||

RV_4,056.01a mahī dyāvāpṛthivī iha jyeṣṭhe rucā bhavatāṃ śucayadbhir arkaiḥ |
RV_4,056.01c yat sīṃ variṣṭhe bṛhatī viminvan ruvad dhokṣā paprathānebhir evaiḥ ||
RV_4,056.02a devī devebhir yajate yajatrair aminatī tasthatur ukṣamāṇe |
RV_4,056.02c ṛtāvarī adruhā devaputre yajñasya netrī śucayadbhir arkaiḥ ||
RV_4,056.03a sa it svapā bhuvaneṣv āsa ya ime dyāvāpṛthivī jajāna |
RV_4,056.03c urvī gabhīre rajasī sumeke avaṃśe dhīraḥ śacyā sam airat ||
RV_4,056.04a nū rodasī bṛhadbhir no varūthaiḥ patnīvadbhir iṣayantī sajoṣāḥ |
RV_4,056.04c urūcī viśve yajate ni pātaṃ dhiyā syāma rathyaḥ sadāsāḥ ||
RV_4,056.05a pra vām mahi dyavī abhy upastutim bharāmahe |
RV_4,056.05c śucī upa praśastaye ||
RV_4,056.06a punāne tanvā mithaḥ svena dakṣeṇa rājathaḥ |
RV_4,056.06c ūhyāthe sanād ṛtam ||
RV_4,056.07a mahī mitrasya sādhathas tarantī pipratī ṛtam |
RV_4,056.07c pari yajñaṃ ni ṣedathuḥ ||

RV_4,057.01a kṣetrasya patinā vayaṃ hiteneva jayāmasi |
RV_4,057.01c gām aśvam poṣayitnv ā sa no mṛḷātīdṛśe ||
RV_4,057.02a kṣetrasya pate madhumantam ūrmiṃ dhenur iva payo asmāsu dhukṣva |
RV_4,057.02c madhuścutaṃ ghṛtam iva supūtam ṛtasya naḥ patayo mṛḷayantu ||
RV_4,057.03a madhumatīr oṣadhīr dyāva āpo madhuman no bhavatv antarikṣam |
RV_4,057.03c kṣetrasya patir madhumān no astv ariṣyanto anv enaṃ carema ||
RV_4,057.04a śunaṃ vāhāḥ śunaṃ naraḥ śunaṃ kṛṣatu lāṅgalam |
RV_4,057.04c śunaṃ varatrā badhyantāṃ śunam aṣṭrām ud iṅgaya ||
RV_4,057.05a śunāsīrāv imāṃ vācaṃ juṣethāṃ yad divi cakrathuḥ payaḥ |
RV_4,057.05c tenemām upa siñcatam ||
RV_4,057.06a arvācī subhage bhava sīte vandāmahe tvā |
RV_4,057.06c yathā naḥ subhagāsasi yathā naḥ suphalāsasi ||
RV_4,057.07a indraḥ sītāṃ ni gṛhṇātu tām pūṣānu yacchatu |
RV_4,057.07c sā naḥ payasvatī duhām uttarām-uttarāṃ samām ||
RV_4,057.08a śunaṃ naḥ phālā vi kṛṣantu bhūmiṃ śunaṃ kīnāśā abhi yantu vāhaiḥ |
RV_4,057.08c śunam parjanyo madhunā payobhiḥ śunāsīrā śunam asmāsu dhattam ||

RV_4,058.01a samudrād ūrmir madhumāṃ ud ārad upāṃśunā sam amṛtatvam ānaṭ |
RV_4,058.01c ghṛtasya nāma guhyaṃ yad asti jihvā devānām amṛtasya nābhiḥ ||
RV_4,058.02a vayaṃ nāma pra bravāmā ghṛtasyāsmin yajñe dhārayāmā namobhiḥ |
RV_4,058.02c upa brahmā śṛṇavac chasyamānaṃ catuḥśṛṅgo 'vamīd gaura etat ||
RV_4,058.03a catvāri śṛṅgā trayo asya pādā dve śīrṣe sapta hastāso asya |
RV_4,058.03c tridhā baddho vṛṣabho roravīti maho devo martyāṃ ā viveśa ||
RV_4,058.04a tridhā hitam paṇibhir guhyamānaṃ gavi devāso ghṛtam anv avindan |
RV_4,058.04c indra ekaṃ sūrya ekaṃ jajāna venād ekaṃ svadhayā niṣ ṭatakṣuḥ ||
RV_4,058.05a etā arṣanti hṛdyāt samudrāc chatavrajā ripuṇā nāvacakṣe |
RV_4,058.05c ghṛtasya dhārā abhi cākaśīmi hiraṇyayo vetaso madhya āsām ||
RV_4,058.06a samyak sravanti sarito na dhenā antar hṛdā manasā pūyamānāḥ |
RV_4,058.06c ete arṣanty ūrmayo ghṛtasya mṛgā iva kṣipaṇor īṣamāṇāḥ ||
RV_4,058.07a sindhor iva prādhvane śūghanāso vātapramiyaḥ patayanti yahvāḥ |
RV_4,058.07c ghṛtasya dhārā aruṣo na vājī kāṣṭhā bhindann ūrmibhiḥ pinvamānaḥ ||
RV_4,058.08a abhi pravanta samaneva yoṣāḥ kalyāṇyaḥ smayamānāso agnim |
RV_4,058.08c ghṛtasya dhārāḥ samidho nasanta tā juṣāṇo haryati jātavedāḥ ||
RV_4,058.09a kanyā iva vahatum etavā u añjy añjānā abhi cākaśīmi |
RV_4,058.09c yatra somaḥ sūyate yatra yajño ghṛtasya dhārā abhi tat pavante ||
RV_4,058.10a abhy arṣata suṣṭutiṃ gavyam ājim asmāsu bhadrā draviṇāni dhatta |
RV_4,058.10c imaṃ yajñaṃ nayata devatā no ghṛtasya dhārā madhumat pavante ||
RV_4,058.11a dhāman te viśvam bhuvanam adhi śritam antaḥ samudre hṛdy antar āyuṣi |
RV_4,058.11c apām anīke samithe ya ābhṛtas tam aśyāma madhumantaṃ ta ūrmim ||




_____________________________________________________________




Ṛgveda 5






RV_5,001.01a abodhy agniḥ samidhā janānām prati dhenum ivāyatīm uṣāsam |
RV_5,001.01c yahvā iva pra vayām ujjihānāḥ pra bhānavaḥ sisrate nākam accha ||
RV_5,001.02a abodhi hotā yajathāya devān ūrdhvo agniḥ sumanāḥ prātar asthāt |
RV_5,001.02c samiddhasya ruśad adarśi pājo mahān devas tamaso nir amoci ||
RV_5,001.03a yad īṃ gaṇasya raśanām ajīgaḥ śucir aṅkte śucibhir gobhir agniḥ |
RV_5,001.03c ād dakṣiṇā yujyate vājayanty uttānām ūrdhvo adhayaj juhūbhiḥ ||
RV_5,001.04a agnim acchā devayatām manāṃsi cakṣūṃṣīva sūrye saṃ caranti |
RV_5,001.04c yad īṃ suvāte uṣasā virūpe śveto vājī jāyate agre ahnām ||
RV_5,001.05a janiṣṭa hi jenyo agre ahnāṃ hito hiteṣv aruṣo vaneṣu |
RV_5,001.05c dame-dame sapta ratnā dadhāno 'gnir hotā ni ṣasādā yajīyān ||
RV_5,001.06a agnir hotā ny asīdad yajīyān upasthe mātuḥ surabhā u loke |
RV_5,001.06c yuvā kaviḥ puruniṣṭha ṛtāvā dhartā kṛṣṭīnām uta madhya iddhaḥ ||
RV_5,001.07a pra ṇu tyaṃ vipram adhvareṣu sādhum agniṃ hotāram īḷate namobhiḥ |
RV_5,001.07c ā yas tatāna rodasī ṛtena nityam mṛjanti vājinaṃ ghṛtena ||
RV_5,001.08a mārjālyo mṛjyate sve damūnāḥ kavipraśasto atithiḥ śivo naḥ |
RV_5,001.08c sahasraśṛṅgo vṛṣabhas tadojā viśvāṃ agne sahasā prāsy anyān ||
RV_5,001.09a pra sadyo agne aty eṣy anyān āvir yasmai cārutamo babhūtha |
RV_5,001.09c īḷenyo vapuṣyo vibhāvā priyo viśām atithir mānuṣīṇām ||
RV_5,001.10a tubhyam bharanti kṣitayo yaviṣṭha balim agne antita ota dūrāt |
RV_5,001.10c ā bhandiṣṭhasya sumatiṃ cikiddhi bṛhat te agne mahi śarma bhadram ||
RV_5,001.11a ādya ratham bhānumo bhānumantam agne tiṣṭha yajatebhiḥ samantam |
RV_5,001.11c vidvān pathīnām urv antarikṣam eha devān haviradyāya vakṣi ||
RV_5,001.12a avocāma kavaye medhyāya vaco vandāru vṛṣabhāya vṛṣṇe |
RV_5,001.12c gaviṣṭhiro namasā stomam agnau divīva rukmam uruvyañcam aśret ||

RV_5,002.01a kumāram mātā yuvatiḥ samubdhaṃ guhā bibharti na dadāti pitre |
RV_5,002.01c anīkam asya na minaj janāsaḥ puraḥ paśyanti nihitam aratau ||
RV_5,002.02a kam etaṃ tvaṃ yuvate kumāram peṣī bibharṣi mahiṣī jajāna |
RV_5,002.02c pūrvīr hi garbhaḥ śarado vavardhāpaśyaṃ jātaṃ yad asūta mātā ||
RV_5,002.03a hiraṇyadantaṃ śucivarṇam ārāt kṣetrād apaśyam āyudhā mimānam |
RV_5,002.03c dadāno asmā amṛtaṃ vipṛkvat kim mām anindrāḥ kṛṇavann anukthāḥ ||
RV_5,002.04a kṣetrād apaśyaṃ sanutaś carantaṃ sumad yūthaṃ na puru śobhamānam |
RV_5,002.04c na tā agṛbhrann ajaniṣṭa hi ṣaḥ paliknīr id yuvatayo bhavanti ||
RV_5,002.05a ke me maryakaṃ vi yavanta gobhir na yeṣāṃ gopā araṇaś cid āsa |
RV_5,002.05c ya īṃ jagṛbhur ava te sṛjantv ājāti paśva upa naś cikitvān ||
RV_5,002.06a vasāṃ rājānaṃ vasatiṃ janānām arātayo ni dadhur martyeṣu |
RV_5,002.06c brahmāṇy atrer ava taṃ sṛjantu ninditāro nindyāso bhavantu ||
RV_5,002.07a śunaś cic chepaṃ niditaṃ sahasrād yūpād amuñco aśamiṣṭa hi ṣaḥ |
RV_5,002.07c evāsmad agne vi mumugdhi pāśān hotaś cikitva iha tū niṣadya ||
RV_5,002.08a hṛṇīyamāno apa hi mad aiyeḥ pra me devānāṃ vratapā uvāca |
RV_5,002.08c indro vidvāṃ anu hi tvā cacakṣa tenāham agne anuśiṣṭa āgām ||
RV_5,002.09a vi jyotiṣā bṛhatā bhāty agnir āvir viśvāni kṛṇute mahitvā |
RV_5,002.09c prādevīr māyāḥ sahate durevāḥ śiśīte śṛṅge rakṣase vinikṣe ||
RV_5,002.10a uta svānāso divi ṣantv agnes tigmāyudhā rakṣase hantavā u |
RV_5,002.10c made cid asya pra rujanti bhāmā na varante paribādho adevīḥ ||
RV_5,002.11a etaṃ te stomaṃ tuvijāta vipro rathaṃ na dhīraḥ svapā atakṣam |
RV_5,002.11c yadīd agne prati tvaṃ deva haryāḥ svarvatīr apa enā jayema ||
RV_5,002.12a tuvigrīvo vṛṣabho vāvṛdhāno 'śatrv aryaḥ sam ajāti vedaḥ |
RV_5,002.12c itīmam agnim amṛtā avocan barhiṣmate manave śarma yaṃsad dhaviṣmate manave śarma yaṃsat ||

RV_5,003.01a tvam agne varuṇo jāyase yat tvam mitro bhavasi yat samiddhaḥ |
RV_5,003.01c tve viśve sahasas putra devās tvam indro dāśuṣe martyāya ||
RV_5,003.02a tvam aryamā bhavasi yat kanīnāṃ nāma svadhāvan guhyam bibharṣi |
RV_5,003.02c añjanti mitraṃ sudhitaṃ na gobhir yad dampatī samanasā kṛṇoṣi ||
RV_5,003.03a tava śriye maruto marjayanta rudra yat te janima cāru citram |
RV_5,003.03c padaṃ yad viṣṇor upamaṃ nidhāyi tena pāsi guhyaṃ nāma gonām ||
RV_5,003.04a tava śriyā sudṛśo deva devāḥ purū dadhānā amṛtaṃ sapanta |
RV_5,003.04c hotāram agnim manuṣo ni ṣedur daśasyanta uśijaḥ śaṃsam āyoḥ ||
RV_5,003.05a na tvad dhotā pūrvo agne yajīyān na kāvyaiḥ paro asti svadhāvaḥ |
RV_5,003.05c viśaś ca yasyā atithir bhavāsi sa yajñena vanavad deva martān ||
RV_5,003.06a vayam agne vanuyāma tvotā vasūyavo haviṣā budhyamānāḥ |
RV_5,003.06c vayaṃ samarye vidatheṣv ahnāṃ vayaṃ rāyā sahasas putra martān ||
RV_5,003.07a yo na āgo abhy eno bharāty adhīd agham aghaśaṃse dadhāta |
RV_5,003.07c jahī cikitvo abhiśastim etām agne yo no marcayati dvayena ||
RV_5,003.08a tvām asyā vyuṣi deva pūrve dūtaṃ kṛṇvānā ayajanta havyaiḥ |
RV_5,003.08c saṃsthe yad agna īyase rayīṇāṃ devo martair vasubhir idhyamānaḥ ||
RV_5,003.09a ava spṛdhi pitaraṃ yodhi vidvān putro yas te sahasaḥ sūna ūhe |
RV_5,003.09c kadā cikitvo abhi cakṣase no 'gne kadāṃ ṛtacid yātayāse ||
RV_5,003.10a bhūri nāma vandamāno dadhāti pitā vaso yadi taj joṣayāse |
RV_5,003.10c kuvid devasya sahasā cakānaḥ sumnam agnir vanate vāvṛdhānaḥ ||
RV_5,003.11a tvam aṅga jaritāraṃ yaviṣṭha viśvāny agne duritāti parṣi |
RV_5,003.11c stenā adṛśran ripavo janāso 'jñātaketā vṛjinā abhūvan ||
RV_5,003.12a ime yāmāsas tvadrig abhūvan vasave vā tad id āgo avāci |
RV_5,003.12c nāhāyam agnir abhiśastaye no na rīṣate vāvṛdhānaḥ parā dāt ||

RV_5,004.01a tvām agne vasupatiṃ vasūnām abhi pra mande adhvareṣu rājan |
RV_5,004.01c tvayā vājaṃ vājayanto jayemābhi ṣyāma pṛtsutīr martyānām ||
RV_5,004.02a havyavāḷ agnir ajaraḥ pitā no vibhur vibhāvā sudṛśīko asme |
RV_5,004.02c sugārhapatyāḥ sam iṣo didīhy asmadryak sam mimīhi śravāṃsi ||
RV_5,004.03a viśāṃ kaviṃ viśpatim mānuṣīṇāṃ śucim pāvakaṃ ghṛtapṛṣṭham agnim |
RV_5,004.03c ni hotāraṃ viśvavidaṃ dadhidhve sa deveṣu vanate vāryāṇi ||
RV_5,004.04a juṣasvāgna iḷayā sajoṣā yatamāno raśmibhiḥ sūryasya |
RV_5,004.04c juṣasva naḥ samidhaṃ jātaveda ā ca devān haviradyāya vakṣi ||
RV_5,004.05a juṣṭo damūnā atithir duroṇa imaṃ no yajñam upa yāhi vidvān |
RV_5,004.05c viśvā agne abhiyujo vihatyā śatrūyatām ā bharā bhojanāni ||
RV_5,004.06a vadhena dasyum pra hi cātayasva vayaḥ kṛṇvānas tanve svāyai |
RV_5,004.06c piparṣi yat sahasas putra devānt so agne pāhi nṛtama vāje asmān ||
RV_5,004.07a vayaṃ te agna ukthair vidhema vayaṃ havyaiḥ pāvaka bhadraśoce |
RV_5,004.07c asme rayiṃ viśvavāraṃ sam invāsme viśvāni draviṇāni dhehi ||
RV_5,004.08a asmākam agne adhvaraṃ juṣasva sahasaḥ sūno triṣadhastha havyam |
RV_5,004.08c vayaṃ deveṣu sukṛtaḥ syāma śarmaṇā nas trivarūthena pāhi ||
RV_5,004.09a viśvāni no durgahā jātavedaḥ sindhuṃ na nāvā duritāti parṣi |
RV_5,004.09c agne atrivan namasā gṛṇāno 'smākam bodhy avitā tanūnām ||
RV_5,004.10a yas tvā hṛdā kīriṇā manyamāno 'martyam martyo johavīmi |
RV_5,004.10c jātavedo yaśo asmāsu dhehi prajābhir agne amṛtatvam aśyām ||
RV_5,004.11a yasmai tvaṃ sukṛte jātaveda u lokam agne kṛṇavaḥ syonam |
RV_5,004.11c aśvinaṃ sa putriṇaṃ vīravantaṃ gomantaṃ rayiṃ naśate svasti ||

RV_5,005.01a susamiddhāya śociṣe ghṛtaṃ tīvraṃ juhotana |
RV_5,005.01c agnaye jātavedase ||
RV_5,005.02a narāśaṃsaḥ suṣūdatīmaṃ yajñam adābhyaḥ |
RV_5,005.02c kavir hi madhuhastyaḥ ||
RV_5,005.03a īḷito agna ā vahendraṃ citram iha priyam |
RV_5,005.03c sukhai rathebhir ūtaye ||
RV_5,005.04a ūrṇamradā vi prathasvābhy arkā anūṣata |
RV_5,005.04c bhavā naḥ śubhra sātaye ||
RV_5,005.05a devīr dvāro vi śrayadhvaṃ suprāyaṇā na ūtaye |
RV_5,005.05c pra-pra yajñam pṛṇītana ||
RV_5,005.06a supratīke vayovṛdhā yahvī ṛtasya mātarā |
RV_5,005.06c doṣām uṣāsam īmahe ||
RV_5,005.07a vātasya patmann īḷitā daivyā hotārā manuṣaḥ |
RV_5,005.07c imaṃ no yajñam ā gatam ||
RV_5,005.08a iḷā sarasvatī mahī tisro devīr mayobhuvaḥ |
RV_5,005.08b barhiḥ sīdantv asridhaḥ ||
RV_5,005.09a śivas tvaṣṭar ihā gahi vibhuḥ poṣa uta tmanā |
RV_5,005.09c yajñe-yajñe na ud ava ||
RV_5,005.10a yatra vettha vanaspate devānāṃ guhyā nāmāni |
RV_5,005.10c tatra havyāni gāmaya ||
RV_5,005.11a svāhāgnaye varuṇāya svāhendrāya marudbhyaḥ |
RV_5,005.11c svāhā devebhyo haviḥ ||

RV_5,006.01a agniṃ tam manye yo vasur astaṃ yaṃ yanti dhenavaḥ |
RV_5,006.01c astam arvanta āśavo 'staṃ nityāso vājina iṣaṃ stotṛbhya ā bhara ||
RV_5,006.02a so agnir yo vasur gṛṇe saṃ yam āyanti dhenavaḥ |
RV_5,006.02c sam arvanto raghudruvaḥ saṃ sujātāsaḥ sūraya iṣaṃ stotṛbhya ā bhara ||
RV_5,006.03a agnir hi vājinaṃ viśe dadāti viśvacarṣaṇiḥ |
RV_5,006.03c agnī rāye svābhuvaṃ sa prīto yāti vāryam iṣaṃ stotṛbhya ā bhara ||
RV_5,006.04a ā te agna idhīmahi dyumantaṃ devājaram |
RV_5,006.04c yad dha syā te panīyasī samid dīdayati dyavīṣaṃ stotṛbhya ā bhara ||
RV_5,006.05a ā te agna ṛcā haviḥ śukrasya śociṣas pate |
RV_5,006.05c suścandra dasma viśpate havyavāṭ tubhyaṃ hūyata iṣaṃ stotṛbhya ā bhara ||
RV_5,006.06a pro tye agnayo 'gniṣu viśvam puṣyanti vāryam |
RV_5,006.06c te hinvire ta invire ta iṣaṇyanty ānuṣag iṣaṃ stotṛbhya ā bhara ||
RV_5,006.07a tava tye agne arcayo mahi vrādhanta vājinaḥ |
RV_5,006.07c ye patvabhiḥ śaphānāṃ vrajā bhuranta gonām iṣaṃ stotṛbhya ā bhara ||
RV_5,006.08a navā no agna ā bhara stotṛbhyaḥ sukṣitīr iṣaḥ |
RV_5,006.08c te syāma ya ānṛcus tvādūtāso dame-dama iṣaṃ stotṛbhya ā bhara ||
RV_5,006.09a ubhe suścandra sarpiṣo darvī śrīṇīṣa āsani |
RV_5,006.09c uto na ut pupūryā uktheṣu śavasas pata iṣaṃ stotṛbhya ā bhara ||
RV_5,006.10a evāṃ agnim ajuryamur gīrbhir yajñebhir ānuṣak |
RV_5,006.10c dadhad asme suvīryam uta tyad āśvaśvyam iṣaṃ stotṛbhya ā bhara ||

RV_5,007.01a sakhāyaḥ saṃ vaḥ samyañcam iṣaṃ stomaṃ cāgnaye |
RV_5,007.01c varṣiṣṭhāya kṣitīnām ūrjo naptre sahasvate ||
RV_5,007.02a kutrā cid yasya samṛtau raṇvā naro nṛṣadane |
RV_5,007.02c arhantaś cid yam indhate saṃjanayanti jantavaḥ ||
RV_5,007.03a saṃ yad iṣo vanāmahe saṃ havyā mānuṣāṇām |
RV_5,007.03c uta dyumnasya śavasa ṛtasya raśmim ā dade ||
RV_5,007.04a sa smā kṛṇoti ketum ā naktaṃ cid dūra ā sate |
RV_5,007.04c pāvako yad vanaspatīn pra smā mināty ajaraḥ ||
RV_5,007.05a ava sma yasya veṣaṇe svedam pathiṣu juhvati |
RV_5,007.05c abhīm aha svajenyam bhūmā pṛṣṭheva ruruhuḥ ||
RV_5,007.06a yam martyaḥ puruspṛhaṃ vidad viśvasya dhāyase |
RV_5,007.06c pra svādanam pitūnām astatātiṃ cid āyave ||
RV_5,007.07a sa hi ṣmā dhanvākṣitaṃ dātā na dāty ā paśuḥ |
RV_5,007.07c hiriśmaśruḥ śucidann ṛbhur anibhṛṣṭataviṣiḥ ||
RV_5,007.08a śuciḥ ṣma yasmā atrivat pra svadhitīva rīyate |
RV_5,007.08c suṣūr asūta mātā krāṇā yad ānaśe bhagam ||
RV_5,007.09a ā yas te sarpirāsute 'gne śam asti dhāyase |
RV_5,007.09c aiṣu dyumnam uta śrava ā cittam martyeṣu dhāḥ ||
RV_5,007.10a iti cin manyum adhrijas tvādātam ā paśuṃ dade |
RV_5,007.10c ād agne apṛṇato 'triḥ sāsahyād dasyūn iṣaḥ sāsahyān nṝn ||

RV_5,008.01a tvām agna ṛtāyavaḥ sam īdhire pratnam pratnāsa ūtaye sahaskṛta |
RV_5,008.01c puruścandraṃ yajataṃ viśvadhāyasaṃ damūnasaṃ gṛhapatiṃ vareṇyam ||
RV_5,008.02a tvām agne atithim pūrvyaṃ viśaḥ śociṣkeśaṃ gṛhapatiṃ ni ṣedire |
RV_5,008.02c bṛhatketum pururūpaṃ dhanaspṛtaṃ suśarmāṇaṃ svavasaṃ jaradviṣam ||
RV_5,008.03a tvām agne mānuṣīr īḷate viśo hotrāvidaṃ viviciṃ ratnadhātamam |
RV_5,008.03c guhā santaṃ subhaga viśvadarśataṃ tuviṣvaṇasaṃ suyajaṃ ghṛtaśriyam ||
RV_5,008.04a tvām agne dharṇasiṃ viśvadhā vayaṃ gīrbhir gṛṇanto namasopa sedima |
RV_5,008.04c sa no juṣasva samidhāno aṅgiro devo martasya yaśasā sudītibhiḥ ||
RV_5,008.05a tvam agne pururūpo viśe-viśe vayo dadhāsi pratnathā puruṣṭuta |
RV_5,008.05c purūṇy annā sahasā vi rājasi tviṣiḥ sā te titviṣāṇasya nādhṛṣe ||
RV_5,008.06a tvām agne samidhānaṃ yaviṣṭhya devā dūtaṃ cakrire havyavāhanam |
RV_5,008.06c urujrayasaṃ ghṛtayonim āhutaṃ tveṣaṃ cakṣur dadhire codayanmati ||
RV_5,008.07a tvām agne pradiva āhutaṃ ghṛtaiḥ sumnāyavaḥ suṣamidhā sam īdhire |
RV_5,008.07c sa vāvṛdhāna oṣadhībhir ukṣito 'bhi jrayāṃsi pārthivā vi tiṣṭhase ||

RV_5,009.01a tvām agne haviṣmanto devam martāsa īḷate |
RV_5,009.01c manye tvā jātavedasaṃ sa havyā vakṣy ānuṣak ||
RV_5,009.02a agnir hotā dāsvataḥ kṣayasya vṛktabarhiṣaḥ |
RV_5,009.02c saṃ yajñāsaś caranti yaṃ saṃ vājāsaḥ śravasyavaḥ ||
RV_5,009.03a uta sma yaṃ śiśuṃ yathā navaṃ janiṣṭāraṇī |
RV_5,009.03c dhartāram mānuṣīṇāṃ viśām agniṃ svadhvaram ||
RV_5,009.04a uta sma durgṛbhīyase putro na hvāryāṇām |
RV_5,009.04c purū yo dagdhāsi vanāgne paśur na yavase ||
RV_5,009.05a adha sma yasyārcayaḥ samyak saṃyanti dhūminaḥ |
RV_5,009.05c yad īm aha trito divy upa dhmāteva dhamati śiśīte dhmātarī yathā ||
RV_5,009.06a tavāham agna ūtibhir mitrasya ca praśastibhiḥ |
RV_5,009.06c dveṣoyuto na duritā turyāma martyānām ||
RV_5,009.07a taṃ no agne abhī naro rayiṃ sahasva ā bhara |
RV_5,009.07c sa kṣepayat sa poṣayad bhuvad vājasya sātaya utaidhi pṛtsu no vṛdhe ||

RV_5,010.01a agna ojiṣṭham ā bhara dyumnam asmabhyam adhrigo |
RV_5,010.01c pra no rāyā parīṇasā ratsi vājāya panthām ||
RV_5,010.02a tvaṃ no agne adbhuta kratvā dakṣasya maṃhanā |
RV_5,010.02c tve asuryam āruhat krāṇā mitro na yajñiyaḥ ||
RV_5,010.03a tvaṃ no agna eṣāṃ gayam puṣṭiṃ ca vardhaya |
RV_5,010.03c ye stomebhiḥ pra sūrayo naro maghāny ānaśuḥ ||
RV_5,010.04a ye agne candra te giraḥ śumbhanty aśvarādhasaḥ |
RV_5,010.04c śuṣmebhiḥ śuṣmiṇo naro divaś cid yeṣām bṛhat sukīrtir bodhati tmanā ||
RV_5,010.05a tava tye agne arcayo bhrājanto yanti dhṛṣṇuyā |
RV_5,010.05c parijmāno na vidyutaḥ svāno ratho na vājayuḥ ||
RV_5,010.06a nū no agna ūtaye sabādhasaś ca rātaye |
RV_5,010.06c asmākāsaś ca sūrayo viśvā āśās tarīṣaṇi ||
RV_5,010.07a tvaṃ no agne aṅgira stuta stavāna ā bhara |
RV_5,010.07c hotar vibhvāsahaṃ rayiṃ stotṛbhya stavase ca na utaidhi pṛtsu no vṛdhe ||

RV_5,011.01a janasya gopā ajaniṣṭa jāgṛvir agniḥ sudakṣaḥ suvitāya navyase |
RV_5,011.01c ghṛtapratīko bṛhatā divispṛśā dyumad vi bhāti bharatebhyaḥ śuciḥ ||
RV_5,011.02a yajñasya ketum prathamam purohitam agniṃ naras triṣadhasthe sam īdhire |
RV_5,011.02c indreṇa devaiḥ sarathaṃ sa barhiṣi sīdan ni hotā yajathāya sukratuḥ ||
RV_5,011.03a asammṛṣṭo jāyase mātroḥ śucir mandraḥ kavir ud atiṣṭho vivasvataḥ |
RV_5,011.03c ghṛtena tvāvardhayann agna āhuta dhūmas te ketur abhavad divi śritaḥ ||
RV_5,011.04a agnir no yajñam upa vetu sādhuyāgniṃ naro vi bharante gṛhe-gṛhe |
RV_5,011.04c agnir dūto abhavad dhavyavāhano 'gniṃ vṛṇānā vṛṇate kavikratum ||
RV_5,011.05a tubhyedam agne madhumattamaṃ vacas tubhyam manīṣā iyam astu śaṃ hṛde |
RV_5,011.05c tvāṃ giraḥ sindhum ivāvanīr mahīr ā pṛṇanti śavasā vardhayanti ca ||
RV_5,011.06a tvām agne aṅgiraso guhā hitam anv avindañ chiśriyāṇaṃ vane-vane |
RV_5,011.06c sa jāyase mathyamānaḥ saho mahat tvām āhuḥ sahasas putram aṅgiraḥ ||

RV_5,012.01a prāgnaye bṛhate yajñiyāya ṛtasya vṛṣṇe asurāya manma |
RV_5,012.01c ghṛtaṃ na yajña āsye supūtaṃ giram bhare vṛṣabhāya pratīcīm ||
RV_5,012.02a ṛtaṃ cikitva ṛtam ic cikiddhy ṛtasya dhārā anu tṛndhi pūrvīḥ |
RV_5,012.02c nāhaṃ yātuṃ sahasā na dvayena ṛtaṃ sapāmy aruṣasya vṛṣṇaḥ ||
RV_5,012.03a kayā no agna ṛtayann ṛtena bhuvo navedā ucathasya navyaḥ |
RV_5,012.03c vedā me deva ṛtupā ṛtūnāṃ nāham patiṃ sanitur asya rāyaḥ ||
RV_5,012.04a ke te agne ripave bandhanāsaḥ ke pāyavaḥ saniṣanta dyumantaḥ |
RV_5,012.04c ke dhāsim agne anṛtasya pānti ka āsato vacasaḥ santi gopāḥ ||
RV_5,012.05a sakhāyas te viṣuṇā agna ete śivāsaḥ santo aśivā abhūvan |
RV_5,012.05c adhūrṣata svayam ete vacobhir ṛjūyate vṛjināni bruvantaḥ ||
RV_5,012.06a yas te agne namasā yajñam īṭṭa ṛtaṃ sa pāty aruṣasya vṛṣṇaḥ |
RV_5,012.06c tasya kṣayaḥ pṛthur ā sādhur etu prasarsrāṇasya nahuṣasya śeṣaḥ ||

RV_5,013.01a arcantas tvā havāmahe 'rcantaḥ sam idhīmahi |
RV_5,013.01c agne arcanta ūtaye ||
RV_5,013.02a agne stomam manāmahe sidhram adya divispṛśaḥ |
RV_5,013.02c devasya draviṇasyavaḥ ||
RV_5,013.03a agnir juṣata no giro hotā yo mānuṣeṣv ā |
RV_5,013.03c sa yakṣad daivyaṃ janam ||
RV_5,013.04a tvam agne saprathā asi juṣṭo hotā vareṇyaḥ |
RV_5,013.04c tvayā yajñaṃ vi tanvate ||
RV_5,013.05a tvām agne vājasātamaṃ viprā vardhanti suṣṭutam |
RV_5,013.05c sa no rāsva suvīryam ||
RV_5,013.06a agne nemir arāṃ iva devāṃs tvam paribhūr asi |
RV_5,013.06c ā rādhaś citram ṛñjase ||

RV_5,014.01a agniṃ stomena bodhaya samidhāno amartyam |
RV_5,014.01c havyā deveṣu no dadhat ||
RV_5,014.02a tam adhvareṣv īḷate devam martā amartyam |
RV_5,014.02c yajiṣṭham mānuṣe jane ||
RV_5,014.03a taṃ hi śaśvanta īḷate srucā devaṃ ghṛtaścutā |
RV_5,014.03c agniṃ havyāya voḷhave ||
RV_5,014.04a agnir jāto arocata ghnan dasyūñ jyotiṣā tamaḥ |
RV_5,014.04c avindad gā apaḥ svaḥ ||
RV_5,014.05a agnim īḷenyaṃ kaviṃ ghṛtapṛṣṭhaṃ saparyata |
RV_5,014.05c vetu me śṛṇavad dhavam ||
RV_5,014.06a agniṃ ghṛtena vāvṛdhu stomebhir viśvacarṣaṇim |
RV_5,014.06c svādhībhir vacasyubhiḥ ||

RV_5,015.01a pra vedhase kavaye vedyāya giram bhare yaśase pūrvyāya |
RV_5,015.01c ghṛtaprasatto asuraḥ suśevo rāyo dhartā dharuṇo vasvo agniḥ ||
RV_5,015.02a ṛtena ṛtaṃ dharuṇaṃ dhārayanta yajñasya śāke parame vyoman |
RV_5,015.02c divo dharman dharuṇe seduṣo nṝñ jātair ajātāṃ abhi ye nanakṣuḥ ||
RV_5,015.03a aṅhoyuvas tanvas tanvate vi vayo mahad duṣṭaram pūrvyāya |
RV_5,015.03c sa saṃvato navajātas tuturyāt siṅhaṃ na kruddham abhitaḥ pari ṣṭhuḥ ||
RV_5,015.04a māteva yad bharase paprathāno janaṃ-janaṃ dhāyase cakṣase ca |
RV_5,015.04c vayo-vayo jarase yad dadhānaḥ pari tmanā viṣurūpo jigāsi ||
RV_5,015.05a vājo nu te śavasas pātv antam uruṃ doghaṃ dharuṇaṃ deva rāyaḥ |
RV_5,015.05c padaṃ na tāyur guhā dadhāno maho rāye citayann atrim aspaḥ ||

RV_5,016.01a bṛhad vayo hi bhānave 'rcā devāyāgnaye |
RV_5,016.01c yam mitraṃ na praśastibhir martāso dadhire puraḥ ||
RV_5,016.02a sa hi dyubhir janānāṃ hotā dakṣasya bāhvoḥ |
RV_5,016.02c vi havyam agnir ānuṣag bhago na vāram ṛṇvati ||
RV_5,016.03a asya stome maghonaḥ sakhye vṛddhaśociṣaḥ |
RV_5,016.03c viśvā yasmin tuviṣvaṇi sam arye śuṣmam ādadhuḥ ||
RV_5,016.04a adhā hy agna eṣāṃ suvīryasya maṃhanā |
RV_5,016.04c tam id yahvaṃ na rodasī pari śravo babhūvatuḥ ||
RV_5,016.05a nū na ehi vāryam agne gṛṇāna ā bhara |
RV_5,016.05c ye vayaṃ ye ca sūrayaḥ svasti dhāmahe sacotaidhi pṛtsu no vṛdhe ||

RV_5,017.01a ā yajñair deva martya itthā tavyāṃsam ūtaye |
RV_5,017.01c agniṃ kṛte svadhvare pūrur īḷītāvase ||
RV_5,017.02a asya hi svayaśastara āsā vidharman manyase |
RV_5,017.02c taṃ nākaṃ citraśociṣam mandram paro manīṣayā ||
RV_5,017.03a asya vāsā u arciṣā ya āyukta tujā girā |
RV_5,017.03c divo na yasya retasā bṛhac chocanty arcayaḥ ||
RV_5,017.04a asya kratvā vicetaso dasmasya vasu ratha ā |
RV_5,017.04c adhā viśvāsu havyo 'gnir vikṣu pra śasyate ||
RV_5,017.05a nū na id dhi vāryam āsā sacanta sūrayaḥ |
RV_5,017.05c ūrjo napād abhiṣṭaye pāhi śagdhi svastaya utaidhi pṛtsu no vṛdhe ||

RV_5,018.01a prātar agniḥ purupriyo viśa stavetātithiḥ |
RV_5,018.01c viśvāni yo amartyo havyā marteṣu raṇyati ||
RV_5,018.02a dvitāya mṛktavāhase svasya dakṣasya maṃhanā |
RV_5,018.02c induṃ sa dhatta ānuṣak stotā cit te amartya ||
RV_5,018.03a taṃ vo dīrghāyuśociṣaṃ girā huve maghonām |
RV_5,018.03c ariṣṭo yeṣāṃ ratho vy aśvadāvann īyate ||
RV_5,018.04a citrā vā yeṣu dīdhitir āsann ukthā pānti ye |
RV_5,018.04b stīrṇam barhiḥ svarṇare śravāṃsi dadhire pari ||
RV_5,018.05a ye me pañcāśataṃ dadur aśvānāṃ sadhastuti |
RV_5,018.05b dyumad agne mahi śravo bṛhat kṛdhi maghonāṃ nṛvad amṛta nṛṇām ||

RV_5,019.01a abhy avasthāḥ pra jāyante pra vavrer vavriś ciketa |
RV_5,019.01c upasthe mātur vi caṣṭe ||
RV_5,019.02a juhure vi citayanto 'nimiṣaṃ nṛmṇam pānti |
RV_5,019.02c ā dṛḷhām puraṃ viviśuḥ ||
RV_5,019.03a ā śvaitreyasya jantavo dyumad vardhanta kṛṣṭayaḥ |
RV_5,019.03b niṣkagrīvo bṛhaduktha enā madhvā na vājayuḥ ||
RV_5,019.04a priyaṃ dugdhaṃ na kāmyam ajāmi jāmyoḥ sacā |
RV_5,019.04c gharmo na vājajaṭharo 'dabdhaḥ śaśvato dabhaḥ ||
RV_5,019.05a krīḷan no raśma ā bhuvaḥ sam bhasmanā vāyunā vevidānaḥ |
RV_5,019.05b tā asya san dhṛṣajo na tigmāḥ susaṃśitā vakṣyo vakṣaṇesthāḥ ||

RV_5,020.01a yam agne vājasātama tvaṃ cin manyase rayim |
RV_5,020.01c taṃ no gīrbhiḥ śravāyyaṃ devatrā panayā yujam ||
RV_5,020.02a ye agne nerayanti te vṛddhā ugrasya śavasaḥ |
RV_5,020.02b apa dveṣo apa hvaro 'nyavratasya saścire ||
RV_5,020.03a hotāraṃ tvā vṛṇīmahe 'gne dakṣasya sādhanam |
RV_5,020.03b yajñeṣu pūrvyaṃ girā prayasvanto havāmahe ||
RV_5,020.04a itthā yathā ta ūtaye sahasāvan dive-dive |
RV_5,020.04b rāya ṛtāya sukrato gobhiḥ ṣyāma sadhamādo vīraiḥ syāma sadhamādaḥ ||

RV_5,021.01a manuṣvat tvā ni dhīmahi manuṣvat sam idhīmahi |
RV_5,021.01c agne manuṣvad aṅgiro devān devayate yaja ||
RV_5,021.02a tvaṃ hi mānuṣe jane 'gne suprīta idhyase |
RV_5,021.02c srucas tvā yanty ānuṣak sujāta sarpirāsute ||
RV_5,021.03a tvāṃ viśve sajoṣaso devāso dūtam akrata |
RV_5,021.03b saparyantas tvā kave yajñeṣu devam īḷate ||
RV_5,021.04a devaṃ vo devayajyayāgnim īḷīta martyaḥ |
RV_5,021.04b samiddhaḥ śukra dīdihy ṛtasya yonim āsadaḥ sasasya yonim āsadaḥ ||

RV_5,022.01a pra viśvasāmann atrivad arcā pāvakaśociṣe |
RV_5,022.01c yo adhvareṣv īḍyo hotā mandratamo viśi ||
RV_5,022.02a ny agniṃ jātavedasaṃ dadhātā devam ṛtvijam |
RV_5,022.02c pra yajña etv ānuṣag adyā devavyacastamaḥ ||
RV_5,022.03a cikitvinmanasaṃ tvā devam martāsa ūtaye |
RV_5,022.03c vareṇyasya te 'vasa iyānāso amanmahi ||
RV_5,022.04a agne cikiddhy asya na idaṃ vacaḥ sahasya |
RV_5,022.04c taṃ tvā suśipra dampate stomair vardhanty atrayo gīrbhiḥ śumbhanty atrayaḥ ||

RV_5,023.01a agne sahantam ā bhara dyumnasya prāsahā rayim |
RV_5,023.01c viśvā yaś carṣaṇīr abhy āsā vājeṣu sāsahat ||
RV_5,023.02a tam agne pṛtanāṣahaṃ rayiṃ sahasva ā bhara |
RV_5,023.02b tvaṃ hi satyo adbhuto dātā vājasya gomataḥ ||
RV_5,023.03a viśve hi tvā sajoṣaso janāso vṛktabarhiṣaḥ |
RV_5,023.03c hotāraṃ sadmasu priyaṃ vyanti vāryā puru ||
RV_5,023.04a sa hi ṣmā viśvacarṣaṇir abhimāti saho dadhe |
RV_5,023.04b agna eṣu kṣayeṣv ā revan naḥ śukra dīdihi dyumat pāvaka dīdihi ||

RV_5,024.01a agne tvaṃ no antama uta trātā śivo bhavā varūthyaḥ ||
RV_5,024.02a vasur agnir vasuśravā acchā nakṣi dyumattamaṃ rayiṃ dāḥ ||
RV_5,024.03a sa no bodhi śrudhī havam uruṣyā ṇo aghāyataḥ samasmāt ||
RV_5,024.04a taṃ tvā śociṣṭha dīdivaḥ sumnāya nūnam īmahe sakhibhyaḥ ||

RV_5,025.01a acchā vo agnim avase devaṃ gāsi sa no vasuḥ |
RV_5,025.01c rāsat putra ṛṣūṇām ṛtāvā parṣati dviṣaḥ ||
RV_5,025.02a sa hi satyo yam pūrve cid devāsaś cid yam īdhire |
RV_5,025.02c hotāram mandrajihvam it sudītibhir vibhāvasum ||
RV_5,025.03a sa no dhītī variṣṭhayā śreṣṭhayā ca sumatyā |
RV_5,025.03c agne rāyo didīhi naḥ suvṛktibhir vareṇya ||
RV_5,025.04a agnir deveṣu rājaty agnir marteṣv āviśan |
RV_5,025.04c agnir no havyavāhano 'gniṃ dhībhiḥ saparyata ||
RV_5,025.05a agnis tuviśravastamaṃ tuvibrahmāṇam uttamam |
RV_5,025.05c atūrtaṃ śrāvayatpatim putraṃ dadāti dāśuṣe ||
RV_5,025.06a agnir dadāti satpatiṃ sāsāha yo yudhā nṛbhiḥ |
RV_5,025.06c agnir atyaṃ raghuṣyadaṃ jetāram aparājitam ||
RV_5,025.07a yad vāhiṣṭhaṃ tad agnaye bṛhad arca vibhāvaso |
RV_5,025.07c mahiṣīva tvad rayis tvad vājā ud īrate ||
RV_5,025.08a tava dyumanto arcayo grāvevocyate bṛhat |
RV_5,025.08c uto te tanyatur yathā svāno arta tmanā divaḥ ||
RV_5,025.09a evāṃ agniṃ vasūyavaḥ sahasānaṃ vavandima |
RV_5,025.09c sa no viśvā ati dviṣaḥ parṣan nāveva sukratuḥ ||

RV_5,026.01a agne pāvaka rociṣā mandrayā deva jihvayā |
RV_5,026.01c ā devān vakṣi yakṣi ca ||
RV_5,026.02a taṃ tvā ghṛtasnav īmahe citrabhāno svardṛśam |
RV_5,026.02c devāṃ ā vītaye vaha ||
RV_5,026.03a vītihotraṃ tvā kave dyumantaṃ sam idhīmahi |
RV_5,026.03c agne bṛhantam adhvare ||
RV_5,026.04a agne viśvebhir ā gahi devebhir havyadātaye |
RV_5,026.04b hotāraṃ tvā vṛṇīmahe ||
RV_5,026.05a yajamānāya sunvata āgne suvīryaṃ vaha |
RV_5,026.05c devair ā satsi barhiṣi ||
RV_5,026.06a samidhānaḥ sahasrajid agne dharmāṇi puṣyasi |
RV_5,026.06c devānāṃ dūta ukthyaḥ ||
RV_5,026.07a ny agniṃ jātavedasaṃ hotravāhaṃ yaviṣṭhyam |
RV_5,026.07c dadhātā devam ṛtvijam ||
RV_5,026.08a pra yajña etv ānuṣag adyā devavyacastamaḥ |
RV_5,026.08c stṛṇīta barhir āsade ||
RV_5,026.09a edam maruto aśvinā mitraḥ sīdantu varuṇaḥ |
RV_5,026.09c devāsaḥ sarvayā viśā ||

RV_5,027.01a anasvantā satpatir māmahe me gāvā cetiṣṭho asuro maghonaḥ |
RV_5,027.01c traivṛṣṇo agne daśabhiḥ sahasrair vaiśvānara tryaruṇaś ciketa ||
RV_5,027.02a yo me śatā ca viṃśatiṃ ca gonāṃ harī ca yuktā sudhurā dadāti |
RV_5,027.02c vaiśvānara suṣṭuto vāvṛdhāno 'gne yaccha tryaruṇāya śarma ||
RV_5,027.03a evā te agne sumatiṃ cakāno naviṣṭhāya navamaṃ trasadasyuḥ |
RV_5,027.03c yo me giras tuvijātasya pūrvīr yuktenābhi tryaruṇo gṛṇāti ||
RV_5,027.04a yo ma iti pravocaty aśvamedhāya sūraye |
RV_5,027.04b dadad ṛcā saniṃ yate dadan medhām ṛtāyate ||
RV_5,027.05a yasya mā paruṣāḥ śatam uddharṣayanty ukṣaṇaḥ |
RV_5,027.05c aśvamedhasya dānāḥ somā iva tryāśiraḥ ||
RV_5,027.06a indrāgnī śatadāvny aśvamedhe suvīryam |
RV_5,027.06c kṣatraṃ dhārayatam bṛhad divi sūryam ivājaram ||

RV_5,028.01a samiddho agnir divi śocir aśret pratyaṅṅ uṣasam urviyā vi bhāti |
RV_5,028.01c eti prācī viśvavārā namobhir devāṃ īḷānā haviṣā ghṛtācī ||
RV_5,028.02a samidhyamāno amṛtasya rājasi haviṣ kṛṇvantaṃ sacase svastaye |
RV_5,028.02c viśvaṃ sa dhatte draviṇaṃ yam invasy ātithyam agne ni ca dhatta it puraḥ ||
RV_5,028.03a agne śardha mahate saubhagāya tava dyumnāny uttamāni santu |
RV_5,028.03c saṃ jāspatyaṃ suyamam ā kṛṇuṣva śatrūyatām abhi tiṣṭhā mahāṃsi ||
RV_5,028.04a samiddhasya pramahaso 'gne vande tava śriyam |
RV_5,028.04c vṛṣabho dyumnavāṃ asi sam adhvareṣv idhyase ||
RV_5,028.05a samiddho agna āhuta devān yakṣi svadhvara |
RV_5,028.05c tvaṃ hi havyavāḷ asi ||
RV_5,028.06a ā juhotā duvasyatāgnim prayaty adhvare |
RV_5,028.06c vṛṇīdhvaṃ havyavāhanam ||

RV_5,029.01a try aryamā manuṣo devatātā trī rocanā divyā dhārayanta |
RV_5,029.01c arcanti tvā marutaḥ pūtadakṣās tvam eṣām ṛṣir indrāsi dhīraḥ ||
RV_5,029.02a anu yad īm maruto mandasānam ārcann indram papivāṃsaṃ sutasya |
RV_5,029.02c ādatta vajram abhi yad ahiṃ hann apo yahvīr asṛjat sartavā u ||
RV_5,029.03a uta brahmāṇo maruto me asyendraḥ somasya suṣutasya peyāḥ |
RV_5,029.03c tad dhi havyam manuṣe gā avindad ahann ahim papivāṃ indro asya ||
RV_5,029.04a ād rodasī vitaraṃ vi ṣkabhāyat saṃvivyānaś cid bhiyase mṛgaṃ kaḥ |
RV_5,029.04c jigartim indro apajargurāṇaḥ prati śvasantam ava dānavaṃ han ||
RV_5,029.05a adha kratvā maghavan tubhyaṃ devā anu viśve adaduḥ somapeyam |
RV_5,029.05c yat sūryasya haritaḥ patantīḥ puraḥ satīr uparā etaśe kaḥ ||
RV_5,029.06a nava yad asya navatiṃ ca bhogān sākaṃ vajreṇa maghavā vivṛścat |
RV_5,029.06c arcantīndram marutaḥ sadhasthe traiṣṭubhena vacasā bādhata dyām ||
RV_5,029.07a sakhā sakhye apacat tūyam agnir asya kratvā mahiṣā trī śatāni |
RV_5,029.07c trī sākam indro manuṣaḥ sarāṃsi sutam pibad vṛtrahatyāya somam ||
RV_5,029.08a trī yac chatā mahiṣāṇām agho mās trī sarāṃsi maghavā somyāpāḥ |
RV_5,029.08c kāraṃ na viśve ahvanta devā bharam indrāya yad ahiṃ jaghāna ||
RV_5,029.09a uśanā yat sahasyair ayātaṃ gṛham indra jūjuvānebhir aśvaiḥ |
RV_5,029.09c vanvāno atra sarathaṃ yayātha kutsena devair avanor ha śuṣṇam ||
RV_5,029.10a prānyac cakram avṛhaḥ sūryasya kutsāyānyad varivo yātave 'kaḥ |
RV_5,029.10c anāso dasyūṃr amṛṇo vadhena ni duryoṇa āvṛṇaṅ mṛdhravācaḥ ||
RV_5,029.11a stomāsas tvā gaurivīter avardhann arandhayo vaidathināya piprum |
RV_5,029.11c ā tvām ṛjiśvā sakhyāya cakre pacan paktīr apibaḥ somam asya ||
RV_5,029.12a navagvāsaḥ sutasomāsa indraṃ daśagvāso abhy arcanty arkaiḥ |
RV_5,029.12c gavyaṃ cid ūrvam apidhānavantaṃ taṃ cin naraḥ śaśamānā apa vran ||
RV_5,029.13a katho nu te pari carāṇi vidvān vīryā maghavan yā cakartha |
RV_5,029.13c yā co nu navyā kṛṇavaḥ śaviṣṭha pred u tā te vidatheṣu bravāma ||
RV_5,029.14a etā viśvā cakṛvāṃ indra bhūry aparīto januṣā vīryeṇa |
RV_5,029.14c yā cin nu vajrin kṛṇavo dadhṛṣvān na te vartā taviṣyā asti tasyāḥ ||
RV_5,029.15a indra brahma kriyamāṇā juṣasva yā te śaviṣṭha navyā akarma |
RV_5,029.15c vastreva bhadrā sukṛtā vasūyū rathaṃ na dhīraḥ svapā atakṣam ||

RV_5,030.01a kva sya vīraḥ ko apaśyad indraṃ sukharatham īyamānaṃ haribhyām |
RV_5,030.01c yo rāyā vajrī sutasomam icchan tad oko gantā puruhūta ūtī ||
RV_5,030.02a avācacakṣam padam asya sasvar ugraṃ nidhātur anv āyam icchan |
RV_5,030.02c apṛccham anyāṃ uta te ma āhur indraṃ naro bubudhānā aśema ||
RV_5,030.03a pra nu vayaṃ sute yā te kṛtānīndra bravāma yāni no jujoṣaḥ |
RV_5,030.03b vedad avidvāñ chṛṇavac ca vidvān vahate 'yam maghavā sarvasenaḥ ||
RV_5,030.04a sthiram manaś cakṛṣe jāta indra veṣīd eko yudhaye bhūyasaś cit |
RV_5,030.04b aśmānaṃ cic chavasā didyuto vi vido gavām ūrvam usriyāṇām ||
RV_5,030.05a paro yat tvam parama ājaniṣṭhāḥ parāvati śrutyaṃ nāma bibhrat |
RV_5,030.05c ataś cid indrād abhayanta devā viśvā apo ajayad dāsapatnīḥ ||
RV_5,030.06a tubhyed ete marutaḥ suśevā arcanty arkaṃ sunvanty andhaḥ |
RV_5,030.06c ahim ohānam apa āśayānam pra māyābhir māyinaṃ sakṣad indraḥ ||
RV_5,030.07a vi ṣū mṛdho januṣā dānam invann ahan gavā maghavan saṃcakānaḥ |
RV_5,030.07c atrā dāsasya namuceḥ śiro yad avartayo manave gātum icchan ||
RV_5,030.08a yujaṃ hi mām akṛthā ād id indra śiro dāsasya namucer mathāyan |
RV_5,030.08c aśmānaṃ cit svaryaṃ vartamānam pra cakriyeva rodasī marudbhyaḥ ||
RV_5,030.09a striyo hi dāsa āyudhāni cakre kim mā karann abalā asya senāḥ |
RV_5,030.09c antar hy akhyad ubhe asya dhene athopa praid yudhaye dasyum indraḥ ||
RV_5,030.10a sam atra gāvo 'bhito 'navanteheha vatsair viyutā yad āsan |
RV_5,030.10c saṃ tā indro asṛjad asya śākair yad īṃ somāsaḥ suṣutā amandan ||
RV_5,030.11a yad īṃ somā babhrudhūtā amandann aroravīd vṛṣabhaḥ sādaneṣu |
RV_5,030.11c purandaraḥ papivāṃ indro asya punar gavām adadād usriyāṇām ||
RV_5,030.12a bhadram idaṃ ruśamā agne akran gavāṃ catvāri dadataḥ sahasrā |
RV_5,030.12c ṛṇañcayasya prayatā maghāni praty agrabhīṣma nṛtamasya nṛṇām ||
RV_5,030.13a supeśasam māva sṛjanty astaṃ gavāṃ sahasrai ruśamāso agne |
RV_5,030.13c tīvrā indram amamanduḥ sutāso 'ktor vyuṣṭau paritakmyāyāḥ ||
RV_5,030.14a aucchat sā rātrī paritakmyā yāṃ ṛṇañcaye rājani ruśamānām |
RV_5,030.14c atyo na vājī raghur ajyamāno babhruś catvāry asanat sahasrā ||
RV_5,030.15a catuḥsahasraṃ gavyasya paśvaḥ praty agrabhīṣma ruśameṣv agne |
RV_5,030.15c gharmaś cit taptaḥ pravṛje ya āsīd ayasmayas tam v ādāma viprāḥ ||

RV_5,031.01a indro rathāya pravataṃ kṛṇoti yam adhyasthān maghavā vājayantam |
RV_5,031.01c yūtheva paśvo vy unoti gopā ariṣṭo yāti prathamaḥ siṣāsan ||
RV_5,031.02a ā pra drava harivo mā vi venaḥ piśaṅgarāte abhi naḥ sacasva |
RV_5,031.02c nahi tvad indra vasyo anyad asty amenāṃś cij janivataś cakartha ||
RV_5,031.03a ud yat sahaḥ sahasa ājaniṣṭa dediṣṭa indra indriyāṇi viśvā |
RV_5,031.03c prācodayat sudughā vavre antar vi jyotiṣā saṃvavṛtvat tamo 'vaḥ ||
RV_5,031.04a anavas te ratham aśvāya takṣan tvaṣṭā vajram puruhūta dyumantam |
RV_5,031.04c brahmāṇa indram mahayanto arkair avardhayann ahaye hantavā u ||
RV_5,031.05a vṛṣṇe yat te vṛṣaṇo arkam arcān indra grāvāṇo aditiḥ sajoṣāḥ |
RV_5,031.05c anaśvāso ye pavayo 'rathā indreṣitā abhy avartanta dasyūn ||
RV_5,031.06a pra te pūrvāṇi karaṇāni vocam pra nūtanā maghavan yā cakartha |
RV_5,031.06c śaktīvo yad vibharā rodasī ubhe jayann apo manave dānucitrāḥ ||
RV_5,031.07a tad in nu te karaṇaṃ dasma viprāhiṃ yad ghnann ojo atrāmimīthāḥ |
RV_5,031.07c śuṣṇasya cit pari māyā agṛbhṇāḥ prapitvaṃ yann apa dasyūṃr asedhaḥ ||
RV_5,031.08a tvam apo yadave turvaśāyāramayaḥ sudughāḥ pāra indra |
RV_5,031.08c ugram ayātam avaho ha kutsaṃ saṃ ha yad vām uśanāranta devāḥ ||
RV_5,031.09a indrākutsā vahamānā rathenā vām atyā api karṇe vahantu |
RV_5,031.09c niḥ ṣīm adbhyo dhamatho niḥ ṣadhasthān maghono hṛdo varathas tamāṃsi ||
RV_5,031.10a vātasya yuktān suyujaś cid aśvān kaviś cid eṣo ajagann avasyuḥ |
RV_5,031.10c viśve te atra marutaḥ sakhāya indra brahmāṇi taviṣīm avardhan ||
RV_5,031.11a sūraś cid ratham paritakmyāyām pūrvaṃ karad uparaṃ jūjuvāṃsam |
RV_5,031.11c bharac cakram etaśaḥ saṃ riṇāti puro dadhat saniṣyati kratuṃ naḥ ||
RV_5,031.12a āyaṃ janā abhicakṣe jagāmendraḥ sakhāyaṃ sutasomam icchan |
RV_5,031.12c vadan grāvāva vedim bhriyāte yasya jīram adhvaryavaś caranti ||
RV_5,031.13a ye cākananta cākananta nū te martā amṛta mo te aṃha āran |
RV_5,031.13c vāvandhi yajyūṃr uta teṣu dhehy ojo janeṣu yeṣu te syāma ||

RV_5,032.01a adardar utsam asṛjo vi khāni tvam arṇavān badbadhānāṃ aramṇāḥ |
RV_5,032.01c mahāntam indra parvataṃ vi yad vaḥ sṛjo vi dhārā ava dānavaṃ han ||
RV_5,032.02a tvam utsāṃ ṛtubhir badbadhānāṃ araṃha ūdhaḥ parvatasya vajrin |
RV_5,032.02c ahiṃ cid ugra prayutaṃ śayānaṃ jaghanvāṃ indra taviṣīm adhatthāḥ ||
RV_5,032.03a tyasya cin mahato nir mṛgasya vadhar jaghāna taviṣībhir indraḥ |
RV_5,032.03c ya eka id apratir manyamāna ād asmād anyo ajaniṣṭa tavyān ||
RV_5,032.04a tyaṃ cid eṣāṃ svadhayā madantam miho napātaṃ suvṛdhaṃ tamogām |
RV_5,032.04c vṛṣaprabharmā dānavasya bhāmaṃ vajreṇa vajrī ni jaghāna śuṣṇam ||
RV_5,032.05a tyaṃ cid asya kratubhir niṣattam amarmaṇo vidad id asya marma |
RV_5,032.05c yad īṃ sukṣatra prabhṛtā madasya yuyutsantaṃ tamasi harmye dhāḥ ||
RV_5,032.06a tyaṃ cid itthā katpayaṃ śayānam asūrye tamasi vāvṛdhānam |
RV_5,032.06c taṃ cin mandāno vṛṣabhaḥ sutasyoccair indro apagūryā jaghāna ||
RV_5,032.07a ud yad indro mahate dānavāya vadhar yamiṣṭa saho apratītam |
RV_5,032.07c yad īṃ vajrasya prabhṛtau dadābha viśvasya jantor adhamaṃ cakāra ||
RV_5,032.08a tyaṃ cid arṇam madhupaṃ śayānam asinvaṃ vavram mahy ādad ugraḥ |
RV_5,032.08c apādam atram mahatā vadhena ni duryoṇa āvṛṇaṅ mṛdhravācam ||
RV_5,032.09a ko asya śuṣmaṃ taviṣīṃ varāta eko dhanā bharate apratītaḥ |
RV_5,032.09c ime cid asya jrayaso nu devī indrasyaujaso bhiyasā jihāte ||
RV_5,032.10a ny asmai devī svadhitir jihīta indrāya gātur uśatīva yeme |
RV_5,032.10c saṃ yad ojo yuvate viśvam ābhir anu svadhāvne kṣitayo namanta ||
RV_5,032.11a ekaṃ nu tvā satpatim pāñcajanyaṃ jātaṃ śṛṇomi yaśasaṃ janeṣu |
RV_5,032.11c tam me jagṛbhra āśaso naviṣṭhaṃ doṣā vastor havamānāsa indram ||
RV_5,032.12a evā hi tvām ṛtuthā yātayantam maghā viprebhyo dadataṃ śṛṇomi |
RV_5,032.12c kiṃ te brahmāṇo gṛhate sakhāyo ye tvāyā nidadhuḥ kāmam indra ||

RV_5,033.01a mahi mahe tavase dīdhye nṝn indrāyetthā tavase atavyān |
RV_5,033.01c yo asmai sumatiṃ vājasātau stuto jane samaryaś ciketa ||
RV_5,033.02a sa tvaṃ na indra dhiyasāno arkair harīṇāṃ vṛṣan yoktram aśreḥ |
RV_5,033.02c yā itthā maghavann anu joṣaṃ vakṣo abhi prāryaḥ sakṣi janān ||
RV_5,033.03a na te ta indrābhy asmad ṛṣvāyuktāso abrahmatā yad asan |
RV_5,033.03c tiṣṭhā ratham adhi taṃ vajrahastā raśmiṃ deva yamase svaśvaḥ ||
RV_5,033.04a purū yat ta indra santy ukthā gave cakarthorvarāsu yudhyan |
RV_5,033.04c tatakṣe sūryāya cid okasi sve vṛṣā samatsu dāsasya nāma cit ||
RV_5,033.05a vayaṃ te ta indra ye ca naraḥ śardho jajñānā yātāś ca rathāḥ |
RV_5,033.05c āsmāñ jagamyād ahiśuṣma satvā bhago na havyaḥ prabhṛtheṣu cāruḥ ||
RV_5,033.06a papṛkṣeṇyam indra tve hy ojo nṛmṇāni ca nṛtamāno amartaḥ |
RV_5,033.06c sa na enīṃ vasavāno rayiṃ dāḥ prārya stuṣe tuvimaghasya dānam ||
RV_5,033.07a evā na indrotibhir ava pāhi gṛṇataḥ śūra kārūn |
RV_5,033.07c uta tvacaṃ dadato vājasātau piprīhi madhvaḥ suṣutasya cāroḥ ||
RV_5,033.08a uta tye mā paurukutsyasya sūres trasadasyor hiraṇino rarāṇāḥ |
RV_5,033.08c vahantu mā daśa śyetāso asya gairikṣitasya kratubhir nu saśce ||
RV_5,033.09a uta tye mā mārutāśvasya śoṇāḥ kratvāmaghāso vidathasya rātau |
RV_5,033.09c sahasrā me cyavatāno dadāna ānūkam aryo vapuṣe nārcat ||
RV_5,033.10a uta tye mā dhvanyasya juṣṭā lakṣmaṇyasya suruco yatānāḥ |
RV_5,033.10c mahnā rāyaḥ saṃvaraṇasya ṛṣer vrajaṃ na gāvaḥ prayatā api gman ||

RV_5,034.01a ajātaśatrum ajarā svarvaty anu svadhāmitā dasmam īyate |
RV_5,034.01c sunotana pacata brahmavāhase puruṣṭutāya prataraṃ dadhātana ||
RV_5,034.02a ā yaḥ somena jaṭharam apipratāmandata maghavā madhvo andhasaḥ |
RV_5,034.02c yad īm mṛgāya hantave mahāvadhaḥ sahasrabhṛṣṭim uśanā vadhaṃ yamat ||
RV_5,034.03a yo asmai ghraṃsa uta vā ya ūdhani somaṃ sunoti bhavati dyumāṃ aha |
RV_5,034.03c apāpa śakras tatanuṣṭim ūhati tanūśubhram maghavā yaḥ kavāsakhaḥ ||
RV_5,034.04a yasyāvadhīt pitaraṃ yasya mātaraṃ yasya śakro bhrātaraṃ nāta īṣate |
RV_5,034.04c vetīd v asya prayatā yataṅkaro na kilbiṣād īṣate vasva ākaraḥ ||
RV_5,034.05a na pañcabhir daśabhir vaṣṭy ārabhaṃ nāsunvatā sacate puṣyatā cana |
RV_5,034.05c jināti ved amuyā hanti vā dhunir ā devayum bhajati gomati vraje ||
RV_5,034.06a vitvakṣaṇaḥ samṛtau cakramāsajo 'sunvato viṣuṇaḥ sunvato vṛdhaḥ |
RV_5,034.06c indro viśvasya damitā vibhīṣaṇo yathāvaśaṃ nayati dāsam āryaḥ ||
RV_5,034.07a sam īm paṇer ajati bhojanam muṣe vi dāśuṣe bhajati sūnaraṃ vasu |
RV_5,034.07c durge cana dhriyate viśva ā puru jano yo asya taviṣīm acukrudhat ||
RV_5,034.08a saṃ yaj janau sudhanau viśvaśardhasāv aved indro maghavā goṣu śubhriṣu |
RV_5,034.08c yujaṃ hy anyam akṛta pravepany ud īṃ gavyaṃ sṛjate satvabhir dhuniḥ ||
RV_5,034.09a sahasrasām āgniveśiṃ gṛṇīṣe śatrim agna upamāṃ ketum aryaḥ |
RV_5,034.09c tasmā āpaḥ saṃyataḥ pīpayanta tasmin kṣatram amavat tveṣam astu ||

RV_5,035.01a yas te sādhiṣṭho 'vasa indra kratuṣ ṭam ā bhara |
RV_5,035.01c asmabhyaṃ carṣaṇīsahaṃ sasniṃ vājeṣu duṣṭaram ||
RV_5,035.02a yad indra te catasro yac chūra santi tisraḥ |
RV_5,035.02c yad vā pañca kṣitīnām avas tat su na ā bhara ||
RV_5,035.03a ā te 'vo vareṇyaṃ vṛṣantamasya hūmahe |
RV_5,035.03c vṛṣajūtir hi jajñiṣa ābhūbhir indra turvaṇiḥ ||
RV_5,035.04a vṛṣā hy asi rādhase jajñiṣe vṛṣṇi te śavaḥ |
RV_5,035.04c svakṣatraṃ te dhṛṣan manaḥ satrāham indra pauṃsyam ||
RV_5,035.05a tvaṃ tam indra martyam amitrayantam adrivaḥ |
RV_5,035.05c sarvarathā śatakrato ni yāhi śavasas pate ||
RV_5,035.06a tvām id vṛtrahantama janāso vṛktabarhiṣaḥ |
RV_5,035.06c ugram pūrvīṣu pūrvyaṃ havante vājasātaye ||
RV_5,035.07a asmākam indra duṣṭaram puroyāvānam ājiṣu |
RV_5,035.07c sayāvānaṃ dhane-dhane vājayantam avā ratham ||
RV_5,035.08a asmākam indrehi no ratham avā purandhyā |
RV_5,035.08c vayaṃ śaviṣṭha vāryaṃ divi śravo dadhīmahi divi stomam manāmahe ||

RV_5,036.01a sa ā gamad indro yo vasūnāṃ ciketad dātuṃ dāmano rayīṇām |
RV_5,036.01c dhanvacaro na vaṃsagas tṛṣāṇaś cakamānaḥ pibatu dugdham aṃśum ||
RV_5,036.02a ā te hanū harivaḥ śūra śipre ruhat somo na parvatasya pṛṣṭhe |
RV_5,036.02c anu tvā rājann arvato na hinvan gīrbhir madema puruhūta viśve ||
RV_5,036.03a cakraṃ na vṛttam puruhūta vepate mano bhiyā me amater id adrivaḥ |
RV_5,036.03c rathād adhi tvā jaritā sadāvṛdha kuvin nu stoṣan maghavan purūvasuḥ ||
RV_5,036.04a eṣa grāveva jaritā ta indreyarti vācam bṛhad āśuṣāṇaḥ |
RV_5,036.04c pra savyena maghavan yaṃsi rāyaḥ pra dakṣiṇid dharivo mā vi venaḥ ||
RV_5,036.05a vṛṣā tvā vṛṣaṇaṃ vardhatu dyaur vṛṣā vṛṣabhyāṃ vahase haribhyām |
RV_5,036.05c sa no vṛṣā vṛṣarathaḥ suśipra vṛṣakrato vṛṣā vajrin bhare dhāḥ ||
RV_5,036.06a yo rohitau vājinau vājinīvān tribhiḥ śataiḥ sacamānāv adiṣṭa |
RV_5,036.06c yūne sam asmai kṣitayo namantāṃ śrutarathāya maruto duvoyā ||

RV_5,037.01a sam bhānunā yatate sūryasyājuhvāno ghṛtapṛṣṭhaḥ svañcāḥ |
RV_5,037.01c tasmā amṛdhrā uṣaso vy ucchān ya indrāya sunavāmety āha ||
RV_5,037.02a samiddhāgnir vanavat stīrṇabarhir yuktagrāvā sutasomo jarāte |
RV_5,037.02c grāvāṇo yasyeṣiraṃ vadanty ayad adhvaryur haviṣāva sindhum ||
RV_5,037.03a vadhūr iyam patim icchanty eti ya īṃ vahāte mahiṣīm iṣirām |
RV_5,037.03c āsya śravasyād ratha ā ca ghoṣāt purū sahasrā pari vartayāte ||
RV_5,037.04a na sa rājā vyathate yasminn indras tīvraṃ somam pibati gosakhāyam |
RV_5,037.04c ā satvanair ajati hanti vṛtraṃ kṣeti kṣitīḥ subhago nāma puṣyan ||
RV_5,037.05a puṣyāt kṣeme abhi yoge bhavāty ubhe vṛtau saṃyatī saṃ jayāti |
RV_5,037.05c priyaḥ sūrye priyo agnā bhavāti ya indrāya sutasomo dadāśat ||

RV_5,038.01a uroṣ ṭa indra rādhaso vibhvī rātiḥ śatakrato |
RV_5,038.01c adhā no viśvacarṣaṇe dyumnā sukṣatra maṃhaya ||
RV_5,038.02a yad īm indra śravāyyam iṣaṃ śaviṣṭha dadhiṣe |
RV_5,038.02c paprathe dīrghaśruttamaṃ hiraṇyavarṇa duṣṭaram ||
RV_5,038.03a śuṣmāso ye te adrivo mehanā ketasāpaḥ |
RV_5,038.03c ubhā devāv abhiṣṭaye divaś ca gmaś ca rājathaḥ ||
RV_5,038.04a uto no asya kasya cid dakṣasya tava vṛtrahan |
RV_5,038.04c asmabhyaṃ nṛmṇam ā bharāsmabhyaṃ nṛmaṇasyase ||
RV_5,038.05a nū ta ābhir abhiṣṭibhis tava śarmañ chatakrato |
RV_5,038.05c indra syāma sugopāḥ śūra syāma sugopāḥ ||

RV_5,039.01a yad indra citra mehanāsti tvādātam adrivaḥ |
RV_5,039.01c rādhas tan no vidadvasa ubhayāhasty ā bhara ||
RV_5,039.02a yan manyase vareṇyam indra dyukṣaṃ tad ā bhara |
RV_5,039.02c vidyāma tasya te vayam akūpārasya dāvane ||
RV_5,039.03a yat te ditsu prarādhyam mano asti śrutam bṛhat |
RV_5,039.03c tena dṛḷhā cid adriva ā vājaṃ darṣi sātaye ||
RV_5,039.04a maṃhiṣṭhaṃ vo maghonāṃ rājānaṃ carṣaṇīnām |
RV_5,039.04c indram upa praśastaye pūrvībhir jujuṣe giraḥ ||
RV_5,039.05a asmā it kāvyaṃ vaca uktham indrāya śaṃsyam |
RV_5,039.05c tasmā u brahmavāhase giro vardhanty atrayo giraḥ śumbhanty atrayaḥ ||

RV_5,040.01a ā yāhy adribhiḥ sutaṃ somaṃ somapate piba |
RV_5,040.01c vṛṣann indra vṛṣabhir vṛtrahantama ||
RV_5,040.02a vṛṣā grāvā vṛṣā mado vṛṣā somo ayaṃ sutaḥ |
RV_5,040.02c vṛṣann indra vṛṣabhir vṛtrahantama ||
RV_5,040.03a vṛṣā tvā vṛṣaṇaṃ huve vajriñ citrābhir ūtibhiḥ |
RV_5,040.03c vṛṣann indra vṛṣabhir vṛtrahantama ||
RV_5,040.04a ṛjīṣī vajrī vṛṣabhas turāṣāṭ chuṣmī rājā vṛtrahā somapāvā |
RV_5,040.04c yuktvā haribhyām upa yāsad arvāṅ mādhyandine savane matsad indraḥ ||
RV_5,040.05a yat tvā sūrya svarbhānus tamasāvidhyad āsuraḥ |
RV_5,040.05c akṣetravid yathā mugdho bhuvanāny adīdhayuḥ ||
RV_5,040.06a svarbhānor adha yad indra māyā avo divo vartamānā avāhan |
RV_5,040.06c gūḷhaṃ sūryaṃ tamasāpavratena turīyeṇa brahmaṇāvindad atriḥ ||
RV_5,040.07a mā mām imaṃ tava santam atra irasyā drugdho bhiyasā ni gārīt |
RV_5,040.07c tvam mitro asi satyarādhās tau mehāvataṃ varuṇaś ca rājā ||
RV_5,040.08a grāvṇo brahmā yuyujānaḥ saparyan kīriṇā devān namasopaśikṣan |
RV_5,040.08c atriḥ sūryasya divi cakṣur ādhāt svarbhānor apa māyā aghukṣat ||
RV_5,040.09a yaṃ vai sūryaṃ svarbhānus tamasāvidhyad āsuraḥ |
RV_5,040.09c atrayas tam anv avindan nahy anye aśaknuvan ||

RV_5,041.01a ko nu vām mitrāvaruṇāv ṛtāyan divo vā mahaḥ pārthivasya vā de |
RV_5,041.01c ṛtasya vā sadasi trāsīthāṃ no yajñāyate vā paśuṣo na vājān ||
RV_5,041.02a te no mitro varuṇo aryamāyur indra ṛbhukṣā maruto juṣanta |
RV_5,041.02c namobhir vā ye dadhate suvṛktiṃ stomaṃ rudrāya mīḷhuṣe sajoṣāḥ ||
RV_5,041.03a ā vāṃ yeṣṭhāśvinā huvadhyai vātasya patman rathyasya puṣṭau |
RV_5,041.03c uta vā divo asurāya manma prāndhāṃsīva yajyave bharadhvam ||
RV_5,041.04a pra sakṣaṇo divyaḥ kaṇvahotā trito divaḥ sajoṣā vāto agniḥ |
RV_5,041.04c pūṣā bhagaḥ prabhṛthe viśvabhojā ājiṃ na jagmur āśvaśvatamāḥ ||
RV_5,041.05a pra vo rayiṃ yuktāśvam bharadhvaṃ rāya eṣe 'vase dadhīta dhīḥ |
RV_5,041.05c suśeva evair auśijasya hotā ye va evā marutas turāṇām ||
RV_5,041.06a pra vo vāyuṃ rathayujaṃ kṛṇudhvam pra devaṃ vipram panitāram arkaiḥ |
RV_5,041.06c iṣudhyava ṛtasāpaḥ purandhīr vasvīr no atra patnīr ā dhiye dhuḥ ||
RV_5,041.07a upa va eṣe vandyebhiḥ śūṣaiḥ pra yahvī divaś citayadbhir arkaiḥ |
RV_5,041.07c uṣāsānaktā viduṣīva viśvam ā hā vahato martyāya yajñam ||
RV_5,041.08a abhi vo arce poṣyāvato nṝn vāstoṣ patiṃ tvaṣṭāraṃ rarāṇaḥ |
RV_5,041.08c dhanyā sajoṣā dhiṣaṇā namobhir vanaspatīṃr oṣadhī rāya eṣe ||
RV_5,041.09a tuje nas tane parvatāḥ santu svaitavo ye vasavo na vīrāḥ |
RV_5,041.09c panita āptyo yajataḥ sadā no vardhān naḥ śaṃsaṃ naryo abhiṣṭau ||
RV_5,041.10a vṛṣṇo astoṣi bhūmyasya garbhaṃ trito napātam apāṃ suvṛkti |
RV_5,041.10c gṛṇīte agnir etarī na śūṣaiḥ śociṣkeśo ni riṇāti vanā ||
RV_5,041.11a kathā mahe rudriyāya bravāma kad rāye cikituṣe bhagāya |
RV_5,041.11c āpa oṣadhīr uta no 'vantu dyaur vanā girayo vṛkṣakeśāḥ ||
RV_5,041.12a śṛṇotu na ūrjām patir giraḥ sa nabhas tarīyāṃ iṣiraḥ parijmā |
RV_5,041.12c śṛṇvantv āpaḥ puro na śubhrāḥ pari sruco babṛhāṇasyādreḥ ||
RV_5,041.13a vidā cin nu mahānto ye va evā bravāma dasmā vāryaṃ dadhānāḥ |
RV_5,041.13c vayaś cana subhva āva yanti kṣubhā martam anuyataṃ vadhasnaiḥ ||
RV_5,041.14a ā daivyāni pārthivāni janmāpaś cācchā sumakhāya vocam |
RV_5,041.14c vardhantāṃ dyāvo giraś candrāgrā udā vardhantām abhiṣātā arṇāḥ ||
RV_5,041.15a pade-pade me jarimā ni dhāyi varūtrī vā śakrā yā pāyubhiś ca |
RV_5,041.15c siṣaktu mātā mahī rasā naḥ smat sūribhir ṛjuhasta ṛjuvaniḥ ||
RV_5,041.16a kathā dāśema namasā sudānūn evayā maruto acchoktau praśravaso maruto acchoktau |
RV_5,041.16c mā no 'hir budhnyo riṣe dhād asmākam bhūd upamātivaniḥ ||
RV_5,041.17a iti cin nu prajāyai paśumatyai devāso vanate martyo va ā devāso vanate martyo vaḥ |
RV_5,041.17c atrā śivāṃ tanvo dhāsim asyā jarāṃ cin me nirṛtir jagrasīta ||
RV_5,041.18a tāṃ vo devāḥ sumatim ūrjayantīm iṣam aśyāma vasavaḥ śasā goḥ |
RV_5,041.18c sā naḥ sudānur mṛḷayantī devī prati dravantī suvitāya gamyāḥ ||
RV_5,041.19a abhi na iḷā yūthasya mātā sman nadībhir urvaśī vā gṛṇātu |
RV_5,041.19c urvaśī vā bṛhaddivā gṛṇānābhyūrṇvānā prabhṛthasyāyoḥ ||
RV_5,041.20a siṣaktu na ūrjavyasya puṣṭeḥ ||

RV_5,042.01a pra śantamā varuṇaṃ dīdhitī gīr mitram bhagam aditiṃ nūnam aśyāḥ |
RV_5,042.01c pṛṣadyoniḥ pañcahotā śṛṇotv atūrtapanthā asuro mayobhuḥ ||
RV_5,042.02a prati me stomam aditir jagṛbhyāt sūnuṃ na mātā hṛdyaṃ suśevam |
RV_5,042.02c brahma priyaṃ devahitaṃ yad asty aham mitre varuṇe yan mayobhu ||
RV_5,042.03a ud īraya kavitamaṃ kavīnām unattainam abhi madhvā ghṛtena |
RV_5,042.03c sa no vasūni prayatā hitāni candrāṇi devaḥ savitā suvāti ||
RV_5,042.04a sam indra ṇo manasā neṣi gobhiḥ saṃ sūribhir harivaḥ saṃ svasti |
RV_5,042.04c sam brahmaṇā devahitaṃ yad asti saṃ devānāṃ sumatyā yajñiyānām ||
RV_5,042.05a devo bhagaḥ savitā rāyo aṃśa indro vṛtrasya saṃjito dhanānām |
RV_5,042.05c ṛbhukṣā vāja uta vā purandhir avantu no amṛtāsas turāsaḥ ||
RV_5,042.06a marutvato apratītasya jiṣṇor ajūryataḥ pra bravāmā kṛtāni |
RV_5,042.06c na te pūrve maghavan nāparāso na vīryaṃ nūtanaḥ kaś canāpa ||
RV_5,042.07a upa stuhi prathamaṃ ratnadheyam bṛhaspatiṃ sanitāraṃ dhanānām |
RV_5,042.07c yaḥ śaṃsate stuvate śambhaviṣṭhaḥ purūvasur āgamaj johuvānam ||
RV_5,042.08a tavotibhiḥ sacamānā ariṣṭā bṛhaspate maghavānaḥ suvīrāḥ |
RV_5,042.08c ye aśvadā uta vā santi godā ye vastradāḥ subhagās teṣu rāyaḥ ||
RV_5,042.09a visarmāṇaṃ kṛṇuhi vittam eṣāṃ ye bhuñjate apṛṇanto na ukthaiḥ |
RV_5,042.09c apavratān prasave vāvṛdhānān brahmadviṣaḥ sūryād yāvayasva ||
RV_5,042.10a ya ohate rakṣaso devavītāv acakrebhis tam maruto ni yāta |
RV_5,042.10c yo vaḥ śamīṃ śaśamānasya nindāt tucchyān kāmān karate siṣvidānaḥ ||
RV_5,042.11a tam u ṣṭuhi yaḥ sviṣuḥ sudhanvā yo viśvasya kṣayati bheṣajasya |
RV_5,042.11c yakṣvā mahe saumanasāya rudraṃ namobhir devam asuraṃ duvasya ||
RV_5,042.12a damūnaso apaso ye suhastā vṛṣṇaḥ patnīr nadyo vibhvataṣṭāḥ |
RV_5,042.12c sarasvatī bṛhaddivota rākā daśasyantīr varivasyantu śubhrāḥ ||
RV_5,042.13a pra sū mahe suśaraṇāya medhāṃ giram bhare navyasīṃ jāyamānām |
RV_5,042.13c ya āhanā duhitur vakṣaṇāsu rūpā mināno akṛṇod idaṃ naḥ ||
RV_5,042.14a pra suṣṭuti stanayantaṃ ruvantam iḷas patiṃ jaritar nūnam aśyāḥ |
RV_5,042.14c yo abdimāṃ udanimāṃ iyarti pra vidyutā rodasī ukṣamāṇaḥ ||
RV_5,042.15a eṣa stomo mārutaṃ śardho acchā rudrasya sūnūṃr yuvanyūṃr ud aśyāḥ |
RV_5,042.15c kāmo rāye havate mā svasty upa stuhi pṛṣadaśvāṃ ayāsaḥ ||
RV_5,042.16a praiṣa stomaḥ pṛthivīm antarikṣaṃ vanaspatīṃr oṣadhī rāye aśyāḥ |
RV_5,042.16c devo-devaḥ suhavo bhūtu mahyam mā no mātā pṛthivī durmatau dhāt ||
RV_5,042.17a urau devā anibādhe syāma ||
RV_5,042.18a sam aśvinor avasā nūtanena mayobhuvā supraṇītī gamema |
RV_5,042.18c ā no rayiṃ vahatam ota vīrān ā viśvāny amṛtā saubhagāni ||

RV_5,043.01a ā dhenavaḥ payasā tūrṇyarthā amardhantīr upa no yantu madhvā |
RV_5,043.01c maho rāye bṛhatīḥ sapta vipro mayobhuvo jaritā johavīti ||
RV_5,043.02a ā suṣṭutī namasā vartayadhyai dyāvā vājāya pṛthivī amṛdhre |
RV_5,043.02c pitā mātā madhuvacāḥ suhastā bhare-bhare no yaśasāv aviṣṭām ||
RV_5,043.03a adhvaryavaś cakṛvāṃso madhūni pra vāyave bharata cāru śukram |
RV_5,043.03c hoteva naḥ prathamaḥ pāhy asya deva madhvo rarimā te madāya ||
RV_5,043.04a daśa kṣipo yuñjate bāhū adriṃ somasya yā śamitārā suhastā |
RV_5,043.04c madhvo rasaṃ sugabhastir giriṣṭhāṃ caniścadad duduhe śukram aṃśuḥ ||
RV_5,043.05a asāvi te jujuṣāṇāya somaḥ kratve dakṣāya bṛhate madāya |
RV_5,043.05c harī rathe sudhurā yoge arvāg indra priyā kṛṇuhi hūyamānaḥ ||
RV_5,043.06a ā no mahīm aramatiṃ sajoṣā gnāṃ devīṃ namasā rātahavyām |
RV_5,043.06c madhor madāya bṛhatīm ṛtajñām āgne vaha pathibhir devayānaiḥ ||
RV_5,043.07a añjanti yam prathayanto na viprā vapāvantaṃ nāgninā tapantaḥ |
RV_5,043.07c pitur na putra upasi preṣṭha ā gharmo agnim ṛtayann asādi ||
RV_5,043.08a acchā mahī bṛhatī śantamā gīr dūto na gantv aśvinā huvadhyai |
RV_5,043.08c mayobhuvā sarathā yātam arvāg gantaṃ nidhiṃ dhuram āṇir na nābhim ||
RV_5,043.09a pra tavyaso namauktiṃ turasyāham pūṣṇa uta vāyor adikṣi |
RV_5,043.09c yā rādhasā coditārā matīnāṃ yā vājasya draviṇodā uta tman ||
RV_5,043.10a ā nāmabhir maruto vakṣi viśvān ā rūpebhir jātavedo huvānaḥ |
RV_5,043.10c yajñaṃ giro jarituḥ suṣṭutiṃ ca viśve ganta maruto viśva ūtī ||
RV_5,043.11a ā no divo bṛhataḥ parvatād ā sarasvatī yajatā gantu yajñam |
RV_5,043.11c havaṃ devī jujuṣāṇā ghṛtācī śagmāṃ no vācam uśatī śṛṇotu ||
RV_5,043.12a ā vedhasaṃ nīlapṛṣṭham bṛhantam bṛhaspatiṃ sadane sādayadhvam |
RV_5,043.12c sādadyoniṃ dama ā dīdivāṃsaṃ hiraṇyavarṇam aruṣaṃ sapema ||
RV_5,043.13a ā dharṇasir bṛhaddivo rarāṇo viśvebhir gantv omabhir huvānaḥ |
RV_5,043.13c gnā vasāna oṣadhīr amṛdhras tridhātuśṛṅgo vṛṣabho vayodhāḥ ||
RV_5,043.14a mātuṣ pade parame śukra āyor vipanyavo rāspirāso agman |
RV_5,043.14c suśevyaṃ namasā rātahavyāḥ śiśum mṛjanty āyavo na vāse ||
RV_5,043.15a bṛhad vayo bṛhate tubhyam agne dhiyājuro mithunāsaḥ sacanta |
RV_5,043.15c devo-devaḥ suhavo bhūtu mahyam mā no mātā pṛthivī durmatau dhāt ||
RV_5,043.16a urau devā anibādhe syāma ||
RV_5,043.17a sam aśvinor avasā nūtanena mayobhuvā supraṇītī gamema |
RV_5,043.17c ā no rayiṃ vahatam ota vīrān ā viśvāny amṛtā saubhagāni ||

RV_5,044.01a tam pratnathā pūrvathā viśvathemathā jyeṣṭhatātim barhiṣadaṃ svarvidam |
RV_5,044.01c pratīcīnaṃ vṛjanaṃ dohase girāśuṃ jayantam anu yāsu vardhase ||
RV_5,044.02a śriye sudṛśīr uparasya yāḥ svar virocamānaḥ kakubhām acodate |
RV_5,044.02c sugopā asi na dabhāya sukrato paro māyābhir ṛta āsa nāma te ||
RV_5,044.03a atyaṃ haviḥ sacate sac ca dhātu cāriṣṭagātuḥ sa hotā sahobhariḥ |
RV_5,044.03c prasarsrāṇo anu barhir vṛṣā śiśur madhye yuvājaro visruhā hitaḥ ||
RV_5,044.04a pra va ete suyujo yāmann iṣṭaye nīcīr amuṣmai yamya ṛtāvṛdhaḥ |
RV_5,044.04c suyantubhiḥ sarvaśāsair abhīśubhiḥ krivir nāmāni pravaṇe muṣāyati ||
RV_5,044.05a saṃjarbhurāṇas tarubhiḥ sutegṛbhaṃ vayākinaṃ cittagarbhāsu susvaruḥ |
RV_5,044.05c dhāravākeṣv ṛjugātha śobhase vardhasva patnīr abhi jīvo adhvare ||
RV_5,044.06a yādṛg eva dadṛśe tādṛg ucyate saṃ chāyayā dadhire sidhrayāpsv ā |
RV_5,044.06c mahīm asmabhyam uruṣām uru jrayo bṛhat suvīram anapacyutaṃ sahaḥ ||
RV_5,044.07a vety agrur janivān vā ati spṛdhaḥ samaryatā manasā sūryaḥ kaviḥ |
RV_5,044.07c ghraṃsaṃ rakṣantam pari viśvato gayam asmākaṃ śarma vanavat svāvasuḥ ||
RV_5,044.08a jyāyāṃsam asya yatunasya ketuna ṛṣisvaraṃ carati yāsu nāma te |
RV_5,044.08c yādṛśmin dhāyi tam apasyayā vidad ya u svayaṃ vahate so araṃ karat ||
RV_5,044.09a samudram āsām ava tasthe agrimā na riṣyati savanaṃ yasminn āyatā |
RV_5,044.09c atrā na hārdi kravaṇasya rejate yatrā matir vidyate pūtabandhanī ||
RV_5,044.10a sa hi kṣatrasya manasasya cittibhir evāvadasya yajatasya sadhreḥ |
RV_5,044.10c avatsārasya spṛṇavāma raṇvabhiḥ śaviṣṭhaṃ vājaṃ viduṣā cid ardhyam ||
RV_5,044.11a śyena āsām aditiḥ kakṣyo mado viśvavārasya yajatasya māyinaḥ |
RV_5,044.11c sam anyam-anyam arthayanty etave vidur viṣāṇam paripānam anti te ||
RV_5,044.12a sadāpṛṇo yajato vi dviṣo vadhīd bāhuvṛktaḥ śrutavit taryo vaḥ sacā |
RV_5,044.12c ubhā sa varā praty eti bhāti ca yad īṃ gaṇam bhajate suprayāvabhiḥ ||
RV_5,044.13a sutambharo yajamānasya satpatir viśvāsām ūdhaḥ sa dhiyām udañcanaḥ |
RV_5,044.13c bharad dhenū rasavac chiśriye payo 'nubruvāṇo adhy eti na svapan ||
RV_5,044.14a yo jāgāra tam ṛcaḥ kāmayante yo jāgāra tam u sāmāni yanti |
RV_5,044.14c yo jāgāra tam ayaṃ soma āha tavāham asmi sakhye nyokāḥ ||
RV_5,044.15a agnir jāgāra tam ṛcaḥ kāmayante 'gnir jāgāra tam u sāmāni yanti |
RV_5,044.15c agnir jāgāra tam ayaṃ soma āha tavāham asmi sakhye nyokāḥ ||

RV_5,045.01a vidā divo viṣyann adrim ukthair āyatyā uṣaso arcino guḥ |
RV_5,045.01c apāvṛta vrajinīr ut svar gād vi duro mānuṣīr deva āvaḥ ||
RV_5,045.02a vi sūryo amatiṃ na śriyaṃ sād orvād gavām mātā jānatī gāt |
RV_5,045.02c dhanvarṇaso nadyaḥ khādoarṇā sthūṇeva sumitā dṛṃhata dyauḥ ||
RV_5,045.03a asmā ukthāya parvatasya garbho mahīnāṃ januṣe pūrvyāya |
RV_5,045.03c vi parvato jihīta sādhata dyaur āvivāsanto dasayanta bhūma ||
RV_5,045.04a sūktebhir vo vacobhir devajuṣṭair indrā nv agnī avase huvadhyai |
RV_5,045.04c ukthebhir hi ṣmā kavayaḥ suyajñā āvivāsanto maruto yajanti ||
RV_5,045.05a eto nv adya sudhyo bhavāma pra ducchunā minavāmā varīyaḥ |
RV_5,045.05c āre dveṣāṃsi sanutar dadhāmāyāma prāñco yajamānam accha ||
RV_5,045.06a etā dhiyaṃ kṛṇavāmā sakhāyo 'pa yā mātāṃ ṛṇuta vrajaṃ goḥ |
RV_5,045.06c yayā manur viśiśipraṃ jigāya yayā vaṇig vaṅkur āpā purīṣam ||
RV_5,045.07a anūnod atra hastayato adrir ārcan yena daśa māso navagvāḥ |
RV_5,045.07c ṛtaṃ yatī saramā gā avindad viśvāni satyāṅgirāś cakāra ||
RV_5,045.08a viśve asyā vyuṣi māhināyāḥ saṃ yad gobhir aṅgiraso navanta |
RV_5,045.08c utsa āsām parame sadhastha ṛtasya pathā saramā vidad gāḥ ||
RV_5,045.09a ā sūryo yātu saptāśvaḥ kṣetraṃ yad asyorviyā dīrghayāthe |
RV_5,045.09c raghuḥ śyenaḥ patayad andho acchā yuvā kavir dīdayad goṣu gacchan ||
RV_5,045.10a ā sūryo aruhac chukram arṇo 'yukta yad dharito vītapṛṣṭhāḥ |
RV_5,045.10c udnā na nāvam anayanta dhīrā āśṛṇvatīr āpo arvāg atiṣṭhan ||
RV_5,045.11a dhiyaṃ vo apsu dadhiṣe svarṣāṃ yayātaran daśa māso navagvāḥ |
RV_5,045.11c ayā dhiyā syāma devagopā ayā dhiyā tuturyāmāty aṃhaḥ ||

RV_5,046.01a hayo na vidvāṃ ayuji svayaṃ dhuri tāṃ vahāmi prataraṇīm avasyuvam |
RV_5,046.01c nāsyā vaśmi vimucaṃ nāvṛtam punar vidvān pathaḥ puraeta ṛju neṣati ||
RV_5,046.02a agna indra varuṇa mitra devāḥ śardhaḥ pra yanta mārutota viṣṇo |
RV_5,046.02c ubhā nāsatyā rudro adha gnāḥ pūṣā bhagaḥ sarasvatī juṣanta ||
RV_5,046.03a indrāgnī mitrāvaruṇāditiṃ svaḥ pṛthivīṃ dyām marutaḥ parvatāṃ apaḥ |
RV_5,046.03c huve viṣṇum pūṣaṇam brahmaṇas patim bhagaṃ nu śaṃsaṃ savitāram ūtaye ||
RV_5,046.04a uta no viṣṇur uta vāto asridho draviṇodā uta somo mayas karat |
RV_5,046.04c uta ṛbhava uta rāye no aśvinota tvaṣṭota vibhvānu maṃsate ||
RV_5,046.05a uta tyan no mārutaṃ śardha ā gamad divikṣayaṃ yajatam barhir āsade |
RV_5,046.05c bṛhaspatiḥ śarma pūṣota no yamad varūthyaṃ varuṇo mitro aryamā ||
RV_5,046.06a uta tye naḥ parvatāsaḥ suśastayaḥ sudītayo nadyas trāmaṇe bhuvan |
RV_5,046.06c bhago vibhaktā śavasāvasā gamad uruvyacā aditiḥ śrotu me havam ||
RV_5,046.07a devānām patnīr uśatīr avantu naḥ prāvantu nas tujaye vājasātaye |
RV_5,046.07c yāḥ pārthivāso yā apām api vrate tā no devīḥ suhavāḥ śarma yacchata ||
RV_5,046.08a uta gnā vyantu devapatnīr indrāṇy agnāyy aśvinī rāṭ |
RV_5,046.08c ā rodasī varuṇānī śṛṇotu vyantu devīr ya ṛtur janīnām ||

RV_5,047.01a prayuñjatī diva eti bruvāṇā mahī mātā duhitur bodhayantī |
RV_5,047.01c āvivāsantī yuvatir manīṣā pitṛbhya ā sadane johuvānā ||
RV_5,047.02a ajirāsas tadapa īyamānā ātasthivāṃso amṛtasya nābhim |
RV_5,047.02c anantāsa uravo viśvataḥ sīm pari dyāvāpṛthivī yanti panthāḥ ||
RV_5,047.03a ukṣā samudro aruṣaḥ suparṇaḥ pūrvasya yonim pitur ā viveśa |
RV_5,047.03c madhye divo nihitaḥ pṛśnir aśmā vi cakrame rajasas pāty antau ||
RV_5,047.04a catvāra īm bibhrati kṣemayanto daśa garbhaṃ carase dhāpayante |
RV_5,047.04c tridhātavaḥ paramā asya gāvo divaś caranti pari sadyo antān ||
RV_5,047.05a idaṃ vapur nivacanaṃ janāsaś caranti yan nadyas tasthur āpaḥ |
RV_5,047.05c dve yad īm bibhṛto mātur anye iheha jāte yamyā sabandhū ||
RV_5,047.06a vi tanvate dhiyo asmā apāṃsi vastrā putrāya mātaro vayanti |
RV_5,047.06c upaprakṣe vṛṣaṇo modamānā divas pathā vadhvo yanty accha ||
RV_5,047.07a tad astu mitrāvaruṇā tad agne śaṃ yor asmabhyam idam astu śastam |
RV_5,047.07c aśīmahi gādham uta pratiṣṭhāṃ namo dive bṛhate sādanāya ||

RV_5,048.01a kad u priyāya dhāmne manāmahe svakṣatrāya svayaśase mahe vayam |
RV_5,048.01c āmenyasya rajaso yad abhra āṃ apo vṛṇānā vitanoti māyinī ||
RV_5,048.02a tā atnata vayunaṃ vīravakṣaṇaṃ samānyā vṛtayā viśvam ā rajaḥ |
RV_5,048.02c apo apācīr aparā apejate pra pūrvābhis tirate devayur janaḥ ||
RV_5,048.03a ā grāvabhir ahanyebhir aktubhir variṣṭhaṃ vajram ā jigharti māyini |
RV_5,048.03c śataṃ vā yasya pracaran sve dame saṃvartayanto vi ca vartayann ahā ||
RV_5,048.04a tām asya rītim paraśor iva praty anīkam akhyam bhuje asya varpasaḥ |
RV_5,048.04c sacā yadi pitumantam iva kṣayaṃ ratnaṃ dadhāti bharahūtaye viśe ||
RV_5,048.05a sa jihvayā caturanīka ṛñjate cāru vasāno varuṇo yatann arim |
RV_5,048.05c na tasya vidma puruṣatvatā vayaṃ yato bhagaḥ savitā dāti vāryam ||

RV_5,049.01a devaṃ vo adya savitāram eṣe bhagaṃ ca ratnaṃ vibhajantam āyoḥ |
RV_5,049.01c ā vāṃ narā purubhujā vavṛtyāṃ dive-dive cid aśvinā sakhīyan ||
RV_5,049.02a prati prayāṇam asurasya vidvān sūktair devaṃ savitāraṃ duvasya |
RV_5,049.02c upa bruvīta namasā vijānañ jyeṣṭhaṃ ca ratnaṃ vibhajantam āyoḥ ||
RV_5,049.03a adatrayā dayate vāryāṇi pūṣā bhago aditir vasta usraḥ |
RV_5,049.03c indro viṣṇur varuṇo mitro agnir ahāni bhadrā janayanta dasmāḥ ||
RV_5,049.04a tan no anarvā savitā varūthaṃ tat sindhava iṣayanto anu gman |
RV_5,049.04c upa yad voce adhvarasya hotā rāyaḥ syāma patayo vājaratnāḥ ||
RV_5,049.05a pra ye vasubhya īvad ā namo dur ye mitre varuṇe sūktavācaḥ |
RV_5,049.05c avaitv abhvaṃ kṛṇutā varīyo divaspṛthivyor avasā madema ||

RV_5,050.01a viśvo devasya netur marto vurīta sakhyam |
RV_5,050.01c viśvo rāya iṣudhyati dyumnaṃ vṛṇīta puṣyase ||
RV_5,050.02a te te deva netar ye cemāṃ anuśase |
RV_5,050.02c te rāyā te hy āpṛce sacemahi sacathyaiḥ ||
RV_5,050.03a ato na ā nṝn atithīn ataḥ patnīr daśasyata |
RV_5,050.03c āre viśvam patheṣṭhāṃ dviṣo yuyotu yūyuviḥ ||
RV_5,050.04a yatra vahnir abhihito dudravad droṇyaḥ paśuḥ |
RV_5,050.04c nṛmaṇā vīrapastyo 'rṇā dhīreva sanitā ||
RV_5,050.05a eṣa te deva netā rathaspatiḥ śaṃ rayiḥ |
RV_5,050.05c śaṃ rāye śaṃ svastaya iṣastuto manāmahe devastuto manāmahe ||

RV_5,051.01a agne sutasya pītaye viśvair ūmebhir ā gahi |
RV_5,051.01c devebhir havyadātaye ||
RV_5,051.02a ṛtadhītaya ā gata satyadharmāṇo adhvaram |
RV_5,051.02c agneḥ pibata jihvayā ||
RV_5,051.03a viprebhir vipra santya prātaryāvabhir ā gahi |
RV_5,051.03c devebhiḥ somapītaye ||
RV_5,051.04a ayaṃ somaś camū suto 'matre pari ṣicyate |
RV_5,051.04c priya indrāya vāyave ||
RV_5,051.05a vāyav ā yāhi vītaye juṣāṇo havyadātaye |
RV_5,051.05c pibā sutasyāndhaso abhi prayaḥ ||
RV_5,051.06a indraś ca vāyav eṣāṃ sutānām pītim arhathaḥ |
RV_5,051.06c tāñ juṣethām arepasāv abhi prayaḥ ||
RV_5,051.07a sutā indrāya vāyave somāso dadhyāśiraḥ |
RV_5,051.07c nimnaṃ na yanti sindhavo 'bhi prayaḥ ||
RV_5,051.08a sajūr viśvebhir devebhir aśvibhyām uṣasā sajūḥ |
RV_5,051.08c ā yāhy agne atrivat sute raṇa ||
RV_5,051.09a sajūr mitrāvaruṇābhyāṃ sajūḥ somena viṣṇunā |
RV_5,051.09c ā yāhy agne atrivat sute raṇa ||
RV_5,051.10a sajūr ādityair vasubhiḥ sajūr indreṇa vāyunā |
RV_5,051.10c ā yāhy agne atrivat sute raṇa ||
RV_5,051.11a svasti no mimītām aśvinā bhagaḥ svasti devy aditir anarvaṇaḥ |
RV_5,051.11c svasti pūṣā asuro dadhātu naḥ svasti dyāvāpṛthivī sucetunā ||
RV_5,051.12a svastaye vāyum upa bravāmahai somaṃ svasti bhuvanasya yas patiḥ |
RV_5,051.12c bṛhaspatiṃ sarvagaṇaṃ svastaye svastaya ādityāso bhavantu naḥ ||
RV_5,051.13a viśve devā no adyā svastaye vaiśvānaro vasur agniḥ svastaye |
RV_5,051.13c devā avantv ṛbhavaḥ svastaye svasti no rudraḥ pātv aṃhasaḥ ||
RV_5,051.14a svasti mitrāvaruṇā svasti pathye revati |
RV_5,051.14c svasti na indraś cāgniś ca svasti no adite kṛdhi ||
RV_5,051.15a svasti panthām anu carema sūryācandramasāv iva |
RV_5,051.15c punar dadatāghnatā jānatā saṃ gamemahi ||

RV_5,052.01a pra śyāvāśva dhṛṣṇuyārcā marudbhir ṛkvabhiḥ |
RV_5,052.01c ye adrogham anuṣvadhaṃ śravo madanti yajñiyāḥ ||
RV_5,052.02a te hi sthirasya śavasaḥ sakhāyaḥ santi dhṛṣṇuyā |
RV_5,052.02c te yāmann ā dhṛṣadvinas tmanā pānti śaśvataḥ ||
RV_5,052.03a te syandrāso nokṣaṇo 'ti ṣkandanti śarvarīḥ |
RV_5,052.03c marutām adhā maho divi kṣamā ca manmahe ||
RV_5,052.04a marutsu vo dadhīmahi stomaṃ yajñaṃ ca dhṛṣṇuyā |
RV_5,052.04c viśve ye mānuṣā yugā pānti martyaṃ riṣaḥ ||
RV_5,052.05a arhanto ye sudānavo naro asāmiśavasaḥ |
RV_5,052.05c pra yajñaṃ yajñiyebhyo divo arcā marudbhyaḥ ||
RV_5,052.06a ā rukmair ā yudhā nara ṛṣvā ṛṣṭīr asṛkṣata |
RV_5,052.06c anv enāṃ aha vidyuto maruto jajjhatīr iva bhānur arta tmanā divaḥ ||
RV_5,052.07a ye vāvṛdhanta pārthivā ya urāv antarikṣa ā |
RV_5,052.07c vṛjane vā nadīnāṃ sadhasthe vā maho divaḥ ||
RV_5,052.08a śardho mārutam uc chaṃsa satyaśavasam ṛbhvasam |
RV_5,052.08c uta sma te śubhe naraḥ pra syandrā yujata tmanā ||
RV_5,052.09a uta sma te paruṣṇyām ūrṇā vasata śundhyavaḥ |
RV_5,052.09c uta pavyā rathānām adrim bhindanty ojasā ||
RV_5,052.10a āpathayo vipathayo 'ntaspathā anupathāḥ |
RV_5,052.10c etebhir mahyaṃ nāmabhir yajñaṃ viṣṭāra ohate ||
RV_5,052.11a adhā naro ny ohate 'dhā niyuta ohate |
RV_5,052.11c adhā pārāvatā iti citrā rūpāṇi darśyā ||
RV_5,052.12a chandastubhaḥ kubhanyava utsam ā kīriṇo nṛtuḥ |
RV_5,052.12c te me ke cin na tāyava ūmā āsan dṛśi tviṣe ||
RV_5,052.13a ya ṛṣvā ṛṣṭividyutaḥ kavayaḥ santi vedhasaḥ |
RV_5,052.13c tam ṛṣe mārutaṃ gaṇaṃ namasyā ramayā girā ||
RV_5,052.14a accha ṛṣe mārutaṃ gaṇaṃ dānā mitraṃ na yoṣaṇā |
RV_5,052.14c divo vā dhṛṣṇava ojasā stutā dhībhir iṣaṇyata ||
RV_5,052.15a nū manvāna eṣāṃ devāṃ acchā na vakṣaṇā |
RV_5,052.15c dānā saceta sūribhir yāmaśrutebhir añjibhiḥ ||
RV_5,052.16a pra ye me bandhveṣe gāṃ vocanta sūrayaḥ pṛśniṃ vocanta mātaram |
RV_5,052.16c adhā pitaram iṣmiṇaṃ rudraṃ vocanta śikvasaḥ ||
RV_5,052.17a sapta me sapta śākina ekam-ekā śatā daduḥ |
RV_5,052.17c yamunāyām adhi śrutam ud rādho gavyam mṛje ni rādho aśvyam mṛje ||

RV_5,053.01a ko veda jānam eṣāṃ ko vā purā sumneṣv āsa marutām |
RV_5,053.01c yad yuyujre kilāsyaḥ ||
RV_5,053.02a aitān ratheṣu tasthuṣaḥ kaḥ śuśrāva kathā yayuḥ |
RV_5,053.02c kasmai sasruḥ sudāse anv āpaya iḷābhir vṛṣṭayaḥ saha ||
RV_5,053.03a te ma āhur ya āyayur upa dyubhir vibhir made |
RV_5,053.03c naro maryā arepasa imān paśyann iti ṣṭuhi ||
RV_5,053.04a ye añjiṣu ye vāśīṣu svabhānavaḥ srakṣu rukmeṣu khādiṣu |
RV_5,053.04c śrāyā ratheṣu dhanvasu ||
RV_5,053.05a yuṣmākaṃ smā rathāṃ anu mude dadhe maruto jīradānavaḥ |
RV_5,053.05c vṛṣṭī dyāvo yatīr iva ||
RV_5,053.06a ā yaṃ naraḥ sudānavo dadāśuṣe divaḥ kośam acucyavuḥ |
RV_5,053.06c vi parjanyaṃ sṛjanti rodasī anu dhanvanā yanti vṛṣṭayaḥ ||
RV_5,053.07a tatṛdānāḥ sindhavaḥ kṣodasā rajaḥ pra sasrur dhenavo yathā |
RV_5,053.07c syannā aśvā ivādhvano vimocane vi yad vartanta enyaḥ ||
RV_5,053.08a ā yāta maruto diva āntarikṣād amād uta |
RV_5,053.08c māva sthāta parāvataḥ ||
RV_5,053.09a mā vo rasānitabhā kubhā krumur mā vaḥ sindhur ni rīramat |
RV_5,053.09c mā vaḥ pari ṣṭhāt sarayuḥ purīṣiṇy asme it sumnam astu vaḥ ||
RV_5,053.10a taṃ vaḥ śardhaṃ rathānāṃ tveṣaṃ gaṇam mārutaṃ navyasīnām |
RV_5,053.10c anu pra yanti vṛṣṭayaḥ ||
RV_5,053.11a śardhaṃ-śardhaṃ va eṣāṃ vrātaṃ-vrātaṃ gaṇaṃ-gaṇaṃ suśastibhiḥ |
RV_5,053.11c anu krāmema dhītibhiḥ ||
RV_5,053.12a kasmā adya sujātāya rātahavyāya pra yayuḥ |
RV_5,053.12c enā yāmena marutaḥ ||
RV_5,053.13a yena tokāya tanayāya dhānyam bījaṃ vahadhve akṣitam |
RV_5,053.13c asmabhyaṃ tad dhattana yad va īmahe rādho viśvāyu saubhagam ||
RV_5,053.14a atīyāma nidas tiraḥ svastibhir hitvāvadyam arātīḥ |
RV_5,053.14c vṛṣṭvī śaṃ yor āpa usri bheṣajaṃ syāma marutaḥ saha ||
RV_5,053.15a sudevaḥ samahāsati suvīro naro marutaḥ sa martyaḥ |
RV_5,053.15c yaṃ trāyadhve syāma te ||
RV_5,053.16a stuhi bhojān stuvato asya yāmani raṇan gāvo na yavase |
RV_5,053.16c yataḥ pūrvāṃ iva sakhīṃr anu hvaya girā gṛṇīhi kāminaḥ ||

RV_5,054.01a pra śardhāya mārutāya svabhānava imāṃ vācam anajā parvatacyute |
RV_5,054.01c gharmastubhe diva ā pṛṣṭhayajvane dyumnaśravase mahi nṛmṇam arcata ||
RV_5,054.02a pra vo marutas taviṣā udanyavo vayovṛdho aśvayujaḥ parijrayaḥ |
RV_5,054.02c saṃ vidyutā dadhati vāśati tritaḥ svaranty āpo 'vanā parijrayaḥ ||
RV_5,054.03a vidyunmahaso naro aśmadidyavo vātatviṣo marutaḥ parvatacyutaḥ |
RV_5,054.03c abdayā cin muhur ā hrādunīvṛta stanayadamā rabhasā udojasaḥ ||
RV_5,054.04a vy aktūn rudrā vy ahāni śikvaso vy antarikṣaṃ vi rajāṃsi dhūtayaḥ |
RV_5,054.04c vi yad ajrāṃ ajatha nāva īṃ yathā vi durgāṇi maruto nāha riṣyatha ||
RV_5,054.05a tad vīryaṃ vo maruto mahitvanaṃ dīrghaṃ tatāna sūryo na yojanam |
RV_5,054.05c etā na yāme agṛbhītaśociṣo 'naśvadāṃ yan ny ayātanā girim ||
RV_5,054.06a abhrāji śardho maruto yad arṇasam moṣathā vṛkṣaṃ kapaneva vedhasaḥ |
RV_5,054.06c adha smā no aramatiṃ sajoṣasaś cakṣur iva yantam anu neṣathā sugam ||
RV_5,054.07a na sa jīyate maruto na hanyate na sredhati na vyathate na riṣyati |
RV_5,054.07c nāsya rāya upa dasyanti notaya ṛṣiṃ vā yaṃ rājānaṃ vā suṣūdatha ||
RV_5,054.08a niyutvanto grāmajito yathā naro 'ryamaṇo na marutaḥ kabandhinaḥ |
RV_5,054.08c pinvanty utsaṃ yad ināso asvaran vy undanti pṛthivīm madhvo andhasā ||
RV_5,054.09a pravatvatīyam pṛthivī marudbhyaḥ pravatvatī dyaur bhavati prayadbhyaḥ |
RV_5,054.09c pravatvatīḥ pathyā antarikṣyāḥ pravatvantaḥ parvatā jīradānavaḥ ||
RV_5,054.10a yan marutaḥ sabharasaḥ svarṇaraḥ sūrya udite madathā divo naraḥ |
RV_5,054.10c na vo 'śvāḥ śrathayantāha sisrataḥ sadyo asyādhvanaḥ pāram aśnutha ||
RV_5,054.11a aṃseṣu va ṛṣṭayaḥ patsu khādayo vakṣassu rukmā maruto rathe śubhaḥ |
RV_5,054.11c agnibhrājaso vidyuto gabhastyoḥ śiprāḥ śīrṣasu vitatā hiraṇyayīḥ ||
RV_5,054.12a taṃ nākam aryo agṛbhītaśociṣaṃ ruśat pippalam maruto vi dhūnutha |
RV_5,054.12c sam acyanta vṛjanātitviṣanta yat svaranti ghoṣaṃ vitatam ṛtāyavaḥ ||
RV_5,054.13a yuṣmādattasya maruto vicetaso rāyaḥ syāma rathyo vayasvataḥ |
RV_5,054.13c na yo yucchati tiṣyo yathā divo 'sme rāranta marutaḥ sahasriṇam ||
RV_5,054.14a yūyaṃ rayim maruta spārhavīraṃ yūyam ṛṣim avatha sāmavipram |
RV_5,054.14c yūyam arvantam bharatāya vājaṃ yūyaṃ dhattha rājānaṃ śruṣṭimantam ||
RV_5,054.15a tad vo yāmi draviṇaṃ sadyaūtayo yenā svar ṇa tatanāma nṝṃr abhi |
RV_5,054.15c idaṃ su me maruto haryatā vaco yasya tarema tarasā śataṃ himāḥ ||

RV_5,055.01a prayajyavo maruto bhrājadṛṣṭayo bṛhad vayo dadhire rukmavakṣasaḥ |
RV_5,055.01c īyante aśvaiḥ suyamebhir āśubhiḥ śubhaṃ yātām anu rathā avṛtsata ||
RV_5,055.02a svayaṃ dadhidhve taviṣīṃ yathā vida bṛhan mahānta urviyā vi rājatha |
RV_5,055.02c utāntarikṣam mamire vy ojasā śubhaṃ yātām anu rathā avṛtsata ||
RV_5,055.03a sākaṃ jātāḥ subhvaḥ sākam ukṣitāḥ śriye cid ā prataraṃ vāvṛdhur naraḥ |
RV_5,055.03c virokiṇaḥ sūryasyeva raśmayaḥ śubhaṃ yātām anu rathā avṛtsata ||
RV_5,055.04a ābhūṣeṇyaṃ vo maruto mahitvanaṃ didṛkṣeṇyaṃ sūryasyeva cakṣaṇam |
RV_5,055.04c uto asmāṃ amṛtatve dadhātana śubhaṃ yātām anu rathā avṛtsata ||
RV_5,055.05a ud īrayathā marutaḥ samudrato yūyaṃ vṛṣṭiṃ varṣayathā purīṣiṇaḥ |
RV_5,055.05c na vo dasrā upa dasyanti dhenavaḥ śubhaṃ yātām anu rathā avṛtsata ||
RV_5,055.06a yad aśvān dhūrṣu pṛṣatīr ayugdhvaṃ hiraṇyayān praty atkāṃ amugdhvam |
RV_5,055.06c viśvā it spṛdho maruto vy asyatha śubhaṃ yātām anu rathā avṛtsata ||
RV_5,055.07a na parvatā na nadyo varanta vo yatrācidhvam maruto gacchathed u tat |
RV_5,055.07c uta dyāvāpṛthivī yāthanā pari śubhaṃ yātām anu rathā avṛtsata ||
RV_5,055.08a yat pūrvyam maruto yac ca nūtanaṃ yad udyate vasavo yac ca śasyate |
RV_5,055.08c viśvasya tasya bhavathā navedasaḥ śubhaṃ yātām anu rathā avṛtsata ||
RV_5,055.09a mṛḷata no maruto mā vadhiṣṭanāsmabhyaṃ śarma bahulaṃ vi yantana |
RV_5,055.09c adhi stotrasya sakhyasya gātana śubhaṃ yātām anu rathā avṛtsata ||
RV_5,055.10a yūyam asmān nayata vasyo acchā nir aṃhatibhyo maruto gṛṇānāḥ |
RV_5,055.10c juṣadhvaṃ no havyadātiṃ yajatrā vayaṃ syāma patayo rayīṇām ||

RV_5,056.01a agne śardhantam ā gaṇam piṣṭaṃ rukmebhir añjibhiḥ |
RV_5,056.01c viśo adya marutām ava hvaye divaś cid rocanād adhi ||
RV_5,056.02a yathā cin manyase hṛdā tad in me jagmur āśasaḥ |
RV_5,056.02c ye te nediṣṭhaṃ havanāny āgaman tān vardha bhīmasaṃdṛśaḥ ||
RV_5,056.03a mīḷhuṣmatīva pṛthivī parāhatā madanty ety asmad ā |
RV_5,056.03c ṛkṣo na vo marutaḥ śimīvāṃ amo dudhro gaur iva bhīmayuḥ ||
RV_5,056.04a ni ye riṇanty ojasā vṛthā gāvo na durdhuraḥ |
RV_5,056.04c aśmānaṃ cit svaryam parvataṃ girim pra cyāvayanti yāmabhiḥ ||
RV_5,056.05a ut tiṣṭha nūnam eṣāṃ stomaiḥ samukṣitānām |
RV_5,056.05c marutām purutamam apūrvyaṃ gavāṃ sargam iva hvaye ||
RV_5,056.06a yuṅgdhvaṃ hy aruṣī rathe yuṅgdhvaṃ ratheṣu rohitaḥ |
RV_5,056.06c yuṅgdhvaṃ harī ajirā dhuri voḷhave vahiṣṭhā dhuri voḷhave ||
RV_5,056.07a uta sya vājy aruṣas tuviṣvaṇir iha sma dhāyi darśataḥ |
RV_5,056.07c mā vo yāmeṣu marutaś ciraṃ karat pra taṃ ratheṣu codata ||
RV_5,056.08a rathaṃ nu mārutaṃ vayaṃ śravasyum ā huvāmahe |
RV_5,056.08c ā yasmin tasthau suraṇāni bibhratī sacā marutsu rodasī ||
RV_5,056.09a taṃ vaḥ śardhaṃ ratheśubhaṃ tveṣam panasyum ā huve |
RV_5,056.09c yasmin sujātā subhagā mahīyate sacā marutsu mīḷhuṣī ||

RV_5,057.01a ā rudrāsa indravantaḥ sajoṣaso hiraṇyarathāḥ suvitāya gantana |
RV_5,057.01c iyaṃ vo asmat prati haryate matis tṛṣṇaje na diva utsā udanyave ||
RV_5,057.02a vāśīmanta ṛṣṭimanto manīṣiṇaḥ sudhanvāna iṣumanto niṣaṅgiṇaḥ |
RV_5,057.02c svaśvā stha surathāḥ pṛśnimātaraḥ svāyudhā maruto yāthanā śubham ||
RV_5,057.03a dhūnutha dyām parvatān dāśuṣe vasu ni vo vanā jihate yāmano bhiyā |
RV_5,057.03c kopayatha pṛthivīm pṛśnimātaraḥ śubhe yad ugrāḥ pṛṣatīr ayugdhvam ||
RV_5,057.04a vātatviṣo maruto varṣanirṇijo yamā iva susadṛśaḥ supeśasaḥ |
RV_5,057.04c piśaṅgāśvā aruṇāśvā arepasaḥ pratvakṣaso mahinā dyaur ivoravaḥ ||
RV_5,057.05a purudrapsā añjimantaḥ sudānavas tveṣasaṃdṛśo anavabhrarādhasaḥ |
RV_5,057.05c sujātāso januṣā rukmavakṣaso divo arkā amṛtaṃ nāma bhejire ||
RV_5,057.06a ṛṣṭayo vo maruto aṃsayor adhi saha ojo bāhvor vo balaṃ hitam |
RV_5,057.06c nṛmṇā śīrṣasv āyudhā ratheṣu vo viśvā vaḥ śrīr adhi tanūṣu pipiśe ||
RV_5,057.07a gomad aśvāvad rathavat suvīraṃ candravad rādho maruto dadā naḥ |
RV_5,057.07c praśastiṃ naḥ kṛṇuta rudriyāso bhakṣīya vo 'vaso daivyasya ||
RV_5,057.08a haye naro maruto mṛḷatā nas tuvīmaghāso amṛtā ṛtajñāḥ |
RV_5,057.08c satyaśrutaḥ kavayo yuvāno bṛhadgirayo bṛhad ukṣamāṇāḥ ||

RV_5,058.01a tam u nūnaṃ taviṣīmantam eṣāṃ stuṣe gaṇam mārutaṃ navyasīnām |
RV_5,058.01c ya āśvaśvā amavad vahanta uteśire amṛtasya svarājaḥ ||
RV_5,058.02a tveṣaṃ gaṇaṃ tavasaṃ khādihastaṃ dhunivratam māyinaṃ dātivāram |
RV_5,058.02c mayobhuvo ye amitā mahitvā vandasva vipra tuvirādhaso nṝn ||
RV_5,058.03a ā vo yantūdavāhāso adya vṛṣṭiṃ ye viśve maruto junanti |
RV_5,058.03c ayaṃ yo agnir marutaḥ samiddha etaṃ juṣadhvaṃ kavayo yuvānaḥ ||
RV_5,058.04a yūyaṃ rājānam iryaṃ janāya vibhvataṣṭaṃ janayathā yajatrāḥ |
RV_5,058.04c yuṣmad eti muṣṭihā bāhujūto yuṣmat sadaśvo marutaḥ suvīraḥ ||
RV_5,058.05a arā ived acaramā aheva pra-pra jāyante akavā mahobhiḥ |
RV_5,058.05c pṛśneḥ putrā upamāso rabhiṣṭhāḥ svayā matyā marutaḥ sam mimikṣuḥ ||
RV_5,058.06a yat prāyāsiṣṭa pṛṣatībhir aśvair vīḷupavibhir maruto rathebhiḥ |
RV_5,058.06c kṣodanta āpo riṇate vanāny avosriyo vṛṣabhaḥ krandatu dyauḥ ||
RV_5,058.07a prathiṣṭa yāman pṛthivī cid eṣām bharteva garbhaṃ svam ic chavo dhuḥ |
RV_5,058.07c vātān hy aśvān dhury āyuyujre varṣaṃ svedaṃ cakrire rudriyāsaḥ ||
RV_5,058.08a haye naro maruto mṛḷatā nas tuvīmaghāso amṛtā ṛtajñāḥ |
RV_5,058.08c satyaśrutaḥ kavayo yuvāno bṛhadgirayo bṛhad ukṣamāṇāḥ ||

RV_5,059.01a pra va spaḷ akran suvitāya dāvane 'rcā dive pra pṛthivyā ṛtam bhare |
RV_5,059.01c ukṣante aśvān taruṣanta ā rajo 'nu svam bhānuṃ śrathayante arṇavaiḥ ||
RV_5,059.02a amād eṣām bhiyasā bhūmir ejati naur na pūrṇā kṣarati vyathir yatī |
RV_5,059.02c dūredṛśo ye citayanta emabhir antar mahe vidathe yetire naraḥ ||
RV_5,059.03a gavām iva śriyase śṛṅgam uttamaṃ sūryo na cakṣū rajaso visarjane |
RV_5,059.03c atyā iva subhvaś cārava sthana maryā iva śriyase cetathā naraḥ ||
RV_5,059.04a ko vo mahānti mahatām ud aśnavat kas kāvyā marutaḥ ko ha pauṃsyā |
RV_5,059.04c yūyaṃ ha bhūmiṃ kiraṇaṃ na rejatha pra yad bharadhve suvitāya dāvane ||
RV_5,059.05a aśvā ived aruṣāsaḥ sabandhavaḥ śūrā iva prayudhaḥ prota yuyudhuḥ |
RV_5,059.05c maryā iva suvṛdho vāvṛdhur naraḥ sūryasya cakṣuḥ pra minanti vṛṣṭibhiḥ ||
RV_5,059.06a te ajyeṣṭhā akaniṣṭhāsa udbhido 'madhyamāso mahasā vi vāvṛdhuḥ |
RV_5,059.06c sujātāso januṣā pṛśnimātaro divo maryā ā no acchā jigātana ||
RV_5,059.07a vayo na ye śreṇīḥ paptur ojasāntān divo bṛhataḥ sānunas pari |
RV_5,059.07c aśvāsa eṣām ubhaye yathā viduḥ pra parvatasya nabhanūṃr acucyavuḥ ||
RV_5,059.08a mimātu dyaur aditir vītaye naḥ saṃ dānucitrā uṣaso yatantām |
RV_5,059.08c ācucyavur divyaṃ kośam eta ṛṣe rudrasya maruto gṛṇānāḥ ||

RV_5,060.01a īḷe agniṃ svavasaṃ namobhir iha prasatto vi cayat kṛtaṃ naḥ |
RV_5,060.01c rathair iva pra bhare vājayadbhiḥ pradakṣiṇin marutāṃ stomam ṛdhyām ||
RV_5,060.02a ā ye tasthuḥ pṛṣatīṣu śrutāsu sukheṣu rudrā maruto ratheṣu |
RV_5,060.02c vanā cid ugrā jihate ni vo bhiyā pṛthivī cid rejate parvataś cit ||
RV_5,060.03a parvataś cin mahi vṛddho bibhāya divaś cit sānu rejata svane vaḥ |
RV_5,060.03c yat krīḷatha maruta ṛṣṭimanta āpa iva sadhryañco dhavadhve ||
RV_5,060.04a varā ived raivatāso hiraṇyair abhi svadhābhis tanvaḥ pipiśre |
RV_5,060.04c śriye śreyāṃsas tavaso ratheṣu satrā mahāṃsi cakrire tanūṣu ||
RV_5,060.05a ajyeṣṭhāso akaniṣṭhāsa ete sam bhrātaro vāvṛdhuḥ saubhagāya |
RV_5,060.05c yuvā pitā svapā rudra eṣāṃ sudughā pṛśniḥ sudinā marudbhyaḥ ||
RV_5,060.06a yad uttame maruto madhyame vā yad vāvame subhagāso divi ṣṭha |
RV_5,060.06c ato no rudrā uta vā nv asyāgne vittād dhaviṣo yad yajāma ||
RV_5,060.07a agniś ca yan maruto viśvavedaso divo vahadhva uttarād adhi ṣṇubhiḥ |
RV_5,060.07c te mandasānā dhunayo riśādaso vāmaṃ dhatta yajamānāya sunvate ||
RV_5,060.08a agne marudbhiḥ śubhayadbhir ṛkvabhiḥ somam piba mandasāno gaṇaśribhiḥ |
RV_5,060.08c pāvakebhir viśvaminvebhir āyubhir vaiśvānara pradivā ketunā sajūḥ ||

RV_5,061.01a ke ṣṭhā naraḥ śreṣṭhatamā ya eka-eka āyaya |
RV_5,061.01c paramasyāḥ parāvataḥ ||
RV_5,061.02a kva vo 'śvāḥ kvābhīśavaḥ kathaṃ śeka kathā yaya |
RV_5,061.02c pṛṣṭhe sado nasor yamaḥ ||
RV_5,061.03a jaghane coda eṣāṃ vi sakthāni naro yamuḥ |
RV_5,061.03c putrakṛthe na janayaḥ ||
RV_5,061.04a parā vīrāsa etana maryāso bhadrajānayaḥ |
RV_5,061.04c agnitapo yathāsatha ||
RV_5,061.05a sanat sāśvyam paśum uta gavyaṃ śatāvayam |
RV_5,061.05c śyāvāśvastutāya yā dor vīrāyopabarbṛhat ||
RV_5,061.06a uta tvā strī śaśīyasī puṃso bhavati vasyasī |
RV_5,061.06c adevatrād arādhasaḥ ||
RV_5,061.07a vi yā jānāti jasuriṃ vi tṛṣyantaṃ vi kāminam |
RV_5,061.07c devatrā kṛṇute manaḥ ||
RV_5,061.08a uta ghā nemo astutaḥ pumāṃ iti bruve paṇiḥ |
RV_5,061.08c sa vairadeya it samaḥ ||
RV_5,061.09a uta me 'rapad yuvatir mamanduṣī prati śyāvāya vartanim |
RV_5,061.09c vi rohitā purumīḷhāya yematur viprāya dīrghayaśase ||
RV_5,061.10a yo me dhenūnāṃ śataṃ vaidadaśvir yathā dadat |
RV_5,061.10c taranta iva maṃhanā ||
RV_5,061.11a ya īṃ vahanta āśubhiḥ pibanto madiram madhu |
RV_5,061.11c atra śravāṃsi dadhire ||
RV_5,061.12a yeṣāṃ śriyādhi rodasī vibhrājante ratheṣv ā |
RV_5,061.12c divi rukma ivopari ||
RV_5,061.13a yuvā sa māruto gaṇas tveṣaratho anedyaḥ |
RV_5,061.13c śubhaṃyāvāpratiṣkutaḥ ||
RV_5,061.14a ko veda nūnam eṣāṃ yatrā madanti dhūtayaḥ |
RV_5,061.14c ṛtajātā arepasaḥ ||
RV_5,061.15a yūyam martaṃ vipanyavaḥ praṇetāra itthā dhiyā |
RV_5,061.15c śrotāro yāmahūtiṣu ||
RV_5,061.16a te no vasūni kāmyā puruścandrā riśādasaḥ |
RV_5,061.16c ā yajñiyāso vavṛttana ||
RV_5,061.17a etam me stomam ūrmye dārbhyāya parā vaha |
RV_5,061.17c giro devi rathīr iva ||
RV_5,061.18a uta me vocatād iti sutasome rathavītau |
RV_5,061.18c na kāmo apa veti me ||
RV_5,061.19a eṣa kṣeti rathavītir maghavā gomatīr anu |
RV_5,061.19c parvateṣv apaśritaḥ ||

RV_5,062.01a ṛtena ṛtam apihitaṃ dhruvaṃ vāṃ sūryasya yatra vimucanty aśvān |
RV_5,062.01c daśa śatā saha tasthus tad ekaṃ devānāṃ śreṣṭhaṃ vapuṣām apaśyam ||
RV_5,062.02a tat su vām mitrāvaruṇā mahitvam īrmā tasthuṣīr ahabhir duduhre |
RV_5,062.02c viśvāḥ pinvathaḥ svasarasya dhenā anu vām ekaḥ pavir ā vavarta ||
RV_5,062.03a adhārayatam pṛthivīm uta dyām mitrarājānā varuṇā mahobhiḥ |
RV_5,062.03c vardhayatam oṣadhīḥ pinvataṃ gā ava vṛṣṭiṃ sṛjataṃ jīradānū ||
RV_5,062.04a ā vām aśvāsaḥ suyujo vahantu yataraśmaya upa yantv arvāk |
RV_5,062.04c ghṛtasya nirṇig anu vartate vām upa sindhavaḥ pradivi kṣaranti ||
RV_5,062.05a anu śrutām amatiṃ vardhad urvīm barhir iva yajuṣā rakṣamāṇā |
RV_5,062.05c namasvantā dhṛtadakṣādhi garte mitrāsāthe varuṇeḷāsv antaḥ ||
RV_5,062.06a akravihastā sukṛte paraspā yaṃ trāsāthe varuṇeḷāsv antaḥ |
RV_5,062.06c rājānā kṣatram ahṛṇīyamānā sahasrasthūṇam bibhṛthaḥ saha dvau ||
RV_5,062.07a hiraṇyanirṇig ayo asya sthūṇā vi bhrājate divy aśvājanīva |
RV_5,062.07c bhadre kṣetre nimitā tilvile vā sanema madhvo adhigartyasya ||
RV_5,062.08a hiraṇyarūpam uṣaso vyuṣṭāv ayasthūṇam uditā sūryasya |
RV_5,062.08c ā rohatho varuṇa mitra gartam ataś cakṣāthe aditiṃ ditiṃ ca ||
RV_5,062.09a yad baṃhiṣṭhaṃ nātividhe sudānū acchidraṃ śarma bhuvanasya gopā |
RV_5,062.09c tena no mitrāvaruṇāv aviṣṭaṃ siṣāsanto jigīvāṃsaḥ syāma ||

RV_5,063.01a ṛtasya gopāv adhi tiṣṭhatho rathaṃ satyadharmāṇā parame vyomani |
RV_5,063.01c yam atra mitrāvaruṇāvatho yuvaṃ tasmai vṛṣṭir madhumat pinvate divaḥ ||
RV_5,063.02a samrājāv asya bhuvanasya rājatho mitrāvaruṇā vidathe svardṛśā |
RV_5,063.02c vṛṣṭiṃ vāṃ rādho amṛtatvam īmahe dyāvāpṛthivī vi caranti tanyavaḥ ||
RV_5,063.03a samrājā ugrā vṛṣabhā divas patī pṛthivyā mitrāvaruṇā vicarṣaṇī |
RV_5,063.03c citrebhir abhrair upa tiṣṭhatho ravaṃ dyāṃ varṣayatho asurasya māyayā ||
RV_5,063.04a māyā vām mitrāvaruṇā divi śritā sūryo jyotiś carati citram āyudham |
RV_5,063.04c tam abhreṇa vṛṣṭyā gūhatho divi parjanya drapsā madhumanta īrate ||
RV_5,063.05a rathaṃ yuñjate marutaḥ śubhe sukhaṃ śūro na mitrāvaruṇā gaviṣṭiṣu |
RV_5,063.05c rajāṃsi citrā vi caranti tanyavo divaḥ samrājā payasā na ukṣatam ||
RV_5,063.06a vācaṃ su mitrāvaruṇāv irāvatīm parjanyaś citrāṃ vadati tviṣīmatīm |
RV_5,063.06c abhrā vasata marutaḥ su māyayā dyāṃ varṣayatam aruṇām arepasam ||
RV_5,063.07a dharmaṇā mitrāvaruṇā vipaścitā vratā rakṣethe asurasya māyayā |
RV_5,063.07c ṛtena viśvam bhuvanaṃ vi rājathaḥ sūryam ā dhattho divi citryaṃ ratham ||

RV_5,064.01a varuṇaṃ vo riśādasam ṛcā mitraṃ havāmahe |
RV_5,064.01c pari vrajeva bāhvor jaganvāṃsā svarṇaram ||
RV_5,064.02a tā bāhavā sucetunā pra yantam asmā arcate |
RV_5,064.02c śevaṃ hi jāryaṃ vāṃ viśvāsu kṣāsu joguve ||
RV_5,064.03a yan nūnam aśyāṃ gatim mitrasya yāyām pathā |
RV_5,064.03c asya priyasya śarmaṇy ahiṃsānasya saścire ||
RV_5,064.04a yuvābhyām mitrāvaruṇopamaṃ dheyām ṛcā |
RV_5,064.04c yad dha kṣaye maghonāṃ stotṝṇāṃ ca spūrdhase ||
RV_5,064.05a ā no mitra sudītibhir varuṇaś ca sadhastha ā |
RV_5,064.05c sve kṣaye maghonāṃ sakhīnāṃ ca vṛdhase ||
RV_5,064.06a yuvaṃ no yeṣu varuṇa kṣatram bṛhac ca bibhṛthaḥ |
RV_5,064.06c uru ṇo vājasātaye kṛtaṃ rāye svastaye ||
RV_5,064.07a ucchantyām me yajatā devakṣatre ruśadgavi |
RV_5,064.07c sutaṃ somaṃ na hastibhir ā paḍbhir dhāvataṃ narā bibhratāv arcanānasam ||

RV_5,065.01a yaś ciketa sa sukratur devatrā sa bravītu naḥ |
RV_5,065.01c varuṇo yasya darśato mitro vā vanate giraḥ ||
RV_5,065.02a tā hi śreṣṭhavarcasā rājānā dīrghaśruttamā |
RV_5,065.02c tā satpatī ṛtāvṛdha ṛtāvānā jane-jane ||
RV_5,065.03a tā vām iyāno 'vase pūrvā upa bruve sacā |
RV_5,065.03c svaśvāsaḥ su cetunā vājāṃ abhi pra dāvane ||
RV_5,065.04a mitro aṃhoś cid ād uru kṣayāya gātuṃ vanate |
RV_5,065.04c mitrasya hi pratūrvataḥ sumatir asti vidhataḥ ||
RV_5,065.05a vayam mitrasyāvasi syāma saprathastame |
RV_5,065.05c anehasas tvotayaḥ satrā varuṇaśeṣasaḥ ||
RV_5,065.06a yuvam mitremaṃ janaṃ yatathaḥ saṃ ca nayathaḥ |
RV_5,065.06c mā maghonaḥ pari khyatam mo asmākam ṛṣīṇāṃ gopīthe na uruṣyatam ||

RV_5,066.01a ā cikitāna sukratū devau marta riśādasā |
RV_5,066.01c varuṇāya ṛtapeśase dadhīta prayase mahe ||
RV_5,066.02a tā hi kṣatram avihrutaṃ samyag asuryam āśāte |
RV_5,066.02c adha vrateva mānuṣaṃ svar ṇa dhāyi darśatam ||
RV_5,066.03a tā vām eṣe rathānām urvīṃ gavyūtim eṣām |
RV_5,066.03c rātahavyasya suṣṭutiṃ dadhṛk stomair manāmahe ||
RV_5,066.04a adhā hi kāvyā yuvaṃ dakṣasya pūrbhir adbhutā |
RV_5,066.04c ni ketunā janānāṃ cikethe pūtadakṣasā ||
RV_5,066.05a tad ṛtam pṛthivi bṛhac chravaeṣa ṛṣīṇām |
RV_5,066.05c jrayasānāv aram pṛthv ati kṣaranti yāmabhiḥ ||
RV_5,066.06a ā yad vām īyacakṣasā mitra vayaṃ ca sūrayaḥ |
RV_5,066.06c vyaciṣṭhe bahupāyye yatemahi svarājye ||

RV_5,067.01a baḷ itthā deva niṣkṛtam ādityā yajatam bṛhat |
RV_5,067.01c varuṇa mitrāryaman varṣiṣṭhaṃ kṣatram āśāthe ||
RV_5,067.02a ā yad yoniṃ hiraṇyayaṃ varuṇa mitra sadathaḥ |
RV_5,067.02c dhartārā carṣaṇīnāṃ yantaṃ sumnaṃ riśādasā ||
RV_5,067.03a viśve hi viśvavedaso varuṇo mitro aryamā |
RV_5,067.03c vratā padeva saścire pānti martyaṃ riṣaḥ ||
RV_5,067.04a te hi satyā ṛtaspṛśa ṛtāvāno jane-jane |
RV_5,067.04c sunīthāsaḥ sudānavo 'ṃhoś cid urucakrayaḥ ||
RV_5,067.05a ko nu vām mitrāstuto varuṇo vā tanūnām |
RV_5,067.05c tat su vām eṣate matir atribhya eṣate matiḥ ||

RV_5,068.01a pra vo mitrāya gāyata varuṇāya vipā girā |
RV_5,068.01c mahikṣatrāv ṛtam bṛhat ||
RV_5,068.02a samrājā yā ghṛtayonī mitraś cobhā varuṇaś ca |
RV_5,068.02c devā deveṣu praśastā ||
RV_5,068.03a tā naḥ śaktam pārthivasya maho rāyo divyasya |
RV_5,068.03c mahi vāṃ kṣatraṃ deveṣu ||
RV_5,068.04a ṛtam ṛtena sapanteṣiraṃ dakṣam āśāte |
RV_5,068.04c adruhā devau vardhete ||
RV_5,068.05a vṛṣṭidyāvā rītyāpeṣas patī dānumatyāḥ |
RV_5,068.05c bṛhantaṃ gartam āśāte ||

RV_5,069.01a trī rocanā varuṇa trīṃr uta dyūn trīṇi mitra dhārayatho rajāṃsi |
RV_5,069.01c vāvṛdhānāv amatiṃ kṣatriyasyānu vrataṃ rakṣamāṇāv ajuryam ||
RV_5,069.02a irāvatīr varuṇa dhenavo vām madhumad vāṃ sindhavo mitra duhre |
RV_5,069.02c trayas tasthur vṛṣabhāsas tisṛṇāṃ dhiṣaṇānāṃ retodhā vi dyumantaḥ ||
RV_5,069.03a prātar devīm aditiṃ johavīmi madhyandina uditā sūryasya |
RV_5,069.03c rāye mitrāvaruṇā sarvatāteḷe tokāya tanayāya śaṃ yoḥ ||
RV_5,069.04a yā dhartārā rajaso rocanasyotādityā divyā pārthivasya |
RV_5,069.04c na vāṃ devā amṛtā ā minanti vratāni mitrāvaruṇā dhruvāṇi ||

RV_5,070.01a purūruṇā cid dhy asty avo nūnaṃ vāṃ varuṇa |
RV_5,070.01c mitra vaṃsi vāṃ sumatim ||
RV_5,070.02a tā vāṃ samyag adruhvāṇeṣam aśyāma dhāyase |
RV_5,070.02c vayaṃ te rudrā syāma ||
RV_5,070.03a pātaṃ no rudrā pāyubhir uta trāyethāṃ sutrātrā |
RV_5,070.03c turyāma dasyūn tanūbhiḥ ||
RV_5,070.04a mā kasyādbhutakratū yakṣam bhujemā tanūbhiḥ |
RV_5,070.04c mā śeṣasā mā tanasā ||

RV_5,071.01a ā no gantaṃ riśādasā varuṇa mitra barhaṇā |
RV_5,071.01c upemaṃ cārum adhvaram ||
RV_5,071.02a viśvasya hi pracetasā varuṇa mitra rājathaḥ |
RV_5,071.02c īśānā pipyataṃ dhiyaḥ ||
RV_5,071.03a upa naḥ sutam ā gataṃ varuṇa mitra dāśuṣaḥ |
RV_5,071.03c asya somasya pītaye ||

RV_5,072.01a ā mitre varuṇe vayaṃ gīrbhir juhumo atrivat |
RV_5,072.01c ni barhiṣi sadataṃ somapītaye ||
RV_5,072.02a vratena stho dhruvakṣemā dharmaṇā yātayajjanā |
RV_5,072.02c ni barhiṣi sadataṃ somapītaye ||
RV_5,072.03a mitraś ca no varuṇaś ca juṣetāṃ yajñam iṣṭaye |
RV_5,072.03c ni barhiṣi sadatāṃ somapītaye ||

RV_5,073.01a yad adya sthaḥ parāvati yad arvāvaty aśvinā |
RV_5,073.01c yad vā purū purubhujā yad antarikṣa ā gatam ||
RV_5,073.02a iha tyā purubhūtamā purū daṃsāṃsi bibhratā |
RV_5,073.02c varasyā yāmy adhrigū huve tuviṣṭamā bhuje ||
RV_5,073.03a īrmānyad vapuṣe vapuś cakraṃ rathasya yemathuḥ |
RV_5,073.03c pary anyā nāhuṣā yugā mahnā rajāṃsi dīyathaḥ ||
RV_5,073.04a tad ū ṣu vām enā kṛtaṃ viśvā yad vām anu ṣṭave |
RV_5,073.04c nānā jātāv arepasā sam asme bandhum eyathuḥ ||
RV_5,073.05a ā yad vāṃ sūryā rathaṃ tiṣṭhad raghuṣyadaṃ sadā |
RV_5,073.05c pari vām aruṣā vayo ghṛṇā varanta ātapaḥ ||
RV_5,073.06a yuvor atriś ciketati narā sumnena cetasā |
RV_5,073.06c gharmaṃ yad vām arepasaṃ nāsatyāsnā bhuraṇyati ||
RV_5,073.07a ugro vāṃ kakuho yayiḥ śṛṇve yāmeṣu saṃtaniḥ |
RV_5,073.07c yad vāṃ daṃsobhir aśvinātrir narāvavartati ||
RV_5,073.08a madhva ū ṣu madhūyuvā rudrā siṣakti pipyuṣī |
RV_5,073.08c yat samudrāti parṣathaḥ pakvāḥ pṛkṣo bharanta vām ||
RV_5,073.09a satyam id vā u aśvinā yuvām āhur mayobhuvā |
RV_5,073.09c tā yāman yāmahūtamā yāmann ā mṛḷayattamā ||
RV_5,073.10a imā brahmāṇi vardhanāśvibhyāṃ santu śantamā |
RV_5,073.10c yā takṣāma rathāṃ ivāvocāma bṛhan namaḥ ||
RV_5,074.01a kūṣṭho devāv aśvinādyā divo manāvasū |
RV_5,074.01c tac chravatho vṛṣaṇvasū atrir vām ā vivāsati ||
RV_5,074.02a kuha tyā kuha nu śrutā divi devā nāsatyā |
RV_5,074.02c kasminn ā yatatho jane ko vāṃ nadīnāṃ sacā ||
RV_5,074.03a kaṃ yāthaḥ kaṃ ha gacchathaḥ kam acchā yuñjāthe ratham |
RV_5,074.03c kasya brahmāṇi raṇyatho vayaṃ vām uśmasīṣṭaye ||
RV_5,074.04a pauraṃ cid dhy udaprutam paura paurāya jinvathaḥ |
RV_5,074.04c yad īṃ gṛbhītatātaye siṃham iva druhas pade ||
RV_5,074.05a pra cyavānāj jujuruṣo vavrim atkaṃ na muñcathaḥ |
RV_5,074.05c yuvā yadī kṛthaḥ punar ā kāmam ṛṇve vadhvaḥ ||
RV_5,074.06a asti hi vām iha stotā smasi vāṃ saṃdṛśi śriye |
RV_5,074.06c nū śrutam ma ā gatam avobhir vājinīvasū ||
RV_5,074.07a ko vām adya purūṇām ā vavne martyānām |
RV_5,074.07c ko vipro vipravāhasā ko yajñair vājinīvasū ||
RV_5,074.08a ā vāṃ ratho rathānāṃ yeṣṭho yātv aśvinā |
RV_5,074.08c purū cid asmayus tira āṅgūṣo martyeṣv ā ||
RV_5,074.09a śam ū ṣu vām madhūyuvāsmākam astu carkṛtiḥ |
RV_5,074.09c arvācīnā vicetasā vibhiḥ śyeneva dīyatam ||
RV_5,074.10a aśvinā yad dha karhi cic chuśrūyātam imaṃ havam |
RV_5,074.10c vasvīr ū ṣu vām bhujaḥ pṛñcanti su vām pṛcaḥ ||

RV_5,075.01a prati priyatamaṃ rathaṃ vṛṣaṇaṃ vasuvāhanam |
RV_5,075.01c stotā vām aśvināv ṛṣi stomena prati bhūṣati mādhvī mama śrutaṃ havam ||
RV_5,075.02a atyāyātam aśvinā tiro viśvā ahaṃ sanā |
RV_5,075.02c dasrā hiraṇyavartanī suṣumnā sindhuvāhasā mādhvī mama śrutaṃ havam ||
RV_5,075.03a ā no ratnāni bibhratāv aśvinā gacchataṃ yuvam |
RV_5,075.03c rudrā hiraṇyavartanī juṣāṇā vājinīvasū mādhvī mama śrutaṃ havam ||
RV_5,075.04a suṣṭubho vāṃ vṛṣaṇvasū rathe vāṇīcy āhitā |
RV_5,075.04c uta vāṃ kakuho mṛgaḥ pṛkṣaḥ kṛṇoti vāpuṣo mādhvī mama śrutaṃ havam ||
RV_5,075.05a bodhinmanasā rathyeṣirā havanaśrutā |
RV_5,075.05c vibhiś cyavānam aśvinā ni yātho advayāvinam mādhvī mama śrutaṃ havam ||
RV_5,075.06a ā vāṃ narā manoyujo 'śvāsaḥ pruṣitapsavaḥ |
RV_5,075.06c vayo vahantu pītaye saha sumnebhir aśvinā mādhvī mama śrutaṃ havam ||
RV_5,075.07a aśvināv eha gacchataṃ nāsatyā mā vi venatam |
RV_5,075.07c tiraś cid aryayā pari vartir yātam adābhyā mādhvī mama śrutaṃ havam ||
RV_5,075.08a asmin yajñe adābhyā jaritāraṃ śubhas patī |
RV_5,075.08c avasyum aśvinā yuvaṃ gṛṇantam upa bhūṣatho mādhvī mama śrutaṃ havam ||
RV_5,075.09a abhūd uṣā ruśatpaśur āgnir adhāyy ṛtviyaḥ |
RV_5,075.09c ayoji vāṃ vṛṣaṇvasū ratho dasrāv amartyo mādhvī mama śrutaṃ havam ||

RV_5,076.01a ā bhāty agnir uṣasām anīkam ud viprāṇāṃ devayā vāco asthuḥ |
RV_5,076.01c arvāñcā nūnaṃ rathyeha yātam pīpivāṃsam aśvinā gharmam accha ||
RV_5,076.02a na saṃskṛtam pra mimīto gamiṣṭhānti nūnam aśvinopastuteha |
RV_5,076.02c divābhipitve 'vasāgamiṣṭhā praty avartiṃ dāśuṣe śambhaviṣṭhā ||
RV_5,076.03a utā yātaṃ saṃgave prātar ahno madhyandina uditā sūryasya |
RV_5,076.03c divā naktam avasā śantamena nedānīm pītir aśvinā tatāna ||
RV_5,076.04a idaṃ hi vām pradivi sthānam oka ime gṛhā aśvinedaṃ duroṇam |
RV_5,076.04c ā no divo bṛhataḥ parvatād ādbhyo yātam iṣam ūrjaṃ vahantā ||
RV_5,076.05a sam aśvinor avasā nūtanena mayobhuvā supraṇītī gamema |
RV_5,076.05c ā no rayiṃ vahatam ota vīrān ā viśvāny amṛtā saubhagāni ||

RV_5,077.01a prātaryāvāṇā prathamā yajadhvam purā gṛdhrād araruṣaḥ pibātaḥ |
RV_5,077.01c prātar hi yajñam aśvinā dadhāte pra śaṃsanti kavayaḥ pūrvabhājaḥ ||
RV_5,077.02a prātar yajadhvam aśvinā hinota na sāyam asti devayā ajuṣṭam |
RV_5,077.02c utānyo asmad yajate vi cāvaḥ pūrvaḥ-pūrvo yajamāno vanīyān ||
RV_5,077.03a hiraṇyatvaṅ madhuvarṇo ghṛtasnuḥ pṛkṣo vahann ā ratho vartate vām |
RV_5,077.03c manojavā aśvinā vātaraṃhā yenātiyātho duritāni viśvā ||
RV_5,077.04a yo bhūyiṣṭhaṃ nāsatyābhyāṃ viveṣa caniṣṭham pitvo rarate vibhāge |
RV_5,077.04c sa tokam asya pīparac chamībhir anūrdhvabhāsaḥ sadam it tuturyāt ||
RV_5,077.05a sam aśvinor avasā nūtanena mayobhuvā supraṇītī gamema |
RV_5,077.05c ā no rayiṃ vahatam ota vīrān ā viśvāny amṛtā saubhagāni ||

RV_5,078.01a aśvināv eha gacchataṃ nāsatyā mā vi venatam |
RV_5,078.01c haṃsāv iva patatam ā sutāṃ upa ||
RV_5,078.02a aśvinā hariṇāv iva gaurāv ivānu yavasam |
RV_5,078.02c haṃsāv iva patatam ā sutāṃ upa ||
RV_5,078.03a aśvinā vājinīvasū juṣethāṃ yajñam iṣṭaye |
RV_5,078.03c haṃsāv iva patatam ā sutāṃ upa ||
RV_5,078.04a atrir yad vām avarohann ṛbīsam ajohavīn nādhamāneva yoṣā |
RV_5,078.04c śyenasya cij javasā nūtanenāgacchatam aśvinā śantamena ||
RV_5,078.05a vi jihīṣva vanaspate yoniḥ sūṣyantyā iva |
RV_5,078.05c śrutam me aśvinā havaṃ saptavadhriṃ ca muñcatam ||
RV_5,078.06a bhītāya nādhamānāya ṛṣaye saptavadhraye |
RV_5,078.06c māyābhir aśvinā yuvaṃ vṛkṣaṃ saṃ ca vi cācathaḥ ||
RV_5,078.07a yathā vātaḥ puṣkariṇīṃ samiṅgayati sarvataḥ |
RV_5,078.07c evā te garbha ejatu niraitu daśamāsyaḥ ||
RV_5,078.08a yathā vāto yathā vanaṃ yathā samudra ejati |
RV_5,078.08c evā tvaṃ daśamāsya sahāvehi jarāyuṇā ||
RV_5,078.09a daśa māsāñ chaśayānaḥ kumāro adhi mātari |
RV_5,078.09c niraitu jīvo akṣato jīvo jīvantyā adhi ||

RV_5,079.01a mahe no adya bodhayoṣo rāye divitmatī |
RV_5,079.01c yathā cin no abodhayaḥ satyaśravasi vāyye sujāte aśvasūnṛte ||
RV_5,079.02a yā sunīthe śaucadrathe vy auccho duhitar divaḥ |
RV_5,079.02c sā vy uccha sahīyasi satyaśravasi vāyye sujāte aśvasūnṛte ||
RV_5,079.03a sā no adyābharadvasur vy ucchā duhitar divaḥ |
RV_5,079.03c yo vy aucchaḥ sahīyasi satyaśravasi vāyye sujāte aśvasūnṛte ||
RV_5,079.04a abhi ye tvā vibhāvari stomair gṛṇanti vahnayaḥ |
RV_5,079.04c maghair maghoni suśriyo dāmanvantaḥ surātayaḥ sujāte aśvasūnṛte ||
RV_5,079.05a yac cid dhi te gaṇā ime chadayanti maghattaye |
RV_5,079.05c pari cid vaṣṭayo dadhur dadato rādho ahrayaṃ sujāte aśvasūnṛte ||
RV_5,079.06a aiṣu dhā vīravad yaśa uṣo maghoni sūriṣu |
RV_5,079.06c ye no rādhāṃsy ahrayā maghavāno arāsata sujāte aśvasūnṛte ||
RV_5,079.07a tebhyo dyumnam bṛhad yaśa uṣo maghony ā vaha |
RV_5,079.07c ye no rādhāṃsy aśvyā gavyā bhajanta sūrayaḥ sujāte aśvasūnṛte ||
RV_5,079.08a uta no gomatīr iṣa ā vahā duhitar divaḥ |
RV_5,079.08c sākaṃ sūryasya raśmibhiḥ śukraiḥ śocadbhir arcibhiḥ sujāte aśvasūnṛte ||
RV_5,079.09a vy ucchā duhitar divo mā ciraṃ tanuthā apaḥ |
RV_5,079.09c net tvā stenaṃ yathā ripuṃ tapāti sūro arciṣā sujāte aśvasūnṛte ||
RV_5,079.10a etāvad ved uṣas tvam bhūyo vā dātum arhasi |
RV_5,079.10c yā stotṛbhyo vibhāvary ucchantī na pramīyase sujāte aśvasūnṛte ||

RV_5,080.01a dyutadyāmānam bṛhatīm ṛtena ṛtāvarīm aruṇapsuṃ vibhātīm |
RV_5,080.01c devīm uṣasaṃ svar āvahantīm prati viprāso matibhir jarante ||
RV_5,080.02a eṣā janaṃ darśatā bodhayantī sugān pathaḥ kṛṇvatī yāty agre |
RV_5,080.02c bṛhadrathā bṛhatī viśvaminvoṣā jyotir yacchaty agre ahnām ||
RV_5,080.03a eṣā gobhir aruṇebhir yujānāsredhantī rayim aprāyu cakre |
RV_5,080.03c patho radantī suvitāya devī puruṣṭutā viśvavārā vi bhāti ||
RV_5,080.04a eṣā vyenī bhavati dvibarhā āviṣkṛṇvānā tanvam purastāt |
RV_5,080.04c ṛtasya panthām anv eti sādhu prajānatīva na diśo mināti ||
RV_5,080.05a eṣā śubhrā na tanvo vidānordhveva snātī dṛśaye no asthāt |
RV_5,080.05c apa dveṣo bādhamānā tamāṃsy uṣā divo duhitā jyotiṣāgāt ||
RV_5,080.06a eṣā pratīcī duhitā divo nṝn yoṣeva bhadrā ni riṇīte apsaḥ |
RV_5,080.06c vyūrṇvatī dāśuṣe vāryāṇi punar jyotir yuvatiḥ pūrvathākaḥ ||

RV_5,081.01a yuñjate mana uta yuñjate dhiyo viprā viprasya bṛhato vipaścitaḥ |
RV_5,081.01c vi hotrā dadhe vayunāvid eka in mahī devasya savituḥ pariṣṭutiḥ ||
RV_5,081.02a viśvā rūpāṇi prati muñcate kaviḥ prāsāvīd bhadraṃ dvipade catuṣpade |
RV_5,081.02c vi nākam akhyat savitā vareṇyo 'nu prayāṇam uṣaso vi rājati ||
RV_5,081.03a yasya prayāṇam anv anya id yayur devā devasya mahimānam ojasā |
RV_5,081.03c yaḥ pārthivāni vimame sa etaśo rajāṃsi devaḥ savitā mahitvanā ||
RV_5,081.04a uta yāsi savitas trīṇi rocanota sūryasya raśmibhiḥ sam ucyasi |
RV_5,081.04c uta rātrīm ubhayataḥ parīyasa uta mitro bhavasi deva dharmabhiḥ ||
RV_5,081.05a uteśiṣe prasavasya tvam eka id uta pūṣā bhavasi deva yāmabhiḥ |
RV_5,081.05c utedaṃ viśvam bhuvanaṃ vi rājasi śyāvāśvas te savita stomam ānaśe ||

RV_5,082.01a tat savitur vṛṇīmahe vayaṃ devasya bhojanam |
RV_5,082.01c śreṣṭhaṃ sarvadhātamaṃ turam bhagasya dhīmahi ||
RV_5,082.02a asya hi svayaśastaraṃ savituḥ kac cana priyam |
RV_5,082.02c na minanti svarājyam ||
RV_5,082.03a sa hi ratnāni dāśuṣe suvāti savitā bhagaḥ |
RV_5,082.03c tam bhāgaṃ citram īmahe ||
RV_5,082.04a adyā no deva savitaḥ prajāvat sāvīḥ saubhagam |
RV_5,082.04c parā duṣṣvapnyaṃ suva ||
RV_5,082.05a viśvāni deva savitar duritāni parā suva |
RV_5,082.05c yad bhadraṃ tan na ā suva ||
RV_5,082.06a anāgaso aditaye devasya savituḥ save |
RV_5,082.06c viśvā vāmāni dhīmahi ||
RV_5,082.07a ā viśvadevaṃ satpatiṃ sūktair adyā vṛṇīmahe |
RV_5,082.07c satyasavaṃ savitāram ||
RV_5,082.08a ya ime ubhe ahanī pura ety aprayucchan |
RV_5,082.08c svādhīr devaḥ savitā ||
RV_5,082.09a ya imā viśvā jātāny āśrāvayati ślokena |
RV_5,082.09c pra ca suvāti savitā ||

RV_5,083.01a acchā vada tavasaṃ gīrbhir ābhi stuhi parjanyaṃ namasā vivāsa |
RV_5,083.01c kanikradad vṛṣabho jīradānū reto dadhāty oṣadhīṣu garbham ||
RV_5,083.02a vi vṛkṣān hanty uta hanti rakṣaso viśvam bibhāya bhuvanam mahāvadhāt |
RV_5,083.02c utānāgā īṣate vṛṣṇyāvato yat parjanya stanayan hanti duṣkṛtaḥ ||
RV_5,083.03a rathīva kaśayāśvāṃ abhikṣipann āvir dūtān kṛṇute varṣyāṃ aha |
RV_5,083.03c dūrāt siṃhasya stanathā ud īrate yat parjanyaḥ kṛṇute varṣyaṃ nabhaḥ ||
RV_5,083.04a pra vātā vānti patayanti vidyuta ud oṣadhīr jihate pinvate svaḥ |
RV_5,083.04c irā viśvasmai bhuvanāya jāyate yat parjanyaḥ pṛthivīṃ retasāvati ||
RV_5,083.05a yasya vrate pṛthivī nannamīti yasya vrate śaphavaj jarbhurīti |
RV_5,083.05c yasya vrata oṣadhīr viśvarūpāḥ sa naḥ parjanya mahi śarma yaccha ||
RV_5,083.06a divo no vṛṣṭim maruto rarīdhvam pra pinvata vṛṣṇo aśvasya dhārāḥ |
RV_5,083.06c arvāṅ etena stanayitnunehy apo niṣiñcann asuraḥ pitā naḥ ||
RV_5,083.07a abhi kranda stanaya garbham ā dhā udanvatā pari dīyā rathena |
RV_5,083.07c dṛtiṃ su karṣa viṣitaṃ nyañcaṃ samā bhavantūdvato nipādāḥ ||
RV_5,083.08a mahāntaṃ kośam ud acā ni ṣiñca syandantāṃ kulyā viṣitāḥ purastāt |
RV_5,083.08c ghṛtena dyāvāpṛthivī vy undhi suprapāṇam bhavatv aghnyābhyaḥ ||
RV_5,083.09a yat parjanya kanikradat stanayan haṃsi duṣkṛtaḥ |
RV_5,083.09c pratīdaṃ viśvam modate yat kiṃ ca pṛthivyām adhi ||
RV_5,083.10a avarṣīr varṣam ud u ṣū gṛbhāyākar dhanvāny atyetavā u |
RV_5,083.10c ajījana oṣadhīr bhojanāya kam uta prajābhyo 'vido manīṣām ||

RV_5,084.01a baḷ itthā parvatānāṃ khidram bibharṣi pṛthivi |
RV_5,084.01c pra yā bhūmim pravatvati mahnā jinoṣi mahini ||
RV_5,084.02a stomāsas tvā vicāriṇi prati ṣṭobhanty aktubhiḥ |
RV_5,084.02c pra yā vājaṃ na heṣantam perum asyasy arjuni ||
RV_5,084.03a dṛḷhā cid yā vanaspatīn kṣmayā dardharṣy ojasā |
RV_5,084.03c yat te abhrasya vidyuto divo varṣanti vṛṣṭayaḥ ||

RV_5,085.01a pra samrāje bṛhad arcā gabhīram brahma priyaṃ varuṇāya śrutāya |
RV_5,085.01c vi yo jaghāna śamiteva carmopastire pṛthivīṃ sūryāya ||
RV_5,085.02a vaneṣu vy antarikṣaṃ tatāna vājam arvatsu paya usriyāsu |
RV_5,085.02c hṛtsu kratuṃ varuṇo apsv agniṃ divi sūryam adadhāt somam adrau ||
RV_5,085.03a nīcīnabāraṃ varuṇaḥ kavandham pra sasarja rodasī antarikṣam |
RV_5,085.03c tena viśvasya bhuvanasya rājā yavaṃ na vṛṣṭir vy unatti bhūma ||
RV_5,085.04a unatti bhūmim pṛthivīm uta dyāṃ yadā dugdhaṃ varuṇo vaṣṭy ād it |
RV_5,085.04c sam abhreṇa vasata parvatāsas taviṣīyantaḥ śrathayanta vīrāḥ ||
RV_5,085.05a imām ū ṣv āsurasya śrutasya mahīm māyāṃ varuṇasya pra vocam |
RV_5,085.05c māneneva tasthivāṃ antarikṣe vi yo mame pṛthivīṃ sūryeṇa ||
RV_5,085.06a imām ū nu kavitamasya māyām mahīṃ devasya nakir ā dadharṣa |
RV_5,085.06c ekaṃ yad udnā na pṛṇanty enīr āsiñcantīr avanayaḥ samudram ||
RV_5,085.07a aryamyaṃ varuṇa mitryaṃ vā sakhāyaṃ vā sadam id bhrātaraṃ vā |
RV_5,085.07c veśaṃ vā nityaṃ varuṇāraṇaṃ vā yat sīm āgaś cakṛmā śiśrathas tat ||
RV_5,085.08a kitavāso yad riripur na dīvi yad vā ghā satyam uta yan na vidma |
RV_5,085.08c sarvā tā vi ṣya śithireva devādhā te syāma varuṇa priyāsaḥ ||

RV_5,086.01a indrāgnī yam avatha ubhā vājeṣu martyam |
RV_5,086.01c dṛḷhā cit sa pra bhedati dyumnā vāṇīr iva tritaḥ ||
RV_5,086.02a yā pṛtanāsu duṣṭarā yā vājeṣu śravāyyā |
RV_5,086.02c yā pañca carṣaṇīr abhīndrāgnī tā havāmahe ||
RV_5,086.03a tayor id amavac chavas tigmā didyun maghonoḥ |
RV_5,086.03c prati druṇā gabhastyor gavāṃ vṛtraghna eṣate ||
RV_5,086.04a tā vām eṣe rathānām indrāgnī havāmahe |
RV_5,086.04c patī turasya rādhaso vidvāṃsā girvaṇastamā ||
RV_5,086.05a tā vṛdhantāv anu dyūn martāya devāv adabhā |
RV_5,086.05c arhantā cit puro dadhe 'ṃśeva devāv arvate ||
RV_5,086.06a evendrāgnibhyām ahāvi havyaṃ śūṣyaṃ ghṛtaṃ na pūtam adribhiḥ |
RV_5,086.06c tā sūriṣu śravo bṛhad rayiṃ gṛṇatsu didhṛtam iṣaṃ gṛṇatsu didhṛtam ||

RV_5,087.01a pra vo mahe matayo yantu viṣṇave marutvate girijā evayāmarut |
RV_5,087.01c pra śardhāya prayajyave sukhādaye tavase bhandadiṣṭaye dhunivratāya śavase ||
RV_5,087.02a pra ye jātā mahinā ye ca nu svayam pra vidmanā bruvata evayāmarut |
RV_5,087.02c kratvā tad vo maruto nādhṛṣe śavo dānā mahnā tad eṣām adhṛṣṭāso nādrayaḥ ||
RV_5,087.03a pra ye divo bṛhataḥ śṛṇvire girā suśukvānaḥ subhva evayāmarut |
RV_5,087.03c na yeṣām irī sadhastha īṣṭa āṃ agnayo na svavidyutaḥ pra syandrāso dhunīnām ||
RV_5,087.04a sa cakrame mahato nir urukramaḥ samānasmāt sadasa evayāmarut |
RV_5,087.04c yadāyukta tmanā svād adhi ṣṇubhir viṣpardhaso vimahaso jigāti śevṛdho nṛbhiḥ ||
RV_5,087.05a svano na vo 'mavān rejayad vṛṣā tveṣo yayis taviṣa evayāmarut |
RV_5,087.05c yenā sahanta ṛñjata svarociṣa sthāraśmāno hiraṇyayāḥ svāyudhāsa iṣmiṇaḥ ||
RV_5,087.06a apāro vo mahimā vṛddhaśavasas tveṣaṃ śavo 'vatv evayāmarut |
RV_5,087.06c sthātāro hi prasitau saṃdṛśi sthana te na uruṣyatā nidaḥ śuśukvāṃso nāgnayaḥ ||
RV_5,087.07a te rudrāsaḥ sumakhā agnayo yathā tuvidyumnā avantv evayāmarut |
RV_5,087.07c dīrgham pṛthu paprathe sadma pārthivaṃ yeṣām ajmeṣv ā mahaḥ śardhāṃsy adbhutainasām ||
RV_5,087.08a adveṣo no maruto gātum etana śrotā havaṃ jaritur evayāmarut |
RV_5,087.08c viṣṇor mahaḥ samanyavo yuyotana smad rathyo na daṃsanāpa dveṣāṃsi sanutaḥ ||
RV_5,087.09a gantā no yajñaṃ yajñiyāḥ suśami śrotā havam arakṣa evayāmarut |
RV_5,087.09c jyeṣṭhāso na parvatāso vyomani yūyaṃ tasya pracetasaḥ syāta durdhartavo nidaḥ ||



_____________________________________________________________





Ṛgveda 6



RV_6,001.01a tvaṃ hy agne prathamo manotāsyā dhiyo abhavo dasma hotā |
RV_6,001.01c tvaṃ sīṃ vṛṣann akṛṇor duṣṭarītu saho viśvasmai sahase sahadhyai ||
RV_6,001.02a adhā hotā ny asīdo yajīyān iḷas pada iṣayann īḍyaḥ san |
RV_6,001.02c taṃ tvā naraḥ prathamaṃ devayanto maho rāye citayanto anu gman ||
RV_6,001.03a vṛteva yantam bahubhir vasavyais tve rayiṃ jāgṛvāṃso anu gman |
RV_6,001.03c ruśantam agniṃ darśatam bṛhantaṃ vapāvantaṃ viśvahā dīdivāṃsam ||
RV_6,001.04a padaṃ devasya namasā vyantaḥ śravasyavaḥ śrava āpann amṛktam |
RV_6,001.04c nāmāni cid dadhire yajñiyāni bhadrāyāṃ te raṇayanta saṃdṛṣṭau ||
RV_6,001.05a tvāṃ vardhanti kṣitayaḥ pṛthivyāṃ tvāṃ rāya ubhayāso janānām |
RV_6,001.05c tvaṃ trātā taraṇe cetyo bhūḥ pitā mātā sadam in mānuṣāṇām ||
RV_6,001.06a saparyeṇyaḥ sa priyo vikṣv agnir hotā mandro ni ṣasādā yajīyān |
RV_6,001.06c taṃ tvā vayaṃ dama ā dīdivāṃsam upa jñubādho namasā sadema ||
RV_6,001.07a taṃ tvā vayaṃ sudhyo navyam agne sumnāyava īmahe devayantaḥ |
RV_6,001.07c tvaṃ viśo anayo dīdyāno divo agne bṛhatā rocanena ||
RV_6,001.08a viśāṃ kaviṃ viśpatiṃ śaśvatīnāṃ nitośanaṃ vṛṣabhaṃ carṣaṇīnām |
RV_6,001.08c pretīṣaṇim iṣayantam pāvakaṃ rājantam agniṃ yajataṃ rayīṇām ||
RV_6,001.09a so agna īje śaśame ca marto yas ta ānaṭ samidhā havyadātim |
RV_6,001.09c ya āhutim pari vedā namobhir viśvet sa vāmā dadhate tvotaḥ ||
RV_6,001.10a asmā u te mahi mahe vidhema namobhir agne samidhota havyaiḥ |
RV_6,001.10c vedī sūno sahaso gīrbhir ukthair ā te bhadrāyāṃ sumatau yatema ||
RV_6,001.11a ā yas tatantha rodasī vi bhāsā śravobhiś ca śravasyas tarutraḥ |
RV_6,001.11c bṛhadbhir vājai sthavirebhir asme revadbhir agne vitaraṃ vi bhāhi ||
RV_6,001.12a nṛvad vaso sadam id dhehy asme bhūri tokāya tanayāya paśvaḥ |
RV_6,001.12c pūrvīr iṣo bṛhatīr āre-aghā asme bhadrā sauśravasāni santu ||
RV_6,001.13a purūṇy agne purudhā tvāyā vasūni rājan vasutā te aśyām |
RV_6,001.13c purūṇi hi tve puruvāra santy agne vasu vidhate rājani tve ||

RV_6,002.01a tvaṃ hi kṣaitavad yaśo 'gne mitro na patyase |
RV_6,002.01c tvaṃ vicarṣaṇe śravo vaso puṣṭiṃ na puṣyasi ||
RV_6,002.02a tvāṃ hi ṣmā carṣaṇayo yajñebhir gīrbhir īḷate |
RV_6,002.02c tvāṃ vājī yāty avṛko rajastūr viśvacarṣaṇiḥ ||
RV_6,002.03a sajoṣas tvā divo naro yajñasya ketum indhate |
RV_6,002.03c yad dha sya mānuṣo janaḥ sumnāyur juhve adhvare ||
RV_6,002.04a ṛdhad yas te sudānave dhiyā martaḥ śaśamate |
RV_6,002.04c ūtī ṣa bṛhato divo dviṣo aṃho na tarati ||
RV_6,002.05a samidhā yas ta āhutiṃ niśitim martyo naśat |
RV_6,002.05c vayāvantaṃ sa puṣyati kṣayam agne śatāyuṣam ||
RV_6,002.06a tveṣas te dhūma ṛṇvati divi ṣañ chukra ātataḥ |
RV_6,002.06c sūro na hi dyutā tvaṃ kṛpā pāvaka rocase ||
RV_6,002.07a adhā hi vikṣv īḍyo 'si priyo no atithiḥ |
RV_6,002.07c raṇvaḥ purīva jūryaḥ sūnur na trayayāyyaḥ ||
RV_6,002.08a kratvā hi droṇe ajyase 'gne vājī na kṛtvyaḥ |
RV_6,002.08c parijmeva svadhā gayo 'tyo na hvāryaḥ śiśuḥ ||
RV_6,002.09a tvaṃ tyā cid acyutāgne paśur na yavase |
RV_6,002.09c dhāmā ha yat te ajara vanā vṛścanti śikvasaḥ ||
RV_6,002.10a veṣi hy adhvarīyatām agne hotā dame viśām |
RV_6,002.10c samṛdho viśpate kṛṇu juṣasva havyam aṅgiraḥ ||
RV_6,002.11a acchā no mitramaho deva devān agne vocaḥ sumatiṃ rodasyoḥ |
RV_6,002.11c vīhi svastiṃ sukṣitiṃ divo nṝn dviṣo aṃhāṃsi duritā tarema tā tarema tavāvasā tarema ||

RV_6,003.01a agne sa kṣeṣad ṛtapā ṛtejā uru jyotir naśate devayuṣ ṭe |
RV_6,003.01c yaṃ tvam mitreṇa varuṇaḥ sajoṣā deva pāsi tyajasā martam aṃhaḥ ||
RV_6,003.02a īje yajñebhiḥ śaśame śamībhir ṛdhadvārāyāgnaye dadāśa |
RV_6,003.02c evā cana taṃ yaśasām ajuṣṭir nāṃho martaṃ naśate na pradṛptiḥ ||
RV_6,003.03a sūro na yasya dṛśatir arepā bhīmā yad eti śucatas ta ā dhīḥ |
RV_6,003.03c heṣasvataḥ śurudho nāyam aktoḥ kutrā cid raṇvo vasatir vanejāḥ ||
RV_6,003.04a tigmaṃ cid ema mahi varpo asya bhasad aśvo na yamasāna āsā |
RV_6,003.04c vijehamānaḥ paraśur na jihvāṃ dravir na drāvayati dāru dhakṣat ||
RV_6,003.05a sa id asteva prati dhād asiṣyañ chiśīta tejo 'yaso na dhārām |
RV_6,003.05c citradhrajatir aratir yo aktor ver na druṣadvā raghupatmajaṃhāḥ ||
RV_6,003.06a sa īṃ rebho na prati vasta usrāḥ śociṣā rārapīti mitramahāḥ |
RV_6,003.06c naktaṃ ya īm aruṣo yo divā nṝn amartyo aruṣo yo divā nṝn ||
RV_6,003.07a divo na yasya vidhato navīnod vṛṣā rukṣa oṣadhīṣu nūnot |
RV_6,003.07c ghṛṇā na yo dhrajasā patmanā yann ā rodasī vasunā daṃ supatnī ||
RV_6,003.08a dhāyobhir vā yo yujyebhir arkair vidyun na davidyot svebhiḥ śuṣmaiḥ |
RV_6,003.08c śardho vā yo marutāṃ tatakṣa ṛbhur na tveṣo rabhasāno adyaut ||

RV_6,004.01a yathā hotar manuṣo devatātā yajñebhiḥ sūno sahaso yajāsi |
RV_6,004.01c evā no adya samanā samānān uśann agna uśato yakṣi devān ||
RV_6,004.02a sa no vibhāvā cakṣaṇir na vastor agnir vandāru vedyaś cano dhāt |
RV_6,004.02c viśvāyur yo amṛto martyeṣūṣarbhud bhūd atithir jātavedāḥ ||
RV_6,004.03a dyāvo na yasya panayanty abhvam bhāsāṃsi vaste sūryo na śukraḥ |
RV_6,004.03c vi ya inoty ajaraḥ pāvako 'śnasya cic chiśnathat pūrvyāṇi ||
RV_6,004.04a vadmā hi sūno asy admasadvā cakre agnir januṣājmānnam |
RV_6,004.04c sa tvaṃ na ūrjasana ūrjaṃ dhā rājeva jer avṛke kṣeṣy antaḥ ||
RV_6,004.05a nitikti yo vāraṇam annam atti vāyur na rāṣṭry aty ety aktūn |
RV_6,004.05c turyāma yas ta ādiśām arātīr atyo na hrutaḥ patataḥ parihrut ||
RV_6,004.06a ā sūryo na bhānumadbhir arkair agne tatantha rodasī vi bhāsā |
RV_6,004.06c citro nayat pari tamāṃsy aktaḥ śociṣā patmann auśijo na dīyan ||
RV_6,004.07a tvāṃ hi mandratamam arkaśokair vavṛmahe mahi naḥ śroṣy agne |
RV_6,004.07c indraṃ na tvā śavasā devatā vāyum pṛṇanti rādhasā nṛtamāḥ ||
RV_6,004.08a nū no agne 'vṛkebhiḥ svasti veṣi rāyaḥ pathibhiḥ parṣy aṃhaḥ |
RV_6,004.08c tā sūribhyo gṛṇate rāsi sumnam madema śatahimāḥ suvīrāḥ ||

RV_6,005.01a huve vaḥ sūnuṃ sahaso yuvānam adroghavācam matibhir yaviṣṭham |
RV_6,005.01c ya invati draviṇāni pracetā viśvavārāṇi puruvāro adhruk ||
RV_6,005.02a tve vasūni purvaṇīka hotar doṣā vastor erire yajñiyāsaḥ |
RV_6,005.02c kṣāmeva viśvā bhuvanāni yasmin saṃ saubhagāni dadhire pāvake ||
RV_6,005.03a tvaṃ vikṣu pradivaḥ sīda āsu kratvā rathīr abhavo vāryāṇām |
RV_6,005.03c ata inoṣi vidhate cikitvo vy ānuṣag jātavedo vasūni ||
RV_6,005.04a yo naḥ sanutyo abhidāsad agne yo antaro mitramaho vanuṣyāt |
RV_6,005.04c tam ajarebhir vṛṣabhis tava svais tapā tapiṣṭha tapasā tapasvān ||
RV_6,005.05a yas te yajñena samidhā ya ukthair arkebhiḥ sūno sahaso dadāśat |
RV_6,005.05c sa martyeṣv amṛta pracetā rāyā dyumnena śravasā vi bhāti ||
RV_6,005.06a sa tat kṛdhīṣitas tūyam agne spṛdho bādhasva sahasā sahasvān |
RV_6,005.06c yac chasyase dyubhir akto vacobhis taj juṣasva jaritur ghoṣi manma ||
RV_6,005.07a aśyāma taṃ kāmam agne tavotī aśyāma rayiṃ rayivaḥ suvīram |
RV_6,005.07c aśyāma vājam abhi vājayanto 'śyāma dyumnam ajarājaraṃ te ||

RV_6,006.01a pra navyasā sahasaḥ sūnum acchā yajñena gātum ava icchamānaḥ |
RV_6,006.01c vṛścadvanaṃ kṛṣṇayāmaṃ ruśantaṃ vītī hotāraṃ divyaṃ jigāti ||
RV_6,006.02a sa śvitānas tanyatū rocanasthā ajarebhir nānadadbhir yaviṣṭhaḥ |
RV_6,006.02c yaḥ pāvakaḥ purutamaḥ purūṇi pṛthūny agnir anuyāti bharvan ||
RV_6,006.03a vi te viṣvag vātajūtāso agne bhāmāsaḥ śuce śucayaś caranti |
RV_6,006.03c tuvimrakṣāso divyā navagvā vanā vananti dhṛṣatā rujantaḥ ||
RV_6,006.04a ye te śukrāsaḥ śucayaḥ śuciṣmaḥ kṣāṃ vapanti viṣitāso aśvāḥ |
RV_6,006.04c adha bhramas ta urviyā vi bhāti yātayamāno adhi sānu pṛśneḥ ||
RV_6,006.05a adha jihvā pāpatīti pra vṛṣṇo goṣuyudho nāśaniḥ sṛjānā |
RV_6,006.05c śūrasyeva prasitiḥ kṣātir agner durvartur bhīmo dayate vanāni ||
RV_6,006.06a ā bhānunā pārthivāni jrayāṃsi mahas todasya dhṛṣatā tatantha |
RV_6,006.06c sa bādhasvāpa bhayā sahobhi spṛdho vanuṣyan vanuṣo ni jūrva ||
RV_6,006.07a sa citra citraṃ citayantam asme citrakṣatra citratamaṃ vayodhām |
RV_6,006.07c candraṃ rayim puruvīram bṛhantaṃ candra candrābhir gṛṇate yuvasva ||

RV_6,007.01a mūrdhānaṃ divo aratim pṛthivyā vaiśvānaram ṛta ā jātam agnim |
RV_6,007.01c kaviṃ samrājam atithiṃ janānām āsann ā pātraṃ janayanta devāḥ ||
RV_6,007.02a nābhiṃ yajñānāṃ sadanaṃ rayīṇām mahām āhāvam abhi saṃ navanta |
RV_6,007.02c vaiśvānaraṃ rathyam adhvarāṇāṃ yajñasya ketuṃ janayanta devāḥ ||
RV_6,007.03a tvad vipro jāyate vājy agne tvad vīrāso abhimātiṣāhaḥ |
RV_6,007.03c vaiśvānara tvam asmāsu dhehi vasūni rājan spṛhayāyyāṇi ||
RV_6,007.04a tvāṃ viśve amṛta jāyamānaṃ śiśuṃ na devā abhi saṃ navante |
RV_6,007.04c tava kratubhir amṛtatvam āyan vaiśvānara yat pitror adīdeḥ ||
RV_6,007.05a vaiśvānara tava tāni vratāni mahāny agne nakir ā dadharṣa |
RV_6,007.05c yaj jāyamānaḥ pitror upasthe 'vindaḥ ketuṃ vayuneṣv ahnām ||
RV_6,007.06a vaiśvānarasya vimitāni cakṣasā sānūni divo amṛtasya ketunā |
RV_6,007.06c tasyed u viśvā bhuvanādhi mūrdhani vayā iva ruruhuḥ sapta visruhaḥ ||
RV_6,007.07a vi yo rajāṃsy amimīta sukratur vaiśvānaro vi divo rocanā kaviḥ |
RV_6,007.07c pari yo viśvā bhuvanāni paprathe 'dabdho gopā amṛtasya rakṣitā ||

RV_6,008.01a pṛkṣasya vṛṣṇo aruṣasya nū sahaḥ pra nu vocaṃ vidathā jātavedasaḥ |
RV_6,008.01c vaiśvānarāya matir navyasī śuciḥ soma iva pavate cārur agnaye ||
RV_6,008.02a sa jāyamānaḥ parame vyomani vratāny agnir vratapā arakṣata |
RV_6,008.02c vy antarikṣam amimīta sukratur vaiśvānaro mahinā nākam aspṛśat ||
RV_6,008.03a vy astabhnād rodasī mitro adbhuto 'ntarvāvad akṛṇoj jyotiṣā tamaḥ |
RV_6,008.03c vi carmaṇīva dhiṣaṇe avartayad vaiśvānaro viśvam adhatta vṛṣṇyam ||
RV_6,008.04a apām upasthe mahiṣā agṛbhṇata viśo rājānam upa tasthur ṛgmiyam |
RV_6,008.04c ā dūto agnim abharad vivasvato vaiśvānaram mātariśvā parāvataḥ ||
RV_6,008.05a yuge-yuge vidathyaṃ gṛṇadbhyo 'gne rayiṃ yaśasaṃ dhehi navyasīm |
RV_6,008.05c pavyeva rājann aghaśaṃsam ajara nīcā ni vṛśca vaninaṃ na tejasā ||
RV_6,008.06a asmākam agne maghavatsu dhārayānāmi kṣatram ajaraṃ suvīryam |
RV_6,008.06c vayaṃ jayema śatinaṃ sahasriṇaṃ vaiśvānara vājam agne tavotibhiḥ ||
RV_6,008.07a adabdhebhis tava gopābhir iṣṭe 'smākam pāhi triṣadhastha sūrīn |
RV_6,008.07c rakṣā ca no daduṣāṃ śardho agne vaiśvānara pra ca tārī stavānaḥ ||

RV_6,009.01a ahaś ca kṛṣṇam ahar arjunaṃ ca vi vartete rajasī vedyābhiḥ |
RV_6,009.01c vaiśvānaro jāyamāno na rājāvātiraj jyotiṣāgnis tamāṃsi ||
RV_6,009.02a nāhaṃ tantuṃ na vi jānāmy otuṃ na yaṃ vayanti samare 'tamānāḥ |
RV_6,009.02c kasya svit putra iha vaktvāni paro vadāty avareṇa pitrā ||
RV_6,009.03a sa it tantuṃ sa vi jānāty otuṃ sa vaktvāny ṛtuthā vadāti |
RV_6,009.03c ya īṃ ciketad amṛtasya gopā avaś caran paro anyena paśyan ||
RV_6,009.04a ayaṃ hotā prathamaḥ paśyatemam idaṃ jyotir amṛtam martyeṣu |
RV_6,009.04c ayaṃ sa jajñe dhruva ā niṣatto 'martyas tanvā vardhamānaḥ ||
RV_6,009.05a dhruvaṃ jyotir nihitaṃ dṛśaye kam mano javiṣṭham patayatsv antaḥ |
RV_6,009.05c viśve devāḥ samanasaḥ saketā ekaṃ kratum abhi vi yanti sādhu ||
RV_6,009.06a vi me karṇā patayato vi cakṣur vīdaṃ jyotir hṛdaya āhitaṃ yat |
RV_6,009.06c vi me manaś carati dūraādhīḥ kiṃ svid vakṣyāmi kim u nū maniṣye ||
RV_6,009.07a viśve devā anamasyan bhiyānās tvām agne tamasi tasthivāṃsam |
RV_6,009.07c vaiśvānaro 'vatūtaye no 'martyo 'vatūtaye naḥ ||

RV_6,010.01a puro vo mandraṃ divyaṃ suvṛktim prayati yajñe agnim adhvare dadhidhvam |
RV_6,010.01c pura ukthebhiḥ sa hi no vibhāvā svadhvarā karati jātavedāḥ ||
RV_6,010.02a tam u dyumaḥ purvaṇīka hotar agne agnibhir manuṣa idhānaḥ |
RV_6,010.02c stomaṃ yam asmai mamateva śūṣaṃ ghṛtaṃ na śuci matayaḥ pavante ||
RV_6,010.03a pīpāya sa śravasā martyeṣu yo agnaye dadāśa vipra ukthaiḥ |
RV_6,010.03c citrābhis tam ūtibhiś citraśocir vrajasya sātā gomato dadhāti ||
RV_6,010.04a ā yaḥ paprau jāyamāna urvī dūredṛśā bhāsā kṛṣṇādhvā |
RV_6,010.04c adha bahu cit tama ūrmyāyās tiraḥ śociṣā dadṛśe pāvakaḥ ||
RV_6,010.05a nū naś citram puruvājābhir ūtī agne rayim maghavadbhyaś ca dhehi |
RV_6,010.05c ye rādhasā śravasā cāty anyān suvīryebhiś cābhi santi janān ||
RV_6,010.06a imaṃ yajñaṃ cano dhā agna uśan yaṃ ta āsāno juhute haviṣmān |
RV_6,010.06c bharadvājeṣu dadhiṣe suvṛktim avīr vājasya gadhyasya sātau ||
RV_6,010.07a vi dveṣāṃsīnuhi vardhayeḷām madema śatahimāḥ suvīrāḥ ||

RV_6,011.01a yajasva hotar iṣito yajīyān agne bādho marutāṃ na prayukti |
RV_6,011.01c ā no mitrāvaruṇā nāsatyā dyāvā hotrāya pṛthivī vavṛtyāḥ ||
RV_6,011.02a tvaṃ hotā mandratamo no adhrug antar devo vidathā martyeṣu |
RV_6,011.02c pāvakayā juhvā vahnir āsāgne yajasva tanvaṃ tava svām ||
RV_6,011.03a dhanyā cid dhi tve dhiṣaṇā vaṣṭi pra devāñ janma gṛṇate yajadhyai |
RV_6,011.03c vepiṣṭho aṅgirasāṃ yad dha vipro madhu cchando bhanati rebha iṣṭau ||
RV_6,011.04a adidyutat sv apāko vibhāvāgne yajasva rodasī urūcī |
RV_6,011.04c āyuṃ na yaṃ namasā rātahavyā añjanti suprayasam pañca janāḥ ||
RV_6,011.05a vṛñje ha yan namasā barhir agnāv ayāmi srug ghṛtavatī suvṛktiḥ |
RV_6,011.05c amyakṣi sadma sadane pṛthivyā aśrāyi yajñaḥ sūrye na cakṣuḥ ||
RV_6,011.06a daśasyā naḥ purvaṇīka hotar devebhir agne agnibhir idhānaḥ |
RV_6,011.06c rāyaḥ sūno sahaso vāvasānā ati srasema vṛjanaṃ nāṃhaḥ ||

RV_6,012.01a madhye hotā duroṇe barhiṣo rāḷ agnis todasya rodasī yajadhyai |
RV_6,012.01c ayaṃ sa sūnuḥ sahasa ṛtāvā dūrāt sūryo na śociṣā tatāna ||
RV_6,012.02a ā yasmin tve sv apāke yajatra yakṣad rājan sarvatāteva nu dyauḥ |
RV_6,012.02c triṣadhasthas tataruṣo na jaṃho havyā maghāni mānuṣā yajadhyai ||
RV_6,012.03a tejiṣṭhā yasyāratir vanerāṭ todo adhvan na vṛdhasāno adyaut |
RV_6,012.03c adrogho na dravitā cetati tmann amartyo 'vartra oṣadhīṣu ||
RV_6,012.04a sāsmākebhir etarī na śūṣair agni ṣṭave dama ā jātavedāḥ |
RV_6,012.04c drvanno vanvan kratvā nārvosraḥ piteva jārayāyi yajñaiḥ ||
RV_6,012.05a adha smāsya panayanti bhāso vṛthā yat takṣad anuyāti pṛthvīm |
RV_6,012.05c sadyo yaḥ syandro viṣito dhavīyān ṛṇo na tāyur ati dhanvā rāṭ ||
RV_6,012.06a sa tvaṃ no arvan nidāyā viśvebhir agne agnibhir idhānaḥ |
RV_6,012.06c veṣi rāyo vi yāsi ducchunā madema śatahimāḥ suvīrāḥ ||

RV_6,013.01a tvad viśvā subhaga saubhagāny agne vi yanti vanino na vayāḥ |
RV_6,013.01c śruṣṭī rayir vājo vṛtratūrye divo vṛṣṭir īḍyo rītir apām ||
RV_6,013.02a tvam bhago na ā hi ratnam iṣe parijmeva kṣayasi dasmavarcāḥ |
RV_6,013.02c agne mitro na bṛhata ṛtasyāsi kṣattā vāmasya deva bhūreḥ ||
RV_6,013.03a sa satpatiḥ śavasā hanti vṛtram agne vipro vi paṇer bharti vājam |
RV_6,013.03c yaṃ tvam praceta ṛtajāta rāyā sajoṣā naptrāpāṃ hinoṣi ||
RV_6,013.04a yas te sūno sahaso gīrbhir ukthair yajñair marto niśitiṃ vedyānaṭ |
RV_6,013.04c viśvaṃ sa deva prati vāram agne dhatte dhānyam patyate vasavyaiḥ ||
RV_6,013.05a tā nṛbhya ā sauśravasā suvīrāgne sūno sahasaḥ puṣyase dhāḥ |
RV_6,013.05c kṛṇoṣi yac chavasā bhūri paśvo vayo vṛkāyāraye jasuraye ||
RV_6,013.06a vadmā sūno sahaso no vihāyā agne tokaṃ tanayaṃ vāji no dāḥ |
RV_6,013.06c viśvābhir gīrbhir abhi pūrtim aśyām madema śatahimāḥ suvīrāḥ ||

RV_6,014.01a agnā yo martyo duvo dhiyaṃ jujoṣa dhītibhiḥ |
RV_6,014.01c bhasan nu ṣa pra pūrvya iṣaṃ vurītāvase ||
RV_6,014.02a agnir id dhi pracetā agnir vedhastama ṛṣiḥ |
RV_6,014.02c agniṃ hotāram īḷate yajñeṣu manuṣo viśaḥ ||
RV_6,014.03a nānā hy agne 'vase spardhante rāyo aryaḥ |
RV_6,014.03c tūrvanto dasyum āyavo vrataiḥ sīkṣanto avratam ||
RV_6,014.04a agnir apsām ṛtīṣahaṃ vīraṃ dadāti satpatim |
RV_6,014.04c yasya trasanti śavasaḥ saṃcakṣi śatravo bhiyā ||
RV_6,014.05a agnir hi vidmanā nido devo martam uruṣyati |
RV_6,014.05c sahāvā yasyāvṛto rayir vājeṣv avṛtaḥ ||
RV_6,014.06a acchā no mitramaho deva devān agne vocaḥ sumatiṃ rodasyoḥ |
RV_6,014.06c vīhi svastiṃ sukṣitiṃ divo nṝn dviṣo aṃhāṃsi duritā tarema tā tarema tavāvasā tarema ||

RV_6,015.01a imam ū ṣu vo atithim uṣarbudhaṃ viśvāsāṃ viśām patim ṛñjase girā |
RV_6,015.01c vetīd divo januṣā kac cid ā śucir jyok cid atti garbho yad acyutam ||
RV_6,015.02a mitraṃ na yaṃ sudhitam bhṛgavo dadhur vanaspatāv īḍyam ūrdhvaśociṣam |
RV_6,015.02c sa tvaṃ suprīto vītahavye adbhuta praśastibhir mahayase dive-dive ||
RV_6,015.03a sa tvaṃ dakṣasyāvṛko vṛdho bhūr aryaḥ parasyāntarasya taruṣaḥ |
RV_6,015.03c rāyaḥ sūno sahaso martyeṣv ā chardir yaccha vītahavyāya sapratho bharadvājāya saprathaḥ ||
RV_6,015.04a dyutānaṃ vo atithiṃ svarṇaram agniṃ hotāram manuṣaḥ svadhvaram |
RV_6,015.04c vipraṃ na dyukṣavacasaṃ suvṛktibhir havyavāham aratiṃ devam ṛñjase ||
RV_6,015.05a pāvakayā yaś citayantyā kṛpā kṣāman ruruca uṣaso na bhānunā |
RV_6,015.05c tūrvan na yāmann etaśasya nū raṇa ā yo ghṛṇe na tatṛṣāṇo ajaraḥ ||
RV_6,015.06a agnim-agniṃ vaḥ samidhā duvasyata priyam-priyaṃ vo atithiṃ gṛṇīṣaṇi |
RV_6,015.06c upa vo gīrbhir amṛtaṃ vivāsata devo deveṣu vanate hi vāryaṃ devo deveṣu vanate hi no duvaḥ ||
RV_6,015.07a samiddham agniṃ samidhā girā gṛṇe śucim pāvakam puro adhvare dhruvam |
RV_6,015.07c vipraṃ hotāram puruvāram adruhaṃ kaviṃ sumnair īmahe jātavedasam ||
RV_6,015.08a tvāṃ dūtam agne amṛtaṃ yuge-yuge havyavāhaṃ dadhire pāyum īḍyam |
RV_6,015.08c devāsaś ca martāsaś ca jāgṛviṃ vibhuṃ viśpatiṃ namasā ni ṣedire ||
RV_6,015.09a vibhūṣann agna ubhayāṃ anu vratā dūto devānāṃ rajasī sam īyase |
RV_6,015.09c yat te dhītiṃ sumatim āvṛṇīmahe 'dha smā nas trivarūthaḥ śivo bhava ||
RV_6,015.10a taṃ supratīkaṃ sudṛśaṃ svañcam avidvāṃso viduṣṭaraṃ sapema |
RV_6,015.10c sa yakṣad viśvā vayunāni vidvān pra havyam agnir amṛteṣu vocat ||
RV_6,015.11a tam agne pāsy uta tam piparṣi yas ta ānaṭ kavaye śūra dhītim |
RV_6,015.11c yajñasya vā niśitiṃ voditiṃ vā tam it pṛṇakṣi śavasota rāyā ||
RV_6,015.12a tvam agne vanuṣyato ni pāhi tvam u naḥ sahasāvann avadyāt |
RV_6,015.12c saṃ tvā dhvasmanvad abhy etu pāthaḥ saṃ rayi spṛhayāyyaḥ sahasrī ||
RV_6,015.13a agnir hotā gṛhapatiḥ sa rājā viśvā veda janimā jātavedāḥ |
RV_6,015.13c devānām uta yo martyānāṃ yajiṣṭhaḥ sa pra yajatām ṛtāvā ||
RV_6,015.14a agne yad adya viśo adhvarasya hotaḥ pāvakaśoce veṣ ṭvaṃ hi yajvā |
RV_6,015.14c ṛtā yajāsi mahinā vi yad bhūr havyā vaha yaviṣṭha yā te adya ||
RV_6,015.15a abhi prayāṃsi sudhitāni hi khyo ni tvā dadhīta rodasī yajadhyai |
RV_6,015.15c avā no maghavan vājasātāv agne viśvāni duritā tarema tā tarema tavāvasā tarema ||
RV_6,015.16a agne viśvebhiḥ svanīka devair ūrṇāvantam prathamaḥ sīda yonim |
RV_6,015.16c kulāyinaṃ ghṛtavantaṃ savitre yajñaṃ naya yajamānāya sādhu ||
RV_6,015.17a imam u tyam atharvavad agnim manthanti vedhasaḥ |
RV_6,015.17c yam aṅkūyantam ānayann amūraṃ śyāvyābhyaḥ ||
RV_6,015.18a janiṣvā devavītaye sarvatātā svastaye |
RV_6,015.18c ā devān vakṣy amṛtāṃ ṛtāvṛdho yajñaṃ deveṣu pispṛśaḥ ||
RV_6,015.19a vayam u tvā gṛhapate janānām agne akarma samidhā bṛhantam |
RV_6,015.19c asthūri no gārhapatyāni santu tigmena nas tejasā saṃ śiśādhi ||

RV_6,016.01a tvam agne yajñānāṃ hotā viśveṣāṃ hitaḥ |
RV_6,016.01c devebhir mānuṣe jane ||
RV_6,016.02a sa no mandrābhir adhvare jihvābhir yajā mahaḥ |
RV_6,016.02c ā devān vakṣi yakṣi ca ||
RV_6,016.03a vetthā hi vedho adhvanaḥ pathaś ca devāñjasā |
RV_6,016.03c agne yajñeṣu sukrato ||
RV_6,016.04a tvām īḷe adha dvitā bharato vājibhiḥ śunam |
RV_6,016.04c īje yajñeṣu yajñiyam ||
RV_6,016.05a tvam imā vāryā puru divodāsāya sunvate |
RV_6,016.05c bharadvājāya dāśuṣe ||
RV_6,016.06a tvaṃ dūto amartya ā vahā daivyaṃ janam |
RV_6,016.06c śṛṇvan viprasya suṣṭutim ||
RV_6,016.07a tvām agne svādhyo martāso devavītaye |
RV_6,016.07c yajñeṣu devam īḷate ||
RV_6,016.08a tava pra yakṣi saṃdṛśam uta kratuṃ sudānavaḥ |
RV_6,016.08c viśve juṣanta kāminaḥ ||
RV_6,016.09a tvaṃ hotā manurhito vahnir āsā viduṣṭaraḥ |
RV_6,016.09c agne yakṣi divo viśaḥ ||
RV_6,016.10a agna ā yāhi vītaye gṛṇāno havyadātaye |
RV_6,016.10c ni hotā satsi barhiṣi ||
RV_6,016.11a taṃ tvā samidbhir aṅgiro ghṛtena vardhayāmasi |
RV_6,016.11c bṛhac chocā yaviṣṭhya ||
RV_6,016.12a sa naḥ pṛthu śravāyyam acchā deva vivāsasi |
RV_6,016.12c bṛhad agne suvīryam ||
RV_6,016.13a tvām agne puṣkarād adhy atharvā nir amanthata |
RV_6,016.13c mūrdhno viśvasya vāghataḥ ||
RV_6,016.14a tam u tvā dadhyaṅṅ ṛṣiḥ putra īdhe atharvaṇaḥ |
RV_6,016.14c vṛtrahaṇam purandaram ||
RV_6,016.15a tam u tvā pāthyo vṛṣā sam īdhe dasyuhantamam |
RV_6,016.15c dhanañjayaṃ raṇe-raṇe ||
RV_6,016.16a ehy ū ṣu bravāṇi te 'gna itthetarā giraḥ |
RV_6,016.16c ebhir vardhāsa indubhiḥ ||
RV_6,016.17a yatra kva ca te mano dakṣaṃ dadhasa uttaram |
RV_6,016.17c tatrā sadaḥ kṛṇavase ||
RV_6,016.18a nahi te pūrtam akṣipad bhuvan nemānāṃ vaso |
RV_6,016.18c athā duvo vanavase ||
RV_6,016.19a āgnir agāmi bhārato vṛtrahā purucetanaḥ |
RV_6,016.19c divodāsasya satpatiḥ ||
RV_6,016.20a sa hi viśvāti pārthivā rayiṃ dāśan mahitvanā |
RV_6,016.20c vanvann avāto astṛtaḥ ||
RV_6,016.21a sa pratnavan navīyasāgne dyumnena saṃyatā |
RV_6,016.21c bṛhat tatantha bhānunā ||
RV_6,016.22a pra vaḥ sakhāyo agnaye stomaṃ yajñaṃ ca dhṛṣṇuyā |
RV_6,016.22c arca gāya ca vedhase ||
RV_6,016.23a sa hi yo mānuṣā yugā sīdad dhotā kavikratuḥ |
RV_6,016.23c dūtaś ca havyavāhanaḥ ||
RV_6,016.24a tā rājānā śucivratādityān mārutaṃ gaṇam |
RV_6,016.24c vaso yakṣīha rodasī ||
RV_6,016.25a vasvī te agne saṃdṛṣṭir iṣayate martyāya |
RV_6,016.25c ūrjo napād amṛtasya ||
RV_6,016.26a kratvā dā astu śreṣṭho 'dya tvā vanvan surekṇāḥ |
RV_6,016.26c marta ānāśa suvṛktim ||
RV_6,016.27a te te agne tvotā iṣayanto viśvam āyuḥ |
RV_6,016.27c taranto aryo arātīr vanvanto aryo arātīḥ ||
RV_6,016.28a agnis tigmena śociṣā yāsad viśvaṃ ny atriṇam |
RV_6,016.28c agnir no vanate rayim ||
RV_6,016.29a suvīraṃ rayim ā bhara jātavedo vicarṣaṇe |
RV_6,016.29c jahi rakṣāṃsi sukrato ||
RV_6,016.30a tvaṃ naḥ pāhy aṃhaso jātavedo aghāyataḥ |
RV_6,016.30c rakṣā ṇo brahmaṇas kave ||
RV_6,016.31a yo no agne dureva ā marto vadhāya dāśati |
RV_6,016.31c tasmān naḥ pāhy aṃhasaḥ ||
RV_6,016.32a tvaṃ taṃ deva jihvayā pari bādhasva duṣkṛtam |
RV_6,016.32c marto yo no jighāṃsati ||
RV_6,016.33a bharadvājāya saprathaḥ śarma yaccha sahantya |
RV_6,016.33c agne vareṇyaṃ vasu ||
RV_6,016.34a agnir vṛtrāṇi jaṅghanad draviṇasyur vipanyayā |
RV_6,016.34c samiddhaḥ śukra āhutaḥ ||
RV_6,016.35a garbhe mātuḥ pituṣ pitā vididyutāno akṣare |
RV_6,016.35c sīdann ṛtasya yonim ā ||
RV_6,016.36a brahma prajāvad ā bhara jātavedo vicarṣaṇe |
RV_6,016.36c agne yad dīdayad divi ||
RV_6,016.37a upa tvā raṇvasaṃdṛśam prayasvantaḥ sahaskṛta |
RV_6,016.37c agne sasṛjmahe giraḥ ||
RV_6,016.38a upa cchāyām iva ghṛṇer aganma śarma te vayam |
RV_6,016.38c agne hiraṇyasaṃdṛśaḥ ||
RV_6,016.39a ya ugra iva śaryahā tigmaśṛṅgo na vaṃsagaḥ |
RV_6,016.39c agne puro rurojitha ||
RV_6,016.40a ā yaṃ haste na khādinaṃ śiśuṃ jātaṃ na bibhrati |
RV_6,016.40c viśām agniṃ svadhvaram ||
RV_6,016.41a pra devaṃ devavītaye bharatā vasuvittamam |
RV_6,016.41c ā sve yonau ni ṣīdatu ||
RV_6,016.42a ā jātaṃ jātavedasi priyaṃ śiśītātithim |
RV_6,016.42c syona ā gṛhapatim ||
RV_6,016.43a agne yukṣvā hi ye tavāśvāso deva sādhavaḥ |
RV_6,016.43c araṃ vahanti manyave ||
RV_6,016.44a acchā no yāhy ā vahābhi prayāṃsi vītaye |
RV_6,016.44c ā devān somapītaye ||
RV_6,016.45a ud agne bhārata dyumad ajasreṇa davidyutat |
RV_6,016.45c śocā vi bhāhy ajara ||
RV_6,016.46a vītī yo devam marto duvasyed agnim īḷītādhvare haviṣmān |
RV_6,016.46c hotāraṃ satyayajaṃ rodasyor uttānahasto namasā vivāset ||
RV_6,016.47a ā te agna ṛcā havir hṛdā taṣṭam bharāmasi |
RV_6,016.47c te te bhavantūkṣaṇa ṛṣabhāso vaśā uta ||
RV_6,016.48a agniṃ devāso agriyam indhate vṛtrahantamam |
RV_6,016.48c yenā vasūny ābhṛtā tṛḷhā rakṣāṃsi vājinā ||

RV_6,017.01a pibā somam abhi yam ugra tarda ūrvaṃ gavyam mahi gṛṇāna indra |
RV_6,017.01c vi yo dhṛṣṇo vadhiṣo vajrahasta viśvā vṛtram amitriyā śavobhiḥ ||
RV_6,017.02a sa īm pāhi ya ṛjīṣī tarutro yaḥ śipravān vṛṣabho yo matīnām |
RV_6,017.02c yo gotrabhid vajrabhṛd yo hariṣṭhāḥ sa indra citrāṃ abhi tṛndhi vājān ||
RV_6,017.03a evā pāhi pratnathā mandatu tvā śrudhi brahma vāvṛdhasvota gīrbhiḥ |
RV_6,017.03c āviḥ sūryaṃ kṛṇuhi pīpihīṣo jahi śatrūṃr abhi gā indra tṛndhi ||
RV_6,017.04a te tvā madā bṛhad indra svadhāva ime pītā ukṣayanta dyumantam |
RV_6,017.04c mahām anūnaṃ tavasaṃ vibhūtim matsarāso jarhṛṣanta prasāham ||
RV_6,017.05a yebhiḥ sūryam uṣasam mandasāno 'vāsayo 'pa dṛḷhāni dardrat |
RV_6,017.05c mahām adrim pari gā indra santaṃ nutthā acyutaṃ sadasas pari svāt ||
RV_6,017.06a tava kratvā tava tad daṃsanābhir āmāsu pakvaṃ śacyā ni dīdhaḥ |
RV_6,017.06c aurṇor dura usriyābhyo vi dṛḷhod ūrvād gā asṛjo aṅgirasvān ||
RV_6,017.07a paprātha kṣām mahi daṃso vy urvīm upa dyām ṛṣvo bṛhad indra stabhāyaḥ |
RV_6,017.07c adhārayo rodasī devaputre pratne mātarā yahvī ṛtasya ||
RV_6,017.08a adha tvā viśve pura indra devā ekaṃ tavasaṃ dadhire bharāya |
RV_6,017.08c adevo yad abhy auhiṣṭa devān svarṣātā vṛṇata indram atra ||
RV_6,017.09a adha dyauś cit te apa sā nu vajrād dvitānamad bhiyasā svasya manyoḥ |
RV_6,017.09c ahiṃ yad indro abhy ohasānaṃ ni cid viśvāyuḥ śayathe jaghāna ||
RV_6,017.10a adha tvaṣṭā te maha ugra vajraṃ sahasrabhṛṣṭiṃ vavṛtac chatāśrim |
RV_6,017.10c nikāmam aramaṇasaṃ yena navantam ahiṃ sam piṇag ṛjīṣin ||
RV_6,017.11a vardhān yaṃ viśve marutaḥ sajoṣāḥ pacac chatam mahiṣāṃ indra tubhyam |
RV_6,017.11c pūṣā viṣṇus trīṇi sarāṃsi dhāvan vṛtrahaṇam madiram aṃśum asmai ||
RV_6,017.12a ā kṣodo mahi vṛtaṃ nadīnām pariṣṭhitam asṛja ūrmim apām |
RV_6,017.12c tāsām anu pravata indra panthām prārdayo nīcīr apasaḥ samudram ||
RV_6,017.13a evā tā viśvā cakṛvāṃsam indram mahām ugram ajuryaṃ sahodām |
RV_6,017.13c suvīraṃ tvā svāyudhaṃ suvajram ā brahma navyam avase vavṛtyāt ||
RV_6,017.14a sa no vājāya śravasa iṣe ca rāye dhehi dyumata indra viprān |
RV_6,017.14c bharadvāje nṛvata indra sūrīn divi ca smaidhi pārye na indra ||
RV_6,017.15a ayā vājaṃ devahitaṃ sanema madema śatahimāḥ suvīrāḥ ||

RV_6,018.01a tam u ṣṭuhi yo abhibhūtyojā vanvann avātaḥ puruhūta indraḥ |
RV_6,018.01c aṣāḷham ugraṃ sahamānam ābhir gīrbhir vardha vṛṣabhaṃ carṣaṇīnām ||
RV_6,018.02a sa yudhmaḥ satvā khajakṛt samadvā tuvimrakṣo nadanumāṃ ṛjīṣī |
RV_6,018.02c bṛhadreṇuś cyavano mānuṣīṇām ekaḥ kṛṣṭīnām abhavat sahāvā ||
RV_6,018.03a tvaṃ ha nu tyad adamāyo dasyūṃr ekaḥ kṛṣṭīr avanor āryāya |
RV_6,018.03c asti svin nu vīryaṃ tat ta indra na svid asti tad ṛtuthā vi vocaḥ ||
RV_6,018.04a sad id dhi te tuvijātasya manye sahaḥ sahiṣṭha turatas turasya |
RV_6,018.04c ugram ugrasya tavasas tavīyo 'radhrasya radhraturo babhūva ||
RV_6,018.05a tan naḥ pratnaṃ sakhyam astu yuṣme itthā vadadbhir valam aṅgirobhiḥ |
RV_6,018.05c hann acyutacyud dasmeṣayantam ṛṇoḥ puro vi duro asya viśvāḥ ||
RV_6,018.06a sa hi dhībhir havyo asty ugra īśānakṛn mahati vṛtratūrye |
RV_6,018.06c sa tokasātā tanaye sa vajrī vitantasāyyo abhavat samatsu ||
RV_6,018.07a sa majmanā janima mānuṣāṇām amartyena nāmnāti pra sarsre |
RV_6,018.07c sa dyumnena sa śavasota rāyā sa vīryeṇa nṛtamaḥ samokāḥ ||
RV_6,018.08a sa yo na muhe na mithū jano bhūt sumantunāmā cumuriṃ dhuniṃ ca |
RV_6,018.08c vṛṇak pipruṃ śambaraṃ śuṣṇam indraḥ purāṃ cyautnāya śayathāya nū cit ||
RV_6,018.09a udāvatā tvakṣasā panyasā ca vṛtrahatyāya ratham indra tiṣṭha |
RV_6,018.09c dhiṣva vajraṃ hasta ā dakṣiṇatrābhi pra manda purudatra māyāḥ ||
RV_6,018.10a agnir na śuṣkaṃ vanam indra hetī rakṣo ni dhakṣy aśanir na bhīmā |
RV_6,018.10c gambhīraya ṛṣvayā yo rurojādhvānayad duritā dambhayac ca ||
RV_6,018.11a ā sahasram pathibhir indra rāyā tuvidyumna tuvivājebhir arvāk |
RV_6,018.11c yāhi sūno sahaso yasya nū cid adeva īśe puruhūta yotoḥ ||
RV_6,018.12a pra tuvidyumnasya sthavirasya ghṛṣver divo rarapśe mahimā pṛthivyāḥ |
RV_6,018.12c nāsya śatrur na pratimānam asti na pratiṣṭhiḥ purumāyasya sahyoḥ ||
RV_6,018.13a pra tat te adyā karaṇaṃ kṛtam bhūt kutsaṃ yad āyum atithigvam asmai |
RV_6,018.13c purū sahasrā ni śiśā abhi kṣām ut tūrvayāṇaṃ dhṛṣatā ninetha ||
RV_6,018.14a anu tvāhighne adha deva devā madan viśve kavitamaṃ kavīnām |
RV_6,018.14c karo yatra varivo bādhitāya dive janāya tanve gṛṇānaḥ ||
RV_6,018.15a anu dyāvāpṛthivī tat ta ojo 'martyā jihata indra devāḥ |
RV_6,018.15c kṛṣvā kṛtno akṛtaṃ yat te asty ukthaṃ navīyo janayasva yajñaiḥ ||

RV_6,019.01a mahāṃ indro nṛvad ā carṣaṇiprā uta dvibarhā aminaḥ sahobhiḥ |
RV_6,019.01c asmadryag vāvṛdhe vīryāyoruḥ pṛthuḥ sukṛtaḥ kartṛbhir bhūt ||
RV_6,019.02a indram eva dhiṣaṇā sātaye dhād bṛhantam ṛṣvam ajaraṃ yuvānam |
RV_6,019.02c aṣāḷhena śavasā śūśuvāṃsaṃ sadyaś cid yo vāvṛdhe asāmi ||
RV_6,019.03a pṛthū karasnā bahulā gabhastī asmadryak sam mimīhi śravāṃsi |
RV_6,019.03c yūtheva paśvaḥ paśupā damūnā asmāṃ indrābhy ā vavṛtsvājau ||
RV_6,019.04a taṃ va indraṃ catinam asya śākair iha nūnaṃ vājayanto huvema |
RV_6,019.04c yathā cit pūrve jaritāra āsur anedyā anavadyā ariṣṭāḥ ||
RV_6,019.05a dhṛtavrato dhanadāḥ somavṛddhaḥ sa hi vāmasya vasunaḥ purukṣuḥ |
RV_6,019.05c saṃ jagmire pathyā rāyo asmin samudre na sindhavo yādamānāḥ ||
RV_6,019.06a śaviṣṭhaṃ na ā bhara śūra śava ojiṣṭham ojo abhibhūta ugram |
RV_6,019.06c viśvā dyumnā vṛṣṇyā mānuṣāṇām asmabhyaṃ dā harivo mādayadhyai ||
RV_6,019.07a yas te madaḥ pṛtanāṣāḷ amṛdhra indra taṃ na ā bhara śūśuvāṃsam |
RV_6,019.07c yena tokasya tanayasya sātau maṃsīmahi jigīvāṃsas tvotāḥ ||
RV_6,019.08a ā no bhara vṛṣaṇaṃ śuṣmam indra dhanaspṛtaṃ śūśuvāṃsaṃ sudakṣam |
RV_6,019.08c yena vaṃsāma pṛtanāsu śatrūn tavotibhir uta jāmīṃr ajāmīn ||
RV_6,019.09a ā te śuṣmo vṛṣabha etu paścād ottarād adharād ā purastāt |
RV_6,019.09c ā viśvato abhi sam etv arvāṅ indra dyumnaṃ svarvad dhehy asme ||
RV_6,019.10a nṛvat ta indra nṛtamābhir ūtī vaṃsīmahi vāmaṃ śromatebhiḥ |
RV_6,019.10c īkṣe hi vasva ubhayasya rājan dhā ratnam mahi sthūram bṛhantam ||
RV_6,019.11a marutvantaṃ vṛṣabhaṃ vāvṛdhānam akavāriṃ divyaṃ śāsam indram |
RV_6,019.11c viśvāsāham avase nūtanāyograṃ sahodām iha taṃ huvema ||
RV_6,019.12a janaṃ vajrin mahi cin manyamānam ebhyo nṛbhyo randhayā yeṣv asmi |
RV_6,019.12c adhā hi tvā pṛthivyāṃ śūrasātau havāmahe tanaye goṣv apsu ||
RV_6,019.13a vayaṃ ta ebhiḥ puruhūta sakhyaiḥ śatroḥ-śatror uttara it syāma |
RV_6,019.13c ghnanto vṛtrāṇy ubhayāni śūra rāyā madema bṛhatā tvotāḥ ||

RV_6,020.01a dyaur na ya indrābhi bhūmāryas tasthau rayiḥ śavasā pṛtsu janān |
RV_6,020.01c taṃ naḥ sahasrabharam urvarāsāṃ daddhi sūno sahaso vṛtraturam ||
RV_6,020.02a divo na tubhyam anv indra satrāsuryaṃ devebhir dhāyi viśvam |
RV_6,020.02c ahiṃ yad vṛtram apo vavrivāṃsaṃ hann ṛjīṣin viṣṇunā sacānaḥ ||
RV_6,020.03a tūrvann ojīyān tavasas tavīyān kṛtabrahmendro vṛddhamahāḥ |
RV_6,020.03c rājābhavan madhunaḥ somyasya viśvāsāṃ yat purāṃ dartnum āvat ||
RV_6,020.04a śatair apadran paṇaya indrātra daśoṇaye kavaye 'rkasātau |
RV_6,020.04c vadhaiḥ śuṣṇasyāśuṣasya māyāḥ pitvo nārirecīt kiṃ cana pra ||
RV_6,020.05a maho druho apa viśvāyu dhāyi vajrasya yat patane pādi śuṣṇaḥ |
RV_6,020.05c uru ṣa sarathaṃ sārathaye kar indraḥ kutsāya sūryasya sātau ||
RV_6,020.06a pra śyeno na madiram aṃśum asmai śiro dāsasya namucer mathāyan |
RV_6,020.06c prāvan namīṃ sāpyaṃ sasantam pṛṇag rāyā sam iṣā saṃ svasti ||
RV_6,020.07a vi pipror ahimāyasya dṛḷhāḥ puro vajriñ chavasā na dardaḥ |
RV_6,020.07c sudāman tad rekṇo apramṛṣyam ṛjiśvane dātraṃ dāśuṣe dāḥ ||
RV_6,020.08a sa vetasuṃ daśamāyaṃ daśoṇiṃ tūtujim indraḥ svabhiṣṭisumnaḥ |
RV_6,020.08c ā tugraṃ śaśvad ibhaṃ dyotanāya mātur na sīm upa sṛjā iyadhyai ||
RV_6,020.09a sa īṃ spṛdho vanate apratīto bibhrad vajraṃ vṛtrahaṇaṃ gabhastau |
RV_6,020.09c tiṣṭhad dharī adhy asteva garte vacoyujā vahata indram ṛṣvam ||
RV_6,020.10a sanema te 'vasā navya indra pra pūrava stavanta enā yajñaiḥ |
RV_6,020.10c sapta yat puraḥ śarma śāradīr dard dhan dāsīḥ purukutsāya śikṣan ||
RV_6,020.11a tvaṃ vṛdha indra pūrvyo bhūr varivasyann uśane kāvyāya |
RV_6,020.11c parā navavāstvam anudeyam mahe pitre dadātha svaṃ napātam ||
RV_6,020.12a tvaṃ dhunir indra dhunimatīr ṛṇor apaḥ sīrā na sravantīḥ |
RV_6,020.12c pra yat samudram ati śūra parṣi pārayā turvaśaṃ yaduṃ svasti ||
RV_6,020.13a tava ha tyad indra viśvam ājau sasto dhunīcumurī yā ha siṣvap |
RV_6,020.13c dīdayad it tubhyaṃ somebhiḥ sunvan dabhītir idhmabhṛtiḥ pakthy arkaiḥ ||

RV_6,021.01a imā u tvā purutamasya kāror havyaṃ vīra havyā havante |
RV_6,021.01c dhiyo ratheṣṭhām ajaraṃ navīyo rayir vibhūtir īyate vacasyā ||
RV_6,021.02a tam u stuṣa indraṃ yo vidāno girvāhasaṃ gīrbhir yajñavṛddham |
RV_6,021.02c yasya divam ati mahnā pṛthivyāḥ purumāyasya ririce mahitvam ||
RV_6,021.03a sa it tamo 'vayunaṃ tatanvat sūryeṇa vayunavac cakāra |
RV_6,021.03c kadā te martā amṛtasya dhāmeyakṣanto na minanti svadhāvaḥ ||
RV_6,021.04a yas tā cakāra sa kuha svid indraḥ kam ā janaṃ carati kāsu vikṣu |
RV_6,021.04c kas te yajño manase śaṃ varāya ko arka indra katamaḥ sa hotā ||
RV_6,021.05a idā hi te veviṣataḥ purājāḥ pratnāsa āsuḥ purukṛt sakhāyaḥ |
RV_6,021.05c ye madhyamāsa uta nūtanāsa utāvamasya puruhūta bodhi ||
RV_6,021.06a tam pṛcchanto 'varāsaḥ parāṇi pratnā ta indra śrutyānu yemuḥ |
RV_6,021.06c arcāmasi vīra brahmavāho yād eva vidma tāt tvā mahāntam ||
RV_6,021.07a abhi tvā pājo rakṣaso vi tasthe mahi jajñānam abhi tat su tiṣṭha |
RV_6,021.07c tava pratnena yujyena sakhyā vajreṇa dhṛṣṇo apa tā nudasva ||
RV_6,021.08a sa tu śrudhīndra nūtanasya brahmaṇyato vīra kārudhāyaḥ |
RV_6,021.08c tvaṃ hy āpiḥ pradivi pitṝṇāṃ śaśvad babhūtha suhava eṣṭau ||
RV_6,021.09a protaye varuṇam mitram indram marutaḥ kṛṣvāvase no adya |
RV_6,021.09c pra pūṣaṇaṃ viṣṇum agnim purandhiṃ savitāram oṣadhīḥ parvatāṃś ca ||
RV_6,021.10a ima u tvā puruśāka prayajyo jaritāro abhy arcanty arkaiḥ |
RV_6,021.10c śrudhī havam ā huvato huvāno na tvāvāṃ anyo amṛta tvad asti ||
RV_6,021.11a nū ma ā vācam upa yāhi vidvān viśvebhiḥ sūno sahaso yajatraiḥ |
RV_6,021.11c ye agnijihvā ṛtasāpa āsur ye manuṃ cakrur uparaṃ dasāya ||
RV_6,021.12a sa no bodhi puraetā sugeṣūta durgeṣu pathikṛd vidānaḥ |
RV_6,021.12c ye aśramāsa uravo vahiṣṭhās tebhir na indrābhi vakṣi vājam ||

RV_6,022.01a ya eka id dhavyaś carṣaṇīnām indraṃ taṃ gīrbhir abhy arca ābhiḥ |
RV_6,022.01c yaḥ patyate vṛṣabho vṛṣṇyāvān satyaḥ satvā purumāyaḥ sahasvān ||
RV_6,022.02a tam u naḥ pūrve pitaro navagvāḥ sapta viprāso abhi vājayantaḥ |
RV_6,022.02c nakṣaddābhaṃ taturim parvateṣṭhām adroghavācam matibhiḥ śaviṣṭham ||
RV_6,022.03a tam īmaha indram asya rāyaḥ puruvīrasya nṛvataḥ purukṣoḥ |
RV_6,022.03c yo askṛdhoyur ajaraḥ svarvān tam ā bhara harivo mādayadhyai ||
RV_6,022.04a tan no vi voco yadi te purā cij jaritāra ānaśuḥ sumnam indra |
RV_6,022.04c kas te bhāgaḥ kiṃ vayo dudhra khidvaḥ puruhūta purūvaso 'suraghnaḥ ||
RV_6,022.05a tam pṛcchantī vajrahastaṃ ratheṣṭhām indraṃ vepī vakvarī yasya nū gīḥ |
RV_6,022.05c tuvigrābhaṃ tuvikūrmiṃ rabhodāṃ gātum iṣe nakṣate tumram accha ||
RV_6,022.06a ayā ha tyam māyayā vāvṛdhānam manojuvā svatavaḥ parvatena |
RV_6,022.06c acyutā cid vīḷitā svojo rujo vi dṛḷhā dhṛṣatā virapśin ||
RV_6,022.07a taṃ vo dhiyā navyasyā śaviṣṭham pratnam pratnavat paritaṃsayadhyai |
RV_6,022.07c sa no vakṣad animānaḥ suvahmendro viśvāny ati durgahāṇi ||
RV_6,022.08a ā janāya druhvaṇe pārthivāni divyāni dīpayo 'ntarikṣā |
RV_6,022.08c tapā vṛṣan viśvataḥ śociṣā tān brahmadviṣe śocaya kṣām apaś ca ||
RV_6,022.09a bhuvo janasya divyasya rājā pārthivasya jagatas tveṣasaṃdṛk |
RV_6,022.09c dhiṣva vajraṃ dakṣiṇa indra haste viśvā ajurya dayase vi māyāḥ ||
RV_6,022.10a ā saṃyatam indra ṇaḥ svastiṃ śatrutūryāya bṛhatīm amṛdhrām |
RV_6,022.10c yayā dāsāny āryāṇi vṛtrā karo vajrin sutukā nāhuṣāṇi ||
RV_6,022.11a sa no niyudbhiḥ puruhūta vedho viśvavārābhir ā gahi prayajyo |
RV_6,022.11c na yā adevo varate na deva ābhir yāhi tūyam ā madryadrik ||

RV_6,023.01a suta it tvaṃ nimiśla indra some stome brahmaṇi śasyamāna ukthe |
RV_6,023.01c yad vā yuktābhyām maghavan haribhyām bibhrad vajram bāhvor indra yāsi ||
RV_6,023.02a yad vā divi pārye suṣvim indra vṛtrahatye 'vasi śūrasātau |
RV_6,023.02c yad vā dakṣasya bibhyuṣo abibhyad arandhayaḥ śardhata indra dasyūn ||
RV_6,023.03a pātā sutam indro astu somam praṇenīr ugro jaritāram ūtī |
RV_6,023.03c kartā vīrāya suṣvaya u lokaṃ dātā vasu stuvate kīraye cit ||
RV_6,023.04a ganteyānti savanā haribhyām babhrir vajram papiḥ somaṃ dadir gāḥ |
RV_6,023.04c kartā vīraṃ naryaṃ sarvavīraṃ śrotā havaṃ gṛṇata stomavāhāḥ ||
RV_6,023.05a asmai vayaṃ yad vāvāna tad viviṣma indrāya yo naḥ pradivo apas kaḥ |
RV_6,023.05c sute some stumasi śaṃsad ukthendrāya brahma vardhanaṃ yathāsat ||
RV_6,023.06a brahmāṇi hi cakṛṣe vardhanāni tāvat ta indra matibhir viviṣmaḥ |
RV_6,023.06c sute some sutapāḥ śantamāni rāṇḍyā kriyāsma vakṣaṇāni yajñaiḥ ||
RV_6,023.07a sa no bodhi puroḷāśaṃ rarāṇaḥ pibā tu somaṃ goṛjīkam indra |
RV_6,023.07c edam barhir yajamānasya sīdoruṃ kṛdhi tvāyata u lokam ||
RV_6,023.08a sa mandasvā hy anu joṣam ugra pra tvā yajñāsa ime aśnuvantu |
RV_6,023.08c preme havāsaḥ puruhūtam asme ā tveyaṃ dhīr avasa indra yamyāḥ ||
RV_6,023.09a taṃ vaḥ sakhāyaḥ saṃ yathā suteṣu somebhir īm pṛṇatā bhojam indram |
RV_6,023.09c kuvit tasmā asati no bharāya na suṣvim indro 'vase mṛdhāti ||
RV_6,023.10a eved indraḥ sute astāvi some bharadvājeṣu kṣayad in maghonaḥ |
RV_6,023.10c asad yathā jaritra uta sūrir indro rāyo viśvavārasya dātā ||

RV_6,024.01a vṛṣā mada indre śloka ukthā sacā someṣu sutapā ṛjīṣī |
RV_6,024.01c arcatryo maghavā nṛbhya ukthair dyukṣo rājā girām akṣitotiḥ ||
RV_6,024.02a taturir vīro naryo vicetāḥ śrotā havaṃ gṛṇata urvyūtiḥ |
RV_6,024.02c vasuḥ śaṃso narāṃ kārudhāyā vājī stuto vidathe dāti vājam ||
RV_6,024.03a akṣo na cakryoḥ śūra bṛhan pra te mahnā ririce rodasyoḥ |
RV_6,024.03c vṛkṣasya nu te puruhūta vayā vy ūtayo ruruhur indra pūrvīḥ ||
RV_6,024.04a śacīvatas te puruśāka śākā gavām iva srutayaḥ saṃcaraṇīḥ |
RV_6,024.04c vatsānāṃ na tantayas ta indra dāmanvanto adāmānaḥ sudāman ||
RV_6,024.05a anyad adya karvaram anyad u śvo 'sac ca san muhur ācakrir indraḥ |
RV_6,024.05c mitro no atra varuṇaś ca pūṣāryo vaśasya paryetāsti ||
RV_6,024.06a vi tvad āpo na parvatasya pṛṣṭhād ukthebhir indrānayanta yajñaiḥ |
RV_6,024.06c taṃ tvābhiḥ suṣṭutibhir vājayanta ājiṃ na jagmur girvāho aśvāḥ ||
RV_6,024.07a na yaṃ jaranti śarado na māsā na dyāva indram avakarśayanti |
RV_6,024.07c vṛddhasya cid vardhatām asya tanū stomebhir ukthaiś ca śasyamānā ||
RV_6,024.08a na vīḷave namate na sthirāya na śardhate dasyujūtāya stavān |
RV_6,024.08c ajrā indrasya girayaś cid ṛṣvā gambhīre cid bhavati gādham asmai ||
RV_6,024.09a gambhīreṇa na uruṇāmatrin preṣo yandhi sutapāvan vājān |
RV_6,024.09c sthā ū ṣu ūrdhva ūtī ariṣaṇyann aktor vyuṣṭau paritakmyāyām ||
RV_6,024.10a sacasva nāyam avase abhīka ito vā tam indra pāhi riṣaḥ |
RV_6,024.10c amā cainam araṇye pāhi riṣo madema śatahimāḥ suvīrāḥ ||

RV_6,025.01a yā ta ūtir avamā yā paramā yā madhyamendra śuṣminn asti |
RV_6,025.01c tābhir ū ṣu vṛtrahatye 'vīr na ebhiś ca vājair mahān na ugra ||
RV_6,025.02a ābhi spṛdho mithatīr ariṣaṇyann amitrasya vyathayā manyum indra |
RV_6,025.02c ābhir viśvā abhiyujo viṣūcīr āryāya viśo 'va tārīr dāsīḥ ||
RV_6,025.03a indra jāmaya uta ye 'jāmayo 'rvācīnāso vanuṣo yuyujre |
RV_6,025.03c tvam eṣāṃ vithurā śavāṃsi jahi vṛṣṇyāni kṛṇuhī parācaḥ ||
RV_6,025.04a śūro vā śūraṃ vanate śarīrais tanūrucā taruṣi yat kṛṇvaite |
RV_6,025.04c toke vā goṣu tanaye yad apsu vi krandasī urvarāsu bravaite ||
RV_6,025.05a nahi tvā śūro na turo na dhṛṣṇur na tvā yodho manyamāno yuyodha |
RV_6,025.05c indra nakiṣ ṭvā praty asty eṣāṃ viśvā jātāny abhy asi tāni ||
RV_6,025.06a sa patyata ubhayor nṛmṇam ayor yadī vedhasaḥ samithe havante |
RV_6,025.06c vṛtre vā maho nṛvati kṣaye vā vyacasvantā yadi vitantasaite ||
RV_6,025.07a adha smā te carṣaṇayo yad ejān indra trātota bhavā varūtā |
RV_6,025.07c asmākāso ye nṛtamāso arya indra sūrayo dadhire puro naḥ ||
RV_6,025.08a anu te dāyi maha indriyāya satrā te viśvam anu vṛtrahatye |
RV_6,025.08c anu kṣatram anu saho yajatrendra devebhir anu te nṛṣahye ||
RV_6,025.09a evā na spṛdhaḥ sam ajā samatsv indra rārandhi mithatīr adevīḥ |
RV_6,025.09c vidyāma vastor avasā gṛṇanto bharadvājā uta ta indra nūnam ||

RV_6,026.01a śrudhī na indra hvayāmasi tvā maho vājasya sātau vāvṛṣāṇāḥ |
RV_6,026.01c saṃ yad viśo 'yanta śūrasātā ugraṃ no 'vaḥ pārye ahan dāḥ ||
RV_6,026.02a tvāṃ vājī havate vājineyo maho vājasya gadhyasya sātau |
RV_6,026.02c tvāṃ vṛtreṣv indra satpatiṃ tarutraṃ tvāṃ caṣṭe muṣṭihā goṣu yudhyan ||
RV_6,026.03a tvaṃ kaviṃ codayo 'rkasātau tvaṃ kutsāya śuṣṇaṃ dāśuṣe vark |
RV_6,026.03c tvaṃ śiro amarmaṇaḥ parāhann atithigvāya śaṃsyaṃ kariṣyan ||
RV_6,026.04a tvaṃ ratham pra bharo yodham ṛṣvam āvo yudhyantaṃ vṛṣabhaṃ daśadyum |
RV_6,026.04c tvaṃ tugraṃ vetasave sacāhan tvaṃ tujiṃ gṛṇantam indra tūtoḥ ||
RV_6,026.05a tvaṃ tad uktham indra barhaṇā kaḥ pra yac chatā sahasrā śūra darṣi |
RV_6,026.05c ava girer dāsaṃ śambaraṃ han prāvo divodāsaṃ citrābhir ūtī ||
RV_6,026.06a tvaṃ śraddhābhir mandasānaḥ somair dabhītaye cumurim indra siṣvap |
RV_6,026.06c tvaṃ rajim piṭhīnase daśasyan ṣaṣṭiṃ sahasrā śacyā sacāhan ||
RV_6,026.07a ahaṃ cana tat sūribhir ānaśyāṃ tava jyāya indra sumnam ojaḥ |
RV_6,026.07c tvayā yat stavante sadhavīra vīrās trivarūthena nahuṣā śaviṣṭha ||
RV_6,026.08a vayaṃ te asyām indra dyumnahūtau sakhāyaḥ syāma mahina preṣṭhāḥ |
RV_6,026.08c prātardaniḥ kṣatraśrīr astu śreṣṭho ghane vṛtrāṇāṃ sanaye dhanānām ||

RV_6,027.01a kim asya made kim v asya pītāv indraḥ kim asya sakhye cakāra |
RV_6,027.01c raṇā vā ye niṣadi kiṃ te asya purā vividre kim u nūtanāsaḥ ||
RV_6,027.02a sad asya made sad v asya pītāv indraḥ sad asya sakhye cakāra |
RV_6,027.02c raṇā vā ye niṣadi sat te asya purā vividre sad u nūtanāsaḥ ||
RV_6,027.03a nahi nu te mahimanaḥ samasya na maghavan maghavattvasya vidma |
RV_6,027.03c na rādhaso-rādhaso nūtanasyendra nakir dadṛśa indriyaṃ te ||
RV_6,027.04a etat tyat ta indriyam aceti yenāvadhīr varaśikhasya śeṣaḥ |
RV_6,027.04c vajrasya yat te nihatasya śuṣmāt svanāc cid indra paramo dadāra ||
RV_6,027.05a vadhīd indro varaśikhasya śeṣo 'bhyāvartine cāyamānāya śikṣan |
RV_6,027.05c vṛcīvato yad dhariyūpīyāyāṃ han pūrve ardhe bhiyasāparo dart ||
RV_6,027.06a triṃśacchataṃ varmiṇa indra sākaṃ yavyāvatyām puruhūta śravasyā |
RV_6,027.06c vṛcīvantaḥ śarave patyamānāḥ pātrā bhindānā nyarthāny āyan ||
RV_6,027.07a yasya gāvāv aruṣā sūyavasyū antar ū ṣu carato rerihāṇā |
RV_6,027.07c sa sṛñjayāya turvaśam parādād vṛcīvato daivavātāya śikṣan ||
RV_6,027.08a dvayāṃ agne rathino viṃśatiṃ gā vadhūmato maghavā mahyaṃ samrāṭ |
RV_6,027.08c abhyāvartī cāyamāno dadāti dūṇāśeyaṃ dakṣiṇā pārthavānām ||

RV_6,028.01a ā gāvo agmann uta bhadram akran sīdantu goṣṭhe raṇayantv asme |
RV_6,028.01c prajāvatīḥ pururūpā iha syur indrāya pūrvīr uṣaso duhānāḥ ||
RV_6,028.02a indro yajvane pṛṇate ca śikṣaty uped dadāti na svam muṣāyati |
RV_6,028.02c bhūyo-bhūyo rayim id asya vardhayann abhinne khilye ni dadhāti devayum ||
RV_6,028.03a na tā naśanti na dabhāti taskaro nāsām āmitro vyathir ā dadharṣati |
RV_6,028.03c devāṃś ca yābhir yajate dadāti ca jyog it tābhiḥ sacate gopatiḥ saha ||
RV_6,028.04a na tā arvā reṇukakāṭo aśnute na saṃskṛtatram upa yanti tā abhi |
RV_6,028.04c urugāyam abhayaṃ tasya tā anu gāvo martasya vi caranti yajvanaḥ ||
RV_6,028.05a gāvo bhago gāva indro me acchān gāvaḥ somasya prathamasya bhakṣaḥ |
RV_6,028.05c imā yā gāvaḥ sa janāsa indra icchāmīd dhṛdā manasā cid indram ||
RV_6,028.06a yūyaṃ gāvo medayathā kṛśaṃ cid aśrīraṃ cit kṛṇuthā supratīkam |
RV_6,028.06c bhadraṃ gṛhaṃ kṛṇutha bhadravāco bṛhad vo vaya ucyate sabhāsu ||
RV_6,028.07a prajāvatīḥ sūyavasaṃ riśantīḥ śuddhā apaḥ suprapāṇe pibantīḥ |
RV_6,028.07c mā va stena īśata māghaśaṃsaḥ pari vo hetī rudrasya vṛjyāḥ ||
RV_6,028.08a upedam upaparcanam āsu goṣūpa pṛcyatām |
RV_6,028.08c upa ṛṣabhasya retasy upendra tava vīrye ||

RV_6,029.01a indraṃ vo naraḥ sakhyāya sepur maho yantaḥ sumataye cakānāḥ |
RV_6,029.01c maho hi dātā vajrahasto asti mahām u raṇvam avase yajadhvam ||
RV_6,029.02a ā yasmin haste naryā mimikṣur ā rathe hiraṇyaye ratheṣṭhāḥ |
RV_6,029.02c ā raśmayo gabhastyo sthūrayor ādhvann aśvāso vṛṣaṇo yujānāḥ ||
RV_6,029.03a śriye te pādā duva ā mimikṣur dhṛṣṇur vajrī śavasā dakṣiṇāvān |
RV_6,029.03c vasāno atkaṃ surabhiṃ dṛśe kaṃ svar ṇa nṛtav iṣiro babhūtha ||
RV_6,029.04a sa soma āmiślatamaḥ suto bhūd yasmin paktiḥ pacyate santi dhānāḥ |
RV_6,029.04c indraṃ nara stuvanto brahmakārā ukthā śaṃsanto devavātatamāḥ ||
RV_6,029.05a na te antaḥ śavaso dhāyy asya vi tu bābadhe rodasī mahitvā |
RV_6,029.05c ā tā sūriḥ pṛṇati tūtujāno yūthevāpsu samījamāna ūtī ||
RV_6,029.06a eved indraḥ suhava ṛṣvo astūtī anūtī hiriśipraḥ satvā |
RV_6,029.06c evā hi jāto asamātyojāḥ purū ca vṛtrā hanati ni dasyūn ||

RV_6,030.01a bhūya id vāvṛdhe vīryāyaṃ eko ajuryo dayate vasūni |
RV_6,030.01c pra ririce diva indraḥ pṛthivyā ardham id asya prati rodasī ubhe ||
RV_6,030.02a adhā manye bṛhad asuryam asya yāni dādhāra nakir ā mināti |
RV_6,030.02c dive-dive sūryo darśato bhūd vi sadmāny urviyā sukratur dhāt ||
RV_6,030.03a adyā cin nū cit tad apo nadīnāṃ yad ābhyo arado gātum indra |
RV_6,030.03c ni parvatā admasado na sedus tvayā dṛḷhāni sukrato rajāṃsi ||
RV_6,030.04a satyam it tan na tvāvāṃ anyo astīndra devo na martyo jyāyān |
RV_6,030.04c ahann ahim pariśayānam arṇo 'vāsṛjo apo acchā samudram ||
RV_6,030.05a tvam apo vi duro viṣūcīr indra dṛḷham arujaḥ parvatasya |
RV_6,030.05c rājābhavo jagataś carṣaṇīnāṃ sākaṃ sūryaṃ janayan dyām uṣāsam ||

RV_6,031.01a abhūr eko rayipate rayīṇām ā hastayor adhithā indra kṛṣṭīḥ |
RV_6,031.01c vi toke apsu tanaye ca sūre 'vocanta carṣaṇayo vivācaḥ ||
RV_6,031.02a tvad bhiyendra pārthivāni viśvācyutā cic cyāvayante rajāṃsi |
RV_6,031.02c dyāvākṣāmā parvatāso vanāni viśvaṃ dṛḷham bhayate ajmann ā te ||
RV_6,031.03a tvaṃ kutsenābhi śuṣṇam indrāśuṣaṃ yudhya kuyavaṃ gaviṣṭau |
RV_6,031.03c daśa prapitve adha sūryasya muṣāyaś cakram avive rapāṃsi ||
RV_6,031.04a tvaṃ śatāny ava śambarasya puro jaghanthāpratīni dasyoḥ |
RV_6,031.04c aśikṣo yatra śacyā śacīvo divodāsāya sunvate sutakre bharadvājāya gṛṇate vasūni ||
RV_6,031.05a sa satyasatvan mahate raṇāya ratham ā tiṣṭha tuvinṛmṇa bhīmam |
RV_6,031.05c yāhi prapathinn avasopa madrik pra ca śruta śrāvaya carṣaṇibhyaḥ ||

RV_6,032.01a apūrvyā purutamāny asmai mahe vīrāya tavase turāya |
RV_6,032.01c virapśine vajriṇe śantamāni vacāṃsy āsā sthavirāya takṣam ||
RV_6,032.02a sa mātarā sūryeṇā kavīnām avāsayad rujad adriṃ gṛṇānaḥ |
RV_6,032.02c svādhībhir ṛkvabhir vāvaśāna ud usriyāṇām asṛjan nidānam ||
RV_6,032.03a sa vahnibhir ṛkvabhir goṣu śaśvan mitajñubhiḥ purukṛtvā jigāya |
RV_6,032.03c puraḥ purohā sakhibhiḥ sakhīyan dṛḷhā ruroja kavibhiḥ kaviḥ san ||
RV_6,032.04a sa nīvyābhir jaritāram acchā maho vājebhir mahadbhiś ca śuṣmaiḥ |
RV_6,032.04c puruvīrābhir vṛṣabha kṣitīnām ā girvaṇaḥ suvitāya pra yāhi ||
RV_6,032.05a sa sargeṇa śavasā takto atyair apa indro dakṣiṇatas turāṣāṭ |
RV_6,032.05c itthā sṛjānā anapāvṛd arthaṃ dive-dive viviṣur apramṛṣyam ||

RV_6,033.01a ya ojiṣṭha indra taṃ su no dā mado vṛṣan svabhiṣṭir dāsvān |
RV_6,033.01c sauvaśvyaṃ yo vanavat svaśvo vṛtrā samatsu sāsahad amitrān ||
RV_6,033.02a tvāṃ hīndrāvase vivāco havante carṣaṇayaḥ śūrasātau |
RV_6,033.02c tvaṃ viprebhir vi paṇīṃr aśāyas tvota it sanitā vājam arvā ||
RV_6,033.03a tvaṃ tāṃ indrobhayāṃ amitrān dāsā vṛtrāṇy āryā ca śūra |
RV_6,033.03c vadhīr vaneva sudhitebhir atkair ā pṛtsu darṣi nṛṇāṃ nṛtama ||
RV_6,033.04a sa tvaṃ na indrākavābhir ūtī sakhā viśvāyur avitā vṛdhe bhūḥ |
RV_6,033.04c svarṣātā yad dhvayāmasi tvā yudhyanto nemadhitā pṛtsu śūra ||
RV_6,033.05a nūnaṃ na indrāparāya ca syā bhavā mṛḷīka uta no abhiṣṭau |
RV_6,033.05c itthā gṛṇanto mahinasya śarman divi ṣyāma pārye goṣatamāḥ ||

RV_6,034.01a saṃ ca tve jagmur gira indra pūrvīr vi ca tvad yanti vibhvo manīṣāḥ |
RV_6,034.01c purā nūnaṃ ca stutaya ṛṣīṇām paspṛdhra indre adhy ukthārkā ||
RV_6,034.02a puruhūto yaḥ purugūrta ṛbhvāṃ ekaḥ purupraśasto asti yajñaiḥ |
RV_6,034.02c ratho na mahe śavase yujāno 'smābhir indro anumādyo bhūt ||
RV_6,034.03a na yaṃ hiṃsanti dhītayo na vāṇīr indraṃ nakṣantīd abhi vardhayantīḥ |
RV_6,034.03c yadi stotāraḥ śataṃ yat sahasraṃ gṛṇanti girvaṇasaṃ śaṃ tad asmai ||
RV_6,034.04a asmā etad divy arceva māsā mimikṣa indre ny ayāmi somaḥ |
RV_6,034.04c janaṃ na dhanvann abhi saṃ yad āpaḥ satrā vāvṛdhur havanāni yajñaiḥ ||
RV_6,034.05a asmā etan mahy āṅgūṣam asmā indrāya stotram matibhir avāci |
RV_6,034.05c asad yathā mahati vṛtratūrya indro viśvāyur avitā vṛdhaś ca ||

RV_6,035.01a kadā bhuvan rathakṣayāṇi brahma kadā stotre sahasrapoṣyaṃ dāḥ |
RV_6,035.01c kadā stomaṃ vāsayo 'sya rāyā kadā dhiyaḥ karasi vājaratnāḥ ||
RV_6,035.02a karhi svit tad indra yan nṛbhir nṝn vīrair vīrān nīḷayāse jayājīn |
RV_6,035.02c tridhātu gā adhi jayāsi goṣv indra dyumnaṃ svarvad dhehy asme ||
RV_6,035.03a karhi svit tad indra yaj jaritre viśvapsu brahma kṛṇavaḥ śaviṣṭha |
RV_6,035.03c kadā dhiyo na niyuto yuvāse kadā gomaghā havanāni gacchāḥ ||
RV_6,035.04a sa gomaghā jaritre aśvaścandrā vājaśravaso adhi dhehi pṛkṣaḥ |
RV_6,035.04c pīpihīṣaḥ sudughām indra dhenum bharadvājeṣu suruco rurucyāḥ ||
RV_6,035.05a tam ā nūnaṃ vṛjanam anyathā cic chūro yac chakra vi duro gṛṇīṣe |
RV_6,035.05c mā nir araṃ śukradughasya dhenor āṅgirasān brahmaṇā vipra jinva ||

RV_6,036.01a satrā madāsas tava viśvajanyāḥ satrā rāyo 'dha ye pārthivāsaḥ |
RV_6,036.01c satrā vājānām abhavo vibhaktā yad deveṣu dhārayathā asuryam ||
RV_6,036.02a anu pra yeje jana ojo asya satrā dadhire anu vīryāya |
RV_6,036.02c syūmagṛbhe dudhaye 'rvate ca kratuṃ vṛñjanty api vṛtrahatye ||
RV_6,036.03a taṃ sadhrīcīr ūtayo vṛṣṇyāni pauṃsyāni niyutaḥ saścur indram |
RV_6,036.03c samudraṃ na sindhava ukthaśuṣmā uruvyacasaṃ gira ā viśanti ||
RV_6,036.04a sa rāyas khām upa sṛjā gṛṇānaḥ puruścandrasya tvam indra vasvaḥ |
RV_6,036.04c patir babhūthāsamo janānām eko viśvasya bhuvanasya rājā ||
RV_6,036.05a sa tu śrudhi śrutyā yo duvoyur dyaur na bhūmābhi rāyo aryaḥ |
RV_6,036.05c aso yathā naḥ śavasā cakāno yuge-yuge vayasā cekitānaḥ ||

RV_6,037.01a arvāg rathaṃ viśvavāraṃ ta ugrendra yuktāso harayo vahantu |
RV_6,037.01c kīriś cid dhi tvā havate svarvān ṛdhīmahi sadhamādas te adya ||
RV_6,037.02a pro droṇe harayaḥ karmāgman punānāsa ṛjyanto abhūvan |
RV_6,037.02c indro no asya pūrvyaḥ papīyād dyukṣo madasya somyasya rājā ||
RV_6,037.03a āsasrāṇāsaḥ śavasānam acchendraṃ sucakre rathyāso aśvāḥ |
RV_6,037.03c abhi śrava ṛjyanto vaheyur nū cin nu vāyor amṛtaṃ vi dasyet ||
RV_6,037.04a variṣṭho asya dakṣiṇām iyartīndro maghonāṃ tuvikūrmitamaḥ |
RV_6,037.04c yayā vajrivaḥ pariyāsy aṃho maghā ca dhṛṣṇo dayase vi sūrīn ||
RV_6,037.05a indro vājasya sthavirasya dātendro gīrbhir vardhatāṃ vṛddhamahāḥ |
RV_6,037.05c indro vṛtraṃ haniṣṭho astu satvā tā sūriḥ pṛṇati tūtujānaḥ ||

RV_6,038.01a apād ita ud u naś citratamo mahīm bharṣad dyumatīm indrahūtim |
RV_6,038.01c panyasīṃ dhītiṃ daivyasya yāmañ janasya rātiṃ vanate sudānuḥ ||
RV_6,038.02a dūrāc cid ā vasato asya karṇā ghoṣād indrasya tanyati bruvāṇaḥ |
RV_6,038.02c eyam enaṃ devahūtir vavṛtyān madryag indram iyam ṛcyamānā ||
RV_6,038.03a taṃ vo dhiyā paramayā purājām ajaram indram abhy anūṣy arkaiḥ |
RV_6,038.03c brahmā ca giro dadhire sam asmin mahāṃś ca stomo adhi vardhad indre ||
RV_6,038.04a vardhād yaṃ yajña uta soma indraṃ vardhād brahma gira ukthā ca manma |
RV_6,038.04c vardhāhainam uṣaso yāmann aktor vardhān māsāḥ śarado dyāva indram ||
RV_6,038.05a evā jajñānaṃ sahase asāmi vāvṛdhānaṃ rādhase ca śrutāya |
RV_6,038.05c mahām ugram avase vipra nūnam ā vivāsema vṛtratūryeṣu ||

RV_6,039.01a mandrasya kaver divyasya vahner vipramanmano vacanasya madhvaḥ |
RV_6,039.01c apā nas tasya sacanasya deveṣo yuvasva gṛṇate goagrāḥ ||
RV_6,039.02a ayam uśānaḥ pary adrim usrā ṛtadhītibhir ṛtayug yujānaḥ |
RV_6,039.02c rujad arugṇaṃ vi valasya sānum paṇīṃr vacobhir abhi yodhad indraḥ ||
RV_6,039.03a ayaṃ dyotayad adyuto vy aktūn doṣā vastoḥ śarada indur indra |
RV_6,039.03c imaṃ ketum adadhur nū cid ahnāṃ śucijanmana uṣasaś cakāra ||
RV_6,039.04a ayaṃ rocayad aruco rucāno 'yaṃ vāsayad vy ṛtena pūrvīḥ |
RV_6,039.04c ayam īyata ṛtayugbhir aśvaiḥ svarvidā nābhinā carṣaṇiprāḥ ||
RV_6,039.05a nū gṛṇāno gṛṇate pratna rājann iṣaḥ pinva vasudeyāya pūrvīḥ |
RV_6,039.05c apa oṣadhīr aviṣā vanāni gā arvato nṝn ṛcase rirīhi ||

RV_6,040.01a indra piba tubhyaṃ suto madāyāva sya harī vi mucā sakhāyā |
RV_6,040.01c uta pra gāya gaṇa ā niṣadyāthā yajñāya gṛṇate vayo dhāḥ ||
RV_6,040.02a asya piba yasya jajñāna indra madāya kratve apibo virapśin |
RV_6,040.02c tam u te gāvo nara āpo adrir induṃ sam ahyan pītaye sam asmai ||
RV_6,040.03a samiddhe agnau suta indra soma ā tvā vahantu harayo vahiṣṭhāḥ |
RV_6,040.03c tvāyatā manasā johavīmīndrā yāhi suvitāya mahe naḥ ||
RV_6,040.04a ā yāhi śaśvad uśatā yayāthendra mahā manasā somapeyam |
RV_6,040.04c upa brahmāṇi śṛṇava imā no 'thā te yajñas tanve vayo dhāt ||
RV_6,040.05a yad indra divi pārye yad ṛdhag yad vā sve sadane yatra vāsi |
RV_6,040.05c ato no yajñam avase niyutvān sajoṣāḥ pāhi girvaṇo marudbhiḥ ||

RV_6,041.01a aheḷamāna upa yāhi yajñaṃ tubhyam pavanta indavaḥ sutāsaḥ |
RV_6,041.01c gāvo na vajrin svam oko acchendrā gahi prathamo yajñiyānām ||
RV_6,041.02a yā te kākut sukṛtā yā variṣṭhā yayā śaśvat pibasi madhva ūrmim |
RV_6,041.02c tayā pāhi pra te adhvaryur asthāt saṃ te vajro vartatām indra gavyuḥ ||
RV_6,041.03a eṣa drapso vṛṣabho viśvarūpa indrāya vṛṣṇe sam akāri somaḥ |
RV_6,041.03c etam piba hariva sthātar ugra yasyeśiṣe pradivi yas te annam ||
RV_6,041.04a sutaḥ somo asutād indra vasyān ayaṃ śreyāñ cikituṣe raṇāya |
RV_6,041.04c etaṃ titirva upa yāhi yajñaṃ tena viśvās taviṣīr ā pṛṇasva ||
RV_6,041.05a hvayāmasi tvendra yāhy arvāṅ araṃ te somas tanve bhavāti |
RV_6,041.05c śatakrato mādayasvā suteṣu prāsmāṃ ava pṛtanāsu pra vikṣu ||

RV_6,042.01a praty asmai pipīṣate viśvāni viduṣe bhara |
RV_6,042.01c araṅgamāya jagmaye 'paścāddaghvane nare ||
RV_6,042.02a em enam pratyetana somebhiḥ somapātamam |
RV_6,042.02c amatrebhir ṛjīṣiṇam indraṃ sutebhir indubhiḥ ||
RV_6,042.03a yadī sutebhir indubhiḥ somebhiḥ pratibhūṣatha |
RV_6,042.03c vedā viśvasya medhiro dhṛṣat taṃ-tam id eṣate ||
RV_6,042.04a asmā-asmā id andhaso 'dhvaryo pra bharā sutam |
RV_6,042.04c kuvit samasya jenyasya śardhato 'bhiśaster avasparat ||

RV_6,043.01a yasya tyac chambaram made divodāsāya randhayaḥ |
RV_6,043.01c ayaṃ sa soma indra te sutaḥ piba ||
RV_6,043.02a yasya tīvrasutam madam madhyam antaṃ ca rakṣase |
RV_6,043.02c ayaṃ sa soma indra te sutaḥ piba ||
RV_6,043.03a yasya gā antar aśmano made dṛḷhā avāsṛjaḥ |
RV_6,043.03c ayaṃ sa soma indra te sutaḥ piba ||
RV_6,043.04a yasya mandāno andhaso māghonaṃ dadhiṣe śavaḥ |
RV_6,043.04c ayaṃ sa soma indra te sutaḥ piba ||

RV_6,044.01a yo rayivo rayintamo yo dyumnair dyumnavattamaḥ |
RV_6,044.01c somaḥ sutaḥ sa indra te 'sti svadhāpate madaḥ ||
RV_6,044.02a yaḥ śagmas tuviśagma te rāyo dāmā matīnām |
RV_6,044.02c somaḥ sutaḥ sa indra te 'sti svadhāpate madaḥ ||
RV_6,044.03a yena vṛddho na śavasā turo na svābhir ūtibhiḥ |
RV_6,044.03c somaḥ sutaḥ sa indra te 'sti svadhāpate madaḥ ||
RV_6,044.04a tyam u vo aprahaṇaṃ gṛṇīṣe śavasas patim |
RV_6,044.04c indraṃ viśvāsāhaṃ naram maṃhiṣṭhaṃ viśvacarṣaṇim ||
RV_6,044.05a yaṃ vardhayantīd giraḥ patiṃ turasya rādhasaḥ |
RV_6,044.05c tam in nv asya rodasī devī śuṣmaṃ saparyataḥ ||
RV_6,044.06a tad va ukthasya barhaṇendrāyopastṛṇīṣaṇi |
RV_6,044.06c vipo na yasyotayo vi yad rohanti sakṣitaḥ ||
RV_6,044.07a avidad dakṣam mitro navīyān papāno devebhyo vasyo acait |
RV_6,044.07c sasavān staulābhir dhautarībhir uruṣyā pāyur abhavat sakhibhyaḥ ||
RV_6,044.08a ṛtasya pathi vedhā apāyi śriye manāṃsi devāso akran |
RV_6,044.08c dadhāno nāma maho vacobhir vapur dṛśaye venyo vy āvaḥ ||
RV_6,044.09a dyumattamaṃ dakṣaṃ dhehy asme sedhā janānām pūrvīr arātīḥ |
RV_6,044.09c varṣīyo vayaḥ kṛṇuhi śacībhir dhanasya sātāv asmāṃ aviḍḍhi ||
RV_6,044.10a indra tubhyam in maghavann abhūma vayaṃ dātre harivo mā vi venaḥ |
RV_6,044.10c nakir āpir dadṛśe martyatrā kim aṅga radhracodanaṃ tvāhuḥ ||
RV_6,044.11a mā jasvane vṛṣabha no rarīthā mā te revataḥ sakhye riṣāma |
RV_6,044.11c pūrvīṣ ṭa indra niṣṣidho janeṣu jahy asuṣvīn pra vṛhāpṛṇataḥ ||
RV_6,044.12a ud abhrāṇīva stanayann iyartīndro rādhāṃsy aśvyāni gavyā |
RV_6,044.12c tvam asi pradivaḥ kārudhāyā mā tvādāmāna ā dabhan maghonaḥ ||
RV_6,044.13a adhvaryo vīra pra mahe sutānām indrāya bhara sa hy asya rājā |
RV_6,044.13c yaḥ pūrvyābhir uta nūtanābhir gīrbhir vāvṛdhe gṛṇatām ṛṣīṇām ||
RV_6,044.14a asya made puru varpāṃsi vidvān indro vṛtrāṇy apratī jaghāna |
RV_6,044.14c tam u pra hoṣi madhumantam asmai somaṃ vīrāya śipriṇe pibadhyai ||
RV_6,044.15a pātā sutam indro astu somaṃ hantā vṛtraṃ vajreṇa mandasānaḥ |
RV_6,044.15c gantā yajñam parāvataś cid acchā vasur dhīnām avitā kārudhāyāḥ ||
RV_6,044.16a idaṃ tyat pātram indrapānam indrasya priyam amṛtam apāyi |
RV_6,044.16c matsad yathā saumanasāya devaṃ vy asmad dveṣo yuyavad vy aṃhaḥ ||
RV_6,044.17a enā mandāno jahi śūra śatrūñ jāmim ajāmim maghavann amitrān |
RV_6,044.17c abhiṣeṇāṃ abhy ādediśānān parāca indra pra mṛṇā jahī ca ||
RV_6,044.18a āsu ṣmā ṇo maghavann indra pṛtsv asmabhyam mahi varivaḥ sugaṃ kaḥ |
RV_6,044.18c apāṃ tokasya tanayasya jeṣa indra sūrīn kṛṇuhi smā no ardham ||
RV_6,044.19a ā tvā harayo vṛṣaṇo yujānā vṛṣarathāso vṛṣaraśmayo 'tyāḥ |
RV_6,044.19c asmatrāñco vṛṣaṇo vajravāho vṛṣṇe madāya suyujo vahantu ||
RV_6,044.20a ā te vṛṣan vṛṣaṇo droṇam asthur ghṛtapruṣo normayo madantaḥ |
RV_6,044.20c indra pra tubhyaṃ vṛṣabhiḥ sutānāṃ vṛṣṇe bharanti vṛṣabhāya somam ||
RV_6,044.21a vṛṣāsi divo vṛṣabhaḥ pṛthivyā vṛṣā sindhūnāṃ vṛṣabha stiyānām |
RV_6,044.21c vṛṣṇe ta indur vṛṣabha pīpāya svādū raso madhupeyo varāya ||
RV_6,044.22a ayaṃ devaḥ sahasā jāyamāna indreṇa yujā paṇim astabhāyat |
RV_6,044.22c ayaṃ svasya pitur āyudhānīndur amuṣṇād aśivasya māyāḥ ||
RV_6,044.23a ayam akṛṇod uṣasaḥ supatnīr ayaṃ sūrye adadhāj jyotir antaḥ |
RV_6,044.23c ayaṃ tridhātu divi rocaneṣu triteṣu vindad amṛtaṃ nigūḷham ||
RV_6,044.24a ayaṃ dyāvāpṛthivī vi ṣkabhāyad ayaṃ ratham ayunak saptaraśmim |
RV_6,044.24c ayaṃ goṣu śacyā pakvam antaḥ somo dādhāra daśayantram utsam ||

RV_6,045.01a ya ānayat parāvataḥ sunītī turvaśaṃ yadum |
RV_6,045.01c indraḥ sa no yuvā sakhā ||
RV_6,045.02a avipre cid vayo dadhad anāśunā cid arvatā |
RV_6,045.02c indro jetā hitaṃ dhanam ||
RV_6,045.03a mahīr asya praṇītayaḥ pūrvīr uta praśastayaḥ |
RV_6,045.03c nāsya kṣīyanta ūtayaḥ ||
RV_6,045.04a sakhāyo brahmavāhase 'rcata pra ca gāyata |
RV_6,045.04c sa hi naḥ pramatir mahī ||
RV_6,045.05a tvam ekasya vṛtrahann avitā dvayor asi |
RV_6,045.05c utedṛśe yathā vayam ||
RV_6,045.06a nayasīd v ati dviṣaḥ kṛṇoṣy ukthaśaṃsinaḥ |
RV_6,045.06c nṛbhiḥ suvīra ucyase ||
RV_6,045.07a brahmāṇam brahmavāhasaṃ gīrbhiḥ sakhāyam ṛgmiyam |
RV_6,045.07c gāṃ na dohase huve ||
RV_6,045.08a yasya viśvāni hastayor ūcur vasūni ni dvitā |
RV_6,045.08c vīrasya pṛtanāṣahaḥ ||
RV_6,045.09a vi dṛḷhāni cid adrivo janānāṃ śacīpate |
RV_6,045.09c vṛha māyā anānata ||
RV_6,045.10a tam u tvā satya somapā indra vājānām pate |
RV_6,045.10c ahūmahi śravasyavaḥ ||
RV_6,045.11a tam u tvā yaḥ purāsitha yo vā nūnaṃ hite dhane |
RV_6,045.11c havyaḥ sa śrudhī havam ||
RV_6,045.12a dhībhir arvadbhir arvato vājāṃ indra śravāyyān |
RV_6,045.12c tvayā jeṣma hitaṃ dhanam ||
RV_6,045.13a abhūr u vīra girvaṇo mahāṃ indra dhane hite |
RV_6,045.13c bhare vitantasāyyaḥ ||
RV_6,045.14a yā ta ūtir amitrahan makṣūjavastamāsati |
RV_6,045.14c tayā no hinuhī ratham ||
RV_6,045.15a sa rathena rathītamo 'smākenābhiyugvanā |
RV_6,045.15c jeṣi jiṣṇo hitaṃ dhanam ||
RV_6,045.16a ya eka it tam u ṣṭuhi kṛṣṭīnāṃ vicarṣaṇiḥ |
RV_6,045.16c patir jajñe vṛṣakratuḥ ||
RV_6,045.17a yo gṛṇatām id āsithāpir ūtī śivaḥ sakhā |
RV_6,045.17c sa tvaṃ na indra mṛḷaya ||
RV_6,045.18a dhiṣva vajraṃ gabhastyo rakṣohatyāya vajrivaḥ |
RV_6,045.18c sāsahīṣṭhā abhi spṛdhaḥ ||
RV_6,045.19a pratnaṃ rayīṇāṃ yujaṃ sakhāyaṃ kīricodanam |
RV_6,045.19c brahmavāhastamaṃ huve ||
RV_6,045.20a sa hi viśvāni pārthivāṃ eko vasūni patyate |
RV_6,045.20c girvaṇastamo adhriguḥ ||
RV_6,045.21a sa no niyudbhir ā pṛṇa kāmaṃ vājebhir aśvibhiḥ |
RV_6,045.21c gomadbhir gopate dhṛṣat ||
RV_6,045.22a tad vo gāya sute sacā puruhūtāya satvane |
RV_6,045.22c śaṃ yad gave na śākine ||
RV_6,045.23a na ghā vasur ni yamate dānaṃ vājasya gomataḥ |
RV_6,045.23c yat sīm upa śravad giraḥ ||
RV_6,045.24a kuvitsasya pra hi vrajaṃ gomantaṃ dasyuhā gamat |
RV_6,045.24c śacībhir apa no varat ||
RV_6,045.25a imā u tvā śatakrato 'bhi pra ṇonuvur giraḥ |
RV_6,045.25c indra vatsaṃ na mātaraḥ ||
RV_6,045.26a dūṇāśaṃ sakhyaṃ tava gaur asi vīra gavyate |
RV_6,045.26c aśvo aśvāyate bhava ||
RV_6,045.27a sa mandasvā hy andhaso rādhase tanvā mahe |
RV_6,045.27c na stotāraṃ nide karaḥ ||
RV_6,045.28a imā u tvā sute-sute nakṣante girvaṇo giraḥ |
RV_6,045.28c vatsaṃ gāvo na dhenavaḥ ||
RV_6,045.29a purūtamam purūṇāṃ stotṝṇāṃ vivāci |
RV_6,045.29c vājebhir vājayatām ||
RV_6,045.30a asmākam indra bhūtu te stomo vāhiṣṭho antamaḥ |
RV_6,045.30c asmān rāye mahe hinu ||
RV_6,045.31a adhi bṛbuḥ paṇīnāṃ varṣiṣṭhe mūrdhann asthāt |
RV_6,045.31c uruḥ kakṣo na gāṅgyaḥ ||
RV_6,045.32a yasya vāyor iva dravad bhadrā rātiḥ sahasriṇī |
RV_6,045.32c sadyo dānāya maṃhate ||
RV_6,045.33a tat su no viśve arya ā sadā gṛṇanti kāravaḥ |
RV_6,045.33c bṛbuṃ sahasradātamaṃ sūriṃ sahasrasātamam ||

RV_6,046.01a tvām id dhi havāmahe sātā vājasya kāravaḥ |
RV_6,046.01c tvāṃ vṛtreṣv indra satpatiṃ naras tvāṃ kāṣṭhāsv arvataḥ ||
RV_6,046.02a sa tvaṃ naś citra vajrahasta dhṛṣṇuyā maha stavāno adrivaḥ |
RV_6,046.02c gām aśvaṃ rathyam indra saṃ kira satrā vājaṃ na jigyuṣe ||
RV_6,046.03a yaḥ satrāhā vicarṣaṇir indraṃ taṃ hūmahe vayam |
RV_6,046.03c sahasramuṣka tuvinṛmṇa satpate bhavā samatsu no vṛdhe ||
RV_6,046.04a bādhase janān vṛṣabheva manyunā ghṛṣau mīḷha ṛcīṣama |
RV_6,046.04c asmākam bodhy avitā mahādhane tanūṣv apsu sūrye ||
RV_6,046.05a indra jyeṣṭhaṃ na ā bharaṃ ojiṣṭham papuri śravaḥ |
RV_6,046.05c yeneme citra vajrahasta rodasī obhe suśipra prāḥ ||
RV_6,046.06a tvām ugram avase carṣaṇīsahaṃ rājan deveṣu hūmahe |
RV_6,046.06c viśvā su no vithurā pibdanā vaso 'mitrān suṣahān kṛdhi ||
RV_6,046.07a yad indra nāhuṣīṣv āṃ ojo nṛmṇaṃ ca kṛṣṭiṣu |
RV_6,046.07c yad vā pañca kṣitīnāṃ dyumnam ā bhara satrā viśvāni pauṃsyā ||
RV_6,046.08a yad vā tṛkṣau maghavan druhyāv ā jane yat pūrau kac ca vṛṣṇyam |
RV_6,046.08c asmabhyaṃ tad rirīhi saṃ nṛṣāhye 'mitrān pṛtsu turvaṇe ||
RV_6,046.09a indra tridhātu śaraṇaṃ trivarūthaṃ svastimat |
RV_6,046.09c chardir yaccha maghavadbhyaś ca mahyaṃ ca yāvayā didyum ebhyaḥ ||
RV_6,046.10a ye gavyatā manasā śatrum ādabhur abhipraghnanti dhṛṣṇuyā |
RV_6,046.10c adha smā no maghavann indra girvaṇas tanūpā antamo bhava ||
RV_6,046.11a adha smā no vṛdhe bhavendra nāyam avā yudhi |
RV_6,046.11c yad antarikṣe patayanti parṇino didyavas tigmamūrdhānaḥ ||
RV_6,046.12a yatra śūrāsas tanvo vitanvate priyā śarma pitṝṇām |
RV_6,046.12c adha smā yaccha tanve tane ca chardir acittaṃ yāvaya dveṣaḥ ||
RV_6,046.13a yad indra sarge arvataś codayāse mahādhane |
RV_6,046.13c asamane adhvani vṛjine pathi śyenāṃ iva śravasyataḥ ||
RV_6,046.14a sindhūṃr iva pravaṇa āśuyā yato yadi klośam anu ṣvaṇi |
RV_6,046.14c ā ye vayo na varvṛtaty āmiṣi gṛbhītā bāhvor gavi ||

RV_6,047.01a svāduṣ kilāyam madhumāṃ utāyaṃ tīvraḥ kilāyaṃ rasavāṃ utāyam |
RV_6,047.01c uto nv asya papivāṃsam indraṃ na kaś cana sahata āhaveṣu ||
RV_6,047.02a ayaṃ svādur iha madiṣṭha āsa yasyendro vṛtrahatye mamāda |
RV_6,047.02c purūṇi yaś cyautnā śambarasya vi navatiṃ nava ca dehyo han ||
RV_6,047.03a ayam me pīta ud iyarti vācam ayam manīṣām uśatīm ajīgaḥ |
RV_6,047.03c ayaṃ ṣaḷ urvīr amimīta dhīro na yābhyo bhuvanaṃ kac canāre ||
RV_6,047.04a ayaṃ sa yo varimāṇam pṛthivyā varṣmāṇaṃ divo akṛṇod ayaṃ saḥ |
RV_6,047.04c ayam pīyūṣaṃ tisṛṣu pravatsu somo dādhārorv antarikṣam ||
RV_6,047.05a ayaṃ vidac citradṛśīkam arṇaḥ śukrasadmanām uṣasām anīke |
RV_6,047.05c ayam mahān mahatā skambhanenod dyām astabhnād vṛṣabho marutvān ||
RV_6,047.06a dhṛṣat piba kalaśe somam indra vṛtrahā śūra samare vasūnām |
RV_6,047.06c mādhyandine savana ā vṛṣasva rayisthāno rayim asmāsu dhehi ||
RV_6,047.07a indra pra ṇaḥ puraeteva paśya pra no naya prataraṃ vasyo accha |
RV_6,047.07c bhavā supāro atipārayo no bhavā sunītir uta vāmanītiḥ ||
RV_6,047.08a uruṃ no lokam anu neṣi vidvān svarvaj jyotir abhayaṃ svasti |
RV_6,047.08c ṛṣvā ta indra sthavirasya bāhū upa stheyāma śaraṇā bṛhantā ||
RV_6,047.09a variṣṭhe na indra vandhure dhā vahiṣṭhayoḥ śatāvann aśvayor ā |
RV_6,047.09c iṣam ā vakṣīṣāṃ varṣiṣṭhām mā nas tārīn maghavan rāyo aryaḥ ||
RV_6,047.10a indra mṛḷa mahyaṃ jīvātum iccha codaya dhiyam ayaso na dhārām |
RV_6,047.10c yat kiṃ cāhaṃ tvāyur idaṃ vadāmi taj juṣasva kṛdhi mā devavantam ||
RV_6,047.11a trātāram indram avitāram indraṃ have-have suhavaṃ śūram indram |
RV_6,047.11c hvayāmi śakram puruhūtam indraṃ svasti no maghavā dhātv indraḥ ||
RV_6,047.12a indraḥ sutrāmā svavāṃ avobhiḥ sumṛḷīko bhavatu viśvavedāḥ |
RV_6,047.12c bādhatāṃ dveṣo abhayaṃ kṛṇotu suvīryasya patayaḥ syāma ||
RV_6,047.13a tasya vayaṃ sumatau yajñiyasyāpi bhadre saumanase syāma |
RV_6,047.13c sa sutrāmā svavāṃ indro asme ārāc cid dveṣaḥ sanutar yuyotu ||
RV_6,047.14a ava tve indra pravato normir giro brahmāṇi niyuto dhavante |
RV_6,047.14c urū na rādhaḥ savanā purūṇy apo gā vajrin yuvase sam indūn ||
RV_6,047.15a ka īṃ stavat kaḥ pṛṇāt ko yajāte yad ugram in maghavā viśvahāvet |
RV_6,047.15c pādāv iva praharann anyam-anyaṃ kṛṇoti pūrvam aparaṃ śacībhiḥ ||
RV_6,047.16a śṛṇve vīra ugram-ugraṃ damāyann anyam-anyam atinenīyamānaḥ |
RV_6,047.16c edhamānadviḷ ubhayasya rājā coṣkūyate viśa indro manuṣyān ||
RV_6,047.17a parā pūrveṣāṃ sakhyā vṛṇakti vitarturāṇo aparebhir eti |
RV_6,047.17c anānubhūtīr avadhūnvānaḥ pūrvīr indraḥ śaradas tartarīti ||
RV_6,047.18a rūpaṃ-rūpam pratirūpo babhūva tad asya rūpam praticakṣaṇāya |
RV_6,047.18c indro māyābhiḥ pururūpa īyate yuktā hy asya harayaḥ śatā daśa ||
RV_6,047.19a yujāno haritā rathe bhūri tvaṣṭeha rājati |
RV_6,047.19c ko viśvāhā dviṣataḥ pakṣa āsata utāsīneṣu sūriṣu ||
RV_6,047.20a agavyūti kṣetram āganma devā urvī satī bhūmir aṃhūraṇābhūt |
RV_6,047.20c bṛhaspate pra cikitsā gaviṣṭāv itthā sate jaritra indra panthām ||
RV_6,047.21a dive-dive sadṛśīr anyam ardhaṃ kṛṣṇā asedhad apa sadmano jāḥ |
RV_6,047.21c ahan dāsā vṛṣabho vasnayantodavraje varcinaṃ śambaraṃ ca ||
RV_6,047.22a prastoka in nu rādhasas ta indra daśa kośayīr daśa vājino 'dāt |
RV_6,047.22c divodāsād atithigvasya rādhaḥ śāmbaraṃ vasu praty agrabhīṣma ||
RV_6,047.23a daśāśvān daśa kośān daśa vastrādhibhojanā |
RV_6,047.23c daśo hiraṇyapiṇḍān divodāsād asāniṣam ||
RV_6,047.24a daśa rathān praṣṭimataḥ śataṃ gā atharvabhyaḥ |
RV_6,047.24c aśvathaḥ pāyave 'dāt ||
RV_6,047.25a mahi rādho viśvajanyaṃ dadhānān bharadvājān sārñjayo abhy ayaṣṭa ||
RV_6,047.26a vanaspate vīḍvaṅgo hi bhūyā asmatsakhā prataraṇaḥ suvīraḥ |
RV_6,047.26c gobhiḥ saṃnaddho asi vīḷayasvāsthātā te jayatu jetvāni ||
RV_6,047.27a divas pṛthivyāḥ pary oja udbhṛtaṃ vanaspatibhyaḥ pary ābhṛtaṃ sahaḥ |
RV_6,047.27c apām ojmānam pari gobhir āvṛtam indrasya vajraṃ haviṣā rathaṃ yaja ||
RV_6,047.28a indrasya vajro marutām anīkam mitrasya garbho varuṇasya nābhiḥ |
RV_6,047.28c semāṃ no havyadātiṃ juṣāṇo deva ratha prati havyā gṛbhāya ||
RV_6,047.29a upa śvāsaya pṛthivīm uta dyām purutrā te manutāṃ viṣṭhitaṃ jagat |
RV_6,047.29c sa dundubhe sajūr indreṇa devair dūrād davīyo apa sedha śatrūn ||
RV_6,047.30a ā krandaya balam ojo na ā dhā ni ṣṭanihi duritā bādhamānaḥ |
RV_6,047.30c apa protha dundubhe ducchunā ita indrasya muṣṭir asi vīḷayasva ||
RV_6,047.31a āmūr aja pratyāvartayemāḥ ketumad dundubhir vāvadīti |
RV_6,047.31c sam aśvaparṇāś caranti no naro 'smākam indra rathino jayantu ||

RV_6,048.01a yajñā-yajñā vo agnaye girā-girā ca dakṣase |
RV_6,048.01c pra-pra vayam amṛtaṃ jātavedasam priyam mitraṃ na śaṃsiṣam ||
RV_6,048.02a ūrjo napātaṃ sa hināyam asmayur dāśema havyadātaye |
RV_6,048.02c bhuvad vājeṣv avitā bhuvad vṛdha uta trātā tanūnām ||
RV_6,048.03a vṛṣā hy agne ajaro mahān vibhāsy arciṣā |
RV_6,048.03c ajasreṇa śociṣā śośucac chuce sudītibhiḥ su dīdihi ||
RV_6,048.04a maho devān yajasi yakṣy ānuṣak tava kratvota daṃsanā |
RV_6,048.04c arvācaḥ sīṃ kṛṇuhy agne 'vase rāsva vājota vaṃsva ||
RV_6,048.05a yam āpo adrayo vanā garbham ṛtasya piprati |
RV_6,048.05c sahasā yo mathito jāyate nṛbhiḥ pṛthivyā adhi sānavi ||
RV_6,048.06a ā yaḥ paprau bhānunā rodasī ubhe dhūmena dhāvate divi |
RV_6,048.06c tiras tamo dadṛśa ūrmyāsv ā śyāvāsv aruṣo vṛṣā śyāvā aruṣo vṛṣā ||
RV_6,048.07a bṛhadbhir agne arcibhiḥ śukreṇa deva śociṣā |
RV_6,048.07c bharadvāje samidhāno yaviṣṭhya revan naḥ śukra dīdihi dyumat pāvaka dīdihi ||
RV_6,048.08a viśvāsāṃ gṛhapatir viśām asi tvam agne mānuṣīṇām |
RV_6,048.08c śatam pūrbhir yaviṣṭha pāhy aṃhasaḥ sameddhāraṃ śataṃ himā stotṛbhyo ye ca dadati ||
RV_6,048.09a tvaṃ naś citra ūtyā vaso rādhāṃsi codaya |
RV_6,048.09c asya rāyas tvam agne rathīr asi vidā gādhaṃ tuce tu naḥ ||
RV_6,048.10a parṣi tokaṃ tanayam partṛbhiṣ ṭvam adabdhair aprayutvabhiḥ |
RV_6,048.10c agne heḷāṃsi daivyā yuyodhi no 'devāni hvarāṃsi ca ||
RV_6,048.11a ā sakhāyaḥ sabardughāṃ dhenum ajadhvam upa navyasā vacaḥ |
RV_6,048.11c sṛjadhvam anapasphurām ||
RV_6,048.12a yā śardhāya mārutāya svabhānave śravo 'mṛtyu dhukṣata |
RV_6,048.12c yā mṛḷīke marutāṃ turāṇāṃ yā sumnair evayāvarī ||
RV_6,048.13a bharadvājāyāva dhukṣata dvitā |
RV_6,048.13b dhenuṃ ca viśvadohasam iṣaṃ ca viśvabhojasam ||
RV_6,048.14a taṃ va indraṃ na sukratuṃ varuṇam iva māyinam |
RV_6,048.14c aryamaṇaṃ na mandraṃ sṛprabhojasaṃ viṣṇuṃ na stuṣa ādiśe ||
RV_6,048.15a tveṣaṃ śardho na mārutaṃ tuviṣvaṇy anarvāṇam pūṣaṇaṃ saṃ yathā śatā |
RV_6,048.15c saṃ sahasrā kāriṣac carṣaṇibhya āṃ āvir gūḷhā vasū karat suvedā no vasū karat ||
RV_6,048.16a ā mā pūṣann upa drava śaṃsiṣaṃ nu te apikarṇa āghṛṇe |
RV_6,048.16c aghā aryo arātayaḥ ||
RV_6,048.17a mā kākambīram ud vṛho vanaspatim aśastīr vi hi nīnaśaḥ |
RV_6,048.17c mota sūro aha evā cana grīvā ādadhate veḥ ||
RV_6,048.18a dṛter iva te 'vṛkam astu sakhyam |
RV_6,048.18b acchidrasya dadhanvataḥ supūrṇasya dadhanvataḥ ||
RV_6,048.19a paro hi martyair asi samo devair uta śriyā |
RV_6,048.19c abhi khyaḥ pūṣan pṛtanāsu nas tvam avā nūnaṃ yathā purā ||
RV_6,048.20a vāmī vāmasya dhūtayaḥ praṇītir astu sūnṛtā |
RV_6,048.20c devasya vā maruto martyasya vejānasya prayajyavaḥ ||
RV_6,048.21a sadyaś cid yasya carkṛtiḥ pari dyāṃ devo naiti sūryaḥ |
RV_6,048.21c tveṣaṃ śavo dadhire nāma yajñiyam maruto vṛtrahaṃ śavo jyeṣṭhaṃ vṛtrahaṃ śavaḥ ||
RV_6,048.22a sakṛd dha dyaur ajāyata sakṛd bhūmir ajāyata |
RV_6,048.22c pṛśnyā dugdhaṃ sakṛt payas tad anyo nānu jāyate ||

RV_6,049.01a stuṣe janaṃ suvrataṃ navyasībhir gīrbhir mitrāvaruṇā sumnayantā |
RV_6,049.01c ta ā gamantu ta iha śruvantu sukṣatrāso varuṇo mitro agniḥ ||
RV_6,049.02a viśo-viśa īḍyam adhvareṣv adṛptakratum aratiṃ yuvatyoḥ |
RV_6,049.02c divaḥ śiśuṃ sahasaḥ sūnum agniṃ yajñasya ketum aruṣaṃ yajadhyai ||
RV_6,049.03a aruṣasya duhitarā virūpe stṛbhir anyā pipiśe sūro anyā |
RV_6,049.03c mithasturā vicarantī pāvake manma śrutaṃ nakṣata ṛcyamāne ||
RV_6,049.04a pra vāyum acchā bṛhatī manīṣā bṛhadrayiṃ viśvavāraṃ rathaprām |
RV_6,049.04c dyutadyāmā niyutaḥ patyamānaḥ kaviḥ kavim iyakṣasi prayajyo ||
RV_6,049.05a sa me vapuś chadayad aśvinor yo ratho virukmān manasā yujānaḥ |
RV_6,049.05c yena narā nāsatyeṣayadhyai vartir yāthas tanayāya tmane ca ||
RV_6,049.06a parjanyavātā vṛṣabhā pṛthivyāḥ purīṣāṇi jinvatam apyāni |
RV_6,049.06c satyaśrutaḥ kavayo yasya gīrbhir jagata sthātar jagad ā kṛṇudhvam ||
RV_6,049.07a pāvīravī kanyā citrāyuḥ sarasvatī vīrapatnī dhiyaṃ dhāt |
RV_6,049.07c gnābhir acchidraṃ śaraṇaṃ sajoṣā durādharṣaṃ gṛṇate śarma yaṃsat ||
RV_6,049.08a pathas-pathaḥ paripatiṃ vacasyā kāmena kṛto abhy ānaḷ arkam |
RV_6,049.08c sa no rāsac churudhaś candrāgrā dhiyaṃ-dhiyaṃ sīṣadhāti pra pūṣā ||
RV_6,049.09a prathamabhājaṃ yaśasaṃ vayodhāṃ supāṇiṃ devaṃ sugabhastim ṛbhvam |
RV_6,049.09c hotā yakṣad yajatam pastyānām agnis tvaṣṭāraṃ suhavaṃ vibhāvā ||
RV_6,049.10a bhuvanasya pitaraṃ gīrbhir ābhī rudraṃ divā vardhayā rudram aktau |
RV_6,049.10c bṛhantam ṛṣvam ajaraṃ suṣumnam ṛdhag ghuvema kavineṣitāsaḥ ||
RV_6,049.11a ā yuvānaḥ kavayo yajñiyāso maruto ganta gṛṇato varasyām |
RV_6,049.11c acitraṃ cid dhi jinvathā vṛdhanta itthā nakṣanto naro aṅgirasvat ||
RV_6,049.12a pra vīrāya pra tavase turāyājā yūtheva paśurakṣir astam |
RV_6,049.12c sa pispṛśati tanvi śrutasya stṛbhir na nākaṃ vacanasya vipaḥ ||
RV_6,049.13a yo rajāṃsi vimame pārthivāni triś cid viṣṇur manave bādhitāya |
RV_6,049.13c tasya te śarmann upadadyamāne rāyā madema tanvā tanā ca ||
RV_6,049.14a tan no 'hir budhnyo adbhir arkais tat parvatas tat savitā cano dhāt |
RV_6,049.14c tad oṣadhībhir abhi rātiṣāco bhagaḥ purandhir jinvatu pra rāye ||
RV_6,049.15a nu no rayiṃ rathyaṃ carṣaṇiprām puruvīram maha ṛtasya gopām |
RV_6,049.15c kṣayaṃ dātājaraṃ yena janān spṛdho adevīr abhi ca kramāma viśa ādevīr abhy aśnavāma ||

RV_6,050.01a huve vo devīm aditiṃ namobhir mṛḷīkāya varuṇam mitram agnim |
RV_6,050.01c abhikṣadām aryamaṇaṃ suśevaṃ trātṝn devān savitāram bhagaṃ ca ||
RV_6,050.02a sujyotiṣaḥ sūrya dakṣapitṝn anāgāstve sumaho vīhi devān |
RV_6,050.02c dvijanmāno ya ṛtasāpaḥ satyāḥ svarvanto yajatā agnijihvāḥ ||
RV_6,050.03a uta dyāvāpṛthivī kṣatram uru bṛhad rodasī śaraṇaṃ suṣumne |
RV_6,050.03c mahas karatho varivo yathā no 'sme kṣayāya dhiṣaṇe anehaḥ ||
RV_6,050.04a ā no rudrasya sūnavo namantām adyā hūtāso vasavo 'dhṛṣṭāḥ |
RV_6,050.04c yad īm arbhe mahati vā hitāso bādhe maruto ahvāma devān ||
RV_6,050.05a mimyakṣa yeṣu rodasī nu devī siṣakti pūṣā abhyardhayajvā |
RV_6,050.05c śrutvā havam maruto yad dha yātha bhūmā rejante adhvani pravikte ||
RV_6,050.06a abhi tyaṃ vīraṃ girvaṇasam arcendram brahmaṇā jaritar navena |
RV_6,050.06c śravad id dhavam upa ca stavāno rāsad vājāṃ upa maho gṛṇānaḥ ||
RV_6,050.07a omānam āpo mānuṣīr amṛktaṃ dhāta tokāya tanayāya śaṃ yoḥ |
RV_6,050.07c yūyaṃ hi ṣṭhā bhiṣajo mātṛtamā viśvasya sthātur jagato janitrīḥ ||
RV_6,050.08a ā no devaḥ savitā trāyamāṇo hiraṇyapāṇir yajato jagamyāt |
RV_6,050.08c yo datravāṃ uṣaso na pratīkaṃ vyūrṇute dāśuṣe vāryāṇi ||
RV_6,050.09a uta tvaṃ sūno sahaso no adyā devāṃ asminn adhvare vavṛtyāḥ |
RV_6,050.09c syām ahaṃ te sadam id rātau tava syām agne 'vasā suvīraḥ ||
RV_6,050.10a uta tyā me havam ā jagmyātaṃ nāsatyā dhībhir yuvam aṅga viprā |
RV_6,050.10c atriṃ na mahas tamaso 'mumuktaṃ tūrvataṃ narā duritād abhīke ||
RV_6,050.11a te no rāyo dyumato vājavato dātāro bhūta nṛvataḥ purukṣoḥ |
RV_6,050.11c daśasyanto divyāḥ pārthivāso gojātā apyā mṛḷatā ca devāḥ ||
RV_6,050.12a te no rudraḥ sarasvatī sajoṣā mīḷhuṣmanto viṣṇur mṛḷantu vāyuḥ |
RV_6,050.12c ṛbhukṣā vājo daivyo vidhātā parjanyāvātā pipyatām iṣaṃ naḥ ||
RV_6,050.13a uta sya devaḥ savitā bhago no 'pāṃ napād avatu dānu papriḥ |
RV_6,050.13c tvaṣṭā devebhir janibhiḥ sajoṣā dyaur devebhiḥ pṛthivī samudraiḥ ||
RV_6,050.14a uta no 'hir budhnyaḥ śṛṇotv aja ekapāt pṛthivī samudraḥ |
RV_6,050.14c viśve devā ṛtāvṛdho huvānā stutā mantrāḥ kaviśastā avantu ||
RV_6,050.15a evā napāto mama tasya dhībhir bharadvājā abhy arcanty arkaiḥ |
RV_6,050.15c gnā hutāso vasavo 'dhṛṣṭā viśve stutāso bhūtā yajatrāḥ ||

RV_6,051.01a ud u tyac cakṣur mahi mitrayor āṃ eti priyaṃ varuṇayor adabdham |
RV_6,051.01c ṛtasya śuci darśatam anīkaṃ rukmo na diva uditā vy adyaut ||
RV_6,051.02a veda yas trīṇi vidathāny eṣāṃ devānāṃ janma sanutar ā ca vipraḥ |
RV_6,051.02c ṛju marteṣu vṛjinā ca paśyann abhi caṣṭe sūro arya evān ||
RV_6,051.03a stuṣa u vo maha ṛtasya gopān aditim mitraṃ varuṇaṃ sujātān |
RV_6,051.03c aryamaṇam bhagam adabdhadhītīn acchā voce sadhanyaḥ pāvakān ||
RV_6,051.04a riśādasaḥ satpatīṃr adabdhān maho rājñaḥ suvasanasya dātṝn |
RV_6,051.04c yūnaḥ sukṣatrān kṣayato divo nṝn ādityān yāmy aditiṃ duvoyu ||
RV_6,051.05a dyauṣ pitaḥ pṛthivi mātar adhrug agne bhrātar vasavo mṛḷatā naḥ |
RV_6,051.05c viśva ādityā adite sajoṣā asmabhyaṃ śarma bahulaṃ vi yanta ||
RV_6,051.06a mā no vṛkāya vṛkye samasmā aghāyate rīradhatā yajatrāḥ |
RV_6,051.06c yūyaṃ hi ṣṭhā rathyo nas tanūnāṃ yūyaṃ dakṣasya vacaso babhūva ||
RV_6,051.07a mā va eno anyakṛtam bhujema mā tat karma vasavo yac cayadhve |
RV_6,051.07c viśvasya hi kṣayatha viśvadevāḥ svayaṃ ripus tanvaṃ rīriṣīṣṭa ||
RV_6,051.08a nama id ugraṃ nama ā vivāse namo dādhāra pṛthivīm uta dyām |
RV_6,051.08c namo devebhyo nama īśa eṣāṃ kṛtaṃ cid eno namasā vivāse ||
RV_6,051.09a ṛtasya vo rathyaḥ pūtadakṣān ṛtasya pastyasado adabdhān |
RV_6,051.09c tāṃ ā namobhir urucakṣaso nṝn viśvān va ā name maho yajatrāḥ ||
RV_6,051.10a te hi śreṣṭhavarcasas ta u nas tiro viśvāni duritā nayanti |
RV_6,051.10c sukṣatrāso varuṇo mitro agnir ṛtadhītayo vakmarājasatyāḥ ||
RV_6,051.11a te na indraḥ pṛthivī kṣāma vardhan pūṣā bhago aditiḥ pañca janāḥ |
RV_6,051.11c suśarmāṇaḥ svavasaḥ sunīthā bhavantu naḥ sutrātrāsaḥ sugopāḥ ||
RV_6,051.12a nū sadmānaṃ divyaṃ naṃśi devā bhāradvājaḥ sumatiṃ yāti hotā |
RV_6,051.12c āsānebhir yajamāno miyedhair devānāṃ janma vasūyur vavanda ||
RV_6,051.13a apa tyaṃ vṛjinaṃ ripuṃ stenam agne durādhyam |
RV_6,051.13c daviṣṭham asya satpate kṛdhī sugam ||
RV_6,051.14a grāvāṇaḥ soma no hi kaṃ sakhitvanāya vāvaśuḥ |
RV_6,051.14c jahī ny atriṇam paṇiṃ vṛko hi ṣaḥ ||
RV_6,051.15a yūyaṃ hi ṣṭhā sudānava indrajyeṣṭhā abhidyavaḥ |
RV_6,051.15c kartā no adhvann ā sugaṃ gopā amā ||
RV_6,051.16a api panthām aganmahi svastigām anehasam |
RV_6,051.16c yena viśvāḥ pari dviṣo vṛṇakti vindate vasu ||

RV_6,052.01a na tad divā na pṛthivyānu manye na yajñena nota śamībhir ābhiḥ |
RV_6,052.01c ubjantu taṃ subhvaḥ parvatāso ni hīyatām atiyājasya yaṣṭā ||
RV_6,052.02a ati vā yo maruto manyate no brahma vā yaḥ kriyamāṇaṃ ninitsāt |
RV_6,052.02c tapūṃṣi tasmai vṛjināni santu brahmadviṣam abhi taṃ śocatu dyauḥ ||
RV_6,052.03a kim aṅga tvā brahmaṇaḥ soma gopāṃ kim aṅga tvāhur abhiśastipāṃ naḥ |
RV_6,052.03c kim aṅga naḥ paśyasi nidyamānān brahmadviṣe tapuṣiṃ hetim asya ||
RV_6,052.04a avantu mām uṣaso jāyamānā avantu mā sindhavaḥ pinvamānāḥ |
RV_6,052.04c avantu mā parvatāso dhruvāso 'vantu mā pitaro devahūtau ||
RV_6,052.05a viśvadānīṃ sumanasaḥ syāma paśyema nu sūryam uccarantam |
RV_6,052.05c tathā karad vasupatir vasūnāṃ devāṃ ohāno 'vasāgamiṣṭhaḥ ||
RV_6,052.06a indro nediṣṭham avasāgamiṣṭhaḥ sarasvatī sindhubhiḥ pinvamānā |
RV_6,052.06c parjanyo na oṣadhībhir mayobhur agniḥ suśaṃsaḥ suhavaḥ piteva ||
RV_6,052.07a viśve devāsa ā gata śṛṇutā ma imaṃ havam |
RV_6,052.07c edam barhir ni ṣīdata ||
RV_6,052.08a yo vo devā ghṛtasnunā havyena pratibhūṣati |
RV_6,052.08c taṃ viśva upa gacchatha ||
RV_6,052.09a upa naḥ sūnavo giraḥ śṛṇvantv amṛtasya ye |
RV_6,052.09c sumṛḷīkā bhavantu naḥ ||
RV_6,052.10a viśve devā ṛtāvṛdha ṛtubhir havanaśrutaḥ |
RV_6,052.10c juṣantāṃ yujyam payaḥ ||
RV_6,052.11a stotram indro marudgaṇas tvaṣṭṛmān mitro aryamā |
RV_6,052.11c imā havyā juṣanta naḥ ||
RV_6,052.12a imaṃ no agne adhvaraṃ hotar vayunaśo yaja |
RV_6,052.12c cikitvān daivyaṃ janam ||
RV_6,052.13a viśve devāḥ śṛṇutemaṃ havam me ye antarikṣe ya upa dyavi ṣṭha |
RV_6,052.13c ye agnijihvā uta vā yajatrā āsadyāsmin barhiṣi mādayadhvam ||
RV_6,052.14a viśve devā mama śṛṇvantu yajñiyā ubhe rodasī apāṃ napāc ca manma |
RV_6,052.14c mā vo vacāṃsi paricakṣyāṇi vocaṃ sumneṣv id vo antamā madema ||
RV_6,052.15a ye ke ca jmā mahino ahimāyā divo jajñire apāṃ sadhasthe |
RV_6,052.15c te asmabhyam iṣaye viśvam āyuḥ kṣapa usrā varivasyantu devāḥ ||
RV_6,052.16a agnīparjanyāv avataṃ dhiyam me 'smin have suhavā suṣṭutiṃ naḥ |
RV_6,052.16c iḷām anyo janayad garbham anyaḥ prajāvatīr iṣa ā dhattam asme ||
RV_6,052.17a stīrṇe barhiṣi samidhāne agnau sūktena mahā namasā vivāse |
RV_6,052.17c asmin no adya vidathe yajatrā viśve devā haviṣi mādayadhvam ||

RV_6,053.01a vayam u tvā pathas pate rathaṃ na vājasātaye |
RV_6,053.01c dhiye pūṣann ayujmahi ||
RV_6,053.02a abhi no naryaṃ vasu vīram prayatadakṣiṇam |
RV_6,053.02c vāmaṃ gṛhapatiṃ naya ||
RV_6,053.03a aditsantaṃ cid āghṛṇe pūṣan dānāya codaya |
RV_6,053.03c paṇeś cid vi mradā manaḥ ||
RV_6,053.04a vi patho vājasātaye cinuhi vi mṛdho jahi |
RV_6,053.04c sādhantām ugra no dhiyaḥ ||
RV_6,053.05a pari tṛndhi paṇīnām ārayā hṛdayā kave |
RV_6,053.05c athem asmabhyaṃ randhaya ||
RV_6,053.06a vi pūṣann ārayā tuda paṇer iccha hṛdi priyam |
RV_6,053.06c athem asmabhyaṃ randhaya ||
RV_6,053.07a ā rikha kikirā kṛṇu paṇīnāṃ hṛdayā kave |
RV_6,053.07c athem asmabhyaṃ randhaya ||
RV_6,053.08a yām pūṣan brahmacodanīm ārām bibharṣy āghṛṇe |
RV_6,053.08c tayā samasya hṛdayam ā rikha kikirā kṛṇu ||
RV_6,053.09a yā te aṣṭrā goopaśāghṛṇe paśusādhanī |
RV_6,053.09c tasyās te sumnam īmahe ||
RV_6,053.10a uta no goṣaṇiṃ dhiyam aśvasāṃ vājasām uta |
RV_6,053.10c nṛvat kṛṇuhi vītaye ||

RV_6,054.01a sam pūṣan viduṣā naya yo añjasānuśāsati |
RV_6,054.01c ya evedam iti bravat ||
RV_6,054.02a sam u pūṣṇā gamemahi yo gṛhāṃ abhiśāsati |
RV_6,054.02c ima eveti ca bravat ||
RV_6,054.03a pūṣṇaś cakraṃ na riṣyati na kośo 'va padyate |
RV_6,054.03c no asya vyathate paviḥ ||
RV_6,054.04a yo asmai haviṣāvidhan na tam pūṣāpi mṛṣyate |
RV_6,054.04c prathamo vindate vasu ||
RV_6,054.05a pūṣā gā anv etu naḥ pūṣā rakṣatv arvataḥ |
RV_6,054.05c pūṣā vājaṃ sanotu naḥ ||
RV_6,054.06a pūṣann anu pra gā ihi yajamānasya sunvataḥ |
RV_6,054.06c asmākaṃ stuvatām uta ||
RV_6,054.07a mākir neśan mākīṃ riṣan mākīṃ saṃ śāri kevaṭe |
RV_6,054.07c athāriṣṭābhir ā gahi ||
RV_6,054.08a śṛṇvantam pūṣaṇaṃ vayam iryam anaṣṭavedasam |
RV_6,054.08c īśānaṃ rāya īmahe ||
RV_6,054.09a pūṣan tava vrate vayaṃ na riṣyema kadā cana |
RV_6,054.09c stotāras ta iha smasi ||
RV_6,054.10a pari pūṣā parastād dhastaṃ dadhātu dakṣiṇam |
RV_6,054.10c punar no naṣṭam ājatu ||

RV_6,055.01a ehi vāṃ vimuco napād āghṛṇe saṃ sacāvahai |
RV_6,055.01c rathīr ṛtasya no bhava ||
RV_6,055.02a rathītamaṃ kapardinam īśānaṃ rādhaso mahaḥ |
RV_6,055.02c rāyaḥ sakhāyam īmahe ||
RV_6,055.03a rāyo dhārāsy āghṛṇe vaso rāśir ajāśva |
RV_6,055.03c dhīvato-dhīvataḥ sakhā ||
RV_6,055.04a pūṣaṇaṃ nv ajāśvam upa stoṣāma vājinam |
RV_6,055.04c svasur yo jāra ucyate ||
RV_6,055.05a mātur didhiṣum abravaṃ svasur jāraḥ śṛṇotu naḥ |
RV_6,055.05c bhrātendrasya sakhā mama ||
RV_6,055.06a ājāsaḥ pūṣaṇaṃ rathe niśṛmbhās te janaśriyam |
RV_6,055.06c devaṃ vahantu bibhrataḥ ||

RV_6,056.01a ya enam ādideśati karambhād iti pūṣaṇam |
RV_6,056.01c na tena deva ādiśe ||
RV_6,056.02a uta ghā sa rathītamaḥ sakhyā satpatir yujā |
RV_6,056.02c indro vṛtrāṇi jighnate ||
RV_6,056.03a utādaḥ paruṣe gavi sūraś cakraṃ hiraṇyayam |
RV_6,056.03c ny airayad rathītamaḥ ||
RV_6,056.04a yad adya tvā puruṣṭuta bravāma dasra mantumaḥ |
RV_6,056.04c tat su no manma sādhaya ||
RV_6,056.05a imaṃ ca no gaveṣaṇaṃ sātaye sīṣadho gaṇam |
RV_6,056.05c ārāt pūṣann asi śrutaḥ ||
RV_6,056.06a ā te svastim īmaha āreaghām upāvasum |
RV_6,056.06c adyā ca sarvatātaye śvaś ca sarvatātaye ||

RV_6,057.01a indrā nu pūṣaṇā vayaṃ sakhyāya svastaye |
RV_6,057.01c huvema vājasātaye ||
RV_6,057.02a somam anya upāsadat pātave camvoḥ sutam |
RV_6,057.02c karambham anya icchati ||
RV_6,057.03a ajā anyasya vahnayo harī anyasya sambhṛtā |
RV_6,057.03c tābhyāṃ vṛtrāṇi jighnate ||
RV_6,057.04a yad indro anayad rito mahīr apo vṛṣantamaḥ |
RV_6,057.04c tatra pūṣābhavat sacā ||
RV_6,057.05a tām pūṣṇaḥ sumatiṃ vayaṃ vṛkṣasya pra vayām iva |
RV_6,057.05c indrasya cā rabhāmahe ||
RV_6,057.06a ut pūṣaṇaṃ yuvāmahe 'bhīśūṃr iva sārathiḥ |
RV_6,057.06c mahyā indraṃ svastaye ||

RV_6,058.01a śukraṃ te anyad yajataṃ te anyad viṣurūpe ahanī dyaur ivāsi |
RV_6,058.01c viśvā hi māyā avasi svadhāvo bhadrā te pūṣann iha rātir astu ||
RV_6,058.02a ajāśvaḥ paśupā vājapastyo dhiyañjinvo bhuvane viśve arpitaḥ |
RV_6,058.02c aṣṭrām pūṣā śithirām udvarīvṛjat saṃcakṣāṇo bhuvanā deva īyate ||
RV_6,058.03a yās te pūṣan nāvo antaḥ samudre hiraṇyayīr antarikṣe caranti |
RV_6,058.03c tābhir yāsi dūtyāṃ sūryasya kāmena kṛta śrava icchamānaḥ ||
RV_6,058.04a pūṣā subandhur diva ā pṛthivyā iḷas patir maghavā dasmavarcāḥ |
RV_6,058.04c yaṃ devāso adaduḥ sūryāyai kāmena kṛtaṃ tavasaṃ svañcam ||

RV_6,059.01a pra nu vocā suteṣu vāṃ vīryā yāni cakrathuḥ |
RV_6,059.01c hatāso vām pitaro devaśatrava indrāgnī jīvatho yuvam ||
RV_6,059.02a baḷ itthā mahimā vām indrāgnī paniṣṭha ā |
RV_6,059.02c samāno vāṃ janitā bhrātarā yuvaṃ yamāv ihehamātarā ||
RV_6,059.03a okivāṃsā sute sacāṃ aśvā saptī ivādane |
RV_6,059.03c indrā nv agnī avaseha vajriṇā vayaṃ devā havāmahe ||
RV_6,059.04a ya indrāgnī suteṣu vāṃ stavat teṣv ṛtāvṛdhā |
RV_6,059.04c joṣavākaṃ vadataḥ pajrahoṣiṇā na devā bhasathaś cana ||
RV_6,059.05a indrāgnī ko asya vāṃ devau martaś ciketati |
RV_6,059.05c viṣūco aśvān yuyujāna īyata ekaḥ samāna ā rathe ||
RV_6,059.06a indrāgnī apād iyam pūrvāgāt padvatībhyaḥ |
RV_6,059.06c hitvī śiro jihvayā vāvadac carat triṃśat padā ny akramīt ||
RV_6,059.07a indrāgnī ā hi tanvate naro dhanvāni bāhvoḥ |
RV_6,059.07c mā no asmin mahādhane parā varktaṃ gaviṣṭiṣu ||
RV_6,059.08a indrāgnī tapanti māghā aryo arātayaḥ |
RV_6,059.08c apa dveṣāṃsy ā kṛtaṃ yuyutaṃ sūryād adhi ||
RV_6,059.09a indrāgnī yuvor api vasu divyāni pārthivā |
RV_6,059.09c ā na iha pra yacchataṃ rayiṃ viśvāyupoṣasam ||
RV_6,059.10a indrāgnī ukthavāhasā stomebhir havanaśrutā |
RV_6,059.10c viśvābhir gīrbhir ā gatam asya somasya pītaye ||

RV_6,060.01a śnathad vṛtram uta sanoti vājam indrā yo agnī sahurī saparyāt |
RV_6,060.01c irajyantā vasavyasya bhūreḥ sahastamā sahasā vājayantā ||
RV_6,060.02a tā yodhiṣṭam abhi gā indra nūnam apaḥ svar uṣaso agna ūḷhāḥ |
RV_6,060.02c diśaḥ svar uṣasa indra citrā apo gā agne yuvase niyutvān ||
RV_6,060.03a ā vṛtrahaṇā vṛtrahabhiḥ śuṣmair indra yātaṃ namobhir agne arvāk |
RV_6,060.03c yuvaṃ rādhobhir akavebhir indrāgne asme bhavatam uttamebhiḥ ||
RV_6,060.04a tā huve yayor idam papne viśvam purā kṛtam |
RV_6,060.04c indrāgnī na mardhataḥ ||
RV_6,060.05a ugrā vighaninā mṛdha indrāgnī havāmahe |
RV_6,060.05c tā no mṛḷāta īdṛśe ||
RV_6,060.06a hato vṛtrāṇy āryā hato dāsāni satpatī |
RV_6,060.06c hato viśvā apa dviṣaḥ ||
RV_6,060.07a indrāgnī yuvām ime 'bhi stomā anūṣata |
RV_6,060.07c pibataṃ śambhuvā sutam ||
RV_6,060.08a yā vāṃ santi puruspṛho niyuto dāśuṣe narā |
RV_6,060.08c indrāgnī tābhir ā gatam ||
RV_6,060.09a tābhir ā gacchataṃ naropedaṃ savanaṃ sutam |
RV_6,060.09c indrāgnī somapītaye ||
RV_6,060.10a tam īḷiṣva yo arciṣā vanā viśvā pariṣvajat |
RV_6,060.10c kṛṣṇā kṛṇoti jihvayā ||
RV_6,060.11a ya iddha āvivāsati sumnam indrasya martyaḥ |
RV_6,060.11c dyumnāya sutarā apaḥ ||
RV_6,060.12a tā no vājavatīr iṣa āśūn pipṛtam arvataḥ |
RV_6,060.12c indram agniṃ ca voḷhave ||
RV_6,060.13a ubhā vām indrāgnī āhuvadhyā ubhā rādhasaḥ saha mādayadhyai |
RV_6,060.13c ubhā dātārāv iṣāṃ rayīṇām ubhā vājasya sātaye huve vām ||
RV_6,060.14a ā no gavyebhir aśvyair vasavyair upa gacchatam |
RV_6,060.14c sakhāyau devau sakhyāya śambhuvendrāgnī tā havāmahe ||
RV_6,060.15a indrāgnī śṛṇutaṃ havaṃ yajamānasya sunvataḥ |
RV_6,060.15c vītaṃ havyāny ā gatam pibataṃ somyam madhu ||

RV_6,061.01a iyam adadād rabhasam ṛṇacyutaṃ divodāsaṃ vadhryaśvāya dāśuṣe |
RV_6,061.01c yā śaśvantam ācakhādāvasam paṇiṃ tā te dātrāṇi taviṣā sarasvati ||
RV_6,061.02a iyaṃ śuṣmebhir bisakhā ivārujat sānu girīṇāṃ taviṣebhir ūrmibhiḥ |
RV_6,061.02c pārāvataghnīm avase suvṛktibhiḥ sarasvatīm ā vivāsema dhītibhiḥ ||
RV_6,061.03a sarasvati devanido ni barhaya prajāṃ viśvasya bṛsayasya māyinaḥ |
RV_6,061.03c uta kṣitibhyo 'vanīr avindo viṣam ebhyo asravo vājinīvati ||
RV_6,061.04a pra ṇo devī sarasvatī vājebhir vājinīvatī |
RV_6,061.04c dhīnām avitry avatu ||
RV_6,061.05a yas tvā devi sarasvaty upabrūte dhane hite |
RV_6,061.05c indraṃ na vṛtratūrye ||
RV_6,061.06a tvaṃ devi sarasvaty avā vājeṣu vājini |
RV_6,061.06c radā pūṣeva naḥ sanim ||
RV_6,061.07a uta syā naḥ sarasvatī ghorā hiraṇyavartaniḥ |
RV_6,061.07c vṛtraghnī vaṣṭi suṣṭutim ||
RV_6,061.08a yasyā ananto ahrutas tveṣaś cariṣṇur arṇavaḥ |
RV_6,061.08c amaś carati roruvat ||
RV_6,061.09a sā no viśvā ati dviṣaḥ svasṝr anyā ṛtāvarī |
RV_6,061.09c atann aheva sūryaḥ ||
RV_6,061.10a uta naḥ priyā priyāsu saptasvasā sujuṣṭā |
RV_6,061.10c sarasvatī stomyā bhūt ||
RV_6,061.11a āpapruṣī pārthivāny uru rajo antarikṣam |
RV_6,061.11c sarasvatī nidas pātu ||
RV_6,061.12a triṣadhasthā saptadhātuḥ pañca jātā vardhayantī |
RV_6,061.12c vāje-vāje havyā bhūt ||
RV_6,061.13a pra yā mahimnā mahināsu cekite dyumnebhir anyā apasām apastamā |
RV_6,061.13c ratha iva bṛhatī vibhvane kṛtopastutyā cikituṣā sarasvatī ||
RV_6,061.14a sarasvaty abhi no neṣi vasyo māpa spharīḥ payasā mā na ā dhak |
RV_6,061.14c juṣasva naḥ sakhyā veśyā ca mā tvat kṣetrāṇy araṇāni ganma ||

RV_6,062.01a stuṣe narā divo asya prasantāśvinā huve jaramāṇo arkaiḥ |
RV_6,062.01c yā sadya usrā vyuṣi jmo antān yuyūṣataḥ pary urū varāṃsi ||
RV_6,062.02a tā yajñam ā śucibhiś cakramāṇā rathasya bhānuṃ rurucū rajobhiḥ |
RV_6,062.02c purū varāṃsy amitā mimānāpo dhanvāny ati yātho ajrān ||
RV_6,062.03a tā ha tyad vartir yad aradhram ugretthā dhiya ūhathuḥ śaśvad aśvaiḥ |
RV_6,062.03c manojavebhir iṣiraiḥ śayadhyai pari vyathir dāśuṣo martyasya ||
RV_6,062.04a tā navyaso jaramāṇasya manmopa bhūṣato yuyujānasaptī |
RV_6,062.04c śubham pṛkṣam iṣam ūrjaṃ vahantā hotā yakṣat pratno adhrug yuvānā ||
RV_6,062.05a tā valgū dasrā puruśākatamā pratnā navyasā vacasā vivāse |
RV_6,062.05c yā śaṃsate stuvate śambhaviṣṭhā babhūvatur gṛṇate citrarātī ||
RV_6,062.06a tā bhujyuṃ vibhir adbhyaḥ samudrāt tugrasya sūnum ūhathū rajobhiḥ |
RV_6,062.06c areṇubhir yojanebhir bhujantā patatribhir arṇaso nir upasthāt ||
RV_6,062.07a vi jayuṣā rathyā yātam adriṃ śrutaṃ havaṃ vṛṣaṇā vadhrimatyāḥ |
RV_6,062.07c daśasyantā śayave pipyathur gām iti cyavānā sumatim bhuraṇyū ||
RV_6,062.08a yad rodasī pradivo asti bhūmā heḷo devānām uta martyatrā |
RV_6,062.08c tad ādityā vasavo rudriyāso rakṣoyuje tapur aghaṃ dadhāta ||
RV_6,062.09a ya īṃ rājānāv ṛtuthā vidadhad rajaso mitro varuṇaś ciketat |
RV_6,062.09c gambhīrāya rakṣase hetim asya droghāya cid vacasa ānavāya ||
RV_6,062.10a antaraiś cakrais tanayāya vartir dyumatā yātaṃ nṛvatā rathena |
RV_6,062.10c sanutyena tyajasā martyasya vanuṣyatām api śīrṣā vavṛktam ||
RV_6,062.11a ā paramābhir uta madhyamābhir niyudbhir yātam avamābhir arvāk |
RV_6,062.11c dṛḷhasya cid gomato vi vrajasya duro vartaṃ gṛṇate citrarātī ||

RV_6,063.01a kva tyā valgū puruhūtādya dūto na stomo 'vidan namasvān |
RV_6,063.01c ā yo arvāṅ nāsatyā vavarta preṣṭhā hy asatho asya manman ||
RV_6,063.02a aram me gantaṃ havanāyāsmai gṛṇānā yathā pibātho andhaḥ |
RV_6,063.02c pari ha tyad vartir yātho riṣo na yat paro nāntaras tuturyāt ||
RV_6,063.03a akāri vām andhaso varīmann astāri barhiḥ suprāyaṇatamam |
RV_6,063.03c uttānahasto yuvayur vavandā vāṃ nakṣanto adraya āñjan ||
RV_6,063.04a ūrdhvo vām agnir adhvareṣv asthāt pra rātir eti jūrṇinī ghṛtācī |
RV_6,063.04c pra hotā gūrtamanā urāṇo 'yukta yo nāsatyā havīman ||
RV_6,063.05a adhi śriye duhitā sūryasya rathaṃ tasthau purubhujā śatotim |
RV_6,063.05c pra māyābhir māyinā bhūtam atra narā nṛtū janiman yajñiyānām ||
RV_6,063.06a yuvaṃ śrībhir darśatābhir ābhiḥ śubhe puṣṭim ūhathuḥ sūryāyāḥ |
RV_6,063.06c pra vāṃ vayo vapuṣe 'nu paptan nakṣad vāṇī suṣṭutā dhiṣṇyā vām ||
RV_6,063.07a ā vāṃ vayo 'śvāso vahiṣṭhā abhi prayo nāsatyā vahantu |
RV_6,063.07c pra vāṃ ratho manojavā asarjīṣaḥ pṛkṣa iṣidho anu pūrvīḥ ||
RV_6,063.08a puru hi vām purubhujā deṣṇaṃ dhenuṃ na iṣam pinvatam asakrām |
RV_6,063.08c stutaś ca vām mādhvī suṣṭutiś ca rasāś ca ye vām anu rātim agman ||
RV_6,063.09a uta ma ṛjre purayasya raghvī sumīḷhe śatam peruke ca pakvā |
RV_6,063.09c śāṇḍo dād dhiraṇinaḥ smaddiṣṭīn daśa vaśāso abhiṣāca ṛṣvān ||
RV_6,063.10a saṃ vāṃ śatā nāsatyā sahasrāśvānām purupanthā gire dāt |
RV_6,063.10c bharadvājāya vīra nū gire dād dhatā rakṣāṃsi purudaṃsasā syuḥ ||
RV_6,063.11a ā vāṃ sumne variman sūribhiḥ ṣyām ||

RV_6,064.01a ud u śriya uṣaso rocamānā asthur apāṃ normayo ruśantaḥ |
RV_6,064.01c kṛṇoti viśvā supathā sugāny abhūd u vasvī dakṣiṇā maghonī ||
RV_6,064.02a bhadrā dadṛkṣa urviyā vi bhāsy ut te śocir bhānavo dyām apaptan |
RV_6,064.02c āvir vakṣaḥ kṛṇuṣe śumbhamānoṣo devi rocamānā mahobhiḥ ||
RV_6,064.03a vahanti sīm aruṇāso ruśanto gāvaḥ subhagām urviyā prathānām |
RV_6,064.03c apejate śūro asteva śatrūn bādhate tamo ajiro na voḷhā ||
RV_6,064.04a sugota te supathā parvateṣv avāte apas tarasi svabhāno |
RV_6,064.04c sā na ā vaha pṛthuyāmann ṛṣve rayiṃ divo duhitar iṣayadhyai ||
RV_6,064.05a sā vaha yokṣabhir avātoṣo varaṃ vahasi joṣam anu |
RV_6,064.05c tvaṃ divo duhitar yā ha devī pūrvahūtau maṃhanā darśatā bhūḥ ||
RV_6,064.06a ut te vayaś cid vasater apaptan naraś ca ye pitubhājo vyuṣṭau |
RV_6,064.06c amā sate vahasi bhūri vāmam uṣo devi dāśuṣe martyāya ||

RV_6,065.01a eṣā syā no duhitā divojāḥ kṣitīr ucchantī mānuṣīr ajīgaḥ |
RV_6,065.01c yā bhānunā ruśatā rāmyāsv ajñāyi tiras tamasaś cid aktūn ||
RV_6,065.02a vi tad yayur aruṇayugbhir aśvaiś citram bhānty uṣasaś candrarathāḥ |
RV_6,065.02c agraṃ yajñasya bṛhato nayantīr vi tā bādhante tama ūrmyāyāḥ ||
RV_6,065.03a śravo vājam iṣam ūrjaṃ vahantīr ni dāśuṣa uṣaso martyāya |
RV_6,065.03c maghonīr vīravat patyamānā avo dhāta vidhate ratnam adya ||
RV_6,065.04a idā hi vo vidhate ratnam astīdā vīrāya dāśuṣa uṣāsaḥ |
RV_6,065.04c idā viprāya jarate yad ukthā ni ṣma māvate vahathā purā cit ||
RV_6,065.05a idā hi ta uṣo adrisāno gotrā gavām aṅgiraso gṛṇanti |
RV_6,065.05c vy arkeṇa bibhidur brahmaṇā ca satyā nṛṇām abhavad devahūtiḥ ||
RV_6,065.06a ucchā divo duhitaḥ pratnavan no bharadvājavad vidhate maghoni |
RV_6,065.06c suvīraṃ rayiṃ gṛṇate rirīhy urugāyam adhi dhehi śravo naḥ ||

RV_6,066.01a vapur nu tac cikituṣe cid astu samānaṃ nāma dhenu patyamānam |
RV_6,066.01c marteṣv anyad dohase pīpāya sakṛc chukraṃ duduhe pṛśnir ūdhaḥ ||
RV_6,066.02a ye agnayo na śośucann idhānā dvir yat trir maruto vāvṛdhanta |
RV_6,066.02c areṇavo hiraṇyayāsa eṣāṃ sākaṃ nṛmṇaiḥ pauṃsyebhiś ca bhūvan ||
RV_6,066.03a rudrasya ye mīḷhuṣaḥ santi putrā yāṃś co nu dādhṛvir bharadhyai |
RV_6,066.03c vide hi mātā maho mahī ṣā set pṛśniḥ subhve garbham ādhāt ||
RV_6,066.04a na ya īṣante januṣo 'yā nv antaḥ santo 'vadyāni punānāḥ |
RV_6,066.04c nir yad duhre śucayo 'nu joṣam anu śriyā tanvam ukṣamāṇāḥ ||
RV_6,066.05a makṣū na yeṣu dohase cid ayā ā nāma dhṛṣṇu mārutaṃ dadhānāḥ |
RV_6,066.05c na ye staunā ayāso mahnā nū cit sudānur ava yāsad ugrān ||
RV_6,066.06a ta id ugrāḥ śavasā dhṛṣṇuṣeṇā ubhe yujanta rodasī sumeke |
RV_6,066.06c adha smaiṣu rodasī svaśocir āmavatsu tasthau na rokaḥ ||
RV_6,066.07a aneno vo maruto yāmo astv anaśvaś cid yam ajaty arathīḥ |
RV_6,066.07c anavaso anabhīśū rajastūr vi rodasī pathyā yāti sādhan ||
RV_6,066.08a nāsya vartā na tarutā nv asti maruto yam avatha vājasātau |
RV_6,066.08c toke vā goṣu tanaye yam apsu sa vrajaṃ dartā pārye adha dyoḥ ||
RV_6,066.09a pra citram arkaṃ gṛṇate turāya mārutāya svatavase bharadhvam |
RV_6,066.09c ye sahāṃsi sahasā sahante rejate agne pṛthivī makhebhyaḥ ||
RV_6,066.10a tviṣīmanto adhvarasyeva didyut tṛṣucyavaso juhvo nāgneḥ |
RV_6,066.10c arcatrayo dhunayo na vīrā bhrājajjanmāno maruto adhṛṣṭāḥ ||
RV_6,066.11a taṃ vṛdhantam mārutam bhrājadṛṣṭiṃ rudrasya sūnuṃ havasā vivāse |
RV_6,066.11c divaḥ śardhāya śucayo manīṣā girayo nāpa ugrā aspṛdhran ||

RV_6,067.01a viśveṣāṃ vaḥ satāṃ jyeṣṭhatamā gīrbhir mitrāvaruṇā vāvṛdhadhyai |
RV_6,067.01c saṃ yā raśmeva yamatur yamiṣṭhā dvā janāṃ asamā bāhubhiḥ svaiḥ ||
RV_6,067.02a iyam mad vām pra stṛṇīte manīṣopa priyā namasā barhir accha |
RV_6,067.02c yantaṃ no mitrāvaruṇāv adhṛṣṭaṃ chardir yad vāṃ varūthyaṃ sudānū ||
RV_6,067.03a ā yātam mitrāvaruṇā suśasty upa priyā namasā hūyamānā |
RV_6,067.03c saṃ yāv apnastho apaseva janāñ chrudhīyataś cid yatatho mahitvā ||
RV_6,067.04a aśvā na yā vājinā pūtabandhū ṛtā yad garbham aditir bharadhyai |
RV_6,067.04c pra yā mahi mahāntā jāyamānā ghorā martāya ripave ni dīdhaḥ ||
RV_6,067.05a viśve yad vām maṃhanā mandamānāḥ kṣatraṃ devāso adadhuḥ sajoṣāḥ |
RV_6,067.05c pari yad bhūtho rodasī cid urvī santi spaśo adabdhāso amūrāḥ ||
RV_6,067.06a tā hi kṣatraṃ dhārayethe anu dyūn dṛṃhethe sānum upamād iva dyoḥ |
RV_6,067.06c dṛḷho nakṣatra uta viśvadevo bhūmim ātān dyāṃ dhāsināyoḥ ||
RV_6,067.07a tā vigraṃ dhaithe jaṭharam pṛṇadhyā ā yat sadma sabhṛtayaḥ pṛṇanti |
RV_6,067.07c na mṛṣyante yuvatayo 'vātā vi yat payo viśvajinvā bharante ||
RV_6,067.08a tā jihvayā sadam edaṃ sumedhā ā yad vāṃ satyo aratir ṛte bhūt |
RV_6,067.08c tad vām mahitvaṃ ghṛtānnāv astu yuvaṃ dāśuṣe vi cayiṣṭam aṃhaḥ ||
RV_6,067.09a pra yad vām mitrāvaruṇā spūrdhan priyā dhāma yuvadhitā minanti |
RV_6,067.09c na ye devāsa ohasā na martā ayajñasāco apyo na putrāḥ ||
RV_6,067.10a vi yad vācaṃ kīstāso bharante śaṃsanti ke cin nivido manānāḥ |
RV_6,067.10c ād vām bravāma satyāny ukthā nakir devebhir yatatho mahitvā ||
RV_6,067.11a avor itthā vāṃ chardiṣo abhiṣṭau yuvor mitrāvaruṇāv askṛdhoyu |
RV_6,067.11c anu yad gāva sphurān ṛjipyaṃ dhṛṣṇuṃ yad raṇe vṛṣaṇaṃ yunajan ||

RV_6,068.01a śruṣṭī vāṃ yajña udyataḥ sajoṣā manuṣvad vṛktabarhiṣo yajadhyai |
RV_6,068.01c ā ya indrāvaruṇāv iṣe adya mahe sumnāya maha āvavartat ||
RV_6,068.02a tā hi śreṣṭhā devatātā tujā śūrāṇāṃ śaviṣṭhā tā hi bhūtam |
RV_6,068.02c maghonām maṃhiṣṭhā tuviśuṣma ṛtena vṛtraturā sarvasenā ||
RV_6,068.03a tā gṛṇīhi namasyebhiḥ śūṣaiḥ sumnebhir indrāvaruṇā cakānā |
RV_6,068.03c vajreṇānyaḥ śavasā hanti vṛtraṃ siṣakty anyo vṛjaneṣu vipraḥ ||
RV_6,068.04a gnāś ca yan naraś ca vāvṛdhanta viśve devāso narāṃ svagūrtāḥ |
RV_6,068.04c praibhya indrāvaruṇā mahitvā dyauś ca pṛthivi bhūtam urvī ||
RV_6,068.05a sa it sudānuḥ svavāṃ ṛtāvendrā yo vāṃ varuṇa dāśati tman |
RV_6,068.05c iṣā sa dviṣas tared dāsvān vaṃsad rayiṃ rayivataś ca janān ||
RV_6,068.06a yaṃ yuvaṃ dāśvadhvarāya devā rayiṃ dhattho vasumantam purukṣum |
RV_6,068.06c asme sa indrāvaruṇāv api ṣyāt pra yo bhanakti vanuṣām aśastīḥ ||
RV_6,068.07a uta naḥ sutrātro devagopāḥ sūribhya indrāvaruṇā rayiḥ ṣyāt |
RV_6,068.07c yeṣāṃ śuṣmaḥ pṛtanāsu sāhvān pra sadyo dyumnā tirate taturiḥ ||
RV_6,068.08a nū na indrāvaruṇā gṛṇānā pṛṅktaṃ rayiṃ sauśravasāya devā |
RV_6,068.08c itthā gṛṇanto mahinasya śardho 'po na nāvā duritā tarema ||
RV_6,068.09a pra samrāje bṛhate manma nu priyam arca devāya varuṇāya saprathaḥ |
RV_6,068.09c ayaṃ ya urvī mahinā mahivrataḥ kratvā vibhāty ajaro na śociṣā ||
RV_6,068.10a indrāvaruṇā sutapāv imaṃ sutaṃ somam pibatam madyaṃ dhṛtavratā |
RV_6,068.10c yuvo ratho adhvaraṃ devavītaye prati svasaram upa yāti pītaye ||
RV_6,068.11a indrāvaruṇā madhumattamasya vṛṣṇaḥ somasya vṛṣaṇā vṛṣethām |
RV_6,068.11c idaṃ vām andhaḥ pariṣiktam asme āsadyāsmin barhiṣi mādayethām ||

RV_6,069.01a saṃ vāṃ karmaṇā sam iṣā hinomīndrāviṣṇū apasas pāre asya |
RV_6,069.01c juṣethāṃ yajñaṃ draviṇaṃ ca dhattam ariṣṭair naḥ pathibhiḥ pārayantā ||
RV_6,069.02a yā viśvāsāṃ janitārā matīnām indrāviṣṇū kalaśā somadhānā |
RV_6,069.02c pra vāṃ giraḥ śasyamānā avantu pra stomāso gīyamānāso arkaiḥ ||
RV_6,069.03a indrāviṣṇū madapatī madānām ā somaṃ yātaṃ draviṇo dadhānā |
RV_6,069.03c saṃ vām añjantv aktubhir matīnāṃ saṃ stomāsaḥ śasyamānāsa ukthaiḥ ||
RV_6,069.04a ā vām aśvāso abhimātiṣāha indrāviṣṇū sadhamādo vahantu |
RV_6,069.04c juṣethāṃ viśvā havanā matīnām upa brahmāṇi śṛṇutaṃ giro me ||
RV_6,069.05a indrāviṣṇū tat panayāyyaṃ vāṃ somasya mada uru cakramāthe |
RV_6,069.05c akṛṇutam antarikṣaṃ varīyo 'prathataṃ jīvase no rajāṃsi ||
RV_6,069.06a indrāviṣṇū haviṣā vāvṛdhānāgrādvānā namasā rātahavyā |
RV_6,069.06c ghṛtāsutī draviṇaṃ dhattam asme samudra sthaḥ kalaśaḥ somadhānaḥ ||
RV_6,069.07a indrāviṣṇū pibatam madhvo asya somasya dasrā jaṭharam pṛṇethām |
RV_6,069.07c ā vām andhāṃsi madirāṇy agmann upa brahmāṇi śṛṇutaṃ havam me ||
RV_6,069.08a ubhā jigyathur na parā jayethe na parā jigye kataraś canainoḥ |
RV_6,069.08c indraś ca viṣṇo yad apaspṛdhethāṃ tredhā sahasraṃ vi tad airayethām ||

RV_6,070.01a ghṛtavatī bhuvanānām abhiśriyorvī pṛthvī madhudughe supeśasā |
RV_6,070.01c dyāvāpṛthivī varuṇasya dharmaṇā viṣkabhite ajare bhūriretasā ||
RV_6,070.02a asaścantī bhūridhāre payasvatī ghṛtaṃ duhāte sukṛte śucivrate |
RV_6,070.02c rājantī asya bhuvanasya rodasī asme retaḥ siñcataṃ yan manurhitam ||
RV_6,070.03a yo vām ṛjave kramaṇāya rodasī marto dadāśa dhiṣaṇe sa sādhati |
RV_6,070.03c pra prajābhir jāyate dharmaṇas pari yuvoḥ siktā viṣurūpāṇi savratā ||
RV_6,070.04a ghṛtena dyāvāpṛthivī abhīvṛte ghṛtaśriyā ghṛtapṛcā ghṛtāvṛdhā |
RV_6,070.04c urvī pṛthvī hotṛvūrye purohite te id viprā īḷate sumnam iṣṭaye ||
RV_6,070.05a madhu no dyāvāpṛthivī mimikṣatām madhuścutā madhudughe madhuvrate |
RV_6,070.05c dadhāne yajñaṃ draviṇaṃ ca devatā mahi śravo vājam asme suvīryam ||
RV_6,070.06a ūrjaṃ no dyauś ca pṛthivī ca pinvatām pitā mātā viśvavidā sudaṃsasā |
RV_6,070.06c saṃrarāṇe rodasī viśvaśambhuvā saniṃ vājaṃ rayim asme sam invatām ||

RV_6,071.01a ud u ṣya devaḥ savitā hiraṇyayā bāhū ayaṃsta savanāya sukratuḥ |
RV_6,071.01c ghṛtena pāṇī abhi pruṣṇute makho yuvā sudakṣo rajaso vidharmaṇi ||
RV_6,071.02a devasya vayaṃ savituḥ savīmani śreṣṭhe syāma vasunaś ca dāvane |
RV_6,071.02c yo viśvasya dvipado yaś catuṣpado niveśane prasave cāsi bhūmanaḥ ||
RV_6,071.03a adabdhebhiḥ savitaḥ pāyubhiṣ ṭvaṃ śivebhir adya pari pāhi no gayam |
RV_6,071.03c hiraṇyajihvaḥ suvitāya navyase rakṣā mākir no aghaśaṃsa īśata ||
RV_6,071.04a ud u ṣya devaḥ savitā damūnā hiraṇyapāṇiḥ pratidoṣam asthāt |
RV_6,071.04c ayohanur yajato mandrajihva ā dāśuṣe suvati bhūri vāmam ||
RV_6,071.05a ud ū ayāṃ upavakteva bāhū hiraṇyayā savitā supratīkā |
RV_6,071.05c divo rohāṃsy aruhat pṛthivyā arīramat patayat kac cid abhvam ||
RV_6,071.06a vāmam adya savitar vāmam u śvo dive-dive vāmam asmabhyaṃ sāvīḥ |
RV_6,071.06c vāmasya hi kṣayasya deva bhūrer ayā dhiyā vāmabhājaḥ syāma ||

RV_6,072.01a indrāsomā mahi tad vām mahitvaṃ yuvam mahāni prathamāni cakrathuḥ |
RV_6,072.01c yuvaṃ sūryaṃ vividathur yuvaṃ svar viśvā tamāṃsy ahataṃ nidaś ca ||
RV_6,072.02a indrāsomā vāsayatha uṣāsam ut sūryaṃ nayatho jyotiṣā saha |
RV_6,072.02c upa dyāṃ skambhathu skambhanenāprathatam pṛthivīm mātaraṃ vi ||
RV_6,072.03a indrāsomāv ahim apaḥ pariṣṭhāṃ hatho vṛtram anu vāṃ dyaur amanyata |
RV_6,072.03c prārṇāṃsy airayataṃ nadīnām ā samudrāṇi paprathuḥ purūṇi ||
RV_6,072.04a indrāsomā pakvam āmāsv antar ni gavām id dadhathur vakṣaṇāsu |
RV_6,072.04c jagṛbhathur anapinaddham āsu ruśac citrāsu jagatīṣv antaḥ ||
RV_6,072.05a indrāsomā yuvam aṅga tarutram apatyasācaṃ śrutyaṃ rarāthe |
RV_6,072.05c yuvaṃ śuṣmaṃ naryaṃ carṣaṇibhyaḥ saṃ vivyathuḥ pṛtanāṣāham ugrā ||

RV_6,073.01a yo adribhit prathamajā ṛtāvā bṛhaspatir āṅgiraso haviṣmān |
RV_6,073.01c dvibarhajmā prāgharmasat pitā na ā rodasī vṛṣabho roravīti ||
RV_6,073.02a janāya cid ya īvata u lokam bṛhaspatir devahūtau cakāra |
RV_6,073.02c ghnan vṛtrāṇi vi puro dardarīti jayañ chatrūṃr amitrān pṛtsu sāhan ||
RV_6,073.03a bṛhaspatiḥ sam ajayad vasūni maho vrajān gomato deva eṣaḥ |
RV_6,073.03c apaḥ siṣāsan svar apratīto bṛhaspatir hanty amitram arkaiḥ ||

RV_6,074.01a somārudrā dhārayethām asuryam pra vām iṣṭayo 'ram aśnuvantu |
RV_6,074.01c dame-dame sapta ratnā dadhānā śaṃ no bhūtaṃ dvipade śaṃ catuṣpade ||
RV_6,074.02a somārudrā vi vṛhataṃ viṣūcīm amīvā yā no gayam āviveśa |
RV_6,074.02c āre bādhethāṃ nirṛtim parācair asme bhadrā sauśravasāni santu ||
RV_6,074.03a somārudrā yuvam etāny asme viśvā tanūṣu bheṣajāni dhattam |
RV_6,074.03c ava syatam muñcataṃ yan no asti tanūṣu baddhaṃ kṛtam eno asmat ||
RV_6,074.04a tigmāyudhau tigmahetī suśevau somārudrāv iha su mṛḷataṃ naḥ |
RV_6,074.04c pra no muñcataṃ varuṇasya pāśād gopāyataṃ naḥ sumanasyamānā ||

RV_6,075.01a jīmūtasyeva bhavati pratīkaṃ yad varmī yāti samadām upasthe |
RV_6,075.01c anāviddhayā tanvā jaya tvaṃ sa tvā varmaṇo mahimā pipartu ||
RV_6,075.02a dhanvanā gā dhanvanājiṃ jayema dhanvanā tīvrāḥ samado jayema |
RV_6,075.02c dhanuḥ śatror apakāmaṃ kṛṇoti dhanvanā sarvāḥ pradiśo jayema ||
RV_6,075.03a vakṣyantīved ā ganīganti karṇam priyaṃ sakhāyam pariṣasvajānā |
RV_6,075.03c yoṣeva śiṅkte vitatādhi dhanvañ jyā iyaṃ samane pārayantī ||
RV_6,075.04a te ācarantī samaneva yoṣā māteva putram bibhṛtām upasthe |
RV_6,075.04c apa śatrūn vidhyatāṃ saṃvidāne ārtnī ime viṣphurantī amitrān ||
RV_6,075.05a bahvīnām pitā bahur asya putraś ciścā kṛṇoti samanāvagatya |
RV_6,075.05c iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ ||
RV_6,075.06a rathe tiṣṭhan nayati vājinaḥ puro yatra-yatra kāmayate suṣārathiḥ |
RV_6,075.06c abhīśūnām mahimānam panāyata manaḥ paścād anu yacchanti raśmayaḥ ||
RV_6,075.07a tīvrān ghoṣān kṛṇvate vṛṣapāṇayo 'śvā rathebhiḥ saha vājayantaḥ |
RV_6,075.07c avakrāmantaḥ prapadair amitrān kṣiṇanti śatrūṃr anapavyayantaḥ ||
RV_6,075.08a rathavāhanaṃ havir asya nāma yatrāyudhaṃ nihitam asya varma |
RV_6,075.08c tatrā ratham upa śagmaṃ sadema viśvāhā vayaṃ sumanasyamānāḥ ||
RV_6,075.09a svāduṣaṃsadaḥ pitaro vayodhāḥ kṛcchreśritaḥ śaktīvanto gabhīrāḥ |
RV_6,075.09c citrasenā iṣubalā amṛdhrāḥ satovīrā uravo vrātasāhāḥ ||
RV_6,075.10a brāhmaṇāsaḥ pitaraḥ somyāsaḥ śive no dyāvāpṛthivī anehasā |
RV_6,075.10c pūṣā naḥ pātu duritād ṛtāvṛdho rakṣā mākir no aghaśaṃsa īśata ||
RV_6,075.11a suparṇaṃ vaste mṛgo asyā danto gobhiḥ saṃnaddhā patati prasūtā |
RV_6,075.11c yatrā naraḥ saṃ ca vi ca dravanti tatrāsmabhyam iṣavaḥ śarma yaṃsan ||
RV_6,075.12a ṛjīte pari vṛṅdhi no 'śmā bhavatu nas tanūḥ |
RV_6,075.12c somo adhi bravītu no 'ditiḥ śarma yacchatu ||
RV_6,075.13a ā jaṅghanti sānv eṣāṃ jaghanāṃ upa jighnate |
RV_6,075.13c aśvājani pracetaso 'śvān samatsu codaya ||
RV_6,075.14a ahir iva bhogaiḥ pary eti bāhuṃ jyāyā hetim paribādhamānaḥ |
RV_6,075.14c hastaghno viśvā vayunāni vidvān pumān pumāṃsam pari pātu viśvataḥ ||
RV_6,075.15a ālāktā yā ruruśīrṣṇy atho yasyā ayo mukham |
RV_6,075.15c idam parjanyaretasa iṣvai devyai bṛhan namaḥ ||
RV_6,075.16a avasṛṣṭā parā pata śaravye brahmasaṃśite |
RV_6,075.16c gacchāmitrān pra padyasva māmīṣāṃ kaṃ canoc chiṣaḥ ||
RV_6,075.17a yatra bāṇāḥ sampatanti kumārā viśikhā iva |
RV_6,075.17c tatrā no brahmaṇas patir aditiḥ śarma yacchatu viśvāhā śarma yacchatu ||
RV_6,075.18a marmāṇi te varmaṇā chādayāmi somas tvā rājāmṛtenānu vastām |
RV_6,075.18c uror varīyo varuṇas te kṛṇotu jayantaṃ tvānu devā madantu ||
RV_6,075.19a yo naḥ svo araṇo yaś ca niṣṭyo jighāṃsati |
RV_6,075.19c devās taṃ sarve dhūrvantu brahma varma mamāntaram ||



_____________________________________________________________




Ṛgveda 7



RV_7,001.01a agniṃ naro dīdhitibhir araṇyor hastacyutī janayanta praśastam |
RV_7,001.01c dūredṛśaṃ gṛhapatim atharyum ||
RV_7,001.02a tam agnim aste vasavo ny ṛṇvan supraticakṣam avase kutaś cit |
RV_7,001.02c dakṣāyyo yo dama āsa nityaḥ ||
RV_7,001.03a preddho agne dīdihi puro no 'jasrayā sūrmyā yaviṣṭha |
RV_7,001.03c tvāṃ śaśvanta upa yanti vājāḥ ||
RV_7,001.04a pra te agnayo 'gnibhyo varaṃ niḥ suvīrāsaḥ śośucanta dyumantaḥ |
RV_7,001.04c yatrā naraḥ samāsate sujātāḥ ||
RV_7,001.05a dā no agne dhiyā rayiṃ suvīraṃ svapatyaṃ sahasya praśastam |
RV_7,001.05c na yaṃ yāvā tarati yātumāvān ||
RV_7,001.06a upa yam eti yuvatiḥ sudakṣaṃ doṣā vastor haviṣmatī ghṛtācī |
RV_7,001.06c upa svainam aramatir vasūyuḥ ||
RV_7,001.07a viśvā agne 'pa dahārātīr yebhis tapobhir adaho jarūtham |
RV_7,001.07c pra nisvaraṃ cātayasvāmīvām ||
RV_7,001.08a ā yas te agna idhate anīkaṃ vasiṣṭha śukra dīdivaḥ pāvaka |
RV_7,001.08c uto na ebhi stavathair iha syāḥ ||
RV_7,001.09a vi ye te agne bhejire anīkam martā naraḥ pitryāsaḥ purutrā |
RV_7,001.09c uto na ebhiḥ sumanā iha syāḥ ||
RV_7,001.10a ime naro vṛtrahatyeṣu śūrā viśvā adevīr abhi santu māyāḥ |
RV_7,001.10c ye me dhiyam panayanta praśastām ||
RV_7,001.11a mā śūne agne ni ṣadāma nṛṇām māśeṣaso 'vīratā pari tvā |
RV_7,001.11c prajāvatīṣu duryāsu durya ||
RV_7,001.12a yam aśvī nityam upayāti yajñam prajāvantaṃ svapatyaṃ kṣayaṃ naḥ |
RV_7,001.12c svajanmanā śeṣasā vāvṛdhānam ||
RV_7,001.13a pāhi no agne rakṣaso ajuṣṭāt pāhi dhūrter araruṣo aghāyoḥ |
RV_7,001.13c tvā yujā pṛtanāyūṃr abhi ṣyām ||
RV_7,001.14a sed agnir agnīṃr aty astv anyān yatra vājī tanayo vīḷupāṇiḥ |
RV_7,001.14c sahasrapāthā akṣarā sameti ||
RV_7,001.15a sed agnir yo vanuṣyato nipāti sameddhāram aṃhasa uruṣyāt |
RV_7,001.15c sujātāsaḥ pari caranti vīrāḥ ||
RV_7,001.16a ayaṃ so agnir āhutaḥ purutrā yam īśānaḥ sam id indhe haviṣmān |
RV_7,001.16c pari yam ety adhvareṣu hotā ||
RV_7,001.17a tve agna āhavanāni bhūrīśānāsa ā juhuyāma nityā |
RV_7,001.17c ubhā kṛṇvanto vahatū miyedhe ||
RV_7,001.18a imo agne vītatamāni havyājasro vakṣi devatātim accha |
RV_7,001.18c prati na īṃ surabhīṇi vyantu ||
RV_7,001.19a mā no agne 'vīrate parā dā durvāsase 'mataye mā no asyai |
RV_7,001.19c mā naḥ kṣudhe mā rakṣasa ṛtāvo mā no dame mā vana ā juhūrthāḥ ||
RV_7,001.20a nū me brahmāṇy agna uc chaśādhi tvaṃ deva maghavadbhyaḥ suṣūdaḥ |
RV_7,001.20c rātau syāmobhayāsa ā te yūyam pāta svastibhiḥ sadā naḥ ||
RV_7,001.21a tvam agne suhavo raṇvasaṃdṛk sudītī sūno sahaso didīhi |
RV_7,001.21c mā tve sacā tanaye nitya ā dhaṅ mā vīro asman naryo vi dāsīt ||
RV_7,001.22a mā no agne durbhṛtaye sacaiṣu deveddheṣv agniṣu pra vocaḥ |
RV_7,001.22c mā te asmān durmatayo bhṛmāc cid devasya sūno sahaso naśanta ||
RV_7,001.23a sa marto agne svanīka revān amartye ya ājuhoti havyam |
RV_7,001.23c sa devatā vasuvaniṃ dadhāti yaṃ sūrir arthī pṛcchamāna eti ||
RV_7,001.24a maho no agne suvitasya vidvān rayiṃ sūribhya ā vahā bṛhantam |
RV_7,001.24c yena vayaṃ sahasāvan mademāvikṣitāsa āyuṣā suvīrāḥ ||
RV_7,001.25a nū me brahmāṇy agna uc chaśādhi tvaṃ deva maghavadbhyaḥ suṣūdaḥ |
RV_7,001.25c rātau syāmobhayāsa ā te yūyam pāta svastibhiḥ sadā naḥ ||

RV_7,002.01a juṣasva naḥ samidham agne adya śocā bṛhad yajataṃ dhūmam ṛṇvan |
RV_7,002.01c upa spṛśa divyaṃ sānu stūpaiḥ saṃ raśmibhis tatanaḥ sūryasya ||
RV_7,002.02a narāśaṃsasya mahimānam eṣām upa stoṣāma yajatasya yajñaiḥ |
RV_7,002.02c ye sukratavaḥ śucayo dhiyandhāḥ svadanti devā ubhayāni havyā ||
RV_7,002.03a īḷenyaṃ vo asuraṃ sudakṣam antar dūtaṃ rodasī satyavācam |
RV_7,002.03c manuṣvad agnim manunā samiddhaṃ sam adhvarāya sadam in mahema ||
RV_7,002.04a saparyavo bharamāṇā abhijñu pra vṛñjate namasā barhir agnau |
RV_7,002.04c ājuhvānā ghṛtapṛṣṭham pṛṣadvad adhvaryavo haviṣā marjayadhvam ||
RV_7,002.05a svādhyo vi duro devayanto 'śiśrayū rathayur devatātā |
RV_7,002.05c pūrvī śiśuṃ na mātarā rihāṇe sam agruvo na samaneṣv añjan ||
RV_7,002.06a uta yoṣaṇe divye mahī na uṣāsānaktā sudugheva dhenuḥ |
RV_7,002.06c barhiṣadā puruhūte maghonī ā yajñiye suvitāya śrayetām ||
RV_7,002.07a viprā yajñeṣu mānuṣeṣu kārū manye vāṃ jātavedasā yajadhyai |
RV_7,002.07c ūrdhvaṃ no adhvaraṃ kṛtaṃ haveṣu tā deveṣu vanatho vāryāṇi ||
RV_7,002.08a ā bhāratī bhāratībhiḥ sajoṣā iḷā devair manuṣyebhir agniḥ |
RV_7,002.08c sarasvatī sārasvatebhir arvāk tisro devīr barhir edaṃ sadantu ||
RV_7,002.09a tan nas turīpam adha poṣayitnu deva tvaṣṭar vi rarāṇaḥ syasva |
RV_7,002.09c yato vīraḥ karmaṇyaḥ sudakṣo yuktagrāvā jāyate devakāmaḥ ||
RV_7,002.10a vanaspate 'va sṛjopa devān agnir haviḥ śamitā sūdayāti |
RV_7,002.10c sed u hotā satyataro yajāti yathā devānāṃ janimāni veda ||
RV_7,002.11a ā yāhy agne samidhāno arvāṅ indreṇa devaiḥ sarathaṃ turebhiḥ |
RV_7,002.11c barhir na āstām aditiḥ suputrā svāhā devā amṛtā mādayantām ||

RV_7,003.01a agniṃ vo devam agnibhiḥ sajoṣā yajiṣṭhaṃ dūtam adhvare kṛṇudhvam |
RV_7,003.01c yo martyeṣu nidhruvir ṛtāvā tapurmūrdhā ghṛtānnaḥ pāvakaḥ ||
RV_7,003.02a prothad aśvo na yavase 'viṣyan yadā mahaḥ saṃvaraṇād vy asthāt |
RV_7,003.02c ād asya vāto anu vāti śocir adha sma te vrajanaṃ kṛṣṇam asti ||
RV_7,003.03a ud yasya te navajātasya vṛṣṇo 'gne caranty ajarā idhānāḥ |
RV_7,003.03c acchā dyām aruṣo dhūma eti saṃ dūto agna īyase hi devān ||
RV_7,003.04a vi yasya te pṛthivyām pājo aśret tṛṣu yad annā samavṛkta jambhaiḥ |
RV_7,003.04c seneva sṛṣṭā prasitiṣ ṭa eti yavaṃ na dasma juhvā vivekṣi ||
RV_7,003.05a tam id doṣā tam uṣasi yaviṣṭham agnim atyaṃ na marjayanta naraḥ |
RV_7,003.05c niśiśānā atithim asya yonau dīdāya śocir āhutasya vṛṣṇaḥ ||
RV_7,003.06a susaṃdṛk te svanīka pratīkaṃ vi yad rukmo na rocasa upāke |
RV_7,003.06c divo na te tanyatur eti śuṣmaś citro na sūraḥ prati cakṣi bhānum ||
RV_7,003.07a yathā vaḥ svāhāgnaye dāśema parīḷābhir ghṛtavadbhiś ca havyaiḥ |
RV_7,003.07c tebhir no agne amitair mahobhiḥ śatam pūrbhir āyasībhir ni pāhi ||
RV_7,003.08a yā vā te santi dāśuṣe adhṛṣṭā giro vā yābhir nṛvatīr uruṣyāḥ |
RV_7,003.08c tābhir naḥ sūno sahaso ni pāhi smat sūrīñ jaritṝñ jātavedaḥ ||
RV_7,003.09a nir yat pūteva svadhitiḥ śucir gāt svayā kṛpā tanvā rocamānaḥ |
RV_7,003.09c ā yo mātror uśenyo janiṣṭa devayajyāya sukratuḥ pāvakaḥ ||
RV_7,003.10a etā no agne saubhagā didīhy api kratuṃ sucetasaṃ vatema |
RV_7,003.10c viśvā stotṛbhyo gṛṇate ca santu yūyam pāta svastibhiḥ sadā naḥ ||

RV_7,004.01a pra vaḥ śukrāya bhānave bharadhvaṃ havyam matiṃ cāgnaye supūtam |
RV_7,004.01c yo daivyāni mānuṣā janūṃṣy antar viśvāni vidmanā jigāti ||
RV_7,004.02a sa gṛtso agnis taruṇaś cid astu yato yaviṣṭho ajaniṣṭa mātuḥ |
RV_7,004.02c saṃ yo vanā yuvate śucidan bhūri cid annā sam id atti sadyaḥ ||
RV_7,004.03a asya devasya saṃsady anīke yam martāsaḥ śyetaṃ jagṛbhre |
RV_7,004.03c ni yo gṛbham pauruṣeyīm uvoca durokam agnir āyave śuśoca ||
RV_7,004.04a ayaṃ kavir akaviṣu pracetā marteṣv agnir amṛto ni dhāyi |
RV_7,004.04c sa mā no atra juhuraḥ sahasvaḥ sadā tve sumanasaḥ syāma ||
RV_7,004.05a ā yo yoniṃ devakṛtaṃ sasāda kratvā hy agnir amṛtāṃ atārīt |
RV_7,004.05c tam oṣadhīś ca vaninaś ca garbham bhūmiś ca viśvadhāyasam bibharti ||
RV_7,004.06a īśe hy agnir amṛtasya bhūrer īśe rāyaḥ suvīryasya dātoḥ |
RV_7,004.06c mā tvā vayaṃ sahasāvann avīrā māpsavaḥ pari ṣadāma māduvaḥ ||
RV_7,004.07a pariṣadyaṃ hy araṇasya rekṇo nityasya rāyaḥ patayaḥ syāma |
RV_7,004.07c na śeṣo agne anyajātam asty acetānasya mā patho vi dukṣaḥ ||
RV_7,004.08a nahi grabhāyāraṇaḥ suśevo 'nyodaryo manasā mantavā u |
RV_7,004.08c adhā cid okaḥ punar it sa ety ā no vājy abhīṣāḷ etu navyaḥ ||
RV_7,004.09a tvam agne vanuṣyato ni pāhi tvam u naḥ sahasāvann avadyāt |
RV_7,004.09c saṃ tvā dhvasmanvad abhy etu pāthaḥ saṃ rayi spṛhayāyyaḥ sahasrī ||
RV_7,004.10a etā no agne saubhagā didīhy api kratuṃ sucetasaṃ vatema |
RV_7,004.10c viśvā stotṛbhyo gṛṇate ca santu yūyam pāta svastibhiḥ sadā naḥ ||

RV_7,005.01a prāgnaye tavase bharadhvaṃ giraṃ divo arataye pṛthivyāḥ |
RV_7,005.01c yo viśveṣām amṛtānām upasthe vaiśvānaro vāvṛdhe jāgṛvadbhiḥ ||
RV_7,005.02a pṛṣṭo divi dhāyy agniḥ pṛthivyāṃ netā sindhūnāṃ vṛṣabha stiyānām |
RV_7,005.02c sa mānuṣīr abhi viśo vi bhāti vaiśvānaro vāvṛdhāno vareṇa ||
RV_7,005.03a tvad bhiyā viśa āyann asiknīr asamanā jahatīr bhojanāni |
RV_7,005.03c vaiśvānara pūrave śośucānaḥ puro yad agne darayann adīdeḥ ||
RV_7,005.04a tava tridhātu pṛthivī uta dyaur vaiśvānara vratam agne sacanta |
RV_7,005.04c tvam bhāsā rodasī ā tatanthājasreṇa śociṣā śośucānaḥ ||
RV_7,005.05a tvām agne harito vāvaśānā giraḥ sacante dhunayo ghṛtācīḥ |
RV_7,005.05c patiṃ kṛṣṭīnāṃ rathyaṃ rayīṇāṃ vaiśvānaram uṣasāṃ ketum ahnām ||
RV_7,005.06a tve asuryaṃ vasavo ny ṛṇvan kratuṃ hi te mitramaho juṣanta |
RV_7,005.06c tvaṃ dasyūṃr okaso agna āja uru jyotir janayann āryāya ||
RV_7,005.07a sa jāyamānaḥ parame vyoman vāyur na pāthaḥ pari pāsi sadyaḥ |
RV_7,005.07c tvam bhuvanā janayann abhi krann apatyāya jātavedo daśasyan ||
RV_7,005.08a tām agne asme iṣam erayasva vaiśvānara dyumatīṃ jātavedaḥ |
RV_7,005.08c yayā rādhaḥ pinvasi viśvavāra pṛthu śravo dāśuṣe martyāya ||
RV_7,005.09a taṃ no agne maghavadbhyaḥ purukṣuṃ rayiṃ ni vājaṃ śrutyaṃ yuvasva |
RV_7,005.09c vaiśvānara mahi naḥ śarma yaccha rudrebhir agne vasubhiḥ sajoṣāḥ ||

RV_7,006.01a pra samrājo asurasya praśastim puṃsaḥ kṛṣṭīnām anumādyasya |
RV_7,006.01c indrasyeva pra tavasas kṛtāni vande dāruṃ vandamāno vivakmi ||
RV_7,006.02a kaviṃ ketuṃ dhāsim bhānum adrer hinvanti śaṃ rājyaṃ rodasyoḥ |
RV_7,006.02c purandarasya gīrbhir ā vivāse 'gner vratāni pūrvyā mahāni ||
RV_7,006.03a ny akratūn grathino mṛdhravācaḥ paṇīṃr aśraddhāṃ avṛdhāṃ ayajñān |
RV_7,006.03c pra-pra tān dasyūṃr agnir vivāya pūrvaś cakārāparāṃ ayajyūn ||
RV_7,006.04a yo apācīne tamasi madantīḥ prācīś cakāra nṛtamaḥ śacībhiḥ |
RV_7,006.04c tam īśānaṃ vasvo agniṃ gṛṇīṣe 'nānataṃ damayantam pṛtanyūn ||
RV_7,006.05a yo dehyo anamayad vadhasnair yo aryapatnīr uṣasaś cakāra |
RV_7,006.05c sa nirudhyā nahuṣo yahvo agnir viśaś cakre balihṛtaḥ sahobhiḥ ||
RV_7,006.06a yasya śarmann upa viśve janāsa evais tasthuḥ sumatim bhikṣamāṇāḥ |
RV_7,006.06c vaiśvānaro varam ā rodasyor āgniḥ sasāda pitror upastham ||
RV_7,006.07a ā devo dade budhnyā vasūni vaiśvānara uditā sūryasya |
RV_7,006.07c ā samudrād avarād ā parasmād āgnir dade diva ā pṛthivyāḥ ||

RV_7,007.01a pra vo devaṃ cit sahasānam agnim aśvaṃ na vājinaṃ hiṣe namobhiḥ |
RV_7,007.01c bhavā no dūto adhvarasya vidvān tmanā deveṣu vivide mitadruḥ ||
RV_7,007.02a ā yāhy agne pathyā anu svā mandro devānāṃ sakhyaṃ juṣāṇaḥ |
RV_7,007.02c ā sānu śuṣmair nadayan pṛthivyā jambhebhir viśvam uśadhag vanāni ||
RV_7,007.03a prācīno yajñaḥ sudhitaṃ hi barhiḥ prīṇīte agnir īḷito na hotā |
RV_7,007.03c ā mātarā viśvavāre huvāno yato yaviṣṭha jajñiṣe suśevaḥ ||
RV_7,007.04a sadyo adhvare rathiraṃ jananta mānuṣāso vicetaso ya eṣām |
RV_7,007.04c viśām adhāyi viśpatir duroṇe 'gnir mandro madhuvacā ṛtāvā ||
RV_7,007.05a asādi vṛto vahnir ājaganvān agnir brahmā nṛṣadane vidhartā |
RV_7,007.05c dyauś ca yam pṛthivī vāvṛdhāte ā yaṃ hotā yajati viśvavāram ||
RV_7,007.06a ete dyumnebhir viśvam ātiranta mantraṃ ye vāraṃ naryā atakṣan |
RV_7,007.06c pra ye viśas tiranta śroṣamāṇā ā ye me asya dīdhayann ṛtasya ||
RV_7,007.07a nū tvām agna īmahe vasiṣṭhā īśānaṃ sūno sahaso vasūnām |
RV_7,007.07c iṣaṃ stotṛbhyo maghavadbhya ānaḍ yūyam pāta svastibhiḥ sadā naḥ ||

RV_7,008.01a indhe rājā sam aryo namobhir yasya pratīkam āhutaṃ ghṛtena |
RV_7,008.01c naro havyebhir īḷate sabādha āgnir agra uṣasām aśoci ||
RV_7,008.02a ayam u ṣya sumahāṃ avedi hotā mandro manuṣo yahvo agniḥ |
RV_7,008.02c vi bhā akaḥ sasṛjānaḥ pṛthivyāṃ kṛṣṇapavir oṣadhībhir vavakṣe ||
RV_7,008.03a kayā no agne vi vasaḥ suvṛktiṃ kām u svadhām ṛṇavaḥ śasyamānaḥ |
RV_7,008.03c kadā bhavema patayaḥ sudatra rāyo vantāro duṣṭarasya sādhoḥ ||
RV_7,008.04a pra-prāyam agnir bharatasya śṛṇve vi yat sūryo na rocate bṛhad bhāḥ |
RV_7,008.04c abhi yaḥ pūrum pṛtanāsu tasthau dyutāno daivyo atithiḥ śuśoca ||
RV_7,008.05a asann it tve āhavanāni bhūri bhuvo viśvebhiḥ sumanā anīkaiḥ |
RV_7,008.05c stutaś cid agne śṛṇviṣe gṛṇānaḥ svayaṃ vardhasva tanvaṃ sujāta ||
RV_7,008.06a idaṃ vacaḥ śatasāḥ saṃsahasram ud agnaye janiṣīṣṭa dvibarhāḥ |
RV_7,008.06c śaṃ yat stotṛbhya āpaye bhavāti dyumad amīvacātanaṃ rakṣohā ||
RV_7,008.07a nū tvām agna īmahe vasiṣṭhā īśānaṃ sūno sahaso vasūnām |
RV_7,008.07c iṣaṃ stotṛbhyo maghavadbhya ānaḍ yūyam pāta svastibhiḥ sadā naḥ ||

RV_7,009.01a abodhi jāra uṣasām upasthād dhotā mandraḥ kavitamaḥ pāvakaḥ |
RV_7,009.01c dadhāti ketum ubhayasya jantor havyā deveṣu draviṇaṃ sukṛtsu ||
RV_7,009.02a sa sukratur yo vi duraḥ paṇīnām punāno arkam purubhojasaṃ naḥ |
RV_7,009.02c hotā mandro viśāṃ damūnās tiras tamo dadṛśe rāmyāṇām ||
RV_7,009.03a amūraḥ kavir aditir vivasvān susaṃsan mitro atithiḥ śivo naḥ |
RV_7,009.03c citrabhānur uṣasām bhāty agre 'pāṃ garbhaḥ prasva ā viveśa ||
RV_7,009.04a īḷenyo vo manuṣo yugeṣu samanagā aśucaj jātavedāḥ |
RV_7,009.04c susaṃdṛśā bhānunā yo vibhāti prati gāvaḥ samidhānam budhanta ||
RV_7,009.05a agne yāhi dūtyam mā riṣaṇyo devāṃ acchā brahmakṛtā gaṇena |
RV_7,009.05c sarasvatīm maruto aśvināpo yakṣi devān ratnadheyāya viśvān ||
RV_7,009.06a tvām agne samidhāno vasiṣṭho jarūthaṃ han yakṣi rāye purandhim |
RV_7,009.06c puruṇīthā jātavedo jarasva yūyam pāta svastibhiḥ sadā naḥ ||

RV_7,010.01a uṣo na jāraḥ pṛthu pājo aśred davidyutad dīdyac chośucānaḥ |
RV_7,010.01c vṛṣā hariḥ śucir ā bhāti bhāsā dhiyo hinvāna uśatīr ajīgaḥ ||
RV_7,010.02a svar ṇa vastor uṣasām aroci yajñaṃ tanvānā uśijo na manma |
RV_7,010.02c agnir janmāni deva ā vi vidvān dravad dūto devayāvā vaniṣṭhaḥ ||
RV_7,010.03a acchā giro matayo devayantīr agniṃ yanti draviṇam bhikṣamāṇāḥ |
RV_7,010.03c susaṃdṛśaṃ supratīkaṃ svañcaṃ havyavāham aratim mānuṣāṇām ||
RV_7,010.04a indraṃ no agne vasubhiḥ sajoṣā rudraṃ rudrebhir ā vahā bṛhantam |
RV_7,010.04c ādityebhir aditiṃ viśvajanyām bṛhaspatim ṛkvabhir viśvavāram ||
RV_7,010.05a mandraṃ hotāram uśijo yaviṣṭham agniṃ viśa īḷate adhvareṣu |
RV_7,010.05c sa hi kṣapāvāṃ abhavad rayīṇām atandro dūto yajathāya devān ||

RV_7,011.01a mahāṃ asy adhvarasya praketo na ṛte tvad amṛtā mādayante |
RV_7,011.01c ā viśvebhiḥ sarathaṃ yāhi devair ny agne hotā prathamaḥ sadeha ||
RV_7,011.02a tvām īḷate ajiraṃ dūtyāya haviṣmantaḥ sadam in mānuṣāsaḥ |
RV_7,011.02c yasya devair āsado barhir agne 'hāny asmai sudinā bhavanti ||
RV_7,011.03a triś cid aktoḥ pra cikitur vasūni tve antar dāśuṣe martyāya |
RV_7,011.03c manuṣvad agna iha yakṣi devān bhavā no dūto abhiśastipāvā ||
RV_7,011.04a agnir īśe bṛhato adhvarasyāgnir viśvasya haviṣaḥ kṛtasya |
RV_7,011.04c kratuṃ hy asya vasavo juṣantāthā devā dadhire havyavāham ||
RV_7,011.05a āgne vaha haviradyāya devān indrajyeṣṭhāsa iha mādayantām |
RV_7,011.05c imaṃ yajñaṃ divi deveṣu dhehi yūyam pāta svastibhiḥ sadā naḥ ||

RV_7,012.01a aganma mahā namasā yaviṣṭhaṃ yo dīdāya samiddhaḥ sve duroṇe |
RV_7,012.01c citrabhānuṃ rodasī antar urvī svāhutaṃ viśvataḥ pratyañcam ||
RV_7,012.02a sa mahnā viśvā duritāni sāhvān agni ṣṭave dama ā jātavedāḥ |
RV_7,012.02c sa no rakṣiṣad duritād avadyād asmān gṛṇata uta no maghonaḥ ||
RV_7,012.03a tvaṃ varuṇa uta mitro agne tvāṃ vardhanti matibhir vasiṣṭhāḥ |
RV_7,012.03c tve vasu suṣaṇanāni santu yūyam pāta svastibhiḥ sadā naḥ ||

RV_7,013.01a prāgnaye viśvaśuce dhiyandhe 'suraghne manma dhītim bharadhvam |
RV_7,013.01c bhare havir na barhiṣi prīṇāno vaiśvānarāya yataye matīnām ||
RV_7,013.02a tvam agne śociṣā śośucāna ā rodasī apṛṇā jāyamānaḥ |
RV_7,013.02c tvaṃ devāṃ abhiśaster amuñco vaiśvānara jātavedo mahitvā ||
RV_7,013.03a jāto yad agne bhuvanā vy akhyaḥ paśūn na gopā iryaḥ parijmā |
RV_7,013.03c vaiśvānara brahmaṇe vinda gātuṃ yūyam pāta svastibhiḥ sadā naḥ ||

RV_7,014.01a samidhā jātavedase devāya devahūtibhiḥ |
RV_7,014.01c havirbhiḥ śukraśociṣe namasvino vayaṃ dāśemāgnaye ||
RV_7,014.02a vayaṃ te agne samidhā vidhema vayaṃ dāśema suṣṭutī yajatra |
RV_7,014.02c vayaṃ ghṛtenādhvarasya hotar vayaṃ deva haviṣā bhadraśoce ||
RV_7,014.03a ā no devebhir upa devahūtim agne yāhi vaṣaṭkṛtiṃ juṣāṇaḥ |
RV_7,014.03c tubhyaṃ devāya dāśataḥ syāma yūyam pāta svastibhiḥ sadā naḥ ||

RV_7,015.01a upasadyāya mīḷhuṣa āsye juhutā haviḥ |
RV_7,015.01c yo no nediṣṭham āpyam ||
RV_7,015.02a yaḥ pañca carṣaṇīr abhi niṣasāda dame-dame |
RV_7,015.02c kavir gṛhapatir yuvā ||
RV_7,015.03a sa no vedo amātyam agnī rakṣatu viśvataḥ |
RV_7,015.03c utāsmān pātv aṃhasaḥ ||
RV_7,015.04a navaṃ nu stomam agnaye divaḥ śyenāya jījanam |
RV_7,015.04c vasvaḥ kuvid vanāti naḥ ||
RV_7,015.05a spārhā yasya śriyo dṛśe rayir vīravato yathā |
RV_7,015.05c agre yajñasya śocataḥ ||
RV_7,015.06a semāṃ vetu vaṣaṭkṛtim agnir juṣata no giraḥ |
RV_7,015.06c yajiṣṭho havyavāhanaḥ ||
RV_7,015.07a ni tvā nakṣya viśpate dyumantaṃ deva dhīmahi |
RV_7,015.07c suvīram agna āhuta ||
RV_7,015.08a kṣapa usraś ca dīdihi svagnayas tvayā vayam |
RV_7,015.08c suvīras tvam asmayuḥ ||
RV_7,015.09a upa tvā sātaye naro viprāso yanti dhītibhiḥ |
RV_7,015.09c upākṣarā sahasriṇī ||
RV_7,015.10a agnī rakṣāṃsi sedhati śukraśocir amartyaḥ |
RV_7,015.10c śuciḥ pāvaka īḍyaḥ ||
RV_7,015.11a sa no rādhāṃsy ā bhareśānaḥ sahaso yaho |
RV_7,015.11c bhagaś ca dātu vāryam ||
RV_7,015.12a tvam agne vīravad yaśo devaś ca savitā bhagaḥ |
RV_7,015.12c ditiś ca dāti vāryam ||
RV_7,015.13a agne rakṣā ṇo aṃhasaḥ prati ṣma deva rīṣataḥ |
RV_7,015.13c tapiṣṭhair ajaro daha ||
RV_7,015.14a adhā mahī na āyasy anādhṛṣṭo nṛpītaye |
RV_7,015.14c pūr bhavā śatabhujiḥ ||
RV_7,015.15a tvaṃ naḥ pāhy aṃhaso doṣāvastar aghāyataḥ |
RV_7,015.15c divā naktam adābhya ||

RV_7,016.01a enā vo agniṃ namasorjo napātam ā huve |
RV_7,016.01c priyaṃ cetiṣṭham aratiṃ svadhvaraṃ viśvasya dūtam amṛtam ||
RV_7,016.02a sa yojate aruṣā viśvabhojasā sa dudravat svāhutaḥ |
RV_7,016.02c subrahmā yajñaḥ suśamī vasūnāṃ devaṃ rādho janānām ||
RV_7,016.03a ud asya śocir asthād ājuhvānasya mīḷhuṣaḥ |
RV_7,016.03c ud dhūmāso aruṣāso divispṛśaḥ sam agnim indhate naraḥ ||
RV_7,016.04a taṃ tvā dūtaṃ kṛṇmahe yaśastamaṃ devāṃ ā vītaye vaha |
RV_7,016.04c viśvā sūno sahaso martabhojanā rāsva tad yat tvemahe ||
RV_7,016.05a tvam agne gṛhapatis tvaṃ hotā no adhvare |
RV_7,016.05c tvam potā viśvavāra pracetā yakṣi veṣi ca vāryam ||
RV_7,016.06a kṛdhi ratnaṃ yajamānāya sukrato tvaṃ hi ratnadhā asi |
RV_7,016.06c ā na ṛte śiśīhi viśvam ṛtvijaṃ suśaṃso yaś ca dakṣate ||
RV_7,016.07a tve agne svāhuta priyāsaḥ santu sūrayaḥ |
RV_7,016.07c yantāro ye maghavāno janānām ūrvān dayanta gonām ||
RV_7,016.08a yeṣām iḷā ghṛtahastā duroṇa āṃ api prātā niṣīdati |
RV_7,016.08c tāṃs trāyasva sahasya druho nido yacchā naḥ śarma dīrghaśrut ||
RV_7,016.09a sa mandrayā ca jihvayā vahnir āsā viduṣṭaraḥ |
RV_7,016.09c agne rayim maghavadbhyo na ā vaha havyadātiṃ ca sūdaya ||
RV_7,016.10a ye rādhāṃsi dadaty aśvyā maghā kāmena śravaso mahaḥ |
RV_7,016.10c tāṃ aṃhasaḥ pipṛhi partṛbhiṣ ṭvaṃ śatam pūrbhir yaviṣṭhya ||
RV_7,016.11a devo vo draviṇodāḥ pūrṇāṃ vivaṣṭy āsicam |
RV_7,016.11c ud vā siñcadhvam upa vā pṛṇadhvam ād id vo deva ohate ||
RV_7,016.12a taṃ hotāram adhvarasya pracetasaṃ vahniṃ devā akṛṇvata |
RV_7,016.12c dadhāti ratnaṃ vidhate suvīryam agnir janāya dāśuṣe ||

RV_7,017.01 agne bhava suṣamidhā samiddha uta barhir urviyā vi stṛṇītām ||
RV_7,017.02 uta dvāra uśatīr vi śrayantām uta devāṃ uśata ā vaheha ||
RV_7,017.03 agne vīhi haviṣā yakṣi devān svadhvarā kṛṇuhi jātavedaḥ ||
RV_7,017.04 svadhvarā karati jātavedā yakṣad devāṃ amṛtān piprayac ca ||
RV_7,017.05 vaṃsva viśvā vāryāṇi pracetaḥ satyā bhavantv āśiṣo no adya ||
RV_7,017.06 tvām u te dadhire havyavāhaṃ devāso agna ūrja ā napātam ||
RV_7,017.07 te te devāya dāśataḥ syāma maho no ratnā vi dadha iyānaḥ ||

RV_7,018.01a tve ha yat pitaraś cin na indra viśvā vāmā jaritāro asanvan |
RV_7,018.01c tve gāvaḥ sudughās tve hy aśvās tvaṃ vasu devayate vaniṣṭhaḥ ||
RV_7,018.02a rājeva hi janibhiḥ kṣeṣy evāva dyubhir abhi viduṣ kaviḥ san |
RV_7,018.02c piśā giro maghavan gobhir aśvais tvāyataḥ śiśīhi rāye asmān ||
RV_7,018.03a imā u tvā paspṛdhānāso atra mandrā giro devayantīr upa sthuḥ |
RV_7,018.03c arvācī te pathyā rāya etu syāma te sumatāv indra śarman ||
RV_7,018.04a dhenuṃ na tvā sūyavase dudukṣann upa brahmāṇi sasṛje vasiṣṭhaḥ |
RV_7,018.04c tvām in me gopatiṃ viśva āhā na indraḥ sumatiṃ gantv accha ||
RV_7,018.05a arṇāṃsi cit paprathānā sudāsa indro gādhāny akṛṇot supārā |
RV_7,018.05c śardhantaṃ śimyum ucathasya navyaḥ śāpaṃ sindhūnām akṛṇod aśastīḥ ||
RV_7,018.06a puroḷā it turvaśo yakṣur āsīd rāye matsyāso niśitā apīva |
RV_7,018.06c śruṣṭiṃ cakrur bhṛgavo druhyavaś ca sakhā sakhāyam atarad viṣūcoḥ ||
RV_7,018.07a ā pakthāso bhalānaso bhanantālināso viṣāṇinaḥ śivāsaḥ |
RV_7,018.07c ā yo 'nayat sadhamā āryasya gavyā tṛtsubhyo ajagan yudhā nṝn ||
RV_7,018.08a durādhyo aditiṃ srevayanto 'cetaso vi jagṛbhre paruṣṇīm |
RV_7,018.08c mahnāvivyak pṛthivīm patyamānaḥ paśuṣ kavir aśayac cāyamānaḥ ||
RV_7,018.09a īyur arthaṃ na nyartham paruṣṇīm āśuś caned abhipitvaṃ jagāma |
RV_7,018.09c sudāsa indraḥ sutukāṃ amitrān arandhayan mānuṣe vadhrivācaḥ ||
RV_7,018.10a īyur gāvo na yavasād agopā yathākṛtam abhi mitraṃ citāsaḥ |
RV_7,018.10c pṛśnigāvaḥ pṛśninipreṣitāsaḥ śruṣṭiṃ cakrur niyuto rantayaś ca ||
RV_7,018.11a ekaṃ ca yo viṃśatiṃ ca śravasyā vaikarṇayor janān rājā ny astaḥ |
RV_7,018.11c dasmo na sadman ni śiśāti barhiḥ śūraḥ sargam akṛṇod indra eṣām ||
RV_7,018.12a adha śrutaṃ kavaṣaṃ vṛddham apsv anu druhyuṃ ni vṛṇag vajrabāhuḥ |
RV_7,018.12c vṛṇānā atra sakhyāya sakhyaṃ tvāyanto ye amadann anu tvā ||
RV_7,018.13a vi sadyo viśvā dṛṃhitāny eṣām indraḥ puraḥ sahasā sapta dardaḥ |
RV_7,018.13c vy ānavasya tṛtsave gayam bhāg jeṣma pūruṃ vidathe mṛdhravācam ||
RV_7,018.14a ni gavyavo 'navo druhyavaś ca ṣaṣṭiḥ śatā suṣupuḥ ṣaṭ sahasrā |
RV_7,018.14c ṣaṣṭir vīrāso adhi ṣaḍ duvoyu viśved indrasya vīryā kṛtāni ||
RV_7,018.15a indreṇaite tṛtsavo veviṣāṇā āpo na sṛṣṭā adhavanta nīcīḥ |
RV_7,018.15c durmitrāsaḥ prakalavin mimānā jahur viśvāni bhojanā sudāse ||
RV_7,018.16a ardhaṃ vīrasya śṛtapām anindram parā śardhantaṃ nunude abhi kṣām |
RV_7,018.16c indro manyum manyumyo mimāya bheje patho vartanim patyamānaḥ ||
RV_7,018.17a ādhreṇa cit tad v ekaṃ cakāra siṃhyaṃ cit petvenā jaghāna |
RV_7,018.17c ava sraktīr veśyāvṛścad indraḥ prāyacchad viśvā bhojanā sudāse ||
RV_7,018.18a śaśvanto hi śatravo rāradhuṣ ṭe bhedasya cic chardhato vinda randhim |
RV_7,018.18c martāṃ ena stuvato yaḥ kṛṇoti tigmaṃ tasmin ni jahi vajram indra ||
RV_7,018.19a āvad indraṃ yamunā tṛtsavaś ca prātra bhedaṃ sarvatātā muṣāyat |
RV_7,018.19c ajāsaś ca śigravo yakṣavaś ca baliṃ śīrṣāṇi jabhrur aśvyāni ||
RV_7,018.20a na ta indra sumatayo na rāyaḥ saṃcakṣe pūrvā uṣaso na nūtnāḥ |
RV_7,018.20c devakaṃ cin mānyamānaṃ jaghanthāva tmanā bṛhataḥ śambaram bhet ||
RV_7,018.21a pra ye gṛhād amamadus tvāyā parāśaraḥ śatayātur vasiṣṭhaḥ |
RV_7,018.21c na te bhojasya sakhyam mṛṣantādhā sūribhyaḥ sudinā vy ucchān ||
RV_7,018.22a dve naptur devavataḥ śate gor dvā rathā vadhūmantā sudāsaḥ |
RV_7,018.22c arhann agne paijavanasya dānaṃ hoteva sadma pary emi rebhan ||
RV_7,018.23a catvāro mā paijavanasya dānāḥ smaddiṣṭayaḥ kṛśanino nireke |
RV_7,018.23c ṛjrāso mā pṛthiviṣṭhāḥ sudāsas tokaṃ tokāya śravase vahanti ||
RV_7,018.24a yasya śravo rodasī antar urvī śīrṣṇe-śīrṣṇe vibabhājā vibhaktā |
RV_7,018.24c sapted indraṃ na sravato gṛṇanti ni yudhyāmadhim aśiśād abhīke ||
RV_7,018.25a imaṃ naro marutaḥ saścatānu divodāsaṃ na pitaraṃ sudāsaḥ |
RV_7,018.25c aviṣṭanā paijavanasya ketaṃ dūṇāśaṃ kṣatram ajaraṃ duvoyu ||

RV_7,019.01a yas tigmaśṛṅgo vṛṣabho na bhīma ekaḥ kṛṣṭīś cyāvayati pra viśvāḥ |
RV_7,019.01c yaḥ śaśvato adāśuṣo gayasya prayantāsi suṣvitarāya vedaḥ ||
RV_7,019.02a tvaṃ ha tyad indra kutsam āvaḥ śuśrūṣamāṇas tanvā samarye |
RV_7,019.02c dāsaṃ yac chuṣṇaṃ kuyavaṃ ny asmā arandhaya ārjuneyāya śikṣan ||
RV_7,019.03a tvaṃ dhṛṣṇo dhṛṣatā vītahavyam prāvo viśvābhir ūtibhiḥ sudāsam |
RV_7,019.03c pra paurukutsiṃ trasadasyum āvaḥ kṣetrasātā vṛtrahatyeṣu pūrum ||
RV_7,019.04a tvaṃ nṛbhir nṛmaṇo devavītau bhūrīṇi vṛtrā haryaśva haṃsi |
RV_7,019.04c tvaṃ ni dasyuṃ cumuriṃ dhuniṃ cāsvāpayo dabhītaye suhantu ||
RV_7,019.05a tava cyautnāni vajrahasta tāni nava yat puro navatiṃ ca sadyaḥ |
RV_7,019.05c niveśane śatatamāviveṣīr ahañ ca vṛtraṃ namucim utāhan ||
RV_7,019.06a sanā tā ta indra bhojanāni rātahavyāya dāśuṣe sudāse |
RV_7,019.06c vṛṣṇe te harī vṛṣaṇā yunajmi vyantu brahmāṇi puruśāka vājam ||
RV_7,019.07a mā te asyāṃ sahasāvan pariṣṭāv aghāya bhūma harivaḥ parādai |
RV_7,019.07c trāyasva no 'vṛkebhir varūthais tava priyāsaḥ sūriṣu syāma ||
RV_7,019.08a priyāsa it te maghavann abhiṣṭau naro madema śaraṇe sakhāyaḥ |
RV_7,019.08c ni turvaśaṃ ni yādvaṃ śiśīhy atithigvāya śaṃsyaṃ kariṣyan ||
RV_7,019.09a sadyaś cin nu te maghavann abhiṣṭau naraḥ śaṃsanty ukthaśāsa ukthā |
RV_7,019.09c ye te havebhir vi paṇīṃr adāśann asmān vṛṇīṣva yujyāya tasmai ||
RV_7,019.10a ete stomā narāṃ nṛtama tubhyam asmadryañco dadato maghāni |
RV_7,019.10c teṣām indra vṛtrahatye śivo bhūḥ sakhā ca śūro 'vitā ca nṛṇām ||
RV_7,019.11a nū indra śūra stavamāna ūtī brahmajūtas tanvā vāvṛdhasva |
RV_7,019.11c upa no vājān mimīhy upa stīn yūyam pāta svastibhiḥ sadā naḥ ||

RV_7,020.01a ugro jajñe vīryāya svadhāvāñ cakrir apo naryo yat kariṣyan |
RV_7,020.01c jagmir yuvā nṛṣadanam avobhis trātā na indra enaso mahaś cit ||
RV_7,020.02a hantā vṛtram indraḥ śūśuvānaḥ prāvīn nu vīro jaritāram ūtī |
RV_7,020.02c kartā sudāse aha vā u lokaṃ dātā vasu muhur ā dāśuṣe bhūt ||
RV_7,020.03a yudhmo anarvā khajakṛt samadvā śūraḥ satrāṣāḍ januṣem aṣāḷhaḥ |
RV_7,020.03c vy āsa indraḥ pṛtanāḥ svojā adhā viśvaṃ śatrūyantaṃ jaghāna ||
RV_7,020.04a ubhe cid indra rodasī mahitvā paprātha taviṣībhis tuviṣmaḥ |
RV_7,020.04c ni vajram indro harivān mimikṣan sam andhasā madeṣu vā uvoca ||
RV_7,020.05a vṛṣā jajāna vṛṣaṇaṃ raṇāya tam u cin nārī naryaṃ sasūva |
RV_7,020.05c pra yaḥ senānīr adha nṛbhyo astīnaḥ satvā gaveṣaṇaḥ sa dhṛṣṇuḥ ||
RV_7,020.06a nū cit sa bhreṣate jano na reṣan mano yo asya ghoram āvivāsāt |
RV_7,020.06c yajñair ya indre dadhate duvāṃsi kṣayat sa rāya ṛtapā ṛtejāḥ ||
RV_7,020.07a yad indra pūrvo aparāya śikṣann ayaj jyāyān kanīyaso deṣṇam |
RV_7,020.07c amṛta it pary āsīta dūram ā citra citryam bharā rayiṃ naḥ ||
RV_7,020.08a yas ta indra priyo jano dadāśad asan nireke adrivaḥ sakhā te |
RV_7,020.08c vayaṃ te asyāṃ sumatau caniṣṭhāḥ syāma varūthe aghnato nṛpītau ||
RV_7,020.09a eṣa stomo acikradad vṛṣā ta uta stāmur maghavann akrapiṣṭa |
RV_7,020.09c rāyas kāmo jaritāraṃ ta āgan tvam aṅga śakra vasva ā śako naḥ ||
RV_7,020.10a sa na indra tvayatāyā iṣe dhās tmanā ca ye maghavāno junanti |
RV_7,020.10c vasvī ṣu te jaritre astu śaktir yūyam pāta svastibhiḥ sadā naḥ ||

RV_7,021.01a asāvi devaṃ goṛjīkam andho ny asminn indro januṣem uvoca |
RV_7,021.01c bodhāmasi tvā haryaśva yajñair bodhā na stomam andhaso madeṣu ||
RV_7,021.02a pra yanti yajñaṃ vipayanti barhiḥ somamādo vidathe dudhravācaḥ |
RV_7,021.02c ny u bhriyante yaśaso gṛbhād ā dūraupabdo vṛṣaṇo nṛṣācaḥ ||
RV_7,021.03a tvam indra sravitavā apas kaḥ pariṣṭhitā ahinā śūra pūrvīḥ |
RV_7,021.03c tvad vāvakre rathyo na dhenā rejante viśvā kṛtrimāṇi bhīṣā ||
RV_7,021.04a bhīmo viveṣāyudhebhir eṣām apāṃsi viśvā naryāṇi vidvān |
RV_7,021.04c indraḥ puro jarhṛṣāṇo vi dūdhod vi vajrahasto mahinā jaghāna ||
RV_7,021.05a na yātava indra jūjuvur no na vandanā śaviṣṭha vedyābhiḥ |
RV_7,021.05c sa śardhad aryo viṣuṇasya jantor mā śiśnadevā api gur ṛtaṃ naḥ ||
RV_7,021.06a abhi kratvendra bhūr adha jman na te vivyaṅ mahimānaṃ rajāṃsi |
RV_7,021.06c svenā hi vṛtraṃ śavasā jaghantha na śatrur antaṃ vividad yudhā te ||
RV_7,021.07a devāś cit te asuryāya pūrve 'nu kṣatrāya mamire sahāṃsi |
RV_7,021.07c indro maghāni dayate viṣahyendraṃ vājasya johuvanta sātau ||
RV_7,021.08a kīriś cid dhi tvām avase juhāveśānam indra saubhagasya bhūreḥ |
RV_7,021.08c avo babhūtha śatamūte asme abhikṣattus tvāvato varūtā ||
RV_7,021.09a sakhāyas ta indra viśvaha syāma namovṛdhāso mahinā tarutra |
RV_7,021.09c vanvantu smā te 'vasā samīke 'bhītim aryo vanuṣāṃ śavāṃsi ||
RV_7,021.10a sa na indra tvayatāyā iṣe dhās tmanā ca ye maghavāno junanti |
RV_7,021.10c vasvī ṣu te jaritre astu śaktir yūyam pāta svastibhiḥ sadā naḥ ||

RV_7,022.01a pibā somam indra mandatu tvā yaṃ te suṣāva haryaśvādriḥ |
RV_7,022.01c sotur bāhubhyāṃ suyato nārvā ||
RV_7,022.02a yas te mado yujyaś cārur asti yena vṛtrāṇi haryaśva haṃsi |
RV_7,022.02c sa tvām indra prabhūvaso mamattu ||
RV_7,022.03a bodhā su me maghavan vācam emāṃ yāṃ te vasiṣṭho arcati praśastim |
RV_7,022.03c imā brahma sadhamāde juṣasva ||
RV_7,022.04a śrudhī havaṃ vipipānasyādrer bodhā viprasyārcato manīṣām |
RV_7,022.04c kṛṣvā duvāṃsy antamā sacemā ||
RV_7,022.05a na te giro api mṛṣye turasya na suṣṭutim asuryasya vidvān |
RV_7,022.05c sadā te nāma svayaśo vivakmi ||
RV_7,022.06a bhūri hi te savanā mānuṣeṣu bhūri manīṣī havate tvām it |
RV_7,022.06c māre asman maghavañ jyok kaḥ ||
RV_7,022.07a tubhyed imā savanā śūra viśvā tubhyam brahmāṇi vardhanā kṛṇomi |
RV_7,022.07c tvaṃ nṛbhir havyo viśvadhāsi ||
RV_7,022.08a nū cin nu te manyamānasya dasmod aśnuvanti mahimānam ugra |
RV_7,022.08c na vīryam indra te na rādhaḥ ||
RV_7,022.09a ye ca pūrva ṛṣayo ye ca nūtnā indra brahmāṇi janayanta viprāḥ |
RV_7,022.09c asme te santu sakhyā śivāni yūyam pāta svastibhiḥ sadā naḥ ||

RV_7,023.01a ud u brahmāṇy airata śravasyendraṃ samarye mahayā vasiṣṭha |
RV_7,023.01c ā yo viśvāni śavasā tatānopaśrotā ma īvato vacāṃsi ||
RV_7,023.02a ayāmi ghoṣa indra devajāmir irajyanta yac churudho vivāci |
RV_7,023.02c nahi svam āyuś cikite janeṣu tānīd aṃhāṃsy ati parṣy asmān ||
RV_7,023.03a yuje rathaṃ gaveṣaṇaṃ haribhyām upa brahmāṇi jujuṣāṇam asthuḥ |
RV_7,023.03c vi bādhiṣṭa sya rodasī mahitvendro vṛtrāṇy apratī jaghanvān ||
RV_7,023.04a āpaś cit pipyu staryo na gāvo nakṣann ṛtaṃ jaritāras ta indra |
RV_7,023.04c yāhi vāyur na niyuto no acchā tvaṃ hi dhībhir dayase vi vājān ||
RV_7,023.05a te tvā madā indra mādayantu śuṣmiṇaṃ tuvirādhasaṃ jaritre |
RV_7,023.05c eko devatrā dayase hi martān asmiñ chūra savane mādayasva ||
RV_7,023.06a eved indraṃ vṛṣaṇaṃ vajrabāhuṃ vasiṣṭhāso abhy arcanty arkaiḥ |
RV_7,023.06c sa na stuto vīravad dhātu gomad yūyam pāta svastibhiḥ sadā naḥ ||

RV_7,024.01a yoniṣ ṭa indra sadane akāri tam ā nṛbhiḥ puruhūta pra yāhi |
RV_7,024.01c aso yathā no 'vitā vṛdhe ca dado vasūni mamadaś ca somaiḥ ||
RV_7,024.02a gṛbhītaṃ te mana indra dvibarhāḥ sutaḥ somaḥ pariṣiktā madhūni |
RV_7,024.02c visṛṣṭadhenā bharate suvṛktir iyam indraṃ johuvatī manīṣā ||
RV_7,024.03a ā no diva ā pṛthivyā ṛjīṣinn idam barhiḥ somapeyāya yāhi |
RV_7,024.03c vahantu tvā harayo madryañcam āṅgūṣam acchā tavasam madāya ||
RV_7,024.04a ā no viśvābhir ūtibhiḥ sajoṣā brahma juṣāṇo haryaśva yāhi |
RV_7,024.04c varīvṛjat sthavirebhiḥ suśiprāsme dadhad vṛṣaṇaṃ śuṣmam indra ||
RV_7,024.05a eṣa stomo maha ugrāya vāhe dhurīvātyo na vājayann adhāyi |
RV_7,024.05c indra tvāyam arka īṭṭe vasūnāṃ divīva dyām adhi naḥ śromataṃ dhāḥ ||
RV_7,024.06a evā na indra vāryasya pūrdhi pra te mahīṃ sumatiṃ vevidāma |
RV_7,024.06c iṣam pinva maghavadbhyaḥ suvīrāṃ yūyam pāta svastibhiḥ sadā naḥ ||

RV_7,025.01a ā te maha indroty ugra samanyavo yat samaranta senāḥ |
RV_7,025.01c patāti didyun naryasya bāhvor mā te mano viṣvadryag vi cārīt ||
RV_7,025.02a ni durga indra śnathihy amitrāṃ abhi ye no martāso amanti |
RV_7,025.02c āre taṃ śaṃsaṃ kṛṇuhi ninitsor ā no bhara sambharaṇaṃ vasūnām ||
RV_7,025.03a śataṃ te śiprinn ūtayaḥ sudāse sahasraṃ śaṃsā uta rātir astu |
RV_7,025.03c jahi vadhar vanuṣo martyasyāsme dyumnam adhi ratnaṃ ca dhehi ||
RV_7,025.04a tvāvato hīndra kratve asmi tvāvato 'vituḥ śūra rātau |
RV_7,025.04c viśved ahāni taviṣīva ugraṃ okaḥ kṛṇuṣva harivo na mardhīḥ ||
RV_7,025.05a kutsā ete haryaśvāya śūṣam indre saho devajūtam iyānāḥ |
RV_7,025.05c satrā kṛdhi suhanā śūra vṛtrā vayaṃ tarutrāḥ sanuyāma vājam ||
RV_7,025.06a evā na indra vāryasya pūrdhi pra te mahīṃ sumatiṃ vevidāma |
RV_7,025.06c iṣam pinva maghavadbhyaḥ suvīrāṃ yūyam pāta svastibhiḥ sadā naḥ ||

RV_7,026.01a na soma indram asuto mamāda nābrahmāṇo maghavānaṃ sutāsaḥ |
RV_7,026.01c tasmā ukthaṃ janaye yaj jujoṣan nṛvan navīyaḥ śṛṇavad yathā naḥ ||
RV_7,026.02a uktha-ukthe soma indram mamāda nīthe-nīthe maghavānaṃ sutāsaḥ |
RV_7,026.02c yad īṃ sabādhaḥ pitaraṃ na putrāḥ samānadakṣā avase havante ||
RV_7,026.03a cakāra tā kṛṇavan nūnam anyā yāni bruvanti vedhasaḥ suteṣu |
RV_7,026.03c janīr iva patir ekaḥ samāno ni māmṛje pura indraḥ su sarvāḥ ||
RV_7,026.04a evā tam āhur uta śṛṇva indra eko vibhaktā taraṇir maghānām |
RV_7,026.04c mithastura ūtayo yasya pūrvīr asme bhadrāṇi saścata priyāṇi ||
RV_7,026.05a evā vasiṣṭha indram ūtaye nṝn kṛṣṭīnāṃ vṛṣabhaṃ sute gṛṇāti |
RV_7,026.05c sahasriṇa upa no māhi vājān yūyam pāta svastibhiḥ sadā naḥ ||

RV_7,027.01a indraṃ naro nemadhitā havante yat pāryā yunajate dhiyas tāḥ |
RV_7,027.01c śūro nṛṣātā śavasaś cakāna ā gomati vraje bhajā tvaṃ naḥ ||
RV_7,027.02a ya indra śuṣmo maghavan te asti śikṣā sakhibhyaḥ puruhūta nṛbhyaḥ |
RV_7,027.02c tvaṃ hi dṛḷhā maghavan vicetā apā vṛdhi parivṛtaṃ na rādhaḥ ||
RV_7,027.03a indro rājā jagataś carṣaṇīnām adhi kṣami viṣurūpaṃ yad asti |
RV_7,027.03c tato dadāti dāśuṣe vasūni codad rādha upastutaś cid arvāk ||
RV_7,027.04a nū cin na indro maghavā sahūtī dāno vājaṃ ni yamate na ūtī |
RV_7,027.04c anūnā yasya dakṣiṇā pīpāya vāmaṃ nṛbhyo abhivītā sakhibhyaḥ ||
RV_7,027.05a nū indra rāye varivas kṛdhī na ā te mano vavṛtyāma maghāya |
RV_7,027.05c gomad aśvāvad rathavad vyanto yūyam pāta svastibhiḥ sadā naḥ ||

RV_7,028.01a brahmā ṇa indropa yāhi vidvān arvāñcas te harayaḥ santu yuktāḥ |
RV_7,028.01c viśve cid dhi tvā vihavanta martā asmākam ic chṛṇuhi viśvaminva ||
RV_7,028.02a havaṃ ta indra mahimā vy ānaḍ brahma yat pāsi śavasinn ṛṣīṇām |
RV_7,028.02c ā yad vajraṃ dadhiṣe hasta ugra ghoraḥ san kratvā janiṣṭhā aṣāḷhaḥ ||
RV_7,028.03a tava praṇītīndra johuvānān saṃ yan nṝn na rodasī ninetha |
RV_7,028.03c mahe kṣatrāya śavase hi jajñe 'tūtujiṃ cit tūtujir aśiśnat ||
RV_7,028.04a ebhir na indrāhabhir daśasya durmitrāso hi kṣitayaḥ pavante |
RV_7,028.04c prati yac caṣṭe anṛtam anenā ava dvitā varuṇo māyī naḥ sāt ||
RV_7,028.05a vocemed indram maghavānam enam maho rāyo rādhaso yad dadan naḥ |
RV_7,028.05c yo arcato brahmakṛtim aviṣṭho yūyam pāta svastibhiḥ sadā naḥ ||

RV_7,029.01a ayaṃ soma indra tubhyaṃ sunva ā tu pra yāhi harivas tadokāḥ |
RV_7,029.01c pibā tv asya suṣutasya cāror dado maghāni maghavann iyānaḥ ||
RV_7,029.02a brahman vīra brahmakṛtiṃ juṣāṇo 'rvācīno haribhir yāhi tūyam |
RV_7,029.02c asminn ū ṣu savane mādayasvopa brahmāṇi śṛṇava imā naḥ ||
RV_7,029.03a kā te asty araṅkṛtiḥ sūktaiḥ kadā nūnaṃ te maghavan dāśema |
RV_7,029.03c viśvā matīr ā tatane tvāyādhā ma indra śṛṇavo havemā ||
RV_7,029.04a uto ghā te puruṣyā id āsan yeṣām pūrveṣām aśṛṇor ṛṣīṇām |
RV_7,029.04c adhāhaṃ tvā maghavañ johavīmi tvaṃ na indrāsi pramatiḥ piteva ||
RV_7,029.05a vocemed indram maghavānam enam maho rāyo rādhaso yad dadan naḥ |
RV_7,029.05c yo arcato brahmakṛtim aviṣṭho yūyam pāta svastibhiḥ sadā naḥ ||

RV_7,030.01a ā no deva śavasā yāhi śuṣmin bhavā vṛdha indra rāyo asya |
RV_7,030.01c mahe nṛmṇāya nṛpate suvajra mahi kṣatrāya pauṃsyāya śūra ||
RV_7,030.02a havanta u tvā havyaṃ vivāci tanūṣu śūrāḥ sūryasya sātau |
RV_7,030.02c tvaṃ viśveṣu senyo janeṣu tvaṃ vṛtrāṇi randhayā suhantu ||
RV_7,030.03a ahā yad indra sudinā vyucchān dadho yat ketum upamaṃ samatsu |
RV_7,030.03c ny agniḥ sīdad asuro na hotā huvāno atra subhagāya devān ||
RV_7,030.04a vayaṃ te ta indra ye ca deva stavanta śūra dadato maghāni |
RV_7,030.04c yacchā sūribhya upamaṃ varūthaṃ svābhuvo jaraṇām aśnavanta ||
RV_7,030.05a vocemed indram maghavānam enam maho rāyo rādhaso yad dadan naḥ |
RV_7,030.05c yo arcato brahmakṛtim aviṣṭho yūyam pāta svastibhiḥ sadā naḥ ||

RV_7,031.01a pra va indrāya mādanaṃ haryaśvāya gāyata |
RV_7,031.01c sakhāyaḥ somapāvne ||
RV_7,031.02a śaṃsed ukthaṃ sudānava uta dyukṣaṃ yathā naraḥ |
RV_7,031.02c cakṛmā satyarādhase ||
RV_7,031.03a tvaṃ na indra vājayus tvaṃ gavyuḥ śatakrato |
RV_7,031.03c tvaṃ hiraṇyayur vaso ||
RV_7,031.04a vayam indra tvāyavo 'bhi pra ṇonumo vṛṣan |
RV_7,031.04c viddhī tv asya no vaso ||
RV_7,031.05a mā no nide ca vaktave 'ryo randhīr arāvṇe |
RV_7,031.05c tve api kratur mama ||
RV_7,031.06a tvaṃ varmāsi saprathaḥ puroyodhaś ca vṛtrahan |
RV_7,031.06c tvayā prati bruve yujā ||
RV_7,031.07a mahāṃ utāsi yasya te 'nu svadhāvarī sahaḥ |
RV_7,031.07c mamnāte indra rodasī ||
RV_7,031.08a taṃ tvā marutvatī pari bhuvad vāṇī sayāvarī |
RV_7,031.08c nakṣamāṇā saha dyubhiḥ ||
RV_7,031.09a ūrdhvāsas tvānv indavo bhuvan dasmam upa dyavi |
RV_7,031.09c saṃ te namanta kṛṣṭayaḥ ||
RV_7,031.10a pra vo mahe mahivṛdhe bharadhvam pracetase pra sumatiṃ kṛṇudhvam |
RV_7,031.10c viśaḥ pūrvīḥ pra carā carṣaṇiprāḥ ||
RV_7,031.11a uruvyacase mahine suvṛktim indrāya brahma janayanta viprāḥ |
RV_7,031.11c tasya vratāni na minanti dhīrāḥ ||
RV_7,031.12a indraṃ vāṇīr anuttamanyum eva satrā rājānaṃ dadhire sahadhyai |
RV_7,031.12c haryaśvāya barhayā sam āpīn ||

RV_7,032.01a mo ṣu tvā vāghataś canāre asman ni rīraman |
RV_7,032.01c ārāttāc cit sadhamādaṃ na ā gahīha vā sann upa śrudhi ||
RV_7,032.02a ime hi te brahmakṛtaḥ sute sacā madhau na makṣa āsate |
RV_7,032.02c indre kāmaṃ jaritāro vasūyavo rathe na pādam ā dadhuḥ ||
RV_7,032.03 rāyaskāmo vajrahastaṃ sudakṣiṇam putro na pitaraṃ huve ||
RV_7,032.04a ima indrāya sunvire somāso dadhyāśiraḥ |
RV_7,032.04c tāṃ ā madāya vajrahasta pītaye haribhyāṃ yāhy oka ā ||
RV_7,032.05a śravac chrutkarṇa īyate vasūnāṃ nū cin no mardhiṣad giraḥ |
RV_7,032.05c sadyaś cid yaḥ sahasrāṇi śatā dadan nakir ditsantam ā minat ||
RV_7,032.06a sa vīro apratiṣkuta indreṇa śūśuve nṛbhiḥ |
RV_7,032.06c yas te gabhīrā savanāni vṛtrahan sunoty ā ca dhāvati ||
RV_7,032.07a bhavā varūtham maghavan maghonāṃ yat samajāsi śardhataḥ |
RV_7,032.07c vi tvāhatasya vedanam bhajemahy ā dūṇāśo bharā gayam ||
RV_7,032.08a sunotā somapāvne somam indrāya vajriṇe |
RV_7,032.08c pacatā paktīr avase kṛṇudhvam it pṛṇann it pṛṇate mayaḥ ||
RV_7,032.09a mā sredhata somino dakṣatā mahe kṛṇudhvaṃ rāya ātuje |
RV_7,032.09c taraṇir ij jayati kṣeti puṣyati na devāsaḥ kavatnave ||
RV_7,032.10a nakiḥ sudāso ratham pary āsa na rīramat |
RV_7,032.10c indro yasyāvitā yasya maruto gamat sa gomati vraje ||
RV_7,032.11a gamad vājaṃ vājayann indra martyo yasya tvam avitā bhuvaḥ |
RV_7,032.11c asmākam bodhy avitā rathānām asmākaṃ śūra nṛṇām ||
RV_7,032.12a ud in nv asya ricyate 'ṃśo dhanaṃ na jigyuṣaḥ |
RV_7,032.12c ya indro harivān na dabhanti taṃ ripo dakṣaṃ dadhāti somini ||
RV_7,032.13a mantram akharvaṃ sudhitaṃ supeśasaṃ dadhāta yajñiyeṣv ā |
RV_7,032.13c pūrvīś cana prasitayas taranti taṃ ya indre karmaṇā bhuvat ||
RV_7,032.14a kas tam indra tvāvasum ā martyo dadharṣati |
RV_7,032.14c śraddhā it te maghavan pārye divi vājī vājaṃ siṣāsati ||
RV_7,032.15a maghonaḥ sma vṛtrahatyeṣu codaya ye dadati priyā vasu |
RV_7,032.15c tava praṇītī haryaśva sūribhir viśvā tarema duritā ||
RV_7,032.16a taved indrāvamaṃ vasu tvam puṣyasi madhyamam |
RV_7,032.16c satrā viśvasya paramasya rājasi nakiṣ ṭvā goṣu vṛṇvate ||
RV_7,032.17a tvaṃ viśvasya dhanadā asi śruto ya īm bhavanty ājayaḥ |
RV_7,032.17c tavāyaṃ viśvaḥ puruhūta pārthivo 'vasyur nāma bhikṣate ||
RV_7,032.18a yad indra yāvatas tvam etāvad aham īśīya |
RV_7,032.18c stotāram id didhiṣeya radāvaso na pāpatvāya rāsīya ||
RV_7,032.19a śikṣeyam in mahayate dive-dive rāya ā kuhacidvide |
RV_7,032.19c nahi tvad anyan maghavan na āpyaṃ vasyo asti pitā cana ||
RV_7,032.20a taraṇir it siṣāsati vājam purandhyā yujā |
RV_7,032.20c ā va indram puruhūtaṃ name girā nemiṃ taṣṭeva sudrvam ||
RV_7,032.21a na duṣṭutī martyo vindate vasu na sredhantaṃ rayir naśat |
RV_7,032.21c suśaktir in maghavan tubhyam māvate deṣṇaṃ yat pārye divi ||
RV_7,032.22a abhi tvā śūra nonumo 'dugdhā iva dhenavaḥ |
RV_7,032.22c īśānam asya jagataḥ svardṛśam īśānam indra tasthuṣaḥ ||
RV_7,032.23a na tvāvāṃ anyo divyo na pārthivo na jāto na janiṣyate |
RV_7,032.23c aśvāyanto maghavann indra vājino gavyantas tvā havāmahe ||
RV_7,032.24a abhī ṣatas tad ā bharendra jyāyaḥ kanīyasaḥ |
RV_7,032.24c purūvasur hi maghavan sanād asi bhare-bhare ca havyaḥ ||
RV_7,032.25a parā ṇudasva maghavann amitrān suvedā no vasū kṛdhi |
RV_7,032.25c asmākam bodhy avitā mahādhane bhavā vṛdhaḥ sakhīnām ||
RV_7,032.26a indra kratuṃ na ā bhara pitā putrebhyo yathā |
RV_7,032.26c śikṣā ṇo asmin puruhūta yāmani jīvā jyotir aśīmahi ||
RV_7,032.27a mā no ajñātā vṛjanā durādhyo māśivāso ava kramuḥ |
RV_7,032.27c tvayā vayam pravataḥ śaśvatīr apo 'ti śūra tarāmasi ||

RV_7,033.01a śvityañco mā dakṣiṇataskapardā dhiyañjinvāso abhi hi pramanduḥ |
RV_7,033.01c uttiṣṭhan voce pari barhiṣo nṝn na me dūrād avitave vasiṣṭhāḥ ||
RV_7,033.02a dūrād indram anayann ā sutena tiro vaiśantam ati pāntam ugram |
RV_7,033.02c pāśadyumnasya vāyatasya somāt sutād indro 'vṛṇītā vasiṣṭhān ||
RV_7,033.03a even nu kaṃ sindhum ebhis tatāreven nu kam bhedam ebhir jaghāna |
RV_7,033.03c even nu kaṃ dāśarājñe sudāsam prāvad indro brahmaṇā vo vasiṣṭhāḥ ||
RV_7,033.04a juṣṭī naro brahmaṇā vaḥ pitṝṇām akṣam avyayaṃ na kilā riṣātha |
RV_7,033.04c yac chakvarīṣu bṛhatā raveṇendre śuṣmam adadhātā vasiṣṭhāḥ ||
RV_7,033.05a ud dyām ivet tṛṣṇajo nāthitāso 'dīdhayur dāśarājñe vṛtāsaḥ |
RV_7,033.05c vasiṣṭhasya stuvata indro aśrod uruṃ tṛtsubhyo akṛṇod u lokam ||
RV_7,033.06a daṇḍā ived goajanāsa āsan paricchinnā bharatā arbhakāsaḥ |
RV_7,033.06c abhavac ca puraetā vasiṣṭha ād it tṛtsūnāṃ viśo aprathanta ||
RV_7,033.07a trayaḥ kṛṇvanti bhuvaneṣu retas tisraḥ prajā āryā jyotiragrāḥ |
RV_7,033.07c trayo gharmāsa uṣasaṃ sacante sarvāṃ it tāṃ anu vidur vasiṣṭhāḥ ||
RV_7,033.08a sūryasyeva vakṣatho jyotir eṣāṃ samudrasyeva mahimā gabhīraḥ |
RV_7,033.08c vātasyeva prajavo nānyena stomo vasiṣṭhā anvetave vaḥ ||
RV_7,033.09a ta in niṇyaṃ hṛdayasya praketaiḥ sahasravalśam abhi saṃ caranti |
RV_7,033.09c yamena tatam paridhiṃ vayanto 'psarasa upa sedur vasiṣṭhāḥ ||
RV_7,033.10a vidyuto jyotiḥ pari saṃjihānam mitrāvaruṇā yad apaśyatāṃ tvā |
RV_7,033.10c tat te janmotaikaṃ vasiṣṭhāgastyo yat tvā viśa ājabhāra ||
RV_7,033.11a utāsi maitrāvaruṇo vasiṣṭhorvaśyā brahman manaso 'dhi jātaḥ |
RV_7,033.11c drapsaṃ skannam brahmaṇā daivyena viśve devāḥ puṣkare tvādadanta ||
RV_7,033.12a sa praketa ubhayasya pravidvān sahasradāna uta vā sadānaḥ |
RV_7,033.12c yamena tatam paridhiṃ vayiṣyann apsarasaḥ pari jajñe vasiṣṭhaḥ ||
RV_7,033.13a satre ha jātāv iṣitā namobhiḥ kumbhe retaḥ siṣicatuḥ samānam |
RV_7,033.13c tato ha māna ud iyāya madhyāt tato jātam ṛṣim āhur vasiṣṭham ||
RV_7,033.14a ukthabhṛtaṃ sāmabhṛtam bibharti grāvāṇam bibhrat pra vadāty agre |
RV_7,033.14c upainam ādhvaṃ sumanasyamānā ā vo gacchāti pratṛdo vasiṣṭhaḥ ||

RV_7,034.01 pra śukraitu devī manīṣā asmat sutaṣṭo ratho na vājī ||
RV_7,034.02 viduḥ pṛthivyā divo janitraṃ śṛṇvanty āpo adha kṣarantīḥ ||
RV_7,034.03 āpaś cid asmai pinvanta pṛthvīr vṛtreṣu śūrā maṃsanta ugrāḥ ||
RV_7,034.04 ā dhūrṣv asmai dadhātāśvān indro na vajrī hiraṇyabāhuḥ ||
RV_7,034.05 abhi pra sthātāheva yajñaṃ yāteva patman tmanā hinota ||
RV_7,034.06 tmanā samatsu hinota yajñaṃ dadhāta ketuṃ janāya vīram ||
RV_7,034.07 ud asya śuṣmād bhānur nārta bibharti bhāram pṛthivī na bhūma ||
RV_7,034.08 hvayāmi devāṃ ayātur agne sādhann ṛtena dhiyaṃ dadhāmi ||
RV_7,034.09 abhi vo devīṃ dhiyaṃ dadhidhvam pra vo devatrā vācaṃ kṛṇudhvam ||
RV_7,034.10 ā caṣṭa āsām pātho nadīnāṃ varuṇa ugraḥ sahasracakṣāḥ ||
RV_7,034.11 rājā rāṣṭrānām peśo nadīnām anuttam asmai kṣatraṃ viśvāyu ||
RV_7,034.12 aviṣṭo asmān viśvāsu vikṣv adyuṃ kṛṇota śaṃsaṃ ninitsoḥ ||
RV_7,034.13 vy etu didyud dviṣām aśevā yuyota viṣvag rapas tanūnām ||
RV_7,034.14 avīn no agnir havyān namobhiḥ preṣṭho asmā adhāyi stomaḥ ||
RV_7,034.15 sajūr devebhir apāṃ napātaṃ sakhāyaṃ kṛdhvaṃ śivo no astu ||
RV_7,034.16 abjām ukthair ahiṃ gṛṇīṣe budhne nadīnāṃ rajassu ṣīdan ||
RV_7,034.17 mā no 'hir budhnyo riṣe dhān mā yajño asya sridhad ṛtāyoḥ ||
RV_7,034.18 uta na eṣu nṛṣu śravo dhuḥ pra rāye yantu śardhanto aryaḥ ||
RV_7,034.19 tapanti śatruṃ svar ṇa bhūmā mahāsenāso amebhir eṣām ||
RV_7,034.20 ā yan naḥ patnīr gamanty acchā tvaṣṭā supāṇir dadhātu vīrān ||
RV_7,034.21 prati na stomaṃ tvaṣṭā juṣeta syād asme aramatir vasūyuḥ ||
RV_7,034.22a tā no rāsan rātiṣāco vasūny ā rodasī varuṇānī śṛṇotu |
RV_7,034.22c varūtrībhiḥ suśaraṇo no astu tvaṣṭā sudatro vi dadhātu rāyaḥ ||
RV_7,034.23a tan no rāyaḥ parvatās tan na āpas tad rātiṣāca oṣadhīr uta dyauḥ |
RV_7,034.23c vanaspatibhiḥ pṛthivī sajoṣā ubhe rodasī pari pāsato naḥ ||
RV_7,034.24a anu tad urvī rodasī jihātām anu dyukṣo varuṇa indrasakhā |
RV_7,034.24c anu viśve maruto ye sahāso rāyaḥ syāma dharuṇaṃ dhiyadhyai ||
RV_7,034.25a tan na indro varuṇo mitro agnir āpa oṣadhīr vanino juṣanta |
RV_7,034.25c śarman syāma marutām upasthe yūyam pāta svastibhiḥ sadā naḥ ||

RV_7,035.01a śaṃ na indrāgnī bhavatām avobhiḥ śaṃ na indrāvaruṇā rātahavyā |
RV_7,035.01c śam indrāsomā suvitāya śaṃ yoḥ śaṃ na indrāpūṣaṇā vājasātau ||
RV_7,035.02a śaṃ no bhagaḥ śam u naḥ śaṃso astu śaṃ naḥ purandhiḥ śam u santu rāyaḥ |
RV_7,035.02c śaṃ naḥ satyasya suyamasya śaṃsaḥ śaṃ no aryamā purujāto astu ||
RV_7,035.03a śaṃ no dhātā śam u dhartā no astu śaṃ na urūcī bhavatu svadhābhiḥ |
RV_7,035.03c śaṃ rodasī bṛhatī śaṃ no adriḥ śaṃ no devānāṃ suhavāni santu ||
RV_7,035.04a śaṃ no agnir jyotiranīko astu śaṃ no mitrāvaruṇāv aśvinā śam |
RV_7,035.04c śaṃ naḥ sukṛtāṃ sukṛtāni santu śaṃ na iṣiro abhi vātu vātaḥ ||
RV_7,035.05a śaṃ no dyāvāpṛthivī pūrvahūtau śam antarikṣaṃ dṛśaye no astu |
RV_7,035.05c śaṃ na oṣadhīr vanino bhavantu śaṃ no rajasas patir astu jiṣṇuḥ ||
RV_7,035.06a śaṃ na indro vasubhir devo astu śam ādityebhir varuṇaḥ suśaṃsaḥ |
RV_7,035.06c śaṃ no rudro rudrebhir jalāṣaḥ śaṃ nas tvaṣṭā gnābhir iha śṛṇotu ||
RV_7,035.07a śaṃ naḥ somo bhavatu brahma śaṃ naḥ śaṃ no grāvāṇaḥ śam u santu yajñāḥ |
RV_7,035.07c śaṃ naḥ svarūṇām mitayo bhavantu śaṃ naḥ prasvaḥ śam v astu vediḥ ||
RV_7,035.08a śaṃ naḥ sūrya urucakṣā ud etu śaṃ naś catasraḥ pradiśo bhavantu |
RV_7,035.08c śaṃ naḥ parvatā dhruvayo bhavantu śaṃ naḥ sindhavaḥ śam u santv āpaḥ ||
RV_7,035.09a śaṃ no aditir bhavatu vratebhiḥ śaṃ no bhavantu marutaḥ svarkāḥ |
RV_7,035.09c śaṃ no viṣṇuḥ śam u pūṣā no astu śaṃ no bhavitraṃ śam v astu vāyuḥ ||
RV_7,035.10a śaṃ no devaḥ savitā trāyamāṇaḥ śaṃ no bhavantūṣaso vibhātīḥ |
RV_7,035.10c śaṃ naḥ parjanyo bhavatu prajābhyaḥ śaṃ naḥ kṣetrasya patir astu śambhuḥ ||
RV_7,035.11a śaṃ no devā viśvadevā bhavantu śaṃ sarasvatī saha dhībhir astu |
RV_7,035.11c śam abhiṣācaḥ śam u rātiṣācaḥ śaṃ no divyāḥ pārthivāḥ śaṃ no apyāḥ ||
RV_7,035.12a śaṃ naḥ satyasya patayo bhavantu śaṃ no arvantaḥ śam u santu gāvaḥ |
RV_7,035.12c śaṃ na ṛbhavaḥ sukṛtaḥ suhastāḥ śaṃ no bhavantu pitaro haveṣu ||
RV_7,035.13a śaṃ no aja ekapād devo astu śaṃ no 'hir budhnyaḥ śaṃ samudraḥ |
RV_7,035.13c śaṃ no apāṃ napāt perur astu śaṃ naḥ pṛśnir bhavatu devagopā ||
RV_7,035.14a ādityā rudrā vasavo juṣantedam brahma kriyamāṇaṃ navīyaḥ |
RV_7,035.14c śṛṇvantu no divyāḥ pārthivāso gojātā uta ye yajñiyāsaḥ ||
RV_7,035.15a ye devānāṃ yajñiyā yajñiyānām manor yajatrā amṛtā ṛtajñāḥ |
RV_7,035.15c te no rāsantām urugāyam adya yūyam pāta svastibhiḥ sadā naḥ ||

RV_7,036.01a pra brahmaitu sadanād ṛtasya vi raśmibhiḥ sasṛje sūryo gāḥ |
RV_7,036.01c vi sānunā pṛthivī sasra urvī pṛthu pratīkam adhy edhe agniḥ ||
RV_7,036.02a imāṃ vām mitrāvaruṇā suvṛktim iṣaṃ na kṛṇve asurā navīyaḥ |
RV_7,036.02c ino vām anyaḥ padavīr adabdho janaṃ ca mitro yatati bruvāṇaḥ ||
RV_7,036.03a ā vātasya dhrajato ranta ityā apīpayanta dhenavo na sūdāḥ |
RV_7,036.03c maho divaḥ sadane jāyamāno 'cikradad vṛṣabhaḥ sasminn ūdhan ||
RV_7,036.04a girā ya etā yunajad dharī ta indra priyā surathā śūra dhāyū |
RV_7,036.04c pra yo manyuṃ ririkṣato mināty ā sukratum aryamaṇaṃ vavṛtyām ||
RV_7,036.05a yajante asya sakhyaṃ vayaś ca namasvinaḥ sva ṛtasya dhāman |
RV_7,036.05c vi pṛkṣo bābadhe nṛbhi stavāna idaṃ namo rudrāya preṣṭham ||
RV_7,036.06a ā yat sākaṃ yaśaso vāvaśānāḥ sarasvatī saptathī sindhumātā |
RV_7,036.06c yāḥ suṣvayanta sudughāḥ sudhārā abhi svena payasā pīpyānāḥ ||
RV_7,036.07a uta tye no maruto mandasānā dhiyaṃ tokaṃ ca vājino 'vantu |
RV_7,036.07c mā naḥ pari khyad akṣarā caranty avīvṛdhan yujyaṃ te rayiṃ naḥ ||
RV_7,036.08a pra vo mahīm aramatiṃ kṛṇudhvam pra pūṣaṇaṃ vidathyaṃ na vīram |
RV_7,036.08c bhagaṃ dhiyo 'vitāraṃ no asyāḥ sātau vājaṃ rātiṣācam purandhim ||
RV_7,036.09a acchāyaṃ vo marutaḥ śloka etv acchā viṣṇuṃ niṣiktapām avobhiḥ |
RV_7,036.09c uta prajāyai gṛṇate vayo dhur yūyam pāta svastibhiḥ sadā naḥ ||

RV_7,037.01a ā vo vāhiṣṭho vahatu stavadhyai ratho vājā ṛbhukṣaṇo amṛktaḥ |
RV_7,037.01c abhi tripṛṣṭhaiḥ savaneṣu somair made suśiprā mahabhiḥ pṛṇadhvam ||
RV_7,037.02a yūyaṃ ha ratnam maghavatsu dhattha svardṛśa ṛbhukṣaṇo amṛktam |
RV_7,037.02c saṃ yajñeṣu svadhāvantaḥ pibadhvaṃ vi no rādhāṃsi matibhir dayadhvam ||
RV_7,037.03a uvocitha hi maghavan deṣṇam maho arbhasya vasuno vibhāge |
RV_7,037.03c ubhā te pūrṇā vasunā gabhastī na sūnṛtā ni yamate vasavyā ||
RV_7,037.04a tvam indra svayaśā ṛbhukṣā vājo na sādhur astam eṣy ṛkvā |
RV_7,037.04c vayaṃ nu te dāśvāṃsaḥ syāma brahma kṛṇvanto harivo vasiṣṭhāḥ ||
RV_7,037.05a sanitāsi pravato dāśuṣe cid yābhir viveṣo haryaśva dhībhiḥ |
RV_7,037.05c vavanmā nu te yujyābhir ūtī kadā na indra rāya ā daśasyeḥ ||
RV_7,037.06a vāsayasīva vedhasas tvaṃ naḥ kadā na indra vacaso bubodhaḥ |
RV_7,037.06c astaṃ tātyā dhiyā rayiṃ suvīram pṛkṣo no arvā ny uhīta vājī ||
RV_7,037.07a abhi yaṃ devī nirṛtiś cid īśe nakṣanta indraṃ śaradaḥ supṛkṣaḥ |
RV_7,037.07c upa tribandhur jaradaṣṭim ety asvaveśaṃ yaṃ kṛṇavanta martāḥ ||
RV_7,037.08a ā no rādhāṃsi savita stavadhyā ā rāyo yantu parvatasya rātau |
RV_7,037.08c sadā no divyaḥ pāyuḥ siṣaktu yūyam pāta svastibhiḥ sadā naḥ ||

RV_7,038.01a ud u ṣya devaḥ savitā yayāma hiraṇyayīm amatiṃ yām aśiśret |
RV_7,038.01c nūnam bhago havyo mānuṣebhir vi yo ratnā purūvasur dadhāti ||
RV_7,038.02a ud u tiṣṭha savitaḥ śrudhy asya hiraṇyapāṇe prabhṛtāv ṛtasya |
RV_7,038.02c vy urvīm pṛthvīm amatiṃ sṛjāna ā nṛbhyo martabhojanaṃ suvānaḥ ||
RV_7,038.03a api ṣṭutaḥ savitā devo astu yam ā cid viśve vasavo gṛṇanti |
RV_7,038.03c sa na stomān namasyaś cano dhād viśvebhiḥ pātu pāyubhir ni sūrīn ||
RV_7,038.04a abhi yaṃ devy aditir gṛṇāti savaṃ devasya savitur juṣāṇā |
RV_7,038.04c abhi samrājo varuṇo gṛṇanty abhi mitrāso aryamā sajoṣāḥ ||
RV_7,038.05a abhi ye mitho vanuṣaḥ sapante rātiṃ divo rātiṣācaḥ pṛthivyāḥ |
RV_7,038.05c ahir budhnya uta naḥ śṛṇotu varūtry ekadhenubhir ni pātu ||
RV_7,038.06a anu tan no jāspatir maṃsīṣṭa ratnaṃ devasya savitur iyānaḥ |
RV_7,038.06c bhagam ugro 'vase johavīti bhagam anugro adha yāti ratnam ||
RV_7,038.07a śaṃ no bhavantu vājino haveṣu devatātā mitadravaḥ svarkāḥ |
RV_7,038.07c jambhayanto 'hiṃ vṛkaṃ rakṣāṃsi sanemy asmad yuyavann amīvāḥ ||
RV_7,038.08a vāje-vāje 'vata vājino no dhaneṣu viprā amṛtā ṛtajñāḥ |
RV_7,038.08c asya madhvaḥ pibata mādayadhvaṃ tṛptā yāta pathibhir devayānaiḥ ||

RV_7,039.01a ūrdhvo agniḥ sumatiṃ vasvo aśret pratīcī jūrṇir devatātim eti |
RV_7,039.01c bhejāte adrī rathyeva panthām ṛtaṃ hotā na iṣito yajāti ||
RV_7,039.02a pra vāvṛje suprayā barhir eṣām ā viśpatīva bīriṭa iyāte |
RV_7,039.02c viśām aktor uṣasaḥ pūrvahūtau vāyuḥ pūṣā svastaye niyutvān ||
RV_7,039.03a jmayā atra vasavo ranta devā urāv antarikṣe marjayanta śubhrāḥ |
RV_7,039.03c arvāk patha urujrayaḥ kṛṇudhvaṃ śrotā dūtasya jagmuṣo no asya ||
RV_7,039.04a te hi yajñeṣu yajñiyāsa ūmāḥ sadhasthaṃ viśve abhi santi devāḥ |
RV_7,039.04c tāṃ adhvara uśato yakṣy agne śruṣṭī bhagaṃ nāsatyā purandhim ||
RV_7,039.05a āgne giro diva ā pṛthivyā mitraṃ vaha varuṇam indram agnim |
RV_7,039.05c āryamaṇam aditiṃ viṣṇum eṣāṃ sarasvatī maruto mādayantām ||
RV_7,039.06a rare havyam matibhir yajñiyānāṃ nakṣat kāmam martyānām asinvan |
RV_7,039.06c dhātā rayim avidasyaṃ sadāsāṃ sakṣīmahi yujyebhir nu devaiḥ ||
RV_7,039.07a nū rodasī abhiṣṭute vasiṣṭhair ṛtāvāno varuṇo mitro agniḥ |
RV_7,039.07c yacchantu candrā upamaṃ no arkaṃ yūyam pāta svastibhiḥ sadā naḥ ||

RV_7,040.01a o śruṣṭir vidathyā sam etu prati stomaṃ dadhīmahi turāṇām |
RV_7,040.01c yad adya devaḥ savitā suvāti syāmāsya ratnino vibhāge ||
RV_7,040.02a mitras tan no varuṇo rodasī ca dyubhaktam indro aryamā dadātu |
RV_7,040.02c dideṣṭu devy aditī rekṇo vāyuś ca yan niyuvaite bhagaś ca ||
RV_7,040.03a sed ugro astu marutaḥ sa śuṣmī yam martyam pṛṣadaśvā avātha |
RV_7,040.03c utem agniḥ sarasvatī junanti na tasya rāyaḥ paryetāsti ||
RV_7,040.04a ayaṃ hi netā varuṇa ṛtasya mitro rājāno aryamāpo dhuḥ |
RV_7,040.04c suhavā devy aditir anarvā te no aṃho ati parṣann ariṣṭān ||
RV_7,040.05a asya devasya mīḷhuṣo vayā viṣṇor eṣasya prabhṛthe havirbhiḥ |
RV_7,040.05c vide hi rudro rudriyam mahitvaṃ yāsiṣṭaṃ vartir aśvināv irāvat ||
RV_7,040.06a mātra pūṣann āghṛṇa irasyo varūtrī yad rātiṣācaś ca rāsan |
RV_7,040.06c mayobhuvo no arvanto ni pāntu vṛṣṭim parijmā vāto dadātu ||
RV_7,040.07a nū rodasī abhiṣṭute vasiṣṭhair ṛtāvāno varuṇo mitro agniḥ |
RV_7,040.07c yacchantu candrā upamaṃ no arkaṃ yūyam pāta svastibhiḥ sadā naḥ ||

RV_7,041.01a prātar agnim prātar indraṃ havāmahe prātar mitrāvaruṇā prātar aśvinā |
RV_7,041.01c prātar bhagam pūṣaṇam brahmaṇas patim prātaḥ somam uta rudraṃ huvema ||
RV_7,041.02a prātarjitam bhagam ugraṃ huvema vayam putram aditer yo vidhartā |
RV_7,041.02c ādhraś cid yam manyamānas turaś cid rājā cid yam bhagam bhakṣīty āha ||
RV_7,041.03a bhaga praṇetar bhaga satyarādho bhagemāṃ dhiyam ud avā dadan naḥ |
RV_7,041.03c bhaga pra ṇo janaya gobhir aśvair bhaga pra nṛbhir nṛvantaḥ syāma ||
RV_7,041.04a utedānīm bhagavantaḥ syāmota prapitva uta madhye ahnām |
RV_7,041.04c utoditā maghavan sūryasya vayaṃ devānāṃ sumatau syāma ||
RV_7,041.05a bhaga eva bhagavāṃ astu devās tena vayam bhagavantaḥ syāma |
RV_7,041.05c taṃ tvā bhaga sarva ij johavīti sa no bhaga puraetā bhaveha ||
RV_7,041.06a sam adhvarāyoṣaso namanta dadhikrāveva śucaye padāya |
RV_7,041.06c arvācīnaṃ vasuvidam bhagaṃ no ratham ivāśvā vājina ā vahantu ||
RV_7,041.07a aśvāvatīr gomatīr na uṣāso vīravatīḥ sadam ucchantu bhadrāḥ |
RV_7,041.07c ghṛtaṃ duhānā viśvataḥ prapītā yūyam pāta svastibhiḥ sadā naḥ ||

RV_7,042.01a pra brahmāṇo aṅgiraso nakṣanta pra krandanur nabhanyasya vetu |
RV_7,042.01c pra dhenava udapruto navanta yujyātām adrī adhvarasya peśaḥ ||
RV_7,042.02a sugas te agne sanavitto adhvā yukṣvā sute harito rohitaś ca |
RV_7,042.02c ye vā sadmann aruṣā vīravāho huve devānāṃ janimāni sattaḥ ||
RV_7,042.03a sam u vo yajñam mahayan namobhiḥ pra hotā mandro ririca upāke |
RV_7,042.03c yajasva su purvaṇīka devān ā yajñiyām aramatiṃ vavṛtyāḥ ||
RV_7,042.04a yadā vīrasya revato duroṇe syonaśīr atithir āciketat |
RV_7,042.04c suprīto agniḥ sudhito dama ā sa viśe dāti vāryam iyatyai ||
RV_7,042.05a imaṃ no agne adhvaraṃ juṣasva marutsv indre yaśasaṃ kṛdhī naḥ |
RV_7,042.05c ā naktā barhiḥ sadatām uṣāsośantā mitrāvaruṇā yajeha ||
RV_7,042.06a evāgniṃ sahasyaṃ vasiṣṭho rāyaskāmo viśvapsnyasya staut |
RV_7,042.06c iṣaṃ rayim paprathad vājam asme yūyam pāta svastibhiḥ sadā naḥ ||

RV_7,043.01a pra vo yajñeṣu devayanto arcan dyāvā namobhiḥ pṛthivī iṣadhyai |
RV_7,043.01c yeṣām brahmāṇy asamāni viprā viṣvag viyanti vanino na śākhāḥ ||
RV_7,043.02a pra yajña etu hetvo na saptir ud yacchadhvaṃ samanaso ghṛtācīḥ |
RV_7,043.02c stṛṇīta barhir adhvarāya sādhūrdhvā śocīṃṣi devayūny asthuḥ ||
RV_7,043.03a ā putrāso na mātaraṃ vibhṛtrāḥ sānau devāso barhiṣaḥ sadantu |
RV_7,043.03c ā viśvācī vidathyām anaktv agne mā no devatātā mṛdhas kaḥ ||
RV_7,043.04a te sīṣapanta joṣam ā yajatrā ṛtasya dhārāḥ sudughā duhānāḥ |
RV_7,043.04c jyeṣṭhaṃ vo adya maha ā vasūnām ā gantana samanaso yati ṣṭha ||
RV_7,043.05a evā no agne vikṣv ā daśasya tvayā vayaṃ sahasāvann āskrāḥ |
RV_7,043.05c rāyā yujā sadhamādo ariṣṭā yūyam pāta svastibhiḥ sadā naḥ ||

RV_7,044.01a dadhikrāṃ vaḥ prathamam aśvinoṣasam agniṃ samiddham bhagam ūtaye huve |
RV_7,044.01c indraṃ viṣṇum pūṣaṇam brahmaṇas patim ādityān dyāvāpṛthivī apaḥ svaḥ ||
RV_7,044.02a dadhikrām u namasā bodhayanta udīrāṇā yajñam upaprayantaḥ |
RV_7,044.02c iḷāṃ devīm barhiṣi sādayanto 'śvinā viprā suhavā huvema ||
RV_7,044.03a dadhikrāvāṇam bubudhāno agnim upa bruva uṣasaṃ sūryaṃ gām |
RV_7,044.03c bradhnam māṃścator varuṇasya babhruṃ te viśvāsmad duritā yāvayantu ||
RV_7,044.04a dadhikrāvā prathamo vājy arvāgre rathānām bhavati prajānan |
RV_7,044.04c saṃvidāna uṣasā sūryeṇādityebhir vasubhir aṅgirobhiḥ ||
RV_7,044.05a ā no dadhikrāḥ pathyām anaktv ṛtasya panthām anvetavā u |
RV_7,044.05c śṛṇotu no daivyaṃ śardho agniḥ śṛṇvantu viśve mahiṣā amūrāḥ ||

RV_7,045.01a ā devo yātu savitā suratno 'ntarikṣaprā vahamāno aśvaiḥ |
RV_7,045.01c haste dadhāno naryā purūṇi niveśayañ ca prasuvañ ca bhūma ||
RV_7,045.02a ud asya bāhū śithirā bṛhantā hiraṇyayā divo antāṃ anaṣṭām |
RV_7,045.02c nūnaṃ so asya mahimā paniṣṭa sūraś cid asmā anu dād apasyām ||
RV_7,045.03a sa ghā no devaḥ savitā sahāvā sāviṣad vasupatir vasūni |
RV_7,045.03c viśrayamāṇo amatim urūcīm martabhojanam adha rāsate naḥ ||
RV_7,045.04a imā giraḥ savitāraṃ sujihvam pūrṇagabhastim īḷate supāṇim |
RV_7,045.04c citraṃ vayo bṛhad asme dadhātu yūyam pāta svastibhiḥ sadā naḥ ||

RV_7,046.01a imā rudrāya sthiradhanvane giraḥ kṣipreṣave devāya svadhāvne |
RV_7,046.01c aṣāḷhāya sahamānāya vedhase tigmāyudhāya bharatā śṛṇotu naḥ ||
RV_7,046.02a sa hi kṣayeṇa kṣamyasya janmanaḥ sāmrājyena divyasya cetati |
RV_7,046.02c avann avantīr upa no duraś carānamīvo rudra jāsu no bhava ||
RV_7,046.03a yā te didyud avasṛṣṭā divas pari kṣmayā carati pari sā vṛṇaktu naḥ |
RV_7,046.03c sahasraṃ te svapivāta bheṣajā mā nas tokeṣu tanayeṣu rīriṣaḥ ||
RV_7,046.04a mā no vadhī rudra mā parā dā mā te bhūma prasitau hīḷitasya |
RV_7,046.04c ā no bhaja barhiṣi jīvaśaṃse yūyam pāta svastibhiḥ sadā naḥ ||

RV_7,047.01a āpo yaṃ vaḥ prathamaṃ devayanta indrapānam ūrmim akṛṇvateḷaḥ |
RV_7,047.01c taṃ vo vayaṃ śucim aripram adya ghṛtapruṣam madhumantaṃ vanema ||
RV_7,047.02a tam ūrmim āpo madhumattamaṃ vo 'pāṃ napād avatv āśuhemā |
RV_7,047.02c yasminn indro vasubhir mādayāte tam aśyāma devayanto vo adya ||
RV_7,047.03a śatapavitrāḥ svadhayā madantīr devīr devānām api yanti pāthaḥ |
RV_7,047.03c tā indrasya na minanti vratāni sindhubhyo havyaṃ ghṛtavaj juhota ||
RV_7,047.04a yāḥ sūryo raśmibhir ātatāna yābhya indro aradad gātum ūrmim |
RV_7,047.04c te sindhavo varivo dhātanā no yūyam pāta svastibhiḥ sadā naḥ ||

RV_7,048.01a ṛbhukṣaṇo vājā mādayadhvam asme naro maghavānaḥ sutasya |
RV_7,048.01c ā vo 'rvācaḥ kratavo na yātāṃ vibhvo rathaṃ naryaṃ vartayantu ||
RV_7,048.02a ṛbhur ṛbhubhir abhi vaḥ syāma vibhvo vibhubhiḥ śavasā śavāṃsi |
RV_7,048.02c vājo asmāṃ avatu vājasātāv indreṇa yujā taruṣema vṛtram ||
RV_7,048.03a te cid dhi pūrvīr abhi santi śāsā viśvāṃ arya uparatāti vanvan |
RV_7,048.03c indro vibhvāṃ ṛbhukṣā vājo aryaḥ śatror mithatyā kṛṇavan vi nṛmṇam ||
RV_7,048.04a nū devāso varivaḥ kartanā no bhūta no viśve 'vase sajoṣāḥ |
RV_7,048.04c sam asme iṣaṃ vasavo dadīran yūyam pāta svastibhiḥ sadā naḥ ||

RV_7,049.01a samudrajyeṣṭhāḥ salilasya madhyāt punānā yanty aniviśamānāḥ |
RV_7,049.01c indro yā vajrī vṛṣabho rarāda tā āpo devīr iha mām avantu ||
RV_7,049.02a yā āpo divyā uta vā sravanti khanitrimā uta vā yāḥ svayañjāḥ |
RV_7,049.02c samudrārthā yāḥ śucayaḥ pāvakās tā āpo devīr iha mām avantu ||
RV_7,049.03a yāsāṃ rājā varuṇo yāti madhye satyānṛte avapaśyañ janānām |
RV_7,049.03c madhuścutaḥ śucayo yāḥ pāvakās tā āpo devīr iha mām avantu ||
RV_7,049.04a yāsu rājā varuṇo yāsu somo viśve devā yāsūrjam madanti |
RV_7,049.04c vaiśvānaro yāsv agniḥ praviṣṭas tā āpo devīr iha mām avantu ||

RV_7,050.01a ā mām mitrāvaruṇeha rakṣataṃ kulāyayad viśvayan mā na ā gan |
RV_7,050.01c ajakāvaṃ durdṛśīkaṃ tiro dadhe mā mām padyena rapasā vidat tsaruḥ ||
RV_7,050.02a yad vijāman paruṣi vandanam bhuvad aṣṭhīvantau pari kulphau ca dehat |
RV_7,050.02c agniṣ ṭac chocann apa bādhatām ito mā mām padyena rapasā vidat tsaruḥ ||
RV_7,050.03a yac chalmalau bhavati yan nadīṣu yad oṣadhībhyaḥ pari jāyate viṣam |
RV_7,050.03c viśve devā nir itas tat suvantu mā mām padyena rapasā vidat tsaruḥ ||
RV_7,050.04a yāḥ pravato nivata udvata udanvatīr anudakāś ca yāḥ |
RV_7,050.04c tā asmabhyam payasā pinvamānāḥ śivā devīr aśipadā bhavantu sarvā nadyo aśimidā bhavantu ||

RV_7,051.01a ādityānām avasā nūtanena sakṣīmahi śarmaṇā śantamena |
RV_7,051.01c anāgāstve adititve turāsa imaṃ yajñaṃ dadhatu śroṣamāṇāḥ ||
RV_7,051.02a ādityāso aditir mādayantām mitro aryamā varuṇo rajiṣṭhāḥ |
RV_7,051.02c asmākaṃ santu bhuvanasya gopāḥ pibantu somam avase no adya ||
RV_7,051.03a ādityā viśve marutaś ca viśve devāś ca viśva ṛbhavaś ca viśve |
RV_7,051.03c indro agnir aśvinā tuṣṭuvānā yūyam pāta svastibhiḥ sadā naḥ ||

RV_7,052.01a ādityāso aditayaḥ syāma pūr devatrā vasavo martyatrā |
RV_7,052.01c sanema mitrāvaruṇā sananto bhavema dyāvāpṛthivī bhavantaḥ ||
RV_7,052.02a mitras tan no varuṇo māmahanta śarma tokāya tanayāya gopāḥ |
RV_7,052.02c mā vo bhujemānyajātam eno mā tat karma vasavo yac cayadhve ||
RV_7,052.03a turaṇyavo 'ṅgiraso nakṣanta ratnaṃ devasya savitur iyānāḥ |
RV_7,052.03c pitā ca tan no mahān yajatro viśve devāḥ samanaso juṣanta ||

RV_7,053.01a pra dyāvā yajñaiḥ pṛthivī namobhiḥ sabādha īḷe bṛhatī yajatre |
RV_7,053.01c te cid dhi pūrve kavayo gṛṇantaḥ puro mahī dadhire devaputre ||
RV_7,053.02a pra pūrvaje pitarā navyasībhir gīrbhiḥ kṛṇudhvaṃ sadane ṛtasya |
RV_7,053.02c ā no dyāvāpṛthivī daivyena janena yātam mahi vāṃ varūtham ||
RV_7,053.03a uto hi vāṃ ratnadheyāni santi purūṇi dyāvāpṛthivī sudāse |
RV_7,053.03c asme dhattaṃ yad asad askṛdhoyu yūyam pāta svastibhiḥ sadā naḥ ||

RV_7,054.01a vāstoṣ pate prati jānīhy asmān svāveśo anamīvo bhavā naḥ |
RV_7,054.01c yat tvemahe prati tan no juṣasva śaṃ no bhava dvipade śaṃ catuṣpade ||
RV_7,054.02a vāstoṣ pate prataraṇo na edhi gayasphāno gobhir aśvebhir indo |
RV_7,054.02c ajarāsas te sakhye syāma piteva putrān prati no juṣasva ||
RV_7,054.03a vāstoṣ pate śagmayā saṃsadā te sakṣīmahi raṇvayā gātumatyā |
RV_7,054.03c pāhi kṣema uta yoge varaṃ no yūyam pāta svastibhiḥ sadā naḥ ||

RV_7,055.01a amīvahā vāstoṣ pate viśvā rūpāṇy āviśan |
RV_7,055.01c sakhā suśeva edhi naḥ ||
RV_7,055.02a yad arjuna sārameya dataḥ piśaṅga yacchase |
RV_7,055.02c vīva bhrājanta ṛṣṭaya upa srakveṣu bapsato ni ṣu svapa ||
RV_7,055.03a stenaṃ rāya sārameya taskaraṃ vā punaḥsara |
RV_7,055.03c stotṝn indrasya rāyasi kim asmān ducchunāyase ni ṣu svapa ||
RV_7,055.04a tvaṃ sūkarasya dardṛhi tava dardartu sūkaraḥ |
RV_7,055.04c stotṝn indrasya rāyasi kim asmān ducchunāyase ni ṣu svapa ||
RV_7,055.05a sastu mātā sastu pitā sastu śvā sastu viśpatiḥ |
RV_7,055.05c sasantu sarve jñātayaḥ sastv ayam abhito janaḥ ||
RV_7,055.06a ya āste yaś ca carati yaś ca paśyati no janaḥ |
RV_7,055.06c teṣāṃ saṃ hanmo akṣāṇi yathedaṃ harmyaṃ tathā ||
RV_7,055.07a sahasraśṛṅgo vṛṣabho yaḥ samudrād udācarat |
RV_7,055.07c tenā sahasyenā vayaṃ ni janān svāpayāmasi ||
RV_7,055.08a proṣṭheśayā vahyeśayā nārīr yās talpaśīvarīḥ |
RV_7,055.08c striyo yāḥ puṇyagandhās tāḥ sarvāḥ svāpayāmasi ||

RV_7,056.01a ka īṃ vyaktā naraḥ sanīḷā rudrasya maryā adha svaśvāḥ ||
RV_7,056.02a nakir hy eṣāṃ janūṃṣi veda te aṅga vidre mitho janitram ||
RV_7,056.03a abhi svapūbhir mitho vapanta vātasvanasaḥ śyenā aspṛdhran ||
RV_7,056.04a etāni dhīro niṇyā ciketa pṛśnir yad ūdho mahī jabhāra ||
RV_7,056.05a sā viṭ suvīrā marudbhir astu sanāt sahantī puṣyantī nṛmṇam ||
RV_7,056.06a yāmaṃ yeṣṭhāḥ śubhā śobhiṣṭhāḥ śriyā sammiślā ojobhir ugrāḥ ||
RV_7,056.07a ugraṃ va oja sthirā śavāṃsy adhā marudbhir gaṇas tuviṣmān ||
RV_7,056.08a śubhro vaḥ śuṣmaḥ krudhmī manāṃsi dhunir munir iva śardhasya dhṛṣṇoḥ ||
RV_7,056.09a sanemy asmad yuyota didyum mā vo durmatir iha praṇaṅ naḥ ||
RV_7,056.10a priyā vo nāma huve turāṇām ā yat tṛpan maruto vāvaśānāḥ ||
RV_7,056.11a svāyudhāsa iṣmiṇaḥ suniṣkā uta svayaṃ tanvaḥ śumbhamānāḥ ||
RV_7,056.12a śucī vo havyā marutaḥ śucīnāṃ śuciṃ hinomy adhvaraṃ śucibhyaḥ |
RV_7,056.12c ṛtena satyam ṛtasāpa āyañ chucijanmānaḥ śucayaḥ pāvakāḥ ||
RV_7,056.13a aṃseṣv ā marutaḥ khādayo vo vakṣassu rukmā upaśiśriyāṇāḥ |
RV_7,056.13c vi vidyuto na vṛṣṭibhī rucānā anu svadhām āyudhair yacchamānāḥ ||
RV_7,056.14a pra budhnyā va īrate mahāṃsi pra nāmāni prayajyavas tiradhvam |
RV_7,056.14c sahasriyaṃ damyam bhāgam etaṃ gṛhamedhīyam maruto juṣadhvam ||
RV_7,056.15a yadi stutasya maruto adhīthetthā viprasya vājino havīman |
RV_7,056.15c makṣū rāyaḥ suvīryasya dāta nū cid yam anya ādabhad arāvā ||
RV_7,056.16a atyāso na ye marutaḥ svañco yakṣadṛśo na śubhayanta maryāḥ |
RV_7,056.16c te harmyeṣṭhāḥ śiśavo na śubhrā vatsāso na prakrīḷinaḥ payodhāḥ ||
RV_7,056.17a daśasyanto no maruto mṛḷantu varivasyanto rodasī sumeke |
RV_7,056.17c āre gohā nṛhā vadho vo astu sumnebhir asme vasavo namadhvam ||
RV_7,056.18a ā vo hotā johavīti sattaḥ satrācīṃ rātim maruto gṛṇānaḥ |
RV_7,056.18c ya īvato vṛṣaṇo asti gopāḥ so advayāvī havate va ukthaiḥ ||
RV_7,056.19a ime turam maruto rāmayantīme sahaḥ sahasa ā namanti |
RV_7,056.19c ime śaṃsaṃ vanuṣyato ni pānti guru dveṣo araruṣe dadhanti ||
RV_7,056.20a ime radhraṃ cin maruto junanti bhṛmiṃ cid yathā vasavo juṣanta |
RV_7,056.20c apa bādhadhvaṃ vṛṣaṇas tamāṃsi dhatta viśvaṃ tanayaṃ tokam asme ||
RV_7,056.21a mā vo dātrān maruto nir arāma mā paścād daghma rathyo vibhāge |
RV_7,056.21c ā na spārhe bhajatanā vasavye yad īṃ sujātaṃ vṛṣaṇo vo asti ||
RV_7,056.22a saṃ yad dhananta manyubhir janāsaḥ śūrā yahvīṣv oṣadhīṣu vikṣu |
RV_7,056.22c adha smā no maruto rudriyāsas trātāro bhūta pṛtanāsv aryaḥ ||
RV_7,056.23a bhūri cakra marutaḥ pitryāṇy ukthāni yā vaḥ śasyante purā cit |
RV_7,056.23c marudbhir ugraḥ pṛtanāsu sāḷhā marudbhir it sanitā vājam arvā ||
RV_7,056.24a asme vīro marutaḥ śuṣmy astu janānāṃ yo asuro vidhartā |
RV_7,056.24c apo yena sukṣitaye taremādha svam oko abhi vaḥ syāma ||
RV_7,056.25a tan na indro varuṇo mitro agnir āpa oṣadhīr vanino juṣanta |
RV_7,056.25c śarman syāma marutām upasthe yūyam pāta svastibhiḥ sadā naḥ ||

RV_7,057.01a madhvo vo nāma mārutaṃ yajatrāḥ pra yajñeṣu śavasā madanti |
RV_7,057.01c ye rejayanti rodasī cid urvī pinvanty utsaṃ yad ayāsur ugrāḥ ||
RV_7,057.02a nicetāro hi maruto gṛṇantam praṇetāro yajamānasya manma |
RV_7,057.02c asmākam adya vidatheṣu barhir ā vītaye sadata pipriyāṇāḥ ||
RV_7,057.03a naitāvad anye maruto yatheme bhrājante rukmair āyudhais tanūbhiḥ |
RV_7,057.03c ā rodasī viśvapiśaḥ piśānāḥ samānam añjy añjate śubhe kam ||
RV_7,057.04a ṛdhak sā vo maruto didyud astu yad va āgaḥ puruṣatā karāma |
RV_7,057.04c mā vas tasyām api bhūmā yajatrā asme vo astu sumatiś caniṣṭhā ||
RV_7,057.05a kṛte cid atra maruto raṇantānavadyāsaḥ śucayaḥ pāvakāḥ |
RV_7,057.05c pra ṇo 'vata sumatibhir yajatrāḥ pra vājebhis tirata puṣyase naḥ ||
RV_7,057.06a uta stutāso maruto vyantu viśvebhir nāmabhir naro havīṃṣi |
RV_7,057.06c dadāta no amṛtasya prajāyai jigṛta rāyaḥ sūnṛtā maghāni ||
RV_7,057.07a ā stutāso maruto viśva ūtī acchā sūrīn sarvatātā jigāta |
RV_7,057.07c ye nas tmanā śatino vardhayanti yūyam pāta svastibhiḥ sadā naḥ ||

RV_7,058.01a pra sākamukṣe arcatā gaṇāya yo daivyasya dhāmnas tuviṣmān |
RV_7,058.01c uta kṣodanti rodasī mahitvā nakṣante nākaṃ nirṛter avaṃśāt ||
RV_7,058.02a janūś cid vo marutas tveṣyeṇa bhīmāsas tuvimanyavo 'yāsaḥ |
RV_7,058.02c pra ye mahobhir ojasota santi viśvo vo yāman bhayate svardṛk ||
RV_7,058.03a bṛhad vayo maghavadbhyo dadhāta jujoṣann in marutaḥ suṣṭutiṃ naḥ |
RV_7,058.03c gato nādhvā vi tirāti jantum pra ṇa spārhābhir ūtibhis tireta ||
RV_7,058.04a yuṣmoto vipro marutaḥ śatasvī yuṣmoto arvā sahuriḥ sahasrī |
RV_7,058.04c yuṣmotaḥ samrāḷ uta hanti vṛtram pra tad vo astu dhūtayo deṣṇam ||
RV_7,058.05a tāṃ ā rudrasya mīḷhuṣo vivāse kuvin naṃsante marutaḥ punar naḥ |
RV_7,058.05c yat sasvartā jihīḷire yad āvir ava tad ena īmahe turāṇām ||
RV_7,058.06a pra sā vāci suṣṭutir maghonām idaṃ sūktam maruto juṣanta |
RV_7,058.06c ārāc cid dveṣo vṛṣaṇo yuyota yūyam pāta svastibhiḥ sadā naḥ ||

RV_7,059.01a yaṃ trāyadhva idam-idaṃ devāso yaṃ ca nayatha |
RV_7,059.01c tasmā agne varuṇa mitrāryaman marutaḥ śarma yacchata ||
RV_7,059.02a yuṣmākaṃ devā avasāhani priya ījānas tarati dviṣaḥ |
RV_7,059.02c pra sa kṣayaṃ tirate vi mahīr iṣo yo vo varāya dāśati ||
RV_7,059.03a nahi vaś caramaṃ cana vasiṣṭhaḥ parimaṃsate |
RV_7,059.03c asmākam adya marutaḥ sute sacā viśve pibata kāminaḥ ||
RV_7,059.04a nahi va ūtiḥ pṛtanāsu mardhati yasmā arādhvaṃ naraḥ |
RV_7,059.04c abhi va āvart sumatir navīyasī tūyaṃ yāta pipīṣavaḥ ||
RV_7,059.05a o ṣu ghṛṣvirādhaso yātanāndhāṃsi pītaye |
RV_7,059.05c imā vo havyā maruto rare hi kam mo ṣv anyatra gantana ||
RV_7,059.06a ā ca no barhiḥ sadatāvitā ca na spārhāṇi dātave vasu |
RV_7,059.06c asredhanto marutaḥ somye madhau svāheha mādayādhvai ||
RV_7,059.07a sasvaś cid dhi tanvaḥ śumbhamānā ā haṃsāso nīlapṛṣṭhā apaptan |
RV_7,059.07c viśvaṃ śardho abhito mā ni ṣeda naro na raṇvāḥ savane madantaḥ ||
RV_7,059.08a yo no maruto abhi durhṛṇāyus tiraś cittāni vasavo jighāṃsati |
RV_7,059.08c druhaḥ pāśān prati sa mucīṣṭa tapiṣṭhena hanmanā hantanā tam ||
RV_7,059.09a sāṃtapanā idaṃ havir marutas taj jujuṣṭana |
RV_7,059.09c yuṣmākotī riśādasaḥ ||
RV_7,059.10a gṛhamedhāsa ā gata maruto māpa bhūtana |
RV_7,059.10c yuṣmākotī sudānavaḥ ||
RV_7,059.11a iheha vaḥ svatavasaḥ kavayaḥ sūryatvacaḥ |
RV_7,059.11c yajñam maruta ā vṛṇe ||
RV_7,059.12a tryambakaṃ yajāmahe sugandhim puṣṭivardhanam |
RV_7,059.12c urvārukam iva bandhanān mṛtyor mukṣīya māmṛtāt ||

RV_7,060.01a yad adya sūrya bravo 'nāgā udyan mitrāya varuṇāya satyam |
RV_7,060.01c vayaṃ devatrādite syāma tava priyāso aryaman gṛṇantaḥ ||
RV_7,060.02a eṣa sya mitrāvaruṇā nṛcakṣā ubhe ud eti sūryo abhi jman |
RV_7,060.02c viśvasya sthātur jagataś ca gopā ṛju marteṣu vṛjinā ca paśyan ||
RV_7,060.03a ayukta sapta haritaḥ sadhasthād yā īṃ vahanti sūryaṃ ghṛtācīḥ |
RV_7,060.03c dhāmāni mitrāvaruṇā yuvākuḥ saṃ yo yūtheva janimāni caṣṭe ||
RV_7,060.04a ud vām pṛkṣāso madhumanto asthur ā sūryo aruhac chukram arṇaḥ |
RV_7,060.04c yasmā ādityā adhvano radanti mitro aryamā varuṇaḥ sajoṣāḥ ||
RV_7,060.05a ime cetāro anṛtasya bhūrer mitro aryamā varuṇo hi santi |
RV_7,060.05c ima ṛtasya vāvṛdhur duroṇe śagmāsaḥ putrā aditer adabdhāḥ ||
RV_7,060.06a ime mitro varuṇo dūḷabhāso 'cetasaṃ cic citayanti dakṣaiḥ |
RV_7,060.06c api kratuṃ sucetasaṃ vatantas tiraś cid aṃhaḥ supathā nayanti ||
RV_7,060.07a ime divo animiṣā pṛthivyāś cikitvāṃso acetasaṃ nayanti |
RV_7,060.07c pravrāje cin nadyo gādham asti pāraṃ no asya viṣpitasya parṣan ||
RV_7,060.08a yad gopāvad aditiḥ śarma bhadram mitro yacchanti varuṇaḥ sudāse |
RV_7,060.08c tasminn ā tokaṃ tanayaṃ dadhānā mā karma devaheḷanaṃ turāsaḥ ||
RV_7,060.09a ava vediṃ hotrābhir yajeta ripaḥ kāś cid varuṇadhrutaḥ saḥ |
RV_7,060.09c pari dveṣobhir aryamā vṛṇaktūruṃ sudāse vṛṣaṇā u lokam ||
RV_7,060.10a sasvaś cid dhi samṛtis tveṣy eṣām apīcyena sahasā sahante |
RV_7,060.10c yuṣmad bhiyā vṛṣaṇo rejamānā dakṣasya cin mahinā mṛḷatā naḥ ||
RV_7,060.11a yo brahmaṇe sumatim āyajāte vājasya sātau paramasya rāyaḥ |
RV_7,060.11c sīkṣanta manyum maghavāno arya uru kṣayāya cakrire sudhātu ||
RV_7,060.12a iyaṃ deva purohitir yuvabhyāṃ yajñeṣu mitrāvaruṇāv akāri |
RV_7,060.12c viśvāni durgā pipṛtaṃ tiro no yūyam pāta svastibhiḥ sadā naḥ ||

RV_7,061.01a ud vāṃ cakṣur varuṇa supratīkaṃ devayor eti sūryas tatanvān |
RV_7,061.01c abhi yo viśvā bhuvanāni caṣṭe sa manyum martyeṣv ā ciketa ||
RV_7,061.02a pra vāṃ sa mitrāvaruṇāv ṛtāvā vipro manmāni dīrghaśrud iyarti |
RV_7,061.02c yasya brahmāṇi sukratū avātha ā yat kratvā na śaradaḥ pṛṇaithe ||
RV_7,061.03a proror mitrāvaruṇā pṛthivyāḥ pra diva ṛṣvād bṛhataḥ sudānū |
RV_7,061.03c spaśo dadhāthe oṣadhīṣu vikṣv ṛdhag yato animiṣaṃ rakṣamāṇā ||
RV_7,061.04a śaṃsā mitrasya varuṇasya dhāma śuṣmo rodasī badbadhe mahitvā |
RV_7,061.04c ayan māsā ayajvanām avīrāḥ pra yajñamanmā vṛjanaṃ tirāte ||
RV_7,061.05a amūrā viśvā vṛṣaṇāv imā vāṃ na yāsu citraṃ dadṛśe na yakṣam |
RV_7,061.05c druhaḥ sacante anṛtā janānāṃ na vāṃ niṇyāny acite abhūvan ||
RV_7,061.06a sam u vāṃ yajñam mahayaṃ namobhir huve vām mitrāvaruṇā sabādhaḥ |
RV_7,061.06c pra vām manmāny ṛcase navāni kṛtāni brahma jujuṣann imāni ||
RV_7,061.07a iyaṃ deva purohitir yuvabhyāṃ yajñeṣu mitrāvaruṇāv akāri |
RV_7,061.07c viśvāni durgā pipṛtaṃ tiro no yūyam pāta svastibhiḥ sadā naḥ ||

RV_7,062.01a ut sūryo bṛhad arcīṃṣy aśret puru viśvā janima mānuṣāṇām |
RV_7,062.01c samo divā dadṛśe rocamānaḥ kratvā kṛtaḥ sukṛtaḥ kartṛbhir bhūt ||
RV_7,062.02a sa sūrya prati puro na ud gā ebhi stomebhir etaśebhir evaiḥ |
RV_7,062.02c pra no mitrāya varuṇāya voco 'nāgaso aryamṇe agnaye ca ||
RV_7,062.03a vi naḥ sahasraṃ śurudho radantv ṛtāvāno varuṇo mitro agniḥ |
RV_7,062.03c yacchantu candrā upamaṃ no arkam ā naḥ kāmam pūpurantu stavānāḥ ||
RV_7,062.04a dyāvābhūmī adite trāsīthāṃ no ye vāṃ jajñuḥ sujanimāna ṛṣve |
RV_7,062.04c mā heḷe bhūma varuṇasya vāyor mā mitrasya priyatamasya nṛṇām ||
RV_7,062.05a pra bāhavā sisṛtaṃ jīvase na ā no gavyūtim ukṣataṃ ghṛtena |
RV_7,062.05c ā no jane śravayataṃ yuvānā śrutam me mitrāvaruṇā havemā ||
RV_7,062.06a nū mitro varuṇo aryamā nas tmane tokāya varivo dadhantu |
RV_7,062.06c sugā no viśvā supathāni santu yūyam pāta svastibhiḥ sadā naḥ ||

RV_7,063.01a ud v eti subhago viśvacakṣāḥ sādhāraṇaḥ sūryo mānuṣāṇām |
RV_7,063.01c cakṣur mitrasya varuṇasya devaś carmeva yaḥ samavivyak tamāṃsi ||
RV_7,063.02a ud v eti prasavītā janānām mahān ketur arṇavaḥ sūryasya |
RV_7,063.02c samānaṃ cakram paryāvivṛtsan yad etaśo vahati dhūrṣu yuktaḥ ||
RV_7,063.03a vibhrājamāna uṣasām upasthād rebhair ud ety anumadyamānaḥ |
RV_7,063.03c eṣa me devaḥ savitā cacchanda yaḥ samānaṃ na pramināti dhāma ||
RV_7,063.04a divo rukma urucakṣā ud eti dūrearthas taraṇir bhrājamānaḥ |
RV_7,063.04c nūnaṃ janāḥ sūryeṇa prasūtā ayann arthāni kṛṇavann apāṃsi ||
RV_7,063.05a yatrā cakrur amṛtā gātum asmai śyeno na dīyann anv eti pāthaḥ |
RV_7,063.05c prati vāṃ sūra udite vidhema namobhir mitrāvaruṇota havyaiḥ ||
RV_7,063.06a nū mitro varuṇo aryamā nas tmane tokāya varivo dadhantu |
RV_7,063.06c sugā no viśvā supathāni santu yūyam pāta svastibhiḥ sadā naḥ ||

RV_7,064.01a divi kṣayantā rajasaḥ pṛthivyām pra vāṃ ghṛtasya nirṇijo dadīran |
RV_7,064.01c havyaṃ no mitro aryamā sujāto rājā sukṣatro varuṇo juṣanta ||
RV_7,064.02a ā rājānā maha ṛtasya gopā sindhupatī kṣatriyā yātam arvāk |
RV_7,064.02c iḷāṃ no mitrāvaruṇota vṛṣṭim ava diva invataṃ jīradānū ||
RV_7,064.03a mitras tan no varuṇo devo aryaḥ pra sādhiṣṭhebhiḥ pathibhir nayantu |
RV_7,064.03c bravad yathā na ād ariḥ sudāsa iṣā madema saha devagopāḥ ||
RV_7,064.04a yo vāṃ gartam manasā takṣad etam ūrdhvāṃ dhītiṃ kṛṇavad dhārayac ca |
RV_7,064.04c ukṣethām mitrāvaruṇā ghṛtena tā rājānā sukṣitīs tarpayethām ||
RV_7,064.05a eṣa stomo varuṇa mitra tubhyaṃ somaḥ śukro na vāyave 'yāmi |
RV_7,064.05c aviṣṭaṃ dhiyo jigṛtam purandhīr yūyam pāta svastibhiḥ sadā naḥ ||

RV_7,065.01a prati vāṃ sūra udite sūktair mitraṃ huve varuṇam pūtadakṣam |
RV_7,065.01c yayor asuryam akṣitaṃ jyeṣṭhaṃ viśvasya yāmann ācitā jigatnu ||
RV_7,065.02a tā hi devānām asurā tāv aryā tā naḥ kṣitīḥ karatam ūrjayantīḥ |
RV_7,065.02c aśyāma mitrāvaruṇā vayaṃ vāṃ dyāvā ca yatra pīpayann ahā ca ||
RV_7,065.03a tā bhūripāśāv anṛtasya setū duratyetū ripave martyāya |
RV_7,065.03c ṛtasya mitrāvaruṇā pathā vām apo na nāvā duritā tarema ||
RV_7,065.04a ā no mitrāvaruṇā havyajuṣṭiṃ ghṛtair gavyūtim ukṣatam iḷābhiḥ |
RV_7,065.04c prati vām atra varam ā janāya pṛṇītam udno divyasya cāroḥ ||
RV_7,065.05a eṣa stomo varuṇa mitra tubhyaṃ somaḥ śukro na vāyave 'yāmi |
RV_7,065.05c aviṣṭaṃ dhiyo jigṛtam purandhīr yūyam pāta svastibhiḥ sadā naḥ ||

RV_7,066.01a pra mitrayor varuṇayo stomo na etu śūṣyaḥ |
RV_7,066.01c namasvān tuvijātayoḥ ||
RV_7,066.02a yā dhārayanta devāḥ sudakṣā dakṣapitarā |
RV_7,066.02c asuryāya pramahasā ||
RV_7,066.03a tā na stipā tanūpā varuṇa jaritṝṇām |
RV_7,066.03c mitra sādhayataṃ dhiyaḥ ||
RV_7,066.04a yad adya sūra udite 'nāgā mitro aryamā |
RV_7,066.04c suvāti savitā bhagaḥ ||
RV_7,066.05a suprāvīr astu sa kṣayaḥ pra nu yāman sudānavaḥ |
RV_7,066.05c ye no aṃho 'tipiprati ||
RV_7,066.06a uta svarājo aditir adabdhasya vratasya ye |
RV_7,066.06c maho rājāna īśate ||
RV_7,066.07a prati vāṃ sūra udite mitraṃ gṛṇīṣe varuṇam |
RV_7,066.07c aryamaṇaṃ riśādasam ||
RV_7,066.08a rāyā hiraṇyayā matir iyam avṛkāya śavase |
RV_7,066.08c iyaṃ viprā medhasātaye ||
RV_7,066.09a te syāma deva varuṇa te mitra sūribhiḥ saha |
RV_7,066.09c iṣaṃ svaś ca dhīmahi ||
RV_7,066.10a bahavaḥ sūracakṣaso 'gnijihvā ṛtāvṛdhaḥ |
RV_7,066.10c trīṇi ye yemur vidathāni dhītibhir viśvāni paribhūtibhiḥ ||
RV_7,066.11a vi ye dadhuḥ śaradam māsam ād ahar yajñam aktuṃ cād ṛcam |
RV_7,066.11c anāpyaṃ varuṇo mitro aryamā kṣatraṃ rājāna āśata ||
RV_7,066.12a tad vo adya manāmahe sūktaiḥ sūra udite |
RV_7,066.12c yad ohate varuṇo mitro aryamā yūyam ṛtasya rathyaḥ ||
RV_7,066.13a ṛtāvāna ṛtajātā ṛtāvṛdho ghorāso anṛtadviṣaḥ |
RV_7,066.13c teṣāṃ vaḥ sumne succhardiṣṭame naraḥ syāma ye ca sūrayaḥ ||
RV_7,066.14a ud u tyad darśataṃ vapur diva eti pratihvare |
RV_7,066.14c yad īm āśur vahati deva etaśo viśvasmai cakṣase aram ||
RV_7,066.15a śīrṣṇaḥ-śīrṣṇo jagatas tasthuṣas patiṃ samayā viśvam ā rajaḥ |
RV_7,066.15c sapta svasāraḥ suvitāya sūryaṃ vahanti harito rathe ||
RV_7,066.16a tac cakṣur devahitaṃ śukram uccarat |
RV_7,066.16b paśyema śaradaḥ śataṃ jīvema śaradaḥ śatam ||
RV_7,066.17a kāvyebhir adābhyā yātaṃ varuṇa dyumat |
RV_7,066.17c mitraś ca somapītaye ||
RV_7,066.18a divo dhāmabhir varuṇa mitraś cā yātam adruhā |
RV_7,066.18c pibataṃ somam ātujī ||
RV_7,066.19a ā yātam mitrāvaruṇā juṣāṇāv āhutiṃ narā |
RV_7,066.19c pātaṃ somam ṛtāvṛdhā ||

RV_7,067.01a prati vāṃ rathaṃ nṛpatī jaradhyai haviṣmatā manasā yajñiyena |
RV_7,067.01c yo vāṃ dūto na dhiṣṇyāv ajīgar acchā sūnur na pitarā vivakmi ||
RV_7,067.02a aśocy agniḥ samidhāno asme upo adṛśran tamasaś cid antāḥ |
RV_7,067.02c aceti ketur uṣasaḥ purastāc chriye divo duhitur jāyamānaḥ ||
RV_7,067.03a abhi vāṃ nūnam aśvinā suhotā stomaiḥ siṣakti nāsatyā vivakvān |
RV_7,067.03c pūrvībhir yātam pathyābhir arvāk svarvidā vasumatā rathena ||
RV_7,067.04a avor vāṃ nūnam aśvinā yuvākur huve yad vāṃ sute mādhvī vasūyuḥ |
RV_7,067.04c ā vāṃ vahantu sthavirāso aśvāḥ pibātho asme suṣutā madhūni ||
RV_7,067.05a prācīm u devāśvinā dhiyam me 'mṛdhrāṃ sātaye kṛtaṃ vasūyum |
RV_7,067.05c viśvā aviṣṭaṃ vāja ā purandhīs tā naḥ śaktaṃ śacīpatī śacībhiḥ ||
RV_7,067.06a aviṣṭaṃ dhīṣv aśvinā na āsu prajāvad reto ahrayaṃ no astu |
RV_7,067.06c ā vāṃ toke tanaye tūtujānāḥ suratnāso devavītiṃ gamema ||
RV_7,067.07a eṣa sya vām pūrvagatveva sakhye nidhir hito mādhvī rāto asme |
RV_7,067.07c aheḷatā manasā yātam arvāg aśnantā havyam mānuṣīṣu vikṣu ||
RV_7,067.08a ekasmin yoge bhuraṇā samāne pari vāṃ sapta sravato ratho gāt |
RV_7,067.08c na vāyanti subhvo devayuktā ye vāṃ dhūrṣu taraṇayo vahanti ||
RV_7,067.09a asaścatā maghavadbhyo hi bhūtaṃ ye rāyā maghadeyaṃ junanti |
RV_7,067.09c pra ye bandhuṃ sūnṛtābhis tirante gavyā pṛñcanto aśvyā maghāni ||
RV_7,067.10a nū me havam ā śṛṇutaṃ yuvānā yāsiṣṭaṃ vartir aśvināv irāvat |
RV_7,067.10c dhattaṃ ratnāni jarataṃ ca sūrīn yūyam pāta svastibhiḥ sadā naḥ ||

RV_7,068.01a ā śubhrā yātam aśvinā svaśvā giro dasrā jujuṣāṇā yuvākoḥ |
RV_7,068.01c havyāni ca pratibhṛtā vītaṃ naḥ ||
RV_7,068.02a pra vām andhāṃsi madyāny asthur araṃ gantaṃ haviṣo vītaye me |
RV_7,068.02c tiro aryo havanāni śrutaṃ naḥ ||
RV_7,068.03a pra vāṃ ratho manojavā iyarti tiro rajāṃsy aśvinā śatotiḥ |
RV_7,068.03c asmabhyaṃ sūryāvasū iyānaḥ ||
RV_7,068.04a ayaṃ ha yad vāṃ devayā u adrir ūrdhvo vivakti somasud yuvabhyām |
RV_7,068.04c ā valgū vipro vavṛtīta havyaiḥ ||
RV_7,068.05a citraṃ ha yad vām bhojanaṃ nv asti ny atraye mahiṣvantaṃ yuyotam |
RV_7,068.05c yo vām omānaṃ dadhate priyaḥ san ||
RV_7,068.06a uta tyad vāṃ jurate aśvinā bhūc cyavānāya pratītyaṃ havirde |
RV_7,068.06c adhi yad varpa itaūti dhatthaḥ ||
RV_7,068.07a uta tyam bhujyum aśvinā sakhāyo madhye jahur durevāsaḥ samudre |
RV_7,068.07c nir īm parṣad arāvā yo yuvākuḥ ||
RV_7,068.08a vṛkāya cij jasamānāya śaktam uta śrutaṃ śayave hūyamānā |
RV_7,068.08c yāv aghnyām apinvatam apo na staryaṃ cic chakty aśvinā śacībhiḥ ||
RV_7,068.09a eṣa sya kārur jarate sūktair agre budhāna uṣasāṃ sumanmā |
RV_7,068.09c iṣā taṃ vardhad aghnyā payobhir yūyam pāta svastibhiḥ sadā naḥ ||

RV_7,069.01a ā vāṃ ratho rodasī badbadhāno hiraṇyayo vṛṣabhir yātv aśvaiḥ |
RV_7,069.01c ghṛtavartaniḥ pavibhī rucāna iṣāṃ voḷhā nṛpatir vājinīvān ||
RV_7,069.02a sa paprathāno abhi pañca bhūmā trivandhuro manasā yātu yuktaḥ |
RV_7,069.02c viśo yena gacchatho devayantīḥ kutrā cid yāmam aśvinā dadhānā ||
RV_7,069.03a svaśvā yaśasā yātam arvāg dasrā nidhim madhumantam pibāthaḥ |
RV_7,069.03c vi vāṃ ratho vadhvā yādamāno 'ntān divo bādhate vartanibhyām ||
RV_7,069.04a yuvoḥ śriyam pari yoṣāvṛṇīta sūro duhitā paritakmyāyām |
RV_7,069.04c yad devayantam avathaḥ śacībhiḥ pari ghraṃsam omanā vāṃ vayo gāt ||
RV_7,069.05a yo ha sya vāṃ rathirā vasta usrā ratho yujānaḥ pariyāti vartiḥ |
RV_7,069.05c tena naḥ śaṃ yor uṣaso vyuṣṭau ny aśvinā vahataṃ yajñe asmin ||
RV_7,069.06a narā gaureva vidyutaṃ tṛṣāṇāsmākam adya savanopa yātam |
RV_7,069.06c purutrā hi vām matibhir havante mā vām anye ni yaman devayantaḥ ||
RV_7,069.07a yuvam bhujyum avaviddhaṃ samudra ud ūhathur arṇaso asridhānaiḥ |
RV_7,069.07c patatribhir aśramair avyathibhir daṃsanābhir aśvinā pārayantā ||
RV_7,069.08a nū me havam ā śṛṇutaṃ yuvānā yāsiṣṭaṃ vartir aśvināv irāvat |
RV_7,069.08c dhattaṃ ratnāni jarataṃ ca sūrīn yūyam pāta svastibhiḥ sadā naḥ ||

RV_7,070.01a ā viśvavārāśvinā gataṃ naḥ pra tat sthānam avāci vām pṛthivyām |
RV_7,070.01c aśvo na vājī śunapṛṣṭho asthād ā yat sedathur dhruvase na yonim ||
RV_7,070.02a siṣakti sā vāṃ sumatiś caniṣṭhātāpi gharmo manuṣo duroṇe |
RV_7,070.02c yo vāṃ samudrān saritaḥ piparty etagvā cin na suyujā yujānaḥ ||
RV_7,070.03a yāni sthānāny aśvinā dadhāthe divo yahvīṣv oṣadhīṣu vikṣu |
RV_7,070.03c ni parvatasya mūrdhani sadanteṣaṃ janāya dāśuṣe vahantā ||
RV_7,070.04a caniṣṭaṃ devā oṣadhīṣv apsu yad yogyā aśnavaithe ṛṣīṇām |
RV_7,070.04c purūṇi ratnā dadhatau ny asme anu pūrvāṇi cakhyathur yugāni ||
RV_7,070.05a śuśruvāṃsā cid aśvinā purūṇy abhi brahmāṇi cakṣāthe ṛṣīṇām |
RV_7,070.05c prati pra yātaṃ varam ā janāyāsme vām astu sumatiś caniṣṭhā ||
RV_7,070.06a yo vāṃ yajño nāsatyā haviṣmān kṛtabrahmā samaryo bhavāti |
RV_7,070.06c upa pra yātaṃ varam ā vasiṣṭham imā brahmāṇy ṛcyante yuvabhyām ||
RV_7,070.07a iyam manīṣā iyam aśvinā gīr imāṃ suvṛktiṃ vṛṣaṇā juṣethām |
RV_7,070.07c imā brahmāṇi yuvayūny agman yūyam pāta svastibhiḥ sadā naḥ ||

RV_7,071.01a apa svasur uṣaso nag jihīte riṇakti kṛṣṇīr aruṣāya panthām |
RV_7,071.01c aśvāmaghā gomaghā vāṃ huvema divā naktaṃ śarum asmad yuyotam ||
RV_7,071.02a upāyātaṃ dāśuṣe martyāya rathena vāmam aśvinā vahantā |
RV_7,071.02c yuyutam asmad anirām amīvāṃ divā naktam mādhvī trāsīthāṃ naḥ ||
RV_7,071.03a ā vāṃ ratham avamasyāṃ vyuṣṭau sumnāyavo vṛṣaṇo vartayantu |
RV_7,071.03c syūmagabhastim ṛtayugbhir aśvair āśvinā vasumantaṃ vahethām ||
RV_7,071.04a yo vāṃ ratho nṛpatī asti voḷhā trivandhuro vasumāṃ usrayāmā |
RV_7,071.04c ā na enā nāsatyopa yātam abhi yad vāṃ viśvapsnyo jigāti ||
RV_7,071.05a yuvaṃ cyavānaṃ jaraso 'mumuktaṃ ni pedava ūhathur āśum aśvam |
RV_7,071.05c nir aṃhasas tamasa spartam atriṃ ni jāhuṣaṃ śithire dhātam antaḥ ||
RV_7,071.06a iyam manīṣā iyam aśvinā gīr imāṃ suvṛktiṃ vṛṣaṇā juṣethām |
RV_7,071.06c imā brahmāṇi yuvayūny agman yūyam pāta svastibhiḥ sadā naḥ ||

RV_7,072.01a ā gomatā nāsatyā rathenāśvāvatā puruścandreṇa yātam |
RV_7,072.01c abhi vāṃ viśvā niyutaḥ sacante spārhayā śriyā tanvā śubhānā ||
RV_7,072.02a ā no devebhir upa yātam arvāk sajoṣasā nāsatyā rathena |
RV_7,072.02c yuvor hi naḥ sakhyā pitryāṇi samāno bandhur uta tasya vittam ||
RV_7,072.03a ud u stomāso aśvinor abudhrañ jāmi brahmāṇy uṣasaś ca devīḥ |
RV_7,072.03c āvivāsan rodasī dhiṣṇyeme acchā vipro nāsatyā vivakti ||
RV_7,072.04a vi ced ucchanty aśvinā uṣāsaḥ pra vām brahmāṇi kāravo bharante |
RV_7,072.04c ūrdhvam bhānuṃ savitā devo aśred bṛhad agnayaḥ samidhā jarante ||
RV_7,072.05a ā paścātān nāsatyā purastād āśvinā yātam adharād udaktāt |
RV_7,072.05c ā viśvataḥ pāñcajanyena rāyā yūyam pāta svastibhiḥ sadā naḥ ||

RV_7,073.01a atāriṣma tamasas pāram asya prati stomaṃ devayanto dadhānāḥ |
RV_7,073.01c purudaṃsā purutamā purājāmartyā havate aśvinā gīḥ ||
RV_7,073.02a ny u priyo manuṣaḥ sādi hotā nāsatyā yo yajate vandate ca |
RV_7,073.02c aśnītam madhvo aśvinā upāka ā vāṃ voce vidatheṣu prayasvān ||
RV_7,073.03a ahema yajñam pathām urāṇā imāṃ suvṛktiṃ vṛṣaṇā juṣethām |
RV_7,073.03c śruṣṭīveva preṣito vām abodhi prati stomair jaramāṇo vasiṣṭhaḥ ||
RV_7,073.04a upa tyā vahnī gamato viśaṃ no rakṣohaṇā sambhṛtā vīḷupāṇī |
RV_7,073.04c sam andhāṃsy agmata matsarāṇi mā no mardhiṣṭam ā gataṃ śivena ||
RV_7,073.05a ā paścātān nāsatyā purastād āśvinā yātam adharād udaktāt |
RV_7,073.05c ā viśvataḥ pāñcajanyena rāyā yūyam pāta svastibhiḥ sadā naḥ ||

RV_7,074.01a imā u vāṃ diviṣṭaya usrā havante aśvinā |
RV_7,074.01c ayaṃ vām ahve 'vase śacīvasū viśaṃ-viśaṃ hi gacchathaḥ ||
RV_7,074.02a yuvaṃ citraṃ dadathur bhojanaṃ narā codethāṃ sūnṛtāvate |
RV_7,074.02c arvāg rathaṃ samanasā ni yacchatam pibataṃ somyam madhu ||
RV_7,074.03a ā yātam upa bhūṣatam madhvaḥ pibatam aśvinā |
RV_7,074.03c dugdham payo vṛṣaṇā jenyāvasū mā no mardhiṣṭam ā gatam ||
RV_7,074.04a aśvāso ye vām upa dāśuṣo gṛhaṃ yuvāṃ dīyanti bibhrataḥ |
RV_7,074.04c makṣūyubhir narā hayebhir aśvinā devā yātam asmayū ||
RV_7,074.05a adhā ha yanto aśvinā pṛkṣaḥ sacanta sūrayaḥ |
RV_7,074.05c tā yaṃsato maghavadbhyo dhruvaṃ yaśaś chardir asmabhyaṃ nāsatyā ||
RV_7,074.06a pra ye yayur avṛkāso rathā iva nṛpātāro janānām |
RV_7,074.06c uta svena śavasā śūśuvur nara uta kṣiyanti sukṣitim ||

RV_7,075.01a vy uṣā āvo divijā ṛtenāviṣkṛṇvānā mahimānam āgāt |
RV_7,075.01c apa druhas tama āvar ajuṣṭam aṅgirastamā pathyā ajīgaḥ ||
RV_7,075.02a mahe no adya suvitāya bodhy uṣo mahe saubhagāya pra yandhi |
RV_7,075.02c citraṃ rayiṃ yaśasaṃ dhehy asme devi marteṣu mānuṣi śravasyum ||
RV_7,075.03a ete tye bhānavo darśatāyāś citrā uṣaso amṛtāsa āguḥ |
RV_7,075.03c janayanto daivyāni vratāny āpṛṇanto antarikṣā vy asthuḥ ||
RV_7,075.04a eṣā syā yujānā parākāt pañca kṣitīḥ pari sadyo jigāti |
RV_7,075.04c abhipaśyantī vayunā janānāṃ divo duhitā bhuvanasya patnī ||
RV_7,075.05a vājinīvatī sūryasya yoṣā citrāmaghā rāya īśe vasūnām |
RV_7,075.05c ṛṣiṣṭutā jarayantī maghony uṣā ucchati vahnibhir gṛṇānā ||
RV_7,075.06a prati dyutānām aruṣāso aśvāś citrā adṛśrann uṣasaṃ vahantaḥ |
RV_7,075.06c yāti śubhrā viśvapiśā rathena dadhāti ratnaṃ vidhate janāya ||
RV_7,075.07a satyā satyebhir mahatī mahadbhir devī devebhir yajatā yajatraiḥ |
RV_7,075.07c rujad dṛḷhāni dadad usriyāṇām prati gāva uṣasaṃ vāvaśanta ||
RV_7,075.08a nū no gomad vīravad dhehi ratnam uṣo aśvāvat purubhojo asme |
RV_7,075.08c mā no barhiḥ puruṣatā nide kar yūyam pāta svastibhiḥ sadā naḥ ||

RV_7,076.01a ud u jyotir amṛtaṃ viśvajanyaṃ viśvānaraḥ savitā devo aśret |
RV_7,076.01c kratvā devānām ajaniṣṭa cakṣur āvir akar bhuvanaṃ viśvam uṣāḥ ||
RV_7,076.02a pra me panthā devayānā adṛśrann amardhanto vasubhir iṣkṛtāsaḥ |
RV_7,076.02c abhūd u ketur uṣasaḥ purastāt pratīcy āgād adhi harmyebhyaḥ ||
RV_7,076.03a tānīd ahāni bahulāny āsan yā prācīnam uditā sūryasya |
RV_7,076.03c yataḥ pari jāra ivācaranty uṣo dadṛkṣe na punar yatīva ||
RV_7,076.04a ta id devānāṃ sadhamāda āsann ṛtāvānaḥ kavayaḥ pūrvyāsaḥ |
RV_7,076.04c gūḷhaṃ jyotiḥ pitaro anv avindan satyamantrā ajanayann uṣāsam ||
RV_7,076.05a samāna ūrve adhi saṃgatāsaḥ saṃ jānate na yatante mithas te |
RV_7,076.05c te devānāṃ na minanti vratāny amardhanto vasubhir yādamānāḥ ||
RV_7,076.06a prati tvā stomair īḷate vasiṣṭhā uṣarbudhaḥ subhage tuṣṭuvāṃsaḥ |
RV_7,076.06c gavāṃ netrī vājapatnī na ucchoṣaḥ sujāte prathamā jarasva ||
RV_7,076.07a eṣā netrī rādhasaḥ sūnṛtānām uṣā ucchantī ribhyate vasiṣṭhaiḥ |
RV_7,076.07c dīrghaśrutaṃ rayim asme dadhānā yūyam pāta svastibhiḥ sadā naḥ ||

RV_7,077.01a upo ruruce yuvatir na yoṣā viśvaṃ jīvam prasuvantī carāyai |
RV_7,077.01c abhūd agniḥ samidhe mānuṣāṇām akar jyotir bādhamānā tamāṃsi ||
RV_7,077.02a viśvam pratīcī saprathā ud asthād ruśad vāso bibhratī śukram aśvait |
RV_7,077.02c hiraṇyavarṇā sudṛśīkasaṃdṛg gavām mātā netry ahnām aroci ||
RV_7,077.03a devānāṃ cakṣuḥ subhagā vahantī śvetaṃ nayantī sudṛśīkam aśvam |
RV_7,077.03c uṣā adarśi raśmibhir vyaktā citrāmaghā viśvam anu prabhūtā ||
RV_7,077.04a antivāmā dūre amitram ucchorvīṃ gavyūtim abhayaṃ kṛdhī naḥ |
RV_7,077.04c yāvaya dveṣa ā bharā vasūni codaya rādho gṛṇate maghoni ||
RV_7,077.05a asme śreṣṭhebhir bhānubhir vi bhāhy uṣo devi pratirantī na āyuḥ |
RV_7,077.05c iṣaṃ ca no dadhatī viśvavāre gomad aśvāvad rathavac ca rādhaḥ ||
RV_7,077.06a yāṃ tvā divo duhitar vardhayanty uṣaḥ sujāte matibhir vasiṣṭhāḥ |
RV_7,077.06c sāsmāsu dhā rayim ṛṣvam bṛhantaṃ yūyam pāta svastibhiḥ sadā naḥ ||

RV_7,078.01a prati ketavaḥ prathamā adṛśrann ūrdhvā asyā añjayo vi śrayante |
RV_7,078.01c uṣo arvācā bṛhatā rathena jyotiṣmatā vāmam asmabhyaṃ vakṣi ||
RV_7,078.02a prati ṣīm agnir jarate samiddhaḥ prati viprāso matibhir gṛṇantaḥ |
RV_7,078.02c uṣā yāti jyotiṣā bādhamānā viśvā tamāṃsi duritāpa devī ||
RV_7,078.03a etā u tyāḥ praty adṛśran purastāj jyotir yacchantīr uṣaso vibhātīḥ |
RV_7,078.03c ajījanan sūryaṃ yajñam agnim apācīnaṃ tamo agād ajuṣṭam ||
RV_7,078.04a aceti divo duhitā maghonī viśve paśyanty uṣasaṃ vibhātīm |
RV_7,078.04c āsthād rathaṃ svadhayā yujyamānam ā yam aśvāsaḥ suyujo vahanti ||
RV_7,078.05a prati tvādya sumanaso budhantāsmākāso maghavāno vayaṃ ca |
RV_7,078.05c tilvilāyadhvam uṣaso vibhātīr yūyam pāta svastibhiḥ sadā naḥ ||

RV_7,079.01a vy uṣā āvaḥ pathyā janānām pañca kṣitīr mānuṣīr bodhayantī |
RV_7,079.01c susaṃdṛgbhir ukṣabhir bhānum aśred vi sūryo rodasī cakṣasāvaḥ ||
RV_7,079.02a vy añjate divo anteṣv aktūn viśo na yuktā uṣaso yatante |
RV_7,079.02c saṃ te gāvas tama ā vartayanti jyotir yacchanti saviteva bāhū ||
RV_7,079.03a abhūd uṣā indratamā maghony ajījanat suvitāya śravāṃsi |
RV_7,079.03c vi divo devī duhitā dadhāty aṅgirastamā sukṛte vasūni ||
RV_7,079.04a tāvad uṣo rādho asmabhyaṃ rāsva yāvat stotṛbhyo arado gṛṇānā |
RV_7,079.04c yāṃ tvā jajñur vṛṣabhasyā raveṇa vi dṛḷhasya duro adrer aurṇoḥ ||
RV_7,079.05a devaṃ-devaṃ rādhase codayanty asmadryak sūnṛtā īrayantī |
RV_7,079.05c vyucchantī naḥ sanaye dhiyo dhā yūyam pāta svastibhiḥ sadā naḥ ||

RV_7,080.01a prati stomebhir uṣasaṃ vasiṣṭhā gīrbhir viprāsaḥ prathamā abudhran |
RV_7,080.01c vivartayantīṃ rajasī samante āviṣkṛṇvatīm bhuvanāni viśvā ||
RV_7,080.02a eṣā syā navyam āyur dadhānā gūḍhvī tamo jyotiṣoṣā abodhi |
RV_7,080.02c agra eti yuvatir ahrayāṇā prācikitat sūryaṃ yajñam agnim ||
RV_7,080.03a aśvāvatīr gomatīr na uṣāso vīravatīḥ sadam ucchantu bhadrāḥ |
RV_7,080.03c ghṛtaṃ duhānā viśvataḥ prapītā yūyam pāta svastibhiḥ sadā naḥ ||

RV_7,081.01a praty u adarśy āyaty ucchantī duhitā divaḥ |
RV_7,081.01c apo mahi vyayati cakṣase tamo jyotiṣ kṛṇoti sūnarī ||
RV_7,081.02a ud usriyāḥ sṛjate sūryaḥ sacāṃ udyan nakṣatram arcivat |
RV_7,081.02c taved uṣo vyuṣi sūryasya ca sam bhaktena gamemahi ||
RV_7,081.03a prati tvā duhitar diva uṣo jīrā abhutsmahi |
RV_7,081.03c yā vahasi puru spārhaṃ vananvati ratnaṃ na dāśuṣe mayaḥ ||
RV_7,081.04a ucchantī yā kṛṇoṣi maṃhanā mahi prakhyai devi svar dṛśe |
RV_7,081.04c tasyās te ratnabhāja īmahe vayaṃ syāma mātur na sūnavaḥ ||
RV_7,081.05a tac citraṃ rādha ā bharoṣo yad dīrghaśruttamam |
RV_7,081.05c yat te divo duhitar martabhojanaṃ tad rāsva bhunajāmahai ||
RV_7,081.06a śravaḥ sūribhyo amṛtaṃ vasutvanaṃ vājāṃ asmabhyaṃ gomataḥ |
RV_7,081.06c codayitrī maghonaḥ sūnṛtāvaty uṣā ucchad apa sridhaḥ ||

RV_7,082.01a indrāvaruṇā yuvam adhvarāya no viśe janāya mahi śarma yacchatam |
RV_7,082.01c dīrghaprayajyum ati yo vanuṣyati vayaṃ jayema pṛtanāsu dūḍhyaḥ ||
RV_7,082.02a samrāḷ anyaḥ svarāḷ anya ucyate vām mahāntāv indrāvaruṇā mahāvasū |
RV_7,082.02c viśve devāsaḥ parame vyomani saṃ vām ojo vṛṣaṇā sam balaṃ dadhuḥ ||
RV_7,082.03a anv apāṃ khāny atṛntam ojasā sūryam airayataṃ divi prabhum |
RV_7,082.03c indrāvaruṇā made asya māyino 'pinvatam apitaḥ pinvataṃ dhiyaḥ ||
RV_7,082.04a yuvām id yutsu pṛtanāsu vahnayo yuvāṃ kṣemasya prasave mitajñavaḥ |
RV_7,082.04c īśānā vasva ubhayasya kārava indrāvaruṇā suhavā havāmahe ||
RV_7,082.05a indrāvaruṇā yad imāni cakrathur viśvā jātāni bhuvanasya majmanā |
RV_7,082.05c kṣemeṇa mitro varuṇaṃ duvasyati marudbhir ugraḥ śubham anya īyate ||
RV_7,082.06a mahe śulkāya varuṇasya nu tviṣa ojo mimāte dhruvam asya yat svam |
RV_7,082.06c ajāmim anyaḥ śnathayantam ātirad dabhrebhir anyaḥ pra vṛṇoti bhūyasaḥ ||
RV_7,082.07a na tam aṃho na duritāni martyam indrāvaruṇā na tapaḥ kutaś cana |
RV_7,082.07c yasya devā gacchatho vītho adhvaraṃ na tam martasya naśate parihvṛtiḥ ||
RV_7,082.08a arvāṅ narā daivyenāvasā gataṃ śṛṇutaṃ havaṃ yadi me jujoṣathaḥ |
RV_7,082.08c yuvor hi sakhyam uta vā yad āpyam mārḍīkam indrāvaruṇā ni yacchatam ||
RV_7,082.09a asmākam indrāvaruṇā bhare-bhare puroyodhā bhavataṃ kṛṣṭyojasā |
RV_7,082.09c yad vāṃ havanta ubhaye adha spṛdhi naras tokasya tanayasya sātiṣu ||
RV_7,082.10a asme indro varuṇo mitro aryamā dyumnaṃ yacchantu mahi śarma saprathaḥ |
RV_7,082.10c avadhraṃ jyotir aditer ṛtāvṛdho devasya ślokaṃ savitur manāmahe ||

RV_7,083.01a yuvāṃ narā paśyamānāsa āpyam prācā gavyantaḥ pṛthuparśavo yayuḥ |
RV_7,083.01c dāsā ca vṛtrā hatam āryāṇi ca sudāsam indrāvaruṇāvasāvatam ||
RV_7,083.02a yatrā naraḥ samayante kṛtadhvajo yasminn ājā bhavati kiṃ cana priyam |
RV_7,083.02c yatrā bhayante bhuvanā svardṛśas tatrā na indrāvaruṇādhi vocatam ||
RV_7,083.03a sam bhūmyā antā dhvasirā adṛkṣatendrāvaruṇā divi ghoṣa āruhat |
RV_7,083.03c asthur janānām upa mām arātayo 'rvāg avasā havanaśrutā gatam ||
RV_7,083.04a indrāvaruṇā vadhanābhir aprati bhedaṃ vanvantā pra sudāsam āvatam |
RV_7,083.04c brahmāṇy eṣāṃ śṛṇutaṃ havīmani satyā tṛtsūnām abhavat purohitiḥ ||
RV_7,083.05a indrāvaruṇāv abhy ā tapanti māghāny aryo vanuṣām arātayaḥ |
RV_7,083.05c yuvaṃ hi vasva ubhayasya rājatho 'dha smā no 'vatam pārye divi ||
RV_7,083.06a yuvāṃ havanta ubhayāsa ājiṣv indraṃ ca vasvo varuṇaṃ ca sātaye |
RV_7,083.06c yatra rājabhir daśabhir nibādhitam pra sudāsam āvataṃ tṛtsubhiḥ saha ||
RV_7,083.07a daśa rājānaḥ samitā ayajyavaḥ sudāsam indrāvaruṇā na yuyudhuḥ |
RV_7,083.07c satyā nṛṇām admasadām upastutir devā eṣām abhavan devahūtiṣu ||
RV_7,083.08a dāśarājñe pariyattāya viśvataḥ sudāsa indrāvaruṇāv aśikṣatam |
RV_7,083.08c śvityañco yatra namasā kapardino dhiyā dhīvanto asapanta tṛtsavaḥ ||
RV_7,083.09a vṛtrāṇy anyaḥ samitheṣu jighnate vratāny anyo abhi rakṣate sadā |
RV_7,083.09c havāmahe vāṃ vṛṣaṇā suvṛktibhir asme indrāvaruṇā śarma yacchatam ||
RV_7,083.10a asme indro varuṇo mitro aryamā dyumnaṃ yacchantu mahi śarma saprathaḥ |
RV_7,083.10c avadhraṃ jyotir aditer ṛtāvṛdho devasya ślokaṃ savitur manāmahe ||

RV_7,084.01a ā vāṃ rājānāv adhvare vavṛtyāṃ havyebhir indrāvaruṇā namobhiḥ |
RV_7,084.01c pra vāṃ ghṛtācī bāhvor dadhānā pari tmanā viṣurūpā jigāti ||
RV_7,084.02a yuvo rāṣṭram bṛhad invati dyaur yau setṛbhir arajjubhiḥ sinīthaḥ |
RV_7,084.02c pari no heḷo varuṇasya vṛjyā uruṃ na indraḥ kṛṇavad u lokam ||
RV_7,084.03a kṛtaṃ no yajñaṃ vidatheṣu cāruṃ kṛtam brahmāṇi sūriṣu praśastā |
RV_7,084.03c upo rayir devajūto na etu pra ṇa spārhābhir ūtibhis tiretam ||
RV_7,084.04a asme indrāvaruṇā viśvavāraṃ rayiṃ dhattaṃ vasumantam purukṣum |
RV_7,084.04c pra ya ādityo anṛtā mināty amitā śūro dayate vasūni ||
RV_7,084.05a iyam indraṃ varuṇam aṣṭa me gīḥ prāvat toke tanaye tūtujānā |
RV_7,084.05c suratnāso devavītiṃ gamema yūyam pāta svastibhiḥ sadā naḥ ||

RV_7,085.01a punīṣe vām arakṣasam manīṣāṃ somam indrāya varuṇāya juhvat |
RV_7,085.01c ghṛtapratīkām uṣasaṃ na devīṃ tā no yāmann uruṣyatām abhīke ||
RV_7,085.02a spardhante vā u devahūye atra yeṣu dhvajeṣu didyavaḥ patanti |
RV_7,085.02c yuvaṃ tāṃ indrāvaruṇāv amitrān hatam parācaḥ śarvā viṣūcaḥ ||
RV_7,085.03a āpaś cid dhi svayaśasaḥ sadassu devīr indraṃ varuṇaṃ devatā dhuḥ |
RV_7,085.03c kṛṣṭīr anyo dhārayati praviktā vṛtrāṇy anyo apratīni hanti ||
RV_7,085.04a sa sukratur ṛtacid astu hotā ya āditya śavasā vāṃ namasvān |
RV_7,085.04c āvavartad avase vāṃ haviṣmān asad it sa suvitāya prayasvān ||
RV_7,085.05a iyam indraṃ varuṇam aṣṭa me gīḥ prāvat toke tanaye tūtujānā |
RV_7,085.05c suratnāso devavītiṃ gamema yūyam pāta svastibhiḥ sadā naḥ ||

RV_7,086.01a dhīrā tv asya mahinā janūṃṣi vi yas tastambha rodasī cid urvī |
RV_7,086.01c pra nākam ṛṣvaṃ nunude bṛhantaṃ dvitā nakṣatram paprathac ca bhūma ||
RV_7,086.02a uta svayā tanvā saṃ vade tat kadā nv antar varuṇe bhuvāni |
RV_7,086.02c kim me havyam ahṛṇāno juṣeta kadā mṛḷīkaṃ sumanā abhi khyam ||
RV_7,086.03a pṛcche tad eno varuṇa didṛkṣūpo emi cikituṣo vipṛccham |
RV_7,086.03c samānam in me kavayaś cid āhur ayaṃ ha tubhyaṃ varuṇo hṛṇīte ||
RV_7,086.04a kim āga āsa varuṇa jyeṣṭhaṃ yat stotāraṃ jighāṃsasi sakhāyam |
RV_7,086.04c pra tan me voco dūḷabha svadhāvo 'va tvānenā namasā tura iyām ||
RV_7,086.05a ava drugdhāni pitryā sṛjā no 'va yā vayaṃ cakṛmā tanūbhiḥ |
RV_7,086.05c ava rājan paśutṛpaṃ na tāyuṃ sṛjā vatsaṃ na dāmno vasiṣṭham ||
RV_7,086.06a na sa svo dakṣo varuṇa dhrutiḥ sā surā manyur vibhīdako acittiḥ |
RV_7,086.06c asti jyāyān kanīyasa upāre svapnaś caned anṛtasya prayotā ||
RV_7,086.07a araṃ dāso na mīḷhuṣe karāṇy ahaṃ devāya bhūrṇaye 'nāgāḥ |
RV_7,086.07c acetayad acito devo aryo gṛtsaṃ rāye kavitaro junāti ||
RV_7,086.08a ayaṃ su tubhyaṃ varuṇa svadhāvo hṛdi stoma upaśritaś cid astu |
RV_7,086.08c śaṃ naḥ kṣeme śam u yoge no astu yūyam pāta svastibhiḥ sadā naḥ ||

RV_7,087.01a radat patho varuṇaḥ sūryāya prārṇāṃsi samudriyā nadīnām |
RV_7,087.01c sargo na sṛṣṭo arvatīr ṛtāyañ cakāra mahīr avanīr ahabhyaḥ ||
RV_7,087.02a ātmā te vāto raja ā navīnot paśur na bhūrṇir yavase sasavān |
RV_7,087.02c antar mahī bṛhatī rodasīme viśvā te dhāma varuṇa priyāṇi ||
RV_7,087.03a pari spaśo varuṇasya smadiṣṭā ubhe paśyanti rodasī sumeke |
RV_7,087.03c ṛtāvānaḥ kavayo yajñadhīrāḥ pracetaso ya iṣayanta manma ||
RV_7,087.04a uvāca me varuṇo medhirāya triḥ sapta nāmāghnyā bibharti |
RV_7,087.04c vidvān padasya guhyā na vocad yugāya vipra uparāya śikṣan ||
RV_7,087.05a tisro dyāvo nihitā antar asmin tisro bhūmīr uparāḥ ṣaḍvidhānāḥ |
RV_7,087.05c gṛtso rājā varuṇaś cakra etaṃ divi preṅkhaṃ hiraṇyayaṃ śubhe kam ||
RV_7,087.06a ava sindhuṃ varuṇo dyaur iva sthād drapso na śveto mṛgas tuviṣmān |
RV_7,087.06c gambhīraśaṃso rajaso vimānaḥ supārakṣatraḥ sato asya rājā ||
RV_7,087.07a yo mṛḷayāti cakruṣe cid āgo vayaṃ syāma varuṇe anāgāḥ |
RV_7,087.07c anu vratāny aditer ṛdhanto yūyam pāta svastibhiḥ sadā naḥ ||

RV_7,088.01a pra śundhyuvaṃ varuṇāya preṣṭhām matiṃ vasiṣṭha mīḷhuṣe bharasva |
RV_7,088.01c ya īm arvāñcaṃ karate yajatraṃ sahasrāmaghaṃ vṛṣaṇam bṛhantam ||
RV_7,088.02a adhā nv asya saṃdṛśaṃ jaganvān agner anīkaṃ varuṇasya maṃsi |
RV_7,088.02c svar yad aśmann adhipā u andho 'bhi mā vapur dṛśaye ninīyāt ||
RV_7,088.03a ā yad ruhāva varuṇaś ca nāvam pra yat samudram īrayāva madhyam |
RV_7,088.03c adhi yad apāṃ snubhiś carāva pra preṅkha īṅkhayāvahai śubhe kam ||
RV_7,088.04a vasiṣṭhaṃ ha varuṇo nāvy ādhād ṛṣiṃ cakāra svapā mahobhiḥ |
RV_7,088.04c stotāraṃ vipraḥ sudinatve ahnāṃ yān nu dyāvas tatanan yād uṣāsaḥ ||
RV_7,088.05a kva tyāni nau sakhyā babhūvuḥ sacāvahe yad avṛkam purā cit |
RV_7,088.05c bṛhantam mānaṃ varuṇa svadhāvaḥ sahasradvāraṃ jagamā gṛhaṃ te ||
RV_7,088.06a ya āpir nityo varuṇa priyaḥ san tvām āgāṃsi kṛṇavat sakhā te |
RV_7,088.06c mā ta enasvanto yakṣin bhujema yandhi ṣmā vipra stuvate varūtham ||
RV_7,088.07a dhruvāsu tvāsu kṣitiṣu kṣiyanto vy asmat pāśaṃ varuṇo mumocat |
RV_7,088.07c avo vanvānā aditer upasthād yūyam pāta svastibhiḥ sadā naḥ ||

RV_7,089.01a mo ṣu varuṇa mṛnmayaṃ gṛhaṃ rājann ahaṃ gamam |
RV_7,089.01c mṛḷā sukṣatra mṛḷaya ||
RV_7,089.02a yad emi prasphurann iva dṛtir na dhmāto adrivaḥ |
RV_7,089.02c mṛḷā sukṣatra mṛḷaya ||
RV_7,089.03a kratvaḥ samaha dīnatā pratīpaṃ jagamā śuce |
RV_7,089.03c mṛḷā sukṣatra mṛḷaya ||
RV_7,089.04a apām madhye tasthivāṃsaṃ tṛṣṇāvidaj jaritāram |
RV_7,089.04c mṛḷā sukṣatra mṛḷaya ||
RV_7,089.05a yat kiṃ cedaṃ varuṇa daivye jane 'bhidroham manuṣyāś carāmasi |
RV_7,089.05c acittī yat tava dharmā yuyopima mā nas tasmād enaso deva rīriṣaḥ ||

RV_7,090.01a pra vīrayā śucayo dadrire vām adhvaryubhir madhumantaḥ sutāsaḥ |
RV_7,090.01c vaha vāyo niyuto yāhy acchā pibā sutasyāndhaso madāya ||
RV_7,090.02a īśānāya prahutiṃ yas ta ānaṭ chuciṃ somaṃ śucipās tubhyaṃ vāyo |
RV_7,090.02c kṛṇoṣi tam martyeṣu praśastaṃ jāto-jāto jāyate vājy asya ||
RV_7,090.03a rāye nu yaṃ jajñatū rodasīme rāye devī dhiṣaṇā dhāti devam |
RV_7,090.03c adha vāyuṃ niyutaḥ saścata svā uta śvetaṃ vasudhitiṃ nireke ||
RV_7,090.04a ucchann uṣasaḥ sudinā ariprā uru jyotir vividur dīdhyānāḥ |
RV_7,090.04c gavyaṃ cid ūrvam uśijo vi vavrus teṣām anu pradivaḥ sasrur āpaḥ ||
RV_7,090.05a te satyena manasā dīdhyānāḥ svena yuktāsaḥ kratunā vahanti |
RV_7,090.05c indravāyū vīravāhaṃ rathaṃ vām īśānayor abhi pṛkṣaḥ sacante ||
RV_7,090.06a īśānāso ye dadhate svar ṇo gobhir aśvebhir vasubhir hiraṇyaiḥ |
RV_7,090.06c indravāyū sūrayo viśvam āyur arvadbhir vīraiḥ pṛtanāsu sahyuḥ ||
RV_7,090.07a arvanto na śravaso bhikṣamāṇā indravāyū suṣṭutibhir vasiṣṭhāḥ |
RV_7,090.07c vājayantaḥ sv avase huvema yūyam pāta svastibhiḥ sadā naḥ ||

RV_7,091.01a kuvid aṅga namasā ye vṛdhāsaḥ purā devā anavadyāsa āsan |
RV_7,091.01c te vāyave manave bādhitāyāvāsayann uṣasaṃ sūryeṇa ||
RV_7,091.02a uśantā dūtā na dabhāya gopā māsaś ca pāthaḥ śaradaś ca pūrvīḥ |
RV_7,091.02c indravāyū suṣṭutir vām iyānā mārḍīkam īṭṭe suvitaṃ ca navyam ||
RV_7,091.03a pīvoannāṃ rayivṛdhaḥ sumedhāḥ śvetaḥ siṣakti niyutām abhiśrīḥ |
RV_7,091.03c te vāyave samanaso vi tasthur viśven naraḥ svapatyāni cakruḥ ||
RV_7,091.04a yāvat taras tanvo yāvad ojo yāvan naraś cakṣasā dīdhyānāḥ |
RV_7,091.04c śuciṃ somaṃ śucipā pātam asme indravāyū sadatam barhir edam ||
RV_7,091.05a niyuvānā niyuta spārhavīrā indravāyū sarathaṃ yātam arvāk |
RV_7,091.05c idaṃ hi vām prabhṛtam madhvo agram adha prīṇānā vi mumuktam asme ||
RV_7,091.06a yā vāṃ śataṃ niyuto yāḥ sahasram indravāyū viśvavārāḥ sacante |
RV_7,091.06c ābhir yātaṃ suvidatrābhir arvāk pātaṃ narā pratibhṛtasya madhvaḥ ||
RV_7,091.07a arvanto na śravaso bhikṣamāṇā indravāyū suṣṭutibhir vasiṣṭhāḥ |
RV_7,091.07c vājayantaḥ sv avase huvema yūyam pāta svastibhiḥ sadā naḥ ||

RV_7,092.01a ā vāyo bhūṣa śucipā upa naḥ sahasraṃ te niyuto viśvavāra |
RV_7,092.01c upo te andho madyam ayāmi yasya deva dadhiṣe pūrvapeyam ||
RV_7,092.02a pra sotā jīro adhvareṣv asthāt somam indrāya vāyave pibadhyai |
RV_7,092.02c pra yad vām madhvo agriyam bharanty adhvaryavo devayantaḥ śacībhiḥ ||
RV_7,092.03a pra yābhir yāsi dāśvāṃsam acchā niyudbhir vāyav iṣṭaye duroṇe |
RV_7,092.03c ni no rayiṃ subhojasaṃ yuvasva ni vīraṃ gavyam aśvyaṃ ca rādhaḥ ||
RV_7,092.04a ye vāyava indramādanāsa ādevāso nitośanāso aryaḥ |
RV_7,092.04c ghnanto vṛtrāṇi sūribhiḥ ṣyāma sāsahvāṃso yudhā nṛbhir amitrān ||
RV_7,092.05a ā no niyudbhiḥ śatinībhir adhvaraṃ sahasriṇībhir upa yāhi yajñam |
RV_7,092.05c vāyo asmin savane mādayasva yūyam pāta svastibhiḥ sadā naḥ ||

RV_7,093.01a śuciṃ nu stomaṃ navajātam adyendrāgnī vṛtrahaṇā juṣethām |
RV_7,093.01c ubhā hi vāṃ suhavā johavīmi tā vājaṃ sadya uśate dheṣṭhā ||
RV_7,093.02a tā sānasī śavasānā hi bhūtaṃ sākaṃvṛdhā śavasā śūśuvāṃsā |
RV_7,093.02c kṣayantau rāyo yavasasya bhūreḥ pṛṅktaṃ vājasya sthavirasya ghṛṣveḥ ||
RV_7,093.03a upo ha yad vidathaṃ vājino gur dhībhir viprāḥ pramatim icchamānāḥ |
RV_7,093.03c arvanto na kāṣṭhāṃ nakṣamāṇā indrāgnī johuvato naras te ||
RV_7,093.04a gīrbhir vipraḥ pramatim icchamāna īṭṭe rayiṃ yaśasam pūrvabhājam |
RV_7,093.04c indrāgnī vṛtrahaṇā suvajrā pra no navyebhis tirataṃ deṣṇaiḥ ||
RV_7,093.05a saṃ yan mahī mithatī spardhamāne tanūrucā śūrasātā yataite |
RV_7,093.05c adevayuṃ vidathe devayubhiḥ satrā hataṃ somasutā janena ||
RV_7,093.06a imām u ṣu somasutim upa na endrāgnī saumanasāya yātam |
RV_7,093.06c nū cid dhi parimamnāthe asmān ā vāṃ śaśvadbhir vavṛtīya vājaiḥ ||
RV_7,093.07a so agna enā namasā samiddho 'cchā mitraṃ varuṇam indraṃ voceḥ |
RV_7,093.07c yat sīm āgaś cakṛmā tat su mṛḷa tad aryamāditiḥ śiśrathantu ||
RV_7,093.08a etā agna āśuṣāṇāsa iṣṭīr yuvoḥ sacābhy aśyāma vājān |
RV_7,093.08c mendro no viṣṇur marutaḥ pari khyan yūyam pāta svastibhiḥ sadā naḥ ||

RV_7,094.01a iyaṃ vām asya manmana indrāgnī pūrvyastutiḥ |
RV_7,094.01c abhrād vṛṣṭir ivājani ||
RV_7,094.02a śṛṇutaṃ jaritur havam indrāgnī vanataṃ giraḥ |
RV_7,094.02c īśānā pipyataṃ dhiyaḥ ||
RV_7,094.03a mā pāpatvāya no narendrāgnī mābhiśastaye |
RV_7,094.03c mā no rīradhataṃ nide ||
RV_7,094.04a indre agnā namo bṛhat suvṛktim erayāmahe |
RV_7,094.04c dhiyā dhenā avasyavaḥ ||
RV_7,094.05a tā hi śaśvanta īḷata itthā viprāsa ūtaye |
RV_7,094.05c sabādho vājasātaye ||
RV_7,094.06a tā vāṃ gīrbhir vipanyavaḥ prayasvanto havāmahe |
RV_7,094.06c medhasātā saniṣyavaḥ ||
RV_7,094.07a indrāgnī avasā gatam asmabhyaṃ carṣaṇīsahā |
RV_7,094.07c mā no duḥśaṃsa īśata ||
RV_7,094.08a mā kasya no araruṣo dhūrtiḥ praṇaṅ martyasya |
RV_7,094.08c indrāgnī śarma yacchatam ||
RV_7,094.09a gomad dhiraṇyavad vasu yad vām aśvāvad īmahe |
RV_7,094.09c indrāgnī tad vanemahi ||
RV_7,094.10a yat soma ā sute nara indrāgnī ajohavuḥ |
RV_7,094.10c saptīvantā saparyavaḥ ||
RV_7,094.11a ukthebhir vṛtrahantamā yā mandānā cid ā girā |
RV_7,094.11c āṅgūṣair āvivāsataḥ ||
RV_7,094.12a tāv id duḥśaṃsam martyaṃ durvidvāṃsaṃ rakṣasvinam |
RV_7,094.12c ābhogaṃ hanmanā hatam udadhiṃ hanmanā hatam ||

RV_7,095.01a pra kṣodasā dhāyasā sasra eṣā sarasvatī dharuṇam āyasī pūḥ |
RV_7,095.01c prabābadhānā rathyeva yāti viśvā apo mahinā sindhur anyāḥ ||
RV_7,095.02a ekācetat sarasvatī nadīnāṃ śucir yatī giribhya ā samudrāt |
RV_7,095.02c rāyaś cetantī bhuvanasya bhūrer ghṛtam payo duduhe nāhuṣāya ||
RV_7,095.03a sa vāvṛdhe naryo yoṣaṇāsu vṛṣā śiśur vṛṣabho yajñiyāsu |
RV_7,095.03c sa vājinam maghavadbhyo dadhāti vi sātaye tanvam māmṛjīta ||
RV_7,095.04a uta syā naḥ sarasvatī juṣāṇopa śravat subhagā yajṇe asmin |
RV_7,095.04c mitajñubhir namasyair iyānā rāyā yujā cid uttarā sakhibhyaḥ ||
RV_7,095.05a imā juhvānā yuṣmad ā namobhiḥ prati stomaṃ sarasvati juṣasva |
RV_7,095.05c tava śarman priyatame dadhānā upa stheyāma śaraṇaṃ na vṛkṣam ||
RV_7,095.06a ayam u te sarasvati vasiṣṭho dvārāv ṛtasya subhage vy āvaḥ |
RV_7,095.06c vardha śubhre stuvate rāsi vājān yūyam pāta svastibhiḥ sadā naḥ ||

RV_7,096.01a bṛhad u gāyiṣe vaco 'suryā nadīnām |
RV_7,096.01c sarasvatīm in mahayā suvṛktibhi stomair vasiṣṭha rodasī ||
RV_7,096.02a ubhe yat te mahinā śubhre andhasī adhikṣiyanti pūravaḥ |
RV_7,096.02c sā no bodhy avitrī marutsakhā coda rādho maghonām ||
RV_7,096.03a bhadram id bhadrā kṛṇavat sarasvaty akavārī cetati vājinīvatī |
RV_7,096.03c gṛṇānā jamadagnivat stuvānā ca vasiṣṭhavat ||
RV_7,096.04a janīyanto nv agravaḥ putrīyantaḥ sudānavaḥ |
RV_7,096.04c sarasvantaṃ havāmahe ||
RV_7,096.05a ye te sarasva ūrmayo madhumanto ghṛtaścutaḥ |
RV_7,096.05c tebhir no 'vitā bhava ||
RV_7,096.06a pīpivāṃsaṃ sarasvata stanaṃ yo viśvadarśataḥ |
RV_7,096.06c bhakṣīmahi prajām iṣam ||

RV_7,097.01a yajñe divo nṛṣadane pṛthivyā naro yatra devayavo madanti |
RV_7,097.01c indrāya yatra savanāni sunve gaman madāya prathamaṃ vayaś ca ||
RV_7,097.02a ā daivyā vṛṇīmahe 'vāṃsi bṛhaspatir no maha ā sakhāyaḥ |
RV_7,097.02c yathā bhavema mīḷhuṣe anāgā yo no dātā parāvataḥ piteva ||
RV_7,097.03a tam u jyeṣṭhaṃ namasā havirbhiḥ suśevam brahmaṇas patiṃ gṛṇīṣe |
RV_7,097.03c indraṃ śloko mahi daivyaḥ siṣaktu yo brahmaṇo devakṛtasya rājā ||
RV_7,097.04a sa ā no yoniṃ sadatu preṣṭho bṛhaspatir viśvavāro yo asti |
RV_7,097.04c kāmo rāyaḥ suvīryasya taṃ dāt parṣan no ati saścato ariṣṭān ||
RV_7,097.05a tam ā no arkam amṛtāya juṣṭam ime dhāsur amṛtāsaḥ purājāḥ |
RV_7,097.05c śucikrandaṃ yajatam pastyānām bṛhaspatim anarvāṇaṃ huvema ||
RV_7,097.06a taṃ śagmāso aruṣāso aśvā bṛhaspatiṃ sahavāho vahanti |
RV_7,097.06c sahaś cid yasya nīlavat sadhasthaṃ nabho na rūpam aruṣaṃ vasānāḥ ||
RV_7,097.07a sa hi śuciḥ śatapatraḥ sa śundhyur hiraṇyavāśīr iṣiraḥ svarṣāḥ |
RV_7,097.07c bṛhaspatiḥ sa svāveśa ṛṣvaḥ purū sakhibhya āsutiṃ kariṣṭhaḥ ||
RV_7,097.08a devī devasya rodasī janitrī bṛhaspatiṃ vāvṛdhatur mahitvā |
RV_7,097.08c dakṣāyyāya dakṣatā sakhāyaḥ karad brahmaṇe sutarā sugādhā ||
RV_7,097.09a iyaṃ vām brahmaṇas pate suvṛktir brahmendrāya vajriṇe akāri |
RV_7,097.09c aviṣṭaṃ dhiyo jigṛtam purandhīr jajastam aryo vanuṣām arātīḥ ||
RV_7,097.10a bṛhaspate yuvam indraś ca vasvo divyasyeśāthe uta pārthivasya |
RV_7,097.10c dhattaṃ rayiṃ stuvate kīraye cid yūyam pāta svastibhiḥ sadā naḥ ||

RV_7,098.01a adhvaryavo 'ruṇaṃ dugdham aṃśuṃ juhotana vṛṣabhāya kṣitīnām |
RV_7,098.01c gaurād vedīyāṃ avapānam indro viśvāhed yāti sutasomam icchan ||
RV_7,098.02a yad dadhiṣe pradivi cārv annaṃ dive-dive pītim id asya vakṣi |
RV_7,098.02c uta hṛdota manasā juṣāṇa uśann indra prasthitān pāhi somān ||
RV_7,098.03a jajñānaḥ somaṃ sahase papātha pra te mātā mahimānam uvāca |
RV_7,098.03c endra paprāthorv antarikṣaṃ yudhā devebhyo varivaś cakartha ||
RV_7,098.04a yad yodhayā mahato manyamānān sākṣāma tān bāhubhiḥ śāśadānān |
RV_7,098.04c yad vā nṛbhir vṛta indrābhiyudhyās taṃ tvayājiṃ sauśravasaṃ jayema ||
RV_7,098.05a prendrasya vocam prathamā kṛtāni pra nūtanā maghavā yā cakāra |
RV_7,098.05c yaded adevīr asahiṣṭa māyā athābhavat kevalaḥ somo asya ||
RV_7,098.06a tavedaṃ viśvam abhitaḥ paśavyaṃ yat paśyasi cakṣasā sūryasya |
RV_7,098.06c gavām asi gopatir eka indra bhakṣīmahi te prayatasya vasvaḥ ||
RV_7,098.07a bṛhaspate yuvam indraś ca vasvo divyasyeśāthe uta pārthivasya |
RV_7,098.07c dhattaṃ rayiṃ stuvate kīraye cid yūyam pāta svastibhiḥ sadā naḥ ||

RV_7,099.01a paro mātrayā tanvā vṛdhāna na te mahitvam anv aśnuvanti |
RV_7,099.01c ubhe te vidma rajasī pṛthivyā viṣṇo deva tvam paramasya vitse ||
RV_7,099.02a na te viṣṇo jāyamāno na jāto deva mahimnaḥ param antam āpa |
RV_7,099.02c ud astabhnā nākam ṛṣvam bṛhantaṃ dādhartha prācīṃ kakubham pṛthivyāḥ ||
RV_7,099.03a irāvatī dhenumatī hi bhūtaṃ sūyavasinī manuṣe daśasyā |
RV_7,099.03c vy astabhnā rodasī viṣṇav ete dādhartha pṛthivīm abhito mayūkhaiḥ ||
RV_7,099.04a uruṃ yajñāya cakrathur u lokaṃ janayantā sūryam uṣāsam agnim |
RV_7,099.04c dāsasya cid vṛṣaśiprasya māyā jaghnathur narā pṛtanājyeṣu ||
RV_7,099.05a indrāviṣṇū dṛṃhitāḥ śambarasya nava puro navatiṃ ca śnathiṣṭam |
RV_7,099.05c śataṃ varcinaḥ sahasraṃ ca sākaṃ hatho apraty asurasya vīrān ||
RV_7,099.06a iyam manīṣā bṛhatī bṛhantorukramā tavasā vardhayantī |
RV_7,099.06c rare vāṃ stomaṃ vidatheṣu viṣṇo pinvatam iṣo vṛjaneṣv indra ||
RV_7,099.07a vaṣaṭ te viṣṇav āsa ā kṛṇomi tan me juṣasva śipiviṣṭa havyam |
RV_7,099.07c vardhantu tvā suṣṭutayo giro me yūyam pāta svastibhiḥ sadā naḥ ||

RV_7,100.01a nū marto dayate saniṣyan yo viṣṇava urugāyāya dāśat |
RV_7,100.01c pra yaḥ satrācā manasā yajāta etāvantaṃ naryam āvivāsāt ||
RV_7,100.02a tvaṃ viṣṇo sumatiṃ viśvajanyām aprayutām evayāvo matiṃ dāḥ |
RV_7,100.02c parco yathā naḥ suvitasya bhūrer aśvāvataḥ puruścandrasya rāyaḥ ||
RV_7,100.03a trir devaḥ pṛthivīm eṣa etāṃ vi cakrame śatarcasam mahitvā |
RV_7,100.03c pra viṣṇur astu tavasas tavīyān tveṣaṃ hy asya sthavirasya nāma ||
RV_7,100.04a vi cakrame pṛthivīm eṣa etāṃ kṣetrāya viṣṇur manuṣe daśasyan |
RV_7,100.04c dhruvāso asya kīrayo janāsa urukṣitiṃ sujanimā cakāra ||
RV_7,100.05a pra tat te adya śipiviṣṭa nāmāryaḥ śaṃsāmi vayunāni vidvān |
RV_7,100.05c taṃ tvā gṛṇāmi tavasam atavyān kṣayantam asya rajasaḥ parāke ||
RV_7,100.06a kim it te viṣṇo paricakṣyam bhūt pra yad vavakṣe śipiviṣṭo asmi |
RV_7,100.06c mā varpo asmad apa gūha etad yad anyarūpaḥ samithe babhūtha ||
RV_7,100.07a vaṣaṭ te viṣṇav āsa ā kṛṇomi tan me juṣasva śipiviṣṭa havyam |
RV_7,100.07c vardhantu tvā suṣṭutayo giro me yūyam pāta svastibhiḥ sadā naḥ ||

RV_7,101.01a tisro vācaḥ pra vada jyotiragrā yā etad duhre madhudogham ūdhaḥ |
RV_7,101.01c sa vatsaṃ kṛṇvan garbham oṣadhīnāṃ sadyo jāto vṛṣabho roravīti ||
RV_7,101.02a yo vardhana oṣadhīnāṃ yo apāṃ yo viśvasya jagato deva īśe |
RV_7,101.02c sa tridhātu śaraṇaṃ śarma yaṃsat trivartu jyotiḥ svabhiṣṭy asme ||
RV_7,101.03a starīr u tvad bhavati sūta u tvad yathāvaśaṃ tanvaṃ cakra eṣaḥ |
RV_7,101.03c pituḥ payaḥ prati gṛbhṇāti mātā tena pitā vardhate tena putraḥ ||
RV_7,101.04a yasmin viśvāni bhuvanāni tasthus tisro dyāvas tredhā sasrur āpaḥ |
RV_7,101.04c trayaḥ kośāsa upasecanāso madhva ścotanty abhito virapśam ||
RV_7,101.05a idaṃ vacaḥ parjanyāya svarāje hṛdo astv antaraṃ taj jujoṣat |
RV_7,101.05c mayobhuvo vṛṣṭayaḥ santv asme supippalā oṣadhīr devagopāḥ ||
RV_7,101.06a sa retodhā vṛṣabhaḥ śaśvatīnāṃ tasminn ātmā jagatas tasthuṣaś ca |
RV_7,101.06c tan ma ṛtam pātu śataśāradāya yūyam pāta svastibhiḥ sadā naḥ ||

RV_7,102.01a parjanyāya pra gāyata divas putrāya mīḷhuṣe |
RV_7,102.01c sa no yavasam icchatu ||
RV_7,102.02a yo garbham oṣadhīnāṃ gavāṃ kṛṇoty arvatām |
RV_7,102.02c parjanyaḥ puruṣīṇām ||
RV_7,102.03a tasmā id āsye havir juhotā madhumattamam |
RV_7,102.03c iḷāṃ naḥ saṃyataṃ karat ||

RV_7,103.01a saṃvatsaraṃ śaśayānā brāhmaṇā vratacāriṇaḥ |
RV_7,103.01c vācam parjanyajinvitām pra maṇḍūkā avādiṣuḥ ||
RV_7,103.02a divyā āpo abhi yad enam āyan dṛtiṃ na śuṣkaṃ sarasī śayānam |
RV_7,103.02c gavām aha na māyur vatsinīnām maṇḍūkānāṃ vagnur atrā sam eti ||
RV_7,103.03a yad īm enāṃ uśato abhy avarṣīt tṛṣyāvataḥ prāvṛṣy āgatāyām |
RV_7,103.03c akhkhalīkṛtyā pitaraṃ na putro anyo anyam upa vadantam eti ||
RV_7,103.04a anyo anyam anu gṛbhṇāty enor apām prasarge yad amandiṣātām |
RV_7,103.04c maṇḍūko yad abhivṛṣṭaḥ kaniṣkan pṛśniḥ sampṛṅkte haritena vācam ||
RV_7,103.05a yad eṣām anyo anyasya vācaṃ śāktasyeva vadati śikṣamāṇaḥ |
RV_7,103.05c sarvaṃ tad eṣāṃ samṛdheva parva yat suvāco vadathanādhy apsu ||
RV_7,103.06a gomāyur eko ajamāyur ekaḥ pṛśnir eko harita eka eṣām |
RV_7,103.06c samānaṃ nāma bibhrato virūpāḥ purutrā vācam pipiśur vadantaḥ ||
RV_7,103.07a brāhmaṇāso atirātre na some saro na pūrṇam abhito vadantaḥ |
RV_7,103.07c saṃvatsarasya tad ahaḥ pari ṣṭha yan maṇḍūkāḥ prāvṛṣīṇam babhūva ||
RV_7,103.08a brāhmaṇāsaḥ somino vācam akrata brahma kṛṇvantaḥ parivatsarīṇam |
RV_7,103.08c adhvaryavo gharmiṇaḥ siṣvidānā āvir bhavanti guhyā na ke cit ||
RV_7,103.09a devahitiṃ jugupur dvādaśasya ṛtuṃ naro na pra minanty ete |
RV_7,103.09c saṃvatsare prāvṛṣy āgatāyāṃ taptā gharmā aśnuvate visargam ||
RV_7,103.10a gomāyur adād ajamāyur adāt pṛśnir adād dharito no vasūni |
RV_7,103.10c gavām maṇḍūkā dadataḥ śatāni sahasrasāve pra tiranta āyuḥ ||

RV_7,104.01a indrāsomā tapataṃ rakṣa ubjataṃ ny arpayataṃ vṛṣaṇā tamovṛdhaḥ |
RV_7,104.01c parā śṛṇītam acito ny oṣataṃ hataṃ nudethāṃ ni śiśītam atriṇaḥ ||
RV_7,104.02a indrāsomā sam aghaśaṃsam abhy aghaṃ tapur yayastu carur agnivāṃ iva |
RV_7,104.02c brahmadviṣe kravyāde ghoracakṣase dveṣo dhattam anavāyaṃ kimīdine ||
RV_7,104.03a indrāsomā duṣkṛto vavre antar anārambhaṇe tamasi pra vidhyatam |
RV_7,104.03c yathā nātaḥ punar ekaś canodayat tad vām astu sahase manyumac chavaḥ ||
RV_7,104.04a indrāsomā vartayataṃ divo vadhaṃ sam pṛthivyā aghaśaṃsāya tarhaṇam |
RV_7,104.04c ut takṣataṃ svaryam parvatebhyo yena rakṣo vāvṛdhānaṃ nijūrvathaḥ ||
RV_7,104.05a indrāsomā vartayataṃ divas pary agnitaptebhir yuvam aśmahanmabhiḥ |
RV_7,104.05c tapurvadhebhir ajarebhir atriṇo ni parśāne vidhyataṃ yantu nisvaram ||
RV_7,104.06a indrāsomā pari vām bhūtu viśvata iyam matiḥ kakṣyāśveva vājinā |
RV_7,104.06c yāṃ vāṃ hotrām parihinomi medhayemā brahmāṇi nṛpatīva jinvatam ||
RV_7,104.07a prati smarethāṃ tujayadbhir evair hataṃ druho rakṣaso bhaṅgurāvataḥ |
RV_7,104.07c indrāsomā duṣkṛte mā sugam bhūd yo naḥ kadā cid abhidāsati druhā ||
RV_7,104.08a yo mā pākena manasā carantam abhicaṣṭe anṛtebhir vacobhiḥ |
RV_7,104.08c āpa iva kāśinā saṃgṛbhītā asann astv āsata indra vaktā ||
RV_7,104.09a ye pākaśaṃsaṃ viharanta evair ye vā bhadraṃ dūṣayanti svadhābhiḥ |
RV_7,104.09c ahaye vā tān pradadātu soma ā vā dadhātu nirṛter upasthe ||
RV_7,104.10a yo no rasaṃ dipsati pitvo agne yo aśvānāṃ yo gavāṃ yas tanūnām |
RV_7,104.10c ripu stena steyakṛd dabhram etu ni ṣa hīyatāṃ tanvā tanā ca ||
RV_7,104.11a paraḥ so astu tanvā tanā ca tisraḥ pṛthivīr adho astu viśvāḥ |
RV_7,104.11c prati śuṣyatu yaśo asya devā yo no divā dipsati yaś ca naktam ||
RV_7,104.12a suvijñānaṃ cikituṣe janāya sac cāsac ca vacasī paspṛdhāte |
RV_7,104.12c tayor yat satyaṃ yatarad ṛjīyas tad it somo 'vati hanty āsat ||
RV_7,104.13a na vā u somo vṛjinaṃ hinoti na kṣatriyam mithuyā dhārayantam |
RV_7,104.13c hanti rakṣo hanty āsad vadantam ubhāv indrasya prasitau śayāte ||
RV_7,104.14a yadi vāham anṛtadeva āsa moghaṃ vā devāṃ apyūhe agne |
RV_7,104.14c kim asmabhyaṃ jātavedo hṛṇīṣe droghavācas te nirṛthaṃ sacantām ||
RV_7,104.15a adyā murīya yadi yātudhāno asmi yadi vāyus tatapa pūruṣasya |
RV_7,104.15c adhā sa vīrair daśabhir vi yūyā yo mā moghaṃ yātudhānety āha ||
RV_7,104.16a yo māyātuṃ yātudhānety āha yo vā rakṣāḥ śucir asmīty āha |
RV_7,104.16c indras taṃ hantu mahatā vadhena viśvasya jantor adhamas padīṣṭa ||
RV_7,104.17a pra yā jigāti khargaleva naktam apa druhā tanvaṃ gūhamānā |
RV_7,104.17c vavrāṃ anantāṃ ava sā padīṣṭa grāvāṇo ghnantu rakṣasa upabdaiḥ ||
RV_7,104.18a vi tiṣṭhadhvam maruto vikṣv icchata gṛbhāyata rakṣasaḥ sam pinaṣṭana |
RV_7,104.18c vayo ye bhūtvī patayanti naktabhir ye vā ripo dadhire deve adhvare ||
RV_7,104.19a pra vartaya divo aśmānam indra somaśitam maghavan saṃ śiśādhi |
RV_7,104.19c prāktād apāktād adharād udaktād abhi jahi rakṣasaḥ parvatena ||
RV_7,104.20a eta u tye patayanti śvayātava indraṃ dipsanti dipsavo 'dābhyam |
RV_7,104.20c śiśīte śakraḥ piśunebhyo vadhaṃ nūnaṃ sṛjad aśaniṃ yātumadbhyaḥ ||
RV_7,104.21a indro yātūnām abhavat parāśaro havirmathīnām abhy āvivāsatām |
RV_7,104.21c abhīd u śakraḥ paraśur yathā vanam pātreva bhindan sata eti rakṣasaḥ ||
RV_7,104.22a ulūkayātuṃ śuśulūkayātuṃ jahi śvayātum uta kokayātum |
RV_7,104.22c suparṇayātum uta gṛdhrayātuṃ dṛṣadeva pra mṛṇa rakṣa indra ||
RV_7,104.23a mā no rakṣo abhi naḍ yātumāvatām apocchatu mithunā yā kimīdinā |
RV_7,104.23c pṛthivī naḥ pārthivāt pātv aṃhaso 'ntarikṣaṃ divyāt pātv asmān ||
RV_7,104.24a indra jahi pumāṃsaṃ yātudhānam uta striyam māyayā śāśadānām |
RV_7,104.24c vigrīvāso mūradevā ṛdantu mā te dṛśan sūryam uccarantam ||
RV_7,104.25a prati cakṣva vi cakṣvendraś ca soma jāgṛtam |
RV_7,104.25c rakṣobhyo vadham asyatam aśaniṃ yātumadbhyaḥ ||


_____________________________________________________________




Ṛgveda 8



RV_8,001.01a mā cid anyad vi śaṃsata sakhāyo mā riṣaṇyata |
RV_8,001.01c indram it stotā vṛṣaṇaṃ sacā sute muhur ukthā ca śaṃsata ||
RV_8,001.02a avakrakṣiṇaṃ vṛṣabhaṃ yathājuraṃ gāṃ na carṣaṇīsaham |
RV_8,001.02c vidveṣaṇaṃ saṃvananobhayaṅkaram maṃhiṣṭham ubhayāvinam ||
RV_8,001.03a yac cid dhi tvā janā ime nānā havanta ūtaye |
RV_8,001.03c asmākam brahmedam indra bhūtu te 'hā viśvā ca vardhanam ||
RV_8,001.04a vi tartūryante maghavan vipaścito 'ryo vipo janānām |
RV_8,001.04c upa kramasva pururūpam ā bhara vājaṃ nediṣṭham ūtaye ||
RV_8,001.05a mahe cana tvām adrivaḥ parā śulkāya deyām |
RV_8,001.05c na sahasrāya nāyutāya vajrivo na śatāya śatāmagha ||
RV_8,001.06a vasyāṃ indrāsi me pitur uta bhrātur abhuñjataḥ |
RV_8,001.06c mātā ca me chadayathaḥ samā vaso vasutvanāya rādhase ||
RV_8,001.07a kveyatha kved asi purutrā cid dhi te manaḥ |
RV_8,001.07c alarṣi yudhma khajakṛt purandara pra gāyatrā agāsiṣuḥ ||
RV_8,001.08a prāsmai gāyatram arcata vāvātur yaḥ purandaraḥ |
RV_8,001.08c yābhiḥ kāṇvasyopa barhir āsadaṃ yāsad vajrī bhinat puraḥ ||
RV_8,001.09a ye te santi daśagvinaḥ śatino ye sahasriṇaḥ |
RV_8,001.09c aśvāso ye te vṛṣaṇo raghudruvas tebhir nas tūyam ā gahi ||
RV_8,001.10a ā tv adya sabardughāṃ huve gāyatravepasam |
RV_8,001.10c indraṃ dhenuṃ sudughām anyām iṣam urudhārām araṅkṛtam ||
RV_8,001.11a yat tudat sūra etaśaṃ vaṅkū vātasya parṇinā |
RV_8,001.11c vahat kutsam ārjuneyaṃ śatakratuḥ tsarad gandharvam astṛtam ||
RV_8,001.12a ya ṛte cid abhiśriṣaḥ purā jatrubhya ātṛdaḥ |
RV_8,001.12c saṃdhātā saṃdhim maghavā purūvasur iṣkartā vihrutam punaḥ ||
RV_8,001.13a mā bhūma niṣṭyā ivendra tvad araṇā iva |
RV_8,001.13c vanāni na prajahitāny adrivo duroṣāso amanmahi ||
RV_8,001.14a amanmahīd anāśavo 'nugrāsaś ca vṛtrahan |
RV_8,001.14c sakṛt su te mahatā śūra rādhasā anu stomam mudīmahi ||
RV_8,001.15a yadi stomam mama śravad asmākam indram indavaḥ |
RV_8,001.15c tiraḥ pavitraṃ sasṛvāṃsa āśavo mandantu tugryāvṛdhaḥ ||
RV_8,001.16a ā tv adya sadhastutiṃ vāvātuḥ sakhyur ā gahi |
RV_8,001.16c upastutir maghonām pra tvāvatv adhā te vaśmi suṣṭutim ||
RV_8,001.17a sotā hi somam adribhir em enam apsu dhāvata |
RV_8,001.17c gavyā vastreva vāsayanta in naro nir dhukṣan vakṣaṇābhyaḥ ||
RV_8,001.18a adha jmo adha vā divo bṛhato rocanād adhi |
RV_8,001.18c ayā vardhasva tanvā girā mamā jātā sukrato pṛṇa ||
RV_8,001.19a indrāya su madintamaṃ somaṃ sotā vareṇyam |
RV_8,001.19c śakra eṇam pīpayad viśvayā dhiyā hinvānaṃ na vājayum ||
RV_8,001.20a mā tvā somasya galdayā sadā yācann ahaṃ girā |
RV_8,001.20c bhūrṇim mṛgaṃ na savaneṣu cukrudhaṃ ka īśānaṃ na yāciṣat ||
RV_8,001.21a madeneṣitam madam ugram ugreṇa śavasā |
RV_8,001.21c viśveṣāṃ tarutāram madacyutam made hi ṣmā dadāti naḥ ||
RV_8,001.22a śevāre vāryā puru devo martāya dāśuṣe |
RV_8,001.22c sa sunvate ca stuvate ca rāsate viśvagūrto ariṣṭutaḥ ||
RV_8,001.23a endra yāhi matsva citreṇa deva rādhasā |
RV_8,001.23c saro na prāsy udaraṃ sapītibhir ā somebhir uru sphiram ||
RV_8,001.24a ā tvā sahasram ā śataṃ yuktā rathe hiraṇyaye |
RV_8,001.24c brahmayujo haraya indra keśino vahantu somapītaye ||
RV_8,001.25a ā tvā rathe hiraṇyaye harī mayūraśepyā |
RV_8,001.25c śitipṛṣṭhā vahatām madhvo andhaso vivakṣaṇasya pītaye ||
RV_8,001.26a pibā tv asya girvaṇaḥ sutasya pūrvapā iva |
RV_8,001.26c pariṣkṛtasya rasina iyam āsutiś cārur madāya patyate ||
RV_8,001.27a ya eko asti daṃsanā mahāṃ ugro abhi vrataiḥ |
RV_8,001.27c gamat sa śiprī na sa yoṣad ā gamad dhavaṃ na pari varjati ||
RV_8,001.28a tvam puraṃ cariṣṇvaṃ vadhaiḥ śuṣṇasya sam piṇak |
RV_8,001.28c tvam bhā anu caro adha dvitā yad indra havyo bhuvaḥ ||
RV_8,001.29a mama tvā sūra udite mama madhyandine divaḥ |
RV_8,001.29c mama prapitve apiśarvare vasav ā stomāso avṛtsata ||
RV_8,001.30a stuhi stuhīd ete ghā te maṃhiṣṭhāso maghonām |
RV_8,001.30c ninditāśvaḥ prapathī paramajyā maghasya medhyātithe ||
RV_8,001.31a ā yad aśvān vananvataḥ śraddhayāhaṃ rathe ruham |
RV_8,001.31c uta vāmasya vasunaś ciketati yo asti yādvaḥ paśuḥ ||
RV_8,001.32a ya ṛjrā mahyam māmahe saha tvacā hiraṇyayā |
RV_8,001.32c eṣa viśvāny abhy astu saubhagāsaṅgasya svanadrathaḥ ||
RV_8,001.33a adha plāyogir ati dāsad anyān āsaṅgo agne daśabhiḥ sahasraiḥ |
RV_8,001.33c adhokṣaṇo daśa mahyaṃ ruśanto naḷā iva saraso nir atiṣṭhan ||
RV_8,001.34a anv asya sthūraṃ dadṛśe purastād anastha ūrur avarambamāṇaḥ |
RV_8,001.34c śaśvatī nāry abhicakṣyāha subhadram arya bhojanam bibharṣi ||

RV_8,002.01a idaṃ vaso sutam andhaḥ pibā supūrṇam udaram |
RV_8,002.01c anābhayin rarimā te ||
RV_8,002.02a nṛbhir dhūtaḥ suto aśnair avyo vāraiḥ paripūtaḥ |
RV_8,002.02c aśvo na nikto nadīṣu ||
RV_8,002.03a taṃ te yavaṃ yathā gobhiḥ svādum akarma śrīṇantaḥ |
RV_8,002.03c indra tvāsmin sadhamāde ||
RV_8,002.04a indra it somapā eka indraḥ sutapā viśvāyuḥ |
RV_8,002.04c antar devān martyāṃś ca ||
RV_8,002.05a na yaṃ śukro na durāśīr na tṛprā uruvyacasam |
RV_8,002.05c apaspṛṇvate suhārdam ||
RV_8,002.06a gobhir yad īm anye asman mṛgaṃ na vrā mṛgayante |
RV_8,002.06c abhitsaranti dhenubhiḥ ||
RV_8,002.07a traya indrasya somāḥ sutāsaḥ santu devasya |
RV_8,002.07c sve kṣaye sutapāvnaḥ ||
RV_8,002.08a trayaḥ kośāsa ścotanti tisraś camvaḥ supūrṇāḥ |
RV_8,002.08c samāne adhi bhārman ||
RV_8,002.09a śucir asi puruniṣṭhāḥ kṣīrair madhyata āśīrtaḥ |
RV_8,002.09c dadhnā mandiṣṭhaḥ śūrasya ||
RV_8,002.10a ime ta indra somās tīvrā asme sutāsaḥ |
RV_8,002.10c śukrā āśiraṃ yācante ||
RV_8,002.11a tāṃ āśiram puroḷāśam indremaṃ somaṃ śrīṇīhi |
RV_8,002.11c revantaṃ hi tvā śṛṇomi ||
RV_8,002.12a hṛtsu pītāso yudhyante durmadāso na surāyām |
RV_8,002.12c ūdhar na nagnā jarante ||
RV_8,002.13a revāṃ id revata stotā syāt tvāvato maghonaḥ |
RV_8,002.13c pred u harivaḥ śrutasya ||
RV_8,002.14a ukthaṃ cana śasyamānam agor arir ā ciketa |
RV_8,002.14c na gāyatraṃ gīyamānam ||
RV_8,002.15a mā na indra pīyatnave mā śardhate parā dāḥ |
RV_8,002.15c śikṣā śacīvaḥ śacībhiḥ ||
RV_8,002.16a vayam u tvā tadidarthā indra tvāyantaḥ sakhāyaḥ |
RV_8,002.16c kaṇvā ukthebhir jarante ||
RV_8,002.17a na ghem anyad ā papana vajrinn apaso naviṣṭau |
RV_8,002.17c taved u stomaṃ ciketa ||
RV_8,002.18a icchanti devāḥ sunvantaṃ na svapnāya spṛhayanti |
RV_8,002.18c yanti pramādam atandrāḥ ||
RV_8,002.19a o ṣu pra yāhi vājebhir mā hṛṇīthā abhy asmān |
RV_8,002.19c mahāṃ iva yuvajāniḥ ||
RV_8,002.20a mo ṣv adya durhaṇāvān sāyaṃ karad āre asmat |
RV_8,002.20c aśrīra iva jāmātā ||
RV_8,002.21a vidmā hy asya vīrasya bhūridāvarīṃ sumatim |
RV_8,002.21c triṣu jātasya manāṃsi ||
RV_8,002.22a ā tū ṣiñca kaṇvamantaṃ na ghā vidma śavasānāt |
RV_8,002.22c yaśastaraṃ śatamūteḥ ||
RV_8,002.23a jyeṣṭhena sotar indrāya somaṃ vīrāya śakrāya |
RV_8,002.23c bharā piban naryāya ||
RV_8,002.24a yo vediṣṭho avyathiṣv aśvāvantaṃ jaritṛbhyaḥ |
RV_8,002.24c vājaṃ stotṛbhyo gomantam ||
RV_8,002.25a panyam-panyam it sotāra ā dhāvata madyāya |
RV_8,002.25c somaṃ vīrāya śūrāya ||
RV_8,002.26a pātā vṛtrahā sutam ā ghā gaman nāre asmat |
RV_8,002.26c ni yamate śatamūtiḥ ||
RV_8,002.27a eha harī brahmayujā śagmā vakṣataḥ sakhāyam |
RV_8,002.27c gīrbhiḥ śrutaṃ girvaṇasam ||
RV_8,002.28a svādavaḥ somā ā yāhi śrītāḥ somā ā yāhi |
RV_8,002.28c śiprinn ṛṣīvaḥ śacīvo nāyam acchā sadhamādam ||
RV_8,002.29a stutaś ca yās tvā vardhanti mahe rādhase nṛmṇāya |
RV_8,002.29c indra kāriṇaṃ vṛdhantaḥ ||
RV_8,002.30a giraś ca yās te girvāha ukthā ca tubhyaṃ tāni |
RV_8,002.30c satrā dadhire śavāṃsi ||
RV_8,002.31a eved eṣa tuvikūrmir vājāṃ eko vajrahastaḥ |
RV_8,002.31c sanād amṛkto dayate ||
RV_8,002.32a hantā vṛtraṃ dakṣiṇenendraḥ purū puruhūtaḥ |
RV_8,002.32c mahān mahībhiḥ śacībhiḥ ||
RV_8,002.33a yasmin viśvāś carṣaṇaya uta cyautnā jrayāṃsi ca |
RV_8,002.33c anu ghen mandī maghonaḥ ||
RV_8,002.34a eṣa etāni cakārendro viśvā yo 'ti śṛṇve |
RV_8,002.34c vājadāvā maghonām ||
RV_8,002.35a prabhartā rathaṃ gavyantam apākāc cid yam avati |
RV_8,002.35c ino vasu sa hi voḷhā ||
RV_8,002.36a sanitā vipro arvadbhir hantā vṛtraṃ nṛbhiḥ śūraḥ |
RV_8,002.36c satyo 'vitā vidhantam ||
RV_8,002.37a yajadhvainam priyamedhā indraṃ satrācā manasā |
RV_8,002.37c yo bhūt somaiḥ satyamadvā ||
RV_8,002.38a gāthaśravasaṃ satpatiṃ śravaskāmam purutmānam |
RV_8,002.38c kaṇvāso gāta vājinam ||
RV_8,002.39a ya ṛte cid gās padebhyo dāt sakhā nṛbhyaḥ śacīvān |
RV_8,002.39c ye asmin kāmam aśriyan ||
RV_8,002.40a itthā dhīvantam adrivaḥ kāṇvam medhyātithim |
RV_8,002.40c meṣo bhūto 'bhi yann ayaḥ ||
RV_8,002.41a śikṣā vibhindo asmai catvāry ayutā dadat |
RV_8,002.41c aṣṭā paraḥ sahasrā ||
RV_8,002.42a uta su tye payovṛdhā mākī raṇasya naptyā |
RV_8,002.42c janitvanāya māmahe ||

RV_8,003.01a pibā sutasya rasino matsvā na indra gomataḥ |
RV_8,003.01c āpir no bodhi sadhamādyo vṛdhe 'smāṃ avantu te dhiyaḥ ||
RV_8,003.02a bhūyāma te sumatau vājino vayam mā na star abhimātaye |
RV_8,003.02c asmāñ citrābhir avatād abhiṣṭibhir ā naḥ sumneṣu yāmaya ||
RV_8,003.03a imā u tvā purūvaso giro vardhantu yā mama |
RV_8,003.03c pāvakavarṇāḥ śucayo vipaścito 'bhi stomair anūṣata ||
RV_8,003.04a ayaṃ sahasram ṛṣibhiḥ sahaskṛtaḥ samudra iva paprathe |
RV_8,003.04c satyaḥ so asya mahimā gṛṇe śavo yajñeṣu viprarājye ||
RV_8,003.05a indram id devatātaya indram prayaty adhvare |
RV_8,003.05c indraṃ samīke vanino havāmaha indraṃ dhanasya sātaye ||
RV_8,003.06a indro mahnā rodasī paprathac chava indraḥ sūryam arocayat |
RV_8,003.06c indre ha viśvā bhuvanāni yemira indre suvānāsa indavaḥ ||
RV_8,003.07a abhi tvā pūrvapītaya indra stomebhir āyavaḥ |
RV_8,003.07c samīcīnāsa ṛbhavaḥ sam asvaran rudrā gṛṇanta pūrvyam ||
RV_8,003.08a asyed indro vāvṛdhe vṛṣṇyaṃ śavo made sutasya viṣṇavi |
RV_8,003.08c adyā tam asya mahimānam āyavo 'nu ṣṭuvanti pūrvathā ||
RV_8,003.09a tat tvā yāmi suvīryaṃ tad brahma pūrvacittaye |
RV_8,003.09c yenā yatibhyo bhṛgave dhane hite yena praskaṇvam āvitha ||
RV_8,003.10a yenā samudram asṛjo mahīr apas tad indra vṛṣṇi te śavaḥ |
RV_8,003.10c sadyaḥ so asya mahimā na saṃnaśe yaṃ kṣoṇīr anucakrade ||
RV_8,003.11a śagdhī na indra yat tvā rayiṃ yāmi suvīryam |
RV_8,003.11c śagdhi vājāya prathamaṃ siṣāsate śagdhi stomāya pūrvya ||
RV_8,003.12a śagdhī no asya yad dha pauram āvitha dhiya indra siṣāsataḥ |
RV_8,003.12c śagdhi yathā ruśamaṃ śyāvakaṃ kṛpam indra prāvaḥ svarṇaram ||
RV_8,003.13a kan navyo atasīnāṃ turo gṛṇīta martyaḥ |
RV_8,003.13c nahī nv asya mahimānam indriyaṃ svar gṛṇanta ānaśuḥ ||
RV_8,003.14a kad u stuvanta ṛtayanta devata ṛṣiḥ ko vipra ohate |
RV_8,003.14c kadā havam maghavann indra sunvataḥ kad u stuvata ā gamaḥ ||
RV_8,003.15a ud u tye madhumattamā gira stomāsa īrate |
RV_8,003.15c satrājito dhanasā akṣitotayo vājayanto rathā iva ||
RV_8,003.16a kaṇvā iva bhṛgavaḥ sūryā iva viśvam id dhītam ānaśuḥ |
RV_8,003.16c indraṃ stomebhir mahayanta āyavaḥ priyamedhāso asvaran ||
RV_8,003.17a yukṣvā hi vṛtrahantama harī indra parāvataḥ |
RV_8,003.17c arvācīno maghavan somapītaya ugra ṛṣvebhir ā gahi ||
RV_8,003.18a ime hi te kāravo vāvaśur dhiyā viprāso medhasātaye |
RV_8,003.18c sa tvaṃ no maghavann indra girvaṇo veno na śṛṇudhī havam ||
RV_8,003.19a nir indra bṛhatībhyo vṛtraṃ dhanubhyo asphuraḥ |
RV_8,003.19c nir arbudasya mṛgayasya māyino niḥ parvatasya gā ājaḥ ||
RV_8,003.20a nir agnayo rurucur nir u sūryo niḥ soma indriyo rasaḥ |
RV_8,003.20c nir antarikṣād adhamo mahām ahiṃ kṛṣe tad indra pauṃsyam ||
RV_8,003.21a yam me dur indro marutaḥ pākasthāmā kaurayāṇaḥ |
RV_8,003.21c viśveṣāṃ tmanā śobhiṣṭham upeva divi dhāvamānam ||
RV_8,003.22a rohitam me pākasthāmā sudhuraṃ kakṣyaprām |
RV_8,003.22c adād rāyo vibodhanam ||
RV_8,003.23a yasmā anye daśa prati dhuraṃ vahanti vahnayaḥ |
RV_8,003.23c astaṃ vayo na tugryam ||
RV_8,003.24a ātmā pitus tanūr vāsa ojodā abhyañjanam |
RV_8,003.24c turīyam id rohitasya pākasthāmānam bhojaṃ dātāram abravam ||

RV_8,004.01a yad indra prāg apāg udaṅ nyag vā hūyase nṛbhiḥ |
RV_8,004.01c simā purū nṛṣūto asy ānave 'si praśardha turvaśe ||
RV_8,004.02a yad vā rume ruśame śyāvake kṛpa indra mādayase sacā |
RV_8,004.02c kaṇvāsas tvā brahmabhi stomavāhasa indrā yacchanty ā gahi ||
RV_8,004.03a yathā gauro apā kṛtaṃ tṛṣyann ety averiṇam |
RV_8,004.03c āpitve naḥ prapitve tūyam ā gahi kaṇveṣu su sacā piba ||
RV_8,004.04a mandantu tvā maghavann indrendavo rādhodeyāya sunvate |
RV_8,004.04c āmuṣyā somam apibaś camū sutaṃ jyeṣṭhaṃ tad dadhiṣe sahaḥ ||
RV_8,004.05a pra cakre sahasā saho babhañja manyum ojasā |
RV_8,004.05c viśve ta indra pṛtanāyavo yaho ni vṛkṣā iva yemire ||
RV_8,004.06a sahasreṇeva sacate yavīyudhā yas ta ānaḷ upastutim |
RV_8,004.06c putram prāvargaṃ kṛṇute suvīrye dāśnoti namauktibhiḥ ||
RV_8,004.07a mā bhema mā śramiṣmograsya sakhye tava |
RV_8,004.07c mahat te vṛṣṇo abhicakṣyaṃ kṛtam paśyema turvaśaṃ yadum ||
RV_8,004.08a savyām anu sphigyaṃ vāvase vṛṣā na dāno asya roṣati |
RV_8,004.08c madhvā sampṛktāḥ sāragheṇa dhenavas tūyam ehi dravā piba ||
RV_8,004.09a aśvī rathī surūpa id gomāṃ id indra te sakhā |
RV_8,004.09c śvātrabhājā vayasā sacate sadā candro yāti sabhām upa ||
RV_8,004.10a ṛśyo na tṛṣyann avapānam ā gahi pibā somaṃ vaśāṃ anu |
RV_8,004.10c nimeghamāno maghavan dive-diva ojiṣṭhaṃ dadhiṣe sahaḥ ||
RV_8,004.11a adhvaryo drāvayā tvaṃ somam indraḥ pipāsati |
RV_8,004.11c upa nūnaṃ yuyuje vṛṣaṇā harī ā ca jagāma vṛtrahā ||
RV_8,004.12a svayaṃ cit sa manyate dāśurir jano yatrā somasya tṛmpasi |
RV_8,004.12c idaṃ te annaṃ yujyaṃ samukṣitaṃ tasyehi pra dravā piba ||
RV_8,004.13a ratheṣṭhāyādhvaryavaḥ somam indrāya sotana |
RV_8,004.13c adhi bradhnasyādrayo vi cakṣate sunvanto dāśvadhvaram ||
RV_8,004.14a upa bradhnaṃ vāvātā vṛṣaṇā harī indram apasu vakṣataḥ |
RV_8,004.14c arvāñcaṃ tvā saptayo 'dhvaraśriyo vahantu savaned upa ||
RV_8,004.15a pra pūṣaṇaṃ vṛṇīmahe yujyāya purūvasum |
RV_8,004.15c sa śakra śikṣa puruhūta no dhiyā tuje rāye vimocana ||
RV_8,004.16a saṃ naḥ śiśīhi bhurijor iva kṣuraṃ rāsva rāyo vimocana |
RV_8,004.16c tve tan naḥ suvedam usriyaṃ vasu yaṃ tvaṃ hinoṣi martyam ||
RV_8,004.17a vemi tvā pūṣann ṛñjase vemi stotava āghṛṇe |
RV_8,004.17c na tasya vemy araṇaṃ hi tad vaso stuṣe pajrāya sāmne ||
RV_8,004.18a parā gāvo yavasaṃ kac cid āghṛṇe nityaṃ rekṇo amartya |
RV_8,004.18c asmākam pūṣann avitā śivo bhava maṃhiṣṭho vājasātaye ||
RV_8,004.19a sthūraṃ rādhaḥ śatāśvaṃ kuruṅgasya diviṣṭiṣu |
RV_8,004.19c rājñas tveṣasya subhagasya rātiṣu turvaśeṣv amanmahi ||
RV_8,004.20a dhībhiḥ sātāni kāṇvasya vājinaḥ priyamedhair abhidyubhiḥ |
RV_8,004.20c ṣaṣṭiṃ sahasrānu nirmajām aje nir yūthāni gavām ṛṣiḥ ||
RV_8,004.21a vṛkṣāś cin me abhipitve arāraṇuḥ |
RV_8,004.21c gām bhajanta mehanāśvam bhajanta mehanā ||

RV_8,005.01a dūrād iheva yat saty aruṇapsur aśiśvitat |
RV_8,005.01c vi bhānuṃ viśvadhātanat ||
RV_8,005.02a nṛvad dasrā manoyujā rathena pṛthupājasā |
RV_8,005.02c sacethe aśvinoṣasam ||
RV_8,005.03a yuvābhyāṃ vājinīvasū prati stomā adṛkṣata |
RV_8,005.03c vācaṃ dūto yathohiṣe ||
RV_8,005.04a purupriyā ṇa ūtaye purumandrā purūvasū |
RV_8,005.04c stuṣe kaṇvāso aśvinā ||
RV_8,005.05a maṃhiṣṭhā vājasātameṣayantā śubhas patī |
RV_8,005.05c gantārā dāśuṣo gṛham ||
RV_8,005.06a tā sudevāya dāśuṣe sumedhām avitāriṇīm |
RV_8,005.06c ghṛtair gavyūtim ukṣatam ||
RV_8,005.07a ā na stomam upa dravat tūyaṃ śyenebhir āśubhiḥ |
RV_8,005.07c yātam aśvebhir aśvinā ||
RV_8,005.08a yebhis tisraḥ parāvato divo viśvāni rocanā |
RV_8,005.08c trīṃr aktūn paridīyathaḥ ||
RV_8,005.09a uta no gomatīr iṣa uta sātīr aharvidā |
RV_8,005.09c vi pathaḥ sātaye sitam ||
RV_8,005.10a ā no gomantam aśvinā suvīraṃ surathaṃ rayim |
RV_8,005.10c voḷham aśvāvatīr iṣaḥ ||
RV_8,005.11a vāvṛdhānā śubhas patī dasrā hiraṇyavartanī |
RV_8,005.11c pibataṃ somyam madhu ||
RV_8,005.12a asmabhyaṃ vājinīvasū maghavadbhyaś ca saprathaḥ |
RV_8,005.12c chardir yantam adābhyam ||
RV_8,005.13a ni ṣu brahma janānāṃ yāviṣṭaṃ tūyam ā gatam |
RV_8,005.13c mo ṣv anyāṃ upāratam ||
RV_8,005.14a asya pibatam aśvinā yuvam madasya cāruṇaḥ |
RV_8,005.14c madhvo rātasya dhiṣṇyā ||
RV_8,005.15a asme ā vahataṃ rayiṃ śatavantaṃ sahasriṇam |
RV_8,005.15c purukṣuṃ viśvadhāyasam ||
RV_8,005.16a purutrā cid dhi vāṃ narā vihvayante manīṣiṇaḥ |
RV_8,005.16c vāghadbhir aśvinā gatam ||
RV_8,005.17a janāso vṛktabarhiṣo haviṣmanto araṅkṛtaḥ |
RV_8,005.17c yuvāṃ havante aśvinā ||
RV_8,005.18a asmākam adya vām ayaṃ stomo vāhiṣṭho antamaḥ |
RV_8,005.18c yuvābhyām bhūtv aśvinā ||
RV_8,005.19a yo ha vām madhuno dṛtir āhito rathacarṣaṇe |
RV_8,005.19c tataḥ pibatam aśvinā ||
RV_8,005.20a tena no vājinīvasū paśve tokāya śaṃ gave |
RV_8,005.20c vahatam pīvarīr iṣaḥ ||
RV_8,005.21a uta no divyā iṣa uta sindhūṃr aharvidā |
RV_8,005.21c apa dvāreva varṣathaḥ ||
RV_8,005.22a kadā vāṃ taugryo vidhat samudre jahito narā |
RV_8,005.22c yad vāṃ ratho vibhiṣ patāt ||
RV_8,005.23a yuvaṃ kaṇvāya nāsatyā ṛpiriptāya harmye |
RV_8,005.23c śaśvad ūtīr daśasyathaḥ ||
RV_8,005.24a tābhir ā yātam ūtibhir navyasībhiḥ suśastibhiḥ |
RV_8,005.24c yad vāṃ vṛṣaṇvasū huve ||
RV_8,005.25a yathā cit kaṇvam āvatam priyamedham upastutam |
RV_8,005.25c atriṃ śiñjāram aśvinā ||
RV_8,005.26a yathota kṛtvye dhane 'ṃśuṃ goṣv agastyam |
RV_8,005.26c yathā vājeṣu sobharim ||
RV_8,005.27a etāvad vāṃ vṛṣaṇvasū ato vā bhūyo aśvinā |
RV_8,005.27c gṛṇantaḥ sumnam īmahe ||
RV_8,005.28a rathaṃ hiraṇyavandhuraṃ hiraṇyābhīśum aśvinā |
RV_8,005.28c ā hi sthātho divispṛśam ||
RV_8,005.29a hiraṇyayī vāṃ rabhir īṣā akṣo hiraṇyayaḥ |
RV_8,005.29c ubhā cakrā hiraṇyayā ||
RV_8,005.30a tena no vājinīvasū parāvataś cid ā gatam |
RV_8,005.30c upemāṃ suṣṭutim mama ||
RV_8,005.31a ā vahethe parākāt pūrvīr aśnantāv aśvinā |
RV_8,005.31c iṣo dāsīr amartyā ||
RV_8,005.32a ā no dyumnair ā śravobhir ā rāyā yātam aśvinā |
RV_8,005.32c puruścandrā nāsatyā ||
RV_8,005.33a eha vām pruṣitapsavo vayo vahantu parṇinaḥ |
RV_8,005.33c acchā svadhvaraṃ janam ||
RV_8,005.34a rathaṃ vām anugāyasaṃ ya iṣā vartate saha |
RV_8,005.34c na cakram abhi bādhate ||
RV_8,005.35a hiraṇyayena rathena dravatpāṇibhir aśvaiḥ |
RV_8,005.35c dhījavanā nāsatyā ||
RV_8,005.36a yuvam mṛgaṃ jāgṛvāṃsaṃ svadatho vā vṛṣaṇvasū |
RV_8,005.36c tā naḥ pṛṅktam iṣā rayim ||
RV_8,005.37a tā me aśvinā sanīnāṃ vidyātaṃ navānām |
RV_8,005.37c yathā cic caidyaḥ kaśuḥ śatam uṣṭrānāṃ dadat sahasrā daśa gonām ||
RV_8,005.38a yo me hiraṇyasaṃdṛśo daśa rājño amaṃhata |
RV_8,005.38c adhaspadā ic caidyasya kṛṣṭayaś carmamnā abhito janāḥ ||
RV_8,005.39a mākir enā pathā gād yeneme yanti cedayaḥ |
RV_8,005.39c anyo net sūrir ohate bhūridāvattaro janaḥ ||

RV_8,006.01a mahāṃ indro ya ojasā parjanyo vṛṣṭimāṃ iva |
RV_8,006.01c stomair vatsasya vāvṛdhe ||
RV_8,006.02a prajām ṛtasya piprataḥ pra yad bharanta vahnayaḥ |
RV_8,006.02c viprā ṛtasya vāhasā ||
RV_8,006.03a kaṇvā indraṃ yad akrata stomair yajñasya sādhanam |
RV_8,006.03c jāmi bruvata āyudham ||
RV_8,006.04a sam asya manyave viśo viśvā namanta kṛṣṭayaḥ |
RV_8,006.04c samudrāyeva sindhavaḥ ||
RV_8,006.05a ojas tad asya titviṣa ubhe yat samavartayat |
RV_8,006.05c indraś carmeva rodasī ||
RV_8,006.06a vi cid vṛtrasya dodhato vajreṇa śataparvaṇā |
RV_8,006.06c śiro bibheda vṛṣṇinā ||
RV_8,006.07a imā abhi pra ṇonumo vipām agreṣu dhītayaḥ |
RV_8,006.07c agneḥ śocir na didyutaḥ ||
RV_8,006.08a guhā satīr upa tmanā pra yac chocanta dhītayaḥ |
RV_8,006.08c kaṇvā ṛtasya dhārayā ||
RV_8,006.09a pra tam indra naśīmahi rayiṃ gomantam aśvinam |
RV_8,006.09c pra brahma pūrvacittaye ||
RV_8,006.10a aham id dhi pituṣ pari medhām ṛtasya jagrabha |
RV_8,006.10c ahaṃ sūrya ivājani ||
RV_8,006.11a aham pratnena manmanā giraḥ śumbhāmi kaṇvavat |
RV_8,006.11c yenendraḥ śuṣmam id dadhe ||
RV_8,006.12a ye tvām indra na tuṣṭuvur ṛṣayo ye ca tuṣṭuvuḥ |
RV_8,006.12c mamed vardhasva suṣṭutaḥ ||
RV_8,006.13a yad asya manyur adhvanīd vi vṛtram parvaśo rujan |
RV_8,006.13c apaḥ samudram airayat ||
RV_8,006.14a ni śuṣṇa indra dharṇasiṃ vajraṃ jaghantha dasyavi |
RV_8,006.14c vṛṣā hy ugra śṛṇviṣe ||
RV_8,006.15a na dyāva indram ojasā nāntarikṣāṇi vajriṇam |
RV_8,006.15c na vivyacanta bhūmayaḥ ||
RV_8,006.16a yas ta indra mahīr apa stabhūyamāna āśayat |
RV_8,006.16c ni tam padyāsu śiśnathaḥ ||
RV_8,006.17a ya ime rodasī mahī samīcī samajagrabhīt |
RV_8,006.17c tamobhir indra taṃ guhaḥ ||
RV_8,006.18a ya indra yatayas tvā bhṛgavo ye ca tuṣṭuvuḥ |
RV_8,006.18c mamed ugra śrudhī havam ||
RV_8,006.19a imās ta indra pṛśnayo ghṛtaṃ duhata āśiram |
RV_8,006.19c enām ṛtasya pipyuṣīḥ ||
RV_8,006.20a yā indra prasvas tvāsā garbham acakriran |
RV_8,006.20c pari dharmeva sūryam ||
RV_8,006.21a tvām ic chavasas pate kaṇvā ukthena vāvṛdhuḥ |
RV_8,006.21c tvāṃ sutāsa indavaḥ ||
RV_8,006.22a taved indra praṇītiṣūta praśastir adrivaḥ |
RV_8,006.22c yajño vitantasāyyaḥ ||
RV_8,006.23a ā na indra mahīm iṣam puraṃ na darṣi gomatīm |
RV_8,006.23c uta prajāṃ suvīryam ||
RV_8,006.24a uta tyad āśvaśvyaṃ yad indra nāhuṣīṣv ā |
RV_8,006.24c agre vikṣu pradīdayat ||
RV_8,006.25a abhi vrajaṃ na tatniṣe sūra upākacakṣasam |
RV_8,006.25c yad indra mṛḷayāsi naḥ ||
RV_8,006.26a yad aṅga taviṣīyasa indra prarājasi kṣitīḥ |
RV_8,006.26c mahāṃ apāra ojasā ||
RV_8,006.27a taṃ tvā haviṣmatīr viśa upa bruvata ūtaye |
RV_8,006.27c urujrayasam indubhiḥ ||
RV_8,006.28a upahvare girīṇāṃ saṃgathe ca nadīnām |
RV_8,006.28c dhiyā vipro ajāyata ||
RV_8,006.29a ataḥ samudram udvataś cikitvāṃ ava paśyati |
RV_8,006.29c yato vipāna ejati ||
RV_8,006.30a ād it pratnasya retaso jyotiṣ paśyanti vāsaram |
RV_8,006.30c paro yad idhyate divā ||
RV_8,006.31a kaṇvāsa indra te matiṃ viśve vardhanti pauṃsyam |
RV_8,006.31c uto śaviṣṭha vṛṣṇyam ||
RV_8,006.32a imām ma indra suṣṭutiṃ juṣasva pra su mām ava |
RV_8,006.32c uta pra vardhayā matim ||
RV_8,006.33a uta brahmaṇyā vayaṃ tubhyam pravṛddha vajrivaḥ |
RV_8,006.33c viprā atakṣma jīvase ||
RV_8,006.34a abhi kaṇvā anūṣatāpo na pravatā yatīḥ |
RV_8,006.34c indraṃ vananvatī matiḥ ||
RV_8,006.35a indram ukthāni vāvṛdhuḥ samudram iva sindhavaḥ |
RV_8,006.35c anuttamanyum ajaram ||
RV_8,006.36a ā no yāhi parāvato haribhyāṃ haryatābhyām |
RV_8,006.36c imam indra sutam piba ||
RV_8,006.37a tvām id vṛtrahantama janāso vṛktabarhiṣaḥ |
RV_8,006.37c havante vājasātaye ||
RV_8,006.38a anu tvā rodasī ubhe cakraṃ na varty etaśam |
RV_8,006.38c anu suvānāsa indavaḥ ||
RV_8,006.39a mandasvā su svarṇara utendra śaryaṇāvati |
RV_8,006.39c matsvā vivasvato matī ||
RV_8,006.40a vāvṛdhāna upa dyavi vṛṣā vajry aroravīt |
RV_8,006.40c vṛtrahā somapātamaḥ ||
RV_8,006.41a ṛṣir hi pūrvajā asy eka īśāna ojasā |
RV_8,006.41c indra coṣkūyase vasu ||
RV_8,006.42a asmākaṃ tvā sutāṃ upa vītapṛṣṭhā abhi prayaḥ |
RV_8,006.42c śataṃ vahantu harayaḥ ||
RV_8,006.43a imāṃ su pūrvyāṃ dhiyam madhor ghṛtasya pipyuṣīm |
RV_8,006.43c kaṇvā ukthena vāvṛdhuḥ ||
RV_8,006.44a indram id vimahīnām medhe vṛṇīta martyaḥ |
RV_8,006.44c indraṃ saniṣyur ūtaye ||
RV_8,006.45a arvāñcaṃ tvā puruṣṭuta priyamedhastutā harī |
RV_8,006.45c somapeyāya vakṣataḥ ||
RV_8,006.46a śatam ahaṃ tirindire sahasram parśāv ā dade |
RV_8,006.46c rādhāṃsi yādvānām ||
RV_8,006.47a trīṇi śatāny arvatāṃ sahasrā daśa gonām |
RV_8,006.47c daduṣ pajrāya sāmne ||
RV_8,006.48a ud ānaṭ kakuho divam uṣṭrāñ caturyujo dadat |
RV_8,006.48c śravasā yādvaṃ janam ||

RV_8,007.01a pra yad vas triṣṭubham iṣam maruto vipro akṣarat |
RV_8,007.01c vi parvateṣu rājatha ||
RV_8,007.02a yad aṅga taviṣīyavo yāmaṃ śubhrā acidhvam |
RV_8,007.02c ni parvatā ahāsata ||
RV_8,007.03a ud īrayanta vāyubhir vāśrāsaḥ pṛśnimātaraḥ |
RV_8,007.03c dhukṣanta pipyuṣīm iṣam ||
RV_8,007.04a vapanti maruto miham pra vepayanti parvatān |
RV_8,007.04c yad yāmaṃ yānti vāyubhiḥ ||
RV_8,007.05a ni yad yāmāya vo girir ni sindhavo vidharmaṇe |
RV_8,007.05c mahe śuṣmāya yemire ||
RV_8,007.06a yuṣmāṃ u naktam ūtaye yuṣmān divā havāmahe |
RV_8,007.06c yuṣmān prayaty adhvare ||
RV_8,007.07a ud u tye aruṇapsavaś citrā yāmebhir īrate |
RV_8,007.07c vāśrā adhi ṣṇunā divaḥ ||
RV_8,007.08a sṛjanti raśmim ojasā panthāṃ sūryāya yātave |
RV_8,007.08c te bhānubhir vi tasthire ||
RV_8,007.09a imām me maruto giram imaṃ stomam ṛbhukṣaṇaḥ |
RV_8,007.09c imam me vanatā havam ||
RV_8,007.10a trīṇi sarāṃsi pṛśnayo duduhre vajriṇe madhu |
RV_8,007.10c utsaṃ kavandham udriṇam ||
RV_8,007.11a maruto yad dha vo divaḥ sumnāyanto havāmahe |
RV_8,007.11c ā tū na upa gantana